[1a] [1a.1]༄༅། །དཀོན་བརྩེགས་ཆ་པ་བཞུགས་སོ། ། [1b] [1b.1]༄༅༅། །འཕགས་པ་ལྷའི་བུ་བློ་གྲོས་རབ་གནས་ཀྱིས་ཞུས་པ་ལུང་བསྟན་པ། ཐེག་པ་ཆེན་པོའི་མདོ། བམ་པོ་གསུམ་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ [1b.2]ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ་སེམས་དང་པོ་བསྐྱེད་པ་དང་ལྡན་པ་ཞེས་བགྱི་ན། བཅོམ་ལྡན་འདས་ཅི་ [1b.3]ཙམ་གྱིས་ན་བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་གང་གིས་ཁམས་གསུམ་ [1b.4]པ་ཐམས་ཅད་ལས་འདུ་ཤེས་དང་། ཡིད་ལ་བྱེད་པ་བསྐྱེད་པ་དེ་ནི་སེམས་དང་པོ་བསྐྱེད་པ་དང་ལྡན་པ་ཞེས་བྱའོ། །འཇམ་དཔལ་གྱིས་གསོལ་བ། བཅོམ་ལྡན་འདས་ཀྱིས་བཀའ་སྩལ་བའི་དོན་ [1b.5]བདག་གིས་འཚལ་བ་ལྟར་ན། བྱང་ཆུབ་སེམས་དཔའ་གང་གིས་འདོད་ཆགས་བསྐྱེད་པ་དང་། ཞེ་སྡང་བསྐྱེད་པ་དང་། གཏི་མུག་བསྐྱེད་པ་དེ་ནི་སེམས་དང་པོ་བསྐྱེད་པ་དང་ལྡན་པ་ཞེས་བགྱིའོ། ། [2a] [2a.1]དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་འདོད་ཆགས་དང་། ཞེ་སྡང་དང་། གཏི་མུག་དག་བསྐྱེད་པ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ལགས་ན། [2a.2]དེ་ལྟ་ན་བྱིས་པ་སོ་སོའི་སྐྱེ་བོ་རྣམས་ཀྱང་སེམས་དང་པོ་བསྐྱེད་པ་དང་ལྡན་པ་ལགས་པར་འགྱུར་རོ། །དེ་ཅིའི་སླད་དུ་ཞེ་ན། འཇམ་དཔལ་འདི་ལྟར་དེ་དག་ནི་འདོད་ཆགས་དང་། ཞེ་སྡང་དང་། གཏི་མུག་དག་སྐྱེད་པར་བགྱི་བའི་སླད་དུའོ། །འཇམ་དཔལ་གྱིས་སྨྲས་པ། [2a.3]ལྷའི་བུ་བྱིས་པ་སོ་སོའི་སྐྱེ་བོ་རྣམས་ཀྱིས་ནི་འདོད་ཆགས་དང་། ཞེ་སྡང་དང་། གཏི་མུག་དག་སྐྱེད་པར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་བུ་འདོད་ཆགས་དང་། ཞེ་སྡང་དང་། གཏི་མུག་དག་ནི་སངས་རྒྱས་རྣམས་དང་། རང་སངས་རྒྱས་རྣམས་དང་། ཉན་ [2a.4]ཐོས་རྣམས་དང་། བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཀྱིས་བསྐྱེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་འཁོར་འདིས་ཁྱོད་ཀྱིས་དགོངས་པའི་གསུང་མི་རྟོགས་ཤིང་མ་འཚལ་ན། ཐེ་ཚོམ་འཚལ་བར་འགྱུར་གྱིས་རྣམ་པར་ཕྱེ་སྟེ་བསྟན་དུ་ [2a.5]གསོལ། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། འདབ་ཆགས་བྱ་སྟེང་གི་བར་སྣང་ལ་རྒྱུ་བ་དེ་འཕུར་ཏེ་སོང་ངམ། འོན་ཏེ་འདུག་སྙམ། ལྷའི་བུས་སྨྲས་པ། འཇམ་དཔལ་འཕུར་ཏེ་མཆིས་སོ། །འཇམ་དཔལ་གྱིས་སྨྲས་པ། ལྷའི་ [2a.6]བུ་ཁོ་བོ་ནི་དེ་ལས་བསམས་ནས་དེ་སྐད་ཅེས། གང་དག་འདོད་ཆགས་དང་། ཞེ་སྡང་དང་། གཏི་མུག་དག་སྐྱེད་པར་བྱེད་པ་དེ་དག་ནི་སངས་རྒྱས་རྣམས་དང་། རང་སངས་རྒྱས་རྣམས་དང་། ཉན་ཐོས་རྣམས་དང་། བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཞེས་བྱའོ་ཞེས་ [2b] [2b.1]སྟོན་ཏོ། །ལྷའི་བུ་གང་ལ་རྟེན་མེད་པ་དེ་ནི་སྐྱེ་བ་ཡིན་ནོ། །གང་ལ་ལྷག་པར་ཆགས་པ་མེད་པ་དེ་ནི་སྐྱེ་བ་ཡིན་ནོ། །གང་ལ་མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ནོ། །ལྷའི་བུ་གང་ལ་རྟེན་མེད་པ་དང་ལྷག་པར་ཆགས་པ་མེད་པ་དང་། མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ཏེ། [2b.2]སྐྱེ་བ་ཞེས་བྱ་བ་དེ་ནི་གཞི་མེད་པ་ཡིན་ནོ། །སྐྱེ་བ་ཞེས་བྱ་བ་དེ་ནི་བརྟག་ཏུ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་འབྱུང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་ངོ་བོ་ཉིད་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་དངོས་པོ་མེད་པའི་གཞི་ཡིན་ནོ། ། [2b.3]སྐྱེ་བ་ཞེས་བྱ་བ་དེ་ནི་འོང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་འགྲོ་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་སྐྱེ་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་དམིགས་པ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་རྣམ་པར་རིག་པ་མེད་པའི་གཞི་ཡིན་ནོ། ། [2b.4]སྐྱེ་བ་ཞེས་བྱ་བ་དེ་ནི་རྡུལ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་རློམ་སེམས་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་སྤྱོད་པ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་བརྗོད་དུ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་མི་ཕྱེད་པའི་གཞི་ཡིན་ནོ། ། [2b.5]སྐྱེ་བ་ཞེས་བྱ་བ་དེ་ནི་ཡི་གེ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་གཟུང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་གནས་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་བླང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་དོར་བ་མེད་པའི་གཞི་ཡིན་ནོ། ། [2b.6]སྐྱེ་བ་ཞེས་བྱ་བ་དེ་ནི་ཕྱིར་མི་ཟློགས་པའི་གཞི་ཡིན་ཏེ། ལྷའི་བུ་ཆོས་དེ་ལ་རློམ་སེམས་སུ་མི་བྱེད། མངོན་པར་ཞེན་པར་མི་བྱེད། སེམས་པར་མི་བྱེད། ཤེས་པར་མི་བྱེད། ལྟ་བར་མི་བྱེད། ཉན་པར་མི་བྱེད། རྣམ་པར་ཤེས་པར་མི་བྱེད། ལེན་པར་མི་བྱེད། གཏོང་བར་མི་ [2b.7]བྱེད། སྐྱེད་པར་མི་བྱེད། འགོག་པར་མི་བྱེད་པ་གང་ཡིན་པ་དེ་ནི་བྱང་ཆུབ་སེམས་དཔའི་སེམས་དང་པོ་བསྐྱེད་པ་ཡིན་ནོ། །ལྷའི་བུ་དེ་ལྟ་བས་ན་བྱང་ཆུབ་སེམས་དཔའ་ཚུལ་དེ་དང་། ཆོས་ཀྱི་དབྱིངས་དེ་དང་། མཉམ་པ་ཉིད་དེ་དང་། མཐའ་དེ་དང་། ཐབས་ལ་མཁས་པ་དེས་ [3a] [3a.1]འདོད་ཆགས་བསྐྱེད་པར་བྱའོ། །ཞེ་སྡང་དང་། གཏི་མུག་བསྐྱེད་པར་བྱའོ། །མིག་གི་རྟེན་བསྐྱེད་པར་བྱའོ། །ཡིད་ཀྱི་རྟེན་གྱི་བར་དུ་བསྐྱེད་པར་བྱའོ། །གཟུགས་ལ་ལྷག་པར་ཆགས་པ་བསྐྱེད་པར་བྱའོ། །རྣམ་པར་ཤེས་པ་ལ་ལྷག་པར་ཆགས་པའི་བར་དུ་བསྐྱེད་ [3a.2]པར་བྱའོ། །མིང་བསྐྱེད་པར་བྱའོ། །གཟུགས་བསྐྱེད་པར་བྱའོ། །རྒྱུ་བསྐྱེད་པར་བྱའོ། །ལྟ་བའི་རྣམ་པ་ཐམས་ཅད་བསྐྱེད་པར་བྱའོ། །མ་རིག་པ་བསྐྱེད་པར་བྱའོ། །སྲིད་པའི་སྲེད་པ་བསྐྱེད་པར་བྱའོ། །རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལ་འཇུག་ [3a.3]པའི་བར་དུ་བསྐྱེད་པར་བྱའོ། །འདོད་པའི་ཡོན་ཏན་ལྔ་བསྐྱེད་པར་བྱའོ། །ཁམས་གསུམ་པ་ལ་མངོན་པར་ཞེན་པ་བསྐྱེད་པར་བྱའོ། །ངར་འཛིན་པ་དང་། ང་ཡིར་འཛིན་པ་བསྐྱེད་པར་བྱའོ། །འཇིག་ཚོགས་བསྐྱེད་པར་བྱའོ། །འཇིག་ཚོགས་ལ་ལྟ་བ་བསྐྱེད་པར་བྱའོ། ། [3a.4]ལྟ་བའི་རྣམ་པ་དྲུག་ཅུ་རྩ་གཉིས་བསྐྱེད་པར་བྱའོ། །སངས་རྒྱས་སུ་འདུ་ཤེས་པ་དང་། ཆོས་སུ་འདུ་ཤེས་པ་དང་། དགེ་འདུན་དུ་འདུ་ཤེས་པ་བསྐྱེད་པར་བྱའོ། །བདག་ཏུ་འདུ་ཤེས་པ་དང་། གཞན་དུ་འདུ་ཤེས་པ་བསྐྱེད་པར་བྱའོ། །སར་འདུ་ཤེས་པ་བསྐྱེད་ [3a.5]པར་བྱའོ། །ཆུར་འདུ་ཤེས་པ་དང་། མེར་འདུ་ཤེས་པ་དང་། རླུང་དུ་འདུ་ཤེས་པ་དང་། ནམ་མཁར་འདུ་ཤེས་པ་དང་། རྣམ་པར་ཤེས་པར་འདུ་ཤེས་པ་བསྐྱེད་པར་བྱའོ། །ཕྱིན་ཅི་ལོག་བཞི་བསྐྱེད་པར་བྱའོ། །སྒྲིབ་པ་ལྔ་དང་། རྣམ་པར་ཤེས་པ་གནས་པ་བཞི་ [3a.6]དང་། ལོག་པ་ཉིད་བརྒྱད་དང་། མི་དགེ་བ་བཅུའི་ལས་ཀྱི་ལམ་རྣམས་བསྐྱེད་པར་བྱའོ། །ལྷའི་བུ་མདོར་ན་བྱང་ཆུབ་སེམས་དཔས་རྟོག་པ་ཐམས་ཅད་དང་། ཡོངས་སུ་རྟོག་པ་ཐམས་ཅད་དང་། རྣམ་པར་རྟོག་པ་ཐམས་ཅད་དང་། མཚན་མ་ཐམས་ཅད་དང་། སྤྲོས་པ་ [3a.7]ཐམས་ཅད་དང་། འདོད་པ་ཐམས་ཅད་དང་། འཛིན་པ་ཐམས་ཅད་དང་། མངོན་པར་ཞེན་པ་ཐམས་ཅད་དང་། འདུ་ཤེས་ཐམས་ཅད་དང་། རློམ་སེམས་ཐམས་ཅད་དང་། ཆགས་པ་ཐམས་ཅད་བསྐྱེད་པར་བྱ་སྟེ། ལྷའི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་ཆོས་དེ་ལ་མངོན་པར་ [3b] [3b.1]ཞེན་པ་མེད་པ་དང་། ལྷག་པར་ཆགས་པ་མེད་པ་གང་ཡིན་པ་དེ་ནི་སྐྱེ་བ་ཞེས་བྱ་བ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་གང་གི་ཕྱིར་ཁྱོད་ཀྱིས་འདི་ལྟ་སྟེ། སངས་ [3b.2]རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་དང་པོ་སྐྱེ་བ་འདི་བསྟན་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་ [3b.3]འདས་དེ་ལྟར་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའི་སེམས་དང་པོ་སྐྱེ་བ་འདི་བསྟན་པའི་སེམས་སྐྱེ་བ་འདི་ནི་མི་སྐྱེ་བའི་ཆོས་ལ་བཟོད་པ་ཐོབ་པ་དང་མཚུངས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་ [3b.4]བཞིན་ཏེ། ཤཱ་རིའི་བུ་གང་གི་ཚེ་དེ་བཞིན་གཤེགས་པ་མར་མེ་མཛད་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ [3b.5]ལུང་བསྟན་པ་དེའི་ཚེ་ན་ཤཱ་རིའི་བུ་ང་སེམས་སྐྱེ་བ་འདི་དང་བྲལ་བར་མ་གྱུར་ཏེ། ཤཱ་རིའི་བུ་དེ་ན་ངས་མི་སྐྱེ་བའི་ཆོས་ལ་བཟོད་པ་ཐོབ་པ་གང་ཡིན་པ་དང་། བྱང་ཆུབ་སེམས་དཔའི་སེམས་དང་པོ་སྐྱེ་བ་དེ་ནི་འཇམ་དཔལ་གཞོན་ནུར་གྱུར་པས་ཇི་སྐད་བསྟན་པ་འདི་ཡིན་ནོ། ། [3b.6]འཇམ་དཔལ་གྱིས་གསོལ་པ། བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་ལྟར་ན། བྱང་ཆུབ་སེམས་དཔའི་སེམས་སྐྱེ་བ་ཐམས་ཅད་ནི་སེམས་དང་པོ་སྐྱེ་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་སེམས་སྐྱེ་བ་ཐམས་ཅད་ [3b.7]ནི་སྐྱེ་བ་མ་མཆིས་པ་ལགས་ལ། སྐྱེ་བ་མ་མཆིས་པ་གང་ལགས་པ་དེ་ནི་བྱང་ཆུབ་སེམས་དཔའི་སེམས་དང་པོ་སྐྱེ་བ་ལགས་པའི་སླད་དུའོ། །བསྟན་པ་འདི་བཤད་པ་ན་བྱང་ཆུབ་སེམས་དཔའ་ཉི་ཁྲི་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་ལྔ་བརྒྱ་ནི་ [4a] [4a.1]ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ་དུང་ཕྱུར་ཕྲག་དྲུག་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ [4a.2]ཅེས་གསོལ་ཏོ། །བཅོམ་ལྡན་འདས་དེ་ལྟར་འཇམ་དཔལ་གཞོན་ནུར་གྱུར་པས་ཆོས་བསྟན་པས་སེམས་ཅན་འདི་སྙེད་ཀྱི་དོན་བགྱིས་པ་ནི་འཇམ་དཔལ་གཞོན་ནུར་གྱུར་པ་དཀའ་བ་བགྱིད་པ་ལགས་སོ། །འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་ [4a.3]ཁོ་བོ་ནི་དཀའ་བ་བྱེད་པ་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ་ཆོས་ཐམས་ཅད་བྱེད་པ་མེད་པ། མ་བྱས་པ། བྱ་བ་མེད་པ་ཡིན་པས་ཁོ་བོ་ཆོས་འགའ་ཡང་མི་བྱེད། འཇིག་པར་མི་བྱེད་པའི་ཕྱིར་རོ། །ཁོ་བོ་ནི་སེམས་ཅན་འགའ་ [4a.4]ཡང་གྲོལ་བར་མི་བྱེད། འཆིང་བར་མི་བྱེད་དོ། །དེ་ཅིའི་ཕྱིར་ཞེ་ན། སེམས་ཅན་མེད་པའི་ཕྱིར་རོ། །བཙུན་པ་འོད་སྲུང་ཆེན་པོ་གཞན་ཡང་དེ་སྐད་ཅེས་དཀའ་བ་བྱེད་པ་ཡིན་ནོ་ཞེས་ཟེར་བ་ནི་བཙུན་པ་འོད་སྲུང་ཆེན་པོ་ཁོ་བོ་ནི་དཀའ་བ་བྱེད་པ་མ་ཡིན་ཏེ། དེ་བཞིན་ [4a.5]གཤེགས་པ་ཡང་མ་ཡིན། དགྲ་བཅོམ་པ་རྣམས་ཀྱང་མ་ཡིན། རང་སངས་རྒྱས་རྣམས་ཀྱང་མ་ཡིན་ནོ། །བཙུན་པ་འོད་སྲུང་ཆེན་པོ་གང་དག་བྱིས་པ་སོ་སོའི་སྐྱེ་བོ་རྣམས་དཀའ་བ་བྱེད་པ་ཡིན་ནོ་ཞེས་ཡང་དག་པར་སྨྲ་བརྗོད་པར་གྱུར་ན་དེ་དག་ནི་ཡང་དག་པར་ [4a.6]སྨྲ་བརྗོད་པ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ་འདི་ལྟར་སངས་རྒྱས་ཐམས་ཅད་ཀྱིས་མ་བརྙེས་མི་བརྙེས་བརྙེས་པར་མི་འགྱུར་བ་གང་ཡིན་པ་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་ཀྱིས་མ་རྙེད་མི་རྙེད་རྙེད་པར་མི་ [4a.7]འགྱུར་བ་གང་ཡིན་པ་དེ་ནི་བྱིས་པ་སོ་སོའི་སྐྱེ་བོ་རྣམས་ཀྱིས་རྙེད་པའི་ཕྱིར་རོ། །འོད་སྲུང་ཆེན་པོས་སྨྲས་པ། འཇམ་དཔལ་སངས་རྒྱས་ཐམས་ཅད་ཀྱིས་ཅི་ཞིག་མ་བརྙེས། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་བདག་མ་བརྙེས་སོ། །སེམས་ཅན་ [4b] [4b.1]མ་བརྙེས་སོ། །སྲོག་མ་བརྙེས་སོ། །གང་ཟག་མ་བརྙེས་སོ། །རྟག་པ་མ་བརྙེས་སོ། །ཆད་པ་མ་བརྙེས་སོ། །ཕུང་པོ་རྣམས་མ་བརྙེས་སོ། །ཁམས་རྣམས་མ་བརྙེས་སོ། །སྐྱེ་མཆེད་རྣམས་མ་བརྙེས་སོ། །མིང་མ་བརྙེས་སོ། །གཟུགས་མ་བརྙེས་སོ། །འདོད་པའི་ཁམས་ [4b.2]མ་བརྙེས་སོ། །གཟུགས་ཀྱི་ཁམས་མ་བརྙེས་སོ། །གཟུགས་མེད་པའི་ཁམས་མ་བརྙེས་སོ། །རྟོག་པ་དང་། ཡོངས་སུ་རྟོག་པ་དང་། རྣམ་པར་རྟོག་པ་དང་། རྒྱུ་དང་སྐྱེ་བ་རྣམས་མ་བརྙེས་སོ། །ཕྱིན་ཅི་ལོག་རྣམས་མ་བརྙེས་སོ། །འདོད་ཆགས་དང་། ཞེ་སྡང་ [4b.3]དང་། གཏི་མུག་དག་མ་བརྙེས་སོ། །འཇིག་རྟེན་འདི་དང་། འཇིག་རྟེན་ཕ་རོལ་མ་བརྙེས་སོ། །ངར་འཛིན་པ་དང་། ང་ཡིར་འཛིན་པ་དག་མ་བརྙེས་ཏེ། བཙུན་པ་འོད་སྲུང་ཆེན་པོ་མདོར་ན་ཆོས་ཐམས་ཅད་མ་བརྙེས། མ་བཤིག །མ་བཀྲོལ། མ་བཟུང་། [4b.4]མ་བཏང་། མ་སྦྱར། མ་ཕྱེའོ། །བཙུན་པ་འོད་སྲུང་ཆེན་པོ་རྣམ་གྲངས་དེས་ན་ཁྱོད་ཀྱིས་འདི་ལྟར་སངས་རྒྱས་ཐམས་ཅད་ཀྱིས་མ་བརྙེས་པ་གང་ཡིན་པ་དེ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ཀྱིས་རྙེད་པར་རིག་པར་བྱ་སྟེ། དེའི་ཕྱིར་དེ་དག་ནི་དཀའ་ [4b.5]བ་བྱེད་པ་ཡིན་ནོ། །སངས་རྒྱས་རྣམས་ཀྱིས་མ་མཛད་པ་གང་ཡིན་པ་དང་། ཉན་ཐོས་རྣམས་དང་རང་སངས་རྒྱས་རྣམས་ཀྱིས་མ་བྱས་པ་གང་ཡིན་པ་དེ་ཡང་བྱིས་པ་སོ་སོའི་སྐྱེ་བོ་རྣམས་བྱེད་དོ། །འོད་སྲུང་ཆེན་པོས་སྨྲས་པ། འཇམ་དཔལ་ཅི་ཞིག་བྱེད། འཇམ་ [4b.6]དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ་རྟག་པ་བྱེད་དོ། །ཆད་པ་བྱེད་དོ། །ཀུན་ཏུ་སྦྱོར་བ་བྱེད་དོ། །མངོན་པར་གནས་པ་བྱེད་དོ། །རློམ་སེམས་བྱེད་དོ། །སེམས་པ་བྱེད་དོ། །སྐྱེ་བ་བྱེད་དོ། །འཇིག་པ་བྱེད་དོ། །ལེན་པ་བྱེད་དོ། །འདོར་བ་བྱེད་དོ། ། [4b.7]འཕྲོ་བ་བྱེད་དོ། །རྟོག་པ་བྱེད་དོ། །རྗེས་སུ་ཆགས་པ་བྱེད་དོ། །ཁོང་ཁྲོ་བ་བྱེད་དོ། །ཁེངས་པ་བྱེད་དོ། །འདུད་པ་བྱེད་དེ། བཙུན་པ་འོད་སྲུང་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱིས་མ་མཛད་མི་མཛད་མཛད་པར་མི་འགྱུར་བའི་ཆོས་གང་དག་ཡིན་པ་ [5a] [5a.1]དེ་དག་བྱིས་པ་སོ་སོའི་སྐྱེ་བོ་རྣམས་བྱེད་པས་ན་དེའི་ཕྱིར་དེ་དག་ནི་དཀའ་བ་བྱེད་པ་ཡིན་ནོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་མི་སྐྱེ་བའི་ཆོས་ལ་བཟོད་པ་མི་སྐྱེ་བའི་ཆོས་ལ་ [5a.2]བཟོད་པ་ཞེས་བགྱི་ན་བཅོམ་ལྡན་འདས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཞེས་བགྱི་བ་དེ་ནི་གང་ལགས། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔས་ནི་ཅི་ཞིག་འཐོབ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཐོབ་པ་ [5a.3]ཅི་ཡང་མེད་པའི་ཕྱིར་མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་བྱའོ། །དེ་ཅིའི་ཕྱིར་ཞེ་ན། བཟོད་པ་དེ་ནི་འཐོབ་པ་མེད་པ་སྟེ། ཐོབ་པ་མེད་པས་ཐོབ་པ་དང་བྲལ་བ། མ་ཐོབ་པ། མ་བཤིག་པ་ཡིན་པའི་ཕྱིར་རོ། །འཇམ་དཔལ་མི་སྐྱེ་བའི་ཆོས་ལ་བཟོད་པ་ཞེས་བྱ་ [5a.4]བ་དེ་ནི་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འོང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འགྲོ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་མཉམ་པ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་བདག་པོ་ [5a.5]མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་བླང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་དོར་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་དངོས་པོ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་ངོ་བོ་ཉིད་མེད་པ་ཞེས་བྱ་བ་བཟོད་པ་དང་། [5a.6]ཆོས་ཐམས་ཅད་འདྲ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་རྡུལ་མེད་ཅིང་ནམ་མཁའ་དང་མཚུངས་པ་ཞེས་བྱ་བ་བཟོད་པ་དང་། ཆོས་ཐམས་ཅད་དབྱེར་མེད་ཅིང་གཅད་དུ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་ཀུན་ནས་ཉོན་མོངས་པ་མེད་པ་ཞེས་ [5a.7]བྱ་བ་བཟོད་པ་དང་། ཆོས་ཐམས་ཅད་རྣམ་པར་བྱང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་སྟོང་པ་དང་། མཚན་མ་མེད་པ་དང་། སྨོན་པ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འདོད་ཆགས་དང་བྲལ་བ་དང་། ཞེ་སྡང་དང་བྲལ་བ་དང་། གཏི་ [5b] [5b.1]མུག་དང་བྲལ་བ་ཞེས་བྱ་བ་བཟོད་པ་དང་། ཆོས་ཐམས་ཅད་དེ་བཞིན་ཉིད་དང་། ཆོས་ཀྱི་དབྱིངས་དང་། ཡང་དག་པའི་མཐའ་ལ་གནས་པ་ཞེས་བྱ་བ་བཟོད་པ་དང་། ཆོས་ཐམས་ཅད་མ་བརྟགས་པ་དང་། རྣམ་པར་མ་བརྟགས་པ་དང་། མ་རློམས་པ་དང་། མ་སྤྲོས་པ་ [5b.2]དང་། མ་བསམས་པ་དང་། མ་བྱས་པ་དང་། སྟོབས་མེད་པ་དང་། ཉམ་ཆུང་བ་དང་། གསོག་དང་། གསོ་བ་དང་། སྒྱུ་མ་ལྟ་བུ་དང་། རྨི་ལམ་ལྟ་བུ་དང་། བྲག་ཅ་ལྟ་བུ་དང་། མིག་ཡོར་ལྟ་བུ་དང་། སྨིག་རྒྱུ་ལྟ་བུ་དང་། ཆུ་ཤིང་གི་སྙིང་པོ་ལྟ་བུ་དང་། ཆུ་བུར་ལྟ་ [5b.3]བུ་དང་། དབུ་བ་རྡོས་པ་ལྟ་བུ་ཞེས་བྱ་བ་བཟོད་ཅིང་དེ་དག་ནི་ཆོས་རྣམས་ཀྱང་མ་ཡིན། ཆོས་མ་ཡིན་པ་རྣམས་ཀྱང་མ་ཡིན་ཏེ། མིང་གིས་བརྗོད་པ་ཁོ་ན་ཡིན་ཞིང་མིང་དེ་ཡང་གཡོ་བ་མེད་པ། རང་བཞིན་གྱིས་དབེན་པ་ཡིན་ནོ་ཞེས་བྱ་བ་དེ་ལྟར་བཟོད་པར་བྱེད། མོས་པར་ [5b.4]བྱེད། ཡིད་ཆེས་པར་བྱེད། འཇིག་པར་བྱེད། རྟོག་པར་བྱེད་ཅིང་ནེམ་ནུར་མི་བྱེད། ཐེ་ཚོམ་མི་ཟ་ལ། མི་སྐྲག་མི་དངང་ཞིང་དངང་བར་མི་འགྱུར་བར་ལུས་ཀྱིས་རེག་པར་བྱས་ནས་བསྒྲུབས་ཏེ་གནས་ཤིང་ལུས་ཀྱང་མི་དམིགས་ཤིང་གནས་པ་ཡང་མི་དམིགས་པ་དེ་ནི་ [5b.5]འཇམ་དཔལ་འདི་ལྟ་སྟེ། མཚན་མ་ཐམས་ཅད་རབ་ཏུ་མི་རྒྱུ་བའི་ཕྱིར་བྱང་ཆུབ་སེམས་དཔའི་མི་སྐྱེ་བའི་ཆོས་ལ་བཟོད་པ་ཞེས་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས་བཟོད་པ་བཟོད་པ་ཞེས་བགྱི་བ་ནི་ཆོས་གང་ཆོས་གང་གིས་ཀྱང་རྨས་པར་བགྱིར་ [5b.6]མ་མཆིས་པ་དེ་ནི་བཟོད་པ་ཞེས་བགྱིའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཆོས་གང་ཞིག་ཆོས་གང་གིས་རྨས་པར་བགྱིད། འཇམ་དཔལ་གྱིས་སྨྲས་པ། ལྷའི་བུ་མིག་ནི་ [5b.7]གཟུགས་ཡིད་དུ་འོང་བ་དང་། ཡིད་དུ་མི་འོང་བ་དག་གིས་རྨས་པར་བྱེད་དོ། །རྣ་བ་ནི་སྒྲ་དག་གིས་སོ། །སྣ་ནི་དྲི་དག་གིས་སོ། །ལྕེ་ནི་རོ་དག་གིས་སོ། །ལུས་ནི་རེག་བྱ་དག་གིས་སོ། །ལྷའི་བུ་ཡིད་ནི་ཆོས་ཡིད་དུ་འོང་བ་དང་། ཡིད་དུ་མི་འོང་བ་དག་ [6a] [6a.1]གིས་རྨས་པར་བྱེད་དོ། །ལྷའི་བུ་བྱང་ཆུབ་སེམས་དཔའ་ནི་མིག་གིས་གཟུགས་མཐོང་ཡང་མཚན་མར་འཛིན་པར་མི་བྱེད། མངོན་རྟགས་སུ་འཛིན་པར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། རྗེས་སུ་ཆགས་པར་མི་བྱེད། ཁོང་ [6a.2]ཁྲོ་བར་མི་བྱེད་དེ། གཟུགས་རང་བཞིན་གྱིས་སྟོང་པར་ཤེས་པར་བྱེད་ཅིང་རློམ་སེམས་སུ་མི་བྱེད་ཅིང་རྨས་པར་མི་བྱེད་དོ། །དེ་བཞིན་དུ་རྣ་བས་སྒྲ་ཐོས་པ་དང་། སྣས་དྲི་བསྣམས་པ་དང་། ལྕེས་རོ་མྱང་བ་དང་། ལུས་ཀྱིས་རེག་བྱ་རེག་པ་དང་། ཡིད་ཀྱིས་ [6a.3]ཆོས་ཤེས་ཀྱང་མཚན་མར་འཛིན་པར་མི་བྱེད། མངོན་རྟགས་སུ་འཛིན་པར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། རྗེས་སུ་ཆགས་པར་མི་བྱེད། ཁོང་ཁྲོ་བར་མི་བྱེད་དེ། ཆོས་རང་བཞིན་གྱིས་སྟོང་པར་ཤེས་པར་བྱེད་ཅིང་རློམ་སེམས་སུ་མི་བྱེད། [6a.4]རྨས་པར་མི་བྱེད་དོ། །ལྷའི་བུ་དེ་ལྟར་སྐྱེ་མཆེད་དྲུག་པོ་དག་ལ་ཆགས་པར་མི་བྱེད་རྨས་པར་མི་བྱེད་དེ། རྨས་པར་མི་བྱེད་པ་གང་ཡིན་པ་དེ་ནི་བཟོད་པ་ཞེས་བྱའོ། །ལྷའི་བུ་བཟོད་པ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་ནི་ཆོས་རྣམས་ལ་སྐྱེ་བའམ། [6a.5]མི་སྐྱེ་བར་མི་རྟོག་གོ །ཆོས་རྣམས་ལ་ཟག་པ་དང་བཅས་པའམ། ཟག་པ་མེད་པའམ། ཁ་ན་མ་ཐོ་བ་དང་བཅས་པའམ། ཁ་ན་མ་ཐོ་བ་མེད་པའམ། འདུས་བྱས་སམ། འདུས་མ་བྱས་སུ་མི་རྟོག་སྟེ། གང་གི་ཚེ་མི་རྟོག་པ་དེའི་ཚེ་མི་སྐྱེ་བའི་ཆོས་ལ་བཟོད་ [6a.6]པ་ཞེས་བྱའོ། །བསྟན་པ་འདི་བཤད་པ་ན་སྲོག་ཆགས་དྲུག་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ལྷའི་བུ་བློ་གྲོས་རབ་ [6a.7]གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ས་ནས་སར་འཕར་བས་ནས་སར་འཕར་བ་ཞེས་བགྱི་ན། ཇི་ལྟར་བྱང་ཆུབ་སེམས་དཔའ་ས་ནས་སར་འཕར་བར་བགྱིད། འཇམ་དཔལ་གྱིས་སྨྲས་པ། ལྷའི་བུ་ས་ནས་སར་ [6b] [6b.1]འཕར་བར་བྱེད་པ་གང་ཡིན་པ་དེ་ལ་དྲིས་ཤིག །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་ས་ནས་སར་འཕར་ཞིང་ས་བཅུ་པའི་བར་དུ་གནོན་པར་མི་བགྱིད་དམ། འཇམ་དཔལ་གྱིས་སྨྲས་པ། ལྷའི་བུ་ཁྱོད་བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུའོ་ [6b.2]ཞེས་གསུངས་པ་ལ་མ་མོས་སམ། ལྷའི་བུས་སྨྲས་པ། འཇམ་དཔལ་མོས་སོ། །འཇམ་དཔལ་གྱིས་སྨྲས་པ། ལྷའི་བུ་ཅི་སྒྱུ་མ་དང་སྤྲུལ་པ་ས་ནས་སར་འཕར་ཞིང་ས་བཅུ་པའི་བར་དུ་གནོན་ཏམ། ལྷའི་བུས་སྨྲས་པ། འཇམ་དཔལ་དེ་ནི་མ་ལགས་སོ། ། [6b.3]འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་སྒྱུ་མ་དང་སྤྲུལ་པ་ས་ནས་སར་འཕར་བར་གྱུར་པ་དེའི་ཚེ་ཁོ་བོ་ཡང་ས་ནས་སར་འཕར་བར་འགྱུར་རོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུའོ་ཞེས་གསུངས་པའི་ཕྱིར་རོ། །ལྷའི་བུ་དེ་ལྟ་དེ་ [6b.4]ལྟ་མོད་ཀྱི་ས་ནས་སར་འཕར་བ་བསྟན་པ་དེ་ནི་འཕར་བ་མེད་པར་བསྟན་པར་བྱའི་འཕར་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་འཕོ་བ་མེད་པར་ཆོས་རྣམས་ནི་ཆོས་རྣམས་སུ་མི་འཕོ་བའི་ཕྱིར་ཏེ། གཟུགས་ནི་ཚོར་བར་མི་འཕོ། ཚོར་བ་ཡང་གཟུགས་སུ་ [6b.5]མི་འཕོ། གཟུགས་ནི་འདུ་ཤེས་སུ་མི་འཕོ། འདུ་ཤེས་ཀྱང་གཟུགས་སུ་མི་འཕོ། གཟུགས་ནི་འདུ་བྱེད་རྣམས་སུ་མི་འཕོ། འདུ་བྱེད་རྣམས་ཀྱང་གཟུགས་སུ་མི་འཕོ། གཟུགས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་གཟུགས་སུ་མི་འཕོ། [6b.6]ཚོར་བ་ནི་འདུ་ཤེས་སུ་མི་འཕོ། འདུ་ཤེས་ཀྱང་ཚོར་བར་མི་འཕོ། ཚོར་བ་ནི་འདུ་བྱེད་རྣམས་སུ་མི་འཕོ། འདུ་བྱེད་རྣམས་ཀྱང་ཚོར་བར་མི་འཕོ། ཚོར་བ་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་ཚོར་བར་མི་འཕོ། འདུ་ཤེས་ནི་འདུ་བྱེད་རྣམས་སུ་མི་འཕོ། [6b.7]འདུ་བྱེད་རྣམས་ཀྱང་འདུ་ཤེས་སུ་མི་འཕོ། འདུ་ཤེས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་འདུ་ཤེས་སུ་མི་འཕོ། འདུ་བྱེད་རྣམས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་འདུ་བྱེད་རྣམས་སུ་མི་འཕོ། མིག་ནི་རྣ་བར་མི་འཕོ། [7a] [7a.1]རྣ་བ་ཡང་མིག་ཏུ་མི་འཕོ། མིག་ནི་སྣར་མི་འཕོ། སྣ་ཡང་མིག་ཏུ་མི་འཕོ། མིག་ནི་ལྕེར་མི་འཕོ། ལྕེ་ཡང་མིག་ཏུ་མི་འཕོ། མིག་ནི་ལུས་སུ་མི་འཕོ། ལུས་ཀྱང་མིག་ཏུ་མི་འཕོ། མིག་ནི་ཡིད་དུ་མི་འཕོ། ཡིད་ཡང་མིག་ཏུ་མི་འཕོ། རྣ་བ་ནི་སྣར་ [7a.2]མི་འཕོ། སྣ་ཡང་རྣ་བར་མི་འཕོ། རྣ་བ་ནི་ལྕེར་མི་འཕོ། ལྕེ་ཡང་རྣ་བར་མི་འཕོ། རྣ་བ་ནི་ལུས་སུ་མི་འཕོ། ལུས་ཀྱང་རྣ་བར་མི་འཕོ། རྣ་བ་ནི་ཡིད་དུ་མི་འཕོ། ཡིད་ཀྱང་རྣ་བར་མི་འཕོ། སྣ་ནི་ལྕེར་མི་འཕོ། ལྕེ་ཡང་སྣར་མི་འཕོ། སྣ་ནི་ལུས་སུ་མི་འཕོ། [7a.3]ལུས་ཀྱང་སྣར་མི་འཕོ། སྣ་ནི་ཡིད་དུ་མི་འཕོ། ཡིད་ཀྱང་སྣར་མི་འཕོ། ལྕེ་ནི་ལུས་སུ་མི་འཕོ། ལུས་ཀྱང་ལྕེར་མི་འཕོ། ལྕེ་ནི་ཡིད་དུ་མི་འཕོ། ཡིད་ཀྱང་ལྕེར་མི་འཕོ། ལུས་ནི་ཡིད་དུ་མི་འཕོ། ཡིད་ཀྱང་ལུས་སུ་མི་འཕོ་ཞིང་ཆོས་དེ་དག་ནི་སྤྱོད་ཡུལ་ཐ་དད་པ། [7a.4]ཡུལ་ཐ་དད་པ། བླུན་པ། བེམས་པོ། སེམས་པ་མེད་པ། གཡོ་བ་མེད་པ། བྱེད་པ་མེད་པ། རྩྭ་དང་རྩིག་པ་ལྟ་བུར་སྣང་བ། སྒྱུ་མ་ལྟ་བུར་རྣམ་པར་རིག་པ་མེད་པ། མཚན་ཉིད་མེད་པར་མཚན་ཉིད་གཅིག་པ་སྟེ། དེ་དག་ནི་འཕོ་བར་མི་བྱེད། འོང་བར་ [7a.5]མི་བྱེད། འགྲོ་བར་མི་བྱེད་པའི་ཕྱིར་རོ། །ལྷའི་བུ་བྱང་ཆུབ་སེམས་དཔའ་གང་དེ་ལྟར་ཤེས་པར་བྱེད་པ་དེ་ནི་ཆོས་གང་ལ་ཡང་འཕོ་བར་མི་བྱེད་ཅིང་སར་ཡང་རྣམ་པར་རྟོག་པར་མི་བྱེད། སར་འཕར་བར་ཡང་མི་མཐོང་། ས་ཡོངས་སུ་སྤོང་བར་ཡང་མི་བྱེད་དོ། །འཕོ་ [7a.6]བ་མེད་པ་དང་། འཇིག་པ་མེད་པའི་ཕྱིར་བྱང་ཆུབ་ལས་ལོག་པར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་གཟོད་མ་ནས་རྣམ་པར་དག་པའི་ཕྱིར་ཕུང་པོ་དང་། ཁམས་དང་། སྐྱེ་མཆེད་ཀྱི་ངོ་བོ་ཉིད་གང་ཡིན་པ་དེ་ནི་འཕོ་བ་མེད་ཅིང་འཇིག་པ་མེད་པའི་ [7a.7]ཕྱིར་ཏེ། ལྷའི་བུ་དེ་ནི་བྱང་ཆུབ་སེམས་དཔའ་རྣམས་ཀྱི་ས་ནས་སར་འཕར་བ་ཡིན་ནོ། །ལྷའི་བུ་འདི་ལྟ་སྟེ། དཔེར་ན་སྒྱུ་མ་མཁན་ཞིག་གིས་ས་བཅུའི་ཁང་པ་བརྩེགས་པ་ཞིག་མངོན་པར་སྤྲུལ་ནས་དེར་སྒྱུ་མའི་མི་ཞིག་ཞུགས་པར་གྱུར་ན། ལྷའི་བུ་འདི་ཇི་སྙམ་དུ་ [7b] [7b.1]སེམས། དེར་འགའ་ཡང་ཞུགས་པ་ཡོད་སྙམ་འམ། ལྷའི་བུས་སྨྲས་པ། འཇམ་དཔལ་དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའི་ས་བཅུར་འཕར་བ་ཡང་དེ་བཞིན་དུ་བལྟ་བར་བྱའོ། །དེ་ནས་ལྷའི་བུ་བློ་གྲོས་རབ་ [7b.2]གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ལ་ལ་ཞིག་རབ་ཏུ་འབྱུང་བའི་སླད་དུ་ཁྱོད་ཀྱི་ཐད་དུ་མཆིས་ན་རབ་ཏུ་འབྱུང་བ་དེ་ལ་ཁྱོད་ཇི་སྐད་གསུང་ཞིང་དེ་རབ་ཏུ་ནི་ཇི་ལྟར་འབྱིན། རྫོགས་པར་བསྙེན་པར་ནི་ཇི་ལྟར་མཛད། ཚུལ་ [7b.3]ཁྲིམས་ཀྱི་ཕུང་པོ་ལ་ནི་ཇི་ལྟར་སྦྱོར། བསླབ་པའི་ལུང་ནི་ཇི་སྐད་འབོག་པར་མཛད། འཇམ་དཔལ་གྱིས་སྨྲས་པ། ལྷའི་བུ་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོང་ན་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་རབ་ཏུ་འབྱུང་བའི་སེམས་བསྐྱེད་པར་མི་ [7b.4]བྱེད་པ་དེ་ལྟ་ན་ཁོ་བོས་ཁྱོད་རབ་ཏུ་དབྱུང་ངོ་ཞེས་སྨྲའོ། །དེ་ཅིའི་ཕྱིར་ཞེ་ན། ལྷའི་བུ་གང་རབ་ཏུ་དབྱུང་བ་དེ་ནི་འདོད་པའི་ཁམས་སུ་གནས་པའམ། གཟུགས་ཀྱི་ཁམས་སུ་གནས་པ་འམ། གཟུགས་མེད་པའི་ཁམས་སུ་གནས་པ་འམ། འདོད་པའི་ཡོན་ཏན་ [7b.5]ལྔ་ལ་གནས་པ་ཡིན་ལ། གནས་དགུ་ལ་སྤྱོད་པའི་རིགས་ཀྱི་བུ་ནི་ཆོས་མངོན་སུམ་དུ་བྱེད་པའི་ཕྱིར་ཏེ། ལྷའི་བུ་དགུ་གང་ཞེ་ན། གང་ཅི་ལ་ཡང་མི་གནས་པ་དེ་ནི་སེམས་ཉེ་བར་དམིགས་པར་མི་བྱེད་པ་དང་། གང་སེམས་ཉེ་བར་དམིགས་པར་མི་བྱེད་པ་དེ་ནི་རབ་ [7b.6]ཏུ་འབྱུང་བར་མི་འདོད་པ་དང་། གང་རབ་ཏུ་འབྱུང་བར་མི་འདོད་པ་དེ་ནི་རབ་ཏུ་འབྱུང་བའི་སེམས་སྐྱེད་པར་མི་བྱེད་པ་དང་། གང་རབ་ཏུ་འབྱུང་བའི་སེམས་སྐྱེད་པར་མི་བྱེད་པ་དེ་ནི་མི་སྐྱེ་བ་དང་། གང་མི་སྐྱེ་བ་དེ་ནི་སྡུག་བསྔལ་ཟད་པ་དང་། གང་སྡུག་བསྔལ་ཟད་པ་དེ་ནི་གཏན་ [7b.7]ཟད་པ་དང་། གང་གཏན་ཟད་པ་དེ་ནི་མི་ཟད་པ་དང་། གང་མི་ཟད་པ་དེ་ནི་ཟད་པར་མི་འགྱུར་བ་དང་། གང་ཟད་པར་མི་འགྱུར་བ་དེ་ནི་ནམ་མཁའ་ཡིན་པ་སྟེ། ལྷའི་བུ་ཁོ་བོ་ནི་རིགས་ཀྱི་བུ་དེ་ལ་དེ་སྐད་ཅེས་སྨྲའོ། །ལྷའི་བུ་གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་ [8a] [8a.1]བོའི་ཐད་དུ་འོངས་ན། དེ་ལ་ཁོ་བོ་འདི་སྐད་ཅེས་རིགས་ཀྱི་བུ་ཁྱོད་རབ་ཏུ་འབྱུང་བའི་སེམས་མ་སྐྱེད་ཅིག །དེ་ཅིའི་ཕྱིར་ཞེ་ན། འདི་ལྟར་སེམས་དེ་ནི་སྐྱེ་བ་མེད་པའི་ཕྱིར་ཏེ། དེ་རྣམ་པར་མ་དཀྲུགས་ཤིག །རིགས་ཀྱི་བུ་གལ་ཏེ་ཁྱོད་སྐྲ་འདྲེག་པར་མི་ [8a.2]བྱེད་པ་དེ་ལྟ་ན། ཁྱོད་ལེགས་པར་རབ་ཏུ་བྱུང་བ་ཡིན་ནོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པ་ནི་གཅད་དུ་མེད་པ་དང་། དབྱེར་མེད་པའི་ཕྱིར་ཆོས་ [8a.3]སྟོན་པར་མཛད་དོ། །ལྷའི་བུས་སྨྲས་པ། འཇམ་དཔལ་ཅི་ཞིག་གཅོད་པར་མི་བགྱིད་ཅིང་ཅི་ཞིག་འབྱེད་པར་མི་བགྱིད། འཇམ་དཔལ་གྱིས་སྨྲས་པ། ལྷའི་བུ་གཟུགས་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ། །ཚོར་བ་དང་། འདུ་ཤེས་དང་། འདུ་ [8a.4]བྱེད་རྣམས་དང་། རྣམ་པར་ཤེས་པ་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ། །ལྷའི་བུ་གང་འདི་སྙམ་དུ་བདག་གི་སྐྲ་བྲེག་གོ་སྙམ་དུ་སེམས་པ་དེ་ནི་ངར་འཛིན་པ་དང་། ང་ཡིར་འཛིན་པ་ལ་གནས་པ་ཡིན་པས་ངར་འཛིན་པ་དང་། ང་ཡིར་འཛིན་པ་ལ་སྤྱོད་པ་དག་ [8a.5]གིས་ནི་མཉམ་པ་ཉིད་མི་མཐོང་སྟེ། བདག་ཏུ་དམིགས་པ་ཡོད་ན་སྐྲར་དམིགས་པར་འགྱུར་ལ། སྐྲར་དམིགས་པ་ཡོད་ན་སེམས་ཅན་དུ་དམིགས་པར་འགྱུར་ཞིང་སེམས་ཅན་དུ་དམིགས་པ་ཡོད་ན་འབྲེག་པའི་འདུ་ཤེས་འབྱུང་བར་འགྱུར་རོ། །ལྷའི་བུ་གང་ལ་བདག་ཏུ་དམིགས་ [8a.6]པ་མེད་པ་དེ་ལ་གཞན་དུ་དམིགས་པ་མེད་དོ། །གང་ལ་གཞན་དུ་དམིགས་པ་མེད་པ་དེ་ལ་ངར་འཛིན་པ་མེད་དོ། །གང་ལ་ངར་འཛིན་པ་མེད་པ་དེས་ང་ཡིར་འཛིན་པ་སྤོང་ངོ་། །གང་གིས་ང་ཡིར་འཛིན་པ་སྤངས་པ་དེ་རྣམ་པར་མི་རྟོག་གོ །གང་རྣམ་པར་མི་རྟོག་པ་དེ་མི་འགྱུར་རོ། ། [8a.7]གང་མི་འགྱུར་བ་དེ་སྤྲོས་པ་མེད་དོ། །གང་སྤྲོས་པ་མེད་པ་དེ་མི་ལེན། མི་འདོར། མི་བྱེད། འཇིག་པར་མི་བྱེད། མི་གཅོད། མི་འབྱེད། མི་སྦྱོར། མི་འབྲལ། མི་ནུར། མི་སྤོང་ཞིང་འབྲི་བར་མི་བྱེད། གང་བར་མི་བྱེད། སྡུད་པར་མི་བྱེད། འཕྲོ་བར་མི་བྱེད། རློམ་ [8b] [8b.1]སེམས་སུ་མི་བྱེད། སྨྲ་བར་མི་བྱེད། རྗོད་པར་མི་བྱེད། རབ་ཏུ་རྗོད་པར་མི་བྱེད་དེ། དེ་ནི་ཡང་དག་པ་ལ་གནས་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཡང་དག་པ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ་ཡང་དག་པ་ཞེས་བྱ་བ་ནི་ནམ་ [8b.2]མཁའ་སྟེ། ནམ་མཁའ་ནི་འགྲིབ་པ་འམ། འཕེལ་བ་འམ། འབྱུང་བ་འམ། འཇིག་པར་མི་འགྱུར་བས་དེའི་ཕྱིར་ནམ་མཁའ་དེ་ནི་ཡང་དག་པའོ། །ཡང་དག་པ་ནི་སྟོང་པ་ཉིད་དོ། །ཡང་དག་པ་ནི་དེ་བཞིན་ཉིད་དོ། །ཡང་དག་པ་ནི་ཆོས་ཀྱི་དབྱིངས་སོ། །ཡང་དག་པ་ནི་ [8b.3]ཡང་དག་པའི་མཐའོ། །ཡང་དག་པ་གང་ཡིན་པ་དེ་ནི་མ་བྱུང་བའོ། །དེ་ཅིའི་ཕྱིར་ཞེ་ན། དེ་ནི་མ་བྱུང་ཞིང་འབྱུང་བར་མི་འགྱུར་བས་དེའི་ཕྱིར་དེ་ནི་མ་བྱུང་བ་ཡིན་ནོ། །ལྷའི་བུ་གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན་དེ་ལ་ཁོ་བོ་འདི་སྐད་ཅེས་རིགས་ [8b.4]ཀྱི་བུ་གལ་ཏེ་ཁྱོད་ངུར་སྨྲིག་འཛིན་པར་མི་བྱེད་ཅིང་གྱོན་པར་མི་བྱེད་པ་དེ་ལྟ་ན་ཁྱོད་རབ་ཏུ་དབྱུང་ངོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པ་ནི་འཛིན་པ་མེད་ [8b.5]པའི་ཕྱིར་ཆོས་སྟོན་པར་མཛད་ཀྱི་འཛིན་པའི་ཕྱིར་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཅི་ཞིག་མི་འཛིན། འཇམ་དཔལ་གྱིས་སྨྲས་པ། ལྷའི་བུ་གཟུགས་རྟག་ཅེས་བྱ་བ་འམ། མི་རྟག་ཅེས་བྱ་བར་མི་འཛིན་ཏོ། །ཚོར་བ་དང་། འདུ་ཤེས་དང་། འདུ་ [8b.6]བྱེད་རྣམས་དང་། རྣམ་པར་ཤེས་པ་རྟག་ཅེས་བྱ་བ་འམ། མི་རྟག་ཅེས་བྱ་བར་མི་འཛིན་ཏོ། །མིག་མི་འཛིན་ཏོ། །གཟུགས་མི་འཛིན་ཏོ། །རྣ་བ་མི་འཛིན་ཏོ། །སྒྲ་མི་འཛིན་ཏོ། །སྣ་མི་འཛིན་ཏོ། །དྲི་མི་འཛིན་ཏོ། །ལྕེ་མི་འཛིན་ཏོ། །རོ་མི་འཛིན་ཏོ། །ལུས་ [8b.7]མི་འཛིན་ཏོ། །རེག་བྱ་མི་འཛིན་ཏོ། །ཡིད་མི་འཛིན་ཏོ། །ཆོས་མི་འཛིན་ཏོ། །འདོད་ཆགས་མི་འཛིན་ཏོ། །ཞེ་སྡང་མི་འཛིན་ཏོ། །གཏི་མུག་མི་འཛིན་ཏོ། །ཕྱིན་ཅི་ལོག་མི་འཛིན་ཏེ། ལྷའི་བུ་མདོར་ན་ཆོས་ཐམས་ཅད་མི་འཛིན། མི་གཏོང་། མི་སྤོང་། མི་ [9a] [9a.1]འདོར་རོ། །ལྷའི་བུ་གང་དུ་ངུར་སྨྲིག་དག་ལ་འཛིན་པའི་འདུ་ཤེས་དང་ལྡན་པ་དེ་ནི་ལྟ་བའི་རྣམ་པ་ཅན་ཡིན་པར་ཁོ་བོ་སྨྲ་སྟེ། ལྷའི་བུ་ངུར་སྨྲིག་འཛིན་པས་ནི་རྣམ་པར་དག་པ་འམ། རྣམ་པར་གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་ [9a.2]བུ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་སྙིགས་མ་མེད་པ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་སྙིགས་མ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ་འདོད་ཆགས་ནི་སྙིགས་མའོ། །ཞེ་སྡང་ནི་སྙིགས་མའོ། ། [9a.3]གཏི་མུག་ནི་སྙིགས་མའོ། །རྒྱུ་ནི་སྙིགས་མའོ། །ལྟ་བ་ནི་སྙིགས་མའོ། །མིང་ནི་སྙིགས་མའོ། །གཟུགས་ནི་སྙིགས་མའོ། །འདུ་ཤེས་ནི་སྙིགས་མའོ། །ལྷག་པར་འཛིན་པ་ནི་སྙིགས་མའོ། །མཚན་མ་ནི་སྙིགས་མའོ། །སྤྲོས་པ་ནི་སྙིགས་མའོ། ། [9a.4]ལྷའི་བུ་གང་མི་དགེ་བའི་ཆོས་དེ་དག་ཡིད་ལ་མི་བྱེད་པ་དེ་ནི་སྙིགས་མ་མེད་པའོ། །གང་སྙིགས་མ་མེད་པ་དེ་ནི་ཅི་ཡང་མེད་པའོ། །གང་ཅི་ཡང་མེད་པ་དེ་ནི་ཉོན་མོངས་པ་མེད་པའོ། །གང་ཉོན་མོངས་པ་མེད་པ་དེ་ནི་ནམ་མཁའ་ཡིན་ནོ། །ལྷའི་བུས་སྨྲས་པ། [9a.5]འཇམ་དཔལ་ལྷག་པར་བྱ་བ་མེད་པ་ལྷག་པར་བྱ་བ་མེད་པ་ཞེས་བགྱི་ན། འཇམ་དཔལ་ལྷག་པར་བྱ་བ་མེད་པ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ་ལྷག་པར་བྱ་བ་མེད་པ། ལྷག་པར་བྱ་བ་མེད་པ་ཞེས་བྱ་བ་ནི་ཆོས་འགའ་ཡང་ལྷག་པར་ [9a.6]མི་བྱ་བ་དེ་ནི་ལྷག་པར་བྱ་བ་མེད་པ་ཞེས་བྱ་སྟེ། ལྷའི་བུ་གང་དག་ལྷག་པར་བྱེད་པ་དེ་དག་ལ་དེ་བཞིན་གཤེགས་པས་ལྷག་པར་བྱ་བ་མེད་པ་ཞེས་གསུངས་ཏེ། དེ་ནི་ལྷག་པར་བྱ་བ་མེད་པ་ཞེས་བྱའོ། །ལྷའི་བུས་སྨྲས་པ། འཇམ་དཔལ་ཅི་ཞིག་ལྷག་པར་བགྱིད། [9a.7]འཇམ་དཔལ་གྱིས་སྨྲས་པ། ལྷའི་བུ་མཉམ་པ་ཉིད་ལས་འདའ་བར་བྱེད་ཅིང་མཉམ་པ་ཉིད་ལས་འདས་ནས་ཆོས་གང་མ་རྙེད་མི་རྙེད་རྙེད་པར་མི་འགྱུར་ཞིང་མ་འབྱུང་མི་འབྱུང་འབྱུང་བར་མི་འགྱུར་བའི་ཆོས་དེ་ལ་ལོག་པར་གནས་ཤིང་ལྷག་པར་བྱེད་དེ། འདི་ལྟ་སྟེ། བདག་ [9b] [9b.1]ཅེས་བྱ་བར་རྟོག་ཅིང་ལྷག་པར་བྱེད་པ་དང་། སེམས་ཅན་དང་། སྲོག་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། རྟག་པ་དང་ཆད་པ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་ [9b.2]ཞེས་བྱ་བར་རྟོག་ཅིང་ལྷག་པར་བྱེད་པ་དང་། སངས་རྒྱས་དང་། ཆོས་དང་། དགེ་འདུན་ཞེས་བྱ་བར་རྟོག་ཅིང་ལྷག་པར་བྱེད་པ་དང་། འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། ཀུན་ནས་ཉོན་ [9b.3]མོངས་པ་དང་། རྣམ་པར་བྱང་བ་དང་། འཐོབ་པ་དང་། འབྲས་བུ་དང་། མངོན་སུམ་དུ་བྱ་བ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་ [9b.4]པ་ཉིད་དང་། རང་སངས་རྒྱས་ཉིད་དང་། སངས་རྒྱས་ཉིད་ཅེས་བྱ་བར་རྟོག་ཅིང་ལྷག་པར་བྱེད་པ་དང་། འདི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བའོ་ཞེས་བྱ་བར་རྟོག་ [9b.5]ཅིང་ལྷག་པར་བྱེད་དེ། ལྷའི་བུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ནི་ལྷག་པར་བྱ་བ་དེ་ལྟ་བུ་དེ་དག་ལ་རྟོག་ཅིང་ལྷག་པར་བྱེད་དོ། །མི་གཏི་མུག་ཅན་དེ་དག་རྟོག་པར་བྱ་བའི་ཆོས་ལ་སྒྲོ་འདོགས་ཤིང་ཡོངས་སུ་རྟོག་པར་བྱེད་དེ། དེ་དག་གིས་སྒྲོ་ [9b.6]འདོགས་པ་ལ་འདུན་པ་བཟློག་པའི་ཕྱིར་དེ་བཞིན་གཤེགས་པ་ལྷག་པར་བྱ་བ་མེད་པ་སྟོན་པར་མཛད་དོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །འཇམ་ [9b.7]དཔལ་ཁྱོད་ཀྱིས་ལྷག་པར་བྱ་བ་མེད་པ་བསྟན་པ་འདི་བཤད་པ་ལེགས་སོ་ལེགས་སོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །གལ་ཏེ་བསྟན་པར་བྱ་ན་དེ་སྐད་བསྟན་ [10a] [10a.1]པར་བྱའོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ་གང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན་དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བསྙེན་ [10a.2]པར་རྫོགས་པར་མི་བྱེད་པ་དེ་ལྟ་ན་ཁྱོད་རབ་ཏུ་བྱུང་བ་ཡིན་ནོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་བཅོམ་ལྡན་འདས་ཀྱིས་བསྙེན་པར་རྫོགས་པ་ནི་འདི་གཉིས་ཡིན་པར་གསུངས་ཏེ། [10a.3]གཉིས་གང་ཞེ་ན། མཉམ་པར་རྫོགས་པར་བསྙེན་པ་དང་། མི་མཉམ་པར་རྫོགས་པར་བསྙེན་པའོ། །དེ་ལ་མི་མཉམ་པར་རྫོགས་པར་བསྙེན་པ་གང་ཞེ་ན། གང་མི་མཉམ་པར་ལྟུང་བའོ། །དེ་ལ་མི་མཉམ་པ་གང་ཞེ་ན། བདག་ཏུ་འཛིན་པ་དང་། སེམས་ཅན་ [10a.4]དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། རྟག་པ་དང་། ཆད་པ་དང་། ང་རྒྱལ་དང་། ལོག་པར་ལྟ་བ་དང་། ཆགས་པ་དང་། ཞེ་སྡང་དང་། གཏི་མུག་ཏུ་ལྟུང་བ་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་ [10a.5]མེད་པའི་ཁམས་སུ་ལྟུང་བ་དང་། ལྷག་པར་འཛིན་པ་དང་། རློམ་སེམས་དང་། ཉེ་བར་ལེན་པར་ལྟུང་བ་སྟེ། ལྷའི་བུ་མདོར་ན་མི་དགེ་བའི་ཆོས་ཐམས་ཅད་དུ་ལྟུང་བ་དང་། སྡིག་པའི་གྲོགས་པོ་རྣམས་ཀྱི་ལག་ཏུ་ལྟུང་བ་དང་། ངེས་པར་འབྱུང་བ་མི་ཤེས་ཤིང་ཡོངས་སུ་ [10a.6]འཛིན་པ་ཐམས་ཅད་ཡོངས་སུ་འཛིན་པར་བྱེད་པ་གང་ཡིན་པ་དེ་ནི་ལྷའི་བུ་མི་མཉམ་པར་རྫོགས་པར་བསྙེན་པ་ཡིན་ནོ། །དེ་ལ་མཉམ་པར་རྫོགས་པར་བསྙེན་པ་གང་ཞེ་ན། གང་མཉམ་པ་ཉིད་དུ་འབབ་པའོ། །དེ་ལ་མཉམ་པ་ཉིད་གང་ཞེ་ན། སྟོང་པ་ཉིད་མཉམ་པ་ཉིད་དང་། [10a.7]མཚན་མ་མེད་པ་མཉམ་པ་ཉིད་དང་། སྨོན་པ་མེད་པ་མཉམ་པ་ཉིད་དེ། ལྷའི་བུ་རྣམ་པར་ཐར་པའི་སྒོ་གསུམ་པོ་དེ་དག་མངོན་སུམ་དུ་བྱ་བ་ཡང་དག་པ་ཇི་ལྟ་བ་བཞིན་སྒྲུབ་ཅིང་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། ཀུན་ཏུ་རྟོག་པ་མེད་པ་དང་། ཕྱིར་མི་ལྡོག་པ་གང་ཡིན་པ་ [10b] [10b.1]དེ་ནི་ལྷའི་བུ་མཉམ་པར་རྫོགས་པར་བསྙེན་པ་ཡིན་ནོ། །ལྷའི་བུ་གཞན་ཡང་འདོད་ཆགས་སེལ་བར་བྱེད་པ་དང་། ཞེ་སྡང་སེལ་བར་བྱེད་པ་དང་། གཏི་མུག་སེལ་བར་བྱེད་པ་དང་། སྲེད་པ་དང་། མ་རིག་པ་དང་། འཇིག་ཚོགས་དང་། འཇིག་ཚོགས་ཀྱི་རྩ་བ་ལས་བྱུང་བའི་ལྟ་བའི་རྣམ་ [10b.2]པ་དྲུག་ཅུ་རྩ་གཉིས་སེལ་བར་བྱེད་པ་དང་། ཕྱིན་ཅི་ལོག་རྣམས་སེལ་བར་བྱེད་པ་དང་། ཉེས་པ་སྤྱོད་པ་གསུམ་དང་། ལོག་པ་ཉིད་བརྒྱད་དང་། ཀུན་ནས་མནར་སེམས་ཀྱི་དངོས་པོ་དགུ་དང་། མི་དགེ་བ་བཅུའི་ལས་ཀྱི་ལམ་སེལ་བར་བྱེད་པ་གང་ཡིན་པ་དེ་ནི་ཡང་དག་པར་རྫོགས་ [10b.3]པར་བསྙེན་པ་ཞེས་བྱའོ། །ལྷའི་བུ་འདི་ལྟ་སྟེ། དཔེར་ན་ས་གཞི་ལ་བརྟེན་ནས་ས་བོན་ཐམས་ཅད་སྐྱེ་ཞིང་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་ཀྱང་སྐྱེ་ལ་དེ་དག་འཕེལ་བ་ན་རྫོགས་པ་ཞེས་བྱའོ། །ལྷའི་བུ་དེ་བཞིན་དུ་གང་དག་བསྟན་པ་འདི་ལ་ [10b.4]རྫོགས་པར་བྱེད་པ་དེ་དག་ཀྱང་རྫོགས་པར་བསྙེན་པ་ཞེས་བྱའོ། །ལྷའི་བུ་འདི་ལྟ་སྟེ། དཔེར་ན་ས་ཆེན་པོ་ནི་ས་བོན་ཐམས་ཅད་ཀྱི་རྟེན་ཡིན་ཏེ། ཚུལ་ཁྲིམས་ཕུན་སུམ་ཚོགས་པ་ཡང་དེ་བཞིན་དུ་བལྟ་བར་བྱའོ། །དེ་ཅིའི་ཕྱིར་ཞེ་ན། ཚུལ་ཁྲིམས་ལ་བརྟེན་ནས་ཆོས་ [10b.5]མངོན་པར་རྟོགས་པར་འགྱུར་བའི་ཕྱིར་རོ། །ཇི་ལྟར་ས་བོན་རྣམས་དང་། ཇི་ལྟར་སྨན་རྣམས་རྣམ་པར་འཕེལ་བ་ལ་རྫོགས་པ་ཞེས་བྱ་བ་དེ་བཞིན་དུ་ཚུལ་ཁྲིམས་དང་། དད་པ་ལ་རྟེན་པའི་བྱང་ཆུབ་ཀྱི་ཕྱོགས་དང་འཐུན་པའི་ཆོས་ཐམས་ཅད་སྐྱེ་ཞིང་རྫོགས་པར་འགྱུར་ཏེ། [10b.6]ལྷའི་བུ་རྣམ་པར་ཐར་པའི་སྒོ་གསུམ་པོ་དེ་དག་རྟོགས་ཤིང་སྤྲོས་པ་ཐམས་ཅད་ཡང་དག་པར་ཆད་པ་གང་ཡིན་པ་དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཉན་ཐོས་ཐམས་ཅད་ཀྱི་རྫོགས་པར་བསྙེན་པ་ཡིན་ནོ། ། [10b.7]ལྷའི་བུ་གང་དེ་ལྟར་རྫོགས་པར་བསྙེན་པར་བྱེད་པ་དེ་ནི་ཡང་དག་པར་རྫོགས་པར་བསྙེན་པར་བྱེད་པ་ཡིན་གྱི་མི་མཉམ་པར་ནི་མ་ཡིན་ནོ། །ལྷའི་བུ་གཞན་ཡང་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བསླབ་པ་ [11a] [11a.1]ལེན་པར་མི་བྱེད་པ་དེ་ལྟར་ན་ཁྱོད་བསླབ་པ་འདོད་པ་ཡིན་ནོ་ཞེས་རྗེས་སུ་བསྟན་པ་སྦྱིན་པར་བྱའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་ཆོས་ཐམས་ཅད་ནི་མ་བླངས་པ་ཡིན་ [11a.2]པས་ལྷའི་བུ་གང་ཚུལ་ཁྲིམས་ལེན་པ་དེ་ནི་ཁམས་གསུམ་ལེན་པ་ཡིན་ནོ། །ལྷའི་བུ་འདི་ཇི་སྙམ་དུ་སེམས། བསླབ་པ་དེ་གང་ཡིན་སྙམ། ལྷའི་བུས་སྨྲས་པ། འཇམ་དཔལ་སོ་སོར་ཐར་པའི་སྡོམ་པ་གང་ལགས་པའོ། །འཇམ་དཔལ་གྱིས་སྨྲས་པ། ལྷའི་བུ་སོ་ [11a.3]སོར་ཐར་པའི་སྡོམ་པ་ཡང་གང་ཡིན། ལྷའི་བུས་སྨྲས་པ། འཇམ་དཔལ་སྡོམ་པ་ཞེས་བགྱི་བ་ནི་ལུས་སྡོམ་པ་དང་། ངག་སྡོམ་པ་དང་། ཡིད་སྡོམ་པ་སྟེ། དེ་ནི་སོ་སོར་ཐར་པའི་སྡོམ་པ་ཞེས་བགྱིའོ། །འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་ [11a.4]སེམས། ལུས་དང་། ངག་དང་། ཡིད་ཀྱིས་མ་བྱས་མི་བྱེད་བྱེད་པར་མི་འགྱུར་བའི་ལས་གང་ཡིན་པ་དེ་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། བཙོད་ཁ་འམ། ཤེལ་གྱི་ཁ་དོག་ལྟ་བུའོ་ཞེས་གདགས་པར་ནུས་སྙམ་འམ། ལྷའི་བུས་ [11a.5]སྨྲས་པ། འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་འོ་ན་ཇི་སྐད་བརྗོད་པར་བྱ། ལྷའི་བུས་སྨྲས་པ། འཇམ་དཔལ་མངོན་པར་འདུ་བགྱིད་པ་མ་མཆིས་པ་ཞེས་བརྗོད་པར་བགྱི་སྟེ། དེ་ནི་ལུས་ཀྱི་ལས་སམ། ངག་གི་ལས་སམ། [11a.6]ཡིད་ཀྱི་ལས་ཞེས་གདགས་པར་རྔོ་མི་ཐོག་གོ །འཇམ་དཔལ་གྱིས་སྨྲས་པ། ལྷའི་བུ་འདི་ཅི་སྙམ་དུ་སེམས། གང་མངོན་པར་འདུ་བྱེད་པ་མེད་པ་དེ་བླང་བར་ནུས་སྙམ་འམ། ལྷའི་བུས་སྨྲས་པ། འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། [11a.7]ལྷའི་བུ་དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐུད་ཅེས་གང་བསླབ་པ་ལེན་པར་མི་བྱེད་པ་དེ་བསླབ་པ་འདོད་པ་ཡིན་ནོ་ཞེས་སྟོན་ཏོ། །ལྷའི་བུ་ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་ཀྱི་བསླབ་པ་དང་། ལྷག་པའི་ཤེས་རབ་ཀྱི་བསླབ་པ་ཞེས་བྱ་བ་གང་ [11b] [11b.1]ཡིན་པ་དེ་ཡང་མཐའ་དེ་ཉིད་ཀྱིས་རྟོགས་པར་བྱ་སྟེ། ཚུལ་ཁྲིམས་མི་དམིགས་པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ། །སེམས་མི་དམིགས་པས་ལྷག་པའི་སེམས་ཀྱི་བསླབ་པ་ཞེས་བྱའོ། །ཤེས་རབ་མི་དམིགས་པས་ལྷག་པའི་ཤེས་རབ་ཀྱི་བསླབ་པ་ [11b.2]ཞེས་བྱའོ། །སེམས་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་པས་ལྷག་པའི་སེམས་ཀྱི་བསླབ་པ་ཞེས་བྱའོ། །ཚུལ་ཁྲིམས་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་ [11b.3]པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ། །ཤེས་རབ་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་པས་ལྷག་པའི་ཤེས་རབ་ཀྱི་བསླབ་པ་ཞེས་བྱའོ། །ལྷའི་བུ་གང་གིས་སེམས་མ་རྙེད་པ་དེ་ཚུལ་ཁྲིམས་སུ་རློམ་ [11b.4]སེམས་མི་བྱེད་དོ། །གང་ཚུལ་ཁྲིམས་སུ་རློམ་སེམས་མི་བྱེད་པ་དེས་ཏིང་ངེ་འཛིན་མི་དམིགས་སོ། །གང་གིས་ཏིང་ངེ་འཛིན་མི་དམིགས་པ་དེས་ཤེས་རབ་མི་དམིགས་སོ། །གང་གིས་ཤེས་རབ་མི་དམིགས་པ་དེ་ལ་ཐེ་ཚོམ་ཐམས་ཅད་མི་འབྱུང་ངོ་། །གང་ལ་ཐེ་ཚོམ་ [11b.5]ཐམས་ཅད་མི་འབྱུང་བ་དེ་བསླབ་པ་མི་ལེན་ཏོ། །གང་བསླབ་པ་མི་ལེན་པ་དེ་བསླབ་པ་འདོད་པ་ཞེས་བྱའོ། །གང་བསླབ་པ་འདོད་པ་དེ་ཕྱིར་མི་འོང་བའོ། །གང་ཕྱིར་མི་འོང་བ་དེ་རྣམ་པར་དག་པའོ། །གང་རྣམ་པར་དག་པ་དེ་བྲལ་བའོ། །གང་བྲལ་བ་དེ་ཟག་པ་མེད་པའོ། ། [11b.6]གང་ཟག་པ་མེད་པ་དེ་ཡང་དག་པར་ཞུགས་པའོ། །གང་ཡང་དག་པར་ཞུགས་པ་དེ་ལ་བཅོས་པ་མེད་དོ། །གང་ལ་བཅོས་པ་མེད་པ་དེ་ནམ་མཁའོ། །དེ་ཅིའི་ཕྱིར་ཞེ་ན། ནམ་མཁའ་ནི་བཅོས་པ་མེད་པའི་ཕྱིར་རོ། །ལྷའི་བུ་གང་དེ་ལྟར་སློབ་པ་དེ་ནི་སློབ་པར་མི་བྱེད་དོ། ། [11b.7]གང་སློབ་པར་མི་བྱེད་པ་དེ་ནི་སློབ་པར་བྱེད་དོ། །གང་ལ་སློབ་ཅེ་ན། ཅི་ལ་ཡང་མི་སློབ་སྟེ། གང་གི་ཚེ་ཅི་ལ་ཡང་མི་སློབ་པ་དེ་ནི་ཡང་དག་པའི་བསླབ་པ་ལ་གནས་པ་ཞེས་བྱའོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་ [12a] [12a.1]སྨྲས་སོ། །ལྷའི་བུ་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་ཅིང་ཡོངས་སུ་སྦྱོང་བར་ [12a.2]མི་བྱེད་པ་དེ་ལྟ་ན་ཁྱོད་ཚུལ་ཁྲིམས་ཡོངས་སུ་དག་པ་ཡིན་ནོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་གང་ལེན་པར་བྱེད་པ་དང་། བདེ་བར་བྱེད་པ་དེ་ནི་སྦྱོང་བར་བྱེད་དོ། །གང་ [12a.3]དམིགས་པར་བྱེད་པ་དེ་ནི་སྦྱོང་བར་བྱེད་དོ། །གང་རློམ་སེམས་སུ་བྱེད་པ་དེ་ནི་སྦྱོང་བར་བྱེད་དོ། །གང་རྟོག་པར་བྱེད་པ་དེ་ནི་སྦྱོང་བར་བྱེད་དོ། །ལྷའི་བུ་གང་ལེན་པར་མི་བྱེད་པ་དང་། བདེ་བར་མི་བྱེད་པ་དང་། དམིགས་པར་མི་བྱེད་པ་དང་། རློམ་སེམས་སུ་མི་བྱེད་པ་ [12a.4]དང་། རྟོག་པར་མི་བྱེད་པ་དེ་ནི་ཅི་ཡང་སྦྱོང་བར་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་གཏན་དག་པ་ཡིན་པའི་ཕྱིར་རོ། །ལྷའི་བུ་དེ་ལྟ་བས་ན་སོ་སོའི་སྐྱེ་བོ་རྣམས་ནི་དད་པས་བྱིན་པ་སྦྱོང་བར་བྱེད་ཀྱི་དགྲ་བཅོམ་པ་དག་ནི་མ་ཡིན་ནོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་ [12a.5]རྣམས་ནི་ལེན་པར་བྱེད། བདེ་བར་བྱེད། དམིགས་པར་བྱེད། རློམ་སེམས་སུ་བྱེད། རྟོག་པར་བྱེད་ཅིང་བདག་ནི་ལེན་པ་ཡིན་ནོ་སྙམ་དུ་རྟོག་པར་བྱེད། འདི་ནི་སྦྱིན་པར་བྱེད་པ་ཡིན་ནོ་སྙམ་དུ་རྟོག་པར་བྱེད་པས་དེ་དག་ནི་སྦྱོང་བར་བྱེད་པ་ཡིན་པའི་ཕྱིར་ཏེ། ཇི་ལྟར་སྦྱོང་བར་ [12a.6]བྱེད་ཅེ་ན། སྲིད་པའི་འགྲོ་བར་སྐྱེ་བ་འགྲུབ་པར་བྱེད་ཅིང་དེར་སྦྱོང་བར་བྱེད་དོ། །ལྷའི་བུ་དགྲ་བཅོམ་པ་དག་ནི་སྲིད་པ་གཞན་དུ་གཏོགས་པའི་ལུས་གཞན་འགའ་ཡང་འགྲུབ་པར་མི་བྱེད་པས་དེ་དག་ནི་ཅི་ཡང་སྦྱོང་བར་མི་བྱེད་དོ། །དེ་དག་བསོད་སྙོམས་དེ་ལེན་པ་ན་ཡང་འཁོར་གསུམ་ [12a.7]ཡོངས་སུ་དག་པས་ལེན་ཏོ། །ལྷའི་བུ་འཁོར་གསུམ་ཡོངས་སུ་དག་པ་དེ་ཡང་གང་ཞེ་ན། ལེན་པར་བྱེད་པའི་བདག་གང་ཡིན་པ་ཡང་མི་དམིགས། སྦྱིན་པར་བྱེད་པའི་སྦྱིན་པ་པོ་གང་ཡིན་པ་ཡང་མི་དམིགས། བླང་བར་བྱ་བའི་བསོད་སྙོམས་གང་ཡིན་པ་ཡང་མི་དམིགས་པ་ [12b] [12b.1]སྟེ། ལྷའི་བུ་དེ་ནི་འཁོར་གསུམ་ཡོངས་སུ་དག་པ་ཞེས་བྱའོ། །ལྷའི་བུ་གང་དེ་ལྟར་དག་པ་དེ་ནི་ཡང་སྦྱོང་བར་མི་བྱེད་པས་ན་ཁོ་བོ་ནི་དེ་ལས་བསམས་ནས་དེ་སྐད་ཅེས་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་དད་པས་བྱིན་པ་ཡོངས་སུ་ [12b.2]ལོངས་སྤྱོད་པར་བྱེད་ཅིང་ཡོངས་སུ་སྦྱོང་བར་མི་བྱེད་པ་དེ་ནི་འཇིག་རྟེན་ན་སྦྱིན་གནས་ཀྱི་འོས་ཡིན་ཏེ། དེ་ནི་ལེགས་པར་རབ་ཏུ་བྱུང་བ་ཡིན་ནོ་ཞེས་སྟོན་ཏོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ་དེ་ [12b.3]ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་དགོན་པར་མི་གནས་ཤིང་གྲོང་དུ་མ་ཡིན། ཐག་ཉེ་བར་མ་ཡིན། ཐག་རིང་བར་མ་ཡིན། ལམ་གོལ་བར་མ་ཡིན། གཅིག་པུ་མ་ཡིན། སྐྱེ་བོ་མང་པོའི་དབུས་སུ་མ་ཡིན། [12b.4]འདུ་འཛིའི་ནང་དུ་མ་ཡིན། དབེན་པར་མ་ཡིན། བསོད་སྙོམས་སྤྱོད་པར་ཡང་མི་བྱེད། འགྲོན་དུ་ཡང་མི་འགྲོ། ཕྱག་དར་ཁྲོད་པར་ཡང་མི་བྱེད། སྨད་པའི་ལྷུང་བཟེད་དང་། ཆོས་གོས་ཀྱང་མི་འཆང་། བླ་གབ་མེད་པ་ཡང་མི་བྱེད། འདོད་པ་ཆུང་བར་ཡང་ [12b.5]མི་བྱེད། འདོད་པ་ཆེ་བར་ཡང་མི་བྱེད། ཆོག་ཤེས་པར་ཡང་མི་བྱེད། ཆོག་མི་ཤེས་པར་ཡང་མི་བྱེད། རབ་ཏུ་དབེན་པར་ཡང་མི་བྱེད། རབ་ཏུ་མི་དབེན་པ་ཡང་མི་བྱེད། ཤིང་དྲུང་པ་ཡང་མི་བྱེད། གནས་ཁང་དུ་ཡང་མི་གནས། སྨན་བསྐུས་ཏེ་བོར་བ་ [12b.6]ཡང་མི་སྟེན། མར་སར་དང་། སྦྲང་རྩི་ཡང་མི་སྟེན་ཅིང་རིགས་ཀྱི་བུ་གལ་ཏེ་ཁྱོད་སྦྱངས་པའི་ཡོན་ཏན་གྱི་ཆོས་དེ་ལྟ་བུ་ཐམས་ཅད་ཡང་དག་པར་བླངས་ཏེ་འཇུག་པར་མི་བྱེད་པ་དེ་ལྟ་ན་ཁྱོད་སྦྱངས་པ་དང་ལྡན་པ་ཡིན་ནོ་ཞེས་སྨྲའོ། །དེ་ཅིའི་ཕྱིར་ཞེ་ན། ལྷའི་བུ་གང་འདི་སྙམ་ [12b.7]དུ་བདག་ནི་ཕྱག་དར་ཁྲོད་པའོ། །བསོད་སྙོམས་པའོ། །ཤིང་དྲུང་པའོ། །བདག་ནི་སྨན་བསྐུས་ཏེ་བོར་བས་ཆོག་ཤེས་པའོ། །བདག་ནི་འདོད་པ་ཆུང་བའོ། །བདག་ནི་ཆོག་ཤེས་པའོ། །བདག་ནི་དགོན་པ་པའོ། །བདག་ནི་བླ་གབ་མེད་པའོ། །བདག་ནི་སྦྱངས་པ་ [13a] [13a.1]དང་ལྡན་པའོ་སྙམ་དུ་སེམས་པ་དེ་དག་ནི་མངོན་པའི་ང་རྒྱལ་ཅན་གྱི་རྣམ་པར་གཡོ་བ་ཡིན་པའི་ཕྱིར་རོ། །ལྷའི་བུ་ཡང་དག་པར་ཞུགས་པ་ལ་ནི་ལྷག་པར་གཡོ་བ་དང་བྲལ་བར་གཡོ་བ་དེ་དག་མི་འབྱུང་ངོ་། །དེ་ཅིའི་ཕྱིར་ཞེ་ན། འདི་ལྟར་དེ་ལ་རྣམ་པར་རྟོག་ [13a.2]པ་མེད་པས་བདག་ཉིད་ཀྱང་མི་དམིགས་ན་སྦྱངས་པའི་ཡོན་ཏན་རྣམས་སུ་དམིགས་པ་ལྟ་ཅི་སྨོས་ཏེ། དེ་ནི་གནས་མེད་པའི་ཕྱིར་རོ། །ལྷའི་བུ་དེ་ལྟ་བས་ན་གང་སྦྱངས་པའི་ཡོན་ཏན་དེ་དག་ཡང་དག་པར་བླངས་ཏེ་འཇུག་ཅིང་རློམ་སེམས་སུ་མི་བྱེད། རྣམ་པར་རྟོག་པར་མི་བྱེད་པ་ [13a.3]དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲའོ། །དེ་ཅིའི་ཕྱིར་ཞེ་ན། ལྷའི་བུ་དགེ་སློང་གང་འདོད་ཆགས་སྦྱོང་བ་དང་། ཞེ་སྡང་སྦྱོང་བ་དང་། གཏི་མུག་སྦྱོང་བ་དང་། ཁམས་གསུམ་སྦྱོང་བ་དང་། ཕུང་པོ་རྣམས་སྦྱོང་བ་དང་། ཁམས་རྣམས་སྦྱོང་བ་དང་། ནང་གི་སྐྱེ་ [13a.4]མཆེད་དྲུག་དང་། ཕྱིའི་སྐྱེ་མཆེད་དྲུག་པོ་དག་སྦྱོང་བར་བྱེད་ཅིང་ཅི་ནས་ཀྱང་མི་ལེན། མི་འདོར། མི་སྒོམ། མི་སེལ། རྣམ་པར་མི་སེལ་བ་དེ་ལྟར་སྦྱོང་བར་བྱེད་པ་དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲ་བའི་ཕྱིར་རོ། །ལྷའི་བུ་གཞན་ཡང་དེ་ལྟར་རབ་ཏུ་བྱུང་ [13a.5]ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བདེན་པ་བཞི་རྟོགས་པར་མི་བྱེད། དྲན་པ་ཉེ་བར་གཞག་པ་བཞི་ཡང་མི་སྒོམ། ཡང་དག་པར་སྤོང་བ་བཞི་ཡང་མ་ཡིན། རྫུ་འཕྲུལ་གྱི་རྐང་པ་བཞི་ཡང་མ་ཡིན། དབང་པོ་ལྔ་ཡང་མ་ཡིན། [13a.6]སྟོབས་ལྔ་ཡང་མི་ཡིན། བྱང་ཆུབ་ཀྱི་ཡན་ལག་བདུན་ཡང་མ་ཡིན། འཕགས་པའི་ལམ་ཡན་ལག་བརྒྱད་པ་ཡང་མི་སྒོམ་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་ཡང་མི་སྒོམ། མངོན་སུམ་དུ་མི་བྱེད། རྣམ་པར་ཐར་པའི་སྒོ་གསུམ་ཡང་མི་སྒོམ། མངོན་ [13a.7]སུམ་དུ་མི་བྱེད་པ་དེ་ལྟ་ན་ཁྱོད་བྱང་ཆུབ་ཀྱི་ཕྱོགས་དང་འཐུན་པའི་ཆོས་རྣམས་སྒོམ་པ་ཡིན་ནོ་ཞེས་སྨྲའོ། །དེ་ཅིའི་ཕྱིར་ཞེ་ན། ལྷའི་བུ་དེ་ནི་མི་སྐྱེ་བའི་མཚན་ཉིད་རྟོགས་པ་ཞེས་བྱ་སྟེ། དེ་ནི་བསྒོམ་པར་བྱར་མེད་ཅིང་མངོན་སུམ་དུ་བྱར་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། [13b] [13b.1]མི་སྐྱེ་བ་ནི་མངོན་སུམ་དུ་བྱར་མི་ནུས་པའི་ཕྱིར་རོ། །ལྷའི་བུ་དྲན་པ་ཉེ་བར་གཞག་པ་རྣམས་ཞེས་བྱ་བ་ནི་ཆོས་ཐམས་ཅད་དྲན་པ་མེད་ཅིང་ཡིད་ལ་བྱེད་པ་མེད་པས་དེའི་ཕྱིར་དྲན་པ་ཉེ་བར་གཞག་པ་རྣམས་ཞེས་བྱའོ། །ལྷའི་བུ་དགེ་སློང་གང་འདོད་པའི་ཁམས་ལ་ཡང་ [13b.2]མི་གནས། གཟུགས་ཀྱི་ཁམས་ལ་ཡང་མི་གནས། གཟུགས་མེད་པའི་ཁམས་ལ་ཡང་མི་གནས་པ་དེ་ནི་གནས་མེད་པ་ལ་གནས་པའི་དགེ་སློང་དྲན་པ་ཉེ་བར་གཞག་པ་རྣམས་སྒོམ་པ་ཞེས་བྱའོ། །ཇི་ལྟར་སྒོམ་ཞེ་ན། ཅི་ནས་ཀྱང་སྒོམ་པར་མི་བྱེད། འཇིག་པར་ [13b.3]མི་བྱེད་པ་དེ་ལྟར་སྒོམ་པར་བྱེད་པས་དེའི་ཕྱིར་སྒོམ་པར་བྱེད་པ་ཞེས་བྱ་སྟེ། བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་པོ་ཐམས་ཅད་ལ་ཡང་དེ་བཞིན་དུ་སྦྱར་རོ། །ལྷའི་བུ་གང་གི་ཚེ་དགེ་སློང་རྣལ་འབྱོར་པ་རྣལ་འབྱོར་སྤྱོད་པས་ཆོས་ཐམས་ཅད་མི་དམིགས་པ་དེའི་ [13b.4]ཚེ་ན་རློམ་སེམས་སུ་མི་བྱེད་དོ། །གང་གི་ཚེ་རློམ་སེམས་སུ་མི་བྱེད་པ་དེའི་ཚེ་སྒོམ་པར་མི་བྱེད་དོ། །གང་གི་ཚེ་སྒོམ་པར་མི་བྱེད་པ་དེའི་ཚེ་མངོན་སུམ་དུ་མི་བྱེད་དོ། །དེ་ཅིའི་ཕྱིར་ཞེ་ན། ལྷའི་བུ་བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་ཞེས་བྱ་བ་ [13b.5]གང་ཡིན་པ་དེ་ནི་མིང་ཙམ་སྟེ། མིང་དེ་ཡང་གཡོ་བ་མེད་པ། རྐྱེན་ལས་སྐྱེས་པ། མཚན་ཉིད་མེད་པར་མཚན་ཉིད་གཅིག་པ། བརྗོད་ཀྱང་རུང་། མ་བརྗོད་ཀྱང་རུང་། མིང་གི་ཡོངས་སུ་ཤེས་པ་གང་ཡིན་པ་དེ་དམིགས་སུ་མེད་པའི་ཕྱིར་ཏེ། བྱང་ཆུབ་ཀྱི་ཕྱོགས་དང་ [13b.6]འཐུན་པའི་ཆོས་སུམ་ཅུ་རྩ་བདུན་ཡོངས་སུ་ཤེས་པ་གང་ཡིན་པ་དེ་ནི་བདེན་པ་མཐོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ་རྣལ་འབྱོར་སྤྱོད་པ་རྣལ་འབྱོར་སྤྱོད་པ་ཞེས་བགྱི་ན་ཇི་ལྟར་ན་དགེ་སློང་རྣལ་འབྱོར་སྤྱོད་པ་ལགས། འཇམ་དཔལ་གྱིས་སྨྲས་པ། ལྷའི་བུ་ [13b.7]གང་གི་ཚེ་རྣལ་འབྱོར་སྤྱོད་པ་འདི་ལྟ་སྟེ། ཆོས་ཐམས་ཅད་སྐྱེ་བ་མེད་པའི་ཚུལ་གྱིས་ཚུལ་གཅིག་ཏུ་སྦྱོར་བར་བྱེད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །གང་གི་ཚེ་ཅི་ལ་ཡང་མི་སྤྱོད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །ཅི་ལ་མི་སྤྱོད་ཅེ་ན། འདི་ལྟ་སྟེ། ཆོས་ [14a] [14a.1]ཐམས་ཅད་ཡོད་པ་མ་ཡིན་པའི་ཕྱིར་འཇིག་རྟེན་འདི་ལ་མི་སྤྱོད། འཇིག་རྟེན་ཕ་རོལ་ལ་མི་སྤྱོད། ཁམས་གསུམ་ལ་མི་སྤྱོད་དེ། དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །ལྷའི་བུ་གང་གི་ཚེ་རྣལ་འབྱོར་སྤྱོད་པ་ཆོས་འགའ་ཡང་སྦྱོར་བར་མི་བྱེད། འབྱེད་པར་ [14a.2]མི་བྱེད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །དེ་ནས་འཁོར་དེ་ལས་དགེ་སློང་སྟོང་ཕྲག་མང་པོ་དག་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པས་རྣམ་པར་ཐར་པའི་སྒོ་གསུམ་རྟོགས་པས་མྱ་ངན་ལས་འདའ་བ་དང་། བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ [14a.3]ཅུ་རྩ་བདུན་མངོན་སུམ་དུ་བྱས་པས་མྱ་ངན་ལས་འདའ་བར་འགྱུར་རོ་ཞེས་གསུངས་པ་དེ་འཇམ་དཔལ་གཞོན་ནུར་གྱུར་པ་འདིས་བཀག་པར་གྱུར་ན། འཇམ་དཔལ་གཞོན་ནུར་གྱུར་པས་བསྟན་པ་འདི་ཇི་ལྟར་རུང་སྟེ། ཆོས་བསྟན་པ་འདི་འགལ་བའམ་གཅིག་ཏུ་མ་གྱུར་གྲང་སྙམ་ [14a.4]དུ་ཐེ་ཚོམ་གྱི་སེམས་སྐྱེས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་དགེ་སློང་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་གནས་བརྟན་ཤཱ་རིའི་བུ་ལ་སྨྲས་པ། བཙུན་པ་ཤཱ་རིའི་བུ་ཁྱོད་ནི་དེ་བཞིན་གཤེགས་པས་ཡིད་ཆེས་པ་དད་པ་དང་ལྡན་ [14a.5]པ་ཤེས་རབ་ཆེན་པོ་རྣམས་ཀྱི་མཆོག་ཏུ་བསྟན་པ་ཡིན་ན། ཤཱ་རིའི་བུ་གང་གི་ཚེ་ཁྱོད་ཀྱིས་འདོད་ཆགས་དང་བྲལ་བའི་ཆོས་རྣམས་མངོན་སུམ་དུ་བྱས་པའི་ཚེ་བཙུན་པས་བདེན་པ་བཞི་པོ་དག་དམིགས་པའམ། མངོན་སུམ་དུ་བྱས་པའམ། བསྒོམས་པ་འམ། བྱང་ [14a.6]ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་དང་། རྣམ་པར་ཐར་པའི་སྒོ་གསུམ་པོ་དག་དམིགས་པའམ། མངོན་སུམ་དུ་བྱས་པ་འམ། བསྒོམས་པ་ཅི་ཡང་ཡོད་དམ། ཤཱ་རིའི་བུས་སྨྲས་པ། འཇམ་དཔལ་དེ་ནི་མེད་དེ། གང་མངོན་སུམ་དུ་བྱ་བ་འམ། [14a.7]བསྒོམ་པར་བྱ་བ་འམ། རྟོགས་པར་བྱ་བའི་ཆོས་དེ་ནི་འགའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བླང་དུ་མེད་པ། མ་སྐྱེས་པ། རྣམ་པར་རིག་པ་མེད་པ། སྟོང་པ་ཡིན་པས་སྟོང་པས་སྟོང་པ་ཉིད་མངོན་སུམ་དུ་མི་བྱེད་པའི་ཕྱིར་རོ། །བསྟན་པ་འདི་བཤད་ [14b] [14b.1]པ་ན་དགེ་སློང་སུམ་སྟོང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ།། །།བམ་པོ་བཞི་པ་སྟེ་ཐ་མ། དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་དེ་ [14b.2]ནི་འདི་ལྟ་སྟེ། ཕྱེ་བས་གོ་བ་ཟབ་མོ་ལ་བཟོད་པ་སྟོང་པ་ཉིད་ལ་གནས་པས་བསྟན་པ་ལགས་ཏེ། ལེགས་སོ་ལེགས་སོ། །འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་ཕྱེ་བས་གོ་བ་མ་ཡིན་གྱི་བྱིས་པ་སོ་སོའི་སྐྱེ་བོ་ཐམས་ཅད་ནི་ཕྱེ་བས་གོ་བ་ཡིན་ནོ། །དེ་ཅིའི་ཕྱིར་ཞེ་ན། [14b.3]འདི་ལྟར་དེ་དག་ནི་འབྱེད་པར་བྱེད་པ་ཡིན་པའི་ཕྱིར་རོ། །ཅི་ཞིག་འབྱེད་པར་བྱེད་ཅེ་ན། སེམས་ཅན་དམྱལ་བ་འབྱེད་པར་བྱེད་དོ། །དུད་འགྲོའི་སྐྱེ་གནས་འབྱེད་པར་བྱེད་དོ། །གཤིན་རྗེའི་འཇིག་རྟེན་འབྱེད་པར་བྱེད་དོ། །ཁམས་གསུམ་པ་འབྱེད་པར་བྱེད་དེ། དེ་ལྟར་ན་ [14b.4]འབྱེད་པ་རྣམས་དང་། ཀུན་ཏུ་འབྱེད་པ་རྣམས་ཀྱི་འཁོར་བའི་སྔོན་གྱི་མཐའ་མི་མངོན་ནོ། །ལྷའི་བུ་བྱིས་པ་རྣམས་ནི་འདོད་ཆགས་ཀུན་ཏུ་འབྱེད་པར་བྱེད་དོ། །ཞེ་སྡང་ཀུན་ཏུ་འབྱེད་པར་བྱེད་དོ། །གཏི་མུག་ཀུན་ཏུ་འབྱེད་པར་བྱེད་དོ། །ལྟ་བ་ཀུན་ཏུ་འབྱེད་པར་བྱེད་དོ། ། [14b.5]མིང་དང་གཟུགས་ཀུན་ཏུ་འབྱེད་པར་བྱེད་དོ། །ལྷའི་བུ་སངས་རྒྱས་རྣམས་ནི་ཕྱེ་བས་གོ་བ་མ་ཡིན་ནོ། །ཉན་ཐོས་རྣམས་ཀྱང་མ་ཡིན། རང་སངས་རྒྱས་རྣམས་ཀྱང་མ་ཡིན། བྱང་ཆུབ་སེམས་དཔའ་བཟོད་པ་ཐོབ་པ་རྣམས་ཀྱང་མ་ཡིན་གྱི་ལྷའི་བུ་བྱིས་པ་རྣམས་ནི་ཕྱེ་ [14b.6]བས་གོ་བ་ཡིན་ནོ། །ལྷའི་བུས་སྨྲས་པ། འཇམ་དཔལ་འོ་ན་ཅི་ཁྱོད་རྣམ་པར་སྤྲོས་ན་གོ་བ་ལགས་སམ། འཇམ་དཔལ་གྱིས་སྨྲས་པ། ལྷའི་བུ་དེ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་འོ་ན་བཀྲི་དགོས་པ་ལགས་སམ། འཇམ་དཔལ་གྱིས་ [14b.7]སྨྲས་པ། ལྷའི་བུ་དེ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་འོ་ན་ཚིག་ལྷུར་ལེན་པ་ལགས་སམ། འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། ཁོ་བོ་ནི་ཚིག་ལྷུར་ལེན་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་ [15a] [15a.1]དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་གང་བྱང་ཆུབ་སེམས་དཔའ་ནི་ཡི་གེ་གཅིག་དང་ཚིག་གཅིག་ལས་ཀྱང་མི་གཡོ་ལ། ཡི་གེ་དེ་ཉིད་དང་། ཚིག་དེ་ཉིད་ཀྱི་དོན་དང་། ཚུལ་དང་། སྒོ་དང་། ལམ་ཡང་ཡང་དག་པ་ཇི་ལྟ་བ་ [15a.2]བཞིན་རབ་ཏུ་ཤེས་པར་བྱེད་དེ། འདི་ནི་སྟོང་པའོ་ཞེས་བྱ་བར་ཤེས་པར་བྱེད་དོ། །འདི་ནི་དབེན་པའོ་ཞེས་བྱ་བར་ཤེས་པར་བྱེད་དོ། །འདི་ནི་དངོས་པོ་མེད་པའོ་ཞེས་བྱ་བར་ཤེས་པར་བྱེད་དོ། །འདི་ནི་སྐྱེ་བ་མེད་པའོ་ཞེས་བྱ་བར་ཤེས་པར་བྱེད་ཅིང་། ཅི་ནས་ཀྱང་རྣམ་ [15a.3]པར་ཤེས་པར་མི་བྱེད། རིག་པར་མི་བྱེད། ཚོར་བར་མི་བྱེད་པ་དེ་ལྟར་ཤེས་པར་བྱེད་པས་དེའི་ཕྱིར་ཚིག་ལྷུར་ལེན་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་དེ་ནི་འདི་ལྟ་སྟེ། གཟུངས་ [15a.4]ཐོབ་པས་བསྟན་པ་ཡིན་ཏེ། ལེགས་སོ་ལེགས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་བདག་ནི་གཟུངས་ཐོབ་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྱིས་པ་རྣམས་ནི་གཟུངས་ཐོབ་པ་ལགས་ཀྱི། སངས་རྒྱས་རྣམས་དང་། [15a.5]བྱང་ཆུབ་སེམས་དཔའ་རྣམས་ནི་གཟུངས་ཐོབ་པ་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྱིས་པ་རྣམས་ནི་འཛིན་པར་བགྱིད་པའི་སླད་དུ་སྟེ། ཅི་ཞིག་འཛིན་པར་བགྱིད་ཅེ་ན། བདག་ཏུ་འཛིན་པ་འཛིན་པར་བགྱིད་དོ། །སེམས་ཅན་དུ་འཛིན་ [15a.6]པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་འཛིན་པར་བགྱིད་དོ། །ཆད་པར་འཛིན་པ་དང་། རྟག་པར་འཛིན་པ་དང་། འདོད་ཆགས་དང་། ཞེ་སྡང་དང་། གཏི་མུག་འཛིན་པར་བགྱིད་དོ། །མ་རིག་པ་དང་། སྲིད་པའི་སྲེད་པ་དང་། ཕུང་པོ་ལྔ་དང་། [15a.7]འཇིག་ཚོགས་དང་། ཁམས་བཅོ་བརྒྱད་དང་། ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་འཛིན་པར་བགྱིད་དོ། །རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། ལྟ་བའི་རྣམ་པ་དག་འཛིན་པར་བགྱིད་དེ། བཅོམ་ལྡན་འདས་དེ་ལྟ་ལགས་པས་ [15b] [15b.1]བྱིས་པ་རྣམས་ནི་གཟུངས་ཐོབ་པ་ལགས་སོ། །རྟོག་གེ་བ་རྣམས་ནི་རྟོག་པ་དང་རྣམ་པར་རྟོག་པ་དང་ཡོངས་སུ་རྟོག་པ་དང་ལྟ་བའི་རྣམ་པ་དག་འཛིན་པར་བགྱིད་པས། བཅོམ་ལྡན་འདས་དེའི་སླད་དུ་བྱིས་པ་རྣམས་ནི་གཟུངས་ཐོབ་པ་ལགས་སོ། །དེ་ཅིའི་སླད་དུ་ཞེ་ན། [15b.2]བྱིས་པ་རྣམས་ཆོས་གང་དག་འཛིན་པར་བགྱིད་པ་དེ་དག་ནི་སངས་རྒྱས་རྣམས་འཛིན་པར་མི་མཛད། ཉན་ཐོས་རྣམས་ཀྱང་མི་བགྱིད། རང་སངས་རྒྱས་རྣམས་ཀྱང་མི་བགྱིད་དེ། བྱང་ཆུབ་སེམས་དཔའ་རྣམས་ཀྱང་མི་བགྱིད་པས། དེའི་སླད་དུ་བྱིས་པ་རྣམས་ནི་ [15b.3]གཟུངས་ཐོབ་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་བྱིས་པ་རྣམས་ནི་ལེགས་པར་འཛིན་པ་མ་ལགས་པ་འཛིན་པར་བགྱིད་ཀྱི། སངས་རྒྱས་རྣམས་ནི་མི་མཛད། ཉན་ཐོས་རྣམས་ཀྱང་མི་བགྱིད། རང་སངས་རྒྱས་རྣམས་ཀྱང་མི་བགྱིད། བྱང་ཆུབ་སེམས་དཔའ་ [15b.4]རྣམས་ཀྱང་མི་བགྱིད་པའི་སླད་དུའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་ཁྱོད་གཟུངས་ཐོབ་པ་མ་ལགས་ན་འོ་ན་ཅི་ཁྱོད་རྟོགས་པ་བུལ་བ་ལགས་སམ། འཇམ་དཔལ་གྱིས་སྨྲས་པ། [15b.5]ལྷའི་བུ་དེ་དེ་བཞིན་ཏེ། ཁོ་བོ་ནི་རྟོགས་པ་བུལ་བ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ་ཁོ་བོ་ནི་རྟོགས་པ་གང་སངས་རྒྱས་རྣམས་དང་། ཉན་ཐོས་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་ཀྱིས་ཀྱང་མི་མཁྱེན་པ་དེ་ཙམ་དུ་བུལ་བའི་རྟོགས་ [15b.6]པ་དང་ལྡན་པ་ཡིན་པའི་ཕྱིར་རོ། །ལྷའི་བུ་བྱིས་པ་སོ་སོའི་སྐྱེ་བོ་གང་དག་ཡིན་པ་དེ་དག་ནི་རྟོགས་པ་བུལ་བ་མ་ཡིན་ནོ། །དེ་ཅིའི་ཕྱིར་ཞེ་ན། བྱིས་པ་སོ་སོའི་སྐྱེ་བོ་རྣམས་ནི་མངོན་པར་ཆགས་པའི་རྟོགས་པ་ཅན་ཡིན་ལ། མཁས་པ་རྣམས་ནི་རྟོགས་པ་བུལ་བ་དང་ལྡན་ [15b.7]པའི་ཕྱིར་རོ། །རྒྱུན་དུ་ཞུགས་པ་རྣམས་ཀྱང་རེ་ཤིག་མངོན་པར་ཆགས་པའི་རྟོགས་པ་ཅན་དུ་སྟོན་ན་བྱིས་པ་སོ་སོའི་སྐྱེ་བོ་གཞན་དག་ལྟ་སྨོས་ཀྱང་ཅི་དགོས་ཏེ། ལྷའི་བུ་དེ་ལྟ་བས་ན་ཁོ་བོ་ནི་རྟོགས་པ་བུལ་བ་ཡིན་གྱི་གཟུངས་ཐོབ་པ་མ་ཡིན་ནོ། །དེ་ཅིའི་ཕྱིར་ཞེ་ [16a] [16a.1]ན། ཁོ་བོས་ནི་གང་གཟུང་བར་བྱ་བ་ཅུང་ཟད་ཀྱང་མ་རྙེད་པའི་ཕྱིར་རོ། །བསྟན་པ་འདི་བཤད་པ་ན་འཁོར་དེ་ལས་དགེ་སློང་ལྔ་བརྒྱ་ཙམ་ཆོས་ཀྱི་རྣམ་གྲངས་འདི་མ་རྟོགས་ཏེ། སྤངས་ཤིང་འགལ་བར་བྱས་ནས་རང་རང་གི་ལུས་དེ་དག་ཉིད་ཀྱིས་སེམས་ཅན་ [16a.2]དམྱལ་བ་ཆེན་པོ་རྣམས་སུ་ལྷུང་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སློང་ལྔ་བརྒྱ་ཙམ་པོ་དེ་དག་ཆོས་ཀྱི་རྣམ་གྲངས་འདི་མ་རྟོགས་ཏེ། སྤངས་ཤིང་འགལ་བར་བྱས་ནས་རང་ [16a.3]རང་གི་ལུས་དེ་དག་ཉིད་ཀྱིས་སེམས་ཅན་དམྱལ་བ་ཆེན་པོ་རྣམས་སུ་ལྟུང་བར་གྱུར་གྱིས། དེ་ལྟ་བུའི་གནས་ཟབ་མོ་དག་མ་སྟོན་པར་སོ་སོར་རྟོགས་ཏེ་སྟོན་ཅིག །འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་ཁྱོད་མ་རྟོག་ཤིག །གང་སེམས་ཅན་དམྱལ་བར་འགྲོ་བའི་ [16a.4]ཆོས་དེ་ལྟ་བུ་འགའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སྐྱེ་བ་མེད་པའི་ཕྱིར་རོ། །བཙུན་པ་ཤཱ་རིའི་བུ་གཞན་ཡང་དེ་སྐད་ཅེས་སོ་སོར་རྟོགས་ཏེ་སྟོན་ཅིག་ཅེས་ཟེར་བ་ནི་བཙུན་པ་ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་བདག་ཏུ་ལྟ་བ་ལ་རྟེན་པ་ [16a.5]འམ། སེམས་ཅན་དུ་ལྟ་བ་ལ་རྟེན་པ་འམ། སྲོག་ཏུ་ལྟ་བ་ལ་རྟེན་པ་འམ། གང་ཟག་ཏུ་ལྟ་བ་ལ་རྟེན་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་གང་གཱའི་ཀླུང་གི་བྱེ་མ་སྙེད་ཅིག་ལ་ཇི་སྲིད་ [16a.6]འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང་། གང་གིས་ཆོས་ཟབ་མོ་ཤེས་པར་དཀའ་བ་འཇིག་རྟེན་ཐམས་ཅད་དང་མི་འཐུན་པ་འདི་ལྟ་བུ་འདི་ཐོས་ཤིང་ཆོས་སྟོང་པ་དང་། མཚན་མ་མེད་པ་དང་། སྨོན་པ་མེད་པ་དང་། ཞི་བ་དང་། དབེན་ [16a.7]པ་དང་། སྐྱེ་བ་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པ་དང་། མི་རྟག་པ་དང་། སྡུག་བསྔལ་བ་དང་། བདག་མེད་པ་འདི་ལྟ་བུ་འདི་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྷུང་བར་གྱུར་པ་ནི་བཙུན་པ་ཤཱ་རིའི་བུ་ [16b] [16b.1]རིགས་ཀྱི་བུ་འམ། རིགས་ཀྱི་བུ་མོ་ཆོས་ཟབ་མོ་འདི་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྷུང་བ་དེ་ཆེས་མྱུར་བར་དེ་དག་ནས་ལྡང་ཞིང་རྣམ་པར་ཐར་པར་འགྱུར་གྱི། རིགས་ཀྱི་བུའམ། རིགས་ཀྱི་བུ་མོ་བདག་ཏུ་ལྟ་བ་ལ་རྟེན་པ་ཆོས་འདི་མ་ཐོས་པར་དེ་བཞིན་ [16b.2]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པ་དེ་ནི་དེ་ལྟ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་ [16b.3]སོ། །ཇི་སྐད་སྨྲས་པ་དེ་བཞིན་ཏེ། ཐོས་པ་འདི་ནི་སངས་རྒྱས་བྱུང་བ་དང་འདྲའོ། །ཐོས་པ་འདི་ནི་རྒྱུན་དུ་ཞུགས་པའི་འབྲས་བུ་དང་འདྲའོ། །ཐོས་པ་འདི་ནི་ལན་ཅིག་ཕྱིར་འོང་བའི་འབྲས་བུ་དང་འདྲའོ། །ཐོས་པ་འདི་ནི་ཕྱིར་མི་འོང་བའི་འབྲས་བུ་དང་འདྲའོ། ། [16b.4]ཐོས་པ་འདི་ནི་དགྲ་བཅོམ་པ་ཉིད་དང་འདྲའོ། །དེ་ཅིའི་ཕྱིར་ཞེ་ན། བདག་ཏུ་ལྟ་བ་ལ་རྟེན་པ་དང་། དམིགས་པ་ཅན་ལ་ནི་ཐོབ་པའམ། མངོན་པར་རྟོགས་པ་མེད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། ། [16b.5]ཤཱ་རིའི་བུ་དགེ་སློང་དེ་དག་ནི་སེམས་ཅན་དམྱལ་བ་དེ་དག་ནས་ཆེས་མྱུར་བར་ལྡང་ཞིང་ཡོངས་སུ་མྱ་ངན་ལས་འདའ་བར་འགྱུར་གྱི། འདི་ན་མི་གཏི་མུག་ཅན་དམིགས་པའི་ལྟ་བ་དང་ལྡན་པ། ཐེ་ཚོམ་དུ་གྱུར་པ་གང་དག་དེ་བཞིན་གཤེགས་པ་ལ་མཆོད་པ་བྱེད་པ་དེ་དག་ནི་ [16b.6]དེ་ལྟ་མ་ཡིན་ནོ། །ཤཱ་རིའི་བུ་དེ་ལྟ་མོད་ཀྱི། དེ་ནི་དེ་དག་ཡོངས་སུ་མྱ་ངན་ལས་འདའ་བའི་རྒྱུར་འགྱུར་བ་ཡིན་ཏེ། མྱུར་དུ་རྣམ་པར་ཐར་པར་ནི་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཟབ་མོ་དག་མ་ཐོས་པའི་ཕྱིར་རོ། །ཤཱ་རིའི་བུ་གཞན་ཡང་རིགས་ [16b.7]ཀྱི་བུ་འམ། རིགས་ཀྱི་བུ་མོ་གང་དག་རྣ་བླགས་ཏེ་ཆོས་ཟབ་མོ་འདི་མཉན་ནས་མ་རྟོགས་ཤིང་སྤངས་ཏེ་སེམས་ཅན་དམྱལ་བར་འགྲོ་བ་དེ་དག་ནི་ཆེས་མྱུར་བར་རྣམ་པར་ཐར་པར་འགྱུར་གྱི་དམིགས་པ་ཅན་ཐེ་ཚོམ་དུ་གྱུར་པ་གཞན་དག་ནི་དེ་ལྟ་མ་ཡིན་ནོ། །དེ་ནས་ལྷའི་ [17a] [17a.1]བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་བདག་དང་ཚངས་པ་མཚུངས་པར་སྤྱོད་བཞེད་དམ། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཁྱོད་ཚངས་པར་སྤྱོད་པ་མི་ལེན་ཅིང་ཚངས་ [17a.2]པར་སྤྱད་པ་སྤྱོད་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་གང་ལེན་པར་བྱེད་པ་དེ་ནི་སྤྱོད་པར་བྱེད་ཀྱི་གང་ལེན་པར་ [17a.3]མི་བྱེད་པ་དེ་ནི་ཅི་ཡང་སྤྱོད་པར་མི་བྱེད་དོ། །ལྷའི་བུ་གང་ཚངས་པར་སྤྱོད་པ་དམིགས་པར་བྱེད་པ་དེ་ནི་སྤྱོད་པར་བྱེད་ཀྱི་གང་དམིགས་པར་མི་བྱེད་པ་དེ་ནི་ཅི་ཡང་སྤྱོད་པར་མི་བྱེད་དོ། །ལྷའི་བུས་སྨྲས་པ། འཇམ་དཔལ་འོ་ན་ཅི་ཁྱོད་ཚངས་པར་མི་སྤྱོད་ལགས་སམ། [17a.4]འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། ཁོ་བོ་ནི་ཚངས་པར་མི་སྤྱོད་དོ། །དེ་ཅིའི་ཕྱིར་ཞེ་ན། ཁོ་བོ་ནི་ཚངས་པ་ཡང་མ་ཡིན་ལ་སྤྱོད་པ་ཡང་མ་ཡིན་པས་དེའི་ཕྱིར་ཁོ་བོ་ཚངས་པར་མི་སྤྱོད་དོ། །ལྷའི་བུས་སྨྲས་པ། འཇམ་དཔལ་དེ་ནི་འདི་ལྟ་སྟེ། [17a.5]ཐོགས་པ་མེད་པའི་སྤོབས་པ་དང་ལྡན་པས་བསྟན་པ་ལགས་ཏེ། ལེགས་སོ་ལེགས་སོ། །འཇམ་དཔལ་གྱིས་སྨྲས་པ། ལྷའི་བུ་གལ་ཏེ་ཁོ་བོ་ཐོགས་པ་མེད་པའི་སྤོབས་པ་དང་ལྡན་པ་ཡིན་པར་གྱུར་ན་ནི་དེ་ལྟར་ན་ཐོགས་པར་ཡང་འགྱུར་རོ། །དེ་ཅིའི་ཕྱིར་ཞེ་ན། ཇི་ཙམ་དུ་བདག་གི་ [17a.6]ཡོད་པ་དང་། ཇི་ཙམ་དུ་མངོན་པར་ཞེན་པ་ཡོད་པ་དེ་ཙམ་དུ་ཐོགས་པར་འགྱུར་བའི་ཕྱིར་རོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ་གལ་ཏེ་ཁྱོད་སེམས་ཅན་ཐམས་ཅད་སྲོག་དང་བྲལ་བར་བྱེད་ཅིང་མཚོན་ [17a.7]ཆ་ཡང་ཐོགས་པར་མི་བྱེད། རལ་གྲི་ཡང་མ་ཡིན། བོང་བ་ཡང་མ་ཡིན། དབྱུག་པ་ཡང་ཐོགས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་ [17b] [17b.1]དཔལ་གྱིས་སྨྲས་པ། ལྷའི་བུ་སེམས་ཅན་སེམས་ཅན་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ་སེམས་ཅན་སེམས་ཅན་ཞེས་བགྱི་བ་ནི་འདི་ལྟ་སྟེ། མིང་ཙམ་དང་། འཛིན་པའི་འདུ་ཤེས་ཙམ་ལགས་སོ། །འཇམ་དཔལ་གྱིས་ [17b.2]སྨྲས་པ། ལྷའི་བུ་དེ་ལྟ་བས་ན་བདག་ཏུ་འཛིན་པའི་འདུ་ཤེས་གསད་པར་བྱའོ། །སེམས་ཅན་དུ་འཛིན་པའི་འདུ་ཤེས་གསད་པར་བྱའོ། །སྲོག་ཏུ་འཛིན་པའི་འདུ་ཤེས་གསད་པར་བྱའོ། །གང་ཟག་ཏུ་འཛིན་པའི་འདུ་ཤེས་གསད་པར་བྱའོ། །མིང་དུ་འཛིན་པའི་འདུ་ [17b.3]ཤེས་གསད་པར་བྱའོ། །ལྷའི་བུས་སྨྲས་པ། འཇམ་དཔལ་ཅིས་དགུམ་པར་བགྱི། འཇམ་དཔལ་གྱིས་སྨྲས་པ། ལྷའི་བུ་ཤེས་རབ་ཀྱི་མཚོན་གྱིས་གསད་པར་བྱའོ། །ཤེས་རབ་ཀྱི་མཚོན་དེས་ཀྱང་ཅི་ནས་ཀྱང་འཛིན་པ་མེད་པ་དང་། གཅོད་པ་མེད་པ་དེ་ལྟར་གཟུང་ [17b.4]བར་བྱ་ཞིང་དེ་ལྟར་གསད་པར་བྱའོ། །ལྷའི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་གང་གིས་བདག་གི་འདུ་ཤེས་དང་། སེམས་ཅན་གྱི་འདུ་ཤེས་གསད་པ་དེས་སེམས་ཅན་ཐམས་ཅད་གསད་པ་ཡིན་པར་རིག་པར་བྱའོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་ [17b.5]བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ་གལ་ཏེ་ཁྱོད་མི་དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་ཏེ་འཇུག་ཅིང་ནག་པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན་ [17b.6]ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་ནག་པོའི་ཕྱོགས་ཀྱི་མཉམ་པ་ཉིད་གང་ཡིན་པ་དེས་དེ་མཉམ་པ་ཉིད་ཡིན་པས་མཉམ་པ་ཉིད་དུ་འཇུག་ [17b.7]པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུ་འདི་ཇི་སྙམ་དུ་སེམས། ནག་པོའི་ཕྱོགས་ཀྱི་མཉམ་པ་ཉིད་གང་ཡིན་སྙམ། ལྷའི་བུས་སྨྲས་པ། འཇམ་དཔལ་བྱ་བ་མ་མཆིས་པ་དང་། ལྷག་པར་བྱ་བ་མི་བགྱིད་པ་ལགས་སོ། །འཇམ་ [18a] [18a.1]དཔལ་གྱིས་སྨྲས་པ། ལྷའི་བུ་དཀར་པོའི་ཕྱོགས་ཞེས་བྱ་བ་གང་ཡིན་སྙམ། ལྷའི་བུས་སྨྲས་པ། འཇམ་དཔལ་ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་དང་། རྣམ་པར་ཐར་པའི་སྒོ་གསུམ་སྟེ། དེ་ནི་དཀར་པོའི་ཕྱོགས་ [18a.2]ལགས་སོ། །འཇམ་དཔལ་གྱིས་སྨྲས་པ། ལྷའི་བུ་ཆོས་ཀྱི་དབྱིངས་ཀྱིས་སྒྲིབ་པར་ནུས་སམ། ལྷའི་བུས་སྨྲས་པ། འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་ནག་ [18a.3]པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ [18a.4]ལ་འདི་སྐད་ཅེས་སྨྲས་སོ། །ལྷའི་བུ་གལ་ཏེ་ཁྱོད་གསད་པ་དང་པོ་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། [18a.5]འཇམ་དཔལ་གྱིས་སྨྲས་པ། ལྷའི་བུ་གསད་པ་གསད་པ་ཞེས་བྱ་བ་དེ་གང་ཞེ་ན། ལྷའི་བུ་འདོད་ཆགས་ནི་གསད་པ་ཞེས་བྱའོ། །ཞེ་སྡང་དང་། གཏི་མུག་ནི་གསད་པ་ཞེས་བྱའོ། །ང་རྒྱལ་དང་། ཁྲོ་བ་དང་། འཆབ་པ་དང་། ཕྲག་དོག་དང་། སྒྱུ་དང་། གཡོ་ [18a.6]དང་། སེར་སྣ་དང་། ལྷག་པར་འཛིན་པ་དང་། མཚན་མ་དང་། ཉེ་བར་ལེན་པ་དང་། འདུ་ཤེས་དང་། ཚོར་བ་ནི་གསད་པ་ཞེས་བྱ་སྟེ། ལྷའི་བུ་དེ་དག་ནི་གསད་པ་ཡིན་པར་གསུངས་སོ། །ལྷའི་བུ་རྣལ་འབྱོར་པ་རྣལ་འབྱོར་སྤྱོད་པ་གང་འདོད་ཆགས་ཀྱི་སེམས་སྐྱེས་ [18a.7]པ་སེལ་བར་བྱེད། ཞི་བར་བྱེད། རབ་ཏུ་ཞི་བར་བྱེད་པ་དེ་ལ་ནི་སྟོང་པར་སྣང་བས་མི་སྡུག་པ་ལ་འཇུག་པར་མི་བྱེད་པར་སེམས་འདི་གང་ལས་སྐྱེས། གང་དུ་འགག །ཡུལ་གང་ལ་ཆགས་པར་འགྱུར། གང་གིས་ཆགས་པར་འགྱུར་ཞེས་འདོད་ཆགས་ཀྱི་སེམས་དེ་ཉིད་ཀྱི་ [18b] [18b.1]འབྱུང་བ་དང་འཇིག་པ་ལ་སོ་སོར་རྟོག་པར་བྱེད་དེ། དེ་དེ་ལྟར་སོ་སོར་རྟོག་པར་བྱེད་པ་ན་འདོད་ཆགས་ཀྱང་མི་དམིགས། གང་ལ་ཆགས་པར་འགྱུར་བ་དང་། གང་གིས་ཆགས་པར་འགྱུར་བ་དེ་ཡང་མི་དམིགས་སོ། །གང་གི་ཚེ་མི་དམིགས་པ་དེའི་ཚེ་མི་ལེན་ཏོ། །གང་ [18b.2]གི་ཚེ་མི་ལེན་པ་དེའི་ཚེ་མི་འདོར་རོ། །གང་གི་ཚེ་མི་འདོར་བ་དེའི་ཚེ་མི་འཛིན་མི་སྤོང་སྟེ། དེ་ནི་མྱ་ངན་ལས་འདས་པ་ཞེས་བྱའོ། །ཞེ་སྡང་དང་། གཏི་མུག་དང་། ང་རྒྱལ་དང་། ཁྲོ་བ་དང་། འཆབ་པ་དང་། ཕྲག་དོག་དང་། སྒྱུ་དང་། གཡོ་དང་། སེར་སྣ་དང་། [18b.3]ལྷག་པར་འཛིན་པ་དང་། མཚན་མ་དང་། ཉེ་བར་ལེན་པ་དང་། འདུ་ཤེས་དང་། ཚོར་བའི་སེམས་ལ་ཡང་དེ་བཞིན་དུ་སྦྱར་ཏེ། ལྷའི་བུ་གང་གསད་པ་དེ་ལྟ་བུ་སྐྱེས་མ་ཐག་ཏུ་གསོད་པར་བྱེད་པ་དེ་ནི་གསད་པ་དང་པོའི་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པ་ [18b.4]ཞེས་བྱ་སྟེ། དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས་སྟོན་ཏོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ་གལ་ཏེ་ཁྱོད་སངས་རྒྱས་མཉེས་པར་མི་བྱེད། ཆོས་མཉེས་པར་མི་ [18b.5]བྱེད། དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་སངས་རྒྱས་སངས་རྒྱས་ཞེས་བྱ་བ་ཅི་ཞིག་ [18b.6]ཡིན་པར་ཤེས། ལྷའི་བུས་སྨྲས་པ། འཇམ་དཔལ་དེ་བཞིན་ཉིད་དང་། ཆོས་ཀྱི་དབྱིངས་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། དེ་བཞིན་ཉིད་དང་། ཆོས་ཀྱི་དབྱིངས་མཉེས་པར་བྱར་ནུས་སྙམ་འམ། ལྷའི་བུས་སྨྲས་པ། [18b.7]འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་སངས་རྒྱས་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །ལྷའི་བུ་ཆོས་ཆོས་ཞེས་བྱ་བ་ཅི་ [19a] [19a.1]ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ་ཆོས་ཞེས་བགྱི་བ་ནི་འདོད་ཆགས་དང་བྲལ་བ་ཉིད་དང་། ཆོས་ཉིད་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། འདོད་ཆགས་དང་བྲལ་བ་ཉིད་དང་། ཆོས་ [19a.2]ཉིད་མཉེས་པར་བྱར་ནུས་སྙམ་འམ། ལྷའི་བུས་སྨྲས་པ། འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་ཆོས་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་ [19a.3]སྤྱོད་འདོད་དོ་ཞེས་སྟོན་ཏོ། །ལྷའི་བུ་དགེ་འདུན་དགེ་འདུན་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ་འཕགས་པ་ཉན་ཐོས་རྣམས་ནི་འདུས་མ་བགྱིས་ཀྱིས་རབ་ཏུ་ཕྱེ་བ་ལགས་པས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ [19a.4]འདུས་མ་བགྱིས་ལགས་སོ། །འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། འདུས་མ་བྱས་མཉེས་པར་བྱར་ནུས་སྙམ་འམ། ལྷའི་བུས་སྨྲས་པ། འཇམ་དཔལ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་ཁོ་བོ་ནི་དེ་ལས་ [19a.5]བསམས་ནས་དེ་སྐད་ཅེས་གལ་ཏེ་ཁྱོད་དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །ལྷའི་བུ་གཞན་ཡང་གང་སངས་རྒྱས་སུ་དམིགས་པ་དེ་ནི་སངས་རྒྱས་མཉེས་པར་བྱེད་དོ། །གང་ཆོས་སུ་དམིགས་པ་ [19a.6]དེ་ནི་ཆོས་མཉེས་པར་བྱེད་དོ། །གང་དགེ་འདུན་དུ་དམིགས་པ་དེ་ནི་དགེ་འདུན་མཉེས་པར་བྱེད་དོ། །ལྷའི་བུ་གང་སངས་རྒྱས་སུ་མི་དམིགས་པ་དང་། ཆོས་སུ་མི་དམིགས་པ་དང་། དགེ་འདུན་དུ་མི་དམིགས་པ་དེས་ནི་སངས་རྒྱས་མཉེས་པར་མ་བྱས། དེས་ནི་ [19a.7]ཆོས་མཉེས་པར་མ་བྱས། དེས་ནི་དགེ་འདུན་མཉེས་པར་མ་བྱས་པ་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། དེས་དེ་དག་མ་དམིགས་པས་ན་དེས་མཉེས་པར་མ་བྱས་པའི་ཕྱིར་རོ། །ལྷའི་བུ་གཞན་ཡང་གང་དག་སངས་རྒྱས་ལ་ཆགས་པ་དང་། ཆོས་ལ་ཆགས་པ་དང་། དགེ་ [19b] [19b.1]འདུན་ལ་ཆགས་པ་དེ་དག་གིས་སངས་རྒྱས་མཉེས་པར་བྱས། ཆོས་མཉེས་པར་བྱས། དགེ་འདུན་མཉེས་པར་བྱས་པ་ཡིན་ནོ། །གང་དག་གིས་སངས་རྒྱས་མི་དམིགས་པ་དེ་དག་ནི་སངས་རྒྱས་ལ་ཆགས་པ་མེད་པས་དེ་དག་གིས་སངས་རྒྱས་མཉེས་པར་མ་བྱས་ [19b.2]པ་ཡིན་ནོ། །གང་དག་གིས་ཆོས་མ་དམིགས་པ་དེ་དག་ནི་ཆོས་ལ་ཆགས་པ་མེད་པས་དེ་དག་གིས་ཆོས་མཉེས་པར་མ་བྱས་པ་ཡིན་ནོ། །གང་དག་གིས་དགེ་འདུན་མ་དམིགས་པ་དེ་དག་ནི་དགེ་འདུན་ལ་ཆགས་པ་མེད་པས་དེ་དག་གིས་དགེ་འདུན་མཉེས་པར་མ་བྱས་པ་ཡིན་ [19b.3]ནོ། །ལྷའི་བུ་མཉེས་པར་མ་བྱས་པ་མཉེས་པར་མ་བྱས་པ་ཞེས་བྱ་བ་དེ་ནི་འདོད་ཆགས་དང་བྲལ་བའི་གནས་ཡིན་ནོ། །དེ་ནི་ཀུན་དུ་སྦྱོར་བ་དང་བྲལ་བའི་གནས་ཡིན་ནོ། །དེ་ནི་རྣམ་པར་བཤིག་པའི་གནས་ཡིན་ནོ། །དེ་ནི་སེམས་དང་བྲལ་བའི་གནས་ཡིན་ནོ། །དེ་ནི་ [19b.4]མ་བྱུང་བའི་གནས་ཡིན་ནོ། །དེ་ནི་རྣམ་པར་ངེས་པའི་གནས་ཡིན་ནོ། །དེ་ནི་ཡིད་བྱུང་བར་མ་བྱས་པའི་གནས་ཡིན་པས་དེའི་ཕྱིར་མཉེས་པར་མ་བྱས་པ་ཞེས་བྱ་སྟེ། ལྷའི་བུ་དེའི་ཕྱིར་ཁོ་བོ་ནི་དེ་ལས་བསམས་ནས་འདི་སྐད་ཅེས་གལ་ཏེ་ཁྱོད་སངས་རྒྱས་དང་། ཆོས་ [19b.5]དང་། དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ཙམ་དུ་ཁྱོད་ཟབ་མོའི་གནས་དག་སྟོན་ [19b.6]པར་མཛད་པ་ནི་ངོ་མཚར་སྟེ། བདག་ཅག་གིས་ཁྱོད་ལ་བགྱིས་པ་གཟོ་བར་བགྱིའོ། །འཇམ་དཔལ་གྱིས་སྨྲས་པ། ལྷའི་བུ་ཁྱོད་བྱས་པ་གཟོ་བར་མ་བྱེད་ཅིག །ལྷའི་བུས་སྨྲས་པ། འཇམ་དཔལ་འོ་ན་ཅི་བགྱིས་པ་མི་གཟོ་བར་བགྱི་འམ། འཇམ་དཔལ་གྱིས་སྨྲས་པ། [19b.7]ལྷའི་བུ་དེ་དེ་བཞིན་ཏེ། ལྷའི་བུ་ཁྱོད་བྱས་པ་མི་གཟོ་བར་བྱོས་ལ་བྱས་པ་གཟོ་བར་མ་བྱེད་ཅིག །ལྷའི་བུས་སྨྲས་པ། འཇམ་དཔལ་ཅི་ཁྱོད་བགྱིས་པ་མི་གཟོ་བ་ལགས་སམ། འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། ཁོ་བོ་ནི་བྱས་པ་མི་གཟོ་བ་ཡིན་གྱི་ [20a] [20a.1]བྱས་པ་གཟོ་བ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་བྱིས་པ་རྣམས་ནི་རྣམ་པ་གཞན་དང་གཞན་དག་བྱེད་པས་ན་བྱིས་པ་རྣམས་ནི་གཞན་དང་གཞན་དག་གི་ [20a.2]བྱེད་པ་པོ་སྟེ། གང་གི་ཕྱིར་ལྟ་བའི་རྣམ་པ་གཞན་དང་གཞན་དག་བྱེད་པ་དེའི་ཕྱིར་དེ་དག་ནི་བྱས་པ་གཟོ་བ་ཞེས་བྱའོ། །ལྷའི་བུ་ཡང་དག་པར་ཞུགས་པའི་རིགས་ཀྱི་བུ་དག་ནི་བྱ་བའམ། མི་བྱ་བ་གང་ཡང་མི་བྱེད་དེ། གང་གི་ཚེ་མི་བྱེད་པ་དེའི་ཕྱིར་དེ་དག་ནི་བྱས་པ་མི་ [20a.3]གཟོ་བ་ཞེས་བྱའོ། །ཇི་སྐད་དུ་སངས་རྒྱས་བཅོམ་ལྡན་འདས་རྣམས་ཀྱིས་འདི་ལྟ་སྟེ། ཆོས་ཐམས་ཅད་ནི་བྱ་བ་མེད་པ། བྱེད་པ་མེད་པ། ལྷག་པར་བྱེད་པ་མེད་པ་སྟེ། མཉམ་པ་ཉིད་ལས་ཀྱང་མི་འདའ་ལ་གཞན་ལེན་པར་ཡང་མི་བྱེད། བྱ་བ་གཞན་ཡང་མི་ [20a.4]བྱེད་པས་མཉམ་པ་ཉིད་ཡིན་ནོ་ཞེས་གསུངས་པས་ན་དེའི་ཕྱིར་བྱས་པ་མི་གཟོ་བ་ཞེས་བྱའོ། །ལྷའི་བུས་སྨྲས་པ། འཇམ་དཔལ་ཁྱོད་བཟོད་པའམ། འོན་ཏེ་ཆོས་ཉིད་དམ། གང་ལ་གནས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་བཟོད་པ་ [20a.5]ལ་ཡང་མ་ཡིན། ཆོས་ཉིད་ལ་ཡང་མ་ཡིན་ནོ། །ལྷའི་བུས་སྨྲས་པ། འཇམ་དཔལ་འོ་ན་ཁྱོད་གང་ལ་གནས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ་སྒྱུ་མའི་སྐྱེས་བུའི་ལུས་གང་ལ་གནས་པ་ལའོ། །ལྷའི་བུས་སྨྲས་པ། འཇམ་དཔལ་སྒྱུ་ [20a.6]མའི་སྐྱེས་བུའི་ལུས་གང་ལ་གནས། འཇམ་དཔལ་གྱིས་སྨྲས་པ། ལྷའི་བུ་སྒྱུ་མའི་སྐྱེས་བུའི་ལུས་ནི་དེ་བཞིན་ཉིད་གང་ལ་གནས་པ་དེ་ལ་གནས་སོ། །ལྷའི་བུ་གཞན་ཡང་དེ་སྐད་ཅེས་ཁྱོད་བཟོད་པའམ། འོན་ཏེ་ཆོས་ཉིད་དམ། གང་ལ་གནས་ཏེ་དེ་སྐད་སྟོན་ཅེས་ [20a.7]ཟེར་བ་ནི་ལྷའི་བུ་བཟོད་པ་ཞེས་བྱ་བ་ནི་མིང་ཙམ་སྟེ། མིང་ལ་ནི་གནས་པར་མི་ནུས་སོ། །ཆོས་ཉིད་ཀྱང་འགྱུར་བ་མེད་ཅིང་རྟོག་པ་མེད་པ་སྟེ། དེ་ལ་ཡང་གནས་མེད་དོ། །ལྷའི་བུ་དེ་བཞིན་གཤེགས་པ་ནི་སེམས་ཅན་ཐམས་ཅད་གང་ལ་གནས་ཏེ་སྟོན་པར་བྱེད་པ་དེ་ཉིད་ [20b] [20b.1]ལ་བཞུགས་ཏེ་སྟོན་པར་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་དེ་བཞིན་ཉིད་ལ་བཞུགས་ཏེ་སྟོན་ལ། སེམས་ཅན་ཐམས་ཅད་ཀྱང་དེ་བཞིན་ཉིད་ལས་མི་གཡོ་སྟེ། སེམས་ཅན་ཐམས་ཅད་ཀྱི་དེ་བཞིན་ཉིད་གང་ཡིན་པ་དང་། དེ་བཞིན་ [20b.2]གཤེགས་པའི་དེ་བཞིན་ཉིད་གང་ཡིན་པའི་དེ་བཞིན་ཉིད་དེ་ནི་གཉིས་སུ་མེད་པའི་ཕྱིར་རོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དགེ་སྦྱོང་དང་བྲམ་ཟེ་ཞེས་བགྱི་ན་ཅི་ཙམ་གྱིས་ན་དགེ་སྦྱོང་དང་བྲམ་ [20b.3]ཟེ་ཞེས་བགྱི། འཇམ་དཔལ་གྱིས་སྨྲས་པ། ལྷའི་བུ་གང་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་པ་དེ་ནི་དགེ་སྦྱོང་དང་བྲམ་ཟེ་ཞེས་བྱའོ། །དེ་ཅིའི་ཕྱིར་ཞེ་ན། ལྷའི་བུ་གང་འདོད་པའི་ཁམས་ལ་ཡང་མི་ཆགས། གཟུགས་དང་། གཟུགས་མེད་པའི་ཁམས་ [20b.4]ལ་ཡང་མ་ཆགས་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་ཞིང་། ལྷའི་བུ་གང་མིག་ལས་མི་འཛག །རྣ་བ་ལས་མི་འཛག །སྣ་ལས་མི་འཛག །ལྕེ་ལས་མི་འཛག །ལུས་ལས་མི་འཛག །ཡིད་ལས་མི་འཛག་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་ལ། [20b.5]ལྷའི་བུ་གང་ལ་གནས་པ་མེད་ཅིང་གནས་པར་གདགས་པ་མེད་པ་དང་། ཀུན་ཏུ་གནས་པ་མེད་ཅིང་ཀུན་ཏུ་གནས་པར་གདགས་པ་མེད་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་བའི་ཕྱིར་དང་། ལྷའི་བུ་གང་ལས་ཀྱང་མི་འོང་། གང་དུ་ཡང་མི་འགྲོ་ལ། རྨ་མེད་ཅིང་རྨ་དང་ [20b.6]བྲལ་བ་དེ་ནི་བྲམ་ཟེ་ཡིན་ནོ་ཞེས་ཁོ་བོ་སྨྲ་བའི་ཕྱིར་རོ། །གང་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་པ་དེ་ནི་དགེ་སྦྱོང་དང་བྲམ་ཟེ་ཞེས་བྱའོ་ཞེས་བྱ་བའི་ཚིག་དེའི་བསྟན་པ་ནི་དེ་ཡིན་ནོ། །དེ་ནས་འཁོར་དེ་ཉིད་དུ་བྱང་ཆུབ་སེམས་དཔའ་བསམ་གཏན་བཞི་བསྒོམས་པ། [20b.7]མངོན་པར་ཤེས་པ་ལྔ་ཐོབ་པ་ལྔ་ཞིག་འདུས་པར་གྱུར་པ་དེ་དག་ད་དུང་བཟོད་པ་ཐོབ་པ་མ་ཡིན་པས་གནས་ཤིང་སྙོམས་པར་འཇུག་པར་བྱེད། གནས་ཤིང་རྣམ་པར་ལྡང་བར་བྱེད་དེ། བྱང་ཆུབ་སེམས་དཔའ་དེ་དག་གིས་སྔོན་ཕ་བསད་པ་དང་། མ་བསད་པ་དང་། དགྲ་བཅོམ་ [21a] [21a.1]པ་བསད་པའི་སྔོན་གྱི་གནས་རྗེས་སུ་དྲན་ཞིང་དེ་དག་ལ་ལས་ཀྱི་རྣམ་པར་སྨིན་པ་དེའི་ལས་ཀྱི་ལྷག་མ་ཡོད་པས་དེ་དག་སེམས་ཡོངས་སུ་གདུང་བ་དེས་ཆོས་ཟབ་མོ་དག་ལ་མི་བཟོད་ཅིང་བདག་ཉིད་ལ་རྟེན་ཅིང་རྣམ་པར་རྟོག་པ་ཁོ་ནར་བྱེད་དེ། དེ་དག་གིས་འདི་ [21a.2]ལྟ་སྟེ། ཆོས་ལ་བཟོད་པ་མ་ཐོབ་པས་ཀུན་ནས་ལྡང་བ་དེ་རྣམ་པར་གནོན་པར་མི་ནུས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལྔ་པོ་དེ་དག་གདུལ་བའི་དབང་གི་ཕྱིར་འཇམ་དཔལ་གཞོན་ནུར་གྱུར་པའི་སེམས་བསྡུ་བ་མཛད་དོ། །དེ་ནས་འཇམ་དཔལ་ [21a.3]གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ལག་པ་གཡས་པས་རལ་གྲི་བླངས་ཏེ་ལེགས་པར་བདར་ནས་བཅོམ་ལྡན་འདས་ག་ལ་བ་དེ་ལོགས་སུ་བརྒྱུགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་ [21a.4]བཀའ་སྩལ་ཏོ། །འཇམ་དཔལ་ང་ནི་བསད་ཟིན་ཅིང་ལེགས་པར་བསད་ཟིན་ཀྱིས་ཐོང་ཤིག །དེ་ཅིའི་ཕྱིར་ཞེ་ན། འཇམ་དཔལ་སྐྱེས་བུ་གང་དག་གིས་གང་གི་ཚེ་བསད་དོ་སྙམ་པའི་སེམས་སྐྱེད་པར་བྱེད་པའི་སེམས་སྐྱེས་པ་དེའི་ཚེ་དེ་དག་གིས་ཡུན་རིང་པོ་ནས་བསད་ [21a.5]ཟིན་པའི་ཕྱིར་རོ། །དེ་ནས་བྱང་ཆུབ་སེམས་དཔའ་ལྔ་པོ་དེ་དག་འདི་སྙམ་དུ་སེམས་ཏེ། ཆོས་ཐམས་ཅད་ནི་སྒྱུ་མ་ལྟ་བུ་སྟེ། འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གམ། ཤེད་ལས་སྐྱེས་སམ། ཤེད་བུ་ནི་འགའ་ཡང་མེད་དོ། ། [21a.6]འདི་ལ་ཕ་ཡང་མེད། མ་ཡང་མེད། སངས་རྒྱས་ཀྱང་མེད། ཆོས་ཀྱང་མེད། དགེ་འདུན་ཡང་མེད་དོ། །འདི་ལ་གང་མཚམས་མེད་པ་བྱེད་པར་འགྱུར་བ་ཡང་འགའ་ཡང་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་ནི་མཁས་པ། མཛངས་ [21a.7]པ། ཡིད་གཞུངས་པ། སངས་རྒྱས་ཐམས་ཅད་ཀྱིས་བསྟོད་པ། བསྔགས་པ། ཟབ་མོ་ལ་བཟོད་པ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་ལ་བསྙེན་བཀུར་བྱས་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། ཆོས་ཐམས་ཅད་རབ་ཏུ་འབྱེད་པའི་ཤེས་ [21b] [21b.1]པ་ལ་མཁས་པ། ཇི་ལྟ་བ་བཞིན་དུ་ཆོས་སྟོན་པ། ཡང་དག་པར་སྨྲ་བ། དེ་བཞིན་གཤེགས་པ་ལ་གུས་པ་དང་བཅས་པ་ཡིན་ན་དེ་མཚོན་རྣོན་པོ་ཐོགས་ཏེ། དེ་བཞིན་གཤེགས་པ་ག་ལ་བ་དེར་རྒྱུག་ཅིང་། དེ་བཞིན་གཤེགས་པ་ཡང་དེ་སྐད་ཅེས་འཇམ་དཔལ་ང་ནི་ [21b.2]བསད་ཟིན་ཅིང་ལེགས་པར་བསད་ཟིན་ཀྱིས་ཐོང་ཤིག་ཅེས་གསུངས་པའི་ཕྱིར་ཏེ། གལ་ཏེ་འདི་ལ་སངས་རྒྱས་ཞེས་བྱ་བ་དང་། ཆོས་ཞེས་བྱ་བ་དང་། དགེ་འདུན་ཞེས་བྱ་བ་དང་། ཕ་ཞེས་བྱ་བ་དང་། མ་ཞེས་བྱ་བ་དང་། དགྲ་བཅོམ་པ་ཞེས་བྱ་བའི་ཆོས་ཐེར་ཟུག་ཏུ་ [21b.3]གནས་པ་འགའ་ཞིག་ཡོངས་སུ་གྲུབ་པར་གྱུར་ན་ནི་མཚམས་མེད་པ་འཛིན་པ་དེ་ལ་ངེས་པར་འབྱུང་བ་ཡང་ཡོད་པར་མི་འགྱུར་བ་ཞིག་ན། གང་གི་ཕྱིར་ཆོས་དེ་དག་ནི་མེད་པ། ལོག་པ། ཡང་དག་པ་མ་ཡིན་པར་བཟུང་བ། སྟོང་པ། སྒྱུ་མ་ལྟ་བུ་ཡིན་པས་དེའི་ཕྱིར་ [21b.4]འདི་ལ་གང་བྱེད་པར་འགྱུར་བའམ། གང་ལ་བྱེད་པར་འགྱུར་བའི་བྱེད་པ་འགའ་ཡང་མེད་དོ་སྙམ་མོ། །བྱང་ཆུབ་སེམས་དཔའ་ལྔ་པོ་དེ་དག་གིས་དེ་ལྟར་ཤེས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ནས། དེ་དག་དགའ་བ་དང་མཆོག་ཏུ་དགའ་བ་དེ་ཉིད་ཀྱིས་ཏ་ [21b.5]ལ་བདུན་སྲིད་ཙམ་དུ་ནམ་མཁའ་ལ་མངོན་པར་འཕགས་ཏེ། མངོན་པར་འཕགས་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཆོས་ཀུན་སྒྱུ་མ་ལྟ་བུ་སྟེ། ཡོངས་སུ་རྟོག་པས་ཀུན་ནས་བསྐྱེད། །འདི་ལ་གྲུབ་པ་མ་མཆིས་ཏེ། ། [21b.6]ཆོས་འདི་ཐམས་ཅད་སྟོང་པ་ལགས། །བདག་ཏུ་འདུ་ཤེས་རྨོངས་པ་རྣམས། །ལོག་པར་ཡོངས་སུ་རྟོག་པར་བགྱིད། །སྔོན་གྱི་མཐར་ནི་མི་བཟད་པའི། །སུག་ལས་བགྱིས་པ་དེ་ཡང་དྲན། །ཚེ་རབས་སྔ་མ་རྣམས་སུ་ནི། །ཕ་མ་སྦྱིན་གནས་བཀུམ་གྱུར་ཅིང་། ། [21b.7]དགེ་སློང་དགྲ་བཅོམ་བཀུམ་པ་ཡི། །ཤིན་ཏུ་མི་བཟད་སུག་ལས་བགྱིས། །སུག་ལས་དེ་ཡི་རྣམ་སྨིན་གྱིས། །སྡུག་བསྔལ་ཚོར་བ་མྱོང་གྱུར་ཅིང་། །འགྱོད་པ་སྐྱེས་པར་གྱུར་པ་ནི། །ཆོས་ཐོས་པས་ནི་རྣམ་དག་གྱུར། །གྲགས་ཆེན་ཟུག་རྔུ་འབྱིན་པ་ཡིས། [22a] [22a.1]བདག་ཅག་འགྱོད་པ་བསལ་མཛད་པས། །གང་ལ་ཉོན་མོངས་མ་མཆིས་པའི། །ཆོས་དབྱིངས་རྗེས་སུ་རྟོགས་པར་གྱུར། །སངས་རྒྱས་ཐབས་ལ་མཁས་པ་སྟེ། །ཐུབ་པ་ཐབས་ཀྱི་མཁྱེན་པ་མངའ། །ཐབས་དེས་སེམས་ཅན་ཐམས་ཅད་ཀྱི། ། [22a.2]འགྱོད་པ་དག་ནི་རྣམ་པར་བསལ། །ཆོས་རྣམས་རང་བཞིན་སྟོང་པས་ན། །འདི་ལ་སངས་རྒྱས་ཆོས་དང་ཡང་། །དགེ་འདུན་མི་དམིགས་འདི་ལ་ནི། །ཕ་མ་མ་མཆིས་དགྲ་བཅོམ་མིན། །འདི་ལ་དགུམ་པ་མ་མཆིས་ཏེ། །འགུམ་པ་འགའ་ཡང་མ་མཆིས་མ་ལགས། ། [22a.3]མཉམ་ཉིད་ཇི་བཞིན་འབྱུང་བ་སྟེ། །དེ་ནི་ཆོས་རྣམས་མཚན་ཉིད་ལགས། །འཇམ་དབྱངས་ཤེས་རབ་ཆེན་པོ་པ། །ཆོས་རྣམས་ཕ་རོལ་ཕྱིན་པ་ཡིས། །མཚོན་ཆ་རྣོན་པོ་ཐོགས་ནས་ནི། །སངས་རྒྱས་ག་ལ་བཞུགས་པར་བརྒྱུགས། །སངས་རྒྱས་ཇི་བཞིན་མཚོན་དེ་ [22a.4]བཞིན། །དེ་དག་གཉི་ག་མཚན་ཉིད་གཅིག །མི་སྐྱེ་འབྱུང་བ་མ་མཆིས་ཏེ། །འདི་ལ་འགུམ་པ་འགའ་མ་མཆིས། །མཚོན་ཐོགས་པའི་ཆོས་ཀྱི་རྣམ་གྲངས་འདི་བཤད་པ་ན་ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་རྣམ་པ་དྲུག་ཏུ་རབ་ [22a.5]ཏུ་གཡོས་ཤིང་ས་ཆེན་པོ་གཡོས་པ་ཡང་འཇིག་རྟེན་དུ་བྱུང་བར་གྱུར་ཏོ། །དེ་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ལ་རང་རང་གི་བསྙེན་བཀུར་བ་དེ་དག་ [22a.6]གིས་ཞུས་པ། བཅོམ་ལྡན་འདས་གང་གིས་དོག་ས་ཆེན་པོ་གཡོས་པ་འདི་ལྟ་བུ་འདི་འཇིག་རྟེན་དུ་བྱུང་བ་འདི་སུའི་མཐུ་ལགས། སངས་རྒྱས་བཅོམ་ལྡན་འདས་དེ་དག་གིས་བཀའ་སྩལ་པ། རིགས་ཀྱི་བུ་དག་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ [22a.7]ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཆོས་སྟོན་ཏོ། །འཇིག་རྟེན་གྱི་ཁམས་མི་མཇེད་དེ་ན་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ [22b] [22b.1]ལས་ཕྱིར་མི་ལྡོག་པ་ཞིག་འདུག་པ་དེས་འདི་ལྟ་སྟེ། བྱང་ཆུབ་སེམས་དཔའ་གཞན་དག་གདུལ་བའི་དབང་གི་ཕྱིར་ཤེས་རབ་ཀྱི་རལ་གྲིའི་མཚོན་རྣོན་པོ་ཐོགས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ག་ལ་བ་དེ་ལོགས་སུ་བརྒྱུགས་སོ། །དེ་ནས་ [22b.2]སངས་རྒྱས་བཅོམ་ལྡན་འདས་དེ་དག་གིས་ཤེས་རབ་ཀྱི་མཚོན་ལས་བརྩམས་ཏེ། ཅི་ནས་ཀྱང་སེམས་ཅན་དཔག་ཏུ་མེད་པ་དག་མིག་རྣམ་པར་དག་པ་དང་། སེམས་རྣམ་པར་གྲོལ་བ་དང་། བཟོད་པ་སྐྱེས་པ་དང་། བྱང་ཆུབ་ལ་ཞུགས་པར་གྱུར་པ་དེ་ལྟར་དེ་ལྟར་ཆོས་བསྟན་ཏོ། ། [22b.3]དེ་ནས་བཅོམ་ལྡན་འདས་ཀྱིས་ཅི་ནས་ཀྱང་འཁོར་དེ་ན་སེམས་ཅན་ལས་དང་པོ་པ་དགེ་བའི་རྩ་བ་ཆུང་བ་རྣམ་པར་རྟོག་པ་མང་བ་གང་དག་འཁོད་པ་དེ་དག་གིས་མཚོན་དེ་མི་མཐོང་ཞིང་ཆོས་བསྟན་པ་དེ་ཡང་མི་ཐོས་པ་དེ་ལྟར་བྱིན་གྱི་རླབས་ཀྱིས་བྱིན་གྱིས་བརླབས་སོ། །དེ་ནས་གནས་ [22b.4]བརྟན་ཤཱ་རིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་སྟོན་པ་བགྲོངས་པའི་ཕྱིར་བརྟུལ་བའི་ལས་མི་བཟད་པ་མངོན་པར་འདུས་བྱས་པ་དེ་ཁྱོད་ལ་གང་དུ་རྣམ་པར་སྨིན་པར་འགྱུར། འཇམ་དཔལ་གྱིས་སྨྲས་པ། བཙུན་ [22b.5]པ་ཤཱ་རིའི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཁོ་བོས་ལས་མི་བཟད་པ་དེ་ལྟ་བུ་ནི་བྱས་ན་དེ་གང་དུ་རྣམ་པར་སྨིན་པར་འགྱུར་བའི་གནས་ནི་མི་ཤེས་སོ། །བཙུན་པ་ཤཱ་རིའི་བུ་དེ་ལྟ་མོད་ཀྱི་སྒྱུ་མའི་སྐྱེས་བུའི་ལས་གང་དུ་རྣམ་པར་སྨིན་པར་འགྱུར་བ་དེར་ཁོ་བོའི་ [22b.6]ཡང་རྣམ་པར་སྨིན་པར་འགྱུར་རོ། །དེ་ཅིའི་ཕྱིར་ཞེ་ན། བཙུན་པ་ཤཱ་རིའི་བུ་སྒྱུ་མའི་སྐྱེས་བུ་ཡང་མི་རྟོག་རྣམ་པར་མི་རྟོག་ལ། ཆོས་ཐམས་ཅད་ཀྱང་མི་རྟོག་རྣམ་པར་མི་རྟོག་པའི་ཕྱིར་རོ། །བཙུན་པ་ཤཱ་རིའི་བུ་འདི་ལྟར་དེ་བཙུན་པ་ཉིད་ལ་དྲིས། ཁྱོད་ཀྱིས་ཇི་ལྟར་བཟོད་ [22b.7]པ་དེ་ལྟར་སྟོན་ཅིག །བཙུན་པ་མཚོན་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ལས་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ་དེ་ནི་མ་ཡིན་ནོ། །འཇམ་དཔལ་ [23a] [23a.1]གྱིས་སྨྲས་པ། བཙུན་པ་རྣམ་པར་སྨིན་པ་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་མཚོན་ཡང་མེད། ལས་ཀྱང་མེད། རྣམ་པར་སྨིན་པ་ [23a.2]ཡང་མེད་ན། འོ་ན་ལས་དེ་གང་དུ་རྣམ་པར་སྨིན་པར་འགྱུར། ཤཱ་རིའི་བུས་སྨྲས་པ། འཇམ་དཔལ་ཁྱོད་ཀྱིས་བསམ་པ་དེས་བསྟན་པ་ལྟར་ན་ལས་དེ་ནི་གང་དུ་ཡང་རྣམ་པར་སྨིན་པར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ལས་མེད་པ། རྣམ་པར་ [23a.3]སྨིན་པ་མེད་པའི་ཕྱིར་རོ། །དེ་ནས་བཅོམ་ལྡན་འདས་ལ་གང་དག་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ཅི་ནས་ཀྱང་བདག་ཅག་གི་སངས་རྒྱས་ [23a.4]ཀྱི་ཞིང་དག་ཏུ་མཆི་ཞིང་སངས་རྒྱས་ཀྱི་ཞིང་དེ་དག་ཏུ་ཆོས་སྟོན་པར་འགྱུར་བ་དེ་ལྟར་ཐུགས་བརྩེ་བས་སྤྲོ་བར་མཛད་དུ་གསོལ། དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཅག་ཇེ་རང་རང་གི་སངས་ [23a.5]རྒྱས་ཀྱི་ཞིང་རྣམས་སུ་ལྟོས་ཤིག །དེ་ནས་བྱང་ཆུབ་སེམས་དཔའ་དེ་དག་གིས་ཕྱོགས་བཅུ་ཀུན་གྱི་རང་རང་གི་སངས་རྒྱས་ཀྱི་ཞིང་རྣམས་སུ་བལྟས་སོ། །བལྟས་པ་ན་ཕྱོགས་བཅུ་ཀུན་གྱི་རང་རང་གི་སངས་རྒྱས་ཀྱི་ཞིང་དེ་དག་ནས་འཇམ་དཔལ་གཞོན་ནུར་གྱུར་པའི་སྒྲ་སྙན་ [23a.6]པ་ཡང་ཐོས། འཇམ་དཔལ་གཞོན་ནུར་གྱུར་པ་སངས་རྒྱས་བཅོམ་ལྡན་འདས་དེ་དག་གི་སྤྱན་སྔ་ན་འདུག་ཅིང་ལྷའི་བུ་བློ་གྲོས་རབ་གནས་ཆོས་ཀྱི་རྣམ་གྲངས་འདི་ཉིད་འདྲི་བ་ལ་ཆོས་སྟོན་པ་དང་། དེ་དག་ཏུ་བྱང་ཆུབ་སེམས་དཔའ་འདུས་པ་དེ་སྙེད་དང་། ལྷའི་བུ་འདུས་པ་ [23a.7]དེ་སྙེད་ཀྱང་མཐོང་ངོ་། །མཐོང་བས་ཀྱང་འདི་སྙམ་དུ་འཇམ་དཔལ་གཞོན་ནུར་གྱུར་པ་འདི་དེ་ལྟར་སངས་རྒྱས་ཀྱི་ཞིང་འདི་ནས་ཀྱང་མི་གཡོ་ལ། ཐམས་ཅད་དུ་ཡང་བཞིན་ཉེ་བར་སྟོན་པ་ནི་ངོ་མཚར་ཏོ། །ངོ་མཚར་ཏོ་སྙམ་དུ་ངོ་མཚར་དང་ལྡན་པར་གྱུར་ཏོ། །དེ་ནས་འཇམ་ [23b] [23b.1]དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་འདི་ལྟ་སྟེ་དཔེར་ན་སྒྱུ་མ་མཁན་ནི་སྒྱུ་མ་ཤིན་ཏུ་བསླབས་པའི་ཕྱིར་སྟན་ལས་ཀྱང་མི་གཡོ་ལ། གཟུགས་རྣམ་པ་སྣ་ཚོགས་དག་ཀྱང་སྟོན་པར་བྱེད་དོ། །དེ་བཞིན་དུ་ [23b.2]བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ལེགས་པར་བསླབས་པ་ཡང་སྒྱུ་མ་ལྟ་བུའི་ཆོས་རྣམས་ལ་སངས་རྒྱས་ཀྱི་ཞིང་ཇི་སྙེད་དུ་བཞིན་ཉེ་བར་སྟོན་པར་འདོད་པ་དེ་སྙེད་དུ་སྤྲུལ་པ་དག་སྤྲུལ་པར་བྱེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་འདི་སྒྱུ་མ་ལྟ་ [23b.3]བུར་རིག་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཆོས་ཀྱི་རྣམ་གྲངས་འདི་ཐོས་པ་དེ་ནི་སངས་རྒྱས་འབྱུང་བ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་རྒྱུན་ཏུ་ཞུགས་པའི་འབྲས་བུ་དང་ [23b.4]འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་ལན་ཅིག་ཕྱིར་འོང་བའི་འབྲས་བུ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་ཕྱིར་མི་འོང་བའི་འབྲས་བུ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་དགྲ་བཅོམ་པ་ཉིད་དང་འདྲ་སྟེ། འཇམ་དཔལ་ཆོས་ཀྱི་རྣམ་ [23b.5]གྲངས་འདི་ལ་མོས་ཤིང་ཡིད་ཆེས་པ་དང་། བྱང་ཆུབ་ཀྱི་སྙིང་པོ་ལ་འདུག་པ་གང་ཡིན་པ་དེ་ནི་འདྲ་བ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་དེ་དེ་བཞིན་ལགས་ཏེ། དེ་ནི་སྟོང་པ་ཉིད་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་མཚན་མ་མ་ [23b.6]མཆིས་པ་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་སྨོན་པ་མ་མཆིས་པ་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་དེ་བཞིན་ཉིད་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་ཆོས་ཀྱི་དབྱིངས་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་ཡང་དག་པའི་མཐའ་ཇི་ལྟ་བ་དེ་ལྟར་འདྲ་བ་ [23b.7]ལགས་སོ། །དེ་ནི་མཉམ་པ་ཉིད་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་རྣམ་པར་གྲོལ་བ་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་དབེན་པ་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། ། [24a] [24a.1]བཅོམ་ལྡན་འདས་ཆོས་ཀྱི་རྣམ་གྲངས་འདི་ཅི་ནས་ཀྱང་མ་འོངས་པའི་དུས་ལྔ་བརྒྱ་ཐ་མར་གྱུར་པ་ན་སྤྱོད་པར་འགྱུར་ཞིང་། རིགས་ཀྱི་བུ་དང་། རིགས་ཀྱི་བུ་མོ་དག་གི་རྣ་ལམ་དུ་གྲག་པར་འགྱུར་བ་དེ་ལྟར་དེ་བཞིན་གཤེགས་པས་བྱིན་གྱིས་ [24a.2]བརླབ་ཏུ་གསོལ། དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་མི་རྣམས་ཀྱི་རོལ་མོའི་སྒྲ་གང་ཇི་སྙེད་པ་དེ་དག་ཐམས་ཅད་མ་དཀྲོལ་བར་སྒྲ་གྲག་ཅིང་ཤིང་ལྗོན་པ་ཐམས་ཅད་ལས་ཀྱང་མེ་ཏོག་སྣ་ཚོགས་དག་རབ་ཏུ་རྒྱས་ཤིང་ལྷགས་ [24a.3]པར་གྱུར་ཏོ། །རྫིང་བུ་དག་ནས་ཀྱང་པད་མ་མང་པོ་དག་རབ་ཏུ་འཐོན་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཤིང་སྣང་བ་ཆེན་པོས་ཁྱབ་པར་གྱུར་ནས་ཉི་མ་དང་ཟླ་བ་འདི་དག་ཀྱང་མི་སྣང་བར་གྱུར་ཏོ། །ལྷ་ [24a.4]བྱེ་བ་འབུམ་ཕྲག་མང་པོ་དག་ཀྱང་དགའ་ཞིང་མགུ་ལ་ཡི་རངས་ཏེ། སྟེང་གི་བར་སྣང་ལ་འཁོད་ནས་མེ་ཏོག་གི་ཆར་དག་མངོན་པར་རབ་ཏུ་འབེབས་ཤིང་ཕྱེ་མ་དང་། སྤོས་དང་། མེ་ཏོག་ཕྲེང་དང་། བྱུག་པའི་ཆར་དག་ཀྱང་མངོན་པར་རབ་ཏུ་འབེབས་སོ། །སིལ་ [24a.5]སྙན་དག་ཀྱང་རབ་ཏུ་གསིལ་ཞིང་ལྷའི་གླུ་དབྱངས་མང་པོ་དག་ཀྱང་བསྒྲགས་ནས་ཐམས་ཅད་ཀྱིས་ཀྱང་ཐལ་མོ་སྦྱར་བ་བཏུད་དེ་ཁ་འཐུན་པར་ཚིག་འདི་སྐད་ཅེས་ཨ་ལ་ལ་འཇམ་དཔལ་གཞོན་ནུར་གྱུར་པས་བསྟན་པའི་ཆོས། ཨ་ལ་ལ་ཆོས། ཨ་ལ་ལ་ཆོས། འཇིག་རྟེན་དུ་ [24a.6]ཆོས་ཀྱི་འཁོར་ལོ་གཉིས་པ་བསྐོར་བ་ཡང་མཐོང་ངོ་། །སེམས་ཅན་གང་དག་གིས་ཆོས་ཀྱི་རྣམ་གྲངས་འདི་ཐོས་པ་དང་། ཐོས་ནས་ཀྱང་མོས་པར་འགྱུར་བ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ནོ། །གང་དག་གིས་ཆོས་ཀྱི་རྣམ་གྲངས་འདི་ཐོས་ནས་སྐྲག་པར་མི་ [24a.7]འགྱུར་བ་དེ་དག་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། ཟབ་མོ་ལ་བཟོད་པ་ཡིན་ནོ་ཞེས་ཀྱང་སྨྲས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་སླད་དུ་ [24b] [24b.1]སྔ་ལྟས་འདི་དག་བྱུང་བ་ལགས་ན། དེ་ནི་མ་འོངས་པའི་དུས་ན་སྤྱོད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་སྔ་ལྟས་འདི་དག་བྱུང་བ་ཡིན་ནོ། །འཇམ་དཔལ་གྱིས་གསོལ་པ། [24b.2]བཅོམ་ལྡན་འདས་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བགྱི་བའི་སླད་དུ་བཅོམ་ལྡན་འདས་ཀྱིས་བདེན་པའི་བྱིན་གྱིས་རླབས་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བདེན་པ་དང་བདེན་པའི་ཚིག་གང་གིས་རྣམ་པར་ཐར་པའི་ [24b.3]སྒོ་གསུམ་ལ་བརྟེན་ནས་རྣམ་པར་གྲོལ་བའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག །འཇམ་དཔལ་གྱིས་གསོལ་པ། བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་བདག་མ་ [24b.4]མཆིས་པ་དང་། སེམས་ཅན་མ་མཆིས་པ་དང་། སྲོག་མ་མཆིས་པ་དང་། གང་ཟག་མ་མཆིས་པ་དང་། ཤེད་ལས་སྐྱེས་མ་མཆིས་པ་དང་། ཤེད་བུ་མ་མཆིས་པ་དང་། ཀུན་ནས་ཉོན་མོངས་པ་མ་མཆིས་པ་དང་། རྣམ་པར་བྱང་བ་མ་མཆིས་པའི་ [24b.5]བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་འདོད་ཆགས་མ་མཆིས་པ་དང་། ཞེ་སྡང་མ་མཆིས་པ་དང་། གཏི་མུག་མ་མཆིས་པ་དང་། [24b.6]མིང་མ་མཆིས་པ་དང་། གཟུགས་མ་མཆིས་པ་དང་། རྒྱུ་མ་མཆིས་པ་དང་། ལྟ་བ་མ་མཆིས་པ་དང་། སྲིད་པ་མ་མཆིས་པ་དང་། སྲིད་པ་ཡོངས་སུ་འཚལ་བ་མ་མཆིས་པ་དང་། ལུས་མ་མཆིས་པ་དང་། ལུས་སུ་གདགས་པ་མ་མཆིས་པ་དང་། སེམས་མ་ [24b.7]མཆིས་པ་དང་། སེམས་སུ་གདགས་པ་མ་མཆིས་པ་དང་། དྲན་པ་མ་མཆིས་པ་དང་། དྲན་པར་བགྱིད་པ་དག་མ་མཆིས་པ་དང་། དྲན་པ་ཉེ་བར་གཞག་པ་དག་མ་མཆིས་པ་དང་། གཞག་པ་མ་མཆིས་པ་དང་། ཉེ་བར་གཞག་པ་མ་མཆིས་པ་དང་། གཟུགས་མ་ [25a] [25a.1]མཆིས་པ་དང་། ཚོར་བ་མ་མཆིས་པ་དང་། འདུ་ཤེས་མ་མཆིས་པ་དང་། འདུ་བྱེད་རྣམས་མ་མཆིས་པ་དང་། རྣམ་པར་ཤེས་པ་མ་མཆིས་པ་དང་། མིག་མ་མཆིས་པ་དང་། གཟུགས་མ་མཆིས་པ་དང་། རྣ་བ་མ་མཆིས་པ་ [25a.2]དང་། སྒྲ་མ་མཆིས་པ་དང་། སྣ་མ་མཆིས་པ་དང་། དྲི་མ་མཆིས་པ་དང་། ལྕེ་མ་མཆིས་པ་དང་། རོ་མ་མཆིས་པ་དང་། ལུས་མ་མཆིས་པ་དང་། རེག་མ་མཆིས་པ་དང་། ཡིད་མ་མཆིས་པ་དང་། ཆོས་མ་མཆིས་པ་དང་། འདོད་པའི་ཁམས་མ་ [25a.3]མཆིས་པ་དང་། གཟུགས་ཀྱི་ཁམས་མ་མཆིས་པ་དང་། གཟུགས་མེད་པའི་ཁམས་མ་མཆིས་པ་དང་། འདི་ལ་རྟག་པ་མ་མཆིས་པ་དང་། ཆད་པ་མ་མཆིས་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་ [25a.4]པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་རྒྱུན་དུ་ཞུགས་པ་མ་མཆིས་པ་དང་། རྒྱུན་དུ་ཞུགས་པའི་འབྲས་བུ་མ་མཆིས་པ་དང་། ལན་ཅིག་ཕྱིར་འོང་བ་མ་མཆིས་པ་དང་། ལན་ཅིག་ཕྱིར་འོང་བའི་འབྲས་བུ་མ་མཆིས་པ་དང་། ཕྱིར་ [25a.5]མི་འོང་བ་མ་མཆིས་པ་དང་། ཕྱིར་མི་འོང་བའི་འབྲས་བུ་མ་མཆིས་པ་དང་། དགྲ་བཅོམ་པ་མ་མཆིས་པ་དང་། དགྲ་བཅོམ་པའི་ཆོས་རྣམས་མ་མཆིས་པ་དང་། རང་སངས་རྒྱས་མ་མཆིས་པ་དང་། རང་སངས་རྒྱས་ཀྱི་ཆོས་རྣམས་མ་མཆིས་པ་དང་། དེ་ [25a.6]བཞིན་གཤེགས་པ་མ་མཆིས་པ་དང་། དེ་བཞིན་གཤེགས་པའི་ཆོས་རྣམས་མ་མཆིས་པ་དང་། སྟོབས་རྣམས་མ་མཆིས་པ་དང་། མི་འཇིགས་པ་རྣམས་མ་མཆིས་པ་དང་། ཡེ་ཤེས་མ་མཆིས་པ་དང་། རྣམ་པར་ཤེས་པ་མ་མཆིས་པ་དང་། སྟོང་ [25a.7]པ་ཉིད་མ་མཆིས་པ་དང་། མཚན་མ་མ་མཆིས་པ་མ་མཆིས་པ་དང་། སྨོན་པ་མ་མཆིས་པ་མ་མཆིས་པ་དང་། འདོད་ཆགས་དང་བྲལ་བ་ཉིད་མ་མཆིས་པ་དང་། རང་བཞིན་མ་མཆིས་པ་དང་། འཐོབ་པ་མ་མཆིས་པ་དང་། མངོན་སུམ་དུ་བགྱི་བ་མ་ [25b] [25b.1]མཆིས་པ་དང་། མངོན་པར་རྟོགས་པ་མ་མཆིས་པ་དང་། རིག་པ་མ་མཆིས་པ་དང་། རྣམ་པར་གྲོལ་བ་མ་མཆིས་པ་དང་། འགྲམ་མ་མཆིས་པ་དང་། ཕ་རོལ་མ་མཆིས་པ་དང་། ཚུ་རོལ་མ་མཆིས་པ་དང་། ཐར་པ་མ་མཆིས་པ་དང་། མིང་མ་མཆིས་ [25b.2]པ་དང་། མིང་དུ་གདགས་པ་མ་མཆིས་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་ཆོས་བསྟན་པ་འདིས་འགའ་ཡང་མ་སྦྱར། མ་གྲོལ་ [25b.3]མི་སྦྱོར། མི་འགྲོལ་བའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ [25b.4]རྒྱས་དེ་དག་གིས་སེམས་ཅན་འགའ་ཡང་མ་བཀྲོལ། ཡོངས་སུ་མྱ་ངན་ལས་མ་བཟླས་པ་དེ་དག་གིས་སེམས་ཅན་འགའ་ཡང་མ་བརྙེས། མ་བཤིག །ཆོས་འགའ་ཡང་མ་བསྐྱེད། མ་བཀག །རྣམ་པར་མ་བཤིག །མ་བསྐྱོད་པ་དང་། མ་འོངས་ [25b.5]པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་སེམས་ཅན་འགའ་ཡང་འགྲོལ་བར་མི་འགྱུར། ཡོངས་སུ་མྱ་ངན་ལས་ཟློ་བར་མི་འགྱུར། དེ་དག་གིས་སེམས་ཅན་འགའ་ཡང་བརྙེས་པར་མི་འགྱུར། འཇིག་པར་མི་འགྱུར། [25b.6]ཆོས་འགའ་ཡང་སྐྱེད་པར་མི་འགྱུར། འགོག་པར་མི་འགྱུར། རྣམ་པར་འཇིག་པར་མི་འགྱུར། སྐྱོད་པར་མི་འགྱུར་བ་དང་། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་སེམས་ཅན་འགའ་ཡང་མི་ [25b.7]འགྲོལ། ཡོངས་སུ་མྱ་ངན་ལས་མི་ཟློ། དེ་དག་གིས་སེམས་ཅན་འགའ་ཡང་མི་བརྙེས། མི་འཇིག །ཆོས་འགའ་ཡང་མི་སྐྱེད། མི་འགོག །རྣམ་པར་མི་འཇིག །མི་སྐྱོད་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་ [26a] [26a.1]དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་ཆོས་བསྟན་པ་འདི་ལ་ཅུང་ཟད་ཀྱང་མ་སྨྲས། མ་བརྗོད། མ་བཤད། མ་བསྟན། མ་བརྟགས། མ་བསྒྲགས། མ་བསྙད། མ་ [26a.2]སྨོས། མ་བཟླས་ཤིང་། ཆོས་བསྟན་པ་འདི་ལ་ཡི་གེ་གཅིག་ཀྱང་མ་བརྗོད་ལ། ཆོས་བསྟན་པ་འདི་གང་གིས་ཀྱང་མ་མཉན། འགའ་ཡང་ཉན་པར་མི་འགྱུར། འགའ་ཡང་རྣམ་པར་གྲོལ་བར་མི་འགྱུར་བའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་ [26a.3]འདི་མ་འོངས་པའི་དུས་ལྔ་བརྒྱ་ཐ་མ་ན་འཛམ་བུའི་གླིང་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་འདི་ལ་ཚུལ་ཁྲིམས་མ་མཆིས་པ་དང་། ཚུལ་ཁྲིམས་ཀྱི་འབྲས་བུ་མ་མཆིས་པ་དང་། ཏིང་ངེ་འཛིན་མ་མཆིས་པ་དང་། [26a.4]ཏིང་ངེ་འཛིན་གྱི་གནས་མ་མཆིས་པ་དང་། ཤེས་རབ་མ་མཆིས་པ་དང་། ཤེས་རབ་ཀྱི་དབང་པོ་མ་མཆིས་པ་དང་། རྣམ་པར་གྲོལ་བ་མ་མཆིས་པ་དང་། རྣམ་པར་གྲོལ་བའི་ཡེ་ཤེས་མ་མཆིས་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་ [26a.5]པའི་དུས་ལྔ་བརྒྱ་ཐ་མ་ན་འཛམ་བུའི་གླིང་ན་སྤྱོད་པར་གྱུར་ཅིག །བཅོམ་ལྡན་འདས་བདེན་པ་དང་བདེན་པའི་ཚིག་གང་གིས་བྱང་ཆུབ་སེམས་དཔའ་སྦྱིན་པ་སྩོལ་བར་མི་བགྱིད། ཚུལ་ཁྲིམས་སྲུང་བར་མི་བགྱིད། བཟོད་པ་སྒྲུབ་པར་མི་བགྱིད། བརྩོན་འགྲུས་རྩོམ་པར་ [26a.6]མི་བགྱིད། བསམ་གཏན་རྣམས་སྒོམ་པར་མི་བགྱིད། ཤེས་རབ་སྤྱོད་པར་མི་བགྱིད། བྱང་ཆུབ་དོན་དུ་གཉེར་བར་མི་བགྱིད། ཡང་དག་པ་ལ་འཇུག་པར་མི་བགྱིད། བྱང་ཆུབ་ཐོབ་པར་མི་བགྱིད། སྟོབས་རྣམས་ཐོབ་པར་མི་བགྱིད། མི་འཇིགས་པ་ [26a.7]རྣམས་ཐོབ་པར་མི་བགྱིད། དབང་པོ་རྣམས་ཐོབ་པར་མི་བགྱིད། སོ་སོ་ཡང་དག་པར་རིག་པ་རྣམས་ཐོབ་པར་མི་བགྱིད། ཆོས་ཀྱི་འཁོར་ལོ་སྐོར་བར་མི་བགྱིད། སེམས་ཅན་གྲོལ་བར་མི་བགྱིད། སྨྲ་བར་མི་བགྱིད་པའི་བདེན་པ་དང་བདེན་པའི་ཚིག་དེས་ [26b] [26b.1]ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་འཛམ་བུའི་གླིང་ན་སྤྱོད་པར་གྱུར་ཅིག །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་ [26b.2]པས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་དོག་ས་ཆེར་གཡོས་པར་གྱུར་པ་འདིའི་རྒྱུ་ནི་གང་ལགས། རྐྱེན་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ [26b.3]ཏོ། །བྱམས་པ་དམན་པ་ལ་མོས་པའི་སེམས་ཅན་འདི་དག་འཛིན་པར་མི་འགྱུར་ནམ་ལེགས་ཀྱིས་ཐོང་ཤིག །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེ་བོ་མང་ [26b.4]པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་དོན་གྱི་སླད་དུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ཆོས་ཀྱི་རྣམ་གྲངས་འདི་ནི་ས་ཕྱོགས་འདི་ཉིད་དུ་སངས་རྒྱས་བྱེ་བ་ཁྲག་ཁྲིག་འབུམ་ཕྲག་བདུན་ཅུ་ [26b.5]རྩ་བཞིས་བསྟན་ཏེ། ཐམས་ཅད་དུ་ཡང་འཇམ་དཔལ་གཞོན་ནུར་གྱུར་པ་དང་། ལྷའི་བུ་བློ་གྲོས་རབ་གནས་ཀྱིས་ཞུས་སོ། །བྱམས་པས་གསོལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དང་། ལྷའི་བུ་བློ་གྲོས་རབ་གནས་ཀྱིས་ཆོས་ཀྱི་ [26b.6]རྣམ་གྲངས་འདི་ཐོས་ནས་ཇི་སྲིད་ཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་རིགས་ཀྱི་བུ་འདི་དག་གིས་བསྐལ་པ་གྲངས་མེད་པ་ཕྲག་འབུམ་འདས་པ་ན་དེ་བཞིན་གཤེགས་པ་ཀུན་ནས་མེ་ཏོག་མངོན་པར་འཕགས་པ་སེང་གེའི་རྩལ་གྱི་ [26b.7]ཡོན་ཏན་ཕུང་པོ་ཞེས་བྱ་བ་ལས་ཆོས་ཀྱི་རྣམ་གྲངས་འདི་ཐོས་སོ། །ཆོས་ཀྱི་རྣམ་གྲངས་འདི་བཤད་པ་ན་སེམས་ཅན་གང་གཱའི་ཀླུང་གི་བྱེ་མ་སྙེད་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེའི་ཉིས་གྱུར་སྙེད་ཀྱིས་ནི་ཕྱིར་མི་ལྡོག་པའི་ [27a] [27a.1]བཟོད་པ་ཐོབ་བོ། །དེའི་ཉིས་གྱུར་སྙེད་ཀྱིས་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་དང་། འཇམ་དཔལ་གཞོན་ནུར་གྱུར་ [27a.2]པ་དང་། ལྷའི་བུ་བློ་གྲོས་རབ་གནས་དང་། ཇི་ལྟར་འདུས་པའི་བྱང་ཆུབ་སེམས་དཔའ་དེ་དག་དང་། ལྷའི་བུ་དེ་དག་དང་། ཚེ་དང་ལྡན་པ་ཤཱ་རིའི་བུ་དང་། གནས་བརྟན་འོད་སྲུང་ཆེན་པོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་ [27a.3]འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལྷའི་བུ་བློ་གྲོས་རབ་གནས་ཀྱིས་ཞུས་པ་ [27a.4]ཞེས་བྱ་བའི་ལེའུ་སྟེ་སུམ་ཅུ་རྩ་དྲུག་པ་རྫོགས་སོ།། །།བན་དེ་ཀླུའི་རྒྱལ་མཚན་གྱིས་ཞུས་པ།། {D81}༄༅༅། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ [27a.5]ལས་ལེའུ་སུམ་ཅུ་རྩ་བདུན་པ་སྟེ་འཕགས་པ་སེང་གེས་ཞུས་པ། ཤོ་ལོ་ཀ་དྲུག་ཅུ། རྒྱ་གར་སྐད་དུ། ཨཱརྱ་སིང་ཧ་པ་རི་པྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སེང་གེས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་ [27a.6]སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་ [27a.7]དཔའི་དགེ་འདུན་ཆེན་པོ་དང་ཡང་ཐབས་ཅིག་གོ། །ཐམས་ཅད་མཁྱེན་ཅིང་ཐམས་ཅད་གཟིགས། །རྒྱལ་བ་གང་ཟག་མཚུངས་པ་མེད། །རྒྱལ་པོ་མ་སྐྱེས་དགྲ་ཡི་བུ། །སེང་གེ་ཞེས་ནི་གྲགས་པ་ཞིག །ཚོང་དཔོན་བུ་ཕོ་ལྔ་བརྒྱ་ཡིས། །མདུན་དུ་བདར་ཏེ་ལྷན་ [27b] [27b.1]ཅིག་ཏུ། །རྒྱལ་པོའི་ཁབ་ནས་དེ་བྱུང་ནས། །རྒྱལ་པོའི་འབྱོར་པ་ཆེན་པོ་ཡིས། །གསེར་ལས་བྱས་པའི་གདུགས་ཐོགས་ཏེ། །རྫོགས་སངས་རྒྱས་ཀྱི་གན་སོང་ནས། །ཞབས་ལ་མགོ་བོས་ཕྱག་འཚལ་ཏེ། །ལྔ་བརྒྱ་པོ་ཡིས་གདུགས་དེ་དག ། [27b.2]ཚང་བར་ཐུབ་པ་ཆེ་ལ་ཕུལ། །ཀུན་ཀྱང་བྱང་ཆུབ་དོན་དུ་ཞུགས། །རྫོགས་སངས་རྒྱས་ཀྱི་མཐུ་ཡིས་ནི། །དེ་དག་མི་འཇིགས་སྐྱེས་གྱུར་ནས། །སེང་གེས་ཐལ་མོ་སྦྱར་བྱས་ཏེ། །རྫོགས་སངས་རྒྱས་ལ་ཞུས་པ་ནི། །བྱང་ཆུབ་སེམས་དཔའི་སྤྱོད་པ་ [27b.3]གང་། །དེ་ནི་འདྲེན་པས་བདག་ལ་གསུངས། །གང་གིས་མཛེས་པར་འགྱུར་བ་ལགས། །གང་གིས་རྫུས་ཏེ་སྐྱེ་བར་འགྱུར། །སྐྱེ་བ་དྲན་པར་ཇི་ལྟར་འགྱུར། །ཐུབ་པ་ཆེན་པོས་ལུང་བསྟན་གསོལ། །དེ་དག་ལྷག་བསམ་ཡེ་ཤེས་ཀྱིས། །མཁྱེན་ [27b.4]ནས་སངས་རྒྱས་ལུང་བསྟན་པ། །བྱང་ཆུབ་སེམས་དཔའ་སྤྱོད་གང་ཞེས། །ཁྱོད་ཀྱི་དྲིས་པ་དེ་བསྟན་ཏོ། །བཟོད་པ་ཡིས་ནི་མཛེས་པར་འགྱུར། །ཚངས་པར་སྤྱད་པས་རྫུས་ཏེ་སྐྱེ། །ཆོས་ཀྱི་སྦྱིན་པས་སྐྱེ་བ་དྲན། །གཞོན་ནུ་དེ་ལྟར་ཤེས་པར་གྱིས། ། [27b.5]གང་གིས་སུམ་ཅུ་རྩ་གཉིས་མཚན། །དཔེ་བྱད་བཟང་པོ་བརྒྱད་ཅུ་དང་། །གསེར་མདོག་འདྲ་བའི་ལུས་འགྱུར་ཞིང་། །དེ་མཐོང་སེམས་ཅན་དགའ་བར་འགྱུར། །སྦྱིན་པ་ཀུན་གྱིས་མཚན་དུ་འགྱུར། །བྱམས་པས་དེ་བཞིན་དཔེ་བྱད་བཟང་། །སེམས་ [27b.6]ཅན་ཀུན་ལ་སེམས་མཉམ་པས། །རྒྱལ་བ་གསེར་གྱི་མདོག་འདྲར་འགྱུར། །གཟུངས་ནི་གང་གིས་ཐོབ་པར་འགྱུར། །གང་གིས་ཏིང་འཛིན་སྐྱེ་འགྱུར་ལགས། །གཟུང་བའི་ཚིག་ཏུ་གང་གིས་འགྱུར། །ཐུབ་པ་ཆེན་པོས་ལུང་བསྟན་གསོལ། །ཆོས་ལ་ [27b.7]བཟོད་པས་གཟུངས་རྣམས་འཐོབ། །སེམས་བསྒོམས་པས་ནི་ཏིང་འཛིན་སྐྱེ། །ཀྱལ་བའི་ཚིག་རྣམས་སྤང་བྱས་ན། །གཟུང་བར་འོས་པའི་ཚིག་ཏུ་འགྱུར། །དྲན་དང་ལྡན་པར་ཇི་ལྟར་འགྱུར། །ཐུབ་པ་ཇི་ལྟར་བློ་གྲོས་ལྡན། །ཇི་ལྟར་ཆོས་སྤྱོད་འགྱུར་ [28a] [28a.1]བ་ལགས། །སྐྱེས་བུ་དམ་པ་མཁས་ཅིས་འགྱུར། །གཡོ་མེད་པས་ནི་དྲན་ལྡན་འགྱུར། །དོན་ལ་སེམས་པས་བློ་གྲོས་ལྡན། །གུས་དང་བཅས་པས་ཆོས་སྤྱོད་འགྱུར། །ཆོས་ཀྱི་མཚན་ཉིད་རྟོགས་པས་མཁས། །འཇིག་རྟེན་མགོན་ [28a.2]པོའི་སྤྱན་སྔར་ནི། །ལས་གང་གིས་ནི་སྐྱེ་བར་འགྱུར། །འཇིག་རྟེན་མགོན་གྱི་མངོན་སུམ་དུ། །ཞུ་བ་ཞུ་བར་ཇི་ལྟར་འགྱུར། །གང་ཞིག་ཆོས་ཀྱི་སྦྱིན་པ་ལ། །ནམ་ཡང་བར་ཆད་མི་བྱེད་པ། །དེ་ནི་དེས་ན་མྱུར་རབ་ཏུ། །འཇིག་རྟེན་མགོན་དང་ཕྲད་པར་ [28a.3]འགྱུར། །གང་གིས་མི་ཁོམ་སྤོང་བར་འགྱུར། །གང་གིས་བཟང་འགྲོར་མཆི་འགྱུར་ལགས། །སྐྱེ་བ་ཀུན་ཏུ་སྐྱེ་བ་ན། །བག་མཆིས་པར་ནི་ཇི་ལྟར་འགྱུར། །དད་པས་མི་ཁོམ་སྤོང་བར་འགྱུར། །ཚུལ་ཁྲིམས་ཀྱིས་ནི་བཟང་འགྲོར་འགྲོ། །སྟོང་པ་ཉིད་ [28a.4]ནི་བསྒོམ་བྱས་ན། །རྟག་ཏུ་བག་དང་ལྡན་པར་འགྱུར། །ཐུབ་པ་བྱང་ཆུབ་སེམས་དཔའ་རྣམས། །ཇི་ལྟར་ལས་རྣམས་དག་པར་འགྱུར། །ཇི་ལྟར་བདུད་ཀྱི་སྙིས་མི་ཐོགས། །ཇི་ལྟར་ཆོས་ཀྱིས་ཕོངས་འགྱུར་སྤོང་། །རྣམ་པར་གྲོལ་བས་ལས་རྣམས་ [28a.5]འདག །བརྩོན་འགྲུས་ཀྱིས་ནི་བདུད་འདུལ་འགྱུར། །ཅི་སྨྲས་དེ་བཞིན་བྱེད་པས་ནི། །ཆོས་ཀྱིས་ཕོངས་པ་སྤོང་བར་འགྱུར། །ཀ་ལ་པིང་ཀའི་སྒྲ་སྙན་དང་། །ཚངས་པའི་དབྱངས་འདྲར་ཇི་ལྟར་འགྱུར། །ཐུབ་པ་མོས་པ་སྣ་ཚོགས་ཀྱི། །སེམས་ [28a.6]ཅན་རྣམས་ནི་གང་གིས་དགའ། །བདེན་པར་སྨྲས་པས་ཚངས་པའི་དབྱངས། །ངག་རྩུབ་སྤངས་པས་སྒྲ་སྙན་འགྱུར། །ཀྱལ་བའི་ཚིག་དང་ཕྲ་མ་རྣམས། །སྤངས་པས་སེམས་ཅན་དགའ་བར་འགྱུར། །ཇི་ལྟར་ཚེ་རིང་འགྱུར་བ་ལགས། །བྲོ་ནད་ཉུང་བར་ཇི་ལྟར་ [28a.7]འགྱུར། །རྣམ་པར་འདྲེན་པ་གང་གིས་ན། །གཡོག་འཁོར་རྣམས་ནི་མི་ཕྱེད་འགྱུར། །གསོད་པ་མི་བྱེད་ཚེ་རིང་འགྱུར། །མི་འཚེ་བས་ནི་ནད་ཉུང་འགྱུར། །མི་འཐུན་པ་དག་བསྡུམས་བྱས་ན། །གཡོག་འཁོར་རྣམས་ནི་མི་ཕྱེད་འགྱུར། །དོན་རྣམས་ཇི་ལྟར་འགྲུབ་འགྱུར་ [28b] [28b.1]ལགས། །གང་གིས་ལོངས་སྤྱོད་མི་ཉམས་འགྱུར། །གང་དང་གང་དུ་སྐྱེ་བ་དེར། །དབང་ཆེན་གྲགས་པར་ཇི་ལྟར་འགྱུར། །ཆགས་པ་མེད་པས་དོན་རྣམས་འགྲུབ། །སེར་སྣ་མེད་པས་ལོངས་སྤྱོད་འཕེལ། །གང་དང་གང་དུ་སྐྱེ་བ་དེར། །ཕྲག་དོག་མེད་པས་ [28b.2]དབང་ཆེར་གྲགས། །ཇི་ལྟར་ལྷ་ཡི་མིག་འཐོབ་འགྱུར། །ལྷ་ཡི་རྣ་བ་ཇི་ལྟར་འཐོབ། །སེམས་ཅན་འཆི་འཕོ་སྐྱེ་བ་དག །འདྲེན་པ་གང་གིས་འཚལ་བར་འགྱུར། །མར་མེ་བྱིན་པས་མིག་འཐོབ་འགྱུར། །རོལ་མོའི་སྒྲ་ཡིས་རྣ་བ་འདག །འཆི་འཕོ་སྐྱེ་ཤེས་ཡེ་ཤེས་ [28b.3]ཀྱིས། །དེ་དག་དེ་ལྟར་འགྲུབ་པར་འགྱུར། །འདྲེན་པ་བྱང་ཆུབ་སེམས་དཔའ་ཡི། །ཟག་པ་གང་གིས་བས་པར་འགྱུར། །ཚེ་རབས་སྔ་དྲན་ཅིས་འགྱུར་ལགས། །རྫུ་འཕྲུལ་ཅི་ཡིས་འཐོབ་པར་འགྱུར། །བཞོན་པ་བྱིན་པས་རྫུ་འཕྲུལ་འཐོབ། །དྲན་པ་བསྒོམས་པས་རྗེས་སུ་དྲན། ། [28b.4]མཐའ་གཉིས་རབ་ཏུ་སྤང་བྱས་ན། །ཟག་པ་ཟད་པར་རེག་པར་འགྱུར། །གང་གིས་ཞིང་ནི་ཕུན་སུམ་ཚོགས། །ཅིས་ནི་དགེ་འདུན་ཕུན་སུམ་ཚོགས། །གང་གིས་ཕུན་སུམ་ཚོགས་འོད་འགྱུར། །གང་གིས་ཕྱོགས་བཅུར་ལྷང་ངེར་གདའ། །སྨོན་ལམ་གྱིས་ནི་ཕུན་སུམ་ཞིང་། །བསྡུ་བས་དགེ་འདུན་ཕུན་ [28b.5]སུམ་ཚོགས། །འདིར་ནི་རིན་ཆེན་གདུགས་ཕུལ་བས། །ཕྱོགས་བཅུར་ལྷང་ངེར་སྣང་བར་འགྱུར། །ཆོས་རྣམས་ཐམས་ཅད་བསྡུ་བ་ནི། །ཆོས་གང་གིས་ནི་ཐོབ་པར་འགྱུར། །གང་དང་གང་དུ་སྐྱེས་པ་དེར། །བྱང་ཆུབ་སེམས་དཔའ་དགའ་བ་འཐོབ། །སེམས་ཅན་ [28b.6]ཐམས་ཅད་ཐར་བྱའི་ཕྱིར། །བྱང་ཆུབ་དོན་དུ་སེམས་བཏུད་པ། །དེས་ནི་ཆོས་རྣམས་བསྡུ་བ་འཐོབ། །དེར་ནི་དགའ་བའང་འཐོབ་པར་འགྱུར། །བསླབ་པ་ཅི་འདྲ་བསླབས་པ་དང་། །སེམས་ནི་ཅི་འདྲ་བསྒོམས་པ་ཡིས། །ཐུབ་པ་ཆེན་པོ་ཁྱོད་འདྲ་བའི། །སྟོན་པ་ [28b.7]ཐམས་ཅད་མཁྱེན་པར་འགྱུར། །སེམས་ཅན་མ་ལུས་ཐམས་ཅད་ལ། །མཉམ་པའི་སེམས་ཉིད་བསླབས་པ་དང་། །མཉམ་པར་སེམས་ནི་བསྒོམས་པས་ན། །ཐམས་ཅད་ཟིལ་གནོན་རྒྱལ་བར་འགྱུར། །སྐྱེ་བ་ཀུན་ཏུ་བྱང་ཆུབ་སེམས། །རྨི་ལམ་ན་ཡང་སེམས་དེ་ནི། ། [29a] [29a.1]འདོར་མི་འགྱུར་ན་མ་ཉལ་ཚེ། །སྨོས་ཅི་འཚལ་བར་གང་གིས་འགྱུར། །གྲོང་དང་གྲོང་ཁྱེར་རྣམས་སུའམ། །གང་དུ་གནས་པའི་ཡུལ་རྣམས་སུ། །བྱང་ཆུབ་ལ་ནི་ཡང་དག་འཛུད། །དེས་ན་སེམས་འདོར་མི་འགྱུར་རོ། །གང་དང་གང་དུ་སྐྱེ་བར་ཡང་། །ཇི་ [29a.2]ལྟར་སྟོབས་ནི་ཆེ་འགྱུར་ཞིང་། །རྟག་ཏུ་མཐུ་ཡིས་འཕགས་པ་དང་། །བདུད་རྣམས་བྱེ་བས་མི་ཚུགས་འགྱུར། །འདིར་ནི་སྙིང་པོ་ལྔ་བྱིན་ཞིང་། །སྐྲག་ལ་མི་འཇིགས་བྱིན་ན་ནི། །གང་དང་གང་དུ་སྐྱེ་བར་ཡང་། །དེས་ནི་སྟོབས་ནི་ཆེ་འགྱུར་ཏེ། །རྟག་ཏུ་མཐུ་ཡིས་ [29a.3]འཕགས་པ་དང་། །བདུད་རྣམས་བྱེ་བས་མི་ཚུགས་སོ། །བྱང་ཆུབ་སེམས་དཔའི་སྤྱོད་པ་དེ། །འཇིག་རྟེན་མགོན་གྱིས་མངོན་སུམ་དུ། །ལུང་བསྟན་པ་འདི་ཐོས་ནས་སུ། །སེང་གེ་ཡིད་ནི་དགའ་བར་འགྱུར། །སེང་གེ་གྲོགས་དང་ལྷན་ཅིག་ཏུ། །འདི་སྐད་ཀྱི་ནི་ཚིག་ [29a.4]སྨྲས་ཏེ། །སྤྱོད་པ་བསྟན་པ་འདི་ལ་ནི། །བདག་ཅག་རྗེས་སུ་བསླབ་པར་བགྱི། །དེ་ནས་སངས་རྒྱས་འཛུམ་མཛད་དེ། །སྟོང་གསུམ་པོ་ཡང་གཡོས་གྱུར་ནས། །མ་ཕམ་པས་ནི་སངས་རྒྱས་ལ། །ཅི་ཞིག་སླད་དུ་འཛུམ་མཛད་པ། །ཐུབ་ཆེན་ལུང་བསྟན་གསོལ་ཞེས་ཞུས། ། [29a.5]དེ་སྐད་ཞུ་བ་ཞུས་པ་དང་། །མ་ཕམ་པ་ལ་སངས་རྒྱས་ཀྱིས། །འདི་སྐད་ཅེས་ནི་བཀའ་སྩལ་ཏོ། །གང་གི་ཕྱིར་ནི་འཛུམ་མཛད་པ། །མ་ཕམ་ང་ལས་འདིར་ཉོན་ཅིག །སངས་རྒྱས་བྱེ་བ་བརྒྱད་ཅུ་དང་། །གཞན་ཡང་ཁྲག་ཁྲིག་ཕྲག་བཅུ་ལ། །བྱང་ཆུབ་དོན་དུ་འདུས་ནས་ནི། །མི་ཡི་ [29a.6]འདྲེན་པ་རྣམས་ལ་མཆོད། །རྫོགས་པའི་སངས་རྒྱས་རྐང་གཉིས་མཆོག །མར་མེ་མཛད་པ་ཚུན་ཆད་དུ། །བྲམ་ཟེའི་ཁྱེའུ་འདི་དག་རྣམས། །ང་ཡིས་ཡོངས་སུ་སྨིན་པར་བྱས། །སྣང་བ་ཆེ་ཞེས་བྱ་བ་ཡི། །བསྐལ་པ་མཛེས་པ་འབྱུང་འགྱུར་ཏེ། །དེ་དག་བསྐལ་པ་གཅིག་དེ་ལ། ། [29a.7]རྣམ་པར་འདྲེན་པར་འགྱུར་བ་སྟེ། །ཡེ་ཤེས་ཏོག་གི་རྒྱལ་མཚན་ཞེས། །འཇིག་རྟེན་འདྲེན་པ་རྣམས་སུ་འགྱུར། །འོད་དཔག་མེད་ཀྱི་བཀོད་པ་ལྟར། །དེ་དག་གི་ཡང་དེ་འདྲར་འགྱུར། །བྱམས་པ་ནས་ནི་བཟུང་ནས་སུ། །བསྐལ་པ་སུམ་བརྒྱ་ཚང་བར་ནི། །དེ་ཡི་བར་དུ་དུས་ [29b] [29b.1]ཀུན་ཏུ། །རྟག་ཏུ་སངས་རྒྱས་ཕྲད་པར་འགྱུར། །འདི་དག་བྱང་ཆུབ་ཐོབ་པ་ཡི། །མིང་ནི་གང་སུས་ཐོས་པ་རྣམས། །དེ་དག་ཐམས་ཅད་འཇིག་རྟེན་དུ། །ཀུན་མཁྱེན་གང་ཟག་མཚུངས་མེད་འགྱུར། །གང་ཞིག་ལུང་བསྟན་འདི་ཐོས་ནས། །མོས་པ་སྐྱེད་པར་བྱེད་པ་ནི། ། [29b.2]འཇིག་རྟེན་གསུམ་པོ་འདི་དག་ན། །དེ་དང་མཚུངས་པའི་བསོད་ནམས་མེད། །གང་གིས་བསྐལ་པ་དྲུག་སྟོང་དུ། །སངས་རྒྱས་ཞིང་རྣམས་ཐམས་ཅད་དུ། །རིན་ཆེན་རྣམས་ཀྱིས་བཀང་བྱས་ནས། །བྱང་ཆུབ་ཕྱིར་འདིར་བྱིན་པ་བས། །གང་གིས་ཆོས་ཀྱི་རྣམ་གྲངས་འདི། ། [29b.3]ཐོས་ནས་བྱང་ཆུབ་ཕྱིར་འཇུག་ན། །སྔར་སྨོས་པ་ཡི་བསོད་ནམས་ཀྱིས། །གྲངས་དང་ཆར་ཡང་མི་ཕོད་དོ། །ཆོས་འདི་བཤད་པའི་ཚེ་ན་ནི། །འཇིག་རྟེན་མགོན་པོའི་མཐུ་ཡིས་ནི། །ལྷ་རྣམས་མེ་ཏོག་ཆར་པ་འབེབས། །སྟོང་གསུམ་པོ་ཡང་གཡོས་པར་གྱུར། །སེང་གེ་ [29b.4]གྲོགས་དང་བཅས་པ་ཡིས། །མངོན་པར་ཤེས་པ་ལྔ་ཐོབ་ནས། །ཉིན་བདུན་བར་དུ་མཆོད་བྱས་ནས། །བསྟན་པ་ལ་ནི་རབ་ཏུ་བྱུང་། །དེ་དག་ཀུན་གྱིས་ཏིང་འཛིན་འཐོབ། །ཟད་མི་ཤེས་པའི་གཟུངས་ཀྱང་ཐོབ། །སེམས་ཅན་རྣམས་ཀྱི་དོན་བྱེད་དེ། །སངས་རྒྱས་ [29b.5]ཆོས་ལ་འཛུད་པར་བྱེད། །ཆོས་ཀྱི་རྣམ་གྲངས་འདི་བསྟན་པ་ན་སེམས་ཅན་བྱེ་བ་ཕྲག་བརྒྱད་ཅུ་བྱང་ཆུབ་མཆོག་ལ་ཞུགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། སེང་གེ་གྲོགས་དང་བཅས་པ་དང་། ལྷ་དང་། མི་དང་། ལྷ་མ་ཡིན་དང་། [29b.6]དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། སེང་གེས་ཞུས་ [29b.7]པའི་ལེའུ་ཞེས་བྱ་སྟེ་སུམ་ཅུ་རྩ་བདུན་པ་རྫོགས་སོ།། །།རྒྱ་གར་གྱི་མཁན་པོ་དཱ་ན་ཤཱི་ལ་དང་། མུ་ནི་བར་མ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། ། [30a] [30a.1]{D82}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་སུམ་ཅུ་རྩ་བརྒྱད་པ་སྟེ་སངས་རྒྱས་ཐམས་ཅད་ཀྱི་གསང་ཆེན་ཐབས་ལ་མཁས་པ་བྱང་ཆུབ་སེམས་དཔའ་ཡེ་ཤེས་དམ་པས་ཞུས་པ། བམ་པོ་དང་པོ། །རྒྱ་གར་སྐད་དུ། [30a.2]ཨཱརྱ་སརྦ་བུད་དྷ་མ་ཧཱ་ར་ཧ་སྱོ་པཱ་ཡ་ཀཽ་ཤ་ལྱ་ཛྙྱཱ་ནོད་ཏ་ར་བོ་དྷི་སཏྭ་པ་རི་པྲྀཙྪ་པ་རི་བརྟ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སངས་རྒྱས་ཐམས་ཅད་ཀྱི་གསང་ཆེན་ཐབས་ལ་མཁས་པ་བྱང་ཆུབ་སེམས་དཔའ་ཡེ་ཤེས་དམ་པས་ཞུས་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ། [30a.3]སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། སློབ་པ་དང་མི་སློབ་པའི་དགེ་སློང་བརྒྱད་སྟོང་གི་དགེ་སློང་གི་ [30a.4]དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཁྲི་དྲུག་སྟོང་ཐམས་ཅད་ཀྱང་མངོན་པར་ཤེས་པ་གཟུངས་ཐོབ་པ། སྤོབས་པ་ཐོགས་པ་མེད་པ། མངོན་པར་ཤེས་པ་སྒྲུབ་པ་ལ་མཁས་པ། མི་སྐྱེ་བའི་ཆོས་ལ་བཟོད་པ་ཐོབ་པ། ཡོན་ཏན་འབུམ་ [30a.5]ཕྲག་དུ་མ་དང་ལྡན་པའི་བྱང་ཆུབ་སེམས་དཔའ་ཤ་སྟག་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་བཞེངས་ནས་རིང་པོ་མ་ལོན་པར་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། ཚངས་པར་སྤྱོད་པ། [30a.6]ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ཞེས་བྱ་བ་འཁོར་དེ་ཉིད་དུ་འདུས་ཏེ་ [30a.7]འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷང་ས་ལ་བཙུགས་ཏེ། བཅོམ་ལྡན་འདས་གལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་ [30b] [30b.1]གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་དབྱེ་བར་གནང་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། [30b.2]བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཅི་དང་ཅི་འདོད་པ་དེ་གཤེགས་པ་ལ་དྲིས་ཤིག་དང་། ངས་དྲིས་པ་དེ་དང་དེ་ཉིད་ཀྱི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་ [30b.3]བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་ལ་མཁས་པ་ཐབས་ལ་མཁས་པ་ཞེས་བགྱི་ན་ཐབས་ལ་མཁས་པ་ [30b.4]དེ་གང་ལགས། བཙུན་པ་བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ཅེས་བཀའ་སྩལ་ [30b.5]ཏོ། །རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་རྣམས་དང་། མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང་། ཕན་པ་དང་། བདེ་བ་དང་། ད་ལྟར་དང་། མ་འོངས་པའི་བྱང་ [30b.6]ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་པ་རྗེས་སུ་ཡོངས་སུ་གཟུང་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བ་དང་། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དམ་པའི་ཆོས་ཡོངས་སུ་གཟུང་བའི་ [30b.7]ཕྱིར་ཞུགས་ཏེ། རིགས་ཀྱི་བུ་ཁྱོད་དེ་བཞིན་གཤེགས་པ་ལ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པ་ཡོངས་སུ་དྲི་བར་སེམས་པ་ནི་རིགས་ཀྱི་བུ་ཡང་ཁྱོད་ལེགས་སོ། །རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཚུལ་བཞིན་དུ་ཡིད་ལ་ཟུང་ཤིག་དང་། ངས་བྱང་ཆུབ་ [31a] [31a.1]སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་ལ་མཁས་པ་ཁྱོད་ལ་བཤད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་ [31a.2]དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་ཟན་ཁམ་གཅིག་ཙམ་ཡང་སེམས་ཅན་ཐམས་ཅད་ལ་སྦྱིན་པར་བྱེད་དེ། དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ [31a.3]ལ་མཁས་པ་ནི་གང་གི་ཚེ་དུད་འགྲོའི་སྐྱེ་གནས་སུ་གྱུར་པ་ལ་ཟན་ཁམ་གཅིག་ཙམ་ཡང་སྦྱིན་པར་བྱེད་ན་དེ་ཡང་ཐམས་ཅད་མཁྱེན་པ་ཉིད་དང་ལྡན་པའི་སེམས་ཀྱིས་སྦྱིན་པར་བྱེད་ཅིང་དགེ་བའི་རྩ་བ་དེ་ཡང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཡོངས་སུ་རྫོགས་པར་བྱ་བར་ཡོངས་སུ་ [31a.4]བསྔོ་བའི་ཕྱིར་རོ། །དེ་རྒྱུ་གཉིས་ཀྱིས་ན་སེམས་ཅན་ཐམས་ཅད་ལ་ཡོངས་སུ་སྔོ་བར་བྱེད་དེ། གཉིས་གང་ཞེ་ན། ཐམས་ཅད་མཁྱེན་པ་ཉིད་ཀྱི་སེམས་དང་། ཡོངས་སུ་བསྔོ་བ་ལ་མཁས་པ་ཉིད་ཀྱིས་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ [31a.5]ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་གཞན་གྱི་དགེ་བའི་རྩ་བ་མངོན་པར་འདུས་བྱས་པ་ལ་རྗེས་སུ་ཡི་རང་བར་བྱེད་ཅིང་། རྗེས་སུ་ཡི་རང་ནས་ཀྱང་སེམས་ཅན་ཐམས་ཅད་ལ་ཡོངས་སུ་བསྔོ་ཞིང་ [31a.6]བཏང་སྟེ་ཡོངས་སུ་སྔོ་བར་ཡང་བྱེད་དོ། །དེ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པའི་དགེ་བའི་རྩ་བ་དེས་བྱང་ཆུབ་ཀྱི་སེམས་དང་བྲལ་བའི་སྦྱིན་པ་པོ་དང་། སྦྱིན་བདག་གང་དག་ཡིན་པ་དེ་དག་ཀྱང་ཟིལ་གྱིས་གནོན་པར་བྱེད་ལ། ལེན་པ་པོ་གང་དག་ཡིན་པ་དེ་དག་ཀྱང་ [31a.7]ཟིལ་གྱིས་གནོན་པར་བྱེད་དེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ནི་ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། [31b] [31b.1]སྤོས་ཀྱི་ཤིང་ལྗོན་པ་དང་། མེ་ཏོག་དང་། མེ་ཏོག་ཕྲེང་དང་། སྤོས་དང་། ཕྱེ་མ་དང་། བྱུག་པ་བདག་གིར་མ་བྱས་ཤིང་ཡོངས་སུ་མ་བཟུང་བ་གང་ཇི་སྙེད་པ་དེ་དག་ཐམས་ཅད་བསམ་པས་ཡོངས་སུ་བཟུང་ཞིང་ཡོངས་སུ་བསྡུས་ནས་སངས་རྒྱས་ཐམས་ཅད་ལ་འབུལ་བར་བྱེད་ཅིང་དགེ་བའི་རྩ་ [31b.2]བ་དེ་ཡང་སེམས་ཅན་ཐམས་ཅད་ལ་གཏོང་བར་བྱེད་དེ། ཡོངས་སུ་བཏང་ནས་ཀྱང་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་དོ། །ཕྱོགས་བཅུ་དག་ན་མེ་ཏོག་གི་ཤིང་ལྗོན་པ་དང་། སྤོས་ཀྱི་ཤིང་ལྗོན་པ་དང་། མེ་ཏོག་དང་། མེ་ཏོག་ཕྲེང་དང་། སྤོས་དང་། ཕྱེ་མ་དང་། [31b.3]བྱུག་པ་བདག་གི་དང་བཅས་ཤིང་ཡོངས་སུ་བཟུང་བ་དང་བཅས་པ་གང་ཇི་སྙེད་པ་དེ་དག་ཐམས་ཅད་ཀྱི་དྲི་རླུང་གིས་བཏབ་པའི་ངད་དེ་དག་ཀྱང་བྱང་ཆུབ་སེམས་དཔའ་ཐབས་ལ་མཁས་པས་སངས་རྒྱས་ཐམས་ཅད་ལ་འབུལ་བར་བྱེད་ཅིང་། དགེ་བའི་རྩ་བ་དེ་ཡང་བདག་དང་། སེམས་ཅན་ཐམས་ཅད་ཀྱིས་ [31b.4]ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །དེ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པའི་དགེ་བའི་རྩ་བ་དེས་ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ [31b.5]དཔག་ཏུ་མེད་པ་འཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་ཕྱོགས་བཅུའི་འཇིག་རྟེན་གྱི་ཁམས་དག་ན་སེམས་ཅན་ [31b.6]སྡུག་བསྔལ་གྱི་ཚོར་བ་མྱོང་བར་གྱུར་པ་གང་ཇི་སྙེད་པ་དེ་དག་ལ་བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་དེ་དག་གི་སྡུག་བསྔལ་གྱི་ཚོར་བ་དེ་དག་ཐམས་ཅད་བསྡུས་ཏེ་འཆགས་པར་བྱེད་ཅིང་། འདི་ལྟར་སེམས་ཅན་དེ་དག་གི་སྡུག་བསྔལ་གྱི་ཚོར་བ་གང་དག་ཡིན་པ་དེ་དག་ [31b.7]ཐམས་ཅད་བདག་གི་ལུས་ལ་འབབ་པར་འགྱུར་ཞིང་སེམས་ཅན་དེ་དག་བདེ་བར་གྱུར་ཅིག་ཅེས་གོ་ཆ་གྱོན་པར་ཡང་བྱེད་དོ། །ཕྱོགས་བཅུ་ཀུན་གྱི་འཇིག་རྟེན་གྱི་ཁམས་དག་ན་སེམས་ཅན་བདེ་བའི་ཚོར་བ་མྱོང་བར་གྱུར་པ་གང་དག་ཡིན་པ་དེ་དག་ལ་བྱང་ཆུབ་སེམས་དཔའ་ཐབས་ལ་མཁས་ [32a] [32a.1]པས་དེ་དག་ཡང་དག་པར་བསྡུས་ཏེ་རྗེས་སུ་ཡི་རང་བར་བྱེད་ཅིང་། རྗེས་སུ་ཡི་རང་ནས་ཀྱང་ཐམས་ཅད་མཁྱེན་པ་ཉིད་ལ་དམིགས་པའི་སེམས་བསྐྱེད་པས་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་བྱ་བའི་ཕྱིར་ཐམས་ཅད་མཁྱེན་པ་ཉིད་དུ་ཡོངས་ [32a.2]སུ་བསྔོ་བར་བྱེད་དོ། །དེ་དགེ་བའི་རྩ་བ་དེས་སངས་རྒྱས་ཐམས་ཅད་ཀྱི་བདེ་བའི་ཡོ་བྱད་རྣམས་འཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ [32a.3]ཐབས་ལ་མཁས་པ་ནི་དེ་བཞིན་གཤེགས་པ་གཅིག་ལ་ཕྱག་བྱས། བཀུར་སྟིར་བྱས། བླ་མར་བྱས། རི་མོར་བྱས། མཆོད་པ་བྱས། བསྙེན་བཀུར་བྱས་ནས་འདི་ལྟར་སོ་སོར་རྟོག་པར་བྱེད་དེ། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་དབྱིངས་གཅིག་ལས་ངེས་པར་བྱུང་བ་དང་། [32a.4]ཚུལ་ཁྲིམས་གཅིག་པ་དང་། ཏིང་ངེ་འཛིན་གཅིག་པ་དང་། ཤེས་རབ་གཅིག་པ་དང་། རྣམ་པར་གྲོལ་བ་གཅིག་པ་དང་། རྣམ་པར་གྲོལ་བའི་ཡེ་ཤེས་མཐོང་བ་གཅིག་པ་དང་། ཡེ་ཤེས་གཅིག་པ་དང་། རིག་པ་གཅིག་པ་ཡིན་ནོ་ཞེས་སོ་སོར་རྟོག་པར་བྱེད་དོ། །དེས་དེ་ལྟར་སོ་སོར་ [32a.5]བརྟགས་ནས་འདི་ལྟར་ཤེས་པར་བྱེད་དེ། དེ་བཞིན་གཤེགས་པ་གཅིག་ལ་ཕྱག་བྱས། བཀུར་སྟིར་བྱས། བླ་མར་བྱས། རི་མོར་བྱས། མཆོད་པ་བྱས། བསྙེན་བཀུར་བྱས་པས་ནི་དེ་བཞིན་གཤེགས་པ་ཐམས་ཅད་ལ་ཕྱག་བྱས་པ་དང་། བཀུར་སྟི་བྱས་པ་དང་། བླ་མར་བྱས་པ་དང་། [32a.6]རི་མོར་བྱས་པ་དང་། མཆོད་པ་བྱས་པ་དང་། བསྙེན་བཀུར་བྱས་པར་འགྱུར་རོ་སྙམ་དུ་ཤེས་པར་བྱེད་དོ། །བྱང་ཆུབ་སེམས་དཔའ་ཐབས་ལ་མཁས་པ་ནི་ཕྱོགས་བཅུའི་སངས་རྒྱས་བཅོམ་ལྡན་འདས་དེ་དག་གི་མཆོད་པ་འབྱུང་བར་འགྱུར་བ་གང་དག་ཡིན་པ་དེ་དག་ཐམས་ཅད་བསམ་པས་ཡོངས་སུ་བཟུང་ [32a.7]ནས་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་དེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ནི་གང་གི་ཚེ་བློ་རྟུལ་བར་གྱུར་ན་ཡང་དེ་ [32b] [32b.1]བདག་ཉིད་ཁྱད་དུ་གསོད་པར་མི་བྱེད་ཅིང་། ཞུམ་པར་མི་བྱེད་པར་དེ་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ལ་ཡང་འཇུག་པར་བྱེད་ཅིང་དེ་འདི་ལྟར་སོ་སོར་རྟོག་པར་ཡང་བྱེད་དེ། ཚིག་བཞི་པའི་ཚིགས་སུ་བཅད་པ་གཅིག་པོ་འདིའི་དོན་གང་ཡིན་པ་དེ་ནི་གསུང་རབ་ཏུ་གཏོགས་པ་ཐམས་ [32b.2]ཅད་ཀྱི་དོན་ཡིན་ནོ་ཞེས་སོ་སོར་རྟོག་པར་བྱེད་དོ། །དེས་དེ་ལྟར་ཚིག་བཞི་པའི་ཚིགས་སུ་བཅད་པ་གཅིག་ཁ་ཏོན་དུ་བསླབས་ནས་ཞུམ་པ་མེད་པའི་སེམས་ཀྱིས་སྙིང་རྗེ་ཆེན་པོ་བསྐྱེད་དེ། རྙེད་པ་དང་། བཀུར་སྟི་དང་། གྲགས་པ་འདོད་པ་མེད་པས་གྲོང་དང་། གྲོང་ཁྱེར་དང་། གྲོང་རྡལ་དང་། [32b.3]ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་སྐྱེ་བོ་མང་པོ་ལ་ཚིག་བཞི་པའི་ཚིགས་སུ་བཅད་པ་དེ་རྒྱ་ཆེར་ཡང་དག་པར་སྟོན་པར་བྱེད་ཅིང་འདི་ལྟར་སྨོན་ལམ་འདེབས་པར་ཡང་བྱེད་དེ། སེམས་ཅན་གང་སུ་དག་གིས་བདག་གི་ཚིག་བཞི་པའི་ཚིགས་སུ་བཅད་པ་འདི་ཐོས་པར་གྱུར་པ་དེ་དག་ [32b.4]ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཅིག་ཅེས་སྨོན་ལམ་འདེབས་པར་ཡང་བྱེད་དོ། །དེ་དགེ་བའི་རྩ་བ་ཐབས་ལ་མཁས་པས་ཡོངས་སུ་ཟིན་པ་དེས་སེམས་ཅན་ཐམས་ཅད་ཀུན་དགའ་བོ་ལྟར་མང་དུ་ཐོས་པར་འགྱུར་ཞིང་སངས་རྒྱས་ཀྱི་སྤོབས་པ་ཉིད་ [32b.5]ཀྱང་འཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ནི་གལ་ཏེ་བརྒྱ་ལ་བརྒྱ་ལམ་ན་དབུལ་པོར་གྱུར་ན་ཡང་དེས་ཐ་ [32b.6]ན་གཞན་གྱི་ལས་ཀྱང་བྱས་ཏེ། ཁ་ཟས་ནལ་ཟེ་གང་ཙམ་ཡང་བླངས་ནས་ཞུམ་པ་མེད་པའི་སེམས་ཀྱིས་དགེ་འདུན་ནམ། གང་ཟག་ལ་འབུལ་བར་ཡང་བྱེད་དོ། །ཕུལ་ནས་ཀྱང་དེ་འདི་ལྟར་སོ་སོར་རྟོག་པར་བྱེད་དེ། བཅོམ་ལྡན་འདས་ཀྱིས་སེམས་རྒྱ་ཆེན་པོས་བྱིན་ན་སྦྱིན་པ་ཡང་རྒྱ་ [32b.7]ཆེན་པོར་འགྱུར་རོ་ཞེས་གསུངས་པས་ན་འདི་ལྟར་བདག་གི་སྦྱིན་པར་བྱ་བའི་ཆོས་འདི་ནི་ཆུད་མོད་ཀྱི། ཐམས་ཅད་མཁྱེན་པ་ཉིད་ཀྱི་སེམས་ཀྱིས་བྱིན་པས་དཔག་ཏུ་མེད་པར་འགྱུར་རོ་སྙམ་དུ་སོ་སོར་རྟོག་པར་བྱེད་དོ། །དེ་ཐམས་ཅད་མཁྱེན་པ་ཉིད་ཀྱི་སེམས་ཚད་མེད་པར་གྱུར་པ་ [33a] [33a.1]དེས་ཁ་ཟས་ནལ་ཟེ་གང་ཙམ་པོ་དེ་སྦྱིན་པར་བྱེད་ཅིང་། བདག་གི་དགེ་བའི་རྩ་བ་འདིས་བདག་དང་སེམས་ཅན་ཐམས་ཅད་འདི་ལྟ་སྟེ་དཔེར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཇི་ལྟ་བ་བཞིན་དུ་སྐྱེས་ [33a.2]བུ་ཆེན་པོའི་མཚན་རོ་བྲོ་བའི་མཆོག་འགྲུབ་པར་འགྱུར་ཞིང་ལག་ན་རིན་པོ་ཆེ་གྲུབ་པར་གྱུར་ཅིག་ཅེས་ཡོངས་སུ་སྔོ་བར་བྱེད་དོ། །དེའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་དེས་བྱང་ཆུབ་ཀྱི་སེམས་དང་བྲལ་བའི་སེམས་ཅན་རྣམས་ཀྱི་སྦྱིན་པ་ལས་བྱུང་བའི་བསོད་ནམས་ [33a.3]བྱ་བའི་དངོས་པོ་ཡང་ཟིལ་གྱིས་གནོན་པར་འགྱུར་ལ། སྐྱེས་བུ་ཆེན་པོའི་མཚན་རོ་བྲོ་བའི་མཆོག་ཀྱང་འགྲུབ་པར་འགྱུར། ལག་ན་རིན་པོ་ཆེ་ཡང་འགྲུབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་ [33a.4]གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་གལ་ཏེ་ཉན་ཐོས་དང་། རང་སངས་རྒྱས་རྣམས་དང་། ཉན་ཐོས་ཀྱི་ཐེག་པ་པ་རྣམས་དང་། རང་སངས་རྒྱས་ཀྱི་ཐེག་པ་པ་རྣམས་དང་ལྷན་ཅིག་གནས་པར་གྱུར་ཀྱང་དེ་དག་ལ་དགའ་བར་མི་བྱེད་ཅིང་། [33a.5]གལ་ཏེ་བྱང་ཆུབ་སེམས་དཔའ་ཐབས་ལ་མཁས་པས་ཉན་ཐོས་དང་རང་སངས་རྒྱས་རྣམས་ལ་བསྙེན་བཀུར་ལྷག་པ་དག་ཡོད་ལ། བདག་ལ་དེ་ལྟ་མ་ཡིན་པར་མཐོང་ན་ཡང་དེ་རྒྱུ་གཉིས་ཀྱིས་བདག་ལ་རྟོག་པར་བྱེད་དེ། གཉིས་གང་ཞེ་ན། བྱང་ཆུབ་སེམས་དཔའ་ལས་ངེས་པར་བྱུང་བ་ནི་ [33a.6]སངས་རྒྱས་བཅོམ་ལྡན་འདས་རྣམས་ཡིན་ལ། སངས་རྒྱས་བཅོམ་ལྡན་འདས་རྣམས་ལས་ངེས་པར་བྱུང་བ་ནི་ཉན་ཐོས་དང་། རང་སངས་རྒྱས་རྣམས་ཡིན་ནོ་སྙམ་དུ་བདག་ཉིད་ལ་རྟོག་པར་བྱེད་ཅིང་། དེ་འདི་ལྟར་སོ་སོར་རྟོག་པར་ཡང་བྱེད་དེ། འདི་དག་ལ་བསྙེན་བཀུར་བ་ལྷག་ [33a.7]པ་དག་ཡོད་མོད་ཀྱི། འོན་ཀྱང་འདིར་ནི་བདག་ཉིད་ཤིན་དུ་མཆོག་དང་། ཤིན་ཏུ་གཙོ་བོ་ཡིན་གྱི། འདི་དག་ནི་མ་ཡིན་ནོ། །འདི་དག་ནི་བདག་གི་ཕའི་ནོར་གྱི་ཕུང་པོ་ལ་ཡོངས་སུ་སྤྱོད་པར་བྱེད་པ་ཡིན་པས་བདག་གིས་འདི་དག་ལ་དགའ་བར་ཡང་མི་བྱ་ལ། འདི་དག་ལ་ཕྲག་ [33b] [33b.1]དོག་ཀྱང་མི་བྱའོ་སྙམ་དུ་སོ་སོར་རྟོག་པར་བྱེད་དོ། །དེས་ལྷག་པའི་བསམ་པས་སེམས་བསྐྱེད་པ་དེས་གང་གིས་དེ་བཞིན་གཤེགས་པ་ལ་བསྙེན་བཀུར་བྱས་ཀྱང་ཁེངས་པར་མི་འགྱུར་ལ། བསྙེན་བཀུར་མ་བྱས་ཀྱང་ཞུམ་པར་མི་འགྱུར་ཞིང་སེམས་ཅན་ཐམས་ཅད་ལ་ཐུགས་མཉམ་པ་ [33b.2]ཀུན་དུ་འཛིན་པར་མཛད་པ་ལྟ་བུའི་རྗེས་སུ་ཆགས་པ་དང་། ཁོང་ཁྲོ་བ་སྤངས་པ་འཐོབ་པར་འགྱུར་ཏེ། རིགས་ཀྱི་བུ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་ [33b.3]མཁས་པ་ནི་སྦྱིན་པ་སྦྱིན་པས་ཕ་རོལ་དུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་བྱེད་དོ། །ཇི་ལྟར་ཡོངས་སུ་རྫོགས་པར་བྱེད་ཅེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་གང་གི་ཚེ་སློངས་མོ་བ་མཐོང་བ་ན་དེ་ཐམས་ཅད་མཁྱེན་པ་ཉིད་ལ་ [33b.4]དམིགས་ཏེ། སེར་སྣའི་སེམས་ཚར་གཅོད་པར་བྱེད་ཅིང་གཏོང་བ་ཆེན་པོ་ཡང་སྤེལ་བར་བྱེད་ལ། སྦྱིན་ནོ་སྙམ་པའི་སེམས་ཀྱང་སྐྱེད་པར་བྱེད་པ་གང་ཡིན་པ་དེ་ནི་དེའི་སྦྱིན་པའི་ཕ་རོལ་དུ་ཕྱིན་པ་ཡིན་ནོ། །ཚུལ་ཁྲིམས་ཡང་དག་པར་བླངས་ཤིང་ཚུལ་ཁྲིམས་དང་ལྡན་པ་ལ་སྦྱིན་པ་སྦྱིན་ [33b.5]པར་བྱེད་པ་དང་། སེམས་ཅན་ཚུལ་ཁྲིམས་འཆལ་བ་གང་དག་ཡིན་པ་དེ་དག་ཚུལ་ཁྲིམས་ལ་འགོད་པར་བྱེད་ཅིང་སྦྱིན་པ་སྦྱིན་ནས་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འགོད་པར་བྱེད་པ་གང་ཡིན་པ་དེ་ནི་དེའི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡིན་ནོ། །བྱམས་ [33b.6]པའི་སེམས་དང་། ཕན་པའི་སེམས་དང་། མ་འདྲེས་པའི་སེམས་དང་། མ་འཁྲུགས་པའི་སེམས་དང་། ལེ་ལོ་མེད་པའི་སེམས་དང་། རྙོག་པ་མེད་པའི་སེམས་དང་། སྙོམས་པའི་སེམས་ཀྱིས་སྦྱིན་པ་སྦྱིན་པར་བྱེད་པ་གང་ཡིན་པ་དེ་ནི་དེའི་བཟོད་པའི་ཕ་རོལ་ཏུ་ཕྱིན་པ་ཡིན་ནོ། ། [33b.7]བཟའ་བ་དང་། བཅའ་བ་དང་། བཏུང་བ་དང་། བལྡག་པ་དང་། མྱང་བ་དག་ལ་མངོན་པར་གུས་པ་ཡང་དག་པར་སྒྲུབ་པར་བྱེད་ཅིང་རྩོལ་བར་བྱེད་པ་དང་། ལུས་ཀྱིས་ཞལ་ཏ་བྱེད་པ་དང་། སེམས་ཀྱིས་ཞལ་ཏ་བྱེད་པ་དང་། ལྡང་བ་དང་། འགྲོ་བ་དང་། འོང་བར་བྱེད་པ་གང་ [34a] [34a.1]ཡིན་པ་དེ་ནི་དེའི་བརྩོན་འགྲུས་ཀྱི་ཕ་རོལ་དུ་ཕྱིན་པ་ཡིན་ནོ། །བྱིན་པ་གང་ཡིན་པ་དེ་ལ་སེམས་རྩེ་གཅིག་པ་ཉིད་དང་། དགའ་བ་དང་། ཡིད་བདེ་བ་དང་། མཆོག་ཏུ་དགའ་བའི་བསམ་པ་དང་། རྣམ་པར་གཡེང་བ་མེད་པ་གང་ཡིན་པ་དེ་ནི་དེའི་བསམ་གཏན་གྱི་ཕ་རོལ་ [34a.2]དུ་ཕྱིན་པ་ཡིན་ནོ། །སྦྱིན་པ་བྱིན་ནས་ཆོས་ཉིད་ཀྱི་རྗེས་སུ་ཡང་དག་པར་གཞོལ་བར་བྱེད་དེ། སུས་བྱིན། སུ་ལ་བྱིན། ཅི་ཞིག་བྱིན། འདིའི་རྣམ་པར་སྨིན་པ་སུས་མྱོང་བར་འགྱུར་ཞེས་ཆོས་ཉིད་ཀྱི་རྗེས་སུ་ཡང་དག་པར་གཞོལ་བར་བྱེད་ཅིང་དེས་དེ་ལྟར་ཡོངས་སུ་བཙལ་ནས་ཀྱང་གང་གིས་ [34a.3]བྱིན་པ་དང་། གང་ལ་བྱིན་པ་དང་། ཅི་ཞིག་བྱིན་པ་དང་། དེའི་རྣམ་པར་སྨིན་པ་མྱོང་བར་བྱེད་པ་གང་ཡིན་པའི་ཆོས་འགའ་ཡང་མི་དམིགས་པ་གང་ཡིན་པ་དེ་ནི་དེའི་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་ [34a.4]མཁས་པ་ནི་སྦྱིན་པ་སྦྱིན་པས་ཀྱང་ཕ་རོལ་དུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་ལྟར་བྱང་ཆུབ་སེམས་ [34a.5]དཔའ་སེམས་དཔའ་ཆེན་པོ་ཐབས་ལ་མཁས་པས་སྦྱིན་པ་གང་གིས་སེམས་ཅན་རྣམས་ཀྱང་འཁོར་བ་ལས་ཡོངས་སུ་འཛིན་པར་བགྱིད་ལ། སྦྱིན་པ་དེ་ཉིད་ཀྱིས་སངས་རྒྱས་ཀྱི་ཆོས་ཐམས་ཅད་ཀྱང་ཡོངས་སུ་འཛིན་པར་བགྱིད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ [34a.6]རྣམས་ཀྱི་ཐབས་ལ་མཁས་པ་དེ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་ཐབས་ལ་མཁས་པ་དང་། ཐབས་ལ་ [34a.7]མཁས་པའི་ཕ་རོལ་ཏུ་ཕྱིན་པས་སྦྱིན་པ་ཆུང་ངུ་ཡང་ཆེན་པོར་བྱེད་ལ། ཆེན་པོ་ནི་དཔག་ཏུ་མེད་པ་དང་། གྲངས་མེད་པར་བྱེད་དོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ཅེས་བཀའ་སྩལ་ཏོ། །རིགས་ [34b] [34b.1]ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་གལ་ཏེ་བརྒྱ་ལ་བརྒྱ་ལམ་ན་སྡིག་པའི་གྲོགས་པོའི་དབང་ངམ། སེམས་ཀུན་དུ་རྨོངས་པས་ཉེས་པ་བྱུང་ན་ཡང་དེ་འདི་ལྟར་སོ་སོར་སློབ་སྟེ། གལ་ཏེ་བདག་ཕུང་པོ་དང་། ཁམས་དང་། སྐྱེ་མཆེད་འདི་ [34b.2]དག་ཉིད་ཀྱིས་ཡོངས་སུ་མྱ་ངན་ལས་འདས་པར་གྱུར་ན་ནི་དེ་ལྟ་ན་བདག་གིས་ཡོངས་སུ་གདུང་བར་བྱ་དགོས་པར་འགྱུར་བས་བདག་གིས་འདི་ལྟར་གོ་ཆ་བགོ་བར་བྱ་སྟེ། བདག་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་ཕྱི་མའི་མཐའི་མུའི་བར་དུ་འཁོར་བར་འཁོར་བར་བྱ་བ་ལ་བདག་ [34b.3]གིས་སེམས་ཞུམ་པར་མི་བྱ། འཇིགས་པར་མི་བྱ། སེམས་སྐྲག་པར་མི་བྱ། ཡོངས་སུ་གདུང་བར་མི་བྱ་ཞིང་། ཇི་ལྟ་ཇི་ལྟར་འཁོར་བ་ན་འཁོར་བར་འགྱུར་བ་དེ་ལྟ་དེ་ལྟར་སེམས་ཅན་ཡོངས་སུ་སྨིན་པར་བྱ་བ་དང་། ཉེས་པ་འདི་ཡང་ཆོས་བཞིན་དུ་ཕྱིར་བྱ་ཞིང་ཕྱིན་ཆད་ཀྱང་ཉེས་པ་ [34b.4]མི་འབྱུང་བར་བྱ་བ་དང་། བདག་གིས་སེམས་ཅན་ཐམས་ཅད་ཀྱང་ཉེས་པ་ལས་དབྱུང་བའི་ཕྱིར་ཆོས་བསྟན་པར་བྱའོ་ཞེས་གོ་ཆ་གྱོན་པར་བྱེད་དོ། །རིགས་ཀྱི་བུ་ཡོངས་སུ་བརྟག་པ་ཉེ་བར་བཟུང་ན་བྱང་ཆུབ་སེམས་དཔའ་རབ་ཏུ་བྱུང་བ་ནི་གལ་ཏེ་རྩ་བའི་ཉེས་པ་བཞི་པོ་ཐམས་ཅད་བྱུང་ [34b.5]བར་གྱུར་ན་ཡང་ཐབས་ལ་མཁས་པ་དེས་སེལ་བར་བྱེད་ན། རིགས་ཀྱི་བུ་ང་ནི་བྱང་ཆུབ་སེམས་དཔའ་ལ་ཉེས་པ་མེད་ཅེས་སྨྲའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པས་འདི་སྐད་ཅེས་གསོལ་ཏོ། ། [34b.6]བཙུན་པ་བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ནོངས་པ་དང་བཅས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟར་བྱང་ཆུབ་སེམས་དཔའ་སོ་སོར་ཐར་པའི་བསླབ་པ་ལ་སློབ་པར་བྱེད་པ་ན་བསྐལ་པ་འབུམ་གྱི་བར་དུ་རྩ་བ་དང་འབྲས་བུ་ཟ་ [34b.7]བར་བྱེད་ཅིང་སེམས་ཅན་ཐམས་ཅད་ཀྱི་ལེགས་པར་སྨྲས་པ་དང་། ཉེས་པར་སྨྲས་སོ་ཅོག་བཟོད་པར་བྱེད་དུ་ཟིན་ཀྱང་། ཉན་ཐོས་དང་། རང་སངས་རྒྱས་དང་ལྡན་པའི་ཡིད་ལ་བྱེད་པ་དག་གིས་གནས་པར་གྱུར་ན། རིགས་ཀྱི་བུ་དེ་ནི་བྱང་ཆུབ་སེམས་དཔའི་རྩ་བའི་ཉེས་པ་ལྕི་ [35a] [35a.1]བ་ཞེས་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཉན་ཐོས་ཀྱི་ཐེག་པ་པའི་གང་ཟག་རྩ་བའི་ཉེས་པ་བྱུང་བར་གྱུར་པ་ནི་ཕུང་པོ་དང་། ཁམས་དང་། སྐྱེ་མཆེད་དེ་དག་ཉིད་ཀྱིས་ཡོངས་སུ་མྱ་ངན་ལས་འདའ་བར་འགྱུར་བའི་སྐལ་བ་མེད་པ་དེ་བཞིན་དུ་བྱང་ཆུབ་སེམས་དཔའ་ [35a.2]ཡང་ཉན་ཐོས་དང་། རང་སངས་རྒྱས་དང་ལྡན་པའི་ཡིད་ལ་བྱེད་པ་དག་མ་བཤགས་མ་སྤངས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་སྐལ་བ་མེད་ཅིང་སངས་རྒྱས་ཀྱི་ས་འཐོབ་པར་འགྱུར་བའི་སྐལ་པ་མེད་དེ་དེ་ནི་གནས་མེད་ [35a.3]དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་སྟོན་པ་ལགས་ཏེ། མི་མཁྱེན་པ་འམ། མ་གཟིགས་པ་འམ། ཐུགས་སུ་མ་ཆུད་པ་འམ། མངོན་ [35a.4]སུམ་དུ་མ་མཛད་པ་ཅུང་ཟད་མི་མངའ་ལགས་མོད་ཀྱི། འོན་ཀྱང་དེ་བཞིན་གཤེགས་པས་འདི་སྐད་ཅེས་དགེ་སློང་གིས་ཉེས་པ་བྱུང་བ་མཐོང་ན་བཅབ་པར་མི་བྱ་བར་ཚངས་པ་མཚུངས་པར་སྤྱོད་པ་གཞན་དག་གམ། དེ་བཞིན་གཤེགས་པའི་སྤྱན་སྔར་སྨྲོས་ཤིག་ཅེས་བཀའ་སྩལ་ [35a.5]པས། བཙུན་པ་བཅོམ་ལྡན་འདས་བདག་མཉན་ཡོད་ཀྱི་གྲོང་ཁྱེར་ཆེན་པོ་འདིར་མཐར་ཆགས་སུ་བསོད་སྙོམས་ཀྱི་སླད་དུ་མཆི་བ་ན། གྲོང་ཁྱེར་གཞན་ཞིག་ན་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་ཞེས་བགྱི་བ་ཁྲིའི་སྟེང་ན་བུད་མེད་ཞིག་དང་ལྷན་ཅིག་མཆིས་པ་ [35a.6]མཐོང་བ་དེ་བདག་བྱམས་པ་དང་ལྡན་པ་དང་། ནོངས་པ་མ་མཆིས་པའི་སེམས་ཀྱིས་བཅོམ་ལྡན་འདས་ལ་གསོལ་ལགས་སོ། །ཚེ་དང་ལྡན་པ་ཀུན་དགའ་བོས་ཚིག་འདི་སྐད་ཅེས་གསོལ་ནས་རིང་པོ་མ་ལོན་པར་དེ་ནས་དེའི་མོད་ལ་ས་ཆེན་པོ་འདི་རྣམ་པ་དྲུག་ཏུ་རབ་ཏུ་གཡོས་པར་ [35a.7]གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོས་བཅོམ་ལྡན་འདས་ཀྱི་སྤྱན་སྔར་སྟེང་གི་བར་སྣང་ལ་ཏ་ལ་བདུན་སྲིད་ཙམ་དུ་འཕགས་ཏེ་འདུག་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་འདི་ཇི་སྙམ་དུ་སེམས། [35b] [35b.1]ཉེས་པའི་ཆོས་དང་ལྡན་པ་བར་སྣང་ལ་འདུག་པར་ནུས་སྙམ་འམ། ཀུན་དགའ་བོས་སྨྲས་པ། རིགས་ཀྱི་བུ་དེ་ནི་མི་ནུས་སོ། །བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོས་སྨྲས་པ། ཚེ་དང་ལྡན་པ་ཀུན་དགའ་བོ་འོན་ཀྱང་དེ་བཞིན་གཤེགས་པ་མངོན་དུ་གྱུར་པ་འདི་ལ་ [35b.2]ཇི་ལྟར་ན་བྱང་ཆུབ་སེམས་དཔའ་ཉེས་པའི་ཆོས་དང་ལྡན་པ་དྲིས་ཤིག །དེ་ནས་ཚེ་དང་ལྡན་པ་ཀུན་དགའ་བོ་ཡུལ་ཡུལ་པོར་གྱུར་ནས་བཅོམ་ལྡན་འདས་ཀྱི་ཞབས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་གཙོ་བོ་ཆེན་ [35b.3]པོ་འདི་ལྟ་བུ་ལ་ནོངས་པ་ཡོངས་སུ་གླེངས་པ་གང་ལགས་པའི་ནོངས་པ་ལ་ནོངས་པར་འཆགས་ཤིང་མཆིས་ན། བཙུན་པ་བཅོམ་ལྡན་འདས་ཀྱིས་བདག་གི་ནོངས་པ་ལ་ནོངས་པར་བཤགས་པ་གང་ལགས་པ་དེ་ནོངས་པ་ལ་ནོངས་པར་ཡོངས་སུ་གཟུང་དུ་གསོལ། དེ་ནས་བཅོམ་ལྡན་ [35b.4]འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཐེག་པ་ཆེན་པོ་ལ་ཡང་དག་པར་ཞུགས་པའི་སྐྱེས་བུ་དམ་པ་དག་ལ་ཉེས་པའི་འདུ་ཤེས་མ་སྐྱེད་ཅིག །ཀུན་དགའ་བོ་འདི་ལྟ་སྟེ། དཔེར་ན་ཉན་ཐོས་ཀྱི་ཐེག་པ་པའི་གང་ཟག་གཅིག་པུ་ཟླ་ [35b.5]མེད་པར་ཞི་གནས་ཀྱི་གནས་པས་གནས་པར་བྱེད་པ་ནི་ཟག་པ་ཟད་པ་མངོན་སུམ་དུ་བྱ་བ་ལ་བར་ཆད་མེད་པར་འགྱུར་བ་དེ་བཞིན་དུ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཐམས་ཅད་མཁྱེན་པ་ཉིད་ཀྱི་སེམས་དང་ལྡན་པ་བུད་མེད་ཀྱི་འཁོར་དམ་ [35b.6]པའི་ནང་ན་འདུག་ཅིང་དགའ་བ་དང་། རྩེ་བ་དང་། དགའ་མགུར་སྤྱོད་པར་བྱེད་པ་ཡང་ཐམས་ཅད་མཁྱེན་པ་ཉིད་ལ་བར་དུ་གཅོད་པ་མེད་པར་རིག་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ནི་དཀོན་མཆོག་གསུམ་མོ། ། [35b.7]གསུམ་གང་ཞེ་ན། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མ་བཀོད་པའི་གཡོག་འཁོར་གང་ཡིན་པ་དེ་མི་འཛིན་པའི་ཕྱིར་རོ། །ཀུན་དགའ་བོ་གང་གི་ཚེ་ཁྱོད་ཀྱིས་བྱང་ཆུབ་ [36a] [36a.1]སེམས་དཔའི་ཐེག་པ་པའི་རིགས་ཀྱི་བུ་འམ་རིགས་ཀྱི་བུ་མོ་ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་འདོད་པའི་ཡོན་ཏན་ལྔ་པོ་དག་གིས་རྩེ་བ་དང་། དགའ་བ་དང་། དགའ་མགུར་སྤྱོད་པར་བྱེད་པ་མཐོང་ན་ཀུན་དགའ་བོ་ཁྱོད་ཀྱིས་སྐྱེས་བུ་དམ་པ་དེ་ནི་དེ་བཞིན་ [36a.2]གཤེགས་པ་ལྟ་བུའི་དབང་པོ་ལྔ་དང་ལྡན་ཞིང་གནས་པ་ཡིན་པར་ཤེས་པར་བྱའོ། །ཀུན་དགའ་བོ་གང་གི་ཕྱིར་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་ཁྲི་གཅིག་གི་སྟེང་ན་བུད་མེད་དང་ལྷན་ཅིག་འདུག་པར་གྱུར་པ་ཡང་ཉོན་ཅིག །ཀུན་དགའ་བོ་བུད་མེད་དེ་ནི་འདས་པའི་དུས་ན་ཚེ་ [36a.3]རབས་ལྔ་བརྒྱར་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོའི་ཆུང་མར་གྱུར་ཏེ། དེ་སྔོན་གྱི་ཚུལ་བཞིན་མ་ཡིན་པ་དེ་ཉིད་ཀྱིས་རིགས་ཀྱི་བུ་དེ་ལ་ལྷག་པར་སེམས་ཀྱིས་འབྲེལ་པར་གྱུར་ཀྱང་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་དེའི་དཔལ་དང་། གཟི་བརྗིད་ [36a.4]དང་། ཚུལ་ཁྲིམས་ཀྱི་སྟོབས་བསྐྱེད་པ་མཐོང་ནས། གནས་ངན་ལེན་གྱི་ཚིག་བརྗོད་པར་མ་ནུས་ནས་དེ་གཅིག་པུ་དབེན་པར་འདུག་པ་ན་འདི་ལྟ་བུའི་སེམས་སྐྱེས་པར་གྱུར་ཏེ། གལ་ཏེ་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་བདག་དང་ལྷན་ཅིག་ཁྲི་གཅིག་གི་སྟེང་ན་ [36a.5]འདུག་པར་གྱུར་ན་བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོས་སྲིང་མོ་དེའི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་དེ་ཉིད་ཀྱི་མཚན་མོ་འདས་པ་དང་སྔ་ [36a.6]དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བགོས་ཏེ་ལྷུང་བཟེད་ཐོགས་ནས་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་སོ། །དེ་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་རྒྱུ་བ་ན་སྲིང་མོ་དེའི་ཁྱིམ་ག་ལ་བ་དེར་ཞུགས་ནས་ནང་གི་སའི་ཁམས་གང་ཡིན་པ་ [36a.7]དང་། ཕྱི་རོལ་གྱི་སའི་ཁམས་གང་ཡིན་པའི་སའི་ཁམས་དེ་དག་ནི་གཅིག་པ་ཡིན་པའི་ཆོས་ཀྱི་སྒོ་འདིས་དེས་ས་དང་མཉམ་པའི་སེམས་ཀྱིས་ལག་པ་གཡས་པས་སྲིང་མོ་དེ་བཟུང་སྟེ་ཁྲི་གཅིག་ལ་འཁོད་དོ། །འཁོད་མ་ཐག་ཏུ་དེས་དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། ། [36b] [36b.1]སངས་རྒྱས་འདོད་པ་བསྔགས་མི་མཛད། །དེ་ནི་བྱིས་པའི་སྤྱོད་ཡུལ་ཡིན། །འདོད་ལ་སྲེད་པ་སྤངས་བྱས་ན། །མི་མཆོག་སངས་རྒྱས་རྣམས་སུ་འགྱུར། །ཀུན་དགའ་བོ་དེ་ནས་སྲིང་མོ་དེས་ཚིགས་སུ་བཅད་པ་དེ་ཐོས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། ཁྲི་དེ་ལས་ [36b.2]བབས་ནས་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོའི་རྐང་པ་ལ་གཏུགས་ཏེ། དེའི་ཚེ་ཚིགས་སུ་བཅད་པ་འདི་སྐད་སྨྲས་སོ། །འདོད་གང་སངས་རྒྱས་སྨད་པ་དག །སླན་ཆད་དོན་དུ་གཉེར་མི་བགྱིད། །འདོད་ལ་སྲེད་པ་སྤངས་བགྱིས་ནས། །མི་མཆོག་སངས་རྒྱས་ [36b.3]གྲུབ་གྱུར་ཅིག །བདག་གི་སེམས་ཀྱིས་གང་བསམས་པའི། །ནོངས་པ་དེ་ནི་ཁྱོད་ལ་འཆགས། །སྲོག་ཆགས་ཀུན་ལ་སྨན་སླད་དུ། །བདག་ནི་བྱང་ཆུབ་འདུན་པ་སྐྱེད། །ཀུན་དགའ་བོ་དེ་ལྟར་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོས་ཐབས་ལ་མཁས་པ་དེས་ [36b.4]སྲིང་མོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྟན། ཡང་དག་པར་གཟེངས་བསྟོད། ཡང་དག་པར་འཛིན་དུ་བཅུག །ཡང་དག་པར་རབ་ཏུ་བཞག་ནས་སྟན་ལས་ལངས་ཏེ་སོང་ངོ་། །ཀུན་དགའ་བོ་དེའི་ལྷག་པའི་བསམ་པའི་ཁྱད་པར་ལ་ལྟོས། ཀུན་ [36b.5]དགའ་བོ་ང་ནི་སྲིང་མོ་དེ་འདི་ནས་ཤི་འཕོས་ནས་བུད་མེད་ཀྱི་ལུས་བསྒྱུར་ཏེ་བསྐལ་པ་གྲངས་མེད་པ་འབུམ་ཕྲག་དགུ་བཅུ་རྩ་དགུ་འདས་པའི་འོག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་ལྡང་བ་དང་བྲལ་བ་ཞེས་བྱ་བར་འགྱུར་ཏེ། འཇིག་རྟེན་ [36b.6]དུ་འབྱུང་བར་འགྱུར་ཞིང་དེས་བྱང་ཆུབ་ཐོབ་པའི་སངས་རྒྱས་ཀྱི་ཞིང་དེ་ན་སེམས་ཅན་མི་དགེ་བའི་ཀུན་ནས་ལྡང་བའི་སེམས་དང་ལྡན་པ་འགའ་ཡང་འབྱུང་བར་མི་འགྱུར་བར་ལུང་སྟོན་ཏོ། །ཀུན་དགའ་བོ་རྣམ་གྲངས་དེས་ཀྱང་འདི་ལྟར་བྱང་ཆུབ་སེམས་དཔའ་ནི་འཁོར་གང་བཟུང་ན་ལོག་པར་ལྟུང་ [36b.7]བའི་ཆོས་སུ་འགྱུར་བ་དེ་འཛིན་པར་མི་བྱེད་པར་རིག་པར་བྱའོ། །དེ་ནས་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་བར་སྣང་དེ་ལས་བབས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ [37a] [37a.1]ལྡན་འདས་བྱང་ཆུབ་སེམས་དཔས་ནི་ཐབས་ལ་མཁས་པ་དང་སྙིང་རྗེ་ཆེན་པོ་ལ་གནས་པར་བགྱི་ལགས་ཏེ། བཙུན་པ་བཅོམ་ལྡན་འདས་འདི་ལ་བདག་ནི་འདི་སྙམ་དུ་གལ་ཏེ་བྱང་ཆུབ་སེམས་དཔས་ནི་སེམས་ཅན་གཅིག་གི་དགེ་བའི་རྩ་བ་ཡང་དག་པར་བསྐྱེད་པའི་སླད་དུ་འདི་ [37a.2]ལྟ་བུའི་ནོངས་པ་འབྱུང་བར་འགྱུར་ཞིང་ནོངས་པ་ཇི་ལྟ་བུ་བྱུང་བས་བསྐལ་པ་འབུམ་གྱི་བར་དུ་སེམས་ཅན་དམྱལ་བ་ཆེན་པོར་སྲེག་པར་འགྱུར་ཡང་། བཙུན་པ་བཅོམ་ལྡན་འདས་བྱང་ཆུབ་སེམས་དཔས་ནི་ནོངས་པ་འབྱུང་བ་དེ་དང་། སེམས་ཅན་དམྱལ་བའི་སྡུག་བསྔལ་དེ་ལ་སྤྲོ་བར་བགྱི་ [37a.3]ལགས་ཀྱི། སེམས་ཅན་གཅིག་པོ་དེའི་དགེ་བའི་རྩ་བ་ཡོངས་སུ་བཏང་བ་ལ་ནི་མ་ལགས་སོ། །སྙམ་དུ་སེམས་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཚོགས་ཅན་རབ་མཆོག་རྒྱལ་པོ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ལེགས་སོ་ལེགས་ [37a.4]སོ། །བྱང་ཆུབ་སེམས་དཔའ་སྙིང་རྗེ་ཆེན་པོ་དེ་ལྟ་བུ་དང་ལྡན་པ་ནི་ཉེས་པའི་ཆོས་དང་ལྡན་པར་ཡང་མི་འགྱུར་ལ། ཉེས་པ་ཐམས་ཅད་སྤོང་བར་ཡང་བྱེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་ངས་མངོན་པར་ཤེས་པའི་ཕྱིར་ཏེ། སྔོན་འདས་པའི་དུས་ན་བསྐལ་པ་གྲངས་མེད་པའི་ཡང་ [37a.5]ཆེས་གྲངས་མེད་པ། རྒྱ་ཆེ་བ། དཔག་ཏུ་མེད་པ། བསམ་གྱིས་མི་ཁྱབ་པ། དེའི་ཕ་རོལ་གྱི་ཡང་ཆེས་ཕ་རོལ་ཏུ་གྱུར་པ་དེའི་ཚེ་དེའི་དུས་ན་བྲམ་ཟེའི་ཁྱེའུ་སྐར་མ་ཞེས་བྱ་བ་ཞིག་བྱུང་བར་གྱུར་ཏེ། དེས་ལོ་བཞི་ཁྲི་ཉིས་སྟོང་གི་བར་དུ་ནགས་འདབ་དག་ཏུ་ཚངས་པར་སྤྱོད་པ་སྤྱད་པ་ [37a.6]བྱས་ནས་དེས་ལོ་བཞི་ཁྲི་ཉིས་སྟོང་པོ་དེ་དག་འདས་པ་དང་རྒྱལ་པོའི་ཕོ་བྲང་ལེགས་འབྱོར་ཅེས་བྱ་བར་ཞུགས་སོ། །དེས་གྲོང་ཁྱེར་ཆེན་པོ་དེར་ཞུགས་པ་ན་ཚོང་དཔོན་གྱི་བུ་མོ་ཞིག་གིས་བྲམ་ཟེའི་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་དེ་མཐོང་ནས་དེ་འདོད་པ་ལ་འདོད་ [37a.7]ཆགས་ཀྱིས་ཀུན་ནས་དཀྲིས་པའི་སེམས་ཀྱིས་བྲམ་ཟེའི་ཁྱེའུ་དེའི་མདུན་དུ་རབ་ཏུ་བརྒྱུགས་ཏེ་རྐང་པ་ལ་གཏུགས་སོ། །རིགས་ཀྱི་བུ་དེ་ནས་བྲམ་ཟེའི་ཁྱེའུ་སྐར་མ་དེས་བུ་མོ་དེ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་ཅི་འདོད་དེས་དེ་ལ་འདི་སྐད་ཅེས་སྨྲས་སོ། །བྲམ་ཟེའི་ [37b] [37b.1]ཁྱེའུ་ཁོ་མོ་ནི་ཁྱོད་འཚལ་ལོ། །དེས་དེ་ལ་འདི་སྐད་ཅེས་སྨྲས་སོ། །སྲིང་མོ་ཁོ་བོ་ནི་འདོད་པ་རྣམས་དོན་དུ་གཉེར་བ་མ་ཡིན་གྱི། ཁོ་བོ་ནི་ཚངས་པར་སྤྱོད་པ་ཡིན་ནོ། །དེས་དེ་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ་གལ་ཏེ་ཁྱོད་དང་ལྷན་ཅིག་ཏུ་འགྲོགས་པར་མི་འགྱུར་བ་ལྟ་ན་ [37b.2]བདག་འགུམ་པར་འགྱུར་ལགས་སོ། །དེ་ནས་བྲམ་ཟེའི་ཁྱེའུ་སྐར་མ་འདི་སྙམ་དུ་སེམས་པར་གྱུར་ཏེ། བདག་གིས་ལོ་བཞི་ཁྲི་ཉིས་སྟོང་གི་བར་དུ་ཚངས་པར་སྤྱོད་པ་སྤྱད་ནས་དེང་བརྟུལ་ཞུགས་གཞིག་པ་འདི་ནི་བདག་གི་ཚུལ་དང་འཐུན་པ་མ་ཡིན་ནོ་སྙམ་ནས། དེས་བུ་མོ་དེ་མཐུས་ [37b.3]སྤངས་ཏེ་བོར་ནས་གོམ་པ་བདུན་བོར་བ་དང་། དེའི་གོམ་པ་བདུན་པ་ལ་གནས་པའི་ཚེ་སྙིང་རྗེ་སྐྱེས་པར་གྱུར་ནས་འདི་ལྟར་བདག་གིས་བརྟུལ་ཞུགས་བཤིག་སྟེ་སེམས་ཅན་དམྱལ་བར་འགྲོ་བར་གྱུར་ཀྱང་བདག་གིས་སེམས་ཅན་དམྱལ་བའི་སྡུག་བསྔལ་མྱོང་བར་འགྱུར་བ་དེ་བཟོད་པར་བྱ་ [37b.4]ཞིང་བུ་མོ་འདི་བདེ་བར་འགྱུར་བ་དང་། འཆི་བའི་དུས་བྱེད་པར་མི་འགྱུར་བར་བྱ་གོར་མ་ཆག་སྙམ་མོ། །རིགས་ཀྱི་བུ་དེ་ནས་བྲམ་ཟེའི་ཁྱེའུ་སྐར་མ་དེ་དེ་ནས་ཕྱིར་ལོག་སྟེ། ལག་པ་གཡས་པས་བུ་མོ་དེ་བཟུང་སྟེ། དེ་ལ་འདི་སྐད་ཅེས་སྨྲས་སོ། །བཟང་མོ་ལོངས་ཤིག་དང་ [37b.5]ཁོ་བོས་ཁྱོད་ཅི་འདོད་པ་བཞིན་བྱའོ། །དེ་ནས་བྲམ་ཟེའི་ཁྱེའུ་སྐར་མ་དེ་ལོ་བཅུ་གཉིས་ཀྱི་བར་དུ་དེའི་ཁྱིམ་ན་གནས་ནས་ཡང་མངོན་པར་བྱུང་སྟེ། ཚངས་པའི་གནས་པ་བཞི་བསྐྱེད་ནས་དེ་ནས་ཤི་འཕོས་མ་ཐག་ཏུ་ཚངས་པའི་འཇིག་རྟེན་དུ་སྐྱེས་པར་གྱུར་ཏོ། །རིགས་ཀྱི་བུ་དེའི་ [37b.6]ཚེ་དེའི་དུས་ན་བྲམ་ཟེའི་ཁྱེའུ་སྐར་མ་ཞེས་བྱ་བར་གྱུར་པ་དེ་གཞན་ཡིན་སྙམ་དུ་ཁྱོད་ཡིད་གཉིས་དང་ཐེ་ཚོམ་ཟ་བར་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་བྲམ་ཟེའི་ཁྱེའུ་སྐར་མ་ཞེས་བྱ་བ་དེར་གྱུར་ཏོ། །ཤཱཀྱའི་བུ་མོ་ས་འཚོ་མ་ནི་དེའི་ཚེ་དེའི་ [37b.7]དུས་ན་ཚོང་དཔོན་གྱི་བུ་མོར་གྱུར་ཏོ། །རིགས་ཀྱི་བུ་ངས་སྙིང་རྗེ་ཆེན་པོ་དང་ལྡན་པའི་སེམས་བསྐྱེད་པ་དེས་ཅུང་ཟད་ཙམ་ཞིག་འདོད་པ་དང་ལྡན་པར་བྱས་པས་ཀྱང་བསྐལ་པ་ཁྲིར་འཁོར་བ་བསྙིལ་ཅིང་སྤངས་པར་འགྱུར་རོ། །རིགས་ཀྱི་བུ་སེམས་ཅན་གཞན་དག་གི་སེམས་ཅན་དམྱལ་ [38a] [38a.1]བར་འགྲོ་བར་འགྱུར་བའི་ལས་གང་ཡིན་པ་དེ་ཡང་བྱང་ཆུབ་སེམས་དཔའ་ཐབས་ལ་མཁས་པ་ལ་ཚངས་པའི་འཇིག་རྟེན་དུ་སྐྱེ་བར་འགྱུར་བ་ལ་ལྟོས། དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ [38a.2]ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་དགེ་སློང་ཤཱ་རིའི་བུ་དང་། མཽད་གལ་གྱི་བུ་དག་ཐབས་ལ་མཁས་པ་ཡིན་པར་གྱུར་ན་ནི་དགེ་སློང་ཀོ་ཀ་ལི་ཀ་ཡང་སེམས་ཅན་དམྱལ་བར་འགྲོ་བར་མི་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་ངས་མངོན་པར་ཤེས་པའི་ཕྱིར་ཏེ། སྔོན་ [38a.3]འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་གསུང་རབ་ལ་དགེ་སློང་དྲི་མེད་ཅེས་བྱ་བ་ཆོས་སྨྲ་བ་ཞིག་བྱུང་བར་གྱུར་ཏོ། །དེ་དགོན་པའི་ཕུག་ཞིག་ན་གནས་སོ། །དེ་དང་ཧ་ཅང་ཡང་མི་རིང་བ་ན་དྲང་སྲོང་ལྔ་བརྒྱ་ཞིག་ [38a.4]ཀྱང་གནས་ཏེ། དེའི་ཚེ་ན་དུས་མ་ཡིན་པར་སྤྲིན་ཆེན་པོ་འདུས་ཤིང་ཆར་ཆེན་པོ་བབས་པར་གྱུར་ཏོ། །དེ་ནས་བུད་མེད་གཉིས་ཤིག་གྲོང་བར་གྱི་ལམ་ན་འདུག་པ་དེ་གཉིས་ཆར་པ་དེ་བསྐྱབ་པའི་ཕྱིར་དགེ་སློང་དྲི་མེད་གནས་པའི་ཕུག་ཏུ་ཞུགས་ཏེ། ཕུག་དེ་ནས་ཕྱིར་བྱུང་བ་དང་། [38a.5]དྲང་སྲོང་ལྔ་བརྒྱ་ཙམ་པོ་དེ་དག་གིས་བུད་མེད་དེ་གཉིས་དགེ་སློང་དྲི་མེད་ཀྱི་ཕུག་ནས་ཕྱིར་བྱུང་བ་མཐོང་ངོ་། །མཐོང་ནས་ཀྱང་དྲང་སྲོང་ལྔ་བརྒྱ་ཙམ་པོ་དེ་དག་འདི་སྙམ་དུ་ཨེ་མའོ་དགེ་སློང་དྲི་མེད་འདི་ནི་སྡིག་པ་འདོད་པ་མི་ཚངས་པར་སྤྱོད་པ་ཡིན་ནོ་སྙམ་ནས་ཐབ་དང་ཞེ་སྡང་གི་འདུ་ཤེས་ [38a.6]སྐྱེས་པར་གྱུར་ཏོ། །དེ་ནས་དགེ་སློང་དྲི་མེད་ཀྱིས་དྲང་སྲོང་ལྔ་བརྒྱ་ཙམ་པོ་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་དེའི་ཚེ་སྟེང་གི་བར་སྣང་གི་ནམ་མཁའ་ལ་ཏ་ལ་བདུན་སྲིད་ཙམ་དུ་མངོན་པར་འཕགས་ཏེ་འདུག་པ་དྲང་སྲོང་དེ་དག་གིས་མཐོང་ནས་དེ་དག་འདི་ [38a.7]སྙམ་དུ་སེམས་ཏེ། བདག་ཅག་གི་བསྟན་བཅོས་དག་ལས་མི་ཚངས་པར་སྤྱོད་པས་ནི་སྟེང་གི་བར་སྣང་ལ་མངོན་པར་འཕགས་ཏེ་འདུག་པར་མི་ནུས་སོ་ཞེས་འབྱུང་སྙམ་ནས། དེ་དག་གིས་དེའི་མོད་ལ་དགེ་སློང་དྲི་མེད་ཀྱི་རྐང་པ་ལ་ཡན་ལག་ལྔས་གཏུགས་ཏེ་ཉེས་པ་ལ་ཉེས་ [38b] [38b.1]པར་བཤགས་སོ། །རིགས་ཀྱི་བུ་གལ་ཏེ་དགེ་སློང་དྲི་མེད་དེ་དེའི་ཚེ་སྟེང་གི་བར་སྣང་ལ་མངོན་པར་འཕགས་ཏེ་འདུག་པར་མ་གྱུར་ན་ནི་དྲང་སྲོང་ལྔ་བརྒྱ་ཙམ་པོ་དེ་དག་རང་རང་གི་ལུས་དེ་ཉིད་ཀྱིས་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་འདི་ཇི་སྙམ་དུ་སེམས། [38b.2]དེའི་ཚེ་དེའི་དུས་ན་དགེ་སློང་དྲི་མེད་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་ཡིད་གཉིས་དང་ཐེ་ཚོམ་ཟ་བར་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་བྱམས་པ་འདི་དེའི་ཚེ་དེའི་དུས་ན་དགེ་སློང་དྲི་མེད་ཅེས་བྱ་བ་དེར་གྱུར་ཏོ། །རིགས་ [38b.3]ཀྱི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་གལ་ཏེ་དགེ་སློང་ཤཱ་རིའི་བུ་དང་། མཽད་གལ་གྱི་བུ་གཉིས་དེའི་ཚེ་སྟེང་གི་བར་སྣང་ལ་མངོན་པར་འཕགས་ཏེ་འདུག་པར་གྱུར་ན་ནི་དགེ་སློང་ཀོ་ཀ་ལི་ཀ་ཡང་སེམས་ཅན་དམྱལ་བར་འགྲོ་བར་མི་འགྱུར་བར་རིག་པར་བྱའོ། །རིགས་ཀྱི་བུ་རྣམ་ [38b.4]གྲངས་དེས་ཀྱང་ཁྱེད་ཀྱིས་འདི་ལྟར་གང་དུ་བྱང་ཆུབ་སེམས་དཔའ་ཐབས་ལ་མཁས་པའི་ཡེ་ཤེས་འཇུག་པར་འགྱུར་བ་དེ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་མ་ཡིན་པར་རིག་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་སྨད་འཚོང་མ་སྒྱུ་རྩལ་དྲུག་ཅུ་རྩ་བཞིའི་ [38b.5]བྱ་བ་ཤེས་ཤིང་ལེགས་པར་ལོབས་པ་ནི་དེའི་འོག་ཏུ་ནོར་འདོད་པའི་ཕྱིར་སྐྱེས་བུ་གཞན་གྱི་དྲུང་དུ་ཅི་ནས་ཀྱང་བདག་ཉིད་ཡོངས་སུ་གཏང་ཞིང་དགའ་བ་སྟོན་པ་དང་། ཇི་སྲིད་དུ་སྐྱེས་བུ་དེ་ལས་དོན་ཐམས་ཅད་མ་བསྒྲུབས་ཀྱི་བར་དུ་དེ་ལ་ཡོ་བྱད་ཐམས་ཅད་ཀྱང་སྲི་བར་མི་བྱེད་པ་དེ་ [38b.6]ལྟ་དེ་ལྟར་གནས་པར་བྱེད་དོ། །དེ་ནས་དོན་བསྒྲུབས་ཟིན་པའི་འོག་ཏུ་ནི་དེ་ལ་མི་ལྟ་མི་སེམས་པར་སྤོང་བར་བྱེད་ཅིང་དེ་གཞི་དེ་ལས་འགྱོད་པའི་སེམས་གཅིག་ཙམ་ཡང་འབྱུང་བར་མི་འགྱུར་བ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་ཐབས་ལ་མཁས་པ་ཡང་ཐབས་ [38b.7]ལ་མཁས་པ་དེས་སེམས་ཅན་འདི་དག་ཡོངས་སུ་སྨིན་པར་བྱའོ་ཞེས་བྱ་བར་ཤེས་ཏེ། རྣམ་གྲངས་དེས་སེམས་ཅན་དེ་དག་གི་བསམ་པ་ཇི་ལྟ་བ་བཞིན་དུ་དྲུང་དུ་སྦྱོར་བར་བྱེད་ཅིང་དེ་དག་ལ་ཡོ་བྱད་ཐམས་ཅད་མི་སྲི་བར་བྱེད་དོ། །སེམས་ཅན་རྣམས་ཀྱི་དགེ་བ་ལ་དགའ་ [39a] [39a.1]བས་བདག་ཉིད་ཀྱང་ཡོངས་སུ་གཏོང་བར་བྱེད་ཀྱི་ཡོ་བྱད་ལ་དགའ་བས་ནི་མ་ཡིན་ནོ། །གང་གི་ཚེ་ཀྱེ་མ་སེམས་ཅན་འདི་དག་ནི་དགེ་བའི་རྩ་བ་བྱས་པར་གྱུར་པ་དག་སྟེ། འདི་དག་གིས་ཕྱིས་ཡོངས་སུ་ཉམས་པར་བྱེད་མི་ནུས་པར་ཤེས་ན་ནི་དེའི་འོག་ཏུ་འདོད་པའི་ [39a.2]དགའ་བ་དང་རྩེད་མོ་ཐམས་ཅད་ལ་མི་ལྟ་བར་སྤངས་ཏེ་འགྲོ་ཞིང་དེ་དེ་དང་འབྲེལ་པའི་སེམས་ལ་གནས་པར་མི་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་མེས་ཡོངས་སུ་གདུངས་པའི་ས་བོན་རྣམས་ནི་ཁ་དོག་ཡོངས་སུ་ཉམས་པ་མེད་པ་ལ་མྱུ་གུ་འབྱུང་བའི་སྐལ་བ་མེད་པ་དེ་བཞིན་ [39a.3]དུ་རིགས་ཀྱི་བུ་བྱང་ཆུབ་སེམས་དཔའི་ཉོན་མོངས་པ་རྣམས་ཀྱང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། བདག་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་གདུངས་ན་དེ་འདོད་པའི་དགའ་བ་ཐམས་ཅད་ལ་ཡོངས་སུ་སྤྱོད་པ་བྱེད་ཀྱང་། [39a.4]ལོག་པར་ལྟུང་བར་འགྲོ་བའི་ཀུན་ནས་ཉོན་མོངས་པ་ཡོངས་སུ་འཛིན་པར་མི་བྱེད་ལ། སངས་རྒྱས་ཀྱི་ཁ་དོག་ལས་ཡོངས་སུ་ཉམས་པར་ཡང་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་དུད་འགྲོའི་སྐྱེ་གནས་སུ་སོང་བའི་སྲོག་ཆགས་བུང་བ་ནི་མེ་ཏོག་ཐམས་ཅད་ལས་དྲི་ [39a.5]སྣོམ་ཞིང་རོ་མྱོང་བར་བྱེད་ཀྱང་གང་ལ་ཡང་རྟག་པའི་འདུ་ཤེས་སྒོམ་པར་མི་བྱེད། གནས་ཀྱི་སྲེད་པ་སྐྱེད་པར་མི་བྱེད་ཅིང་དེ་དག་ལས་དྲི་དང་། འདབ་མ་དང་། སྡོང་བུ་དང་། མེ་ཏོག་འཕྲོག་པར་མི་བྱེད་པ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་ཐབས་ལ་མཁས་པ་ཡང་ [39a.6]སེམས་ཅན་ཡོངས་སུ་སྨིན་པར་བྱ་བའི་ཕྱིར་འདོད་པའི་དགའ་བ་དང་རྩེད་མོ་ཐམས་ཅད་ལ་ཡོངས་སུ་ལོངས་སྤྱོད་པར་བྱེད་ཀྱང་དེ་དག་ལ་རྟག་པའི་འདུ་ཤེས་སྒོམ་པར་ཡང་མི་བྱེད། གནས་ཀྱི་སྲེད་པ་སྐྱེད་པར་ཡང་མི་བྱེད་ལ། བདག་ཀྱང་རྨས་པར་མི་འགྱུར། གཞན་ཡང་ [39a.7]རྨས་པར་མི་འགྱུར་བར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་ཉ་པ་ཤིན་ཏུ་ལེགས་པར་བསླབས་པ་ནི་སྲད་བུ་གཅིག་ལ་གཟན་མ་བཏགས་ཏེ་མཆིལ་པ་བྱས་ནས་མཚོ་ཆེན་པོའི་ནང་དུ་འདོར་རོ། །དེ་སྲད་བུ་ལེགས་པར་བསྲུངས་པ་གཅིག་པོ་དེས་གང་གི་ཚེ་འདོད་པ་དེའི་ཚེ་ན་མཚོ་ [39b] [39b.1]ཆེན་པོ་ནས་མཆིལ་པ་དེ་འདྲེན་པར་བྱེད་པ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་ཐབས་ལ་མཁས་པ་ཡང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། བདག་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སེམས་ཐམས་ཅད་མཁྱེན་ [39b.2]པ་ཉིད་ལ་བརྟན་པར་གཏད་པས་འདོད་པའི་འདམ་ཆེན་པོར་འཇུག་པར་བྱེད་ཀྱང་དེ་ཐམས་ཅད་མཁྱེན་པ་ཉིད་ཀྱི་སེམས་ལེགས་པར་བསྲུངས་པ་དེས་གང་གི་ཚེ་འདོད་པ་དེའི་ཚེ་ན་འདོད་པའི་ཁམས་སྤངས་ཏེ་ཚངས་པའི་འཇིག་རྟེན་དུ་སྐྱེ་བར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་སྐྱེས་ [39b.3]བུ་རིག་སྔགས་དང་། གསང་སྔགས་འཆང་བ་ནི་རྒྱལ་པོའི་མི་རྣམས་ཀྱིས་བཟུང་སྟེ་ཞགས་པ་ལྔའི་ཆིངས་མས་བཅིངས་པར་གྱུར་ཀྱང་དེ་ནི་གང་གི་ཚེ་འགྲོ་བར་འདོད་པ་དེའི་ཚེ་རིག་སྔགས་དང་། གསང་སྔགས་ཀྱི་སྟོབས་བསྐྱེད་པ་གཅིག་གིས་ཆིངས་མ་དེ་དག་ཐམས་ཅད་བཅད་ [39b.4]ནས་གང་དུ་འགྲོ་བར་འདོད་པ་དེར་འགྲོ་བར་བྱེད་པ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་ཐབས་ལ་མཁས་པ་ཡང་སེམས་ཅན་ཡོངས་སུ་སྨིན་པར་བྱ་བའི་ཕྱིར་གང་གི་ཚེ་འདོད་པའི་ཡོན་ཏན་ལྔ་པོ་དེ་དག་གི་དགའ་བ་མྱོང་བར་བྱེད་ཅིང་དེ་དག་དང་འདྲེས་པར་གནས་པར་བྱེད་ཀྱང་ [39b.5]དེ་གང་གི་ཚེ་འདོད་པ་དེའི་ཚེ་ཤེས་རབ་ཀྱི་རིག་སྔགས་དང་། གསང་སྔགས་ཀྱི་སྟོབས་བསྐྱེད་པ་དང་། ཐམས་ཅད་མཁྱེན་པ་ཉིད་ཀྱི་སེམས་ལེགས་པར་བསྲུངས་པ་གཅིག་གིས་འདོད་པའི་ཡོན་ཏན་ལྔའི་ཆིངས་མ་དེ་དག་ཐམས་ཅད་རབ་ཏུ་བཅད་དེ། དེ་ནས་ཤི་འཕོས་ [39b.6]ནས་ཚངས་པའི་འཇིག་རྟེན་དུ་སྐྱེ་བར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན་འཕོང་གི་སློབ་དཔོན་ལེགས་པར་བསླབས་པ་ཞིག་རལ་གྲི་རྣོན་པོ་རས་བཅོས་བུས་དཀྲིས་པ་ཞིག་ཐོགས་ཏེ་འདྲོན་པ་མང་པོ་སྒྲོལ་བར་བྱེད་པ་དེ་ན་སེམས་ཅན་མི་མཁས་པ་འཕོང་གི་ཤེས་པའི་བྱ་བ་ [39b.7]མི་ཤེས་པ་གང་དག་ཡིན་པ་དེ་དག་ནི་འཕོང་གི་སློབ་དཔོན་དེ་ལ་སྙིང་རྗེ་བ་དང་། བརྙས་པའི་འདུ་ཤེས་སྐྱེད་པར་བྱེད་ཅིང་། ཚིག་འདི་སྐད་ཅེས་གཞུ་ཡང་མེད། རལ་གྲི་ཡང་མེད། དོང་པ་ཡང་མེད། འཁོར་ཀྱང་མེད་པ་འདིས་ནི་འདྲོན་པ་འདི་དག་བསྒྲལ་བར་མི་ནུས་ [40a] [40a.1]ཏེ། འདིས་ནི་བདག་ཉིད་ཀྱང་ཐར་པར་བྱེད་མི་ནུས་ན་འདྲོན་པ་ཐམས་ཅད་བསྒྲལ་བ་དང་། ཆོམ་རྐུན་པའི་སྡེ་ཕམ་པར་བྱ་བ་ལྟ་ཅི་སྨོས་ཏེ། དེ་ནི་གནས་མེད་པས་འདི་ནི་ཚུལ་མ་ཡིན་པས་འཆི་བར་འགྱུར་རོ་ཞེས་ཀྱང་ཟེར་བར་འགྱུར་ལ། དེ་ནས་འཕོང་གི་སློབ་ [40a.2]དཔོན་དེ་འབྲོག་དགོན་པར་སོན་ཏེ་ཆོམ་རྐུན་པའི་ཚོགས་ལྷགས་པར་གྱུར་པ་ན། མདའ་གཞུ་ཐོགས་ཏེ་གོ་ཆ་སྲ་བ་བགོས་ནས་མཚོན་ཆ་དེ་གཟས་ཏེ་ཆོམ་རྐུན་པ་རྣམས་ལ་འདེབས་པར་བྱེད་ཅིང་། དེས་ཆོམ་རྐུན་པ་དེ་དག་ཐམས་ཅད་སྲོག་དང་ཕྲལ་ནས་ཡང་མཚོན་ཆ་ལག་ཏུ་ལེན་པར་ [40a.3]བྱེད་པ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་ཐབས་ལ་མཁས་པ་ཡང་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་མཚོན་ཆ་ལེགས་པར་ཐོགས་ཏེ། ཐབས་ལ་མཁས་པས་འདོད་པའི་ཡོན་ཏན་ལྔ་པོ་དག་གིས་དགའ་བ་དང་། རྩེ་བ་དང་། [40a.4]དགའ་མགུར་སྤྱོད་པར་བྱེད་པ་དེ་ན་ཉན་ཐོས་ཀྱི་ཐེག་པ་པ་གང་དག་དེའི་ཐབས་ལ་མཁས་པའི་ཤེས་པ་དེ་ཁོང་དུ་མ་ཆུད་པ་དེ་དག་གིས་དེ་མཐོང་བའི་ཚེ་དེ་དག་དེ་ལ་མ་དད་པ་དང་། སྙིང་རྗེ་སྐྱེད་པར་བྱེད་ཅིང་ཚིག་འདི་སྐད་ཅེས་འདི་ལྟར་བག་མེད་པའི་གནས་པས་གནས་པ་འདིས་ནི་བདག་ཉིད་ [40a.5]ཀྱང་ཐར་པར་བྱེད་མི་ནུས་ན་སེམས་ཅན་ཐམས་ཅད་བསྒྲལ་བ་ལྟ་ཅི་སྨོས་ཤིང་བདུད་ཀྱི་སྡེ་ཕམ་པར་བྱེད་པར་ལྟ་ག་ལ་འགྱུར་ཏེ། དེ་ནི་གནས་མེད་པས་འདི་ནི་ཚུལ་མ་ཡིན་པས་འཆི་བར་འགྱུར་རོ་ཞེས་ཀྱང་ཟེར་མོད་ཀྱི། བྱང་ཆུབ་སེམས་དཔའ་ཐབས་ལ་མཁས་པ་དང་། ཤེས་ [40a.6]རབ་ཀྱིས་ལེགས་པར་ཡོངས་སུ་ཟིན་པ་ནི་གང་གི་ཚེ་འདོད་པ་དེའི་ཚེ་ཤེས་རབ་ཀྱི་མཚོན་དེས་ཉོན་མོངས་པའི་དྲ་བ་ཐམས་ཅད་དྲལ་ཅིང་རབ་ཏུ་གཏུབས་ནས་ཤེས་རབ་དང་ལྷན་ཅིག་ཏུ་སངས་རྒྱས་ཀྱི་ཞིང་བུད་མེད་དང་བྲལ་བ་དང་། འཁྲིག་པ་དང་བྲལ་བ་ཤིན་ཏུ་ཡོངས་སུ་དག་པ་དག་ཏུ་འགྲོ་ [40a.7]བར་བྱེད་དོ། །གཏམ་འདི་བརྗོད་པར་གྱུར་པ་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་ཅེས་བྱ་བ་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་པར་གྱུར་ཏེ། དེ་མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་སྤྱོད་པ་ན་ཚོང་དཔོན་ཞིག་གི་ [40b] [40b.1]ཁྱིམ་དུ་ཕྱིན་པ་དང་། ཚོང་དཔོན་དེ་ལ་བུ་མོ་དཔལ་ཡོན་ཅན་གྱི་མཆོག་ཅེས་བྱ་བ་ཕྱུག་ཆུང་ཞིག་ཡོད་པར་གྱུར་པ་ཁང་{བཟངས་ཀྱི་,བཟང་གི་}སྟེང་ན་འདུག་པ་དེས་དགེ་སློང་དེའི་སྐད་ཐོས་ནས་བསོད་སྙོམས་ཐོགས་ཏེ་བྱང་ཆུབ་སེམས་དཔའ་དགའ་བྱེད་ག་ལ་བ་དེར་སོང་ངོ་། །དེ་ནས་བུ་མོ་དཔལ་ [40b.2]ཡོན་ཅན་གྱི་མཆོག་གིས་བྱང་ཆུབ་སེམས་དཔའ་དགའ་བྱེད་མཐོང་མ་ཐག་ཏུ་འདོད་ཆགས་ཀྱིས་ཀུན་ནས་དཀྲིས་པའི་སེམས་ཀྱིས་དཔེ་བྱད་ལས་བྱད་བཞིན་དང་སྒྲ་སྐད་དང་། ཁ་དོག་གི་མཚན་མ་གཟུང་བ་དང་། དེ་འདོད་ཆགས་ཀྱིས་ཀུན་ནས་དཀྲིས་པའི་སེམས་དང་། འདོད་ [40b.3]ཆགས་ཀྱིས་ཀུན་ནས་བསླང་བའི་སེམས་དང་། འདོད་ཆགས་ཀྱིས་ཡོངས་སུ་གཏུགས་པའི་སེམས་དང་། འདོད་ཆགས་ཀྱིས་ཡོངས་སུ་གདུངས་པའི་སེམས་ཀྱིས་བསྲེགས་པས་ལུས་རྔུལ་བར་གྱུར་ནས་འགྲེང་བཞིན་དུ་འཆི་བའི་དུས་བྱས་པར་གྱུར་ཏོ། །བྱང་ཆུབ་སེམས་ [40b.4]དཔའ་དགའ་བྱེད་ཀྱང་བུ་མོ་དཔལ་ཡོན་ཅན་གྱི་མཆོག་མཐོང་ནས་ཚུལ་བཞིན་མ་ཡིན་པ་ཡིད་ལ་བྱེད་པའི་རྣམ་པར་རྟོག་པ་འདི་ལྟ་སྟེ། འདོད་ཆགས་དང་བཅས་པའི་སེམས་སྐྱེས་པར་གྱུར་ནས་ཡུད་ཙམ་ཞིག་ན་དེ་ལ་དྲན་པ་འདི་ལྟ་བུ་སྐྱེས་པར་གྱུར་ཏེ། ཆོས་གང་ལ་ཆགས་ [40b.5]པར་གྱུར་པའི་ཆོས་དེ་གང་ཡིན། ཅི་མིག་མིག་ལ་ཆགས་སམ། མིག་ནི་ཆགས་པ་མི་ཡིན་ཏེ། གཡོ་བ་མེད་པ། བྱེད་པ་མེད་པ། སེམས་པ་མེད་པ། འདུས་བྱས་པ། རིམ་པ་བདུན་པ། ཤའི་རི་ལུ་ཡིན་ཏེ། མིག་དེ་ནི་རང་བཞིན་གྱིས་སྟོང་པའི་ཕྱིར་སེམས་པར་མི་ [40b.6]བྱེད། ཚོར་བར་མི་བྱེད་དོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། པགས་པ་དང་། མདོག་དང་། ཤ་ཡང་དེ་དང་འདྲ་སྟེ། དེས་རྐང་མཐིལ་ཡན་ཆད་{གླད་པ་,ཀླད་པ་}མན་ཆད་ཀྱི་བར་ལ་སོ་སོར་བརྟགས་ན་ནང་དང་ཕྱི་རོལ་ན་གང་ཆགས་པར་འགྱུར་བའམ། སྡང་བར་ [40b.7]འགྱུར་བའམ། རྨོངས་པར་འགྱུར་བའི་ཆོས་འགའ་ཡང་མ་དམིགས་སོ། །དེས་མ་དམིགས་ནས་འདོད་ཆགས་ཀྱི་སེམས་དང་བྲལ་བར་གྱུར་ཅིང་། དེས་སེམས་ཀྱིས་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པས་ཆོས་ཐམས་ཅད་མ་སྐྱེས་པར་རིག་ནས་མི་སྐྱེ་བའི་ཆོས་ལ་ [41a] [41a.1]བཟོད་པ་ཐོབ་པར་གྱུར་ཏོ། །དེ་དགའ་བ་དང་། མཆོག་ཏུ་དགའ་བ་དེ་ཉིད་ཀྱིས་སྟེང་གི་བར་སྣང་ལ་ཏ་ལ་བདུན་སྲིད་ཙམ་དུ་མངོན་པར་འཕགས་ཏེ། མཉན་ཡོད་ཀྱི་གྲོང་ཁྱེར་ཆེན་པོ་ལ་ལན་བདུན་བསྐོར་བ་བྱས་ནས་ནམ་མཁའ་དེ་ཉིད་ལས་རྒྱལ་བུ་རྒྱལ་བྱེད་ཀྱི་ཚལ་ [41a.2]ག་ལ་བ་དང་། བཅོམ་ལྡན་འདས་ག་ལ་བ་དེར་སོང་ངོ་།། །།བམ་པོ་གཉིས་པ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་སྟེང་གི་བར་སྣང་ལས་ངང་པའི་རྒྱལ་པོ་ལྟར་ཆགས་པ་མེད་པར་འོང་བ་གཟིགས་སོ། །གཟིགས་ [41a.3]ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་སྟེང་གི་བར་སྣང་ལས་ངང་པའི་རྒྱལ་པོ་ལྟར་ཆགས་པ་མེད་པར་འོང་བ་མཐོང་ངམ། ཀུན་དགའ་བོས་གསོལ་པ། བཅོམ་ལྡན་འདས་མཐོང་ [41a.4]ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་འདིས་ནི་འདོད་ཆགས་ཀྱི་སེམས་ལ་བརྟེན་ཏེ། ཆོས་ཐམས་ཅད་ཡོངས་སུ་བཙལ་བས་བདུད་ཀྱི་སྡེ་བཏུལ་ཞིང་ཆོས་ཀྱི་འཁོར་ལོ་རབ་ཏུ་བསྐོར་ཏོ། [41a.5]དེ་ནས་བུ་མོ་དཔལ་ཡོན་ཅན་གྱི་མཆོག་འཆི་བའི་དུས་བྱས་ནས་བུད་མེད་ཀྱི་ལུས་སྤངས་ཏེ། མཐོ་རིས་ཀྱི་འཇིག་རྟེན་དུ་སྐྱེས་པའི་ལུས་ཐོབ་ཅིང་སུམ་ཅུ་རྩ་གསུམ་པའི་ལྷ་རྣམས་དང་སྐལ་བ་མཉམ་པར་སྐྱེས་སོ། །སྐྱེས་མ་ཐག་ཏུ་དེ་ལ་རིན་པོ་ཆེ་སྣ་བདུན་ལས་བྱས་པའི་ [41a.6]གཞལ་མེད་ཁང་དཔག་ཚད་བཅུ་གཉིས་པ་ཡང་བྱུང་བར་གྱུར། དེའི་རིམ་གྲོ་བྱེད་པའི་བསྙེན་བཀུར་མ་ལྷའི་བུ་མོ་ཁྲི་བཞི་སྟོང་ཡང་ཉེ་བར་གནས་པར་གྱུར་ཏོ། །དེའི་མོད་ལ་དེས་བདག་གི་ལས་ཅི་ཞིག་བྱས་ཤིང་བསགས་པས་འདིར་སྐྱེས་པར་གྱུར་སྙམ་དུ་བསམས་པ་དང་། [41a.7]དེ་འདི་སྙམ་དུ་གྱུར་ཏེ། བདག་ནི་མཉན་ཡོད་ཀྱི་གྲོང་ཁྱེར་ཆེན་པོར་ཚོང་དཔོན་གྱི་བུ་མོར་གྱུར་པ་ལས་དེ་ན་བདག་གིས་ཀུན་དུ་ཆགས་པའི་སེམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་ལ་བལྟས་པ་དང་། བདག་འདོད་པའི་འདོད་ཆགས་ཀྱིས་ཀུན་ནས་ [41b] [41b.1]དཀྲིས་པའི་སེམས་ཀྱིས་འཆི་བའི་དུས་བྱས་ནས་བུད་མེད་ཀྱི་ལུས་རྗེས་ཏེ། བདག་གིས་འདིར་སྐྱེས་པའི་ལུས་ཐོབ་ཅིང་བདག་ལ་འབྱོར་པ་དཔག་ཏུ་མེད་པ་འདི་ལྟ་བུ་དག་ཀྱང་བྱུང་བར་གྱུར་ཏོ་སྙམ་ནས་སྔོན་གྱི་ལས་རྗེས་སུ་དྲན་པའི་ཤེས་པ་ཡང་སྐྱེས་པར་གྱུར་ཏོ། །དེ་ནས་ལྷའི་བུ་ [41b.2]དེ་འདི་སྙམ་དུ་སེམས་ཏེ། འདོད་ཆགས་ཀྱི་སེམས་ལས་ཀྱང་རྣམ་པར་སྨིན་པ་འདི་ལྟ་བུ་འབྱུང་བར་འགྱུར་ན། བདག་གི་དད་པའི་སེམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་ལ་ཕྱག་བྱས་ཤིང་། བསྙེན་བཀུར་བྱས་ན་ལྟ་སྨོས་ཀྱང་ཅི་དགོས་ཏེ། བདག་ [41b.3]འདོད་པས་དགའ་བ་དང་། རྩེ་བ་དང་། དགའ་མགུར་སྤྱོད་ཅིང་བག་མེད་པའི་གནས་པས་གནས་པ་ནི་བདག་གི་ཚུལ་དང་འཐུན་པ་མ་ཡིན་ཞིང་མི་རིགས་ཀྱི། བདག་བཅོམ་ལྡན་འདས་ག་ལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་ག་ལ་བ་དེར་འགྲོ་བར་ [41b.4]བྱ་གོར་མ་ཆག་སྙམ་མོ། །དེ་ནས་ལྷའི་བུ་དེ་འཁོར་ལྔ་བརྒྱ་དང་ལྷན་ཅིག་ཏུ་ལྷའི་མེ་ཏོག་དང་། སྤོས་དང་། མེ་ཏོག་ཕྲེང་དང་། བྱུག་པ་དག་ཐོགས་ཏེ། བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་ག་ལ་བ་དེར་སོང་ནས་ཁ་དོག་ཤིན་དུ་ [41b.5]འཕགས་པ་ཤིན་དུ་འཕགས་པའི་སྣང་བ་ཆེན་པོས་རྒྱལ་བུ་རྒྱལ་བྱེད་ཀྱི་ཚལ་སྣང་བར་བྱས་ཏེ། ལྷའི་མེ་ཏོག་དང་། སྤོས་དང་། མེ་ཏོག་ཕྲེང་དང་། བྱུག་པ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། [41b.6]བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་དང་། བྱང་ཆུབ་སེམས་དཔའ་ཐམས་ཅད་དང་། དགེ་སློང་གི་དགེ་འདུན་གྱི་རྐང་པ་ལ་ཡང་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་ཐལ་མོ་པུག་པུག་ [41b.7]པོར་སྦྱར་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་མི་མཆོག་རྣམས་ནི་བསམ་མི་ཁྱབ། །བྱང་ཆུབ་མཆོག་ལ་ཞུགས་རྣམས་བསམ་མི་ཁྱབ། །བདེ་གཤེགས་རྣམས་ཀྱི་ཆོས་ཀྱང་བསམ་མི་ཁྱབ། །གྲགས་ཆེན་རྣམས་ཀྱི་སྤྱོད་པའང་བསམ་མི་ཁྱབ། ། [42a] [42a.1]མཉན་ཡོད་དུ་ནི་བདག་སྔོན་བུ་མོར་གྱུར། །ཚོང་དཔོན་བུ་མོ་དཔལ་ཡོན་མཆོག་ཅེས་བགྱི། །མཛེས་ཤིང་ཐོག་མར་ཕྱུག་ཆུང་གྱུར་པ་ལགས། །ཕ་མའི་གློ་བར་མཆི་ཞིང་རབ་ཏུ་བྱམས། །སངས་རྒྱས་སྲས་པོ་སྨད་པར་མ་གྱུར་པ། །མཐུ་ཆེན་དགའ་བྱེད་ [42a.2]ཅེས་བགྱི་གང་ལགས་པ། །བསོད་སྙོམས་སྤྱོད་ཅིང་མཉན་ཡོད་རྒྱུ་བའི་ཚེ། །དེ་ནི་བདག་གི་ཕ་ཡི་ཁྱིམ་དུ་མཆིས། །སྐད་སྙན་ཡིད་དུ་མཆི་བ་ཐོས་གྱུར་ནས། །བདག་ཅག་སེམས་ཀྱིས་བསོད་སྙོམས་ཐོགས་ནས་ནི། །དེ་བཞིན་གཤེགས་པའི་སྲས་པོ་གང་ལགས་པ། །དགའ་ [42a.3]བྱེད་མཐུ་ཆེན་ག་ལ་མཆིས་པར་མཆིས། །མཐོང་མ་ཐག་ཏུ་བདག་ནི་འདོད་ཆགས་དང་། །ལྡན་པ་ཚུལ་བཞིན་མ་ལགས་སེམས་སྐྱེས་ཏེ། །གལ་ཏེ་ཇི་ལྟར་བསམས་བཞིན་མ་མཇལ་ན། །སྲོག་ལ་མི་ལྟ་འགུམ་པའི་དུས་བགྱི་སྙམ། །ཚུལ་བཞིན་མ་ལགས་འདོད་པས་རབ་ [42a.4]གདུངས་ནས། །དེ་ལ་བཀའ་མཆིད་བརྗོད་པར་བགྱི་བ་དང་། །བསོད་སྙོམས་སྩོལ་བའི་རྔོ་ཡང་མ་ཐོག་ནས། །རྔུལ་བྱུང་དེར་ནི་འགྲེང་བཞིན་གུམ་པར་གྱུར། །བཅོམ་ལྡན་བདག་ནི་འཆི་འཕོར་གྱུར་པའི་ཚེ། །སྐད་ཅིག་དེ་ལ་བུད་མེད་ལུས་སྤངས་ཏེ། །ཤི་འཕོས་མཐོ་རིས་འཇིག་ [42a.5]རྟེན་སྐྱེས་གྱུར་ནས། །བདག་གི་འོད་གསལ་སྐྱེས་པ་ཉིད་འདི་ཐོབ། །རིན་ཆེན་སྣ་ཚོགས་བལྟ་ན་སྡུག་པ་ཡི། །གཞལ་མེད་ཁང་མཆོག་མཛེས་པ་གྲུབ་གྱུར་ཅིང་། །བདག་གི་གཡོག་འཁོར་ལྷ་ཡི་བུ་མོ་ནི། །ཁྲི་དང་བཞི་སྟོང་ཚང་བ་བྱུང་བར་གྱུར། །བདག་ལ་སེམས་བཟང་བྱུང་ [42a.6]བར་གྱུར་པ་ནི། །སུག་ལས་གང་གི་རྣམ་སྨིན་འདི་འདྲ་བ། །རྗེས་སུ་དྲན་ནས་བདག་ནི་འདི་སྙམ་བགྱིད། །ཆགས་བཅས་སེམས་ཀྱི་རྣམ་སྨིན་འདི་འདྲ་སྟེ། །དགའ་བྱེད་ཡིད་དགའ་འོད་གསལ་མཁས་པ་ལ། །ཆགས་བཅས་སེམས་ཀྱིས་བདག་གིས་བལྟས་གྱུར་པས། །སུག་ [42a.7]ལས་དེ་ཡི་རྣམ་སྨིན་བཟང་པོ་དེས། །བདག་ནི་གཟི་བརྗིད་མཐུ་སྟོབས་འདི་འདྲ་བས། །ཆགས་བཅས་སེམས་ཀྱི་རྣམ་སྨིན་འདི་འདྲ་ན། །གང་གིས་དེ་ལ་མཆོད་བགྱིས་ཅི་སྨོས་ཏེ། །གང་ལ་བདེ་གཤེགས་མཁྱེན་པ་འཇུག་འགྱུར་བ། །དེ་ནི་ཉན་ཐོས་རང་རྒྱལ་ས་མ་ལགས། [42b] [42b.1]བདག་ནི་དེ་བཞིན་གཤེགས་པའི་སྤྱན་སྔར་ནི། །སངས་རྒྱས་ཡེ་ཤེས་མཆོག་རབ་བསྒྲུབ་པ་དང་། །བསྐལ་པ་གང་གཱའི་བྱེ་སྙེད་སྤྱད་བགྱི་བར། །བདག་གི་དམ་བཅས་འདི་ནི་སྤང་མི་བགྱི། །དགེ་བའི་བཤེས་གཉེན་དགའ་བྱེད་དམ་པ་ལ། །ཆོས་ཀྱི་མཆོད་པ་མཆོག་གིས་མཆོད་ [42b.2]པར་བགྱི། །གང་དག་བྱང་ཆུབ་འཚལ་བ་མ་གཏོགས་པར། །གཞན་གྱིས་འདི་ལ་འདྲེན་རྣམས་མཆོད་མི་འགྱུར། །བུད་མེད་གང་དག་འདོད་ཆགས་སེམས་ཀྱིས་ནི། །བདག་ལ་རྟོག་པ་བུད་མེད་ལུས་བསྒྱུར་ནས། །དེ་ཀུན་འཇིགས་མེད་སྐྱེས་པ་འཐོབ་འགྱུར་བར། །བྱང་ཆུབ་ [42b.3]སྤྱོད་མཆོག་དམ་པ་སྤྱད་པར་བགྱི། །ལུས་རྔུལ་ཤི་བར་གྱུར་པ་མཐོང་ནས་ནི། །བུ་མོའི་ཕ་མ་ཆོ་ངེས་འདེབས་བྱེད་ཅིང་། །དགེ་སློང་དེ་ཡིས་བྱད་སྟེམས་བྱས་སྙམ་སྟེ། །ངུ་ཞིང་དགེ་སྦྱོང་རྣམས་ལ་མི་སྙན་བརྗོད། །སངས་རྒྱས་མཐུ་ཡིས་ལྷ་ཡི་བུ་དེ་ནི། །སོང་ནས་ཕ་མ་དག་ལ་ཚིག་ [42b.4]སྨྲས་པ། །དགེ་སྦྱོང་ལ་ནི་ཞེ་སྡང་ཁྲོ་མ་བྱེད། །ཡུན་རིང་སྡུག་བསྔལ་འགྱུར་བར་མ་བྱེད་ཅིག །བུ་མོ་དཔལ་ཡོན་ཤི་འཕོས་གང་ཡིན་དེ། །སུམ་ཅུ་རྩ་གསུམ་སྐལ་བ་མཉམ་གྱུར་ཅིང་། །དེས་ནི་བུད་མེད་ལུས་ཀྱང་སྤངས་བྱས་ཏེ། །དེ་ནི་ལྷ་ཡི་བུ་ཕོ་འོད་གསལ་གྱུར། །བདེ་ [42b.5]བར་གཤེགས་ཀྱི་སྤྱན་སྔར་ཁྱེད་དེང་ལ། །ཁྲོ་བའི་སེམས་ཀྱི་ཉེས་པ་འདི་ཤོགས་ཤིག །སངས་རྒྱས་མི་མཆོག་རྣམས་ནི་མ་གཏོགས་པར། །སེམས་ཅན་རྣམས་ཀྱི་དཔུང་གཉེན་གནས་གཞན་མེད། །འཇིགས་མེད་དེ་ཡིས་ལེགས་པར་བསྐུལ་བྱས་པས། །ཕ་མ་གཉིས་ [42b.6]ཀྱིས་སངས་རྒྱས་སྒྲ་ཐོས་ནས། །ཉེ་དུའི་ཚོགས་དང་ལྷན་ཅིག་འགྲོགས་གྱུར་ཏེ། །ཤཱཀྱ་ཐུབ་པའི་སྤྱན་སྔར་དོང་བར་གྱུར། །མི་མཆོག་ཞབས་ལ་སྤྱི་བོས་ཕྱག་འཚལ་ཏེ། །ཁྲོ་བའི་སེམས་ཀྱི་ཉེས་པ་བཤགས་བྱས་ནས། །དེ་བཞིན་གཤེགས་ལ་གུས་དང་བཅས་བྱས་ཏེ། ། [42b.7]བདེ་གཤེགས་རང་བྱུང་ལ་ནི་ཞུ་ཞུས་པ། །ཇི་ཙམ་གྱིས་ན་འདྲེན་པ་མཆོད་པར་འགྱུར། །ཆོས་དང་དགེ་འདུན་ཇི་ལྟར་མཆོད་པ་ལགས། །ཞུས་པ་དེ་ཡི་ལན་ནི་སྩལ་དུ་གསོལ། །ཐོས་ནས་དེ་བཞིན་གནས་བགྱི་གཞན་མ་ལགས། །རྒྱལ་བས་དེ་དག་བསམ་པ་དག་མཁྱེན་ནས། ། [43a] [43a.1]འཇིག་རྟེན་མགོན་པོས་འདི་སྐད་བཀའ་སྩལ་ཏོ། །གང་ཞིག་སངས་རྒྱས་ཐམས་ཅད་མཆོད་འདོད་པ། །དེ་ཡིས་བརྟན་པར་བྱང་ཆུབ་སེམས་སྐྱེད་ཅིག །བུ་མོའི་ཕ་དང་མ་དང་ཉེ་དུ་ནི། །ལྔ་བརྒྱ་ཚང་བ་ཉུང་བ་མ་ཡིན་པས། །སྐྱེས་བུ་ཁྱུ་མཆོག་དེ་ཡི་གསུང་ཐོས་ [43a.2]ནས། །བྱང་ཆུབ་ཕྱིར་ནི་སེམས་ཀྱང་བརྟན་པར་བསྐྱེད། །རྒྱལ་བས་ཀུན་དགའ་བཟང་ལ་བཀའ་སྩལ་པ། །ཀུན་དགའ་ཇི་ལྟར་བཤད་པ་འདི་ཉོན་ཅིག །བྱང་ཆུབ་སེམས་དཔའི་སྤྱོད་པ་བསམ་ཡས་ཏེ། །ཤེས་རབ་ཐབས་ལ་མཁས་པའང་དེ་བཞིན་ནོ། །དགའ་བྱེད་སྨོན་ [43a.3]ལམ་ཡང་དང་ཡང་འདེབས་པ། །བུད་མེད་གང་དག་ཆགས་པའི་སེམས་ཀྱིས་ནི། །བདག་ལ་རྟོག་པ་བུད་མེད་ལུས་སྤངས་ནས། །དེ་དག་མྱུར་དུ་སྐྱེས་བུ་འཇིགས་མེད་ཤོག །བུད་མེད་གཅིག་མིན་གཉིས་དང་གསུམ་མིན་ཏེ། །བྱེ་བ་ཁྲག་ཁྲིག་སྟོང་ཕྲག་མང་པོ་རྣམས། །གང་ [43a.4]དག་དགའ་བྱེད་ལ་ན་ཆགས་གྱུར་པ། །དེ་དག་ཐམས་ཅད་ཤི་འཕོས་སྐྱེས་པར་གྱུར། །ཀུན་དགའ་འདོད་ཆགས་བསྐྱེད་པ་གང་གིས་ནི། །སེམས་ཅན་གཞན་དག་སེམས་དམྱལ་འགྲོ་འགྱུར་བ། །དེ་ཡིས་དཔའ་རྣམས་མཐོ་རིས་འགྲོ་འགྱུར་ཞིང་། །སྐྱེས་པར་འགྱུར་བའི་ཡོན་ [43a.5]ཏན་དེ་འདྲ་ལྟོས། །ལྷའི་བུ་གང་གིས་ང་ལ་མཆོད་བྱས་ཏེ། །གུས་དང་བཅས་པས་བྱང་ཆུབ་མཆོག་ཞུགས་པ། །དེས་ནི་སངས་རྒྱས་བྱེ་མང་མཆོད་བྱས་ནས། །རྒྱལ་བ་བལྟ་ན་མཛེས་ཞེས་བྱ་བར་འགྱུར། །ལྔ་བརྒྱ་གང་དག་བྱང་ཆུབ་ཞུགས་གྱུར་པ། །དེ་དག་མི་མཆོག་རྣམས་ [43a.6]སུ་འབྱུང་འགྱུར་བ། །གང་ལ་དད་བྱས་བདེ་བ་བསམ་ཡས་པའི། །འཇིག་རྟེན་མགོན་ལ་སུ་ཞིག་གུས་མི་བྱེད། །གང་དག་ཉོན་མོངས་རྣམས་ཀྱང་བདེ་སྦྱིན་ན། །གང་དག་གུས་བྱེད་དེ་ལ་ཅི་སྨོས་པ། །གྲགས་ཆེན་སྨན་གྱི་རྒྱལ་པོ་ལྟ་བུ་ཡི། །བྱང་ཆུབ་སེམས་དཔའ་རྣམས་ [43a.7]ལ་སུ་སྡང་སྐྱེད། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟ་སྟེ་དཔེར་བགྱི་ན་སེམས་ཅན་རབ་ཏུ་སྡང་བའི་སེམས་དང་ལྡན་པའམ། དང་བའི་སེམས་དང་ལྡན་པའམ། ཆགས་པའི་སེམས་ [43b] [43b.1]དང་ལྡན་པའམ། ཆོས་ཀྱི་བར་དུ་གཅོད་པའི་སེམས་དང་ལྡན་པ་གང་ལ་ལ་དག་རིའི་རྒྱལ་པོ་རི་རབ་ཀྱི་དྲུང་དུ་མཆིས་ན་དེ་དག་ཐམས་ཅད་འདི་ལྟ་སྟེ། གསེར་གྱི་ཁ་དོག་ཏུ་ཁ་དོག་གཅིག་པར་འགྱུར་བ་དེ་བཞིན་དུ་བཙུན་པ་བཅོམ་ལྡན་འདས་སེམས་ཅན་རབ་ཏུ་སྡང་བའི་སེམས་དང་ལྡན་ [43b.2]པའམ། དང་བའི་སེམས་དང་ལྡན་པའམ། ཆགས་པའི་སེམས་དང་ལྡན་པའམ་ཆོས་ཀྱི་བར་དུ་གཅོད་པའི་སེམས་དང་ལྡན་པ་གང་ལ་ལ་དག་བྱང་ཆུབ་སེམས་དཔའ་རྣམས་ཀྱི་དྲུང་དུ་མཆིས་ན་ཡང་དེ་དག་ཐམས་ཅད་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་སེམས་ཀྱི་ཁ་ [43b.3]དོག་ཏུ་སེམས་གཅིག་ཏུ་འགྱུར་ལགས་པས། བཙུན་པ་བཅོམ་ལྡན་འདས་བདག་ནི་དེང་སླན་ཅད་བྱང་ཆུབ་སེམས་དཔའ་ཐམས་ཅད་རིའི་རྒྱལ་པོ་རི་རབ་དང་འདྲ་བར་འཛིན་ལགས་སོ། །བཙུན་པ་བཅོམ་ལྡན་འདས་འདི་ལྟ་སྟེ་དཔེར་བགྱི་ན་སྨན་གྱི་རིགས་ཆེན་པོ་བལྟ་མཛེས་ཞེས་ [43b.4]བགྱི་བ་མཆིས་ཏེ། སེམས་ཅན་རབ་ཏུ་སྡང་བའི་སེམས་དང་ལྡན་པ་འམ། དང་བའི་སེམས་དང་ལྡན་པའི་སེམས་ཅན་བྲོ་ནད་སྣ་ཚོགས་ཀྱིས་ཐེབས་པ་གང་ལ་ལ་དག་གིས་དེ་མཐོང་ན་དེ་དག་ཐམས་ཅད་ཀྱི་བྲོ་ནད་རྣམས་རབ་ཏུ་ཞི་བར་འགྱུར་བ་དེ་བཞིན་དུ་བཙུན་པ་བཅོམ་ལྡན་འདས་ [43b.5]སེམས་ཅན་གང་དག་རབ་ཏུ་སྡང་བའི་སེམས་དང་ལྡན་པའམ། དང་བའི་སེམས་དང་ལྡན་པ་དག་བྱང་ཆུབ་སེམས་དཔའ་རྣམས་ཀྱི་དྲུང་དུ་མཆིས་ན་དེ་དག་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་དང་ཉོན་མོངས་པའི་བྲོ་ནད་རྣམས་ཀྱང་རབ་ཏུ་ཞི་བར་འགྱུར་ལགས་སོ། ། [43b.6]དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཀུན་དགའ་བོ་ཇི་སྐད་སྨྲས་པ་དེ་བཞིན་ཏེ། ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་གི་ [43b.7]སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་ཞི་བའི་ཏིང་ངེ་འཛིན་ཀྱི་གནས་པ་དག་གིས་ཀྱང་གནས་པར་བགྱིད་ལ། སེམས་ཅན་རྣམས་ལ་སྙིང་བརྩེ་བའི་སླད་དུ་འདོད་པའི་ཁམས་ན་ཡང་ཀུན་དུ་གདའ་བ་དང་། སྟོང་པ་ཉིད་དང་། མཚན་མ་མ་མཆིས་པ་ [44a] [44a.1]དང་། སྨོན་པ་མ་མཆིས་པ་དང་། མངོན་པར་འདུ་བགྱི་བ་མ་མཆིས་པའི་ཆོས་རྣམས་ཀྱིས་ཀྱང་གནས་པར་བགྱིད་ལ་ཉན་ཐོས་དང་། རང་སངས་རྒྱས་ཀྱི་ཆོས་རྣམས་ལ་ཡང་རེག་པར་མི་བགྱིད་པ་དང་། སྙིང་རྗེ་ཆེན་པོ་ཡང་ཀུན་དུ་སྐྱེད་པར་བགྱིད་ལ་ཐམས་ཅད་མཁྱེན་ [44a.2]པ་ཉིད་ཀྱི་སེམས་ལ་ཡང་འཇུག་པར་བགྱིད་པ་དེ་ནི་བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ངོ་མཚར་ལགས་ཏེ། བདེ་བར་གཤེགས་པ་དེ་ནི་མཆོག་ཏུ་ངོ་མཚར་ལགས་སོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་ [44a.3]དཔའ་ཆེན་པོ་གང་དག་ཆགས་པ་ཐམས་ཅད་སྲུང་བར་བགྱིད་ཅིང་འདི་ལྟ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ཆགས་པ་དག་ལ་སྤྱོད་པར་བགྱིད་ཀྱང་དེ་དག་ལ་ཆགས་པར་ཡང་མི་འགྱུར་བ་དེ་དག་ནི་ཐབས་ལ་མཁས་པ་བསམ་གྱིས་མི་ཁྱབ་པ་ལ་གནས་པ་ [44a.4]ལགས་ཏེ། བཙུན་པ་བཅོམ་ལྡན་འདས་བདག་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་བརྩམས་ཏེ། དཔེ་འགའ་ཞིག་བརྗོད་པར་སྤོབས་ལགས་སོ། །བདེ་བར་གཤེགས་པ་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ [44a.5]ཁྱོད་སྤོབས་པར་གྱིས་ཤིག །འོད་སྲུང་ཆེན་པོས་གསོལ་པ། བཙུན་པ་བཅོམ་ལྡན་འདས་འདི་ལྟ་སྟེ་དཔེར་བགྱི་ན་འབྲོག་དགོན་པ་ཆེན་པོ་ཞིག་མཆིས་པར་གྱུར་ལ། འབྲོག་དགོན་པ་ཆེན་པོ་དེ་ལ་ཡང་སྲིད་པའི་རྩེ་མོ་དང་མཉམ་པའི་ར་བ་མཆིས་པར་གྱུར་ཅིང་། འབྲོག་དགོན་ [44a.6]པ་ཆེན་པོ་དེར་ཡང་སྲོག་ཆགས་འབུམ་ཕྲག་དུ་མ་ཞིག་ཞུགས་པར་གྱུར་ལ། འབྲོག་དགོན་པ་ཆེན་པོ་དེ་ལ་ཡང་ཆབ་སྒོ་ནི་གཅིག་ཅིག་མཆིས་པར་གྱུར་ཅིང་། འབྲོག་དགོན་པ་ཆེན་པོ་དེ་དང་ཧ་ཅང་ཡང་མི་རིང་བ་ཞིག་ན་གྲོང་ཁྱེར་ཆེན་པོ་འབྱོར་པ་རྒྱས་པ། གཙང་ལོ་ལེགས་པ། སྐྱེ་ [44a.7]བོ་དང་མི་མང་པོས་ཀུན་དུ་གཏམ་པ་ཉམས་དགའ་བ་ཞིག་ཀྱང་མཆིས་པར་གྱུར་ལ། གྲོང་ཁྱེར་ཆེན་པོ་དེ་ལ་ཡང་ཆབ་སྒོ་ནི་གཅིག་ཅིག་མཆིས་པར་གྱུར་ཅིང་། གང་དག་གྲོང་ཁྱེར་ཆེན་པོ་དེར་ཞུགས་པར་གྱུར་པ་དེ་དག་ནི་དགའ་བ་དང་། འགུམ་པ་མ་མཆིས་པར་འགྱུར་ལ། གྲོང་ [44b] [44b.1]ཁྱེར་ཆེན་པོ་དེ་ན་ཡང་མཐོ་གང་ཙམ་གྱི་ཚད་ཀྱི་ཤུལ་ཤིན་ཏུ་དོག་ཅིང་ཉམ་ང་བ་ཞིག་ཀྱང་མཆིས་ཤིང་དེའི་གཡས་གཡོན་ན་ཁྲུ་འབུམ་ཙམ་མཆིས་པའི་གཡང་ས་ཆེན་པོ་དག་ཀྱང་མཆིས་པར་གྱུར་ལ། དེ་ནས་འབྲོག་དགོན་པ་ཆེན་པོ་དེའི་དབུས་ནས་སེམས་ཅན་མཁས་པ་ཞི་བ། གློ་ [44b.2]བ་གཞུངས་པ། སེམས་ཅན་ཐམས་ཅད་ལ་དོན་དུ་འགྱུར་བར་འཚལ་བ་བདེ་བར་འཚལ་བ། གྲུབ་པ་དང་བདེ་བར་འཚལ་བ། སྨན་པར་འཚལ་བ་སྙིང་རྗེ་ཆེན་པོ་དང་ལྡན་པ་གཅིག་ཅིག་བྱུང་བར་གྱུར་ནས་དེས་འབྲོག་དགོན་པ་ཆེན་པོ་དེར་འདི་སྐད་ཅེས་ཀྱེ་གྲོགས་པོ་དག་ཁོ་བོ་ནི་ [44b.3]ཁྱེད་ཅག་གི་ཡོངས་སུ་སྐྱོབ་པ་ཡིན་ཏེ། འབྲོག་དགོན་པ་ཆེན་པོ་འདི་ནས་ཧ་ཅང་ཡང་མི་རིང་བ་ན་གྲོང་ཁྱེར་ཆེན་པོ་འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགའ་བ་ཞིག་ཡོད་དེ། གང་དག་དེར་ཞུགས་པར་གྱུར་པ་དེ་དག་ནི་རྒ་བ་མེད་པ་དང་། འཆི་བ་མེད་པར་ [44b.4]འགྱུར་ཞིང་སེམས་ཅན་དཔག་ཏུ་མེད་པ་རྣམས་སྐྱེ་བ་དང་། རྒ་བ་དང་། ན་བ་དང་། འཆི་བ་ལས་ཡང་དག་པར་འདའ་བར་བྱ་བའི་ཕྱིར་ཆོས་སྟོན་པར་ཡང་འགྱུར་བས་སེམས་ཅན་ཤེས་པ་དང་ལྡན་པ་དག་ཚུར་ཤོག །གྲོང་ཁྱེར་ཆེན་པོ་དེར་འདོང་ངོ་ཞེས་སྒྲ་བསྒྲགས་ཤིང་སྐད་ཀྱིས་ [44b.5]གོ་བར་བགྱིས་པར་གྱུར་ན། དེ་ན་སེམས་ཅན་དམན་པ་ལ་མོས་ཤིང་ངེས་པར་འབྱུང་བའི་བསམ་པ་ཅན་གང་དག་ལགས་པ་དེ་དག་ནི་འདི་སྐད་ཅེས་བདག་ཅག་འདི་ནས་ཀྱང་མི་གཡོ་བར་གདམས་ཤིང་རྗེས་སུ་བསྟན་པ་དེ་ཡང་འཚལ་ལ། བདག་ཅག་འདི་ན་གནས་བཞིན་དུ་ [44b.6]གྲོང་ཁྱེར་དེ་ན་མཆིས་པའི་ཡོན་ཏན་དེ་དག་ཀྱང་འབྱུང་བར་གྱུར་ཅིག་ཅེས་མཆི་ལགས་སོ། །སེམས་ཅན་རྒྱ་ཆེན་པོ་ལ་མོས་པ་གང་དག་ལགས་པ་དེ་དག་ནི་འདི་སྐད་ཅེས་བདག་ཅག་ནི་ཁྱོད་ཇི་ལྟ་བ་དེ་བཞིན་དུ་གྲོང་ཁྱེར་དེར་མཆིའོ་ཞེས་མཆི་ལགས་སོ། །སེམས་ཅན་བསོད་ [44b.7]ནམས་ཆུང་བ་གང་དག་ལགས་པ་དེ་དག་ནི་སྒྲ་དེ་ཉན་ཅིང་ཐོས་ནས་ཀྱང་དད་པར་མི་བགྱིད་ཅིང་སྐྱེས་བུ་མཁས་པའི་རང་བཞིན་ཅན་དེའི་སླད་བཞིན་དུ་མཆི་བར་མི་བགྱིད་ལགས་ཏེ། དེ་ནས་སྐྱེས་བུ་མཁས་པའི་རང་བཞིན་ཅན་དེ་འབྲོག་དགོན་པ་ཆེན་པོ་དེ་ནས་སླར་བྱུང་བ་དང་། [45a] [45a.1]དེས་ཤུལ་དེ་ཡང་མཐོང་བར་གྱུར། དེས་མཐོ་གང་ཙམ་གྱི་ཤུལ་ཤིན་ཏུ་དོག་ཅིང་ཉམ་ང་བ་དེ་ཡང་མཐོང་བར་གྱུར། ཤུལ་དེའི་གཡས་གཡོན་ན་ཁྲུ་འབུམ་ཙམ་མཆིས་པའི་གཡང་ས་ཆེན་པོ་དེ་དག་ཀྱང་མཐོང་བར་གྱུར་ནས་དེས་གཡས་གཡོན་གྱི་གཡང་ས་དེ་ [45a.2]དག་རྩིག་པ་དང་། སྤང་ལེབ་ཀྱིས་བཀུམ་སྟེ། རྐང་ལག་བཞིས་འཕྱེ་ཞིང་ཤུལ་དེ་ལས་འདའ་བར་བགྱིད་ལ། གཡས་གཡོན་དུ་ཡང་མི་ལྟ་བར་སླད་བཞིན་དུ་ཕྱིར་རྒོལ་བ་སྒྲ་འབྱིན་ཅིང་འཇིགས་པ་སྟོན་པ་དག་མཆི་ཡང་སླར་ཡང་མི་ལྟ་ལ། སྐྱོ་ཞིང་ཡིད་བྱུང་བ་ཡང་མ་མཆིས་ [45a.3]པར་ཤུལ་དེར་མཆི་བར་འགྱུར་བ་དང་། ཇི་ལྟ་ཇི་ལྟར་མཆི་བར་འགྱུར་བ་དེ་ལྟ་དེ་ལྟར་གྲོང་ཁྱེར་དེ་མཐོང་བར་ཡང་འགྱུར་ལ་ཇི་ལྟ་ཇི་ལྟར་མཐོང་བ་དེ་ལྟ་དེ་ལྟར་དེའི་འཇིགས་པ་དང་འཇིགས་སུ་རུང་བ་ཐམས་ཅད་ཀྱང་མ་མཆིས་པར་འགྱུར་ཞིང་གྲོང་ཁྱེར་དེར་ཞུགས་ན་རྒ་བ་དང་། འགུམ་པ་ [45a.4]དང་། བྲོ་ནད་མ་མཆིས་པར་འགྱུར་ལ། སེམས་ཅན་དཔག་ཏུ་མ་མཆིས་པ་རྣམས་ཀྱི་དོན་བགྱིད་ཅིང་སྐྱེ་བ་དང་། རྒ་བ་དང་། བྲོ་འཚལ་བ་དང་། འགུམ་པ་ལས་ཡང་དག་པར་བཟླ་བའི་སླད་དུ་ཆོས་སྟོན་པར་ཡང་བགྱིད་པ་ཞིག་མཆིས་ན། བཙུན་པ་བཅོམ་ལྡན་འདས་ [45a.5]དེ་ལ་འབྲོག་དགོན་པ་ཆེན་པོ་ཞེས་བགྱི་བ་དེ་ནི་འཁོར་བའི་དགོན་པའི་ཚིག་{བླ་དགས་,བླ་དྭགས་}ལགས་སོ། །སྲིད་པའི་རྩེ་མོ་དང་མཉམ་པའི་ར་བ་ཞེས་བགྱི་བ་དེ་ནི་མ་རིག་པ་དང་སྲིད་པའི་སྲེད་པའི་ཚིག་{བླ་དགས་,བླ་དྭགས་}ལགས་སོ། །འབྲོག་དགོན་པ་ཆེན་པོ་དེར་ཡང་སྲོག་ཆགས་འབུམ་ཕྲག་ [45a.6]དུ་མ་ཞུགས་པར་གྱུར་ལ་ཞེས་བགྱི་བ་དེ་ཅི་བྱིས་པ་སོ་སོའི་སྐྱེ་བོ་ཐམས་ཅད་ཀྱི་ཚིག་{བླ་དགས་,བླ་དྭགས་}ལགས་སོ། །འབྲོག་དགོན་པ་ཆེན་པོ་དེ་ལ་ཡང་ཆབ་སྒོ་ནི་གཅིག་ཅིག་མཆིས་པར་གྱུར་ཅིང་ཞེས་བགྱི་བ་དེ་ཇི་ལྟ་བ་དེ་བཞིན་དུ་ནི་བགྲོད་པ་གཅིག་པའི་ཤུལ་བལྟ་བར་བགྱི་ལགས་སོ། ། [45a.7]སྐྱེས་བུ་མཁས་པའི་རང་བཞིན་ཅན་ཞེས་བགྱི་བ་ཇི་ལྟ་བ་དེ་བཞིན་དུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བལྟ་བར་བགྱི་ལགས་སོ། །སེམས་ཅན་དམན་པ་ལ་མོས་ཤིང་ངེས་པར་འབྱུང་བའི་བསམ་པ་ཅན་གནས་དེ་ལས་ཀྱང་མི་གཡོ་ལ་གྲོང་ཁྱེར་གྱི་ཡོན་ [45b] [45b.1]ཏན་ཡང་འཚལ་བ་དེ་དག་ཇི་ལྟ་བ་དེ་བཞིན་དུ་ནི་ཉན་ཐོས་དང་། རང་སངས་རྒྱས་ཐམས་ཅད་བལྟ་བར་བགྱི་ལགས་སོ། །སེམས་ཅན་རྒྱ་ཆེན་པོ་ལ་མོས་པའི་ཚིག་འདི་སྐད་ཅེས་བདག་ཅག་ནི་ཁྱོད་ཇི་ལྟ་བ་བཞིན་དུ་གྲོང་ཁྱེར་དེར་མཆི་ལགས་སོ་ཞེས་མཆི་བ་དེ་དག་ཇི་ལྟ་བ་དེ་བཞིན་དུ་ནི་ [45b.2]བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་བལྟ་བར་བགྱི་ལགས་སོ། །སེམས་ཅན་བསོད་ཉམས་ཆུང་ངུ་སྒྲ་དེ་ཉན་ཅིང་ཐོས་ནས་ཀྱང་དད་པར་མི་བགྱིད་པ་གང་ལགས་པ་དེ་དག་ནི་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དག་གི་ཚིག་{བླ་དགས་,བླ་དྭགས་}ལགས་སོ། ། [45b.3]འབྲོག་དགོན་པ་ཆེན་པོ་དེ་ནས་སླར་བྱུང་བ་ཞེས་བགྱི་བ་ཇི་ལྟ་བ་དེ་བཞིན་དུ་ནི་ཐམས་ཅད་མཁྱེན་པ་ཉིད་དུ་ངེས་པར་བསྔོས་པའི་སེམས་ཀྱིས་བརྩོན་འགྲུས་བརྩམས་པ་བལྟ་བར་བགྱི་ལགས་སོ། །མཐོ་གང་ཙམ་གྱི་ཚད་ཀྱི་ཤུལ་ཞེས་བགྱི་བ་དེ་ཇི་ལྟ་བ་བཞིན་དུ་ནི་ཆོས་ཀྱི་དབྱིངས་བལྟ་ [45b.4]བར་བགྱི་ལགས་སོ། །དེའི་གཡས་གཡོན་ན་ཁྲུ་འབུམ་ཙམ་མཆིས་པའི་གཡང་ས་ཆེན་པོ་ཞེས་བགྱི་བ་ཇི་ལྟ་བ་དེ་བཞིན་དུ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ས་རྣམས་བལྟ་བར་བགྱི་ལགས་སོ། །གཡས་གཡོན་གྱི་གཡང་ས་དེ་དག་རྩིག་པ་དང་སྤང་ལེབ་ཀྱིས་ [45b.5]བཀུམ་སྟེ་ཞེས་བགྱི་བ་དེ་ཇི་ལྟ་བ་བཞིན་དུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པ་བལྟ་བར་བགྱི་ལགས་སོ། །རྐང་ལག་བཞིས་འཕྱེ་ཞིང་ཤུལ་དེ་ལས་ཡང་དག་པར་འདའ་བར་བགྱིད་ལ་ཞེས་བགྱི་བ་དེ་བཞིན་དུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ [45b.6]བསྡུ་བའི་དངོས་པོ་བཞིས་སེམས་ཅན་དཔག་ཏུ་མ་མཆིས་པ་རྣམས་སྡུད་ཅིང་ཡང་དག་པར་འདའ་བར་བགྱིད་པ་དག་བལྟ་བར་བགྱི་ལགས་སོ། །སླད་བཞིན་དུ་ཕྱིར་རྒོལ་བ་སྒྲ་འབྱིན་ཅིང་འཇིགས་པ་སྟོན་པ་དག་མཆི་ཡང་ཞེས་བགྱི་བ་དེ་ཇི་ལྟ་བ་དེ་བཞིན་དུ་ནི་བདུད་དང་བདུད་ཀྱི་ [45b.7]རིས་ཀྱི་ལྷའི་བུ་རྣམས་ཀྱང་བལྟ་བར་བགྱི་ལ། དེ་བཞིན་དུ་སེམས་ཅན་སྡིག་པ་ལ་མངོན་པར་ཞེན་པ་ཡོངས་སུ་ཉོན་མོངས་པ་ཅན་གྱི་ལས་ཀུན་དུ་སྤྱོད་པར་བགྱིད་པ་གང་དག་བྱང་ཆུབ་སེམས་དཔའ་དེ་དག་ལ་འཕྱ་བ་དང་སྨོད་པར་བགྱིད་པ་དག་ཀྱང་བལྟ་བར་བགྱི་ལགས་སོ། །སླར་ [46a] [46a.1]ཡང་མི་ལྟ་ལ་ཞེས་བགྱི་བ་དེ་ནི་བཟོད་པའི་ཕ་རོལ་ཏུ་ཕྱིན་པ་དང་། ལྷག་པའི་བསམ་པས་སེམས་བསྐྱེད་པའི་ཚིག་{བླ་དགས་,བླ་དྭགས་}ལགས་སོ། །གཡས་གཡོན་དུ་ཡང་མི་ལྟ་བར་ཞེས་བགྱི་བ་དེ་ནི་ཉན་ཐོས་དང་། རང་སངས་རྒྱས་ཀྱི་ས་ལ་མི་དགའ་བ་དང་། ཐམས་ཅད་མཁྱེན་པའི་ཡེ་ཤེས་ [46a.2]ཀྱི་ཚིག་{བླ་དགས་,བླ་དྭགས་}ལགས་སོ། །གྲོང་ཁྱེར་ཆེན་པོ་ཞེས་བགྱི་བ་དེ་ནི་ཐམས་ཅད་མཁྱེན་པ་ཉིད་ཀྱི་གྲོང་ཁྱེར་གྱི་ཚིག་{བླ་དགས་,བླ་དྭགས་}ལགས་སོ། །ཇི་ལྟ་ཇི་ལྟར་མཆི་བར་འགྱུར་བ་དེ་ལྟ་དེ་ལྟར་གྲོང་ཁྱེར་དེ་མཐོང་བར་ཡང་འགྱུར་ལ་ཞེས་བགྱི་བ་དེ་ནི་དེ་བཞིན་གཤེགས་པ་བསྙེངས་པ་ཐམས་ཅད་དང་བྲལ་བའི་ཚིག་ [46a.3]{བླ་དགས་,བླ་དྭགས་}དང་དེ་བཞིན་དུ་བྱང་ཆུབ་སེམས་དཔའ་སངས་རྒྱས་ཀྱི་ཡོན་ཏན་མཐོང་བ་དང་། སངས་རྒྱས་ཀྱི་སྤྱོད་པ་དང་། ཡེ་ཤེས་ལ་ངེས་པར་རྟོགས་པར་བགྱིད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པ་ལ་ཤིན་དུ་ལེགས་པར་སློབ་པའི་ཚིག་{བླ་དགས་,བླ་དྭགས་}ལགས་སོ། །ཇི་ལྟ་ [46a.4]ཇི་ལྟར་མཐོང་བ་དེ་ལྟ་དེ་ལྟར་དེའི་འཇིགས་པ་དང་། འཇིགས་སུ་རུང་བ་ཐམས་ཅད་ཀྱང་མ་མཆིས་པར་འགྱུར་ཞིང་ཞེས་བགྱི་བ་དེ་ནི་སེམས་ཅན་ཐམས་ཅད་འཇིགས་པ་མ་མཆིས་ཤིང་ཐེ་ཚོམ་དང་བྲལ་བར་འགྱུར་བའི་ཚིག་{བླ་དགས་,བླ་དྭགས་}ལགས་སོ། །གྲོང་ཁྱེར་དེར་ཞུགས་ན་རྒ་བ་དང་། འགུམ་པ་དང་ [46a.5]བྲོ་ནད་མ་མཆིས་པར་འགྱུར་ཞིང་སེམས་ཅན་དཔག་ཏུ་མ་མཆིས་པ་རྣམས་ཀྱི་དོན་བགྱིད་ལ། སྐྱེ་བ་དང་། རྒ་བ་དང་། བྲོ་ནད་དང་། འགུམ་པ་ལས་ཡང་དག་པར་བཟླ་བའི་སླད་དུ་ཆོས་སྟོན་པར་ཡང་བགྱིད་ཅེས་བགྱི་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ [46a.6]ཀྱི་ཚིག་{བླ་དགས་,བླ་དྭགས་}ལགས་སོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཡེ་ཤེས་དང་ལྡན་པ་ལགས་ཏེ། བཙུན་པ་བཅོམ་ལྡན་འདས་བདག་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་ཕྱག་འཚལ་ལགས་སོ། །དེ་ནས་བཅོམ་ [46a.7]ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་ལེགས་སོ་ཞེས་བྱ་བ་བྱིན་ཏེ། འོད་སྲུང་ལེགས་སོ་ལེགས་སོ། །འོད་སྲུང་ཁྱོད་ཀྱིས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྤྲོ་བ་སྐྱེད་པ་ནི་ཡང་ཁྱོད་ལེགས་ཏེ། འོད་སྲུང་ཁྱོད་ཀྱིས་དཔེ་བརྗོད་པ་དེས་ལྷ་དང་མི་རྣམས་ [46b] [46b.1]ཀྱི་སྐྱེ་དགུ་ལས་སྲོག་ཆགས་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འོད་སྲུང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཐབས་ལ་མཁས་པ་ལེགས་པར་བསླབས་པ། ཡོན་ཏན་དཔག་ཏུ་མེད་པ་དང་ལྡན་པ་ཡིན་ཏེ། འོད་སྲུང་བྱང་ [46b.2]ཆུབ་སེམས་དཔའ་སེམས་དཔའ་ཆེན་པོ་ནི་གང་གིས་བདག་ལ་གནོད་པར་འགྱུར་བ་འམ། གཞན་ལ་གནོད་པར་འགྱུར་བ་དེ་ལྟ་བུའི་ལས་མི་བྱེད་ཅིང་། ཚིག་གང་གིས་བདག་དང་གཞན་ལ་གདུང་བར་འགྱུར་བ་དེ་ལྟ་བུའི་ཚིག་ཀྱང་མི་སྨྲའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ [46b.3]བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བཅོམ་ལྡན་འདས་ཀྱིས་དེ་སྐད་དུ་བྱང་ཆུབ་སེམས་དཔའ་ནི་ཚིག་གང་གིས་བདག་དང་གཞན་ལ་གདུང་བར་འགྱུར་བ་དེ་ལྟ་བུའི་ཚིག་མི་སྨྲའོ་ཞེས་བཀའ་སྩལ་ལགས་ན། [46b.4]བཅོམ་ལྡན་འདས་འོ་ན་ཅིའི་སླད་དུ་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་བྲམ་ཟེའི་ཁྱེའུ་འོད་ཟེར་ཕྲེང་ཞེས་བགྱི་བར་གྱུར་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་སྐད་ཅེས་དགེ་སྦྱོང་མགོ་ [46b.5]རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་གསུངས་ན། བཅོམ་ལྡན་འདས་ཀྱིས་དེ་སྐད་གསུངས་པ་དེ་ཅི་ལས་དགོངས་ཏེ་དེ་སྐད་གསུངས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་ [46b.6]འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་དང་། བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚད་རབ་ཏུ་རྣམ་པར་དབྱེ་བས་ཁྱོད་ལ་ཅི་ཞིག་བྱ་ཐོང་ཤིག །དེ་ཅིའི་ཕྱིར་ཞེ་ན། རིགས་ [46b.7]ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཐབས་ལ་མཁས་པ་བསམ་གྱིས་མི་ཁྱབ་པ་དང་ལྡན་པས་སྐྱེས་བུ་དམ་པ་དེ་དག་ནི་ཇི་ལྟ་ཇི་ལྟར་སེམས་ཅན་ཡོངས་སུ་སྨིན་པར་འགྱུར་བ་དེ་ལྟ་དེ་ལྟར་གནས་པར་བྱེད་པའི་ཕྱིར་རོ། །རིགས་ཀྱི་བུ་དེ་ལྟ་མོད་ཀྱི་འོན་ཀྱང་ [47a] [47a.1]ལེགས་པར་རབ་ཏུ་ཉོན་ལ་ཚུལ་བཞིན་དུ་ཡིད་ལ་ཟུང་ཤིག་དང་། ཐབས་ལ་མཁས་པའི་ཕ་རོལ་ཏུ་ཕྱིན་པ་ལ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་བཤད་པར་བྱའོ། །ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ [47a.2]སངས་རྒྱས་མར་མེ་མཛད་ཚུན་ཆད་དུ་ཐབས་ལ་མཁས་པ་བསམ་གྱིས་མི་ཁྱབ་པ་བསྟན་པ་གང་ཡིན་པ་དེ་དག་ལས་ཕྱོགས་ཙམ་ཞིག་བསྟན་པར་བྱ་སྟེ། རིགས་ཀྱི་བུ་གང་གི་ཚེ་བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་ [47a.3]མེ་མཛད་མཐོང་མ་ཐག་ཏུ་མི་སྐྱེ་བའི་ཆོས་ལ་བཟོད་པ་འཐོབ་པའི་བར་དེར་བྱང་ཆུབ་སེམས་དཔའ་ནི་འཁྲུལ་པ་མེད་པ་དང་། ཅ་ཅོ་མེད་པ་དང་། བརྗེད་པ་མེད་པ་དང་། སེམས་རྣམ་པར་གཡེངས་པ་མེད་པ་དང་། ཤེས་རབ་ཉམས་པ་མེད་པ་ཡིན་ཏེ། རིགས་ཀྱི་བུ་མི་སྐྱེ་བའི་ཆོས་ལ་ [47a.4]བཟོད་པ་ཐོབ་པའི་བྱང་ཆུབ་སེམས་དཔའ་ནི་འདོད་ན་ཞག་བདུན་གྱིས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་འགྱུར། འདོད་ན་བསྐལ་པས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདོད་ན་བསྐལ་པ་བརྒྱས་ཀྱང་བྱང་ཆུབ་མངོན་པར་རྫོགས་པར་འཚང་ [47a.5]རྒྱ་བར་འགྱུར། འདོད་ན་བསྐལ་པ་སྟོང་གིས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདོད་ན་བསྐལ་པ་འབུམ་གྱིས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བྱང་ཆུབ་སེམས་དཔའ་ནི་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་འདོད་ [47a.6]ན་བསམས་བཞིན་དུ་སྲིད་པ་ལེན་ཅིང་འགྲོ་བར་ཡང་བྱེད་དོ། །དེ་ནི་ཐབས་ལ་མཁས་པ་དང་། ཤེས་རབ་ཀྱི་སྟོབས་བསྐྱེད་པས་གང་གི་ཚེ་འདོད་པ་དེའི་ཚེ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་ཅིང་། འདོད་ན་ཕྱི་མའི་མཐའི་ [47a.7]མུར་ཐུག་པའི་བསྐལ་པ་བརྒྱ་ཕྲག་མང་པོར་ཡང་ཡིད་ཡོངས་སུ་སྐྱོ་བ་མེད་པར་གནས་པར་བྱེད་དེ། དེ་ནི་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་ཉན་ཐོས་ཀྱང་ཞི་བའི་ཏིང་ངེ་འཛིན་དག་ལ་སྙོམས་པར་འཇུག་ལ། བྱང་ཆུབ་སེམས་དཔའ་ [47b] [47b.1]ཡང་ཞི་བའི་ཏིང་ངེ་འཛིན་དག་ལ་སྙོམས་པར་འཇུག་ཅིང་ལྡང་བར་བྱེད་མོད་ཀྱི་དེའི་ལུས་གཡོ་བར་ཡང་མི་འགྱུར། སེམས་གཡོ་བར་ཡང་མི་འགྱུར་རོ། །ཉན་ཐོས་ནི་བདག་ཉིད་ཡོངས་སུ་མྱ་ངན་ལས་འདའ་བ་ཁོ་ནར་ཤེས་པར་བྱེད་ཀྱི། བྱང་ཆུབ་སེམས་དཔའ་ནི་ཞི་བའི་ཏིང་ངེ་འཛིན་ [47b.2]དག་ལ་སྙོམས་པར་འཇུག་ཀྱང་བསྡུ་བའི་དངོས་པོ་བཞིས་སེམས་ཅན་རྣམས་བསྡུ་བའི་བརྩོན་འགྲུས་རྒྱུན་མི་གཅོད་ཅིང་ཕ་རོལ་ཏུ་ཕྱིན་པ་དྲུག་གིས་སེམས་ཅན་ཡོངས་སུ་སྨིན་པར་ཡང་བྱེད་ལ། སེམས་ཅན་རྣམས་ཡོངས་སུ་སྨིན་པར་བྱེད་པ་ན་སྙིང་རྗེ་ཆེན་པོ་སྐྱེད་པར་ཡང་བྱེད་དེ། དེ་ [47b.3]ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ནི་འདོད་ན་དགའ་ལྡན་གྱི་གནས་ན་འདུག་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ཆོས་ཀྱི་འཁོར་ལོ་སྐོར་བར་ཡང་ནུས་མོད་ཀྱི། བྱང་ཆུབ་ [47b.4]སེམས་དཔའ་འདི་སྙམ་དུ་སེམས་ཏེ། འཛམ་བུའི་གླིང་པའི་མི་རྣམས་ཀྱིས་ནི་ཆོས་མཉན་པའི་ཕྱིར་དགའ་ལྡན་གྱི་གནས་སུ་འཛེག་པར་མི་ནུས་ལ། ལྷ་རྣམས་ཀྱིས་ནི་ཆོས་མཉན་པའི་ཕྱིར་འཛམ་བུའི་གླིང་དུ་འབབ་པར་ནུས་སོ། །སྙམ་ནས་དེའི་ཕྱིར་བྱང་ཆུབ་སེམས་དཔའ་འཛམ་བུའི་ [47b.5]གླིང་དུ་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ནི་འདོད་ན་དགའ་ལྡན་གྱི་གནས་ནས་ཤི་འཕོས་ནས་མའི་མངལ་དུ་མ་ཞུགས་ཤིང་མངལ་གྱི་དྲི་མས་མ་རིག་པ་ཁོ་ནར་ [47b.6]དེའི་སྐད་ཅིག་དེ་ཉིད་ལ་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ཆོས་ཀྱི་འཁོར་ལོ་སྐོར་བར་ཡང་ནུས་མོད་ཀྱི། དེ་ལ་སེམས་ཅན་ཁ་ཅིག་འདི་སྙམ་དུ་འདི་ལྷ་འམ། ཀླུ་འམ། གནོད་སྦྱིན་ནམ། དྲི་ཟའམ། སྤྲུལ་པ་ཞིག་གམ། འདི་ག་ལས་འོངས་པ་ཞིག་སྙམ་དུ་ནེམ་ནུར་དང་། ཡིད་ [47b.7]གཉིས་དང་། ཐེ་ཚོམ་སྐྱེ་བར་འགྱུར་ཏེ། དེ་དག་ནེམ་ནུར་དང་། ཡིད་གཉིས་དང་། ཐེ་ཚོམ་སྐྱེས་པར་གྱུར་ན། ཉོན་མོངས་པ་ཡོངས་སུ་ཟད་པར་བྱ་བའི་ཕྱིར་ཆོས་ཉན་པར་མི་བྱེད། ཤེས་པར་མི་བྱེད། བརྩོན་འགྲུས་རྩོམ་པར་མི་བྱེད་པས་བྱང་ཆུབ་སེམས་དཔས་མངལ་ན་གནས་པ་ [48a] [48a.1]བསྟན་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ནོ། །རིགས་ཀྱི་བུ་ཁྱོད་འདི་སྙམ་དུ་བྱང་ཆུབ་སེམས་དཔའ་མངལ་གྱི་གནས་སུ་ཞུགས་སོ། །སྙམ་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ཏིང་ངེ་འཛིན་དྲི་མ་མེད་པ་ཞེས་བྱ་བ་ཡོད་དེ། བྱང་ཆུབ་སེམས་དཔའ་དགའ་ [48a.2]ལྡན་གྱི་གནས་ན་གནས་བཞིན་དུ་དེ་ལ་སྙོམས་པར་ཞུགས་ཤིང་ཡོངས་སུ་བསྟེན་ནས་ཏིང་ངེ་འཛིན་དེ་ལས་མ་ལངས་བཞིན་དུ་དགའ་ལྡན་གྱི་གནས་ཉིད་ནས་བྱང་ཆུབ་ཀྱི་སྙིང་པོ་ལ་འདུག་མོད་ཀྱི། དགའ་ལྡན་གྱི་ལྷ་རྣམས་ཀྱིས་དེ་ན་དེ་མ་མཐོང་བས་བྱང་ཆུབ་སེམས་དཔའ་ཏིང་ངེ་འཛིན་ལས་ལངས་སོ། ། [48a.3]སྙམ་དུ་ཤེས་པར་ཟད་དོ། །བྱང་ཆུབ་སེམས་དཔའ་ནི་དགའ་ལྡན་གྱི་གནས་ནས་མི་གཡོ་བཞིན་དུ་སྤྲུལ་པ་དག་གིས་འཕོ་བ་དང་། སྐྱེ་བ་དང་མངོན་པར་འབྱུང་བ་དང་། དཀའ་བ་སྤྱོད་པའི་བྱ་བ་ཐམས་ཅད་ཀུན་དུ་སྟོན་པར་བྱེད་དེ། དེ་དག་ཐམས་ཅད་ནི་བྱང་ཆུབ་སེམས་དཔས་སྤྲུལ་པ་དག་གིས་ [48a.4]ཀུན་ཏུ་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་ནི་ཀུན་དུ་སྤྱོད་པ་གཙང་བ་ཡིན་པས་ཕྱིར་མངལ་གྱི་གནས་སུ་མི་འགྲོ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་གླང་པོ་ཆེ་ཐལ་ཀར་དུ་བསྒྱུར་ཏེ་ [48a.5]མའི་མངལ་དུ་འཇུག་པ་སྟོན་པར་བྱེད་ཅེ་ན། དེ་ནི་དཀར་པོའི་ཕྱོགས་ཀྱི་ཚིག་{བླ་དགས་,བླ་དྭགས་}ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལས་ཁྱད་པར་དུ་འཕགས་པ་ཡིན་པས་ན་དེས་ནི་ཅི་ནས་ཀྱང་ལྷའམ་མི་གཞན་གང་ལ་ཡང་མེད་པ་དེ་ལྟ་བུ་ཁོ་ནས་མངལ་དུ་འཇུག་ [48a.6]པ་བསྟན་པར་བྱ་དགོས་པའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་ཟླ་བ་བཅུར་མའི་མངལ་ན་གནས་ཤིང་དགུར་མ་ཡིན་ཞེ་ན། སེམས་ཅན་གང་དག་འདི་སྙམ་དུ་ཀྱེ་མ་གཞོན་ནུ་འདི་ནི་མངལ་ན་གནས་པའི་དུས་ཡོངས་སུ་མ་ [48a.7]རྫོགས་པས་དབང་པོ་མ་ཚང་བར་གྱུར་ཏོ། །སྙམ་དུ་སེམས་པའི་སེམས་ཅན་དེ་དག་གི་ཐེ་ཚོམ་བཅད་པ་དང་། མངལ་གྱི་དུས་དང་། དབང་པོ་ཡོངས་སུ་རྫོགས་པ་ཀུན་དུ་བསྟན་པར་བྱ་བའི་ཕྱིར་བྱང་ཆུབ་སེམས་དཔའ་ཟླ་བ་བཅུར་མའི་མངལ་ན་གནས་ཀྱི་དགུར་ནི་མ་ཡིན་ནོ། །བྱང་ཆུབ་ [48b] [48b.1]སེམས་དཔའ་ཟླ་བ་བཅུར་མའི་མངལ་ན་གནས་པ་ན་ཡང་ལྷ་རྣམས་བྱང་ཆུབ་སེམས་དཔའ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འོང་བར་འགྱུར་ཞིང་དེ་དག་གིས་བྱང་ཆུབ་སེམས་དཔའ་མའི་མངལ་ན་གནས་པའི་ཚེ་བྱང་ཆུབ་སེམས་དཔའི་ལོངས་སྤྱོད་རིན་པོ་ཆེ་བཀོད་པའི་ཁང་པ་ [48b.2]བརྩེགས་པ་ལྷའི་ལོངས་སྤྱོད་ཐམས་ཅད་ལས་ཡང་དག་པར་འདས་པ་མཐོང་ནས་ལྷའི་བུ་ས་ཡ་ཕྲག་གཉིས་དང་། བཞི་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་ [48b.3]སེམས་དཔའ་མའི་མཚན་བརྟོལ་ཏེ་མངལ་གྱི་གནས་ནས་འབྱུང་བ་ཀུན་དུ་སྟོན་པར་བྱེད་ཅེ་ན། སེམས་ཅན་གང་དག་འདི་སྙམ་དུ་བྱང་ཆུབ་སེམས་དཔའ་ནི་ཕ་དང་མའི་མེར་མེར་པོ་ལས་སྐྱེས་པ་མ་ཡིན་གྱི་རྫུས་ཏེ་སྐྱེས་པ་ཡིན་ནོ་སྙམ་དུ་སེམས་པའི་སེམས་ཅན་དེ་དག་གི་ཐེ་ཚོམ་བཅད་པའི་ཕྱིར་ [48b.4]མའི་མཆན་བརྟོལ་ཏེ་མངལ་གྱི་གནས་ནས་འབྱུང་བ་ཀུན་ཏུ་བསྟན་ཏོ། །བྱུང་མ་ཐག་ཏུ་ཡུམ་ལྷ་མོ་སྒྱུ་འཕྲུལ་གྱི་ལུས་ལ་ཡང་རྨ་མེད་ཅིང་སྒྲོས་མེད་ལ། བྱང་ཆུབ་སེམས་དཔའ་མངལ་ན་གནས་པའི་ཚེ་ཡུམ་ལྷ་མོ་སྒྱུ་འཕྲུལ་གྱིས་བདེ་བ་མྱོང་བར་གྱུར་པ་གང་ཡིན་པ་དེ་ལྟ་བུའི་བདེ་བ་ནི་སྔོན་ནམ་ [48b.5]ཡང་མ་རེག་ཅིང་སྔོན་ནམ་ཡང་མ་མྱོང་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་དགོན་པར་བཙས་ཤིང་གྲོང་དུ་མ་ཡིན་ཞེ་ན། བྱང་ཆུབ་སེམས་དཔའ་ནི་ཡུན་རིང་པོ་ནས་དགོན་པའི་བསྔགས་པ་བརྗོད་པ་དང་། དབེན་པ་ལ་དགའ་བ་ [48b.6]དང་། ཀུན་སྤྱོད་པ་གཙང་བ་དང་། གྲོང་དུ་བཙས་ན་ལྷ་དང་། ཀླུ་དང་། གནོད་སྦྱིན་རྣམས་ཀྱང་ལྷའི་ཕྱེ་མ་དང་། སྤོས་དང་། མེ་ཏོག་ཕྲེང་བ་དང་། བྱུག་པ་དང་། མེ་ཏོག་དག་གིས་ཤིན་ཏུ་འཕགས་པའི་མཆོད་པ་བྱེད་པར་མི་འགྱུར་བ་དང་། སེར་སྐྱའི་གནས་ཀྱི་གྲོང་ཁྱེར་ན་གནས་པའི་མི་རྣམས་ཀྱང་ [48b.7]རྒྱགས་པ་དང་། བག་མེད་པ་སྐྱེ་བར་འགྱུར་བའི་ཕྱིར་ཏེ། གང་གི་ཕྱིར་བྱང་ཆུབ་སེམས་དཔའ་དགོན་པར་བཙས་ཤིང་གྲོང་དུ་མ་ཡིན་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའི་ཡུམ་གྱིས་ཤིང་བླག་ཤའི་ཡལ་ག་ལ་བཟུང་སྟེ་བང་མལ་མ་བྱས་པར་བྱང་ཆུབ་སེམས་ [49a] [49a.1]དཔའ་བཙས་པར་བྱས་ཤེ་ན། སེམས་ཅན་གང་དག་འདི་སྙམ་དུ་ཡུམ་ལྷ་མོ་སྒྱུ་འཕྲུལ་ནི་ཇི་ལྟར་བུད་མེད་གཞན་དག་བཞིན་དུ་སྡུག་བསྔལ་གྱི་ཚོར་བས་རེག་ཅིང་བྱང་ཆུབ་སེམས་དཔའ་བཙས་སོ་སྙམ་དུ་སེམས་པའི་སེམས་ཅན་དེ་དག་གི་ཐེ་ཚོམ་གཅད་པ་དང་། བདེ་བར་བཙས་ [49a.2]པར་ཀུན་ཏུ་བསྟན་པར་བྱ་བའི་ཕྱིར་ཡུམ་ལྷ་མོ་སྒྱུ་འཕྲུལ་གྱིས་ཤིང་བླག་ཤའི་ཡལ་ག་ལ་བཟུང་སྟེ་བང་མལ་མ་བྱས་པར་བྱང་ཆུབ་སེམས་དཔའ་བཙས་པར་བྱས་སོ། །ཅིའི་ཕྱིར་བྱང་ཆུབ་སེམས་དཔའ་མའི་མཆན་གཡས་པ་བརྟོལ་ཏེ། དྲན་པ་དང་ཤེས་བཞིན་གྱིས་མངལ་གྱི་གནས་ནས་བྱུང་ཞིང་ [49a.3]སྐྱེ་གནས་ནས་ཀྱང་མ་ཡིན། ལུས་ཀྱི་ཕྱོགས་གཞན་ནས་ཀྱང་མ་ཡིན་ཞེ་ན། བྱང་ཆུབ་སེམས་དཔའ་ནི་ཀུན་སྤྱོད་པ་གཙང་བ་དང་། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པ་དང་། འདུལ་བའི་སེམས་ཅན་རྣམས་གདུལ་བའི་ཕྱིར་དེས་ནི་ཇི་ལྟར་སེམས་ཅན་དམན་པ་ [49a.4]གཞན་དག་བཞིན་དུ་མའི་མངལ་དུ་རྟེན་ཅིང་གནས་པ་མ་ཡིན་པ་དང་། མི་གཙང་བ་མ་ཡིན་པ་དེ་ལྟར་སྐྱེ་བ་བསྟན་པར་བྱ་དགོས་པའི་ཕྱིར་ཏེ། དེས་ན་བྱང་ཆུབ་སེམས་དཔའ་མའི་མཆན་གཡས་པ་བརྟོལ་ཏེ། དྲན་པ་དང་ཤེས་བཞིན་གྱིས་མངལ་གྱི་གནས་ནས་བྱུང་ཞིང་བྱང་ཆུབ་སེམས་དཔའ་བཙས་མ་ [49a.5]ཐག་ཏུ་ཡུམ་ལྷ་མོ་སྒྱུ་འཕྲུལ་གྱི་མཆན་ཡང་རྨ་མེད་ཅིང་སྒྲོས་མེད་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་བཙས་མ་ཐག་ཏུ་ལྷའི་དབང་པོ་བརྒྱ་བྱིན་གྱིས་བཟུང་ལ་མིར་གྱུར་པ་གཞན་དག་གིས་མ་ཡིན་ཞེ་ན། དེ་ནི་བྱང་ཆུབ་སེམས་ [49a.6]དཔའི་དགེ་བའི་རྩ་བ་འབར་བས་ལྷ་རྣམས་འདུན་པར་བྱས་པས་ལྷའི་དབང་པོ་བརྒྱ་བྱིན་གྱིས་བདག་གིས་བྱང་ཆུབ་སེམས་དཔའ་བཙས་མ་ཐག་ཏུ་གོས་རིན་པོ་ཆེས་བཟུང་བར་བྱའོ། །ཞེས་སྔོན་སྨོན་ལམ་བཏབ་པའི་ཕྱིར་དེས་ན་བྱང་ཆུབ་སེམས་དཔའ་ལ་མཆོད་པའི་ལས་རྒྱ་ཆེན་པོ་ལ་བརྩོན་པར་བྱེད་ [49a.7]པ་ཡིན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་བཙས་མ་ཐག་ཏུ་ཡོངས་སུ་མ་བཟུང་བར་གོམ་པ་བདུན་འདོར་བར་བྱེད་ལ་དྲུག་ཀྱང་མ་ཡིན། བརྒྱད་ཀྱང་མ་ཡིན་ཞེ་ན། བྱང་ཆུབ་སེམས་དཔས་ནི་ཇི་ལྟར་གཞན་སུས་ཀྱང་སྔོན་མ་ [49b] [49b.1]བསྟན་པ་དེ་ལྟ་བུའི་རྫུ་འཕྲུལ་གྱི་སྟོབས་ཀྱི་བརྩོན་འགྲུས་ཆེན་པོ་དང་། སྐྱེས་བུ་དམ་པའི་རྩལ་གདོན་མི་ཟ་བར་ཀུན་ཏུ་བསྟན་པར་བྱ་དགོས་པ་དང་། གོམ་པ་བདུན་བོར་བས་སེམས་ཅན་གང་དག་གི་དོན་བྱ་དགོས་པ་དེ་དག་གི་དོན་གོམ་པ་དྲུག་གིས་ཀྱང་མི་ཆོག་ལ་བརྒྱད་ནི་ལྷག་པར་འགྱུར་བས་ན་དེའི་ [49b.2]ཕྱིར་བྱང་ཆུབ་སེམས་དཔའ་བཙས་མ་ཐག་ཏུ་ཡོངས་སུ་མ་བཟུང་བར་གོམ་པ་བདུན་འདོར་བར་བྱེད་ལ་དྲུག་ཀྱང་མ་ཡིན། བརྒྱད་ཀྱང་མ་ཡིན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་གོམ་པ་བདུན་འདོར་བ་ན་ཚིག་འདི་སྐད་ཅེས་ང་ནི་ [49b.3]འཇིག་རྟེན་ན་ཐུ་བོ་ཡིན་ནོ། །ང་ནི་འཇིག་རྟེན་ན་གཙོ་བོ་ཡིན་ཏེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་དབྱུང་བར་བྱའོ་ཞེས་རྗོད་པར་བྱེད་ཅེ་ན། རིགས་ཀྱི་བུ་འཁོར་དེ་ན་བརྒྱ་བྱིན་དང་། ཚངས་པ་དང་། ལྷའི་བུ་དབང་ཆེ་བར་གྲགས་པ་དབང་ཆེ་བར་གྲགས་པ་དག་འདུས་པར་གྱུར་ཏེ་འཁོད་ལ་ [49b.4]ང་རྒྱལ་གྱིས་ཁེངས་པ་དེ་དག་འདི་སྙམ་དུ་བདག་ཅག་ནི་ཆེས་བླ་མ་ཡིན་གྱི། བྱང་ཆུབ་སེམས་དཔའ་འདི་ནི་དེ་ལྟ་མ་ཡིན་ནོ། །སྙམ་དུ་སེམས་ཤིང་འདུད་པར་མི་བྱེད། རབ་ཏུ་འདུད་པར་མི་བྱེད། ཕྱག་འཚལ་བར་མི་བྱེད། རབ་ཏུ་ཕྱག་འཚལ་བར་མི་བྱེད་པས་ན་དེས་ན་བྱང་ཆུབ་སེམས་དཔའ་འདི་སྙམ་དུ་ [49b.5]སེམས་ཏེ། བརྒྱ་བྱིན་དང་། ཚངས་པ་དང་། ལྷའི་བུ་འདི་དག་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་རོ། །སྙམ་ནས། དེའི་ཕྱིར་བྱང་ཆུབ་སེམས་དཔས་ཚིག་འདི་སྐད་ཅེས་ང་ནི་འཇིག་རྟེན་ན་ཐུ་བོ་ཡིན་ནོ། །ང་ནི་འཇིག་རྟེན་ན་གཙོ་བོ་ཡིན་ [49b.6]ཏེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་དབྱུང་བར་བྱའོ་ཞེས་སྨྲས་ཏེ། ཚིག་གི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གོ་བར་གྱུར་ནས་ལྷའི་བུ་གང་དག་དེར་མ་ལྷགས་པ་དེ་དག་ཀྱང་སྒྲ་དེ་ཐོས་ནས་ལྷགས་པར་གྱུར་ཅིང་། དེ་ནས་ལྷའི་བུ་དེ་དག་དང་། བརྒྱ་བྱིན་ [49b.7]དང་། ཚངས་པ་དག་ཡིད་བྱུང་བ་སྐྱེས་ཤིང་ངོ་མཚར་དུ་འཛིན་པར་གྱུར་ནས་གུས་པ་དང་བཅས་པས་ཐལ་མོ་པུག་པུག་པོར་སྦྱར་ཏེ། བྱང་ཆུབ་སེམས་དཔའ་ལ་མངོན་པར་འདུད་ཅིང་ཕྱག་འཚལ་བར་བྱེད་དེ། གང་གི་ཕྱིར་བྱང་ཆུབ་སེམས་དཔའ་ཚིག་འདི་སྐད་ཅེས་ང་ནི་འཇིག་རྟེན་ན་གཙོ་བོ་ཡིན་ [50a] [50a.1]ཏེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་དབྱུང་བར་བྱའོ། །ཞེས་སྨྲས་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ནོ། །བྱང་ཆུབ་སེམས་དཔའི་ཚིག་དེ་ནི་ཡང་དག་པ་ཡིན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་བཙས་ [50a.2]མ་ཐག་ཏུ་གད་མོ་ཆེར་དགོད་པར་བྱེད་ཅེ་ན། རིགས་ཀྱི་བུ་བྱང་ཆུབ་སེམས་དཔའ་ལ་ནི་འདོད་ཆགས་དང་ལྷན་ཅིག་སྐྱེས་པའམ། ཞེ་སྡང་དང་ལྷན་ཅིག་སྐྱེས་པའམ། གཏི་མུག་དང་ལྷན་ཅིག་སྐྱེས་པ་རྒོད་པའི་གད་མོ་ཡང་མེད། རྟ་གད་དུ་དགོད་པ་ཡང་མེད་མོད་ཀྱི། འོན་ཀྱང་བྱང་ཆུབ་སེམས་དཔའ་ [50a.3]འདི་སྙམ་དུ་སེམས་ཏེ། བྱང་ཆུབ་སེམས་དཔའ་འདི་དག་གིས་ནི་བདག་དང་ལྷན་ཅིག་ཏུ་བྱང་ཆུབ་ཏུ་སེམས་བསྐྱེད་པ་ལས་བདག་གིས་ནི་བྱང་ཆུབ་ཐོབ་པར་གྱུར་གྱི། སེམས་ཅན་འདི་དག་ནི་ལེ་ལོའི་དབང་གིས་འཁོར་བ་ཐིབ་པོར་གནས་པར་གྱུར་པས་ཀྱེ་མ་སེམས་ཅན་འདི་དག་ནི་ཐམས་ཅད་མཁྱེན་ [50a.4]པ་ཉིད་ཐོབ་པར་བྱ་བའི་ཕྱིར་སྙིང་རྗེས་བགྲོད་པར་བྱ་བའི་ཆོས་ཐམས་ཅད་ལ་བརྩོན་འགྲུས་རྩོམ་པར་མི་བྱེད་པ་ཡིན་ནོ་ཞེས་དེ་ལྟར་སྙིང་རྗེ་ཆེན་པོ་བསྐྱེད་པ་ན། སེམས་ཅན་དེ་དག་གིས་བྱང་ཆུབ་སེམས་དཔའ་ནི་བསམ་པ་ཡོངས་སུ་རྫོགས་པ་ཡིན་པར་རིག་ལ། བདག་ཅག་ནི་དམན་པ་དང་། བག་ [50a.5]མེད་པ་ཡིན་པར་རིག་ནས་དེ་དག་ད་བདག་ལ་ཕྱག་འཚལ་བར་འགྱུར་རོ། །སྙམ་ནས་དེའི་ཕྱིར་བྱང་ཆུབ་སེམས་དཔའ་གད་མོ་ཆེར་དགོད་པར་བྱེད་དེ་དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་དྲི་མ་མེད་པ་བཙས་མ་ཐག་ཏུ་བརྒྱ་བྱིན་དང་། [50a.6]ཚངས་པ་དག་གིས་འཁྲུ་བར་བྱེད་ཅེ་ན། རིགས་ཀྱི་བུ་དེ་ནི་བརྒྱ་བྱིན་དང་། ཚངས་པ་དག་མཆོད་པའི་ལས་བྱེད་པ་ཡང་ཡིན་ལ། འཇིག་རྟེན་ན་ཡང་ཁྱེའུ་དག་བཙས་མ་ཐག་ཏུ་གདོན་མི་ཟ་བར་ཁྲུས་བྱེད་པ་དག་ཡོད་པས་བྱང་ཆུབ་སེམས་དཔས་ཀྱང་འཇིག་རྟེན་ཤེས་པའི་རྗེས་སུ་ [50a.7]གདོན་མི་ཟ་བར་འཇུག་པར་བྱ་དགོས་པས་ན་དོན་གྱི་དབང་དེ་མཐོང་བའི་ཕྱིར་བྱང་ཆུབ་སེམས་དཔའ་བཙས་མ་ཐག་ཏུ་བརྒྱ་བྱིན་དང་། ཚངས་པ་དག་གིས་འཁྲུ་བར་བྱེད་དེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་དགོན་པར་བཙས་ [50b] [50b.1]མ་ཐག་ཁོ་ནར་བྱང་ཆུབ་ཀྱི་སྙིང་པོར་མི་འགྲོ་བར་ཅིའི་ཕྱིར་གྲོང་ཁྱེར་དུ་འཇུག་ཅེ་ན། དབང་པོ་རྣམས་ཡོངས་སུ་སྨིན་པར་ཀུན་དུ་བསྟན་པ་དང་། བཙུན་མོའི་འཁོར་གྱི་བྱ་བ་ཀུན་དུ་བསྟན་པ་དང་། དགའ་བ་དང་། རྩེད་མོ་དེ་དག་ཀུན་དུ་བསྟན་ནས་ཀྱང་གླིང་ཆེན་པོ་བཞི་ལ་མི་ལྟ་བར་སྤངས་ཏེ་མངོན་པར་འབྱུང་བ་ [50b.2]ཀུན་དུ་བསྟན་པར་བྱ་བ་དང་། འདི་ལྟར་སེམས་ཅན་གཞན་དག་ཀྱང་བདག་གི་རྗེས་སུ་སློབ་པ་ན་འདོད་པའི་དགའ་བ་དང་། རྩེད་མོ་དང་། ལོངས་སྤྱོད་དང་། འཁོར་རྒྱ་ཆེན་པོ་དག་སྤངས་ཏེ་རབ་ཏུ་འབྱུང་བའི་ཕྱིར་མངོན་པར་འབྱུང་བར་འགྱུར་བར་བྱ་བའི་ཕྱིར་ཏེ། གང་གི་ཕྱིར་བྱང་ཆུབ་སེམས་དཔའ་དགོན་པར་ [50b.3]བཙས་མ་ཐག་ཁོ་ནར་བྱང་ཆུབ་ཀྱི་སྙིང་པོར་མི་འགྲོ་བར་གྲོང་ཁྱེར་དུ་ཞུགས་ནས་མངོན་པར་འབྱུང་བར་བྱེད་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་བཙས་ནས་ཞག་བདུན་ལོན་པ་ན། ཡུམ་ལྷ་མོ་སྒྱུ་འཕྲུལ་འཆི་བའི་ [50b.4]དུས་བྱེད་པར་གྱུར་ཅེ་ན། དེ་ལ་ནི་བྱང་ཆུབ་སེམས་དཔའ་བཙས་པའི་ཉེས་པ་མེད་དེ། ཡུམ་ལྷ་མོ་སྒྱུ་འཕྲུལ་ཉིད་ཚེ་ཟད་ནས་དུས་ལས་འདས་པ་ཡིན་གྱི་བྱང་ཆུབ་སེམས་དཔའི་ཉེས་པ་མ་ཡིན་ཏེ། འདི་ལྟར་བྱང་ཆུབ་སེམས་དཔའ་དགའ་ལྡན་གྱི་གནས་མཆོག་ན་གནས་པ་ཉིད་ཀྱི་ཚེ་ན་ལྷའི་མིག་ [50b.5]རྣམ་པར་དག་པས་ཡུམ་ལྷ་མོ་སྒྱུ་འཕྲུལ་གྱི་ཚེ་ལ་སོ་སོར་བརྟགས་ན་བྱང་ཆུབ་སེམས་དཔའི་ཡུམ་ལྷ་མོ་སྒྱུ་འཕྲུལ་གྱི་ཚེའི་ལྷག་མ་ནི་ཟླ་བ་བཅུ་དང་ཞག་བདུན་ལས་མ་ལས་པར་ཤེས་ནས། དེའི་འོག་ཏུ་བྱང་ཆུབ་སེམས་དཔའ་དགའ་ལྡན་གྱི་གནས་མཆོག་ནས་ཤི་འཕོས་ཏེ་མའི་མངལ་དུ་ [50b.6]ཞུགས་པ་ཡིན་པས་རིགས་ཀྱི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་ཡུམ་ལྷ་མོ་སྒྱུ་འཕྲུལ་ཉིད་ཚེ་ཟད་ནས་འཆི་བའི་དུས་བྱས་པར་ཟད་ཀྱི། བྱང་ཆུབ་སེམས་དཔའ་བཙས་པའི་ཉེས་པ་ནི་མ་ཡིན་པར་རིགས་པར་བྱ་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་ [50b.7]སེམས་དཔས་ཡི་གེ་དང་། ལག་རྩིས་དང་། བསྟན་བཅོས་དང་། གྲངས་དང་རྩིས་དང་། རལ་གྲིའི་ཐབས་དང་། མདའ་གཞུའི་ཐབས་དང་། འགྱེད་སྟོབས་དང་། གྱད་ཀྱི་འཛིན་སྟངས་དང་། སྐར་མའི་དཔྱད་དང་། དགའ་བ་དང་། རྩེད་མོ་དག་ལེགས་པར་བསླབས་ཤེ་ན། འཇིག་རྟེན་དང་རྗེས་སུ་འཐུན་པར་བྱ་བའི་ཕྱིར་ཏེ། འདི་ [51a] [51a.1]ལྟར་བྱང་ཆུབ་སེམས་དཔའ་དང་པོ་ཉིད་ནས་གང་ལ་ལེགས་པར་བསླབས་པར་མ་བྱས་པའི་བཟོ་འམ། གསང་སྔགས་སམ། རིག་སྔགས་སམ། བསྟན་བཅོས་སམ། བྲོ་གར་རམ་གླུ་འམ། རོལ་མོའི་སྒྲ་འམ། བཞད་གད་དམ། འཇོ་སྒེག་གམ། དགའ་བ་འམ། རྩེད་མོ་ཀུན་དུ་བསྟན་པར་བྱ་བ་ནི་སྟོང་གསུམ་གྱི་ [51a.2]སྟོང་ཆེན་པོའི་འཇིག་རྟེན་གྱི་ཁམས་ན་འགའ་ཡང་མེད་མོད་ཀྱི། འོན་ཀྱང་བྱང་ཆུབ་སེམས་དཔའ་ལ་ནི་བཙས་མ་ཐག་ཁོ་ནར་འཇིག་རྟེན་དང་འཇིག་རྟེན་ལས་འདས་པའི་བཟོ་དང་། ལས་ཀྱི་གནས་ཐམས་ཅད་མངོན་དུ་འགྱུར་རོ། །དེ་ཅིའི་ཕྱིར་ཞེ་ན། སྔོན་ཤིན་དུ་ལེགས་པར་བསླབས་པ་དང་། དགེ་བའི་རྩ་བ་ཡོངས་ [51a.3]སུ་སྨིན་པའི་དབང་གི་སྟོབས་བསྐྱེད་པའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་སྲིད་པ་ཐ་མ་པ་བཙུན་མོ་དང་། སླས་དང་། གཡོག་འཁོར་ལེན་པར་བྱེད་ཅེ་ན། རིགས་ཀྱི་བུ་བྱང་ཆུབ་སེམས་དཔའ་ནི་འདོད་པ་དོན་དུ་གཉེར་བ་མ་ཡིན་ནོ། །དེ་ཅིའི་ [51a.4]ཕྱིར་ཞེ་ན། དེའི་གནས་སྐབས་ན་སྐྱེས་བུ་དམ་པ་ནི་འདོད་ཆགས་དང་བྲལ་བའི་ཕྱིར་ཏེ། འོན་ཀྱང་བྱང་ཆུབ་སེམས་དཔའ་སྲིད་པ་ཐམ་པས་ནི་བཙུན་མོ་དང་། སླས་དང་བུའི་འཁོར་གདོན་མི་ཟ་བར་བསྟན་པར་བྱ་དགོས་ཏེ་སེམས་ཅན་གང་དག་འདི་སྙམ་དུ་བྱང་ཆུབ་སེམས་དཔའ་ནི་སྐྱེས་བུ་དམ་པ་མ་ཡིན་གྱི་ཟ་མའི་ [51a.5]རིགས་ཤིག་ཡིན་ནོ་སྙམ་དུ་སེམས་པར་གྱུར་ན། དེ་དག་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་བས་སེམས་ཅན་དེ་དག་གི་ཐེ་ཚོམ་གཅད་པ་དང་། འདི་ལྟ་སྟེ་སྲས་སྒྲ་གཅན་ཟིན་ཀུན་ཏུ་བསྟན་པར་བྱ་བའི་ཕྱིར་བྱང་ཆུབ་སེམས་དཔས་ཤཱཀྱའི་བུ་མོ་ [51a.6]ས་འཚོ་མ་བླངས་སོ། །གང་དག་འདི་སྙམ་དུ་སྲས་སྒྲ་གཅན་ཟིན་ནི་ཡབ་དང་ཡུམ་གྱི་མེར་མེར་པོ་ལས་སྐྱེས་པ་ཡིན་ནོ་སྙམ་དུ་སེམས་ན་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། སྒྲ་གཅན་ཟིན་འདི་ནི་སྔོན་འདི་སྐད་དུ་བདག་སྲིད་པ་ཐམ་པའི་བུར་གྱུར་ཅིག་ཅེས་སྨོན་ལམ་བཏབ་པས་ན་སྒྲ་གཅན་ཟིན་ནི་ལྷ་ [51a.7]ཡུལ་ནས་ཤི་འཕོས་ནས་འདིར་རྫུས་ཏེ་སྐྱེས་པ་ཡིན་གྱི། ཕ་དང་མའི་མེར་མེར་པོ་ལས་སྐྱེས་པ་ནི་མ་ཡིན་པའི་ཕྱིར་རོ། །ཤཱཀྱའི་བུ་མོ་ས་འཚོ་མ་ཡང་སྔོན་གྱི་སྨོན་ལམ་གྱི་དབང་གིས་བླངས་པ་ཡིན་ཏེ། དེས་དེ་བཞིན་གཤེགས་པ་མར་མེ་མཛད་ཀྱི་སྤྱན་སྔར་བྲམ་ཟེའི་ཁྱེའུ་ཁྱོད་སྲིད་པ་ཐ་མ་པར་ [51b] [51b.1]གྱུར་པ་ན་བདག་གི་ཁྱིམ་ཐབ་ཏུ་གྱུར་ལ། བདག་ཀྱང་ཁྱོད་ཀྱི་བཙུན་མོར་གྱུར་ཅིག་ཅེས་སྨོན་ལམ་བཏབ་པའི་ཕྱིར་རོ། དེའི་ཚེ་ན་བྱང་ཆུབ་སེམས་དཔས་ཀྱང་འདི་སྐད་ཅེས་བཟང་མོ་ང་ནི་འདོད་པ་རྣམས་དོན་དུ་གཉེར་བ་མ་ཡིན་མོད་ཀྱི། འོན་ཀྱང་ཁྱོད་ཀྱི་བསམ་པ་ཇི་ལྟ་བ་བཞིན་དུ་གྱུར་ཅིག་ཅེས་ཨུད་པ་ [51b.2]ལའི་ཕྱིར་ཁས་བླངས་ཏེ། སངས་རྒྱས་ཀྱི་སྤྱན་སྔར་དགེ་བའི་རྩ་བ་བསྐྱེད་པ་དེ་ནི་མི་སླུ་བ་ཡིན་པས་ན་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་སོ། །གཞན་ཡང་བྱང་ཆུབ་སེམས་དཔའ་སྲིད་པ་ཐམ་པས་ནི་བཙུན་མོའི་འཁོར་དང་། གཡོག་འཁོར་གདོན་མི་ཟ་བར་ཀུན་དུ་བསྟན་ [51b.3]པར་བྱ་དགོས་ཏེ། འདི་ལྟར་ཤཱཀྱའི་བུ་མོ་ས་འཚོ་མས་ཀྱང་བྱང་ཆུབ་སེམས་དཔའི་གཟུགས་ཕུན་སུམ་ཚོགས་པ་དང་། ལྷའི་མཆོད་པ་ཕུན་སུམ་ཚོགས་པ་དང་། མངོན་པར་འབྱུང་བ་ཕུན་སུམ་ཚོགས་པ་མཐོང་ནས་འདི་སྐད་དུ་ཀྱེ་མ་བདག་ཀྱང་ཡོན་ཏན་གྱི་ཆོས་འདི་ལྟ་བུ་དང་ལྡན་པར་གྱུར་ཅིག་ [51b.4]ཅེས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པའི་ཕྱིར་ཏེ། དེ་ལྟར་ན་ཤཱཀྱའི་བུ་མོ་ས་འཚོ་མ་བྱང་ཆུབ་ཀྱི་སེམས་བརྟན་པར་སྐྱེད་དུ་གཞུག་པའི་ཕྱིར་ཡང་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་སོ། །གཞན་ [51b.5]ཡང་སེམས་ཅན་གང་དག་འདོད་པ་དང་། བྲན་དང་། ཆུང་མ་དང་། ལས་ཀྱི་མཐའ་དང་། ཁང་ཁྱིམ་དང་། ནོར་རྫས་ཀྱི་འདུ་འཛིས་སྦགས་ནས་ཡོངས་སུ་འཛིན་པ་སྤངས་ཏེ་རབ་ཏུ་འབྱུང་བར་མི་ནུས་པའི་སེམས་ཅན་དེ་དག་ལ་འདོད་པའི་སྲེད་པ་དང་། ལོངས་སྤྱོད་དང་། ནོར་ [51b.6]རྫས་དང་། ཆུང་མ་ལ་མི་ལྟ་བ་ཀུན་དུ་བསྟན་པར་བྱ་བའི་ཕྱིར་ཡང་བྱང་ཆུབ་སེམས་དཔས་ཤཱཀྱའི་བུ་མོ་ས་འཚོ་མ་བླངས་ནས་ཁང་ཁྱིམ་དང་ནོར་རྫས་དང་། ཆུང་མ་དང་། འཁོར་རྣམས་ལ་མི་ལྟ་བར་སྤངས་ཏེ་མངོན་པར་བྱུང་ན། སེམས་ཅན་དེ་དག་ཀྱང་འདི་སྙམ་དུ་གཞོན་ [51b.7]ནུ་དོན་ཐམས་ཅད་གྲུབ་པ་འདི་ཡང་དེ་ལྟར་བཙུན་མོ་དང་། ནོར་རྫས་དང་། འཁོར་དང་། ལོངས་སྤྱོད་རྒྱ་ཆེན་པོ་དག་ལ་མི་ལྟ་བར་སྤངས་ཏེ། རབ་ཏུ་བྱུང་ན་དེའི་ཕྱིར་བདག་ཅག་ཀྱང་ཅིའི་ཕྱིར་རབ་ཏུ་འབྱུང་བར་མི་བྱ་སྙམ་དུ་སེམས་པར་བྱ་བའི་ཕྱིར་རོ།། །། [52a] [52a.1]བམ་པོ་གསུམ་པ། གཞན་ཡང་བྱང་ཆུབ་སེམས་དཔས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བུད་མེད་གཞོན་ནུ་བསྙེན་བཀུར་མ་གང་དག་དགེ་བའི་ཆོས་རྣམས་ཀྱིས་ཡོངས་སུ་སྨིན་པར་བྱས་ཤིང་ཡིད་གཅུགས་པར་གྱུར་པ་དེ་དག་གིས་འདི་སྐད་ཅེས་བདག་ཅག་ [52a.2]ཁྱོད་སྲིད་པ་ཐམ་པར་གྱུར་པའི་བར་ཚུན་ཆད་ཀྱི་བཙུན་མོར་གྱུར་ཅིག་ཅེས་སྨོན་ལམ་བཏབ་པས་ན་དེ་དག་གི་དཀར་པོའི་ཆོས་རྒྱ་ཆེར་སྨིན་པར་བྱ་བའི་ཕྱིར་ཡང་བྱང་ཆུབ་སེམས་དཔས་འཁོར་རྣམས་བླངས་ཏེ། དེ་ན་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་དུ་གནས་པའི་བུད་མེད་བཞི་ [52a.3]ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ལྷག་མ་རྣམས་ནི་ལོག་པར་མི་ལྟུང་བའི་ཆོས་ཅན་དུ་བྱས་ཏེ། རྣམ་གྲངས་དེས་ཀྱང་བྱང་ཆུབ་སེམས་དཔས་འཁོར་རྣམས་བླངས་སོ། །གཞན་ཡང་བུད་མེད་གང་དག་འདོད་ཆགས་ཀྱིས་ཡོངས་སུ་ [52a.4]གདུང་བ་ཆེན་པོས་ཡོངས་སུ་གདུངས་པར་གྱུར་པ་དེ་དག་གིས་བྱང་ཆུབ་སེམས་དཔའ་མཐོང་མ་ཐག་ཏུ་བདག་ཉིད་འདོད་ཆགས་དང་བྲལ་བར་ཀུན་ཤེས་པར་བྱ་བའི་ཕྱིར་རོ། །གཞན་ཡང་བྱང་ཆུབ་སེམས་དཔས་བདག་ཉིད་ཀྱི་ཆུ་ཞེང་དང་། ཁ་དོག་དང་། དབྱིབས་ཅི་འདྲ་བ་དེ་འདྲ་བའི་སྤྲུལ་ [52a.5]པ་མངོན་པར་སྤྲུལ་ནས། སྤྲུལ་པ་དེ་དང་བུད་མེད་དེ་དག་ལྷན་ཅིག་དགའ་བ་དང་། རྩེ་བ་དང་། དགའ་མགུར་སྤྱོད་པར་བྱེད་པ་ན་དེ་དག་སོ་སོ་ནས་འདི་སྙམ་དུ་བདག་ནི་བྱང་ཆུབ་སེམས་དཔའ་དང་ལྷན་ཅིག་དགའ་བ་དང་། རྩེ་བ་དང་། དགའ་མགུར་སྤྱོད་པར་བྱེད་དོ་སྙམ་དུ་སེམས་པར་ཟད་ [52a.6]ཀྱི། བྱང་ཆུབ་སེམས་དཔའ་ནི་བསམ་གཏན་གྱི་དགའ་བའི་གནས་པས་གནས་པར་བྱེད་དོ། །སྤྲུལ་པའི་འདོད་པའི་ལོངས་སྤྱོད་ཇི་ལྟ་བ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཚུན་ཆད་ནས། བྱང་ཆུབ་སེམས་དཔའི་འདོད་པའི་ [52a.7]ལོངས་སྤྱོད་ཀྱང་དེ་དང་འདྲ་བར་བལྟ་བར་བྱའོ། །ཤཱཀྱའི་བུ་འདུན་པ་དང་། རྟ་བསྔགས་ལྡན་གཉིས་ཀྱང་དེ་གཉིས་ཀྱི་སྔོན་གྱི་སྨོན་ལམ་ཉིད་ཡིན་པར་བལྟ་བར་བྱ་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་པར་བལྟ་བར་བྱའོ། །ཅིའི་ཕྱིར་བྱང་ཆུབ་སེམས་དཔའ་ [52b] [52b.1]ཤིང་འཛམ་བུའི་གྲིབ་མ་ལ་བསམ་གཏན་བྱེད་ཅེ་ན། བྱང་ཆུབ་སེམས་དཔའ་དེ་ན་གནས་པས་ལྷ་བྱེ་བ་ཕྲག་བདུན་ཅུ་གདུལ་བ་དང་ཡབ་དང་ཡུམ་དག་ཡང་དག་པར་བསྟན་པར་བྱ་བ་དང་། བྱང་ཆུབ་སེམས་དཔའ་བདག་རབ་ཏུ་འབྱུང་བའི་ཕྱིར་མངོན་པར་འབྱུང་བ་དང་། ཤེས་རབ་ཆེ་ [52b.2]བ་ཉིད་གདོན་མི་ཟ་བར་ཀུན་ཏུ་བསྟན་པར་བྱ་དགོས་པ་དང་། ཤིང་འཛམ་བུའི་གྲིབ་མས་མ་བཏང་བ་ཉིད་ཀྱང་ཀུན་ཏུ་བསྟན་པར་བྱ་བའི་ཕྱིར་ཏེ། གང་གི་ཕྱིར་བྱང་ཆུབ་སེམས་དཔའ་ཤིང་འཛམ་བུའི་གྲིབ་མ་ལ་བསམ་གཏན་བྱེད་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་བྱང་ཆུབ་ [52b.3]སེམས་དཔའི་ཐབས་ལ་མཁས་པ་ཡིན་ནོ། །བྱང་ཆུབ་སེམས་དཔའ་དགའ་བ་དང་། རྩེད་མོ་ཐམས་ཅད་དོན་དུ་མི་གཉེར་བ་ཅིའི་ཕྱིར་སྐྱེད་མོས་ཚལ་གྱི་སར་བྱུང་ཞེ་ན། རྒན་པོ་དང་། ནད་པ་དང་། ཤི་བ་ཀུན་ཏུ་བསྟན་པར་བྱ་བ་དང་། ཉེ་དུ་རྣམས་ཀྱིས་འདི་ལྟར་བྱང་ཆུབ་སེམས་ [52b.4]དཔའ་ནི་ཉེ་དུ་རྣམས་མི་འདོད་པ་མ་ཡིན་གྱི། རྒ་བ་དང་། ན་བ་དང་། འཆི་བས་འཇིགས་ཤིང་སྐྲག་པ་དང་། ཁྱིམ་ན་གནས་པ་ནི་ཉེས་པ་མང་པོའི་སྐྱོན་ཆགས་པས་གནས་མ་ཡིན་པར་རིག་ནས་མངོན་པར་བྱུང་བ་ཡིན་ནོ་ཞེས་ཤེས་པར་འགྱུར་བ་ཀུན་ཏུ་བསྟན་པར་བྱ་བ་དང་། སེམས་ [52b.5]ཅན་ཐམས་ཅད་ཀྱང་རྒ་བ་དང་། ན་བ་དང་། འཆི་བས་འཇིགས་པ་ཀུན་ཏུ་བསྟན་པར་བྱ་བའི་ཕྱིར་ཏེ། དེའི་ཕྱིར་ན་བྱང་ཆུབ་སེམས་དཔའ་དགའ་བ་དང་། རྩེད་མོ་དོན་དུ་མི་གཉེར་བ་ཡང་སྐྱེད་མོས་ཚལ་གྱི་སར་བྱུང་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ [52b.6]ཕྱིར་བྱང་ཆུབ་སེམས་དཔའ་ནམ་ཕྱེད་ཀྱི་དུས་ཀྱི་ཚེ་མངོན་པར་བྱུང་ལ་ཉིན་མོ་མ་ཡིན་ཞེ་ན་སེམས་ཅན་རྣམས་གང་ལ་གནས་ན། དགེ་བའི་རྩ་བ་འཕེལ་བར་འགྱུར་བའི་དགེ་བའི་རྩ་བ་ཀུན་ཏུ་བསྟན་པར་བྱ་བའི་ཕྱིར་ཏེ། དཀར་པོའི་ཆོས་དོན་དུ་གཉེར་བའི་རིགས་ཀྱི་བུས་ནི་བདེ་བ་རྒྱ་ཆེན་པོ་ཇི་སྙེད་ [52b.7]པ་ཡང་ཡོངས་སུ་སྤངས་ཏེ་ནམ་ཕྱེད་ཀྱི་དུས་ཀྱི་ཚེ་ན་མ་དྲིས་མི་ལྟོས་པར་མངོན་པར་འབྱུང་བར་བྱ་བ་དང་བདེ་བའི་ཡོ་བྱད་ཇི་སྙེད་པ་དག་ཀྱང་ཡོངས་སུ་སྤང་བར་བྱ་བ་དང་། དཀར་པོའི་ཕྱོགས་ཡོངས་སུ་ཉམས་པར་མི་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། ། [53a] [53a.1]ཅིའི་ཕྱིར་བྱང་ཆུབ་སེམས་དཔས་སྐྱེ་བོ་རྣམས་གཉིད་ལོག་པར་བྱས་ཏེ་མངོན་པར་བྱུང་ཞེ་ན། སྐྱེ་བོ་རྣམས་ནི་ལྷ་རྣམས་ཀྱིས་གཉིད་ལོག་པར་བྱས་པས་ལྷ་རྣམས་ཀྱིས་ཉེས་པར་ཀུན་ཏུ་བསྟན་པའི་ཕྱིར་ཏེ། བྱང་ཆུབ་སེམས་དཔའ་ལ་ཉེ་དུ་རྣམས་དང་། སྐྱེ་བོ་རྣམས་ [53a.2]ཐ་བ་དང་། ཞེ་སྡང་གི་སེམས་བསྐྱེད་པར་གྱུར་ན་དེ་དག་ལ་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་གྱི། དེ་དག་གི་སྐྱེ་བོ་རྣམས་ལྷ་རྣམས་ཀྱིས་གཉིད་ལོག་པར་བྱས་ཤིང་ལྷ་རྣམས་ཀྱིས་སྒོ་ཕྱེ་སྟེ། བར་སྣང་ལ་ཁྱེར་བས་དེ་ནི་ [53a.3]བྱང་ཆུབ་སེམས་དཔས་མཉེས་སོ་ཞེས་ཤེས་པར་གྱུར་ན། དེ་དག་བྱང་ཆུབ་སེམས་དཔའ་ལ་དད་པ་རྒྱ་ཆེན་པོ་འཐོབ་པར་འགྱུར་བས་དོན་གྱི་དབང་དེ་མཐོང་བའི་ཕྱིར་སྐྱེ་བོ་རྣམས་གཉིད་ལོག་པར་བྱས་ནས་མངོན་པར་བྱུང་སྟེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། ། [53a.4]ཅིའི་ཕྱིར་བྱང་ཆུབ་སེམས་དཔས་རྟ་དང་རྒྱན་རྣམས་ཤཱཀྱའི་བུ་འདུན་པ་ལ་ཕྱིར་བསྐུར་ཞེ་ན། འདི་ལྟ་སྟེ་ཆོག་ཤེས་པ་ཀུན་ཏུ་བསྟན་པར་བྱ་བའི་ཕྱིར་ཏེ། གཞན་དག་འདི་སྐད་ཅེས་བྱང་ཆུབ་སེམས་དཔའ་ནི་དངོས་པོ་ཐམས་ཅད་ལ་མི་ལྟ་བར་རབ་ཏུ་བྱུང་བས་ན་གསེར་དང་། དངུལ་དག་ [53a.5]དོན་དུ་གཉེར་བ་མ་ཡིན་ནོ། །ཞེས་བརྗོད་པར་བྱ་བ་དང་གཞན་ཡང་བྱང་ཆུབ་སེམས་དཔའ་ཕྱི་མའི་སྐྱེ་བོ་དག་རྗེས་སུ་སློབ་ཏུ་གཞུག་པར་བྱ་བའི་ཕྱིར་ཏེ། འདི་ལྟར་གང་དག་བསྟན་པ་འདི་ལ་རབ་ཏུ་བྱུང་བར་འགྱུར་བ་དེ་དག་གིས་ནི་ངའི་རྗེས་སུ་བསླབ་ཅིང་དངོས་པོ་ཐམས་ཅད་ལ་མི་ལྟ་བར་ [53a.6]འཕགས་པའི་རིགས་བཞི་ལ་བརྟེན་ནས་རབ་ཏུ་འབྱུང་བར་བྱ་སྟེ། རབ་ཏུ་འབྱུང་བས་ནི་དང་པོ་ཁོ་ན་ནས་འཚོ་བ་ལ་ལྟོས་ཤིང་རབ་ཏུ་འབྱུང་བར་མི་བྱའོ། །ཞེས་བསྟན་པར་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་ [53a.7]བདག་ཉིད་ཀྱིས་རལ་གྲིས་སྐྲ་བྲེགས་ཏེ། རབ་ཏུ་བྱུང་ཞེ་ན་རིགས་ཀྱི་བུ་འདི་ལྟར་གང་གིས་བྱང་ཆུབ་སེམས་དཔའི་དཔལ་དང་གཟི་བརྗིད་ཟིལ་གྱིས་མནན་ཏེ། སྐྲ་འདྲེག་པར་བཟོད་པའི་ལྷའམ། ཀླུའམ། གནོད་སྦྱིན་ནམ། དྲི་ཟའམ། མིའམ། མི་མ་ཡིན་པ་ནི་སྟོང་གསུམ་གྱི་སྟོང་ [53b] [53b.1]ཆེན་པོའི་འཇིག་རྟེན་གྱི་ཁམས་ན་འགའ་ཡང་མེད་པ་དང་། བྱང་ཆུབ་སེམས་དཔའ་དེ་ཉིད་རབ་ཏུ་འབྱུང་བ་དོན་དུ་གཉེར་བས་ན་དད་པ་དང་ལྡན་པ་ཡིན་ནོ་ཞེས་ཀུན་ཏུ་བསྟན་པ་དང་། བདག་ཉིད་ཀྱིས་སྐྲ་བྲེགས་ཏེ་རབ་ཏུ་བྱུང་ན་རྒྱལ་པོ་ཟས་གཙང་ཡང་སུས་ངའི་བུའི་སྐྲ་བྲེགས་དེ་ཆད་པས་གཅད་དོ་ [53b.2]ཞེས་མི་དགའ་བར་མི་འགྱུར་བ་དང་། བྱང་ཆུབ་སེམས་དཔའ་བདག་ཉིད་ཀྱིས་རང་གི་རལ་གྲིས་སྐྲ་བྲེགས་སོ་ཞེས་རྒྱལ་པོ་ཟས་གཙང་གིས་ཐོས་ནས་ཅང་མི་ཟེར་བར་འགྱུར་བར་བྱ་བའི་ཕྱིར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་ [53b.3]སེམས་དཔའ་ཡེ་ཤེས་དམ་པ་ལ་བཀའ་སྩལ་པ། རིགས་ཀྱི་བུ་གཞན་ཡང་གང་གི་ཕྱིར་བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱོད་པ་སྤྱད་པ་ཡང་ཉོན་ཅིག །འདི་ལྟར་བྱང་ཆུབ་སེམས་དཔའ་ནི་ཐབས་ལ་མཁས་པས་སེམས་ཅན་རྣམས་ཀྱི་མི་དགེ་བའི་ལས་ཀྱི་བྱ་བ་དག་ལ་ངེས་པར་སྐྱོ་བར་ [53b.4]བྱ་ཞིང་འདུན་པར་བྱ་བའི་ཕྱིར་ཏེ། རིགས་ཀྱི་བུ་འདི་ལྟར་བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་ [53b.5]པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་པ་དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་དང་། ལྡེམ་པོའི་ངག་ཡིན་པར་བལྟ་བར་བྱ་སྟེ། ལས་ཀྱི་སྒྲིབ་པ་དེའི་རྒྱུས་བྱང་ཆུབ་སེམས་དཔའ་ལོ་དྲུག་ཏུ་དཀའ་བ་སྤྱད་པ་སྤྱོད་དོ། །བྱང་ཆུབ་སེམས་དཔས་ཅི་ལས་བསམས་ [53b.6]ཏེ་ཚིག་དེ་སྐད་ཅེས་སྨྲས་ཤེ་ན། རིགས་ཀྱི་བུ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་བྲམ་ཟེའི་ཁྱེའུ་འོད་ཟེར་ཕྲེང་དེ་ལ་ནེའུ་ལྡངས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་བྱང་ཆུབ་སེམས་དཔའི་ཐེག་པ་ལ་ཡང་ [53b.7]དག་པར་ཞུགས་པ་ལྔ་ཞིག་ཡོད་པ་དེ་དག་སྡིག་པའི་གྲོགས་པོའི་དབང་དང་། སྡིག་པའི་གྲོགས་པོ་དང་ཕྲད་པས་བྱང་ཆུབ་ཀྱི་སེམས་དག་བརྗེད་པར་གྱུར་ནས་དེའི་ཚེ་རིགས་ཀྱི་བུ་ལྔ་པོ་དེ་དག་མུ་སྟེགས་ཅན་གྱི་བརྟུལ་ཞུགས་སྤྱོད་པར་གྱུར་ཅིང་སངས་རྒྱས་ཀྱི་བརྟུལ་ཞུགས་མི་སྤྱོད་པ་དང་། མུ་སྟེགས་ [54a] [54a.1]ཅན་གྱི་གསང་སྔགས་ལ་བརྩོན་ཞིང་སངས་རྒྱས་ཀྱི་གསང་སྔགས་ལ་མི་བརྩོན་པ་དང་། མུ་སྟེགས་ཅན་ལ་མོས་ཤིང་མུ་སྟེགས་ཅན་གྱི་དབང་གིས་བྱང་ཆུབ་ནི་བདག་ཅག་ལ་ཡོད་དེ། བདག་ཅག་ཀྱང་སངས་རྒྱས་ཡིན་ནོ་ཞེས་བདག་ཉིད་སྟོན་པ་ཡིན་པར་ཁས་འཆེ་བར་བྱེད་དོ། ། [54a.2]བྲམ་ཟེའི་ཁྱེའུ་འོད་ཟེར་ཕྲེང་གིས་རིགས་ཀྱི་བུ་དེ་དག་སྣོད་ཡིན་པར་རིག་ནས་དེ་ཐབས་ལ་མཁས་པས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་རིམ་གྱིས་མུ་སྟེགས་ཅན་དེ་དག་གི་དྲུང་ནས་ཕྱིར་བཟློག་པར་འདོད་པས་དེ་ཐབས་ལ་མཁས་པས་རྫ་མཁན་བུམ་བྱེད་ལ་ཚིག་འདི་སྐད་ [54a.3]ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཏེ། རིགས་ཀྱི་བུ་དེའི་ཚེ་བྲམ་ཟེའི་ཁྱེའུ་འོད་ཟེར་ཕྲེང་དེ་ཕྱོགས་གཞན་ཞིག་ཏུ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་ [54a.4]དང་ལྷན་ཅིག་ཏུ་འཁོད་དོ། །དེ་ནས་རྫ་མཁན་བུམ་བྱེད་དེ་ས་ཕྱོགས་ག་ལ་བ་དེར་སོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྔགས་པ་བརྗོད་ཅིང་བསྔགས་པ་བརྗོད་ནས་བྲམ་ཟེའི་ཁྱེའུ་འོད་ཟེར་ཕྲེང་ལ་འདི་སྐད་ཅེས་སྨྲས་སོ། །ཀྱེ་འོད་ [54a.5]ཟེར་ཕྲེང་ཚུར་ཤོག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འདོང་ངོ་། །རིགས་ཀྱི་བུ་དེ་ནས་བྲམ་ཟེའི་ཁྱེའུ་འོད་ཟེར་ཕྲེང་འདི་སྙམ་དུ་སེམས་ཏེ། ཀྱེ་མ་བྲམ་ཟེའི་ཁྱེའུ་འདི་དག་ནི་དགེ་བའི་རྩ་བ་ཡོངས་སུ་མ་སྨིན་པ་ཡིན་པས་གལ་ཏེ་ [54a.6]བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་དང་། བྱང་ཆུབ་ཀྱི་བསྔགས་པ་བརྗོད་ཅིང་མུ་སྟེགས་ཅན་རྣམས་ཀྱི་བསྔགས་པ་མ་ཡིན་པར་བརྗོད་པར་གྱུར་ན་རིགས་ཀྱི་བུ་འདི་དག་ཡོངས་སུ་དོགས་པར་གྱུར་ནས་དེ་བཞིན་གཤེགས་པ་དགྲ་ [54a.7]བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འགྲོ་བར་མི་འགྱུར་བའི་གནས་དེ་ལྟ་བུ་ཡོད་དོ་སྙམ་ནས་བྲམ་ཟེའི་ཁྱེའུ་འོད་ཟེར་ཕྲེང་དེ་སྔར་དམ་བཅས་པ་དེ་ཉིད་རྗེས་སུ་སྲུང་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པས་ཚིག་འདི་སྐད་ཅེས་དགེ་ [54b] [54b.1]སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་སོ། །ཇི་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པ་ཡིན་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ [54b.2]པའི་བྱང་ཆུབ་སེམས་དཔའ་ལ་ནི་བྱང་ཆུབ་ཀྱི་འདུ་ཤེས་ཀྱང་མེད། སངས་རྒྱས་ཀྱི་འདུ་ཤེས་ཀྱང་མེད། སངས་རྒྱས་ཞེས་བྱ་བའི་སངས་རྒྱས་ཀྱང་ཡང་དག་པར་རྗེས་སུ་མི་མཐོང་། བྱང་ཆུབ་ཀྱང་ཡང་དག་པར་རྗེས་སུ་མི་མཐོང་སྟེ། བྱང་ཆུབ་ནི་ནང་དུ་ཡང་ཡང་དག་པར་རྗེས་སུ་མི་མཐོང་། [54b.3]བྱང་ཆུབ་ནི་ཕྱི་རོལ་དུ་ཡང་དག་པར་རྗེས་སུ་མི་མཐོང་། བྱང་ཆུབ་ནི་ནང་དང་ཕྱི་རོལ་དུ་ཡང་ཡང་དག་པར་རྗེས་སུ་མི་མཐོང་བའི་ཕྱིར་རོ། །དེ་ལྟར་ཆོས་ཐམས་ཅད་མ་སྐྱེས་མི་དམིགས་པའི་ཕྱིར་བྱང་ཆུབ་ནི་གཏན་སྟོང་པ་ཉིད་ཡིན་པས་བྲམ་ཟེའི་ཁྱེའུ་འོད་ཟེར་ཕྲེང་གིས་ཤེས་རབ་ཀྱི་ཕ་རོལ་ཏུ་ [54b.4]ཕྱིན་པའི་རྒྱུ་འཐུན་པའི་ཐབས་ལ་མཁས་པ་དེས་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་སོ། །དེ་ནས་དུས་གཞན་ཞིག་གི་ཚེ་ན་བྲམ་ཟེའི་ཁྱེའུ་འོད་ཟེར་ཕྲེང་ [54b.5]དེ་ནེའུ་ལྡངས་ལྔ་པོ་དེ་དག་དང་ཆུ་འགྲམ་ཞིག་ན་འཁོད་པར་གྱུར་པ་དང་། དེ་ནས་སངས་རྒྱས་ཀྱི་མཐུས་རིགས་ཀྱི་བུ་ལྔ་པོ་དེ་དག་གདུལ་བའི་དབང་གི་ཕྱིར་རྫ་མཁན་བུམ་བྱེད་ཆུ་འགྲམ་དེ་ག་ལ་བ་དེར་སོང་སྟེ་བྲམ་ཟེའི་ཁྱེའུ་འོད་ཟེར་ཕྲེང་དེ་ལ་འདི་སྐད་ཅེས་སྨྲས་སོ། །ཀྱེ་འོད་ཟེར་ཕྲེང་ཚུར་ཤོག་ [54b.6]སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བ་ནི་ཤིན་ཏུ་རྙེད་པར་དཀའ་བ་ཡིན་གྱིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འདོང་ངོ་། །བྲམ་ཟེའི་ཁྱེའུ་འོད་ཟེར་ཕྲེང་ [54b.7]གིས་སྨྲས་པ། དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས། དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཏེ། བྲམ་ཟེའི་ཁྱེའུ་འོད་ཟེར་ཕྲེང་དེས་དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་ [55a] [55a.1]བྱ་བའི་ཕྱིར་འགྲོར་མ་བཏུབ་པ་དང་། དེ་ནས་རྫ་མཁན་བུམ་བྱེད་དེས་བྲམ་ཟེའི་ཁྱེའུ་འོད་ཟེར་ཕྲེང་གི་ཐོར་ཏོ་ནས་བཟུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་ཁྲིད་དེ་སོང་ངོ་། །བྲམ་ཟེའི་ཁྱེའུ་ལྔ་པོ་ [55a.2]དེ་དག་གིས་ཀྱང་བྲམ་ཟེའི་ཁྱེའུ་འོད་ཟེར་ཕྲེང་ལ་ཡོངས་སུ་བསྐོར་ཏེ་ཡིད་འདུན་པར་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་དོང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལོག་པར་ལྟ་བའི་ཁྱིམ་དུ་ [55a.3]སྐྱེས་པ་ལྔ་པོ་དེ་དག་ཆེར་འདུན་པར་གྱུར་ནས། འདི་སྙམ་དུ་འདི་ལྟར་བྲམ་ཟེའི་ཁྱེའུ་འོད་ཟེར་ཕྲེང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། དྲུང་དུ་འགྲོ་བ་དང་། དགེ་བའི་ཆོས་ [55a.4]ཡོངས་སུ་རྫོགས་པར་བྱ་བའི་ཕྱིར་རྫ་མཁན་བུམ་བྱེད་འདིས་ཐོར་ཏོ་ནས་བཟུང་བཞིན་དུ་ཡང་བདག་ཉིད་ཀྱི་སྲོག་ཡོངས་སུ་བཏང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་འགྲོ་བར་འགྱུར་བའི་སངས་རྒྱས་དེ་ནི་ཅི་འདྲ་བ་ཞིག་ [55a.5]ཡིན། སངས་རྒྱས་ཀྱི་ཆོས་དེ་ནི་ཅི་འདྲ་བ་ཞིག་ཡིན་སྙམ་ནས། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་གིས་འདུན་པ་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བལྟ་བའི་ཕྱིར་དེ་བཞིན་གཤེགས་པ་ [55a.6]འོད་སྲུང་གི་ཐད་དུ་དོང་ངོ་། །དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་མཐོང་མ་ཐག་ཏུ་སྔོན་གྱི་དགེ་བའི་རྩ་བས་ཡང་དག་པར་བསྐུལ་བས་དད་པ་ཐོབ་པར་གྱུར་ཏོ། །དེ་དག་གིས་དད་པ་ཐོབ་ནས་བྲམ་ཟེའི་ཁྱེའུ་འོད་ཟེར་ཕྲེང་ལ་ [55a.7]སྨྲས་པ། སྟོན་པའི་ཡོན་ཏན་འདི་ལྟ་བུ་དག་ཁྱོད་ཀྱིས་སྔོན་ཆད་ཁོ་བོ་ཅག་ལ་མ་སྨྲས་སོ་ཞེས་སྤྱོས་སོ། །རིགས་ཀྱི་བུ་དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ལྔ་པོ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་དཔལ་ [55b] [55b.1]དང་གཟི་བརྗིད་ཀྱང་མཐོང་། སྤོབས་པ་ཡང་ཐོས། ཚངས་པའི་སྒྲ་དབྱངས་བསྒྲགས་པ་ཡང་ཐོས་ནས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ [55b.2]རྫོགས་པའི་སངས་རྒྱས་འོད་སྲུང་གིས་རིགས་ཀྱི་བུ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས། དེའི་ཚེ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཕྱིར་མི་ལྡོག་པའི་འཁོར་ལོའི་གཟུངས་རྡོ་རྗེའི་ཚིག་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་དེ་ལྟ་དེ་ལྟར་ཡང་དག་ [55b.3]པར་བསྟན་པར་མཛད་དེ། དེས་རིགས་ཀྱི་བུ་ལྔ་པོ་དེ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །རིགས་ཀྱི་བུ་དེ་ལྟར་ན་ང་ནི་སངས་རྒྱས་ཀྱི་ཡེ་ཤེས་ཐོགས་པ་མི་མངའ་བས་ཁྱེད་ཅག་ལ་གལ་ཏེ་བྲམ་ཟེའི་ཁྱེའུ་འོད་ཟེར་ཕྲེང་དེས་རིགས་ཀྱི་བུ་དེ་དག་གི་མདུན་དུ་དེ་བཞིན་ [55b.4]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྔགས་པ་བརྗོད་ཅིང་མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་བརྗོད་པར་གྱུར་ན། དེས་ནི་རིགས་ཀྱི་བུ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ [55b.5]གི་སྤྱན་སྔར་འགྲོ་བའི་གནས་དང་སྐབས་ཀྱང་མེད་ན་དད་པ་འཐོབ་པར་འགྱུར་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཞེས་ལུང་བསྟན་ཏོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་ལྔ་པོ་དེ་དག་ཡོངས་སུ་སྨིན་པར་བྱ་བའི་ཕྱིར་བྲམ་ [55b.6]ཟེའི་ཁྱེའུ་འོད་ཟེར་ཕྲེང་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་ལ་མཁས་པས་ཚིག་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་པར་ཟད་ཀྱི། [55b.7]རིགས་ཀྱི་བུ་ཕྱིར་མི་ལྡོག་པའི་བྱང་ཆུབ་སེམས་དཔའ་ནི་སངས་རྒྱས་ལ་ནེམ་ནུར་མེད་ཅིང་བྱང་ཆུབ་ལ་ཡང་སོམ་ཉི་མེད། སངས་རྒྱས་ཀྱི་ཆོས་རྣམས་ལ་ཡང་སོམ་ཉི་མེད་དེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ [56a] [56a.1]དེ་དག་ཡོངས་སུ་སྨིན་པར་བྱས་ཤིང་ལས་ཀྱི་རྣམ་པར་སྨིན་པ་བསྟན་པ་གང་ཡིན་པའི་ལས་ཀྱི་རྣམ་པར་སྨིན་པ་དེས་ཀྱང་ངས་ལོ་དྲུག་ཏུ་དཀའ་བ་སྤྱོད་པ་སྤྱད་པར་གྱུར་པས་སེམས་ཅན་མི་ཤེས་པར་སྤྱོད་པ་གཞན་དག་གིས་ནི་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་ [56a.2]དག་ལ་ལྐོག་ནས་ཚིག་རྩུབ་པོ་སྨྲས་ལ། དེ་དག་གིས་ཤེས་ཀྱང་རུང་མི་ཤེས་ཀྱང་རུང་། ཤེས་པ་དང་ལྡན་ཡང་རུང་། ཤེས་པ་དང་མི་ལྡན་ཡང་རུང་སྟེ། བརྗོད་པར་གྱུར་ན་དེ་དག་ཡུན་རིང་པོར་དོན་མེད་པ་དང་། གནོད་པ་དང་སྡུག་བསྔལ་བ་དང་། ལོག་པར་ལྟུང་བར་འགྱུར་ [56a.3]བས་ན་སེམས་ཅན་དེ་དག་ལ་ལས་ཀྱི་བྱ་བ་བསྟན་པའི་ཕྱིར་དེ་བཞིན་གཤེགས་པས་དེ་ལ་དེའི་ལས་ཀུན་ཏུ་སྟོན་པར་ཟད་ཀྱི། བྱང་ཆུབ་སེམས་དཔའ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མེད་དོ། །གཞན་ཡང་སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་ [56a.4]ལ་ཚིག་རྩུབ་པོ་སྨྲས་ནས། བདག་ལ་ནི་ཐར་པའི་སྐལ་བ་མེད་དོ་སྙམ་ནས་འགྱོད་པ་ལ་གནས་ཤིང་ཕྱིན་ཆད་རྩོལ་བར་མི་བྱེད་པའི་སེམས་ཅན་དེ་དག་གི་འགྱོད་པ་བསལ་བར་བྱ་བའི་ཕྱིར་ཡང་ལས་དེ་ཀུན་ཏུ་བསྟན་ཏེ། དེ་དག་འདི་སྙམ་དུ་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་ [56a.5]པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་ཚིག་འདི་སྐད་ཅེས་བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད་ཅེས་སྨྲས་ཀྱང་དེ་ལ་རྣམ་པར་གྲོལ་བའི་སྐལ་བ་ཡོད་པར་གྱུར་ན། [56a.6]བདག་ཅག་མི་ཤེས་པ་རྣམས་ལྟ་སྨོས་ཀྱང་ཅི་དགོས་སྙམ་དུ་སེམས་ཞིང་དེ་དག་སྡིག་པའི་ལས་ཀྱི་ཉེས་པ་དེ་ཡང་འཆགས་ལ་གཞན་དག་ཀྱང་མངོན་པར་འདུ་མི་བྱེད་པར་འགྱུར་བའི་ཕྱིར་རོ། །རིགས་ཀྱི་བུ་གཞན་ཡང་མུ་སྟེགས་ཅན་དག་གདུལ་བའི་ཕྱིར་བྱང་ཆུབ་སེམས་དཔས་ལོ་དྲུག་ཏུ་ [56a.7]དཀའ་བ་སྤྱོད་པ་ཀུན་ཏུ་བསྟན་གྱི་ལས་ཀྱི་སྒྲིབ་པའི་རྒྱུས་ནི་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སྦྱོང་དང་བྲམ་ཟེ་རྒྱ་ཤུག་དང་ཏིལ་དང་འབྲས་འབྲུ་གཅིག་ཙམ་ཟ་ཞིང་ཟས་གཞན་མི་ཟ་བས་རྣམ་པར་དག་པར་འགྱུར་བར་འདོད་པ་དག་ཡོད་པས་དེ་དག་ཚར་གཅད་པའི་ཕྱིར་བྱང་ཆུབ་སེམས་ [56b] [56b.1]དཔས་འཕགས་པའི་ལམ་ལ་མ་བརྟེན་པར་རྒྱ་ཤུག་དང་ཏིལ་དང་འབྲས་འབྲུ་གཅིག་ཙམ་གྱི་ཟས་ངན་པ་ཟ་བས་རྣམ་པར་དག་པར་མི་ནུས་པར་བསྟན་པའི་ཕྱིར་ཏེ། འདི་ལྟར་བྱང་ཆུབ་སེམས་དཔའ་ཚིག་འདི་སྐད་ཅེས་བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ [56b.2]ལ་བྱང་ཆུབ་གལ་ཡོད་ཅེས་སྨྲ་བའི་རྒྱུ་ནི་དེ་ཡིན་རྐྱེན་ནི་དེ་ཡིན་ཏེ། ལས་ཀྱི་བྱ་བ་དེ་ལ་དམིགས་ནས་ལོ་དྲུག་ཏུ་དཀའ་བ་སྤྱད་པ་བསྟན་ཏོ། །བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱད་པ་བསྟན་པས་ལྷ་དང་ཕྱི་རོལ་པའི་དྲང་སྲོང་ངན་པ་ལ་མོས་པ་ས་ཡ་ཕྲག་བཞི་དང་ཉིས་འབུམ་ [56b.3]ཡང་ཁ་ཟས་ངན་པ་དེས་བཏུལ་ནས་དེ་དག་གིས་ཡེ་ཤེས་མངོན་པར་རྟོགས་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔས་ཟས་ལ་ཡོངས་སུ་ལོངས་སྤྱད་དེ། ལུས་ཀྱི་སྟོབས་དང་། ཤུགས་དང་མཐུ་ཡང་དག་པར་བསྐྱེད་ནས་ [56b.4]བྱང་ཆུབ་ཀྱི་ཤིང་དྲུང་དུ་སོང་གི །ལུས་ཉམས་པ་དང་། ལུས་ཉམ་ཆུང་བཞིན་དུ་མ་སོང་ཞེ་ན། བྱང་ཆུབ་སེམས་དཔས་ནི་ཟས་མ་ཟོས་ཤིང་ལུས་ཉམས་པ་དང་། ལུས་ཉམ་ཆུང་བས་ཀྱང་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ནུས་ན་ཟས་ངན་པ་ཟོས་པས་ལྟ་ཅི་སྨོས་ཏེ། འོན་ [56b.5]ཀྱང་སྐྱེ་བོ་ཕྱི་མ་དགེ་བའི་རྩ་བ་ཡོངས་སུ་མ་སྨིན་པ་ཟས་མི་ཟ་བས་བྱང་ཆུབ་ཡོངས་སུ་བཙལ་བར་སེམས་པ་དེ་དག་བཀྲེས་པས་ཡོངས་སུ་གདུང་བས་ཡེ་ཤེས་བསྒྲུབ་པར་མི་ནུས་པ་དེ་དག་ལ་སྙིང་བརྩེ་བའི་ཕྱིར་བྱང་ཆུབ་སེམས་དཔས་ཟས་ལ་ཡོངས་སུ་ལོངས་སྤྱད་དོ། །དེ་ཅིའི་ཕྱིར་ཞེ་ [56b.6]ན། བདེ་བར་གྱུར་པ་རྣམས་ཀྱིས་ནི་ཆོས་མངོན་པར་བརྗོད་པར་ནུས་ཀྱི། སྡུག་བསྔལ་བར་གྱུར་པ་རྣམས་ཀྱིས་ནི་མི་ནུས་པས་ངས་སེམས་ཅན་དེ་དག་ལ་བདེ་བའི་ཡེ་ཤེས་རྟོགས་པ་ཀུན་ཏུ་བསྟན་པར་བྱ་བའི་ཕྱིར་ཏེ། ཇི་ལྟ་ཞེ་ན། བྱང་ཆུབ་སེམས་དཔའ་ཉིད་ཀྱང་གྲོང་མིའི་བུ་མོའི་ [56b.7]ཟས་ལ་ཡོངས་སུ་ལོངས་སྤྱད་ནས་ཟས་ཀྱི་བདེ་བ་ཉིད་ཀྱིས་བྱང་ཆུབ་ཐོབ་པོ་ཞེས་སེམས་ཅན་རྣམས་ངའི་རྗེས་སུ་སློབ་པར་འགྱུར་བའི་ཕྱིར་རོ། །དེ་ནས་བྱང་ཆུབ་སེམས་དཔས་གྲོང་མིའི་བུ་མོ་ལེགས་སྐྱེས་མའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བ་དང་། སྐྱེ་ [57a] [57a.1]བོ་ཕྱི་མ་རྣམས་ལ་རྗེས་སུ་སྙིང་བརྩེ་བའི་ཕྱིར་བྱང་ཆུབ་སེམས་དཔས་དེའི་ཁ་ཟས་ཡོངས་སུ་ལོངས་སྤྱད་ནས་བྱང་ཆུབ་ཐོབ་པར་ཀུན་ཏུ་བསྟན་པར་ཟད་ཀྱི། རིགས་ཀྱི་བུ་བྱང་ཆུབ་སེམས་དཔས་ནི་བསམ་གཏན་དང་ཏིང་ངེ་འཛིན་གྱི་དགའ་བ་དང་། མཆོག་ཏུ་དགའ་བ་ [57a.2]གཅིག་གིས་ཀྱང་བསྐལ་པ་འབུམ་ཕྲག་མང་པོར་ཁ་ཟས་མེད་པར་གནས་པར་ནུས་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་རྩྭ་དག་སློང་བར་བྱེད་ཅེ་ན། སྔོན་གྱི་དེ་བཞིན་གཤེགས་པ་དེ་དག་ཀྱང་རྩྭའི་གདིང་བ་ལ་མོས་ [57a.3]ཤིང་གདན་ལ་གདུབ་མ་ཡིན་པས་ཆོག་ཤེས་པ་ཉིད་ཀྱི་ཕྱིར་དང་། རྩྭ་འཚོང་བཀྲ་ཤིས་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་རོ། །དེས་ཀྱང་བྱང་ཆུབ་སེམས་དཔའ་ལ་རྩྭ་དག་ཕུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ [57a.4]བསྐྱེད་པས་ན། དེ་ཡང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་བྲལ་ཞེས་བྱ་བར་འགྱུར་རོ་ཞེས་ངས་ལུང་བསྟན་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྱང་ཆུབ་སེམས་དཔའ་ [57a.5]བྱང་ཆུབ་ཀྱི་ཤིང་དྲུང་དུ་འདུག་ནས་བདུད་སྡིག་ཅན་མ་འོངས་པར་མྱུར་བ་མྱུར་བར་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བྱེད་ཅེ་ན། རིགས་ཀྱི་བུ་བྱང་ཆུབ་སེམས་དཔས་སྐབས་མ་ཕྱེ་བར་བདུད་སྡིག་ཅན་བྱང་ཆུབ་ཀྱི་ཤིང་དྲུང་དུ་འོང་བ་ནི་གནས་མེད་ཅིང་སྐབས་མེད་དེ། དེ་ནི་ [57a.6]གནས་མེད་མོད་ཀྱི་རིགས་ཀྱི་བུ་འོན་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་འདུག་པ་ན་འདི་སྙམ་དུ་སེམས་ཏེ། གླིང་ཆེན་པོ་བཞི་པའི་འདོད་པའི་ཁམས་འདི་ན་དབང་ཕྱུག་ནི་སུ་ཡིན། སེམས་ཅན་འདི་དག་ནི་སུའི་དབང་དུ་སོང་སྙམ་པ་དང་། དེ་འདི་སྙམ་དུ་སེམས་ཏེ། [57a.7]དེ་ནི་བདུད་སྡིག་ཅན་ཡིན་ཏེ། དེའི་དབང་དུ་སོང་ངོ་སྙམ་ནས། དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གིས་བདུད་སྡིག་ཅན་དང་གཡུལ་སྤྲད་དེ། དེ་ལས་རྒྱལ་བར་བྱས་ན་འདོད་པའི་ཁམས་ཐམས་ཅད་ལས་ཀྱང་རྒྱལ་བར་འགྱུར་ལ། བདུད་ཀྱི་འཁོར་མང་པོ་ [57b] [57b.1]ཡང་འདུ་བར་འགྱུར། གནོད་སྦྱིན་གྱི་འཁོར་དང་། སྲིན་པོའི་འཁོར་དང་། དྲི་ཟའི་འཁོར་དང་། ལྷ་མ་ཡིན་གྱི་འཁོར་ཀྱང་འདུ་བར་འགྱུར་ཞིང་འཁོར་མང་པོ་འདུས་པ་དག་གིས་བྱང་ཆུབ་སེམས་དཔའི་སེང་གེའི་རྣམ་པར་རྩེ་བ་མཐོང་ན། བླ་ན་མེད་པ་ཡང་དག་པར་རྫོགས་པའི་བྱང་ [57b.2]ཆུབ་ཏུ་སེམས་བསྐྱེད་ཅིང་སྨོན་ལམ་འདེབས་པར་ཡང་འགྱུར་ལ་གཞན་གང་དག་གིས་མཐོང་བ་དེ་དག་ལ་ཡང་ཡོངས་སུ་མྱ་ངན་ལས་འདའ་བའི་བར་གྱི་རྒྱུར་འགྱུར་རོ་སྙམ་སྟེ། རིགས་ཀྱི་བུ་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་ན་འདུག་པས་མཛོད་སྤུ་ནས་འོད་རབ་ཏུ་བཀྱེའོ། ། [57b.3]འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་ཤིང་ཉི་མ་དང་ཟླ་བ་དག་གི་འོད་ཀྱང་ཡོངས་སུ་གཏུགས་ཏེ་བདུད་ཀྱི་གནས་ཐམས་ཅད་སྤ་བཀོང་ནས་འོད་དེ་ལས་སྒྲ་འདི་ལྟ་བུ་བྱུང་ངོ་། །ཤཱཀྱའི་སྲས་པོ་དེ་ཤཱཀྱའི་ཁབ་ནས་མངོན་པར་བྱུང་སྟེ། དེ་ནི་ང་བྱང་ [57b.4]ཆུབ་མངོན་པར་རྫོགས་པར་འཚང་རྒྱ་བར་འགྱུར་བས་བདུད་ཀྱི་ཡུལ་ལས་ཡང་དག་པར་འདའ་ཞིང་སེམས་ཅན་བརྒྱ་སྟོང་དཔག་ཏུ་མེད་པ་གཞན་དག་ཀྱང་བདུད་ཀྱི་ཡུལ་ལས་ཡང་དག་པར་འདའ་བར་བྱེད་པར་འགྱུར་བས་བདུད་ཀྱི་ཕྱོགས་ཉུང་བ་དང་། བདུད་ཀྱི་འཁོར་ཉུང་བར་འགྱུར་གྱིས། [57b.5]ཁྱོད་སོང་ལ་དེ་དང་གཡུལ་སྤྲོད་ཅིག །རིགས་ཀྱི་བུ་དེ་ནས་འོད་དེས་བདུད་སྡིག་ཅན་ལ་ཡང་དག་པར་བསྐུལ་བ་ན་དེ་མྱ་ངན་གྱི་ཟུག་རྔུ་ཆེན་པོས་གཟིར་བར་གྱུར་ཏེ། ཁྲོ་ཞིང་རྔམ་བཞིན་དུ་དེའི་མོད་ལ་དཔུང་གི་ཚོགས་ཡན་ལག་བཞི་པ་བཤམས་ཞིང་བསྡུས་ནས། བྱང་ཆུབ་ཀྱི་ཤིང་དྲུང་ [57b.6]ག་ལ་བ་དེར་སོང་སྟེ། བྱང་ཆུབ་སེམས་དཔའ་ལ་བགེགས་བྱ་བའི་ཕྱིར་དཔག་ཚད་སུམ་ཅུ་རྩ་གཉིས་ཀྱི་ཁོར་ཡུག་ཏུ་བདུད་ཀྱི་དམག་གིས་གང་བར་བྱས་སོ། །དེ་ནས་བྱང་ཆུབ་སེམས་དཔའ་ཤེས་རབ་ཆེན་པོ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་ལ་གནས་ནས་ཤེས་རབ་རིན་ [57b.7]པོ་ཆེ་ལས་ངེས་པར་བྱུང་བའི་ཕྱག་གསེར་གྱི་ཁ་དོག་ལྟ་བུས་ས་གཞི་ཆེན་པོ་ལ་བརྡབས་ཏེ་བྱམས་པའི་སྟོབས་ཀྱིས་བདུད་ཀྱི་སྡེ་ཐམས་ཅད་ཕམ་པར་མཛད་དོ། །བདུད་ཀྱི་སྡེ་ཕམ་པར་མཛད་མ་ཐག་ཏུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། ལྟོ་ [58a] [58a.1]འཕྱེ་ཆེན་པོ་དང་། གྲུལ་བུམ་བྱེ་བ་ཕྲག་བརྒྱད་ཅུ་རྩ་བཞིས་བྱང་ཆུབ་སེམས་དཔའི་དཔལ་དང་། གཟི་བརྗིད་དང་། སྐུ་མདོག་དང་། གཟུགས་དང་། དབྱིབས་ཀྱང་མཐོང་། སྟོབས་དང་། ཤུགས་དང་། མཐུ་དང་། སེང་གེའི་རྣམ་པར་རྩེ་བ་ཡང་མཐོང་ [58a.2]ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པས་བྱང་ཆུབ་བརྙེས་ནས་ཞག་བདུན་དུ་སྐྱིལ་མོ་ཀྲུང་མི་འཇིག་པར་ཤིང་གི་རྒྱལ་པོ་ལ་སྤྱན་མི་འཛུམས་ [58a.3]པར་གཟིགས་ཤེ་ན། དེ་ན་གཟུགས་ན་སྤྱོད་པའི་ལྷའི་བུ་རབ་ཏུ་ཞི་བར་སྤྱོད་པ་དག་ཀྱང་འཁོད་ལ། དེ་དག་གིས་དེ་བཞིན་གཤེགས་པ་སྐྱིལ་མོ་ཀྲུང་གི་བཞུགས་པ་མཐོང་ནས་དགའ་བ་དང་། དང་བ་དང་། མཆོག་ཏུ་དགའ་བ་རྒྱ་ཆེན་པོ་སྐྱེས་ཤིང་། དགའ་བ་དང་། དང་བ་དང་། [58a.4]མཆོག་ཏུ་དགའ་བ་སྐྱེས་པ་དེ་དག་འདི་སྙམ་དུ་སེམས་ཏེ། བདག་ཅག་གིས་དགེ་སྦྱོང་གཽ་ཏ་མའི་སེམས་ཅི་ལ་བརྟེན་པ་ངེས་པར་བརྟག་པར་བྱའོ། །སྙམ་ནས་དེ་དག་གིས་ཞག་བདུན་དུ་སེམས་གཅིག་ཏུ་བསྡུས་ཏེ་བརྟགས་ཀྱང་། དེ་བཞིན་གཤེགས་པའི་ཐུགས་ཅི་ལ་བརྟེན་པ་མ་ [58a.5]རྟོགས་ནས། དེ་དག་དགའ་བ་དང་། དང་བ་དང་། མཆོག་ཏུ་དགའ་བ་རྒྱ་ཆེན་པོ་སྐྱེས་ནས། ལྷའི་བུ་སུམ་ཁྲི་ཉིས་སྟོང་གིས་བདག་ཅག་ཀྱང་མ་འོངས་པའི་དུས་ན་འདི་ལྟར་རབ་ཏུ་ཞི་བའི་སྤྱོད་པས་བྱང་ཆུབ་ཀྱི་ཤིང་ལ་རྟོག་པར་གྱུར་ཅིག །ཅེས་བླ་ན་མེད་པ་ཡང་དག་པར་ [58a.6]རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། གང་གི་ཕྱིར་དེ་བཞིན་གཤེགས་པས་བྱང་ཆུབ་བརྙེས་ནས། ཞག་བདུན་དུ་སྐྱིལ་མོ་ཀྲུང་མི་འཇིག་པར་ཤིང་གི་རྒྱལ་པོ་ལ་སྤྱན་མི་འཛུམས་པར་གཟིགས་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ནི་དེ་བཞིན་གཤེགས་པའི་ཐབས་ [58a.7]ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པས་བསྐལ་པ་གྲངས་མེད་པ་ནས་རྣམ་པར་ཐར་པའི་སྒོས། སེམས་ཅན་ཐམས་ཅད་དབུགས་ཕྱུང་ཞིང་འགྲོན་དུ་གཉེར་ནས་ཚངས་པས་གསོལ་བ་མ་བཏབ་པར་ཆོས་སྟོན་པར་མི་མཛད་ཅེ་ན། རིགས་ཀྱི་བུ་འདི་ལ་དེ་བཞིན་ [58b] [58b.1]གཤེགས་པ་འདི་སྙམ་དུ་དགོངས་ཏེ། ལྷ་དང་མིར་བཅས་པའི་འཇིག་རྟེན་ནི་ཕལ་ཆེར་ཚངས་པ་ལ་བརྟེན་ཅིང་། ཚངས་པ་གཙོ་བོར་འཛིན་པ་ཡིན་པས་དེ་དག་འདི་སྙམ་དུ་བདག་ཅག་ནི་ཚངས་པས་སྤྲུལ་ཏོ། །བདག་ཅག་ནི་ཚངས་པ་ལས་སྐྱེས་ཏེ། ཚངས་པ་མ་གཏོགས་པར་འཇིག་ [58b.2]རྟེན་གྱི་བྱེད་པ་པོ་གཞན་ཡང་མེད་ལ། སྟོན་པ་ཡང་གཞན་མེད་དོ་སྙམ་དུ་སེམས་པས་དེས་ན། དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ཚངས་པ་འོང་བར་བྱས་ཤིང་ཚངས་པ་ལ་བསྡད་དེ། ཚངས་པས་ཕྱག་བྱས་ན་ཚངས་པ་ལ་བརྟེན་པ་ལྷ་དང་བཅས་པའི་ [58b.3]འཇིག་རྟེན་ཡང་དེ་བཞིན་གཤེགས་པ་ལ་ཕྱག་འཚལ་བར་འགྱུར་ལ། ཚངས་པས་གསོལ་བ་བཏབ་ན་དེ་བཞིན་གཤེགས་པ་ཆོས་སྟོན་པར་མཛད་ཀྱི། མ་གསོལ་བར་བསྟན་ན་དེ་དག་ངའི་ཆོས་ཀྱང་འཛིན་དུ་མ་ངེས་སོ་སྙམ་དུ་དགོངས་པའི་ཕྱིར་ཏེ། ཚངས་པ་ཡང་དེ་བཞིན་ [58b.4]གཤེགས་པ་ཉིད་ཀྱི་མཐུས་འདི་ལྟ་སྟེ། ཆོས་ཀྱི་འཁོར་ལོ་བསྐོར་བར་གསོལ་བ་གདབ་པའི་ཕྱིར་འོངས་པར་ཟད་ཀྱི། ཚངས་པ་ཉིད་ལ་ནི་བདག་གིས་དེ་བཞིན་གཤེགས་པ་ལ་གསོལ་བ་གདབ་པར་བྱའོ། །ཞེས་ཡིད་ལ་བྱེད་པའི་སེམས་གཅིག་ཙམ་ཡང་མེད་དོ། །དེ་ལྟར་ན་ཚངས་ [58b.5]པ་ལ་རྟེན་པའི་སེམས་ཅན་རྣམས་ཀྱི་ཚངས་པ་ལ་ངེས་པ་སྤང་བའི་ཕྱིར། དེ་བཞིན་གཤེགས་པས་ཚངས་པ་འོང་བར་མཛད་ཅིང་ཚངས་པ་ལ་གཞེས་ཏེ། གང་གི་ཚེ་ཚངས་པས་ཆོས་ཀྱི་འཁོར་ལོ་བསྐོར་བར་བསྐུལ་བའི་ཕྱིར། དེ་བཞིན་གཤེགས་པ་ལ་གསོལ་བ་བཏབ་པ་དེའི་ཚེ་ [58b.6]ན་ཚངས་པ་དྲུག་ཁྲི་བརྒྱད་སྟོང་གིས་སངས་རྒྱས་བཅོམ་ལྡན་འདས་འདི་ནི་སེམས་ཅན་ཐམས་ཅད་ཀྱི་མཆོག་ཡིན་ནོ། །འདི་ནི་གཙོ་བོ་ཡིན་ནོ། །འདི་ནི་རབ་མཆོག་ཡིན་ཏེ། བདག་ཅག་ཀྱང་ཡེ་ཤེས་འདི་ལྟ་བུ་དང་། ཡོན་ཏན་འདི་ལྟ་བུ་དང་ལྡན་པར་གྱུར་ཅིག་ཅེས་བླ་ན་མེད་པ་ཡང་ [58b.7]དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་ཡེ་ཤེས་དམ་པ་ལ་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་སེམས་ཅན་རྣམས་ལ་ [59a] [59a.1]ལས་ཀྱི་རྒྱུད་བཅུ་པོ་འདི་དག་བསྟན་པ་དེ་ཡང་བྱང་ཆུབ་སེམས་དཔའ་དང་། དེ་བཞིན་གཤེགས་པས་ཐབས་ལ་མཁས་པ་ཡིན་པར་ཡང་བལྟ་བར་བྱ། ལྡེམ་པོའི་ངག་ཡིན་པར་ཡང་བལྟ་བར་བྱ་སྟེ། རིགས་ཀྱི་བུ་བྱང་ཆུབ་སེམས་དཔའི་ནི་མི་དགེ་བ་ཐ་ན་ [59a.2]སྐྲའི་རྩེ་མོའི་ཆ་ཤས་ཙམ་དུ་ཕྲ་བ་འགའ་དང་ལྡན་ན་ཡང་བྱང་ཆུབ་ཀྱི་སྙིང་པོར་བྱང་ཆུབ་ཀྱི་ཤིང་དྲུང་དུ་འདུག་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་གནས་མེད། སྐབས་མ་ཡིན་ཏེ། དེ་ནི་གནས་མེད་དོ། །དེ་ཅིའི་ [59a.3]ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་ནི་དགེ་བའི་ཆོས་ཐམས་ཅད་དང་ལྡན་ཞིང་མི་དགེ་བའི་ཆོས་སྤང་བ་ཐམས་ཅད་སྤངས་པ་སྟེ། རིགས་ཀྱི་བུ་དེ་བཞིན་གཤེགས་པ་ལ་ནི་སྡིག་པའི་ལས་མངོན་པར་འདུ་བྱ་བའི་ལྷག་མ་མ་སྤངས་པའི་བག་ཆགས་ཀྱི་མཚམས་སྦྱོར་བ་ [59a.4]ཙམ་ཡང་མི་མངའ་ན་ལས་ཀྱི་སྒྲིབ་པ་ལྟ་སྨོས་ཀྱང་ཅི་དགོས་ཏེ། དེ་ནི་གནས་མེད་པའི་ཕྱིར་རོ། །འོན་ཀྱང་སེམས་ཅན་གང་དག་ལས་ཀྱི་རྣམ་པར་སྨིན་པ་ཆུད་གསོན་ཅིང་ལས་ཀྱི་རྣམ་པར་སྨིན་པ་ལ་མ་དད་པའི་སེམས་ཅན་དེ་དག་ལ་ལས་ཀྱི་རྣམ་པར་སྨིན་པ་ཀུན་ཏུ་བསྟན་པར་བྱ་བའི་ [59a.5]ཕྱིར་དེ་བཞིན་གཤེགས་པས་ལས་ཀྱི་རྒྱུད་ཀུན་ཏུ་སྟོན་པར་ཡང་མཛད་དེ། ཆོས་ཀྱི་བདག་པོ་ང་ལ་ཡང་ལས་ཀྱི་རྣམ་པར་སྨིན་པར་འགྱུར་ན། ཁྱེད་ཅག་ལ་ལྟ་ཅིའི་ཕྱིར་ལས་རྣམ་པར་སྨིན་པར་མི་འགྱུར་ཞེས་དེ་དག་ལ་ལས་ཀྱི་རྣམ་པར་སྨིན་པར་ཀུན་ཏུ་བསྟན་པར་བྱ་བའི་ཕྱིར་དེ་ [59a.6]བཞིན་གཤེགས་པ་ལས་ཀྱི་རྒྱུད་སྟོན་པར་མཛད་ཀྱི། དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའོ། །རིགས་ཀྱི་བུ་འདི་ལྟ་སྟེ་དཔེར་ན་ཡི་གེ་དང་། གྲངས་དང་། ལག་རྩིས་ལེགས་པར་བསླབ་པའི་སློབ་དཔོན་ནི་བྱིས་པ་རྣམས་བསླབས་པའི་ [59a.7]དོན་དུ་བྱིས་པ་རྣམས་བོད་པའི་ཚུལ་གྱིས་ཡི་གེའི་ཕྱི་མོ་དག་ཀློག་ཏུ་འཇུག་པར་ཟད་དེ། དེ་ནི་དེ་ལ་མ་ཤེས་པ་དང་སྒྲིབ་པ་མེད་མོད་ཀྱི། འོན་ཀྱང་བྱིས་པ་རྣམས་ཀྱིས་བདག་ལས་ཐོས་ནས་ཅི་ནས་ཀྱང་ཡི་གེ་དང་། གྲངས་དང་། ལག་རྩིས་དང་། བགྲང་བ་དག་གི་རྗེས་སུ་ [59b] [59b.1]སློབ་ཅིང་བྱང་བར་བྱ་བ་དེའི་ཆེད་དུ་ཡི་གེའི་ཕྱི་མོ་དག་ཀློག་ཏུ་འཇུག་པ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པ་ཆོས་ཐམས་ཅད་ལ་ལེགས་པར་བསླབ་པ་དེ་ཡང་ཇི་ལྟ་ཇི་ལྟར་སེམས་ཅན་གཞན་དག་གི་ལས་ཡོངས་སུ་དག་པར་འགྱུར་བ། དེ་ལྟ་དེ་ལྟར་གསུང་ཞིང་དེ་ལྟ་དེ་ལྟར་ལས་ [59b.2]ཉེ་བར་སྟོན་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ་དཔེར་ན། སྨན་པ་ནད་ཐམས་ཅད་རབ་ཏུ་ཞི་བར་བྱ་བ་ལ་ལེགས་པར་བསླབས་པ་ནི་ནད་མེད་བཞིན་དུ་སེམས་ཅན་ནད་པ་རྣམས་ཀྱི་མདུན་དུ་སྨན་ཚ་བ་དག་གི་རོ་མྱོང་བར་བྱེད་ཅིང་བསྔགས་པ་རྗོད་པར་ཡང་བྱེད། རབ་ཏུ་ [59b.3]བསྔགས་པ་རྗོད་པར་ཡང་བྱེད་དེ། ནད་པ་རྣམས་ཀྱིས་དེ་མཐོང་ནས་སྨན་ཚ་བ་དེ་དག་འཐུང་བར་བྱེད། ཡོངས་སུ་ལོངས་སྤྱོད་པར་བྱེད་ཅིང་དེ་དག་ནད་དེ་དག་ལས་ཡོངས་སུ་ཐར་བར་འགྱུར་བ་དེ་བཞིན་དུ་རིགས་ཀྱི་བུ་དེ་བཞིན་གཤེགས་པ་སྨན་པའི་རྒྱལ་པོ་ཆེན་པོ་ཉོན་མོངས་ [59b.4]པའི་ནད་ཐམས་ཅད་ལས་ཡོངས་སུ་ཐར་བ། ཆོས་ཐམས་ཅད་ལ་སྒྲིབ་པ་མི་མངའ་བ་བརྙེས་པ་ཡང་ལས་དགེ་བ་དང་མི་དགེ་བ་འདིའི་འབྲས་བུ་རྣམ་པར་སྨིན་པ་ནི་འདི་ཡིན་ནོ། །ཞེས་ལས་ཀུན་ཏུ་སྟོན་པར་མཛད་ཅིང་། ཇི་ལྟར་ན་སེམས་ཅན་རྣམས་ལས་ཀྱི་སྒྲིབ་པས་ [59b.5]འཇིགས་ཤིང་སྐྲག་པ་དང་། ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་ཡོངས་སུ་དག་པར་འགྱུར་སྙམ་ནས་བསམས་བཞིན་དུ་ལས་ཀུན་ཏུ་སྟོན་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ་དཔེར་ན། ཚོང་དཔོན་གྱི་བུའམ་ཁྱིམ་བདག་གི་བུ་བཙས་ནས་ [59b.6]རིང་པོར་མ་ལོན་པ་ཞིག་ལ་ཕ་མ་དག་གིས་མ་མ་ཞིག་བྱིན་པར་གྱུར་ན། མ་མ་དེ་ནད་མེད་པར་གྱུར་བཞིན་དུ་འདི་ལྟ་སྟེ། ཁྱེའུ་དེའི་འོ་མ་ཡོངས་སུ་དག་པར་བྱའོ། །སྙམ་ནས་སྨན་ཁ་བ་དང་། བསྐ་བ་དག་སོ་སོར་བརྟགས་ཞིང་འཐུང་བར་བྱེད་པ་དེ་བཞིན་དུ་རིགས་ཀྱི་ [59b.7]བུ་དེ་བཞིན་གཤེགས་པ་འཇིག་རྟེན་ཐམས་ཅད་ཀྱི་ཡབ་ཀྱང་སྙུན་མི་མངའ་བ་བརྙེས་བཞིན་དུ་ལས་ཀྱི་བྱ་བ་ཆུད་གསོན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ལས་ཀུན་ཏུ་སྟོན་པར་མཛད་དེ། ལས་ཆེ་གེ་མོ་ཞིག་གི་རྣམ་པར་སྨིན་པ་ནི་འདི་ཡིན་ནོ་ཞེས་ཐོས་ནས་སེམས་ [60a] [60a.1]ཅན་དེ་དག་ཡིད་བྱུང་བ་འཐོབ་པར་འགྱུར་ཞིང་དེ་དག་ཡིད་བྱུང་ན་སྡིག་པའི་ལས་མངོན་པར་འདུ་བྱེད་པར་མི་འགྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་ཡེ་ཤེས་ [60a.2]དམ་པ་ལ་བཀའ་སྩལ་པ། རིགས་ཀྱི་བུ་སྔོན་བྱུང་བ་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་ཕ་རོལ་གྱི་ཡང་ཆེས་ཕ་རོལ་ན་ཚོང་པ་ནོར་འདོད་པ་ལྔ་བརྒྱ་ཙམ་ཞིག་རྒྱ་མཚོ་ཆེན་པོར་ཞུགས་པ་དང་། [60a.3]དེའི་ཚེ་ན་འདྲོན་པ་དེ་དག་ཉིད་ཀྱི་ནང་ན་མི་ལས་ནག་པོ་བྱེད་པ། སྡིག་པའི་ལས་བྱེད་པ། འཕོང་རྩལ་གྱི་རིག་པ་ལེགས་པར་བསླབས་པ། ཆོམ་རྐུན་བྱེད་པ། ཚོང་པའི་ཆ་ལུགས་ཀྱི་གཞན་གྱི་ནོར་འཕྲོག་པ་ཞིག་ཀྱང་གྲུ་བོ་ཆེ་དེ་ཉིད་ཀྱི་ནང་དུ་ཞུགས་པར་གྱུར་ཏོ། །དེ་ [60a.4]ནས་དེ་འདི་སྙམ་དུ་སེམས་ཏེ། བདག་གིས་གང་གི་ཚེ་ཚོང་པ་འདི་དག་དོན་གྲུབ་ཅིང་བྱ་བ་བྱས་པ་དེའི་ཚེ་ན་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོའོ་སྙམ་དུ་སེམས་སོ། །རིགས་ཀྱི་བུ་དེ་ནས་ཚོང་པ་དེ་དག་ [60a.5]དོན་གྲུབ་སྟེ་ཕ་རོལ་དུ་འགྲོ་འདོད་པར་གྱུར་པ་དང་། དེ་ནས་མི་གཡོན་ཅན་གྱི་རང་བཞིན་ཅན་དེ་འདི་སྙམ་དུ་སེམས་ཏེ། ད་ནི་བདག་གིས་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོ་བའི་དུས་ལ་བབ་ [60a.6]པོ་སྙམ་པ་དང་། དེའི་ཚེ་ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་ཞིག་ཀྱང་གྲུ་བོ་ཆེ་དེ་ཉིད་ཀྱི་ནང་དུ་ཞུགས་པར་གྱུར་ཏེ། དེ་ནས་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེ་གཉིད་ལོག་སྟེ་རྨི་ལམ་རྨི་བ་ན་རྒྱ་མཚོ་ཆེན་པོ་དེ་ཉིད་ན་གནས་པའི་ལྷ་གང་ཡིན་པ་དེས་ [60a.7]དེའི་རྨི་ལམ་དུ་བསྟན་པ། འདྲོན་པ་འདི་ཉིད་ཀྱི་ནང་ན་མིའི་མིང་ནི་འདི་ཞེས་བྱ། གཟུགས་ནི་འདི་འདྲ། ཆ་བྱད་དང་། ཁ་དོག་དང་། དབྱིབས་ནི་འདི་འདྲ་བ། ཆོམ་རྐུན་པ། འཁུ་བ། གཞན་གྱི་ནོར་འཕྲོག་པ་ཞིག་འདུག་པ་དེས་འདི་ལྟར་སེམས་བསྐྱེད་དེ། [60b] [60b.1]བདག་གིས་ཚོང་པ་འདི་དག་ཐམས་ཅད་སྲོག་དང་ཕྲལ་ལ་ནོར་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ་འཛམ་བུའི་གླིང་དུ་འགྲོའོ་སྙམ་དུ་སེམས་པས། གལ་ཏེ་མི་འདིས་ཚོང་པ་འདི་དག་ཐམས་ཅད་སྲོག་དང་བྲལ་བར་གྱུར་ན་ནི་དེའི་ཚེ་སྡིག་པའི་ལས་དམ་པོ་བྱས་པར་འགྱུར་རོ། ། [60b.2]དེ་ཅིའི་ཕྱིར་ཞེ་ན། འདི་ལྟར་ཚོང་པ་ལྔ་བརྒྱ་ཙམ་པོ་འདི་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ཤིང་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཡིན་པའི་ཕྱིར་ཏེ། གལ་ཏེ་མི་འདིས་བྱང་ཆུབ་སེམས་དཔའ་འདི་དག་ [60b.3]བསད་པར་གྱུར་ན་དེ་ལས་ཀྱི་སྒྲིབ་པའི་ཉེས་པ་དེས་བྱང་ཆུབ་སེམས་དཔའ་རེ་རེའི་ཕྱིར་ཡང་བྱང་ཆུབ་སེམས་དཔའ་གཅིག་གིས་ཡུན་རིང་པོ་ཇི་སྲིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབ་པར་འགྱུར་བའི་ཡུན་རིང་པོ་དེ་སྲིད་དུ་སེམས་ཅན་ [60b.4]དམྱལ་བ་ཆེན་པོ་རྣམས་སུ་སྲེག་པར་འགྱུར་བས། དེ་ལ་དེད་དཔོན་ཁྱོད་ཀྱིས་དེ་ལྟ་བུ་ལས་བརྟེན་ཏེ། ཅི་ནས་ཀྱང་མི་འདིས་ཚོང་པ་ལྔ་བརྒྱ་ཙམ་པོ་འདི་དག་བསད་པར་མི་འགྱུར་བ་དང་། འདི་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བ་དེ་ལྟ་བུའི་ [60b.5]ཐབས་ལ་མཁས་པ་བསམ་པར་གྱིས་ཤིག་ཅེས་བསྟན་ཏོ། །རིགས་ཀྱི་བུ་དེ་ནི་དེད་དཔོན་སྙིང་རྗེ་ཆེན་པོ་དང་ལྡན་པ་དེ་སད་ནས་འདི་སྙམ་དུ་སེམས་ཏེ། མི་འདིས་ཚོང་པ་ལྔ་བརྒྱ་ཙམ་པོ་འདི་དག་ཀྱང་བསད་པར་མི་འགྱུར་ལ། འདི་ཡང་སེམས་ཅན་དམྱལ་བ་ཆེན་པོ་རྣམས་སུ་ [60b.6]འགྲོ་བར་མི་འགྱུར་བའི་ཐབས་ཅི་ཡོད་སྙམ་ནས། དེ་ཞག་བདུན་གྱི་བར་དུ་འཛམ་བུའི་གླིང་དུ་འགྲོ་བ་དང་མི་འཐུན་པའི་རླུང་ལངས་ཏེ་སྡོད་པའི་ཚེ། ཞག་བདུན་དུ་སུ་ལ་ཡང་མི་སྨྲ་བར་སེམས་པ་ལ་ཞུགས་པར་གྱུར་པ་ན་དེ་འདི་སྙམ་དུ་སེམས་ཏེ། འདི་ལ་ཚོང་པ་འདི་ [60b.7]དག་ཀྱང་བསད་པར་མི་འགྱུར་ལ། མི་འདི་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བའི་ཐབས་ནི་མི་འདི་ཉིད་སྲོག་དང་དབྲལ་བར་བྱ་བ་མ་གཏོགས་པར་གཞན་མེད་དོ་སྙམ་ནས་དེ་འདི་སྙམ་དུ་སེམས་ཏེ། གལ་ཏེ་བདག་གིས་དོན་འདི་ཚོང་པ་ཐམས་ [61a] [61a.1]ཅད་ལ་བསྒྲགས་པར་གྱུར་ན་ནི་འདི་དག་གིས་རབ་ཏུ་སྡང་བའི་སེམས་ཀྱིས་མི་འདི་ཡང་སྲོག་དང་ཕྲལ་ཞིང་བསད་པར་འགྱུར་ལ་འདི་དག་ཐམས་ཅད་ཀྱང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བར་འགྱུར་རོ་སྙམ་ནས་དེ་ཡང་འདི་སྙམ་དུ་སེམས་ཏེ། [61a.2]འདི་ལྟར་བདག་གིས་མི་འདི་སྲོག་དང་ཕྲལ་ན་གཞི་དེས་བདག་བསྐལ་པ་འབུམ་དུ་སེམས་ཅན་དམྱལ་བ་ཆེན་པོ་རྣམས་སུ་སྲེག་པར་འགྱུར་ཡང་བདག་གིས་སེམས་ཅན་དམྱལ་བ་ཆེན་པོའི་སྡུག་བསྔལ་མྱོང་བར་འགྱུར་བ་དེ་ལ་སྤྲོ་བར་བྱའི། ཚོང་པ་ལྔ་བརྒྱ་ཙམ་པོ་འདི་དག་ [61a.3]སྲོག་དང་ཕྲལ་བར་གྱུར་ན་ཡང་མི་རུང་ན། མི་འདི་ལ་སྡིག་པའི་ལས་དེ་སྙེད་ཅིག་རབ་ཏུ་འཕེལ་བར་གྱུར་ན་ཡང་མི་རུང་བས་བདག་རང་གིས་མི་འདི་སྲོག་དང་འབྲལ་བར་བྱའོ་སྙམ་ནས། རིགས་ཀྱི་བུ་དེ་ལྟར་དེད་དཔོན་སྙིང་རྗེ་ཆེན་པོ་དང་ལྡན་པ་དེས་ཚོང་པ་ལྔ་བརྒྱ་ཙམ་པོ་དེ་ [61a.4]དག་ཀུན་ཏུ་བསྲུང་བ་དང་། མི་དེ་ཡང་སེམས་ཅན་དམྱལ་བ་ཆེན་པོ་རྣམས་སུ་འགྲོ་བ་ལས་ཀུན་ཏུ་བསྲུང་བའི་ཕྱིར་སྙིང་རྗེ་ཆེན་པོ་དེ་དང་ཐབས་ལ་མཁས་པ་དེས་བསམས་བཞིན་དུ་ཆོམ་རྐུན་པའི་མི་དེ་མདུང་ཐུང་གིས་བཏབ་སྟེ། སྲོག་དང་ཕྲལ་ནས་འདྲོན་པ་ཐམས་ཅད་ཀྱང་ [61a.5]དོན་གྲུབ་ཅིང་རང་རང་གི་གྲོང་ཁྱེར་དུ་ཕྱིན་པར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་ཡིད་གཉིས་དང་ཐེ་ཚོམ་ཟ་བར་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ [61a.6]ན་དེད་དཔོན་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེར་གྱུར་པའི་ཕྱིར་རོ། །ཚོང་པ་ལྔ་བརྒྱ་ཙམ་པོ་གང་དག་གྲུ་བོ་ཆེ་དེ་ཉིད་དུ་ཞུགས་པར་གྱུར་པ་དེ་དག་ནི་གང་དག་བསྐལ་པ་བཟང་པོ་འདི་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ [61a.7]འགྱུར་བ་བསྐལ་པ་བཟང་པོའི་བྱང་ཆུབ་སེམས་དཔའ་ལྔ་བརྒྱ་ཡིན་ནོ། །རིགས་ཀྱི་བུ་ངས་ཐབས་ལ་མཁས་པ་དེ་དང་། སྙིང་རྗེ་ཆེན་པོ་དེས་བསྐལ་པ་འབུམ་དུ་འཁོར་བ་བསྙིལ་ཏེ་བོར་བར་གྱུར་ཏོ། །ཆོམ་རྐུན་པ་དེ་ཡང་དེ་ནས་ཤི་འཕོས་ནས་མཐོ་རིས་ཀྱི་འཇིག་རྟེན་དུ་ [61b] [61b.1]སྐྱེས་སོ། །རིགས་ཀྱི་བུ་འདི་ཇི་སྙམ་དུ་སེམས། གང་གི་ཕྱིར་ཐབས་ལ་མཁས་པ་དེ་དང་། སྙིང་རྗེ་ཆེན་པོ་དེས་བསྐལ་པ་འབུམ་གྱི་འཁོར་བ་བསྙིལ་ཏེ་བོར་བར་གྱུར་པའི་དོན་དེ་བྱང་ཆུབ་སེམས་དཔའི་ལས་ཀྱི་སྒྲིབ་པ་ཡིན་པར་བལྟའམ་སྙམ་ན་ཁྱོད་ཀྱིས་དེ་ལྟར་མི་བལྟ་སྟེ། [61b.2]དེ་ནི་ཐབས་ལ་མཁས་པ་ཉིད་ཡིན་པར་བལྟ་བར་བྱའོ།། །།བམ་པོ་བཞི་པ་སྟེ་ཐ་མ། རིགས་ཀྱི་བུ་དེ་བཞིན་གཤེགས་པས་སེམས་ཅན་ལས་ཀྱི་བྱ་བ་ལ་གཟུད་པའི་ཕྱིར་ཐབས་ལ་མཁས་པས་སེང་ལྡེང་གི་ཚལ་པ་ཞབས་ལ་ཟུག་པར་བསྟན་ཏེ། དེ་ [61b.3]བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་པ་གང་ཡིན་པ་དེ་ཡང་སངས་རྒྱས་ཀྱི་མཐུ་ཉིད་ཡིན་པར་བལྟ་བར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི་རྡོ་རྗེ་མཁྲེགས་པ་ལྟར་མི་ཤིགས་པའི་སྐུ་ཡིན་པའི་ཕྱིར་རོ། །རིགས་ཀྱི་བུ་འོན་ཀྱང་ [61b.4]མཉན་ཡོད་ཀྱི་གྲོང་ཁྱེར་ཆེན་པོ་འདི་ཉིད་ན་སྲིད་པ་ཐ་མ་པའི་མི་ཉི་ཤུ་དང་། མི་ཉི་ཤུ་པོ་དེ་དག་ཉིད་ཀྱི་དགྲ་བོ་མི་ཉི་ཤུ་ཞིག་ཀྱང་ཡོད་པར་གྱུར་ཏེ། དེ་ནས་མི་དགྲ་བོ་ཉི་ཤུ་པོ་དེ་དག་རང་རང་གི་སྒྱུ་དག་གིས་འདི་ལྟ་བུའི་རྣམ་པར་རྟོག་པ་སྐྱེས་པར་གྱུར་ཏེ། བདག་ཅག་གིས་མཛའ་ [61b.5]བཤེས་ལྟར་བཅོས་ཏེ། རང་རང་གི་དགྲ་བོ་རྣམས་ཀྱི་ཁྱིམ་དུ་ཞུགས་ལ་དེ་དག་སྲོག་དང་དབྲལ་བར་བྱའོ་སྙམ་དུ་བསམས་ཏེ། གཅིག་ལ་གཅིག་ཚིག་ཏུ་ནི་མ་སྨྲས་སོ། །རིགས་ཀྱི་བུ་དེ་ནས་སངས་རྒྱས་ཀྱི་མཐུས་སྲིད་པ་ཐ་མ་པའི་མི་ཉི་ཤུ་པོ་གང་དག་ཡིན་པ་དེ་དག་དང་། [61b.6]མི་དེ་དག་གི་དགྲ་བོ་གསོད་པ་པོའི་མི་ཉི་ཤུ་པོ་གང་དག་ཡིན་པ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་དོང་ངོ་། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ [61b.7]མི་བཞི་བཅུ་པོ་དེ་དག་གདུལ་བའི་དབང་གི་ཕྱིར་དང་། སྐྱེ་བོ་ཕལ་པོ་ཆེ་གཞན་དག་ཀྱང་གདུལ་བའི་དབང་གི་ཕྱིར་གནས་བརྟན་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཆེན་པོ་དེ་ངས་ཕྱོགས་འདི་ནས་སེང་ལྡེང་གི་ཚལ་པ་ཞིག་འབྱུང་བར་འགྱུར་ཏེ། དེས་དེ་ [62a] [62a.1]བཞིན་གཤེགས་པའི་ཞབས་གཡས་པའི་མཐིལ་དུ་ཟུག་པར་འགྱུར་རོ། །དེ་བཞིན་གཤེགས་པས་དེ་སྐད་ཅེས་བཀའ་སྩལ་ནས་རིང་པོ་མ་ལོན་པར་དེ་ནས་དེའི་མོད་ལ་ས་ཕྱོགས་དེ་ཉིད་ནས་སེང་ལྡེང་གི་ཚལ་པ་རྣོན་པོ་མཐོ་གང་ཙམ་གྱི་ཚད་ཅིག་བྱུང་བར་གྱུར་ [62a.2]ཏོད། །དེ་ནས་བཅོམ་ལྡན་འདས་ལ་གནས་བརྟན་མཽང་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་སེང་ལྡེང་གི་ཚལ་པ་འདི་འཇིག་རྟེན་གྱི་ཁམས་གཞན་དུ་དོར་བར་བགྱི་ལགས་སོ། །ངས་དེ་ལ་འདི་སྐད་ཅེས་བཀའ་སྩལ་ཏོ། །མཽང་གལ་ [62a.3]གྱི་བུ་ཆེན་པོ་ཁྱོད་ཀྱིས་སེང་ལྡེང་གི་ཚལ་པ་འདི་ས་ཕྱོགས་འདི་ནས་གཞན་དུ་དོར་བར་མི་ནུས་སོ། །རིགས་ཀྱི་བུ་དེ་ནས་གནས་བརྟན་མཽད་གལ་གྱི་བུ་ཆེན་པོས་སྟོབས་ཀྱི་ཤུགས་ཀྱིས་སེང་ལྡེང་གི་ཚལ་པ་དེ་བཟུང་བ་དང་། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ [62a.4]ཁམས་འདི་ཁ་གྱེན་དུ་བལྟས་ཏེ་རབ་ཏུ་གཡོས་པར་གྱུར་ཀྱང་སེང་ལྡེང་གི་ཚལ་པ་དེ་ནི་ཐ་ན་སྐྲའི་རྩེ་མོའི་ཆ་ཤས་ཙམ་ཡང་མི་འགུལ་ལོ། །རིགས་ཀྱི་བུ་དེ་ནས་དེ་བཞིན་གཤེགས་པ་རྫུ་འཕྲུལ་གྱི་སྟོབས་ཀྱིས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གནས་སུ་གཤེགས་པ་དང་། [62a.5]སེང་ལྡེང་གི་ཚལ་པ་དེ་ཡང་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གནས་སུ་འོངས་སོ། །དེ་ནས་དེ་བཞིན་གཤེགས་པ་སུམ་ཅུ་རྩ་གསུམ་པའི་ལྷ་རྣམས་ཀྱི་གནས་སུ་རི་རབ་ཀྱི་སྟེང་དུ་གཤེགས་པ་དང་། སེང་ལྡེང་གི་ཚལ་པ་དེ་ཡང་རི་རབ་ཀྱི་སྟེང་དུ་འོངས་སོ། །དེ་ནས་དེ་བཞིན་ [62a.6]གཤེགས་པ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གནས་སུ་ཡང་གཤེགས། ཚངས་པའི་འཇིག་རྟེན་གྱི་བར་དུ་ཡང་གཤེགས་པ་དང་། སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་གྱི་བར་དུ་འོངས་སོ། ། [62a.7]དེ་ནས་དེ་བཞིན་གཤེགས་པ་ཚངས་པའི་འཇིག་རྟེན་ནས་བབས་ཏེ་གདན་ལ་བཞུགས་པ་དང་། སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་ནས་བབས་ཏེ་བཅོམ་ལྡན་འདས་ཀྱི་སྤྱན་སྔར་འདུག་གོ །རིགས་ཀྱི་བུ་དེ་ནས་དེ་བཞིན་གཤེགས་པས་ཕྱག་གཡས་པས་ཞབས་ [62b] [62b.1]གཡས་པ་བཟུང་སྟེ་སེང་ལྡེང་གི་ཚལ་པ་རྩེ་མོ་ཡ་གཅིག་ས་ལ་ཟུག་ལ་རྩེ་མོ་ཡ་གཅིག་ས་ལས་གྱེན་དུ་ལྟ་བ་དེའི་སྟེང་དུ་ཞབས་བཞག་གོ །བཅོམ་ལྡན་འདས་ཀྱིས་སེང་ལྡེང་གི་ཚལ་པའི་སྟེང་དུ་ཞབས་བཞག་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་ [62b.2]རྟེན་གྱི་ཁམས་འདི་རབ་ཏུ་གཡོས་པར་གྱུར་ཏོ། །དེ་ནས་ང་ལ་གནས་བརྟན་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བཅོམ་ལྡན་འདས་ཀྱིས་སྔོན་ཕྲིན་ལས་ཀྱི་སྒྲིབ་པ་ཅི་ཞིག་མཛད་ལགས་ན། དེའི་རྣམ་པར་སྨིན་པ་འདི་ལྟ་བུར་ [62b.3]གྱུར་ལགས། ངས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ང་སྔོན་རྒྱ་མཚོ་ཆེན་པོའི་ནང་དུ་སོང་བ་ན་ཚོང་པ་གཡོན་ཅན་ཞིག་མདུང་ཐུང་གིས་བཏབ་སྟེ་སྲོག་དང་ཕྲལ་བར་གྱུར་པས་འདི་ནི་ལས་དེའི་ལྷག་མ་ཡིན་ནོ། །རིགས་ཀྱི་བུ་དེ་ནས་མི་ཉི་ཤུ་པོ་དེ་དག་གསོད་ [62b.4]པར་འདོད་པའི་མི་མཛའ་བཤེས་ལྟར་བཅོས་པ་ཉི་ཤུ་པོ་གང་དག་ཡིན་པ་དེ་དག་འདི་སྙམ་དུ་སེམས་ཏེ། དེ་བཞིན་གཤེགས་པ་ཆོས་ཀྱི་བདག་པོ་ལ་ཡང་ལས་རྣམ་པར་སྨིན་པར་འགྱུར་ན། བདག་ཅག་ལྟ་ལ་ཅིའི་ཕྱིར་རྣམ་པར་སྨིན་པར་མི་འགྱུར་སྙམ་ནས་དེ་དག་གིས་དེའི་ [62b.5]མོད་ལ་དེ་བཞིན་གཤེགས་པའི་སྤྱན་སྔར་བཙུན་པ་བཅོམ་ལྡན་འདས་བདག་ཅག་ཀྱང་སྲོག་ཆགས་འགུམས་པ་དང་། རྗེས་སུ་འགུམས་པར་འཚལ་བ་ལགས་ཏེ། བདག་ཅག་བཅོམ་ལྡན་འདས་ཀྱི་སྤྱན་སྔར་ནོངས་པ་དེ་དག་ནོངས་པར་འཆགས་ཤིང་མཆིས་ན། བཙུན་ [62b.6]པ་བཅོམ་ལྡན་འདས་ཀྱིས་བདག་ཅག་གིས་ནོངས་པ་ལ་ནོངས་པར་བཤགས་པ་དེ་དག་རྗེས་སུ་གཟུང་དུ་གསོལ། ཞེས་ཉེས་པ་ལ་ཉེས་པར་བཤགས་སོ། །དེ་བཞིན་གཤེགས་པས་དེ་དག་ལ་ལས་ཀྱི་བྱ་བ་དང་། ལས་ཟད་པར་འགྱུར་བ་ལས་བརྩམས་ཏེ་དེ་ལྟ་དེ་ལྟར་ [62b.7]ཆོས་བསྟན་པས་མི་བཞི་བཅུ་པོ་གང་དག་ཡིན་པ་དེ་དག་གིས་ནི་ཡེ་ཤེས་མངོན་པར་རྟོགས་པར་གྱུར་ཏོ། །སྲོག་ཆགས་གཞན་བཞི་ཁྲིས་ནི་ཆོས་མངོན་པར་རྟོགས་པར་གྱུར་ཏོ། །གང་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ [63a] [63a.1]ཞབས་ལ་སེང་ལྡེང་གི་ཚལ་པས་ཟུག་པར་གྱུར་པའི་རྒྱུ་ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་བྱང་ཆུབ་སེམས་དཔའ་དང་། དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་སྙུན་དང་བྲལ་བ་སྨན་པའི་རྒྱལ་པོ་འཚོ་ [63a.2]བྱེད་ལས་བཀྲུ་སྨན་ཨུད་པ་ལ་ཧསྟ་གན་དྷ་བསླངས་ཏེ་གསོལ་བར་མཛད་ཅེ་ན། རིགས་ཀྱི་བུ་དེའི་ཚེ་ན་སོ་སོར་ཐར་པའི་བསླབ་པ་བཅས་ནས་རིང་པོ་མ་ལོན་པ་ཞིག་ན་དགེ་སློང་རྣམ་པར་གྲོལ་བར་འགྱུར་བའི་སྲིད་པ་ཐ་མ་པ་ལྔ་བརྒྱ་ཞིག་ནགས་ཁྲོད་ཅིག་ན་གནས་པ་དེ་དག་ལ་ [63a.3]འདི་ལྟར་སྨན་བཀུས་ཏེ་བོར་བས་འཚོ་བར་མི་ནུས་པ་དེ་ལྟ་བུའི་ནད་བྱུང་བར་གྱུར་ནས་དེ་དག་དེ་བཞིན་གཤེགས་པ་ལ་གུས་པས་སྨན་གཞན་སྟེན་པར་མི་བྱེད། ཚོལ་བར་མི་བྱེད་དོ། །རིགས་ཀྱི་བུ་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ངས་དགེ་སློང་དེ་དག་སྨན་ [63a.4]གཞན་ཚོལ་ཞིང་སྟེན་པར་རྗེས་སུ་གནང་བར་བྱ་བའི་ཐབས་ནི་ཅི་ཡོད། རྣམ་གྲངས་ནི་ཅི་ཡོད་སྙམ་དུ་དགོངས་སོ། །དེ་ཅིའི་ཕྱིར་ཞེ་ན། འདི་ལྟར་གལ་ཏེ་དེ་བཞིན་གཤེགས་པས་དགེ་སློང་རྣམས་ལ་སྨན་གཞན་དག་རྗེས་སུ་མ་གནང་ན། ཕྱི་མའི་དུས་ཀྱི་དགེ་སློང་རྣམས་ [63a.5]འཕགས་པའི་རིགས་ཀྱི་རྗེས་སུ་འཇུག་པར་མི་འགྱུར་ཞིང་འཕགས་པའི་རིགས་འདྲལ་བར་འགྱུར་བའི་ཕྱིར་ཏེ། དེ་བས་ན་དེ་བཞིན་གཤེགས་པས་ཐབས་ལ་མཁས་པས་སྨན་པའི་རྒྱལ་པོ་འཚོ་བྱེད་ལས་བཀྲུ་སྨན་ཨུད་པ་ལ་ཧསྟ་གན་དྷ་བསླངས་ཏེ་གསོལ་པ་དང་། དེ་ནས་ [63a.6]གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁྱེད་ཅག་སྨན་གཞན་དག་ཚོལ་ལ་འཆི་བའི་དུས་བྱེད་པར་མི་འགྱུར་བར་གྱིས་ཤིག །དགེ་སློང་དེ་དག་གིས་འདི་སྐད་ཅེས་སྨྲས་སོ། །ལྷའི་བུ་དག་ཁོ་བོ་ཅག་ནི་དེ་ [63a.7]བཞིན་གཤེགས་པའི་བསླབ་པ་ལས་ཡང་དག་པར་འདའ་བའི་མཐུ་མེད་ཅིང་དབང་མེད་པ་ཡིན་པས་ཤི་བར་གྱུར་ཀྱང་ཁོ་བོ་ཅག་ནི་དེ་བཞིན་གཤེགས་པའི་བསླབ་པ་ལས་ཡང་དག་པར་འདའ་བར་མི་བྱེད་དོ། །དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དགེ་སློང་དེ་དག་ [63b] [63b.1]ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་དེ་བཞིན་གཤེགས་པ་ཆོས་ཀྱི་བདག་པོ་དེ་ཉིད་ཀྱིས་ཀྱང་སྨན་བཀུས་ཏེ་བོར་བ་སྤངས་ནས་སྨན་གཞན་བཙལ་གྱིས་ཁྱེད་ཅག་ཀྱང་སྨན་གཞན་ཚོལ་ཅིག །དེ་ནས་དགེ་སློང་དེ་དག་འགྱོད་པ་དང་བྲལ་ནས་སྨན་གཞན་བཙལ་ཏེ་བསྟེན་པ་ [63b.2]དང་། དེ་དག་ནད་དེ་ལས་ཡོངས་སུ་ཐར་ནས་ནད་དང་བྲལ་བ་དེ་དག་གིས་ཞག་བདུན་གྱིས་དགྲ་བཅོམ་པ་ཉིད་མངོན་དུ་བྱས་སོ། །རིགས་ཀྱི་བུ་གལ་ཏེ་དེ་བཞིན་གཤེགས་པས་སྨན་གཞན་བཙལ་བ་མ་མཛད་དུ་ཟིན་ན་དགེ་སློང་དེ་དག་ཀྱང་སྨན་གཞན་ཚོལ་བར་མི་བྱེད་པས་དེ་དག་ [63b.3]ནད་དེ་ལས་ཐར་པ་དང་། ཉོན་མོངས་པ་རྣམས་ལས་གྲོལ་ཞིང་དགྲ་བཅོམ་པ་ཉིད་འཐོབ་པར་འགྱུར་བའི་གནས་མེད་ལ། སྐབས་མ་ཡིན་ཞིང་དེ་ནི་གནས་མེད་དེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་བསོད་ནམས་ [63b.4]ཐམས་ཅད་དང་ལྡན་པ་གྲོང་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཅེ་ན། རིགས་ཀྱི་བུ་དེ་ལ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་མོད་ཀྱི། འོན་ཀྱང་དེ་བཞིན་གཤེགས་པས་ནི། སྐྱེ་བོ་ [63b.5]ཕྱི་མ་རྣམས་ལ་ཐུགས་བརྩེ་བ་དང་། རྗེས་སུ་བསྲུང་བར་བྱ་དགོས་ཏེ། དགེ་སློང་བསོད་སྙོམས་པ་གང་ལ་ལ་དག་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་བསོད་སྙོམས་ཀྱི་ཕྱིར་ཞུགས་པ་ན་དེ་དག་བདག་ཉིད་ [63b.6]བསོད་ནམས་ཆུང་བས་བསོད་སྙོམས་མི་རྙེད་པ་དེའི་ཚེ་ན་དེ་དག་དེ་བཞིན་གཤེགས་པ་ཡིད་ལ་བྱེད་པར་འགྱུར་ཏེ། དེ་བཞིན་གཤེགས་པ་བསོད་ནམས་ཐམས་ཅད་ཀྱི་གཟི་བརྗིད་ཀྱིས་མངོན་པར་འཕགས་པ་དེ་ཉིད་ཀྱང་གྲོང་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་ [63b.7]ཞུགས་པ་བཞིན་དུ་བསོད་སྙོམས་མ་བརྙེས་པས་ཕྱིར་བྱུང་བར་གྱུར་ན། བདག་ཅག་དགེ་བའི་རྩ་བ་ཆུང་ངུ་དང་ལྡན་པ་རྣམས་ལྟ་ལ་སྨོས་ཀྱང་ཅི་དགོས་ཏེ། དེ་བས་ན་བདག་ཅག་བསོད་སྙོམས་མ་རྙེད་པ་ཡི་ཆད་པ་བསྐྱེད་པར་མི་བྱའོ། །སྙམ་དུ་སེམས་པར་འགྱུར་བའི་ཕྱིར་ [64a] [64a.1]ཏེ། དོན་གྱི་དབང་དེ་གཟིགས་པས་ན་དེ་བཞིན་གཤེགས་པ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་གྲོང་དུ་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཏོ། །གཞན་ཡང་གང་ལ་ལ་དག་འདི་སྐད་ཅེས་གང་དག་གིས་དེ་བཞིན་གཤེགས་པ་ལ་བསོད་ [64a.2]སྙོམས་མ་ཕུལ་བའི་བྲམ་ཟེ་དང་། ཁྱིམ་བདག་དེ་དག་ནི་བདུད་སྡིག་ཅན་གྱིས་བྱིན་གྱིས་བརླབས་སོ། །ཞེས་སྨྲ་ན་རིགས་ཀྱི་བུ་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བདུད་སྡིག་ཅན་གྱིས་ནི་དེ་བཞིན་གཤེགས་པ་ལ་བར་ཆད་བྱ་བར་མི་ནུས་པའི་ཕྱིར་ཏེ། [64a.3]གཞན་དུ་ན་དེ་བཞིན་གཤེགས་པ་ཉིད་ཀྱི་བྱིན་གྱིས་བརླབས་ཀྱིས་བདུད་སྡིག་ཅན་གྱིས་བྲམ་ཟེ་དང་། ཁྱིམ་བདག་དེ་དག་བྱིན་གྱིས་བརླབས་པར་ཟད་ཀྱི་རང་གི་བློས་ནི་མ་ཡིན་ནོ། །དེ་ལ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་མོད་ཀྱི། སེམས་ [64a.4]ཅན་དེ་དག་ཉིད་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པ་ཇི་ལྟར་ལྷུང་བཟེད་བཀྲུས་པས་གྲོང་དུ་ཞུགས་པ་བཞིན་དུ་ཕྱིར་ཡང་བྱུང་བར་གྱུར་ཏོ། །ཞལ་ཟས་བཅད་པ་དེའི་ཚེ་ན་དེ་བཞིན་གཤེགས་པ་དང་། དགེ་སློང་གི་དགེ་འདུན་ལ་ཡིད་མི་བདེ་བ་མེད་ཅིང་སྔོན་ཇི་ལྟ་ [64a.5]བ་བཞིན་དུ་ཕྱིས་ཀྱང་དེ་བཞིན་ཏེ། མཐོ་བ་མེད། དམའ་བ་ཡང་མེད་པར་གྱུར་ཏོ། །དེ་ནས་དེའི་མོད་ལ་ལྷའི་བུ་བདུན་ཁྲིས་དད་པ་ཐོབ་པར་གྱུར་ནས། དེ་བཞིན་གཤེགས་པ་ལ་རབ་ཏུ་བཏུད་པ་དང་། དེ་བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་ [64a.6]ཐམས་ཅད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །བྲམ་ཟེ་དང་ཁྱིམ་བདག་དེ་དག་གིས་ཀྱང་དུས་གཞན་ཞིག་གི་ཚེ་ན་སྟོན་པ་བཅོམ་ལྡན་འདས་ཀྱི་ཡོན་ཏན་དང་། ཆོག་ཤེས་པ་དག་ [64a.7]མཐོང་ནས་བཅོམ་ལྡན་འདས་ཀྱི་སྤྱན་སྔར་ལྷགས་ཏེ། ཉེས་པ་ལ་ཉེས་པར་བཤགས་པ་དང་། དེ་བཞིན་གཤེགས་པས་ཀྱང་དེ་དག་ལ་འཕགས་པའི་བདེན་པ་བཞིའི་གཏམ་ཡང་དག་པར་བསྟན་པ་མཛད་པས། དེ་ནས་ལྷ་དང་མི་རྣམས་ཀྱི་སྐྱེ་དགུ་ལས་སྲོག་ [64b] [64b.1]ཆགས་ཉི་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་སྟེ། གང་གི་ཕྱིར་དེ་བཞིན་གཤེགས་པ་བྲམ་ཟེའི་གྲོང་ཤིང་སཱ་ལ་ཆེན་པོ་ཅན་དུ་བསོད་སྙོམས་ཀྱི་ཕྱིར་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་བྱུང་བའི་རྒྱུ་ [64b.2]ནི་དེ་ཡིན། རྐྱེན་ནི་དེ་ཡིན་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་བྲམ་ཟེའི་བུ་མོ་དྲེགས་མས་ཤིང་གི་གཞོང་བུ་ལྟོ་བར་བཅིངས་ཏེ། དགེ་སྦྱོང་ཁྱོད་ཀྱིས་ཁོ་མོ་སྦྲུམ་པར་བྱས་ཀྱིས། ཁོ་མོ་ལ་ཟས་དང་གོས་བྱིན་ [64b.3]ཅིག །ཅེས་དེ་བཞིན་གཤེགས་པ་ལ་སྐུར་པ་བཏབ་པར་གྱུར་ཅེ་ན། རིགས་ཀྱི་བུ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མི་མངའ་སྟེ། དེ་བཞིན་གཤེགས་པས་བྲམ་ཟེའི་བུ་མོ་དྲེགས་མ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་ [64b.4]སྙེད་དུ་འཕང་བར་ཡང་སྤྱོད་མོད་ཀྱི། དེ་བཞིན་གཤེགས་པ་དེས་མཁྱེན་བཞིན་དུ་བཏང་སྙོམས་མཛད་ཅིང་། ཐབས་ལ་མཁས་པས་ལས་ཀྱི་བྱ་བ་ཀུན་ཏུ་བསྟན་པ་མཛད་དོ། །དེ་ཅིའི་ཕྱིར་ཞེ་ན། ཕྱི་མའི་དུས་ན་བསྟན་པ་འདི་ལ་རབ་ཏུ་བྱུང་བའི་དགེ་སློང་ [64b.5]དག་འབྱུང་བར་འགྱུར་ཏེ། དེ་དག་ལ་ཡང་དག་པ་མ་ཡིན་པའི་སྐུར་བ་བཏབ་པས་དེ་དག་འགྱོད་པ་དང་། སེམས་ཞུམ་པར་འགྱུར་ཞིང་། དེ་དག་མངོན་པར་མི་དགའ་བ་དང་། ཉམས་པ་ལ་འཇུག་པར་འགྱུར་བས། དེ་དག་སྐུར་བ་བཏབ་པའི་ཚེ་ན་འདི་སྐད་ [64b.6]དུ། དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེ་ཉིད་ཀྱིས་ཀྱང་སྐུར་བ་བརྙེས་པར་གྱུར་ན། བདག་ཅག་གིས་ལྟ་ཅིའི་ཕྱིར་མི་རྙེད་ཅེས་དེ་བཞིན་གཤེགས་པ་རྗེས་སུ་དྲན་པར་བྱེད་ཅིང་། དེ་དག་དེའི་ཚེ་ན་སྐུར་བ་དེ་ཟིལ་གྱིས་མནན་ [64b.7]ནས་ཚངས་པར་སྤྱོད་པ་ཡོངས་སུ་དག་པ། ཡོངས་སུ་བྱང་བར་སྤྱོད་པར་འགྱུར་བ་དང་། ཉམས་པ་ལ་འཇུག་པར་མི་འགྱུར་བར་བྱ་བའི་ཕྱིར་རོ། །བྲམ་ཟེའི་བུ་མོ་དྲེགས་མ་ནི་རེ་ཤིག་སྡིག་པའི་ལས་ཀུན་ཏུ་རྒྱས་པ་དང་། རང་བཞིན་གྱིས་མ་དད་པ་མང་ [65a] [65a.1]བ་ཡིན་པས་དེ་ལྟར་ལས་ཀྱི་སྒྲིབ་པས་བསྒྲིབས་པ་དེས་ན་ཕུང་པོ་དང་། ཁམས་དང་། སྐྱེ་མཆེད་དེ་དག་ཉིད་ཀྱིས་བསྟན་པ་འདི་ལ་གདོན་མི་ཟ་བར་རྨ་འབྱིན་པར་བྱེད་པ་ཡིན་ཏེ། དེ་སྡིག་པའི་ལས་ཀུན་དུ་རྒྱས་པ་དེས་གལ་ཏེ་རྨི་ལམ་ [65a.2]ན་དེ་བཞིན་གཤེགས་པ་ལ་སྐུར་བ་བཏབ་པར་གྱུར་ན་ཡང་། དེ་ཉིད་ཀྱིས་སད་པའི་ཚེ་ན་དྲི་མར་ཡང་འགྱུར་རོ། །རིགས་ཀྱི་བུ་གལ་ཏེ་དེ་བཞིན་གཤེགས་པས་ཐབས་འགའ་ཞིག་གིས་དེ་མི་དགེ་བའི་ལས་མངོན་པར་འདུ་བྱེད་པ་དེ་ལས་ཟློག་པར་སྤྱོད་ན་ནི་ཟློག་ [65a.3]པར་ཡང་མཛད་ལ། དེ་བཞིན་གཤེགས་པས་བསྲུང་བར་སྤྱོད་ན་སྲུང་བར་ཡང་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སེམས་ཅན་འགའ་ཡང་ཡོངས་སུ་མ་བཏང་བའི་ཕྱིར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ [65a.4]ནོ། །ཅིའི་ཕྱིར་དེ་བཞིན་གཤེགས་པ་ཐམས་ཅད་མཁྱེན་པས་ཀུན་ཏུ་རྒྱུ་མཛེས་མ་ཀུན་ཏུ་རྒྱུ་དག་གིས་སྲོག་དང་ཕྲལ་ཏེ། རྒྱལ་བུ་རྒྱལ་བྱེད་ཀྱི་ཚལ་གྱི་འོབས་ཀྱི་ནང་དུ་བོར་བ་བཏང་སྙོམས་སུ་མཛད་ཅེ་ན། དེ་བཞིན་གཤེགས་པ་ནི་ཐམས་ཅད་མཁྱེན་པ་ཐོགས་ [65a.5]པ་མི་མངའ་བའི་ཡེ་ཤེས་གཟིགས་པ་དང་ལྡན་པ་ཡིན་པས། དེ་བཞིན་གཤེགས་པས་དེ་དེ་ལྟར་འགྱུར་བར་མཁྱེན་ཅིང་། དེ་བཞིན་གཤེགས་པས་དེ་ལྟ་བུའི་བྱིན་གྱི་རླབས་བྱིན་གྱིས་རློབ་པར་ཡང་སྤྱོད་མོད་ཀྱི། ཀུན་ཏུ་རྒྱུ་མཛེས་མ་ཉིད་ཚེའི་ཚད་ཟད་ཅིང་གདོན་ [65a.6]མི་ཟ་བར་གཞན་གྱི་གནོད་པས་ཚུལ་མ་ཡིན་པས་འཆི་བའི་དུས་བྱེད་པར་འགྱུར་བའི་ཕྱིར་ཏེ་རྣམ་གྲངས་དེས་ན་གཞན་མུ་སྟེགས་ཅན་དག་འདི་ལྟར་སངས་རྒྱས་ཀྱི་ཡེ་ཤེས་དེ་ནི། ཇི་ལྟ་ཇི་ལྟར་སེམས་ཅན་རྣམས་ཀྱི་དཀར་པོའི་ཆོས་རྣམ་པར་འཕེལ་བ་དང་། དགེ་བའི་རྩ་ [65a.7]བ་རྣམ་པར་འཕེལ་བར་འགྱུར་བ་དང་། ཇི་ལྟ་ཇི་ལྟར་དེ་ལ་གཞག་པར་བྱ་བ་དེ་ལྟ་དེ་ལྟར་དེ་ལ་འཇོག་པར་མཛད་དོ། །ཞེས་བདག་ཉིད་ཀྱི་རང་གི་ཉེས་པས་ཤིན་ཏུ་ཚར་གཅོད་པར་འགྱུར་རོ། །དེའི་ཚེ་བཅོམ་ལྡན་འདས་ཞག་བདུན་གྱི་བར་དུ་གྲོང་ཁྱེར་དུ་མ་ཞུགས་ [65b] [65b.1]པར་ལྷ་བྱེ་བ་ཕྲག་དྲུག་ཅུ་བཏུལ་ནས་ཞག་བདུན་པོ་དེ་འདས་པ་དང་། བཅོམ་ལྡན་འདས་ཀྱི་ཐད་དུ་འཁོར་བཞི་པོ་དག་ལྷགས་ནས་བཅོམ་ལྡན་འདས་ཀྱིས་ཅི་ནས་སྲོག་ཆགས་བརྒྱད་ཁྲི་བཞི་སྟོང་དག་ཡེ་ཤེས་མཐོང་བ་སྐྱེས་པར་གྱུར་པ་དེ་ལྟ་དེ་ལྟར་དེ་དག་ལ་ཆོས་ [65b.2]བསྟན་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན། ཟླ་བ་གསུམ་དུ་སྐྱེ་བོ་རྣམས་ [65b.3]ལ་བག་ཕབ་སྟེ། བྲམ་ཟེ་ཉོན་མོངས་མེད་ཀྱི་རྟ་ཆས་ཀྱི་ནས་དག་གསོལ་ཅེ་ན། རིགས་ཀྱི་བུ་དེ་བཞིན་གཤེགས་པས་ཇི་ལྟར་ཁྱིམ་བདག་དེས་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་སྤྱན་དྲངས་ནས། རི་མོ་མི་བྱེད་པར་ཡང་མཁྱེན་མོད་ [65b.4]ཀྱི། དེས་མཁྱེན་བཞིན་དུ་དང་དུ་བླངས་ཤིང་བཏང་སྙོམས་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་དབྱར་ཟླ་བ་གསུམ་དུ་གང་དག་གི་རྟ་ཆས་ཀྱི་ནས་དག་གསོལ་བའི་རྟ་ལྔ་བརྒྱ་པོ་གང་དག་ཡིན་པ་དེ་དག་ཐམས་ [65b.5]ཅད་ནི། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཤ་སྟག་ཡིན་ཏེ། དེ་དག་སྡིག་པའི་གྲོགས་པོའི་དབང་གིས་སྡིག་པའི་ལས་དང་། ལས་དམན་པ་བྱས་ཤིང་མངོན་པར་འདུ་བྱས་པས། [65b.6]ལས་དེས་དེ་དག་དུད་འགྲོའི་སྐྱེ་གནས་སུ་སྐྱེས་ཏེ། རྟ་ལྔ་བརྒྱ་པོ་དེ་དག་གི་ནང་ན་རྟ་ཅང་ཤེས་ཅིག་ཡོད་པ་གང་ཡིན་པ་དེ་ནི། བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་སྨོན་ལམ་གྱི་དབང་གིས་བསམས་བཞིན་དུ་དེར་སྐྱེས་པ་ཡིན་ལ། རྟ་ལྔ་བརྒྱ་ [65b.7]པོ་དེ་དག་ཐམས་ཅད་ཀྱང་སྔོན་མིར་གྱུར་པ་ན་བྱང་ཆུབ་སེམས་དཔའ་ཉི་མའི་སྙིང་པོ་དེ་ཉིད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་ཡིན་པས། དེ་དེ་དག་ཡོངས་སུ་ཐར་བར་བྱ་བ་དང་། ཡོངས་སུ་སྨིན་པར་བྱ་བའི་ཕྱིར་དེར་སྐྱེས་ཏེ། རྟ་ཅང་ཤེས་དེ་ [66a] [66a.1]ཡིད་ཀྱི་མཐུས་རྟ་ལྔ་བརྒྱ་པོ་དེ་དག་ཐམས་ཅད་ཀྱིས་སྔོན་གྱི་ཚེ་རབས་རྗེས་སུ་དྲན་པར་གྱུར་ཅིང་དེ་དག་གི་བྱང་ཆུབ་ཀྱི་སེམས་དེ་ཡང་མངོན་དུ་གྱུར་བའི་ཕྱིར་ཏེ། རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་བྱང་ཆུབ་སེམས་དཔའ་རྟར་གྱུར་པ་ [66a.2]ལྔ་བརྒྱ་པོ་དེ་དག་ལ་ཐུགས་བརྩེ་བའི་ཕྱིར། དེ་བཞིན་གཤེགས་པ་དུད་འགྲོའི་སྐྱེ་གནས་སུ་སྐྱེས་པ་དེ་དག་གི་དོན་དུ་དབྱར་ཟླ་བ་གསུམ་དེར་གནས་པར་ཞལ་གྱིས་བཞེས་སོ། །དེ་ན་རྟ་ལྔ་བརྒྱ་པོ་དག་གིས་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ཕྱེད་ནི་ [66a.3]དགེ་སློང་ལྔ་བརྒྱ་པོ་དེ་དག་ལ་འབུལ་ལོ། །རྟ་ཅང་ཤེས་ཀྱི་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ནི་དེ་བཞིན་གཤེགས་པ་ལ་འབུལ་ལོ། །ཕྱེད་ནི་རྟ་ཅང་ཤེས་དེ་ཉིད་ཟ་ཞིང་རྟ་ཅང་ཤེས་དེས་རྟའི་སྐད་ཀྱིས་རྟ་ལྔ་བརྒྱ་པོ་དེ་དག་ཐམས་ཅད་སྡིག་པ་འཆགས་སུ་ [66a.4]བཅུག་ཅིང་། སངས་རྒྱས་ལ་སོགས་པ་དགེ་སློང་གི་དགེ་འདུན་དེ་དག་ལ་ཕྱག་འཚལ་དུ་ཡང་བཅུག་གོ །རྟ་ཅང་ཤེས་དེས་རྟ་ལྔ་བརྒྱ་པོ་དེ་དག་ལ་འདི་སྐད་ཅེས། ཁྱེད་ཅག་གི་ཆས་ཀྱི་ནས་དག་ལས་ཕྱེད་ཕྱེད་དེ་བཞིན་གཤེགས་པ་དང་། དགེ་སློང་གི་ [66a.5]དགེ་འདུན་གྱིས་གསོལ་ཏོ། །ཞེས་གོ་བར་ཡང་བྱས་སོ། །དེ་ལྟར་རྟ་ལྔ་བརྒྱ་པོ་དེ་དག་གིས་སྡིག་པ་བཤགས་ཤིང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་དད་པ་བསྐྱེད་ནས། ཟླ་བ་གསུམ་པོ་དེ་དག་འདས་པའི་འོག་ཏུ་དུས་གཞན་གྱི་ཚེ་ན་རྟ་ལྔ་བརྒྱ་ [66a.6]པོ་དེ་དག་ཐམས་ཅད་ཤི་འཕོས་ཏེ། དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེས་ནས་ལྷར་གྱུར་པ་དེ་དག་གིས་ཡང་དེ་བཞིན་གཤེགས་པ་ལ་ཞལ་ཟས་ཕུལ་ཞིང་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་བྱས་པ་དང་། དེ་ [66a.7]བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །རྟ་ལྔ་བརྒྱ་པོ་དེ་དག་འདུལ་ཞིང་འཚོ་བར་བྱེད་པའི་རྟ་རྫི་གང་ཡིན་པ་དེ་ཡང་དེ་བཞིན་གཤེགས་པས་རང་སངས་རྒྱས་ [66b] [66b.1]རབ་ཏུ་སེམས་དུལ་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །དེ་བཞིན་གཤེགས་པས་རྟ་ཅང་ཤེས་དེ་ཡང་སངས་རྒྱས་བཅོམ་ལྡན་འདས་དཔག་ཏུ་མེད་པ་ལ་མཆོད་པ་བྱས་ཤིང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱས་ནས། དེ་བཞིན་ [66b.2]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་སེམས་དུལ་ཞེས་བྱ་བར་འགྱུར་ཏེ། འཇིག་རྟེན་དུ་འབྱུང་བར་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ་དེ་ལྟ་མོད་ཀྱི་མིའི་ཁ་ཟས་གང་ཡིན་པ་དེ་དག་ནི་དེ་བཞིན་གཤེགས་པ་ལ་མི་ [66b.3]བསོད་པ་ཅུང་ཟད་ཀྱང་མེད་དེ། རིགས་ཀྱི་བུ་ཡོངས་སུ་བརྟག་པ་ཉེ་བར་བཟུང་ན་གལ་ཏེ་དེ་བཞིན་གཤེགས་པས་ཤིང་དང་། བོང་བ་དང་། གསེག་མ་དང་། གྱོ་མོ་དག་ཞལ་ཟས་ཀྱི་ཕྱིར་ཡོངས་སུ་ལོངས་སྤྱད་པར་གྱུར་ན་ཡང་ཤིང་དང་། བོང་བ་ [66b.4]དང་། གསེག་མ་དང་། གྱོ་མོ་ལ་སོགས་པ་དེ་དག་གི་རོ་དེ་ལྟ་བུ་དང་། རོ་བྲོ་བའི་མཆོག་གི་ཁྱད་པར་གང་དག་ཡིན་པ་དེ་ལྟ་བུ་དག་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡང་འགའ་ཡང་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་ [66b.5]བུ་འདི་ལྟར་དེ་བཞིན་གཤེགས་པ་ནི་སྐྱེས་བུ་ཆེན་པོའི་མཚན་རོ་བྲོ་བའི་མཆོག་དང་ལྡན་པ་ཡིན་པས་ན། དེ་བཞིན་གཤེགས་པའི་སྐུ་ལ་ཞལ་ཟས་མི་བསོད་པ་ཐམས་ཅད་གསོལ་མ་ཐག་ཏུ་ཡང་། ལྷའི་ཁ་ཟས་ལས་ཡང་དག་པར་འདས་པའི་རོ་དང་ལྡན་ [66b.6]པར་འགྱུར་བའི་ཕྱིར་ཏེ། རིགས་ཀྱི་བུ་དེའི་ཕྱིར་རྣམ་གྲངས་དེས་ན་ཁྱོད་ཀྱིས་འདི་ལྟར། དེ་བཞིན་གཤེགས་པའི་ཞལ་ཟས་ཐམས་ཅད་ནི་བསོད་པ་ཡིན་པར་རིག་པར་བྱའོ། །རིགས་ཀྱི་བུ་དེའི་ཚེ་ན་དགེ་སློང་ཀུན་དགའ་བོ་འདི་སྙམ་དུ། དེ་བཞིན་ [66b.7]གཤེགས་པ་འདིས་འཁོར་ལོས་སྒྱུར་བའི་རྒྱལ་སྲིད་སྤངས་ཏེ། རབ་ཏུ་བྱུང་ནས་ད་རྟ་ཆས་ཀྱི་ནས་དག་གསོལ་བར་མཛད་པ་ལྟ་ཞེས་ཡིད་མི་བདེ་བར་གྱུར་པ་དང་། དེ་བཞིན་གཤེགས་པས་དེའི་སེམས་ལ་རྣམ་པར་གཟིགས་ནས། ཀུན་དགའ་བོ་འདི་ [67a] [67a.1]ཅིའི་རོ་ཡིན་ཤེས་སམ། ཞེས་ནས་ཀྱི་འབྲུ་གཅིག་བྱིན་པ་དང་། དེས་དེ་ཟོས་ནས་ངོ་མཚར་དུ་འཛིན་པར་གྱུར་ཏེ། ང་ལ་འདི་སྐད་ཅེས་བཅོམ་ལྡན་འདས་བདག་ནི་རྒྱལ་པོའི་ཁྱིམ་དུ་སྐྱེས་ཤིང་། རྒྱལ་པོའི་ཁྱིམ་དུ་ལེགས་པར་རྒྱས་ [67a.2]པ་ལགས་ན། བཅོམ་ལྡན་འདས་བདག་གིས་རོའི་མཆོག་འདི་ལྟ་བུ་ནི་སྔན་ཆད་མ་འཚལ་མ་མྱོང་ལགས་སོ། །ཞེས་ཟེར་ཏེ། དེའི་བྱིན་གྱིས་དགེ་སློང་ཀུན་དགའ་བོ་ཟས་གཞན་མི་ཟ་བར་དགའ་བ་དང་། བདེ་བས་ཞག་བདུན་འདས་པར་གྱུར་ཏོ། །རིགས་ [67a.3]ཀྱི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་དེ་ནི་དེ་བཞིན་གཤེགས་པའི་ཐབས་ལ་མཁས་པ་ཡིན་གྱིས། ལས་ཀྱི་སྒྲིབ་པ་མ་ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་མགྲོན་དུ་ [67a.4]གཉེར་ལ་སེམས་རྣམ་པར་གཡེངས་པས་རི་མོ་མི་བྱེད་པའི་སེམས་ཅན་དེ་དག་ལ་ཇི་སྐད་སྨྲས་པ་དེ་བཞིན་བྱེད་པ་ཉིད་ཀུན་ཏུ་བསྟན་པར་བྱ་བའི་ཕྱིར། ལས་ཀྱི་རྒྱུད་དེ་ལྟ་བུ་དག་ཀུན་ཏུ་སྟོན་པར་མཛད་དོ། །རིགས་ཀྱི་བུ་གང་གིས་དེ་བཞིན་གཤེགས་པ་སྤྱན་དྲངས་ [67a.5]ལ། རི་མོ་མ་བྱས་པ་དེ་ཡང་དེ་བཞིན་གཤེགས་པས་ལོག་པར་ལྟུང་བར་མི་འགྱུར་བའི་ཆོས་སུ་ལུང་བསྟན་པའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཆོས་ཉིད་ལ་ལྟོས། རིགས་ཀྱི་བུ་གཞན་ཡང་དེ་བཞིན་གཤེགས་པ་དང་ཐབས་ཅིག་ཏུ་དབྱར་ [67a.6]ཟླ་བ་གསུམ་གནས་པར་ཁས་བླངས་པའི་དགེ་སློང་ལྔ་བརྒྱ་པོ་གང་དག་གིས་རྟ་ཆས་ཀྱི་ནས་ཟོས་པ་དེ་དག་ལས། དགེ་སློང་བཞི་བཅུ་ནི་འདོད་ཆགས་སྤྱོད་པ་དང་། སྡུག་པའི་མཚན་མ་སྤྱོད་པ་ཡིན་པས། གལ་ཏེ་དེའི་ཚེ་ན་དེ་དག་གིས་ཟས་བསོད་པ་ [67a.7]དག་ཟོས་པར་གྱུར་ན་དེ་དག་གིས་འདོད་ཆགས་དང་ལྡན་པའི་རྣམ་པར་རྟོག་པ་ཤིན་ཏུ་ཤས་ཆེན་པོ་དག་སྐྱེ་བར་འགྱུར་བ་ཞིག་ན། དེ་དག་གིས་ཟས་ངན་པ་ཟོས་པ་དེས་འདོད་ཆགས་ཀྱི་ཀུན་ནས་ལྡང་བ་དེ་དག་སྲབས་ཤིང་མེད་པར་གྱུར་ཏེ། དེ་དག་གིས་འདོད་ཆགས་ [67b] [67b.1]ཀྱི་ཀུན་ནས་ལྡང་བ་དག་རྣམ་པར་བསལ་ནས། དེ་དག་ཐམས་ཅད་ཀྱི་ཟླ་བ་གསུམ་པོ་དེ་དག་འདས་ནས། ཞག་བདུན་གྱིས་དགྲ་བཅོམ་པ་ཉིད་ཐོབ་པར་གྱུར་ཏོ། །རིགས་ཀྱི་བུ་དེ་ལྟ་བས་ན་དགེ་སློང་ལྔ་བརྒྱ་པོ་དེ་དག་གདུལ་བའི་དབང་གི་ཕྱིར་དང་། བྱང་ཆུབ་ [67b.2]སེམས་དཔའ་དེ་དག་ཡོངས་སུ་སྨིན་པར་བྱ་བའི་ཕྱིར། དེ་བཞིན་གཤེགས་པས་ཐབས་ལ་མཁས་པ་དེས་ཟླ་བ་གསུམ་དུ་རྟ་ཆས་ཀྱི་ནས་དག་གསོལ་བར་ཟད་ཀྱི། ལས་ཀྱི་སྒྲིབ་པའི་ཉེས་པ་ནི་མ་ཡིན་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ [67b.3]ཡིན་ནོ། །ཅིའི་ཕྱིར་དེ་བཞིན་གཤེགས་པ་གསོ་སྦྱོང་ལ་ཞུགས་པ་ན་འོད་སྲུང་ང་ནི་རོ་རྒྱབ་ནས་ཁྱོད་ཀྱི་བྱང་ཆུབ་ཀྱི་ཡན་ལག་དག་ཤོད་ཅིག །ཅེས་བཀའ་སྩལ་ཅེ་ན། རིགས་ཀྱི་བུ་དེའི་ཚེ་ན་ལྷའི་བུ་ཉན་ཐོས་ཀྱིས་འདུལ་བ་གང་དག་སྔོན་དགེ་སློང་འོད་སྲུང་གིས་ [67b.4]སངས་རྒྱས་དང་། ཆོས་དང་། དགེ་འདུན་དང་། བག་ཡོད་པའི་བྱ་བ་དག་ལ་ཡང་དང་ཡང་དུ་དད་པ་བསྐྱེད་ཅིང་། ཡང་དག་པར་འཛིན་དུ་བཅུག་པ་བརྒྱད་སྟོང་འཁོར་དེ་ཉིད་དུ་འདུས་པར་གྱུར་ཏེ་འདུག་པས། ལྷའི་བུ་དེ་དག་གིས་སྔོན་ཡང་བྱང་ཆུབ་ [67b.5]ཀྱི་ཡན་ལག་གི་གཏམ་དག་ཐོས་ལ། ལྷའི་བུ་དེ་དག་ལ་དགེ་སློང་འོད་སྲུང་མ་གཏོགས་པར་གལ་ཏེ་སངས་རྒྱས་འབུམ་གྱིས་ཆོས་བསྟན་པར་གྱུར་ཀྱང་། དེ་དག་གིས་ཆོས་བསྟན་པ་ཀུན་ཤེས་པར་མི་འགྱུར་བས་ན། དེའི་ཕྱིར་དགེ་སློང་འོད་སྲུང་གིས་བྱང་ཆུབ་ཀྱི་ [67b.6]ཡན་ལག་རབ་ཏུ་དབྱེ་བ་རྒྱ་ཆེར་བཤད་པས། ལྷའི་བུ་བརྒྱད་སྟོང་པོ་དེ་དག་གིས་ཡེ་ཤེས་མངོན་པར་རྟོགས་པར་གྱུར་ཏོ། །གཞན་ཡང་སེམས་ཅན་གང་ལ་ལ་དག་ནད་ཀྱིས་གནོད་པར་གྱུར་ཅིང་། ནད་པར་གྱུར་ནས་ཆོས་ཉན་དུ་མ་འོངས་ཤིང་ཆོས་མི་ཉན་པའི་ [67b.7]སེམས་ཅན་ཆོས་མ་ཐོས་པ་དེ་དག་འདི་སྙམ་དུ་དེ་བཞིན་གཤེགས་པ་ཆོས་ཀྱི་བདག་པོ་དེ་ཡང་། བྱང་ཆུབ་ཀྱི་ཡན་ལག་གི་གཏམ་དག་གསན་ནས། སྙུན་ནད་ལས་ཡོངས་སུ་ཐར་བར་གྱུར་ན་བདག་ཅག་གི་ཅིའི་ཕྱིར་ཆོས་མཉན་པར་མི་བྱ། སྙམ་དུ་སེམས་ [68a] [68a.1]པར་ཡང་འགྱུར་ཏེ། རིགས་ཀྱི་བུ་དེ་ལྟར་ན་ལྷའི་བུ་དེ་དག་གདུལ་བའི་དབང་གི་ཕྱིར་དང་། སེམས་ཅན་ནད་པ་རྣམས་ཆོས་ལ་གུས་པ་ཀུན་ཏུ་བསྟན་པར་བྱ་བའི་ཕྱིར། དེ་བཞིན་གཤེགས་པས་ཚིག་འདི་སྐད་ཅེས། འོད་སྲུང་ང་ནི་རོ་ [68a.2]རྒྱབ་ནས་ཁྱོད་ཀྱིས་བྱང་ཆུབ་ཀྱི་ཡན་ལག་དག་ཤོད་ཅེས་གསུངས་པར་ཟད་ཀྱི། དེ་བཞིན་གཤེགས་པའི་སྐུ་ལ་སྙུན་མངའ་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ [68a.3]ཆོས་ཀྱི་སྐུ་ཡིན་ཏེ། དེ་དག་ལས་འབྱུང་བའི་ལུས་རགས་པ་ཡོངས་སུ་གྲུབ་པ་མེད་པའི་ཕྱིར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པས་ཤཱཀྱ་རྣམས་རབ་ཏུ་རྣམ་པར་འཇིག་པར་གྱུར་པ་ན་ཚིག་འདི་ [68a.4]སྐད་ཅེས། ཀུན་དགའ་བོ་ང་ཀླད་པ་ན་ཞིང་མི་བདེའོ། །ཞེས་གསུངས་ཞེ་ན། རིགས་ཀྱི་བུ་དེ་ནི་སེམས་ཅན་གང་ལ་ལ་དག་དེ་བཞིན་གཤེགས་པས་ཉེ་དུ་རྣམས་ཀྱི་སྲིད་པའི་རྩེ་མོའི་བར་གྱི་སྡུག་བསྔལ་གྱི་ཕུང་པོའི་མཐར་མཛད་པ་མི་ཤེས་པའི་སེམས་ཅན་ [68a.5]དེ་དག་འདི་སྙམ་དུ་གང་གི་ཕྱིར། དེ་བཞིན་གཤེགས་པ་འཇིག་རྟེན་ལ་ཕན་པའི་ཕྱིར་རབ་ཏུ་བྱུང་ནས། རྒྱལ་པོའི་གདུང་རྒྱུད་ཐམས་ཅད་ཆུད་ཟོས་ཀྱང་དེས་ཉེ་དུ་རྣམས་ཡོངས་སུ་མ་བསྐྱབས་པ་ལས་ན། དེ་བཞིན་གཤེགས་པ་ནི་ཉེ་དུ་རྣམས་ལ་ཕན་པར་བཞེད་ [68a.6]པ་ཡང་མ་ཡིན། དོན་དུ་བཞེད་པ་ཡང་མ་ཡིན། བདེ་བར་བཞེད་པ་ཡང་མ་ཡིན། གྲུབ་པ་དང་། བདེ་བར་བཞེད་པ་ཡང་མ་ཡིན་ནོ། །སྙམ་དུ་སེམས་པར་མི་འགྱུར་བར་སེམས་ཅན་དེ་དག་གི་སེམས་གཟུང་བའི་ཕྱིར་དེ་བཞིན་གཤེགས་པས་ [68a.7]གནས་བརྟན་ཀུན་དགའ་བོ་ལ་ཚིག་འདི་སྐད་ཅེས། ཀུན་དགའ་བོ་ང་ཀླད་པ་ན་ཞིང་མི་བདེའོ་ཞེས་གསུངས་སོ། །རིགས་ཀྱི་བུ་གང་གི་ཚེ་དེ་བཞིན་གཤེགས་པས་གནས་བརྟན་ཀུན་དགའ་བོ་ལ་ཚིག་འདི་སྐད་ཅེས། ཀུན་དགའ་བོ་ང་ཀླད་པ་ན་ཞིང་མི་བདེའོ། ། [68b] [68b.1]ཞེས་གསུངས་པ་དེའི་ཚེ་ན་ལྷའི་བུ་ཆད་པར་སྨྲ་བ་སུམ་སྟོང་འདུས་པར་གྱུར་པ་དང་། སེམས་ཅན་སྲོག་གཅོད་པ་རབ་ཏུ་མང་པོ་དག་ཀྱང་འདུས་པར་གྱུར་པས། དེ་ན་སེམས་ཅན་ཆད་པར་སྨྲ་བ་དེ་དག་དང་། སེམས་ཅན་སྲོག་གཅོད་པ་དེ་དག་ལས་ཀྱི་བྱ་ [68b.2]བ་ལ་གཟུད་པའི་ཕྱིར། དེ་བཞིན་གཤེགས་པས་སྲོག་གཅོད་པའི་དབང་གིས་དེ་བཞིན་གཤེགས་པའི་དབུ་སྙུང་ཞིང་མི་བདེའོ། །ཞེས་ལས་ཀྱི་རྒྱུད་དེ་ཀུན་ཏུ་བསྟན་ཏོ། །དེ་ན་དེ་བཞིན་གཤེགས་པས་གསུང་གི་ཕྲིན་ལས་བརྗོད་པ་དེ་བསྟན་པ་ན། ལྷ་ [68b.3]དང་། མི་རྣམས་ཀྱི་སྐྱེ་དགུ་ལས་སྲོག་ཆགས་ཁྲི་བཏུལ་བར་གྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །ཅིའི་ཕྱིར་དེ་བཞིན་གཤེགས་པ་བྲམ་ཟེ་བྷ་ར་དྭ་ཛས་སྤྱོ་བ་རྣམ་པ་བརྒྱས་སྤྱོས་པ་ན། དེ་བཞིན་གཤེགས་པ་སྤྱོས་ [68b.4]པ་དེ་དག་དང་དུ་ལེན་པར་མཛད་ཅེ་ན། རིགས་ཀྱི་བུ་དེ་བཞིན་གཤེགས་པས་ནི་བྲམ་ཟེ་བྷ་ར་དྭ་ཛ་སྤྱོ་བར་བྱེད་པ་ལ་ཕྱིར་སྤྱོ་བའམ། ཡང་ན་དེ་ཕྱོགས་གཞན་དུ་འཕང་བ་འམ། ཡང་ན་དེ་དེ་བཞིན་གཤེགས་པ་ལ་ཚིག་གཅིག་ཙམ་གྱིས་སྤྱོ་བར་ཡང་མི་ [68b.5]སྤོབས་པ་དེ་ལྟར་བྱིན་གྱི་རླབས་ཀྱིས་བྱིན་གྱིས་བརླབ་པར་ཡང་སྤྱོད་མོད་ཀྱི། འོན་ཀྱང་འཁོར་དེར་ལྷ་དང་། མི་མང་པོ་འདུས་པར་གྱུར་པ་དེ་དག་གིས་དེ་བཞིན་གཤེགས་པའི་མ་ཞུམ་པ་དང་། མ་ཁེངས་པ་དང་། ཐུགས་མཉམ་པ་དང་། ཕན་པའི་ [68b.6]དངོས་པོ་དང་། མཉེན་པ་དང་། ངེས་པ་དང་། སྔོན་ཇི་ལྟ་བར་ཕྱིས་ཀྱང་དེ་བཞིན་བས། བཟོད་པའི་སྟོབས་བསྐྱེད་པ་མཐོང་ནས་སྲོག་ཆགས་བཞི་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏེ། དེ་ [68b.7]བཞིན་གཤེགས་པས་དོན་གྱི་དབང་དེ་གཟིགས་པས་ན། བྲམ་ཟེ་བྷ་ར་དྭ་ཛས་སྤྱོས་པ་བཏང་སྙོམས་སུ་བཞག་གོ །དེས་ཀྱང་སྤྱོ་བར་བྱེད་པ་བྲམ་ཟེ་བྷ་ར་དྭ་ཛ་དེ་བཞིན་གཤེགས་པ་ལ་སེམས་དད་པར་གྱུར་ནས། སངས་རྒྱས་ལ་སྐྱབས་སུ་སོང་ཞིང་ [69a] [69a.1]ཡོངས་སུ་མྱ་ངན་ལས་འདའ་བའི་བར་གྱི་ས་བོན་བསྐྱེད་པར་གྱུར་ཏེ། དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་ནོ། །རིགས་ཀྱི་བུ་གང་གི་ཕྱིར་བྱང་ཆུབ་སེམས་དཔའི་སྐྱེ་བ་ཐམས་ཅད་དང་། སྲིད་པ་ཐམས་ཅད་དུ་ལྷས་བྱིན་ [69a.2]ཡང་དང་ཡང་དུ་རྗེས་སུ་འབྲང་བར་གྱུར་པ་དེ་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་ནོ། །དེ་ཅིའི་ཕྱིར་ཞེ་ན། ལྷས་བྱིན་ལ་བརྟེན་ནས་ང་ཕ་རོལ་ཏུ་ཕྱིན་པ་དྲུག་པོ་དག་ཡོངས་སུ་རྫོགས་ཤིང་སེམས་ཅན་དཔག་ཏུ་མེད་པ་རྣམས་ཀྱི་དོན་ཀྱང་བྱས་པའི་ཕྱིར་རོ། [69a.3]རྣམ་གྲངས་གང་གིས་ཤེ་ན། རིགས་ཀྱི་བུ་འདི་ལ་གང་གི་ཚེ་སེམས་ཅན་རྣམས་བདེ་བ་དང་ལྡན་པར་གྱུར་ཅིང་། གང་གི་ཚེ་སྦྱིན་པ་དེ་ཡང་མི་ཤེས། ལེན་པ་པོ་ཡང་མི་ཤེས་པ་དེའི་ཚེ་ན། ལྷས་བྱིན་བྱང་ཆུབ་སེམས་དཔའི་དྲུང་དུ་འོངས་ཏེ། བུ་དག་ཀྱང་སློང་ [69a.4]བར་བྱེད། ཆུང་མ་དག་ཀྱང་སློང་བར་བྱེད། རྒྱལ་སྲིད་དག་ཀྱང་སློང་བར་བྱེད། ལག་པ་དང་། རྐང་པ་དག་དང་། མིག་དང་། མགོ་ཡང་སློང་བར་བྱེད་ཅིང་དེ་དག་ལ་སོགས་པ་དགའ་བ་དང་། སེམས་ཅན་རྣམས་ལ་བདེ་བ་སྐྱེད་པར་བྱེད་པ་གཞན་གང་ [69a.5]ཡང་རུང་བ་དག་ཀྱང་སློང་བར་བྱེད་དོ། །བྱང་ཆུབ་སེམས་དཔའ་ཞུམ་པ་མེད་པར་དེ་དག་སྦྱིན་པར་བྱེད་པ་དེ་སེམས་ཅན་དཔག་ཏུ་མེད་པ་དག་གིས་མཐོང་ནས་དགའ་བ་དང་། དད་པ་དང་། མཆོག་ཏུ་དགའ་བ་སྐྱེས་ཏེ། སྤྲོ་བ་བསྐྱེད་ནས་འདི་ཇི་ལྟ་བ་བཞིན་དུ་ [69a.6]བདག་ཅག་ཀྱང་དེ་བཞིན་དུ་གྱུར་ཅིག་ཅེས་དེ་དག་སྦྱིན་པ་ལ་མོས་ཤིང་། བྱང་ཆུབ་ཏུ་སྨོན་ལམ་འདེབས་པར་ཡང་བྱེད་དོ། །གཞན་ཡང་ལྷས་བྱིན་དང་། སེམས་ཅན་དཔག་ཏུ་མེད་པ་གང་དག་ཚུལ་ཁྲིམས་འདྲལ་བར་འདོད་པ་དེ་དག་གིས་བྱང་ཆུབ་སེམས་དཔའ་ [69a.7]ཚུལ་ཁྲིམས་མི་འདྲལ་བ་མཐོང་ནས་དེ་དག་ཀྱང་ཚུལ་ཁྲིམས་ཡང་དག་པར་ལེན་པར་བྱེད་པ་དང་། སེམས་ཅན་དེ་དག་བྱང་ཆུབ་སེམས་དཔའི་རྗེས་སུ་སློབ་པ་ན་བཟོད་པ་ཕུན་སུམ་ཚོགས་པ་དེ་མཐོང་ནས། དེ་དག་ལ་སྤྱོས་སམ། བརྒྱད་བཀག་གམ། བརྡེགས་ [69b] [69b.1]ན་ཡང་འཁྲུགས་པར་མི་འགྱུར་ཞིང་བཟོད་པ་ཡོངས་སུ་རྫོགས་པར་གྱུར་ཏེ། རྣམ་གྲངས་དེས་ཀྱང་སེམས་ཅན་རྣམས་ཀྱི་དོན་བྱས་པ་ཡིན་ནོ། །གང་གི་ཚེ་ལྷས་བྱིན་གྱིས་དེ་བཞིན་གཤེགས་པ་དགྲོངས་པའི་ཕྱིར། གཤེད་མ་པའི་མི་དག་རྦད་པ་དང་། དེ་ [69b.2]བཞིན་གཤེགས་པ་བཀྲོངས་པའི་ཕྱིར་གླང་པོ་ཆེ་གདུག་པ་ནོར་སྐྱོང་རྦད་པ་དང་། དེ་བཞིན་གཤེགས་པ་དགྲོངས་པའི་ཕྱིར། དེ་བཞིན་གཤེགས་པ་ལ་རྡོ་འཕངས་པ་གང་ཡིན་པ་དེ་ཡང་དེ་བཞིན་གཤེགས་པའི་ཐབས་ལ་མཁས་པ་ཡིན་པར་བལྟ་བར་བྱའི། ལས་ [69b.3]ཀྱི་སྒྲིབ་པའི་ཉེས་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཐབས་ལ་མཁས་པ་དེ་ལ་བརྟེན་ནས་སེམས་ཅན་དཔག་ཏུ་མེད་པ་དག་གི་དོན་མཛད་པའི་ཕྱིར་ཏེ། རིགས་ཀྱི་བུ་མདོར་ན་ལྷས་བྱིན་དེ་ནི་ངའི་སྟོན་པ་ཕན་པར་འདོད་པ་ཡིན་ནོ། །ལས་ཀྱི་རྒྱུད་བཅུ་པོ་ [69b.4]ཐམས་ཅད་ཀྱང་དེ་བཞིན་གཤེགས་པའི་ཐབས་ལ་མཁས་པ་ཡིན་པར་བལྟ་བར་བྱའི། ལས་ཀྱི་སྒྲིབ་པའི་ཉེས་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་ལས་ཀྱི་བྱ་བ་དང་། རྣམ་པར་སྨིན་པ་ཆུད་གཟོན་པ་རྣམས་ལས་ཀྱི་བྱ་བ་དང་། རྣམ་པར་ [69b.5]སྨིན་པ་ལ་འཇུག་པར་བྱ་བའི་ཕྱིར། དེ་བཞིན་གཤེགས་པས་ཐབས་ལ་མཁས་པས་སེམས་ཅན་རྣམས་ལ་ལས་ཆེ་གེ་མོ་ཞིག་གི་རྣམ་པར་སྨིན་པ་ནི་འདི་ཡིན་ནོ། །ལས་ཆེ་གེ་མོ་ཞིག་གི་རྣམ་པར་སྨིན་པ་ནི་འདི་ཡིན་ནོ། །ཞེས་ལས་ཀྱི་རྒྱུད་ཀུན་ཏུ་བསྟན་ཏེ། [69b.6]དེ་ཐོས་ནས་སེམས་ཅན་རྣམས་མི་དགེ་བའི་ལས་ཀྱི་སྒྲིབ་པ་དང་། དགེ་བའི་ལས་ཀྱི་སྒྲིབ་པ་དང་། དགེ་བའི་ལས་མངོན་པར་འདུ་བྱ་བ་ལ་མི་གཡེལ་བར་སྤྱོད་པར་འགྱུར་བའི་ཕྱིར་རོ། །རིགས་ཀྱི་བུ་ཐབས་ལ་མཁས་པ་བསྟན་པ་བཤད་པ་འདི་ནི་གསང་བར་བྱ་བ་ [69b.7]ཡིན་ཏེ། སེམས་ཅན་དམན་པ་དགེ་བའི་རྩ་བ་ཆུང་ངུ་རྣམས་ཀྱི་མདུན་དུ་བརྗོད་པར་མི་བྱ། བསྟན་པར་མི་བྱ། བཤད་པར་མི་བྱ། བཀླག་པར་མི་བྱའོ། །དེ་ཅིའི་ཕྱིར་ཞེ་ན། བསྟན་པ་འདི་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཡང་མ་ཡིན་ [70a] [70a.1]ན་བྱིས་པ་སོ་སོའི་སྐྱེ་བོ་དམན་པ་ལ་མོས་པ་རྣམས་ཀྱི་ལྟ་སྨོས་ཀྱང་ཅི་དགོས་པའི་ཕྱིར་རོ། །དེ་ཅིའི་ཕྱིར་ཞེ་ན། དེ་དག་ནི་ཐབས་ལ་མཁས་པ་འདི་ལ་མ་བསླབས་པའི་ཕྱིར་རོ། །དེ་ཅིའི་ཕྱིར་ཞེ་ན། དེ་དག་ལ་འདིས་དོན་དུ་འགྱུར་བ་མེད་དེ། ཐབས་ [70a.2]ལ་མཁས་པ་བསྟན་པ་འདིའི་སྣོད་དུ་འགྱུར་བ་དང་། གང་དག་གིས་བསྟན་པ་འདི་ལ་བསླབ་པར་བྱ་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་གཞན་འགའ་ཡང་མེད་པའི་ཕྱིར་རོ། །རིགས་ཀྱི་བུ་འདི་ལྟ་སྟེ་དཔེར་ན་མཚན་མོ་མུན་པ་མུན་གནག་གི་ [70a.3]ནང་དུ་འབྲུ་མར་གྱི་མར་མེ་བྱུང་ན་ཁྱིམ་གྱི་སྣོད་ཐམས་ཅད་སྣང་བར་འགྱུར་བ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔས་ཀྱང་ཐབས་ལ་མཁས་པ་བསྟན་པ་འདི་ཐོས་ན་སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ལ་འཇུག་པར་མཐོང་ཞིང་། བདག་གིས་ཀྱང་འདི་ལ་ [70a.4]བསླབ་པར་བྱས་ན་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། སངས་རྒྱས་ཀྱི་སྤྱོད་པ་ཐམས་ཅད་ལ་འཇུག་ཅིང་འགྲོ་བར་འགྱུར་ཏེ། དེ་ནི་ལེགས་པར་ཡང་དག་པར་བརྩོན་པས་སླའོ་སྙམ་དུ་སེམས་པ་དང་། དེ་ཐབས་ལ་མཁས་པ་དེ་དག་ལ་ལེགས་པར་ [70a.5]བསླབས་པ་དང་། སེམས་ཅན་རྣམས་སྨིན་པར་མི་བྱེད་པ་དེ་ལྟ་བུའི་མིང་དུ་ཡང་འགྱུར་རོ། །རིགས་ཀྱི་བུ་ཁྱོད་མོས་པར་བྱ། ཁྱོད་ཀྱི་ཁོང་དུ་ཆུད་པར་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་དོན་དུ་གཉེར་བས་ནི་གང་ནས་ཐབས་ལ་མཁས་པའི་ཕ་རོལ་ཏུ་ཕྱིན་ [70a.6]པ་བསྟན་པ་འདི་རྣ་ལམ་དུ་གྲག་པར་འགྱུར་བའི་དཔག་ཚད་འབུམ་དུ་ཡང་འགྲོ་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔས་ཐབས་ལ་མཁས་པ་བསྟན་པ་འདི་ཐོས་ན་སྣང་བ་ཐོབ་པར་འགྱུར་ཞིང་ཐེ་ཚོམ་དང་བྲལ་བ་དང་། ནེམ་ནུར་དང་བྲལ་བར་འགྱུར་བའི་ཕྱིར་ [70a.7]རོ། །དེ་ནས་ལྷ་དང་བཅས་པའི་འཇིག་རྟེན་དང་། འཁོར་བཞི་པོ་གང་དག་ཆོས་ཀྱི་རྣམ་གྲངས་འདིའི་སྣོད་དུ་གྱུར་པ་འཁོར་དེར་འདུས་པར་གྱུར་པ་དེ་དག་གིས་ནི་བཅོམ་ལྡན་འདས་ཀྱིས་གསུངས་པའི་ཆོས་ཀྱི་རྣམ་གྲངས་འདི་ཐོས་པར་གྱུར་ཏོ། །གང་དག་སྣོད་དུ་མ་གྱུར་ཅིང་མི་ཤེས་ [70b] [70b.1]པ་འཁོར་དེར་འདུས་པར་གྱུར་པ་དེ་དག་ལ་ནི་ཆོས་ཀྱི་རྣམ་གྲངས་འདི་རྣ་ལམ་དུ་གྲག་པར་ཡང་མ་གྱུར་ཏོ། །ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་བདུན་ཁྲི་ཉིས་སྟོང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་བཅོམ་ལྡན་ [70b.2]འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་ [70b.3]རྣམ་གྲངས་འདི་ནི་ཐབས་ལ་མཁས་པའི་ཕ་རོལ་ཏུ་ཕྱིན་པ་བསྟན་པ་ཞེས་བྱ་བར་ཟུང་ཤིག །ཐབས་ལ་མཁས་པའི་ལེའུ་ཞེས་བྱ་བར་ཡང་ཟུང་ཤིག །ཐབས་ལ་མཁས་པ་བསྟན་པ་ཞེས་བྱ་བར་ཡང་ཟུང་ཤིག །སངས་རྒྱས་ཐམས་ཅད་ཀྱི་གསང་ཆེན་ [70b.4]ཐབས་ལ་མཁས་པའི་ལེའུ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དམ་པ་དང་། ཉན་ཐོས་ཀྱི་ཐེག་པ་པ་དང་། རང་སངས་ [70b.5]རྒྱས་ཀྱི་ཐེག་པ་པ་དང་། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་དགེ་བསྙེན་དང་། དགེ་བསྙེན་མ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་ [70b.6]པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། སངས་རྒྱས་ཐམས་ཅད་ཀྱི་གསང་ཆེན་ཐབས་ལ་མཁས་པ་བྱང་ཆུབ་སེམས་དཔའ་ཡེ་ཤེས་དམ་པས་ཞུས་པ་ཞེས་ [70b.7]བྱ་བའི་ལེའུ་སྟེ་སུམ་ཅུ་རྩ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་དཱ་ན་ཤཱི་ལ་དང་ཀརྨ་ཝརྨ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། ཤོ་ལོ་ཀ་སྟོང་ཉིས་བརྒྱ་སུམ་ཅུ་མཆིས།། །། [71a] [71a.1]{D83}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་སུམ་ཅུ་རྩ་དགུ་པ་སྟེ་ཚོང་དཔོན་བཟང་སྐྱོང་གིས་ཞུས་པ། བམ་པོ་དང་པོ། རྒྱ་གར་སྐད་དུ། ཨཱརྱ་བྷ་དྲ་པཱ་ལ་ཤྲེཥྛཱི་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སུ་ཏྲ། [71a.2]བོད་སྐད་དུ། འཕགས་པ་ཚོང་དཔོན་བཟང་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་པ་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ [71a.3]ལན་ད་ཀ་གནས་པ་ན། ཤཱ་རིའི་བུ་ལ་སོགས་པ་བྱ་བ་བྱས་པ། བྱེད་པ་བྱས་པ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །དེའི་ཚེ་དགེ་སློང་དེ་དག་བཅོམ་ལྡན་འདས་ཀྱི་ཐད་ན་ལུས་སྙོམ་པ་དང་། གཉིད་ཀྱི་གནས་པས་ལུས་ཉོན་མོངས་ [71a.4]པ་མེད་ཅིང་ལུས་སྙོམ་པ་མེད་པར་གནས་སོ། །ཡང་དེའི་ཚེ་བཅོམ་ལྡན་འདས་ཀྱི་ཞལ་གྱི་མདངས་མེ་ཏོག་པད་མའི་ཚལ་རྒྱས་པ་ལྟ་བུར་སྣང་བར་གྱུར་ཏོ། །དེ་ནས་དགེ་སློང་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱི་ཞལ་གྱི་མདངས་པད་མའི་ཚལ་རྒྱས་པ་ལྟ་བུར་སྣང་བར་ [71a.5]གྱུར་པ་ལས་ན། བཅོམ་ལྡན་འདས་འདི་ཆོས་ཀྱི་ཚུལ་ཇི་ལྟ་བུ་ཞིག་སྟོན་པར་དགོངས་ཤིག་གུ་སྙམ་མོ། །དེ་ནས་དེའི་ཚེ་ཚོང་དཔོན་བཟང་སྐྱོང་ཞེས་བྱ་བ་འཁོར་ཚོང་པ་དྲུག་ཁྲི་དང་བཅོམ་ལྡན་འདས་ཀྱི་ཐད་དུ་དོང་ངོ་། །དེ་ནས་བཟང་སྐྱོང་ཤིན་ཏུ་གཞོན་ཤ་ཅན་ལ་ལུས་ཀྱི་མདོག་ [71a.6]བཟང་ཞིང་བཞིན་རྒྱས་པ་དང་ལྡན་པ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཏིང་ངེ་འཛིན་དུ་ཞུགས་པ། རབ་ཏུ་ཞི་བ་དང་དུལ་བའི་ཡོན་ཏན་གྱི་གཏེར་དུ་གྱུར་པ། གསེར་གྱི་ཤིང་ལྗོན་པ་ལྟར་གཟི་བརྗིད་འབར་བ་མཐོང་ངོ་། །དེ་ནས་བཟང་སྐྱོང་དད་པ་ [71a.7]སྐྱེས་ཏེ་མཉམ་པར་བཞག་པའི་ཡིད་ཀྱིས་འདི་སྙམ་དུ་སེམས་ཏེ། ཀྱེ་མ་ཐམས་ཅད་མཁྱེན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་འཇིག་རྟེན་དུ་སྙན་པ་དག་གྲགས་པ་འདི་ནི་མི་{བརྫུན་,རྫུན་}ནོ་སྙམ་མོ། །དེ་ནས་བཟང་སྐྱོང་གིས་བཅོམ་ལྡན་འདས་ཀྱི་ [71b] [71b.1]ཞབས་ལ་གཏུགས་ནས་དེ་བཞིན་གཤེགས་པའི་ཞལ་དུ་ལྟ་བ་གཏད་དེ་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བཟང་སྐྱོང་ལ་གཟིགས་ནས་སྐུ་ལས་འོད་ཕྱུང་ངོ་། །འོད་ཟེར་དེས་ཀྱང་ཚོང་དཔོན་བཟང་སྐྱོང་མི་འཇིགས་པ་སྐྱེས་ནས་བཅོམ་ལྡན་འདས་ལ་ལན་གསུམ་བསྐོར་ [71b.2]བ་བྱས་ཏེ། ཡང་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བར་མཛད་དུ་གསོལ། བདག་ནི་བཅོམ་ལྡན་འདས་ལ་ད་གདོད་དད་པ་ཐོབ་པ་ལགས་སོ། །བཅོམ་ལྡན་འདས་དེ་ལྟ་ལགས་ [71b.3]པས་ཕྱོགས་འགའ་ལ་རེ་བ། ཆོས་འཚལ་བ། འཁོར་བའི་གནོད་པ་རྣམས་ཀྱིས་ཡོངས་སུ་ཉོན་མོངས་པ། རྣམ་པར་རྟོག་པའི་ཤས་ཆེ་བ་ངོ་མཚར་དུ་གྱུར་པ་ཅན་བདག་ལ་བཤད་དུ་གསོལ། བཅོམ་ལྡན་འདས་བདག་ནི་ཐེ་ཚོམ་ཅན་ལགས། བདེ་བར་གཤེགས་པ་བདག་ནི་ [71b.4]སོམ་ཉི་ཅན་ལགས་ན། གང་གིས་བདག་རྨོངས་པར་གྱུར་ཅིང་འཁོར་བ་ལས་ངེས་པར་འབྱུང་བ་མ་འཚལ་ཏོ། །བཅོམ་ལྡན་འདས་ནི་ཐམས་ཅད་མཁྱེན་པ་ལགས་ཏེ། བདེ་བའི་ཡོ་བྱད་ཐམས་ཅད་འགྲུབ་པར་མཛད་པས་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་འཇིག་རྟེན་དུ་དེའུ་མ་བྱུང་ [71b.5]སྟེ་བྱུང་ངོ་། །བཅོམ་ལྡན་འདས་ནི་སེམས་ཅན་ཐམས་ཅད་ལ་མཉེས་གཤིན་པས་ན་ཕ་མ་ལྟ་བུ་ཡང་ལགས་སོ། །དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ཚོང་དཔོན་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་དེའི་ཕྱིར་ཅི་འདོད་པ་དྲིས་ཤིག་དང་། ངས་དྲིས་ [71b.6]པ་དེ་དང་དེའི་ལུང་བསྟན་པས་སེམས་རངས་པར་བྱའོ། །དེ་ནས་བཟང་སྐྱོང་ཞུ་བར་འདོད་པས་ཕྱོགས་གཅིག་ཏུ་འདུག་གོ །ཚོང་དཔོན་བཟང་སྐྱོང་གཟི་བརྗིད་འབར་ཞིང་གཟུགས་བཟང་པོ་ཕུན་སུམ་ཚོགས་པ་ཕྱོགས་གཅིག་ཏུ་འདུག་པ་ཚེ་དང་ལྡན་པ་ཀུན་དགའ་བོས་མཐོང་ནས་བཅོམ་ལྡན་ [71b.7]འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཟང་སྐྱོང་འདིའི་མདོག་བཟང་ཞིང་རྒྱས་པས་རྒྱལ་པོའི་དཔལ་ཡང་ཟིལ་གྱིས་ནོན་ཏེ་ལྷག་པར་མཛེས་པ་ནི་ངོ་མཚར་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ [72a] [72a.1]བཟང་སྐྱོང་འདིའི་བདེ་བའི་ཡོ་བྱད་གང་ཡིན་པ་དང་། དགའ་ཞིང་རྩེ་ལ་དགའ་མགུར་སྤྱོད་པ་གང་ཡིན་པ་དེ་ནི་ཚོང་དཔོན་གཞོན་ནུ་ཟླ་བ་འབྱོར་པ་མ་གཏོགས་པར་ལྷ་རྣམས་ཀྱི་དབང་པོ་བརྒྱ་བྱིན་ལ་ཡང་མེད་དོ། །འཛམ་བུའི་གླིང་འདི་ན་ཁྱད་པར་དུ་འཕགས་པ་ [72a.2]རྣམས་ལ་ཡང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚོང་དཔོན་བཟང་སྐྱོང་འདིའི་ནོར་དུ་གྱུར་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཚོང་དཔོན་ [72a.3]དགེ་བའི་རྩ་བ་བྱས་པ་འདིའི་འབྱོར་པ་དང་ལོངས་སྤྱོད་རྒྱས་པ་ཉོན་ཅིག །ཀུན་དགའ་བོ་ནོར་དང་གསེར་ཕུན་སུམ་ཚོགས་པའི་ཚོང་པ་དྲུག་ཁྲི་འདིའི་ཕྱི་བཞིན་འབྲང་ངོ་། །མལ་ཁྲི་ཚོན་སྣ་ཚོགས་སྤེལ་བས་མཛེས་པར་བྱས་པ། སྨིག་ཐགས་ཅན་ལ་སྟན་ནང་ཚངས་ཅན་གཏིང་ [72a.4]བ། གཡས་གཡོན་དུ་སྔས་དམར་པོ་བཞག་པ་དྲུག་ཁྲི་དང་། བུད་མེད་བགོ་བ་དར་དང་། དུ་ཀུ་ལའི་རས་དང་། མེན་ཏྲི་དང་། མོན་དར་དང་། མེས་སྦྱངས་པའི་གོས་དང་། ལ་ཚིག་གུའི་སྟོད་ཀོར་དང་། དམར་པོ་དང་། རྣམ་པ་སྣ་ཚོགས་ཀྱི་སྣམ་ཕྲན་གྱི་གོས་གྱོན་པ། འོད་ཆགས་པའི་ [72a.5]རྒྱན་གྱིས་བརྒྱན་པ། ལག་མཐིལ་རེག་ན་སྙི་ཞིང་ཤིན་ཏུ་འཇམ་པ་རྣམ་པ་སྣ་ཚོགས་སུ་གྱུར་པ་དགོད་ཅིང་དགའ་བ་དང་། ཚིག་འཆོས་ཤིང་སྒེག་ལ་སྙན་པའི་གཏམ་བརྗོད་པས་བསྐྱེད་པའི་དགའ་བ་དང་མཆོག་ཏུ་དགའ་བས་རྒོད་པར་བྱེད་པ། ཁྱིམ་ཐབ་ལ་བསྙེན་བཀུར་བྱེད་པའི་ཚུལ་གྱིས་ [72a.6]ལུས་ལ་སྟོད་པར་བྱེད་པ། སྐྱེས་པ་གཞན་ལ་འདོད་པའི་རྒྱུད་སྤངས་པ་མཛེས་པས་འདུད་ཅིང་བླ་གོས་བཟང་པོ་བགོས་པ། གཅིག་ལ་གཅིག་ཕྲག་དོག་གིས་འཐབ་པ་དང་། འཚེ་བས་བཞིན་ཁྲོ་གཉེར་གཙིགས་ཤིང་འཁུ་བར་འགྱུར་བ་མེད་པ། རྐང་ལག་དང་སོར་མོ་ཤིན་ཏུ་ [72a.7]འཇམ་པ། རྐང་ལག་གི་ཚིགས་ཀྱི་བར་མཚམས་མི་མངོན་པ། རྐང་ལག་རྒྱས་པ། སྐྲ་མཉམ་ཞིང་བཅོས་ལ་གཡས་སུ་འཁྱིལ་ཞིང་མཛེས་པ། སྙིང་ཆགས་པ་དང་ལྡན་ཞིང་ཤིན་ཏུ་སྙིང་ཉེ་བ། སྙན་པར་གྲགས་པའི་རིགས་དང་རུས་ལས་བྱུང་བས་གྲགས་པ་དང་ལེགས་པ་ [72b] [72b.1]བསྐྱེད་པ། ལུས་ཤིན་ཏུ་འཇམ་པ། རིགས་མཐོ་བའི་བུད་མེད་རྩེ་བར་འོས་པའི་ཁང་པ་དང་། མལ་ཆ་རྒྱས་པ་དང་ལྡན་པ་དྲུག་ཁྲི་དང་། བཙོ་ཟངས་དྲུག་ཁྲི་གང་བའི་འབྲས་ཅན་བཟང་པོ་ཚོད་མ་ཤིན་ཏུ་དྲི་ཞིམ་པོས་སྣ་ཐ་དད་པར་ཕྱེ་བ། སཱ་ལུ་བཟང་པོའི་ཆན་དང་། ཆུ་ཡན་ [72b.2]ལག་བརྒྱད་དང་ལྡན་པ་ལྟ་བུའི་ཁ་ཟས་རྣམ་པ་སྣ་ཚོགས་དྲི་ཞིམ་ཞིང་ཡིད་དུ་འོང་ལ་དགའ་བ་སྐྱེད་པར་བྱེད་པ། ཉོན་མ་མོངས་པར་གྲུབ་ཅིང་བསོད་ནམས་ཀྱིས་བྱུང་ལ་དྲི་ང་ཞིང་མི་གཙང་བ་དང་། ལུས་ཀྱི་སྐྱོན་དུ་འགྱུར་བ་མེད་པ་དག་དང་། ཁང་པ་བརྩེགས་པ་ནོར་བུ་དང་། མུ་ཏིག་ [72b.3]དང་། བཻདཱུརྱ་དང་། རིན་པོ་ཆེ་སྣ་ཚོགས་ཀྱིས་སྤྲས་པ་རྣམ་པར་ཕྱེ་ལ་སྡུག་ཅིང་མཛེས་པར་བྱས་པ་དང་། རས་སྤྱངས་ཤིང་རླུང་གིས་བསྐྱོད་པའི་བུན་ལོང་དང་། མེ་ཏོག་སིལ་མས་གཏོར་བ་དང་། བསིལ་བའི་ཆུས་རེག་ན་བདེ་བས་ཁྱབ་པས་བསིལ་བར་གྱུར་པ། འཁར་རྔ་ [72b.4]དང་། པི་བང་རྒྱུད་གཅིག་པ་དང་། པི་བང་དང་། གླིང་བུ་དང་། རྫ་རྔ་ཆེན་པོ་ལས་བྱུང་བའི་སྒྲ་སྙན་པའི་དར་དིར་དང་། ཕུག་རོན་གྱི་སྐད་ཡིད་དུ་འོང་ཞིང་ཆགས་སུ་རུང་བས་མཛེས་པར་བྱས་པ། མེ་ཏོག་གི་འཁྲི་ཤིང་གིས་རྩེ་མོ་འཁྲིས་པ་ལ་སྦྲང་བུ་སྒྲ་སྙན་པ་འབྱིན་པ། [72b.5]ལྷའི་གནས་དང་། རི་རབ་ཀྱི་ཕྲག་གི་བར་ལྟ་བུར་རླུང་སྐྱབས་དང་ལྡན་པའི་མར་མེ་འབར་བའི་གཟི་བརྗིད་དང་། སྨན་གྱི་སྒྲོན་མ་དངར་བ་དྲུག་ཁྲི་དང་། གྲོང་ཁྱེར་བཞི་མདོ་དང་། སུམ་མདོ་དང་། བ་གམ་དང་། སྲང་སྡུག་གུས་མཛེས་པར་བྱས་པ། ཡུལ་སྣ་ཚོགས་ཀྱི་སྐད་ [72b.6]དང་། སྤྱོད་པ་དང་། ཟོང་དང་། ཚོང་ཁང་སྣ་ཚོགས་སྤེལ་བས་མཛེས་པར་བྱས་པ། ཚོང་པའི་ཚོགས་སྟོང་དག་གིས་ལང་ལོང་དུ་གྱུར་པ། ནགས་དང་ཤིང་ལྗོན་པ་སྣ་ཚོགས་བརྒྱ་སྟོང་དག་གིས་འཁྲིགས་པ། ཀུ་མུ་དའི་མེ་ཏོག་རྒྱས་པ་དྲི་མ་མེད་པ་སྤེལ་བས་མཛེས་པར་བྱས་པ། [72b.7]རྟ་དང་། གླང་པོ་ཆེ་དང་། ཤིང་རྟའི་མཆོག་གིས་བུན་ལོང་དུ་གྱུར་པ་དྲུག་ཁྲི་ཡོད་དོ། །ཀུན་དགའ་བོ་གྲོང་ཁྱེར་དེ་དག་གི་ནང་ན་ཚོང་དཔོན་དང་། ཚོང་པ་དང་། ཡུལ་གྱི་མི་དང་། དེད་དཔོན་འཁོད་པ་རྣམས་ཀྱང་ཚོང་དཔོན་གཞོན་ནུ་བཟང་སྐྱོང་དེའི་བསྔགས་པ་རྗོད་ཅིང་སྙན་པ་སྨྲ་བར་བྱེད་ [73a] [73a.1]དེ། ཉིན་གཅིག་བཞིན་དུ་ཐལ་མོ་སྦྱར་ནས་འདུད་པར་བྱེད་དོ། །ཡུལ་ཀོ་ས་ལའི་རྒྱལ་པོ་གསལ་རྒྱལ་ཡང་དེའི་དབང་ཕྱུག་དང་། འབྱོར་པ་དང་། ལོངས་སྤྱོད་རྒྱས་པ་མཐོང་ན་བདག་ཉིད་ལ་མི་དབུལ་པོ་ལྟ་བུར་འཛིན་ཏོ། །ཀུན་དགའ་བོ་ཚོང་དཔོན་གཞོན་ནུ་ཟླ་བ་ [73a.2]འབྱོར་པ་འདི་ནི་བཙོ་ཟངས་འབུམ་གྱི་གཡོས་བྱེད་པ་དང་ལྡན་པའི་འཁོར་གྱིས་བསྐོར་ཏེ། ཀུན་དགའ་བོ་དེའི་བསྙེན་བཀུར་བྱེད་པ་ཡང་བུད་མེད་ལྔ་སྟོང་ཡོད་དོ། །ཀུན་དགའ་བོ་ཟླ་བ་འབྱོར་པ་དེ་ལ་ནི་ལྷ་རྣམས་ཀྱི་དབང་པོ་བརྒྱ་བྱིན་གྱི་བདེ་བའི་ཡོ་བྱད་ཀྱིས་ཀྱང་ཆ་ཙམ་དུ་ཡང་མི་ཕོད་དོ། ། [73a.3]ཀུན་དགའ་བོ་ཚོང་དཔོན་གཞོན་ནུ་ཟླ་བ་འབྱོར་པ་དེ་ལ་ནི་ཚོང་དཔོན་བཟང་སྐྱོང་གི་གཟུགས་བཟང་བ་དང་། ཁ་དོག་རྒྱས་པ་དང་། དབང་ཕྱུག་དང་། བདེ་བའི་ཡོ་བྱད་ཀྱིས་བརྒྱའི་ཆར་ཡང་མི་ཕོད་དོ། །ཀུན་དགའ་བོ་འོན་ཀྱང་བཟང་སྐྱོང་ལ་ནི་ལྷའི་ཤིང་རྟ་ལྷའི་ནོར་བུ་རིན་པོ་ཆེ་འོད་འབར་ [73a.4]བ་ནམ་མཁའ་སྐར་མས་སྤྲས་པ་དང་འདྲ་བ། ལྷའི་གསེར་འཚེར་བས་ངོས་སྤྲད་པ། རྡོ་རྗེ་དང་། སྤུག་དང་། མེ་ཤེལ་སྣ་ཚོགས་ཀྱིས་མཛེས་པར་བྱས་པ་རླུང་གི་ཤུགས་ལྟར་མགྱོགས་ཤིང་ནམ་མཁའ་ལྡིང་གི་ཤུགས་ལྟར་འགྲོ་བ་དེ་ལ་ཞོན་ནས་རིན་པོ་ཆེའི་གླིང་དུ་ཡང་འགྲོ་ཞིང་བདེ་བ་ [73a.5]དང་ལྡན་ལ། རྩེད་མོ་ཉམས་སུ་མྱོང་ནས་ཕྱིར་འོང་བའི་ཤིང་རྟའི་མཆོག་ཡིད་འཕྲོག་པ་ཞེས་བྱ་བ་ཡོད་དོ། །དེ་ནས་ཀུན་དགའ་བོས་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚོང་དཔོན་གཞོན་ནུ་བཟང་སྐྱོང་ [73a.6]འདིས་དགེ་བའི་རྩ་བ་ཇི་ལྟ་བུ་ཞིག་བསགས་ལགས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་འདིར་དགེ་བའི་རྩ་བ་སངས་རྒྱས་ལ་བསྐྱེད་པ་དག་གི་རྣམ་པར་སྨིན་པ་ནི་དེ་ཡིན་ཏེ། ཀུན་དགའ་བོ་འདས་པའི་དུས་ན་འདིར་དེ་ [73a.7]བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་འོད་ཅེས་བྱ་བ་བྱུང་ངོ་། །ཀུན་དགའ་བོ་ཚོང་དཔོན་བཟང་སྐྱོང་དེ་ནི་དེའི་ཉན་ཐོས་གཙུག་ཕུད་བཟང་ཞེས་བྱ་བར་གྱུར་ཏེ། བསླབ་པའི་གཞི་མ་ཉམས་ཤིང་ཚུལ་ཁྲིམས་མ་འཆལ་བར་སྤྱོད་པ། ཆོས་ [73b] [73b.1]སྨྲ་བ། ཐོས་པའི་མཛོད་འཛིན་པ་དང་། འདུལ་བ་འཛིན་པར་གྱུར་ཏེ། དེས་ཉིན་གཅིག་བཞིན་དུ་སེམས་ཅན་རྣམས་ལ་སྐད་སྙན་ཅིང་ཡིད་དུ་འོང་བ་དང་། ཟབ་ཅིང་བརྟན་པ་དང་། གསང་མཐོ་ཞིང་ཟུར་ཕྱིན་པས་ཆོས་བསྟན་ཏོ། །གང་གིས་ཆོས་དེ་ཐོས་ཤིང་ཀུན་ཆུབ་པར་བྱས་པ་དེ་ [73b.2]ཡང་ཕྱིན་ཆད་ལོག་པར་ལྟུང་བར་འགྲོ་བར་མི་འགྱུར་རོ། །ཀུན་དགའ་བོ་ཆོས་ཀྱི་སྦྱིན་པ་དེས་བསྐལ་པ་དགུ་བཅུ་རྩ་གཅིག་གི་བར་དུ་ལྷ་དང་མི་རྣམས་མགུ་བར་བྱས་སོ། །ཀུན་དགའ་བོ་དེའི་ཤིང་རྟའི་གཞལ་མེད་ཁང་གང་ཡིན་པ་དེ་ཡང་བཤད་པར་བྱ་སྟེ། ཀུན་དགའ་བོ་འདིས་དགེ་སློང་ [73b.3]ཚངས་པར་སྤྱོད་ཅིང་ཚུལ་ཁྲིམས་དང་ལྡན་པ་ལུས་ཉམ་ཆུང་བ་ཞིག་ལ་དད་པའི་སེམས་ཀྱིས་བསོད་སྙོམས་བྱིན་ནས་ལྷམ་ཟུང་ཅིག་ཀྱང་བྱིན་ཏེ། དེའི་བསོད་ནམས་རྣམ་པར་སྨིན་པ་དེས་ན་ལྷའི་ཤིང་རྟའི་མཆོག་མངོན་པར་གྲུབ་པར་གྱུར་ཏོ། །ཀུན་དགའ་བོ་དེ་བཞིན་གཤེགས་པ་དགྲ་ [73b.4]བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཀྱང་འདི་སྐད་དུ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འབྱུང་བ་དེས་ཁྱོད་ལུང་སྟོན་པར་འགྱུར་རོ་ཞེས་གསུངས་སོ། །ཀུན་དགའ་བོ་ཚོང་དཔོན་བཟང་ [73b.5]སྐྱོང་འདི་ནི་ངས་འདུལ་བའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚོང་དཔོན་འདི་ནི་ནོར་དང་། གསེར་ཕུན་སུམ་ཚོགས་ལ་འདོད་པ་དང་ལྡན་པའི་ཡུལ་རྣམས་ཀྱིས་ཀྱང་དྲེགས་པར་མ་གྱུར་པ་ནི་ངོ་མཚར་ལགས་ [73b.6]སོ། །བཅོམ་ལྡན་འདས་ཀྱིས་བཀའ་སྩལ་པ། མཁས་པ་དག་ནི་འདོད་པའི་ལོངས་སྤྱོད་རྒྱས་པའི་ཁྱད་པར་དག་གིས་དྲེགས་པར་མི་འགྱུར་ཏེ། ཀུན་དགའ་བོ་ཚོང་དཔོན་འདི་ནི་དགེ་བའི་ཆོས་ཅན། དགེ་བའི་རྩ་བ་ཉམས་སུ་མྱོང་བ་ཡིན་ནོ། །དེ་ནས་བཅོམ་ལྡན་འདས་ཀྱིས་བསྐུལ་ [73b.7]ནས་ཚོང་དཔོན་གཞོན་ནུ་བཟང་སྐྱོང་གིས་བདག་ཉིད་ཀྱི་སྐབས་ཕྱེ་བར་རྟོགས་ནས་ཐལ་མོ་སྦྱར་ཏེ་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན་བཅོམ་ལྡན་འདས་སེམས་ཅན་ཐམས་ཅད་ལ་ [74a] [74a.1]སྨན་འདོགས་ཤིང་ཐུགས་བརྩེ་བ་ཅན་ལ་བདག་ཕྱོགས་འགའ་ཞིག་ཞུ་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེའི་ཕྱིར་ཁྱོད་ཀྱི་དྲི་བ་དང་འཐུན་པའི་དུས་ལ་བབ་ཀྱིས། བཟང་སྐྱོང་ཁྱོད་ཅི་དང་ཅི་འདོད་པ་དྲིས་ཤིག་དང་ངས་ཁྱོད་ལ་ [74a.2]བཤད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ན་སེམས་ཅན་རྣམས་རྣམ་པར་ཤེས་པ་མ་འཚལ་ཏེ། ཟ་མ་ཏོག་གི་ནང་གི་རིན་པོ་ཆེ་མི་རིག་པ་བཞིན་དུ་ཐམས་ཅད་ཀྱིས་རྣམ་པར་ཤེས་པ་མི་ [74a.3]རྟོགས་ན། བཅོམ་ལྡན་འདས་རྣམ་པར་ཤེས་པ་དེ་གང་ལགས། ཇི་ལྟར་ན་རྣམ་པར་ཤེས་པ་ཞེས་བགྱི། བཅོམ་ལྡན་འདས་ཇི་ལྟར་ན་མི་གུམ་པའི་རྐང་ལག་དང་མིག་ཉམས་ཤིང་འགུམ་པའི་དུས་ཀྱི་ཚེ་དབང་པོ་རྣམས་འགག་ཅིང་ཁམས་རྣམས་དང་མི་ལྡན་པར་གྱུར་པ་ན་རྣམ་པར་ཤེས་པ་ [74a.4]འདི་ལུས་ལས་ཇི་ལྟར་འཕོ་ཞིང་མཆི་གཟུགས་ནི་ཇི་ལྟ་བུ་ལགས། རང་བཞིན་ནི་ཇི་ལྟ་བུ་ལགས། ལུས་དང་ནི་ཇི་ལྟར་འབྲལ་བར་འགྱུར། རྣམ་པར་ཤེས་པ་འདིས་ལུས་ཡོངས་སུ་བཏང་ནས་ལུས་གཞན་ཇི་ལྟར་ལེན་པར་འགྱུར། ཇི་ལྟར་ན་ཁམས་རྣམས་ཡོངས་སུ་བཏང་ཞིང་སྐྱེ་ [74a.5]མཆེད་རྣམས་བོར་ནས་འདི་ནས་འཇིག་རྟེན་ཕ་རོལ་དུ་མཆི་བར་འགྱུར། ཇི་ལྟར་ན་ལུས་ཐ་དད་པ་དག་ལེན་པར་བགྱིད། བཅོམ་ལྡན་འདས་ཇི་ལྟར་ན་མི་གུམ་པའི་སྐྱེ་མཆེད་རྣམས་རྗེས་སུ་འབྲང་བར་འགྱུར། བཅོམ་ལྡན་འདས་འཇིག་རྟེན་འདིར་དགེ་བའི་རྩ་བ་བསགས་པ། འཇིག་ [74a.6]རྟེན་ཕ་རོལ་དུ་ཇི་ལྟར་མྱོང་བར་འགྱུར། ཇི་ལྟར་ན་ཕུང་པོ་འདི་དག་གིས་དགེ་བའི་རྩ་བ་བསགས་ལ་ཕྱིས་ཕུང་པོ་གཞན་དག་གིས་ཉམས་སུ་མྱོང་བར་འགྱུར། ཇི་ལྟར་ན་རྣམ་པར་ཤེས་པ་འདི་ལུས་ཀྱི་རྗེས་སུ་འབྲང་བར་འགྱུར། ཇི་ལྟར་ན་སྐྱེ་མཆེད་རྣམས་ལུས་ཀྱི་རྗེས་སུ་འབྲང་བར་འགྱུར། [74a.7]དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ལེགས་སོ་ལེགས་སོ། །དེ་དེ་བཞིན་ཏེ། ཁྱོད་ཀྱིས་ང་ལ་བསྐུལ་བ་བཞིན་ནོ། །བཟང་སྐྱོང་དེའི་ཕྱིར་རྣམ་པར་ཤེས་པའི་འོང་བ་དང་། འགྲོ་བ་དང་། འཕོ་བ་དང་། [74b] [74b.1]འགག་པ་ཉོན་ཅིག །བཟང་སྐྱོང་དཔེར་ན་རླུང་གི་ཁམས་གཟུགས་ཅན་མ་ཡིན་པ་ཡིན་ཡང་བསྟན་དུ་ཡོད་ཅིང་གཟུང་དུ་ཡོད་པ་དག་ལས་གཟུགས་སུ་སྣང་ངོ་། །དེ་ལ་བསྟན་དུ་ཡོད་པ་ནི་ཤིང་འགུལ་ཤིང་གཡོ་བ་དང་། སྒྲ་སྐད་འུར་འུར་པོའི་སྒྲ་འབྱིན་པ་དང་། གྲང་བ་དང་། དྲོ་བའི་རེག་པའི་ཚོར་བ་སྐྱེད་ [74b.2]པ་ཡིན་ཡང་དེ་ལ་རྐང་ལག་དང་མིག་དང་། གདོང་དམིགས་པར་མི་འགྱུར་ཏེ། སྔོ་བསངས་དང་དཀར་བ་ཞེས་ཁ་དོག་ལྷག་པར་མི་དམིགས་སོ། །བཟང་སྐྱོང་དེ་བཞིན་དུ་རྣམ་པར་ཤེས་པའི་ཁམས་འདི་ཡང་གཟུགས་སུ་དམིགས་ཤིང་གཟུགས་སུ་སྣང་བར་མི་འགྱུར་ཏེ། ཁྱོད་ཀྱིས་རྒྱུའི་བྱེ་བྲག་དག་ [74b.3]གིས་རྣམ་པར་ཤེས་པའི་ཁམས་རྟོགས་པར་བྱའོ། །དེ་ལ་རྒྱུ་གང་ཞེ་ན། སེམས་པ་དང་། ཚོར་བ་དང་། ཆོས་ཀྱི་ཁམས་སོ། །དེ་ལ་ཇི་ལྟར་ན་རྣམ་པར་ཤེས་པའི་ཁམས་འདི་ལུས་ཡོངས་སུ་བཏང་ནས་ཚོར་བ་དང་སེམས་པ་ལེན་ཅེ་ན། དཔེར་ན་རླུང་གི་ཁམས་ཀྱིས་མེ་ཏོག་གི་དྲི་བསྡུས་ [74b.4]ནས་འཕོས་ཏེ་འགྲོ་བ་དེ་ལས་ལྷའི་མེ་ཏོག་གི་དྲི་འདི་ངད་ལྡང་ངོ་ཞེས་ཤེས་མོད་ཀྱི། རླུང་གི་ཁམས་ཀྱང་མེ་ཏོག་གི་དྲི་མི་འཛིན་ལ་རླུང་གི་ཁམས་མེད་པར་ཡང་མེ་ཏོག་སྣ་ཚོགས་ཀྱི་དྲི་མི་དམིགས་སོ། །དྲི་དེ་ཡང་གཟུགས་ཅན་མ་ཡིན་ལ། རླུང་གི་ཁམས་དེ་ཡང་གཟུགས་ཅན་མ་ཡིན། [74b.5]སྣའི་དབང་པོ་དེ་ཡང་གཟུགས་ཅན་མ་ཡིན་ནོ། །བཟང་སྐྱོང་དེ་བཞིན་དུ་མི་ཤི་བའི་རྣམ་པར་ཤེས་པ་དེས་ཚོར་བ་ཡོངས་སུ་བླངས་ཤིང་སེམས་པ་ཀུན་ཏུ་བླངས་ཏེ་ཆོས་ཀྱི་ཁམས་ཡང་དག་པར་བླངས་ནས་འཇིག་རྟེན་ཕ་རོལ་དུ་འགྲོ་སྟེ། ཕ་མ་ཕྲད་པ་ལས་རྣམ་པར་ཤེས་པ་སྐྱེ་བར་འགྱུར་རོ། ། [74b.6]རྣམ་པར་ཤེས་པ་སྐྱེས་ན་ཚོར་བ་རྣམས་དང་། སེམས་པ་རྣམས་འདུ་བར་འགྱུར་ཏེ། དཔེར་ན་མེ་ཏོག་གི་དབང་གིས་སྣས་ཚོར་ལ། སྣའི་དབང་གིས་དྲི་དམིགས་པར་འགྱུར་བ་དང་། གཞན་ཡང་ལུས་ཀྱི་དབང་གིས་རླུང་གི་རང་བཞིན་གྱི་རེག་པ་དམིགས་པར་འགྱུར་ལ་རླུང་གི་དབང་གིས་མེ་ [74b.7]ཏོག་གི་དྲི་འབྱུང་བར་འགྱུར་བ་དེ་བཞིན་དུ་རྣམ་པར་ཤེས་པའི་དབང་གིས་ཚོར་བ་འབྱུང་བར་འགྱུར་ལ་ཚོར་བའི་དབང་གིས་སེམས་པ་འབྱུང་བར་འགྱུར་རོ། །སེམས་པའི་དབང་གིས་གང་གིས་དགེ་བ་འམ་མི་དགེ་བ་ཤེས་པའི་ཆོས་ཀྱི་ཁམས་འབྱུང་བར་འགྱུར་ཏེ། དཔེར་ན་རི་མོ་མཁན་རྩིག་པ་དང་ [75a] [75a.1]ཤིང་ལེབ་ཤིན་ཏུ་བྱི་དོར་བྱས་པ་ལ་ཅི་འདོད་པ་བཞིན་དུ་ལས་བྱེད་དེ། ལས་ལ་བློ་སྦྱངས་པས་ཅི་འདོད་པ་བཞིན་དུ་གཟུགས་རྣམས་མངོན་པར་འགྲུབ་པར་བྱེད་ཀྱང་དེའི་རྣམ་པར་ཤེས་པ་དེ་ཡང་གཟུགས་ཅན་མ་ཡིན་ལ། རྣམ་པར་ཤེས་པ་གཟུགས་ཅན་མ་ཡིན་པས་ [75a.2]ཀྱང་གཟུགས་སྣ་ཚོགས་མངོན་པར་འགྲུབ་པར་བྱེད་པ་དེ་བཞིན་དུ་རྣམ་པར་ཤེས་པའི་ཁམས་གཟུགས་ཅན་མ་ཡིན་པ་འདིས་གཟུགས་ཀྱི་ལུས་དྲུག་མངོན་པར་འགྲུབ་པར་བྱེད་དེ། འདི་ལྟ་སྟེ་མིག་གི་རྐྱེན་གྱིས་གཟུགས་མཐོང་ལ། རྣམ་པར་ཤེས་པ་མིག་ལ་རྟེན་པ་གང་ཡིན་པ་དེ་ཡང་ [75a.3]གཟུགས་ཅན་མ་ཡིན་ནོ། །རྣ་བའི་རྐྱེན་གྱིས་སྒྲ་སྟེ། དེ་ཡང་གཟུགས་ཅན་མ་ཡིན་ནོ། །སྣའི་རྐྱེན་གྱིས་དྲི་སྟེ། དེ་ཡང་གཟུགས་ཅན་མ་ཡིན་ནོ། །ལྕེའི་རྐྱེན་གྱིས་རོ་སྟེ། དེ་ཡང་གཟུགས་ཅན་མ་ཡིན་ནོ། །ལུས་ཀྱི་རྐྱེན་གྱིས་རེག་བྱ་སྟེ། དེ་ཡང་གཟུགས་ཅན་མ་ཡིན་ནོ། ། [75a.4]ཆོས་ཀྱི་སྐྱེ་མཆེད་ཀྱང་གཟུགས་ཅན་མ་ཡིན་ནོ། །རབ་ཏུ་ཤེས་པ་གང་ཡིན་པ་དེ་ཡང་གཟུགས་ཅན་མ་ཡིན་པ་སྟེ། དེ་བས་ན་སྤྱོད་ཡུལ་རྣམས་ཀྱང་གཟུགས་ཅན་མ་ཡིན་པར་བལྟ་བར་བྱའོ། །དེ་བཞིན་དུ་རྣམ་པར་ཤེས་པའི་ཁམས་འདི་ཡང་གཟུགས་ཅན་མ་ཡིན་པར་བལྟ་བར་བྱའོ། ། [75a.5]ཇི་ལྟར་ན་རྣམ་པར་ཤེས་པའི་ཁམས་འདིས་ལུས་ཡོངས་སུ་བཏང་ནས་འཇིག་རྟེན་ཕ་རོལ་དུ་འགྲོ་ཞེ་ན། བཟང་སྐྱོང་འདིར་འཆི་བའི་དུས་ཀྱི་ཚེ་ལས་ཟད་པས་ཚེ་འགག་པ་ན་ལས་ཀྱི་སྒྲིབ་པས་ཟིན་པའི་རྣམ་པར་ཤེས་པའི་ཁམས་འདི་འཕོ་བར་འགྱུར་ཏེ། དཔེར་ན་དགྲ་བཅོམ་པ་འགོག་ [75a.6]པའི་སྙོམས་པར་ཞུགས་པའི་རྣམ་པར་ཤེས་པའི་ཁམས་དེ་ཁོང་བར་འགགས་ནས་ཡོངས་སུ་མཁྱེན་པ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་སྐྱེ་བ་པོ་ཤི་བའི་ལུས་ཡོངས་སུ་བཏང་ཞིང་ཁམས་རྣམས་བོར་ནས་དྲན་པ་སྟོབས་དང་ལྡན་པར་འགྱུར་ཏེ། འདི་ལྟར་བདག་ནི་མཆོད་སྦྱིན་ [75a.7]གྱིས་བྱིན་ཞེས་བྱ་བ་དེ་ཉིད་ཡིན་ཏེ། ལུས་ཀྱི་ཚོར་བ་དང་། ཡིད་ཀྱི་ཚོར་བ་དང་། ཚོར་བ་རྣམ་པ་གཉིས་ཀྱིས་ཟིན་ཏོ་སྙམ་དུ་རབ་ཏུ་ཤེས་ཏེ། དེ་འཆི་བའི་དུས་ཀྱི་ཚེ་ནི་ལུས་ཀྱི་ཚོར་བ་དང་ལྡན་པར་འགྱུར་རོ། །ཤི་ནས་ནི་ཡིད་ཀྱི་ཚོར་བ་དང་ལྡན་པར་འགྱུར་རོ། །གཞན་ཡང་རྣམ་པར་ཤེས་ [75b] [75b.1]པ་ཞེས་བྱ་བའི་དོན་ཅི་ཞེ་ན་ས་བོན་གྱིས་ལུས་ཀྱི་མྱུ་གུ་མངོན་པར་འགྲུབ་པར་བྱེད་ལ་སེམས་པས་ཤེས་པ་དྲན་པ་ཐོབ་པར་འགྱུར་ཏེ། དེ་བས་ན་ས་བོན་དང་། ཤེས་པ་ལ་རྣམ་པར་ཤེས་པ་ཞེས་བྱའོ། །གཞན་ཡང་བདེ་བ་དང་སྡུག་བསྔལ་གྱི་ཚོར་བས་ཤེས་པ་དེ་རྟོགས་པས་ན་དེའི་ཕྱིར་རྣམ་པར་ [75b.2]ཤེས་པ་ཞེས་བྱའོ། །གཞན་ཡང་དེ་དགེ་བ་དང་མི་དགེ་བ་རིག་པ་དང་། དགེ་བ་དང་མི་དགེ་བའི་སྤྱོད་ཡུལ་ཤེས་པས་ན་དེའི་ཕྱིར་རྣམ་པར་ཤེས་པ་ཞེས་བྱའོ། །ས་བོན་གྱིས་མྱུ་གུ་སྐྱེད་པ་བཞིན་དུ་ལུས་འགྲུབ་པས་དེའི་ཕྱིར་ཡང་རྣམ་པར་ཤེས་པ་ཞེས་བྱའོ། །བཟང་སྐྱོང་གཞན་ཡང་ཇི་ལྟར་ [75b.3]རྣམ་པར་ཤེས་པའི་ཁམས་ཀྱིས་ལུས་ཡོངས་སུ་བཏང་ནས་འཕོ་ཞིང་འགྲོ་བར་འགྱུར་ཞེས་ཁྱོད་ཀྱིས་སྨྲས་པ་དེ་ནི་དཔེར་ན་མེ་ལོང་གི་གཟུགས་བརྙན་ལྟ་བུ་དང་། འཇིབ་ལ་རྒྱས་བཏབ་པའི་འབུར་བཞིན་ནོ། །དཔེར་ན་ཉི་མ་ཤར་ན་རབ་རིབ་དང་། མུན་པ་མེད་པར་འགྱུར་ལ་ཉི་མ་མེད་པར་གྱུར་ [75b.4]ན་ཡང་མུན་པ་འབྱུང་བར་འགྱུར་མོད་ཀྱི། མུན་པ་དེའི་གནས་ཐེར་ཟུག་པའམ། ཐེར་ཟུག་པ་མ་ཡིན་པ་ཡང་མེད་ལ། མུན་པ་དེ་ལ་ཡང་གཟུགས་དང་ཚོར་བ་མི་སྣང་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་ལུས་སྐྱེས་ནས་མུན་པ་བཞིན་དུ་ལུས་ལ་གནས་པར་འགྱུར་ཏེ། མིས་ [75b.5]ཀྱང་རྣམ་པར་ཤེས་པ་མི་མཐོང་ལ་རྣམ་པར་ཤེས་པའི་ཁམས་ཀྱང་ལུས་འཛིན་པར་བྱེད་དོ། །དཔེར་ན་བུད་མེད་ཀྱི་མངལ་ན་བུ་གནས་པ་ལ་ཅི་བདག་གི་ལྟོ་ན་འདུག་པ་འདི་ཁྱེའུ་འམ། བུ་མོ་འམ། སྔོ་བསངས་སམ། དཀར་རམ། སེར་རམ། དབང་པོ་ཚང་བ་འམ། དབང་པོ་ [75b.6]མ་ཚང་བ་ཡིན་པ་འམ། རྐང་ལག་མཉམ་པ་ཡིན་པར་མི་ཤེས་ལ། ལྟོའི་མངལ་ན་གནས་པ་དེ་ཡང་ཁ་ཟས་ཧ་ཅང་ཚ་བས་འགུལ་ཞིང་རེག་ལ་ཚོར་བར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་འགྲོ་བ་དང་། འོང་བ་དང་། བརྐྱང་བ་དང་། བསྐུམ་པ་དང་། མིག་ [75b.7]འཛུམས་པ་དང་། འབྱེད་པ་དང་། ལས་ཐམས་ཅད་ཡོངས་སུ་སྤྱོད་ཅིང་རྒོད་པ་དང་། གཏམ་དང་བསམ་པ་སྐྱེད་པའི་རང་བཞིན་ཅན་ལུས་ལ་གནས་པའི་རྣམ་པར་ཤེས་པ་ལ་བདག་གི་ལུས་ལ་རྣམ་པར་ཤེས་པ་གནས་པ་འདི་རང་བཞིན་ཇི་ལྟ་བུ་ཞིག་སྙམ་དུ་སེམས་ཅན་རྣམས་ [76a] [76a.1]ཀྱིས་མི་ཤེས་སོ། །བཟང་སྐྱོང་གཞན་ཡང་རྣམ་པར་ཤེས་པའི་ཁམས་འདི་ནི་ཤིན་ཏུ་ཡོངས་སུ་སྦྱང་བ་བྱས་པ་དང་། དངོས་པོ་ཐམས་ཅད་ལ་ཆུབ་པ་ཡིན་ལ། དངོས་པོ་རྣམས་ཀྱིས་ཀྱང་གོས་པ་མེད་དོ། །བཟང་སྐྱོང་འདི་ན་རྣམ་པར་ཤེས་པ་ནི་བསྒོས་པ་ཡིན་ཏེ། [76a.2]དབང་པོ་དྲུག་པོ་རྣམས་དང་། དབང་པོ་དྲུག་གི་སྤྱོད་ཡུལ་རྣམས་དང་། ཁམས་བཞི་པོ་རྣམས་དང་། ཉེ་བར་ལེན་པའི་ཕུང་པོ་ལྔ་པོ་རྣམས་དང་། བཟང་སྐྱོང་འདི་དག་ནི་རྣམ་པར་ཤེས་པ་ལ་བསྒོ་བར་བྱ་བ་ཡིན་པར་བལྟའོ། །དཔེར་ན་ཤིང་གི་འཁྲུལ་འཁོར་ཕུར་བུ་གཅིག་གིས་ [76a.3]ཟུངས་བྱས་པ་དེ་བྱ་བ་ཐམས་ཅད་བྱེད་དེ་རྒྱུག་པ་དང་། མཆོང་བ་དང་། གར་བྱེད་པ་དང་། བྱ་བ་རྣམ་པ་སྣ་ཚོགས་དག་ལ་འཇུག་ན་བཟང་སྐྱོང་འདི་ཇི་སྙམ་དུ་སེམས། འཁྲུལ་འཁོར་དེ་གང་གི་དབང་གིས་འཇུག་པར་འགྱུར། བཟང་སྐྱོང་གིས་གསོལ་པ། བཅོམ་ལྡན་འདས་ [76a.4]བཀས་རྨས་པ་དེའི་རྒྱུས་ནི་བདག་གིས་མ་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་འཁྲུལ་འཁོར་དེ་ནི་ལས་ཀྱི་དབང་གིས་འཇུག་སྟེ། ལས་དེ་ཡང་གཟུགས་ཅན་མ་ཡིན་ཞིང་རྣམ་པར་ཤེས་པ་ལས་མངོན་པར་གྲུབ་པའོ། །དེ་བཞིན་དུ་ལུས་ཀྱི་འཁྲུལ་ [76a.5]འཁོར་འདི་ཡང་རྣམ་པར་ཤེས་པའི་དབང་གིས་འབྱུང་སྟེ། རྣམ་པར་ཤེས་པའི་ཁམས་འདི་ནི་ལུས་སྣ་ཚོགས་ལ་འཇུག་པ་ཡིན་ནོ། །རྣམ་པར་ཤེས་པའི་ཁམས་འདི་ནི་ལུས་སྐྱེད་པར་བྱེད་པའི་ཕྱིར་བྱེད་པ་པོ་ཡང་ཡིན་ནོ། །རྣམ་པར་ཤེས་པའི་ཁམས་འདི་ནི་ལུས་ཀྱི་ཁམས་ལ་སྟེན་པའི་ [76a.6]ཕྱིར་མི་ཟད་པ་ཡང་ཡིན་ནོ། །རྣམ་པར་ཤེས་པའི་ཁམས་འདི་ནི་སྔོན་གྱི་ལུས་ཀྱི་གནས་རྗེས་སུ་དྲན་པའི་ཕྱིར་བློ་ཕུན་སུམ་ཚོགས་པ་ཡང་ཡིན་ནོ། །རྣམ་པར་ཤེས་པའི་ཁམས་འདི་ནི་ཉི་མའི་འོད་ཟེར་དང་འདྲ་བར་བལྟ་བར་བྱ་སྟེ། དཔེར་ན་ཉི་མའི་འོད་ཟེར་ནི་དྲི་ང་བ་དག་དང་། མི་གཙང་ [76a.7]བ་དག་དང་། རོ་དག་ལ་ཡང་འབབ་སྟེ། འོན་ཀྱང་དེ་དག་ལ་དྲི་དེས་གོས་པར་མི་འགྱུར་ལ། ཉི་མ་ཡང་དྲི་ང་བ་བོར་ཏེ་ཡང་མི་འགྲོའོ། །དེ་བཞིན་དུ་རྣམ་པར་ཤེས་པའི་ཁམས་འདི་ཡང་ཕྱིས་དང་། སྙག་སྙིག་ཟ་བའི་ཁྱི་དང་། ཕག་གི་སྐྱེ་གནས་དག་ཏུ་ཡང་སྐྱེ་བ་ཡོངས་སུ་འཛིན་ [76b] [76b.1]ཏེ། འོན་ཀྱང་རྣམ་པར་ཤེས་པའི་ཁམས་ལ་སྤྱོད་པ་ངན་པ་དེ་དག་གིས་གོས་པ་མེད་དོ། །བཟང་སྐྱོང་གཞན་ཡང་རྣམ་པར་ཤེས་པའི་ཁམས་འདི་ནི་ལུས་ཡོངས་སུ་བཏང་ནས་དགེ་བ་དང་མི་དགེ་བའི་རྗེས་སུ་འཇུག་སྟེ། དེ་ཡང་ཇི་ལྟ་ཞེ་ན། རྣམ་པར་ཤེས་པའི་ཁམས་གཟུགས་ [76b.2]ཅན་མ་ཡིན་པ་འདིས་ལུས་འདིར་བོར་ནས་བསོད་ནམས་དང་། བསོད་ནམས་མ་ཡིན་པ་ཡོངས་སུ་འཛིན་ཏོ། །དཔེར་ན་རླུང་གི་ཁམས་བྲག་གི་ཕྲག་ནས་བྱུང་ནས་ཤིང་ཙམ་པ་ཀ་དང་ཕྲད་དེ། སྤོས་ཤིན་ཏུ་དྲི་ཞིམ་པ་ཁྱེར་ནས་ཡང་འགྲོ། །དྲི་ང་བ་དང་། མི་གཙང་བ་དང་། རོའི་དྲི་ཡང་ [76b.3]ཁྱེར་ཏེ་འགྲོ་ལ། བཟང་སྐྱོང་དེ་ལས་གང་ཆེས་ཤས་ཆེ་བ་དེའི་དྲི་དང་ལྡན་པར་འགྱུར་རོ། ཇི་ལྟར་རླུང་གི་ཁམས་དེ་དྲི་རྣམ་པ་གཉིས་ཁྱེར་ཏེ་འགྲོ་ཡང་རླུང་གི་ཁམས་དེ་ཡང་གཟུགས་ཅན་མ་ཡིན་ལ། དྲི་དེ་གཉིས་ཀྱང་གཟུགས་ཅན་མ་ཡིན་པ་དེ་བཞིན་དུ་རྣམ་པར་ཤེས་པའི་ཁམས་འདི་ [76b.4]ཡང་ལུས་ལས་འཕོས་ཏེ་དགེ་བ་དང་མི་དགེ་བ་ཁྱེར་ནས་འཕོ་སྟེ། དེ་ལྟར་ན་དེའི་འཕོ་བ་དམིགས་སོ། །དཔེར་ན་རྨི་ལམ་ན་མིས་དངོས་པོ་ཐམས་ཅད་ཤེས་ཀྱང་ལུས་དེ་མལ་ན་འདུག་པར་མི་ཤེས་པ་དེ་བཞིན་དུ་བསོད་ནམས་སུ་ཉེ་བར་འགྲོ་བའི་སེམས་ཅན་རྣམས་རྨི་ལམ་རྨི་བ་བཞིན་དུ་འཕོ་ [76b.5]ཞིང་འགྲོ་ཡང་རྣམ་པར་ཤེས་པའི་ཁམས་འདི་ཡང་ལྐོག་མའི་མིད་པ་རྣམས་ནས་ཀྱང་མི་འབྱུང་། བུ་ག་རྣམས་ནས་ཀྱང་མ་ཡིན་ཏེ། དེ་ནི་ཁུང་བུ་དང་གསེབ་རྣམས་མི་ཚོལ་ལོ། །དེ་ནས་བཟང་སྐྱོང་གིས་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་ [76b.6]གསོལ་ཏོ། །བཅོམ་ལྡན་འདས་ཇི་ལྟར་ན་བྱ་གག་གི་སྒོ་ངའམ། ངང་པའི་སྒོ་ང་མ་ཕྲུགས་པ་ཤུན་པ་མ་བརྟོལ་བར་སྒོ་ངའི་ནང་ནས་བྱེའུ་ཕྲུག་རྣམས་འཆི་འཕོ་བར་འགྱུར་བ་ལགས། ཇི་ལྟར་ན་བུ་གམ་བརྟོལ་བར་རྣམ་པར་ཤེས་པ་འཕོ་བར་འགྱུར། བཅོམ་ལྡན་འདས་ཀྱིས་བཀའ་སྩལ་ [76b.7]པ། དཔེར་ན་ཏིལ་འབྲུ་ཙམ་པ་ཀའི་མེ་ཏོག་གིས་བསྒོས་ནས་ལེགས་པར་བརྡུངས་ཏེ་བཙིར་བ་ལས་ཏིལ་མར་བྱུང་བ་ནི་ཙམ་པ་ཀའི་ཏིལ་མར་ཞེས་བྱའོ། །འདི་ལྟ་སྟེ་དཔེར་ན་དྲི་དེས་ཀྱང་ཏིལ་འབྲུ་མ་བརྟོལ་བཞིན་དུ་དྲི་ཞིམ་པོས་བསྒོས་ཏེ་འཕོ་ཞིང་འགྲོ་ཡང་དྲི་དེས་སྣུམ་གྱི་རོ་མྱོང་བར་ཡང་མི་ [77a] [77a.1]འགྱུར་ལ། འབྲུའི་རྐྱེན་དང་མེ་ཏོག་ཕྲད་པས་ཏིལ་མར་དྲི་དང་འདྲེས་པའི་དངོས་པོར་འགྱུར་ཏེ། འོན་ཀྱང་ཏིལ་གྱི་འབྲུ་དེ་ལ་མེ་ཏོག་གི་དྲི་དེ་གསེབ་ནས་འགྲོ་བ་ནི་མེད་ལ། དེའི་རྐྱེན་གྱིས་དྲི་དེ་འཕོ་ཞིང་འགྲོ་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་མེ་ཏོག་ [77a.2]གི་དྲི་བཞིན་དུ་སྒོ་ངའི་ཤུན་པ་མ་བརྟོལ་བར་འཕོ་ཞིང་འགྲོ་སྟེ། དེའི་འཕོ་བ་ཡང་དེ་བཞིན་དུ་བལྟ་བར་བྱའོ། །གཞན་ཡང་དེའི་འཕོ་བ་ནི་ཉི་མ་དང་། མེ་ཤེལ་དང་། བསྲེག་བྱ་དང་འདྲ་བར་ཡང་བལྟ་བར་བྱའོ། །གཞན་ཡང་ས་བོན་འཕོ་བ་དང་འདྲ་སྟེ། ས་ཕྱོགས་གང་དུ་ས་བོན་ [77a.3]བཏབ་ན་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་གཅིག་པུ་ཁོ་ན་ལས་ས་བོན་དེ་ས་ལ་རྟེན་ཅིང་སྡོང་བུ་དང་ལོ་མ་སྔོན་པོར་འགྲུབ་ལ། མེ་ཏོག་དཀར་པོ་འམ་སྔོན་པོ་འམ། དམར་པོར་སྣང་བ་འམ། ཁ་དོག་སྣ་ཚོགས་སམ། སྨིན་པའི་རོ་ཐ་ [77a.4]དད་པར་འགྲུབ་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་ཆོས་ཀྱི་ཁམས་གཅིག་པུ་འདི་ལས་སྲིད་པར་སྐྱེ་བ་ཐམས་ཅད་དུ་ལུས་སྔོ་བསངས་སམ། དཀར་བ་འམ། སེར་བ་འམ། ཁྲ་བོ་འམ། ནག་པོ་འམ། རང་བཞིན་གྱིས་མཉེན་པོར་སྐྱེ་བར་འགྱུར་རོ། །བཟང་སྐྱོང་གཞན་ [77a.5]ཡང་འཆི་བའི་དུས་ཀྱི་ཚེ་རྣམ་པར་ཤེས་པའི་ཁམས་འདི་ལུས་ཡོངས་སུ་བཏང་ནས་ས་བོན་དུ་འགྱུར་ཏེ། བདག་ཉིད་རྐང་ལག་དང་ལྡན་པར་ཤེས་སོ། །འོན་ཀྱང་དེ་ལ་ཡན་ལག་དང་ཉིང་ལག་ནི་མེད་དོ། །དེ་ཡང་སའི་ཁམས་ཡོངས་སུ་བཏང་ནས་ཆོས་ཀྱི་ཁམས་ཡོངས་སུ་འཛིན་ [77a.6]ཏེ། ཆོས་ཀྱི་ཁམས་དེ་ཡང་དྲན་པ་དང་མཚུངས་པར་ལྡན་ནོ། །དྲན་པ་དེ་ཡང་སྤྱོད་ཡུལ་གྱི་སྟོབས་དང་ལྡན་ནོ། །ཆོས་ཀྱི་ཁམས་དྲན་པ་དང་མཚུངས་པར་ལྡན་པའི་ལེན་པའི་རྒྱུ་ནི་རྣམ་པར་ཤེས་པ་ཡིན་ཏེ། རྣམ་པར་ཤེས་པ་མ་གཏོགས་པར་ཡང་ཆོས་ཀྱི་ཁམས་མི་དམིགས་ལ། [77a.7]ཆོས་ཀྱི་ཁམས་མ་གཏོགས་པར་ཡང་རྣམ་པར་ཤེས་པའི་ཁམས་མེད་དོ། །རླུང་གི་ཁམས་ནི་རྣམ་པར་ཤེས་པ་དེའི་རྗེས་སུ་འཇུག་གོ །གཞན་ཡང་སའི་ཁམས་འདི་ལྟ་སྟེ། དྲན་པའི་ཁམས་དང་། ཚོར་བའི་ཁམས་དང་། ཆོས་ཀྱི་ཁམས་དང་། གཟུགས་ཀྱི་ཁམས་ [77b] [77b.1]གང་ཡིན་པ་རྣམས་ཀྱང་རྗེས་སུ་འཇུག་གོ །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་རྣམ་པར་ཤེས་པ་དེ་གཟུགས་ཅན་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་འདི་ [77b.2]ལ་ནང་གི་གཟུགས་དང་། ཕྱི་རོལ་གྱི་གཟུགས་ཡོད་དེ། དེ་ལ་ནང་གི་གཟུགས་གང་ཞེ་ན། ཟིན་པའི་མིག་གང་ཡིན་པ་དེ་ནི་ཕྱི་རོལ་གྱི་གཟུགས་སོ། །མིག་གི་རྣམ་པར་ཤེས་པ་གང་ཡིན་པ་དེ་ནི་ནང་གི་གཟུགས་སོ། །རྣ་བ་གང་ཡིན་པ་དེ་ནི་ཕྱི་རོལ་གྱི་གཟུགས་སོ། །རྣ་བའི་ [77b.3]རྣམ་པར་ཤེས་པ་གང་ཡིན་པ་དེ་ནི་ནང་གི་གཟུགས་སོ། །སྣ་གང་ཡིན་པ་དེ་ནི་ཕྱི་རོལ་གྱི་གཟུགས་སོ། །སྣའི་རྣམ་པར་ཤེས་པ་གང་ཡིན་པ་དེ་ནི་ནང་གི་གཟུགས་སོ། །ལྕེ་གང་ཡིན་པ་དེ་ནི་ཕྱི་རོལ་གྱི་གཟུགས་སོ། །ལྕེའི་རྣམ་པར་ཤེས་པ་གང་ཡིན་པ་དེ་ནི་ནང་གི་གཟུགས་སོ། ། [77b.4]ལུས་གང་ཡིན་པ་དེ་ནི་ཕྱི་རོལ་གྱི་གཟུགས་སོ། །ལུས་ཀྱི་འདུས་ཏེ་རེག་པ་ལས་བྱུང་བའི་ཚོར་བ་གང་ཡིན་པ་དེ་ནི་ནང་གི་གཟུགས་སོ། །བཟང་སྐྱོང་འདི་ལྟ་སྟེ། དཔེར་ན་མི་དམུས་ལོང་ཞིག་ནུབ་མོ་གཉིད་ཀྱི་དབང་དུ་གྱུར་པ་ན་ལྷའི་གཟུགས་རྐང་ལག་མཉམ་ཞིང་མཆོག་ཏུ་ཡིད་དུ་འོང་ [77b.5]བ་དག་མཐོང་ལ། དེས་དེ་དག་མཐོང་ནས་མཆོག་ཏུ་དགའ་བ་བསྐྱེད་དེ། གཉིད་ལོག་པ་ལས་སད་པ་དང་གཟུགས་དེ་དག་མ་མཐོང་ལ། དེ་ནམ་ནངས་ནས་འདི་སྐད་དུ་ཁྱོད་ཉོན་ཅིག་མདང་མཚན་མོ་བདག་གི་རྨི་ལམ་དུ་བུད་མེད་ཀྱི་གཟུགས་མཆོག་ཏུ་ཡིད་དུ་འོང་བ་དང་། སྐྱེད་མོས་ [77b.6]ཚལ་མི་སྟོང་གིས་གང་བ་མཐོང་སྟེ། དེར་བདག་གིས་མི་ལུས་ཤིན་ཏུ་གཞོན་ཤ་ཅན། ལག་པ་གླང་པོ་ཆེ་མཆོག་གི་སྣ་ལྟར་རིང་བ། ཐལ་གོང་ཡངས་ཤིང་རྒྱས་ལ། བྲང་ཡངས་ཤིང་མཁྲེགས་པ་དག་མཐོང་ངོ་ཞེས་སྨྲ་ཞིང་མི་དེ་དག་གི་ལུས་ཀྱི་རྒྱན་མཛེས་པ་གང་ཡིན་པ་ [77b.7]དེ་དག་བཟླས་ལ། དེ་ནས་དམུས་ལོང་དེས་མི་དེ་དག་ཉིད་ཀྱི་གཟུགས་རྣམས་མ་མཐོང་ན་བཟང་སྐྱོང་འདི་ཇི་སྙམ་དུ་སེམས། མི་དམུས་ལོང་དེས་རྨི་ལམ་དུ་གཟུགས་རྣམས་ཇི་ལྟར་མཐོང་། བཟང་སྐྱོང་གིས་གསོལ་པ། བཅོམ་ལྡན་འདས་དེའི་སླད་དུ་བདག་ལ་བཀའ་སྩལ་དུ་ [78a] [78a.1]གསོལ། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེ་བས་ན་ནང་གི་མིག་ཤེས་པ་དང་ལྡན་པས་རྨི་ལམ་དུ་གཟུགས་རྣམས་མཐོང་གི་ཤའི་མིག་གིས་ནི་མ་ཡིན་ནོ། །ཇི་ལྟར་མི་གཉིད་ཀྱིས་ལོག་པའི་རྨི་ལམ་དུ་ཡུད་ཙམ་ཞིག་དྲན་པ་ [78a.2]འབྱུང་བ་དེ་བཞིན་དུ་ཤི་བའི་དྲན་པ་ཡང་དེ་དང་འདྲ་སྟེ། ནང་གི་གཟུགས་དེ་ཡང་དེ་བཞིན་དུ་བལྟ་བར་བྱའོ། །བཟང་སྐྱོང་གཞན་ཡང་མི་ཤི་བའི་རྣམ་པར་ཤེས་པའི་ཁམས་དེ་ས་བོན་གྱི་ཁམས་བཞིན་དུ་འཕོ་ཞིང་འགྲོ་བ་ངས་བཤད་པར་བྱ་སྟེ། དཔེར་ན་ས་བོན་གྱི་ཁམས་ས་ [78a.3]གཞི་ལ་བཏབ་ན་ཁམས་བཞི་པོ་དག་སྡུད་པར་བྱེད་པ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་དྲན་པ་རབ་ཏུ་འཛིན་ཅིང་ཚོར་བ་ཡོངས་སུ་འཛིན་ཏེ། དགེ་བ་དང་མི་དགེ་བ་ཡང་རྗེས་སུ་བཟུང་ནས་ལུས་ཡོངས་སུ་བཏང་སྟེ་འཕོ་ཞིང་འགྲོའོ། །བཅོམ་ལྡན་འདས་ཇི་ལྟར་ན་ [78a.4]རྣམ་པར་ཤེས་པ་དེ་དགེ་བ་དང་མི་དགེ་བ་ཡོངས་སུ་འཛིན་པར་འགྱུར། བཟང་སྐྱོང་དཔེར་ན། ནོར་བུ་རིན་པོ་ཆེ་པད་མ་རཱ་ག་ནི་འོད་ནག་པོ་འམ་དཀར་པོ་འཛིན་ཏེ། འོད་ཀྱི་རང་བཞིན་ཇི་ལྟ་བ་བཞིན་དུ་ནོར་བུ་རིན་པོ་ཆེ་དེ་ལ་འབྱུང་ཞིང་དེའི་རང་བཞིན་ཉིད་ནོར་བུ་རིན་པོ་ཆེ་དེ་ལ་སྣང་བར་ [78a.5]འགྱུར་ཏེ། གནས་གང་དང་གང་དུ་འཕོས་པ་དེ་དང་དེར་ཁ་དོག་དག་སྣང་བ་དེ་བཞིན་དུ་རྣམ་པར་ཤེས་པ་འདི་དགེ་བ་དང་མི་དགེ་བ་ཡོངས་སུ་བཟུང་ནས་འཕོ་ཞིང་འགྲོའོ། །དེ་ནས་ཡང་བཅོམ་ལྡན་འདས་ལ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ [78a.6]ཇི་ལྟར་ན་ལུས་འདི་ལ་རྣམ་པར་ཤེས་པ་རྟོགས་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་རྣམ་པར་ཤེས་པ་འདི་བསགས་པ་འམ། སྤུངས་པར་མི་དམིགས་སོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཁམས་འདི་སྐྱེ་ཞིང་འགག་ [78a.7]པའི་ཕྱིར་རོ། །བཟང་སྐྱོང་དཔེར་ན་ས་བོན་ལས་མྱུ་གུ་འབྱུང་མོད་ཀྱི། ས་བོན་རུལ་པ་ལས་མྱུ་གུ་འབྱུང་བར་མི་འགྱུར་ལ། ས་བོན་ཉམས་པ་ལས་ཀྱང་མྱུ་གུ་འབྱུང་བར་མི་འགྱུར་ཏེ། མྱུ་གུ་ཡང་འགྲུབ་པར་འགྱུར་ན། བཟང་སྐྱོང་འདི་ཇི་སྙམ་དུ་སེམས། མྱུ་གུ་དེའི་ས་ [78b] [78b.1]བོན་སྡོང་བུ་འམ། ལོ་མ་འམ། སྦུབས་གང་ལ་གནས། ས་བོན་ནི་ཤིང་གི་རྩེ་མོ་ན་ཡང་མི་གནས་སོ། །དེ་བཞིན་དུ་ལུས་འདི་ལ་རྣམ་པར་ཤེས་པ་གང་ན་ཡང་མི་གནས་ཏེ། མིག་ལ་ཡང་མ་ཡིན། རྣ་བ་ལ་ཡང་མ་ཡིན། སྣའི་དབང་པོ་ལ་ཡང་མ་ཡིན་ནོ། །ས་བོན་གྱི་མྱུ་གུ་ [78b.2]སྐྱེ་བ་གང་ཡིན་པ་དེ་ནི་སེམས་པ་ཆུང་བ་ཡིན་ནོ། །མངལ་དུ་སྐྱེ་བ་དེ་ནི་ཚོར་བ་ཆུང་བ་ཡིན་ཏེ། དཔེར་ན་མྱུ་གུ་འབྱུང་ཞིང་དུས་ཚིགས་དང་ལྡན་པ་ན་མེ་ཏོག་རྣམས་འགྲུབ་སྟེ། མེ་ཏོག་གྲུབ་ན་འབྲས་བུ་འགྲུབ་པ་ཡོད་པ་དེ་བཞིན་དུ་རྣམ་པར་ཤེས་པའི་ཁམས་འདིས་ལུས་འགྲུབ་ [78b.3]པར་འགྱུར་རོ། །ལུས་གྲུབ་པ་ན་ཡན་ལག་དང་ཉིང་ལག་གང་ལ་ཡང་རྣམ་པར་ཤེས་པ་མི་གནས་ལ། རྣམ་པར་ཤེས་པ་མེད་ན་ཡང་ལུས་སྐྱེ་བར་མི་འགྱུར་རོ། །དཔེར་ན་ཤིང་ཡོངས་སུ་སྨིན་པ་ལས་ས་བོན་འབྱུང་ལ་ཡོངས་སུ་མ་སྨིན་པ་ལས་མ་ཡིན་པ་དེ་བཞིན་དུ་འཆི་བའི་ [78b.4]དུས་ཀྱི་ཚེ་ལུས་ལས་རྣམ་པར་ཤེས་པ་འདི་སྣང་བར་འགྱུར་ཏེ། ཚོར་བ་དང་མཚུངས་པར་ལྡན་པ། སྲེད་པས་བསྡམས་པ། དྲན་པས་ཡོངས་སུ་བཟུང་བ། དགེ་བ་ལ་དམིགས་པ་དང་མཚུངས་པར་ལྡན་པ། མི་དགེ་བ་ལ་དམིགས་པ་དང་མཚུངས་པར་ལྡན་པ། རླུང་གི་ [78b.5]ཁམས་ཀྱིས་ཡོངས་སུ་ཟིན་པ། ཤེས་པས་མངོན་པར་བརླན་པ། རྐྱེན་ལ་མངོན་དུ་ཕྱོགས་པའི་རྣམ་པར་ཤེས་པ་ནི་ཕ་མ་ཕྲད་པ་ན་སྐྱེ་བར་འགྱུར་རོ། །དཔེར་ན་མེ་ལོང་གི་དཀྱིལ་འཁོར་ཤིན་ཏུ་ཕྱིས་པ་ལ་བཞིན་གྱི་གཟུགས་བརྙན་སྣང་གི །བཞིན་མེད་པར་གཟུགས་ [78b.6]བརྙན་མི་འབྱུང་ལ། མེ་ལོང་མེད་པར་ཡང་གཟུགས་བརྙན་མི་འབྱུང་སྟེ། ཇི་ལྟར་བཞིན་དང་མེ་ལོང་ཕྲད་པ་ལས་གཟུགས་བརྙན་འབྱུང་བར་འགྱུར་ཞིང་གཟུགས་བརྙན་དེ་ཡང་གཟུགས་ཅན་མ་ཡིན་ལ། དེ་ལ་ཚོར་བ་དང་རབ་ཏུ་ཤེས་པ་ཡང་མེད་དེ། ལུས་གང་དང་ [78b.7]གང་དུ་བསྐྱོད་པ་དེ་དང་དེ་ཉིད་དུ་གཟུགས་བརྙན་འཕོ་ཞིང་ཇི་ལྟ་བུར་ལུས་སྨྲ་བ་དང་། འབོད་པ་དང་། འགྲོ་བ་དང་། བསྐུམ་པ་དང་། བརྐྱང་བར་བྱེད་པ་དེ་བཞིན་དུ་བཞིན་གྱི་གཟུགས་བརྙན་ཡང་འགྱུར་བར་སྣང་ངོ་། །བཟང་སྐྱོང་འདི་ཇི་སྙམ་དུ་སེམས། གང་ [79a] [79a.1]གི་དབང་གིས་གཟུགས་བརྙན་དེ་དམིགས་པར་འགྱུར། བཟང་སྐྱོང་གིས་གསོལ་པ། མིའི་དབང་པོའི་གཟུགས་བརྙན་གདའ་སྟེ། དེ་ཡང་མེ་ལོང་གི་རྐྱེན་གྱིས་བཞིན་གྱི་གཟུགས་བརྙན་གདའ་ལ། བཞིན་གྱི་མདོག་ཅི་འདྲ་བ་དང་། དབང་པོ་ [79a.2]མ་ཚང་བའམ། དབང་པོ་ཚང་བ་དེ་ཉིད་ཀྱི་གཟུགས་བརྙན་འབྱུང་ལགས་སོ། །བཟང་སྐྱོང་ཇི་ལྟར་ལུས་ཀྱི་དབང་དང་། མེ་ལོང་གི་དཀྱིལ་འཁོར་གྱི་རྐྱེན་གྱིས་གཟུགས་བརྙན་འགྲུབ་པར་འགྱུར་བ་དེ་བཞིན་དུ་རྣམ་པར་ཤེས་པའི་དབང་གིས་ལུས་འདི་ཚོར་བ་མྱོང་ཞིང་། འདུ་ [79a.3]ཤེས་དང་། འདུ་བྱེད་རྣམས་དང་། ཡིད་ལ་བྱེད་པ་འགྲུབ་པར་བྱེད་དོ། །དེ་ལ་མེ་ལོང་གང་ཡིན་པ་དེ་ནི་ཕ་མ་དང་ཕྲད་པ་ལྟ་བུར་བལྟའོ། །ཇི་ལྟར་ལུས་མི་སྣང་ན་གཟུགས་བརྙན་མི་སྣང་སྟེ། དཔེར་ན་མེ་ལོང་གི་དཀྱིལ་འཁོར་ལ་གཟུགས་བརྙན་གྱི་རང་བཞིན་ཡོད་པ་སྤངས་ [79a.4]ནས་ཡང་ཆུའི་ནང་དུ་གཟུགས་བརྙན་འབྱུང་བར་བྱེད་པ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་ལུས་ཡོངས་སུ་བཏང་སྟེ། ལུས་ཀྱི་རང་བཞིན་འཕངས་ནས་ཕུང་པོ་གཞན་འཐོབ་པར་འགྱུར་རོ། །དཔེར་ན་ས་བོན་གྱི་ཁམས་ཆུང་ངུ་ཟིན་ཀྱང་ཤིང་ནྱ་གྲོ་དྷ་དང་། ཨུ་དུམ་ [79a.5]བ་ར་ལ་སོགས་པའི་ཤིང་གི་ཕུང་པོ་ཆེན་པོ་བསྐྱེད་ནས་ཡང་ཤིང་དེ་ཡོངས་སུ་བཏང་སྟེ། ཤིང་གཞན་འཛིན་ལ་ས་བོན་གྱི་ཁམས་ཡོངས་སུ་བཏང་བ་ན་དུས་བཟློག་པར་གྱུར་པས་ཤིང་དེའི་ཁམས་ཀྱི་བཅུད་མེད་པར་འགྱུར་རོ། །ཁམས་ཀྱི་བཅུད་རྣམས་མེད་པར་གྱུར་པས་ཤིང་ [79a.6]དེ་ཡོངས་སུ་རྙིངས་ཤིང་ཡོངས་སུ་སྐམ་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་ཕྲ་ཞིང་མི་གསལ་བ་འདིས་ཀྱང་ལུས་རྣམས་བསྐྱེད་ནས་ཡང་ཡོངས་སུ་བཏང་སྟེ། ལུས་གཞན་དག་སྒྲུབ་པར་བྱེད་དོ། །དཔེར་ན་ནས་དང་། ཏིལ་དང་། གྲོ་དང་། མོན་སྲན་གྲེའུ་ [79a.7]དང་། མོན་སྲན་སྡེའུ་ལ་སོགས་པའི་ས་བོན་ཅུང་ཟད་གང་ན་ཡོད་པ་དེར་ཅུང་ཟད་སེམས་པ་ལྟ་བུར་གནས་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་སེམས་ཅན་གྱི་རིས་གང་དང་གང་དུ་འཕོ་བ་དེ་དང་དེར་སེམས་པ་ཡོངས་སུ་བཟུང་ཞིང་ཚོར་བ་ཆུང་ངུ་དང་། བསོད་ [79b] [79b.1]ནམས་དང་བསོད་ནམས་མ་ཡིན་པ་རྗེས་སུ་བཟུང་ནས་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོའོ། །དཔེར་ན་བུང་བ་རོ་ལ་སྲེད་པས་ཡུན་རིང་དུ་མེ་ཏོག་ལ་གནས་ཏེ་ལོངས་སྤྱད་ནས་མེ་ཏོག་ཡོངས་སུ་བཏང་སྟེ་མེ་ཏོག་གཞན་དུ་འཕོ་ལ། བུང་བ་དེ་ཡང་མེ་ཏོག་དྲི་མི་ཞིམ་པ་ལོངས་ [79b.2]སྤྱད་ནས་དྲི་ཞིམ་པོར་འགྲོ་བར་བྱེད་དེ། མེ་ཏོག་གང་དང་གང་ལ་འབྱར་བ་དེ་དང་དེ་ལ་ཆགས་ཤིང་རོ་ཡང་མྱོང་བར་བྱེད་པ་དེ་བཞིན་དུ་རྣམ་པར་ཤེས་པའི་ཁམས་འདིས་ཀྱང་ལྷ་རྣམས་ཀྱི་ནང་དུ་ལྷའི་ལུས་བླངས་ཏེ། དགེ་བའི་རྩ་བ་ཤིན་ཏུ་ལོངས་སྤྱད་ནས་ཕྱིར་ཡང་སེམས་ཅན་དམྱལ་ [79b.3]བ་དང་། དུད་འགྲོ་དང་། {ཡི་དགས་,ཡི་དྭགས་}ཀྱི་ནང་དུ་ལུས་བླངས་ཏེ། དེས་མི་དགེ་བའི་རྩ་བ་ཡོངས་སུ་མྱོང་ནས་ཡང་ཕུང་པོ་ལྔ་པོ་གཞན་དག་ལེན་ཏོ། །དེ་ལ་རྣམ་པར་ཤེས་པའི་ཁམས་འདི་ཇི་ལྟར་བལྟ་བར་བྱ་ཞེ་ན། དཔེར་ན་གུར་གུམ་གྱི་ས་བོན་ནམ་ལེབ་རྒན་རྩིའི་ས་བོན་ [79b.4]རྣམས་རང་བཞིན་གྱིས་དཀར་ལ། དེ་དག་གི་ཁོང་ན་མྱུ་གུ་ཡང་མི་སྣང་། མེ་ཏོག་ཀྱང་མི་སྣང་། ཁ་དོག་ཀྱང་མི་སྣང་ཡང་ས་བོན་དེ་སའི་ཁམས་ལ་བཏབ་ན་ཆུའི་ཁམས་ཀྱིས་ཡོངས་སུ་བརླན་ནས་མྱུ་གུ་མངོན་པར་འགྲུབ་པར་བྱེད་དེ། མྱུ་གུ་མངོན་པར་གྲུབ་ནས་མེ་ཏོག་ [79b.5]དམར་པོའམ། དཀར་པོ་འམ། སྔོན་པོ་འབྱུང་བར་འགྱུར་ཏེ། འོན་ཀྱང་ཁ་དོག་དེ་ཡང་ས་བོན་གྱི་ཁོང་ན་མི་གནས་ལ་ས་བོན་མེད་ན་ཡང་ཁ་དོག་དང་མྱུ་གུ་འབྱུང་བར་མི་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདིས་ཀྱང་ལུས་ཡོངས་སུ་བཏང་ནས་མིའི་ཤ་ཚུགས་ [79b.6]ཅན་ཡིན་ལ། ཤ་སྣག་གུའི་དབང་པོ་འབྱུང་བའི་སྐྱེ་མཆེད་དང་ལྡན་པ་མ་ཡིན་ཏེ། དེ་ལྷའི་མིག་དང་། ལྷའི་རྣ་བ་དང་ལྡན་ཞིང་སྒྲ་དང་། དྲི་དང་། རོ་དང་། ཆོས་ཀྱི་སྐྱེ་མཆེད་རབ་ཏུ་ཤེས་པའི་བདག་ཉིད་ཅན་དུ་འགྱུར་ལ། འདི་སྙམ་དུ་གང་བདག་གིས་ལས་བྱས་ [79b.7]པ་དེ་ཉིད་ནི་བདག་ཡིན་ནོ་སྙམ་དུ་ཡང་ཤེས་སོ། །ལུས་དེ་ཡང་རྣམ་པར་ཤེས་པའི་རྐྱེན་གྱིས་བསྡུས་པ་ཡིན་ཏེ། དཔེར་ན་དར་གྱི་སྲིན་བུ་རང་གི་ལུས་ལས་སྐུད་པའི་རྒྱུད་བྱུང་བས་ཁྱིམ་བྱས་ལ་དེ་ཉིད་དེའི་ནང་དུ་འཆི་བའི་དུས་བྱེད་དོ། །དེ་བཞིན་དུ་རྣམ་པར་ཤེས་པའི་ཁམས་ [80a] [80a.1]འདིས་ཀྱང་ལུས་བསྐྱེད་ནས། དར་གྱི་སྲིན་བུ་བཞིན་དུ་བདག་ཉིད་ཡང་ལུས་ཡོངས་སུ་བཏང་ནས་མེད་པར་འགྱུར་རོ། །དཔེར་ན་པད་མ་ཆུའི་ནང་ནས་སྐྱེས་ཏེ། ལྷའི་དྲི་དང་། ཁ་དོག་མངོན་པར་འགྲུབ་ཀྱང་པད་མ་དཀར་པོ་དེ་ལ་ཆུའི་ཁམས་ཀྱང་མི་ [80a.2]དམིགས་ལ་དེའི་ནང་དུ་མི་སྣང་བར་གྱུར་ནས་གང་དུ་ས་བོན་གནས་པ་དེར་ཁ་དོག་དང་། དྲི་དང་། རོ་རྣམས་གནས་པར་འགྱུར་རོ། །དེ་བཞིན་དུ་རྣམ་པར་ཤེས་པའི་ཁམས་འདི་གང་དུ་འཕོ་ཞིང་འགྲོ་བ་དེར་དབང་པོ་དག་གི་སྤྱོད་ཡུལ་རྣམས་འཕོ་བར་འགྱུར་ཏེ། ཚོར་བ་དང་། [80a.3]སེམས་པ་དང་། ཆོས་ཀྱི་ཁམས་རྣམས་ཀྱང་དེར་འཕོ་ཞིང་འགྲོ་བར་འགྱུར་རོ། །དཔེར་ན་ཡིད་བཞིན་གྱི་ནོར་བུ་རིན་པོ་ཆེ་གང་དུ་འགྲོ་བ་དེར་ལོངས་སྤྱོད་ཐམས་ཅད་འཕོ་ཞིང་འགྲོ་བར་འགྱུར་རོ། །དཔེར་ན་ཉི་མ་དང་འབྲེལ་བའི་འོད་ཟེར་རྣམས་ཉི་མ་གང་དང་གང་དུ་འགྲོ་བ་དེ་ [80a.4]དང་དེ་ཉིད་དུ་འོད་ཟེར་རྣམས་ཀྱང་རྗེས་སུ་འགྲོ་བ་དེ་བཞིན་དུ་རྣམ་པར་ཤེས་པའི་ཁམས་འདི་གང་དང་གང་དུ་འཕོ་བ་དེ་དང་དེ་ཉིད་དུ་ཚོར་བ་དང་། འདུ་ཤེས་དང་། ཆོས་ཀྱི་ཁམས་རྣམས་ཀྱང་འཕོ་ཞིང་འགྲོའོ། །གཞན་ཡང་རྣམ་པར་ཤེས་པའི་ཁམས་འདིས་ལུས་ཡོངས་སུ་ [80a.5]བཏང་ནས་དབང་པོ་ཐམས་ཅད་ཀྱི་ཕྲད་པ་ཡོངས་སུ་བཟུང་སྟེ། ཤ་མེད་པ་དང་། རུས་པ་མེད་པའི་ལུས་འགྲུབ་པར་བྱེད་དོ། །དེའི་ལུས་ལེན་པའི་རྒྱུ་ནི་གཟུགས་ཡིན་ནོ། །དབང་པོའི་དངོས་པོ་རྣམས་ནི་ཚོར་བས་མྱོང་ངོ་། །དྲན་པ་ནི་ལྷའི་ལྟ་བས་མཐོང་སྟེ། དགེ་བ་དང་ [80a.6]མི་དགེ་བ་ཡང་ཡོངས་སུ་ལེན་ཏོ། །དཔེར་ན་རྒྱ་ཤུག་དང་། འབྲ་གོ་དང་། ཨམྲ་དང་། ཉོ་ཏི་དང་། སེའུ་དང་། བིལ་བ་དང་། ཀ་པིད་ཏ་ལ་སོགས་པའི་འབྲས་བུ་རྣམས་ནི་རོ་དུ་མར་འགྲུབ་སྟེ། ཚ་བ་དང་། ཁ་བ་དང་། སྐྱུར་བ་དང་། ལན་ཚྭའི་རོ་དང་། བསྐ་བ་ལ་ [80a.7]སོགས་པའི་རོ་རེ་རེར་རྣམ་པར་སྨིན་པར་འགྱུར་ཏེ། ལ་ལ་ནི་རོ་ཚ་བར་འགྱུར། ལ་ལ་ནི་སྐྱུར། ལ་ལ་ནི་མངར་རོ། །འབྲས་བུ་དེ་དག་མེད་པར་གྱུར་པའི་ས་བོན་གང་དང་གང་དུ་འཕོ་བ་དེར་རོ་ཡང་འཕོ་བར་འགྱུར་རོ། །དེ་བཞིན་དུ་རྣམ་པར་ཤེས་པའི་ཁམས་འདི་གང་དང་གང་ [80b] [80b.1]དུ་འཕོ་བ་དེ་དང་དེར་ཚོར་བ་འཕོ་བར་འགྱུར་རོ། །བསོད་ནམས་དང་། བསོད་ནམས་མ་ཡིན་པ་དང་། དྲན་པ་ཡང་འཕོ་བར་འགྱུར་རོ། །གཞན་ཡང་རྣམ་པར་ཤེས་པའི་ཁམས་འདིས་ནི་ལུས་ཡོངས་སུ་བཏང་ནས་བདག་གི་ལུས་འདི་ཡོངས་སུ་བཏང་ངོ་སྙམ་དུ་རབ་ཏུ་ཤེས་ཏེ། [80b.2]དེ་བས་ན་འདི་ལ་རྣམ་པར་ཤེས་པའི་ཁམས་ཞེས་བྱའོ། །དགེ་བའི་ལས་ཀྱང་རབ་ཏུ་ཤེས་སོ། །མི་དགེ་བའི་ལས་ཀྱང་རབ་ཏུ་ཤེས་སོ། །ལས་འདི་དག་ནི་བདག་གི་ཕྱི་བཞིན་འབྲང་ངོ་། །བདག་ཀྱང་འདི་དག་གི་ཕྱི་བཞིན་དུ་འབྲང་ངོ་སྙམ་དུ་དེ་ལྟར་རབ་ཏུ་ཤེས་ཏེ། དེ་བས་ན་ [80b.3]རྣམ་པར་ཤེས་པ་ཞེས་བྱའོ། །གཞན་ཡང་ལུས་འདིའི་བྱ་བ་ཐམས་ཅད་རབ་ཏུ་ཤེས་ཏེ། དེ་བས་ན་རྣམ་པར་ཤེས་པ་ཞེས་བྱའོ། །དཔེར་ན་རླུང་གི་ཁམས་གྲང་བར་ཡང་འགྱུར་ཞིང་ཚ་བར་ཡང་འགྱུར་ལ། དྲི་ཞིམ་པོར་ཡང་ལྡང་ཞིང་དྲི་ང་བར་ཡང་ལྡང་སྟེ། སྤྱོད་པ་དེ་ [80b.4]དག་ཐམས་ཅད་ནི་རླུང་གི་ཁམས་ཀྱི་རྐྱེན་ལས་བྱུང་ཡང་རླུང་གི་ཁམས་དེ་ཡང་གཟུགས་ཅན་མ་ཡིན་ལ། ལེན་པའི་རྒྱུས་སྣང་སྟེ། ཇི་ལྟར་རླུང་གི་ཁམས་ཀྱིས་ཤིང་གཡོ་བ་དང་། གྲང་བ་དང་། ཚ་བའི་རེག་པ་ལེན་པའི་རྐྱེན་བྱེད་པ་ལས་རླུང་གི་ཁམས་ཤེས་པར་འགྱུར་ [80b.5]བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་གཟུགས་ཅན་མ་ཡིན་ཏེ། གཟུགས་ལེན་པའི་རྐྱེན་དང་། འདོད་པ་ལེན་པའི་རྐྱེན་དང་། ལྟ་བ་ལེན་པའི་རྐྱེན་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པ་ལེན་པའི་རྐྱེན་གྱིས་ཚོར་བ་མྱོང་བར་འགྱུར་རོ། །ཚོར་བའི་རྐྱེན་གྱིས་ལུས་ [80b.6]དང་ཁ་དོག་སྐྱེ་ཞིང་འགྲུབ་པར་བྱེད་པས་ན་རྣམ་པར་ཤེས་པ་ཞེས་བྱའོ། །དེ་ནས་ཚོང་དཔོན་གཞོན་ནུ་ཟླ་བ་འབྱོར་པ་སྟན་ལས་ལངས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུགས་ཇི་ལྟར་བལྟ་བར་བགྱི། ལེན་པ་ནི་ཇི་ [80b.7]ལྟ་བུ་ལགས། ལས་ལེན་པ་ནི་ཇི་ལྟར་བལྟ་བར་བགྱི། ལྟ་བ་ལེན་པ་ནི་ཇི་ལྟ་བུ་ལགས། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་པའི་ལེན་པ་ནི་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་འབྱོར་པ་ལེགས་སོ་ལེགས་སོ། ། [81a] [81a.1]མཁས་པས་ནི་མཁས་པའི་མཚན་ཉིད་དེ་ལྟར་ཤེས་སོ། །ཟླ་བ་འབྱོར་པ་འདི་ནི་ཁ་དོག་བཟང་པོ་འམ། ཁ་དོག་ངན་པ་ཡང་རུང་སྟེ། དེ་ནི་ཤ་ཁམ་ཚད་དང་། རྩ་དང་། རྒྱུས་པ་དང་། མགོ་དང་། ཀླད་པ་དང་། རུས་པ་དང་། རྐང་པ་དང་། རྒྱུ་མ་ [81a.2]དང་། གཉེ་མ་དང་། མཁལ་མ་དང་། སྙིང་དང་། ལྟོ་དང་། གློ་བ་དང་། ཕྱི་ས་དང་། གཅིན་དང་། ལྒང་པ་དང་། ཕོ་བ་དང་། ལོང་ཀ་དང་། ཞག་དང་། ཆུ་སེར་དང་། རྣག་དང་། ཁྲག་དང་། མཁྲིས་པ་དང་། བད་ཀན་དང་། ངར་སྣབས་དང་། སྐྲ་དང་། ཁ་ [81a.3]སྤུ་དང་། སེན་མོ་དང་། སྤུ་དང་། པགས་པས་གཡོགས་པ་ཤིན་ཏུ་གྱུར་པ། མི་སྡུག་པ། མི་གཙང་བ་མང་པོ་ལ་བརྟེན་པའོ། །གཟུགས་གང་ཅི་ཡང་རུང་བ་དེ་དག་ཐམས་ཅད་ནི་འབྱུང་བ་ཆེན་པོ་བཞི་དང་། འབྱུང་བ་ཆེན་པོ་བཞི་རྒྱུར་བྱས་པ་ལས་མངོན་པར་འགྲུབ་ [81a.4]སྟེ། དེ་ཡང་ཕ་མ་ཕྲད་པའི་རྐྱེན་གྱིས་འགྲུབ་པར་འགྱུར་ཏེ། དེ་བས་ན་གཟུགས་ལེན་པའི་རྒྱུ་ཞེས་བཤད་དོ། །ཟླ་བ་འབྱོར་པ་ལུས་ཀྱི་སྲ་བ་ཉིད་གང་ཡིན་པ་དེ་ནི་སའི་ཁམས་སོ། །གཤེར་བ་ཉིད་གང་ཡིན་པ་དེ་ནི་ཆུའི་ཁམས་སོ། །དྲོ་བ་ཉིད་དང་། ཡོངས་སུ་སྨིན་པར་ [81a.5]བྱེད་པ་གང་ཡིན་པ་དེ་ནི་མེའི་ཁམས་སོ། །གཡོ་བ་ཉིད་དང་། བསྐུམ་པ་དང་། བརྐྱང་བ་ཉིད་གང་ཡིན་པ་དེ་ནི་རླུང་གི་ཁམས་སོ། །ལུས་དེའི་རབ་ཏུ་ཤེས་པ་དང་། རོའི་ཁམས་དང་། དྲིའི་ཁམས་དང་། སྒྲའི་ཁམས་དང་། རེག་བྱའི་ཁམས་དང་། དྲན་པ་གང་ [81a.6]ཡིན་པ་དེ་ནི་རྣམ་པར་ཤེས་པའི་ཁམས་ཞེས་བྱའོ། །དེ་ནས་བཅོམ་ལྡན་འདས་ལ་ཚོང་དཔོན་གཞོན་ནུ་ཟླ་བ་འབྱོར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འགུམ་པའི་དུས་ཀྱི་ཚེ་རྣམ་པར་ཤེས་པ་འདིས་གཟུགས་ཀྱི་ཁམས་ཇི་ལྟར་ཡོངས་སུ་གཏོང་བར་འགྱུར། [81a.7]ལུས་ལས་རྣམ་པར་ཤེས་པ་ཇི་ལྟར་འབྱུང་བར་འགྱུར། ལུས་ཡོངས་སུ་བཏང་ནས་འདི་སྙམ་དུ་འདི་ནི་བདག་གི་ཁོག་པ་ཡིན་ནོ་སྙམ་དུ་ཇི་ལྟར་འཚལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་འབྱོར་པ་འདིར་ལུས་འདི་གནས་པར་གྱུར་ནས། དུས་ལོག་ [81b] [81b.1]པར་གྱུར་པས། ཁམས་རྣམས་ཡོངས་སུ་གཏོང་བར་འགྱུར་ཏེ། དཔེར་ན་འོ་མ་དང་ཆུ་བསྲེས་ཏེ། ལྷན་ཅིག་ཏུ་བཞག་པ་མེ་དང་ཕྲད་ན། འོ་མ་ཡང་ལོགས་ཤིག་ཏུ་འགྱུར་ཞིང་། ཆུ་ཡང་ལོགས་ཤིག་ཏུ་འགྱུར་ཏེ། འོ་མའི་སྣུམ་གྱི་ཁམས་གང་ཡིན་པ་དེ་ཡང་གཟུགས་ [81b.2]ཅན་མ་ཡིན་ནོ། །ཟླ་བ་འབྱོར་པ་དེ་བཞིན་དུ་མི་ཤི་བའི་ཁོག་པ་ཡང་ལོགས་ཤིག་ཏུ་འགྱུར། ཁམས་རྣམས་ཀྱང་ལོགས་ཤིག་ཏུ་འགྱུར། རྣམ་པར་ཤེས་པ་ཡང་ལོགས་ཤིག་ཏུ་འགྱུར་ཏེ། རྣམ་པར་ཤེས་པ་དེ་ཡང་ཁམས་ཀྱི་རྟེན་ཡོངས་སུ་བླངས་ནས། ཆོས་ཀྱི་ཁམས་ [81b.3]ཡོངས་སུ་ལེན་ཏོ། །དྲན་པ་ནི་ཆོས་ཀྱི་ཁམས་དང་། འབྲེལ་བར་འགྱུར་ཏེ། དྲན་པ་ཆོས་ཀྱི་ཁམས་དང་འབྲེལ་བ་དང་། དགེ་བ་དང་མི་དགེ་བ་བླངས་ནས། འཇིག་རྟེན་ཕ་རོལ་དུ་འགྲོ་བར་འགྱུར་རོ། །དཔེར་ན་དགེ་བ་ཆེན་པོ་ཞེས་བྱ་བའི་སྨན་མར་དེ་ནི། སྨན་རོ་ཚ་བ་དང་། [81b.4]ཁ་བ་དང་། སྐྱུར་བ་དང་། ལན་ཚྭའི་རོ་དང་། བསྐ་བའི་རོའི་མཐུ་དང་། རྣམ་པར་སྨིན་པ་དུ་མ་བླངས་ནས་ལུས་ཀྱི་ནང་དུ་འགྲོའོ། །དགེ་བའི་སྨན་མར་གྱི་རོའི་མཐུ་དང་། རྣམ་པར་སྨིན་པ་དེ་ནང་དུ་སོང་བས་ལུས་ལ་ཁ་དོག་དང་། དྲི་དང་། རོ་སྐྱེད་པར་བྱེད་ཅིང་། དེ་མར་ [81b.5]གྱི་ཁམས་ཡོངས་སུ་བཏང་ནས་ལུས་ལ་འཕོ་བ་དེ་བཞིན་དུ། རྣམ་པར་ཤེས་པའི་ཁམས་འདིས་ཀྱང་ལུས་ཡོངས་སུ་བཏང་ནས། དགེ་བ་དང་མི་དགེ་བ་ཡོངས་སུ་བླངས་ཤིང་། ཆོས་ཀྱི་ཁམས་ཡོངས་སུ་བླངས་ནས། རྣམ་པར་ཤེས་པ་འཕོ་བར་འགྱུར་ཏེ། མར་གྱི་ [81b.6]ཁམས་གང་ཡིན་པ་དེ་ལུས་ལྟ་བུའོ། །སྨན་རྣམས་ཕྲད་པ་གང་ཡིན་པ་དེ་ནི་དབང་པོ་རྣམས་ཕྲད་པ་ལྟ་བུའོ། །སྨན་རྣམས་ཀྱི་ཁ་དོག་དང་། དྲི་དང་། རོ་དང་། རེག་བྱ་གང་ཡིན་པ་དེ་ནི་རྣམ་པར་ཤེས་པ་ལྟ་བུའོ། །འཕོ་བ་གང་ཡིན་པ་དེ་ནི་ཤི་འཕོས་པའི་རྣམ་པར་ཤེས་ [81b.7]པ་འཕོ་བ་ལྟ་བུར་བལྟ་བར་བྱའོ། །མིའི་ཁ་དོག་རྒྱས་པ་དང་། མདོག་བཟང་ཞིང་བདེ་བར་སྨིན་པ་གང་ཡིན་པ་དེ་ནི་དགེ་བ་ལྟ་བུར་བསྟན་ཏོ། །དགེ་བ་ཆེན་པོའི་སྨན་མར་དེས་མདོག་ངན་ཅིང་སྐྱ་བོར་གྱུར་པ་གང་ཡིན་པ་དེ་ནི་མི་དགེ་བ་ལྟ་བུར་བསྟན་ཏོ། །དགེ་བ་ཆེན་པོའི་སྨན་ [82a] [82a.1]མར་རིན་པོ་ཆེ་ཇི་ལྟ་བ་དེ་བཞིན་དུ་ནི་རྣམ་པར་ཤེས་པའི་ཁམས་བལྟ་བར་བྱའོ། །ཇི་ལྟར་དགེ་བ་ཆེན་པོའི་སྨན་མར་གྱིས་སྨན་རྣམས་ཀྱི་ཁ་དོག་འཇུག་པར་བྱེད་ཅིང་། རོ་དང་། དྲི་འཇུག་པར་བྱེད་ཀྱང་། མར་དེ་ལ་རྐང་ལག་དང་མིག་མེད་པ་དེ་བཞིན་དུ། [82a.2]རྣམ་པར་ཤེས་པའི་ཁམས་འདིས་ཀྱང་ལུས་ཡོངས་སུ་བཏང་ཞིང་། ཁམས་རྣམས་བོར་ནས་ཆོས་ཀྱི་ཁམས་ཡོངས་སུ་ལེན་ཅིང་། ཚོར་བ་ཡོངས་སུ་ལེན་ཏེ། དགེ་བ་དང་མི་དགེ་བ་ཡོངས་སུ་ལེན་ཏོ། །ཟླ་བ་འབྱོར་པ་མི་ཤི་འཕོས་པ་དེས་ཀྱང་ལྷའི་དྲན་པ་ཐོབ་པར་འགྱུར་ཏེ། [82a.3]འདོད་པ་ན་སྤྱོད་པ་དྲུག་གི་ལྷ་རྣམས་མཐོང་ངོ་། །སེམས་ཅན་དམྱལ་བ་བཅུ་དྲུག་ཀྱང་མཐོང་ངོ་། །བདག་ཉིད་ཀྱི་ལུས་རྐང་ལག་མཉམ་པ་ཡང་མཐོང་སྟེ། དེ་འདི་སྙམ་དུ། འདི་ནི་བདག་གི་ཁོག་པ་ཡིན་ནོ་སྙམ་དུ་ཡང་ཤེས་སོ། །དེའི་འཆི་བའི་དུས་ཀྱི་ཚེའི་དྲན་པས་ལྷའི་ [82a.4]ལྟས་ཁང་པ་བརྩེགས་པ་རྣམ་པར་བཀྲ་ཞིང་། ཤིང་གེལ་པ་དང་། འཁྲི་ཤིང་དང་། ལྡུམ་བུ་སྣ་ཚོགས་ཀྱིས་ཀུན་ནས་བསྐོར་བ། གསེར་བཙོ་མ་སར་པའི་མདོག་ལྟར་སྤ་བ། སྤྲས་པ་རྣམ་པར་དབྱེ་བ་བྱས་པ་དག་མཐོང་ངོ་། །དེས་ལྟས་དེ་མཐོང་ནས། མཆོག་ཏུ་ [82a.5]དགའ་བ་སྐྱེས་ཏེ། དེ་དགའ་བ་སྐྱེས་པ་དེས་བདེ་བའི་རྣམ་པར་སྨིན་པའི་འཆི་བའི་དུས་ཀྱི་ཆོས་དང་ལྡན་པར་འགྱུར་རོ། །དེའི་རྣམ་པར་ཤེས་པ་དེ་ནི་རྟ་ལ་ཞོན་པ་དང་འདྲ་བར་བལྟ་སྟེ། དཔེར་ན་གཡུལ་ངོར་ཆས་པ་ན། དམག་མིའི་ནང་ན་མི་ཅི་ལ་མ་རེག་པར་ཆས་པ་སྒ་ལས་ [82a.6]བཟུང་སྟེ། མྱུར་བ་མྱུར་བར་ཞོན་པར་བྱེད་པ་དེ་བཞིན་དུ། རྣམ་པར་ཤེས་པའི་ཁམས་འདི་ཡང་དགེ་བ་ལ་དམིགས་པ་དང་འབྲེལ་ཞིང་། དབུགས་རྒྱུ་བ་རྒོད་པས་ཆོས་ཀྱི་ཁམས་ཡོངས་སུ་བླངས་ཤིང་སྐྱེ་མཆེད་འགགས་ཏེ། ལུས་བོར་ནས་ལྷའི་གནས་འོག་མིན་མན་ [82a.7]ཆད་ཚངས་པའི་བར་དུ་ཡོངས་སུ་ལེན་པར་འགྱུར་རོ།། །།བམ་པོ་གཉིས་པ་སྟེ་ཐ་མ། དེ་ནས་སྨན་ཆེན་གྱིས་བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྣམ་པར་ཤེས་པ་ལུས་ལས་འཕོ་བ་དེའི་རང་བཞིན་ [82b] [82b.1]ཇི་ལྟ་བུ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་ད་ལྟར་ཁྱོད་ཀྱིས་ང་ལ་ཇི་སྐད་བསྐུལ་བ་དེ་ནི་དེ་བཞིན་ཏེ། ལེགས་སོ་ལེགས་སོ། །དྲི་བ་འདི་ནི་མཆོག་ཏུ་ཟབ་པོ། །དྲི་བ་འདི་ནི་དེ་བཞིན་གཤེགས་པས་བསྟན་པར་བྱ་བ་ཡིན་ཏེ། རྣམ་པར་ [82b.2]ཤེས་པ་དེ་སྟོན་པ་དེ་ནི་དེ་བཞིན་གཤེགས་པ་མ་གཏོགས་པར་གཞན་མེད་དོ། །དེ་ནས་བཅོམ་ལྡན་འདས་ལ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོའི་བུ་གཞོན་ནུ་སྨན་ཆེན་ནི་ཟབ་མོའི་ཞུ་བ་ཞུ་བ་ལ་མཁས་པ་ལགས་ཏེ་བློ་ཞིབ་ཅིང་མཛངས་ལ་ [82b.3]མཁས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེ་བཞིན་ཏེ། རྒྱལ་པོའི་བུ་གཞོན་ནུ་སྨན་ཆེན་འདི་ནི་བཅོམ་ལྡན་འདས་རྣམ་པར་གཟིགས་ལ་དགེ་བའི་རྩ་བ་བསྐྱེད་པ་ཡིན་ནོ། །བཟང་སྐྱོང་རྒྱལ་པོའི་བུ་གཞོན་ནུ་སྨན་ཆེན་འདི་ནི་ཚེ་རབས་ [82b.4]ལྔ་བརྒྱའི་བར་དུ་གཞན་མུ་སྟེགས་ཅན་དུ་གྱུར་ནས་དེ་འདི་སྙམ་དུ་རྟོག་སྟེ། རྣམ་པར་ཤེས་པའི་ཁམས་འདི་ཅི་ཡིན། རྣམ་པར་ཤེས་པའི་ཁམས་འདི་སུའི་ཡིན། རྣམ་པར་ཤེས་པའི་ཁམས་འདི་ཇི་ལྟ་བུ་ཞིག་ཡིན་སྙམ་མོ། །བཟང་སྐྱོང་འོན་ཀྱང་རྣམ་པར་ཤེས་པའི་ [82b.5]འགྲོ་བ་དང་འོང་བ་ཁོང་དུ་མ་ཆུད་དེ་ངས་འདིའི་ཐེ་ཚོམ་བསལ་བར་བྱའོ། །དེ་ནས་ཚོང་དཔོན་བཟང་སྐྱོང་གིས་སྨན་ཆེན་ལ་འདི་སྐད་ཅེས་སྨྲས་སོ། །སྨན་ཆེན་ལེགས་སོ་ལེགས་སོ། །ཁྱོད་ནི་ཤེས་རབ་རྒྱ་ཆེ་ཞིང་ཡངས་ལ་ཆོས་ཟབ་མོ་ཞུ་བ་ལ་མཁས་སོ། །སྨན་ཆེན་ [82b.6]བཅོམ་ལྡན་འདས་ཡེ་ཤེས་ལ་འཇུག་པ་བློ་དག་པའི་རྩ་བར་གྱུར་པ་ལ་སྐུལ་ཅིག །ཟླ་བ་འབྱོར་པ་འདི་ནི་བྱིས་པ་སྟེ། ཡུལ་ལ་སྲེད་པས་བཅོམ་ལྡན་འདས་དེ་བཞིན་གཤེགས་པ་ལ་ལན་འགའ་ཡང་མ་བསྐུལ་བསྐུལ་བར་མ་བྱས་སོ། །དེ་བཞིན་གཤེགས་པ་འབྱུང་བ་ནི་རྙེད་པར་དཀའ་ [82b.7]ལ་དམ་པའི་ཆོས་དང་ཕྲད་པ་ཡང་ཤིན་ཏུ་རྙེད་པར་དཀས། བཅོམ་ལྡན་འདས་ཀྱི་ཟབ་པ་ཟབ་པའི་གནས་རྣམས་བཅོམ་ལྡན་འདས་ལ་སྐུལ་ཅིག །དེ་ནས་སྨན་ཆེན་གྱིས་བཅོམ་ལྡན་འདས་ཀྱི་ཞལ་སྟོན་ཀའི་དུས་ཀྱི་མེ་ཏོག་པད་མའི་ཚལ་ལྟར་རྒྱས་པ་མཐོང་ངོ་། །མཐོང་ [83a] [83a.1]ནས་ཀྱང་སྨན་ཆེན་དད་པ་སྐྱེས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཆོས་འཚལ་བ་ལགས་ན་བདེ་བར་གཤེགས་པས་བདག་ལ་ཆོས་བསྟན་དུ་གསོལ། བསྐལ་པའི་མཐར་མ་ཐུག་པར་ཡོངས་སུ་མྱ་ངན་ལས་འདས་ [83a.2]པར་གཤེགས་པ་ཞིག་ཏུ་གྱུར་ན། དེའི་སླད་ན་སེམས་ཅན་འདི་དག་གིས་ལས་དགེ་བ་དང་མི་དགེ་བ་རྣམས་ཀྱི་རྣམ་པར་སྨིན་པ་མ་འཚལ་ཏེ། འཁོར་བ་ན་ཡོངས་སུ་འཁྱམ་པར་འགྱུར་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་ངས་ཚིགས་སུ་བཅད་ [83a.3]པ་ཕྱེད་ཀྱི་དོན་གྱི་ཕྱིར་ཡང་བྲག་གི་རྩེ་མོ་ནས་རང་གི་ལུས་བོར་ཏེ་དཀའ་བ་རྣམ་པ་བརྒྱ་སྟོང་དུ་མ་ཉམས་སུ་མྱོང་ངོ་། །སྨན་ཆེན་ཁྱོད་ཅི་དང་ཅི་འདོད་པ་དྲིས་ཤིག་དང་ངས་ཁྱོད་ལ་ལན་གདབ་བོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་ [83a.4]གསོལ་ཏོ། །བཅོམ་ལྡན་འདས་རྣམ་པར་ཤེས་པ་འདིའི་རང་བཞིན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་སྒྱུ་མ་མཁན་གྱི་མིའི་རང་བཞིན་གང་ཡིན་པ་དང་། མིའི་གྲིབ་མ་ཆུའི་ནང་དུ་འབྱུང་བ་གསལ་བ་མ་ཡིན་ཞིང་མི་གསལ་བའི་རང་བཞིན་གང་ [83a.5]ཡིན་པ་དང་། མིག་དང་ནམ་མཁའི་རང་བཞིན་གང་ཡིན་པ་དང་། སྲེད་པའི་རང་བཞིན་གང་ཡིན་པ་བཞིན་ནོ། །སྨན་ཆེན་གྱིས་གསོལ་པ། བཅོམ་ལྡན་འདས་སྲེད་པའི་རང་བཞིན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། སྙིང་དུ་སྡུག་པའི་མི་ [83a.6]མཐོང་བ་ན་མིག་གི་དབང་པོ་འཕོ་བ་དང་། ཇི་ལྟར་མིས་མེ་ལོང་ལ་རང་གི་བཞིན་གྱི་གཟུགས་བརྙན་མཐོང་ལ། མེ་ལོང་གུད་དུ་ཕྱུང་ན་རང་གི་བཞིན་གྱི་གཟུགས་བརྙན་མི་མཐོང་བ་དེ་བཞིན་དུ་རྣམ་པར་ཤེས་པའི་ཁམས་འདི་འཕོས་ན་རང་གི་བསོད་ནམས་དང་། བསོད་ནམས་མ་ [83a.7]ཡིན་པ་རྣམ་པར་ཤེས་པའི་ཁམས་དེས་མཐོང་ངོ་། །དཔེར་ན་མི་དམུས་ལོང་གིས་ཉི་མ་འཆར་བ་འམ། ཉི་མ་གུང་ན་འདུག་པ་ཡང་མི་མཐོང་ལ། མཚན་མོ་ཡང་ཟླ་བ་འཆར་བ་དང་ནུབ་པ་མི་མཐོང་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་ལུས་ལ་མི་སྣང་ངོ་། [83b] [83b.1]སྨན་ཆེན་འོན་ཀྱང་ལུས་ལ་སྲེད་པ་དང་། ཚོར་བ་དང་། འདུ་ཤེས་དང་། རབ་ཏུ་ཤེས་པ་གང་ཡིན་པ་དེ་ནི་རྣམ་པར་ཤེས་པའི་ཁམས་ཡིན་ཏེ། དེ་ཡང་ལུས་འདིའི་ཁམས་རྣམས་དང་། སྐྱེ་མཆེད་རྣམས་དང་། ཕུང་པོ་རྣམས་ཕྲད་པར་བྱེད་པ་ཡིན་ནོ། །དེ་ལ་གཟུགས་ [83b.2]ཅན་གྱི་དངོས་པོ་གང་ཡིན་པ་ནི་འདི་ལྟ་སྟེ། མིག་དང་། རྣ་བ་དང་། སྣ་དང་། རོ་དང་། སྒྲ་རྣམས་སོ། །ཚོར་བ་དང་། སྡུག་བསྔལ་དང་། བདེ་བ་དང་། ཡིད་རྣམས་ནི་གཟུགས་ཅན་མ་ཡིན་པའི་དངོས་པོ་སྟེ། དེ་ནི་རྣམ་པར་ཤེས་པའི་ཁམས་ཡིན་ནོ། །སྨན་ [83b.3]ཆེན་ཇི་ལྟར་མིའི་ལྕེའི་ཐོར་ཏོས་རོ་ཁ་བ་དང་། ཚ་བ་དང་། སྐྱུར་བ་དང་། མངར་བ་དང་། ལན་ཚྭའི་རོ་དང་། བསྐ་བ་ཚོར་ཏེ། དེའི་ལྕེ་དེ་ཡང་གཟུགས་ཅན་ཡིན་ལ་རོའི་དངོས་པོ་ཡང་གཟུགས་ཅན་ཡིན་ནོ། །དེ་བཞིན་དུ་ལུས་འདི་ལ་ཡང་རུས་པ་དང་། རྐང་དང་། [83b.4]ཤ་དང་། ཁྲག་ནི་གཟུགས་ཅན་ཡིན་ལ། ཚོར་བ་གང་ཡིན་པ་དེ་ནི་གཟུགས་ཅན་མ་ཡིན་ཏེ། གང་གིས་རྣམ་པར་སྨིན་པ་དང་། བསོད་ནམས་དང་། བསོད་ནམས་མ་ཡིན་པ་མྱོང་བ་དེ་ནི་རྣམ་པར་ཤེས་པའོ། །དེ་ནས་བཟང་སྐྱོང་གིས་བཅོམ་ལྡན་འདས་ཀྱི་ཞབས་ [83b.5]ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བསོད་ནམས་དང་། བསོད་ནམས་མ་ལགས་པ་མྱོང་བ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེའི་ཕྱིར་ཉོན་ཅིག །བདེན་པ་མ་མཐོང་བས་ནི་རྣམ་ [83b.6]པར་ཤེས་པ་འདི་མི་མཐོང་སྟེ། དེ་ནི་ལག་མཐིལ་དུ་སྐྱུ་རུ་ར་བཞག་པ་བཞིན་དུ་མཐོང་བར་མི་འགྱུར་རོ། །དེ་ནི་མིག་ལ་ཡང་མི་གནས་ཏེ། མིག་ལས་ཀྱང་སྐྱེ་བ་མཐོང་བར་ཡང་མི་འགྱུར་རོ། །བཟང་སྐྱོང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་དག་གིས་རྣམ་པར་ [83b.7]ཤེས་པའི་ཁམས་འདི་ཇི་ལྟར་གཟིགས་པ་དེ་བཞིན་དུ་ངས་ཀྱང་གཟུགས་ཅན་མ་ཡིན་པར་ཐུགས་སུ་ཆུད་དེ། འོན་ཀྱང་བྱིས་པ་རྣམས་ཀྱིས་མི་ཤེས་པའི་ཕྱིར་རྣམ་པར་ཤེས་པའི་ཁམས་འདི་དཔེས་བསྟན་ཏོ། །བཟང་སྐྱོང་འདི་ན་རྣམ་པར་ཤེས་པའི་ཁམས་འདིས་བསོད་ནམས་ [84a] [84a.1]དང་། བསོད་ནམས་མ་ཡིན་པ་ཇི་ལྟ་བ་བཞིན་དུ་རིག་སྟེ། དཔེར་ན་མི་ལ་ལ་སྐེམ་བྱེད་དམ། བརྗེད་བྱེད་དམ། དྲི་ཟའི་གདོན་ནམ། ལྷའི་གདོན་གྱིས་ཟིན་པར་གྱུར་ན་བཟང་སྐྱོང་འདི་ཇི་སྙམ་དུ་སེམས། ཅི་མི་དེའི་ཁོང་ན་འདུག་པའི་སྐེམ་བྱེད་དམ། དྲི་ཟ་ [84a.2]འམ། ལྷ་དེ་སྣང་ངམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །མི་དེའི་ནའང་མ་སླད་རོལ་ན་ཡང་གདོན་མི་གདའ་སྟེ། གདོན་དེ་དག་ནི་གཟུགས་མ་མཆིས་པ་ལགས་སོ། །བཟང་སྐྱོང་དཔེར་ན་ལྷའི་གདོན་ཆེན་པོས་མེ་ཏོག་ཤིན་ཏུ་དྲི་ཞིམ་པ་དང་། སྤོས་དང་། [84a.3]བདུག་པ་དང་། མེ་ཏོག་ཕྲེང་བྱིན་པ་ལེན་པ་དེ་བཞིན་དུ་རྣམ་པར་ཤེས་པའི་ཁམས་བསོད་ནམས་དང་ལྡན་པས་ཀྱང་ལུས་བླངས་ནས་རྒྱལ་སྲིད་ཀྱི་དབང་ཕྱུག་གམ། ཚོང་དཔོན་ཉིད་དམ། ལྷ་ཉིད་བྱེད་དུ་འཇུག་སྟེ། དེ་ལྟར་ན་རྣམ་པར་ཤེས་པའི་ཁམས་འདི་ནི་བསོད་ནམས་མྱོང་ [84a.4]བ་ཡིན་ནོ། །ཇི་ལྟར་ལྷའི་གདོན་དེ་ལྷའི་མེ་ཏོག་ཕྲེང་བྱིན་པས་རངས་པར་འགྱུར་ཞིང་མི་དེའི་ལུས་ཀྱང་ཚིམ་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་རྒྱལ་སྲིད་ཀྱི་དབང་ཕྱུག་ཉིད་ལ་དགའ་བར་འགྱུར་ཞིང་ལུས་དེ་ཡང་ཚིམ་པར་འགྱུར་ཏེ། དེ་ལྟར་ན་རྣམ་ [84a.5]པར་ཤེས་པ་འདི་ནི་བསོད་ནམས་མྱོང་བ་ཡིན་ནོ། །བཟང་སྐྱོང་དཔེར་ན་སྲུལ་པོའི་གདོན་མི་སྡུག་ཅིང་གཟུགས་མི་སྣང་བ་མིའི་ལུས་ལ་གནས་ཏེ་མི་གཙང་བ་དང་། རུལ་པ་དང་། ལྗན་ལྗིན་དང་། གཏོར་ཁུང་ནས་འབབ་པ་དང་། གཏོར་མ་འདོད་ཅིང་དེ་ཡང་གཏོར་མ་དེས་ [84a.6]དགའ་བར་འགྱུར་ལ། མི་དེ་ཡང་གདོན་གྱི་དབང་གིས་དྲི་ང་ཞིང་མི་གཙང་བ་ལས་བྱུང་བའི་ཁ་ཟས་བཙོག་པ་དག་ལ་ཆགས་ཤིང་དགའ་བར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་བསོད་ནམས་མ་ཡིན་པར་ཉེ་བར་འགྲོ་བའི་ལས་ཀྱིས་སྐྱེ་གནས་ངན་པ་བསྐྱེད་དེ། [84a.7]དབུལ་པོའམ། {ཡི་དགས་,ཡི་དྭགས་}ངན་པ་འམ། ལྗན་ལྗིན་ཟ་བ་དག་ལ་ཆགས་ཤིང་དགའ་བར་འགྱུར་ཏེ། དེ་ལྟར་ན་རྣམ་པར་ཤེས་པའི་ཁམས་འདི་ནི་བསོད་ནམས་མ་ཡིན་པ་མྱོང་བ་ཡང་ཡིན་ནོ། །དཔེར་ན་ལྷའི་གདོན་ཆེན་པོ་གཟུགས་མེད་པ་དེ་ལྷའི་ལོངས་སྤྱོད་ལེན་པ་དེ་བཞིན་དུ་ [84b] [84b.1]རྣམ་པར་ཤེས་པའི་ཁམས་གཟུགས་ཅན་མ་ཡིན་པ་འདི་ཡང་བསོད་ནམས་གཟུགས་ཅན་མ་ཡིན་པས་ཡོངས་སུ་བཟུང་ནས་ལྷའི་ལུས་རྣམས་སྐྱེད་པར་བྱེད་དོ། །དཔེར་ན་སྲུལ་པོའི་གདོན་གཟུགས་མེད་པ་མི་ལ་གནས་ཤིང་ཕྱི་ས་དང་། ལྗན་ལྗིན་ཟ་བར་བྱེད་པ་དེ་བཞིན་དུ་རྣམ་པར་ [84b.2]ཤེས་པའི་ཁམས་འདི་ཡང་བསོད་ནམས་མ་ཡིན་པར་ཉེ་བར་འགྲོ་བའི་ལས་རྣམས་ཀྱིས་སྐྱེ་གནས་ངན་པར་སྐྱེ་བར་འགྱུར་ཏེ། དེ་ལྟར་ན་རྣམ་པར་ཤེས་པའི་ཁམས་འདི་ནི་བསོད་ནམས་མ་ཡིན་པར་ཉེ་བར་འགྲོ་བར་ཡང་བལྟའོ། །བཟང་སྐྱོང་དེ་བས་ན་ཁྱོད་ཀྱིས་གདོན་གང་ [84b.3]ཡིན་པ་དེ་ནི་གཟུགས་མེད་པའི་ཕྱིར་རྣམ་པར་ཤེས་པའི་ཁམས་ལྟ་བུར་བལྟའོ། །གདོན་གྱི་ལོངས་སྤྱོད་བཟང་པོ་དང་ངན་པ་གང་ཡིན་པ་དེ་དག་ནི་དགེ་བ་དང་མི་དགེ་བ་ལྟ་བུར་བལྟའོ། །མི་གང་ཡིན་པ་དེ་ནི་ལུས་ལྟ་བུར་བལྟའོ། །དེ་ནས་བཅོམ་ལྡན་འདས་ལ་སྨན་ཆེན་གྱིས་ [84b.4]འདི་སྐད་ཅེས་གསོལ་ཏོ། །བཅོམ་ལྡན་འདས་ལུས་འདི་ལེན་པའི་རྒྱུ་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འདི་ནི་ཕན་ཚུན་གྱི་རྐྱེན་གྱིས་འདོད་པ་ལེན་པར་བྱེད་དེ། དཔེར་ན་གཙུབ་སྟན་ལས་ཀྱང་བརྟེན། གཙུབ་ཤིང་ལས་ཀྱང་བརྟེན། དེ་སྐྱེད་ [84b.5]པ་མིའི་རྩོལ་བ་ལས་ཀྱང་བརྟེན་ཏེ་མེ་འགྲུབ་པར་འགྱུར་བ་དེ་བཞིན་དུ་ལུས་འདི་ལེན་པའི་རྒྱུ་སྐྱེས་པ་དང་བུད་མེད་ཀྱི་རྐྱེན་གྱིས་སྒྲ་དང་རེག་པ་དང་། རོ་དང་། གཟུགས་ལ་སོགས་པའི་འདོད་པ་འགྲུབ་པར་འགྱུར་རོ། །དཔེར་ན་མེ་ཏོག་ལས་འབྲས་བུ་འགྲུབ་པར་འགྱུར་ཏེ། འོན་ཀྱང་ [84b.6]མེ་ཏོག་དེ་ལ་ཡང་འབྲས་བུ་མི་དམིགས་ལ་འབྲས་བུ་གྲུབ་པ་ལ་ཡང་མེ་ཏོག་མི་དམིགས་པ་དེ་བཞིན་དུ་ལུས་འདི་ལས་རྣམ་པར་ཤེས་པ་འབྱུང་སྟེ། འོན་ཀྱང་ལུས་དེ་ལ་ཡང་རྣམ་པར་ཤེས་པ་མི་སྣང་ལ་རྣམ་པར་ཤེས་པ་ལྡོག་པས་ཀྱང་ལུས་ཀྱི་རུས་པ་དང་། རྐང་དང་། མེར་ [84b.7]མེར་པོ་དང་། མི་གཙང་བ་རྣམས་རྣམ་པར་འཇིག་པར་འགྱུར་རོ། །དཔེར་ན་ས་བོན་དེ་མེ་ཏོག་གི་ཁ་དོག་དང་། དྲི་དང་། རོ་འདེབས་པ་དེ་བཞིན་དུ་རྣམ་པར་ཤེས་པའི་ཁམས་འདིས་ཀྱང་ལུས་ཡོངས་སུ་བཏང་ནས་དགེ་བ་དང་མི་དགེ་བ་བཏབ་ཅིང་ཚོར་བ་དང་། འདུ་ [85a] [85a.1]ཤེས་དང་། ཡིད་ལ་བྱེད་པ་ཡང་བཏབ་ནས་འཇིག་རྟེན་ཕ་རོལ་ཏུ་འགྲོའོ། །དཔེར་ན་སྐྱེས་པ་དང་བུད་མེད་གཉིས་ཀྱི་དབང་པོ་གཉིས་ཕྲད་ན་དགའ་བས་བརླན་ཏེ་བུད་མེད་ལ་ཤིན་ཏུ་དམ་པོར་འཁྱུད་ནས་ཉོན་མོངས་པ་འབྱིན་པར་བྱེད་དེ། དེ་གཉིས་ཀྱི་ཉོན་མོངས་ [85a.2]པ་མེད་པར་གྱུར་ན་ཡང་འབྲལ་བར་འགྱུར་རོ། །དེ་གཉིས་ལ་འདོད་པ་དང་ལྡན་པའི་བདེ་བ་འབྱུང་བར་འགྱུར་ཏེ། དེར་ཉོན་མོངས་པ་ཕྱུང་ནས་འདོད་ཆགས་མེད་པར་འགྱུར་ཏེ། ཡང་གཅིག་ལ་གཅིག་འདོད་ཆགས་དང་བྲལ་བར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་ [85a.3]འདིས་ལུས་དང་ཕྲད་པ་རྙེད་ནས་དགའ་བ་སྐྱེད་ནས་ཆགས་པ་འཕེལ་བར་བྱེད་དོ། །དཔེར་ན་ལུས་ཀྱི་རྐྱེན་གྱིས་བུད་མེད་ཀྱི་གཟུགས་མཐོང་ན་སྐྱེས་པའི་འདོད་ཆགས་སྐྱེད་ལ། ཡང་ཕྲད་པ་ལས་བྲལ་ན་ཕྱིར་ལྡོག་པར་འགྱུར་བ་དེ་བཞིན་དུ་རྣམ་པར་ཤེས་པའི་ཁམས་འདིས་ལུས་ [85a.4]ཡོངས་སུ་བླངས་ནས་ཡང་བོར་ཏེ་གཞན་དུ་འགྱུར་བ་མེད་པར་འགྱུར་རོ། །འདི་ལ་ཕ་མ་ཕྲད་པ་དང་། དྲི་ཟ་ཉེ་བར་གནས་པ་དང་། ལས་ལ་དམིགས་པའི་དངོས་པོ་ལས་རྣམ་པར་ཤེས་པས་ལུས་འགྲུབ་པར་བྱེད་དེ། ལས་དེ་དག་ཀྱང་གཟུགས་ཅན་མ་ཡིན་ལ་སྐྱེས་པ་དང་བུད་མེད་ [85a.5]ཀྱི་རྐྱེན་གྱི་ངོ་བོ་དེ་ཡང་གཟུགས་ཅན་མ་ཡིན་ནོ། །ལེན་པའི་རྐྱེན་ལས་འདོད་པ་འབྱུང་སྟེ། དེ་བས་ན་འདོད་པའི་ལེན་པ་ཞེས་བྱའོ། །གཟུགས་ཀྱིས་འདོད་པ་ལེན་པས་ན་དེའི་ཕྱིར་ཡང་འདོད་པའི་ལེན་པ་ཞེས་བྱའོ། །སྨན་ཆེན་གཞན་ཡང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་ [85a.6]པའི་ལེན་པ་དེ་གང་ཞེ་ན། འདི་ལ་ཚུལ་ཁྲིམས་ནི་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། {བརྫུན་,རྫུན་}དུ་སྨྲ་བ་དང་། འབྲུའི་ཆང་དང་། སྦྱར་བའི་ཆང་མྱོས་པར་བྱེད་པ་བག་མེད་པའི་གནས་སྤོང་བའོ། །དེ་མཆོག་ཏུ་འཛིན་པ་ནི་རྒྱུན་ཏུ་ [85a.7]ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུའོ། །དེའི་ལེན་པ་ནི་སྲིད་པ་སྟེ། ལྷ་དང་མིར་སྐྱེ་ཞིང་སྐྱེ་བ་ཡོངས་སུ་འཛིན་པ་སྐྱེད་པ་སྟེ། དེ་ནི་ཟག་པ་དང་བཅས་པ་དང་། ཟག་པ་མེད་པའི་དགེ་བ་ཡོངས་སུ་སྨིན་པར་བྱེད་དོ། །ཕུང་པོ་རྣམས་ཀྱི་ས་བོན་ཡང་རླན་པར་ [85b] [85b.1]བྱེད་དོ། །ལས་དགེ་བ་དང་མི་དགེ་བ་རྣམས་ཀྱང་སྡུད་པར་བྱེད་དོ། །རྣམ་པར་ཤེས་པ་ཡང་སྦྱོང་བར་བྱེད་དོ། །ཉོན་མོངས་པ་བླངས་པ་རྣམས་ཀྱང་སྲེག་པར་བྱེད་དེ། དེ་བས་ན་འདི་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལེན་པ་ཞེས་བྱའོ། །དེ་སྐད་ཅེས་བཀའ་ [85b.2]སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པ་འདིས་ཇི་ལྟར་ལྷའི་ནང་དུ་ལུས་ཡོངས་སུ་ལེན་པ་ལགས། སེམས་ཅན་དམྱལ་བ་རྣམས་སུ་ཇི་ལྟར་ལེན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། [85b.3]སྨན་ཆེན་དེའི་ཕྱིར་ཉོན་ཅིག །འདི་ལ་རྣམ་པར་ཤེས་པའི་ཁམས་འདིས་ཆོས་ཀྱི་ཁམས་ཡོངས་སུ་བླངས་ནས་ལྷའི་ལྟ་བ་སྐྱེད་དེ། དེའི་ལྟ་བ་དེ་ཡང་ཤའི་མིག་ལ་རྟེན་པ་མ་ཡིན་ནོ། །དེའི་ལྟ་བས་མཐོང་བ་གང་ཡིན་པ་དེ་ནི་ལེན་པ་ཞེས་བྱ་སྟེ། དེ་བས་ན་ལྟ་བའི་ལེན་པ་ [85b.4]ཞེས་བྱའོ། །དེའི་ལྷའི་ལྟ་བ་བསོད་ནམས་ལ་དམིགས་པ་དང་མཚུངས་པར་ལྡན་པ་དེས་འདོད་པ་ན་སྤྱོད་པའི་ལྷ་རྣམས་ཀྱི་ནང་དུ་ལྷའི་གནས་མཐོང་སྟེ། དེར་ལྷ་རྣམས་ལྷའི་རྩེ་བ་དག་གིས་རྩེ་བ་མཐོང་ནས་དེ་དེར་ཆགས་པ་སྐྱེའོ། །འདི་སྙམ་དུ་ཡང་སེམས་ཏེ། བདག་ནི་ [85b.5]དེར་འགྲོའོ་སྙམ་མོ། །དེས་དེར་ཆགས་སུ་རུང་ཞིང་དྲན་པ་དང་ལྡན་པའི་སྲིད་པ་རབ་ཏུ་ཤེས་སོ། །དུར་ཁྲོད་ན་འདུག་པའི་ཁོག་པ་དེ་ཡང་དེས་མཐོང་ནས་འདི་སྙམ་དུ་སེམས་ཏེ། འདི་ནི་བདག་གི་དགེ་བའི་བཤེས་གཉེན་ཡིན་ཏེ། འདིས་བདག་ལྷ་རྣམས་ཀྱི་ནང་དུ་སྐྱེ་བ་ [85b.6]ཡོངས་སུ་ལེན་པ་གང་ཡིན་པའི་དགེ་བའི་རྩ་བ་བསགས་སོ་སྙམ་མོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པ་ཁོག་པ་དེ་ལ་ཆགས་ན་ཅིའི་སླད་དུ་མི་གནས། ཁོག་པ་དེ་ཉིད་ [85b.7]ལ་ཅིའི་སླད་དུ་མི་རྟེན། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དཔེར་ན་མི་ལ་ལའི་སྐྲ་དང་ཁ་སྤུ་བྲེགས་ཏེ། སྐྲ་དང་ཁ་སྤུ་དེ་མཐོང་ནས་མི་དེ་འདི་སྙམ་དུ་སེམས་ཏེ། སྐྲ་འདི་དག་ནི་དྲི་ཞིམ་ཞིང་གནག་པ་ཡིན་གྱི་འདི་དག་ནི་ཕྱིར་ཡང་མགོ་ལ་བསྐྱེད་པར་བྱའོ་སྙམ་ [86a] [86a.1]ན། སྨན་ཆེན་འདི་ཇི་སྙམ་དུ་སེམས། ཅི་སྐྲ་དེ་དག་ཕྱིར་སྐྱེ་བར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དེ་བཞིན་དུ་རྣམ་པར་ཤེས་པའི་ཁམས་འདིས་ཁོག་པ་བོར་ནས་ཕྱིར་ [86a.2]ཡང་ཁོག་པ་དེ་ཉིད་ལ་གནས་པ་འདི་ནི་གནས་མེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་ཡང་འདི་སྐད་ཅེས་གསོལ་ཏོ། །རྣམ་པར་ཤེས་པའི་ཁམས་ཆ་ཕྲ་ཞིང་མི་མངོན་པ་འདིས་གླང་པོ་ཆེའི་ལུས་བོང་ཆེན་པོ་ཇི་ལྟར་སྒྲུབ་པར་བགྱིད་ཅིང་རྡོ་རྗེ་ [86a.3]ལྟར་སྲ་བའི་ཁོག་པ་ཡང་ཇི་ལྟར་རྟོལ་བར་བགྱིད། གླང་པོ་ཆེ་དགུ་སྟོང་གི་སྟོབས་དང་ལྡན་པའི་མི་དང་གླང་པོ་ཆེའི་རྒྱལ་པོ་ཡང་ཇི་ལྟར་འཛིན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དཔེར་ན་རླུང་གི་ཁམས་གཟུགས་མེད་ཅིང་བསྟན་དུ་མེད་པ་རིའི་ཕྲག་ན་ [86a.4]གནས་པ་དེ་ཡང་རིའི་ཕྲག་དེ་ནས་བྱུང་སྟེ། རི་རབ་དང་འདྲ་ཞིང་མཚུངས་པའི་རིའི་རྩེ་མོ་སྙིལ་བར་བྱེད་ཅིང་འགྱེས་པར་བྱེད་ན། སྨན་ཆེན་འདི་ཇི་སྙམ་དུ་སེམས། རླུང་གི་ཁམས་ཀྱི་རང་བཞིན་ནི་ཇི་ལྟ་བུ། རི་དེའི་རང་བཞིན་ནི་ཇི་ལྟ་བུ། སྨན་ཆེན་གྱིས་གསོལ་པ། རླུང་གི་ཁམས་ [86a.5]ནི་སྙི་ཞིང་ལུས་མ་མཆིས་པར་བལྟ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དེ་དེ་བཞིན་ཏེ། ཇི་ལྟར་རླུང་གི་ཁམས་སྙི་ཞིང་ལུས་མེད་པ་དེ་བཞིན་དུ་རྣམ་པར་ཤེས་པ་འདི་ཡང་ཞན་ཅིང་ལུས་མེད་མོད་ཀྱི་ལུས་ཆེན་པོ་དག་དང་ཆུང་ངུ་དག་ཀྱང་སྐྱེད་པར་བྱེད་དེ། [86a.6]སྦྲང་བུའི་ཡང་རྣམ་པར་ཤེས་པ་དེ་ཉིད་ཡིན་ནོ། །གླང་པོ་ཆེའི་ཡང་དེ་ཉིད་ཡིན་ནོ། །དཔེར་ན་མར་མེའི་མེ་ལྕེ་ཆུང་ཡང་ར་བ་འམ། ཁང་པའི་ནང་གི་མུན་པ་ཆེན་པོ་སེལ་བར་བྱེད་པ་དེ་བཞིན་དུ་རྣམ་པར་ཤེས་པའི་ཁམས་འདིས་ཀྱང་ལས་ལེན་པའི་རྒྱུ་དེས་ན་གཟུགས་ཆུང་ངུ་དང་ཆེན་ [86a.7]པོ་རྣམས་འགྲུབ་པར་བྱེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལགས། དེ་གཟུགས་ཅན་ཞིག་ལགས་སམ། འོན་ཏེ་གཟུགས་མ་མཆིས་པ་ཞིག་ལགས། རང་བཞིན་ནི་ཇི་ལྟ་བུ་ལགས། [86b] [86b.1]རྐྱེན་ནི་ཇི་ལྟ་བུ་དག་ལས་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་འདི་ལ་ལས་རྣམས་ཀྱི་སྤྱོད་ཡུལ་ནི་ལྷའི་བདེ་བ་དག་དང་། འབྱོར་པ་དག་དང་། ལྷའི་ཁ་ཟས་འཐོབ་པ་ཡིན་ཏེ། དཔེར་ན་མི་དབུལ་པོ་གཉིས་ཤིག་འབྲོག་ཏུ་འཁྱམས་པ་ལས་དེར་གཅིག་ [86b.2]གིས་ནི་ཆུ་བསིལ་བ་རྙེད་ལ། གཅིག་ནི་སྐོམ་སྟེ་ཤི་ན་ཆུ་དེ་ལ་ལ་ཞིག་གིས་སྙིམ་པས་བཅུས་ཏེ་མི་དེ་ལ་བྱིན་པ་ཡང་མེད། ལ་ལ་ཞིག་གིས་མི་ཅིག་ཤོས་དེ་ལ་བཀག་པ་ཡང་མེད་ཀྱི་བསོད་ནམས་ཀྱི་མཐུ་འབའ་ཤིག་གིས་གཅིག་གིས་ནི་ཆུ་རྙེད་ལ་གཅིག་གིས་ནི་ཆུ་མ་རྙེད་པ་དེ་བཞིན་དུ་དགེ་ [86b.3]བ་དང་མི་དགེ་བའི་ཆོས་དེ་དག་བལྟ་བར་བྱའོ། །ཟླ་བ་ཡར་གྱི་ངོ་དང་མར་གྱི་ངོ་ཇི་ལྟ་བ་བཞིན་དུ་དགེ་བ་དང་མི་དགེ་བ་ཡང་དེ་བཞིན་དུ་བལྟ་བར་བྱའོ། །དཔེར་ན་ཤིང་ཐོག་རློན་པ་ཡོངས་སུ་སྨིན་པ་ན་ཁ་དོག་གཞན་དུ་འགྱུར་ཏེ། ཁ་དོག་དེ་དང་ཡོངས་སུ་སྨིན་པ་ཡང་མེའི་ཁམས་ [86b.4]ཀྱི་དབང་གིས་འགྱུར་རོ། །དེ་བཞིན་དུ་ལུས་འདི་ཡང་བསོད་ནམས་ཀྱི་དབང་གིས་ཚོང་དཔོན་གྱི་ཁྱིམ་ནོར་དང་གསེར་འབྱོར་པ་དག་ཏུ་རྒྱན་ཉེ་བར་སྟོན་ཏོ། །ལྷའི་གནས་དག་ཏུ་ལྷའི་རྒྱན་དག་ཉེ་བར་སྟོན་ཏེ། དབང་ཕྱུག་གི་རྒྱན་གང་ཡིན་པ་དེ་ནི་བསོད་ནམས་ཀྱི་དཔེར་བསྟན་ཏོ། །དཔེར་ [86b.5]ན་ས་བོན་ས་ལ་བཏབ་ན་ཤིང་གི་རྩེ་མོར་སྣང་བར་འགྱུར་ལ། ས་བོན་དེ་ཡང་སྡོང་བུ་ནས་སྡོང་བུའི་རྩེ་མོར་འཕོ་བ་མེད་ཅིང་ཤིང་གི་ནང་ན་ཡང་ས་བོན་དེ་མི་དམིགས་ལ། མི་ལ་ལ་ཞིག་གིས་ལག་པ་གཉིས་ཀྱིས་ས་བོན་བླངས་ཏེ་ཤིང་གི་རྩེ་མོར་བཞག་པ་ཡང་མེད་ཅིང་ས་བོན་རྩ་བ་ནས་ [86b.6]འཕོ་བ་ཡང་མི་དམིགས་པ་དེ་བཞིན་དུ་དགེ་བ་དང་མི་དགེ་བ་ལུས་ལ་གནས་པ་རྣམས་ཀྱང་ལུས་ལ་མི་སྣང་ངོ་། །དཔེར་ན་ས་བོན་ལས་མེ་ཏོག་འགྲུབ་པ་ན་ས་བོན་གྱི་ནང་ན་ཡང་མེ་ཏོག་མི་སྣང་ཞིང་མེ་ཏོག་གི་ནང་ན་ཡང་འབྲས་བུ་མི་དམིགས་ལ། ས་བོན་དང་མེ་ཏོག་ཀྱང་གཉིས་སུ་དབྱེར་ [86b.7]མེད་པ་དེ་བཞིན་དུ་ལུས་ལས་ཀྱང་ལས་འབྱུང་ལས་ལས་ཀྱང་ལུས་འབྱུང་མོད་ཀྱི། ལུས་ཀྱི་ནང་ན་ཡང་ལས་མི་སྣང་ལས་ཀྱི་ནང་ན་ཡང་ལུས་མི་སྣང་ངོ་། །དཔེར་ན་མེ་ཏོག་ཡོངས་སུ་སྨིན་པ་ན་འབྲས་བུ་དམིགས་པ་དེ་བཞིན་དུ་ལུས་སྨིན་ན་ལས་རྣམས་དམིགས་སོ། །དཔེར་ན་གང་ [87a] [87a.1]ན་ས་བོན་གནས་པ་དེར་མེ་ཏོག་འབྱུང་བར་སྣང་བ་དེ་བཞིན་དུ་ལུས་འདི་གང་དང་གང་དུ་སྐྱེས་པར་གྱུར་པ་དེ་དང་དེར་ལས་དགེ་བ་དང་མི་དགེ་བ་འབྱུང་བར་སྣང་སྟེ། ལས་དེ་ཡང་གཟུགས་ཅན་མ་ཡིན་ལ་རྣམ་པར་སྨིན་པ་ཡང་གཟུགས་ཅན་མ་ཡིན་ནོ། །དཔེར་ན་ [87a.2]མིའི་ལུས་ལས་གྲིབ་མ་མི་གསལ་ཞིང་གཟུགས་ཅན་མ་ཡིན་པ་འབྱུང་ལ་མི་དེ་ཉིད་ཀྱི་ཕྱི་བཞིན་འབྲང་སྟེ། གྲིབ་མ་དེ་ཡང་མི་དེའི་ལུས་དང་འབྲེལ་བ་མ་ཡིན་ལ་ལུས་མེད་པར་ཡང་གྲིབ་མ་འབྱུང་བར་མི་འགྱུར་བ་དེ་བཞིན་དུ་ལུས་འདི་ལ་དགེ་བ་དང་མི་དགེ་བ་འབྲེལ་བར་འདུག་སྟེ། [87a.3]ལུས་གང་དང་གང་དུ་འཕོ་བ་དེ་དང་དེར་ལས་རྣམས་འགྲོ་བར་འགྱུར་ཏེ། ལུས་ཀྱི་དབང་གིས་ལས་རྣམས་འབྲང་བ་ཡང་མ་ཡིན་ལ་ལུས་མེད་ན་ཡང་ལས་རྣམས་སྐྱེ་བར་མི་འགྱུར་རོ། །དཔེར་ན་སྨན་ཚ་བ་དང་། ཁ་བ་དང་། བསྐ་བ་ལ་སོགས་པའི་བྱེ་བྲག་གིས་ལུས་ལ་བཀྲུ་ [87a.4]སྨན་བཏང་ན་ནད་ཐམས་ཅད་ལས་ཐར་བར་འགྱུར་ཞིང་ལྷའི་མདོག་རྒྱས་པ་ཡང་ལུས་ལ་སྣང་བར་འགྱུར་ཏེ། ཇི་ལྟར་སྨན་ཚ་བ་དང་། ཁ་བ་རྣམས་ཀྱིས་ལུས་ཀྱི་མདོག་གཞོན་ཤར་འདུག་པ་དང་། ཡིད་དུ་འོང་བ་སྒྲུབ་པར་བྱེད་ཅིང་འདི་སྙམ་དུ་མི་འདིས་ནི་སྨན་ཟོས་གོར་མ་ [87a.5]ཆག་གོ་སྙམ་དུ་ཤེས་པར་འགྱུར་མོད་ཀྱི། སྨན་དེ་དག་གི་རོ་དང་སྨིན་པ་དེ་ཡང་གཟུགས་ཅན་མ་ཡིན་ལ་རོ་དང་སྨིན་པ་གཟུགས་ཅན་མ་ཡིན་པ་ཡང་མིའི་མདོག་རྒྱས་པ་ལ་ལས་སྣང་བར་འགྱུར་བ་དེ་བཞིན་དུ། དགེ་བའི་ལས་འདི་ཡང་གཟུགས་ཅན་མ་ཡིན་ཏེ། དེ་ལས་ལུས་གྲུབ་ [87a.6]ནས་ཁ་ཟས་དང་། ཉེ་བར་སྤྱད་པ་དང་། ལོངས་སྤྱོད་དང་། གོས་ཀྱི་བྱེ་བྲག་གི་དབང་གིས་རྐང་ལག་མཉམ་ཞིང་མཆོག་ཏུ་བདེ་བ་དང་ལྡན་ཏེ། ནོར་བུ་དང་། གསེར་དང་། དངུལ་འབྱོར་པར་འགྱུར་བ་དེ་དག་ཐམས་ཅད་ནི་དགེ་བའི་ལས་ཀྱི་འབྲས་བུ་ཡིན་ནོ། །རིགས་དང་ [87a.7]ལོངས་སྤྱོད་རྒྱས་ཤིང་འབྱོར་པ་ལས་ཉམས་པ་དང་། ཉེ་བར་སྤྱད་པ་དང་བྲལ་ཞིང་གཞན་ལ་རེ་བ་དང་། ཁ་ཟས་ངན་པ་ཟ་ཞིང་མལ་སྟན་ངན་པ་དང་། གཟུགས་ངན་ཅིང་མི་སྡུག་པའི་ལུས་ཅན་གང་ཡིན་པ་དེ་དག་ནི་མི་དགེ་བའི་ལས་དེའི་འབྲས་བུ་ཡིན་ནོ། །དཔེར་ན་མེ་ལོང་ [87b] [87b.1]གི་དབང་གིས་བཞིན་གྱི་མདོག་སྡུག་པ་འམ་མི་སྡུག་པ་སྣང་ལ། མེ་ལོང་གི་གཟུགས་བརྙན་དེ་ཡང་གཟུགས་ཅན་མ་ཡིན་པ་དེ་བཞིན་དུ་དགེ་བ་དང་མི་དགེ་བའི་ལས་ཀྱི་དབང་གིས་རྣམ་པར་ཤེས་པ་འདི་ལྷ་རྣམས་དང་། མི་རྣམས་དང་། སེམས་ཅན་དམྱལ་བ་དང་། དུད་འགྲོ་དང་། [87b.2]{ཡི་དགས་,ཡི་དྭགས་}རྣམས་ཀྱི་ནང་དུ་སྐྱེ་བར་འགྱུར་ཏེ། སྨན་ཆེན་ལས་རྣམས་ནི་དེ་ལྟར་བལྟ་བར་བྱའོ། །དེ་ལྟར་ན་ལས་འདི་དག་ནི་རྣམ་པར་ཤེས་པའི་རྗེས་སུ་འབྲང་ངོ་། །གསོལ་པ། བཅོམ་ལྡན་འདས་རྣམ་པར་ཤེས་པ་འདིས་དབང་པོ་རྣམས་ཇི་ལྟར་འདེབས། ལུས་ཆེན་པོ་ཡང་ཇི་ལྟར་ [87b.3]ཡོངས་སུ་འཛིན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་འདི་ལྟ་སྟེ་དཔེར་ན་རྔོན་པ་ནགས་ཐིབས་པོའི་ནང་དུ་སོང་ནས་གཞུ་ཤིན་ཏུ་བཀང་སྟེ། དུག་{མངས་,མང་}སྤོས་ཀྱི་གླང་པོ་ཆེ་བོང་ཚོད་ཆེ་བ་ལ་སྣུན་ལ། དུག་དེ་ཡང་ཁྲག་དང་ཕྲད་ན་ཡན་ལག་དང་ཉིང་ [87b.4]ལག་རྣམས་སུ་འཕོ་ཞིང་འགྲོ་སྟེ། དབང་པོའི་སྤྱོད་ཡུལ་ཐམས་ཅད་འདོར་ལ་གནད་རྣམས་སུ་བསྣུན་ཅིང་ཁྲག་གི་ཁ་དོག་བསྒྱུར་ཏེ། ཡན་ལག་དང་ཉིང་ལག་ཐམས་ཅད་དུ་འཕོ་ཞིང་འགྲོ་ལ། ཕྱིར་ཡང་ལུས་བོར་ནས་དུག་དེ་ལུས་ལས་ཕྱིར་བྱུང་ན། སྨན་ཆེན་འདི་ཇི་སྙམ་དུ་ [87b.5]སེམས། དུག་དེ་དང་གླང་པོ་ཆེའི་ཁོག་པ་དེའི་ཚད་ཇི་ཙམ། གསོལ་པ། རི་རབ་དང་ཡུངས་འབྲུ་བཞིན་ལགས་སོ། །བཀའ་སྩལ་པ། དུག་དེ་ཇི་ལྟར་འཕོ་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་ལུས་ཡོངས་སུ་སྤོང་ཞིང་དབང་པོ་རྣམས་ཀྱང་འདོར་ལ་ཁམས་རྣམས་ [87b.6]ཀྱང་ཡོངས་སུ་གཏོང་ངོ་། །དེ་ལྟར་ན་རྣམ་པར་ཤེས་པ་འདི་དབང་པོ་རྣམས་འདོར་བར་བྱེད་དོ། །སྨན་ཆེན་གཞན་ཡང་ཁྱོད་ཀྱིས་བཅོམ་ལྡན་འདས་རྣམ་པར་ཤེས་པ་འདི་ཇི་ལྟར་ལུས་ཆེན་པོ་ཡོངས་སུ་འཛིན་པར་བགྱིད་ཅེས་ཟེར་བ་ནི་ཇི་ལྟར་ཁོ་ལག་ཆེ་ཞིང་རགས་པའི་ལུས་འདི་ལ་ [87b.7]མི་སེམས་པ་བཞིན་ཏེ། དཔེར་ན་རིའི་རྒྱལ་པོ་རི་རབ་ཀྱི་འཕང་དུ་དཔག་ཚད་བརྒྱད་ཁྲི་བཞི་སྟོང་ཡོད་ལ་དེ་ཡང་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཀྱིས་སུམ་ཁྲིས་སུ་ཡོངས་སུ་དཀྲིས་ཏེ། ཀླུའི་རྒྱལ་པོ་དེ་གཉིས་ཀྱིས་དབུགས་ཕྱི་ནང་དུ་རྒྱུ་བས་རྒྱ་མཚོ་བཏུང་དུ་མི་རུང་ [88a] [88a.1]བར་འགྱུར་ཞིང་དེ་གཉིས་ཀྱི་དབུགས་ཀྱིས་རི་རབ་ཀྱང་གཡོ་བར་བྱེད་དེ། དེ་གཉིས་ཇི་ལྟར་དུག་ཆེ་ལ་སྤྲོ་བ་ཆེ་ཞིང་ཡངས་པ་བཞིན་དུ་ནོར་རྒྱས་ཀྱི་བུ་དང་འཇོག་པོ་གཉིས་ཀྱང་དེ་དང་འདྲའོ། །སྨན་ཆེན་འདི་ཇི་སྙམ་དུ་སེམས། དེ་དག་གི་རྣམ་པར་ཤེས་པ་ [88a.2]ཡང་གཞན་ལ། སྦྲང་བུའི་ཡང་གཞན་ནོ་སྙམ་ན་དེ་ལྟར་བལྟ་བར་མི་བྱ་སྟེ། སྨན་ཆེན་འདི་ལྟར་རྣམ་པར་ཤེས་པ་དེ་ཉིད་སྦྲང་བུའི་ཡང་ཡིན་ལ་དེ་ཉིད་དེ་དག་གི་ཡང་ཡིན་ནོ། །དཔེར་ན་དུག་བད་ས་ནཱ་བྷ་དང་། ཧ་ལ་ཧ་ལའི་ཐིགས་པ་ཆུང་ངུ་ཡང་ཀླུའི་རྒྱལ་པོ་དགའ་བོ་དང་། ཉེ་ [88a.3]དགའ་ལ་སོགས་པ་དེ་དག་གིས་ཟོས་ན་དེ་དག་ཀྱང་འཆི་བར་འགྱུར་རོ། །སྨན་ཆེན་འདི་ཇི་སྙམ་དུ་སེམས། དགའ་བོ་དང་ཉེ་དགའ་ལ་སོགས་པའི་དུག་གང་ཡིན་པ་དང་། བད་ས་ནཱ་བྷ་དང་ཧ་ལ་ཧ་ལའི་དུག་གི་ཐིགས་པ་གང་ཡིན་པ་དེའི་ནང་ན་ཆེས་མང་བ་གང་ཡིན། གསོལ་ [88a.4]པ། བཅོམ་ལྡན་འདས་དགའ་བོ་དང་ཉེ་དགའ་གཉིས་ཀྱི་དུག་ཆེས་མང་བར་བལྟ་བར་བགྱི་སྟེ། བད་ས་ནཱ་བྷ་དང་། ཧ་ལ་ཧ་ལའི་དུག་ནི་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དེ་བཞིན་དུ་ལུས་ཆེན་པོ་གླང་པོ་ཆེ་དགུ་སྟོང་གི་སྟོབས་དང་ [88a.5]ལྡན་པ་དེ་དག་གི་རྣམ་པར་ཤེས་པའི་ཁམས་ཀྱང་ཆུང་ཞིང་མི་གསལ་ལ་གཟུགས་ཅན་མ་ཡིན་པར་བལྟ་བར་བྱའོ། །རྣམ་པར་ཤེས་པ་དེ་ཡང་ལས་ཀྱི་རྐྱེན་གྱིས་ལུས་ཆེན་པོ་མངོན་པར་འགྲུབ་པར་བྱེད་དེ། དཔེར་ན་ཤིང་ནྱ་གྲོ་དྷའི་ས་བོན་ཆུང་ངུ་ལས་ཤིང་གི་རྒྱལ་པོ་མཐོ་ཞིང་ [88a.6]རྒྱ་ཆེ་ལ་ཡལ་ག་དང་། ཡལ་ག་ཕྲེའུ་བརྒྱ་སྟོང་གིས་རྒྱས་པ་འགྲུབ་པར་འགྱུར་རོ། །སྨན་ཆེན་འདི་ཇི་སྙམ་དུ་སེམས། ས་བོན་དེའི་ཚད་ནི་ཇི་ཙམ། ཤིང་དེའི་ཚད་ནི་ཇི་ཙམ། གསོལ་པ། བཅོམ་ལྡན་འདས་ཡུངས་འབྲུའི་ནང་དང་བར་སྣང་བཞིན་ཏེ་ཁྱད་ཆེ་ལགས་སོ། །བཅོམ་ལྡན་འདས་ [88a.7]ཀྱིས་བཀའ་སྩལ་པ། སྨན་ཆེན་དེ་བཞིན་དུ་ས་བོན་དེའི་ནང་ན་ཡང་ཤིང་མི་སྣང་ལ་ས་བོན་མེད་ན་ཡང་ཤིང་སྐྱེ་བ་མི་དམིགས་ཏེ། ཇི་ལྟར་ས་བོན་ཕྲ་མོ་ལས་ཤིང་ཆེན་པོ་སྐྱེ་བ་དེ་བཞིན་དུ་རྣམ་པར་ཤེས་པ་ཆ་ཕྲ་བ་ལས་གཟུགས་ཆེན་པོ་འགྲུབ་པར་འགྱུར་ཏེ། ལུས་ལ་ཡང་རྣམ་ [88b] [88b.1]པར་ཤེས་པ་མི་དམིགས་ལ་རྣམ་པར་ཤེས་པ་མེད་ན་ཡང་ལུས་སྐྱེ་བ་མི་དམིགས་སོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་རྡོ་རྗེའི་སྙིང་པོ་ལྟ་བུའི་རྣམ་པར་ཤེས་པ་དེས་ལུས་ཉམ་ཆུང་བ་ [88b.2]རྣམས་ཇི་ལྟར་མངོན་པར་འགྲུབ་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དཔེར་ན་མི་དབུལ་པོ་ལ་ལ་ཞིག་གིས་ཡིད་བཞིན་གྱི་ནོར་བུ་རིན་པོ་ཆེ་རྙེད་ན། དེས་ཡིད་བཞིན་གྱི་ནོར་བུ་རིན་པོ་ཆེ་དེ་བླངས་ནས་ལྷའི་གནས་དང་། སྐྱེད་མོས་ཚལ་དང་། སྐྱེད་ [88b.3]ཚལ་དང་། ཞིང་དང་། ར་བ་དང་། སྒོ་ཁང་དང་། ཤིང་གེལ་པ་དང་། འཁྲི་ཤིང་སྣ་ཚོགས་ཀྱིས་འཁོར་བ་དང་། ཁང་པ་མེ་ཏོག་གིས་གཏོར་བ་དང་། རྫས་དང་། ཡོ་བྱད་དག་སྤྲུལ་ན། སྨན་ཆེན་དེ་དག་ཐམས་ཅད་ནི་མི་བརྟན་ཞིང་ཉམ་ཆུང་ལ་མྱུར་དུ་འགྱེས་ [88b.4]ཤིང་འཇིག་པའི་ཆོས་ཅན་ཡིན་ཏེ། ཡིད་བཞིན་གྱི་ནོར་བུ་རིན་པོ་ཆེ་དེ་མི་དེའི་ལག་ནས་སྟོར་ན་དེའི་བདེ་བའི་ལོངས་སྤྱོད་དེ་དག་ཀྱང་མེད་པར་འགྱུར་རོ། །ཇི་ལྟར་ཡིད་བཞིན་གྱི་ནོར་བུ་རིན་པོ་ཆེ་དེ་རྡོ་རྗེ་སྟོང་གིས་ཀྱང་མི་ཕྱེད་ལ། དེའི་ཡོ་བྱད་དེ་དག་འཇིག་པའི་རང་བཞིན་ཅན་ [88b.5]ཡིན་པ་དེ་བཞིན་དུ་རྣམ་པར་ཤེས་པའི་ཁམས་ནི་རྡོ་རྗེའི་སྙིང་པོའི་རང་བཞིན་ལྟ་བུ་ཡིན་ལ་ལུས་གང་ཡིན་པ་དེ་ནི་སྙིང་པོ་མེད་དོ། །གསོལ་པ། བཅོམ་ལྡན་འདས་རྣམ་པར་ཤེས་པའི་ཁམས་ཞན་པ་དེས་ཇི་ལྟར་གཟུགས་མཁྲང་ཞིང་སྲ་བ་ཕྱེ་སྟེ་འཕོ་ཞིང་མཆི། བཅོམ་ལྡན་ [88b.6]འདས་ཀྱིས་བཀའ་སྩལ་པ། སྨན་ཆེན་དཔེར་ན་ཆུའི་རྒྱུན་ཤིན་ཏུ་འཇམ་པོ་རིའི་གསེབ་ན་འདུག་པས་རི་དེ་ཉིད་རྟོལ་ཏེ་བྱུང་ན། སྨན་ཆེན་དེ་ཇི་སྙམ་དུ་སེམས། དེའི་ནང་ན་ཆེས་སྲ་བ་གང་ཡིན། གསོལ་པ། བཅོམ་ལྡན་འདས་རི་ནི་རང་བཞིན་གྱིས་མཁྲང་ལ་རྡོ་རྗེ་ལྟར་བརྟན་ [88b.7]ཞིང་སྲ་བ་ལགས་ལ། ཆབ་ནི་རང་བཞིན་གྱིས་འཇམ་ཞིང་རེག་ན་བདེ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་རྣམ་པར་ཤེས་པ་རང་བཞིན་གྱིས་ཞན་པས་ལུས་ཆེན་པོ་དག་ཕྱེ་སྟེ་འགྲོ་བར་འགྱུར་རོ། །གསོལ་པ། བཅོམ་ལྡན་འདས་ཇི་ལྟར་ [89a] [89a.1]སེམས་ཅན་གྱི་རིས་ནས། སེམས་ཅན་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བ་ལེན་པ་ལགས་ཇི་ལྟར་སེམས་ཅན་དམྱལ་བ་རྣམས་སུ་སྐྱེ་བ་ཡོངས་སུ་ལེན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དེའི་ཕྱིར་ཉོན་ཅིག །སེམས་ [89a.2]ཅན་དེ་ཤི་འཕོས་ནས་བསོད་ནམས་སུ་ཉེ་བར་འགྲོ་བའི་འདུ་བྱེད་ཀྱིས་ཡོངས་སུ་ཟིན་ན་ལུས་ཡོངས་སུ་བཏང་ནས་རྣམ་པར་ཤེས་པ་དེས་མིའི་ལྟ་བ་ཡོངས་སུ་སྤངས་ཏེ་ལྷའི་ལྟ་བ་ཐོབ་པར་འགྱུར་རོ། །དེ་ལྷའི་ལྟ་བ་དེས་འདོད་པ་ན་སྤྱོད་པ་དྲུག་གི་ལྷ་རྣམས་མཐོང་ངོ་། །སེམས་ [89a.3]ཅན་དམྱལ་བ་ཆེན་པོ་བརྒྱད་ཀྱང་མཐོང་ངོ་། །ལུས་དེ་ཡང་འདོར་བར་མཐོང་ངོ་། །ལྷ་རྫས་ཀྱི་ལྷའི་གནས་དང་། དགའ་ཚལ་དང་། འདྲེས་ཚལ་དང་། མེ་ཏོག་གི་རྣ་རྒྱན་དང་། ཤིང་ཀུ་ཤེ་ཤ་ཡ་དང་། ཀོ་ཀན་ད་དང་། གཞལ་མེད་ཁང་དང་། ཚལ་སྟུག་པོ་དང་། [89a.4]ལྷའི་བུ་མོ་རྩེ་བས་བསྐོར་བ་ཡང་མཐོང་ངོ་། །རྟག་ཏུ་མེ་ཏོག་རྒྱས་ཤིང་རྣམ་པར་བཀྲ་བར་བྱས་པའི་ལྷའི་ལོངས་སྤྱོད་སྡུག་གུས་མཛེས་པར་བྱས་པ་དང་། སེ་མོ་དོ་དང་། གདུབ་ཟླུམ་དང་། གདུབ་ལེབ་དང་། དཔུང་རྒྱན་སྤ་ཞིང་སྤྲས་པས་བརྒྱན་པ་དེ་དག་ཀྱང་དེས་མཐོང་ [89a.5]ངོ་། །ལྷ་གཞོན་ནུ་དང་ལྷ་མོ་ཁྲིའི་སྟེང་ན་འདུག་ཅིང་ཡིད་རབ་ཏུ་དགའ་བ་ཡང་དེས་མཐོང་ངོ་། །དེས་དེ་དག་མཐོང་ནས་ཀུན་ཏུ་ཆགས་པ་སྐྱེད་དོ། །དེ་དེར་ཀུན་ཏུ་ཆགས་པས་དགའ་བ་ཐོབ་པར་འགྱུར་རོ། །དགའ་བ་ཐོབ་པས་ཡིད་རབ་ཏུ་དགའ་བར་འགྱུར་རོ། །དེ་སྙིང་ [89a.6]དགའ་བས་དེའི་ཚེ་ལུས་ཀྱི་ཁ་དོག་རྒྱས་པར་འགྱུར་ཏེ། འདི་ལྟར་བཞིན་གྱི་མདོག་པད་མ་ལྟ་བུར་སྣང་བར་འགྱུར་ཞིང་ལྟ་བ་ཕྱིན་ཅི་མ་ལོག་པར་འགྱུར་རོ། །སྣ་ཡང་ཡོ་བར་མི་འགྱུར། དེའི་ཁ་ཡང་མནམ་པར་མི་འགྱུར་རོ། །དེ་བཞིན་དུ་དེའི་མིག་ཨུད་པ་ལ་སྔོན་པོའི་འདབ་མ་ [89a.7]འདྲ་བར་སྣང་བར་འགྱུར་རོ། །དེའི་གནད་རྣམས་ཀྱང་འཆད་པར་མི་འགྱུར། དེའི་ཁྲག་ཀྱང་ཟག་པར་མི་འགྱུར། ཕྱི་ས་ཡང་འབྱུང་བར་མི་འགྱུར་རོ། །དེ་སྤུ་ཟིང་ཞེས་བྱེད་པར་མི་འགྱུར་དེའི་སེན་མོ་རྣམས་ཀྱང་ནག་པོར་མི་འགྱུར། ལག་པ་ཡང་སེར་པོར་སྣང་བར་མི་འགྱུར། [89b] [89b.1]རྐང་ལག་ཀྱང་གཡོབ་པར་མི་འགྱུར། རྐང་ལག་འཁུམས་བཞིན་དུ་འཆི་བའི་ཆོས་དང་ལྡན་པར་ཡང་མི་འགྱུར་རོ། །སྨན་ཆེན་དེ་འཆི་བའི་དུས་ཀྱི་ཚེ་ལྷའི་ལྟས་འབྱུང་བར་འགྱུར་ཏེ། འདི་ལྟར་ཁང་པ་བརྩེགས་པ་ཀ་བ་བརྒྱ་སྟོང་གིས་བརྒྱན་པ་མཐོང་སྟེ། ལྷའི་དྲིལ་བུ་ [89b.2]གཡེར་ཀའི་དྲ་བ་སྒྲ་སྙན་པ་འབྱུང་བ་དང་ལྡན་པ་དང་། ལྷའི་མེ་ཏོག་སྣ་ཚོགས་སྤེལ་བའི་ཕྲེང་བ་ཤིན་ཏུ་དྲི་ཞིམ་པ་དག་མཐོང་ངོ་། །ལྷ་གཞོན་ནུ་རྒྱན་དང་། གསེར་གྱི་མཆོག་དང་། སེ་མོ་དོ་དང་། གདུབ་བུ་དང་། དཔུང་རྒྱན་གྱིས་མཛེས་པར་བྱས་ཤིང་ལུས་བརྒྱན་པ་ [89b.3]དག་ཀྱང་མཐོང་ངོ་། །དེས་ལྷ་གཞོན་ནུ་དག་མཐོང་ནས་མཆོག་ཏུ་དགའ་བ་སྐྱེའོ། །དེ་ཡིད་དགའ་བས་ཁོག་པ་ལ་ལྟས་གཉིས་འབྱུང་བར་འགྱུར་ཏེ། སོ་མེ་ཏོག་ཀུན་ད་དང་། ཀུ་མུ་ད་ལྟར་དཀར་བར་སྣང་ངོ་། །མིག་ཧ་ཅང་ཡང་མི་འཛུམས་ཧ་ཅང་ཡང་མི་འབྱེད་དོ། །སྒྲ་སྙན་ [89b.4]པ་དག་ཀྱང་འབྱུང་ངོ་། །དེའི་བཞིན་ཡང་པད་མ་ལྟ་བུར་སྣང་བར་འགྱུར་རོ། །ཤི་བའི་ཁོག་པ་ཡང་ཧ་ཅང་ཚ་བར་ཡང་མི་འགྱུར། ཧ་ཅང་གྲང་བར་ཡང་མི་འགྱུར་རོ། །དེའི་གཉེན་སྡུག་པ་རྣམས་ཀྱང་སྨྲེ་སྔགས་ཆེན་པོ་འདོན་པར་མི་བྱེད་དོ། །དེ་ཉི་མ་འཆར་བའི་དུས་ཀྱི་ཚེ་ [89b.5]འཆི་བའི་ཆོས་དང་ལྡན་པར་ཡང་འགྱུར་རོ། །ཕྱོགས་ཀྱང་མུན་པར་སྣང་བར་མི་འགྱུར་རོ། །དེ་འཆི་བའི་དུས་ཀྱི་ཚེ་ཕྱོགས་ཤིན་ཏུ་དྲི་ཞིམ་ཞིང་ཤིན་ཏུ་ཡོངས་སུ་དག་པ་ཚོར་བར་འགྱུར་རོ། །དེའི་མིག་ཀྱང་སེར་བར་མི་འགྱུར། དེའི་ལྟ་བ་ཡང་ཕྱིན་ཅི་ལོག་ཏུ་མི་འགྱུར། དེ་ [89b.6]བཞིན་གཤེགས་པའི་སྐུ་གཟུགས་མཐོང་ན་ཡིད་ཆེས་ཤིང་དང་བ་སྐྱེ་བར་འགྱུར། གཉེན་སྡུག་པ་དག་མཐོང་ན་ག་ཞིག་ནས་ཕྱིར་འོངས་པའམ། རིང་མོ་ཞིག་ཏུ་གུད་ན་འདུག་འདུག་པ་བཞིན་དུ་མགུལ་ནས་འཁྱུད་ཅིང་ཡིད་རབ་ཏུ་དགའ་སྟེ། འདི་སྐད་དུ་སྲིད་པར་སྐྱེས་པ་ [89b.7]ཐམས་ཅད་ཀྱི་ཚུལ་ནི་འདི་ཡིན་གྱིས། ད་ང་དང་བྲལ་བའི་ཕྱིར་གདུང་བར་མ་བྱེད་པར་ཐོང་ཤིག་ཅེས་དེས་གཉེན་དེ་དག་ཡང་དག་པར་དབུགས་འབྱིན་པར་བྱེད་དོ། །སྨན་ཆེན་གལ་ཏེ་སེམས་ཅན་བསོད་ནམས་སུ་ཉེ་བར་འགྲོ་བས་འཆི་བའི་དུས་ཀྱི་ཚེ་སྦྱིན་པ་ལ་སྲེད་ཅིང་ཡུད་ཙམ་ [90a] [90a.1]རེ་རེ་ལ་ཚིགས་བཅད་དང་། ཚིགས་སུ་བཅད་པ་དང་། གཏམ་སྣ་ཚོགས་དང་། གཏན་ཚིགས་སྣ་ཚོགས་རྗོད་ཅིང་སྨྲ་ལ། དེའི་ཚེ་གཉིད་ལ་ཡང་སྲེད་པར་མི་འགྱུར་ཞིང་གཉིད་ཀྱི་དབང་དུ་ཡང་མི་འགྲོ་ལ། བདེ་བ་ཐམས་ཅད་དང་ལྡན་པས་ཚེའི་འདུ་བྱེད་ [90a.2]འདོར་བར་འགྱུར་རོ། །དེ་འཆི་བའི་དུས་ཀྱི་ཚེ་ལྷ་དང་ལྷ་མོ་ལྷན་ཅིག་ཏུ་ཁྲི་གཅིག་གི་སྟེང་ན་འདུག་ལ། ལྷ་མོ་ཁྲིའི་སྟེང་ན་འདུག་པ་དེའི་ལག་པ་ལྷའི་ལག་པའི་སྟེང་དུ་བཞག་ཅིང་དེའི་ལག་པ་གཉིས་ལས་མེ་ཏོག་དག་འབྱུང་སྟེ། ལྷ་མོ་དེས་མེ་ཏོག་བྱུང་བ་དག་མཐོང་ནས་ [90a.3]ལྷ་དེ་ལ་འདི་སྐད་དུ་ལྷ་གཞོན་ནུ་སྐྱེ་བའི་དགའ་བའི་དུས་ལ་བབ་ཀྱིས་དགྱེས་པར་མཛོད་ཅིག་ཅེས་ཟེར་རོ། །དེས་ཀྱང་མེ་ཏོག་རྣམས་ལག་པས་མཉེས་ཤིང་འཕུར་བར་བྱེད་དོ། །དེས་མེ་ཏོག་དེ་དག་མཉེས་པས་སེམས་ཅན་དེ་འཆི་བའི་ཆོས་དང་ལྡན་པར་འགྱུར་རོ། །དེའི་རྣམ་ [90a.4]པར་ཤེས་པ་དེས་ཀྱང་དབང་པོ་རྣམས་བོར་ཞིང་དབང་པོའི་སྤྱོད་ཡུལ་རྣམས་བཏང་སྟེ། ཁམས་རྣམས་ཡོངས་སུ་བཏང་ནས་ཁམས་ཀྱི་དོན་ཡོངས་སུ་བླངས་ཏེ། མི་གསལ་ཞིང་གཟུགས་ཅན་མ་ཡིན་ལ་རྟ་ཞོན་པ་ལྟ་བུ་དང་། ཉི་མ་དང་། མེ་ཤེལ་དང་། བསྲེག་བྱ་ལྟ་བུ་དང་། [90a.5]ཆུ་ལ་ཟླ་བའི་གཟུགས་བརྙན་ལྟ་བུ་དང་། སྦུབས་ཀྱི་ནང་གི་རླུང་ལྟར་དགེ་བ་ལ་དམིགས་པ་བསྡུས་ནས་བྱུང་སྟེ་འཕོ་ཞིང་འགྲོའོ། །དེ་ཡང་དེའི་ཚེ་མེ་ཏོག་ལ་བརྟེན་ནས་ཕ་མ་ཁྲི་གཅིག་ལ་འདུག་ཅིང་ཕྲད་པས་རྣམ་པར་ཤེས་པ་མེ་ཏོག་དེ་དག་གི་ནང་དུ་འདྲེས་པར་འགྱུར་རོ། །ཡང་ [90a.6]དེར་བདུད་རྩི་འདོད་པ་ཞེས་བྱ་བའི་རླུང་ལྡང་སྟེ། རླུང་དེས་རྣམ་པར་ཤེས་པ་དེ་ཞག་བདུན་ལོན་པ་ན་ལྷ་གཞོན་ནུ་རྣ་ཆ་གདུབ་ཀོར་དྲི་མ་མེད་ཅིང་འགུལ་བ་དང་ལྡན་པ་འགྲུབ་པར་འགྱུར་རོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་ [90a.7]གསོལ་ཏོ། །བཅོམ་ལྡན་འདས་རྣམ་པར་ཤེས་པ་གཟུགས་ཅན་མ་ལགས་པའི་རྐྱེན་གྱི་དབང་གིས་གཟུགས་རྣམས་ཇི་ལྟར་མངོན་པར་འགྲུབ་པར་བགྱིད། རྐྱེན་རྣམས་ལ་ཡང་ཇི་ལྟར་གདའ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དཔེར་ན་ [90b] [90b.1]རླུང་གི་ཁམས་གཟུགས་མེད་ཅིང་བསྟན་དུ་མེད་པའི་རྐྱེན་གྱི་དབང་གིས་ལྷའི་གནས་དང་། རི་དང་། ནགས་ཚལ་ལ་སོགས་པ་འཇིག་རྟེན་གྱི་ཁམས་རྣམས་འགྲུབ་པར་བྱེད་པ་དེ་བཞིན་དུ་རྣམ་པར་ཤེས་པ་འདི་ཡང་རྐྱེན་གྱི་དབང་གིས་གཟུགས་རྣམས་འགྲུབ་པར་བྱེད་དོ། །སྨན་ཆེན་ [90b.2]གཞན་ཡང་ཤིང་འཛིངས་པ་གཉིས་ཕན་ཚུན་ཕྲད་དེ་གཅིག་ལ་གཅིག་དྲུད་ཅིང་གཙུབས་པ་ལས་མེ་འགྲུབ་པར་འགྱུར་ཏེ། མེ་དེ་ཡང་ཤིང་གི་ནང་ན་མི་སྣང་ལ་ཤིང་མེད་ན་ཡང་མེ་འབྱུང་བར་མི་འགྱུར་ཏེ། མེ་དེ་ཡང་རྐྱེན་གྱི་དབང་གིས་ཤིང་ལས་འགྲུབ་པར་འགྱུར་གྱི་རྐྱེན་མེད་པར་ [90b.3]ནི་མི་འབྱུང་ངོ་། །གཟུགས་ཀྱི་དབང་གིས་ཀྱང་ཤིང་གི་ནང་ན་ཡང་མེ་མི་སྣང་ལ་ཤིང་མ་གཏོགས་པར་ཡང་མེ་མི་དམིགས་སོ། །སྨན་ཆེན་དེ་བཞིན་དུ་རྣམ་པར་ཤེས་པ་དེ་ཡང་ཕ་མའི་དབང་གིས་འཇུག་སྟེ། རྣམ་པར་ཤེས་པ་ཡང་ལུས་ཀྱི་ནང་ན་མི་དམིགས་ལ་ལུས་མེད་པར་ [90b.4]ཡང་རྣམ་པར་ཤེས་པ་མི་འབྱུང་ངོ་། །སྨན་ཆེན་དཔེར་ན་མེ་མ་བྱུང་བར་གཟུགས་དང་། དྲོ་བ་དང་། ཁ་དོག་གསལ་བར་མི་སྣང་ངོ་། །སྨན་ཆེན་དེ་བཞིན་དུ་ལུས་མ་གྲུབ་པར་རྣམ་པར་ཤེས་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་མི་སྣང་ངོ་། །སྨན་ཆེན་ [90b.5]དཔེར་ན་ཉི་མའི་དཀྱིལ་འཁོར་ཆེན་པོ་གསལ་བར་སྣང་ཞིང་གཟི་བརྗིད་ཀྱིས་ལམ་མེར་འདུག་ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་ཉི་མའི་གཟུགས་གནག་གམ། སེར་རམ། དཀར་རམ། དམར་སེར་དུ་མི་མཐོང་ངོ་། །སྨན་ཆེན་དེ་བཞིན་དུ་རྣམ་པར་ཤེས་པ་ནི་ལྟ་བ་དང་། [90b.6]ཉན་པ་དང་། སྣོམ་པ་དང་། རོ་མྱང་པ་དང་། རེག་པའི་རྣམ་པ་དག་གིས་རྟོགས་པར་འགྱུར་གྱི་ལུས་ལ་རྣམ་པར་ཤེས་པ་གནག་པའམ། དཀར་བ་འམ། གཟུགས་སུ་སྣང་བར་མིས་མི་མཐོང་ངོ་། །དཔེར་ན་ཉི་མ་ཚ་བ་དང་། སེར་བ་དང་། འགྲོ་བ་དང་། ཕྱིར་ཡང་འཆར་བ་དག་ [90b.7]གི་རྟགས་ལས་སྣང་བ་དེ་བཞིན་དུ་རྣམ་པར་ཤེས་པ་ཡང་རྟགས་དག་གིས་བལྟ་བར་བྱའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པའི་རྟགས་ཇི་ལྟར་བལྟ་བར་བགྱི། བཅོམ་ལྡན་འདས་ [91a] [91a.1]ཀྱིས་བཀའ་སྩལ་པ། འདུ་བྱེད་ཀྱི་རྟགས་དང་། ཚོར་བའི་རྟགས་དང་། འདུ་ཤེས་ཀྱི་རྟགས་དང་། སེམས་པ་དང་། མྱ་ངན་དང་། གདུང་བ་དང་། ཡིད་མི་བདེ་བ་ནི་རྣམ་པར་ཤེས་པའི་རྟགས་སུ་བལྟའོ། །གཞན་ཡང་རྣམ་པར་ཤེས་པའི་བག་ཆགས་འདི་ལྟར་དགེ་བར་ཉེ་བར་ [91a.2]འགྲོ་བའི་སེམས་དང་། མི་དགེ་བར་ཉེ་བར་འགྲོ་བའི་སེམས་ལས་བལྟ་བར་བྱའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་རྣམ་པར་ཤེས་པ་ལུས་ལས་བྱུང་སྟེ་མྱུར་དུ་སྐྱེ་བ་ཡོངས་སུ་ལེན་པ་ལགས། [91a.3]རྣམ་པར་ཤེས་པ་ལུས་ལས་བྱུང་ནས་མ་སྐྱེས་ཤིང་ཡོངས་སུ་མ་བཟུང་བ་དེས་ཇི་ལྟར་ལུས་གཞན་ལ་གནས་པར་བགྱིད། རྣམ་པར་ཤེས་པ་འདི་ནི་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་དཔེར་ན་མི་ལ་ལ་ལག་པ་རིང་ཞིང་ཐུར་དུ་བརྐྱང་ལ་གཡུལ་གྱི་གོ་ [91a.4]ཆ་གྱོན་ཏེ། ལྷའི་རྟ་རླུང་གི་ཤུགས་དང་འདྲ་བར་མགྱོགས་པ་ལ་ཞོན་ནས་གཡུལ་དུ་འགྲོ་སྟེ། དེ་གཡུལ་ངོ་དེར་སོང་ནས་མདུང་དང་། རལ་གྲི་དང་། མདའ་དག་གིས་སྙིང་མྱོས་ཏེ། གཡུལ་ངོར་རྟའི་མཆོག་དེ་ལས་ས་ལ་ལྷུང་ལ། དེ་ཡང་ལུས་ཀྱི་འཕོང་རྩལ་ཡོངས་སུ་སྦྱངས་པ་ཞིག་སྟེ། [91a.5]མྱུར་བ་མྱུར་བར་ས་ལས་རྟའི་རྒྱབ་ཏུ་འགོང་བར་བྱེད་ན། ཇི་ལྟར་མི་དེ་ལྷུང་ནས་རྟ་ཞོན་པ་དང་འགོད་ཆེ་བས་ཇི་ལྟར་རྟ་ཉེ་བར་གནས་པ་ལ་རྟ་ལ་འགོང་བ་ན་རྟ་འགྲོ་བཞིན་དུ་འགོང་བ་ཆེན་པོས་འགོང་བར་བྱེད་པ་དེ་བཞིན་དུ་རྣམ་པར་ཤེས་པ་ཡང་བལྟ་བར་བྱའོ། །ཇི་ལྟར་མི་ཕ་རོལ་གྱི་ [91a.6]དམག་ཚོགས་ཀྱིས་འཇིགས་ཤིང་སྐྲག་ནས་རྟ་ཞོན་ཏེ་འབྲོས་པ་དེ་བཞིན་དུ་རྣམ་པར་ཤེས་པ་འདི་ཐོག་མ་ཤི་འཕོས་ནས་ལྷའི་དམིགས་པས་ཡོངས་སུ་ཟིན་ཅིང་ལྷ་དང་ལྷ་མོ་ཁྲིའི་སྟེང་ན་འདུག་པ་མཐོང་ནས་ཤིན་ཏུ་མྱུར་བར་སྐྱེ་བ་ཡོངས་སུ་ལེན་ཏོ། །སྨན་ཆེན་གཞན་ཡང་དང་པོ་ཤི་ [91a.7]འཕོས་ནས། ད་དུང་མ་སྐྱེས་པའི་རྣམ་པར་ཤེས་པའི་རྣམ་པ་ཇི་ལྟར་བལྟ་བར་བྱ་ཞེས་གང་ཁྱོད་ཀྱིས་སྨྲས་པ་དེ་ནི་དཔེར་ན་མིའི་གྲིབ་མ་ཆུའི་སྟེང་དུ་བབ་པ་གཟུགས་སུ་སྣང་མོད་ཀྱི། དེ་གཟུགས་སུ་གཏོགས་པར་ཡང་བལྟ་བར་མི་བྱའོ། །སྨན་ཆེན་དཔེར་ན་རྐང་ལག་མཉམ་པ་དང་ [91b] [91b.1]ལྡན་པའི་གཟུགས་ཆུའི་སྟེང་དུ་བབ་པ་དེ་ལ་ནི་དྲོ་བ་འམ། གྲང་བ་འམ། ལུས་ངལ་བར་འགྱུར་བ་མེད་ཅིང་ལུས་དེ་ལ་ནི་ཤའི་དུམ་བུ་ཡང་མེད་དོ། །གྲིབ་མ་དེ་ལ་ནི་ཁམས་ཀྱིས་བླངས་པ་ཡང་མེད་དོ། །མིའི་གཟུགས་བརྙན་ཆུའི་ནང་དུ་བྱུང་བ་དེ་ལས་ནི་སྡུག་བསྔལ་བའི་སྒྲ་འམ། བདེ་ [91b.2]བའི་སྒྲ་འབྱུང་བ་ཡང་མེད་དོ། །དེ་བཞིན་དུ་རྣམ་པར་ཤེས་པ་དང་པོ་ཤི་འཕོས་ནས་ལུས་ཀྱི་ཁོག་པ་བོར་ཏེ་གཟུགས་བརྙན་གྱི་རྣམ་པ་ལྟ་བུར་འགྱུར་རོ། །སྨན་ཆེན་དེ་ལྟར་ན་རྣམ་པར་ཤེས་པ་བསོད་ནམས་སུ་ཉེ་བར་འགྲོ་བ་ནི་ལྷ་རྣམས་ཀྱི་ནང་དུ་སྐྱེ་བ་ཡོངས་སུ་ལེན་པར་འགྱུར་རོ། ། [91b.3]དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པ་སེམས་ཅན་དམྱལ་བ་རྣམས་སུ་ཇི་ལྟར་སྐྱེ་བ་ཡོངས་སུ་ལེན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་བསོད་ནམས་མ་ [91b.4]ཡིན་པར་ཉེ་བར་འགྲོ་བའི་སེམས་ཅན་དམྱལ་བ་རྣམས་སུ་སྐྱེ་བ་ཡོངས་སུ་ལེན་པ་དེ་ཉོན་ཅིག །སྨན་ཆེན་འདི་ལ་སེམས་ཅན་ལས་མི་དགེ་བས་ཡོངས་སུ་ཟིན་པ་ནི་སེམས་ཅན་གྱི་རིས་ནས་འཆི་འཕོ་སྟེ། ཤི་འཕོས་པ་དེ་འདི་སྙམ་དུ་མི་དེ་ནི་ང་ཉིད་ཡིན་ཏེ། སེམས་ཅན་དམྱལ་བ་ [91b.5]འདི་ནས་ཤི་འཕོས་སོ། །འདི་གཉིས་ནི་བདག་གི་ཕ་མ་ཡིན་ནོ་སྙམ་དུ་དྲན་པ་སྐྱེའོ། །ཤི་འཕོས་པ་དེའི་ལུས་དེ་ནི་ཐ་མལ་པའི་གཟུགས་ཀྱི་རང་བཞིན་གྱི་རྣམ་པ་དང་ལྡན་པར་འགྱུར་ཏེ། ཡན་ལག་སྐྱེས་པ་རྣམས་ཀྱང་དེ་དང་འདྲ་བ་ཉིད་དུ་སྣང་ངོ་། །དང་པོ་ཤི་འཕོས་པ་དེ་མྱ་ [91b.6]ངན་གྱིས་གཡེངས་ནས་སེམས་ཅན་དམྱལ་བ་སྣ་ཚོགས་སྣང་བ་མཐོང་ངོ་། །རྣམ་པར་ཤེས་པ་དང་པོ་ཤི་འཕོས་པ་དེའི་ལས་སེམས་ཅན་དམྱལ་བ་དང་འབྲེལ་བར་འགྱུར་ཏེ། ཕྱོགས་ཁ་ཅིག་ན་ནི་སེམས་ཅན་དམྱལ་བའི་ས་གཞི་ཁྲག་གིས་གཏོར་བ་མཐོང་ནས་དེ་དེར་ཆགས་པ་ [91b.7]སྐྱེད་པར་འགྱུར་རོ། །དེ་ཆགས་པར་གྱུར་ནས་སེམས་ཅན་དམྱལ་བའི་ལུས་འགྲུབ་པར་འགྱུར་ཏེ། དེའི་རྣམ་པར་ཤེས་པ་དེ་ལས་ཀྱི་རྐྱེན་གྱི་དབང་གིས་ཆུའི་རྗེན་ཤུལ་ཤིན་ཏུ་རུལ་ཅིང་མཆོག་ཏུ་དྲི་མི་ཞིམ་པ་མནམ་པའི་ནང་དུ་ལུས་སྐྱེ་བ་ཡོངས་སུ་ལེན་ཏེ། དཔེར་ན་མི་གཙང་བ་དང་། ལྗན་ [92a] [92a.1]ལྗིན་མནམ་པོའི་རྐྱེན་གྱིས་སྲིན་བུ་སྐྱེ་བ་དང་། དཔེར་ན་ཞོ་དང་། སྦྲང་རྩི་དང་། ཆང་མནམ་པོར་གྱུར་པའི་ཕྱིར་སྲོག་ཆགས་སྐྱེ་བར་འགྱུར་རོ། །སྨན་ཆེན་དེ་བཞིན་དུ་སེམས་ཅན་རྣམས་སེམས་ཅན་དམྱལ་བར་འབྱུང་བར་འགྱུར་རོ། །དེ་སྐད་ཅེས་བཀའ་སྩལ་ནས། བཟང་སྐྱོང་གིས་ཐལ་མོ་སྦྱར་ [92a.2]ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དམྱལ་བ་པའི་སེམས་ཅན་རྣམས་ཀྱི་ཁ་དོག་གི་རྣམ་པ་ཇི་ལྟ་བུ་ལགས། ལུས་ཀྱི་རྣམ་པ་ནི་ཇི་ལྟ་བུར་འགྲུབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་དེར་ཁྲག་གི་ནང་དུ་སྐྱེ་བ་གང་ཡིན་པ་དེ་དག་ནི་ཁྲག་གི་ [92a.3]མདོག་འདྲ་བར་འབྱུང་བར་འགྱུར་རོ། །ཆུ་ཀླུང་རྒལ་དུ་མེད་པ་དག་གི་ནང་དུ་སྐྱེ་བ་གང་ཡིན་པ་དེ་དག་ནི་སྤྲིན་སྔོན་པོའི་ཁ་དོག་ལྟར་འགྱུར་རོ། །བ་ཚྭ་ཅན་གྱི་ཆུ་ཀླུང་གི་ནང་དུ་སྐྱེ་བ་གང་ཡིན་པ་དེ་དག་ནི་ཤ་གཟི་གུར་འབྱུང་བར་འགྱུར་རོ། །དེ་དག་གི་ལུས་ནི་རྒྱལ་པོའི་བུ་གཞོན་ནུ་བདེ་དགུར་རིམ་གྲོར་བྱས་པ་ལྟར་ [92a.4]གཞོན་ཤ་ཅན་དུ་འགྱུར་རོ། །བཟང་སྐྱོང་དེ་ན་དེ་དག་ལུས་བོང་ཆེ་བར་འགྱུར་ཏེ། མགོ་བོ་མ་གཏོགས་པར་ཁྲུ་བརྒྱད་པར་འགྱུར་རོ། །སེན་མོ་རིང་ཞིང་ཁ་སྤུ་ཡོད་ལ་སྤུན་པོར་འགྱུར་ཞིང་རྐང་ལག་མི་སྡུག་པར་འགྱུར་ཏེ། གལ་ཏེ་འཛམ་བུའི་གླིང་པའི་མི་སེམས་ཅན་དམྱལ་བ་པའི་མི་ལ་ལྟར་འགྲོ་ན་མཐོང་ [92a.5]མ་ཐག་ཏུ་འཆི་བའི་ཆོས་དང་ལྡན་པར་འགྱུར་རོ། །བཟང་སྐྱོང་གཞན་ཡང་སེམས་ཅན་དམྱལ་བ་པའི་སེམས་ཅན་རྣམས་ཁ་ཟས་ཟ་མོད་ཀྱི་དེ་དག་ལ་བདེ་བར་འགྱུར་བ་ཅུང་ཟད་ཀྱང་མེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །བཅོམ་ [92a.6]ལྡན་འདས་སེམས་ཅན་དེ་དག་ཁ་ཟས་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་སེམས་ཅན་དམྱལ་བ་དེ་ན་དེ་དག་ཡོངས་སུ་འཁྱམ་ལ་ཤིན་ཏུ་རྒྱང་རིང་བ་ནས་ཟངས་དང་ར་གན་དམར་པོར་སྣང་བ་མཐོང་བར་འགྱུར་ཏེ། དེ་དག་མཐོང་ནས་ཁ་ཟས་ཀྱི་ཚིག་རྗོད་པར་བྱེད་དེ། ཁ་ [92a.7]ཟས་འདོད་པ་ཁྱེད་ཚུར་ཤོག་ཅེས་ཟེར་རོ། །དེ་དག་ཀུན་ནས་འཕུངས་ཏེ་སྙིམ་པ་བཟེད་ནས་ཟངས་དང་ར་གན་བསྐོལ་བ་ག་ལ་བ་དེར་དོང་སྟེ་ལྷགས་ནས་སྙིམ་པ་བཟེད་ཅིང་ཟངས་དང་ར་གན་བསྐོལ་བའི་ཁ་ཟས་དེ་དག་འདོད་པས་ཁ་གདངས་ཏེ་ཟངས་དང་ར་གན་ཟ་བར་བྱེད་དོ། །དེ་དག་ཟངས་དང་ [92b] [92b.1]ར་གན་རབ་ཏུ་འབར་བ་དེས་སུ་རུ་རུར་རབ་ཏུ་འབར་ཞིང་ཁོག་པ་རབ་ཏུ་འབར་བར་འགྱུར་རོ། །སྨན་ཆེན་དེ་དག་ཁ་ཟས་འདྲ་བས་བསླུས་ནས་སྡུག་བསྔལ་ཤིན་ཏུ་ཆེ་བ་མྱོང་བར་འགྱུར་རོ། །སྨན་ཆེན་སེམས་ཅན་དམྱལ་བ་པའི་སེམས་ཅན་དེ་དག་གི་རྣམ་པར་ཤེས་པ་དེ་རུས་པའི་ལུས་དག་ལ་ [92b.2]གནས་པར་འགྱུར་ཞིང་རུས་པའི་ཚོགས་དང་འབྲལ་བར་མི་འགྱུར་ཏེ། སེམས་ཅན་དམྱལ་བ་པའི་སེམས་ཅན་དེ་དག་རྣམ་པར་ཤེས་པ་དང་མི་འབྲལ་བའི་ཕྱིར། འཆི་བའི་དུས་བྱེད་པར་མི་འགྱུར་རོ། །དེ་དག་བྲུ་བ་ཚ་བས་གཟིར་བཞིན་དུ་དེ་ན་ཁ་ཟས་ཀྱི་བྱ་བ་ཡང་མེད་དོ། །དེ་ན་ལྷའི་སྐྱེད་ [92b.3]མོས་ཚལ་ཤིང་ལྗོན་པ་བརྒྱ་ཕྲག་མང་པོ་མེ་ཏོག་ཤིན་ཏུ་རྒྱས་པ་དག་དང་། གསིང་མ་སྔོན་པོ་ཡངས་པའི་ས་ཕྱོགས་དག་ཀྱང་ཡོད་པར་མཐོང་ངོ་། །དེ་དག་གིས་སྐྱེད་མོས་ཚལ་དེ་དག་མཐོང་ནས་ཡིད་རབ་ཏུ་དགའ་སྟེ་འདི་སྐད་དུ་གྲོགས་པོ་དག་སྐྱེད་མོས་ཚལ་འདི་ན་རེག་ན་བདེ་བའི་སེར་བུ་ལྡང་ [92b.4]བ་ཡོད་ཀྱིས་ཚུར་ཤོག་ཅེས་ཟེར་ཏེ། དེ་དག་འདུས་ནས་མྱུར་བ་མྱུར་བར་སྐྱེད་མོས་ཚལ་དེའི་ནང་དུ་འགྲོའོ། །དེ་དག་དེའི་ནང་དུ་སོང་ནས་ཡུད་ཙམ་ཞིག་བདེ་བའི་འདུ་ཤེས་སྐྱེད་དོ། །དེ་དག་གིས་ཤིང་དེ་དག་ལས་བྱུང་བའི་མེ་ཏོག་དེ་དག་དང་། ལོ་མ་དེ་དག་རལ་གྲིར་འགྱུར་ཏེ། རལ་ [92b.5]གྲི་དེ་དག་གིས་དེ་དག་གི་ཡན་ལག་གཅོད་ཅིང་གཤེགས་པར་བྱེད་དེ། དེ་དག་རལ་གྲིས་བཅད་ནས་ཉམ་ཐག་པའི་སྒྲ་ཆེན་པོ་འབྱིན་པར་བྱེད་ཅིང་ཕྱོགས་ཕྱོགས་སུ་འབྱེར་རོ། །དེ་དག་འབྱེར་བ་ན་ཡང་རང་གི་ལས་ལས་བྱུང་བའི་གཤིན་རྗེའི་མི་ལག་ན་སོག་ལེ་དང་ཐོ་བ་ཐོགས་ཤིང་སོ་ [92b.6]དང་བཞིན་བསྒྱུར་ལ་སྐྲ་འབར་ཞིང་ལུས་འབར་བའི་ཕྲེང་བས་ཡོག་ལ་མཚོན་ཆ་གཟས་པ་དག་ཕྱི་བཞིན་དུ་སྒྲ་འབྱིན་ཅིང་འདི་སྐད་དུ་ཁྱེད་ཅག་སྡོད་ཅིག་ད་གར་འབྲོས། ཁྱེད་རང་གི་ལས་ཀྱིས་བསྒྲུབས་པའི་ཚུལ་འདི་ཉམས་སུ་མྱོང་བར་གྱིས་ཤིག་ཅེས་ཟེར་ཏེ། སྨན་ཆེན་དེ་ལྟར་ན་སེམས་ཅན་ [92b.7]དམྱལ་བ་པའི་སེམས་ཅན་རྣམས་སྐྱོ་བ་སྐྱེ་བར་འགྱུར་རོ། །སྨན་ཆེན་གཞན་ཡང་ཞག་བདུན་ལོན་ནས་སེམས་ཅན་དམྱལ་བ་པའི་སེམས་ཅན་རྣམས་ཀྱིས་ལས་ཉམས་སུ་མྱོང་བར་འགྱུར་ཏེ། བུང་བ་མེ་ཏོག་ལ་འཕོ་བ་བཞིན་དུ་དངོས་པོ་སྣ་ཚོགས་ཀྱི་རྐྱེན་གྱི་དབང་གིས་རྣམ་པར་ཤེས་པ་སེམས་ཅན་ [93a] [93a.1]དམྱལ་བ་རྣམས་སུ་སྐྱེ་བ་ཡོངས་སུ་ལེན་ཏོ། །དེ་ཡང་དང་པོ་ཤི་འཕོས་ནས་དབང་མེད་པར་ཁྲིད་དེ་སྡུག་བསྔལ་ཞིང་ཡིད་མི་བདེ་བར་གྱུར་ནས་མུན་པ་མུན་ནག་ཆེན་པོར་ཞུགས་ཏེ། མི་རྒོད་ཀྱིས་ཁྲིད་པ་བཞིན་དུ་འདི་སྙམ་དུ་སེམས་ཏེ། ཀྱི་ཧུད་ད་ནི་བདག་འཛམ་བུའི་གླིང་རྣམ་པར་བཀྲ་ [93a.2]བ་བོར་ཏེ། གཉེན་སྡུག་པ་ཡོངས་སུ་སྤངས་ནས་སེམས་ཅན་དམྱལ་བ་དག་ཏུ་མངོན་དུ་གནས་པར་གྱུར་ཅིང་འདུག་ཅིག་གུད་ནི་མཐོ་རིས་ཀྱི་ལམ་མི་མཐོང་ངོ་སྙམ་མོ་དེ་ཡང་དར་གྱི་སྲིན་བུ་རྒྱུད་གཅིག་གིས་དཀྲིས་པ་བཞིན་དུ་ཤིན་ཏུ་མྱུར་བར་སྐྱེ་བ་ཡོངས་སུ་ལེན་ཏེ། དེ་ཡང་བདག་ཉིད་ཀྱི་མགུལ་ནས་ [93a.3]ཞགས་པས་བཏགས་པར་ཤེས་སོ། །བཟང་སྐྱོང་དེ་ལྟར་ན་སེམས་ཅན་དམྱལ་བར་སེམས་ཅན་རྣམས་སུ་སྐྱེ་བར་འགྱུར་ཞིང་དེ་ལྟར་ན་དེ་དག་ལ་རྒྱུའི་བྱེ་བྲག་དག་འབྱུང་བར་འགྱུར་རོ། །དེ་ནས་བཟང་སྐྱོང་སྤུ་ཟིང་ཞེས་བྱེད་ནས་ཐལ་མོ་སྦྱར་ཏེ། བཅོམ་ལྡན་འདས་ལ་སྐྱབས་སུ་སོང་ངོ་། །རྒྱལ་པོའི་ [93a.4]བུ་གཞོན་ནུ་སྨན་ཆེན་གྱིས་ཀྱང་འདི་སྐད་དུ་དམ་པའི་ཆོས་མཉན་པ་འདིས་ན་བདག་འཁོར་བ་ནས་འཁོར་བའི་ཚེ་ལོག་པར་ལྟུང་བའི་ཆོས་ཅན་དུ་མ་གྱུར་ཅིག །བདག་སེམས་ཅན་དམྱལ་བ་རྣམས་སུ་སྐྱེ་བ་ཡོངས་སུ་ལེན་པར་མ་གྱུར་ཅིག་ཅེས་སྨོན་ལམ་བཏབ་བོ། །དེ་ནས་བཅོམ་ལྡན་འདས་ [93a.5]ལ་བཟང་སྐྱོང་གིས་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་ལ་བདག་ཞུ་བ་ཞུའོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ཅི་དང་ཅི་འདོད་པ་བཞིན་དུ་འདོད་པ་དྲིས་ཤིག །བཟང་སྐྱོང་གིས་གསོལ་པ། བཅོམ་ལྡན་འདས་བསགས་པ་ནི་གང་ལགས། སྤུངས་ [93a.6]པ་ནི་གང་ལགས། ཕུང་པོ་རྣམས་ནི་གང་ལགས། འཕོ་བ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་འདི་ལ་ཁམས་ཕྲད་པའི་ཕྱིར་ཁམས་བཞི་པོ་དག་གིས་ལུས་འགྲུབ་པར་བྱེད་དེ། ཤེས་རབ་དང་། ལྟ་བ་དང་། ཡིད་དང་། མ་རིག་པ་དང་། ཁམས་དང་། སྤྱོད་ [93a.7]ཡུལ་དང་། རྣམ་པར་ཤེས་པ་རྣམས་ནི་བསགས་པ་ཞེས་བྱའོ། །དེ་ལ་སྤུངས་པ་ནི་ཁམས་དྲུག་པོ་ཉིད་དང་། སྐྱེ་མཆེད་ཀྱི་སྤྱོད་ཡུལ་དྲུག་དང་། ཁམས་ཀྱི་རང་བཞིན་གསུམ་དང་། སྐྱེ་མཆེད་ལེན་པའི་རྒྱུ་གཉིས་དང་། སྐྲ་དང་། ཁ་སྤུ་དང་། སེན་མོ་དང་། བ་སྤུ་དང་། པགས་པ་དང་། ཤ་དང་། [93b] [93b.1]རྣག་དང་། མཁྲིས་པ་དང་། བད་ཀན་དང་། སྣབས་དང་། ཚིལ་དང་། ཆུ་སེར་དང་། རྐང་དང་། མིག་དང་། ཡན་ལག་དང་། ཉིང་ལག་ཚོགས་པ་ལ་སྤུངས་པ་ཞེས་བྱའོ། །དཔེར་ན་འབྲུ་སྤུངས་པ་བཞིན་ཏེ། ནས་དང་། ཏིལ་དང་། གྲོ་དང་། མོན་སྲན་སྡེའུ་མང་པོ་ལ་སྤུངས་པ་ཞེས་བྱ་བ་དེ་ [93b.2]བཞིན་དུ་ལུས་ཀྱི་ཡན་ལག་དང་ཉིང་ལག་ཏུ་གཏོགས་པ་ཚོགས་པ་ལ་སྤུངས་པ་ཞེས་བྱའོ། །ཁམས་དྲུག་པོ་དག་གང་ཞེ་ན། དེ་ལ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ཞེས་བྱའོ། །སྐྱེ་མཆེད་ [93b.3]དྲུག་གང་ཞེ་ན། འདི་ལ་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཅེས་བྱ་བའོ། །སྐྱེ་མཆེད་ཀྱི་སྤྱོད་ཡུལ་དྲུག་གང་ཞེ་ན། འདི་ལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་སྐྱེ་མཆེད་ཅེས་བྱ་བ་སྟེ། དེ་དག་ནི་སྤྱོད་ཡུལ་དྲུག་ཡིན་ནོ། །དེ་ལ་ཁམས་ [93b.4]ཀྱི་རང་བཞིན་གསུམ་གང་ཞེ་ན། འདི་ལ་འདོད་ཆགས་དང་། ཞེ་སྡང་དང་། གཏི་མུག་ཅེས་བྱ་བའོ། །དེ་ལ་དེ་དག་ཉིད་ཀྱི་ཀུན་ནས་ལྡང་བ་གསུམ་གང་ཞེ་ན། རླུང་དང་། མཁྲིས་པ་དང་། བད་ཀན་རྣམས་སོ། །དེ་ལ་སྐྱེ་མཆེད་ལེན་པའི་རྒྱུ་གཉིས་གང་ཞེ་ན། འདི་ལ་ཚུལ་ཁྲིམས་དང་། དད་ [93b.5]པ་དང་། གཏོང་བ་དང་། ནོར་དང་། བརྩོན་འགྲུས་དང་། ཏིང་ངེ་འཛིན་དང་། དགེ་བ་དང་། མི་དགེ་བ་ཞེས་བྱ་བའོ། །དེ་ལ་ཕུང་པོ་ཞེས་བྱ་བའི་དོན་གང་ཞེ་ན། འདི་ལ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཞེས་བྱ་བ་སྟེ། བཞི་པོ་འདི་དག་ནི་ [93b.6]གཟུགས་ཅན་མ་ཡིན་པའི་ཕུང་པོ་རྣམས་སོ། །དེ་ལ་ཚོར་བ་ནི་མྱོང་བའོ། །འདུ་ཤེས་ནི་ཤེས་པའོ། །བདེ་བ་དང་སྡུག་བསྔལ་ནི་འདུ་བྱེད་རྣམས་སོ། །ལྟ་བ་དང་། ཉན་པ་དང་། སྣོམ་པ་དང་། རོ་མྱང་བ་དང་། རེག་བྱ་རྣམས་རིག་པ་ནི་རྣམ་པར་ཤེས་པ་སྟེ། དངོས་པོ་ཐམས་ཅད་ [93b.7]ཀྱི་ཁོངས་སུ་གཏོགས་པས་ན་ལུས་ལ་དབང་བའི་དབང་ཕྱུག་དང་ལེན་པ་དང་འཐུན་པ་ཡིན་ནོ། །དེ་ལ་འཕོ་བ་ཞེས་བྱ་བ་ནི་ཚུལ་ཁྲིམས་ཤིན་ཏུ་ཡོངས་སུ་དག་པ་དང་། ལུས་དང་ངག་གི་ལས་ཀྱི་འབྲས་བུ་ཐོབ་པ་འཆི་བའི་དུས་བྱེད་པ་གང་ཡིན་པ་དེའི་ཚེ་རྣམ་པར་ཤེས་པ་དེས་ [94a] [94a.1]ཕུང་པོ་རྣམས་ཡོངས་སུ་བཏང་ནས་ཡང་སྲིད་པར་མི་སྐྱེ་ཞིང་ཕྱིར་མི་ལྡོག་པས་ན་ཤིན་ཏུ་བདེ་བར་འཕོ་ཞིང་འགྲོ་སྟེ། འཕོས་པ་དེའི་ཕྱིར་ཡང་འཕོ་བ་ཅན་མ་ཡིན་པ་དེ་ལྟ་བུ་ནི་དེའི་འཕོ་བ་འགྱུར་བ་ཡིན་ནོ། །དེ་ནས་བཟང་སྐྱོང་དང་སྨན་ཆེན་གཉིས་ཀྱིས་བཅོམ་ [94a.2]ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མཁྱེན་པས་སེམས་ཅན་རྣམས་ཚིམ་པར་བགྱིད་པ་གང་ལགས་པའི་ཆོས་ཀྱི་ཚོགས་འདི་ལེགས་པར་གསུངས་སོ། །བཅོམ་ལྡན་འདས་ཀྱིས་བཀའ་སྩལ་པ། [94a.3]བཟང་སྐྱོང་དེ་བཞིན་གཤེགས་པའི་ཡེ་ཤེས་འདི་ནི་བཅོས་མ་མ་ཡིན་ཏེ། འདིའི་རང་བཞིན་ནི་ཐམས་ཅད་མཁྱེན་པ་མ་ཡིན་པས་རིག་པ་མ་ཡིན་ནོ། །ཤེས་རབ་ཀྱི་སྣང་བ་འདི་ནི་དཀའ་བ་སྤྱད་པ་བརྒྱ་སྟོང་དུ་མས་བསྒྲུབས་པ་སྟེ། འདི་ནི་ངས་ཇི་སྐད་བསྟན་པ་དེ་ཁོ་ན་བཞིན་ནོ། །ཆོས་ [94a.4]ཀྱི་ཉི་མ་ཐམས་ཅད་མཁྱེན་པ་ཉིད་སྣང་བར་བྱེད་པ། ཡོན་ཏན་གྱི་གྲགས་པ་རྒྱས་པར་བྱེད་པ། ཐམས་ཅད་མཁྱེན་པའི་ཡེ་ཤེས་རྒྱ་མཚོའི་མཛོད་སེམས་ཅན་རྣམས་ཀྱི་རྒྱུད་འདུལ་བར་བྱེད་པ་འདུལ་བ་སྟོན་པ་འདི་ཡུལ་གང་ན་གནས་སམ། དེ་སྟོན་པར་འགྱུར་བ་དེར་ནི་མི་མ་ཡིན་པ་ [94a.5]རྣམས་སྲུང་བར་བྱེད་དེ། ལྷ་དང་། ལྷ་མ་ཡིན་དང་། ལྟོ་འཕྱེ་ཆེན་པོ་རྣམས་ཕྱག་བྱ་བའི་ཕྱིར་འོང་བར་འགྱུར་རོ། །ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་གང་ཡིན་པ་དེ་ལ་ནི་མཚོན་ [94a.6]གྱི་འཇིགས་པ་འབྱུང་བར་མི་འགྱུར། དུག་གི་འཇིགས་པ་འབྱུང་བར་མི་འགྱུར། མེའི་འཇིགས་པ་དང་། རྒྱལ་པོ་དང་། ཆུ་དང་། ཆོམ་རྐུན་གྱི་འཇིགས་པ་འབྱུང་བར་མི་འགྱུར་རོ། །དགེ་སློང་དག་ཁྱེད་ཀྱིས་དེང་ཕན་ཆད་མ་དད་པ་རྣམས་ལ་བཤད་པར་མི་བྱའོ། །ཀླན་ཀ་ཚོལ་བ་རྣམས་ལ་མ་ཡིན། [94a.7]གཅེར་བུ་བ་རྣམས་ལ་མ་ཡིན། གཅེར་བུ་བའི་ཉན་ཐོས་རྣམས་ལ་མ་ཡིན། གནས་གཞན་ལ་ཞུགས་པ་ལ་བཤད་པར་མི་བྱའོ། །མ་དྲིས་པར་ཡང་བཤད་པར་མི་བྱའོ། །དེ་བས་ན་གལ་ཏེ་ལ་ལ་འཁྲུལ་པར་གྱུར་ན་དེ་བཞིན་གཤེགས་པ་ལ་འཁྲུལ་པ་བྱས་པར་འགྱུར་རོ། །དགེ་ [94b] [94b.1]སློང་ངམ་ཁྱིམ་ན་གནས་པ་གང་ལ་ལས་འདི་རྟོགས་པ་དེ་ནི་ཕྱག་བྱ་བའི་གནས་སུ་འགྱུར་ཏེ། དེ་བཞིན་གཤེགས་པ་ལ་བྱ་བ་བཞིན་དུ་གུས་པ་བསྐྱེད་པར་བྱ་ཞིང་འདི་ནི་མཛོད་འཛིན་པ་ཡིན་ནོ་སྙམ་དུ་གཟུང་བར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་ [94b.2]བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཤོད་ཅིག །གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག །ཀུན་དགའ་བོས་གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདི་གཟུང་ [94b.3]བར་འཚལ་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་རྣམ་པར་ཤེས་པ་འཕོ་བ་ཞེས་བྱ་བར་ཟུང་ཤིག ། [94b.4]བཟང་སྐྱོང་གིས་ཞུས་པ་ཞེས་བྱ་བར་ཡང་ཟུང་ཤིག །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་ [94b.5]འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་མཐའ་མར་འབྱིན་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། རྒྱལ་པོའི་བུ་གཞོན་ནུ་སྨན་ཆེན་དང་། ཚོང་དཔོན་བཟང་སྐྱོང་དང་། ལྷ་དང་། མི་དང་། ལྷ་མ་ཡིན་ [94b.6]དང་། ནམ་མཁའ་ལྡིང་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ཚོང་དཔོན་ [94b.7]བཟང་སྐྱོང་གིས་ཞུས་པའི་ལེའུ་ཞེས་བྱ་སྟེ་སུམ་ཅུ་རྩ་དགུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ།། །། [95a] [95a.1]{D84}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་པ་སྟེ། བུ་མོ་རྣམ་དག་དད་པས་ཞུས་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་དཱ་རི་ཀཱ་བི་མ་ལ་ཤྲད་དྷཱ་པ་རི་པྲྀཙྪཱ་ནཱ་མ་མ་ [95a.2]ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བུ་མོ་རྣམ་དག་དད་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་ [95a.3]རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་ལྔ་བརྒྱ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་སྟོང་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་ཤེས་པར་བྱ་བ་རྣམས་རབ་ཏུ་ཤེས་པ། གཟུངས་དང་ [95a.4]ཐོགས་པ་མེད་པའི་སྤོབས་པ་ཐོབ་པ། བཟོད་པ་རྣམས་ཕུན་སུམ་ཚོགས་པ། བདུད་ཀྱི་དཔུང་རབ་ཏུ་བཅོམ་པ། དེ་བཞིན་གཤེགས་པ་རྣམས་ཀྱིས་བརྙེས་པའི་ཆོས་རྣམས་རབ་ཏུ་ཐོབ་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་འཇིག་རྟེན་འཛིན་དང་། བྱང་ཆུབ་ [95a.5]སེམས་དཔའ་ལམ་འཛིན་དང་། བྱང་ཆུབ་སེམས་དཔའ་ས་འཛིན་དང་། བྱང་ཆུབ་སེམས་དཔའ་ས་འཛིན་ཆེན་པོ་དང་། བྱང་ཆུབ་སེམས་དཔའ་མོས་པའི་བློ་གྲོས་དང་། བྱང་ཆུབ་སེམས་དཔའ་མོས་བྱེད་དང་། བྱང་ཆུབ་སེམས་དཔའ་གཟུགས་མཛེས་བཀོད་པ་དང་། [95a.6]བྱང་ཆུབ་སེམས་དཔའ་རིན་པོ་ཆེའི་ཏོག་དང་། བྱང་ཆུབ་སེམས་དཔའ་རིན་པོ་ཆེའི་རྒྱལ་མཚན་དང་། བྱང་ཆུབ་སེམས་དཔའ་རིན་ཆེན་སེམས་པ་དང་། བྱང་ཆུབ་སེམས་དཔའ་རིན་ཆེན་འབྱུང་གནས་དང་། བྱང་ཆུབ་སེམས་དཔའ་རིན་ཆེན་བློ་གྲོས་དང་། བྱང་ཆུབ་སེམས་དཔའ་ [95a.7]རིན་ཆེན་ཡོན་ཏན་དང་། བྱང་ཆུབ་སེམས་དཔའ་རིན་ཆེན་འོད་དང་། གཞན་ཡང་བསྐལ་པ་བཟང་པོའི་བྱང་ཆུབ་སེམས་དཔའ་བྱམས་པ་ལ་སོགས་པ་གཙོ་བོར་གྱུར་པ་དང་ཐབས་ཅིག་གོ །གཞན་ཡང་སེམས་པ་དཔེ་ཟླ་མེད་པའི་བྱང་ཆུབ་སེམས་དཔའ་འཇམ་དཔལ་ལ་སོགས་པ་གཙོ་ [95b] [95b.1]བོར་གྱུར་པ་དྲུག་ཅུ་པོ་དག་དང་ཡང་ཐབས་ཅིག་གོ །གཞན་ཡང་སྐྱེས་བུ་ཆེན་པོ་བྱང་ཆུབ་སེམས་དཔའ་བཟང་སྐྱོང་ལ་སོགས་པ་གཙོ་བོར་གྱུར་པ་བཅུ་དྲུག་དང་ཡང་ཐབས་ཅིག་གོ །གཞན་ཡང་དགའ་ལྡན་གྱི་རིས་ཀྱི་ལྷའི་བུ་ཉི་ཁྲི་འཁོར་དེ་ཉིད་དུ་འདུས་པར་གྱུར་པ་དག་དང་ [95b.2]ཡང་ཐབས་ཅིག་གོ །དེའི་ཚེ་བཅོམ་ལྡན་འདས་བཀོད་པ་ཆེན་པོའི་མཛོད་ཅེས་བྱ་བའི་སེང་གེའི་གདན་ལ་འཁོར་བརྒྱ་སྟོང་ཚད་མེད་པ་དག་གིས་ཡོངས་སུ་བསྐོར་ནས་བཞུགས་པས་ཉི་ཟླ་ལྟ་བུའི་འོད་ཟེར་གྱིས་ནི་ཀུན་དུ་སྣང་བར་མཛད། བརྒྱ་བྱིན་དང་ཚངས་པའི་རྒྱལ་པོ་ལྟར་གཟི་ [95b.3]བྱིན་ནི་ཁྱད་པར་དུ་འཕགས། རིའི་རྒྱལ་པོ་རི་རབ་ལྟ་བུར་ཤིན་ཏུ་མཐོ་ཞིང་ཕལ་ལས་ནི་མངོན་པར་འཕགས་པར་གྱུར། སྒྲོན་མ་ཆེན་པོ་ལྟ་བུར་འོད་ཟེར་དག་ནི་རབ་ཏུ་འབར། གླང་པོ་ཆེའི་རྒྱལ་པོ་ལྟར་ཕན་ཚུན་དུ་ནི་གཟིགས་པར་མཛད། སེང་གེའི་སྒྲ་སྒྲོགས་པ་ལྟར་ [95b.4]བསྙེངས་པ་མི་མངའ་བར་ནི་ཆོས་སྟོན་པར་མཛད། ལྷ་མ་ཡིན་གྱི་རྒྱལ་པོ་སྒྲ་གཅན་ཟིན་ལྟར་འཁོར་མང་པོ་རྣམས་ནི་ཟིལ་གྱིས་མནན། མཚན་དང་དཔེ་བྱད་བཟང་པོ་དག་གིས་ནི་སྐུ་རབ་ཏུ་བརྒྱན། གཟི་བྱིན་དང་མཐུ་སྟོབས་དག་ནི་རབ་ཏུ་འབར་བར་གྱུར་ཏེ། སེམས་ཅན་ཐམས་ཅད་ [95b.5]ངེས་པའི་དོན་མཆོག་ལ་འགོད་ཅིང་ཁོང་དུ་ཆུད་པར་མཛད་པའི་ཕྱིར་ཚངས་པའི་སྒྲ་དབྱངས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་ཏུ་བསྒྲགས་ནས་འཁོར་མང་པོའི་དབུས་སུ་ཆོས་སྟོན་པར་མཛད་དོ། །དེ་ནས་རྒྱལ་པོ་གསལ་རྒྱལ་གྱི་བུ་མོ་རྣམ་དག་དད་པ་ [95b.6]ཞེས་བྱ་བ་གཞོན་ནུ་མ་བྱད་བཞིན་སྡུག་ཅིང་མཛེས་པ། སེམས་ཅན་རྣམས་ཀྱིས་མཐོང་བར་མོས་པ། སྔོན་དགེ་བའི་རྩ་བ་བསྐྱེད་པ། ཐེག་པ་ཆེན་པོ་བསྒོམས་པ་ཞིག་ཡོད་པ་དེ་བུ་མོ་གཞོན་ནུ་མ་ལྔ་བརྒྱས་ཡོངས་སུ་བསྐོར་ཏེ། སོ་སོ་ནས་གསེར་གྱི་ཕྲེང་བ་ཐོགས་ནས་གྲོང་ཁྱེར་ [95b.7]མཉན་ཡོད་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཕྱག་བྱས་ནས། ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་ནས་ཚིགས་སུ་བཅད་དེ་མངོན་པར་བསྟོད་པ། [96a] [96a.1]ཡུན་རིང་བསོད་ནམས་རྣམ་དག་ཕྲིན་ལས་བསགས། །ཡོན་ཏན་རྒྱ་མཚོ་མཐའ་ཡས་ཡོངས་རྫོགས་ཤིང་། །མང་པོ་དད་མོས་དགའ་བར་མཛད་པས་ན། །དེ་སླད་ཐུབ་མཆོག་ཁྱོད་ལ་བདག་ཕྱག་འཚལ། །གཟི་བྱིན་ལྷམ་མེ་ཡ་མཚན་རབ་སྟོན་ཅིང་། །རིན་ [96a.2]ཆེན་འབྱུང་གནས་ཆོས་སྒོ་སྟོན་པར་མཛད། །སྐུ་ཡི་འོད་ཟེར་འདོམ་གང་རྟག་གསལ་བ། །བློ་ཆེན་བསིལ་བའི་རྫིང་ལ་བདག་ཕྱག་འཚལ། །ཡོན་ཏན་ལྗོན་ཤིང་བསོད་ནམས་བས་མ་འཚལ། །མི་མཆོག་ཁྱོད་ལ་འཇིག་རྟེན་ཀུན་གྱིས་བསྔགས། །སྨོན་ལམ་ཆེན་པོ་ཚུལ་ [96a.3]ཁྲིམས་ཡོངས་རྫོགས་པས། །དེ་སླད་མཆོད་འོས་གཙོ་ལ་བདག་ཕྱག་འཚལ། །ཆོས་མཆོག་རབ་གནས་རྟག་པར་ཞི་ཞིང་དབེན། །འཇིག་རྟེན་ཀུན་ལ་ཐུགས་སྙོམས་བུ་གཅིག་བཞིན། །མཁྱེན་པ་དག་གིས་སྤྱོད་རྣམས་རབ་མཁྱེན་པས། །འདྲེན་མཁན་བཞིན་དུ་མཉམ་པའི་ [96a.4]ཤུལ་ཡང་སྟོན། །རབ་བརྟན་བརྩོན་འགྲུས་ལྡན་པ་མཆིས་གྱུར་ན། །བྱམས་དང་ཐུགས་རྗེས་སེམས་ཅན་སྨན་མཛད་པས། །བྱང་ཆུབ་སེམས་དཔའི་སྤྱོད་པ་གང་ལགས་པ། །དེ་བཞིན་གཤེགས་པས་བཀས་ནི་བཤད་དུ་གསོལ། །ཇི་ལྟར་རབ་བརྟན་སྟོབས་ནི་ཐོབ་གྱུར་ནས། ། [96a.5]འཁོར་བར་གནས་ཀྱང་བདུད་དཔུང་ཕམ་བགྱིད་ལགས། །ཇི་ལྟར་མཉམ་པའི་ཆོས་ནི་ཐོབ་འགྱུར་ཞིང་། །ཇི་ལྟར་སེམས་ཅན་ཡོངས་སུ་སྨིན་བགྱིད་ལགས། །ཇི་ལྟར་བགྱིས་ན་ས་གཞི་ནམ་མཁའ་དང་། །རླུང་དང་ཆུ་མེ་ཇི་ལྟ་བཞིན་དུ་འགྱུར། །ཇི་ལྟར་ཡིད་ཆེས་ [96a.6]ཐོབ་ནས་ཆོས་གནས་ཤིང་། །རི་རབ་སེང་གེའི་རྒྱལ་པོ་བཞིན་དུ་འགྱུར། །ཇི་ལྟར་བྱམས་སྡང་སེམས་ནི་ཡོངས་སྤངས་ནས། །སེམས་གཙང་དྲང་ལ་གཡོ་སྒྱུ་མ་མཆིས་འགྱུར། །ཇི་ལྟར་སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་རྣམ་གྲོལ་སྐྱེ་ [96a.7]འགྱུར་ཞིང་། །ཤེས་རབ་ཉོན་མོངས་མུན་པ་རབ་བཅོམ་ནས། །རྟག་པར་ཐབས་ཆེན་ལ་ནི་གནས་པ་དང་། །ཏིང་འཛིན་གཟུངས་ལ་ཐོགས་པ་མ་མཆིས་ཤིང་། །ཚད་མེད་བཞི་དང་མངོན་ཤེས་ལྔ་ལ་གནས། །ཇི་ལྟར་སངས་རྒྱས་སྤྱན་སྔར་གནས་གྱུར་ནས། །རྟག་པར་རྫུས་ [96b] [96b.1]ཏེ་སྐྱེ་ཞིང་ཚེ་རབས་དྲན། །སྦྱངས་པས་རྩོད་པ་མ་མཆིས་དགོན་གནས་ནས། །སེམས་ནི་རབ་བཏུལ་ཉོན་མོངས་ཞི་བགྱིད་དང་། །ཚུལ་ཁྲིམས་ལྡན་ཞིང་བྱང་ཆུབ་ལམ་བསྒོམས་དང་། །བདུད་རྩི་འགོག་ཐོབ་བདུད་དཔུང་འཇོམས་པ་དང་། །བདེ་སྩོལ་ཆོས་ཀྱི་འཁོར་ [96b.2]ལོ་སྐོར་འགྱུར་བ། །དེ་འདྲའི་ཡང་དག་ལམ་ནི་བཀས་བཤད་གསོལ། །དེ་ནས་བཅོམ་ལྡན་འདས་ཀྱིས་བུ་མོ་རྣམ་དག་དད་པ་ལ་བཀའ་སྩལ་པ། བུ་མོ་བྱང་ཆུབ་སེམས་དཔའ་གང་སྟོབས་རྣམ་པ་བརྒྱད་དང་ལྡན་པར་གྱུར་ན་འཁོར་བ་ན་གནས་ཀྱང་རབ་ཏུ་བརྟན་པའི་ [96b.3]དཔའ་བོར་འགྱུར་ཞིང་ཡོངས་སུ་ངལ་བ་མེད་པར་འགྱུར་རོ། །བརྒྱད་གང་ཞེ་ན། དང་པོ་ནི་སེམས་ཀྱིས་འདུན་པའི་སྟོབས་ཏེ་གཡོ་སྒྱུ་མེད་པའི་ཕྱིར་རོ། །གཉིས་པ་ནི་མོས་པའི་སྟོབས་ཏེ། སྡིག་པ་རྣམས་སྤོང་བར་བྱེད་པའི་ཕྱིར་རོ། །གསུམ་པ་ནི་སྦྱོར་བའི་སྟོབས་ཏེ། [96b.4]རྟག་ཏུ་དགེ་བ་བསྒྲུབ་པའི་ཕྱིར་རོ། །བཞི་པ་ནི་མངོན་པར་ཡིད་ཆེས་པའི་སྟོབས་ཏེ། ལས་ཀྱི་རྣམ་པར་སྨིན་པ་དག་ལ་ཤིན་ཏུ་མངོན་པར་ཡིད་ཆེས་པའི་ཕྱིར་རོ། །ལྔ་པ་ནི་བྱང་ཆུབ་ཀྱི་སེམས་ཀྱི་སྟོབས་ཏེ། ཐེག་པ་དམན་པ་ཡོངས་སུ་མི་ཚོལ་བའི་ཕྱིར་རོ། །དྲུག་པ་ནི་ [96b.5]བྱམས་པ་ཆེན་པོའི་སྟོབས་ཏེ། སེམས་ཅན་ལ་གནོད་པ་མེད་པའི་ཕྱིར་རོ། །བདུན་པ་ནི་སྙིང་རྗེ་ཆེན་པོའི་སྟོབས་ཏེ་གནོད་པ་བྱས་པ་རྣམས་དང་དུ་ལེན་པར་བྱེད་པའི་ཕྱིར་རོ། །བརྒྱད་པ་ནི་དགེ་བའི་བཤེས་གཉེན་གྱི་སྟོབས་ཏེ། དུས་དུས་སུ་སད་པར་བྱེད་པའི་ཕྱིར་རོ། །བུ་མོ་ [96b.6]འདི་ནི་སྟོབས་རྣམ་པ་བརྒྱད་ཅེས་བྱ་སྟེ། བྱང་ཆུབ་སེམས་དཔའ་གང་སྟོབས་བརྒྱད་པོ་འདི་དག་དང་ལྡན་པར་གྱུར་ན་རབ་ཏུ་བསྟན་པའི་དཔའ་བོར་འགྱུར་བས་འཁོར་བ་ན་གནས་ཀྱང་མངོན་པར་ཞེན་ཅིང་ཆགས་པ་མེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་ [96b.7]བཅད་དེ་བཀའ་སྩལ་པ། སེམས་འདུན་དཔའ་བོ་གང་ཡིན་པ། །གཡོ་སྒྱུ་དག་ནི་སྤོང་བྱེད་ཅིང་། །རྟག་པར་དྲང་པོར་སྤྱོད་པས་ན། །ཡང་དག་བྱང་ཆུབ་གཞོལ་བར་འགྱུར། །མོས་པའི་སྟོབས་ནི་གང་ཡིན་པ། །ཉེས་པ་མང་པོ་སྤོང་བྱེད་ཅིང་། །དགེ་བ་འབའ་ཞིག་སྤྱོད་ [97a] [97a.1]པས་ན། །ཡང་དག་བརྩོན་ལ་གནས་པར་འགྱུར། །སྦྱོར་བ་ཕུན་སུམ་ཚོགས་གྱུར་པ། །རྟག་ཏུ་ལེགས་པར་རབ་བསྟན་ནས། །བརྩོན་འགྲུས་བརྟན་པར་གྱུར་པས་ན། །སེམས་ཅན་རྣམས་ནི་བདེ་བར་བྱེད། །མངོན་པར་ཡིད་ཆེས་སྟོབས་དབང་གིས། ། [97a.2]ལས་ཀྱི་རྣམ་སྨིན་རིག་པས་ན། །སངས་རྒྱས་ཡེ་ཤེས་ཡིད་ཆེས་ཤིང་། །འཇིག་རྟེན་ཡོངས་སུ་སྡུད་པར་འགྱུར། །བྱང་ཆུབ་སེམས་སྟོབས་གང་ཡིན་དེས། །ཐེག་པ་དམན་པ་སྤོང་བྱེད་ཅིང་། །སངས་རྒྱས་གདུང་ནི་མི་གཅོད་པས། །ཆོས་ཉིད་ལ་ནི་གནས་པར་འགྱུར། ། [97a.3]བྱམས་ཆེན་སྟོབས་ཀྱི་དབང་གིས་ནི། །སེམས་ཅན་སྙོམས་པར་ལྟ་བྱེད་ཅིང་། །བྱམས་སྡང་དག་ནི་མེད་པས་ན། །ཞེ་སྡང་གནོད་སེམས་སྐྱེད་མི་འགྱུར། །སྙིང་རྗེ་ཆེན་པོའི་སྟོབས་ཀྱིས་ནི། །སེམས་ཅན་དང་དུ་ལེན་བྱེད་ཅིང་། །འཁོར་བ་དག་ལ་ཞེན་མེད་པས། །ཡོངས་སུ་སྐྱོ་ [97a.4]ཞིང་ངལ་བ་མེད། །དགེ་བའི་བཤེས་གཉེན་སྟོབས་ཀྱིས་ནི། །རྟག་པར་ཕན་ཚུན་སད་བྱེད་ཅིང་། །སེམས་ནི་བྱིང་བར་མི་འགྱུར་བས། །བྱང་ཆུབ་ལ་ནི་གནས་པར་འགྱུར། །དཔའ་བོ་གང་ཡིན་དེ་དག་གིས། །སྟོབས་བརྒྱད་འདི་དག་ཐོབ་གྱུར་ན། །བྱང་ཆུབ་སྙིང་ [97a.5]པོར་འདུག་ནས་ནི། །བདུད་དཔུང་མང་པོ་བཅོམ་པར་འགྱུར། །གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་པར་གྱུར་ན་མཉམ་པ་ཉིད་ལ་རབ་ཏུ་གནས་པར་འགྱུར་རོ། །བརྒྱད་གང་ཞེ་ན་དང་པོ་ནི་སེམས་ཅན་ཐམས་ཅད་མཉམ་པར་གྱུར་པ་སྟེ་རང་བཞིན་ [97a.6]གྱིས་བདག་མེད་པའི་ཕྱིར་རོ། །གཉིས་པ་ནི་ཆོས་ཐམས་ཅད་མཉམ་པར་གྱུར་པ་སྟེ་ཆོས་རྣམས་རབ་ཏུ་དབེན་པའི་ཕྱིར་རོ། །གསུམ་པ་ནི་ཞིང་ཐམས་ཅད་མཉམ་པར་གྱུར་པ་སྟེ། སྟོང་པ་ཉིད་ཀྱི་ཁམས་སུ་འཇུག་པར་འགྱུར་བའི་ཕྱིར་རོ། །བཞི་པ་ནི་དེ་བཞིན་གཤེགས་ [97a.7]པ་ཐམས་ཅད་མཉམ་པར་གྱུར་པ་སྟེ། སྙོམས་པ་ཉིད་དུ་སྟོན་པའི་ཕྱིར་རོ། །ལྔ་པ་ནི་སྤྱོད་པ་ཐམས་ཅད་མཉམ་པར་གྱུར་པ་སྟེ། རྒྱུ་དང་རྐྱེན་ལ་རང་བཞིན་མེད་པའི་ཕྱིར་རོ། །དྲུག་པ་ནི་ཐེག་པ་ཐམས་ཅད་མཉམ་པར་གྱུར་པ་སྟེ། འདུས་མ་བྱས་སུ་མཚུངས་པའི་ [97b] [97b.1]ཕྱིར་རོ། །བདུན་པ་ནི་སེམས་མཉམ་པར་གྱུར་པ་སྟེ། སེམས་སྒྱུ་མ་དང་མཚུངས་པའི་ཕྱིར་རོ། །བརྒྱད་པ་ནི་བདུད་རྣམས་མཉམ་པར་གྱུར་པ་སྟེ། ཉོན་མོངས་པའི་ཐོག་མ་མི་དམིགས་པའི་ཕྱིར་རོ། །འདི་ནི་ཆོས་རྣམ་པ་བརྒྱད་ཀྱིས་མཉམ་པ་ཉིད་ལ་རབ་ཏུ་གནས་པ་ [97b.2]ཞེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སེམས་ཅན་རང་བཞིན་བདག་མེད་པས། །སྐད་ཅིག་ཙམ་ཡང་དམིགས་མི་འགྱུར། །མཉམ་པ་ཉིད་ལ་གང་གནས་པ། །དེ་ལྟ་བུར་ནི་བལྟ་བར་བྱ། །ཆོས་རྣམས་ཐམས་ [97b.3]ཅད་མཉམ་པས་ན། །རང་བཞིན་རྟག་པར་སྟོང་ཞིང་དབེན། །ཡི་གེས་ཐ་དད་ཕྱེ་བར་ཟད། །ཆོས་རྣམས་རང་བཞིན་བྱེ་བྲག་མེད། །ཕྱོགས་བཅུའི་ཞིང་རྣམས་ཐམས་ཅད་ཀུན། །མུ་མཐའ་དག་ནི་མི་དམིགས་པས། །དེ་ཡི་རང་བཞིན་ནམ་མཁའ་འདྲ། །སངས་ [97b.4]རྒྱས་ཞིང་ནི་རྟག་ཏུ་མཉམ། །དུས་གསུམ་དེ་བཞིན་གཤེགས་པ་ཀུན། །ཆོས་དབྱིངས་གནས་པར་མཉམ་པས་ན། །ཡེ་ཤེས་མཐའ་ཡས་རྣམ་པར་གྲོལ། །སངས་རྒྱས་ཀུན་ཀྱང་དེ་བཞིན་ནོ། །སེམས་ཅན་རང་བཞིན་རྒྱུ་རྐྱེན་རྣམས། །ཐམས་ཅད་ཀུན་ཀྱང་མཉམ་ [97b.5]པ་དང་། །དེ་ཡི་སྤྱོད་པ་རབ་ཤེས་པས། །ཅི་རིགས་པར་ནི་གོ་བར་བྱེད། །སེམས་ཅན་ཇི་སྙེད་ཐ་དད་པ། །སྒྱུ་སྦྲུལ་ལྟ་བུར་རབ་ཏུ་རྟོགས། །ཕྱི་ནང་གཉིས་ཀ་ལེན་མེད་པས། །རང་བཞིན་རྟག་ཏུ་རྣམ་པར་དག །ཐེག་པ་སྣ་ཚོགས་རབ་བཤད་ཀྱང་། །འདུས་ [97b.6]མ་བྱས་སུ་རབ་ཏུ་མཉམ། །འདྲེན་པས་ཐབས་ནི་རབ་མཁྱེན་པས། །རྣམ་པར་ཕྱེ་སྟེ་ཐེག་གསུམ་བཤད། །ཉོན་མོངས་བདུད་ལ་རབ་གནས་ཀྱང་། །ཉོན་མོངས་དངོས་པོ་ཅི་ཡང་མེད། །ལྷ་དང་ཕུང་པོ་འཆི་བདག་བདུད། །སྤྱོད་ཡུལ་ཐམས་ཅད་སྟོང་པ་ཡིན། ། [97b.7]གཞན་ཡང་བུ་མོ་བྱང་ཆུབ་སེམས་དཔའ་ཆོས་བརྒྱད་དང་ལྡན་ན་བྱམས་སྡང་རྣམས་ཡོངས་སུ་སྤོང་བར་བྱེད་དོ། །བརྒྱད་གང་ཞེ་ན་བྱམས་པ་དང་ལྡན་པ་དང་། སྙིང་རྗེ་དང་ལྡན་པ་དང་། རྟག་པར་ཕན་འདོགས་པར་བྱེད་པ་དང་། འཇིག་རྟེན་པའི་ཆོས་ལ་མ་ཆགས་པ་དང་། [98a] [98a.1]རང་གི་ལུས་ལ་ཆགས་པ་མེད་པ་དང་། རྟག་ཏུ་ཏིང་ངེ་འཛིན་གྱི་སེམས་སྒོམ་པ་དང་། ལུས་དང་སྲོག་ཡོངས་སུ་གཏོང་བ་དང་། ཉོན་མོངས་པ་རྣམས་ལ་སོ་སོར་རྟོག་པ་སྟེ། ཆོས་བརྒྱད་པོ་འདི་དག་མངོན་པར་སྒྲུབ་པར་ནུས་ན་བྱམས་སྡང་ཡོངས་སུ་སྤོང་ [98a.2]བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། བྱམས་སེམས་གོ་ཆ་རབ་བགོས་ནས། །ཐམས་ཅད་ཀུན་ལ་སྙིང་བརྩེ་ཞིང་། །མཉམ་པའི་སེམས་ལ་གང་གནས་པ། །བྱམས་སྡང་སེམས་ལ་སྐྱེ་མི་འགྱུར། །བློ་ [98a.3]ལྡན་ཕན་འདོགས་སྤྱོད་པས་ན། །རྟག་པར་གཞན་ལ་བདེ་བ་གཏོང་། །རྙེད་པ་ཐོབ་ཀྱང་རང་མི་མཐོང་། །བརྙས་ཤིང་སྨད་ཀྱང་འཁོན་འཛིན་མེད། །རླུང་བརྒྱད་ཀྱིས་ནི་མི་བསྐྱོད་པས། །བྱམས་སྡང་དག་ནི་མི་སྐྱེ་ཞིང་། །བདག་གམ་གལ་ཏེ་གཞན་ཡང་རུང་། །བྱམས་ [98a.4]སྡང་འདུ་ཤེས་ཡོངས་མི་སྐྱེད། །འདུ་ཤེས་རྣམས་ནི་རབ་སྤངས་ནས། །སྤྱོད་ཡུལ་དག་ལ་ཞེན་པ་མེད། །རྟག་པར་རང་གི་ལུས་རྟོགས་པས། །ལུས་སྲོག་དག་ལ་ཕོངས་པ་མེད། །མཁས་རྣམས་སྡུག་བསྔལ་བདེ་བ་ཡིས། །གཡོས་པར་མི་འགྱུར་ནམ་མཁའ་བཞིན། ། [98a.5]ཉོན་མོངས་ལེགས་པར་རྟོགས་བྱེད་ན། །བདག་དང་བདག་གི་གཉི་ག་སྤོང་། །སྤྱོད་འཛིན་རྟག་པར་ས་འདྲ་བས། །བྱམས་སྡང་དག་ནི་ཡོངས་མི་སྐྱེད། །གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་ན་འཁོར་བས་ཡོངས་སུ་ངལ་བར་མི་འགྱུར་རོ། ། [98a.6]བརྒྱད་གང་ཞེ་ན། དགེ་བའི་རྩ་བ་ཡངས་ཤིང་རྒྱ་ཆེ་བའི་ཕྱིར་དང་། སེམས་ཅན་ལ་སོ་སོར་རྟོག་པར་བྱེད་པའི་ཕྱིར་དང་། རྟག་པར་དེ་བཞིན་གཤེགས་པ་རྣམས་མཐོང་ཞིང་མཆོད་པ་བྱེད་པའི་ཕྱིར་དང་། སངས་རྒྱས་ཀྱི་ཞིང་ཚད་མེད་པ་རྣམས་མཐོང་བའི་ཕྱིར་དང་། རྟག་ [98a.7]པར་སངས་རྒྱས་ཀྱི་མཁྱེན་པ་ཡོངས་སུ་གཉེར་བའི་ཕྱིར་དང་། འཁོར་བ་རྨི་ལམ་ལྟ་བུར་རབ་ཏུ་རྟོགས་པའི་ཕྱིར་དང་། ཆོས་ཁྱད་པར་ཅན་དག་ལ་ཞུམ་པ་མེད་པའི་ཕྱིར་དང་། སྔོན་གྱི་མཐའ་དང་ཕྱི་མའི་མཐའ་དང་ཡང་དག་པའི་མཐའ་ལ་སོ་སོར་རྟོག་པའི་ཕྱིར་རོ། །དེ་ནས་ [98b] [98b.1]བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྣལ་འབྱོར་ལམ་ནི་གང་སྒོམ་པ། །དགེ་སྦྱོང་སྐྱོན་འཕེན་དྲི་མ་མེད། །བར་སྣང་ཟླ་བ་རྣམ་དག་བཞིན། །སྡུག་བསྔལ་སེམས་ཅན་སྒྲོལ་བར་བྱེད། །ཡོན་ཏན་རྣམས་ནི་བསྡུ་བའི་ཕྱིར། །འཁོར་བས་ [98b.2]ཡོངས་སུ་ངལ་མི་འགྱུར། །སེམས་ཅན་རང་བཞིན་རྟོག་བྱེད་ཅིང་། །རབ་བརྟེན་བརྩོན་འགྲུས་སྤྱོད་པར་བྱེད། །སངས་རྒྱས་ཞིང་ནི་ཚད་མེད་དུ། །སངས་རྒྱས་རྣམས་ནི་གུས་མཆོད་པས། །དེ་ཕྱིར་སྟོབས་བཅུ་གང་ལྡན་པ། །འཁོར་བས་ཡོངས་སུ་ངལ་མི་འགྱུར། ། [98b.3]འཇིག་རྟེན་ཚད་མེད་དཔག་མེད་དུ། །བསམ་གྱིས་མི་ཁྱབ་ཆོས་སྟོན་ཅིང་། །དཀོན་མཆོག་གསུམ་གྱི་གདུང་མི་གཅོད། །ཆོས་རྒྱལ་ཉིད་དུ་མངོན་འཚང་རྒྱ། །ཚུལ་ཁྲིམས་དམ་པ་གང་སྲུང་བ། །འཁོར་བས་ངལ་བར་མི་འགྱུར་ཞིང་། །འཁོར་བའི་རང་བཞིན་ [98b.4]གང་ཡིན་པ། །རྨི་ལམ་སྤྲིན་དང་གློག་ལྟར་ཤེས། །ཆོས་ལས་གང་ཞིག་རྣམ་གྲོལ་བ། །འཁོར་བས་ཡོངས་སུ་ངལ་མི་འགྱུར། །བྱང་ཆུབ་ལ་ནི་རབ་གནས་ཤིང་། །དགའ་བའི་སེམས་ཀྱིས་རྟག་ཏུ་བདེ། །ཐབས་ཀྱིས་ཕ་རོལ་གང་ཕྱིན་པ། །འཁོར་བས་ [98b.5]ཡོངས་སུ་ངལ་མི་འགྱུར། །རྟག་པར་དམ་ཆོས་སྒྲུབ་པ་ཡང་། །བར་སྣང་ཟླ་བཞིན་འཕེལ་བར་འགྱུར། །སངས་རྒྱས་ཡོན་ཏན་གང་མོས་པ། །འཁོར་བས་ཡོངས་སུ་ངལ་མི་འགྱུར། །འཁོར་བ་མུ་མཐའ་མེད་གྱུར་ཀྱང་། །རྟག་པར་ཡང་དག་མཐའ་ལ་ [98b.6]གནས། །ཡུད་ཙམ་ཤེས་རབ་རྗེས་འཐུན་པ། །འཁོར་བ་དག་གིས་ངལ་མི་འགྱུར། །གཞན་ཡང་བུ་མོ་ཆོས་བརྒྱད་དང་ལྡན་ན་སེམས་ཀྱི་ཁམས་མཉམ་པར་འགྱུར་རོ། །བརྒྱད་གང་ཞེ་ན། སེམས་ས་དང་མཚུངས་པར་གྱུར་པའི་ཕྱིར་དང་། སེམས་ཆུ་དང་མཚུངས་ [98b.7]པར་གྱུར་པའི་ཕྱིར་དང་། སེམས་མེ་དང་མཚུངས་པར་གྱུར་པའི་ཕྱིར་དང་། སེམས་རླུང་དང་མཚུངས་པར་གྱུར་པའི་ཕྱིར་དང་། སེམས་ནམ་མཁའ་དང་མཚུངས་པར་གྱུར་པའི་ཕྱིར་དང་། སེམས་ཆོས་ཀྱི་དབྱིངས་དང་མཚུངས་པར་གྱུར་པའི་ཕྱིར་དང་། སེམས་ [99a] [99a.1]རྣམ་པར་གྲོལ་བ་དང་མཚུངས་པར་གྱུར་པའི་ཕྱིར་དང་། སེམས་མྱ་ངན་ལས་འདས་པ་དང་མཚུངས་པར་གྱུར་པའི་ཕྱིར་ཏེ། འདི་ནི་སེམས་ཀྱི་ཁམས་མཉམ་པ་ཉིད་རྣམ་པ་བརྒྱད་ཅེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་ [99a.2]བཀའ་སྩལ་པ། སེམས་ནི་ས་དང་མཚུངས་པས་ན། །ཐམས་ཅད་ཁུར་དུ་ཁྱེར་བར་བྱེད། །དགེ་བ་དང་ནི་སྡིག་པ་འང་རུང་། །འཕེལ་བ་མེད་ཅིང་འགྲིབ་པ་མེད། །སེམས་ནི་ཆུ་དང་མཚུངས་པས་ན། །དྲི་མ་མི་གཙང་འཁྲུ་བྱེད་ཅིང་། །འཇིག་རྟེན་རྣམས་ནི་ [99a.3]གསོ་བ་དང་། །ཉོན་མོངས་གདུང་བ་སེལ་བར་བྱེད། །སེམས་ནི་མེ་དང་མཚུངས་པས་ན། །ཉོན་མོངས་དག་ནི་སྲེག་བྱེད་ཅིང་། །སྒྲོན་མ་ཆེན་པོ་སྣང་བ་ཡིས། །གསལ་བར་མི་བྱེད་གང་ཡང་མེད། །སེམས་ནི་རླུང་དང་མཚུངས་པས་ན། །གནས་པ་མེད་ [99a.4]ཅིང་རྟེན་མེད་པར། །ཚུལ་ཁྲིམས་ཐོས་པའི་དྲི་ཡིས་ནི། །དུས་གསུམ་ཀུན་ཏུ་ཁྱབ་པར་བྱེད། །སེམས་ནི་ནམ་མཁའ་མཚུངས་པས་ན། །ལྟ་བ་སྤོང་ཞིང་རྣམ་པར་དག །ཐམས་ཅད་ཀུན་ཏུ་འཇུག་བྱེད་ཀྱང་། །བདུད་ཀྱི་རྗེས་སུ་འབྲང་མི་བྱེད། །སེམས་ [99a.5]ནི་ཆོས་དབྱིངས་མཚུངས་པས་ན། །བདེ་བ་ཉིད་དུ་རབ་གནས་ཤིང་། །འཕེལ་བ་མེད་ཅིང་འགྲིབ་མེད་པར། །རྟག་པར་མཉམ་པ་ཉིད་ལ་གནས། །ཉན་ཐོས་དང་ནི་རང་རྒྱལ་གྱི། །རྣམ་པར་གྲོལ་བ་ཐོབ་གྱུར་ཀྱང་། །འཆིང་བ་དག་ཀྱང་ཡོད་མིན་ལ། །གྲོལ་བ་ [99a.6]དག་ཀྱང་ཡོད་པ་མིན། །འཁོར་བ་དང་ནི་མྱ་ངན་འདས། །འོང་བ་མེད་ཅིང་འགྲོ་མེད་ཅེས། །རབ་དབེན་ཉེར་ཞིར་གནས་ནས་ནི། །དུས་གསུམ་ཀུན་ཏུ་འགྲོ་བར་བྱེད། །གཞན་ཡང་བུ་མོ་ཆོས་རྣམ་པ་བརྒྱད་དང་ལྡན་པའི་བྱང་ཆུབ་སེམས་དཔའ་ནི་བྱང་ཆུབ་ཀྱི་ [99a.7]འབྱུང་གནས་སུ་འགྱུར་རོ། །བརྒྱད་གང་ཞེ་ན། དང་པོ་ནི་སྦྱིན་པ་འབྱུང་གནས་སུ་གྱུར་པ་ཡིན་ཏེ། ཅི་བདོག་པ་རྣམས་ཡོངས་སུ་གཏོང་བའི་ཕྱིར་རོ། །གཉིས་པ་ནི་ཚུལ་ཁྲིམས་འབྱུང་གནས་སུ་གྱུར་པ་ཡིན་ཏེ། ཉམས་པ་མེད་པའི་ཕྱིར་རོ། །གསུམ་པ་ནི་བཟོད་ [99b] [99b.1]པ་འབྱུང་གནས་སུ་གྱུར་པ་ཡིན་ཏེ། ཞེ་སྡང་མེད་པའི་ཕྱིར་རོ། །བཞི་པ་ནི་བརྩོན་འགྲུས་འབྱུང་གནས་སུ་གྱུར་པ་ཡིན་ཏེ། །ལེ་ལོ་མེད་ཅིང་ནུར་བ་མེད་པའི་ཕྱིར་རོ། །ལྔ་པ་ནི་བསམ་གཏན་འབྱུང་གནས་སུ་གྱུར་པ་ཡིན་ཏེ། ཐབས་ལ་མཁས་པའི་ཕྱིར་རོ། ། [99b.2]དྲུག་པ་ནི་ཤེས་རབ་འབྱུང་གནས་སུ་གྱུར་པ་ཡིན་ཏེ། ཚུལ་ཁྲིམས་སྲུང་ཞིང་མང་དུ་ཐོས་པ་དང་ལྡན་པའི་ཕྱིར་རོ། །བདུན་པ་ནི་ཚངས་པའི་གནས་པ་འབྱུང་གནས་སུ་གྱུར་པ་ཡིན་ཏེ། རྣམ་པར་གྲོལ་བས་ཉེ་བར་ཞི་བར་འགྱུར་བའི་ཕྱིར་རོ། །བརྒྱད་པ་ནི་མངོན་པར་ [99b.3]ཤེས་པ་འབྱུང་གནས་སུ་གྱུར་པ་ཡིན་ཏེ། རྟག་པར་མཉམ་པར་བཞག་པ་ལ་རབ་ཏུ་གནས་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྟག་པར་སྦྱིན་པ་གང་གཏོང་བ། །འདོད་ཆགས་གདུང་བ་སྤོང་བས་ན། །འབྲས་ [99b.4]བུ་རྣམ་སྨིན་མི་རེ་བར། །སངས་རྒྱས་བྱང་ཆུབ་སྔོ་བར་བྱེད། །ཁྲིམས་ལྡན་ཐེག་པ་ཆེ་བའི་ཕྱིར། །བཅད་ཅིང་གཏུབས་ཀྱང་ཁོང་ཁྲོ་མེད། །རྩེ་གཅིག་བདེ་ཆེན་གཉེར་བྱེད་ཅིང་། །བག་ཆགས་སྤངས་ནས་འགོག་མངོན་མེད། །བྱང་ཆུབ་སེམས་དཔའ་བརྩོན་འགྲུས་ཅན། ། [99b.5]བསྐལ་མང་སེམས་ཅན་ཆེད་དུ་ནི། །སྡུག་བསྔལ་བཟོད་ཅིང་འཇིག་རྟེན་རྒྱུ། །བརྩོན་འགྲུས་སྟོབས་ནི་འཕེལ་བར་བྱེད། །བསམ་གཏན་དག་ནི་གང་སྒོམ་པ། །སྤྲོས་པ་རྣམས་ནི་སྤོང་བྱེད་ཅིང་། །བསམ་གཏན་ཕ་རོལ་ཕྱིན་གྱུར་ཀྱང་། །བསམ་གཏན་རྗེས་སུ་ཡོང་ [99b.6]མི་སྐྱེ། །ཤེས་རབ་ཆེན་པོ་མཚུངས་མེད་པས། །མཐར་ལྟ་རྣམས་ནི་སྤོང་བྱེད་ཅིང་། །འཇིག་རྟེན་སྟོང་དབེན་རིག་པས་ན། །གཏི་མུག་མུན་པ་མ་ལུས་སེལ། །ཉེར་ཞི་ཚངས་གནས་གང་སྒོམ་པ། །ངན་སོང་རྣམས་ནི་སྤངས་པས་ན། །རྟག་པར་བརྒྱ་བྱིན་ཚངས་པར་ [99b.7]འགྱུར། །དོན་གྱི་ཕན་པ་ནན་ཏན་སྒོམ། །མངོན་ཤེས་སངས་རྒྱས་ཞིང་རྒྱུ་བ། །སངས་རྒྱས་བསྙེན་བཀུར་ཆོས་ཀྱང་ཉན། །རང་བཞིན་མོས་པ་རབ་ཤེས་པས། །ཆོས་བཤད་སེམས་ཅན་ཟློས་པར་བྱེད། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་བརྒྱད་དང་ [100a] [100a.1]ལྡན་པའི་ཕྱིར་གཟུངས་དང་། ཐོགས་པ་མེད་པའི་སྤོབས་པ་འཐོབ་པར་འགྱུར་རོ། །བརྒྱད་གང་ཞེ་ན། ཆོས་ལ་བླ་མར་བྱེད་པའི་ཕྱིར་དང་། མཁན་པོ་དང་། སློབ་དཔོན་ལ་རིམ་གྲོ་བྱེད་པའི་ཕྱིར་དང་། ཆོས་ཡོངས་སུ་གཉེར་བ་ལ་སྐྱོ་བ་མེད་པའི་ [100a.2]ཕྱིར་དང་། ཇི་སྐད་ཐོས་པ་བཞིན་དུ་ཡང་དག་པར་སྟོན་པར་བྱེད་པའི་ཕྱིར་དང་། ཆོས་ལ་སེར་སྣ་མི་བྱེད་པའི་ཕྱིར་དང་། གཞན་གྱི་ཉེས་པ་སྒྲོགས་པར་མི་བྱེད་པའི་ཕྱིར་དང་། །ཆོས་སྨྲ་བ་དག་ལ་མཁན་པོ་བཞིན་དུ་གུས་པས་སྲི་ཞུ་བྱེད་པའི་ཕྱིར་དང་། གཞན་ [100a.3]གྱི་ཉེས་པ་མི་མཐོང་ཞིང་ཉེས་པ་སྤོང་བར་སྐུལ་བར་བྱེད་པའི་ཕྱིར་ཏེ། འདི་ནི་བྱང་ཆུབ་སེམས་དཔའ་ཆོས་བརྒྱད་དང་ལྡན་ན་གཟུངས་དང་། ཐོགས་པ་(མད་,མེད་)པའི་སྤོབས་པ་ཕུན་སུམ་ཚོགས་པ་འཐོབ་པར་འགྱུར་བ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་ [100a.4]སུ་བཅད་དེ་བཀའ་སྩལ་པ། རྩེ་གཅིག་རྟག་ཏུ་ཆོས་གཉེར་བ། །མཁན་པོ་དགེ་བཤེས་རིམ་གྲོ་བྱེད། །སྡིག་པའི་གྲོགས་པོ་སྤོང་བས་ན། །མི་ཟད་གཏེར་འཛིན་ཐོབ་པར་འགྱུར། །མང་ཐོས་ཡོངས་སུ་སྐྱོ་མེད་པར། །རབ་བརྩོན་ཆོས་ནི་གཉེར་བར་ [100a.5]བྱེད། །ཇི་སྐད་ཐོས་བཞིན་སྟོན་བྱེད་པས། །རྙེད་པ་དག་ལ་རེ་ཚོལ་མེད། །སྤོབས་པ་རྣམ་དག་གང་ཐོབ་པ། །འཁོར་མང་དགའ་བར་བྱེད་པས་ན། །ཆོས་སྦྱིན་པ་ལ་རབ་མོས་ཤིང་། །སེར་སྣ་ཕྲག་དོག་སྤོང་བར་བྱེད། །ཆོས་སྤྱོད་མངོན་པར་ཞེན་མེད་ [100a.6]ཅིང་། །གཟུངས་ནི་གང་ཞིག་ཐོབ་འགྱུར་བ། །ཁྲིམས་སྲུང་རང་ལུས་ལྟ་བས་ན། །གཞན་གྱི་ཉེས་སྐྱོན་ཡོང་མི་ཚོལ། །བྱམས་དང་སྙིང་རྗེ་གནས་གྱུར་ཅིང་། །དུས་མིན་ཚིག་ནི་མི་སྨྲ་བས། །ཐོགས་མེད་སྤོབས་པ་ཐོབ་གྱུར་ནས། །སྤྲོ་ཚིག་ཕ་རོལ་ [100a.7]ཕྱིན་པ་སྟོན། །ཆོས་ནི་ལེགས་པར་སྨྲ་བ་ལ། །མཁན་པོ་བཞིན་དུ་གུས་པར་བྱེད། །སྐྱོན་འཆབ་ཉེས་པ་སྤོང་སྐུལ་བས། །མི་ཟད་ཀུན་འཛིན་རྒྱ་མཚོ་འཐོབ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར་སངས་རྒྱས་ [100b] [100b.1]རྣམས་ཀྱི་སྤྱན་སྔར་པད་མ་ལས་རྫུས་ཏེ་སྐྱེ་བར་འགྱུར་རོ། །བརྒྱད་གང་ཞེ་ན། སྲོག་ལ་བབ་པར་གྱུར་ཀྱང་གཞན་གྱི་ཉེས་པ་མི་རྗོད་པ་དང་། སེམས་ཅན་རྣམས་དཀོན་མཆོག་གསུམ་ལ་སྐྱབས་སུ་འགྲོ་བར་སྐུལ་བ་དང་། ཐམས་ཅད་བྱང་ཆུབ་ཀྱི་སེམས་ལ་ [100b.2]འགོད་པ་དང་། ཚངས་པར་སྤྱོད་པ་ལ་གོས་པ་མེད་པ་དང་། དེ་བཞིན་གཤེགས་པའི་སྐུ་གཟུགས་དག་བྱས་ནས་པད་མོའི་གདན་ལ་འཇོག་པ་དང་། སེམས་ཅན་མྱ་ངན་བྱེད་པ་དག་གི་མྱ་ངན་སེལ་བར་བྱེད་པ་དང་། ཁེངས་ཤིང་ང་རྒྱལ་བྱེད་པ་དག་གི་མདུན་དུ་ [100b.3]རྟག་པར་བདག་ཉིད་དམན་པར་བྱེད་པ་དང་། གཞན་ལ་འཚེ་བར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གལ་ཏེ་སྡུག་བསྔལ་གཟིར་གྱུར་ཀྱང་། །ནམ་ཡང་གཞན་གྱི་སྐྱོན་མི་སྨྲ། །རྟག་པར་ [100b.4]དཀོན་མཆོག་གང་བསྔགས་པ། །སངས་རྒྱས་སྤྱན་སྔར་རྫུས་ཏེ་སྐྱེ། །བྱང་ཆུབ་སེམས་ནི་བསྐྱེད་པ་དང་། །ཐམས་ཅད་མཁྱེན་པ་གཉེར་བསྐུལ་ནས། །རྟག་པར་ཚངས་པར་གང་སྤྱོད་པ། །སངས་རྒྱས་སྤྱན་སྔར་རྫུས་ཏེ་སྐྱེ། །གསེར་གྱིས་སངས་རྒྱས་གཟུགས་ [100b.5]བརྒྱན་ཏེ། །རིན་ཆེན་པད་མའི་གདན་ལ་བཞག །སེམས་ཅན་མྱ་ངན་གང་སེལ་བ། །སངས་རྒྱས་སྤྱན་སྔར་རྫུས་ཏེ་སྐྱེ། །ང་རྒྱལ་བྱེད་པ་དེ་དག་ལ། །སློབ་མ་བཞིན་དུ་བདག་དམན་ཞིང་། །གཞན་ལ་གང་ཞིག་མི་འཚེ་བ། །སངས་རྒྱས་སྤྱན་སྔར་རྫུས་ཏེ་སྐྱེ། ། [100b.6]གཞན་ཡང་བུ་མོ་བྱང་ཆུབ་སེམས་དཔའ་ཆོས་རྣམ་པ་བརྒྱད་དང་ལྡན་པར་གྱུར་ན་སྦྱངས་པའི་ཡོན་ཏན་ཕུན་སུམ་ཚོགས་པར་འགྱུར་ཞིང་རྟག་པར་དགོན་པ་ན་གནས་པ་ལ་མོས་པར་འགྱུར་རོ། །བརྒྱད་གང་ཞེ་ན། འདོད་པ་ཆུང་བ་དང་། ཆོག་ཤེས་པ་དང་། དགེ་ [100b.7]བའི་ཆོས་ཡོངས་སུ་རྫོགས་པར་གྱུར་པ་དང་། དགེ་བས་བདག་ཉིད་གསོ་བར་བྱེད་པ་དང་། རྟག་པར་འཕགས་པའི་རིགས་ཡོངས་སུ་འཛིན་པ་དང་། འཁོར་བའི་ཉེས་དམིགས་མཐོང་བས་སེམས་ལ་རྟག་པར་སྐྱོ་བ་དང་། རྟག་པར་མི་རྟག་པ་དང་། སྡུག་བསྔལ་བ་དང་། [101a] [101a.1]སྟོང་པ་དང་། བདག་མེད་པར་ལྟ་བ་དང་། དད་པ་ཤིན་ཏུ་བརྟན་ཞིང་གཞན་གྱི་དྲིང་ལ་མི་འཇོག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། འདོད་པ་ཆུང་ཞིང་ཆོག་ཤེས་པས། །ཆོས་དགའ་ [101a.2]དགེ་མང་བདག་ཉིད་གསོ། །རྟག་པར་འཕགས་རིགས་སྒྲུབ་ལ་མོས། །འཁོར་བའི་སྐྱོན་མཐོང་སེམས་ལ་སྐྲག །སྦྱངས་པ་དག་ལ་རྟག་མོས་པས། །བསེ་རུ་གཅིག་ལྟར་གྲོགས་ཀྱང་མེད། །འདུས་བྱས་སྡུག་བསྔལ་བདག་མེད་ཅེས། །བློ་ཡིས་རབ་ [101a.3]དང་བརྩོན་འགྲུས་གནས། །ཆོས་མཐོང་གཞན་གྱི་རྗེས་མི་འབྲང་། །རྟག་པར་དབེན་གནས་སངས་རྒྱས་བསྔགས། །སྦྱངས་པས་ཐག་བསྲིངས་གདུང་བ་མེད། །རྩོད་པ་ཉེས་དམིགས་མང་པོ་མེད། །གཉེན་བཤེས་ཡོངས་སྤངས་བསྔགས་པ་རྗོད། །དེས་ན་ [101a.4]དགོན་པར་གནས་ལ་མོས། །གཞན་ཡང་བུ་མོ་བྱང་ཆུབ་སེམས་དཔའི་ནི་ཆོས་རྣམ་པ་བརྒྱད་དང་ལྡན་པའི་ཕྱིར་བདུད་ཀྱི་དཔུང་རབ་ཏུ་ཕམ་པར་བྱེད་དོ། །བརྒྱད་གང་ཞེ་ན། ངོ་བོ་ཉིད་སྟོང་པ་ཉིད་ལ་ཞུགས་པ་དང་། མཚན་མ་མེད་པ་ལ་མངོན་པར་ཡིད་ཆེས་པ་ [101a.5]དང་། སྨོན་པ་མེད་པ་ལ་མངོན་པར་ཡིད་ཆེས་པ་དང་། མངོན་པར་འདུ་བྱ་བ་མེད་པར་རབ་ཏུ་ཤེས་པ་དང་། དེ་ལ་ཐེ་ཚོམ་དང་སོམ་ཉི་མེད་པ་དང་། སྐྱེ་བ་མེད་པར་རབ་ཏུ་བཟོད་པ་དང་། ངོ་བོ་ཉིད་མེད་པར་རབ་ཏུ་རྟོགས་པ་དང་། ཐབས་ལ་མཁས་པས་ [101a.6]ཆོས་ཐམས་ཅད་ལ་སོ་སོར་རྟོག་ཅིང་དེ་བཞིན་ཉིད་འཇིག་པར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སྟོང་དང་མཚན་མ་མེད་དང་སྨོན་མེད་པ། །རྣམ་ཐར་གསུམ་ཐོབ་བདུད་དཔུང་རབ་ཏུ་འཇོམས། ། [101a.7]འདུས་བྱས་འདུས་མིན་མཚན་ཉིད་གཉིས་སུ་མེད། །སྐྱེ་མེད་ཐོབ་པས་རྣམ་པར་གྲོལ་བར་འགྱུར། །ཆོས་རྣམས་སྐྱེ་མེད་དེ་ལྟར་གང་བཟོད་པ། །དེ་དག་བདུད་དཔུང་རབ་ཏུ་ཕམ་པར་བྱེད། །སྐྱེ་བ་མེད་དང་འགག་མེད་འདི་དག་དང་། །ཕུང་པོ་ཁམས་ལ་བདག་ [101b] [101b.1]མེད་སྒྱུ་མ་འདྲ། །ཆོས་ལ་ངོ་བོ་ཉིད་མེད་རབ་ཏུ་རྟོགས། །དེ་བཞིན་ཉིད་ནི་མི་འཇིག་ཐབས་མཁས་པས། །ཆོས་རྣམས་བདུད་ཀྱི་ལས་ཞེས་གང་འབྱེད་པ། །རྣམ་རྟོག་སྤངས་ནས་བདུད་ནི་ཕམ་པར་བྱེད། །ཐབས་དང་ཤེས་རབ་གཉིས་ཀ་རབ་སྤྱོད་ཅིང་། །ཡོད་དང་སྟོང་ [101b.2]ལ་གནས་པ་མེད་པར་ནི། །དེ་ལྟར་ཆོས་མཆོག་གང་ཞིག་སྒོམ་བྱེད་པ། །ཐབས་མཁས་གཟུགས་ལུས་མཛེས་པ་འཐོབ་པར་འགྱུར། །གཞན་ཡང་བུ་མོ་བྱང་ཆུབ་སེམས་དཔའ་ནི། ཆོས་རྣམ་པ་བརྒྱད་དང་ལྡན་པའི་ཕྱིར་བྱང་ཆུབ་དང་ནམ་ཡང་འབྲལ་བར་མི་འགྱུར་ [101b.3]རོ། །བརྒྱད་གང་ཞེ་ན། ཡང་དག་པའི་ལྟ་བས་ལོག་པར་ལྟ་བའི་སེམས་ཅན་ཡོངས་སུ་སྨིན་པར་བྱེད་པ་དང་། ཡང་དག་པའི་དྲན་པས་ལོག་པར་སེམས་པའི་སེམས་ཅན་ལ་སྙིང་བརྩེ་བར་བྱེད་པ་དང་། ཡང་དག་པའི་ངག་གིས་ལོག་པར་སྨྲ་བ་རྣམས་ལ་སྙིང་ [101b.4]བརྩེ་བར་བྱེད་པ་དང་། ཡང་དག་པའི་ལས་ཀྱི་མཐས་ལོག་པའི་ལས་ཅན་རྣམས་ཡོངས་སུ་སྡུད་པ་དང་། ཡང་དག་པའི་རྩོལ་བས་ལོག་པར་རྩོལ་བ་རྣམས་ཡོངས་སུ་ཟློག་པ་དང་ཡང་དག་པའི་འཚོ་བས་ལོག་པར་འཚོ་བའི་སེམས་ཅན་རྣམས་སྤོང་བར་མི་བྱེད་པ་དང་། [101b.5]ཡང་དག་པའི་རྟོག་པས་ལོག་པར་ཡིད་ལ་བྱེད་པ་སྤོང་བར་བྱེད་པ་དང་། ཡང་དག་པའི་ཏིང་ངེ་འཛིན་གྱིས་ལོག་པའི་ཏིང་ངེ་འཛིན་ལ་གནས་པ་དག་བསླང་ནས་གོང་དུ་རྩོལ་དུ་གཞུག་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་ [101b.6]སྩལ་པ། ཡང་དག་ལྟ་དང་གང་ལྡན་པ། །ལོག་ལྟ་དེ་དག་སྨིན་པར་བྱེད། །རྟག་པར་ཡང་དག་དྲན་སྒོམ་པ། །ལོག་སེམས་དག་ལ་བརྩེ་བར་བྱེད། །རྣམ་དག་ཡང་དག་དག་གིས་ནི། །ལོག་སྨྲ་རྣམས་ལ་བརྩེ་བར་བྱེད། །ཡང་དག་ལས་མཐའ་གནས་ [101b.7]པ་ཡིས། །ལོག་པའི་ལས་ཅན་སྡུད་པར་བྱེད། །རྟག་པར་ཡང་དག་རྩོལ་བསྒོམས་ནས། །ལོག་བརྩོན་དག་ནི་སྤོང་བར་བྱེད། །ཡང་དག་འཚོ་བས་རྗེས་འཐུན་པས། །ལོག་འཚོ་གང་ཡིན་སྡུད་པར་བྱེད། །བློ་ལྡན་ཡང་དག་རྟོག་པ་ཡིས། །ལོག་པར་ [102a] [102a.1]ཡིད་བྱེད་བརྩེ་བར་སེམས། །ཡང་དག་ཏིང་འཛིན་རྟག་གནས་ནས། །ལོག་པའི་ཏིང་འཛིན་སྡུད་པར་བྱེད། །བླ་མེད་ཡང་དག་ལམ་བརྒྱད་ཀྱིས། །ཆུ་བོ་དག་ལ་སྒྲོལ་བར་བྱེད། །རྒྱུན་ཕྱོགས་དེད་པ་ཟློག་བྱེད་པས། །དེ་ནི་བྱང་ཆུབ་ལམ་ཆེན་ [102a.2]ཡིན། །ཉན་ཐོས་དང་ནི་རང་རྒྱལ་རྣམས། །རྩྭ་ཡི་གཟིངས་བཞིན་བདག་ཉིད་ཟློས། །བྱང་ཆུབ་སེམས་དཔའ་ཀུན་ཟློས་པས། །དཔེར་ན་གྲུ་ཆེན་འདྲེན་མཁན་འདྲ། །གཞན་ཡང་བུ་མོ་བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར། བདུད་རྩིའི་ [102a.3]ལམ་མངོན་སུམ་དུ་བྱེད་པར་འགྱུར་རོ། །བརྒྱད་གང་ཞེ་ན། རྩོད་པ་མེད་པའི་ཆོས་ལ་གནས་པ་དང་། ཐོགས་པའི་སེམས་ལེགས་པར་རབ་ཏུ་སྲུང་བར་བྱེད་པ་དང་། རྟག་པར་དེ་ཁོ་ན་ཉིད་ཀྱི་དོན་ལ་ལྟ་བར་བྱེད་པ་དང་། བྱང་ཆུབ་ཀྱི་སེམས་ལ་རབ་ཏུ་གནས་ [102a.4]ནས། རྗེས་སུ་དྲན་པ་དྲུག་སྒོམ་པར་བྱེད་པ་དང་། ནན་ཏན་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམས་སྒོམ་པར་བྱེད་པ་དང་། དགེ་བའི་རྩ་བ་བསགས་ནས་སེམས་ཅན་ཡོངས་སུ་སྨིན་པར་བྱེད་པ་དང་། སྙིང་རྗེ་ཆེན་པོ་ལ་གནས་ནས་ཡང་དག་པའི་ཆོས་ [102a.5]ཡོངས་སུ་སྡུད་པར་བྱེད་པ་དང་། མི་སྐྱེ་བའི་ཆོས་ལ་བཟོད་པ་ཐོབ་ནས། ཕྱིར་མི་ལྡོག་པ་ལ་རབ་ཏུ་གནས་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། རྟག་པར་རྩོད་མེད་སྤྱོད་བསྒྲུབས་ནས། །དགེ་སྦྱོང་ཆེན་པོའི་ [102a.6]ཆོས་ལ་གནས། །ཞེ་སྡང་ཉེས་པ་ཡོངས་སྤངས་ནས། །དགེ་བའི་རྩ་བ་སོགས་པར་བྱེད། །ཡང་དག་དོན་ལ་རབ་ལྟ་བས། །མི་ཟད་སྤོབས་རྣམས་འཐོབ་པར་བྱེད། །བྱང་ཆུབ་སེམས་ལ་རབ་གནས་ནས། །རྟག་པར་དྲན་བྱེད་རྗེས་སུ་དྲན། །ཕ་རོལ་ཕྱིན་པ་ [102a.7]ཐམས་ཅད་ལ། །རབ་བརྩོན་བསྒྲུབས་པས་ལོག་པ་མེད། །ཐབས་མཁས་སྟོབས་རྣམས་ཐོབ་པས་ན། །དེས་ནི་སེམས་ཅན་སྒྲོལ་བར་བྱེད། །ཆོས་ཀྱི་མངའ་བདག་ནོར་གྱིས་ནི། །བརྩེ་སེམས་ཐམས་ཅད་ཀུན་སྡུད་པས། །མྱུར་དུ་མི་སྐྱེ་བཟོད་ཐོབ་ནས། །བྱང་ [102b] [102b.1]ཆུབ་ལས་ནི་ལྡོག་མི་འགྱུར། །གལ་ཏེ་དེ་ལྟར་སྤྱོད་ནུས་ན། །སངས་རྒྱས་ཆོས་ནི་ཐོབ་མི་དཀའ། །རིང་པོར་མི་ཐོགས་བདུད་བཏུལ་ནས། །བྱང་ཆུབ་མཆོག་ནི་ཐོབ་པར་འགྱུར། །དེ་ནས་བུ་མོ་དེས་ཆོས་དེ་ལྟ་བུ་ཐོས་ནས་དགའ་མགུ་རངས་པར་གྱུར་ནས་བཅོམ་ལྡན་ [102b.2]འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། བུ་མོ་ཆོས་བརྒྱད་དང་ལྡན་པར་གྱུར་ན་བུད་མེད་ཀྱི་དངོས་པོ་ལས་ལྡོག་པར་འགྱུར་རོ། ། [102b.3]བརྒྱད་གང་ཞེ་ན། ཕྲག་དོག་མི་བྱེད་པ་དང་། སེར་སྣ་མི་བྱེད་པ་དང་། གཡོ་སྒྱུ་མེད་པ་དང་། ཁོང་ཁྲོ་བ་མེད་པ་དང་། བདེན་པར་སྨྲ་བ་དང་། ངག་རྩུབ་པོ་མི་སྨྲ་བ་དང་། འདོད་ཆགས་སྤངས་པ་དང་། ལོག་པར་ལྟ་བ་རྣམས་སྤངས་པ་གང་ཡིན་པ་སྟེ། བུ་ [102b.4]མོ་ཆོས་བརྒྱད་པོ་འདི་དག་མངོན་པར་བསྒྲུབས་ན། མྱུར་དུ་བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གཞན་ལ་ཕྲག་དོག་མི་བྱེད་ཅིང་། །སེར་སྣ་སྤངས་ནས་ཆོས་མོས་དང་། །གཡོ་སྒྱུ་དག་ [102b.5]ནི་མི་སྤྱོད་ཅིང་། །བུད་མེད་ལུས་ལ་སྐྱོ་བ་དང་། །བྱམས་སེམས་ཞེ་སྡང་རབ་སྤངས་ནས། །རྟག་པར་བདེན་ཚིག་སྨྲ་བ་དང་། །འདོད་བསལ་ངག་རྩུབ་སྤངས་ནས་ནི། །ཡང་དག་ལྟ་ལ་གནས་པར་བྱ། །གང་གིས་བུད་མེད་ལུས་སྐྱོ་ནས། །འདི་འདྲའི་ཆོས་ནི་སྒྲུབ་ [102b.6]བྱེད་ན། །མྱུར་དུ་བུད་མེད་དངོས་སྤངས་ནས། །སྐྱེས་པའི་ལུས་བཟང་ལེན་པར་འགྱུར། །གཞན་ཡང་བུ་མོ་ཆོས་བརྒྱད་དང་ལྡན་པར་གྱུར་ན། བུད་མེད་ཀྱི་དངོས་པོ་ལས་ལྡོག་པར་འགྱུར་རོ། །བརྒྱད་གང་ཞེ་ན། སངས་རྒྱས་ལ་བླ་མར་བྱེད་ཅིང་། ཆོས་ལ་ [102b.7]ཤིན་ཏུ་མོས་པ་དང་། ཚུལ་ཁྲིམས་དང་། བཟོད་པ་དང་། མང་དུ་ཐོས་པ་དང་ལྡན་པའི་དགེ་སྦྱོང་དང་བྲམ་ཟེ་དག་ལ་བསྙེན་བཀུར་དང་རིམ་གྲོར་བྱེད་པ་དང་། སྐྱེས་པ་དང་། བུད་མེད་དང་། ཁྱིམ་གྱི་དངོས་པོ་དག་ལ་མངོན་པར་ཞེན་ཅིང་། ཆགས་པ་མེད་པ་དང་། [103a] [103a.1]བསླབ་པའི་དངོས་པོ་ཡང་དག་པར་བླངས་པ་རྣམས་འཇིག་པར་མི་བྱེད་པ་དང་། སྲོག་ཆགས་རྣམས་ལ་ལོག་པའི་བསམ་པ་མི་སྐྱེད་པ་དང་། ལྷག་པའི་བསམ་པས་བུད་མེད་ཀྱི་དངོས་པོ་ལ་ཡོངས་སུ་སྐྱོ་བར་འགྱུར་བ་དང་། [103a.2]བྱང་ཆུབ་ཀྱི་སེམས་ཀྱིས་སྐྱེས་བུ་ཆེན་པོའི་ཆོས་ལ་གནས་པ་དང་། འཇིག་རྟེན་པའི་ཁྱིམ་གྱི་འཚོ་ཚིས་རྣམས་ལ་སྒྱུ་མ་ལྟ་བུ་དང་རྨི་ལམ་ལྟ་བུར་ལྟ་བ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། སངས་རྒྱས་རབ་གུས་ [103a.3]ཆོས་ལ་མོས། །ཚུལ་ཁྲིམས་མང་ཐོས་བླ་མར་བྱེད། །འདོད་ཆགས་སྲེད་སེམས་མི་སྐྱེད་ན། །བུད་མེད་དངོས་པོ་མྱུར་དུ་སྤོང་། །ཁྲིམས་སྲུང་ངོ་ཚ་ཁྲེལ་ཡོད་ལྡན། །གཞན་ལ་མི་བདེན་བསམ་མི་བྱེད། །བྱང་ཆུབ་སེམས་ལ་རབ་གནས་ནས། །ཐེག་པ་གཞན་ལ་ [103a.4]མོས་མེད་ན། །དེས་ནི་མྱུར་བ་ཁོ་ནར་ཡང་། །མི་གཙང་བུད་མེད་དངོས་པོ་སྤོང་། །བསམ་པ་མཆོག་གིས་སེམས་སྐྱོ་ནས། །ཐམས་ཅད་སྒྱུ་མ་ལྟ་བུ་དང་། །ཆོས་རྣམས་རང་བཞིན་གཡོ་མེད་དང་། །རྒྱུ་རྐྱེན་རང་བཞིན་སྟོང་དབེན་ཞེས། །ནན་ཏན་ཡང་དག་ཆོས་ [103a.5]བསྒོམས་ན། །མྱུར་དུ་སྐྱེས་པའི་ལུས་འཐོབ་འགྱུར། །དེ་ནས་བུ་མོ་རྣམ་དག་དད་པས་གསེར་གྱི་ཕྲེང་བ་ཐོགས་པ་དེ་དག་བཅོམ་ལྡན་འདས་ལ་མངོན་པར་གཏོར་བ་དང་། །སྟེང་གི་བར་སྣང་ལ་གསེར་ཡང་དག་པའི་གཞལ་མེད་ཁང་། ཁང་པ་བརྩེགས་པ་ [103a.6]དག་ཏུ་གྱུར་ནས་གཞལ་མེད་ཁང་དེ་དག་གི་ནང་ན་སྤྲུལ་པའི་དེ་བཞིན་གཤེགས་པ་གསེར་གྱི་གདན་ལ་བཞུགས་པ། ཤ་སྟག་མངོན་དུ་བྱུང་བར་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་གིས་ཀྱང་སོ་སོ་ནས། ལུས་ཀྱི་རྒྱན་རྣམས་བཀྲོལ་ནས་བཅོམ་ལྡན་འདས་ལ་ [103a.7]མངོན་པར་གཏོར་བ་དང་། སྟེང་གི་བར་སྣང་ལ་གསེར་གྱི་གཞལ་མེད་ཁང་དང་། རིན་པོ་ཆེའི་གུར་དང་། རིན་པོ་ཆེའི་གདུགས་དང་། བཀོད་པ་རྣམ་པ་སྣ་ཚོགས་སུ་གྱུར་ཏོ། །དེ་ནས་བུ་མོ་ལྔ་བརྒྱ་པོ་དེ་དག་གིས་དེ་ལྟ་བུའི་ཆོ་འཕྲུལ་ཆེན་པོ་མཐོང་བ་དང་། སྐད་ [103b] [103b.1]འཐུན་པར་ཚིགས་སུ་བཅད་དེ་སྨྲས་པ། བཅོམ་ལྡན་མི་མཆོག་ཁྱད་པར་འཕགས་པས་ན། །ཐུགས་རྗེས་སེམས་ཅན་རྣམས་ལ་སྨན་པར་མཛད། །བདག་ཅག་དེང་ནི་བྱང་ཆུབ་སེམས་བསྐྱེད་ནས། །མོས་པ་རྗེས་འཐུན་རབ་ཏུ་དུལ་ལ་གནས། །བཅོམ་ལྡན་འདྲེན་ [103b.2]པ་བདེ་བ་རབ་སྩོལ་བ། །བདག་ཅག་མི་མཆོག་ལ་ནི་མཆོད་པར་བགྱི། །ཆོས་ཐོས་དབང་གིས་རྡུལ་རྣམས་རབ་སྤངས་ནས། །བདག་ཅག་ཐེ་ཚོམ་ནེམ་ནུར་ཡོངས་མ་མཆིས། །དེས་ན་བུད་མེད་ཉོན་མོངས་མང་སྤངས་ནས། །ཉོན་མོངས་གཏན་བཅོམ་བདུད་ནི་ཕམ་ [103b.3]པར་བགྱི། །ཕྱོགས་བཅུའི་སངས་རྒྱས་བྱེ་བ་ཚད་མེད་རྣམས། །བདག་ཅག་དགའ་བས་རྟག་ཏུ་མཆོད་པར་འཚལ། །སྦྱིན་དང་ཚུལ་ཁྲིམས་བརྩོན་འགྲུས་རབ་གནས་ནས། །བཟོད་དང་བསམ་གཏན་སེམས་ནི་རབ་ཏུ་བགྱི། །ཐབས་དང་ཤེས་རབ་སེམས་ཅན་ཡོངས་ [103b.4]བསྡུས་ནས། །བྱང་ཆུབ་མཆོག་ལམ་གང་ལགས་མངོན་དུ་བགྱི། །ལྷ་མིའི་འཁོར་ནི་ཚད་མེད་སྨན་བཏགས་ནས། །ཐམས་ཅད་ཐེག་ཆེན་སེམས་ནི་བསྐྱེད་པར་བསྐུལ། །བདག་ཅག་སེང་གེའི་སྒྲ་ནི་སྒྲོགས་པར་འགྱུར། །བདག་ཅག་ལྷ་མིའི་སྟོན་པ་བགྱིད་པར་ [103b.5]མཆི། །དེ་ནས་བཅོམ་ལྡན་འདས་འཛུམ་པ་མཛད་དོ། །སངས་རྒྱས་རྣམས་ཀྱི་ཆོས་ཉིད་ནི་ནམ་འཛུམ་པ་མཛད་པ་ན་འོད་ཟེར་ཁ་དོག་རྣམ་པ་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། དངུལ་དང་། ཤེལ་ [103b.6]གྱི་ཁ་དོག་ལྟ་བུ་དག་དེ་བཞིན་གཤེགས་པའི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་ཚད་མེད་དཔག་ཏུ་མེད་པ་དག་ནས། ཚངས་པའི་འཇིག་རྟེན་གྱི་བར་དུ་ཁྱབ་པར་སྣང་བར་བྱས་ནས། དེ་བཞིན་གཤེགས་པ་ལ་ལན་གསུམ་བསྐོར་བ་བྱས་ཏེ། དེ་བཞིན་ [103b.7]གཤེགས་པའི་དབུའི་གཙུག་ཏུ་ཐིམ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་རྐྱེན་གང་གི་སླད་དུ་འཛུམ་པ་འདི་ལྟ་བུ་བསྟན་པར་མཛད་ལགས། བཅོམ་ལྡན་འདས་ཀྱིས་ [104a] [104a.1]བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་རྣམ་དག་དད་པ་འདི་མཐོང་ངམ། ཀུན་དགའ་བོས་གསོལ་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ་འདི་དག་ནི། [104a.2]འདི་ནས་ཚེ་ཟད་པ་དང་། བུད་མེད་ཀྱི་ལུས་སྤངས་ནས་དགའ་ལྡན་གྱི་ལྷའི་རིས་སུ་སྐྱེ་སྟེ། བཅོམ་ལྡན་འདས་བྱམས་པ་དང་། བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་བཀུར་སྟི་དང་། རིམ་གྲོ་དང་། མཆོད་པ་བྱེད་པར་འགྱུར་བས་བུ་མོ་རྣམ་དག་དད་པས་ [104a.3]བསྐལ་པ་བྱེ་བ་ཁྲག་ཁྲིག་བརྒྱད་ཁྲི་བཞི་སྟོང་འདས་པའི་འོག་ཏུ་འཇིག་རྟེན་གྱི་ཁམས་གློག་གི་འོད་ཅེས་བྱ་བར་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་འོད་ཟེར་གྱི་བཀོད་པ་ཞེས་བྱ་བར་འགྱུར་རོ། །བསྐལ་པའི་མིང་ནི་རྟག་པར་སྣང་བ་ཞེས་ [104a.4]བྱའོ། །དེ་བཞིན་གཤེགས་པ་དེའི་སྐུ་ཚེའི་ཚད་ནི་དགའ་ལྡན་གྱི་ལྷ་བཞིན་དུ། ཚེ་ལོ་སྟོང་ཕྲག་བཅུ་གཉིས་ཐུབ་པར་འགྱུར་རོ། །འཇིག་རྟེན་གྱི་ཁམས་དེ་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གི་འཁོར་ཚད་མེད་དཔག་ཏུ་མེད་པ་དག་གིས་འཁོར་ [104a.5]བྱེད་པར་འགྱུར་རོ། །བུ་མོ་ལྔ་བརྒྱ་པོ་འདི་དག་ཀྱང་འཁོར་དེ་དག་གི་ནང་ན་གཙོ་བོ་མཆོག་བྱེད་པར་འགྱུར་ཏེ། ཇི་ལྟར་ད་ལྟར་ངའི་ཚེ་བྱང་ཆུབ་སེམས་དཔའ་འཇམ་དཔལ་ལ་སོགས་པ་དྲུག་ཅུ་པོ་འདི་དག་གཙོ་བོར་གྱུར་པ་བཞིན་ནོ། །ཀུན་དགའ་བོ་བུད་མེད་གང་ལ་ལ་ [104a.6]ཞིག་ཆོས་ཀྱི་རྣམ་གྲངས་འདི་ཐོས་ནས་ཡོངས་སུ་འཛིན་པར་བྱེད། ཀློག་པར་བྱེད། ཁ་ཏོན་དུ་འདོན་པར་བྱེད་ན་བུད་མེད་ཀྱི་ལུས་འདི་དག་གཏུགས་ནས་ཕྱིས་ཡང་ལེན་པར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་ [104a.7]འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བུ་མོ་རྣམ་དག་དད་པ་ལ་སོགས་པ་བུ་མོ་ལྔ་བརྒྱ་པོ་དེ་དག་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་རབ་ཏུ་དགའ་ [104b] [104b.1]ནས་མངོན་པར་བསྟོད་དོ།། །།{D85}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བུ་མོ་རྣམ་དག་དད་པས་ཞུས་པའི་ལེའུ་སྟེ་བཞི་བཅུ་པ་རྫོགས་སོ།། །།འཕགས་པ་དཀོན་ [104b.2]མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་གཅིག་པ་སྟེ། འཕགས་པ་བྱམས་པས་ཞུས་པ་ལུང་བསྟན་པ། བམ་པོ་གཅིག་པ། རྒྱ་གར་སྐད་དུ། ཨཱརྱ་མཻ་ཏྲི་ཡ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། [104b.3]འཕགས་པ་བྱམས་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བརྒ་ན་ཆུ་སྲིན་བྱིས་པ་གསོད་ལྟ་བུའི་རི་ [104b.4]འཇིགས་སུ་རུང་བའི་ནགས་{རི་དགས་,རི་དྭགས་}ཀྱི་ནགས་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་མངོན་པར་ཤེས་པ་མངོན་པར་ཤེས་པ་གནས་བརྟན་ཉན་ཐོས་ཆེན་པོ་ཤ་སྟག་ལ། འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽ་ཌི་ནྱ་དང་། ཚེ་དང་ལྡན་པ་རྟ་ཐུལ་དང་། [104b.5]ཚེ་དང་ལྡན་པ་རླངས་པ་དང་། ཚེ་དང་ལྡན་པ་མིང་ཆེན་དང་། ཚེ་དང་ལྡན་པ་བཟང་ལྡན་དང་། ཚེ་དང་ལྡན་པ་དྲི་མ་མེད་དང་། ཚེ་དང་ལྡན་པ་གང་པོ་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་{རི་དགས་,རི་དྭགས་}མགོ་དང་། ཚེ་དང་ལྡན་པ་ལྟེང་རྒྱས་འོད་སྲུང་ [104b.6]དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་ག་ཡ་འོད་སྲུང་དང་། ཚེ་དང་ལྡན་པ་བྱིན་པ་འོད་སྲུང་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་དོན་ཡོད་རྒྱལ་པོ་དང་། ཚེ་དང་ལྡན་པ་བློ་གྲོས་བཟང་དང་། ཚེ་དང་ལྡན་པ་ཤཱ་རིའི་ [104b.7]བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་རི་རྒྱལ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཉེ་དགའ་དང་། ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་སྒྲ་གཅན་ཟིན་དང་། དེ་དག་ལ་སོགས་པ་དགེ་སློང་ལྔ་བརྒྱ་ [105a] [105a.1]ཙམ་དང་ཐབས་ཅིག་ཏུ་བཞུགས་སོ། །བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་མངོན་པར་ཤེས་པ་ཁྲི་དང་ཡང་ཐབས་ཅིག་ལ་འདི་ལྟ་སྟེ། བྱང་ཆུབ་སེམས་དཔའ་བློ་གྲོས་འཕེལ་དང་། བྱང་ཆུབ་ [105a.2]སེམས་དཔའ་བློ་གྲོས་བཟང་དང་། བྱང་ཆུབ་སེམས་དཔའ་བློ་གྲོས་བརྟན་དང་། བློ་གྲོས་ཡངས་པ་དང་། སྤོབས་པ་བརྩེགས་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། ཏོག་དཔལ་དང་། འཇམ་དཔལ་དང་། མངོན་པར་ཤེས་པའི་མེ་ [105a.3]ཏོག་ཤིན་ཏུ་རྒྱས་པ་དང་། དམིགས་པ་མེད་པ་ཡིད་ལ་བྱེད་པ་དང་། དད་ལྡན་དང་། རིན་པོ་ཆེའི་ཏོག་དང་། དབང་པོའི་ལྷ་དང་། ཆུ་ལྷ་དང་། སྒྲ་དབྱངས་སྙན་དང་། ཞིང་རྣམ་པར་སྦྱོང་དང་། ལྷུན་པོ་བརྩེགས་དང་། སྤོབས་པ་ཕུན་སུམ་ཚོགས་དང་། དབང་པོའི་ [105a.4]དཔལ་དང་། ས་འཛིན་དང་། སེམས་ཅན་དམྱལ་བ་སྐེམས་དང་། ངན་སོང་སྤོང་དང་། རིན་ཆེན་ཟེ་བ་ཅན་དང་དེ་དག་ལ་སོགས་པ་བྱང་ཆུབ་སེམས་དཔའ་ཁྲི་དང་ཐབས་ཅིག་སྟེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་ [105a.5]བལྟས་ནས་ཆོས་སྟོན་ཏོ། །དེའི་ཚེ་བྱང་ཆུབ་སེམས་དཔའ་བྱམས་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་བྱང་ཆུབ་སེམས་དཔའ་བྱམས་པས་བྱང་ཆུབ་སེམས་དཔའི་འཁོར་ཆེན་པོ་དེ་འདུས་པར་རིག་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ [105a.6]ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན་ [105a.7]དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ [105b] [105b.1]དྲི་བ་ལུང་བསྟན་པའི་ཕྱིར། དེ་བཞིན་གཤེགས་པས་རྟག་ཏུ་སྐབས་ཕྱེས། བྱམས་པ་ཁྱོད་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་པས། སེམས་རངས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་ [105b.2]པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་དུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་སུག་པར་མཆི་བར་མི་འགྱུར་ལ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ [105b.3]པར་འཚང་རྒྱ་བར་འགྱུར་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ཁྱོད་ནི་འདི་ལྟར་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་ [105b.4]བསྐྱེད་པ། ཚེ་རབས་དྲན་པ། སྤོབས་པ་ཐོབ་པ། ཡུན་རིང་པོ་ནས་ཚངས་པར་སྤྱོད་པ་སྤྱད་པ་སྟེ། བྱམས་པ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། [105b.5]ཕན་པ་དང་། བདེ་བ་དང་། བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་། རིགས་ཀྱི་བུ་མོ་ད་ལྟར་གྱི་དང་། མ་འོངས་པ་རྣམས་ཡོངས་སུ་གཟུང་བའི་ཕྱིར་ཞུགས་ནས་ཁྱོད་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ་ལེགས་སོ། །བྱམས་པ་ [105b.6]དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བྱམས་ [105b.7]པ་བྱང་ཆུབ་སེམས་དཔའ་ཆོས་གཅིག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ཆོས་གཅིག་གང་ཞེ་ན། འདི་ལྟ་སྟེ། ལྷག་པའི་བསམ་པ་ཕུན་ [106a] [106a.1]སུམ་ཚོགས་པའི་བྱང་ཆུབ་ཀྱི་སེམས་ཏེ། བྱམས་པ་བྱང་ཆུབ་སེམས་དཔའ་ཆོས་གཅིག་པོ་དེ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་ [106a.2]འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་གཉིས་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། གཉིས་གང་ཞེ་ན། འདི་ལྟ་སྟེ། [106a.3]ཞི་གནས་ཡོངས་སུ་ཚོལ་བ་དང་། ལྷག་མཐོང་ལ་མཁས་པ་སྟེ། བྱང་ཆུབ་སེམས་དཔའ་ཆོས་གཉིས་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་ [106a.4]རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་གསུམ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། གསུམ་གང་ཞེ་ན། འདི་ལྟ་ [106a.5]སྟེ། སྙིང་རྗེ་ཆེན་པོ་ཐོབ་པ་དང་། སྟོང་པ་ཉིད་ཀྱི་ཆོས་ངེས་པར་སེམས་པ་དང་། དེས་ཀྱང་རློམ་སེམས་མི་བྱེད་པ་སྟེ། བྱམས་པ་བྱང་ཆུབ་སེམས་དཔའ་ཆོས་གསུམ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ། མྱུར་ [106a.6]དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་ [106a.7]བྱང་ཆུབ་མངོན་པར་རྫོགས་པར་འཚང་རྒྱ་སྟེ། བཞི་གང་ཞེ་ན། འདི་ལྟ་སྟེ། ཚུལ་ཁྲིམས་ལ་གནས་པ་ཡིན། ཆོས་ཐམས་ཅད་ལ་སོམ་ཉི་མེད་པ་ཡིན། དགོན་པ་ལ་མངོན་པར་དགའ་བ་ཡིན། ཡང་དག་པར་ཞུགས་ཤིང་ཡང་དག་པར་བླངས་པ་ལས་མི་གཡོ་བ་ཡིན་ [106b] [106b.1]ཏེ། བྱམས་པ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་ [106b.2]སེམས་དཔའ་ཆོས་ལྔ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ལྔ་གང་ཞེ་ན། འདི་ལྟ་སྟེ། སྟོང་པ་ཉིད་ལ་གནས་པ་དང་། གཞན་དག་གི་ [106b.3]འཁྲུལ་པ་མི་ཚོལ་བ་དང་། བདག་ལྟ་རྟོག་པ་དང་། ཆོས་ལ་མངོན་པར་དགའ་བ་དང་། གཞན་ལ་ཕན་འདོགས་པར་ཞུགས་པ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་ལྔ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་ [106b.4]མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་དྲུག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་ [106b.5]པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དྲུག་གང་ཞེ་ན། འདི་ལྟ་སྟེ། བརྐམ་པ་མེད་པ་ཡིན། སྡང་བ་མེད་པ་ཡིན། རྨོངས་པ་མེད་པ་ཡིན། དྲིས་མ་ཐག་ཏུ་ཡང་དག་པ་ཇི་ལྟ་བ་བཞིན་དུ་ལན་ལྡོན་པ་ཡིན། བསྙེན་པར་དཀའ་བ་མེད་པ་ཡིན། སྟོང་པ་ [106b.6]ཉིད་སྤྱོད་ཡུལ་བ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་དྲུག་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ [106b.7]ཡང་བྱང་ཆུབ་སེམས་དཔའ་ཆོས་བདུན་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བདུན་གང་ཞེ་ན། འདི་ལྟ་སྟེ། དྲན་པ་ལ་མཁས་པ་ [107a] [107a.1]ཡིན། ཆོས་ལ་མཁས་པ་ཡིན། བརྩོན་འགྲུས་བརྩམས་པ་ཡིན། དགའ་བ་ཐོབ་པ་ཡིན། ཤིན་ཏུ་སྦྱངས་པ་དང་ལྡན་པ་ཡིན། ཏིང་ངེ་འཛིན་ལ་མཁས་པ་ཡིན། ཤེས་རབ་ཀྱིས་རབ་ཏུ་དབྱེ་བ་ལ་མཁས་པ་ཡིན་ཏེ། བྱམས་པ་བྱང་ [107a.2]ཆུབ་སེམས་དཔའ་ཆོས་བདུན་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ [107a.3]ཆོས་བརྒྱད་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བརྒྱད་གང་ཞེ་ན། འདི་ལྟ་སྟེ། ཡང་དག་པའི་ལྟ་བ་ཅན་ཡིན། ཡང་དག་པའི་རྟོག་པ་ [107a.4]ཅན་ཡིན། ཡང་དག་པའི་ངག་ཅན་ཡིན། ཡང་དག་པའི་ལས་ཀྱི་མཐའ་ཅན་ཡིན། ཡང་དག་པའི་འཚོ་བ་ཅན་ཡིན། ཡང་དག་པའི་རྩོལ་བ་ཅན་ཡིན། ཡང་དག་པའི་དྲན་པ་ཅན་ཡིན། ཡང་དག་པའི་ཏིང་ངེ་འཛིན་ཅན་ཡིན་ཏེ། བྱམས་པ་ཆོས་བརྒྱད་པོ་དེ་དག་དང་ [107a.5]ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ཆོས་དགུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་ [107a.6]པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དགུ་གང་ཞེ་ན། འདི་ལྟ་སྟེ། བྱམས་པ་འདི་ལ་བྱང་ཆུབ་སེམས་དཔའ་ནི་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་ [107a.7]ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །རྟོག་པ་དང་དཔྱོད་པ་དང་བྲལ་ཞིང་ནང་རབ་ཏུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། [107b] [107b.1]དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དགའ་བའི་འདོད་ཆགས་དང་བྲལ་བས། བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་ [107b.2]པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ། །ཞེས་བརྗོད་པ་སྟེ། དགའ་བ་མེད་པ་བསམ་གཏན་གསུམ་པ་བསྒྲུབས་ཏེ་གནས་སོ། །བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ [107b.3]ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ། བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་ [107b.4]ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་ [107b.5]མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་ཅི་ [107b.6]ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་བསྒྲུབས་ཏེ་གནས་སོ། །རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ནས་འདུ་ཤེས་དང་ཚོར་བ་འགོག་པ་བསྒྲུབས་ནས་གནས་པ་སྟེ། [107b.7]བྱམས་པ་བྱང་ཆུབ་སེམས་དཔའ་ཆོས་དགུ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བྱམས་པ་གཞན་ཡང་བྱང་ཆུབ་སེམས་དཔའ་ [108a] [108a.1]ཆོས་བཅུ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བཅུ་གང་ཞེ་ན། འདི་ལྟ་སྟེ། རྡོ་རྗེ་ལྟ་བུའི་ཏིང་ངེ་འཛིན་དང་ལྡན་ [108a.2]པ་ཡིན། གནས་དང་གནས་མ་ཡིན་པ་ལ་མངོན་པར་བརྩོན་པའི་ཏིང་ངེ་འཛིན་དང་ལྡན་པ་ཡིན། ཐབས་ཀྱིས་འགྲོ་བའི་ཏིང་ངེ་འཛིན་དང་ལྡན་པ་ཡིན། རྣམ་པར་སྣང་བྱེད་ཀྱི་ཏིང་ངེ་འཛིན་དང་ལྡན་པ་ཡིན། ཀུན་ནས་སྣང་བའི་ཏིང་ངེ་འཛིན་དང་ལྡན་པ་ཡིན། [108a.3]ཀུན་དུ་གསལ་བའི་ཏིང་ངེ་འཛིན་དང་ལྡན་པ་ཡིན། རིན་ཆེན་ཟླ་བའི་ཏིང་ངེ་འཛིན་དང་ལྡན་པ་ཡིན། ཟླ་བ་སྒྲོན་མའི་ཏིང་ངེ་འཛིན་དང་ལྡན་པ་ཡིན། ཉོན་མོངས་པ་མེད་པའི་ཏིང་ངེ་འཛིན་དང་ལྡན་པ་ཡིན། རྒྱལ་མཚན་གྱི་རྩེ་མོའི་དཔུང་རྒྱན་གྱི་ཏིང་ངེ་འཛིན་དང་ [108a.4]ལྡན་པ་ཡིན་ཏེ། བྱམས་པ་བྱང་ཆུབ་སེམས་དཔའ་ཆོས་བཅུ་པོ་དེ་དག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ནས་ [108a.5]བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ [108a.6]ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྔོན་ཅད་སྦྱིན་པ་སྦྱིན་མཛད་པ། །སྡུག་པའི་བུ་དང་ཟས་དང་སྐོམ། །མགོ་དང་མིག་ཀྱང་བཏང་མཛད་དེ། །སངས་རྒྱས་ [108a.7]སྦྱིན་ཀུན་ཕ་རོལ་ཕྱིན། །གཡག་རྔ་བཞིན་དུ་ཡུན་རིང་ནས། །ཁྱོད་ཀྱིས་ཚུལ་ཁྲིམས་མ་ཉམས་བསྲུངས། །ཁྲིམས་ཀྱིས་ཁྱོད་འདྲ་མ་མཆིས་ཏེ། །སངས་རྒྱས་ཁྲིམས་ལེགས་ཕ་རོལ་ཕྱིན། །བཟོད་པའི་སྟོབས་ནི་བསྐྱེད་མཛད་ནས། །བྱིས་པས་ནོངས་པ་བགྱིས་པ་ [108b] [108b.1]བཟོད། །བཟོད་པའི་སྟོབས་རྣམས་ཀུན་དང་ལྡན། །སངས་རྒྱས་བཟོད་ལེགས་ཕ་རོལ་ཕྱིན། །བརྩོན་འགྲུས་སྟོབས་ནི་བསྐྱེད་མཛད་ནས། །ཞི་བདེ་བླ་ན་མེད་པ་བརྙེས། །བརྩོན་འགྲུས་སྟོབས་ཀྱིས་སྟོབས་དང་ལྡན། །སངས་རྒྱས་བརྩོན་ལེགས་ཕ་རོལ་ཕྱིན། ། [108b.2]སྡིག་པ་ཐམས་ཅད་བསྲེག་མཛད་ནས། །འདྲེན་པ་སྐྱེས་ཆེན་བསམ་གཏན་དགྱེས། །བསམ་གཏན་སྟོབས་ཀྱིས་སྟོབས་དང་ལྡན། །སངས་རྒྱས་བསམ་ལེགས་ཕ་རོལ་ཕྱིན། །ཆོས་རྣམས་དེ་དག་རང་བཞིན་སྟོང་། །ངོ་བོ་ཉིད་ཀྱིས་གང་མི་སྐྱེ། །ཤེས་རབ་ཀྱིས་ [108b.3]ནི་ཕ་རོལ་གཤེགས། །སངས་རྒྱས་ཤེས་ལེགས་ཕ་རོལ་ཕྱིན། །མཁྱེན་ཆེན་བྱང་ཆུབ་ཤིང་དྲུང་དུ། །སྡེར་བཅས་བདུད་ནི་ཁྱོད་ཀྱིས་བཏུལ། །དོན་གྱི་མཆོག་ཀྱང་བརྙེས་པར་གྱུར། །སངས་རྒྱས་བདུད་ཀྱི་ཚོགས་ངན་འཇོམས། །སྐྱེས་ཆེན་བཱ་ར་ཎཱ་སིར་ནི། ། [108b.4]ཆོས་ཀྱི་འཁོར་ལོ་རབ་ཏུ་བསྐོར། །མུ་སྟེགས་ཚོགས་ངན་སྐྲག་པར་མཛད། །སངས་རྒྱས་མུ་སྟེགས་ཅན་ཚོགས་འཇོམས། །ཤེས་རབ་ཆེན་པོ་བླ་ན་མེད། །ཀུན་ནས་ཟླ་དཔེ་ཡོང་མ་མཆིས། །དཀོན་མཆོག་ཆོས་དེ་སྟོན་པར་མཛད། །འདྲེན་པ་སངས་རྒྱས་འོད་མཛད་ [108b.5]ལགས། །སྦྱིན་པ་དང་ནི་ཁྲིམས་སྟོབས་དང་། །བཟོད་བརྩོན་ཁྱོད་དང་འདྲ་མ་མཆིས། །ཀུན་གྱི་ཕ་རོལ་ཕྱིན་པར་གྱུར། །སངས་རྒྱས་ཡོན་ཏན་མང་པོས་འཕགས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་ཚུལ་དང་འདྲ་ [108b.6]བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་འདི་ལྟར་ [108b.7]སྤོབས་པ་ཕུན་སུམ་ཚོགས་པ་དང་། འདི་ལྟར་ཤིན་ཏུ་རྣམ་པར་ངེས་པའི་ཚིག་གིས་ཆོས་སྟོན་པ་དང་། འདི་ལྟར་ཚིག་དང་ཡི་གེ་མཚུངས་པའི་ཆོས་སྟོན་པ་དང་། འདི་ལྟར་ཟབ་མོའི་ཚིག་གིས་ཆོས་སྟོན་པ་དང་། འདི་ལྟར་ལེགས་པར་འབྲེལ་པའི་ཚིག་གིས་ཆོས་སྟོན་པ་ [109a] [109a.1]དང་། དྲན་པའི་ཚིག་གིས་ཆོས་སྟོན་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། བྱང་ཆུབ་སེམས་དཔའ་བྱམས་པ་སྤོབས་པ་ཕུན་སུམ་ཚོགས་པ་དང་ལྡན་ཞིང་བྱང་ཆུབ་སེམས་ [109a.2]དཔའ་བྱམས་པ་ཤིན་ཏུ་རྣམ་པར་ངེས་པའི་ཚིག་གིས་ཆོས་སྟོན་པ་ནས་རྗེས་སུ་དྲན་པའི་ཚིག་གི་བར་གྱིས་ཆོས་སྟོན་པ་ནི་ངོ་མཚར་ཏོ། །ཀུན་དགའ་བོ་བྱང་ཆུབ་སེམས་དཔའ་བྱམས་པ་ནི་ད་ལྟར་ང་ལ་ཚུལ་དང་འདྲ་བའི་ཚིགས་སུ་བཅད་པ་དག་གིས་བསྟོད་པར་ཡང་མ་ཟད་དེ། དེ་ཅིའི་ [109a.3]ཕྱིར་ཞེ་ན། ཀུན་དགའ་བོ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བཅུར་ཚང་བར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། [109a.4]སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྣང་བས་རྣམ་པར་རོལ་པའི་མངོན་པར་ཤེས་པ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་བྲམ་ཟེའི་ཁྱེའུ་བཟང་དག་ཅེས་བྱ་བ་གཟུགས་བཟང་བ། མཛེས་པ། [109a.5]བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་མཛེས་པ། [109a.6]དད་པར་བྱ་བ། དབང་པོ་ཞི་བ། ཐུགས་ཞི་བ། དུལ་བ་དང་ཞི་གནས་ཀྱི་མཆོག་བརྙེས་པ། དུལ་བ་དང་ཞི་གནས་ཀྱི་དམ་པ་བརྙེས་པ། དབང་པོ་བསྲུངས་པ། གླང་པོ་ཆེ་དབང་པོ་ཐུལ་བ་ལྟ་བུ། མཚོ་ལྟར་དང་ཞིང་རྙོག་པ་མེད་ལ་གསལ་བ། སྐྱེས་བུ་ཆེན་པོའི་ [109a.7]མཚན་སུམ་ཅུ་རྩ་གཉིས་པོ་དག་གིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུ་པོ་དག་གིས་སྐུ་རྣམ་པར་སྤྲས་པ། ཤིང་སཱ་ལའི་རྒྱལ་པོ་མེ་ཏོག་ཤིན་ཏུ་རྒྱས་པ་འདྲ་བ། རིའི་རྒྱལ་པོ་རི་རབ་ལྟར་མངོན་པར་འཕགས་པ། ཞལ་ཟླ་བའི་དཀྱིལ་འཁོར་ལྟར་ཞི་བ། [109b] [109b.1]ཉི་མའི་དཀྱིལ་འཁོར་ལྟར་ལྷམ་མེ་ལྷན་ནེ་ལྷང་ངེ་བ། ཤིང་ནྱ་གྲོ་དྷ་ལྟར་ཆུ་ཞེང་གབ་པ་འོད་འབར་བའི་སྐུ་དཔལ་ཆེན་པོས་འབར་བ་མཐོང་ངོ་། །མཐོང་ནས་ཀྱང་དེ་བཅོམ་ལྡན་འདས་ལ་སེམས་དད་པར་གྱུར་ཏོ། །དེ་སེམས་དད་ནས་འདི་སྙམ་དུ་སེམས་ཏེ། ཨ་ལ་ལ་དེ་བཞིན་ [109b.2]གཤེགས་པའི་སྐུ་འདི་རྣམ་པར་སྤྲས་ཤིང་ཁ་དོག་དང་གཟི་བརྗིད་དང་། དཔལ་དང་མཚན་རྣམས་ཀྱིས་འབར་ཞིང་ལྷམ་མེ་ལྷན་ནེ་ལྷང་ངེ་བ་ངོ་མཚར་ཏོ། །སྙམ་མོ་དེ་ནས་བྲམ་ཟེའི་ཁྱེའུ་བཟང་དག་གིས་འདི་སྐད་ཅེས་སྨྲས་ཏེ། ཨ་ལ་ལ་བདག་ཀྱང་མ་འོངས་པའི་དུས་ན་ལུས་ [109b.3]འདི་འདྲ་བ་དང་ལྡན་པར་གྱུར་ཅིག་ཁ་དོག་དང་། གཟི་བརྗིད་དང་། དཔལ་དང་། མཚན་རྣམས་ཀྱིས་འདི་ལྟར་འབར་ཞིང་ལྷམ་མེ་ལྷན་ནེ་ལྷང་ངེ་བར་གྱུར་ཅིག་ཅེས་དེས་སྨོན་ལམ་དེ་སྐད་བཏབ་ནས་ས་ལ་ཉལ་ཏེ་འདི་སྙམ་དུ་བསམས་སོ། །གལ་ཏེ་བདག་ཀྱང་མ་འོངས་པའི་ [109b.4]དུས་ན་འདི་ལྟ་བུའི་ལུས་དང་ལྡན་པར་གྱུར་ཏེ། ཁ་དོག་དང་། གཟི་བརྗིད་དང་། དཔལ་དང་། མཚན་རྣམས་ཀྱིས་འབར་ཞིང་ལྷམ་མེ་ལྷན་ནེ་ལྷང་ངེར་འགྱུར་ཞེ་ན། དེ་བཞིན་གཤེགས་པའི་ཞབས་བདག་གི་ལུས་ལ་རེག་པར་གྱུར་ཅིག་སྙམ་མོ། །ཀུན་དགའ་བོ་དེ་ [109b.5]ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་དེས་བྲམ་ཟེའི་ཁྱེའུ་བཟང་དག་གི་ལྷག་པའི་བསམ་པ་མཁྱེན་ནས་བྲམ་ཟེའི་ཁྱེའུ་བཟང་དག་ག་ལ་བ་དེར་གཤེགས་ཏེ། བྲམ་ཟེའི་ཁྱེའུ་ [109b.6]བཟང་དག་ལ་ཞབས་ཀྱིས་རེག་པར་མཛད་དོ། །དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པ་དེས་བྲམ་ཟེའི་ཁྱེའུ་བཟང་དག་ལ་ཞབས་ཀྱིས་རེག་པར་མཛད་མ་ཐག་ཏུ། དེ་ནས་དེའི་ཚེ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཀུན་དགའ་ [109b.7]བོ་དེ་ནས་དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པ་དེས་སྣམ་ལོགས་སུ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་གང་གིས་ཀྱང་བྲམ་ཟེའི་ཁྱེའུ་བཟང་དག་དེའི་ལུས་ལ་རྐང་པས་མ་རྫི་ཤིག །དེ་ཅིའི་ཕྱིར་ཞེ་ན། བྱང་ [110a] [110a.1]ཆུབ་སེམས་དཔའ་སེམས་དཔའ་ཆེན་པོ་འདི་མི་སྐྱེ་བའི་ཆོས་ལ་བཟོད་པ་ཐོབ་པའི་ཕྱིར་རོ། །དེ་ནས་དེ་ཉིད་ཀྱི་ཚེ་བྲམ་ཟེའི་ཁྱེའུ་བཟང་དག་གིས་ལྷའི་མིག་དང་། ལྷའི་རྣ་བ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་གནས་རྗེས་སུ་ [110a.2]དྲན་པ་མངོན་སུམ་དུ་བྱ་བའི་ཤེས་པ་ཐོབ་བོ། །རྫུ་འཕྲུལ་ཡང་མངོན་པར་བསྒྲུབས་སོ། །དེས་དེ་བཞིན་གཤེགས་པ་སྣང་བས་རྣམ་པར་རོལ་པའི་མངོན་པར་ཤེས་པའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་དག་གིས་ཀྱང་མངོན་པར་བསྟོད་དོ། ། [110a.3]ཕྱོགས་དང་ཕྱོགས་མཚམས་རྣམས་སུ་བསྐོར་ཏེ་བཙལ་བགྱིས་ཀྱང་། །འཇིག་རྟེན་དག་ན་མི་དབང་ཁྱོད་འདྲ་ཡོད་མ་མཆིས། །འགྲོ་བ་ཀུན་ན་རྫོགས་པའི་སངས་རྒྱས་མངོན་པར་འཕགས། །རྣམ་པར་འདྲེན་པ་རང་བྱུང་ཁྱོད་ལ་བདག་ཕྱག་འཚལ། །དཔེར་ན་ [110a.4]བར་སྣང་ན་ནི་ཉི་མ་ལྷན་ནེ་ལྟར། །ཕྱོགས་དང་ཕྱོགས་མཚམས་ཀུན་གྱི་འཇིག་རྟེན་ཁམས་རྣམས་ན། །འཇིག་རྟེན་འདི་དག་ཐམས་ཅད་འོད་ཀྱིས་ལྷམ་མེར་གྱུར། །སངས་རྒྱས་ཡོན་ཏན་གཟི་མངའ་ཁྱོད་ལ་བདག་ཕྱག་འཚལ། །ཇི་ལྟར་སེང་གེ་ནགས་ཁྲོད་དག་ན་ [110a.5]སྒྲ་སྒྲོགས་པ། །ཝ་ཚོགས་ཕལ་ཆེན་ཐམས་ཅད་ཟིལ་གྱིས་གནོན་པར་བགྱིད། །དེ་ལྟར་མི་ཡི་དམ་པ་མཐུ་ཆེན་མངའ་བ་ཡང་། །མུ་སྟེགས་ཅན་མང་འདུས་པ་ཐམས་ཅད་ཟིལ་གྱིས་གནོན། །བདེ་བར་གཤེགས་པ་སྨིན་མཚམས་བར་གྱི་མཛོད་སྤུ་དཀར། ། [110a.6]དངུལ་དང་ཁ་བའི་ཚོགས་བཞིན་མཐའ་ཡས་གཟི་བརྗིད་ཅན། །དེས་ནི་འཇིག་རྟེན་འདི་དག་ཐམས་ཅད་སྣང་བར་བགྱིས། །འཇིག་རྟེན་ཀུན་ན་སངས་རྒྱས་ཁྱོད་ནི་མི་མཉམ་མཉམ། །སྐྱེས་བུ་ཁྱུ་མཆོག་ཞབས་ལ་ལྷ་ཡི་འཁོར་ལོ་མངའ། །གསལ་ཞིང་མཛེས་ལ་ [110a.7]རྩིབས་སྟོང་ཚང་ཞིང་མུ་ཁྱུད་འཁོར། །དེ་དག་གིས་ནི་རི་དང་ནགས་བཅས་ས་འདི་རྣམས། །རབ་ཏུ་གཡོ་བགྱིད་ཐུབ་པ་གང་ཟག་མཚུངས་མེད་པ། །ཉོན་མོངས་ཤས་ཆེན་དོར་བར་བགྱི་བ་ཐམས་ཅད་བོར། །འཕགས་པ་ངེས་པར་འབྱིན་པའི་ལམ་ནི་རབ་ཏུ་བརྙེས། ། [110b] [110b.1]ནོར་རྣམས་ཀུན་དང་ལྡན་ཞིང་ཡོན་ཏན་རྣམས་ཀྱིས་ཕྱུག །བསམ་པ་བཞིན་དུ་འཕགས་པའི་ནོར་རྣམས་བཀོད་པ་མཛད། །ས་དང་མཚུངས་ཤིང་སྦྱིན་པའི་གནས་གྱུར་མཚུངས་མ་མཆིས། །ཡོན་ཏན་ཀུན་ལ་མངའ་བརྙེས་ཚུལ་ཁྲིམས་རྣམ་དག་པ། །ཇི་ལྟར་ [110b.2]ནམ་མཁར་ལག་པ་མི་ཐོགས་མི་ཆགས་ལྟར། །འཇིག་རྟེན་དག་ན་ཁྱོད་ལ་རྗེས་ཆགས་ཁྲོ་མི་མངའ། །བཟོད་པ་ཟད་ཀྱིས་གཏུགས་པ་དོན་དང་ཆོས་རྣམས་ཀུན། །སྙིང་པོ་མ་མཆིས་པ་དང་གསོབ་དང་གསོག་ཏུ་མཁྱེན། །སྲིད་པའི་འགྲོ་བ་ཐམས་ཅད་དག་ན་ [110b.3]གང་རྣམས་ལ། །རློམ་སེམས་འགྱུར་བའི་སེམས་ཅན་སྲོག་དང་དངོས་མ་བརྙེས། །ཁམས་དང་སྤྱོད་པ་དག་དང་སྦྱོར་དང་བསམ་པ་མཁྱེན། །རྨད་དུ་བྱུང་དང་རྣམ་པར་འབྱེད་མཛད་སྒྲོན་མར་གྱུར། །ཆུ་བོ་ཆེན་པོས་དེད་པའི་འགྲོ་བ་གཟིགས་གྱུར་ནས། །སྔོན་ [110b.4]ཆད་བརྩོན་འགྲུས་སྟོབས་བརྟན་མཐུ་ནི་བསྐྱེད་པ་མཛད། །སྐྱེ་བ་སྤངས་ཤིང་ཉོན་མོངས་ཞི་བའི་ཐུགས་དང་ལྡན། །ཐུགས་རྒྱ་ཆེན་པོ་སྐྱེ་དང་རྒ་ཤི་མཐའ་མར་འབྱིན། །ནམ་མཁའི་དཀྱིལ་དང་མཚུངས་པར་ཆགས་པ་མི་མངའ་རྒྱུ། །འཇིག་རྟེན་ཆོས་ཀྱིས་མི་ [110b.5]གོས་འཇིག་རྟེན་གསུམ་ན་རྒྱུ། །བདག་ཉིད་ཆེན་པོ་ཤེས་རབ་ཀྱིས་ནི་སྣང་བར་མཛད། །མུན་པ་མུན་གནག་གྱུར་པ་ཐམས་ཅད་རྣམ་པར་སེལ། །འདོད་ཆགས་རྡུལ་ཞི་མཛད་ཅིང་ཞེ་སྡང་གཏི་མུག་གི །དྲི་མ་སྣ་ཚོགས་མུན་བསལ་ཁྱོད་ལ་ཕྱག་འཚལ་ལོ། །ཀུན་ [110b.6]དགའ་བོ་དེ་ཚུན་ཆད་བྲམ་ཟེའི་ཁྱེའུ་བཟང་དག་དེའི་རྫུ་འཕྲུལ་རྣམས་སམ། མངོན་པར་ཤེས་པ་རྣམས་ཡོངས་སུ་ཉམས་པར་མ་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་བྲམ་ཟེའི་ཁྱེའུ་བཟང་དག་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཡིད་ [110b.7]གཉིས་ཟ་འམ། ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ཉིད་དེའི་ཚེ་དེའི་དུས་ན་བྲམ་ཟེའི་ཁྱེའུ་བཟང་དག་ཅེས་བྱ་བར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ [111a] [111a.1]པའི་སངས་རྒྱས་སྣང་བས་རྣམ་པར་རོལ་པའི་མངོན་པར་ཤེས་པ་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། ། [111a.2]བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་གལ་ཏེ་ཡུན་རིང་པོ་དེ་སྲིད་ནས་མི་སྐྱེ་བའི་ཆོས་ལ་བཟོད་པ་ཐོབ་པ་ལགས་ན། ཅིའི་སླད་དུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས། [111a.3]དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བྱང་ཆུབ་སེམས་དཔའ་རྣམས་ཀྱི་བཀོད་པ་དང་ཡོངས་སུ་གཟུང་བ་ནི་གཉིས་པོ་འདི་དག་སྟེ། གཉིས་གང་ཞེ་ན། སེམས་ཅན་ [111a.4]བཀོད་པ་དང་སེམས་ཅན་ཡོངས་སུ་གཟུང་བ་དང་། ཞིང་བཀོད་པ་དང་ཞིང་ཡོངས་སུ་གཟུང་བ་དང་། གཉིས་པོ་འདི་དག་ཡིན་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཞིང་བཀོད་པ་རྣམ་པར་སྦྱངས་ [111a.5]ཤིང་ཡོངས་སུ་གཟུང་བ་ཡོངས་སུ་བཟུང་ངོ་། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ངས་ནི་སེམས་ཅན་བཀོད་པ་རྣམ་པར་སྦྱངས། སེམས་ཅན་ཡོངས་སུ་གཟུང་བ་ཡོངས་སུ་བཟུང་། ཞིང་བཀོད་པ་ཡང་རྣམ་པར་སྦྱངས། ཞིང་ [111a.6]ཡོངས་སུ་གཟུང་བ་ཡང་ཡོངས་སུ་བཟུང་ངོ་། །ཀུན་དགའ་བོ་ངས་མངོན་པར་ཤེས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཡང་དག་པར་ཞུགས་ནས་བསྐལ་པ་བཞི་བཅུ་རྩ་གཉིས་ལོན་པའི་འོག་ཏུ་ངས་གདོད་བླ་ན་མེད་པ་ཡང་དག་པར་རྫོགས་ [111a.7]པའི་བྱང་ཆུབ་ཏུ་སེམས་བསྐྱེད་དེ། ཀུན་དགའ་བོ་བསྐལ་པ་བཟང་པོ་འདི་འདས་ནས་བསྐལ་པ་དགུ་བཅུ་རྩ་བཞི་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་རིགས་པ་ལས། ཀུན་དགའ་བོ་ངས་བརྩོན་འགྲུས་འབར་བར་ [111b] [111b.1]བྱས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ངས་བརྩོན་འགྲུས་རླབས་པོ་ཆེས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཀུན་དགའ་ [111b.2]བོ་ཆོས་བཅུ་པོ་འདི་དག་གིས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། བཅུ་གང་ཞེ་ན། བདོག་པ་ཕངས་པ་ཐམས་ཅད་ཡོངས་སུ་བཏང་བ་དང་། ཆུང་མ་ཕངས་པ་ཡོངས་སུ་བཏང་བ་དང་། བུ་ཕངས་པ་ཡོངས་ [111b.3]སུ་བཏང་བ་དང་། མགོ་ཕངས་པ་ཡོངས་སུ་བཏང་བ་དང་། མིག་ཕངས་པ་ཡོངས་སུ་བཏང་བ་དང་། རྒྱལ་སྲིད་ཕངས་པ་ཡོངས་སུ་བཏང་བ་དང་། ལོངས་སྤྱོད་ཕངས་པ་ཡོངས་སུ་བཏང་བ་དང་། ཁྲག་ཕངས་པ་ཡོངས་སུ་བཏང་བ་དང་། རུས་པ་དང་རྐང་ [111b.4]ཕངས་པ་ཡོངས་སུ་བཏང་བ་དང་། ཡན་ལག་ཕངས་པ་ཐམས་ཅད་ཡོངས་སུ་བཏང་བས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ཆོས་བཅུ་པོ་དེ་དག་གིས་ང་མྱུར་དུ་བླ་ན་མེད་པ་ཡང་དག་པར་ [111b.5]རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་གཞན་ཡང་ང་ཆོས་བཅུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། བཅུ་གང་ཞེ་ན། ཀུན་དགའ་བོ་ང་ཚུལ་ཁྲིམས་ཀྱི་ཡོན་ཏན་གྱི་ [111b.6]ཆོས་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་བཟོད་པའི་སྟོབས་དང་ལྡན་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་ [111b.7]བོ་ང་བརྩོན་འགྲུས་འབར་བ་བརྩམས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་བསམ་གཏན་གྱི་ཡོན་ཏན་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ [112a] [112a.1]པར་སངས་རྒྱས་སོ། །ཀུན་དགའ་བོ་ང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་སེམས་ཅན་ཐམས་ཅད་ཡོངས་སུ་མ་བཏང་བས་ [112a.2]མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་ཐབས་ལ་མཁས་པ་ལ་གནས་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ང་སེམས་ཅན་ [112a.3]ཐམས་ཅད་ལ་སེམས་སྙོམས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་སྟོང་པ་ཉིད་ཀྱི་ཆོས་རྟོགས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། ། [112a.4]ཀུན་དགའ་བོ་ངས་མཚན་མ་མེད་པ་དང་། སྨོན་པ་མེད་པའི་ཆོས་རྟོགས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཀུན་དགའ་བོ་ཆོས་བཅུ་པོ་དེ་དག་གིས་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ [112a.5]ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ་ངས་ཚོར་བ་སྡུག་བསྔལ་བ་དྲག་པ་རྩུབ་པ་ཇི་ལྟ་བུ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ། གལ་ཏེ་ཁྱོད་ཀྱིས་ཤེས་སུ་ཟིན་ན་ཀུན་དགའ་བོ་ [112a.6]ཁྱོད་སྤོབས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ། །རྒྱས་པ་མཆོག་དང་ལྡན་པ། རྒྱལ་ [112a.7]པོའི་འབྱོར་པ་ཆེན་པོ་དང་རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་གནོད་པས་ཉེན་ཅིང་སྡུག་བསྔལ་ལ་ནད་ཚབས་ཆེན་པོས་བཏབ་པའི་མི་ཞིག་མཐོང་ངོ་། །མཐོང་ནས་ཀྱང་དེ་སྙིང་རྗེ་བར་གྱུར་ཏེ། དེ་མི་དེ་ག་ལ་བ་དེར་ [112b] [112b.1]སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཀྱེ་མི་ཁྱོད་ཅི་སྡུག་བསྔལ་ལམ། དེས་སྨྲས་པ། ལྷ་བདག་ནི་ནད་ཀྱིས་བཏབ་བོ། །དེས་སྨྲས་པ། ཀྱེ་མི་ཁྱོད་ཀྱི་ནད་ཅིས་ཞི་བར་འགྱུར། ཁྱོད་ལ་ཅི་སྦྱིན། དེས་འདི་སྐད་ཅེས་སྨྲས་སོ། །གལ་ཏེ་བདག་གིས་ལྷ་ཁྱོད་ཀྱི་ལུས་ [112b.2]ལས་ཇི་ཙམ་གྱིས་ཚིམ་པར་འགྱུར་བའི་ཁྲག་ཅིག་བཏུང་དུ་ཐོབ་པ་ལྟ་ན་བདག་གི་ནད་ཞི་བར་འགྱུར་རོ། །ཀུན་དགའ་བོ་དེ་ནས་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་དེས་མཚོན་རྣོན་པོ་བླངས་ཏེ། རང་གིས་ལུས་ཕུག་ནས་ཁྲག་གཟགས་ཏེ་མི་དེ་ལ་བཏུང་བར་བྱིན་ནོ། ། [112b.3]ཀུན་དགའ་བོ་མི་དེས་དེ་འཐུངས་མ་ཐག་ཏུ་མི་དེའི་ནད་སོས་པར་གྱུར་ཏོ། །ཀུན་དགའ་བོ་རྒྱལ་བུ་གཞོན་ནུ་ནོར་ཐམས་ཅད་སྦྱིན་པས་རང་གི་ལུས་ཕུག་སྟེ་ཁྲག་ཐམས་ཅད་གཟགས་ཀྱང་འགྱོད་པའི་སེམས་གཅིག་ཀྱང་མེད་དོ། །ཀུན་དགའ་བོ་དེའི་ཚེ་དེའི་དུས་ན་རྒྱལ་བུ་གཞོན་ [112b.4]ནུ་ནོར་ཐམས་ཅད་སྦྱིན་པར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ། ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་ཞེས་བྱ་བར་གྱུར་ཏོ། །ཀུན་དགའ་བོ་རྒྱ་མཚོ་ཆེན་པོ་ [112b.5]བཞིའི་ཆུའི་ཕུང་པོ་ནི་ཚད་གཟུང་དུ་ཡོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སྔོན་སེམས་ཅན་རྣམས་ལ་ཁྲག་བྱིན་པ་ནི་ཚད་མེད་དོ། །ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བ་གཟུགས་བཟང་བ། མཛེས་ [112b.6]པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་གྱི་སར་འགྲོ་སྟེ། གྲོང་བར་དུ་ཕྱིན་པ་དང་སྐྱ་རྦབ་ཀྱིས་ནད་ཀྱིས་བཏབ་པའི་མི་གནོད་པས་ཉེན་པ། [112b.7]སྡུག་བསྔལ་བ། ནད་ཚབས་ཆེན་པོ་ཞིག་མཐོང་ངོ་། །དེས་དེ་མཐོང་ནས་ཀྱང་སྙིང་རྗེ་བར་གྱུར་ཏེ། དེ་མི་དེ་ག་ལ་བ་དེར་སོང་སྟེ། འདི་སྐད་ཅེས་སྨྲས་སོ། །ཀྱེ་ཅི་ཞིག་གིས་མི་ཁྱོད་ཀྱི་ནད་འདི་ཞི་བར་འགྱུར། ཁྱོད་ལ་ཅི་ཞིག་སྦྱིན། དེས་འདི་སྐད་ཅེས་སྨྲས་སོ། ། [113a] [113a.1]གལ་ཏེ་བདག་གིས་ལྷ་ཁྱོད་ཀྱི་ལུས་ལས་ཇི་ཙམ་གྱིས་ཚིམ་པར་འགྱུར་བའི་རྐང་ཞིག་ཐོབ་པ་ལྟ་ན་བདག་གི་ནད་ཞི་བར་འགྱུར་རོ། །དེ་ནས་རྒྱལ་བུ་གཞོན་ནུ་མེ་ཏོག་དེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་བདེ་བ་དང་ཡིད་བདེ་བ་སྐྱེས་ཏེ། [113a.2]རང་གི་ལུས་བརྡུངས་ནས་རྐང་བྲུས་ཏེ་མི་དེའི་ལུས་ལ་བསྐུས་སོ། །ཀུན་དགའ་བོ་བསྐུས་མ་ཐག་ཏུ་མི་དེའི་ནད་སོས་པར་གྱུར་ཏོ། །ཀུན་དགའ་བོ་རྒྱལ་བུ་གཞོན་ནུ་མེ་ཏོག་གིས་རང་གི་ལུས་བརྡུངས་ཏེ། རྐང་གཟགས་ཀྱང་སེམས་ལ་འགྱོད་པ་མེད་པར་གྱུར་ཏོ། ། [113a.3]ཀུན་དགའ་བོ་དེའི་ཚེ་དེའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ་ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་མེ་ཏོག་ཅེས་བྱ་བར་གྱུར་ [113a.4]ཏོ། །ཀུན་དགའ་བོ་རྒྱ་མཚོ་ཆེན་པོ་བཞིའི་ཆུའི་ཕུང་པོ་ནི་ཚད་བཟུང་དུ་ཡོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སྔོན་སེམས་ཅན་རྣམས་ལ་རྐང་བྱིན་པ་ནི་ཚད་མེད་དོ། །ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་པོ་ཟླ་འོད་ [113a.5]ཅེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། རྒྱལ་པོའི་འབྱོར་པ་ཆེན་པོ་དང་རྒྱལ་པོའི་མཐུ་ཆེན་པོ་དང་ལྡན་པ་ཞིག་ཡོད་པ་དེ་སྐྱེད་མོས་ཚལ་དུ་འགྲོ་སྟེ། གྲོང་བར་དུ་ཕྱིན་པ་དང་། མི་མིག་མེད་པ་ལོང་བ། དབུལ་པོ། [113a.6]བཀྲེན་པ། སློངས་མོ་བྱེད་པ་ཞིག་མཐོང་ངོ་། །མཐོང་ནས་ཀྱང་དེ་སྙིང་རྗེ་བར་གྱུར་ཏོ། །དེ་ནས་མི་དེ་རྒྱལ་པོ་ཟླ་འོད་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ལྷ་ཁྱོད་ནི་སྐྱིད་དོ། །ལྷ་ཁྱོད་ནི་དགྱེས་སོ། །བདག་ནི་སྡུག་བསྔལ་ལོ། །ལོང་ངོ་། ། [113a.7]མིག་མ་མཆིས་སོ། །དབུལ་ལོ་བཀྲེན་ནོ། །སློངས་མོ་པའོ། །མགོན་མ་མཆིས་པའོ། །ཀུན་དགའ་བོ་དེ་ནས་རྒྱལ་པོ་ཟླ་འོད་ཀྱིས་མི་དེ་ཡང་མཐོང་། ཚིག་ཀྱང་ཐོས་ནས་ངུས་ཏེ་མཆི་མ་ཟག་བཞིན་དུ་དེ་ལ་འདི་སྐད་ཅེས་སྨྲས་སོ། །ཀྱེ་མི་ཁྱོད་ལ་ཅི་དགོས། [113b] [113b.1]ཁྱོད་ལ་བཟའ་བ་དང་། བཏུང་བ་དང་། བཞོན་པ་དང་། རྒྱན་དང་། གསེར་དང་། ནོར་བུ་དང་། མུ་ཏིག་དང་། རིན་པོ་ཆེ་སྣ་ཚོགས་སྦྱིན་པར་བྱ་འམ། ཁྱོད་ལ་གང་དགོས་པ་དེ་སྨྲོས་ཤིག །མི་དེས་སྨྲས་པ། བདག་ལ་མིག་འཚལ་ན་བདག་ལ་མིག་སྩལ་དུ་གསོལ། [113b.2]ཀུན་དགའ་བོ་དེ་ནས་རྒྱལ་པོ་ཟླ་འོད་དེས་རང་གི་མིག་ཕྱུང་སྟེ་མི་དེ་ལ་བྱིན་ནོ། །ཀུན་དགའ་བོ་དེ་ནས་རྒྱལ་པོ་ཟླ་འོད་ཀྱིས་རང་གི་མིག་ཕྱུང་སྟེ་མི་དེ་ལ་བྱིན་ཡང་དེའི་སེམས་ལ་འགྱོད་པ་མེད་པར་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་རྒྱལ་པོ་ཟླ་འོད་ཅེས་བྱ་བར་གྱུར་ [113b.3]པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཡིད་གཉིས་སམ་ཐེ་ཚོམ་ཟ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་པོ་ཟླ་འོད་ཅེས་བྱ་བར་གྱུར་ཏོ། །ཀུན་དགའ་བོ་རིའི་རྒྱལ་པོ་རི་རབ་ལ་ནི་ཚད་གཟུང་དུ་ཡོད་ཀྱི་བླ་ན་མེད་པ་ཡང་དག་ [113b.4]པར་རྫོགས་པའི་བྱང་ཆུབ་འདི་ཡོངས་སུ་ཚོལ་ཞིང་ངས་སེམས་ཅན་རྣམས་ལ་མིག་བྱིན་པ་ནི་ཆེས་མང་སྟེ་ཚད་མེད་དོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐེག་པ་བདེ་བ། འཇུག་པ་ [113b.5]བདེ་བ། ལམ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་སོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ལག་པ་ཡོངས་སུ་བཏང་བ་མ་བྱས། རྐང་ [113b.6]པ་ཡོངས་སུ་བཏང་བ་མ་བྱས། རྐང་ཡོངས་སུ་བཏང་བ་མ་བྱས། ཆུང་མ་ཕངས་པ་ཡོངས་སུ་བཏང་བ་མ་བྱས། བུ་ཕངས་པ་ཡོངས་སུ་བཏང་བ་མ་བྱས། གྲོང་དང་། གྲོང་རྡལ་དང་། གྲོང་ཁྱེར་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་ [113b.7]འཁོར་ཕངས་པ་ཡོངས་སུ་བཏང་བ་མ་བྱས་ཏེ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐབས་མཁས་པས་ཡོངས་སུ་ཟིན་པས་ཐེག་པ་བདེ་བ། འཇུག་པ་བདེ་བ། ལམ་བདེ་བས་བླ་ན་ [114a] [114a.1]མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ [114a.2]ཐབས་ལ་མཁས་པ་གང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པའི་ཐབས་ལ་མཁས་པ་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་ [114a.3]བཀའ་སྩལ་ཏོ། །ཀུན་དགའ་བོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ [114a.4]ཏེ་ཐལ་མོ་སྦྱར་ནས་སངས་རྒྱས་ཐམས་ཅད་མངོན་སུམ་དུ་བྱས་ཏེ་ཚིག་འདི་སྐད་ཅེས་སྨྲས་སོ། །སངས་རྒྱས་ཀུན་ལ་ཕྱག་འཚལ་ལོ། །དྲང་སྲོང་ལྷ་མིག་ལྡན་པ་ཡི། །བྱང་ཆུབ་སེམས་དཔའ་རྣམས་དང་ཡང་། །ཉན་ཐོས་རྣམས་ལ་ཕྱག་འཚལ་ལོ། །ངན་འགྲོ་ཐམས་ [114a.5]ཅད་ཟློག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། །སེམས་ཀྱི་དབང་དུ་གྱུར་པས་ན། །བདག་གིས་སྡིག་པ་ཅི་བགྱིས་པ། །སངས་རྒྱས་སྤྱན་སྔར་མཆིས་ནས་སུ། །བདག་གིས་དེ་ [114a.6]དག་བཤགས་པར་བགྱི། །བདག་ལས་རྣམ་པ་གསུམ་གང་གིས། །བསོད་ནམས་ཚོགས་ནི་སྐྱེད་པ་དེ། །བདག་གི་ཀུན་མཁྱེན་ས་བོན་ཏེ། །བདག་གི་བྱང་ཆུབ་མི་ཟད་ཤོག །ཕྱོགས་བཅུ་དག་གི་ཞིང་རྣམས་སུ། །སངས་རྒྱས་མཆོད་པ་གང་བྱུང་བ། ། [114a.7]སངས་རྒྱས་མཁྱེན་པ་ཡི་རང་བས། །དེ་ལ་བདག་ནི་ཡི་རང་ངོ་། །སྡིག་པ་ཐམས་ཅད་བཤགས་པར་བགྱི། །བསོད་ནམས་ཀུན་ལ་ཡི་རང་ངོ་། །སངས་རྒྱས་ཀུན་ལ་ཕྱག་འཚལ་ལོ། །བདག་ནི་ཡེ་ཤེས་མཆོག་ཐོབ་ཤོག །ཕྱོགས་བཅུ་དག་གི་ཕྱོགས་རྣམས་ [114b] [114b.1]ན། །ས་བཅུ་དག་ལ་གནས་པ་ཡི། །བྱང་ཆུབ་སེམས་དཔའ་བྱང་ཆུབ་མཆོག །འཚང་རྒྱ་བགྱིད་པར་སྐུལ་མ་འདེབས། །བྱང་ཆུབ་དམ་པར་སངས་རྒྱས་ཤིང་། །སྡེ་དང་བཅས་པའི་བདུད་བཏུལ་ནས། །སྲོག་ཆགས་ཀུན་ལ་སྨན་སླད་དུ། །ཆོས་ [114b.2]ཀྱི་འཁོར་ལོ་སྐོར་གྱུར་ཅིག །ཆོས་རྔ་ཆེན་པོའི་སྒྲ་ཡིས་ནི། སྡུག་བསྔལ་སེམས་ཅན་ཐར་བགྱིད་ཤོག །བསྐལ་པ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །འདོད་པའི་འདམ་དུ་བྱིང་གྱུར་ཅིང་། །སྲེད་པའི་སྲད་བུས་དམ་བཅིངས་པ། ། [114b.3]འཆིང་བ་ཀུན་གྱིས་བཅིངས་བདག་ལ། །རྐང་གཉིས་མཆོག་རྣམས་གཟིགས་སུ་གསོལ། །སེམས་ཀྱི་དྲི་མར་བགྱིས་པ་ལ། །སངས་རྒྱས་རྣམས་ནི་སྨོད་མི་མཛད། །སེམས་ཅན་རྣམས་ལ་བྱམས་ཐུགས་ལྡན། །སྲིད་པའི་མཚོ་ལས་སྒྲོལ་བར་ཤོག །རྫོགས་པའི་ [114b.4]སངས་རྒྱས་གང་བཞུགས་དང་། །གང་དག་འདས་དང་མ་བྱོན་པ། །(ད་,དེ་)དག་རྗེས་སུ་བདག་སློབ་ཅིང་། །བྱང་ཆུབ་སྤྱད་པ་སྤྱོད་གྱུར་ཅིག །ཕ་རོལ་ཕྱིན་དྲུག་རྫོགས་བགྱིས་ནས། །འགྲོ་དྲུག་སེམས་ཅན་ཐར་བགྱིད་ཤོག །མངོན་ཤེས་དྲུག་པོ་མངོན་བགྱིས་ནས། ། [114b.5]བླ་མེད་བྱང་ཆུབ་རེག་གྱུར་ཅིག །མ་སྐྱེས་པ་དང་མི་འབྱུང་དང་། །རང་བཞིན་མ་མཆིས་གནས་མ་མཆིས། །རྣམ་རིག་མ་མཆིས་དངོས་མ་མཆིས། །སྟོང་པའི་ཆོས་ནི་རྟོགས་པར་ཤོག །སངས་རྒྱས་དྲང་སྲོང་ཆེན་པོ་ལྟར། །སེམས་ཅན་མ་མཆིས་སྲོག་མ་མཆིས། ། [114b.6]གང་ཟག་མ་མཆིས་གསོ་མ་མཆིས། །བདག་མ་མཆིས་པའི་ཆོས་རྟོགས་ཤོག །བདག་འཛིན་བདག་གིར་འཛིན་པར་ནི། །དངོས་པོ་ཀུན་ལ་མི་གནས་པར། །སེམས་ཅན་ཀུན་ལ་བདེ་སླད་དུ། །སེར་སྣ་མ་མཆིས་སྦྱིན་གཏོང་ཤོག །དངོས་པོ་དངོས་པོ་མ་ [114b.7]མཆིས་པས། །བདག་གི་ལོངས་སྤྱོད་ལྷུན་གྲུབ་ཤོག །དངོས་པོ་ཐམས་ཅད་རྣམ་འཇིག་པས། །སྦྱིན་པའི་ཕ་རོལ་ཕྱིན་རྫོགས་ཤོག །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ [115a] [115a.1]ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །ས་འམ་ཡང་ན་ཆུ་འམ་མེ། །རླུང་གི་ཁམས་ལྟར་མི་གནས་ཤིང་། །བཟོད་པའམ་ཁྲོ་བ་མ་མཆིས་པར། །བཟོད་པའི་ཕ་རོལ་ཕྱིན་རྫོགས་ཤོག །བརྩོན་འགྲུས་བརྩམས་པའི་བརྩོན་ [115a.2]འགྲུས་ཀྱིས། །བརྟན་སྤྲོ་ལེ་ལོ་མ་མཆིས་ཤིང་། །སྟོབས་དང་ལྡན་པའི་ལུས་སེམས་ཀྱིས། །བརྩོན་འགྲུས་ཕ་རོལ་ཕྱིན་རྫོགས་ཤོག །སྒྱུ་མ་ལྟ་བུའི་ཏིང་འཛིན་དང་། །དཔའ་བར་འགྲོ་བའི་ཏིང་འཛིན་དང་། །རྡོ་རྗེ་ལྟ་བུའི་ཏིང་འཛིན་གྱིས། །བསམ་གཏན་ [115a.3]ཕ་རོལ་ཕྱིན་རྫོགས་ཤོག །རྣམ་པར་ཐར་པའི་སྒོ་གསུམ་དང་། །དུས་གསུམ་མཉམ་པ་ཉིད་དང་ཡང་། །རིག་གསུམ་མངོན་སུམ་བགྱིས་པ་ཡིས། །ཤེས་རབ་ཕ་རོལ་ཕྱིན་རྫོགས་ཤོག །སངས་རྒྱས་ཀུན་གྱིས་བསྔགས་པ་དང་། །འོད་དང་གཟི་བརྗིད་འབར་ [115a.4]བ་དང་། །བྱང་ཆུབ་སེམས་དཔའི་བརྩོན་འགྲུས་ཀྱིས། །བདག་གི་བསམ་པ་རྫོགས་གྱུར་ཅིག །དེ་ལྟར་སྤྱད་པ་སྤྱོད་བྱེད་ཅིང་། །བྱམས་པ་གྲགས་དང་ལྡན་པ་ཡིས། །ཕ་རོལ་ཕྱིན་དྲུག་རྫོགས་བྱས་ནས། །ས་བཅུ་པོ་ལ་རབ་ཏུ་གནས། །ཀུན་དགའ་བོ་བྱང་ [115a.5]ཆུབ་སེམས་དཔའ་སེམས་དཔའ་ཆེན་པོ་བྱམས་པས་གང་ལ་གནས་ནས་ཐབས་ལ་མཁས་པས་ཐེག་པ་བདེ་བ། འཇུག་པ་བདེ་བ། ལམ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པའི་ཐབས་ལ་མཁས་པ་ནི་དེ་ཡིན་ནོ། ། [115a.6]ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་འདོད་ཆགས་ཆུང་བ་དང་། ཞེ་སྡང་ཆུང་བ་དང་། གཏི་མུག་ཆུང་བ་དང་། དགེ་བ་བཅུའི་ལས་ཀྱི་ལམ་དང་ལྡན་པར་གྱུར་ལ། [115a.7]ཕྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ན་ཅི་མ་རུང་ཞེས་དེ་ལྟར་ཞིང་རྣམ་པར་སྦྱངས་སོ། །ཀུན་དགའ་བོ་དུས་དེ་དང་ཚོད་དེ་འབྱུང་བ་ཡོད་དེ། དེའི་ཚེ་དེའི་དུས་ན་སེམས་ཅན་དག་འདོད་ཆགས་ཆུང་བ་དང་། །ཞེ་སྡང་ཆུང་བ་ [115b] [115b.1]དང་། གཏི་མུག་ཆུང་བ་དང་། དགེ་བ་བཅུའི་ལས་ཀྱི་ལམ་དང་ལྡན་པ་དག་འབྱུང་བར་འགྱུར་ཏེ། དེའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྨོན་ལམ་གྱི་དབང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་ [115b.2]འཚང་རྒྱ་བར་འགྱུར་རོ། །ཀུན་དགའ་བོ་ངས་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིགས་མ་ལྔ་དང་ལྡན་པའི་འཇིག་རྟེན་གནས་པའི་ཚེ་སེམས་ཅན་འདོད་ཆགས་ཀྱི་ཤས་ཆེ་བ་དང་། ཞེ་སྡང་གི་ཤས་ཆེ་བ་དང་། གཏི་མུག་གི་ཤས་ཆེ་བ་དང་། འདོད་ [115b.3]ཆགས་བདོ་བ་དང་། ཞེ་སྡང་བདོ་བ་དང་། གཏི་མུག་བདོ་བ་དང་། ཆོས་མ་ཡིན་པ་ལ་ཆགས་ཤིང་ཞེན་པ་དང་། ཆགས་པའི་ཡ་ང་བས་ཟིལ་གྱིས་ནོན་པ་དང་། ཆོས་ལོག་པས་ཡོངས་སུ་ཟིན་པ་དང་། ཕ་ལ་འཁུ་བ་དང་། མ་ལ་འཁུ་བ་དང་། སྤུན་ལ་འཁུ་བ་ [115b.4]དང་། མིང་སྲིང་ལ་འཁུ་བ་དང་། ཁྱོ་ཤུག་ལ་འཁུ་བ་དང་། ཉེ་དུ་ལ་འཁུ་བ་དང་། འཕགས་པ་ལ་འཁུ་བ་དང་། མཁན་པོ་དང་། སློབ་དཔོན་ལ་འཁུ་བ་དང་། བདག་ལ་འཁུ་བ་དང་། མི་གཞན་ལ་འཁུ་བ་དང་། མི་དྲི་མ་ཅན་དང་། མི་དམུ་རྒོད་དང་། མི་ཅང་ཤེས་ [115b.5]མ་ཡིན་པ་རྣམས་ཀྱི་ནང་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ན་ཅི་མ་རུང་ཞེས་དེ་ལྟར་སྨོན་ལམ་ཡོངས་སུ་སྦྱོངས་ཏེ། དུས་ཡ་ང་བ་འདི་ལྟ་བུ་ལ་གནས་ནས་ཀུན་དགའ་བོ་ངས་སྙིང་རྗེ་ཆེན་པོ་མདུན་དུ་བྱས་ཏེ། སྙིང་རྗེ་ཆེན་ [115b.6]པོ་དང་ལྡན་པས་ང་ད་ལྟར་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་ཞུགས་ཏེ་ཆོས་སྟོན་པ་ན། ང་ལ་ཁ་ངན་ཟེར་ཞིང་གཤེ་རྒྱ་སྟེ་ཚོགས་པར་མི་དབྱུང་བ་རྩུབ་པ་བརླང་པོས་སྨྲ་བར་བྱེད་དོ། །ཀུན་དགའ་བོ་ང་ [115b.7]ལ་ཆད་པར་སྨྲ་བ་ཡིན་ནོ་ཞེས་ཀྱང་ཟེར་རོ། །རྟག་པར་སྨྲ་བ་ཡིན་ནོ་ཞེས་ཀྱང་ཟེར་རོ། །འཁོར་འདོད་པ་མང་ངོ་ཞེས་ཀྱང་གླེང་ངོ་། །འདོད་པ་ཆེའོ་ཞེས་ཀྱང་གླེང་ངོ་། །ཁྱིམ་གྱི་ནང་དུ་ཞུགས་ན་ཡང་ང་ལ་སས་ཀྱང་འཐོར་རོ། །དུག་དང་བསྲེས་པའི་ཟས་ཀྱང་བྱིན་ནོ། །མེའི་ཕུང་པོ་ཡང་ [116a] [116a.1]ཉེ་བར་བསྒྲུབས་སོ། །འདི་ལྟ་སྟེ། སངས་རྒྱས་སུ་གྱུར་ཀྱང་མཛེས་ལྡན་མ་དང་ཞེས་བྱ་བ་ལྟ་བུ་འཁྲིག་པའི་ཆོས་དང་ལྡན་པས་ང་ལ་སྐུར་པ་ཡང་བཏབ་བོ། །ཀུན་དགའ་བོ་ང་ནི་སྙིང་རྗེ་ཆེན་པོ་མདུན་དུ་བྱས་ཏེ། སྙིང་རྗེ་ཆེན་པོ་དང་ལྡན་པས་ད་ལྟར་སེམས་ཅན་དེ་ལྟ་བུ་དེ་དག་ལ་ཆོས་ [116a.2]སྟོན་ཏོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དེ་ལྟ་བུ་དེ་དག་ལ་ཆོས་སྟོན་པར་མཛད་པ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་དུལ་བ་ [116a.3]འདུལ་བ། ཁུར་ཆེན་པོ་བསྣམས་པ། དཀའ་བ་མཛད་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་ [116a.4]པ་ཡང་དག་པར་རྫོགས་པའི་སངས་རྒྱས་མ་དུལ་བ་འདུལ་བ། ཁུར་ཆེན་པོ་བསྣམས་པ། དགེ་བའི་ཆོས་ཐམས་ཅད་དང་ལྡན་པ་གང་དག་སེམས་ཅན་དེ་ལྟ་བུ་དག་ལ་ཆོས་སྟོན་པ་ནི་དཀའ་བ་མཛད་པའོ། །དེ་ཅིའི་ཕྱིར་ཞེ་ན། འདི་ལྟར་སྙིང་རྗེ་ཆེན་པོས་ཡོངས་སུ་ཟིན་པའི་ཕྱིར་རོ། །དེ་སྐད་ཅེས་བཀའ་ [116a.5]སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཆོས་ཀྱི་རྣམ་གྲངས་འདི་མཛེས་པ་དང་། བདག་གིས་ཆོས་ཀྱི་རྣམ་གྲངས་འདི་ཐོས་ཤིང་བཅོམ་ལྡན་འདས་ཀྱི་ཁྱུ་མཆོག་གི་གནས་འདི་ཐོས་ནས་སྤུ་ཟིང་ཞེས་བགྱིད་པ་ནི་ངོ་མཚར་ལགས་སོ། ། [116a.6]བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་སྔོན་གྱི་སྨོན་ལམ་ཡང་དག་པར་འཕགས་པ་ཞེས་བྱ་བར་ཟུང་ཤིག །དེ་བཞིན་གཤེགས་པ་ཡང་དག་པར་འབྱུང་བ་ཞེས་བྱ་བར་ [116a.7]ཡང་ཟུང་ཤིག །བྱང་ཆུབ་ཀྱི་དགོངས་པ་འབྱུང་བ་ཞེས་བྱ་བར་ཡང་ཟུང་ཤིག །བྱམས་པས་ཞུས་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་བྱང་ཆུབ་སེམས་དཔའ་བྱམས་པ་དང་། དགེ་སློང་ལྔ་བརྒྱ་པོ་དེ་དག་དང་ཐམས་ [116b] [116b.1]ཅད་དང་ལྡན་པའི་འཁོར་དེ་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བྱམས་པས་ [116b.2]ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་གཅིག་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།{D86}འཕགས་པ་དཀོན་མཆོག་བརྩེགས་པ་ [116b.3]ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་གཉིས་པ་སྟེ་འཕགས་པ་བྱམས་པས་ཆོས་བརྒྱད་ཞུས་པ་ལུང་བསྟན་པ། བམ་པོ་ཕྱེད་པ། རྒྱ་གར་སྐད་དུ། ཨཱརྱ་མཻ་ཏྲི་ཡ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱམས་པས་ཞུས་པ་ཞེས་བྱ་བ་ [116b.4]ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་ [116b.5]སེམས་དཔའ་ཁྲི་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་ [116b.6]བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། [116b.7]གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ [117a] [117a.1]ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་ [117a.2]པས་ངས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ཀྱིས་སྐབས་ཕྱེ་བས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ [117a.3]དུ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཆོས་ཅན་དུ་འགྱུར་ཞིང་མི་ཉམས་ལ་ཡོངས་སུ་མི་ཉམས་ཏེ། ཁྱད་པར་ཐོབ་པར་འགྱུར་བ་དང་། བདུད་ཕྱིར་རྒོལ་བ་བཅོམ་པར་འགྱུར་བ་དང་། བྱང་ཆུབ་སེམས་དཔའི་སྤྱད་པ་ [117a.4]སྤྱོད་པ་ན་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་ཇི་ལྟ་བ་བཞིན་དུ་རྟོགས་ནས་འཁོར་བ་ན་ཡོངས་སུ་མི་སྐྱོ་བ་དང་། ཡོངས་སུ་མི་སྐྱོ་བའི་ཡིད་དང་ལྡན་པར་གྱུར་ནས་ཀྱང་གཞན་གྱི་ཁ་ན་མ་ལས་པའི་ཡེ་ཤེས་ཀྱིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ [117a.5]མངོན་པར་རྫོགས་པར་འཚང་རྒྱ་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་ལེགས་སོ། །བྱམས་པ་ཁྱོད་དེ་བཞིན་གཤེགས་པ་ [117a.6]ལ་དོན་འདི་འདྲི་བར་སེམས་པ་ཁྱོད་ཡང་ལེགས་སོ། །བྱམས་པ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བཅོམ་ [117a.7]ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བརྒྱད་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཆོས་ཅན་དུ་འགྱུར་ [117b] [117b.1]ཞིང་མི་ཉམས་ལ་ཡོངས་སུ་མི་ཉམས་ཏེ། ཁྱད་པར་ཐོབ་པར་འགྱུར། བདུད་ཕྱིར་རྒོལ་བ་བཅོམ་པར་འགྱུར། བྱང་ཆུབ་སེམས་དཔའི་སྤྱད་པ་སྤྱོད་པ་ན་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་ཇི་ལྟ་བ་བཞིན་དུ་རྟོགས་ནས་འཁོར་བ་ན་ཡོངས་སུ་མི་སྐྱོ་བར་འགྱུར། ཡོངས་སུ་ [117b.2]མི་སྐྱོ་བའི་ཡིད་དང་ལྡན་པར་གྱུར་ནས་ཀྱང་གཞན་གྱི་ཁ་ན་མ་ལས་པའི་ཡེ་ཤེས་ཀྱིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བརྒྱད་གང་ཞེ་ན། འདི་ལྟ་སྟེ། བྱམས་པ་འདི་ལ་བྱང་ཆུབ་སེམས་དཔའ་སེམས་ [117b.3]དཔའ་ཆེན་པོ་ནི་བསམ་པ་ཕུན་སུམ་ཚོགས་པ་ཡིན། སྦྱོར་བ་ཕུན་སུམ་ཚོགས་པ་ཡིན། གཏོང་བ་ཕུན་སུམ་ཚོགས་པ་ཡིན། ཡོངས་སུ་བསྔོ་བ་ལ་མཁས་པ་ཡིན། བྱམས་པ་ཕུན་སུམ་ཚོགས་པ་ཡིན། སྙིང་རྗེ་ཕུན་སུམ་ཚོགས་པ་ཡིན། [117b.4]ཐབས་ལ་མཁས་པ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་བྱུང་བ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་ཕུན་སུམ་ཚོགས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ [117b.5]ཆེན་པོ་ནི་སངས་རྒྱས་ཀྱི་བསྔགས་པ་འམ། བསྔགས་པ་མ་ཡིན་པ་ཐོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བསམ་པ་ངེས་པ་ཡིན། ཆོས་ཀྱི་བསྔགས་པ་འམ་བསྔགས་པ་མ་ཡིན་པ་ཐོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ [117b.6]བསམ་པ་ངེས་པ་ཡིན། དགེ་འདུན་གྱི་བསྔགས་པ་འམ་བསྔགས་པ་མ་ཡིན་པ་ཐོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བསམ་པ་ངེས་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་ཕུན་སུམ་ཚོགས་པ་ནི་ [117b.7]ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱོར་བ་ཕུན་སུམ་ཚོགས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྲོག་གཅོད་པ་སྤངས་པ་ཡིན། མ་བྱིན་པར་ལེན་པ་དང་། འདོད་པ་ལ་ལོག་ [118a] [118a.1]པར་གཡེམ་པ་དང་། {བརྫུན་,རྫུན་}དུ་སྨྲ་བ་དང་། ཕྲ་མའི་ཚིག་དང་། ངག་རྩུབ་པོ་དང་། ཚིག་ཀྱལ་བ་སྤངས་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱོར་བ་ཕུན་སུམ་ཚོགས་པ་ཡིན་ནོ། །བྱམས་ [118a.2]པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཏོང་བ་ཕུན་སུམ་ཚོགས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དགེ་སྦྱོང་དང་། བྲམ་ཟེ་རྣམས་དང་། ཕོངས་པ་དང་སློང་བ་རྣམས་ལ་གོས་དང་། ཟས་དང་། མལ་ [118a.3]ཆ་དང་། ན་བའི་གསོས་སྨན་དང་། ཡོ་བྱད་རྣམས་གཏོང་བ་དང་། སྦྱིན་པ་དག་ཏུ་གྱུར་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཏོང་བ་ཕུན་སུམ་ཚོགས་པ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་ [118a.4]དཔའ་ཆེན་པོ་ཡོངས་སུ་བསྔོ་བ་ལ་མཁས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལུས་དང་ངག་དང་། ཡིད་ཀྱིས་དགེ་བའི་རྩ་བ་མངོན་པར་འདུ་བྱེད་པ་གང་ཅི་ཡང་རུང་སྟེ། དེ་ཐམས་ཅད་བླ་ན་མེད་པ་ཡང་དག་པར་རྫོགས་པའི་ [118a.5]བྱང་ཆུབ་ཏུ་ཡོངས་སུ་སྔོ་བར་བྱེད་དེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་བསྔོ་བ་ལ་མཁས་པ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཕུན་སུམ་ཚོགས་པ་ཡིན་ཞེ་ན། བྱམས་ [118a.6]པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱམས་པའི་ལུས་ཀྱི་ལས་དང་ལྡན་པ་ཡིན། བྱམས་པའི་ངག་གི་ལས་དང་ལྡན་པ་ཡིན། བྱམས་པའི་ཡིད་ཀྱི་ལས་དང་ལྡན་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་ [118a.7]པོ་བྱམས་པ་ཕུན་སུམ་ཚོགས་པ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཕུན་སུམ་ཚོགས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གནོད་སེམས་མེད་པའི་ལུས་ཀྱི་ལས་དང་ལྡན་པ་ཡིན། [118b] [118b.1]གནོད་སེམས་མེད་པའི་ངག་གི་ལས་དང་ལྡན་པ་ཡིན། གནོད་སེམས་མེད་པའི་ཡིད་ཀྱི་ལས་དང་ལྡན་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཕུན་སུམ་ཚོགས་པ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་ [118b.2]སེམས་དཔའ་ཆེན་པོ་ཐབས་ལ་མཁས་པ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཀུན་རྫོབ་ཀྱི་དོན་ལ་མཁས་པ་ཡིན། དམ་པའི་དོན་ལ་མཁས་པ་ཡིན། གཉི་གའི་དོན་ལ་མཁས་པ་ཡིན་ཏེ། བྱམས་པ་དེ་ལྟར་ན་བྱང་ཆུབ་ [118b.3]སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ཡིན་ནོ། །བྱམས་པ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བ་ཡིན་ཞེ་ན། བྱམས་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ [118b.4]འདི་ལྟར་ཡང་དག་པར་སློབ་སྟེ། འདི་ཡོད་པའི་ཕྱིར་འདི་འབྱུང་། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་ [118b.5]རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་ [118b.6]པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་མེད་པའི་ཕྱིར་འདི་མི་འབྱུང་། འདི་འགགས་པས་འདི་འགག་སྟེ། འདི་ལྟ་སྟེ། མ་རིག་པ་ [118b.7]འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས། སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་ [119a] [119a.1]བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་ [119a.2]བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འགག་པར་འགྱུར་རོ། །སྙམ་པ་སྟེ། བྱམས་པ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བ་ཡིན་ནོ། །བྱམས་པ་ [119a.3]བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བརྒྱད་པོ་དེ་དག་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ཆོས་ཅན་དུ་འགྱུར་ཞིང་མི་ཉམས་ལ་ཡོངས་སུ་མི་ཉམས་ཏེ། ཁྱད་པར་ཐོབ་པར་འགྱུར། བདུད་ཕྱིར་རྒོལ་བ་བཅོམ་པར་འགྱུར། [119a.4]བྱང་ཆུབ་སེམས་དཔའི་སྤྱད་པ་སྤྱོད་པ་ན་ཆོས་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་ཇི་ལྟ་བ་བཞིན་དུ་རྟོགས་ནས་འཁོར་བ་ན་ཡོངས་སུ་མི་སྐྱོ་བར་འགྱུར། ཡོངས་སུ་མི་སྐྱོ་བའི་ཡིད་དང་ལྡན་ནས་ཀྱང་གཞན་གྱི་ཁ་ན་མ་ལས་པའི་ཡེ་ཤེས་ཀྱིས་མྱུར་དུ་བླ་ན་མེད་པ་ཡང་དག་པར་ [119a.5]རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། [119a.6]ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བྱམས་པས་ཞུས་པ་ [119a.7]ཆོས་བརྒྱད་པ་ཞེས་བྱ་བའི་ལེའུ་སྟེ་བཞི་བཅུ་རྩ་གཉིས་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། [119b] [119b.1]{D87}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་གསུམ་པ་སྟེ། འཕགས་པ་འོད་སྲུང་གིས་ཞུས་པ་ལུང་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཀཱཤྱ་པ་པ་རི་བརྟ་ནཱ་མ་མ་ཧཱ་ཡཱན་སཱུ་ཏྲ། བོད་སྐད་ [119b.2]དུ། འཕགས་པ་འོད་སྲུང་གི་ལེའུ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ནི་བྱ་རྒོད་ཀྱི་ཕུང་པོའི་རི་ལ། དགེ་སློང་བརྒྱད་སྟོང་གི་དགེ་སློང་གི་དགེ་ [119b.3]འདུན་ཆེན་པོ་དང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་སྣ་ཚོགས་ནས། འདུས་པ་ཁྲི་དྲུག་སྟོང་ཐམས་ཅད་ཀྱང་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པ་ཤ་སྟག་དང་ཐབས་ཅིག་ཏུ་བཞུགས་ཏེ། དེའི་ཚེ་ན་ཚེ་དང་ལྡན་པ་འོད་སྲུང་ཆེན་པོ་ [119b.4]འཁོར་དེ་ཉིད་དུ་འདུས་པར་གྱུར་ནས་འདུག་གོ །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་ཤེས་རབ་ཡོངས་སུ་ཉམས་པར་འགྱུར་བ་སྟེ། བཞི་གང་ཞེ་ན། འདི་ལྟ་སྟེ། ཆོས་དང་ཆོས་སྨྲ་ [119b.5]བ་ལ་མི་གུས་པ་ཡིན། ཆོས་ལ་སེར་སྣ་བྱེད་ཅིང་ཆོས་ལ་སློབ་དཔོན་གྱི་དཔེ་མཁྱུད་བྱེད་པ་ཡིན། ཆོས་འདོད་པའི་གང་ཟག་རྣམས་ལ་ཆོས་ཀྱི་བར་ཆད་བྱེད་ཅིང་འདུན་པ་ཟློག་པར་བྱེད། རྣམ་པར་འཁྲུག་པར་བྱེད་དེ། མི་སྟོན་ཅིང་རབ་ཏུ་འཆབ་པ་ཡིན། མངོན་པའི་ང་རྒྱལ་གྱིས་བདག་ [119b.6]ལ་བསྟོད་ཅིང་གཞན་ལ་སྨོད་པ་ཡིན་ཏེ། འོད་སྲུང་ཆོས་བཞི་པོ་དེ་དག་ནི་བྱང་ཆུབ་སེམས་དཔའི་ཤེས་རབ་ཡོངས་སུ་ཉམས་པར་འགྱུར་བའོ། །དེ་ལ་འདི་སྐད་ཅེས་བྱ་སྟེ། ཆོས་སྨྲ་བ་ལ་གུས་པ་མེད་པ་ཡིན། །ཆོས་ལ་སེར་སྣ་བྱེད་པར་གྱུར་པ་དང་། །ཆོས་ལ་སློབ་དཔོན་དཔེ་མཁྱུད་ [119b.7]བྱེད་པ་ཡིན། །ཆོས་འདོད་རྣམས་ལ་བགེགས་ནི་བྱེད་གྱུར་ཅིང་། །འདུན་པ་ཟློག་ལ་དེ་བཞིན་རྣམ་འཁྲུག་བྱེད། །རྒྱལ་བས་བསྔགས་པའི་ཆོས་ནི་ཡོང་མི་སྟོན། །ལེ་ལོ་ཅན་དེ་བདག་བསྟོད་རྟག་ཏུ་བརྩོན། །གཞན་ལ་སྨོད་པར་བྱེད་ལ་མངོན་པར་དགའ། །ཆོས་བཞི་འདི་དག་རྒྱལ་ [120a] [120a.1]བའི་སྲས་རྣམས་ཀྱི། །ཤེས་རབ་ཉམས་པར་འགྱུར་བར་རྒྱལ་བས་གསུངས། །ཆོས་བཞི་འདི་དག་རབ་ཏུ་སྤང་བྱས་ལ། །རྒྱལ་བས་གསུངས་པའི་ཆོས་བཞི་གཞན་བསྒོམ་མོ། །འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་ཤེས་རབ་ཆེན་ [120a.2]པོར་འགྱུར་བ་སྟེ། བཞི་གང་ཞེ་ན། འདི་ལྟ་སྟེ། ཆོས་དང་ཆོས་སྨྲ་བ་ལ་གུས་པ་དང་བཅས་པ་ཡིན། ཟང་ཟིང་མེད་པའི་སེམས་ཀྱིས་རྙེད་པ་དང་བཀུར་སྟི་དང་། ཚིགས་སུ་བཅད་པ་ལ་མི་རེ་བར་ཇི་ལྟར་ཐོས་པ་དང་། ཇི་ལྟར་ཁོང་དུ་ཆུད་པའི་ཆོས་རྣམས་གཞན་དག་ལ་རྒྱ་ཆེར་ཡང་དག་ [120a.3]པར་རབ་ཏུ་སྟོན་པར་བྱེད་པ་ཡིན། མང་དུ་ཐོས་པ་ལས་ཤེས་རབ་འབྱུང་བར་རིག་ནས་མགོའམ་གོས་ལ་མེ་འབར་བ་བཞིན་དུ་ཐོས་པ་ཡོངས་སུ་ཚོལ་ཞིང་ཇི་ལྟར་ཐོས་པའི་ཆོས་རྣམས་འཛིན་པར་བྱེད་པ་ཡིན། ནན་ཏན་སྙིང་པོར་བྱེད་ཀྱི་སྨྲ་བ་དང་བརྗོད་པའི་ཚིག་ལྷུར་ལེན་པ་མ་ཡིན་པ་སྟེ། འོད་ [120a.4]སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་ཤེས་རབ་ཆེན་པོར་འགྱུར་བའོ། །དེ་ལ་འདི་སྐད་ཅེས་བྱ་སྟེ། ཆོས་སྨྲ་བ་ལ་གུས་དང་བཅས་པ་ཡིན། །ཟང་ཟིང་མེད་ཅིང་རྙེད་དང་བཀུར་སྟི་ལ། །རེ་བ་མེད་ཅིང་ཚིགས་བཅད་མི་སེམས་པར། །ཇི་ལྟར་ཐོས་པའི་ཆོས་རྣམས་ [120a.5]གཞན་ལ་སྟོན། །ཐོས་ལས་ཤེས་རབ་འབྱུང་བར་དེས་རིག་ནས། །མགོ་ལ་འབར་བཞིན་རྟག་ཏུ་ཐོས་པ་ཚོལ། །དེ་ནི་ཇི་ལྟར་ཐོས་པའི་ཆོས་རྣམས་འཛིན། །ཆོས་བཟུང་ནས་ནི་ནན་ཏན་བྱ་ཕྱིར་གནས། །མཁས་དེ་ནན་ཏན་སྙིང་པོར་བྱེད་པ་ཡིན། །ཚིག་ལྷུར་མི་ལེན་སྨྲ་བ་ [120a.6]ལྷུར་མི་ལེན། །མཁས་པས་ཆོས་བཞི་འདི་དག་བསྟེན་བྱས་ན། །རྒྱལ་བས་བསྔགས་པའི་ཤེས་རབ་ཐོབ་པར་འགྱུར། །འོད་སྲུང་བྱང་ཆུབ་སེམས་དཔའ་ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སློབ་དཔོན་དང་། བླ་མ་ [120a.7]དང་། སྦྱིན་གནས་ལ་སླུ་བ་དང་། གཞན་འགྱོད་པ་མེད་པ་དག་ལ་འགྱོད་པ་ཉེ་བར་སྒྲུབ་པ་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་རྣམས་ལ་བསྔགས་པ་མ་ཡིན་པ་དང་། མི་སྙན་པ་དང་། བརྗོད་པ་མ་ཡིན་པའི་སྒྲ་ཚིགས་སུ་བཅད་པ་འབྱིན་པ་དང་ [120b] [120b.1]སྒྱུ་དང་གཡོས་གཞན་ལ་ཉེ་བར་སྤྱོད་ཀྱི་ལྷག་པའི་བསམ་པས་མ་ཡིན་པ་སྟེ། འོད་སྲུང་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། སྦྱིན་གནས་བླ་མས་བསྒོ་བཞིན་མི་བྱེད་དང་། །གཞན་དག་ལ་ཡང་ [120b.2]ཐེ་ཚོམ་ཉེར་སྒྲུབ་དང་། །སེམས་ཅན་གང་དག་བྱང་ཆུབ་རབ་ཞུགས་པ། །དེ་ལ་བསྔགས་མིན་མི་སྙན་སྨྲ་བ་དང་། །སྒྱུ་དང་གཡོ་དང་རྒྱན་ལ་དོར་བྱེད་པས། །གཞན་ལ་སྟེན་གྱི་བསམ་པས་མ་ཡིན་པ། །ཆོས་བཞི་འདི་དག་ཀུན་ཏུ་བསྟེན་བྱས་ན། །སངས་རྒྱས་བྱང་ [120b.3]ཆུབ་སེམས་མཆོག་ཉམས་པར་འགྱུར། །དེ་ལྟ་བས་ན་ཆོས་འདི་སྟེན་བྱེད་ན། །བྱང་ཆུབ་མཆོག་ལས་དེ་ནི་རིང་བར་འགྱུར། །དེ་ལས་བཟློག་པ་སྟེན་པར་བྱེད་ན་ནི། །བྱང་ཆུབ་མཆོག་རབ་བསྔགས་པ་རེག་པར་འགྱུར། །འོད་སྲུང་བྱང་ཆུབ་སེམས་དཔའ་ཆོས་བཞི་དང་ [120b.4]ལྡན་ན་སྐྱེ་བ་ཐམས་ཅད་དུ་སྐྱེས་མ་ཐག་ཏུ་བྱང་ཆུབ་ཀྱི་སེམས་མངོན་དུ་འགྱུར་ཏེ། བྱང་ཆུབ་ཀྱི་སྙིང་པོ་ལ་འདུག་གི་བར་དུ་བར་མ་དོར་བརྗེད་པར་མི་འགྱུར་རོ། །བཞི་གང་ཞེ་ན། འདི་ལྟ་སྟེ་སྲོག་གི་ཕྱིར་རམ། ཐ་ན་བཞད་གད་ཀྱི་ཕྱིར་ཡང་{བརྫུན་,རྫུན་}གྱི་ཚིག་མི་སྨྲ་བ་དང་། སྒྱུ་དང་ [120b.5]གཡོ་མེད་པར་སེམས་ཅན་ཐམས་ཅད་ཀྱི་དྲུང་ན་ལྷག་པའི་བསམ་པས་གནས་པ་དང་། བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་སྐྱེད་ཅིང་དེ་དག་གི་ཡང་དག་པའི་བསྔགས་པ་ཕྱོགས་བཞིར་རྗོད་པ་དང་། ཉི་ཚེ་བའི་ཐེག་པ་མི་འདོད་པའི་ཕྱིར་སེམས་ཅན་གང་རྣམས་ [120b.6]ཡོངས་སུ་སྨིན་པར་བྱེད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་པ་སྟེ། འོད་སྲུང་ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་སྐྱེ་བ་ཐམས་ཅད་དུ་སྐྱེས་མ་ཐག་ཏུ་བྱང་ཆུབ་ཀྱི་སེམས་མངོན་དུ་འགྱུར་ཏེ། བྱང་ [120b.7]ཆུབ་ཀྱི་སྙིང་པོ་ལ་འདུག་གི་བར་དུ་བར་མ་དོར་བརྗེད་པར་མི་འགྱུར་རོ། །དེ་ལ་འདི་སྐད་ཅེས་བྱ་སྟེ། སྲོག་གི་ཕྱིར་ཡང་{བརྫུན་,རྫུན་}ཚིག་མི་སྨྲ་ཞིང་། །རྟག་ཏུ་དོན་དང་ལྡན་པའི་ཚིག་རྣམས་སྨྲ། །སྒྱུ་དང་གཡོ་ནི་རྟག་ཏུ་རྣམ་སྤངས་ཏེ། །ལྷག་པའི་བསམ་པས་རྟག་ཏུ་སེམས་ཅན་ལྟ། ། [121a] [121a.1]སེམས་ཅན་དག་པ་བྱང་ཆུབ་གང་ཞུགས་པ། །བྱང་ཆུབ་སེམས་དཔའ་དེ་ལ་སྟོན་པར་སེམས། །སྟོན་པའི་འདུ་ཤེས་ཉེ་བར་བཞག་ནས་ཀྱང་། །དེ་དག་བསྔགས་པ་ཕྱོགས་བཞིར་རྗོད་པར་བྱེད། །སེམས་ཅན་གང་དག་ཡོངས་སུ་སྨིན་བྱེད་པ། །བླ་མེད་ཡེ་ཤེས་ [121a.2]ཡང་དག་འཛིན་དུ་འཇུག །ཆོས་དེ་དག་ལ་རབ་ཏུ་གནས་པ་རྣམས། །བྱང་ཆུབ་སེམས་ནི་ནམས་ཀྱང་བརྗེད་མི་འགྱུར། །འོད་སྲུང་བྱང་ཆུབ་སེམས་དཔའ་ཆོས་བཞི་དང་ལྡན་པའི་དགེ་བའི་ཆོས་སྐྱེས་ཤིང་བྱུང་བ་རྣམས་ཡོངས་སུ་ཟད་པར་འགྱུར་ཏེ། དགེ་བའི་ཆོས་དེ་དག་གིས་ [121a.3]རྒྱས་པར་མི་འགྱུར་རོ། །བཞི་གང་ཞེ་ན། འདི་ལྟ་སྟེ། མངོན་པའི་ང་རྒྱལ་གྱིས་འཇིག་རྟེན་རྒྱང་པན་པའི་གསང་ཚིག་ཚོལ་བ་དང་། རྙེད་པ་དང་བཀུར་སྟི་ལ་ལྷག་པར་ཞེན་པས་ཁྱིམ་ལ་ལྟ་བ་དང་། བྱང་ཆུབ་སེམས་དཔའ་ལ་རྣམ་པར་སྡང་ཞིང་སྐུར་པ་འདེབས་པ་དང་། མ་ཐོས་པ་དང་། [121a.4]མ་ཟིན་པའི་མདོ་སྡེ་རྣམས་སྤོང་བ་སྟེ། འོད་སྲུང་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་པའི་དགེ་བའི་ཆོས་སྐྱེས་ཤིང་བྱུང་བ་རྣམས་ཡོངས་སུ་ཟད་པར་འགྱུར་ཏེ། དགེ་བའི་ཆོས་དེ་དག་གི་རྒྱས་པར་མི་འགྱུར་རོ། །དེ་ལ་འདི་སྐད་ཅེས་བྱ་སྟེ། ང་རྒྱལ་གྱིས་ནི་འཇིག་རྟེན་ [121a.5]རྒྱང་པན་ཚོལ། །རྙེད་ཀྱི་ཕྱིར་ན་ཁྱིམ་ལ་སྦྱོར་བར་བྱེད། །བྱང་ཆུབ་སེམས་དཔའ་སངས་རྒྱས་སྲས་ལ་སྡང་། །དེ་དག་བསྔགས་མིན་ཀུན་ཏུ་སྨྲ་བར་བྱེད། །དེ་ནི་མ་ཐོས་པ་དང་མ་ཟིན་མདོ། །བདེ་བར་གཤེགས་པས་གསུངས་པ་སྤོང་བར་བྱེད། །ཆོས་འདི་དག་དང་ལྡན་པར་གྱུར་ [121a.6]པ་ནི། །དགེ་བའི་ཆོས་ཀྱིས་རྒྱས་པར་མི་འགྱུར་རོ། །དེ་ལྟས་བྱང་ཆུབ་སེམས་དཔའ་མཁས་པ་ཡིས། །ཆོས་བཞི་འདི་དག་རྒྱང་སྲིང་རྣམ་པར་སྤོང་། །འདི་དག་བསྟེན་ན་བྱང་ཆུབ་རབ་རིང་སྟེ། །གནམ་ས་རིང་བས་ཤིན་ཏུ་རིང་བར་འགྱུར། །འོད་སྲུང་བྱང་ཆུབ་སེམས་དཔའ་ [121a.7]ཆོས་བཞི་དང་ལྡན་ན་ཁྱད་པར་དུ་འགྲོ་བས་ཡོངས་སུ་མི་ཉམས་པའི་ཆོས་ཅན་དུ་འགྱུར་ཏེ། བཞི་གང་ཞེ་ན་འདི་ལྟ་སྟེ། འདི་ལྟར་ཕ་རོལ་ཏུ་ཕྱིན་པ་དྲུག་དང་ལྡན་པ་བྱང་ཆུབ་སེམས་དཔའི་སྡེ་སྣོད་ཚོལ་བ་ལ་བརྩམས་ནས་ལེགས་པར་ཐོས་པ་ཚོལ་གྱི་ཉེས་པ་མི་ཚོལ་ཏེ། སེམས་ཅན་ཐམས་ [121b] [121b.1]ཅད་ལ་ང་རྒྱལ་མེད་པའི་ཕྱིར་སེམས་ཁྱི་དང་འདྲ་བ་ཡིན། ཆོས་ཀྱི་རྙེད་པས་ཆོག་པར་འཛིན་ཏེ། ལོག་པས་འཚོ་བ་ཐམས་ཅད་ཡོངས་སུ་སྤངས་ཤིང་འཕགས་པའི་རིགས་ཀྱིས་ཆོག་པར་འཛིན་པ་ཡིན། གཞན་དག་གི་ལྟུང་བ་བྱུང་བ་དང་མ་བྱུང་བ་མི་གླེང་ཞིང་གཞན་དག་གི་ [121b.2]འཁྲུལ་པ་གཞན་དང་གཞན་མི་ཚོལ་བ་ཡིན། སངས་རྒྱས་ཀྱི་ཆོས་ཟབ་མོ་གང་དག་དེའི་བློས་མི་རྟོགས་པ་དེ་ལ་སངས་རྒྱས་ཀྱི་བྱང་ཆུབ་ནི་མཐའ་ཡས་ཤིང་སེམས་ཅན་མོས་པ་ཐ་དད་པ་རྣམས་ལ་དེ་བཞིན་གཤེགས་པ་རྣམས་ཀྱི་ཆོས་བསྟན་པ་འཇུག་སྟེ། དེ་བཞིན་གཤེགས་ [121b.3]པ་ཉིད་ཀྱིས་མཁྱེན་ཀྱི་བདག་གིས་ནི་མི་ཤེས་ཏེ། དེ་བཞིན་གཤེགས་པས་མངོན་སུམ་མོ་ཞེས་བྱས་ནས་མི་སྤོང་བ་སྟེ། འོད་སྲུང་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཁྱད་པར་དུ་འགྲོ་བས་ཡོངས་སུ་མི་ཉམས་པའི་ཆོས་ཅན་དུ་འགྱུར་རོ། །དེ་ལ་འདི་སྐད་ཅེས་བྱ་སྟེ། [121b.4]དེ་ནི་རྟག་ཏུ་ཕ་རོལ་ཕྱིན་རྣམས་དང་། །ཐབས་ལ་མཁས་དང་བྱང་ཆུབ་སྡེ་སྣོད་བརྩོན། །ང་རྒྱལ་མེད་པས་ཁྱི་འདྲའི་སེམས་ཀྱིས་སུ། །སེམས་ཅན་ཀུན་ལ་ང་རྒྱལ་བཅག་པ་ཡིན། །ཆོས་དང་འཐུན་པའི་རྙེད་པས་ཆོག་སེམས་ཤིང་། །འཚོ་བ་ཡོངས་དག་འཕགས་པའི་ [121b.5]རིགས་ལ་གནས། །གཞན་གྱི་འཁྲུལ་པ་ཚོལ་བར་མི་བྱེད་ཅིང་། །གཞན་གྱི་ལྟུང་བ་གླེང་བར་མི་བྱེད་དོ། །གང་ལ་དེ་ཡི་བློས་ནི་མི་རྟོགས་པ། །དེ་ལ་དེ་བཞིན་གཤེགས་པ་མངོན་སུམ་སྟེ། །བདེ་གཤེགས་བཤད་པའི་བྱང་ཆུབ་མཐའ་ཡས་པས། །རྒྱལ་བས་མཁྱེན་གྱི་བདག་གིས་ [121b.6]མི་ཤེས་སོ། །ཆོས་བཞི་འདི་དག་རིག་པར་གྱུར་པ་ནི། །ཡེ་ཤེས་ཁྱད་པར་འཕགས་མཆོག་ཉམས་མི་འགྱུར། །ཆོས་འདི་དག་ལ་རབ་ཏུ་གནས་པ་ནི། །རྒྱལ་བས་བསྔགས་པའི་བྱང་ཆུབ་རྙེད་མི་དཀའ། །འོད་སྲུང་ཆོས་བཞི་པོ་འདི་དག་ནི་གྱ་གྱུ་ཅན་གྱི་སེམས་བསྐྱེད་པ་སྟེ། [121b.7]དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་རྣམས་ལ་སོམ་ཉི་དང་ཡིད་གཉིས་དང་ཐེ་ཚོམ་ཟ་བ་དང་། སེམས་ཅན་རྣམས་ལ་ང་རྒྱལ་དང་། རྒྱགས་པ་དང་། འཆབ་པ་དང་། ཁྲོ་བ་དང་། གནོད་པར་ [122a] [122a.1]སེམས་པ་དང་། གཞན་གྱི་རྙེད་པ་རྣམས་ལ་ཕྲག་དོག་དང་སེར་སྣ་བྱེད་པ་དང་། བྱང་ཆུབ་སེམས་དཔའ་རྣམས་ལ་བསྔགས་པ་མ་ཡིན་པ་དང་། མི་སྙན་པ་དང་། བརྗོད་པ་མ་ཡིན་པའི་སྒྲས་ཚིགས་སུ་བཅད་པ་འབྱིན་པ་སྟེ། འོད་སྲུང་བཞི་པོ་དེ་དག་ནི་གྱ་གྱུ་ཅན་ [122a.2]གྱི་སེམས་བསྐྱེད་པ་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །དེ་ལ་འདི་སྐད་ཅེས་བྱ་སྟེ། ཆོས་རྣམས་ལ་ནི་སོམ་ཉི་ཡིད་གཉིས་བྱེད། །སེམས་ཅན་རྣམས་ལ་ང་རྒྱལ་རྒྱགས་ཁྲོ་སྟེན། །གཞན་གྱི་རྙེད་ལ་སེར་སྣ་ཕྲག་དོག་བྱེད། །རྒྱལ་བ་ལ་ནི་ནམས་ཀྱང་ [122a.3]དད་མི་བྱེད། །མི་མཁས་རྟག་ཏུ་བྱང་ཆུབ་སེམས་དཔའ་ལ། །བསྔགས་པ་མིན་དང་བརྗོད་མིན་མི་སྙན་བརྗོད། །གྱ་གྱུ་ཅན་གྱི་སེམས་བཞི་རྣམ་པར་སྤང་། །བྱང་ཆུབ་སེམས་དཔས་རྟག་ཏུ་སེམས་ཅན་བསྟེན། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་དྲང་པོའི་དྲང་བའི་ [122a.4]མཚན་ཉིད་ཡིན་ཏེ་བཞི་གང་ཞེ་ན། འདི་ལྟ་སྟེ། ལྟུང་བ་བྱུང་བ་རྣམས་མི་འཆབ་ཅིང་རྗོད་དེ་རྣམ་པར་འབྱེད་པ་དང་། འཆགས་པས་ཀུན་ནས་ལྡང་བ་མེད་པ་ཡིན། དེའི་བདེན་པའི་ཚིག་གང་གིས་རྒྱལ་སྲིད་སྟོར་བ་འམ། ནོར་ཡལ་བ་འམ། སྲོག་གི་བར་ཆད་དུ་འགྱུར་ཡང་བདེན་པའི་ཚིག་ [122a.5]མི་མཁྱུད་ཅིང་གཞན་ནས་གཞན་དུ་སྒྱུར་བའི་ཚིག་མི་སྨྲ་བ་ཡིན། གཞན་གྱིས་གནོད་པར་བྱ་བ་སྐུར་པ་དང་། མཚང་འདྲུ་བ་དང་། སྨོད་པ་དང་། བཤུང་བ་དང་། སྡིགས་པ་དང་། རྡེག་པ་དང་། གསོད་པ་དང་། འཆིང་བར་བྱེད་པའི་ཉེས་པ་ཐམས་ཅད་ལ་བདག་གིས་ཉེས་པར་ [122a.6]སེམས་ཤིང་ལས་ཀྱི་རྣམ་པར་སྨིན་པ་ལ་རྟོན་པས་གཞན་དག་ལ་མི་འཁྲུག་ཅིང་འཁོན་དུ་འཛིན་པ་མེད་པ་ཡིན། དེ་དད་པ་ལ་རབ་ཏུ་གནས་པ་ཡིན་ཏེ། བསམ་པ་ཡོངས་སུ་དག་པའི་ཕྱིར་ཐམས་ཅད་དད་པར་མི་འགྱུར་བའི་སངས་རྒྱས་ཀྱི་ཆོས་ལ་མངོན་པར་དད་པ་སྟེ། འོད་སྲུང་བཞི་ [122a.7]པོ་དེ་དག་ནི་བྱང་ཆུབ་སེམས་དཔའ་དྲང་པོའི་དྲང་བའི་མཚན་ཉིད་ཡིན་ནོ། །དེ་ལ་འདི་སྐད་ཅེས་བྱ་སྟེ། ལྟུང་བ་བྱུང་བ་འཆབ་པར་མི་བྱེད་ཀྱི། །རྗོད་ཅིང་རྣམ་པར་འབྱེད་དེ་ཉེས་པར་འདོད། །ནོར་དང་རྒྱལ་སྲིད་ཕྱིར་དང་སྲོག་ཕྱིར་ཡང་། །འདུ་ཤེས་བསྒྱུར་ཏེ་{བརྫུན་,རྫུན་}པའི་ཚིག་མི་སྨྲ། ། [122b] [122b.1]སྐུར་དང་སྨོད་དང་བཤུང་དང་གསོད་པ་དང་། །འཆིང་བར་བྱེད་དང་གོ་རར་བཅུག་པ་ལ། །བདག་གིས་ཉེས་སེམས་གཞན་ལ་འཁྲུག་མི་བྱེད། །ལས་ནི་བདག་གིར་བྱ་བས་འཁོན་མི་འཛིན། །དེ་ནི་བདེ་གཤེགས་རྣམས་ཀྱི་བྱང་ཆུབ་དང་། །དད་ལ་གནས་ཤིང་བསམ་པ་དག་ [122b.2]ལྡན་པ། །འདི་དག་དྲང་བའི་མཚན་དུ་སངས་རྒྱས་གསུངས། །སེམས་ཅན་མཆོག་གིས་རྟག་ཏུ་བསྟེན་པར་བྱ། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་དམུ་རྒོད་དེ། བཞི་གང་ཞེ་ན། འདི་ལྟ་སྟེ། ཐོས་པ་ལ་གཅེས་པ་འདོར་བའི་ཆོས་སུ་གནས་ཤིང་ཆོས་ཀྱི་རྗེས་སུ་འཐུན་ [122b.3]པའི་ཆོས་སྒྲུབ་པ་ལ་ནན་ཏན་དུ་མི་བྱེད་པ་ཡིན། རྗེས་སུ་བསྟན་པ་ལ་གཅེས་པ་འདོར་བའི་ཆོས་སུ་གནས་ཤིང་སློབ་དཔོན་དང་མཁན་པོ་ལ་སྲི་ཞུ་མི་བྱེད་པ་ཡིན། དམ་བཅས་པ་ལས་ཉམས་ཀྱང་དད་པས་བྱིན་པ་ལ་ཀུན་དུ་སྤྱོད་དེ། དད་པས་བྱིན་པ་ལོག་པར་ལྟུང་བར་བྱེད་པ་ཡིན། [122b.4]བྱང་ཆུབ་སེམས་དཔའ་དུལ་བ་ཅང་ཤེས་རྣམས་མཐོང་ན་མི་གུས་ཤིང་ང་རྒྱལ་འཛིན་པ་ཡིན་ཏེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའ་དམུ་རྒོད་དོ། །དེ་ལ་འདི་སྐད་ཅེས་བྱ་སྟེ། ཐོས་པས་རྒོད་པར་གནས་པར་བྱེད་པ་ཡིན། །རྗེས་སུ་བསྟན་པའི་ཆོས་ཉིད་རྟོགས་མི་འགྱུར། ། [122b.5]དེ་ནི་ཆོས་ཀུན་གཅེས་པ་འདོར་བ་སྟེན། །འཕགས་པ་རྣམས་ལ་ནམ་ཡང་སྲི་ཞུ་མེད། །དམ་བཅས་ཉམས་ཀྱང་དད་པས་བྱིན་པ་ཡི། །ཁ་ཟས་རྣམས་ལ་དེ་ནི་རྟག་ཏུ་ཟ། །བྱང་ཆུབ་སེམས་དཔའ་ཅང་ཤེས་ཐོབ་པ་དག །མཐོང་བར་གྱུར་ན་གུས་པར་མི་བྱེད་ཅིང་། །དམུ་རྒོད་ [122b.6]དེ་ནི་ང་རྒྱལ་འཕེལ་བར་བྱེད། །བྱང་ཆུབ་སེམས་དཔའ་ང་རྒྱལ་བཅག་མི་སྟེན། །འདི་དག་དམུ་རྒོད་བདེ་བར་གཤེགས་པས་གསུངས། །དེ་དག་རྒྱལ་སྲས་རྣམས་ཀྱིས་ཡོངས་སུ་སྤང་། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་ཅང་ཤེས་པ་སྟེ། བཞི་གང་ཞེ་ན། [122b.7]འདི་ལྟ་སྟེ། ལེགས་པར་ཐོས་པ་ཉན་ཅིང་དེ་ལ་ནན་ཏན་དུ་བྱེད་དེ་དོན་ལ་རྟོན་ཀྱི། ཚིག་འབྲུ་ལ་མི་རྟོན་པ་ཡིན། གདམས་ངག་དང་རྗེས་སུ་བསྟན་པ་ལ་འཐུན་པར་འཛིན་ཅིང་བཀའ་བློ་བདེ་ལ་ལེགས་པར་བྱེད་པའི་ལས་བྱེད་ཅིང་བླ་མ་ལ་སྲི་ཞུ་བྱ་བ་ཚར་ཕྱིན་པ་ཡིན། ཚུལ་ཁྲིམས་དང་ཏིང་ [123a] [123a.1]ངེ་འཛིན་ལས་མ་ཉམས་ཏེ་ཅང་ཤེས་པས་ཟས་ཟ་བ་ཡིན། བྱང་ཆུབ་སེམས་དཔའ་དུལ་བ་ཅང་ཤེས་རྣམས་མཐོང་ན་གུས་པ་དང་བཅས་ཤིང་རྗེ་ས་དང་བཅས་པར་དེ་ལ་གཞོལ། དེ་ལ་འབབ། དེ་ལ་བབ་ཅིང་དེའི་ཡོན་ཏན་འདོད་པ་ཡིན་ཏེ། འོད་སྲུང་བཞི་པོ་དེ་ [123a.2]དག་ནི་བྱང་ཆུབ་སེམས་དཔའ་ཅང་ཤེས་སོ། །དེ་ལ་འདི་སྐད་ཅེས་བྱ་སྟེ། གང་མཉན་དེ་ནི་ལེགས་པར་ཐོས་པར་བྱེད། །ཆོས་དོན་སྙིང་པོར་བྱེད་ཅིང་ནན་ཏན་གནས། །རྗེས་སུ་བསྟན་པ་འཐུན་པར་འཛིན་བྱེད་ཅིང་། །ཆོས་འདོད་བཀའ་བློ་བདེ་བར་བླ་མ་སྟེན། །ཚུལ་ [123a.3]ཁྲིམས་ཏིང་ངེ་འཛིན་ལ་རྟག་གནས་ཤིང་། །ཚུལ་ཁྲིམས་བསྡམས་ནས་དེ་ནི་བཟའ་བ་ཟ། །གུས་དང་བཅས་ཤིང་རྗེ་སར་བཅས་པ་ཡིན། །དེ་ལ་གཞོལ་ཞིང་དེར་འབབ་ཡོན་ཏན་འདོད། །རྒྱལ་སྲས་གང་དག་ཅང་ཤེས་ཐོབ་གྱུར་པ། །དེ་དག་ལ་ནི་རྟག་ཏུ་དགའ་བས་ལྟ། ། [123a.4]བདེ་བར་གཤེགས་པས་བསྟན་པ་འདི་བཞི་ནི། །བདེ་གཤེགས་སྲས་པོ་ཅང་ཤེས་ཐོབ་པ་ཡིན། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་འཁྲུལ་པ་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྨིན་པར་མ་བྱས་པ་རྣམས་ལ་ཡིད་རྟོན་པ་བྱང་ཆུབ་ [123a.5]སེམས་དཔའི་འཁྲུལ་པ་དང་། སེམས་ཅན་སྣོད་དུ་མ་གྱུར་པ་རྣམས་ལ་སངས་རྒྱས་ཀྱི་ཆོས་རྒྱ་ཆེན་པོ་སྟོན་པ་བྱང་ཆུབ་སེམས་དཔའི་འཁྲུལ་པ་དང་། རྒྱུ་ཆེན་པོ་ལ་མོས་པའི་སེམས་ཅན་རྣམས་ལ་ཐེག་པ་དམན་པ་སྟོན་པ། བྱང་ཆུབ་སེམས་དཔའི་འཁྲུལ་པ་དང་། སེམས་ [123a.6]ཅན་ཡང་དག་པ་ལ་རབ་ཏུ་གནས་པ་ཚུལ་ཁྲིམས་དང་ལྡན་པ་དགེ་བའི་ཆོས་ཅན་རྣམས་ལ་བརྙས་ཤིང་ཚུལ་ཁྲིམས་འཆལ་པ་སྡིག་པའི་ཆོས་ཅན་ཀུན་དུ་སྡུད་པ་བྱང་ཆུབ་སེམས་དཔའི་འཁྲུལ་པ་སྟེ། འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་འཁྲུལ་པའོ། །དེ་ལ་འདི་ [123a.7]སྐད་ཅེས་བྱ་སྟེ། ཡོངས་སྨིན་མ་བྱས་རྣམས་ལ་ཡིད་མི་བརྟན། །སྣོད་མིན་རྣམས་ལ་རྒྱ་ཆེན་ཆོས་མི་བཤད། །རྒྱ་ཆེན་སེམས་ཅན་རྣམས་ལ་ཐེག་པ་དམན། །བྱང་ཆུབ་སེམས་དཔའ་མཆོག་གིས་བཤད་མི་བྱ། །ཡང་དག་གནས་ཤིང་ཚུལ་ཁྲིམས་ཡོན་ཏན་ལྡན། ། [123b] [123b.1]དགེ་བའི་ཆོས་ཅན་རྣམས་ལ་བརྙས་མི་བྱ། །ཚུལ་ཁྲིམས་འཆལ་པའི་སེམས་ཅན་ཡོངས་མི་བསྡུ། །སྡིག་པའི་ཆོས་རྣམས་ཡོངས་སུ་སྤང་བར་བྱ། །འཁྲུལ་བའི་ཆོས་བཞི་འདི་དག་ཤེས་གྱུར་ནས། །བྱང་ཆུབ་སེམས་དཔས་རྒྱང་བསྲིང་རྣམ་པར་སྤོང་། །འདི་དག་བསྟན་ན་ [123b.2]བྱང་ཆུབ་འཚང་མི་རྒྱ། །དེ་ལྟ་བས་ན་མཁས་པས་ཆོས་འདི་སྤོང་། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་ལམ་སྟེ། བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་སེམས་མཉམ་པ་དང་། སེམས་ཅན་ཐམས་ཅད་ལ་མཚུངས་པར་ཆོས་སྟོན་པ་དང་ [123b.3]སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཡང་དག་པར་འཛིན་དུ་འཇུག་པ་དང་། སེམས་ཅན་ཐམས་ཅད་ལ་ཡང་དག་པར་སྦྱོར་བ་སྟེ། འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་ལམ་མོ། །དེ་ལ་འདི་སྐད་ཅེས་བྱ་སྟེ། སེམས་ཅན་རྣམས་ལ་རྟག་ཏུ་སེམས་སྙོམས་ [123b.4]བྱ། །སངས་རྒྱས་ཐེག་མཆོག་ཡང་དག་འཛིན་དུ་འཇུག །རྒྱལ་བས་བསྔགས་པའི་ཆོས་ནི་བསྟན་པར་བྱ། །སེམས་ཅན་ཀུན་ལ་དང་བའི་སེམས་སུ་བྱ། །ཡང་དག་སྦྱོར་ཞིང་ནན་ཏན་བྱེད་པར་གནས། །སེམས་ཅན་ཀུན་ལ་མཚུངས་པར་སྤྱད་པར་བྱ། །ཆོས་བཞི་འདི་ [123b.5]དག་རྒྱལ་བས་རབ་བསྔགས་ཏེ། །རྒྱལ་སྲས་རྣམས་ཀྱིས་དེ་དག་རྟག་ཏུ་བསྟེན། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་བཤེས་གཉེན་ངན་པ་གྲོགས་པོ་ངན་པ་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །བཞི་གང་ཞེ་ན། འདི་ལྟ་སྟེ། ཉན་ [123b.6]ཐོས་ཀྱི་ཐེག་པ་པ་དག་ལ་ཕན་པའི་ཕྱིར་ཞུགས་པ་དང་། རང་སངས་རྒྱས་ཀྱི་ཐེག་པ་པ་དོན་ཉུང་ཞིང་བྱ་བ་ཉུང་བ་དང་། འཇིག་རྟེན་རྒྱང་པན་པ་གསང་ཚིག་སྣ་ཚོགས་ཀྱི་སྤོབས་པ་ཅན་དང་། གང་ལ་བརྟེན་པས་འཇིག་རྟེན་གྱི་ཟང་ཟིང་ཀུན་སྡུད་པར་འགྱུར་གྱི། ཆོས་ཀུན་མི་སྡུད་པ་སྟེ། [123b.7]འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའི་བཤེས་གཉེན་ངན་པ་གྲོགས་པོ་ངན་པ་སྟེ། དེ་དག་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །དེ་ལ་འདི་སྐད་ཅེས་བྱ་སྟེ། ཉན་ཐོས་གང་དག་བདག་ཕན་བརྩོན་པ་དང་། །གང་དག་རབ་ཏུ་བྱུང་ནས་རྣལ་འབྱོར་སྤྱོད། ། [124a] [124a.1]རང་སངས་རྒྱས་པ་གང་དག་བྱེད་ཉུང་ཞིང་། །བདག་གི་དོན་དུ་འདུ་འཛི་རྣམ་པར་སྤོང་། །བྱིས་པ་གང་དག་འཇིག་རྟེན་རྒྱང་པན་ཀློག །ཇི་ལྟར་བསྟན་བཞིན་གང་དག་འདིར་རྩོད་བྱེད། །གང་ལ་བརྟེན་ན་ཟང་ཟིང་ཀུན་སྡུད་ཀྱི། །ཆོས་ནི་ནམ་ཡང་སྡུད་པར་མི་བྱེད་ [124a.2]པ། དེ་བཞི་བྱང་ཆུབ་སེམས་དཔས་རབ་སྤངས་ནས། །དགེ་བའི་བཤེས་གཉེན་བཞི་ལ་བསྟེན་པར་བྱ། །འདི་དག་བཤེས་གཉེན་ངན་དང་གྲོགས་ངན་དུ། །རྒྱལ་བས་གསུངས་ཏེ་ཐག་བསྲིང་ཡོངས་སུ་སྤོང་། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་དགེ་བའི་ [124a.3]བཤེས་གཉེན་ཏེ། བཞི་གང་ཞེ་ན། འདི་ལྟ་སྟེ། བྱང་ཆུབ་ཀྱི་ལམ་རྟོན་པའི་ཕྱིར་སློང་བ་བྱང་ཆུབ་སེམས་དཔའི་དགེ་བའི་བཤེས་གཉེན་དང་། ཐོས་པའི་ཤེས་རབ་རྟོན་པའི་ཕྱིར་ཆོས་སྨྲ་བ་བྱང་ཆུབ་སེམས་དཔའི་དགེ་བའི་བཤེས་གཉེན་དང་། དགེ་བའི་རྩ་བ་ཐམས་ཅད་རྟོན་པའི་ཕྱིར་ [124a.4]རབ་ཏུ་འབྱུང་བ་ཡང་དག་པར་འཛིན་དུ་འཇུག་པ་བྱང་ཆུབ་སེམས་དཔའི་དགེ་བའི་བཤེས་གཉེན་དང་། སངས་རྒྱས་ཀྱི་ཆོས་ཐམས་ཅད་རྟོན་པའི་ཕྱིར་སངས་རྒྱས་བཅོམ་ལྡན་འདས་རྣམས་བྱང་ཆུབ་སེམས་དཔའི་དགེ་བའི་བཤེས་གཉེན་ཏེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའི་ [124a.5]དགེ་བའི་བཤེས་གཉེན་ནོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་ཡོངས་སུ་རྟོན་ཕྱིར་ལེན་པ་པོ། །སྦྱིན་བྱེད་རྣམས་ཀྱི་དགེ་བའི་བཤེས་གཉེན་ཡིན། །ཆོས་དོན་སྨྲ་བ་ཐོས་དང་ཤེས་རབ་བྱེད། །དགེ་བའི་བཤེས་གཉེན་ཡིན་པར་བདེ་གཤེགས་གསུངས། །གང་དག་རབ་ [124a.6]འབྱུང་ཡང་དག་འཛིན་འཇུག་པ། །དེ་དག་དགེ་རྩ་ཡིན་པས་བཤེས་གཉེན་གསུངས། །རྫོགས་སངས་རྒྱས་ཀྱི་ལམ་ནི་རྟོན་པའི་ཕྱིར། །སངས་རྒྱས་རྣམས་ནི་བདེ་གཤེགས་སྲས་ཀྱི་བཤེས། །རྒྱལ་བས་བསྔགས་པ་བཞི་པོ་འདི་དག་ནི། །བདེ་གཤེགས་སྲས་ཀྱི་དགེ་ [124a.7]བའི་བཤེས་གཉེན་ཏེ། །འདི་དག་བསྟེན་ཅིང་རྟག་ཏུ་བག་ཡོད་ན། །བདེ་གཤེགས་བསྟན་པའི་བྱང་ཆུབ་འཐོབ་པར་འགྱུར། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་ལྟར་བཅོས་པ་སྟེ། བཞི་གང་ཞེ་ན། འདི་ལྟ་སྟེ། རྙེད་པ་དང་། བཀུར་སྟི་དོན་དུ་གཉེར་གྱི་ [124b] [124b.1]ཆོས་དོན་དུ་གཉེར་བ་མ་ཡིན་པ་དང་། བརྗོད་པའི་སྒྲ་ཚིགས་སུ་བཅད་པ་དོན་དུ་གཉེར་གྱི་ཡོན་ཏན་དོན་དུ་གཉེར་བ་མ་ཡིན་པ་དང་། བདག་བདེ་བ་དོན་དུ་གཉེར་གྱི་སེམས་ཅན་གྱི་སྡུག་བསྔལ་བསལ་བ་དོན་དུ་གཉེར་བ་མ་ཡིན་པ་དང་། འཁོར་གྱི་ཚོགས་དོན་དུ་གཉེར་གྱི་དབེན་པ་ [124b.2]དོན་དུ་གཉེར་བ་མ་ཡིན་པ་སྟེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའ་ལྟར་བཅོས་པའོ། །དེ་ལ་འདི་སྐད་ཅེས་བྱ་སྟེ། རྙེད་པ་དོན་དུ་གཉེར་གྱི་ཆོས་འདོད་མིན། །བརྗོད་པ་དོན་གཉེར་ཡོན་ཏན་དོན་གཉེར་མིན། །བདག་བདེ་རྟག་ཏུ་དོན་དུ་གཉེར་བྱེད་ཅིང་། །སེམས་ [124b.3]ཅན་སྡུག་བསྔལ་བསལ་བ་དོན་མི་གཉེར། །འཁོར་ཚོགས་དོན་དུ་གཉེར་གྱི་དབེན་མི་འདོད། །བདེ་ལ་ཆགས་ཀྱི་ཡོན་ཏན་མ་ཆགས་པ། །བཞི་པོ་དེ་དག་བཅོས་པར་གསུངས་པ་སྟེ། །དེ་དག་བྱང་ཆུབ་སེམས་དཔས་ཡོངས་སུ་སྤང་། །འོད་སྲུང་བཞི་པོ་འདི་དག་ནི་བྱང་ཆུབ་སེམས་ [124b.4]དཔའ་རྣམས་ཀྱི་བྱང་ཆུབ་སེམས་དཔའི་ཡང་དག་པའི་ཡོན་ཏན་ཏེ། བཞི་གང་ཞེ་ན། འདི་ལྟ་སྟེ། སྟོང་པ་ཉིད་ལ་ཡང་མོས་ལ་ལས་ཀྱི་རྣམ་པར་སྨིན་པ་ལ་ཡང་ཡིད་ཆེས་པ་དང་། དེ་བདག་མེད་པར་ཡང་བཟོད་ལ་སེམས་ཅན་ཐམས་ཅད་ལ་ཡང་སྙིང་རྗེ་ཆེ་བ་དང་དེའི་བསམ་པ་མྱ་ངན་ [124b.5]ལས་འདས་པ་ལ་ཡང་གནས་ལ་སྦྱོར་བ་འཁོར་བ་ན་ཡང་གནས་པ་དང་། དེ་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་ཡང་གཏོང་ལ་རྣམ་པར་སྨིན་པ་ལ་ཡང་མི་རེ་བ་སྟེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཡང་དག་པའི་ཡོན་ [124b.6]ཏན་ནོ། །དེ་ལ་འདི་སྐད་ཅེས་བྱ་སྟེ། ཆོས་རྣམས་སྟོང་པ་ཉིད་དུ་རྟག་མོས་ཀྱང་། །ལས་ཀྱི་རྣམ་པར་སྨིན་ལ་འང་ཡིད་ཆེས་སོ། །བདག་མེད་བཟོད་པས་མཉམ་པ་ཉིད་གནས་ཀྱང་། །སེམས་ཅན་རྣམས་ལ་སྙིང་རྗེ་ཆེན་པོ་སྐྱེད། །དེ་བསམ་རྟག་ཏུ་མྱ་ངན་འདས་ལ་གནས། ། [124b.7]དེ་ཡི་སྦྱོར་བ་འཁོར་བར་གནས་པ་ཡིན། །ཡོངས་སྨིན་བྱ་ཕྱིར་སྦྱིན་པ་སྦྱིན་བྱེད་ཀྱང་། །ལས་ཀྱི་རྣམ་པར་སྨིན་ལ་རེ་བ་མེད། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་གཏེར་ཆེན་པོ་རྙེད་པ་སྟེ། བཞི་གང་ཞེ་ན། འདི་ལྟ་སྟེ། སངས་རྒྱས་འབྱུང་བ་མཉེས་པར་བྱེད་ [125a] [125a.1]པ་དང་། ཕ་རོལ་དུ་ཕྱིན་པ་དྲུག་ཉན་པ་དང་། ཆོས་སྨྲ་བ་ལ་ཁོང་ཁྲོ་བ་མེད་པའི་སེམས་ཀྱིས་ལྟ་བ་དང་། བག་ཡོད་པར་དགོན་པ་ལ་གནས་པར་མངོན་པར་དགའ་བ་སྟེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའི་གཏེར་ཆེན་པོ་རྙེད་པའོ། །དེ་ལ་འདི་སྐད་ [125a.2]ཅེས་བྱ་སྟེ། ཚེ་རབས་ཀུན་ཏུ་སངས་རྒྱས་མཉེས་པར་བྱེད། །ཕ་རོལ་ཕྱིན་པ་དྲུག་པོ་རྣམས་ཀྱང་ཉན། །ཆོས་སྨྲ་བ་ལ་སེམས་ནི་རབ་ཏུ་དང་། །མཐོང་ན་རྟག་ཏུ་གུས་པ་སྐྱེད་པར་བྱེད། །རྟག་ཏུ་བག་ཡོད་གྱུར་ནས་དགོན་པར་གནས། །དེ་ནི་དེ་ཉིད་ལ་ཡང་རྟག་ཏུ་དགའ། ། [125a.3]བཞི་པོ་འདི་དག་རྒྱལ་བའི་སྲས་རྣམས་ཀྱི། །གཏེར་ཆེན་ཡིན་པར་བདེ་བར་གཤེགས་པས་གསུངས། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའ་བདུད་ཀྱི་ལམ་ལས་ཡང་དག་པར་འདའ་བའི་ཆོས་ཏེ། བཞི་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་གཏོང་བ་དང་། [125a.4]སེམས་ཅན་ཐམས་ཅད་ལ་ཁོང་ཁྲོ་བའི་སེམས་མེད་པ་དང་། ལྟ་བར་གྱུར་པ་ཐམས་ཅད་རྟོག་པ་དང་། སེམས་ཅན་ཐམས་ཅད་ལ་མི་བརྙས་པ་སྟེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའ་བདུད་ཀྱི་ལམ་ལས་ཡང་དག་པར་འདའ་བའི་ཆོས་སོ། །དེ་ལ་འདི་སྐད་ཅེས་བྱ་སྟེ། [125a.5]བྱང་ཆུབ་སེམས་ནི་ཡོངས་སུ་གཏོང་མི་བྱེད། །སེམས་ཅན་རྣམས་ལ་ཁོང་ཁྲོ་རྟག་ཏུ་སྤོང་། །ལྟ་བར་གྱུར་པ་ཐམས་ཅད་འདོར་བར་བྱེད། །སེམས་ཅན་ཚོགས་ལ་བརྙས་པར་ཡོང་མི་བྱེད། །བདེ་བར་གཤེགས་པས་བཞི་པོ་འདི་དག་ནི། །བདུད་ལས་འདའ་བར་འགྱུར་བའི་ [125a.6]ཆོས་སུ་གསུངས། །འདི་དག་བསྟེན་ན་རྒྱལ་བ་རྣམ་འདྲེན་པ། །གསེར་འདྲའི་སྐུ་མངའ་མཚུངས་པ་མེད་པར་འགྱུར། །འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་དགེ་བའི་རྩ་བའི་ཆོས་ཐམས་ཅད་སྡུད་པར་འགྱུར་བ་སྟེ། བཞི་གང་ཞེ་ན། འདི་ལྟ་སྟེ། ཚུལ་འཆོས་ [125a.7]པ་མེད་པར་དགོན་པ་ན་གནས་པ་དང་། ལན་དུ་ཕན་འདོགས་པར་རེ་བ་མེད་པར་འགྱུར་བའི་བསྡུ་བའི་དངོས་པོ་བཞི་པོ་དག་དང་། སེམས་ཅན་ཐམས་ཅད་ལ་ལུས་དང་སྲོག་གཏོང་ཞིང་དམ་པའི་ཆོས་ཡོངས་སུ་ཚོལ་བ་དང་། ཐོས་པ་དང་དོན་གྱིས་ངོམས་མི་མྱོང་ཞིང་དགེ་བའི་རྩ་བ་ཐམས་ [125b] [125b.1]ཅད་ཡང་དག་པར་སྡུད་པའི་བརྩོན་འགྲུས་ཏེ། འོད་སྲུང་ཆོས་བཞི་པོ་དེ་དག་ནི་བྱང་ཆུབ་སེམས་དཔའི་དགེ་བའི་རྩ་བའི་ཆོས་ཐམས་ཅད་སྡུད་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། དགོན་པར་གནས་ཤིང་ཚུལ་འཆོས་རྣམ་པར་སྤོང་། །རྒྱལ་གསུངས་བསྡུ་བ་སེམས་ཅན་རྣམས་ [125b.2]ལ་བྱེད། །དམ་ཆོས་ཡོངས་སུ་བཙལ་བ་བརྩམ་བྱས་ནས། །ལུས་དང་སྲོག་ཀྱང་ཡོངས་སུ་གཏོང་བར་བྱེད། །དགེ་བའི་རྩ་བ་ཤིན་ཏུ་མི་ཉུང་བ། །ཡང་དག་བསྒྲུབ་ཕྱིར་རྟག་ཏུ་ངོམས་མི་མྱོང་། །དགེ་བའི་ཆོས་རྣམས་ཡང་དག་བསྡུ་བའི་ཕྱིར། །ཆོས་བཞི་འདི་དག་བདེ་བར་ [125b.3]གཤེགས་པས་གསུངས། །འོད་སྲུང་བཞི་པོ་འདི་དག་ནི་བྱང་ཆུབ་སེམས་དཔའི་བསོད་ནམས་ཀྱི་ཚོགས་དཔག་ཏུ་མེད་པ་སྟེ། བཞི་གང་ཞེ་ན། འདི་ལྟ་སྟེ། ཟང་ཟིང་མེད་པའི་སེམས་ཀྱིས་ཆོས་སྦྱིན་པ་དང་། ཚུལ་ཁྲིམས་འཆལ་པ་རྣམས་ལ་ཆེར་སྙིང་རྗེ་བ་དང་། སེམས་ཅན་ [125b.4]ཐམས་ཅད་ལ་བྱང་ཆུབ་ཀྱི་སེམས་སྟོན་པ་དང་། ཉམ་ཆུང་བ་རྣམས་ལ་བཟོད་པ་སྟེན་པ་སྟེ། འོད་སྲུང་བཞི་པོ་དེ་དག་ནི་བྱང་ཆུབ་སེམས་དཔའི་བསོད་ནམས་ཀྱི་ཚོགས་དཔག་ཏུ་མེད་པའོ། །དེ་ལ་འདི་སྐད་ཅེས་བྱ་སྟེ། དག་ཅིང་ཟང་ཟིང་མེད་པའི་སེམས་ཀྱིས་སུ། །ཆོས་ཀྱི་ [125b.5]སྦྱིན་བྱེད་རྒྱལ་བས་རབ་ཏུ་བསྔགས། །ཚུལ་ཁྲིམས་མི་ལྡན་པ་ལ་སྙིང་རྗེ་ཆེ། །གཞན་དག་བྱང་ཆུབ་ཕྱིར་ནི་སེམས་སྐྱེད་འཇུག །ཉམ་ཆུང་རྣམས་ལ་བཟོད་པས་དང་དུ་ལེན། །འདི་ནི་དགེ་ཆོས་སྡུད་པར་གསུངས་པ་སྟེ། །འདི་དག་བསྟེན་ན་རྒྱལ་བར་འགྱུར་བས་ན། །བྱང་ [125b.6]ཆུབ་སེམས་དཔས་དེ་དག་རྟག་ཏུ་བསྟེན། །འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་མ་རིག་པའི་བག་ཆགས་ཀྱི་སའི་ཉོན་མོངས་པ་འཇོམས་པར་འགྱུར་བ་སྟེ། བཞི་གང་ཞེ་ན། འདི་ལྟ་སྟེ། ཚུལ་ཁྲིམས་ཀྱི་སྡོམ་པ་ཡང་དག་པར་འཛིན་པ་དང་། དམ་པའི་ཆོས་ཡོངས་ [125b.7]སུ་འཛིན་པ་དང་། སྒྲོན་མ་སྦྱིན་པ་དང་། ཐ་ན་འདྲིས་པ་རྣམས་ལ་ཡང་སྦྱིན་པ་སྟེ། འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་མ་རིག་པའི་བག་ཆགས་ཀྱི་སའི་ཉོན་མོངས་པ་འཇོམས་པར་བྱེད་པའོ། །དེ་ལ་འདི་སྐད་ཅེས་བྱ་སྟེ། ཚུལ་ཁྲིམས་སྡོམ་པ་ཡང་དག་འཛིན་བྱེད་ [126a] [126a.1]དང་། །དམ་ཆོས་འཛིན་དང་སྒྲོན་མ་སྦྱིན་པ་དང་། །དེ་བཞིན་ཐ་ན་འདྲིས་ལ་སྦྱིན་བྱེད་ཅིང་། །མཁས་པ་མ་རིག་ས་ལས་རྣམ་པར་འབྱེད། །འོད་སྲུང་ཆོས་བཞི་པོ་འདི་དག་ནི་བྱང་ཆུབ་སེམས་དཔའི་སྒྲིབ་པ་མེད་པའི་ཡེ་ཤེས་ཐོབ་པར་འགྱུར་བ་སྟེ། བཞི་ [126a.2]གང་ཞེ་ན། འདི་ལྟ་སྟེ། དམ་པའི་ཆོས་སྦྱིན་པ་དང་། དམ་པའི་ཆོས་ཡོངས་སུ་འཛིན་པ་དང་། ཕྲག་དོག་མེད་པ་དང་། གཞན་དག་ལ་མི་བརྙས་པ་སྟེ། འོད་སྲུང་ཆོས་བཞི་པོ་དེ་དག་ནི་བྱང་ཆུབ་སེམས་དཔའ་སྒྲིབ་པ་མེད་པའི་ཡེ་ཤེས་ཐོབ་པར་འགྱུར་བའོ། །དེ་ལ་འདི་ [126a.3]སྐད་ཅེས་བྱ་སྟེ། གང་དག་བྱང་ཆུབ་ལ་ནི་སྒྲིབ་བྱེད་པ། །སྡིག་པ་བཞི་པ་བཅུ་པོ་རྣམ་སྤངས་ནས། །མཁས་པས་དེ་བཞིན་བཅུ་གཉིས་གཞན་བསྟེན་ན། །འཆི་མེད་རེག་ནས་བྱང་ཆུབ་ཐོབ་པར་འགྱུར། །སེམས་ཅན་དམ་པ་གང་དག་ཆོས་ཚུལ་འདི། །འཛིན་ཏམ་ཀློག་གམ་ [126a.4]རབ་ཏུ་སྟེན་བྱེད་པ། །དེ་དག་བསོད་ནམས་མཐའ་ཡས་རྒྱལ་བས་གསུངས། །དེ་ཡི་ཚད་ནི་རྒྱལ་བ་རྣམ་བརྗོད་དོ། །གང་གིས་ཞིང་ནི་གང་གཱའི་བྱེ་མ་སྙེད། །རིན་ཆེན་བཀང་སྟེ་རྒྱལ་ལ་ཕུལ་བ་བས། །གང་གིས་འདི་ལ་ཚིག་བཞིའི་ཚིགས་བཅད་ཀློག །བསོད་ནམས་འདི་ཡི་གྲངས་ [126a.5]སུའང་མི་ཕོད་དོ། །འོད་སྲུང་བྱང་ཆུབ་སེམས་དཔའ་ནི་མིང་ཙམ་གྱིས་བྱང་ཆུབ་སེམས་དཔའ་ཞེས་མི་བྱའི་འོད་སྲུང་བྱང་ཆུབ་སེམས་དཔའ་ཆོས་སྤྱོད་པ་དང་། སྙོམས་པར་སྤྱོད་པ་དང་། དགེ་བ་སྤྱོད་པ་དང་། ཆོས་ལ་གནས་པ་དང་ལྡན་པ་ལ་བྱང་ཆུབ་སེམས་དཔའ་ཞེས་བྱའོ། ། [126a.6]འོད་སྲུང་གཞན་ཡང་བྱང་ཆུབ་སེམས་དཔའ་ཆོས་སུམ་ཅུ་རྩ་གཉིས་དང་ལྡན་ན་བྱང་ཆུབ་སེམས་དཔའ་ཞེས་བྱ་སྟེ། སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བའི་ལྷག་པའི་བསམ་པ་དང་། ཐམས་ཅད་མཁྱེན་པའི་ཡེ་ [126a.7]ཤེས་ལ་འཛུད་པ་དང་། བདག་ཅི་རེ་ཞེས་ཡོངས་སུ་འཇལ་ཞིང་གཞན་གྱི་ཤེས་པ་ལ་མི་སྨོད་པ་དང་། ང་རྒྱལ་མེད་པ་དང་། ལྷག་པའི་བསམ་པ་བརྟན་པ་དང་། བཅོས་མ་མ་ཡིན་པའི་བྱམས་པ་དང་། མཛའ་བ་དང་མི་མཛའ་བ་ལ་སེམས་སྙོམས་པ་དང་། མྱ་ངན་ [126b] [126b.1]ལས་འདས་པའི་མཐའི་བར་དུ་གཏན་དུ་མཛའ་བ་དང་། ཚིག་རན་ཅིང་འཛུམ་པའི་བཞིན་གྱིས་གསོང་པོར་སྨྲ་བ་དང་། ཁུར་བླངས་པ་རྣམས་ལ་སྒྱིད་ལུག་པ་མེད་པ་དང་། སེམས་ཅན་ཐམས་ཅད་ལ་སྙིང་རྗེ་ཆེན་པོ་ཡོངས་སུ་མ་བཅད་པ་དང་། ཡིད་ཡོངས་སུ་མི་སྐྱོ་བ་དང་། [126b.2]དམ་པའི་ཆོས་ཡོངས་སུ་ཚོལ་བའི་ཕྱིར་ཐོས་པ་དང་། དོན་གྱིས་ངོམས་མི་མྱོང་བ་དང་། བདག་གི་འཁྲུལ་པ་རྣམས་ལ་སྐྱོན་དུ་ལྟ་ཞིང་གཞན་གྱི་འཁྲུལ་པ་རྣམས་ལ་མི་གཤེ་བར་བསྒོ་བ་དང་། སྤྱོད་ལམ་ཐམས་ཅད་དུ་བྱང་ཆུབ་ཀྱི་སེམས་ཡོངས་སུ་སྦྱོང་བ་དང་། རྣམ་པར་སྨིན་པ་ [126b.3]ལ་མི་རེ་བའི་གཏོང་བ་དང་། སྲིད་པའི་འགྲོ་བར་སྐྱེ་བ་ཐམས་ཅད་ལ་མི་གནས་པའི་ཚུལ་ཁྲིམས་དང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་དང་། དགེ་བའི་རྩ་བ་ཐམས་ཅད་ཡང་དག་པར་སྒྲུབ་པའི་བརྩོན་འགྲུས་དང་། གཟུགས་མེད་པའི་ཁམས་རྣམ་པར་ [126b.4]གསལ་བའི་བསམ་གཏན་དང་། ཐབས་མཁས་པས་བསྡུ་བའི་དངོས་པོ་བཞི་དང་རབ་ཏུ་ལྡན་པའི་ཐབས་ཀྱིས་ཟིན་པའི་ཤེས་རབ་དང་། ཚུལ་ཁྲིམས་དང་ལྡན་པ་དང་ཚུལ་ཁྲིམས་འཆལ་པ་རྣམས་ལ་གཉིས་སུ་མེད་པའི་བྱམས་པ་དང་། གུས་པར་བྱས་ཏེ་ཆོས་ཉན་པ་དང་། གུས་ [126b.5]པར་བྱས་ཏེ་དགོན་པ་ལ་གནས་པར་མངོན་པར་དགའ་བ་དང་། འཇིག་རྟེན་གྱི་སྣ་ཚོགས་རྣམས་ལ་མི་དགའ་ཞིང་འཇིག་རྟེན་ལས་འདས་པའི་ཆོས་རྣམས་ལ་མངོན་པར་དགའ་བ་དང་། ཐེག་པ་དམན་པ་ལ་མི་འདོད་ཅིང་ཐེག་པ་ཆེན་པོ་ལ་ཕན་ཡོན་དུ་ལྟ་བ་དང་། སྡིག་པའི་གྲོགས་ [126b.6]པོ་ཡོངས་སུ་སྤོང་ཞིང་དགེ་བའི་བཤེས་གཉེན་ལ་སྟེན་པ་དང་། ཚངས་པའི་གནས་བཞི་སྒྲུབ་པ་དང་། མངོན་པར་ཤེས་པ་ལྔས་རྣམ་པར་རྩེན་པ་དང་། ཡེ་ཤེས་ལ་རྟོན་པ་དང་། སྒྲུབ་པ་དང་ལོག་པར་སྒྲུབ་པ་ལ་གནས་པའི་སེམས་ཅན་རྣམས་མི་གཏོང་བ་དང་། གཅིག་ཏུ་ [126b.7]ཆད་པར་སྨྲ་བ་དང་། བདེན་པ་གཅེས་སུ་བྱེད་པ་དང་། བྱང་ཆུབ་ཀྱི་སེམས་སྔོན་དུ་འགྲོ་བ་སྟེ། འོད་སྲུང་བྱང་ཆུབ་སེམས་དཔའ་ཆོས་སུམ་ཅུ་རྩ་གཉིས་པོ་དེ་དག་དང་ལྡན་ན་བྱང་ཆུབ་སེམས་དཔའ་ཞེས་བྱའོ། །དེ་ལ་འདི་སྐད་ཅེས་བྱ་སྟེ། སེམས་ཅན་ཀུན་ལ་ཕན་དང་བདེ་བྱ་ [127a] [127a.1]བའི། །ལྷག་པའི་བསམ་ལ་མོས་པར་བྱེད་པ་ཡིན། །ཀུན་མཁྱེན་ཡེ་ཤེས་ལ་ནི་སེམས་གྲོལ་ཞིང་། །རི་འམ་མི་རི་སྙམ་དུ་བདག་ལ་དཔོག །སྨོད་པ་མེད་ཅིང་ལྷག་པའི་ང་རྒྱལ་མེད། །བསམ་པ་བརྟན་ཞིང་བཅོས་པ་མེད་པར་བྱམས། །མཛའ་ [127a.2]དང་མི་མཛའ་རྣམས་ལ་སེམས་ཀྱང་སྙོམས། །མྱ་ངན་འདས་པའི་མཐའ་ལ་ཐུག་བར་དུ། །སེམས་ཅན་རྣམས་ལ་གཏན་དུ་རབ་ཏུ་མཛའ། །འཛུམ་པའི་བཞིན་གྱིས་འཇམ་པོར་སྨྲ་བར་བྱེད། །ཁུར་བླངས་པ་ལ་སྒྱིད་ལུག་ཞུམ་པ་མེད། །སེམས་ཅན་དག་ལ་སྙིང་རྗེ་ཡོངས་ [127a.3]མ་བཅད། །དམ་ཆོས་ཡོངས་སུ་ཚོལ་ལ་སྐྱོ་བ་མེད། །ཐོས་པས་མི་ངོམས་བདག་གི་འཁྲུལ་སྐྱོན་ལྟ། །གཞན་ལ་གཤེ་བས་གདུང་བར་བྱེད་པ་མེད། །སྤྱོད་ལམ་རྣམས་སུ་སེམས་ནི་རབ་ཏུ་སྦྱོང་། །གཏོང་བ་རྣམ་པར་སྨིན་ལ་རེ་བ་མེད། །ཚུལ་ཁྲིམས་སྲིད་པའི་འགྲོ་ [127a.4]བར་གནས་མ་ཡིན། །སེམས་ཅན་རྣམས་ལ་བཟོད་ཅིང་ཁོང་ཁྲོ་མེད། །དགེ་བ་ཡང་དག་སྒྲུབ་པའི་བརྩོན་འགྲུས་དང་། །གཟུགས་མེད་ཁམས་སྤངས་པ་ཡི་བསམ་གཏན་དང་། །ཐབས་ཀྱིས་ཡང་དག་ཟིན་པའི་ཤེས་རབ་དང་། །བསྡུ་བ་རྣམ་བཞིས་ཡང་དག་ཟིན་ཐབས་ [127a.5]དང་། །ཁྲིམས་ལྡན་ཁྲིམས་མེད་གཉིས་མེད་བྱམས་པ་དང་། །གུས་པར་བྱས་ཏེ་དུས་སུ་ཆོས་ཉན་དང་། །གུས་པར་བྱས་ཏེ་དགོན་ཞི་གནས་པ་དང་། །འཇིག་རྟེན་སྣ་ཚོགས་དགའ་བར་མི་བྱེད་དང་། །ཐེག་པ་དམན་ལ་དགའ་བར་མི་བྱེད་ཅིང་། །ཐེག་པ་ཆེ་ལ་འདོད་པ་སྐྱེད་ [127a.6]པ་དང་། །སྡིག་པའི་གྲོགས་པོ་རྣམ་པར་སྤོང་བྱེད་ཅིང་། །དགེ་བའི་བཤེས་གཉེན་རྟག་ཏུ་སྟེན་པ་དང་། །ཚངས་པའི་གནས་པ་བཞི་ལ་སྒོམ་པ་དང་། །མངོན་ཤེས་རྣམ་ལྔས་རྟག་ཏུ་རྩེན་པ་དང་། །ཡེ་ཤེས་རྗེས་སུ་རྟག་ཏུ་འབྲང་བ་དང་། །སྒྲུབ་དང་ལྡན་པ་གཏོང་བར་ [127a.7]མི་བྱེད་དང་། །སྒྲུབ་དང་མི་ལྡན་གཞན་ཡང་མི་གཏོང་དང་། །གཅིག་ཏུ་ཆད་པར་རྟག་ཏུ་སྨྲ་བ་དང་། །བདེན་ལ་རྟག་ཏུ་གུས་དང་བཅས་པ་དང་། །བྱང་ཆུབ་སེམས་ནི་སྔོན་དུ་བཏང་ནས་སུ། །རྒྱལ་བས་བསྔགས་པའི་ཆོས་ནི་སྒོམ་པར་བྱེད། །བདེ་གཤེགས་གསུངས་ [127b] [127b.1]པའི་སུམ་ཅུ་རྩ་གཉིས་ཆོས། །འདི་དག་བདེ་གཤེགས་སྲས་ཀྱིས་བསྟེན་པར་བྱ། །བྱང་ཆུབ་སེམས་དཔའ་གང་ཡིན་དེ་དག་ནི། །ཆོས་འདི་ལྡན་ཞེས་བདེ་བར་གཤེགས་པས་གསུངས། །འོད་སྲུང་དཔེ་ཉེ་བར་འགོད་པ་བསྟན་པ་གང་དག་གིས་བྱང་ཆུབ་སེམས་དཔའི་ཡོན་ཏན་རབ་ [127b.2]ཏུ་ཤེས་པར་བྱེད་པའི་དཔེ་ཉེ་བར་དགོད་པ་ཁྱོད་ལ་བསྟན་པར་བྱའོ། །འོད་སྲུང་འདི་ལྟ་སྟེ། དཔེར་ན་ས་ཆེན་པོ་འདི་ནི་སེམས་ཅན་ཐམས་ཅད་ཀྱི་འཚོ་བ་སྟེ། འགྱུར་བ་མེད་ཅིང་ལན་དུ་ཕན་འདོགས་པ་ལ་རེ་བ་མེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་ [127b.3]བསྐྱེད་པ་ཡང་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་སེམས་ཅན་ཐམས་ཅད་ཀྱི་འཚོ་བ་ཡིན་ཏེ། འགྱུར་བ་མེད་ཅིང་ལན་དུ་ཕན་འདོགས་པར་རེ་བ་མེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་ས་འདི་སྐྱེ་བོ་ཀུན་གྱི་འཚོ། །ལན་ལ་མི་རེ་འགྱུར་བ་མེད་པ་བཞིན། །བྱང་ཆུབ་སེམས་ [127b.4]དཔའ་ཐོག་མར་སེམས་གནས་པ། །རྒྱལ་མཆོག་བླ་ན་མེད་པའི་སངས་རྒྱས་སུ། །མ་གྱུར་བར་དུ་སྐྱེ་བོ་ཀུན་གྱི་འཚོ། །ལན་ལ་རེ་བ་མེད་ཅིང་འགྱུར་བ་མེད། །བུ་དང་དགྲ་ལ་ཡིད་ཀྱིས་མཚུངས་པར་སེམས། །བྱང་ཆུབ་མཆོག་རབ་རྟག་པར་ཡོངས་སུ་ཚོལ། །འོད་སྲུང་ [127b.5]འདི་ལྟ་སྟེ་དཔེར་ན་ཆུའི་ཁམས་ནི་རྩ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་སྐྱེད་པར་བྱེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་བསམ་པ་དག་པ་སེམས་ཅན་ཐམས་ཅད་ལ་བྱམས་པས་ཁྱབ་པར་བྱས་ཏེ་གནས་པ་ཡང་སེམས་ཅན་ཐམས་ཅད་ [127b.6]ལ་དཀར་པོའི་ཆོས་ཐམས་ཅད་སྐྱེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་ཆུ་ནི་རྩྭ་དང་གེལ་པ་དང་། །ནགས་ཚལ་སྨན་དང་འབྲུ་ཡི་རྣམ་པ་སྐྱེད། །དེ་བཞིན་བྱང་ཆུབ་སེམས་དཔའ་བསམ་དག་པ། །སེམས་ཅན་མཐའ་ཡས་བྱམས་པས་ཁྱབ་པར་བྱེད། །སྣ་ཚོགས་ཆོས་ [127b.7]ལ་ཁྱབ་བྱས་རིམ་གྱིས་སུ། །དཀར་པོའི་ཆོས་ཀྱིས་རྣམ་པར་རྒྱས་འགྱུར་ཞིང་། །དཔུང་བཅས་སྡེ་དང་བཅས་པའི་བདུད་བཅོམ་ནས། །རིམ་གྱིས་རྒྱལ་བའི་བྱང་ཆུབ་ཐོབ་པར་འགྱུར། །འོད་སྲུང་འདི་ལྟ་སྟེ། དཔེར་ན་མེའི་ཁམས་ནི་ལོ་ཏོག་ཐམས་ཅད་ཡོངས་སུ་སྨིན་པར་བྱེད་ [128a] [128a.1]དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་ཤེས་རབ་ཀྱང་སེམས་ཅན་ཐམས་ཅད་ཀྱི་དཀར་པོའི་ཆོས་ཐམས་ཅད་ཡོངས་སུ་སྨིན་པར་བྱེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་མེ་ནི་རྩྭ་དང་སྨན་རྣམས་དང་། །ལོ་ཏོག་ཐམས་ཅད་ཡོངས་སུ་སྨིན་ [128a.2]པར་བྱེད། །དེ་བཞིན་བདེ་གཤེགས་སྲས་ཀྱི་ཤེས་རབ་ཀྱང་། །སྐྱེ་བོ་རྣམས་ཀྱི་དགེ་བའི་ཆོས་སྨིན་བྱེད། །འོད་སྲུང་འདི་ལྟ་སྟེ། དཔེར་ན་རླུང་གི་ཁམས་ནི་སངས་རྒྱས་ཀྱི་ཞིང་ཐམས་ཅད་རྣམ་པར་སྒྲུབ་བོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་ཐབས་མཁས་པ་ཡང་ [128a.3]སེམས་ཅན་ཐམས་ཅད་ལ་སངས་རྒྱས་ཀྱི་ཆོས་ཐམས་ཅད་རྣམ་པར་སྒྲུབ་བོ། །དེ་ལ་འདི་སྐད་ཅེས་བྱ་སྟེ། དཔེར་ན་རླུང་ནི་སངས་རྒྱས་དགོངས་པ་བཞིན། །རྣམ་པ་སྣ་ཚོགས་ཞིང་རྣམས་རྣམ་པར་སྒྲུབ། །དེ་བཞིན་རྒྱལ་སྲས་རྣམས་ཀྱི་ཐབས་མཁས་ཀྱང་། །བདེ་གཤེགས་ [128a.4]གསུངས་པའི་ཆོས་མཆོག་རྣམ་པར་སྒྲུབ། །འོད་སྲུང་འདི་ལྟ་སྟེ་དཔེར་ན་བདུད་སྡིག་ཅན་གྱི་དཔུང་གི་ཚོགས་ཡན་ལག་བཞི་པ་ནི་འདོད་པ་ན་སྤྱོད་པའི་ལྷ་ཐམས་ཅད་ཀྱི་ཟིལ་གྱིས་གནོན་པ་འམ། ཡོངས་སུ་ཟད་པར་བྱ་བར་མི་ནུས་སོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ [128a.5]བསམ་པ་དག་པ་ཡང་བདུད་ཐམས་ཅད་ཀྱི་ཟིལ་གྱིས་གནོན་པ་འམ། ཡོངས་སུ་ཟད་པར་བྱ་བར་མི་ནུས་སོ། །འོད་སྲུང་འདི་ལྟ་སྟེ། དཔེར་ན་ཟླ་བ་ཡར་གྱི་ངོ་ལ་ཟླ་བའི་དཀྱིལ་འཁོར་སྐྱེ་ཞིང་གང་བར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་བསམ་པ་དག་པ་ཡང་ [128a.6]དཀར་པོའི་ཆོས་ཐམས་ཅད་ཀྱིས་རྫོགས་ཤིང་རྒྱས་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་ཟླ་བའི་དཀྱིལ་འཁོར་ཡར་ངོ་ལ། །སྐྱེ་ཞིང་ཡོངས་སུ་གང་འགྱུར་འབྲི་མི་འགྱུར། །དེ་བཞིན་བསམ་དག་བྱང་ཆུབ་སེམས་དཔའ་ཡང་། །དཀར་པོའི་ཆོས་ཀྱིས་རྟག་ཏུ་རྒྱས་ [128a.7]པར་འགྱུར། །འོད་སྲུང་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ལས་ལས་ལན་ཅིག་བྱུང་བའི་འོད་ཟེར་རྣམས་ཀྱིས་སེམས་ཅན་ཐམས་ཅད་ལ་སྣང་བར་བྱེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་རྣམས་ཀྱིས་ལན་ཅིག་བྱུང་བའི་ཤེས་རབ་ཀྱི་འོད་ཟེར་རྣམས་ཀྱིས་ཀྱང་སེམས་ཅན་ [128b] [128b.1]ཐམས་ཅད་ལ་ཤེས་པའི་སྣང་བ་བྱེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་ཉི་ལས་ལན་ཅིག་བྱུང་བ་ཡི། །འོད་ཟེར་རྣམས་ཀྱིས་སེམས་ཅན་སྣང་བར་བྱེད། །དེ་བཞིན་རྒྱལ་སྲས་ཡེ་ཤེས་འོད་ཟེར་གྱིས། །སེམས་ཅན་རྣམས་ལ་ཤེས་རབ་སྣང་བར་བྱེད། །འོད་སྲུང་འདི་ [128b.2]ལྟ་སྟེ། དཔེར་ན་{རི་དགས་,རི་དྭགས་}ཀྱི་རྒྱལ་པོ་སེང་གེ་ནི་ག་ལས་གར་འགྲོ་བ་ཐམས་ཅད་དུ་མི་འཇིགས་མི་སྐྲག་པ་ཉིད་དུ་འགྲོའོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ཐོས་པ་དང་། ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་དང་། ཏིང་ [128b.3]ངེ་འཛིན་དང་། ཡེ་ཤེས་ལ་གནས་པ་ཡང་ག་ལས་གར་འགྲོ་བ་ཐམས་ཅད་དུ་མི་འཇིགས་མི་སྐྲག་པ་ཉིད་དུ་འགྲོའོ། །དེ་ལ་འདི་སྐད་ཅེས་བྱ་སྟེ། {རི་དགས་,རི་དྭགས་}རྒྱལ་པོ་སེང་གེ་རལ་པ་ཅན། །འཇིགས་པ་མེད་པར་གང་དུ་འདོད་པར་འགྲོ། །དེ་བཞིན་བྱང་ཆུབ་སེམས་དཔའ་ཚུལ་ [128b.4]ཁྲིམས་དང་། །ཐོས་དང་ཡེ་ཤེས་གནས་པ་དགའ་མགུར་འགྲོ། །འོད་སྲུང་འདི་ལྟ་སྟེ་དཔེར་ན་བལ་གླང་གླང་པོ་ཆེ་ཤིན་དུ་དུལ་བ་ནི་ཁལ་ཐམས་ཅད་ཁྱེར་བས་ཡོངས་སུ་སྐྱོ་བ་མེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་ཤིན་དུ་དུལ་བ་ཡང་སེམས་ཅན་ཐམས་ཅད་ཀྱི་ [128b.5]དོན་གྱི་ཕྱིར་ཕུང་པོ་ལྔའི་ཁུར་ཁྱེར་བས་ཡོངས་སུ་སྐྱོ་བ་མེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་རབ་དུལ་སྟོབས་ལྡན་གླང་པོ་ཆེ། །ཁལ་རྣམས་ཁྱེར་ཡང་ཡོངས་སུ་སྐྱོ་བ་མེད། །དེ་བཞིན་བྱང་ཆུབ་སེམས་དཔའ་སེམས་རབ་དུལ། །སེམས་ཅན་ཁུར་གྱིས་སྐྱོ་བར་འགྱུར་བ་མེད། ། [128b.6]འོད་སྲུང་འདི་ལྟ་སྟེ། དཔེར་ན་པད་མ་ནི་ཆུ་ལས་སྐྱེས་ཀྱང་ཆུས་མི་གོས་སོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་འཇིག་རྟེན་དུ་སྐྱེས་ཀྱང་འཇིག་རྟེན་གྱི་ཆོས་རྣམས་ཀྱིས་མི་གོས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་པད་མ་ཆུ་ལས་སྐྱེས་གྱུར་ཀྱང་། །ཆུ་འམ་རྫབ་ཀྱིས་ [128b.7]དེ་ལ་གོས་པ་མེད། །དེ་བཞིན་བྱང་ཆུབ་སེམས་དཔའ་འཇིག་རྟེན་སྐྱེས། །འཇིག་རྟེན་ཆོས་ཀྱིས་ནམ་ཡང་གོས་པ་མེད། འོད་སྲུང་འདི་ལྟ་སྟེ་དཔེར་ན་ཤིང་ལྗོན་པ་ཡལ་ག་བཅད་པ་ནི་རྩ་བ་མ་སྣད་ན་སླར་ཡང་ས་ལས་སྐྱེའོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ཐབས་ལ་མཁས་ [129a] [129a.1]པ་ཉོན་མོངས་པའི་ཡལ་ག་བཅད་པ་ཡང་སྙིང་རྗེ་ཆེན་པོ་དགེ་བའི་རྩ་བ་ལ་ཀུན་ཏུ་སྦྱོར་བ་མ་ཉམས་ན་སླར་ཡང་ཁམས་གསུམ་དུ་སྐྱེའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཤིང་ལྗོན་ཡལ་ག་བཅད་པ་ནི། །རྩ་བ་བརྟན་པ་མ་སྣད་སླར་ཡང་སྐྱེ། །དེ་བཞིན་རྩ་བ་ཀུན་ [129a.2]སྦྱོར་མ་སྤངས་ན། །ཐབས་ཀྱིས་བསལ་ཀྱང་སླར་ཡང་སྐྱེ་བར་འགྱུར། །འོད་སྲུང་འདི་ལྟ་སྟེ་དཔེར་ན་ཕྱོགས་དང་ཕྱོགས་མཚམས་ཐ་དད་པ་ནས་ཀླུང་ཆེན་པོའི་ཆུའི་ཕུང་པོ་རྒྱ་མཚོ་ཆེན་པོར་བབ་པ་ནི་འདི་ལྟ་སྟེ། ལན་ཚྭའི་རོར་རོ་གཅིག་པར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་ [129a.3]དཔའི་དགེ་བའི་རྩ་བ་སྒོ་ཐ་དད་པ་ནས་བསགས་པ་བྱང་ཆུབ་ཏུ་ཡོངས་སུ་བསྔོས་པ་ཐམས་ཅད་ཀྱང་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་རོར་རོ་གཅིག་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་ཐ་དད་ཕྱོགས་ཀྱི་ཆུ་ཀླུང་རྣམས། །རྒྱ་མཚོ་ཆེར་བབ་རོ་གཅིག་འགྱུར་བ་བཞིན། ། [129a.4]ཐ་དད་སྒོ་ནས་དགེ་བ་བསགས་བྱས་པ། །བྱང་ཆུབ་བསྔོས་པ་རྣམས་ཀྱང་རོ་གཅིག་འགྱུར། །འོད་སྲུང་འདི་ལྟ་སྟེ་དཔེར་ན་རྒྱལ་ཆེན་བཞིའི་རིས་དང་། སུམ་ཅུ་རྩ་གསུམ་པའི་ལྷ་རྣམས་ནི་རི་རབ་ལ་གནས་སོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ [129a.5]ཉིད་ཀྱང་བྱང་ཆུབ་ཀྱི་སེམས་ཀྱི་དགེ་བའི་རྩ་བ་ལ་གནས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་ཆེན་བཞིའི་རིས་རྣམས་དང་། །སུམ་ཅུ་རྩ་གསུམ་ལྷ་ཚོགས་རི་རབ་གནས། །དེ་བཞིན་བྱང་ཆུབ་སེམས་དཔའ་དགེར་གནས་ཏེ། །ཐམས་ཅད་མཁྱེན་ཉིད་ཐོབ་ནས་ [129a.6]ཆོས་ཀྱང་སྟོན། །འོད་སྲུང་འདི་ལྟ་སྟེ། དཔེར་ན་བློན་པོས་ཡོངས་སུ་ཟིན་པའི་རྒྱལ་པོ་རྣམས་ནི་རྒྱལ་པོའི་བྱ་བ་ཐམས་ཅད་བྱེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ཐབས་མཁས་པས་ཡོངས་སུ་ཟིན་པའི་ཤེས་རབ་ཀྱང་སངས་རྒྱས་ཀྱི་མཛད་པ་ཐམས་ཅད་བྱེད་དོ། །དེ་ལ་ [129a.7]འདི་སྐད་ཅེས་བྱ་སྟེ། དཔེར་ན་བློན་པོར་ལྡན་པའི་རྒྱལ་པོ་རྣམས། །བྱ་བ་ཐམས་ཅད་རྟག་ཏུ་བྱེད་པ་ལྟར། །ཐབས་ལྡན་བྱང་ཆུབ་སེམས་དཔའི་ཤེས་རབ་ཀྱང་། །སངས་རྒྱས་དོན་རྣམས་རྟག་ཏུ་བྱེད་པ་ཡིན། །འོད་སྲུང་འདི་ལྟ་སྟེ་དཔེར་ན་སྤྲིན་མེད་ཅིང་ནམ་ཐང་པའི་ནམ་མཁའ་ལ་ནི་ [129b] [129b.1]ཆར་འབབ་པའི་རྒྱུ་མེད་དོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་ཐོས་པ་ཉུང་བ་ལ་ཡང་དམ་པའི་ཆོས་ཀྱི་ཆར་འབབ་པའི་རྒྱུ་མེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་སྤྲིན་མེད་ནམ་ཐང་ནམ་མཁའ་ལ། །ཆར་འབབ་རྒྱུ་ནི་ནམས་ཀྱང་མི་དམིགས་སོ། །དེ་བཞིན་ [129b.2]བྱང་ཆུབ་སེམས་དཔའ་ཐོས་ཉུང་ལ། །ཆོས་སྟོན་ནམ་ཡང་དམིགས་པར་མི་འགྱུར་རོ། །འོད་སྲུང་འདི་ལྟ་སྟེ་དཔེར་ན་སྤྲིན་ཆེན་པོ་ལས་བྱུང་བའི་ཆར་གྱི་རྒྱུན་ནི་ལོ་ཏོག་ཐམས་ཅད་ལ་མངོན་པར་འབབ་བོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་དང་མང་དུ་ཐོས་པའི་ [129b.3]ཆོས་ཀྱི་སྤྲིན་ལས་བྱུང་བའི་དམ་པའི་ཆོས་ཀྱི་ཆར་ཡང་སེམས་ཅན་ཐམས་ཅད་ལ་མངོན་པར་འབབ་བོ། །དེ་ལ་འདི་སྐད་ཅེས་བྱ་སྟེ། དཔེར་ན་སྤྲིན་ཆེན་གློག་དང་བཅས་པ་ལས། །ཆར་པ་འབབ་པས་ལོ་ཏོག་ངོམས་པར་བྱེད། །དེ་བཞིན་བྱང་ཆུབ་སེམས་དཔའ་དམ་ཆོས་ཀྱི། །སྤྲིན་བྱུང་ཆོས་ [129b.4]རྒྱུན་སེམས་ཅན་ཚིམ་པར་བྱེད། །འོད་སྲུང་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་གང་དུ་བྱུང་བ་དེར་རིན་པོ་ཆེ་སྣ་བདུན་ཡང་འབྱུང་ངོ་། །འོད་སྲུང་དེ་བཞིན་དུ་བྱང་ཆུབ་སེམས་དཔའ་གང་དུ་བྱུང་བ་དེར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་དག་ཀྱང་འབྱུང་ངོ་། །དེ་ལ་འདི་ [129b.5]སྐད་ཅེས་བྱ་སྟེ། འཁོར་ལོས་སྒྱུར་བའི་རྒྱལ་པོ་གར་བྱུང་བ། །དེར་ནི་དེ་ཡི་རིན་ཆེན་སྣ་བདུན་འབྱུང་། །བྱང་ཆུབ་སེམས་དཔའ་གང་དུ་བྱུང་གྱུར་པ། །དེར་དེའི་བྱང་ཆུབ་ཡན་ལག་བདུན་པོ་འབྱུང་། །འོད་སྲུང་འདི་ལྟ་སྟེ་དཔེར་ན་གང་ན་ནོར་བུ་རིན་པོ་ཆེ་བཻདཱུརྱ་འབྱུང་བའི་སྒོ་ཡོད་པ་ [129b.6]དེ་ན་ཀཱར་ཥ་པཱ་ཎ་བརྒྱ་སྟོང་མང་པོ་འབྱུང་པའི་སྒོ་ཡོད་དོ། །འོད་སྲུང་དེ་བཞིན་དུ་གང་ན་བྱང་ཆུབ་སེམས་དཔའ་འབྱུང་བའི་སྒོ་ཡོད་པ་དེ་ན་ཉན་ཐོས་དང་། རང་སངས་རྒྱས་འབུམ་ཕྲག་མང་པོ་འབྱུང་བའི་སྒོ་ཡོད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་གང་དུ་ནོར་བུ་རིན་ཆེན་འབྱུང་། །དེར་ [129b.7]ནི་ཀཱར་ཥ་པཱ་ཎ་མང་འབྱུང་ལྟར། །གང་དུ་རྫོགས་པའི་བྱང་ཆུབ་སེམས་འབྱུང་བ། །དེར་ནི་ཉན་ཐོས་མང་པོ་འབྱུང་བར་འགྱུར། །འོད་སྲུང་འདི་ལྟ་སྟེ། དཔེར་ན་སུམ་ཅུ་རྩ་གསུམ་པའི་ལྷ་འདྲེས་པའི་ཚལ་དུ་ཞུགས་པ་རྣམས་ཀྱི་ལོངས་སྤྱོད་དང་ཡོངས་སུ་སྤྱད་པ་རྣམས་ནི་མཚུངས་པར་ [130a] [130a.1]གནས་སོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་བསམ་པ་དག་པའི་སྦྱོར་བ་ཡང་སེམས་ཅན་ཐམས་ཅད་ཀྱི་བྱ་བ་ཐམས་ཅད་ལ་མཚུངས་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་འདྲེས་པའི་ཚལ་གནས་ལྷ་རྣམས་ཀྱི། །ལོངས་སྤྱོད་རྣམས་ [130a.2]ནི་མཚུངས་པར་གནས་པ་ཡིན། །དེ་བཞིན་བསམ་དག་བྱང་ཆུབ་སེམས་དཔའ་ཡང་། །སེམས་ཅན་རྣམས་ལ་རྟག་ཏུ་ལེགས་པར་སྦྱོར། །འོད་སྲུང་འདི་ལྟ་སྟེ་དཔེར་ན་སྔགས་དང་སྨན་གྱིས་ཡོངས་སུ་ཟིན་པའི་དུག་གིས་ནི་འཆི་བར་བྱེད་མི་ནུས་སོ། །འོད་སྲུང་དེ་བཞིན་དུ་ཡེ་ཤེས་ [130a.3]དང་ཐབས་མཁས་པས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཉོན་མོངས་པའི་དུག་གིས་ཀྱང་ལོག་པར་ལྟུང་བར་བྱེད་མི་ནུས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་སྔགས་ཀྱིས་ཡོངས་སུ་ཟིན་པའི་དུག །སྐྱེ་བོ་རྣམས་ལ་ཉེས་པ་བྱེད་མི་ནུས། །དེ་བཞིན་བྱང་ཆུབ་སེམས་ [130a.4]དཔའི་ཡེ་ཤེས་ཅན། །ཉོན་མོངས་རྣམས་ཀྱིས་ལོག་ལྟུང་བྱེད་མི་ནུས། །འོད་སྲུང་འདི་ལྟ་སྟེ་དཔེར་ན་གྲོང་ཁྱེར་ཆེན་པོ་རྣམས་ཀྱི་ལུད་གང་ཡིན་པ་དེ་ནི་བུ་རམ་ཤིང་གི་ཞིང་དག་དང་། རྒུན་གྱི་ཞིང་དག་ལ་ཕན་པར་གྱུར་པ་ཡིན་ནོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་ཉོན་ [130a.5]མོངས་པའི་ལུད་གང་ཡིན་པ་དེ་ཡང་ཐམས་ཅད་མཁྱེན་པ་ཉིད་ལ་ཕན་པར་གྱུར་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་གྲོང་ཁྱེར་རྣམས་ཀྱི་མི་གཙང་ལུད། །དེ་ནི་བུ་རམ་ཤིང་གི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་རྒྱལ་ [130a.6]བའི་ཆོས་ལ་ཕན་པར་བྱེད། །འོད་སྲུང་འདི་ལྟ་སྟེ། དཔེར་ན་འཕང་རྩལ་མ་བསླབས་པ་ལས་མཚོན་ཐབས་སློབ་པ་དེ་བཞིན་དུ་བྱང་ཆུབ་སེམས་དཔའ་ཐོས་པ་ཉུང་བ་ལས་དམ་པའི་ཆོས་རབ་ཏུ་རྣམ་པར་འབྱེད་པ་དང་། དཔྱོད་པ་དང་། དོན་འཛིན་པའི་ཤེས་པར་བལྟའོ། །འོད་ [130a.7]སྲུང་འདི་ལྟ་སྟེ། དཔེར་ན་སོ་མ་བཏང་བའི་སྣོད་རྣམས་ལ་ནི་རྫ་མཁན་གྱིས་མེ་ཆེན་པོ་བཏང་དགོས་སོ། །འོད་སྲུང་དེ་བཞིན་དུ་ཤེས་རབ་མ་སྨིན་པའི་སེམས་ཅན་རྣམས་ལ་ཡང་བྱང་ཆུབ་སེམས་དཔས་སངས་རྒྱས་ཀྱི་ཆོས་ཀྱི་མེ་ཆེན་པོ་བཏང་དགོས་པར་བལྟའོ། །འོད་སྲུང་ [130b] [130b.1]དེ་ལྟ་བས་ན་བྱང་ཆུབ་སེམས་དཔའ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལ་སློབ་པར་འདོད་པས་ཚུལ་བཞིན་དུ་ཆོས་ལ་རབ་ཏུ་སྦྱར་བར་བྱའོ། །འོད་སྲུང་དེ་ལ་བྱང་ཆུབ་སེམས་དཔའི་ཚུལ་བཞིན་དུ་ཆོས་ལ་རབ་ཏུ་སྦྱོར་བ་གང་ཞེ་ན། འདི་ལྟ་སྟེ་དབུ་མའི་ [130b.2]ལམ་ཆོས་རྣམས་ལ་ཡང་དག་པར་སོ་སོར་རྟོག་པའོ། །འོད་སྲུང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་གང་ཞེ་ན། འོད་སྲུང་གང་ལ་བདག་མེད་པར་སོ་སོར་རྟོག་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། སྐྱེས་ [130b.3]བུ་མེད་པ་དང་། གང་ཟག་མེད་པ་དང་། ཤེད་ལས་སྐྱེས་མེད་པ་དང་། ཤེད་བུ་མེད་པར་སོ་སོར་རྟོག་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་གཞན་ཡང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་ [130b.4]རྟོག་པ་ནི་གང་གཟུགས་ལ་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་དང་། འོད་སྲུང་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་གང་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་སྟེ། [130b.5]འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་གཞན་ཡང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ནི་གང་སའི་ཁམས་ལ་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་དང་། དེ་བཞིན་ [130b.6]དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ལ་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་ [130b.7]པ་ཞེས་བྱའོ། །འོད་སྲུང་གཞན་ཡང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོགས་པ་ནི་གང་མིག་གི་སྐྱེ་མཆེད་ལ་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་དང་། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་སྐྱེ་མཆེད་ [131a] [131a.1]རྣམས་ལ་རྟག་པར་ཡང་སོ་སོར་མི་རྟོག །མི་རྟག་པར་ཡང་སོ་སོར་མི་རྟོག་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་རྟག་ཅེས་བྱ་བ་འདི་ནི་མཐའ་གཅིག་གོ །མི་རྟག་ཅེས་བྱ་བ་འདི་ནི་མཐའ་གཉིས་སོ། ། [131a.2]མཐའ་དེ་གཉིས་ཀྱི་དབུས་གང་ཡིན་པ་དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་བདག་ཅེས་ [131a.3]བྱ་བ་དེ་ནི་མཐའ་གཅིག་གོ །བདག་མེད་ཅེས་བྱ་བ་དེ་ནི་མཐའ་གཉིས་སོ། །མཐའ་དེ་གཉིས་ཀྱི་དབུས་གང་ཡིན་པ་དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ [131a.4]ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་སེམས་ཡང་དག་པ་ཞེས་བྱ་བ་འདི་ནི་མཐའ་གཅིག་གོ །སེམས་ཡང་དག་པ་མ་ཡིན་པ་ཞེས་བྱ་བ་དེ་ནི་མཐའ་གཉིས་སོ། །འོད་སྲུང་གང་ན་སེམས་མེད་པ་དང་། སེམས་པ་མེད་པ་དང་། ཡིད་མེད་པ་དང་། རྣམ་པར་ [131a.5]ཤེས་པ་མེད་པ་འདི་ནི་འོད་སྲུང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །དགེ་བ་དང་། མི་དགེ་བ་རྣམས་དང་། འཇིག་རྟེན་པ་དང་། འཇིག་རྟེན་ལས་འདས་པ་རྣམས་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་རྣམས་དང་། [131a.6]ཟག་པ་དང་བཅས་པ་དང་། ཟག་པ་མེད་པ་རྣམས་དང་། འདུས་བྱས་དང་། འདུས་མ་བྱས་ཀྱི་ཆོས་ཐམས་ཅད་ཀྱང་དེ་བཞིན་ནོ། །འོད་སྲུང་ཀུན་ནས་ཉོན་མོངས་པ་ཞེས་བྱ་བ་དེ་ནི་མཐའ་གཅིག་གོ །རྣམ་པར་བྱང་བ་ཞེས་བྱ་བ་དེ་ནི་མཐའ་གཉིས་སོ། །མཐའ་དེ་གཉིས་ [131a.7]ཁས་མི་ལེན་ཅིང་མི་རྗོད་མི་སྨྲ་བ་གང་ཡིན་པ་དེ་ནི་འོད་སྲུང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་ཡོད་ཅེས་བྱ་བ་དེ་ནི་མཐའ་གཅིག་གོ །མེད་ཅེས་བྱ་བ་དེ་ནི་མཐའ་གཉིས་སོ། །དེ་གཉིས་ཀྱི་དབུས་གང་ཡིན་པ་དེ་ནི་དཔྱད་དུ་མེད་པ། བསྟན་ [131b] [131b.1]དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །འོད་སྲུང་འཁོར་བ་ཞེས་བྱ་བ་དེ་ནི་མཐའ་གཅིག་གོ །མྱ་ངན་ལས་འདས་པ་ཞེས་བྱ་བ་དེ་ནི་ [131b.2]མཐའ་གཉིས་སོ། །དེ་གཉིས་ཀྱི་དབུས་གང་ཡིན་པ་དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། ། [131b.3]འོད་སྲུང་གང་ཡང་ངས་ཁྱེད་རྣམས་ལ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་ [131b.4]གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ [131b.5]འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འབྱུང་བར་འགྱུར་རོ། །མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་ [131b.6]སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་ [131b.7]འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འགག་པར་འགྱུར་རོ། །ཞེས་བསྟན་པ་དེ་ལ་འོད་སྲུང་རིག་པ་དང་མ་རིག་པ་དེ་དག་ [132a] [132a.1]གཉིས་མ་ཡིན་ཞིང་རྣམ་པ་གཉིས་སུ་དབྱེར་མེད་དེ། འོད་སྲུང་འདི་ལ་ཤེས་པ་གང་ཡིན་པ་དེ་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །དེ་བཞིན་དུ་འདུ་བྱེད་རྣམས་དང་། འདུས་མ་བྱས་དང་། རྣམ་པར་ཤེས་པ་དང་། རྣམ་པར་ [132a.2]ཤེས་པ་འགག་པ་དང་། མིང་དང་། གཟུགས་དང་། མིང་དང་གཟུགས་འགག་པ་དང་། སྐྱེ་མཆེད་དྲུག་དང་། སྐྱེ་མཆེད་དྲུག་འགག་པ་དང་། རེག་པ་དང་། རེག་པ་འགག་པ་དང་། ཚོར་བ་དང་། ཚོར་བ་འགག་པ་དང་། སྲེད་པ་དང་། སྲེད་པ་འགག་པ་དང་། ལེན་ [132a.3]པ་དང་། ལེན་པ་འགག་པ་དང་། སྲིད་པ་དང་། སྲིད་པ་འགག་པ་དང་། སྐྱེ་བ་དང་། སྐྱེ་བ་འགག་པ་དང་། རྒ་ཤི་དང་། རྒ་ཤི་འགག་པ་དེ་དག་གཉིས་མ་ཡིན་ཞིང་རྣམ་པ་གཉིས་སུ་དབྱེར་མེད་དེ། འོད་སྲུང་འདི་ལ་ཤེས་པ་གང་ཡིན་པ་དེ་ནི་དབུ་མའི་ལམ་ཆོས་རྣམས་ལ་ཡང་དག་པར་ [132a.4]སོ་སོར་རྟོགས་པ་ཞེས་བྱའོ། །འོད་སྲུང་གཞན་ཡང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ནི་གང་སྟོང་པ་ཉིད་ཀྱིས་ཆོས་རྣམས་སྟོང་པར་མི་བྱེད་དེ། ཆོས་རྣམས་ཉིད་སྟོང་པ་དང་། གང་མཚན་མ་མེད་པས་ཆོས་རྣམས་མཚན་མ་མེད་པར་མི་བྱེད་དེ་ཆོས་རྣམས་ཉིད་མཚན་ [132a.5]མ་མེད་པ་དང་། གང་སྨོན་པ་མེད་པས་ཆོས་རྣམས་སྨོན་པ་མེད་པར་མི་བྱེད་དེ་ཆོས་རྣམས་ཉིད་སྨོན་པ་མེད་པ་དང་། གང་མངོན་པར་འདུ་བྱེད་པ་མེད་པས་ཆོས་རྣམས་མངོན་པར་འདུ་བྱེད་པ་མེད་པར་མི་བྱེད་དེ། ཆོས་རྣམས་ཉིད་མངོན་པར་འདུ་མི་བྱེད་པ་དང་། གང་མ་སྐྱེས་པས་ཆོས་ [132a.6]རྣམས་མ་སྐྱེས་པར་མི་བྱེད་དེ། ཆོས་རྣམས་ཉིད་མ་སྐྱེས་པ་དང་། གང་མ་བྱུང་བས་ཆོས་རྣམས་མ་བྱུང་བར་མི་བྱེད་དེ། ཆོས་རྣམས་ཉིད་མ་བྱུང་བ་དང་། གང་ངོ་བོ་ཉིད་མེད་པས་ཆོས་རྣམས་ངོ་བོ་ཉིད་མེད་པར་མི་བྱེད་དེ། ཆོས་རྣམས་ཉིད་ངོ་བོ་ཉིད་མེད་པར་གང་དག་དེ་ལྟར་སོ་ [132a.7]སོར་རྟོག་པ་དེ་ནི་འོད་སྲུང་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་ཞེས་བྱའོ། །ཡང་འོད་སྲུང་གང་ཟག་རྣམ་པར་གཞིག་པའི་ཕྱིར་སྟོང་པ་ཉིད་མ་ཡིན་གྱི་སྟོང་པ་ཉིད་སྟོང་པའོ། །འོད་སྲུང་སྔོན་གྱི་མཐའ་སྟོང་པ་ཕྱི་མའི་མཐའ་སྟོང་པ། ད་ལྟར་བྱུང་བ་སྟོང་པ་སྟེ། སྟོང་ [132b] [132b.1]པ་ཉིད་ལ་རྟོན་པར་བྱའི་གང་ཟག་ལ་མ་ཡིན་ནོ། །འོད་སྲུང་གང་ཟག་སྟོང་པ་ཉིད་དུ་དམིགས་པས་སྟོང་པ་ཉིད་ལ་རྟོན་པ་དེ་དག་ནི་ངས་གསུང་རབ་འདི་ལས་ཉམས་རབ་ཏུ་ཉམས་ཞེས་བཤད་དོ། །འོད་སྲུང་གང་ཟག་ཏུ་ལྟ་བ་རི་རབ་ཙམ་ལ་གནས་པ་སླའི། མངོན་པའི་ང་རྒྱལ་ཅན་ [132b.2]སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། འོད་སྲུང་ལྟ་བར་གྱུར་པ་ཐམས་ཅད་ལས་འབྱུང་བ་ནི་སྟོང་པ་ཉིད་ཡིན་ན། འོད་སྲུང་གང་སྟོང་པ་ཉིད་ཁོ་ནར་ལྟ་བ་དེ་ནི་གསོར་མི་རུང་ངོ་ཞེས་ངས་བཤད་དོ། །འོད་སྲུང་འདི་ལྟ་སྟེ། དཔེར་ན་མི་ནད་པ་ཞིག་ཡོད་ན་སྨན་ [132b.3]པས་ད་ལ་སྨན་བཏང་ནས་སྨན་དེས་དེའི་ནད་ཐམས་ཅད་བསྐྱོད་དེ་སྨན་ལྟོ་ན་འདུག་པ་དེ་ཉིད་མི་འབྱུང་ན། འོད་སྲུང་འདི་ཇི་སྙམ་དུ་སེམས། མི་དེ་ནད་དེ་ལས་ཐར་བར་འགྱུར་རམ། གསོལ་པ། བཅོམ་ལྡན་འདས་དེ་ནི་མི་འགྱུར་ལགས་ཏེ། གང་སྨན་དེས་ནད་ཐམས་ཅད་བསྐྱོད་ནས་ [132b.4]སྨན་ལྟོར་མཆིས་པ་ཉིད་མ་བྱུང་ན་མི་དེའི་བྲོ་ནད་ཤིན་ཏུ་ཚབས་ཆེ་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ལྟ་བར་གྱུར་པ་ཐམས་ཅད་ལས་འབྱུང་བ་ནི་སྟོང་པ་ཉིད་ཡིན་ན་འོད་སྲུང་གང་སྟོང་པ་ཉིད་ཁོ་ནར་ལྟ་བ་དེ་ནི་གསོར་མི་རུང་ངོ་ཞེས་ངས་བཤད་ [132b.5]དོ། །དེ་ལ་འདི་སྐད་ཅེས་བྱ་སྟེ། དཔེར་ན་སྨན་པས་ནད་ནི་བསལ་བའི་ཕྱིར། །མི་ཞིག་ལ་ནི་བཀྲུ་སྨན་བཏང་བ་ལས། །ནད་རྣམས་བསྐྱོད་ནས་འཁྲུས་པར་མ་གྱུར་ན། །དེ་ཡི་གཞི་ལས་ནད་ནི་སོས་མི་འགྱུར། །དེ་བཞིན་ལྟ་བ་ཐིབས་པོར་གནས་པ་ལས། །འབྱུང་བའི་མཆོག་ [132b.6]ནི་སྟོང་པ་ཉིད་ཡིན་ན། །གང་ཞིག་སྟོང་པ་ཁོ་ནར་ལྟ་གྱུར་པ། །དེ་ནི་གསོར་མི་རུང་ཞེས་རྒྱལ་བས་གསུངས། །འོད་སྲུང་འདི་ལྟ་སྟེ་དཔེར་ན་མི་ལ་ལ་ཞིག་ནམ་མཁས་འཇིགས་སྐྲག་ནས་བྲང་རྡུང་ཞིང་ངུ་སྟེ། ནམ་མཁའ་འདི་སོལ། ནམ་མཁའ་འདི་སོལ་ཞེས་དེ་སྐད་ཅེས་ཟེར་ན་འོད་ [132b.7]སྲུང་འདི་ཇི་སྙམ་དུ་སེམས། ནམ་མཁའ་དེ་བསལ་བར་ནུས་སམ། གསོལ་པ། བཅོམ་ལྡན་འདས་དེ་ནི་རྔོ་མི་ཐོག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་དགེ་སྦྱོང་དང་། བྲམ་ཟེ་གང་དག་སྟོང་པ་ཉིད་ཀྱིས་སྐྲག །རབ་ཏུ་སྐྲག་ན་དེ་ [133a] [133a.1]དེ་དག་ནི་སེམས་འཁྲུགས་པ་ཆེན་པོར་འགྱུར་རོ། །ཞེས་ངས་བཤད་དོ། །དེ་ཅིའི་ཕྱིར་ཞེ་ན། འོད་སྲུང་དེ་དག་ནི་སྟོང་པ་ཉིད་ལ་སྤྱོད་ལ་དེ་ཉིད་ཀྱིས་སྐྲག་པའི་ཕྱིར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་ནམ་མཁས་འཇིགས་པས་ཉེན་པའི་ [133a.2]མི། །བླུན་པོ་ནམ་མཁའ་འདི་ནི་སོལ་ཞེས་ཟེར། །ནམ་མཁའ་བསལ་བར་ནུས་པ་མ་ཡིན་ཡང་། །རྨོངས་པས་བྱིས་པ་དག་ནི་དེ་སྐད་སྨྲ། །དེ་བཞིན་དགེ་སྦྱོང་བྲམ་ཟེ་གང་དག་ཅིག །སྟོང་པ་ཉིད་ཀྱིས་སྐྲག་ཅིང་སེམས་འཁྲུགས་པ། །བྱིས་པ་དེ་དག་སྟོང་པ་ཉིད་ [133a.3]སྤྱོད་པ། །སྟོང་པ་ཉིད་ནི་གང་དུ་འང་གཞིག་མི་ནུས། །འོད་སྲུང་འདི་ལྟ་སྟེ་དཔེར་ན་རི་མོ་མཁན་ཞིག་གིས་བདག་ཉིད་ཀྱི་གནོད་སྦྱིན་གྱི་གཟུགས་འཇིགས་འཇིགས་ལྟ་ཞིག་བྲིས་ནས་དེ་འཇིགས་སྐྲག་སྟེ་ཁས་བུབ་དུ་འགྱེལ་ནས་བརྒྱལ་བར་གྱུར་པ་དེ་བཞིན་དུ་འོད་སྲུང་བྱིས་པ་སོ་སོའི་སྐྱེ་བོ་རྣམས་ཀྱང་ [133a.4]བདག་ཉིད་ཀྱིས་བྱས་པའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་འཁོར་བ་ན་འཁོར་ཡང་ཆོས་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་རི་མོ་མཁན་ཞིག་གིས། །གནོད་སྦྱིན་འཇིགས་པའི་ [133a.5]གཟུགས་བྱས་ནས། །དེ་ཡིས་འཇིགས་ཏེ་ཁས་བུབ་ཏུ། །འགྱེལ་ནས་བརྒྱལ་བར་གྱུར་པ་ལྟར། །བྱིས་པ་སོ་སོའི་སྐྱེ་བོ་ཀུན། །བདག་ཉིད་ཀྱིས་ནི་བྱས་པ་ཡི། །གཟུགས་སྒྲ་ལ་སོགས་རྨོངས་གྱུར་པས། །འགྲོ་བ་དྲུག་ཏུ་འཁྱམ་པར་གྱུར། །འོད་སྲུང་འདི་ལྟ་ [133a.6]སྟེ། དཔེར་ན་མི་སྒྱུ་མ་མཁན་ཞིག་གིས་སྒྱུ་མ་སྤྲུལ་པ་སྤྲུལ་ནས་སྤྲུལ་པ་དེས་སྒྱུ་མ་མཁན་དེ་ཉིད་ཟོས་པ་དེ་བཞིན་དུ་འོད་སྲུང་དགེ་སློང་རྣལ་འབྱོར་སྤྱོད་པ་ཡང་གང་དང་གང་ཡིད་ལ་བྱེད་པ་དེ་ཐམས་ཅད་དེ་ལ་གསོག་ཏུ་སྣང་ངོ་། །གསོབ་དང་། སྟོང་པ་དང་། སྙིང་པོ་མེད་པ་ཉིད་དུ་སྣང་ངོ་། །དེ་ [133a.7]ལ་འདི་སྐད་ཅེས་བྱ་སྟེ། དཔེར་ན་སྒྱུ་མ་མཁན་གྱིས་མངོན་སྤྲུལ་པ། །སྒྱུ་མ་བྱས་པ་དེ་ཡིས་དེ་ཟོས་ལྟར། །རྣལ་འབྱོར་པས་ནི་ཡིད་ལ་གང་བྱེད་པ། །དེ་ནི་དེ་ལ་གསོག་དང་གསོབ་ཏུ་སྣང་། །འོད་སྲུང་འདི་ལྟ་སྟེ། དཔེར་ན་ཤིང་གཉིས་རླུང་གིས་དྲུད་པ། དེ་ལས་མེ་བྱུང་ [133b] [133b.1](སྟ་,སྟེ་)། བྱུང་ནས་ཤིང་དེ་གཉིས་སྲེག་པ་དེ་བཞིན་དུ་འོད་སྲུང་ཡང་དག་པར་སོ་སོར་རྟོག་པ་ཡོད་ན་འཕགས་པ་ཤེས་རབ་ཀྱི་དབང་པོ་སྐྱེ་སྟེ། དེ་སྐྱེས་པས་ཡང་དག་པར་སོ་སོར་རྟོག་པ་དེ་ཉིད་སྲེག་པར་བྱེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་ཤིང་གཉིས་རླུང་གིས་དྲུད་པ་ [133b.2]ལས། །མེ་བྱུང་ནས་ནི་དེ་ཉིད་སྲེག་པར་བྱེད། །དེ་བཞིན་ཤེས་རབ་དབང་པོ་སྐྱེས་ནས་ཀྱང་། །སོ་སོར་རྟོག་པ་དེ་ཉིད་སྲེག་པར་བྱེད། །འོད་སྲུང་འདི་ལྟ་སྟེ་དཔེར་ན། མར་མེ་བུས་ན་མུན་པ་མུན་གནག་ཐམས་ཅད་མེད་པར་འགྱུར་ཡང་མུན་པ་མུན་གནག་དེ་གང་ནས་ཀྱང་འོང་བ་འམ་ [133b.3]འགྲོ་བ་མེད་དེ་ཤར་ཕྱོགས་དང་། ལྷོ་དང་། ནུབ་དང་། བྱང་ཕྱོགས་སུ་ཡང་འགྲོ་བ་འམ་འོང་བ་མེད་དོ། །ཡང་འོད་སྲུང་མར་མེ་དེ་འདི་སྙམ་དུ་བདག་གིས་མུན་པ་མུན་གནག་བསལ་ལོ་སྙམ་དུ་མི་སེམས་མོད་ཀྱི་འོན་ཀྱང་མར་མེ་ལ་བརྟེན་ནས་མུན་པ་མུན་གནག་མེད་པར་འགྱུར་རོ། ། [133b.4]འོད་སྲུང་དེ་ལ་མར་མེ་གང་ཡིན་པ་དང་། མུན་པ་མུན་གནག་གང་ཡིན་པ་དེ་གཉི་ག་སྟོང་པ་སྟེ། གཟུང་དུ་མེད་ཅིང་བྱེད་པ་མེད་དོ། །འོད་སྲུང་དེ་བཞིན་དུ་ཡེ་ཤེས་སྐྱེས་ན་མི་ཤེས་པ་མེད་པར་འགྱུར་ཡང་མི་ཤེས་པ་དེ་གང་ནས་ཀྱང་འོང་བ་འམ་འགྲོ་བ་མེད་དེ། ཤར་ཕྱོགས་དང་། [133b.5]ལྷོ་དང་། ནུབ་དང་། བྱང་ཕྱོགས་སུ་ཡང་འགྲོ་བའམ་འོང་བ་མེད་དོ། །ཡང་འོད་སྲུང་ཡེ་ཤེས་ཀྱང་འདི་སྙམ་དུ་བདག་གིས་མི་ཤེས་པ་བསལ་ལོ་སྙམ་དུ་མི་སེམས་མོད་ཀྱི་འོན་ཀྱང་ཡེ་ཤེས་ལ་བརྟེན་ནས་མི་ཤེས་པ་མེད་པར་འགྱུར་རོ། །འོད་སྲུང་དེ་ལ་ཡེ་ཤེས་གང་ཡིན་པ་དང་ [133b.6]མི་ཤེས་པ་གང་ཡིན་པ་དེ་གཉི་ག་སྟོང་པ་སྟེ་གཟུང་དུ་མེད་ཅིང་བྱེད་པ་མེད་དོ། །དེ་ལ་འདི་སྐད་ཅེས་བྱ་སྟེ། དཔེར་ན་སྒྲོན་མས་མུན་པ་མུན་གནག་ཀུན། །མེད་པར་གྱུར་ཀྱང་འོང་བ་འམ་འགྲོ་བ་མེད། །དེ་བཞིན་ཤེས་བྱུང་མི་ཤེས་མེད་འགྱུར་ཡང་། །དེ་ནི་གང་ནས་འོང་བ་ [133b.7]འམ་འགྲོ་བ་མེད། །སྒྲོན་མས་མུན་པ་བསལ་སྙམ་མི་སེམས་ཀྱང་། །སྣང་བ་བྱུང་ནས་མུན་པ་མེད་པར་འགྱུར། །སྟོང་པ་གཟུང་མེད་ནམ་མཁའི་མེ་ཏོག་འདྲ། །དེ་བཞིན་ཡེ་ཤེས་མི་ཤེས་གཉི་ག་སྟོང་། །འོད་སྲུང་འདི་ལྟ་སྟེ། དཔེར་ན་ཁྱིམ་དང་། ཁང་པ་དང་། ཁང་ཕྲན་ [134a] [134a.1]ལོ་འབུམ་འདས་པར་སུས་ཀྱང་ལན་འགའ་ཡང་མར་མེ་མ་བུས་པ་དེར་མི་ལ་ལ་ཞིག་གིས་མར་མེ་བུས་ན་འོད་སྲུང་འདི་ཇི་སྙམ་དུ་སེམས། མུན་པ་མུན་གནག་དེ་འདི་སྙམ་དུ་བདག་ནི་ལོ་འབུམ་དུ་བསགས་པ་ཡིན་ཏེ། བདག་འདི་ནས་མི་འགྲོའོ་སྙམ་དུ་སེམས་ [134a.2]སམ། གསོལ་པ་བཅོམ་ལྡན་འདས་དེ་ནི་མི་སེམས་ལགས་ཏེ། མར་མེ་བུས་ན་མུན་པ་མུན་གནག་ལ་མི་འཆི་བའི་མཐུ་མ་མཆིས་ཀྱི་གདོན་མི་འཚལ་བར་མ་མཆིས་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ལས་དང་ཉོན་མོངས་པ་བསྐལ་ [134a.3]པ་འབུམ་དུ་བསགས་པ་ཡང་ཚུལ་བཞིན་དུ་ཡིད་ལ་བྱེད་པའི་སོ་སོར་རྟོག་པ་གཅིག་གིས་མེད་པར་འགྱུར་རོ། །འོད་སྲུང་མར་མེ་ཞེས་བྱ་བ་དེ་ནི་འཕགས་པའི་ཤེས་རབ་ཀྱི་དབང་པོའི་ཚིག་{བླ་དགས་,བླ་དྭགས་}སོ། །འོད་སྲུང་མུན་པ་མུན་གནག་ཅེས་བྱ་བ་དེ་ནི་འཕགས་པ་མ་ཡིན་པའི་ལས་དང་ཉོན་ [134a.4]མོངས་པའི་ཚིག་{བླ་དགས་,བླ་དྭགས་}སོ། །དེ་ལ་འདི་སྐད་ཅེས་བྱ་སྟེ། དཔེར་ན་ཁྱིམ་དུ་མི་འགའ་ལ་ལ་ཡིས། །རིང་ཞིག་ལོན་ནས་མར་མེ་བུས་བྱས་ན། །དེ་ལ་མུན་པ་བདག་གནས་རིང་ལོན་གྱིས། །འདི་ནས་མི་འགྲོ་སྙམ་དུ་སེམས་པ་མེད། །མར་མེ་ཕྱུང་ན་མུན་པ་མུན་གནག་ལ། ། [134a.5]མེད་པར་མི་འགྱུར་བ་ཡི་ནུས་མེད་དེ། །མར་མེ་བརྟེན་ནས་མུན་པ་མེད་པར་འགྱུར། །གཉི་ག་སྟོང་བ་རློམ་སེམས་ཅི་ཡང་མེད། །དེ་བཞིན་ཟག་མེད་འཕགས་པའི་ཡེ་ཤེས་བརྟེན། །མི་ཤེས་ཉོན་མོངས་བསགས་པ་མེད་པར་འགྱུར། །ཡེ་ཤེས་དང་ནི་ཉོན་མོངས་རྟག་ [134a.6]པར་ཡང་། །དེ་དག་ལན་འགའ་ཙམ་ཡང་འགྲོགས་པ་མེད། །ཡེ་ཤེས་མི་ཤེས་མེད་བྱ་མི་སེམས་ཀྱང་། །ཡེ་ཤེས་བརྟེན་ནས་མི་ཤེས་མེད་པར་འགྱུར། །གཉི་ག་གཟུང་མེད་ནམ་མཁའི་མེ་ཏོག་བཞིན། །དེ་བཞིན་ཡེ་ཤེས་མི་ཤེས་གཉི་ག་སྟོང་། །འོད་སྲུང་འདི་ལྟ་ [134a.7]སྟེ། དཔེར་ན་ནམ་མཁའ་ལ་ནི་ས་བོན་རྣམས་མི་སྐྱེའོ། །འོད་སྲུང་དེ་བཞིན་དུ་གང་འདུས་མ་བྱས་ལས་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེ་བ་ནི་མ་བྱུང་མི་འབྱུང་ངོ་། །དེ་ལ་འདི་སྐད་ཅེས་བྱ་སྟེ། དཔེར་ན་མཁའ་ལས་ས་བོན་སྐྱེ་བ་ནི། །འདས་དང་ [134b] [134b.1]མ་འོངས་པ་དང་ད་ལྟར་མེད། །དེ་བཞིན་འདུས་མ་བྱས་ལས་སངས་རྒྱས་ཆོས། །སྐྱེ་བ་གང་དུའང་མ་བྱུང་འབྱུང་མི་འགྱུར། །འོད་སྲུང་འདི་ལྟ་སྟེ་དཔེར་ན་ལུད་ཀྱིས་གང་བའི་ས་ལ་ནི་ས་བོན་ཐམས་ཅད་སྐྱེའོ། །འོད་སྲུང་དེ་བཞིན་དུ་ཉོན་མོངས་པའི་ལུད་ཀྱིས་གང་བའི་འཇིག་ [134b.2]རྟེན་གནས་པ་ལས་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལུད་བཅས་རླན་དང་བཅས་པ་ལ། །ས་བོན་སྐྱེ་ཡི་དགོན་དུང་རྣམས་ལ་མིན། །དེ་བཞིན་ཉོན་མོངས་ལོག་ལྡན་སྐྱེ་བོ་ལ། །རྒྱལ་སྲས་རྣམས་ཀྱི་རྒྱལ་བའི་ [134b.3]ཆོས་རྣམས་སྐྱེ། །འོད་སྲུང་འདི་ལྟ་སྟེ། དཔེར་ན་འབྲོག་དགོན་པ་དགོན་དུང་རྣམས་ན་ནི་པད་མ་མི་སྐྱེའོ། །འོད་སྲུང་དེ་བཞིན་དུ་གང་འདུས་མ་བྱས་ལ་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེ་བ་ནི་མ་བྱུང་མི་འབྱུང་ངོ་། །དེ་ལ་འདི་སྐད་ཅེས་བྱ་སྟེ། དཔེར་ན་པད་ [134b.4]མ་ཆུ་རྫིང་རྣམས་ན་སྐྱེ། །དགོན་དུང་དག་ན་ནམས་ཀྱང་སྐྱེ་མི་འགྱུར། །དེ་བཞིན་འདུས་མ་བྱས་ལ་སངས་རྒྱས་ཆོས། །སྐྱེ་བ་གང་དུའང་མ་བྱུང་འབྱུང་མི་འགྱུར། །འོད་སྲུང་འདི་ལྟ་སྟེ། དཔེར་ན་ལུད་ཡོད་པའི་འདམ་རྫབ་ནས་པད་མ་སྐྱེའོ། །འོད་སྲུང་དེ་བཞིན་དུ་ཉོན་མོངས་ [134b.5]པའི་ལུད་ཡོད་པའི་འདམ་རྫབ་ལོག་པ་ཉིད་དུ་ངེས་པའི་སེམས་ཅན་རྣམས་ལ་བྱང་ཆུབ་སེམས་དཔའི་སངས་རྒྱས་ཀྱི་ཆོས་རྣམས་སྐྱེའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལུད་བཅས་འདམ་རྫབ་ཆུ་ལས་ནི། །པད་མ་སྐྱེ་ཡི་ཐང་ལས་ནམ་ཡང་མིན། །དེ་བཞིན་ཉོན་མོངས་ལོག་ལྡན་ [134b.6]སྐྱེ་བོ་ལ། །རྒྱལ་སྲས་རྣམས་ཀྱི་རྒྱལ་བའི་ཆོས་རྣམས་སྐྱེ། །འོད་སྲུང་འདི་ལྟ་སྟེ་དཔེར་ན་རྒྱ་མཚོ་ཆེན་པོ་བཞི་མར་སར་གྱིས་ཡོངས་སུ་གང་བར་གྱུར་པ་དེ་བཞིན་དུ་བྱང་ཆུབ་སེམས་དཔའི་དགེ་བའི་རྩ་བ་མངོན་པར་འདུས་བྱས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ [134b.7]རྒྱ་མཚོ་བཞི་པོ་མར་སར་གྱིས། །ཡོངས་གང་གཙང་ཞིང་ཀུན་ནས་ཡིད་དུ་འོང་། །དེ་བཞིན་བྱང་ཆུབ་སེམས་དཔའ་བདེ་གཤེགས་སྲས། །དགེ་བའི་རླུང་གིས་རྟག་ཏུ་གང་བར་བལྟ། །འོད་སྲུང་འདི་ལྟ་སྟེ། དཔེར་ན་མི་ལ་ལ་ཞིག་གིས་སྐྲ་ཚལ་པ་བརྒྱར་གཤགས་པའི་རྩེ་མོས་ [135a] [135a.1]རྒྱ་མཚོ་ཆེན་པོ་བཞི་ལས། ཆུ་ཐིགས་པ་གཅིག་བླངས་པ་དེ་བཞིན་དུ་འོད་སྲུང་ཉན་ཐོས་ཀྱི་དགེ་བའི་རྩ་བ་མངོན་པར་འདུས་བྱས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཆུ་ཡི་ཕུང་པོ་དེ་ལས་ནི། །སྐྲ་ཚལ་བརྒྱ་ཡི་རྩེ་མོས་ཐིགས་བླངས་ [135a.2]པ། །དེ་བཞིན་ཉན་ཐོས་རྣམས་ཀྱིས་དགེ་བྱས་པའི། །དགེ་བ་དག་དང་ལྡན་པར་བལྟ་བར་བྱ། །འོད་སྲུང་འདི་ལྟ་སྟེ། དཔེར་ན་ཡུངས་འབྲུ་སྲིན་བུས་ཟོས་པའི་ནང་གི་ནམ་མཁའ་བཞིན་དུ་ཉན་ཐོས་ཀྱི་འདུས་མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ [135a.3]ན་ཡུངས་འབྲུ་སྲིན་བུས་ཟོས་པ་ཡི། །ནང་གི་ནམ་མཁའ་དེ་ནི་ཆུང་བ་ཡིན། །ཉན་ཐོས་འདུས་མ་བྱས་པ་ཤེས་པ་ཡང་། །དེ་བཞིན་ཆུང་ཞིང་ཤིན་ཏུ་ཆུང་བར་བལྟ། འོད་སྲུང་འདི་ལྟ་སྟེ། དཔེར་ན་ཕྱོགས་བཅུའི་ནམ་མཁའི་ཁམས་བཞིན་དུ་བྱང་ཆུབ་སེམས་དཔའི་འདུས་ [135a.4]མ་བྱས་ཤེས་པ་བལྟ་བར་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་ཕྱོགས་བཅུའི་འཇིག་རྟེན་ཐམས་ཅད་ན། །ནམ་མཁའི་ཁམས་ནི་སྒྲིབ་པ་མེད་པར་འདུག །བྱང་ཆུབ་སེམས་དཔའི་འདུས་མ་བྱས་ཤེས་པ། །འགྲོ་བ་ཀུན་གྱི་མཆོག་ཀྱང་དེ་ལྟར་བལྟའོ། །འོད་སྲུང་འདི་ [135a.5]ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བཙུན་མོ་དམ་པ་སྐྱེས་པ། དབུལ་པོ་དང་ཉལ་ནས་ཕྱིས་དེ་ལ་བུ་བྱུང་བར་གྱུར་ན། འོད་སྲུང་འདི་ཇི་སྙམ་དུ་སེམས། དེ་རྒྱལ་པོའི་བུ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མི་འགྱུར་ལགས་སོ། །བཅོམ་ལྡན་ [135a.6]འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ངའི་ཉན་ཐོས་རྣམས་ཆོས་ཀྱི་དབྱིངས་ལས་སྐྱེས་མོད་ཀྱི། དེ་དག་དེ་བཞིན་གཤེགས་པའི་སྲས་དབང་བསྐུར་བའི་འོས་ཞེས་མི་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་པོའི་བཙུན་མོ་ཡིད་འོང་བ། །སྐྱེས་པ་དབུལ་པོ་དང་ [135a.7]ནི་ཉལ་གྱུར་ཏེ། །དེ་ཕྱིར་དེ་ལ་བུ་བྱུང་གང་ཡིན་པ། །དེ་ནི་རྒྱལ་པོའི་བུ་མིན་དབང་བསྐུར་མིན། །དེ་བཞིན་ཉན་ཐོས་འདོད་ཆགས་བྲལ་གྱུར་པ། །དེ་དག་ང་བུ་དབང་བསྐུར་འོས་མ་ཡིན། །དེ་ལྟར་དེ་དག་བདག་ལ་ཕན་ཕྱིར་བརྩོན། །བདག་གཞན་གཉི་གའི་དོན་བྱེད་ [135b] [135b.1]སངས་རྒྱས་སྲས། །འོད་སྲུང་འདི་ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་བྲན་མོ་ངན་པ་དང་ཉལ་བ་དེ་ལས་དེའི་བུ་བྱུང་ན། འོད་སྲུང་དེ་བྲན་མོ་ངན་པ་ལས་བྱུང་དུ་ཟིན་ཀྱང་དེ་ལ་རྒྱལ་པོའི་སྲས་ཞེས་བྱའོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་ [135b.2]དང་པོ་བསྐྱེད་པ་འཁོར་བ་ན་འཁོར་ཞིང་སེམས་ཅན་རྣམས་འདུལ་བའི་མཐུ་མ་ཐོབ་ཏུ་ཟིན་ཀྱང་དེ་ནི་དེ་བཞིན་གཤེགས་པའི་སྲས་ཞེས་བྱའོ། །དེ་ལ་འདི་སྐད་ཅེས་བྱ་སྟེ། དཔེར་ན་འཁོར་ལོས་སྒྱུར་བ་བྲན་མོ་དང་། །ཉལ་བར་གྱུར་པ་དེ་ལས་བུ་བྱུང་བ། །བྲན་མོ་ལས་ནི་བྱུང་བར་ [135b.3]གྱུར་ཀྱང་དེ། །རྒྱལ་པོའི་སྲས་ཞེས་འཇིག་རྟེན་ཟེར་བ་ལྟར། །བྱང་ཆུབ་སེམས་དཔའ་དང་པོ་སེམས་བསྐྱེད་པ། །སྲིད་པ་གསུམ་ན་འཁོར་ཞིང་མཐུ་ཆུང་སྟེ། །སྦྱིན་དང་ཐབས་ཀྱིས་སེམས་ཅན་མི་འདུལ་ཡང་། །སེམས་ཅན་དག་པ་རྒྱལ་བའི་སྲས་ཞེས་བྱ། ། [135b.4]བམ་པོ་གཉིས་པ་སྟེ་ཐ་མ། འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་བུ་གཞོན་ནུ་སྟོབས་ཆེ་ཞིང་མགྱོགས་པའི་ཤུགས་དང་ལྡན་པ་མཐུ་རྙེད་པ་སྟོང་ཡོད་པར་གྱུར་ལ། དེ་དག་གང་ཡང་འཁོར་ལོས་སྒྱུར་བའི་མཚན་དང་མི་ལྡན་ན་ [135b.5]དེ་དག་ལ་འཁོར་ལོས་སྒྱུར་བའི་རྒྱལ་པོའི་སྲས་སུ་འདུ་ཤེས་མི་སྐྱེད་པ་དེ་བཞིན་དུ། འོད་སྲུང་དེ་བཞིན་གཤེགས་པའི་ཞབས་འབྲིང་བ་ཉན་ཐོས་བྱེ་བ་བརྒྱ་སྟོང་དེ་དག་གང་ཡང་བྱང་ཆུབ་སེམས་དཔར་མ་གྱུར་ན་དེ་དག་ལ་དེ་བཞིན་གཤེགས་པའི་སྲས་སུ་འདུ་ཤེས་མི་སྐྱེད་དོ། །དེ་ལ་ [135b.6]འདི་སྐད་ཅེས་བྱ་སྟེ། དཔེར་ན་མི་དབང་རྒྱལ་པོའི་སྲས་སྟོང་པོ། །འགའ་ཡང་བུ་ཡི་མཚན་དང་མི་ལྡན་ན། །དེ་ཕྱིར་དེ་དག་གཅེས་བྱེད་མི་ནུས་པས། །དེ་ལ་མི་མཆོག་བུ་ཡི་འདུ་ཤེས་མེད། །དེ་བཞིན་སངས་རྒྱས་ཞབས་འབྲིང་བྱེ་བ་མང་། །འགའ་ཡང་བྱང་ཆུབ་ [135b.7]སེམས་དཔའ་མ་ཡིན་ན། །དེ་ན་བྱང་ཆུབ་སེམས་དཔའ་འགའ་མེད་ཕྱིར། །དེ་ལ་བདེ་གཤེགས་སྲས་སུ་དགོངས་མི་མཛད། །འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོའི་བཙུན་མོ་དམ་པའི་མངལ་དུ་གཞོན་ནུ་འཁོར་ལོས་སྒྱུར་བའི་མཚན་དང་ལྡན་པ་ཆགས་ [136a] [136a.1]ནས་ཞག་བདུན་ལོན་ཏེ་འབྱུང་བ་ཆེན་པོ་མེར་མེར་པོར་འདུག་ཀྱང་ཤིན་ཏུ་སྟོབས་དང་ལྡན་པས་དེ་ལ་ལྷ་རྣམས་རེ་བ་སྐྱེད་ཀྱི། གཞོན་ནུ་སྟོབས་ཆེ་ལ་མགྱོགས་པའི་ཤུགས་དང་ལྡན་ཞིང་མཐུ་རྙེད་པ་དེ་དག་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་ནི་འཁོར་ལོས་སྒྱུར་བའི་ [136a.2]རིགས་མི་འཆད་པར་གནས་པའི་ཕྱིར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་དབང་པོ་ཡོངས་སུ་མ་སྨིན་པ། ཉོན་མོངས་པའི་འབྱུང་བ་ཆེན་པོ་མེར་མེར་པོར་གྱུར་པ་འཁོར་བ་ན་འཁོར་ཞིང་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་པ་ཡང་ [136a.3]ཤིན་ཏུ་སྟོབས་དང་ལྡན་པས་དེ་ལ་སྔོན་སངས་རྒྱས་མཐོང་བའི་ལྷ་རྣམས་རེ་བ་སྐྱེད་ཀྱི། དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དེ་དག་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་སངས་རྒྱས་ཀྱི་གདུང་མི་འཆད་པར་གནས་པའི་ཕྱིར་རོ། །དེ་ལ་འདི་སྐད་ཅེས་བྱ་ [136a.4]སྟེ། དཔེར་ན་འཁོར་ལོས་སྒྱུར་བའི་བཙུན་མོ་མཆོག །དེ་མངལ་བསོད་ནམས་མཚན་ལྡན་སེམས་ཅན་ཆགས། །སྟོབས་དང་ལྡན་པས་ལྷ་རྣམས་རེ་བ་སྐྱེད། །གཞོན་ནུ་མཐུ་ཐོབ་རྣམས་ལ་མ་ཡིན་ལྟར། །བྱང་ཆུབ་སེམས་དཔའ་རྩེ་གཅིག་སེམས་གནས་ཤིང་། ། [136a.5]འཁོར་བར་གནས་ཏེ་བྱང་ཆུབ་ཚོལ་བྱེད་པ། །དེ་ལ་ལྷ་དང་ཀླུ་རྣམས་རེ་བ་སྐྱེད། །རྣམ་ཐར་བརྒྱད་པོས་བསམ་གཏན་བྱེད་ལ་མིན། །འོད་སྲུང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་བཻདཱུརྱ་གཅིག་གིས་མཆིང་བུའི་ནོར་བུའི་ཕུང་པོ་རི་རབ་ཙམ་ཟིལ་གྱིས་གནོན་ཏོ། །འོད་སྲུང་དེ་ [136a.6]བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པས་ཀྱང་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་ཏོ། །དེ་ལ་འདི་སྐད་ཅེས་བྱ་སྟེ། དཔེར་ན་འོད་གསལ་རིན་ཆེན་བཻདཱུརྱས། །མཆིང་བུའི་ནོར་བུ་མང་པོ་ཟིལ་གྱིས་གནོན། །བྱང་ཆུབ་སེམས་དཔའ་ཐོག་ [136a.7]མར་སེམས་བསྐྱེད་པས། །ཉན་ཐོས་སྟོང་ཡང་དེ་ལྟར་ཟིལ་གྱིས་གནོན། །འོད་སྲུང་འདི་ལྟ་སྟེ། དཔེར་ན་བྱ་ཀ་ལ་པིང་ཀའི་ཕྲུག་གུ་སྒོ་ངའི་སྦུབས་ན་འདུག་པ་མིག་མ་བྱེ་བ་ཡང་འདི་ལྟ་སྟེ། ཟབ་ཅིང་སྙན་པའི་སྒྲ་སྐད་ཀྱིས་བྱའི་ཚོགས་ཐམས་ཅད་ཟིལ་གྱིས་གནོན་ཏོ། །འོད་ [136b] [136b.1]སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་མ་རིག་པའི་སྒོ་ངའི་སྦུབས་ན་འདུག་པ་ལས་དང་ཉོན་མོངས་པའི་མུན་པ་དང་རབ་རིབ་ཀྱི་ལིང་ཏོག་གིས་མིག་ཁེབས་པ་ཡང་འདི་ལྟ་སྟེ། དགེ་བའི་རྩ་བ་ཡོངས་སུ་བསྔོ་བའི་སྦྱོར་བའི་སྒྲ་སྐད་ཀྱིས་ཉན་ཐོས་དང་རང་ [136b.2]སངས་རྒྱས་ཐམས་ཅད་ཟིལ་གྱིས་གནོན་ཏོ། །འོད་སྲུང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོའི་བཙུན་མོ་དམ་པ་ལས་གཞོན་ནུ་འཁོར་ལོས་སྒྱུར་བའི་མཚན་དང་ལྡན་པ་བཙས་མ་ཐག་ཏུ་ཚོང་དཔོན་དང་གྲོང་རྡལ་གྱི་མི་དང་། ཡུལ་གྱི་མི་ཐམས་ཅད་དང་། རྒྱལ་ཕྲན་ཐམས་ [136b.3]ཅད་ཕྱག་འཚལ་བར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་སྐྱེད་པ་ལ་ཡང་ལྷ་དང་བཅས་པའི་འཇིག་རྟེན་ཕྱག་འཚལ་ལོ། །དེ་ལ་འདི་སྐད་ཅེས་བྱ་སྟེ། དཔེར་ན་ས་བདག་ཆེན་པོ་རྒྱལ་པོ་ལ། །མཚན་གྱིས་ལུས་སྤྲས་བུ་ཞིག་ཡོད་གྱུར་ན། ། [136b.4]གཞོན་ནུ་དེ་ནི་བཙས་པར་མཐོང་མ་ཐག །གྲོང་ཁྱེར་མི་དང་རྒྱལ་ཕྲན་ཐམས་ཅད་འདུད། །དེ་བཞིན་བྱང་ཆུབ་སེམས་ནི་བསྐྱེད་མ་ཐག །མཚན་ལྡན་རྒྱལ་བའི་སྲས་པོ་དེ་ལ་ནི། །ལྷ་དང་བཅས་པའི་འཇིག་རྟེན་ཕྱག་འཚལ་ཞིང་། །དང་བའི་སེམས་ཀྱི་ཤིན་ཏུ་གཅེས་ [136b.5]པར་འཛིན། །འོད་སྲུང་འདི་ལྟ་སྟེ་དཔེར་ན་རིའི་རྒྱལ་པོ་གངས་རི་ལ་སྨན་གང་དག་སྐྱེས་པ་དེ་དག་ཐམས་ཅད་ནི་ང་ཡིར་བྱ་བ་མེད། རིས་སུ་བཅད་པ་མེད། རྣམ་པར་རྟོག་པ་མེད་དེ། ནད་གང་ལ་བཏང་ཡང་ནད་དེ་རབ་ཏུ་ཞི་བར་བྱེད་དོ། །འོད་སྲུང་དེ་བཞིན་དུ་བྱང་ཆུབ་ [136b.6]སེམས་དཔའ་ཡེ་ཤེས་ཀྱི་སྨན་གང་ཡང་དག་པར་སྒྲུབ་པ་དེ་ཐམས་ཅད་རྣམ་པར་མི་རྟོག་པར་སྒྲུབ་ཅིང་། སེམས་ཅན་ཐམས་ཅད་ལ་སྙོམས་པའི་སེམས་ཀྱིས་གསོ་བར་རབ་ཏུ་སྦྱོར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་རི་རྒྱལ་གངས་ཀྱི་རི་བོ་ལ། །སྨན་སྐྱེས་དེ་ [136b.7]དག་མི་རྟོག་ངར་འཛིན་མེད། །གང་ལ་བཏང་བ་དེ་ཀུན་ཞི་བར་བྱེད། །ཁ་ཅིག་ནད་དང་རྒ་བ་འང་སེལ་བར་བྱེད། །དེ་བཞིན་རྒྱལ་བའི་སྲས་པོ་ཡེ་ཤེས་སྨན། །ཡང་དག་སྒྲུབ་པ་འང་རྣམ་པར་རྟོག་སྤངས་ནས། །སེམས་ཅན་ཕན་ཕྱིར་ཐམས་ཅད་ཡང་དག་སྒྲུབ། ། [137a] [137a.1]སྙོམས་པའི་སེམས་ཀྱིས་སེམས་ཅན་གསོ་བར་བྱེད། །འོད་སྲུང་འདི་ལྟ་སྟེ་དཔེར་ན་ཟླ་བ་ཚེས་པ་ལ་ཕྱག་འཚལ་བ་ལྟར་ཉ་བ་ལ་ནི་མ་ཡིན་ནོ། །འོད་སྲུང་དེ་བཞིན་དུ་གང་དག་ང་ལ་རབ་ཏུ་དད་པ་དེ་དག་གིས་བྱང་ཆུབ་སེམས་དཔའ་རྣམས་ལ་ཕྱག་བྱའི་དེ་བཞིན་ [137a.2]གཤེགས་པ་རྣམས་ལ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་རྣམས་འབྱུང་ངོ་། །དེ་བཞིན་གཤེགས་པ་ལས་ནི་ཉན་ཐོས་དང་རང་སངས་རྒྱས་ཐམས་ཅད་འབྱུང་ངོ་། །དེ་ལ་འདི་སྐད་ཅེས་བྱ་སྟེ། ཟླ་བ་ཚེས་ལ་ཐམས་ [137a.3]ཅད་ཕྱག་འཚལ་གྱི། །ཟླ་བ་ཉ་ལ་དེ་ལྟར་ཕྱག་མི་འཚལ། །དེ་བཞིན་གང་དག་ང་དད་དེ་དག་གིས། །རྒྱལ་སྲས་བྱང་ཆུབ་སེམས་དཔའ་ཕྱག་འཚོལ་ཅིག །འོད་སྲུང་འདི་ལྟ་སྟེ། དཔེར་ན་ཡི་གེའི་ཕྱི་མོ་རྣམས་ནི་བསྟན་བཅོས་ཐམས་ཅད་འཛིན་པ་ཤེས་པའི་སྔོན་དུ་འགྲོའོ། ། [137a.4]འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ཡང་སངས་རྒྱས་ཀྱི་རྣམ་པར་སྤྲུལ་པ་དང་། བྱིན་གྱི་རླབས་ཐམས་ཅད་འཛིན་པའི་ཡེ་ཤེས་བླ་ན་མེད་པའི་སྔོན་དུ་འགྲོའོ། །འོད་སྲུང་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་བཏང་སྟེ་སུས་ཀྱང་སྐར་མའི་གཟུགས་ [137a.5]ལ་ནམ་ཡང་སྔོན་ཕྱག་མ་བྱས་སོ། །འོད་སྲུང་དེ་བཞིན་དུ་མཁས་པ་རྣམས་ཀྱང་བྱང་ཆུབ་སེམས་དཔའ་བདག་ལ་ཕན་པ་དང་གཞན་ལ་ཕན་པའི་སྙིང་རྗེ་ཆེན་པོ་དང་ལྡན་པ་ངའི་བསླབ་པ་ལ་ཞུགས་པ་བཏང་སྟེ། ཉན་ཐོས་ལ་ནམ་ཡང་ཕྱག་མི་འཚལ་ལོ། །དེ་ལ་འདི་ [137a.6]སྐད་ཅེས་བྱ་སྟེ། སུས་ཀྱང་ཟླ་བ་རྣམ་པར་སྤངས་ནས་སུ། །སྐར་མའི་ཚོགས་ལ་ནམ་ཡང་ཕྱག་མ་བྱས། །དེ་བཞིན་བསླབ་ལ་ཞུགས་པ་ནམ་དུ་ཡང་། །ང་སྲས་བཏང་སྟེ་ཉན་ཐོས་ཕྱག་མི་འཚལ། འོད་སྲུང་འདི་ལྟ་སྟེ་དཔེར་ན་ལྷ་དང་བཅས་པའི་འཇིག་རྟེན་གྱིས་ [137a.7]མཆིང་བུའི་ནོར་བུ་བྱི་དོར་བྱས་ཀྱང་མཆིང་བུའི་ནོར་བུ་ནམ་ཡང་ནོར་བུ་རིན་པོ་ཆེ་བཻདཱུརྱ་མི་འགྱུར་རོ། །འོད་སྲུང་དེ་བཞིན་དུ་ཉན་ཐོས་ཚུལ་ཁྲིམས་དང་། བསླབས་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་དང་། ཏིང་ངེ་འཛིན་ཐམས་ཅད་དང་ལྡན་ཡང་ [137b] [137b.1]བྱང་ཆུབ་ཀྱི་སྙིང་པོ་ལ་འདུག་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནམ་ཡང་མི་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་ལྷ་དང་བཅས་པའི་འཇིག་རྟེན་གྱིས། །མཆིང་བུའི་ནོར་བུ་བྱི་དོར་བྱས་ཀྱང་ནི། །མཆིང་བུ་དག་སྟེ་ [137b.2]བཻདཱུརྱ་མི་འགྱུར། །འདི་འདྲ་དེ་ཉིད་དེའི་རང་བཞིན་ཡིན། །དེ་བཞིན་ཉན་ཐོས་ཁྲིམས་དང་ཐོས་པ་དང་། །བསམ་གཏན་ལྡན་ཞིང་སྦྱངས་པ་ཀུན་ལྡན་ཡང་། །བྱང་ཆུབ་སྙིང་པོར་འདུག་སྟེ་བདུད་བཏུལ་ནས། །བྱང་ཆུབ་རེག་སྟེ་བདེ་གཤེགས་འགྱུར་བ་མེད། ། [137b.3]འོད་སྲུང་འདི་ལྟ་སྟེ། དཔེར་ན་ནོར་བུ་རིན་པོ་ཆེ་བཻདཱུ་རྱ་བྱི་དོར་བྱས་ན་དེ་ཀཱར་ཥ་པཱ་ཎ་བརྒྱ་སྟོང་མང་པོ་འབྱུང་བའི་སྒོར་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའི་ཡོན་ཏན་བྱི་དོར་བྱས་ན་དེ་ཉན་ཐོས་དང་རང་སངས་རྒྱས་བརྒྱ་སྟོང་མང་པོ་འབྱུང་བའི་སྒོར་འགྱུར་རོ། །དེ་ལ་ [137b.4]འདི་སྐད་ཅེས་བྱ་སྟེ། རིན་ཆེན་བཻདཱུརྱ་སྦྱང་བྱས་ན། ཀཱར་ཥ་པཱ་ཎ་མང་པོ་འབྱུང་བར་འགྱུར། །དེ་བཞིན་སངས་རྒྱས་སྲས་ཀྱིས་སྦྱང་བྱས་ན། །ཉན་ཐོས་མང་པོ་འབྱུང་བའི་སྒོར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་ [137b.5]སྩལ་པ། འོད་སྲུང་ཡུལ་གང་དུ་སྲིན་བུ་རྔ་མོ་དུད་ཀ་ཞེས་བྱ་བ་མགོ་ནག་གན་རྐྱལ་དུ་ཉལ་བ་བྱུང་ན་ཡུལ་དེ་འཇིགས་པ་དང་བཅས། འཚེ་བ་དང་བཅས། ཉེ་བའི་ཉོན་མོངས་པ་དང་བཅས། འཁྲུག་པ་དང་བཅས་པར་འགྱུར་རོ། །འོད་སྲུང་གལ་ཏེ་ཡུལ་དེར་བྱང་ཆུབ་ [137b.6]སེམས་དཔའི་བྱུང་ན་ཡུལ་དེ་འཇིགས་པ་མེད་པ་དང་། འཚེ་བ་མེད་པ་དང་། ཉེ་བའི་ཉོན་མོངས་པ་མེད་པ་དང་། འཁྲུག་པ་མེད་པར་འགྱུར་རོ། །འོད་སྲུང་དེ་ལྟ་བས་ན་བྱང་ཆུབ་སེམས་དཔའ་སེམས་ཅན་གྱི་དོན་ལ་བརྩོན་པར་བྱ་སྟེ། དེས་དགེ་བའི་རྩ་བ་ཐམས་ཅད་ [137b.7]ཡང་དག་པར་བསྒྲུབ་པར་བྱའོ། །དགེ་བའི་རྩ་བ་ཐམས་ཅད་ཡང་དག་པར་བསྒྲུབས་ནས་སེམས་ཅན་ཐམས་ཅད་ལ་གཏང་བར་བྱའོ། །ཡེ་ཤེས་ཀྱི་སྨན་གང་ཚོལ་བ་དེས་ཕྱོགས་བཞིར་སོང་སྟེ་སེམས་ཅན་རྣམས་ལ་ཡང་དག་པའི་གསོ་བ་བྱའོ། །ཡང་དག་པའི་གསོ་བས་ [138a] [138a.1]སེམས་ཅན་རྣམས་གསོ་བར་བྱའོ། །འོད་སྲུང་དེ་ལ་ཡང་དག་པའི་གསོ་བ་གང་ཞེ་ན། འདི་ལྟ་སྟེ། འདོད་ཆགས་ལ་མི་སྡུག་པ་དང་། ཞེ་སྡང་ལ་བྱམས་པ་དང་། གཏི་མུག་ལ་རྟེན་ཅིང་འབྲེལ་པར་འབྱུང་བ་དང་། ལྟ་བར་གྱུར་པ་ཐམས་ཅད་ལ་སྟོང་ [138a.2]པ་ཉིད་དང་། རྟོག་པ་དང་། རྣམ་པར་རྟོག་པ་དང་། མཚན་མའི་དམིགས་པ་ཡིད་ལ་བྱེད་པ་ཐམས་ཅད་ལ་མཚན་མ་མེད་པ་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཐམས་ཅད་ལ་གནས་པ་སྤངས་པའི་ཕྱིར་སྨོན་པ་མེད་ [138a.3]པ་དང་། ཕྱིན་ཅི་ལོག་ཐམས་ཅད་སྤང་བའི་ཕྱིར་ཕྱིན་ཅི་མ་ལོག་པ་བཞི་སྟེ། བཞི་གང་ཞེ་ན་མི་རྟག་པ་ལ་རྟག་པར་འདུ་ཤེས་པ་ལ་འདུ་བྱེད་ཐམས་ཅད་མི་རྟག་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་ལ། འདུ་བྱེད་ཐམས་ཅད་སྡུག་བསྔལ་བ་དང་། བདག་མེད་པ་ལ་བདག་ཏུ་ [138a.4]འདུ་ཤེས་པ་ལ་ཆོས་ཐམས་ཅད་བདག་མེད་པ་དང་། མི་སྡུག་པ་ལ་སྡུག་པར་འདུ་ཤེས་པ་ལ་མྱ་ངན་ལས་འདས་པ་ཞི་བས་གསོ་བ་དང་། ལུས་དང་། ཚོར་བ་དང་། སེམས་དང་། ཆོས་ལ་གནས་པ་རྣམས་ལ་དྲན་པ་ཉེ་བར་གཞག་པ་བཞི་སྟེ། དེ་ལ་ལུས་ལ་ལུས་ [138a.5]ཀྱི་རྗེས་སུ་ལྟ་བ་ཅན་དུ་གནས་ཀྱང་ལུས་ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། ཚོར་བ་རྣམས་ལ་ཚོར་བའི་རྗེས་སུ་ལྟ་བ་ཅན་དུ་གནས་ཀྱང་ཚོར་བའི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། སེམས་ལ་སེམས་ཀྱི་རྗེས་སུ་ལྟ་བ་ཅན་དུ་གནས་ཀྱང་སེམས་ [138a.6]ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བ་དང་། ཆོས་ལ་ཆོས་ཀྱི་རྗེས་སུ་ལྟ་བ་ཅན་དུ་གནས་ཀྱང་ཆོས་ཀྱི་རྗེས་སུ་ལྟ་བས་བདག་ཏུ་ལྟ་བར་མི་ལྟུང་བས་གསོ་བ་དང་། ཡང་དག་པར་སྤོང་བ་བཞིས་ནི་མི་དགེ་བའི་ཆོས་ཐམས་ཅད་སྤོང་བ་དང་། དགེ་བའི་ཆོས་ཐམས་ཅད་ཡོངས་ [138a.7]སུ་རྫོགས་པར་འགྱུར་བ་དང་། རྫུ་འཕྲུལ་གྱི་རྐང་པ་བཞིས་ནི་ལུས་དང་སེམས་ལ་རིལ་པོར་འཛིན་པ་འདོར་བར་འགྱུར་བ་དང་། དབང་པོ་ལྔ་དང་། སྟོབས་ལྔས་ནི་མ་དད་པ་དང་། ལེ་ལོ་དང་། བརྗེད་ངས་པ་དང་། རྣམ་པར་གཡེང་བ་དང་། ཤེས་བཞིན་མེད་པ་རྣམས་ [138b] [138b.1]གསོ་བ་དང་། བྱང་ཆུབ་ཀྱི་ཡན་ལག་བདུན་གྱིས་ནི་ཆོས་ལ་ཤིན་ཏུ་རྨོངས་ཤིང་མི་ཤེས་པ་གསོ་བ་དང་། འཕགས་པའི་ལམ་ཡན་ལག་བརྒྱད་པས་ནི་འཆལ་པའི་ཤེས་རབ་དང་། ཕས་ཀྱི་རྒོལ་བ་ཐམས་ཅད་དང་། ལམ་ངན་པར་ཞུགས་པ་རྣམས་གསོ་བ་སྟེ། འོད་ [138b.2]སྲུང་འདི་ནི་ཡང་དག་པའི་གསོ་བ་ཞེས་བྱའོ། །འོད་སྲུང་བྱང་ཆུབ་སེམས་དཔའ་གསོ་བ་འདི་ལ་བསླབ་པར་བརྩོན་པར་བྱའོ། །འོད་སྲུང་འཛམ་བུའི་གླིང་ན་སྨན་པ་དང་། སྨན་པའི་སློབ་མ་ཇི་སྙེད་ཡོད་པ་དེ་དག་གི་ནང་ན་འཚོ་བྱེད་ནི་མཆོག་ཅེས་བྱའོ། །འོད་སྲུང་གལ་ཏེ་ [138b.3]སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་སྨན་པའི་རྒྱལ་པོ་འཚོ་བྱེད་དང་འདྲ་བར་གྱུར་ཀྱང་དེ་དག་ལ་ལ་ཞིག་གིས་ལྟ་བ་དང་འགྱོད་པ་ལ་གནས་པ་གསོ་བའི་སྨན་གང་ཡིན་ཞེས་དྲིས་ན། དེ་དག་གིས་ཤེས་པ་འམ། བསྟན་པ་ [138b.4]འམ། བསྒོ་བར་མི་ནུས་སོ། །འོད་སྲུང་དེ་ལ་བྱང་ཆུབ་སེམས་དཔས་འདི་སྙམ་དུ་བདག་ནི་འཇིག་རྟེན་གྱི་སྨན་ཙམ་གྱི་ཆོག་པར་མི་བྱའི། བདག་གིས་འཇིག་རྟེན་ལས་འདས་པའི་ཡེ་ཤེས་ཀྱི་སྨན་ཡོངས་སུ་བཙལ་བར་བྱའོ། །དགེ་བའི་རྩ་བ་ཐམས་ཅད་ཀྱང་ལེགས་པར་ [138b.5]ཡང་དག་པར་བསྒྲུབ་པར་བྱའོ་སྙམ་དུ་བརྟག་པར་བྱའོ། །དེ་ལྟར་བརྟགས་ནས་འཇིག་རྟེན་ལས་འདས་པའི་ཡེ་ཤེས་ཀྱི་སྨན་གང་ཚོལ་བ་དེས་ཕྱོགས་བཞིར་སོང་ལ་སེམས་ཅན་རྣམས་ལ་ཡང་དག་པའི་གསོ་བ་བྱ་སྟེ། ཡང་དག་པའི་གསོ་བས་སེམས་ཅན་རྣམས་གསོ་བར་ [138b.6]བྱའོ། །འོད་སྲུང་དེ་ལ་འཇིག་རྟེན་ལས་འདས་པའི་ཡེ་ཤེས་ཀྱི་སྨན་གང་ཞེ་ན། འདི་ལྟ་སྟེ། རྒྱུ་རྐྱེན་ལ་འཇུག་པ་ཤེས་པ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པའི་ཆོས་རྣམས་ [138b.7]ལ་མོས་པའི་ཤེས་པ་དང་། སྟོང་པ་ཉིད་ཀྱིས་མི་དམིགས་པའི་ཆོས་རྣམས་ལ་མི་སྡང་བ་དང་། སེམས་ཅན་ཡོངས་སུ་ཚོལ་བའི་བརྩོན་འགྲུས་སོ། །དེ་འདི་ལྟར་སེམས་ཡོངས་སུ་ཚོལ་ཏེ། འདོད་ཆགས་པར་འགྱུར་བ་འམ། ཞེ་སྡང་བར་འགྱུར་བ་འམ། གཏི་མུག་པར་ [139a] [139a.1]འགྱུར་བའི་སེམས་དེ་གང་ཡིན། ཅི་འདས་པའམ། མ་འོངས་པའམ། ད་ལྟར་བྱུང་བ་ཞིག་ཡིན་ནམ། དེ་ལ་སེམས་འདས་པ་གང་ཡིན་པ་དེ་ནི་ཟད་པའོ། །མ་འོངས་པ་གང་ཡིན་པ་དེ་ནི་མ་ཕྱིན་པའོ། །ད་ལྟར་བྱུང་བ་ནི་གནས་པ་མེད་དོ་ [139a.2]སྙམ་མོ། །འོད་སྲུང་སེམས་ནི་ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པ་ལ་ཡང་མི་དམིགས་སོ། །འོད་སྲུང་སེམས་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་པ་མེད་པའོ། ། [139a.3]འོད་སྲུང་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་རོ། །ལོག་པར་ཞུགས་པའི་འདུ་ཤེས་ལས་ཆོས་རྣམས་འབྱུང་བ་མ་གཏོགས་པར་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། [139a.4]གཟིགས་པར་མི་འགྱུར་བ་གང་ཡིན་པ་དེའི་རྒྱུ་བ་ཅི་འདྲ་བར་བལྟ་ཞེ་ན། འོད་སྲུང་སེམས་ནི་སྒྱུ་མ་དང་མཚུངས་ཏེ། ཡང་དག་པ་མ་ཡིན་པ་ཀུན་བརྟགས་པས་སྐྱེ་བ་རྣམ་པ་མང་པོ་ཡོངས་སུ་འཛིན་ཏོ། །འོད་སྲུང་སེམས་ནི་འབབ་ཆུའི་རྒྱུན་དང་མཚུངས་ཏེ། མི་གནས་པ་སྐྱེས་ [139a.5]ནས་འཇིག་ཅིང་འཇུག་པའོ། །འོད་སྲུང་སེམས་ནི་རླུང་དང་མཚུངས་ཏེ། རིང་དུ་འགྲོ་ཞིང་གཟུང་དུ་མེད་པར་རྒྱུ་བའོ། །འོད་སྲུང་སེམས་ནི་མར་མེའི་འོད་འཕྲོ་བ་དང་མཚུངས་ཏེ། རྒྱུ་དང་རྐྱེན་ལས་འབྱུང་བའོ། །འོད་སྲུང་སེམས་ནི་ནམ་མཁའ་དང་མཚུངས་ཏེ། ཉེ་བའི་ཉོན་ [139a.6]མོངས་པ་གློ་བུར་བ་རྣམས་ཀྱིས་ཉེ་བར་ཉོན་མོངས་པའོ། །འོད་སྲུང་སེམས་ནི་གློག་དང་མཚུངས་ཏེ། སྐད་ཅིག་ཏུ་འཇིག་ཅིང་མི་གནས་པའོ། །འོད་སྲུང་སེམས་ནི་སྤྲེའུ་དང་མཚུངས་ཏེ། ཡུལ་ཐམས་ཅད་འདོད་པའོ། །འོད་སྲུང་སེམས་ནི་ལས་རྣམ་པ་སྣ་ཚོགས་ [139a.7]མངོན་པར་འདུ་བྱེད་པའི་ཕྱིར་རི་མོ་མཁན་དང་མཚུངས་སོ། །འོད་སྲུང་སེམས་ནི་ཉོན་མོངས་པ་ཐ་དད་པ་འབྱུང་བའི་ཕྱིར་མི་གནས་པའོ། །འོད་སྲུང་སེམས་ནི་གཉིས་པ་མཚམས་སྦྱོར་བ་མེད་པའི་ཕྱིར་གཅིག་པུ་རྒྱུ་སྟེ་གཉིས་སུ་མེད་པའོ། །འོད་སྲུང་སེམས་ནི་ཆོས་ཐམས་ [139b] [139b.1]ཅད་ལ་དབང་བྱེད་པའི་ཕྱིར་རྒྱལ་པོ་དང་མཚུངས་སོ། །འོད་སྲུང་སེམས་ནི་སྡུག་བསྔལ་ཐམས་ཅད་སྐྱེད་པའི་ཕྱིར་མི་མཛའ་བ་དང་མཚུངས་སོ། །འོད་སྲུང་སེམས་ནི་དགེ་བའི་རྩ་བ་ཐམས་ཅད་འཇིག་པར་བྱེད་པའི་ཕྱིར་བྱེ་མའི་ཁང་པ་དང་མཚུངས་སོ། །འོད་སྲུང་སེམས་ནི་མི་རྟག་པ་ལ་ [139b.2]རྟག་པར་འདུ་ཤེས་པའི་ཕྱིར་ཟིལ་པ་དང་མཚུངས་སོ། །འོད་སྲུང་སེམས་ནི་སྡུག་བསྔལ་ལ་བདེ་བར་འདུ་ཤེས་པའི་ཕྱིར་ཉའི་མཆིལ་པ་དང་མཚུངས་སོ། །འོད་སྲུང་སེམས་ནི་བདག་མེད་པ་ལ་བདག་ཏུ་འདུ་ཤེས་པའི་ཕྱིར་རྨི་ལམ་དང་མཚུངས་སོ། །འོད་སྲུང་སེམས་ནི་མི་གཙང་བ་ [139b.3]ལ་གཙང་བར་འདུ་ཤེས་པའི་ཕྱིར་སྦྲང་མ་སྔོན་པ་དང་མཚུངས་སོ། །འོད་སྲུང་སེམས་ནི་གནོད་པ་རྣམ་པ་མང་པོ་བྱེད་པས་ཕྱིར་རྒོལ་བ་དང་མཚུངས་སོ། །འོད་སྲུང་སེམས་ནི་རྟག་ཏུ་ཀླན་ཀ་ཚོལ་བའི་ཕྱིར་གནོད་སྦྱིན་མདངས་འཕྲོག་པ་དང་མཚུངས་སོ། །འོད་སྲུང་སེམས་ནི་ [139b.4]རྟག་ཏུ་གླགས་ལྟ་བས་དགྲ་དང་མཚུངས་སོ། །འོད་སྲུང་སེམས་ནི་རྗེས་སུ་ཆགས་པ་དང་ཁོང་ཁྲོ་བ་དང་ལྡན་པས་རྟག་པར་མཐོ་དམའ་ཅན་ནོ། །འོད་སྲུང་སེམས་ནི་དགེ་བའི་རྩ་བ་ཐམས་ཅད་རྐུ་བས་ཆོམ་རྐུན་དང་མཚུངས་སོ། །འོད་སྲུང་སེམས་ནི་གཟུགས་ལ་དགའ་བས་ཕྱི་བྱི་ཞྭ་ [139b.5]ལའི་མིག་དང་མཚུངས་སོ། །འོད་སྲུང་སེམས་ནི་སྒྲ་ལ་དགའ་བས་གཡུལ་གྱི་རྔ་དང་མཚུངས་སོ། །འོད་སྲུང་སེམས་ནི་ཕག་མི་གཙང་བའི་དྲི་ལ་དགའ་བ་བཞིན་དུ་དྲི་ལ་དགའོ། །འོད་སྲུང་སེམས་ནི་རོ་ལ་དགའ་བས་ཟས་ཀྱི་ལྷག་མ་ཟ་བའི་བྲན་མོ་དང་མཚུངས་སོ། ། [139b.6]འོད་སྲུང་སེམས་ནི་རེག་པ་ལ་དགའ་བས་སྦྲང་མ་འབྲུ་མར་གྱི་སྣོད་ལ་ཆགས་པ་དང་མཚུངས་སོ། །འོད་སྲུང་སེམས་ནི་ཀུན་ཏུ་བཙལ་ན་མི་རྙེད་དོ། །གང་མི་རྙེད་པ་དེ་ནི་མི་དམིགས་སོ། །གང་མི་དམིགས་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་ [139b.7]བ་ཡང་མ་ཡིན་ནོ། །གང་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་ཡང་དག་པར་འདས་པའོ། །གང་དུས་གསུམ་ལས་ཡང་དག་པར་འདས་པ་དེ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་ནོ། ། [140a] [140a.1]གང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ལ་ངོ་བོ་ཉིད་མེད་དོ། །གང་ངོ་བོ་ཉིད་མེད་པ་དེ་ལ་འབྱུང་བ་མེད་དོ། །གང་འབྱུང་བ་མེད་པ་དེ་ལ་འགག་པ་མེད་དོ། །གང་འགག་པ་མེད་པ་དེ་ལ་འབྲལ་བ་མེད་ [140a.2]དོ། །གང་འབྲལ་བ་མེད་པ་དེ་ལ་འོང་བ་ཡང་མེད། འགྲོ་བ་ཡང་མེད། འཆི་འཕོ་ཡང་མེད། སྐྱེ་བ་ཡང་མེད་དོ། །གང་ལ་འོང་བ་ཡང་མེད། འགྲོ་བ་ཡང་མེད། འཆི་འཕོ་ཡང་མེད། སྐྱེ་བ་ཡང་མེད་པ་དེ་ལ་འདུ་བྱེད་གང་ཡང་མེད་དོ། །གང་ལ་འདུ་བྱེད་ [140a.3]གང་ཡང་མེད་པ་དེ་ནི་འདུས་མ་བྱས་པའོ། །གང་འདུས་མ་བྱས་པ་དེ་ནི་འཕགས་པ་རྣམས་ཀྱི་རིགས་སོ། །འཕགས་པ་རྣམས་ཀྱི་རིགས་གང་ཡིན་པ་དེ་ལ་བསླབ་པ་ཡང་མེད་བསླབ་པ་ལས་འདས་པ་ཡང་མེད་དོ། །གང་ལ་བསླབ་པ་ཡང་མེད་བསླབ་པ་ལས་འདས་པ་ཡང་མེད་པ་དེ་ལ་རྒྱུ་བ་ [140a.4]ཡང་མེད་མི་རྒྱུ་བ་ཡང་མེད། རབ་ཏུ་རྒྱུ་བ་ཡང་མེད། གང་ལ་རྒྱུ་བ་ཡང་མེད། མི་རྒྱུ་བ་ཡང་མེད། རབ་ཏུ་རྒྱུ་བ་ཡང་མེད་པ་དེ་ལ་སེམས་ཀྱང་མེད། སེམས་ལས་བྱུང་བའི་ཆོས་རྣམས་ཀྱང་མེད་དོ། །གང་ལ་སེམས་ཀྱང་མེད། སེམས་ལས་བྱུང་བའི་ཆོས་རྣམས་ཀྱང་མེད་པ་དེ་ལ་ལས་ཀྱང་མེད། ལས་ཀྱི་ [140a.5]རྣམ་པར་སྨིན་པ་ཡང་མེད་དོ། །གང་ལ་ལས་ཀྱང་མེད། ལས་ཀྱི་རྣམ་པར་སྨིན་པ་ཡང་མེད་པ་དེ་ལ་བདེ་བ་ཡང་མེད། སྡུག་བསྔལ་ཡང་མེད་དོ། །གང་ལ་བདེ་བ་ཡང་མེད། སྡུག་བསྔལ་བ་ཡང་མེད་པ་དེ་ནི་འཕགས་པ་རྣམས་ཀྱི་རིགས་ཏེ། འཕགས་པ་རྣམས་ཀྱི་ [140a.6]རིགས་གང་ཡིན་པ་དེ་ལ་ནི་ལས་ཀྱང་མེད། ལས་མངོན་པར་འདུ་བྱེད་པ་ཡང་མེད་དོ། །གང་ལ་ལས་ཀྱང་མེད། ལས་མངོན་པར་འདུ་བྱེད་པ་ཡང་མེད་པའི་རིགས་དེ་ལ་ནི་ལུས་ཀྱིས་ལས་བྱེད་པ་མེད་དོ། །ངག་གིས་མ་ཡིན། ཡིད་ཀྱིས་མ་ཡིན་ནོ། །རིགས་དེ་ལ་ [140a.7]ཐ་མ་དང་འབྲིང་དང་མཆོག་ཏུ་རྣམ་པར་གཞག་པ་ཡང་མེད་དོ། །དེ་ཅིའི་ཕྱིར་ཞེ་ན། རིགས་དེ་ནི་ནམ་མཁའ་དང་མཚུངས་པའི་ཕྱིར་མཉམ་པའོ། །རིགས་དེ་ནི་ཆོས་ཐམས་ཅད་རོ་གཅིག་པའི་ཕྱིར་ཁྱད་པར་མེད་པའོ། །རིགས་དེ་ནི་ལུས་དང་སེམས་དབེན་པའི་ཕྱིར་དབེན་པའོ་ [140b] [140b.1]རིགས་དེ་ནི་མྱ་ངན་ལས་འདས་པ་དང་འཐུན་པའོ། །རིགས་དེ་ནི་ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའི་ཕྱིར་དྲི་མ་མེད་པའོ། །རིགས་དེ་ནི་ངར་འཛིན་པ་དང་། ང་ཡིར་འཛིན་པས་ངའི་བ་མེད་པའོ། །རིགས་དེ་ནི་ཡང་དག་པ་དང་། ཡང་དག་པ་མ་ཡིན་པ་མཉམ་ [140b.2]པ་ལས་བྱུང་བ་སྟེ། མི་མཉམ་པ་མེད་པའོ། །རིགས་དེ་ནི་དོན་དམ་པའི་བདེན་པ་ཡིན་པས་བདེན་པའོ། །རིགས་དེ་ནི་གཏན་དུ་མི་སྐྱེ་བའི་ཕྱིར་མི་ཟད་པའོ། །རིགས་དེ་ནི་རྟག་ཏུ་ཆོས་ཐམས་ཅད་དེ་བཞིན་ཉིད་ཀྱི་ཕྱིར་རྟག་པའོ། །རིགས་དེ་ནི་མྱ་ངན་ལས་འདས་པ་ [140b.3]མཆོག་གི་ཕྱིར་བདེ་བའོ། །རིགས་དེ་ནི་རྣམ་པ་ཐམས་ཅད་དུ་དྲི་མ་མེད་པའི་ཕྱིར་དགེ་བའོ། །རིགས་དེ་ནི་བདག་ཡོངས་སུ་བཙལ་ཏེ་མ་རྙེད་པའི་ཕྱིར་བདག་མེད་དོ། །རིགས་དེ་ནི་རབ་ཏུ་རྣམ་པར་དག་པའི་ཕྱིར་རྣམ་པར་དག་པའོ། །འོད་སྲུང་ནང་དུ་ཡོངས་སུ་ཚོལ་ལ་ཕྱི་རོལ་ [140b.4]དུ་མ་རྒྱུག་ཤིག །འོད་སྲུང་མ་འོངས་པའི་དུས་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་དག་འབྱུང་ངོ་། །འོད་སྲུང་ཇི་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་ཡིན་ཞེ་ན། འོད་སྲུང་འདི་ལྟ་སྟེ་དཔེར་ན་ཁྱི་ནི་རྡོས་འཇིགས་ལ་རྡོ་དེ་ཉིད་ཀྱི་ཕྱིར་སྙེགས་ཀྱི་རྡོ་དེ་སུས་འཕངས་ [140b.5]པ་དེ་ལ་ནི་མི་སྙེགས་སོ། །འོད་སྲུང་དེ་བཞིན་དུ་དགེ་སྦྱོང་དང་བྲམ་ཟེ་ཁ་ཅིག་གཟུགས་དང་། སྒྲ་དང་། དྲི་དང་། རོ་དང་། རེག་བྱས་འཇིགས་ཤིང་སྐྲག་ནས་དགོན་པའི་གནས་རྣམས་ན་གནས་ཤིང་དེ་དག་དེ་ན་གཅིག་པུ་གཉིས་སུ་མེད་པར་ལུས་རབ་ཏུ་དབེན་པར་འདུག་ [140b.6]སྟེ། ཆགས་པར་འགྱུར་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་སྣང་བར་གྱུར་ན་དེ་དག་དེ་ལ་བཏང་སྙོམས་སུ་འཇོག་ཅིང་བསོད་ཉམས་སུ་སྦྱོར་བ་དང་ལྡན་པར་གནས་ཀྱི་ནང་དུ་སོ་སོར་རྟོག་པ་ལ་མངོན་པར་མི་བརྩོན་ཏེ། དེ་དག་གཟུགས་ [140b.7]དང་། སྒྲ་དང་། དྲི་དང་། རོ་དང་། རེག་བྱ་རྣམས་ལས་ཅིས་འབྱུང་བ་མི་ཤེས་ཤིང་ཁོང་དུ་མི་ཆུད་དོ། །དེ་དག་གིས་དེ་མ་ཤེས་ཤིང་ཁོང་དུ་མ་ཆུད་པས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ [141a] [141a.1]དག་ཏུ་སོང་ན་ཡང་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་གནོད་པར་འགྱུར་རོ། །གལ་ཏེ་དེ་དག་དགོན་པ་ན་གནས་པ་ལས་འཆི་བའི་དུས་བྱས་པར་གྱུར་ན་འཇིག་རྟེན་པའི་སྡོམ་པ་ལ་གནས་པ་དེ་དག་མཐོ་རིས་ཀྱི་འཇིག་རྟེན་དུ་ [141a.2]སྐྱེ་བར་འགྱུར་ཏེ། དེར་ཡང་དེ་དག་ལྷའི་འདོད་པའི་ཡོན་ཏན་ལྔ་པོ་དག་གིས་གནོད་པར་འགྱུར་རོ། །དེ་དག་དེ་ནས་ཤི་འཕོས་ནས་ངན་སོང་བཞི་ལས་ཡོངས་སུ་མ་གྲོལ་བར་འགྱུར་ཏེ། བཞི་གང་ཞེ་ན། འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་ [141a.3]དང་། གཤིན་རྗེའི་འཇིག་རྟེན་དང་། ལྷ་མ་ཡིན་ནོ། །འོད་སྲུང་དེ་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མཚུངས་པ་དག་ཡིན་ནོ། །འོད་སྲུང་ཇི་ལྟར་ན་ཁྱི་རྡོ་ལ་སྙེགས་པ་དང་མི་འདྲ་བ་ཡིན་ཞེ་ན། འོད་སྲུང་གང་གཤེ་ཡང་སླར་མི་གཤེ །ཁྲོས་ཀྱང་སླར་མི་ [141a.4]ཁྲོ། མཚང་བྲུས་ཀྱང་སླར་མཚང་མི་འདྲུ། བརྡེགས་ཀྱང་སླར་མི་རྡེག །བསྡིགས་ཀྱང་སླར་མི་སྡིགས། སྨད་ཀྱང་སླར་མི་སྨོད་ཅིང་ནང་དུ་སེམས་ལ་སོ་སོར་རྟོག་སྟེ། འདི་ལ་གཤེ་བ་འམ། ཁྲོས་པའམ། བརྡེགས་པའམ། བསྡིགས་པའམ། སྨད་པ་ [141a.5]འམ། མཚང་བྲུས་པ་དེ་དག་གང་ཡིན་སྙམ་དུ་སོ་སོར་རྟོག་པའོ། །འོད་སྲུང་དེ་ལྟར་ན་དགེ་སློང་ཁྱི་རྡོ་ལ་སྙེགས་པ་དང་མི་འདྲ་བ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་ཁྱི་ནི་རྡོ་བས་སྐྲག་གྱུར་ཀྱང་། །སུས་འཕངས་མི་སྙེགས་རྡོ་ལ་སྙེགས་པར་བྱེད། །དེ་ [141a.6]བཞིན་དགེ་སྦྱོང་བྲམ་ཟེ་ལ་ལ་དག །གཟུགས་ལ་སོགས་པས་སྐྲག་ནས་དགོན་པར་གནས། །དེ་དག་དགོན་པ་དེ་ལ་གནས་གྱུར་ཀྱང་། །གཟུགས་ལ་སོགས་པ་སྡུག་པ་མཐོང་གྱུར་ན། །བཏང་སྙོམས་འཇོག་ཅིང་ནང་གི་ཚུལ་མི་ཤེས། །དེ་ཡི་ཉེས་ལས་བྱུང་བ་ [141a.7]གང་ཡིན་པ། །མི་ཤེས་པས་ན་སླར་ཡང་གྲོང་དུ་གནས། །གཟུགས་ལ་སོགས་པས་དེར་ཡང་གནོད་པར་འགྱུར། །འདིར་ཡང་ལྷ་ཡི་ལོངས་སྤྱོད་སྤྱད་གྱུར་ཏེ། །ལྷ་དང་མི་ལས་ཁ་ཅིག་ཤི་འཕོས་ནས། །དེ་དག་ངན་སོང་སར་ནི་ལྟུང་བར་འགྱུར། །བླུན་པོ་དེ་ [141b] [141b.1]དག་ཤི་འཕོས་སྡུག་བསྔལ་འགྱུར། །དེ་ལྟར་སྡུག་བསྔལ་བརྒྱ་ལྡན་དེ་དག་ནི། །ཁྱི་རྡོ་སྙེགས་པ་འདྲ་ཞེས་བདེ་གཤེགས་གསུངས། །སྤྱོས་ཀྱང་མི་གཤེ་བརྡེགས་ཀྱང་མི་རྡེག་དང་། །སུ་ཞིག་སྨད་ཀྱང་སྨོད་པར་མི་བྱེད་དང་། །དེ་བཞིན་མཚང་བྲུས་མཚང་ [141b.2]འདྲུ་མི་བྱེད་དང་། །ཁྲོས་ཀྱང་དེས་པ་ཁྲོ་བར་མི་བྱེད་ཅིང་། །ནང་གི་སེམས་ཀྱི་གཉེན་པོར་གྱུར་པ་དག །ཚོལ་ཞིང་ཡིད་ཞི་དྲན་དང་ལྡན་གྱུར་པ། །དེ་འདྲའི་ཚུལ་ཁྲིམས་བརྟུལ་ཞུགས་ལྡན་པ་ནི། །རྡོ་སྙེགས་ཁྱི་མི་འདྲ་ཞེས་རྒྱལ་བས་གསུངས། །འོད་ [141b.3]སྲུང་འདི་ལྟ་སྟེ་དཔེར་ན་རྟའི་འདུལ་སྦྱོང་ལ་མཁས་པས་རྟ་དེ་གང་དང་གང་དུ་གཡོ་བྱེད་ཅིང་མ་བྱང་བ་དེ་དང་དེ་རབ་ཏུ་སྦྱོང་ངོ་། །འོད་སྲུང་དེ་བཞིན་དུ་དགེ་སློང་རྣལ་འབྱོར་སྤྱོད་པ་ཡང་གང་དང་གང་དུ་སེམས་འགྱུར་བར་མཐོང་བ་དེ་དང་དེར་རབ་ཏུ་སྦྱོང་བ་ལ་འཇུག་སྟེ། དེ་ཅི་ནས་ཕྱིས་ [141b.4]འཁྲུག་པར་མི་འགྱུར་བ་དེ་ལྟར་སེམས་རབ་ཏུ་འཆོས་སོ། །དེ་ལ་འདི་སྐད་ཅེས་བྱ་སྟེ། དཔེར་ན་རྟ་ཡི་འདུལ་སྦྱོང་མཁས་པ་ཞིག །བྱང་ཞིང་གཡོ་མེད་ཚུལ་དུ་རབ་ཏུ་འདུལ། །རྣལ་འབྱོར་པ་ཡང་སེམས་ནི་འགྱུར་མཐོང་ནས། །ཇི་ལྟར་ཕྱིས་འཁྲུག་མི་འགྱུར་དེ་ [141b.5]ལྟར་འཆོས། །འོད་སྲུང་འདི་ལྟ་སྟེ་དཔེར་ན་ལྐོག་ནད་ལྷ་འོར་གྱིས་ནི་སྲོག་གི་དབང་པོ་འགག་པར་བྱེད་དོ། །འོད་སྲུང་དེ་བཞིན་དུ་ལྟ་བར་གྱུར་པ་ཐམས་ཅད་ཀྱི་ནང་ན་བདག་ཏུ་འཛིན་པ་ནི་ཆོས་ཀྱི་སྲོག་གི་དབང་པོ་འགག་པར་བྱེད་པའོ། །དེ་ལ་འདི་སྐད་ཅེས་བྱ་སྟེ། དཔེར་ན་ལྷ་འོར་སྲོག་གི་ [141b.6]དབང་པོ་ལ། །གནོད་ཅིང་དེ་ལ་བདེ་བ་སྦྱིན་པ་མིན། །དེ་བཞིན་ལྟ་གྱུར་ནང་ན་བདག་ལྟ་བ། །དེ་ནི་ཆོས་སྲོག་རྣམ་པར་འཇིག་པར་བྱེད། །འོད་སྲུང་འདི་ལྟ་སྟེ། དཔེར་ན་མི་ནི་གང་དང་གང་དུ་བཅིངས་པ་དེ་དང་དེ་ཉིད་ལས་དགྲོལ་བར་བྱ་བ་ཡིན་ནོ། །འོད་སྲུང་དེ་བཞིན་དུ་རྣལ་འབྱོར་སྤྱོད་པའི་ [141b.7]སེམས་གང་དང་གང་ལ་ཆགས་པ་དེ་དང་དེ་ལས་དགྲོལ་བར་བྱ་བ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་ནི་གང་དུ་བཅིངས་གྱུར་པ། །དེ་དང་དེ་ལས་དགྲོལ་བར་བྱ་བ་ཡིན། །དེ་བཞིན་སེམས་རྨོངས་གང་དང་གང་ཆགས་པ། །རྣལ་འབྱོར་པས་ནི་དེ་དང་དེ་ལས་ [142a] [142a.1]དགྲོལ། །འོད་སྲུང་འདི་གཉིས་ནི་རབ་ཏུ་བྱུང་བའི་ནམ་མཁའ་ལ་ཡོངས་སུ་ཆགས་པ་སྟེ། གཉིས་གང་ཞེ་ན། འཇིག་རྟེན་རྒྱང་ཕན་པའི་གསང་ཚིག་ཡོངས་སུ་ཚོལ་བ་དང་། ལྷུང་བཟེད་དང་ཆོས་གོས་ལྷག་པར་འཆང་བ་སྟེ། འདི་གཉིས་སོ། ། [142a.2]དེ་ལ་འདི་སྐད་ཅེས་བྱ་སྟེ། འཇིག་རྟེན་རྒྱང་ཕན་གོམས་བྱེད་བརྩོན་པ་དང་། །ལྷུང་བཟེད་ཆོས་གོས་ལྷག་པར་འཆང་བྱེད་པ། །འདི་གཉིས་ནམ་མཁའ་ལ་ནི་ཆགས་པ་སྟེ། །དེ་དག་བྱང་ཆུབ་སེམས་དཔས་སྤང་བར་བྱ། །འོད་སྲུང་འདི་གཉིས་ནི་རབ་ཏུ་བྱུང་བའི་འཆིང་བ་དམ་ [142a.3]པོ་སྟེ། གཉིས་གང་ཞེ་ན། ལྟ་བར་གྱུར་པའི་འཆིང་བ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པའི་འཆིང་བ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། ལྟ་གྱུར་འཆིང་དང་རྙེད་དང་བཀུར་སྟི་དང་། །གྲགས་པའི་འཆིང་བ་རབ་ཏུ་བྱུང་བ་ཡི། །འཆིང་ [142a.4]བ་དམ་ཞེས་འཕགས་པ་རྣམས་ཀྱིས་གསུངས། །དེ་དག་རྟག་ཏུ་རབ་ཏུ་བྱུང་བས་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་བར་དུ་གཅོད་པའི་ཆོས་ཏེ། གཉིས་གང་ཞེ་ན། ཁྱིམ་པའི་ཕྱོགས་ལ་སྟེན་པ་དང་། འཕགས་པའི་ཕྱོགས་ལ་སྨོད་པར་སེམས་པ་སྟེ་འདི་གཉིས་སོ། ། [142a.5]དེ་ལ་འདི་སྐད་ཅེས་བྱ་སྟེ། ཁྱིམ་པའི་ཕྱོགས་ལ་སྟེན་པར་བྱེད་པ་དང་། །འཕགས་པའི་ཕྱོགས་ལ་རྣམ་པར་སྨོད་བྱེད་པ། །འདི་གཉིས་རབ་བྱུང་བར་ཆད་བགེགས་བྱེད་ཡིན། །བྱང་ཆུབ་སེམས་དཔས་དེ་དག་རྣམ་པར་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་དྲི་མ་ [142a.6]སྟེ། གཉིས་གང་ཞེ་ན། ཉོན་མོངས་པ་ལ་མི་མཇེད་པ་དང་། མཛའ་བོའི་ཁྱིམ་དང་ཟས་སྟེར་བའི་ཁྱིམ་ཡོངས་སུ་འཛིན་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། རབ་ཏུ་བྱུང་བ་ཉོན་མོངས་མི་མཇེད་དང་། །མཛའ་བོའི་ཁྱིམ་དང་ཟས་སྟེར་ཁྱིམ་སྟེན་པ། ། [142a.7]དེ་གཉིས་དྲི་མར་རྒྱལ་བའི་དབང་པོས་གསུངས། །བྱང་ཆུབ་སེམས་དཔས་དེ་དག་རྣམ་པར་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་སེར་བ་འབབ་པ་སྟེ། གཉིས་གང་ཞེ་ན། དམ་པའི་ཆོས་སྤོང་བ་དང་། ཚུལ་ཁྲིམས་ལས་ཉམས་ཀྱང་དད་པས་སྦྱིན་པ་ཡོངས་སུ་ [142b] [142b.1]སྤྱོད་པ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། དམ་པའི་ཆོས་ནི་སྤོང་བ་དང་། །ཚུལ་ཁྲིམས་ཉམས་ཀྱང་སྤྱོད་པ་སྟེ། །སེར་བ་འབབ་པ་འདི་གཉིས་ནི། །རྒྱལ་སྲས་རྣམས་ཀྱིས་སྤང་བར་བྱ། །འོད་སྲུང་འདི་གཉིས་ནི་རབ་ཏུ་བྱུང་བའི་རྨ་ཡིན་ཏེ། གཉིས་ [142b.2]གང་ཞེ་ན། ཕ་རོལ་གྱི་ཉེས་པ་ལ་སོ་སོར་རྟོག་པ་དང་། བདག་གི་ཉེས་པ་འཆབ་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། བདག་གི་སྐྱོན་ནི་འཆབ་བྱེད་དང་། །ཕ་རོལ་ཉེས་ལ་རྟོག་བྱེད་པ། །འདི་གཉིས་དུག་གི་མེ་དང་འདྲ། །རྟོག་པ་རྣམས་ཀྱི་རྨ་ [142b.3]འདི་སྤང་། །འོད་སྲུང་འདི་གཉིས་ནི་རབ་ཏུ་བྱུང་བའི་ཡོངས་སུ་གདུང་བ་སྟེ། གཉིས་གང་ཞེ་ན། རྙོག་པ་དང་བཅས་པའི་སེམས་ཀྱིས་ངུར་སྨྲིག་འཆང་བ་དང་། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་ལས་བསྙེན་བཀུར་དང་རིམ་གྲོར་བྱ་བ་བདག་གིར་བྱེད་ [142b.4]པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། རྙོག་དང་བཅས་པའི་སེམས་ཀྱིས་ངུར་སྨྲིག་འཆང་བ་དང་། །བསྙེན་བཀུར་རིམ་གྲོ་བྱེད་དང་གུས་པར་སྨྲ་བ་དག །ཚུལ་ཁྲིམས་ལྡན་པ་རྣམས་ལ་སྟེན་པར་བྱེད་པ་སྟེ། །ཆོས་གཉིས་འདི་དག་ཡོངས་སུ་སྤང་ [142b.5]བར་བྱ་བ་ཡིན། །འོད་སྲུང་འདི་གཉིས་ནི་རབ་ཏུ་བྱུང་བའི་ཟུག་རྔུ་སྟེ། གཉིས་གང་ཞེ་ན། བསླབ་པའི་གཞི་ལས་འགལ་བ་དང་། སྙིང་པོ་མ་བླངས་པར་འཆི་བའི་དུས་བྱེད་པ་སྟེ། འདི་གཉིས་སོ། །དེ་ལ་འདི་སྐད་ཅེས་བྱ་སྟེ། བསླབ་པའི་གཞི་ལས་འགལ་བར་ [142b.6]གྱུར་པ་དང་། །སྙིང་པོ་མ་བླངས་པར་ནི་དུས་བྱེད་པ། །འདི་གཉིས་རབ་ཏུ་བྱུང་བའི་ཟུག་རྔུ་ཞེས། །ལྷ་མིའི་སྟོན་པ་ཐམས་ཅད་མཁྱེན་པས་གསུངས། །འོད་སྲུང་འདི་གཉིས་ནི་རབ་ཏུ་བྱུང་བའི་ནད་གསོར་མི་རུང་བ་སྟེ། གཉིས་གང་ཞེ་ན། མངོན་པའི་ང་རྒྱལ་གྱིས་སེམས་ [142b.7]ངེས་པར་སེམས་པ་དང་ཐེག་པ་ཆེན་པོ་ལ་ཡང་དག་པར་ཞུགས་པའི་གང་ཟག་རྣམས་ཀྱི་འདུན་པ་ཟློག་པ་སྟེ་འདི་གཉིས་སོ། །དེ་ལ་འདི་སྐད་ཅེས་བྱ་སྟེ། མངོན་པའི་ང་རྒྱལ་སེམས་ལ་ངེས་སེམས་དང་། །སངས་རྒྱས་ཐེག་པ་ལས་ནི་འདུན་པ་ཟློག །འདི་གཉིས་རབ་ཏུ་བྱུང་བའི་ [143a] [143a.1]ནད་ཡིན་ཞེས། །གང་ཟག་མཚུངས་པ་མེད་པའི་རྒྱལ་བས་གསུངས། །འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ཇི་ཙམ་གྱིས་ན་དགེ་སྦྱོང་དགེ་སྦྱོང་ཞེས་བྱ་ཞེ་ན། འོད་སྲུང་བཞི་པོ་འདི་དག་ནི་དགེ་སྦྱོང་སྟེ། བཞི་གང་ཞེ་ན། ཁ་དོག་དང་རྟགས་དང་དབྱིབས་ཀྱི་དགེ་སྦྱོང་དང་ [143a.2]ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་དང་བརྗོད་པའི་སྒྲ་ཚིགས་སུ་བཅད་པའི་དགེ་སྦྱོང་དང་། ཡང་དག་པར་སྒྲུབ་པའི་དགེ་སྦྱོང་ངོ་། །འོད་སྲུང་དེ་ལ་ཁ་དོག་དང་རྟགས་དང་དབྱིབས་ཀྱི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཁ་དོག་དང་རྟགས་དང་དབྱིབས་དང་ལྡན་པར་གྱུར་ཏེ། [143a.3]ཆོས་གོས་སྣམ་སྦྱར་གྱོན་ཅིང་མགོ་བྲེགས་ཏེ། ལག་ན་ལྷུང་བཟེད་ཐོགས་མོད་ཀྱི་དེ་ལུས་ཀྱི་ལས་ཡོངས་སུ་མ་དག་པར་སྤྱོད། ངག་གི་ལས་ཡོངས་སུ་མ་དག་པར་སྤྱོད། ཡིད་ཀྱི་ལས་ཡོངས་སུ་མ་དག་པར་སྤྱོད་ཅིང་མ་དུལ་བ་མ་ཞི་བ། མ་བསྲུངས་པ། མ་བྱང་བ། འཚོ་བ་ཡོངས་སུ་མ་ [143a.4]དག་པ། བརྐམ་པ། ལེ་ལོ་ཅན། ཚུལ་ཁྲིམས་འཆལ་པ། སྡིག་པའི་ཆོས་ཅན་ཡིན་ཏེ། འོད་སྲུང་དེ་ནི་ཁ་དོག་དང་རྟགས་དང་དབྱིབས་ཀྱི་དགེ་སྦྱོང་ཞེས་བྱའོ། །འོད་སྲུང་དེ་ལ་ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཆོ་ག་དང་། སྤྱོད་ཡུལ་ [143a.5]དང་། སྤྱོད་པ་ཕུན་སུམ་ཚོགས་ཤིང་སྤྱོད་ལམ་བཞིར་ཤེས་བཞིན་དུ་སྤྱོད་ལ། ཟས་དང་སྐོམ་ངན་པ་ཟ་འཐུང་། འཕགས་པའི་རིགས་བཞི་པོ་དག་གིས་ཆོག་པར་འཛིན། བས་མཐའི་གནས་མལ་ལ་མངོན་པར་དགའ། ཁྱིམ་པ་དང་རབ་ཏུ་བྱུང་བ་རྣམས་དང་མི་འདྲེ་ལ་ཚིག་ཉུང་ཞིང་སྨྲ་བ་ [143a.6]ཉུང་མོད་ཀྱི་དེའི་སྤྱོད་ལམ་དེ་དག་ཀྱང་ཚུལ་འཆོས་པ་དང་། ཁ་གསག་གིས་ཡོངས་སུ་བརྟགས་པ་ཡིན་ཏེ། སེམས་ཡོངས་སུ་དག་པར་བྱ་བའི་ཕྱིར་མ་ཡིན། དུལ་བར་བྱ་བའི་ཕྱིར་མ་ཡིན། ཉེ་བར་ཞི་བར་བྱ་བའི་ཕྱིར་མ་ཡིན་གྱི། དམིགས་པར་ལྟ་བ་ཡིན་ཏེ། ངར་འཛིན་པ་དང་ [143a.7]ང་ཡིར་འཛིན་པ་ལ་གནས་ཤིང་སྟོང་པ་ཉིད་ཀྱིས་མི་དམིགས་པའི་ཆོས་རྣམས་ལ་གཡང་སར་འདུ་ཤེས་པ་ཡིན། སྟོང་པ་ཉིད་སྨྲ་བའི་དགེ་སློང་རྣམས་ལ་ཡང་དགྲར་འདུ་ཤེས་པ་ཡིན་ཏེ། འོད་སྲུང་དེ་ནི་ཆོ་ག་སྲུང་ཞིང་ཚུལ་འཆོས་པའི་དགེ་སྦྱོང་ཞེས་བྱའོ། །འོད་སྲུང་དེ་ལ་བརྗོད་པའི་སྒྲ་ [143b] [143b.1]ཚིགས་སུ་བཅད་པའི་དགེ་སྦྱོང་གང་ཞེ་ན། འོད་སྲུང་འདི་ལ་དགེ་སྦྱོང་ཁ་ཅིག་ཇི་ལྟར་བདག་ཚུལ་ཁྲིམས་དང་ལྡན་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་ནས་ཚུལ་ཁྲིམས་སྲུང་། ཇི་ལྟར་མང་དུ་ཐོས་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་ [143b.2]ནས་ཐོས་པ་འཛིན། ཇི་ལྟར་བདག་དགོན་པར་གཞན་གྱིས་ཤེས་པར་འགྱུར་སྙམ་དུ་སོ་སོར་བརྟགས་ནས་དགོན་པ་ལ་གནས་ཤིང་སོ་སོར་བརྟགས་ནས་འདོད་པ་ཉུང་ལ་ཆོག་ཤེས་པ་དང་། རབ་ཏུ་དབེན་པར་གྱུར་ཏེ། འདི་ལྟར་གཞན་ལ་བསྟན་པའི་ཕྱིར་ཡིན་གྱི་སྐྱོ་བར་བྱ་ [143b.3]བའི་ཕྱིར་མ་ཡིན། འདོད་ཆགས་དང་བྲལ་བར་བྱ་བའི་ཕྱིར་མ་ཡིན། འགོག་པར་བྱ་བའི་ཕྱིར་མ་ཡིན། ཉེ་བར་ཞི་བར་བྱ་བའི་ཕྱིར་མ་ཡིན། རྫོགས་པར་བྱང་ཆུབ་པར་བྱ་བའི་ཕྱིར་མ་ཡིན། དགེ་སྦྱོང་གི་ཕྱིར་མ་ཡིན། ཚངས་པའི་ཕྱིར་མ་ཡིན། མྱ་ངན་ལས་འདས་པའི་ [143b.4]ཕྱིར་མ་ཡིན་ཏེ། འོད་སྲུང་དེ་ནི་བརྗོད་པའི་སྒྲ་ཚིགས་སུ་བཅད་པའི་དགེ་སྦྱོང་ཞེས་བྱའོ། །འོད་སྲུང་དེ་ལ་ཡང་དག་པར་སྒྲུབ་པའི་དགེ་སྦྱོང་གང་ཞེ་ན། འོད་སྲུང་གང་ལུས་དང་སྲོག་ལ་ཡང་མི་ལྟ་བ་ཡིན་ན་རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་ལྟ་ཅི་སྨོས། སྟོང་ [143b.5]པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་རྣམས་ཐོས་ནས་དགའ་ཞིང་དེ་བཞིན་ཉིད་དུ་ཞུགས་པ་ཡིན། མྱ་ངན་ལས་འདས་པ་ལ་ཡང་འདོད་པ་མེད་པར་སྤྱད་པ་སྤྱོད་ན་ཁམས་གསུམ་པ་ལ་མངོན་པར་དགའ་བ་ལྟ་ཅི་སྨོས། སྟོང་པ་ཉིད་དུ་ལྟ་བ་ཡང་མི་ [143b.6]འདོད་པ་ཡིན་ན། བདག་དང་སེམས་ཅན་དང་སྲོག་དང་སྐྱེ་བ་པོ་དང་གསོ་བ་དང་སྐྱེས་བུ་དང་གང་ཟག་ཏུ་ལྟ་བ་ལྟ་ཅི་སྨོས། དོན་ལ་རྟོན་གྱི་ཚིག་འབྲུ་ལ་རྟོན་པ་མ་ཡིན། ཉོན་མོངས་པ་རྣམས་ལས་རྣམ་པར་ཐར་པ་ནང་དུ་ཚོལ་གྱི་ཕྱི་རོལ་དུ་རྒྱུག་པ་མ་ཡིན། ཆོས་ཐམས་ཅད་ [143b.7]ཤིན་ཏུ་ཡོངས་སུ་དག་ཅིང་རང་བཞིན་གྱིས་ཀུན་ནས་ཉོན་མོངས་པ་མེད་པར་མཐོང་བས་བདག་ཉིད་སྐྱབས་ཡིན་གྱི། གཞན་སྐྱབས་མ་ཡིན། དེ་དེ་བཞིན་གཤེགས་པ་ལ་ཆོས་ཉིད་དུ་ཡང་མི་ལྟ་ན་གཟུགས་ཀྱི་སྐུར་ལྟ་ཅི་སྨོས། ཆོས་ལ་འདོད་ཆགས་དང་བྲལ་བར་ཡང་མི་ལྟ་ན་སྨྲ་ [144a] [144a.1]བའི་ཚིག་གི་ལམ་ནས་བརྗོད་པར་ལྟ་ཅི་སྨོས། འཕགས་པ་འདུས་མ་བྱས་པའི་དགེ་འདུན་ལ་ཡང་རྣམ་པར་མི་རྟོག་ན་མང་པོ་འདུས་པར་ལྟ་ཅི་སྨོས། ཆོས་གང་སྤང་བར་བྱ་བའི་ཕྱིར་བརྩོན་པ་མ་ཡིན། བསྒོམ་པར་བྱ་བའི་ཕྱིར་མ་ཡིན། མངོན་སུམ་དུ་ [144a.2]བྱ་བའི་ཕྱིར་མ་ཡིན། འཁོར་བར་ཡང་མི་སྐྱེ། མྱ་ངན་ལས་འདས་པ་ལ་ཡང་མངོན་པར་དགའ་བ་མ་ཡིན། ཐར་པ་ཡང་མི་དམིགས་སོ། །བཅིང་བ་ཡང་མ་ཡིན་ལ་ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་རིག་ནས་ཀུན་ཏུ་མི་འཁོར། ཡོངས་ [144a.3]སུ་མྱ་ངན་ལས་མི་འདའ་བ་ཡིན་ཏེ། འོད་སྲུང་དེ་ནི་ཡང་དག་པར་སྒྲུབ་པའི་དགེ་སྦྱོང་ཞེས་བྱའོ། །འོད་སྲུང་ཡང་དག་པར་སྒྲུབ་པའི་དགེ་སྦྱོང་དུ་འགྱུར་བར་བརྩོན་པར་བྱའི་མིང་གིས་གནོད་པར་ནི་མི་བྱ་སྟེ། འོད་སྲུང་དགེ་སྦྱོང་ནི་བཞི་པོ་དེ་དག་གོ །དེ་ལ་འདི་སྐད་ཅེས་བྱ་སྟེ། གང་ [144a.4]ཞིག་ལུས་དང་ངག་དང་སེམས་མ་དག །མ་དུལ་མ་བསྲུངས་མ་བྱང་འདོད་ཆེན་ཅན། །མགོ་བྲེགས་ཆོས་གོས་ལྷུང་བཟེད་ལག་ན་ཐོགས། །དེ་ནི་དབྱིབས་རྟགས་དགེ་སྦྱོང་ཡིན་ཞེས་བསྟན། །ཆོ་ག་སྤྱོད་པ་ལ་སོགས་ལྡན་གྱུར་ཅིང་། །ཁ་ཟས་ངན་ཟ་ཚུལ་ [144a.5]འཆོས་ལ་སོགས་སྟེན། །འདུ་འཛི་རྒྱང་རིང་ཡོངས་སུ་སྤོང་བྱེད་ཅིང་། །སྤྱོད་ལམ་འཕགས་པའི་རིགས་དང་ལྡན་གྱུར་ཀྱང་། །དེ་ཡི་དེ་ཀུན་དུལ་བར་བྱ་ཕྱིར་མིན། །ཞི་ཕྱིར་མ་ཡིན་སྐྱོ་བར་བྱ་ཕྱིར་མིན། །སྟོང་པ་མཚན་མེད་གཡང་སར་འདུ་ཤེས་པ། །ཆོ་ག་སྲུང་ [144a.6]ཞིང་ཚུལ་འཆོས་གཉིས་པ་ཡིན། །ཚུལ་ཁྲིམས་ཏིང་འཛིན་སྦྱངས་པའི་ཡོན་ཏན་ཐོས། །གཞན་དག་ངོ་མཚར་འཛིན་དུ་གཞུག་ཕྱིར་བྱེད། །ཞི་ཕྱིར་མ་ཡིན་སྐྱོ་བར་བྱ་ཕྱིར་མིན། །བརྗོད་དང་གྲགས་འདོད་དགེ་སྦྱོང་གསུམ་པ་ཡིན། །གང་ཞིག་ལུས་སྲོག་དོན་དུ་མི་གཉེར་ [144a.7]ཞིང་། །རྙེད་དང་བཀུར་སྟི་ལ་ནི་རྒྱབ་ཀྱིས་ཕྱོགས། །རྣམ་པར་ཐར་པ་བསྐྱེད་པའི་སྒོ་ཐོས་ནས། །སྲིད་པའི་འགྲོ་བ་ཐམས་ཅད་དོན་མི་གཉེར། ཆོས་རྣམས་ཤིན་ཏུ་སྟོང་པར་ཡོངས་བརྟགས་ནས། །མྱ་ངན་འདས་དང་མ་འདས་མཐོང་མི་འགྱུར། །ཆོས་ལ་ [144b] [144b.1]འདོད་ཆགས་བྲལ་བར་རྟག་ཏུ་རྟོག །མ་བྱས་ཆོས་རྟོགས་མྱ་ངན་འདས་པར་འགྱུར། །འོད་སྲུང་འདི་ལྟ་སྟེ། དཔེར་ན་མི་དབུལ་པོ་ཞིག་ལ་མཛོད་འབྱོར་པ་ཞེས་མིང་བཏགས་ན། འོད་སྲུང་འདི་ཇི་སྙམ་དུ་སེམས། མི་དབུལ་པོ་དེ་དང་མིང་དེ་འཐུན་པ་ཡིན་ནམ། གསོལ་ [144b.2]པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་གང་དགེ་སྦྱོང་དང་། བྲམ་ཟེ་གང་དག་དགེ་སྦྱོང་དང་། བྲམ་ཟེའི་ཡོན་ཏན་དང་མི་ལྡན་པ་དེ་དག་ནི་གསུང་རབ་འདི་ལ་མི་དབུལ་པོ་ཞེས་ངས་བཤད་དོ། །དེ་ [144b.3]ལ་འདི་སྐད་ཅེས་བྱ་སྟེ། དཔེར་ན་དབུལ་པོར་གྱུར་པའི་མི་ཞིག་ལ། །མཛོད་ལྡན་མིང་བཏགས་དེ་ལ་མཛེས་མ་ཡིན། །དགེ་སྦྱོང་ཉམས་ལ་དགེ་སྦྱོང་མིང་མི་མཛེས། །དབུལ་ལ་ཕྱུག་ཅེས་བཏགས་པའི་དཔེ་དང་མཚུངས། །འོད་སྲུང་འདི་ལྟ་སྟེ་དཔེར་ན་མི་ལ་ལ་ཞིག་རྒྱ་ [144b.4]མཚོའི་ཆུ་ཆེན་པོས་ཁྱེར་ལ་ཆུས་སྐོམ་བཞིན་དུ་འཆི་བའི་དུས་བྱེད་པ་དེ་བཞིན་དུ་འོད་སྲུང་འདི་ལ་དགེ་སྦྱོང་དང་བྲམ་ཟེ་ཁ་ཅིག་ཆོས་མང་པོ་བླངས་ཏེ་ཀུན་ཆུབ་པར་བྱས་ཀྱང་འདོད་ཆགས་ལ་སྲེད་པ་མི་སེལ། ཞེ་སྡང་ལ་སྲེད་པ་མི་སེལ། གཏི་མུག་ལ་སྲེད་པ་མི་སེལ་བ་དེ་དག་ [144b.5]ཆོས་ཀྱི་རྒྱ་མཚོས་ཁྱེར་ལ། ཉོན་མོངས་པའི་སྐོམ་པས་འཆི་བའི་དུས་བྱེད་པར་འགྱུར་ཏེ། ངན་འགྲོར་འགྲོ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་ཞིག་རྒྱ་མཚོའི་ཆུས་ཁྱེར་ལ། །དེ་ནི་སྐོམ་བཞིན་འཆི་བའི་དུས་བྱེད་གྱུར། །དེ་བཞིན་ཆོས་མང་སྲེད་ [144b.6]པས་བག་མེད་པ། །ཆོས་ཀྱི་རྒྱ་མཚོར་གནས་ཀྱང་ངན་སོང་འགྲོ། །འོད་སྲུང་འདི་ལྟ་སྟེ་དཔེར་ན་སྨན་པ་སྨན་སྒྲོ་ཐོགས་ཏེ། ཕྱོགས་དང་ཕྱོགས་མཚམས་སུ་རྒྱུ་བ་དེ་ནད་ཅིག་གིས་བཏབ་ནས་ནད་དེ་གསོ་མི་ནུས་ན་དེའི་སྨན་དེ་ནི་དོན་མེད་པ་ཡིན་ནོ། །འོད་སྲུང་དེ་བཞིན་དུ་མང་དུ་ཐོས་ [144b.7]པའི་ཉོན་མོངས་པའི་ནད་དུ་བལྟ་སྟེ། གང་མང་དུ་ཐོས་པ་དེས་བདག་ཉོན་མོངས་པའི་ནད་ལས་གསོ་མི་ནུས་ན་དེའི་མང་དུ་ཐོས་པ་དེ་ནི་དོན་མེད་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། དཔེར་ན་སྨན་པའི་སྨན་སྒྲོར་བཅུག་པའི་སྨན། །འཇིག་རྟེན་ཀུན་ཏུ་ཡོངས་སུ་ [145a] [145a.1]རྒྱུ་བྱེད་ཀྱང་། །ནད་ཀྱིས་བཏབ་པ་བཟློག་པར་མི་ནུས་ན། །དེ་ཡི་སྨན་དེ་དོན་མེད་གྱུར་པ་ཡིན། །དེ་བཞིན་དགེ་སློང་ཚུལ་ཁྲིམས་ཡོན་ཏན་ལྡན། །ཐོས་དང་ལྡན་ཡང་ཚུལ་བཞིན་མ་ཡིན་པའི། །ཉོན་མོངས་བྱུང་བའི་ནད་དེ་མི་སེལ་ན། །དེ་ཡི་ [145a.2]ཐོས་ལ་བརྩོན་པ་དོན་མེད་ཡིན། །འོད་སྲུང་འདི་ལྟ་སྟེ་དཔེར་ན་མི་ནད་པ་ཞིག་ལ་རྒྱལ་པོ་ལ་འོས་པའི་སྨན་བཏང་ལ་ཆོ་ག་བཞིན་མ་བྱས་པས་འཆི་བའི་དུས་བྱེད་པ་དེ་བཞིན་དུ་འོད་སྲུང་གང་མི་སྡོམ་པ་དེས་འཆི་བའི་དུས་བྱེད་པ་དེ་ཡང་མང་དུ་ཐོས་པའི་ཉོན་མོངས་པའི་ནད་དུ་བལྟའོ། ། [145a.3]དེ་ལ་འདི་སྐད་ཅེས་བྱ་སྟེ། དཔེར་ན་རྒྱལ་པོ་འོས་པའི་སྨན་བཏང་ནས། །ཆོ་ག་མ་བྱས་མི་དེ་ཤི་བར་གྱུར། །དེ་བཞིན་གང་མི་སྡོམ་པས་འདིར་ཤི་བ། །དེ་ནི་མང་དུ་ཐོས་པའི་ཉོན་མོངས་ནད། །འོད་སྲུང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་མི་གཙང་བའི་ནང་དུ་ [145a.4]ལྷུང་ན་སྨད་པར་འགྱུར་ཞིང་མཁོ་བར་མི་འགྱུར་རོ། །འོད་སྲུང་དེ་བཞིན་དུ་མང་དུ་ཐོས་པ་རྙེད་པ་དང་བཀུར་སྟིའི་མི་གཙང་བའི་ནང་དུ་ལྷུང་བར་བལྟ་སྟེ། ཅི་ཡང་མེད་པ་ལ་ནི་ལྷ་དང་མི་རྣམས་དགའ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། དཔེར་ན་རིན་ཆེན་མི་གཙང་ [145a.5]ལྷུང་བ་སྨད། །ཇི་ལྟར་སྔོན་བཞིན་དུ་ནི་ཕྱིས་མ་ཡིན། །དགེ་སློང་མང་དུ་ཐོས་པར་གྱུར་པ་ཡང་། །བཀུར་སྟིའི་མི་གཙང་ལྷུང་བ་དེ་འདྲར་བཤད། །འོད་སྲུང་འདི་ལྟ་སྟེ་དཔེར་ན་མི་རོའི་མགོ་ལ་གསེར་གྱི་ཕྲེང་བ་བཏགས་པ་དེ་བཞིན་དུ་ཚུལ་ཁྲིམས་འཆལ་པ་ [145a.6]ངུར་སྨྲིག་གྱོན་པར་བལྟའོ། །དེ་ལ་འདི་སྐད་ཅེས་བྱ་སྟེ། དཔེར་ན་མི་རོ་མགོ་ལ་གསེར་ཕྲེང་ངམ། །ཡང་ན་མེ་ཏོག་ཕྲེང་བ་བཏགས་བྱས་པ། །དེ་བཞིན་ཁྲིམས་མེད་ངུར་སྨྲིག་གྱོན་པ་ཡང་། །མཐོང་ནས་དེ་ལ་ཡིད་ནི་དད་མི་འགྱུར། །འོད་སྲུང་འདི་ལྟ་སྟེ་ [145a.7]དཔེར་ན་ཚོང་དཔོན་གྱི་བུ་ཞིག་ལེགས་པར་ཁྲུས་བྱས་ཏེ། ལེགས་པར་རྣམ་པར་བྱུགས་ལ། སྐྲ་དང་སེན་མོ་བྲེགས་ནས་གོས་དཀར་པོ་བགོས་ཏེ་ཙན་དན་མཆོག་གིས་བསྐུས་པའི་མགོ་ལ་ཙམ་པ་ཀའི་མེ་ཏོག་གི་ཕྲེང་བ་ཐོགས་པ་དེ་བཞིན་དུ་འོད་སྲུང་ཚུལ་ཁྲིམས་དང་ལྡན་ཞིང་མང་དུ་ཐོས་ [145b] [145b.1]པ་ངུར་སྨྲིག་གྱོན་པར་བལྟའོ། །དེ་ལ་འདི་སྐད་ཅེས་བྱ་སྟེ། ལེགས་བཀྲུས་ལེགས་པར་བྱུགས་པ་ཡི། །ཚོང་དཔོན་བུ་ཡི་མགོ་བོ་ལ། །ཙམ་པ་ཀ་ཡི་མེ་ཏོག་ཕྲེང་། །དྲི་ཞིམ་ཡིད་འོང་བཏགས་པར་མཛེས། །དེ་བཞིན་ཚུལ་ཁྲིམས་ལྡན་གྱུར་ཅིང་། །མང་ཐོས་ [145b.2]ཚུལ་ཁྲིམས་ཕུན་སུམ་ཚོགས། །རྒྱལ་བའི་སྲས་པོ་ཡོན་ཏན་ལྡན། །དེ་ལ་ངུར་སྨྲིག་དེ་བཞིན་མཛེས། །འོད་སྲུང་བཞི་པོ་འདི་དག་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་ཡིན་ཏེ། བཞི་གང་ཞེ་ན། འོད་སྲུང་འདི་ལ་དགེ་སློང་ཁ་ཅིག་ཚུལ་ [145b.3]ཁྲིམས་དང་ལྡན་པ་ཡིན་ཏེ། སོ་སོར་ཐར་པའི་སྡོམ་པས་བསྡམས་ཤིང་གནས། ཆོ་ག་དང་སྤྱོད་ཡུལ་ཕུན་སུམ་ཚོགས། ཁ་ན་མ་ཐོ་བ་ཕྲ་རབ་རྣམས་ལ་ཡང་འཇིགས་པར་ལྟ། ཡང་དག་པར་བླངས་ཏེ་བསླབ་པའི་གཞི་རྣམས་ལ་སློབ་ཅིང་ལུས་ཀྱི་ལས་དང་། ངག་ [145b.4]གི་ལས་དང་། ཡིད་ཀྱི་ལས་ཡོངས་སུ་དག་པ་དང་ལྡན་པར་གནས་པས་འཚོ་བ་ཡོངས་སུ་དག་ཀྱང་དེ་བདག་ཏུ་སྨྲ་བ་ཡིན་ཏེ། འོད་སྲུང་དེ་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་དང་པོའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་འདུལ་བ་འཛིན་ [145b.5]ཅིང་འདུལ་བ་ལ་ཞུགས་ཏེ། འདུལ་བའི་ཚུལ་ལ་གནས་པ་ཡིན་ཡང་འཇིག་ཚོགས་ལ་ལྟ་བ་ལས་མ་བསྐྱོད་པ་ཡིན་ཏེ། འོད་སྲུང་དེ་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་གཉིས་པའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་བྱམས་པ་ [145b.6]ལ་གནས་པ་ཡིན་ཏེ། སེམས་ཅན་ལ་དམིགས་པའི་བྱམས་པ་དང་ལྡན་པ་ཡིན་ཡང་འདུ་བྱེད་ཐམས་ཅད་ལ་སྐྱེ་བ་མེད་པ་ཐོས་ནས་སྐྲག་སྟེ། ཀུན་ཏུ་དངང་བར་འགྱུར་ཞིང་ཀུན་ཏུ་རབ་ཏུ་དངང་བར་འགྱུར་བ་དེ་ནི་འོད་སྲུང་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་ [145b.7]པ་གསུམ་པའོ། །འོད་སྲུང་གཞན་ཡང་འདི་ལ་དགེ་སློང་ཁ་ཅིག་སྦྱངས་པའི་ཡོན་ཏན་བཅུ་གཉིས་ཡང་དག་པར་བླངས་ཀྱང་དམིགས་པར་ལྟ་བ་ཡིན་ཏེ། ངར་འཛིན་པ་དང་། ང་ཡིར་འཛིན་པ་ལ་གནས་པ་དེ་ནི་འོད་སྲུང་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ [146a] [146a.1]ལྟར་བཅོས་པ་བཞི་པ་སྟེ་འོད་སྲུང་བཞི་པོ་དེ་དག་ནི་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་ཡིན་ནོ། །འོད་སྲུང་ཚུལ་ཁྲིམས་ཚུལ་ཁྲིམས་ཞེས་བྱ་བ་ནི་གང་ལ་བདག་མེད་པ་དང་། བདག་གི་བ་མེད་པ་དང་། བྱ་བ་མེད་པ་དང་། མི་བྱ་བ་ཡང་མེད་པ་དང་། བྱེད་པ་མེད་པ་དང་། བྱེད་པ་མེད་ [146a.2]པ་ཡང་མ་ཡིན་པ་དང་རྒྱུ་བ་མ་ཡིན་པ་དང་། མི་རྒྱུ་བ་ཡང་མ་ཡིན་པ་དང་། རབ་ཏུ་སྤྱོད་པ་མེད་པ་དང་། རབ་ཏུ་སྤྱོད་པ་མེད་པ་ཡང་མ་ཡིན་པ་དང་། མིང་མེད་པ་དང་། གཟུགས་མེད་པ་དང་། མཚན་མ་མེད་པ་དང་། མཚན་མ་མེད་པ་ཡང་མ་ཡིན་པ་དང་རབ་ཏུ་ཞི་བ་མ་ཡིན་པ་དང་། རབ་ཏུ་ཞི་བ་མ་ཡིན་པ་ཡང་མ་ཡིན་པ་ [146a.3]དང་། འཛིན་པ་མེད་པ་དང་། འདོར་བ་མེད་པ་དང་། གཟུང་བ་མེད་པ་དང་། གཟུང་བ་མེད་པ་ཡང་མ་ཡིན་པ་དང་། སེམས་ཅན་མེད་པ་དང་། སེམས་ཅན་དུ་འདོགས་པ་མེད་པ་དང་། ཚིག་མེད་པ་དང་། ཚིག་ཏུ་འདོགས་པ་མེད་པ་དང་། སེམས་མེད་པ་དང་། སེམས་སུ་འདོགས་པ་མེད་པ་དང་། འཇིག་རྟེན་མེད་པ་ [146a.4]དང་། འཇིག་རྟེན་མེད་པ་ཡང་མ་ཡིན་པ་དང་། རྟེན་མེད་པ་དང་། རྟེན་མེད་པ་ཡང་མ་ཡིན་པ་དང་། བདག་གི་ཚུལ་ཁྲིམས་ལ་མི་སྟོད་པ་དང་། གཞན་གྱི་ཚུལ་ཁྲིམས་ལ་མི་སྨོད་པ་དང་། ཚུལ་ཁྲིམས་ཀྱིས་རློམ་སེམས་སུ་མི་བྱེད་པ་དང་། ཚུལ་ཁྲིམས་ལ་མི་རྟོག་པ་ཡིན་ཏེ། དེ་ནི་འཕགས་པ་རྣམས་ཀྱི་ཚུལ་ [146a.5]ཁྲིམས་ཟག་པ་མེད་པ། གཏོགས་པ་མ་ཡིན་པ། ཁམས་གསུམ་པ་དང་བྲལ་བ། རྟེན་ཐམས་ཅད་མེད་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཚུལ་ཁྲིམས་ལྡན་ལ་དྲི་མ་མེད་ཅིང་ཅི་ཡང་མེད། །ཚུལ་ཁྲིམས་ལྡན་ལ་རྒྱགས་པ་མེད་དེ་རྟེན་པ་མེད། །ཚུལ་ [146a.6]ཁྲིམས་ལྡན་ལ་མུན་པ་མེད་ཅིང་འཆིང་བ་མེད། །ཚུལ་ཁྲིམས་ལྡན་ལ་རྡུལ་རྣམས་མེད་དེ་ཉེས་པ་མེད། །ཞི་བ་རབ་ཏུ་ཞི་བ་ཉེ་བར་ཞི་བའི་ཡིད། །རྟོག་དང་རྣམ་པར་རྟོག་དང་བྲལ་ཞིང་ཉོན་མོངས་མེད། །གཡོ་བ་དང་ནི་རློམ་སེམས་ཀུན་དང་རྣམ་བྲལ་བ། །དེ་ནི་འོད་སྲུང་སངས་རྒྱས་བསྟན་ལ་ཚུལ་ [146a.7]ཁྲིམས་ལྡན། །ལུས་ལ་མི་ལྟ་སྲོག་ལ་ཕངས་པར་འཛིན་མི་བྱེད། །སྲིད་པ་རྣམས་སུ་སྐྱེ་བ་ཀུན་ལ་འདོད་པ་མེད། །ཡང་དག་ཞུགས་ཤིང་དེ་ཉིད་ཚུལ་ལ་རབ་གནས་པ། །དེ་ནི་འོད་སྲུང་སངས་རྒྱས་བསྟན་ལ་ཚུལ་ཁྲིམས་ལྡན། །འཇིག་རྟེན་མ་གོས་འཇིག་རྟེན་དག་ལ་གནས་པ་མེད། །སྣང་བ་ [146b] [146b.1]ཐོབ་ཅིང་བདག་གི་མེད་དེ་ཅི་ཡང་མེད། །བདག་ཏུ་འདུ་ཤེས་མེད་ཅིང་གཞན་དུ་འདུ་ཤེས་མེད། །འདུ་ཤེས་ཡོངས་སུ་ཤེས་པས་ཚུལ་ཁྲིམས་རྣམ་པར་དག །གང་ལ་ཚུ་རོལ་མེད་ཅིང་ཕ་རོལ་དབུས་ཀྱང་མེད། །ཕ་རོལ་ཚུ་རོལ་དག་ལ་ནམས་ཀྱང་མི་ཆགས་ཤིང་། །བཅིངས་དང་ཆགས་མེད་ཚུལ་ [146b.2]འཆོས་མེད་ཅིང་ཟག་པ་མེད། །དེ་ནི་འོད་སྲུང་སངས་རྒྱས་བསྟན་ལ་ཚུལ་ཁྲིམས་ལྡན། །མིང་དང་གཟུགས་རྣམས་ལ་ཡང་ཆགས་པ་མེད་པའི་ཡིད། །དེ་ནི་མཉམ་པར་བཞག་ཅིང་ཤིན་ཏུ་དུལ་བའི་སེམས། །གང་ལ་བདག་མེད་བདག་གིར་འཛིན་པ་མེད་པ་ནི། །དེ་ཙམ་གྱིས་ན་ཚུལ་ཁྲིམས་ [146b.3]གནས་ཤེས་བརྗོད་པ་ཡིན། །སོ་སོར་ཐར་པའི་སློབ་པས་རློམ་སེམས་བྱེད་པ་མེད། །དེས་ནི་འདི་ན་དེ་ལ་ཆགས་པར་མི་འགྱུར་ཏེ། །དེ་ཡི་གོང་དུ་འཕགས་པའི་ལམ་རྣམས་ཚོལ་བྱེད་པ། །དེ་ནི་ཚུལ་ཁྲིམས་རྣམ་པར་དག་པའི་མཚན་མའོ། །ཚུལ་ཁྲིམས་གཙོ་བོར་མ་ཡིན་ཏིང་འཛིན་དེར་ཆགས་མེད། །དེ་ [146b.4]ཡི་གོང་དུ་ཤེས་རབ་བསྒོམ་པ་ཡོངས་སུ་ཚོལ། །དམིགས་པ་མེད་པ་འཕགས་པ་རྣམས་ཀྱི་རིགས་ཡིན་ཏེ། །ཚུལ་ཁྲིམས་དེ་ནི་བདེ་བར་གཤེགས་པས་རབ་ཏུ་བསྔགས། །འཇིག་པའི་ཚོགས་ལ་ལྟ་ལས་རྣམ་པར་གྲོལ་བའི་ཡིད། །དེ་འདིར་ང་དང་ང་ཡི་སྙམ་དུ་འགྱུར་བ་མེད། །སངས་རྒྱས་སྤྱོད་ [146b.5]ཡུལ་སྟོང་པ་ཉིད་ལ་ལྷག་པར་མོས། །དེ་ཡི་ཚུལ་ཁྲིམས་དེ་ནི་མཉམ་པ་མེད་པའོ། །ཚུལ་ཁྲིམས་ལ་ནི་གནས་ནས་ཏིང་ངེ་འཛིན་ཀྱང་ཐོབ། །ཏིང་ངེ་འཛིན་རྣམས་ཐོབ་ནས་ཤེས་རབ་ཤིན་ཏུ་སྒོམ། །ཤེས་རབ་ཀྱིས་ནི་ཡེ་ཤེས་རྣམ་པར་དག་པ་འཐོབ། །ཡེ་ཤེས་རྣམ་པར་དག་པས་ཚུལ་ཁྲིམས་ [146b.6]ཕུན་སུམ་ཚོགས། །ཚིགས་སུ་བཅད་པ་མངོན་པར་སྒྲུབ་པ་འདི་དག་གསུངས་པའི་ཚེ་དགེ་སློང་བརྒྱད་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་གོ །དགེ་སློང་ [146b.7]བསམ་གཏན་ཐོབ་པ་ལྔ་བརྒྱ་ནི་ཆོས་བསྟན་པ་ཟབ་མོ་འདི་ལ་མི་འཇུག་སྟེ། མ་རྟོགས་མ་མོས་པས་སྟན་ལས་ལངས་ཏེ་དོང་ངོ་། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་བསམ་གཏན་ཐོབ་པ་ལྔ་བརྒྱ་པོ་འདི་དག་ཆོས་ [147a] [147a.1]བསྟན་པ་ཟབ་མོ་འདི་ལ་མི་འཇུག་སྟེ། མ་རྟོགས་མ་མོས་པས་སྟན་ལས་ལངས་ཏེ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདི་ལྟར་དགེ་སློང་མངོན་པའི་ང་རྒྱལ་ཅན་འདི་དག་ནི་ཚུལ་ཁྲིམས་རྣམ་པར་དག་པ་ཟག་པ་མེད་པ་འདི་ལ་མི་འཇུག་སྟེ། མ་རྟོགས་མི་ [147a.2]མོས་ཤིང་སྐྲག་སྟེ་ཀུན་དུ་དངངས། ཀུན་ཏུ་རབ་ཏུ་དངངས་སོ། །འོད་སྲུང་ཚིགས་སུ་བཅད་པ་མངོན་པར་སྒྲུབ་པ་ཟབ་པས་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ཟབ་སྟེ། དེ་ལ་དགེ་བའི་རྩ་བ་མ་བསྐྱེད་པ། སྡིག་པའི་གྲོགས་པོས་ཡོངས་སུ་ཟིན་པ་དང་། མོས་པ་མི་མང་བ་དག་གིས་མོས་ [147a.3]པར་མི་ནུས་སོ། །འོད་སྲུང་དགེ་སློང་ལྔ་བརྒྱ་པོ་འདི་དག་ནི་དེ་བཞིན་གཤེགས་པ་འོད་སྲུང་གི་གསུང་རབ་ལ་མུ་སྟེགས་ཅན་གྱི་ཉན་ཐོས་སུ་གྱུར་ཏེ་དེ་དག་དེ་བཞིན་གཤེགས་པ་འོད་སྲུང་ལས་རྒལ་བའི་བསམ་པས་ཆོས་བསྟན་པ་གཅིག་ཐོས་སོ། །ཐོས་ནས་དད་པའི་སེམས་གཅིག་རྙེད་དེ། ཇི་ [147a.4]ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་འཇམ་ཞིང་སྙན་པར་གསུང་བ་ངོ་མཚར་ཏོ་སྙམ་མོ། །དེ་དག་འཆི་བའི་དུས་བྱས་ནས་དད་པའི་སེམས་གཅིག་རྙེད་པ་དེས་སུམ་ཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེས་སོ། །དེ་དག་དེ་ནས་ཤི་འཕོས་ [147a.5]ནས་འདིར་སྐྱེས་ཏེ། རྒྱུ་དེ་ཉིད་ཀྱིས་ངའི་བསྟན་པ་འདི་ལ་རབ་ཏུ་བྱུང་སྟེ། འོད་སྲུང་དགེ་སློང་ལྔ་བརྒྱ་པོ་ལྟ་བར་བྱིང་བ་འདི་དག་ནི་ཆོས་བསྟན་པ་ཟབ་མོ་འདི་ལ་མི་འཇུག་སྟེ། མི་རྟོགས་མི་མོས་ཤིང་སྐྲག་སྟེ། ཀུན་ཏུ་དངངས། ཀུན་ཏུ་རབ་ཏུ་དངངས་སོ། །ཡང་འདི་དག་ནི་ཆོས་བསྟན་པ་འདིས་ [147a.6]ཡོངས་སུ་སྦྱང་བ་བྱས་ཏེ་ཕྱིས་ངན་འགྲོ་ལོག་པར་ལྟུང་བར་མི་འགྱུར་ཞིང་ཕུང་པོ་འདི་དག་ཉིད་ཀྱིས་ཡོངས་སུ་མྱ་ངན་ལས་འདའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་ཁྱོད་སོང་ལ་དགེ་སློང་དེ་དག་ཀུན་ཤེས་པར་བྱོས་ཤིག །རབ་འབྱོར་ [147a.7]གྱིས་གསོལ་པ། བཅོམ་ལྡན་འདས་ཉིད་ཀྱིས་འདི་དག་ལ་བཤད་ན་ཡང་འཐུན་པར་མི་བགྱིད་ན་བདག་ལ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལམ་གང་ནས་འདོང་བའི་ལམ་དེར་དགེ་སློང་གཉིས་ཤིག་སྤྲུལ་པ་སྤྲུལ་ཏོ། །དེ་ནས་དགེ་སློང་ལྔ་ [147b] [147b.1]བརྒྱ་པོ་དེ་དག་སྤྲུལ་པའི་དགེ་སློང་དེ་གཉིས་ལམ་གང་ནས་འདོང་བའི་ལམ་དེར་དོང་སྟེ་ཕྱིན་པ་དང་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གར་འདོང་། དེ་གཉིས་ཀྱིས་སྨྲས་པ། ཁོ་བོ་ཅག་ནི་དགོན་པའི་གནས་རྣམས་སུ་བསམ་གཏན་གྱི་བདེ་བ་ལ་རེག་པར་གནས་པར་བྱ་བར་ [147b.2]འདོང་ངོ་། །དེ་ཅིའི་ཕྱིར་ཞེ་ན། ཁོ་བོ་ཅག་ནི་བཅོམ་ལྡན་འདས་ཀྱིས་ཆོས་བསྟན་པ་གང་ཡིན་པའི་ཆོས་བསྟན་པ་དེ་ལ་མི་འཇུག་སྟེ། མ་རྟོགས་མ་མོས་ཤིང་སྐྲག་སྟེ་ཀུན་ཏུ་དངངས། ཀུན་ཏུ་རབ་ཏུ་དངངས་པར་གྱུར་ནས་ཁོ་བོ་ཅག་དགོན་པའི་གནས་རྣམས་སུ་བསམ་གཏན་གྱི་བདེ་ [147b.3]བ་ལ་རེག་པར་གནས་པ་རྣམས་ཀྱིས་གནས་པར་བྱའོ། །དགེ་སློང་ལྔ་བརྒྱ་པོ་དེ་དག་གིས་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁོ་བོ་ཅག་ཀྱང་བཅོམ་ལྡན་འདས་ཀྱིས་ཆོས་བཤད་པ་ལ་མི་འཇུག་སྟེ། མ་རྟོགས་མ་མོས་ཤིང་སྐྲག་སྟེ་ཀུན་ཏུ་དངངས། ཀུན་ཏུ་རབ་ཏུ་དངངས་པར་གྱུར་ [147b.4]ཏོ། །དེའི་ཕྱིར་ཁོ་བོ་ཅག་ཀྱང་དགོན་པའི་གནས་རྣམས་སུ་བསམ་གཏན་གྱི་བདེ་བ་ལ་རེག་པར་གནས་པ་རྣམས་ཀྱིས་གནས་པར་བྱའོ། །སྤྲུལ་པ་དག་གིས་སྨྲས་པ་ཚེ་དང་ལྡན་པ་དག་དེའི་ཕྱིར་བདག་ཅག་ཡང་དག་པར་འགྲོ་བར་བྱའོ། །རྩོད་པར་མི་བྱའོ། །རྩོད་པ་མེད་པ་ལྷུར་ལེན་པ་ནི་དགེ་ [147b.5]སྦྱོང་གི་ཆོས་སོ། །ཚེ་དང་ལྡན་པ་དག་གང་འདི་ཡོངས་སུ་མྱ་ངན་ལས་འདས་པ་ཞེས་བྱ་བ་གང་ཡོངས་སུ་མྱ་ངན་ལས་འདའ་བར་འགྱུར་བའི་ཆོས་དེ་གང་། ལུས་འདི་ལ་བདག་གམ། སེམས་ཅན་ནམ། སྲོག་གམ། སྐྱེ་བ་པོ་འམ། སྐྱེས་བུ་འམ། གང་ཟག་གམ། ཤེད་ལས་སྐྱེས་ [147b.6]སམ། ཤེད་བུ་འམ། གང་ཡོངས་སུ་མྱ་ངན་ལས་འདའ་བར་འགྱུར། གང་ཟད་པས་ཡོངས་སུ་མྱ་ངན་ལས་འདའ། དེ་དག་གིས་སྨྲས་པ། འདོད་ཆགས་ཟད་ཞེ་སྡང་ཟད། གཏི་མུག་ཟད་པས་ཡོངས་སུ་མྱ་ངན་ལས་འདའོ། །སྤྲུལ་པ་གཉིས་ཀྱིས་སྨྲས་པ། ཚེ་དང་ལྡན་པ་དག་ [147b.7]འདོད་ཆགས་དང་ཞེ་སྡང་དང་གཏི་མུག་ཡོད་པ་ཡིན་ནམ་ཅི་ནམ་དེ་ཟད་པར་བྱ། དེ་དག་གིས་སྨྲས་པ། དེ་དག་ནི་ནང་ན་ཡང་མེད། ཕྱི་རོལ་ན་ཡང་མེད། གཉི་ག་མེད་པ་ལ་ཡང་མི་དམིགས་ཏེ། དེ་དག་ནི་ཡོངས་སུ་མ་བརྟགས་པ་ལས་ཀྱང་མི་སྐྱེའོ། །སྤྲུལ་པ་གཉིས་ཀྱིས་ [148a] [148a.1]སྨྲས་པ། ཚེ་དང་ལྡན་པ་དག་དེ་ལྟ་བས་ན་མ་རྟོག་རྣམ་པར་མ་རྟོག་ཤིག །ཚེ་དང་ལྡན་པ་དག་ནམ་མི་རྟོག་རྣམ་པར་མི་རྟོག་པ་དེ་ནི་ཆགས་པར་ཡང་མི་འགྱུར་ཆགས་པ་དང་བྲལ་བར་ཡང་མི་འགྱུར་རོ། །ཆགས་པ་མེད་ཅིང་ཆགས་པ་དང་བྲལ་བ་ཡང་མེད་པ་གང་ [148a.2]ཡིན་པ་དེ་ནི་ཞི་བ་ཞེས་བྱའོ། །ཚེ་དང་ལྡན་པ་དག་ཚུལ་ཁྲིམས་ནི་མི་འཁོར་ཞིང་ཡོངས་སུ་མྱ་ངན་ལས་མི་འདའོ། །ཚེ་དང་ལྡན་པ་དག་ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བ་ཡང་མི་འཁོར་ཞིང་ཡོངས་སུ་མྱ་ངན་ལས་མི་འདའོ། ། [148a.3]ཚེ་དང་ལྡན་པ་དག་ཆོས་དེ་དག་གིས་ཡོངས་སུ་མྱ་ངན་ལས་འདའ་བར་སྟོན་ན་ཆོས་དེ་དག་ཀྱང་སྟོང་པ་དབེན་པ་གཟུང་དུ་མེད་པའོ། །ཚེ་དང་ལྡན་པ་དག་འདི་ལྟ་སྟེ་མྱ་ངན་ལས་འདས་པའི་འདུ་ཤེས་སྤོངས་ཤིག །འདུ་ཤེས་ལ་ཡང་འདུ་ཤེས་སུ་མ་བྱེད་ཅིག །འདུ་ཤེས་ལ་འདུ་ [148a.4]ཤེས་ཀྱིས་ཡོངས་སུ་ཤེས་པར་མ་བྱེད་ཅིག །གང་འདུ་ཤེས་ལ་འདུ་ཤེས་ཀྱིས་ཡོངས་སུ་ཤེས་པ་དེ་ནི་དེའི་འདུ་ཤེས་ཀྱིས་བཅིངས་པ་ཡིན་ནོ། །ཚེ་དང་ལྡན་པ་དག་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་ཤིག །ཚེ་དང་ལྡན་པ་དག་འདུ་ [148a.5]ཤེས་དང་ཚོར་བ་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་པ་ལས་གང་ན་བྱ་བ་མེད་དོ་ཞེས་སྨྲའོ། །ཆོས་ཀྱི་རྣམ་གྲངས་འདི་བཤད་པའི་ཚེ་དགེ་སློང་ལྔ་བརྒྱ་པོ་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་ [148a.6]བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གར་དོང་དོང་། གང་ནས་ལྷགས་དེ་དག་ [148a.7]གིས་སྨྲས་པ། བཙུན་པ་རབ་འབྱོར་གང་དུ་ཡང་འགྲོ་བ་མེད་པ་དང་། གང་ནས་ཀྱང་འོང་བ་མེད་པའི་ཕྱིར་བཅོམ་ལྡན་འདས་ཀྱིས་ཆོས་བསྟན་ཏོ། །སྨྲས་པ། ཚེ་དང་ལྡན་པ་དག་ཁྱོད་ཀྱི་སྟོན་པ་གང་ཡིན། སྨྲས་པ། གང་མ་སྐྱེས་ཤིང་ཡོངས་སུ་མྱ་ངན་ལས་མི་འདའ་བའོ། ། [148b] [148b.1]སྨྲས་པ། ཁྱེད་ཀྱིས་ཇི་ལྟར་ཆོས་ཐོས། སྨྲས་པ། བཅིངས་པའི་ཕྱིར་ཡང་མ་ཡིན་ཐར་བའི་ཕྱིར་ཡང་མ་ཡིན་ནོ། །སྨྲས་པ། ཁྱོད་སུས་བཏུལ། སྨྲས་པ། སུ་ལ་ལུས་མེད་ཅིང་སེམས་མེད་པས་སོ། །སྨྲས་པ། ཁྱེད་ཇི་ལྟར་བརྩོན། སྨྲས་པ། མ་རིག་པ་སྤང་བའི་ཕྱིར་ [148b.2]ཡང་མ་ཡིན་རིག་པ་བསྐྱེད་པའི་ཕྱིར་ཡང་མ་ཡིན་ནོ། །སྨྲས་པ། ཁྱེད་ཇི་ལྟར་རྣམ་པར་གྲོལ། སྨྲས་པ། སྦྱོར་བའི་ཕྱིར་ཡང་མ་ཡིན་སྤང་བའི་ཕྱིར་ཡང་མ་ཡིན་ནོ། །སྨྲས་པ། ཁྱེད་སུའི་ཉན་ཐོས། སྨྲས་པ། གང་གིས་ཐོབ་པ་མེད་ཅིང་མངོན་པར་རྫོགས་པར་ [148b.3]སངས་རྒྱས་པ་མེད་པའི་འོ། །སྨྲས་པ། ཁྱེད་ཀྱི་ཚངས་པ་མཚུངས་པར་སྤྱོད་པ་གང་། སྨྲས་པ། གང་དག་ཁམས་གསུམ་ནི་མི་རྒྱུ་བ་རྣམས་སོ། །སྨྲས་པ། ཚེ་དང་ལྡན་པ་དག །ཁྱེད་ཇི་སྲིད་ཅིག་ན་ཡོངས་སུ་མྱ་ངན་ལས་འདའ། སྨྲས་པ། དེ་བཞིན་ [148b.4]གཤེགས་པའི་སྤྲུལ་པ་ནམ་ཡོངས་སུ་མྱ་ངན་ལས་འདའ་བ་ནའོ། །སྨྲས་པ། ཁྱེད་ཀྱིས་བྱ་བ་བྱས་སམ། སྨྲས་པ། ངར་འཛིན་པ་དང་། ང་ཡིར་འཛིན་པ་ཡོངས་སུ་ཤེས་པས་སོ། །སྨྲས་པ། ཁྱེད་ཀྱི་ཉོན་མོངས་པ་ཟད་དམ། སྨྲས་པ། ཆོས་ཐམས་ཅད་གཏན་དུ་ [148b.5]ཟད་པའི་ཕྱིར་རོ། །སྨྲས་པ། ཁྱེད་ཀྱིས་བདུད་བཏུལ་ལམ། སྨྲས་པ། ཕུང་པོའི་བདུད་མི་དམིགས་པའི་ཕྱིར་རོ། །སྨྲས་པ། ཁྱེད་ཀྱིས་སྟོན་པ་ལ་བསྙེན་བཀུར་བྱས་སམ། སྨྲས་པ། ལུས་ཀྱིས་ཀྱང་མ་བྱས་ངག་གིས་ཀྱང་མ་བྱས། སེམས་ཀྱིས་ཀྱང་མ་བྱས་སོ། ། [148b.6]སྨྲས་པ། ཁྱེད་ཀྱིས་སྦྱིན་པའི་གནས་ཀྱིས་སྦྱངས་སམ། སྨྲས་པ། འཛིན་པ་མེད་ཅིང་སྡུད་པ་མེད་པས་སོ། །སྨྲས་པ། ཁྱེད་འཁོར་བ་ལས་རྒལ་ཏམ། སྨྲས་པ། ཆད་པ་མེད་ཅིང་རྟག་པ་མེད་པའི་ཕྱིར་རོ། །སྨྲས་པ། ཁྱེད་སྦྱིན་པའི་གནས་ཀྱི་སར་ཞུགས་སམ། ། [148b.7]སྨྲས་པ། འཛིན་པ་ཐམས་ཅད་ལས་རྣམ་པར་གྲོལ་བའི་ཕྱིར་རོ། །སྨྲས་པ། ཚེ་དང་ལྡན་པ་དག་གར་འགྲོ། སྨྲས་པ། དེ་བཞིན་གཤེགས་པའི་སྤྲུལ་པ་གང་དུ་བཞུད་པར་རོ། །དེ་ལྟར་ཚེ་དང་ལྡན་པ་རབ་འབྱོར་གྱིས་ཡོངས་སུ་དྲིས་ཏེ་དགེ་སློང་དེ་དག་གིས་ལན་བཏབ་ནས་ [149a] [149a.1]འཁོར་དེའི་དགེ་སློང་བརྒྱད་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བྱང་ཆུབ་སེམས་དཔའ་སེམས་ [149a.2]དཔའ་ཆེན་པོ་ཀུན་ཏུ་སྣང་བ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་ [149a.3]འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལ་སློབ་པར་འཚལ་བའི་བྱང་ཆུབ་སེམས་དཔས་ཇི་ལྟར་བསླབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཚར་གཅད་ཅིང་ཚར་བཅད་ [149a.4]ནས་ཆོས་ཀྱི་རྣམ་གྲངས་འདིར་བསླབ་པ་བསྟན་ཏེ། ཆོས་ཀྱི་རྣམ་གྲངས་འདི་ནི་སྐྱེས་བུ་དམ་པ་ནན་ཏན་སྙིང་པོར་བྱེད་པ་རྣམས་ཀྱི་དོན་ཆེན་པོར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་མི་ལ་ལ་ཞིག་ཁམ་པའི་གྲུར་ཞུགས་ཏེ། གང་གཱའི་ཀླུང་ཆེན་པོ་རྒལ་བར་འདོད་པར་གྱུར་ [149a.5]ན་རིགས་ཀྱི་བུ་འདི་ཇི་སྙམ་དུ་སེམས། མི་དེས་ཅི་འདྲ་བའི་བརྩོན་འགྲུས་ཀྱིས་གྲུ་དེ་བཙལ་བར་བྱ། གསོལ་པ། བཅོམ་ལྡན་འདས་སྟོབས་དང་ལྡན་པའི་བརྩོན་འགྲུས་ཀྱིས་བགྱིའོ། །དེ་ཅིའི་སླད་དུ་ཞེ་ན། བདག་ནི་ཆུ་བོ་ཆེན་པོའི་ནང་དུ་ཞུགས་ཀྱི་བདག་འགྲམ་དུ་མ་ཕྱིན་པར་ [149a.6]བར་མ་དོར་གྲུ་ཞིག་ཏུ་འོང་ངོ་སྙམ་དུ་སེམས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་སྣང་བ་དེ་ལྟར་བྱང་ཆུབ་སེམས་དཔས་དེ་བས་ཆེས་སྟོབས་དང་ལྡན་པའི་བརྩོན་འགྲུས་ཀྱིས་ཆོས་ཀྱི་རྣམ་གྲངས་འདི་ལ་བསླབ་པར་བྱ་སྟེ། སྟོབས་ཆེན་པོ་དང་ལྡན་པའི་ [149a.7]བརྩོན་འགྲུས་ཀྱིས་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྒྲུབ་པར་བྱའོ། །ཀྱེ་མའོ་ལུས་འདི་ནི་མི་རྟག་པ་སྟེ་བདག་གིས་སྙིང་པོ་མ་བླངས་པར་བར་མ་དོར་འཆི་བའི་དུས་བྱས་སུ་འོང་ངོ་ཞེས་ཡིད་ལ་བྱེད་པ་དེ་ལྟ་བུས་བདག་ནི་ཆུ་བོ་ཆེན་པོར་ཞུགས་ཀྱིས་ཆུ་བོ་བཞིར་ཞུགས་པའི་སེམས་ [149b] [149b.1]ཅན་རྣམས་ཆུ་བོ་ཆེན་པོར་ཞུགས་པ་ལས་བསྒྲལ་བའི་ཕྱིར་དམ་པའི་ཆོས་ཀྱི་གྲུ་གང་གིས་སེམས་ཅན་འཁོར་བའི་རྒྱ་མཚོས་ཁྱེར་བ་ཐམས་ཅད་བསྒྲལ་བར་བྱ་བའི་དམ་པའི་ཆོས་ཀྱི་གྲུ་ཆེན་པོ་སྦྱར་བར་བྱའོ། །ཀུན་ཏུ་སྣང་བ་དེ་ལ་བྱང་ཆུབ་སེམས་དཔས་དམ་པའི་ཆོས་ཀྱི་གྲུ་ཆེན་པོ་སྦྱར་བར་བྱ་བ་དེ་ཅི་ [149b.2]འདྲ་ཞེ་ན་འདི་ལྟ་སྟེ། སེམས་ཅན་ཐམས་ཅད་ལ་སེམས་མཉམ་པ་ཉིད་དེ་བསོད་ནམས་ཀྱི་ཚོགས་མཐའ་ཡས་པ་བསགས་པ། ཚུལ་ཁྲིམས་ཀྱི་སྣམ་གྱིས་སྦྱར་བ་སྦྱིན་པའི་འཁོར་གྱི་རྒྱན་གྱིས་བརྒྱན་པ་བསམ་པ་དང་ལྷག་པའི་བསམ་པའི་བཅིང་བ་སྲ་བས་དམ་པོར་སྦྲེལ་བ། བཟོད་པ་དང་དེས་པ་ [149b.3]དང་དྲན་པའི་སྦྱོར་ཀས་ལེགས་པར་སྦྱར་བ། བྱང་ཆུབ་ཀྱི་ཡན་ལག་བདུན་གྱི་ཚོགས་ཅན། བརྩོན་འགྲུས་བརྟན་པ་དང་དགེ་བའི་ཆོས་ཀྱི་ཤིང་གིས་ཡང་དག་པར་སྦྱར་བ་བསམ་གཏན་གྱི་སེམས་ཀྱིས་ལས་སུ་རུང་བར་བྱས་པ། དུལ་བ་དང་ཞི་བ་དང་ཅང་ཤེས་ཀྱི་དགེ་བའི་བཟོས་ལེགས་པར་ཟིན་ [149b.4]པར་བྱས་པ། ཤིན་ཏུ་མི་འཁྲུགས་པའི་ཆོས་ཅན་སྙིང་རྗེ་ཆེན་པོས་ཡང་དག་པར་ཟིན་པ། བསྡུ་བའི་དངོས་པོ་དང་དཔའ་བར་འགྲོ་བས་བསྟར་བ། ཤེས་རབ་དང་ཡེ་ཤེས་ཀྱིས་ཕྱིར་རྒོལ་བ་ལེགས་པར་བསྲུངས་པ། ཐབས་མཁས་པས་རྣམ་པར་བསགས་པ་ལེགས་པར་བྱས་པ། ཚངས་པའི་ [149b.5]གནས་པ་བཞིས་ལེགས་པར་ཡོངས་སུ་སྦྱངས་པ། དྲན་པ་ཉེ་བར་གཞག་པ་བཞིས་ལེགས་པར་རྣམ་པར་བསམས་པའི་ལུས་ཀྱིས་བསྟན་པ་ཡང་དག་པའི་སྤོང་བས་འགྲོ་བ། རྫུ་འཕྲུལ་གྱི་རྐང་པའི་མགྱོགས་པའི་ཤུགས་དང་ལྡན་པ་དབང་པོས་ལེགས་པར་བརྟགས་པས་ལྟ་བ་ངན་པའི་ཤིང་ཡོན་པོ་མེད་པ། སྟོབས་ཀྱི་ [149b.6]ཤུགས་ཡང་དག་པར་འབྱུང་བས་བར་ཤག་ཤིག་མེད་པ། བྱང་ཆུབ་ཀྱི་ཡན་ལག་གིས་འགྲོ་བ་རྣམ་པར་དག་པ། གཅུགས་ཅན་དགྲ་ཉོན་མོངས་པའི་བདུད་ཀྱི་ལམ་འདོར་བར་བྱེད་པ། ལམ་དུ་འཇུག་པར་བྱེད་པ། ཕ་རོལ་གྱི་ངོགས་སུ་ཕྱིན་པར་བྱེད་པ། མུ་སྟེགས་ཅན་ངན་པའི་མུ་སྟེགས་འདོར་བར་བྱེད་པ། ཞི་གནས་ [149b.7]ཀྱི་ངེས་པར་སེམས་པ་བརྟན་པ། ལྷག་མཐོང་གིས་སྦྱོར་བ་མཐའ་གཉིས་ལ་མ་ཆགས་པར་འཇུག་པ། རྒྱུའི་ཆོས་དང་ཡང་དག་པར་ལྡན་པ། སྒྲ་གྲགས་པ་ཡངས་ཤིང་རྒྱ་ཆེ་ལ་མི་ཟད་ཅིང་ཚད་མེད་པ་ཚུར་ཤོག །དམ་པའི་ཆོས་ཀྱི་གྲུ་ཆེན་པོ་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་བདེ་བར་འགྲོ་བ། [150a] [150a.1]འཇིགས་པ་མེད་པར་འགྲོ་བ་ལམ་དུ་འགྲོ་བ། འཇིག་ཚོགས་ལ་ལྟ་བ་འདོར་བར་ཞུགས་ལ་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་ལྟ་བ་ཐམས་ཅད་སེལ་བ། གཙེ་བ་མེད་པའི་མྱ་ངན་ལས་འདས་པར་མྱུར་དུ་སོང་ཤིག་ཅེས་ཕྱོགས་བཅུར་སྒྲས་གོ་བར་བྱེད་པ་སྟེ། རིགས་ཀྱི་བུ་སེམས་ [150a.2]ཅན་ཐམས་ཅད་ཀྱི་དོན་གྱི་ཕྱིར་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་ཡིད་ཡོངས་སུ་མི་སྐྱོ་བར་བྱང་ཆུབ་སེམས་དཔའ་དམ་པའི་ཆོས་ཀྱི་གྲུ་ཆེན་པོ་འདི་འདྲ་བ་དེ་སྦྱར་བར་བྱའོ། །དམ་པའི་ཆོས་ཀྱི་གྲུ་འདིས་ཆུ་བོ་བཞིས་ཁྱེར་བའི་སེམས་ཅན་ཐམས་ཅད་བསྒྲལ་བར་བྱའོ། །ཀུན་ཏུ་སྣང་བ་དེ་ལ་ [150a.3]འདིར་བྱང་ཆུབ་སེམས་དཔའི་མངོན་པར་ཤེས་པ་མྱུར་བ་གང་ཞེ་ན། གང་འདི་སེམས་ཅན་ཐམས་ཅད་ལ་བཅོས་མ་མ་ཡིན་པའི་སྦྱོར་བ་སྟེ་བསམ་པ་དག་པས་རབ་ཏུ་འདུན་པ་དང་། དགེ་བའི་རྩ་བ་ཐམས་ཅད་ཡང་དག་པར་བསྒྲུབ་པའི་ཕྱིར་བརྩོན་འགྲུས་འབར་བ་དང་། ཚུལ་བཞིན་ཡིད་ལ་བྱེད་པས་དགེ་བ་ [150a.4]ལ་འདུན་པ་དང་ཤེས་རབ་ཡོངས་སུ་རྫོགས་པར་བྱ་བའི་ཕྱིར་ཐོས་པས་མི་ངོམས་པ་དང་། ཡེ་ཤེས་བརྟན་པར་བྱ་བའི་ཕྱིར་ང་རྒྱལ་མེད་པ་དང་ཡོན་ཏན་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་རབ་ཏུ་འབྱུང་བ་ལ་གཞོལ་བ་དང་། ལུས་དང་སེམས་དབེན་པར་དགོན་པ་ན་གནས་པ་དང་། སྐྱེ་བོ་མི་སྲུན་ [150a.5]པ་རྣམ་པར་སྤངས་པས་འདུ་འཛི་མེད་པ་དང་། དོན་དམ་པ་ལ་རྟོན་པས་ཆོས་དོན་དུ་གཉེར་བ་དང་ཤིན་ཏུ་མི་འཁྲུགས་པས་ཡེ་ཤེས་ཀྱི་དོན་དང་། ཡེ་ཤེས་ཀྱི་དོན་ཡིན་པས་ཆོས་ཀྱི་དོན་དང་མི་འཁྲུགས་པས་བདེན་པའི་དོན་དང་། ཡང་དག་པར་སྦྱོར་བར་བྱ་བས་སྟོང་པ་ཉིད་ཀྱི་དོན་དང་། ཤིན་ཏུ་ཉེ་བར་ཞི་བའི་དོན་ཡིན་པས་ [150a.6]དབེན་པའི་དོན་ཡིན་ཏེ་རིགས་ཀྱི་བུ་འདི་ནི་འདིར་བྱང་ཆུབ་སེམས་དཔའི་མངོན་པར་ཤེས་པ་མྱུར་བའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །འདི་ལྟར་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ཐེག་པ་ཆེན་པོ་ལ་ཡང་དག་པར་ཞུགས་པའི་ [150a.7]རིགས་ཀྱི་བུའམ་རིགས་ཀྱི་བུ་མོ་རྣམས་ལ་ཕན་འདོགས་པར་གྱུར་པ་ནི་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་ཙམ་བསྟན་ན་རིགས་ཀྱི་བུ་འམ་རིགས་ཀྱི་བུ་མོ་དེ་ [150b] [150b.1]བསོད་ནམས་ཀྱི་ཕུང་པོ་ཇི་ཙམ་སྐྱེད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་རིན་པོ་ཆེ་སྣ་བདུན་གྱིས་རབ་ [150b.2]ཏུ་གང་བར་བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་སྦྱིན་པ་བྱིན་པ་དང་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་རྣམས་ལས་དེ་བཞིན་གཤེགས་པ་རེ་རེའི་གཙུག་ལག་ཁང་རིན་པོ་ཆེ་སྣ་བདུན་ལས་བྱས་པ་གང་གཱའི་ཀླུང་གི་བྱེ་མ་སྙེད་ [150b.3]བརྩིགས་པ་དང་། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་རྣམས་ལས་དེ་བཞིན་གཤེགས་པ་རེ་རེའི་ཉན་ཐོས་ཀྱི་དགེ་འདུན་དཔག་ཏུ་མེད་པ་དག་ལ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་པ་དང་། དེ་བཞིན་གཤེགས་པ་ཡོངས་སུ་མྱ་ [150b.4]ངན་ལས་འདས་པ་དེ་དག་གི་མཆོད་རྟེན་རིན་པོ་ཆེ་སྣ་བདུན་ལས་བྱས་པ་བས་རིགས་ཀྱི་བུ་འམ་རིགས་ཀྱི་བུ་མོ་དད་པ་དང་ལྡན་པ་གཞན་ཞིག་གིས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་ཙམ་ལུང་མནོས་ཏེ། ལུང་མནོས་ནས་ཀྱང་མི་སྤོང་ན་དེ་ནི་ [150b.5]དེ་བས་ཆེས་བསོད་ནམས་མང་དུ་སྐྱེད་དོ། །བུད་མེད་གང་ཞིག་ལུང་འབོག་ན་དེ་ནམ་ཡང་ལོག་པར་ལྟུང་བར་མི་འགྱུར་ཏེ། དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །ས་ཕྱོགས་གང་དུ་ཆོས་ཀྱི་རྣམ་གྲངས་འདི་བཤད་པ་འམ་བསྟན་པ་འམ། ཡི་གེར་འདྲི་བ་འམ་ཡི་གེར་བྲིས་ནས་གླེགས་བམ་དུ་བྱས་ཏེ་ [150b.6]བཞག་པའི་ས་ཕྱོགས་དེ་ལྷ་དང་བཅས་པའི་འཇིག་རྟེན་གྱི་མཆོད་རྟེན་དང་འདྲ་བར་འགྱུར་རོ། །སུ་ཞིག་ཆོས་སྨྲ་བ་ལས་ཆོས་ཀྱི་རྣམ་གྲངས་འདི་ཉན་པ་འམ། འཛིན་པ་འམ་ཡི་གེར་འདྲི་བ་དེ་ལ་འདི་ལྟ་སྟེ། དེ་བཞིན་གཤེགས་པ་ལ་ཇི་ལྟར་བྱ་བ་དེ་བཞིན་དུ་གུས་པར་བྱའོ། །འོད་སྲུང་རིགས་ཀྱི་བུ་འམ། [150b.7]རིགས་ཀྱི་བུ་མོ་གང་ཞིག་དེ་བཞིན་གཤེགས་པའི་ཆོས་སྨྲ་བ་ལ་བཀུར་སྟིར་བྱེད་པ་དང་། བཙུན་པར་བྱེད་པ་དང་། རི་མོར་བྱེད་པ་དང་། མཆོད་པར་བྱེད་པ་དེ་ལ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་འཆི་བའི་དུས་ཀྱི་ཚེ་དེ་བཞིན་གཤེགས་པ་མཐོང་བར་འགྱུར་རོ། །དེ་བཞིན་ [151a] [151a.1]གཤེགས་པ་མཐོང་ནས་ཀྱང་ལུས་ཀྱི་ལས་ཡོངས་སུ་དག་པ་བཅུ་འཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཚོར་བས་སེམས་ཀུན་ཏུ་མ་ཟིན་པར་འཆི་བའི་དུས་བྱེད་པ་དང་། དེ་མིག་འཁྲུལ་པར་མི་འགྱུར་བ་དང་། ལག་པ་གཡོབ་པར་མི་བྱེད་པ་དང་། རྐང་པ་འཕྲ་བར་མི་བྱེད་པ་དང་། [151a.2]གཅིན་མི་གཏོར་བ་དང་། ཕྱི་ས་མི་འབྱུང་བ་དང་། དེའི་སྙིང་ཁར་རྡུལ་མི་འབྱུང་བ་དང་། ཁུ་ཚུར་མི་འཆང་བ་དང་། ནམ་མཁའ་ལ་མི་སྙེགས་པ་དང་། ཇི་ལྟར་འདུག་པ་དེ་བཞིན་དུ་ཚེའི་འདུ་བྱེད་འདོར་བར་འགྱུར་བ་སྟེ། ལུས་ཀྱི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །ངག་གི་ལས་ཡོངས་ [151a.3]སུ་དག་པ་བཅུ་འཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། གདངས་སྙན་པའི་ཚིག་དང་། མཉེན་པའི་ཚིག་དང་། འཇམ་པའི་ཚིག་དང་། དགའ་བའི་ཚིག་དང་། སྣུམ་པའི་ཚིག་དང་། སླར་བཟློག་པ་མ་ཡིན་པའི་ཚིག་དང་། གཟུང་བར་འོས་པའི་ཚིག་དང་། བཙུན་པའི་ཚིག་དང་། ལྷ་དང་མིས་ཡོངས་ [151a.4]སུ་གཟུང་བའི་ཚིག་དང་། སངས་རྒྱས་ཀྱིས་ཡོངས་སུ་གཟུང་བའི་ཚིག་སྟེ་ངག་གི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །ཡིད་ཀྱི་ལས་ཡོངས་སུ་དག་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཁྲོ་བར་མི་འགྱུར་བ་དང་། འཁོན་དུ་འཛིན་པ་མེད་པ་དང་། འཆབ་ [151a.5]པར་མི་འགྱུར་བ་དང་། འཚིག་པར་མི་འགྱུར་བ་དང་། ཉེས་པ་ལ་མི་དགའ་བ་དང་། འཁོན་གཅུགས་ལ་མི་དགའ་བ་དང་། འདུ་ཤེས་ཕྱིན་ཅི་ལོག་ཏུ་མི་འགྱུར་བ་དང་། སྤོང་བ་ལ་བག་ཡོད་པར་འགྱུར་བ་དང་། མ་ཞུམ་པའི་སེམས་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་འཛིན་པ་དང་། ང་རྒྱལ་ [151a.6]དང་ཆེ་བའི་ང་རྒྱལ་མེད་པར་སངས་རྒྱས་ཀྱི་ཆོས་ཐམས་ཅད་མངོན་པར་སྒྲུབ་པའི་ཏིང་ངེ་འཛིན་ཐོབ་པར་འགྱུར་བ་སྟེ། ཡིད་ཀྱི་ལས་ཡོངས་སུ་དག་པ་བཅུ་པོ་དེ་དག་འཐོབ་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། ཚོར་བས་ཉེན་ཅིང་འཆི་བའི་དུས་མི་བྱེད། །དེ་ཡི་མིག་ལ་འཁྲུལ་པར་འགྱུར་བ་མེད། ། [151a.7]ལག་པ་མི་གཡོ་བ་རྐང་པ་འཕྲ་མི་འགྱུར། །དེ་ནི་བཤང་གཅི་གཏོར་བར་ཡོད་མི་འགྱུར། །དེ་ཡི་སྙིང་ཁར་རྡུལ་ཡང་འབྱུང་མི་འགྱུར། །ཁུ་ཚུར་མི་འཆང་ནམ་མཁར་སྙེགས་མི་འགྱུར། །འདུག་བཞིན་བདེ་བར་འཆི་བའི་དུས་བྱེད་དེ། །ལུས་ལས་ཡོངས་སུ་དག་པ་འདི་བཅུ་འཐོབ། །གདངས་ [151b] [151b.1]སྙན་ཕུན་སུམ་ཚོགས་ཤིང་འཇམ་མཉེན་ཚིག །སྣུམ་ཞིང་ཡིད་འོང་དེ་བཞིན་དགའ་བར་འགྱུར། །གཞན་གྱིས་སླར་མི་བཟློག་ཅིང་གཟུང་འོས་ཚིག །སྐྱེ་བོས་བཙུན་པར་བྱ་བའི་ཚིག་ཏུ་འགྱུར། །དེ་ཡི་ཚིག་ནི་ལྷ་དང་ཀླུ་དག་དང་། །མི་འམ་ཅི་དང་དེ་བཞིན་རྒྱལ་བས་བསྔགས། །དེས་བཤད་པ་ཡི་དོན་ཀྱང་འཛིན་བྱེད་དེ། ། [151b.2]དེས་ནི་ངག་ལས་དག་པ་དེ་དག་འཐོབ། །ཁྲོ་བ་མེད་ཅིང་འཁོན་དུ་འཛིན་པ་མེད། །བརྟན་པ་འཆབ་པ་མེད་ཅིང་འཚིག་པ་མེད། །ཉེས་ལ་མི་དགའ་འཁོན་གཅུགས་དགའ་བ་མེད། །དེ་ཡི་འདུ་ཤེས་ཕྱིན་ཅི་ལོག་མི་འགྱུར། །བསླབ་པ་ཡང་དག་བླངས་ལ་སེམས་མི་ཞུམ། །སྤོང་བ་ལ་ནི་བག་མེད་མི་འགྱུར་ཏེ། །ཞུམ་པ་ [151b.3]མེད་པའི་སེམས་ཀྱིས་ཞིང་སྦྱོང་བྱེད། །ང་རྒྱལ་ལས་ཀྱང་ང་རྒྱལ་ཡོངས་སྤངས་ནས། །ཏིང་འཛིན་འབྱོར་པ་ཐམས་ཅད་མངོན་བསྒྲུབས་ཤིང་། །ཡིད་ཀྱི་མངོན་པར་བསྒྲུབས་པའི་ཆོས་རྣམས་འཐོབ། །ཆོས་རྣམས་འདི་དག་ལྡན་པར་གྱུར་པ་ལ། །སངས་རྒྱས་དངོས་པོ་དཀོན་པར་མི་འགྱུར་རོ། །འོད་སྲུང་གང་ལ་ལ་བདེ་ [151b.4]བའི་ཡོ་བྱད་ཐམས་ཅད་ཀྱིས་ང་ལ་བཀུར་སྟི་བྱེད་པར་འདོད་པ་དང་མཆོད་པ་ཐམས་ཅད་ཀྱིས་མཆོད་པར་འདོད་པ་དེས་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་འདི་གཟུང་བར་བྱ། ཀུན་ཆུབ་པར་བྱ། ཡི་གེར་བྲི་བར་བྱ། བཀླག་པར་བྱ། བཅང་བར་བྱའོ། །འོད་སྲུང་དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་ [151b.5]དག་པར་རྫོགས་པའི་སངས་རྒྱས་རྣམས་ལ་མཆོད་པ་བླ་ན་མེད་པ་བྱས་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་འོད་སྲུང་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་དེ་དག་དང་། དགེ་སློང་དེ་དག་ [151b.6]དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་འོད་སྲུང་གི་ལེའུ་ཞེས་ [151b.7]བྱ་སྟེ་བཞི་བཅུ་རྩ་གསུམ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། [152a] [152a.1]{D88}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་བཞི་པ་སྟེ། འཕགས་པ་རིན་པོ་ཆེའི་ཕུང་པོ་ལུང་བསྟན་པ། བམ་པོ་དང་པོ། རྒྱ་གར་སྐད་དུ། ཨཱརྱ་རད་ན་རཱ་ཤི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རིན་པོ་ཆེའི་ཕུང་པོ་ [152a.2]ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་བརྒྱད་སྟོང་ཙམ་གྱི་དགེ་སློང་གི་དགེ་འདུན་ཆེན་པོ་དང་། སངས་རྒྱས་ཀྱི་ཞིང་ [152a.3]སྣ་ཚོགས་ནས་འདུས་པའི་བྱང་ཆུབ་སེམས་དཔའ་ཁྲི་དྲུག་སྟོང་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པ་ཕྱིར་མི་ལྡོག་པའི་བཟོད་པ་ཐོབ་པ་ཤ་སྟག་གོ །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་ [152a.4]སྐད་ཅེས་གསོལ་ཏོ། །བཅོམ་ལྡན་འདས་དགེ་སྦྱོང་དགེ་སྦྱོང་ཞེས་བགྱི་བ་ཇི་ཙམ་གྱིས་ན་དགེ་སྦྱོང་དགེ་སྦྱོང་ཞེས་བགྱི་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ནི། ཞི་བ་དང་། [152a.5]དུལ་བ་དང་། ཅང་ཤེས་པ་དང་། ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་དང་། ཏིང་ངེ་འཛིན་ལ་འཇུག་པ་ཤེས་པས་དགེ་སྦྱོང་ཞེས་བྱ་སྟེ། ཤེས་རབ་དང་ལྡན་པ་དང་། རྣམ་པར་གྲོལ་བའི་སྙིང་པོ་ལྷུར་ལེན་པ་དང་། རྣམ་པར་ཐར་པའི་སྒོ་གསུམ་ལ་སོམ་ཉི་མེད་ཅིང་ཐེ་ཚོམ་མི་ཟ་བ་དང་། འཕགས་པའི་ [152a.6]སྤྱོད་ཡུལ་ལ་གནས་པ་དང་། དྲན་པ་ཉེ་བར་གཞག་པ་བཞི་ལ་གནས་པ་དང་། ཡང་དག་པར་སྤོང་བ་བཞི་ལ་གནས་པ་དང་། རྫུ་འཕྲུལ་གྱི་རྐང་པ་བཞི་བསྒོམ་པ་བསྒོམས་པ་དང་། དད་པའི་དབང་པོ་དང་ལྡན་པ་དང་། སངས་རྒྱས་ལ་དད་པ་མི་ཕྱེད་པ་དང་། ཆོས་ལ་དད་པ་མི་ཕྱེད་པ་དང་། དགེ་འདུན་ [152a.7]ལ་དད་པ་མི་ཕྱེད་པ་དང་། སངས་རྒྱས་དང་། ཆོས་དང་། དགེ་འདུན་ལ་ཤེས་པས་དད་པ་དང་ལྡན་པ་དང་། གཞན་གྱི་དྲིང་ལ་མི་འཇོག་པའི་ཤེས་པ་དང་ལྡན་པ་དང་། དགེ་བའི་ཆོས་རྣམས་ལ་བརྩོན་འགྲུས་བརྩམས་པ་དང་། སྲིད་པ་བཅོམ་པ་དང་། ཡང་དག་པར་ཞུགས་པ་དང་། དྲན་པ་དང་། [152b] [152b.1]ཤེས་བཞིན་ལ་མཁས་པ་དང་། སེམས་རྩེ་གཅིག་པ་དང་། ཤེས་རབ་ཀྱིས་ལྷག་མཐོང་ལ་མཁས་པ་དང་། སྟོབས་ལྔ་དང་ལྡན་པ་དང་། ཉོན་མོངས་པ་ཐམས་ཅད་ཀྱིས་མི་རྫི་བ་དང་། བྱང་ཆུབ་ཀྱི་ཡན་ལག་བདུན་ལ་བསམ་གཏན་པ་དང་། ཆོས་རྣམས་ཀྱི་བརྟེན་པ་ཤེས་པ་ལ་མཁས་པ་དང་། ལམ་ [152b.2]ཤེས་པ་དང་། ལམ་ལ་མཁས་པ་དང་། ཡང་དག་པར་ལྟ་བ་དང་། ཡང་དག་པའི་ཏིང་ངེ་འཛིན་དང་། ཞི་གནས་དང་། ལྷག་མཐོང་སྒོམ་པ་ལ་མཁས་པ་དང་། སོ་སོ་ཡང་དག་པར་རིག་པ་བཞི་ལ་གཞན་གྱི་དྲིང་མི་འཇོག་པའི་ཤེས་རབ་དང་ལྡན་པ་དང་། དོན་ལ་རྟོན་གྱི་ཚིག་འབྲུ་ལ་མི་རྟོན་ [152b.3]པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མི་རྟོན་པ་དང་། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་དོན་གྱི་མདོ་སྡེ་ལ་མི་རྟོན་པ་དང་། ཆོས་ཉིད་ལ་རྟོན་གྱི་གང་ཟག་ལ་མི་རྟོན་པ་དང་། བདུད་བཞིའི་ལམ་ལས་ཤིན་ཏུ་འདས་པ་དང་། ཕུང་པོ་ཡོངས་སུ་ཤེས་པ་སྲུང་བ་ [152b.4]དང་། ཉོན་མོངས་པ་བསལ་བ་དང་། ཐ་མའི་ལུས་འཛིན་པ་དང་། འཆི་བདག་གི་ལམ་ལས་ཡང་དག་པར་འདས་པ་དང་། སྡུག་བསྔལ་ཡང་དག་པར་ཡོངས་སུ་ཤེས་པ་དང་། ཀུན་འབྱུང་བ་ཐམས་ཅད་སྤངས་པ་དང་། འགོག་པ་མངོན་སུམ་དུ་བྱ་བ་ལ་ཞུགས་པ་དང་། ལམ་སྒོམ་ [152b.5]པའི་རྣལ་འབྱོར་གྱི་རྗེས་སུ་ཞུགས་པ་དང་། འཕགས་པའི་བདེན་པ་བཞི་མཐོང་བ་དང་། གཞན་གྱི་དྲིང་ལ་མི་འཇོག་པ་དང་། སྟོན་པའི་བསྟན་པ་ལ་བྱ་བ་བྱས་པ་དང་། བྱེད་པ་བྱས་པ་དང་། ཟག་པ་ཟད་པ་དང་། རྣམ་པར་ཐར་པ་བརྒྱད་ལ་བསམ་གཏན་པ་དང་། [152b.6]བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བས་བསུ་བ་དང་། སྔོན་གྱི་སྤྱོད་པ་དང་། བསམ་པ་ཕུན་སུམ་ཚོགས་པ་དང་། དགོན་པ་ལ་གནས་པར་མངོན་པར་དགའ་བ་དང་། འཕགས་པའི་རིགས་ལ་གནས་པ་དང་། སྦྱངས་པའི་ཡོན་ཏན་ལ་གནས་པ་དང་། [152b.7]བློ་གྱ་གྱུ་མེད་པ་དང་། རབ་ཏུ་བྱུང་ནས། ཁྱིམ་གྱི་གནས་དང་མི་འདྲེ་བ་དང་། བསེ་རུ་ལྟར་གཅིག་པུ་རྒྱུ་བ་དང་། འདུ་འཛིས་འཇིགས་སྐྲག་པ་དང་། ཁམས་གསུམ་མ་ལུས་པ་ལས་རྣམ་པར་གྲོལ་བ་དང་། རྟག་ཏུ་འཇིགས་པའི་ཡིད་དང་ལྡན་པ་དང་། ཡང་དག་པའི་དགེ་སྦྱོང་གི་ཚུལ་ལ་གནས་པ་ [153a] [153a.1]དང་། ཐམས་ཅད་ལ་འདོད་པ་མེད་པ་དང་། འཇིག་རྟེན་གྱི་ཆོས་བརྒྱད་པོ་རྙེད་པ་དང་མ་རྙེད་པ་དང་། གྲགས་པ་དང་མ་གྲགས་པ་དང་། བདེ་བ་དང་སྡུག་བསྔལ་བ་དང་། བསྟོད་པ་དང་། སྨད་པ་རྣམས་ལས་ཡང་དག་པར་འདས་པ་དང་། ས་དང་མཚུངས་པའི་སེམས་ཀྱིས་ [153a.2]ཉེ་བར་བསྒྲུབས་ཏེ་གནས་པ་དང་། བདག་དང་གཞན་རྗེས་སུ་སྲུང་བ་དང་། འཁྲུལ་པ་མེད་པ་དང་། འཁྲུག་པ་མེད་པ་དང་། ཡང་དག་པར་ཞུགས་པ་དང་། ནམ་མཁའ་དང་མཚུངས་པའི་སེམས་ཀྱིས་ཉེ་བར་བསྒྲུབས་ཏེ་གནས་པ་དང་། མཚན་མ་ཐམས་ཅད་ལ་དེའི་སེམས་མི་ཆགས་མི་འཆིང་ [153a.3]སྟེ་དཔེར་ན་ནམ་མཁའ་ལ་ལག་མཐིལ་བཞིན་དུ་མི་ཆགས་མི་འཆིང་བ་ཡིན་ཏེ། འོད་སྲུང་དགེ་སྦྱོང་གི་ཆོས་རྣམ་པ་དེ་ལྟ་བུ་དེ་དག་དང་ལྡན་ན་དགེ་སྦྱོང་དགེ་སྦྱོང་ཞེས་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་དེ་ [153a.4]བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཡང་དག་པའི་དགེ་སྦྱོང་གི་ཡོན་ཏན་འདི་དག་ཡང་དག་པར་རབ་ཏུ་བསྟན་པ་ནི་ངོ་མཚར་ཏོ། །བཅོམ་ལྡན་འདས་མ་མཆིས་པའི་དུས་ན་གང་དག་དེ་བཞིན་གཤེགས་པའི་བྱང་ཆུབ་བསྐལ་པ་གྲངས་མ་མཆིས་པར་ཡང་ [153a.5]དག་པར་བསྒྲུབས་པ་ནུས་པར་བགྱིད་པ་དགེ་སྦྱོང་མ་ལགས་ལ་དགེ་སྦྱོང་དུ་མཆིད་ཀྱིས་འཆེ་ཞིང་། ཚངས་པར་སྤྱོད་པ་མ་ལགས་པར་ཚངས་པར་སྤྱོད་པར་མཆིད་ཀྱིས་འཆེ་བའི་དགེ་སློང་གང་ལ་ལ་དག་འབྱུང་བར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ང་ [153a.6]དང་། ཁྱོད་དང་ཉན་ཐོས་ཆེན་པོ་འདི་དག་ཀྱང་ཡོངས་སུ་མྱ་ངན་ལས་འདས་ཤིང་། བྱང་ཆུབ་སེམས་དཔའ་འདི་དག་ཀྱང་སངས་རྒྱས་ཀྱི་ཞིང་གཞན་དུ་དོང་ནས་བསྟན་པ་འདི་རབ་ཏུ་འཇིག་པར་འགྱུར་བ་ནི་ཚིག་གིས་བསྟན་པར་མི་ནུས་སོ། །འོད་སྲུང་དེ་ལ་དགེ་སློང་ལུས་མ་བསྒོམས་པ། ཚུལ་ [153a.7]ཁྲིམས་མ་བསྒོམས་པ། སེམས་མ་བསྒོམས་པ། ཤེས་རབ་མ་བསྒོམས་པ། བྱིས་པ་དམན་པ། གླེན་པ། རྨོངས་པ། རབ་ཏུ་མ་ཞི་བ། མ་དུལ་བ་ཁ་ཅིག་འབྱུང་བར་འགྱུར་ཏེ། དེ་དག་གི་གཡོ་དང་། སྒྱུ་དང་། མི་དྲང་བ་དང་། གྱ་གྱུ་དང་། དགེ་སྦྱོང་གི་དྲི་མ་དང་། དགེ་སྦྱོང་གི་སྐྱོན་ [153b] [153b.1]རྣམས་བརྗོད་པར་བྱའོ། །འོད་སྲུང་དེ་ལ་དགེ་སྦྱོང་གི་དྲི་མ་རྣམས་གང་ཞེ་ན། འོད་སྲུང་སུམ་ཅུ་རྩ་གཉིས་པོ་འདི་དག་ནི་དགེ་སྦྱོང་གི་དྲི་མ་སྟེ། དེ་དག་སྤངས་ན་དགེ་སྦྱོང་དགེ་སྦྱོང་ཞེས་བྱའོ། །སུམ་ཅུ་རྩ་གཉིས་གང་ཞེ་ན། འདོད་པ་ལ་རྣམ་པར་རྟོག་པ་དགེ་སྦྱོང་གི་དྲི་མ་དང་། གནོད་སེམས་ཀྱི་རྣམ་ [153b.2]པར་རྟོག་པ་དགེ་སྦྱོང་གི་དྲི་མ་དང་། རྣམ་པར་འཚེ་བའི་རྣམ་པར་རྟོག་པ་དགེ་སྦྱོང་གི་དྲི་མ་དང་། བདག་ལ་བསྟོད་པ་དགེ་སྦྱོང་གི་དྲི་མ་དང་། གཞན་ལ་བརྙས་པ་དགེ་སྦྱོང་གི་དྲི་མ་དང་། མི་འཐུན་པའི་རྙེད་པ་ཀུན་དུ་ཚོལ་བ་དགེ་སྦྱོང་གི་དྲི་མ་དང་། རྙེད་པས་རྙེད་པར་བྱེད་འདོད་པ་དགེ་སྦྱོང་གི་དྲི་མ་དང་། [153b.3]དད་པས་བྱིན་པ་ཆུད་གཟོན་པ་དགེ་སྦྱོང་གི་དྲི་མ་དང་། ལྟུང་བ་འཆབ་པ་དགེ་སྦྱོང་གི་དྲི་མ་དང་། ཁྱིམ་པ་ལ་སྟེན་པ་དགེ་སྦྱོང་གི་དྲི་མ་དང་། རབ་ཏུ་བྱུང་བ་དང་སྟེན་པ་དགེ་སྦྱོང་གི་དྲི་མ་དང་། འདུ་འཛི་ལ་མངོན་པར་དགའ་བ་དགེ་སྦྱོང་གི་དྲི་མ་དང་། རྙེད་པ་ཡོངས་སུ་མ་གྲུབ་པར་རྟོག་པ་དགེ་སྦྱོང་གི་དྲི་ [153b.4]མ་དང་། བདག་གི་རྙེད་པས་ཆོག་པར་མི་འཛིན་པ་དགེ་སྦྱོང་གི་དྲི་མ་དང་། ཕ་རོལ་བསོད་སྙོམས་རྙེད་པ་ལ་ཕྲག་དོག་དང་སེར་སྣ་བྱེད་པ་དགེ་སྦྱོང་གི་དྲི་མ་དང་། ཕ་རོལ་གྱི་རྙེད་པ་ལ་འདོད་པ་དགེ་སྦྱོང་གི་དྲི་མ་དང་། བདག་གི་འཁྲུལ་པ་ལ་མི་རྟོག་པ་དགེ་སྦྱོང་གི་དྲི་མ་དང་། གཞན་གྱི་འཁྲུལ་པ་ཡོངས་ [153b.5]སུ་ཚོལ་བ་དགེ་སྦྱོང་གི་དྲི་མ་དང་། སོ་སོར་ཐར་པ་དང་འདུལ་བ་མི་སྲུང་བ་དགེ་སྦྱོང་གི་དྲི་མ་དང་། ཁྭ་ལྟར་མུ་ཅོར་སྨྲ་བ་དགེ་སྦྱོང་གི་དྲི་མ་དང་། མ་གུས་པ་དང་། རྒོད་པ་དང་། ཁེངས་པ་དགེ་སྦྱོང་གི་དྲི་མ་དང་། ལྟ་བས་ཀུན་ནས་དཀྲིས་པ་དགེ་སྦྱོང་གི་དྲི་མ་དང་། རྟེན་ཅིང་འབྲེལ་བར་འབྱུང་བ་དང་ [153b.6]འགལ་བ་དགེ་སྦྱོང་གི་དྲི་མ་དང་། མཐར་ལྟ་བ་ལ་གནས་པ་དགེ་སྦྱོང་གི་དྲི་མ་དང་། འཁོར་བ་ལ་མངོན་པར་དགའ་བ་དགེ་སྦྱོང་གི་དྲི་མ་དང་། མྱ་ངན་ལས་འདས་པ་ལ་མངོན་པར་མི་དགའ་བ་དགེ་སྦྱོང་གི་དྲི་མ་དང་། འཇིག་རྟེན་རྒྱང་པན་པའི་གསང་ཚིག་འཛིན་པ་དགེ་སྦྱོང་གི་དྲི་མ་དང་། སྒྲིབ་ [153b.7]པས་ཀུན་ནས་དཀྲིས་པ་དགེ་སྦྱོང་གི་དྲི་མ་དང་། ལས་ཀྱི་རྣམ་པར་སྨིན་པ་དང་འགལ་བ་དགེ་སྦྱོང་གི་དྲི་མ་དང་། རྣམ་པར་ཐར་པའི་སྒོ་གསུམ་གྱིས་སྐྲག་པ་དགེ་སྦྱོང་གི་དྲི་མ་དང་། ཆོས་ཟབ་མོ་སྤོང་བ་དགེ་སྦྱོང་གི་དྲི་མ་དང་། ཆོས་དང་འགལ་བར་གནས་པ་དགེ་སྦྱོང་གི་དྲི་མ་དང་། དཀོན་མཆོག་ [154a] [154a.1]གསུམ་ལ་མི་གུས་པ་དགེ་སྦྱོང་གི་དྲི་མ་སྟེ། འོད་སྲུང་སུམ་ཅུ་རྩ་གཉིས་པོ་དེ་དག་ནི་དགེ་སྦྱོང་གི་དྲི་མ་སྟེ། དེ་དག་སྤངས་ན་དགེ་སྦྱོང་དགེ་སྦྱོང་ཞེས་བྱའོ། །འོད་སྲུང་བརྒྱད་པོ་འདི་དག་ནི་དགེ་སྦྱོང་གི་ཆོས་ཀྱི་སྒྲིབ་པ་སྟེ། བརྒྱད་གང་ཞེ་ན་འདི་ལྟ་སྟེ། བླ་མ་རྣམས་ལ་མི་གུས་པ་དང་། [154a.2]ཆོས་རྣམས་ལ་རིམ་གྲོ་མེད་པ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་དང་། མ་ཐོས་པའི་མདོ་སྡེ་སྤོང་བ་དང་། བདག་མེད་པ་སེམས་ཅན་མེད་པ། སྲོག་མེད་པ། གང་ཟག་མེད་པའི་ཆོས་ཀྱིས་སྐྲག་པ་དང་། འདུས་མ་བྱས་ཀྱི་ཆོས་བསྟན་པ་ལ་མི་འཇུག་པར་འདུས་བྱས་ཉིད་ཀྱི་རྗེས་སུ་ [154a.3]སྙེགས་པ་དང་། འདུ་བྱེད་རྣམས་མ་སྐྱེས་པ་ཞེས་ཐོས་ན་སྐྲག་པ་དང་། ཆོས་ཐམས་ཅད་རང་བཞིན་གྱིས་མ་སྐྱེས་པ་ཞེས་ཐོས་ན་གཡང་ས་ཆེན་པོར་ལྟུང་བ་བཞིན་དུ་ལྟུང་བ་སྟེ། འོད་སྲུང་བརྒྱད་པོ་དེ་དག་ནི་དགེ་སྦྱོང་གི་ཆོས་ཀྱི་སྒྲིབ་པ་སྟེ། རབ་ཏུ་བྱུང་བས་དེ་དག་ཡོངས་སུ་སྤང་བར་བྱའོ། ། [154a.4]འོད་སྲུང་དགེ་སྦྱོང་ནི་ཁ་དོག་དང་རྟགས་ཀྱི་དབྱིབས་ཀྱིས་དགེ་སྦྱོང་ཞེས་ང་མི་འཆད་ཀྱི། ཡོན་ཏན་གྱི་ཆོས་ལ་ནན་ཏན་བྱེད་པའི་དགེ་སྦྱོང་ནི་དགེ་སྦྱོང་ངོ་ཞེས་ངས་བཤད་དོ། །འོད་སྲུང་དགེ་སྦྱོང་གིས་ནི་རྙོག་པ་མེད་པའི་སེམས་ཀྱིས་ལུས་ལ་ངུར་སྨྲིག་དག་བཅང་བར་བྱའོ། །དེ་ཅིའི་ཕྱིར་ཞེ་ན། [154a.5]འོད་སྲུང་རྙོག་པ་མེད་པ་ལ་ངས་ངུར་སྨྲིག་གནང་གི །འོད་སྲུང་གང་རྙོག་པ་དང་བཅས་པས་ལུས་ལ་ངུར་སྨྲིག་དག་འཆང་བ་དེ་དག་ཐམས་ཅད་ནི་ངུར་སྨྲིག་ཚིག་པའོ་ཞེས་བཤད་དེ། བསམ་པས་མོས་པ་རྣམས་ནི་མ་གཏོགས་སོ། །དེ་ཅིའི་ཕྱིར་ཞེ་ན། དེ་ནི་འཕགས་པ་རྣམས་ཀྱི་རྒྱལ་མཚན་ [154a.6]ཡིན་པའི་ཕྱིར་ཏེ། སྐྱོ་ཞིང་འདོད་ཆགས་དང་བྲལ་བར་སྤྱོད་པ་རྣམས་ཀྱི་གོས་འདི་དག་ནི་ཉེ་བར་ཞི་བའི་རྗེས་སུ་འཐུན་པ་བྱམས་པའི་རྗེས་སུ་ཞུགས་པའོ། །འོད་སྲུང་དེ་ལ་འཕགས་པ་རྣམས་ཀྱི་རྒྱལ་མཚན་གང་ཞེ་ན། འོད་སྲུང་བཅུ་གཉིས་པོ་འདི་དག་ནི་འཕགས་པ་རྣམས་ཀྱི་རྒྱལ་མཚན་ཏེ། བཅུ་གཉིས་ [154a.7]གང་ཞེ་ན། འོད་སྲུང་ཚུལ་ཁྲིམས་འཕགས་པ་རྣམས་ཀྱི་རྒྱལ་མཚན་དང་། ཏིང་ངེ་འཛིན་འཕགས་པ་རྣམས་ཀྱི་རྒྱལ་མཚན་དང་། ཤེས་རབ་འཕགས་པ་རྣམས་ཀྱི་རྒྱལ་མཚན་དང་། རྣམ་པར་གྲོལ་བ་འཕགས་པ་རྣམས་ཀྱི་རྒྱལ་མཚན་དང་། རྣམ་པར་གྲོལ་བའི་ཡེ་ཤེས་མཐོང་བ་འཕགས་ [154b] [154b.1]པ་རྣམས་ཀྱི་རྒྱལ་མཚན་དང་། བདེན་པ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། རྟེན་ཅིང་འབྲེལ་པར་འབྱུང་བ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། བསམ་གཏན་བཞི་འཕགས་པ་རྣམས་ཀྱི་རྒྱལ་མཚན་དང་། ཚད་མེད་པ་བཞི་འཕགས་པ་རྣམས་ [154b.2]ཀྱི་རྒྱལ་མཚན་དང་། གཟུགས་མེད་པའི་སྙོམས་པར་འཇུག་པ་བཞི་འཕགས་པ་རྣམས་ཀྱི་རྒྱལ་མཚན་དང་། སྐྱོན་མེད་པ་ལ་འཇུག་པ་འཕགས་པ་རྣམས་ཀྱི་རྒྱལ་མཚན་དང་། ཟག་པ་ཟད་པ་འཕགས་པ་རྣམས་ཀྱི་རྒྱལ་མཚན་ཏེ། འོད་སྲུང་བཅུ་གཉིས་པོ་དེ་དག་ནི་འཕགས་པ་ [154b.3]རྣམས་ཀྱི་རྒྱལ་མཚན་ནོ། །འོད་སྲུང་གང་ལ་ལ་རྒྱལ་མཚན་འདི་དག་དང་མི་ལྡན་པར་འཕགས་པའི་རིགས་གོས་ངུར་སྨྲིག་དག་འཆང་བ་དེ་ནི་ནོར་པའི་ཆོས་ལ་ཞུགས་པའོ་ཞེས་ངས་བཤད་དོ། །ཆོས་དང་འགལ་བར་གནས་པ་ཞེས་བཤད་དོ། །དེ་བཞིན་གཤེགས་པའི་བསྟན་པ་ལས་ [154b.4]རིང་དུ་གནས་པ་ཞེས་བཤད་དོ། །མྱ་ངན་ལས་འདས་པའི་ཕྱོགས་ཀྱི་མི་འཐུན་པའི་ཕྱོགས་ལ་གནས་པ་ཞེས་བཤད་དོ། །འཁོར་བའི་ཕྱོགས་དང་འཐུན་པ་ཞེས་བཤད་དོ། །ང་རྒྱལ་གྱི་མཆིལ་པས་ཟིན་པ་ཞེས་བཤད་དོ། །སྙིང་པོ་མ་བླངས་པ་ཞེས་བཤད་དོ། །ཆོས་ལས་ཉམས་པ་ [154b.5]ཞེས་བཤད་དོ། །ཉམ་ང་བའི་ལམ་ལ་གནས་པ་ཞེས་བཤད་དོ། །འོད་སྲུང་དེ་ལྟ་བས་ན་དགེ་སྦྱོང་གིས་ལུས་ལ་ངུར་སྨྲིག་དག་འཆང་བ་ན་རྙོག་པ་མེད་པའི་སེམས་སུ་བྱའོ། །གལ་ཏེ་དེས་འབྲས་བུ་ཐོབ་པར་མ་གྱུར་ན་དེས་གུས་པ་བརྒྱད་ཀྱིས་ལུས་ལ་ངུར་སྨྲིག་དག་བཅང་བར་བྱ་སྟེ། བརྒྱད་ [154b.6]གང་ཞེ་ན། མཆོད་རྟེན་གྱི་འདུ་ཤེས་དང་། སྟོན་པའི་འདུ་ཤེས་དང་། ཉེ་བར་ཞི་བའི་འདུ་ཤེས་དང་། བྱམས་པའི་འདུ་ཤེས་དང་། སངས་རྒྱས་ལ་གུས་པའི་འདུ་ཤེས་དང་། ངོ་ཚ་ཤེས་པའི་འདུ་ཤེས་དང་། ཁྲེལ་ཡོད་པའི་འདུ་ཤེས་དང་། རྙོག་པ་མེད་པར་བྱའོ་སྙམ་པ་སྟེ། དགེ་སྦྱོང་ [154b.7]གི་ཚུལ་དང་འཐུན་པའི་ཕྱིར་གུས་པ་བརྒྱད་པོ་དེ་དག་གིས་ལུས་ལ་ངུར་སྨྲིག་དག་བཅང་བར་བྱའོ། །འོད་སྲུང་གང་དག་ལྷོད་ཅིང་ཡང་དག་པར་མ་སྡོམ་པ་དང་། དགེ་སྦྱོང་གི་ཡོན་ཏན་གྱི་ཆོས་འདི་དག་ལས་ཉམས་པར་ལུས་ལ་ངུར་སྨྲིག་དག་འཆང་བ་རྣམས་ནི་གུས་པ་འདི་དག་མི་སྐྱེད་ [155a] [155a.1]དོ། །འོད་སྲུང་དགེ་སྦྱོང་གི་ཁ་དོག་དང་གཟུགས་ཅན་ལ་གནོད་པ་བྱེད་པ་ཞེས་བྱ་བ་ཉི་ཚེ་བའི་སེམས་ཅན་དམྱལ་བ་ཡོད་དེ། འོད་སྲུང་ཉི་ཚེ་བའི་སེམས་ཅན་དམྱལ་བ་དེར་དགེ་སྦྱོང་གི་གཟུགས་སུ་གྱུར་བཞིན་དུ་གོས་འབར་བ་དག་དང་། མགོ་འབར་བ་དག་དང་། ལྷུང་བཟེད་ [155a.2]འབར་བ་དག་དང་། སྟན་འབར་བ་དག་དང་། མལ་ཆ་འབར་བ་དག་གནོད་པ་བྱེད་དེ། དེ་དག་གི་ལོངས་སྤྱོད་དང་ཡོངས་སུ་སྤྱད་པ་གང་ཅི་ཡོད་པ་དེ་དག་ཐམས་ཅད་འབར་རབ་ཏུ་འབར་ཏེ་ཀུན་དུ་རབ་ཏུ་མཆེད་ཅིང་འབར་ལ་དེ་མེར་གྱུར་ཏེ། དགེ་སྦྱོང་གི་ཁ་དོག་དང་གཟུགས་ཀྱིས་གནོད་པ་ [155a.3]དེ་དག་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ལུས་དང་ངག་དང་ཡིད་ཀྱི་ལས་ཡོངས་སུ་མ་དག་པ་དང་ལྡན་པའི་ཕྱིར་ཏེ། ལུས་དང་ངག་དང་ཡིད་ཀྱི་ལས་ཡོངས་སུ་མ་དག་པ་དང་ལྡན་པ་དེ་དག་གི་འགྲོ་བ་ཡང་ཡོངས་སུ་མ་དག་པ་ཉིད་དུ་འགྱུར་རོ། །འོད་སྲུང་དགེ་སྦྱོང་ [155a.4]མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱད་པར་ཁས་འཆེ་བ་གང་ཞིག་ཚུལ་ཁྲིམས་དང་ལྡན་པ་རྣམས་དང་། ཡོན་ཏན་དང་ལྡན་པ་རྣམས་ཀྱིས་ཕྱག་བྱས་པ་བདག་གིར་བྱེད་ན་དེ་མི་དགེ་བའི་ལས་དེས་བརྙས་པ་བརྒྱད་འཐོབ་སྟེ། བརྒྱད་ [155a.5]གང་ཞེ་ན། བེམས་པོ་ལྟ་བུར་འགྱུར་བ་དང་། གོ་དཀའ་ཞིང་ལེ་ལོ་ཅན་དུ་འགྱུར་བ་དང་། སྐྱེ་བོ་མང་པོས་བགད་པའི་བུད་མེད་དུ་འགྱུར་བ་དང་། རང་དབང་མེད་ཅིང་བྲན་དུ་འགྱུར་བ་དང་། མདོག་ངན་ཞིང་མི་སྡུག་པར་འགྱུར་བ་དང་། མདོག་ངན་ཞིང་དབང་ཆུང་བར་གྲགས་པར་ [155a.6]འགྱུར་བ་དང་། དེ་ལ་སུ་ཡང་སྩུ་བར་མི་འགྱུར་བ་དང་། སྦྱིན་གནས་རྣམས་ལ་མགུ་བར་མི་བྱེད་པ་སྟེ། བརྙས་པ་བརྒྱད་པོ་དེ་དག་འཐོབ་བོ། །འོད་སྲུང་དེ་ལྟ་བས་ན་བཟང་པོ་མ་ཡིན་པའི་ཆོས་འདི་ལྟ་བུ་འདི་དག་ཐོས་ནས་དགེ་སྦྱོང་སྡིག་པ་ཅན་གྱིས་གཞན་གྱིས་ཕྱག་བྱས་པ་བདག་གིར་ [155a.7]མི་བྱའི། འོད་སྲུང་གང་དགེ་སྦྱོང་མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བ་ནི་ཐ་ན་ས་ཆེན་པོ་འདི་ལ་མཆིལ་མའི་ཐལ་བ་ཙམ་འདོར་བ་དེ་ཡང་ངས་རྙེད་པར་མི་འགྱུར་ན་གོམ་པ་འདེག་པ་དང་འཇོག་པ་ལྟ་ཅི་སྨོས། དེ་ [155b] [155b.1]ཅིའི་ཕྱིར་ཞེ་ན། འོད་སྲུང་ཆེན་པོ་འདི་ནི་སྔོན་གྱི་རྒྱལ་པོ་རྣམས་ཀྱིས་ཚུལ་ཁྲིམས་དང་ལྡན་པ་རྣམས་དང་། ཡོན་ཏན་དང་ལྡན་པ་རྣམས་དང་། སྦྱིན་གནས་རྣམས་ལ་ཀུན་ཏུ་སྤྱད་པའི་དོན་དུ་ཕུལ་བའི་ཕྱིར་རོ། །འོད་སྲུང་དེ་ལ་མི་བླུན་པོ་དེ་ནི་གོམ་པ་འཇོག་པ་དང་འདོར་བ་གང་ཡིན་པ་དེ་ནི་ [155b.2]ཐམས་ཅད་ཀྱང་དད་པས་བྱིན་པ་ལ་མི་དབང་བཞིན་དུ་གོམ་པ་འདོར་ཞིང་འཇོག་པ་ཡིན་ན་དགེ་འདུན་གྱི་འམ། ཕྱོགས་བཞིའི་དགེ་འདུན་གྱི་ཁྲི་འམ། ཁྲིའུ་འམ། འཆག་ས་འམ། གདིང་བ་འམ། གནས་ཁང་ངམ། གཙུག་ལག་ཁང་ངམ། ཀུན་དགའ་ར་བའམ། ཀུན་དགའ་ [155b.3]ར་བའི་གཞི་འམ། ཡོངས་སུ་སྤྱད་པ་འམ། ལྷུང་བཟེད་དམ། ཆོས་གོས་སམ། བསོད་སྙོམས་སམ། མལ་ཆ་འམ། ན་བའི་གསོས་སྨན་ནམ། ཡོ་བྱད་ཀྱང་རུང་སྟེ། ཐམས་ཅད་དད་པས་བྱིན་པ་ལ་མི་དབང་བར་སྤྱོད་པ་ཡིན་པ་ལྟ་ཅི་སྨོས། འོད་སྲུང་ཁྱོད་མོས་པར་བྱའོ། །ཁྱོད་ [155b.4]ཀྱིས་ཁོང་དུ་ཆུད་པར་བྱའོ། །འོད་སྲུང་དགེ་སྦྱོང་མ་ཡིན་ལ་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བས་ནི་དད་པས་བྱིན་པ་སྐྲའི་རྩེ་མོའི་ཆ་ཙམ་ཡང་ཡོངས་སུ་དག་པར་བྱ་མི་ནུས་སོ། །དེ་ཅིའི་ཕྱིར་ཞེ་ན། འོད་སྲུང་འཕགས་པའི་དགེ་འདུན་ [155b.5]ནི་ངས་རྒྱ་མཚོ་ཆེན་པོ་ལྟ་བུ་དང་། བསོད་ནམས་ཀྱི་ཞིང་དང་། སྦྱིན་གནས་རྣམས་ཀྱི་མཆོག་ཏུ་བསྟན་པའི་ཕྱིར་རོ། །འོད་སྲུང་བྲམ་ཟེའམ་ཁྱིམ་བདག་དད་པ་གང་དག་དེ་ལ་ཡོན་འབུལ་བ་དེ་དག་ཚད་མེད་པའི་འདུ་ཤེས་ཀྱིས་འབུལ་བ་དེ་ལ་འོད་སྲུང་མི་བླུན་པོ་ཚུལ་ཁྲིམས་འཆལ་པས་ [155b.6]ཐ་ན་སྐྲའི་རྩེ་མོ་བརྒྱར་གཤེགས་པའི་ཆ་ཙམ་ཞིག་དད་པས་བྱིན་པ་ཡོངས་སུ་སྤྱད་ན་ཡང་སྦྱིན་པ་པོ་དང་། སྦྱིན་བདག་དེའི་ཡོངས་སུ་སྦྱང་བའི་ཕྱིར་དད་པས་བྱིན་པ་སྐྲའི་རྩེ་མོའི་ཆ་ཙམ་ཇི་སྙེད་ལ་སྤྱད་པ་དེ་སྙེད་ཀྱི་ལས་ཀྱི་རྒྱ་མཚོ་ཆེན་པོ་སོགས་པར་འགྱུར་རོ། །འོད་སྲུང་དེ་ལྟ་བས་ན་ཚུལ་ [155b.7]ཁྲིམས་ཡོངས་སུ་དག་པས་དད་པས་བྱིན་པ་ཡོངས་སུ་སྤྱད་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །བསྟན་པ་འདི་བཤད་པ་ན་རྣལ་འབྱོར་སྤྱོད་པའི་དགེ་སློང་ཉིས་བརྒྱས་བསྟན་པ་འདི་ཐོས་ནས་རབ་ཏུ་ངུས་ཏེ་མཆི་མ་ཟག་ཅིང་ཚིག་འདི་སྐད་ཅེས་བདག་ཅག་ནི་གུམ་ [156a] [156a.1]ཡང་རུང་སྟེ། འབྲས་བུ་མ་ཐོབ་ཀྱི་བར་དུ་དད་པས་སྩལ་བའི་བསོད་སྙོམས་གཅིག་ཙམ་ཡང་ཡོངས་སུ་སྤྱད་པར་མི་བགྱིའོ་ཞེས་སྨྲས་སོ། །བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ་དག་ལེགས་སོ་ལེགས་སོ། །ངོ་ཚ་ཤེས་པ་དང་། འགྱོད་པ་དང་ལྡན་ [156a.2]པ་དང་། འཇིག་རྟེན་ཕ་རོལ་ཏུ་ཁ་ན་མ་ཐོ་བས་འཇིགས་པར་ལྟ་བ་རྣམ་པ་འདི་ལྟ་བུ་དག་གིས་གསུང་རབ་འདི་མཛེས་སོ། །འོད་སྲུང་ངས་དགེ་སློང་གཉིས་ལ་དད་པས་བྱིན་པ་གནང་སྟེ། གཉིས་གང་ཞེ་ན་ལྡན་པ་དང་། གྲོལ་བའོ། །ཡང་གཉིས་ཏེ། འདུ་བྱེད་ཐམས་ཅད་ལ་ [156a.3]མི་རྟག་པར་ལྟ་བ་དང་གང་ཡང་སེམས་རྣམ་པར་གྲོལ་བ་བྱམས་པ་ལ་སྙོམས་པར་འཇུག་པའོ། །དགེ་སློང་དག་དེ་ལ་དགེ་སློང་ལྡན་པ་རྣལ་འབྱོར་སྤྱོད་པ་ངའི་བསྟན་པ་ལ་ཞུགས་པ་གང་ཞིག་སྦྱིན་པ་པོ་དང་། སྦྱིན་བདག་ལས་ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་ [156a.4]གསོས་སྨན་དང་། ཡོ་བྱད་རྣམས་ཡོངས་སུ་སྤྱད་ནས་འཁོར་བའི་སྐྱོན་མཐོང་། འདུ་བྱེད་ཐམས་ཅད་མི་རྟག་པར་མཐོང་། འདུ་བྱེད་ཐམས་ཅད་སྡུག་བསྔལ་བར་རིག །ཆོས་ཐམས་ཅད་ལ་བདག་མེད་པར་མོས། མྱ་ངན་ལས་འདས་པ་ཞི་བར་རྟོགས་པས་ནི་རི་རབ་ཙམ་གྱི་ཁམ་དག་གི་དད་པས་བྱིན་ [156a.5]པ་ཡོངས་སུ་སྤྱད་ཀྱང་དེའི་ཡོན་ཤིན་དུ་ཡོངས་སུ་དག་པར་འགྱུར་རོ། །སྦྱིན་པ་པོ་དང་། སྦྱིན་བདག་གང་དག་ལས་དད་པས་བྱིན་པ་ཡོངས་སུ་སྤྱད་པ་དེ་ལས་དེ་དག་གིས་བསོད་ནམས་ཀྱི་རྣམ་པར་སྨིན་པ་འབྱོར་པ་ཆེན་པོ་དང་། ཕན་ཡོན་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། དགེ་ [156a.6]སློང་དག་རྫས་ལས་བྱུང་བའི་བསོད་ནམས་བྱ་བའི་དངོས་པོ་རྣམས་ལས་གང་བྱམས་པའི་སེམས་ལ་སྙོམས་པར་འཇུག་པ་དེ་མཆོག་ཡིན་པའི་ཕྱིར་རོ། །དགེ་སློང་དག་དགེ་སློང་གང་ཞིག་སྦྱིན་པ་པོ་དང་། སྦྱིན་བདག་གི་ཆོས་གོས་དང་། བསོད་སྙོམས་དང་། མལ་ཆ་དང་། ཡོ་བྱད་ [156a.7]རྣམས་ཡོངས་སུ་སྤྱད་ནས་སེམས་རྣམ་པར་གྲོལ་བ་ཚད་མེད་པ་ལ་སྙོམས་པར་འཇུག་ན་སྦྱིན་པ་པོ་དང་། སྦྱིན་བདག་དེའི་རྣམ་པར་སྨིན་པ་ཡང་ཚད་མེད་པར་ཤེས་པར་བྱའོ། །འོད་སྲུང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་པའི་རྒྱ་མཚོ་ཆེན་པོ་རྣམས་ནི་ཡོངས་ [156b] [156b.1]སུ་ཟད་པར་འགྱུར་ཡང་སྲིད་ཀྱི་དེའི་བསོད་ནམས་ཀྱི་རྒྱུ་འཐུན་པ་ནི་ཡོངས་སུ་ཟད་པར་གང་ཡང་མི་འགྱུར་རོ། །འོད་སྲུང་གང་ཞིག་སྦྱིན་པ་པོ་དང་། སྦྱིན་བདག་གི་དད་པས་བྱིན་པ་ཡོངས་སུ་སྤྱད་ནས་འཆལ་བའི་ཚུལ་ཁྲིམས་ཀྱིས་ལོག་པར་ལྟུང་བར་བྱེད་ན་མི་གཏི་མུག་པ་དེ་གནོད་པ་ཇི་ [156b.2]ཙམ་གྱི་ཕྱིར་ཞུགས་པ་ལ་ལྟོས། འོད་སྲུང་དེ་ལྟ་བས་ན་དགེ་སྦྱོང་གི་དྲི་མ་དང་། དགེ་སྦྱོང་གི་སྐྱོན་དང་། དགེ་སྦྱོང་གི་མི་དྲང་བ་དང་། དགེ་སྦྱོང་གི་གཡོ་དང་། དགེ་སྦྱོང་གི་སྒྱུ་དང་། དགེ་སྦྱོང་གི་གྱ་གྱུ་རྣམ་པ་དེ་ལྟ་བུ་དེ་དག་ནི་དགེ་སྦྱོང་བསམ་པ་དག་པས་ཡོངས་སུ་སྤོང་བར་བྱའོ། ། [156b.3]འོད་སྲུང་དགེ་སྦྱོང་དགེ་སྦྱོང་ཞེས་བྱ་བ་ནི་གང་མིག་ནས་མི་ཟག་ཅིང་རྣ་བ་ནས་མ་ཡིན། སྣ་ནས་མ་ཡིན། ལྕེ་ནས་མ་ཡིན། ལུས་ལས་མ་ཡིན། ཡིད་ནས་ཀྱང་མི་ཟག་པ་སྟེ། དེའི་ཕྱིར་དགེ་སྦྱོང་དགེ་སྦྱོང་ཞེས་བྱའོ། །སྐྱེ་མཆེད་དྲུག་རིག་པ་དང་མངོན་པར་ཤེས་པ་དྲུག་དང་། [156b.4]རྗེས་སུ་དྲན་པ་དྲུག་དང་ལྡན་པ་དང་། དམ་པ་རྣམས་ལ་གུས་པར་གནས་པ་དང་། ཕ་རོལ་དུ་འགྲོ་བའི་ཆོས་དྲུག་ལ་གནས་པ་སྟེ། དེའི་ཕྱིར་དགེ་སྦྱོང་དགེ་སྦྱོང་ཞེས་བྱའོ། །དགེ་སྦྱོང་གི་ལེའུ་སྟེ་དང་པོའོ།། །།འོད་སྲུང་དགེ་སློང་དགེ་སློང་ཞེས་བྱ་བ་ནི། [156b.5]ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །བདག་ཏུ་འདུ་ཤེས་པ་བཅོམ་པ་དང་། སེམས་ཅན་དུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གསོ་བར་འདུ་ཤེས་པ་དང་། གང་ཟག་ཏུ་འདུ་ཤེས་པ་དང་། སྐྱེས་པར་འདུ་ཤེས་པ་དང་། བུད་མེད་དུ་འདུ་ཤེས་པ་དང་། [156b.6]ཁྱེའུར་འདུ་ཤེས་པ་དང་། བུ་མོར་འདུ་ཤེས་པ་བཅོམ་པ་སྟེ། དེའི་ཕྱིར་དགེ་སློང་དགེ་སློང་ཞེས་བྱའོ། །ལུས་བསྒོམས་པ་དང་། ཚུལ་ཁྲིམས་བསྒོམས་པ་དང་། སེམས་བསྒོམས་པ་དང་། ཤེས་རབ་བསྒོམས་པ་དང་། འཇིགས་སྐྲག་པ་མེད་པ་དང་། སྲིད་པའི་ཆུ་བོ་ལས་ [156b.7]རྒལ་བ་དང་། འབྱུང་བ་དང་། འཇིག་པ་ལ་ལྟ་བ་དང་། འཇིགས་པ་ཐམས་ཅད་དང་བྲལ་བ་དང་། འཇིགས་པ་མེད་པའི་ལམ་ལ་གནས་པ་སྟེ། དེའི་ཕྱིར་དགེ་སློང་དགེ་སློང་ཞེས་བྱའོ། །འོད་སྲུང་གང་ལ་ལ་ཞིག་ཆོས་འདི་དག་དང་མི་ལྡན་ལ་བདག་ནི་དགེ་སློང་དགེ་སློང་ངོ་སྙམ་དུ་ [157a] [157a.1]ཁས་འཆེ་ན་བསམ་པས་མོས་པ་མ་གཏོགས་པར་ང་ཡང་དེའི་སྟོན་པ་མ་ཡིན་ལ་དེ་ཡང་ངའི་ཉན་ཐོས་མ་ཡིན་ནོ། །འོད་སྲུང་སྡིག་པ་ཅན་གྱི་དགེ་སློང་དག་ཕལ་ཆེར་ངའི་བསྟན་པ་འདི་ནུབ་པར་བྱེད་པར་འགྱུར་ཏེ། འོད་སྲུང་ཡ་མཚན་ཅན་དགུ་བཅུ་རྩ་ལྔ་དང་། ཕས་ཀྱི་རྒོལ་ [157a.2]བ་ཐམས་ཅད་ཀྱིས་ནི་ངའི་བསྟན་པ་འདི་ནུབ་པར་བྱེད་མི་ནུས་སོ། །གཞན་དུ་ན་ངའི་བསྟན་པ་འདི་ལས་མི་གཏི་མུག་པ་ངེས་པར་མི་སེམས་པ་གང་དག་འབྱུང་བ་དེ་དག་གིས་ངའི་བསྟན་པ་ནུབ་པར་བྱེད་པར་འགྱུར་རོ། །འོད་སྲུང་འདི་ལྟ་སྟེ་དཔེར་ན་{རི་དགས་,རི་དྭགས་}ཀྱི་རྒྱལ་པོ་སེང་གེ་ཤི་བའི་ཤ་ལ་གཅན་ [157a.3]གཟན་ནམ་བྱ་གང་གིས་ཀྱང་ཟ་བར་མི་ནུས་ཀྱི་སེང་གེའི་རོ་དེ་ཉིད་ལས་སྲིན་བུ་གང་དག་འབྱུང་བ་དེ་དག་རི་(དགས་,དྭགས་)ཀྱི་རྒྱལ་པོ་སེང་གེའི་ཤ་ལ་ཟའོ། །འོད་སྲུང་དེ་བཞིན་དུ་ངའི་བསྟན་པ་འདི་ཉིད་ལ་མི་བླུན་པོ་བརྐམ་པ། ཆགས་པས་ཟིལ་གྱིས་ནོན་པ། ཆོས་མ་ཡིན་པ་ལ་ལྟ་བ། ངེས་པར་མི་སེམས་ [157a.4]པ། ལྷོད་པ། {བརྫུན་,རྫུན་}དུ་སྨྲ་བ་གང་དག་འབྱུང་བ་དེ་དག་ངའི་བསྟན་པ་ནུབ་པར་བྱེད་པར་འགྱུར་རོ། །འོད་སྲུང་ཆོས་བཞི་དང་ལྡན་ན་སྡིག་པ་ཅན་གྱི་དགེ་སློང་དུ་རིག་པར་བྱ་སྟེ། བཞི་གང་ཞེ་ན། ཆགས་པ་དང་། ཞེ་སྡང་དང་། གཏི་མུག་དང་། ངའོ་སྙམ་པའི་ང་རྒྱལ་ཏེ། བཞི་པོ་དེ་དག་གོ །གཞན་ [157a.5]ཡང་བཞི་སྟེ། བཞི་གང་ཞེ་ན། ཁེངས་པ་དང་། མུ་ཆོར་སྨྲ་བ་དང་། བྱ་ཁྭ་ལྟ་བུ་དང་། ཚིག་འཆལ་པ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། རྒོད་པ་དང་། ཕོ་ཐེག་ཅན་དང་། རྙེད་པ་འདོད་པ་དང་། ཆོས་མ་ཡིན་པ་འདོད་པ་སྟེ། བཞི་པོ་དེ་དག་གོ །གཞན་ཡང་བཞི་སྟེ། [157a.6]བཞི་གང་ཞེ་ན། གཡོ་ཅན་དང་། སྒྱུ་ཅན་དང་། མི་འཐུན་པས་འཚོ་བ་དང་། མི་གཙིགས་པར་སྨྲ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བྱས་པ་མི་གཟོ་བ་དང་། བྱས་པ་ལ་སྨོད་པ་དང་། སྔོན་བྱས་པ་མི་དྲན་པ་དང་། མཛའ་བོ་ལ་འཁུ་བ་ཡིན་ཏེ། བཞི་པོ་དེ་དག་ [157a.7]གོ། །གཞན་ཡང་བཞི་སྟེ། བཞི་གང་ཞེ་ན་དད་པས་བྱིན་པ་ལོག་པར་ལྟུང་བར་བྱེད་པ་དང་། ཚུལ་ཁྲིམས་མི་སྲུང་བ་དང་། སོ་སོར་ཐར་པ་ཁྱད་དུ་གསོད་པ་དང་། འདུལ་བ་མི་སྲུང་བ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བདག་ཏུ་སྨྲ་བ་ཡིན། སེམས་ཅན་དུ་སྨྲ་བ་ [157b] [157b.1]ཡིན། སྲོག་ཏུ་སྨྲ་བ་ཡིན། གང་ཟག་ཏུ་སྨྲ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། སངས་རྒྱས་ལ་མི་གུས་པ་ཡིན། ཆོས་ལ་མི་གུས་པ་ཡིན། དགེ་འདུན་ལ་མི་གུས་པ་ཡིན། བསླབ་པ་རྣམས་ལ་མི་གུས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་ [157b.2]སྟེ། བཞི་གང་ཞེ་ན། དགེ་འདུན་འཐུན་པ་ལ་མི་དགའ་བ་ཡིན། གཙུག་ལག་ཁང་ལ་དགའ་བ་མི་རྙེད་པ་ཡིན། འདུ་འཛི་ལ་མངོན་པར་དགའ་བ་ཡིན། འཇིག་རྟེན་རྒྱང་པ་ན་པའི་གསང་ཚིག་རྗོད་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། རྙེད་པ་འདོད་པ་ [157b.3]ཡིན། གྲགས་པ་འདོད་པ་ཡིན། གཉེན་བཤེས་འདོད་པ་ཡིན། ཆོས་ལ་མཆོག་ཏུ་དགའ་བ་མི་རྙེད་པ་ཡིན་ཏེ་བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། བདུད་ཀྱིས་ཟིན་པ་ཡིན། བདུད་ཀྱིས་ནོན་པ་ཡིན། རྨུགས་པ་དང་གཉིད་མང་བ་ཡིན། འཕགས་པའི་རིགས་ [157b.4]རྣམས་ལ་མི་གནས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལུས་རུལ་ཅིང་བརྒྱན་པ་དང་། ཉོན་མོངས་པས་སྣད་པ་དང་། མྱ་ངན་ལས་འདས་པ་ལ་རྒྱབ་ཀྱིས་བལྟས་པ་དང་། འབྲས་བུ་ཐོབ་པ་མེད་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། [157b.5]བཞི་གང་ཞེ་ན། འདོད་ཆགས་ཀྱི་ཡོངས་སུ་གདུང་བས་ཡོངས་སུ་གདུངས་པ་དང་། ཞེ་སྡང་གི་ཡོངས་སུ་གདུང་བས་ཡོངས་སུ་གདུངས་པ་དང་། གཏི་མུག་གི་ཡོངས་སུ་གདུང་བས་ཡོངས་སུ་གདུངས་པ་དང་། ཉོན་མོངས་པ་ཐམས་ཅད་ཀྱི་ཡོངས་སུ་གདུང་བས་ཡོངས་སུ་གདུངས་ [157b.6]པ་སྟེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལམ་ངན་པ་ལ་གནས་ཏེ་འབྱུང་བ་མི་མཐོང་བ་ཡིན། སེར་སྣ་ཅན་དུ་གྱུར་ཏེ་ཀུན་མི་བགེད་པའི་ངང་ཚུལ་ཅན་ཡིན། ཐམས་ཅད་ཡོངས་སུ་འཛིན་པར་འདོད་ཅིང་ཆོག་མི་ཤེས་པ་ཡིན། ངོམས་མི་མྱོང་ཞིང་ཐོས་པའི་ [157b.7]ནན་ཏན་དང་བྲལ་བ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། མུན་པར་གཞོལ་བས་མུན་པར་གྱུར་པ་ཡིན། རྨོངས་པ་ལ་གཞོལ་བས་རྨོངས་པར་གྱུར་པ་ཡིན། ལོག་པའི་ཆོས་ཀྱིས་དཀྲིས་པས་ཆོས་མ་ཡིན་པ་མཐོང་བ་ཡིན། མྱ་ངན་ལས་འདས་ [158a] [158a.1]པའི་སྒོ་བཅད་པས་འཁོར་བའི་འཆིང་བས་བཅིངས་པ་ཡིན་ཏེ། བཞི་པོ་དེ་དག་གོ །གཞན་ཡང་བཞི་སྟེ། བཞི་གང་ཞེ་ན། ལུས་ཀྱི་ཚུལ་འཆོས་པ་ཡིན། ངག་གི་ཚུལ་འཆོས་པ་ཡིན། སེམས་ཀྱི་ཚུལ་འཆོས་པ་ཡིན། སྤྱོད་ལམ་གྱི་ཚུལ་འཆོས་པ་ཡིན་ཏེ། [158a.2]བཞི་པོ་དེ་དག་གོ །དེ་ལ་ལུས་ཀྱི་ཚུལ་འཆོས་པ་ནི་དལ་གྱིས་འགྲོ་བར་ཚུལ་འཆོས་པ་ཡིན། མགོ་སྨད་པར་ཚུལ་འཆོས་པ་ཡིན། གཉའ་ཤིང་གང་ཙམ་དུ་ལྟ་བར་ཚུལ་འཆོས་པ་ཡིན། གོས་ཚགས་ལེགས་པར་གྱོན་པར་ཚུལ་འཆོས་པ་ཡིན། དགོན་པ་ལ་གནས་པའི་ཡོན་ [158a.3]ཏན་མི་ཚོལ་བར་དགོན་པ་ལ་གནས་པ་ལྟར་ཚུལ་འཆོས་པ་ཡིན། གོང་བུར་འདུ་ཤེས་པ་མི་སེལ་བར་བསོད་སྙོམས་ལེན་པ་ལྟར་ཚུལ་འཆོས་པ་ཡིན། ངོ་ཚ་ཤེས་པ་དང་ཁྲེལ་ཡོད་པའི་རྗེས་སུ་མི་འཇུག་པར་ཕྱག་དར་ཁྲོད་འཆང་བ་ལྟར་ཚུལ་འཆོས་པ་ཡིན། རྟེན་ཅིང་འབྲེལ་བར་ [158a.4]འབྱུང་བ་ལ་མི་འཇུག་པར་རི་དྲུང་དང་ཤིང་དྲུང་དུ་གནས་པ་ལྟར་ཚུལ་འཆོས་པ་ཡིན། ཆོས་བདུད་རྩིའི་སྨན་མི་ཚོལ་བར་བཀུས་ཏེ་བོར་བའི་སྨན་ཚོལ་བ་ལྟར་ཚུལ་འཆོས་པ་ཡིན་ཏེ། འདི་ནི་ལུས་ཀྱི་ཚུལ་འཆོས་པ་ཞེས་བྱའོ། །དེ་ལ་ངག་གི་ཚུལ་འཆོས་པ་གང་ཞེ་ན། ཆེ་གེ་མོ་ཞེས་བྱ་ [158a.5]བས་ཁོ་བོ་ཤེས་ཤིང་ཆེ་གེ་མོ་ཞེས་བྱ་བས་ཁོ་བོ་མགྲོན་དུ་བོས་ཏེ། ཁོ་བོས་གང་འདོད་པ་རྙེད་ཅིང་བསྟི་སྟང་དུ་བྱས་ནས་རྙེད། ཁོ་བོས་བཟང་པོ་རྙེད། ཁོ་བོས་ལན་མང་དུ་རྙེད། ཁོ་བོས་མང་དུ་ཐོས། ཁོ་བོ་ཚུལ་ཁྲིམས་དང་ལྡན་ཞིང་དགེ་བའི་ཆོས་ཅན་ཡིན། ཁོ་བོ་ནི་བོད་པར་འོས་ [158a.6]པ་ཡིན། ཁོ་བོ་ནི་སླར་ལན་གདབ་པའི་འོས་ཡིན། ཁོ་བོ་ནི་ནུས་པ་དང་ལྡན་ཞིང་སྐལ་བ་ཡོད་ལ་མཐུ་ཡོད་པ་ཡིན། ཁོ་བོ་ནི་དོན་རྣམ་པར་ངེས་པ་བསྟན་པ་ལ་མཁས་པ་ཡིན། གང་ཆེ་གེ་མོ་ཞེས་བྱ་བས་ཁོ་བོ་ལ་འདི་སྐད་ཅེས་སྨྲས་ཏེ། ཁོ་བོས་དེ་ལ་འདི་སྐད་ཅེས་སྨྲས་ནས་ཚར་ [158a.7]བཅད་དེ་སྤོབས་པ་མེད་པར་བྱས། ཁོ་བོས་འཁོར་མགུ་བར་བྱས། ཁོ་བོས་ལེགས་སོ་ཞེས་བྱ་བ་ཐོབ། ཁོ་བོས་དེ་ལས་བགོ་བ་ཐོབ། ཡང་འོང་བར་བྱ་བའི་ཕྱིར་ཁོ་བོ་མགྲོན་དུ་གཉེར་ཅེས་བྱ་བ་སྟེ། འོད་སྲུང་ངེས་པར་མི་སེམས་པའི་སེམས་དང་ལྡན་པ་ལས་ཚིག་འཆལ་ [158b] [158b.1]པ་དེ་ལྟ་བུ་གང་ཅི་འབྱུང་བ་དེ་ཐམས་ཅད་ནི་ངག་གི་ཚུལ་འཆོས་པ་སྟེ། མི་རིགས་པ་རྣམས་ཀྱི་ཡིན་གྱི་རིགས་པ་རྣམས་ཀྱི་མ་ཡིན་ཏེ། འདི་ནི་ངག་གི་ཚུལ་འཆོས་པ་ཞེས་བྱའོ། །འོད་སྲུང་དེ་ལ་སེམས་ཀྱི་ཚུལ་འཆོས་པ་གང་ཞེ་ན། གང་སེམས་ཀྱིས་ཆོས་གོས་དང་བསོད་ [158b.2]སྙོམས་རྙེད་ཀྱང་རུང་བར་ཡོངས་སུ་རྟོག་ལ་ཚིག་གིས་བདག་ལ་ཅི་ཡང་མི་དགོས་སོ་ཞེས་ཟེར་བ་དང་། གང་སེམས་ཀྱིས་རྙེད་པར་འདོད་ལ་འདོད་པ་ཉུང་བ་སྐད་དུ་སྨྲ་བ་འདི་ནི་སེམས་ཀྱི་ཚུལ་འཆོས་པ་ཞེས་བྱའོ། །དེ་ལ་འདི་སྐད་ཅེས་བྱ་སྟེ། སེམས་ཀྱིས་རྙེད་ཀྱང་ཅི་མ་རུང་སྙམ་ [158b.3]སེམས། །ཚིག་ཏུ་བདག་ལ་ཅི་ཡང་དགོས་མེད་སྨྲ། །མེད་པའི་ངོ་བོའི་ཡིད་ཀྱིས་དེ་སྨྲས་ཏེ། །ནམ་ཡང་བདེ་བ་རྙེད་པར་འགྱུར་མ་ཡིན། །སེམས་ཀྱི་ཚུལ་འཆོས་བསམ་པས་ལྷ་རྣམས་དང་། །ཀླུ་དང་ལྷ་མིག་ཅན་རྣམས་སླུ་བར་བྱེད། །སྨྲས་པའི་སེམས་ཀྱིས་ནམས་ཀྱང་དག་ [158b.4]མི་འགྱུར། །དེ་བཞིན་གཤེགས་པ་ཀུན་གྱིས་དེ་མཁྱེན་ཏོ། །འོད་སྲུང་དེ་ལྟར་ན་དགེ་སློང་ཆོས་མ་ཡིན་པ་དང་ལྡན་པ་སྡིག་པ་ཅན་རྣམས་ཀྱི་ཆོག་མ་ཡིན་པའི་སྤྱོད་ཡུལ་ལ་སྤྱོད་པ་འདི་ལྟ་བུ་གང་ཡིན་པ་འདི་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་ [158b.5]འཇིག་རྟེན་དུ་འགྲོ་བར་འགྱུར་བའོ། །དགེ་སློང་གི་ལེའུ་སྟེ་གཉིས་པའོ།། །།འོད་སྲུང་དེ་ལ་དགེ་སྦྱོང་གདོལ་པ་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་གདོལ་པ་ནི་རྟག་ཏུ་དུར་ཁྲོད་སྤྱོད་ཡུལ་པ་ཡིན་ཏེ། ཤི་བ་ལ་རེ་བ་དང་། བྱམས་པ་མེད་པའི་ [158b.6]མིག་གིས་འགྲོ་བ་ལ་ལྟ་བ་དང་། ཤི་བ་ལ་དགའ་བ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་རྟག་ཏུ་མཛའ་བཤེས་ཀྱི་ཁྱིམ་དང་། སློང་བ་སྟེར་བའི་ཁྱིམ་ལ་གདུ་བ་ཡིན་ཏེ། དེ་ནས་རྙེད་པ་དང་བཀུར་སྟིས་ཉེ་བར་འཚོ་ཞིང་ཁྱིམ་པ་དེ་དག་ཆོས་སམ། འདུལ་བ་ཡང་ [158b.7]དག་པར་འཛིན་དུ་མི་འཇུག་པ་དང་། དེ་རྙེད་པའི་ཆེད་དུ་འདྲིས་པར་བྱེད་ཀྱི་དོན་གྱི་ཆེད་དུ་མ་ཡིན་པ་དང་། མཛའ་བའི་སེམས་མེད་ཅིང་རྟག་ཏུ་རྙེད་པ་ལ་རེ་བ་ཡིན་ཏེ། འོད་སྲུང་འདི་ནི་དགེ་སྦྱོང་གདོལ་པ་ལྟ་བུ་ཞེས་བྱའོ། །འོད་སྲུང་འདི་ལྟ་སྟེ། དཔེར་ན་གདོལ་པ་ནི་ཚོང་དཔོན་ [159a] [159a.1]དང་། ཁྱིམ་བདག་དང་། བློན་པོ་དང་། ཁམས་ཀྱི་རྒྱལ་པོ་དག་དང་། བྲམ་ཟེ་དང་། རྒྱལ་རིགས་དང་། གྲོང་རྡལ་གྱི་མི་དང་ཡུལ་གྱི་མི་རྣམས་ཀྱིས་རྟག་ཏུ་ཡོངས་སུ་སྤང་བར་བྱ་བའི་འོས་ཡིན་ཏེ། གདོལ་པར་རིག་ནས་ཐག་རིང་པོ་བས་ཀྱང་རིང་པོར་ཡོངས་ [159a.2]སུ་སྤོང་ངོ་། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་རྣམས་ཀྱིས་ཡོངས་སུ་སྤང་བར་བྱ་བའི་འོས་ཡིན་ཏེ། དགེ་སྦྱོང་གདོལ་པ་ལྟ་བུ་སྡིག་པའི་ཆོས་ཀུན་དུ་ [159a.3]སྤྱོད་ཅིང་ཚུལ་ཁྲིམས་འཆལ་པར་རིག་ནས་ཐག་རིང་པོ་བས་ཀྱང་རིང་པོར་ཡོངས་སུ་སྤོང་ངོ་། །འོད་སྲུང་འདི་ལྟ་སྟེ། དཔེར་ན་གདོལ་པའི་ཁ་ཕྱིས་སམ། གོས་སམ། ཡོངས་སུ་སྤྱད་པ་དེ་ཐམས་ཅད་ལ་ནི་སྐྱེ་བོ་ཡ་རབས་རྣམས། མི་རེག་ཅིང་ཡོངས་སུ་མི་སྤྱོད་དོ། །འོད་ [159a.4]སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུའི་ལྷུང་བཟེད་དམ། ཆོས་གོས་སམ། ཡོངས་སུ་སྤྱད་པ་དེ་ཐམས་ཅད་ནི་མི་འཐུན་པའི་འཚོ་བས་ཡོངས་སུ་བཙལ་བ། ལུས་དང་སེམས་རྨས་པས་ཡོངས་སུ་བཙལ་བ་ཡིན་པས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་དེ་ལ་མི་ [159a.5]རེག་ཅིང་མི་སྤྱོད་དོ། །འོད་སྲུང་འདི་ལྟ་སྟེ་དཔེར་ན་གདོལ་པ་ནི་ཁ་ཕྱིས་ཐོགས་ཏེ། ཞུམ་ཞུམ་པོར་བྱས་ནས་གཞན་གྱི་ཁྱིམ་དུ་འགྲོའོ། །འོད་སྲུང་དེ་བཞིན་དུ་དགེ་སྦྱོང་གདོལ་པ་ལྟ་བུ་ཡང་ཞུམ་ཞུམ་པོར་བྱས་ནས། དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་ལོ། ། [159a.6]ཞུམ་ཞུམ་པོར་བྱས་ནས་འཁོར་གྱི་ནང་དུ་འགྲོའོ། །ཞུམ་ཞུམ་པོར་བྱས་ནས་གཙུག་ལག་ཁང་དང་། གནས་ཁང་དང་། གཞན་གྱི་ཁྱིམ་དུ་འགྲོའོ། །ཞུམ་ཞུམ་པོར་བྱས་ནས་འགྲོ་བ་དང་། འདུག་པ་དང་། ཉལ་བར་བྱེད་དོ། །འོད་སྲུང་དེ་ལྟར་ན་ཞུམ་ཞུམ་པོར་བྱས་པ། སྡིག་པ་ [159a.7]འཆབ་པ་དེའི་སྤྱོད་ལམ་གང་ཡིན་པ་དེ་ཐམས་ཅད་ནི་རུང་བ་མ་ཡིན་པ་ལས་ཡོངས་སུ་བརྟགས་པའོ། །འོད་སྲུང་འདི་ལྟ་སྟེ། དཔེར་ན་གདོལ་པའི་སེམས་ནི་བདེ་འགྲོའི་སྐྱེ་བ་ལ་མི་གནས་སོ། །དེ་ཅིའི་ཕྱིར་ཞེ་ན། འདི་ལྟར་དེ་རང་གི་ལས་ཀྱི་ཉེས་པའི་ཕྱིར་རོ། །འོད་སྲུང་དེ་ [159b] [159b.1]བཞིན་དུ་དགེ་སྦྱོང་གདོལ་པ་ལྟ་བུའི་སེམས་ཀྱང་བདེ་འགྲོར་འགྲོ་བར་བྱ་བའི་ཕྱིར་མི་གནས་ཤིང་། དེའི་འཇིག་རྟེན་ཕ་རོལ་རྣམ་པར་ཞི་གསལ། དེ་ངན་འགྲོ་གསུམ་དུ་གནས་པར་སྒྲིབ་པ་མེད་དེ། འོད་སྲུང་འདི་ནི་དགེ་སྦྱོང་གདོལ་པ་ལྟ་བུ་ཞེས་བྱའོ། །འོད་སྲུང་དེ་ལ་དགེ་སྦྱོང་རུལ་པ་གང་ [159b.2]ཞེ་ན། འོད་སྲུང་འདི་ལྟ་སྟེ་དཔེར་ན་རྒྱལ་པོ་ལ་འོས་པའི་བཏུང་བའི་རོ་མཆོག་དང་ལྡན་པ་ལས་གང་སྙིང་ཁུའི་མཆོག་བཅུས་པ་དེའི་ལྷག་མ་ནི་རུལ་ཅིང་མི་གཙང་བར་གྱུར་པ་སྟེ་མྱང་བར་བྱ་བ་མ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་ཆོས་ཀྱི་མཆོག་གི་སྙིང་ཁུའི་རོ་བྲོ་བ་དང་ [159b.3]བྲལ་བ་ཡིན་ཏེ། དྲི་ང་བ་དང་། ཡོངས་སུ་སྤང་བར་བྱ་བའི་འོས་ཡིན། ཉོན་མོངས་པ་དང་། གཡོ་སྒྱུ་འཛིན་པ་དང་། འཆལ་པའི་ཚུལ་ཁྲིམས་ཀྱི་དྲི་མི་ཞིམ་པ་དང་ལྡན་ཞིང་ཚུལ་ཁྲིམས་ཀྱི་དྲི་དང་བྲལ་བ་ཡིན། ཉོན་མོངས་པའི་དྲིས་བསྒོས་པ་ཡིན་ཏེ། དེ་གང་དང་གང་དུ་ [159b.4]འགྲོ་བ་དེ་དང་དེ་ཉིད་དུ་ཡང་བདག་ལ་ཕན་པའི་ཕྱིར་ཞུགས་ཀྱི་གཞན་ལ་ཕན་པའི་ཕྱིར་མ་ཡིན་ཏེ། འོད་སྲུང་འདི་ནི་དགེ་སྦྱོང་རུལ་པ་ཞེས་བྱའོ། །འོད་སྲུང་འདི་ལྟ་སྟེ་དཔེར་ན་རུལ་པ་ཞེས་བྱ་བ་ནི་གང་ཟོས་པ་དང་འཐུངས་པ་དང་། འཆོས་པ་གཟགས་པ་དེ་ནི་རུལ་ཞིང་དྲི་ང་བ་ཡིན་ཏེ། སྐྱེ་བོ་ཡ་རབས་ཐམས་ཅད་ཀྱིས་ [159b.5]ཡོངས་སུ་སྤང་བར་བྱ་བའི་འོས་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་གཟགས་པ་དང་མཚུངས་ཏེ། ལུས་དང་ངག་དང་སེམས་ཀྱི་ཀུན་ཏུ་སྤྱོད་པ་ཡོངས་སུ་མ་དག་པས་འཕགས་པའི་སྐྱེ་བོས་ཡོངས་སུ་སྤང་བར་བྱ་བ་ཡིན་ཏེ། འདི་ནི་དགེ་སྦྱོང་རུལ་པ་ཞེས་བྱའོ། །འོད་སྲུང་འདི་ [159b.6]ལྟ་སྟེ། དཔེར་ན་ས་བོན་རུལ་པ་གང་ཡིན་པ་དེ་ནི་ས་ཆེན་པོ་ལས་སྐྱེར་མི་རུང་ངོ་། །འོད་སྲུང་དེ་བཞིན་དུ་དགེ་སྦྱོང་རུལ་པ་ཡང་སངས་རྒྱས་ཀྱི་བསྟན་པ་འདི་ལ་མི་སྐྱེ་ཞིང་འཕགས་པའི་ཆོས་རྣམ་པར་གྲོལ་བའི་ས་བོན་ནུས་པ་མ་ཡིན་ལ་འབྲས་བུ་ཐོབ་པར་མི་འགྱུར་ཏེ། འོད་སྲུང་འདི་ནི་དགེ་ [159b.7]སྦྱོང་རུལ་པ་ཞེས་བྱའོ། །འོད་སྲུང་དེ་ལ་དགེ་སྦྱོང་ཟ་མ་ཏོག་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ཟ་མ་ཏོག་ཕྱི་རོལ་ཤིན་ཏུ་བྱི་དོར་བྱས་ལ་ནང་མི་གཙང་བ་སྣ་ཚོགས་ཀྱིས་གང་བ་ཞིག་ཡོད་པ་དེ་བཞིན་དུ་འོད་སྲུང་དགེ་སྦྱོང་ཟ་མ་ཏོག་ལྟ་བུ་ཡང་དགེ་སྦྱོང་ལྟར་བཅོས་ཤིང་ཕྱི་རོལ་གཙང་སྦྲ་ [160a] [160a.1]སྤྱོད་པར་གྱུར་ལ། ནང་འདོད་ཆགས་དང་། ཞེ་སྡང་དང་། གཏི་མུག་གིས་ཡོངས་སུ་གང་བ་ཡིན་ཏེ། འོད་སྲུང་འདི་ནི་དགེ་སྦྱོང་ཟ་མ་ཏོག་ལྟ་བུ་ཞེས་བྱའོ། །འོད་སྲུང་དེ་ལ་དགེ་སྦྱོང་ཀུ་ར་ཎ་ཌཱ་ཀ་ལྟ་བུ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ཀུ་ར་ཎ་ཌཱ་ཀ་ཞེས་བྱ་བའི་མེ་ཏོག་ [160a.2]ནི་ཁ་དོག་བལྟ་ན་སྡུག་ལ་རེག་ན་རྩུབ་པ་ལྕི་བའི་སྦྲང་མའི་དྲི་མ་ནམ་ཞིང་ཤི་ལ་བར་ཀའི་རྩ་བའི་དྲི་མ་ནམ་སྟེ། མཁས་པ་མཛངས་པ་རྣམས་ནི་མེ་ཏོག་དེ་ལྟ་བུ་ལ་མི་རེག །མི་ལེན་མི་སྣོམ་གྱི། གང་དག་བྱིས་པའི་རང་བཞིན་ཅན་དུ་གྱུར་པ་དེའི་སྐྱོན་མི་ཤེས་པ། དེ་དག་ནི་མེ་ཏོག་དེ་ལྟ་ [160a.3]བུ་ལེན་ཅིང་སྣོམ་མོ། །འོད་སྲུང་དེ་བཞིན་དུ་དགེ་སྦྱོང་ཀུ་ར་ཎ་ཌཱ་ཀ་ལྟ་བུ་ཡང་དགེ་སྦྱོང་གི་ཁ་དོག་དང་། གཟུགས་དང་ལྡན་པར་གྱུར་ཀྱང་མི་དེས་པ་ཡིན། ཚིག་བརླང་བ་ཡིན། འཆལ་པའི་ཚུལ་ཁྲིམས་ཀྱི་དྲི་མི་ཞིམ་པ་ཡིན། འཚོ་བ་ཉམས་པ་ཡིན། སྤྱོད་པ་ཉམས་པ་ [160a.4]ཡིན། ལྟ་བ་ཉམས་པ་ཡིན་ཏེ། མཛངས་པ་མཁས་པ་རྣམས་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་དེ་ལྟ་བུ་ལ་སྟེན་པའམ། སྙེན་པའམ། བསྙེན་བཀུར་མི་བྱེད་ཀྱི། དེའི་ཚུལ་རིག་པས་ཐག་རིང་པོ་བས་ཀྱང་རིང་པོར་ཡོངས་སུ་སྤོང་ངོ་། །གང་དག་བྱིས་པའི་རང་བཞིན་ཅན་དུ་གྱུར་ [160a.5]པ་དེ་དག་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་དེ་ལྟ་བུ་ལ་སྟེན་ཅིང་སྙེན་ལ་བསྙེན་བཀུར་བྱེད་དེ། ཀུ་ར་ཎ་ཌཱ་ཀའི་མེ་ཏོག་བྱིས་པའི་ལག་ན་འདུག་པ་བཞིན་དུ་དེ་དང་འཐུན་པ་ཉིད་དུ་འགྱུར་ཏེ། འོད་སྲུང་འདི་ནི་ཀུ་ར་ཎ་ཌཱ་ཀ་ལྟ་བུའི་དགེ་སྦྱོང་ཞེས་བྱའོ། །འོད་སྲུང་དེ་ལ་ཆོམ་རྐུན་ལྟ་བུའི་དགེ་སྦྱོང་ [160a.6]གང་ཞེ་ན། འོད་སྲུང་འདི་ལྟ་སྟེ་དཔེར་ན། མི་གཡོ་ཅན་གྱི་རང་བཞིན་ཅན། རྟག་ཏུ་བརྐམ་པ། ཆགས་པའི་ཟིལ་གྱིས་ནོན་པ། བདག་གི་རྙེད་པས་ཆོག་པར་མི་འཛིན་པ། གཞན་གྱི་ནོར་ལ་རེ་བ། དྲག་ཤུལ་ཅན། དབྱུག་པ་དང་། མཚོན་ཆ་དང་དགྲ་ཆ་ཐོགས་པ། ངོ་ཚ་མེད་པ། [160a.7]སྙིང་རྗེ་མེད་པ། རྟག་ཏུ་གདུག་ཅིང་རབ་ཏུ་གདུག་པའི་སེམས་དང་ལྡན་པ་ནི་དེ་གང་གི་ཚེ་གྲོང་བར་རམ། གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་དུ་འཇུག་པ་དེའི་ཚེ་དེ་འདི་སྙམ་དུ་གཞན་དག་གི་ནོར་གྱི་ཕུང་པོ་གང་ཡིན་པ་དེ་བདག་གིར་གྱུར་ན་རེ་སྟེས་སྙམ་དུ་སེམས་ [160b] [160b.1]ཤིང་དེ་ཟིན་དུ་འོང་ཞེས་མཁྱུན་བུ་མཁྱུན་བུར་རྒྱུ་བ་ཡིན་ནོ། །འོད་སྲུང་དེ་བཞིན་དུ་ཆོམ་རྐུན་ལྟ་བུའི་དགེ་སྦྱོང་ཡང་རྟག་ཏུ་བརྐམ་པ། ཆགས་པའི་ཟིལ་གྱིས་ནོན་པ། བདག་གི་རྙེད་པས་ཆོག་མི་ཤེས་པ། གཞན་གྱི་རྙེད་པ་ལ་རེ་བ་ཡིན་ཏེ། དེ་གང་གི་ཚེ་གྲོང་བར་རམ། གྲོང་ངམ། གྲོང་ཁྱེར་ [160b.2]རམ། གྲོང་རྡལ་ལམ། ཡུལ་དུ་འཇུག་པ་དེའི་ཚེ། དེ་རྙེད་པའི་ཕྱིར་འཇུག་གི་ཆོས་ཀྱི་ཕྱིར་མ་ཡིན་ཏེ། སྤྱོད་ལམ་ཐམས་ཅད་ཀྱང་ཆོམ་རྐུན་ལྟ་བུར་སྟོན་པ་ཡིན། འཆབ་ཅིང་སྦེད་པ་ཡིན་ཏེ། བདག་དགེ་སློང་གཞན་གྱིས་ཚུལ་ཁྲིམས་འཆལ་བར་ཤེས་ན་མི་རུང་སྟེ། ཤེས་ [160b.3]པར་གྱུར་ན་སོ་སོར་ཐར་པའི་མདོ་འདོན་པ་ལས་བསྐྲད་པར་འགྱུར་རོ་སྙམ་ནས་རྟག་ཏུ་སྐྲག་ཅིང་རྟག་ཏུ་འཇིགས་ཏེ། སྤྱོད་ལམ་ཐམས་ཅད་ཀྱང་གཡོས་སྤྱོད་པས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དག་གིས་ཆོམ་རྐུན་འོང་ངོ་། །ཆོམ་རྐུན་འགྲོའོ། །ཆོམ་རྐུན་ [160b.4]འགྲེང་ངོ་། །ཆོམ་རྐུན་འཆག་གོ །ཆོམ་རྐུན་འདུག་གོ །ཉལ་ལོ། །ཆོས་གོས་ལེན་ཏོ། །ཆོམ་རྐུན་གྲོང་དུ་འགྲོའོ། །གྲོང་ནས་འབྱུང་ངོ་། །ཆོམ་རྐུན་ཟའོ། །ཆོམ་རྐུན་འཐུང་ངོ་། །ཆོམ་རྐུན་སྐྲ་འདྲེག་གོ་ཞེས་རིག་པར་འགྱུར་རོ། །འོད་སྲུང་དེ་ལྟར་ན་ལྷ་དང་། ཀླུ་དང་། [160b.5]གནོད་སྦྱིན་དང་། དྲི་ཟ་རྣམས་ཀྱིས་དེའི་སྤྱོད་ལམ་གང་ཡིན་པ་དེ་ཐམས་ཅད་རུང་བ་མ་ཡིན་ལ། ཡོངས་སུ་བརྟགས་པ་ཡིན་པར་རིག་པར་འགྱུར་ཏེ། རིག་ནས་ཀྱང་དེ་ལ་སྙིང་རྗེ་ཆེན་པོ་སྐྱེད་ཅིང་ཀྱེ་མ་འདི་མཚར་ཅིག་སྡིག་པ་ཅན་གྱི་དགེ་སློང་འདི་ལྟ་བུ་དག་གིས་བཅོམ་ལྡན་ [160b.6]འདས་ཤཱཀྱ་ཐུབ་པའི་བསྟན་པ་ནུབ་པར་བྱེད་པར་འགྱུར་ཞེས་འཕྱ་ཞིང་མི་སྙན་པར་ཟེར་རོ། །ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་རྣམས་ལ་ནི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་ཀྱང་འདི་དག་ནི་བསྟན་པ་ཡོངས་སུ་འཛིན་པའོ་ཞེས་གུས་པ་ཆེན་ [160b.7]པོ་བྱེད་དོ། །འོད་སྲུང་ཆོམ་རྐུན་པ་ལྟ་བུའི་དགེ་སྦྱོང་བསྟན་པ་འདི་ལ་རབ་ཏུ་བྱུང་བ་ནི་སྐྱོ་བ་དང་། འདོད་ཆགས་དང་བྲལ་བའི་སེམས་གཅིག་ཀྱང་མི་སྐྱེད་ན་འབྲས་བུ་ཐོབ་པ་ལྟ་ཅི་སྨོས་ཀྱི་དེ་ནི་གནས་མེད་དོ། །འོད་སྲུང་འདི་ནི་ཆོམ་རྐུན་ལྟ་བུའི་དགེ་སྦྱོང་ཞེས་བྱའོ། །འོད་སྲུང་དེ་ [161a] [161a.1]ལ་དགེ་སློང་ཤིན་ཏེ་མ་གང་ཞེ་ན། འོད་སྲུང་འདི་ལྟ་སྟེ། དཔེར་ན་འབྲུའི་ནང་ན་གང་དག་མ་སྨིན་པ་དང་། མི་གྲུང་བ་དང་། འོངས་མེད་ཅིང་འབྲུ་འདྲ་བ་དེ་དག་ནི་ཤིན་ཏེ་མ་ཞེས་བྱའོ། །འོད་སྲུང་དེ་བཞིན་དུ་དགེ་སྦྱོང་ཤིན་ཏེ་མ་ཡང་ཡང་ཞིང་མཐུ་ཆུང་ [161a.2]ལ་བདུད་ཀྱིས་ཟིན་པ། བདུད་ཀྱིས་ནོན་པ། ཉོན་མོངས་པ་ཐམས་ཅད་ཀྱིས་ནོན་པ། ཉོན་མོངས་པ་ཐམས་ཅད་ཀྱིས་འཕྲོགས་པ། རླུང་གིས་གཡེངས་པ་ལྟ་བུ་སྟེ། འོད་སྲུང་དགེ་སྦྱོང་ཤིན་ཏེ་མ་ཞེས་བྱ་བ་དེ་ནི་དགེ་སློང་ཚུལ་ཁྲིམས་འཆལ་པ་སྡིག་པ་ཅན་རྣམས་ཀྱི་ཚིག་བླ་ [161a.3]དགས་ཏེ། དེ་དག་ནི་ངས་དགེ་སྦྱོང་ཤིན་ཏེ་མ་ཞེས་བཏགས་སོ། །འོད་སྲུང་དེ་ལ་དགེ་སྦྱོང་སུན་པར་བྱེད་པ་གང་ཞེ་ན། འོད་སྲུང་འདི་ལྟ་སྟེ། དཔེར་ན་ནས་ཀྱི་ལྗང་བུ་ཕུན་སུམ་ཚོགས་པའི་ནང་ན་ནས་ལ་གནོད་པ་ཞིག་སྐྱེས་ནས་དེ་ལྗང་བུའི་ཁ་དོག་འདྲ་ཞིང་རྟགས་དང་དབྱིབས་ [161a.4]ཀྱང་འདྲ་བས་དེ་ལ་ནས་ཀྱི་བདག་པོ་དེ་དག་འདི་སྙམ་དུ་འདི་དག་ཐམས་ཅད་ནི་ནས་ཡིན་ནོ་སྙམ་པའི་འདུ་ཤེས་སྐྱེད་སྐྱེད་པ་ལས་གང་གི་ཚེ་ན་ནས་ཀྱི་ལྗང་བུ་ལས་སྙེ་མ་བྱུང་བར་གྱུར་པ་དེའི་ཚེ་ནས་ལ་གནོད་པ་དེ་ལ་ནས་ཀྱི་འདུ་ཤེས་མི་འབྱུང་ངོ་། །འོད་སྲུང་དེ་བཞིན་དུ་དགེ་སྦྱོང་ [161a.5]སུན་པར་བྱེད་པའི་དགེ་སློང་དགེ་སློང་གི་དགེ་འདུན་གྱི་ནང་ན་འདུག་པ་ཡང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་པའི་གནས་སུ་གྱུར་པ་རྣམས་དང་ཁ་དོག་དང་རྟགས་ཀྱི་དབྱིབས་འདྲ་བས་དེ་ལ་སྦྱིན་པ་པོ་དང་། སྦྱིན་བདག་དེ་དག་དགེ་སྦྱོང་ངོ་ [161a.6]སྙམ་པའི་འདུ་ཤེས་སྐྱེད་ཅིང་སྦྱིན་གནས་སུ་འདུ་ཤེས་བསྐྱེད་པ་ལས་དེ་ནས་གལ་ཏེ་མི་གཏི་མུག་པ་དགེ་སྦྱོང་མ་ཡིན་པ་ལ་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བ། ནང་རུལ་ཅིང་ཟག་པ་དེ་འཁོར་གྱི་ནང་ནས་བྱུང་སྟེ། ཤི་ [161a.7]འཕོས་ཤིང་འཆི་བའི་དུས་བྱས་ནས་སེམས་ཅན་དམྱལ་བར་འགྲོ་བར་འགྱུར་ཏེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་ལྷའི་མིག་དང་ལྡན་པ་རྣམས་ཀྱིས་དེ་སེམས་ཅན་དམྱལ་བར་སྐྱེས་པར་མཐོང་སྟེ། མཐོང་ནས་ཀྱང་མི་གཏི་མུག་པ་འདི་ནི་སྔོན་དགེ་སྦྱོང་གི་ཁ་དོག་དང་ [161b] [161b.1]གཟུགས་ཀྱིས་སྡིག་པའི་ལས་བྱས་པས། དེ་སེམས་ཅན་དམྱལ་བ་ཆེན་པོར་སྐྱེས་ཏེ། ནས་ལ་གནོད་པ་ལ་ནས་ཀྱི་ཡོན་ཏན་མེད་པ་ལྟར་འདི་ལ་ཡང་དགེ་སྦྱོང་གི་ཡོན་ཏན་གྱི་འབྲས་བུ་མེད་དོ། །ཞེས་སྙིང་རྗེ་ཆེན་པོ་སྐྱེད་དེ། འོད་སྲུང་འདི་ནི་དགེ་སྦྱོང་སུན་པར་བྱེད་པ་ཞེས་བྱའོ། ། [161b.2]འོད་སྲུང་དེ་ལ་དགེ་སྦྱོང་ལྟར་བཅོས་པ་གང་ཞེ་ན། འོད་སྲུང་འདི་ལྟ་སྟེ་དཔེར་ན་ར་གན་ཆེན་པོ་ཞེས་བྱ་བའི་ལྕགས་ཤིག་ཡོད་དེ། ཤིན་ཏུ་ཡོངས་སུ་སྦྱང་བ་བྱས་ཤིང་ཤིན་ཏུ་ཡོངས་སུ་དག་པར་བྱས་ན་གསེར་འདྲ་བར་འགྱུར་ཏེ། འོན་ཀྱང་གསེར་གྱི་རིན་ཐང་དང་། གསེར་གྱི་ཁ་དོག་ [161b.3]དང་། བདར་འཕྲོ་དང་། སྲང་ལ་གཅལ་བའི་ལྕིད་འདྲ་བ་ནི་མ་ཡིན་ནོ། །འོད་སྲུང་དེ་བཞིན་དུ་དགེ་སྦྱོང་ལྟར་བཅོས་པའི་དགེ་སྦྱོང་ཡང་ལུས་ཤིན་ཏུ་བཀྲུས་ཤིང་གོས་བཟང་པོ་མཛེས་པ་གྱོན་ལ། དགེ་སྦྱོང་གི་ཕྱི་རོལ་གྱི་སྤྱོད་པ་ཐམས་ཅད་ཡོངས་སུ་དག་སྟེ། འགྲོ་བ་དང་། [161b.4]འོང་བ་དང་མདུན་དུ་ལྟ་བ་དང་། གཡས་གཡོན་ལྟ་བ་དང་བསྐུམ་པ་དང་བརྐྱང་བ་དང་ཆོས་གོས་སྣམ་སྦྱར་དང་ལྷུང་བཟེད་དང་། ཆོས་གོས་འཛིན་པ་ཤེས་བཞིན་དུ་སྤྱོད་ཀྱང་དེ་འདོད་ཆགས་ཀྱིས་བཅོམ་པ་དང་། ཞེ་སྡང་གིས་བཅོམ་པ་དང་། གཏི་མུག་གིས་བཅོམ་པ་དང་། [161b.5]ཉོན་མོངས་པས་བཅོམ་པ་དང་། རྙེད་པ་དང་བཀུར་སྟིས་བཅོམ་པ་དང་། ང་རྒྱལ་དང་། ཆེ་བའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། མངོན་པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་དང་། ལོག་པའི་ང་རྒྱལ་གྱིས་བཅོམ་པ་དང་། ཉོན་ [161b.6]མོངས་པས་འཁོལ་བ་དང་། བསྙེན་བཀུར་ལྷུར་ལེན་གྱི་ཆོས་ལྷུར་མི་ལེན་པ་དང་། ལུས་ཆ་བར་སྦྱོར་བ་ལ་བརྩོན་གྱི་ཚུལ་ཁྲིམས་ཀྱིས་ཆ་བར་སྦྱོར་བ་ལ་མི་བརྩོན་པ་དང་། ཟས་དང་གོས་ལྷུར་ལེན་གྱི་འཕགས་པའི་ཆོས་ལྷུར་མི་ལེན་པ་དང་། འཇིག་རྟེན་ཕ་རོལ་དུ་ཁ་ན་མ་ཐོ་ [161b.7]བས་འཇིགས་པར་མི་ལྟ་བ་དང་། ཚེ་འདི་ལྷུར་ལེན་གྱི་ཚེ་ཕྱི་མ་ལྷུར་མི་ལེན་པ་དང་། ལུས་གསོ་བ་དང་། རྙེད་པ་དང་། བཀུར་སྟི་དང་། གྲགས་པ་ལ་རྟེན་གྱི་ཆོས་ལ་རིམ་གྲོར་བྱ་བ་ལ་མི་རྟེན་པ་དང་། སྦག་པ་སྣ་ཚོགས་ཀྱིས་སྦག་པ་དང་། སྡིག་པས་བསྒོས་པ་དང་། ཁྱིམ་ [162a] [162a.1]གྱི་ལས་ཀྱི་མཐའ་ལ་མངོན་པར་བརྩོན་པ་དང་། ཁྱིམ་པ་དང་མཚུངས་པའི་སེམས་དང་ལྡན་པས་བདེ་བ་དག་གིས་ཀྱང་བདེ་ཞིང་སྡུག་བསྔལ་དག་གིས་ཀྱང་སྡུག་བསྔལ་བ་དང་། རྗེས་སུ་ཆགས་པ་དང་ཁོང་ཁྲོ་བས་བཅོམ་པ་ཡིན་ཏེ། དེའི་དགེ་སྦྱོང་གི་ཆོ་ག་དང་། [162a.2]སྤྱོད་ལམ་ཐམས་ཅད་དང་སེམས་དང་སེམས་ལས་བྱུང་བའི་ཆོས་ཐམས་ཅད་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་གཞོལ་བ་ཡིན་ཞིང་དགེ་སྦྱོང་གི་རིན་ཐང་དང་། རི་བ་དང་། དགེ་སྦྱོང་གི་སྲང་ཁ་དང་མི་མཉམ་པ་སྟེ། འོད་སྲུང་འདི་ [162a.3]ནི་དགེ་སྦྱོང་ལྟར་བཅོས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་དགེ་སློང་གཟི་འཕྲོགས་པ་ཡིན་ཞེ་ན། འོད་སྲུང་འདི་ལྟ་སྟེ་དཔེར་ན་སྐྱེས་པ་འམ། བུད་མེད་དམ། ཁྱེའུ་འམ། བུ་མོ་གང་ལ་ལ་ཞིག་མི་མ་ཡིན་པས་མདངས་ཕྲོགས་པར་གྱུར་ན། དེ་དབང་ཆུང་བར་གྲགས་ཤིང་མདོག་ [162a.4]ངན་ལ་མི་སྡུག་པར་འགྱུར་ཏེ། དེ་ལྟར་ན་མདངས་ཕྲོགས་པ་རྣམས་ལ་ནི་སྨན་ཏམ། གསང་སྔགས་སམ། རིག་སྔགས་རྣམས་ཀྱིས་མི་སློན་ཏེ། དེ་འཆི་བར་འགྱུར་བ་མ་གཏོགས་པར་ཐ་མར་གཞན་དུ་མི་འགྱུར་རོ། །འོད་སྲུང་དེ་བཞིན་དུ་དགེ་སློང་གང་ལ་ཚུལ་ཁྲིམས་ཀྱི་གཟི་ [162a.5]མེད་པ་དང་། ཏིང་ངེ་འཛིན་གྱི་གཟི་མེད་པ་དང་། ཤེས་རབ་ཀྱི་གཟི་མེད་པ་དང་། རྣམ་པར་གྲོལ་བའི་གཟི་མེད་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་གཟི་མེད་པ་དང་། བྱམས་པའི་གཟི་མེད་པ་དང་། སྙིང་རྗེའི་གཟི་མེད་པ་དང་། དགའ་བའི་གཟི་མེད་པ་དང་། [162a.6]བཏང་སྙོམས་ཀྱི་གཟི་མེད་པ་དང་། སྦྱིན་པ་དང་ཡང་དག་པར་སྡོམ་པ་དང་ངེས་པའི་གཟི་མེད་པ་དང་། དགེ་སྦྱོང་གི་ཡོན་ཏན་གྱི་གཟི་མེད་པ་དང་། འཕགས་པའི་རིགས་ལ་གནས་པའི་གཟི་མེད་པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པའི་གཟི་མེད་པ་དང་། ལུས་དང་ངག་དང་སེམས་ [162a.7]ཡོངས་སུ་དག་པའི་གཟི་མེད་པ་འདི་ནི་འོད་སྲུང་དགེ་སློང་གཟི་ཕྲོགས་པ་ཞེས་བྱ་སྟེ། འོད་སྲུང་གཟི་ཕྲོགས་པ་དེ་ལྟ་བུ་རྣམས་ལ་ནི་དེ་བཞིན་གཤེགས་པས་སྦྱར་བའི་སྨན་གྱིས་མི་ཚུགས་ཏེ། འདི་ལྟ་སྟེ། འདོད་ཆགས་ལ་མི་སྡུག་པའི་སྨན་དང་། ཞེ་སྡང་ལ་བྱམས་པ་དང་། [162b] [162b.1]གཏི་མུག་ལ་རྟེན་ཅིང་འབྲེལ་བར་འབྱུང་བ་དང་། ཉོན་མོངས་པ་རྣམས་ལ་ཚུལ་བཞིན་ཡིད་ལ་བྱ་བ་དང་། འདུ་འཛི་ལས་དབེན་པར་དགའ་བ་དང་། འཛིན་པ་ཐམས་ཅད་སྤང་བའི་ཕྱིར་དགོན་པར་གནས་པ་དང་། གསུམ་བསྡམ་པའི་ཕྱིར་ལུས་དང་ངག་དང་སེམས་ཡོངས་སུ་ [162b.2]དག་པ་དང་། སེམས་ལས་སུ་རུང་བར་བྱ་བའི་ཕྱིར་ཏིང་ངེ་འཛིན་ཡོངས་སུ་དག་པའི་སྨན་དེ་བཞིན་གཤེགས་པས་སྦྱར་བ་འདི་ལྟ་བུ་འདི་དག་གིས་དེ་ལ་མི་ཚུགས་ཏེ། དེ་ཤི་ནས་སེམས་ཅན་དམྱལ་བ་ཉིད་དུ་འགྱུར་གྱི་དེའི་ཐ་མ་གཞན་དུ་མི་འགྱུར་རོ། །གང་དག་ཡང་འཇིག་རྟེན་ [162b.3]ལས་འདས་པའི་སྨན་འདི་ལྟ་སྟེ། ཕུང་པོ་ཤེས་པ་དང་། ཁམས་ཤེས་པ་དང་། སྐྱེ་མཆེད་ཤེས་པ་དང་། རྟེན་ཅིང་འབྲེལ་བར་འབྱུང་བ་ཤེས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཤེས་པ་འཇིག་རྟེན་ལས་འདས་པའི་སྨན་འདི་ལྟ་བུ་འདི་དག་ [162b.4]གིས་ཀྱང་དེ་ལ་མི་ཚུགས་ཏེ། དེ་ཤི་ནས་སེམས་ཅན་དམྱལ་བ་ཉིད་དུ་འགྱུར་གྱི་དེའི་ཐ་མ་གཞན་དུ་མི་འགྱུར་རོ། །བསྟན་པ་འདི་བཤད་པ་ན་དགེ་སློང་རྣལ་འབྱོར་སྤྱོད་པ་ལྔ་བརྒྱ་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་ཕྱིན་པ་སྤྱོད་པར་གྱུར་ན་མི་རུང་ཞེས་ཉམས་ [162b.5]པར་བྱས་ཏེ་སླར་ཁྱིམ་དུ་དོང་ངོ་། །དེ་ལ་དགེ་སློང་གཞན་དག་ཅིག་འདི་སྐད་དུ་དགེ་སློང་ཆེ་བའི་བདག་ཉིད་ཅན་རྣལ་འབྱོར་སྤྱོད་པ་འདི་དག་བསྟན་པ་ལས་ཉམས་པ་ནི་ཤིན་ཏུ་མ་ལེགས་སོ་ཞེས་འཕྱའོ། །བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། ། [162b.6]དགེ་སློང་དག་ཁྱེད་འདི་སྐད་དུ་དགེ་སློང་ཆེ་བའི་བདག་ཉིད་ཅན་འདི་དག་འདི་ལྟར་བསྟན་པ་ལས་ཤིན་ཏུ་ཉམས་པ་འདི་ནི་ཤིན་ཏུ་མ་ལེགས་སོ་ཞེས་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་དག་མངོན་པར་མི་དགའ་ནས་ཁྱིམ་ན་གནས་པ་འདི་ནི་དད་པ་ཅན་རྣམས་ཀྱི་ཆོས་ཡིན་ [162b.7]ཏེ། དགེ་སློང་དད་པ་དང་མོས་པ་མང་བ་འགྱོད་པ་དང་ལྡན་པ་འདི་དག་གིས་བསྟན་པ་འདི་ཐོས་ནས་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་ཡོངས་སུ་སྤྱད་ན་མི་རུང་ངོ་ཞེས་ཉམས་པར་གྱུར་ཏོ། །འོད་སྲུང་ང་ལུང་སྟོན་ཏེ། དགེ་སློང་འདི་དག་ནི་འདི་ནས་ [163a] [163a.1]ཤི་འཕོས་ནས་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ། དེ་དག་དེ་བཞིན་གཤེགས་པ་བྱམས་པའི་ཉན་ཐོས་ཐོག་མར་འདུས་པའི་གྲངས་སུ་ཆུད་པར་འགྱུར་རོ། །དགེ་སྦྱོང་གདོལ་པ་ལྟ་བུའི་ལེའུ་སྟེ་གསུམ་པའོ།། །།བམ་པོ་གཉིས་པ་ [163a.2]སྟེ་ཐ་མ། དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ཇི་ལྟ་བུ་ཞལ་ཏ་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ངས་ཞལ་ཏ་བྱ་བར་གནང་བའི་དགེ་སློང་གཉིས་ཏེ། གཉིས་གང་ཞེ་ [163a.3]ན། དགེ་སློང་ཡོངས་སུ་དག་པ་འཇིག་རྟེན་ཕ་རོལ་དུ་ཁ་ན་མ་ཐོ་བས་འཇིགས་པར་ལྟ་བ། ལས་ཀྱི་རྣམ་པར་སྨིན་པ་ལ་རྟོན་པ། འཛེམ་པ་དང་ལྡན་ཞིང་འགྱོད་པ་དང་ལྡན་པ་དང་། གང་ཡང་ཟག་པ་ཟད་པ་དགྲ་བཅོམ་པར་གྱུར་པ་སྟེ། འོད་སྲུང་དགེ་སློང་མ་ཉམས་པ་འདི་གཉིས་ [163a.4]ཞལ་ཏ་བྱེད་པར་ངས་གནང་ངོ་། །དེ་ཅིའི་ཕྱིར་ཞེ་ན། འོད་སྲུང་ལེགས་པར་གསུངས་པའི་ཆོས་འདུལ་བ་འདི་ལ་རིགས་སྣ་ཚོགས་ལས་རབ་ཏུ་བྱུང་བ། སེམས་ཀྱི་མོས་པ་སྣ་ཚོགས་དང་ལྡན་པ། སྤོང་བའི་ཕྱིར་རྣལ་འབྱོར་སྣ་ཚོགས་ལ་གནས་པ། ཁ་ཅིག་ནི་དགོན་པ་པ་ཞི་བའི་མལ་ [163a.5]སྟན་ལ་མངོན་པར་དགའ་བ། ཁ་ཅིག་ནི་བསོད་སྙོམས་པ། ཁ་ཅིག་ནི་གྲོང་འདབ་ན་གནས་པ། ཁ་ཅིག་ནི་འཚོ་བ་ཡོངས་སུ་དག་པ། ཁ་ཅིག་ནི་མང་དུ་ཐོས་པ་ལ་མངོན་པར་བརྩོན་པ། ཁ་ཅིག་ནི་ཆོས་སྨྲ་བ། ཁ་ཅིག་ནི་འདུལ་བ་འཛིན་པ། ཁ་ཅིག་ནི་མ་མོ་འཛིན་པ། ཁ་ཅིག་ [163a.6]ནི་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། ཕོ་བྲང་འཁོར་དག་ཏུ་ཞུགས་ནས་ཆོས་སྟོན་པ་སྟེ། སེམས་ཅན་གཞན་དག་གི་སེམས་ཀྱི་སྤྱོད་པ་རྣམས་སྲུང་དཀའ་བའི་ཕྱིར་རོ། །འོད་སྲུང་དེ་ལ་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་ཐམས་ཅད་ཀྱི་སེམས་ [163a.7]མགུ་བར་བྱའོ། །འོད་སྲུང་དེ་ལ་དགེ་སློང་དགོན་པ་པའི་བས་མཐའི་མལ་སྟན་གང་ཡིན་པ་དེ་དག་ནི་དགེ་སློང་ཞལ་ཏེ་བྱེད་པས་ཡོངས་སུ་བསྐོ་བར་མི་བྱའོ། །ཞལ་ཏ་བྱེད་པས་དགེ་སློང་དགོན་པ་པ་དེ་དག་བསྲུང་བར་བྱ་སྟེ། དུས་མ་ཡིན་པར་གསོལ་བར་མི་བྱ། དུས་མ་ཡིན་པར་གཏང་ [163b] [163b.1]བར་མི་བྱའོ། །འོད་སྲུང་གལ་ཏེ་དགེ་སློང་དགོན་པ་བ་ལ་དགེ་འདུན་གྱི་བྱ་བར་གཏོགས་པ་སློབ་པའི་ལས་རེས་བབ་ན་དགེ་སློང་ཞལ་ཏ་བྱེད་པ་དེ་ལས་དེ་བདག་ཉིད་ཀྱིས་བྱའོ། །ཡང་ན་དགེ་སློང་གཞན་ཞིག་བསྐོས་ལ་ལས་དེ་བྱེད་དུ་གཞུག་སྟེ་དགེ་སློང་དགོན་པ་པ་ལ་གནོད་པར་མི་བྱའོ། ། [163b.2]འོད་སྲུང་དེ་ལ་དགེ་སློང་བསོད་སྙོམས་སྤྱོད་པ་གང་ཡིན་པ་དེ་ལ་དགེ་སློང་ཞལ་ཏ་བྱེད་པ་དེས་ཁ་ཟས་བསོད་པ་བགོ་བཤའ་བྱའོ། །འོད་སྲུང་དེ་ལ་དགེ་སློང་རྣལ་འབྱོར་སྤྱོད་པ་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་པས་འཐུན་པའི་འཚོག་ཆས་དང་། ན་བའི་གསོས་སྨན་དང་། ཡོ་ [163b.3]བྱད་རྣམས་སྦྱིན་པར་བྱའོ། །དགེ་སློང་རྣལ་འབྱོར་སྤྱོད་པ་དེ་ས་ཕྱོགས་ག་ལ་གནས་པའི་ས་ཕྱོགས་དེར་དགེ་སློང་ཞལ་ཏ་བྱེད་པ་དེས་སྒྲ་ཆེན་པོ་དང་། སྐད་དྲག་པོ་མི་དབྱུང་ཞིང་བྱེད་དུ་ཡང་མི་གཞུག་གོ །དགེ་སློང་ཞལ་ཏ་བྱེད་པས་དགེ་སློང་རྣལ་འབྱོར་སྤྱོད་པ་དེ་བསྲུང་ཞིང་མལ་ཆ་ཡང་ [163b.4]སྦྱར་བར་བྱའོ། །ཁ་ཟས་བསོད་པ་དང་། ཡི་གར་འོང་བ་དང་། རྣལ་འབྱོར་སྤྱོད་པའི་ས་དང་འཐུན་པའི་བཟའ་བ་དང་བཅའ་བ་རྣམས་སྦྱིན་པར་བྱའོ། །དགེ་སློང་དེ་ལ་དགེ་སློང་འདི་ནི་དེ་བཞིན་གཤེགས་པའི་བསྟན་པ་རྟོན་པའི་ཕྱིར་གནས་པ་ཡིན་ཏེ། དེ་ལ་བདག་གིས་རྗེས་སུ་འཐུན་ [163b.5]པའི་ཡོ་བྱད་ཐམས་ཅད་མང་དུ་སྦྱར་བར་བྱའོ་སྙམ་དུ་ཤིན་ཏུ་ཕངས་པའི་འདུ་ཤེས་བསྐྱེད་པར་བྱའོ། །འོད་སྲུང་དེ་ལ་དགེ་སློང་མང་དུ་ཐོས་པ་ལ་མངོན་པར་བརྩོན་པ་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་པས་ལུང་ནོས་ཤིག །ལྷོགས་ཤིག །ཁ་ཏོན་གྱིས་ཤིག །ཁོ་བོ་ནི་ཁྱོད་ཀྱི་ [163b.6]རིམ་གྲོ་བྱེད་པ་ཡིན་གྱིས། ཁྱོད་ཇི་ལྟ་ཇི་ལྟ་བུར་མང་དུ་ཐོས་པར་གྱུར་པ་དེ་ལྟ་དེ་ལྟ་བུར་དགེ་སློང་གི་དགེ་འདུན་མཛེས་པར་འགྱུར་བར་གྱིས་ཤིག །འདུག་ལ་བརྗོད་པས་མཛེས་པར་གྱིས་ཤིག །བདག་ཉིད་ཀྱི་ཤེས་རབ་ཀྱང་མཆོག་ཏུ་འགྱུར་བར་གྱིས་ཤིག་ཅེས་སྤྲོ་བ་བསྐྱེད་པར་ [163b.7]བྱའོ། །འོད་སྲུང་དེ་ལ་དགེ་སློང་ཞལ་ཏ་བྱེད་པས་དེ་དག་དུས་མ་ཡིན་པར་གཏང་བར་མི་བྱ། ལས་སུ་བསྐོ་བར་མི་བྱའོ། །དགེ་སློང་ཞལ་ཏ་བྱེད་པ་དེས་དགེ་སློང་མང་དུ་ཐོས་པ་དེ་དག་བསྲུང་བར་བྱའོ། །འོད་སྲུང་དེ་ལ་ཆོས་སྨྲ་བའི་དགེ་སློང་གང་ཡིན་པ་དེ་དག་ལ་དགེ་སློང་ཞལ་ཏ་བྱེད་ [164a] [164a.1]པས་ལས་སུ་མི་བསྐོ་བར་བྱའོ། །གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་འཇུག་ཏུ་བཅུག་ལ་ཆོས་འཆད་དུ་གཞུག་གོ །ཆོས་ཉན་པ་དག་བསྐོ་བར་བྱའོ། །འཁོར་གྱི་དཀྱིལ་འཁོར་རྣམ་པར་དག་པར་བྱའོ། །འབེལ་ [164a.2]བའི་ཆོས་ཀྱི་གཏམ་གྱི་ཕྱིར་དཀྱིལ་འཁོར་དུ་གཞག་པར་བྱའོ། །ཆོས་སྨྲ་བའི་དགེ་སློང་ལ་དགེ་སློང་གང་དག་གནོད་པ་བྱེད་པའི་དགེ་སློང་དེ་དག་དགེ་སློང་ཞལ་ཏ་བྱེད་པས་བཟློག་པར་བྱའོ། །དགེ་སློང་ཞལ་ཏ་བྱེད་པས་ཆོས་སྨྲ་བའི་དགེ་སློང་ལ་རྟག་ཏུ་བསུ་བར་བྱ། ལེགས་སོ་ཞེས་བྱ་བ་མང་དུ་ [164a.3]བྱའོ། །འོད་སྲུང་དེ་ལ་དགེ་སློང་གང་དག་འདུལ་བ་འཛིན་པ་དང་། མ་མོ་འཛིན་པར་གྱུར་པ་དེ་དག་གི་གན་དུ་དགེ་སློང་ཞལ་ཏ་བྱེད་པ་དེ་སོང་ལ་ཇི་ལྟར་ན་བདག་རྨ་མེད་ཅིང་མ་ཉམས་པ་དང་། ཇི་ལྟར་ན་བདག་ལྟུང་བ་མེད་པའི་ཆོས་ཀྱི་ཞལ་ཏ་བྱ་ཞེས་ཡོངས་སུ་དྲི་བར་བྱའོ། །དེ་ནས་འདུལ་བ་ [164a.4]འཛིན་པ་དང་། མ་མོ་འཛིན་པའི་དགེ་སློང་དེ་དག་གིས་དགེ་སློང་ཞལ་ཏ་བྱེད་པ་དེའི་བསམ་པ་རིག་ནས་དེའི་བྱ་བ་དང་། འབྱུང་བ་གང་ཡིན་པ་དང་། བྱེད་པ་གང་ཡིན་པ་དེ་བསྟན་པར་བྱའོ། །དགེ་སློང་ཞལ་ཏ་བྱེད་པས་འདུལ་བ་འཛིན་པ་དང་། མ་མོ་འཛིན་པའི་དགེ་སློང་དེ་དག་ལ་ [164a.5]ཕངས་པར་བྱ་བ་དང་། དད་པ་དང་། གུས་པ་དང་། རྗེས་རབ་ཏུ་བསྐྱེད་པར་བྱའོ། །དགེ་འདུན་གྱི་རྙེད་པ་གང་ཡིན་པ་དེ་དགེ་སློང་ཞལ་ཏ་བྱེད་པས་དུས་དུས་སུ་དགེ་སློང་གི་དགེ་འདུན་ལ་དབུལ་བར་བྱའི། དགེ་འདུན་གྱི་རྙེད་པ་བསགས་ཤིང་སྦ་བར་མི་བྱ་སྟེ། ཇི་ལྟར་རྙེད་པ་བཞིན་དུ་ [164a.6]སྦྱིན་པར་བྱ། མ་སྐུལ་བར་སྦྱིན་པར་བྱ། གནོད་པ་མེད་པར་སྦྱིན་པར་བྱའོ། །དེས་འདུན་པ་དང་། ཞེ་སྡང་དང་། གཏི་མུག་དང་། འཇིགས་པས་འགྲོ་བར་མི་བྱའོ། །དགེ་སློང་གི་དགེ་འདུན་ལ་རྟོན་པར་བྱའི། ཁྱིམ་པའི་ཕྱོགས་ལ་རྟོན་པར་མི་བྱའོ། །དགེ་འདུན་གྱི་བྱ་བ་ལ་རྟོན་ [164a.7]པར་བྱའི། བདག་གི་བྱ་བ་ལ་རྟོན་པར་མི་བྱའོ། །དངོས་པོ་གང་ལ་ཡང་དབང་བྱ་བའི་འདུ་ཤེས་བསྐྱེད་པར་མི་བྱའི། བྱ་བ་ཇི་ཙམ་དུ་ཆུང་བ་ཡང་དགེ་འདུན་གྱི་གྲོས་བཞིན་བྱ་ཞིང་རང་དགར་མི་བྱའོ། །དགེ་འདུན་གྱི་འམ། ཕྱོགས་བཞིའི་དགེ་འདུན་གྱི་འམ། མཆོད་རྟེན་གྱི་ཡོ་བྱད་གང་ [164b] [164b.1]ཅི་ཡང་རུང་སྟེ། ཇི་ལྟ་བ་བཞིན་དུ་གཞག་པར་བྱ་སྟེ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་བསྲེ་བར་མི་བྱའོ། །ཕྱོགས་བཞིའི་དགེ་འདུན་གྱི་རྙེད་པ་ཡང་དགེ་འདུན་གྱི་དང་བསྲེ་བར་མི་བྱའོ། །དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་མཆོད་རྟེན་གྱི་དང་བསྲེ་བར་མི་ [164b.2]བྱའོ། །མཆོད་རྟེན་གྱི་རྙེད་པ་ཡང་དགེ་འདུན་གྱི་དང་ཕྱོགས་བཞིའི་དགེ་འདུན་གྱི་དང་བསྲེ་བར་མི་བྱའོ། །གལ་ཏེ་ཕྱོགས་བཞིའི་དགེ་འདུན་ལ་བྲེལ་ཕོངས་སུ་གྱུར་ལ། དགེ་འདུན་གྱི་རྙེད་པ་ཆེ་བར་གྱུར་ན་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་བསྡུས་ལ་གྲོས་འཐུན་པར་བགྱིས་ [164b.3]ཏེ། དགེ་འདུན་གྱི་རྙེད་པ་དེ་ལས་ཕྱོགས་བཞིའི་དགེ་འདུན་ལ་བཤུག་པར་བྱའོ། །གལ་ཏེ་དེ་བཞིན་གཤེགས་པའི་མཆོད་རྟེན་ཞིག་རལ་དུ་གྱུར་ལ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་ཆེ་བར་གྱུར་ན་དགེ་སློང་ཞལ་ཏ་བྱེད་པས་དགེ་སློང་གི་དགེ་འདུན་ཐམས་ཅད་བསྡུས་ [164b.4]ལ་གྲོས་འཐུན་པར་བགྱིས་ཏེ། འདི་སྐད་ཅེས་དེ་བཞིན་གཤེགས་པའི་མཆོད་རྟེན་འདི་ནི་ཞིག་རལ་དུ་གྱུར་ལ། དགེ་འདུན་གྱི་དང་ཕྱོགས་བཞིའི་དགེ་འདུན་གྱི་རྙེད་པ་ནི་ཆེ་བར་གྱུར་ན། གལ་ཏེ་ཚེ་དང་ལྡན་པ་རྣམས་གནོད་པ་མེད་ཅིང་དད་པ་དང་ལྡན་ལ་བཟོད་ཅིང་གནང་ན་བདག་གིས་དགེ་ [164b.5]འདུན་གྱི་དང་། ཕྱོགས་བཞིའི་དགེ་འདུན་གྱི་རྙེད་པ་འདི་ལས་དངོས་པོ་ཅུང་ཟད་ཅིག་ཁྱེར་ཏེ་དེ་བཞིན་གཤེགས་པའི་མཆོད་རྟེན་འདི་བཅོས་པར་བྱའོ་ཞེས་བརྗོད་པར་བྱའོ། །གལ་ཏེ་དགེ་འདུན་གྱི་གནང་ན་དགེ་སློང་ཞལ་ཏ་བྱེད་པ་དེས་དེ་བཞིན་དུ་བྱའོ། །ཅི་སྟེ་དགེ་འདུན་གྱིས་མ་གནང་ [164b.6]ན་དགེ་སློང་ཞལ་ཏ་བྱེད་པ་དེས་སྦྱིན་པ་པོ་དང་། སྦྱིན་བདག་རྣམས་ལ་གསོལ་བ་ཐོབ་ལ་དེ་བཞིན་གཤེགས་པའི་མཆོད་རྟེན་གསོ་བར་བྱའོ། །འོད་སྲུང་གལ་ཏེ་མཆོད་རྟེན་གྱི་རྙེད་པ་ཇི་ལྟར་མང་དུ་གྱུར་ཏུ་ཟིན་ཀྱང་དགེ་སློང་ཞལ་ཏ་བྱེད་པས་དགེ་འདུན་དང་ཕྱོགས་བཞིའི་དགེ་འདུན་ལ་བཤུག་པར་ [164b.7]མི་བྱའོ། །དེ་ཅིའི་ཕྱིར་ཞེ་ན། དད་ཅིང་དང་བ་མང་པོ་དག་གིས་མཆོད་རྟེན་ལ་ཕུལ་བ་ནི་ཐ་ན་རས་ཀྱི་ཁ་ཚར་གཅིག་ཙམ་གང་ཡིན་པ་དེ་ཡང་ལྷ་དང་བཅས་པའི་འཇིག་རྟེན་གྱི་མཆོད་རྟེན་ཡིན་ན་རིན་པོ་ཆེའམ། རིན་པོ་ཆེར་སྨོས་པ་དག་ལྟ་སྨོས་ཀྱང་ཅི་དགོས། མཆོད་རྟེན་ལ་གོས་ཕུལ་བ་ [165a] [165a.1]གང་ཡིན་པ་དེ་ནི་དེ་བཞིན་གཤེགས་པའི་མཆོད་རྟེན་དེ་ཉིད་དུ་རླུང་དང་། ཉི་མ་དང་། ཆར་པས་དེངས་ཀྱང་སླའི། མཆོད་རྟེན་ལ་ཕུལ་བའི་གོས་དབྱིག་གམ་དབྱིག་གི་རིན་དུ་བསྒྱུར་བར་མི་བྱའོ། །དེ་ཅིའི་ཕྱིར་ཞེ་ན། མཆོད་རྟེན་གྱི་ནི་རིན་ཐང་ཅུང་ཟད་ཀྱང་མེད་ [165a.2]ལ། མཆོད་རྟེན་ནི་ཅིས་ཀྱང་བྲེལ་བ་མེད་པའི་ཕྱིར་རོ། །འོད་སྲུང་དགེ་སློང་ཞལ་ཏ་བྱེད་པས་དེ་ལྟར་ཡོངས་སུ་དག་པར་བྱ་སྟེ། དེས་དཀོན་མཆོག་གསུམ་གྱི་དང་མ་འབགས་པར་བྱའོ། །བདག་གི་རྙེད་པས་ཆོག་ཤེས་པར་བྱའོ། །དཀོན་མཆོག་གསུམ་གྱིས་བྱིན་གྱིས་བརླབས་ [165a.3]པའི་དངོས་པོ་རྣམས་ལ་བདག་གིར་འདུ་ཤེས་མི་བྱའོ། །འོད་སྲུང་དགེ་སློང་ཞལ་ཏ་བྱེད་པ་རབ་ཏུ་སྡང་བའི་སེམས་དང་ལྡན་པ་གང་ལ་ལ་ཞིག་གིས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་གནས་རྣམས་ལ་སེམས་ཁྲོས་སམ། དབང་བྱེད་ཅིང་བསྒོ་བླག་བྱེད་ན་དེ་མི་དགེ་བའི་ [165a.4]ལས་དེས་སེམས་ཅན་དམྱལ་བར་འགྲོ་བར་འགྱུར་རོ། །གལ་ཏེ་མིའི་འཇིག་རྟེན་དུ་འོངས་ན་ཡང་བྲན་དང་གཞན་གྱི་ལས་བྱེད་པར་འགྱུར་བ་དང་། ཁུ་ཚུར་དང་། ཐལ་ལྕག་དང་། ལག་ཆ་སྙེམས་པས་བརྡེགས་པ་དང་ཕྲད་པར་འགྱུར་རོ། །འོད་སྲུང་གཞན་ཡང་དགེ་སློང་ཞལ་ཏ་བྱེད་པ་དགེ་འདུན་ [165a.5]གྱི་བྱ་བ་ལས་འདས་ཏེ་རང་དགར་དགེ་སློང་རྣམས་ལ་དབང་བྱེད་ཅིང་བསྒོ་བ་དང་། ཆད་པས་གཅོད་པ་དང་། འཇིགས་པར་བྱེད་པ་དང་། སྡིགས་པ་དང་། དུས་མ་ཡིན་པར་མངག་པ་དང་། དུས་མ་ཡིན་པར་བསྒོ་བ་བྱེད་ན་དེ་མི་དགེ་བའི་ལས་དེས་ཉི་ཚེ་བའི་སེམས་ཅན་དམྱལ་བ་ཕུར་པ་ [165a.6]མང་པོ་ཞེས་བྱ་བ་དེར་སྐྱེ་བར་འགྱུར་ཏེ། དེར་སྐྱེས་ནས་ལུས་ལ་ལྕགས་ཕུར་བརྒྱ་སྟོང་ཟུག་ཅིང་དེ་དག་འབར། རབ་ཏུ་འབར་ལ། ཀུན་ཏུ་རབ་ཏུ་མཆེད་ཅིང་འབར་བར་འགྱུར་རོ། །དེས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་གནས་རྣམས་ལ་སྡིགས་ཤིང་ངག་གི་ [165a.7]ལས་གདུག་པ་སྨྲ་བར་གྱུར་པ་གང་ཡིན་པ་དེས་དེ་དེར་སྐྱེས་ནས་ལྕེའི་དབང་པོའི་ཁྱོན་དཔག་ཚད་བརྒྱ་པར་འགྱུར་ཞིང་། དེའི་ལྕེའི་དབང་པོ་དེ་ལ་ལྕགས་ཕུར་བརྒྱ་སྟོང་རབ་ཏུ་འབབ་ཅིང་དེ་དག་ཀྱང་འབར། རབ་ཏུ་འབར། ཀུན་དུ་རབ་ཏུ་འབར་ལ། ཀུན་དུ་རབ་ཏུ་མཆེད་ཅིང་འབར་ [165b] [165b.1]ཏེ་མེར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེས་བསྡིགས་ཤིང་ངག་གི་ལས་གདུག་པ་སྨྲས་པར་གྱུར་པའི་ཕྱིར་རོ། །འོད་སྲུང་དགེ་སློང་ཞལ་ཏ་བྱེད་པ་གང་ལ་ལས་དགེ་འདུན་གྱི་རྙེད་པ་འདུས་ཤིང་འདུས་པ་བཞག་སྟེ་དུས་དུས་སུ་མི་སྦྱིན་ཞིང་ཐོ་བཙམས་ལ་གཙེས་ནས་སྦྱིན་ [165b.2]པ་དང་། ཁ་ཅིག་བྱིན། ཁ་ཅིག་མ་བྱིན། ཁ་ཅིག་ལ་བྱིན། ཁ་ཅིག་ལ་མ་བྱིན་ན་དེ་མི་དགེ་བའི་ལས་དེས་{ཡི་དགས་,ཡི་དྭགས་}ཀྱི་སྐྱེ་གནས་(རྐྱག་,སྐྱག་)་འཇིམ་བྱིན་པ་ནུབ་ཅེས་བྱ་བ་དེར་སྐྱེ་བར་འགྱུར་རོ། །དེ་དེར་སྐྱེས་ནས་{ཡི་དགས་,ཡི་དྭགས་}གཞན་གྱིས་ཁ་ཟས་བླངས་ཏེ་དེ་ལ་བསྟན་ན། དེ་བསྟན་པའི་ [165b.3]ཚེ་མིག་གཉི་ག་མི་འཛུམས་པར་ཟས་དེ་ལ་ལྟ་ཞིང་བཀྲེས་པ་དང་སྐོམ་པས་ཉེན་པའི་སྡུག་བསྔལ་གྱི་ཚོར་བ་མྱོང་གི །ལོ་བརྒྱ་སྟོང་དུ་ཡང་ཟས་དེ་ནི་ཐོབ་པར་མི་འགྱུར་རོ། །ཇི་སྟེ་བརྒྱ་ལ་བརྒྱ་ལམ་ན་ཟས་དེ་ཐོབ་ཀྱང་ངན་སྐྱུགས་དང་རྣག་ཁྲག་ཏུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ [165b.4]དེས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། སྦྱིན་གནས་རྣམས་མགུ་བར་མ་བྱས་ཤིང་རང་གི་རྙེད་པས་ཆོག་མི་ཤེས་པར་གྱུར་པའི་ཕྱིར་རོ། །འོད་སྲུང་དགེ་སློང་ཞལ་ཏ་བྱེད་པ་གང་ལ་ལས་དགེ་འདུན་གྱི་འམ། ཕྱོགས་བཞིའི་དགེ་འདུན་གྱི་འམ། མཆོད་རྟེན་གྱི་ [165b.5]ཚོལ་བར་བྱས་ན་དེའི་རྣམ་པར་སྨིན་པ་ནི་ངས་བསྐལ་པ་བགྲངས་པས་ཀྱང་བརྗོད་ཀྱིས་མི་ལང་ངོ་། །འོད་སྲུང་དགེ་སློང་ཞལ་ཏ་བྱེད་པ་གང་ལ་ལས་ཉེས་དམིགས་ཀྱི་གནས་འདི་ལྟ་བུ་འདི་དག་ཐོས་ནས་ཁྲོ་འམ། གཤེ་འམ། གནོད་པར་སེམས་སམ། ཁོང་ཁྲོ་བསྐྱེད་ན་དེ་ནི་གསོར་ [165b.6]མི་རུང་ངོ་ཞེས་ངས་བཤད་དོ། །འོད་སྲུང་དེ་ལྟ་བས་ན་དམ་པའི་ཆོས་འདི་ལྟ་བུ་འདི་ཐོས་ནས་དགེ་སློང་ཞལ་ཏ་བྱེད་པས་ལུས་དང་ངག་དང་ཡིད་ཡོངས་སུ་དག་པར་བྱའོ། །བདག་དང་གཞན་བསྲུང་བར་བྱའོ། །འོད་སྲུང་དགེ་སློང་ཞལ་ཏ་བྱེད་པ་རང་གི་ཤ་ལ་ཟ་ཡང་སླའི། དཀོན་ [165b.7]མཆོག་གསུམ་གྱིས་བྱིན་གྱིས་བརླབས་པའི་ལྷུང་བཟེད་དམ། ཆོས་གོས་སམ། བསོད་སྙོམས་སམ། ན་བའི་གསོས་སྨན་ནམ། ཡོ་བྱད་ཡོངས་སུ་སྤྱད་པར་ནི་མི་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ [166a] [166a.1]ལྡན་འདས་ཀྱིས་ལྷོད་པ་རྣམས་ཀྱི་ལྷོད་པའི་ཆོས་དང་། འཛེམ་མདོག་མཆིས་པ་རྣམས་ཀྱི་འཛེམ་མདོག་གི་ཆོས་རྣམས་བཀའ་སྩལ་ཏོ། །ཞལ་ཏ་བྱེད་པའི་ལེའུ་སྟེ་བཞི་པའོ།། །།བཅོམ་ལྡན་འདས་དགེ་སློང་དགོན་པ་པ་གང་དག་ [166a.2]བདག་དགོན་པ་པ་ཞེས་མཆིད་ཀྱིས་འཆེ་ན། བཅོམ་ལྡན་འདས་ཇི་ཙམ་གྱིས་ན་དགེ་སློང་དགོན་པ་པ་ལགས། ཇི་ཙམ་གྱིས་ན་དགེ་སློང་བསོད་སྙོམས་པ་ལགས། ཇི་ཙམ་གྱིས་ན་དགེ་སློང་ཕྱག་དར་ཁྲོད་པ་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ [166a.3]ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་འདི་ལ་དགེ་སློང་དགོན་པ་པས་དགོན་པ་དང་། ནགས་ཚལ་གྱི་གནས་དང་། བས་མཐར་གནས་མལ་བཅའ་བར་བྱའོ། །ཆོམ་རྐུན་དང་། གནག་རྫི་དང་ཕྱུགས་རྫི་མེད་པ། སྡིག་སྦྲུལ་མེད་པ། {རི་དགས་,རི་དྭགས་} [166a.4]དང་བྱ་མང་པོ་མེད་པ། སྦྲང་བུ་དང་ཤ་སྦྲང་ཉུང་བ། སྒྲ་ཉུང་བ། ཅ་ཅོ་ཉུང་བ་དེ་ལྟ་བུའི་དགོན་པ་བས་མཐའ་དག་ཏུ་གནས་པར་བྱའོ། །དེ་དགོན་པའི་གནས་དེ་ན་གནས་པ་ན་ཡིད་ལ་བྱེད་པ་བརྒྱད་བསྐྱེད་པར་བྱ་སྟེ། བརྒྱད་གང་ཞེ་ན། ལུས་ལ་མི་བལྟ་བར་བྱ་བ་དང་། སྲོག་ལ་མི་ [166a.5]བལྟ་བར་བྱ་བ་དང་། རྙེད་པ་དང་བཀུར་སྟི་ལ་མི་བལྟ་བར་བྱ་བ་དང་། འདུ་འཛི་ཐམས་ཅད་ལ་མི་བལྟ་བར་བྱ་བ་དང་། དགོན་པ་དག་ཏུ་{རི་དགས་,རི་དྭགས་}འཆི་བ་ལྟར་ཁས་བླང་བར་བྱ་བ་དང་། དགོན་པར་དགོན་པའི་ཡོན་ཏན་ཡང་དག་པར་བླངས་ཏེ་གནས་པར་བྱ་བ་དང་། ཆོས་ཀྱི་འཚོ་བས་ [166a.6]འཚོའི་ལོག་པས་འཚོ་བ་མ་ཡིན་པར་བྱ་བ་དང་། ཟང་ཟིང་དང་ཉོན་མོངས་པ་མེད་པའི་འཚོ་བས་འཚོ་བར་བྱ་བ་སྟེ། ཡིད་ལ་བྱ་བ་བརྒྱད་པོ་དེ་དག་བསྐྱེད་ནས་དགོན་པའི་གནས་སུ་གནས་པར་བྱའོ། །དེ་དགོན་པའི་གནས་དེ་ན་གནས་པ་ན་སེམས་ཅན་ཐམས་ཅད་ལ་བྱམས་པ་ [166a.7]རྣམ་པ་བརྒྱད་བསྐྱེད་པར་བྱ་སྟེ། བརྒྱད་གང་ཞེ་ན། ཕན་པའི་བྱམས་པ་དང་། བདེ་བའི་བྱམས་པ་དང་། གནོད་པ་མེད་པའི་བྱམས་པ་དང་། ཡང་དག་པའི་བྱམས་པ་དང་། ཐ་དད་པ་མེད་པའི་བྱམས་པ་དང་། ཞི་གནས་ཀྱི་བྱམས་པ་དང་། ཆོས་ལ་ངེས་པར་སེམས་པའི་ [166b] [166b.1]བྱམས་པ་དང་། བསམ་པ་ཡོངས་སུ་དག་པའི་བྱམས་པ་སྟེ། སེམས་ཅན་ཐམས་ཅད་ལ་བྱམས་པ་བརྒྱད་པོ་དེ་དག་བསྐྱེད་པར་བྱའོ། །དགོན་པའི་གནས་དེ་ན་གནས་པ་ན། འདི་ལྟར་སེམས་བསྐྱེད་པར་བྱ་སྟེ། འདི་ལྟར་བདག་ནི་ལམ་རིང་པོ་ནས་འདིར་འོངས་ལ་གཅིག་པུ་ [166b.2]གཉིས་སུ་མེད་པ་སྟེ། ལེགས་པར་བྱས་པའམ། ཉེས་པར་བྱས་པ་སྐུལ་བའི་གྲོགས་ནི་གང་ཡང་མེད་ཀྱི། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། སངས་རྒྱས་བཅོམ་ལྡན་འདས་གང་དག་བདག་གི་སེམས་ཀྱི་བསམ་པ་ཤེས་པ་དག་ནི་ཡོད་དེ། བདག་དགོན་པའི་ [166b.3]གནས་ན་གནས་ལ་མི་དགེ་བའི་སེམས་ཀྱི་དབང་དུ་སོང་ན་དེ་དག་དབང་དུ་འགྱུར་རོ། །བདག་ལམ་རིང་པོ་ནས་འོངས་ཤིང་གཅིག་པུ་གཉིས་སུ་མེད་དེ། རྟེན་པ་མེད། བདག་གི་མེད། ཡོངས་སུ་འཛིན་པ་མེད་ལ། གལ་ཏེ་འདོད་པ་ལ་རྣམ་པར་རྟོག་པས་རྣམ་པར་རྟོག །གནོད་སེམས་ [166b.4]ཀྱི་རྣམ་པར་རྟོག་པས་རྣམ་པར་རྟོག་འཚེ་བའི་རྣམ་པར་རྟོག་པས་རྣམ་པར་རྟོག་གམ་མི་དགེ་བ་གཞན་ལ་རྣམ་པར་རྟོག་པས་རྣམ་པར་རྟོག་པར་གྱུར་ན་བདག་ཏུ་འཛིན་པ་དང་། འདུ་བ་ལ་མངོན་པར་དགའ་བའི་སེམས་ཅན་རྣམས་དང་བྱེ་བྲག་མེད་པར་འགྱུར་ཏེ། བདག་གིས་ལྷ་དང་། ཀླུ་དང་། [166b.5]གནོད་སྦྱིན་དང་། དྲི་ཟ་རྣམས་ལ་བསླུས་པར་འགྱུར་ཞིང་སངས་རྒྱས་བཅོམ་ལྡན་འདས་རྣམས་ཀྱང་མི་མཉེས་པར་བྱས་པར་འགྱུར་གྱིས། ཅི་ནས་ཀྱང་བདག་ལ་ལྷ་རྣམས་འཕྱ་བར་མི་འགྱུར་བ་དང་། སངས་རྒྱས་བཅོམ་ལྡན་འདས་རྣམས་ཀྱང་དགྱེས་པར་འགྱུར་བ་དེ་ལྟར་བྱའོ་ [166b.6]སྙམ་དུ་སེམས་བསྐྱེད་པར་བྱའོ། །དེ་དགོན་པའི་གནས་དེ་ན་གནས་པ་ན་སོ་སོར་ཐར་པའི་སྡོམ་པས་བསྡམ་པར་བྱ། ཚུལ་ཁྲིམས་ཀྱི་ཕུང་པོ་ཤིན་ཏུ་ཀུན་བསྲུང་བར་བྱ། ལུས་དང་། ངག་དང་། སེམས་ཡོངས་སུ་དག་པ་དང་། ཚུལ་འཆོས་པ་མེད་པ་དང་། ཁ་གསག་མེད་པ་ [166b.7]དང་། འཚོ་བ་ཡོངས་སུ་དག་པ་དང་། ཏིང་ངེ་འཛིན་གྱི་སེམས་མངོན་དུ་བྱ་བ་དང་། ཇི་ལྟར་ཐོས་པའི་ཆོས་ལ་རྟེན་པ་དང་། ཚུལ་བཞིན་ཡིད་ལ་བྱ་བ་དང་། རབ་ཏུ་ལྡན་པ་དང་། ཡིད་བྱུང་བ་དང་། འདོད་ཆགས་དང་བྲལ་བ་དང་། འགོག་པ་དང་། མྱ་ངན་ལས་འདས་པ་ལ་གཞོལ་བ་ [167a] [167a.1]དང་། འཁོར་བས་འཇིགས་སྐྲག་པ་དང་། ཕུང་པོ་ནི་གཤེད་མ་སྟེ་ཕྱིར་རྒོལ་བར་རིག་པ་དང་། ཁམས་བཞི་ལ་མྱུར་དུ་གདུག་པའི་དུག་ཏུ་འདུ་ཤེས་པ་དང་། སྐྱེ་མཆེད་དྲུག་ལ་གྲོང་སྟོང་པ་ལྟར་མོས་པ་དང་། རྟེན་ཅིང་འབྲེལ་པར་འབྱུང་བ་ལ་འཇུག་པ་ལ་མཁས་པ་ [167a.2]དང་། རྟག་པ་དང་ཆད་པར་ལྟ་བ་ཡོངས་སུ་སྤངས་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པར་རྣམ་པར་སྤྱོད་པ་དང་། སྟོང་པ་ཉིད་ལ་མོས་པ་དང་། མཚན་མ་མེད་པ་སྤྱོད་ཡུལ་པ་དང་། སྨོན་པ་མེད་པའི་སེམས་སྤེལ་བ་དང་། [167a.3]ཁམས་གསུམ་ལ་རྟག་ཏུ་འཇིག་པའི་ཡིད་དང་ལྡན་པ་དང་། རྟག་ཏུ་མགོ་དང་གོས་ལ་མེ་འབར་བ་བཞིན་དུ་བརྩོན་འགྲུས་རྩོམ་པ་དང་། བརྩོན་པ་མི་འདོར་བ་དང་། ལུས་ཀྱི་སྐྱོན་ལ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་དང་། སེམས་ཀྱི་སྐྱེ་བ་དང་། འཇིག་པ་ལ་ལྟ་བ་དང་། [167a.4]སྡུག་བསྔལ་ཡོངས་སུ་ཤེས་པ་ལ་མངོན་པར་བརྩོན་པ་དང་། ཀུན་འབྱུང་བ་ཐམས་ཅད་ཀྱི་སྲེད་པ་སྤངས་པ་དང་། འགོག་པ་མངོན་སུམ་དུ་བྱ་བ་ལ་ཞུགས་པ་དང་། ལམ་བསྒོམ་པའི་རྣལ་འབྱོར་ལ་བརྩོན་པ་དང་། ཕྱིའི་སྤྱོད་ཡུལ་དྲན་པ་ཉེ་བར་གཞག་པ་ལ་རབ་ཏུ་གནས་པ་དང་། [167a.5]མི་དགེ་བའི་ཆོས་དང་བྲལ་བ་དང་། དགེ་བའི་ཆོས་ལ་མངོན་དུ་ཕྱོགས་པ་དང་། ཡང་དག་པའི་སྤོང་བ་ལ་ཤིན་ཏུ་གནས་པ་དང་། རྫུ་འཕྲུལ་གྱི་རྐང་པ་མངོན་དུ་གྱུར་པ་དང་། དབང་པོ་ལྔ་དང་ལྡན་པ་དང་། སྟོབས་ལྔའི་ཤུགས་དང་ལྡན་པ་དང་། བྱང་ཆུབ་ཀྱི་ཡན་ལག་བདུན་ལ་བསམ་ [167a.6]གཏན་པ་དང་། འཕགས་པའི་ལམ་ཡན་ལག་བརྒྱད་པ་ལ་མངོན་པར་བརྩོན་པ་དང་། ཞི་གནས་ལ་གནས་པ་དང་། ལྷག་མཐོང་གིས་བལྟ་བར་བྱ་སྟེ། འོད་སྲུང་དེ་ལྟ་བུའི་གོ་ཆ་འདི་དག་བགོས་ནས་ནམ་གྱི་ཆ་སྟོད་དང་། ནམ་གྱི་ཆ་སྨད་ལ་མི་ཉལ་ཞིང་རྣལ་འབྱོར་ལ་བརྩོན་པ་དང་། [167a.7]རྟག་ཏུ་ཁྱད་པར་དུ་འགྲོ་བར་དགོན་པའི་གནས་དེ་ན་གནས་པར་བྱའོ། །དེ་དགོན་པའི་གནས་དེ་ན་གནས་པ་ན་ལུས་བརྒྱན་པར་སྦྱོར་བ་ལ་བརྩོན་པར་མི་བྱའོ། །མལ་ཆས་བརྒྱན་པ་ལ་བརྩོན་པར་མི་བྱའོ། །ཆོས་གོས་ཀྱིས་བརྒྱན་པ་ལ་བརྩོན་པར་མི་བྱའོ། །དེས་རྩྭ་རྙིང་ [167b] [167b.1]པ་སྐམས་པ་བླངས་ལ་འཆག་ས་དང་འདུག་སར་ལེགས་པར་བཏིང་སྟེ་བདག་འདུག་པ་དང་། དགེ་འདུན་གྱི་དང་། ཕྱོགས་བཞིའི་དགེ་འདུན་གྱི་དང་། མ་འབགས་པ་དང་། བདག་གི་གོས་ཀྱིས་ཆོག་ཤེས་པར་དགོན་པའི་གནས་དེར་གནས་པར་བྱའོ། །འོད་སྲུང་དགེ་སློང་དགོན་ [167b.2]པ་པ་གང་གི་ཚེ་ལུས་གསོ་བ་དང་། འཕགས་པའི་ལམ་ཉེ་བར་བརྟེན་པའི་ཕྱིར་གྲོང་ངམ། གྲོང་ཁྱེར་རམ། གྲོང་རྡལ་དུ་བསོད་སྙོམས་ཀྱི་ཕྱིར་འཇུག་པ་ན་དེས་སེམས་འདི་ལྟ་བུས་དགོན་པའི་གནས་དེ་ནས་འགྲོ་བར་བྱ་སྟེ། མ་རྙེད་ཀྱང་ཡོངས་སུ་ཡི་ཆད་པར་མི་བྱ། རྙེད་ཀྱང་ [167b.3]དགའ་བ་བསྐྱེད་པར་མི་བྱ། ལས་ཀྱི་རྣམ་པར་སྨིན་པ་ཡིད་ལ་བྱ། བསོད་ནམས་ཉེ་བར་བརྟེན་པར་བྱ། དེ་བཞིན་གཤེགས་པ་ཡིད་ལ་བྱ་བ་བསམ་ཞིང་དེས་གྲོང་དང་། གྲོང་ཁྱེར་དང་། གྲོང་རྡལ་དུ་བསོད་སྙོམས་ཀྱི་ཕྱིར་འཇུག་པར་བྱའོ། །དེ་གྲོང་དང་། གྲོང་ཁྱེར་དང་། [167b.4]གྲོང་རྡལ་དུ་བསོད་སྙོམས་སྤྱོད་པ་ན་ཆོས་ཀྱི་གོ་ཆ་བགོས་ལ་བསོད་སྙོམས་སྤྱད་པར་བྱའོ། །དེ་ལ་ཆོས་ཀྱི་གོ་ཆ་གང་ཞེ་ན། མིག་གིས་ཡིད་དུ་འོང་བའི་གཟུགས་རྣམས་མཐོང་ན་རྗེས་སུ་ཆགས་པར་མི་བྱའོ། །ཡིད་དུ་མི་འོང་བའི་གཟུགས་རྣམས་མཐོང་ན་ཡང་ཁོང་ཁྲོ་བར་མི་ [167b.5]བྱའོ། །དེ་བཞིན་དུ་སྒྲ་དང་། དྲི་དང་། རོ་དང་། རེག་བྱ་ཡིད་དུ་འོང་བ་དང་། ཡིད་དུ་མི་འོང་བ་རྣམས་ལ་རྗེས་སུ་ཆགས་པ་དང་ཁོང་ཁྲོ་བར་མི་བྱའོ། །དབང་པོ་ཤིན་ཏུ་བསྡམས་པ་དང་། མིག་མི་གཡེང་བ་དང་། གཉའ་ཤིང་གང་ཙམ་དུ་ལྟ་བ་དང་། དུལ་བ་དང་། ཅང་ཤེས་ཀྱི་ [167b.6]སེམས་དང་། སྔོན་ཡིད་ལ་བྱེད་པའི་ཆོས་མི་འདོར་བ་དང་། ཟང་ཟིང་གིས་མ་འབགས་པའི་རྒྱུད་ཀྱིས་བསོད་སྙོམས་སྤྱད་པར་བྱའོ། །མཐར་ཆགས་སུ་བསོད་སྙོམས་བླང་བར་བྱའོ། །གང་ནས་བསོད་སྙོམས་རྙེད་པ་དེར་རྗེས་སུ་ཆགས་པར་མི་བྱའོ། །གང་ནས་མ་ [167b.7]རྙེད་པ་དེར་ཡང་ཁོང་ཁྲོ་བར་མི་བྱའོ། །ཁྱིམ་བཅུར་བསླངས་པ་ལས་ཁྱིམ་བཅུ་གཅིག་པ་ལས་བསོད་སྙོམས་མ་རྙེད་ན་ཡང་ཡོངས་སུ་ཡི་ཆད་པར་མི་བྱའི། དེ་འདི་སྙམ་དུ་བྲམ་ཟེ་དང་ཁྱིམ་བདག་འདི་དག་ནི་བྱ་བ་མང་བ་དག་ཡིན་པས་དེ་དག་གིས་བདག་ལ་སྦྱིན་པར་ངེས་པ་ [168a] [168a.1]མེད་དེ། དེ་དག་བདག་ལ་སེམས་པ་ཡང་ངོ་མཚར་ཆེ་ན་བསོད་སྙོམས་སྦྱིན་པ་ལྟ་སྨོས་ཀྱང་ཅི་དགོས་སྙོམ་པའི་འདུ་ཤེས་བསྐྱེད་པར་བྱ་སྟེ། དེས་དེ་ལྟར་ཡོངས་སུ་ཡི་ཆད་པ་མེད་པར་བསོད་སྙོམས་སྤྱད་པར་བྱའོ། །སེམས་ཅན་གང་དག་དེའི་མིག་ལམ་དུ་སྣང་ [168a.2]བར་གྱུར་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། ཐ་ན་དུད་འགྲོའི་སྐྱེ་གནས་སུ་སོང་བ་དེ་དག་ལ་ཡང་བྱམས་པ་དང་སྙིང་རྗེའི་སེམས་བསྐྱེད་པར་བྱའོ། །ཅི་ནས་ཀྱང་སེམས་ཅན་གང་དག་བདག་གི་མིག་ལམ་དུ་སྣང་བར་གྱུར་པའམ། བསོད་སྙོམས་སྦྱིན་པ་ [168a.3]དེ་དག་མཐོ་རིས་སུ་འགྲོ་བར་འགྱུར་བ་དེ་ལྟར་བྱའོ། །དེ་ལྟར་བརྩོན་པར་བྱའོ། །དེས་བསོད་སྙོམས་ངན་ནམ་བཟང་ཡང་རུང་བླངས་ཏེ། གྲོང་ངམ། གྲོང་ཁྱེར་རམ། གྲོང་རྡལ་འདི་ན་བདག་གི་བསོད་སྙོམས་འདི་ལས་བགོ་བཤའ་བྱ་དགོས་པའི་སེམས་ཅན་དབུལ་པོ་སུ་ཡོད་ [168a.4]སྙམ་དུ་ཕྱོགས་བཞིར་ཀུན་ཏུ་བལྟ་བར་བྱའོ། །གལ་ཏེ་སེམས་ཅན་དབུལ་པོ་ཞིག་མཐོང་ན་དེས་བསོད་སྙོམས་དེ་ལས་བགོ་བཤའ་བྱའོ། །གལ་ཏེ་སེམས་ཅན་དབུལ་པོ་མ་མཐོང་ན་དེས་འདི་ལྟར་གང་དག་བདག་གི་མིག་ལམ་དུ་སྣང་བར་མ་གྱུར་ཏེ། མི་སྣང་བའི་སེམས་ཅན་དེ་ [168a.5]དག་ལ་བསོད་སྙོམས་ཀྱི་ཐོག་མའི་ཆ་སྐལ་སྦྱིན་གྱིས། བྱིན་ནས་ལེན་པ་དག་ཡོངས་སུ་སྤྱོད་ཅིག་སྙམ་དུ་སེམས་བསྐྱེད་ལ། དེས་བསོད་སྙོམས་དེ་ཁྱེར་ཏེ་དགོན་པའི་གནས་དེར་སོང་ལ་ལྷུང་བཟེད་དང་ལག་པ་བཀྲུས་ཏེ། དགེ་སྦྱོང་གི་སྤྱོད་པ་དང་། ཆོག་དང་ལྡན་པའི་ [168a.6]སྤྱོད་པ་བཟང་པོས་བྱིན་གྱིས་བརླབས་ལ་དེས་སྐྱིལ་མོ་ཀྲུང་བཅས་ཏེ་བསོད་སྙོམས་དེ་བཟའ་བར་བྱའོ། །མ་ཆགས་པ་དང་། གནོད་སེམས་མེད་པ་དང་། མི་བརྐམ་པ་དང་། མ་ཞེན་པས་ཟས་ཟོས་ནས་འདི་སྙམ་དུ་ལུས་འདི་ལ་སྲིན་བུའི་རིགས་བརྒྱད་ཁྲི་ཡོད་པ་དག་འདིའི་ [168a.7]མཐུས་བདེ་བར་གནས་པར་གྱུར་ཅིག །ད་ནི་འདི་དག་ཟང་ཟིང་གིས་བསྡུ་བར་བྱའོ། །བྱང་ཆུབ་ཐོབ་ནས་ནི་ཆོས་ཀྱིས་བསྡུ་བར་བྱའོ་སྙམ་དུ་སེམས་བསྐྱེད་པར་བྱའོ། །གལ་ཏེ་ཡང་དེའི་བསོད་སྙོམས་ངན་པར་གྱུར་ན་དེས་འདི་སྙམ་དུ་སེམས་བསྐྱེད་པར་བྱ་སྟེ། ཁ་ཟས་ངན་པས་ནི་ [168b] [168b.1]བདག་གི་ལུས་ཡང་བར་འགྱུར། སྤོང་བ་བཟོད་པར་འགྱུར། བདག་གི་བཤང་གཅི་འབྱུང་བ་ཉུང་བར་འགྱུར། །བདག་ལ་དད་པས་བྱིན་པ་ཆུང་བར་འགྱུར། བདག་གི་ལུས་ཡང་བ་དང་། སེམས་ཡང་བར་འགྱུར། བདག་རྨུགས་པ་དང་གཉིད་ཆུང་བར་འགྱུར། བདག་ལ་འདོད་ [168b.2]ཆགས་ཀྱི་སེམས་ཀྱིས་ཀུན་ནས་དཀྲིས་པར་མི་འགྱུར་སྙམ་དུ་ཡིད་ལ་བྱ་བ་འདི་ལྟ་བུ་འདི་དག་བསྐྱེད་པར་བྱའོ། །གལ་ཏེ་དེས་བསོད་སྙོམས་མང་ཞིག་རྙེད་ན་དེ་ལ་ཡང་རན་པར་བཟའ་བར་བྱའོ། །དོར་བའི་ཆོས་ཉིད་དུ་ཡང་བྱ་སྟེ། བསོད་སྙོམས་དེ་ལས་རྡོ་ལེབ་གང་ཡང་རུང་ [168b.3]བའི་སྟེང་དུ་གཏོར་ལ་འདི་སྙམ་དུ་གཅན་གཟན་དང་། བྱའི་ཚོགས་གང་ལ་ལ་ཟང་ཟིང་གི་ཟས་འདོད་པ་བྱིན་ནས་ལེན་པ་དེ་དག་འདི་ལ་ཟོ་ཤིག་སྙམ་དུ་སེམས་བསྐྱེད་པར་བྱའོ། །དེས་ཟས་ཟོས་ནས་ལྷུང་བཟེད་དང་ལག་པ་བཀྲུས་ཏེ་དགོན་པ་ལ་བརྟེན་ནས་གནས་པར་བྱའོ། །སྔོན་ [168b.4]ཡིད་ལ་བྱེད་པའི་ཆོས་དེ་ཉིད་ཀྱང་མི་དོར་བར་བྱའོ། །འོད་སྲུང་གལ་ཏེ་དགེ་སློང་དགོན་པ་པ་འབྲས་བུ་མ་ཐོབ་པ་སོ་སོའི་སྐྱེ་བོའི་དྲུང་དུ་སྦྲུལ་དང་གཅན་གཟན་གཏུམ་པོ་དག་འོངས་ནས་དེས་དེ་ལ་འཇིགས་པ་དང་སྐྲག་པར་མི་བྱའི། དེས་འདི་སྙམ་དུ་བདག་ཐོག་མ་ཉིད་ནས་ལུས་དང་ [168b.5]སྲོག་བོར་ཏེ་དགོན་པའི་གནས་སུ་འོངས་ཀྱིས། འདི་ལ་བདག་གིས་འཇིགས་པར་མི་བྱ། སྐྲག་པར་མི་བྱའི། བྱམས་པའི་སེམས་བསྐྱེད་པར་བྱ། ཞེ་སྡང་རྣམ་པར་སྤང་བར་བྱ། འཇིགས་པ་སྤང་བར་བྱའོ་སྙམ་དུ་སེམས་བསྐྱེད་པར་བྱའོ། །གལ་ཏེ་དེ་ལྟར་བྱས་ནས་སྦྲུལ་ [168b.6]དང་གཅན་གཟན་དེ་དག་གིས་སྲོག་གཅོད་ཅིང་ཟ་ན་ཡང་དེས་འདི་སྙམ་དུ་གཅན་གཟན་འདི་དག་ལ་བདག་གིས་ཟང་ཟིང་ཙམ་གྱིས་ཚིམ་པར་བྱེད་མི་ནུས་ཀྱི། དེ་དག་གིས་བདག་གི་ཤ་ཟོས་ནས་བདེ་བ་ལ་རེག་པར་གནས་པར་འགྱུར་ལ། བདག་གིས་ཀྱང་སྙིང་པོ་མེད་པའི་ལུས་ལས་སྙིང་པོ་ [168b.7]བླངས་པར་འགྱུར་བ་ནི་བདག་གིས་རྙེད་པ་ལེགས་པར་རྙེད་དོ། །ད་ནི་འདི་དག་ཟང་ཟིང་གིས་བསྡུ་བར་བྱའོ། །བྱང་ཆུབ་ཐོབ་ནས་ནི་ཆོས་ཀྱིས་བསྡུ་བར་བྱའོ་སྙམ་དུ་སེམས་བསྐྱེད་པར་བྱ་སྟེ། འོད་སྲུང་དགོན་པ་ལ་གནས་པའི་དགེ་སློང་གིས་དེ་ལྟར་ལུས་དང་སྲོག་ལ་མི་ལྟ་ [169a] [169a.1]བར་དགོན་པ་ལ་གནས་པར་བྱའོ། །གལ་ཏེ་དགོན་པའི་གནས་དེ་ན་གནས་པ་ན་མི་མ་ཡིན་པ་འོངས་ན་མདོག་སྡུག་ཀྱང་རུང་། མདོག་མི་སྡུག་ཀྱང་རུང་དེ་ལ་ཆགས་པར་མི་བྱ། ཁོང་ཁྲོ་བར་མི་བྱའོ། །གལ་ཏེ་སྔོན་སངས་རྒྱས་མཐོང་བའི་ལྷ་དག་དགེ་སློང་ [169a.2]དགོན་པ་པའི་གན་དུ་འོངས་ཏེ་དྲི་བ་ཡོངས་སུ་འདྲི་ན། དེ་ལ་དགེ་སློང་དགོན་པ་པ་དེས་ཇི་ལྟར་ཐོས་པ་བཞིན་དུ་ལྷ་དེ་དག་ལ་ཆོས་བཤད་པར་བྱའོ། །ཅི་སྟེ་ལྷ་དེ་དག་ཟབ་མོའི་དྲི་བ་ཡོངས་སུ་འདྲི་སྟེ། དགེ་སློང་དགོན་པ་པ་དེས་ལན་མི་ཐེབས་པ་ལྟ་ན་དེས་ང་རྒྱལ་མེད་པར་ [169a.3]བྱས་ལ་འདི་སྐད་ཅེས་མ་བསླབས་པ་ལ་བརྙས་པར་མི་བྱ་སྟེ། སངས་རྒྱས་ཀྱི་བསྟན་པ་ལ་ལུང་མནོས་ནས་འབད་དེ་ཁོང་དུ་མ་ཆུད་པའི་ཆོས་རྣམས་ཁོང་དུ་ཆུད་པར་གྱུར་པ་དེའི་ཚེ་དེའི་དུས་ན་དྲིས་པ་ཐམས་ཅད་ཀྱི་ལན་གདབ་པར་བྱའོ། །བདག་ནི་ཆོས་ཉན་པ་ཡིན་གྱིས་ཁྱེད་ [169a.4]སྤོབས་པར་གྱིས་ཤིག་ཅེས་བརྗོད་པར་བྱ་སྟེ། འོད་སྲུང་དགེ་སློང་དགོན་པ་པས་དེ་ལྟར་ལྷ་དེ་དག་ལ་གོ་བར་བྱའོ། །འོད་སྲུང་གཞན་ཡང་དགེ་སློང་དགོན་པ་པ་དགོན་པ་ལ་གནས་པས་དགོན་པའི་འདུ་ཤེས་ཤིན་ཏུ་བསྒོམ་པར་བྱ་སྟེ། དེ་ལ་ལུས་འདི་རྩྭ་དང་། ཤིང་དང་། [169a.5]རྩིག་པ་དང་། བོང་བ་དང་། མིག་ཡོར་ལྟ་བུ་སྟེ། བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །ལུས་འདི་ལ་ནི་བདག་དང་། སེམས་ཅན་དང་། སྲོག་དང་། གང་ཟག་མེད་ཀྱི་ཆོས་འདི་དག་ནི་རྟེན་ཅིང་འབྲེལ་བར་འབྱུང་བ་སྟེ། རྒྱུ་དང་རྐྱེན་ལས་བྱུང་ [169a.6]ཞིང་བྱེད་རྒྱུ་ཚོགས་པ་ལས་བྱུང་བ་སྟེ། ཅི་ནས་ཀྱང་བདག་གི་ལྟ་བར་གྱུར་པ་ཐམས་ཅད་ཉེ་བར་ཞི་བར་འགྱུར་བ་དེ་ལྟར་བདག་གིས་ཚུལ་བཞིན་སོ་སོར་བརྟག་པར་བྱའོ། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ཀྱང་རྒྱུན་མི་འཆད་པར་ཡང་ཡིད་ལ་བྱའོ། ། [169a.7]སྙམ་དུ་དེ་ལྟར་བསླབ་པར་བྱའོ། །དགོན་པའི་གནས་དེ་ན་གནས་པ་དེས་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དེ་དག་ཇི་ལྟར་འབྱུང་བ་དང་། ཇི་ལྟར་འཇིག་པར་འགྱུར་བ་དང་། ཇི་ལྟར་ཕྱི་རོལ་གྱི་དངོས་པོ་འདི་དག་བདག་པོ་མེད་པ། བདག་གི་མེད་པ། ཡོངས་ [169b] [169b.1]སུ་འཛིན་པ་མེད་པ་དེ་ལྟར་གཡོ་བ་མེད་ཅིང་བྱེད་པ་མེད་དེ། སྟོང་བཞིན་དུ་སྐྱེ་ཞིང་འཇིག་ལ་སུ་ཡང་དེ་དག་སྐྱེ་བར་མི་བྱེད། འགོག་པར་མི་བྱེད་པའི་མཚན་མ་བཟུང་ལ། དེ་བཞིན་དུ་ལུས་འདི་ཡང་རྩྭ་དང་། རྩིག་པ་དང་། ཤིང་དང་། བོང་བ་དང་། མིག་ཡོར་ལྟ་ [169b.2]བུ་སྟེ། བདག་པོ་མེད་པ། བདག་གི་བ་མེད་པ། ཡོངས་སུ་འཛིན་པ་མེད་པ། གཡོ་བ་མེད་པ། བྱེད་པ་མེད་པ། རྒྱུ་དང་རྐྱེན་ཚོགས་པ་ལས་འབྱུང་གི །རྒྱུ་དང་རྐྱེན་མ་ཚང་ན་མི་འབྱུང་བ་སྟེ། འདི་ལ་དོན་དམ་པར་སྐྱེ་བ་དང་། འགག་པའི་ཆོས་གང་ཡང་མེད་དོ་སྙམ་དུ་ [169b.3]མཚན་མ་གཟུང་བར་བྱའོ། །འོད་སྲུང་དེ་ལྟར་དགེ་སློང་དགོན་པ་པས་ཆོས་ཀྱི་ཡི་དམ་གྱི་སྤྱོད་པ་འདི་ལྟ་བུས་དགོན་པ་ལ་གནས་པར་བྱའོ། །དེ་ལྟ་བུའི་ཆོས་ལ་གནས་པ་དེ་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པའམ། བྱང་ཆུབ་སེམས་དཔའི་ཐེག་པ་པ་ [169b.4]ཞིག་ཏུ་མྱུར་དུ་ཁྱད་པར་དུ་འགྱུར་རོ། །གལ་ཏེ་ཉན་ཐོས་ཀྱི་ཐེག་པ་པར་གྱུར་ན་ནི་དེ་མྱུར་དུ་འབྲས་བུ་ཐོབ་པར་འགྱུར་རོ། །ཅི་སྟེ་དེ་ལས་ཀྱི་སྒྲིབ་པས་བསྒྲིབས་ཏེ་འབྲས་བུ་ཐོབ་པར་མ་གྱུར་ན་ཡང་དེ་ཟག་པ་རྣམས་ལས་སེམས་རྣམ་པར་གྲོལ་གྱི་བར་དུ་དེ་བཞིན་གཤེགས་པ་གཉིས་སམ་ [169b.5]གསུམ་ལས་མི་འདའོ། །གལ་ཏེ་རང་སངས་རྒྱས་ཀྱི་ཐེག་པ་པར་གྱུར་ན་ནི་དེ་མྱུར་བ་ཉིད་དུ་རང་བྱང་ཆུབ་ཐོབ་པར་འགྱུར་རོ། །གལ་ཏེ་བྱང་ཆུབ་སེམས་དཔའི་ཐེག་པ་པར་གྱུར་ན་ནི་དེ་ཚེ་འདི་ཉིད་ལ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་ཏེ། དེ་སྒྲིབ་པ་མེད་པར་སངས་རྒྱས་མཐོང་བར་ [169b.6]འགྱུར་རོ། །སྒྲིབ་པ་མེད་པར་སངས་རྒྱས་མཐོང་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དགོན་པ་པའི་ལེའུ་འདི་བཤད་པ་ན་དགེ་སློང་ལྔ་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགོན་ [169b.7]པ་པའི་ལེའུ་སྟེ་ལྔ་པའོ།། །།འོད་སྲུང་དེ་ལ་ཇི་ལྟར་ན་དགེ་སློང་བསོད་སྙོམས་སྤྱོད་པ་ཡིན་ཞེ་ན། འོད་སྲུང་འདི་ལ་དགེ་སློང་བསོད་སྙོམས་སྤྱོད་པས་འདི་ལྟར་བདག་བསོད་སྙོམས་ཀྱི་ཁ་ཟས་ལ་གནས་ཏེ། ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ལ་ [170a] [170a.1]བདག་སྔོན་གྱི་སྨོན་ལམ་དང་དམ་བཅས་པ་ལ་གནས་པར་བྱའོ་སྙམ་དུ་བསླབ་པར་བྱའོ། །དགེ་སློང་བསོད་སྙོམས་སྤྱོད་པ་ལྷག་པའི་བསམ་པ་དང་ལྡན་པ་དེས་མི་བརྐམ་པ་དང་། ཚུལ་འཆོས་པ་མེད་པ་དང་། ཁ་གསག་མེད་པ་དང་། འགྲོན་དུ་བོད་པ་ཐམས་ [170a.2]ཅད་ཀྱི་སེམས་མེད་པ་དང་། དགེ་འདུན་གྱི་རྙེད་པ་དང་མ་འབགས་པ་དང་ཡི་དམ་ལ་བརྟན་པར་བྱའོ། །དེས་ཁ་ཟས་བཟང་པོ་རྣམས་ལ་རོ་བྲོ་བའི་འདུ་ཤེས་ཐམས་ཅད་ཀྱི་ཐམས་ཅད་དུ་བསྐྱེད་པར་མི་བྱའོ། །དེས་འདི་ལྟར་བདག་གིས་གདོལ་བུ་ལྟ་བུ་དང་། ལུས་དང་སེམས་ [170a.3]གཙང་མར་བྱའི་ཁ་ཟས་ཀྱིས་ལུས་གཙང་མར་ནི་མི་བྱའོ། །དེ་ཅིའི་ཕྱིར་ཞེ་ན། ཟས་བཟང་པོ་ཇི་སྙེད་ཅིག་ཟོས་པ་དེ་ཐམས་ཅད་ནི་ཐ་མར་རྣག་ཏུ་ཟག་གོ །ཐ་མར་མི་འཐུན་ནོ། །ཐ་མར་དྲི་ང་བའོ། །དེ་ལྟ་བས་ན་བདག་གིས་བཟང་པོ་འདོད་པར་མི་བྱའོ་སྙམ་དུ་བསླབ་པར་ [170a.4]བྱའོ། །དེ་དེ་ལྟར་ཤིན་ཏུ་ངེས་པར་སེམས་པའི་སེམས་ཀྱིས་གྲོང་ངམ། གྲོང་ཁྱེར་རམ། གྲོང་རྡལ་དུ་བསོད་སྙོམས་ཀྱི་ཕྱིར་འཇུག་པ་ན་མཐར་ཆགས་སུ་བསླང་བར་བྱའོ། །དེས་འདི་ལྟར་སེམས་བསྐྱེད་པར་བྱ་སྟེ། བདག་ལ་སྐྱེས་པ་བསོད་སྙོམས་སྟེར་གྱི་བུད་མེད་ནི་མ་ཡིན་ནོ་ [170a.5]ཞེ་འམ། བདག་ལ་བུད་མེད་བསོད་སྙོམས་སྟེར་གྱི་སྐྱེས་པ་ནི་མ་ཡིན་ནོ་ཞེ་འམ། བདག་ལ་ཁྱེའུ་བསོད་སྙོམས་སྟེར་གྱི་བུ་མོ་ནི་མ་ཡིན་ནོ་ཞེ་འམ། བདག་ལ་བུ་མོ་བསོད་སྙོམས་སྟེར་གྱི་ཁྱེའུ་ནི་མ་ཡིན་ནོ་ཞེ་འམ། བདག་གིས་བཟང་པོ་རྙེད་ཀྱི་ངན་པ་ནི་མ་ཡིན་ནོ་ཞེ་འམ། བདག་ [170a.6]གིས་བསྟི་སྟང་དུ་བྱས་ནས་རྙེད་ཀྱི་བསྟི་སྟང་དུ་མ་བྱས་པར་ནི་མ་ཡིན་ནོ་ཞེ་འམ། བདག་གིས་བདེ་བླག་ཏུ་རྙེད་ཀྱི་ཤ་ཐང་བར་ནི་མ་ཡིན་ནོ་ཞེ་འམ། བདག་ལ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་བསུ་བར་འགྱུར་རོ་ཞེ་འམ། ཕྱིན་མ་ཐག་ཏུ་སེམས་པར་འགྱུར་རམ། [170a.7]བདག་སྡོད་དགོས་པར་འགྱུར་རམ། ཤིན་ཏུ་བསྡོགས་པ་རྙེད་པར་འགྱུར་རམ། བདག་གིས་ཁ་ཟས་བཟང་པོ་རོ་སྣ་ཚོགས་དང་ལྡན་པ་རྙེད་པར་འགྱུར་གྱི་དབུལ་པོའི་ཟས་ལྟ་བུ་ངན་པ་རྙེད་པ་ནི་མ་ཡིན་ནོ་སྙམ་དུ་དེས་མི་དགེ་བའི་ཡིད་ལ་བྱེད་པ་ཐམས་ཅད་བསྐྱེད་པར་མི་ [170b] [170b.1]བྱའོ། །འདི་ལྟ་བུའི་གོ་ཆ་བགོ་བར་ཡང་བྱ་སྟེ། རྙེད་པ་མ་རྙེད་ཀྱང་ཡོངས་སུ་ཡི་ཆད་པར་མི་བྱ་བ་དང་། ངན་པ་དང་བཟང་པོའི་འདུ་ཤེས་བསྐྱེད་པར་མི་བྱ་བ་འདི་ནི་དགེ་སློང་བསོད་སྙོམས་སྤྱོད་པ་དག་གི་ཆོས་ཉིད་དོ། །དེ་ཅིའི་ཕྱིར་ཞེ་ན། སེམས་ཅན་ཕལ་ཆེར་ནི་རོ་ལ་བརྐམ་ [170b.2]སྟེ། ཟས་ཀྱི་ཕྱིར་སྡིག་པའི་ལས་རྣམས་བྱས་ནས་སེམས་ཅན་དམྱལ་བ་རྣམས་སུ་སྐྱེའོ། །གང་དག་ཆོག་ཤེས་པ། མི་བརྐམ་པ། མ་ཞེན་པ་དང་། རོ་ལ་མི་གདུ་བ། ལྕེའི་དབང་པོ་ཆོག་ཤེས་པ། ཟས་ངན་ངོན་ཇི་ཙམ་གྱིས་ཀྱང་འཚོ་བ་དེ་དག་ནི་ཤི་འཕོས་ཏེ། ཤི་ [170b.3]བའི་དུས་བྱས་ནས་མཐོ་རིས་སུ་སྐྱེ་བར་འགྱུར། ལྷ་དང་མི་རྣམས་ཀྱི་ནང་དུ་བདེ་འགྲོར་འགྲོ་བར་འགྱུར། ལྷར་སྐྱེས་ནས་བདུད་རྩི་ཟ་བར་འགྱུར་རོ། །འོད་སྲུང་དེ་ལྟར་ན་བསོད་སྙོམས་སྤྱོད་པའི་དགེ་སློང་གིས་རོ་ལ་སྲེད་པ་བཟློག་སྟེ་སེམས་ངེས་པར་སེམས་པས་ལྷག་ཟན་ཞག་ [170b.4]བདུན་ལོན་པ་ཟ་ཡང་ཡི་ཆད་པར་མི་བྱའོ། །དེ་ཅིའི་ཕྱིར་ཞེ་ན། ལུས་གསོ་བ་དང་། འཕགས་པའི་ལམ་གྱི་ཚོགས་བསགས་པའི་དོན་དུ་བདག་གིས་ཟས་བཟའོ་སྙམ་པའི་ཕྱིར་རོ། །འོད་སྲུང་བསོད་སྙོམས་སྤྱོད་པའི་དགེ་སློང་གི་ལྷུང་བཟེད་དུ་འོངས་པ། ལྷུང་བཟེད་དུ་ཆུད་པ་ [170b.5]ཆོས་དང་ལྡན་པ། ཆོས་ཀྱི་རྙེད་པ། ཚངས་པ་མཚུངས་པར་སྤྱོད་པའི་དགེ་སློང་དག་དང་ཐུན་མོང་དུ་བྱས་ལ་བཟའ་བར་བྱའོ། །འོད་སྲུང་གལ་ཏེ་དགེ་སློང་བསོད་སྙོམས་སྤྱོད་པ་ན་བར་གྱུར་ཏེ། ནད་གཡོག་མེད་ལ་བསོད་སྙོམས་ལ་འཇུག་ཀྱང་མི་ནུས་ན། དེས་འདི་སྙམ་དུ་བདག་ནི་ [170b.6]གྲོགས་མེད་ལ། བདག་ནི་གཅིག་པུ་གཉིས་སུ་མེད་པ། བདག་ནི་རབ་ཏུ་བྱུང་བ། བདག་གི་གྲོགས་པོ་ནི་ཆོས་ཡིན་ཏེ། བདག་ནི་ཆོས་ལ་རྟོན་པ་ཡིན་ལ། བདག་ནི་མི་བདེ་ཞིང་སྡུག་བསྔལ་ཏེ་རབ་ཏུ་ན་བས་དེ་བཞིན་གཤེགས་པས་ཆོས་ཀྱི་སྨན་གསུངས་པ་གང་ཡིན་པ་དེ་ཇི་ལྟར་ [170b.7]ཐོས་པ་བཞིན་དུ་ཆོས་དེ་དག་བདག་གིས་ཚུལ་བཞིན་བརྟག་པར་བྱའོ་སྙམ་དུ་སེམས་བསྐྱེད་པར་བྱའོ། །འོད་སྲུང་དེ་ལ་གང་ལུས་འདི་ལ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་འདི་ནི་ཚུལ་བཞིན་ལ་སྦྱོར་བའོ། །དེ་ལུས་འདི་ལ་སྐྱོན་དུ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་ [171a] [171a.1]ན་ཚུལ་བཞིན་ལ་ཞུགས་པ་དེ་སེམས་རྩེ་གཅིག་ཏུ་འགྱུར་ཞིང་དྲན་པ་དང་ལྡན་ལ། ཤེས་བཞིན་དང་ལྡན་པས་བསམ་གཏན་དང་པོ་བསྐྱེད་པའི་གནས་གང་ཡིན་པ་དེ་ཡོད་པར་འགྱུར་ཏེ། དེས་བསམ་གཏན་ཐོབ་ནས་བསམ་གཏན་གྱི་བདེ་བ་འདོད་པ་ན་ཉི་མ་གཅིག་གམ། ཉི་མ་གཉིས་ [171a.2]སམ། ཉི་མ་གསུམ་ནས་ཉི་མ་བདུན་གྱི་བར་དུ་བསམ་གཏན་གྱི་བདེ་བའི་ཟས་ཀྱིས་གནས་སོ། །གལ་ཏེ་འདི་ལྟར་རྣལ་འབྱོར་ལ་ཞུགས་པ་བསམ་གཏན་བསྐྱེད་པར་མི་ནུས་ན། དེ་ལྟར་བརྩོན་ཞིང་རྣལ་འབྱོར་སྤྱོད་པའི་དགེ་སློང་ཆོས་ལ་གནས་པ་དེ་ལ་མངོན་པར་ཤེས་པ་མངོན་པར་ཤེས་པའི་ལྷ་དང་། [171a.3]ཀླུ་དང་། གནོད་སྦྱིན་དག་ཁ་ཟས་འབུལ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ནི་རྣལ་འབྱོར་སྤྱོད་པ་རྣམས་ཀྱི་རྒྱུ་འཐུན་པ་སྟེ། དེ་ལྷས་ཡོངས་སུ་བཟུང་བ་རྙེད་པའི་ཕྱིར་རོ། །འོད་སྲུང་གལ་ཏེ་སྤྲིན་འདུས་ཤིང་ཆར་འབབ་སྟེ་བསོད་སྙོམས་སྤྱོད་པའི་དགེ་སློང་ལ་བསོད་སྙོམས་ལ་འཇུག་མི་ནུས་པའི་དུས་ཀྱི་ཚེ་ [171a.4]བྱམས་པའི་ཟས་ཀྱི་གོ་བགོས་ཏེ། ཆོས་སེམས་པ་ཡིད་ལ་བྱེད་པ་ལ་གནས་ནས། ཞག་གཉིས་སམ། ཞག་གསུམ་ཞིག་ཟན་ཆད་ན། འདི་ལྟར་{ཡི་དགས་,ཡི་དྭགས་}གཤིན་རྗེའི་འཇིག་རྟེན་པ་ཉེས་པར་བྱེད་པའི་ལས་བྱས་པ་གང་དག་ལོ་བརྒྱར་ཡང་མཆིལ་མ་ཐལ་བ་འགའ་བཟར་མ་རྙེད་པ་དག་ཀྱང་ཡོད་དེ། དེ་ [171a.5]ལྟ་བས་ན་བདག་ཚུལ་བཞིན་དུ་ཆོས་སེམས་པ་ལ་གནས་པས་ལུས་ཉམ་ཆུང་བའམ། སེམས་ཉམ་ཆུང་བ་བསྐྱེད་པར་མི་བྱ་སྟེ། བཀྲེས་པ་དང་སྐོམ་པས་ཇི་མི་སྙམ་པར་བྱའོ། །འཕགས་པའི་ལམ་བསྒོམ་པར་བྱ་བ་ལ་བརྩོན་འགྲུས་རྒྱུན་མི་འཆད་པར་བྱའོ་སྙམ་དུ་འདུ་ཤེས་བསྐྱེད་པར་བྱའོ། །འོད་སྲུང་དགེ་ [171a.6]སློང་བསོད་སྙོམས་སྤྱོད་པས་ཁྱིམ་འདྲིས་པ་དང་། སྐྱེས་པ་འདྲིས་པ་དང་། བུད་མེད་འདྲིས་པ་དང་། ཁྱེའུ་འདྲིས་པ་དང་། བུ་མོ་འདྲིས་པར་མི་བྱའོ། །ཁྱིམ་གང་ན་བསོད་སྙོམས་གཙང་མ་བྱེད་པའི་ཁྱིམ་དེར་སྟན་ལ་འདུག་སྟེ་བསོད་སྙོམས་གཙང་མ་བྱེད་པ་ཟིན་གྱི་བར་དུ་ཆོས་ཀྱི་གཏམ་བརྗོད་པར་བྱའོ། །དེ་ནས་ [171a.7]བསོད་སྙོམས་དེ་བླངས་ལ་སྟན་ལས་ལངས་ཏེ་འགྲོ་བར་བྱའོ། །འོད་སྲུང་བསོད་སྙོམས་སྤྱོད་པའི་དགེ་སློང་གིས་འཁོང་བར་མི་བྱ། ཁ་གསག་མི་བྱ། ཚུལ་བཅོས་པར་མི་བྱའོ། །དེ་ལ་འཁོང་བ་གང་ཞེ་ན། གང་གཞན་དག་ལ་ཚིག་འདི་སྐད་སྨྲ་བ་སྟེ། བདག་གི་བསོད་སྙོམས་ནི་ངན་པའོ། །བདག་གི་བསོད་ [171b] [171b.1]སྙོམས་ནི་རྩུབ་པའོ། །བདག་གིས་སྔོན་འདི་ལྟ་བུ་དང་མ་འགྲངས་པར་མ་ཟོས་སོ། །བདག་གི་བསོད་སྙོམས་ནི་སྐྱེ་བོ་མང་པོ་དང་ཐུན་མོང་དུ་བྱས་སོ། །བདག་གིས་ཉུང་ཞིག་ཟོས་ཏེ། བདག་མ་འགྲངས་པས་བདག་གི་ལུས་ཉམ་ཆུང་ངོ་ཞེས་བྱ་བ་སྟེ། འདི་ལྟར་འཁོང་བའི་མཚན་མ་གང་ཅི་ཡང་རུང་བ་འདི་ [171b.2]ལྟ་བུ་འདི་ནི་སེམས་ཀྱི་ཚུལ་འཆོས་པ་ཞེས་བྱ་སྟེ། དགེ་སློང་བསོད་སྙོམས་སྤྱོད་པས་དེ་དག་ཐམས་ཅད་མི་བྱའོ། །གང་ལྷུང་བཟེད་དུ་འོངས་པ་ངན་ཀྱང་རུང་། བཟང་ཡང་རུང་། ཉུང་ཡང་རུང་། མང་ཡང་རུང་། གཙང་ཡང་རུང་། མི་གཙང་ཡང་རུང་སྟེ་དེ་བཟའ་བར་བྱའོ། །ཡོངས་སུ་གདུང་བ་མེད་པ་དང་། བསམ་ [171b.3]པ་ཡོངས་སུ་དག་པ་དང་། ཆོས་ངེས་པར་སེམས་པ་མང་བ་དང་། ལུས་གསོ་བ་དང་། འཕགས་པའི་ལམ་ཉེ་བར་བརྟེན་པའི་ཕྱིར་དེས་བསོད་སྙོམས་བཟའ་བར་བྱའོ། །འོད་སྲུང་གལ་ཏེ་དགེ་སློང་བསོད་སྙོམས་སྤྱོད་པས་གྲོང་ངམ། གྲོང་ཁྱེར་རམ། གྲོང་རྡལ་དུ་བསོད་སྙོམས་བསླངས་ཏེ་མ་རྙེད་ལ། ཇི་ལྟར་ [171b.4]ལྷུང་བཟེད་བཀྲུས་པ་བཞིན་དུ་ཕྱིར་བྱུང་ན། དེས་དེ་བཞིན་གཤེགས་པ་ཡིད་ལ་བྱ་སྟེ། དེ་བཞིན་གཤེགས་པ་བསོད་ནམས་ཀྱི་གཟི་བརྗིད་ཀྱིས་བརྗིད་པ། འཁོར་ལོས་སྒྱུར་བའི་རྒྱལ་སྲིད་སྤངས་ནས་རབ་ཏུ་བྱུང་བ། ལྷ་དང་། ཀླུ་དང་། གནོད་སྦྱིན་དང་། དྲི་ཟས་མཆོད་པ། མི་དགེ་བའི་ཆོས་ཐམས་ཅད་ [171b.5]སྤངས་པ། དགེ་བའི་ཆོས་ཐམས་ཅད་དང་ལྡན་པ་ཉོན་མོངས་པ་ཐམས་ཅད་དང་བྲལ་བ་དེ་ཉིད་གྲོང་དུ་བསོད་སྙོམས་ཀྱི་ཕྱིར་གཤེགས་ན་ཡང་ཇི་ལྟར་ལྷུང་བཟེད་བཀྲུས་པ་བཞིན་དུ་སླར་གཤེགས་ན། བདག་ལྟ་བུ་བསོད་ནམས་ཆུང་བ་དང་། དགེ་བའི་རྩ་བ་མ་བསྐྱེད་པ་ཇི་ལྟར་ལྷུང་བཟེད་བཀྲུས་པ་བཞིན་དུ་ [171b.6]ཕྱིར་བྱུང་བས་ཅིའི་ཕྱིར་ཡི་ཆད་པར་བྱ། དེ་ཅིའི་ཕྱིར་ཞེ་ན། དགེ་བའི་རྩ་བ་མ་བསྐྱེད་པས་ཁ་ཟས་བཟང་པོ་དག་མི་རྙེད་པའི་ཕྱིར་རོ། །གལ་ཏེ་བདུད་ཀྱི་ལས་སམ། བདུད་ཀྱི་བྱིན་གྱི་རླབས་ཀྱིས་བྲམ་ཟེ་དང་ཁྱིམ་བདག་དེ་དག་བདག་ལ་བསོད་སྙོམས་མི་སྟེར་ན། ཅི་ནས་བདུད་བཞི་ལས་ཡང་དག་པར་འདས་པ་ [171b.7]དང་། ཉོན་མོངས་པ་ཐམས་ཅད་དང་བྲལ་བར་འགྱུར་བ་དེ་ལྟར་བྱའོ་སྙམ་དུ་བསམ་མོ། །དེ་ལྟར་ངའི་ནན་ཏན་ལ་གནས་པ་དེ་ལ་བདུད་དང་བདུད་ཀྱི་རིས་ཀྱི་ལྷ་རྣམས་ཀྱིས་གླགས་རྙེད་པར་མི་འགྱུར་ཏེ། འོད་སྲུང་དགེ་སློང་བསོད་སྙོམས་སྤྱོད་པས་དེ་ལྟར་འཕགས་པའི་རིགས་རྣམས་ཡོངས་སུ་སྦྱང་བར་ [172a] [172a.1]བྱའོ། །བསོད་སྙོམས་སྤྱོད་པའི་ལེའུ་སྟེ་དྲུག་པའོ།། །།འོད་སྲུང་དེ་ལ་དགེ་སློང་ཕྱག་དར་ཁྲོད་པ་པས་ཇི་ལྟ་བུའི་སེམས་ཀྱིས་ཕྱག་དར་ཁྲོད་པ་བསྡུ་བར་བྱ་ཞེ་ན། ངོ་ཚ་ཤེས་པ་དང་། ཁྲེལ་ཡོད་པས་གཡོག་པའི་སེམས་སུ་བྱའི། ཆོས་གོས་ཀྱིས་ཆ་བར་སྦྱོར་བ་ལ་བརྩོན་ [172a.2]པའི་སེམས་ཀྱིས་ནི་མ་ཡིན་ནོ། །རླུང་དང་། ཉི་མ་དང་། སྦྲང་བུ་དང་། ཤ་སྦྲང་དང་། སྡིག་སྦྲུལ་གྱིས་རེག་པར་འགྱུར་བ་ཡོངས་སུ་བསྐྱབ་པའི་ཕྱིར་ཡིན་གྱི་ལུས་བརྒྱན་པའི་ཕྱིར་ནི་མ་ཡིན་ནོ། །དེ་བཞིན་གཤེགས་པའི་གསུང་རབ་ལ་ནན་ཏན་གྱིས་གནས་པས་གོས་གཙང་མ་ལ་མངོན་པར་དགའ་བ་མེད་དེ། [172a.3]དེས་ཕྱག་དར་གྱི་ཕུང་པོ་ལས་ཕྱག་དར་ཁྲོད་པ་བླངས་ལ་འདུ་ཤེས་གཉིས་བསྐྱེད་པར་བྱ་སྟེ། གཉིས་གང་ཞེ་ན། ཆོག་ཤེས་པའི་འདུ་ཤེས་དང་། མགུ་སླ་བའི་འདུ་ཤེས་སོ། །གཞན་ཡང་འདུ་ཤེས་གཉིས་བསྐྱེད་པར་བྱ་སྟེ། གཉིས་གང་ཞེ་ན། ང་རྒྱལ་མེད་པའི་འདུ་ཤེས་དང་། འཕགས་པའི་རིགས་ལ་ [172a.4]གནས་པའི་འདུ་ཤེས་སོ། །གཞན་ཡང་འདུ་ཤེས་གཉིས་བསྐྱེད་པར་བྱ་སྟེ། གཉིས་གང་ཞེ་ན། ལུས་བརྒྱན་པ་དང་། སེམས་གཙང་བའོ། །འོད་སྲུང་གལ་ཏེ་དགེ་སློང་ཕྱག་དར་ཁྲོད་པ་པས་ཕྱག་དར་གྱི་ཕུང་པོ་ལས་ཕྱག་དར་ཁྲོད་པ་ལེན་པ་ནས་ཕྱོགས་དེ་ན་སྔོན་གཉེན་བཤེས་སུ་གྱུར་པའམ། སྔོན་ [172a.5]གཏམ་འདྲེས་པ་འམ། ཕེབས་པར་སྨྲ་བ་དེ་དག་གིས་མཐོང་ན་བདག་ལ་སྨོད་པར་འགྱུར་གྱིས་དོགས་ཏེ་ཕྱག་དར་ཁྲོད་པ་དེ་མ་བླངས་ན། འོད་སྲུང་དགེ་སློང་ཕྱག་དར་ཁྲོད་པ་པའི་ཕྱག་དར་ཁྲོད་པ་དེ་ལྟ་བུ་ནི་ཡོངས་སུ་དག་པ་མ་ཡིན་ནོ་ཞེས་ངས་བཤད་དོ། །དེ་ཅིའི་ཕྱིར་ཞེ་ན། དགེ་སློང་ཕྱག་ [172a.6]དར་ཁྲོད་པ་པས་རྡོ་རྗེ་ལྟ་བུའི་སེམས་དང་། རྡོ་རྗེ་ལྟ་བུའི་སེམས་ཀྱིས་དོགས་པ་མེད་པར་ཕྱག་དར་ཁྲོད་པ་བླང་བར་བྱ་བའི་ཕྱིར་རོ། །དེས་ཕྱག་དར་ཁྲོད་པ་དེ་བླངས་ནས་ལེགས་པར་བཀྲུས་ཏེ་ཤིན་ཏུ་གཙང་ཞིང་དྲི་མ་མེད་པར་བྱས་ལ་ཚོན་བཙལ་ཏེ་ཁ་ལེགས་པར་བསྒྱུར་ལ་ཆོས་གོས་སྣམ་སྦྱར་ལ་གླན་ [172a.7]པར་བྱའོ། །དེ་ཕྱིས་འཇིག་པར་མི་འགྱུར་བར་ལེགས་པར་གླན་ལེགས་པར་སྦྱར། ལེགས་པར་བཙེམས་ཏེ་བགོ་བར་བྱའོ། །འོད་སྲུང་དགེ་སློང་ཕྱག་དར་ཁྲོད་པ་པས་འདོད་ཆགས་ཉེ་བར་ཞི་བར་བྱ་བའི་ཕྱིར་མི་སྡུག་པ་ཡིད་ལ་བྱ་བས་གནས་ལ་ཕྱག་དར་ཁྲོད་པ་དག་ལུས་ལ་བགོ་བར་བྱའོ། །ཞེ་སྡང་ཉེ་བར་ [172b] [172b.1]ཞི་བར་བྱ་བའི་ཕྱིར་བྱམས་པའི་སེམས་ཀྱིས་ཕྱག་དར་ཁྲོད་པ་དག་ལུས་ལ་བགོ་བར་བྱའོ། །གཏི་མུག་ཉེ་བར་ཞི་བར་བྱ་བའི་ཕྱིར་རྟེན་ཅིང་འབྲེལ་པར་འབྱུང་བ་ལ་གནས་ཏེ་ཕྱག་དར་ཁྲོད་པ་དག་ལུས་ལ་བགོ་བར་བྱའོ། །ཉོན་མོངས་པ་ཐམས་ཅད་སྤང་བའི་ཕྱིར་ཚུལ་བཞིན་ཡིད་ལ་བྱེད་པ་ལ་ཞུགས་པས་ཕྱག་ [172b.2]དར་ཁྲོད་པ་དག་ལུས་ལ་བགོ་བར་བྱའོ། །སྐྱེ་མཆེད་དྲུག་ཡོངས་སུ་ཤེས་པར་བྱ་བའི་ཕྱིར་དབང་པོ་ལེགས་པར་བསྡམས་ཏེ་ཕྱག་དར་ཁྲོད་པ་དག་ལུས་ལ་བགོ་བར་བྱའོ། །ལྷ་དང་ཀླུ་དང་གནོད་སྦྱིན་དག་མགུ་བར་བྱ་བའི་ཕྱིར་ཚུལ་འཆོས་པ་མེད་པ་དང་། ཁ་གསག་མེད་པར་ཕྱག་དར་ཁྲོད་པ་དག་ལུས་ [172b.3]ལ་བགོ་བར་བྱའོ། །འོད་སྲུང་ཅིའི་ཕྱིར་ཕྱག་དར་ཁྲོད་པ་ཞེས་བྱ་ཞེ་ན། འོད་སྲུང་དཔེར་ན་ཕྱག་དར་དེ་ལ་ནི་སུ་ཡང་འདོད་པ་མི་སྐྱེད། སུ་ཡང་ཆགས་པ་མི་སྐྱེད་ཅིང་ཡོངས་སུ་མི་ལེན་ཏེ། ཕྱག་དར་ནི་དོར་བའི་ཆའོ། །འོད་སྲུང་དེ་བཞིན་དུ་ཕྱག་དར་དང་མཚུངས་པར་བདག་གི་མེད་པ། ཡོངས་སུ་ [172b.4]འཛིན་པ་མེད་པ། རྙེད་སླ་བ། མོད་པ། གཞན་ལ་གསོལ་མི་དགོས་པ། གཞན་གྱི་ངོར་བལྟ་མི་དགོས་པ། གཞན་ལ་རག་མ་ལུས་པ། ཕྱག་དར་ལྟ་བུར་བོར་བ་སྟེ། དེའི་ཕྱིར་ཕྱག་དར་ཁྲོད་པ་ཕྱག་དར་ཁྲོད་པ་ཞེས་བྱའོ། །འདི་ནི་དྲང་སྲོང་རྣམས་ཀྱི་རིགས་སོ། །འདི་ནི་འཕགས་པ་རྣམས་ [172b.5]ཀྱི་རིགས་གཙང་མའོ། །འདི་ནི་འཕགས་པའི་རིགས་ཀྱི་གནས་སོ། །འདི་ནི་སྦྱངས་པའི་ཡོན་ཏན་རྣམས་ཀྱི་རྟོན་པའོ། །འདི་ནི་ཚུལ་ཁྲིམས་ཀྱི་ཕུང་པོ་ཀུན་སྲུང་བའོ། །འདི་ནི་ཏིང་ངེ་འཛིན་གྱི་ཕུང་པོའི་སྒོའོ། །འདི་ནི་ཤེས་རབ་ཀྱི་ཕུང་པོའི་རྟེན་ཏོ། །འདི་ནི་རྣམ་པར་གྲོལ་བའི་ཕུང་པོ་འབྱུང་བའོ། ། [172b.6]འདི་ནི་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་འཐུན་པ་སྟེ། འོད་སྲུང་དེ་ལྟར་ཕྱག་དར་ཁྲོད་པ་ནི་ཡོན་ཏན་མང་བ། སྐབས་མེད་པ། གོ་སྐབས་མེད་པ། བླ་གབ་མེད་པ་སྟེ། དྲི་མ་མེད་པར་འགྱུར་ཞིང་ཁུར་ཁྱེར་བར་འགྱུར་བའོ། །འོད་སྲུང་དགེ་སློང་ཕྱག་དར་ཁྲོད་པ་པ་གང་ཕྱག་དར་ཁྲོད་ [172b.7]པའི་གོས་ཀྱིས་ཆོག་པར་འཛིན་པ་དེ་ལ་ལྷ་རྣམས་ཀྱང་དགའ་བར་འགྱུར་རོ། །འོད་སྲུང་འདི་ལྟ་བུའི་དུས་དང་། འདི་ལྟ་བུའི་མན་ཡོད་དེ། འདི་ལྟར་དགེ་སློང་ཕྱག་དར་ཁྲོད་པ་པ་ཆོས་གོས་ངན་པ་འཆང་བ། བསམ་གཏན་གྱི་བདེ་བ་ལ་སྙོམས་པར་ཞུགས་པ་དེ་ལ་བརྒྱ་བྱིན་དང་། ཚངས་པ་དང་། [173a] [173a.1]འཇིག་རྟེན་སྐྱོང་བ་རྣམས་ཀྱང་ཐལ་མོ་སྦྱོར་ཞིང་རྐང་པ་ལ་གཏུགས་ཏེ་ཕྱག་འཚལ་བར་འགྱུར་ན། ལྷ་གཞན་ཕྱག་འཚལ་བར་འགྱུར་བ་ལྟ་ཅི་སྨོས། འོད་སྲུང་དགེ་སློང་དག་ཆོས་གོས་ཀྱིས་ཆབ་ལ་མངོན་པར་བརྩོན་གྱི། རྣལ་འབྱོར་ལ་མི་བརྩོན་པ་ལུས་ཀྱི་རྒྱན་ལྷུར་ལེན། ཕྱི་རོལ་ [173a.2]གྱི་གཙང་སྦྲ་སྤྱོད་པ། ནང་འདོད་ཆགས་དང་། ཞེ་སྡང་དང་། གཏི་མུག་གི་དྲི་མས་ཡོངས་སུ་གང་བ་དག་ནི་གོས་བཟང་པོ་ཇི་ཙམ་གྱོན་ཡང་འོད་སྲུང་དེ་དག་ལྷ་རྣམས་དགའ་བའི་གཟུགས་མ་ཡིན་ནོ། །དེ་ཅིའི་ཕྱིར་ཞེ་ན། ལྷ་རྣམས་ཀྱིས་ལུས་ཆ་བར་སྦྱོར་བ་ལ་བརྩོན་པ་དེ་དག་གི་སེམས་དང་སེམས་ [173a.3]ལས་བྱུང་བ་རྣམས་ཤེས་ཏེ། ཤེས་ནས་ཀྱང་དེ་དག་རྒྱང་བསྲིངས་ཏེ་ཡོངས་སུ་སྤོང་བར་འགྱུར་རོ། །འོད་སྲུང་དགེ་ཚུལ་སྐུལ་བྱེད་མི་གཙང་བས་འབགས་པའི་ཕྱག་དར་ཁྲོད་པ་ཐོགས་ནས་བསོད་སྙོམས་བླངས་ཏེ་མཚོ་མ་དྲོས་པར་སོང་བ་དང་། དེ་དེར་སོང་བའི་ཚེ་མཚོ་མཆོག་དེ་ན་གནས་པའི་ [173a.4]ལྷ་དེ་དག་གིས་རྒྱང་རིང་པོ་ནས་བསུ་སྟེ་རྐང་པ་ལ་མགོ་བོས་ཕྱག་འཚལ་ནས་གཙང་སྦྲ་སྤྱོད་པའི་ལྷ་དེ་དག་གིས་མི་གཙང་བས་འབགས་པའི་ཕྱག་དར་ཁྲོད་པ་དེ་བདག་ཉིད་ཀྱིས་བཀྲུས་ཏེ་དྲི་མ་མེད་པར་བྱས་ནས་བཀྲུས་པའི་ཆུ་དྲི་མ་ཅན་དེས་རང་གི་ལུས་ལ་སྐུད་དེ། སྐུལ་བྱེད་(གྱི་,ཀྱི་)ཚུལ་ཁྲིམས་ཀྱི་ཡོན་ཏན་ [173a.5]ཡང་དག་པར་བླངས་པ་དང་། སྙོམས་པར་ཞུགས་པ་ཤེས་ནས་མཚོ་དེའི་ལྷ་རྣམས་ཡན་ལག་ལྔས་ཕྱག་འཚལ་ལོ། །ཀུན་དུ་རྒྱུ་རབ་ཏུ་བཟང་པོ་ཞེས་བྱ་བ་དེ་གོས་གཙང་མ་བགོས་ནས་བསོད་སྙོམས་བླངས་ཏེ་མཚོ་མ་དྲོས་པར་སོང་བ་དང་། མཚོ་དེ་ན་གནས་པའི་ལྷ་དེ་དག་གིས་དེ་མཚོ་ [173a.6]མཆོག་འདིར་ཁ་ཟས་ཟོས་ནས་ལྷག་མ་བོར་ན་མཚོ་མཆོག་མི་གཙང་བར་བྱས་སུ་འོང་ཞེས་རྒྱང་གྲགས་གཅིག་ཁོ་ར་ཁོར་ཡུག་ཙམ་གྱི་ནང་དུ་འདར་མ་སྟེར་བ་ལ་ལྟོས། འོད་སྲུང་འཕགས་པའི་ཆོས་ཀྱི་ཡོན་ཏན་སྒྲུབ་པའི་ཁྱད་པར་དང་སྐུལ་བྱེད་ཀྱི་ཕྱག་དར་ཁྲོད་པ་བཀྲུས་པའི་ཆུ་དྲི་མ་ཅན་ལྷ་དག་ [173a.7]རང་གི་ལུས་ལ་སྐུད་པ་དང་། ཀུན་དུ་རྒྱུ་རབ་ཏུ་བཟང་པོ་ནི་འགྲོར་ཡང་མ་སྟེར་བ་ལ་ལྟོས། འོད་སྲུང་དེ་ལྟ་བས་ན་དགེ་སློང་ཕྱག་དར་ཁྲོད་པ་པ་ཡོན་ཏན་གྱི་ཆོས་འདི་ལྟ་བུ་འདི་དག་འདོད་པ། ཞུམ་ཞུམ་པོར་མ་གྱུར་པ། འཕགས་པའི་རིགས་ལ་གནས་པས་མཆོད་རྟེན་གྱི་འདུ་ཤེས་དང་། སྟོན་ [173b] [173b.1]པའི་འདུ་ཤེས་དང་། བདག་གི་བ་མེད་ཅིང་ཡོངས་སུ་འཛིན་པ་མེད་པའི་འདུ་ཤེས་ཀྱིས་ལུས་ལ་ཕྱག་དར་ཁྲོད་པ་དག་བགོ་བར་བྱའོ། །འདི་ལྟར་ཡང་སེམས་ཀྱིས་ལུས་དག་པར་འགྱུར་གྱི། ལུས་ཀྱིས་སེམས་དག་པར་ནི་མི་འགྱུར་རོ། །དེ་བས་ན་སེམས་དག་པར་འགྱུར་བར་བྱའི་ལུས་ཆ་བས་ [173b.2]དག་པ་ནི་མ་ཡིན་ཏེ། སེམས་དག་པ་ནི་བཅོམ་ལྡན་འདས་ཀྱི་བསྟན་པ་ལ་ཚངས་པར་སྤྱོད་པ་ཞེས་གསུངས་སོ་སྙམ་དུ་སེམས་ངེས་པར་བསམ་པར་བྱའོ། །འོད་སྲུང་དེ་ལྟར་ན་དགེ་སློང་ཕྱག་དར་ཁྲོད་པ་པས་ཁྱོད་དང་ངའི་རྗེས་སུ་བསླབ་པར་བྱའོ། །འོད་སྲུང་འདི་ལྟ་བུའི་དུས་དང་། འདི་ལྟ་ [173b.3]བུའི་མན་ཡོད་དེ། འོད་སྲུང་ཆོས་གོས་ངན་པ་གྱོན་པ། ཆོས་གོས་ངན་ངོན་གྱིས་ཆོག་པར་འཛིན་པ་ཁྱོད་གང་དུ་ཆོས་གོས་སྣམ་སྦྱར་ཁྲིའུ་འམ་ཁྲིའི་སྟེང་དུ་བཞག་སྟེ། ཁྱོད་བླ་གོས་གྱོན་ནས་འཆག་སར་འཆག་པའི་ཚེ་ལྷ་བརྒྱ་སྟོང་ཕྲག་མང་པོ་དག་དེར་ལྷགས་ནས་འདི་ནི་ཚུལ་ཁྲིམས་དང་། [173b.4]ཏིང་ངེ་འཛིན་དང་། ཤེས་རབ་ཀྱིས་ཡོངས་སུ་བསྒོས་པའི་ལུས་ལ་བགོ་བགོ་བའི་ཆོས་གོས་སོ་ཞེས་ཁྱོད་ཀྱི་ཆོས་གོས་སྣམ་སྦྱར་དེ་ལ་ཕྱག་འཚལ་བར་འགྱུར་རོ། །འོད་སྲུང་ལྟོས། ཆོས་གོས་ལ་ཡང་ཕྱག་འཚལ་བར་འགྱུར་ན་ལུས་ལ་ལྟ་ཅི་སྨོས། འོད་སྲུང་ཇི་ལྟར་ན་དགེ་སློང་ངའི་ [173b.5]རྗེས་སུ་སློབ་པ་དག་དེ་བཞིན་དུ་སྒྲུབ་པར་འགྱུར་སྙམ་སྟེ་ངས་འཁོར་ལོས་སྒྱུར་བའི་རྒྱལ་སྲིད་སྤངས་ནས་རབ་ཏུ་བྱུང་སྟེ། ཀ་ཤི་པ་ཕྲ་མོ་དང་། དུ་གུ་ལའི་རས་དང་། ཀོ་ཏམ་པའི་རས་དང་། ངང་རིས་ཅན་གྱི་ཆོས་གོས་རྣམས་སྤངས་ནས་འཕགས་པའི་རིགས་ལ་དགའ་བའི་ཕྱིར་ཤ་ནའི་རས་ [173b.6]ཀྱི་གོས་རྣམས་ལུས་ལ་བགོས་སོ། །འོད་སྲུང་ངས་ཁྱོད་ལས་དར་གོས་ངན་པ་བླངས་ཏེ། ངས་ཁྱོད་ལ་ཤ་ནའི་རས་བྱིན་པ་གང་ཡིན་པ་དེ་ཐམས་ཅད་ཀྱང་ཁྱོད་ཉིད་ལ་སྙིང་བརྩེ་བའི་ཕྱིར་ཡིན་གྱི། ཆགས་པའི་ཕྱིར་མ་ཡིན། ལུས་བརྒྱན་པའི་ཕྱིར་མ་ཡིན་ནོ། །འོད་སྲུང་འདི་ལ་ [173b.7]མི་གཏི་མུག་པ་ཁ་ཅིག་ཁྱོད་དང་ངའི་རྗེས་སུ་མི་སློབ་ཅིང་བརྐམ་པ་དང་ཆགས་པའི་ཟིལ་གྱིས་ནོན་པ། ཆོས་གོས་སོགས་པར་བྱེད་པ། ལྷུང་བཟེད་སོགས་པར་བྱེད་པ། འཇིག་རྟེན་གྱི་ཟང་ཟིང་སོགས་པར་བྱེད་པ། འགྲོན་བུ་དང་། གསེར་དང་། ནོར་བུ་དང་། འབྲུ་སོགས་པར་བྱེད་པ། [174a] [174a.1]བ་ལང་དང་། ལུག་དང་། བྱ་གག་དང་། ཕག་དང་། བོང་བུ་དང་། རྟ་དང་། ཐོང་གཤོལ་དང་། ཤིང་རྟ་འདྲེན་པ་དག་ཉེ་བར་འཇོག་པར་བྱེད་པ། ཁྱིམ་པའི་ལས་ཀྱི་མཐའ་སྤྱོད་པ་དག་པས་ནི་འོད་སྲུང་ཁྱིམ་པ་དག་ལ་ཁྱད་པར་དུ་འགྱུར་བ་ཡོད་ཀྱི། མི་བླུན་པོ་རབ་ཏུ་ [174a.2]བྱུང་བའི་མཚམས་ལས་འདས་པ་དེ་དག་ལ་ནི་ཁྱད་པར་དུ་འགྱུར་བ་གང་ཡང་མེད་དོ། །འོད་སྲུང་ཁྱིམ་པ་རྣམས་ཁྱད་པར་དུ་འགྱུར་བ་ནི་དགེ་སྦྱོང་མ་ཡིན་ལ་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་ལ་ཚངས་པར་སྤྱོད་པར་ཁས་འཆེ་བ། གོས་ངུར་སྨྲིག་བགོས་ཤིང་བྱ་བ་མང་ [174a.3]བ། སྦག་པ་སྣ་ཚོགས་ཀྱིས་སྦགས་པ། ཟས་དང་གོས་ལྷུར་ལེན་པ་དེ་དག་ཁྱིམ་པ་དག་གིས་གོས་ངུར་སྨྲིག་གྱོན་པར་རིག་ནས་རྗེས་དང་གུས་པ་བསྐྱེད་པ་དང་། ཆོས་གོས་དང་། བསོད་སྙོམས་ཀྱིས་སྡུད་པར་བྱེད་པ་དང་། གུས་པར་སྨྲ་ཞིང་ཕྱག་འཚལ་ལ་ལྡང་བར་བྱེད་པ་སྟེ། འོད་ [174a.4]སྲུང་འདི་ནི་ཁྱིམ་པ་དེ་དག་གི་ཁྱད་པར་དུ་འགྱུར་བ་ཡིན་གྱི། དེ་དག་རབ་ཏུ་བྱུང་བ་དེ་དག་ལ་ནི་མེད་པའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཡོངས་སུ་ལེན་པ་ལ་བརྩོན་པ་མ་ཡིན་ཞིང་ཅི་ཡང་མི་སོགས་པའི་ཕྱིར་རོ། །འོད་སྲུང་དེའི་ཚེ་དེའི་དུས་ན་དགེ་སློང་ཕལ་ཆེར་ལྷུང་བཟེད་དང་ [174a.5]ཆོས་གོས་མང་ཞིང་སྣོད་སྤྱད་མང་བ་དང་རྙེད་པ་མང་བར་འགྱུར་ཏེ། དེ་དག་ལ་བསྟི་སྟང་བྱེད་པར་འགྱུར། བཙུན་པར་བྱེད་པར་འགྱུར། རི་མོ་བྱེད་ཅིང་མཆོད་པ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་སྦྱིན་པ་དང་། ཕྱིར་སྦྱིན་པ་དུས་དུས་ས་བྱེད་ཅིང་བྱ་བ་ཇི་ལྟ་བ་བཞིན་དུ་ [174a.6]ཡོངས་སུ་འཛིན་པའི་ཕྱིར་རོ། །དགེ་སློང་གང་དག་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཟག་པ་རྣམས་ཟད་པར་བྱེད་པ་ལ་མངོན་པར་བརྩོན་པ་དང་། ཡིད་བྱུང་བ། མགོ་དང་གོས་ལ་མེ་འབར་བ་བཞིན་དུ་བརྩོན་པ། དོན་ཉུང་བ་བྱེད་པ་ཉུང་བ། རང་གི་དོན་ལ་བརྩོན་ [174a.7]པ། འདྲིས་པར་བྱེད་པ་ཡོངས་སུ་སྤངས་པ་དག་འབྱུང་བ་དེ་དག་གི་གན་དུ་ནི་དེའི་ཚེ་དེའི་དུས་ན་སུ་ཡང་མི་འགྲོ །མི་སྟེན་ཅིང་བསྙེན་བཀུར་མི་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཁྱིམ་བདག་ནི་ཆགས་པའི་རང་བཞིན་ཅན་ཚེ་འདི་ལྷུར་ལེན་གྱི། ཚེ་རབས་ཕྱི་མ་ལྷུར་ལེན་པ་ [174b] [174b.1]མ་ཡིན་པས་དེ་དག་འདི་སྙམ་དུ་དགེ་སློང་དེ་དག་ལ་ནི་བདག་ཅག་གི་འཚོ་བ་མེད་ན་བདག་ཅག་གིས་ཅིའི་ཕྱིར་སྟེན། ཅིའི་ཕྱིར་ཕྱག་བྱ། ཅིའི་ཕྱིར་མཆོད། ཅིའི་ཕྱིར་བསྙེན་བཀུར་བྱ་སྙམ་དུ་སེམས་པའི་ཕྱིར་རོ། །གཞན་དུ་ན་གང་དག་དགེ་བའི་རྩ་བ་བསྐྱེད་པ། སྔོན་གྱི་སྦྱོར་བ་ཕུན་སུམ་ [174b.2]ཚོགས་པ་དག་འབྱུང་ཞིང་ཚུལ་ཁྲིམས་དང་ལྡན་པ། དགེ་བའི་ཆོས་ཅན་དེ་ལྟ་བུ་དེ་དག་ལ་སྟེན་པར་བྱེད། སྙེན་པར་བྱེད་ཅིང་བསྙེན་བཀུར་བྱེད་པ་ནི་མ་གཏོགས་ཏེ་ཉུང་ངོ་། །འོད་སྲུང་ཆོས་འདི་ལྟ་བུ། ཚུལ་དང་འཐུན་པ་འདི་ལྟ་བུ་འདི་དག་ནི་གང་ཟག་གཉིས་ཀྱི་ཡིད་དུ་འོང་བར་འགྱུར་ [174b.3]ཏེ། གཉིས་གང་ཞེ་ན། བདེན་པ་མཐོང་ཞིང་འཁོར་བ་ལ་འཇིགས་པར་ལྟ་བ་དང་། རྣལ་འབྱོར་སྤྱོད་པ་ལ་བརྩོན་ཞིང་འབྲས་བུ་ཐོབ་པར་འདོད་པ། ལས་ཀྱི་རྣམ་པར་སྨིན་པ་ལ་རྟོན་པ། ཆོས་དོན་དུ་གཉེར་ཞིང་ཆོས་འདོད་པའོ། །འོད་སྲུང་མངོན་པར་མི་བརྩོན་པ། ཆོས་མ་ [174b.4]ཡིན་པ་ལ་ལྟ་བ། ལས་ཀྱི་རྣམ་པར་སྨིན་པ་དང་འགལ་བ། འཇིག་རྟེན་ཕ་རོལ་ཏུ་ཁ་ན་མ་ཐོ་བས་འཇིགས་པར་མི་ལྟ་བས་ཚེ་འདི་ལྷུར་ལེན་པ། ཚེ་རབས་ཕྱི་མ་ལྷུར་མི་ལེན་པ་ཐམས་ཅད་ཀྱི་སྒོ་ངས་བཤད་པར་བྱའོ། །འོད་སྲུང་གང་དག་ཐ་ན་ཐར་པ་དང་ལྡན་པའི་སེམས་གཅིག་ [174b.5]ཙམ་ཡང་མི་སྐྱེད་པའི་མི་གཏི་མུག་པ་དེ་དག་ལ་ནི་ངས་འདི་ལྟ་བུའི་ཆོས་འདི་སྐབས་མི་འབྱེད་ཀྱི་སྟེང་དུ་འདི་ལྟ་བུའི་ཆོས་འདི་དག་ཐོས་ན་བདག་བསྒྲུབ་པ་ལས་ཉམས་པར་རིག་ནས་སྨད་པར་བྱ་བར་སེམས་ཏེ། འདི་དག་ནི་སངས་རྒྱས་ཀྱིས་གསུངས་པ་མ་ཡིན་གྱི། འདི་དག་ནི་རང་ [174b.6]བཟོར་སྦྱར་བ་འམ། བདུད་ཀྱིས་ཐོ་བཙམས་ནས་བྱས་པའོ་ཞེས་སྨྲ་ཞིང་དེ་དག་འདི་ལྟར་སྐྱེ་བོ་མང་པོ་དག་ལོག་པར་འཛིན་དུ་འཇུག་པར་འགྱུར་རོ། །དེ་དག་ནི་བདག་ཀྱང་ཕུང་ལ་གཞན་དག་ཀྱང་ཕུང་བར་བྱེད་པར་འགྱུར། བདག་ཀྱང་ཉོན་མོངས་པ་ཅན་དུ་གྱུར་ལ་གཞན་དག་ཀྱང་ཉོན་མོངས་ [174b.7]པ་ཅན་དུ་བྱེད་པར་འགྱུར་ཏེ། དེ་ལྟར་མི་གཏི་མུག་པ་དེ་དག་ནི་བདག་ལ་ཕན་པ་དང་། གཞན་ལ་ཕན་པའི་ཕྱིར་ཞུགས་པ་མ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་ [175a] [175a.1]པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དཀོན་མཆོག་བརྩེགས་པའི་ཆོས་ཀྱི་རྣམ་གྲངས་འདིར་ནན་ཏན་སྙིང་པོར་བགྱིད་པའི་གང་ཟག་ཆོས་ཀྱི་དབང་ཕྱུག་རྣམས་ལ་སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་གང་ལགས་པ་དེ་རྒྱ་ཆེར་ [175a.2]ཡང་དག་པར་རབ་ཏུ་བཤད་ལགས་སོ། །བཅོམ་ལྡན་འདས་སེམས་ཅན་གང་དག་ཆོས་ཀྱི་རྣམ་གྲངས་འདི་ཐོས་ནས་མོས་ཤིང་དེ་བཞིན་ཉིད་དུ་སྒྲུབ་པ་དེ་དག་ནི་སངས་རྒྱས་ཀྱིས་ཡོངས་སུ་བཟུང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་དེ་བཞིན་ནོ། །དེ་དེ་ [175a.3]བཞིན་ཏེ། གང་དག་ཆོས་ཀྱི་རྣམ་གྲངས་འདི་ཐོས་ནས་མོས་ཤིང་། དེ་བཞིན་ཉིད་དུ་སྒྲུབ་པའི་སེམས་ཅན་དེ་དག་ནི་སངས་རྒྱས་ཀྱིས་ཡོངས་སུ་བཟུང་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་རིགས་ཀྱི་བུ་དང་། [175a.4]རིགས་ཀྱི་བུ་མོ་དགེ་བའི་རྩ་བ་བསྐྱེད་པ། ཞི་བ་འདོད་པ་གྲོལ་བར་འདོད་པ་དེ་དག་གི་ཆེད་དུ་ཆོས་ཀྱི་ལེའུ་འདི་ཟུང་ཤིག །ཁྱིམ་པ་དང་རབ་ཏུ་བྱུང་བ་དེ་དག་ཀྱང་ཆོས་འདི་ལ་བསླབས་ནས་ཕུང་པོ་ཐམས་ཅད་རབ་ཏུ་སྤངས་པའི་མྱ་ངན་ལས་འདས་པ་ཐོབ་པར་འགྱུར་རོ། །གསོལ་པ། བཅོམ་ [175a.5]ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ཆོས་ཐམས་ཅད་ཡང་དག་པར་བསྡུས་ [175a.6]པ་ཞེས་བྱ་བར་ཟུང་ཤིག །འཕགས་པའི་རིགས་སྦྱངས་པའི་ཡོན་ཏན་གྱི་གནས་དང་། ཚུལ་ཁྲིམས་དང་ལྡན་པ་ཡོངས་སུ་འཛིན་པ་དང་། ཚུལ་ཁྲིམས་འཆལ་པ་སྤ་འགོང་བ་དང་། རིན་པོ་ཆེ་བརྩེགས་པ་དང་། རིན་པོ་ཆེའི་ཕུང་པོ་དང་། རིན་པོ་ཆེ་བསགས་པ་དང་། རིན་པོ་ཆེའི་ཆོས་ [175a.7]ཀྱི་སྒོའི་ལེའུ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ཀུན་དགའ་བ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་ [175b] [175b.1]གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་རིན་པོ་ཆེའི་ཕུང་པོའི་ལེའུ་ཞེས་བྱ་སྟེ་བཞི་བཅུ་རྩ་བཞི་པ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། [175b.2]ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།{D89}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་ལྔ་པ་སྟེ། འཕགས་པ་བློ་གྲོས་མི་ཟད་པས་ཞུས་པ་ལུང་བསྟན་ [175b.3]པ། བམ་པོ་གཅིག་པ། རྒྱ་གར་སྐད་དུ། ཨཱརྱ་ཨ་ཀྵ་ཡ་མ་ཏི་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བློ་གྲོས་མི་ཟད་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་ [175b.4]བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཏོག་དང་། [175b.5]བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བའི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐའ་ཡས་ཏོག་དང་། བཟང་སྐྱོང་ལ་ [175b.6]སོགས་པ་སྐྱེས་བུ་དམ་པ་བཅུ་དྲུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་སོགས་པ་སེམས་དཔའ་དཔེ་མེད་པ་དྲུག་ཅུ་དང་། བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་ཐབས་ཅིག་ཏུ་བཞུགས་སོ། །བྱང་ [175b.7]ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ཡང་བྱང་ཆུབ་སེམས་དཔའ་བྱེ་བ་ཕྲག་དྲུག་ཅུས་ཡོངས་སུ་བསྐོར་ཅིང་མདུན་དུ་བདར་ཏེ། འཁོར་དེ་ཉིད་དུ་འདུས་ནས་འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ [176a] [176a.1]ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་རིན་པོ་ཆེ་སྣ་ཚོགས་ཀྱི་མེ་ཏོག་གི་གདུགས་དང་། མེ་ཏོག་གི་ཕུར་མས་མཆོད་ [176a.2]ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་ཀྱི་སེམས་བྱང་ཆུབ་ཀྱི་སེམས་ཞེས་བགྱི་ན། བཅོམ་ལྡན་འདས་ཇི་ཙམ་གྱིས་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་དང་ལྡན་པ་ལགས། བཅོམ་ལྡན་འདས་བྱང་ཆུབ་ཀྱི་སེམས་གང་ [176a.3]ལགས། བཅོམ་ལྡན་འདས་བྱང་ཆུབ་ལ་ནི་སེམས་སམ་སེམས་པ་མ་དམིགས། མི་དམིགས། དམིགས་པར་མི་འགྱུར་རོ། །བྱང་ཆུབ་ལས་གུད་ན་ཡང་བྱང་ཆུབ་ཀྱི་སེམས་མི་དམིགས་ཏེ། བྱང་ཆུབ་ནི་བརྗོད་དུ་མ་མཆིས། སེམས་ནི་གཟུགས་མ་མཆིས། བསྟན་དུ་མ་མཆིས། ཐོགས་ [176a.4]པ་མ་མཆིས། རྣམ་པར་རིག་པ་མ་མཆིས་ཤིང་སེམས་པ་ཡང་མི་དམིགས་ན། བཅོམ་ལྡན་འདས་ཇི་ལྟར་ཆོས་འདི་དག་གི་དོན་རྟོགས་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་ནི་བརྡ་འམ། གདགས་པ་འམ་ཐ་སྙད་དུ་མི་དམིགས་ཤིང་ [176a.5]བྱང་ཆུབ་ལས་གུད་ན་བྱང་ཆུབ་ཀྱི་སེམས་ཀྱང་མི་དམིགས་ལ། བྱང་ཆུབ་ནི་བརྗོད་དུ་མེད། སེམས་ནི་གཟུགས་མེད། བསྟན་དུ་མེད། ཐོགས་པ་མེད། རྣམ་པར་རིག་པ་མེད་དེ། སེམས་པ་ཡང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་ནི་བརྗོད་དུ་མེད་པ་སྟེ། བྱང་ [176a.6]ཆུབ་ཇི་ལྟ་བར་སེམས་ཀྱང་དེ་བཞིན་ནོ། །སེམས་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་དང་སེམས་ཇི་ལྟ་བར་སེམས་པ་རྣམས་ཀྱང་དེ་བཞིན་ནོ། །སེམས་པ་རྣམས་ཇི་ལྟ་བར་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ཐམས་ཅད་ཀྱང་དེ་བཞིན་ནོ། ། [176a.7]རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་མིང་འཐོབ་བོ། །ཆོས་ཐམས་ཅད་ཀྱི་རྗེས་སུ་སོང་བའི་སེམས་དེ་ནི་བྱང་ཆུབ་ཀྱི་སེམས་ཞེས་བྱའོ། །བྱང་ཆུབ་ནི་འདས་པ་དང་། མ་འོངས་པ་དང་། ད་ལྟར་བྱུང་བ་ཡང་མ་ཡིན་ཏེ། [176b] [176b.1]སེམས་ཀྱང་དེ་བཞིན་ནོ། །སེམས་པ་ཡང་དེ་བཞིན་ནོ། །ཆོས་ཐམས་ཅད་མི་དམིགས་པའི་ཕྱིར་འདི་ལ་ཅི་ཡང་རྙེད་པ་མེད་དེ་བྱང་ཆུབ་ཀྱང་མེད། བྱང་ཆུབ་ཏུ་གདགས་པ་ཡང་མེད། སེམས་ཅན་ཡང་མེད། སེམས་ཅན་དུ་གདགས་པ་ཡང་མེད། ཉན་ཐོས་ཀྱང་མེད། [176b.2]ཉན་ཐོས་སུ་གདགས་པ་ཡང་མེད། རང་སངས་རྒྱས་ཀྱང་མེད། རང་སངས་རྒྱས་སུ་གདགས་པ་ཡང་མེད། བྱང་ཆུབ་སེམས་དཔའ་ཡང་མེད། བྱང་ཆུབ་སེམས་དཔར་གདགས་པ་ཡང་མེད། སངས་རྒྱས་ཀྱང་མེད། སངས་རྒྱས་སུ་གདགས་པ་ཡང་མེད། འདུས་བྱས་ [176b.3]ཀྱང་མེད། འདུས་བྱས་སུ་གདགས་པ་ཡང་མེད། འདུས་མ་བྱས་ཀྱང་མེད། འདུས་མ་བྱས་སུ་གདགས་པ་ཡང་མ་དམིགས་མི་དམིགས། དམིགས་པར་མི་འགྱུར་མོད་ཀྱི། རིགས་ཀྱི་བུ་འོན་ཀྱང་དཔེར་ན་རི་རབ་ཀྱི་ཚུལ་དུ་དགེ་བའི་རྩ་བ་ཐམས་ཅད་ཀྱིས་ཡང་དག་པར་འཕགས་ [176b.4]པའི་སེམས་དང་པོ་སྐྱེ་སྟེ། དེ་ལ་རྒྱུ་ནི་སྦྱིན་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་གཉིས་པ་ནི་ཆོས་ཐམས་ཅད་ཀྱི་བྱ་བའི་གནས་ཀྱི་ཚུལ་གྱིས་ས་ལྟ་བུར་བལྟ་སྟེ། དེ་ལ་རྒྱུ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་གསུམ་པ་ནི་འཇིགས་པ་མེད་པ་དང་། [176b.5]བག་ཚ་བ་མེད་པ་དང་། སྐྲག་པ་མེད་པའི་ཚུལ་གྱིས་{རི་དགས་,རི་དྭགས་}ཀྱི་རྒྱལ་པོ་སེང་གེ་རལ་པ་ཅན་གྱི་རྩལ་ལྟ་བུར་བལྟ་སྟེ། དེ་ལ་རྒྱུ་ནི་བཟོད་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཞི་པ་ནི་ཕྱིར་མི་ལྡོག་པའི་ཚུལ་གྱིས། སྲེད་མེད་ཀྱི་བུའི་མཐུ་དང་། སྟོབས་དང་། ཤུགས་ [176b.6]དང་། བརྩོན་འགྲུས་དང་། རྟུལ་བ་ལྟ་བུར་བལྟ་སྟེ། དེ་ལ་རྒྱུ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་ལྔ་པ་ནི་བསོད་ནམས་ཀྱིས་ཆོག་མི་ཤེས་པའི་ཚུལ་གྱིས་དགེ་བ་སྣ་ཚོགས་ཀྱིས་ཡང་དག་པར་འཕགས་པ་ལྟ་བུར་བལྟ་སྟེ། དེ་ལ་རྒྱུ་ནི་བསམ་གཏན་གྱི་ཕ་ [176b.7]རོལ་ཏུ་ཕྱིན་པའོ། །སེམས་བསྐྱེད་པ་དྲུག་པ་ནི་མུན་པ་མུན་གནག་ཆེན་པོ་སེལ་བའི་ཚུལ་གྱིས་ཉི་མའི་དཀྱིལ་འཁོར་འོད་གསལ་བ་ལྟ་བུར་བལྟ་སྟེ། དེ་ལ་རྒྱུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བདུན་པ་ནི་དེད་དཔོན་མཛོད་ཆེན་པོས་ཕྱུག་པ་ལྟར་འཁོར་བའི་ [177a] [177a.1]འབྲོག་དགོན་པ་ལས་སྒྲོལ་བའི་ཚུལ་གྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ལེགས་པར་བརྒྱན་པར་བལྟ་སྟེ། དེ་ལ་རྒྱུ་ནི་ཐབས་མཁས་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བརྒྱད་པ་ནི་ཟླ་བ་ཉེ་བའི་དཀྱིལ་འཁོར་རྣམ་པར་དག་པའི་ [177a.2]དཔེའི་ཚུལ་གྱིས་སྒྲིབ་པ་ཐམས་ཅད་རྣམ་པར་དག་པ་ཡོངས་སུ་རྫོགས་པར་བལྟ་སྟེ། དེ་ལ་རྒྱུ་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་དགུ་པ་ནི་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་གྱི་རྒྱན་བཀོད་པ་ཐམས་ཅད་ཀྱི་དཀྱིལ་འཁོར་གྱི་ཚུལ་གྱི་བསམ་པ་ཡོངས་ [177a.3]སུ་རྫོགས་པར་བྱེད་པར་བལྟ་སྟེ། དེ་ལ་རྒྱུ་ནི་སྟོབས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཅུ་པ་ནི་ཡོན་ཏན་དང་། ཡེ་ཤེས་དང་། ཆོས་ཐམས་ཅད་ལ་དབང་སྒྱུར་བར་དབང་བསྐུར་བ་ཐོབ་པས་འཁོར་ལོས་སྒྱུར་བའི་མཚན་གྱི་དཔེའི་ཚུལ་གྱིས་ནམ་མཁའ་དང་མཚུངས་པར་བལྟ་ [177a.4]སྟེ། དེ་ལ་རྒྱུ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ནི་བཅུ་པོ་འདི་དག་ཡིན་ཏེ། འདི་དག་དང་ལྡན་པས་བྱང་ཆུབ་སེམས་དཔའ་ཞེས་བྱའོ། །དོན་དམ་པར་ནི་འདི་ལ་བྱང་ཆུབ་ཀྱང་མེད། བྱང་ཆུབ་སེམས་དཔའ་ཡང་ [177a.5]མེད། བྱང་ཆུབ་ཀྱི་སེམས་ཀྱང་མེད་དོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དད་པའི་དབང་པོ་སྔོན་དུ་འགྲོ་བ་དང་། བསམ་པ་སྔོན་དུ་འགྲོ་བ་དང་། ལྷག་པའི་ [177a.6]བསམ་པ་སྔོན་དུ་འགྲོ་བ་དང་། ཕ་རོལ་ཏུ་ཕྱིན་པ་སྔོན་དུ་འགྲོ་བ་དང་། བྱམས་པ་ཆེན་པོ་སྔོན་དུ་འགྲོ་བ་དང་། སྙིང་རྗེ་ཆེན་པོ་སྔོན་དུ་འགྲོ་བ་དང་། སེམས་ཅན་གྱི་རྟེན་སྔོན་དུ་འགྲོ་བ་དང་། བསྡུ་བའི་དངོས་པོ་སྔོན་དུ་འགྲོ་བ་དང་། སངས་རྒྱས་ཀྱི་ཆོས་འདོད་པ་སྔོན་དུ་འགྲོ་བ་དང་། [177a.7]ཐམས་ཅད་མཁྱེན་པའི་ཡེ་ཤེས་འདོད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྔོན་དུ་ [177b] [177b.1]འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན་འདི་ལྟ་སྟེ། ལུས་ཀྱི་ལས་ཡོངས་སུ་དག་པ་སྔོན་དུ་འགྲོ་བ་དང་། ངག་གི་ལས་ཡོངས་སུ་དག་པ་སྔོན་དུ་འགྲོ་བ་དང་། ཡིད་ཀྱི་ལས་ཡོངས་སུ་དག་པ་སྔོན་དུ་འགྲོ་བ་དང་། རྣམ་པར་མི་འཚེ་བ་སྔོན་དུ་འགྲོ་བ་དང་། ངན་ [177b.2]སོང་ཐམས་ཅད་རྣམ་པར་སྤོང་བ་སྔོན་དུ་འགྲོ་བ་དང་། མི་ཁོམ་པ་བརྒྱད་རྣམ་པར་སྤོང་བ་སྔོན་དུ་འགྲོ་བ་དང་། ཉན་ཐོས་དང་རང་སངས་རྒྱས་ཀྱི་ས་ལས་བཟླ་བ་སྔོན་དུ་འགྲོ་བ་དང་། སངས་རྒྱས་ཀྱི་ཡོན་ཏན་ལ་དགོད་པ་སྔོན་དུ་འགྲོ་བ་དང་། བསམ་པ་ཡོངས་སུ་རྫོགས་པ་ [177b.3]སྔོན་དུ་འགྲོ་བ་དང་། སྨོན་ལམ་ཡོངས་སུ་རྫོགས་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ [177b.4]ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན་འདི་ལྟ་སྟེ། རྗེས་སུ་ཆགས་པ་སྤོང་བ་སྔོན་དུ་འགྲོ་བ་དང་། ཁོང་ཁྲོ་བ་སྤོང་བ་སྔོན་དུ་འགྲོ་བ་དང་། ལུས་ལ་མི་ལྟ་བར་སྔོན་དུ་འགྲོ་བ་དང་། སྲོག་ལ་ཡིད་མི་རྟོན་པ་སྔོན་དུ་འགྲོ་བ་དང་། མོས་པ་སྔོན་དུ་འགྲོ་བ་དང་། [177b.5]སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང་། བྱམས་པའི་སྟོབས་སྔོན་དུ་འགྲོ་བ་དང་། ཟབ་མོའི་ཆོས་ལ་བཟོད་པ་སྔོན་དུ་འགྲོ་བ་དང་། རྒྱ་ཆེན་པོ་ལ་མོས་པ་སྔོན་དུ་འགྲོ་བ་དང་། མི་ཤེས་པ་བསལ་བ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་ [177b.6]རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་བྱ་བ་ [177b.7]ཅི་ཡོད་སྙམ་པ་སྔོན་དུ་འགྲོ་བ་དང་། དགེ་བའི་ལུས་དང་། ངག་དང་། ཡིད་མངོན་པར་སྒྲུབ་པ་ལ་རྗེས་སུ་ཡི་རང་བ་སྔོན་དུ་འགྲོ་བ་དང་། ཞུམ་པ་མེད་པ་སྔོན་དུ་འགྲོ་བ་དང་། ཕྱིར་མི་ལྡོག་པའི་ས་བསྡུ་བ་འཐོབ་པར་བྱ་བ་སྔོན་དུ་འགྲོ་བ་དང་། ཡང་དག་པའི་རྩོལ་བ་སྔོན་དུ་འགྲོ་ [178a] [178a.1]བ་དང་། དྲན་པ་ཉེ་བར་གཞག་པ་སྔོན་དུ་འགྲོ་བ་དང་། ཉོན་མོངས་པའི་དགྲ་གདུལ་བ་སྔོན་དུ་འགྲོ་བ་དང་། ཆོས་ཐམས་ཅད་ཀྱིས་དབེན་པ་སྔོན་དུ་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང་། ཐམས་ཅད་མཁྱེན་པའི་ཡེ་ཤེས་ཡང་ [178a.2]དག་པར་སྒྲུབ་པ་སྔོན་དུ་འགྲོ་བ་སྟེ། རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ [178a.3]ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དགེ་བའི་ཆོས་ལ་གནས་པ་སྔོན་དུ་འགྲོ་བ་དང་། ཏིང་ངེ་འཛིན་སྔོན་དུ་འགྲོ་བ་དང་། སྙོམས་པར་འཇུག་པ་སྔོན་དུ་འགྲོ་བ་དང་། ཡང་དག་པར་རྫོགས་པའི་བྱང་ཆུབ་སྔོན་དུ་འགྲོ་བ་དང་། བསམ་གཏན་དང་རྣམ་པར་ཐར་པ་སྔོན་ [178a.4]དུ་འགྲོ་བ་དང་། ཏིང་ངེ་འཛིན་གྱི་དབང་པོ་སྔོན་དུ་འགྲོ་བ་དང་། ཏིང་ངེ་འཛིན་གྱི་སྟོབས་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བ་སྔོན་དུ་འགྲོ་བ་དང་། ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པར་བྱེད་པ་སྔོན་དུ་འགྲོ་བ་དང་། དམ་པའི་ཆོས་ཡོངས་སུ་ [178a.5]བསྲུང་བ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། [178a.6]བཅུ་གང་ཞེ་ན། འདི་ལྟ་སྟེ། ཕུང་པོ་ལ་མཁས་པ་སྔོན་དུ་འགྲོ་བ་དང་། ཁམས་ལ་མཁས་པ་སྔོན་དུ་འགྲོ་བ་དང་། སྐྱེ་མཆེད་ལ་མཁས་པ་སྔོན་དུ་འགྲོ་བ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་སྔོན་དུ་འགྲོ་བ་དང་། བདེན་པ་ལ་མཁས་པ་སྔོན་དུ་འགྲོ་བ་དང་། [178a.7]ལྟ་བར་གྱུར་པ་ཐམས་ཅད་བསལ་བ་སྔོན་དུ་འགྲོ་བ་དང་། ཤེས་རབ་ཀྱི་དབང་པོ་སྔོན་དུ་འགྲོ་བ་དང་། མི་སྐྱེ་བའི་ཆོས་ལ་བཟོད་པ་སྔོན་དུ་འགྲོ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བ་སྔོན་དུ་འགྲོ་བ་དང་། སྒྲིབ་པ་མེད་པའི་ཡེ་ཤེས་མཐོང་བ་སྔོན་དུ་ [178b] [178b.1]འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། [178b.2]བཅུ་གང་ཞེ་ན། འདི་ལྟ་སྟེ། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་སྔོན་དུ་འགྲོ་བ་དང་། སེམས་ཅན་གྱི་རྟེན་སྔོན་དུ་འགྲོ་བ་དང་། བྱམས་པ་དང་སྙིང་རྗེ་སྔོན་དུ་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བ་ལ་མི་སྐྱོ་བ་སྔོན་དུ་འགྲོ་བ་དང་། སངས་རྒྱས་ཀྱི་ [178b.3]ཆོས་ཐམས་ཅད་ལ་འཇུག་པ་སྔོན་དུ་འགྲོ་བ་དང་། ཁྱད་པར་གྱི་ཡེ་ཤེས་མཐོང་བ་ཁོང་དུ་ཆུད་པ་སྔོན་དུ་འགྲོ་བ་དང་། ཕ་རོལ་ཏུ་ཕྱིན་པ་ཡོངས་སུ་བྱང་བར་བྱ་བ་ཡོངས་སུ་སྨིན་པ་སྔོན་དུ་འགྲོ་བ་དང་། དངོས་པོ་ཇི་ལྟ་བ་བཞིན་དུ་ཡོངས་སུ་རྟོག་པ་སྔོན་དུ་འགྲོ་བ་དང་། སེམས་ཀྱི་ [178b.4]སྟོབས་ཉེ་བར་སྒྲུབ་པ་སྔོན་དུ་འགྲོ་བ་དང་། ཕྱིར་མི་ལྡོག་པའི་ས་ཡོངས་སུ་ཐོབ་པར་བྱེད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་ [178b.5]དཔའ་རྣམས་ཀྱི་སྨོན་ལམ་གྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་ཉོན་མོངས་པའི་ཐིབས་པོ་ཉེ་བར་ [178b.6]རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་དབང་པོ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་པ་དང་མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་པ་དང་། [178b.7]ལྷག་པའི་བསམ་པ་དང་མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། འཇིག་རྟེན་གྱི་ཁམས་ཐ་དད་པ་དང་ཁམས་གསུམ་པོ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་པ་དང་བག་ལ་ཉལ་ཐིབས་པོ་ཉེ་བར་རྒྱུ་བ་ཤེས་ [179a] [179a.1]པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཕུང་པོ་གསུམ་དུ་རྣམ་པར་གཞག་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། དབང་པོ་མི་སྐྱོ་ [179a.2]བའི་སེམས་ཅན་ཡོངས་སུ་སྨིན་པར་བྱ་བ་ཤེས་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཕ་རོལ་ཏུ་ཕྱིན་ [179a.3]པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་གཟོད་མ་ནས་འབྱུང་བ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་གཟོད་མ་ནས་མཚན་ཉིད་མེད་པ་སྔོན་དུ་འགྲོ་བ་དང་། ཆོས་ཐམས་ཅད་གཟོད་མ་ནས་སྐྱེ་བ་མེད་པ་སྔོན་དུ་འགྲོ་བ་ [179a.4]དང་། ཆོས་ཐམས་ཅད་གཟོད་མ་ནས་ཡོད་པ་མ་ཡིན་པ་སྔོན་དུ་འགྲོ་བ་དང་། ཆོས་ཐམས་ཅད་གཟོད་མ་ནས་ཆགས་པ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་འཇུག་པ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་ལྡོག་པ་མེད་པ་སྔོན་དུ་འགྲོ་བ་དང་། ཆོས་ཐམས་ [179a.5]ཅད་དངོས་པོ་མེད་པའི་ངོ་བོ་ཉིད་སྔོན་དུ་འགྲོ་བ་དང་། ཆོས་ཐམས་ཅད་ཀྱི་ཐོག་མ་དང་བར་དང་ཐ་མ་མཉམ་པ་ཉིད་སྔོན་དུ་འགྲོ་བ་དང་། ཆོས་ཐམས་ཅད་དེ་བཞིན་ཉིད་ལ་འཇུག་པ་རྟོག་པ་དང་རྣམ་པར་རྟོག་པ་མེད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ [179a.6]ཀྱི་སྟོབས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་རྣམ་པར་དབྱེ་བ་ལ་ཤིན་ [179a.7]ཏུ་རྣམ་པར་བརྟགས་པ་སྔོན་དུ་འགྲོ་བ་དང་། དཀར་པོའི་ཆོས་ཤིན་ཏུ་ཡོངས་སུ་རྫོགས་པ་སྔོན་དུ་འགྲོ་བ་དང་། བྱང་ཆུབ་ཀྱི་ཚོགས་བསགས་པ་དཔག་ཏུ་མེད་པ་སྔོན་དུ་འགྲོ་བ་དང་། བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ཡོངས་སུ་གཟུང་བ་སྔོན་དུ་འགྲོ་བ་དང་། སྙིང་ [179b] [179b.1]རྗེ་ཆེན་པོ་ཡངས་པ་ཁོང་དུ་ཆུད་པར་བྱ་བ་སྔོན་དུ་འགྲོ་བ་དང་། འཇིག་རྟེན་གྱི་ཁམས་རྣམ་པར་དབྱེ་བའི་རིམ་པ་ཤེས་པ་སྔོན་དུ་འགྲོ་བ་དང་། སེམས་ཅན་གྱི་ཁམས་དང་ཉོན་མོངས་པའི་སྤྱོད་པ་ལ་འཇུག་པ་སྔོན་དུ་འགྲོ་བ་དང་། དེ་བཞིན་གཤེགས་པའི་སྤྱོད་ཡུལ་ལ་འཇུག་ [179b.2]ཅིང་རྗེས་སུ་འགྲོ་བ་ཤེས་པ་ཡིད་ལ་བྱེད་པ་སྔོན་དུ་འགྲོ་བ་དང་། སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ལ་ལྷག་པར་དམིགས་ཤིང་ཀུན་ཤེས་པར་བྱ་བ་སྔོན་དུ་འགྲོ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ [179b.3]ཡེ་ཤེས་ལ་དབང་བསྐུར་བའི་ས་ཐོབ་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །དེ་ལ་ཕ་རོལ་ཏུ་ཕྱིན་པའི་དོན་གང་ཞེ་ན། སྤྱོད་པའི་ཁྱད་པར་ཡོངས་སུ་རྫོགས་པར་བྱེད་པའི་ [179b.4]དོན་ནི་ཕ་རོལ་ཏུ་ཕྱིན་པའི་དོན་ནོ། །ཡེ་ཤེས་ཟབ་ཅིང་རྒྱ་ཆེ་བ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །འདུས་བྱས་དང་འདུས་མ་བྱས་ལ་ཆགས་པ་མེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །འཁོར་བའི་ཉེས་པ་ཇི་ལྟ་བ་བཞིན་ཏུ་རྟོགས་པའི་དོན་ནི་ [179b.5]ཕ་རོལ་ཏུ་ཕྱིན་པའི་དོན་ནོ། །སྐྱེ་བོ་མི་མཁས་པ་རྣམས་ཁོང་དུ་ཆུད་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཀྱི་མཛོད་ཟད་མི་ཤེས་པ་ཡང་དག་པར་སྟོན་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྒྲིབ་པ་མེད་པའི་རྣམ་པར་ཐར་པ་ཡོངས་སུ་རྫོགས་པར་བྱེད་ [179b.6]པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སེམས་ཅན་གྱི་ཁམས་རབ་ཏུ་ཤེས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྦྱིན་པ་མཉམ་པ་ཉིད་རྗེས་སུ་རྟོགས་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཚུལ་ཁྲིམས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ [179b.7]ནི་ཕ་རོལ་ཏུ་ཕྱིན་པའི་དོན་ནོ། །བཟོད་པ་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བརྩོན་འགྲུས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བསམ་གཏན་མཉམ་པ་ཉིད་ཡོངས་སུ་རྫོགས་ [180a] [180a.1]པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་མཁས་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཐམས་ཅད་རབ་ཏུ་ཤེས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །མི་ [180a.2]སྐྱེ་བའི་ཆོས་ལ་བཟོད་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཕྱིར་མི་ལྡོག་པའི་ས་ཡང་དག་པར་ཐོབ་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སངས་རྒྱས་ཀྱི་ཞིང་ཡོངས་སུ་སྦྱང་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སེམས་ [180a.3]ཅན་ཐམས་ཅད་ཡོངས་སུ་སྨིན་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བྱང་ཆུབ་ཀྱི་སྙིང་པོ་ལ་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བདུད་ཐམས་ཅད་གདུལ་བར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །འཁོར་ [180a.4]བ་དང་མྱ་ངན་ལས་འདས་པ་གཉིས་སུ་མེད་པར་སྟོན་ཅིང་སྒྲོལ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཡོན་ཏན་ཐམས་ཅད་ཀྱི་ཕ་རོལ་དུ་འགྲོ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཕས་ཀྱི་རྒོལ་བ་ཐམས་ཅད་ཚར་གཅད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སྟོབས་ [180a.5]བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་ཡོངས་སུ་རྫོགས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །བླ་ན་མེད་པ་ཡང་དག་པར་ [180a.6]རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། །ཆོས་ཀྱི་འཁོར་ལོ་རྣམ་པ་བཅུ་གཉིས་སུ་སྐོར་བའི་དོན་ནི་ཕ་རོལ་ཏུ་ཕྱིན་པའི་དོན་ནོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་ [180a.7]སེམས་དཔའི་ས་དང་པོའི་སྔ་ལྟས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་གཉིས་པའི་སྔ་ [180b] [180b.1]ལྟས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལག་མཐིལ་ལྟ་བུར་གྱུར་པ་ལ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་ [180b.2]གསུམ་པའི་སྔ་ལྟས་ནི་བདག་ཉིད་དཔའ་ཞིང་ལག་ཆ་དང་གོ་ཆ་སྲ་བ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཞི་པའི་སྔ་ལྟས་ནི་ཕྱོགས་བཞི་ནས་རླུང་གི་ [180b.3]དཀྱིལ་འཁོར་བཞིས་ཐམས་ཅད་དང་ལྡན་པའི་སའི་དཀྱིལ་འཁོར་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་དུ་འཐོར་བར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་ལྔ་པའི་སྔ་ལྟས་ནི་རྒྱན་ཐམས་ཅད་ཀྱིས་བརྒྱན་པའི་ [180b.4]བུད་མེད་ཀྱིས་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དྲུག་པའི་སྔ་ལྟས་ནི་རྫིང་ཐེམ་སྐས་བཞི་དང་ལྡན་པ་གསེར་གྱི་བྱེ་མ་བདལ་བ་རྙོག་པ་མེད་ཅིང་དང་ལ་ཡན་ [180b.5]ལག་བརྒྱད་དང་ལྡན་པའི་ཆུས་ཡོངས་སུ་གང་བ་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོས་བརྒྱན་པའི་ཆུ་མཐོང་སྟེ། དེ་ལ་བདག་ཉིད་རྩེ་དགའ་ཡོངས་སུ་སྤྱོད་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་ [180b.6]སེམས་དཔའི་ས་བདུན་པའི་སྔ་ལྟས་ནི་ཕྱོགས་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ། དེ་ནས་བདག་ཉིད་མ་རྨས་མ་ཉམས་པར་སླར་ལྡོག་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ [180b.7]ཆུབ་སེམས་དཔའི་ས་བརྒྱད་པའི་སྔ་ལྟས་ནི་ཕྲག་པ་གཉིས་ན་{རི་དགས་,རི་དྭགས་}ཀྱི་རྒྱལ་པོ་སེང་གེ་རལ་པ་ཅན་ཅོད་པན་ཐོགས་པ་གཅན་གཟན་ཕྲ་མོ་ཐམས་ཅད་སྐྲག་པར་བྱེད་ཅིང་འདུག་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ [181a] [181a.1]ཆུབ་སེམས་དཔའི་ས་དགུ་པའི་སྔ་ལྟས་ནི་འཁོར་ལོས་སྒྱུར་བའི་རྒྱལ་པོ་མཐོང་སྟེ། སྐྱེ་བོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ལ་མགོའི་སྟེང་ན་རིན་པོ་ཆེ་སྣ་ཚོགས་ཀྱིས་སྤྲས་པའི་གདུགས་དཀར་པོ་འཛིན་པར་ [181a.2]མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཅུ་པའི་སྔ་ལྟས་ནི་དེ་བཞིན་གཤེགས་པའི་སྐུ་མཐོང་སྟེ། ཁ་དོག་གསེར་ལྟ་བུ་འོད་འདོམ་གང་བ་ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་ [181a.3]བསྐོར་ཅིང་མདུན་གྱིས་བལྟ་ནས་ཆོས་སྟོན་པ་མཐོང་སྟེ། རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་བཅུ་པོའི་སྔ་ལྟས་ཡིན་ནོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ས་དང་པོ་ལ་གནས་ [181a.4]པའི་བྱང་ཆུབ་སེམས་དཔའ་ནི་སྦྱིན་པའི་ཕ་རོལ་ཏུ་ཕྱིན་པ་གནོན་ཏོ། །བྱང་ཆུབ་སེམས་དཔའི་ས་གཉིས་པ་ལ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་གསུམ་པ་ལ་ནི་བཟོད་པའི་ཕ་རོལ་ཏུ་ཕྱིན་པ་གནོན་ཏོ། །ས་བཞི་པ་ལ་ནི་བརྩོན་འགྲུས་ཀྱི་ཕ་རོལ་ཏུ་ [181a.5]ཕྱིན་པ་གནོན་ཏོ། །ས་ལྔ་པ་ལ་ནི་བསམ་གཏན་གྱི་ཕ་རོལ་ཏུ་ཕྱིན་པ་གནོན་ཏོ། །ས་དྲུག་པ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་བདུན་པ་ལ་ནི་ཐབས་ལ་མཁས་པའི་ཕ་རོལ་ཏུ་ཕྱིན་པ་གནོན་ཏོ། །ས་བརྒྱད་པ་ལ་ནི་སྨོན་ལམ་གྱི་ཕ་རོལ་ཏུ་ཕྱིན་པ་ [181a.6]གནོན་ཏོ། །ས་དགུ་པ་ལ་ནི་སྟོབས་ཀྱི་ཕ་རོལ་ཏུ་ཕྱིན་པ་གནོན་ཏོ། །ས་བཅུ་པ་ལ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་གནོན་ཏོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་བསྐྱེད་པ་དང་པོ་ནི་རིན་པོ་ཆེ་ཡང་དག་པར་འཕགས་པའི་ཏིང་ངེ་ [181a.7]འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གཉིས་པ་ནི་གནས་པ་མེད་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གསུམ་པ་ནི་རབ་ཏུ་མི་གཡོ་བའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཞི་པ་ནི་ཕྱིར་ [181b] [181b.1]མི་ལྡོག་པའི་ཏིང་ངེ་འཛིན་གྱི་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་ལྔ་པ་ནི་རིན་པོ་ཆེའི་མེ་ཏོག་གི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་དྲུག་པ་ནི་ཉི་མའི་འོད་ཀྱི་གཟི་བརྗིད་ཀྱི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་ [181b.2]བདུན་པ་ནི་དོན་ཐམས་ཅད་གྲུབ་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བརྒྱད་པ་ནི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་དགུ་པ་ནི་ཡེ་ཤེས་སྒྲོན་མའི་ཏིང་ངེ་འཛིན་གྱིས་ [181b.3]ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཅུ་པ་ནི་དཔའ་བར་འགྲོ་བའི་ཏིང་ངེ་འཛིན་གྱིས་ཡོངས་སུ་བཟུང་ནས་སྐྱེ་སྟེ། རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་ [181b.4]དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དང་པོ་ལ་ཁྱད་པར་གྱི་བྱིན་གྱི་རླབས་ཞེས་བྱ་བའི་གཟུངས་སྐྱེའོ། །ས་གཉིས་པ་ལ་གཞན་གྱིས་མི་ཐུབ་པ་ཞེས་བྱ་བའི་གཟུངས་སྐྱེའོ། །ས་གསུམ་པ་ལ་རབ་ཏུ་གནས་པ་ཞེས་བྱ་བའི་གཟུངས་སྐྱེའོ། །ས་བཞི་ [181b.5]པ་ལ་གདུལ་དཀའ་བ་ཞེས་བྱ་བའི་གཟུངས་སྐྱེའོ། །ས་ལྔ་པ་ལ་ཡོན་ཏན་སྣ་ཚོགས་ཞེས་བྱ་བའི་གཟུངས་སྐྱེའོ། །ས་དྲུག་པ་ལ་ཡེ་ཤེས་ཀྱི་དཀྱིལ་འཁོར་གྱི་སྒྲོན་མ་ཞེས་བྱ་བའི་གཟུངས་སྐྱེའོ། །ས་བདུན་པ་ལ་ཁྱད་པར་དུ་འཕགས་པ་ཞེས་བྱ་བའི་གཟུངས་སྐྱེའོ། ། [181b.6]ས་བརྒྱད་པ་ལ་རྙོག་པ་མེད་པའི་རྟོག་པ་ཞེས་བྱ་བའི་གཟུངས་སྐྱེའོ། །ས་དགུ་པ་ལ་སྒོ་མཐའ་ཡས་པའི་རྒྱན་ཅེས་བྱ་བའི་གཟུངས་སྐྱེའོ། །ས་བཅུ་པ་ལ་ཟད་མི་ཤེས་པའི་ཟ་མ་ཏོག་ཅེས་བྱ་བའི་གཟུངས་སྐྱེའོ། །དེ་ནས་དེའི་ཚེ་བཅོམ་ལྡན་འདས་ལ་ལྷའི་བུ་སེང་གེའི་ [181b.7]ཏོག་གི་འོད་ཟེར་སྣང་བ་ཐོགས་པ་མེད་པ་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་མ་འདི་ལྟར་ཆོས་ཀྱི་རྣམ་གྲངས་འདིའི་ནང་དུ་ཐམས་ཅད་རྫོགས་ཤིང་སངས་རྒྱས་ཀྱི་ཆོས་དང་ཡོན་ཏན་ཐམས་ཅད་སྒྲུབ་པར་གྱུར་པ་ངོ་མཚར་ཏོ། །བཅོམ་ལྡན་འདས་ཀྱིས་ [182a] [182a.1]བཀའ་སྩལ་པ། ལྷའི་བུ་དེ་ནི་ཇི་སྐད་ཟེར་བ་དེ་བཞིན་ཏེ། ལྷའི་བུ་ཆོས་ཀྱི་རྣམ་གྲངས་འདི་ཐོས་མ་ཐག་ཏུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུའམ། [182a.2]རིགས་ཀྱི་བུ་མོ་ཕྱིར་མི་ལྡོག་པའི་དགེ་བའི་རྩ་བ་ཡོངས་སུ་སྨིན་པ་རྣམས་ཀྱི་ཕྱག་རྒྱ་ནི་འདི་ལྟ་སྟེ། ཆོས་ཀྱི་རྣམ་གྲངས་འདི་ཐོས་པ་ཡིན་ཏེ། ཆོས་ཀྱི་རྣམ་གྲངས་འདི་ནི་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲག་པར་མི་འགྱུར་རོ། །རིགས་ཀྱི་བུ་ཆོས་ཀྱི་རྣམ་གྲངས་ [182a.3]འདི་ཐོས་པ་ཙམ་གྱིས་རིགས་ཀྱི་བུ་འམ། རིགས་ཀྱི་བུ་མོ་དག་ལྷག་པའི་བསམ་པ་ཡོངས་སུ་དག་ཅིང་སངས་རྒྱས་མཐོང་བ་དང་མི་འབྲལ་བར་འགྱུར་རོ། །དམ་པའི་ཆོས་ཉན་པ་དང་མི་འབྲལ་བར་འགྱུར། དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར། [182a.4]རྒྱ་མཚོའི་ཕྱག་རྒྱ་མི་ཟད་པ་མངོན་པར་སྒྲུབ་པའི་གཟུངས་དང་མི་འབྲལ་བར་འགྱུར། སེམས་ཅན་གྱི་བསམ་པ་དང་སྤྱོད་པ་དང་སྒྲ་ལ་འཇུག་པའི་གཟུངས་དང་མི་འབྲལ་བར་འགྱུར། ཉི་མའི་ཏོག་སྣང་བའི་གཟུངས་དང་མི་འབྲལ་བར་འགྱུར། ཟླ་བའི་ཏོག་སྣང་བའི་གཟུངས་ [182a.5]དང་མི་འབྲལ་བར་འགྱུར། ཀུན་ནས་ལྡང་བ་ཐམས་ཅད་རྣམ་པར་གནོན་པ་སྒྲུབ་པའི་གཟུངས་དང་མི་འབྲལ་བར་འགྱུར། རྡོ་རྗེ་ལྟར་སྲ་ཞིང་བརྟན་པའི་རི་རྣམ་པར་འཇོམས་པའི་གཟུངས་དང་མི་འབྲལ་བར་འགྱུར། བརྗོད་དུ་མེད་པའི་དོན་བསྟན་པ་ལ་ཡང་དག་པར་ [182a.6]གཞོལ་བའི་གཟུངས་དང་མི་འབྲལ་བར་འགྱུར། །ཚིག་དང་སྤྱོད་པ་དང་སྒྲ་ཐམས་ཅད་ལ་འཇུག་པའི་གཟུངས་དང་མི་འབྲལ་བར་འགྱུར། ནམ་མཁའི་དཀྱིལ་འཁོར་དྲི་མ་མེད་པ་སྒྲུབ་པའི་ཕྱག་རྒྱས་བཏབ་པའི་གཟུངས་དང་མི་འབྲལ་བར་འགྱུར། སངས་རྒྱས་ཀྱི་སྐུ་ [182a.7]མཐའ་ཡས་པ་ཡོངས་སུ་རྫོགས་པ་སྒྲུབ་པའི་གཟུངས་དང་མི་འབྲལ་བར་འགྱུར་རོ། །ལྷའི་བུ་གཟུངས་འདི་དག་ཐོབ་པས་བྱང་ཆུབ་སེམས་དཔའ་རྣམས་ཕྱོགས་བཅུའི་སངས་རྒྱས་ཀྱི་ཞིང་རྣམས་སུ་སངས་རྒྱས་ཀྱི་སྐུ་མངོན་པར་སྤྲུལ་ནས་ཆོས་སྟོན་ཏེ། ཆོས་ཉིད་ལས་ [182b] [182b.1]ཀྱང་མི་གཡོ་ལ་འགྲོ་བ་ཡང་མེད། འོང་བ་ཡང་མེད་དོ། །སེམས་ཅན་རྣམས་ཡོངས་སུ་སྨིན་པར་བྱེད་ཀྱང་སེམས་ཅན་དུ་དམིགས་པ་ཡང་མེད་དོ། །ཆོས་སྟོན་ཀྱང་ཡི་གེ་མཉམ་པ་ཉིད་ལས་གཡོ་བ་མེད་དོ། །འཆི་འཕོ་དང་སྐྱེ་བ་སྟོན་ཀྱང་འཕོ་བ་ཡང་མེད། སྐྱེ་ [182b.2]བ་ཡང་མེད་དོ། །ཆོས་ཐམས་ཅད་ལ་རྣམ་པར་རྟོག་པ་མེད་པའི་ཕྱིར་འདུ་བྱེད་རྣམས་གང་དུ་འགྲོ་བར་ཡང་མི་འགྱུར། གང་ནས་འོང་བར་ཡང་མི་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་ [182b.3]པར་གྱུར་ཏོ། །སེམས་ཅན་ཚད་མེད་པ་རྣམས་ཀྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་། [182b.4]བྱང་ཆུབ་སེམས་དཔའི་དེ་དག་དང་། དགེ་སློང་དེ་དག་དང་། ལྷའི་བུ་སེང་གེའི་ཏོག་གི་འོད་ཟེར་སྣང་བ་ཐོགས་པ་མེད་པ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ [182b.5]དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བློ་གྲོས་མི་ཟད་པས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་ལྔ་པ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ [182b.6]ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།{D90}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་དྲུག་པ་སྟེ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བདུན་བརྒྱ་པ་ལུང་ [182b.7]བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་སཔྟ་ཤཱ་ཏི་ཀཱ་ནཱ་མ་པྲ་ཛྙཱ་པཱ་ར་མི་ཏཱ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བདུན་བརྒྱ་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ [183a] [183a.1]ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཐམ་པའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། ། [183a.2]བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ས་ཡ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་ལ་འདི་ལྟ་སྟེ། འཇམ་དཔལ་གཞོན་ནུར་གྱུར་པ་དང་། བྱམས་པ་དང་། སྤོབས་པ་ཐོགས་མེད་དང་། [183a.3]བརྩོན་པ་མི་འདོར་དང་། དེ་དག་ལ་སོགས་པ་བྱང་ཆུབ་སེམས་དཔའ་ས་ཡ་དང་ཡང་ཐབས་ཅིག་གོ །དེ་ནས་འཇམ་དཔལ་གཞོན་ནུར་གྱུར་པ་དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་སྐྱ་རེང་ཤར་བའི་དུས་ཀྱི་ཚེ་རང་གི་གནས་ [183a.4]ནས་བྱུང་སྟེ། དེ་བཞིན་གཤེགས་པའི་ཕོ་བྲང་གི་སྒོ་ག་ལ་བ་དེར་སོང་ནས་ཕྱིན་པ་དང་ཕོ་བྲང་གི་སྒོའི་ཕྱི་རོལ་ན་འདུག་གོ །དེ་ནས་ཚེ་དང་ལྡན་པ་ཤར་དྭ་ཏིའི་བུ་ཡང་བཅོམ་ལྡན་འདས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་རང་གི་གནས་ནས་བྱུང་ [183a.5]སྟེ། དེ་བཞིན་གཤེགས་པའི་ཕོ་བྲང་ག་ལ་བ་དེར་སོང་ངོ་། །དེ་ནས་ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་གསུས་པོ་ཆེ་དང་། དེ་དག་ [183a.6]ཐམས་ཅད་དང་། གཞན་ཡང་ཉན་ཐོས་ཆེན་པོ་རྣམས་རང་རང་གི་གནས་ནས་བྱུང་སྟེ་བཅོམ་ལྡན་འདས་ཀྱི་ཕོ་བྲང་ག་ལ་བ་དེར་དོང་ནས་ཕྱིན་པ་དང་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་ཉན་ཐོས་ཆེན་པོ་རྣམས་འོངས་ཤིང་ལྷགས་ཏེ་འདུས་པར་མཁྱེན་ནས། བདག་ [183a.7]གི་ཕོ་བྲང་ནས་བྱུང་སྟེ་ཕོ་བྲང་གི་ཕྱི་རོལ་ཕྱོགས་གཅིག་ཏུ་གདན་བཏིང་བ་ལ་བཞུགས་སོ། །བཞུགས་ནས་ཀྱང་བཅོམ་ལྡན་འདས་ཀྱིས་མཁྱེན་བཞིན་དུ་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ། ཤ་ར་དྭ་ཏིའི་བུ་ཁྱོད་ཅིའི་ཕྱིར་ཞོགས་པས་འོངས་ཏེ་དེ་བཞིན་གཤེགས་པའི་ [183b] [183b.1]ཕོ་བྲང་གི་སྒོ་ན་འདུག །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་ཀྱི་ཐོག་མ་ཉིད་དུ་འཇམ་དཔལ་གཞོན་ནུར་གྱུར་པ་དེ་བཞིན་གཤེགས་པའི་ཕོ་བྲང་གི་ཆབ་སྒོར་མཆིས་ [183b.2]སོ། །བདག་ནི་བཅོམ་ལྡན་འདས་ལ་བལྟ་བར་འཚལ་བའི་སླད་དུ་སླད་ཀྱིས་མཆིས་སོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་དེ་བཞིན་གཤེགས་པ་ལ་བལྟ་བ་དང་། ཕྱག་བྱ་བ་དང་། [183b.3]བསྙེན་བཀུར་བྱ་བའི་ཕྱིར་ཐམས་ཅད་ཀྱི་ཐོག་མ་ཉིད་དུ་དེ་བཞིན་གཤེགས་པའི་ཕོ་བྲང་གི་སྒོར་འདུག་པ་བདེན་ནམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས། [183b.4]བདེ་བར་གཤེགས་པ་དེ་དེ་ལྟ་ལགས་ཏེ། བདག་དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་ཐམས་ཅད་ཀྱི་ཐོག་མ་ཉིད་དུ་རང་གི་གནས་ནས་བྱུང་སྟེ། དེ་བཞིན་གཤེགས་པའི་ཕོ་བྲང་ག་ལ་བ་དེར་མཆིས་ནས་ཕྱོགས་གཅིག་ [183b.5]ཏུ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་བདག་ནི་དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བསམ་ངོམས་པའི་སླད་དུའོ། །བཅོམ་ལྡན་འདས་འདི་ལྟར་བདག་དེ་བཞིན་གཤེགས་པ་ལ་བལྟ་བ་དང་། ཕྱག་ [183b.6]བགྱི་བ་དང་། བསྙེན་བཀུར་བགྱི་བའི་སླད་དུ་མཆི་བ་དེ་ཡང་སེམས་ཅན་ཐམས་ཅད་ཀྱི་དོན་གྱི་སླད་དུ་སྟེ། བཅོམ་ལྡན་འདས་གལ་ཏེ་དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་ན་ཇི་ལྟར་བདག་གིས་མཐོང་བ་དང་། ཇི་ལྟར་བདག་ཕྱག་ [183b.7]བགྱིད་པ་དང་། ཇི་ལྟར་བདག་བསྙེན་བཀུར་བགྱིད་པ་དེ་ལྟར་བལྟ་བར་བགྱིའོ། །དེ་ལྟར་ཕྱག་བགྱིའོ། །དེ་ལྟར་བསྙེན་བཀུར་བགྱིའོ། །དེ་ལྟར་ན་དེ་བཞིན་གཤེགས་པ་མཐོང་བ་ནས་བསྙེན་བཀུར་བགྱིད་པའི་བར་དུ་འགྱུར་རོ། །བཅོམ་ལྡན་འདས་བདག་ནི་སེམས་ཅན་ཐམས་ [184a] [184a.1]ཅད་ཀྱི་སླད་དུ་དེ་བཞིན་གཤེགས་པ་ལ་བལྟ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་གཤེགས་པ་ལ་ཇི་ལྟར་བལྟ། འཇམ་དཔལ་གྱིས་གསོལ་པ། མི་དམིགས་པའི་ཚུལ་གྱིས་དེ་བཞིན་ཉིད་ཀྱི་རྣམ་པ་དང་། [184a.2]རྣམ་པར་མི་རྟོག་པའི་རྣམ་པར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་དུ་དེ་བཞིན་གཤེགས་པ་ལ་མི་སྐྱེ་བའི་རྣམ་པར་ལྟ་བ་ནས་དངོས་པོ་མ་མཆིས་པའི་རྣམ་པའི་བར་དུ་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ལ་ཀུན་ནས་འབྱུང་བ་མ་ [184a.3]མཆིས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་འབྱུང་བ་ཡང་མ་ལགས། འཇིག་པ་ཡང་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་ཡུལ་ན་མི་གནས། ཕྱོགས་ན་མི་གནས་ཏེ། དེ་ལྟར་དེ་ [184a.4]བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་འདས་པ་མ་ལགས། མ་འོངས་པ་མ་ལགས། ད་ལྟར་བྱུང་བ་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་གཉིས་ཀྱིས་རབ་ཏུ་ཕྱེ་བ་མ་ལགས། གཉིས་སུ་མ་མཆིས་ [184a.5]པས་རབ་ཏུ་ཕྱེ་བ་ཡང་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ཉིད་ནི་ཀུན་ནས་ཉོན་མོངས་པར་འགྱུར་བ་མ་ལགས། རྣམ་པར་བྱང་བར་འགྱུར་བ་མ་ལགས་ཏེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་བཞིན་ [184a.6]ཉིད་ནི་མི་སྐྱེ། མི་འགག་པ་སྟེ། དེ་ལྟར་དེ་བཞིན་གཤེགས་པ་ལ་བལྟ་བར་བགྱིའོ། །དེ་ལྟར་ན་དེ་བཞིན་གཤེགས་པ་མཐོང་བ་དང་། ཕྱག་བགྱིས་པ་དང་། བསྙེན་བཀུར་བགྱིས་པར་འགྱུར་རོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ [184a.7]ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་དེ་ལྟར་བལྟས་ན་ཅི་ཞིག་མཐོང་། འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་དེ་ལྟར་བལྟས་ན་ཅི་ཡང་མཐོང་བ་མ་མཆིས་སོ། །བཅོམ་ལྡན་འདས་དེ་བཞིན་དུ་བདག་གིས་ཆོས་གང་ [184b] [184b.1]ཡང་སྐྱེ་བ་ཡང་མ་མཐོང་། འགག་པ་ཡང་མ་མཐོང་ངོ་། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་དེ་བཞིན་གཤེགས་པ་ལ་དེ་ལྟར་མཐོང་བ་དང་། དེ་ལྟར་བསྙེན་བཀུར་བྱས་པ་གང་ [184b.2]ཡིན་པ་དང་། ཁྱོད་ཀྱིས་བྱམས་པ་ཆེན་པོས་སེམས་ཅན་ཐམས་ཅད་ལ་ཉེ་བར་གནས་ཀྱང་ཁྱོད་ལ་སེམས་ཅན་དུ་དམིགས་པ་དང་། སེམས་ཅན་དུ་མངོན་པར་ཞེན་པ་ཅི་ཡང་མེད་ཅིང་། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་ཕྱིར་ཞུགས་ཀྱང་ [184b.3]ཁྱོད་ལ་སེམས་ཅན་དུ་མངོན་པར་ཞེན་པ་གང་ཡང་མི་འབྱུང་བ་དང་། ཁྱོད་མི་དམིགས་པའི་ཚུལ་དང་། དངོས་པོ་མེད་པའི་ཚུལ་དང་། སྒྱིད་ལུག་པ་མེད་པའི་ཚུལ་གྱིས་སེམས་ཅན་ཐམས་ཅད་ཀྱི་ཆེད་དུ་གོ་ཆ་བགོས་པ་དེ་ནི་ཁྱོད་དཀའ་བ་བྱེད་པའོ། །དེ་སྐད་ཅེས་སྨྲས་ [184b.4]པ་དང་། འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་ཇི་སྐད་སྨྲས་པ་དེ་བཞིན་ཏེ། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བའི་ཕྱིར་གོ་ཆ་འདི་ཡང་བགོས་ཏེ། བདག་ལ་སེམས་ [184b.5]ཅན་དུ་དམིགས་པ་འམ། སེམས་ཅན་ལ་མངོན་པར་ཞེན་པ་གང་ཡང་མེད་དོ། །བཙུན་པ་ཤ་ར་དྭ་ཏིའི་བུ་གོ་ཆ་དེ་ནི་ཇི་ལྟར་བདག་གིས་སེམས་ཅན་གྱི་ཁམས་བྲི་བ་འམ་གང་བར་བྱ་ཞེས་དེ་ལྟར་མ་བགོས་སོ། །བཙུན་པ་ཤ་ར་དྭ་ཏིའི་བུ་ཡོངས་སུ་བརྟག་པ་ཉེ་བར་ [184b.6]བཟུང་སྟེ། གལ་ཏེ་སངས་རྒྱས་ཀྱི་ཞིང་རེ་རེ་ན་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་རྣམས་བཞུགས་ཤིང་དེ་བཞིན་གཤེགས་པ་དེ་དག་སོ་སོ་ནས་ཉིན་མཚན་དུ་ཆོས་སྟོན་ཏེ། གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་བཞུགས་པར་གྱུར་ལ། [184b.7]གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་རེ་རེས་སེམས་ཅན་ཇི་སྙེད་བཏུལ་བ་དེ་སྙེད་ཀྱི་སེམས་ཅན་དེ་བཞིན་གཤེགས་པ་རེ་རེས་ཆོས་བསྟན་པ་རེ་རེས་བཏུལ་བར་གྱུར་དུ་ཟིན་ཀྱང་སེམས་ཅན་གྱི་ཁམས་ལ་བྲི་བའམ་གང་ [185a] [185a.1]བར་མངོན་པ་མེད་དོ། །དེ་ཅིའི་ཕྱིར་ཞེ་ན། སེམས་ཅན་དབེན་པ་དང་། སེམས་ཅན་སེམས་ཅན་མ་ཡིན་པའི་ཕྱིར་ཏེ། བཙུན་པ་ཤ་ར་དྭ་ཏིའི་བུ་སེམས་ཅན་གྱི་ཁམས་ནི་བྲི་བ་འམ་གང་བར་མི་མངོན་ནོ། །དེ་སྐད་ཅེས་སྨྲས་པ་དང་། ཚེ་དང་ལྡན་ [185a.2]པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གལ་ཏེ་སེམས་ཅན་དབེན་པ་དང་། སེམས་ཅན་སེམས་ཅན་མ་ཡིན་པའི་ཕྱིར་སེམས་ཅན་གྱི་ཁམས་བྲི་བ་དང་གང་བར་མི་མངོན་ན། འོ་ན་བྱང་ཆུབ་མངོན་པར་རྫོགས་ [185a.3]པར་སངས་རྒྱས་ནས་སུ་ལ་ཆོས་སྟོན། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་གང་གི་ཚེ་སེམས་ཅན་ཤིན་ཏུ་མི་དམིགས་པ་དེའི་ཚེ་སུ་ཞིག་མངོན་པར་རྫོགས་པར་འཚང་ [185a.4]རྒྱ་སྟེ་སུ་ལ་ཆོས་བསྟན་པར་བྱ། དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་འདི་ལྟར་ཆོས་ཐམས་ཅད་ཤིན་ཏུ་མི་དམིགས་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གང་གི་ཚེ་ [185a.5]ཆོས་ཐམས་ཅད་ཤིན་ཏུ་མི་དམིགས་པ་དེའི་ཚེ་ཅི་སེམས་ཅན་དུ་ཡང་འདོགས་སམ། ཡང་གལ་ཏེ་འཇམ་དཔལ་ཁྱོད་ལ་འགའ་ཞིག་སེམས་ཅན་ཇི་སྙེད་ཡོད་ཅེས་དེ་སྐད་འདྲི་ན། དེ་ལ་ཁྱོད་ཀྱིས་ཇི་སྐད་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་སྐད་ [185a.6]འདྲི་བ་དེ་ལ་བདག་གིས་འདི་སྐད་དུ་སངས་རྒྱས་ཀྱི་ཆོས་ཇི་སྙེད་པ་དེ་སྙེད་དོ་ཞེས་བགྱིའོ། །བཅོམ་ལྡན་འདས་གལ་ཏེ་ཡང་སེམས་ཅན་གྱི་ཁམས་ཀྱི་ཚད་ཇི་ཙམ་ཞེས་འདྲི་ན། དེ་སྐད་འདྲི་བ་དེ་ལ་བདག་གིས་འདི་སྐད་དུ། སངས་རྒྱས་ཀྱི་ཡུལ་གྱི་ཚད་ཇི་ཙམ་པ་དེ་ཙམ་ [185a.7]མོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ལ་གལ་ཏེ་ཡང་ལ་ལ་ཞིག་འདི་སྐད་དུ་སེམས་ཅན་གྱི་ཁམས་གང་དུ་གཏོགས་ཤེས་འདྲི་ན། དེ་ལ་ཁྱོད་ཀྱིས་ཇི་སྐད་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་སྐད་འདྲི་བ་ [185b] [185b.1]དེ་ལ་བདག་གིས་འདི་སྐད་དུ་སྐྱེ་བ་མེད་པ་དང་། བསམ་གྱིས་མི་ཁྱབ་པ་གང་དུ་གཏོགས་པར་གཏོགས་སོ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གལ་ཏེ་ཡང་ལ་ལ་ཞིག་ཁྱོད་ལ་འདི་སྐད་དུ་སེམས་ཅན་གྱི་ཁམས་ཅི་ལ་གནས་ [185b.2]ཤེས་འདྲི་ན། དེ་ལ་ཁྱོད་ཀྱིས་ཇི་སྐད་བྱ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ་སྐྱེ་བ་མེད་པའི་ཁམས་ཅི་ལ་གནས་པ་དེ་ལ་སེམས་ཅན་གྱི་ཁམས་ཀྱང་གནས་སོ་ཞེས་བགྱིའོ། །བཅོམ་ལྡན་འདས་ཀྱིས་ [185b.3]བཀའ་སྩལ་པ། འཇམ་དཔལ་ཁྱོད་གང་གི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་དེའི་ཚེ་ཅི་ལ་གནས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ། འཇམ་དཔལ་གྱིས་གསོལ་པ། བཅོམ་ལྡན་འདས་གང་གི་ཚེ་བདག་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་དེའི་ཚེ་ [185b.4]མི་གནས་པར་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་མི་གནས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་དུ་ཡང་ཅི་ཡོད། འཇམ་དཔལ་གྱིས་གསོལ་པ། བཅོམ་ལྡན་འདས་གང་ཅི་ལ་ཡང་མི་ [185b.5]གནས་པ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་གང་གི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་དེའི་ཚེ་ཁྱོད་ཀྱི་དགེ་བའི་རྩ་བ་གང་འཕེལ་བའམ་འབྲི་བར་འགྱུར། འཇམ་དཔལ་གྱིས་གསོལ་པ། [185b.6]བཅོམ་ལྡན་འདས་དེའི་ཚེ་བདག་གི་དགེ་བའི་རྩ་བ་འཕེལ་བ་འམ་འབྲི་བར་འགྱུར་བ་ཅི་ཡང་མ་མཆིས་སོ། །བཅོམ་ལྡན་འདས་གང་ཡང་ཆོས་འགའ་ཞིག་འཕེལ་བ་འམ་འབྲི་བ་མཆིས་ན་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་མ་ལགས་ཏེ། བཅོམ་ལྡན་འདས་གང་ [185b.7]ཡང་ཆོས་འགའ་ཞིག་འཕེལ་བའི་སླད་དུ་འམ། འབྲི་བའི་སླད་དུ་ཉེ་བར་གནས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་མ་ལགས་པར་རིག་པར་བགྱིའོ། །བཅོམ་ལྡན་འདས་གང་སོ་སོའི་སྐྱེ་བོའི་ཆོས་རྣམས་ཀྱང་མི་སྤོང་ལ་སངས་རྒྱས་ཀྱི་ཆོས་རྣམས་ཀྱང་མི་ལེན་པ་དེ་ [186a] [186a.1]ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ནི་ཆོས་གང་སྤང་བ་འམ། བླང་བར་དམིགས་པས་ཆོས་གང་ལ་ཡང་མི་གནས་པའི་སླད་དུའོ། །བཅོམ་ལྡན་ [186a.2]འདས་གང་འཁོར་བའི་སྐྱོན་དུ་ཡང་མི་མཆི་ལ་མྱ་ངན་ལས་འདས་པའི་ཡོན་ཏན་དུ་ཡང་མི་མཆི་བ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་འཁོར་བ་ཉིད་ཀྱང་མི་མཐོང་ན་འཁོར་བའི་སྐྱོན་ལྟ་སྨོས་ཀྱང་ཅི་འཚལ་མྱ་ངན་ [186a.3]ལས་འདས་པ་ཉིད་ཀྱང་མི་དམིགས་ན་མྱ་ངན་ལས་འདས་པའི་ཡོན་ཏན་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་གང་ཆོས་གང་ལ་ཡང་བླང་བ་འམ་གཟུང་བའམ། དོར་བ་མ་མཆིས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གང་ [186a.4]ཆོས་གང་ལ་ཡང་འགྲིབ་པ་དང་འཕེལ་བ་མི་དམིགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེ་བ་མ་མཆིས་པ་ལ་འགྲིབ་པ་དང་། འཕེལ་བ་མ་མཆིས་པའི་སླད་དུའོ། །བཅོམ་ལྡན་འདས་གང་དེ་ལྟར་སྒོམ་ [186a.5]པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གང་ཆོས་གང་ལ་ཡང་སྐྱེ་བ་འམ་འགག་པར་མི་བགྱིད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གང་ཆོས་གང་ལ་ཡང་འགྲིབ་པའམ། རྒྱས་པར་མི་བགྱིད་ [186a.6]པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་ཏེ། བཅོམ་ལྡན་འདས་གང་དེ་ལྟར་སྒོམ་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་བསམ་གྱིས་མི་ཁྱབ་པའི་ཆོས་ལ་ཡང་མི་སྨོན་ཅིང་ཉི་ཚེ་བ་ལ་ཡང་མི་སྨོན་གྱི། [186a.7]བཅོམ་ལྡན་འདས་གང་ལ་སྨོན་པ་དང་། གང་གིས་སྨོན་པ་དེ་ཉིད་ཀྱང་མ་མཆིས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་ཏེ། བཅོམ་ལྡན་འདས་དེ་ལྟར་སྒོམ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ [186b] [186b.1]ཏུ་ཕྱིན་པ་སྒོམ་པ་ནི་འདི་ལྟར་ཆོས་འདི་དག་ནི་མཆོག་གོ །ཆོས་འདི་དག་ནི་ཐ་མའོ། །ཞེས་བགྱི་བར་ཉེ་བར་མི་གནས་ཤིང་། ཆོས་གང་དག་མཆོག་དང་ཐ་མར་འགྱུར་བའི་ཆོས་དེ་དག་ཀྱང་མི་དམིགས་ཏེ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པའི་རྣལ་འབྱོར་ [186b.2]ལ་བརྩོན་པའི་རིགས་ཀྱི་བུ་ནི་ཆོས་ཐམས་ཅད་མི་དམིགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ནི་ཆོས་གང་ཡང་མཆོག་ཅེ་འམ། ཐ་མ་ཞེས་མི་རྟོག་གོ །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེ་བ་མ་མཆིས་པ་ལ་མཆོག་གམ་ཐ་མ་ཞེས་བགྱི་ [186b.3]བ་གང་ཡང་མ་མཆིས་པའི་སླད་དུའོ། །དེ་བཞིན་ཉིད་དང་ཡང་དག་པའི་མཐའ་དང་། ཆོས་ཐམས་ཅད་ཀྱི་བར་ལ་ཡང་མཆོག་གམ་ཐ་མ་མ་མཆིས་ཏེ། བཅོམ་ལྡན་འདས་དེ་ལྟར་སྒོམ་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་སྐད་ཅེས་གསོལ་པ་དང་། [186b.4]བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སངས་རྒྱས་ཀྱི་ཆོས་རྣམས་མཆོག་མ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་གཟུང་དུ་མ་མཆིས་པའི་སླད་དུ་སངས་རྒྱས་ཀྱི་ཆོས་རྣམས་ནི་ [186b.5]མཆོག་ལགས་སོ། །བཅོམ་ལྡན་འདས་ཆོས་ཐམས་ཅད་སྟོང་པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། དེ་བཞིན་གཤེགས་པས་ཆོས་ཐམས་ཅད་སྟོང་ [186b.6]པར་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་སྟོང་པ་ཉིད་ལ་མཆོག་གམ་ཐ་མ་ཞེས་བགྱི་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ལེགས་སོ་ལེགས་སོ། །འཇམ་དཔལ་དེ་དེ་བཞིན་ [186b.7]ཏེ། ཇི་སྐད་སྨྲས་པ་བཞིན་ནོ། །འཇམ་དཔལ་སངས་རྒྱས་ཀྱི་ཆོས་རྣམས་བླ་ན་མེད་པ་མ་ཡིན་ནམ། འཇམ་དཔལ་གྱིས་གསོལ་པ། དེ་དེ་ལྟ་ལགས་ཏེ། སངས་རྒྱས་ཀྱི་ཆོས་རྣམས་ནི་བླ་ན་མ་མཆིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་ [187a] [187a.1]འདས་འདི་ལྟར་དེ་དག་ལ་ཆོས་ཅུང་ཟད་ཙམ་ཡང་མ་མཆིས་ཤིང་མི་དམིགས་ཏེ། དེ་བས་ན་སངས་རྒྱས་ཀྱི་ཆོས་དེ་དག་ནི་བླ་ན་མ་མཆིས་པའོ། །བཅོམ་ལྡན་འདས་གཞན་ཡང་གང་སངས་རྒྱས་ཀྱི་ཆོས་རྣམས་སྒྲུབ་པར་ཡང་མི་བགྱིད་ལ། སོ་ [187a.2]སོའི་སྐྱེ་བོའི་ཆོས་རྣམས་སྤོང་བར་ཡང་མི་བགྱིད་ཅིང་སངས་རྒྱས་ཀྱི་ཆོས་རྣམས་འདུལ་བ་ཡང་མ་ལགས་ལ། འཛིན་པ་འང་མ་ལགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་གང་ཆོས་གང་ལ་ཡང་མི་ [187a.3]སེམས་པ་རྣམ་པར་མི་རིག་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་སངས་རྒྱས་ཀྱི་ཆོས་རྣམས་ལ་མི་སེམས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་གིས་ [187a.4]སངས་རྒྱས་ཀྱི་ཆོས་རྣམས་ཡོངས་སུ་གྲུབ་པར་མཐོང་ན་ནི་བདག་སངས་རྒྱས་ཀྱི་ཆོས་རྣམས་ལ་སེམས་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་དག་ནི་སོ་སོའི་སྐྱེ་བོའི་ཆོས་སོ། །འདི་དག་ནི་ཉན་ཐོས་ཀྱི་ཆོས་སོ། །འདི་དག་ [187a.5]ནི་རང་སངས་རྒྱས་ཀྱི་ཆོས་སོ། །འདི་དག་ནི་ཡང་དག་པར་རྫོགས་པའི་སངས་རྒྱས་ཀྱི་ཆོས་སོ་ཞེས་ཆོས་གང་ལ་ཡང་རྣམ་པར་རྟོག་པས་ཉེ་བར་གནས་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པའི་རྣལ་འབྱོར་ལ་ [187a.6]བརྩོན་པའི་རིགས་ཀྱི་བུས་ཆོས་དེ་ཉིད་ཀྱང་མི་དམིགས་ཏེ། གང་ལ་ཆོས་དེ་དག་སོ་སོའི་སྐྱེ་བོའི་ཆོས་ཞེས་བརྗོད་པ་འམ། སློབ་པའི་ཆོས་ཞེས་བརྗོད་པ་འམ། མི་སློབ་པའི་ཆོས་ཞེས་བརྗོད་པ་འམ། རང་སངས་རྒྱས་ཀྱི་ཆོས་ཞེས་བརྗོད་པ་འམ། ཡང་དག་པར་རྫོགས་པའི་ [187a.7]སངས་རྒྱས་ཀྱི་ཆོས་ཞེས་བརྗོད་པ་ཡང་མཐའ་ལས་འདས་པའི་ཆོས་ཉིད་ལགས་པས་ཆོས་དེ་མི་དམིགས་ཤིང་ཡང་དག་པར་རྗེས་སུ་མི་མཐོང་བའི་སླད་དུའོ། །བཅོམ་ལྡན་འདས་དེ་ལྟར་སྒོམ་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ [187b] [187b.1]ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པའི་རྣལ་འབྱོར་ལ་བརྩོན་པའི་རིགས་ཀྱི་བུ་ནི་འདི་ལྟར་འདི་ནི་འདོད་པའི་ཁམས་སོ། །འདི་ནི་གཟུགས་ཀྱི་ཁམས་སོ། །འདི་ནི་གཟུགས་མེད་པའི་ཁམས་སོ་ཞེས་བགྱི་བ་ནས་འདི་ནི་འགོག་པའི་དབྱིངས་སོ་ཞེས་བགྱི་བའི་བར་དུ་ཡང་མི་ [187b.2]སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དེས་འགོག་པའི་ཆོས་གང་ལགས་པའི་ཆོས་དེ་གང་ཡང་མི་མཐོང་སྟེ། བཅོམ་ལྡན་འདས་དེ་ལྟར་སྒོམ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་རིག་པར་བགྱིའོ། །བཅོམ་ལྡན་འདས་གཞན་ཡང་གང་ཆོས་ [187b.3]གང་ལ་ཡང་ཕན་པའམ། གནོད་པར་ཡང་མི་བགྱིད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ནི་སངས་རྒྱས་ཀྱི་ཆོས་རྣམས་སྦྱིན་པར་བགྱིད་པ་ཡང་མ་ལགས། སོ་སོའི་སྐྱེ་བོའི་ཆོས་རྣམས་ [187b.4]གཅོད་པར་བགྱིད་པ་ཡང་མ་ལགས་སོ། །བཅོམ་ལྡན་འདས་གང་སོ་སོའི་སྐྱེ་བོའི་ཆོས་རྣམས་ཀྱང་མི་འགོག་ལ། སངས་རྒྱས་ཀྱི་ཆོས་རྣམས་ཀྱང་མི་འཐོབ་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ [187b.5]འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་ཆོས་ཟབ་མོ་འདི་ལྟ་བུ་འདི་བསྟན་པ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཀྱི་ཐེག་པ་པ་མངོན་པའི་ [187b.6]ང་རྒྱལ་ཅན་རྣམས་དང་། བྱང་ཆུབ་སེམས་དཔའི་ཐེག་པ་པ་དམིགས་པ་ཅན་རྣམས་ཡང་དག་པ་ཇི་ལྟ་བ་བཞིན་དུ་རྟོགས་པར་བྱ་བའི་ཕྱིར་རྒྱ་འདི་བཞག་གོ །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་བསྟན་པ་འདི་ཐོས་ [187b.7]ནས་མི་སྐྲག་མི་དངང་དངང་བར་མི་འགྱུར་བ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན། སངས་རྒྱས་གཅིག་ལ་དགེ་བའི་རྩ་བ་བསྐྱེད་པ་མ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་ [188a] [188a.1]སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱ་ཆེར་སྟོན་པར་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྤོབས་པར་གྱིས་ཤིག །འཇམ་དཔལ་གྱིས་གསོལ་པ། བཅོམ་ལྡན་ [188a.2]འདས་གང་ཆོས་གང་གི་གནས་པ་མི་དམིགས་པ་དང་། མི་གནས་པ་ཡང་མི་དམིགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་ཅིའི་སླད་དུ་ཞེ་ན། ཆོས་ཐམས་ཅད་ནི་མི་གནས་པའི་སླད་དུ་མི་དམིགས་པ་སྟེ། བཅོམ་ལྡན་འདས་གང་ཆོས་གང་ལ་ [188a.3]ཡང་ལྷག་པར་དམིགས་པའི་སླད་དུ་ཉེ་བར་མི་གནས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་རིག་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཆོས་ཐམས་ཅད་ནི་དམིགས་པ་མ་མཆིས་པའི་སླད་དུ་སྟེ། བཅོམ་ལྡན་འདས་དེ་ལྟར་སྒོམ་པ་ནི་ཤེས་རབ་ཀྱི་ཕ་ [188a.4]རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་གཞན་ཡང་གང་ལ་སངས་རྒྱས་ཀྱི་ཆོས་རྣམས་ཀྱང་མངོན་དུ་མི་འགྱུར་ན་རང་སངས་རྒྱས་ཀྱི་ཆོས་རྣམས་ལྟ་སྨོས་ཀྱང་ཅི་འཚལ། ཉན་ཐོས་ཀྱི་ཆོས་རྣམས་ཀྱང་མངོན་དུ་མི་འགྱུར་ན་སོ་སོའི་སྐྱེ་བོའི་ཆོས་རྣམས་ལྟ་སྨོས་ཀྱང་ [188a.5]ཅི་འཚལ་བ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་བལྟ་བར་བགྱིའོ། །བཅོམ་ལྡན་འདས་གཞན་ཡང་བསྒོམ་པ་གང་ལ་བརྟེན་ནས་སངས་རྒྱས་ཀྱི་ཆོས་རྣམས་བསམ་གྱིས་མི་ཁྱབ་པ་ལ་ཡང་སངས་རྒྱས་ཀྱི་ཆོས་རྣམས་བསམ་གྱིས་མི་ཁྱབ་པའོ་ཞེས་རྣམ་པར་མི་རྟོག་པ་ [188a.6]དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ལ་རྣམ་པར་མི་རྟོག་པར་བལྟ་བར་བགྱིའོ། །བཅོམ་ལྡན་འདས་གཞན་ [188a.7]ཡང་བསྒོམ་པ་གང་ལ་བརྟེན་ནས་མཐོང་བ་མ་མཆིས་པར་ཆོས་ཐམས་ཅད་སངས་རྒྱས་ཀྱི་ཆོས་སུ་མཐོང་བ་དང་། ཆོས་ཐམས་ཅད་བསམ་གྱིས་མི་ཁྱབ་པའི་ཆོས་སུ་མཐོང་བ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །རིགས་ཀྱི་བུའམ། རིགས་ཀྱི་བུ་ [188b] [188b.1]མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མི་སྐྲག་མི་དངང་དངང་བར་མི་འགྱུར་བ་དེ་དག་སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བགྱིས་པར་འགྱུར་རོ། །བཅོམ་ལྡན་འདས་གཞན་ཡང་གང་ཀུན་ནས་ཉོན་མོངས་པ་འམ་རྣམ་པར་བྱང་བའི་ཆོས་གང་ [188b.2]ཡང་ཡང་དག་པར་རྗེས་སུ་མི་མཐོང་བ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་ཏེ། བཅོམ་ལྡན་འདས་དེ་ལྟར་སྒོམ་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་དེ་ནི་སོ་སོའི་སྐྱེ་བོ་དང་། [188b.3]ཉན་ཐོས་དང་། རང་སངས་རྒྱས་དང་། ཡང་དག་པར་རྫོགས་པའི་སངས་རྒྱས་ཀྱི་བར་དུ་ཡང་ཐ་དད་དུ་མི་བགྱིད་པ་སྟེ། བཅོམ་ལྡན་འདས་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ [188b.4]ལ་བཀའ་སྩལ་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་ཇི་སྙེད་ཅིག་ལ་བསྙེན་བཀུར་བྱས། འཇམ་དཔལ་གྱིས་གསོལ་པ། བཅོམ་ལྡན་འདས་སྒྱུ་མའི་སྐྱེས་བུའི་སེམས་དང་སེམས་ལས་བྱུང་བ་ཇི་སྙེད་འགག་པ་དེ་སྙེད་ལ་སྟེ། བཅོམ་ལྡན་འདས་བདག་ [188b.5]གིས་དེ་བཞིན་གཤེགས་པ་དེ་སྙེད་ལ་བསྙེན་བཀུར་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་སངས་རྒྱས་ཀྱི་ཆོས་ལ་ཡང་དག་པར་མ་ཞུགས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་གང་སངས་རྒྱས་ཀྱི་ཆོས་ལ་ [188b.6]ཡང་དག་པར་ཞུགས་པའི་ཆོས་དེ་གང་ཡང་དམིགས་སུ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འོ་ན་སངས་རྒྱས་ཀྱི་ཆོས་དེ་དག་སུ་ལ་ཡོད། འཇམ་དཔལ་གྱིས་གསོལ་པ། བཅོམ་ལྡན་འདས་ཉིད་ལ་ཡང་སངས་རྒྱས་ཀྱི་ཆོས་ཞེས་ [188b.7]བགྱི་བ་དེ་དག་གི་མིང་ཡང་མ་མཆིས་ཏེ་མི་དམིགས་ན་གཞན་རྣམས་ལ་མཆིས་པར་འགྱུར་བ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཆགས་པ་མེད་པ་ཉིད་རྙེད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་བདག་ [189a] [189a.1]ཉིད་ཆགས་པ་མ་མཆིས་པ་ཉིད་ལགས་ན། བདག་གིས་ཡང་ཆགས་པ་མ་མཆིས་པ་ཉིད་འཐོབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཅི་བྱང་ཆུབ་ཀྱི་སྙིང་པོ་ལ་འདུག་གམ། འཇམ་དཔལ་གྱིས་གསོལ་པ། [189a.2]ཡང་དག་པའི་མཐའ་བཙན་བར་བགྱིས་ན། བཅོམ་ལྡན་འདས་ཉིད་ཀྱང་བྱང་ཆུབ་ཀྱི་སྙིང་པོ་ལ་མ་ཞུགས་ན་བདག་ལྟ་མཆིས་པར་ཇི་ལྟར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཡང་དག་པའི་མཐའ་ཞེས་བྱ་བ་དེ་གང་གི་ཚིག་{བླ་དགས,བླ་དྭགས}། འཇམ་དཔལ་ [189a.3]གྱིས་གསོལ་པ། བཅོམ་ལྡན་འདས་ཡང་དག་པའི་མཐའ་ཞེས་བགྱི་བ་དེ་ནི་འཇིག་ཚོགས་ཀྱི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་གསོལ་པ། བཅོམ་ལྡན་འདས་ [189a.4]འཇིག་ཚོགས་དེ་ནི་མ་མཆིས་པ་སྟེ། འཇིག་ཚོགས་མ་ལགས་པས་དེ་ནི་མི་འཕོ་ལ། འཕོ་བ་དང་བྲལ་བ་ཡང་མ་ལགས་ཏེ། དེའི་སླད་དུ་ཚོགས་འདི་ནི་འཇིག་ཚོགས་མ་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ [189a.5]ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ཏུ་ངེས་པར་འགྱུར་བ་ལགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ [189a.6]ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ལ་ཉེ་བར་གྱུར་པ་ལགས་སོ། །དེ་ཅིའི་སླད་དུ་ [189a.7]ཞེ་ན། བཅོམ་ལྡན་འདས་གང་ཆོས་དེ་དག་རྗེས་སུ་རྟོགས་པ་དེ་ཉིད་བྱང་ཆུབ་མཆོག་ལགས་པའི་སླད་དུའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་ [189b] [189b.1]རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་སངས་རྒྱས་ཉིད་དུ་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སངས་རྒྱས་ཞེས་བགྱི་བ་དེ་ནི་དོན་དམ་པར་ན་སྐྱེ་བ་མ་མཆིས་པའི་ཚིག་{བླ་དགས་,བླ་དྭགས་}ལགས་པའི་སླད་ [189b.2]དུའོ། །དེ་ནས་བཅོམ་ལྡན་འདས་ལ་སྲིང་མོ་དམིགས་པ་མེད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་དེ་དག་ནི་སོ་སོའི་ [189b.3]སྐྱེ་བོའི་ཆོས་རྣམས་དང་། ཉན་ཐོས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། ཡང་དག་པར་རྫོགས་པའི་སངས་རྒྱས་ཀྱི་ཆོས་རྣམས་ལ་ལྷག་པར་དམིགས་པར་མི་འགྱུར་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཆོས་ཐམས་ [189b.4]ཅད་ནི་མ་མཆིས་པའི་སླད་དུ་མི་དམིགས་པ་སྟེ། དེའི་སླད་དུ་དེ་དག་ལ་དམིགས་པ་མ་མཆིས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ། ཤ་ར་དྭ་ཏིའི་བུ་དེ་དེ་བཞིན་ནོ། །ཤ་ར་དྭ་ཏིའི་བུ་དེ་དེ་བཞིན་ཏེ། རིགས་ཀྱི་བུ་དང་། [189b.5]རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་བསྟན་པ་འདི་ཐོས་ནས་མོས་ཏེ། མི་སྐྲག་མི་དངང་དངང་བར་མི་འགྱུར་བ་དེ་དག་ནི་བྱང་ཆུབ་ཏུ་ངེས་པར་འགྱུར་རོ། །ཤ་ར་དྭ་ཏིའི་བུ་རིགས་ཀྱི་བུ་དང་། རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་ [189b.6]འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་ཞིང་སྤྱི་བོས་ལེན་པ་དེ་དག་ནི་ཕྱིར་མི་ལྡོག་པའི་ས་ལ་གནས་པ་ཡིན་པར་ཁྱོད་ཀྱིས་ཤེས་པར་གྱིས་ཤིག །ཤ་ར་དྭ་ཏིའི་བུ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་ [189b.7]དངང་བར་མི་འགྱུར་བ་དེ་དང་དེ་དག་ནི་སྦྱིན་བདག་དམ་པར་འགྱུར། སྦྱིན་བདག་ཆེན་པོར་འགྱུར། སྦྱིན་བདག་ཁྱད་པར་དུ་འཕགས་པར་འགྱུར་རོ། །ཤ་ར་དྭ་ཏིའི་བུ་དེ་དང་དེ་དག་ནི་ཚུལ་ཁྲིམས་ཕུན་སུམ་ཚོགས་པར་འགྱུར། ཚུལ་ཁྲིམས་དང་ལྡན་པའི་མཆོག་ཏུ་ [190a] [190a.1]འགྱུར། ཚུལ་ཁྲིམས་དང་ལྡན་པ་ཁྱད་པར་དུ་འཕགས་པར་འགྱུར། །ཚུལ་ཁྲིམས་ཀྱི་ཡོན་ཏན་གྱིས་ལམ་རྙེད་པར་འགྱུར་རོ། །ཤ་ར་དྭ་ཏིའི་བུ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ནས་མོས་ཏེ་མི་སྐྲག་མི་དངང་དངང་བར་མི་འགྱུར་བ་ [190a.2]དེ་དང་དེ་དག་ནི་བཟོད་པའི་མཆོག་དང་། བརྩོན་འགྲུས་ཀྱི་མཆོག་དང་། བསམ་གཏན་གྱི་མཆོག་དང་། མཚུངས་པ་མེད་པའི་ཤེས་རབ་ཀྱི་མཆོག་དང་ལྡན་པར་འགྱུར་རོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ [190a.3]བསྟན་པ་འདི་ཐོས་ནས་མོས་ཏེ། མི་སྐྲག་མི་དངང་དངང་བར་མི་འགྱུར་བ་དེ་དག་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་དང་ལྡན་པའི་བར་དུ་འགྱུར་རོ། །བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་གཞན་ཡང་འདི་སྐད་ [190a.4]ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་དོན་གྱི་དབང་ཅི་ཞིག་མཐོང་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འདོད། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་བྱང་ཆུབ་ཏུ་ཞུགས་ན་ནི་དེ་ལྟ་ན་བདག་ [190a.5]མངོན་པར་རྫོགས་པར་འཚང་རྒྱ་བར་ཡང་འཚལ་ན། བཅོམ་ལྡན་འདས་བདག་ནི་བྱང་ཆུབ་ཏུ་སྨོན་པ་མ་ལགས་སོ། །དེ་ཅིའི་སླད་དུ་ཞེ་ན། འཇམ་དཔལ་གཞོན་ནུར་གྱུར་པ་གང་ལགས་པ་དེ་བྱང་ཆུབ་ཉིད་དོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་ [190a.6]དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཟབ་མོ་ཟབ་པའི་གནས་འདི་ལྟ་བུ་འདི་སྟོན་པ་ལེགས་སོ་ལེགས་སོ། །འདི་ལྟར་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་པ་སྟེ། མི་དམིགས་པར་ཚངས་པར་སྤྱོད་པར་ཡུན་རིང་དུ་སྤྱད་པའོ། །འཇམ་ [190a.7]དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་མི་དམིགས་པར་སྤྱོད་པ་ལགས་ན་ནི་ཆོས་ཐོབ་པ་ཉིད་དུ་འགྱུར་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་ [190b] [190b.1]དཔལ་ཁྱོད་ཀྱིས་ངའི་ཉན་ཐོས་ཕུན་སུམ་ཚོགས་པ་འདི་དག་མཐོང་ངམ། འཇམ་དཔལ་གྱིས་གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཅི་འདྲ་བར་མཐོང་། འཇམ་དཔལ་གྱིས་གསོལ་པ། བཅོམ་ལྡན་འདས་ [190b.2]ཇི་ལྟར་སོ་སོའི་སྐྱེ་བོར་མི་མཐོང་བ་དང་། སློབ་པར་མི་མཐོང་བ་དང་། མི་སློབ་པར་མི་མཐོང་བ་དང་། མཐོང་བ་ཡང་མ་མཆིས་མ་མཐོང་བ་ཡང་མ་མཆིས་པ་དེ་ལྟར་མཐོང་ངོ་། །འདི་ལྟར་མང་དུ་ཡང་མི་མཐོང་བ་དང་། ཉུང་དུ་ཡང་མི་མཐོང་བ་དང་དུལ་བར་ཡང་མི་མཐོང་བ་དང་། [190b.3]མ་དུལ་བ་ཡང་མི་མཐོང་བ་དེ་ལྟར་མཐོང་ངོ་། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་ཉན་ཐོས་ཀྱི་ཐེག་པ་པ་རྣམས་དེ་ལྟར་མཐོང་ན་ཡང་དག་པར་རྫོགས་པའི་སངས་རྒྱས་ཀྱི་ཐེག་པ་པ་རྣམས་ཁྱོད་ [190b.4]ཀྱིས་ཇི་ལྟར་མཐོང་། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་ཞེས་བྱ་བའི་ཆོས་ཀྱང་རྗེས་སུ་མི་མཐོང་། བྱང་ཆུབ་ཏུ་ཞུགས་པ་ཞེས་བྱ་བའི་ཆོས་ཀྱང་རྗེས་སུ་མི་མཐོང་། བྱང་ཆུབ་ཀྱི་ཕྱིར་སྤྱོད་དོ་ཞེས་བྱ་བའི་ཆོས་ཀྱང་རྗེས་སུ་མི་མཐོང་། མངོན་ [190b.5]པར་རྫོགས་པར་སངས་རྒྱས་ཞེས་བྱ་བའི་ཆོས་ཀྱང་རྗེས་སུ་མི་མཐོང་སྟེ། བཙུན་པ་ཤ་ར་དྭ་ཏིའི་བུ་ཡང་དག་པར་རྫོགས་པའི་སངས་རྒྱས་ཀྱི་ཐེག་པ་པ་དག་དེ་ལྟར་མཐོང་ངོ་། །ཤ་ར་དྭ་ཏིའི་བུས་སྨྲས་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་ཇི་ལྟར་མཐོང་། [190b.6]འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་གླང་པོ་ཆེན་པོ་ཞོག་ཤིག །གླང་པོ་ཆེན་པོ་མ་སྐྱོད་ཅིག །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་སངས་རྒྱས་ཞེས་བྱ་ [190b.7]བ་དེ་གང་གི་ཚིག་{བླ་དགས,བླ་དྭགས}། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་བདག་ཅེས་བྱ་བ་དེ་གང་གི་ཚིག་{བླ་དགས,བླ་དྭགས}། ཤ་ར་དྭ་ཏིའི་བུས་སྨྲས་པ། འཇམ་དཔལ་འདི་ལྟ་སྟེ། བདག་ཅེས་བྱ་བ་དེ་ནི་སྐྱེ་བ་མེད་པའི་ཚིག་{བླ་དགས་,བླ་དྭགས་}སོ། །འཇམ་དཔལ་གྱིས་སྨྲས་ [191a] [191a.1]པ། བཙུན་པ་ཤ་ར་དྭ་ཏིའི་བུ་དེ་དེ་བཞིན་ཏེ། བདག་ཅེས་བྱ་བ་དེ་གང་གི་ཚིག་{བླ་དགས་,བླ་དྭགས་}ཡིན་པ་སངས་རྒྱས་ཞེས་བྱ་བ་དེ་ཡང་དེའི་ཚིག་{བླ་དགས་,བླ་དྭགས་}སོ། །བཙུན་པ་ཤ་ར་དྭ་ཏིའི་བུ་ཡང་འདི་ལྟ་སྟེ། སངས་རྒྱས་ཞེས་བྱ་བ་དེ་ནི་གཞི་མེད་པའི་ཚིག་{བླ་དགས་,བླ་དྭགས་}སོ། ། [191a.2]བཙུན་པ་ཤ་ར་དྭ་ཏིའི་བུ་སངས་རྒྱས་ཞེས་བྱ་བ་དེ་ནི་ཚིག་གིས་ཤེས་པར་བྱར་དཀའ་བའོ། །བཙུན་པ་ཤ་ར་དྭ་ཏིའི་བུ་ཚིག་ཀྱང་འདི་ནི་ཚིག་གོ་ཞེས་བྱ་བར་བརྟག་པར་དཀའ་ན་སངས་རྒྱས་ཞེས་བྱ་བ་ལྟ་ཅི་སྨོས། བཙུན་པ་ཤ་ར་དྭ་ཏིའི་བུ་སངས་རྒྱས་ཞེས་བྱ་བ་དེ་གང་གི་ཚིག་བླ་ [191a.3]དགས་ཤེས་དེ་སྐད་སྨྲ་བ་ནི་གང་ཡང་དག་པར་མ་གྲུབ་པ་དང་། མ་སྐྱེས་པ་དང་མི་འགག་པ་སྟེ། གང་ཆོས་གང་དང་ཡང་མི་ལྡན་པ་དེ་ལ་གཞི་ཅི་ཡང་མེད་ཅིང་གཞི་དབྱེར་མེད་ལ་གཞི་མེད་པ་སྟེ། བཙུན་པ་ཤ་ར་དྭ་ཏིའི་བུ་འདི་ལྟ་སྟེ། སངས་རྒྱས་ཞེས་བྱ་བ་དེ་ནི་དེའི་ཚིག་བླ་ [191a.4]དགས་སོ། །བཙུན་པ་ཤ་ར་དྭ་ཏིའི་བུ་དེ་བཞིན་གཤེགས་པ་ཚོལ་བར་འདོད་པས་ནི་བདག་བཙལ་བར་བྱའོ། །བཙུན་པ་ཤ་ར་དྭ་ཏིའི་བུ་བདག་ཅེས་བྱ་བ་དེ་ནི་སངས་རྒྱས་ཀྱི་ཚིག་{བླ་དགས་,བླ་དྭགས་}ཏེ། ཇི་ལྟར་བདག་ཅེས་བྱ་བ་ཤིན་ཏུ་མེད་ཅིང་མི་དམིགས་པ་དེ་བཞིན་དུ་སངས་རྒྱས་ཀྱང་ [191a.5]ཤིན་ཏུ་མེད་ཅིང་མི་དམིགས་སོ། །ཇི་ལྟར་བདག་ཅེས་བྱ་བའི་ཆོས་དེ་ནི་གང་གིས་ཀྱང་ཚིག་ཏུ་བརྗོད་པ་མ་ཡིན་པ་དེ་བཞིན་དུ་སངས་རྒྱས་ཀྱང་ཆོས་གང་གིས་ཀྱང་ཚིག་ཏུ་བརྗོད་པ་མ་ཡིན་ནོ། །གང་ལ་གྲངས་སུ་བྱ་བ་མེད་པ་དེ་ནི་སངས་རྒྱས་ཞེས་བྱ་སྟེ། བཙུན་པ་ཤ་ར་དྭ་ཏིའི་ [191a.6]བདག་ཅེས་བྱ་བའི་གཞིའི་ཚིག་{བླ་དགས་,བླ་དྭགས་}དེ་ནི་ཤེས་པར་སླ་བ་མ་ཡིན་ནོ། །བཙུན་པ་ཤ་ར་དྭ་ཏིའི་བུ་དེ་བཞིན་དུ་སངས་རྒྱས་ཞེས་བྱ་བའི་གཞིའི་ཚིག་{བླ་དགས་,བླ་དྭགས་}འདི་ཡང་ཤེས་པར་སླ་བ་མ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་ [191a.7]གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ནི་ཇི་ལྟར་ལས་དང་པོ་བས་འཚལ་བར་འགྱུར་བ་དེ་ལྟ་བུ་མི་སྟོན་ཏོ། །དེ་སྐད་ཅེས་གསོལ་པ་དང་། འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་ [191b] [191b.1]པ་ཤ་ར་དྭ་ཏིའི་བུ་ཁོ་བོ་ནི་ཇི་ལྟར་དགྲ་བཅོམ་པ་བྱས་པ་རྟོགས་པ་ཅན་གྱིས་ཀྱང་ཤེས་པར་འགྱུར་བ་དེ་ལྟ་བུའི་ཆོས་མི་སྟོན་ཏོ། །ཁོ་བོ་ནི་ཇི་ལྟར་སུས་ཀྱང་ཤེས་པར་འགྱུར་བ་དེ་ལྟ་བུར་ཡང་མི་སྟོན་ཏོ། །དེ་ཅིའི་སླད་དུ་ཞེ་ན། བྱང་ཆུབ་ནི་སུས་ཀྱང་མ་ཤེས། སུས་ཀྱང་རྣམ་པར་ [191b.2]མ་ཤེས། སུས་ཀྱང་མངོན་པར་རྫོགས་པར་སངས་མ་རྒྱས་མ་རྟོགས། མ་མཐོང་མ་ཐོས། མ་དྲན་མ་བསྐྱེད། མ་བཀག །མ་སྨྲས་མ་བསྟན་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་བྱང་ཆུབ་ནི་དེ་ལྟ་བུ་སྟེ། བྱང་ཆུབ་དེ་ཡང་དངོས་པོ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ [191b.3]ཆུབ་ཀྱིས་མངོན་པར་རྫོགས་པར་འཚང་རྒྱ་བར་བྱ་བ་ཅི་ཡང་མེད་ཅིང་བྱང་ཆུབ་ཀྱང་བྱང་ཆུབ་ཀྱིས་མངོན་པར་རྫོགས་པར་འཚང་རྒྱ་བ་མ་ཡིན་པའི་ཕྱིར་རོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་བཅོམ་ལྡན་འདས་ཀྱིས་ཆོས་ཀྱི་དབྱིངས་ཉིད་མངོན་པར་རྫོགས་པར་སངས་མ་ [191b.4]རྒྱས་སམ། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་དེ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་འདི་ལྟར་ཆོས་ཀྱི་དབྱིངས་ཉིད་བཅོམ་ལྡན་འདས་ཡིན་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་གལ་ཏེ་བཅོམ་ལྡན་འདས་ཀྱིས་ཆོས་ཀྱི་དབྱིངས་ [191b.5]མངོན་པར་རྫོགས་པར་སངས་རྒྱས་པར་གྱུར་ན། འོ་ན་ནི་གང་སྐྱེ་བ་མེད་པའི་དབྱིངས་དེ་དང་ཡང་འགལ་བར་འགྱུར་རོ། །བཙུན་པ་ཤ་ར་དྭ་ཏིའི་བུ་ཆོས་ཀྱི་དབྱིངས་དེ་ཉིད་བྱང་ཆུབ་བོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ནི་སེམས་ཅན་མེད་པའི་ཕྱིར་རོ། །ཆོས་ཐམས་ [191b.6]ཅད་ངོ་བོ་ཉིད་མེད་པའོ་ཞེས་བྱ་བ་དེ་ནི་བྱང་ཆུབ་ཀྱི་ཚིག་{བླ་དགས་,བླ་དྭགས་}ཏེ། དེ་ནི་ཆོས་ཀྱི་དབྱིངས་ཀྱི་གྲངས་སུ་འགྲོ་བའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་སངས་རྒྱས་ཀྱི་ཡུལ་དུ་ཐ་དད་པ་མེད་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་ཐ་དད་པ་མེད་ཅེས་བྱ་བ་དེ་ནི་རྣམ་པར་ [191b.7]རིག་པ་མེད་པའོ། །བཙུན་པ་ཤ་ར་དྭ་ཏིའི་བུ་རྣམ་པར་རིག་པ་མེད་པ་ཞེས་བྱ་བ་དེ་ནི་རྣམ་པར་ཤེས་པར་མི་ནུས་པ་སྟེ། འདུས་བྱས་སུ་རྣམ་པར་རིག་པར་མི་ནུས་པ་ནས་འདུས་མ་བྱས་ཀྱི་བར་དུ་ཡང་རྣམ་པར་རིག་པར་མི་ནུས་པ་སྟེ། དེ་ལ་རྣམ་པར་རིག་པ་གང་ཡང་མེད་ [192a] [192a.1]པས་དེས་ན་དེ་རྣམ་པར་རིག་པ་མེད་པའོ། །བཙུན་པ་ཤ་ར་དྭ་ཏིའི་བུ་ཆོས་ཐམས་ཅད་ནི་རྣམ་པར་རིག་པ་མེད་པ་སྟེ། དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་གང་ལ་གནས་ཏེ་རྣམ་པར་རིག་པར་འགྱུར་བའི་སྐྱེ་བ་མེད་པའི་ཕྱིར་རོ། །གང་དག་ [192a.2]མཚམས་མེད་པ་ལ་ཞུགས་པ་དེ་དག་ནི་བསམ་གྱིས་མི་ཁྱབ་པ་ལ་ཞུགས་པའོ། །གང་དག་བསམ་གྱིས་མི་ཁྱབ་པ་ལ་ཞུགས་པ་དེ་དག་ནི་ཡང་དག་པ་ལ་ཞུགས་པའོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་ཡང་དག་པ་ཞེས་བྱ་བ་དེ་ནི་གཞི་དབྱེར་མེད་པའི་ཕྱིར་ [192a.3]རོ། །གང་དག་བསམ་གྱིས་མི་ཁྱབ་པ་དང་ལྡན་པ་དེ་དག་ནི་མཐོ་རིས་སུ་འགྲོ་བ་མ་ཡིན། ངན་སོང་དུ་འགྲོ་བ་མ་ཡིན། མྱ་ངན་ལས་འདས་པར་འགྲོ་བ་མ་ཡིན་ནོ། །དེ་ཅིའི་ཕྱིར་ཞེ་ན། བསམ་གྱིས་མི་ཁྱབ་པ་ནི་འགྲོ་བ་དང་མི་འགྲོ་བར་ཉེ་བར་གནས་པ་མ་ཡིན་པ་ནས་མྱ་ངན་ [192a.4]ལས་འདས་པའི་བར་དུ་འགྲོ་བ་དང་མི་འགྲོ་བར་ཉེ་བར་གནས་པ་མ་ཡིན་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་གང་དག་ལྟུང་བའི་རྩ་བ་བཞི་ལ་གནས་པ་དེ་དག་ཀྱང་རྩ་བ་མེད་པ་ལ་གནས་པའོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་སྐྱེ་བ་མེད་པ་ལ་རྩ་བ་འམ། རྩེ་ [192a.5]མོ་ཞེས་བྱ་བ་མེད་པའི་ཕྱིར་རོ། །རྩ་བ་མེད་པའི་དགེ་སློང་ཞེས་བྱ་བ་དེ་ནི་མི་གནས་པའི་དགེ་སློང་གི་ཚིག་{བླ་དགས་,བླ་དྭགས་}སོ། །རྩོད་པ་བྱུང་བ་ཞེས་བྱ་བ་དེ་ནི་ལྷག་པར་སྒྲོ་འདོགས་པ་ཞེས་བྱ་བའི་ཚིག་{བླ་དགས་,བླ་དྭགས་}སོ། །བཙུན་པ་ཤ་ར་དྭ་ཏིའི་བུ་ལྷག་པར་སྒྲོ་འདོགས་པ་ལ་སྤྱོད་པ་ནི་འཇིག་ [192a.6]རྟེན་ན་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་མཉམ་པ་ལ་དེ་ལྷག་པར་སྒྲོ་བཏགས་པའི་ཕྱིར་རོ། །བཙུན་པ་ཤ་ར་དྭ་ཏིའི་བུ་དགེ་སློང་དད་པ་ནི་དད་པས་བྱིན་པ་སྤྱད་པའི་འོས་མ་ཡིན་ནོ། །བཙུན་པ་ཤ་ར་དྭ་ཏིའི་བུ་དགེ་སློང་མ་དད་པ་ནི་དད་པས་བྱིན་པ་སྤྱད་པའི་ [192a.7]འོས་སོ། །བཙུན་པ་ཤ་ར་དྭ་ཏིའི་བུ་རུང་བ་ཅན་གྱི་དགེ་སློང་ནི་དད་པས་བྱིན་པ་སྤྱད་པའི་འོས་མ་ཡིན་ནོ། །བཙུན་པ་ཤ་ར་དྭ་ཏིའི་བུ་རུང་བ་ཅན་མ་ཡིན་པའི་དགེ་སློང་ནི་དད་པས་བྱིན་པ་སྤྱད་པའི་འོས་སོ། །ཚུལ་ཡང་དག་པར་མ་བཅོམ་པའི་དགེ་སློང་ནི་དགྲ་བཅོམ་པ་ཟག་ [192b] [192b.1]པ་ཟད་པ་ཞེས་བྱའོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། མཉམ་པ་ཉིད་གང་མཉམ་པ་ཉིད་ཡང་དག་པར་འཇོམ་པར་མི་བྱེད་པ་དེ་ཉིད་ཚུལ་ཡིན་ཏེ། བཙུན་པ་ཤ་ར་དྭ་ཏིའི་བུ་དེ་ལ་བསམས་ནས་ཚུལ་ཡང་ [192b.2]དག་པར་མ་བཅོམ་པའི་དགེ་སློང་ནི་དགྲ་བཅོམ་པ་ཟག་པ་ཟད་པ་ཞེས་བྱའོ་ཞེས་དེ་སྐད་སྨྲས་སོ། །བཙུན་པ་ཤ་ར་དྭ་ཏིའི་བུ་འཇིགས་པ་ལས་མ་རྒལ་བ་ཞེས་བྱ་བ་དེ་ནི་དགྲ་བཅོམ་པ་ཟག་པ་ཟད་པ་ཞེས་བྱ་བའི་ཚིག་{བླ་དགས་,བླ་དྭགས་}སོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་ [192b.3]བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། དེའི་འཇིགས་པ་ཅུང་ཟད་ཙམ་ཡང་མེད་ན་ཅི་ཞིག་ལས་རྒལ་བར་འགྱུར། ཤ་ར་དྭ་ཏིའི་བུས་སྨྲས་པ། འཇམ་དཔལ་མ་སྐྱེས་པའི་བཟོད་པ་ཅན་ཞེས་བྱ་བ་དེ་གང་གི་ཚིག་{བླ་དགས,བླ་དྭགས}། འཇམ་དཔལ་གྱིས་སྨྲས་པ། བཙུན་ [192b.4]པ་ཤ་ར་དྭ་ཏིའི་བུ་གང་གིས་ཆོས་ཅུང་ཟད་ཙམ་ཡང་མ་བསྐྱེད་པ་དེ་མ་བསྐྱེད་པའི་བཟོད་པ་ཅན་ཞེས་བྱའོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་དགེ་སློང་མ་དུལ་བ་ཞེས་བྱ་བ་གང་གི་ཚིག་{བླ་དགས,བླ་དྭགས}། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་དགེ་སློང་མ་དུལ་བ་ [192b.5]ཞེས་བྱ་བ་དེ་ནི་དགྲ་བཅོམ་པ་ཟག་པ་ཟད་པའི་ཚིག་{བླ་དགས་,བླ་དྭགས་}སོ། །དེ་ཅིའི་ཕྱིར་ཞེ་ན། མ་དུལ་བ་ནི་དུལ་ལ་དུལ་བ་ནི་མ་དུལ་བས་བཙུན་པ་ཤ་ར་དྭ་ཏིའི་བུ་འདི་ལ་བསམས་ཏེ། དགེ་སློང་མ་དུལ་བ་ཞེས་བྱ་བ་དེ་ནི་དགྲ་བཅོམ་པ་ཟག་པ་ཟད་པའི་ཚིག་{བླ་དགས་,བླ་དྭགས་}སོ་ཞེས་དེ་སྐད་སྨྲས་སོ། ། [192b.6]བཙུན་པ་ཤ་ར་དྭ་ཏིའི་བུ། ལྷག་པའི་སེམས་ལ་སྤྱོད་དོ། །ཞེས་བྱ་བ་དེ་ནི་སོ་སོའི་སྐྱེ་བོའི་ཚིག་{བླ་དགས་,བླ་དྭགས་}སོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་འདི་ལྟར་དེ་ལྷག་པར་བྱེད་པའི་ཕྱིར་ [192b.7]རོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་དགྲ་བཅོམ་པ་ཟག་པ་ཟད་པ་ཇི་ལྟ་བ་དེ་བཞིན་དུ་སྨྲས་པ་ལེགས་སོ་ལེགས་སོ། །འཇམ་དཔལ་གྱིས་སྨྲས་པ། བཙུན་པ་ཤ་ [193a] [193a.1]ར་དྭ་ཏིའི་བུ་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །ཁོ་བོ་ནི་ཟག་པ་ཟད་མོད་ཀྱི་དགྲ་བཅོམ་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་འདི་ལྟར་ཉན་ཐོས་ཀྱིས་དང་། རང་སངས་རྒྱས་ཀྱི་སར་ཁོ་བོའི་བསམ་པ་ཟད་པའི་ཕྱིར་ཏེ། བཙུན་ [193a.2]པ་ཤ་ར་དྭ་ཏིའི་བུ་རྣམ་གྲངས་འདིས་ན་ཁོ་བོ་ཟག་པ་ཟད་མོད་ཀྱི་དགྲ་བཅོམ་པ་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་འདུག་ལ། [193a.3]བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བའི་སྐལ་བ་མེད་པར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་མཆིས་ལ་བླ་ན་མེད་པ་ [193a.4]ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་མ་མཆིས་པར་འགྱུར་བའི་རྣམ་གྲངས་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་ལ་ཅུང་ཟད་ཙམ་གྱི་ཆོས་ཀྱང་མ་མཆིས་ཤིང་མི་དམིགས་པས་དེའི་སླད་དུ་བླ་ན་མེད་པ་ཡང་དག་པར་རྫོགས་ [193a.5]པའི་བྱང་ཆུབ་ཅེས་བགྱིའོ། །བྱང་ཆུབ་དེ་ཡང་མ་སྐྱེས་པ་སྟེ། དེ་ལ་གང་བྱང་ཆུབ་ཀྱི་སྙིང་པོ་ལ་མཆིས་པའམ། སུ་བྱང་ཆུབ་མངོན་པར་རྫོགས་པར་འཚང་རྒྱ་བའམ། གང་གིས་བྱང་ཆུབ་མངོན་པར་རྫོགས་པར་འཚང་རྒྱ་བའམ། བྱང་ཆུབ་གང་མངོན་པར་རྫོགས་པར་འཚང་ [193a.6]རྒྱ་བའམ། གང་བྱང་ཆུབ་ཀྱི་སྙིང་པོ་ལས་ལྡང་བ་གང་ཡང་མ་མཆིས་ཤིང་མི་དམིགས་ཏེ། བཅོམ་ལྡན་འདས་རྣམ་གྲངས་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་མཆིས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ [193a.7]རྫོགས་པར་འཚང་རྒྱ་བའི་སྐལ་བ་མ་མཆིས་པའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་ཅེས་བྱ་བ་དེ་གང་གི་ཚིག་{བླ་དགས་,བླ་དྭགས་}ཡིན་འཇམ་དཔལ་གྱིས་གསོལ་པ། [193b] [193b.1]བཅོམ་ལྡན་འདས་བྱང་ཆུབ་ཅེས་བགྱི་བ་དེ་ནི་མཚམས་མ་མཆིས་པ་ལྔ་པོ་དག་གི་ཚིག་{བླ་དགས་,བླ་དྭགས་}ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དངོས་པོ་མ་མཆིས་པས་མཚམས་མ་མཆིས་པ་ལྔ་པོ་དེ་དག་ཉིད་བྱང་ཆུབ་ཀྱི་རང་བཞིན་ཏེ། དེའི་སླད་དུ་བྱང་ཆུབ་དེ་ནི་ [193b.2]མཚམས་མ་མཆིས་པ་ལྔའི་རང་བཞིན་ལགས་སོ། །མཚམས་མ་མཆིས་པ་རྣམས་མངོན་པར་རྫོགས་པར་རྟོགས་པ་བྱང་ཆུབ་མ་ལགས། ཆོས་ཐམས་ཅད་མངོན་སུམ་དུ་གྱུར་པ་ཡང་བྱང་ཆུབ་མ་ལགས་སོ། །དེ་ཅིའི་སླད་དུ་ཞེ་ན། ཆོས་ཐམས་ཅད་ནི་ཤིན་དུ་མངོན་སུམ་མ་ལགས་ [193b.3]ཏེ། དེ་དག་གང་གིས་ཀྱང་མངོན་པར་རྫོགས་པར་མ་རྟོགས། མ་མཐོང་མ་ཐོས་མ་འཚལ་བ་ནས་མ་རྟོགས་པའི་བར་གྱི་སླད་དུ་སྟེ། དེ་ལྟ་བུ་དེ་ནི་བྱང་ཆུབ་བོ། །དེ་ལྟ་ལགས་ཀྱིས་ཀྱང་བཅོམ་ལྡན་འདས་མངོན་པའི་ང་རྒྱལ་ཅན་དག་གིས་ནི་མངོན་པར་རྫོགས་པར་སངས་རྒྱས་པ་ནས་ [193b.4]མངོན་སུམ་དུ་བགྱིས་པའི་བར་དུ་དེ་དག་བཞག་གོ །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཅི་ཁྱོད་ང་ལ་འདི་སྙམ་དུ་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་དུ་ [193b.5]སེམས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་དུ་མི་སེམས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་ [193b.6]འདས་འདི་ལྟར་དེ་བཞིན་ཉིད་ནི་དེ་བཞིན་གཤེགས་པ་ཉིད་དེ། དེ་བཞིན་ཉིད་ཀྱིས་དེ་བཞིན་གཤེགས་པ་རྣམ་པར་རིག་པར་མི་བགྱིད་ཅིང་དེ་བཞིན་གཤེགས་པས་ཀྱང་དེ་བཞིན་ཉིད་རྣམ་པར་རིག་པར་མི་བགྱིད་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་དོན་དམ་ [193b.7]པར་ན་དེ་བཞིན་ཉིད་དངོས་པོ་མ་མཆིས་ཤིང་། དེ་བཞིན་གཤེགས་པ་ཡང་དངོས་པོ་མ་མཆིས་པའི་སླད་དུའོ། །བཅོམ་ལྡན་འདས་དེ་བས་ན་བདག་ནི་འདི་སྙམ་དུ་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་དུ་མི་སེམས་སོ། །བཅོམ་ལྡན་འདས་དེ་བཞིན་གཤེགས་ [194a] [194a.1]པ་ཞེས་བགྱི་བ་དེ་ནི་མིང་ཙམ་དུ་བས་ན། གང་ལ་བདག་འདི་སྙམ་དུ་དེ་བཞིན་གཤེགས་པ་ནི་བདག་གི་དེ་བཞིན་གཤེགས་པའོ་སྙམ་དུ་སེམས་པར་འགྱུར་བའི་དེ་བཞིན་གཤེགས་པ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་དེ་བཞིན་ [194a.2]གཤེགས་པ་ལ་ཐེ་ཚོམ་ཟ་འམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་གལ་ཏེ་དེ་བཞིན་གཤེགས་པ་བྱུང་བའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཡང་རུང་སྟེ། དེ་བཞིན་གཤེགས་པར་ཡོངས་སུ་ [194a.3]གྲུབ་པ་འགའ་ཞིག་མཆིས་ན་ནི་དེ་ལ་བདག་ཐེ་ཚོམ་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དེ་བཞིན་གཤེགས་པ་བྱུང་ངོ་སྙམ་དུ་མི་སེམས་སམ། འཇམ་དཔལ་གྱིས་ [194a.4]གསོལ་པ། བཅོམ་ལྡན་འདས་གལ་ཏེ་ཆོས་ཀྱི་དབྱིངས་ལ་འབྱུང་བ་མཆིས་ན་ནི་བདག་དེ་བཞིན་གཤེགས་པ་བྱུང་ངོ་སྙམ་དུ་སེམས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཡོངས་སུ་མྱ་ངན་ [194a.5]ལས་འདས་པར་མི་མོས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་པ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། སངས་ [194a.6]རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་གོ །འཇམ་དཔལ་གྱིས་གསོལ་པ། བཅོམ་ལྡན་འདས་དེ་ལྟར་བཞུགས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །འཇམ་དཔལ་གྱིས་གསོལ་པ། [194a.7]བཅོམ་ལྡན་འདས་དེའི་སླད་དུ་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་མ་འདས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་འདི་ལྟར་བསམ་གྱིས་མི་ཁྱབ་པའི་ཡུལ་དུ་ཡུལ་གཅིག་པའི་སླད་དུ་སྟེ། [194b] [194b.1]བསམ་གྱིས་མི་ཁྱབ་པ་ཉིད་ནི་སྐྱེ་བ་མ་ལགས། འགག་པ་མ་ལགས་སོ། །བཅོམ་ལྡན་འདས་དེ་བས་ན་བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་ན་གང་དག་མ་མཆིས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་ [194b.2]དེ་དག་ཀྱང་དེ་བཞིན་དུ་མངོན་པར་རྫོགས་པར་སངས་རྒྱས་པ་ཉིད་དོ། །དེ་ཅིའི་སླད་དུ་ཞེ་ན། བསམ་གྱིས་མི་ཁྱབ་པ་ལས་འདས་པའམ། མ་འོངས་པ་འམ། ད་ལྟར་ཞེས་བགྱི་བ་མ་མཆིས་པའི་སླད་དུའོ། །བཅོམ་ལྡན་འདས་དེ་བས་ན་སུ་དག་འདི་སྙམ་དུ་དེ་བཞིན་གཤེགས་པ་སྐྱེས་སོ་ [194b.3]ཞེས་བགྱི་བ་ནས་ཡོངས་སུ་མྱ་ངན་ལས་འདས་པའི་བར་དུ་སེམས་པ་དེ་དག་གི་འཇིག་རྟེན་གནས་པ་ནི་འཁྲུལ་པ་སྟེ། བཅོམ་ལྡན་འདས་དེ་དག་ནི་འཇིག་རྟེན་གནས་པ་འཕྲོས་པར་བགྱིད་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ [194b.4]འདི་སྐད་ཅེས་བཀའ་སྩལ་ཏོ། །འཇམ་དཔལ་དེའི་ཕྱིར་ཁྱོད་ཀྱིས་དེ་བཞིན་གཤེགས་པའི་བསམ་གྱིས་མི་ཁྱབ་པ། བསམ་དུ་མེད་པ། བསམ་གྱིས་མི་ལང་བ། བསམ་པ་ལས་འདས་པ་འདི་དེ་བཞིན་གཤེགས་པའམ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ [194b.5]འམ། དགྲ་བཅོམ་པ་ཟག་པ་ཟད་པའི་མདུན་དུ་བརྗོད་ན་རྗོད་ཅིག །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ཐོས་ནས་བསྔགས་པར་ཡང་མི་འགྱུར། སྤོང་བར་ཡང་མི་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་འདི་བསམ་གྱིས་མི་ཁྱབ་པ། བསམ་དུ་མེད་པ། བསམ་གྱིས་མི་ [194b.6]ལང་བའི་ཕྱིར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་ཐམས་ཅད་བསམ་གྱིས་མི་ཁྱབ་ཅིང་བསམ་དུ་མ་མཆིས་པ་འདི་ལ་སུ་ཞིག་བསྔགས་པའམ་སྤོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཇི་ལྟར་དེ་བཞིན་གཤེགས་པ་ [194b.7]བསམ་གྱིས་མི་ལང་བ་དེ་ལྟར་སོ་སོའི་སྐྱེ་བོ་རྣམས་ཀྱང་བསམ་གྱིས་མི་ལང་བ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་སོ་སོའི་སྐྱེ་བོ་རྣམས་ཀྱང་དེ་བཞིན་དུ་བསམ་གྱིས་མི་ལང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ [195a] [195a.1]ནོ། །དེ་ཅིའི་ཕྱིར་ཞེ་ན། འདི་ལྟར་བསམ་པ་ཐམས་ཅད་ནི་བསམ་གྱིས་མི་ལང་བའི་ཕྱིར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་འོ་ན་ཇི་ལྟར་དེ་བཞིན་གཤེགས་པ་བསམ་གྱིས་མི་ལང་བ་དེ་བཞིན་དུ་སོ་སོའི་སྐྱེ་བོ་རྣམས་ཀྱང་བསམ་གྱིས་མི་ལང་ [195a.2]བའོ་ཞེས་བཅོམ་ལྡན་འདས་ཀྱིས་ཅིའི་སླད་དུ་དེ་སྐད་བཀའ་སྩལ། བཅོམ་ལྡན་འདས་སོ་སོའི་སྐྱེ་བོ་ཉིད་ཀྱང་བསམ་གྱིས་མི་ལང་བ་མ་ལགས་སམ། དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་བསམ་གྱིས་མི་ལང་བའི་སླད་དུའོ། །བཅོམ་ལྡན་འདས་གང་ལ་ལ་དག་ [195a.3]མྱ་ངན་ལས་འདས་པའི་སླད་དུ་ཞུགས་ན། བཅོམ་ལྡན་འདས་དེ་དག་ནི་ཉམ་ཐག་པར་འགྱུར་རོ། །དེ་ཅིའི་སླད་དུ་ཞེ་ན། གང་བསམ་གྱིས་མི་ལང་བ་དེ་ཉིད་མྱ་ངན་ལས་འདས་པ་ལགས་པའི་སླད་དུ་སྟེ། བཅོམ་ལྡན་འདས་དེའི་སླད་དུ་བསམ་གྱིས་མི་ལང་བ་ལ་ཐ་དད་པ་མ་མཆིས་སོ། ། [195a.4]བཅོམ་ལྡན་འདས་གང་དག་འདི་སྐད་དུ་འདི་དག་ནི་སོ་སོའི་སྐྱེ་བོའི་ཆོས་རྣམས་སོ། །འདི་དག་ནི་འཕགས་པའི་ཆོས་རྣམས་སོ་ཞེས་མཆི་བ་དེ་དག་ལ་རེ་ཤིག་དགེ་བའི་བཤེས་གཉེན་རྣམས་ལ་བསྙེན་བཀུར་གྱིས་ཤིག་དང་། དེ་ནས་གཟོད་འདི་དག་ནི་སོ་སོའི་སྐྱེ་བོའི་ཆོས་རྣམས་སོ། །འདི་ [195a.5]དག་ནི་འཕགས་པའི་ཆོས་རྣམས་སོ་ཞེས་བྱ་བར་ཤེས་པར་འགྱུར་རོ། །ཞེས་དེ་དག་ལ་འདི་སྐད་བརྗོད་པར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དེ་བཞིན་གཤེགས་པ་ [195a.6]སེམས་ཅན་ཐམས་ཅད་ཀྱི་མཆོག་ཏུ་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་འདི་ལ་སེམས་ཅན་དུ་ཡོངས་སུ་གྲུབ་པ་འགའ་ཞིག་མཆིས་ན་ནི་བདག་དེ་བཞིན་གཤེགས་པ་སེམས་ཅན་ཐམས་ཅད་ཀྱི་མཆོག་ཏུ་འཚལ་ལོ། །བཅོམ་ལྡན་འདས་ [195a.7]ཀྱིས་བཀའ་སྩལ་པ། འཇམ་དཔལ་ཁྱོད་དེ་བཞིན་གཤེགས་པ་བསམ་གྱིས་མི་ཁྱབ་པའི་ཆོས་དང་ལྡན་པར་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བསམ་པའི་ཆོས་དང་ལྡན་པ་འགའ་ཞིག་མཆིས་ན་ནི་བདག་དེ་བཞིན་གཤེགས་པ་བསམ་གྱིས་ [195b] [195b.1]མི་ཁྱབ་པའི་ཆོས་དང་ལྡན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་འདི་ལྟར་ཉན་ཐོས་འདི་དག་ནི་དེ་བཞིན་གཤེགས་པས་བཏུལ་ལོ་ཞེས་བྱ་བར་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་ལ་ལ་ཞིག་བསམ་གྱིས་ [195b.2]མི་ཁྱབ་པའི་དབྱིངས་འདུལ་བར་འགྱུར་ན་ནི་བདག་ཉན་ཐོས་འདི་དག་དེ་བཞིན་གཤེགས་པས་བཏུལ་ལོ་ཞེས་བགྱི་བར་དེ་ལྟར་འཚལ་ལོ། །བཅོམ་ལྡན་འདས་སངས་རྒྱས་འབྱུང་བ་ནི་གང་ལ་ཕན་པའམ། གནོད་པར་ཡང་ཉེ་བར་གནས་པ་མ་ལགས་སོ། །དེ་ཅིའི་སླད་དུ་ཞེ་ན། འདི་ [195b.3]ལྟར་དབྱིངས་འདི་ནི་གནས་པ་ཉིད་དང་། དབྱིངས་འདི་ནི་མ་འདྲེས་པ་ཉིད་དེ། འདི་ལྟ་སྟེ། བསམ་གྱིས་མི་ཁྱབ་པའི་དབྱིངས་ལགས་པའི་སླད་དུའོ། །དབྱིངས་དེ་ལ་ནི་ཉན་ཐོས་ཐ་དད་པ་ནས་སོ་སོའི་སྐྱེ་བོ་ཐ་དད་པའི་བར་དུ་མི་དམིགས་སོ། །བཅོམ་ལྡན་འདས་ཀྱིས་བཀའ་སྩལ་པ། [195b.4]འཇམ་དཔལ་ཁྱོད་འདི་ལྟར་དེ་བཞིན་གཤེགས་པ་བསོད་ནམས་ཀྱི་ཞིང་བླ་ན་མེད་པ་ཡིན་པར་མི་འདོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་དངོས་པོ་མ་མཆིས་པའི་སླད་དུ་དེ་བཞིན་གཤེགས་པ་བསོད་ནམས་ཀྱི་ཞིང་སྟེ། དེའི་སླད་དུ་དེ་ནི་བསོད་ནམས་ཀྱི་ཞིང་བླ་ན་མ་ [195b.5]མཆིས་པའོ། །དེ་ནི་ཞིང་གང་བ་མ་ལགས། ཞིང་མ་གང་བ་ཡང་མ་ལགས་ཤིང་། ཞིང་མ་ལགས་པ་ཡང་མ་ལགས་ཏེ། དེའི་སླད་དུ་དེ་ནི་བསོད་ནམས་ཀྱི་ཞིང་བླ་ན་མ་མཆིས་པའོ། །བཅོམ་ལྡན་འདས་ཡང་དེ་ལ་ཆོས་གང་ཡང་ཡང་དག་པར་འགྲུབ་པར་མི་འགྱུར་བས་པར་མི་འགྱུར་ [195b.6]ཏེ། དེ་ལྟར་ན་དེ་བསོད་ནམས་ཀྱི་ཞིང་ལགས་སོ། །དེ་ལ་ས་བོན་བཏབ་པ་ནི་རྣམ་པར་མི་འཕེལ་ཞིང་ཡོངས་སུ་མི་འགྲིབ་བོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཅི་ལས་བསམས་ཏེ་ཞིང་དེ་ལ་ས་བོན་བཏབ་པ་རྣམ་པར་མི་འཕེལ་ཞིང་ཡོངས་སུ་མི་འགྲིབ་བོ་ཞེས་དེ་སྐད་ [195b.7]སྨྲ། འཇམ་དཔལ་གྱིས་གསོལ་པ། བཅོམ་ལྡན་འདས་འདི་ལྟར་ཞིང་དེ་ནི་བསམ་གྱིས་མི་ཁྱབ་པ་སྟེ། དེ་ལྟར་ན་དེ་བསོད་ནམས་ཀྱི་ཞིང་ལགས་སོ། །དེ་ནས་དེའི་ཚེ་སངས་རྒྱས་ཀྱི་མཐུས་ས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏོ། །དགེ་སློང་ཁྲི་དྲུག་སྟོང་ནི་ལེན་པ་མེད་པར་ཟག་ [196a] [196a.1]པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་བདུན་བརྒྱ་དང་། དགེ་བསྙེན་སུམ་བརྒྱ་དང་། དགེ་བསྙེན་མ་བཞི་ཁྲི་དང་། འདོད་པ་ན་སྤྱོད་པའི་ལྷ་བྱེ་བ་ཁྲག་ཁྲིག་ཕྲག་དྲུག་ཅུ་ནི་ཆོས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་སྐྱེས་སོ། །དེ་ནས་ [196a.2]ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ [196a.3]འཇིག་རྟེན་དུ་དོག་ས་ཆེར་གཡོས་པ་བྱུང་བ་འདིའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བསོད་ནམས་ཀྱི་ཞིང་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་ [196a.4]འདི་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ས་ཕྱོགས་འདི་ཉིད་དུ་གསུངས་ཏེ། ཀུན་དགའ་བོ་འཇིག་རྟེན་དུ་ས་གཡོས་པ་བྱུང་བ་འདིའི་རྒྱུ་ནི་དེ་ཡིན། རྐྱེན་ནི་དེ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ [196a.5]ལྡན་འདས་འཇམ་དཔལ་འདི་ནི་བསམ་གྱིས་མི་ཁྱབ་པའི་དཔལ་ལོ། །དེ་ཅིའི་སླད་དུ་ཞེ་ན། འདི་ལྟར་འདིའི་སྤོབས་པ་གང་དང་གང་ལགས་པའི་སྤོབས་པ་དེ་དང་དེ་ཉིད་བསམ་གྱིས་མི་ཁྱབ་པ་ཉིད་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ [196a.6]ལ་བཀའ་སྩལ་པ། འཇམ་དཔལ་དགེ་སློང་ཤ་ར་དྭ་ཏིའི་བུས་ཚིག་ཇི་སྐད་སྨྲས་པ་དེ་དེ་བཞིན་ཏེ། འཇམ་དཔལ་གཞོན་ནུར་གྱུར་པའི་སྤོབས་པ་གང་དང་གང་ཡིན་པའི་སྤོབས་པ་དེ་དག་ཐམས་ཅད་ནི་བསམ་གྱིས་མི་ཁྱབ་པ་ཉིད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་ [196a.7]པས་འདི་སྐད་ཅེས་གསོལ་ཏོ། །བཅོམ་ལྡན་འདས་བསམ་གྱིས་མི་ཁྱབ་པ་ནི་སྤོབས་པར་མི་འགྱུར་རོ། །གལ་ཏེ་བསམ་གྱིས་མི་ཁྱབ་པ་སྤོབས་པར་གྱུར་ན་ནི་བསམ་དུ་མཆིས་པ་ཉིད་དུ་འགྱུར་རོ། །གང་ཡང་བསམ་གྱིས་མི་ཁྱབ་པ་མ་ལགས་པའི་བསམ་གྱིས་མི་ཁྱབ་པ་ [196b] [196b.1]ནི་ཅི་ཡང་མ་མཆིས་སོ། །བཅོམ་ལྡན་འདས་སྒྲ་ཐམས་ཅད་ནི་བསམ་གྱིས་མི་ཁྱབ་པ་སྟེ། བསམ་གྱིས་མི་ཁྱབ་པ་ཉིད་ནི་སྒྲ་མ་ལགས་སོ། །སྒྲ་མ་ལགས་པ་དང་། སྒྲ་མ་ལགས་པ་ཡང་མ་ལགས་པ་ནི་བསྟན་པར་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་ [196b.2]པ། འཇམ་དཔལ་ཁྱོད་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། བསམ་གྱིས་མི་ཁྱབ་པའི་ཏིང་ངེ་འཛིན་ལ་བདག་སྙོམས་པར་མི་འཇུག་གོ །དེ་ཅིའི་སླད་དུ་ཞེ་ན། བཅོམ་ལྡན་ [196b.3]འདས་འདི་ལྟར་བདག་ཉིད་བསམ་གྱིས་མི་ཁྱབ་པའི་ཏིང་ངེ་འཛིན་ལགས་པའི་སླད་དུའོ། །བཅོམ་ལྡན་འདས་གལ་ཏེ་བདག་བསམ་དུ་རུང་བ་ལགས་ན་ནི་བདག་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ །བཅོམ་ལྡན་འདས་ཏིང་ངེ་འཛིན་ཅེས་བགྱི་བ་དེ་ནི་བསམ་ [196b.4]དུ་མ་མཆིས་པ། བསམ་གྱིས་མི་ཁྱབ་པ། བསམ་གྱིས་མི་ལང་བ་ལགས་ན་ཇི་ལྟར་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་པར་བགྱི། དེ་ལྟ་ལགས་ཀྱིས་ཀྱང་བཅོམ་ལྡན་འདས་བདག་སྔོན་ལས་དང་པོ་པའི་ཚེ་ན་བསམ་གྱིས་མི་ཁྱབ་པའི་ཏིང་ངེ་འཛིན་ལ་ [196b.5]སྙོམས་པར་འཇུག་གོ་སྙམ་དུ་བསམས་པར་གྱུར་ཏོ། །བཅོམ་ལྡན་འདས་ད་ལྟར་ནི་བདག་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ་སྙམ་དུ་ཡང་དེ་ལ་སེམས་པ་ཀུན་དུ་འབྱུང་བ་མ་མཆིས་སོ། །བཅོམ་ལྡན་འདས་འདི་ལྟ་སྟེ་དཔེར་ན་འཕང་གི་སློབ་དཔོན་ [196b.6]ནི་སྔོན་ལས་དང་པོ་པའི་ས་ན་སློབ་པའི་ཚེ་འདི་སྙམ་དུ་བ་ལང་གི་ཕུར་པ་དག་ལ་ཕོག་པར་བྱའོ་སྙམ་དུ་སེམས་སོ། །དེ་གང་གི་ཚེ་སྐྲ་ལ་ཕོག་པར་གྱུར་པ་དེའི་ཚེ་འདི་ལྟར་སྐྲ་ལ་ཕོག་པར་ལེགས་པར་ལོབས་པའི་སླད་དུ་དེ་ཡང་འདི་སྙམ་དུ་བདག་གིས་བ་ལང་གི་ཕུར་པ་དག་ལ་ཕོག་པར་བྱའོ་ [196b.7]སྙམ་དུ་སེམས་པ་མི་འབྱུང་ངོ་། །ཅི་སྟེ་གང་གི་ཚེ་སྐྲ་ལ་ཕོག་པར་འཚལ་བ་དེའི་ཚེ་བསྒྲིམ་མི་འཚལ་བར་ཕོག་པར་འགྱུར་རོ། །བཅོམ་ལྡན་འདས་དེ་བཞིན་དུ་བདག་ནི་སྔོན་བསམ་གྱིས་མི་ཁྱབ་པའི་ཏིང་ངེ་འཛིན་ལ་སྙོམས་པར་འཇུག་གོ་སྙམ་དུ་དེ་སྙམ་དུ་བསམས་པར་གྱུར་ [197a] [197a.1]ཏོ། །གང་གི་ཚེ་བདག་གིས་ཏིང་ངེ་འཛིན་དེ་ལ་སྙོམས་པར་ཞུགས་ནས་ཏིང་ངེ་འཛིན་འདིས་གནས་པ་དེའི་ཚེ་བདག་སླར་ཡང་ཏིང་ངེ་འཛིན་འདིས་གནས་པར་བགྱིའོ་སྙམ་དུ་མི་སེམས་སོ། །དེ་ཅིའི་སླད་དུ་ཞེ་ན། གང་དང་གང་གི་ཚེ་ཏིང་ངེ་འཛིན་འདིས་གནས་པ་དེ་དང་དེའི་ [197a.2]ཚེ་ཏིང་ངེ་འཛིན་འདི་གདགས་སུ་མ་མཆིས་པའི་སླད་དུའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ནི་བསམ་གྱིས་མི་ཁྱབ་པའི་ཏིང་ངེ་འཛིན་འདིས་གནས་པའི་ཚེ་འདི་ལ་ཡིད་མི་རྟོན་ན། [197a.3]བཅོམ་ལྡན་འདས་བསམ་གྱིས་མི་ཁྱབ་པའི་ཏིང་ངེ་འཛིན་འདི་བས་ཆེས་ཞི་བའི་ཏིང་ངེ་འཛིན་གཞན་ལྟ་མཆིས་སམ། དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་འདི་སྐད་དུ་བསམ་གྱིས་མི་ཁྱབ་པའི་ཏིང་ངེ་འཛིན་འདི་བས་ [197a.4]ཆེས་ཞི་བའི་ཏིང་ངེ་འཛིན་གཞན་ལྟ་མཆིས་སམ་ཞེས་འདྲི་ན་བཙུན་པ་ཤ་ར་དྭ་ཏིའི་བུ་ཁྱོད་ཀྱིས་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཞི་བ་ཡིན་པར་ཇི་ལྟར་ཤེས། བཙུན་པ་ཤ་ར་དྭ་ཏིའི་བུ་གལ་ཏེ་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཡོད་ཅིང་དམིགས་ན་ནི་བསམ་གྱིས་མི་ཁྱབ་པའི་ཏིང་ངེ་ [197a.5]འཛིན་འདི་བས་ཆེས་ཞི་བའི་ཏིང་ངེ་འཛིན་གཞན་ཡོད་པར་འགྱུར་རོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་བསམ་གྱིས་མི་ཁྱབ་པའི་ཏིང་ངེ་འཛིན་འདི་མེད་ཅིང་མི་དམིགས་པ་ཡིན་ནམ། འཇམ་དཔལ་གྱིས་སྨྲས་པ། བཙུན་པ་ཤར་དྭ་ཏིའི་བུ་འདི་ལྟར་དེ་ནི་བསམ་གྱིས་མི་ཁྱབ་པའི་ཏིང་ [197a.6]ངེ་འཛིན་ཏེ། དེ་བས་ན་བསམ་གྱིས་མི་ཁྱབ་པའི་ཏིང་ངེ་འཛིན་འདི་ནི་མེད་དེ་མི་དམིགས་པའོ། །དེ་ལྟ་མོད་ཀྱི་བཙུན་པ་ཤ་ར་དྭ་ཏིའི་བུ་བསམ་གྱིས་མི་ཁྱབ་པའི་ཏིང་ངེ་འཛིན་མ་ཐོབ་པ་ནི་སུ་ཡང་མེད་དོ། །བཙུན་པ་ཤ་ར་དྭ་ཏིའི་བུ་སེམས་ཅན་ཐམས་ཅད་ཀྱང་བསམ་གྱིས་མི་ཁྱབ་པའི་ཏིང་ངེ་ [197a.7]འཛིན་ཐོབ་པའོ། །དེ་ཅིའི་ཕྱིར་ཞེ་ན། བསམ་པ་ཐམས་ཅད་ནི་བསམ་གྱིས་མི་ཁྱབ་པ་ཡིན་ལ། གང་བསམ་གྱིས་མི་ཁྱབ་པ་དེ་ནི་བསམ་གྱིས་མི་ཁྱབ་པའི་ཏིང་ངེ་འཛིན་ཏེ། དེ་བས་ན་སེམས་ཅན་ཐམས་ཅད་བསམ་གྱིས་མི་ཁྱབ་པའི་ཏིང་ངེ་འཛིན་འདི་ཐོབ་པའོ།། །། [197b] [197b.1]བམ་པོ་གཉིས་པ་སྟེ་ཐ་མ། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་ཟབ་མོ་ཟབ་པའི་གནས་འདི་ལྟ་བུ་འདི་ཐམས་ཅད་བསྟན་པ་ལེགས་སོ་ལེགས་སོ། །འདི་ལྟར་འཇམ་དཔལ་ཁྱོད་ནི་སྔོན་གྱི་ [197b.2]རྒྱལ་བ་ལ་བྱ་བ་བྱས་པ་སྟེ། མི་དམིགས་པར་ཚངས་པར་སྤྱོད་པ་ཡུན་རིང་དུ་སྤྱད་པའོ། །ཅི་འཇམ་དཔལ་ཁྱོད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཏེ་དེ་སྐད་སྨྲའོ་སྙམ་དུ་སེམས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་གལ་ཏེ་བདག་འདི་ལྟར་ཤེས་ [197b.3]རབ་ཀྱི་ཕ་རོལ་ཏུ་ཕྱིན་པ་ལ་གནས་ནས་འདི་སྐད་མཆི་ན་ནི་འོ་ན་དམིགས་པ་ལ་གནས་ཏེ་དེ་སྐད་མཆི་བར་འགྱུར། བདག་ཏུ་འདུ་ཤེས་པ་ལ་གནས་པ་ནས་དངོས་པོའི་འདུ་ཤེས་ཀྱི་བར་ལ་གནས་ཏེ་དེ་སྐད་མཆི་བར་འགྱུར་རོ། །དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ཏེ་དེ་ [197b.4]སྐད་མི་མཆིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་གནས་སུ་གྱུར་ཏམ། ཅི་སྟེ་གནས་མ་ལགས་པ་ཞིག་ཏུ་གྱུར་ན་ཤེས་རབ་ཀྱི་ཕ་རོལ་ཏུ་ཕྱིན་པ་མ་ལགས་པར་འགྱུར་རོ། །བཅོམ་ལྡན་འདས་བདག་གི་གནས་ནི་ཤེས་རབ་ཀྱི་ [197b.5]ཕ་རོལ་ཏུ་ཕྱིན་པའི་གནས་ཏེ། གནས་མ་མཆིས་པ། ཀུན་ནས་འབྱུང་བ་མ་མཆིས་པ། གོ་སྐབས་མ་མཆིས་པ། འབྱུང་བ་མ་མཆིས་པ་ལགས་སོ། །དེ་ལྟར་ན་གནས་དེ་ནི་ཆོས་གང་གི་གནས་ཀྱང་མ་ལགས་སོ། །དེའི་སླད་དུ་གནས་དེ་ནི་བསམ་གྱིས་མི་ཁྱབ་པའི་གནས་ [197b.6]ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་ལགས་སོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བ་ནི་ཆོས་ཐམས་ཅད་ཀྱི་སྐྱེ་བ་མ་མཆིས་པ་གང་ལགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བ་དེ་ནི་ [197b.7]འདི་ལྟ་སྟེ། བསམ་གྱིས་མི་ཁྱབ་པའི་དབྱིངས་ཀྱི་ཚིག་{བླ་དགས་,བླ་དྭགས་}སོ། །བསམ་གྱིས་མི་ཁྱབ་པའི་དབྱིངས་གང་ལགས་པ་དེ་སྐྱེ་བ་མ་མཆིས་པའི་དབྱིངས་སོ། །སྐྱེ་བ་མ་མཆིས་པའི་དབྱིངས་གང་ལགས་པ་དེ་ཆོས་ཀྱི་དབྱིངས་སོ། །ཆོས་ཀྱི་དབྱིངས་གང་ལགས་པ་དེ་ [198a] [198a.1]ཀུན་ཏུ་འབྱུང་བ་མ་མཆིས་པའི་དབྱིངས་སོ། །ཀུན་ཏུ་འབྱུང་བ་མ་མཆིས་པའི་དབྱིངས་གང་ལགས་པ་དེ་བསམ་གྱིས་མི་ཁྱབ་པའི་དབྱིངས་སོ། །བསམ་གྱིས་མི་ཁྱབ་པའི་དབྱིངས་གང་ལགས་པ་དེ་བདག་གི་དབྱིངས་སོ། །བདག་གི་དབྱིངས་གང་ [198a.2]ལགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་དབྱིངས་ཏེ། དེ་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པའི་དབྱིངས་དང་། བདག་གི་དབྱིངས་འདི་ནི་གཉིས་སུ་མ་མཆིས་ཏེ་གཉིས་སུ་བགྱིར་མ་མཆིས་སོ། །གང་གི་སླད་དུ་འདི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་པ། [198a.3]དེའི་སླད་དུ་འདི་ནི་བསམ་གྱིས་མི་ཁྱབ་པའི་དབྱིངས་སོ། །གང་གི་སླད་དུ་འདི་བསམ་གྱིས་མི་ཁྱབ་པའི་དབྱིངས་ལགས་པ་དེའི་སླད་དུ་འདི་ནི་སྐྱེ་བ་མ་མཆིས་པའི་དབྱིངས་སོ། །གང་གི་སླད་དུ་འདི་སྐྱེ་བ་མ་མཆིས་པའི་དབྱིངས་ལགས་པ་དེའི་སླད་དུ་འདི་ནི་ཆོས་ཀྱི་དབྱིངས་སོ། ། [198a.4]གང་གི་སླད་དུ་འདི་ཆོས་ཀྱི་དབྱིངས་ལགས་པ་དེའི་སླད་དུ་འདི་ནི་ཀུན་ཏུ་འབྱུང་བ་མ་མཆིས་པའི་དབྱིངས་སོ། །གང་གི་སླད་དུ་འདི་ཀུན་ཏུ་འབྱུང་བ་མ་མཆིས་པའི་དབྱིངས་ལགས་པ་དེའི་སླད་དུ་འདི་ནི་བསམ་གྱིས་མི་ཁྱབ་པའི་དབྱིངས་སོ། །གང་གི་སླད་དུ་འདི་བསམ་གྱིས་མི་ཁྱབ་པའི་ [198a.5]དབྱིངས་ལགས་པ་དེའི་སླད་དུ་འདི་ནི་བདག་གི་དབྱིངས་སོ། །གང་གི་སླད་དུ་འདི་བདག་གི་དབྱིངས་ལགས་པ་དེའི་སླད་དུ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དབྱིངས་སོ། །གང་གི་སླད་དུ་འདི་ཤེས་རབ་ཀྱི་ཕ་རོལ་ཏུ་ཕྱིན་པའི་དབྱིངས་ལགས་པ་དེའི་སླད་དུ་འདི་ནི་བསམ་གྱིས་མི་ [198a.6]ཁྱབ་པའི་དབྱིངས་སོ། །གང་གིས་སླད་དུ་འདི་བསམ་གྱིས་མི་ཁྱབ་པའི་དབྱིངས་ལགས་པ་དེའི་སླད་དུ་འདི་ནི་ཡང་དག་པར་འགྲུབ་པ་མ་མཆིས་པའི་དབྱིངས་སོ། །ཡང་དག་པར་འགྲུབ་པ་མ་མཆིས་པ་གང་ལགས་པ་དེ་མཆིས་པ་མ་ལགས་སོ། །གང་མཆིས་པ་མ་ [198a.7]ལགས་པ་དེ་ནི་འཇིག་པར་མི་འགྱུར་རོ། །གང་འཇིག་པར་མི་འགྱུར་བ་དེ་ནི་བསམ་གྱིས་མི་ཁྱབ་པ་སྟེ། དེ་ལྟར་ན་དེ་བཞིན་གཤེགས་པའི་དབྱིངས་དང་། བདག་གི་དབྱིངས་འདི་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་སོ། །བཅོམ་ལྡན་འདས་ཀྱིས་གང་ [198b] [198b.1]བདག་བསྒོམ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་མོ་ཞེས་བཀའ་སྩལ་པ་དེ་ཡང་ཅིའི་སླད་དུ་ཞེ་ན། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བ་འདི་ནི་བདག་གི་དབྱིངས་ཀྱི་ཚིག་{བླ་དགས་,བླ་དྭགས་}ལགས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་ [198b.2]འདས་གང་གིས་བདག་གི་དབྱིངས་འཚལ་བ་དེས་ཆགས་པ་མ་མཆིས་པའི་དབྱིངས་འཚལ་ཏོ། །གང་གིས་ཆགས་པ་མ་མཆིས་པ་ཉིད་འཚལ་བ་དེས་ཆོས་གང་ཡང་འཚལ་བ་མ་མཆིས་ཏེ། དེ་ཅིའི་སླད་དུ་ཞེ་ན། འདི་ལྟར་བསམ་གྱིས་མི་ཁྱབ་པའི་ཡེ་ཤེས་ནི་སངས་ [198b.3]རྒྱས་ཀྱི་ཡེ་ཤེས་ལགས་ཏེ། ཆོས་གང་ལ་ཡང་ཤེས་པ་མ་མཆིས་པ་ནི་སངས་རྒྱས་ཀྱི་ཡེ་ཤེས་ལགས་པའི་སླད་དུའོ། །དེ་ཅིའི་སླད་དུ་ཞེ་ན། ཡེ་ཤེས་དེ་ནི་དོན་དམ་པར་ན་མཆིས་པ་མ་ལགས་ཏེ། གང་དོན་དམ་པར་མ་མཆིས་པ་དེ་ཆོས་ཀྱི་འཁོར་ལོ་བསྐོར་བར་ [198b.4]ཡང་ཇི་ལྟར་འགྱུར། གང་གི་ཚེ་ཡེ་ཤེས་དེ་དོན་དམ་པར་མ་མཆིས་པ་དེའི་ཚེ་ཡེ་ཤེས་དེ་ནི་ཆགས་པ་མ་མཆིས་པའོ། །གང་གི་ཚེ་ཡེ་ཤེས་དེ་ཆགས་པ་མ་མཆིས་པ་དེའི་ཚེ་ཡེ་ཤེས་དེ་ནི་དངོས་པོ་མ་མཆིས་པའོ། །གང་གི་ཚེ་ཡེ་ཤེས་དེ་དངོས་པོ་མ་མཆིས་པ་དེའི་ཚེ་ཡེ་ཤེས་ [198b.5]དེ་ནི་ཡུལ་མ་མཆིས་པའོ། །གང་གི་ཚེ་ཡེ་ཤེས་དེ་ཡུལ་མ་མཆིས་པ་དེའི་ཚེ་ཡེ་ཤེས་དེ་ནི་མི་གནས་པའོ། །གང་གི་ཚེ་ཡེ་ཤེས་དེ་མི་གནས་པ་དེའི་ཚེ་ཡེ་ཤེས་དེ་ནི་རྟེན་པ་མ་མཆིས་པའོ། །གང་གི་ཚེ་ཡེ་ཤེས་དེ་རྟེན་པ་མ་མཆིས་པ་དེའི་ཚེ་ཡེ་ཤེས་དེ་ནི་མ་བསྐྱེད་པའོ། ། [198b.6]མ་ཐོབ་པའོ། །སྐྱེ་བར་མི་འགྱུར་བའོ། །དེ་ཅིའི་སླད་དུ་ཞེ་ན། ཡེ་ཤེས་དེ་ནི་ཡོན་ཏན་གྱིས་འདུས་བགྱིས་པའམ། ཡོན་ཏན་མ་ལགས་པས་འདུས་བགྱིས་པ་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། འདི་ལྟར་ཡེ་ཤེས་དེ་ནི་བསམ་གྱིས་མི་ཁྱབ་པ་སྟེ། དེའི་སླད་དུ་ [198b.7]ཡོན་ཏན་ནམ་ཡོན་ཏན་མ་ལགས་པར་ཡང་ཇི་སྐད་དུ་བསྟན་པར་བགྱི། གང་གི་སླད་དུ་ཡེ་ཤེས་དེ་བསམ་གྱིས་མི་ཁྱབ་པ་དེའི་སླད་དུ་ཡེ་ཤེས་དེ་ནི་བསམ་དུ་མ་མཆིས་པ་སྟེ། གང་དེ་ལྟར་ཤེས་པ་དེ་ནི་མི་དམིགས་པའི་ཚུལ་དུ་སངས་རྒྱས་ཀྱི་ཡེ་ཤེས་ལགས་སོ། །ཡེ་ཤེས་ [199a] [199a.1]དེས་ནི་ཆོས་གང་ཡང་མངོན་པར་རྫོགས་པར་སངས་རྒྱས་པའམ། མཁྱེན་པ་མ་མཆིས་སོ། །ཡེ་ཤེས་དེ་ནི་སྔོན་གྱི་མཐའ་འམ། ཕྱི་མའི་མཐའ་ནས་མཆིས་པ་མ་ལགས་སོ། །ཡེ་ཤེས་དེ་ནི་སྔོན་སྐྱེས་པ་ཡང་མ་ལགས། ཡེ་ཤེས་དེ་ནི་སྔོན་མ་སྐྱེས་པ་ཡང་མ་ལགས་ཏེ། སྔོན་མ་ [199a.2]སྐྱེས་པའི་སླད་དུ་གང་མ་སྐྱེས་པ་དེ་ནི་ནུབ་པར་ཡང་མི་འགྱུར། ཆད་པར་ཡང་མི་འགྱུར་རོ། །ཡེ་ཤེས་དེ་དང་འདྲ་བའི་ཡེ་ཤེས་གང་ཡང་མ་མཆིས་ཏེ། དེའི་སླད་དུ་ཡེ་ཤེས་དེ་ནི་བསམ་གྱིས་མི་ཁྱབ་ཅིང་འདྲ་བ་མ་མཆིས་པའོ། །ཡེ་ཤེས་དེ་ནི་ཐོག་མ་དང་། དབུས་དང་། ཐ་མ་མི་དམིགས་པ་ [199a.3]སྟེ། དེའི་སླད་དུ་ཡེ་ཤེས་དེ་ནི་ནམ་མཁའ་དང་འདྲ་བའོ། །ཡེ་ཤེས་དེ་ལ་མཉམ་པ་འམ་མི་མཉམ་པ་མི་དམིགས་ཏེ། དེའི་སླད་དུ་ཡེ་ཤེས་དེ་ནི་མི་མཉམ་པ་དང་མཉམ་པའོ། །ཡེ་ཤེས་དེ་ལ་ནི་དེ་དང་འདྲ་བའི་ཡེ་ཤེས་གཞན་མི་དམིགས་ཏེ། དེའི་སླད་དུ་ཡེ་ཤེས་དེ་ནི་མཚུངས་པ་ [199a.4]མ་མཆིས་པའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཡེ་ཤེས་འདི་མ་བསྒྱུར་བ་མ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་ཡེ་ཤེས་འདི་ནི་མ་བགྱིས་པ་སྟེ། དེའི་སླད་དུ་འདི་མ་ [199a.5]བསྒྱུར་བ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་ན་ཀཱར་ཥ་པཱ་ཎ་རྟགས་མ་བཏབ་པ་ནི་བསྒྱུར་བ་ཡང་མ་ལགས། མ་བསྒྱུར་བ་ཡང་མ་ལགས་པའི་གྲངས་སུ་མཆིའོ། །བཅོམ་ལྡན་འདས་དེ་བཞིན་དུ་ཡེ་ཤེས་འདི་ཡང་མ་བགྱིས་པ། མ་བསྒྲུབས་པ། མ་བསྐྱེད་པ། མ་བྱུང་ [199a.6]བ། མ་འགགས་པ་སྟེ། དེའི་སླད་དུ་མ་བསྒྱུར་བ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་དེ་བཞིན་གཤེགས་པའི་ཡེ་ཤེས་བསྟན་པ་འདི་ལ་འདི་ལྟར་བསྟན་པར་སུ་དག་མོས། འཇམ་དཔལ་གྱིས་གསོལ་པ། བཅོམ་ [199a.7]ལྡན་འདས་གང་དག་འཁོར་བའི་ཆོས་ཅན་ཡང་མ་ལགས་ལ། ཡོངས་སུ་མྱ་ངན་ལས་འདས་པའི་ཆོས་ཅན་ཡང་མ་ལགས་པ་དང་། གང་དག་འཇིག་ཚོགས་ལས་ཀྱང་མ་བསྐྱོད་པ་དང་། གང་དག་འདོད་ཆགས་དང་། ཞེ་སྡང་དང་། གཏི་མུག་ཀྱང་མ་བས་པ་དེ་དག་མོས་སོ། །དེ་ཅིའི་སླད་ [199b] [199b.1]དུ་ཞེ་ན། མི་བས་པ་ནི་བས་པར་མི་འགྱུར་ཞིང་། ཡོངས་སུ་བས་པར་མི་མཆིའོ། །གང་དག་འཁོར་བ་ལས་ཀྱང་མ་འདས་ལ། འཁོར་བའི་གྲངས་སུ་ཡང་མི་མཆི་བ་དང་། གང་དག་ལམ་དང་བྲལ་བ་ཡང་མ་ལགས་ཤིང་། ལམ་གྱི་འདུ་ཤེས་མི་སྐྱེད་པ་དེ་དག་གིས་བསྟན་པ་འདིའི་དོན་ [199b.2]འཚལ་བར་འགྱུར་རོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །ཁྱོད་ཀྱིས་ཚིག་འདི་ལེགས་པར་སྨྲས་པའོ། །དེ་ནས་དེའི་ཚེ་བཅོམ་ལྡན་འདས་ལ་ཚེ་དང་ལྡན་པ་འོད་ [199b.3]སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མ་མཆིས་པའི་དུས་ན་གང་ལ་ལ་ཆོས་འདུལ་བ་ཟབ་མོ་འདི་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཉན་པ་དང་། མོས་པ་དང་ཀུན་འཚལ་བ་དང་། རབ་ཏུ་འཛིན་པར་འགྱུར་བ་འབྱུང་བ་མཆིས་སམ། དེ་སྐད་ [199b.4]ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་འཁོར་འདི་ཉིད་ན་ཡང་གང་དག་མ་འོངས་པའི་དུས་ན་ཆོས་འདུལ་བ་ཟབ་མོ་འདི་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཉན་པ་དང་། མོས་པ་དང་། [199b.5]ཀུན་ཤེས་པ་དང་། རབ་ཏུ་འཛིན་པར་འགྱུར་བའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཡོད་དོ། །འོད་སྲུང་འདི་ལྟ་སྟེ་དཔེར་ན་ཁྱིམ་བདག་གམ། ཁྱིམ་བདག་གི་བུ་ཞིག་ནོར་བུ་རིན་པོ་ཆེ་བརྒྱ་སྟོང་རི་བ་སྟོར་ན་སྡུག་བསྔལ་བ་དང་ཡིད་མི་བདེ་བར་འགྱུར་རོ། ། [199b.6]དེ་ཉིད་རྙེད་ན་བདེ་བ་དང་ཡིད་བདེ་བ་སྐྱེ་ཞིང་ཀུན་ནས་དཀྲིས་པའི་ཡིད་ལ་བྱེད་པ་མེད་པར་འགྱུར་རོ། །འོད་སྲུང་དེ་བཞིན་དུ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་མ་སྐྱེས་པ་དང་། མ་བྱུང་བ་དང་། རང་བཞིན་ [199b.7]གྱིས་ཡོངས་སུ་མྱ་ངན་ལས་འདས་པ་ནས་དངོས་པོ་མེད་པའི་བར་དུ་མ་ཐོས་པ་ན་འདི་སྙམ་དུ་བདག་ཅག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ནས་དངོས་པོ་མེད་པའི་བར་འདི་ལྟ་བུ་འདི་མ་ཐོས་སོ་སྙམ་དུ་ [200a] [200a.1]སེམས་སོ། །དེ་དག་གིས་དུས་གཞན་ན་ཐོས་པར་གྱུར་པ་ན་དགའ་བ་དང་། བདེ་བ་དང་། ཡིད་དགའ་བར་འགྱུར་ཞིང་ཀུན་ནས་དཀྲིས་པའི་ཡིད་ལ་བྱེད་པ་མེད་པར་འགྱུར་ཏེ། ཚིག་འདི་སྐད་དུ་འདི་ལྟར་བདག་ཅག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་ [200a.2]དང་། དངོས་པོ་མེད་པ་དང་། མ་བྱུང་བ་འདི་ཐོས་པས་དེང་བདག་ཅག་གིས་སངས་རྒྱས་མཐོང་ཞིང་། དེ་བཞིན་གཤེགས་པ་ལ་བསྙེན་བཀུར་ཡང་བྱས་སོ་ཞེས་སྨྲ་བར་འགྱུར་རོ། །འོད་སྲུང་འདི་ལྟ་སྟེ། དཔེར་ན་སུམ་ཅུ་རྩ་གསུམ་པའི་ལྷ་རྣམས་ནི་ཤིང་ཡོངས་འདུ་ས་བརྟོལ་ཁ་འབུས་ [200a.3]པ་མཐོང་ནས་ཀྱེ་མ་ཡོངས་འདུ་ས་བརྟོལ་འདི་རིང་པོ་མི་ཐོགས་པར་མེ་ཏོག་ཐམས་ཅད་རྒྱས་པར་འགྱུར་རོ་སྙམ་སྟེ། ཡིད་དགའ་བ་དང་། རབ་ཏུ་དགའ་བར་འགྱུར་རོ། །འོད་སྲུང་དེ་བཞིན་དུ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་ [200a.4]པ་ཟབ་མོ་མ་སྐྱེས་པ་དང་མ་བྱུང་བ་ནས་དངོས་པོ་མེད་པའི་བར་འདི་ཐོས་ན་ཡིད་དགའ་བ་དང་། རབ་ཏུ་དགའ་བར་འགྱུར་རོ། །གང་དག་མ་འོངས་པའི་དུས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་མ་བྱུང་བ་ནས་དངོས་པོ་མེད་པའི་བར་འདི་ཐོས་ན་ཡིད་དགའ་བ་དང་། རབ་ཏུ་ [200a.5]དགའ་བར་འགྱུར་བ་དེ་དག་ཀྱང་ངའི་འཁོར་འདི་ཉིད་ན་གནས་པར་འོད་སྲུང་ཁྱོད་ཀྱིས་ཤེས་པར་གྱིས་ཤིག །གང་དག་མ་འོངས་པའི་དུས་ན་ཡིད་དགའ་བ་དང་། རབ་ཏུ་དགའ་བར་འགྱུར་བ་དེ་དག་ཡིད་དགའ་བ་དེ་དང་། རབ་ཏུ་དགའ་བ་དེས་རིང་པོར་མི་ཐོགས་པར་སངས་རྒྱས་ཀྱི་ཆོས་ [200a.6]ཐམས་ཅད་ཀྱི་མེ་ཏོག་རྒྱས་པར་འགྱུར་བས་མེ་ཏོག་ཐམས་ཅད་རྒྱས་པར་འགྱུར་བར་ཤེས་པར་གྱིས་ཤིག །འོད་སྲུང་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་འདི་མ་འོངས་པའི་དུས་ན་དེ་བཞིན་གཤེགས་པ་འདས་པའི་ [200a.7]ཕྱིན་གནས་པར་འགྱུར་བ་དང་། སྤྱོད་པར་འགྱུར་བ་གང་ཡིན་པ་དེ་ཡང་འོད་སྲུང་སངས་རྒྱས་ཀྱི་བྱིན་གྱི་རླབས་དང་སངས་རྒྱས་ཀྱི་མཐུ་ཡིན་པར་ཤེས་པར་བྱའོ། །འོད་སྲུང་དེ་བས་ན་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་མ་བྱུང་བ་ནས་དངོས་པོ་མེད་པའི་བར་འདི་ [200b] [200b.1]ཐོས་ནས་དགའ་ན། འོད་སྲུང་དེ་ནི་དེ་དག་གི་ཐོས་པའི་དང་པོ་མ་ཡིན་ནོ། །འོད་སྲུང་འདི་ལྟ་སྟེ། དཔེར་ན་ནོར་བུ་མཁན་ཞིག་གིས་ནོར་བུ་རིན་པོ་ཆེ་མཐོང་ནས་གང་གི་ཚེ་དགའ་བར་གྱུར་པ་དེ་ནི་ནོར་བུ་མཁན་དེས་ནོར་བུ་རིན་པོ་ཆེ་གདོད་མཐོང་བ་མ་ཡིན་གྱི། དེ་ནི་སྔོན་ནས་རྒྱུན་ཏུ་ནོར་བུ་རིན་པོ་ཆེ་མཐོང་ [200b.2]བའོ་ཞེས་ཤེས་པར་བྱའོ། །འོད་སྲུང་དེ་བཞིན་དུ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་མ་བྱུང་བ་ནས་དངོས་པོ་མེད་པའི་བར་འདི་ཐོས་ནས་ཡིད་དགའ་བ་དང་། རབ་ཏུ་དགའ་བར་གྱུར་ཅིང་མགུ་བ་དང་། རངས་པ་དང་། ཡིད་བདེ་བ་སྐྱེས་ན་འོད་སྲུང་འདི་ནི་དེ་དག་གི་ཐོས་ [200b.3]པའི་དང་པོ་མ་ཡིན་ནོ། །འོད་སྲུང་དེ་དག་ནི་འདི་སྐད་དུ་སྨྲ་བར་འགྱུར་ཏེ། གང་འདི་འཇམ་དཔལ་གཞོན་ནུར་གྱུར་པས་མ་སྐྱེས་པ་ནས་དངོས་པོ་མེད་པ་དང་། མ་བྱུང་བའི་བར་དུ་བསྟན་པ་འདི་ཉིད་སྨྲོས་ཤིག་ཅེས་ཟེར་བར་འགྱུར་ཏེ། དེ་དག་ནི་སྔོན་རྒྱུན་ཏུ་འཇམ་དཔལ་གཞོན་ནུར་གྱུར་པ་ལ་བསྙེན་ [200b.4]བཀུར་བྱས་པར་གྱུར་པའོ། །འོད་སྲུང་འདི་ལྟ་སྟེ་དཔེར་ན་མི་ལ་ལ་ཞིག་གྲོང་ངམ། གྲོང་ཁྱེར་རམ། གྲོང་རྡལ་ལམ། གྲོང་གང་ཡང་རུང་བ་ཞིག་ཏུ་དགོས་པ་ལ་ལའི་ཕྱིར་སོན་པར་གྱུར་ལ། ཡང་དུས་གཞན་ཞིག་ན་དེའི་དྲུང་དུ་མི་ལ་ལ་ཞིག་སོང་སྟེ། གྲོང་ཁྱེར་དེའི་བསྔགས་པ་བརྗོད་ཅིང་ཀུན་ [200b.5]དགའི་ར་བ་ཉམས་དགའ་བ་དང་། ཡུལ་ཉམས་དགའ་བ་དང་། རྫིང་བུ་ཉམས་དགའ་བ་དང་། སྐྱེད་མོས་ཚལ་ཉམས་དགའ་བ་དང་། ཆུ་མིག་དང་། མཚེའུ་དང་། མཚོ་བྲན་ཉམས་དགའ་བ་དང་། མེ་ཏོག་དང་། འབྲས་བུ་ཉམས་དགའ་བ་དེ་དག་གི་བསྔགས་པ་བརྗོད་ནས། དེས་དེ་ཐོས་པ་དང་ [200b.6]དགའ་བར་ཚོར་ཏ་ཡིད་བདེ་བ་སྐྱེས་ནས་ཡང་དང་ཡང་འདི་སྐད་དུ་ཀྱེ་སྐྱེས་བུ་དེ་ཉིད་ཟློས་ཏེ་བརྗོད་ཅིག་ཅེས་འཚོལ་ན། མི་དེས་ནི་སྔོན་ཡང་གྲོང་ཁྱེར་དེ་དང་། ཀུན་དགའི་ར་བ་ཉམས་དགའ་བ་དང་། ཡུལ་ཉམས་དགའ་བ་དང་། རྫིང་བུ་ཉམས་དགའ་བ་དང་། སྐྱེད་མོས་ཚལ་ཉམས་དགའ་བ་དང་། [200b.7]ཆུ་མིག་དང་། མཚེའུ་དང་། མཚོ་བྲན་ཉམས་དགའ་བ་དང་། མེ་ཏོག་དང་། འབྲས་བུ་ཉམས་དགའ་བ་དག་ཀྱང་མྱོང་བ་ཡིན་པར་མི་དེས་དེ་ལྟར་རྟོགས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་ཐོས་ནས་ཡིད་ཆེར་དགའ་བ་དང་། རབ་ཏུ་དགའ་བར་གྱུར་ཏེ། མགུ་བ་དང་། རངས་པ་དང་། [201a] [201a.1]ཡིད་བདེ་བ་སྐྱེས་པའི་ཕྱིར་རོ། །འོད་སྲུང་དེ་བཞིན་དུ་གང་དག་གིས་འཇམ་དཔལ་གཞོན་ནུར་གྱུར་པ་ལ་བསྙེན་བཀུར་བྱས་པར་གྱུར་པ་དང་། ཡང་དང་ཡང་དྲུང་དུ་འགྲོ་ཞིང་འདྲི་བར་བྱས་པར་གྱུར་པ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་། མ་བྱུང་བ་ནས་དངོས་པོ་ [201a.2]མེད་པའི་བར་འདི་ཐོས་ན་རབ་ཏུ་དགའ་ཞིང་མགུ་བར་འགྱུར་ཏེ། དགའ་བ་དང་། མགུ་བ་ཆེར་སྐྱེད་ཅིང་ཚིག་འདི་སྐད་དུ་མ་ལ་འདི་ལྟ་སྟེ། མ་སྐྱེས་པ་དང་། མ་བྱུང་བ་ནས་དངོས་པོ་མེད་པའི་བར་དུ་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟ་བུ་འདི་ཉིད་ཇེ་མཉན་ཏོ་ཞེས་སྨྲ་བར་འགྱུར་རོ། །དེ་སྐད་ཅེས་ [201a.3]བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་མ་མཆིས་པའི་དུས་ན་དད་པའི་རིགས་ཀྱི་བུའམ། རིགས་ཀྱི་བུ་མོ་འབྱུང་བ་དེ་དག་གི་རྣམ་པ་དང་། རྟགས་དང་། མཚན་མ་བཅོམ་ལྡན་འདས་ཀྱིས་གང་དག་བཀའ་སྩལ་ [201a.4]པ་དེ་དག་ཉིད་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཇི་སྐད་སྨྲས་པ་དེ་དེ་བཞིན་ཏེ། མ་འོངས་པའི་དུས་ན་དད་པའི་རིགས་ཀྱི་བུའམ། རིགས་ཀྱི་བུ་མོ་འབྱུང་བ་དེ་དག་གི་རྣམ་པ་དང་རྟགས་དང་། མཚན་མ་ནི་གང་དག་ངས་ད་ལྟར་བསྟན་པ་འདི་དག་ཉིད་ཡིན་ནོ། །དེ་ནས་ [201a.5]བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དེ་ནི་རྣམ་པ་མ་མཆིས་ཤིང་རྟགས་མ་མཆིས་པ་དང་། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རྣམ་པ་མ་མཆིས་པ་ནས་མཚན་མ་མཆིས་པའི་བར་དུ་ལགས་ན་རྣམ་ [201a.6]པ་འམ་རྟགས་སམ། མཚན་མ་ཇི་ལྟ་བུ་ཞིག་མཆིས་པར་འགྱུར། བཅོམ་ལྡན་འདས་ཀྱིས་ཆོས་བསྟན་པ་གང་ལགས་པ་དེ་ཡང་རྣམ་པ་མ་མཆིས། རྟགས་མ་མཆིས། མཚན་མ་མ་མཆིས་པའི་བར་དུ་ལགས་ན་བཅོམ་ལྡན་འདས་རྣམ་པ་མ་མཆིས་པ་དང་། རྟགས་མ་མཆིས་པ་དང་། མཚན་ [201a.7]མ་མ་མཆིས་པ་ཇི་ལྟར་བསྟན་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ཤིན་ཏུ་མ་སྐྱེས་པ་དང་། དངོས་པོ་མེད་པའི་བར་འདི་བསྟན་པ་ན་གང་ [201b] [201b.1]དག་མོས་པ་ནས་ཀུན་ཆུབ་པར་བྱེད་པའི་བར་དུ་བྱེད་པ་དེ་དག་ཉིད། རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་རྣམ་པ་དང་། རྟགས་དང་། མཚན་མ་ཡིན་ནོ། །འཇམ་དཔལ་གང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་དེར་སངས་རྒྱས་ཀྱི་ཆོས་ཐམས་ [201b.2]ཅད་བསྟན་པར་བལྟའོ། །དེར་བསམ་གྱིས་མི་ཁྱབ་པ་བསྟན་པར་བལྟའོ། །འཇམ་དཔལ་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་གང་དག་ཡང་དག་པར་བསྒྲུབས་ཏེ། དགེ་བའི་རྩ་བ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ [201b.3]འདི་མངོན་པར་རྫོགས་པར་སངས་རྒྱས་པའི་དགེ་བའི་རྩ་བ་དེ་དག་ཡང་དག་པར་བསྒྲུབ་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། མོས་པར་བྱ། ཡི་གེར་བྲི་བར་བྱ། གཟུང་བར་བྱ། བཀླག་པར་བྱ། ལུང་ [201b.4]མནོད་པར་བྱ། ཁ་ཏོན་དུ་བྱ། ཚིག་ཏུ་གདོན་པར་བྱ། ཀུན་ཆུབ་པར་བྱ། ཚུལ་བཞིན་ཡིད་ལ་བྱ། བསྒོམ་པར་བྱ་བ་ནས། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་ [201b.5]པར་རྒྱལ་བའི་བ་དན་དང་། མར་མེ་ལ་སོགས་པས་ཅི་ནུས་ཅི་ཕོད་དུ་མཆོད་པའི་བར་དུ་བྱའོ། །རིམ་གྲོར་བྱའོ། །ཉན་ཐོས་དང་། རང་སངས་རྒྱས་ཐམས་ཅད་ཀྱིས་ལས་འདའ་བར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ [201b.6]མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་ཇི་ལྟར་ཕྱིར་མི་ལྡོག་པའི་ས་ལ་འཇུག་པར་འགྱུར་བ་དེ་ལྟ་བུ་ཉན་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་ [201b.7]དཔལ་ཆོས་གང་ཡང་རུང་སྟེ། དེ་དག་ཐམས་ཅད་མ་སྐྱེས་པར་མཉམ་པ་ཉིད་དུ་མོས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་སངས་རྒྱས་ཀྱི་ཆོས་ཐམས་ [202a] [202a.1]ཅད་མངོན་པར་རྫོགས་པར་བྱང་ཆུབ་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་ཆོས་ཐམས་ཅད་དེ་བཞིན་གཤེགས་པས་མངོན་པར་ [202a.2]རྫོགས་པར་སངས་རྒྱས་སོ་ཞེས་ཤིན་ཏུ་བསྟན་པ་འདི་ལ་མོས་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། གང་མངོན་པར་རྫོགས་པར་འཚང་རྒྱ་ [202a.3]བར་བྱེད་པའམ། གང་གིས་མངོན་པར་རྫོགས་པར་འཚང་རྒྱ་བར་བྱེད་པའམ། གང་མངོན་པར་རྫོགས་པར་འཚང་རྒྱ་བར་བྱ་བའི་ཆོས་དེ་གང་ཡང་མེད་དེ་མི་དམིགས་པའི་ཕྱིར་རོ། །དེ་ལྟར་དོན་འདི་རྟོགས་ཤིང་མོས་པར་འདོད་པའི་རིགས་ཀྱི་བུ་འམ། རིགས་ཀྱི་ [202a.4]བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །གང་བྱང་ཆུབ་མ་ཡིན་པའི་ཆོས་དེ་གང་ཡང་མེད་དོ་ཞེས་དེ་ལྟར་མོས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་ [202a.5]པར་བྱ་བ་ནས་རིམ་གྲོའི་བར་དུ་བྱའོ། །ཆོས་ཐམས་ཅད་ལ་རྣམ་པར་མི་རྟོག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་ [202a.6]རོལ་ཏུ་ཕྱིན་པ་ནི་ཆོས་གང་གི་ཡོངས་སུ་གྲུབ་པ་རྣམ་པར་གཞོག་པའམ། སྐྱེད་པའམ། སྟོན་པ་མ་ཡིན་པའི་ཕྱིར་རོ། །ཆོས་ཐམས་ཅད་ཀུན་ནས་ཉོན་མོངས་པ་མ་ཡིན། རྣམ་པར་བྱང་བམ་ཡིན་ཞེས་བྱ་བར་འཇུག་པར་འདོད་པའི་རིགས་ཀྱི་བུའམ། རིགས་ [202a.7]ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །ཆོས་ཐམས་ཅད་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ཞེས་བྱ་བར་མོས་པར་བྱ་བར་འདོད་ཅིང་འཇུག་པར་འདོད་པའི་རིགས་ཀྱི་བུའམ། [202b] [202b.1]རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །དེ་ཅིའི་ཕྱིར་ཞེ་ན། འཇམ་དཔལ་སྐྱེ་བ་མེད་པ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ [202b.2]ཅད་ནི་སྐྱེ་བ་མེད་པ་ལ་རྟོན་པའི་ཕྱིར་རོ། །དེ་ལྟ་བུའི་ཆོས་ཐམས་ཅད་ལ་ཐེ་ཚོམ་མེད་པར་རྟོགས་པར་འདོད་པའི་རིགས་ཀྱི་བུའམ་རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །འཇམ་དཔལ་ལན་གསུམ་དུ་བཟླས་ཏེ་རྣམ་པ་བཅུ་ [202b.3]གཉིས་སུ་བསྐོར་བའི་ཆོས་ཀྱི་འཁོར་ལོར་ཇི་ལྟར་འགྱུར་བ་དེ་ཉན་པར་འདོད་པ་དང་། དེ་རྟོགས་པར་འདོད་པ་དང་། དེ་ལ་མོས་པར་འདོད་པ་དང་། དེ་ལ་འཇུག་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་ [202b.4]བྱའོ། །སེམས་ཅན་ཐམས་ཅད་ལ་བྱམས་པས་ཁྱབ་པར་བྱ་བར་ཡང་འདོད་ལ་སེམས་ཅན་དུ་འདུ་ཤེས་པ་ལ་ཡང་མི་གནས་པར་འདོད་པ་དང་། འཇིག་རྟེན་ཐམས་ཅད་དང་རྩོད་པ་མེད་པར་ཡང་འདོད་ཅིང་འཇིག་རྟེན་ཐམས་ཅད་མི་དམིགས་པར་རྟོགས་པར་འདོད་པའི་རིགས་ [202b.5]ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ་བ་ནས་རིམ་གྲོའི་བར་དུ་བྱའོ། །ཆོས་ཐམས་ཅད་སྐྱེ་བ་མེད་པའི་བར་དུ་རྟོགས་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་ [202b.6]དམིགས་པའི་ཚུལ་གྱིས་བསླབ་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོན་ཏན་མ་མཆིས་པའི་ཡོན་ཏན་གང་ལགས་ཕན་ཡོན་གང་ལགས། བཅོམ་ལྡན་འདས་ [202b.7]ཤེས་རབ་ཀྱི་ཕ་རོལ་ཏུ་ཕྱིན་པ་ནི་ནུས་པ་ཅི་ཡང་མ་མཆིས་པ། ཀུན་ནས་སློང་བར་མི་བགྱིད་པ། རྣམ་པར་འཇིགས་པར་མི་བགྱིད་པ། ཆོས་གང་ཡང་མི་ལེན་པ། མི་འདོར་བ། གཡོ་བ་མ་མཆིས་པ། བྱེད་པ་མ་མཆིས་པ་ལགས། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ངོ་བོ་ཉིད་ཤེས་པ་མ་ [203a] [203a.1]ལགས་པ། དེ་ངོ་བོ་ཉིད་མཐོང་བ་མ་ལགས་པ། ཆོས་གང་ཡང་སྦྱིན་པར་མི་བགྱིད་པ། ཆོས་ཐམས་ཅད་དང་མི་འགལ་བ། ཆོས་ཐམས་ཅད་ཐ་དད་པར་མི་བགྱིད་པ་ལགས་ན། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པའི་ཡོན་ཏན་གང་ལགས། ཕན་ཡོན་གང་ལགས་ [203a.2]བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་ཐམས་ཅད་གཅིག་ཏུ་བགྱིད་པ་མ་ལགས་པ། ཆོས་ཐམས་ཅད་ཐ་དད་དུ་བགྱིད་པ་མ་ལགས་པ་མ་བགྱིས་པ། བགྱི་བ་མ་མཆིས་པ། མི་བས་པ། རྣམ་པར་འཇིག་པར་མི་བགྱིད་པ། སོ་སོའི་སྐྱེ་བོའི་ཆོས་རྣམས་དང་། དགྲ་བཅོམ་པའི་ [203a.3]ཆོས་རྣམས་དང་། བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཀྱང་སྦྱིན་པར་བགྱིད་པ་མ་ལགས་པ། འགྲིབ་པར་བགྱིད་པ་མ་ལགས་པ། འཁོར་བ་ལེན་པར་མི་བགྱིད་པ། མྱ་ངན་ལས་འདས་པ་འདོར་བར་མི་བགྱིད་པ། སངས་རྒྱས་ཀྱི་ཆོས་རྣམས་ [203a.4]སྦྱིན་པར་བགྱིད་པ་མ་ལགས་པ། རྣམ་པར་འཇིག་པར་བགྱིད་པ་མ་ལགས་པ། བསམ་པར་བགྱི་བ་མ་ལགས་པ། བསམ་དུ་མ་མཆིས་པ་མ་ལགས་པ། བགྱིད་པ་མ་ལགས་པ། འཇིག་པར་བགྱིད་པ་མ་ལགས་པ། ཆོས་ཐམས་ཅད་སྐྱེད་པ་མ་ལགས་པ། འགོག་པ་མ་ [203a.5]ལགས་པ། ཆད་པར་བགྱིད་པ་མ་ལགས་པ། རྟག་པར་བགྱིད་པ་མ་ལགས་པ། འོང་བར་བགྱིད་པ་མ་ལགས་པ། འགྲོ་བར་བགྱིད་པ་མ་ལགས་པ། དབེན་པར་བགྱིད་པ་མ་ལགས་པ། མི་དབེན་པར་བགྱིད་པ་མ་ལགས་པ། གཉིས་སུ་བགྱིད་པ་མ་ལགས་པ། མི་གཉིས་པར་ [203a.6]བགྱིད་པ་མ་ལགས་པའི་ཡོན་ཏན་གང་ལགས་ཕན་ཡོན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དངོས་པོ་མེད་པ་ནས་བྱེད་པ་མེད་པའི་བར་འདི་ཉིད་ཤེས་རབ་ཀྱི་ཕ་ [203a.7]རོལ་ཏུ་ཕྱིན་པ་འདིའི་ཡོན་ཏན་དུ་རིག་པར་བྱའོ། །འཇམ་དཔལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ཏིང་ངེ་འཛིན་ལ་སློབ་པར་འདོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་སྒྲུབ་པར་འདོད་པ་དང་། ཏིང་ངེ་འཛིན་གང་ལ་གནས་ནས་ [203b] [203b.1]སངས་རྒྱས་བཅོམ་ལྡན་འདས་ཐམས་ཅད་སྣང་བ་དང་། དེ་དག་གི་སངས་རྒྱས་ཀྱི་ཞིང་རྣམས་ཀྱང་མཐོང་བར་འདོད་པ་དང་། དེ་དག་གི་མིང་ཡང་ཤེས་པར་འདོད་པ་དང་། དེ་དག་ལ་མཆོད་པ་བླ་ན་མེད་པ་ཡང་བྱེད་པར་འདོད་པ་དང་། དེ་དག་གི་ཆོས་བསྟན་པ་ལ་རྗེས་སུ་འཇུག་པར་འདོད་པ་ [203b.2]དང་། མོས་པར་འདོད་པས་མི་བསླབ་པའི་ཚུལ་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་འདི་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི། བཅོམ་ [203b.3]ལྡན་འདས་ཀྱིས་བཀའ་སྩལ་པ། འཇམ་དཔལ་མ་སྐྱེས་མ་འགགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །འདི་ལྟར་ཡང་གཟོད་མ་ནས་ཞི་བ་དང་། འབྱུང་བ་མེད་པ་དང་བྱ་བ་མེད་པ་ནས་དངོས་པོ་མེད་པའི་བར་གྱི་ཕྱིར་ཏེ། གང་དངོས་པོ་མེད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ [203b.4]ཡིན་ནོ། །འཇམ་དཔལ་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་ཤེས་པར་བྱའོ། །གང་ཆོས་ཐམས་ཅད་སྤྱོད་ཡུལ་མ་ཡིན་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་ཡུལ་ཏེ། འདི་ལ་སྤྱོད་ན་བྱང་ཆུབ་ [203b.5]སེམས་དཔའ་སེམས་དཔའ་ཆེན་པོ་སྤྱོད་ཡུལ་ལ་ཞུགས་པ་ཞེས་བྱའོ། །འདི་ལྟ་སྟེ། སྤྱོད་ཡུལ་མ་ཡིན་པ་ཐེག་པ་ཐམས་ཅད་པ་འདི་ཉིད་སྤྱོད་ཡུལ་ཡིན་ནོ། །དེ་ཅིའི་ཕྱིར་ཞེ་ན། སྤྱོད་ཡུལ་འདི་ནི་མ་བྱས་པ་སྟེ། དེའི་ཕྱིར་སྤྱོད་ཡུལ་མ་ཡིན་པ་ཞེས་བྱའོ། །དེ་ནས་བཅོམ་ལྡན་འདས་ལ་ [203b.6]འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་སྤྱད་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་ [203b.7]འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་ན། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་ [204a] [204a.1]དཔལ་བཀོད་པ་གཅིག་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ལ་སྤྱད་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། [204a.2]བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བཀོད་པ་གཅིག་པའི་ཏིང་ངེ་འཛིན་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་འཇུག་པར་བགྱི། ཅིའི་སླད་དུ་བཀོད་པ་གཅིག་པའི་ཏིང་ངེ་འཛིན་ཅེས་བགྱི། བཅོམ་ལྡན་ [204a.3]འདས་ཀྱིས་བཀའ་སྩལ་པ། འཇམ་དཔལ་བཀོད་པ་གཅིག་པ་ཞེས་བྱ་བ་འདི་ནི་སྐྱེ་བ་མེད་པའི་ཚིག་{བླ་དགས་,བླ་དྭགས་}སོ། །བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཐོག་མ་ཉིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དྲི་བ་བྱ་དགོས་ཏེ། [204a.4]དེའི་འོག་ཏུ་བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་སྐྱེ་བ་མེད་པ་ནི་མི་འཁྲུགས་པ་སྟེ། དཀྲུག་ཏུ་མི་རུང་བ། དཀྲུག་པར་བྱ་བ་མ་ཡིན་པ། བསམ་གྱིས་མི་ཁྱབ་པ། བསམ་པར་མི་བྱ་བ། བསམ་གྱིས་མི་ལང་བའོ། ། [204a.5]འཇམ་དཔལ་བཀོད་པ་གཅིག་པའི་ཏིང་ངེ་འཛིན་ལ་འཇུག་པར་འདོད་པའི་རིགས་ཀྱི་བུ་འམ་རིགས་ཀྱི་བུ་མོས་དབེན་པའི་མལ་སྟན་རྣམས་བསྟེན་པར་བྱ། འདུ་འཛི་མེད་པ་ལ་དགའ་བར་བྱས་ལ་མཚན་མ་ཐམས་ཅད་ཡིད་ལ་མི་བྱ་བར་སྐྱིལ་མོ་ཀྲུང་བཅས་ཏེ། འདུག་ནས་དེར་མི་དམིགས་ [204a.6]པའི་ཚུལ་གྱིས་དེ་བཞིན་གཤེགས་པ་གཅིག་ཡིད་ལ་བྱའོ། །ཆོས་ཐམས་ཅད་ཀྱང་ཡིད་ལ་བྱའོ། །དེ་བཞིན་གཤེགས་པ་གང་ཡིད་ལ་བྱེད་པ་དེའི་མིང་ཡང་གཟུང་བར་བྱའོ། །མིང་དེ་ཡང་ཐོས་ཏེ་དམིགས་ནས་དེ་བཞིན་གཤེགས་པ་དེ་ཕྱོགས་ག་ལ་བཞུགས་པའི་ཕྱོགས་དེར་མངོན་དུ་བལྟས་ [204a.7]ཏེ་འདུག་པར་བྱའོ། །ཡིད་ལ་བྱའོ། །དེ་བཞིན་གཤེགས་པ་དེ་ཉིད་ཡིད་ལ་བྱས་ན་དེ་ཡིད་ལ་བྱས་པས་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཡིད་ལ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉིད་གཅིག་པའི་ཕྱིར་རོ། །འཇམ་ [204b] [204b.1]དཔལ་ཇི་ལྟར་དེ་བཞིན་གཤེགས་པ་གཅིག་གི་སངས་རྒྱས་ཀྱི་ཡོན་ཏན་ཚད་མེད་པ་དང་། སྤོབས་པ་ཚད་མེད་པ་དེ་བཞིན་དུ་འཇམ་དཔལ་བཀོད་པ་གཅིག་པའི་ཏིང་ངེ་འཛིན་ཐོབ་ནས། སྐྱེ་བ་མེད་པ་གཅིག་གི་ཆོས་ཀྱི་རྣམ་གྲངས་ཀྱི་བྱེ་བྲག་ཚད་མེད་པར་ཤེས་པར་བྱའོ། །འདིར་གང་དག་ཆུད་པར་ [204b.2]འགྱུར་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གང་དག་གསུངས་པ་དང་། ཀུན་དགའ་བོས་ཇི་སྙེད་ཡོངས་སུ་བཟུང་བ་དེ་སྙེད་ཀྱི་ཆོས་ཀྱི་རྣམ་གྲངས་འདིར་སྣང་བར་འགྱུར་རོ། །བཀོད་པ་གཅིག་པའི་ཏིང་ངེ་འཛིན་འདི་བསྒྲུབས་པས་ [204b.3]དེའི་ཚེའི་ཚད་ཇི་ཙམ་པ་དེ་ཙམ་དུ་གནས་ཤིང་གླེང་གཞི་དང་བཅས་པའི་ཆོས་སྟོན་པར་འགྱུར་རོ། །འཇམ་དཔལ་དེ་ལ་བྱང་ཆུབ་སེམས་དཔའི་ཐེག་པ་ཁ་ཅིག་འདི་སྙམ་དུ་བཀོད་པ་གཅིག་པའི་ཏིང་ངེ་འཛིན་འདི་གང་ཡིན་སྙམ་དུ་སེམས་ན། དེ་དག་ལ་འདི་སྐད་ཅེས་ཡོན་ཏན་བསམ་གྱིས་མི་ཁྱབ་པ་ [204b.4]ཡོངས་སུ་བསྒྲགས་པ་འདི་ཡང་དག་པར་ཟུང་ལ་འདུག་ཤིག་དང་། ཇི་ལྟ་ཇི་ལྟར་ཡང་དག་པར་བླངས་ཏེ་གནས་པ་དེ་ལྟ་དེ་ལྟར་ཏིང་ངེ་འཛིན་འདིའི་ཡོན་ཏན་མཐོང་བར་འགྱུར་གྱིས། ཇི་སྐད་བསྟན་པའི་ཚུལ་གྱིས་ཞུམ་པ་མེད་པར་གྱིས་ཤིག་ཅེས་བརྗོད་པར་བྱའོ། །ཏིང་ངེ་འཛིན་འདི་ནི་ [204b.5]དམིགས་པའི་ལྟ་བ་ཅན་དག་དང་། དངོས་པོར་ལྟ་བ་ཅན་དག་ནས་ཡོད་པར་ལྟ་བ་ཅན་དག་གི་བར་གྱིས་བསྒྲུབ་པར་མི་ནུས་སོ། །འཇམ་དཔལ་འདི་ལྟ་སྟེ། དཔེར་ན་མི་ཞིག་ལ་རིན་ཐང་མེད་པའི་ནོར་བུ་རིན་པོ་ཆེ་བྱི་དོར་མ་བྱས་པ་ཞིག་བདོག་ལ། མི་གཞན་ཞིག་གིས་དེར་མི་དེ་ལ་འདི་སྐད་དུ་ [204b.6]ཀྱེ་སྐྱེས་བུ་ནོར་བུ་རིན་པོ་ཆེ་འདིའི་རིན་ཐང་ཇི་ཙམ། ནོར་བུ་རིན་པོ་ཆེ་འདི་ལ་ཡོན་ཏན་ཅི་ཞིག་ཡོད་ཅེས་ཟེར་ལ། མི་དེས་ཀྱང་དེ་ལ་འདི་སྐད་དུ་ཀྱེ་སྐྱེས་བུ་ནོར་བུ་རིན་པོ་ཆེ་འདིའི་ཡོན་ཏན་ཚད་མེད་ཀྱིས་ཚད་མེད་པ་ཉིད་ཤེས་པར་གྱིས་ཤིག་ཅེས་སྨྲས་ཏེ། དེ་ནས་མི་དེས་ནོར་བུ་རིན་པོ་ཆེ་དེ་བྱི་དོར་བྱ་ [204b.7]བའི་ཕྱིར་མི་དེ་ལ་བཞག་ནས། ཀྱེ་སྐྱེས་བུ་ནོར་བུ་རིན་པོ་ཆེ་འདི་རེ་ཤིག་བྱི་དོར་གྱིས་ཤིག་དང་དེ་ནས་ཤེས་པར་འགྱུར་རོ་ཞེས་བྱས་ལ། དེ་ནས་མི་དེས་ནོར་བུ་རིན་པོ་ཆེ་དེ་མི་དེ་ལས་བླངས་ཏེ་ཕྱི་བདར་བྱ་བའི་ཡོ་བྱད་རྣམས་ཀྱིས་བྱི་དོར་བྱས་པ་དང་། དེ་ལྟར་བྱི་དོར་བྱས་པས་ནོར་བུ་རིན་པོ་ [205a] [205a.1]ཆེ་དེ་རིན་ཐང་མེད་དེ། དེས་ཇི་ལྟ་ཇི་ལྟར་ནོར་བུ་རིན་པོ་ཆེ་དེའི་ཕྱི་བདར་བྱས་པ་དེ་ལྟ་དེ་ལྟར་ནོར་བུ་རིན་པོ་ཆེ་དེའི་ཡོན་ཏན་མཐོང་བར་འགྱུར་བ་དེ་བཞིན་དུ་འཇམ་དཔལ་གང་དང་གང་གི་ཚེ་རིགས་ཀྱི་བུ་འམ། རིགས་ཀྱི་བུ་མོ་དེ་ཏིང་ངེ་འཛིན་འདི་ལ་མཉམ་པར་ [205a.2]འཇོག་པ་དང་འཇུག་པ་དེ་དང་དེའི་ཚེ་ཏིང་ངེ་འཛིན་འདིའི་ཡོན་ཏན་མཐོང་བར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་ཉི་མའི་དཀྱིལ་འཁོར་གྱི་འོད་ཟེར་དག་གིས་སའི་དཀྱིལ་འཁོར་མཐའ་དག་ཀྱང་མ་ཁྱབ་པ་མེད་དོ། །འཇམ་དཔལ་དེ་བཞིན་དུ་བཀོད་པ་གཅིག་པའི་ཏིང་ངེ་འཛིན་ཐོབ་ [205a.3]ཅིང་ཞུགས་ནས་རྙེད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་མ་ཡིན་པའི་ཆོས་གང་ཡང་མི་སྟོན་ཏོ། །གང་ལ་ལས་འདི་གཞན་དུ་ཤེས་ན་དེས་སྐྱེ་བ་མེད་པ་དང་འགལ་བའི་ཆོས་གང་ཡང་མི་མཐོང་ངོ་། །འཇམ་དཔལ་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་ཕྱོགས་བཞི་ནས་སྐྱེས་བུ་ [205a.4]བཞི་ཆུ་འཆུ་ན་དེ་ཐམས་ཅད་འདི་ལྟ་སྟེ་ལན་ཚྭའི་རོར་རོ་གཅིག་པ་ཉིད་འཆུ་ཞིང་ལེན་ཏོ། །འཇམ་དཔལ་དེ་བཞིན་དུ་ངས་ཆོས་གང་ཅི་བསྟན་པ་དེ་དག་ཐམས་ཅད་ནི་འདི་ལྟ་སྟེ། སྐྱེ་བ་མེད་པའི་རོ་དང་། དངོས་པོ་མེད་པའི་རོ་དང་། འདོད་ཆགས་དང་བྲལ་བའི་རོ་དང་། རྣམ་པར་ [205a.5]གྲོལ་བའི་རོ་དང་། འགོག་པའི་རོར་རོ་གཅིག་པའོ། །འཇམ་དཔལ་དེ་ལྟ་བས་ན་རིགས་ཀྱི་བུ་འམ། རིགས་ཀྱི་བུ་མོས་ཏིང་ངེ་འཛིན་འདི་དང་ལྡན་པ་དེ་ཆོས་གང་དང་གང་སྟོན་ཀྱང་དེ་དག་ཐམས་ཅད་འདི་ལྟ་སྟེ། སྐྱེ་བ་མེད་པའི་རོ་དང་། དངོས་པོ་མེད་པའི་རོ་དང་། འདོད་ཆགས་དང་བྲལ་ [205a.6]བའི་རོ་དང་། རྣམ་པར་གྲོལ་བའི་རོ་དང་། འགོག་པའི་རོར་རོ་གཅིག་པར་སྟོན་པར་འགྱུར་རོ། །ཏིང་ངེ་འཛིན་འདི་ཐོབ་ནས་རིགས་ཀྱི་བུའམ། རིགས་ཀྱི་བུ་མོ་དེ་འདོད་ན་ངས་ཆོས་གང་ཅི་བསྟན་པ་དེ་འཆད་པ་དང་། རྣམ་པར་སྟོན་པ་དང་། ཉེ་བར་སྟོན་པར་འགྱུར་རོ། ། [205a.7]འཇམ་དཔལ་དེ་ལྟར་ན་རིགས་ཀྱི་བུའམ། རིགས་ཀྱི་བུ་མོ་དེ་ཏིང་ངེ་འཛིན་འདི་ཐོབ་ནས་གང་ཅི་སྟོན་ཀྱང་དེ་དག་ཐམས་ཅད་མི་དམིགས་པའི་ཚུལ་དུ་མ་སྐྱེས་པ་དང་། མ་བྱུང་བ་དང་། དངོས་པོ་མེད་པར་སྟོན་པར་འགྱུར་རོ། །འཇམ་དཔལ་གཞན་ཡང་ཏིང་ངེ་འཛིན་འདི་ཐོབ་པའི་བྱང་ [205b] [205b.1]ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ནས་མྱུར་བ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་སེམས་ [205b.2]དཔའ་ཆེན་པོས་གང་གི་ཚེ་བདག་གི་དབྱིངས་ནས་ཆོས་ཀྱི་དབྱིངས་ཀྱི་བར་དུ་སྐྱེ་བ་དང་། འགག་པ་དང་། གཅིག་ཁོ་ན་དང་། ཐ་དད་པ་ཁོ་ནར་ཡང་མི་མཐོང་ན། འཇམ་དཔལ་དེ་ལྟ་བུའི་བཟོད་པ་ཅན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་ [205b.3]རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རིགས་ཀྱི་བུ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མི་སེམས་པ་དང་། རྣམ་པར་མི་རྟོག་པ་དེའི་བཟོད་པ་འདི་ཡང་བྱང་ཆུབ་སེམས་དཔའི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཐོབ་པར་ [205b.4]འགྱུར་བའོ། །གང་ཡང་སངས་རྒྱས་ཉིད་ཀྱི་ཕྱིར། བྱང་ཆུབ་ཏུ་མི་སྨོན་པ་དེ་ལྟ་བུའི་བཟོད་པ་འདི་ཡང་རིགས་ཀྱི་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་བར་འགྱུར་བར་བཤད་དོ། །ཆོས་ཐམས་ཅད་ནི་སངས་རྒྱས་ཀྱི་ཆོས་སོ་ཞེས་སུ་དེ་ལྟར་མོས་ཤིང་ [205b.5]ཞུམ་པར་མི་འགྱུར་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ངས་བཤད་དེ། དེ་ནི་སངས་རྒྱས་ཀྱི་ཆོས་ཐམས་ཅད་དང་མ་བྲལ་བར་བརྗོད་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་གིས་བསྟན་པ་འདི་ཐོས་ནས་རྨོངས་པར་མི་འགྱུར་བ་དང་། [205b.6]སོམ་ཉི་ཟ་བར་མི་འགྱུར་བ་དེ་ཡང་སངས་རྒྱས་ཀྱི་ཆོས་ཐམས་ཅད་དང་མི་འབྲལ་བར་བརྗོད་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བླ་ན་མེད་པོ་ཡང་དག་པར་རྫོགས་ [205b.7]པའི་བྱང་ཆུབ་རྒྱུ་ལས་ངེས་པར་བྱུང་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་ནི་མ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་རྒྱུ་མ་ཡིན་ཞིང་རྒྱུ་ལས་ངེས་པར་བྱུང་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། སྐྱེ་བ་མེད་པ་དང་དངོས་པོ་ [206a] [206a.1]མེད་པ་ནི་རྒྱུ་ཡང་མ་ཡིན་ལ་རྒྱུ་ལས་ངེས་པར་བྱུང་བ་ཡང་མ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་མ་སྐྱེས་པའི་ཕྱིར་རོ། །འཇམ་དཔལ་དེ་ལྟ་བས་ན་རིགས་ཀྱི་བུའམ། རིགས་ཀྱི་བུ་མོ་གང་དག་གིས་བསྟན་པ་འདི་ཐོས་ནས་ནུར་བར་མི་འགྱུར་བ་དེ་ཡང་བླ་ [206a.2]ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ངས་བཤད་དོ། །འཇམ་དཔལ་དེ་ལྟ་བས་ན་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཞུམ་པར་མི་འགྱུར་བ་ནས་ནུར་བའི་བར་དུ་མི་འགྱུར་ [206a.3]བ་དེ་དག་ནི་ང་ལ་སྐྱབས་སུ་དོང་བའོ། །དེ་དག་ནི་ངའི་རྗེས་སུ་རབ་ཏུ་བྱུང་བའོ། །དེ་དག་གི་སྟོན་པ་ནི་ང་ཡིན་ནོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་མི་སློབ་པ་དེ་བྱང་ཆུབ་སེམས་དཔའི་བསླབ་པ་ལ་མི་སློབ་པའོ། །འཇམ་ [206a.4]དཔལ་འདི་ལྟ་སྟེ། དཔེར་ན་འབྱུང་བའི་ཚོགས་དང་། ས་བོན་གྱི་ཚོགས་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་གང་ཅི་ཡོད་པ་དེ་དག་ཐམས་ཅད་ནི་ས་ཆེན་པོ་ལ་བརྟེན་ནས་སྐྱེའོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་ [206a.5]བའི་ཆོས་གང་ཅི་ཡང་རུང་བ་དེ་དག་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ན་འཕེལ་ཞིང་རྒྱས་པ་དང་། ཡངས་པར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སླུ་བར་མི་བྱེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་ [206a.6]འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་བཤད་པ་གང་ལགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་འཛམ་བུའི་གླིང་འདིར་གྲོང་ངམ། གྲོང་ཁྱེར་རམ། [206a.7]ཡུལ་ལམ། ལྗོངས་དག་དུ་གང་ལ་ལ་དག་འཛིན་པར་འགྱུར་བ་ནས་སྟོན་པའི་བར་དུ་འགྱུར་བ་མཆིས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གང་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ [206b] [206b.1]ད་ལྟར་གྱི་ཚེ་ལ་ཐོས་ནས་བདག་ཚེ་འདི་རྗེས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་མཉན་ཏོ་ཞེས་སྨོན་ལམ་བཏབ་པ་དེ་དག་ནི་ཉན་པ་ནས་རྒྱ་ཆེར་མི་སྒོམ་པའི་ཚུལ་གྱིས་སྒོམ་པར་བྱེད་པའི་བར་དུ་འགྱུར་རོ། །འཇམ་དཔལ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ཏེ་ཐོས་ནས་ཀྱང་ [206b.2]དགའ་བ་དང་། མགུ་བ་ཡངས་པ་འཐོབ་པ་དེ་དག་ནི་དགེ་བའི་རྩ་བ་ཆུང་བར་ང་མི་འཆད་དོ། །འཇམ་དཔལ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ལ་ཉན་འདོད་པར་གྱུར་ན། དེ་ལ་འདི་སྐད་ཅེས་རིགས་ཀྱི་བུ་ཁྱོད་དེ་མཉན་པས་ཅི་ཞིག་བྱ། ཐོས་ནས་མ་དད་ཅིང་ཕྱིར་ནུར་ཏ་རེ། དེ་ཅིའི་ཕྱིར་ཞེ་ན། [206b.3]འདི་ལ་ཆོས་གང་ཡང་ཡོངས་སུ་འགྲུབ་པར་མ་བསྟན་ཏེ། སོ་སོའི་སྐྱེ་བོའི་ཆོས་རྣམས་སྐྱེ་བའམ་འཇིག་པར་ཡང་མ་བསྟན། སློབ་པའི་ཆོས་རྣམས་དང་། མི་སློབ་པའི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། སངས་རྒྱས་ཀྱི་ཆོས་རྣམས་ཀྱང་སྐྱེ་བའམ། འཇིག་པའམ། འཐོབ་ [206b.4]པར་མ་བསྟན་པའི་ཕྱིར་རོ་ཞེས་བརྗོད་པར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ལ་ལ་བདག་ལ་འདི་སྐད་དུ། དེང་དེ་ [206b.5]བཞིན་གཤེགས་པའི་ཆོས་ཀྱི་གཏམ་མཛད་པ་དེ་གང་ཡིན་ཞེས་མཆི་ན། བཅོམ་ལྡན་འདས་དེ་སྐད་འདྲི་བ་དེ་ལ་བདག་གིས་འདི་སྐད་དུ་ཆོས་ཐམས་ཅད་དང་མི་འགལ་བའི་གཏམ་མོ་ཞེས་བརྗོད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་སྐྱེ་བ་མ་མཆིས་པ་དང་འགལ་བའི་ཆོས་དེ་གང་ཡང་མ་ [206b.6]མཆིས་ཏེ། བཀའ་མཆིད་དེ་ནི་སེམས་ཅན་གང་གིས་ཀྱང་འཚལ་བར་སླ་བ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་སེམས་ཅན་གང་ཡང་དམིགས་སུ་མ་མཆིས་པའི་སླད་དུའོ། །བཅོམ་ལྡན་འདས་གཞན་ཡང་བདག་གིས་དེ་ལ་འདི་སྐད་དུ་མི་སྐྱེ་བ་ཞེས་བྱ་བའི་ཆོས་དེ་བསྟན་པར་གྱུར་ཏོ་ཞེས་བརྗོད་ [206b.7]པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་ཆོས་ཐམས་ཅད་ནི་སྐྱེ་བ་མ་མཆིས་པར་མཉམ་པའི་སླད་དུའོ། །བཀའ་མཆིད་དེར་ནི་ཇི་ལྟར་དགྲ་བཅོམ་པའི་ཆོས་རྣམས་ཀྱིས་སོ་སོའི་སྐྱེ་བོའི་ཆོས་དེ་དག་རྣམ་པར་བཤིག་པ་མ་ལགས་པ་དགྲ་བཅོམ་པ་རྣམས་ཀྱི་གང་མ་ [207a] [207a.1]རྟོགས་པ་མ་བསྟན་ཏོ། །བཅོམ་ལྡན་འདས་གཞན་ཡང་དེ་ལ་བདག་གིས་འདི་སྐད་དུ་ཆོས་བསྟན་པ་འདི་ལ་སེམས་ཅན་གང་ཡང་མྱ་ངན་ལས་འདས་པ་དང་། མྱ་ངན་ལས་འདའ་བ་དང་། མྱ་ངན་ལས་འདའ་བར་འགྱུར་བ་མེད་དོ་ཞེས་བརྗོད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ [207a.2]ལྡན་འདས་འདི་ལྟར་སེམས་ཅན་ཤིན་ཏུ་མི་དམིགས་པའི་སླད་དུ་སྟེ། བཅོམ་ལྡན་འདས་དེ་སྐད་འདྲི་ན་བདག་གིས་དེ་སྐད་ཅེས་བགྱིའོ། །བཅོམ་ལྡན་འདས་གཞན་ཡང་བདག་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པར་འཚལ་ཏེ། དེང་ཁྱོད་བཅོམ་ལྡན་འདས་དང་གཏམ་ཅི་ཞིག་བྱས་ [207a.3]ཞེས་འདྲི་ན། དེ་ལ་བདག་གིས་འདི་སྐད་དུ་གལ་ཏེ་ཁྱོད་དེ་ཉན་པར་འདོད་ན་མཉན་ཏོ་སྙམ་དུ་ཡིད་མ་གཏོད་ཅིག །མཉན་ཏོ་སྙམ་དུ་སེམས་མ་སྐྱེད་ཅིག །ཀྱེ་སྐྱེས་བུ་སྒྱུ་མའི་སྐྱེས་བུའི་ཤེས་རབ་ཅི་འདྲ་བ་དེ་ལྟ་བུའི་ཤེས་རབ་སྐྱེད་ཅིག་དང་། དེ་ལྟ་བུས་ཆོས་བསྟན་པ་འདི་ཤེས་པར་ནུས་སོ། །ཀྱེ་སྐྱེས་བུ་ [207a.4]གལ་ཏེ་ཁྱོད་ཀྱི་ཆོས་བསྟན་པ། འདི་མཉན་པར་འདོད་ན་དེའི་ཕྱིར་འདི་ལྟར་འདི་ལྟ་སྟེ་དཔེར་ན་ནམ་མཁའ་ལ་བྱའི་རྗེས་ལྟ་བུར་གནས་པར་གྱིས་ཤིག་དང་། དེ་ལྟ་བུས་ཆོས་བསྟན་པ་འདི་མཉན་པར་ནུས་སོ། །ཀྱེ་སྐྱེས་བུ་གལ་ཏེ་ཁྱོད་ཀྱིས་ཆོས་བསྟན་པ་འདི་མཉན་པར་འདོད་ན་དེའི་ཕྱིར་གཉིས་ལ་མ་ [207a.5]དམིགས་ཤིག །མི་གཉིས་པ་ལ་ཡང་མ་དམིགས་ཤིག །དེ་ཅིའི་ཕྱིར་ཞེ་ན། འདི་ལ་གཉིས་སུ་བརྗོད་པར་བྱ་བ་ཡོངས་སུ་བརྗོད་པའམ། མི་གཉིས་པར་བརྗོད་པར་བྱ་བ་གང་ཡང་མེད་པའི་ཕྱིར་རོ། །གལ་ཏེ་ཆོས་བསྟན་པ་འདི་མཉན་པར་འདོད་ན་བདག་ཏུ་འདུ་ཤེས་རྣམས་ཀྱང་མ་གཞིག་ཤིག་ [207a.6]ལྟ་བར་གྱུར་པ་རྣམས་ལས་ཀྱང་མ་འདའ་ཤིག །སངས་རྒྱས་ཀྱི་ཆོས་རྣམས་ལ་ཡང་ལྷག་པར་མ་དམིགས་ཤིག །སོ་སོའི་སྐྱེ་བོའི་ཆོས་རྣམས་ལས་ཀྱང་མ་བསྐྱོད་ཅིག་ཅེས་བརྗོད་པར་བགྱིའོ། །བཅོམ་ལྡན་འདས་གང་ཞིག་བདག་ལས་ཉན་པར་འཚལ་ཏེ། འདྲི་ན་དེ་ལ་བདག་གིས་དེ་སྐད་ [207a.7]བརྗོད་པར་བགྱིའོ། །དེ་སྐད་རྗེས་སུ་བསྟན་པར་བགྱིའོ། །དེ་ལྟར་འདི་ལ་གཞག་པར་བགྱིའོ། །གལ་ཏེ་འདྲི་བའི་རིགས་ཀྱི་བུ་འམ། རིགས་ཀྱི་བུ་མོ་དེ་ལྟར་གནས་ཤིང་དེ་ལྟར་ཞུགས་ན་སྤོབས་པའི་ཕྱག་རྒྱ་འདི་ལ་གནས་པ་དེ་ལ་སླད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མ་སྐྱེས་པ་དང་། [207b] [207b.1]དངོས་པོ་མ་མཆིས་པ་དང་། མ་བྱུང་བའི་བར་འདི་བསྟན་པར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་ཚིག་འདི་ལེགས་པར་སྨྲས་པ་ལེགས་སོ། ། [207b.2]རིགས་ཀྱི་བུ་འམ། རིགས་ཀྱི་བུ་མོ་དེ་ལ་ཡང་ཕྱིས་འདི་སྐད་གྱིས་ཤིག །དེ་བཞིན་གཤེགས་པ་ལ་བལྟ་བར་འདོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་བསྒོམ་པའི་ཚུལ་གྱིས་བསྒོམ་པར་བྱའོ། །དེ་བཞིན་གཤེགས་པ་ལ་བསྙེན་བཀུར་བྱ་བར་འདོད་པའི་རིགས་ཀྱི་བུའམ། རིགས་ཀྱི་ [207b.3]བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་བཞིན་གཤེགས་པ་ནི་བདག་གི་སྟོན་པའོ་ཞེས་སྨྲ་བར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་ [207b.4]པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མངོན་པར་འདུ་བྱ་བ་མེད་པའི་ཚུལ་གྱིས་བསླབ་པར་བྱའོ། །ཏིང་ངེ་འཛིན་ཐམས་ཅད་ལ་ [207b.5]མཁས་པ་བསྒྲུབ་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །ཏིང་ངེ་འཛིན་ཐམས་ཅད་ལ་སྙོམས་པར་འཇུག་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་ [207b.6]རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་མི་དམིགས་པའི་ཚུལ་གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། ཏིང་ངེ་འཛིན་དེ་དག་བྱས་པ་མ་ཡིན་པའི་ཕྱིར་རོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་བསྒྲུབ་པར་འདོད་པའི་རིགས་ཀྱི་བུ་འམ་ [207b.7]རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དངོས་པོ་མེད་པའི་ཚུལ་གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་བྱས་པ་མ་ཡིན་པ་དང་། མ་སྐྱེས་པ་དང་། དངོས་པོ་ [208a] [208a.1]མེད་པའི་ཕྱིར་རོ། །ཆོས་ཐམས་ཅད་ནི་ངེས་པར་འབྱུང་བ་དང་བཅས་པ་སྟེ། གང་ངེས་པར་མི་འབྱུང་བའི་ཆོས་དེ་གང་ཡང་མེད་དོ་ཞེས་དེ་ལྟར་ཤེས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དངོས་པོ་མེད་པའི་ [208a.2]བར་གྱི་ཚུལ་གྱིས་བསླབ་པར་བྱའོ། །ཆོས་ཐམས་ཅད་ནི་ངེས་པར་མི་འབྱུང་བ་སྟེ། གང་ངེས་པར་འབྱུང་བ་དང་བཅས་པའི་ཆོས་དེ་གང་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་མ་སྐྱེས་པའི་ཕྱིར་རོ། །ཆོས་དེ་དག་ནི་ཇི་ལྟར་བརྗོད་པ་དེ་ལྟར་ཡོད་པ་མ་ཡིན་ཏེ། བརྗོད་ [208a.3]དུ་མེད་པ་ནི་ཡོད་པ་མ་ཡིན་ཞིང་དམིགས་སུ་མེད་དོ་ཞེས་དེ་ལྟར་ཤེས་པར་འདོད་པའི་རིགས་ཀྱི་བུ་འམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དངོས་པོ་མེད་པའི་བར་གྱི་ཚུལ་གྱིས་བསླབ་པར་བྱའོ། །སེམས་ཅན་ཐམས་ཅད་ནི་བྱང་ཆུབ་ཀྱི་ཕྱིར་སྤྱོད་པ་སྟེ། གང་ [208a.4]བྱང་ཆུབ་ཀྱི་ཕྱིར་མི་སྤྱོད་པའི་སེམས་ཅན་དེ་གང་ཡང་མེད་དོ་ཞེ་ན། ཡང་དེ་ལ་ཞུམ་པ་མེད་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དངོས་པོ་མེད་པའི་བར་གྱི་ཚུལ་གྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་ཆོས་ [208a.5]ཐམས་ཅད་ནི་བྱང་ཆུབ་དང་མཉམ་པའོ། །ཇི་ལྟར་ཆོས་ཐམས་ཅད་བྱང་ཆུབ་དང་མཉམ་པ་དང་། བྱང་ཆུབ་ཇི་ལྟ་བར་སེམས་ཅན་ཐམས་ཅད་ཀྱང་དེ་བཞིན་ནོ། །སེམས་ཅན་ཐམས་ཅད་ཅི་འདྲ་བར་སྤྱོད་པ་དེ་ཡང་དེ་བཞིན་ནོ། །མེད་པའི་ཕྱིར་སྤྱོད་པ་ཐམས་ཅད་ནི་སྤྱོད་པ་མེད་པའོ། །དེ་ཡང་ [208a.6]བྱང་ཆུབ་སྟེ། བྱང་ཆུབ་གང་ཡིན་པ་སྐྱེ་བ་མེད་པ་ཡང་དེ་ཡིན། འབྱུང་བ་མེད་པ་ཡང་དེ་ཡིན་ཏེ། དེ་ལྟ་བུའི་ཆོས་འདི་ལ་ཞུམ་པ་མེད་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དངོས་པོ་མེད་པ་དང་། སྐྱེ་བ་མེད་པའི་བར་གྱི་ཚུལ་གྱིས་ [208a.7]བསླབ་པར་བྱའོ་ཞེས་གྱིས་ཤིག །འཇམ་དཔལ་གང་དེ་བཞིན་གཤེགས་པའི་རྣམ་པར་འཕྲུལ་པ་ནས་དེ་བཞིན་གཤེགས་པའི་རྣམ་པར་རོལ་བའི་བར་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལས་བསྟན་ཏོ། །དེ་ཅིའི་ཕྱིར་ཞེ་ན། དེ་ནི་བསྟན་དུ་མེད་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ [208b] [208b.1]ནི་མི་སྟོན་པའི་ཕྱིར་རོ། །འཇམ་དཔལ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཚིག་བཞི་པའི་ཚིགས་སུ་བཅད་པ་ཙམ་ཡང་འཛིན་པ་དང་། ཀུན་ཆུབ་པར་བྱེད་པ་དང་། འཆང་བ་དང་། ཀློག་པ་ནས་ [208b.2]ཡང་དག་པར་སྟོན་པའི་བར་དུ་བྱེད་པ་དེ་དག་ཀྱང་ཕྱིར་མི་ལྡོག་པར་ང་འཆད་ན། གང་དག་དེ་བཞིན་ཉིད་དུ་སྒྲུབ་པ་ལྟ་ཅི་སྨོས་ཏེ། རིགས་ཀྱི་བུ་འམ། རིགས་ཀྱི་བུ་མོ་དེ་དག་ནི་བྱང་ཆུབ་ཏུ་ངེས་པར་རིག་པར་བྱའོ། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་སྐྱེས་པ་དང་། [208b.3]དངོས་པོ་མེད་པ་དང་། འབྱུང་བ་མེད་པའི་བར་འདི་ཐོས་ནས་མི་སྐྲག་མི་དངང་དངང་བར་མི་འགྱུར་བ་དེ་དག་ནི་སངས་རྒྱས་ཀྱི་ཡུལ་ལ་གནས་པའོ། །གོང་དུ་ཡང་མོས་པར་བྱེད་ན་དེ་དག་ནི་སངས་རྒྱས་ཀྱི་ཆོས་ཐམས་ཅད་ལ་ངེས་པར་འགྱུར་རོ། །འཇམ་དཔལ་ངས་སངས་རྒྱས་ཀྱིས་གནང་ [208b.4]བ། དེ་བཞིན་གཤེགས་པས་རྣམ་པར་མཁྱེན་པ། དགྲ་བཅོམ་པ་ཐམས་ཅད་ཀྱིས་ཡང་དག་པར་མནོས་པའི་རྒྱ་འདི་བཞག་པར་བྱ་སྟེ། རྒྱ་འདི་ནི་མཉམ་པ་ཉིད་དུ་རྟོགས་པ་རྣམས་ལ་གཞག་གོ །འདི་ནི་སངས་རྒྱས་ཀྱི་ཆོས་ཐམས་ཅད་ཀྱི་བར་དུ་ཡང་ཆགས་པ་མེད་པ་ [208b.5]ཡོངས་སུ་སྟོན་པའོ། །འཇམ་དཔལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོ་རྒྱ་འདིས་བཏབ་པ་ནི། ངན་སོང་དུ་འགྲོ་བའི་སྐལ་བ་ཅན་མ་ཡིན་ནོ། །ཉན་ཐོས་དང་། རང་སངས་རྒྱས་ཀྱི་སར་འགྲོ་བ་འམ། [208b.6]འཇུག་པའི་སྐལ་བ་ཅན་མ་ཡིན་ནོ། །དེ་ནས་དེའི་ཚེ་ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷའི་བུ་རྣམས་ཀྱིས་ལྷའི་ཙན་དན་གྱི་ཕྱེ་མ་དང་། ལྷའི་གསེར་གྱི་ཕྱེ་མ་དང་། ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། [208b.7]ལྷའི་སྤོས་དང་། ལྷའི་ཨུད་པ་ལ་དང་། ཀུ་མུ་ད་དང་། པད་མ་དཀར་པོ་དང་། ལྷའི་རོལ་མོའི་སྒྲ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཡང་མཆོད་ཅིང་། བཅོམ་ལྡན་འདས་དང་། འཇམ་དཔལ་གཞོན་ནུར་གྱུར་པ་ལ་ཡང་ [209a] [209a.1]གཏོར་མངོན་པར་གཏོར་ནས་འདི་སྐད་ཅེས་དགེ་བའི་རྩ་བ་འདིས་གང་དག་ཕྱག་རྒྱ་འདིས་བཏབ་པ་དེ་དག་གིས་བླ་ན་མེད་པའི་ཆོས་རིན་པོ་ཆེ་འདི་མཆོད་པ་དང་། ཕྱི་ཕྱིར་ཞིང་ཐོས་པར་གྱུར་ཅིག་ཅེས་སྨྲས་སོ། །ལྷའི་དབང་པོ་བརྒྱ་བྱིན་གྱིས་ [209a.2]ཀྱང་ཚིག་འདི་སྐད་ཅེས་སྨྲས་ཏེ། བཅོམ་ལྡན་འདས་བདག་གིས་ཀྱང་མ་བྱུང་བ་དང་། མ་སྐྱེས་པའི་བར་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཛམ་བུའི་གླིང་འདིར་སྤྱོད་པར་འགྱུར་བ་དང་། རིགས་ཀྱི་བུ་འམ། རིགས་ཀྱི་བུ་མོ་དེ་འདྲ་བ་དེ་དག་གི་རྣ་ལམ་ [209a.3]དུ་གྲག་པར་འགྱུར་བ་ནས་དེ་དག་ཉིད་སངས་རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པར་འགྱུར་བར་བགྱི་བའི་བར་གྱི་སླད་དུ་བརྩོན་པར་བགྱིའོ། །བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་རིགས་ཀྱི་བུ་འམ། རིགས་ཀྱི་བུ་མོ་གང་གི་རྣ་ལམ་དུ་ཚེགས་ཆུང་ [209a.4]ངུས་གྲག་ལ་ཐོས་ནས་ཀྱང་མོས་པ་དང་། མོས་ནས་ཀྱང་འཛིན་པ་དང་། ཀུན་ཆུབ་པར་བགྱིད་པ་དང་། འཆང་བའི་བར་དུ་བགྱིད་པའི་རིགས་ཀྱི་བུ་འམ། རིགས་ཀྱི་བུ་མོ་དེ་དག་གིས་བདག་ཅག་གི་འདི་ནི་ལྷས་བསྒྲུབ་པའོ་ཞེས་ཐེ་ཚོམ་མ་མཆིས་པར་འཚལ་བར་བགྱིའོ། །དེ་སྐད་ཅེས་གསོལ་ [209a.5]པ་དང་། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽའུ་ཤི་ཀ་དེ་དེ་བཞིན་ནོ། །རིགས་ཀྱི་བུ་འམ། རིགས་ཀྱི་བུ་མོ་དེ་དག་ལ་སངས་རྒྱས་ཀྱི་ཆོས་ཐམས་ཅད་འགྲུབ་པར་བལྟའོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་ངེས་པར་ [209a.6]ཤེས་པར་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དེ་དག་གི་དོན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་བྱིན་གྱིས་བརླབ་ཏུ་གསོལ། བདེ་བར་གཤེགས་པ་བྱིན་གྱིས་བརླབ་ཏུ་ [209a.7]གསོལ། ཚིག་འདི་སྨྲས་མ་ཐག་ཏུ་དེའི་ཚེ་སྐད་ཅིག་དེ་ཉིད་ལ་སངས་རྒྱས་ཀྱི་མཐུས་ས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏོ། །ས་ཆེན་པོ་གཡོས་མ་ཐག་ཏུ་དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །བཅོམ་ལྡན་འདས་ཀྱིས་འཛུམ་པ་མཛད་མ་ཐག་ཏུ་དེ་ནས་དེའི་ཚེ་ཤེས་ [209b] [209b.1]རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ལ་དེ་བཞིན་གཤེགས་པ་བྱིན་གྱིས་རློབ་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ [209b.2]འདི་ནི་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་བྱིན་གྱིས་བརླབས་པའི་སྔ་ལྟས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །འཇམ་དཔལ་འདི་དག་ནི་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་ [209b.3]འདི་བྱིན་གྱིས་བརླབས་པའི་སྔ་ལྟས་རྣམས་ཏེ། ལྟས་འདི་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་བྱིན་གྱིས་བརླབས་པར་ཤེས་པར་བྱའོ། །འཇམ་དཔལ་གང་དག་ཆོས་གང་ཡང་མི་སྤོང་ཞིང་མི་ཟློག་ལ་བསྔགས་པར་མི་བྱེད་པ་དེ་དང་དེ་དག་ནི་ཕྱག་རྒྱ་འདིས་བཏབ་པར་ཤེས་པར་བྱའོ། ། [209b.4]དེ་ཅིའི་ཕྱིར་ཞེ་ན། འཇམ་དཔལ་དམིགས་པ་ཡོད་ན་སྤོང་བར་བྱེད་པ་དང་བསྔགས་པར་བྱེད་པར་འགྱུར་བའི་ཕྱིར་རོ། །འཇམ་དཔལ་དེ་ལྟ་བས་ན་གང་དག་རྒྱ་འདིས་བཏབ་པ་དེ་དག་གི་ཆེད་དུ་ངས་རྒྱ་འདི་བཞག་སྟེ། འདི་ལྟར་དེ་དག་གིས་ཐོས་ནས་ཀྱང་ཆོས་གང་ལ་ཡང་སྟོན་པ་འམ་ [209b.5]རྣམ་པར་རྟོག་པ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་དོན་དམ་པར་མ་སྐྱེས་པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ཉན་ཐོས་ཆེན་པོ་ [209b.6]དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ [209b.7]ཕྲག་བརྒྱ་པ་ལས། འཇམ་དཔལ་གྱིས་ཞུས་པའི་ལེའུ་ཤེས་རབ་ཀྱི་ཕ་རོལ་ཏུ་ཕྱིན་པ་བདུན་བརྒྱ་པ་ཞེས་བྱ་སྟེ་ལེའུ་བཞི་བཅུ་རྩ་དྲུག་པ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། [210a] [210a.1]{D91}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་བདུན་པ་སྟེ་འཕགས་པ་གཙུག་ན་རིན་པོ་ཆེས་ཞུས་པ། བམ་པོ་དང་པོ། །རྒྱ་གར་སྐད་དུ། ཨཱརྱརཏྣ་ཙཱུ་ཌ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། [210a.2]འཕགས་པ་གཙུག་ན་རིན་པོ་ཆེས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་ [210a.3]རྒོད་ཀྱི་ཕུང་པོའི་རི་ལ་དགེ་སློང་བཞི་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ [210a.4]ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཅན་ཐམས་ཅད་ [210a.5]ཀྱི་དབང་དམ་པའི་ཕ་རོལ་ཏུ་སོན་པ་ཤ་སྟག་གོ །བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་བརྒྱད་ཁྲི་བཞི་སྟོང་དང་ཡང་ཐབས་ཅིག་སྟེ། ཐམས་ཅད་ཀྱང་སྐྱེ་བ་གཅིག་གིས་ཐོགས་པ། དབང་བསྐུར་བ་ཐོབ་པ། དཔའ་བར་འགྲོ་བའི་ཏིང་ངེ་འཛིན་ [210a.6]ལས་བྱུང་བ། པད་མ་བླ་མའི་ཏིང་ངེ་འཛིན་རབ་ཏུ་ཐོབ་པ། རྡོ་རྗེའི་དཀྱིལ་འཁོར་གྱི་ཏིང་ངེ་འཛིན་ལ་རབ་ཏུ་གནས་པ། རྒྱལ་མཚན་གྱི་རྩེ་མོའི་དཔུང་རྒྱན་གྱི་ཏིང་ངེ་འཛིན་གྱིས་རྣམ་པར་རོལ་པ། རྡོ་རྗེ་ལྟ་བུའི་ཏིང་ངེ་འཛིན་ཤིན་ཏུ་རྟོགས་པ། ཡོན་ཏན་འབྱུང་གནས་བཀོད་པའི་ [210a.7]ཏིང་ངེ་འཛིན་ཤིན་ཏུ་གཏན་ལ་ཕེབས་པ། སངས་རྒྱས་ཀྱི་ཆོས་ཐམས་ཅད་མངོན་དུ་གྱུར་པ། བྱང་ཆུབ་ཀྱི་སྙིང་པོར་རབ་ཏུ་གཞོལ་བ། བདུད་ཀྱི་ཡུལ་ཐམས་ཅད་ལས་ཤིན་ཏུ་འདས་པ། སངས་རྒྱས་ཀྱི་ཡུལ་གྱི་གནས་ལ་རབ་ཏུ་གནས་པ། མི་ཟད་པ་བསྟན་པའི་གཟུངས་ [210b] [210b.1]རབ་ཏུ་ཐོབ་པ། སེམས་ཅན་ཐམས་ཅད་ཀྱི་དབང་པོ་ཚིམ་པར་བྱེད་པའི་སྤོབས་པ་རབ་ཏུ་ཐོབ་པ། མི་འཇིགས་པ་སེང་གེའི་སྟབས་ཀྱིས་འཁོར་ཐམས་ཅད་གནོན་པ་ལ་མཁས་པ། ཚིག་བསྟན་པ་ལ་ཕྱད་པས་དོན་ཡོད་པར་བསྐལ་པའི་བར་དུ་ལུང་སྟོན་པ། གཟུགས་ཀྱི་ [210b.2]མཚན་བཟང་པོས་ལེགས་པར་བརྒྱན་པ། འདུས་པ་ངན་པའི་ཚོགས་ཕ་རོལ་རྒོལ་བ་ཡང་དག་པར་རབ་ཏུ་འཇོམས་པ། གྲགས་པ་དང་བརྗོད་པའི་སྒྲ་མཐོན་པོ་ཕྱོགས་བཅུར་གྲགས་པ། སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ་རབ་ཏུ་བཀུར་བ། སྦྱིན་པ་དང་། ཚུལ་ [210b.3]ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དཔག་ཏུ་མེད་པ་ལས་བྱུང་བ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་ཤིན་ཏུ་སྦྱང་བ་བྱས་པ། སེམས་ཅན་ཐམས་ཅད་ཀྱི་ཉོན་མོངས་པའི་ནད་ཡོངས་སུ་ཤེས་ནས་ [210b.4]སོ་སོ་ཅི་རིགས་པར་ཆོས་ཀྱི་སྨན་གཏོང་བ། རྐྱེན་ལས་བྱུང་བའི་ཆོས་ཟབ་ཅིང་གཏིང་དཔག་དཀའ་བ་ལ་འཇུག་ཅིང་མཐའ་དང་མཐའ་མ་ཡིན་པ་དང་། རྟག་པ་དང་ཆད་པར་ལྟ་བ་ཡོངས་སུ་སྤངས་པ། དགེ་བ་དག་ཅིང་དྲི་མ་མེད་པའི་བསམ་པ་དང་ལྷག་པའི་བསམ་པ་ཤིན་ཏུ་ [210b.5]ཡོངས་སུ་དག་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། བསྡུ་བ་དང་། ཀུན་རིག་པ་དང་། རྣམ་པར་རིག་པའི་ཚུལ་ལ་མཁས་པ། རང་གི་སེམས་ལ་དབང་སྒྱུར་བ། སེམས་དཔའ་ཞིང་བརྟན་ལ་རྡོ་རྗེ་ལྟར་མི་ཕྱེད་པ། དད་པ་དང་། བརྩོན་འགྲུས་དང་། དྲན་པ་ [210b.6]དང་། ཏིང་ངེ་འཛིན་དང་། ཤེས་རབ་ཀྱི་སྟོབས་དང་ལྡན་པ། སྟོབས་བཅུ་དང་། གཟུངས་དང་། སྨོན་ལམ་ལ་ཡང་དག་པར་རབ་ཏུ་ཞུགས་པ། ཡོན་ཏན་དང་། ཡེ་ཤེས་དཔག་ཏུ་མེད་པའི་བློ་ནམ་མཁའི་དབྱིངས་དང་མཉམ་པ་རྣམས་ལ་འདི་ལྟ་སྟེ། བྱང་ཆུབ་སེམས་དཔའ་ [210b.7]སེམས་དཔའ་ཆེན་པོ་སྤྱན་རས་གཟིགས་རྣམ་པར་ལྟ་བ་ཞེས་བྱ་བ་དང་། རྟག་ཏུ་རྣམ་པར་ལྟ་བ་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། སེང་གེ་དང་། སེང་གེའི་བློ་གྲོས་དང་། སེང་གེའི་སྟབས་སུ་འགྲོ་དང་། སེང་གེའི་སྒྲ་མངོན་པར་བསྒྲགས་དང་། [211a] [211a.1]མཆོག་གི་བློ་གྲོས་དང་། རྡོ་རྗེའི་བློ་གྲོས་དང་། རྡོ་རྗེས་རྣམ་པར་གནོན་དང་། རྡོ་རྗེའི་རྒྱལ་མཚན་དང་། རྡོ་རྗེའི་སྡེ་དང་། མི་གཡོ་བའི་གོམ་པས་རྣམ་པར་གནོན་དང་། འཇིག་རྟེན་གསུམ་གོམ་པས་རྣམ་པར་གནོན་དང་། མིག་{བཟངས་,བཟང་}དང་། པད་མའི་མིག་ [211a.2]དང་། པད་མ་བཀོད་པ་དང་། རིན་པོ་ཆེ་བཀོད་པ་དང་། སྤོབས་པ་ཆེན་པོ་དང་། མཐུ་བོ་ཆེ་དང་། རིན་ཆེན་ཁར་བ་དང་། རིན་ཆེན་འབྱུང་གནས་དང་། ལག་ན་ཕྱག་རྒྱ་རིན་པོ་ཆེ་དང་། ཡོན་ཏན་གྱི་རྒྱལ་པོ་སྣང་དང་། བཀོད་པའི་རྒྱལ་པོ་སྣང་དང་། བཀོད་པའི་ [211a.3]རྒྱལ་པོ་དང་། ཡིད་གཉིས་རྣམ་པར་འཇོམས་དང་། གློག་གི་སྣང་བས་བརྒྱན་དང་། ནམ་མཁའ་མཛོད་དང་། དབྱངས་སྙན་དང་། སྤྲིན་དབྱངས་དང་། རྔ་སྒྲ་དང་། དབྱངས་རྣམ་པར་དག་དང་། རྣམ་པར་དག་པའི་བློ་གྲོས་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་ [211a.4]དྲུག་དང་། འཇམ་དཔལ་ལ་སོགས་པ་སེམས་དཔའ་དཔེ་མེད་པ་དྲུག་ཅུ་དང་། སྤོས་ཀྱི་གླང་པོ་ཆེ་ལ་སོགས་པ་དག་པའི་སེམས་ཅན་སུམ་ཅུ་རྩ་གཉིས་དང་། བྱམས་པ་ལ་སོགས་པ་ཐམས་ཅད་ཀྱང་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་ [211a.5]གོ །ལྷའི་བུ་བདུད་ལས་རྒྱལ་དང་། ལྷའི་བུ་དགེ་བ་བཀོད་དང་། ལྷའི་བུ་མཚམས་རབ་དང་། བཟང་པོའི་རྒྱལ་པོ་དང་། རྒྱལ་བ་དང་། རྒྱལ་བའི་བློ་གྲོས་དང་། རབ་ཏུ་ཞི་ཞིང་དུལ་བའི་དབང་ཕྱུག་དང་། ལྷའི་བུ་ལེགས་པར་སེམས་པ་དང་། དེ་དག་ལ་སོགས་པ་ཐམས་ཅད་ [211a.6]ཀྱང་ཐེག་པ་ཆེན་པོ་ལ་ཡང་དག་པར་ཞུགས་པའི་ལྷའི་བུ་སྟོང་ཕྲག་ཉི་ཤུ་དང་། རྒྱལ་པོ་ཆེན་པོ་བཞི་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ལྷའི་བུ་དེད་དཔོན་དང་། ལྷའི་བུ་དབང་ཕྱུག་ཆེན་པོ་དང་། དེ་དག་དང་། གཞན་ཡང་ལྷ་ [211a.7]དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དུ་མ་དང་ཡང་ཐབས་ཅིག་གོ །དེ་ནས་བཅོམ་ལྡན་འདས་བཀོད་པ་ཆེན་པོའི་སེང་གེའི་ཁྲི་ལ་བཞུགས་ཏེ་འཁོར་བརྒྱ་སྟོང་དུ་ [211b] [211b.1]མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། སེང་གེ་ལྟར་ནི་སྒྲོགས། ཉི་མ་ལྟར་ནི་ལྷན་ནེ། ཟླ་བ་ལྟར་ནི་ལྷམ་མེ། སྒྲོན་མ་ལྟར་ནི་འབར། བརྒྱ་བྱིན་ལྟར་ནི་ལྷང་ངེ་། ཚངས་པ་ལྟར་ནི་ལྷག་གེ །རྒྱ་མཚོ་ཆེན་པོའི་དབུས་ནས་རི་རབ་ལྟར་ནི་འཕགས་ཏེ། འཁོར་ [211b.2]ཆེན་པོའི་དབུས་སུ་གཤེགས་ནས་ཆོས་སྟོན་པ་ནི་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་འདི་ལྟ་སྟེ། བྱང་ཆུབ་སེམས་དཔའ་ [211b.3]སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་རྣམ་པར་དག་པ་ཞེས་བྱ་བའི་ཆོས་ཀྱི་སྒོ་ལས་བརྩམས་ནས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་ལ་སྤྱོད་པར་འགྱུར་བ་ཡང་དག་པར་རབ་ [211b.4]ཏུ་སྟོན་ཏོ། །ཡང་དེའི་ཚེ་ཤར་ཕྱོགས་ལོགས་ཀྱི་སངས་རྒྱས་ཀྱི་ཞིང་བརྒྱ་སྟོང་ཕྲག་དགུ་བཅུ་རྩ་གཉིས་འདས་པ་ན་འཇིག་རྟེན་གྱི་ཁམས་ལེགས་པར་སྤྲུལ་པ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་དག་པར་རབ་ [211b.5]ཏུ་གནས་པ་ཞེས་བྱ་བ་ད་ལྟ་ན་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པ་དེའི་གན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་ཞེས་བྱ་བ་བྱང་ཆུབ་སེམས་དཔའ་བརྒྱད་སྟོང་དང་ལྷན་ཅིག་ཏུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། [211b.6]ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། འཇིག་རྟེན་གྱི་ཁམས་ལེགས་པར་སྤྲུལ་པ་དེ་ནས་མི་སྣང་བར་གྱུར་ནས་འཇིག་རྟེན་གྱི་ཁམས་མི་མཇེད་ [211b.7]འདིར་གནས་པར་གྱུར་ཏོ། །དེ་ཚངས་པའི་འཇིག་རྟེན་དུ་འདུག་ནས་རིན་པོ་ཆེའི་གདུགས་གཅིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པར་བྱས་ཏེ། མེ་ཏོག་ཁ་དོག་དུ་མ། ཁ་དོག་སྣ་ཚོགས་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་ [212a] [212a.1]གྱི་ཁམས་ཁེབས་པར་བྱས་ནས་ཚངས་པའི་འཇིག་རྟེན་དེ་ཉིད་དུ་འདུག་སྟེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གིས་སྡུག་བསྔལ་མཐའ་ཡས་བཟོད་བྱས་ཤིང་། །བརྟུལ་ཞུགས་བརྟན་པས་བྱང་ཆུབ་རབ་བསྒྲུབས་པ། །དྲང་སྲོང་ཆེན་པོ་ཤཱག་ཐུབ་སུས་ [212a.2]མཐོང་བ། །ལྷ་མི་རྣམས་ཀྱིས་རྙེད་པ་རབ་ཏུ་རྙེད། །གང་གཱའི་བྱེ་སྙེད་བྱང་ཆུབ་སེམས་དཔའ་མང་། །བརྩོན་འགྲུས་དག་གི་སྟོབས་ཀྱིས་ཕྱིར་བོར་ཏེ། །སྟོང་ཕྲག་བྱེ་བའི་བདུད་རྣམས་རབ་བཏུལ་ནས། །བྱང་ཆུབ་རྡུལ་བྲལ་མྱ་ངན་མེད་པ་ཐོབ། །འགྲོ་བ་ཀུན་གྱི་གཙོ་བོ་བསྙེན་ [212a.3]བཀུར་བར། །ཤར་ཕྱོགས་ལོགས་ཀྱི་མཆོག་གི་འཇིག་རྟེན་ཁམས། །ལེགས་པར་སྤྲུལ་ནས་སྤྱོད་པ་ཡོངས་དག་པའི། །རྒྱལ་བའི་ཐད་ནས་བདག་ནི་འདིར་མཆིས་སོ། །སུ་དག་ཆོས་ཀྱི་གཏམ་རྣམས་ཉན་པ་དང་། །ཕྱོགས་བཅུའི་བྱང་ཆུབ་སེམས་དཔའ་བལྟ་བ་དང་། །རྐང་ [212a.4]གཉིས་གཙོ་བོ་དེ་ཡང་བལྟ་འདོད་པ། །དེ་དག་བྱ་རྒོད་ཕུང་པོར་མྱུར་དུ་ཤེག །འདྲེན་པ་མཐོང་བ་ཤིན་ཏུ་རྙེད་པར་དཀའ། །ཞི་བའི་ཆོས་ཀྱང་ཐོས་པར་ཤིན་ཏུ་དཀའ། །དལ་འབྱོར་མིར་སྐྱེ་ཤིན་ཏུ་རྙེད་པར་དཀའ། །ཚུལ་ཁྲིམས་དད་པའང་རྟག་ཏུ་རྙེད་པར་དཀའ། །འཇིག་རྟེན་རྣམ་ [212a.5]པར་འདྲེན་པ་བཞུགས་བཞིན་དུ། །བདེ་འདོད་གང་ཞིག་བསོད་ནམས་མི་བྱེད་ན། །མྱ་ངན་འདས་ནས་དེས་ནི་ཅི་བྱ་ཡིས། །དེ་ནི་རྒྱལ་བའི་དྲུང་དེར་འདོང་བར་བྱ། །གང་དག་ངན་འགྲོ་ཐམས་ཅད་སྤངས་ནས་ནི། ལྷ་མིའི་ནང་དུ་བདེ་བ་འཐོབ་པ་དང་། །མྱ་ངན་འདས་འཐོབ་བདེ་བར་ [212a.6]འགྱུར་འདོད་པ། མཚུངས་མེད་དེ་ཡི་གན་དུ་དེ་དག་དོང་། །དེ་ནི་སྨན་པའི་རྒྱལ་པོ་བདུད་རྩི་སྦྱིན། །དེ་ནི་དེད་དཔོན་མཆོག་གི་ལམ་མཚོན་པ། །དེ་ནི་ཆོས་རྒྱལ་རིན་ཆེན་དམ་པ་འཆང་། །དེ་ནི་སེམས་ཅན་ཀུན་གྱི་རྟེན་དང་དཔུང་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་ [212a.7]པོ་གཙུག་ན་རིན་པོ་ཆེས་ཚིགས་སུ་བཅད་པ་མངོན་པར་སྒྲུབ་པ་འདི་དག་སྨྲས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་དབྱངས་ཀྱིས་གོ་བར་གྱུར། ཚེ་དང་ལྡན་པ་ཤ་ར་དྭ་ཏིའི་བུས་ཀྱང་ཚིགས་སུ་བཅད་པ་འདི་དག་ཐོས་ཏེ། ཐོས་ནས་བཅོམ་ལྡན་འདས་ལ་འདི་ [212b] [212b.1]སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་དོན་དང་ལྡན་པའི་ཚིགས་སུ་བཅད་པ་འདི་དག་གང་ནས་བྱུང་། བཅོམ་ལྡན་འདས་ཀྱིས་བཀའ་སྩལ་པ། ཤ་རིའི་བུ་ཤར་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྒྱ་སྟོང་ཕྲག་དགུ་བཅུ་རྩ་དགུ་གཉིས་ [212b.2]འདས་པ་ན་འཇིག་རྟེན་གྱི་ཁམས་ལེགས་པར་སྤྲུལ་པ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་དག་པར་རབ་ཏུ་གནས་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་དེའི་གན་ནས། [212b.3]བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་ཞེས་བྱ་བ་བྱང་ཆུབ་སེམས་དཔའ་བརྒྱད་སྟོང་དང་བཅས་ཏེ་ང་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ཀྱང་བལྟ་བའི་ [212b.4]ཕྱིར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་བརྒྱ་སྟོང་མང་པོས་ཡོངས་སུ་བསྐོར་ཅིང་མདུན་དུ་བདར་ནས་རྔ་ནི་རབ་ཏུ་རྡུང་། མེ་ཏོག་གི་ཆར་ནི་རབ་ཏུ་འབེབས། འོད་ [212b.5]ཟེར་ནི་འབྱིན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་གཡོ་བར་བྱེད་ཅིང་། བྱང་ཆུབ་སེམས་དཔའི་མཐུ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོས་འཇིག་རྟེན་གྱི་ཁམས་ལེགས་པར་སྤྲུལ་པ་དེ་ནས་མི་སྣང་བར་གྱུར་ནས་འཇིག་རྟེན་གྱི་ཁམས་མི་ [212b.6]མཇེད་འདིར་ཕྱིན་ཏེ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་དེས་སེམས་ཅན་བག་མེད་པ་རྣམས་ཡང་དག་པར་བསྐུལ་བའི་ཕྱིར་ཚངས་པའི་འཇིག་རྟེན་དུ་འདུག་ནས་ཚིགས་སུ་བཅད་པ་འདི་དག་སྨྲས་སོ། །ཤཱ་རིའི་བུ་ཚིགས་སུ་བཅད་ [212b.7]པ་འདི་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གོ་བར་བྱས་ནས་སེམས་ཅན་དཔག་ཏུ་མེད་པ་ཡང་དགེ་བའི་རྩ་བ་བསྐྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་བྱང་ཆུབ་སེམས་དཔའ་བརྒྱད་སྟོང་པོ་དེ་དག་དང་ལྷན་ཅིག་ [213a] [213a.1]ཏུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་རྔ་ནི་རབ་ཏུ་རྡུང་། མེ་ཏོག་གི་ཆར་ནི་རབ་ [213a.2]ཏུ་འབེབས། འོད་ཟེར་ནི་འབྱིན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་གཡོ་བར་བྱེད་ཅིང་བྱང་ཆུབ་སེམས་དཔའི་མཐུ་ཆེན་པོ་དང་། བྱང་ཆུབ་སེམས་དཔའི་རྫུ་འཕྲུལ་ཆེན་པོས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ [213a.3]ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་ [213a.4]མི་མ་ཡིན་པ་བརྒྱ་སྟོང་མང་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ཀྱི་སྤྱན་སྔར་འདུག་གོ །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་གཙུག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ [213a.5]དག་པར་རྫོགས་པའི་སངས་རྒྱས་ཡོངས་སུ་དག་པར་རབ་ཏུ་གནས་པ། བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ལོ། །བཅོམ་ལྡན་འདས་བདག་ཀྱང་བྱང་ཆུབ་སེམས་དཔའ་ [213a.6]སེམས་དཔའ་ཆེན་པོ་རྣམས་ཀྱི་སྤྱོད་པ་ཡོངས་སུ་དག་པ་ཉན་པའི་སླད་དུ་འདིར་མཆིས་ན། བཅོམ་ལྡན་འདས་བྱང་ཆུབ་སེམས་དཔའ་རྣམས་སྤྱོད་པ་ཡོངས་སུ་དག་པ་གང་ལ་གནས་ན་ཤིན་ཏུ་མཐར་ཕྱིན་པ་དང་། ཤིན་ཏུ་གྲུབ་པ་དང་། བདེ་བར་འགྱུར་བ་དང་། ཤིན་ཏུ་ཡོངས་ [213a.7]སུ་དག་པ་འཐོབ་པར་འགྱུར་བ་དང་། དེ་དག་ལ་བག་ཆགས་ཀྱི་མཚམས་སྦྱོར་བར་འགྱུར་བའི་ཉོན་མོངས་པ་ཐམས་ཅད་ཀུན་ཏུ་འབྱུང་བར་མི་འགྱུར་བ་དང་། རང་གི་སྤྱོད་པ་ཡོངས་སུ་དག་པས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རབ་ཏུ་འཚལ་བར་འགྱུར་བ་དང་། སྤྱོད་ [213b] [213b.1]པའི་མཚན་ཉིད་རྣམས་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་འགྱུར་བ་དང་། ཡེ་ཤེས་ཀྱི་སྤྱོད་པས་འདོད་ཆགས་དང་། ཞེ་སྡང་དང་། གཏི་མུག་གི་སྤྱོད་པ་རྣམ་པར་སྤྱོད་པར་འགྱུར་བ་དང་། ཆོས་ཀྱི་སྤྱོད་པས་སེམས་ཅན་མི་འཐུན་པར་སྤྱོད་པ་ལ་གནས་པ་རྣམས་ཡང་དག་པའི་ཆོས་ [213b.2]ཀྱི་ནན་ཏན་ལ་མོས་པར་བགྱིད་པར་འགྱུར་བ་དང་། དེ་བཞིན་གཤེགས་པ་ཐམས་ཅད་ལ་ཁ་ན་མ་ཐོ་བ་མ་མཆིས་པར་འགྱུར་བ་དང་། སེམས་ཅན་ཐམས་ཅད་ཉེ་བར་འཚོ་བར་འགྱུར་བ་དང་། དེ་དག་ལ་བདུད་ཐམས་ཅད་ཀྱིས་གླགས་མི་རྙེད་པར་འགྱུར་བ་དང་། དེ་དག་ཕྱོགས་ [213b.3]བཅུའི་འཇིག་རྟེན་ན་ད་ལྟར་བྱུང་བའི་སངས་རྒྱས་ཐམས་ཅད་ལྟ་བ་ལ་སྒྲིབ་པ་མ་མཆིས་པར་འགྱུར་བ་དང་། དེ་དག་གི་སྤྱོད་པ་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་སྤྱོད་པས་རིག་པར་འགྱུར་བའི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡོངས་སུ་དག་པ་དེ་དེ་བཞིན་ [213b.4]གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་ [213b.5]ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་ཡོངས་སུ་དག་པའི་དཔེ་ཙམ་ཅུང་ཟད་ཅིག་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་བྱང་ཆུབ་སེམས་དཔའ་གཙུག་ན་རིན་པོ་ཆེ་བཅོམ་ [213b.6]ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་ཡོངས་སུ་དག་པ་ནི་འདི་བཞི་སྟེ། བཞི་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པའི་སྤྱོད་པ་ [213b.7]ཡོངས་སུ་དག་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡོངས་སུ་དག་པ་དང་། མངོན་པར་ཤེས་པ་སྒྲུབ་པའི་སྤྱོད་པ་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱ་བའི་སྤྱོད་པ་ཡོངས་སུ་དག་པ་སྟེ། རིགས་ཀྱི་བུ་བཞི་པོ་དེ་དག་ནི་བྱང་ཆུབ་སེམས་དཔའ་ [214a] [214a.1]རྣམས་ཀྱི་སྤྱོད་པ་ཡོངས་སུ་དག་པའོ། །དེ་ལ་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་ནི་ཀུན་ཏུ་བསྔོ་བའི་ཡེ་ཤེས་ལ་མཁས་པར་ཁོང་དུ་ཆུད་པར་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡོངས་སུ་དག་པ་ནི་ལམ་སྨྲ་བའི་ཡེ་ཤེས་ལ་མཁས་པར་ཁོང་དུ་ཆུད་ [214a.2]པར་བྱའོ། །མངོན་པར་ཤེས་པ་སྒྲུབ་པའི་སྤྱོད་པ་ཡོངས་སུ་དག་པ་ནི་བསམ་གཏན་ལ་སེམས་ལས་སུ་རུང་བའི་ཡེ་ཤེས་ལ་མཁས་པར་ཁོང་དུ་ཆུད་པར་བྱའོ། །སེམས་ཅན་ཡོངས་སུ་སྨིན་པར་བྱ་བའི་སྤྱོད་པ་ཡོངས་སུ་དག་པ་ནི་སྙིང་རྗེ་ཆེན་པོས་ལྷག་པའི་བསམ་པ་བརྟན་པའི་ [214a.3]ཡེ་ཤེས་ལ་མཁས་པར་ཁོང་དུ་ཆུད་པར་བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། འདི་ལྟེ་སྟེ། ཕ་རོལ་ཏུ་ཕྱིན་པ་དྲུག་གི་སྤྱོད་པ་ཡོངས་སུ་དག་པའོ། །དྲུག་པོ་དེ་དག་གང་ཞེ་ན། འདི་ལྟ་སྟེ། སྦྱིན་པ་ [214a.4]དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་སོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། འདི་ལྟ་སྟེ། སེར་སྣའི་དྲི་མས་ [214a.5]ཀུན་ཏུ་དཀྲིས་པའི་སེམས་སེལ་བ་དང་། གཏོང་བའི་རྗེས་སུ་འཇུག་པའི་སེམས་འཕེལ་བར་བྱེད་པ་དང་། དེ་སེར་སྣའི་དྲི་མ་བསལ་ཏེ་གཏོང་བའི་སེམས་ལ་གནས་ནས་བདོག་པ་ཐམས་ཅད་ཡོངས་སུ་གཏོང་བའི་སེམས་ལ་གནས་སོ། །དེ་སྦྱིན་པ་སྦྱིན་པ་ན་ཐ་དད་པ་བཞི་མི་ [214a.6]བྱེད་དེ། བཞི་གང་ཞེ་ན། འདི་ལྟ་སྟེ། སེམས་ཅན་ཐ་དད་དུ་མི་བྱེད་པ་དང་། ཆོས་ཐ་དད་པ་དང་། ཡོངས་སུ་བསྔོ་བ་ཐ་དད་པ་དང་། བསམ་པ་ཐ་དད་དུ་མི་བྱེད་དོ། །དེ་ལ་ཇི་ལྟར་ན་སེམས་ཅན་ཐ་དད་དུ་མི་བྱེད་ཅེ་ན། འདི་ལ་ནི་སྦྱིན། འདི་ལ་ནི་མི་སྦྱིན། འདི་ལ་ནི་མང་ [214a.7]དུ་སྦྱིན། འདི་ལ་ནི་ཉུང་ངུ་སྦྱིན། འདི་ལ་ནི་བཟང་པོ་སྦྱིན། འདི་ལ་ནི་ངན་པ་སྦྱིན། འདི་ལ་ནི་རྟག་ཏུ་སྦྱིན། འདི་ལ་ནི་རྟག་ཏུ་མི་སྦྱིན། འདི་ལ་ནི་བསྟི་སྟང་དུ་བྱས་ཏེ་སྦྱིན། འདི་ལ་ནི་བསྟི་སྟང་དུ་བྱས་ཏེ་མི་སྦྱིན། འདི་ལ་ནི་ཐམས་ཅད་སྦྱིན། འདི་ལ་ནི་ཐམས་ཅད་མི་སྦྱིན། [214b] [214b.1]འདི་ནི་ཚུལ་ཁྲིམས་དང་ལྡན་པ། འདི་ནི་ཚུལ་ཁྲིམས་དང་མི་ལྡན་པ། འདི་ནི་སྦྱིན་པའི་གནས། འདི་ནི་སྦྱིན་པའི་གནས་མ་ཡིན། འདི་ལ་སྦྱིན་ན་སྦྱིན་པ་རྣམ་པར་དག་པར་འགྱུར། འདི་ལ་ནི་རྣམ་པར་དག་པར་མི་འགྱུར། འདི་ནི་ཡང་དག་པར་ཞུགས་པ། འདི་ནི་ལོག་པར་ [214b.2]ཞུགས་པའོ་ཞེས་བྱ་བ་སྟེ། རིགས་ཀྱི་བུ་དེ་ལྟར་གང་འདི་ལྟ་བུའི་སེམས་འཕྲོ་བ་སྤོང་ཞིང་མཉམ་པ་ཉིད་དང་། ཐ་དད་པ་མ་ཡིན་པ་དང་། མི་མཐོ་མི་དམའ་བ་དང་། སེམས་ཅན་ཐམས་ཅད་ལ་སེམས་མཉམ་པ་དང་ཡང་དག་པར་སྦྱོར་བ་དང་། མཚུངས་པར་སྦྱིན་པ་དང་། མཚུངས་ [214b.3]པར་བྱམས་པ་དང་། མཚུངས་པར་སྙིང་རྗེ་བ་དང་། བྱེ་བྲག་མེད་པ་དང་། ནམ་མཁའ་དང་མཚུངས་པར་གྱུར་པ་དེ་ནི་སེམས་ཅན་ཐ་དད་པ་མ་ཡིན་པ་ཞེས་བྱའོ། །དེ་ལ་ཇི་ལྟར་ན་ཆོས་ཐ་དད་དུ་མི་བྱེད་ཅེ་ན། གང་ཆོས་སྨྲ་བར་འགྱུར་བ་དེ་དག་ལ་ནི་སྦྱིན། གང་ཆོས་མི་ཡིན་པར་སྨྲ་ [214b.4]བར་འགྱུར་བ་དེ་དག་ལ་ནི་མི་སྦྱིན་ནོ་སྙམ་དུ་དེ་ལྟར་སེམས་མི་སྐྱེད་དེ། དེ་ཆོས་ཐམས་ཅད་མཉམ་པ་ཉིད་ཐོབ་ནས་སྦྱིན་པ་སྦྱིན་ཏེ། སོ་སོའི་སྐྱེ་བོ་རྣམས་ནི་དམན་པའོ་སྙམ་དུ་སྦྱིན་པ་མི་སྦྱིན། འཕགས་པ་རྣམས་ནི་རྒྱ་ཆེན་པོའོ་ཞེས་སྦྱིན་པ་མི་སྦྱིན་གྱི། ཆོས་ཀྱི་དབྱིངས་རང་བཞིན་གྱིས་ [214b.5]མཉམ་སྟེ་བྱེ་བྲག་མེད་པས་སྦྱིན་པ་སྦྱིན་པ་འདི་ནི་ཆོས་ཐ་དད་པ་མ་ཡིན་པ་ཞེས་བྱའོ། །དེ་ལ་ཇི་ལྟར་ན་ཡོངས་སུ་བསྔོ་བ་ཐ་དད་དུ་མི་བྱེད་ཅེ་ན། གང་སྦྱིན་པ་སྦྱིན་པའི་དགེ་བའི་རྩ་བ་དེ་བརྒྱ་བྱིན་ཐོབ་པར་མི་སྔོ། ཚངས་པ་ཐོབ་པར་མ་ཡིན། རྒྱལ་པོའི་སྲིད་དང་། ཚོང་དཔོན་དང་། [214b.6]ཁྱིམ་བདག་དང་། གཟུགས་དང་། ལོངས་སྤྱོད་དང་། དབང་ཕྱུག་དང་། གཡོག་འདོད་པར་མ་ཡིན། སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་སྐྱེ་བའི་སྐྱེ་གནས་རྣམས་སུ་དགེ་བའི་རྩ་བ་དེ་ཡོངས་སུ་མི་སྔོ། ཉན་ཐོས་ཀྱི་ཐེག་པར་མ་ཡིན། རང་སངས་རྒྱས་ཀྱི་ཐེག་པར་མ་ [214b.7]ཡིན་ཏེ། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་གཞན་དུ་མི་སྔོ་བ་འདི་ནི་བསྔོ་བ་ཐ་དད་པ་མ་ཡིན་པ་ཞེས་བྱའོ། །དེ་ལ་ཇི་ལྟར་ན་སྦྱིན་པ་སྦྱིན་པ་ན་བསམ་པ་ཐ་དད་དུ་མི་བྱེད་ཅེ་ན། བསམ་པ་མཉམ་པ། སྦྱོར་བ་མཉམ་པ། རྣམ་པར་སྨིན་པ་ [215a] [215a.1]ལ་མི་རེ་བ། ཕ་རོལ་ལ་བྱས་པའི་ལན་རེ་བ་མེད་པ། གཡོ་མེད་པ་དང་། སྒྱུ་མེད་པས་སེམས་ཐག་པ་ནས་ཤིན་ཏུ་ཡོངས་སུ་བཏང་བའི་བློ་སེམས་འགྱོད་པ་མེད་པ་གནས་གསུམ་དུ་དད་པ་ཐོབ་སྟེ་སྦྱིན་ནོ་སྙམ་པ་དང་། སྦྱིན་པར་བྱེད་པ་དང་། བྱིན་ནས་དད་པ་རབ་ཏུ་ [215a.2]ཐོབ་པ་འདི་ནི་བསམ་པ་ཐ་དད་པ་མ་ཡིན་པ་ཞེས་བྱའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སྦྱིན་པ་སྦྱིན་པ་ན་ཐ་དད་པ་འདི་བཞི་མི་བྱེད་དེ། འདི་ནི་བྱང་ཆུབ་སེམས་དཔའ་རྣམས་སྦྱིན་པའི་ཕ་རོལ་ཏུ་ཕྱིན་པའི་ཡོངས་སུ་དག་པའི་རྐང་པ་དང་པོའོ། །དེ་ལྟ་བ་བརྒྱད་ཡོངས་སུ་ [215a.3]དག་པར་སྦྱིན་པ་སྦྱིན་པར་བྱེད་དེ། བརྒྱད་པོ་དག་གང་ཞེ་ན། འདི་ལྟ་སྟེ། བདག་ཏུ་ལྟ་བ་ཡོངས་སུ་དག་པར་སྦྱིན་པ་སྦྱིན་པ་དང་། དེ་བཞིན་དུ་སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་དང་། ཆད་པར་ལྟ་བ་དང་། རྟག་པར་ལྟ་བ་དང་། འབྱུང་བར་ལྟ་བ་དང་། [215a.4]འཇིག་པར་ལྟ་བ་ཡོངས་སུ་དག་པ་སྟེ། ལྟ་བ་བརྒྱད་པོ་དེ་དག་ཡོངས་སུ་དག་པར་སྦྱིན་པ་སྦྱིན་པར་བྱེད་དོ། །དེ་བག་ལ་ཉལ་བཞི་ཡོངས་སུ་སྤངས་ནས་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། སོ་སོའི་སྐྱེ་བོའི་ཆོས་ཀྱི་བག་ལ་ཉལ་དང་། ཉན་ཐོས་ཀྱི་ཆོས་ཀྱི་བག་ལ་ཉལ་དང་། རང་ [215a.5]སངས་རྒྱས་ཀྱི་ཆོས་ཀྱི་བག་ལ་ཉལ་དང་། བག་ཆགས་ཀྱི་མཚམས་སྦྱོར་བའི་བག་ལ་ཉལ་ཏེ། བག་ལ་ཉལ་བཞི་པོ་དེ་དག་ཡོངས་སུ་སྤངས་ནས་སྦྱིན་པ་སྦྱིན་པར་བྱེད་དོ། །དེ་འདུ་ཤེས་བཞི་ཡོངས་སུ་སྤངས་ནས་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། རྟག་པར་འདུ་ཤེས་པ་ [215a.6]དང་། བདེ་བར་འདུ་ཤེས་པ་དང་། གཙང་བར་འདུ་ཤེས་པ་དང་། བདག་ཏུ་འདུ་ཤེས་པ་སྟེ། འདུ་ཤེས་བཞི་པོ་དེ་དག་ཡོངས་སུ་སྤངས་ནས་སྦྱིན་པ་སྦྱིན་པར་བྱེད་དེ། དེ་རྣམ་པ་བཞི་ཡོངས་སུ་དག་པར་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། ལུས་ཡོངས་སུ་དག་པ་དང་། [215a.7]ངག་ཡོངས་སུ་དག་པ་དང་། སེམས་ཡོངས་སུ་དག་པ་དང་། བསམ་པ་ཡོངས་སུ་དག་པ་སྟེ། རྣམ་པ་བཞི་པོ་དེ་དག་ཡོངས་སུ་དག་པར་སྦྱིན་པ་སྦྱིན་པར་བྱེད་དོ། །དེ་ཆགས་པ་གསུམ་ལས་ཤིན་ཏུ་འདས་ནས་སྦྱིན་པ་སྦྱིན་པར་བྱེད་དེ། གསུམ་གང་ཞེ་ན། རྣམ་པར་སྨིན་ [215b] [215b.1]པ་ལ་ཆགས་པ་དང་། འགྱོད་པ་ལ་ཆགས་པ་དང་། ཐེག་པ་དམན་པར་བསྔོ་བ་ལ་ཆགས་པ་སྟེ། གསུམ་པོ་དེ་དག་ལས་ཤིན་ཏུ་འདས་ནས་སྦྱིན་པ་སྦྱིན་པར་བྱེད་དོ། །དེ་འཇིགས་པ་གསུམ་ལས་ཤིན་ཏུ་འདས་ནས་སྦྱིན་པ་སྦྱིན་པར་བྱེད་དེ། གསུམ་གང་ཞེ་ན། ལྷག་པའི་ང་རྒྱལ་གྱི་འཇིགས་ [215b.2]པ་དང་། རློམ་སེམས་ཀྱི་འཇིགས་པ་དང་། བདུད་ཀྱི་ལས་ཀྱི་འཇིགས་པ་སྟེ། གསུམ་པོ་དེ་དག་ལས་ཤིན་ཏུ་འདས་ནས་སྦྱིན་པ་སྦྱིན་པར་བྱེད་དོ། །དེ་རྒྱ་བཞིས་བཏབ་ནས་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། ནང་སྟོང་པ་ཉིད་ཀྱི་རྒྱས་བཏབ་པ་དང་། ཕྱི་སྟོང་པ་ཉིད་ཀྱི་རྒྱས་ [215b.3]བཏབ་པ་དང་། སེམས་ཅན་སྟོང་པ་ཉིད་ཀྱི་རྒྱས་བཏབ་པ་དང་། བྱང་ཆུབ་སྟོང་པ་ཉིད་ཀྱི་རྒྱས་བཏབ་པ་སྟེ། རྒྱ་བཞི་པོ་དེ་དག་གིས་བཏབ་ནས་སྦྱིན་པ་སྦྱིན་པར་བྱེད་དོ། །དེ་བརྩོན་འགྲུས་རྩོམ་པ་བཞི་དང་མི་འབྲལ་བར་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། སེམས་ཅན་ཐམས་ཅད་ཚིམ་པར་ [215b.4]བྱེད་པའི་བརྩོན་འགྲུས་རྩོམ་པ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་སྒྲུབ་པའི་བརྩོན་འགྲུས་རྩོམ་པ་དང་། མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པའི་བརྩོན་འགྲུས་རྩོམ་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བའི་བརྩོན་འགྲུས་རྩོམ་པ་སྟེ། བརྩོན་ [215b.5]འགྲུས་རྩོམ་པ་བཞི་པོ་དེ་དག་དང་མ་བྲལ་བར་སྦྱིན་པ་སྦྱིན་པར་བྱེད་དོ། །དེ་དྲན་པ་བཞི་དང་མི་འབྲལ་བར་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། བྱང་ཆུབ་ཀྱི་སེམས་དྲན་པ་དང་། སངས་རྒྱས་མཐོང་བ་དྲན་པ་དང་། བྱམས་པ་ཆེན་པོ་དྲན་པ་དང་། སེམས་ཅན་ཐམས་ཅད་ཀྱི་ [215b.6]ཉོན་མོངས་པ་སྤོང་བ་དྲན་པ་སྟེ། དྲན་པ་བཞི་པོ་དེ་དག་དང་མ་བྲལ་བར་སྦྱིན་པ་སྦྱིན་པར་བྱེད་དོ། །དེ་འཁོར་གསུམ་ཡོངས་སུ་དག་པར་སྦྱིན་པ་སྦྱིན་པར་བྱེད་དེ། གསུམ་གང་ཞེ་ན། བདག་གི་འཁོར་ཡོངས་སུ་དག་པ་དང་། སེམས་ཅན་གྱི་འཁོར་ཡོངས་སུ་དག་པ་དང་། བྱང་ཆུབ་ [215b.7]ཀྱི་འཁོར་ཡོངས་སུ་དག་པ་སྟེ། འཁོར་གསུམ་པོ་དེ་དག་ཡོངས་སུ་དག་པར་སྦྱིན་པ་སྦྱིན་པར་བྱེད་དོ། །དེ་ཤེས་པ་ཡོངས་སུ་དག་པ་བཞི་ཡོངས་སུ་དག་པར་སྦྱིན་པ་སྦྱིན་པར་བྱེད་དེ། བཞི་གང་ཞེ་ན། སྦྱིན་པ་ཤེས་པ་ཡོངས་སུ་དག་པ་དང་། སེམས་ཅན་གྱི་བསམ་པ་ [216a] [216a.1]ཚིམ་པར་བྱེད་པ་ཤེས་པ་ཡོངས་སུ་དག་པ་དང་། སྒྱུ་མའི་ཆོས་སུ་སོ་སོར་རྟོག་པ་ཤེས་པ་ཡོངས་སུ་དག་པ་དང་། བསྔོ་བ་ལ་སོ་སོར་རྟོག་པ་ཤེས་པ་ཡོངས་སུ་དག་པ་སྟེ། ཤེས་པ་ཡོངས་སུ་དག་པ་བཞི་པོ་དེ་དག་གིས་ཡོངས་སུ་དག་པར་སྦྱིན་པ་སྦྱིན་པར་བྱེད་དོ། ། [216a.2]རིགས་ཀྱི་བུ་བྱང་ཆུབ་སེམས་དཔའ་དེ་ལྟ་བུའི་ཆོས་ལ་ཞུགས་པ་དེའི་སྦྱིན་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་ཤིན་ཏུ་ཡོངས་སུ་དག་པར་འགྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་ [216a.3]དེ་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་ནི་རྣམ་པ་གཅིག་སྟེ། རྣམ་པ་གཅིག་གང་ཞེ་ན། འདི་ལྟ་སྟེ། བྱང་ཆུབ་ཀྱི་ [216a.4]སེམས་མཉམ་པ་མེད་པའི་སེམས། ཐུན་མོང་མ་ཡིན་པའི་སེམས། འཇིག་རྟེན་གསུམ་པོ་ཐམས་ཅད་ལས་མཆོག་ཏུ་བྱེ་བྲག་ཏུ་འཕགས་པའི་སེམས། ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་པའི་སེམས། བདུད་ཐམས་ཅད་འདུལ་བའི་སེམས། ལས་ [216a.5]དང་ཉོན་མོངས་པའི་སྒྲིབ་པ་ཐམས་ཅད་ཡོངས་སུ་ཟད་པར་བྱེད་པའི་སེམས། སེམས་ཅན་ཐམས་ཅད་སྒྲོལ་བའི་སེམས། ཡོན་ཏན་རིན་པོ་ཆེ་དཔག་ཏུ་མེད་པ་ཐམས་ཅད་ཀྱི་སེམས་དེ་ཉིད་མི་འདོར་ཞིང་སྲུང་བ་དང་། སྦེད་པ་དང་། མི་བརྗེད་པ་སྟེ། རིགས་ཀྱི་བུ་འདི་ [216a.6]ནི་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་གཅིག་གོ །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་གཉིས་ཏེ། རྣམ་པ་གཉིས་གང་ཞེ་ན། འདི་ལྟ་སྟེ། [216a.7]སེམས་ཅན་ཐམས་ཅད་ལ་འོད་ཟེར་ཐོགས་པ་མེད་པ་དང་། སེམས་ཅན་དེ་དག་ཀྱང་བྱང་ཆུབ་ཀྱི་བསམ་པའི་ཚུལ་ཁྲིམས་ལ་འཛུད་པ་སྟེ། འདི་ནི་རྣམ་པ་གཉིས་སོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་ [216b] [216b.1]གསུམ་སྟེ། རྣམ་པ་གསུམ་གང་ཞེ་ན། འདི་ལྟ་སྟེ། ལུས་ཀྱི་གནོད་པ་ཐམས་ཅད་བསལ་བས་ལུས་ཡོངས་སུ་དག་པ་དང་། ཁ་གསག་དང་། གཞོགས་སློང་དང་། ངག་གི་སྐྱོན་ཐམས་ཅད་བསལ་བས། ངག་ཡོངས་སུ་དག་པ་དང་། འདོད་པ་དང་། གནོད་སེམས་དང་། རྣམ་ [216b.2]པར་འཚེ་བའི་རྣམ་པར་རྟོག་པ་བསལ་བས་སེམས་ཡོངས་སུ་དག་པ་སྟེ་འདི་ནི་རྣམ་པ་གསུམ་མོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་བཞི་སྟེ། རྣམ་པ་བཞི་གང་ཞེ་ན། འདི་ལྟ་སྟེ། བསླབ་པ་ཡང་དག་པར་འཛིན་ [216b.3]པ་དང་། བསླབ་པ་ཡང་དག་པར་བཟུང་བ་མ་ཉམས་པ་དང་། སེམས་ཅན་ཚུལ་ཁྲིམས་འཆལ་པ་ཡོངས་སུ་སྨིན་པར་བྱེད་པ་དང་། ཚུལ་ཁྲིམས་དང་ལྡན་པ་ལ་སྟོན་པ་བཞིན་དུ་གུས་པར་བྱེད་པ་སྟེ། འདི་ནི་རྣམ་པ་བཞིའོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ [216b.4]ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་ལྔ་སྟེ། རྣམ་པ་ལྔ་གང་ཞེ་ན། འདི་ལྟ་སྟེ། བདག་ལ་མི་སྟོད་པ་དང་། གཞན་ལ་མི་སྨོད་པ་དང་། མ་བསླབས་པ་ལ་མི་བརྙས་པ་དང་། ཉན་ཐོས་ཀྱི་སེམས་ལ་མི་རེ་བ་དང་། རང་སངས་རྒྱས་ཀྱི་ཐེག་པ་མི་འདོད་པ་སྟེ། [216b.5]འདི་ནི་རྣམ་པ་ལྔའོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་དྲུག་སྟེ། རྣམ་པ་དྲུག་གང་ཞེ་ན། འདི་ལྟ་སྟེ། བསླབ་པ་ལས་མི་འདའ་བས་སངས་རྒྱས་རྗེས་སུ་དྲན་པ་དང་། ཚུལ་ཁྲིམས་ལ་འགྱོད་པ་མེད་པས་ [216b.6]ཆོས་རྗེས་སུ་དྲན་པ་དང་། སངས་རྒྱས་ཀྱི་བསླབ་པ་ལ་ལྟ་བས་དགེ་འདུན་རྗེས་སུ་དྲན་པ་དང་། ཉོན་མོངས་པ་ཐམས་ཅད་ཡོངས་སུ་སྤོང་བས་གཏོང་བ་རྗེས་སུ་དྲན་པ་དང་། སྐྱེ་བ་ཐམས་ཅད་ལ་མི་གནས་པས་ཚུལ་ཁྲིམས་རྗེས་སུ་དྲན་པ་དང་། དགེ་བའི་ཆོས་ཐམས་ཅད་ཡོངས་སུ་ [216b.7]རྫོགས་པར་བྱེད་པས་ལྷ་རྗེས་སུ་དྲན་པ་སྟེ། འདི་ནི་རྣམ་པ་དྲུག་གོ །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་བདུན་ཏེ། རྣམ་པ་བདུན་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་ལ་མངོན་པར་དད་པ་དང་། [217a] [217a.1]བདག་ཉིད་དཔང་དུ་བྱས་ཏེ་ངོ་ཚ་ཤེས་པ་དང་། སངས་རྒྱས་ཐམས་ཅད་མངོན་སུམ་དུ་བྱས་ཏེ་ཁྲེལ་ཡོད་པ་དང་། ང་རྒྱལ་མེད་པས་གུས་པ་དང་། བདག་དང་གཞན་ལ་གདུང་བ་མེད་པས་ངེས་པ་དང་། འཇིག་རྟེན་ཕ་རོལ་དུ་ཁ་ན་མ་ཐོ་བ་ལ་འཇིགས་པར་ལྟ་བས་རྣམ་པར་འཚེ་བ་ [217a.2]མེད་པ་དང་། སེམས་ཀྱི་ཡོངས་སུ་གདུང་བ་ཉེ་བར་ཞི་བས་འཁོན་དུ་མི་འཛིན་པ་སྟེ། འདི་ནི་རྣམ་པ་བདུན་ནོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་བརྒྱད་དེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཟང་ཟིང་མེད་ [217a.3]པའི་སེམས་ཀྱིས་ཚུལ་མི་འཆོས་པ་དང་། ཡོངས་སུ་འཛིན་པ་ཐམས་ཅད་འདོར་བས་ཁ་གསག་མེད་པ་དང་། རང་བཞིན་གྱིས་ཆོག་ཤེས་པས་ཐོབ་ཀྱིས་འཇལ་བ་མི་བྱེད་པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པས་འཕགས་པའི་རིགས་ཡང་དག་པར་འཛིན་པ་ཡོངས་ [217a.4]སུ་རྫོགས་པ་དང་། དགོན་པ་ལ་གནས་པ་རྗེས་སུ་མི་གཏོང་བས་ལུས་ལ་མི་ལྟ་བ་དང་། དམ་པའི་ཆོས་ཡོངས་སུ་འཛིན་པས་སྲོག་ལ་མི་ལྟ་བ་དང་། འདུ་འཛི་སྤོང་བས་གཅིག་པུ་ན་དགའ་བ་དང་། ཁམས་གསུམ་ཐམས་ཅད་ཀྱིས་འཇིགས་པས་ཆོས་ཀྱི་དགའ་བ་ལ་མོས་པ་སྟེ་ [217a.5]འདི་ནི་རྣམ་པ་བརྒྱད་དོ། །རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་དགུ་སྟེ། རྣམ་པ་དགུ་གང་ཞེ་ན། འདི་ལྟ་སྟེ། ཀུན་ནས་མནར་སེམས་ཀྱི་དངོས་པོ་དགུ་པོ་རྣམས་འདུལ་བ་དང་། སེམས་ཅན་གྱི་གནས་དགུ་པོ་རྣམས་ [217a.6]ལས་ཤིན་ཏུ་འདའ་བ་དང་། མཐར་གྱིས་གནས་པའི་སྙོམས་པར་འཇུག་པ་དགུ་པོ་རྣམས་ཀྱི་རྩ་བ་ཡོངས་སུ་སྦྱོང་བ་དང་། ཡོངས་སུ་གདུང་བ་མེད་པས་སེམས་ཞི་བ་དང་། སེམས་ལས་སུ་རུང་བས་ཞི་གནས་ཀྱི་ཚོགས་ཀུན་ཏུ་ཚོལ་བ་དང་། ཆོ་ག་དང་ཚུལ་ཁྲིམས་དང་ལྟ་བ་ [217a.7]ཉམས་པ་ལས་ཤིན་ཏུ་འདས་པས་མི་ལྷོད་པ་དང་། ཐེག་པ་ཆེན་པོ་ཡོངས་སུ་རྫོགས་པས་སེམས་ཅན་ཐམས་ཅད་ལ་མི་སླུ་བ་དང་། ཚུལ་ཁྲིམས་ལ་སྐྱོན་མེད་པས་ཤིན་ཏུ་མཐར་ཐུག་པ་དང་། ཡོངས་སུ་བསྔོ་བ་ལ་མཁས་པས་སེམས་ཕྱད་པ་སྟེ། འདི་ནི་རྣམ་པ་དགུའོ། ། [217b] [217b.1]རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་བཅུ་སྟེ། རྣམ་པ་བཅུ་གང་ཞེ་ན། འདི་ལྟ་སྟེ། ལུས་ཀྱི་ལས་རྣམ་གསུམ་ཡོངས་སུ་དག་པ་དང་། ངག་གི་ལས་རྣམ་བཞི་ཡོངས་སུ་དག་པ་དང་། ཡིད་ཀྱི་ལས་རྣམ་གསུམ་ཡོངས་སུ་དག་ [217b.2]པ་དང་། གཡོ་སྒྱུ་དང་བྲལ་ཏེ་དྲང་ཞིང་ཚུལ་འཆོས་པ་མེད་པའི་བསམ་པ་དང་ལྡན་པ་དང་། བསླབ་པ་ཐམས་ཅད་དང་མི་འགལ་བ་དང་། ཕན་པར་སྦྱོར་བའི་དངོས་པོའི་སྔོན་དུ་འགྲོ་བས་རྗེས་སུ་སྟོན་པ་དང་། དུལ་ཞིང་ཅང་ཤེས་ཀྱི་སའི་ཕྱིར་སེམས་དམུ་རྒོད་མ་ཡིན་པ་དང་། བདག་ [217b.3]ཉིད་བྱེད་པས་སེམས་ཅན་ཐམས་ཅད་ཀྱི་སློབ་མར་གྱུར་པ་དང་། ང་རྒྱལ་མེད་པས་སྦྱིན་པའི་གནས་རྣམས་ལ་འདུད་ཅིང་ཕྱག་འཚལ་བ་དང་། སྲོག་གི་དབང་པོར་ཆོས་མདུན་དུ་བྱེད་ཀྱི་འཇིག་རྟེན་གྱི་ཟང་ཟིང་མདུན་དུ་མི་བྱེད་པ་སྟེ། འདི་ནི་རྣམ་པ་བཅུའོ། །རིགས་ཀྱི་བུ་གཞན་ཡང་ [217b.4]བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་རྣམ་པ་གཉིས་ཏེ། རྣམ་པ་གཉིས་གང་ཞེ་ན། འདི་ལྟ་སྟེ། མཚན་མ་དང་བཅས་ཤིང་འབད་པ་དང་བཅས་པའི་ཚུལ་ཁྲིམས་ནི་སྲོག་གི་ཕྱིར་ཡང་མི་འབྲལ་བ་དང་། མཚན་མ་མེད་པ་དང་ [217b.5]ལྷུན་གྱིས་གྲུབ་པའི་ཚུལ་ཁྲིམས་ནི་ཆོས་ཐམས་ཅད་ལ་སྒྲོ་མི་འདོགས་པར་སློབ་པ་སྟེ། འདི་ནི་རྣམ་པ་གཉིས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གཉིས་ཏེ། གཉིས་གང་ཞེ་ན། འདི་ལྟ་སྟེ། ནང་རྣམ་ [217b.6]པར་དག་པས་སྐྱེ་མཆེད་རྣམ་པར་དག་པ་དང་། ཕྱི་རྣམ་པར་དག་པས་ཡུལ་ཐམས་ཅད་སྤངས་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གཉིས་ཏེ། གཉིས་གང་ཞེ་ན། འདི་ལྟ་སྟེ། བྱང་ཆུབ་ཀྱི་ངོ་བོ་ [217b.7]ཉིད་ཀྱི་མཚན་ཉིད་ཀྱིས་བྱང་ཆུབ་ཏུ་ཡོངས་སུ་བསྔོ་བ་དང་། མངོན་པར་འདུ་མི་བྱེད་པས་ཚུལ་ཁྲིམས་རྣམ་པར་དག་པའི་མཚན་ཉིད་དེ། གཉིས་པོ་དེ་དག་གོ །རིགས་ཀྱི་བུ་འདི་ནི་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ། །རིགས་ [218a] [218a.1]ཀྱི་བུ་དེ་ལ་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་དག་ཡོངས་སུ་དག་པས་འདི་ལྟར་གཤེ་ཡང་སླར་མི་གཤེའོ། །ལུས་ཡོངས་སུ་དག་པས་བརྡེགས་ཀྱང་སླར་མི་རྡེག་ [218a.2]གོ །སེམས་ཡོངས་སུ་དག་པས་ཁྲོས་ཀྱང་སླར་མི་ཁྲོའོ། །ལྷག་པའི་བསམ་པ་ཡོངས་སུ་དག་པས་འཚིག་པར་བྱས་ཀྱང་སླར་མི་འཚིག་གོ །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ནི་སེམས་ཅན་ལ་ལྟ་བའི་ཕྱིར་གཞན་གྱིས་ངན་དུ་སྨྲས་སམ། ངན་དུ་བརྗོད་པའི་ཚིག་གི་ [218a.3]ལམ་ཐོས་ཀྱང་མི་གཤེའོ། །འཇིག་རྟེན་ཕ་རོལ་ལ་ལྟ་བའི་ཕྱིར་ལག་པ་དང་། བོང་བ་དང་དབྱུག་པས་བརྡེགས་ཀྱང་ཁོང་ཁྲོ་བར་མི་འགྱུར་རོ། །བྱང་ཆུབ་ཀུན་ཏུ་སྲུང་བའི་ཕྱིར་ཡན་ལག་དང་ཉིང་ལག་བཅད་ཀྱང་ཁོང་ཁྲོ་བར་མི་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་ [218a.4]དཔའ་ནི་བསྡུ་བའི་དངོས་པོ་ཡོངས་སུ་འཛིན་པའི་ཕྱིར་སློང་བ་ལ་མི་གཤེའོ། །བྱང་ཆུབ་ཀྱི་ལམ་གྱིས་ཉེ་བར་བརྟན་པའི་ཕྱིར་དེ་དག་ལ་བྱམས་པ་ཉེ་བར་སྒྲུབ་བོ། །སྨོན་ལམ་ཡོངས་སུ་རྫོགས་པར་བྱ་བའི་ཕྱིར་དེ་དག་ལ་སྙིང་རྗེ་སྐྱེད་དོ། །བདུད་ཀྱི་ལས་དང་ཉོན་མོངས་པ་ཐམས་ཅད་སྤང་ [218a.5]བའི་ཕྱིར་གང་སློང་ཡང་དེ་ལ་ཕན་པར་སེམས་ཤིང་སྙིང་རྗེ་དང་ལྡན་ཏེ་བྱང་ཆུབ་ཀྱི་ཡན་ལག་ཏུ་ངེས་པར་སྦྱིན་པར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ནི་སངས་རྒྱས་ཀྱི་སྐུ་ཡོངས་སུ་རྫོགས་པར་བྱ་བའི་ཕྱིར་སངས་རྒྱས་རྗེས་སུ་དྲན་ཞིང་བཟོད་དོ། །སྟོབས་བཅུ་ [218a.6]ཡོངས་སུ་རྫོགས་པར་བྱ་བའི་ཕྱིར་བྱང་ཆུབ་རྗེས་སུ་དྲན་ཞིང་བཟོད་དོ། །དུས་གསུམ་ལ་ཆགས་པ་མེད་པའི་ཡེ་ཤེས་མཐོང་བ་ཡོངས་སུ་རྫོགས་པར་བྱ་བའི་ཕྱིར་ཡེ་ཤེས་རྗེས་སུ་དྲན་ཞིང་བཟོད་དོ། །བྱམས་པ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་ཕན་པར་འདོད་པ་རྗེས་སུ་དྲན་ [218a.7]ཞིང་བཟོད་དོ། །སྙིང་རྗེ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་འབྲས་བུ་ཡོད་པ་རྣམ་པར་གནོན་པ་རྗེས་སུ་དྲན་ཞིང་བཟོད་དོ། །མི་འཇིགས་པ་ཡོངས་སུ་རྫོགས་པར་བྱ་བའི་ཕྱིར་སེང་གེ་བསྒྱིངས་པ་རྗེས་སུ་དྲན་ཞིང་བཟོད་དོ། །སེམས་ཅན་ཐམས་ཅད་ལ་འདུད་པའི་ཕྱིར་སྤྱི་ [218b] [218b.1]གཙུག་བལྟར་མི་སྣང་བ་རྗེས་སུ་དྲན་ཞིང་བཟོད་དོ། །འཇིག་རྟེན་ཐམས་ཅད་ཀྱིས་ཟིལ་གྱིས་མི་ནོན་པའི་ཕྱིར་མཚན་དང་དཔེ་བྱད་བཟང་པོ་རྗེས་སུ་དྲན་ཞིང་བཟོད་དོ། །ཐམས་ཅད་མཁྱེན་པའི་ཡེ་ཤེས་མྱང་བའི་ཕྱིར་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་རྗེས་སུ་དྲན་ [218b.2]ཞིང་བཟོད་དོ། །རིགས་ཀྱི་བུ་བྱང་ཆུབ་སེམས་དཔའི་བཟོད་པ་ནི་སྟོབས་གཉིས་ཀྱིས་ཡོངས་སུ་དག་པར་འགྱུར་ཏེ། གཉིས་གང་ཞེ་ན། འདི་ལྟ་སྟེ། སོ་སོར་རྟོག་པའི་སྟོབས་དང་སྒོམ་པའི་སྟོབས་སོ། །དེ་ལ་གང་ལུས་དང་སེམས་ལ་གནས་ཏེ་བཟོད་པ་ནི་སོ་སོར་རྟོག་པའི་སྟོབས་སོ། ། [218b.3]གང་ཆོས་ཐམས་ཅད་ལ་གནས་ཏེ་བཟོད་པ་ནི་སྒོམ་པའི་སྟོབས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་ནི་གང་སེམས་ཅན་ཐམས་ཅད་ལ་བདག་མེད་པར་བཟོད་ཅིང་ཆོས་ཐམས་ཅད་ལ་དབེན་པར་བཟོད་དེ། གང་ཆོས་ [218b.4]ཐམས་ཅད་ལ་མི་བཟོད་པ་དེ་ནི་བཟོད་པ་ཡོངས་སུ་དག་པའོ། །དེ་ཅིའི་ཕྱིར་ཞེ་ན། འདི་ལ་དོན་དམ་པར་གང་བཟོད་པ་འམ། མི་བཟོད་པའི་ཆོས་གང་ཡང་མེད་དོ། །གང་ཆོས་ཐམས་ཅད་ཁས་མི་ལེན་པ་དེའི་བཟོད་པ་ཡོངས་སུ་དག་པ་སྟེ། ཆོས་ཁས་ལེན་པ་ལ་ནི་བཟོད་པ་ཡོངས་སུ་ [218b.5]དག་པ་གང་ཡང་མེད་དོ། །གང་ཆོས་ཐམས་ཅད་ལ་ཞུམ་པ་མེད་པ་དེའི་བཟོད་པ་ཡོངས་སུ་དག་པ་སྟེ། ཞུམ་པ་ལ་ནི་བཟོད་པ་ཡོངས་སུ་དག་པ་གང་ཡང་མེད་དོ། །གང་ཆོས་ཐམས་ཅད་མི་འཛིན་པ་དེའི་བཟོད་པ་ཡོངས་ས་དག་པ་སྟེ། འཛིན་པ་ལ་ནི་བཟོད་པ་ཡོངས་སུ་དག་པ་གང་ཡང་མེད་ [218b.6]དོ། །གང་ལ་བདག་མེད་པ་དང་། སེམས་ཅན་མེད་པ་དང་། ཆོས་མེད་པ་དེའི་བཟོད་པ་ཡོངས་སུ་དག་པ་སྟེ། བདག་དང་སེམས་ཅན་དང་། ཆོས་ལ་གནས་པ་ལ་ནི་བཟོད་པ་ཡོངས་སུ་དག་པ་གང་ཡང་མེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་བཟོད་པའི་ཕ་རོལ་ [218b.7]ཏུ་ཕྱིན་པའི་སྤྱོད་པ་ཡོངས་སུ་དག་པ་གཉིས་ཏེ། གཉིས་གང་ཞེ་ན་འདི་ལྟ་སྟེ། ལུས་རྣམ་པར་འཕྲུལ་པའི་བཟོད་པ་ཡོངས་སུ་དག་པ་དང་། ཆོས་ཐམས་ཅད་ཇི་ལྟ་བ་བཞིན་དུ་བཟོད་པ་ཡོངས་སུ་དག་པ་སྟེ། གཉིས་པོ་དེ་དག་གོ །རིགས་ཀྱི་བུ་འདི་ནི་བྱང་ཆུབ་སེམས་དཔའི་བཟོད་ [219a] [219a.1]པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། གང་བྱང་ཆུབ་ཀྱི་སེམས་མི་གཏོང་བ། དགོས་པ་དང་དགོས་པ་མ་ཡིན་པ་ལ་ཞུམ་པ་མེད་པ། [219a.2]རྩོམ་པས་མི་ངལ་བ། དགེ་བའི་རྩ་བ་སོགས་པ་ལ་མི་ཞན་པ། ཕ་རོལ་ཏུ་ཕྱིན་པ་འདི་དག་ལས་ཕྱིར་མི་ལྡོག་པ། ཆོས་ཐམས་ཅད་ཡོངས་སུ་ཚོལ་བ་ལ་བརྩོན་པ། ཆོས་ཐམས་ཅད་སྟོན་པར་རྩོམ་པ། ཆོས་ཐམས་ཅད་ཡོངས་སུ་འཛིན་པ་ལ་སྤྲོ་བ། མཆོད་སྦྱིན་ཆེན་པོ་ལས་ [219a.3]སྒྲོལ་བ། སེམས་ཅན་རྣམས་ཡོངས་སུ་སྨིན་པར་བྱེད་པ་ལ་ཡོངས་སུ་མི་སྐྱོ་བ། སངས་རྒྱས་ཀྱི་ཞིང་རྣམ་པར་སྤྱོད་པ། ཐེག་པ་དམན་པ་ལས་ཤིན་ཏུ་འདའ་བ། སྔོན་དམ་བཅས་པ་ཡོངས་སུ་རྫོགས་པར་བྱེད་པ། སྦྱིན་པ་དང་། ཚུལ་ཁྲིམས་དང་། ཐོས་པའི་ཚོགས་ [219a.4]སོགས་པ། སྔོན་གྱི་བསོད་ནམས་བསགས་པ་ཆུད་མི་གཟོན་པ། ང་རྒྱལ་མེད་པས་སེམས་ཅན་ཐམས་ཅད་ལ་རིམ་གྲོ་བྱའོ་ཅོག་བྱེད་པ་སྟེ། འདི་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཞེས་བྱའོ། །དེའི་ཡོངས་སུ་དག་པ་གང་ཞེ་ན། གང་ལུས་ལ་མིག་ཡོར་དང་གཟུགས་བརྙན་དུ་ [219a.5]ཤེས་པ། ཚིག་ལ་བརྗོད་དུ་མེད་པར་ཤེས་པ། སེམས་ལ་ཤིན་ཏུ་ཉེ་བར་ཞི་བར་ཤེས་པ། ཟད་པ་ཤེས་པ་རྣམ་པར་རིག་པ། ཟད་པ་ཤེས་པ་རབ་ཏུ་ཤེས་པ། མི་སྐྱེ་བ་ཤེས་པ་ངེས་པར་རྟོགས་པའོ། །དེ་རྩོམ་པ་གསུམ་ལས་རྣམ་པར་གྲོལ་བར་བརྩོན་འགྲུས་རྩོམ་སྟེ། [219a.6]གསུམ་གང་ཞེ་ན། གནས་པའི་རྩོམ་པ་དང་། དམིགས་པའི་རྩོམ་པ་དང་། ཡོངས་སུ་རྟོག་པའི་རྩོམ་པ་སྟེ། གསུམ་པོ་དེ་དག་གོ །དེ་ཆགས་པ་གསུམ་ལ་མི་ཆགས་པར་བརྩོན་འགྲུས་རྩོམ་སྟེ། གསུམ་གང་ཞེ་ན། མིག་དང་གཟུགས་དང་མིག་གི་རྣམ་པར་ཤེས་པ་ [219a.7]ལ་མི་ཆགས་པ། རྣ་བ་དང་། སྒྲ་དང་། རྣ་བའི་རྣམ་པར་ཤེས་པ་ལ་མི་ཆགས་པ། སྣ་དང་། དྲི་དང་། སྣའི་རྣམ་པར་ཤེས་པ་ལ་མི་ཆགས་པ། ལྕེ་དང་། རོ་དང་། ལྕེའི་རྣམ་པར་ཤེས་པ་ལ་མི་ཆགས་པ། ལུས་དང་། རེག་བྱ་དང་། ལུས་ཀྱི་རྣམ་པར་ཤེས་པ་ལ་མི་ཆགས་ [219b] [219b.1]པ། ཡིད་དང་། ཆོས་དང་། ཡིད་ཀྱི་རྣམ་པར་ཤེས་པ་ལ་མི་ཆགས་པའོ། །དེ་འཛིན་པ་མེད་ཅིང་འདོར་བ་མེད་པའི་བརྩོན་འགྲུས་དང་ལྡན་པས་སྦྱིན་པ་མི་ལེན། སེར་སྣ་མི་འདོར། ཚུལ་ཁྲིམས་མི་ལེན། འཆལ་པའི་ཚུལ་ཁྲིམས་མི་འདོར། བཟོད་པ་མི་ལེན། གནོད་སེམས་ [219b.2]མི་འདོར། བརྩོན་འགྲུས་མི་ལེན། ལེ་ལོ་མི་འདོར། བསམ་གཏན་མི་ལེན། གཡེང་བ་མི་འདོར། ཤེས་རབ་མི་ལེན། འཆལ་པའི་ཤེས་རབ་མི་འདོར། དགེ་བ་མི་ལེན། མི་དགེ་བ་མི་འདོར། སངས་རྒྱས་ཀྱི་བྱང་ཆུབ་མི་ལེན། ཉན་ཐོས་དང་རང་སངས་རྒྱས་ཀྱི་བྱང་ཆུབ་ [219b.3]མི་འདོར་རོ། །དེ་ལེན་པ་མེད་ཅིང་འདོར་བ་མེད་པས་གཉིས་ཡོངས་སུ་དག་པའི་བརྩོན་འགྲུས་དང་ལྡན་པར་འགྱུར་ཏེ། དེ་ལ་གཉིས་གང་ཞེ་ན། གང་ནང་གི་ཀུན་ཏུ་ལྡང་བ་ལས་དམིགས་པ་ཀུན་ཏུ་ལྡང་བ་དང་། ཕྱི་རོལ་དུ་རྣམ་པར་ཤེས་པ་མཚན་མའི་རྗེས་སུ་འབྲང་བར་འགྱུར་བ་དེ་ནི་གཉིས་ [219b.4]ཞེས་བྱའོ། །དེ་ལ་གཉིས་ཡོངས་སུ་དག་པ་གང་ཞེ་ན། གང་ནང་ཉེ་བར་ཞི་བས་ཕྱི་རོལ་དུ་མི་རྒྱུ་བ་དང་། སྤྲོས་པ་མེད་པ་སྟེ། འདི་ནི་གཉིས་ཡོངས་སུ་དག་པ་ཞེས་བྱའོ། །གང་རྒྱུ་བ་མེད་ཅིང་མ་སྤྲོས་པ། སྤྲོས་པ་མེད་པའི་བརྩོན་འགྲུས་འདི་ལྟ་བུ་དེ་ནི་བྱང་ཆུབ་སེམས་དཔའི་ [219b.5]བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། གང་བསམ་གཏན་གྱི་ཡན་ལག་རྣམས་ཡང་དག་པར་སྒྲུབ་ཅིང་ཡང་དག་པར་བསྒྲུབས་ནས་སོ་སོར་ [219b.6]རྟོག་པ་དང་། སོ་སོར་བརྟགས་ནས་ཀྱང་སྙོམས་པར་འཇུག་པ་ཡིན་ཏེ། དེ་བསམ་གཏན་བྱེད་ཀྱང་གཟུགས་ལ་གནས་ཏེ་བསམ་གཏན་མི་བྱེད། དེ་བསམ་གཏན་བྱེད་ཀྱང་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། རྣམ་པར་ཤེས་པ་ལ་གནས་ [219b.7]ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་མིག་ལ་གནས་ཏེ་བསམ་གཏན་མི་བྱེད། དེ་བསམ་གཏན་བྱེད་ཀྱང་རྣ་བ་ལ་གནས་ཏེ་བསམ་གཏན་མི་བྱེད། སྣ་ལ་མ་ཡིན། ལྕེ་ལ་མ་ཡིན། ལུས་ལ་མ་ཡིན། ཡིད་ལ་གནས་ཏེ་བསམ་གཏན་མི་བྱེད་དོ། །དེ་བསམ་ [220a] [220a.1]གཏན་བྱེད་ཀྱང་གཟུགས་ལ་གནས་ཏེ་བསམ་གཏན་མི་བྱེད། སྒྲ་ལ་མ་ཡིན། དྲི་ལ་མ་ཡིན། རོ་ལ་མ་ཡིན། རེག་བྱ་ལ་མ་ཡིན། ཆོས་ལ་གནས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་ལུས་སུ་རྣམ་པར་རྟོག་པ་ལ་གནས་ཏེ་བསམ་གཏན་མི་བྱེད། དེ་བསམ་ [220a.2]གཏན་བྱེད་ཀྱང་སེམས་སུ་རྣམ་པར་རྟོག་པ་ལ་གནས་ཏེ་བསམ་གཏན་མི་བྱེད། དེ་བསམ་གཏན་བྱེད་ཀྱང་ས་ལ་གནས་ཏེ་བསམ་གཏན་མི་བྱེད། དེ་བཞིན་དུ་ཆུ་ལ་མ་ཡིན། མེ་ལ་མ་ཡིན། རླུང་ལ་མ་ཡིན། ནམ་མཁའ་ལ་གནས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་ [220a.3]ཟླ་བ་ལ་མ་ཡིན། ཉི་མ་ལ་མ་ཡིན། བརྒྱ་བྱིན་ལ་མ་ཡིན། ཚངས་པ་ལ་མ་ཡིན། སྐྱེ་དགུའི་བདག་པོ་ལ་གནས་ཏེ་བསམ་གཏན་མི་བྱེད་དོ། །འདོད་པའི་ཁམས་ལ་གནས་ཏེ་བསམ་གཏན་མི་བྱེད། གཟུགས་ཀྱི་ཁམས་ལ་མ་ཡིན། གཟུགས་མེད་པའི་ཁམས་ལ་གནས་ [220a.4]ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་འཇིག་རྟེན་འདི་ལ་གནས་ཏེ་བསམ་གཏན་མི་བྱེད། འཇིག་རྟེན་ཕ་རོལ་ལ་གནས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་མི་མཐོ་མི་དམའ་བར་གནས་ཏེ་མི་གཡོ་བར་གྱུར་ཅིང་བསམ་གཏན་བྱེད་དོ། །དེ་བསམ་གཏན་ [220a.5]བྱེད་ཀྱང་བདག་ཉེ་བར་ལེན་པའི་ལྟ་བ་ལ་གནས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་སེམས་ཅན་ལ་མ་ཡིན། སྲོག་ལ་མ་ཡིན། གསོ་བ་ལ་མ་ཡིན། གང་ཟག་ལ་མ་ཡིན། ཤེད་ལས་སྐྱེས་པ་མ་ཡིན། ཤེད་བུ་ཉེ་བར་ལེན་པའི་ལྟ་བ་ལ་གནས་ཏེ་བསམ་གཏན་མི་ [220a.6]བྱེད་དོ། །དེ་བསམ་གཏན་བྱེད་ཀྱང་ཆད་པར་ལྟ་བ་ཁས་བླངས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་རྟག་པར་ལྟ་བ་མ་ཡིན། འབྱུང་བར་ལྟ་བ་མ་ཡིན། འཇིག་པར་ལྟ་བ་ཁས་བླངས་ཏེ་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་ཟག་པ་ཤིན་ཏུ་ཟད་པར་བྱ་ [220a.7]བའི་ཕྱིར་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་སྐྱོན་མེད་པ་ལ་འཇུག་པ་དང་། འབྲས་བུ་ཐོབ་པ་མངོན་སུམ་དུ་བྱ་བའི་ཕྱིར་བསམ་གཏན་མི་བྱེད་དོ། །དེ་བསམ་གཏན་བྱེད་ཀྱང་ཤིན་ཏུ་མངོན་པར་འདུ་མི་བྱ་བའི་ཕྱིར་བསམ་གཏན་མི་བྱེད་དོ། །དེ་སྟོང་པ་ཉིད་ཀྱི་ཏིང་ངེ་འཛིན་ [220b] [220b.1]འདྲིས་པར་བྱ་བའི་ཕྱིར་བསམ་གཏན་བྱེད་ཀྱང་སྟོང་པ་ཉིད་ཀྱི་ཏིང་ངེ་འཛིན་མངོན་སུམ་དུ་བྱ་བའི་ཕྱིར་བསམ་གཏན་མི་བྱེད་དོ། །དེ་མཚན་མ་མེད་པའི་ཏིང་ངེ་འཛིན་འདྲིས་པར་བྱ་བའི་ཕྱིར་བསམ་གཏན་བྱེད་ཀྱང་མཚན་མ་མེད་པའི་ཏིང་ངེ་འཛིན་མངོན་སུམ་དུ་བྱ་བའི་ཕྱིར་བསམ་གཏན་མི་བྱེད་དོ། །དེ་ [220b.2]སྨོན་པ་མེད་པའི་ཏིང་ངེ་འཛིན་འདྲིས་པར་བྱ་བའི་ཕྱིར་བསམ་གཏན་བྱེད་ཀྱང་སྨོན་པ་མེད་པའི་ཏིང་ངེ་འཛིན་མངོན་སུམ་དུ་བྱ་བའི་ཕྱིར་བསམ་གཏན་མི་བྱེད་དོ། །དེ་བྱམས་པ་ཆེན་པོའི་གོ་བགོས་སྙིང་རྗེ་ཆེན་པོའི་བྱིན་གྱི་རླབས་ལ་གནས་ཏེ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་ [220b.3]པ་ཉིད་ཀྱི་རྣམ་པས་མངོན་པར་བསྒྲུབས་པ་བསམ་གཏན་དུ་བྱེད་དོ། །དེ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་གང་ཞེ་ན། སྦྱིན་པ་མ་ཚང་བ་མེད་པ། ཚུལ་ཁྲིམས་མ་ཚང་བ་མེད་པ། བཟོད་པ་མ་ཚང་བ་མེད་པ། བརྩོན་འགྲུས་མ་ཚང་བ་མེད་པ། བསམ་གཏན་ [220b.4]མ་ཚང་བ་མེད་པ། ཤེས་རབ་མ་ཚང་བ་མེད་པ། ཐབས་མ་ཚང་བ་མེད་པ། བྱམས་པ་མ་ཚང་བ་མེད་པ། སྙིང་རྗེ་དང་། དགའ་བ་དང་། བཏང་སྙོམས་མ་ཚང་བ་མེད་པ། བདེན་པ་ཤེས་པ་ལ་འཇུག་པ་མ་ཚང་བ་མེད་པ། བྱང་ཆུབ་ཀྱི་སེམས་སེམས་ཅན་ལ་ལྟ་བ་མ་ཚང་བ་མེད་པ། [220b.5]བསམ་པ་དང་ལྷག་པའི་བསམ་པའི་སྦྱོར་བ་མ་ཚང་བ་མེད་པ། སྦྱིན་པ་དང་། སྙན་པར་སྨྲ་བ་དང་། དོན་བྱེད་པ་དང་། དོན་འཐུན་པ་མ་ཚང་བ་མེད་པ། དྲན་པ་དང་ཤེས་བཞིན་མ་ཚང་བ་མེད་པ། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། [220b.6]དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་ཡན་ལག་བརྒྱད་པ་མ་ཚང་བ་མེད་པ། ཞི་གནས་དང་ལྷག་མཐོང་མ་ཚང་བ་མེད་པ། སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། ངེས་པ་མ་ཚང་བ་མེད་པ། ངོ་ཚ་ཤེས་པ་དང་ཁྲེལ་ [220b.7]ཡོད་པ། མ་ཚང་བ་མེད་པ། མི་དགེ་བའི་ཆོས་དང་མི་ལྡན་པ། དགེ་བའི་ཆོས་ཐམས་ཅད་དང་ལྡན་པ། སངས་རྒྱས་ཀྱི་ཚུལ་རྒྱུན་མི་འཆད་པས་བྱིན་གྱིས་བརླབས་པ། ཆོས་ཀྱི་ཚུལ་འབར་བས་ཡང་དག་པར་བསྡུས་པ། དགེ་འདུན་གྱི་ཚུལ་ཡོངས་སུ་སྡུད་པ་དང་ལྡན་པ། [221a] [221a.1]སེམས་ཅན་ཐམས་ཅད་ལ་ལྟ་བས་བྱིན་གྱིས་བརླབས་པ། སངས་རྒྱས་ཀྱི་སྐུ་ཡོངས་སུ་བསྒྲུབས་པས་ལེགས་པར་བརྒྱན་པ། སངས་རྒྱས་ཀྱི་དབྱིངས་ཡོངས་སུ་རྫོགས་པར་བསྔོས་པ། སངས་རྒྱས་ཀྱི་ཏིང་ངེ་འཛིན་མཉམ་པ་ཉིད་དང་ལྡན་པ། སངས་རྒྱས་ཀྱི་རྫུ་ [221a.2]འཕྲུལ་དང་། སོ་སོ་ཡང་དག་པར་རིག་པ་དང་ལྡན་པ། སྟོབས་བཅུའི་སྟོབས་ཀྱིས་ཡང་དག་པར་བཟུང་བ། མི་འཇིགས་པ་བཞི་ལ་རབ་ཏུ་གནས་པ། སངས་རྒྱས་ཀྱི་ཆོས་མ་འདྲེས་པ་{བཅྭ་,བཅོ་}བརྒྱད་དང་རྗེས་སུ་འཐུན་པ། ཉན་ཐོས་དང་རང་སངས་རྒྱས་ཀྱི་ཐེག་པ་དང་མ་འདྲེས་པ། [221a.3]བག་ཆགས་ཀྱི་མཚམས་སྦྱོར་བའི་ཉོན་མོངས་པ་བསལ་བ། མངོན་པར་ཤེས་པའི་ཡེ་ཤེས་དང་མ་བྲལ་བ། སེམས་ཅན་ཐམས་ཅད་ཀྱི་སྟོན་པར་གྱུར་པ་སྟོན་པ་བཞི་ཐོབ་པ། འཇིག་རྟེན་དང་འཇིག་རྟེན་ལས་འདས་པའི་ཆོས་མཉམ་པ་ཉིད་ཐོབ་པ། སེམས་ཅན་ཐམས་ཅད་ཡོངས་སུ་ [221a.4]སྨིན་པར་བྱེད་པས་མ་སྨད་པ། དྲང་བ། མཁས་པ། སེམས་ཅན་ཐམས་ཅད་ཀྱི་སྡུག་བསྔལ་སེལ་བ། ཉོན་མོངས་པ་ཐམས་ཅད་སྦྱོང་བ། ཆུ་བོ་ལས་སྒྲོལ་བ། འཛིན་པ་ཐམས་ཅད་གཅོད་པ། རང་བཞིན་གྱིས་ཉེ་བར་ཞི་བ། ལས་དང་ཉོན་མོངས་པ་ཐམས་ཅད་ཀྱིས་ཉེ་བར་ཞི་བ། [221a.5]ཆོས་ཉིད་ཀྱིས་བཏང་སྙོམས་པ། སངས་རྒྱས་ཀྱི་ཆོས་ཐམས་ཅད་ལ་ལྟ་བ། རང་གི་མཚན་ཉིད་ཀྱིས་བེམས་པོ་བྱིན་གྱིས་བརླབས་བྱ་བའི་ཕྱིར་རྣམ་པར་གྲོལ་བ་མེད་པ། རང་གི་ངང་གིས་ལུང་དུ་མ་བསྟན་པ། སངས་རྒྱས་ཀྱི་བྱ་བ་ལ་རྟག་ཏུ་བརྩོན་པ། ཉེ་བར་ཞི་བས་བསིལ་བར་གྱུར་པ། [221a.6]སེམས་ཅན་ཡོངས་སུ་སྨིན་པར་བྱ་བ་ལ་རྟག་ཏུ་འབར་བ་སྟེ། འདི་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཅེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ཡོངས་སུ་བརྟག་པ་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་ [221a.7]པ་དེ་དག་ཐམས་ཅད་རི་མོ་མཁན་བཟོ་ཐ་དད་པར་བསླབས་པ། ཡན་ལག་རྣམ་པར་ཕྱེ་བ་ཐ་དད་དུ་བསླབས་པར་གྱུར་ཏེ། དེ་ལ་ལ་ལ་ནི་ས་གཅོད་པ་ལ་མཁས་ཀྱང་འདྲི་བ་ལ་མི་མཁས། ལ་ལ་ནི་གཏན་ལ་འབེབས་པ་ལ་མཁས་ཀྱང་ཡན་ལག་དང་ཉིང་ལག་ལ་མི་མཁས། ཁ་ [221b] [221b.1]ཅིག་ནི་རྐང་ལག་འདྲི་བ་ལ་མཁས་ཀྱང་མིག་དང་མགོ་དང་རྣ་བ་འདྲི་བ་ལ་མི་མཁས་པ་དག་ཅིག་ཡིན་ལ། རིགས་ཀྱི་བུ་དེ་ལྟར་རྣམ་པ་ཐ་དད་དུ་བསླབས་པ། ཡན་ལག་རྣམ་པར་དབྱེ་བ་ལ་ཐ་དད་དུ་བསླབས་པ། གཟུགས་ཐ་དད་དུ་བསླབས་པའི་རི་མོ་མཁན་དེ་དག་ཐམས་ཅད་ [221b.2]ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་རས་ཤིག་བྱིན་ཏེ། ཁྱེད་རྣམས་ཀྱིས་རས་འདི་ལ་ངའི་གཟུགས་བྲིས་ཏེ་འོན་ཅིག་ཁྱེད་ཅག་ཐམས་ཅད་ཀྱིས་ཀྱང་འདི་ལ་རི་མོ་བྲིས་ཤིག །དེ་ནས་རི་མོ་མཁན་དེ་དག་ཚོགས་ནས་རས་དེ་བརྒྱངས་པ་ལས་རི་མོ་མཁན་དེ་དག་གི་ནང་ནས་ [221b.3]རི་མོ་མཁན་གཅིག་ཅིག་ཡུལ་གཞན་ཞིག་ཏུ་སོང་བར་གྱུར་ལ། དེ་ནས་རི་མོ་མཁན་ཕྱི་མ་དེ་དག་གིས་དེ་ལ་རྒྱལ་པོ་དེའི་གཟུགས་བྲིས་ན། རིགས་ཀྱི་བུ་འདི་ཇི་སྙམ་དུ་སེམས། རི་མོ་མཁན་གཅིག་པོ་དེའི་ལག་ཏུ་མ་བླངས་ན་རས་དེ་རྣམ་པ་ཐམས་ཅད་ཀྱི་མཆོག་དང་ལྡན་པར་ [221b.4]འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ལྟར་ན་ཇི་ཙམ་དུ་དོན་རྣམ་པར་རིག་པར་བྱ་བའི་ཕྱིར་འདི་དཔེར་བྱས་ཏེ། འདིའི་དོན་ཅིར་བལྟ་ཞེ་ན། རིགས་ཀྱི་བུ་ཇི་ལྟར་རི་མོ་མཁན་གཅིག་པོ་དེ་མེད་ན་ [221b.5]རས་དེ་རྣམ་པ་ཐམས་ཅད་ཀྱི་མཆོག་དང་ལྡན་པར་མི་འགྱུར་བ་དེ་བཞིན་དུ་རིགས་ཀྱི་བུ་རྣམ་པ་ཇི་སྙེད་དང་། སྤྱོད་པ་ཇི་སྙེད་དང་། བརྩོན་པ་ཇི་སྙེད་ཀྱིས་སངས་རྒྱས་ཀྱི་ཆོས་ཡོངས་སུ་གྲུབ་པར་འགྱུར་བའི་རྣམ་པ་དེ་དག་ལས་གལ་ཏེ་རྣམ་པ་གཅིག་མ་བསྟན་ན་ཡང་རྣམ་པ་ཐམས་ཅད་ [221b.6]ཀྱི་མཆོག་དང་ལྡན་པའི་སྟོང་པ་ཉིད་མ་ཡིན་ནོ། །ནམ་སངས་རྒྱས་ཀྱི་ཆོས་ཐམས་ཅད་ཀྱི་རྣམ་པ་ཡང་དག་པར་བསྡུས་ཤིང་ལྟ་བ་དང་། ཉོན་མོངས་པའི་ཀུན་ནས་ལྡང་བ་དང་། མཚན་མ་ལ་དམིགས་པའི་སྤྲོས་པ་ཐམས་ཅད་དང་ལྷན་ཅིག་མི་གནས་པ་དེ་ནི་བྱང་ཆུབ་སེམས་དཔའི་རྣམ་ [221b.7]པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཡིན་ནོ། །བསྟན་པ་འདི་ངེས་པར་བཤད་པ་ན་བྱང་ཆུབ་སེམས་དཔའ་བརྒྱད་སྟོང་གིས་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ལ་བཟོད་པ་རབ་ཏུ་ཐོབ་བོ། །རིགས་ཀྱི་བུ་འདི་ནི་བྱང་ཆུབ་སེམས་དཔའི་བསམ་གཏན་གྱི་ཕ་ [222a] [222a.1]རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་ཤེས་རབ་ཡོངས་སུ་དག་པ་རྣམ་པ་བཅུ་གཉིས་དང་ལྡན་པ་ [222a.2]ཡིན་ཏེ། རྣམ་པ་བཅུ་གཉིས་གང་ཞེ་ན། འདི་ལྟ་སྟེ། སྔོན་གྱི་མཐའ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། ཕྱི་མའི་མཐའ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་ [222a.3]དང་། ད་ལྟར་བྱུང་བ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། འདུས་བྱས་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། འདུས་མ་བྱས་ལ་ཡང་དེའི་ཤེས་རབ་དང་ཡེ་ཤེས་ [222a.4]མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། འཇིག་རྟེན་གྱི་བཟོའི་གནས་དང་ལས་ཀྱི་གནས་ཐམས་ཅད་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། འཇིག་རྟེན་ལས་འདས་པ་ལ་ཡང་དེའི་ཤེས་རབ་དང་ཡེ་ [222a.5]ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། རྟེན་ཅིང་འབྲེལ་པར་འབྱུང་བ་ཤེས་པ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། བདེན་པ་ཤེས་པ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་ [222a.6]པ་མེད་ཅིང་ཐོགས་པ་མེད་པར་འཇུག་པ་དང་། ཀུན་རྫོབ་བསྟན་པ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་དང་། དོན་དམ་པ་བསྟན་པ་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་ [222a.7]པ་དང་། སེམས་ཅན་གྱི་དབང་པོ་དང་བརྩོན་འགྲུས་རྣམ་པ་ཐ་དད་པའི་ཕྱིར་རབ་དང་། འབྲིང་དང་། ཐ་མའི་དབང་པོ་མཆོག་དང་མཆོག་མ་ཡིན་པ་ཤེས་པས་སེམས་ཅན་ཐམས་ཅད་ལ་ཡང་དེའི་ཤེས་རབ་དང་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པར་འཇུག་པ་ཡིན་ [222b] [222b.1]ཏེ། དེའི་ཤེས་རབ་དེ་ཡང་འཕགས་པ་ཟག་པ་མེད་པ། འཇིག་རྟེན་ལས་འདས་པ། ངེས་པར་འབྱེད་པའི་ཆ་དང་འཐུན་པ། སེམས་ཅན་གྱི་བསམ་པའི་རྗེས་སུ་ཞུགས་པ། གཏིང་དཔག་དཀའ་སྟེ་མཐོང་བར་དཀའ་ཞིང་ཟབ་ལ་ཁོང་དུ་ཆུད་པར་དཀའ་བ་བྱེ་བྲག་ཕྱེད་ཅིང་ངེས་པར་ [222b.2]རྟོགས་པ། ལྟ་བ་དང་བྲལ་བ། བག་ཆགས་བསལ་བ། བདག་སྟོང་པ་ཉིད་དུ་རྟོགས་པ། ཐམས་ཅད་སྟོང་པ་ཉིད་ཀྱི་རྗེས་སུ་ཞུགས་པ། ཆོས་སྟོང་པ་ཉིད་ཀྱི་ཚུལ་ཤེས་པ། དོན་ལ་ངེས་པར་རྟོགས་པ། ཤིན་ཏུ་ལྕིགས་པ། ཤིན་ཏུ་སྦྱངས་པ། ཅི་ཡང་སྣང་བ་མེད་པ། [222b.3]འགལ་བ་མེད་པ། མ་འགགས་པ། དུས་དང་དུས་མ་ཡིན་པ་ལ་རྟོག་པ། དུས་ལས་མི་འདའ་བ། སྐྱོན་མེད་པ། ལེགས་པར་བསྲུངས་པ། སྐྱོན་མེད་པ་ལ་དགའ་བ། བདེན་པ་ཁོང་དུ་ཆུད་པ། འགོག་པའི་བདེན་པ་རྗེས་སུ་རྟོགས་པ། ཤིན་ཏུ་རྒལ་བ་ཐམས་ཅད་དུ་ཁ་ན་མ་ཐོ་ [222b.4]བ་མེད་པ། གཅིག་ཏུ་སྤྱོད་པ་མེད་པ་སྤྱོད་པ། ལེགས་པར་སྤྱད་པ་སྤྱོད་པ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་སྤྱོད་པ། འཇིག་རྟེན་ཐམས་ཅད་ལས་ཕྱིར་ལོག་ཀྱང་གང་ནས་ཀྱང་འོངས་པ་མེད་པ། ཡུལ་ཐམས་ཅད་ལས་ཤིན་ཏུ་འདས་ཀྱང་སངས་རྒྱས་ཀྱི་ཡུལ་ལས་ཕྱིར་ [222b.5]མ་ལོག་པ། རྩོམ་པ་ཐམས་ཅད་ལས་ཤིན་ཏུ་འདས་ཀྱང་སེམས་ཅན་ཡོངས་སུ་སྨིན་པར་བྱེད་པ་ལས་ཕྱིར་མ་ལོག་པ། སྤྱོད་པ་ཐམས་ཅད་ལས་ཤིན་ཏུ་འདས་ཀྱང་དགེ་བའི་སྤྱོད་པ་ལས་ཕྱིར་མ་ལོག་པ། སེམས་ཀྱི་དམིགས་པ་ཐམས་ཅད་ལས་ཤིན་ཏུ་འདས་ཀྱང་ [222b.6]སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལས་ཕྱིར་མ་ལོག་པ། ཉེ་བར་ལེན་པ་ལ་སྤྱོད་ཀྱང་ཉེ་བར་ལེན་པ་མེད་པར་འབར་བ། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་ཀྱང་འཇིག་རྟེན་དང་མ་བྲལ་བ། ལུས་མེད་ཀྱང་སེམས་ཅན་ཐམས་ཅད་ཀྱི་སྤྱོད་པ་དང་བསམ་པའི་ [222b.7]རྗེས་སུ་ཞུགས་པའོ། །དེའི་ཤེས་རབ་དེ་ཡང་དེའི་ངང་ཚུལ་ལ་སྤྱོད་པ་མྱུར་དུ་ཁོང་དུ་ཆུད་པ། དབང་པོ་སྨིན་པར་འགྱུར་བ། ཡུན་རིང་པོར་ལྟ་བ་རྟག་ཏུ་རྒྱུན་མི་འཆད་པར་དགེ་བའི་ཆོས་ལ་བརྩོན་པ། བྱང་ཆུབ་ཀྱི་སྙིང་པོ་ལ་གཞོལ་བ། དགེ་བ་སྦྱིན་པ་ལ་སྤྱོད་པ་ཉེ་བར་ལེན་པ་ [223a] [223a.1]མེད་པར་འབར་བ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ། བདུད་ཐམས་ཅད་འདུལ་བ། སེམས་ཅན་ཐམས་ཅད་ཚིམ་པར་བྱེད་པ། ཐམས་ཅད་མཁྱེན་པའི་ཡེ་ཤེས་མཐོང་བ། དོན་ཐམས་ཅད་རྗེས་སུ་རྟོགས་པ། ཆོས་ཐམས་ཅད་རོ་མཚུངས་ [223a.2]པ། ཐབས་ཐམས་ཅད་ཀྱིས་ཡང་དག་པར་བཟུང་བའོ། །རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་སྲིད་པའི་ཕ་རོལ་ཏུ་སོང་བ་དང་དཔག་ཏུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །མཚན་མ་ཐམས་ཅད་དང་། དམིགས་པ་ཐམས་ཅད་དང་། སེམས་ [223a.3]ཅན་གྱི་སེམས་ཀྱི་སྤྱོད་པ་ཐམས་ཅད་ཀྱི་ཕ་རོལ་དུ་སོང་བས་དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །དེའི་ཤེས་རབ་ཡོངས་སུ་དག་པ་ནི་གཉིས་ཏེ། གཉིས་གང་ཞེ་ན། འདི་ལྟ་སྟེ། ཆགས་པ་མེད་པའི་མཚན་ཉིད་ཡོངས་སུ་དག་པ་དང་། ཐོགས་པ་མེད་པའི་ཡེ་ [223a.4]ཤེས་ཀྱི་མཚན་ཉིད་ཡོངས་སུ་དག་པ་སྟེ། དེ་དག་ནི་ཡོངས་སུ་དག་པ་གཉིས་སོ། །གཞན་ཡོངས་སུ་དག་པ་གཉིས་ཏེ། གཉིས་གང་ཞེ་ན། དམིགས་པ་ཡོངས་སུ་དག་པ་དང་། ལྟ་བ་ཡོངས་སུ་དག་པ་སྟེ། དེ་དག་ནི་ཡོངས་སུ་དག་པ་གཉིས་སོ། །དེའི་ཤེས་རབ་དེ་ཡང་ [223a.5]ཐམས་ཅད་ཀྱི་རྗེས་སུ་སོང་བ། སེམས་ཅན་གྱི་རྗེས་སུ་སོང་བ། ཆོས་ཀྱི་རྗེས་སུ་སོང་བའོ། །དེའི་ཤེས་རབ་དེ་ནི་ཉོན་མོངས་པ་ཐམས་ཅད་ཀྱིས་ཕྱིར་མཚམས་སྦྱོར་བ་ཡང་མེད་ལ་སྐྱེ་བའི་གནས་ཐམས་ཅད་ཀྱི་མཚམས་ཀྱང་སྦྱོར་རོ། །དེའི་ཤེས་རབ་དེ་གནས་པ་ཡང་མེད་ལ་ [223a.6]ཡུལ་ཐམས་ཅད་དང་། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་ཡང་གནས་སོ། །དེའི་ཤེས་རབ་དེ་ནི་མཐའ་དང་ཡང་བྲལ་ལ་དབུས་ལ་ཡང་མི་གནས་སོ། །དེའི་ཤེས་རབ་དེ་ནི་ཕྱོགས་བཅུར་རྣམ་པར་ལྟ་བས་སྒྲིབ་པ་མེད་པའི་སྤྱོད་ཡུལ་ལ་འབྱུང་བ་ཤིན་ཏུ་མཐོང་བའི་ཕྱིར་ [223a.7]སྒྲིབ་པ་མེད་པ་ཡང་རྙེད་པའོ། །དེའི་ཤེས་རབ་དེ་ནི་ཆོས་ཐམས་ཅད་ཤེས་ཤིང་མངོན་པར་རྟོགས་པའི་སྔོན་དུ་འགྲོ་བའོ། །དེའི་ཤེས་རབ་དེ་ནི་ཆོས་ཀྱི་དོན་ཐམས་ཅད་དང་ལྡན་ཡང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན། བྲལ་བ་ཡང་མ་ཡིན་ཏེ་སྦྱོར་བའམ། མི་སྦྱོར་བའམ། [223b] [223b.1]ཆོས་གང་གིས་ཀྱང་བརྗོད་པར་བྱ་བ་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་ཤེས་རབ་ཀྱི་འབྱུང་གནས་ནི་ཡེ་ཤེས་ཀྱི་འབྱུང་གནས་ཡིན་ནོ། །བསོད་ནམས་ཀྱི་འབྱུང་གནས་ཡིན་ནོ། །ཐོས་པའི་འབྱུང་གནས་ཡིན་ནོ། །ཡོན་ཏན་གྱི་འབྱུང་གནས་ཡིན་ནོ། །ཆོས་ཀྱི་འབྱུང་ [223b.2]གནས་ཡིན་ནོ། །གཟུངས་དང་སྤོབས་པའི་འབྱུང་གནས་ཡིན་ནོ། །སོ་སོ་ཡང་དག་པར་རིག་པའི་འབྱུང་གནས་ཡིན་ནོ། །ཡོན་ཏན་དང་ཡེ་ཤེས་རྣམ་པ་ཐམས་ཅད་ཀྱི་མཆོག་དང་ལྡན་པའི་འབྱུང་གནས་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ [223b.3]ཕྱིན་པའི་སྤྱོད་པ་ཡོངས་སུ་དག་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་འདི་བསྟན་པ་ན་འཁོར་དེའི་ནང་ནས་ལྷ་དང་མི་སྲོག་ཆགས་ཉི་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་བརྒྱད་སྟོང་ནི་ [223b.4]མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ་ཁྲི་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་ནས་དེ་དག་ཚིག་འདི་སྐད་ཅེས་འཛེར་ཏེ། བཅོམ་ལྡན་ [223b.5]འདས་གང་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པའི་ཆོས་ཀྱི་སྒོའི་ལེའུ་འདི་ཐོས་པར་འགྱུར་བའི་སེམས་ཅན་དེ་དག་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་བཟུང་བ་ལགས་ན། གང་དག་ཐོས་ནས་མོས་པ་དང་། འཛིན་པ་དང་། འཆང་བ་དང་། ཀློག་པ་དང་། [223b.6]སྟོན་པ་དང་། དེ་བཞིན་ཉིད་དུ་སྒྲུབ་པ་ལྟ་སྨོས་ཀྱང་ཅི་འཚལ་ཞེས་སྨྲས་སོ།། །།བམ་པོ་གཉིས་པ། དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་ལ་བཀའ་སྩལ་པ། རིགས་ཀྱི་བུ་དེ་ལ་བྱང་ [223b.7]ཆུབ་སེམས་དཔའི་བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ལ་གནས་ཏེ། ལུས་ལ་རྣམ་པ་གཉིས་སུ་སོ་སོར་རྟོག་པ་དང་ལྡན་པའི་དྲན་པ་ཉེ་བར་ [224a] [224a.1]འཇོག་གོ །རྣམ་པ་གཉིས་སུ་སོ་སོར་རྟོག་པ་དང་ལྡན་པ་གང་ཞེ་ན། འདི་ལྟ་སྟེ། མི་སྡུག་པའི་རྣམ་པར་སོ་སོར་རྟོག་པ་དང་ལྡན་པ་དང་། སྡུག་པའི་རྣམ་པར་སོ་སོར་རྟོག་པ་དང་ལྡན་པའོ། །དེ་ལ་མི་སྡུག་པའི་རྣམ་པར་སོ་སོར་རྟོག་པ་དང་ལྡན་པ་གང་ཞེ་ན། འདི་ [224a.2]ལྟ་སྟེ། ཀྱེ་མ་ལུས་འདི་ནི་མི་གཙང་བ་སྟེ། བཙོག་པས་ཡོངས་སུ་གང་བ། ཡུན་ཐུང་ཞིང་བྱིས་པ་འདྲིད་པ་ཡིན་ནོ་ཞེས་བྱ་བ་འདི་ནི་མི་སྡུག་པའི་རྣམ་པར་སོ་སོར་རྟོག་པ་དང་ལྡན་པའོ། །དེ་ལ་སྡུག་པའི་རྣམ་པར་སོ་སོར་རྟོག་པ་དང་ལྡན་པ་གང་ཞེ་ན། འདི་ལྟ་སྟེ། གང་ལུས་ [224a.3]མི་གཙང་བ་གྲོགས་མེད་པ་འདིས་དེ་བཞིན་གཤེགས་པའི་སྐུ། ཆོས་ཀྱི་སྐུ། བསོད་ནམས་ཀྱི་སྐུ། ཡེ་ཤེས་ཀྱི་སྐུ། རྡོ་རྗེའི་སྐུ། མི་ཤིགས་པའི་སྐུ། ཟག་པ་མེད་པའི་སྐུ། འཇིག་རྟེན་གསུམ་ལས་བྱེ་བྲག་ཏུ་འཕགས་པའི་སྐུ། གཟུགས་མཐོང་ན་སེམས་ཅན་ཐམས་ཅད་ཚིམ་ [224a.4]པར་འགྱུར་བའི་སྐུ་ཐོབ་པར་བྱའོ་སྙམ་པ་འདི་ནི་སྡུག་པའི་རྣམ་པར་སོ་སོར་རྟོག་པ་དང་ལྡན་པ་ཞེས་བྱ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་རྣམ་པ་གཉིས་སུ་སོ་སོར་རྟོག་པ་དང་ལྡན་པའི་དྲན་པ་ཉེ་བར་གཞག་པ་སྒོམ་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ [224a.5]ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་ནི་ཆོས་གཉིས་ཡོངས་སུ་སྦྱོང་སྟེ། གཉིས་གང་ཞེ་ན་འདི་ལྟ་སྟེ། མི་རྟག་པའི་རྣམ་པ་དང་། རྟག་པའི་རྣམ་པའོ། །དེ་ལ་མི་རྟག་པའི་རྣམ་པ་གང་ཞེ་ན། ཀྱེ་མ་ལུས་འདི་ནི་མི་རྟག་པའི་རྣམ་པ་སྟེ། རིང་པོར་མི་ [224a.6]གནས་པ། ཐ་མར་འཆི་བ་ཡིན་པར་ཤེས་ནས་ལུས་ཀྱི་ཕྱིར་མི་འཐུན་པའི་འཚོ་བ་མི་སྤྱོད་ཅིང་སྙིང་པོ་ཉིད་ལེན་ཏོ། །དེ་སྙིང་པོ་གསུམ་ལེན་ཏེ། གསུམ་གང་ཞེ་ན། ལུས་ཀྱི་སྙིང་པོ་དང་། ལོངས་སྤྱོད་ཀྱི་སྙིང་པོ་དང་། འཚོ་བའི་སྙིང་པོ་དང་གསུམ་མོ། །དེ་ལུས་མི་རྟག་གོ་སྙམ་ [224a.7]ནས་སེམས་ཅན་ཐམས་ཅད་ཀྱི་བྲན་དང་སློབ་མར་ཁས་བླངས་ཏེ་ཅི་བྱའོ་ཅོག་ལ་འབད་པ་ཡིན། ལུས་མི་རྟག་གོ་སྙམ་ནས་ལུས་ཀྱི་ཉེས་པ་ཡོན་པོ་དང་། གཡོ་དང་ཚུལ་འཆོས་པ་ཐམས་ཅད་མི་བྱེད་དོ། །ལུས་མི་རྟག་གོ་སྙམ་ནས་སྲོག་ལ་བག་མི་རྟོན་པར་འགྱུར་ཏེ། སྲོག་གི་ཕྱིར་ཡང་ [224b] [224b.1]སྡིག་པ་མི་བྱེད་དོ། །ལུས་མི་རྟག་གོ་སྙམ་ནས་ལོངས་སྤྱོད་ལ་སྲེད་ཅིང་ཆགས་པར་མི་བྱེད་དེ། བདོག་པ་ཐམས་ཅད་ཡོངས་སུ་གཏོང་བ་ཡིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་མི་རྟག་པའི་རྣམ་པས་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེ་ལས་ཡོན་ཏན་ [224b.2]གྱི་ཕན་ཡོན་རབ་ཏུ་འཐོབ་བོ། །དེ་ལ་རྟག་པའི་རྣམ་པ་གང་ཞེ་ན། གང་ལུས་ལ་ལུས་ཀྱི་རྗེས་སུ་ལྟ་ཞིང་གནས་པའི་བྱང་ཆུབ་སེམས་དཔའ་དགེ་བ་དང་ལྡན་པའི་སེམས་ཀྱི་དཔྱོད་པའི་ཡེ་ཤེས་སྐྱེས་ཤིང་བྱུང་བ་དེ་དག་སངས་རྒྱས་ཀྱི་རིགས་མི་འཆད་པ་དང་། ཆོས་ཀྱི་རིགས་མི་འཆད་ [224b.3]པ་དང་། དགེ་འདུན་གྱི་རིགས་མི་འཆད་པ་དང་། སེམས་ཅན་གྱི་ཁམས་མཐའ་དག་ཡོངས་སུ་བསྐྱབ་པའི་ཕྱིར་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་སྟེ། སེམས་ཅན་ཐམས་ཅད་ལ་བཏང་བ་སེམས་ཅན་ཐམས་ཅད་དང་ཐུན་མོང་དུ་བྱེད་པ་འདི་ནི་རྟག་པའི་རྣམ་པ་ཞེས་བྱའོ། ། [224b.4]གང་མི་ཟད་པ་ནི་རྟག་པ་ཞེས་བྱ་སྟེ། འདུས་མ་བྱས་ནི་མི་ཟད་པ་ཞེས་བྱའོ། །འདུས་མ་བྱས་ནི་རྟག་པའོ། །རིགས་ཀྱི་བུ་བྱང་ཆུབ་སེམས་དཔའ་དགེ་བའི་རྩ་བ་རྩོམ་པ་ཐམས་ཅད་མཁྱེན་པའི་འདུས་མ་བྱས་ཉིད་དུ་ཡོངས་སུ་སྔོ་བ་འདི་ནི་རྟག་པའི་རྣམ་པ་ཞེས་བྱའོ། །སྟོང་པ་ཉིད་ [224b.5]དང་། མཚན་མ་མེད་པ་དང་། སྨོན་པ་མེད་པ་ནི་རྟག་པ་ཞེས་བྱ་སྟེ། དེ་ལ་བྱང་ཆུབ་སེམས་དཔའ་སྟོང་པ་ཉིད་ཀྱི་སྤྱོད་ཡུལ་དང་། མཚན་མ་མེད་པ་ངེས་པར་བརྟགས་པ་དང་། སྨོན་པ་མེད་པའི་རྒྱུ་འཐུན་པས་བརྩོན་འགྲུས་བརྩམ་པ་ཐམས་ཅད་རྩོམ་པ་འདི་ནི་རྟག་པའི་རྣམ་པ་ [224b.6]ཞེས་བྱའོ། །ནམ་མཁའ་ནི་རྟག་པ་ཞེས་བྱ་སྟེ། དེ་ལ་བྱང་ཆུབ་སེམས་དཔའ་ནམ་མཁའ་དང་མཚུངས་པའི་སེམས་རྣམ་པར་མི་རྟོག་པས་བྱང་ཆུབ་སེམས་དཔའི་སྤྱད་པ་སྤྱོད་པ་འདི་ནི་རྟག་པའི་རྣམ་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ལུས་ལ་ལུས་ཀྱི་ [224b.7]རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་དེ་བདག་གི་ལུས་དེ་ལ་སེམས་ཅན་ཐམས་ཅད་ཀྱི་ལུས་ཉེ་བར་འདོགས་ཤིང་བདག་གིས་སེམས་ཅན་ཐམས་ཅད་ཀྱི་ལུས་སངས་རྒྱས་ཀྱི་སྐུའི་གནས་ལ་གནས་པར་བྱའོ་སྙམ་སྟེ། ཇི་ལྟར་དེ་བཞིན་གཤེགས་པའི་སྐུ་ཟག་པ་མེད་པ་ལྟར་རང་གི་ [225a] [225a.1]ལུས་ཀྱི་ཆོས་ཉིད་ལ་ཡང་དེ་བཞིན་དུ་རྟོག་གོ །དེ་ཟག་པ་མེད་པའི་ཆོས་ལ་མཁས་པས་སེམས་ཅན་ཐམས་ཅད་ཀྱི་ལུས་ཀྱང་དེའི་མཚན་ཉིད་དུ་རབ་ཏུ་ཤེས་སོ། །དེ་ཟག་པ་མེད་པའི་ལུས་ཀྱིས་ཟག་པ་མེད་པའི་རང་བཞིན་གྱི་དགེ་བའི་རྩ་བ་རྣམས་སོགས་སོ། ། [225a.2]དེ་ཟག་པ་མེད་པའི་སེམས་ཀྱིས་ཀྱང་དགེ་བའི་རྩ་བ་དེ་དག་ཟག་པ་མེད་པའི་ཐམས་ཅད་མཁྱེན་པར་ཡོངས་སུ་སྔོའོ། །དེ་ཟག་པ་མེད་པའི་ཆོས་ཐོབ་པས་ཟག་པ་ལས་འབྱུང་བར་མི་བྱེད་དོ། །ཟག་པ་རྣམས་གང་ཞེ་ན། འདི་ལྟ་སྟེ། འདོད་པའི་ཟག་པ་དང་། སྲིད་པའི་ཟག་པ་ [225a.3]དང་། མ་རིག་པའི་ཟག་པ་དང་། ལྟ་བའི་ཟག་པའོ། །དེ་འདོད་པའི་ཟག་པ་ཡོངས་སུ་ཤེས་པ་དང་ལྡན་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམས་བཞིན་དུ་འདོད་པའི་ཁམས་སུ་སྐྱེའོ། །སྲིད་པའི་ཟག་པ་ཡོངས་སུ་ཤེས་པ་དང་ལྡན་པས་དགེ་བའི་རྩ་བ་ [225a.4]བསགས་པའི་ཕྱིར་བསམས་བཞིན་དུ་སྲིད་པ་ཡོངས་སུ་འཛིན་ཏོ། །མ་རིག་པའི་ཟག་པ་དང་ལྟ་བའི་ཟག་པ་དེ་གཉིས་རྩ་བ་ནས་གདོན་པའི་ཕྱིར་བྱང་ཆུབ་སེམས་དཔའ་རྣལ་འབྱོར་ལ་འཇུག་གོ །ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པ་སྒོམ་པ་དེ་ལུས་ལ་སྔོན་གྱི་ [225a.5]མཐའ་ནས་ཀྱང་མ་བྱུང་བར་སོ་སོར་རྟོག་གོ །ལུས་ལ་ཕྱི་མའི་མཐར་ཡང་མི་འཕོ་བར་སོ་སོར་རྟོག་གོ །ལུས་ལ་ད་ལྟར་བྱུང་བ་ན་རང་བཞིན་གྱིས་དབེན་པར་ཡང་སོ་སོར་རྟོག་གོ །དེ་དེ་ལྟར་ལུས་ལ་རྗེས་སུ་ལྟ་ཞིང་གནས་པས་ལུས་དང་ལྡན་པའི་འཇིག་ཚོགས་ལ་ལྟ་བ་མི་སྐྱེད་ [225a.6]དོ། །འཇིག་ཚོགས་ལ་ལྟ་བ་དང་བྲལ་བས་བདག་གིར་མི་བྱེད་དོ། །བདག་གིར་བྱེད་པ་མེད་པས་ཡོངས་སུ་འཛིན་པ་ལ་ཡོངས་སུ་མི་འཛིན་ཏོ། །ཡོངས་སུ་འཛིན་པ་མེད་པས་རྩོད་པ་མེད་པ་རབ་ཏུ་འཐོབ་བོ། །རྩོད་པ་སྤངས་པས་གནོད་སེམས་མེད་དོ། །གནོད་སེམས་མེད་པས་ [225a.7]བཟོད་པ་རབ་ཏུ་འཐོབ་བོ། །བཟོད་པ་རབ་ཏུ་ཐོབ་པས་ཕྱིར་ཁེངས་པར་ཡང་མི་འགྱུར་འདུད་པར་ཡང་མི་འགྱུར་རོ། །ཁེངས་པར་ཡང་མི་འགྱུར་འདུད་པར་ཡང་མི་འགྱུར་བས་ཆོས་ཉིད་ལ་གནས་པར་འགྱུར་རོ། །ཆོས་ཉིད་ལ་གནས་པས་ཕྱིར་ཡང་ཆོས་མ་ཡིན་པ་སྤྱོད་པར་མི་འགྱུར་རོ། །ཆོས་ [225b] [225b.1]སྤྱོད་པས་ཆོས་དང་ལྡན་པའི་འགྲོས་སུ་སོང་ངོ་། །ཆོས་ཀྱི་འགྲོས་སུ་སོང་བས་ཆོས་དང་ལྡན་པའི་གྲོགས་པོ་རབ་ཏུ་རྙེད་དོ། །ཆོས་དང་ལྡན་པའི་གྲོགས་པོས་ཡོངས་སུ་བཟུང་བས་ཆོས་དང་ལྡན་པའི་མཉན་པ་ཐོས་པར་འགྱུར་རོ། །ཆོས་ཐོས་པ་དང་ལྡན་པས་ཕྱིར་ཡང་ཡུལ་རྣམས་ [225b.2]ལ་ཟག་པར་མི་འགྱུར་རོ། །དེ་ཡུལ་ལ་བསྲུངས་པས་ཏིང་ངེ་འཛིན་སྒྲུབ་བོ། །མཉམ་པར་བཞག་པས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་ཕྱིར་ཡང་རྟོག་པར་མི་བྱེད་དོ། །རྣམ་པར་རྟོག་པར་མི་བྱེད་དོ། །རྣམ་ [225b.3]པར་མི་རྟོག་པས་མི་འགྱུར་རོ། །མི་འགྱུར་བས་ཕྱིར་ཡང་མི་བྱེད་དོ། །རྣམ་པར་མི་བྱེད་དོ། །ནམ་མི་བྱེད་རྣམ་པར་མི་བྱེད་པ་དེ་ནི་ཆོས་མཉམ་པ་ཉིད་ཀྱིས་ཆོས་ཇི་ལྟ་བ་བཞིན་ཐོབ་ནས་ཐམས་ཅད་མཁྱེན་པའི་ཡེ་ཤེས་རབ་ཏུ་ཐོབ་པ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ [225b.4]ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའི་ [225b.5]ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་ན་ཚོར་བ་ལ་བདེ་བར་གནས་པའི་སེམས་ཅན་རྣམས་ལ་སྙིང་རྗེ་ཆེན་པོ་ཐོབ་པར་འགྱུར་རོ། །དེ་འདི་ལྟར་གང་ལ་ཚོར་བ་མེད་པ་དེ་ནི་བདེ་བ་ཡིན་ནོ་ཞེས་སློབ་སྟེ། དེ་སེམས་ཅན་ཐམས་ཅད་ཀྱི་ཚོར་བ་སྤོང་བའི་ [225b.6]ཕྱིར་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་མོ། །དེ་སེམས་ཅན་རྣམས་ཀྱི་ཚོར་བ་འགོག་པའི་ཕྱིར་གོ་ཆ་བགོས་ཀྱང་བདག་གི་ཚོར་བ་འགོག་པར་ཡང་མི་བྱེད་དོ། །དེས་ཚོར་བ་གང་ཅི་མྱོང་ཡང་ཚོར་བ་དེ་དག་ཐམས་ཅད་སྙིང་རྗེ་ཆེན་པོས་ཡོངས་སུ་བཟུང་ [225b.7]ཞིང་མྱོང་བར་བྱེད་དེ། དེ་ནམ་བདེ་བའི་ཚོར་བ་མྱོང་བ་དེ་ན་འདོད་ཆགས་ལ་སྤྱོད་པའི་སེམས་ཅན་རྣམས་ལ་སྙིང་རྗེ་ཆེན་པོ་རྙེད་དེ། བདག་གི་འདོད་ཆགས་ཀྱི་བག་ལ་ཉལ་བ་ཡང་རབ་ཏུ་སྤོང་ངོ་། །ནམ་སྡུག་བསྔལ་གྱི་ཚོར་བ་མྱོང་བ་དེ་ན་ཞེ་སྡང་ལ་སྤྱོད་པའི་སེམས་ཅན་རྣམས་ལ་སྙིང་རྗེ་ [226a] [226a.1]ཆེན་པོ་རྙེད་དེ། བདག་གི་ཞེ་སྡང་གི་བག་ལ་ཉལ་ཡང་རབ་ཏུ་སྤོང་ངོ་། །ནམ་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པའི་ཚོར་བ་མྱོང་བ་དེ་ན་གཏི་མུག་ལ་སྤྱོད་པའི་སེམས་ཅན་རྣམས་ལ་སྙིང་རྗེ་ཆེན་པོ་རྙེད་དེ་བདག་གི་གཏི་མུག་གི་བག་ལ་ཉལ་ཡང་རབ་ཏུ་སྤོང་ངོ་། །དེ་ [226a.2]བདེ་བའི་ཚོར་བ་ལ་རྗེས་སུ་ཆགས་པར་མི་འགྱུར་ཏེ། རྗེས་སུ་ཆགས་པ་ལེགས་པར་འཇོམས་པར་ཡང་བྱེད་དོ། །དེ་སྡུག་བསྔལ་གྱི་ཚོར་བ་ལ་ཁོང་ཁྲོ་བར་མི་འགྱུར་ཏེ། ཁོང་ཁྲོ་བ་ལེགས་པར་འཇོམས་པར་ཡང་བྱེད་དོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ལ་མ་རིག་པ་དང་། [226a.3]ལྡན་པར་མི་འགྱུར་ཏེ། མ་རིག་པ་ལེགས་པར་འཇོམས་པར་ཡང་བྱེད་དོ། །དེས་ཚོར་བ་གང་ཅི་མྱོང་བ་དེ་དག་ཐམས་ཅད་ཀྱང་མི་རྟག་པར་ཤེས་ཤིང་མྱོང་བར་བྱེད་དོ། །སྡུག་བསྔལ་དུ་ཤེས་ཤིང་མྱོང་བར་བྱེད་དོ། །བདག་མེད་པར་ཤེས་ཤིང་མྱོང་བར་བྱེད་དོ། །དེ་བདེ་བའི་ཚོར་བ་ལ་ནི་མི་རྟག་པར་ [226a.4]ཤེས་པར་འགྱུར་རོ། །སྡུག་བསྔལ་གྱི་ཚོར་བ་ལ་ནི་ཟུག་རྔུར་ཤེས་པར་འགྱུར་རོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ལ་ནི་ཞི་བར་ཤེས་པར་འགྱུར་རོ། །དེ་ལྟར་ན་གང་བདེ་བ་དེ་ནི་མི་རྟག་པའོ། །གང་སྡུག་བསྔལ་བ་དེ་ནི་སྡུག་བསྔལ་བ་ཉིད་དོ། །གང་བདེ་བ་ཡང་མ་ཡིན་ [226a.5]སྡུག་བསྔལ་བ་ཡང་མ་ཡིན་པ་དེ་ནི་བདག་མེད་པའོ། །རིགས་ཀྱི་བུ་བྱང་ཆུབ་སེམས་དཔའ་དེ་ལྟར་ཚོར་བ་རྣམས་ལ་ཚོར་བའི་རྗེས་སུ་ལྟ་ཞིང་གནས་པ་དེ་ཆོས་ཐམས་ཅད་སྐྱེས་པ་དང་། ཞིག་པ་དང་། ཞུ་བ་དང་། གནས་པ་མེད་པར་ཤེས་སོ། །ཆོས་ཐམས་ཅད་ལ་སྐྱེ་བ་དང་འཇིག་ [226a.6]པར་ཡང་སོ་སོར་རྟོག་གོ །སོ་སོར་རྟོག་པ་ན་ཆོས་སྐྱེ་བ་དེ་དག་གང་ནས་འོང་། འགག་པ་རྣམས་གང་དུ་སོགས་པར་འགྱུར་སྙམ་དུ་ཆོས་རྣམས་ཀྱི་སྐྱེ་བ་དང་། འཇིག་པ་ཡང་དག་པར་རྗེས་སུ་མི་མཐོང་ངོ་། །དེས་ཆོས་རྣམས་གང་ནས་ཀྱང་མི་འོང་། གང་དུ་ཡང་མི་འགྲོ་བར་ཤེས་ནས་ [226a.7]ཚོར་བ་ཐམས་ཅད་རྒྱུན་ཆད་པར་སྒྲུབ་བོ། །བསྒྲུབས་ནས་ཀྱང་ནན་ཏན་དུ་མི་བྱེད་དོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་ཚོར་བ་འགག་པར་བྱེད་ཀྱི། བདག་འབའ་ཤིག་གི་ཚོར་བ་འགག་པར་བྱེད་པ་ནི་མ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་ཚོར་བ་རྣམས་ལ་ཚོར་བའི་ [226b] [226b.1]རྗེས་སུ་ལྟ་བའི་དྲན་པ་ཉེ་བར་གཞག་པ་ཐབས་མཁས་པ་དང་། སྙིང་རྗེ་ཆེན་པོས་ཡོངས་སུ་ཟིན་པའོ། །གང་ཚོར་བ་འགག་པ་ཡང་རབ་ཏུ་ཤེས་ལ་ཚོར་བ་འགག་པ་མངོན་སུམ་དུ་ཡང་མི་བྱེད་དེ། ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་ལ་གནས་པ་དེ་ཚོར་བ་ [226b.2]རྣམས་ལ་དབེན་པ་དང་། རྣམ་པར་དབེན་པར་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདི་ལ་ནི་མྱོང་བ་གང་ཡང་མེད་དོ། །འདི་ལ་ནི་ཚོར་བར་བྱེད་པ་གང་ཡང་མེད་དོ། །ཆོས་དེ་དག་ཐམས་ཅད་ནི་སྟོང་པ་སྟེ། བདག་དང་བདག་གི་དང་བྲལ་བའོ། །བྱེད་པ་པོ་དང་ཚོར་བ་པོ་དང་མི་ལྡན་པའོ། ། [226b.3]རྒྱུ་དང་རྐྱེན་ལ་རག་ལུས་པའོ། །བདག་པོ་མེད་པའོ། །ངའི་བ་མེད་པའོ། །ཡོངས་སུ་འཛིན་པ་མེད་པའོ། །དེས་ཡང་དག་པར་ན་རྒྱུ་དང་རྐྱེན་དེ་དག་གི་དངོས་པོ་མི་དམིགས་སོ། །དེ་མ་དམིགས་ནས་འདི་སྙམ་དུ་སེམས་ཏེ། ཇི་ལྟར་རྐྱེན་སྟོང་པ་ཡིན་པ་དེ་བཞིན་དུ་རྐྱེན་ལས་བྱུང་བའི་ཆོས་རྣམས་ཀྱང་སྟོང་ [226b.4]པའོ། སྙམ་ནས་དེ་སྟོང་པ་ཉིད་ཀྱི་དོན་རིག་པས་ལུས་དབེན་པ་དང་། སེམས་དབེན་པ་དང་དོན་ཤེས་པ་དང་ཆོས་རྣམས་ཤེས་པ་དང་། ཡེ་ཤེས་རིག་པས་ཚོར་བ་རྣམས་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་འདི་ནི་བྱང་ཆུབ་སེམས་དཔའ་ཚོར་བ་རྣམས་ལ་ཚོར་བའི་རྗེས་སུ་ལྟ་ [226b.5]བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་ལ་སེམས་ཀྱི་རྗེས་སུ་ལྟ་བའི་དྲན་ [226b.6]པ་ཉེ་བར་གཞག་པས་གནས་པ་བྱང་ཆུབ་ཀྱི་སེམས་དྲན་པ་ཉེ་བར་གཞག་པ་ཤིན་ཏུ་ཉེ་བར་གཞག་སྟེ། སེམས་དྲན་པའི་ཡེ་ཤེས་ཀྱིས་སེམས་ཀུན་ཏུ་ཚོལ་ལོ། །དེ་སེམས་ཀུན་ཏུ་ཚོལ་བ་ན་སེམས་ནང་ན་ཡང་ཡང་དག་པར་རྗེས་སུ་མི་མཐོང་། སེམས་ཕྱི་རོལ་ན་ཡང་ཡང་དག་པར་རྗེས་སུ་ [226b.7]མི་མཐོང་། སེམས་ཕྱི་དང་ནང་ན་ཡང་ཡང་དག་པར་རྗེས་སུ་མི་མཐོང་། ཕུང་པོ་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་། ཁམས་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་། སྐྱེ་མཆེད་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་ངོ་། །དེས་ [227a] [227a.1]སེམས་ཡང་དག་པར་རྗེས་སུ་མ་མཐོང་བས་སེམས་ག་ལས་བྱུང་ཞེས་སེམས་ཀྱི་རྒྱུན་ཀུན་ཏུ་ཚོལ་ཞིང་དེ་འདི་སྙམ་དུ་སེམས་ཏེ། དམིགས་པ་ཡོད་པ་ལས་སེམས་འབྱུང་བར་འགྱུར་རོ་སྙམ་མོ། །དེ་ཡང་འདི་སྙམ་དུ་སེམས་ཏེ། ཅི་དམིགས་པ་དེ་ཡང་གཞན་ལ་སེམས་དེ་ཡང་ [227a.2]གཞན་ནམ་འོན་ཏེ་དམིགས་པ་གང་ཡིན་པ་དེ་ཉིད་སེམས་ཡིན། གལ་ཏེ་དམིགས་པ་ཡང་གཞན་ལ་སེམས་ཀྱང་གཞན་ཡིན་ན་ནི་སེམས་དེ་གཉིས་སུ་འགྱུར་རོ། །འོན་ཏེ་དམིགས་པ་གང་ཡིན་པ་དེ་ཉིད་སེམས་ཡིན་ན་ནི་སེམས་ཀྱིས་སེམས་དེ་ཇི་ལྟར་མཐོང་བར་འགྱུར་ཏེ། སེམས་ཀྱིས་ [227a.3]སེམས་མཐོང་བར་མི་རུང་ངོ་། །འདི་ལྟ་སྟེ། དཔེར་ན་རལ་གྲིའི་སོ་དེ་ཉིད་ཀྱིས་རལ་གྲིའི་སོ་དེ་ཉིད་གཅད་པར་མི་ནུས་པ་དང་། སོར་མོའི་རྩེ་མོ་དེ་ཉིད་ཀྱིས་སོར་མོའི་རྩེ་མོ་དེ་ཉིད་ལ་རེག་པར་མི་ནུས་པ་དེ་བཞིན་དུ་སེམས་དེ་ཉིད་ཀྱིས་ཀྱང་སེམས་དེ་ཉིད་མཐོང་བར་མི་ནུས་སོ་སྙམ་ནས། དེ་འདི་ལྟར་ [227a.4]ཚུལ་བཞིན་དུ་རབ་ཏུ་སྦྱོར་བ་ལས་གང་སེམས་མི་གནས་པ་ཆད་པ་མ་ཡིན་པ། རྟག་པ་མ་ཡིན་པ། ཐེར་ཟུག་ཏུ་མི་གནས་པ། རྒྱུ་མེད་པ་མ་ཡིན་པ། རྐྱེན་དང་མི་འགལ་བ། དེ་ལས་ཀྱང་མ་ཡིན་གཞན་ལས་ཀྱང་མ་ཡིན་པ། དེ་ཉིད་ཀྱང་མ་ཡིན་གཞན་ཡང་མ་ཡིན་པའི་སེམས་ཀྱི་རྒྱུད་ [227a.5]སེམས་ཀྱི་འཁྲི་ཤིང་སེམས་ཀྱི་ཆོས་ཉིད་སེམས་མི་གནས་པ་དང་། སེམས་རྒྱུ་བ་མེད་པ་དང་། སེམས་སྣང་བ་མེད་པ་དང་། སེམས་ཀྱི་རང་གི་མཚན་ཉིད་ཇི་ལྟར་དེ་བཞིན་ཉིད་འཁྲུག་པར་མི་བྱེད་པ་དེ་ལྟར་ཤེས་སོ། །དེ་ལྟར་མཐོང་ངོ་། །དེ་བཞིན་ཉིད་ཇི་ལྟ་བ་དེ་བཞིན་དུ་སེམས་དེ་དག་དབེན་པ་ [227a.6]ཉིད་དུ་རབ་ཏུ་ཤེས། དེ་བཞིན་དུ་མཐོང་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་གཞན་ཡང་སེམས་ལ་ཅུང་ཟད་ཙམ་ཡང་མི་མཐོང་། རྣམ་པར་མི་མཐོང་། མི་རྟོག་རྣམ་པར་མི་རྟོག་ [227a.7]གཡོ་མེད་རློམ་སེམས་མེད། སྤྲོས་པ་མེད་པ་འདི་ཡང་བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །རིགས་ཀྱི་བུ་གཞན་ཡང་ཇི་ལྟར་སེམས་གཟུགས་མེད་པ་དེ་བཞིན་དུ་སེམས་ཀྱིས་མངོན་པར་འདུས་བྱས་པའི་དགེ་བའི་རྩ་བ་རྣམས་ཀྱང་གཟུགས་ [227b] [227b.1]མེད་པའོ། །ཇི་ལྟར་སེམས་ཀྱིས་མངོན་པར་འདུས་བྱས་པའི་དགེ་བའི་རྩ་བ་རྣམས་གཟུགས་མེད་པ་དེ་བཞིན་དུ་བྱང་ཆུབ་ཀྱི་སེམས་སུ་བསྔོས་པ་ཡང་གཟུགས་མེད་པའོ། །ཇི་ལྟར་བྱང་ཆུབ་ཀྱི་སེམས་སུ་བསྔོས་པ་གཟུགས་མེད་པ་དེ་བཞིན་དུ་བྱང་ཆུབ་དེ་ཡང་གཟུགས་མེད་དེ་དེའི་ཕྱིར་སེམས་ཇི་ [227b.2]ལྟ་བར་སྤྱོད་པ་ཡང་དེ་བཞིན་ནོ། །སྤྱོད་པ་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་ཇི་ལྟ་བར་ཡོངས་སུ་བསྔོ་བ་ཡང་དེ་བཞིན་ཞེས་བྱ་སྟེ། སེམས་ཀྱི་རང་བཞིན་ནི་བྱང་ཆུབ་བོ། །བྱང་ཆུབ་ཀྱི་རང་བཞིན་ནི་ཆོས་ཐམས་ཅད་དེ། གང་འདི་ལྟར་སེམས་རབ་ཏུ་རྣམ་པར་འབྱེད་པ་ཤེས་པ་འདི་ནི་ [227b.3]བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །རིགས་ཀྱི་བུ་གཞན་ཡང་གང་མགྱོགས་པ། རབ་ཏུ་མགྱོགས་པ་མི་གནས་པར་རྒྱུ་བ། སྤྲེའུ་དང་རླུང་འདྲ་བ། འབབ་ཆུའི་རྒྱུན་དང་འབྲུ་མར་གྱི་མར་མེ་དང་འདྲ་བ་རྒྱང་རིང་པོར་འགྲོ་བ་ལུས་མེད་པ། ཡུལ་ [227b.4]ལ་བརྐམ་པ། སྐྱེ་མཆེད་དྲུག་ལ་སྤྱོད་ཡུལ་བ། གཞན་དང་གཞན་གྱི་ཤེས་པ་དང་ལྡན་པའི་སེམས་གནས་པ། རྩེ་གཅིག་པ། མི་འཕྲོ་བ། རྣམ་པར་མི་འཕྲོ་བ། ཞི་གནས་ལ་རྩེ་གཅིག་པ། གཡེང་བ་མེད་པ་འདི་ནི་སེམས་གནས་པ་ཞེས་བྱའོ། །དེ་ལ་དྲན་པ་ཉེ་བར་གཞག་པ་ [227b.5]ཡོངས་སུ་རྫོགས་པ་གང་ཞེ་ན། གང་སེམས་ལ་རྣམ་པར་འབྱེད་པར་ཤེས་པ་དང་། སེམས་ལ་ཆོས་ཀྱི་དབྱིངས་སུ་གནས་པར་ཤེས་པ་དང་། སེམས་ལ་སེམས་གནས་པར་ཤེས་པ་དང་། སེམས་ལ་རང་བཞིན་གྱིས་འོད་གསལ་བར་ཤེས་པ་དང་། སེམས་ལ་ཇི་ལྟ་བ་བཞིན་དུ་ཤེས་པ་དང་། [227b.6]སེམས་ལ་མངོན་སུམ་གྱི་ཤེས་པས་རབ་ཏུ་ཤེས་པ་དང་། སེམས་ལ་སྒྱུ་མའི་ཆོས་སུ་ཤེས་པ་དང་། སེམས་ལ་དུས་གསུམ་མཉམ་པ་ཉིད་དུ་ཤེས་པ་དང་། སེམས་ལ་དེ་ཁོ་ནར་ཤེས་པ་དང་། སེམས་ལ་གཡོ་བ་མེད་ཅིང་གཟུང་བ་མེད་པར་ཤེས་པ་འདི་ནི་དྲན་པ་ཉེ་བར་གཞག་པ་ཡོངས་ [227b.7]སུ་རྫོགས་པ་ཞེས་བྱའོ། །དེ་རང་གི་སེམས་ཀྱི་རང་བཞིན་གང་ཡིན་པ་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ཡང་དེ་ཡིན་པར་རབ་ཏུ་ཤེས་སོ། །སེམས་ཀྱི་རང་བཞིན་དེ་ཡོངས་སུ་ཤེས་ནས་དེ་བཞིན་དུ་ཆོས་སྟོན་ཏོ། །རང་གི་སེམས་ཀྱི་ངོ་བོ་ཉིད་གང་ཡིན་པ་སེམས་ཅན་ཐམས་ཅད་ཀྱི་སེམས་ [228a] [228a.1]ཀྱི་ངོ་བོ་ཉིད་ཀྱང་དེ་ཡིན་པར་རབ་ཏུ་ཤེས་སོ། །སེམས་ཀྱི་ངོ་བོ་ཉིད་དུ་ཤེས་ནས་ཀྱང་དེ་བཞིན་དུ་ཆོས་སྟོན་ཏོ། །རང་གི་སེམས་ཀྱི་མཚན་ཉིད་གང་ཡིན་པ་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་མཚན་ཉིད་ཀྱང་དེ་ཡིན་པར་རབ་ཏུ་ཤེས་སོ། །སེམས་ཀྱི་མཚན་ཉིད་དེ་ཤེས་ [228a.2]ནས་ཀྱང་དེ་བཞིན་དུ་ཆོས་སྟོན་ཏོ། །ཇི་ལྟར་རང་གི་སེམས་སྟོང་པ་དེ་བཞིན་དུ་སེམས་ཅན་ཐམས་ཅད་ཀྱི་སེམས་ཀྱང་སྟོང་པར་རབ་ཏུ་ཤེས་སོ། །སེམས་དེ་དག་སྟོང་པ་ཉིད་དུ་ཤེས་ནས་ཀྱང་དེ་བཞིན་དུ་ཆོས་སྟོན་ཏོ། །དེ་རང་གི་སེམས་ཡང་དག་པར་འདུ་བ་གང་ཡིན་པ་སེམས་ཅན་ཐམས་ཅད་ཀྱི་ [228a.3]སེམས་ཡང་དག་པར་འདུ་བ་ཡང་དེ་ཡིན་པར་རབ་ཏུ་ཤེས་སོ། །སེམས་ཡང་དག་པར་འདུ་བ་དེ་དག་ཤེས་ནས་ཀྱང་དེ་བཞིན་དུ་ཆོས་སྟོན་ཏོ། །དེ་རང་གི་སེམས་མཉམ་པ་ཉིད་ཀྱིས་སེམས་ཅན་ཐམས་ཅད་ཀྱི་སེམས་མཉམ་པ་ཉིད་དུ་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་སེམས་མཉམ་ [228a.4]པ་ཉིད་ཀྱིས་ཆོས་ཐམས་ཅད་མཉམ་པ་ཉིད་དུ་རབ་ཏུ་ཤེས་སོ། །ཆོས་ཐམས་ཅད་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དུ་རབ་ཏུ་ཤེས་ཤིང་སེམས་ཀྱིས་འགྱུར་བར་མི་བྱེད་དེ་རྣམ་པར་མི་འགྱུར་རོ། །སེམས་གནས་པས་ཆོས་ཀྱི་དབྱིངས་གནས་པ་རྗེས་སུ་ཤེས་ཀྱང་སེམས་གནས་པའི་ཆོས་ཉིད་ [228a.5]དེ་ལས་ཀྱང་མི་གཡོ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཆོས་རྣམས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་ [228a.6]པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའི་ཆོས་རྣམས་ལ་ཆོས་ཀྱིས་རྗེས་སུ་ལྟ་བའི་དྲན་པ་ཉེ་བར་གཞག་པ་ལ་གནས་པ་འདི་སྙམ་དུ་སེམས་ཏེ། ཆོས་ཁོ་ན་སྐྱེ་བ་རྣམས་སྐྱེ། ཆོས་ཁོ་ན་འགག་པ་རྣམས་འགག་སྟེ། འདི་ལ་བདག་གམ། སེམས་ཅན་ནམ། སྲོག་གམ། སྐྱེ་ [228a.7]བ་པོའམ། གསོ་བའམ། སྐྱེས་བུ་འམ། གང་ཟག་གམ། ཤེད་ལས་སྐྱེས་པའམ། ཤེད་བུའམ། གང་སྐྱེ་བའམ། རྒ་བ་འམ། འཆི་བ་འམ། འཕོ་བའམ། སྐྱེ་བར་འགྱུར་བ་གང་ཡང་མེད་དོ། །འདི་ནི་ཆོས་རྣམས་ཀྱི་ཆོས་ཉིད་དེ། གལ་ཏེ་བསྒྲུབས་ན་ནི་འགྲུབ། མ་བསྒྲུབས་ན་ [228b] [228b.1]ནི་མི་འགྲུབ་སྟེ། དགེ་བ་ཡང་རུང་། མི་དགེ་བ་ཡང་རུང་། མི་གཡོ་བ་ཡང་རུང་། ཇི་ལྟ་བུར་བསྒྲུབས་པ་དེ་ལྟ་བུར་འགྲུབ་མོད་ཀྱི། ཆོས་རྣམས་ལ་སྒྲུབ་པར་བྱེད་པ་ཡང་མེད་ལ་ཆོས་རྣམས་རྒྱུ་མེད་པར་ཡང་གག་ཀྱང་མི་སྐྱེའོ་སྙམ་དུ་ཉེ་བར་བརྟགས་ན་འདི་ལྟར་ཆོས་དྲན་པའི་ཡེ་ཤེས་སྐྱེ་སྟེ། གང་ [228b.2]བསོད་ནམས་དང་བསོད་ནམས་མ་ཡིན་པ་དང་། མི་གཡོ་བ་མངོན་པར་འདུ་བྱེད་པ་དང་གསུམ་མོ། །དེ་ལ་བདག་གིས་ནི་བསོད་ནམས་མངོན་པར་འདུ་བྱེད་པ་ལ་བརྩོན་པར་བྱའོ། །དེ་ནི་བདག་གིས་སངས་རྒྱས་ཀྱི་ཆོས་བླ་ན་མེད་པ། མཆོག་དམ་པ། རབ། ཁྱད་པར་དུ་འཕགས་པ་བཅུའི་རྒྱུར་ [228b.3]འགྱུར་ཏེ། བཅུ་པོ་དེ་དག་གང་ཞེ་ན། འདི་ལྟ་སྟེ། ལུས་ཡོངས་སུ་དག་པས་མཚན་དང་། དཔེ་བྱད་བཟང་པོ་དང་། སྤྱི་གཙུག་བལྟར་མི་མཐོང་བ་དང་། ཕ་རོལ་གྱི་གནོད་པར་བྱ་བ་ཐམས་ཅད་ལས་ཤིན་ཏུ་འདས་པ་དང་། ངག་ཡོངས་སུ་དག་པས་དེ་བཞིན་གཤེགས་པའི་གསུང་སེམས་ [228b.4]ཅན་ཐམས་ཅད་ཚིམ་པར་བྱེད་པ་རྣམ་པ་དྲུག་ཅུ་ཤིན་ཏུ་ཡོངས་སུ་རྫོགས་པ་དང་། སེམས་ཡོངས་སུ་དག་པས་སེམས་ཅན་ཐམས་ཅད་ལ་ཁོང་ཁྲོ་བ་མེད་ཅིང་རྟག་ཏུ་རྒྱུན་མི་འཆད་པར་ཏིང་ངེ་འཛིན་མི་འཁྲུགས་པ་དང་། སོ་སོ་ཡང་དག་པར་རིག་པ་ཡོངས་སུ་དག་པས་དོན་དང་། ཆོས་དང་། ངེས་ [228b.5]པའི་ཚིག་དང་། སྤོབས་པ་མི་ཟད་པ་དང་། བྱམས་པ་ཆེན་པོ་ཡོངས་སུ་དག་པས་སེམས་ཅན་ཐམས་ཅད་མྱ་ངན་ལས་འདས་པའི་ལམ་ལ་རབ་ཏུ་འགོད་པ་དང་། སྙིང་རྗེ་ཆེན་པོ་ཡོངས་སུ་དག་པས་བསྐལ་པ་དཔག་ཏུ་མེད་པར་འཁོར་བས་ཡོངས་སུ་མི་སྐྱོ་བ་དང་། སྟོབས་བཅུ་ཡོངས་སུ་རྫོགས་ [228b.6]པས་སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པ་དང་། མི་འཇིགས་པ་ཡོངས་སུ་རྫོགས་པས་བར་དུ་གཅོད་པ་དང་བར་དུ་གཅོད་པའི་ཆོས་མ་ཡིན་པ་རབ་ཏུ་རྟོགས་པ་དང་། སངས་རྒྱས་ཀྱི་ཆོས་མ་འདྲེས་པ་ཡོངས་སུ་རྫོགས་པས་འདས་པ་དང་། མ་འོངས་པ་ [228b.7]དང་། ད་ལྟར་བྱུང་བ་དང་། དུས་གསུམ་ལ་མི་ཆགས་པའི་ཡེ་ཤེས་མཐོང་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པས་རང་བྱུང་གི་ཡེ་ཤེས་རབ་ཏུ་རྟོགས་པ་སྟེ། སངས་རྒྱས་ཀྱི་ཆོས་བླ་ན་མེད་པ། དམ་པ། བཟང་པོ། མཆོག །རབ། བྱེ་བྲག་ཏུ་འཕགས་པ་བཅུ་པོ་དེ་དག་གི་ [229a] [229a.1]རྒྱུར་འགྱུར་རོ། །དེས་དོན་གྱི་དབང་འདི་མཐོང་བས་བསོད་ནམས་ཀྱི་ཚོགས་སོགས་པ་ལ་ཆོག་མི་ཤེས་པར་འགྱུར་རོ། །དེ་བསོད་ནམས་མ་ཡིན་པའི་འདུ་བྱེད་རྣམས་མངོན་པར་འདུ་མི་བྱ་བའི་ཕྱིར་ཇི་ལྟར་བདག་ལ་མི་དགེ་བའི་ཆོས་རྣམས་ཐམས་ཅད་ཀྱི་ཐམས་ཅད་དུ་བག་ཆགས་སུ་ [229a.2]ཡང་མི་འགྱུར་བར་བྱའོ་སྙམ་ནས་བརྩོན་པར་བྱེད་དོ། །དེ་མི་གཡོ་བའི་འདུ་བྱེད་རྣམས་རབ་ཏུ་ཤེས་ནས་མི་གཡོ་བའི་སྙོམས་པར་འཇུག་པ་སྐྱེད་ཀྱང་ཏིང་ངེ་འཛིན་དེ་ལ་སྙིང་པོར་འདུ་ཤེས་པར་ཡང་མི་འགྱུར་ལ་ཏིང་ངེ་འཛིན་གྱི་དབང་གིས་ཀྱང་མི་སྐྱེ་སྟེ། བསོད་ནམས་ཀྱི་ཚོགས་བསགས་པ་དང་། [229a.3]སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་གྱི་དབང་གིས་འདོད་པའི་ཁམས་སུ་ཡང་སྐྱེའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཐབས་མཁས་པ་ཆོས་རྣམས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ལ་གནས་ཤིང་བྱང་ཆུབ་ཏུ་སྒྲུབ་པའི་ཆོས་གང་ཡིན་པ་དེ་ [229a.4]དག་སྒོམ་ལ། བྱང་ཆུབ་ཀྱི་མི་འཐུན་པའི་ཕྱོགས་ཀྱི་ཆོས་གང་ཡིན་པ་དེ་དག་སྤོང་ཡང་དགེ་བའི་ཆོས་མངོན་པར་འདུ་བྱེད་པས་རྟག་པར་ལྟ་བར་ཡང་མི་ལྟུང་། མི་དགེ་བའི་ཆོས་སྤོང་ཡང་ཆད་པར་ལྟ་བར་ཡང་མི་ལྟུང་སྟེ། གང་ལ་ཆད་པ་མེད་ཅིང་རྟག་པ་མེད་པ་དེ་ནི་བྱང་ཆུབ་སེམས་དཔའི་རྟག་ [229a.5]པ་དང་ཆད་པ་ཡོངས་སུ་སྤངས་པའི་དབུ་མའི་ལམ་མོ། །དེ་ཡང་གང་ཞེ་ན་འདི་ལྟ་སྟེ། གང་ཚུལ་བཞིན་མ་ཡིན་པར་ཡིད་ལ་བྱེད་པ་དང་། མ་རིག་པ་དེ་གཉི་ག་ཡང་མཐའ་སྟེ། གང་དེ་གཉིས་ཀྱི་དབུ་མ་དེ་ནི་བཏགས་པ་མེད་ཅིང་གདགས་པར་འགྱུར་བ་མ་ཡིན་ཏེ། འདི་ནི་ཆོས་རྣམས་ཀྱི་ [229a.6]དབུ་མའི་ལམ་ཞེས་བྱའོ། །དེ་བཞིན་དུ་མ་རིག་པ་དང་མ་རིག་པ་མེད་པ་དང་། འདུ་བྱེད་རྣམས་དང་འདུ་བྱེད་མེད་པ་རྣམས་དང་། རྣམ་པར་ཤེས་པ་དང་རྣམ་པར་ཤེས་པ་མེད་པ་དང་། མིང་དང་གཟུགས་དང་མིང་དང་གཟུགས་མེད་པ་དང་། སྐྱེ་མཆེད་དྲུག་དང་སྐྱེ་མཆེད་དྲུག་མེད་པ་ [229a.7]དང་། རེག་པ་དང་རེག་པ་མེད་པ་དང་། ཚོར་བ་དང་ཚོར་བ་མེད་པ་དང་། སྲེད་པ་དང་སྲེད་པ་མེད་པ་དང་། ལེན་པ་དང་ལེན་པ་མེད་པ་དང་། སྲིད་པ་དང་སྲིད་པ་མེད་པ་དང་། སྐྱེ་བ་དང་སྐྱེ་བ་མེད་པ་དང་། རྒ་ཤི་དང་རྒ་ཤི་མེད་པ་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་ [229b] [229b.1]བ་དང་། ཡིད་མི་བདེ་བ་དང་། འཁྲུག་པ་ཞེས་བྱ་བ་དེ་གཉི་ག་ཡང་མཐའ་སྟེ། གང་དེ་གཉིས་ཀྱི་དབུ་མ་དེ་ནི་བཏགས་པ་མེད་ཅིང་གདགས་པར་འགྱུར་བ་མ་ཡིན་ཏེ། འདི་ནི་ཆོས་རྣམས་ཀྱི་དབུ་མའི་ལམ་ཞེས་བྱའོ། །ཆོས་རྣམས་ཀྱི་དབུ་མའི་ལམ་དེ་ནི་འདི་འདྲའོ། །དེ་འདྲའོ་ཞེས་བསྟན་ [229b.2]པར་མི་རུང་སྟེ། དབུ་མའི་ལམ་ནི་བཏགས་པ་མེད་པ་གདགས་པར་འགྱུར་བ་མ་ཡིན་པ། མཚན་མ་མེད་པ། གནས་མེད་པ། གཟུང་བ་མེད་པ། ཀུན་གཞི་མེད་པ། ཞི་བ། རབ་ཏུ་ཞི་བ། ཉེ་བར་ཞི་བའོ། །རིགས་ཀྱི་བུ་འདི་ལྟ་སྟེ་དཔེར་ན་མདའ་གང་ནས་འཕངས་པ་དང་། གང་དུ་ཕོག་ [229b.3]པ་དེ་གཉི་ག་ཡང་མཐའ་སྟེ། གང་ཕིགས་པ་དང་ཕོག་པ་དེའི་དབུ་མ་དེ་ནི་བཏགས་པ་མེད་ཅིང་གདགས་པར་འགྱུར་བ་མ་ཡིན་ཏེ། བལྟ་བའམ་རེག་པར་མི་ནུས་པ་དེ་བཞིན་དུ་རིགས་ཀྱི་བུ་དམིགས་པ་གང་གིས་རྣམ་པར་ཤེས་པ་སྐྱེ་བ་དང་། གང་དུ་སོ་སོར་རྣམ་པར་རིག་པ་གནས་པ་དེ་གཉི་ག་ཡང་ [229b.4]མཐའ་སྟེ། གང་དེ་གཉིས་ཀྱི་དབུ་མ་བསྟན་པར་མི་ནུས་པ་འདི་ནི་རིགས་ཀྱི་བུ་བརྡ་ཙམ་དུ་དབུ་མའི་ལམ་ཞེས་བྱའི་དོན་དམ་པར་ནི་མ་ཡིན་ནོ། །དོན་དམ་པ་གང་ཡིན་པ་དེ་ནི་བརྗོད་དུ་མེད་དེ། དེ་ལ་ནི་ཉུང་ངུ་ཡང་མེད་མང་པོ་ཡང་མེད་དོ། །གང་ལ་ཉུང་ངུ་ཡང་མེད་མང་པོ་ཡང་མེད་པ་དེ་ནི་དབུ་མའི་ [229b.5]ལམ་མོ། །རིགས་ཀྱི་བུ་གཞན་ཡང་བདག་དང་བདག་མེད་པ་ཞེས་བྱ་བ་དེ་གཉི་ག་ཡང་མཐའ་སྟེ། བདག་དང་བདག་མེད་པའི་ངོ་བོ་ཉིད་རྣམ་པར་དག་པ་ནི་དབུ་མའི་ལམ་མོ། །སྲོག་དང་གང་ཟག་ཅེས་བྱ་བ་དེ་གཉི་ག་ཡང་མཐའ་སྟེ། སྲོག་དང་གང་ཟག་གི་ངོ་བོ་ཉིད་རྣམ་པར་དག་པ་ནི་དབུ་མའི་ [229b.6]ལམ་མོ། །མཚན་མ་དང་མཚན་མ་མེད་པ་ཞེས་བྱ་བ་དེ་གཉི་ག་ཡང་མཐའ་སྟེ། མཚན་མ་མེད་པར་རྟོག་པ་ནི་དབུ་མའི་ལམ་མོ། །དམིགས་པ་དང་མི་དམིགས་པ་ཞེས་བྱ་བ་དེ་གཉི་ག་ཡང་མཐའ་སྟེ། རྟོག་པ་དང་འཇིག་པ་མེད་པ་ནི་དབུ་མའི་ལམ་མོ། །{བརྫུན་,རྫུན་}པ་དང་བདེན་པ་ཞེས་བྱ་བ་དེ་ [229b.7]གཉི་ག་ཡང་མཐའ་སྟེ། བརྗོད་དུ་མེད་པ་ནི་དབུ་མའི་ལམ་མོ། །ཚུ་རོལ་དང་ཕ་རོལ་ཞེས་བྱ་བ་དེ་གཉི་ག་ཡང་མཐའ་སྟེ། འཇིག་ཚོགས་འགག་པ་ནི་དབུ་མའི་ལམ་མོ། །འདུས་བྱས་དང་འདུས་མ་བྱས་ཞེས་བྱ་བ་དེ་གཉི་ག་ཡང་མཐའ་སྟེ། སྤྱོད་པ་མེད་པ་ནི་དབུ་མའི་ལམ་མོ། །འཁོར་ [230a] [230a.1]བ་དང་མྱ་ངན་ལས་འདས་པ་ཞེས་བྱ་བ་དེ་གཉི་ག་ཡང་མཐའ་སྟེ། རྣམ་པར་རིག་པ་མེད་པ་ནི་དབུ་མའི་ལམ་མོ། །རིགས་ཀྱི་བུ་དེ་ལྟར་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པ་ལ་གནས་པའི་བྱང་ཆུབ་སེམས་དཔའ་དེ་ནི་ཆོས་ཀྱི་དབྱིངས་དབྱེར་མེད་པའི་ [230a.2]ཕྱིར་དྲན་པ་ལ་གནས་ཏེ། དེ་ཆོས་ཐམས་ཅད་ཆོས་ཀྱི་དབྱིངས་སུ་འདུ་བར་རབ་ཏུ་ཤེས་སོ། །ཆོས་ཀྱི་དབྱིངས་གང་ཡིན་པ་དེ་ཉིད་སེམས་ཅན་གྱི་ཁམས་སོ། །དེ་ཆོས་ཀྱི་དབྱིངས་དབྱེར་མེད་པས་སེམས་ཅན་གྱི་ཁམས་དབྱེར་མེད་པར་ཁོང་དུ་ཆུད་དོ། །ཆོས་ཀྱི་དབྱིངས་གང་ཡིན་པ་དང་ [230a.3]སེམས་ཅན་གྱི་ཁམས་གང་ཡིན་པ་དེ་གཉི་ག་ཡང་ནམ་མཁའི་དབྱིངས་དང་མཚུངས་པར་རབ་ཏུ་ཤེས་སོ། །དེས་ཆོས་ཐམས་ཅད་དབྱིངས་གཅིག་ཏུ་ཤེས་ནས་ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་གནས་ཀྱང་ཆོས་ལ་མངོན་པར་ཆགས་ཤིང་ལྟ་བར་ཡང་མི་འགྱུར་རོ། །དེ་ནམ་མཐོང་བ་དེ་ནི་ [230a.4]ཆོས་རྣམས་ལ་ཐ་དད་དུ་མི་བྱེད་དོ། །དེས་ཆོས་རྣམས་མཐོང་ཡང་ཤའི་མིག་གིས་མཐོང་བ་མ་ཡིན། ལྷའི་མིག་གིས་མཐོང་བ་མ་ཡིན། ཤེས་རབ་ཀྱི་མིག་གིས་མཐོང་བ་མ་ཡིན་ནོ། །དེ་ཅིའི་ཕྱིར་ཞེ་ན། དེའི་མིག་མཚན་མར་འདུ་ཤེས་པ་མ་ཡིན་ཏེ། དེའི་ཕྱིར་དེ་ཤའི་མིག་གིས་ [230a.5]མཐོང་བ་མ་ཡིན་ནོ། །དེའི་མིག་མངོན་པར་འདུ་བྱེད་པར་ལྷུང་བ་མ་ཡིན་ཏེ། དེའི་ཕྱིར་དེ་ལྷའི་མིག་གིས་མཐོང་བ་མ་ཡིན་ནོ། །དེའི་མིག་སྤྲོས་པ་ལ་སྤྱོད་པ་མ་ཡིན་ཏེ། དེའི་ཕྱིར་དེ་ཤེས་རབ་ཀྱི་མིག་གིས་མཐོང་བ་མ་ཡིན་ནོ། །ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེ་ [230a.6]ཆོས་ཐམས་ཅད་ཇི་ལྟ་བ་བཞིན་དུ་མཐོང་ནས་ཆོས་གང་ལ་ཡང་མི་གནས་སོ། །དེས་ཆོས་ཐམས་ཅད་མི་གནས་པར་ཤེས་ནས་ཆོས་རྗེས་སུ་དྲན་པ་དེས་སྔོན་གྱི་སྨོན་ལམ་མི་གཏོང་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ཆོས་རྣམས་ལ་ཆོས་ཀྱི་རྗེས་སུ་དྲན་པ་སངས་རྒྱས་ཀྱིས་གནང་བའོ། ། [230a.7]གང་ཅུང་ཟད་ཆོས་ཟབ་མོ་ལ་སོ་སོར་རྟོག་ཀྱང་ཐམས་ཅད་མཁྱེན་པ་ཉིད་ཀྱི་བྱང་ཆུབ་ཀྱི་སེམས་རྗེས་སུ་དྲན་པ་དེ་ཡང་མི་འདོར་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ཆོས་རྣམས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པའི་སྤྱོད་པ་ཡོངས་སུ་དག་པའོ། །དྲན་པ་ཉེ་བར་གཞག་ [230b] [230b.1]པ་བཞི་པོ་དེ་དག་ལ་གནས་པ་དེ་ཕྱིན་ཅི་ལོག་བཞི་རབ་ཏུ་སྤོང་སྟེ། བཞི་གང་ཞེ་ན་འདི་ལྟ་སྟེ། ལུས་ལ་ལུས་ཀྱི་རྗེས་སུ་ལྟ་ཞིང་གནས་པས་མི་སྡུག་པ་ལ་སྡུག་པར་འདུ་ཤེས་པའི་ཕྱིན་ཅི་ལོག་རབ་ཏུ་སྤོང་ངོ་། །ཚོར་བ་རྣམས་ལ་ཚོར་བའི་རྗེས་སུ་ལྟ་ཞིང་གནས་པས་སྡུག་བསྔལ་བ་ལ་བདེ་བར་ [230b.2]འདུ་ཤེས་པའི་ཕྱིན་ཅི་ལོག་རབ་ཏུ་སྤོང་ངོ་། །སེམས་ལ་སེམས་ཀྱི་རྗེས་སུ་ལྟ་ཞིང་གནས་པས་མི་རྟག་པ་ལ་རྟག་པར་འདུ་ཤེས་པའི་ཕྱིན་ཅི་ལོག་རབ་ཏུ་སྤོང་ངོ་། །ཆོས་རྣམས་ལ་ཆོས་ཀྱི་རྗེས་སུ་ལྟ་ཞིང་གནས་པས་བདག་མེད་པ་ལ་བདག་ཏུ་འདུ་ཤེས་པའི་ཕྱིན་ཅི་ལོག་རབ་ཏུ་སྤོང་ངོ་། །དེ་ཕྱིན་ [230b.3]ཅི་ལོག་མེད་པས་ཡང་དག་པ་ཉིད་སྒྲུབ་བོ། །ཡང་དག་པ་ཉིད་ལ་ཞུགས་ནས་བྱང་ཆུབ་སེམས་དཔའི་སྤྱོད་པ་ཐམས་ཅད་རྣམ་པར་དག་པར་འགྱུར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་དེ་ཡང་དག་པར་སྤོང་བའི་སྤྱོད་པ་ཡོངས་སུ་དག་པ་རབ་ཏུ་འཐོབ་སྟེ། ཡང་ [230b.4]དག་པར་སྤོང་བའི་སྤྱོད་པ་ཡོངས་སུ་དག་པ་གང་ཞེ་ན། གང་བྱང་ཆུབ་སེམས་དཔའ་དེ་འབད་པ་མེད་ཅིང་ལྷུན་གྱིས་གྲུབ་པས་དགེ་བའི་ཆོས་ལ་སྦྱོར་བ་ལ་སེམས་འཇུག་གི་མི་དགེ་བ་ལ་ནི་མ་ཡིན་ནོ། །དེ་ཕྱིར་ཞིང་སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་བརྩོན་འགྲུས་རྩོམ་པ་ [230b.5]དང་། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་བརྩོན་འགྲུས་རྩོམ་པ་དང་། དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་བརྩོན་འགྲུས་རྩོམ་པ་དང་། དགེ་བའི་ཆོས་སྐྱེས་པ་རྣམས་གནས་པ་དང་། ཉམས་པར་མི་འགྱུར་བ་དང་། ཕྱིར་ཞིང་འབྱུང་བ་དང་། ཡོངས་ [230b.6]སུ་རྫོགས་པར་བྱ་བའི་ཕྱིར་བརྩོན་འགྲུས་རྩོམ་པའོ། །རིགས་ཀྱི་བུ་བྱང་ཆུབ་སེམས་དཔའ་དེ་སྔོན་གྱི་ལས་ཡོངས་སུ་དག་པའི་ཕྱིར་རང་གི་ངང་ཉིད་ཀྱིས་དགེ་བའི་ཆོས་རྣམས་མངོན་དུ་འགྱུར་ཏེ། འབད་པ་མེད་ཅིང་ལྷུན་གྱིས་གྲུབ་པས་དགེ་བའི་ཆོས་མ་སྐྱེས་པ་རྣམས་ནི་སྐྱེའོ། །དགེ་ [230b.7]བའི་ཆོས་སྐྱེས་པ་རྣམས་ནི་ཉམས་པར་མི་འགྱུར་རོ། །རིགས་ཀྱི་བུ་འདི་ལྟར་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་དེ་ཡང་དག་པར་སྤོང་བ་བཞི་པོ་འདི་དག་སེམས་ཀྱིས་དབང་སྒྱུར་བར་འགྱུར་གྱི། བརྩོན་འགྲུས་ཀྱིས་དབང་སྒྱུར་བར་འགྱུར་བ་ནི་མ་ཡིན་ནོ། །དེ་དག་པ་དང་། [231a] [231a.1]དྲི་མ་མེད་པ་དང་། ཁ་ན་མ་ཐོ་བ་མེད་པ་དང་། སངས་རྒྱས་ཐམས་ཅད་ཀྱིས་གནང་བའི་བྱམས་པ་ཆེན་པོ་དང་། སྙིང་རྗེ་ཆེན་པོ་དང་ལྡན་པའི་སེམས་དང་སེམས་ལས་བྱུང་བ་འཇུག་སྟེ། ཡང་དག་པ་ལ་ཞུགས་པ་དེ་ནི་ཡང་དག་པར་སྤོང་བ་ལ་གནས་པ་ཞེས་བྱའོ། །དེ་ [231a.2]ཅིའི་ཕྱིར་ཞེ་ན། དེའི་སྤོང་བ་མཉམ་པ་ཡིན་གྱི་མི་མཉམ་པ་མ་ཡིན་ནོ། །དེའི་སྦྱོར་བ་མཉམ་པ་ཡིན་གྱི་མི་མཉམ་པ་མ་ཡིན་ནོ། །ཡང་དག་པར་སྤོང་བ་ཞེས་བྱ་བ་ནི་མཉམ་པ་ཉིད་ཀྱིས་མཉམ་པར་སྦྱོར་བ་དང་། མཉམ་པ་ཉིད་ཀྱིས་མཉམ་པར་སྒྲུབ་པ་སྟེ། དེའི་ཕྱིར་ཡང་དག་ [231a.3]པར་སྤོང་བ་ཞེས་བྱའོ། །དེ་ལྟར་ཡང་དག་པར་ཞུགས་པ་དེའི་རྫུ་འཕྲུལ་གྱི་རྐང་པ་བཞི་བསྒོམ་པ་ཡོངས་སུ་རྫོགས་པར་འགྱུར་ཏེ། བཞི་གང་ཞེ་ན་འདི་ལྟ་སྟེ། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང་། བརྩོན་འགྲུས་ཀྱི་ཏིང་ངེ་འཛིན་སྤོང་བ་ [231a.4]འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང་། སེམས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང་། དཔྱོད་པའི་ཏིང་ངེ་འཛིན་སྤོང་པའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པའོ། །དེ་བྱང་ཆུབ་ཀྱི་སེམས་ཀྱི་ལྷག་པའི་བསམ་པས་འདུན་པ་ཡང་ [231a.5]བར་འགྱུར་རོ། །མི་དགེ་བའི་ཆོས་སྤོང་བས་བརྩོན་འགྲུས་ཡང་བར་འགྱུར་རོ། །སྙིང་རྗེ་ཆེན་པོ་རབ་ཏུ་ཐོབ་པས་སེམས་ཡང་བར་འགྱུར་རོ། །ཐབས་མཁས་པ་རབ་ཏུ་ཐོབ་པས་དཔྱོད་པ་ཡང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་དེ་རྫུ་འཕྲུལ་གྱི་རྐང་པ་བཞི་པོ་དེ་དག་གིས་ [231a.6]བྱང་ཆུབ་ཀྱི་རྣམ་པ་མངོན་པར་བསྒྲུབས་པས་དབང་བཞི་རབ་ཏུ་འཐོབ་སྟེ། བཞི་གང་ཞེ་ན་འདི་ལྟ་སྟེ། ཚེ་ལ་དབང་བ་འཐོབ་བོ། །ཚེ་ལ་དབང་བ་དེས་འདོད་ན་སེམས་ཅན་ཚེ་ཐུང་ངུ་རྣམས་ཀྱི་ནང་དུ་ཚེ་རིང་པོ་ཡོངས་སུ་འཛིན་ཅིང་སེམས་ཅན་དེ་དག་ཡོངས་སུ་སྨིན་པར་བྱེད་པ་དང་། སེམས་ [231a.7]ཅན་ཚེ་རིང་པོ་ཆོས་བསྟན་ན་ཡོངས་སུ་སྐྱོ་བ་རྣམས་ལ་ཆོས་བསྟན་པས་ཡོངས་སུ་ཚིམ་པར་བྱ་བའི་ཕྱིར་ཚེ་ཐུང་ངུ་ཡོངས་སུ་འཛིན་པ་དང་། ལྷ་འམ་མི་གང་དང་གང་དུ་སྐྱེ་བ་ཐམས་ཅད་དུ་ཚེའི་ཚད་ལ་དབང་སྒྱུར་བ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔས་དབང་དང་པོ་འདི་འཐོབ་ [231b] [231b.1]བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔས་ལུས་ལ་དབང་འཐོབ་སྟེ། ལུས་ལ་དབང་བ་དེས་ཡིད་ཀྱི་ལུས་རབ་ཏུ་ཐོབ་ནས་ལུས་ཅི་འདྲ་བ་དང་། གཟུགས་ཅི་འདྲ་བ་དང་། ཁ་དོག་དང་མཚན་དང་དབྱིབས་དང་། སྤྱོད་ལམ་ཅི་འདྲ་བས་སེམས་ཅན་རྣམས་ཡོངས་སུ་སྨིན་པར་ [231b.2]འགྱུར་བ་དང་། འདུལ་བར་འགྱུར་བ་དེ་འདྲ་བར་བྱང་ཆུབ་སེམས་དཔའ་དེ་ལུས་དང་། གཟུགས་དང་ཁ་དོག་དང་མཚན་དང་དབྱིབས་དང་སྤྱོད་ལམ་ཀུན་ཏུ་སྟོན་ཏེ། དེ་འདོད་ན་སེམས་ཅན་ཐམས་ཅད་ཀྱི་ལུས་དང་། གཟུགས་དང་། ཁ་དོག་དང་མཚན་དང་དབྱིབས་དང་། སྤྱོད་ལམ་ [231b.3]མཚུངས་པར་འགྱུར་བ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔས་དབང་གཉིས་པ་འདི་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔས་ཆོས་ལ་དབང་འཐོབ་སྟེ། ཆོས་ལ་དབང་བ་དེས་འཇིག་རྟེན་ལས་འདས་པའི་ཆོས་ལ་རྟོན་པར་འགྱུར་གྱི། འཇིག་རྟེན་གྱི་ཆོས་ལ་ [231b.4]རྟོན་པར་མི་འགྱུར་བ་དང་། དེ་འཇིག་རྟེན་ལས་འདས་པའི་ཆོས་ལ་རྟོན་ཀྱང་འཇིག་རྟེན་གྱི་བྱ་བ་ཐམས་ཅད་དུ་ཡང་སྣང་ལ་འཇིག་རྟེན་ལས་འདས་པའི་ཡེ་ཤེས་དེ་ལས་ཀྱང་མི་གཡོ་བ་དང་། གང་འདི་ཤེས་རབ་དང་ཡེ་ཤེས་ཆགས་པ་མེད་པ་དང་། རྟེན་ཅིང་འབྲེལ་པར་འབྱུང་བ་ཟབ་མོའི་ [231b.5]ཡེ་ཤེས་ཀྱི་བདག་ཉིད་དང་། ཆོས་རྣམ་པར་བསྒྲུབས་པས་ལྷ་དང་བཅས་པའི་འཇིག་རྟེན་མོས་པར་བྱེད་ཅིང་། གང་གིས་སེམས་ཅན་ཚད་མེད་པ་རྣམས་བསམ་པ་དང་མོས་པ་ཇི་ལྟ་བ་བཞིན་དུ་འདུལ་བར་འགྱུར་བ་དེ་འདྲ་བའི་ཆོས་ཀྱི་གཏམ་བྱེད་པ་ཡིན་ཏེ། རིགས་ཀྱི་བུ་བྱང་ཆུབ་ [231b.6]སེམས་དཔས་དབང་གསུམ་པ་འདི་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་བྱིན་གྱི་རླབས་ཀྱི་དབང་ཐོབ་སྟེ། བྱིན་གྱི་རླབས་ལ་དབང་བ་དེས་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྒྱ་མཚོ་ཆེན་པོ་དེ་དག་ཐམས་ཅད་རྒྱ་མཚོ་གཅིག་ཏུ་བྱིན་གྱིས་ [231b.7]བརླབས་ཀྱང་འདྲེས་པ་ཡང་མེད་ལ་སྤྱོད་པ་དེ་ཡང་ཀུན་ཏུ་སྟོན་པ་དང་། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རིའི་རྒྱལ་པོ་རི་རབ་དེ་དག་ཐམས་ཅད་རི་གཅིག་ཏུ་བྱིན་གྱིས་བརླབས་ཀྱང་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་། སུམ་ཅུ་རྩ་གསུམ་པའི་ལྷའི་བུ་ [232a] [232a.1]རྣམས་ཕན་ཚུན་འཕྲོས་པར་ཡང་མི་ཤེས་ལ་སྤྱོད་པ་དེ་ཡང་ཀུན་ཏུ་སྟོན་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ཇི་ལྟར་རིན་པོ་ཆེའི་ས་གཞི་འམ། ཙན་དན་གྱི་ས་གཞི་འམ། སྤོས་ཀྱི་ས་གཞི་འམ། མེ་ཏོག་གི་ས་གཞི་འམ། ནམ་ [232a.2]མཁར་གྱུར་པའམ། ཆུས་ཡོངས་སུ་གང་བའམ། མེས་ཡོངས་སུ་གང་བའམ། རིན་པོ་ཆེ་ཐམས་ཅད་ཀྱིས་ཡོངས་སུ་གང་བར་གྱུར་ཅིག་ཅེས་དེ་ལྟར་བྱིན་གྱིས་བརླབས་ན་ཡང་དེ་འདྲ་བར་གནས་པ་དང་། དེ་བཞིན་དུ་བྱིན་གྱི་རླབས་ཐམས་ཅད་ཀྱིས་གང་ཇི་ལྟར་བྱིན་གྱིས་བརླབས་པ་ [232a.3]དེའི་དེ་དེ་ལྟར་འགྱུར་བ་དང་། དེའི་སེམས་བསྐྱེད་མ་ཐག་ཏུ་བྱིན་གྱི་རླབས་ཐམས་ཅད་དེ་བཞིན་དུ་ཀུན་ཏུ་གནས་པ་ཡིན་ཏེ། རིགས་ཀྱི་བུ་བྱང་ཆུབ་སེམས་དཔས་དབང་བཞི་པོ་འདི་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་རྫུ་འཕྲུལ་གྱི་རྐང་པ་བཞི་ལ་གནས་པ་ནི། [232a.4]ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་དང་ལྷན་ཅིག་ཏུ་གནས་ཤིང་འདུག་ཅིང་གཏམ་ཟེར་རོ། །དེ་བཞིན་དུ་ཚངས་པ་ཐམས་ཅད་དང་། བརྒྱ་བྱིན་ཐམས་ཅད་དང་། འཇིག་རྟེན་སྐྱོང་བ་ཐམས་ཅད་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། [232a.5]ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་དང་ལྷན་ཅིག་ཏུ་གནས་ཤིང་འདུག་སྟེ་གཏམ་ཟེར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེའི་རྫུ་འཕྲུལ་གྱི་རྐང་པ་དེ་དག་ཤིན་ཏུ་ཡོངས་སུ་སྦྱང་བ་བྱས་པའི་ཕྱིར་རོ། །དེ་ལ་རྫུ་ [232a.6]འཕྲུལ་གྱི་རྐང་པ་རྣམས་ཀྱི་ཡོངས་སུ་སྦྱང་བ་གང་ཞེ་ན། འདི་ལྟ་སྟེ། ལུས་ཡང་བར་བྱ་བའི་ཕྱིར་བླ་མ་དང་སྦྱིན་གནས་རྣམས་ལ་ལྡང་བ་དང་། རིམ་གྲོ་བྱེད་པ་དང་། གུས་པར་སྨ་བ་དང་། ཕྱག་འཚལ་བ་དང་། ཐལ་མོ་སྦྱོར་ཞིང་འཐུན་པར་བྱེད་པ་དང་། ངག་ཡང་བར་བྱ་བའི་ཕྱིར་ [232a.7]བཀའ་བློ་བདེ་ཞིང་འཐུན་པར་འཛིན་ཏེ། ཇི་སྐད་སྨྲས་པ་དེ་བཞིན་དུ་བྱེད་པ་དང་། སེམས་ཡང་བར་བྱ་བའི་ཕྱིར་ང་རྒྱལ་མེད་པ་དང་། ཞེ་འགྲས་པ་མེད་པ་དང་། བླ་མ་ལ་རིམ་གྲོ་བྱེད་ཅིང་གུས་པ་དང་། འདུད་པ་དང་། རབ་ཏུ་འདུད་པ་དང་། སེམས་ལས་སུ་རུང་བ་དང་། སེམས་ [232b] [232b.1]ལ་ཡོངས་སུ་གདུང་བ་མེད་པ་དང་། སྤོང་བ་རྣམས་ལ་བརྩོན་པ་མི་འདོར་བ་དང་། བདེན་པའི་བརྟུལ་ཞུགས་རྫོགས་པར་བྱེད་པ་དང་། མི་ལྷོད་པར་བརྩོན་པ་དང་། དགོས་པ་གྲུབ་པར་བྱེད་པ་དང་། སྙོམ་ལས་མི་བྱེད་པ་དང་། སེམས་མི་ཞུམ་པ་དང་། འདོད་ཆགས་རྣམ་པར་སེལ་བ་དང་། [232b.2]ཞེ་སྡང་ཉེ་བར་ཞི་བར་བྱེད་པ་དང་། གཏི་མུག་གི་མུན་པ་སེལ་བ་དང་། འདོད་པ་མེད་པ་དང་། ཕྲག་དོག་མེད་པ་དང་། སེར་སྣ་དང་བྲལ་བ་དང་། བསམ་པ་དང་ལྷག་པའི་བསམ་པ་ལ་སྦྱོར་བ་དང་། གཞན་གྱི་དགོས་པ་སྒྲུབ་ཅིང་ཁུར་ཁྱེར་བ་དང་། ཉམ་ཆུང་བ་རྣམས་ཀྱི་ཁུར་སྒྲོལ་བ་དང་། [232b.3]འདམ་རྫབ་ལ་སྟེགས་འདོགས་པ་དང་། ཀླུང་ལ་ཟམ་པས་སྒྲོལ་བ་དང་། ཆུ་བོ་ལ་གྲུ་སྦྱོར་བ་དང་། སེམས་ཅན་གྱི་བསམ་པ་ཡོངས་སུ་རྫོགས་པར་བྱེད་པ་དང་། དགའ་བའི་ཚིག་ཐོས་པར་བྱེད་པ་དང་། གཞན་གྱི་ཉེས་པ་མི་གླེང་བ་དང་། ཉེས་པ་བྱུང་བ་རྣམས་གསོ་བར་བྱེད་པ་དང་། འགྱོད་ [232b.4]པ་རྣམས་སེལ་བ་དང་། ཀུན་ནས་ལྡང་བ་རྣམས་རྣམ་པར་སེལ་བ་དང་། ཁམས་གང་གིས་འབྱུང་བ་ཁོང་དུ་ཆུད་པ་དང་། ཕངས་པའི་དངོས་པོ་ཐམས་ཅད་ཡོངས་སུ་གཏོང་བ་དང་། བྱིན་ནས་ཀྱང་འགྱོད་པ་མེད་པ་དང་། སེམས་ཅན་ཐམས་ཅད་ལ་ལྟ་བའི་ཕྱིར་བྱང་ཆུབ་ཏུ་སྔོ་བ་དང་། དད་ [232b.5]པ་སྔོན་དུ་འགྲོ་བ་དང་། གཞན་དག་དགེ་བའི་རྩ་བ་ཡང་དག་པར་འཛིན་དུ་འཇུག་པ་དང་། བདག་བདེ་བ་ལ་མི་ཆགས་པ་དང་། བདེ་བ་གཞན་ལ་སྟོབས་པ་དང་། བདག་གི་རྙེད་པས་ཆོག་ཤེས་པ་དང་། གཞན་གྱི་རྙེད་པ་ལ་ཕྲག་དོག་མེད་པ་དང་། རབ་ཏུ་འབྱུང་བ་ལ་གཞོལ་བ་དང་། གཞན་ [232b.6]དག་ཀྱང་རབ་ཏུ་འབྱུང་བ་ལ་མོས་པར་བྱེད་པ་དང་། བྱས་པ་གཟོ་བ་དང་། བྱས་པ་ཤེས་པ་དང་། མཛའ་བ་བརྟན་པ་དང་། མཛའ་བ་དང་མི་མཛའ་བ་ལ་སེམས་མཉམ་པ་དང་། རྟ་དང་། གླང་པོ་ཆེ་དང་། ཤིང་རྟ་དང་། དཔུང་བུ་ཆུང་སྦྱིན་པ་དང་། ངལ་བ་རྣམས་ཡང་དག་པར་ [232b.7]སྤྲོ་བར་བྱེད་པ་དང་། སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང་། བསླབས་པ་རྣམས་ལ་སྟོན་པ་ཙམ་དུ་ཕངས་པར་འཛིན་པ་དང་། མ་བསླབས་པ་རྣམས་ལ་མི་བརྙས་པ་དང་། དབུལ་པོ་རྣམས་ལ་ལོངས་སྤྱོད་འགེད་པ་དང་། ནད་པ་རྣམས་ཀྱི་གཡོག་བྱེད་པ་དང་། སྨན་ [233a] [233a.1]སྦྱིན་པ་དང་། བྱས་པ་རྣམས་ལ་མི་སྨོད་པ་དང་། དཀོན་མཆོག་གསུམ་ལ་རིམ་གྲོ་བྱེད་པ་དང་། བསྟི་སྟང་བྱེད་པ་དང་། བསྟི་སྟང་མི་བྱེད་པ་རྣམས་ལ་བཏང་སྙོམས་པ་དང་། འཇིག་རྟེན་གྱི་ཆོས་ལས་ཤིན་ཏུ་འདའ་བ་དང་། སྡིག་པ་ཐམས་ཅད་ཤིན་ཏུ་མི་བྱེད་པ་དང་། [233a.2]འཇིག་རྟེན་གྱི་ཆོས་ཐམས་ཅད་ཀྱིས་མི་གོས་པ་དང་། ཡོན་ཏན་ཐམས་ཅད་སྒྲུབ་པ་དང་། བྱང་ཆུབ་ཀྱི་སེམས་སྔོན་དུ་འགྲོ་བ་དང་། དྲན་པ་མི་ཉམས་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་རྫུ་འཕྲུལ་གྱི་རྐང་པ་ཡོངས་སུ་སྦྱང་བའོ། །དེ་ལྟར་རྫུ་འཕྲུལ་གྱི་རྐང་པ་རྣམས་ [233a.3]ཡོངས་སུ་སྦྱངས་ན་བྱང་ཆུབ་ཀྱི་སྙིང་པོའི་བར་དུ་ཉམས་པར་མི་འགྱུར། ཡོངས་སུ་ཉམས་པར་མི་འགྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་རྫུ་འཕྲུལ་གྱི་རྐང་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་དབང་པོའི་སྤྱོད་པ་ཡོངས་སུ་དག་པ་གང་ [233a.4]ཞེ་ན་འདི་ལྟ་སྟེ། མི་འཕྲོགས་པ་དད་པའི་དབང་པོ་དང་། གཞན་གྱི་དྲིང་ལ་མི་འཇོག་པ་བརྩོན་འགྲུས་ཀྱི་དབང་པོ་དང་། བྱང་ཆུབ་ཀྱི་སེམས་མི་བརྗེད་པ་དྲན་པའི་དབང་པོ་དང་། སྙིང་རྗེ་ཆེན་པོ་མི་གཏོང་བ་ཏིང་ངེ་འཛིན་གྱི་དབང་པོ་དང་། ཆོས་ཐམས་ཅད་ཡོངས་སུ་འཛིན་པར་བརྩོན་པ་ཤེས་རབ་ [233a.5]ཀྱི་དབང་པོའོ། །རིགས་ཀྱི་བུ་གཞན་ཡང་སངས་རྒྱས་ཀྱི་ཆོས་ཐམས་ཅད་ལ་མོས་ཤིང་དད་པ་ནི་བྱང་ཆུབ་སེམས་དཔའི་དད་པའི་དབང་པོའོ། །སངས་རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པས་ཡོངས་སུ་མི་སྐྱོ་བ་ནི་བརྩོན་འགྲུས་ཀྱི་དབང་པོའོ། །སངས་རྒྱས་ཀྱི་ཆོས་ཐམས་ཅད་མི་ [233a.6]བརྗེད་པ་ནི་དྲན་པའི་དབང་པོའོ། །སངས་རྒྱས་ཀྱི་ཏིང་ངེ་འཛིན་ཐམས་ཅད་མངོན་པར་སྒྲུབ་པ་ནི་ཏིང་ངེ་འཛིན་གྱི་དབང་པོའོ། །སེམས་ཅན་ཐམས་ཅད་ཀྱི་ཐེ་ཚོམ་གཅད་པར་ཡོངས་སུ་བསྔོས་པ་ནི་ཤེས་རབ་ཀྱི་དབང་པོའོ། །རིགས་ཀྱི་བུ་གཞན་ཡང་སངས་རྒྱས་ཐམས་ཅད་ཀྱི་བྱང་ཆུབ་དང་ [233a.7]བསམ་པ་མི་ཕྱེད་པར་གྱུར་པ་ནི་བྱང་ཆུབ་སེམས་དཔའི་དད་པའི་དབང་པོའོ། །ལྷག་པའི་བསམ་པ་ཁྱད་པར་དུ་འགྲོ་བ་ནི་བརྩོན་འགྲུས་ཀྱི་དབང་པོའོ། །ཡོངས་སུ་བསྔོ་བ་ལ་མཁས་པ་ནི་དྲན་པའི་དབང་པོའོ། །སེམས་ཅན་ཐམས་ཅད་ལ་འོད་ཟེར་མཉམ་པར་གཏོང་བ་ནི་ཏིང་ངེ་ [233b] [233b.1]འཛིན་གྱི་དབང་པོའོ། །སེམས་ཅན་ཐམས་ཅད་ཀྱི་དབང་པོ་ཡོངས་སུ་ཤེས་པ་ནི་ཤེས་རབ་ཀྱི་དབང་པོའོ། །རིགས་ཀྱི་བུ་གཞན་ཡང་སེམས་ཅན་ཐམས་ཅད་ཆགས་པ་ལས་ཤིན་ཏུ་འདའ་བར་བྱེད་པ་ནི་བྱང་ཆུབ་སེམས་དཔའི་དད་པའི་དབང་པོའོ། །སེམས་ཅན་ཐམས་ཅད་ཆགས་པ་ [233b.2]ལས་ཤིན་ཏུ་ཐར་བར་བྱེད་པ་ནི་བརྩོན་འགྲུས་ཀྱི་དབང་པོའོ། །གང་ལ་ཡང་མི་ཆགས་པ་ནི་དྲན་པའི་དབང་པོའོ། །སེམས་ཅན་ཐམས་ཅད་ཀྱི་ཆགས་པ་མཉམ་པ་ཉིད་དུ་ཁོང་དུ་ཆུད་པ་ནི་ཏིང་ངེ་འཛིན་གྱི་དབང་པོའོ། །གང་ཆགས་པ་དང་མི་ཆགས་པ་ཐམས་ཅད་ཤེས་པ་འདི་ནི་ཤེས་ [233b.3]རབ་ཀྱི་དབང་པོའོ། །རིགས་ཀྱི་བུ་གཞན་ཡང་གང་རྙོག་པ་མེད་པར་འགྱུར་བ་འདི་ནི་དད་པའི་དབང་པོའོ། །སེམས་རྙོག་པ་ཅན་དང་བར་བྱེད་པ་གང་ཡིན་པ་དེ་ནི་བརྩོན་འགྲུས་ཀྱི་དབང་པོའོ། །གང་རྙོག་པ་མེད་པའི་ཆོས་ཉིད་ཀྱི་དྲན་པ་མི་འདོར་བ་འདི་ནི་དྲན་པའི་དབང་པོའོ། །གང་སེམས་ [233b.4]རྙོག་པ་མེད་པར་ཏིང་ངེ་འཛིན་དང་སྙོམས་པར་འཇུག་པ་དང་ལྡང་བ་ཤེས་པ་འདི་ནི་ཏིང་ངེ་འཛིན་གྱི་དབང་པོའོ། །གང་རྙོག་པ་མེད་པའི་ཆོས་ཐོབ་པས་རྙོག་པ་ཅན་དུ་གྱུར་པ་རྣམས་རྙོག་པ་མེད་པའི་ཆོས་ཉིད་ལ་རབ་ཏུ་འགོད་པ་འདི་ནི་ཤེས་རབ་ཀྱི་དབང་པོའོ། །རིགས་ཀྱི་བུ་གཞན་ཡང་མི་དགེ་ [233b.5]བའི་ཆོས་ཐམས་ཅད་སྤོང་བ་ནི་བྱང་ཆུབ་སེམས་དཔའི་དད་པའི་དབང་པོའོ། །དགེ་བའི་ཆོས་ཐམས་ཅད་ཡང་དག་པར་སྒྲུབ་པ་ནི་བརྩོན་འགྲུས་ཀྱི་དབང་པོའོ། །དགེ་བའི་ཆོས་བསྒྲུབས་པ་དང་མ་བསྒྲུབས་པ་རྣམས་མི་བརྗེད་པ་ནི་དྲན་པའི་དབང་པོའོ། །གང་ཏིང་ངེ་འཛིན་གྱི་དགའ་བ་དང་བདེ་བ་ [233b.6]མི་འདོད་ཅིང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་བསམ་གཏན་བྱེད་པ་འདི་ནི་ཏིང་ངེ་འཛིན་གྱི་དབང་པོའོ། །གང་དགེ་བ་དང་མི་དགེ་བའི་ཆོས་རྣམས་མཉམ་པ་ཉིད་དུ་སོ་སོར་རང་གིས་ཤེས་པ་འདི་ནི་ཤེས་རབ་ཀྱི་དབང་པོའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དད་ [233b.7]པས་ནི་འདོར་རོ། །བརྩོན་འགྲུས་ཀྱིས་ནི་ཡང་དག་པར་སྒྲུབ་བོ། །དྲན་པས་ནི་ཆུད་མི་གཟོན་ཏོ། །ཏིང་ངེ་འཛིན་གྱིས་ནི་སྲུང་ངོ་། །ཤེས་རབ་ཀྱིས་ནི་རྣམ་པར་འབྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དད་པས་ནི་བདག་ཏུ་འཛིན་པ་རབ་ཏུ་སྤོང་ངོ་། །བརྩོན་འགྲུས་ཀྱིས་ནི་ [234a] [234a.1]བདག་གིར་འཛིན་པ་འདོར་རོ། །དྲན་པས་ནི་འཇིག་ཚོགས་ལ་ལྟ་བ་ལས་ཤིན་ཏུ་འདའོ། །ཏིང་ངེ་འཛིན་གྱིས་ནི་ལྟ་བར་གྱུར་པ་དྲུག་ཅུ་རྩ་གཉིས་འདོར་རོ། །ཤེས་རབ་ཀྱིས་ནི་བག་ཆགས་ཀྱི་མཚམས་སྦྱོར་བར་གྱུར་པའི་ཉོན་མོངས་པ་རྣམས་རབ་ཏུ་སྤོང་སྟེ། རིགས་ཀྱི་བུ་འདི་ནི་ [234a.2]བྱང་ཆུབ་སེམས་དཔའི་དབང་པོའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སྟོབས་ཀྱི་སྤྱོད་པ་ཡོངས་སུ་དག་པ་གང་ཞེ་ན། གང་དབང་པོ་དེ་དག་གིས་ཉེ་བར་བརྟན་ནས་བདུད་ཐམས་ཅད་ཀྱིས་མི་རྫི་བར་འགྱུར་བ་དང་། ཉན་ཐོས་དང་རང་སངས་རྒྱས་ཀྱི་ཐེག་ [234a.3]པ་གཉིས་ཀྱིས་མི་འཕྲོགས་པར་འགྱུར་བ་དང་། ཐེག་པ་ཆེན་པོ་འདི་ལས་ཕྱིར་མི་ལྡོག་པར་འགྱུར་བ་དང་། ཉོན་མོངས་པ་ཐམས་ཅད་ཀྱིས་མི་ཐུལ་བར་འགྱུར་བ་དང་། སྔོན་གྱི་དམ་བཅས་པ་ལ་བརྟན་པར་འགྱུར་བ་དང་། སེམས་ཀྱིས་ཤིན་ཏུ་བརྟན་པར་འགྱུར་བ་དང་། ལུས་ཀྱིས་ [234a.4]སྟོབས་དང་ལྡན་པར་འགྱུར་བ་དང་། དབང་པོ་རྣམས་སྦེད་པར་འགྱུར་བ་དང་། དགྲ་རྣམས་ཀྱིས་མི་ཚུགས་པར་འགྱུར་བ་དང་། ཕས་ཀྱི་རྒོལ་བ་ཐམས་ཅད་ཀྱིས་མི་བསྐྱོད་པར་འགྱུར་བའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་བྱ་བ་མ་ཡིན་པ་མི་བྱེད་ [234a.5]དོ། །བརྩོན་འགྲུས་ཀྱི་སྟོབས་ཀྱིས་ནི་བྱ་བ་བྱེད་དོ། །དྲན་པའི་སྟོབས་ཀྱིས་ནི་བྱས་པའི་ལས་ཆུད་མི་གཟོན་ཏོ། །ཏིང་ངེ་འཛིན་གྱི་སྟོབས་ཀྱིས་ནི་གཟུགས་དང་། སྒྲ་དང་། དྲི་དང་། རོ་དང་རེག་པ་རྣམས་ཀྱིས་རྨ་མི་ཕྱིན་ཏོ། །ཤེས་རབ་ཀྱི་སྟོབས་ཀྱིས་ནི་འགྱོད་པ་དང་། ཀུན་ནས་ལྡང་བ་ [234a.6]ཐམས་ཅད་ལས་ཤིན་ཏུ་འདའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་ཡང་གཞན་ལ་དད་པས་མི་འགྲོའོ། །བརྩོན་འགྲུས་ཀྱི་སྟོབས་ཀྱིས་ནི་བར་མ་དོར་ཞུམ་པར་མི་འགྱུར་རོ། །དྲན་པའི་སྟོབས་ཀྱིས་ནི་གཟུངས་དང་སྤོབས་པ་རབ་ཏུ་འཐོབ་བོ། །ཏིང་ངེ་འཛིན་ [234a.7]གྱི་སྟོབས་ཀྱིས་ནི་མཚུངས་པར་ཆོས་སྟོན་ཏོ། །ཤེས་རབ་ཀྱི་སྟོབས་ཀྱིས་ནི་སེམས་ཅན་ཐམས་ཅད་ཀྱི་ཐེ་ཚོམ་ཐམས་ཅད་གཅོད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་མོས་པའི་སྟོབས་ཡོངས་སུ་རྫོགས་པར་བྱེད་དོ། །བརྩོན་འགྲུས་ཀྱི་ [234b] [234b.1]སྟོབས་ཀྱིས་ནི་རྣམ་པར་གྲོལ་བའི་སྟོབས་ཡོངས་སུ་རྫོགས་པར་བྱེད་དོ། །དྲན་པའི་སྟོབས་ཀྱིས་ནི་རྣམ་པར་གྲོལ་བའི་ཡེ་ཤེས་མཐོང་བའི་སྟོབས་ཡོངས་སུ་རྫོགས་པར་བྱེད་དོ། །ཏིང་ངེ་འཛིན་གྱི་སྟོབས་ཀྱིས་ནི་སེམས་དང་བསམ་པའི་སྟོབས་ཡོངས་སུ་རྫོགས་པར་བྱེད་དོ། །ཤེས་རབ་ [234b.2]ཀྱི་སྟོབས་ཀྱིས་ནི་སེམས་ཅན་ཐམས་ཅད་ཀྱི་སྤྱོད་པ་ཚིམ་པར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་སེར་སྣའི་དྲི་མ་རབ་ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་བདག་གི་བདོག་པ་ཐམས་ཅད་ཡོངས་སུ་གཏོང་ངོ་། །དྲན་པའི་སྟོབས་ [234b.3]ཀྱིས་ནི་བྱང་ཆུབ་ཏུ་ཡོངས་སུ་སྔོའོ། །ཏིང་ངེ་འཛིན་གྱི་སྟོབས་ཀྱིས་ནི་མཉམ་པའི་སེམས་ཀྱིས་འདོར་རོ། །ཤེས་རབ་ཀྱི་སྟོབས་ཀྱིས་ནི་རྣམ་པར་སྨིན་པ་ལ་རེ་བ་མེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་འཆལ་པའི་ཚུལ་ཁྲིམས་ཀྱི་དྲི་མ་རབ་ [234b.4]ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་བསླབ་པ་རྣམས་ལས་མི་འདའོ། །དྲན་པའི་སྟོབས་ཀྱིས་ནི་བྱང་ཆུབ་ཏུ་ཡོངས་སུ་སྔོའོ། །ཏིང་ངེ་འཛིན་གྱི་སྟོབས་ཀྱིས་ནི་དུལ་བ་དང་ཞི་བ་དང་ཅང་ཤེས་ཀྱི་ས་ལ་འགྲོའོ། །ཤེས་རབ་ཀྱི་སྟོབས་ཀྱིས་ནི་མངོན་པར་འདུ་བྱེད་པའི་ཚུལ་ཁྲིམས་རབ་ [234b.5]ཏུ་སྤོང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་གནོད་སེམས་ཀྱི་དྲི་མ་རབ་ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་བཟོད་པ་སྒོམ་མོ། །དྲན་པའི་སྟོབས་ཀྱིས་ནི་བྱང་ཆུབ་ཏུ་ཡོངས་སུ་སྔོའོ། །ཏིང་ངེ་འཛིན་གྱི་སྟོབས་ཀྱིས་ནི་སེམས་ཅན་རྣམས་རྗེས་ [234b.6]སུ་སྲུང་ངོ་། །ཤེས་རབ་ཀྱི་སྟོབས་ཀྱིས་ནི་བདག་དང་སེམས་ཅན་དང་། བཟོད་པ་ལ་རྣམ་པར་མི་རྟོག་གོ །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་ལེ་ལོའི་དྲི་མ་རབ་ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་རྩོམ་པ་ཐམས་ཅད་ཉམས་འོག་ཏུ་ཆུད་པར་ [234b.7]བྱེད་དོ། །དྲན་པའི་སྟོབས་ཀྱིས་ནི་བྱང་ཆུབ་ཏུ་ཡོངས་སུ་སྔོའོ། །ཏིང་ངེ་འཛིན་གྱི་སྟོབས་ཀྱིས་ནི་ལུས་དང་སེམས་ཤིན་ཏུ་སྦྱངས་པ་སྒྲུབ་བོ། །ཤེས་རབ་ཀྱི་སྟོབས་ཀྱིས་ནི་མི་བྱེད་རྣམ་པར་མི་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་རྣམ་པར་གཡེང་ [235a] [235a.1]བའི་དྲི་མ་རབ་ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་བསམ་གཏན་གྱི་ཡན་ལག་རྣམས་ཡང་དག་པར་སྒྲུབ་བོ། །དྲན་པའི་སྟོབས་ཀྱིས་ནི་རྩེ་གཅིག་ཏུ་ཡོངས་སུ་སྔོའོ། །ཏིང་ངེ་འཛིན་གྱི་སྟོབས་ཀྱིས་ནི་ཏིང་ངེ་འཛིན་ལས་མི་གཡོའོ། །ཤེས་རབ་ཀྱི་སྟོབས་ཀྱིས་ [235a.2]ནི་བསམ་གཏན་དེ་ལ་ཆགས་པ་རབ་ཏུ་སྤོང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་འཆལ་པའི་ཤེས་རབ་ཀྱི་དྲི་མ་རབ་ཏུ་སྤོང་ངོ་། །བརྩོན་འགྲུས་ཀྱི་སྟོབས་ཀྱིས་ནི་ཐོས་པ་ཡོངས་སུ་ཚོལ་ལོ། །དྲན་པའི་སྟོབས་ཀྱིས་ནི་ཚུལ་བཞིན་ལ་རབ་ཏུ་སྦྱོར་ [235a.3]རོ། །ཏིང་ངེ་འཛིན་གྱི་སྟོབས་ཀྱིས་ནི་སེམས་ངེས་པར་སེམས་པ་རབ་ཏུ་འཐོབ་བོ། །ཤེས་རབ་ཀྱི་སྟོབས་ཀྱིས་ནི་ནན་ཏན་གྱིས་ཡང་དག་པར་སྒྲུབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དད་པའི་སྟོབས་ཀྱིས་ནི་ནོར་བདུན་རབ་ཏུ་འཐོབ་བོ། །བརྩོན་འགྲུས་ཀྱི་སྟོབས་ཀྱིས་ནི་ [235a.4]བྱང་ཆུབ་ཀྱི་ཡན་ལག་བདུན་རབ་ཏུ་འཐོབ་བོ། །དྲན་པའི་སྟོབས་ཀྱིས་ནི་རྗེས་སུ་དྲན་པ་དྲུག་རབ་ཏུ་འཐོབ་བོ། །ཏིང་ངེ་འཛིན་གྱི་སྟོབས་ཀྱིས་ནི་རྣམ་པར་ཤེས་པ་གནས་པ་བདུན་ལས་ཤིན་ཏུ་འདའོ། །ཤེས་རབ་ཀྱི་སྟོབས་ཀྱིས་ནི་ལོག་པ་ཉིད་དུ་ངེས་པ་བརྒྱད་ལས་ཤིན་ཏུ་འདའོ། །རིགས་ཀྱི་ [235a.5]བུ་གཞན་ཡང་གང་མི་ཕྱེད་ཅིང་སེམས་དང་བསམ་པ་རྙོག་པ་མེད་པ་འདི་ནི་བྱང་ཆུབ་སེམས་དཔའི་དད་པའི་སྟོབས་ཀྱི་སྤྱོད་པ་ཡོངས་སུ་དག་པའོ། །གང་ཕྱིར་མི་ལྡོག་ཅིང་བླང་བ་མེད་ལ་དོར་བ་མེད་པ་འདི་ནི་བརྩོན་འགྲུས་ཀྱི་སྟོབས་ཀྱི་སྤྱོད་པ་ཡོངས་སུ་དག་པའོ། །གང་དྲན་པ་སྔོན་དུ་འགྲོ་ལ་དྲན་ [235a.6]པ་མེད་ཅིང་ཡིད་ལ་བྱེད་པ་མེད་པ་འདི་ནི་དྲན་པའི་སྟོབས་ཀྱི་སྤྱོད་པ་ཡོངས་སུ་དག་པའོ། །གང་སེམས་རབ་ཏུ་དུལ་བས་རང་བཞིན་གྱིས་ཏིང་ངེ་འཛིན་དང་སྙོམས་པར་འཇུག་པ་དང་ལྡང་བ་ཤེས་པ་འདི་ནི་ཏིང་ངེ་འཛིན་གྱི་སྟོབས་ཀྱི་སྤྱོད་པ་ཡོངས་སུ་དག་པའོ། །གང་ལྟ་བ་ཐམས་ཅད་སེལ་བ་ལ་ [235a.7]མཁས་པ་འདི་ནི་ཤེས་རབ་ཀྱི་སྟོབས་ཀྱི་སྤྱོད་པ་ཡོངས་སུ་དག་པའོ། །རིགས་ཀྱི་བུ་གཞན་ཡང་དང་བར་བྱེད་པའི་མཚན་ཉིད་ནི་བྱང་ཆུབ་སེམས་པའི་དད་པའི་སྟོབས་ཀྱི་སྤྱོད་པ་ཡོངས་སུ་དག་པའོ། །ཕྱིར་མི་ལྡོག་པའི་མཚན་ཉིད་ནི་བརྩོན་འགྲུས་ཀྱི་སྟོབས་ཀྱི་སྤྱོད་པ་ཡོངས་སུ་དག་པའོ། ། [235b] [235b.1]མི་བརྗེད་པའི་མཚན་ཉིད་ནི་དྲན་པའི་སྟོབས་ཀྱི་སྤྱོད་པ་ཡོངས་སུ་དག་པའོ། །རྣམ་པར་གཡེང་བ་མེད་པའི་མཚན་ཉིད་ནི་ཏིང་ངེ་འཛིན་གྱི་སྟོབས་ཀྱི་སྤྱོད་པ་ཡོངས་སུ་དག་པའོ། །སོ་སོར་རྟོག་པའི་མཚན་ཉིད་ནི་ཤེས་རབ་ཀྱི་སྟོབས་ཀྱི་སྤྱོད་པ་ཡོངས་སུ་དག་པ་སྟེ། རིགས་ཀྱི་བུ་འདི་ནི་བྱང་ [235b.2]ཆུབ་སེམས་དཔའི་སྟོབས་ཀྱི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་རྣམས་ཞེས་བྱ་བ་ནི་བདུན་ཏེ། བདུན་གང་ཞེ་ན་འདི་ལྟ་སྟེ། དྲན་པ་ཡང་ [235b.3]དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་། དགའ་བ་ཡང་དག་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་ཡང་དག་བྱང་ [235b.4]ཆུབ་ཀྱི་ཡན་ལག་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །དེ་ལ་དྲན་པ་ཡང་དག་བྱང་ཆུབ་ཀྱི་ཡན་ལག་ནི་གང་བྱང་ཆུབ་ཀྱི་ཕྱོགས་ཀྱི་ཆོས་བསགས་ཤིང་བསགས་པ་རྣམས་ཆུད་མི་གཟོན་པ་ཡིན་ཏེ། འདི་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ །ཆོས་རྣམ་ [235b.5]པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་གང་ལྷག་མཐོང་གི་ཚོགས་དང་ཟུང་དུ་འབྲེལ་པར་འགྱུར་བ་ཡིན་ཏེ། འདི་ནི་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་གང་སྤོང་བ་ཁྱད་པར་དུ་འགྲོ་བར་འགྱུར་བ་ཡིན་ཏེ། འདི་ [235b.6]ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གོ །དགའ་བ་ཡང་དག་བྱང་ཆུབ་ཀྱི་ཡན་ལག་ནི་གང་མི་དགའ་བ་སེལ་བར་འགྱུར་བ་ཡིན་ཏེ། འདི་ནི་དགའ་བ་ཡང་དག་བྱང་ཆུབ་ཀྱི་ཡན་ལག་གོ །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་གང་ལུས་དང་སེམས་ཤིན་ཏུ་བྱང་ [235b.7]བར་འགྱུར་བ་ཡིན་ཏེ། འདི་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གོ །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་གང་རྣམ་པར་གྲོལ་བ་སྙིང་པོར་འགྱུར་བ་ཡིན་ཏེ། འདི་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གོ །བཏང་སྙོམས་ཡང་དག་བྱང་ཆུབ་ཀྱི་ [236a] [236a.1]ཡན་ལག་ནི་གང་བྱེད་པ་བྱས་པར་འགྱུར་བ་ཡིན་ཏེ། འདི་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །རིགས་ཀྱི་བུ་གཞན་ཡང་གང་བྱང་ཆུབ་ཀྱི་བསམ་པ་མི་བརྗེད་པ་འདི་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ །གང་དམ་པའི་ཆོས་ཡོངས་སུ་འཛིན་ [236a.2]པ་ལ་བརྩོན་པ་འདི་ནི་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ །གང་སེམས་ཅན་ཡོངས་སུ་སྨིན་པར་བྱེད་པས་ཡོངས་སུ་མི་སྐྱོ་བ་འདི་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གོ །གང་དམ་པའི་ཆོས་ཀྱི་ཀུན་དགའ་ལ་དགའ་བས་གནས་པ་འདི་ནི་དགའ་བ་ [236a.3]ཡང་དག་བྱང་ཆུབ་ཀྱི་ཡན་ལག་གོ །གང་ཤིན་ཏུ་སྦྱངས་པ་ལ་སེམས་ཅན་རྣམས་རབ་ཏུ་འགོད་པ་འདི་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གོ །གང་ཏིང་ངེ་འཛིན་ལ་སེམས་ཅན་རྣམས་རབ་ཏུ་འགོད་པ་འདི་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གོ །གང་མངོན་ [236a.4]སུམ་དུ་ཤེས་པ་བཏང་སྙོམས་པ་ལ་སེམས་ཅན་རྣམས་རབ་ཏུ་འགོད་པ་འདི་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །རིགས་ཀྱི་བུ་གཞན་ཡང་གང་ཉན་ཐོས་དང་རང་སངས་རྒྱས་ཀྱི་ཐེག་པ་གཉིས་དྲན་པ་མེད་ཅིང་ཡིད་ལ་མི་བྱེད་པ་འདི་ནི་དྲན་པ་ཡང་དག་བྱང་ཆུབ་ཀྱི་ཡན་ [236a.5]ལག་གི་སྤྱོད་པ་ཡོངས་སུ་དག་པའོ། །གང་ཆོས་ཐམས་ཅད་ཀྱི་ཚིག་རབ་ཏུ་དབྱེ་བའི་ཡེ་ཤེས་ལ་མཁས་པ་འདི་ནི་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །གང་ལུས་དང་ངག་དང་། ཡིད་ཀྱི་ལས་རྟུལ་བ་འདི་ནི་བརྩོན་འགྲུས་ཡང་ [236a.6]དག་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །གང་རྗེས་སུ་ཆགས་པ་དང་ཁོང་ཁྲོ་བ་སྤོང་བ་འདི་ནི་དགའ་བ་ཡང་དག་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །གང་བྱ་བ་བྱས་པ་དང་བྱེད་པ་བྱས་པ་འདི་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གི་ [236a.7]སྤྱོད་པ་ཡོངས་སུ་དག་པའོ། །གང་འཇིག་རྟེན་གྱི་བྱ་བ་ཐམས་ཅད་ཀྱི་རྗེས་སུ་འཇུག་ཀྱང་གཅིག་ཏུ་སྙོམས་པར་ཞུགས་པར་ཡང་འགྱུར་བ་འདི་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །གང་གཉིས་སུ་མེད་པའི་ཆོས་ལ་རབ་ཏུ་གནས་ཏེ་རྟོག་པ་ [236b] [236b.1]དང་སེལ་བ་མེད་ཅིང་བཏང་སྙོམས་པར་ཡང་ཀུན་ཏུ་སྣང་ལ་སེམས་ཅན་ལ་ཡང་ལྟ་བ་འདི་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་གང་ཆོས་ཐམས་ཅད་ཁོང་དུ་ཆུད་པར་བྱེད་པ་དང་རྗེས་སུ་རྟོགས་པར་བྱེད་པ་ [236b.2]དང་། རབ་ཏུ་ཤེས་པར་བྱེད་པ་དང་། འཇལ་བར་བྱེད་པ་དང་། ཉེ་བར་རྟོག་པ་ཁོང་དུ་ཆུད་ཅིང་སེམས་ཅན་གྱི་སྤྱོད་པ་མཐོ་བ་དང་དམའ་བ་ཐམས་ཅད་རྟོགས་ཏེ། དེ་ལ་གནས་ནས་ཀྱང་ངན་སོང་དུ་འགྱུར་བའི་ལམ་སྒོམ་པ་དང་། དངོས་པོ་དང་དངོས་པོ་མེད་པའི་བག་ལ་ཉལ་བ་དང་། ཀུན་ [236b.3]ནས་དཀྲིས་པ་དང་བྲལ་བ་འདི་དག་ནི་རིགས་ཀྱི་བུ་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་རྣམས་ཞེས་བྱ་སྟེ། འདི་ནི་འཕགས་པ་རྣམས་ཀྱི་སྤྱོད་ཡུལ་ཡིན་གྱི། འཕགས་པ་མ་ཡིན་པ་རྣམས་ཀྱི་ནི་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་བདུད་སྡིག་ཅན་ [236b.4]རྣམས་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་ང་རྒྱལ་ཅན་ཐམས་ཅད་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་ཕས་ཀྱི་རྒོལ་བ་ཐམས་ཅད་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ [236b.5]ཡིན་པ་དེ་ནི་མཚན་མ་ལ་དམིགས་པ་ཐམས་ཅད་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་གཟུགས་དང་། སྒྲ་དང་དྲི་དང་རོ་དང་རེག་པ་དང་། ཆོས་ཐམས་ཅད་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་ཚོར་བ་ [236b.6]ཡོངས་སུ་འཛིན་པ་ཐམས་ཅད་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་སེམས་དང་། ཡིད་དང་རྣམ་པར་ཤེས་པ་རྣམས་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་མཐོང་བ་དང་། ཐོས་པ་དང་། བྱེ་བྲག་ཕྱེད་ [236b.7]པ་དང་། རྣམ་པར་རིག་པའི་ཆོས་རྣམས་ཀྱི་སྤྱོད་ཡུལ་མ་ཡིན་ནོ། །འཕགས་པ་རྣམས་ཀྱི་སྤྱོད་ཡུལ་གང་ཡིན་པ་དེ་ནི་ཐ་ན་མྱ་ངན་ལས་འདའ་བའི་འདུ་ཤེས་ཡིད་ལ་བྱེད་པ་རྣམས་ཀྱི་སྤྱོད་ཡུལ་ཡང་མ་ཡིན་ཏེ། ཆོས་ཐམས་ཅད་ཀྱི་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་ [237a] [237a.1]སྤྱོད་ཡུལ་ལོ། །ཆོས་ཐམས་ཅད་ལ་རྟོག་པ་དང་རྣམ་པར་རྟོག་པ་དང་། ཡོངས་སུ་རྟོག་པའི་སྤྱོད་ཡུལ་མ་ཡིན་པ་ནི་འཕགས་པ་རྣམས་ཀྱི་སྤྱོད་ཡུལ་ལོ། །ཆོས་ཐམས་ཅད་ཀུན་ནས་མི་ལྡང་བའི་སྤྱོད་ཡུལ་ནི་འཕགས་པ་རྣམས་ཀྱི་སྤྱོད་ཡུལ་ལོ། །ཆོས་ཐམས་ཅད་ [237a.2]དང་མི་འཐུན་པའི་སྤྱོད་ཡུལ་ནི་འཕགས་པ་རྣམས་ཀྱི་སྤྱོད་ཡུལ་ལོ། །ཆོས་ཐམས་ཅད་རྩོད་པ་མེད་པའི་སྤྱོད་ཡུལ་ནི་འཕགས་པ་རྣམས་ཀྱི་སྤྱོད་ཡུལ་ལོ། །ཆོས་ཐམས་ཅད་མཚན་མ་མེད་པའི་སྤྱོད་ཡུལ་ནི་འཕགས་པ་རྣམས་ཀྱི་སྤྱོད་ཡུལ་ལོ། །རིགས་ཀྱི་བུ་དེ་ལྟར་གང་ [237a.3]འཕགས་པའི་སྤྱོད་ཡུལ་ཡོངས་སུ་དག་པ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་གི་སྤྱོད་པ་ཡོངས་སུ་དག་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ལམ་གྱི་སྤྱོད་པ་ཡོངས་སུ་དག་པ་གང་ཞེ་ན་འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། [237a.4]ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །ཡང་དག་པའི་ལྟ་བ་ཞེས་སྨོས་པ་དེ་ལ་ཡང་དག་པའི་ལྟ་བ་གང་ཞེ་ན། གང་ཆོས་ཐམས་ཅད་ [237a.5]མཉམ་པ་ཉིད་ནི་ཡང་དག་པའི་ལྟ་བ་ཞེས་བྱ་སྟེ། དེ་བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་དང་། སྟོང་པ་ཉིད་དུ་ལྟ་བ་ཡང་ལྡང་བར་མི་བྱེད་དོ། །དེ་ཅིའི་ཕྱིར་ཞེ་ན། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་ [237a.6]དང་། གང་ཟག་ཏུ་ལྟ་བ་དང་། སྟོང་པ་ཉིད་དུ་ལྟ་བ་དེ་ནི་མཚུངས་སོ། །དེ་ཆད་པར་ལྟ་བ་དང་། རྟག་པར་ལྟ་བ་དང་། སྟོང་པ་ཉིད་དུ་ལྟ་བ་ཡང་ལྡང་བར་མི་བྱེད་དོ། །དེ་ཅིའི་ཕྱིར་ཞེ་ན། ཆད་པར་ལྟ་བ་དང་། རྟག་པར་ལྟ་བ་དང་། སྟོང་པ་ཉིད་དུ་ལྟ་བ་དེ་ནི་མཚུངས་སོ། །དེ་འབྱུང་བར་ [237a.7]ལྟ་བ་དང་། འཇིག་པར་ལྟ་བ་དང་། སྟོང་པ་ཉིད་དུ་ལྟ་བ་ཡང་ལྡང་བར་མི་བྱེད་དོ། །དེ་ཅིའི་ཕྱིར་ཞེ་ན། འབྱུང་བར་ལྟ་བ་དང་། འཇིག་པར་ལྟ་བ་དང་། སྟོང་པ་ཉིད་དུ་ལྟ་བ་དེ་ནི་མཚུངས་སོ། །དེ་འཇིག་ཚོགས་ལ་ལྟ་བ་དང་། ངར་འཛིན་པ་ལྟ་བ་དང་། ང་ཡིར་འཛིན་པར་ལྟ་བ་ [237b] [237b.1]དང་། སྟོང་པ་ཉིད་དུ་ལྟ་བ་ཡང་ལྡང་བར་མི་བྱེད་དོ། །དེ་ཅིའི་ཕྱིར་ཞེ་ན། འཇིག་ཚོགས་ལ་ལྟ་བ་དང་། ངར་འཛིན་པར་ལྟ་བ་དང་། ང་ཡིར་འཛིན་པར་ལྟ་བ་དང་། སྟོང་པ་ཉིད་དུ་ལྟ་བ་དེ་ནི་མཚུངས་སོ། །དེ་སངས་རྒྱས་སུ་ལྟ་བ་དང་། ཆོས་སུ་ལྟ་བ་དང་། དགེ་འདུན་དུ་ལྟ་བ་དང་། [237b.2]སྟོང་པ་ཉིད་དུ་ལྟ་བ་ཡང་ལྡང་བར་མི་བྱེད་དོ། །དེ་ཅིའི་ཕྱིར་ཞེ་ན། སངས་རྒྱས་སུ་ལྟ་བ་དང་། ཆོས་སུ་ལྟ་བ་དང་། དགེ་འདུན་དུ་ལྟ་བ་དང་། སྟོང་པ་ཉིད་དུ་ལྟ་བ་དེ་ནི་མཚུངས་སོ། །རིགས་ཀྱི་བུ་དེ་ལྟར་ན་ལྟ་བའི་དམིགས་པ་ནི་ཇི་ཙམ་དུ་ཆུང་དུ་ན་མྱ་ངན་ལས་འདས་པ་ལ་ལྟ་བའི་ [237b.3]དམིགས་པ་ཡང་རུང་སྟེ། དེ་ཙམ་དུ་ཡང་དག་པའི་ལྟ་བ་མ་ཡིན་ནོ། །གང་ཐ་མ་དང་། རབ་དང་འབྲིང་གི་ལྟ་བར་གྱུར་པ་ཐམས་ཅད་དང་བྲལ་བ་འདི་ནི་ཡང་དག་པའི་ལྟ་བ་ཞེས་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་མཉམ་པར་ལྟའི་མི་མཉམ་པར་མ་ཡིན་ནོ། །ཇི་ལྟར་ན་མཉམ་ [237b.4]པར་ལྟའི་མི་མཉམ་པར་མ་ཡིན་ཞེ་ན། སོ་སོའི་སྐྱེ་བོའི་ཆོས་རྣམས་ནི་དམན་པ། སློབ་པའི་ཆོས་རྣམས་ནི་དམ་པའོ་སྙམ་དུ་གལ་ཏེ་དེ་ལྟར་ལྟ་ན་མི་མཉམ་པར་ལྟ་བའོ། །སོ་སོའི་སྐྱེ་བོའི་ཆོས་རྣམས་ནི་ཟག་པ་དང་བཅས་པ་མི་སློབ་པའི་ཆོས་རྣམས་ནི་ཟག་པ་མེད་པའོ་སྙམ་དུ་གལ་ [237b.5]ཏེ་དེ་ལྟར་ལྟ་ན་མི་མཉམ་པར་ལྟ་བའོ། །སོ་སོའི་སྐྱེ་བོའི་ཆོས་རྣམས་ནི་ཟང་ཟིང་དང་བཅས་པ་རང་སངས་རྒྱས་ཀྱི་ཆོས་རྣམས་ནི་ཟང་ཟིང་མེད་པའོ་སྙམ་དུ་གལ་ཏེ་དེ་ལྟར་ལྟ་ན་མི་མཉམ་པར་ལྟ་བའོ། །སོ་སོའི་སྐྱེ་བོའི་ཆོས་རྣམས་ནི་ཉོན་མོངས་པ་དང་བཅས་པ། བྱང་ཆུབ་སེམས་ [237b.6]དཔའི་ཆོས་རྣམས་ནི་ཉོན་མོངས་པ་མེད་པའོ་སྙམ་དུ་གལ་ཏེ་དེ་ལྟར་ལྟ་ན་མི་མཉམ་པར་ལྟ་བའོ། །སོ་སོའི་སྐྱེ་བོའི་ཆོས་རྣམས་ནི་འདུས་བྱས་ཡིན། སངས་རྒྱས་ཀྱི་ཆོས་རྣམས་ནི་འདུས་མ་བྱས་ཡིན་ནོ་སྙམ་དུ་གལ་ཏེ་དེ་ལྟར་ལྟ་ན་མི་མཉམ་པར་ལྟ་བའོ། །ནམ་སོ་སོའི་སྐྱེ་ [237b.7]བོའི་ཆོས་ཀྱི་རང་བཞིན་གྱིས་ཆོས་ཐམས་ཅད་སློབ་པའི་ཆོས་ཀྱི་རང་བཞིན་གྱི་ངོ་བོ་ཉིད་དུ་མཐོང་སྟེ། དེ་ལྟར་ལྟ་བ་ནི་ཡང་དག་པའི་ལྟ་བ་ཞེས་བྱའོ། །སོ་སོའི་སྐྱེ་བོའི་ཆོས་སྟོང་པ་ཉིད་དང་། མི་སློབ་པའི་ཆོས་སྟོང་པ་ཉིད་མཚུངས་པར་མཐོང་སྟེ། དེ་ལྟར་ལྟ་བ་ནི་ཡང་ [238a] [238a.1]དག་པའི་ལྟ་བ་ཞེས་བྱའོ། །སོ་སོའི་སྐྱེ་བོའི་ཆོས་ཀྱི་རྐྱེན་མཉམ་པ་ཉིད་ཁོང་དུ་ཆུད་པ་དང་། རང་སངས་རྒྱས་ཀྱི་ཆོས་ཀྱི་རྐྱེན་མཉམ་པ་ཉིད་ཁོང་དུ་ཆུད་པ་མཚུངས་པར་མཐོང་སྟེ། དེ་ལྟར་ལྟ་བ་ནི་ཡང་དག་པའི་ལྟ་བ་ཞེས་བྱའོ། །སོ་སོའི་སྐྱེ་བོའི་ཆོས་དབེན་པ་དང་། [238a.2]བྱང་ཆུབ་སེམས་དཔའི་ཆོས་དབེན་པ་ཉིད་མཚུངས་པར་མཐོང་སྟེ། དེ་ལྟར་ལྟ་བ་ནི་ཡང་དག་པའི་ལྟ་བ་ཞེས་བྱའོ། །སོ་སོའི་སྐྱེ་བོའི་ཆོས་ཡོངས་སུ་གྲུབ་པ་མེད་པ་མཉམ་པ་ཉིད་དང་། སངས་རྒྱས་ཀྱི་ཆོས་ཡོངས་སུ་གྲུབ་པ་མེད་པ་མཉམ་པ་ཉིད་མཚུངས་པར་མཐོང་སྟེ། དེ་ལྟར་ [238a.3]ལྟ་བ་ནི་ཡང་དག་པའི་ལྟ་བ་ཞེས་བྱའོ། །གང་མཚུངས་པར་མཐོང་བ་དེ་ཕྱིར་ཡང་གཉིས་ལ་བློ་མི་འཇུག་སྟེ། གང་གཉིས་སུ་མེད་པར་མཐོང་བ་དེ་ཡང་དག་པར་མཐོང་བའོ། །གང་མཚུངས་པར་མཐོང་བ་དེ་ཡང་ཐ་དད་དུ་མི་བྱེད་དོ། །ཐ་དད་མེད་པར་མཐོང་བ་ནི་ཡང་དག་པ་མཐོང་བའོ། ། [238a.4]གང་མཚུངས་པར་མཐོང་བ་དེ་ཐ་མ་དང་འབྲིང་དང་། རབ་ཀྱི་ཆོས་ལ་རྣམ་པར་རྟོག་པ་མི་སྐྱེད་དེ། ཆོས་ཐམས་ཅད་རྣམ་པར་རྟོག་པ་མེད་པར་མཐོང་བ་ནི་ཡང་དག་པ་མཐོང་བའོ། །གང་མཚུངས་པར་མཐོང་བ་ནི་མཐོང་བ་ཅི་ཡང་མེད་དེ་མཐོང་བ་ཅི་ཡང་མེད་པ་ནི་ཡང་དག་པ་མཐོང་ [238a.5]བའོ། །གང་མཚུངས་པར་མཐོང་བ་དེ་ལ་ནི་ཆོས་གང་ཡང་སྣང་བར་མི་འགྱུར་ཏེ། ཆོས་ཐམས་ཅད་སྣང་བ་མེད་པར་མཐོང་བ་དེ་ནི་ཡང་དག་པ་མཐོང་བའོ། །རིགས་ཀྱི་བུ་གང་ཆོས་འདི་དག་དེ་ལྟར་མཐོང་བ་འདི་ནི་ཡང་དག་པ་མཐོང་བའོ། །ཇི་ལྟ་བ་བཞིན་དུ་མཐོང་བ་དང་། [238a.6]མཉམ་པ་ཉིད་དུ་མཐོང་བ་འདི་ནི་ལེགས་པར་གསུངས་པའི་ཆོས་འདུལ་བ་ལ་ཡང་དག་པའི་ལྟ་བ་ཞེས་བྱའོ། །ཡང་དག་པའི་ལྟ་བ་བསྟན་པ་འདི་བཤད་པ་ན་དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་སྟོང་ཕྲག་ [238a.7]མང་པོ་ཞིག་ནི་མཉམ་པ་ཉིད་ཀྱི་ཆོས་ཉིད་ལས་བཟོད་པ་སྐྱེས་སོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་རྟོག་པ་གང་ཞེ་ན། རྟོག་པ་གང་རྟོག་པ་སྤོང་བར་འགྱུར་བའོ། །དེ་ཡང་གང་ཞེ་ན། འདི་ལྟ་སྟེ། ཞི་གནས་ཀྱིས་ཡོངས་སུ་བསྡུས་པའི་ལྷག་མཐོང་ལ་ [238b] [238b.1]མཁས་པ་སྟེ། དེ་ཆོས་གང་ཞིག་ཆོས་གང་དང་ལྡན་སྙམ་དུ་དེ་ཆོས་དེ་དག་ལ་རྣམ་པར་ལྟའོ། །རྣམ་པར་རྟོག་གོ །དེ་ཆོས་ཐམས་ཅད་ཕན་ཚུན་མི་ལྡན་པ་དང་། རབ་ཏུ་ལྡན་པ་མ་ཡིན་པ་དང་། མ་འདྲེས་པར་རབ་ཏུ་ཤེས་ཏེ། དེས་དེ་ལྟར་ཤེས་ནས་མཉམ་པར་ཡང་མི་ [238b.2]རྟོག་ན་གང་མི་མཉམ་པར་རྟོག་པར་འགྱུར་བ་ལྟ་ཅི་སྨོས་ཏེ་དེ་ནི་གནས་མ་ཡིན་ནོ། །དེ་ཆོས་སུ་རྟོག་པ་དང་། ཡོངས་སུ་རྟོག་པ་དང་། རྣམ་པར་རྟོག་པ་ཐམས་ཅད་སྤངས་ཏེ་ཕྱིར་ཡང་མི་རྟོག །རྣམ་པར་མི་རྟོག་པ་འདི་ནི་ཡང་དག་པའི་རྟོག་པ་ཞེས་བྱའོ། །རིགས་ཀྱི་བུ་དེ་ལ་བྱང་ [238b.3]ཆུབ་སེམས་དཔའི་ཡང་དག་པའི་ངག་གང་ཞེ་ན། ཚིག་གང་གིས་བདག་ལ་ཡང་མི་གདུང་ལ་གཞན་ལ་ཡང་མ་ཡིན་པ་དང་། བདག་ཀྱང་ཀུན་ནས་ཉོན་མོངས་པར་མི་བྱེད་ལ་གཞན་ལ་ཡང་མ་ཡིན་པ་དང་། བདག་ལ་ཡང་མི་གནོད་ལ་གཞན་ལ་ཡང་མ་ཡིན་པ་སྟེ། འདི་ནི་ [238b.4]ཡང་དག་པའི་ངག་ཅེས་བྱའོ། །གཞན་ཡང་ཡང་དག་པའི་ངག་ནི་ཚིག་གང་གིས་ཆོས་ཐམས་ཅད་མཉམ་པ་ཉིད་དུ་ངེས་པར་རྟོག་པའོ། །དེའི་ཆོས་ངེས་པར་རྟོག་པ་དེ་ཡང་ཆོས་ངེས་པའི་ཚིག་ངེས་འབྱུང་བ་འདི་ནི་ཡང་དག་པའི་ངག་ཅེས་བྱའོ། །གཞན་ཡང་ཡང་དག་པའི་ངག་ནི་གང་མཛའ་ [238b.5]བ་དང་། མི་མཛའ་བ་རྣམས་ལ་ངག་མཉམ་པ་དང་། ཆོས་ཐམས་ཅད་སྟོང་པའོ་ཞེས་ངག་མཉམ་པ་དང་། ཆོས་ཐམས་ཅད་མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་མི་བྱེད་པ་དང་། མ་སྐྱེས་པ་དང་། མ་བྱུང་བའོ་ཞེས་ངག་མཉམ་པ་དང་། འདུ་བྱེད་ [238b.6]ཐམས་ཅད་མི་རྟག་པའོ། །འདུ་བྱེད་ཐམས་ཅད་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་ངག་མཉམ་པ་དང་། ཆོས་ཐམས་ཅད་ནི་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པ་དང་། [238b.7]བདག་དང་བྲལ་བའོ་ཞེས་ངག་མཉམ་པ་དང་། ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བ་སྟེ། ངོ་བོ་ཉིད་མེད་པའོ་ཞེས་ངག་མཉམ་པ་དང་། རྒྱུ་ཅི་འདྲ་བ་འབྲས་བུ་ཡང་དེ་འདྲའོ་ཞེས་ངག་མཉམ་པའོ། །གཞན་ཡང་ཡང་དག་པའི་ངག་ཅེས་བྱ་བ་ནི་གང་སེམས་ཅན་གཞན་ [239a] [239a.1]རྣམས་དང་། གང་ཟག་གཞན་དག་ཡང་དག་པའི་ཆོས་ལ་འཛུད་པ་དང་། བྱང་ཆུབ་ཡང་དག་པར་འཛིན་དུ་འཇུག་པ་ཡིན་ཏེ་འདི་ནི་ཡང་དག་པའི་ངག་ཅེས་བྱའོ། །དེ་ལ་ཡང་དག་པའི་ངག་ཡོངས་སུ་དག་པ་གང་ཞེ་ན། ངག་ཐམས་ཅད་སངས་རྒྱས་ཀྱིས་ཡོངས་སུ་ཟིན་ [239a.2]པར་འབྱུང་བ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་ཡང་དག་པའི་ངག་ཡོངས་སུ་དག་པ་ཞེས་བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་ལས་ཀྱི་མཐའ་གང་ཞེ་ན། ལས་གང་ལས་ཟད་པར་འགྱུར་གྱི། ལས་མངོན་པར་འདུ་བྱ་བའི་ཕྱིར་མ་ཡིན་པ་དང་། [239a.3]ལས་གང་ཉོན་མོངས་པ་ཉེ་བར་ཞི་བར་འགྱུར་གྱི། ཉོན་མོངས་པ་འབར་བའི་ཕྱིར་མ་ཡིན་པ་དང་། ལས་གང་ཉོན་མོངས་པ་དང་བྲལ་བར་འགྱུར་གྱི། ཉོན་མོངས་པ་སྐྱེ་བའི་ཕྱིར་མ་ཡིན་པ་སྟེ། འདི་ནི་ཡང་དག་པའི་ལས་ཀྱི་མཐའ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་ [239a.4]སེམས་དཔའི་ཡང་དག་པའི་ལས་ཀྱི་མཐའ་ནི་གང་ཆོས་འདི་དག་འདི་ལྟར་རབ་ཏུ་ཤེས་ཤིང་དགེ་བའི་མངོན་པར་འདུ་བྱ་བ་ཐམས་ཅད་མངོན་པར་འདུ་བྱེད་ཀྱང་དེའི་མངོན་པར་འདུ་བྱ་བ་དེ་དག་ཀྱང་གསོབ་ཉིད་དུ་སྣང་བ་དང་། གསོག་ཉིད་དང་། སྙིང་པོ་མེད་པ་ཉིད་དང་། སྟོང་པ་ཉིད་དུ་ [239a.5]སྣང་བ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་རྣམ་པས་མངོན་པར་བསྒྲུབས་པའི་ཡང་དག་པའི་ལས་ཀྱི་མཐའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་འཚོ་བ་གང་ཞེ་ན། འཚོ་བ་གང་བདག་ལ་ཡང་གནོད་པར་མི་འགྱུར། གཞན་ལ་ཡང་གནོད་ [239a.6]པར་མི་འགྱུར། གཉི་ག་ལ་ཡང་གནོད་པར་མི་འགྱུར་བ་སྟེ། འདི་ནི་ཡང་དག་པའི་འཚོ་བ་ཞེས་བྱའོ། །གཞན་ཡང་ཡང་དག་པའི་འཚོ་བ་ནི་འཚོ་བ་གང་ཉོན་མོངས་པ་ཐམས་ཅད་མི་སོགས་པ་སྟེ། འདི་ནི་ཡང་དག་པའི་འཚོ་བ་ཞེས་བྱའོ། །བྱང་ཆུབ་སེམས་དཔའི་ཡང་དག་པའི་ [239a.7]འཚོ་བ་ཞེས་བྱ་བ་ན་གང་སེམས་ཅན་ཐམས་ཅད་ཀྱི་འཚོ་བ་ཡོངས་སུ་དག་པར་འགྱུར་བ་སྟེ། འཚོ་བ་ཡོངས་སུ་དག་པ་དེ་ལ་ཧ་ཅང་ཡང་འདུད་པར་ཡང་མི་བྱེད། མི་འདུད་པར་ཡང་མི་བྱེད་ལ། འཚོ་བ་གང་གིས་བདག་གི་དོན་དང་གཞན་གྱི་དོན་དང་། ཆོས་ཀྱི་དོན་ཡོངས་སུ་རྫོགས་ [239b] [239b.1]པར་འགྱུར་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ཡང་དག་པའི་འཚོ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་རྩོལ་བ་གང་ཞེ་ན། གང་དགེ་ཞིང་ཟབ་པའི་ཆོས་དེ་དག་ཡང་དག་པ་བསྒྲུབ་པའི་ཕྱིར་སེམས་ཡང་དག་པར་རབ་ཏུ་འཛིན་པ་དང་། འདུན་པ་ [239b.2]དང་། བརྩོན་པ་དང་། སྤྲོ་བ་དང་། རྩོམ་པ་དང་། མི་ཞུམ་པ་དང་། ཡང་དག་པའི་ནན་ཏན་གྱིས་མངོན་དུ་བྱེད་པ་སྟེ། འདི་ནི་ཡང་དག་པའི་རྩོལ་བ་ཞེས་བྱའོ། །གཞན་ཡང་ཡང་དག་པའི་རྩོལ་བ་ནི་གང་མཉམ་པར་རྩོལ་གྱི། མི་མཉམ་པར་མ་ཡིན་ནོ། །ཇི་ལྟར་ན་མཉམ་ [239b.3]པར་རྩོལ་གྱི། མི་མཉམ་པར་མ་ཡིན་ཞེ་ན། གང་ཆོས་རྣམས་མཉམ་པར་ཡང་མི་བྱེད་མི་མཉམ་པར་ཡང་མི་བྱེད་ལ་བྱེད་པ་མེད་ཅིང་རྣམ་པར་མི་བྱེད་པའོ། །ཆོས་དེ་དག་གི་ཆོས་ཉིད་དང་ཆོས་གནས་པ་ཉིད་ཇི་ལྟ་བ་དེ་བཞིན་དུ་རྩོལ་བའོ། །ཆོས་དེ་དག་གི་ཡང་དག་པའི་ཆོས་ཉིད་ཇི་ [239b.4]ལྟ་བ་དེ་བཞིན་དུ་རྩོལ་བའོ། །ཆོས་དེ་དག་གི་མཉམ་པ་ཉིད་དང་བྱེ་བྲག་ཏུ་བྱ་བ་མེད་པ་ཇི་ལྟ་བ་དེ་བཞིན་དུ་རྩོལ་བའོ། །ཡང་དག་པའི་རྩོལ་བ་དེ་ཡང་སེམས་ཅན་ཐམས་ཅད་ཀྱི་ལོག་པའི་རྩོལ་བ་སྤང་བའི་ཕྱིར་ཐམས་ཅད་མཁྱེན་པར་ཡོངས་སུ་སྔོ་བ་ཡིན་ཏེ། རིགས་ཀྱི་བུ་འདི་ནི་བྱང་ [239b.5]ཆུབ་སེམས་དཔའི་ཡང་དག་པའི་རྩོལ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་དྲན་པ་གང་ཞེ་ན། གང་བྱང་ཆུབ་ཀྱི་སེམས་དྲན་པ་དང་། སྦྱིན་པ་དྲན་པ་དང་། ཚུལ་ཁྲིམས་དྲན་པ་དང་། བཟོད་པ་དྲན་པ་དང་། བརྩོན་འགྲུས་དྲན་པ་དང་། བསམ་གཏན་ [239b.6]དྲན་པ་དང་། ཤེས་རབ་དྲན་པ་དང་། བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་དྲན་པ་སྟེ། འདི་ནི་ཡང་དག་པའི་དྲན་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ཡང་དག་པའི་དྲན་པ་ནི་ཡང་དག་པའི་དྲན་པ་གང་གིས་ཉོན་མོངས་པ་ཐམས་ཅད་ [239b.7]ཀྱི་སྐབས་མི་འདོད་པ་དང་། དྲན་པ་གང་གིས་བདུད་ཀྱི་ལས་ཐམས་ཅད་ཀྱི་སྐབས་མི་འབྱེད་པ་དང་། དྲན་པ་གང་གིས་ལམ་གོལ་བ་དང་། ལམ་ངན་པར་མི་ལྟུང་བ་དང་། དྲན་པ་སྒོ་བ་ལྟ་བུར་གྱུར་པ་གང་གིས་སེམས་དང་སེམས་ལས་བྱུང་བའི་ཆོས་མི་དགེ་བ་ཐམས་ཅད་ཀྱི་ [240a] [240a.1]སྐབས་མི་འབྱེད་པ་སྟེ། འདི་ནི་ཡང་དག་པའི་དྲན་པ་ཞེས་བྱའོ། །གཞན་ཡང་བྱང་ཆུབ་སེམས་དཔའི་ཡང་དག་པའི་དྲན་པ་ནི་དྲན་པ་གང་གིས་དྲན་པ་ཕུན་སུམ་ཚོགས་པ་དང་། སྐྱོན་མེད་པའི་རིགས་ཐོབ་ཀྱང་འབྲས་བུ་མངོན་སུམ་དུ་མི་བྱེད་པ་སྟེ། རིགས་ཀྱི་བུ་འདི་ [240a.2]ནི་བྱང་ཆུབ་སེམས་དཔའི་ཡང་དག་པའི་དྲན་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ཡང་དག་པའི་ཏིང་ངེ་འཛིན་གང་ཞེ་ན། གང་འཕགས་པའི་རྣམ་པར་ཐར་པར་གྱུར་པའི་ཏིང་ངེ་འཛིན་ཏེ། སྡུག་བསྔལ་གྱི་བདེན་པ་ཡོངས་སུ་ཤེས་པ་དང་འཐུན་པ། ཀུན་འབྱུང་བའི་ [240a.3]བདེན་པ་སྤང་བ་དང་འཐུན་པ། འགོག་པའི་བདེན་པ་མངོན་དུ་བྱ་བ་དང་འཐུན་པ། ལམ་གྱི་བདེན་པ་བསྒོམ་པ་དང་འཐུན་པ་སྟེ། འདི་ནི་ཡང་དག་པའི་ཏིང་ངེ་འཛིན་ཅེས་བྱའོ། །བདག་མཉམ་པ་ཉིད་པས་ཆོས་ཐམས་ཅད་མཉམ་པ་ཉིད་དང་། བདག་རྣམ་པར་དག་པས་ཆོས་ཐམས་ [240a.4]ཅད་རྣམ་པར་དག་པ་དང་། བདག་སྟོང་པ་ཉིད་པས་ཆོས་ཐམས་ཅད་སྟོང་པ་ཉིད་དུ་ཡང་དག་པར་སྙོམས་པར་འཇུག་ལ། གང་དེ་ལྟར་སྙོམས་པར་འཇུག་ཅིང་ཡང་དག་པ་ཉིད་ལ་འཇུག་ཀྱང་ངེས་པར་ཡང་མི་ལྟུང་བ་འདི་ནི་བྱང་ཆུབ་སེམས་དཔའི་ཡང་དག་པའི་ཏིང་ངེ་འཛིན་ཏོ། །ཡང་ [240a.5]དག་པའི་ཏིང་ངེ་འཛིན་གང་གིས་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཐམས་ཅད་མཁྱེན་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་འཚང་རྒྱ་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ཡང་དག་པའི་ཏིང་ངེ་འཛིན་ཅེས་བྱ་སྟེ། འདི་ [240a.6]ནི་བྱང་ཆུབ་སེམས་དཔའི་ལམ་གྱི་སྤྱོད་པ་ཡོངས་སུ་དག་པའོ། །བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡོངས་སུ་དག་པ་འདི་བསྟན་པ་ན་ལྷ་དང་མི་སྲོག་ཆགས་ཉན་ཐོས་ཀྱི་ཐེག་པ་ཅན་ངེས་པར་གྱུར་པ་ལ་མ་ཞུགས་པ་ཁྲི་དྲུག་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ [240a.7]ཏུ་སེམས་སྐྱེས་སོ།། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་ལ་བཀའ་སྩལ་པ། རིགས་ཀྱི་བུ་དེ་ལ་བྱང་ཆུབ་སེམས་དཔའི་མངོན་པར་ཤེས་པའི་སྤྱོད་པ་ [240b] [240b.1]ཡོངས་སུ་དག་པ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ལྷའི་མིག་གི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔ་དང་ལྡན་པ་ཡིན་ཏེ། རྣམ་པ་ལྔ་གང་ཞེ་ན་འདི་ལྟ་སྟེ། ཕྱོགས་བཅུར་རྣམ་པར་ལྟ་བས་སྣང་བ་ཐོབ་པ་དེ་ནི་དེའི་ལྷའི་མིག་ཡིན་ནོ། ། [240b.2]ཕྱོགས་བཅུའི་སངས་རྒྱས་ཐམས་ཅད་ལ་ཡང་དག་པར་ལྟ་བས་མུན་པ་མུན་ནག་དང་བྲལ་བ་དེ་ནི་དེའི་ལྷའི་མིག་ཡིན་ནོ། །སེམས་ཅན་ཐམས་ཅད་ཀྱི་འཆི་འཕོ་དང་། སྐྱེ་བ་ལ་ཡང་དག་པར་ལྟ་བས་ཤིན་ཏུ་ངེས་པར་བརྟགས་པ་དེ་ནི་དེའི་ལྷའི་མིག་ཡིན་ནོ། །ཕྱོགས་བཅུའི་གཟུགས་ [240b.3]སྣང་བ་དང་ཁ་དོག་དང་མཚན་དང་། དབྱིབས་ལ་ཡང་དག་པར་ལྟ་བས་ཤིན་ཏུ་བརྒྱན་པ་དེ་ནི་དེའི་ལྷའི་མིག་ཡིན་ནོ། །རང་གི་གཟི་བརྗིད་གྲུབ་པས་མངོན་པར་འདུ་མི་བྱེད་པའི་མཚན་ཉིད་དུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་ཐམས་ཅད་དང་། ཉན་ཐོས་དང་། རང་སངས་རྒྱས་ [240b.4]ཐམས་ཅད་ཀྱི་སྤྱི་བོར་ཕྱིན་པ་དེ་ནི་དེའི་ལྷའི་མིག་ཡིན་ཏེ། རིགས་ཀྱི་བུ་རྣམ་པ་འདི་ལྔ་ནི་བྱང་ཆུབ་སེམས་དཔའི་ལྷའི་མིག་གི་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །དེ་ལྷའི་རྣ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔ་དང་ལྡན་པ་ཡིན་ཏེ། རྣམ་པ་ [240b.5]ལྔ་གང་ཞེ་ན། གང་གིས་མིའི་སྒྲ་རྣམས་ཐོས་པར་འགྱུར་བ་དང་། མི་མ་ཡིན་པའི་སྒྲ་རྣམས་ཐོས་པར་འགྱུར་བ་དང་། སེམས་ཅན་དམྱལ་བ་པ་དང་། དུད་འགྲོའི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སྒྲ་རྣམས་ཐོས་པར་འགྱུར་བ་དང་། སངས་རྒྱས་ཀྱི་ཆོས་བསྟན་ [240b.6]པའི་སྒྲ་ཐམས་ཅད་ཐོས་པར་འགྱུར་བ་དང་། ཕྱོགས་བཅུའི་སྐད་དང་སྒྲ་ཐམས་ཅད་ཐོས་པར་འགྱུར་བ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་ལྷའི་རྣ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔའོ། །དེ་ཕ་རོལ་གྱི་སེམས་ཤེས་པའི་མངོན་པར་ཤེས་ [240b.7]པའི་སྤྱོད་པ་ཡོངས་སུ་དག་པ་རྣམ་པ་ལྔ་དང་ལྡན་པ་ཡིན་ཏེ། རྣམ་པ་ལྔ་གང་ཞེ་ན། གང་གིས་ལྷ་དང་མི་དང་། སེམས་ཅན་དམྱལ་བ་པ་དང་། དུད་འགྲོའི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱི་སྔོན་གྱི་མཐར་སེམས་སྐྱེས་པ་གང་ཡིན་པ་ [241a] [241a.1]དེ་ཡང་རབ་ཏུ་ཤེས་པ་དང་། ཕྱི་མའི་མཐར་སེམས་སྐྱེ་བར་འགྱུར་བ་གང་ཡིན་པ་དེ་ཡང་རབ་ཏུ་ཤེས་པ་དང་། ད་ལྟར་བྱུང་བའི་དུས་ན་སེམས་སྐྱེ་བ་གང་ཡིན་པ་དེ་ཡང་རབ་ཏུ་ཤེས་པ་དང་། རྒྱུ་དང་། རྐྱེན་དང་། དམིགས་པར་ལྡན་པ་དང་། ངེས་པ་དང་། མ་ངེས་པ་ [241a.2]དང་། ལོག་པ་ཉིད་དུ་ངེས་པ་དང་། ཡང་དག་པ་ཉིད་དུ་ངེས་པའི་སེམས་ཅན་རྣམས་ཀྱི་སེམས་ཀྱི་སྤྱོད་པ་རབ་ཏུ་ཤེས་པ་དང་། འདོད་ཆགས་ལ་སྤྱོད་པ་རྣམས་དང་། ཞེ་སྡང་ལ་སྤྱོད་པ་རྣམས་དང་། གཏི་མུག་ལ་སྤྱོད་པ་རྣམས་དང་། ཆ་མཉམ་པ་ལ་སྤྱོད་པའི་སེམས་ [241a.3]ཅན་རྣམས་ཀྱི་སེམས་ཀྱི་སྤྱོད་པ་རྣམས་རབ་ཏུ་ཤེས་ཏེ། ཤེས་ནས་ཀྱང་དེ་ཁོ་ན་བཞིན་དུ་དེ་དང་འཐུན་པར་ཆོས་སྟོན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་ཕ་རོལ་གྱི་སེམས་ཤེས་པའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔའོ། །དེ་སྔོན་གྱི་གནས་ [241a.4]རྗེས་སུ་དྲན་པའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔ་དང་ལྡན་པ་ཡིན་ཏེ། རྣམ་པ་ལྔ་གང་ཞེ་ན། སེམས་གང་འདོད་ཆགས་ཀྱི་རྒྱུ་ལས་བྱུང་བ་རྣམས་དང་། ཞེ་སྡང་གི་རྒྱུ་ལས་བྱུང་བ་རྣམས་དང་། གཏི་མུག་གི་རྒྱུ་ལས་བྱུང་བ་རྣམས་དང་། དེ་དག་གིས་ [241a.5]ལུས་ཅི་འདྲ་བ་ཡོངས་སུ་བཟུང་བ་དེ་དག་ཀྱང་རྗེས་སུ་དྲན་པ་དང་། སེམས་གང་སྦྱིན་པའི་རྒྱུ་ལས་བྱུང་བ་རྣམས་དང་། ཚུལ་ཁྲིམས་ཀྱི་རྒྱུ་ལས་བྱུང་བ་རྣམས་དང་། བྱམས་པའི་རྒྱུ་ལས་བྱུང་བ་རྣམས་དང་། སྙིང་རྗེའི་རྒྱུ་ལས་བྱུང་བ་རྣམས་དང་། ཏིང་ངེ་འཛིན་གྱི་རྒྱུ་ལས་བྱུང་ [241a.6]བ་རྣམས་དང་། དེ་དག་གིས་ལུས་ཅི་འདྲ་བ་ཡོངས་སུ་བཟུང་བ་དེ་དག་ཀྱང་རྗེས་སུ་དྲན་པ་དང་། སེམས་གང་རྒྱུ་དང་མི་འདྲ་བ་རྣམས་དང་། རྐྱེན་དང་མི་འདྲ་བ་རྣམས་དང་། དམིགས་པ་དང་མི་འདྲ་བ་རྣམས་དང་། དེ་དག་གིས་ལུས་ཅི་འདྲ་བ་ཡོངས་སུ་བཟུང་བ་དེ་དག་ཀྱང་རྗེས་ [241a.7]སུ་དྲན་པ་དང་། སེམས་གང་ལུང་དུ་མ་བསྟན་པ་རྣམས་དང་། མ་རིག་པ་དང་། གཏི་མུག་གིས་ཡང་དག་པར་བསྡུས་པ་རྣམས་དང་། དེ་དག་གིས་ལུས་ཅི་འདྲ་བ་ཡོངས་སུ་བཟུང་བ་དེ་དག་ཀྱང་རྗེས་སུ་དྲན་པ་དང་། དེ་དག་གི་ཚེ་དང་། ཁ་དོག་དང་། གཟུགས་དང་། [241b] [241b.1]གཟི་བརྗིད་དང་། གཡོག་དང་། སྟོབས་དང་། གྲགས་པ་དང་། བརྗོད་པ་དང་། དབང་ཕྱུག་ཅི་འདྲ་བར་གྱུར་པ་དེ་ཡང་རྗེས་སུ་དྲན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་སྔོན་གྱི་གནས་རྗེས་སུ་དྲན་པའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔའོ། ། [241b.2]དེ་རྫུ་འཕྲུལ་བྱ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔ་དང་ལྡན་པ་ཡིན་ཏེ། རྣམ་པ་ལྔ་གང་ཞེ་ན། འདི་ལྟ་སྟེ། ལུས་དང་གཟུགས་ཀུན་ཏུ་སྟོན་པའི་རྫུ་འཕྲུལ་དང་ཚིག་དང་སྐད་རྣམ་པར་རིག་པར་བྱེད་པའི་རྫུ་འཕྲུལ་དང་། སེམས་དང་ཡིད་མངོན་པར་འདུ་ [241b.3]བྱེད་པའི་རྫུ་འཕྲུལ་དང་། སེམས་ཅན་ཐམས་ཅད་ཀྱི་སྐད་དུ་རྣམ་པར་རིག་པར་བྱེད་པའི་རྫུ་འཕྲུལ་དང་། མངོན་དུ་མངོན་པར་འདུ་མི་བྱེད་པའི་རྫུ་འཕྲུལ་ཏེ། རྫུ་འཕྲུལ་བྱ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་འདི་ལྔ་དང་ལྡན་པ་ཡིན་ནོ། །རིགས་ཀྱི་བུ་འདི་ནི་ [241b.4]བྱང་ཆུབ་སེམས་དཔའི་རྫུ་འཕྲུལ་བྱ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པ་རྣམ་པ་ལྔའོ། །རིགས་ཀྱི་བུ་གཞན་ཡང་ཤེས་རབ་ཀྱི་མིག་གིས་བརྟགས་པ་ནི་བྱང་ཆུབ་སེམས་དཔའི་ལྷའི་མིག་གིས་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །རྣམ་པར་ཤེས་པ་རབ་ [241b.5]ཏུ་གནས་པ་ནི་ལྷའི་རྣ་བའི་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །རང་བཞིན་གྱིས་ཡོངས་སུ་དག་པ་རབ་ཏུ་གནས་པ་ནི་ཕ་རོལ་གྱི་སེམས་ཤེས་པའི་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །སྔོན་གྱི་མཐའ་དང་ཕྱི་མའི་མཐའ་ཡོངས་སུ་གཅོད་པར་རབ་ [241b.6]ཏུ་གནས་པ་ནི་སྔོན་གྱི་གནས་རྗེས་སུ་དྲན་པའི་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །མངོན་པར་འདུ་མི་བྱེད་པར་རབ་ཏུ་གནས་པ་ནི་རྫུ་འཕྲུལ་གྱི་རྐང་པའི་མངོན་པར་ཤེས་པའི་སྤྱོད་པ་ཡོངས་སུ་དག་པའོ། །རིགས་ཀྱི་བུ་མངོན་པར་ཤེས་པ་རྣམས་ཞེས་བྱ་བ་དེ་ནི་ཟག་པ་ [241b.7]ཟད་པའི་ཡེ་ཤེས་ཀྱི་ཚིག་{བླ་དགས་,བླ་དྭགས་}སོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་ནི་མངོན་པར་ཤེས་པ་ལྔ་པོ་དེ་དག་གིས་རྣམ་པར་རྩེན་ཅིང་ཟག་པ་ཟད་པའི་ཡེ་ཤེས་ལ་ཡང་གནས་སོ། །རིགས་ཀྱི་བུ་འདི་ལྟ་སྟེ་དཔེར་ན། དཔག་ཚད་བརྒྱ་སྟོང་ཕྲག་བྱེ་བ་བགྲོད་དགོས་པ་ན་ [242a] [242a.1]གྲོང་ཁྱེར་ཆེན་པོ་ཞིག་ཡོད་དེ། གྲོང་ཁྱེར་ཆེན་པོ་དེའི་ལམ་ནི་བགྲོད་པར་དཀའ་ཞིང་རིང་ལ་ཉམ་ང་སྟེ། འཇིགས་པ་དང་བཅས་པ། ཟས་དང་སྐོམ་དང་བཟའ་བ་ཡང་མེད་པ་ཞིག་ལ། གང་གྲོང་ཁྱེར་ཆེན་པོ་དེར་ཕྱིན་པ་དེའི་སྡུག་བསྔལ་ཐམས་ཅད་རྒྱུན་ཆད་པར་ [242a.2]འགྱུར་བ་ཞིག་ཡོད་པ་དང་། དེ་ནས་སྐྱེས་བུ་ལ་ལ་ཞིག་གིས་གྲོང་ཁྱེར་ཆེན་པོ་དེའི་ཡང་དག་པའི་ཡོན་ཏན་དང་བསྔགས་པ་ཐོས་ནས་སྐྱེས་བུ་དེ་ལ་བུ་མཐོང་ན་དགའ་བ། སྡུག་པ་ཡིད་དུ་འོང་བ་མི་འཐུན་པ་མ་ཡིན་པ་གཅིག་ཀྱང་ཡོད་པ་ལས། དེས་བུ་གཅིག་པ་དེ་བོར་ནས་གྲོང་ [242a.3]ཁྱེར་ཆེན་པོ་དེའི་ལམ་དུ་ཞུགས་ཏེ། དེ་སྟོབས་ཀྱི་ཤུགས་དང་བརྩོན་འགྲུས་ཐམས་ཅད་ཀྱིས་སྡུག་བསྔལ་ཐམས་ཅད་ཁྱད་དུ་བསད་དེ། ལམ་རིང་པོ་དེ་འདས་ནས་རྐང་པ་ཡ་གཅིག་ནི་གྲོང་ཁྱེར་ཆེན་པོ་དེའི་སྒོའི་ཐེམ་པ་ལ་བཞག །རྐང་པ་ཡ་གཅིག་ནི་ཕྱི་རོལ་ན་འདུག་པ་ལས་དེས་བུ་ [242a.4]གཅིག་པ་དེ་ཡིད་ལ་དྲན་པར་གྱུར་ནས་དེ་འདི་སྙམ་དུ་སེམས་ཏེ། མ་ལ་ཀྱེ་མའོ་བདག་གིས་བུ་གཅིག་པ་དེ་འདིར་ཁྲིད་དེ་མ་འོངས་པ་ལྟ་ཞིག་སྙམ་ནས། བུ་གཅིག་པ་དེ་སྡུག་པས་གྲོང་ཁྱེར་ཆེན་པོ་དེར་མ་ཞུགས་ཀྱི། ཕྱིར་ཕྱོགས་ནས་དེ་བུ་གཅིག་པ་དེ་ག་ལ་འདུག་པར་སླར་ལོག་ [242a.5]པ་དེ་བཞིན་དུ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འབད་པ་ཆེན་པོ་དང་། བརྩོན་འགྲུས་རྩོམ་པ་ཆེན་པོ་དང་། ལྷག་པའི་བསམ་པ་བརྟན་པའི་ནན་ཏན་གྱིས་མངོན་པར་ཤེས་པ་ལྔ་པོ་རྣམས་བསྐྱེད་དེ། སེམས་ཀྱིས་བསམ་གཏན་དང་མངོན་ [242a.6]པར་ཤེས་པ་ཡོངས་སུ་སྦྱང་བ་བྱས་པ་དེ་ལ་ཟག་པ་ཟད་པའི་ཡེ་ཤེས་མངོན་སུམ་དུ་འགྱུར་རོ། །དེ་སྙིང་རྗེ་ཆེན་པོའི་སེམས་བསྐྱེད་ནས་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་ཟག་པ་ཟད་པའི་ཡེ་ཤེས་འདྲིས་པར་བྱས་པ་ལས་སེམས་ཅན་རྣམས་ལ་ལྟ་བས་ཕྱིར་ཕྱོགས་ [242a.7]ཏེ་སླར་ལོག་ནས་སོ་སོའི་སྐྱེ་བོའི་ས་ན་ཡང་ཀུན་ཏུ་སྣང་ངོ་། །རིགས་ཀྱི་བུ་གྲོང་ཁྱེར་ཞེས་བྱ་བ་དེ་ནི་ཟག་པ་ཟད་པའི་ཡེ་ཤེས་ཀྱི་ཚིག་{བླ་དགས་,བླ་དྭགས་}སོ། །དཔག་ཚད་བརྒྱ་སྟོང་ཕྲག་བྱེ་བ་བགྲོད་དགོས་པ་ཞེས་བྱ་བ་དེ་ནི་འཁོར་བ་དཔག་ཏུ་མེད་པ་ཡོངས་སུ་འཛིན་པའི་ཚིག་{བླ་དགས་,བླ་དྭགས་}སོ། ། [242b] [242b.1]བར་དུ་གཅོད་པ་མང་པོས་བགྲོད་ཅེས་བྱ་བ་དེ་ནི་བདུད་ཀྱི་ལས་འདུན་པ་ཟློག་པའི་བར་ཆད་ཀྱི་ཚིག་{བླ་དགས་,བླ་དྭགས་}སོ། །སྐྱེས་བུ་ཞེས་བྱ་བ་དེ་ནི་བྱང་ཆུབ་སེམས་དཔའི་ཚིག་{བླ་དགས་,བླ་དྭགས་}སོ། །རྐང་པ་ཡ་གཅིག་ནི་གྲོང་ཁྱེར་གྱི་སྒོའི་ཐེམ་པ་ལ་བཞག །རྐང་པ་ཡ་གཅིག་ནི་སྒོའི་ཕྱི་རོལ་དུ་བཞག་ [242b.2]ཅེས་བྱ་བ་དེ་ནི་འདི་ལྟར་བྱང་ཆུབ་སེམས་དཔའི་འདུས་བྱས་དང་འདུས་མ་བྱས་དང་འདྲེས་པའི་སེམས་དང་སེམས་ལས་བྱུང་བ་རྣམས་འཇུག་པའོ། །བུ་གཅིག་པ་དྲན་ནས་གྲོང་ཁྱེར་ཆེན་པོ་དེར་ཞུགས་པ་ལས་ཕྱིར་ཕྱོགས་ཏེ་སླར་ལོག་ཅེས་བྱ་བ་དེ་ནི་འདི་ལྟར་བྱང་ཆུབ་སེམས་དཔའ་ [242b.3]སེམས་ཅན་ཐམས་ཅད་ལ་བུ་གཅིག་པ་བཞིན་དུ་བྱམས་པ་ཉེ་བར་གནས་པར་འགྱུར་བའོ། །དེ་ཟག་པ་ཟད་པའི་སྤྱི་བོར་ཕྱིན་ཀྱང་ཟག་པ་ཡང་མི་སྤོང་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕྱིར་ཕྱོགས་ཤིང་ལྡོག་པར་ཡང་འགྱུར་ཏེ། རིགས་ཀྱི་བུ་བྱང་ཆུབ་སེམས་དཔའ་རྣམས་ [242b.4]ཅི་འདྲ་བའི་ཐབས་མཁས་པས་སེམས་ཅན་རྣམས་ལ་ཆེར་སྙིང་རྗེ་བ་ལ་ལྟོས། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདི་ལྟར་ [242b.5]བྱང་ཆུབ་ལག་མཐིལ་དུ་ཐོབ་པ་ཡང་མི་འཚལ་བར་འཁོར་བ་ཉིད་ཀྱི་རྗེས་སུ་འཇུག་ཅིང་སེམས་ཅན་ཡོངས་སུ་སྨིན་པར་བགྱིད་པས་ཡོངས་སུ་མི་སྐྱོ་བ་ནི་ངོ་མཚར་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་ཞིག་དང་ལྡན་པ་འཁོར་བ་ན་ཡོངས་སུ་མི་སྐྱོ་བ་ [242b.6]ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཉི་ཤུ་དང་ལྡན་ན་འཁོར་བ་ན་ཡོངས་སུ་མི་སྐྱོ་བ་ཡིན་ཏེ། ཆོས་ཉི་ཤུ་གང་ཞེ་ན་འདི་ལྟ་སྟེ། དགེ་བའི་རྩ་བས་ཡང་དག་པར་ཟིན་པའི་བྱམས་པ་ཆེན་པོ་དང་། [242b.7]བྱམས་པ་ཆེན་པོས་ཡང་དག་པར་ཟིན་པའི་སྙིང་རྗེ་ཆེན་པོ་དང་། སྙིང་རྗེ་ཆེན་པོས་ཡང་དག་པར་ཟིན་པའི་སེམས་ཅན་ཡོངས་སུ་སྨིན་པར་བྱེད་པ་དང་། སེམས་ཅན་ཡོངས་སུ་སྨིན་པར་བྱེད་པས་ཡང་དག་པར་ཟིན་པའི་བརྩོན་འགྲུས་དང་། བརྩོན་འགྲུས་ཀྱིས་ཡང་དག་པར་ཟིན་ [243a] [243a.1]པའི་ལྷག་པའི་བསམ་པ་དང་། ལྷག་པའི་བསམ་པས་ཡང་དག་པར་ཟིན་པའི་ཐབས་དང་། ཐབས་ཀྱིས་ཡང་དག་པར་ཟིན་པའི་ཤེས་རབ་དང་། ཤེས་རབ་ཀྱིས་ཡང་དག་པར་ཟིན་པའི་བསམ་གཏན་དང་། བསམ་གཏན་གྱིས་ཡང་དག་པར་ཟིན་པའི་མངོན་པར་ [243a.2]ཤེས་པ་དང་། མངོན་པར་ཤེས་པས་ཡང་དག་པར་ཟིན་པའི་ཡེ་ཤེས་དང་། ཡེ་ཤེས་ཀྱིས་ཡང་དག་པར་ཟིན་པའི་རྟུལ་བ་དང་། རྟུལ་བས་ཡང་དག་པར་ཟིན་པའི་དྲན་པ་དང་། དྲན་པས་ཡང་དག་པར་ཟིན་པའི་བྱང་ཆུབ་ཀྱི་སེམས་ཀྱི་ལྷག་པའི་བསམ་པ་དང་། བྱང་ཆུབ་ [243a.3]ཀྱི་སེམས་ཀྱི་ལྷག་པའི་བསམ་པས་ཡང་དག་པར་ཟིན་པའི་བསྡུ་བའི་དངོས་པོ་བཞི་དང་། བསྡུ་བའི་དངོས་པོ་བཞིས་ཡང་དག་པར་ཟིན་པའི་ཚུལ་ཁྲིམས་ཀྱི་སྡོམ་པ་དང་། ཚུལ་ཁྲིམས་ཀྱི་སྡོམ་པས་ཡང་དག་པར་ཟིན་པའི་ཐོས་པའི་ནན་ཏན་དང་། ཐོས་པའི་ནན་ཏན་གྱིས་ [243a.4]ཡང་དག་པར་ཟིན་པའི་གཟུངས་དང་། གཟུངས་ཀྱིས་ཡང་དག་པར་ཟིན་པའི་སྤོབས་པ་དང་། སྤོབས་པས་ཡང་དག་པར་ཟིན་པའི་བསོད་ནམས་ཀྱི་ཚོགས་དང་། བསོད་ནམས་ཀྱི་ཚོགས་ཀྱིས་ཡང་དག་པར་ཟིན་པའི་ཤེས་རབ་ཀྱི་ཚོགས་ཏེ། རིགས་ཀྱི་བུ་བྱང་ཆུབ་སེམས་ [243a.5]དཔའ་སེམས་དཔའ་ཆེན་པོ་ཆོས་ཉི་ཤུ་པོ་དེ་དག་དང་ལྡན་ན་འཁོར་བ་ན་ཡོངས་སུ་མི་སྐྱོ་བ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་ [243a.6]དཔའ་སེམས་དཔའ་ཆེན་པོ་འཁོར་བ་ན་མཛེས་ཤིང་སྐྱེ་བོ་མང་པོ་ཉེ་བར་འཚོ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བསོད་ནམས་ཀྱིས་བརྒྱན་པའི་ཐོས་པས་ནི་བྱང་ཆུབ་སེམས་དཔའ་འཁོར་བ་ན་མཛེས་སོ། །ཐོས་པས་བརྒྱན་པའི་སྤོབས་པས་ནི་ [243a.7]སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་དྲན་པ་ཉམས་པ་མེད་པ་ཐོབ་པའི་གཟུངས་ཀྱིས་ནི་བྱང་ཆུབ་སེམས་དཔའ་འཁོར་བ་ན་མཛེས་སོ། །ལག་ན་རིན་པོ་ཆེ་མི་ཟད་པའི་ལོངས་སྤྱོད་ཀྱིས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་བྱང་ [243b] [243b.1]ཆུབ་སེམས་དཔའ་བག་ཡོད་པས་ནི་འཁོར་བ་ན་མཛེས་སོ། །ཆོས་སྟོན་པས་ཡོངས་སུ་མི་སྐྱོ་བས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་། བྱང་ཆུབ་སེམས་དཔའ་མཚན་གྱིས་ལེགས་པར་བརྒྱན་པས་ནི་འཁོར་བ་ན་མཛེས་སོ། །ཡེ་ཤེས་ [243b.2]ཀྱིས་བརྒྱན་པས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ཇི་སྐད་སྨྲས་པ་དེ་བཞིན་བྱེད་པས་ནི་འཁོར་བ་ན་མཛེས་སོ། །དེ་བཞིན་དུ་བྱེད་པ་ཉིད་ཀྱིས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་བདོག་པ་ [243b.3]ཐམས་ཅད་ཡོངས་སུ་གཏོང་བས་ནི་བྱང་ཆུབ་སེམས་དཔའ་འཁོར་བ་ན་མཛེས་སོ། །སོ་སོ་ཅི་རིགས་པར་ཆོས་སྟོན་པས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་གཞན་ཡང་ཚུལ་ཁྲིམས་ཡོངས་སུ་དག་པས་ནི་བྱང་ཆུབ་སེམས་དཔའ་འཁོར་བ་ན་མཛེས་སོ། །ཐོས་པ་ [243b.4]ཡོངས་སུ་དག་པས་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་ཇི་ལྟར་བག་ཡོད་པས་བྱང་ཆུབ་སེམས་དཔའ་འཁོར་བ་ན་མཛེས་ཤིང་སྐྱེ་བོ་མང་པོ་ཉེ་བར་འཚོ་བར་འགྱུར་བ་དེ་ཁྱོད་ཀྱིས་རྣམ་གྲངས་འདིས་འདི་ལྟར་རིག་པར་བྱའོ། །རིགས་ཀྱི་བུ་སྔོན་བྱུང་བ་འདས་པའི་དུས་ [243b.5]བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡངས་པ་ཚད་མེད་པ། བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་བསྐལ་པ་དགའ་བར་གྱུར་པ་ཞེས་བྱ་བ་ལ་འཇིག་རྟེན་གྱི་ཁམས་ལྷས་རྣམ་པར་བལྟས་པ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་ [243b.6]པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་ཐམས་ཅད་མངོན་པར་དགའ་བ་ཞེས་བྱ་བ་ [243b.7]འཇིག་རྟེན་དུ་བྱུང་ངོ་། །རིགས་ཀྱི་བུ་ཅིའི་ཕྱིར་བསྐལ་པ་དེ་དགའ་བར་གྱུར་པ་ཞེས་བྱ་ཞེ་ན། རིགས་ཀྱི་བུ་བསྐལ་པ་དེ་ལ་སངས་རྒྱས་སྟོང་ཕྲག་དྲུག་ཅུ་བྱུང་བར་གྱུར་ཏེ། དེ་ན་གནས་གཙང་མའི་རིས་ཀྱི་ལྷ་དག་གིས་ཀྱེ་མའོ་གྲོགས་པོ་དག་འདི་ནི་བསྐལ་པ་བཟང་པོ་ཡིན་ཏེ། [244a] [244a.1]བསྐལ་པ་འདི་ལ་སངས་རྒྱས་སྟོང་ཕྲག་དྲུག་ཅུ་འབྱུང་བར་འགྱུར་རོ་ཞེས་དགའ་བའི་སྒྲ་བསྒྲགས་པ་དང་། དེ་ན་ལྷ་དང་བཅས་པའི་འཇིག་རྟེན་གྱིས་དགའ་བའི་སྒྲ་དེ་ཐོས་སོ། །ཐོས་ནས་ཀྱང་དགའ་བ་དང་དད་པ་དང་མོས་པ་ཆེན་པོ་སྐྱེས་ཏེ། དེ་ནས་ལྷ་དང་མི་དེ་དག་ [244a.2]གིས་ཀྱེ་མའོ་བསྐལ་པ་འདི་ནི་དགའ་བར་གྱུར་པའོ་ཞེས་དེ་སྐད་ཅེས་སྨྲས་པས་དེའི་ཕྱིར་བསྐལ་པ་དེའི་མིང་དགའ་བར་གྱུར་པ་ཞེས་བཏགས་སོ། །རིགས་ཀྱི་བུ་འཇིག་རྟེན་གྱི་ཁམས་དེ་ལྷ་ཐམས་ཅད་ཀྱིས་བལྟས་བརྟགས་ཀྱང་དེ་ངོམས་པར་མི་འགྱུར་བ་དེ་ཙམ་དུ་བལྟ་ན་སྡུག་ཅིང་ [244a.3]དེ་ཙམ་དུ་ཉམས་དགའ་བར་གྱུར་པས་དེའི་ཕྱིར་འཇིག་རྟེན་གྱི་ཁམས་དེ་ལྷས་རྣམ་པར་བལྟས་པ་ཞེས་བྱའོ། །རིགས་ཀྱི་བུ་འཇིག་རྟེན་གྱི་ཁམས་ལྷས་རྣམ་པར་བལྟས་པ་དེའི་གཞི་ནི་ཙན་དན་སྦྲུལ་གྱི་སྙིང་པོ་ཤ་སྟག་སྟེ། སྟོང་གི་འཇིག་རྟེན་གྱི་ཁམས་ཀྱིས་ཙན་དན་སྦྲུལ་གྱི་སྙིང་ [244a.4]པོ་དེའི་ཕྱེ་མ་ཁལ་གཅིག་གི་རིན་དུ་ཡང་མི་བཟོད་དོ། །འཇིག་རྟེན་གྱི་ཁམས་དེ་ནས་སྤོས་ཀྱི་ངད་ལངས་པའི་དྲིས་ནི་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ཏུ་ཁྱབ་བོ། །ཙན་དན་སྦྲུལ་གྱི་སྙིང་པོ་ལས་གྱུར་པའི་ས་ཆེན་པོ་དེ་ལ་འོད་ཟེར་གྱི་དྲ་བ་སྣང་བ་ [244a.5]ཞེས་བྱ་བའི་པད་མ་ཆེན་པོ་ཤ་སྟག་བྱུང་བར་གྱུར་ཏེ། པད་མ་དེ་དག་གི་འོད་ཀྱིས་འཇིག་རྟེན་གྱི་ཁམས་དེ་རྟག་ཏུ་སྣང་བར་གྱུར་ཏོ། །མི་དེ་དག་ཀྱང་ཙན་དན་གྱི་ཕྱེ་མ་ལས་བྱས་པའི་ཁང་པ་བརྩེགས་པ་པུ་ཤུ་དང་། སྒོ་ཁང་དང་། ཁྱམས་དང་། རྟ་བབས་ཀྱིས་ལེགས་པར་བརྒྱན་ [244a.6]པ་ལ་ལོངས་སྤྱོད་པར་གྱུར་ཏོ། །འཇིག་རྟེན་གྱི་ཁམས་དེ་ན་གྲོང་དང་། གྲོང་ཁྱེར་དང་། གྲོང་རྡལ་གནས་པ་མེད་དོ། །མི་དེ་དག་ཐམས་ཅད་ཀྱང་ནམ་མཁའ་ལ་འགྲོའོ། །དེ་དག་མངོན་པར་ཤེས་པ་རབ་ཏུ་ཐོབ་ནས་ནམ་མཁའི་དཀྱིལ་ན་འདུག་པའི་ཁང་པ་བརྩེགས་པ་ [244a.7]དག་གི་ནང་དུ་འཇུག་ཅིང་ནམ་མཁའ་ལ་འགྲོའོ། །འཇིག་རྟེན་གྱི་ཁམས་དེ་ན་མངལ་ན་གནས་པ་ཡང་མེད་དེ། མི་དེ་དག་ཐམས་ཅད་ཀྱང་རྫུས་ཏེ་སྐྱེ་བུ་ཤ་སྟག་གོ །དེ་ན་བུད་མེད་ཀྱི་མིང་ཡང་མི་གྲག་གོ །ངན་སོང་རྣམས་ཀྱང་མེད་དོ། །ངན་འགྲོ་རྣམས་ཀྱང་མེད་དོ། །སྡུག་ [244b] [244b.1]བསྔལ་ཡང་མེད་དོ། །འཇིག་རྟེན་གྱི་ཁམས་དེ་ན་ཁ་ཟས་རགས་པ་ཡང་མེད་དོ། །མི་དེ་དག་ཐམས་ཅད་ཀྱང་མངོན་པར་ཤེས་པ་དང་། བསམ་གཏན་གྱི་དགའ་བའི་ཟས་ཅན་ནོ། །མོས་པ་རླབས་པོ་ཆེས་ཐེག་པ་ཆེན་པོ་ལ་ཞུགས་པ་སྟེ། དེ་ན་ཐེག་པ་གཞན་གྱི་མིང་ཡང་ [244b.2]མེད་དོ། །གང་འཇིག་རྟེན་གྱི་ཁམས་དེའི་མི་དེ་དག་ཐམས་ཅད་ཀྱང་གསེར་གྱི་ཅོད་པན་ཐོགས་ཤིང་དཔུང་རྒྱན་དང་རྣ་ཆས་བརྒྱན་པ། ལྷའི་ཁ་དོག་དང་གཟུགས་དང་ལྡན་པར་གྱུར་པ་ཤ་སྟག་གོ །གང་ཉོན་མོངས་པ་དང་བྲལ་བར་གྱུར་པ་དེ་ཉིད་དེ་དག་གི་རབ་ཏུ་བྱུང་བ་ཡིན་ཏེ། [244b.3]བཅོམ་ལྡན་འདས་དེ་བཞིན་གཤེགས་པ་དེས་བྱང་ཆུབ་སེམས་དཔའ་དེ་དག་ལ་གོས་ངུར་སྨྲིག་ཏུ་བཀའ་སྩལ་པ་ཡང་མེད་དེ། འདི་ལྟར་སེམས་ལ་རྙོག་པ་མེད་པའི་ཕྱིར་རོ། །དེ་བཞིན་གཤེགས་པ་དེ་ཡང་ཚངས་པའི་ཁ་དོག་ལྟ་བུ་སྤྱོད་ལམ་རབ་ཏུ་ཞི་བས་བྱང་ཆུབ་སེམས་དཔའ་ [244b.4]དེ་དག་ལ་ཆོས་སྟོན་ཏོ། །རིགས་ཀྱི་བུ་གང་ཕྱོགས་བཅུའི་བྱང་ཆུབ་སེམས་དཔའ་རྫུ་འཕྲུལ་ཆེ་བ་དེ་དག་ཀྱང་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེ་ལ་བལྟ་བ་དང་། ཕྱག་འཚལ་བ་དང་། བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་ [244b.5]ལྷས་རྣམ་པར་བལྟས་པ་དེར་ལྷགས་ཏེ། སངས་རྒྱས་ཀྱི་ཞིང་དེའི་ཡོན་ཏན་བཀོད་པ་མཐོང་ནས་ངོ་མཚར་དུ་གྱུར་ཏེ། ཆེད་དུ་བརྗོད་པ་ཆེད་དུ་བརྗོད་ཅིང་འདོང་ངོ་། །རིགས་ཀྱི་བུ་དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེ་ནམ་བྱང་ཆུབ་སེམས་དཔའ་དེ་དག་ [244b.6]ལ་ཆོས་སྟོན་པ་དེ་ན་ཏ་ལ་བརྒྱད་ཅུ་སྲིད་དུ་ནམ་མཁའ་ལ་མངོན་པར་འཕགས་ནས་ཚངས་པ་བཀོད་པའི་སེང་གེའི་ཁྲི་ལ་བཞུགས་ཏེ་ཆོས་སྟོན་ཏོ། །རིགས་ཀྱི་བུ་དེ་བཞིན་གཤེགས་པ་དེ་ནི་ཇི་ལྟར་ད་ལྟར་ང་བཞིན་དུ་མང་དུ་སྤྲོས་ཏེ་རྣམ་པར་ཕྱེ་བས་ཆོས་ཀྱི་གཏམ་མི་སྟོན་ཏེ། དེ་བཞིན་ [244b.7]གཤེགས་པ་དེ་ཚིག་དང་ཡི་གེ་ཉུང་ངུས་ཆོས་ཀྱི་གཏམ་མདོར་སྟོན་ཏོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་ནི་ཟུར་ཙམ་གྱིས་གོ་བ་ཤ་སྟག་སྟེ། ཚིག་གཅིག་གིས་ཚིག་བརྒྱ་སྟོང་གི་རྗེས་སུ་འཇུག་པའོ། །དེ་བཞིན་གཤེགས་པ་དེ་ཡང་འདི་ལྟ་སྟེ། ཕ་རོལ་ཏུ་ཕྱིན་པའི་ [245a] [245a.1]སྤྱོད་པ་ཡོངས་སུ་དག་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡོངས་སུ་དག་པ་དང་། མངོན་པར་ཤེས་པ་བསྒྲུབ་པའི་སྤྱོད་པ་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱེད་པའི་སྤྱོད་པ་ཡོངས་སུ་དག་པ་དང་། སྤྱོད་པ་ [245a.2]ཡོངས་སུ་དག་པ་བཞི་པོ་དེ་དག་ཉིད་བྱང་ཆུབ་སེམས་དཔའ་དཀོན་མཆོག་སྐར་མདའ་ལ་བརྩམས་ཏེ་ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེ་ལ། བྱང་ཆུབ་སེམས་དཔའ་ [245a.3]སེམས་དཔའ་ཆེན་པོ་དཀོན་མཆོག་སྐར་མདས་འདི་སྐད་དུ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་འཁོར་བ་ན་མཛེས་ཤིང་སྐྱེ་བོ་མང་པོ་ཉེ་བར་འཚོ་བར་འགྱུར་ཞེས་གསོལ་ཏེ། དེ་བཞིན་གཤེགས་པ་དེས་ཚིག་དེ་ཉིད་རྒྱས་པར་རྣམ་པར་ཕྱེ་སྟེ་བསྟན་ནས། དེ་ [245a.4]ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་ཡེ་ཤེས་ཀྱི་བློ་ཐོགས་པ་མེད་པ་ནི་འཁོར་བ་ན་མཛེས་སོ། །ཡེ་ཤེས་ཀྱི་སྣང་བ་རབ་ཏུ་ཐོབ་པ་ནི་སྐྱེ་བོ་མང་པོ་ཉེ་བར་འཚོ་བར་འགྱུར་རོ། །རིགས་ཀྱི་བུ་དེ་བཞིན་གཤེགས་པ་འཇིག་རྟེན་ཐམས་ཅད་ [245a.5]མངོན་པར་དགའ་བ་དེས་བསྟན་པ་དེ་ལྟ་བུ་བཤད་པ་ན། བྱང་ཆུབ་སེམས་དཔའ་སྟོང་ཕྲག་དྲུག་ཅུ་ཆོས་རྣམས་ལ་རྗེས་སུ་འཐུན་པའི་བཟོད་པ་རབ་ཏུ་ཐོབ་བོ། །རིགས་ཀྱི་བུ་དེ་ནས་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེ་ལ་ [245a.6]བྱང་ཆུབ་སེམས་དཔའ་སེམས་དཔའ་ཆེན་པོ་དཀོན་མཆོག་སྐར་མདའ་དེས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཛེས་པར་བགྱིད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ [245a.7]དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དཀོན་མཆོག་སྐར་མདའ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་བག་ཡོད་པ་ནི་བྱང་ཆུབ་ཀྱི་སྙིང་པོ་མཛེས་པར་བྱེད་ [245b] [245b.1]པའོ། །དེ་ལ་བག་ཡོད་པ་གང་ཞེ་ན། ཇི་ཙམ་དུ་ཆོས་རྣམས་སྒྲུབ་པའོ། །ཆོས་རྣམས་སྒྲུབ་པ་ཡང་གང་ཞེ་ན། འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་སྟེ། འདི་ནི་བག་ཡོད་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་བག་ [245b.2]ཡོད་པ་ནི་འདི་ལྟ་སྟེ། སྦྱོར་བ་ཚད་མེད་པ་མཐར་གཏུགས་པས་གོ་ཆ་རྩོམ་པ་ཚད་མེད་པ་དང་། སེམས་ཅན་ཚད་མེད་པ་སྡུད་པས་སྦྱིན་པ་མི་ཟད་པ་ཚད་མེད་པ་དང་། མི་ལྷོད་ཅིང་སངས་རྒྱས་ཀྱི་རིགས་ཀྱི་རྗེས་སུ་འབྲང་བའི་ཚུལ་ཁྲིམས་ཀྱིས་ཚུལ་ཁྲིམས་ཚད་ [245b.3]མེད་པ་དང་། སྡུག་བསྔལ་ཐམས་ཅད་དང་དུ་ལེན་པས་བཟོད་པ་ཚད་མེད་པ་དང་། སྐྱེས་བུ་དམ་པའི་ལས་ཀྱིས་བརྩོན་འགྲུས་ཚད་མེད་པ་དང་། ཏིང་ངེ་འཛིན་ཚད་མེད་པ་སྒྲུབ་པས་བསམ་གཏན་ཚད་མེད་པ་དང་། ཆགས་པ་མེད་པའི་ཤེས་རབ་ཀྱི་ [245b.4]ཕྱིར་ཤེས་རབ་ཚད་མེད་པ་དང་། སེམས་ཅན་ཚད་མེད་པས་བྱམས་པ་ཚད་མེད་པ་དང་། ཕན་པའི་དངོས་པོས་སྙིང་རྗེ་ཚད་མེད་པ་དང་། སངས་རྒྱས་ཀྱི་ཆོས་ཡང་དག་པར་སྒྲུབ་པས་འཁོར་བ་ཡོངས་སུ་འཛིན་པ་ཚད་མེད་པ་དང་། བདག་བདེ་བ་ལ་ [245b.5]མི་ཆགས་པས་སེམས་ཅན་ཡོངས་སུ་སྨིན་པར་བྱེད་པ་ཚད་མེད་པ་དང་། བརྩོན་འགྲུས་བརྟན་པས་དམ་པའི་ཆོས་ཡོངས་སུ་འཛིན་པ་ཚད་མེད་པ་དང་། ཡང་དག་པར་སྦྱོར་བས་ཡོན་ཏན་ཡང་དག་པར་སྒྲུབ་ཅིང་སོགས་པ་ཚད་མེད་པ་དང་། ཡེ་ཤེས་ཚད་ [245b.6]མེད་པས་སངས་རྒྱས་ལ་མཆོད་པ་དང་རིམ་གྲོ་བྱེད་པ་ཚད་མེད་པ་དང་། ཤེས་རབ་སྦྱོང་བས་ཐོས་པ་ཡོངས་སུ་ཚོལ་བ་ཚད་མེད་པ་དང་། སེམས་ཅན་གྱི་བསམ་པའི་ཚུལ་ཤེས་པས་སེམས་ལ་འཇུག་པ་ཚད་མེད་པ་དང་། བྱམས་པ་ངེས་པས་སྦྱངས་པའི་ཡོན་ [245b.7]ཏན་དང་ཡོ་བྱད་བསྙུངས་པ་ལ་ཞུགས་པ་ཚད་མེད་པ་དང་། སེམས་འདུལ་བས་དགོན་པ་ལ་གནས་པའི་ཡོན་ཏན་གྱི་ཚོགས་ཚད་མེད་པ་དང་། མྱུར་དུ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་བས་ཞི་གནས་དང་ལྷག་མཐོང་གི་ཚོགས་ཚད་མེད་པ་ [246a] [246a.1]སྟེ། དཀོན་མཆོག་སྐར་མདའ་ཆོས་འདི་དག་ནི་བག་ཡོད་པ་སྒྲུབ་པའོ། །རིགས་ཀྱི་བུ་བྱང་ཆུབ་སེམས་དཔའ་བག་ཡོད་པ་ནི་བྱང་ཆུབ་ཀྱི་སྙིང་པོ་མཛེས་པར་བྱེད་པའོ། །རིགས་ཀྱི་བུ་བག་ཡོད་པ་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་རྩ་བའོ། ། [246a.2]བག་ཡོད་པ་ནི་ཡེ་ཤེས་སྒྲུབ་པའི་ཆོས་རྣམས་ཀྱི་གནས་སོ། །བག་ཡོད་པ་ནི་དགེ་བའི་ཆོས་བསགས་ཤིང་བསགས་པ་རྣམས་སོ་སོར་ཡང་དག་པར་འཛིན་པའོ། །བག་ཡོད་པ་ནི་སྔོན་ཐོས་པའི་ཆོས་རྣམས་ཆུད་མི་གཟོན་པའོ། །བག་ཡོད་པ་ནི་བསྡུ་བར་ [246a.3]བྱ་བའི་ཆོས་རྣམས་སྡུད་པའོ། །བག་ཡོད་པ་ནི་སྒྲིབ་པའི་ཆོས་རྣམས་མི་སྡུད་པའོ། །བག་ཡོད་པ་ནི་སྒྲིབ་པར་མི་འགྱུར་བའི་ཆོས་རྣམས་རབ་ཏུ་འཛིན་པའོ། །བག་ཡོད་པ་ནི་མ་རིག་པའི་སྒོ་ངའི་སྦུབས་གཅོག་པའོ། །བག་ཡོད་པ་ནི་དམ་པའི་ཆོས་ཡོངས་སུ་ [246a.4]འཛིན་པ་འབར་བར་བྱེད་པའོ། །བག་ཡོད་པ་ནི་དབང་པོ་རྣམས་སྡོམ་པར་བྱེད་པའོ། །བག་ཡོད་པ་ནི་ལམ་ཉམ་ང་བ་ལས་ཀུན་ཏུ་སྲུང་བའོ། །བག་ཡོད་པ་ནི་དུས་དང་དུས་མ་ཡིན་པར་སྤྱོད་པ་ལས་སྐུལ་བའོ། །བག་ཡོད་པ་ནི་སྟོབས་ཏེ། སྟོབས་བཅུ་ [246a.5]ཡོངས་སུ་རྫོགས་པར་བྱེད་པར་འགྱུར་རོ། །བག་ཡོད་པ་ནི་ཟིལ་གྱིས་གནོན་པ་སྟེ་མི་འཇིགས་པ་ཡོངས་སུ་རྫོགས་པར་བྱེད་པར་འགྱུར་རོ། །བག་ཡོད་པ་ནི་ཡོན་ཏན་དང་ཡེ་ཤེས་དཔག་ཏུ་མེད་པའི་འབྱུང་གནས་ཏེ། སངས་རྒྱས་ཀྱི་ཆོས་ཐམས་ཅད་ཡོངས་ [246a.6]སུ་རྫོགས་པར་བྱེད་པར་འགྱུར་རོ། །བག་ཡོད་པ་ནི་སྤྱི་བོར་ཕྱིན་པ་སྟེ། ཐམས་ཅད་མཁྱེན་པའི་ཡེ་ཤེས་རྟོགས་པར་བྱེད་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པ་འཇིག་རྟེན་ཐམས་ཅད་མངོན་པར་དགའ་བ་དེས་འདི་ལྟ་བུ་བསྟན་པ་དང་། བྱང་ [246a.7]ཆུབ་སེམས་དཔའ་སྟོང་ཕྲག་བཅུ་གཉིས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན། བྱང་ཆུབ་སེམས་དཔའ་དཀོན་མཆོག་སྐར་མདར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་འམ། ཡིད་གཉིས་ [246b] [246b.1]སུ་གྱུར་ན་ཡང་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཁྱོད་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་དཀོན་མཆོག་སྐར་མདའ་ཞེས་བྱ་བར་གྱུར་ཏོ། །རིགས་ཀྱི་བུ་ཁྱོད་རྣམ་གྲངས་འདིས་ཀྱང་ཇི་ལྟར་བག་ཡོད་པའི་བྱང་ཆུབ་སེམས་དཔའ་སེམས་ [246b.2]དཔའ་ཆེན་པོ་བྱང་ཆུབ་ཀྱི་སྙིང་པོ་མཛེས་པར་བྱེད་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་ཀྱང་བག་ཡོད་པས་ཐོབ་པར་རིག་པར་བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སེམས་ཅན་ཡོངས་སུ་ [246b.3]སྨིན་པར་བྱེད་པའི་སྤྱོད་པ་ཡོངས་སུ་དག་པ་གང་ཞེ་ན། རིགས་ཀྱི་བུ་སེམས་ཅན་གྱི་སྤྱོད་པ་ནི་ཚད་མེད་མཐའ་ཡས་བསམ་གྱིས་མི་ཁྱབ་སྟེ། དེ་བཞིན་དུ་བྱང་ཆུབ་སེམས་དཔའ་སེམས་ཅན་ཡོངས་སུ་སྨིན་པར་བྱེད་པའི་སྤྱོད་པ་ཡང་ཚད་མེད་མཐའ་ཡས་བསམ་གྱིས་མི་ཁྱབ་ [246b.4]བོ། །དེ་ལ་བྱང་ཆུབ་སེམས་དཔའ་སེམས་ཅན་རྣམས་ཀྱི་བསམ་པ་ཤེས་ནས་སེམས་ཅན་རྣམས་ཡོངས་སུ་སྨིན་པར་བྱེད་ནུས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལྟར་སེམས་ཅན་ལ་ལ་ནི་ཚུལ་ཁྲིམས་ཀྱིས་ཡོངས་སུ་སྨིན་པར་འགྱུར། ལ་ལ་ནི་ཚུལ་ [246b.5]ཁྲིམས་སྤངས་པས། སེམས་ཅན་ལ་ལ་ནི་ཚིག་གིས་ཤིན་ཏུ་གདམས་པས་ཡོངས་སུ་སྨིན་པར་འགྱུར། ལ་ལ་ནི་འཇམ་པོས། ལ་ལ་ནི་ཚིག་རྩུབ་པོས། ལ་ལ་ནི་དེ་གཉི་གས། ལ་ལ་ནི་འཇིགས་པར་བྱས་པས། ལ་ལ་ནི་འཇིགས་པ་ལས་ཡོངས་སུ་ཐར་ [246b.6]བར་བྱས་པས། ལ་ལ་ནི་བསླངས་པས། ལ་ལ་ནི་མ་བསླངས་པས། ལ་ལ་ནི་གནོད་པས་ལ་ལ་ནི་མི་གནོད་པས། ལ་ལ་ནི་ཟིལ་གྱིས་མནན་པས། ལ་ལ་ནི་ཟིལ་གྱིས་མ་མནན་པས། ལ་ལ་ནི་སྦྱང་བས། ལ་ལ་ནི་མི་སྦྱང་བས། ལ་ལ་ནི་ [246b.7]ཚར་གཅད་པས། ལ་ལ་ནི་སྦྱིན་པའི་ཕྱིར་བྱིན་པས། ལ་ལ་ནི་བླངས་པས། སེམས་ཅན་ལ་ལ་ནི་ཡིད་དུ་འོང་བའི་གཟུགས་ཉེ་བར་བསྒྲུབས་པས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་སྒྲ་དང་། དྲི་དང་། རོ་དང་། རེག་པ་དང་། ཆོས་ [247a] [247a.1]ཡིད་དུ་འོང་བ་ཉེ་བར་བསྒྲུབས་པས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་གཟུགས་ཡིད་དུ་མི་འོང་བ་ཉེ་བར་བསྒྲུབས་པས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་སྒྲ་དང་། དྲི་དང་། རོ་དང་། རེག་པ་དང་། ཆོས་ཡིད་དུ་མི་འོང་བ་ཉེ་བར་ [247a.2]བསྒྲུབས་པས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་སྤྱོ་བས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་རྟག་ཏུ་མཐོང་བས། ལ་ལ་ནི་མི་མཐོང་བས། སེམས་ཅན་ལ་ལ་ནི་སངས་རྒྱས་ཀྱི་སྒྲས། སེམས་ཅན་ལ་ལ་ནི་ཆོས་ཀྱི་སྒྲས། ལ་ [247a.3]ལ་ནི་དགེ་འདུན་གྱི་སྒྲས། ལ་ལ་ནི་མི་རྟག་པའི་སྒྲས། ལ་ལ་ནི་སྡུག་བསྔལ་བའི་སྒྲས། ལ་ལ་ནི་བདག་མེད་པའི་སྒྲས། ལ་ལ་ནི་ཞི་བའི་སྒྲས། སེམས་ཅན་ལ་ལ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་ [247a.4]གཏན་དང་། ཤེས་རབ་ཀྱི་སྒྲས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་མྱོང་བར་འགྱུར་བའི་སྒྲས་ཡོངས་སུ་སྨིན་པར་འགྱུར་རོ། །ལ་ལ་ནི་ལྷའི་ [247a.5]བདེ་བ་མྱོང་བར་འགྱུར་བའི་སྒྲས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་ཉན་ཐོས་ཀྱི་ཐེག་པའི་གཏམ་གྱིས། ལ་ལ་ནི་རང་སངས་རྒྱས་ཀྱི་ཐེག་པའི་གཏམ་གྱིས། ལ་ལ་ནི་ཐེག་པ་ཆེན་པོའི་གཏམ་གྱིས་ཡོངས་སུ་སྨིན་པར་འགྱུར་རོ། །སེམས་ [247a.6]ཅན་ལ་ལ་ནི་སྦྱིན་པས་ཡོངས་སུ་སྨིན་པར་འགྱུར་གྱི། སྙན་པར་སྨྲ་བས་མ་ཡིན། དོན་སྤྱོད་པས་མ་ཡིན། དོན་འཐུན་པས་མ་ཡིན། སེམས་ཅན་ལ་ལ་ནི་སྙན་པར་སྨྲ་བས་ཡོངས་སུ་སྨིན་པར་འགྱུར་གྱི། སྦྱིན་པས་མ་ཡིན། དོན་སྤྱོད་པས་མ་ཡིན། [247a.7]དོན་འཐུན་པས་མ་ཡིན། སེམས་ཅན་ལ་ལ་ནི་དོན་སྤྱོད་པས་ཡོངས་སུ་སྨིན་པར་འགྱུར་གྱི། སྦྱིན་པས་མ་ཡིན། སྙན་པར་སྨྲ་བས་མ་ཡིན། དོན་འཐུན་པས་མ་ཡིན། སེམས་ཅན་ལ་ལ་ནི་དོན་འཐུན་པས་ཡོངས་སུ་སྨིན་པར་འགྱུར་གྱི། སྦྱིན་པས་ [247b] [247b.1]མ་ཡིན། སྙན་པར་སྨྲ་བས་མ་ཡིན། དོན་སྤྱོད་པས་ཡོངས་སུ་སྨིན་པར་འགྱུར་བ་མ་ཡིན། སེམས་ཅན་ལ་ལ་ནི་བསྡུ་བའི་དངོས་པོ་བཞི་པོ་དག་གིས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་ནང་གི་དངོས་པོ་ཡོངས་སུ་གཏོང་བས། ལ་ལ་ནི་ཕྱི་ [247b.2]རོལ་གྱི་དངོས་པོ་ཡོངས་སུ་གཏོང་བས། ལ་ལ་ནི་ཕྱི་ནང་གི་དངོས་པོ་ཡོངས་སུ་གཏོང་བས། སེམས་ཅན་ལ་ལ་ནི་ཆུང་མ་དང་། བུ་ཕོ་དང་། བུ་མོ་ཀུན་གཏོང་བས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་ལག་པ་དང་། རྐང་པ་དང་། མིག་ [247b.3]དང་། མགོ་ཀུན་གཏོང་བས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལ་ནི་རྩེད་མོ་ལ་དགའ་བ་དང་། གླུ་དང་སིལ་སྙན་གྱིས་ཡོངས་སུ་སྨིན་པར་འགྱུར་རོ། །ལ་ལ་ནི་གཅིག་ཏུ་བདེ་བས། ལ་ལ་ནི་གཅིག་ཏུ་སྡུག་བསྔལ་བས། ལ་ལ་ནི་དེ་གཉི་གས། [247b.4]ལ་ལ་ནི་གཉི་ག་མ་ཡིན་པས། སེམས་ཅན་ལ་ལ་ནི་དགེ་སྦྱོང་དུ་སྤྲུལ་པས་འདུལ་བ། སེམས་ཅན་ལ་ལ་ནི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མར་སྤྲུལ་པས་འདུལ་བ། སེམས་ཅན་ལ་ལ་ནི་སངས་རྒྱས་ཀྱི་གཟུགས་ [247b.5]དང་ཁ་དོག་གིས་འདུལ་བ་ཡིན་ཏེ། དེ་དག་ལ་སངས་རྒྱས་ཀྱི་གཟུགས་དང་སྐུ་བསྟན་པས་འདུལ་བར་འགྱུར་རོ། །རིགས་ཀྱི་བུ་དེ་ལ་བྱང་ཆུབ་སེམས་དཔས་འདི་ལྟར་སེམས་ཅན་གྱི་སྤྱོད་པ་སྣ་ཚོགས་བྱེད་པ་ཤེས་ནས། སེམས་ཅན་གྱི་བསམ་པ་ཡོངས་སུ་ཤེས་ [247b.6]པ་ལ་བརྩོན་པར་བྱའོ། །རིགས་ཀྱི་བུ་ནམ་བྱང་ཆུབ་སེམས་དཔའ་འདི་ལྟར་ཕ་རོལ་ཏུ་ཕྱིན་པའི་སྤྱོད་པ་ལས་ངེས་པར་བྱུང་བར་གྱུར་ཅིང་། བྱང་ཆུབ་ཀྱི་ཕྱོགས་ཀྱི་ཆོས་ཀྱི་སྤྱོད་པ་ཡང་དག་པར་བསྡུས་པར་གྱུར་ཏེ་མངོན་པར་ཤེས་པའི་ཡེ་ཤེས་ཀྱི་སྤྱོད་པ་ལ་མཁས་པར་གྱུར་པ་ན། [247b.7]དེ་ནས་གདོད་སེམས་ཅན་ཡོངས་སུ་སྨིན་པར་བྱེད་ནུས་པའི་སྐལ་བ་དང་མཐུ་ཡོད་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་ཏེ། བཞི་གང་ཞེ་ན་འདི་ལྟ་སྟེ། ཡོངས་སུ་མི་སྐྱོ་བ་དང་། [248a] [248a.1]བདག་བདེ་བ་ལ་མི་ཆགས་པ་དང་། དུས་དང་དུས་མ་ཡིན་པར་སྐུལ་བ་དང་། བསམ་པ་ཡོངས་སུ་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་སོ། །རིགས་ [248a.2]ཀྱི་བུ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་ཏེ། བཞི་གང་ཞེ་ན། བཀའ་བློ་བདེ་བ་དང་། སྙན་པར་སྨྲ་བ་དང་། ངང་ཚུལ་གྱིས་འཇམ་པ་དང་། བཞིན་འཛུམ་ཞིང་ཁྲོ་གཉེར་མེད་པ་སྟེ། རིགས་ [248a.3]ཀྱི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་ཏེ། བཞི་གང་ཞེ་ན། ཁོང་ཁྲོ་བ་ [248a.4]མེད་པའི་སེམས་དང་། སྙིང་རྗེ་ཆེན་པོའི་སེམས་དང་། ཕན་པའི་དངོས་པོའི་སེམས་དང་། བདག་ཤིན་ཏུ་དུལ་བའི་སེམས་ཏེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་སོ། །རིགས་ཀྱི་ [248a.5]བུ་གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་ཏེ། བཞི་གང་ཞེ་ན། བསམ་པ་དག་པ་དང་། གཡོ་མེད་ཅིང་སྒྱུ་དང་བྲལ་བ་དང་། བརྩོན་འགྲུས་བརྟན་པ་དང་། ལེགས་པར་བྱས་པ་དང་ཉེས་པར་ [248a.6]བྱས་པ་བཟོད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སེམས་ཅན་རྣམས་ཡོངས་སུ་སྨིན་པར་བྱེད་ནུས་སོ། །རིགས་ཀྱི་བུ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར། གང་བྱང་ཆུབ་སེམས་དཔའ་ཡོངས་སུ་མི་སྐྱོ་བས་སེམས་ཅན་ [248a.7]རྣམས་ཡོངས་སུ་སྨིན་པར་བྱེད་ནུས་པར་རིག་པར་བྱའོ། །རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡངས་པ་ཚད་མེད་པ། བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་བསྐལ་པ་དགའ་བྱེད་ལ་འཇིག་རྟེན་གྱི་ཁམས་ [248b] [248b.1]ཞི་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། [248b.2]སངས་རྒྱས་བཅོམ་ལྡན་འདས་དྲི་མ་མེད་པར་སྣང་བ་ཞེས་བྱ་བ་འཇིག་རྟེན་དུ་བྱུང་ངོ་། །རིགས་ཀྱི་བུ་འཇིག་རྟེན་གྱི་ཁམས་ཞི་བ་དེ་ཡང་འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགའ་བ། ལྷ་དང་མིས་རབ་ཏུ་གང་བར་གྱུར་ཏོ། །རིགས་ཀྱི་བུ་དེ་ [248b.3]བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པར་སྣང་བ་དེའི་ཉན་ཐོས་ཀྱང་ཉན་ཐོས་ཆེན་པོ་བྱེ་བ་ཕྲག་དགུ་བཅུ་རྩ་དྲུག་འདུས་པར་གྱུར་ཏོ། །དེའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་བྱང་ཆུབ་སེམས་དཔའ་སེམས་དཔའ་ཆེན་ [248b.4]པོ་བརྒྱད་ཁྲི་བཞི་སྟོང་འདུས་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དང་། བྱང་ཆུབ་སེམས་དཔའ་དེ་དག་གི་ཚེའི་ཚད་ནི་ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །རིགས་ཀྱི་བུ་དེའི་ཚེ་རྒྱལ་བུ་གཞོན་ནུ་ནོར་དཔལ་ཞེས་བྱ་བ་གཟུགས་ [248b.5]བཟང་བ། མཛེས་པ། བལྟ་ན་སྡུག་པ། མདོག་བཟང་པོ་རྒྱས་པ། མཆོག་དང་ལྡན་པ་ཞིག་བྱུང་སྟེ། བཙས་ནས་ལོ་བཅུ་དྲུག་ལོན་པ་དང་། དེ་གཟུགས་བཟང་བ་དང་། ལོངས་སྤྱོད་དང་སྐྱིད་པས་དྲེགས་ཤིང་ང་རྒྱལ་སྐྱེས་ཏེ་རྒྱགས་ནས། བཅོམ་ [248b.6]ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེའི་གན་དུ་མི་འགྲོ། སྟེན་པར་མི་བྱེད། སྙེན་པར་མི་བྱེད། རིམ་གྲོ་མི་བྱེད་དོ། །རིགས་ཀྱི་བུ་དེ་ནས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེ་འདི་སྙམ་དུ་དགོངས་ཏེ། མ་ལ་ [248b.7]རྒྱལ་བུ་གཞོན་ནུ་ནོར་དཔལ་འདི་ནི་དགེ་བའི་རྩ་བ་ཡོངས་སུ་སྨིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་ཡོད་ན་དེ་གཟུགས་དང་། ལོངས་སྤྱོད་དང་སྐྱིད་པས་རྒྱགས་དྲེགས་ཏེ། ང་རྒྱལ་གྱིས་དེ་བཞིན་ [249a] [249a.1]གཤེགས་པའི་དྲུང་དུ་ཡང་མི་འོང་ན། གལ་ཏེ་དེ་རྒྱུན་མི་འཆད་པར་བསྐུལ་ན་ནི་དེ་དེ་བཞིན་གཤེགས་པའི་དྲུང་དུ་འོང་ཡང་སྲིད་སྙམ་མོ། །རིགས་ཀྱི་བུ་དེ་ནས་དེ་བཞིན་གཤེགས་པ་དྲི་མ་མེད་པར་སྣང་བ་དེས་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་ [249a.2]པོ་དེ་དག་བསྡུས་སོ། །བསྡུས་ནས་ཀྱང་རིགས་ཀྱི་བུ་དག་ཁྱེད་ཀྱི་ནང་ནས་ཡིད་ཡོངས་སུ་མི་སྐྱོ་བར་ལོ་བརྒྱད་ཁྲི་བཞི་སྟོང་གི་བར་དུ་རྒྱལ་བུ་གཞོན་ནུ་ནོར་དཔལ་གྱི་ཁྱིམ་གྱི་སྒོར་འགྲོ་ཞིང་བདེ་བ་ཐམས་ཅད་ནི་སྤངས། སྡུག་བསྔལ་ཐམས་ཅད་ནི་དང་དུ་བླངས་ཏེ། དེ་ [249a.3]ལས་ཐ་ན་ཀུན་ཏུ་སྨྲ་བའམ། ཡང་དག་པར་སྨྲ་བའམ། སྟན་ཙམ་ཡང་མི་རྙེད་ཀྱི་སྟེང་དུ་གཤེ་རྒྱ་ཞིང་ཚིག་ངན་པ་རྩུབ་པོ་མི་སྙན་པར་ཟེར་ཡང་སྤྲོ་བར་འགྱུར་བ་སུ་ཡོད་ཅེས་ཚུལ་ཤིང་བྲིམས་སོ། །རིགས་ཀྱི་བུ་དེ་ལྟར་ཚུལ་ཤིང་བྲིམས་ཀྱང་བྱང་ཆུབ་སེམས་དཔའ་ [249a.4]བརྒྱད་ཁྲི་བཞི་སྟོང་པོ་དེ་དག་ལས་བྱང་ཆུབ་སེམས་དཔའ་འགའ་ཙམ་ཡང་སྤྲོ་བར་མ་གྱུར་ཏོ། །བཅོམ་ལྡན་འདས་དེས་ཚུལ་ཤིང་ཐོགས་ཏེ། ལན་གཉིས་ལན་གསུམ་དུ་བྲིམས་ཀྱང་སུས་ཀྱང་མ་བླངས་པ་དང་། རིགས་ཀྱི་བུ་དེའི་ཚེ་བྱང་ཆུབ་སེམས་དཔའ་སེམས་ [249a.5]དཔའ་ཆེན་པོ་བརྩོན་འགྲུས་འབར་བ་ཞེས་བྱ་བ་ཞིག་བྱང་ཆུབ་སེམས་དཔའི་འཁོར་དེ་ཉིད་དུ་འདུས་པར་གྱུར་ནས་འདུག་པ་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་ [249a.6]དྲི་མ་མེད་པར་སྣང་བ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ལོ་བརྒྱད་ཁྲི་བཞི་སྟོང་གི་བར་དུ་ཡིད་ཡོངས་སུ་མི་སྐྱོ་བར་བདེ་བ་ཐམས་ཅད་ནི་ [249a.7]སྤངས། སྡུག་བསྔལ་ཐམས་ཅད་ནི་ཇི་མི་སྙམ་པར་བགྱིད་དེ། རྒྱལ་བུ་གཞོན་ནུ་ནོར་དཔལ་གྱི་ཁྱིམ་དུ་མཆིའོ་ཞེས་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་འབར་གྱིས་ཚིག་དེ་སྨྲས་མ་ཐག་ཏུ། དེ་ནས་དེ་ཉིད་ཀྱི་ཚེ་སྟོང་གསུམ་གྱི་སྟོང་ཆེན་པོའི་ [249b] [249b.1]འཇིག་རྟེན་གྱི་ཁམས་རྣམ་པ་དྲུག་ཏུ་རབ་ཏུ་གཡོས་ནས་ལྷའི་བུ་བརྒྱ་སྟོང་གིས་ཀྱང་སྟེང་གི་བར་སྣང་ལས། ཀྱེ་མའོ་བྱང་ཆུབ་སེམས་དཔའ་བརྩོན་འགྲུས་འབར་གྱིས་བརྩོན་འགྲུས་ཆེན་པོའི་གོ་ཆ་བགོས་པ་འདི་ནི་ལེགས་སོ་ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ་དེ་ནས་བྱང་ཆུབ་ [249b.2]སེམས་དཔའ་སེམས་དཔའ་ཆེན་པོ་བརྩོན་འགྲུས་འབར་བ་དེ་རྒྱལ་བུ་གཞོན་ནུ་ནོར་དཔལ་གྱི་ཁྱིམ་དུ་སོང་སྟེ། ཁྱིམ་གྱི་སྒོ་དྲུང་ན་འདུག་པ་དང་། དེ་སྐྱེ་བོའི་ཚོགས་ཆེན་པོ་དེས་མཐོང་ནས་གཤེ་རྒྱ་ཞིང་ཚིག་ངན་པ་རྩུབ་པོ་སྣ་ཚོགས་སྨྲས་ཏེ། དེ་ལ་ས་དང་རྡུལ་ཀྱང་གཏོར། [249b.3]དེ་ལ་ལག་པ་དང་། དབྱུག་པ་དང་། བོང་བས་ཀྱང་བརྡེགས་སོ། །དེས་མཐོང་ཞིང་ཐོས་ཏེ། ལུས་ལ་རེག་ཅིང་ཚོར་བར་གྱུར་ཀྱང་བྱང་ཆུབ་སེམས་དཔའ་བརྩོན་འགྲུས་འབར་བ་འཁྲུག་པའམ། གཤེ་བའམ། ཁོང་ཁྲོ་བའམ། ཕྱིར་ལོག་པར་མ་གྱུར་གྱི་སྟེང་དུ། [249b.4]བརྩོན་འགྲུས་བརྟན་པའི་སྟོབས་རབ་ཏུ་བསྐྱེད་ནས་སྟོབས་དང་རབ་ཏུ་ལྡན་པ་དང་། སྙིང་རྗེ་ཆེན་པོ་ཡང་སྐྱེད་དེ། དེ་ལོ་སྟོང་ལོན་པ་དང་། རྒྱལ་པོའི་ཕོ་བྲང་གི་སྒོ་ཁང་གཅིག་ཏུ་ཞུགས་ཏེ། སྨད་པ་དང་། བསྡིགས་པ་དང་། རྡེག་པ་ཐམས་ཅད་ཀྱིས་ཀྱང་ཡོངས་སུ་མི་སྐྱོ་ [249b.5]བར། དེ་ལོ་ཁྲི་ལོན་པ་དང་རྒྱལ་པོའི་ཕོ་བྲང་གི་སྒོ་ཁང་གཉིས་ཀྱི་ནང་དུ་ཞུགས་སོ། །དེ་ལོ་ཉི་ཁྲི་ལོན་པ་དང་རྒྱལ་པོའི་ཕོ་བྲང་གི་སྒོ་ཁང་གསུམ་པའི་ནང་དུ་ཞུགས་པ་ནས། ལོ་བདུན་ཁྲི་ལོན་པ་དང་རྒྱལ་པོའི་ཕོ་བྲང་གི་སྒོ་ཁང་དྲུག་པའི་ནང་དུ་ཞུགས་སོ། །དེ་ལོ་བརྒྱད་ཁྲི་ [249b.6]བཞི་སྟོང་ལོན་པ་དང་རྒྱལ་པོའི་ཕོ་བྲང་གི་སྒོ་ཁང་བདུན་པའི་ནང་དུ་ཞུགས་པ་དང་། དེ་ནས་གདོད་རྒྱལ་བུ་གཞོན་ནུ་ནོར་དཔལ་དེས་ཚིག་སྟེར་ཏེ། དགེ་སློང་ཁྱོད་ཅི་འདོད། ཅི་ཞིག་ཚོལ། ཁྱོད་ལ་ཅི་དགོས་སྨྲོས་ཤིག་དང་། ཅི་ནུས་ཀྱིས་རབ་ཏུ་སྦྱིན་པར་བྱའོ། །རྒྱལ་བུ་ [249b.7]གཞོན་ནུ་དེ་དགེ་སློང་དེ་ལ་ངོ་མཚར་ཆེན་པོའི་འདུ་ཤེས་སྐྱེས་ནས་ཇི་ཙམ་དུ་དགེ་སློང་དེས་ཡོངས་སུ་མི་སྐྱོ་བ་མནགས་ནུས་པ་ནི་ངོ་མཚར་ཏོ་སྙམ་མོ། །རིགས་ཀྱི་བུ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་འབར་བ་དེས་རྒྱལ་བུ་གཞོན་ནུ་ནོར་དཔལ་དེ་སེམས་ [250a] [250a.1]རབ་ཏུ་དང་བར་ཤེས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཟས་དང་སྐོམ་དང་གོས་དང་བཟའ་བ་རྣམས། །གཞོན་ནུ་བདག་ལ་དགོས་པ་ཅི་ཡང་མེད། །ཟང་ཟིང་མེད་པའི་སེམས་ནི་ཉེར་གཞག་ནས། །བདག་ནི་ཆོས་ཀྱི་ཕོ་ཉར་འདིར་འོངས་སོ། ། [250a.2]འཇིག་རྟེན་དོན་མཛད་དྲང་སྲོང་ཆེར་བྱུང་བ། །མི་མཆོག་དྲི་མ་མེད་པར་སྣང་ཞེས་བྱ། །དེ་ནི་སྡུག་བསྔལ་མཐར་འབྱིན་ཆོས་སྟོན་ཏེ། །སེམས་ཅན་གང་གིས་ཐོས་པས་མི་འཆི་འཐོབ། །བསྐལ་པ་སྟོང་ཕྲག་བྱེ་བ་གྲངས་མེད་ན། །སངས་རྒྱས་རྣམས་ནི་བརྒྱ་ལམ་འབྱུང་བར་འགྱུར། ། [250a.3]ད་ལྟར་འཇིག་རྟེན་མུན་ནག་སྒྲོན་གྱུར་པ། །ཡོན་ཏན་དམ་པ་མངའ་བ་དེ་སྐྱེས་ན། །ཁྱོད་ནི་འདི་ན་འདོད་པའི་ཡོན་ཏན་ཆགས། །གཟུགས་དང་ལོངས་སྤྱོད་རྣམས་ལ་རྟག་ཏུ་མྱོས། །སྐྱིད་མྱོས་དེ་བཞིན་རྒྱལ་སྲིད་མྱོས་པས་ན། །ཆོས་ཀྱི་རྒྱལ་པོ་ལྟ་བར་ཡོང་མི་འགྲོ། །ལོངས་སྤྱོད་མི་ [250a.4]རྟག་དེ་བཞིན་རྒྱལ་སྲིད་སྲོག །རྩྭ་རྩེའི་ཟིལ་ཐིགས་འདྲ་ཞེས་རྒྱལ་བས་གསུངས། །གང་ཕྱིར་སངས་རྒྱས་ཐོས་ཀྱང་མྱོས་འགྱུར་བ། །དེ་ནི་རྒྱལ་བུ་ཁྱོད་ཀྱི་ཆ་མ་ཡིན། །ཁྱོད་ནི་འདི་ན་བྱང་ཆུབ་མཆོག་ཞུགས་ལ། །སེམས་ཅན་དག་ཀྱང་གཉེར་ཏེ་གྲོལ་བར་གྱིས། །ཁྱོད་བདག་ [250a.5]ད་ལྟར་འདོད་པའི་བྲན་གྱུར་ན། །ཇི་ལྟར་མྱོས་པས་སྐྱེ་བོ་འདུལ་བར་འགྱུར། །ང་རྒྱལ་སྤོངས་ཏེ་ཉོན་མོངས་རྣམས་སོལ་ལ། །ད་ནི་རྒྱལ་བའི་དྲུང་དུ་འགྲོ་བར་གྱིས། །བརྩོན་འགྲུས་སྐྱེད་དེ་འཇིག་རྟེན་སྙིང་བརྩེ་གྱིས། །ཕྱི་མའི་དུས་ན་གདུང་བར་གྱུར་ཏ་རེ། །རྒྱལ་བུས་ [250a.6]ཚིགས་སུ་བཅད་པ་འདི་ཐོས་ནས། །ང་རྒྱལ་སྤངས་ཏེ་གུས་པ་རབ་བསྐྱེད་ནས། །བརྩོན་འགྲུས་འབར་བའི་རྐང་ལ་ཕྱག་འཚལ་ཏེ། །གང་སྔོན་བདག་གིས་གནོད་བགྱིས་བཟོད་པར་གསོལ། །བདག་ནི་རྒྱལ་སྲིད་ཐམས་ཅད་སྤང་བར་བྱ། །འདོད་དང་དེ་བཞིན་ལོངས་སྤྱོད་ཀུན་མི་ [250a.7]ཚོལ། །ང་རྒྱལ་ཐ་བའི་སྐྱོན་དང་དྲེགས་སྤངས་ཏེ། །མྱུར་དུ་བདེ་བར་གཤེགས་པའི་གན་དུ་འགྲོ། །དེ་ནི་སྲོག་ཆགས་བྱེ་བ་བརྒྱད་ཅུས་བསྐོར། །མེ་ཏོག་ན་བཟའ་སྤོས་དང་བདུག་པ་ཐོགས། །དྲི་མ་མེད་པར་སྣང་བ་སྐྱེས་བུ་མཆོག །རྒྱལ་བ་དེ་ཡི་དྲུང་དུ་ཉེ་བར་སོང་། ། [250b] [250b.1]བདེ་བར་གཤེགས་ཀྱི་གན་དུ་ཕྱིན་ནས་ཀྱང་། །ཞབས་ལ་ཕྱག་འཚལ་དེ་ནས་མཆོད་བྱས་ཏེ། །དེ་བཞིན་གཤེགས་པ་དེ་ཡི་སྤྱན་སྔར་འདུག །རྒྱལ་བུ་དེ་ཡིས་ཚིག་ནི་འདི་སྨྲས་སོ། །གང་ཕྱིར་སྐྱོ་མེད་སེམས་ཀྱིས་བསྐུལ་བས་ན། །བརྩོན་འགྲུས་འབར་བ་བདག་གི་སྟོན་ [250b.2]པ་མགོན། །ཇི་ལྟར་དེ་ནི་མཆོད་པའི་འོས་ལགས་ན། །དེ་ལ་ལན་དུ་ཕན་པ་བགྱིད་མི་ནུས། །བདག་ནི་འཇིག་རྟེན་མགོན་ལ་བཟོད་པར་གསོལ། །ཆོས་ཀྱི་རྒྱལ་ལ་གུས་པ་གང་མ་བགྱིས། །དེ་དག་ཐམས་ཅད་དེ་རིང་སོ་སོར་བཤགས། །བདག་གི་ནོངས་པ་འཇིག་ [250b.3]རྟེན་མགོན་མཁྱེན་མཛོད། །སེམས་ཅན་དོན་དུ་སྙིང་རྗེ་བསྐྱེད་ནས་སུ། །བདག་ནི་བྱང་ཆུབ་མཆོག་ལ་རབ་ཞུགས་ཏེ། །བྱང་ཆུབ་དམ་མཆོག་མ་ཐོབ་བར་དུ་ནི། །སླན་ཆད་བག་མེད་སྤྱོད་པ་མི་བགྱིའོ། །རྒྱལ་བུ་དེ་ཡིས་རྒྱལ་སྲིད་རྣམ་སྤངས་ཏེ། །སེམས་ཅན་བྱེ་བ་ [250b.4]བརྒྱད་ཅུ་རྣམས་ཀྱིས་བསྐོར། །བྱང་ཆུབ་དམ་པ་འདི་ནི་ཡོངས་ཚོལ་ཞིང་། །མངོན་བྱུང་རྒྱལ་བའི་བསྟན་ལ་རབ་ཏུ་བྱུང་། །རྒྱལ་བས་དེ་དག་གི་ནི་བསམ་མཁྱེན་ནས། །བྱང་ཆུབ་ལམ་མཆོག་རབ་ཏུ་བསྟན་པས་ན། །ཆོས་ཐོས་སེམས་ཅན་རྟག་ཏུ་དག་པ་རྣམས། ། [250b.5]ཐམས་ཅད་ཀྱིས་ཀྱང་རྗེས་འཐུན་བཟོད་པ་ཐོབ། །རིགས་ཀྱི་བུ་ངས་བསྐལ་པ་འམ་བསྐལ་པ་ལས་ལྷག་པར་དེ་བཞིན་གཤེགས་པ་དྲི་མ་མེད་པར་སྣང་བ་དེའི་འཇིག་རྟེན་གྱི་ཁམས་ཀྱི་བསྔགས་པ་བརྗོད་ཅིང་། གང་ཆོས་བསྟན་པ་བསམ་གྱིས་མི་ཁྱབ་པ་དེ་ཡོངས་སུ་ [250b.6]བརྗོད་ཀྱང་ཡོན་ཏན་གྱི་མཐའ་ཟད་པར་མི་འགྱུར་རོ། །རིགས་ཀྱི་བུ་དེའི་ཚེ་དེའི་དུས་ན་བྱང་ཆུབ་སེམས་དཔའ་བརྩོན་འགྲུས་འབར་བ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཐེ་ཚོམ་ཟ་འམ། ཡིད་གཉིས་སུ་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ [250b.7]ན། དེའི་ཚེ་དེའི་དུས་ན་ང་ཉིད་བྱང་ཆུབ་སེམས་དཔའ་བརྩོན་འགྲུས་འབར་བ་ཞེས་བྱ་བ་དེར་གྱུར་ཏོ། །རིགས་ཀྱི་བུ་དེའི་ཚེ་དེའི་དུས་ན་རྒྱལ་བུ་གཞོན་ནུ་ནོར་དཔལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཐེ་ཚོམ་ཟ་འམ། ཡིད་གཉིས་སུ་གྱུར་ན་ཡང་དེ་ [251a] [251a.1]ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ནི་དེའི་ཚེ་དེའི་དུས་ན་རྒྱལ་བུ་གཞོན་ནུ་ནོར་དཔལ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལྟར་སྔོན་བྱང་ཆུབ་སེམས་དཔའ་རྣམས་སེམས་ཅན་ཡོངས་སུ་སྨིན་པར་བྱ་བ་ལ་ [251a.2]ཡོངས་སུ་མི་སྐྱོ་ཞིང་འདི་ལྟར་ཤིན་ཏུ་སྟོབས་དང་ལྡན་ཏེ་བརྩོན་འགྲུས་ཉེ་བར་སྟོན་ཏོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔའ་སེམས་ཅན་ཡོངས་སུ་སྨིན་པར་བྱེད་འདོད་པས་ཅི་ནས་ཀྱང་བྱང་ཆུབ་སེམས་དཔའ་བརྩོན་འགྲུས་འབར་བ་ཞེས་བྱ་བ་དེ་ལྟར་བསླབ་པར་བྱའོ། ། [251a.3]དེ་ཅིའི་ཕྱིར་ཞེ་ན། རིགས་ཀྱི་བུ་སེམས་ཅན་ཡོངས་སུ་སྨིན་པར་བྱེད་པ་ནི་བྱང་ཆུབ་སེམས་དཔའ་རྣམས་ཀྱི་ལས་ཡིན་ནོ། །རིགས་ཀྱི་བུ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ལས་ཡིན་ཏེ། སངས་རྒྱས་ཀྱི་ཆོས་ཐམས་ཅད་སྡུད་པར་ [251a.4]འགྱུར་བའོ། །བཞི་གང་ཞེ་ན་འདི་ལྟ་སྟེ། བདུད་ཀྱི་ལས་ལས་ཤིན་ཏུ་འདའ་བ་བྱང་ཆུབ་སེམས་དཔའི་ལས་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་བྱང་ཆུབ་སེམས་དཔའི་ལས་དང་། ལུས་དང་ངག་དང་ཡིད་བརྒྱན་པ་བྱང་ཆུབ་སེམས་དཔའི་ལས་དང་། སངས་རྒྱས་ཀྱི་ [251a.5]ཆོས་ཐམས་ཅད་ཡང་དག་པར་སྒྲུབ་པ་བྱང་ཆུབ་སེམས་དཔའི་ལས་ཏེ། རིགས་ཀྱི་བུ་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ལས་ཡིན་ཏེ། སངས་རྒྱས་ཀྱི་ཆོས་ཐམས་ཅད་སྡུད་པར་འགྱུར་བའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ [251a.6]རྣམས་ཀྱི་བྱང་ཆུབ་སེམས་དཔའི་ལས་སངས་རྒྱས་ཀྱི་ཆོས་ཐམས་ཅད་ཡང་དག་པར་སྡུད་པར་འགྱུར་བ་བཞི་སྟེ། བཞི་གང་ཞེ་ན། བསམ་པ་ལ་འཇུག་པའི་ཡེ་ཤེས་དང་། དབང་པོ་ཡོངས་སུ་ཤེས་པའི་ཡེ་ཤེས་དང་། ནད་ཐམས་ཅད་ཞི་བར་བྱེད་པའི་སྨན་སྦྱིན་པའི་ཡེ་ཤེས་ [251a.7]དང་། ཉོན་མོངས་པའི་ནད་ཐམས་ཅད་རབ་ཏུ་ཞི་བར་བྱེད་པ་མི་འཁྲུགས་པའི་ཡེ་ཤེས་ཏེ། རིགས་ཀྱི་བུ་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ལས་ཡིན་ཏེ། སངས་རྒྱས་ཀྱི་ཆོས་ཐམས་ཅད་ཡང་དག་པར་སྡུད་པར་འགྱུར་བའོ། །དེ་ནས་བྱང་ཆུབ་ [251b] [251b.1]སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེས་གཙུག་གི་ནོར་བུ་རིན་པོ་ཆེ་གང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཚད་མེད་གྲངས་མེད་པའི་དགེ་བའི་རྩ་བས་མངོན་པར་གྲུབ་པ་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བཅུ་ནོར་བུ་རིན་པོ་ཆེ་སྣ་བདུན་གྱིས་རབ་ཏུ་བཀང་བས་ [251b.2]ཀྱང་རིན་དུ་མི་བཟོད་པའི་གཙུག་གི་ནོར་བུ་རིན་པོ་ཆེ་དེ་དེ་བཞིན་གཤེགས་པ་ལ་ཕུལ་ནས་ཚིག་འདི་སྐད་ཅེས་སྨྲས་སོ། །བཅོམ་ལྡན་འདས་བདག་གི་གཙུག་ན་མཆིས་པའི་ནོར་བུ་རིན་པོ་ཆེ་འདི་དེ་བཞིན་གཤེགས་པ་ལ་ཕུལ་བའི་དགེ་བའི་རྩ་བ་འདིས་བཅོམ་ལྡན་འདས་བདག་སྤྱི་གཙུག་བལྟར་ [251b.3]མི་སྣང་བ་ཐོབ་པ་དང་། བདག་སངས་རྒྱས་ཀྱི་ཡེ་ཤེས་སྤྱི་བོར་གྱུར་པ་བསམ་གྱིས་མི་ཁྱབ་པ་དེ་དང་ལྡན་པར་གྱུར་ཅིག །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། ནམ་འཛུམ་པ་མཛད་པ་དེ་ན་ [251b.4]བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་དངུལ་གྱི་ཁ་དོག་ལྟ་བུ་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དེ་དག་ [251b.5]འོད་ཀྱིས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་ཟླ་བ་དང་ཉི་མ་རྣམས་ཀྱི་གཟི་བརྗིད་ཀྱང་གཟི་བརྗིད་ཀྱིས་ཡོངས་སུ་ཟད་པར་བྱས་ནས་སླར་ལོག་སྟེ། བཅོམ་ལྡན་འདས་ལ་ལན་བརྒྱ་སྟོང་དུ་མར་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏུ་ [251b.6]ནུབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སྤོབས་པ་མྱུར་བ་ཞེས་བྱ་བ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་ [251b.7]བཅད་པའི་དབྱངས་ཀྱིས་འཛུམ་པ་མཛད་པའི་དོན་ཞུས་སོ། །མི་མཉམ་མཉམ་པ་དམ་པ་འཇིག་རྟེན་མིག་སྦྱིན་འཇིག་རྟེན་མཆོག །ཤཱཀྱའི་རྒྱལ་སྲས་དབང་པོ་ཞི་ཞིང་དྲི་གསུམ་དྲི་མ་སྤངས། །མཚུངས་མེད་མཚུངས་འདས་བྱམས་པས་འཕགས་པ་རྒྱལ་བ་རི་རབ་བཞིན། །ཅི་སླད་འདིར་འཛུམ་ [252a] [252a.1]ཡེ་ཤེས་འབྱུང་གནས་བདག་ལ་ལུང་བསྟན་གསོལ། །གྱ་གྱུ་མི་མངའ་རབ་ཏུ་མཉེན་ལ་ཤིན་ཏུ་སྙན་པའི་གསུང་། །སྐྱེས་བུ་དམ་པ་བདེ་རབ་སྦྱིན་པ་དྲན་མཆོག་བློ་གྲོས་ཐུགས། །བདེ་གཤེགས་མོས་པ་མཆོག་དང་བདེན་པ་ལྷ་དང་མིས་མཆོད་པ། །ཅི་སླད་འཛུམ་པ་འདི་མཛད་ [252a.2]ཕན་པ་མཛད་པས་བསྟན་དུ་གསོལ། །སྟོབས་བཅུའི་སྟོབས་མངའ་འདོམ་གང་འོད་དང་བསོད་ནམས་གཟི་བརྗིད་འོད། །འཁོར་གྱི་ནང་དུ་སེང་གེ་ལྟ་བུར་རབ་སྒྲོགས་རྒོལ་བ་བཅོམ། །ཐུབ་པ་སྲིད་གསུམ་ཁྱོད་དང་མཉམ་པའམ་ལྷག་པ་གང་ཡང་མེད། །ཆོས་ཀྱི་དབང་ཕྱུག་ཅི་སླད་འཛུམ་ [252a.3]པ་མཛད་པ་བསྟན་དུ་གསོལ། །རབ་ཏུ་བཞད་ཅིང་མཆོག་ཏུ་དགྱེས་པ་ཤིན་ཏུ་དྲི་མེད་ཞལ། །ཟླ་བ་ལྟ་བུར་ནམ་མཁར་གཤེགས་ནས་ཕྱོགས་བཅུ་ལམ་མེ་བར། །མུན་པ་བཅོམ་ཞིང་རྡུལ་བཅོམ་འོད་དང་དཔལ་ནི་རབ་རྒྱས་པ། །བདེ་བར་གཤེགས་པ་འཛུམ་མཛད་ཕན་པ་མཛད་པས་བཀའ་ [252a.4]སྩོལ་ཅིག །གསེར་རི་འོད་འདྲ་བརྟུལ་ཞུགས་གྲུབ་པ་བསོད་ནམས་ཡེ་ཤེས་འཕྲོ། །མཁས་པས་རྟག་ཏུ་རབ་བསྔགས་འཇིག་རྟེན་ངོ་མཚར་མཆོད་པར་འོས། །སྲིད་པའི་དམ་པ་འཇིག་རྟེན་འདས་པ་སྦྱིན་གནས་མི་ཟད་ཅིང་། །ནམ་མཁའི་ངོས་རབ་སྣང་བར་ཤཱཀྱ་སེང་གེའི་འཛུམ་པ་བསྟན། ། [252a.5]ལྷ་དང་མིས་མཆོད་ཁྱོད་འདྲས་དང་ལྷ་ཡུལ་དག་ནའང་མེད། །ཡིད་མཉམ་མོས་པ་མཉམ་པ་ཁྲེལ་ཡོད་དཔལ་གྱིས་རབ་ཏུ་རྒྱས། །ཡོན་ཏན་བརྒྱ་རྣམས་ཤིན་ཏུ་རྒྱས་པའི་མཚན་ནི་རབ་རྫོགས་པ། །བདེ་གཤེགས་འཛུམ་པ་མཛད་པ་ཐུབ་པ་དམ་པ་བཀའ་སྩོལ་ཅིག །ཀུན་ཏུ་ཁྱོད་ཀྱི་ཡེ་ [252a.6]ཤེས་དུས་གསུམ་ཆགས་པ་མེད་པར་འཇུག །སེམས་དང་ཡིད་སྦྱོར་དབང་པོ་གང་དང་སེམས་ཅན་བསམ་པ་གང་། །སེམས་ཅན་ཀུན་གྱི་བསམ་པ་ཅི་འདྲ་ཐམས་ཅད་སྐད་ཅིག་མཁྱེན། །མི་ཡི་སེང་གེས་གང་སླད་འཛུམ་མཛད་རིགས་དོན་བདག་ལ་གསུངས། །ནམ་མཁར་གནས་ [252a.7]པའི་ལྷ་མང་ཡིད་ཀྱང་རབ་ཏུ་དགའ། །མིའི་ཚོགས་ས་ལ་གནས་པ་ཐལ་སྦྱར་ཕྱག་འཚལ་གྱིས། །གང་ཐོས་ལྷ་མི་མུན་པའི་རྡུལ་རྣམས་སེལ་འགྱུར་བ། །མི་མཆོག་གིས་ནི་བདུད་རྩིའི་རོ་མཆོག་དབྱེ་བར་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་ [252b] [252b.1]སེམས་དཔའ་སེམས་དཔའ་ཆེན་པོ་སྤོབས་པ་མྱུར་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་གཙུག་ན་རིན་པོ་ཆེ་འདིས་སངས་རྒྱས་ཀྱི་ཡེ་ཤེས་སྤྱི་བོར་གྱུར་པ་བསམ་གྱིས་མི་ཁྱབ་པའི་ཆེད་དུ་གང་གཙུག་གི་ནོར་བུ་རིན་པོ་ཆེ་འདི་དེ་བཞིན་གཤེགས་ [252b.2]པ་ལ་ཕུལ་བ་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེ་འདིས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་མཉེས་པར་བྱས། བསྟི་ [252b.3]སྟང་དུ་བྱས། བཙུན་པར་བྱས། རི་མོར་བྱས་ཤིང་མཆོད་ནས་ཐམས་ཅད་དུ་ཡང་ཚངས་པར་སྤྱོད་པ་སྤྱད་དེ། སེམས་ཅན་དཔག་ཏུ་མེད་པ་དག་ཀྱང་ཐེག་པ་གསུམ་པོ་དག་ལ་ཡོངས་སུ་སྨིན་པར་བྱས་སོ། །རིགས་ཀྱི་བུ་བྱང་ཆུབ་སེམས་དཔའ་གཙུག་ན་རིན་པོ་ཆེ་འདི་བསྐལ་པ་གྲངས་ [252b.4]མེད་པ་བརྒྱ་སྟོང་ན་བསྐལ་པ་དྲི་མ་མེད་པ་ལ་འཇིག་རྟེན་གྱི་ཁམས་འོད་དྲི་མ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་ [252b.5]མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་པོ་ཆེ་འབྱུང་བ་ཞེས་བྱ་བར་འཇིག་རྟེན་དུ་འབྱུང་ངོ་། །འཇིག་རྟེན་གྱི་ཁམས་འོད་དྲི་མ་མེད་པ་དེའི་ས་གཞི་ནི་རིན་པོ་ཆེ་སྣ་བདུན་དུ་འགྱུར་རོ། །འཇིག་རྟེན་གྱི་ཁམས་དེ་ནས་འོད་གང་བྱུང་བ་དེས་ཕྱོགས་བཅུའི་སངས་རྒྱས་ཀྱི་ [252b.6]ཞིང་གྲངས་མེད་པ་རྣམས་སྣང་བར་འགྱུར་རོ། །འོད་དེ་ཡང་གསེར་གྱི་ཁ་དོག་ལྟ་བུར་འགྱུར་རོ། །སེམས་ཅན་གང་དག་འོད་དེས་རེག་པར་གྱུར་པ་དེ་དག་ཀྱང་ཉོན་མོངས་པ་ཐམས་ཅད་ཀྱིས་མི་གཟིར་བར་འགྱུར་རོ། །འཇིག་རྟེན་གྱི་ཁམས་འོད་དྲི་མ་མེད་པ་དེ་ཡང་འབྱོར་པ། རྒྱས་པ། བྱང་ཆུབ་སེམས་ [252b.7]དཔའ་འབའ་ཤིག་གི་གནས་སུ་འགྱུར་རོ། །དེར་བྱང་ཆུབ་སེམས་དཔའ་རིན་པོ་ཆེ་མ་གཏོགས་པར་རིན་པོ་ཆེ་གཞན་འབྱུང་བར་མི་འགྱུར་ཏེ། དེའི་ཕྱིར་དེ་བཞིན་གཤེགས་པ་དེའི་མིང་རིན་པོ་ཆེ་འབྱུང་བ་ཞེས་བྱའོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་མངོན་པར་ཤེས་པ་རབ་ཏུ་ཐོབ་པར་ [253a] [253a.1]འགྱུར་རོ། །དེ་དག་གི་ལོངས་སྤྱོད་དང་ཀུན་སྤྱོད་པ་ཐམས་ཅད་ཀྱང་བསམས་པ་ཙམ་གྱིས་འབྱུང་བར་འགྱུར་རོ། །གང་འཇིག་རྟེན་གྱི་ཁམས་དེར་ལྷ་དང་མི་འབྱུང་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །དེ་ན་མི་ཁོམ་པ་དང་ངན་སོང་ [253a.2]རྣམས་ཀྱི་མིང་ཡང་མེད་པར་འགྱུར་རོ། །དེ་ན་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་འབྱུང་བ་བླ་ན་མེད་པའི་ཆོས་ཀྱི་རྒྱལ་པོ་མ་གཏོགས་པར་རྒྱལ་པོ་གཞན་འབྱུང་བར་མི་འགྱུར་རོ། །ལྷ་དང་མི་དེ་དག་ཐམས་ཅད་ཀྱང་རྫུས་ཏེ་སྐྱེ་བར་འགྱུར་རོ། །འཇིག་རྟེན་གྱི་ཁམས་དེ་ན་བུད་མེད་དང་ [253a.3]འཁྲིག་ཅིང་འདུ་བའི་མིང་ཡང་མེད་པར་འགྱུར་རོ། །འཇིག་རྟེན་གྱི་ཁམས་དེ་ན་སེམས་ཅན་ལོང་བའམ། ཞར་བའམ། ཞ་བོ་འམ། སྒུར་པོའམ། ཡན་ལག་མ་ཚང་བར་འགྱུར་བ་གང་ཡང་མེད་དེ། དེ་དག་ཐམས་ཅད་ཀྱང་ལུས་མཚན་གྱིས་ལེགས་པར་བརྒྱན་པར་འགྱུར་རོ། །དེ་བཞིན་གཤེགས་པ་དེའི་ [253a.4]བྱང་ཆུབ་སེམས་དཔའི་དགེ་འདུན་ཡང་དཔག་ཏུ་མེད་པར་འགྱུར་རོ། །དེའི་ཚེའི་ཚད་ཀྱང་བསྐལ་པ་བར་མ་བཞི་བཅུ་རྩ་གཉིས་ཐོབ་པར་འགྱུར་རོ། །དེ་བཞིན་གཤེགས་པ་དེ་ཡང་བྱང་ཆུབ་དང་རབ་ཏུ་ལྡན་པ། ཕ་རོལ་ཏུ་ཕྱིན་པ་དང་རབ་ཏུ་ལྡན་པ། སྙིང་རྗེ་ཆེན་པོ་དང་རབ་ཏུ་ལྡན་པ། ཐེག་པ་ཆེན་པོ་དང་རབ་ཏུ་ [253a.5]ལྡན་པ་མ་གཏོགས་པར་གཏམ་གཞན་སྟོན་པར་མི་འགྱུར་རོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དབང་པོ་རྣོ་སྟེ་ཟུར་ཙམ་གྱིས་གོ་བར་འགྱུར་རོ། །དེ་དག་ཀྱང་ཆོས་ཀྱི་སྒོའི་ཚིག་རེ་རེས་སངས་རྒྱས་ཐམས་ཅད་ཀྱི་བྱང་ཆུབ་རྗེས་སུ་རྟོགས་པར་འགྱུར་རོ། །དེ་བཞིན་གཤེགས་པ་དེ་ཡང་བྱང་ [253a.6]ཆུབ་སེམས་དཔའ་དེ་དག་ལ་རྡོ་རྗེའི་ཚིག་གི་གཟུངས་ཡང་དག་པར་རབ་ཏུ་སྟོན་པར་འགྱུར་རོ། །དེ་ལ་རྡོ་རྗེའི་ཚིག་གི་གཟུངས་གང་ཞེ་ན་འདི་ལྟ་སྟེ། ཚིག་གཅིག་གིས་ཚིག་ཐམས་ཅད་ལ་འཇུག་པའོ། །ཚིག་གཅིག་པོ་དེ་ཡང་གང་ཞེ་ན་འདི་ལྟ་སྟེ། ཚིག་མི་ཟད་པའོ། །ཚིག་མི་ཟད་པ་དེ་ཡང་གང་ཞེ་ན། [253a.7]ཚིག་མི་ཟད་པ་ཞེས་བྱ་བ་ནི་གང་སངས་རྒྱས་ཐམས་ཅད་ཀྱིས་ཀྱང་ཟད་པར་བྱེད་མི་ནུས་པའོ། །ཚིག་མི་ཟད་པ་དེ་ཡང་གང་ཞེ་ན་འདི་ལྟ་སྟེ། ཨ་ཞེས་བྱ་བ་ནི་ཚིག་མི་ཟད་པ་སྟེ། ཨ་ཞེས་བྱ་བ་ལ་ཞུགས་ན་ཡི་གེའི་འབྲུ་ཐམས་ཅད་ལ་འཇུག་པར་འགྱུར་རོ། །དེ་ལྟར་ན་ཡི་གེ་ཐམས་ཅད་ནི་མི་ཟད་ [253b] [253b.1]པ་སྟེ། ཡི་གེ་འབྲུ་གཉིས་སྔ་ཕྱི་མེད་པར་ཐོས་པར་བྱ་མི་ནུས་སོ། །ཡི་གེའི་འབྲུ་རེ་རེ་ནས་བརྗོད་ཀྱི་ཡི་གེ་ཡང་ཡི་གེ་གཉིས་དང་འབྲེལ་བ་མ་ཡིན་ནོ། །དེ་བས་ན་ཚིག་གཅིག་པོ་དེ་ཉིད་རྣམ་པར་རིག་པའི་ཚིག་སྟེ། གང་རྣམ་པར་རིག་པའི་ཚིག་དེ་ཡང་རྣམ་པར་རིག་པའི་ཚིག་ཅེས་རྟོག་པར་མི་བྱེད་ [253b.2]རྣམ་པར་རྟོག་པར་མི་བྱེད་དོ། །དེ་ལྟར་ཚིག་དེ་མི་རྟོག་རྣམ་པར་མི་རྟོག་པར་དགོས་པ་བྱེད་དེ། རིགས་ཀྱི་བུ་འདི་ནི་རྡོ་རྗེའི་ཚིག་གི་གཟུངས་ལ་འཇུག་པའོ། །དེ་ལྟར་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་འབྱུང་བ་དེ་བྱང་ཆུབ་སེམས་དཔའ་དེ་དག་ལ་རྡོ་རྗེའི་ཚིག་གི་གཟུངས་ཡང་དག་པར་རབ་ [253b.3]ཏུ་སྟོན་པར་འགྱུར་རོ། །རིགས་ཀྱི་བུ་ངས་བསྐལ་པ་འམ་བསྐལ་པ་ལས་ལྷག་པར་འཇིག་རྟེན་གྱི་ཁམས་འོད་དྲི་མ་མེད་པ་དེའི་བསྔགས་པ་བརྗོད་ཅིང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་འབྱུང་བ་དེའི་ཆོས་བསྟན་པ་བསམ་གྱིས་མི་ཁྱབ་ [253b.4]པ་དེ་ཡོངས་སུ་བརྗོད་ཀྱང་ཡོན་ཏན་ཡོངས་སུ་བརྗོད་པ་ཟད་པར་མི་འགྱུར་ཏེ། སངས་རྒྱས་ཀྱི་ཞིང་དེར་ནི་ཡོན་ཏན་གྱི་རྣམ་པ་བཀོད་པ་ཚད་མེད་པ་དེ་སྙེད་འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་པོ་ཆེས་བདག་ཉིད་ལུང་བསྟན་པ་ཐོས་ནས་ [253b.5]དགའ་མགུ་ཡི་རངས་ཤིང་རབ་ཏུ་དགའ་སྟེ། བདེ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐམས་ཅད་མཁྱེན་ཅིང་ཐམས་ཅད་གཟིགས། །ཆོས་རྣམས་ཀུན་གྱི་ཕ་རོལ་གཤེགས། །འཁྲུལ་པའི་ [253b.6]སྐྱོན་རྣམས་ཐམས་ཅད་ལས། །དེ་བཞིན་གཤེགས་པ་ཤིན་ཏུ་འདས། །ཡེ་ཤེས་ཆེན་པོ་ཁྱོད་རེ་མཚར། །སངས་རྒྱས་བྱེ་བ་དེ་སྙེད་ལ། །བདག་གིས་སྔོན་མཆོད་གང་བགྱིས་པ། །དེ་དག་ཐམས་ཅད་མངོན་པར་མཁྱེན། །འདས་དང་མ་འོངས་དུས་རྣམས་དང་། །དེ་བཞིན་ད་ལྟར་ [253b.7]བྱུང་བ་ཡི། །བདག་གི་སྤྱོད་དང་དེ་བཞིན་དུ། །སྲོག་ཆགས་ཀུན་གྱི་རབ་ཏུ་མཁྱེན། །ཐུབ་པ་ཅི་འདྲ་དེ་འདྲ་བར། །འཇིག་རྟེན་སངས་རྒྱས་བདག་འགྱུར་ཞེས། །རྫོགས་སངས་རྒྱས་ཀྱིས་བདག་ལུང་བསྟན། །བདག་ནི་ཐེ་ཚོམ་ཡོང་མ་མཆིས། །ས་རྣམས་ཐམས་ཅད་འགགས་ [254a] [254a.1]ཀྱང་གདའ། །ཉི་ཟླ་མཁའ་ལས་ལྷུང་ཡང་གདའ། །བཅོམ་ལྡན་ཁྱོད་ཀྱི་ཞལ་སྒོ་ནས། །ཕྱིན་ཅི་ལོག་གི་གསུང་མི་འབྱུང་། །ཡེ་ཤེས་ལྡན་ལ་ཤེས་རབ་ཆེ། །དེས་ནི་བདག་ལ་བདེན་ཚིག་གིས། །བྱང་ཆུབ་མཆོག་ཏུ་ལུང་བསྟན་པས། །སངས་རྒྱས་བླ་ན་མེད་ [254a.2]པར་འགྱུར། །ཐུགས་ཀྱིས་ཡིད་ནི་མཁྱེན་པས་ན། །བདག་གི་སྤྱོད་པ་ཅི་འདྲ་དང་། །སངས་རྒྱས་ཞིང་ཡང་ཅི་འདྲ་བར། །དེ་འདྲ་ཉིད་དུ་ཀུན་བསྟན་ཏོ། །རྫོགས་སངས་རྒྱས་ཀྱི་གསུང་ཐོས་ནས། །ཐེ་ཚོམ་མ་མཆིས་དབང་པོ་ཚིམ། །སེམས་ཅན་རྣམས་ལ་ཕན་པའི་རྒྱུར། ། [254a.3]མཆོག་གི་སྤྱོད་པ་སྤྱད་པར་བགྱི། །བདག་གི་སྤྱོད་པ་ཅི་འདྲ་བ། །སྔོན་གྱི་མཐར་ནི་རྣམ་སྦྱངས་པ། །དེ་བས་ཤིན་ཏུ་དཔག་ཡས་པར། །བདག་གི་སྤྱོད་པ་སྤྱད་པར་བགྱི། །འདི་ནི་ལེ་ལོས་མི་འདའ་བས། །བརྩོན་འགྲུས་བརྟན་པའི་སྤྱོད་པ་འདི། །ཞུམ་པ་མ་མཆིས་སེམས་ [254a.4]ཀྱིས་སུ། །བྱང་ཆུབ་སྤྱོད་པ་སྤྱད་པར་བགྱི། །བདག་ནི་བྱང་ཆུབ་ལུང་བསྟན་པ། །སངས་རྒྱས་ཀྱིས་ནི་སྤྲོ་བ་སྩལ། །ཇི་སྲིད་འདྲེན་པར་མ་གྱུར་པ། །དེ་སྲིད་བརྩོན་འགྲུས་མི་གཏོང་ངོ་། །རྟག་ཏུ་བྱང་ཆུབ་མཆོག་གཞོལ་ཏེ། །སེམས་ཅན་ཐམས་ཅད་གཉེར་བར་བགྱི། །བྱང་ [254a.5]ཆུབ་དམ་པ་དོན་དུ་བཙལ། །དེ་དག་བདག་གིས་བསྐྱང་བར་བགྱི། །བྱང་ཆུབ་སེམས་དཔའ་གཙུག་ན་རིན་པོ་ཆེས་ཚིགས་སུ་བཅད་པ་བསྟན་པ་འདི་བཤད་པ་ན། སྲོག་ཆགས་སྟོང་ཕྲག་བདུན་ཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ [254a.6]འཇིག་རྟེན་གྱི་ཁམས་འོད་དྲི་མ་མེད་པར་སྐྱེ་བར་སེམས་ཀྱིས་སྨོན་ཏེ་ཚིག་འདི་སྐད་ཅེས་བཅོམ་ལྡན་འདས་ནམ་དེ་བཞིན་གཤེགས་པ་རིན་པོ་ཆེ་འབྱུང་བ་དེས་བྱང་ཆུབ་ཐོབ་པར་གྱུར་པ་དེ་ན་བདག་ཅག་ཀྱང་སངས་རྒྱས་ཀྱི་ཞིང་དེར་སྐྱེ་བར་གྱུར་ཅིག་ཅེས་སྨྲས་པ་དང་། དེ་དག་ཐམས་ [254a.7]ཅད་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་དེར་སྐྱེ་བར་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ [254b] [254b.1]ཤིག །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག །ཀུན་དགའ་བོ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་འཆང་ངམ། ཀློག་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ང་ལུང་སྟོན་ཏོ། །ཀུན་དགའ་བོ་ [254b.2]རིགས་ཀྱི་བུ་འམ། རིགས་ཀྱི་བུ་མོ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ལོ་སྟོང་དུ་ཅི་བཞེད་ཅེས་སྦྱིན་པ་བྱིན་པ་བས། རིགས་ཀྱི་བུ་འམ། རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་ཐོས་ནས་མོས་ཏེ། འཆང་ [254b.3]ངམ། ཀློག་གམ། དེ་ཁོ་ན་བཞིན་དུ་ནན་ཏན་བྱེད་ན། འདི་ནི་དེ་བས་བསོད་ནམས་ཆེས་མང་སྟེ། ཚད་མེད་གྲངས་མེད་པར་ཁོང་དུ་ཆུད་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ [254b.4]ཆོས་ཀྱི་རྣམ་གྲངས་འདི་བཟུང་ལགས་ན་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་ཞེས་བྱ་བར་ཟུང་ཤིག །དེ་ [254b.5]བཞིན་གཤེགས་པའི་མན་ངག་ཅེས་བྱ་བར་ཡང་ཟུང་ཤིག །གཙུག་ན་རིན་པོ་ཆེས་ཞུས་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་ཆེན་དང་། བྱང་ཆུབ་སེམས་དཔའ་དེ་དག་ཐམས་ཅད་ [254b.6]དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ [254b.7]ལས། གཙུག་ན་རིན་པོ་ཆེས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་བདུན་པ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་དྷརྨ་ཏཱ་ཤཱི་ལས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། [255a] [255a.1]{D92}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་བརྒྱད་པ་སྟེ་འཕགས་པ་ལྷ་མོ་དཔལ་ཕྲེང་གི་སེང་གེའི་སྒྲ་བསྟན་པ། བམ་པོ་དང་པོ། རྒྱ་གར་སྐད་དུ། ཨཱརྱ་ཤྲཱི་མཱ་ལ་དེ་བཱི་སིང་ཧ་ནཱ་ད་ནཱ་མ་མ་ཧཱ་ཡཱ་ [255a.2]ན་སཱུ་ཏྲ། བོད་སྐད་དུ། འཕགས་པ་ལྷ་མོ་དཔལ་ཕྲེང་གི་སེང་གེའི་སྒྲ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་ [255a.3]མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་དང་། བཙུན་མོ་དམ་པ་བཙུན་མོ་ཕྲེང་ལྡན་མས་ལྷ་མོ་དཔལ་ཕྲེང་ཆོས་རྟོགས་ནས་རིང་པོ་མ་ལོན་པའི་བར་སྐབས་སུ་གཏམ་གླེངས་པ། རྒྱལ་པོ་ཆེན་པོ་ཀྱེ་མ་ཁྱོད་ཀྱི་སྲས་ [255a.4]མོ་ལྷ་མོ་དཔལ་ཕྲེང་ནི་མཛངས་ཤིང་གསལ་ལ་ཟབ་ཅིང་མཁས་ཏེ། གལ་ཏེ་དེས་བཅོམ་ལྡན་འདས་མཐོང་བ་ལྟ་ན་ཚེགས་ཆུང་ངུས་ཆོས་རྟོགས་ལ། བཅོམ་ལྡན་འདས་ཀྱིས་ཆོས་བསྟན་པ་ལ་ཡང་ཐེ་ཚོམ་མ་མཆིས་པར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་ [255a.5]གྱིས་བཙུན་མོ་ཕྲེང་ལྡན་མ་ལ་འདི་སྐད་ཅེས་སྨྲས་སོ། །ཕྲེང་ལྡན་མའུ་བུ་ཅག་གིས་ལྷ་མོ་དཔལ་ཕྲེང་ལ་ཕོ་ཉ་ནུས་པ་ཞིག་གཏང་གོར་མ་ཆག་གོ །དེ་སྐད་ཅེས་སྨྲས་པ་དང་། བཙུན་མོ་ཕྲེང་ལྡན་མས་རྒྱལ་པོ་གསལ་རྒྱལ་གྱི་ཚིག་དེ་མཉན་ནས་ཀོ་ས་ལའི་རྒྱལ་པོ་གསལ་རྒྱལ་ [255a.6]དང་། བཙུན་མོ་ཕྲེང་ལྡན་མས་བཅོམ་ལྡན་འདས་ཀྱི་ཡོན་ཏན་གྱི་བསྔགས་པ་རྣམ་པ་དུ་མ་བྲིས་ཏེ། ནང་ཀོར་མ་ཡིད་བརྟན་པ་ཟླ་བ་ལྟ་བུ་ཞེས་བྱ་བ་དེའི་ལག་ཏུ་ཕྲིན་ཡིག་བསྐུར་ནས་དེ་མཐར་གྱིས་སོང་སྟེ། གྲོང་ཁྱེར་འཐབ་མེད་དུ་ཕྱིན་ནས་བཙུན་མོའི་འཁོར་དུ་སོང་སྟེ། ལྷ་མོ་དཔལ་ [255a.7]ཕྲེང་ལ་ཕྱག་འཚལ་ནས་ཕན་ཚུན་ཀུན་དགའ་བའི་གཏམ་བྱས་ཏེ་ལྷ་མོ་དཔལ་ཕྲེང་གི་ལག་ཏུ་ཕྲིན་ཡིག་བྱིན་ནོ། །དེ་ནས་ལྷ་མོ་དཔལ་ཕྲེང་གིས་ཕ་མ་ལ་གུས་པས་ཕྲིན་ཡིག་དེ་ལག་པ་གཉིས་ཀྱིས་བླངས་ནས་མགོ་ལ་གཏུགས་ཏེ་བདག་ཉིད་ཀྱིས་ཕྲིན་ཡིག་བཀླགས་ནས། ཕྲིན་ཡིག་གི་ [255b] [255b.1]དོན་བཟང་ངོ་ཞེས་ངེས་པར་བཟུང་སྟེ། དོན་དུ་ངེས་པར་བཟུང་ནས་མགོ་གཅོགས་ཏེ་ཡ་མཚན་དུ་བཟུང་ནས་ལྷ་མོ་དཔལ་ཕྲེང་གིས་ནང་ཀོར་མ་ཟླ་བ་ལྟ་བུ་ལ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཞེས་བྱའི་སྒྲ་འདི་ནི། །འཇིག་རྟེན་དག་ན་ཤིན་ཏུ་དཀོན། །གལ་ཏེ་ཚིག་འདི་བདེན་ [255b.2]གྱུར་ན། །བདག་གིས་ཁྱོད་ལ་བགོ་བ་སྦྱིན། །གལ་ཏེ་བཅོམ་ལྡན་སངས་རྒྱས་དེ། །འཇིག་རྟེན་དོན་དུ་བྱུང་གྱུར་ན། །དེ་ནི་བདག་ལ་ཐུགས་རྗེ་ཡིས། །བསྟན་པའི་ཆེད་དུ་འདིར་སྤྱོན་ཅིག །དེ་ནས་དེ་ཡི་སྐད་ཅིག་ལ། །མགོན་པོ་གཤེགས་ནས་མཁའ་ལ་བཞུགས། །བསམ་ [255b.3]གྱིས་མི་ཁྱབ་སངས་རྒྱས་སྐུ། །འོད་ཟེར་འགྱེད་ཅིང་བཞུགས་པ་མཐོང་། །དེ་ནས་དེ་ཚེ་ལྷ་མོ་ནི། །གུས་པས་འཁོར་བཅས་ལངས་ནས་ཀྱང་། །སྤྱི་བོར་ཐལ་མོ་སྦྱར་བྱས་ནས། །སྨྲ་བའི་མཆོག་ལ་བསྟོད་པ་ནི། །མགོན་པོ་ཁྱོད་ཀྱི་སྐུ་གཟུགས་དང་། །དཔལ་དཔེ་གང་ [255b.4]ནའང་ཡོད་མ་མཆིས། །བསམ་ཡས་དཔེ་ཟླ་མ་མཆིས་པའི། །འཇིག་རྟེན་མགོན་ལ་ཕྱག་འཚལ་ལོ། །མགོན་པོ་ཁྱོད་ཀྱི་སྐུ་གཟུགས་དང་། །ཡེ་ཤེས་ལ་ཡང་བས་མ་མཆིས། །ཁྱོད་ཀྱི་སངས་རྒྱས་ཆོས་མི་བས། །དེ་བས་ཐུབ་ཁྱོད་སྐྱབས་ཀྱང་ལགས། །བསམ་ཡས་ [255b.5]རྩལ་ལྡན་ཁྱོད་ཀྱིས་ནི། །སྐུ་གསུང་ཐུགས་ཀྱི་སྐྱོན་རྣམས་བསལ། །ཉམས་མ་མཆིས་པའི་ས་བརྙེས་པ། །ཆོས་རྒྱལ་ཁྱོད་ལ་ཕྱག་འཚལ་ལོ། །ཤེས་བྱ་ཐམས་ཅད་ཁྱོད་ཀྱིས་མཁྱེན། །ཡེ་ཤེས་སྐུ་ཡི་དབང་ཕྱུག་སྟེ། །སངས་རྒྱས་ཆོས་རྣམས་ཐམས་ཅད་ཀྱི། །མཐར་ཕྱིན་ [255b.6]ཁྱོད་ལ་ཕྱག་འཚལ་ལོ། །གཞལ་ཡས་ཁྱོད་ལ་ཕྱག་འཚལ་ལོ། །དཔེ་ལས་འདས་ལ་ཕྱག་འཚལ་ལོ། །བསམ་ཡས་ཆོས་ཁྱོད་ཕྱག་འཚལ་ལོ། །མཐའ་ཡས་གཟུགས་ཁྱོད་ཕྱག་འཚལ་ལོ། །བདག་ནི་ད་ལྟར་མགོན་པོས་བསྐྱབས། །བྱང་ཆུབ་ས་བོན་རྣམ་པར་བསྐྱེད། ། [255b.7]སླན་ཆད་སྲིད་པ་གཞན་དག་ཏུ། །ཐུབ་པས་བདག་ལ་ཕན་གདགས་མཛོད། །བཅོམ་ལྡན་འདས་ཀྱིས་བཀའ་སྩལ་པ། །སྔོན་ཚེ་རྣམས་སུ་ལྷ་མོ་ཁྱོད། །ངས་ནི་བྱང་ཆུབ་སྦྱོར་བ་བྱས། །ཕྱིས་ཀྱང་ཚེ་རབས་གཞན་དག་ཏུ། །ངས་ནི་རྗེས་སུ་གཟུང་བར་བྱ། །ལྷ་མོ་ [256a] [256a.1]དཔལ་ཕྲེང་གིས་གསོལ་པ། །བདག་གིས་འདི་དང་གཞན་དག་ཏུ། །བསོད་ནམས་གང་དང་གང་བགྱིས་པ། །བསོད་ནམས་དེ་ཡིས་མགོན་པོ་ཁྱོད། །རྟག་ཏུ་བདག་གིས་མཐོང་བར་ཤོག །དེ་ནས་ལྷ་མོ་དཔལ་ཕྲེང་དང་ལྷན་ཅིག་ཏུ་བཙུན་མོ་ཀུན་དང་ཐམས་ཅད་ [256a.2]དང་ལྡན་པའི་འཁོར་གྱིས་བཅོམ་ལྡན་འདས་ཀྱི་ཞབས་ལ་གཏུགས་སོ། །དེ་ནས་བཅོམ་ལྡན་འདས་ཀྱིས་འཁོར་འདུས་པའི་ནང་དུ་ལྷ་མོ་དཔལ་ཕྲེང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལྷ་མོ་ཁྱོད་ཀྱིས་དེ་བཞིན་གཤེགས་པ་ལ་ཡང་དག་པའི་ཡོན་ཏན་ [256a.3]དག་གིས་མངོན་པར་བསྟོད་པའི་བསོད་ནམས་བསགས་པ་གང་ཡིན་པའི་དགེ་བའི་རྩ་བ་འདིས་ལྷ་མོ་ཁྱོད་བསྐལ་པ་ཚད་མེད་གྲངས་མེད་པར་ལྷ་དང་མིའི་རྒྱལ་སྲིད་ཕུན་སུམ་ཚོགས་པ་མྱོང་བར་འགྱུར་ཏེ། ཚེ་རབས་ཐམས་ཅད་དུ་ཡང་ང་མཐོང་བ་དང་བྲལ་བར་མི་འགྱུར་ཞིང་ང་ལ་ [256a.4]མངོན་སུམ་དུ་འདི་ལྟ་བུའི་བསྟོད་པ་བསྔགས་པས་བསྔགས་པར་འགྱུར་རོ། །སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་ལ་ཡང་མཆོད་པ་བྱེད་པར་འགྱུར་རོ། །ད་ཕྱིན་ཆད་བསྐལ་པ་བརྒྱ་སྟོང་ཕྲག་གྲངས་མེད་པ་ཉི་ཤུ་ན་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་ [256a.5]དག་པར་རྫོགས་པའི་སངས་རྒྱས་ཀུན་ཏུ་བཟང་པོ་ཞེས་བྱ་བར་འགྱུར་ཏེ། དེའི་ཚེ་ཡང་ལྷ་མོ་ཁྱོད་ཀྱི་སངས་རྒྱས་ཀྱི་ཞིང་དེར་ངན་སོང་དག་འབྱུང་བར་མི་འགྱུར་རོ། །དེའི་ཚེ་སེམས་ཅན་རྣམས་ཀྱང་དགེ་བ་བཅུའི་ལས་ཀྱི་ལམ་ལ་གནས་པར་འགྱུར་ཏེ། སེམས་ཅན་དེ་དག་ལ་ནད་ཀྱང་མེད་ [256a.6]རྒ་བ་ཡང་མེད། །ཡིད་དུ་མི་འོང་བའི་གནོད་པ་ཡང་མེད་དེ། མི་དགེ་བའི་ལས་ཀྱི་ལམ་རྣམས་ཀྱི་མིང་ཡང་མི་གྲག་པར་འགྱུར་རོ། །སངས་རྒྱས་ཀྱི་ཞིང་དེར་སེམས་ཅན་གང་དག་འབྱུང་བ་དེ་དག་གིས་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱང་འདི་ལྟར་བདེ་བ་དང་། གཟུགས་ [256a.7]དང་། ཁ་དོག་དང་། དཔལ་དང་། གཟི་བརྗིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ལོངས་སྤྱོད་ཐམས་ཅད་ཀྱིས་ཟིལ་གྱིས་ནོན་པར་འགྱུར་ཏེ། སེམས་ཅན་དེ་དག་ཤིན་ཏུ་བདེ་བ་དང་ལྡན་པར་འགྱུར་རོ། །ལྷ་མོ་སངས་རྒྱས་ཀྱི་ཞིང་དེར་ [256b] [256b.1]སེམས་ཅན་གང་དག་འབྱུང་བ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པར་འགྱུར་རོ། །ལྷ་མོ་དེ་བཞིན་དུ་དགེ་བའི་རྩ་བ་དག་བྱས་པའི་སེམས་ཅན་རྣམས་དེའི་ཚེ་སངས་རྒྱས་ཀྱི་ཞིང་དེར་འདུ་བར་འགྱུར་རོ། །དེ་ནས་ལྷ་མོ་དཔལ་ཕྲེང་གི་ལུང་བསྟན་པ་ཕུན་ [256b.2]སུམ་ཚོགས་པ་ཐོས་ནས་ལྷ་དང་མི་དཔག་ཏུ་མེད་པ་དག་གིས་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་བོ། །དེ་དག་ཐམས་ཅད་ཀྱང་འཇིག་རྟེན་གྱི་ཁམས་དེར་སྐྱེ་བར་བཅོམ་ལྡན་འདས་ཀྱིས་ལུང་བསྟན་ཏོ། །དེ་ནས་ལྷ་མོ་དཔལ་ཕྲེང་གིས་བཅོམ་ལྡན་འདས་ལས་མངོན་ [256b.3]སུམ་དུ་བདག་ཉིད་ལུང་བསྟན་པ་ཐོས་ནས་ཐལ་མོ་སྦྱར་ཏེ་ཡི་དམ་ཆེན་པོ་བཅུ་ཡང་དག་པར་བླངས་སོ། །བཅུ་གང་ཞེ་ན་འདི་ལྟ་སྟེ། བཅོམ་ལྡན་འདས་ད་སླན་ཆད་བདག་གིས་ཚུལ་ཁྲིམས་ཀྱི་དུས་ལས་འདའ་བའི་སེམས་བསྐྱེད་པར་མི་བགྱི་སྟེ། བཅོམ་ལྡན་འདས་ཡི་དམ་དང་ [256b.4]པོ་འདི་ནི་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་བླ་མ་དག་ལ་མ་གུས་པའི་སེམས་བསྐྱེད་པར་མི་བགྱི་སྟེ། བཅོམ་ལྡན་འདས་ཡི་དམ་གཉིས་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་ [256b.5]དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་གང་དུ་ཡང་སེམས་ཅན་ལ་ཁྲོ་བ་དང་། གནོད་སེམས་ཀྱི་སེམས་བསྐྱེད་པར་མི་བགྱི་སྟེ། བཅོམ་ལྡན་འདས་ཡི་དམ་གསུམ་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ [256b.6]ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་གཞན་གྱི་དཔལ་དང་། གཞན་གྱི་ཕུན་སུམ་ཚོགས་པ་དག་ལ་ཕྲག་དོག་གི་སེམས་བསྐྱེད་པར་མི་བགྱི་སྟེ། བཅོམ་ལྡན་འདས་ཡི་དམ་བཞི་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ [256b.7]ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་ཐ་ན་ཁམ་སླད་མ་ཙམ་ལ་ཡང་སེར་སྣའི་སེམས་བསྐྱེད་པར་མི་བགྱི་སྟེ། བཅོམ་ལྡན་འདས་ཡི་དམ་ལྔ་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་ [257a] [257a.1]འདས་ད་སླན་ཆད་བདག་གིས་བདག་ཉིད་ཀྱིས་ལོངས་སྤྱོད་པའི་སླད་དུ་ནོར་ཡོངས་སུ་གཟུང་བར་མི་བགྱི་སྟེ། འོན་ཀྱང་བཅོམ་ལྡན་འདས་སེམས་ཅན་དབུལ་པོ་སྡུག་བསྔལ་ཞིང་མགོན་མ་མཆིས་པ་ཡོངས་སུ་སྨིན་པར་བགྱི་བའི་སླད་དུ་ཡོངས་སུ་གཟུང་བར་འཚལ་ [257a.2]ཏེ། བཅོམ་ལྡན་འདས་ཡི་དམ་དྲུག་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་བསྡུ་བའི་དངོས་པོ་བཞིས་སེམས་ཅན་རྣམས་ལ་ཕན་འདོགས་པས་ན་བདག་ལ་སྨན་དུ་རེ་བའི་སླད་དུ་སེམས་ཅན་ [257a.3]བསྡུ་བར་མི་བགྱི་སྟེ། འོན་ཀྱང་བཅོམ་ལྡན་འདས་ཟང་ཟིང་མ་མཆིས་པའི་སེམས་དང་། ཆོག་པར་མི་འཛིན་པ་དང་ལྡོག་པ་མ་མཆིས་པར་སེམས་ཅན་ཡང་དག་པར་བསྡུ་བར་འཚལ་ཏེ། བཅོམ་ལྡན་འདས་ཡི་དམ་བདུན་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་ [257a.4]བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་སེམས་ཅན་མགོན་མ་མཆིས་པ་དང་། གོ་རར་སྩལ་བ་དང་བཅིངས་པ་དང་ནད་ཀྱིས་ཉམ་ཐག་པ་དང་སྡུག་བསྔལ་བ་དང་། དབུལ་པོ་དང་ཕོངས་པར་གྱུར་པ་དང་། ཚེགས་ཆེན་པོས་འཚོ་བ་དག་ [257a.5]མཐོང་ན། དེ་དག་ལ་སྨན་མ་བཏགས་པར་གོམ་པ་གཅིག་ཀྱང་དོར་བར་མི་བགྱིའི། བཅོམ་ལྡན་འདས་བདག་གིས་སེམས་ཅན་སྡུག་བསྔལ་གྱིས་ཉམ་ཐག་པ་དེ་དག་མཐོང་ན་སྡུག་བསྔལ་དེ་དང་དེ་དག་ལས་ཡོངས་སུ་ཐར་བར་བགྱིས་ལ་ནོར་གྱི་བསྡུ་བས་བསྒྲུབས་ནས་སླད་ཀྱིས་ [257a.6]བདག་མཆི་བར་བགྱིས་ཏེ། བཅོམ་ལྡན་འདས་ཡི་དམ་བརྒྱད་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་ཕག་འཚོང་དང་། བྱ་བ་ལ་སོགས་པ་སྡིག་པའི་ལས་ཀྱིས་འཚོ་ཞིང་དེ་བཞིན་ [257a.7]གཤེགས་པས་བཀའ་སྩལ་པའི་ཆོས་འདུལ་བ་ལས་ཉམས་པའི་ཆོས་ཅན་དག་མཐོང་ན་ཡལ་བར་མི་དོར་གྱི། བཅོམ་ལྡན་འདས་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་གང་དང་གང་དག་ན་བདག་གིས་མཆིད་ཉན་པ་དེ་དང་དེ་དག་ཏུ་ཚར་དགུམ་ [257b] [257b.1]པའི་རིགས་པ་རྣམས་ལ་ནི་ཚར་དགུམ། སྨན་གདགས་པའི་རིགས་པ་རྣམས་ལ་ནི་སྨན་གདགས་པར་འཚལ་ལ། དེ་ཅིའི་ཕྱིར་ཞེ་ན། བཅོམ་ལྡན་འདས་ཚར་དགུམ་པ་དང་། སྨན་གདགས་པས་ནི་འཇིག་རྟེན་དུ་དམ་པའི་ཆོས་ཡུན་རིང་དུ་གནས་པར་འགྱུར་བའི་སླད་དུ་སྟེ། [257b.2]དམ་པའི་ཆོས་ཡུན་རིང་དུ་གནས་ན་ལྷ་དང་མི་རྣམས་ཀྱི་ལུས་རྣམ་པར་འཕེལ་བར་འགྱུར་ཞིང་ངན་སོང་རྣམས་ཡོངས་སུ་འགྲིབ་པར་འགྱུར་ཏེ། བཅོམ་ལྡན་འདས་འདི་ནི་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་རྗེས་སུ་སྐོར་བར་བགྱིད་པ་ལགས་ཏེ། བཅོམ་ལྡན་ [257b.3]འདས་ཡི་དམ་དགུ་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་ད་སླན་ཆད་བདག་གིས་དམ་པའི་ཆོས་ཡོངས་སུ་བཟུང་བ་ལས་བསྐྱུད་པར་བགྱི་བའི་སེམས་གཅིག་ཙམ་ཡང་བསྐྱེད་པར་མི་བགྱིའོ། །དེ་ཅིའི་སླད་དུ་ [257b.4]ཞེ་ན། བཅོམ་ལྡན་འདས་དམ་པའི་ཆོས་གཟུང་བ་ལས་བསྐྱུད་ན་ཐེག་པ་ཆེན་པོ་བསྐྱུད་པར་འགྱུར་རོ། །བཅོམ་ལྡན་འདས་ཐེག་པ་ཆེན་པོ་བསྐྱུད་ན་ཕ་རོལ་ཏུ་ཕྱིན་པ་བསྐྱུད་པར་འགྱུར་རོ། །བཅོམ་ལྡན་འདས་ཕ་རོལ་ཏུ་ཕྱིན་པ་བསྐྱུད་ན་ཐེག་པ་ཆེན་པོ་ལས་མི་འདུན་པར་ [257b.5]འགྱུར་རོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཐེག་པ་ཆེན་པོ་ལས་མ་ངེས་པ་དེ་ནི་དམ་པའི་ཆོས་ཡོངས་སུ་འཛིན་པ་ལ་མི་འདུན་པར་འགྱུར་ཞིང་རང་ཉམ་དུ་གནས་པར་འགྱུར་ཏེ། བཅོམ་ལྡན་འདས་དེ་ནི་བྱིས་པ་སོ་སོའི་སྐྱེ་བོའི་སར་མཆི་ [257b.6]བའི་སྐལ་བ་ཅན་དུ་འགྱུར་ཏེ། བཅོམ་ལྡན་འདས་འདི་ནི་བདག་གིས་ཉེས་དམིགས་དང་། གནོད་པ་ཆེན་པོར་མཐོང་ལགས་སོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ལས་ནི་བདག་དང་མ་འོངས་པའི་བྱང་ཆུབ་སེམས་དཔའ་རྣམས་ཀྱི་ཕན་ཡོན་དཔག་ཏུ་མ་མཆིས་ [257b.7]པའི་དོན་ཡོངས་སུ་གྲུབ་པར་མཐོང་སྟེ། བཅོམ་ལྡན་འདས་དམ་པའི་ཆོས་ཡོངས་སུ་གཟུང་བའི་ཡི་དམ་བཅུ་པ་འདི་ཡང་བྱང་ཆུབ་ཀྱི་སྙིང་པོའི་མཐར་ཐུག་གི་བར་དུ་བདག་གིས་ཡང་དག་པར་བླང་ངོ་། །བཅོམ་ལྡན་འདས་བདག་གི་ཡི་དམ་ཆེན་པོ་བཅུ་པོ་འདི་དག་ནི་བཅོམ་ལྡན་ [258a] [258a.1]འདས་ཀྱི་སྤྱན་སྔར་བླངས་པ་ལགས་ཏེ། འདི་ལ་ཆོས་ཀྱི་རྗེ་ཉིད་བདག་གི་དབང་དུ་གྱུར་པ་ལགས་སོ། །བཅོམ་ལྡན་འདས་སྟོན་པ་མངོན་སུམ་དུ་གྱུར་དུ་ལགས་ཀྱང་སེམས་ཅན་དགེ་བའི་རྩ་བ་ཆུང་ངུ་ལ་ལ་དག་ཀྱེ་མ་ཡི་དམ་ཆེན་པོ་བཅུ་པོ་འདི་དག་ནི་ལྕོགས་པར་དཀའོ་སྙམ་དུ་བདག་ལ་ཐེ་ཚོམ་ [258a.2]ཟ་འམ། ཡིད་གཉིས་འཚལ་བ་དེ་དག་ནི་བཅོམ་ལྡན་འདས་དེ་ཉིད་ཀྱིས་ཡུན་རིང་པོར་གནོད་པ་དང་། སྡུག་བསྔལ་བ་དང་ཕུང་བར་འགྱུར་ཏེ། བཅོམ་ལྡན་འདས་དེ་དག་ཉིད་ལ་སྨན་གདགས་པའི་སླད་དུ་བཅོམ་ལྡན་འདས་ཀྱི་སྤྱན་སྔར་བདེན་པའི་བྱིན་གྱི་རླབས་འདི་བགྱི་བར་འཚལ་ཏེ། བཅོམ་ལྡན་ [258a.3]འདས་བདག་གིས་ཡི་དམ་ཆེན་པོ་བཅུ་པོ་གང་དག་བླངས་པའི་ཡི་དམ་ཆེན་པོ་བཅུ་པོ་འདི་དག་ལ་བཅོམ་ལྡན་འདས་གལ་ཏེ་བདག་ཇི་སྐད་སྨྲས་པ་དེ་བཞིན་དུ་བགྱིད་པར་འགྱུར་བ་ལྟ་ན། བཅོམ་ལྡན་འདས་བདག་གི་བདེན་པའི་ཚིག་འདིས་འཁོར་གྱི་དཀྱིལ་འཁོར་འདིར་ལྷའི་མེ་ཏོག་གི་ཆར་འབབ་པར་གྱུར་ཅིག །ལྷའི་ [258a.4]སྒྲ་གྲག་པར་གྱུར་ཅིག །དེས་ཀྱང་བདག་གི་བདེན་པའི་བྱིན་གྱི་རླབས་འདི་ལེན་པར་གྱུར་ཅིག །ལྷ་མོ་དཔལ་ཕྲེང་གིས་ཚིག་དེ་སྐད་ཅེས་སྨྲས་མ་ཐག་ཏུ་དེའི་ཚེ་ལྷའི་མེ་ཏོག་གི་ཆར་ཆེན་པོ་བབ་ནས་བར་སྣང་ལས་ལྷའི་སྒྲ་གྲག་པར་གྱུར་ཏེ། དེས་བདེན་པའི་བྱིན་གྱི་རླབས་དེ་མནོས་ནས་ལྷ་མོ་དེ་དེ་བཞིན་ནོ། ། [258a.5]ཇི་ལྟར་ཁྱོད་ཀྱིས་བདེན་པའི་བྱིན་གྱི་རླབས་བྱས་པ་དེ་ནི་དེ་བཞིན་དུ་འགྱུར་ཏེ་གཞན་དུ་མ་ཡིན་ནོ་ཞེས་བྱས་སོ། །དེ་ནས་རྨད་དུ་བྱུང་བའི་ཆོ་འཕྲུལ་དེ་ཡང་མཐོང་། ལྷའི་སྒྲ་མནོས་པ་དེ་ཡང་ཐོས་ནས་ཐམས་ཅད་དང་ལྡན་པའི་འཁོར་ཐེ་ཚོམ་མེད་ཅིང་མཆོག་ཏུ་དགའ་བར་གྱུར་ཏེ། ལྷ་མོ་དཔལ་ཕྲེང་དང་མི་འབྲལ་ཞིང་ [258a.6]འགྲོགས་པར་སྨོན་ལམ་བཏབ་བོ། །འཁོར་དེ་ཐམས་ཅད་ཀྱང་དེ་བཞིན་དུ་འབྲལ་བར་མི་འགྱུར་བར་བཅོམ་ལྡན་འདས་ཀྱིས་ལུང་བསྟན་ཏོ། །དེ་ནས་ལྷ་མོ་དཔལ་ཕྲེང་གིས་བཅོམ་ལྡན་འདས་ཀྱི་སྤྱན་སྔར་སྨོན་ལམ་ཆེན་པོ་གསུམ་བཏབ་བོ། །གསུམ་གང་ཞེ་ན། བཅོམ་ལྡན་འདས་བདག་གིས་བདེན་པའི་ [258a.7]བྱིན་གྱི་རླབས་འདིས་སེམས་ཅན་དཔག་ཏུ་མ་མཆིས་པ་དག་ལ་སྨན་བཏགས་པ་གང་ལགས་པའི་བསོད་ནམས་བསགས་པའི་དགེ་བའི་རྩ་བ་དེས་བཅོམ་ལྡན་འདས་བདག་ཚེ་རབས་ཐམས་ཅད་དུ་དམ་པའི་ཆོས་རྟོགས་པ་ཐོབ་པར་གྱུར་ཅིག །བཅོམ་ལྡན་འདས་འདི་ནི་བདག་གི་སྨོན་ལམ་ཆེན་པོ་དང་པོ་ལགས་སོ། ། [258b] [258b.1]བཅོམ་ལྡན་འདས་བདག་གིས་དམ་པའི་ཆོས་རྟོགས་པ་དེ་ཐོབ་ནས་ཀྱང་ངལ་བ་དང་ཡོངས་སུ་སྐྱོ་བ་མ་མཆིས་པར་སེམས་ཅན་རྣམས་ལ་ཆོས་སྟོན་པར་གྱུར་ཅིག །བཅོམ་ལྡན་འདས་འདི་ནི་བདག་གི་སྨོན་ལམ་ཆེན་པོ་གཉིས་པ་ལགས་སོ། །བཅོམ་ལྡན་འདས་བདག་གིས་དམ་པའི་ཆོས་བསྟན་པ་དེ་ཡང་ལུས་དང་ [258b.2]སྲོག་ལ་མི་ལྟ་བར་དམ་པའི་ཆོས་བསྲུང་བ་དང་། དམ་པའི་ཆོས་ཡོངས་སུ་གཟུང་བར་འཚལ་ལོ། །བཅོམ་ལྡན་འདས་འདི་ནི་བདག་གི་སྨོན་ལམ་ཆེན་པོ་གསུམ་པ་ལགས་ཏེ། བཅོམ་ལྡན་འདས་བདག་ནི་སྨོན་ལམ་ཆེན་པོ་གསུམ་པོ་དེ་དག་འདེབས་སོ། །དེ་ནས་བཅོམ་ལྡན་འདས་ཀྱིས་ལྷ་མོ་དཔལ་ [258b.3]ཕྲེང་གི་སྨོན་ལམ་ཆེན་པོ་ཡུལ་ཆེ་བ་གསུམ་པོ་འདི་དག་ལུང་སྟོན་པ་མཛད་དེ། ལྷ་མོ་འདི་ལྟ་སྟེ་དཔེར་ན་གཟུགས་སུ་གཏོགས་པ་ཐམས་ཅད་ནི་ནམ་མཁའི་ཁམས་ཀྱི་ཁོངས་སུ་འདུས་ཤིང་ཁོངས་སུ་གཏོགས་ལ་ཁོངས་སུ་ཆུད་དོ། །ལྷ་མོ་དེ་བཞིན་དུ་བྱང་ཆུབ་སེམས་དཔའི་སྨོན་ལམ་གང་གཱའི་ཀླུང་གི་བྱེ་མ་སྙེད་ [258b.4]དག་ཀྱང་སྨོན་ལམ་ཆེན་པོ་འདི་གསུམ་གྱི་ཁོངས་སུ་འདུས་ཤིང་ཁོངས་སུ་གཏོགས་ལ་ཁོངས་སུ་ཆུད་དེ། སྨོན་ལམ་ཆེན་པོ་གསུམ་པོ་དེ་དག་ནི་དེ་ལྟར་ཡུལ་ཆེའོ། །དེ་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་སྨོན་ལམ་ཆེན་པོའི་ཡུལ་བསྟན་པ་ [258b.5]གཞན་ཡང་དེ་བཞིན་གཤེགས་པའི་མཐུས་བདག་གིས་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ཁྱོད་ལ་དེ་བཞིན་གཤེགས་པས་གནང་གིས་ཁྱོད་སྤོབས་པར་གྱིས་ཤིག་དེ་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་ [258b.6]དཔའི་སྨོན་ལམ་གང་གཱའི་ཀླུང་གི་བྱེ་མ་སྙེད་གང་དག་ལགས་པ་དེ་དག་ཐམས་ཅད་ཀྱང་འདི་ལྟར་དམ་པའི་ཆོས་ཡོངས་སུ་གཟུང་བའི་སྨོན་ལམ་ཆེན་པོ་གཅིག་གི་ཁོངས་སུ་འདུས་ཤིང་ཁོངས་སུ་ཆུད་དེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་དེ་ལྟར་ཡུལ་ཆེ་བ་ལགས་སོ། །དེ་ནས་ [258b.7]བཅོམ་ལྡན་འདས་ཀྱིས་ལྷ་མོ་དཔལ་ཕྲེང་ལ་ལེགས་སོ་ཞེས་བྱ་བ་བྱིན་ཏེ། ལྷ་མོ་ལེགས་སོ་ལེགས་སོ། །ལྷ་མོ་ཁྱོད་ནི་ཤེས་རབ་ཟབ་པ་སྟེ། ཐབས་ཀྱིས་ཡོངས་སུ་བསྒོས་པའི་ཤེས་རབ་དང་ལྡན་ནོ། །ལྷ་མོ་སེམས་ཅན་གང་དག་ཁྱོད་ཀྱིས་ཆོས་བསྟན་པའི་དོན་རྟོགས་པ་དེ་དག་ནི་དཀོན་པ་ཡིན་ཏེ། [259a] [259a.1]ཡུན་རིང་པོ་ནས་སངས་རྒྱས་དུ་མ་ལ་དགེ་བའི་རྩ་བ་བསྐྱེད་བསྐྱེད་པ་ཡིན་ནོ། །ལྷ་མོ་ཁྱོད་ཀྱིས་དམ་པའི་ཆོས་ཡོངས་སུ་གཟུང་བ་བསྟན་པ་ཇི་སྐད་བཤད་པ་དེ་བཞིན་དུ་འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱིས་ཀྱང་དམ་པའི་ [259a.2]ཆོས་ཡོངས་སུ་གཟུང་བ་བསྟན་པ་དེ་ཉིད་བཤད་དོ། །འཆད་དོ། །འཆད་པར་འགྱུར་རོ། །ལྷ་མོ་ང་ཡང་ད་ལྟར་མངོན་པར་རྫོགས་པའི་བྱང་ཆུབ་མཆོག་ཐོབ་ནས་དམ་པའི་ཆོས་ཡོངས་སུ་གཟུང་བ་བསྟན་པ་རྣམ་པ་དུ་མར་སྟོན་ཏེ། ལྷ་མོ་དེ་ལྟར་དམ་པའི་ཆོས་ཡོངས་སུ་གཟུང་བ་བསྟན་པ་ངས་རྣམ་པ་དུ་ [259a.3]མར་བཤད་ཀྱང་དམ་པའི་ཆོས་ཡོངས་སུ་འཛིན་པའི་ཡོན་ཏན་རྣམས་ཀྱི་མཐའ་འམ་མུ་ཐུག་པ་མེད་དོ། །དེ་བཞིན་གཤེགས་པའི་སྤོབས་པ་ལ་ཡང་མཐའ་འམ་མུ་ཐུག་པ་མེད་དོ། །ལྷ་མོ་དམ་པའི་ཆོས་ཡོངས་སུ་འཛིན་པ་ནི་དེ་ལྟར་དོན་ཆེའོ། །ལྷ་མོ་དམ་པའི་ཆོས་ཡོངས་སུ་འཛིན་པ་ནི་དེ་ལྟར་ [259a.4]ཕན་ཡོན་ཆེའོ། །དེ་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་མཐུས་དོན་ཆེན་པོ་བསྟན་པ་གཞན་ཡང་བདག་གིས་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ད་དེའི་དུས་ལ་བབ་པར་ཤེས་ [259a.5]ན་ཁྱོད་སྤོབས་པར་གྱིས་ཤིག །དེ་ནས་བཅོམ་ལྡན་འདས་ཀྱིས་གནང་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་སངས་རྒྱས་ཀྱི་ཆོས་དཔག་ཏུ་མ་མཆིས་པ་ཐམས་ཅད་ཡོངས་སུ་རྫོགས་པར་འགྱུར་བ་ལགས་ [259a.6]སོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་ཆོས་ཀྱི་སྒོ་བརྒྱད་ཁྲི་བཞི་སྟོང་སྡུད་པ་ལགས་སོ། །བཅོམ་ལྡན་འདས་དཔེར་ན་འཆགས་པའི་དུས་ཀྱི་ཚེའི་སྤྲིན་ཆེན་པོའི་ནི་བདོག་མཐའ་ཡས་པའི་རྒྱུན་དང་། རིན་པོ་ཆེ་མཐའ་ཡས་པའི་རྒྱུན་དང་ལྡན་པ་ལགས་སོ། །བཅོམ་ལྡན་འདས་དེ་བཞིན་དུ་ [259a.7]དམ་པའི་ཆོས་ཡོངས་སུ་འཛིན་པ་ཡང་བསོད་ནམས་ཀྱི་རྣམ་པར་སྨིན་པའི་ཆབ་ཀྱི་རྒྱུན་དཔག་ཏུ་མ་མཆིས་པ་དང་། ཡེ་ཤེས་རིན་པོ་ཆེའི་རྒྱུན་དཔག་ཏུ་མ་མཆིས་པ་དང་ལྡན་པ་ལགས་སོ། །བཅོམ་ལྡན་འདས་དཔེར་ན་འཆགས་པའི་དུས་ཀྱི་ཚེ་ཆབ་ཀྱི་ཕུང་པོ་ཆེན་པོ་སྟོང་གསུམ་གྱི་སྟོང་ཆེན་པོའི་ [259b] [259b.1]འཇིག་རྟེན་གྱི་ཁམས་ཀྱི་སྐྱེ་གནས་དེ་ལས་ནི་གླིང་བཞི་པ་བྱེ་བ་ཕྲག་བརྒྱ་ཁ་དོག་སྣ་ཚོགས་པ་དང་། དབྱིབས་སྣ་ཚོགས་པ་འབྱུང་ཞིང་། འཁོར་གླིང་ཕྲན་བྱེ་བ་བརྒྱ་ཕྲག་བརྒྱད་ཅུ་རྩ་བཞི་ཆབ་ཀྱི་ཕུང་པོ་ཆེན་པོ་དེ་ལས་འབྱུང་ངོ་། །བཅོམ་ལྡན་འདས་དེ་བཞིན་དུ་དམ་པའི་ཆོས་ཡོངས་སུ་འཛིན་ [259b.2]པ་ཐེག་པ་ཆེན་པོ་ཡང་དག་པར་འགྲུབ་པའི་འབྱུང་ཁུངས་དང་། སྐྱེ་གནས་སུ་གྱུར་པ་དེ་ལས་བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་དང་། ཆོས་སྣང་བའི་སྒོ་རྣམ་པ་སྣ་ཚོགས་དང་། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་དང་། འཇིག་རྟེན་གྱི་དབང་ཕྱུག་ [259b.3]ཐམས་ཅད་དང་། འཇིག་རྟེན་ལས་འདས་པའི་བདེ་བ་ལྷ་དང་མི་རྣམས་ཀྱིས་སྔོན་མ་མྱོང་བ་གང་ལགས་པ་ཐམས་ཅད་འབྱུང་བར་འགྱུར་རོ། །བཅོམ་ལྡན་འདས་དཔེར་ན་ས་ཆེན་པོ་ནི་ཁུར་ཆེན་པོ་བཞིའི་རྟེན་བགྱིད་པ་ལགས་ཏེ། བཞི་པོ་དེ་དག་གང་ཞེ་ན་འདི་ལྟ་སྟེ། ཆབ་ཀྱི་ [259b.4]ཕུང་པོ་ཆེན་པོ་རྒྱ་མཚོ་དང་། རི་མང་པོ་ཐམས་ཅད་དང་གནས་པ་དང་། རྩྭ་དང་། ཤིང་གེལ་པ་དང་། སྨན་དང་། མེ་ཏོག་དང་། ནགས་ཚལ་ཐམས་ཅད་དང་། སེམས་ཅན་གྱི་ཚོགས་ཐམས་ཅད་ཀྱི་རྟེན་བགྱིད་དེ། བཅོམ་ལྡན་འདས་ཇི་ལྟར་ས་ཆེན་པོ་ཁུར་ཆེན་པོ་བཞི་པོ་འདི་དག་གི་རྟེན་ [259b.5]བགྱིད་པ་དེ་བཞིན་དུ། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དམ་པའི་ཆོས་ཡོངས་སུ་འཛིན་པ་ནི་ས་ཆེན་པོ་བས་ཀྱང་ཆེས་ཁུར་ཆེན་པོ་བཞི་ཁྱེར་བ་ལགས་སོ། །བཞི་གང་ཞེ་ན་འདི་ལྟ་སྟེ། རིགས་ཀྱི་བུ་འམ་རིགས་ཀྱི་བུ་མོ་སེམས་ཅན་དགེ་བའི་བཤེས་གཉེན་དང་བྲལ་ཞིང་ [259b.6]ཐོས་པ་དང་མི་ལྡན་ལ་ཆོས་ཅན་མ་ལགས་པ་རྣམས་ལྷ་དང་མིའི་ཕུན་སུམ་ཚོགས་པ་འཐོབ་པར་བགྱིད་པའི་དགེ་བའི་རྩ་བ་དག་ལ་སྦྱོར་བ་ནི་ས་ཆེན་པོ་བས་ཀྱང་ཆེས་ཁུར་ཆེན་པོ་ཁྱེར་བ་ལགས་སོ། །རིགས་ཀྱི་བུའམ་རིགས་ཀྱི་བུ་མོ་སེམས་ཅན་ཁ་ཅིག་ཉན་ཐོས་ཀྱི་ཐེག་པ་ལ་སྦྱོར་བར་བགྱིད་པ་ནི་ས་ཆེན་ [259b.7]པོ་བས་ཀྱང་ཆེས་ཁུར་ཆེན་པོ་ཁྱེར་བ་ལགས་སོ། །རིགས་ཀྱི་བུའམ་རིགས་ཀྱི་བུ་མོ་སེམས་ཅན་ཁ་ཅིག་རང་སངས་རྒྱས་ཀྱི་ཐེག་པ་ལ་སྦྱོར་བར་བགྱིད་པ་ནི་ས་ཆེན་པོ་བས་ཀྱང་ཆེས་ཁུར་ཆེན་པོ་ཁྱེར་བ་ལགས་སོ། །རིགས་ཀྱི་བུའམ་རིགས་ཀྱི་བུ་མོ་སེམས་ཅན་ཁ་ཅིག་ཐེག་པ་ཆེན་པོ་ལ་སྦྱོར་བར་བགྱིད་ [260a] [260a.1]པ་ནི་ས་ཆེན་པོ་བས་ཀྱང་ཆེས་ཁུར་ཆེན་པོ་ཁྱེར་བ་ལགས་ཏེ། བཅོམ་ལྡན་འདས་བཞི་པོ་དེ་དག་ནི་ཁུར་ཆེན་པོ་ལགས་སོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དམ་པའི་ཆོས་ཡོངས་སུ་འཛིན་པ་ནི་ཁུར་ཆེན་པོ་འདི་བཞི་ཁྱེར་བ་ལགས་ཏེ། ས་ [260a.2]ཆེན་པོ་བས་ཀྱང་ཆེས་རྟེན་དུ་གྱུར་པ་དང་། ས་ཆེན་པོ་བས་ཀྱང་ཆེས་ཁུར་ཆེན་པོ་ཁྱེར་བ་དང་། ཁུར་མཐའ་ཡས་པ་ཁྱེར་བ་དང་། སེམས་ཅན་ཐམས་ཅད་ཀྱི་གཞི་རྟེན་དུ་གྱུར་པ་དང་། བྱམས་པ་བགྱིས་པ་དང་སྙིང་རྗེ་ཅན་དང་། སྨན་པར་འཚལ་བ་དང་སྙིང་བརྩེ་བ་དང་། ཆོས་ཀྱིས་ [260a.3]འཇིག་རྟེན་གྱི་མ་ཞེས་བགྱི་བ་ལགས་སོ། །བཅོམ་ལྡན་འདས་དཔེར་ན་ས་ཆེན་པོ་ནི་རིན་པོ་ཆེ་སྣ་བཞིའི་འབྱུང་གནས་ལགས་ཏེ། སྣ་བཞི་པོ་དེ་དག་གང་ཞེ་ན། རིན་པོ་ཆེ་རིན་ཐང་མ་མཆིས་པ་དག་གི་འབྱུང་གནས་དང་། རིན་པོ་ཆེ་རིན་ཐང་མཆིས་པ་དག་གི་འབྱུང་གནས་དང་། རིན་ [260a.4]པོ་ཆེ་དེ་བས་ཆུང་བ་དག་གི་འབྱུང་གནས་དང་། རིན་པོ་ཆེ་དེ་བས་ཀྱང་ཆུང་བ་དག་གི་འབྱུང་གནས་ལགས་ཏེ་བཅོམ་ལྡན་འདས་ཇི་ལྟར་ས་ཆེན་པོ་རིན་པོ་ཆེ་སྣ་བཞི་པོ་འདི་དག་གི་འབྱུང་གནས་སུ་གྱུར་པ་དེ་བཞིན་དུ། བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་དམ་པའི་ཆོས་ཡོངས་སུ་ [260a.5]འཛིན་པ་ལ་བརྟེན་ནས་སེམས་ཅན་རྣམས་ཀྱིས་རིན་པོ་ཆེའི་མཆོག་ཆེན་པོ་རིན་པོ་ཆེ་ཐམས་ཅད་ཀྱི་དམ་པར་གྱུར་པ་བཞིའི་ཁེ་རྙེད་པར་འགྱུར་རོ། །བཞི་གང་ཞེ་ན་དགེ་བའི་བཤེས་གཉེན་རིགས་ཀྱི་བུ་འམ། རིགས་ཀྱི་བུ་མོ་དེ་ལ་བརྟེན་ནས་སེམས་ཅན་རྣམས་ཀྱིས་ལྷ་དང་མིའི་ཕུན་སུམ་ཚོགས་པ་འཐོབ་ [260a.6]པར་བགྱིད་པའི་བསོད་ནམས་ཀྱི་ཚོགས་ཀྱི་ཁེ་རྙེད་པར་འགྱུར་བ་དང་། ཉན་ཐོས་ཀྱི་ཐེག་པར་ཉེ་བར་འགྲོ་བའི་དགེ་བའི་རྩ་བ་ཐོབ་པར་བགྱི་བ་རྙེད་པར་འགྱུར་བ་དང་། རང་སངས་རྒྱས་ཀྱི་ཐེག་པར་ཉེ་བར་འགྲོ་བའི་དགེ་བའི་རྩ་བའི་ཚོགས་ཐོབ་པར་བགྱི་བ་རྙེད་པར་འགྱུར་བ་དང་། ཡང་དག་པར་ [260a.7]རྫོགས་པའི་སངས་རྒྱས་སུ་ཉེ་བར་འགྲོ་བའི་བསོད་ནམས་ཀྱི་ཚོགས་ཆེས་མཐོན་པོ་ཐོབ་པར་བགྱི་བ་རྙེད་པར་འགྱུར་བ་སྟེ། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དམ་པའི་ཆོས་ཡོངས་སུ་འཛིན་པ་ལ་བརྟེན་ནས་སེམས་ཅན་རྣམས་ཀྱིས་རིན་པོ་ཆེ་ཐམས་ཅད་ཀྱི་མཆོག་ངོ་ [260b] [260b.1]མཚར་རྨད་དུ་བྱུང་བའི་རིན་པོ་ཆེ་ཆེན་པོ་བཞིའི་ཁེ་རྙེད་པར་འགྱུར་རོ། །བཅོམ་ལྡན་འདས་གཏེར་ཆེན་པོ་རིན་པོ་ཆེ་མཐའ་ཡས་པའི་འབྱུང་གནས་ཞེས་བགྱི་བ་དེ་ནི་དམ་པའི་ཆོས་ཡོངས་སུ་འཛིན་པའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་དམ་པའི་ [260b.2]ཆོས་ཡོངས་སུ་འཛིན་པ་ཞེས་བགྱི་བ་ནི་བཅོམ་ལྡན་འདས་དམ་པའི་ཆོས་ཀྱང་གཞན་མ་ལགས་ལ། དམ་པའི་ཆོས་ཡོངས་སུ་འཛིན་པ་པོ་ཡང་གཞན་མ་ལགས་ཏེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་པོ་ཉིད་དམ་པའི་ཆོས་ལགས་སོ། །བཅོམ་ལྡན་འདས་ཕ་རོལ་ཏུ་ཕྱིན་པ་ [260b.3]རྣམས་ཀྱང་གཞན་མ་ལགས་དམ་པའི་ཆོས་ཡོངས་སུ་འཛིན་པ་པོ་ཡང་གཞན་མ་ལགས་ཏེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ཉིད་ཕ་རོལ་དུ་ཕྱིན་པ་རྣམས་ལགས་སོ། །བཅོམ་ལྡན་འདས་དེ་ཅིའི་སླད་དུ་ཞེ་ན། རིགས་ཀྱི་བུ་འམ་རིགས་ཀྱི་བུ་མོ་དམ་པའི་ཆོས་ཡོངས་ [260b.4]སུ་འཛིན་པ་ནི་སེམས་ཅན་གང་དག་སྦྱིན་པས་ཡོངས་སུ་སྨིན་པར་བགྱི་བ་དེ་དག་ནི་སྦྱིན་པས་ཡོངས་སུ་སྨིན་པར་བགྱིད་དེ། ཐ་ན་ལུས་ཀྱི་ཡན་ལག་དང་ཉིང་ལག་ཡོངས་སུ་གཏོང་བས་ཀྱང་ཡོངས་སུ་སྨིན་པར་བགྱིད་དེ། དེ་ལྟར་ཡོངས་སུ་སྨིན་པར་བགྱིས་པ་རྣམས་དམ་པའི་ཆོས་ལ་གནས་པར་ [260b.5]འགྱུར་བ་འདི་ནི་དེའི་སྦྱིན་པའི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་སེམས་ཅན་གང་དག་ཚུལ་ཁྲིམས་ཀྱིས་ཡོངས་སུ་སྨིན་པར་བགྱི་བའི་སེམས་ཅན་དེ་དག་ནི་དབང་པོ་དྲུག་བསྡམས་པ་དང་། ལུས་དང་། ངག་དང་། ཡིད་ཀྱི་ལས་ཡོངས་སུ་དག་པས་ཡོངས་སུ་སྨིན་པར་བགྱིད་ [260b.6]དེ། ཐ་ན་སྤྱོད་ལམ་གྱིས་ཀྱང་དེ་དག་གི་སེམས་བསྲུང་ཞིང་ཡོངས་སུ་སྨིན་པར་བགྱིད་དེ། དེ་དག་དེ་ལྟ་དེ་ལྟར་ཡོངས་སུ་སྨིན་པར་བགྱིས་པས་དམ་པའི་ཆོས་ལ་གནས་པར་འགྱུར་བ་འདི་ནི་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་སེམས་ཅན་གང་དག་བཟོད་ [260b.7]པས་ཡོངས་སུ་སྨིན་པར་བགྱི་བའི་སེམས་ཅན་དེ་དག་ལ་ནི་དེ་དག་གིས་དེ་ལ་སྤྱོས་བརྒྱད་དེ་གཙེ་བར་བགྱིས་ཀྱང་གནོད་སེམས་མ་མཆིས་ཤིང་སྨན་པར་འཚལ་བ་དང་། བཟོད་པའི་སྟོབས་དམ་པ་དང་ལྡན་པས་ཡོངས་སུ་སྨིན་པར་བགྱིད་དེ། ཐ་ན་བཞིན་གྱི་མདངས་ཀྱིས་ཀྱང་དེ་དག་གི་སེམས་ [261a] [261a.1]སྲུང་ཞིང་ཡོངས་སུ་སྨིན་པར་བགྱིད་དེ། དེ་དག་ཡོངས་སུ་སྨིན་པར་བགྱིས་པས་དམ་པའི་ཆོས་ལ་གནས་པར་འགྱུར་བ་འདི་ནི་དེའི་བཟོད་པའི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་སེམས་ཅན་གང་དག་བརྩོན་འགྲུས་ཀྱིས་ཡོངས་སུ་སྨིན་པར་བགྱི་བའི་སེམས་ [261a.2]ཅན་དེ་དག་ནི་སེམས་མ་ཞུམ་ཞིང་ལེ་ལོ་མ་མཆིས་པ་དང་། འདུན་པ་ཆེན་པོ་དང་བརྩོན་འགྲུས་རྩོམ་པ་མཆོག་དང་ལྡན་པས་ཡོངས་སུ་སྨིན་པར་བགྱིད་དེ། ཐ་ན་རང་གི་སྤྱོད་ལམ་བསྒྲིམས་པས་ཀྱང་དེ་དག་གི་སེམས་སྲུང་ཞིང་ཡོངས་སུ་སྨིན་པར་བགྱིད་དེ། དེ་དག་དེ་ལྟར་ཡོངས་སུ་ [261a.3]སྨིན་པར་བགྱིས་པས་དམ་པའི་ཆོས་ལ་གནས་པར་འགྱུར་བ་འདི་ནི་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་སེམས་ཅན་གང་དག་བསམ་གཏན་གྱིས་ཡོངས་སུ་སྨིན་པར་བགྱི་བའི་སེམས་ཅན་དེ་དག་ནི་སེམས་མི་གཡེང་བ་དང་། ཡིད་ཕྱི་རོལ་དུ་མི་རྒྱུ་བ་དང་། [261a.4]དྲན་པ་འཁྲུལ་པ་མ་མཆིས་པ་མཆོག་དང་ལྡན་པས་ཡོངས་སུ་སྨིན་པར་བགྱིད་དེ། ཐ་ན་བགྱིས་ནས་ཡུན་རིང་དུ་ལགས་པ་དང་། སྨྲས་ནས་ཡུན་རིང་དུ་ལགས་པ་མི་བསྐྱུད་པས་ཀྱང་དེ་དག་གི་སེམས་སྲུང་ཞིང་ཡོངས་སུ་སྨིན་པར་བགྱིད་དེ། དེ་དག་དེ་ལྟར་ཡོངས་སུ་སྨིན་པར་བགྱིས་པས་ [261a.5]དམ་པའི་ཆོས་ལ་གནས་པར་འགྱུར་བ་འདི་ནི་དེའི་བསམ་གཏན་གྱི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་སེམས་ཅན་གང་དག་ཤེས་རབ་ཀྱིས་ཡོངས་སུ་སྨིན་པར་བགྱི་བའི་སེམས་ཅན་དེ་དག་ནི་སེམས་ཅན་གྱི་དོན་འདྲི་བ་དག་ལ་ལེ་ལོ་མ་མཆིས་པར་ལུང་སྟོན་པ་དང་། བསྟན་ [261a.6]བཅོས་ཐམས་ཅད་དང་། རིག་པ་དང་བཟོའི་གནས་ཐམས་ཅད་ཀྱི་མཐར་ཕྱིན་པས་ཡོངས་སུ་སྨིན་པར་བགྱིད་དེ། ཐ་ན་བཟོ་གྲྭའི་གནས་ཆེན་པོ་དག་ཏུ་ཡང་དེ་དག་གི་སེམས་སྲུང་ཞིང་ཡོངས་སུ་སྨིན་པར་བགྱིད་དེ། དེ་དག་དེ་ལྟར་ཡོངས་སུ་སྨིན་པར་བགྱིས་པས་དམ་པའི་ཆོས་ལ་གནས་ [261a.7]པར་འགྱུར་བ་འདི་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་དེ་ལྟ་ལགས་པས་ཕ་རོལ་ཏུ་ཕྱིན་པ་རྣམས་ཀྱང་གཞན་མ་ལགས་ལ། དམ་པའི་ཆོས་ཡོངས་སུ་འཛིན་པ་པོ་ཡང་གཞན་མ་ལགས་ཏེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་པོ་ཉིད་ཕ་ [261b] [261b.1]རོལ་ཏུ་ཕྱིན་པ་རྣམས་ལགས་སོ། །བཅོམ་ལྡན་འདས་འདི་ལ་དེ་བཞིན་གཤེགས་པའི་མཐུས་དོན་ཆེན་པོ་བསྟན་པ་གཞན་ཡང་བདག་གིས་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་དེ་བཞིན་གཤེགས་པས་གནང་གི་ཁྱོད་ཀྱིས་སྤོབས་པར་གྱིས་ཤིག །དེ་ནས་ [261b.2]བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་པོ་དམ་པའི་ཆོས་ཡོངས་སུ་འཛིན་པ་པོ་ཞེས་བགྱི་བ་ནི་བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ཡང་གཞན་མ་ལགས་ལ། དམ་པའི་ཆོས་ཡོངས་སུ་ [261b.3]འཛིན་པ་པོ་ཡང་གཞན་མ་ལགས་ཏེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་པོ་ཉིད་དམ་པའི་ཆོས་ཡོངས་སུ་འཛིན་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་དམ་པའི་ཆོས་ཡོངས་སུ་འཛིན་པ་དེས་ནི་བཅོམ་ལྡན་འདས་དམ་པའི་ [261b.4]ཆོས་ཡོངས་སུ་གཟུང་བའི་སླད་དུ་ཡན་ལག་གསུམ་ཡོངས་སུ་གཏོང་བར་འགྱུར་ཏེ། གསུམ་གང་ཞེ་ན། འདི་ལྟར་ལུས་དང་སྲོག་དང་ལོངས་སྤྱོད་རྣམས་ཏེ། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་ལུས་ཡོངས་སུ་གཏོང་བས་ནི་སངས་རྒྱས་ཀྱི་སྐུ་འཁོར་བའི་ཕྱི་མའི་ [261b.5]མཐའི་མུ་དང་མཉམ་པ་རྒ་བ་དང་། ན་བ་དང་འཆི་བ་དང་བྲལ་བ་མི་ཤིགས་པ། རྟག་པ། བརྟན་པ། ཞི་བ། ཐེར་ཟུག་པ། འཆི་འཕོ་དང་བྲལ་བ། མཐའ་ཡས་པ། ཡོན་ཏན་བསམ་གྱིས་མི་ཁྱབ་པ་དང་ལྡན་པ་འཐོབ་པར་འགྱུར་རོ། །བཅོམ་ལྡན་འདས་རིགས་ཀྱི་བུ་འམ། རིགས་ [261b.6]ཀྱི་བུ་མོ་སྲོག་ཡོངས་སུ་གཏོང་བས་ནི་སངས་རྒྱས་ཀྱི་ཆོས་རྣམ་པར་འཕྲུལ་བར་གནས་པ་འཁོར་བའི་ཕྱི་མའི་མཐའི་མུ་དང་མཉམ་པ་འཆི་འཕོ་དང་བྲལ་བ། མཐའ་ཡས་པ་རྟག་པ་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཐམས་ཅད་ཐོབ་པར་འགྱུར་རོ། །བཅོམ་ལྡན་འདས་རིགས་ཀྱི་བུ་འམ་ [261b.7]རིགས་ཀྱི་བུ་མོ་ལོངས་སྤྱོད་ཡོངས་སུ་གཏོང་བས་ནི་སེམས་ཅན་ཐམས་ཅད་ཀྱིས་མཆོད་པ་འཁོར་བའི་ཕྱི་མའི་མཐའི་མུ་དང་མཉམ་པ་སེམས་ཅན་ཐམས་ཅད་དང་ཐུན་མོང་མ་ལགས་པ། བས་པར་མི་འགྱུར་བ། རྣམ་པར་རྟོག་པ་མ་མཆིས་པ། རྟག་པར་རྒྱུན་མི་འཆད་ཅིང་རྟག་ཏུ་ [262a] [262a.1]གནས་པ། ཡོན་ཏན་བསམ་གྱིས་མི་ཁྱབ་པ་དང་ལྡན་པ་འཐོབ་པར་འགྱུར་རོ། །བཅོམ་ལྡན་འདས་དེ་ལྟར་རིགས་ཀྱི་བུ་འམ། རིགས་ཀྱི་བུ་མོ་དམ་པའི་ཆོས་ཡོངས་སུ་འཛིན་པ་ཡན་ལག་གསུམ་པོ་འདི་དག་ཡོངས་སུ་གཏོང་བས་ནི་ཡོན་ཏན་ཤིན་ཏུ་རྨད་དུ་བྱུང་བ་ [262a.2]གསུམ་པོ་དེ་དག་ཐོབ་པར་འགྱུར་ཏེ། སངས་རྒྱས་ཐམས་ཅད་ཀྱང་ལུང་སྟོན་པར་མཛད་དོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་ཞིག་དམ་པའི་ཆོས་རྣམ་པར་འཇིག་པའི་ཚེ་དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་རྣམས་བྱེ་ཞིང་གཉིས་ [262a.3]སུ་གྱུར་ལ་སྡེ་སྡེར་ཆད་དེ། ཕྱོགས་ཕྱོགས་སུ་གྱེས་ནས་རྩོད་པར་གྱུར་པ་ན་གཡོ་མ་མཆིས་ཤིང་གྱ་གྱུ་མ་མཆིས་ལ་སྒྱུ་མ་མཆིས་པར་ཆོས་ལ་དགའ་ཞིང་དམ་པའི་ཆོས་ཡོངས་སུ་གཟུང་བའི་སླད་དུ་ཆོས་ཅན་གྱི་ཕྱོགས་ལ་འཇུག་པར་བགྱིད་ན་བཅོམ་ལྡན་འདས་རིགས་ཀྱི་བུ་འམ། རིགས་ [262a.4]ཀྱི་བུ་མོ་དེ་ཞུགས་པ་ཉིད་ཀྱིས་སངས་རྒྱས་ཐམས་ཅད་ལས་ལུང་བསྟན་པ་ངེས་པར་ཐོབ་པར་འགྱུར་རོ། །བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་དེ་ལྟར་བརྩོན་འགྲུས་ཆེན་པོ་ལགས་པ་སྙམ་བདག་བགྱིད་དེ། འདི་ལ་བཅོམ་ལྡན་འདས་ཉིད་སྤྱན་དུ་གྱུར་པ་ལགས་ཏེ། ཡེ་ [262a.5]ཤེས་སུ་གྱུར་པ་ལགས། བཅོམ་ལྡན་འདས་ནི་ཆོས་ཐམས་ཅད་ཀྱི་རྩ་བ་ལགས། བཅོམ་ལྡན་འདས་ནི་མངའ་བདག་ལགས། བཅོམ་ལྡན་འདས་ནི་སྟོན་པ་ལགས་སོ། །དེ་ནས་བཅོམ་ལྡན་འདས་ཀྱིས་ལྷ་མོ་དཔལ་ཕྲེང་གིས་དམ་པའི་ཆོས་ཡོངས་སུ་འཛིན་པ་བསྟན་པ་ [262a.6]ལ་རྗེས་སུ་ཡི་རང་བ་མཛད་དེ། ལྷ་མོ་དེ་དེ་བཞིན་ཏེ། ལྷ་མོ་དམ་པའི་ཆོས་ཡོངས་སུ་འཛིན་པ་ནི་བརྩོན་འགྲུས་ཆེན་པོ་ཡིན་ནོ། །ལྷ་མོ་དཔེར་ན་མི་སྟོབས་དང་ལྡན་པས་གནད་དུ་མི་དྲག་པར་བསྣུན་དུ་ཟིན་ཀྱང་སྣད་པར་འགྱུར་ཞིང་ནད་སྐྱེད་པར་བྱེད་དོ། །ལྷ་མོ་དེ་བཞིན་དུ་དམ་པའི་ཆོས་ [262a.7]ཡོངས་སུ་འཛིན་པ་ནི་ཆུང་དུ་ཟིན་ཀྱང་བདུད་སྡིག་ཅན་ལ་གནོད་པར་འགྱུར་ཞིང་མྱ་ངན་སྐྱེད་ལ་སྨྲེ་སྔགས་འདོན་པར་བྱེད་དོ། །ལྷ་མོ་ངས་ནི་བདུད་སྡིག་ཅན་ལ་དམ་པའི་ཆོས་ཡོངས་སུ་འཛིན་པ་ཇི་ལྟར་གནོད་པར་འགྱུར་ཞིང་མྱ་ངན་སྐྱེད་ལ་སྨྲེ་སྔགས་འདོན་པར་བྱེད་པ་དེ་ལྟར་གནོད་པར་འགྱུར་བ་དང་། [262b] [262b.1]དེ་ལྟར་མྱ་ངན་སྐྱེད་པ་དང་དེ་ལྟར་སྨྲེ་སྔགས་འདོན་པར་བྱེད་པའི་དགེ་བའི་ཆོས་གཞན་གཅིག་ཀྱང་མ་མཐོང་ངོ་། །ལྷ་མོ་དཔེར་ན་བ་ལང་གི་མཆོག་ཁྱུ་མཆོག་གིས་ནི་འདི་ལྟར་འཕང་མཐོ་བ་དང་ཆུ་ཞེང་གིས་བ་ལང་གི་ཚོགས་ཐམས་ཅད་ཟིལ་གྱིས་མནན་ཏེ་མངོན་པར་བརྗིད་ཅིང་ཡང་དག་པར་ [262b.2]མངོན་པར་བརྗིད་དོ། །ལྷ་མོ་དེ་བཞིན་དུ་ཐེག་པ་ཆེན་པོ་པའི་དམ་པའི་ཆོས་ཡོངས་སུ་འཛིན་པ་ཡང་ཆུང་དུ་ཟིན་ཀྱང་འདི་ལྟར་རྒྱས་པ་དང་། རྒྱ་ཆེན་པོར་གྱུར་པས་ཉན་ཐོས་དང་རང་སངས་རྒྱས་ཀྱི་ཐེག་པ་པ་རྣམས་ཀྱི་དགེ་བའི་ཆོས་ཐམས་ཅད་ཟིལ་གྱིས་གནོན་ཏོ། །ལྷ་མོ་དཔེར་ན་རིའི་རྒྱལ་པོ་ [262b.3]རི་རབ་ཀྱིས་ནི་འདི་ལྟར་མཐོ་བ་དང་། རྒྱ་ཆེ་བས་རི་ནག་པོ་ཐམས་ཅད་ཟིལ་གྱིས་གནོན་ཅིང་མངོན་པར་ལྷག་གེར་འདུག་གོ །ལྷ་མོ་དེ་བཞིན་དུ་ཐེག་པ་ཆེན་པོ་པའི་ལུས་དང་སྲོག་ལ་མི་ལྟ་ཞིང་། ཕན་གདགས་པའི་སེམས་དང་ལྡན་པའི་དམ་པའི་ཆོས་ཡོངས་སུ་འཛིན་པ་ཡང་འདི་ལྟར་རྒྱས་ [262b.4]པ་དང་རྒྱ་ཆེན་པོར་གྱུར་པས་ཐེག་པ་ཆེན་པོ་པ་ཐེག་པ་ལ་གསར་དུ་ཞུགས་པ་ལུས་དང་སྲོག་ལ་ལྟ་བ་རྣམས་ཀྱི་དགེ་བའི་ཆོས་ཐམས་ཅད་ཟིལ་གྱིས་གནོན་ན་གཞན་དག་གི་ལྟ་ཅི་སྨོས་ཏེ། ལྷ་མོ་དེ་བས་ན་སེམས་ཅན་རྣམས་དམ་པའི་ཆོས་ཡོངས་སུ་གཟུང་བ་ཉིད་ཡང་དག་པར་འཛིན་དུ་གཞུག་ [262b.5]པར་བྱ། ཡང་དག་པར་བསྟན་པར་བྱ། ཡང་དག་པར་གཟེངས་བསྟོད་པར་བྱ། ཡང་དག་པར་རབ་ཏུ་དགའ་བར་བྱ། གཟུད་པར་བྱ་དགོད་པར་བྱའོ། །ལྷ་མོ་དམ་པའི་ཆོས་ཡོངས་སུ་འཛིན་པ་ནི་དེ་ལྟར་དོན་ཆེའོ། །དེ་ལྟར་འབྲས་བུ་ཆེའོ། །དེ་ལྟར་ཕན་ཡོན་ཆེའོ། །ལྷ་མོ་གལ་ [262b.6]ཏེ་བསྐལ་པ་གྲངས་མེད་དཔག་ཏུ་མེད་པར་དམ་པའི་ཆོས་ཡོངས་སུ་འཛིན་པའི་ཡོན་ཏན་དང་ཕན་ཡོན་ངས་བཤད་དུ་ཟིན་ཀྱང་ལྷ་མོ་དམ་པའི་ཆོས་ཡོངས་སུ་འཛིན་པའི་ཡོན་ཏན་དང་། ཕན་ཡོན་བཤད་པ་དེ་དག་གི་མཐའ་འམ་མུར་ཐུག་པར་མི་འགྱུར་རོ། །ལྷ་མོ་དམ་པའི་ཆོས་ཡོངས་སུ་འཛིན་པ་ [262b.7]ནི་དེ་ལྟར་ཡོན་ཏན་མཐའ་ཡས་པ་དང་ལྡན་ནོ། །ལྷ་མོ་དམ་པའི་ཡོངས་སུ་གཟུང་བ་སངས་རྒྱས་ཐམས་ཅད་ཀྱིས་བཞེད་པ་ངས་བསྟན་པ་དེད་ཁྱོད་ཀྱིས་བཤད་པ་སྤོབས་པར་གྱིས་ཤིག །དེ་ནས་ལྷ་མོ་དཔལ་ཕྲེང་གིས་བཅོམ་ལྡན་འདས་ལ་ལེགས་སོ་ཞེས་གསོལ་ནས་བཅོམ་ལྡན་འདས་ཀྱིས་ [263a] [263a.1]བསྐུལ་བ་མནོས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་པའི་ཆོས་ཞེས་བགྱི་བ་དེ་ནི་ཐེག་པ་ཆེན་པོའི་ཚིག་{བླ་དགས་,བླ་དྭགས་}སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཉན་ཐོས་དང་། རང་སངས་རྒྱས་ཀྱི་ཐེག་པ་ [263a.2]ཐམས་ཅད་དང་། འཇིག་རྟེན་པ་དང་འཇིག་རྟེན་ལས་འདས་པའི་དགེ་བའི་ཆོས་ཐམས་ཅད་ནི་ཐེག་པ་ཆེན་པོས་རབ་ཏུ་ཕྱེ་བའི་སླད་དུའོ། །བཅོམ་ལྡན་འདས་འདི་ལྟ་སྟེ་དཔེར་ན་ཀླུང་ཆེན་པོ་བཞི་ནི་མཚོ་མ་དྲོས་པ་ལས་འབྱུང་ངོ་། །བཅོམ་ལྡན་འདས་དེ་བཞིན་དུ་ཉན་ཐོས་དང་རང་སངས་ [263a.3]རྒྱས་ཐམས་ཅད་དང་། འཇིག་རྟེན་པ་དང་འཇིག་རྟེན་ལས་འདས་པའི་དགེ་བའི་ཆོས་ཐམས་ཅད་ཀྱང་ཐེག་པ་ཆེན་པོ་ལས་འབྱུང་ངོ་། །བཅོམ་ལྡན་འདས་དཔེར་ན་ས་བོན་གྱི་རྣམ་པ་གང་ཅི་ཡང་ལགས་པ་དག་དང་། རྩྭ་དང་ཤིང་གེལ་པ་དང་སྨན་དང་། ནགས་ཚལ་དེ་དག་ཐམས་ཅད་ནི་ས་ཆེན་ [263a.4]པོ་ལ་རྟེན་ཅིང་ས་ཆེན་པོ་ལ་གནས་ཏེ་སྐྱེ་ཞིང་འཕེལ་ལ་རྒྱས་པར་འགྱུར་རོ། །བཅོམ་ལྡན་འདས་དེ་བཞིན་དུ་ཉན་ཐོས་དང་རང་སངས་རྒྱས་ཀྱི་ཐེག་པ་གང་ལགས་པ་དག་དང་། འཇིག་རྟེན་པ་དང་འཇིག་རྟེན་ལས་འདས་པའི་དགེ་བའི་ཆོས་གང་ལགས་པ་དེ་དག་ཐམས་ཅད་ནི་ཐེག་པ་ཆེན་པོ་ལ་རྟེན་ཅིང་ [263a.5]ཐེག་པ་ཆེན་པོ་ལ་གནས་ཏེ་སྐྱེ་ཞིང་འཕེལ་ལ་རྒྱས་པར་འགྱུར་རོ། །བཅོམ་ལྡན་འདས་དེ་ལྟ་ལགས་པས་ཐེག་པ་ཆེན་པོ་ལ་གནས་ཤིང་ཐེག་པ་ཆེན་པོ་ཡོངས་སུ་བཟུང་ན་ཉན་ཐོས་དང་རང་སངས་རྒྱས་ཀྱི་ཐེག་པ་ཐམས་ཅད་དང་། འཇིག་རྟེན་པ་དང་འཇིག་རྟེན་ལས་འདས་པའི་དགེ་བའི་ཆོས་ [263a.6]ཐམས་ཅད་ཀྱང་རྟེན་ཅིང་གནས་ཏེ་ཡོངས་སུ་བཟུང་བར་འགྱུར་རོ། །བཅོམ་ལྡན་འདས་འདི་ལྟ་སྟེ། དམ་པའི་ཆོས་གནས་པ་དང་། དམ་པའི་ཆོས་ནུབ་པ་དང་། སོ་སོར་ཐར་པ་དང་། འདུལ་བ་དང་། རབ་ཏུ་འབྱུང་བ་དང་། བསྙེན་པར་རྫོགས་པ་གནས་དྲུག་པོ་འདི་དག་དང་། [263a.7]བཅོམ་ལྡན་འདས་ཀྱིས་བསྟན་ཅིང་བཏགས་པ་གང་ལགས་པའི་གནས་དྲུག་པོ་དེ་དག་ཀྱང་ཐེག་པ་ཆེན་པོའི་དགོངས་པ་ལས་བྱུང་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དམ་པའི་ཆོས་གནས་པ་ཞེས་བགྱི་བའི་བཏགས་པ་འདི་ནི་ཐེག་པ་ཆེན་པོའི་དགོངས་པ་ཅན་ལགས་ཏེ། [263b] [263b.1]བཅོམ་ལྡན་འདས་ཐེག་པ་ཆེན་པོ་གནས་པ་ཉིད་ནི་དམ་པའི་ཆོས་གནས་པ་ལགས་སོ། །བཅོམ་ལྡན་འདས་དམ་པའི་ཆོས་ནུབ་པར་འགྱུར་བ་ཞེས་བགྱི་བའི་བཏགས་པ་འདི་ནི་ཐེག་པ་ཆེན་པོའི་དགོངས་པ་ཅན་ལགས་ཏེ། བཅོམ་ལྡན་འདས་ཐེག་པ་ཆེན་པོ་ནུབ་པ་ཉིད་ནི་དམ་པའི་ཆོས་ [263b.2]ནུབ་པ་ལགས་སོ། །བཅོམ་ལྡན་འདས་སོ་སོར་ཐར་པ་དང་འདུལ་བ་ཞེས་བགྱི་བའི་ཆོས་འདི་གཉིས་ནི་དོན་གཅིག་སྟེ། ཡི་གེའི་འབྲུ་ནི་ཐ་དད་ལགས་སོ། །བཅོམ་ལྡན་འདས་འདུལ་བ་ཞེས་བགྱི་བ་འདི་ནི་ཐེག་པ་ཆེན་པོ་པ་རྣམས་ཀྱི་བསླབ་པ་ལགས་སོ། །དེ་ཅིའི་སླད་དུ་ཞེ་ན། [263b.3]བཅོམ་ལྡན་འདས་འདི་ལྟར་དེ་བཞིན་གཤེགས་པ་ཉིད་ཀྱི་སླད་དུ་རབ་ཏུ་འབྱུང་བ་དང་། བསྙེན་པར་རྫོགས་པ་ལགས་པའི་སླད་དུ་སྟེ། བཅོམ་ལྡན་འདས་དེ་ལྟ་ལགས་པས་འདི་ལྟར་འདུལ་བ་ཞེས་བགྱི་བ་དང་རབ་ཏུ་འབྱུང་བ་དང་། བསྙེན་པར་རྫོགས་པ་ཞེས་བགྱི་བའི་བཏགས་པ་འདི་ནི་ [263b.4]ཐེག་པ་ཆེན་པོའི་ཆོ་གའི་ཚུལ་ཁྲིམས་ཀྱི་ཕུང་པོ་ལགས་སོ། །བཅོམ་ལྡན་འདས་ཉན་ཐོས་དང་རང་སངས་རྒྱས་ཀྱི་ཐེག་པ་ལ་རབ་ཏུ་འབྱུང་བ་དང་བསྙེན་པར་རྫོགས་པ་མ་མཆིས་སོ། །དེ་ཅིའི་སླད་དུ་ཞེ་ན། ཉན་ཐོས་དང་རང་སངས་རྒྱས་ཀྱི་སླད་དུ་རབ་ཏུ་འབྱུང་བ་དང་། བསྙེན་པར་རྫོགས་པ་ [263b.5]ནི་མ་མཆིས་ཀྱི། བཅོམ་ལྡན་འདས་དེ་བཞིན་གཤེགས་པ་ཉིད་ཀྱི་སླད་དུ་ཉན་ཐོས་རྣམས་དང་། རང་སངས་རྒྱས་རྣམས་རབ་ཏུ་འབྱུང་ཞིང་བསྙེན་པར་རྫོགས་པ་ལགས་པའི་སླད་དུའོ། །བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་དེ་བཞིན་གཤེགས་ [263b.6]པ་ཉིད་ལ་སྐྱབས་སུ་མཆི་བ་ལགས་ཏེ། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་འཇིགས་པ་དང་བཅས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་འདུ་བྱེད་ཐམས་ཅད་ལ་མི་ [263b.7]བཟད་པར་འཇིགས་པའི་འདུ་ཤེས་ཉེ་བར་གནས་པ་ལགས་པའི་སླད་དུའོ། །བཅོམ་ལྡན་འདས་དཔེར་ན་གཤེད་མས་རལ་གྲི་གཟས་པ་བཞིན་ཏེ། བཅོམ་ལྡན་འདས་དེ་ལྟ་ལགས་པས་དེ་དག་ཀྱང་ངེས་པར་འབྱུང་བ་ཤིན་ཏུ་བདེ་བ་ཐོབ་པ་མ་ལགས་སོ། །བཅོམ་ལྡན་འདས་དེ་ཅིའི་སླད་དུ་ཞེ་ན། [264a] [264a.1]སྐྱབས་སུ་གྱུར་པ་ནི་སྐྱབས་གཞན་ཚོལ་བ་མ་མཆིས་པའི་སླད་དུའོ། །བཅོམ་ལྡན་འདས་ཇི་ལྟར་སེམས་ཅན་སྐྱབས་མ་མཆིས་པ་རྣམས་གང་དང་གང་གིས་འཇིགས་སྐྲག་པའི་འཇིགས་སྐྲག་པ་དེ་དང་དེ་ལས་འབྱུང་བ་ཚོལ་བ་དེ་བཞིན་དུ། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་ [264a.2]རྒྱས་རྣམས་ལ་ཡང་འཇིགས་པ་དེ་མཆིས་ཏེ། འཇིགས་པ་དེས་སྐྲགས་པས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་བཅོམ་ལྡན་འདས་ལ་སྐྱབས་སུ་མཆི་བར་ཁས་ལེན་པ་ལགས་སོ། །བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་འཇིགས་པ་ [264a.3]དང་བཅས་པ་ལགས་ཏེ། བཅོམ་ལྡན་འདས་དེ་ལྟ་ལགས་པས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་སྐྱེ་བའི་ཆོས་ཀྱི་ལྷག་མ་དང་བཅས་པ་ལགས་ཏེ། བཅོམ་ལྡན་འདས་དེ་དག་གི་སྐྱེ་བ་མ་བས་པ་ཡང་མཆིས་སོ། །བཅོམ་ལྡན་འདས་དེ་དག་ནི་བསྟེན་པར་བགྱི་བའི་ལྷག་མ་ [264a.4]དང་བཅས་པ་ལགས་ཏེ། དེས་ན་དེ་དག་ནི་དག་པ་མ་ལགས། ལས་མཐར་ཕྱིན་པ་མ་ལགས་ཏེ་དེ་དག་གི་བགྱི་བ་མང་ལགས་སོ། །དེ་དག་གི་སྤང་བར་བགྱི་བའི་ཆོས་གཞན་ཡང་མང་དུ་མཆིས་ཏེ། དེ་དག་མ་སྤངས་པས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་ [264a.5]མྱ་ངན་ལས་འདས་པའི་དབྱིངས་དང་རིང་བ་ལགས་སོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་ཞེས་བགྱི་བ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ [264a.6]སངས་རྒྱས་རྣམས་ནི་མྱ་ངན་ལས་འདས་པ་བརྙེས་པས་ཡོན་ཏན་ཐམས་ཅད་དང་ལྡན་པ་ལགས་ལ། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ནི་ཡོན་ཏན་ཐམས་ཅད་དང་ལྡན་པ་མ་ལགས་པའི་སླད་དུའོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ [264a.7]པ་ཞེས་བགྱི་བ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་མྱ་ངན་ལས་འདས་པ་བརྙེས་པས་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ལགས་ལ། [264b] [264b.1]བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་མ་ལགས་པའི་སླད་དུའོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་ཞེས་བགྱི་བ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ལགས་ཏེ། དེ་ཅིའི་སླད་དུ་ཞེ་ན། [264b.2]བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་མྱ་ངན་ལས་འདས་པ་བརྙེས་པས་སྤང་བར་བགྱི་བའི་སྐྱོན་ཐམས་ཅད་སྤངས་ཤིང་མཆོག་ཏུ་ཡོངས་སུ་དག་པ་དང་ལྡན་པ་ལགས་ལ། བཅོམ་ལྡན་འདས་དགྲ་བཅོམ་པ་རྣམས་དང་། [264b.3]རང་སངས་རྒྱས་རྣམས་ནི་སྐྱོན་གྱི་ལྷག་མ་རྣམས་དང་བཅས་པ། ཡོངས་སུ་མ་དག་པའི་ཆོས་ཅན་ལགས་པའི་སླད་དུའོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་ཞེས་བགྱི་བ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ལགས་ཏེ། དེ་ཅིའི་སླད་དུ་ཞེ་ན། བཅོམ་ [264b.4]ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་མྱ་ངན་ལས་འདས་པ་བརྙེས་པའི་སླད་དུ་སྟེ། བཅོམ་ལྡན་འདས་དེ་ལྟ་ལགས་པས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱང་མྱ་ངན་ལས་འདས་པའི་དབྱིངས་དང་རིང་བ་ལགས་ [264b.5]སོ། །བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱིས་རྣམ་པར་གྲོལ་བ་ལ་སོ་སོར་རྟོག་པའི་ཡེ་ཤེས་ཀྱི་མཐའ་དབུགས་ཕྱིན་པ་རྗེས་སུ་དྲན་པ་བཞི་པོ་གང་ལགས་པ་དེ་དག་ཀྱང་བཅོམ་ལྡན་འདས་དགོངས་པ་ཅན་དང་། ལྷག་མ་དང་བཅས་པ་དང་། [264b.6]དྲང་བའི་དོན་དང་རྣམ་པར་ཕྱེ་སྟེ་ལུང་བསྟན་པར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཆི་འཕོ་ནི་འདི་གཉིས་ལགས་ཏེ། གཉིས་གང་ཞེ་ན། རྒྱུན་ཆད་པའི་འཆི་འཕོ་དང་། ཡོངས་སུ་བསྔོས་པ་བསམ་གྱིས་མི་ཁྱབ་པའི་འཆི་འཕོ་ལགས་སོ། །བཅོམ་ལྡན་ [264b.7]འདས་དེ་ལ་རྒྱུན་ཆད་པའི་འཆི་འཕོ་ནི་ཉིང་མཚམས་སྦྱོར་བ་དང་བཅས་པའི་སེམས་ཅན་རྣམས་ཀྱི་ལགས་སོ། །བཅོམ་ལྡན་འདས་ཡོངས་སུ་བསྔོས་པ་བསམ་གྱིས་མི་ཁྱབ་པའི་འཆི་འཕོ་ནི་དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་སེམས་དཔའ་ [265a] [265a.1]ཆེན་པོ་དབང་ཐོབ་པ་དང་། ཡིད་ཀྱི་ལུས་རྣམས་ལགས་ཏེ། བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ལགས་སོ། །བཅོམ་ལྡན་འདས་དེ་ལ་འཆི་འཕོ་འདི་གཉིས་ལས་རྒྱུན་ཆད་པའི་འཆི་འཕོའི་དབང་དུ་བགྱིས་ཏེ། བདག་གི་སྐྱེ་བ་ཟད་དོ་སྙམ་དུ་དགྲ་བཅོམ་པ་ [265a.2]རྣམས་དང་། རང་སངས་རྒྱས་རྣམས་ཀྱི་ཤེས་པ་འབྱུང་ལགས་སོ། །བཅོམ་ལྡན་འདས་དེ་ལྟར་ལྷག་མ་དང་བཅས་པའི་འབྲས་བུ་མངོན་སུམ་དུ་བགྱིས་པ་ལ་བརྟེན་ནས་བདག་གིས་ཚངས་པར་སྤྱོད་པ་བསྟེན་ཏོ་སྙམ་དུ་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱི་ཤེས་པ་ [265a.3]འབྱུང་ལགས་སོ། །བྱིས་པ་སོ་སོའི་སྐྱེ་བོ་དང་ལྷ་དང་མི་བགྱི་བ་དང་བཅས་པ་ཐམས་ཅད་དང་། སློབ་པ་བདུན་པོ་དག་གིས་ཉིང་མཚམས་སྦྱོར་བ་དང་བཅས་པའི་ཉོན་མོངས་པ་རྣམས་སྤང་བ་སྔོན་མ་བགྱིས་པ་དེ་སྤངས་པ་ལ་བརྟེན་ནས་བྱ་བ་བྱས་སོ་སྙམ་དུ་དགྲ་བཅོམ་པ་རྣམས་དང་། རང་ [265a.4]སངས་རྒྱས་རྣམས་ཀྱི་ཤེས་པ་འབྱུང་ལགས་སོ། །བཅོམ་ལྡན་འདས་འདི་ལྟ་བུ་ཉིད་ལས་གཞན་མི་ཤེས་སོ་ཞེས་བགྱི་བ་ནི་དགྲ་བཅོམ་པས་སྤང་བར་བགྱི་བའི་ཉོན་མོངས་པ་རྣམས་དང་། ཡང་སྲིད་པར་ཉིང་མཚམས་སྦྱོར་བའི་དབང་དུ་བགྱིས་ནས་འདི་ལྟ་བུ་ཉིད་ལས་གཞན་མི་ཤེས་སོ་སྙམ་ [265a.5]དུ་དགྲ་བཅོམ་པ་རྣམས་དང་རང་སངས་རྒྱས་རྣམས་ཀྱི་ཤེས་པ་འབྱུང་ལགས་སོ། །བཅོམ་ལྡན་འདས་འདི་ལྟ་བུ་ཉིད་ལས་གཞན་མི་ཤེས་སོ་སྙམ་པའི་ཤེས་པ་དེ་ཡང་ཉོན་མོངས་པ་ཐམས་ཅད་སྤངས་པ་ཡང་མ་ལགས། སྐྱེ་བ་ཐམས་ཅད་ཡོངས་སུ་འཚལ་བ་ལས་བྱུང་བ་ཡང་མ་ [265a.6]ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ལ་ཡང་ཉོན་མོངས་པ་རྣམས་མ་སྤངས་པ་དང་། སྐྱེ་བའི་ཉོན་མོངས་པ་རྣམས་ཡོངས་སུ་མ་འཚལ་བ་ཡང་མཆིས་པའི་སླད་དུའོ། །བཅོམ་ལྡན་འདས་ཉོན་མོངས་པ་དག་ [265a.7]ནི་རྣམ་པ་གཉིས་ཏེ། གནས་ཀྱི་སའི་ཉོན་མོངས་པ་རྣམས་དང་། ཀུན་ནས་ལྡང་བའི་ཉོན་མོངས་པ་རྣམས་སོ། །བཅོམ་ལྡན་འདས་གནས་ཀྱི་ས་ཡང་རྣམ་པ་བཞི་སྟེ། བཞི་གང་ཞེ་ན། འདི་ལྟར་ལྟ་བ་གཅིག་ལ་གནས་པའི་གནས་ཀྱི་ས་དང་། འདོད་པའི་འདོད་ཆགས་ལ་གནས་ [265b] [265b.1]པའི་གནས་ཀྱི་ས་དང་གཟུགས་ཀྱི་འདོད་ཆགས་ལ་གནས་པའི་གནས་ཀྱི་ས་དང་། སྲིད་པའི་འདོད་ཆགས་ལ་གནས་པའི་གནས་ཀྱི་ས་སྟེ། བཅོམ་ལྡན་འདས་གནས་ཀྱི་ས་བཞི་པོ་དེ་དག་གིས་ཉོན་མོངས་པ་ཀུན་ནས་ལྡང་བ་ཐམས་ཅད་སྐྱེད་ལགས་སོ། །བཅོམ་ལྡན་འདས་དེ་དག་ [265b.2]ཀྱང་སྐད་ཅིག་པ་སྟེ། སེམས་ཀྱི་སྐད་ཅིག་པ་དང་མཚུངས་པར་ལྡན་པ་ལགས་སོ། །བཅོམ་ལྡན་འདས་མ་རིག་པའི་གནས་ཀྱིས་ཐོག་མ་མ་མཆིས་པའི་དུས་ནས་མཆིས་པ་ནི་སེམས་དང་མི་ལྡན་པ་ལགས་སོ། །བཅོམ་ལྡན་འདས་གནས་ཀྱི་ས་བཞི་པོ་འདི་དག་གི་ནང་ན་སྟོབས་ [265b.3]ཆེ་བ་གང་ལགས་པ་དེ་ནི་ཉེ་བའི་ཉོན་མོངས་པ་ཐམས་ཅད་ཀྱི་གཞིར་གྱུར་པ་མ་རིག་པའི་གནས་ཀྱི་ས་སྟོབས་ཆེ་བའི་གྲངས་སམ། ཆ་འམ། བགྲང་བའམ། དཔེ་འམ། རྒྱུར་ཡང་མི་བཟོད་ལགས་སོ། །བཅོམ་ལྡན་འདས་དེ་ལྟར་ན་མ་རིག་པའི་གནས་ཀྱི་ས་ནི་སྟོབས་ཆེ་བ་ [265b.4]ལགས་ཏེ། སྲིད་པའི་འདོད་ཆགས་ལ་གནས་པའི་ས་ཞེས་ཀྱང་བགྱིའོ། །བཅོམ་ལྡན་འདས་དཔེར་ན་བདུད་སྡིག་ཅན་ནི་གཞན་འཕྲུལ་དབང་བྱེད་ཀྱི་ལྷའི་ནང་དུ་གཏོགས་ཀྱང་འདི་ལྟར་གཟུགས་དང་། ཁ་དོག་དང་། གཟི་བརྗིད་དང་། སྟོབས་དང་། འཁོར་དང་། དབང་ [265b.5]ཕྱུག་གིས་གཞན་འཕྲུལ་དབང་བྱེད་ཀྱི་ལྷ་རྣམས་ཟིལ་གྱིས་གནོན་ཏོ། །བཅོམ་ལྡན་འདས་དེ་བཞིན་དུ་མ་རིག་པའི་གནས་ཀྱི་ས་སྲིད་པའི་འདོད་ཆགས་ལ་གནས་པའི་གནས་ཀྱི་ས་ཞེས་བགྱི་བས་ཀྱང་གནས་ཀྱི་ས་བཞི་པོ་འདི་དག་ཟིལ་གྱིས་གནོན་ཏེ། ཉེ་བའི་ཉོན་མོངས་པ་གང་ [265b.6]གཱའི་ཀླུང་གི་བྱེ་མ་ལས་འདས་པ་སྙེད་ཀྱི་རྟེན་དུ་གྱུར་པ་དང་། ཉོན་མོངས་པ་བཞི་དང་ཡང་ཡུན་རིང་པོ་ནས་ལྷན་ཅིག་གནས་པ་དང་། ཉན་ཐོས་དང་། རང་སངས་རྒྱས་ཀྱི་ཤེས་པས་མི་རྫི་བ་དང་། དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་པར་བགྱི་བ་ [265b.7]ལགས་ཏེ། བཅོམ་ལྡན་འདས་མ་རིག་པའི་གནས་ཀྱི་ས་ནི་སྟོབས་ཆེ་བ་ལགས་སོ།། །།བམ་པོ་གཉིས་པ་སྟེ་ཐ་མ། བཅོམ་ལྡན་འདས་དཔེར་ན་ལེན་པའི་རྐྱེན་གྱིས་ཟག་པ་དང་བཅས་པའི་ལས་ཀྱི་རྒྱུ་ལས་བྱུང་བའི་སྲིད་པ་གསུམ་འབྱུང་བ་དེ་བཞིན་དུ། [266a] [266a.1]བཅོམ་ལྡན་འདས་མ་རིག་པའི་གནས་ཀྱི་སའི་རྐྱེན་གྱིས་ཟག་པ་མ་མཆིས་པའི་ལས་ཀྱི་རྒྱུ་ལས་བྱུང་བའི་དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་དབང་ཐོབ་པ་རྣམས་ཀྱི་ཡིད་ཀྱི་ལུས་གསུམ་འབྱུང་སྟེ། [266a.2]བཅོམ་ལྡན་འདས་མ་རིག་པའི་གནས་ཀྱི་ས་ནི་ས་གསུམ་པོ་འདི་དག་ཏུ་ཡིད་ཀྱི་ལུས་གསུམ་པོ་འདི་དག་འབྱུང་བ་དང་། ཟག་པ་མ་མཆིས་པའི་ལས་མངོན་པར་སྒྲུབ་པའི་རྟེན་ལགས་སོ། །བཅོམ་ལྡན་འདས་རྐྱེན་མཆིས་ན་རྐྱེན་འབྱུང་སྟེ། དེ་ལྟ་ལགས་པས་མ་རིག་པའི་ [266a.3]གནས་ཀྱི་ས་ནི་ཡིད་ཀྱི་ལུས་གསུམ་པོ་རྣམས་དང་། ཟག་པ་མ་མཆིས་པའི་ལས་ཀྱི་རྐྱེན་ལགས་པའི་སླད་དུ་སྲིད་པའི་འདོད་ཆགས་ལ་གནས་པའི་གནས་ཀྱི་ས་དང་མིང་འདྲ་བ་ལགས་སོ། །དེ་ལྟ་ལགས་ཀྱང་སྲིད་པའི་འདོད་ཆགས་ལ་གནས་པའི་གནས་ཀྱི་ས་དང་ལས་ཐུན་ [266a.4]མོང་བ་ནི་མ་ལགས་ཏེ། བཅོམ་ལྡན་འདས་མ་རིག་པའི་གནས་ཀྱི་ས་ནི་གནས་ཀྱི་ས་བཞི་པོ་དག་ལས་ཐ་དད་པ་ཁོ་ན་ལགས་ཏེ། ཡོངས་སུ་གྲོལ་བའི་ས་པ་དང་། སངས་རྒྱས་ཀྱི་ས་སྤང་བར་བགྱི་བ་དང་། དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་ [266a.5]པར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱི་ས་ནི་གནས་ཀྱི་ས་བཞི་སྤངས་ཀྱང་ཟག་པ་ཟད་པ་ལ་དབང་བའི་སྟོབས་ཀྱང་མི་འཐོབ། མངོན་སུམ་དུ་ཡང་མི་བགྱིད་དོ། །བཅོམ་ལྡན་འདས་ཟག་པ་ [266a.6]ཟད་པ་ཞེས་བགྱི་བ་དེ་ནི་མ་རིག་པའི་གནས་ཀྱི་སའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་དེ་ལྟ་ལགས་པས་དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། སྲིད་པ་ཐ་མ་པར་གཏོགས་པའི་བྱང་ཆུབ་སེམས་དཔའ་རྣམས་ཀྱང་མ་རིག་པའི་གནས་ཀྱི་སས་ [266a.7]བསྒྲིབས་ཤིང་ཆོད་ལ་ཡོངས་སུ་དཀྲིས་ཏེ་ལྡོངས་པར་བགྱིས་པས་ཆོས་དེ་དང་དེ་དག་རབ་ཏུ་མ་འཚལ་ཅིང་མི་རྟོགས་སོ། །བཅོམ་ལྡན་འདས་ཆོས་དེ་དང་དེ་དག་མ་འཚལ་ཅིང་མ་མཐོང་བས་སྤང་བར་བགྱི་བའི་ཆོས་དེ་དང་དེ་དག་མི་སྤོངས་ཤིང་བྱང་བར་མི་བགྱིད་དོ། །བཅོམ་ལྡན་འདས་སྤང་ [266b] [266b.1]བར་བགྱི་བའི་ཆོས་དེ་དག་མ་སྤངས་ཤིང་བྱང་བར་མ་བགྱིས་པས་བཅོམ་ལྡན་འདས་དེ་དག་སྐྱོན་ལས་རྣམ་པར་གྲོལ་བ་ལྷག་མ་དང་བཅས་པ་ལགས་ཀྱི། སྐྱོན་ཐམས་ཅད་ལས་རྣམ་པར་གྲོལ་བ་ནི་མ་ལགས་སོ། །བཅོམ་ལྡན་འདས་དེ་དག་ནི་རྣམ་པར་དག་པ་ལྷག་མ་དང་བཅས་ [266b.2]པའི་ཆོས་ཅན་ལགས་ཀྱི། ཐམས་ཅད་རྣམ་པར་དག་པའི་ཆོས་ཅན་ནི་མ་ལགས་སོ། །བཅོམ་ལྡན་འདས་དེ་དག་ནི་ལྷག་མ་དང་བཅས་པའི་ཡོན་ཏན་དང་ལྡན་པ་ལགས་ཀྱི། ཡོན་ཏན་ཐམས་ཅད་དང་ལྡན་པ་ནི་མ་ལགས་སོ། །བཅོམ་ལྡན་འདས་གང་དག་སྐྱོན་ལས་རྣམ་ [266b.3]པར་གྲོལ་བ་ལྷག་མ་དང་བཅས་པ་ལགས་ཀྱི། སྐྱོན་ཐམས་ཅད་ལས་རྣམ་པར་གྲོལ་བ་ནི་མ་ལགས་པ་དང་། རྣམ་པར་དག་པ་ལྷག་མ་དང་བཅས་པའི་ཆོས་ཅན་ལགས་ཀྱི། ཐམས་ཅད་རྣམ་པར་དག་པའི་ཆོས་ཅན་ནི་མ་ལགས་པ་དང་། ལྷག་མ་དང་བཅས་པའི་ཡོན་ཏན་ [266b.4]དང་ལྡན་པ་ལགས་ཀྱི། ཡོན་ཏན་ཐམས་ཅད་དང་ལྡན་པ་ནི་མ་ལགས་པ་དེ་དག་ནི་བཅོམ་ལྡན་འདས་སྡུག་བསྔལ་ཡོངས་སུ་འཚལ་བ་ལྷག་མ་དང་བཅས་པ་ལགས་སོ། །ཀུན་འབྱུང་བ་སྤངས་པ་ལྷག་མ་དང་བཅས་པ་ལགས་སོ། །སྡུག་བསྔལ་འགོག་པ་མངོན་སུམ་དུ་བགྱིས་པ་ལྷག་མ་དང་བཅས་པ་ལགས་སོ། །སྡུག་བསྔལ་འགོག་ [266b.5]པར་འགྲོ་བའི་ལམ་བསྒོམས་པ་ལྷག་མ་དང་བཅས་པ་ལགས་སོ། །བཅོམ་ལྡན་འདས་གང་དག་སྡུག་བསྔལ་ཡོངས་སུ་འཚལ་བ་ལྷག་མ་དང་བཅས་པ་དང་། སྡུག་བསྔལ་ཀུན་འབྱུང་བ་སྤངས་པ་ལྷག་མ་དང་བཅས་པ་དང་། སྡུག་བསྔལ་འགོག་པ་མངོན་སུམ་དུ་བགྱིས་པ་ལྷག་མ་ [266b.6]དང་བཅས་པ་དང་། སྡུག་བསྔལ་འགོག་པར་འགྲོ་བའི་ལམ་བསྒོམས་པ་ལྷག་མ་དང་བཅས་པ་དེ་དག་ནི་བཅོམ་ལྡན་འདས་དེའི་ཡན་ལག་གི་མྱ་ངན་ལས་འདས་པ་དང་། དེའི་ཡན་ལག་གི་མྱ་ངན་ལས་འདས་པ་ཐོབ་པ་ལགས་སོ། །བཅོམ་ལྡན་འདས་དེ་དག་ནི་མྱ་ངན་ལས་ [266b.7]འདས་པའི་དབྱིངས་སུ་ཞུགས་པ་ཞེས་བགྱིའོ། །བཅོམ་ལྡན་འདས་གང་དག་སྡུག་བསྔལ་ཐམས་ཅད་ཡོངས་སུ་འཚལ་བ་དང་། སྡུག་བསྔལ་ཀུན་འབྱུང་བ་ཐམས་ཅད་སྤངས་པ་དང་། སྡུག་བསྔལ་འགོག་པ་ཐམས་ཅད་མངོན་སུམ་དུ་བགྱིས་པ་དང་། སྡུག་བསྔལ་ [267a] [267a.1]འགོག་པར་འགྲོ་བའི་ལམ་ཐམས་ཅད་བསྒོམས་པ་གང་ལགས་པ་དེ་དག་ནི། བཅོམ་ལྡན་འདས་མི་རྟག་པས་བཅོམ་ཞིང་རྟག་ཏུ་ན་བའི་འཇིག་རྟེན་དུ་རྟག་པ་དང་། ཞི་བ་དང་བསིལ་བའི་དངོས་པོའི་མྱ་ངན་ལས་འདས་པ་ཐོབ་སྟེ། བཅོམ་ལྡན་ [267a.2]འདས་དེ་དག་ནི་སྐྱོབ་པ་མ་མཆིས་པ་དང་། སྐྱབས་མ་མཆིས་པའི་འཇིག་རྟེན་ན། འཇིག་རྟེན་གྱི་སྐྱོབ་པ་དང་། སྐྱབས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བཟང་ངན་དུ་འབྱེད་པའི་ཆོས་ཅན་དག་ནི་མྱ་ངན་ལས་འདས་པ་ཐོབ་པ་མ་ལགས་ཀྱི། [267a.3]བཅོམ་ལྡན་འདས་ཡེ་ཤེས་མཉམ་པ་དག་གིས་མྱ་ངན་ལས་འདས་པ་ཐོབ། བཅོམ་ལྡན་འདས་རྣམ་པར་གྲོལ་བ་མཉམ་པ་དག་གིས་མྱ་ངན་ལས་འདས་པ་ཐོབ། བཅོམ་ལྡན་འདས་རྣམ་པར་དག་པའི་ཡེ་ཤེས་གཟིགས་པ་མཉམ་པ་དག་གིས་མྱ་ངན་ལས་འདས་པ་ཐོབ་པའི་སླད་ [267a.4]དུའོ། །བཅོམ་ལྡན་འདས་དེ་ལྟ་ལགས་པས་མྱ་ངན་ལས་འདས་པའི་དབྱིངས་ནི་རོ་གཅིག་སྟེ། འདི་ལྟར་རིག་པ་དང་རྣམ་པར་གྲོལ་བའི་རོར་རོ་མཚུངས་པ་ལགས་སོ། །བཅོམ་ལྡན་འདས་གང་ལ་ལ་དག་མ་རིག་པའི་གནས་ཀྱི་ས་མ་སྤངས་ཤིང་བྱང་བར་མ་བགྱིས་པ་དེ་དག་ [267a.5]ནི་བཅོམ་ལྡན་འདས་མྱ་ངན་ལས་འདས་པའི་དབྱིངས་སུ་རོ་གཅིག་པ་མ་ལགས་ཏེ། འདི་ལྟར་རིག་པ་དང་རྣམ་པར་གྲོལ་བར་རོ་མཚུངས་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་མ་རིག་པའི་གནས་ཀྱིས་མ་སྤངས་ཤིང་མ་སྦྱངས་པས་ནི་སྤང་བར་བགྱི་བའི་ [267a.6]ཆོས་གང་གཱའི་ཀླུང་གི་བྱེ་མ་ལས་འདས་པ་སྙེད་མ་སྤངས་ཤིང་མ་སྦྱངས་པའི་སླད་དུ་སྟེ། བཅོམ་ལྡན་འདས་སྤང་བར་བགྱི་བའི་ཆོས་གང་གཱའི་ཀླུང་གི་བྱེ་མ་ལས་འདས་པ་སྙེད་དེ་དག་མ་སྤངས་ཤིང་མ་སྦྱངས་པས་ཆོས་གང་གཱའི་ཀླུང་གི་བྱེ་མ་ལས་འདས་པ་སྙེད་མ་ཐོབ་ཅིང་མངོན་ [267a.7]སུམ་དུ་མ་བགྱིས་པར་གྱུར་པའི་སླད་དུའོ། །བཅོམ་ལྡན་འདས་དེ་ལྟ་ལགས་པས་མ་རིག་པའི་གནས་ཀྱི་ས་ནི་སྒོམ་པས་སྤང་བར་བགྱི་བའི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་འབྱུང་བའི་འབྱུང་གནས་ལགས་ཏེ། བཅོམ་ལྡན་འདས་དེ་ལས་ནི་སེམས་ཀྱི་ཉེ་བའི་ [267b] [267b.1]ཉོན་མོངས་པ་དང་། ཞི་གནས་ཀྱི་ཉེ་བའི་ཉོན་མོངས་པ་དང་། ལྷག་མཐོང་གི་ཉེ་བའི་ཉོན་མོངས་པ་དང་། བསམ་གཏན་གྱི་ཉེ་བའི་ཉོན་མོངས་པ་དང་། ཏིང་ངེ་འཛིན་གྱི་ཉེ་བའི་ཉོན་མོངས་པ་དང་། སྙོམས་པར་འཇུག་པའི་ཉེ་བའི་ཉོན་མོངས་པ་དང་། རྣལ་འབྱོར་གྱི་ཉེ་ [267b.2]བའི་ཉོན་མོངས་པ་དང་། ཤེས་པའི་ཉེ་བའི་ཉོན་མོངས་པ་དང་། འབྲས་བུའི་ཉེ་བའི་ཉོན་མོངས་པ་དང་། རྟོགས་པའི་ཉེ་བའི་ཉོན་མོངས་པ་དང་། སྟོབས་ཀྱི་ཉེ་བའི་ཉོན་མོངས་པ་དང་། མི་འཇིགས་པའི་ཉེ་བའི་ཉོན་མོངས་པ་ཡང་འབྱུང་ལགས་སོ། །བཅོམ་ལྡན་ [267b.3]འདས་ཉེ་བའི་ཉོན་མོངས་པ་གང་གཱའི་ཀླུང་གི་བྱེ་མ་ལས་འདས་པ་སྙེད་དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་པར་བགྱི་བ་དེ་དག་ཐམས་ཅད་ཀྱང་མ་རིག་པའི་གནས་ཀྱི་ས་ལས་འབྱུང་ལགས་སོ། །བཅོམ་ལྡན་འདས་མ་རིག་པའི་གནས་ཀྱི་ས་ནི་ཉེ་བའི་ཉོན་མོངས་ [267b.4]པ་དང་། ཀུན་ནས་ལྡང་བ་ཐམས་ཅད་ཀྱི་རྒྱུ་དང་། གཞི་དང་། རྐྱེན་ལགས་སོ། །བཅོམ་ལྡན་འདས་ཀུན་ནས་ལྡང་བ་གང་ལགས་པ་དེ་དག་ནི་སྐད་ཅིག་པ་སྟེ། སེམས་ཀྱི་སྐད་ཅིག་པ་དང་མཚུངས་པར་ལྡན་པ་ལགས་སོ། །བཅོམ་ལྡན་འདས་མ་རིག་པའི་གནས་ཀྱི་ [267b.5]ས་ཐོག་མ་མ་མཆིས་པའི་དུས་ནས་མཆིས་པ་ནི་སེམས་དང་མི་ལྡན་པ་ལགས་སོ། །བཅོམ་ལྡན་འདས་སྤང་བར་བགྱི་བའི་ཆོས་གང་གཱའི་ཀླུང་གི་བྱེ་མ་ལས་འདས་པ་སྙེད་གང་དག་དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་ཞིང་སྤང་བར་བགྱི་བའི་ཆོས་དེ་དག་ཐམས་ [267b.6]ཅད་ཀྱི་གཞི་དང་རྟེན་ནི་འདི་ལྟར་མ་རིག་པའི་གནས་ཀྱི་ས་ལགས་སོ། །བཅོམ་ལྡན་འདས་དཔེར་ན་ས་བོན་གྱི་རྣམ་པ་གང་ཅི་ལགས་པ་དག་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དེ་དག་ཐམས་ཅད་ནི་བཅོམ་ལྡན་འདས་ས་ལ་བརྟེན་ཅིང་ས་ལ་ [267b.7]གནས་ཏེ་སྐྱེ་ཞིང་འཕེལ་ལ་རྒྱས་པར་འགྱུར་ལགས་སོ། །བཅོམ་ལྡན་འདས་ས་ཆེན་པོ་ཚིག་ཅིང་ཞིག་ལ་མི་གདའ་བར་གྱུར་ཏེ་མ་མཆིས་པར་གྱུར་ན་ནི་ས་བོན་གྱི་རྣམ་པ་གང་ཅི་ལགས་པ་དག་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དེ་དག་ཐམས་ཅད་ [268a] [268a.1]ཀྱང་ཚིག་ཅིང་ཞིག་ལ་མི་གདའ་བར་འགྱུར་ཞིང་མ་མཆིས་པར་འགྱུར་ལགས་སོ། །བཅོམ་ལྡན་འདས་དེ་བཞིན་དུ་སྤང་བར་བགྱི་བའི་ཆོས་གང་གཱའི་ཀླུང་གི་བྱེ་མ་ལས་འདས་པ་སྙེད་དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་པར་བགྱི་ [268a.2]བ་དེ་དག་ཐམས་ཅད་ཀྱང་མ་རིག་པའི་གནས་ཀྱི་ས་ལ་རྟེན་ཅིང་མ་རིག་པའི་གནས་ཀྱི་ས་ལ་གནས་ཏེ་སྐྱེ་ཞིང་འཕེལ་ལ་རྒྱས་པར་འགྱུར་ལགས་སོ། །བཅོམ་ལྡན་འདས་མ་རིག་པའི་གནས་ཀྱི་ས་སྤངས་ཤིང་སྦྱངས་ཏེ་མ་མཆིས་པར་གྱུར་ན་ནི་སྤང་བར་བགྱི་བའི་ཆོས་གང་གཱའི་ [268a.3]ཀླུང་གི་བྱེ་མ་ལས་འདས་པ་སྙེད་གང་དག་དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་པར་བགྱི་བ་དེ་དག་ཐམས་ཅད་ཀྱང་སྤངས་ཤིང་སྦྱངས་ཏེ་མ་མཆིས་པར་འགྱུར་ལགས་སོ། །བཅོམ་ལྡན་འདས་ཉོན་མོངས་པ་དང་ཉེ་བའི་ཉོན་མོངས་པ་དེ་དག་ཐམས་ཅད་སྤངས་ [268a.4]ཤིང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་གང་གཱའི་ཀླུང་གི་བྱེ་མ་ལས་འདས་པ་སྙེད་བརྙེས་པ་དེ་བཞིན་གཤེགས་པ་རྣམས་ཀྱིས་ཆོས་ཐམས་ཅད་ལ་སྒྲིབ་པ་མ་མཆིས་པའི་མངོན་པར་མཁྱེན་པ་བརྙེས་ཏེ་ཐམས་ཅད་མཁྱེན་པ་དང་། ཐམས་ཅད་གཟིགས་པ་དང་། [268a.5]སྐྱོན་ཐམས་ཅད་སྤངས་པ་དང་། ཡོན་ཏན་ཐམས་ཅད་དང་ལྡན་པ་དང་། ཆོས་ཀྱི་རྒྱལ་པོ། ཆོས་ཀྱི་དབང་ཕྱུག །ཆོས་ཐམས་ཅད་ལ་མངའ་སྒྱུར་བའི་སར་གཤེགས་ནས་ངའི་སྐྱེ་བ་ཟད་དོ། །ཚངས་པར་སྤྱད་པ་བསྟེན་ཏོ། །བྱ་བ་བྱས་སོ། །འདི་ལྟ་བུ་ཉིད་ [268a.6]ལས་གཞན་མི་ཤེས་སོ་ཞེས་སེང་གེའི་སྒྲ་སྒྲོགས་པར་མཛད་དོ། །བཅོམ་ལྡན་འདས་དེ་ལྟ་ལགས་པས་དེ་བཞིན་གཤེགས་པ་རྣམས་ཀྱི་སེང་གེའི་སྒྲ་འདི་ནི་ངེས་པའི་དོན་ལགས་ཏེ། དོན་འདི་ནི་མགོ་གཅིག་ཏུ་ལུང་བསྟན་པར་བགྱི་བ་ཡང་ལགས་སོ། །བཅོམ་ལྡན་འདས་ [268a.7]འདི་ལྟ་བུ་ཉིད་ལས་གཞན་མི་ཤེས་སོ་ཞེས་བགྱི་བའི་ཡེ་ཤེས་ལ་ཡང་རྣམ་པ་གཉིས་ཏེ། བཅོམ་ལྡན་འདས་དེ་བཞིན་གཤེགས་པས་སངས་རྒྱས་ཀྱི་རྣམ་པར་རྒྱལ་བ་བླ་ན་མ་མཆིས་པས་བདུད་བཞི་བཅོམ་སྟེ་ཕམ་པར་མཛད་ནས་ཆོས་ཀྱི་སྐུ་འཇིག་རྟེན་ཐམས་ཅད་ལས་ [268b] [268b.1]མངོན་པར་འཕགས་པ་སེམས་ཅན་ཐམས་ཅད་ཀྱིས་བལྟ་བར་བགྱི་བ་བསམ་གྱིས་མི་ཁྱབ་པ་བརྙེས་ཏེ། ཤེས་བྱའི་ས་ཐམས་ཅད་ལ་ཐོགས་པ་མ་མཆིས་པའི་ཆོས་ཀྱི་དབང་ཕྱུག་མཛད་པ་ན་འདི་ལས་ལྷག་པར་བྱ་བ་འམ། རྟོགས་པར་བྱ་བའི་ས་མེད་དོ་ཞེས་ཡང་དག་པར་ [268b.2]གཟིགས་ཏེ། སྟོབས་བཅུ་པོ་དག་གི་སྟོབས་དང་ལྡན་ཞིང་མི་འཇིགས་པའི་ས་བླ་ན་མེད་པའི་མཆོག་ཏུ་ཡང་དག་པར་གཤེགས་ཏེ། ཤེས་བྱ་ཐམས་ཅད་ལ་སྒྲིབ་པ་མི་མངའ་བའི་ཡེ་ཤེས་ཀྱིས་རྣམ་པར་གཟིགས་ནས་འདི་ལྟ་བུ་ཉིད་ལས་གཞན་མི་ཤེས་སོ་ཞེས་བགྱི་བའི་ [268b.3]ཡེ་ཤེས་ཀྱིས་སེང་གེའི་སྒྲ་སྒྲོགས་པར་མཛད་དོ། །བཅོམ་ལྡན་འདས་དགྲ་བཅོམ་པ་དང་། རང་སངས་རྒྱས་འཁོར་བའི་འཇིགས་པ་ལས་རྒལ་བ་དེ་མ་ཐག་ཏུ་རྣམ་པར་གྲོལ་བ་དག་གི་བདེ་བ་ཉམས་སུ་མྱོང་བ་རྣམས་ནི་འདི་ལྟར་བདག་ནི་འཁོར་བའི་འཇིགས་པ་རྣམས་ [268b.4]ལས་ཡོངས་སུ་གྲོལ་གྱིས། བདག་གིས་ནི་ཕྱིན་ཆད་འཁོར་བའི་སྡུག་བསྔལ་མྱོང་བར་མི་འགྱུར་རོ་སྙམ་དུ་ཡང་དག་པར་མཐོང་སྟེ། བཅོམ་ལྡན་འདས་དགྲ་བཅོམ་པ་རྣམས་དང་། རང་སངས་རྒྱས་འདི་ལྟ་བུ་ཉིད་ལས་གཞན་མི་ཤེས་སོ་ཞེས་བགྱི་བ་རྟོགས་ནས་དབུགས་ [268b.5]ཕྱིན་པའི་མཆོག་མྱ་ངན་ལས་འདས་པའི་ས་ལ་སོ་སོར་རྟོག་གོ །བཅོམ་ལྡན་འདས་དེ་དག་གིས་རྟོགས་ནས་ཀྱང་ས་དེ་ལ་རྨོངས་པ་མ་མཆིས་པའི་ཆོས་ཅན་དུ་འགྱུར་ཏེ། བཅོམ་ལྡན་འདས་དེ་དག་གིས་ཀྱང་གཞན་གྱི་དྲིང་མི་འཇོག་པར་བདག་གིས་ནི་འདི་ལྟར་ལྷག་མ་དང་ [268b.6]བཅས་པའི་ས་ཐོབ་སྟེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ་སྙམ་དུ་འཚལ་ཏོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཉན་ཐོས་དང་། རང་སངས་རྒྱས་ཀྱི་ཐེག་པ་རྣམས་ནི་ཐེག་པ་ཆེན་པོ་ལ་ཡང་དག་པར་འདུ་བའི་སླད་ [268b.7]དུ་སྟེ། བཅོམ་ལྡན་འདས་ཐེག་པ་ཆེན་པོ་ཞེས་བགྱི་བ་དེ་ནི་སངས་རྒྱས་ཀྱི་ཐེག་པའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་དེ་ལྟར་ན་ཐེག་པ་གསུམ་པོ་འདི་དག་ནི་ཐེག་པ་གཅིག་ཁོ་ནའི་གྲངས་སུ་མཆིའོ། །བཅོམ་ལྡན་འདས་ཐེག་པ་གཅིག་རྟོགས་པས་ [269a] [269a.1]བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་འགྱུར་རོ། །བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བགྱི་བ་དེ་ནི་མྱ་ངན་ལས་འདས་པའི་དབྱིངས་ཀྱི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་མྱ་ [269a.2]ངན་ལས་འདས་པའི་དབྱིངས་ཞེས་བགྱི་བ་དེ་ནི་དེ་བཞིན་གཤེགས་པའི་ཆོས་ཀྱི་སྐུའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་ཆོས་ཀྱི་སྐུ་རྟོགས་པའི་མཐའ་ནི་ཐེག་པ་གཅིག་པ་ལགས་ཏེ། བཅོམ་ལྡན་འདས་དེ་བཞིན་གཤེགས་པ་ཡང་གཞན་མ་ལགས། [269a.3]ཆོས་ཀྱི་སྐུ་ཡང་གཞན་མ་ལགས་ཏེ། བཅོམ་ལྡན་འདས་དེ་བཞིན་གཤེགས་པ་ཉིད་ཆོས་ཀྱི་སྐུ་ལགས་སོ། བཅོམ་ལྡན་འདས་ཆོས་ཀྱི་སྐུ་རྟོགས་པའི་མཐའ་ནི་ཐེག་པ་གཅིག་གི་མཐའ་ལགས་སོ། །བཅོམ་ལྡན་འདས་ཐེག་པ་གཅིག་གི་མཐའ་ཞེས་བགྱི་བ་དེ་ [269a.4]ནི་ཐེག་པ་གཅིག་གི་མཐར་སྦྱར་བའི་ཚིག་{བླ་དགས་,བླ་དྭགས་}ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་རྣམས་ནི་དུས་ཀྱི་མཐའ་མཆིས་པ་ལ་གནས་པ་མ་ལགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ [269a.5]རྫོགས་པའི་སངས་རྒྱས་རྣམས་ནི་ཕྱི་མའི་མཐའི་མུར་ཐུག་པར་གནས་པའི་སླད་དུའོ། །བཅོམ་ལྡན་འདས་དེ་བཞིན་གཤེགས་པ་རྣམས་ནི་འཇིག་རྟེན་ལ་སྨན་པའི་སླད་དུ་དུས་ཀྱི་མཐའ་མཆིས་པའི་ཐུགས་རྗེ་ཅན་དང་། དུས་ཀྱི་མཐའ་མཆིས་པའི་ཐུགས་དམ་མངའ་ [269a.6]བ་མ་ལགས་ཏེ། ཀྱེ་འཇིག་རྟེན་ལ་ཕན་པའི་ཕྱིར་དུས་ཀྱི་མཐའ་མེད་པར་སྙིང་རྗེ་དང་ལྡན་པ་དང་། དུས་ཀྱི་མཐའ་མེད་པར་ཡི་དམ་བཅས་པའི་སེམས་ཅན་ཨ་ལ་ལ་ཞེས་མཆི་བ་དག་ནི་བཅོམ་ལྡན་འདས་དེ་བཞིན་གཤེགས་པ་ཉིད་ལ་ཡང་དག་པར་སྨྲ་བས་སྨྲ་བ་ [269a.7]ལགས་སོ། །ཀྱེ་འཇིག་རྟེན་ལ་ཕན་པའི་ཕྱིར་ཆོས་མི་ཟད་པ་དང་། ཆོས་རྟག་པ་དང་། ཆོས་བརྟན་པ་དང་། སྐྱབས་ཀྱི་སེམས་ཅན་ཨ་ལ་ལ་ཞེས་མཆི་བདག་ཀྱང་དེ་བཞིན་གཤེགས་པ་ཉིད་ལ་ཡང་དག་པར་སྨྲ་བས་སྨྲ་བ་ལགས་སོ། །བཅོམ་ལྡན་འདས་དེ་ལྟ་ [269b] [269b.1]ལགས་པས་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྐྱབས་མ་མཆིས་པ་དང་། སྐྱོབ་པ་མ་མཆིས་པའི་འཇིག་རྟེན་ན་ཕྱི་མའི་མཐར་ཐུག་པར་སྐྱབས་མི་ཟད་པ་དང་། སྐྱབས་རྟག་པ་དང་། སྐྱབས་བརྟན་པ་ལགས་ [269b.2]སོ། །བཅོམ་ལྡན་འདས་ཆོས་ཞེས་བགྱི་བ་དེ་ནི་ཐེག་པ་གཅིག་གི་ལམ་བསྟན་པའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་དགེ་འདུན་ཞེས་བགྱི་བ་དེ་ནི་ཐེག་པ་གསུམ་པའི་ཚོགས་ཀྱི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་སྐྱབས་འདི་གཉིས་ནི་དེའི་ [269b.3]ཡན་ལག་གི་སྐྱབས་ཞེས་བགྱི་སྟེ་སྐྱབས་ཀྱི་རབ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཐེག་པ་གཅིག་གི་ལམ་བསྟན་པའི་ཆོས་ཀྱང་ཆོས་ཀྱི་སྐུ་རྟོགས་པའི་མཐའ་ལགས་ཏེ། བཅོམ་ལྡན་འདས་དེའི་ཕ་རོལ་ན་ཐེག་པ་གཅིག་གི་ལམ་བསྟན་པའི་ཆོས་ [269b.4]ཀྱིས་ནི་བགྱི་བ་ཅི་ཡང་མ་མཆིས་སོ། །བཅོམ་ལྡན་འདས་ཐེག་པ་གསུམ་པའི་ཚོགས་ཀྱང་འཇིག་པ་དང་བཅས་པས་དེ་བཞིན་གཤེགས་པ་ལ་སྐྱབས་སུ་མཆིས་པ་དང་། འབྱུང་བའི་ཐབས་ཚོལ་བ་དང་། སློབ་པ་དང་། བགྱི་བ་དང་བཅས་པ་དང་། བླ་ན་མེད་པ་ [269b.5]ཡང་དག་པར་རྫོགས་པའི་བྱང་ཆུབ་ལ་ཞུགས་པ་ལགས་སོ། །བཅོམ་ལྡན་འདས་དེ་ལྟར་ན་སྐྱབས་འདི་གཉིས་ནི་སྐྱབས་ཀྱི་རབ་མ་ལགས་ཏེ། དུས་ཀྱི་མཐའ་མཆིས་པའི་སྐྱབས་ལགས་སོ། །བཅོམ་ལྡན་འདས་སེམས་ཅན་གང་དག་དེ་བཞིན་གཤེགས་པས་ [269b.6]བཏུལ་བ་དེ་དག་ནི་དེ་བཞིན་གཤེགས་པ་ལ་སྐྱབས་སུ་མཆི་བ་ན་ཆོས་ཉིད་ཀྱི་རྒྱུ་འཐུན་པ་ལ་མངོན་པར་དད་པས་ཆོས་དང་དགེ་སློང་གི་དགེ་འདུན་ལ་ཡང་སྐྱབས་སུ་མཆི་སྟེ། བཅོམ་ལྡན་འདས་ཆོས་ཉིད་ཀྱི་རྒྱུ་འཐུན་པ་ལ་མངོན་པར་དད་པས་སྐྱབས་སུ་མཆི་བ་གཉིས་ལ་ [269b.7]སྐྱབས་སུ་མཆི་བར་བགྱི་བ་ལགས་སོ། །བཅོམ་ལྡན་འདས་དེ་བཞིན་གཤེགས་པ་ལ་སྐྱབས་སུ་མཆི་བ་ནི་ཆོས་ཉིད་ཀྱི་རྒྱུ་འཐུན་པ་ལ་མངོན་པར་དད་པས་མཆི་བར་བགྱི་བ་མ་ལགས་ཏེ། བཅོམ་ལྡན་འདས་དེ་བཞིན་གཤེགས་པ་ལ་སྐྱབས་སུ་མཆི་བ་ནི་སྐྱབས་སུ་ [270a] [270a.1]མཆི་བ་ཡང་དག་པ་ལགས་སོ། །བཅོམ་ལྡན་འདས་སྐྱབས་སུ་མཆི་བ་གཉིས་ཀྱང་ཡང་དག་པར་ན་དེ་བཞིན་གཤེགས་པ་ལ་སྐྱབས་སུ་མཆི་ཞེས་བགྱི་བའི་མཐའ་ལགས་པར་ཁོང་དུ་ཆུད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ [270a.2]བཞིན་གཤེགས་པ་ཡང་གཞན་མ་ལགས། སྐྱབས་གཉིས་པོ་ཡང་གཞན་མ་ལགས་ཏེ། བཅོམ་ལྡན་འདས་དེ་བཞིན་གཤེགས་པ་ཉིད་སྐྱབས་གསུམ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཐེག་པ་གཅིག་གི་ལམ་བསྟན་པའི་ཆོས་འདི་ཡང་དེ་བཞིན་ [270a.3]གཤེགས་པའི་ཁྱུ་མཆོག་གི་གསུང་དང་། དེ་བཞིན་གཤེགས་པའི་སེང་གེའི་སྒྲ་སོ་སོ་ཡང་དག་པར་རིག་པ་བཞི་དང་ལྡན་པ་ལགས་པའི་སླད་དུའོ། །བཅོམ་ལྡན་འདས་མོས་པ་ཇི་ལྟ་བ་དག་ལ་དེ་བཞིན་གཤེགས་པས་ཐེག་པ་གཉིས་པོ་ཐབས་ཀྱི་སྒྲུབ་པས་བསྒྲུབས་པ་དེ་ [270a.4]དག་ཀྱང་ཐེག་པ་ཆེན་པོ་བདག་ཉིད་ཀྱི་སླད་དུ་ལགས་སོ། །བཅོམ་ལྡན་འདས་ཐེག་པ་འདི་གཉིས་ཀྱི་མིང་ནི་མ་མཆིས་ཏེ། བཅོམ་ལྡན་འདས་ཡང་དག་པར་ན་འདི་ལ་ཐེག་པ་གཅིག་པོ་ནི་ཐེག་པ་ཡང་དག་པ་ལགས་ཏེ་ཐེག་པ་གསུམ་ཡང་དག་པར་འདུའོ། །བཅོམ་ [270a.5]ལྡན་འདས་ཉན་ཐོས་དང་རང་སངས་རྒྱས་རྣམས་ཀྱི་འཕགས་པའི་བདེན་པ་ཐོག་མར་མངོན་པར་རྟོགས་པའི་ཤེས་པ་གཅིག་པུས་ནི་གནས་ཀྱི་ས་དེ་སྙེད་ཅིག་སྤོང་བར་འགྱུར་རོ། །བཅོམ་ལྡན་འདས་ཤེས་པ་དེ་གཅིག་པུས་ཡོངས་སུ་འཚལ་བ་ལ་སོགས་པ་ཡོན་ཏན་བཞི་པོ་རྣམས་ [270a.6]མངོན་སུམ་དུ་བགྱིད་པར་འགྱུར་ཞིང་དོན་བཞི་པོ་བདག་ཉིད་ཆོས་ཉིད་ཀྱིས་ཤིན་ཏུ་སོ་སོར་རྟོགས་པར་འགྱུར་རོ། །བཅོམ་ལྡན་འདས་འཇིག་རྟེན་ལས་འདས་པའི་ཤེས་པ་ལ་ཤེས་པ་བཞི་འཕོ་བ་དང་དམིགས་པ་བཞི་འཕོ་བ་མ་མཆིས་ཏེ། བཅོམ་ལྡན་འདས་འཇིག་རྟེན་ལས་འདས་པའི་ཤེས་པ་རྡོ་རྗེ་ལྟ་བུ་ [270a.7]ནི་མི་འཕོ་བའི་ཆོས་ཅན་ལགས་སོ། །བཅོམ་ལྡན་འདས་དེ་ལྟར་འདི་ལ་ཉན་ཐོས་དང་། རང་སངས་རྒྱས་ཐམས་ཅད་ཀྱི་གནས་ཀྱི་ས་སྤོང་བའི་འཕགས་པའི་བདེན་པ་ཤེས་པ་དང་པོ་ནི་ཡང་དག་པའི་ཤེས་པ་ལགས་ཏེ། བཅོམ་ལྡན་འདས་དེ་དག་ལ་འཕགས་པའི་བདེན་ [270b] [270b.1]པ་ཤེས་པ་རྣམ་པ་གཉིས་ཀྱིས་གནས་ཀྱི་ས་སྤོང་བ་ནི་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་སྤྱོད་ཡུལ་མ་ལགས་པ་དང་། བསམ་གྱིས་ [270b.2]མི་ཁྱབ་པ་དང་། སྟོང་པ་ཉིད་ཀྱི་ཡེ་ཤེས་ཀྱིས་ཉོན་མོངས་པ་ཐམས་ཅད་ཀྱི་སྦུབས་སྤོང་ལགས་སོ། །བཅོམ་ལྡན་འདས་ཉོན་མོངས་པའི་སྦུབས་ཐམས་ཅད་འབྱེད་པའི་མཐར་ཕྱིན་པའི་ཡེ་ཤེས་གང་ལགས་པ་དེ་ནི་ཡང་དག་པའི་ཡེ་ཤེས་ཞེས་བགྱིའོ། །བཅོམ་ལྡན་ [270b.3]འདས་འཕགས་པའི་བདེན་པ་འཚལ་བ་དང་པོ་ནི་མཐར་ཕྱིན་པའི་ཤེས་པ་མ་ལགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པའི་ཤེས་པ་ལགས་སོ། །བཅོམ་ལྡན་འདས་འཕགས་པའི་དོན་དེ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཚིག་བླ་ [270b.4]དགས་མ་ལགས་སོ། །བཅོམ་ལྡན་འདས་ཉན་ཐོས་དང་། རང་སངས་རྒྱས་ཐམས་ཅད་ནི་ཡོན་ཏན་ཚད་མཆིས་པ་ལགས་ཏེ། བཅོམ་ལྡན་འདས་དེའི་ཡན་ལག་གི་ཡོན་ཏན་དང་ལྡན་པའི་སླད་དུ་ཉན་ཐོས་དང་། རང་སངས་རྒྱས་རྣམས་ལ་འཕགས་པ་ཞེས་བགྱིའོ། ། [270b.5]བཅོམ་ལྡན་འདས་འཕགས་པའི་བདེན་པ་རྣམས་ཞེས་བགྱི་བ་དེ་དག་ནི་ཉན་ཐོས་དང་། རང་སངས་རྒྱས་རྣམས་ཀྱི་བདེན་པ་མ་ལགས། ཉན་ཐོས་དང་། རང་སངས་རྒྱས་རྣམས་ཀྱི་ཡོན་ཏན་མ་ལགས་ཏེ། བདེན་པ་འདི་དག་ནི་དེ་བཞིན་གཤེགས་པ་དགྲ་བཅོམ་པ་ཡང་ [270b.6]དག་པར་རྫོགས་པའི་སངས་རྒྱས་རྣམས་ཀྱིས་ཐོག་མར་མངོན་པར་རྫོགས་པར་སངས་རྒྱས་ཤིང་མངོན་པར་མཁྱེན་ལ་སོ་སོར་རྟོགས་ནས་དེ་མངོན་པར་མཁྱེན་པའི་འོག་ཏུ་དེ་བཞིན་གཤེགས་པ་རྣམས་ཀྱིས་མ་རིག་པའི་སྒོ་ངའི་སྦུབས་སུ་བཅུག་པའི་འཇིག་རྟེན་ལ་བསྟན་ཅིང་ [270b.7]བཏགས་ཏེ། དེའི་སླད་དུ་འཕགས་པའི་བདེན་པ་རྣམས་ཤེས་བགྱིའོ། །བཅོམ་ལྡན་འདས་འཕགས་པའི་བདེན་པའི་དོན་བཤད་པ་ནི་ཟབ་ཅིང་ཕྲ་ལ་བརྟགས་པར་དཀའ་སྟེ་ཁོང་དུ་ཆུད་པར་དཀའ་ཞིང་བརྟག་མི་ནུས་ལ་རྟོག་གེའི་སྤྱོད་པ་མ་ལགས་ཏེ། མཁས་ཤིང་ [271a] [271a.1]མཛངས་པས་རིག་པ་དང་། འཇིག་རྟེན་ཐམས་ཅད་དང་མི་འཐུན་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཟབ་མོ་བསྟན་པ་བཤད་པ་འདི་ནི་དེ་བཞིན་གཤེགས་པའི་སྙིང་པོ་ལགས་པའི་སླད་དུ་སྟེ། བཅོམ་ལྡན་འདས་དེ་བཞིན་ [271a.2]གཤེགས་པའི་སྙིང་པོ་ནི་དེ་བཞིན་གཤེགས་པའི་སྤྱོད་ཡུལ་ལགས་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱི་སྤྱོད་ཡུལ་མ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་འཕགས་པའི་བདེན་པའི་དོན་བཤད་པ་འདིའི་གནས་ལགས་སོ། ། [271a.3]བཅོམ་ལྡན་འདས་དེ་བཞིན་གཤེགས་པའི་སྙིང་པོའི་གནས་ཟབ་པས་ན་འཕགས་པའི་བདེན་པའི་དོན་ཡང་ཟབ་ཅིང་ཕྲ་ལ་བརྟགས་པ་དཀའ་སྟེ་རྟོགས་པར་དཀའ་ཞིང་བརྟག་མི་ནུས་ལ་རྟོག་གེའི་སྤྱོད་པ་མ་ལགས་ཏེ། མཁས་ཤིང་མཛངས་པས་རིག་པ་དང་། འཇིག་རྟེན་ [271a.4]ཐམས་ཅད་དང་མི་འཐུན་པ་ཞེས་བགྱིའོ། །བཅོམ་ལྡན་འདས་གང་ཉོན་མོངས་པ་ཐམས་ཅད་ཀྱི་སྦུབས་ཀྱི་མཐས་དཀྲིས་པ་དེ་བཞིན་གཤེགས་པའི་སྙིང་པོ་ལ་ཐེ་ཚོམ་མ་མཆིས་པ་དེ་ནི་ཉོན་མོངས་པ་ཐམས་ཅད་ཀྱི་སྦུབས་ནས་རྣམ་པར་གྲོལ་བའི་དེ་བཞིན་གཤེགས་པའི་ཆོས་ཀྱི་སྐུ་ [271a.5]ལ་ཡང་ཐེ་ཚོམ་མ་མཆིས་པ་ལགས་སོ། །བཅོམ་ལྡན་འདས་གང་གི་ཡིད་དེ་བཞིན་གཤེགས་པའི་སྙིང་པོ་དང་། དེ་བཞིན་གཤེགས་པའི་ཆོས་ཀྱི་སྐུ་དང་། སངས་རྒྱས་ཀྱི་ཡུལ་བསམ་གྱིས་མི་ཁྱབ་པའི་དགོངས་པའི་མཐར་ཕྱིན་པ་དེ་ནི་བཅོམ་ལྡན་འདས་འཕགས་ [271a.6]པའི་བདེན་པའི་དོན་བཤད་པ་རྣམ་པ་འདི་གཉིས་ལ་ཡིད་ཆེས་ཤིང་དད་དེ་མོས་པ་ལགས་སོ། །བཅོམ་ལྡན་འདས་དེ་ལྟར་ན་འཕགས་པའི་བདེན་པའི་དོན་བཤད་པ་རྣམ་པ་གཉིས་ནི་རིག་པར་དཀའ་ཞིང་རྟོགས་པར་དཀའ་བ་ལགས་སོ། །བཅོམ་ལྡན་འདས་འཕགས་པའི་ [271a.7]བདེན་པའི་དོན་བཤད་པ་རྣམ་པ་གཉིས་གང་ཞེ་ན། འཕགས་པའི་བདེན་པའི་དོན་བཤད་པར་བགྱི་བ་མཆིས་པ་དང་། བགྱི་བ་མ་མཆིས་པ་ལགས་སོ། །བཅོམ་ལྡན་འདས་དེ་ལ་འཕགས་པའི་བདེན་པའི་དོན་བཤད་པར་བགྱི་བ་མཆིས་པ་ནི་འཕགས་པའི་བདེན་པ་བཞི་བསྟན་ [271b] [271b.1]པ་དང་། བཏགས་པ་ཚད་མཆིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གཞན་གྱིས་བགྱིད་དུ་སྩལ་ཀྱང་སྡུག་བསྔལ་ཐམས་ཅད་ཡོངས་སུ་འཚལ་བ་དང་། སྡུག་བསྔལ་ཀུན་འབྱུང་བ་ཐམས་ཅད་སྤང་བ་དང་། སྡུག་བསྔལ་འགོག་པ་ཐམས་ཅད་མངོན་ [271b.2]སུམ་དུ་བགྱི་བ་དང་། སྡུག་བསྔལ་འགོག་པར་འགྲོ་བའི་ལམ་ཐམས་ཅད་བསྒོམ་པར་མི་ནུས་ཏེ། བཅོམ་ལྡན་འདས་དེ་ལྟ་ལགས་པས་འཁོར་བ་ལ་ཡང་འདུས་བྱས་དང་། འདུས་མ་བྱས་པ་མཆིས་སོ། །མྱ་ངན་ལས་འདས་པ་ལ་ཡང་འདུས་བྱས་དང་འདུས་མ་བྱས་པ་ [271b.3]མཆིས་སོ། །བཅོམ་ལྡན་འདས་འཕགས་པའི་བདེན་པའི་དོན་བཤད་པར་བགྱི་བ་མ་མཆིས་པ་གང་ལགས་པ་ནི་བཅོམ་ལྡན་འདས་དེ་ལ་འཕགས་པའི་བདེན་པ་བཞི་བསྟན་པ་དང་། བཏགས་པ་དག་དཔག་ཏུ་མ་མཆིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་ [271b.4]འདས་བདག་ཉིད་ཀྱིས་བསལ་ཀྱང་ཟིན་པའི་སྡུག་བསྔལ་ཐམས་ཅད་ཡོངས་སུ་འཚལ་བ་དང་ཟིན་པའི་སྡུག་བསྔལ་ཀུན་འབྱུང་བ་ཐམས་ཅད་སྤང་བ་དང་། ཟིན་པའི་སྡུག་བསྔལ་འགོག་པ་ཐམས་ཅད་མངོན་སུམ་དུ་བགྱི་བ་དང་། ཟིན་པའི་སྡུག་བསྔལ་འགོག་པར་འགྲོ་བའི་ལམ་ [271b.5]བསྒོམ་པར་ནུས་པའི་སླད་དུ་སྟེ། བཅོམ་ལྡན་འདས་དེ་ལྟར་ན་དེ་བཞིན་གཤེགས་པས་འཕགས་པའི་བདེན་པ་བཞི་བསྟན་པ་བཤད་པ་གང་ལགས་པ་དེ་དག་ནི་འཕགས་པའི་བདེན་པ་རྣམ་པ་བརྒྱད་དུ་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ [271b.6]དག་པར་རྫོགས་པའི་སངས་རྒྱས་རྣམས་ནི་འཕགས་པའི་བདེན་པའི་དོན་བསྟན་པ་བགྱི་བ་མ་མཆིས་པ་བཞི་པོ་དག་ལ་རྫོགས་པར་མཛད་པ་ལགས་སོ། །ཉན་ཐོས་རྣམས་དང་། རང་སངས་རྒྱས་རྣམས་ནི་རྫོགས་པར་བགྱིད་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ [271b.7]ལྡན་འདས་རབ་འབྲིང་ཐ་མའི་ཆོས་རྟོགས་པས་མྱ་ངན་ལས་འདས་པའི་དབྱིངས་རྟོགས་པ་མ་ལགས་པའི་སླད་དུའོ། །བཅོམ་ལྡན་འདས། ཅིའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཕགས་པའི་བདེན་པ་བཞིའི་དོན་བཤད་ [272a] [272a.1]པ་བགྱི་བ་མ་མཆིས་པ་དག་ལ་རྫོགས་པར་མཛད་པ་ལགས་ཞེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་མ་འོངས་པའི་སྡུག་བསྔལ་ཐམས་ཅད་ནི་ཡོངས་སུ་མཁྱེན། [272a.2]བཅོམ་ལྡན་འདས་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་འདུ་བའི་སྡུག་བསྔལ་ཀུན་འབྱུང་བ་ཐམས་ཅད་ནི་སྤངས། བཅོམ་ལྡན་འདས་ཡིད་ཀྱི་ཕུང་པོ་ཐམས་ཅད་འགོག་པའི་སྡུག་བསྔལ་ཐམས་ཅད་འགོག་པ་ནི་མངོན་སུམ་དུ་མཛད་དེ། བཅོམ་ལྡན་འདས་སྡུག་ [272a.3]བསྔལ་འགོག་པ་ནི་ཆོས་ཆུད་གསོན་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ཐོག་མ་མ་མཆིས་པའི་དུས་ནས་མཆིས་པ། མ་བགྱིས་པ། མ་སྐྱེས་པ། མི་བས་པ། བས་པ་མ་མཆིས་པ། རྟག་པ། བརྟན་པ། [272a.4]རང་བཞིན་གྱིས་ཡོངས་སུ་དག་པ། ཉོན་མོངས་པ་ཐམས་ཅད་ཀྱི་སྦུབས་ནས་ངེས་པར་གྲོལ་བ། སངས་རྒྱས་ཀྱི་ཆོས་ཐ་དད་དུ་མི་གནས་པ། གྲོལ་བར་ཤེས་པ་བསམ་གྱིས་མི་ཁྱབ་པ་གང་གཱའི་ཀླུང་གི་བྱེ་མ་ལས་འདས་པ་སྙེད་དང་ལྡན་པ་ནི་སྡུག་བསྔལ་འགོག་པའི་མིང་གིས་ [272a.5]བསྟན་པའི་སླད་དུ་སྟེ། བཅོམ་ལྡན་འདས་དེ་ཉིད་ལ་དེ་བཞིན་གཤེགས་པའི་སྙིང་པོ་ཆོས་ཀྱི་སྐུ་ཉོན་མོངས་པའི་སྦུབས་ནས་ངེས་པར་གྲོལ་བ་ཞེས་བགྱིའོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ཤེས་པ་ཉིད་ནི་དེ་བཞིན་གཤེགས་པ་རྣམས་ཀྱི་སྟོང་པ་ཉིད་ཀྱི་ཡེ་ [272a.6]ཤེས་ལགས་ཏེ། དེ་བཞིན་གཤེགས་པའི་སྙིང་པོ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་སྔོན་མ་མཐོང་མ་རྟོགས་ལགས་སོ། །བཅོམ་ལྡན་འདས་ཀྱིས་ནི་ཐུགས་སུ་ཆུད་ཅིང་མངོན་སུམ་དུ་མཛད་དོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་སྟོང་ [272a.7]པ་ཉིད་ཤེས་པ་ནི་འདི་གཉིས་ལགས་ཏེ། གཉིས་གང་ཞེ་ན། འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ཉོན་མོངས་པ་ཐམས་ཅད་ཀྱི་སྦུབས་དང་ཐ་དད་དུ་གནས་པ་མ་གྲོལ་བས་ཤེས་པ་རྣམས་ཀྱིས་སྟོང་པ་དང་། བཅོམ་ལྡན་འདས་དེ་བཞིན་གཤེགས་ [272b] [272b.1]པའི་སྙིང་པོའི་སངས་རྒྱས་ཀྱི་ཆོས་ཐ་དད་དུ་མི་གནས་ཤིང་གྲོལ་བས་ཤེས་པ་བསམ་གྱིས་མི་ཁྱབ་པ་གང་གཱའི་ཀླུང་གི་བྱེ་མ་ལས་འདས་པ་སྙེད་དག་གིས་མི་སྟོང་པ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་སྟོང་པ་ཉིད་ཤེས་པ་རྣམ་པ་འདི་གཉིས་ལ་ནི་ཉན་ཐོས་ [272b.2]ཆེན་པོ་དག་ཀྱང་བཅོམ་ལྡན་འདས་ཉིད་ལ་ཡིད་ཆེས་པས་འཇུག་པར་བས་ཏེ། བཅོམ་ལྡན་འདས་ཉན་ཐོས་དང་། རང་སངས་རྒྱས་ཐམས་ཅད་ཀྱི་སྟོང་པ་ཉིད་ཤེས་པ་ནི་ཕྱིན་ཅི་ལོག་གི་དམིགས་པ་བཞི་པོ་དག་ལ་འཇུག་པ་ལགས་སོ། །བཅོམ་ལྡན་འདས་དེ་ལྟ་ལགས་པས་ [272b.3]ཉན་ཐོས་དང་། རང་སངས་རྒྱས་ཐམས་ཅད་ཀྱིས་སྡུག་བསྔལ་འགོག་པ་ཐམས་ཅད་སྔོན་མ་མཐོང་སྔོན་མ་རྟོགས་ཏེ། བཅོམ་ལྡན་འདས་ཀྱིས་ནི་ཐུགས་སུ་ཆུད་ཅིང་མངོན་སུམ་དུ་མཛད་དོ། །ཉོན་མོངས་པའི་སྦུབས་ཐམས་ཅད་འཇོམས་པ་སྡུག་བསྔལ་འགོག་པར་འགྲོ་བའི་ [272b.4]ལམ་ཐམས་ཅད་ཀྱང་བསྒོམས་སོ། །བཅོམ་ལྡན་འདས་འཕགས་པའི་བདེན་པ་བཞི་པོ་འདི་དག་ལ་བདེན་པ་གསུམ་ནི་མི་རྟག་པ་ལགས་སོ། །བདེན་པ་གཅིག་ནི་རྟག་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདེན་པ་གསུམ་ནི་འདུས་བྱས་ཀྱི་མཚན་ཉིད་ [272b.5]དུ་གཏོགས་པའི་སླད་དུ་སྟེ། བཅོམ་ལྡན་འདས་གང་འདུས་བྱས་ཀྱི་མཚན་ཉིད་དུ་གཏོགས་པ་དེ་ནི་མི་རྟག་པ་ལགས་སོ། །གང་མི་རྟག་པ་དེ་ནི་{བརྫུན་,རྫུན་}པ་སླུ་བའི་ཆོས་ཅན་ལགས་སོ། །བཅོམ་ལྡན་འདས་གང་{བརྫུན་,རྫུན་}པ་སླུ་བའི་ཆོས་ཅན་དེ་ནི་མི་བདེན་པ་དང་མི་རྟག་པ་ལགས་ཏེ་སྐྱབས་ [272b.6]མ་ལགས་སོ། །བཅོམ་ལྡན་འདས་དེ་ལྟ་ལགས་པས་འཕགས་པའི་སྡུག་བསྔལ་བདེན་པ་དང་། སྡུག་བསྔལ་ཀུན་འབྱུང་བ་བདེན་པ་དང་། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཡང་ཡང་དག་པར་ན་མི་བདེན་པ་དང་མི་རྟག་པ་ལགས་ཏེ། སྐྱབས་མ་ལགས་སོ། ། [272b.7]བཅོམ་ལྡན་འདས་འདི་ལ་བདེན་པ་གཅིག་ནི་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་ཏེ། བཅོམ་ལྡན་འདས་གང་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་དེ་ནི་རྟག་པ་ལགས་སོ། །གང་རྟག་པ་དེ་ནི་མི་སླུ་བའི་ཆོས་ཅན་ལགས་སོ། །བཅོམ་ [273a] [273a.1]ལྡན་འདས་གང་མི་སླུ་བའི་ཆོས་ཅན་དེ་ནི་བདེན་པ་དང་། རྟག་པ་དང་། སྐྱབས་ལགས་སོ། །བཅོམ་ལྡན་འདས་དེ་ལྟ་ལགས་པས་འདི་ལ་སྡུག་བསྔལ་འགོག་པའི་བདེན་པ་ཉིད་ནི་ཡང་དག་པར་ན་བདེན་པ་དང་། རྟག་པ་དང་། སྐྱབས་ལགས་ [273a.2]སོ། །བཅོམ་ལྡན་འདས་སེམས་ཅན་ཐམས་ཅད་ཀྱི་རྣམ་པར་ཤེས་པའི་ཡུལ་ལས་འདས་པ་སྡུག་བསྔལ་འགོག་པའི་བདེན་པ་ནི་བསམ་གྱིས་མི་ཁྱབ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱི་ཤེས་པའི་སྤྱོད་ཡུལ་མ་ལགས་སོ། །བཅོམ་ལྡན་འདས་དཔེར་ན་དམུས་ [273a.3]ལོང་གཟུགས་ལ་ལྟ་མི་ནུས་པ་དང་། བུ་བཙའ་བའི་གནས་ན་མཆིས་པའི་བྱིས་པ་དགུང་བདུན་ལགས་པ་ཉི་མའི་དཀྱིལ་འཁོར་ལ་ལྟ་མི་ནུས་པ་བཞིན་དུ་བཅོམ་ལྡན་འདས་སྡུག་བསྔལ་འགོག་པའི་བདེན་པ་ཡང་བྱིས་པ་སོ་སོའི་སྐྱེ་བོ་ཐམས་ཅད་ཀྱི་རྣམ་པར་ཤེས་པའི་ཡུལ་ཡང་ [273a.4]མ་ལགས། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཤེས་པའི་ཡུལ་ཡང་མ་ལགས་སོ། །བཅོམ་ལྡན་འདས་བྱིས་པ་སོ་སོའི་སྐྱེ་བོ་ཐམས་ཅད་ཀྱི་རྣམ་པར་ཤེས་པ་ཞེས་བགྱི་བ་དེ་ནི་མཐའ་གཉིས་ལ་ལྟ་བའི་ཕྱིན་ཅི་ལོག་པ་རྣམས་ཀྱི་ཚིག་{བླ་དགས་,བླ་དྭགས་}ལགས་སོ། ། [273a.5]བཅོམ་ལྡན་འདས་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཤེས་པ་ཞེས་བགྱི་བ་དེ་ནི་ཤེས་པ་དག་པའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་མཐའ་གཉིས་སུ་ལྟ་བ་ཞེས་བགྱི་བ་དེ་ནི་ཉེ་བར་ལེན་པའི་ཕུང་པོ་དག་ལ་བདག་ཏུ་མངོན་པར་ཞེན་པའི་བྱིས་པ་སོ་སོའི་སྐྱེ་བོ་ [273a.6]རྟོག་གེ་བ་དག་གི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་འདི་གཉིས་ནི་མཐར་ལྟ་བ་ཞེས་བགྱི་སྟེ། གཉིས་གང་ཞེ་ན། ཆད་པར་ལྟ་བ་དང་། རྟག་པར་ལྟ་བ་ལགས་སོ། །བཅོམ་ལྡན་འདས་གལ་ཏེ་འདུ་བྱེད་རྣམས་ལ་མི་རྟག་པར་ལྟ་ན་དེ་ནི་དེའི་ཆད་པར་ལྟ་བ་མ་ [273a.7]ལགས་ཏེ། དེ་ནི་དེའི་ཡང་དག་པའི་ལྟ་བ་ལགས་སོ། །བཅོམ་ལྡན་འདས་གལ་ཏེ་མྱ་ངན་ལས་འདས་པ་ལ་རྟག་པར་ལྟ་བ་དེ་ནི་དེའི་རྟག་པར་ལྟ་བ་མ་ལགས་ཏེ། དེ་ནི་དེའི་ཡང་དག་པའི་ལྟ་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྟོག་གེ་བ་དག་གི་ལྟ་ [273b] [273b.1]བ་ནི་འདི་ལྟ་བུ་ལགས་ཏེ། ལུས་དང་། དབང་པོ་དང་། ཚོར་བ་དང་། སེམས་པ་རྣམས་ཚེ་འདི་ཉིད་ལ་འཇུག་པར་མཐོང་ནས་སྲིད་པའི་མཚམས་སྦྱོར་བ་ལ་འཇུག་པར་མི་བགྱིད་ཅིང་མ་འཚལ་བས་ལྡོངས་པར་གྱུར་པ་སྐད་དེ་ཆད་པར་ལྟ་བར་འགྱུར་རོ། །བཅོམ་ལྡན་འདས་རྟོག་ [273b.2]གེ་བ་དག་གི་ལྟ་བ་ནི་སེམས་ཀྱི་རྒྱུད་ལ་རྨོངས་ཤིང་སེམས་ཀྱི་སྐད་ཅིག་འཇིག་པ་ལ་ཡང་འཇུག་པར་མི་བགྱིད་ལ། རྣམ་པར་ཤེས་པའི་སྤྱོད་ཡུལ་དུ་མ་གྱུར་པ་སྐད་དེ་རྟག་པར་ལྟ་བར་འགྱུར་རོ། །བཅོམ་ལྡན་འདས་དེ་ལྟར་རྟོག་གེ་བ་དག་གི་ལྟ་བ་ནི་དེ་ལྟ་བུ་དག་ལགས་པ་སྐད་དེ་དེ་དག་ [273b.3]ནི་དོན་དེ་ལས་ཐལ་བའི་ལྟ་བ་དང་། དོན་དེའི་ཐ་ཆད་ཀྱི་ལྟ་བ་དང་། གཞན་གྱི་མཚན་ཉིད་དང་འདྲེས་པའི་ལྟ་བས་ཆད་པར་རློམ་སེམས་བགྱིད་པ་དང་། རྟག་པར་རློམ་སེམས་བགྱིད་པ་ལགས་སོ། །བཅོམ་ལྡན་འདས་སེམས་ཅན་རྣམས་ནི་ཟིན་པའི་ཕུང་པོ་ལྔ་པོ་དག་ལ་ཕྱིན་ཅི་ [273b.4]ལོག་པར་གྱུར་ཏེ། བཅོམ་ལྡན་འདས་དེ་དག་ནི་མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། བདག་མ་མཆིས་པ་ལ་བདག་ཏུ་འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་ལགས་སོ། །བཅོམ་ལྡན་འདས་ཐམས་ [273b.5]ཅད་མཁྱེན་པའི་ཡེ་ཤེས་ཀྱི་ཡུལ་དང་། དེ་བཞིན་གཤེགས་པའི་ཆོས་ཀྱི་སྐུ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཤེས་པ་དག་པས་ཀྱང་སྔོན་མ་མཐོང་ལགས་སོ། །བཅོམ་ལྡན་འདས་སེམས་ཅན་རྣམས་དེ་བཞིན་གཤེགས་པ་ལ་དད་པས་རྟག་པར་འདུ་ཤེས་པ་ [273b.6]དང་། བདེ་བར་འདུ་ཤེས་པ་དང་། བདག་ཏུ་འདུ་ཤེས་པ་དང་། གཙང་བར་འདུ་ཤེས་པའི་སེམས་ཅན་དེ་དག་ནི་བཅོམ་ལྡན་འདས་ཕྱིན་ཅི་ལོག་ཏུ་འགྱུར་བ་མ་ལགས་ཏེ། བཅོམ་ལྡན་འདས་སེམས་ཅན་དེ་དག་ནི་ཡང་དག་པའི་ལྟ་བ་ཅན་དུ་འགྱུར་བ་ལགས་སོ། །དེ་ཅིའི་སླད་ [273b.7]དུ་ཞེ་ན། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ཉིད་རྟག་པའི་ཕ་རོལ་ཏུ་ཕྱིན་པ་དང་། བདེ་བའི་ཕ་རོལ་ཏུ་ཕྱིན་པ་དང་། བདག་གི་ཕ་རོལ་ཏུ་ཕྱིན་པ་དང་། གཙང་བའི་ཕ་རོལ་ཏུ་ཕྱིན་པ་ལགས་པའི་སླད་དུའོ། །བཅོམ་ལྡན་འདས་སེམས་ཅན་གང་དག་དེ་ [274a] [274a.1]བཞིན་གཤེགས་པའི་ཆོས་ཀྱི་སྐུ་ལ་དེ་ལྟར་མཐོང་བ་དེ་དག་ནི་ཡང་དག་པ་མཐོང་བ་ལགས་སོ། །བཅོམ་ལྡན་འདས་ཡང་དག་པའི་མཐོང་བ་གང་ལགས་པ་དེ་དག་ནི། བཅོམ་ལྡན་འདས་ཀྱི་སྲས་ཐུགས་ལས་སྐྱེས་པ་དང་། ཞལ་ནས་སྐྱེས་པ་ [274a.2]དང་། ཆོས་ལས་སྐྱེས་པ་དང་། ཆོས་ཀྱིས་སྤྲུལ་པ་དང་། ཆོས་ཀྱི་བགོ་སྐལ་ལ་སྤྱོད་པ་ཞེས་བགྱིའོ། །བཅོམ་ལྡན་འདས་ཤེས་པ་དག་པ་ཞེས་བགྱི་བ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཤེས་པའི་ཕ་རོལ་ཏུ་ཕྱིན་པ་ལགས་ཏེ་འདི་ལྟར་ཤེས་པ་དག་པ་ [274a.3]ལགས་སོ། །བཅོམ་ལྡན་འདས་སྡུག་བསྔལ་འགོག་པའི་བདེན་པ་ནི་ཤེས་པ་དག་པ་དེའི་སྤྱོད་ཡུལ་ཡང་མ་ལགས་ཡུལ་ཡང་མ་ལགས་ན། བཅོམ་ལྡན་འདས་སྡུག་བསྔལ་འགོག་པའི་བདེན་པ་རྟོན་པ་བཞིའི་ཤེས་པ་ཅན་དག་གི་སྤྱོད་ཡུལ་མ་ལགས་ཤིང་ཡུལ་མ་ལགས་པ་ལྟ་སྨོས་ཀྱང་ཅི་ [274a.4]འཚལ། དེ་ཅིའི་སླད་དུ་ཞེ་ན། བཅོམ་ལྡན་འདས་ཐེག་པ་གསུམ་པའི་ལས་དང་པོ་པ་རྨོངས་པ་མ་མཆིས་པའི་ཆོས་ཅན་དག་གིས་དོན་དེ་ཁོང་དུ་ཆུད་པར་འགྱུར་ཞིང་དོན་དེ་རྟོགས་པར་འགྱུར་བའི་སླད་དུ་བཅོམ་ལྡན་འདས་ཀྱིས་རྟོན་པ་བཞི་བཤད་ཅིང་བཏགས་པའི་སླད་དུའོ། ། [274a.5]བཅོམ་ལྡན་འདས་རྟོན་པ་བཞི་པོ་འདི་དག་ནི་འཇིག་རྟེན་པ་ལགས་སོ། །བཅོམ་ལྡན་འདས་རྟོན་པ་གཅིག་པུ་འདི་ལྟ་སྟེ། སྡུག་བསྔལ་འགོག་པའི་བདེན་པ་ནི་རྟོན་པ་ཐམས་ཅད་ཀྱི་མཆོག་འཇིག་རྟེན་ལས་འདས་པ་ལགས་ཏེ། དེ་ནི་ཡང་དག་པར་རྟོན་པར་བགྱི་བ་དང་། [274a.6]སྐྱབས་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་འཁོར་བ་ན་རྟོན་པ་ལགས་ཏེ། དེ་བཞིན་གཤེགས་པའི་སྙིང་པོ་ཉིད་ཀྱི་དབང་དུ་བགྱིས་ནས་བཅོམ་ལྡན་འདས་ཀྱིས་སྔོན་གྱི་མཐའ་མེད་དོ་ཞེས་བཤད་ཅིང་བཏགས་སོ། །བཅོམ་ལྡན་འདས་དེ་བཞིན་ [274a.7]གཤེགས་པའི་སྙིང་པོ་མཆིས་ན་འཁོར་བ་ཞེས་མཆི་ན་ནི་ཚིག་དེ་རིགས་པ་ལགས་སོ། །བཅོམ་ལྡན་འདས་འཁོར་བ་ཞེས་བགྱི་བ་ནི་ཟིན་པ་དག་གི་དབང་པོ་རྣམས་འཕོས་མ་ཐག་ཏུ་ཟིན་པ་དག་གི་དབང་པོ་རྣམས་ལེན་པ་ལ་འཁོར་བ་ཞེས་བགྱིའོ། །བཅོམ་ལྡན་འདས་འཆི་ [274b] [274b.1]འཕོ་དང་། སྐྱེ་བ་ཞེས་བགྱི་བའི་ཆོས་གཉིས་ཀྱི་མིང་དེ་ནི་དེ་བཞིན་གཤེགས་པའི་སྙིང་པོའི་ཚིག་{བླ་དགས་,བླ་དྭགས་}ལགས་སོ། །བཅོམ་ལྡན་འདས་གུམ་ཞེས་བགྱི་བ་དང་། སྐྱེས་ཞེས་བགྱི་བ་འདི་ནི་འཇིག་རྟེན་གྱི་ཐ་སྙད་ལགས་སོ། །བཅོམ་ལྡན་འདས་གུམ་ཞེས་བགྱི་བ་ནི་དབང་པོ་ [274b.2]འགགས་པ་འདི་ལགས་སོ། །བཅོམ་ལྡན་འདས་སྐྱེས་ཞེས་བགྱི་བ་འདི་ནི་དབང་པོ་གསར་པ་རྣམས་བྱུང་བ་འདི་ལགས་ཏེ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ལ་ནི་སྐྱེ་བའམ། འགུམ་པའམ། འཕོ་བའམ། བྱུང་བ་ཡང་མ་མཆིས་སོ། །བཅོམ་ལྡན་ [274b.3]འདས་དེ་བཞིན་གཤེགས་པའི་སྙིང་པོ་ནི་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་རྟག་པ་དང་། བརྟན་པ་དང་། ཐེར་ཟུག་པ་ལགས་སོ། །བཅོམ་ལྡན་འདས་དེ་ལྟ་ལགས་པས་དེ་བཞིན་གཤེགས་པའི་ [274b.4]སྙིང་པོ་ནི་ཐ་དད་དུ་མི་གནས་ཤིང་འབྲེལ་ལ་སྦུབས་ནས་གྲོལ་བའི་ཤེས་པ་ཅན་དག་གི་གཞི་དང་། རྟེན་དང་། གནས་ལགས་སོ། །བཅོམ་ལྡན་འདས་འདི་ལྟར་དེ་བཞིན་གཤེགས་པའི་སྙིང་པོ་ནི་འབྲེལ་པ་མ་མཆིས་ཤིང་ཐ་དད་དུ་གནས་ལ་ཤེས་པ་གྲོལ་བ་མ་ལགས་པ་ཕྱི་རོལ་གྱི་ [274b.5]འདུས་བྱས་ཀྱི་ཆོས་རྣམས་ཀྱི་གཞི་དང་། རྟེན་དང་། གནས་ཀྱང་ལགས་སོ། །བཅོམ་ལྡན་འདས་གལ་ཏེ་དེ་བཞིན་གཤེགས་པའི་སྙིང་པོ་མ་མཆིས་ན་ནི་སྡུག་བསྔལ་ལ་སྐྱོ་བ་དང་། མྱ་ངན་ལས་འདས་པ་ལ་འདོད་ཅིང་དོན་དུ་གཉེར་བ་དང་སྨོན་པ་ཡང་མ་མཆིས་པར་འགྱུར་རོ། །དེ་ཅིའི་སླད་དུ་ [274b.6]ཞེ་ན། བཅོམ་ལྡན་འདས་རྣམ་པར་ཤེས་པ་དྲུག་པོ་གང་ལགས་པ་འདི་དག་དང་། རྣམ་པར་ཤེས་པ་གང་ལགས་པ་འདི་དང་། བཅོམ་ལྡན་འདས་འདི་ལྟར་ཆོས་བདུན་པོ་འདི་དག་ནི་མི་གནས་པ་དང་། སྐད་ཅིག་པ་དང་། སྡུག་བསྔལ་རྣམས་མྱོང་བ་མ་ལགས་པས་ཆོས་དེ་ [274b.7]དག་ནི་སྡུག་བསྔལ་ལ་སྐྱོ་བ་དང་། མྱ་ངན་ལས་འདས་པ་ལ་འདོད་ཅིང་དོན་དུ་གཉེར་བ་སྨོན་པར་མི་རིགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་ཐོག་མ་དང་ཐ་མ་མ་མཆིས་པའི་མཐར་མཆིས་པ་དང་། མི་སྐྱེ་བ་དང་། མི་འགག་པའི་ཆོས་ཅན་སྡུག་བསྔལ་མྱོང་བ་ [275a] [275a.1]ལགས་པས། བཅོམ་ལྡན་འདས་དེ་བཞིན་གཤེགས་པའི་སྙིང་པོ་དེ་ནི་སྡུག་བསྔལ་ལ་ཡང་སྐྱོ་བ་དང་། མྱ་ངན་ལས་འདས་པ་ལ་ཡང་འདོད་ཅིང་དོན་དུ་གཉེར་བ་དང་སྨོན་པར་འོས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ཡང་བདག་ [275a.2]མ་ལགས། སེམས་ཅན་མ་ལགས། སྲོག་མ་ལགས། གང་ཟག་མ་ལགས་ཏེ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་སེམས་ཅན་འཇིག་ཚོགས་ལ་ལྟ་བར་ལྷུང་བ་དག་དང་། ཕྱིན་ཅི་ལོག་གིས་ཉམས་པར་གྱུར་པ་དག་དང་། སྟོང་པ་ཉིད་ལས་ [275a.3]སེམས་གཡེངས་པ་རྣམས་ཀྱི་སྤྱོད་ཡུལ་མ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་འདི་ནི་དམ་པའི་ཆོས་ཀྱི་དབྱིངས་ཀྱི་སྙིང་པོ་ལགས་སོ། །ཆོས་ཀྱི་སྐུའི་སྙིང་པོ་ལགས་སོ། །འཇིག་རྟེན་ལས་འདས་པའི་ཆོས་ཀྱི་སྙིང་པོ་ལགས་སོ། །རང་ [275a.4]བཞིན་གྱིས་ཡོངས་སུ་དག་པའི་ཆོས་ཀྱི་སྙིང་པོ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་རང་བཞིན་གྱིས་ཡོངས་སུ་དག་པ་གློ་བུར་གྱི་ཉེ་བའི་ཉོན་མོངས་པས་ཉེ་བར་ཉོན་མོངས་པ་འདི་ནི་དེ་བཞིན་གཤེགས་པའི་ཡུལ་ཏེ། བསམ་གྱིས་མི་ཁྱབ་པོ་ [275a.5]སྙམ་པ་དག་བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དགེ་བའི་སེམས་ནི་སྐད་ཅིག་པ་སྟེ། ཉོན་མོངས་པ་རྣམས་ཀྱིས་ཀུན་ནས་ཉོན་མོངས་པ་མ་ལགས། བཅོམ་ལྡན་འདས་མི་དགེ་བའི་སེམས་ཀྱང་སྐད་ཅིག་པ་སྟེ། སེམས་དེ་ཡང་ཉོན་མོངས་པ་རྣམས་ཀྱིས་ [275a.6]ཀུན་ནས་ཉོན་མོངས་པ་མ་ལགས་པའི་སླད་དུའོ། །བཅོམ་ལྡན་འདས་ཉོན་མོངས་པ་རྣམས་ནི་སེམས་ལ་མི་རེག །སེམས་ཀྱང་ཉོན་མོངས་པ་རྣམས་ལ་མི་རེག་པ་ལགས་ན། བཅོམ་ལྡན་འདས་འདི་ལ་ཇི་ལྟར་སེམས་མི་རེག་པའི་ཆོས་ཅན་ཉེ་བར་ཉོན་མོངས་པར་འགྱུར། བཅོམ་ [275a.7]ལྡན་འདས་ཉེ་བའི་ཉོན་མོངས་པ་ཡང་མཆིས་ལ། སེམས་ཉེ་བར་ཉོན་མོངས་པ་ཡང་མཆིས་པས་བཅོམ་ལྡན་འདས་སེམས་རང་བཞིན་གྱིས་ཡོངས་སུ་དག་པའི་ཉེ་བའི་ཉོན་མོངས་པའི་དོན་ནི་ཁོང་དུ་ཆུད་པར་དཀའ་བ་ལགས་ཏེ། བཅོམ་ལྡན་འདས་འདི་ལ་བཅོམ་ལྡན་འདས་ཉིད་སྤྱན་དུ་གྱུར་ [275b] [275b.1]པ་ལགས་ཏེ། ཡེ་ཤེས་སུ་གྱུར་པ་ལགས། བཅོམ་ལྡན་འདས་ནི་ཆོས་ཐམས་ཅད་ཀྱི་རྩ་བ་ལགས། བཅོམ་ལྡན་འདས་ནི་མངའ་བདག་ལགས། བཅོམ་ལྡན་འདས་ནི་རྟོན་པ་ལགས་སོ། །དེ་ནས་བཅོམ་ལྡན་འདས་ཀྱིས་ལྷ་མོ་དཔལ་ཕྲེང་གི་རྟོགས་པར་དཀའ་བའི་དོན་ [275b.2]བཤད་པ་གསན་ནས་རྗེས་སུ་ཡི་རང་བ་མཛད་དེ་ལྷ་མོ་དེ་དེ་བཞིན་ནོ། །ལྷ་མོ་དེ་དེ་བཞིན་ཏེ། སེམས་རང་བཞིན་གྱིས་ཡོངས་སུ་དག་པའི་ཉེ་བའི་ཉོན་མོངས་པའི་དོན་ནི་རྟོགས་པར་དཀའོ། །ལྷ་མོ་ཆོས་འདི་གཉིས་ནི་རྟོགས་པར་དཀའ་བ་སྟེ། འདི་ལྟ་སྟེ་སེམས་རང་བཞིན་ [275b.3]གྱིས་ཡོངས་སུ་དག་པ་རྟོགས་པར་དཀའ་བ་དང་། སེམས་དེའི་ཉེ་བའི་ཉོན་མོངས་པ་རྟོགས་པར་དཀའ་བའོ། །ལྷ་མོ་ཆོས་འདི་གཉིས་ཉན་ནུས་པ་ནི་ཁྱོད་དམ་བྱང་ཆུབ་སེམས་དཔའ་ཆོས་ཆེན་པོ་དང་ལྡན་པ་གཞན་དག་ཡིན་ནོ། །ལྷ་མོ་ལྷག་མ་ཉན་ཐོས་རྣམས་ནི་ཆོས་འདི་ [275b.4]གཉིས་ལ་དེ་བཞིན་གཤེགས་པ་ལ་དད་པས་འགྲོ་བར་ཟད་དེ། ལྷ་མོ་ངའི་ཉན་ཐོས་གང་དག་དད་པ་དང་ལྡན་ཞིང་དད་པའི་དབང་དུ་བྱེད་པ་དེ་དག་ནི་དད་པའི་སྣང་བ་ལ་བརྟེན་ནས་ཆོས་དང་འཐུན་པར་སྡུད་པའི་ཤེས་པས་འདི་ལ་ངེས་པར་འགྱུར་རོ། །ལྷ་མོ་ཆོས་དང་འཐུན་པར་སྡུད་པའི་ [275b.5]ཤེས་པ་ཞེས་བྱ་བ་ནི་ལྷ་མོ་དབང་པོའི་རྣམ་པར་རིག་པ་ཡིད་ཀྱི་སྤྱོད་ཡུལ་ལ་རྣམ་པར་ལྟ་བ་དང་། ལས་ཀྱི་རྣམ་པར་སྨིན་པ་ལ་རྣམ་པར་ལྟ་བ་དང་། དགྲ་བཅོམ་པ་རྣམས་ཀྱི་གཉིད་ལ་རྣམ་པར་ལྟ་བ་དང་། སེམས་ལ་དབང་དུ་གྱུར་པ་རྣམས་ཀྱི་བསམ་གཏན་ལ་དགའ་བ་དང་། [275b.6]བདེ་བ་ལ་རྣམ་པར་ལྟ་བ་དང་། ཉན་ཐོས་དང་། རང་སངས་རྒྱས་རྣམས་ཀྱི་འཕགས་པའི་རྫུ་འཕྲུལ་ལ་རྣམ་པར་ལྟ་བ་སྟེ། ལྷ་མོ་རྣམ་པར་ལྟ་བའི་རང་བཞིན་རྣམ་པ་ལྔ་ལ་མཁས་པ་འདི་དང་ལྡན་ན་ལྷ་མོ་ད་ལྟར་དང་། ང་འདས་པའི་འོག་མ་འོངས་པའི་དུས་ན་ངའི་ཉན་ཐོས་དད་པ་དང་ [275b.7]ལྡན་ཞིང་དད་པའི་དབང་དུ་བྱེད་པ་དེ་དག་དད་པའི་སྣང་བ་ལ་བརྟེན་ནས་ཆོས་དང་འཐུན་པར་སྡུད་པའི་ཤེས་པས་རང་བཞིན་གྱིས་ཡོངས་སུ་དག་པ་དང་། སེམས་ཀྱི་ཉེ་བར་ཉོན་མོངས་པ་ལ་ངེས་པར་འགྱུར་རོ། །ལྷ་མོ་དེ་དག་གི་ངེས་པ་དེ་ཉིད་ནི་ཐེག་པ་ཆེན་པོའི་ལམ་དུ་འཇུག་པའི་རྒྱུར་ [276a] [276a.1]འགྱུར་ཏེ། ལྷ་མོ་དེ་ལྟར་ན་འདི་ལྟ་སྟེ། ཆོས་ཟབ་མོ་མི་སྤོང་བའི་ཕྱིར་དེ་བཞིན་གཤེགས་པ་ལ་དད་པས་འགྲོ་བ་ལ་ནི་ཕན་པ་མང་བ་ཡིན་ནོ། །དེ་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་སྨན་པ་ [276a.2]མང་བའི་དོན་བཤད་པ་གཞན་ཡང་དེ་བཞིན་གཤེགས་པའི་མཐུས་བདག་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ཁྱོད་སྤོབས་པར་གྱིས་ཤིག །དེ་ནས་བཅོམ་ལྡན་འདས་ལ་ལྷ་མོ་དཔལ་ཕྲེང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གསུམ་པོ་ [276a.3]འདི་དག་ནི་རིགས་ཀྱི་བུ་འམ། རིགས་ཀྱི་བུ་མོ་ཆོས་ཟབ་མོ་དག་ལ་མ་རྨས་མ་ཉམས་པར་བདག་ཉིད་ལ་སྲུང་བ་དང་། བསོད་ནམས་ཀྱང་མང་དུ་སྐྱེད་པ་དང་། ཐེག་པ་ཆེན་པོའི་ལམ་དུ་ཡང་ཞུགས་པར་འགྱུར་བ་ལགས་སོ། །གསུམ་གང་ཞེ་ན། བཅོམ་ལྡན་འདས་རིགས་ཀྱི་ [276a.4]བུ་འམ། རིགས་ཀྱི་བུ་མོ་གང་དག་རང་གིས་རིག་པའི་ཆོས་ཟབ་མོ་དང་ལྡན་པ་དང་། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་དག་ཆོས་དང་འཐུན་པར་སྡུད་པའི་ཤེས་པ་དང་ལྡན་པ་དང་། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་དག་ཆོས་ཟབ་ [276a.5]མོ་དག་ལ་བདག་ཉིད་ཀྱི་ཤེས་པ་ཞུམ་པར་འཚལ་ནས་འདི་ནི་བདག་གིས་མི་ཤེས་ཏེ། དོན་འདི་ནི་དེ་བཞིན་གཤེགས་པ་ཉིད་ཀྱིས་མཁྱེན་པར་ཟད་དོ་ཞེས་བཅོམ་ལྡན་འདས་ལ་སེམས་རྣམ་པར་གཏོད་པར་བགྱིད་དེ། སེམས་རྣམ་པར་གཏོད་པ་དེ་དང་ལྡན་པ་ལགས་སོ། །བཅོམ་ལྡན་ [276a.6]འདས་གསུམ་པོ་འདི་དག་ནི་རིགས་ཀྱི་བུ་འམ། རིགས་ཀྱི་བུ་མོ་ཆོས་ཟབ་མོ་དག་ལ་མ་རྨས་མ་ཉམས་པར་བདག་ཉིད་ལ་སྲུང་བ་དང་། བསོད་ནམས་ཀྱང་མང་དུ་སྐྱེད་པ་དང་། ཐེག་པ་ཆེན་པོའི་ལམ་དུ་ཡང་དག་པར་ཞུགས་པར་འགྱུར་བ་ལགས་སོ། །བཅོམ་ལྡན་འདས་རིགས་ [276a.7]ཀྱི་བུ་འམ། རིགས་ཀྱི་བུ་མོ་གསུམ་པོ་འདི་དག་ལས་གཞན་པའི་སེམས་ཅན་གང་ལགས་པ་དེ་དག་ནི་ཆོས་ཟབ་མོ་དག་ལ་ནན་ཏན་གྱིས་མཆོག་ཏུ་བཟུང་ནས་གོབ་ལོབ་ཀྱི་སེམས་འཛིན་ཅིང་མངོན་པར་ཞེན་ཏེ། སྟོན་པར་བགྱིད་ཀུན་ཏུ་སྨྲ་བར་བགྱིད་དོ། །བཅོམ་ལྡན་འདས་བདག་ [276b] [276b.1]ནི་དེ་དག་ལ་དམ་པའི་ཆོས་ལ་རྒྱབ་ཀྱིས་ཕྱོགས་པ་དང་། གཞན་མུ་སྟེགས་ཅན་དག་ས་བོན་རུལ་བ་ལགས་ཏེ། རྒྱལ་པོའི་ཐད་དུ་ཡང་མཆིས་ལ་བརླག་པར་བགྱིའོ་ཞེས་མཆིའོ། །བཅོམ་ལྡན་འདས་ས་བོན་རུལ་བར་གྱུར་པ་དེ་དག་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ [276b.2]གྱིས་ལེགས་པར་ཚར་གཅད་པར་བགྱི་བ་ལགས་སོ། །དེ་ནས་ལྷ་མོ་དཔལ་ཕྲེང་གིས་དེ་སྐད་ཅེས་གསོལ་ནས། འཁོར་དང་བཅས་པས་བཅོམ་ལྡན་འདས་ཀྱི་ཞབས་ལ་གཏུགས་སོ། །དེ་ནས་བཅོམ་ལྡན་འདས་ཀྱིས་ལྷ་མོ་དཔལ་ཕྲེང་ལ་ལེགས་སོ་ཞེས་བྱ་བ་བྱིན་ཏེ། ལྷ་མོ་ཁྱོད་ཀྱིས་ [276b.3]དུས་དང་སྐབས་སུ་ཆོས་ཟབ་མོ་དག་ལ་བདག་ཉིད་ཡང་དག་པར་བསྲུང་བའི་ཐབས་ཀྱི་དོན་བསྟན་པ་བཤད་པ་དང་། དམ་པའི་ཆོས་ཀྱི་དགྲ་ཚར་བཅད་པ་བཤད་པ་ལེགས་སོ། །ལྷ་མོ་ཁྱོད་ནི་སངས་རྒྱས་འབུམ་ཕྲག་བྱེ་བ་མང་པོ་ལ་བསྙེན་བཀུར་བྱས་པ་ཡིན་པས་ཁྱོད་ཀྱིས་དོན་ [276b.4]བཤད་པ་འདི་ལས་ངོ་མཚར་ཆེ་བ་མེད་དོ། །དེ་ནས་བཅོམ་ལྡན་འདས་དཔལ་འབར་བས་འཁོར་གྱི་དཀྱིལ་འཁོར་ཐམས་ཅད་ཀྱི་ལུས་ལ་འོད་ཀྱིས་ཁྱབ་པར་མཛད་ནས་ཏ་ལ་བདུན་སྲིད་ཙམ་དུ་ནམ་མཁའ་ལ་མངོན་པར་འཕགས་ཏེ། ཞབས་ཀྱི་གོམ་པ་འདོར་བའི་རྫུ་འཕྲུལ་གྱིས་མཉན་ [276b.5]ཡོད་ཀྱི་གྲོང་ཁྱེར་ག་ལ་བ་དེར་གཤེགས་སོ། །དེ་ནས་ལྷ་མོ་དཔལ་ཕྲེང་འཁོར་དང་བཅས་པས་སྤྱི་བོར་ཐལ་མོ་སྦྱར་ནས་ལྟ་བས་ཆོག་མི་ཤེས་ཤིང་མིག་མི་འཛུམས་པར་ལྟ་བས་བཅོམ་ལྡན་འདས་ལ་ལྟ་ཞིང་འཁོད་པར་གྱུར་ཏོ། །གང་གི་ཚེ་བཅོམ་ལྡན་འདས་དེ་དག་གི་མིག་རྒྱང་གིས་མི་ [276b.6]སླེབས་པར་གྱུར་པ་དེའི་ཚེ་ལྷ་མོ་དཔལ་ཕྲེང་འཁོར་དང་བཅས་པ་མཆོག་ཏུ་དགའ་ཞིང་རབ་ཏུ་མགུ་བའི་བཞིན་དང་ལྡན་པས་གཅིག་གིས་གཅིག་གི་མདུན་དུ་དེ་བཞིན་གཤེགས་པའི་ཡོན་ཏན་རྣམས་རྣམ་པ་དུ་མར་བསྔགས་ཤིང་སངས་རྒྱས་རྗེས་སུ་དྲན་པ་ཡིད་ལ་བྱེད་པ་མ་བརྗེད་བཞིན་དུ་གྲོང་ཁྱེར་ [276b.7]འཐབ་མེད་དུ་དོང་ངོ་། །དེ་ནས་ལྷ་མོ་དཔལ་ཕྲེང་གིས་རང་གི་ཁྱིམ་ཐབ་རྒྱལ་པོ་གྲགས་པའི་བཤེས་གཉེན་ཐེག་པ་ཆེན་པོ་ལ་ངེས་པར་བཅུག་གོ །གྲོང་ཁྱེར་ཆེན་པོའི་བུད་མེད་ཀྱི་ཚོགས་བུ་མོ་ལོ་བདུན་ལོན་པ་ཡན་ཆད་ཐམས་ཅད་ཐེག་པ་ཆེན་པོ་ལ་བཙུད་དོ། །རྒྱལ་པོ་གྲགས་པའི་བཤེས་ [277a] [277a.1]གཉེན་གྱིས་ཀྱང་གྲོང་ཁྱེར་ཆེན་པོའི་སྐྱེས་པའི་འཁོར་ཁྱེའུ་ལོ་བདུན་ལོན་པ་ཡན་ཆད་ཐམས་ཅད་ཐེག་པ་ཆེན་པོ་ལ་བཙུད་པར་གྱུར་ཏེ། དེ་ལྟར་གྲོང་ཁྱེར་པ་ཐམས་ཅད་ཐེག་པ་ཆེན་པོ་ལ་མངོན་དུ་ཕྱོགས་པར་བྱས་སོ། །བཅོམ་ལྡན་འདས་ཀྱང་རྒྱལ་བུ་རྒྱལ་བྱེད་ཀྱི་ཚལ་དུ་བྱོན་ཏེ་ནང་དུ་གཤེགས་ནས་ཚེ་དང་ལྡན་པ་ཀུན་ [277a.2]དགའ་བོ་ལ་ཡང་བཀའ་སྩལ་ཅིང་། ལྷའི་དབང་པོ་བརྒྱ་བྱིན་ལ་ཡང་དགོངས་སོ། །དེ་ནས་ལྷའི་དབང་པོ་བརྒྱ་བྱིན་སྐད་ཅིག་ཐང་ཅིག་ཡུད་ཙམ་དེ་ཉིད་ལ་ལྷའི་ཚོགས་ཀྱིས་ཡོངས་སུ་བསྐོར་ཏེ། བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་། ཚེ་དང་ལྡན་པ་ [277a.3]ཀུན་དགའ་བོ་ལ་ཆོས་ཀྱི་རྣམ་གྲངས་འདི་རྒྱ་ཆེར་ཡང་དག་པར་བསྟན་ཏེ། ཀཽ་ཤི་ཀ་ཆོས་ཀྱི་རྣམ་གྲངས་འདི་ཁྱོད་ཀྱིས་ཟུང་ཤིག །ཀཽ་ཤི་ཀ་ཆོས་ཀྱི་རྣམ་གྲངས་འདི་ཁྱོད་ཀྱིས་སུམ་ཅུ་རྩ་གསུམ་པའི་ལྷ་རྣམས་ལ་ཤོད་ཅིག །ཀུན་དགའ་བོ་ཁྱོད་ཀྱིས་ཀྱང་ཆོས་ཀྱི་རྣམ་གྲངས་འདི་ཟུང་ཤིག །ཀུན་དགའ་བོ་ཁྱོད་ཀྱིས་ [277a.4]ཆོས་ཀྱི་རྣམ་གྲངས་འདི་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་ལ་ཤོད་ཅིག །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་ [277a.5]འདས་ཀྱིས་བཀའ་སྩལ་པ། ཀཽ་ཤི་ཀ་ཆོས་ཀྱི་རྣམ་གྲངས་འདི་ནི་ཡོན་ཏན་མཐའ་ཡས་པ་དང་ལྡན་ཏེ། ཀཽ་ཤི་ཀ་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མདོ་སྡེ་འདིའི་དོན་ཐམས་ཅད་མ་ལུས་པར་ཤེས་པའམ། བལྟ་བའི་མཉེ་བར་བརྟག་པར་མི་ནུས་ན་སེམས་ཅན་གཞན་དག་གིས་ལྟ་ཅི་སྨོས། ཀཽ་ཤི་ [277a.6]ཀ་དེ་ལྟར་ན་ཆོས་ཀྱི་རྣམ་གྲངས་འདི་ནི་ཟབ་ལ་ཡོན་ཏན་ཆེན་པོའི་འབྱུང་གནས་ཡིན་ནོ། །ཀཽ་ཤི་ཀ་དེའི་ཕྱིར་ཆོས་ཀྱི་རྣམ་གྲངས་འདིའི་ཡོན་ཏན་གྱི་མིང་ཡོངས་སུ་བརྗོད་པ་ཙམ་ཞིག་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །ལྷའི་དབང་པོ་བརྒྱ་བྱིན་དང་། ཚེ་དང་ལྡན་པ་ [277a.7]ཀུན་དགའ་བོས་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་འདི་ནི་དེ་བཞིན་གཤེགས་པའི་ཡོན་ཏན་མཐའ་ཡས་པ་ཡང་དག་པར་བསྟོད་པ་ཞེས་བྱ་བར་ཟུང་ཤིག །ཀཽ་ཤི་ཀ་འདི་ནི་ཡི་དམ་ཆེན་ [277b] [277b.1]པོ་བསམ་གྱིས་མི་ཁྱབ་པ་ཞེས་བྱ་བར་ཡང་ཟུང་ཤིག །སྨོན་ལམ་ཐམས་ཅད་སྡུད་པ་སྨོན་ལམ་ཆེན་པོ་ཞེས་བྱ་བར་ཡང་ཟུང་ཤིག །དམ་པའི་ཆོས་ཡོངས་སུ་འཛིན་པ་བསམ་གྱིས་མི་ཁྱབ་པ་བསྟན་པ་ཞེས་བྱ་བར་ཡང་ཟུང་ཤིག །ཐེག་པ་གཅིག་ཏུ་ཡང་དག་པར་འདུ་བ་བསྟན་པ་ཞེས་བྱ་བར་ཡང་ཟུང་ཤིག ། [277b.2]འཕགས་པའི་བདེན་པ་བརྒྱད་བསྟན་པ་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པའི་སྙིང་པོ་བསྟན་པ་ཞེས་བྱ་བར་ཡང་ཟུང་ཤིག །ཆོས་ཀྱི་སྐུ་བསྟན་པ་ཞེས་བྱ་བར་ཡང་ཟུང་ཤིག །སྟོང་པ་ཉིད་ཀྱི་དོན་གྱི་དགོངས་པ་ཡང་དག་པར་བསྟན་པ་ཞེས་བྱ་བར་ཡང་ཟུང་ཤིག །བདེན་པ་གཅིག་ཏུ་བསྟན་ [277b.3]པ་ཞེས་བྱ་བར་ཡང་ཟུང་ཤིག །རྟག་པ་དང་། བརྟན་པ་དང་། ཞི་བ་དང་། ཐེར་ཟུག་པ་དང་། སྐྱབས་གཅིག་ཏུ་གྱུར་པ་བསྟན་པ་ཞེས་བྱ་བར་ཡང་ཟུང་ཤིག །ཕྱིན་ཅི་ལོག་གིས་བསྟན་པ་ཞེས་བྱ་བར་ཡང་ཟུང་ཤིག །རང་བཞིན་གྱིས་ཡོངས་སུ་དག་པའི་སེམས་ལ་དགོངས་པ་བསྟན་པ་ཞེས་བྱ་བར་ཡང་ཟུང་ཤིག ། [277b.4]དེ་བཞིན་གཤེགས་པའི་སྲས་ཀྱི་ཡང་དག་པ་བསྟན་པ་ཞེས་བྱ་བར་ཡང་ཟུང་ཤིག །ཀཽ་ཤི་ཀ་འདི་ནི་ལྷ་མོ་དཔལ་ཕྲེང་གི་སེང་གེའི་སྒྲ་ཞེས་བྱ་བར་ཡང་ཟུང་ཤིག །ཀཽ་ཤི་ཀ་མདོ་འདིར་བསྟན་པ་གང་དག་བཤད་པ་དེ་དག་ཐམས་ཅད་ནི་རྒྱུ་བ་བཅད་པ་དང་། ངེས་པའི་དོན་དང་། རྟོན་པ་གཅིག་པ་ཞེས་བྱ་བར་ཡང་ཟུང་ཤིག །ཀཽ་ཤི་ [277b.5]ཀ་ལྷ་མོ་དཔལ་ཕྲེང་གི་སེང་གེའི་སྒྲ་བསྟན་པའི་ཆོས་ཀྱི་རྣམ་གྲངས་འདི་ནི་ངས་ཁྱོད་ཀྱི་ལག་ཏུ་གཏད་ཀྱིས་འཇིག་རྟེན་ན་དམ་པའི་ཆོས་ཇི་སྲིད་གནས་པ་དེ་སྲིད་དུ་ཕྱོགས་བཅུའི་འཇིག་རྟེན་ཐམས་ཅད་དུ་ཡང་དག་པར་སྒྲོགས་ཤིག །སྟོན་ཅིག །ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་ [277b.6]འདས་ཀྱི་སྤྱན་སྔར་ཆོས་ཀྱི་རྣམ་གྲངས་འདི་བཟུང་ཞིང་ཀུན་ཆུབ་པར་བྱས་ནས་ལྷའི་དབང་པོ་བརྒྱ་བྱིན་དང་། ཚེ་དང་ལྡན་པ་ཀུན་དགའ་བོ་དང་། གཞན་ཡང་གང་དེར་འདུས་པར་གྱུར་པ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། [277b.7]འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་དཔལ་ཕྲེང་གིས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། [278a] [278a.1]{D93}འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་དགུ་པ་སྟེ་འཕགས་པ་དྲང་སྲོང་རྒྱས་པས་ཞུས་པ། བམ་པོ་དང་པོ། རྒྱ་གར་སྐད་དུ། ཨཱརྱ་རྀ་ཥི་བྱཱ་ས་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དྲང་ [278a.2]སྲོང་རྒྱས་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གང་གཱའི་ཀླུང་གི་འགྲམ་རྒལ་བར་བྱ་བ་མ་ཡིན་པ། ཁུ་བྱུག་དང་། ནེ་ཙོ་དང་། བུང་བ་དང་། ངང་པའི་རྒྱལ་ [278a.3]པོ་དང་། བྱའི་ཚོགས་དུ་མ་སྒྲ་སྙན་པ་འབྱིན་པ། ཤིང་པླག་ཤ་དང་། ནྱ་གྲོ་དྷ་དང་། ཙན་དན་དང་། མྱ་ངན་འཚང་དང་། ས་ལ་ཀིའི་ཡལ་གས་བསྐྱབས་པ། རྟག་ཏུ་མེ་ཏོག་དྲི་ཞིམ་པོ་སིལ་མར་བཀྲམ་པ་དེ་ན་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་བྱ་བ་བྱས་པ། བྱེད་པ་བྱས་པ། ཟག་པ་ [278a.4]ཟད་པ། རྡུལ་ཟད་པ། ཆོས་ལས་མི་ཟློགས་པ། བསམ་གཏན་དང་ཁ་ཏོན་ལ་གནས་པ། འཆག་ས་དང་ཁྲིའི་སྟེང་ན་འདུག་ན་ངང་པའི་རྒྱལ་པོ་ལྟར་ས་ཕྱོགས་དེ་མཛེས་པར་བྱེད་པ་ཤ་སྟག་ལ། ཁ་ཅིག་ནི་ནང་དུ་ཡང་དག་འཇོག་ལ་གནས་པ། ཁ་ཅིག་ནི་ཤིང་དྲུང་ན་གནས་པ། དེ་བཞིན་གཤེགས་ [278a.5]པའི་བཀའ་ཀུན་བགྲོ་བར་བྱེད་པ། ཆ་བྱད་དུལ་ཞིང་བརྟན་པ། སྤྱོད་ལམ་རབ་ཏུ་ཞི་བ། འདོད་པ་ལ་འདོད་པ་དང་། གནོད་སེམས་དང་། སྙོམ་པ་དང་། གཉིད་དང་། ལེ་ལོ་དང་བྲལ་བ་ཤ་སྟག་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་ [278a.6]སློང་དག་སྦྱིན་པ་བྱིན་ཅིག །བྱ་བ་གང་ཡིན་པ་གྱིས་ཤིག །ཚུལ་ཁྲིམས་ཀྱི་སྡོམ་པས་བསྡམས་ཤིང་དབང་པོ་སྦས་ལ་ཡིད་ཞི་བར་གནས་པར་གྱིས་ཤིག །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་ལ་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་དང་། འོད་སྲུང་ཆེན་པོ་དང་། ཤཱ་རིའི་བུ་དང་། [278a.7]བཀྐུ་ལ་དང་། ནམ་གྲུ་དང་། ཚེ་དང་ལྡན་པ་ཀུན་ཤེས་ཀཽ་དི་ནྱ་དང་། དེ་དག་ལ་སོགས་པ་ཉན་ཐོས་ཆེན་པོ་ཤ་སྟག་དང་ཐབས་ཅིག་སྟེ། ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་མཛད་དོ། །དེའི་ཚེ་ནུབ་ཕྱོགས་ལོགས་ན་ཉི་མའི་དཀྱིལ་འཁོར་ལྟར་སྣང་བ་ཞིག་ཚེ་ [278b] [278b.1]དང་ལྡན་པ་ཀུན་དགའ་བོས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནུབ་ཕྱོགས་ལོགས་ན་འབར་ཞིང་སྣང་བ་ཞུགས་ཀྱི་འོད་ཟེར་ལྟ་བུར་གདའ་བ་འདི་ཅི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་ [278b.2]བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་འདི་ནི་དྲི་ནག་མའི་བུ་དྲང་སྲོང་འཇིག་རྟེན་པའི་མངོན་པར་ཤེས་པ་ལྔ་དང་ལྡན་པ་དྲང་སྲོང་རྣམས་ཀྱི་མཆོག་དྲང་སྲོང་རྒྱས་པ་ཞེས་བྱ་སྟེ། དྲང་སྲོང་དཀའ་ཐུབ་དྲག་པོ་ལ་གནས་པ། བསྙེན་པར་གནས་པ་བརྒྱ་སྟོང་གིས་དུབ་པ། ལུས་ཀྱི་མཛེས་པ་མེད་ [278b.3]པ་ལྔ་བརྒྱ་ཙམ་ཕྱི་བཞིན་དུ་འབྲང་བ་ལ་དྲང་སྲོང་དཀར་མིན་གཞོན་ནུ་དང་། མི་ལྷ་དང་། རྣམ་པར་བདེ་སྲུང་གི་བུ་དང་། {རི་དགས་,རི་དྭགས་}མོའི་བུ་དང་། སྒྲ་བྱེད་ཀྱི་བུ་དང་། ཕུར་བུ་རྣ་དང་། མེའི་བུ་དང་། རྣམ་པར་རྐོའི་བུ་དང་། བསྙེན་པར་དཀའ་དང་། དེ་དག་ལ་སོགས་པས་ཡོངས་སུ་བསྐོར་ནས་ [278b.4]རྗེས་སུ་འཆག་པའོ། །དེ་ནས་དེའི་བར་སྐབས་སུ་རྒྱས་པས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དབང་པོ་ཞིབ། ཐུགས་ཞིབ། བསམ་གཏན་གྱི་དབེན་པ་ལ་དགྱེས་པ། ཤིང་ལྗོན་པ་སྟུག་པོའི་ནང་ན་བཞུགས་པ་མཐོང་ངོ་། །མཐོང་ནས་ཀྱང་རྒྱས་པ་འདི་སྙམ་དུ་ [278b.5]སེམས་ཏེ། ཀྱེ་མའོ་མ་ལ་ངོ་མཚར་ཏེ། འདི་བཅོམ་ལྡན་འདས་ཐམས་ཅད་མཁྱེན་པ་ཕྱིན་ཅི་མ་ལོག་པ་གསུང་བ་ཞེས་འཇིག་རྟེན་དུ་གྲགས་པ་ནི་གནས་ཡིན་ནོ། །ཇི་ལྟར་འདི་ཁ་དོག་རྒྱས་པ་མཆོག་དང་ལྡན་ཞིང་རྨད་དུ་བྱུང་བའི་གཟུགས་རྒྱ་ཆེན་པོ་ཕུན་སུམ་ཚོགས་པ་ལས་ན་འདི་གདོན་མི་ཟ་བར་དེ་ [278b.6]བཞིན་གཤེགས་པར་འགྱུར་རོ། །འདི་ལྟར་བཅོམ་ལྡན་འདས་གཟུགས་རྒྱ་ཆེན་པོ་འདི་ལྟ་བུ་དང་ལྡན་པས་འཁོར་ལོས་སྒྱུར་བའི་དབང་ཕྱུག་གི་བདག་པོ་དུག་དང་བཅས་པ་བཞིན་དུ་སྤངས་ཏེ། བུད་མེད་རིན་པོ་ཆེ་ས་འཚོ་མ་ལ་སོགས་པ་བུད་མེད་དྲུག་སྟོང་ཡང་སྤངས་ནས་དཀའ་ཐུབ་ཀྱི་ནགས་ཚལ་ [278b.7]གྱི་ནང་དུ་གཤེགས་ཏེ་བཞུགས་པ་འདི་ནི་ཀྱེ་མའོ་འཇིག་རྟེན་ན་ངོ་མཚར་རྨད་དུ་བྱུང་བའོ་སྙམ་དུ་སེམས་སོ། །དེ་ནས་དྲང་སྲོང་མེས་སྦྱིན་གྱི་བུས་ཀྱང་རྒྱང་རིང་པོ་ནས་བཅོམ་ལྡན་འདས་མཐོང་ངོ་། །མཐོང་ནས་ཀྱང་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་ཚུལ་ [279a] [279a.1]དང་འདྲ་བའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །ཤིང་སྔོན་དག་གི་ཁྲོད་འདུག་ཅིང་། །བཙོ་མའི་གསེར་ལྟར་སེར་བར་སྣང་། །གཟུགས་ནི་ཤིན་ཏུ་འབར་བས་ན། །སྐྱེ་བོ་ཀུན་གྱི་དགའ་བ་སྐྱེད། །བཻདཱུརྱ་ནི་དྲི་མེད་བྲག །སྟུག་ནང་རི་རབ་ [279a.2]རྩེ་གཅིག་འཕགས། །སྟོན་གྱི་ཉི་མ་རབ་ལྷན་ལྟར། །དཔལ་གཟུགས་འབར་བ་འདི་སུ་ཞིག །དེ་ནས་དྲང་སྲོང་ཆེན་པོ་དེ་དག་ཐམས་ཅད་དགའ་སྟེ་མིག་ཕྱེ་ཐལ་མོ་སྦྱར་ནས་བཅོམ་ལྡན་འདས་ག་ལ་བ་དེར་དོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ [279a.3]འཛམ་བུའི་གླིང་པའི་དྲང་སྲོང་མེའི་ཕུང་པོ་ལྟར་འབར་བ། རལ་པའི་ཅོད་པན་ཅན། རྒས་པ། རབ་ཏུ་རྐེ་བ། ཟས་མི་ཟ་ཞིང་བསྙེན་པར་གནས་པ། ཤིང་ཤུན་དང་། གཡང་གཞི་གྱོན་པ། ཐལ་བས་བྱུགས་པ། ཐང་དང་བྲག་ཁྲོད་ན་གནས་པ། བཀྲེས་བཀྲེས་ལྟར་འདུག་པ། རླུང་འགམ་ [279a.4]པ། ཟླ་བ་ཕྱེད་བསྙེན་གནས་བྱས་པ། ཡན་ལག་སྐེམ་པ། གཅེར་བུ་པ་ཤིང་ཤུན་གྱོན་པ། ཨག་ཚོམ་དང་། སེན་མོ་དང་། སྤུ་རིང་བ། བུང་བའི་ཁ་དོག་ལྟ་བུ། དཀའ་ཐུབ་ཀྱི་ནོར་ཅན། བཟླས་བརྗོད་དང་། སྦྱིན་སྲེག་དང་། བསྲུང་བ་དང་། བཀྲ་ཤིས་པ་བྱས་པ། ས་དང་། བླ་ [279a.5]གབ་མེད་པ་དང་། ཤིང་དྲུང་ན་གནས་པ། རྐང་པ་གྱེན་དུ་སྒྲེང་བ། ཅོག་ཅོག་པོར་འདུག་པ། ཆུའི་ནང་དུ་འཇུག་པ། མེ་མདག་འབར་བ་དང་། སྲེག་མེ་རབ་ཏུ་འབར་བ་དང་། ཉི་མས་ལུས་ཤིན་ཏུ་གདུངས་པ། དཀའ་ཐུབ་དྲག་པོས་ཡོངས་སུ་བསྐོར་བ། བབ་བབ་ཏུ་གནས་པ། རིགས་ [279a.6]ཙམ་གྱིས་ཡོངས་སུ་དགའ་བ། བླ་ན་མེད་པའི་ཡེ་ཤེས་དང་བྲལ་བ་དེ་དག་ལ་ལྟོས། དགེ་སློང་དག་དྲང་སྲོང་ཆེན་པོ་འདི་དག་ནི་འཁོར་བ་ལས་འབྱུང་བ་མི་ཤེས་པ་དག་སྟེ། འདི་དག་ནི་འདོད་པ་དང་རྒྱགས་པས་མྱོས་པ། ཡང་སྲིད་པར་སྐྱེ་བ་ཡོངས་སུ་འཛིན་པ། ལྟ་བའི་རྒྱུ་བ་ཡོངས་སུ་མ་དག་པ་ཤ་ [279a.7]སྟག་གོ །དེ་ནས་དགེ་སློང་དེ་དག་བཅོམ་ལྡན་འདས་ལ་སེམས་ཐག་པ་ནས་སྐྱབས་སུ་དོང་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་ཚངས་པར་སྤྱོད་པའི་ཚོགས་སྒྲུབ་པ་སྟེ། དེའི་སླད་དུ་བདག་ཅག་སྲིད་པར་སྐྱེ་བ་མི་འཛིན་ཏོ། །དེ་ནས་དྲང་སྲོང་ཆེན་པོ་རྒྱས་པས་དྲང་སྲོང་ཆེན་པོ་ [279b] [279b.1]དེ་དག་གི་སེམས་དང་མི་འཇིགས་པ་དམན་ཞིང་ལྟ་བ་དམན་པར་ཁད་ཀྱིས་ཁད་ཀྱིས་བརྟགས་ནས་གུས་པ་སྐྱེས་ཏེ། རྗེས་དང་བཅས་པར་དྲང་སྲོང་གི་ཚོགས་ཀྱིས་ཡོངས་སུ་བསྐོར་ནས་རལ་པ་མང་པོ་བརྫེས་ཏེ། མཆོད་ཕྱིར་ཐོགས་ཐོགས་པ། སྔོ་སངས་པོ། མིག་གཉིས་སེར་བ། སྐྲ་རྩུབ་ཅིང་ [279b.2]གྲུགས་པ། ལག་ན་དབྱུག་གུ་གསུམ་ཐོགས་པ། གཟུགས་རབ་ཏུ་མི་སྡུག་པ་དང་ལྡན་པ། ནམ་མཁའི་ངོས་ལས་འགྲོ་བ། གཏམ་སྣ་ཚོགས་ཀྱི་གཏན་ཚིགས་དང་ལྡན་པ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འཁོར་འདི་ནི་ཀུན་ཏུ་རྨོངས་ [279b.3]པ་སྟེ། འདི་ན་གནས་ལགས་ན་བདག་འདིར་མཆིས་པར་བཅོམ་ལྡན་འདས་མཁྱེན་པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་སྲིད་པར་སྐྱེ་བ་ཐམས་ཅད་ཀྱང་ངས་ཤེས་ཏེ་དངོས་པོ་དེ་ཡང་རིག་གོ །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་ [279b.4]སྐད་ཅེས་གསོལ་ཏོ། །བཅོམ་ལྡན་འདས་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་གསལ་བ་ཟུར་ཕྱིན་པ། ཞིབ་པ་མཁས་པ། བློ་དང་། ཤེས་པ་དང་། མི་འཇིགས་པ་དང་། རལ་པའི་ཟར་བུའི་ཅོད་པན་ཅན་འདི་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ [279b.5]ནི་དྲང་སྲོང་ཆེན་པོ་རྒྱས་པ་ཞེས་བྱ་སྟེ། རིག་བྱེད་རྣམས་བྱེད་པ། ནུས་ཅན་བུའི་བསྟན་བཅོས་ཀྱིས་འཚོ་བ། ཡི་གེ་སྣ་ཚོགས་སྡུད་པའོ། །དེ་ནས་དགྲ་བཅོམ་པ་དེ་དག་ཐམས་ཅད་ཀྱིས་རྒྱས་པ་མཐོང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་འཁོར་བའི་ [279b.6]སྡུག་བསྔལ་ལས་ཡོངས་སུ་མ་གྲོལ་བ་ལགས་ན། དཀའ་ཐུབ་དྲག་པོས་ཡོངས་སུ་ཉོན་མོངས་པ་རྙེད་པ་འདིས་ཅི་ཞིག་ཐོབ། དགྲ་བཅོམ་པ་དེ་དག་ཡང་འདི་སྙམ་དུ་སེམས་ཏེ། རྒྱས་པ་འདིས་བཅོམ་ལྡན་འདས་ལ་གཏམ་གང་བདག་མེད་པའི་གཏམ་འམ། སྦྱིན་པ་དང་། ཚུལ་ཁྲིམས་དང་རབ་ཏུ་ [279b.7]ལྡན་པའི་གཏམ་འམ། ཅིའི་རྒྱུ་དང་རྐྱེན་གྱི་གཏམ་ཞིག་ཞུ་སྙམ་མོ། །དེ་ནས་དྲང་སྲོང་ཆེན་པོ་རྒྱས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འབྱུང་བ་དང་། ད་ལྟར་དྲང་སྲོང་ཆེན་པོ་ཚོགས་པ་འདི་ཤིན་ཏུ་རྙེད་པར་དཀའ་བ་ལགས་སོ། །གལ་ཏེ་ཞུས་ནས་ཞུ་བ་ལུང་ [280a] [280a.1]བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་དྲང་སྲོང་ཆེན་པོ་རྒྱས་པ་ལ་འདི་ [280a.2]སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་ཁྱོད་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེ་དེ་ལྟ་དེ་ལྟར་ལུང་བསྟན་པར་བྱའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་སྦྱིན་པ་སྦྱིན་པར་བགྱི། སྦྱིན་པ་མ་ལགས་པའི་དོན་གང་ [280a.3]ལགས། སྦྱིན་པ་ཞེས་བགྱི་བའི་དོན་གང་ལགས། སྦྱིན་བདག་ཇི་ལྟར་རབ་ཏུ་འཚལ་བར་བགྱི། ཇི་ལྟར་ན་གཏོང་བ་པོར་འགྱུར། ཇི་ལྟར་ན་སྦྱིན་བདག་ལགས་ལ་གཏོང་བ་པོ་མ་ལགས། ཇི་ལྟར་ན་སྦྱིན་བདག་སྦྱིན་པའི་མཐར་འགྲོ་བ་ཞེས་བགྱི། སྤུངས་པར་གནས་པ་འམ། བརྩེགས་པར་གནས་ [280a.4]པ་འམ། ཇི་ལྟར་བལྟ་བར་བགྱི། ཇི་ལྟར་ན་སྦྱིན་བདག་ལེན་པ་ལ་མི་གནས་པར་སྦྱིན་པ་སྦྱིན་པ་ལགས། སྦྱིན་པའི་རྣམ་པར་སྨིན་པ་ཇི་ལྟར་བལྟ་བར་བགྱི། ཇི་ལྟར་ན་བཅོམ་ལྡན་འདས་མྱ་ངན་ལས་འདས་པའི་མཆོད་རྟེན་ལ་མཆོད་པ་ལགས། བསོད་ནམས་དེའི་རྣམ་པར་སྨིན་པ་ཇི་ལྟར་བལྟ་བར་བགྱི། [280a.5]བཅོམ་ལྡན་འདས་ཁྱོད་ཡོངས་སུ་མྱ་ངན་ལས་འདས་ནས་ཡོངས་སུ་འཛིན་པར་འགྱུར་བ་གང་ལགས། དེ་ནས་བཅོམ་ལྡན་འདས་ཀྱིས་དྲང་སྲོང་ཆེན་པོ་རྒྱས་པ་ལ་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་སེམས་དང་པོ་བསྐྱེད་པའི་གཏམ་ཁྱོད་ཀྱིས་དྲིས་པ་འདི་ནི་རྩིང་ངོ་། །དེ་ན་གནས་བརྟན་ཤ་ [280a.6]ར་དྭ་ཏིའི་བུ་སྨིན་མ་རིང་བ། གཉེར་མ་ཅན། མགོ་སྐྱ་བོས་ལག་པ་གཡས་པས་སྨིན་མ་གཟར་ནས་མིག་ལྤགས་བཏེགས་ཏེ་བལྟས་ནས་འདི་སྐད་ཅེས་སྨྲས་སོ། །དྲང་སྲོང་ཆེན་པོ་རྒྱས་པ་འདི་འཇིག་རྟེན་ན་གྲགས་པ་ཡིན་ན་གཏན་ཚིགས་ཀྱི་རིག་པ་མི་ཤེས་པའི་བྱིས་པ་རོགས་རྒོད་ལྟ་བུར་མཁས་པའི་བློ་ [280a.7]མེད་དེ། རྒྱུ་དང་རྐྱེན་གྱི་གཏམ་སྤངས་ཤིང་བདག་མེད་པའི་གཏམ་བོར་ལ་ལྷ་ཡུལ་བའི་རྒྱུའི་གཏམ་བཏང་སྟེ། ཅིའི་ཕྱིར་སྦྱིན་པའི་གཏམ་ཉིད་ཞུས་པར་གྱུར། དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། [280b] [280b.1]བཅོམ་ལྡན་འདས་བདག་གིས་དྲང་སྲོང་ཆེན་པོ་འདི་ལ་སྦྱིན་པའི་འབྲས་བུ་སྦྱིན་པའི་བཀའ་མཆིད་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་བཞིན་གཤེགས་པ་ལ་དྲིས་ལ། ཉན་ཐོས་ཀྱིས་བཤད་པ་ནི་དེ་བཞིན་གཤེགས་པ་རྣམས་ཀྱི་ཚུལ་མ་ཡིན་ཏེ་མི་དགོས་ཀྱིས། ཀུན་ [280b.2]དགའ་བོ་དེ་སྐད་མ་ཟེར་ཅིག་འདི་ནི་གནས་མ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དྲང་སྲོང་ཆེན་པོ་རྒྱས་པ་ཅི་དང་ཅི་འཚལ་བ་དྲིས་པའི་ལན་གདབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་ [280b.3]བུ་ཁྱོད་ཀྱང་དེ་སྐད་མི་འཚམ་པར་མ་ཟེར། ངའི་མདུན་ན་ཉན་ཐོས་ཀྱིས་ཐེ་ཚོམ་བཅད་པ་འདི་ནི་མི་རིགས་ཏེ། ང་ལ་སེམས་ཅན་གྱི་སེམས་མ་རངས་པར་འགྱུར་རོ། །སེམས་མ་རངས་ནས་འདི་སྐད་དུ་གང་གི་ཕྱིར་རྒྱས་པས་དྲིས་ཉན་ཐོས་འཆད་དུ་བཅུག་པ་ལས་ན་དེ་བཞིན་གཤེགས་པ་ནི་ཐམས་ [280b.4]ཅད་མཁྱེན་པ་མ་ཡིན་དུ་ངེས་སོ། །ཡང་ན་ནི་སངས་རྒྱས་ལ་ངར་འཛིན་པ་ཡོད་དོ་ཞེས་ཟེར་བར་འགྱུར་ཏེ། སེམས་ཅན་དམྱལ་བར་འགྲོ་བར་འགྱུར་རོ། །དེ་ནས་དགེ་སློང་དེ་དག་བཅོམ་ལྡན་འདས་ལ་དགའ་བ་སྐྱེས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དྲང་སྲོང་ཆེན་པོ་རྒྱས་པའི་ཐེ་ [280b.5]ཚོམ་བསལ་བའི་སླད་དུ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་དྲང་སྲོང་ཆེན་པོ་རྒྱས་པ་ལ་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་སྦྱིན་པའི་རྣམ་པར་སྨིན་པ་དང་། སྦྱིན་པའི་བྱ་བ་དང་། སྦྱིན་པའི་རྣམ་པར་དབྱེ་བ་དང་། སྦྱིན་པ་ཞེས་བྱ་བའི་དོན་གང་ཡིན་པ་དང་། སྦྱིན་བདག་ [280b.6]གིས་ཡོངས་སུ་སྤྱད་ན་ཇི་ལྟར་སྦྱིན་པ་སྦྱོང་བ་དང་། དེ་དག་ལ་བྱིན་ན་བསོད་ནམས་ཀྱི་རྣམ་པར་སྨིན་པ་ཇི་ལྟར་རབ་ཏུ་འཕེལ་བ་དེ་ཉོན་ཅིག་གང་གི་ཕྱིར་སྦྱིན་པ་ཞེས་བྱ་བ་དང་། སྦྱིན་པ་ཞེས་བྱ་བའི་དོན་གང་ཡིན་ཞེས་བྱ་བ་ནི་དྲང་སྲོང་ཆེན་པོ་འདི་ལ་གཏོང་བ་པོས་སྦྱིན་པའི་དངོས་པོ་ཡོངས་སུ་གཏང་སྟེ། དད་ [280b.7]པ་བསྐྱེད་ནས་གཞན་བྱེད་དུ་བཅུག་སྟེ་ཡུལ་གཞན་དུ་སོང་ནས་བྱེད་དུ་བཅུག་པ་དེས་ཀྱང་ནོར་རྣམས་རྣམ་པར་གཏོང་བར་བྱེད་ན་ནོར་གང་གི་ཡིན་པ་དེ་ནི་སྦྱིན་བདག་ཡིན་ནོ། །བྱེད་དུ་བཅུག་པས་བྱིན་པ་ནི་གཏོང་བ་པོ་ཡིན་གྱི་སྦྱིན་བདག་མ་ཡིན་ནོ། །གང་རང་གི་དངོས་པོ་བདག་ཉིད་ཀྱིས་སྦྱིན་པ་དེ་ནི་གཏོང་བ་ [281a] [281a.1]པོ་ཡང་ཡིན་ལ་སྦྱིན་བདག་ཀྱང་ཡིན་ནོ། །དྲང་སྲོང་ཆེན་པོ་རྣམ་པ་སུམ་ཅུ་རྩ་གཉིས་ཀྱིས་སྦྱིན་པ་ཡོངས་སུ་མ་དག་པར་བལྟའོ། །རྣམ་པ་སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། དྲང་སྲོང་ཆེན་པོ་འདི་ལ་གཏོང་བ་པོ་ཕྱིན་ཅི་ལོག་ཏུ་ལྟ་བར་གྱུར་ཅིང་མ་དད་པ་དང་མ་དང་བ་མང་ལ་དེས་ [281a.2]སྦྱིན་པ་བྱིན་ན་དེའི་སྦྱིན་པ་དེ་ཡོངས་སུ་མ་དག་པ་ཡིན་ནོ། །དྲང་སྲོང་ཆེན་པོ་གཞན་ཡང་ཕན་བཏགས་པའི་ལན་དུ་ཕན་འདོགས་པར་བྱ་བའི་ཕྱིར་སྦྱིན་པ་བྱིན་ན་དེ་ཡོངས་སུ་མ་དག་པ་ཡིན་ནོ། །དེས་དམན་པ་དང་། འདོད་པའི་རྒྱུའི་ཕྱིར་གང་འདི་ལྟ་བུའི་སེམས་ཀྱིས་མེ་ལ་སྦྱིན་པ་སྦྱིན་ནོ་ཞེ་འམ། མེ་ [281a.3]ལྕེ་ལ་སྦྱིན་པ་སྦྱིན་ནོ་ཞེའམ། ཆུ་ལ་སྦྱིན་པ་སྦྱིན་ནོ་ཞེ་འམ། དེས་བདག་ཡོངས་སུ་ཤེས་པར་བྱ་བའི་ཕྱིར་རྒྱལ་པོ་ལ་སྦྱིན་པ་བྱིན་ན་སྦྱིན་པ་དེ་ཡོངས་སུ་མ་དག་པ་ཡིན་ནོ། །གང་མི་འཇིགས་པའི་ཕྱིར་ཆོམ་པོ་ལ་སོགས་པ་ལ་སྦྱིན་པ་བྱིན་ཏེ། ཐུན་མོང་མ་ཡིན་པ་ལྔ་བྱིན་ན་སྦྱིན་པ་ཡོངས་སུ་མ་དག་ [281a.4]པ་ཡིན་ནོ། །དུག་སྦྱིན་པ་དང་། མཚོན་ཆ་སྦྱིན་པ་དང་། སྲོག་ཆགས་བསད་དེ་ཤ་སྦྱིན་པ་དང་། བག་མེད་པ་རྣམས་ལ་ཆང་སྦྱིན་པ་དང་། འདི་དག་ནི་བདག་གིར་འགྱུར་ཏེ་བདག་གི་རིམ་གྲོ་དང་། མཆོད་པར་འགྱུར་རོ་སྙམ་ནས་སེམས་ཅན་བསྡུ་བ་དང་འཐོབ་པའི་ཕྱིར་བསྡུ་བའི་སྦྱིན་པ་དང་། གང་ [281a.5]བརྗོད་པ་དང་། སྒྲ་དང་། ཚིགས་སུ་བཅད་པའི་ཕྱིར་སྦྱིན་པ་སྦྱིན་པ་དང་། གང་གར་དང་གླུ་དང་། བཞད་གད་དང་། རྩེད་མོ་དང་། གཏམ་དང་། དགའ་བར་བྱ་བའི་ཕྱིར་རོལ་མོ་མཁན་རྣམས་ལ་སྦྱིན་པ་བྱིན་ན་སྦྱིན་པ་དེ་ཡོངས་སུ་མ་དག་པ་ཡིན་ནོ། །གང་གཟའི་མཚན་མའི་ཕྱིར་སྐར་མཁན་ལ་སྦྱིན་ [281a.6]པ་གཏོང་བར་བྱེད་པ་དང་། གང་གཞན་གྱི་ནོར་མཛའ་བོ་ལ་སྦྱིན་པ་དང་། གང་གི་ཁྱིམ་འམ་ཞིང་ལ་གཞན་གྱི་འབྲུའི་ཕུང་པོ་འམ། ནས་དང་གྲོའི་ཕུང་པོ་ལ་{རི་དགས་,རི་དྭགས་}དང་བྱ་ཟ་བ་ལ་དེ་དེ་ལ་དགའ་བ་དང་མགུ་བ་སྐྱེད་ན་དེ་ཡང་སྦྱིན་པ་ཡོངས་སུ་མ་དག་པ་ཡིན་ནོ། །གང་བཟོའི་ཕྱིར་སྦྱིན་པ་བྱིན་པ་དང་། [281a.7]གང་ཡང་ལུས་མི་བདེ་བས་འཇིགས་པའི་ཕྱིར་སྨན་པ་ལ་སྦྱིན་པ་དང་། གང་ཡང་སློང་བ་རྣམས་ལ་སྤྱོས་བརྒྱད་དེ་ཚིག་པ་ཟ་བར་བྱས་ནས་སྦྱིན་པ་བྱིན་ན་དེ་ཡང་ཡོངས་སུ་མ་དག་པ་ཡིན་ནོ། །གང་ཡང་སྦྱིན་པ་བྱིན་པ་འདིའི་རྣམ་པར་སྨིན་པ་ཡོད་དམ་མེད་ཅེས་ཐེ་ཚོམ་ཟ་ན་དེ་ཡང་ཡོངས་སུ་མ་དག་པ་ཡིན་ནོ། ། [281b] [281b.1]གང་ཡང་སྦྱིན་པ་བྱིན་ནས་གདུང་བ་དང་འགྱོད་པས་གདུངས་ན་དེ་ཡང་ཡོངས་སུ་མ་དག་པ་ཡིན་ནོ། །གང་ཡང་སྦྱིན་པ་བྱིན་ནས་གང་བདག་ལས་ཁྱེར་བ་ཐམས་ཅད་ཀྱིས་ཚེ་ཕྱི་མ་ལ་སླར་སྦྱིན་པར་འགྱུར་རོ། །སྙམ་དུ་འདི་ལྟ་བུའི་སེམས་བསྐྱེད་ན་དེ་ཡང་ཡོངས་སུ་མ་དག་པ་ཡིན་ནོ། །གང་བསོད་ནམས་ཀྱི་རྣམ་ [281b.2]པར་སྨིན་པ་འདི་ནི་བདག་ཉིད་ཀྱིས་སྤྱད་ཀྱི། སེམས་ཅན་གཞན་གང་ལ་ཡང་མ་གྱུར་ཅིག་སྙམ་དུ་དེ་ལྟར་སེམས་བསྐྱེད་ན་དེ་ཡང་ཡོངས་སུ་མ་དག་པ་ཡིན་ནོ། །གང་ལང་ཚོ་ལ་བབ་པས་སྦྱིན་པ་བྱིན་པ་དང་། ཕྱིས་དར་ཕྱིད་པ་དང་རྒ་བའི་གནས་དང་། ན་བས་གཟིར་བ་དང་། འཆི་བའི་དུས་ཀྱི་ཚེ་དང་། གནད་ [281b.3]དུ་ཕོག་པའི་སྡུག་བསྔལ་བ་དང་། སྣང་བ་དང་། འཆི་བའི་མྱ་ངན་དུ་གྱུར་པ་ན་སངས་རྒྱས་པ་ལ་དགའ་བ་དང་དད་པ་མེད་པར་རྩ་ལག་རྣམས་ཀྱིས་བྱེད་དུ་བཅུག་སྟེ་སྦྱིན་གནས་རྣམས་ལ་སྦྱིན་པ་བྱིན་ན་དེ་ཡང་ཡོངས་སུ་མ་དག་པ་ཡིན་ནོ། །གང་ཡུལ་གཞན་ན་གནས་ན་ཡང་ཡུལ་དང་གནས་ཆེ་གེ་མོ་ཞེས་བྱ་བ་ན་ [281b.4]བདག་སྦྱིན་བདག་ཏུ་གྲགས་པར་འགྱུར་རོ་སྙམ་སྟེ་གྲག་པའི་རྒྱུར་སྦྱིན་པ་བྱིན་ན་དེ་ཡང་ཡོངས་སུ་མ་དག་པ་ཡིན་ནོ། །གང་ཡང་ཁ་ཟས་གཏོང་མི་ཕོད་པ་ལ་འཇིག་རྟེན་པ་མི་དགའ་བར་མཐོང་ནས་སྦྱིན་ཕོད་པའི་ཉེས་པ་ནི་འཇིག་རྟེན་གྱིས་བཟོད་དོ་སྙམ་སྟེ་སྦྱིན་པ་བྱིན་ན་དེ་ཡང་ཡོངས་སུ་མ་དག་པ་ཡིན་ནོ། །གང་ [281b.5]ཡང་བུད་མེད་སྙིང་དུ་སྡུག་སྟེ་ཆུང་མར་བླང་བར་བྱ་བའི་དོན་དུ་བུད་མེད་ཀྱི་གཞི་ལས་མཛའ་བཤེས་དང་གཉེན་འདབ་དང་འབྲེལ་བའི་ཕྱོགས་ལ་ནོར་བུ་དང་། གསེར་དང་། དངུལ་དང་། རྡོ་རྗེ་དང་། བཻདཱུརྱ་དང་། དར་དང་། བྱི་རུ་དང་། དུ་ཀུ་ལའི་རས་ལ་སོགས་པས་མགུ་བར་བྱེད་ན་དེ་ཡང་ཡོངས་སུ་མ་ [281b.6]དག་པ་ཡིན་ནོ། །གང་ཡང་འདི་ལྟར་བདག་ལ་ནོར་ནི་མང་དུ་ཡོད་ལ་བདག་ལ་བུ་མེད་དེ། བདག་གིས་གང་རིགས་པ་ལ་གཏང་བར་བྱའོ་སྙམ་སྟེ་སྦྱིན་པ་སྦྱིན་ན་དེ་ཡང་ཡོངས་སུ་མ་དག་པ་ཡིན་ནོ། །གང་ཡང་ཚེ་འདི་ལ་བྱིན་པས་འཇིག་རྟེན་ཕ་རོལ་ཏུ་རྙེད་པར་འགྱུར་རོ་སྙམ་པའི་སེམས་ཀྱིས་སྦྱིན་པ་བྱིན་ན་ [281b.7]དེ་ཡང་ཡོངས་སུ་མ་དག་པ་ཡིན་ནོ། །གང་མེ་ཏོག་དང་། འབྲས་བུ་དང་། ཟང་ཟིང་འདོད་པས་དབུལ་བ་དང་། བཀྲེན་པ་དང་། སྡུག་ཕོངས་པ་གོས་དེངས་ཤིང་དྲི་མ་ཅན་རྣམས་བཀོལ་ཏེ་བོར་ལ་ཕྱུག་པ་རྒྱ་ཆེན་པོ་ཐོབ་པ་དག་ལ་སྦྱིན་པ་བྱིན་ན་དེ་ཡང་སྦྱིན་པ་ཡོངས་སུ་མ་དག་པ་ཡིན་ཏེ། དྲང་སྲོང་ཆེན་པོ་ [282a] [282a.1]རྣམ་པ་སུམ་ཅུ་རྩ་གཉིས་པོ་དེ་དག་ནི་སྦྱིན་པ་བྱིན་ཡང་ཡོངས་སུ་དག་པ་མ་ཡིན་པར་བལྟའོ། །དྲང་སྲོང་ཆེན་པོ་དེ་དག་གི་རྣམ་པར་སྨིན་པ་ནི་ཚྭ་སྒོ་ཅན་གྱི་ཞིང་ལ་ས་བོན་ངན་པ་བཏབ་པའི་མྱུ་གུ་སྐྱེ་བ་བཞིན་དུ་བལྟ་སྟེ། སྦྱིན་པ་དེའི་རྣམ་པར་སྨིན་པ་ནི་མེད་པ་མ་ཡིན་མོད་ཀྱི། འོན་ [282a.2]ཀྱང་ཞིང་དང་ས་བོན་གྱི་ཉེས་པས་མེ་ཏོག་དང་འབྲས་བུར་མི་འགྱུར་རོ། །དྲང་སྲོང་ཆེན་པོ་འདི་ལྟ་སྟེ། དཔེར་ན་སྐྱེས་བུ་ལ་ལ་ཞིག་གང་འདོད་པའི་ས་བོན་ཁྱེར་ཏེ་མ་རྨོས་མ་བསལ་བའི་ཞིང་ལ་བཏབ་ན། དེའི་ས་བོན་ས་ལ་གནས་པ་དེ་ལ་ཆར་པ་བབ་ནས་བངས་ན་གདོན་མི་ཟ་བར་མྱུ་གུ་སྐྱེ་ནུས་པར་འགྱུར་ཏེ། [282a.3]འོན་ཀྱང་མེ་ཏོག་དང་འབྲས་བུར་ནི་མི་འགྱུར་རོ། །དྲང་སྲོང་ཆེན་པོ་དེ་བཞིན་དུ་སྦྱིན་པ་དེའི་རྣམ་པར་དབྱེ་བ་དེ་ཡང་བསམ་པ་དང་སྦྱོར་བ་ཀུན་ནས་ཉོན་མོངས་པ་ཅན་དུ་གྱུར་པས་འབྲས་བུ་རྣམ་པར་སྨིན་པ་གྲུང་པོར་མི་འགྱུར་རོ། །དེ་ནས་དྲང་སྲོང་ཆེན་པོ་རྒྱས་པས་ཐལ་མོ་སྦྱར་ཏེ། བཅོམ་ལྡན་ [282a.4]འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཐམས་ཅད་མཁྱེན་པ་དང་འཐུན་པའི་རྣམ་པར་སྨིན་པ་སྐྱེ་དགུ་རྣམས་ལ་ཕན་པ་དང་བདེ་བ་བགྱིད་པ་ནི་བསྟན་ལགས་སོ། །བཅོམ་ལྡན་འདས་ཇི་ལྟར་ཚུལ་ཁྲིམས་འཆལ་པ་དང་། ཚུལ་ཁྲིམས་དང་ལྡན་པ་ལ་སྩལ་ན་སྦྱིན་པའི་རྣམ་ [282a.5]པར་སྨིན་པ་ཆབ་མི་འཚལ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཁྱོད་སྦྱིན་པའི་རྣམ་པར་སྨིན་པ་ལ་འཇུག་པ་ཉོན་ཅིག །དྲང་སྲོང་ཆེན་པོ་དད་པས་གང་ཅུང་ཟད་ཅི་བྱིན་པ་དེ་དག་ཐམས་ཅད་ནི་སྦྱིན་པ་ཞེས་བྱའོ། །དྲང་སྲོང་ཆེན་པོ་གང་ཡང་འཇིག་རྟེན་ཕ་རོལ་གྱིས་ [282a.6]འཇིགས་པས་སྣོད་ལ་མི་རྟོག་པར་མ་བསླངས་པར་ཡང་ཚུལ་ཁྲིམས་དང་ལྡན་པའམ། ངན་པའི་ཚུལ་ཁྲིམས་འཆལ་པ་ལ་དད་པ་བསྐྱེད་ནས་མིག་ཕྱེ་སྟེ་སེམས་ཅན་ཐམས་ཅད་ལ་མཉམ་པའི་སེམས་ཀྱིས་སྦྱིན་པ་བྱིན་ན། དྲང་སྲོང་ཆེན་པོ་དེ་ནི་སྦྱིན་པ་དག་ཡིན་ནོ། །དྲང་སྲོང་ཆེན་པོ་གཞན་ཡང་སྦྱིན་པ་ [282a.7]ལྔ་ཡོངས་སུ་རྫོགས་པར་བྱའོ། །ལྔ་གང་ཞེ་ན། འདྲོན་པོ་དང་། ནད་པ་དང་། ནད་གཡོག་དང་། ཆོས་སྨྲ་བ་དང་། ཡུལ་གཞན་དུ་འགྲོ་བ་ལ་དུས་སུ་སྦྱིན་པ་སྟེ་ལྔ་པོ་དེ་དག་གོ །གཞན་ཡང་ལྔ་སྟེ། ཆོས་སྦྱིན་པ་དང་། ཟང་ཟིང་སྦྱིན་པ་དང་། གནས་སྦྱིན་པ་དང་། མར་མེ་སྦྱིན་པ་དང་། [282b] [282b.1]སྤོས་དང་ཕྲེང་བ་སྦྱིན་པའོ། །དྲང་སྲོང་ཆེན་པོ་རྒྱས་པས་གསོལ་པ། བཅོམ་ལྡན་འདས་སྦྱིན་པ་ཡོངས་སུ་དག་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་དད་པ་བསྐྱེད་དེ་སེམས་ཅན་ཐམས་ཅད་ལ་དམིགས་ཤིང་བྱམས་པ་དང་ལྡན་པའི་སེམས་ཀྱིས་གུས་པར་བྱས་ཏེ་དུལ་ [282b.2]བས་སྦྱིན་པ་བྱིན་པ་དེ་ཐམས་ཅད་ནི་ཡོངས་སུ་དག་པ་ཡིན་ནོ། །ཐར་པར་བསྔོས་ཏེ་སྦྱིན་པ་བྱིན་པ་ནི་ཡོངས་སུ་དག་པ་ཞེས་བྱའོ། །གཞན་ཡང་སྦྱིན་པ་བླ་ན་མེད་པར་བལྟ་བ་ལྔ་སྟེ། ལྔ་གང་ཞེ་ན། དེ་བཞིན་གཤེགས་པ་ལ་སྦྱིན་པ་བྱིན་པ་ནི་བླ་ན་མེད་པ་ཡིན་ནོ། །དགེ་འདུན་ལ་སྦྱིན་པ་བྱིན་ [282b.3]པ་ནི་བླ་ན་མེད་པ་ཡིན་ནོ། །ཆོས་སྨྲ་བ་ལ་སྦྱིན་པ་བྱིན་པ་ནི་བླ་ན་མེད་པ་ཡིན་ནོ། །ནད་པ་ལ་སྦྱིན་པ་བྱིན་པ་ནི་བླ་ན་མེད་པ་ཡིན་ནོ། །ཕ་མ་ལ་སྦྱིན་པ་བྱིན་པ་ནི་བླ་ན་མེད་པ་ཡིན་ནོ། །གཞན་ཡང་སྦྱིན་པ་ཆེན་པོར་འགྱུར་བ་ནི་རྒྱལ་པོ་རྒྱལ་སྲིད་ཀྱི་དབང་ཕྱུག་ལས་ཉམས་པ་ལ་སྦྱིན་པ་བྱིན་ན་སྦྱིན་པ་ཆེན་ [282b.4]པོ་ཡིན་ནོ། །རྒྱལ་པོས་མནར་བ་དང་། མགོན་མེད་པ་དང་། ནད་པ་ལ་སྦྱིན་པ་བྱིན་ན་སྦྱིན་པ་ཆེན་པོ་ཡིན་ནོ། །རྒྱལ་པོས་སྤངས་ནས་གཞན་ན་ཡང་ཉམ་ང་ཞིང་སྲོག་ཆད་ལ་ཁད་པ་འཆི་ལ་ཐུག་པ་ལས་གསོས་ན་སྦྱིན་པ་ཆེན་པོ་ཡིན་ནོ། །ན་བ་ལ་སྨན་བྱིན་ན་སྦྱིན་པ་ཆེན་པོ་ཡིན་ནོ། །ཚུལ་ [282b.5]ཁྲིམས་ཕུན་སུམ་ཚོགས་པའི་འཕགས་པའི་དགེ་འདུན་ལ་དུས་སུ་སྦྱིན་པ་བྱིན་ན་འབྲས་བུ་ཆེན་པོ་ཡིན་ནོ། །ཏིང་ངེ་འཛིན་ལ་སྙོམས་པར་ཞུགས་པ་དང་། ཤེས་རབ་ཕུན་སུམ་ཚོགས་པ་དང་། རྣམ་པར་གྲོལ་བ་ཕུན་སུམ་ཚོགས་པ་དང་། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ [282b.6]ཚོགས་པ་ལ་སྦྱིན་པ་བྱིན་ན་སྦྱིན་པ་ཆེན་པོ་ཡིན་ནོ། །དུད་འགྲོའི་སྐྱེ་གནས་སུ་སོང་བ་བྱ་རོག་དང་། འུག་པ་དང་། {རི་དགས་,རི་དྭགས་}ལ་སོགས་པ་ལ་མི་འཇིགས་པ་བྱིན་ན་སྦྱིན་པ་ཆེན་པོ་ཡིན་ནོ། །གང་ལ་གང་དགོས་པ་དང་། མི་བདོག་པ་དེའི་བསམ་པ་ཡོངས་སུ་རྫོགས་པར་བྱེད་པ་ནི་ [282b.7]སྦྱིན་པ་ཆེན་པོ་ཡིན་ཏེ། དྲང་སྲོང་ཆེན་པོ་དེ་ལྟར་ན། སྦྱིན་པ་བྱིན་པ་ཡོངས་སུ་དག་པ་དང་སྦྱིན་པ་ཆེན་པོ་ཡིན་ནོ། །སྦྱིན་པ་ཡོངས་སུ་དག་པ་འདི་དག་འདོད་པས་དེ་ལྟར་སྦྱིན་པ་ཡོངས་སུ་དག་པ་བསྒོམ་པར་བྱའོ། །སེམས་ཅན་གང་དག་གཞན་དག་གིས་དེ་ལྟར་བསྐུལ་ནས་དད་པ་དང་དང་བ་བསྐྱེད་ [283a] [283a.1]དེ་སྦྱིན་པ་ཡོངས་སུ་དག་པ་འདི་ལ་རྗེས་སུ་ཡི་རང་བར་འགྱུར་བ་དེ་དག་མཚུངས་པར་བསོད་ནམས་སྐྱེད་པ་པོ་དང་སྦྱིན་བདག་ཏུ་འགྱུར་ཏེ། དེ་ལྟར་ན་གང་རྗེས་སུ་ཡི་རང་བ་དང་། གང་སྐུལ་བ་དེ་དག་ཐམས་ཅད་བསོད་ནམས་སྐྱེད་པ་པོར་མཚུངས་པར་འགྱུར་རོ། །དྲང་སྲོང་ཆེན་ [283a.2]པོ་གང་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་ན་བསོད་ནམས་ཀྱི་རྣམ་པར་སྨིན་པ་ཇི་ལྟར་འགྱུར། ཇི་ལྟར་སྦྱིན་པའི་བསོད་ནམས་ཟད་པར་འགྱུར་ཞེས་ཁྱོད་ཀྱིས་སྨྲས་པ། དྲང་སྲོང་ཆེན་པོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །དྲང་ [283a.3]སྲོང་ཆེན་པོ་གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟར་བཞུགས་པ་ལ་མཆོད་པ་བྱེད་པ་དེའི་རྣམ་པར་སྨིན་པ་ནི་མཚུངས་མཉམ་ཞིང་འདྲའོ་ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་གཟུགས་ཆོས་ཀྱི་སྐུས་རབ་ཏུ་ཕྱེ་བ་ཡིན་གྱི། ཆོས་གཟུགས་ཀྱི་ [283a.4]སྐུས་རབ་ཏུ་ཕྱེ་བ་མ་ཡིན་པའི་ཕྱིར་རོ། །གང་ལ་ལ་ཞིག་ང་འདུག་པའམ། ཡོངས་སུ་མྱ་ངན་ལས་འདས་པ་ལ་མཆོད་ན་སེམས་མཚུངས་པའི་ཕྱིར་འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་ཀྱང་མེད་དོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོས་རིས་སུ་གཏོགས་ [283a.5]པ་རྣམས་ལ་བསྒོ་བ། ངའི་གང་གིས་ཀྱང་དེང་ཕྱིན་ཆད་སྲོག་གཅོད་པ་དང་། མ་བྱིན་པ་ལེན་པ་དང་། འདོད་པས་ལོག་པར་གཡེམ་པ་དང་། {བརྫུན་,རྫུན་}གྱི་ཚིག་འབྱིན་པ་དང་། ཕྲ་མ་དང་། ངག་རྩུབ་པ་དང་། ཚིག་ཀྱལ་པ་འབྱིན་པ་མི་བྱའོ། །བརྣབ་སེམས་དང་། གནོད་སེམས་དང་། [283a.6]ལོག་པར་ལྟ་བའི་སེམས་བསྐྱེད་པར་མི་བྱའོ་ཞེས་བསྒོ་ལ། དེ་ལ་མི་ལ་ལས་རྒྱལ་པོས་བསྒོ་བ་དེ་ཐོས་ནས་བསྒོ་བ་རྣམས་རྗེས་སུ་སྲུང་ན་རྒྱལ་པོ་དེའི་ལུས་ལ་མཆོད་པ་བྱེད་པ་མ་ཡིན་མོད་ཀྱི་རྒྱལ་པོ་ངས་བསྒོ་བ་བཞིན་དུ་དེ་དག་གིས་བྱས་སོ་སྙམ་སྟེ་དགའ་བར་འགྱུར་རོ། །དེ་དག་རྒྱལ་པོ་དེས་བསྟན་ཅིང་བསྒོ་བ་ [283a.7]རབ་ཏུ་སྲུང་ཞིང་སྲོག་གཅོད་པ་ལ་སོགས་པ་ཀུན་དུ་སྲུང་བ་དེའི་ལས་ཀྱི་རྣམ་པར་སྨིན་པས་མཐོ་རིས་ཀྱི་འཇིག་རྟེན་དུ་སྐྱེ་བ་ཡོངས་སུ་འཛིན་པར་འགྱུར་རོ། །གང་དག་རྒྱལ་པོ་དེས་བསྟན་ཅིང་བསྒོ་བ་མི་སྲུང་ཞིང་མི་དགེ་བའི་ལས་ལ་སྦྱོར་བ་དེ་དག་མི་དགེ་བའི་ལས་བྱེད་པས་ཚེ་འདི་ལ་རྒྱལ་པོ་དེ་ལས་སྡུག་བསྔལ་ [283b] [283b.1]རྗེས་སུ་འཐོབ་པར་འགྱུར། དེ་འདི་ནས་ཤི་བའི་དུས་བྱས་ནས་ཀྱང་ལོག་པར་ལྟུང་བར་འགྲོ་བར་འགྱུར་རོ། །དྲང་སྲོང་ཆེན་པོ་དེ་བཞིན་དུ་གང་དག་གིས་ང་ལ་གཟུགས་ཀྱི་སྐུར་མཐོང་ལ་བསླབ་པ་རྣམས་རྗེས་སུ་མི་སྲུང་བ་དེ་དག་གིས་ཅི་འཐོབ་པར་འགྱུར་ཞེ་ན། དེ་དག་གིས་ལོག་པར་ལྟ་བ་བསྐྱེད་ [283b.2]ནས་ལྷས་བྱིན་བཞིན་དུ་སེམས་ཅན་དམྱལ་བར་འགྲོ་བར་འགྱུར་རོ། །གང་དག་ང་ཡོངས་སུ་མྱ་ངན་ལས་འདས་པ་ན་བསླབ་པ་རྣམས་སྲུང་བ་དང་། མཆོད་པ་ཡང་བྱེད་པར་འགྱུར་བ་དེ་དག་ནི་ངས་མཆོག་དམ་པར་ཤེས་སོ། །དྲང་སྲོང་ཆེན་པོ་ད་ལྟར་ང་མཆོག་ཏུ་ཕྱིན་ཏེ་སེམས་ཅན་ཐམས་ཅད་ལས་ཁྱད་ [283b.3]པར་དུ་འཕགས་ཤིང་ཐམས་ཅད་མཁྱེན་པའི་ཡེ་ཤེས་ཐོབ་པས་མ་ངེས་པའི་སེམས་ཅན་རྣམས་ལ་མིང་བསྒྲགས་པས་ཀྱང་བསླབ་པ་ཕུན་སུམ་ཚོགས་པར་བྱའོ། །དྲང་སྲོང་ཆེན་པོ་གང་ལ་ལ་ཞིག་ང་ཡོངས་སུ་མྱ་ངན་ལས་འདས་ཏེ་འདས་པའི་འོག་ཏུ་མཆོད་པ་བྱེད་པ་དེ་འདུག་པ་ལ་མཆོད་པ་བཞིན་དུ་འགྱུར་རོ། །དྲང་སྲོང་ [283b.4]ཆེན་པོ་སེམས་ཅན་དེ་དག་བསོད་ནམས་ལྷག་པར་བྱ་བ་གང་བྱེད་པ་ཐམས་ཅད་ནི་བསོད་ནམས་ཆེན་པོའི་འཕེན་པ་བྱང་ཆུབ་ཏུ་འགྱུར་བ་བྱས་པ་ཡིན་ནོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་ཆུ་ངོགས་ཀྱི་འདམ་བུ་སྟུག་པོའི་ནང་དུ་མེ་བཏང་ན་ཆར་པའི་རྒྱུན་འབབ་པའི་ཆུས་དེ་ཞི་བར་འགྱུར་རོ། །དྲང་སྲོང་ཆེན་པོ་དེ་བཞིན་དུ་སྦྱིན་བདག་ [283b.5]སྦྱིན་པའི་བསོད་ནམས་ཀྱི་ཚོགས་ཆེན་པོ་སྡུད་པར་འགྱུར་རོ། །སྦྱིན་པའི་ཚོགས་དེ་ཡང་སྦྱིན་པ་པོ་དེ་ཉིད་ཀྱི་རྒྱུད་ལ་དད་པའི་ཆར་པ་བབ་ན་སྦྱིན་པ་པོ་ཉིད་ཀྱི་རྒྱུད་ལ་སོགས་པར་འགྱུར་མོད་ཀྱི། སྦྱིན་པ་བྱིན་པ་དེ་ཡང་ཕུང་པོར་གནས་པའམ། སྤུངས་པར་གནས་པ་འམ། ཕྱོགས་ན་གནས་པར་མི་ [283b.6]འགྱུར་རོ། །གང་ཡང་འདི་ལྟར་སྦྱིན་པ་བྱིན་པ་དེའི་བྱིན་པ་དེ་ནི་སྦྱིན་པ་པོ་དེ་ལ་གྲིབ་མ་བཞིན་དུ་རྗེས་སུ་འབྲང་བར་འགྱུར་ཏེ། དེས་ན་སྦྱིན་པ་པོ་དེས་བསོད་ནམས་ཀྱི་རྣམ་པར་སྨིན་པ་དེ་མཐོང་ཡང་བསོད་ནམས་དེ་ཁོང་དུ་མི་ཆུད་དོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་རྒུན་འབྲུ་དང་། བུ་རམ་ཤིང་མ་བཙིར་ [283b.7]བ་དེ་ལ་ཁུ་བ་མི་དམིགས་ཀྱི་བཙིར་ནས་དམིགས་ཏེ། རྒུན་འབྲུ་དང་། བུ་རམ་ཤིང་དེའི་ཁུ་བ་དེ་ཡང་ཕུང་པོར་གནས་པའམ། སྤུངས་པར་གནས་པའམ། ཕྱོགས་ན་གནས་པར་མི་སྣང་ངོ་། །ཁུ་བ་དེ་ནི་རྒུན་འབྲུ་རེ་རེ་དང་། བུ་རམ་ཤིང་གི་དུམ་བུ་རེ་རེའི་ནང་དུ་འདུས་པ་ཡང་མ་ཡིན་ནོ། །དྲང་ [284a] [284a.1]སྲོང་ཆེན་པོ་དེ་བཞིན་དུ་སྦྱིན་པ་བྱིན་པ་དེ་ཡང་སྦྱིན་པ་པོའི་ལག་པའི་རྩེ་མོ་དང་། སྙིང་དང་བྲང་ལ་རྣམ་པར་མི་གནས་ཏེ། སྦྱིན་པ་དེ་རྣམ་པར་སྨིན་པ་མི་འབྱིན་པ་ཡང་མ་ཡིན་ལ་སྦྱིན་བདག་འདོར་བ་ཡང་མ་ཡིན་ནོ། །ཇི་ལྟར་རྒུན་འབྲུ་དང་། བུ་རམ་ཤིང་བོར་ན་ཁུ་བ་དེ་དམིགས་ [284a.2]པར་མི་འགྱུར་བ་དེ་བཞིན་དུ་སྦྱིན་བདག་མེད་ན་སྦྱིན་པའི་རྣམ་པར་སྨིན་པར་མི་འགྱུར་ཏེ། ཚེའི་འདུ་བྱེད་མ་བཏང་བར་ཡང་སྦྱིན་པའི་རྣམ་པར་སྨིན་པ་སྣང་བ་མ་ཡིན་ནོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་ཤིང་ནྱ་གྲོ་དྷ་ས་བོན་ཁ་མ་འབུས་པར་ཤིང་དུ་སྣང་བར་མི་འགྱུར་རོ། །དེ་བཞིན་དུ་སྦྱིན་པ་ [284a.3]འཕེལ་བ་ལས་འབྲས་བུ་གྲུང་པོར་འགྱུར་རོ། །དྲང་སྲོང་ཆེན་པོ་འདི་ལྟ་སྟེ་དཔེར་ན་ཚོང་པ་ལ་ལ་ཞིག་རྫས་ཀྱི་ཚོགས་ཉུང་ངུ་ཞིག་ཁྱེར་ཏེ་ཡུལ་གཞན་གྱི་གྲོང་ཁྱེར་དུ་སོང་ནས་ཚོང་འདུས་ཁྱད་པར་ཅན་དུ་རང་གི་རྫས་ནོར་ཆེན་པོར་རྒྱས་པར་བསྒྱུར་ཏེ། དེའི་ནོར་དེ་ཉུང་ངུ་ལས་མང་པོར་གྱུར་པ་དང་། སྦྲང་ [284a.4]རྩིའི་སྦྲང་མས་མེ་ཏོག་མ་རུང་བར་བྱས་པ་ལྟར་སྦྱིན་བདག་གི་རྣམ་པར་སྨིན་པ་ཡང་ཆེར་སོགས་པར་འགྱུར་རོ། །དཔེར་ན་སྤྲིན་ནི་མ་འོངས་པའི་ཆར་པའི་ཆུ་རབ་ཏུ་འཛིན་ཏོ། །དེ་བཞིན་དུ་སྦྱིན་བདག་ཀྱང་རྣམ་པར་སྨིན་པ་འཕེན་པར་བྱེད་དེ། དྲང་སྲོང་ཆེན་པོ་དེ་ལྟར་སྦྱིན་བདག་བསོད་ནམས་འཕེན་ [284a.5]པར་བྱེད་ཅིང་སྦྱིན་པ་སྦྱིན་ནོ། །དེའི་འབྲས་བུ་ལ་ཡང་སྤྱོད་དོ། །དེ་བས་ན་ལེན་པས་སྦྱིན་པ་ཤེས་པར་བྱེད་དོ། །དྲང་སྲོང་ཆེན་པོ་བསོད་ནམས་ཞེས་བྱ་བ་ནི་འཇིག་རྟེན་ཕ་རོལ་ཏུ་རྫོགས་པར་བྱེད་པ་འམ། མཐུ་རྩལ་ཐོབ་པས་སྲུང་བ་སྟེ། དེ་བས་ན་བསོད་ནམས་ཞེས་བྱའོ། །འཇིག་རྟེན་ཕ་རོལ་ [284a.6]ནས་གཅིག་ནས་གཅིག་ཏུ་ལུས་དང་ལོངས་སྤྱོད་སྐྱེད་པར་བྱེད་པ་དེའི་ཕྱིར་འཇིག་རྟེན་ཕ་རོལ་གྱི་ཞེས་བྱའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་གི་སྦྱིན་པའི་རྣམ་པར་སྨིན་པ་ནི་བཀའ་སྩལ་ཏོ། །བཅོམ་ལྡན་འདས་རྣམ་པར་ [284a.7]ཤེས་པ་ལུས་སུ་ཇི་ལྟར་འཇུག །རྣམ་པར་ཤེས་པ་འདི་ཇི་ལྟར་ན་ལུས་ལ་ཆགས་པ་སྐྱེད། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་འདི་ལྟ་སྟེ། དཔེར་ན། རྒྱལ་པོ་གྲོང་ཁྱེར་གྱི་དབུས་ན་འདུག་ན་ཕ་རོལ་གྱི་དམག་ཚོགས་ཀྱིས་འཇིགས་པས་ཐོག་མ་ཉིད་དུ་འོབས་རྐོ་ཞིང་རྫས་ [284b] [284b.1]དང་། སྨན་དང་། འཕོང་གི་སློབ་དཔོན་དང་། སྐྱེས་བུ་དཔའ་བོ་སྡུད་པར་བྱེད་ཅིང་རྒྱལ་མཚན་བསྒྲེངས་ནས་གཞོན་ནུ་རྣམས་ལ་སྨྲའོ། །གླང་པོ་ཆེ་དང་བལ་གླང་མོ་ཆང་གིས་ར་རོ་བར་བྱེད་དོ། །རི་དང་ནགས་ན་གནས་པ་ཐམས་ཅད་དང་། ཞང་བློན་ལ་སོགས་པ་ཐམས་ཅད་སྡུད་དོ། ། [284b.2]དམག་མི་རྣམས་ཀྱང་ནོར་གྱིས་བསྡུས་ནས་འདི་སྐད་དུ་ཐམས་ཅད་ཀྱང་འཐབ་འདོད་པར་གྱིས་ཏེ། སོ་སོའི་ལག་ཆ་ཐོགས་ལ་རལ་གྲི་ཕྱུང་སྟེ་ཉིན་མཚན་མ་ཉལ་བར་འདུག་ཤིག་ཅེས་བསྒོ་ནས་ཕ་རོལ་གྱི་དམག་རྟ་དང་། གླང་པོ་ཆེ་དང་མིར་འདྲེས་པ་འོངས་པ་དང་། འདི་ལྟར་རྒྱལ་པོ་དེས་བདག་ [284b.3]གི་དམག་དབུགས་འབྱིན་ཅིང་ཕ་རོལ་གྱི་དཔུང་རང་གི་བསོད་ནམས་ཟད་པ་དང་། མཐུ་རྩལ་ཟད་པ་དང་། མཚོན་གྱིས་རྨས་པ་དང་། ཕམ་པར་མ་གྱུར་གྱི་བར་དུ་འཁོར་ལ་གླགས་མི་རྙེད་པར་སྲུང་བར་བྱེད་དོ། །དྲང་སྲོང་ཆེན་པོ་དེ་བཞིན་དུ་རྣམ་པར་ཤེས་པའི་རྒྱལ་པོ་ལུས་ཀྱི་གྲོང་ཁྱེར་དུ་སོང་ནས་ [284b.4]སྐྱེ་མཆེད་ཀྱི་གྲོང་ཁྱེར་ལ་མི་རྟག་པའི་ངོ་བོར་གནས་པར་མཐོང་ནས་དེའི་ཚེ་དད་པའི་འོབས་རྐོ་བར་བྱེད། བརྩོན་འགྲུས་ལ་གནས་ཏེ་འདུག་བཟོད་པའི་གོ་ཆ་གྱོན། བརྩམ་པ་ཆེན་པོ་རྩོམ། ཆོས་ཀྱི་གླང་པོ་ཆེ་རྒྱགས་པར་བྱེད། ཡེ་ཤེས་ཀྱི་རྟ་ལ་ཞོན་ཞིང་རྒྱུག་སྟེ། སྐྱེ་མཆེད་ཀྱི་གྲོང་ཁྱེར་ལ་འདི་ [284b.5]སྐད་ཅེས་བག་ཡོད་པར་ཅི་བྱ་བ་དུས་སུ་གྱིས་ཤིག །ཕ་རོལ་གྱི་དམག་ཚོགས་ཀྱི་དཔུང་ཐུབ་པར་དཀའ་བ་མི་རྟག་པའི་དམག་དཔག་ཏུ་མེད་པ་འོང་གིས། ད་མྱུར་དུ་སྦྱིན་པའི་གོ་ཆ་གྱོན་ཅིག །ཡེ་ཤེས་ཀྱི་མཚོན་ཐོགས་ཤིག །ངོ་ཚ་ཤེས་པ་དང་། ཁྲེལ་ཡོད་པའི་སྒྱོགས་སྦྱོར་ཅིག །ཚུལ་ [284b.6]ཁྲིམས་དང་། ཏིང་ངེ་འཛིན་དང་། གཏོང་བའི་སྲུངས་མ་ཞོག་ཤིག་ཅེས་སྐུལ་ལོ། །དེ་དག་ཀྱང་ཕ་རོལ་གྱི་དམག་ཉེ་བར་གནས་པ་དེ་དང་ཕན་ཚུན་མི་འཐུན་པས་འབྲོས་སོ། །དེ་དག་དང་མི་འཐུན་པས་སྐྱེ་མཆེད་ཀྱི་གྲོང་ཁྱེར་དེ་ཞིག་ནས་རྣམ་པར་ཤེས་པའི་རྒྱལ་པོ་དེ་ལུས་ཀྱི་གྲོང་ཁྱེར་བོར་ཏེ་དེ་ཡུལ་ལ་ཕྱོགས་ [284b.7]ནས་འབྲོས་སོ། །རྣམ་པར་ཤེས་པ་བྲོས་ནས་ལུས་དང་དབང་པོའི་ཚོགས་ཁམས་ཀྱི་སྦྲུལ་གྱིས་གང་བས་སྐྱེ་མཆེད་དྲུག་ཞིག་ནས་བདག་པོ་མེད་པ་ཡིད་བརྟན་དུ་མི་རུང་བའི་ལུས་ཀྱི་གྲོང་ཁྱེར་འཇིག་པར་འགྱུར་རོ། །དྲང་སྲོང་ཆེན་པོ་དེ་བཞིན་དུ་རྣམ་པར་ཤེས་པའི་རྒྱལ་པོས་ལུས་ཀྱི་གྲོང་ཁྱེར་བོར་ནས་ལུས་ [285a] [285a.1]གཞན་ཡོངས་སུ་འཛིན་པར་བྱེད་དེ། དེ་ལྟར་ན་རྣམ་པར་ཤེས་པ་འདི་རྒྱལ་པོ་ལྟར་བལྟའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པས་བསོད་ནམས་སུ་ཉེ་བར་མཆི་བའམ། བསོད་ནམས་མ་ [285a.2]ལགས་པར་ཉེ་བར་མཆི་བའམ། མི་གཡོ་བར་ཉེ་བར་མཆི་བའི་ལུས་ཇི་ལྟར་རབ་ཏུ་འཚལ། རྣམ་པར་ཤེས་པ་འདི་ཉིད་ཀྱིས་བདག་གི་ལུས་འདི་ཡོངས་སུ་བཏང་ངམ་མ་བཏང་སྙམ་དུ་ཇི་ལྟར་རབ་ཏུ་འཚལ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་འདི་ལྟ་སྟེ། དཔེར་ན་སྐྱེས་བུ་རྒྱ་ [285a.3]མཚོ་ཆེན་པོ་རྒལ་བར་འདོད་པས་གཟིངས་ཆེན་པོའི་སྟེང་དུ་འདུག་ནས་ཆུའི་ནང་དུ་ཞུགས་པ་དང་། རྒྱ་མཚོ་ཆེན་པོའི་ཆུ་རླབས་བརྒྱུད་མར་འབྱུང་བས་དཀྲུགས་པ། མཐོ་དམའ་ཅན། ཀུ་མ་བྷི་ར་མ་རུངས་པ་དང་། འཛིན་ཁྲི་དང་། ཆུ་སྲིན་བྱིས་པ་གསོད་དང་། སྦྲུལ་ཡོད་པའི་ཆུ་དེའི་ཚུ་རོལ་གྱི་ [285a.4]འགྲམ་ནས་རླུང་གིས་ཕུལ་ནས་འབད་མི་དགོས་ཤིང་གནོད་པ་མེད་ལ་བདེ་བར་གནས་ཏེ་ཕ་རོལ་གྱི་འགྲམ་དུ་ཕྱིན་པར་གྱུར་ཏོ། །ཆུ་བོའི་ཀླུང་རབ་ཏུ་འཇིགས་པ་དེ་ལས་ཐར་པས་གཟིངས་དེ་ལ་དགའ་བ་བསྐྱེད་ནས་གཟིངས་འདིས་བདག་མཚོ་ཆེན་པོ་འདི་ལས་རྒལ་ཏོ། །སྙམ་བསམས་ནས་གཟིངས་ [285a.5]དེ་ལ་ལན་གསུམ་བསྐོར་བ་བྱས་ཏེ་གཟིངས་དེ་ལ་རབ་ཏུ་མཆོད་པ་བྱས་སོ། །དྲང་སྲོང་ཆེན་པོ་དེ་བཞིན་དུ་གང་བསོད་ནམས་བྱས་པའི་སེམས་ཅན་འདི་ནས་ཤི་འཕོས་པ་དེའི་རྣམ་པར་ཤེས་པ་དེ་འདི་སྙམ་དུ་སེམས་ཏེ། ལུས་འདིས་བདག་བདེ་འགྲོ་ལྷ་དང་མིར་སྐྱེ་བ་ཡོངས་སུ་བཟུང་བ་དང་ལྡན་པས་ [285a.6]བདག་དོན་ཡོད་པར་མིའི་ལུས་ཐོབ་པར་གྱུར་ཏེ། ལུས་འདིས་བདག་ངན་སོང་དུ་འགྲོ་བའི་རྒྱ་མཚོ་ལས་རྒལ་ཏེ། འདིས་ལྷར་སྐྱེ་བའི་གནས་ཡོངས་སུ་བཟུང་ངོ་ཞེས་འདི་ལྟར་ལུས་དེ་ལ་དགའ་བ་བསྐྱེད་ནས་བདག་གིས་འདི་ལ་མཆོད་པ་ལེགས་པར་བྱའོ་སྙམ་མོ། །ཕྱིས་ལུས་དེ་གཟིངས་བཞིན་ [285a.7]དུ་བོར་ནས་འཇིག་རྟེན་ཕ་རོལ་ཏུ་འགྲོའོ། །གང་རང་གི་ལུས་ཀྱིས་བསོད་ནམས་མ་བྱས་པ་དེའི་རྣམ་པར་ཤེས་པ་དེ་ནི་ཇི་ལྟར་སྐྱེས་བུ་གཟིངས་རུལ་བས་མཚོ་ཆེན་པོ་དེའི་ནང་དུ་འབྱིང་ཞིང་ཞིག་སྟེ་མ་རུང་བར་གྱུར་ནས་སྐྱེས་བུ་དེ་ཡང་ཉམ་ཐག་སྟེ། གཟིངས་ཞིག་པ་དེས་འཇིགས་བཞིན་དུ་འགྲམ་དུ་ [285b] [285b.1]ཕྱིན་ནས་ཀྱང་སེང་གེ་དང་སྟག་ཡོད་པའི་འཇིགས་སར་ཕྱིན་པར་གྱུར་ནས་དེ་འདི་སྐད་ཅེས་ཟེར་རོ། །གཟིངས་རུལ་བས་ཉོན་མོངས་ཀྱི་སྟེང་དུ་ལོག་པར་སོང་ནས་མཚོ་ཆེན་པོ་ཆུའི་རླབས་ཀྱིས་དཀྲུགས་པ་སྦྲུལ་གྱིས་གློངས་པར་ཞུགས་སོ་ཞེས་གཟིངས་དེ་ལ་དེ་སྐད་སྨྲའོ། །དེ་བཞིན་དུ་རྣམ་པར་ཤེས་པ་ [285b.2]འདི་བསོད་ནམས་མ་ཡིན་པ་བྱས་པའི་ལུས་ལ་བརྟེན་ནས་ངན་སོང་གི་སར་སོང་ནས་ལུས་དེ་ལ་འདི་སྐད་ཟེར་རོ། །སྡིག་པའི་ལུས་འདིས་ཅི་ཞིག་རྙེད་ན་སྡིག་པ་ཅན་གྱི་ལུས་མངོན་པར་གྲུབ་ནས་བདག་ཁུར་ལྟ་བུས་ནོན་པར་གྱུར། བདག་ལུས་རུལ་པ་འདིའི་རྒྱུས་ངན་སོང་དུ་མངོན་པར་ཕྱོགས་ཤིང་ [285b.3]ཞུགས་ཏེ། མཆིལ་པས་ཉ་ཟིན་པ་བཞིན་ནོ་སྙམ་མོ། །དེ་ལྟར་རྣམ་པར་ཤེས་པ་དེ་ལེགས་པར་བྱས་པའི་བསོད་ནམས་ཀྱིས་གཟིངས་བཟང་པོ་བཞིན་དུ་འཁོར་བ་ལས་རྒལ་བར་བྱེད་དོ། །བསོད་ནམས་མ་ཡིན་པས་ནི་ལོག་པར་ལྟུང་བར་བྱེད་དོ། །དེ་ལྟར་ན་རྣམ་པར་ཤེས་པས་བསོད་ནམས་ [285b.4]སུ་ཉེ་བར་འགྲོ་བ་དང་། བསོད་ནམས་མ་ཡིན་པར་ཉེ་བར་འགྲོ་བའི་ལུས་རྣམ་པ་འདི་གཉིས་རབ་ཏུ་ཤེས་སོ། །ཡང་རྣམ་པར་ཤེས་པས་ལུས་འདི་ཡོངས་སུ་བཏང་ནས་གཞན་ལུས་གཉིས་པར་འགྲོ་ཞིང་ཉེ་བར་འགྲོའོ། །དེ་མངལ་ན་གནས་པའི་ཚེ་ཞག་བདུན་གྱི་བར་དུ་རྣམ་པར་ཤེས་པས་བདག་ [285b.5]འདི་ནས་ཤི་འཕོས་ནས་འདིར་འོངས་སོ། །ལས་འདི་བྱས་སོ། །བདག་གིས་ལས་འདི་བྱས་སོ་ཞེས་དེ་དྲན་ནས་དེ་ལེགས་པར་བྱས་པའི་ལས་ཀྱིས་དགའ་བཞིན་དུ་འགྲོའོ། །དེ་རུམ་ན་གནས་པ་ན་དེའི་མ་ལ་མཚན་མ་གསུམ་འབྱུང་ངོ་། །གསུམ་གང་ཞེ་ན། བཞིན་འཛུམ་ཞིང་དེའི་བཞིན་ [285b.6]རྙི་རྙི་པོ་མ་ཡིན་པ་དང་། བཞིན་ལྷའི་ཁ་དོག་ལྟ་བུར་འགྱུར་ཞིང་རྐང་པ་གཡས་པ་ལ་རབ་ཏུ་གནོན་ལ་དཀུ་གཡས་པ་ལ་ལན་དུ་མར་ཉུག་པ་དང་། དེ་གོས་དཀར་པོ་དང་རབ་ཏུ་མཛེས་པ་སྟེ། བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པ་མའི་མངལ་ན་གནས་པའི་ཚེ་མའི་གཟུགས་དེ་ལྟ་བུར་ [285b.7]བལྟའོ། །དྲང་སྲོང་ཆེན་པོ་གང་བསོད་ནམས་མ་ཡིན་པའི་རྣམ་པར་ཤེས་པས་སྐྱེས་པར་གྱུར་པ་དེ་ཞག་བདུན་གྱི་བར་དུ་བདག་དེ་ནས་ཤི་འཕོས་ནས་འདིར་སྐྱེས་སོ། །སྡིག་པའི་ལས་ནི་འདི་བྱས་སོ་ཞེས་དེ་ལྟ་བུ་དྲན་པར་འགྱུར་རོ། །དེ་དེ་ལྟ་བུ་དྲན་ནས་ཡིད་མི་བདེ་བ་སྐྱེའོ། །ཡིད་མི་བདེ་བ་སྐྱེས་པ་ [286a] [286a.1]དེའི་མ་ལ་ལྟས་མང་དུ་འབྱུང་བར་བལྟ་སྟེ། ལུས་དྲི་མི་ཞིམ་པར་འགྱུར་བ་དང་། ལུས་རིད་པར་འགྱུར་བ་དང་། ལུས་ལ་སེམས་པས་ཁྱབ་པར་འགྱུར་བ་དང་། ཡང་དང་ཡང་དུ་བཞིན་ཁྲོ་གཉེར་སྡུད་པར་འགྱུར་བ་དང་། གང་ཚུན་ཆད་སེམས་ཅན་དེ་མངལ་དུ་སྐྱེས་པར་གྱུར་པ་ [286a.2]དེ་ཚུན་ཆད་ཁྱིམ་དེར་ཉོན་མོངས་པ་དང་། གནོད་པ་དང་། ནད་མང་པོར་འགྱུར་རོ། །སེམས་ཅན་དེ་བཙས་པའི་ཚེ་ཡང་ན་ནི་མ་འཆི་བའི་དུས་བྱེད་པ་དང་ལྡན་པར་འགྱུར། ཡང་ན་ནི་བདག་ཉིད་མངལ་ན་གནས་པའི་ཚེ་མ་རུང་བར་འགྱུར་ཏེ། དྲང་སྲོང་ཆེན་པོ་དེ་ལྟ་བུ་ནི་བསོད་ནམས་མ་ [286a.3]ཡིན་པས་ཉེ་བར་འགྲོ་བའི་སེམས་ཅན་དུ་བལྟའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་རྣམ་པར་ཤེས་པ་དེ་ཐོག་མ་མངལ་དུ་སྐྱེས་པའི་ཚེ་ཅི་དྲན། ཅི་རྣམ་པར་ཤེས་པར་འགྱུར། བཅོམ་ལྡན་འདས་ཀྱིས་བཀའ་ [286a.4]སྩལ་པ། དྲང་སྲོང་ཆེན་པོ་འདི་ལ་རྣམ་པར་ཤེས་པ་ཐོག་མ་སྐྱེས་པའི་ཚེ་འདི་ལྟ་བུ་དྲན་པར་འགྱུར་ཏེ། ཀུན་དགའ་ར་བ་དང་། སྐྱེད་མོས་ཚལ་དང་། ནགས་ཚལ་དང་། རྫིང་དང་། ལུ་མ་དང་། གསེར་གྱི་གཞལ་མེད་ཁང་མཐོང་ཞིང་འཛམ་བུའི་གླིང་འདིར་སྐྱེ་བོ་མཛའ་བ་འདུ་ [286a.5]བས་གང་བ་དང་། མཆོག་ཏུ་ཡིད་དུ་འོང་བའི་བསོད་ནམས་བྱེད་པའི་སེམས་ཅན་གྱིས་གང་བར་མཐོང་ངོ་། །ལྷའི་ཤེས་པའི་སྣང་བས་ཚེ་རབས་བརྒྱ་སྟོང་དུ་མ་རྗེས་སུ་དྲན་ནོ། །རྗེས་སུ་དྲན་ཞིང་རྗེས་སུ་དྲན་ནས་ཀྱང་དགའ་བསྐྱེད་དེ། འདི་ནི་སྐྱེ་བ་ལྔ་བརྒྱར་བདག་གི་མར་གྱུར་ཏོ་ཞེས་དེ་ [286a.6]ལྟར་རབ་ཏུ་ཤེས་ཏེ། དེ་ལྟར་རྗེས་སུ་དྲན་ནས་མ་དེ་ལ་ཆགས་པར་མི་བྱེད་ཅིང་འདོད་ཆགས་དང་བྲལ་བ་སྐྱེད་དེ། ཀྱེ་མ་འོ་འདི་ལྟར་ཡང་སྐྱེ་བ་དང་འབྱུང་བ་ནི་སྡུག་བསྔལ་ཏེ་འཁོར་བས་ནི་ཆོག་གོ །ཡོངས་སུ་འཛིན་པ་འདིས་ཀྱང་ཆོག་གོ་སྙམ་མོ། །དེ་སྐད་ཅེས་བཀའ་སྩལ་པ་དང་། [286a.7]དྲང་སྲོང་ཆེན་པོ་རྒྱས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དེ་མི་ཆགས་ན་འཁོར་བ་ལས་འབྱུང་བར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཐམས་ཅད་དེ་ལྟ་བུ་ནི་མ་ཡིན་ཏེ། རྣམ་པར་ཤེས་པ་དེ་ནི་ [286b] [286b.1]གཟུགས་མེད་པ། བསྟན་ཏུ་མེད་པ། སྣང་བ་མེད་པའོ། །གང་རྣམ་པར་ཤེས་པའི་ཁམས་ཆགས་པ་མེད་པར་མ་གྱུར་པར་འཁོར་བར་མི་སྐྱེ་བ་དེ་ལྟ་བུའི་གནས་མེད་དོ། །བསོད་ནམས་སུ་ཉེ་བར་འགྲོ་བ་དང་། མི་གཡོ་བར་ཉེ་བར་འགྲོ་བ་དང་། མྱ་ངན་ལས་འདའ་བར་ཉེར་བར་འགྲོ་བ་ [286b.2]ཐམས་ཅད་ནི་དེ་ལྟར་འགྱུར་རོ། །དྲང་སྲོང་ཆེན་པོ་དེ་དག་ནི་འདི་ལྟར་བལྟ་སྟེ། རྣམ་པར་ཤེས་པ་གང་དེ་ལྟར་སེམས་པ་དེ་ནི་རྣམ་པར་ཤེས་པའི་ཤས་ཆེ་བར་བལྟ་སྟེ། ལུས་ཀྱི་ཤས་ཆེ་བས་ནི་མི་ནུས་སོ། །རྣམ་པར་ཤེས་པ་ནི་ཚོར་བར་བྱེད་པ། རྣམ་པར་ཤེས་པ་ནི་སེམས་པར་བྱེད་པ་སྟེ། [286b.3]དེའི་ཕྱིར་རྣམ་པར་ཤེས་པ་ཞེས་བྱའོ། །དྲང་སྲོང་ཆེན་པོ་ཁྱོད་ཀྱིས་རྣམ་པར་ཤེས་པ་དེ་དེ་ལྟར་ཁོང་དུ་ཆུད་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །དགྲ་རྣམས་ཐམས་ཅད་ཤིན་ཏུ་བསྲུང་། །ཉོན་མོངས་སོགས་པར་བྱེད་པའོ། ། [286b.4]ཤེས་དང་མི་ཤེས་ཤེས་པ་པོ། །ཤེས་རབ་དང་ནི་གཏི་མུག་ལྡན། །ལྟ་དང་ང་རྒྱལ་མ་རིག་དང་། །རྣམ་པར་ཤེས་པ་ཀུན་ལ་ཡོད། །རྣམ་པར་ཤེས་པ་མེད་པར་ནི། །གང་ཡང་འབྱུང་བར་མི་འགྱུར་རོ། །རྣམ་པར་ཤེས་པ་མེད་པར་ནི། །དེ་དག་འདུ་བར་མི་འགྱུར་ཏེ། །ཅིག་ཅར་ [286b.5]གྱུར་ན་འདུ་བར་འགྱུར། །གཅིག་མིན་འཁོར་ལོ་ཤིང་རྟ་བཞིན། །སྐྱེས་བུ་མཉམ་དུ་འདུ་བ་ནི། །ཉིད་དང་གཞན་དང་གཉི་གས་མིན། །གཅིག་གིས་མ་ཡིན་གཞན་གྱིས་མིན། །གླང་གཉིས་ཇི་ལྟ་བཞིན་དུའོ། །ཤིང་རྟ་སྣ་སྒྱུར་གཉིས་དང་ནི། །འཁོར་ལོ་གཉིས་སུ་ལྡན་པ་དང་། །ཐག་ [286b.6]པ་དག་གིས་བཅིངས་བྱས་པ། །ཤིང་རྟ་ཞེས་ནི་ཡོངས་སུ་གྲགས། །དེ་ལྟར་ལུས་ཀྱི་ཤིང་རྟ་ཡང་། །ཁམས་ཀྱི་འདུ་འཕྲོད་རྣམས་ལས་འབྱུང་། །དེ་ལས་དབང་པོ་ལྡན་གྱུར་ཏེ། །རྣམ་པར་ཤེས་པས་རབ་ཏུ་བསྟན། །གནད་དང་མཚམས་སུ་སྦྱོར་བ་དང་། །དེ་ལྟར་རྩ་དང་འཇིང་ཆུ་དང་། ། [286b.7]སྐྲ་དང་རུས་པ་སོ་དང་མགོ །སེན་མོ་ལྤགས་པས་མདོག་བྱས་དང་། །རྒྱུ་མ་གློ་བ་མཁལ་མ་དང་། །སྙིང་དང་མཆེར་བ་ཚིལ་བུ་དག །ཐམས་ཅད་མཉམ་དུ་འདུས་པ་ལས། །ལུས་ནི་ཤིན་ཏུ་གནས་པ་ཡིན། །དེ་ལ་ཁམས་ནི་ལུས་ཆེན་ཏེ། །སེམས་ལས་དངོས་པོ་ཀུན་འབྱུང་བས། ། [287a] [287a.1]དེ་ཕྱིར་རྣམ་པར་ཤེས་ཀྱིར་འདོད། །དེ་ནི་ཁ་ལོ་སྒྱུར་བར་འདོད། །དྲང་སྲོང་ཆེན་པོ་གཞན་ཡང་རྣམ་པར་ཤེས་པ་འདི་ནི་ཕྲ་བ། གཟུགས་མེད་པ། བསྟན་དུ་མེད་པ། མི་མངོན་པ་སྟེ། དེ་ནི་ཁ་དོག་དང་། དབྱིབས་དང་། གཟུགས་ཀྱི་དབང་པོ་མ་ཡིན་ནོ། །དབང་ [287a.2]པོ་རགས་པ་བོར་བའི་ཕྱིན་རྣམ་པར་ཤེས་པར་བལྟ་བ་གཞན་མེད་དེ། མིའི་སྙིང་འཕར་བ་དང་། འཇིགས་པ་གང་ལས་བྱུང་བ་དང་། རྣམ་པར་རྟོག་པ་དང་། རྣམ་པར་དཔྱོད་པ་གང་ཡིན་པ་དེ་ཐམས་ཅད་ནི་རྣམ་པར་ཤེས་པའི་ཤས་ཆེ་བ་ཡིན་གྱི། ལུས་ཀྱི་ཤས་ཆེ་བ་མ་ཡིན་ནོ། །དེ་ནས་ [287a.3]བཅོམ་ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ཀྱི་སྔོན་གྱི་རང་བཞིན་ཇི་ལྟར་བལྟ་བར་བགྱི། སེམས་ཅན་དམྱལ་བར་ཉེ་བར་མཆི་བ་དང་། {ཡི་དགས་,ཡི་དྭགས་}སུ་ཉེ་བར་མཆི་བ་དང་། དུད་འགྲོའི་སྐྱེ་གནས་སུ་ཉེ་བར་མཆི་བའི་རང་བཞིན་ཇི་ [287a.4]ལྟར་བལྟ་བར་བགྱི། ཇི་ལྟར་ལྷར་ཉེ་བར་མཆི་བ་དང་། ཇི་ལྟར་མིར་ཉེ་བར་མཆི་བ་དང་། དགེ་བའི་རྩ་བ་རྣམས་དང་། མི་དགེ་བའི་རྩ་བ་རྣམས་གང་ལགས་པར་བལྟ་བར་བགྱི། དགེ་བའི་རྩ་བ་གང་དག་གིས་ལྷ་དང་མིར་སྐྱེ་བར་འགྱུར། མི་དགེ་བའི་རྩ་བ་གང་དག་གིས་སེམས་ཅན་དམྱལ་བ་དང་། དུད་འགྲོ་དང་། {ཡི་དགས་,ཡི་དྭགས་} [287a.5]སུ་སྐྱེ་བར་འགྱུར་བ་འདི་དག་བཅོམ་ལྡན་འདས་ཀྱིས་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཁྱོད་སེམས་ཅན་རྣམས་ཀྱི་རང་བཞིན་དང་། དགེ་བའི་རྩ་བ་རྣམས་དང་། འཆི་འཕོ་དང་སྐྱེ་བ་ཉོན་ཅིག །ཡང་ཐམས་ཅད་མཁྱེན་པའི་ཡུལ་འདི་ནི་མངོན་ [287a.6]པར་ཤེས་པ་ལྔའི་ཡུལ་མ་ཡིན་ནོ། །འདི་ནི་ལྷ་རྣམས་དང་། ཚངས་པ་ལ་སོགས་པ་འོག་མིན་ལ་ཐུག་པ་རྣམས་ཀྱི་མ་ཡིན་ཏེ། འདི་ནི་ཉན་ཐོས་རྣམས་ཀྱི་སྐབས་ཀྱང་མ་ཡིན་ན་སེམས་ཅན་གཞན་རྣམས་ཀྱི་ལྟ་ག་ལ་ཡིན། དྲང་སྲོང་ཆེན་པོ་གང་དྲི་མ་གསུམ་སྤངས་པ། ཆོས་ཉིད་དང་པོ་ [287a.7]ཐོབ་པ། ངའི་བསྟན་པ་ལ་རྒྱུན་དུ་ཞུགས་པའི་རྣམ་པར་ཤེས་པའི་ཡུལ་ནི་འདི་ཡིན་ཏེ། དེ་ལྷ་དང་དྲང་སྲོང་ཐམས་ཅད་ཀྱི་ནི་མ་ཡིན་ནོ། །དེ་སྐད་ཅེས་བཀའ་སྩལ་པ་དང་། དྲང་སྲོང་ཆེན་པོ་རྒྱས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ད་ [287b] [287b.1]རྒས་འཁོགས་གཏུགས་པས་འབྲས་བུ་རྣམས་ལ་བཙལ་བའི་རྔོ་མི་ཐོག་གོ །བདག་ད་ཁུར་ཆེན་པོ་བསྐུར་བའི་རྔོ་མི་ཐོག་གོ །བདག་ད་བཅོམ་ལྡན་འདས་དང་། ཆོས་དང་། ཐ་བ་ཐམས་ཅད་སྤངས་པའི་འཕགས་པའི་དགེ་འདུན་ལ་སྐྱབས་སུ་མཆིའོ། །བདག་དེང་སླན་ཆད་སློབ་མ་ [287b.2]དང་བཅས། གཡོག་དང་བཅས་ཏེ་གསུམ་ལ་སྐྱབས་སུ་མཆིའོ། །བཅོམ་ལྡན་འདས་ལྷའི་འཇིག་རྟེན་ནས་ཤི་འཕོས་ནས་འགྲོ་བ་གང་དུ་འགྱུར་བ་དེ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། [287b.3]ལྷའི་འཇིག་རྟེན་དུ་སྐྱེ་བའི་རང་བཞིན་གང་ཡིན་པ་དང་། ལྟས་གང་ཡིན་པ་ངས་བཤད་དོ། །དྲང་སྲོང་ཆེན་པོ་འདི་ལ་མེ་ཏོག་དང་། སྤོས་དང་། ཕྲེང་བ་སྦྱིན་པ་དང་། བསྟེན་པ་དང་། བསྒོམས་པ་དང་། མང་དུ་བྱས་པ་དང་། དད་པ་དང་ལྡན་པའི་སྐྱེས་བུ་ནི་འཆི་བའི་དུས་བྱས་ན་ཕྲེང་ཐོགས་ [287b.4]ཀྱི་ལྷའི་ནང་དུ་སྐྱེའོ། །དྲང་སྲོང་ཆེན་པོ་དེ་འཆི་བའི་དུས་ཀྱི་ཚེ་དེའི་ལུས་དྲི་རབ་ཏུ་ཞིམ་པའི་སྤོས་ཀྱིས་བསྒོས་པའི་མེ་ཏོག་བཞིན་དུ་སྣང་ངོ་། །དྲང་སྲོང་ཆེན་པོ་དེ་ལ་མེ་ཏོག་གི་ཆར་མང་པོ་རབ་ཏུ་བབ་ནས་འཆི་བའི་དུས་བྱེད་པར་འགྱུར། དེའི་ལུས་ལ་མེ་ཏོག་ཁ་དོག་སྣ་ཚོགས་རབ་ཏུ་འཐོར་བར་ [287b.5]འགྱུར། དེའི་རྩ་ལག་སྙིང་དུ་སྡུག་པ་གང་ཡིན་པ་དེ་དག་ཀྱང་མེ་ཏོག་ཐོགས་ཤིང་མྱ་ངན་བྱེད་པར་འགྱུར། དེའི་བཞིན་གྱི་མདོག་སྣུམ་པར་འགྱུར། དེའི་མིག་ཧ་ཅང་བཙུམས་པ་ཡང་མ་ཡིན། ཧ་ཅང་ཕྱེ་བ་ཡང་མ་ཡིན་པར་འགྱུར། རྐང་ལག་ལེགས་པར་སྨྱང་ནས་འཆི་བའི་དུས་ [287b.6]བྱེད་པར་འགྱུར་ཏེ། དེ་འཆི་བའི་དུས་ཀྱི་ཚེ་འདི་ལྟ་བུའི་རྟགས་འདི་དག་འབྱུང་། འདི་ལྟ་བུའི་ལྟས་ཀྱང་མཐོང་བར་འགྱུར་ཏེ། ཁང་པ་བརྩེགས་པ་མེ་ཏོག་སྣ་ཚོགས་རབ་ཏུ་སྦྱངས་པ། མེ་ཏོག་ཐ་དད་པས་མཛེས་པར་བྱས་པ། བུད་མེད་བརྒྱ་སྟོང་གིས་བསྐོར་བ་མཐོང་ནས་རྩ་ལག་ [287b.7]རྣམས་ལ་འདི་སྐད་སྨྲ་སྟེ། བདག་གིས་རྨི་ལམ་ན་ཁང་པ་བརྩེགས་པ་ལྷའི་མེ་ཏོག་རྣམ་པ་སྣ་ཚོགས་དང་། མེ་ཏོག་གི་ལྡ་ལྡི་སྦྱངས་པ། ལྷའི་མེ་ཏོག་བཀྲམ་པ། བུད་མེད་བརྒྱ་སྟོང་གིས་བསྐོར་བ་དེ་ལྟ་བུ་མཐོང་ངོ་ཞེས་བདག་གི་རྩ་ལག་དེ་དག་ལ་སྨྲས་ནས། དེ་དག་གིས་ཀྱང་ [288a] [288a.1]ཕྲེང་ཐོགས་ཀྱི་ལྷའི་ནང་དུ་སྐྱེ་བར་རིག་གོ །དེ་འཆི་བའི་དུས་བྱས་ནས་ཕྲེང་ཐོགས་ཀྱི་ལྷའི་ནང་དུ་སྐྱེ་བ་ན་ཕ་དང་མ་འདུས་པ་མཐོང་ནས་སྐྱེ་བ་ཡོངས་སུ་འཛིན་ཏོ། །ཕྲེང་བ་ཐོགས་པ་དེ་དག་ཀྱང་གཉིས་ཀྱི་དབང་པོ་གཉིས་སྤྲོད་པར་འགྱུར་ཏེ། འདི་ལྟ་སྟེ་དཔེར་ན་འཛམ་ [288a.2]བུའི་གླིང་པའི་མི་བཞིན་ནོ། །དེ་ལ་དེ་དག་གི་རྣམ་པར་ཤེས་པ་ཕན་ཚུན་འདྲེས་ཤིང་དགའ་བ་ཙམ་གྱིས་ནོན་པས་འཇུག་པར་འགྱུར་གྱི་དེ་དག་ཁུ་བ་འབྱུང་བ་ནི་མ་ཡིན་ནོ། །དྲང་སྲོང་ཆེན་པོ་ལྷ་དེ་དག་ནི་ལྷ་མོས་མངལ་ན་ཞག་བདུན་དུ་འཛིན་ཏོ། །ཞག་བདུན་འདས་ནས་དཀུ་གཡས་པ་ནས་ [288a.3]འབྱུང་ངོ་། །དྲང་སྲོང་ཆེན་པོ་དེ་དེའི་མངལ་ནས་བྱུང་ནས་ལྷའི་མེ་ཏོག་དྲི་རབ་ཏུ་ཞིམ་པ་མཆོག་ཏུ་ཡིད་དུ་འོང་བ་སྣ་ཚོགས་པ་བརྒྱུས་པའི་ཕྲེང་བ་བྲང་ལས་འབྱུང་བར་འགྱུར་རོ། །དྲང་སྲོང་ཆེན་པོ་དེའི་ཕྲེང་བ་དྲི་རབ་ཏུ་ཞིམ་པའི་ངད་རླུང་གིས་བདས་ནས་ཕྱོགས་ཀུན་དུ་དཔག་ཚད་ཙམ་ [288a.4]དུ་འགྲོའོ། །ཕྲེང་བ་དེ་ལ་ཁ་དོག་བདུན་ཡོད་པ་འདི་ལྟ་སྟེ། དཀར་པོ་དང་། དམར་པོ་དང་། སེར་པོ་དང་། སྔོན་པོ་དང་། བཻ་དཱུརྱ་དང་། རྨ་དང་། པད་མ་རཱ་ག་ལས་ལྷག་པ་སྟེ། བལྟ་ན་སྡུག་པ་སྣ་ཚོགས་ཀྱི་ཕྲེང་བ་དེ་དག་དེ་མ་ཤི་བར་དུ་མ་རྙིས་པར་ཐོགས་པར་འགྱུར་ [288a.5]ཏེ། དེའི་ཕྱིར་དེ་ཕྲེང་ཐོགས་ཞེས་བྱའོ། །དྲང་སྲོང་ཆེན་པོ་ཕྲེང་ཐོགས་ཀྱི་ལྷ་དེ་དག་གི་གནས་དེ་ན་ཤིང་ལྗོན་པ་ཧ་ཅང་ཡང་མི་རིང་། ཧ་ཅང་ཡང་མི་ཐུང་བ་འབྲས་བུ་སྣ་ཚོགས་ཧ་ཅང་ཡང་མི་སྐྱུར། ཧ་ཅང་ཡང་མི་མངར་ལ་བདུད་རྩི་དང་འདྲ་བའི་རོ་བྲོ་བ་མང་པོ་བཟང་པོ་ལྷའི་རོ་བྲོ་བ་ཡན་ [288a.6]ལག་བརྒྱད་དང་ལྡན་པ་དག་ཡོད་དོ། །དྲང་སྲོང་ཆེན་པོ་ཤིང་དེ་དག་གི་འབྲས་བུ་དེ་དག་གི་ཚད་ནི་ཤིང་ཏོག་བིལ་བ་ཙམ་མོ། །དེ་དག་གི་ནང་ནས་ལྷ་རྣམས་གང་དང་གང་ཟ་བར་འདོད་པའི་ཟས་དེ་དང་དེ་དེ་དག་ལ་ཉེ་བར་གནས་ཏེ། ལྷ་དེ་དག་ནི་འབྲས་བུ་ཟ་བར་ལྟའི། ཁམ་གྱིས་ཟ་བའི་ [288a.7]ཟས་ཅན་ནི་མ་ཡིན་ནོ། །དྲང་སྲོང་ཆེན་པོ་ལྷ་དེ་དག་གིས་ཕྱོགས་ནི་རབ་ཏུ་རྣོ་བའི་ཚེར་མའི་བག་མེད་པ། མེ་ཏོག་གིས་མཛེས་པར་བྱས་པ་ནེའུ་གསིང་གིས་ཁེབས་པ། གསེར་དང་དངུལ་གྱི་ཕྲེང་བ་སྣ་ཚོགས་ཀྱིས་མཛེས་པར་བྱས་པ། ཡིད་ཙམ་སེར་བ་ལྟ་བུར་སྣང་བའོ། །དྲང་ [288b] [288b.1]སྲོང་ཆེན་པོ་གནས་དེ་ན་ཕྲེང་བ་ཐོགས་པའི་ལྷ་དེ་དག་ལྷའི་བུ་མོ་མཆོག་ཏུ་འབར་བའི་གོས་དང་རྒྱན་ཅན། སྐར་ཁུང་དང་། ཁ་ཁྱེར་དང་། པུ་ཤུའི་ངོས་ལ་རྒྱུ་བ། བདེ་བ་དང་ཡིད་བདེ་བ་མཆོག་དང་ལྡན་པ་དག་དང་གནས་སོ། །དེ་ན་དེ་དག་གི་ཚེའི་ཚད་ནི་ལོ་ཉིས་སྟོང་ཐུབ་བོ། །དེ་ན་ཚེ་ཟད་པའི་ [288b.2]ལྟས་འབྱུང་བ་ནི་ཤིང་གང་གི་དྲུང་ན་འདུག་འདུག་པའི་ཤིང་དེ། ལོ་མ་རྙིས། ཡལ་ག་འཕྱང་། མེ་ཏོག་དང་དྲི་ཡང་མེད་པར་འགྱུར་ཏེ། སེམས་ཅན་དེ་ཡང་ཤིང་དྲུང་དེ་ན་མི་དགའ་བ་རྙེད་པར་འགྱུར། དེའི་ཕྲེང་བ་སྔོན་མ་རྙིས་པ་དེ་ཡང་རྙེས་པར་འགྱུར། ལྷའི་འཇིག་རྟེན་གྱི་རླུང་བསིལ་ཞིང་བདེ་བར་ [288b.3]ལྡང་བ་དེ་ཡང་དྲོ་བར་ལྡང་བར་འགྱུར་བ་སྟེ། དེའི་གནས་དེ་དག་མཐོང་ནས་ལྷའི་བུ་མོ་དེ་དག་ང་རོ་གཅིག་ཏུ་སྙིང་རྗེ་རྗེ་སྐད་སྨྲེ་སྔགས་འདོན་ཏེ། སེམས་ཅན་དེ་ཡང་མཐོ་རིས་ཀྱི་གྲོང་ཁྱེར་ལྷའི་ཤིང་དང་། མེ་ཏོག་དང་། འབྲས་བུས་མཛེས་པར་བྱས་པ་དང་། ལྷའི་བུ་མོའི་ཚོགས་དང་ [288b.4]འདྲེ་བ་ཡོངས་སུ་བཏང་ནས་བསོད་ནམས་ཟད་པར་འགྱུར་བ་འདི་ནི་མཐོ་རིས་ཀྱི་ཉེས་པའོ། །དྲང་སྲོང་ཆེན་པོ་དེ་ནས་ལྷའི་བུ་མོ་དེ་དག་གིས་དེའི་མཐའ་སྐོར་ནས་ཉམ་ཐག་པ་ཆེན་པོའི་སྒྲར་ངུ་སྟེ། ཀྱི་ཧུད་མི་རྟག་པ་འདི་ནི་སྙིང་རྗེ་མེད་པའོ། །འདི་ལྟར་སྙིང་ལ་དགའ་བ་སྐྱེས་ཤིང་འཁོད་ [288b.5]འཁོད་པ་ལས་མི་འདོད་བཞིན་དུ་དབང་མེད་པར་མཐོ་རིས་ནས་ལྟུང་ངམ། ཨེ་མའོ་ལྷ་གཞོན་ནུ་ད་མྱུར་དུ་མིའི་འཇིག་རྟེན་དུ་མིར་སྐྱེ་བར་གྱུར་ཅིག་ཅེས་མྱ་ངན་བྱེད་པ་ན་རིམས་དྲག་པོས་བཏབ་ནས་དེ་རིམས་དྲག་པོས་ནོན་ཏེ། དེའི་ལུས་གཅིག་ཏུ་འབར་བར་འགྱུར་རོ། །ལུས་འབར་བས་གནས་ [288b.6]དེ་ནས་འཆི་འཕོ་བར་འགྱུར་ཏེ། དེའི་འབར་བ་དེ་ཁར་ཞི་བར་འགྱུར་རོ། །དེ་ནས་ཤི་འཕོས་ནས་ཕ་དང་མ་འདུས་པ་མཐོང་བས་སྐྱེ་བ་ཡོངས་སུ་འཛིན་ཏོ། །དྲང་སྲོང་ཆེན་པོ་ཕྲེང་ཐོགས་སུ་ཉེ་བར་འགྲོ་བའི་ལྷའི་བུ་དེ་འདི་ལྟར་སྐྱེ་བར་བལྟ་སྟེ། མའི་མངལ་ན་གནས་པའི་ཚེ་ལྟས་ [288b.7]འབྱུང་བ་ནི་མངལ་ན་གནས་པ་ན་མེ་ཏོག་དང་། སྤོས་དང་། ཕྲེང་བ་འདོད་པ་དང་། འབྲས་བུ་སྣ་ཚོགས་འདོད་པ་དང་། ནགས་ཚལ་སྣ་ཚོགས་སྟུག་པོ་ཉམས་དགའ་བ་འདོད་པར་འགྱུར། བདེ་བ་ཐམས་ཅད་དང་ལྡན་པར་འགྱུར། ལུས་ལ་ན་བ་མེད་པར་མངལ་ན་འཛིན་པར་འགྱུར། [289a] [289a.1]རྨི་ལམ་ན་བསོད་ནམས་སྣ་ཚོགས་ཀྱི་ཚོང་འདུས་མེ་ཏོག་གི་ཕྲེང་བ་སྤྱངས་པའི་གྲོང་ཁྱེར་མཐོང་སྟེ། འདི་དག་ནི་དེའི་མས་ལྟས་མཐོང་བའོ། །དྲང་སྲོང་ཆེན་པོ་གཞན་ཡང་ལྷ་གཞོན་ནུ་དེ་བཙས་ནས་ཕྲེང་བ་ཐོགས་པའི་ལྷ་ལས་ཤི་འཕོས་པས་ཤིན་ཏུ་དགའ་བ་ཆེན་པོ་ [289a.2]སྐྱེའོ། །གོས་དཀར་པོ་ལ་དགའ་བར་འགྱུར། མཛེས་པ་དང་ལྡན་པར་འགྱུར། ཤེས་པ་དང་ལྡན་པར་འགྱུར། འདོད་པ་ལ་རབ་ཏུ་ཆགས་ཤིང་འགྲོ་བ་དང་། རྒྱུ་བ་འཕྱར་བག་ཅན་དང་། དུས་སྟོན་དང་། ལྟད་མོ་དང་། ཕྲ་བའི་གོས་ལ་མངོན་པར་དགའ་བར་འགྱུར། ཀུན་དགའི་ར་བ་ལ་ [289a.3]དགའ་བ་དང་། ཕ་རོལ་འབྱོར་པ་མཐོང་ན་འདོད་པ་སྟེ། དྲང་སྲོང་ཆེན་པོ་འདི་དག་ནི་ཕྲེང་ཐོགས་ཀྱི་ལྷ་ལས་མིར་སྐྱེ་བའི་ལྟས་སུ་བལྟ་བ་དག་གོ། །།བམ་པོ་གཉིས་པ་སྟེ་ཐ་མ། དྲང་སྲོང་ཆེན་པོ་གཞན་ཡང་རྒྱལ་ཆེན་བཞིའི་རིས་ཀྱི་ལྷར་སྐྱེ་བའི་ལྟས་དང་། འཆི་འཕོའི་ལྟས་སུ་ལྟ་བ་ནི་ [289a.4]དྲང་སྲོང་ཆེན་པོ་འདི་ལ་དམན་པའམ། མགོན་མེད་པ་ལ་ཟས་བཟང་པོ་དང་། ན་བའི་གསོས་སྨན་དང་། ཀུན་འཐུང་བའི་ཆུ་གྲང་མོ་དང་། ཆུ་མིག་དང་། མཚེའུ་དང་། ལྟེང་ཀ་དང་། ལུ་མ་དང་། རྫིང་བུ་དང་། ཁྲོན་ཆུ་བྱིན་ནས། དད་པ་དང་། ཡིད་རབ་ཏུ་དགའ་ཞིང་འཆི་བའི་དུས་ [289a.5]ཀྱི་ཚེ་ཉོན་མོངས་པའི་འབར་བ་མེད་པའི་ལུས་སུ་འགྱུར། དེའི་ལུས་རིད་པར་མི་འགྱུར། མདོག་ངན་པར་མི་འགྱུར་རྔུལ་དང་དྲི་མ་ཆགས་པར་མི་འགྱུར། དེའི་ལུས་ལ་ཉམ་ང་བའི་ཚོར་བ་མི་འབྱུང་། སྐད་དམན་པ་དང་། རྩ་ལག་དང་བྲལ་ཞིང་གདུང་བ་དང་ལྡན་པར་མི་འགྱུར། དེ་བཀྲེས་པ་ [289a.6]དང་། སྐོམ་པས་ཉན་པར་མི་འགྱུར། དེའི་ལུས་བསྐུམ་པ་དང་། སྨྱང་བ་ལ་སོགས་པས་སྡུག་བསྔལ་བར་མི་འགྱུར། བཤང་གཅི་འབྱུང་བར་མི་འགྱུར། ཡུལ་ལས་ཡོངས་སུ་ཉམས་པས་སྒྱིད་ལུག་པར་མི་འགྱུར། དེའི་དབང་པོ་ཞུམ་པར་མི་འགྱུར་བ་སྟེ། དེ་ལྟ་བུ་དེ་ནི་མཐོ་ [289a.7]རིས་ཀྱི་བདེ་བ་དང་ལྡན་ཞིང་འཆི་བའི་དུས་བྱེད་པར་འགྱུར་རོ། །དེའི་ལུས་ཡོངས་སུ་བཏང་ནས་རྣམ་པར་ཤེས་པ་དེ་རབ་ཏུ་དགའ་བར་རྒྱལ་ཆེན་བཞིའི་རིས་ཀྱི་ལྷའི་ནང་དུ་སྐྱེད་མོས་ཚལ་དང་། ནགས་ཚལ་སྟུག་པོའི་ནང་དུ་གནས་པར་འགྱུར་རོ། །དེ་འཆི་ཁར་ལྷའི་རིས་དེ་མཐོང་ནས་བཞིན་ [289b] [289b.1]མེ་ཏོག་པད་མ་ལྟ་བུར་འགྱུར། དེའི་ཁ་ནས་དྲི་ཞིམ་པོ་འབྱུང་བར་འགྱུར། དེ་ལ་མེ་ཏོག་སྣ་ཚོགས་དྲི་དང་ལྡན་པའི་རླུང་རྗེས་སུ་འཐུན་པ་ལྡང་བར་འགྱུར། དེ་ཤི་ནས་ཀྱང་རྒྱལ་ཆེན་བཞིའི་རིས་ཀྱི་ལྷའི་ནང་ན་ཕ་མ་འདུས་ནས་སྐྱེད་མོས་ཚལ་ན་རྩེ་ཞིང་འདོད་པ་མྱོང་བས་རྒྱགས་དྲེགས་ནས་ [289b.2]ལག་པ་གཡས་པས་ལྷ་མོའི་ལྟེ་བ་ལ་རེག་པར་མཐོང་ནས། དེའི་རྐྱེན་གྱིས་རྣམ་པར་ཤེས་པ་ལྷ་མོ་དེའི་པང་པར་སྐྱེ་བ་ཡོངས་སུ་འཛིན་ཏོ། །དེ་ཞག་བདུན་འདས་ནས་དྲི་མ་མེད་པའི་རྣ་ཆ་འགུལ་བའི་མགོ་དང་ལྡན་པའི་གཞོན་ནུར་མངོན་པར་འགྲུབ་སྟེ། དགོད་པ་དང་། གར་བྱེད་པ་དང་། [289b.3]གླུ་ལེན་པ་དང་། འདོད་པའི་ལོངས་སྤྱོད་སྐྱེད་ནུས་སོ། །དྲང་སྲོང་ཆེན་པོ་དེ་ལ་རྒྱལ་ཆེན་བཞིའི་ལྷའི་རིས་ཀྱིས་ཕྱོགས་ནི་དངུལ་དང་ལྡོང་རོས་རྣམ་པར་བཀྲ་བ་སྣ་ཚོགས་ཀྱིས་སྤྲས་ཤིང་མཛེས་པར་བྱས་པ། ལྷ་མོ་བརྒྱ་སྟོང་གིས་ལེགས་པར་བརྒྱན་པ། ལྷའི་གནས་མཐོ་བ། རང་བཞིན་གྱིས་ [289b.4]མཛེས་པ། རེག་ན་བདེ་བའི་རླུང་ལྡང་བའོ། །དྲང་སྲོང་ཆེན་པོ་རྒྱལ་ཆེན་བཞིའི་རིས་ཀྱི་ལྷ་དེ་དག་གི་སྐྱེད་མོས་ཚལ་ནི་དཔག་ཚད་བརྒྱད་ཁྲི་བཞི་སྟོང་གྲུ་བཞི་ལྷམ་པ། ནོར་བུའི་སྒྲོན་མས་སྣང་བར་བྱས་པ། ཤིང་གི་ཡལ་ག་དང་རྩེ་མོ་ལ་དཔག་བསམ་གྱི་ཤིང་གི་རས་བཅོས་བུ་དང་། རྒྱ་དར་ [289b.5]ལའི་ལྡ་ལྡི་སྤྱངས་པ། ནགས་ཚལ་གྱི་བར་འཇམ་ཞིང་ཡིད་དུ་འོང་བ། ཁྱིམ་གྱི་བར་ན་རྟག་ཏུ་པི་བང་དང་། གླིང་བ་དང་། རྫ་རྔ་དང་། ཁར་རྔའི་སྒྲ་འབྱུང་བའོ། །དྲང་སྲོང་ཆེན་པོ་ལྷའི་གནས་ན་གནས་པ་དེ་དག་ཟས་ཁམ་གྱི་ཟ་བ་ཅན་ཏེ། དྲི་རབ་ཏུ་ཞིམ་པའི་དྲི་དང་། ཁ་དོག་དང་། རོ་དང་། [289b.6]རེག་པ་དང་། ཡོན་ཏན་ཕུན་སུམ་ཚོགས་པར་རིག་པར་བྱའོ། །དེ་དག་རེ་རེ་ལ་ཡང་གསེར་གཞོང་གཉིས་གཉིས་ཡོད་དེ་དེ་ན་གང་ཟས་གང་འདོད་པ་དེ་ནི་དེའི་ཕུན་སུམ་ཚོགས་པར་གཞོང་པ་དེ་ལས་འགྲུབ་པར་འགྱུར་རོ། །ལྷའི་མེ་ཏོག་གི་ཁུ་བ་རོ་དང་ལྡན་པ་མངོན་པར་འགྲུབ་སྟེ། དེ་ནི་མེ་ཏོག་ [289b.7]གི་ཆང་ཞེས་བྱའོ། །དྲང་སྲོང་ཆེན་པོ་ཆང་དེ་ནི་དྲི་རབ་ཏུ་ཞིམ་པ། མཆོག་ཏུ་བདེ་བ་བསིལ་བ། དྲིས་ཀྱང་ར་རོ་བ་མངོན་པར་འགྲུབ་ན་འཐུངས་པས་ལྟ་ཅི་སྨོས་ཏེ། དེ་ན་ལྷ་གཞོན་ནུ་ར་རོ་བར་འགྱུར་རོ། །དྲང་སྲོང་ཆེན་པོ་རྒྱལ་ཆེན་བཞིའི་རིས་ཀྱི་ལྷ་དེ་དག་གི་གཞལ་མེད་ཁང་ནི་མཛེས་བྱེད་ཅེས་ [290a] [290a.1]བྱ་སྟེ། རྟག་ཏུ་མེ་ཏོག་རྒྱས་པ་འཁྲི་ཤིང་གིས་མཛེས་པར་བྱས་པ། གསེར་དང་། དངུལ་དང་། རྡོ་རྗེ་འབར་བའི་ཀ་བ་བརྒྱ་སྟོང་གིས་ཕྱོགས་ཕྱོགས་ཤིན་ཏུ་བརྟན་པ། ལྷའི་མལ་ཆ་དང་། གདིང་བ་བཏིང་བས་ས་ཕྱོགས་ཤིན་ཏུ་རྣམ་པར་ཕྱེ་བ། ལྷ་མོ་བཟོར་བྱས་ [290a.2]པ་སྣ་ཚོགས་ཀྱིས་བརྒྱན་པའི་ཁྱད་པར་དང་ལྡན་པ། སྟེག་ཅིང་འཇོ་བའི་རྗེས་སུ་ཆགས་པ། ལྷའི་གོས་འབར་ཞིང་རྣམ་པར་མཛེས་པས་སྤུད་སྤུད་པ། ཀ་ལ་པིང་ཀ་དང་། བུང་བའི་ཚོགས་ཀྱི་སྒྲ་ལྟ་བུ་དང་ལྡན་པ། གཟུགས་རབ་ཏུ་ཆེ་ཞིང་ཤིན་ཏུ་གཞོན་ཤ་ཆགས་པ། གླུ་དང་། [290a.3]གར་དང་། སིལ་སྙན་དང་། འཛུམ་ཞིང་རྩེ་བས་རྒྱགས་པའི་ཤས་ཆེ་ལ་རབ་ཏུ་སྒེག་པ་ཤ་སྟག་གིས་བསྐོར་ཅིང་གང་བ་སྟེ། གནས་དེའི་ཀ་བ་ནི་གསེར་ཆུ་དང་། དངུལ་ཆུས་རྣམ་པར་བྲིས་པ། དར་གྱི་རྒྱལ་མཚན་སྦྱངས་པ། རྒྱལ་མཚན་དང་བ་དན་བསྒྲེང་བའོ། །གཞལ་མེད་ [290a.4]ཁང་དེ་དག་ན་འདི་ལྟ་སྟེ། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། ལུས་ངན་པོ་དང་རྒྱལ་པོ་ཆེན་པོ་བཞི་པོ་དེ་དག་ལྷའི་འདོད་པ་དང་། བདེ་བ་དང་། རྩེ་བ་མྱོང་ཞིང་རབ་ཏུ་དགའ་སྟེ། དགའ་བ་དང་བདེ་བ་དང་ལྡན་ལ། གླུ་དང་། གར་དང་། སིལ་ [290a.5]སྙན་དང་། ལྷའི་ཁ་ཟས་ཟ་བས་དབང་པོ་ཚིམ་ཞིང་བདེ་བ་ཐམས་ཅད་དང་ལྡན་པར་གནས་སོ། །དྲང་སྲོང་ཆེན་པོ་རྒྱལ་ཆེན་བཞིའི་རིས་ཀྱི་ལྷའི་རིས་དེ་ན་ལྷ་གཞོན་ནུ་དེ་དག་ལག་པ་རིང་ཞིང་ཤ་རྒྱས་པ། གླང་པོ་རྒྱགས་པའི་ཚུལ་དུ་འགྲོ་བ། སྐྱེས་བུ་སྟོང་གི་སྟོབས་དང་རྩལ་ཡོད་པ། [290a.6]ལྷའི་ལུས་ཤིན་ཏུ་འཇམ་པ་ཤ་སྟག་གོ །དེ་དག་གི་དྲི་ཆང་གི་ཤས་ཆེ་བས་དཔག་ཚད་ཁོར་ཡུག་ཆང་དྲིར་ཕྱོགས་པར་བྱེད་དོ། །ལྷ་དེ་དག་གི་ཚེའི་ཚད་ནི་ལོ་བཞི་སྟོང་ཐུབ་སྟེ། བར་མ་དོར་འཆི་བའི་དུས་མི་བྱེད་དེ། དེ་དག་ཐམས་ཅད་བདེ་བ་དང་། ཡིད་བདེ་བ་དང་། དགའ་ [290a.7]བར་གནས་སོ། །ལྷའི་རིས་དེ་ན་སྐལ་བ་བཟང་པོ་ཅན་གསེར་དྲི་མ་མེད་པའི་འོད་ཀྱིས་བརྒྱན་པ་དག་ནགས་ཀྱི་ཕྲེང་བས་མཛེས་པར་བརྒྱན་པ། དགའ་བ་སྐྱེད་པ་ལ་སོགས་པའི་སྐྱེད་མོས་ཚལ་བཟང་པོ་དྲི་ང་བ་མེད་པ་རྣམས་ནི་སྙིང་དགའ་བ་དང་ལྡན་པར་གནས་སོ། །དེ་དག་དེ་ན་ [290b] [290b.1]གནས་པ་ན་མེ་ཏོག་སིལ་མ་བཀྲམ་ཞིང་ནོར་བུ་དང་གསེར་གྱིས་མཛེས་པར་བྱས་པ། ཤིན་ཏུ་རྣམ་པར་ཕྱེ་བ། གྲུ་བཞི་པ། ནོར་བུའི་ཐེམ་སྐས་ཀྱིས་བརྒྱན་པ། ལྷའི་བུ་མོ་བརྒྱ་སྟོང་གླུ་སྙན་པ་ལེན་པ། ནོར་བུའི་སྣོད་རྣམས་བདག་ཉིད་སྒྲ་འབྱིན་པའི་རྗེས་སུ་ཆགས་པ་ན་དེ་དག་གནས་ [290b.2]གནས་པ་ལས་དེ་དག་བསོད་ནམས་ཟད་པས་ཚེ་ཟད་པར་འགྱུར་བའི་ལྟས་གཉིས་འབྱུང་སྟེ། དེ་ཐོག་མར་གྲིབ་མ་མི་སྣང་བར་འགྱུར་ཞིང་མེ་ཏོག་ལས་དྲི་མི་འབྱུང་བ་དང་། ལྷའི་བུ་མོ་དང་ཀུན་སྨྲ་བའི་སྒྲ་སྙན་པ་མི་ཐོས་པའོ། །ཡང་ལྷ་གཞོན་ནུ་དེ་ལྷ་ཡུལ་བའི་ལྷའི་གནས་རྣམས་སུ་འདུ་ཞིང་ [290b.3]མི་འགྲོ་སྟེ། ལྷའི་གནས་ལྷའི་བུ་མོ་བརྒྱ་སྟོང་གིས་གང་བ། ཡལ་གའི་རྩེ་མོ་ལ་དོ་ཤལ་དང་། སེ་མོ་དོ་དང་མེ་ཏོག་གི་ཕྲེང་བ་སྤྱངས་པ། ནགས་ཚལ་གྱི་བར་གྱི་བྱ་ཁུ་བྱུག་རྒྱགས་པའི་སྒྲ་འབྱིན་པ་དེ་དག་ན་ལྷའི་བུ་མོའི་ཚོགས་ཏུ་ཞིང་གོས་དྲི་མ་ཅན་གྱོན་ནས་སའི་སྟེང་ན་འགྲེ་ལྡོག་ཅིང་ [290b.4]སྙིང་རྗེ་རྗེ་ལྟར་ལྟ་སྟེ། སའི་སྟེང་ན་འགྲེ་ལྡོག་པས་མེ་ཏོག་གི་བླ་རེས་བརྒྱན་པའི་ས་ཕྱོགས་དག་ན་ཡང་དགའ་བ་མི་རྙེད་དེ། དེ་དག་གི་ལུས་ལས་རྔུལ་འབྱུང་ཞིང་དེ་དག་མིག་མི་འཛུམས་པ་ལས་མིག་འཛུམ་པར་འགྱུར་ཏེ། ཉ་ཆུའི་གནས་ནས་བྱུང་ནས་ཉི་མའི་འོད་ཟེར་གྱིས་གདུངས་པ་བཞིན་ [290b.5]དུ་ཕན་ཚུན་དུ་འགྲེ་ལྡོག་ཅིང་གཅིག་པུ་ས་ལ་གནས་པར་མཐོང་ནས་ལྷའི་བུ་མོ་དེ་དག་གིས་བསྐོར་ཏེ། སྙིང་རྗེ་རྗེ་ལྟར་ལྟ་ཞིང་སྐད་འཐུན་པར་ངུ་སྟེ། འདི་སྐད་ཅེས་ཀྱི་ཧུད་རེ་སྡུག །ཀྱི་ཧུད་རེ་སྡུག །ཀྱི་ཧུད་གཞོན་ནུའི་མཆོག་དེ་ཕྱོགས་གང་དུ་སོང་། ལུས་ཆེ་ལ་རྒྱན་སྣ་ཚོགས་ཀྱིས་ [290b.6]བརྒྱན་པ། འགྲམ་པ་ཆེ་ལ་མཛེས་པ་བྲང་ཤིན་ཏུ་རྒྱས་པ། སྐྱེད་མོས་ཚལ་སྣ་ཚོགས་ཀྱི་བར་ན་རྒྱུ་བ་དེས་བདག་ཅག་བོར་ཞིང་ལྷ་ཡུལ་བའི་ལྷའི་གནས་ཡིད་དུ་འོང་བ་ཡང་བོར་ཏེ་དགར་འགྲོ་ཞེས་འཛེར་ཏོ། །དེ་ནས་ལྷའི་བུ་མོ་དེ་དག་གིས་ཚིགས་སུ་བཅད་པ་འདི་དག་སྨྲས་སོ། །རྣམ་པ་སྣ་ [290b.7]ཚོགས་ལེགས་པར་བཀོད། །ལྷ་ཡི་ནགས་ཀྱིས་ཤིན་ཏུ་བརྒྱན། །ཟས་དང་དུས་སྟོན་གང་གྱུར་པ། །རྒྱལ་པོ་ཆེན་པོས་གནས་བྱས་པ། །ཀ་བ་བཞི་དང་རབ་ལྡན་པ། །བསོད་ནམས་ཀྱི་ནི་ཚོང་འདུས་མཆོག །ལྷ་ཡི་བུད་མེད་གང་བས་དགའ། །མེ་ཏོག་འབྱོར་པ་ཡིད་འཕྲོག་ [291a] [291a.1]པ། །བོར་ནས་མི་རྟག་པ་འདི་ཡིས། །སྡུག་པ་དག་ནི་ཟིན་ཏེ་སོང་། །དེ་ལྟར་ལྷའི་བུ་བུ་མོ་དེ་དག་གིས་བསྐོར་ཏེ། མཆི་མ་ཟག་སྐད་འགགས་ཤིང་ཐག་རིང་པོ་ཉིད་ནས་ལག་པ་གཡས་པ་བརྐྱང་སྟེ་མེ་ཏོག་གཏོར་ནས་འདི་སྐད་ཅེས་ཀྱེ་མའོ་སྡུག་པ། ལེགས་ [291a.2]པར་བྱེད་པའི་འཇིག་རྟེན་མིའི་འཇིག་རྟེན་དུ་སོང་སྟེ། དད་པའི་གཤོལ་གྱིས་བསོད་ནམས་ཀྱི་ཞིང་རྨེད་པར་གྱུར་ཅིག་ཅེས་འཛེར་ཏོ། །དེ་ལྟར་སེམས་པས་ཀུན་དུ་ཁྱབ་པའི་ལུས་ཡོངས་སུ་བཏང་བར་བདག་གིས་རིག་ནས་དེ་རིམས་དྲག་པོ་མི་བཟད་པས་བཏབ་བོ། །རིམས་དྲག་ [291a.3]པོ་དེས་ལུས་བཤིག་ནས་དེའི་ལུས་མར་གྱི་ཐིགས་པ་རྡོ་ཚན་ལ་ཐིམ་པ་བཞིན་ནོ། །དེའི་ལུས་ཡོངས་སུ་རྙིས་ནས་འདྲུད་པ་ཞེས་བྱ་བའི་རླུང་གིས་རབ་ཏུ་བདས་ཏེ། རླུང་དེས་དེའི་ལུས་སྟོང་དུ་གཏོར་ནས་ཕྱེ་མ་ཞིབ་མོ་བཞིན་དུ་ནམ་མཁའི་དཀྱིལ་ནས་ལྷུང་ངོ་། །དེ་ལྟར་ལྷུང་ནས་མིའི་སྲིད་པར་ [291a.4]སྐྱེ་བ་ཡོངས་སུ་ལེན་ཏེ། ཕ་མ་འདུས་པ་མཐོང་ནས་རབ་ཏུ་དགའ་བའི་ཡིད་ཀྱིས་མའི་མངལ་དུ་སྐྱེའོ། །དེ་ཐོག་མར་སྐྱེས་ཤིང་མའི་མངལ་ན་གནས་པ་ན་མཚན་མ་འབྱུང་བ་ནི་དེའི་མ་དེ་ཁ་ཟས་ལ་རབ་ཏུ་དགའ་བར་འགྱུར། གོས་དམར་པོ་འཚེར་བ་ལ་མངོན་པར་དགའ་བར་འགྱུར། [291a.5]སྐྱེ་བོ་སྣ་ཚོགས་ཕལ་པོ་ཆེ་ལ་ལྟ་འདོད་ཅིང་རྩ་ལག་དང་མཛའ་བ་ཙམ་དུ་འདུ་ཤེས་སྐྱེད་པར་འགྱུར། དེ་དེའི་མངལ་དུ་ཞུགས་ནས་མངལ་ན་ཚོར་བ་སྐྱེ་བར་མི་འགྱུར། ཁ་ཆུ་ཟག་པ་དང་། ཆུ་སེར་འབྱུང་བར་མི་འགྱུར། དེའི་ལུས་ན་བར་མི་འགྱུར། དེ་དེའི་མངལ་ན་ལག་པ་དང་། [291a.6]རྐང་པ་དང་། མགོ་ཤིན་ཏུ་ཡོངས་སུ་རྫོགས་པར་གྲུབ་ནས། དེ་བཙས་པ་དང་གཟི་བརྗིད་དང་ལྡན་ཞིང་མཐོང་ན་དགའ་བ་རབ་ཏུ་འཕེལ་བར་འགྱུར། རྒྱལ་ཆེན་བཞིའི་རིས་ཀྱི་ལྷའི་གཏམ་ཐོས་ན་དགའ་བ་སྐྱེ་བར་འགྱུར། སྦྱིན་པ་ལ་དགའ་བ་དང་། ཆང་ལ་སྲེད་པ་དང་། ཤིན་ [291a.7]ཏུ་དྲི་ཞིམ་པའི་ཆ་བྱད་འཛིན་ཅིང་སྐྱེད་མོས་ཚལ་ལ་དགའ་བར་འགྱུར། བུད་མེད་ལ་དབང་པོ་མངོན་པར་རབ་ཏུ་ཆགས་པར་འགྱུར། ཡང་དང་ཡང་ཟས་འདོད་པར་འགྱུར། གླུ་དང་། གར་དང་། སིལ་སྙན་གྱི་རྗེས་སུ་འཇུག་པར་འགྱུར། མདོག་སྣུམ་ཞིང་སྔོ་སངས་པོར་འགྱུར། [291b] [291b.1]མིག་ལྷའི་བཻ་དཱུརྱ་སྔོན་པོ་ལྟར་འགྱུར་རོ། །དྲང་སྲོང་ཆེན་པོ་འདི་དག་ནི་ལུས་དང་སེམས་ཀྱི་རྒྱུད་ཀྱི་བག་ཆགས་ཀྱིས་བསྒོས་པས་རྒྱལ་ཆེན་བཞིའི་རིས་ནས་ཤི་འཕོ་བའི་ལྟས་སུ་བལྟའོ། །དྲང་སྲོང་ཆེན་པོ་གང་ལ་ལ་སྲོག་གཅོད་པ་སྤངས་ནས་དད་ཅིང་དང་བས་སྦྱིན་པ་སྦྱིན་ཞིང་། མ་ [291b.2]བྱིན་པར་མི་ལེན་པ་དང་། བཟའ་བ་དང་། བཅའ་བ་དང་། བལྡག་པ་དང་། གཞིབ་པ་དང་། ཡོ་བྱད་ཀྱི་ཁྱད་པར་སྤངས་ནས་ནོར་བུ་དང་། གསེར་དང་། དངུལ་དང་། རྡོ་རྗེ་དང་། བཻ་དཱུརྱ་ལ་སོགས་པ་རྫས་ཐམས་ཅད་རབ་ཏུ་སྦྱིན་པ་ལ་བསྟན་པ་དང་། བསྒོམས་པ་དང་། [291b.3]མང་དུ་བྱས་ནས་དད་པ་དང་། རབ་ཏུ་དགའ་བའི་ཡིད་ཀྱིས་མེ་ཏོག་གི་ལྡ་ལྡི་འབུལ་བ་དང་། མཆོད་རྟེན་ལ་མངོན་པར་ཕྱག་འཚལ་བ་ལ་སོགས་པའི་རྣམ་པར་སྨིན་པས་ཚེ་ཡོངས་སུ་ཟད་པའི་དུས་ན་ལུས་ལ་ཉོན་མོངས་པ་ཆུང་བར་འགྱུར། སྣུམ་པའི་དྲི་མ་དང་། དྲི་ང་བ་རྣམ་པར་ [291b.4]སྤངས་ནས་རང་གི་དགེ་བའི་རྩ་བ་རྗེས་སུ་དྲན་ཞིང་འཆི་བའི་དུས་ཀྱི་ཚེ་རབ་ཏུ་དང་བའི་ལྟས་མཐོང་བར་འགྱུར་རོ། །འདི་ནི་དེའི་ལྟས་ཡིན་ཏེ། བཞིན་གསེར་གྱི་ཁ་དོག་ལྟ་བུར་འགྱུར། དེའི་སྣ་ཡོན་པོར་མི་འགྱུར། དེའི་སྙིང་འཕར་བར་མི་འགྱུར། མིད་པ་ནས་སྒྲ་ངར་ངར་པོ་འབྱུང་ [291b.5]བར་མི་འགྱུར། དེའི་ལུས་ལ་དབུགས་རྒོད་པར་མི་འགྱུར། དེའི་ལུས་གདུང་བར་མི་འགྱུར། དབང་པོ་འགྱུར་བ་མ་ཡིན། ཡན་ལག་དང་ཉིང་ལག་ཀུན་དུ་ཆད་པར་མི་འགྱུར། གཤིས་ཀྱི་མཚམས་འཇིགས་པར་མི་འགྱུར། མལ་གྱི་སྟེང་ན་འགྲེ་ཞིང་ལྡོག་པ་བྱེད་པར་མི་འགྱུར། དམན་པའི་ [291b.6]ཚིག་ལྟ་བུ་སྨྲ་བར་མི་འགྱུར། རིམས་ནད་ཀྱིས་འཆི་བའི་དུས་བྱེད་པར་མི་འགྱུར། ཕ་རོལ་པོས་དུག་བྱིན་པས་གནོད་པར་མི་འགྱུར། མེ་ཏོག་དང་འབྲས་བུ་ལ་བརྐམ་པའི་ཕྱིར་ཤིང་ལ་འཛེགས་ནས་ལྷུང་བས་འཆི་བའི་དུས་བྱེད་པར་མི་འགྱུར། ཡིད་དུ་མི་འོང་བའི་ཁ་ཟས་ཟོས་ཏེ། [291b.7]ཁ་ཟས་མ་ཞུ་བས་འཆི་བའི་དུས་བྱེད་པར་མི་འགྱུར་རོ། །གལ་ཏེ་མིའི་ཕུང་པོ་ཡོངས་སུ་བཏང་ནས་ཀྱང་ལྷའི་ནང་གི་རྣམ་པར་ཤེས་པས་སུམ་ཅུ་རྩ་གསུམ་རིས་ཀྱི་ལྷ་རྣམས་མཐོང་སྟེ། ཁང་པ་བརྩེགས་པ་ནོར་བུ་དང་། གསེར་དང་། བཻ་དཱུརྱ་དང་། དངུལ་སྟོང་གིས་རྣམ་པར་བརྒྱན་ [292a] [292a.1]ཅིང་ཤིན་ཏུ་རྣམ་པར་ཕྱེ་བས་སྤྲས་པ། གསེར་གྱི་ཉ་དང་། ཆུ་སྲིན་གྱི་རྒྱལ་མཚན་དང་། རྟ་བབས་དང་། བ་དན་གྱིས་མཛེས་པར་བྱས་པ། རོལ་མོའི་དབྱངས་སྒྲ་དང་། སིལ་སྙན་སྣ་ཚོགས་ཀྱི་སྒྲ་སྙན་པ་འབྱུང་བ་དང་། གནས་སྣ་ཚོགས་ཀྱིས་བསྐོར་བ། [292a.2]ཤིང་འདབ་ཆགས་པས་བརྒྱན་པའི་ནགས་ཚལ་གྱི་ནང་ན་འདུག་པ། ཙན་དན་སྦྲུལ་གྱི་སྙིང་པོའི་ཆུས་ཆག་ཆག་བཏབ་པས་འདམ་དུ་གྱུར་པ། ལྷའི་ནོར་བུའི་སྒྲོན་མའི་ཕྲེང་བས་བརྒྱན་ཅིང་མཛེས་པར་བྱས་པ། བུད་མེད་འབར་བ་སྣ་ཚོགས་རྣམ་པར་རྩེ་བས་མཛེས་པར་བྱས་པ། [292a.3]དཔུང་རྒྱན་དང་། གདུ་བུ་དང་། སོར་གདུབ་དང་། སེ་མོ་དོ་དང་། དོ་ཤལ་སྣ་ཚོགས་ཀྱིས་བརྒྱན་ཅིང་མཛེས་པར་བྱས་པའི་སུམ་ཅུ་རྩ་གསུམ་རིས་ཀྱི་ལྷ་རྣམས་མཐོང་ངོ་། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན་ལྷའི་བུ་དེ་དག་མཆོག་གི་སྐྱེད་མོས་ཚལ་དུ་སོང་སྟེ་རྩེ་ [292a.4]དགའ་ལ་དགའ་མགུར་སྤྱོད་ཅིང་འདོད་པས་རྒྱགས་མྱོས་ནས་དེ་དག་སྐྱེད་མོས་ཚལ་དང་། ནགས་ཚལ་གྱི་བར་དུ་འགྲོ་ཞིང་དགའ་བ་སྐྱེད་དོ། །སེམས་ཅན་དེའི་རྣམ་པར་ཤེས་པ་དེ་བསོད་ནམས་སུ་ཉེ་བར་འགྲོ་བ་ཡིན་པས་སེམས་ཅན་དེས་ལྷ་དང་ལྷ་མོ་ཁྲི་གཅིག་གི་སྟེང་ན་ [292a.5]འདུག་པ་མཐོང་ནས་རབ་ཏུ་དགའ་བའི་ཡིད་ཀྱིས་མྱུར་བ་མྱུར་བར་ནོར་བུ་སྐུད་པ་ལ་བརྒྱུས་པ་འཆུགས་པ་བཞིན་དུ་སོང་སྟེ་སྐྱེའོ། །སེམས་ཅན་དེ་འཇུག་པའི་ཚེ་ལྷ་མོ་དེའི་ལག་མཐིལ་གཉིས་ནས་མེ་ཏོག་འབྱུང་ངོ་། །སེམས་ཅན་དེས་མེ་ཏོག་དེ་མཐོང་ནས་འཇུག་སྟེ་ལྷ་མོ་དེ་ལྷ་ལ་དགའ་ [292a.6]བ་དང་བདེ་བའི་ཡིད་ཀྱིས་ལྟ་ཞིང་ལག་པ་གཉིས་ཀྱིས་མེ་ཏོག་དེ་མཉེས་ནས་དེའི་ལག་པ་ཕྲད་པའི་རྐྱེན་གྱིས་ལྷའི་ནང་དུ་སྐྱེ་བར་འགྱུར་རོ། །དེ་སྐྱེས་པའི་ཚེ་ལྷ་མོ་དེ་ལྷ་ལ་ལྟ་ཞིང་གཞོན་ནུ་སྐྱེས་ཀྱིས་ཁྱོད་དགའ་བ་སྐྱེད་ཅིག་ཅེས་ཟེར་ཏེ་ཕ་མ་དེ་གཉིས་ཡིད་དགའོ། །གཞོན་ནུ་དེ་ཞག་བདུན་ [292a.7]འདས་ནས་རྣ་ཆ་སྣ་ཚོགས་འགུལ་བ་འཕྱང་བ་མངོན་པར་འགྲུབ་བོ། །དེ་ཞག་བདུན་འདས་ནས་འདི་ལྟ་བུ་དྲན་པར་འགྱུར་ཏེ། བདག་ཆེ་གེ་མོ་ཞིག་ནས་འདིར་འོངས་ཏེ་འདི་གཉིས་ནི་བདག་གི་ཕ་མ་ཡིན་ནོ། །བདག་གིས་དགེ་བའི་ལས་ནི་འདི་བྱས་སོ་སྙམ་དུ་དེ་ལྟར་སེམས་ཤིང་ཉེ་བར་རྟོག་པ་ན་ [292b] [292b.1]དགའ་བ་ཆེན་པོ་སྐྱེའོ། །དེ་དགའ་བས་མྱོས་ནས་རྒྱགས་པས་འདོད་པ་ལ་སྲེད་པར་འགྱུར། རྒྱང་རིང་པོ་ཉིད་ནས་ལྷའི་གནས་ཡངས་པ་ཉེ་བར་གནས་པ་དེ་དེས་མཐོང་ནས་དེ་ལ་མངོན་པར་དགའ་བའི་སེམས་སྐྱེ་བར་འགྱུར་རོ། །དེ་ལྷའི་འགྲོས་ཀྱི་ཚུལ་གྱིས་གླང་པོ་རྒྱགས་པའི་ [292b.2]འགྲོས་ལྟར་འགྲོ་བ། བྲང་ཆེ་བ། ལག་པ་རིང་ཞིང་རབ་ཏུ་འཕྱང་བ། རོ་སྟོད་སེང་གེ་འདྲ་བ། ལྟེ་བ་ཟབ་པ། རྐེད་པ་གཞུའི་ཆང་ཟུངས་ལྟར་ཕྲ་བ། སྒལ་ཚིགས་རིམ་བཞིན་འདུག་པ། བརླ་ཆུ་ཤིང་གི་སྡོང་པོ་ལྟར་མཁྲེགས་པ། ལྷའི་སྨྲ་བ། ཨག་ཙོམ་དང་སྤུ་ཐུང་ [292b.3]བ། དྲི་ང་བ་མེད་པ། ལྷའི་དྲི་ཡོངས་སུ་བཟུང་བ། ལུས་ལྷབ་ལྷུབ་ཀྱིས་སྤུད་པ། ལྷའི་གོས་འབར་བ་བགོས་པ། ཡིད་གཅིག་ཏུ་བརྟགས་ཀྱང་ལུས་མཛེས་པ་སྟེ། དེ་ལྷའི་གནས་དེ་ན་ལྷའི་བུ་མོ་ཁ་ཅིག་གིས་ནི་ཀུན་ནས་བསྐོར་ཅིང་གནས། ཁ་ཅིག་ནི་རྩེ་དགའ་ལ་དགའ་ [292b.4]མགུར་སྤྱོད་ཅིང་འདི་སྐད་ཅེས་འཛེར་ཏེ། ཇོ་ཅོ་ལྷའི་གནས་འདིར་སྙུན་མི་མངའ་ཞིང་ལེགས་པར་བྱོན་ཏམ། ཁྱོད་བདག་ཅག་གི་མགོན་དུ་གྱུར་ཅིག །བདག་ཅག་ལང་ཚོ་ལ་བབ་པ། གཟུགས་ཕུན་སུམ་ཚོགས་པ། ནུ་མ་གསེར་གྱི་བུམ་པ་ལྟར་འབུར་བ། མཆུ་པད་མ་འདྲ་བ། [292b.5]གཟུགས་སྤྲིན་གྱི་ནང་ནས་གློག་འབྱུང་བ་འདྲ་བ་དག་དང་། གཞལ་མེད་ཁང་ཆེན་པོ་དང་། ཤིང་ཡོངས་འདུ་ས་བརྟོལ་མྱུ་གུ་དང་ཡལ་ག་ཆགས་པས་མཛེས་པར་བྱས་པ། བུད་མེད་དྲུག་ཁྲི་ལང་ལོང་དུ་གྱུར་པ་འདི་དག་ལ་ཇོ་ཅོ་དགྱེས་པར་མཛོད་ཅིག་ཅེས་འཛེར་ཏོ། །ལྷའི་ [292b.6]གནས་པི་བང་དང་། གླིང་བུ་དང་། རྫ་རྔ་དང་། ཅང་ཏེའུ་དང་། གླུ་དབྱངས་འབྱུང་བ་དེ་དག་ན་ལྷའི་གདིང་བས་མཛེས་པར་བྱས་པའི་སེང་གེའི་ཁྲི་མཐོང་ངོ་། །དེས་དེ་མཐོང་ནས་རྒྱལ་བུ་དར་མང་པོས་བཅིངས་ཏེ་སྤྱི་བོ་ནས་དབང་བསྐུར་བ་བཞིན་དུ་དེ་སེང་གེའི་ཁྲི་ལ་འཛེགས་ནས་ [292b.7]འདུག་གོ །དེ་དེ་ན་གནས་པ་ན་རྟག་ཏུ་ཡིད་དུ་འོང་བའི་སྒྲ་འབྱུང་ངོ་། །ལྷའི་རོལ་མོའི་སྒྲ་འབྱུང་ངོ་། །ཕྱོགས་ཀུན་ནས་ཀྱང་འདི་ལྟ་བུའི་སྒྲ་གྲག་སྟེ། འདི་ནི་བསོད་ནམས་སུ་ཉེ་བར་འགྲོ་བའི་སེམས་ཅན་ཏེ། འཛམ་བུའི་གླིང་ནས་ཤི་འཕོས་ནས་བསོད་ནམས་ཀྱིས་ཡོངས་སུ་བཟུང་ [293a] [293a.1]བས་ལྷའི་གནས་འདིར་སྐྱེས་ཀྱིས་བདག་ཅག་དེའི་གན་དུ་འདོང་ངོ་། །ཉེ་བར་གནས་ནས་དགའ་མགུར་སྤྱད་པར་བྱའོ། །རོལ་མོའི་དབྱངས་སྒྲ་དང་གར་གྱིས་རྩེ་བར་བྱའོ་ཞེས་སྒྲོགས་སོ། །དེ་བུད་མེད་དྲུག་ཁྲི་དང་དགའ་མགུར་སྤྱོད་དེ། དེ་དག་ཐམས་ཅད་ཀྱང་ [293a.2]ལག་ན་མེ་ཏོག་ཐོགས་པ། ཤིན་ཏུ་དྲི་ཞིམ་པས་དྲི་ཞིམ་པའི་ཆ་བྱད་ཅན། དུ་ཀུ་ལའི་རས་ཀྱི་བླ་གོས་བགོས་པ། རྒྱན་དམ་པ་དང་། རྐང་གདུབ་སྒྲ་སྙན་པ། བཞིན་པད་མ་ལྟ་བུ་ལ་ཟླ་གམ་ལྟ་བུས་མཛེས་པར་བྱས་པ་དག་སྦྲང་རྩི་དང་། སྦྲང་ཆང་མངར་བ་དང་། མེ་ཏོག་གི་ཆང་གིས་རྒྱགས་ [293a.3]ཤིང་མྱོས་པས་འཁྱུད་ནས་འདུག་སྟེ། དེ་དག་ཐམས་ཅད་འདི་སྐད་ཅེས་བདག་ཅག་ཐམས་ཅད་ཇོ་ཅོ་འདིའི་གཡོག་དང་བསྙེན་བཀུར་བྱའོ། །ཁྱོད་འདི་ནས་བསོད་ནམས་ཀྱི་སྟོབས་ཀྱིས་བསྒྲུབས་པའི་མཐོ་རིས་ཀྱི་འཇིག་རྟེན་གྱི་དྲི་ཞིམ་ཞིང་བདེ་བའི་ལྷའི་འདོད་པའི་ལོངས་སྤྱོད་ཤིས་པ་ [293a.4]འདི་ལ་ཀུན་དུ་སྤྱོད་ཅིག་ཅེས་འཛེར་ཏོ། །དྲང་སྲོང་ཆེན་པོ་ལྷའི་བུ་དེ་དང་། ལྷའི་བུ་མོ་དེ་དག་ལྷན་ཅིག་ཏུ་དགའ་ཚལ་དང་། །འདྲིས་ཚལ་དང་། ཨར་མོ་ནིག་ལྟ་བུའི་རྡོ་ལེབ་དང་། རྣམ་པར་མཉམ་འཕྲུལ་དང་། རབ་འབབ་དང་། སེང་སེང་པོ་དང་། མེ་ཏོག་གི་འཕྲལ་ཐབས་དང་། [293a.5]ཤིང་ཡོངས་འདུ་ས་བརྟོལ་ལ་སོགས་པའི་སྐྱེད་མོས་ཚལ་དམ་པ་མཆོག་ཏུ་བདེ་ཞིང་བསིལ་བ། གནོད་པའི་རླུང་མེད་པ། ལྷའི་བྱ་ནམ་མཁའ་འགྲོ་ཞེས་བྱ་བའི་སྒྲ་སྙན་པས་མཛེས་པར་བྱས་པ། ལྷའི་མེ་ཏོག་དང་། འབྲས་བུ་དང་། སྤོས་ཀྱིས་ཀུན་དུ་གང་བ། བཻ་དཱུརྱ་དང་། [293a.6]ནོར་བུ་དང་། སྤུག་དང་། རྡོའི་སྙིང་པོ་རྣམ་པ་སྣ་ཚོགས་ཀྱི་སྒྲོན་མ་ཅན། བུང་བ་དང་། ཁུ་བྱུག་རྒྱགས་པ་དང་། བྱ་སྒྲ་སྙན་པ་འབྱིན་པ། རྨ་བྱ་འདབ་གཤོག་རྩེ་མོ་གསེར་ཅན་ཡོད་པ། ནོར་བུ་དང་། རིན་པོ་ཆེའི་ཐིག་ལེས་རྣམ་པར་བཀྲ་ཞིང་བཀྲ་ཤིས་པ་ཡོད་པ། སྣ་མཐོ་ཞིང་ [293a.7]རིང་བ། བཻ་དཱུརྱའི་མཆུ་ལས་སྒྲ་སྐད་སྙན་པ་སྣ་ཚོགས་འཐུན་པར་སྒྲོགས་པ། མེ་ཏོག་བཀྲམ་པ་རྣམ་པར་ཕྱེ་བས་བརྒྱན་པའི་ཕྱོགས་རྣམས་ན་ལྷའི་བུ་འདི་དག་འདོད་པས་ངོམས་པས་རྒྱུན་དུ་ལོངས་སྤྱོད་པར་གྱུར་ཏེ་གནས་སོ། །སུམ་ཅུ་རྩ་གསུམ་པའི་ལྷའི་གནས་དེ་ན་རྫིང་བུ་གྲུ་བཞི་པ་ཟབ་པ། ཆུ་ [293b] [293b.1]དང་བ། ཧ་ཅང་གྲང་བ་ཡང་མ་ཡིན། ཧ་ཅང་དྲོ་བ་ཡང་མ་ཡིན་པ། ཡིད་དུ་འོང་བ། ཆུ་དྲི་མ་མེད་པ། པད་མ་འདབ་མ་བརྒྱ་པ་ཁ་བྱེ་བ་ཡོད་པ། དོགས་ཤིང་གིས་མཛེས་པར་བྱས་པ། མེ་ཏོག་བཀྲམ་པས་ཆུ་ཡིད་དུ་འོང་བའི་རྫིང་བུ་དེ་དག་ན་ལྷའི་བུ་དེ་དག་ལྷའི་བུ་མོ་བརྒྱ་སྟོང་ [293b.2]གིས་བསྐོར་ནས་ཆུ་ལ་རྩེ་བ་རྗེས་སུ་མྱོང་ཞིང་བདེ་བར་གནས་སོ། །དྲང་སྲོང་ཆེན་པོ་དེ་དག་ན་དེ་དག་གི་སྐྱེད་མོས་ཚལ་དང་། ནགས་ཚལ་གྱི་གམ་ཡོན་རྣམ་པ་སྣ་ཚོགས་ཀྱི་ཐིག་ལེས་རྣམ་པར་བཀྲ་བའི་སྣོད་མངོན་པར་འགྲུབ་སྟེ། ལྷའི་བུ་དེ་དག་སྣོད་དེ་དག་འདོད་པ་ན་མེ་ཏོག་ཀུན་ད་དང་། [293b.3]ཀུ་མུ་ད་དང་། ཁ་བ་ལྟ་བུ་དང་། དངུལ་གྱི་ཁ་དོག་ལྟ་བུའི་ཁ་ཟས་མངོན་པར་འགྲུབ་བོ། །དྲང་སྲོང་ཆེན་པོ་རིན་པོ་ཆེའི་སྣོད་གཅིག་ལ་ཟ་བ་ན། གང་གིས་ཁ་ཅིག་གི་ཁམ་བླངས་པ་ནི་རིན་པོ་ཆེའི་ཁ་དོག་ལྟ་བུར་གྱུར། ཁ་ཅིག་གི་ཁམ་བླངས་པ་ནི་ཁ་དོག་སེར་པོ་དང་། སྔོན་ [293b.4]པོ་དང་། དཀར་པོར་གྱུར་ཏེ། ཁ་དོག་གཅིག་ཏུ་འདྲ་བར་ཁ་དོག་རྒྱས་པ་མཆོག་དང་ལྡན་པ་གཅིག་པ་དེ་དག་གི་རིན་པོ་ཆེའི་སྣོད་དེ་དག་ལས་ཁ་ཟས་ཀྱི་ཁྱད་པར་སོ་སོ་ཐ་དད་པར་འབྱུང་སྟེ། དེ་ནི་དེ་དག་གི་སྦྱིན་པ་ཉེ་བའི་ཉོན་མོངས་པ་ཅན་གྱི་རྣམ་པར་སྨིན་པར་བལྟ་སྟེ། གང་གིས་ [293b.5]སྔར་སྦྱིན་པ་བྱིན་ལ་ཕྱིས་འགྱོད་པར་གྱུར་པའི་ལས་དེའི་རྣམ་པར་སྨིན་པས་དེའི་ཟས་ཁ་དོག་ངན་པར་འགྲུབ་བོ། །གང་གིས་སྔར་སྦྱིན་པ་བྱིན་ལ་ཕྱིས་བྱམས་པ་དང་ལྡན་པའི་སེམས་ཀྱིས་སྙིང་རྗེ་བསྐྱེད་དེ་དགའ་བ་བསྐྱེད་པར་གྱུར་པའི་ལས་དེའི་རྣམ་པར་སྨིན་པས་དེའི་ཟས་ཀྱི་བྱེ་བྲག་ཁ་དོག་ [293b.6]བཟང་པོ་རིན་པོ་ཆེ་ལྟ་བུར་སྣང་བ་འགྲུབ་སྟེ། དྲང་སྲོང་ཆེན་པོ་ཁྱོད་ཀྱིས་དེ་ལྟར་ལས་ཀྱི་འབྲས་བུ་རྣམ་པར་སྨིན་པ་ཤེས་པར་བྱའོ། །དྲང་སྲོང་ཆེན་པོ་གཞན་ཡང་སུམ་ཅུ་རྩ་གསུམ་པའི་གནས་ཀྱི་ལྷའི་རིས་དེ་ན་ཤི་རི་ཤ་ཀ་ཞེས་བྱ་བའི་སྐྱེད་མོས་ཚལ་ཡལ་ག་དང་། མེ་ཏོག་དང་། [293b.7]འབྲས་བུ་སྣ་ཚོགས་ཀྱིས་རབ་ཏུ་བརྒྱན་པ། ཤིང་བརྒྱ་སྟོང་སྣ་ཚོགས་སྟུག་པ། སྟུག་པོའི་མཐོངས་ན་ཤེལ་ལྟར་དྲི་མ་མེད་པའི་རྡོ་ལེབ་ཤིན་ཏུ་ཕྱི་བདར་བྱས་པ་ཕུན་སུམ་ཚོགས་པ་ཞི་ཞིང་དབང་པོ་རབ་ཏུ་ཞི་བའི་ཐུབ་པ་འདོད་ཆགས་དང་བྲལ་བས་བསྟེན་པ་ཡོད་དེ། དེ་ན་འདོད་པའི་ལོངས་ [294a] [294a.1]སྤྱོད་ཅན་གྱི་ལྷའི་བུ་དང་། ལྷའི་བུ་མོའི་ཚོགས་མི་གནས་སོ། །དྲང་སྲོང་ཆེན་པོ་སྐྱེད་མོས་ཚལ་དམ་པ་ཤི་རི་ཤ་ཀ་དེ་ན་མེ་ཏོག་དང་འབྲས་བུའི་ཤིང་ལྗོན་པ་མང་པོ་ལས་རྟག་ཏུ་ལྷའི་གཏམ་བརྗོད་པའི་སྒྲ་འབྱུང་ངོ་། །དྲང་སྲོང་ཆེན་པོ་དེ་ན་ཉན་ཐོས་ཀྱི་དགེ་འདུན་འདུས་པའི་ [294a.2]གནས་བརྟན་བ་ལང་བདག་བྲམ་ཟེའི་རིགས་སུ་སྐྱེས་པ། བསམ་གཏན་ལ་གནས་པ། སྙིང་རྗེ་དང་། དགའ་བ་དང་། བཏང་སྙོམས་ལ་གནས་པ། བྱམས་པའི་ཏིང་ངེ་འཛིན་ལ་སྙོམས་པར་ཞུགས་ཏེ་འདུག་གོ །དྲང་སྲོང་ཆེན་པོ་དེ་ཞག་བདུན་གྱི་བར་དུ་དབུགས་ཕྱི་ནང་དུ་མི་རྒྱུའོ། །དྲང་ [294a.3]སྲོང་ཆེན་པོ་དེ་བྱམས་པའི་ཏིང་ངེ་འཛིན་ལ་སྙོམས་པར་ཞུགས་པའི་ཚེ་འདོད་ན་རླུང་མི་ལྡང་ངོ་། །དྲང་སྲོང་ཆེན་པོ་དེ་སྲེག་པའི་བསྐལ་པའི་ཚེས་མེ་ལྕེ་གཅིག་ཏུ་གྱུར་པ་ན་ཡང་དེའི་ལུས་ཡུངས་འབྲུ་ཙམ་ཡང་ཚིག་པར་མི་འགྱུར་རོ། །དེའི་ཚིགས་ཀྱིས་རིའི་རྒྱལ་པོ་རི་རབ་ཀྱང་ཕིགས་སོ། །ཀླུའི་ [294a.4]རྒྱལ་པོ་དགའ་བོ་དང་། ཉེ་དགའ་སྟོབས་ཆེ་བ། ཆེར་གདུག་པའི་ཤུགས་ཅན་རྫུ་འཕྲུལ་ཆེ་བ། དབུགས་ཀྱིས་ཀྱང་རིའི་རྒྱལ་པོ་རི་རབ་འཇིག་པ། རྒྱ་མཚོ་ཆེན་པོ་བཞི་ཡང་སྐམ་པར་བྱེད་པ། གཏུམ་ཞིང་ཆེར་གདུག་པའི་ཤུགས་ཅན་ཀླུའི་རྒྱལ་པོ་དེ་གཉིས་ཀྱང་དགེ་སློང་བ་ལང་ [294a.5]བདག་དེའི་ཏིང་ངེ་འཛིན་གྱི་མཐུས་གདུག་པ་མེད་པར་འགྱུར་རོ། །དྲང་སྲོང་ཆེན་པོ་གནས་བརྟན་བ་ལང་བདག་སྐྱེད་མོས་ཚལ་ཤི་རི་ཤ་ཀ་ན་གནས་ཤིང་བསམ་གཏན་ལ་གནས་པར་ལྷ་གཞོན་ནུ་དེ་དག་དང་། ལྷའི་བུ་མོ་དེ་དག་གིས་མཐོང་ནས་གུས་པ་དང་བཅས་རི་མོ་དང་བཅས་པས་གནས་ [294a.6]བརྟན་དེ་ལ་དགའ་བ་དང་དད་པ་སྐྱེས་ནས་ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། ཨུད་པ་ལ་དང་། ཀུ་མུ་ད་དང་། དྲི་མཆོག་དང་། པད་མ་དཀར་པོས་གཏོར་ནས་ཐལ་མོ་སྦྱར་བ་བྱས་ཏེ་ཕྱག་འཚལ་ནས། སུམ་ [294a.7]ཅུ་རྩ་གསུམ་རིས་ཀྱི་ལྷའི་བུ་དེ་དག་ཐམས་ཅད་ཀྱིས་གནས་བརྟན་བ་ལང་བདག་ལ་ཡོངས་སུ་བསྐོར་ཏེ་མཆོད་པ་ཆེན་པོ་བྱས་ནས་མདུན་གྱིས་བལྟས་ཏེ་གནས་ནས་ལྷའི་ཟས་བདུད་རྩིའི་རོ་དང་ལྡན་པས་ཚིམ་པར་བྱེད་ཅིང་ཅི་བདེར་བྱེད་དོ། །གནས་བརྟན་བ་ལང་བདག་དེ་ལྷའི་བུ་དེ་དག་ལ་ [294b] [294b.1]ཆོས་སྟོན་པ་ནི་འདི་ལྟ་སྟེ་མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་ [294b.2]དུ་བྱུང་བའི་ཆོས་ཀྱི་སྡེ་དང་། འདུལ་བའི་སྡེ་དང་། མདོ་སྡེའི་ལུང་གི་ཕྱོགས་ཡང་དག་པར་རབ་ཏུ་སྟོན་ཏེ། དེ་དག་དགའ་བ་དང་། དད་པ་སྐྱེད་དོ། །དེ་ལྷའི་སྐྱེད་མོས་ཚལ་དེ་ན་བསམ་གཏན་ལ་གནས་ཏེ་ཐམས་ཅད་བདེ་བ་དང་ལྡན་པར་སྐྱེད་མོས་ཚལ་ཤི་རི་ཤ་ཀ་ན་རྟེན་ཅིང་ [294b.3]གནས་སོ། །དྲང་སྲོང་ཆེན་པོ་གཞན་ཡང་སུམ་ཅུ་རྩ་གསུམ་ལྷའི་རིས་དེ་ན་ལྷའི་འདུན་ས་ཆོས་{བཟངས་,བཟང་}ཞེས་བྱ་བ་ཡོད་དོ། །དེའི་ཀ་བ་བརྒྱད་ཁྲི་བཞི་སྟོང་གསེར་དང་། དངུལ་དང་། རྡོ་རྗེ་དང་། སྤུག་དང་། རྡོའི་སྙིང་པོ་ལས་བྱས་པ། ཙན་དན་མཆོག་ཤིང་གི་སྙིང་པོ་ལ་སོགས་ [294b.4]པ་དྲིལ་བུ་གཡེར་ཀ་སྒྲ་སྙན་པའི་དྲ་བས་ཁེབས་པར་བྱས་པ། ས་ཕྱོགས་གསེར་གྱི་བྱེ་མ་བདལ་བའོ། །ལྷའི་འདུན་ས་ཆོས་{བཟངས་,བཟང་}ལྷའི་རས་རབ་ཏུ་སྦྱངས་པ། རྒྱལ་མཚན་དང་། གདུགས་དང་། བ་དན་བསྒྲེང་བ་དང་། ལྷའི་རོལ་མོ་ཁོང་ཧུ་དང་། པི་བང་དང་། གླིང་བུ་ [294b.5]དང་། རྫ་རྔ་དང་། རྔ་པ་ཊ་ཧ་དང་། ལྕགས་ཀྱི་སིལ་ཁྲོལ་དང་། དུང་དང་། པི་བང་རྒྱུད་གསུམ་པ་རབ་ཏུ་སྒྲོགས་པ། ག་ཞ་དང་། སིལ་ཁྲོལ་དང་། ཅ་ཅོའི་སྒྲ་སྙན་པ་འབྱིན་པ་དང་ལྡན་པ། མེ་ཏོག་དང་། འབྲས་བུ་དང་། ཡལ་ག་དང་། ཁུ་བྱུག་གནས་ཤིང་ཕན་ཚུན་ [294b.6]ནས་སྒྲ་འབྱིན་པ་དེ་ན་ལྷ་དང་། ལྷ་མོ་དེ་དག་དགའ་བ་དང་། བདེ་བ་སྐྱེ་བའི་བཞིན་གྱིས་གནས་སོ། །དྲང་སྲོང་ཆེན་པོ་ལྷའི་འདུན་ས་ཆོས་{བཟངས་,བཟང་}དེའི་སའི་ངོས་ནོར་བུ་རིན་པོ་ཆེས་རབ་ཏུ་སྤྲས་པ། ལྗང་གུས་བྱུགས་པས་མདོག་སྣུམ་ཞིང་བཻ་དཱུརྱ་ལྟར་དྲི་མ་མེད་དེ། མེ་ལོང་གི་ངོས་ལྟ་བུར་བྱས་ [294b.7]པ་རབ་ཏུ་འཇམ་པ་ན་སྤོས་ཀྱི་ཕྱེ་མ་དང་། མེ་ཏོག་རྣམ་པ་སྣ་ཚོགས་འཐོར་བ། རླུང་དང་། ཉི་མ་དང་། ཤ་སྦྲང་དང་། སྦྲང་བུ་དང་། སྦྲུལ་གྱི་ཉེས་པ་ཡོངས་སུ་སྤངས་པ། ངང་གིས་གཉིད་དང་། སྙོམ་པ་དང་། ལེ་ལོ་རྣམ་པར་སྤངས་པ་མཐོང་ཁུང་དང་། སྐར་ཁུང་ཟླ་ཁམ་ལྟ་ [295a] [295a.1]བུའི་དྲ་བའི་བུ་གནས་རེག་ན་བདེ་བའི་རླུང་གཏོང་བ། རྟ་བབས་དང་། ཡང་ཏོག་དང་། ཡང་ཏོག་ཆུང་ངུ་ནས་བདེ་བའི་རླུང་གཏོང་བ། རིན་པོ་ཆེའི་ཕྲེང་བ་བྲེས་པའི་སྒྲས་རྟག་ཏུ་མཛེས་པར་བྱས་པ། དྲི་རབ་ཏུ་ཞིམ་པ་འབྱུང་བའི་སྤོས་དང་མེ་ཏོག་གི་སིལ་མ་འཐོར་ [295a.2]བ་ཡིད་དུ་འོང་བ། བཞིན་ཟླ་བ་དང་། ཉི་མ་དང་། མེ་ལོང་གི་དཀྱིལ་འཁོར་ལྟ་བུ། ལྷའི་ཁྱད་པར་གྱིས་གཟུགས་རབ་ཏུ་བརྒྱན་པའི་ལྷའི་བུ་མོ་དག་གནས་ཏེ། དྲང་སྲོང་ཆེན་པོ་ལྷའི་འདུན་ས་ཆོས་{བཟངས་,བཟང་}དེ་ན་ལྷའི་བུ་མོ་རོལ་མོའི་དབྱངས་སྒྲ་སྒྲོགས་སོ། །ལྷའི་འདུན་ས་ཆོས་ [295a.3]{བཟངས་,བཟང་}དེ་ནི་གྲུ་བཞི་ལྷམ་པ། ཤིན་ཏུ་རྣམ་པར་ཕྱེ་བ། ངོས་ཡངས་པ། ཤིང་ལྗོན་པ་དང་། སྐྱེད་མོས་ཚལ་དང་། ནགས་དང་། ནགས་ཚལ་གཞན་རྣམ་པ་སྣ་ཚོགས་ཀྱིས་མཛེས་པར་བྱས་པ། རྒྱར་ཁོ་ར་ཁོར་ཡུག་ཏུ་དཔག་ཚད་བརྒྱ་ཡོད་པ། གསེར་དང་པད་མ་ [295a.4]བཀྲམ་པ། མེ་ཏོག་སིལ་མ་བཀྲམ་པ། གླུ་དབྱངས་ཀྱི་སྒྲ་འབྱུང་བ། པད་མ་དང་ཤིང་ཡོངས་འདུ་ས་བརྟོལ་གྱིས་མཛེས་པར་བྱས་པའོ། །ལྷའི་འདུན་ས་ཆོས་{བཟངས་,བཟང་}དེ་ནི་ཡོ་བྱད་ཀྱི་ཁྱད་པར་ཐམས་ཅད་གསེར་དང་། དངུལ་དང་། བཻ་དཱུརྱ་དང་། སྤུག་དང་། རྡོའི་ [295a.5]སྙིང་པོ་ལས་བྱས་པ། རིན་པོ་ཆེའི་ཕུང་པོ་ཡོངས་སུ་བཟུང་བ། གསེར་གྱི་སྙིང་པོས་ཀུན་ཏུ་ཁྱབ་པ། རི་རྣམ་པ་དུ་མས་ཉེ་བར་བསྐོར་ཅིང་སྣ་ཚོགས་རྣམ་པར་བཀྲ་བས་མཛེས་པར་བྱས་པ། ངོས་སྐྱེད་མོས་ཚལ་བརྒྱ་སྟོང་གིས་མཛེས་པར་བྱས་པ་སྟེ། སུམ་ཅུ་རྩ་གསུམ་གྱི་ལྷ་ [295a.6]མྱ་ངན་དང་། ནད་ཀྱི་རྣམ་པའི་ཉེས་པ་ལས་གྲོལ་བ་དག་སྐྱེད་མོས་ཚལ་མཆོག་ཏུ་དགའ་འདུན་མྱོང་ནས་ལྷའི་འདུན་ས་ཆོས་{བཟངས་,བཟང་}དེར་འདུས་ཏེ་རྩེ་བ་རྗེས་སུ་མྱོང་ངོ་། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན་བལྟ་ན་སྡུག་ཅེས་བྱ་བའི་གཞལ་མེད་ཁང་ཟླ་བ་དང་ཉི་མ་དང་། [295a.7]མེ་ལོང་གི་ངོས་ལྟར་དྲི་མ་མེད་པ། དྲི་རབ་ཏུ་ཞིམ་པའི་སྤོས་དང་མེ་ཏོག་གིས་མཛེས་པར་བྱས་པ། ཕྲེང་བ་དང་བྱུག་པས་བྲེས་པས་མཛེས་པར་བྱས་པ། བུད་མེད་བརྒྱ་སྟོང་གིས་མཛེས་པར་བྱས་པ། འཇོ་ཞིང་སྒེག་པ། མིག་ཟུར་གྱིས་ལྟ་ཞིང་ཁྲོ་གཉེར་གྱི་རིམ་པ་གཡོ་བའི་ [295b] [295b.1]ཆ་བྱད་ཅན་འཁོད་པ། ངོས་མེ་ཏོག་རྣམ་པ་སྣ་ཚོགས་ཕལ་པོ་ཆེས་མཛེས་པར་བྱས་པ། ནོར་བུའི་སྐྱང་ནུལ་བྱས་པ། དྲིལ་བུ་གཡེར་ཀའི་དྲ་བ་བྲེས་པས་མཛེས་པར་བྱས་པ། རྟ་དང་། གླང་པོ་ཆེ་དང་། ཤིང་རྟའི་རྨིག་པས་རེག་ན་གསེར་གྱི་རྡུལ་ལྡང་བ་དང་། ཅོད་པན་ [295b.2]ཆགས་ཤིང་འབྱོར་པས་མཛེས་པར་བྱས་པ་ཡོད་དོ། །དྲང་སྲོང་ཆེན་པོ་བལྟ་ན་སྡུག་ཅེས་བྱ་བའི་གཞལ་མེད་ཁང་དེ་ལ་ཀ་བ་དྲུག་ཁྲི་ཡོད་དེ། ཀ་ཞུ་ལྷའི་གསེར་དང་། དངུལ་དང་། བཻ་དཱུརྱ་ལས་བྱས་པ་སྣ་ཚོགས་ཀྱི་འཕྲས་རྣམ་པར་སྤྲས་པ། ཤིང་ཏ་མ་ལའི་ལོ་མ་དང་། [295b.3]ཨ་ག་རུ་དང་། བདུག་པའི་ཕྲེང་བ་དྲི་རབ་ཏུ་ཞིམ་པར་བྱས་པའི་ཁྱད་པར་ཅན་ནོ། །གཞལ་མེད་ཁང་དེ་ན་ལྷའི་དབང་པོ་བརྒྱ་བྱིན་གནས་ཏེ། ལྷའི་བུད་མེད་བརྒྱ་སྟོང་གིས་བསྐོར་བ། གསེར་དང་རྡོ་རྗེའི་མྱུ་གུས་ལུས་མཛེས་པར་བྱས་པ། ལྷའི་འདོད་པ་ལ་རྩེ་བ་རྗེས་སུ་མྱོང་བ། [295b.4]གླང་པོ་ཆེ་དགུ་ཁྲིའི་སྟོབས་དང་ལྡན་པ། ལག་པ་གླང་པོ་ཆེའི་སྣ་ལྟ་བུ། མདོག་གསེར་དྲི་མ་མེད་པ་ལྟར་སེར་བ། ལུས་གྲིམས་པ། རོ་སྟོད་སེང་གེའི་འདྲ་བ། རྣ་ཆ་དྲི་མ་མེད་པ་འགུལ་བས་ལུས་སྣང་བར་བྱས་པ། གོས་མཆོག་ཏུ་ཕྲ་ལ་རིང་ཞིང་ནར་བ། དབང་པོའི་ [295b.5]བརྡ་སྤྲོད་པ་འདོད་ཅིང་བསྟན་བཅོས་ཤེས་ཤིང་མཁས་པ། ལྷའི་བུ་བརྒྱ་སྟོང་དུ་མ་རྗེས་སུ་འབྲང་ཞིང་ལྷའི་གསེར་གྱི་གཞལ་མེད་ཁང་གི་གནས་ན་རྒྱུ་བ། གསེར་གྱི་སྐུད་པ་དང་། སེ་མོ་དོ་དང་། དོ་ཤལ་གྱིས་བྲང་བརྒྱན་ཅིང་མཛེས་པར་བྱས་པ། ཧ་ཅང་ཚོ་བ་ཡང་མ་ [295b.6]ཡིན། ཧ་ཅང་རིང་བ་ཡང་མ་ཡིན་པ། རྐང་པ་ཤིན་ཏུ་གནས་པ། བདུད་རྩིའི་རོ་དང་ལྡན་པའི་ཁ་ཟས་ཟ་བ། མཁུར་ཙོས་བུད་མེད་བརྒྱ་སྟོང་གིས་ཟུར་གྱིས་ལྟ་བ་དང་ལྡན་པ། གླང་པོ་ཆེ་ས་སྲུང་གི་བུ་རྒྱགས་པའི་རྣ་བའི་རླུང་གིས་སྒྲ་ཕྱུང་བ་སྟེ། དྲང་སྲོང་ཆེན་པོ་ལྷའི་དབང་ [295b.7]པོའི་རྒྱལ་པོ་དེའི་ལུས་ལ་རུས་པ་མེད་དོ། །དེའི་ལུས་ལ་ནད་ཐམས་ཅད་མེད་དེ། དྲི་རབ་ཏུ་ཞིམ་པ་དང་ལྡན་ལ་གདངས་ཤིན་ཏུ་སྙན་ཅིང་འཇམ་པའི་དབྱངས་དང་ལྡན་ནོ། །ལྷའི་རྒྱལ་པོ་དེའི་ལུས་ཀྱི་དྲིས་ཕོག་ན་སྤོས་ཀྱི་གླང་པོ་ཆེ་རབ་ཏུ་རྒྱགས་ཤིང་བདོ་བ་ཡང་རྒྱགས་པ་ [296a] [296a.1]ཡོངས་སུ་འབྲི་བར་འགྱུར་རོ། །དྲང་སྲོང་ཆེན་པོ་ལྷའི་དབང་པོ་དེའི་ལུས་ཀྱི་ཚད་ནི་དེ་བཞིན་གཤེགས་པའི་སྐུའི་ཚད་ཙམ་མོ། །དེའི་གཟུགས་ཆེ་བ་གསེར་གྱི་མདོག་ལྟ་བུ་དེ་མཐོང་ནས་འཕགས་པ་ཉན་ཐོས་རྣམས་ཀྱང་དེའི་གན་དུ་འདོང་སྟེ། ལྷའི་དབང་པོའི་ [296a.2]གཟུགས་ཕུན་སུམ་ཚོགས་པ་དེ་བཞིན་གཤེགས་པ་དང་འདྲའོ་ཞེས་བརྗོད་དོ། །དེ་ནས་དྲང་སྲོང་ཆེན་པོ་རྒྱས་པས་ལྷའི་དབང་པོའི་ལུས་ཀྱི་ཚད་ཐོས་ནས་ངོ་མཚར་དུ་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་དབང་ཆེན་པོའི་ལུས་ཆུང་ངུ་མི་རྟག་པའི་ [296a.3]རྗེས་སུ་འབྲང་བ་གར་མཁན་གྱི་ཆ་བྱད་ལྟ་བུར་ཤིན་ཏུ་སྤྲས་པ། གླེགས་ཤིང་གི་ལས་དང་། ཤིང་གི་ལས་དང་། འཁྲུལ་འཁོར་གྱི་ལས་ལྟ་བུར་བྱས་པ། མེ་ཏོག་གི་ལས་ལྟ་བུར་ཡུད་ཙམ་ཞིག་མཛེས་པ། མེ་ལོང་གི་ནང་གི་གཟུགས་བརྙན་ལྟ་བུ་ལ་ཁྱོད་ཅིའི་ཕྱིར་ངོ་ [296a.4]མཚར་དུ་བྱེད། དྲང་སྲོང་ཆེན་པོ་ཁྱོད་དགེ་སློང་མ་འགགས་པའི་ལུས་ཕ་དང་མ་ལས་སྐྱེས་པའི་ཚིགས་ཚིགས་མཚམས་མཚམས་རེ་རེ་ལ་ཡང་དབང་པོ་ཆེན་པོ་འདུན་པར་འགྱུར་བ་ལ་ལྟོས། དྲང་སྲོང་ཆེན་པོ་གཞན་ཡང་དགེ་སློང་མ་འགགས་པའི་ལུས་ལ་རྫུ་འཕྲུལ་གྱི་སྒྱུ་མ་ [296a.5]ལ་ད་ལྟོས། དེ་ནས་དགེ་སློང་མ་འགགས་པ་བཅོམ་ལྡན་འདས་ཀྱིས་བསྐུལ་བར་ཤེས་ནས་ཏིང་ངེ་འཛིན་ལ་སྙོམས་པར་ཞུགས་པ་དང་། ཏིང་ངེ་འཛིན་དེའི་མཐུས་དགེ་སློང་མ་འགགས་པ་ལྷའི་གསེར་འབར་བ་དང་། བྱི་རུའི་སྡོང་པོའི་ཁ་དོག་མཆོག་དང་ལྡན་པ། གཙུག་གི་ [296a.6]ནོར་བུ་དང་ཅོད་པན་འཕྱང་བའི་གཙུག་ཕུད་དང་ལྡན་པ། མཁུར་བ་རྒྱས་ཤིང་མདངས་སྣུམ་པའི་མདོག་ཅན། མིག་ལྷའི་ཨུད་པ་ལ་སྔོན་པོ་འདྲ་ལ། ནོར་བུ་དང་། སྤུག་དང་། རྡོའི་སྙིང་པོ་དང་ལྡན་པའི་ཀླུའི་རྒྱལ་པོ་ལྟ་བུར་ཀུན་ཏུ་སྣང་སྟེ། དེའི་གཟུགས་ཆེན་པོ་མངོན་པར་ [296a.7]གྲུབ་པའི་ལྷའི་དྲི་དང་གཟུགས་ཀྱིས་འཁོར་ཐམས་ཅད་ལ་སྣང་བར་བྱས་པས་ངོ་མཚར་དང་དགའ་བར་གྱུར་ཏེ་དྲི་རབ་ཏུ་ཞིམ་པའི་དྲི་དང་ལྡན་པར་གྱུར་ཏོ། །དེའི་ཆོ་འཕྲུལ་དེ་དྲང་སྲོང་ཆེན་པོ་རྒྱས་པས་མཐོང་ནས་སྙིང་འཕར་ཞིང་སྟན་ལས་ལངས་ཏེ་ཐལ་མོ་སྦྱར་ནས་རབ་ཏུ་ངོ་མཚར་དུ་ [296b] [296b.1]གྱུར་པས་སྒྲ་ཆེར་ཀྱེ་ཨ་ལ་ལ་ལེགས་སོ། །གང་གི་ཕྱིར་བདག་དེ་བཞིན་གཤེགས་པ་དང་ཕྲད་ཅིང་འདུས་ལ་ཐམས་ཅད་མཁྱེན་པའི་སྒོ་ནས་འདི་ལྟ་བུ་སྔོན་མ་མཐོང་བའི་ཆོ་འཕྲུལ་མཐོང་བ་མི་ཉིད་ཐོབ་པ་བདག་དོན་མཆིས་སོ། །བཅོམ་ལྡན་འདས་ཀྱིས་དྲང་སྲོང་ཆེན་པོ་རྒྱས་པ་ལ་ [296b.2]འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་འདི་ཇི་སྙམ་དུ་སེམས། དབང་པོ་ཆེན་པོའི་ལུས་དང་། གང་འདི་དགེ་སློང་མ་འགགས་པའི་ལུས་གསེར་འབར་བ་དང་། ནོར་བུ་མཆོག་ལས་གྲུབ་པ་འདི་གཉིས་གང་བཟང་། དེ་སྐད་ཅེས་བཀའ་སྩལ་པ་དང་། བཅོམ་ [296b.3]ལྡན་འདས་ལ་དྲང་སྲོང་ཆེན་པོ་རྒྱས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་འདི་དགེ་སློང་མ་འགགས་པའི་ལུས་དེ་ལ་དབང་པོ་ཆེན་པོའི་ལུས་ཀྱིས་བརྒྱའི་ཆར་ཡང་ཉེ་བར་མི་མཆི། སྟོང་གི་ཆ་དང་། བརྒྱ་སྟོང་གི་ཆའམ། གྲངས་སམ། ཆར་རམ། བགྲང་བར་ [296b.4]རམ། དཔེར་ཡང་མི་བཟོད་དོ། །དྲང་སྲོང་ཆེན་པོ་བསོད་ནམས་ལས་བསྒྲུབས་པའི་ལུས་ལ་དགེ་བའི་རྩ་བ་བསྔོས་པའི་ཁྱད་པར་ནི་དེ་ལྟར་བལྟའོ། །དྲང་སྲོང་ཆེན་པོ་སུམ་ཅུ་རྩ་གསུམ་གྱི་ལྷའི་རིས་དེ་ན། བརྒྱ་བྱིན་གྱི་ཆུང་མའི་དམ་པ་བདེ་སོགས་ཞེས་བྱ་བ་ལྷའི་བུ་མོ་བརྒྱ་སྟོང་ [296b.5]གིས་ཡོངས་སུ་བསྐོར་ཅིང་དགའ་ཚལ་ན་འདུག་སྟེ། ལུས་སྤོས་དང་། ཕྲེང་བ་དང་། མེ་ཏོག་གིས་བརྒྱན་ཅིང་འབར་བ། ལྷའི་མེ་ཏོག་པད་མ་དང་། ཨུད་པ་ལ་དྲི་རབ་ཏུ་ཞིམ་པའི་དྲི་དང་ལྡན་པ། མཆུ་གསེར་དང་བིམ་པ་འདྲ་བ། མཆོག་ཏུ་འབར་བའི་ཆ་བྱད་འཛིན་པ། མཆོག་ [296b.6]ཏུ་ཕྲལ་འཚེར་བ། སྐྱེད་མོས་ཚལ་དང་ནགས་ན་རྒྱུ་བ། ལྷའི་རྒྱན་དང་། རྐང་གདུབ་དང་། གདུ་བུ་དང་། གདུ་བུ་བསྒྲིལ་མ་དང་། དོ་ཤལ་དང་། སེ་མོ་དོས་ལུས་དུད་པ། འཕྲལ་བ་དང་མཁུར་བ་ཆེ་ལ་ཤིན་ཏུ་རྣམ་པར་ཕྱེ་བ། ནོར་བུ་དང་གསེར་ཤིན་ཏུ་རྣམ་པར་ཕྱེ་བའི་སྐ་རགས་ཀྱིས་བཅིངས་པ་ [296b.7]འཇོ་ཞིང་སྒེག་པའི་རྗེས་སུ་ཆགས་པ། མིག་རིང་ཞིང་ཕྱེ་ལ་འཛུམ་པ། ལག་པའི་ནང་རི་མོ་རིང་པོས་ཁྱབ་པ། ལྟེ་བ་ཟབ་པ། ཁྲོ་བ་དང་། སེར་སྣ་དང་། ཕྲག་དོག་དང་། འཐབ་པ་དང་། རྩོད་པའི་ཉེས་པ་སྤངས་པ། བཞིན་ཁྲོ་གཉེར་གྱི་རིམ་པ་གཡོ་བ་དང་བྲལ་བ། མངལ་འཛིན་པའི་སྐྱོན་རྣམ་པར་ [297a] [297a.1]སྤངས་པའི་ལུས་དང་ལྡན་པའོ། །ལྷའི་བུ་མོ་བདེ་སོགས་ཞེས་བྱ་བ་དེ་ཤིན་ཏུ་འདོད་པ་ལ་ཆགས་པ་ལས་བྱུང་བའི་སྒེག་པ། རི་རབ་ལ་ཡོད་པའི་གཞལ་མེད་ཁང་དང་། ཤིང་གེལ་པ་དང་འཁྲི་ཤིང་གི་བླ་རེས་ཁེབས་པར་བྱས་པ་ལས་བྱུང་བའི་འདོད་པ་སྐྱེས་པས་བྱུང་བ། [297a.2]མེ་ཏོག་འཐོར་བ་དང་བཅས་པའི་རླུང་ལྡང་བ། ཧ་ཅང་རིང་བ་ཡང་མ་ཡིན། ཧ་ཅང་ཐུང་བ་ཡང་མ་ཡིན། དཀུ་ཧ་ཅང་སྦོམ་པ་ཡང་མ་ཡིན། ཧ་ཅང་ཕྲ་བ་ཡང་མ་ཡིན་པ། ལུས་ཧ་ཅང་སྦོམ་པ་ཡང་མ་ཡིན། ཧ་ཅང་ཕྲ་བ་ཡང་མ་ཡིན་པ། བཞིན་མདངས་ཅན། གཙང་ཞིང་མཛེས་པ། པད་མ་ [297a.3]འདོད་པ། དྲི་རབ་ཏུ་ཞིམ་པའི་དྲིའི་ངད་རླུང་གིས་བདས་པ་རྨད་དུ་བྱུང་བས་མཛེས་པར་བྱས་པའོ། །དྲང་སྲོང་ཆེན་པོ་དེ་ལྟར་སུམ་ཅུ་རྩ་གསུམ་རིས་ཀྱི་ལྷ་དེ་དག་ནི་ནད་མེད་པ། རིམས་ནད་མེད་པ། སྐྱེད་མོས་ཚལ་དང་། ནགས་ཚལ་དང་། གཞལ་མེད་ཁང་གི་གནས་ཀྱི་ནང་ན་གནས་ཤིང་ [297a.4]རྒྱུ་བའོ། །དེ་དག་གི་ཚེ་ནི་ལྷའི་ལོ་སྟོང་ཐུབ་བོ། །དེ་དག་ལྷའི་གནས་དེ་ན་གནས་པ་ལས་བསོད་ནམས་ཟད་ནས་ཚེ་ཟད་པར་གྱུར་པའི་ཚེ་ཤི་འཕོ་བའི་ལྟས་སྔོན་མ་བྱུང་བ་ལྔ་འབྱུང་སྟེ། རྫིང་བུ་ཤེལ་རྡོ་ལྟར་གསལ་བ། རེག་ན་བདེ་བའི་རླུང་ལྡང་བ། རྫིང་བུའི་འགྲམ་འཁྲི་ཤིང་གི་བླ་ [297a.5]རེ་དང་། ཤིང་གེལ་པ་ཕུན་སུམ་ཚོགས་པ་དང་ལྡན་པར་ཞུགས་པ་ན་འབྲུ་མར་གྱིས་གཏོར་བ་ལྟ་བུ་འབྱུང་ངོ་། །དེས་འབྲུ་མར་གྱིས་གཏོར་བ་དེ་མཐོང་ནས་སྙིང་དངངས་སྐྲག་སྟེ། རྫིང་བུ་དེ་ནས་བྱུང་ནས་ནགས་སྟུག་པོར་རྒྱུག་ཅིང་བྲོས་སོ། །དེ་རིངས་པར་འགྲོ་བ་ལྷའི་བུ་མོ་དེ་དག་གི་ [297a.6]མཐོང་ནས་ཕྱི་བཞིན་དུ་འབྲངས་པ་དང་། དེ་ནགས་སྟུག་པོ་དེའི་ནང་ན་ཤིང་དྲུང་ཞིག་ན་གནས་ཤིང་འདུག་གོ །དེ་ནས་ལྷའི་བུ་མོ་དེ་དག་སྙིང་རྗེ་རྗེ་སྐད་དུ་ག་ཆད་པར་ངུ་ཞིང་འདི་སྐད་ཅེས་ཇོ་ཅོ་བདག་ཅག་བོར་ཏ་གཅིག་པུ་ཤིང་དྲུང་འདི་ན་ཅི་དགའ་ཞེས་འཛེར་ཏེ་དེ་ངུ་ཞིང་དམན་པའི་སྒྲས་སླར་འདི་སྐད་ཅེས་སྨྲས་ [297a.7]སོ། །བདག་འདི་ན་སྔོན་མ་བྱུང་བ་འབྲུ་མར་གྱིས་གཏོར་བ་ལྟ་བུ་ལུས་ལས་བྱུང་ངོ་ཞེས་དེ་སྐད་སྨྲས་པ་དང་། མཆན་ཁུང་གཉིས་ནས་རྔུལ་བྱུང་ནས། དེ་དག་གིས་རྔུལ་བྱུང་བ་མཐོང་བ་དང་། ལྷའི་བུ་མོ་དེ་དག་རིང་དུ་དོང་སྟེ་ཡོངས་སུ་སྤངས་སོ། །དེས་ཡོངས་སུ་སྤངས་པར་ཤེས་ནས་མྱ་ངན་གྱིས་རེག་གོ །དེ་ [297b] [297b.1]མྱ་ངན་གྱིས་རེག་པས་དབུགས་དྲག་ཏུ་རྒྱུའོ། །དབུགས་རྒྱུ་བའི་རྒྱུས་ལུས་ལ་གདུང་བ་སྐྱེས་སོ། །དེ་ལུས་དང་སེམས་གདུངས་པས་མེ་ཏོག་གི་ཐོད་སྔོན་རྙིས་མི་སྲིད་པ་ཡང་རྙིས། ཕྲེང་བ་ཡང་ཡོངས་སུ་རྙིས། སྔོན་རྙིངས་མི་སྲིད་པའི་གོས་ཀྱང་རྙིས། ལྷའི་གདིང་བ་བཏིང་བའི་མལ་ཆ་ལ་ཡང་ [297b.2]དགའ་བ་མི་རྙེད་དོ། །དེ་ནས་ལྷའི་བུ་མོ་དེ་དག་གིས་འཆི་འཕོ་བའི་ལྟས་ཀྱིས་ཉེན་པར་ཤེས་ནས་དེའི་དྲི་དེ་མི་བཟོད་དེ་རིང་དུ་སྤངས་ནས་སྙིང་རྗེ་རྗེ་སྐད་ག་ཆད་པར་བདག་དབང་མེད་པར་ངུའོ། །འབྲལ་བའི་སྡུག་བསྔལ་གྱིས་ཉེན་ནས་རབ་ཏུ་ངུ་ཞིང་ཀྱི་ཧུད་ལུས་མཆོག་ཏུ་ཤིན་ཏུ་འཇམ་པ། ལྷའི་ [297b.3]སྐྱེད་མོས་ཚལ་དང་། ནགས་ཚལ་ན་རྒྱུ་བ། སུམ་ཅུ་རྩ་གསུམ་གྱི་གླིང་ན་ངུར་བ་དང་འདྲ་བ། ལྷའི་མདུན་ས་ཆོས་{བཟངས་,བཟང་}ན་ངང་པའི་རྒྱལ་པོ་དང་འདྲ་བ། དགའ་ཚལ་ན་བྱ་ཀ་ལན་ད་བལྟ་བུ། རྫིང་བུ་ན་སྤོས་ཀྱི་གླང་པོ་ཆེ་འདྲ་བ། ཤིང་ཡོངས་འདུ་ས་བརྟོལ་དང་། སྐྱེད་མོས་ཚལ་ན་བུང་བ་ལྟ་བུ། [297b.4]འདྲེས་པའི་ཚལ་ན་མེ་ཏོག་གི་རྣ་རྒྱན་ལྟ་བུ་བདག་ཅག་བོར་ཏེ་ད་གར་སོང་། གང་ན་གནས་ཞེས་འཛེར་ཅིང་བདག་ལ་དབང་མེད་པར་ངུའོ། །དེ་བདག་ལ་དབང་མེད་པར་རིམས་ནད་ཀྱིས་བཏབ་སྟེ། རིམས་དེས་ལུས་དང་སེམས་དཀྲུགས་ནས་འདྲོན་པོ་འདྲོན་པ་མང་པོ་དང་བྲལ་ཏེ་འབྲོག་འཚོལ་བ་དང་ [297b.5]མཚུངས་ལ་མ་གྲོགས་གྲུ་ཞིག་པ་དང་འདྲ། རྒྱལ་པོ་ཡིད་བཞིན་གྱི་ནོར་བུ་སྟོར་བ་དང་མཚུངས། རི་ཞིག་པ་དང་འདྲ་བར་མི་རྟག་པའི་རླུང་གིས་གཏོར་ནས་ལུས་སའི་སྟེང་ན་འགྲེ་ལྡོག་སྟེ། ནམ་མཁའ་ལྡིང་གི་མཆུས་ཀླུ་གཞོན་ནུ་ཟིན་པ་དང་འདྲ་བར་འདར་བཞིན་དུ་མྱུར་བ་མྱུར་བར་ཐལ་མོ་སྦྱར་ནས་ [297b.6]ལྷའི་བུ་མོ་དེ་དག་ལ་གསོལ་བ་བཏབ་པ་ཚུར་ཤེག་ལག་པའི་ཐལ་མོས་ངའི་ལུས་ལ་རེག་པར་གྱིས་ཤིག་ཅེས་སྙིང་འདར་ལ་གདུངས་བཞིན་དུ་དེ་སྨྲེ་སྔགས་འདོན་ཅིང་གསོལ་བ་བཏབ་པ་དང་། ལྷའི་བུ་མོ་དེ་དག་གིས་བལྟས་ནས་མི་ཉེ་བར་སྤངས་ཏེ། ཡན་ལག་ལ་རེག་པར་ལྟ་ག་ལ་བྱེད་ཀྱི། མེ་ཏོག་ [297b.7]ཅན་གྱི་ཡལ་ག་ཐོགས་ཏེ་འཆི་འཕོ་བར་འགྱུར་བའི་ལྷའི་བུ་དེའི་སྙིང་ཀར་བཞག་ནས་འདི་སྐད་ཅེས་འཛེར་ཏེ། མཐོ་རིས་ཀྱི་བསོད་ནམས་ཡོངས་སུ་ཉམས་ཏེ་ད་མྱུར་དུ་འཛམ་བུའི་གླིང་དུ་སྐྱེ་བར་འགྱུར་རོ་ཞེས་དེ་སྐད་སྨྲས་པ་དང་། ལྷའི་བུ་དེ་བདག་ལུས་ཀྱིས་ཡོངས་སུ་བཏང་བར་ཤེས་ནས་ཀྱི་ཧུད་ [298a] [298a.1]ཀྱི་ཧུད་ཅེས་སྒྲ་ཆེར་སྙིང་རྗེ་རྗེ་སྐད་དུ་ངུ་ཞིང་ཀྱེ་མའོ་མཐོ་རིས་ལྷའི་གནས་འདིའི་ལྷའི་ཡོ་བྱད་དང་། རྒྱན་དང་། སྐྱེད་མོས་ཚལ་མཆོག་ན་རྩེ་བ་རྗེས་སུ་མྱོང་ཞིང་ལྷའི་བུ་མོ་འདི་དག་ལ་བདག་གིས་སྡུག་པར་བསམས་པ་ལས་ད་བདག་འཆི་བའི་དུས་ལ་ཕྱོགས་ཤིང་ཞུགས་པའི་ཚེ་དེ་དག་ [298a.2]ཉེ་བར་མི་གནས་ཤིང་འདི་སྐད་ཅེས་ཁྱོད་འཛམ་བུའི་གླིང་དུ་སྐྱེ་བར་འགྱུར་རོ་ཞེས་འཛེར་ཏོ་སྙམ་ནས་ཡང་དང་ཡང་དུ་བདག་གི་གནས་ལ་བལྟ་ཞིང་ས་ལ་འགྱེལ་ནས་སྙིང་རྗེ་རྗེ་སྐད་དུ་སྨྲེ་སྔགས་འདོན་ཏེ། ཀྱི་ཧུད་དགའ་ཚལ་དང་། འདྲེས་ཚལ་དང་། ཨར་མོ་ནིག་ལྟར་འཇམ་པའི་རྡོ་ལེབ་དང་། ཀྱི་ [298a.3]ཧུད་ལྷའི་འདུན་ས་ཆོས་{བཟངས་,བཟང་}དང་། ཤིང་ཡོངས་འདུ་དང་། རྣམ་པར་མཛེས་དང་། དགའ་ཚལ་དང་། སྐྱེད་མོས་ཚལ་དང་། རྫིང་བུ་དང་། གཞལ་མེད་ཁང་དམ་པ་སྒོ་མང་པོ་འདི་དག་དང་། ལྷ་ཡུལ་བའི་ལྷའི་གནས་འདི་དག་བོར་ཏེ། ད་ནི་མཐོ་རིས་ཀྱི་གཡང་ས་ནས་གདོན་མི་ཟ་བར་ [298a.4]ལྷུང་ངོ་ཞེས་སྐྲག་པ་སྐྱེས་ནས་དེ་རང་གི་གནས་ལ་ལྟ་ཞིང་ཀྱི་ཧུད་བདག་གི་མཛའ་བོ་བྱམས་པ་རྣམས་ང་འཆིར་ཉེ་ན་ཅིའི་ཕྱིར་མི་སྨྲ། འདི་ལྟར་ང་ནི་ད་འཁོར་བའི་འབྲོག་དགོན་པ་དགོངས་མལ་རིང་པོར་ཆས་ཀྱིས་ཚུར་ཤོག་ང་ལ་འཁྱུད། ཕྱིས་ངས་ཀྱང་ཁྱེད་མི་མཐོང་། ཁྱོད་ཀྱིས་ཀྱང་ང་མི་མཐོང་ [298a.5]ངོ་། །ཀྱི་ཧུད་མཐོ་རིས་འདི་ནས་བསོད་ནམས་ཀྱི་འབྲས་བུ་ཟད་པས་འཕོ་བར་འགྱུར་བའི་ཚེ་བདག་ལ་མུན་པ་ལྟ་བུར་སྣང་ངོ་། །ཅི་མཐོ་རིས་འདི་སྟོངས་སམ། འདི་ན་ཡང་རོལ་མོ་དང་སིལ་སྙན་ཀྱང་མི་ལེན་ནམ། དེ་དག་གི་སྒྲ་ཡང་མི་གྲག་གོ །ལས་ཀྱི་ཉེས་པས་བདག་ནི་འདིར་ཉམས་པར་ [298a.6]གྱུར་ཏོ་ཞེས་དེ་སྐད་སྨྲས་ནས་ཡང་སྨྲེ་སྔགས་འདོན་ཏོ། །ཀྱི་ཧུད་མཐོ་རིས་ལྷ་དང་དྲི་ཟས་མཛེས་པར་བྱས་པ་ན་གང་མིག་སྟོང་པའི་ལྷའི་འཁོར་དུ་འགྲོ་བ་དང་། ཕྱིས་ཡང་དེ་མཐོང་བར་འགྱུར་བ་ནི་བསོད་ནམས་ཆེའོ། །ཀུན་ནས་སྐྱེས་པའི་མེ་ཏོག་ངའི་ཀླད་པ་ལ་འདུག་པ་ཅིའི་ཕྱིར་རྙིས་ཤེས་ [298a.7]ལྷའི་བུ་དེས་སྨྲས་པ་དང་། ལྷའི་བུ་སེམས་དམན་པ་དྲི་མ་མེད་པའི་རྣ་ཆའི་གདུ་བུ་འགུལ་བ་ཐོགས་པ་དེ་དག་ཐམས་ཅད་མེ་ཏོག་ཁྱེར་ཏེ། ལྷའི་དབང་པོ་བརྒྱ་བྱིན་ལྷའི་བུ་བརྒྱ་སྟོང་གིས་ཡོངས་སུ་བསྐོར་ཅིང་ལྷ་མོ་བདེ་སོགས་དང་། ལྷ་མོ་དག་ཕྱི་བཞིན་འབྲང་བ་མི་སྦྱིན་གྱི་བུ་དང་། སྨིག་རྒྱུ་དང་། [298b] [298b.1]སྣ་ཚོགས་རྒྱན་དང་། གཙུག་ཕུད་ལྔ་པ་དང་། ཏུམ་བུ་རུལ་སོགས་པའི་ལྷ་དང་དྲི་ཟ་རྣམས་ལྷའི་གླུའི་དབྱངས་ལེན་ཅིང་འདོད་པ་དག་གིས་ལྟས་ལྔ་པོ་དེས་ཉམ་ཐག་པར་གྱུར་པ་མཐོང་ནས་སྙིང་རྗེ་བསྐྱེད་དེ། ང་རོ་གཅིག་ཏུ་ཀྱི་ཧུད་མི་རྟག་པ་འདི་ནི་རབ་ཏུ་དྲག་ཅིང་མི་བཟད་དོ་ཞེས་ཚིག་སྨྲའོ། །ལྷའི་ [298b.2]རྒྱལ་པོ་བརྒྱ་བྱིན་གྱིས་ཀྱང་ལྷའི་བུ་དེ་ལ་བལྟས་ནས་ཚངས་པའི་དབྱངས་ཀྱིས་འདི་སྐད་ཅེས་སྨྲས་སོ། །ཆོག་གོ་ལྷའི་བུ་བདག་ཅག་ཐམས་ཅད་ཀྱི་འགྲོ་བ་ཡང་འདི་འདྲས་སྲེད་པར་མ་བྱེད། ངན་འགྲོར་མ་གནས་ཤིག །ལྷའི་བུ་དེ་དག་གིས་དབྱངས་གཅིག་ཏུ་སྨྲས་པ་གྲོགས་པོ་དགེ་བ་བྱེད་ [298b.3]པའི་འཇིག་རྟེན་མིའི་འཇིག་རྟེན་དུ་སོང་ཤིག་ཅེས་བྱས་པ་དང་། ལྷའི་བུ་དེས་བདག་ནི་ངེས་པར་འཆི་ཡང་དག་སྙམ་དུ་བསམས་ཏེ། ཐལ་མོ་སྦྱར་ནས་ལྷ་མང་པོ་དེ་དག་ལ་འདི་སྐད་ཅེས་གསོལ་བ་བཏབ་བོ། །བདག་ནི་འཆི་འཕོ་བའི་དུས་ལ་ཉེ་བར་གནས་ཀྱིས་ལྷའི་བུ་ཐམས་ཅད་བདག་ [298b.4]ལ་བཟོད་པར་མཛོད་ཅིག །དེའི་ཚེ་ཤུགས་རིང་དུ་ཕྱུང་ནས་ལྟས་གཉིས་བྱུང་སྟེ། མིག་པད་མའི་ལོ་མ་རྙིས་པ་ལྟ་བུར་གྱུར་པ་དང་། རྒྱན་ཐམས་ཅད་མི་སྣང་བར་གྱུར་པའོ། །དེ་ནས་ལྷའི་བུ་དེ་དག་གིས་རྒྱན་མི་སྣང་བར་གྱུར་པ་མཐོང་ནས་མེ་ཏོག་མན་དཱ་ར་བ་དང་། པད་མ་ལ་སོགས་པས་མངོན་པར་ [298b.5]གཏོར། པི་བང་དང་། གླིང་བུ་དང་། སིལ་སྙན་གྱི་སྒྲ་ཡང་བྱས་ནས་རྒྱན་དེ་དག་ཀྱང་ལྷས་བསྡུས་པར་མཐོང་ནས་འཛམ་བུའི་གླིང་ལ་དགའ་བ་བསྐྱེད་དེ། དེ་མཆི་མ་ཟག་ཅིང་ག་ཆད་པར་ངུ་སྟེ་འཆི་བའི་དུས་ཀྱི་ཆོས་རྣམས་སྦྱོར་རོ། །ལྷའི་བསོད་ནམས་དང་ཚེ་ཡོངས་སུ་ཟད་ནས་རླུང་དྲག་ [298b.6]པོ་ལངས་སོ། །རླུང་དྲི་རབ་ཏུ་ཞིམ་པ་དང་ལྡན་པ་དེས་དེའི་ལུས་ལ་ཕོག་ནས་གཏོར་ཏེ་ལྷའི་བུ་དེ་གནས་དེ་ནས་འཆི་འཕོ་བར་འགྱུར་རོ། །གནས་དེ་ནས་འཕོ་བ་ན་ལུས་ཀྱི་གནས་མི་ཤེས་སོ། །དེ་གནས་དེ་ནས་འཕོས་ནས་མིར་སྐྱེ་བ་ཡོངས་སུ་ལེན་ཏོ། །མིར་སྐྱེས་ཏེ་མའི་མངལ་ན་གནས་པའི་ཚེ་ [298b.7]མ་ལ་མཚན་མར་བལྟ་བ་ནི་དེ་ཉིད་གླུ་དང་། གར་དང་། རྩེ་བ་དང་། དགོད་པ་ལ་དགའ་བའི་དབང་པོར་འགྱུར། མེ་ཏོག་དང་། འབྲས་བུ་དང་། དགོན་པ་ལ་དགའ་བར་འགྱུར། ཁ་དོག་སྣ་ཚོགས་འཚེར་བའི་གོས་འཆང་བར་འགྱུར། ལྷའི་ཁ་ཟས་ཤིན་ཏུ་བཟང་པོ་ལ་སྲེད་པར་འགྱུར་རོ། །དེ་མའི་མངལ་ན་ [299a] [299a.1]གནས་པའི་ཚེ་མ་འདོད་པའི་འདོད་ཆགས་ཀྱིས་ཀུན་ནས་བསྐོར་བར་མི་འགྱུར། དེ་དྲི་རབ་ཏུ་ཞིམ་པའི་ཆ་ལུགས་ལ་དགའ་བར་འགྱུར། གཉིད་ལོག་ན་ཡང་རྨི་ལམ་ན་ལྷའི་དོན་སྐུལ་བ་མཐོང་བར་འགྱུར་རོ། །དྲང་སྲོང་ཆེན་པོ་དེ་མངལ་ན་གནས་པ་ན་ཕྱིན་ཅི་མ་ལོག་པའི་རྨི་ལམ་མཐོང་ངོ་། ། [299a.2]བཙས་པའི་དུས་ན་ཡང་འདོད་ཆགས་དང་། ཞེ་སྡང་དང་། གཏི་མུག་རྣམ་པར་སྤངས་ནས་བཙས་ཏེ། དེ་གཟུགས་བཟང་བ། བལྟ་ན་སྡུག་པ། མཛེས་པ། རྐང་པ་ཤིན་ཏུ་གནས་པ། ཤིས་པའི་ཡན་ལག་དང་ཉིང་ལག་འབྲེལ་པ། ལག་པ་དང་། རྐང་པ་རིང་ལ་སྦོམ་པ། རོ་སྟོད་སེང་གེ་ལྟ་བུ། སོ་ཐགས་བཟང་ [299a.3]བ། ཤིན་ཏུ་འཇམ་པའི་ལུས་སོ། །དེ་གཅིག་ཏུ་འདོད་པའི་འདོད་ཆགས་ལ་ཆགས་པར་འགྱུར། །འདོད་ཆགས་མི་བཟད་པ། གོས་ཕྲ་བ་ལ་དགའ་བ། སྐྱེད་མོས་ཚལ་ལ་དགའ་བ། ལྷའི་དྲི་དང་རོལ་མོ་ལ་དགའ་བར་འགྱུར་རོ། །དེ་གསེར་དང་། ནོར་ཐམས་ཅད་འབྱོར་བའི་རིགས་ཆེན་པོར་སྐྱེ་སྟེ། སྦྱིན་པ་དང་། དུལ་བ་དང་། [299a.4]ཡང་དག་པར་སྡོམ་པ་ལ་དགའ་བར་འགྱུར་རོ། །གལ་ཏེ་འདོད་པ་ལ་ཤིན་ཏུ་ཆགས་ནས་སྦྱིན་པ་དང་། ཚུལ་ཁྲིམས་ལ་དགའ་བར་མ་གྱུར་ན། དེ་ཕྱིར་གཅིག་ནས་གཅིག་ཏུ་དབུལ་པོའི་རིགས་སུ་སྐྱེ་བར་འགྱུར་ཏེ། སེར་སྣ་ཅན་དང་། ཚུལ་ཁྲིམས་འཆལ་པ་རྣམས་ལ་བསྟོད་པ་དང་། ཧ་ཅང་སྔོ་བ་ཡང་མ་ཡིན་པ་དང་། [299a.5]ཧ་ཅང་དཀར་བ་ཡང་མ་ཡིན་པ་དང་། སྐྱེ་བོ་ཐམས་ཅད་དགའ་བ་དང་། གཞན་གྱི་ཆུང་མ་ལ་ཆགས་ཤིང་བདག་གི་ཆུང་མ་ལ་མི་ལྟ་བ་དང་། རྩ་ལག་གི་སྐྱེ་བོ་ལ་དགའ་བར་འགྱུར་རོ། །དྲང་སྲོང་ཆེན་པོ་འདི་ནི་སུམ་ཅུ་རྩ་གསུམ་ལྷའི་རིས་ནས་ཤི་འཕོ་བའི་ལྟས་འབྱུང་བའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་ [299a.6]སྩལ་ནས། དྲང་སྲོང་ཆེན་པོ་རྒྱས་པ་དང་། དྲང་སྲོང་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ [299a.7]ལས་དྲང་སྲོང་རྒྱས་པས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་དགུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།