Πίνδαρον ὑψαγόρην Καδμηίδος οὔδεϊ Θήβης
Κλειδίκη εὐνηθεῖσα μενεπτολέμῳ
Δαϊφάντῳ
γείνατο ναιετάουσα Κυνὸς κεφαλῆς παρὰ χώρῳ,
οὐκ οἶον· ἅμα τῷ
καὶ Ἐρίτιμον εἰδότα θήρην,
τὸν μὲν ὅτε κνώσσοντα ποτὶ χθόνα κάτθετο μήτηρ
εἰσέτι παιδνὸν ἐόντα,
μέλισσά τις ὡς ἐπὶ σίμβλῳ
χείλεσι νηπιάχοισι τιθαιβώσσουσα ποτᾶτο.
τῷ
δὲ λιγυφθόγγων ἐπέων μελέων θ᾿ ὑποθήμων
τὸ πρῶτον· μετὰ τὴν δ᾿ Ἀγαθοκλέος ἔμμορεν αὐδῆς,
ὅς τέ ῥά οἱ
κατέδειξεν ὁδὸν καὶ μέτρον ἀοιδῆς.
εὖτε δ᾿ Ἀλεξάνδροιο Φιλιππιάδαο μενοινῇ
Καδμείων ἀφίκοντο Μακηδόνες ἄστεα πέρσαι,
ἀλλὰ τὰ μὲν μετόπισθεν. ἔτι ζώοντι δ᾿ ἀοιδῷ
Φοῖβος ἄναξ ἐκέλευσε
πολυχρύσου παρὰ Πυθοῦς
ἤια καὶ μέθυ λαρὸν ἀεὶ Θήβηνδε κομίζειν.
καὶ
μέλος, ὡς ἐνέπουσιν, ἐν οὔρεσιν ἠυκέρως Πάν
ἦμος δ᾿ ἐν Μαραθῶνι καὶ ἐν Σαλαμῖνι παρέσταν
αἰναρέται Πέρσαι μετὰ
Δάτιδος ἀγριοφώνου,
τῆμος ἔτι ζώεσκεν, ὅτ᾿ Αἰσχύλος ἦν ἐν Ἀθήναις.
τῷ
δὲ Τιμοξείνη παρελέξατο δῖα γυναικῶν,
Πρωτομάχην δ᾿ ἐπὶ τοῖσιν. ἔμελψε δὲ κῦδος ἀγώνων
τῶν πισύρων, μακάρων
παιήονας ἐνδεδεγμένους,
καὶ μέλος ὀρχηθμοῖο, θεῶν τ᾿ ἐρικυδέας ὕμνους,
ἠδὲ μελιφθόγγων μελεδήματα παρθενικάων.
κάτθανεν ὀγδώκοντα τελειομένων ἐνιαυτῶν.