ܢܘܕܥ ܗܟܝܠ ܒܪܝܫ ܡܠܬܢ ܠܝܕܘ̈ܥܐ ܕܦܘܪܫܢܐ ܟܕ ܢܦܩ ܐܕܡ ܘܚܘܐ ܡܢ ܦܪܕܝܣܐ ܒܬܘ̈ܠܐ ܗܘܘ ܬܪ̈ܝܗܘܢ ܘܡܢ ܒܬܪ ܬܠܬܝܢ ܫܢ̈ܝܢ ܕܡܦܩܬܗܘܢ ܕܡܢ ܦܪܕܝܣܐ ܚܟܡ ܐܕܡ ܠܚܘܐ ܐܢܬܬܗ ܒܛܢܬ ܘܝܠܕܬ ܠܩܐܝܢ ܒܘܟܪܗ ܕܐܕܡ ܥܡ ܩܠܝܡܐ ܚܬܗ ܥܡܗ ܘܡܢ ܒܬܪ ܬܠܬܝܢ ܫܢ̈ܝܢ ܒܛܢܬ ܘܝܠܕܬ ܘܠܒܘܕܐ ܠܗܒܝܠ ܚܬܗ

ܘܒܫܢܬ ܡܐܐ ܠܚܝ̈ܝ ܐܕܡ ܩܛܠܗ ܩܐܝܢ ܠܗܒܝܠ ܐܚܘܗܝ ܘܐܬܐܒܠ ܥܠ ܩܛܠܗ ܐܕܡ ܡܐܐ ܫܢ̈ܝܐ ܘܒܫܢܬܐ ܡܐܬܝܢ ܘܬܠܬܝܢ ܕܐܠܦܐ ܗܿܘ ܩܕܡܝܐ ܐܬܝܠܕ ܫܝܬ ܫܦܝܪܐ ܓܒܪܐ ܒܕܡܘܬܗ ܕܐܕܡ ܘܒܫܢܬ ܚܡܫܡܐܐ ܕܐܠܦܐ ܗܿܘ ܩܕܡܝܐ ܫܪܝܘ ܒܢ̈ܝ ܘܩܐܝܢ ܕܢܙܢܘܢ ܒܢܫ̈ܝ ܐܚܝ̈ܗܘܢ

ܘܟܕ ܫܡܥ ܐܕܡ ܐܬܒܐܫ ܠܗ ܛܒ ܘܒܫܢܬ ܫܝܬܡܐܐ ܕܐܠܦܐ ܗܿܘ ܩܕܡܝܐ ܡܪ̈ܕܝ ܢܫ̈ܐ ܥܠ ܓܒܪ̈ܝܗܝܢ ܒܓܘ ܡܫܪܝܬܐ ܕܒܝܬ ܩܐܝܢ ܘܗܘ̈ܝ ܙܢܝ̈ܬܐ ܘܕܠܐ ܟܘܚܕܐ ܥܐܠܝܢ ܗܘܘ ܓܒܪ̈ܐ ܥܠܝܗܝܢ ܘܡܙܢܝܢ ܗܘܘ ܒܗܝܢ ܓܠܝܐܝܬ

ܘܒܫܢܬ ܬܡܢܡܐܐ ܠܚܝܘ̈ܗܝ ܕܐܕܡ ܣܓܬ ܫܪܝܚܘܬܐ ܘܙܢܝܘܬܐ ܒܒܢ̈ܬ ܩܐܝܢ ܘܡܝܬ ܐܕܡ ܒܫܢܬ ܬܫܥܡܐܐ ܘܬܠܬܝܢ ܕܐܠܦܐ ܗܿܘ ܩܕܡܝܐ ܡܚܕܐ ܦܪܫ ܛܘܗܡܐ ܕܒܝܬ ܫܝܬ

ܘܬܘ̈ܠܕܬܗ ܡܢ ܒܢ̈ܝ ܩܛܘܠܐ ܘܕܒܪ ܫܝܬ ܘܐܣܩ ܥܡܗ ܠܪ̈ܝܫܝ ܛܘܪ̈ܐ ܕܦܪܕܝܣܐ ܠܟܠܗܝܢ ܬܘ̈ܠܕܬܗ ܕܒܢ̈ܘܗܝ ܘܕܒܢ̈ܝ ܒܢ̈ܘܗܝ ܘܦܫ ܩܐܝܢ ܘܬܘ̈ܠܕܬܗ ܠܬܚܬ ܒܦܩܥܬܐ ܐܝܟܐ ܕܩܛܠܗ ܠܗܒܝܠ ܐܚܘܗܝ ܘܒܫܢܬ ܐܪܒܥܝܢ ܕܝܪܕ ܫܠܡ ܐܠܦܐ ܩܕܡܝܐ

ܘܒܫܢܬ ܬܠܬܡܐܐ ܘܫܒܥܝܢ ܕܝܪܕ ܒܬܠܬܡܐܐ ܒܐܠܦܐ ܕܬܪܝܢ ܗܘܘ ܗܠܝܢ ܐܘܡ̈ܢܐ ܕܚܛܝܬܐ ܕܗܘܘ ܒܢ̈ܝ ܥܘܠܐ ܒܓܘ ܡܫܪܝܬܐ ܕܒܢ̈ܝ ܩܐܝܢ ܝܘܒܠ ܘܬܘܒܠܩܝܢ ܒܢ̈ܘܗܝ ܕܠܡܟ ܣܡܝܐ ܗܿܘ ܕܩܛܠܗ ܠܩܐܝܢ ܘܥܠ ܣܛܢܐ ܘܥܡܪ ܒܗܘܢ ܘܪܟܒܘ ܘܥܒܕܘ ܟܠ ܙܢ̈ܝ ܙܡܪܐ ܩܝܬܪ̈ܐ ܘܐܒ̈ܘܒܐ

ܘܒܫܢܬܐ ܚܡܫܡܐܐ ܕܐܠܦܐ ܕܬܪܝܢ ܐܬܦܩܪܘ ܓܒܪ̈ܐ ܘܢܫ̈ܐ ܒܓܘ ܡܫܪ̈ܝܬܐ ܕܒܢ̈ܝ ܩܐܝܢ ܘܓܠܝܐܝܬ ܪ̈ܗܛܢ ܗܘ̈ܝ ܢܫ̈ܐ ܒܬܪ ܓܒܪ̈ܐ ܘܒܕܡܘܬܐ ܕܪ̈ܟܫܬܐ ܗܠܝܢ ܕܐܝܬܝܗܝܢ ܒܪܡܟܐ ܒܥܪܝܪܝܬܐ ܗܟܢܐ ܡܬܦܩܪ̈ܢ ܗܘ̈ܝ ܢܫ̈ܐ ܒܫܪܝܚܘܬ ܙܢܝܘܬܐ ܓܒܪ̈ܐ ܐܟܚܕܐ ܘܢܫ̈ܐ

ܥܒܕ ܣܛܢܐ ܩܪܒܐ ܥܡ ܒܢ̈ܝ ܫܝܬ ܘܒܫܘܠܡ ܐܠܦܐ ܗܿܘ ܕܬܪ̈ܝܢ ܗܘܐ ܛܘܒܢܐ ܕܡ̈ܝܐ ܘܐܬܚܒܠ ܗܿܘ ܬܘܩܢܐ ܕܬܪ̈ܝܢ ܐܠܦ̈ܝܢ ܫܢ̈ܝܐ ܒܚܕܐ ܫܥܬܐ

ܘܒܫܢܬ ܬܠܬܡܐܐ ܘܬܪܬܥܣܪ̈ܐ ܠܚܝ̈ܝ ܢܘܚ ܒܬܪܬܥܣܪܐ ܠܕܪܐ ܐܠܦܐ ܗܿܘ ܕܬܠܬܐ ܟܕ ܢܦܩ ܢܘܚ ܡܢ ܩܐܒܘܬܐ ܒܢܘ ܒܢ̈ܝ ܢܘܚ ܒܢܝ̈ܢܐ ܒܐܪܥܐ ܗܕܐ ܩܪܝܬܐ ܘܩܪܘ ܫܡܗܿ ܕܩܪܝܬܐ ܬܡܢܘܢ ܥܠ ܫܡ ܬܡ̈ܢܐ ܢܦܫ̈ܢ ܗܠܝܢ ܕܐܫܬܚܪܘ ܒܥܠܡܐ

ܘܒܫܢܬ ܫܒܥܡܐܐ ܠܚܝ̈ܝ ܢܘܚ ܘܡܐܐ ܫܢ̈ܝܢ ܕܐܠܦܐ ܕܬܠܬܐ ܐܬܝܠܕ ܠܢܘܚ ܒܪܐ ܓܒܪܐ ܒܕܡܘܬܗ ܐܝܟ ܨܠܡܗ ܘܩܪܐ ܫܡܗ ܝܘܢܛܘܢ ܘܒܫܢܬ ܬܠܬܡܐܐ ܕܐܠܦܐ ܕܬܠܬܐ ܝܗܒ ܢܘܚ ܡܘܗ̈ܒܬܐ ܠܝܘܢܛܘܢ ܒܪܗ ܘܫܕܪܗ ܠܡܕܢܚܐ

ܘܡܢ ܒܬܪ ܡܘܬܗ ܕܢܘܚ ܒܫܢܬ ܫܒܥܡܐܐ ܘܬܫܥܝܢ ܕܐܠܦܐ ܕܬܠܬܐ ܣܠܩܘ ܒܢ̈ܝ ܢܘܚ ܡܢ ܡܕܢܚܐ ܘܒܢܘ ܠܗܘܢ ܡܓܕܠܐ ܒܦܩܥܬܐ ܕܣܝܢܥܕܘܪ ܒܒܝܠ ܘܬܡܢ ܐܬܒܠܒܠܘ ܗܘܘ ܠܫܢ̈ܝܗܘܢ ܘܐܬܒܕܪܘ ܗܘܘ ܥܠ ܐܦܝ̈ ܟܠܗܿ ܐܪܥܐ

ܘܝܘܢܛܘܢ ܒܪ ܢܘܚ ܢܚܬ ܠܗ ܠܡܕܢܚܐ ܘܡܛܐ ܠܝܡܐ ܗܿܘ ܕܡܬܩܪܐ ܢܘܪ ܫܡܫܐ ܗܿܘ ܕܡܢܗ ܗܘ ܣܠܩ ܫܡܫܐ ܡܢ ܡܕܢܚܐ ܘܗܘܐ ܡܥܡܪܗ ܬܡܢ

ܗܘ ܗܢܐ ܝܘܢܛܘܢ ܩܒܠ ܓܠܝ̈ܢܐ ܕܚܟܡܬܐ ܡܢ ܐܠܗܐ ܘܗܘ ܫܪܝ ܠܘܩܕܡ ܕܢܬܚܫܚ ܒܗܠܝܢ ܕܪܗܛܐ ܕܟܘ̈ܟܒܐ ܘܠܘܬܗ ܢܚܬ ܢܡܪܘܕ ܘܗܘ ܪܕܝܗܝ ܒܟܠܗܿ ܚܟܡܬܐ ܘܡܢܗ ܩܒܠ ܦܘܩ̈ܕܢܐ ܕܢܗܘܐ ܡܠܟܐ ܗܘ ܓܝܪ ܗܢܐ ܢܡܪܘܕ ܓܒܪܐ ܗܘܐ ܡܢ ܒܢ̈ܝܫܝܡ ܗܢܐ ܗܘܐ ܡܠܟܐ ܩܕܡܝܐ ܥܠ ܟܠܗܿ ܐܪܥܐ

ܘܒܫܢܬ ܫܒܥ ܡܐܐ ܘܬܫܥܝܢ ܘܬܫܥ ܕܐܠܦܐ ܕܬܠܬܐ ܒܫܢܬ ܬܠܬܝܢ ܕܡܠܟܘܬܗ ܕܢܡܪܘܕ ܫܕܪ ܓܒܪ̈ܐ ܓܢܒܪ̈ܝ ܚܝܠܐ ܡܢ ܒܢ̈ܝ ܝܦܬ ܐܢܫ̈ܐ ܚܟ̈ܝܡܐ ܘܐܘܡ̈ܢܐ ܡܗܝܪ̈ܝ ܒܝܕܥܬܐ ܘܢܚܬܘ ܠܡܕܢܚܐ ܠܘܬ ܝܘܢܛܘܢ ܒܪ ܢܘܚ ܘܒܢܘ ܠܗ ܡܕܝܢܬܐ ܫܦܝܪܬܐ ܘܥܡܪ ܒܗܿ ܘܩܪܘ ܫܡܗܿ ܝܘܢܛܘܢ

ܘܗܘܐ ܫܠܡܐ ܒܝܬ ܡܠܟܘܬܗ ܕܝܘܢܛܘܢ ܠܒܝܬ ܡܠܟܘܬܗ ܕܢܡܪܘܕ ܥܕܡܐ ܠܝܘܡܢܐ ܘܒܝܬ ܡܠܟܘܬܗ ܕܢܡܪܘܕ ܒܪ ܫܝܡ ܠܒܝܬ ܡܠܟܘܬܗ ܕܦܘܦܝܢܘܣ ܒܪ ܚܡ ܠܐ ܗܘܐ ܫܠܡܐ ܡܛܠ ܕܒܝܘ̈ܡܝ ܢܡܪܘܕ ܥܒܕܘ ܪܩܒܐ ܚܕ ܥܡ ܚܕ ܒܢ̈ܝ ܝܦܬ ܘܒܢ̈ܝ ܚܡ

ܟܬܒ ܠܗܘܢ ܝܘܢܛܘܢ ܒܪ ܢܘܚ ܕܡܠܟܘܬܐ ܠܡ ܕܒܢ̈ܝ ܝܦܬ ܗܝ ܡܫܬܥܒܕܐ ܠܡܠܟܘܬܐ ܕܒܢ̈ܝ ܗܠܝܢ ܬܪܝܢ ܡܠܟܘ̈ܬܐ ܗܘ̈ܝ ܒܐܪܥܐ ܡܢ ܩܕܝܡ ܘܗܝܕܝܢ ܫܩܠ ܫܘܪܝܐ ܟܠܗܝܢ ܡܠܟܘ̈ܬܐ ܕܥܡ̈ܡܐ

ܘܡܢ ܒܬܪ ܡܠܟܘܬܗ ܕܢܡܪܘܕ ܟܕ ܫܠܡ ܐܠܦܐ ܕܬܠܬܐ ܘܒܫܢܬ ܫܒܥܝܢ ܕܐܪܥܘ ܕܐܝܬܝܗܿ ܫܢܬ ܬܠܬܝܢ ܘܬܫܥ ܕܐܠܦܐ ܗܿܘ ܕܐܪܒܥܐ ܥܒܕܘ ܩܪܒܐ ܬܪ̈ܬܝܗܝܢ ܡ̈ܠܟܘܬܐ ܚܕܐ ܘܚܕܐ ܘܚܣܢܬ ܡܠܟܘܬܗ ܕܒܝܬ ܢܡܪܘܕ ܠܡܠܟܘܬܐ ܕܡܨܪ̈ܝܐ ܘܐܬܝܒܠܬ ܡܠܟܘܬܐ ܕܒܒ̈ܠܝܐ ܡܢ ܙܪܥܗ ܕܢܡܪܘܕ ܓܒܪܐ ܥܕܡܐ ܠܡܠܟܘܬܗ ܕܗܘܪܡܙܕ ܗܢܐ ܢܣܒ ܠܗ ܐܢܬܬܐ ܡܢ ܬܘ̈ܠܕܬܗ ܕܚܡ

ܟܕ ܡܝܬ ܗܘܪܡܙܕ ܢܣܒ ܠܗ ܥܙܪܝ ܒܪܗ ܠܐܡܗ ܒܢܫ̈ܐ ܘܐܬܝܠܕ ܠܗ ܡܢܗܿ ܗܘܪܡܙܕ ܗܢܐ ܟܢܫ ܠܗ ܚܝ̈ܠܘܬܐ ܣܓܝ̈ܐܐ ܘܣܠܩ ܥܠ ܡܠܟܘܬܐ ܕܒܢ̈ܝ ܚܕ ܘܫܒܐ ܘܐܚܪܒ ܘܐܘܩܕ ܒܢܘܪܐ ܠܐܬܪ̈ܘܬܐ ܟܠܗܘܢ ܕܡܥܪܒܐ

ܘܒܫܢܬ ܬܪܬܝܢ ܕܡܠܟܘܬܗ ܕܟܘܕܪܘܣ ܒܪ ܗܘܪܡܙܕ ܐܬܟܢ̈ܫܝ ܡ̈ܠܟܘܬܐ ܕܒܒ̈ܠܝܐ ܘܗܘܝܢ ܗܘܘ ܒܡܢܝܢܐ ܬܠܬܡܐܐ ܘܥܣܪ̈ܝܢ ܐܠܦ̈ܝܢ ܪ̈ܓܠܝܐ ܕܛܥܝܢܝܢ ܗܘܘ ܟܠܗܘܢ ܚܘܛܪ̈ܐ ܒܠܚܘܕ

ܘܟܕ ܫܡܥ ܟܘܕܪܘܣ ܡܛܠܬܗܘܢ ܓܚܟ ܘܫܒܩ ܐܢܘܢ ܕܢܚܬܘܢ ܘܢܐܬܘܢ ܥܕܡܐ ܠܕܩܠܬ ܘܫܕܪ ܥܠܝܗܘܢ ܡܠܟܐ ܚܝܠܐ ܕܦܪ̈ܣܝܐ ܘܓܒܪ̈ܐ ܓܢܒܪ̈ܝ ܚܝܠܐ ܟܕ ܪܟܝܒܝܢ ܦܝ̈ܠܐ ܘܣܠܩ ܥܠܝܗܘܢ ܘܚܪܒ ܐܢܘܢ ܘܠܐ ܐܫܬܚܪܘ ܡܢܗܘܢ ܐܦܠܐ ܚܕ

ܘܟܕ ܫܠܡ ܐܠܦܐ ܗܿܘ ܕܐܪܒܥܐ ܕܐܝܬܝܗܿ ܫܢܬ ܥܣܪܝܢ ܘܚܡܫ ܕܗܘܪܡܙܕ ܒܗܿ ܒܫܢܬܐ ܗܿܝ ܩܕܡܝܬܐ ܕܥܠ ܒܗܿ ܐܠܦܐ ܕܚܡܫܐ ܢܚܬ ܫܡܥܝܥܣܪ ܡܠܟ ܡܕܢܚܐ ܡܢ ܬܘ̈ܠܕܬܗ ܕܝܘܢܛܘܢ ܒܪ ܢܘܚ ܘܚܪܒ ܡܢ ܦܪܬ ܘܥܕܡܐ ܠܐܕܪܘܝܓܢ ܫܬܝܢ ܘܫܒܥ ܡܕܝ̈ܢܬܐ ܘܐܬܪ̈ܘܬܐ ܟܠܗܘܢ ܕܚܕܪ̈ܝܗܝܢ

ܘܥܠ ܠܬܠܬ̈ܝܗܝܢ ܡ̈ܠܟܘܬܐ ܕܗܢ̈ܕܘܝܐ ܘܚܪܒ ܘܫܒܐ ܘܐܘܩܕ ܒܢܘܪܐ ܘܢܦܩ ܠܡܕܒܪܐ ܘܚܪܒ ܘܫܒܐ ܠܡܫܪܝܬܐ ܕܒܢ̈ܝ ܐܝܫܡܝܠ ܒܪ ܗܓܪ ܡܨܪܝܬܐ ܐܡܬܗܿ ܕܣܪܐ ܐܢܬܬܗ ܕܐܒܪܗܡ ܘܥܪܩ ܡܢ ܡܕܒܪܐ ܕܝܬܪܒ ܘܥܠܘ ܠܓܘ ܐܪܥܐ ܕܫܝܢܐ ܘܥܒܕ ܩܪܒܐ ܥܡ ܡܠܟ̈ܐ ܕܥܡ̈ܡܐ ܘܚܪܒ ܐܢܘܢ ܘܐܚܪܒܘ ܘܫܒܘ ܘܫܥܒܕܘ ܠܟܠܗܝܢ ܡ̈ܠܟܘܬܐ ܕܥܡ̈ܡܐ ܘܗܘܬ ܟܠܗܿ ܐܪܥܐ ܕܡܘܠܟܢܐ ܬܚܝܬ ܫܘܥܒܕܗܘܢ

ܘܐܬܡܠܝܬ ܐܪܥܐ ܡܢܗܘܢ ܘܡܢ ܡܫܪ̈ܝܬܗܘܢ ܘܐܝܟ ܩܡܨܐ ܡܗܠܟܝܢ ܗܘܘ ܫܠܝܚܐܝܬ ܘܐܟܠܝܢ ܗܘܘ ܒܣܪܐ ܒܠܓ̈ܝ ܒܣܪܐ ܘܫܬܝܢ ܕܡܐ ܕܚܝܘ̈ܬܐ

ܘܟܕ ܟܒܫܘܗܿ ܒܢ̈ܝ ܐܝܫܡܝܥܝܠ ܘܫܥܒܕܘܗܿ ܠܟܠܗܿ ܐܪܥܐ ܘܚܪܒܘ ܡܕܝܢ̈ܬܐ ܘܩܘܪ̈ܝܐܣ ܘܐܫܬܠܛܘ ܒܟܠܗܝܢ ܡ̈ܠܟܘܬܐ ܕܥܡ̈ܡܐ ܘܒܪ̈ܟܘܒܐ ܕܩܝ̈ܣܐ ܦܪܚܝܢ ܗܘܘ ܠܥܠ ܡܢ ܓܐ̈ܠܠܘܗܝ ܕܝܡܐ ܣܠܩܘ ܠܐܬܪ̈ܘܬܐ ܕܡܥܪܒܐ ܘܡܛܘ ܥܕܡܐ ܠܪܘܡܝ ܪܒܬܐ ܘܥܕܡܐ ܠܐܠܩܩܘܢ ܘܠܐܓܒܛܘܣ ܘܠܐܦܢܣܘܠܝܘܣ ܘܐܠܘܙܐ ܪܒܬܐ ܕܠܥܠ ܡܢ ܪܘܡܝ

ܘܟܕ ܐܚܕܘ ܠܐܪܥܐ ܫܬܝܢ ܫܢ̈ܝܢ ܘܥܒܕܘ ܒܗܿ ܐܝܟ ܨܒܝܢܗܘܢ ܡܢ ܒܬܪ ܬܡܢܝܐ ܫܒܘ̈ܥܝܢ ܘܦܠܓܘܬ ܫܒܘܥܐ ܚܣܢܘ ܠܟܠܗܝܢ ܡ̈ܠܟܘܬܐ ܕܥܡ̈ܡܐ ܘܦܩܪܘ ܘܐܫܬܝܚܢܘ ܒܫܘܒܗܪܐ ܕܪܡܘܬܗܘܢ ܘܗܘܘ ܠܗܘܢ ܥܒ̈ܕܐ ܡܠܟ̈ܐ ܕܚܝ̈ܬܝܐ ܘܡܠܟ̈ܐ ܕܚܩ̈ܝܐ ܘܡܠܟ̈ܐ ܕܐܡܘܪ̈ܝܐ ܘܡܠܟ̈ܐ ܕܝܒܘ̈ܣܝܐ ܘܡܠܟ̈ܐ ܕܓܪ̈ܓܘܣܝܐ ܘܡܠܟ̈ܐ ܕܟܢ̈ܥܢܝܐ ܘܡܠܟ̈ܐ ܕܥܡܘ̈ܢܝܐ ܘܡܠܟ̈ܐ ܕܦܠܫ̈ܬܝܐ.

ܘܗܘܘ ܒܗܿܘ ܙܒܢܐ ܗܠܝܢ ܡܕܒܪ̈ܢܐ ܐܪܒܥܐ ܛܪ̈ܘܢܐ ܒܢ̈ܝܗܿ ܕܡܘܢܝ ܛܝܝܬܐ ܥܘܪܝܒܕ ܘܙܝܒ ܘܙܒܚ ܘܨܠܡܢܥ ܘܟܕ ܥܒܕ ܠܗܘܢ ܦܘܪܩܢܐ ܠܐܣܝܪ̈ܠܝܐ ܒܐܝ̈ܕܝ ܡܘܫܐ ܘܐܗܪܘܢ ܡܢ ܫܘܥܒܕܐ ܕܡܨܪ̈ܝܐ ܘܟܕ ܥܠܘ ܠܐܪܥܐ ܕܢܝܚܬܐ ܘܐܬܟܕܢܘ ܒܢܝܪܐ ܕܥܒܕܘܬܐ ܥܦܝܦܬܐ ܠܡܪܕܘܬܐ ܕܒܢ̈ܝ ܐܝܫܡܥܝܠ ܗܠܝܢ ܡܕܝ̈ܢܝܐ ܡܫܬܒܗܪܝܢ ܗܘܘ ܘܟܕ ܚܙܐ ܐܠܗܐ ܐܘܠܨܢܐ ܩܫܝܐ ܕܐܠܨܝܢ ܠܗܘܢ ܥܒܕ ܠܗܘܢ ܐܠܗܐ ܦܘܪܩܢܐ

ܘܗܢܐ ܚܪܒ ܐܢܘܢ ܠܗܘܢ ܘܠܡܕܒܪ̈ܢܝܗܘܢ ܘܛܪܕ ܘܐܦܩ ܐܢܘܢ ܡܢ ܓܘ ܫܝܢܐ ܠܡܕܒܪܐ ܕܝܬܪܒ

ܘܗܠܝܢ ܕܐܫܬܚܪܘ ܡܢܗܘܢ ܝܗܒܘ ܝܡܝܢܐ ܕܫܠܡܐ ܠܒܢ̈ܝ ܝܣܝܪܐܝܠ ܘܢܦܩܘ ܠܗܘܢ ܠܡܕܒܪܐ ܗܢܐ ܓܘܝܐ ܫܒ̈ܥ ܫܪ̈ܒܢ ܒܪܡ ܕܝܢ ܥܬܝܕܝܢ ܐܢܘܢ ܕܢܦܩܘܢ ܘܢܐܚܪܒܘܢ ܐܪܥܐ ܘܢܫܬܠܛܘܢ ܒܗܿ ܘܢܐܚܕܘܢ ܐܬܪ̈ܘܬܐ ܘܡܥܒܪ̈ܬܐ ܘܡܥ̈ܠܢܝ ܫܝܢܐ ܡܢ ܡܨܪܝܢ ܘܥܕܡܐ ܠܟܘܫ ܘܡܢ ܦܪܬ ܘܥܕܡܐ ܠܗܢܕܘ ܘܡܢ ܕܩܠܬ ܘܥܕܡܐ ܠܝܡܐ ܗܿܘ ܕܡܬܩܪܐ ܢܘܪ ܫܡܫܐ ܘܡܠܟܘܬܗ ܕܝܘܢܛܘܢ ܒܪ ܢܘܚ ܘܡܢ ܓܪܒܝܐ ܘܥܕܡܐ ܠܪܘܡܝ ܪܒܬܐ ܘܥܕܡܐ ܠܝܡܐ ܪܒܐ ܕܦܢܛܘܣ ܡܛܠ ܕܥܦܝܦ ܢܝܪܗܘܢ ܥܠ ܫܘܥܒܕܐ ܕܟܠܗܘܢ ܥܡ̈ܡܐ

ܘܠܝܬ ܥܡܐ ܐܘ ܡܠܟܘܬܐ ܕܬܚܝܬ ܫܡܝܐ ܕܡܩܪܒܝܢ ܥܡܗܿ ܠܐ ܚܣܢܝܢ ܠܗܿ ܘܡܢ ܒܬܪ ܥܣܪܐ ܫܒܘ̈ܥܐ ܕܫܢ̈ܝܐ ܗܠܝܢ ܘܐܦ ܗܢܘܢ ܡܬܚܣܢܝܢ ܡܢ ܡܠܟܘܬܐ ܕܪ̈ܘܡܝܐ ܘܠܗܿ ܡܫܬܥܒܕܝܢ ܡܛܠ ܕܗܝ ܚܣܢܬ ܠܟܠܗܝܢ ܡ̈ܠܟܘܬܐ ܘܗܝ ܠܐ ܡܬܚܣܢܐ ܡܢ ܚܕܐ ܡܢܗܝܢ ܡܛܠ ܕܗܝ ܐܚܝܕܐ ܫܪܝܪܐܝܬ ܙܝܢܐ ܗܿܘ ܠܐ ܡܙܕܟܝܢܐ ܕܠܟܠ ܙܟܐ.

ܘܡܢ ܗܪܟܐ ܐܣܬܟܠܘ ܒܝܘܒܠܐ ܕܡ̈ܠܟܘܬܐ ܘܡܚܕܐ ܡܬܝܕܥ ܠܟܘܢ ܫܪܪܐ ܘܗܘ ܡܚܘܐ ܠܟܘܢ ܢܦܫܗ ܕܠܐ ܬܚܦܝܬܐ ܘܕܠܐ ܛܘܥܝܝ

ܘܥܕܡܐ ܠܗܕܪܙܪܩ ܡܠܟܐ ܕܓܢܒܪ̈ܐ ܕܒܢ̈ܝ ܢܡܪܘܕ ܗܠܝܢ ܕܐܚܝܕܝܢ ܗܘܘ ܡܠܟܘܬܐ ܕܒܒܝܠ ܘܡܢ ܗܕܪܙܪܩ ܘܥܕܡܐ ܠܣܣܢ ܣܒܐ ܡܡܠܟܝܢ ܦܪ̈ܣܝܐ ܘܡܢ ܣܣܢ ܘܥܕܡܐ ܠܦܝܪܡܘܙ ܡܠܟ ܡܠܟ̈ܐ ܘܡܢ ܣܠܝܩ ܘܥܕܡܐ ܠܩܛܝܣܦܘܢ ܘܡܢ ܦܝܪܘܙ ܘܥܕܡܐ ܠܣܢܚܝܪܝܒ

ܠܝܢܩܬ ܩܪܕܘܝܬܐ ܐܬܝܠܕ ܠܗܿ ܡܢܗܿ ܐܕܪܡܠܟ ܘܫܪܐܨܕ ܘܣܪܚܕܘܡ ܘܩܛܠܘܗܝ ܗܠܝܢ ܬܪܝܢ ܒܢ̈ܝܐ ܠܐܒܘܗܘܢ ܘܗܢܘܢ ܥܪܩܘ ܠܐܪܥܐ ܕܩܪ̈ܕܘܝܐ

ܘܐܡܠܟ ܣܪܚܕܘܡ ܒܪܗ ܒܒܒܝܠ ܚܠܦ ܣܢܚܝܪܝܒ ܐܒܘܗܝ ܘܒܬܪܗ ܢܒܘܟܕܢܨܪ ܘܗܘܐ ܡܢ ܐܒܐ ܠܘܕܝܐ ܘܡܢ ܡܠܟܐ ܫܒܐ

ܘܟܕ ܥܠ ܣܢܚܝܪܝܒ ܕܢܥܒܕ ܩܪܒܐ ܥܡ ܡܠܟܐ ܕܗܢ̈ܕܘܝܐ ܥܠ ܥܕܡܐ ܠܝܒܐ ܘܚܪܒ ܒܗܿ ܐܬܪ̈ܘܬܐ ܣܓܝ̈ܐܐ ܘܢܦܩ ܥܡܗ ܒܪܗ ܘܗܘܐ ܪܒ ܡܗ̈ܝܡܢܐ ܘܒܝܕ ܚܟܡܬܗ ܘܓܢܒܪܘܬܗ ܐܬܝܗܒܬ ܠܗ ܡܠܟܘܬܐ ܕܒܒܝܠ

ܘܢܣܒ ܠܗ ܐܢܬܬܐ ܡܢ ܡܕܝ ܠܗܘܪܡܝܙܕܘ ܡܕܝܢܬܐ ܘܕܪܝܘܫ ܢܣܒ ܠܗ ܐܢܬܬܐ ܠܪܘܕ ܦܪܣܝܬܐ ܗܿܝ ܕܡܢܗܿ ܐܬܝܠܕ ܟܘܪܫ ܦܪܣܝܐ

ܫܡܥ ܗܫܐ ܐܝܟܢܐ ܐܬܚܣ̈ܢܝ ܠܗܝܢ ܡ̈ܠܟܘܬܐ ܕܡܕܢܚܐ ܚܕܐ ܡܢ ܚܕܐ ܗܿܘ ܕܒܒ̈ܠܝܐ ܐܬܚܣܢܬ ܡܢ ܗܿܝ ܕܡܕ̈ܝܐ ܘܗܿܝ ܕܡܕ̈ܝܐ ܡܢ ܗܿܝ ܕܦܪ̈ܣܝܐ ܘܚܣܢܬ ܗܿܝ ܒܒ̈ܠܝܐ ܠܗܿܝ ܕܟܘ̈ܫܝܐ ܘܕܫܒܐ ܘܕܣܐܒܐ ܘܠܡ̈ܠܟܘܬܐ ܕܥܡ̈ܡܐ ܡܢ ܝܡܐ ܥܕܡܐ ܠܦܪܬ ܣܛܪ ܡܢ ܡܠܟܘܬܐ ܕܒܝܬ ܕܘܝܕ ܘܠܗܿܝ ܕܒܝܬ ܕܘܝܕ ܚܣܢܬ ܡܠܟܘܬܐ ܕܒܒܝܠ ܒܝܕ ܢܒܘܟܕܢܨܪ ܗܢܐ ܚܣܢ ܠܥܒܪ̈ܝܐ ܘܠܡܨܪ̈ܝܐ

ܘܕܪܝܘܫ ܡܕܝܐ ܚܣܢ ܠܗܢ̈ܕܘܝܐ ܘܠܠܘܙ̈ܝܐ ܘܟܘܪܫ ܦܪܣܝܐ ܚܣܢ ܠܬܪ̈ܩܝܐ ܘܥܒܕ ܦܘܢܝܐ ܠܒܢ̈ܝ ܝܣܪܐܝܠ

ܫܡܥ ܗܫܐ ܥܠ ܗܠܝܢ ܡ̈ܠܟܘܬܐ ܐܪ̈ܒܥ ܕܐܝܟܢܐ ܐܬܚܣ̈ܢܝ ܚܕܐ ܒܚܕܐ ܗܿܝ ܕܟܘ̈ܫܝܐ ܒܗܿܝ ܕܡܩܕ̈ܘܢܝܐ ܘܗܿܝ ܕܡܩܕ̈ܘܢܝܐ ܘܗܿܝ ܕܡܩܕ̈ܘܢܝܐ ܒܗܿܝ ܕܝܘ̈ܢܝܐ ܘܗܿܝ ܕܝܘ̈ܢܝܐ ܒܗܿܝ ܕܪ̈ܘܡܝܐ ܘܗܠܝܢ ܗܘ̈ܝ ܐܪܒܥ ܪ̈ܘܚܝ ܫܡܝܐ ܕܚܙܐ ܕܢܝܐܝܠ ܕܡܓܝܚ̈ܢ ܗܘ̈ܝ ܠܝܡܐ ܪܒܐ.

ܦܝܠܠܝܦܘܣ ܐܒܘܗܝ ܕܡܠܟ ܡܠܟ̈ܐ ܐܠܟܣܢܕܪܘܣ ܐܝܬܘܗܝ ܗܘܐ ܡܩܕ̈ܘܢܝܐ ܘܢܣܒ ܠܗ ܦܝܠܠܝܦܘܣ ܐܢܬܬܐ ܡܿܢ ܠܟܘܫܬ ܒܪܬ ܦܝܠ ܡܠܟܐ ܕܟܘܫ̈ܝܐ ܘܡܢܗܿ ܐܬܝܠܕ ܐܠܟܣܢܕܪܘܣ ܡܠܟܐ ܡܩܕ̈ܘܢܝܐ ܕܝܘ̈ܢܝܐ

ܗܢܐ ܒܢܐ ܠܐܠܟܣܢܕܪܘܝܐ ܪܒܬܐ ܘܐܡܠܟ ܒܗܿ ܬܪܬܥܣܪܐ ܫܢ̈ܝܢ ܗܘ ܗܢܐ ܢܚܬ ܠܡܕܢܚܐ ܘܩܛܠܗ ܠܕܪܝܘܫ ܡܕܝܐ ܘܟܒܫ ܐܬܪ̈ܘܬܐ ܣ̈ܓܝܐܐ ܘܐܬܟܪܟ ܒܐܪܥܐ ܘܢܚܬ ܠܡܕܢܚܐ ܘܐܙܠ ܥܕܡܐ ܠܝܡܐ ܕܡܬܩܪܐ ܢܘܪ ܫܡܫܐ ܘܚܙܐ ܬܡܢ ܥܡ̈ܡܐ ܡܣܝ̈ܒܐ ܘܡܫܟܪ̈ܝ ܒܚܙܬܐ ܗܠܝܢ ܕܐܝܬܝܗܘܢ ܒܢ̈ܝ ܝܦܬ

ܘܟܕ ܚܙܐ ܐܢܘܢ ܕܐܝܕܐ ܛܢܦܘܬܐ ܣܥܪܝܢ ܗܘܘ ܕܐܟܠܝܢ ܗܘܘ ܫܪܨܗܿ ܕܐܪܥܐ ܥܩܘܒܪ̈ܐ ܘܟܠܒ̈ܐ ܘܩܛܘ̈ܢܐ ܐܟܠܝܢ ܗܘܘ ܘܠܐ ܡܥܦܝܢ ܗܘܘ ܘܩܒܪܝܢ ܡܝ̈ܬܝܗܘܢ ܘܥܘ̈ܠܐ ܗܠܝܢ ܕܡܝܚ̈ܛܢ ܗܘ̈ܝ ܢܫ̈ܐ ܐܝܟ ܡܕܡ ܡܝܬܪܐ ܐܟܠܝܢ ܗܘܘ

ܘܟܕ ܚܙܐ ܐܠܟܣܢܕܪܘܣ ܛܢܦܘܬܗܘܢ ܩܪܐ ܠܐܠܗܐ ܠܥܘܕܪܢܗ ܘܟܢܫ ܘܐܦܩ ܐܢܘܢ ܠܗܘܢ ܘܠܢܫ̈ܝܗܘܢ ܘܠܒܢ̈ܝܗܘܢ ܘܠܟܠܗܝܢ ܡܫܪ̈ܝܬܗܘܢ

ܐܦܩ ܐܢܘܢ ܡܢ ܓܘ ܡܕܢܚܐ ܘܐܥܠ ܘܚܒܫ ܐܢܘܢ ܡܢ ܣܘ̈ܦܝ ܓܪܒܝܐ ܠܓܘ ܡܢ ܡܥܠܢܐ ܗܿܘ ܕܐܝܬܘܗܝ ܬܪܥܗ ܕܥܠܡܐ ܡܢ ܓܪܒܝܐ ܘܠܝܬ ܡܥܠܢܐ ܐܚܪܢܐ ܐܘ ܡܦܩܢܐ ܡܢ ܣܘ̈ܦܝ ܥܠܡܐ ܡܢ ܡܕܢܚܐ ܠܡܥܪܒܐ

ܘܨܠܝ ܐܠܟܣܢܕܪܘܣ ܡܠܟܐ ܩܕܡ ܐܠܗܐ ܘܫܡܥܗ ܐܠܗܐ ܘܦܩܕ ܠܗܘܢ ܐܠܗܐ ܠܛܘܪ̈ܐ ܗܠܝܢ ܕܡܬܩܪܝܢ ܒܢ̈ܝ ܓܪܒܝܐ ܘܩܪܒ ܚܕ ܠܘܬ ܚܕ ܥܕܡܐ ܠܬܪ̈ܬܥܣܪ̈ܐ ܐܡ̈ܝܢ ܒܠܚܘܕ

ܘܥܒܕ ܬܪܥܐ ܕܢܚܫܐ ܘܡܫܚܗ ܡܢ ܠܓܘ ܬܐܣܩܛܝܣ ܕܐܢ ܡܩܪܒܝܢ ܠܗ ܦܪܙܠܐ ܐܝܟ ܕܢܦܬܚܘܢܝܗܝ ܘܠܐ ܡܙܝܥܝܢ ܠܗ ܘܐܢ ܨܒܝܢ ܕܒܢܘܪܐ ܢܦܫܪܘܢܝܗܝ ܡܕܥܟ ܠܗܿ ܠܢܘܪܐ ܕܡܬܩܪܒܐ ܠܗ ܡܛܠ ܕܟܝܢܗܿ ܕܬܐܣܩܛܝܣ ܠܐ ܙܐܥ ܡܢ ܦܪܙܠܐ ܘܐܦܠܐ ܡܢ ܡܥܒܕܢܘܬܐ ܕܫ̈ܐܕܐ ܘܐܦܠܐ ܡܫܟܚܐ ܢܘܪܐ ܕܬܘܩܕܝ ܡܕܡ ܐܢ ܡܬܩܪܒܐ ܠܗ

ܡܛܠ ܕܒܟܠܗܿ ܒܝܫܘܬܐ ܕܚܪܫܘܬܐ ܡܬܚܫܚܝܢ ܗܘܘ ܗܠܝܢ ܥܡ̈ܡܐ ܛܢ̈ܦܐ ܕܚܒܝܫܝ ܠܓܘ ܡܢܗ ܘܒܝܕ ܗܠܝܢ ܬܪܬܝܢ ܨܒ̈ܘܬܐ ܚܣܝ̈ܢܬܐ ܒܛܠܗܿ ܠܟܠܗܿ ܡܥܒܕܢܘܬܗܘܢ ܕܠܐ ܒܝܕ ܦܪܙܠܐ ܘܠܐ ܒܝܕ ܡܥܒܕܢܘܬܐ ܕܕܝܘ̈ܐ ܢܬܦܬܚ ܒܐܦܝ̈ܗܘܢ ܘܢܦܩܘܢ ܘܢܚܒܠܘܢ ܒܢܝ̈ܢܫܐ ܘܢܛܢܦܘܢ ܐܪܥܐ

ܒܪܡ ܕܝܢ ܒܚܪܬ ܥܠܡ̈ܐ ܐܝܟ ܡܠܬܗ ܕܢܒܝܐ ܚܙܩܝܐܝܠ ܕܐܬܢܒܝ ܥܠܝܗܘܢ ܘܐܡܪ ܕܒܚܪܬܐ ܕܙܒ̈ܢܐ ܒܣܘ̈ܦܝ ܥܠܡܐ ܢܦܩܘܢ ܕܒܝܬ ܐܓܘܓ ܘܡܐܓܘܓ ܠܐܪܥܐ ܕܝܣܪܐܝܠ ܘܗܠܝܢ ܐܝܬܝܗܘܢ ܥܡ̈ܡܗ ܕܚܒܫ ܐܠܟܣܢܕܪܘܣ ܠܓܘ ܡܢ ܬܪ̈ܥܝ ܓܪܒܝܐ ܐܓܘܓ ܘܡܐܓܘܓ ܘܝܘܐܝܠ ܘܐܓܝܓ ܘܐܫܟܢܙܘ ܘܕܝܦܪ ܘܦܘ̈ܛܝܐ ܘܠܘ̈ܕܝܐ ܘܗܘ̈ܢܝܐ ܘܦܪ̈ܣܝܐ ܘܕܩ̈ܠܝܐ ܘܬܒ̈ܠܝܐ ܘܕܪ̈ܡܛܝܐ ܘܟܘܟ̈ܒܝܐ ܘܐܡܪ̈ܬܝܐ ܘܓܪ̈ܡܝܕܡܝܐ ܘܐܟ̈ܠܝ ܒܢܝ̈ܢܫܐ ܗܠܝܢ ܕܡܬܩܪܝܢ ܟܠܒ ܒܪܐܢܫ ܘܬܪ̈ܩܝܐ ܘܐܠܢ̈ܝܐ ܘܦܝܣ̈ܝܠܝܐ ܘܕܫ̈ܝܐ ܘܣܠܛܪ̈ܝܐ ܗܠܝܢ ܥܣܪܝܢ ܘܬܪܬܝܢ ܡ̈ܠܟܘܢ ܚܒܝܫܝܢ ܠܓܘ ܡܢ ܬܪ̈ܥܝ ܓܪܒܝܐ

ܘܟܕ ܡܝܬ ܐܠܟܣܢܕܪܘܣ ܡܠܟܐ ܩܕܡܝܐ ܕܝܘܢ̈ܝܐ ܡܛܠ ܕܠܐ ܢܣܒ ܐܢܬܬܐ ܘܠܐ ܗܘܘ ܠܗ ܒܢ̈ܝܐ ܐܡܠܟܘ ܡܢ ܒܬܪܗ ܗܠܝܢ ܪ̈ܒܝ ܚܝ̈ܠܐ ܕܝܠܗ ܘܟܘܫܬ ܐܡܗ ܐܠܟܣܢܕܪܘܣ ܗܦܟܬ ܠܒܝܬ ܐܒܘܗܿ ܠܟܘܫ

ܘܫܕܪ ܒܘܙ ܡܠܟܐ ܗܿܘ ܕܒܢܗܿ ܠܒܘܙܢܛܝܐ ܡܕܝܢܬܐ ܕܡܠܟܘܬܐ ܕܒܓܘ ܝܡܐ ܠܐܓܪܡܝܢܩܘܣ ܪܒ ܚܝܠܐ ܠܘܬ ܦܝܠ ܡܠܟܐ ܕܟܘܫ̈ܝܐ ܘܥܒܕ ܥܡܗ ܫܝܢܐ ܘܟܬܒ ܠܗ ܡܛܠ ܒܪܬܗ ܐܡܗ ܕܐܠܟܣܢܕܪܘܣ ܐܝܟ ܕܢܣܒܝܗܿ ܠܗ ܒܢܫ̈ܐ ܘܢܥܒܕܝܗܿ ܡܠܟܬܐ

ܘܟܕ ܩܒܠ ܡܠܟܐ ܕܟܘܫ̈ܝܐ ܐܓܪ̈ܬܐ ܕܒܐܝܕ̈ܝ ܐܓܪܡܝܢܩܘܣ ܪܒ ܚܝܠܗ ܕܒܘܙ ܡܠܟܐ ܕܝܘܢ̈ܝܐ ܟܕ ܚܙܐ ܡܘܗ̈ܒܬܐ ܘܐܝܩܪ̈ܐ ܕܫܕܪ ܠܗ ܚܕܝ ܛܒ ܘܢܣܒ ܡܚܕܐ ܐܦ ܗܘ ܦܝܠ ܡܢ ܛܘ̈ܒܝ ܡܠܟܘܬܐ ܕܟܘܫ̈ܝܐ ܘܐܦ ܠܟܘܫܬ ܒܪܬܗ ܥܡܗ ܘܣܠܩ ܠܒܘܙܢܛܝܐ ܠܘܬ ܒܘܙ ܡܠܟܐ ܥܡ ܬܠܬܝܢ ܐܠܦ̈ܐ ܟܘܫ̈ܝܐ ܘܐܬܩܒܠ ܡܢ ܒܘܙ ܡܠܟܐ ܠܒܪ ܡܢ ܝܡܐ ܕܩܠܟܝܕܘܢܐ ܚܕܝܐܝܬ ܘܡܘܗ̈ܒܬܐ ܝܗܒ ܠܚܝ̈ܠܘܬܐ ܕܥܠܘ ܥܡܗ ܠܓܘ ܒܘܙܢܛܝܐ ܘܐܝܩܪ̈ܐ ܪܘܪ̈ܒܐ ܘܡܘܗ̈ܒܬܐ ܐܝܟ ܐܝܕܐ ܕܡܠܟܐ ܝܗܒ ܠܗ

ܘܢܣܒܗܿ ܡܠܟܐ ܕܝܘ̈ܢܝܐ ܠܟܘܫܬ ܒܪܬ ܦܝܠ ܡܠܟܐ ܕܟܘܫ̈ܝܐ ܘܐܬܝܠܕ ܠܗ ܡܢܗܿ ܒܪܬܐ ܘܩܪܐ ܫܡܥܗܿ ܒܘܙܢܛܝܐ ܥܠ ܫܡ ܡܕܝܢܬܐ ܕܒܢܐ ܘܠܒܘܙܢܛܝܐ ܢܣܒܗܿ ܒܢܫ̈ܐ ܐܪܡܠܐܘܣ ܡܠܟܐ ܕܪ̈ܘܡܝܐ ܘܡܛܠ ܕܫܦܝܪܐ ܗܘܬ ܛܒ ܐܚܕܗܿ ܘܒܗܿܝ ܕܓܒܪܐ ܗܘܐ ܦܫܝܛܐ ܘܠܝܬ ܗܘܐ ܒܗ ܥܪܝܡܘܬܐ ܐܦܠܐ ܩܠܝܠ ܟܬܒܗܿ ܠܪܘܡܝ ܘܝܗܒܗܿ ܡܘܗܒܬܐ ܠܒܘܙܢܛܝܐ ܒܦܪܢܝܬܐ ܕܒܘܙܢܛܝܐ ܘܟܕ ܐܫܬܡܥܬ ܗܕܐ ܒܒܝܬ ܪܘܪ̈ܒܢܐ ܕܗܘܘ ܒܪܘܡܝ ܗܘܐ ܪܘܒܐ ܪܒܐ ܥܠܗܕܐ

ܘܐܬܝܠܕ ܠܐܪܡܠܐܘܣ ܡܢ ܒܘܙܢܛܝܐ ܒܪܬ ܒܘܙ ܡܠܟܐ ܕܒܘܙܢܛܝܐ ܗܿܝ ܕܐܬܝܠܕܬ ܡܢ ܟܘܫܬ ܐܡܗ ܕܐܠܟܣܢܕܪܘܣ ܡܠܟܐ ܬܠܬܐ ܙܒܢܝܢ ܐܪܡܠܐܘܣ ܘܐܪܒܢܘܣ ܘܩܠܘܕܝܘܣ

ܘܐܡܠܟ ܐܪܡܠܘܣ ܒܪܘܡܝ ܚܠܦ ܐܪܡܠܐܘܣ ܘܐܪܒܢܘܣ ܐܡܠܟ ܒܒܘܙܢܛܝܐ ܡܕܝܢܬܐ ܕܐܡܗ ܘܩܠܘܕܝܘܣ ܐܡܠܟ ܒܐܠܟܣܢܕܪܝܐ ܡܕܝܢܬ ܡܠܟܘܬܗ ܕܐܒܘܗܝ

ܘܐܚܕ ܙܪܥܗܿ ܕܟܘܫܬ ܡܠܟܬܐ ܒܪܬ ܦܝܠ ܡܠܟܐ ܕܟܘܫ̈ܝܐ ܡܠܟܘܬܐ ܕܡܩܕܘܢܝܐ ܘܕܪ̈ܘܡܝܐ ܘܕܝܘ̈ܢܝܐ ܡܢ ܙܪܥܗ ܕܟܘܫܬ ܒܪܬ ܦܝܠ ܥܕܡܐ ܠܥܠܡ ܡܛܠ ܡܠܟܘܬܐ ܕܝܘ̈ܢܝܐ ܗܿܝ ܕܐܝܬܝܗܿ ܡܢ ܙܪܥܐ ܕܟܘ̈ܫܝܐ ܗܝ ܡܫܠܡܐ ܐܝܕܐ ܠܐܠܗܐ ܒܚܪܬ ܙܒ̈ܢܐ ܟܕ ܚܪ ܕܝܢ ܛܘܒܢܐ ܕܘܝܕ ܒܥܝܢܐ ܢܗܝܪܬܐ ܕܪܘܚܐ ܕܐܠܗܐ ܘܚܙܐ ܡܢ ܟܘܫܬ ܒܪܬ ܦܝܠ ܡܠܟܐ ܕܟܘܫ̈ܝܐ ܥܬܝܕܐ ܕܬܬܝܒܠܝ ܡܠܟܘܬܐ ܕܝܘ̈ܢܝܐ ܒܪܡ ܕܝܢ ܣܓܝ̈ܐܐ ܐܚ̈ܐ ܡܢ ܒܢ̈ܝ ܥܕܬܐ ܐܣܒܪܘ ܕܥܠ ܡܠܟܘܬܐ ܕܟܘܫ̈ܝܐ ܐܡܪ ܛܘܒܢܐ ܕܘܝܕ ܡܠܬܐ ܗܕܐ ܘܐܝܠܝܢ ܕܗܠܝܢ ܐܬܪܥܝܘ ܛܥܘ ܠܗܘܢ

ܥܠܗܕܐ ܓܝܪ ܡܠܟܘܬܐ ܕܝܘ̈ܢܝܐ ܕܐܝܬܝܗܿ ܡܢ ܙܪܥܗ ܕܟܘܫܬ ܘܗܝ ܐܚܕܐ ܠܗܿܘ ܕܐܬܬܣܝܡ ܒܡܨܥܬܐ ܕܐܝܬܘܗܝ ܨܠܝܒܐ ܩܕܝܫܐ ܥܠܝܗܿ ܕܝܢ ܥܠܗܕܐ ܐܡܪ ܛܘܒܢܐ ܕܘܝܕ ܕܟܘܫ ܬܫܠܡܝ ܐܝܕܐ ܠܐܠܗܐ ܠܝܬ ܓܝܪ ܥܡܐ ܐܘ ܡܠܟܘܬܐ ܕܬܚܝܬ ܫܡܝܐ ܕܡܫܟܚܐ ܕܬܚܣܢܝ ܠܡܠܟܘܬܐ ܕܟܪ̈ܝܣܛܝܢܐ

ܟܡܐ ܕܐܚܝܕܐ ܓܘܣܐ ܒܨܠܝܒܐ ܚܝܐ ܗܿܘ ܕܐܩܒܥ ܒܡܨܥܬܗܿ ܕܐܪܥܐ ܘܐܚܝܕ ܚܝܠܗܿ ܠܪܘܡܐ ܘܠܥܘܡܩܐ ܐܦ ܡܘ̈ܟܠܐ ܕܫܝܘܠ ܗܠܝܢ ܕܐܝܬܝܗܘܢ ܛܪ̈ܘܢܐ ܕܚܢܦܘܬܐ ܠܐ ܡܫܟ̈ܚܢ ܕܢܚܣܘܢ ܠܗܕܐ ܡܠܟܘܬܐ ܕܟܪ̈ܝܣܛܝܢܐ ܐܝܟ ܒܪܬ ܩܠܗ ܫܪܝܪܬܐ ܕܦܪܘܩܢ ܕܐܡܪ ܠܘܬ ܫܡܥܘܢ ܕܐܝܢܘ ܚܝܠܐ ܐܘ ܡܠܟܘܬܐ ܐܘ ܥܡܐ ܕܐܝܬ ܬܚܝܬ ܫܡܝܐ ܕܚܝܠܬܢ ܘܬܩܝܦ ܚܝܠܗ ܕܡܫܟܚ ܕܢܚܣܢ ܠܚܝܠܗ ܪܒܐ ܕܨܠܝܒܐ ܩܕܝܫܐ ܗܿܘ ܕܒܗ ܐܚܝܕܐ ܓܘܣܐ ܡܠܟܘܬܐ ܕܝܘ̈ܢܝܐ ܕܐܝܬܝܗܿ ܕܪ̈ܘܡܝܐ

ܟܬܒ ܗܘܐ ܠܗܘܢ ܠܬܣܐܠܘܢܝܩܝܐ ܒܐܓܪܬܐ ܕܬܪܬܝܢ ܛܘܒܢܐ ܦܘܠܠܘܣ ܟܕ ܡܙܗܪ ܠܗܘܢ ܕܠܐ ܬܬܪܗܒܘܢ ܡܢ ܫܡ̈ܥܐ ܩܠܝ̈ܠܐ ܘܕܓ̈ܠܐ ܕܗܐ ܠܡ ܡܢܥ ܠܗ ܝܘܡܗ ܕܡܪܢ ܝܫܘܥ ܕܟܡܐ ܠܡ ܡܠܟܘܬܐ ܗܕܐ ܕܐܚܝܕܐ ܓܘܣܐ ܩܝܡܐ ܒܡܨܥܬܐ ܒܪܗ ܕܒܕܢܐ ܠܐ ܡܬܓܠܐ

ܗܿܘ ܡܕܡ ܓܝܪ ܕܐܝܬ ܒܡܨܥܬܐ ܟܗܢܘܬܐ ܐܝܬܘܗܝ ܘܡܠܟܘܬܐ ܘܨܠܝܒܐ ܩܕܝܫܐ ܘܗܝ ܡܠܟܘܬܐ ܕܟܪ̈ܝܣܛܝܢܐ ܚܣܢܐ ܠܟܠܗܘܢ ܡ̈ܠܟܘܬܐ ܕܐܪܥܐ ܘܒܗܿ ܡܫܬܪܝܢ ܘܒܛܠܝܢ ܟܠܪܝܫ ܘܟܠܫܘܠܛܢ

ܘܟܠܗܘܢ ܥܡܗܿ ܡܬܓܙܝܢ ܘܡܢܗܿ ܚܝܒܝܢ ܘܒܗܿ ܒܛܠܝܢ ܘܠܐ ܡܫܬܚܪ ܒܟܠܗܿ ܐܪܥܐ ܚܕ ܪܝܫ ܚܕ ܫܘܠܛܢ ܡܐ ܕܡܬܓܠܐ ܒܪܗ ܕܐܒܕܢܐ ܐܠܐ ܐܢ ܡܠܟܘܬܐ ܕܝܘ̈ܢܝܐ ܕܗܝ ܡܫܠܡܐ ܐܝܕܐ ܠܐܠܗܐ ܐܝܟ ܒܪܬ ܩܠܗ ܕܫܠܝܚܐ ܕܐܡܪ ܘܒܛܠ ܟܠܪܝܫ ܘܟܠܫܘܠܛܢ ܘܟܠܚܝ̈ܠܝܢ ܗܝܕܝܢ ܗܘ ܒܪܐ ܡܫܠܡ ܗܘ ܡܠܟܘܬܐ ܕܟܪ̈ܝܣܛܝܢܐ ܠܐܠܗܐ ܐܒܐ

ܐܬܓܪܝܘ ܓܝܪ ܡܠܟ̈ܐ ܕܥܡ̈ܡܐ ܣܓܝ̈ܐܐ ܥܡ ܡܠܟܘܬܐ ܕܓܢܒܪ̈ܐ ܘܠܐ ܐܫܟܚܘ ܕܢܙܟܘܢܗܿ ܐܦܠܐ ܡܠܟܘܬܐ ܗܿܝ ܕܚܣܢܬ ܠܡܨܪܝܢ ܘܩܛܠܬ ܠܬܠܬܝܢ ܘܚܕܐ ܡ̈ܠܟܘܬܐ ܕܥܡ̈ܡܐ ܘܠܬܪܝܢ ܪ̈ܒܝ ܡ̈ܠܟܘܬܐ ܕܐܡܘܪ̈ܝܐ ܠܣܝܚܘܢ ܘܠܥܘܓ ܘܠܟܠܗܘܢ ܛܪ̈ܘܢܐ ܕܦܠܫ̈ܬܝܐ ܐܫܟܚܬ ܕܬܚܣܢܝ ܠܡܠܟܘܬܐ ܕܒܒܠ ܘܡܠܟܘܬܐ ܕܪ̈ܘܡܝܐ ܘܗܕܐ ܕܐܝܬܝܗܿ ܕܝܘ̈ܢܝܐ ܚܣܢܬ ܠܡܠܟܘܬܐ ܕܥܒܪ̈ܝܐ ܘܐܚܪܒܬ ܘܥܩܪܬܗܿ ܡܢ ܫܪ̈ܫܝܗܿ ܘܠܐ ܐܫܬܚܪ ܒܗܿ ܣܪܝܕܐ ܐܦܠܐ ܥܩܒܐ ܚܕ ܬܚܠܦܝ ܘܬܦܩܝ ܦܐܪ̈ܐ ܡܛܠ ܕܡܢ ܟܕܘ ܐܫܬܠܡܬ ܒܐܝ̈ܕܝ ܐܣܦܣܝܢܘܣ ܘܛܝܛܘܣ ܒܪܗ ܗܠܝܢ ܒܐܝ̈ܕܝܗܘܢ ܐܬܥܩܪܬ ܡܠܟܘܬܐ ܕܥܒܪ̈ܝܐ ܘܚܪܒܬ ܡܚܕܐ ܡܠܟܘܬܗܘܢ ܗܿܝ ܕܐܬܢܒܝ ܥܠܝܗܿ ܕܢܝܐܝܠ ܕܡܢ ܒܬܪ ܕܡܬܩܛܠ ܡܫܝܚܐ ܬܚܪܒܝ ܡܕܝܢܬ ܩܘܕ̈ܫܐ ܟܕ ܕܝܢ ܚܣܢܘ ܗܘܘ ܒܒ̈ܠܝܐ ܠܡܠܟܘܬܐ ܕܥܒܪ̈ܝܐ ܕܒܗ ܗܘ̈ܝ ܗܠܝܢ ܡܣ̈ܩܬܐ ܡܝܬܪ̈ܬܐ ܟܗܢܘܬܐ ܘܢܒܝܘܬܐ ܘܡܠܟܘܬܐ ܘܟܕ ܥܩܪܗܿ ܐܣܦܣܝܢܘܣ ܘܒܙܗܿ ܠܡܕܝܢܬ ܩܘܕ̈ܫܐ ܠܐ ܐܫܬܟܚܬ ܚܕܐ ܡܢ ܡܘܗ̈ܒܬܐ ܗܠܝܢ ܒܚܕ ܫܒ̈ܛܝܗܘܢ ܐܦܠܐ ܡܠܟܘܬܐ ܕܝܢ ܕܡܨܪ̈ܝܐ ܕܗܝ ܐܝܬܝܗܿ ܡܩܕ̈ܘܢܝܐ ܕܒܝܕ ܗܕܐ ܕܐܝܬܝܗܿ ܕܪ̈ܘܡܝܐ ܐܬܒܛܠܬ ܡܠܟܘܬܐ ܕܡܕܝ ܘܕܦܪܣ ܘܕܐܪ̈ܡܢܝܐ ܗܕܐ ܡܠܟܘܬܐ ܚܣܢܬ ܠܟܠܗܝܢ ܡ̈ܠܟܘܬܐ ܕܐܪܥܐ

ܠܐܠܦ̈ܐ ܕܫܢ̈ܝܐ ܐܬܥܩܪܬ ܡܠܟܘܬܐ ܕܥܒܪ̈ܝܐ ܘܕܡܨܪ̈ܝܐ ܠܬܠܬܐ ܐܠܦ̈ܐ ܕܫܢ̈ܝܐ ܘܟܕ ܐܬܥܩܪܬ ܡܠܟܘܬܐ ܕܡܩ̈ܕܘܢܝܐ ܕܐܝܬܝܗܿ ܕܐܝܬܝܗܿ ܐܬܓܪܝܬ ܥܡ ܡܠܟܘܬܐ ܕܪ̈ܘܡܝܐ ܡܠܟܘܬܐ ܕܒܪܒܪ̈ܝܐ ܗܢܘ ܕܝܢ ܕܬܘܪܩܝܐ ܘܕܐܒܪܝܘܣ

ܘܟܕ ܐܬܥܩܪܬ ܡܠܟܘܬܐ ܕܥܒܪ̈ܝܐ ܐܬܓܪܝܘ ܚܠܦܝܗܿ ܥܡ ܪ̈ܘܡܝܐ ܒܢ̈ܝ ܐܝܫܡܥܝܠ ܒܪ ܗܓܪ ܗܠܝܢ ܕܩܪܐ ܠܗܘܢ ܕܢܝܐܝܠ ܙܪܥܐ ܕܬܝܡܢܐ ܘܡܬܓܪܐ ܥܡܗ ܥܣܪܐ ܫܒ̈ܘܥܝܢ ܕܫܢ̈ܝܐ ܡܛܠ ܕܡܬܒܝܢ ܩܨܐ ܘܠܝܬ ܡܬܚܐ ܒܡܨܥܬܐ

ܒܗܢܐ ܓܝܪ ܐܠܦܐ ܐܚܪܝܐ ܕܐܝܬܘܗܝ ܫܒܝܥܝܐ ܕܒܗ ܡܬܥܩܪܐ ܡܠܟܘܬܐ ܕܦܪ̈ܣܝܐ ܘܒܗ ܢܦܩܝܢ ܒܢ̈ܝ ܐܝܫܡܥܝܠ ܡܢ ܡܕܒܪܐ ܕܝܬܪܒ ܘܐܬܝܢ ܘܡܬܟܢܫܝܢ ܟܠܗܘܢ ܬܡܢ ܒܓܒܥܘܬ ܪܡܬܐ

ܘܬܡܢ ܫܠܡܐ ܡܠܬܗ ܕܡܪܢ ܕܐܡܪܐ ܕܕܡܝܢ ܠܡ ܠܚܝܘܬܐ ܕܕܒܪܐ ܘܠܦܪܚܬܐ ܕܫܡܝܐ ܘܩܪܐ ܠܗܘܢ ܕܐܬܟܢܫܘ ܘܬܘ ܡܛܠ ܕܕܒܚܬܐ ܪܒܬܐ ܕܒܚ ܐܢܐ ܠܟܘܢ ܝܘܡܢܐ ܐܟܘܠܘ ܒܣܪܐ ܕܒܦܛܡ̈ܐ ܘܐܫܬܘ ܕܡܐ ܕܓܢܒܪ̈ܐ

ܒܗܿ ܓܝܪ ܒܓܒܥܘܬ ܡܬܚܪܒܝܢ ܡܦܛܡ̈ܐ ܡܠܟܘܬܐ ܕܝܘ̈ܢܝܐ ܕܚܪܒܘ ܠܡܠܟܘܬܐ ܕܥܒܪ̈ܝܐ ܘܕܦܪ̈ܣܝܐ ܘܗܟܢܐ ܡܬܚܪܒܝܢ ܐܦ ܗܢܘܢ ܒܓܒܥܘܬ ܡܢ ܐܝܫܡܥܝܠ ܥܕܪܐ ܕܡܕܒܪܐ ܕܒܚܡܬܐ ܕܪܘܓܙܐ ܡܫܬܕܪ ܥܠ ܒܢܝ̈ܢܫܐ ܘܥܠ ܚܝܘܬܐ ܘܥܠ ܒܥܝܪ̈ܐ ܘܥܠ ܐܝܠܢ̈ܐ ܘܥܠ ܢܨܒ̈ܬܐ

ܘܡܪܕܘܬܐ ܐܝܬܝܗܿ ܕܠܝܬ ܒܗܿ ܪ̈ܚܡܐ ܘܗܠܝܢ ܐܪܥܐ ܪ̈ܝܫܝܢ ܡܫܬܕܪܝܢ ܩܕܡܝܗܘܢ ܥܠ ܟܠܗܿ ܐܪܥܐ ܐܒܕܢܐ ܘܡܘܒܕܢܐ ܘܚܒܠܐ ܘܡܚܒܠܢܐ ܡܘܒܕ ܠܟܠ ܡܕܝܢܐ ܕܡܫܟܚ ܘܚܒܠܐ ܕܡܚܒܠ ܟܠܡܕܡ

ܐܡܪ ܓܝܪ ܒܝܕ ܡܘܫܐ ܕܠܘ ܡܛܠ ܕܪܚܡ ܠܟܘܢ ܡܪܝܐ ܐܠܗܟܘܢ ܡܥܠ ܠܟܘܢ ܠܐܪܥܐ ܕܥܡ̈ܡܐ ܕܬܐܪܬܘܢܗܿ ܐܠܐ ܡܛܠ ܥܘܠܐ ܕܥܡܘܪ̈ܝܗܿ ܐܦ ܗܠܝܢ ܒܢ̈ܝ ܐܝܫܡܥܝܠ ܠܐ ܗܘܐ ܡܛܠ ܕܪܚܡ ܠܗܘܢ ܐܠܗܐ ܝܗܒ ܠܗܘܢ ܕܢܥܠܘܢ ܒܡܠܟܘܬܐ ܕܟܪ̈ܝܣܛܝܢܐ ܐܠܐ ܡܛܠ ܥܘܠܐ ܘܚܛܝܬܐ ܕܡܬܥܒܕܐ ܒܐܝܕ̈ܝܐ ܕܟܪ̈ܝܣܛܝܢܐ ܕܠܐ ܐܬܥܒܕܬ ܐܟܘܬܗܿ ܒܚܕ ܡܢ ܕܪ̈ܐ ܩܕܡ̈ܝܐ

ܕܡܬܟܣܝܢ ܗܘܘ ܓܒܪ̈ܐ ܒܠܒܘ̈ܫܐ ܦܚ̈ܙܐ ܕܢܫ̈ܐ ܙܢܝ̈ܬܐ ܕܡܨܛܒܬܝܢ ܗܘܘ ܐܝܟ ܒܬܘ̈ܠܬܐ ܘܩܝܡܝܢ ܓܠܝܐܝܬ ܒܫܘ̈ܩܐ ܕܡܕܝܢ̈ܬܐ ܘܡܬܦܩܪܝܢ ܗܘܘ ܒܪܘܝܘܬܐ ܘܒܫܪܝܚܘܬܐ ܕܠܐ ܟܘܚܕ ܘܡܫܬܘܬܦܝܢ ܗܘܘ ܚܕ ܥܡ ܚܕ ܐܦ ܢܫ̈ܐ ܙܢܝ̈ܬܐ ܩܝ̈ܡܢ ܗܘ̈ܝ ܓܠܝܐܝܬ ܒܫܘ̈ܩܐ ܘܥܐܠ ܗܘܐ ܓܒܪܐ ܘܡܙܢܐ ܘܢܦܩ ܘܐܬܐ ܒܪܗ ܘܒܗܿ ܟܕ ܒܗܿ ܡܬܛܢܦ ܗܘܐ ܘܐܚ̈ܐ ܘܐܒ̈ܗܐ ܘܒܢ̈ܝܐ ܟܠܗܘܢ ܐܟܚܕܐ ܡܬܛܢܦܝܢ ܗܘܘ ܒܚܕܐ ܐܢܬܬܐ ܘܥܠܗܕܐ ܐܡܪ ܦܘܠܠܘܣ ܫܠܝܚܐ ܕܕܟܪ̈ܝܗܘܢ ܫܒܩܘ ܚܫܚܬܐ ܕܟܝܢܐ ܕܢܩܒ̈ܬܐ ܘܐܫܬܪܚܘ ܒܪܓܬܐ ܚܕ ܥܠ ܚܕ ܘܕܟܪܐ ܥܠ ܕܟܪܐ ܒܗܬܬܐ ܥܒܕܘ ܬܘܒ ܠܡ ܐܦ ܢ̈ܫܐ ܗܟܢܐ ܫܒܩ̈ܝ ܚܫܚܬܐ ܕܟܝܢܐ ܕܓܒܪ̈ܐ ܘܒܡܕܡ ܕܠܐ ܡܟܢ ܐܬܚܫ̈ܚܝ

ܡܛܠ ܗܢܐ ܡܫܠܡ ܠܗܘܢ ܐܠܗܐ ܠܛܢܦܘܬܐ ܕܒܪܒܪ̈ܝܐ ܘܢܬܢܘܠܘܢ ܓܒܪ̈ܐ ܓܢܒܪ̈ܐ ܒܡܪܕܘܢܬܐ ܕܐܘ̈ܠܨܢܐ ܘܢܬܛܢ̈ܦܢ ܢܫܝ̈ܗܘܢ ܥܡ ܒܢ̈ܝ ܛܢܦܘܬܐ ܐܢܐ ܕܝܢ ܟܕ ܚܙܬ ܘܚܡܝܬ ܠܗܠܝܢ ܐܪܒܥܐ ܪ̈ܝܫܝܢ ܕܡܪ̈ܕܘܬܐ ܠܚܒܠܐ ܘܠܡܚܒܠܢܐ ܘܠܐܒܕܢܐ ܘܠܡܘܒܕܢܐ ܗܿܝ ܕܝܢ ܐܪܡܝܘ ܦܨ̈ܐ ܥܠ ܐܪܥܐ

ܐܬܝܗܒܬ ܐܪܥܐ ܕܦܪܣ ܠܚܒܠܐ ܕܢܚܒܠܝܗܿ ܘܠܥܡܘܪ̈ܝܗܿ ܠܫܒܝܐ ܘܠܩܛܠܐ ܘܠܚܒܠܐ

ܘܣܘܪܝܐ ܗܝ ܠܚܪܒܐ ܕܚܒܠܐ ܘܥܡܘܪ̈ܝܗܿ ܠܫܒܝܐ ܘܠܩܛܠܐ ܣܝܩܝܠܝܐ ܠܐܒܕܢܐ ܘܠܚܪܒܐ ܘܝܬܒ̈ܝܗܿ ܠܫܒܝܐ ܘܠܩܛܠܐ

ܐܠܕܐ ܗܝ ܠܚܪܒܐ ܕܚܒܠܐ ܘܥܡܘܪ̈ܝܗܿ ܠܫܒܝܐ ܘܠܩܛܠܐ ܐܪܥܐ ܕܪ̈ܘܡܝܐ ܗܝ ܠܚܒܠܐ ܘܠܚܪܒܐ ܘܝܬܒ̈ܝܗܿ ܠܥܪܘܩܝܐ ܘܠܚܛܘܦܝܐ ܘܠܫܒܝܐ ܘܓܙܪ̈ܬܐ ܕܝܡܐ ܗܢܝܢ ܠܥܪܘܩܝܐ ܘܥܡܘܪ̈ܝܗܝܢ ܠܫܒܝܐ ܕܐܒܕܢܐ

ܡܨܪܝܢ ܘܣܘܪܝܐ ܘܐܬܪ̈ܘܬܐ ܕܡܕܢܚܐ ܢܬܟܕܢܘܢ ܒܢܝܪܐ ܕܡܕܐܬܐ ܘܕܫܩܠܐ ܚܕ ܒܫܒܥܐ ܒܐܘܠܨܢܐ ܕܒܢ̈ܝ ܫܒܝܐ

ܘܬܬܡܠܐ ܐܪܥܐ ܕܡܘܠܟܢܐ ܒܢܝ̈ܢܫܐ ܡܢ ܐܪ̈ܒܥ ܪ̈ܘܚܝ ܫܡܝܐ ܐܝܟ ܩܡܨܐ ܕܡܬܟܢܫ ܒܥܠܥܠܐ ܘܢܗܘܐ ܒܗܿ ܟܦܢܐ ܘܐܘܠܨܢܐ ܘܡܘܬܢܐ ܘܢܥܫܢ ܡܚܒܠܢܐ ܘܬܬܬܪܝܡܝ ܩܪܢܗ ܘܢܪܟܒ ܪܡܘܬܐ ܘܢܬܥܛܦ ܫܘܒܗܪܐ ܥܕܡܐ ܠܙܒܢ ܪܘܓܙܐ ܘܢܐܚܘܕ ܡܥ̈ܠܢܝ ܓܪܒܝܐ ܘܐܘܪ̈ܚܬܐ ܕܡܕܢܚܐ ܘܡܥܒܪ̈ܬܗ ܕܝܡܐ ܘܢܬܟܕܢܘܢ ܒܢܝܪܐ ܕܫܘܥܒܕܗܘܢ ܒܢܝ̈ܢܫܐ ܘܒܥܝܪ̈ܐ ܘܚܝ̈ܘܬܐ ܘܦܪ̈ܚܬܐ ܘܡ̈ܝܐ ܕܝܡ̈ܡܐ ܢܫܬܥܒܕܘܢ ܠܗܘܢ

ܘܚܪ̈ܒܬܐ ܕܐܪ̈ܡܠܝ ܡܢ ܦܘܠܚܢܝܗܝܢ ܕܝܠܗ ܢܗ̈ܘܝܢ ܘܢܟܬܘܒ ܛܪ̈ܘܢܐ ܕܝܠܗ ܘܢܗܘܘܢ ܢܘ̈ܢܐ ܕܒܓܘ ܝܡܐ ܘܐܝ̈ܠܢܐ ܕܒܓܘ ܥܒ̈ܐ ܘܢܨܒ̈ܬܐ ܕܦܐܪ̈ܝܗܝܢ ܘܥܦܪܗܿ ܕܐܪܥܐ ܥܡ ܟܐܦ̈ܝܗܿ ܘܥ̈ܠܠܬܗܿ ܘܬܐܓܘܪܬܐ ܕܬܐܓܪ̈ܐ ܘܦܘܠܚܢܐ ܕܦܠܚ̈ܐ ܘܝܪܬܘܬܐ ܕܥܬܝܪ̈ܐ ܘܡܘܗ̈ܒܬܐ ܘܩܕ̈ܝܫܐ ܕܕܗܒܐ ܘܕܣܐܡܐ ܘܕܢܚܫܐ ܘܕܦܪܙܠܐ ܘܠܒܘ̈ܫܐ ܘܟܠܗܘܢ ܡ̈ܐܢܝ ܫܘܒܚܐ ܘܬܨܒܝܬܐ ܘܡܐܟ̈ܠܬܐ ܘܦܛܒ̈ܓܐ ܘܟܠܗܝܢ ܪ̈ܓܝܓܬܐ ܘܦܘ̈ܢܩܐ ܕܝܠܗ ܢܗܘ̈ܝܢ ܘܫܬܥܠܐ ܒܚܡܬܗ ܘܒܪܡܘܬܗ ܥܕܡܐ ܕܢܬܒܥ ܡܐܬܐ ܡܢ ܡܝ̈ܬܐ ܫܟܝ̈ܒܝ ܥܦܪܐ ܘܢܣܒ ܟܣܦ ܪܝܫܐ ܡܢ ܝܬܡ̈ܐ ܘܡܢ ܐܪ̈ܡܠܬܐ ܘܡܢ ܩܕ̈ܝܫܐ.

ܘܠܐ ܢܪܚܡܘܢ ܥܠ ܡܣ̈ܟܢܐ ܘܠܐ ܢܕܘܢܘܢ ܠܐܠܝ̈ܨܐ ܘܢܩܦܚܘܢ ܠܣܝܒܘܬܐ ܘܢܥܝܩܘܢ ܪܘܚܐ ܕܡܛܪ̈ܦܐ ܘܠܐ ܢܚܘܣܘܢ ܥܠ ܟܪ̈ܝܗܐ ܘܠܐ ܢܪܚܡܘܢ ܥܠ ܡܚܝ̈ܠܝ ܚܝܠܐ ܐܠܐ ܢܓܚܟܘܢ ܒܚܟ̈ܝܡܐ ܘܢܡܝܩܘܢ ܒܣܝ̈ܡܝ ܢܡ̈ܘܣܐ ܘܢܗܠܘܢ ܒܝܕܘ̈ܥܬܢܐ ܘܬܬܦܪܣܝ ܬܚܦܝܬܐ ܕܫܬܩܐ ܥܠ ܟܠܗܘܢ ܒܢܝ̈ܢܫܐ ܘܢܬܒܘܢ ܟܠܗܘܢ ܥܡܘܪ̈ܝܗܿ ܕܐܪܥܐ ܒܬܡܗܐ ܘܒܨܘܪ̈ܢܐ ܘܬܗܘܐ ܐܘܪܚܐ ܕܡܪܕܝܬܗܘܢ ܡܢܗܘܢ ܒܗܘܢ ܘܙܥܘܪܐ ܐܝܟ ܪܒܐ ܢܬܚܫܒ ܘܫܝܛܐ ܐܝܟ ܡܝܩܪܐ ܘܡ̈ܠܝܗܘܢ ܐܝܟ ܕܒܣܦܣܝܪ̈ܐ ܢܦܣ̈ܩܢ ܘܠܝܬ ܕܡܫܚܠܦ ܠܦܝܣܐ ܕܡ̈ܠܝܗܘܢ

ܘܬܗܘܐ ܐܘܪܚܐ ܕܡܠܝܐ ܡܪܕܝܬܗܘܢ ܡܢ ܝܡܐ ܘܥܕܡܐ ܠܝܡܐ ܘܡܢ ܓܪܒܝܐ ܘܥܕܡܐ ܠܡܕܒܪܐ ܕܝܬܪܒ ܘܬܗܘܐ ܐܘܪܚܐ ܠܐܘ̈ܠܨܢܐ ܘܢܪܕܘܢ ܒܗܿ ܣܒ̈ܐ ܘܣܒ̈ܬܐ ܘܥܬܝܪ̈ܐ ܘܡܣ̈ܟܢܐ ܟܕ ܟܦܢܝܢ ܘܨܗܝܢ ܘܡܬܢܘܠܝܢ ܒܐܣܘܪ̈ܐ ܩܫ̈ܝܐ ܥܕܡܐ ܕܢܬܠܝܘܢ ܛܘܒܐ ܠܡܝ̈ܬܐ

ܡܛܠ ܕܗܝ ܡܪܕܘܬܐ ܕܐܡܪ ܫܠܝܚܐ ܕܐܢ ܠܐ ܠܡ ܠܘܩܕܡ ܬܐܬܐ ܗܝ ܡܪܕܘܬܐ ܘܗܝܕܝܢ ܢܬܓܠܐ ܒܪܐܢܫܐ ܗܿܘ ܕܚܛܝܬܐ ܒܪܗ ܕܐܒܕܢܐ ܘܠܘ ܥܠ ܒܢܝ̈ܢܫܐ ܒܠܚܘܕ ܡܫܬܕܪܐ ܗܕܐ ܡܪܕܘܬܐ ܐܠܐ ܐܦ ܥܠ ܟܠܡܕܡ ܕܐܝܬ ܥܠ ܐܦ̈ܝ ܟܠܗܿ ܐܪܥܐ ܥܠ ܓܒܪ̈ܐ ܘܥܠ ܢܫ̈ܐ ܘܥܠ ܛܠܝ̈ܐ ܘܥܠ ܚܝ̈ܘܬܐ ܘܥܠ ܒܥܝܪ̈ܐ ܘܥܠ ܦܪ̈ܚܬܐ ܘܡܬܢܘܠܝܢ ܒܢܝ̈ܢܫܐ ܒܗܿܝ ܡܪܕܘܬܐ ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܒܢ̈ܬܗܘ ܘܩܢܝܢܗܘܢ ܘܣܒܐ ܡܚܝ̈ܠܝ ܚܝܠܐ ܘܟܪ̈ܝܗܐ ܥܡ ܚܝ̈ܠܬܢܐ ܘܡܣ̈ܟܢܐ ܥܡ ܥܬܝܪ̈ܐ ܡܛܠ ܕܥܕܪܐ ܕܒܡܕܒܪܐ ܩܪܝܗܝ ܐܠܗܐ ܠܐܝܫܡܥܝܠ ܐܒܘܗܘܢ ܘܛܒ̈ܝܐ ܘܟܠܗܝܢ ܚܝ̈ܘܬܐ ܕܕܒܪܐ ܘܕܒܓܘ ܫܝܢܐ ܡܬܐ̈ܠܨܢ ܡܢܗܘܢ ܘܡܬܪܕܦܝܢ ܒܢܝ̈ܢܫܐ ܘܡܝ̈ܬܢ ܚܝ̈ܘܬܐ ܘܒܥܝܪ̈ܐ ܘܐܝ̈ܠܢܝ ܥܒܐ ܡܬܦܣܩܝܢ ܘܫܘܦܪ̈ܐ ܕܢܨܒ̈ܬܐ ܕܛܘܪ̈ܐ ܡܬܚܒܠܝܢ ܘܚܪ̈ܒܢ ܡܕܝ̈ܢܬܐ ܟܗ̈ܝܢܬܐ ܘܨܐܕ̈ܝܢ ܐܬܪ̈ܘܬܐ ܡܢ ܒܠܝ ܕܥܒܪ ܒܗܘܢ ܘܡܬܛܢܦܐ ܐܪܥܐ ܒܕܡܐ ܘܡܬܓ̈ܙܠܢ ܡܢܗܿ ܥ̈ܠܠܬܐ ܘܠܘ ܓܝܪ ܒܢܝ̈ܢܫܐ ܐܢܘܢ ܗܠܝܢ ܛܪ̈ܘܢܐ ܒܪܒܪ̈ܝܐ ܐܠܐ ܒܢ̈ܝ ܚܪܒܐ ܐܢܘܢ ܘܠܚܪܒܐ ܣܝܡܝܢ ܐܦܝ̈ܗܘܢ ܘܡܚܒ̈ܠܢܐ ܐܢܘܢ ܘܠܚܒܠܐ ܡܫܬܕܪܝܢ ܘܐܒܕܢܐ ܐܢܘܢ ܘܠܐܒܕܢܐ ܕܟܠ ܢܦܩܝܢ ܘܡܛܢ̈ܦܐ ܐܢܘܢ ܘܛܢܦܘܬܐ ܪܚܡܝܢ ܘܒܙܒܢ ܡܦܩܬܗܘܢ ܕܡܢ ܓܘ ܡܕܒܪܐ ܠܝܠܘ̈ܕܐ ܡܢ ܟܢ̈ܦܬܐ ܕܐܡܗ̈ܬܗܘܢ ܚܛܦܝܢ ܘܐܝܟ ܕܠܚܝ̈ܘܬܐ ܡܛܢ̈ܦܢܬܐ ܡܫܩܦܝܢ ܠܗܘܢ ܒܟܐܦ̈ܐ

ܘܡܫܡ̈ܫܢܐ ܒܓܘ ܒܝܬ ܩܘܕܫܐ ܕܒܚܝܢ ܘܐܦ ܥܡ ܢܫ̈ܝܗܘܢ ܘܥܡ ܒܢ̈ܬ ܫܒܝܐ ܒܓܘ ܒܝܬ ܩܘܕܫܐ ܕܡܟܝܢ ܘܡ̈ܐܢܝ ܩܘܕܫܐ ܠܠܒܘܫܐ ܕܝܠܗܘܢ ܘܕܒܢ̈ܝܗܘܢ ܥܒܕܝܢ ܘܒܥܝܪܗܘܢ ܒܓܘܪ̈ܢܐ ܕܣܗ̈ܕܐ ܘܒܒܝܬ ܩܒܘܪ̈ܐ ܕܩܕ̈ܝܫܐ ܐܣܪܝܢ ܘܐܝܬܝܗܘܢ ܡܪ̈ܘܕܐ ܘܩ̈ܛܘܠܐ ܘܐܫ̈ܕܝ ܕܡܐ ܘܡܚܒ̈ܠܢܐ ܘܟܘܪܐ ܕܒܘܚܪܢܐ ܐܝܬܝܗܘܢ ܠܟܠܗܘܢ ܟܪ̈ܝܣܛܝܢܐ

ܐܡܪ ܓܝܪ ܫܠܝܚܐ ܛܘܒܢܐ ܕܠܘ ܟܠܗܘܢ ܕܡܢ ܝܣܪܐܝܠ ܐܝܬܝܗܘܢ ܐܣܪܐܝܠ ܘܐܦܠܐ ܟܠܗܘܢ ܐܝܠܝܢ ܕܡܬܩܪܝܢ ܟܪ̈ܝܣܛܝܢܐ ܐܝܬܝܗܘܢ ܟܪ̈ܝܣܛܝܢܐ ܫܒܥܐ ܓܝܪ ܐܠܦܐ ܒܠܚܘܕ ܐܫܬܚܪܘ ܡܢ ܒܢ̈ܝ ܝܣܪܐܝܠ ܒܝܘ̈ܡܝ ܐܠܝܐ ܢܒܝܐ ܣܓܕܝܢ ܗܘܘ ܠܡܪܝܐ ܐܠܗܐ ܘܟܠܗ ܝܣܪܐܝܠ ܒܗܘܢ ܐܬܦܪܩ

ܗܟܢܐ ܐܦ ܒܙܒܢ ܡܪܕܘܬܗܘܢ ܕܗܠܝܢ ܛܪ̈ܘܢܐ ܩܠܝܠ ܡܢ ܣܓܝ ܡܫܬܚܪܝܢ ܐܝܠܝܢ ܕܐܝܬܝܗܘܢ ܟܪ̈ܝܣܛܝܢܐ ܐܝܟ ܕܗܘ ܦܪܘܩܢ ܡܚܘܐ ܠܢ ܒܐܘܢܓܠܝܘܢ ܩܕܝܫܐ ܘܐܡܪ ܕܟܕ ܠܡ ܢܐܬܐ ܒܪܗ ܕܐܢܫܐ ܘܢܫܟܚ ܗܝܡܢܘܬܐ ܥܠ ܐܪܥܐ ܗܐ ܐܦ ܗܠܝܢ ܡܫܡ̈ܠܝܝ ܒܐܬܘ̈ܬܐ ܡܬܟܪܝܢ ܪܘܚܗܘܢ ܒܗܿܢܘܢ ܝܘ̈ܡܬܐ ܕܡܪܕܘܬܐ

ܘܣܘܓܐܐ ܡܢ ܗܠܝܢ ܕܗܘܘ ܒܢ̈ܝ ܥܕܬܐ ܟܦܪܝܢ ܒܗܝܡܢܘܬܐ ܫܪܝܪܬܐ ܕܟܪ̈ܝܣܛܝܢܐ ܘܒܨܠܝܒܐ ܩܕܝܫܐ ܘܒܪ̈ܐܙܐ ܕܚܝ̈ܠܐ ܘܕܠܐ ܩܛܝܪܐ ܘܢܓ̈ܕܐ ܘܡܚ̈ܘܬܐ ܟܦܪܝܢ ܒܡܫܝܚܐ ܘܡܫܘܝܢ ܢܦܫܗܘܢ ܥܡ ܟܦܘܪ̈ܐ

ܘܡܛܠܗܕܐ ܐܦ ܫܠܝܚܐ ܐܟܪܙ ܥܠܝܗܘܢ ܕܒܙܒ̈ܢܐ ܐܚܪ̈ܝܐ ܢܦܩܘܢ ܒܢܝ̈ܢܫܐ ܡܢ ܗܝܡܢܘܬܐ ܘܢܐܙܠܘܢ ܒܬܪ ܪ̈ܘܚܐ ܛܢ̈ܦܬܐ ܘܒܬܪ ܝܘܠܦܢܐ ܕܫ̈ܐܕܐ

ܘܢܗܘܘܢ ܡܪ̈ܘܕܐ ܘܐܟ̈ܠܝܩܪ̈ܨܐ ܘܫܒܗܪ̈ܢܐ ܘܣܢ̈ܝܝ ܛܒ̈ܬܐ ܘܡܫ̈ܠܡܢܐ ܘܒܥܪܝܪ̈ܝܐ

ܘܟܠܗܘܢ ܐܝܠܝܢ ܕܐܝܬܝܗܘܢ ܙܐܦ̈ܢܐ ܘܟܪܝܗܝܢ ܒܗܝܡܢܘܬܐ ܒܗܿܝ ܡܪܕܘܬܐ ܡܬܒܚܪܝܢ ܘܡܬܝܕܥܝܢ ܘܗܢܘܢ ܠܗܘܢ ܦܪܫܝܢ ܡܢ ܓܘ ܟܢܘܫܝܐ ܕܟܪ̈ܝܣܛܝܢܐ ܒܨܒܝܢ ܢܦܫܗܘܢ ܡܛܠ ܕܗܘ ܙܒܢܐ ܩܪܐ ܠܗܘܢ ܕܢܐܙܠܘܢ ܒܬܪ ܛܢܦܘܬܗ ܡܟܝ̈ܟܐ ܓܝܪ ܢܝ̈ܚܐ ܘܒܣ̈ܝܡܐ ܘܫ̈ܠܝܐ ܘܫܪ̈ܝܪܐ ܘܒܢ̈ܝ ܚܐܪ̈ܐ ܘܚܟ̈ܝܡܐ ܘܓܒ̈ܝܐ ܠܐ ܡܬܒܥܝܢ ܒܗܿܘ ܙܒܢܐ ܡܛܠ ܕܡܣܬܠܝܢ ܘܡܬܬܫܝܛܝܢ

ܐܠܐ ܚܠܦ ܗܠܝܢ ܡܬܒܥܝܢ ܚܬܝܪ̈ܐ ܘܪ̈ܡܐ ܘܫܒܗܪ̈ܢܐ ܘܕܓ̈ܠܐ ܘܐܟܠ̈ܝ ܩܪ̈ܨܐ ܘܡܩܪ̈ܓܢܐ ܘܫܓܘ̈ܫܐ ܘܙܠܝ̈ܠܐ ܘܐܝܠܝܢ ܕܓܠܝܙܝܢ ܡܢ ܪ̈ܚܡܐ ܘܚ̈ܛܘܦܐ ܘܒ̈ܙܘܙܐ ܘܒܥܪܝܪ̈ܝܐ ܘܠܐ ܡܗܝܪ̈ܐ ܘܣܟ̈ܠܝ ܡܢ ܗܘܢܐ ܘܡܢ ܕܚܠܬ ܐܠܗܐ ܘܐܝܠܝܢ ܕܡܨܚܝܢ ܠܐܒܗ̈ܝܗܘܢ ܘܐܝܠܝܢ ܕܡܓܕܦܝܢ ܥܠ ܪ̈ܐܙܐ ܩܕ̈ܝܫܐ ܘܟܦܪܝܢ ܒܡܫܝܚܐ ܘܐܢܫ̈ܐ ܗܕܝܘ̈ܛܐ ܕܠܝܬ ܒܗܘܢ ܚܟܡܬܐ ܕܐܠܗܐ.

ܗܢܘܢ ܕܝܢ ܗܘܝܢ ܡܫܡ̈ܫܢܐ ܕܗܿܘ ܘܡ̈ܠܝܗܘܢ ܕܝܠܗܘܢ ܕܓ̈ܠܬܐ ܡܬܗ̈ܝܡܢܢ ܘܥܠ ܡܕܡ ܕܡܬܐܡܪ ܠܗܘܢ ܡܢܗܘܢ ܫܡܥܝܢ ܘܫܪ̈ܝܪܐ ܘܩܠܝܪ̈ܩܐ ܘܚܟ̈ܝܡܐ ܘܛܒ̈ܐ ܢܬܬܫܝܛܘܢ ܒܥܝܢ̈ܝܗܘܢ ܘܐܝܟ ܙܒܠܐ ܢܗܘܘܢ

ܢܗܘܘܢ ܓܝܪ ܒܡܪܕܘܬܐ ܕܒܢ̈ܝ ܐܝܫܡܥܝܠ ܘܢܥܠܘܢ ܠܐܘ̈ܠܨܢܐ ܥܕܡܐ ܕܢܦܣܩܘܢ ܣܒܪܐ ܕܚܝ̈ܝܗܘܢ ܘܢܫܬܩܠ ܐܝܩܪܐ ܡܢ ܟܗ̈ܢܐ ܘܬܒܛܠܝ ܬܫܬܫܬܐ ܕܐܠܗܐ ܘܕܒܚܬܐ ܚܝܬܐ ܡܢ ܓܘ ܥܕܬܐ ܘܢܗܘܘܢ ܟܗ̈ܢܐ ܐܝܟ ܥܡܐ ܒܗܿܘ ܙܒܢܐ

ܘܒܗܿܘ ܫܒܘܥܐ ܕܥܣܪܐ ܕܒܗ ܡܫܬܡܠܝܐ ܙܟܘܬܗܘܢ ܢܥܫܢ ܐܘܠܨܢܐ ܥܦܝܦ ܡܪܕܘܬܐ ܥܠ ܒܢܝ̈ܢܫܐ ܘܥܠ ܒܥܝܪ̈ܐ ܘܥܠ ܚܝ̈ܘܬܐ ܘܢܗܘܐ ܟܦܢܐ ܪܒܐ ܘܢܡܘܬܘܢ ܒܢܝ̈ܢܫܐ ܣܓܝ̈ܐܐ ܘܫܬܕ̈ܝܢ ܫ̈ܠܕܝܗܘܢ ܐܝܟ ܣܝܢܐ ܒܓܘ ܫܘ̈ܩܐ ܡܢ ܒܠܝ ܕܩܒܪ. ܘܒܚܕ ܡܢ ܗܿܢܘܢ ܝܘ̈ܡܬܐ ܢܫܬܕܪ̈ܢ ܡܚ̈ܘܬܐ ܕܪܘܓܙܐ ܥܠ ܒܢܝ̈ܢܫܐ ܬܪܝܢ ܘܬܠܬ ܒܝܘܡܐ ܚܕ

ܘܢܕܡܟ ܒܪ ܐܢܫܐ ܡܢ ܪܡܫܐ ܘܢܩܘܡ ܒܨܦܪܐ ܘܢܫܟܚ ܠܒܪ ܡܢ ܬܪܥܗ ܬܪܝܢ ܘܬܠܬܐ ܕܒܪ̈ܝ ܒܩܛܝܪܐ ܘܬܒ̈ܥܝ ܡܕܐܬܐ ܘܟܣܦܐ ܘܢܓܡܪ ܡܢ ܐܪܥܐ ܟܠܗ ܚܘܫܒܢܐ ܕܝܗܝܒܐ ܘܕܫܩܠܐ ܘܢܙܒܢܘܢ ܒܢܝ̈ܢܫܐ ܒܗܿܘ ܙܒܢܐ ܢܚܫ̈ܝܗܘܢ ܘܦܪ̈ܙܠܝܗܘܢ ܘܡ̈ܐܢܝ ܩܪܒܗܘܢ

ܘܒܗܿܘ ܫܒܘܥܐ ܕܥܣܪܐ ܡܐ ܕܓܡܪ ܟܠܡܕܡ ܒܢ̈ܝܗܘܢ ܘܒܢ̈ܬܗܘܢ ܒܟܣܦܐ ܠܚܢ̈ܦܐ ܢܬܠܘܢ ܡܛܠ ܐܝܕܐ ܥܠܬܐ ܡܗܡܐ ܐܠܗܐ ܚܝܪܗ ܡܢ ܥܘܕܪܢܗܘܢ ܕܡܗ̈ܝܡܢܐ ܕܢܣܒܠܘܢ ܗܠܝܢ ܐܘ̈ܠܨܢܐ ܐܝܟ ܕܢܬܒܚܪܘܢ ܘܢܬܦܪܫܘܢ ܡܗ̈ܝܡܢܐ ܡܢ ܠܐ ܡܗ̈ܝܡܢܐ ܘܙܝ̈ܙܢܐ ܘܡܣ̈ܠܝܐ ܡܢ ܚ̈ܛܐ ܓܒܝ̈ܬܐ ܡܛܠ ܕܟܘܪܐ ܕܒܘܚܪܢܐ ܐܝܬܘܗܝ ܡܿܢ ܙܒܢܐ ܗܿܘ.

ܘܡܐܓܪ ܐܠܗܐ ܪܘܚܗ ܟܕ ܡܬܪܕܦܝܢ ܣ̈ܓܘܕܘܗܝ ܕܒܝܕ ܡܪܕܘܬܐ ܢܬܝܕܥܘܢ ܒܢ̈ܝܐ ܐܝܟ ܕܩܕܡ ܐܟܪܙ ܠܢ ܗܘ ܫܠܝܚܐ ܕܐܝܢ ܕܝܢ ܠܡ ܕܠܐ ܡܪܕܘܬܐ ܐܝܬܝܢ ܗܘܝܢܢ ܠܢ ܢܘܟܪ̈ܝܐ ܘܠܐ ܒܢ̈ܝܐ ܐܦ ܗܘ ܦܪܘܩܢ ܦܩܕ ܘܐܡܪ ܠܢ ܕܛܘܒ̈ܝܟܘܢ ܐܡܬܝ ܕܡܚܣܕܝܢ ܠܟܘܢ ܘܪܕܦܝܢ ܠܟܘܢ ܘܐܡܪܝܢ ܥܠܝܟܘܢ ܟܠ ܡܠܐ ܒܝܫܐ ܡܛܠܬܝ ܒܕܓܠܘܬܐ ܗܝܕܝܢ ܚܕܘ ܘܪܘܙܘ ܕܐܓܪܟܘܢ ܣܓܝ ܒܫܡܝܐ ܗܟܢܐ ܓܝܪ ܪܕܦܘ ܠܢܒ̈ܝܐ ܕܡܢ ܩܕܡܝܟܘܢ ܘܡܿܢ ܕܢܣܝܒܪ ܥܕܡܐ ܠܚܪܬܐ ܗܘ ܢܐܚܐ.

ܘܡܢ ܒܬܪ ܗܠܝܢ ܐܘܠܨ̈ܢܐ ܘܡܪ̈ܕܘܬܐ ܕܒܢ̈ܝ ܐܝܫܡܥܝܠ ܒܫܘܠܡ ܫܒܘܥܐ ܗܿܘ ܟܕ ܪܡܝܢ ܒܢܝ̈ܢܫܐ ܒܩܝܢܕܘܢܘܣ ܕܡܪܕܘܬܐ ܘܠܝܬ ܣܒܪܐ ܕܡܬܦܪܩܝܢ ܡܢ ܫܘܥܒܕܐ ܗܿܘ ܩܫܝܐ ܟܕ ܡܬܪܕܦܝܢ ܘܡܬܐܠܨܝܢ ܘܡܬܩܦܚܝܢ ܘܟܦܢܝܢ ܘܨܗܝܢ ܘܡܬܢܘܠܝܢ ܒܡܪܕܘܬܐ ܩܫܝܬܐ ܐܦ ܗܠܝܢ ܛܪ̈ܘܢܐ ܒܥܪܝܪ̈ܝܐ ܡܬܦܢܩܝܢ ܒܡܐܟ̈ܠܬܐ ܘܒܡܫܬܝܐ ܘܒܢܝܚܐ ܘܡܫܬܒܗܪܝܢ ܒܙܟܘܬܗܘܢ ܕܚܪܒܘ ܘܐܘܒܕܘ ܠܦܪ̈ܣܝܐ. ܘܠܐܪ̈ܡܢܝܐ ܘܩ̈ܝܠܝܩܝܐ ܘܠܝܣܘܪ̈ܝܐ ܘܠܩܦܘ̈ܕܩܝܐ ܘܣ̈ܝܠܝܩܠܝܐ ܘܠܐܠܕ̈ܢܝܐ ܘܝܬܒ̈ܝ ܐܪܥܐ ܕܪ̈ܘܡܝܐ ܘܟܠܗܝܢ ܓܙܪ̈ܬܐ ܕܝܡ̈ܡܐ ܘܠܒܝܫܝܢ ܐܝܟ ܚ̈ܬܢܐ ܘܡܨܒܬܝܢ ܐܝܟ ܟ̈ܠܠܬܐ ܘܡܓܕܦܝܢ ܟܕ ܐܡܪܝܢ ܕܠܝܬ ܦܪܘܩܐ ܠܟܪ̈ܝܣܛܝܢܐ.

ܗܝܕܝܢ ܡܢ ܬܚܝܬ ܫܠܝܐ ܢܬܬܥܝܪܘܢ ܚܒ̈ܠܐ ܕܐܘܠܨܢܐ ܐܝܟ ܕܝܠܕܬܐ ܘܢܦܘܩ ܥܠܝܗܘܢ ܡܠܟܐ ܕܝܘ̈ܢܝܐ ܒܚܡܬܐ ܪܒܐ ܘܢܬܬܥܝܪ ܥܠܝܗܘܢ ܐܝܟ ܓܒܪܐ ܕܢܦܨܗ ܚܡܪܗ ܗܿܘ ܕܡܬܚܫܒ ܗܘܐ ܥܠܝܗܘܢ ܐܝܟ ܡܝܬܐ ܢܦܘܩ ܥܠܝܗܘܢ ܡܢ ܝܡܐ ܕܟܘ̈ܫܝܐ ܘܢܪܡܐ ܚܪܒܐ ܘܐܒܕܢܐ ܒܡܕܒܪܐ ܕܝܬܪܒ ܘܒܓܘ ܒܝܬ ܡܥܒܪ̈ܐ ܕܐܒܗ̈ܝܗܘܢ ܘܢܐܚܕܘܢ ܒܢ̈ܘܗܝ ܕܡܠܟܐ ܕܝܘ̈ܢܝܐ ܐܬܪ̈ܘܬܐ ܕܡܕܒܪܐ ܘܢܓܡܪܘܢ ܒܚܪܒܐ ܠܣܪܝܕܐ ܕܡܫܬܚܪ ܡܢܗܘܢ ܒܐܪܥܐ ܕܡܘܠܟܢܐ.

ܘܬܦܠܝ ܒܗܘܢ ܕܚܠܬܐ ܡܢ ܟܠܗܘܢ ܕܚܕܪ̈ܝܗܘܢ ܘܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܡܕܒܪ̈ܢܝܗܘܢ ܘܟܠܗܝܢ ܡܫܪ̈ܝܬܗܘܢ ܘܟܠܗܿ ܐܪܥܐ ܕܡܕܒܪܐ ܕܐܒܗ̈ܝܗܘܢ ܒܐܝܕܐ ܕܡܠܟ̈ܐ ܕܝܘ̈ܢܝܐ ܬܫ̈ܬܠܡܝ ܘܢܬܝܗܒܘܢ ܠܚܪܒܐ ܘܠܚܪܒܐ ܘܠܫܒܝܐ ܘܠܩܛܠܐ.

ܘܢܗܘܐ ܚܣܝܢ ܫܘܥܒܕܗܘܢ ܚܕ ܒܡܐܐ ܕܢܝܪܗܘܢ ܕܝܠܗܘܢ ܘܢܗܘܘܢ ܒܐܘܠܨܢܐ ܩܫܝܐ ܡܢ ܟܦܢܐ ܘܡܢ ܛܘܪܦܐ ܘܢܗܘܘܢ ܥܒ̈ܕܐ ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܢܫܡܫܘܢ ܥܒܕܘܬܐ ܠܗܿܢܘܢ ܕܡܫܡܫܝܢ ܗܘܘ ܠܗܘܢ ܘܬܗܘܐ ܡܪܝܪܐ ܥܒܕܘܬܗܘܢ ܚܕ ܒܡܐܐ ܡܢ ܗܿܝ ܕܝܠܗܘܢ.

ܘܬܫܬܝܢܝ ܐܪܥܐ ܕܚܪܒܬ ܡܢ ܥܡܘܪ̈ܝܗܿ ܘܢܗܦܘܟ ܣܪܝܕܐ ܕܡܫܬܚܪ ܐܢܫ ܐܢܫ ܠܐܪܥܗ ܘܠܝܪܬܘܬܐ ܕܐܒܗ̈ܘܗܝ. ܘܩܐܦ̈ܘܕܩܝܐ ܘܐܪ̈ܡܢܝܐ ܘܩ̈ܝܠܝܩܝܐ ܘܐܣܘܪ̈ܝܐ ܘܦܪ̈ܝܩܝܐ ܘܐܠܕ̈ܝܐ ܘܣ̈ܝܠܘܩܝܐ ܘܟܠܗ ܣܪܝܕܐ ܕܐܫܬܚܪ ܡܢ ܫܒܝܬܐ ܘܕܗܘܐ ܒܥܒܕܘܬܐ ܕܫܒܝܐ ܢܗܦܘܟ ܟܠ ܐܢܫ ܠܐܬܪܗ ܘܠܒܝܬ ܐܒܘܗܝ.

ܘܢܣܓܘܢ ܒܢܝ̈ܢܫܐ ܥܠ ܐܪܥܐ ܕܚܪܝܒܐ ܗܘܬ ܐܝܟ ܩܡܨܐ ܘܐܓܒܛܘܣ ܬܚܪܒܝ ܘܐܪܩܐ ܬܐܩܕܝ ܘܐܪܥܐ ܕܚܒܪܘܢ ܬܚܪܒܝ ܘܠܫܢ ܝܡܐ ܢܫܬܝܢ ܘܟܠܗ ܚܡܬܐ ܕܪܘܓܙܗ ܕܡܠܟܐ ܕܝܘ̈ܢܝܐ ܒܐܝܠܝܢ ܕܟܦܪܘ ܬܬܓܡܪܝ ܘܢܗܘܐ ܫܝܢܐ ܒܐܪܥܐ ܕܠܐ ܗܘܐ ܐܟܘܬܗ ܡܛܠ ܕܗܘ ܐܝܬܘܗܝ ܫܝܢܐ ܐܚܪܝܐ ܕܫܘܠܡܗ ܕܥܠܡܐ.

ܘܬܗܘܐ ܚܕܘܬܐ ܒܟܠܗܿ ܐܪܥܐ ܘܢܬܒܘܢ ܒܢܝ̈ܢܫܐ ܒܫܝܢܐ ܪܒܐ ܘܢܬܚ̈ܕܬܢ ܥܕ̈ܬܐ ܘܢܬܒܢ̈ܝܢ ܡܕ̈ܝܢܬܐ ܘܢܬܚܪܪܘܢ ܟܗ̈ܢܐ ܡܢ ܫܩܠܐ ܘܢܬܬܢܝܚܘܢ ܟܗ̈ܢܐ ܘܒܢܝ̈ܢܫܐ ܒܗܿܘ ܙܒܢܐ ܡܢ ܥܡܠܐ ܘܠܐܘܬܐ ܘܛܘܪܦܐ.

ܡܛܠ ܕܗܘ ܐܝܬܘܗܝ ܫܝܢܐ ܗܿܘ ܕܐܡܪ ܒܐܘܢܓܠܝܘܢ ܕܝܠܗ ܕܢܗܘܐ ܠܡ ܫܝܢܐ ܪܒܐ ܕܠܐ ܗܘܐ ܐܟܘܬܗ ܘܢܬܒܘܢ ܒܢܝ̈ܢܫܐ ܒܢܝܚܐ ܘܢܐܟܠܘܢ ܘܢܫܬܘܢ ܘܢܚܕܘܢ ܒܚܕܘܬܐ ܕܠܒܐ ܘܓܒܪ̈ܐ ܢܣܒܘܢ ܢܫ̈ܐ ܘܢܫ̈ܐ ܢܬܝܗ̈ܒܢ ܠܓܒܪ̈ܐ ܘܢܒܢܘܢ ܒܢܝ̈ܢܫܐ ܘܢܨܒܘܢ ܟܪ̈ܡܐ ܘܟܕ ܠܡ ܐܟܠܝܢ ܘܫܬܝܢ ܘܚܕܝܢ ܘܪܘܙܝܢ ܘܠܝܬ ܒܝܫܐ ܘܠܐ ܪܢܝܗܿ ܕܒܝܫܬܐ ܘܠܐ ܕܚܠܬܐ ܘܙܘܥܬܐ ܒܠܒ̈ܘܬܗܘܢ.

ܒܗܿܘ ܫܝܢܐ ܢܬܦܬܚܘܢ ܬܪ̈ܥܝ ܓܪܒܝܐ ܘܢܦܩܘܢ ܚܝ̈ܠܘܬܐ ܕܥܡ̈ܡܐ ܗܠܝܢ ܕܚܒܝܫܝܢ ܗܘܘ ܬܡܢ ܘܬܙܘܥܝ ܐܪܥܐ ܡܢ ܩܕܡܝܗܘܢ ܘܢܬܪܗܒܘܢ ܒܢܝ̈ܢܫܐ ܘܢܥܪܩܘܢ ܘܢܣܬܪܘܢ ܢܦܫ̈ܬܗܘܢ ܒܛܘܪ̈ܐ ܘܒܡܥܪ̈ܐ ܘܒܒܝܬ ܩܒܘܪ̈ܐ ܘܢܡܘܬܘܢ ܡܢ ܕܚܠܬܐ ܘܡܢ ܟܦܢܐ ܘܠܝܬ ܕܩܒܪ ܠܗܘܢ.

ܘܢܬܐܟܠܘܢ ܩܕܡ ܐܒܗ̈ܝܗܘܢ ܟܕ ܚܙܝܢ ܠܗܘܢ ܡܛܠ ܕܗܠܝܢ ܥܡ̈ܡܗ ܕܢܦܩܝܢ ܡܢ ܓܪܒܝܐ ܐܟܠܝܢ ܒܣܪܐ ܕܒܢ̈ܝ ܐܢܫܐ ܘܫܬܝܢ ܕܡܐ ܕܚܝ̈ܘܬܐ ܘܐܟܠܝܢ ܫܪܨܗܿ ܕܐܪܥܐ ܘܥܩܘܒܪ̈ܐ ܘܚܘ̈ܘܬܐ ܘܥܩܪ̈ܒܐ ܘܟܠܗ ܪܚܫܐ ܛܡܐܐ ܕܪܚܫ ܥܠ ܐܪܥܐ ܘܦܓܪ̈ܐ ܕܚܝ̈ܘܬܐ ܡܣܝ̈ܒܬܐ ܘܝܚ̈ܛܐ ܕܒܥܝܪ̈ܐ ܘܕܒܚܝܢ ܝܠܘ̈ܕܐ ܘܝܗܒܝܢ ܠܐܡܗ̈ܬܗܘܢ ܘܐܠܨܝܢ ܠܗܝܢ ܕܢܐܟ̈ܠܢ ܦܓܪ̈ܐ ܕܒܢ̈ܝܗܝܢ ܘܐܟܠܝܢ ܟܠܒ̈ܐ ܡܝ̈ܬܐ ܘܩ̈ܛܘܢܐ ܘܟܠܗܿ ܛܢܦܘܬܐ ܘܡܚܒܠܝܢ ܠܗܿ ܠܐܪܥܐ ܘܠܝܬ ܕܡܫܟܚ ܕܩܐܡ ܩܕܡܝܗܘܢ.

ܘܡܢ ܒܬܪ ܚܕ ܫܒܘܥܐ ܕܐܘܠܨܢܐ ܡܬܟܢܫܝܢ ܟܠܗܘܢ ܠܦܩܥܬܐ ܕܝܘܦܐ ܡܛܠ ܕܠܬܡܢ ܡܬܟܢܫܝܢ ܟܠܗܘܢ ܗܠܝܢ ܥܡ̈ܡܐ ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܠܬܡܢ ܡܫܕܪ ܐܠܗܐ ܥܠܝܗܘܢ ܚܕ ܡܢ ܪ̈ܒܝ ܚܝ̈ܠܘܬܐ ܕܡ̈ܠܐܟܐ ܘܚܪܒ ܠܗܘܢ ܒܚܕܐ ܫܥܬܐ ܘܗܝܕܝܢ ܢܚܬ ܡܠܟܐ ܕܝܘ̈ܢܝܐ ܘܝܬܒ ܒܐܘܪܝܫܠܡ ܫܒܘܥܐ ܚܕ ܘܦܠܓܘܬ ܫܒܘܥܐ ܒܡܢ̈ܝܢ ܥܣܪ ܫܢ̈ܝܐ ܘܦܠܓܗ ܘܗܝܕܝܢ ܢܬܓܠܐ ܒܪܗ ܕܐܒܕܢܐ ܡܫܝܚܐ ܕܓܠܐ.

ܗܢܐ ܡܬܒܛܢ ܒܟܘܪܙܝܢ ܘܡܬܝܠܕ ܒܨܝܕܢ ܘܡܡܠܟ ܒܟܦܪܢܚܘܡ ܘܡܫܬܒܗܪܐ ܒܗ ܟܘܪܙܝܢ ܕܐܬܝܠܕ ܒܗܿ ܘܒܝܬ ܨܝܕܢ ܕܐܬܪܒܝ ܒܗܿ ܘܟܦܪܢܚܘܡ ܕܐܡܠܟ ܒܗܿ ܘܡܛܠܗܕܐ ܠܬܠܬ̈ܝܗܝܢ ܝܗܒ ܡܪܢ ܘܝܐ ܒܐܘܢܓܠܝܘܢ ܕܝܠܗ ܟܕ ܐܡܪ ܕܘܝ ܠܟܝ ܟܘܪܙܝܢ ܘܝ ܠܟܝ ܒܝܬ ܨܝܕܐ ܘܐܢܬܝ ܟܦܪܢܚܘܡ ܗܿܝ ܕܥܕܡܐ ܠܫܡܝܐ ܐܬܬܪܝܡܬܝ ܥܕܡܐ ܠܫܝܘܠ ܬܬܬܚܬܝܢ.

ܘܡܚܕܐ ܕܡܬܓܠܐ ܒܪܗ ܕܐܒܕܢܐ ܗܝܕܝܢ ܣܠܩ ܡܠܟܐ ܕܝܘ̈ܢܝܐ ܘܩܐܡ ܥܠ ܓܓܘܠܬܐ ܘܡܬܬܣܝܡ ܨܠܝܒܐ ܩܕܝܫܐ ܒܗܿܝ ܕܘܟܬܐ ܕܐܬܩܒܥ ܒܗܿ ܟܕ ܛܥܢܗ ܠܡܫܝܚܐ.

ܘܣܐܡ ܡܠܟܐ ܕܝܘ̈ܢܝܐ ܬܐܓܗ ܒܪܝܗ ܕܨܠܝܒܐ ܩܕܝܫܐ ܘܦܫܛ ܠܗܝܢ ܠܬܪܬܝܗܝܢ ܐܝܕ̈ܘܗܝ ܠܫܡܝܐ ܘܡܫܠܡ ܡܠܟܘܬܐ ܠܐܠܗܐ ܐܒܐ.

ܡܬܥܠܐ ܨܠܝܒܐ ܩܕܝܫܐ ܗܿܘ ܕܐܨܛܠܒ ܥܠܘܗܝ ܡܫܝܚܐ ܠܫܡܝܐ ܘܟܠܝܠ ܡܠܟܘܬܐ ܥܡܗ ܡܛܠ ܕܗܘ ܨܠܝܒܐ ܩܕܝܫܐ ܕܥܠܘܗܝ ܐܨܛܠܒ ܡܫܝܚܐ ܚܠܦ ܦܘܪܩܢܐ ܕܟܠܗܘܢ ܒܢܝ̈ܢܫܐ ܕܡܗܝܡܢܝܢ ܒܗ ܐܨܛܠܒ ܗܿܘ ܕܐܝܬܘܗܝ ܢܝܫܐ ܕܡܬܚܙܐ ܩܕܡ ܡܬܝܬܗ ܕܡܪܢ ܐܝܟ ܕܠܒܗܬܬܗܘܢ ܕܟܦܘܪ̈ܐ.

ܘܫܠܡܐ ܡܠܬܐ ܕܛܘܒܢܐ ܕܘܝܕ ܗܿܝ ܕܐܬܢܒܝ ܥܠ ܚܪܬܐ ܕܙܒ̈ܢܐ ܘܐܡܪ ܕܟܘܫܝ ܬܫܠܡܝ ܐܝܕܐ ܠܐܠܗܐ ܡܛܠ ܕܒܪܗܿ ܕܟܘܫܬ ܒܪܬ ܦܝܠ ܡܠܟܐ ܕܟܘܫ̈ܝܐ ܗܘ ܐܝܬܘܗܝ ܐܝܢܐ ܕܡܫܠܡ ܐܝܕܐ ܠܐܠܗܐ.

ܘܡܚܕܐ ܕܡܬܥܠܐ ܨܠܝܒܐ ܩܕܝܫܐ ܠܫܡܝܐ ܘܡܫܠܡ ܢܦܫܗ ܠܒܪܘܝܗ ܡܠܟܐ ܕܝܘ̈ܢܝܐ ܗܝܕܝܢ ܡܬܒܛܠ ܟܠ ܪܝܫ ܘܟܠ ܫܘܠܛܢ ܘܟܠ ܚܝ̈ܠܝܢ ܘܡܚܕܐ ܡܬܓܠܐ ܒܪܗ ܕܐܒܕܢܐ ܗܿܘ ܕܐܝܬܘܗܝ ܡܢ ܫܒܛܐ ܕܕܢ ܐܝܟ ܢܒܝܘܬܗ ܕܝܥܩܘܒ ܕܐܬܢܒܝ ܥܠܘܗܝ ܘܐܡܪ ܕܢܗܘܐ ܕܢ ܚܘܝܐ ܚܪܡܢܐ ܕܪܒܝܥ ܥܠ ܐܘܪܚܐ ܕܡܘܒܠܐ ܠܡܠܟܘܬܐ ܕܫܡܝܐ.

ܗܝܕܝܢ ܕܢܟܬ ܠܣܘܣܝܐ ܐܝܬܝܗܿ ܡ̈ܠܐ ܕܒܐܣܟܝܡܐ ܕܙܕܝܩܘܬܐ ܗܝܕܝܢ ܕܡܪܡܐ ܠܪܟܒܗ ܠܒܣܬܪܗ ܐܝܬܝܗܘܢ ܩܕ̈ܝܫܐ ܕܡܨܛܠܝܢ ܒܬܪ ܛܥܝܘܬܗ ܥܩܒܐ ܕܝܢ ܫܘܠܡܐ ܕܥܠܡ̈ܐ ܘܚܪܬܐ ܕܫܢ̈ܝܐ ܡܚܘܝܐ ܠܢ ܘܗܿܢܘܢ ܩܕ̈ܝܫܐ ܕܗܘܝܢ ܒܗܿܘ ܙܒܢܐ ܗܠܝܢ ܕܪܟܝܒܝܢ ܥܠ ܡܠܬܐ ܕܩܘܫܬܐ ܕܡܡܟܟܝܢ ܘܡܫܦܠܝܢ ܒܥܡ̈ܠܐ ܕܙܕܝܩܘܬܐ ܢܟܬ ܠܗܘܢ ܒܝܕ ܐܬܘ̈ܬܐ ܕܦܢ̈ܛܐܣܝܐܣ ܕܛܘܥܝܝ ܕܝܠܗ ܕܥܒܕ

ܘܪܗܛܝܢ ܗܢܘܢ ܒܬܪܗ ܕܡܛܥܝܢܐ ܟܕ ܚܙܝܢ ܠܓܪ̈ܒܐ ܕܡܬܕܟܝܢ ܘܠܣ̈ܡܝܐ ܕܡܬܦܬܚܝܢ ܘܠܡܫܪ̈ܝܐ ܕܡܗܠܟܝܢ ܘܠܕܝܘ̈ܐ ܕܢܦܩܝܢ ܘܠܫܡܫܐ ܕܚܐܪ ܒܗ ܘܚܫܟ ܘܠܣܗܪܐ ܕܦܩܕ ܠܗ ܘܡܫܬܚܠܦ ܠܕܡܐ ܘܠܐܝ̈ܠܢܐ ܕܡܦܩܝܢ ܦܐܪ̈ܐ ܡܢ ܣܘ̈ܟܝܗܘܢ ܘܠܐܪܥܐ ܕܡܘܥܝܐ ܥܩܪ̈ܐ ܘܠܡܒ̈ܘܥܐ ܕܡ̈ܝܐ ܕܓܝܙܝܢ ܘܒܝܕ ܗܠܝܢ ܐܬܘ̈ܬܐ ܕܦܢܛܐܣܝܐ ܡܛܥܐ ܠܗܘܢ ܠܩܕ̈ܝܫܐ ܡܛܠܗܕܐ ܐܡܪ ܕܢܟܬ ܠܣܘܣܝܐ ܒܥܩܒܗ ܟܠ ܓܝܪ ܡܘܡܐ ܕܡܬܥܒܕ ܒܦܓܪܐ ܒܝܕ ܦܪܙܠܐ ܐܘ ܒܝܕ ܢܘܟ̈ܬܬܐ ܡܕܡ ܫܘܡܬܐ ܡܬܝܕܥܐ ܒܗ ܟܠ ܡܐ ܕܐܝܬܘܗܝ ܒܚ̈ܝܐ ܗܟܢܐ ܐܦ ܟܠ ܚܛܗܐ ܕܡܬܥܒܕ ܒܢܦܫܐ ܢܘܪܐ ܘܬܫܢܝܩܐ ܕܠܥܠܡ ܢܛܝܪ ܠܗܿ ܒܣܬܪܐ ܓܝܪ ܓܒܐ ܕܣܡܠܐ ܡܫܘܕܥ.

ܘܟܕ ܒܥܝܢܐ ܕܪܘܚܐ ܚܪ ܛܘܒܢܐ ܝܥܩܘܒ ܘܚܙܝܗܝ ܠܗܿܘ ܐܘܠܨܢܐ ܕܗܘܐ ܒܗܿܘ ܙܒܢܐ ܘܐܡܪ ܗܟܢܐ ܕܠܦܘܪܩܢܟ ܣܟܝܬ ܡܪܝܐ ܘܡܪܢ ܬܘܒ ܐܡܪ ܕܐܢ ܡܫܟܚ ܣܛܢܐ ܐܦ ܠܓܒ̈ܝܐ ܡܛܥܐ.

ܥܐܠ ܓܝܪ ܗܘ ܗܢܐ ܒܪ ܐܒܕܢܐ ܠܐܘܪܝܫܠܡ ܘܝܬܒ ܒܗܝܟܠܐ ܕܐܠܗܐ ܘܥܒܕ ܢܦܫܗ ܐܝܟ ܐܠܗܐ ܐܝܬܘܗܝ ܓܝܪ ܗܢܐ ܒܪܐܢܫܐ ܕܚܛܝܬܐ ܡܓܫܡܐ ܡܢ ܙܪܥ ܓܒܪܐ ܘܡܬܝܠܕ ܡܢ ܡܙܘܓܬܐ ܡܢ ܫܒܛܗ ܕܕܐܢ.

ܗܢܐ ܕܝܢ ܝܠܕܐ ܕܐܒܕܢܐ ܒܝܕ ܡܪܝܪܘܬ ܝܨܪܗ ܡܛܥܐ ܠܟܠ ܐܢ ܡܫܟܚ ܒܝܕ ܕܥܒܝܕ ܒܝܬ ܡܥܡܪܐ ܠܟܠܗܘܢ ܕܝ̈ܘܐ ܘܟܠܗܿ ܡܥܒܕܢܘܬܗܘܢ ܒܗ ܡܬܓܡܪܐ.

ܘܒܡܬܝܬܗ ܕܡܪܢ ܕܡܢ ܫܡܝܐ ܡܫܬܠܡ ܠܓܝܗܢܐ ܕܢܘܪܐ ܘܠܚܫܘܟܐ ܒܪܝܐ ܘܬܡܢ ܢܗܘܐ ܒܒܟܝܐ ܘܒܚܘܪܩܐ ܕܫܢ̈ܐ ܥܡ ܟܠܗܘܢ ܐܝܠܝܢ ܕܗܝܡܢܘ ܒܗ ܘܠܢ ܕܝܢ ܢܫܘܐ ܡܪܢ ܝܫܘܥ ܡܫܝܚܐ ܠܡܠܟܘܬܐ ܕܝܠܗ ܫܡܝܢܝܬܐ ܥܡ ܟܠܗܘܢ ܥܒ̈ܕܝ ܨܒܝܢܗ ܘܢܣܩ ܬܫܒܘܚܬܐ ܘܐܝܩܪܐ ܘܣܓܕܬܐ ܘܪܘܡܪܡܐ ܗܫܐ ܘܒܟܠܙܒܢ ܠܥܠܡܥܠܡܝܢ ܐܡܝ