Bonne gent, entendez par amours un biau dit.
Se je me porte cointe, n’en aiez pas despit,
Car j’aimme par amours celle qui me belist !
Volentiers l’atendroie toute nuit en mon lit.
Compains, n’as tu pas honte — maufeu tarde la main —
Qui te vantes d’amer et au soir et au main !
Tu me fais grant despit, par le cors saint Germain ;
Pour Dieu or regardez quel troncon de vilain !
Vilain chaitif dolent, tu n’es c’un sechellon.
S’une femme t’amoit, ce seroit foloison.
Mais je sui biaus et jones, si aimme Marion
Qui garde les brebis. Ier le vi au buisson.
Amis tu n’as pas tort se tu aimes bregiere,
Car bien sambles bergier au cors et a la chiere.
Ne te faut que hoüte et une panetiere.
Fui ! Va t’en loins de ci avant que je te fiere !
Me veus tu dont ferir ? Voir se ferus estoie,
Pour l’amour de m’amie bien me revengeroie.
Au buisson le trouvai, delez une sausoie.
De son pain me donna, de quoi j’ai moult grant joie.
Male joie te puist le cuer el cors crever,
Se me mens d’une chose que te veul demander :
Comment l’acointas tu ne par confait parler ?
Sez tu bien de certain qu’elle te veult amer ?
Ouïl, quar elle rit touz jourz quant vois vers li,
Et si m’a demandé un chapelet joli.
Je en avrai un biau pour mains d’un parisis.
Porter le mi faudra ainz que face autre ami.
Hastez vous biax amis et y alez courant !
Robinet va entour, je le vi ne sai quant.
Il la vouloit baisier, mais elle aloit grouçant.
Elle est borgne et toullouque : de deux pars va clochant.
Tu dis voir, elle est borgne, mais ce fait mignotise.
Le clochier li siet bien, gentement se debrise.
Se le me blasmes plus tu feras fole emprise ;
Garde que ne mesprengnes car je l’aim moult et prise !
Compains, de tes amours t’envoit Diex pute joie.
Va t’ent de devant moi, je le te loeroie !
A ces bonnes gens ci un dit dire cuidoie
Du pappe nostre pere, mais ta jengle m’anoie.
Que ai je a faire du pappe ? Il ne li chaut de moi.
Se tu veulz estriver, bien parlerai a toi.
Trop me vas desprisant, du grief mal saint Eloy.
Soit ton cors tourmentez se ne te tais tout quoi !
Voir ne me terai je ja pour telle loberie.
Tu es trop bien taillie pour avaler boullie.
Il pert bien a tes joes — que ne t’esmaies mie —
Comment le roy penra la terre de Surie.
Se je me soucioie, fol seroie prouvez.
Mon souci n’i vaudroit la monte de deux dez.
Que le feu saint Antoinne te puist mengier le nez !
Aussi est il trop lonc, bonne gent regardez !
Hé ! Chetif malostru, que regardera l’en ?
Ton let musel boufi ? Diex te mete en mal an !
S’a moi estrive plus, ce ne sera pas sen,
Mais sueffre toi tout quoi. Je le te lo : va t’en !
Vaten est en Berry assez pres de Crassai,
A deux lïeues d’un bourc c’on apelle Massai.
Or me di par amours se tu es cler ou lai.
Je croi que du pays ou les gens dient “nai”.
Mescheant, que te chaut de quel pays je soie,
Se les yex de ta teste touz deux crevez [t]’avoie ?
Ja parmi ceste ville a aler n’en lairoie.
Te portes tu si fier. Pour t’amie m’aroie ?
Ouïl, fier je m’en porte et je le doi bien faire,
Car elle est bele et douce, courtoise et debonnaire.
A couchier avec moi, je ne le puis atraire
Se ne l’espouse avant, dont j’ai au cuer contraire.
Compains, celle qui t’aimme n’a pas merde enhaïe.
Ja femme de ton cors ne sera bien servie ;
Tu n’es c’un droit mouflart. Par amours je te prie
Que ne te vantes plus que tu as mesamie.
Ne te courouce pas, par amour, biau varlet ;
Volentiers te donrai plain un pot de bufet
Pour tant que me conseilles se ce sera bien fait
Que j’espouse m’amie qui a biau chapelet.
Je ne t’en dirai riens, foy que doi Nostre Dame,
Car se te conseilloie que tu preïsses femme
Et il t’en avenoit encombrier ne diffame,
Bien sai que maudiroies souvent mon cors et m’ame.
Amis, puis que ne puis trouver conseil en toi,
Je m’en conseillerai a ce clerc que la voi.
Bien m’en dira le voir si comme je le croi.
Male honte t’aviengne ! Tu m’as moustré au doi !
Sire, ne vous desplaise, se Diex me puist sauver.
Pas ne l’ai fait por mal, mais je ne puis durer ;
Tant ai le cuer joli, si vous veul demander
Dont veniez orains. Moult vous vi tost aler.
Douz compains, je venoie — ja ne t’en quier mentir —
Tout droit du cemitiere de ma femme enfouïr.
Combien que la veïsse en la terre couvrir,
Si ai je touz jourz doute ne doie revenir.
Vous vous trufez de moi ! Ce n’est pas courtoisie !
Tout sanz Chastiau Landon truis bien la moquerie.
Vous dites qu’avez hui vostre femme enfouïe,
Mais ne puet estre voir quant vous ne plourez mie.
Plourer ? Sainte Marie ! Je te jur se j’avoie
Sept anemis mortiex et trainer les veoie
Au gibet de Paris, pas si liez ne seroie
Com je sui de sa mort ; Onques mais n’oi tel joie !
Par ma foi, biax amis, moult sui esmerveilliez !
Je voi ces autres hommes qui sont touz courouciez
Quant leur femmes trespassent et vont touz embrunchiez
Et de la mort la vostre estes joianz et liez !
Douz Diex, se je fais joie, il y a bien raison :
Onques puis que la pris, je n’oi pais en maison ;
En yver n’en esté ne en nule saison
N’estoit qu’adez n’eüsse de tences a foison.
Par ma foi, biau douz sire, moult volentiers savroie
Pourquoi menez tel vie. Marier me vouloie,
Mais je sui tout certain, s’une femme prenoie
Qui m’alast riotant, je le mehainneroie.
T’en cuideroies tu miex chevir que je n’ai fait ?
Tu n’es que un bourdeur et un droit davoudet !
Tant ai souffert par li de tourment et de lait
Que je ne l’ose dire, s’ame soit au gibet.
Je sui touz esbahis des mos que vous contez,
Mais par amours vous pri que conseil me donnez,
Car de tenir manage sui fort entalentez
Et de moi marier. Dites que m’en loez !
Davoudet, biaus amis, tu n’es mie bien sage.
Je te recorderai l’anuie et le domage
Qu’ai souffert puis le jour qu’entrai en mariage.
Mais avant t’aprendrai qu’il couvient a mesnage.
Dan maistre qui voulez de manage parler,
Voir j’en sai plus que vous. Je le puis bien prouver :
J’i ai esté dix anz, mais je puis bien jurer
C’onques n’i oy bon jour. Deable m’i fist entrer !
Compains, bien vous en croi. Je sai certainement
S’il en prent bien a un, qu’il en meschiet a cent.
Manage fait dancier la gent premierement,
Mais puis vient la riote qui dure longuement.
Manage veult avoir robe neuve au primier
Et noble chauceüre pour gentement marcier,
Ganz blans a la çainture et coutel pour taillier,
Ne les joiaus la dame ne doit on pas laissier.
Ausi faut il les coutes et cousins por lor lis,
Les dras, les courtes pointes, et sarges et tapis,
Fuerre blanc, couverteurs, et quovrechiez faitis.
S’il n’i avoit courtines, ce seroit grant despit.
En la chambre faut coffres et escrins pour joiaus,
Et parmi la maison granz huces et huceaus,
Escüelles parfondes, sausieres et platiaus.
Quant cela est d’estain l’ostel en est plus biaus.
Il couvient a manage : pos, chauderons, paëles,
Hates, selles et auges, escuves, escüelles,
Bans, forme[te]s et chazeres, et eschammaz et seles,
Traitiaus, tables, bufez, napes, touelles belles.
Manage veut avoir : voirre, godés, henas,
Et la maist pour pestrir, buletel et saas,
Sasoirë et ratoire, et plume se ne l’as.
Un balai en l’ostel, il ne vaut pas deux as.
Ou manage couvient : buche, charbon, grant fais,
Cramillie, trepié, tenailles et mollés,
Griex, tronchus, landiers, et les petiz chenés,
Et s’est moult bien seant, en l’atre li soufflés.
N’est si petit ostel ou ne faille sailliere,
Sel, pestel et mortier, et pilete legiere,
Chandeliere et chandele, et huile qui est chiere,
La lampe et le crasset, et la lanterne entiere.
Vous dites voir amis, mais il li faut tout el :
Les auz et les oingnons, et verjus en tonnel.
Desce que on aproche du haut jour sollempnel,
La dame se demente d’avoir habit nouvel.
Encore n’est ce riens vers ce que dire veul,
Car au petit enfant lïen faut et berceul,
Et dangier de norrices qui sont plaines d’orgueil :
La paële au papin, l’aumuce et le lincheul.
Davoudet, entens tu ce qu’il te va disant ?
Ouïl voir. De manage di “fi” d’ore en avant !
Amis, trop plus de choses faut — je le te creant —
A ces gens de vilage que n’as eü devant.
Je sai bien qu’il leur faut, nez fui en un hamel.
Il leur couvient par force la fource et le flaël,
Une paule et un pic, la houe et le hoël,
Le rouable et la fauz, la queuz et le martel.
Ausi ques leur faut il, et vachiers et berchieres,
Charetes, tuberiaus, brouetes et chivieres,
La charrue et la harche, soc, coutre et dossïeres,
Chevaus, jumens et bués, et anesses somieres.
A vilages couvient : brebis, vaches, moutons,
Chievres, bous et chevreaus, oës, jars et oisons,
Avetes et mallars, cos, gelines, chapons,
Et le chat qui enchace les ras loins des bacons.
Bacins et chaufouetes faut aus granz managiers,
Corbelles et boissiaus, et hotes et paniers.
Qui n’a serpe ou hachete, il ne vaut deux deniers.
Moufles, ganz et mitenes faut, quant hyver est fiers.
Il y faut corde a puis, eschieles et ma[r]tel,
La coulonne a la dame, la pezon, le fuizel,
Et les desvideüres ou desouz est l’aviel
Ou on met le maillet dont on bat le luissel.
Davoudet, tu oublies : il faut un bateür,
Le traoul, le cerens, et le fer a ferrer !
Sire lessïez moi ! Diex vous puist craventer !
Je renie masnage ! N’en veul plus escouter.
Quant y faut tant de choses, de ma part le renie,
Mais orains promeïtes devant la compaignie
Que me conterïez la dolente de vie
Que vous faisoit la femme qui du siecle est partie.
Or te tais dont tout qu’ois, si orras le hustin
Qu’avoie de ma femme ; trop sui liez de sa fin.
Coie ne se taisoit, au soir ne au matin.
Adez aloit sa langue com batiau de molin.
Et que vous disoit elle, pour le cors saint Marcel ?
Tout adez riotoit, ou fust ou d’un ou d’el :
Une heure de sa vache, autre de son veel.
Souvent m’en couvenoit fuïr hors de l’ostel.
Il ne m’en chaloit ja qu’elle alast devisant,
Quant ne parlast de chose qui m’alast aferant.
Je n’en feïsse ja ne chiere ne samblant,
Ainz li laissaisse dire du tout a son talent.
Amis, quant m’en taisoie tant estoit aïree
Que d’aire m’apeloit : “ribaut, hance pelee”.
S’a li gesir vousisse, tantost se fust donnee
Aus deables d’enfer qui l’en ont emportee.
Sire, je vous demande se belle femme estoit.
Ouïl, se Dieu me gart, mais lever me faisoit
Souvent ainz qu’il fust jor, et puis si me bailloit
Ma houe par le manche, et aus chans m’enveoit.
Male honte vous viengne, sire ribaut puant !
On vous deüst clamer compere au mescheant
Quant d’une seule femme vous faloit souffrir tant.
Je la laisse de coups trestoute derompant !
Hé laz, tres douz compains ! Une foiz l’a feri,
Mais ne me donnai garde qu’aus cheveus me saisi ;
A terre me geta, sus mon ventre sailli,
Et me prist par la gorge. A poi ne me murdri !
Voir j’ou grant joie au cuer quant me daigna laissier.
Onques si male beste ne vi terre marchier !
Or me dites, biau sire, aprés si fait dangier,
De quoi vous servoit elle quant venoit au mengier ?
J’avoie du pain d’orge poi cuit et mal levé,
Ort pot et sale nape, et lait aigre esburré.
Puis que Jhesucrist m’a de ses laz delivré,
Jamais en mariage ne me rebouteré.
Il n’est mie mestier que toutes femmes soient
Telle comme elle estoit. Pluseurs genz y perdroient :
Il est grant plenté d’ommes que se il le savoient,
Que jamais en leur vie ne se marieroient.
En non Dieu, tu diz voir. N’ai soing de dire outrage
Des dames, fors de celle qui m’a fait tel dommage.
Mais avant m’enfuiroie outre la mere a nage
Que je me remeïsse en si fait mariage !
Sire qui mariage si forment redoutez,
Je croi c’est pour les biens que souffert y avez.
Par amours or me dites, mie ne me celez,
Comment d’ore en avant maintenir vous voudrez.
Davoudet, tu l’orras. Quant le douz Roy celestre
Me delivra de celle que deable fist nestre,
D’ore en avant voudrai de touz poins preudons estre,
Et ferai se Dieu plait que briement serai prestre.
Prestre, deable y soient ! Estes vous forsenez ?
Prestre Hue ot l’autr’ier [trestout les biens coupez]
[Sur une orde ribaude] : d’un barbier fu trouvés.
[Prestres sont si ribaus] qu’il ne valent deux dez !
Tu men mauvaisement ! Il ne va pas ainssi.
Bien voi a ton parler qu’il [...].
Se plus mesdiz des prestres, de touz poins te deffi,
Et de l’auctorité que j’ai, t’escommeni !
Hé laz tres douce gent ! Je ne savrai mengier
Puis qu’escommenié m’a mesire Gautier.
Car me veilliez absoudre, pour Dieu le vous requier.
Savez vous par quel lettre commence le Sautier ?
Tanstost le te dirai mais que m’avise un poi.
Je connois bien les lettres, quant el livre les voi.
Or ne parle pas haut et te tais trestout quoi.
Je pense le Sautier se commence par ‘B’ !
“Boi” ? Et que bevrai je ? Au mains dites “bevez”,
Et me portez hounour ; bien faire le devez.
Alez a Avignon — en l’eure passerez —
Et par devant les maistres si sagement parlez !
En non Dieu, tu dis voir qu’il en y a de tiex
Qui ne sont pas si sages com moi, ne tant soutiex.
Se des flourins y porte j’en passerai trop miex :
En l’eure serai prestre que je sui trop soutiex.
Bonne gent, entendez : voir quant prestre sera,
De beles avalees en sa messe fera !
Bien croi que quant l’offrande receüe sera,
Que de l’autre servise briement se passera.
Davodet, or me croi : se grant offrande avoie,
Je te jure sur Dieu, du meilleur vin bevroie ;
Jamais pour messe dire es mains gale n’avroie.
Prestres ont biau mestier : volentiers le seroie.
Fol garcon recreant, or puet on bien savoir
Que voulez estre prestre pour en repos manoir
Et pour boire bon vin et au main et au soir !
Davoudet, biax compains, tu ne diz mie voir.
Je ne veul estre prestres fors que pour Dieu servir
Et pour aus povres gens de mes biens departir,
Si que quant de mon cors faudra l’ame partir,
Que Dieu en sa grant joie la veille recueillir.
Mes trestouz les deables d’enfer l’emporteront ;
Prestre sont plus aver que nule gent du mont !
Qu’il prennent tout adez, les mains ouvertes ont ;
Ja de chose qu’il aient asouvis ne seront.
Davoudet, je te jur se les prestres n’estoient,
Les laies gens com bestes en cest siecle vivroient.
N’est il pas bien raison que d’eulz soustenus soient
Quant il font le service du seignor en qui croient ?
Voir il me desplait trop qu’il faut argent baillier
A baptizier enfant et le cresmel paier !
Des femmes relever veulent avoir loier,
Et quant il portent Dieu, il en ont un denier.
Davoudet, le boucel te puist crever les yex !
Pas ne l’acoustumai, li usages est tiex :
Prestres couchent et lievent celui qui est vraiz Diex ;
Par euz sont couronnees pluseurs ames es ciex.
Vous mentez ! Mes dampnees en enfer a tourment,
Car des mors et des vis veulent avoir argent.
Leurs parochïens font couz, menu et souvent ;
Voir quant Diex en a un le deable en a cent.
Pour quoi diz ytes mos, maleüreuz chetis ?
Pour ce que je di voir. Estes vous esbahiz ?
Se vous me voulez croire, par Dieu de Paradis,
Bon conseil vous donrai et devant vos amis.
Di quanques tu veulz dire et je t’escouterai !
Se tu me diz raison, je m’i acorderai.
Se vous voulez souffrir d’estre prestre curé,
Jamais jour de ma vie femme n’espouserai.
Et que ferons nous dont ? Di moi tout ton penser !
Tu ne me doins en riens ton courage celer.
En Engleterre yron touz ces Englois tuer,
Car on dit que vers nous se veulent reveler.
Douz amis je le veul, car se prestres estoie
Et soisante livrees de bonne rente avoie,
Si lairoie tout quoi et tuer les yroie.
A touz ceuz qui sont ci otroit Jhesucrist joie !