Pour ce que je voy grant partie
Du monde qui met s’estudie
A li un l’autre decevoir,
Veil dire un dit qui tout est voir ;
N’en puis mes se j’en sui haïs,
Mes je tiens ceus pour foux naïs
Qui tant se fient estre fors
Et en la force de leur corps
Que il ne leur chaille de l’ame.
Dïex ! il n’est si belle dame
Ne si fort homme tant soit fier
Que mort ne face trebuchier.
Personne qui a a mourir
Ne se devroit ja orgueillir.
Des estas du monde veil dire
Par amours ; n’en aiés pas ire,
Car partout a trop a reprendre.
Aucuns aimment miex a entendre
Une foulour quant on l’a dit
Que chose donc vïent profit ;
Mes pour ce ne lairoi je mie
Que pure verité ne die :
Diex gart qui l’orra sanz noisier.
Saint Pol si le veut tesmonier,
Car celui doit bien jeüner
Qui a point ne veult laborer ;
C’est un certain enseignement.
Or entendés bien sainement :
Il sunt deux paire de labeurs,
Li un d’aquerre bonnes meurs,
L’autre est ouvrer de ses mains :
Ces deux ouvrages sunt certains.
Personne qui set son mestier,
Dont elle puet pain gaaignier,
Doit loer Dieu parfetement
Et conforter la povre gent
De ses biens que Diex li envoie.
Diverse gens vont par la voie :
L’un demande pour Dieu sa vie
Et l’autre la boe nestie,
Le tiers si fait vessiaus d’argent.
Li un achete et l’autre vent,
Les autres servent d’autre guise
Qui ne se mevent de l’eglise.
Les marcheans, les laboureurs,
Les soustiennent de leur labeurs ;
Noble [chose] est que de donner
Et chetive de demander :
Celui qui donne se franchist
Et celui qui prent s’aservist,
Mes chascun ne puet pas avoir
Grasce d’amasser grant avoir ;
Ceus qui sunt riches saches sunt
Quant a la povre gent bien font ;
Mes par le monde queurt un vice
Qui est apellés avarice
Qui pluseurs gens en enfer meine.
Il a sept jours en la semeine
De quoy veil un petit parler :
Vous les oiés souvent noumer.
Les nons qu’il ont leur sunt venus
Des sept planetes de lassus,
Ausiques a il sept estas
De gens au monde ca jus bas
Que comparer veil par mon cours
Aus sept planetes et aus jours.
Le diemenche est jour de repos ;
Et pour tant bien comparer l’os
Au souleil, c’est le non de Dieu ;
Aler doivent de bon cuer pieu
Au moustier chascun et chascune.
Le lundi est dit de la lune ;
De Mars pren selonc le mardi,
De Mercure le merquedi ;
Le jeudi de Jupiter jus,
Et le vendredi de Venus ;
De Saturnus le samedi.
Or entendés je vous em pri.
Le diemenche est un digne jour ;
Si com le souleil rent luour
Plus qu’autres planetes ne font,
Ausi ceus qui bonne foy ont
Vont devotement au mostier
Au diemenche, de cuer entier,
La messe oïr et le sermon.
Voir, ce n’est mie sans raison
Se nostre Seingneur se courouce
Quant les gloutons, plains de reprouce,
Vont en la taverne ou il boivent,
Quant oïr le servise doivent,
Et font traire du plus fort vin.
La bonne viande bien matin
Vont acheter, il le couvient,
Et se par avanture avient
Que li uns d’eus vaist au mostier,
L’autre le vendra sachier
Par la corne du chaperon,
Et li dit : “Vien t’en, si beron ;
Ne te chaut d’arester plus ci.
Il m’ennuie je le t’afi”
Vrais Diex ! il ne leur desplaist mie
D’estre du main jusqu’a complie
En la meson du tavernier ;
Ne font fors crier et noisier.
La sunt aesés sus le coute ;
Souvent faut que l’oste les boute
Hors de l’ostel, tant i sunt tart.
Le vin qu’em le foie leur art !
Et quant ce vient a l’endemain,
La teste leur deust et la main
Leur tremble, lors vont par effors
Au poil du chien qui les a mors.
La recoumencent le trumel,
Et quant reviennent a l’ostel
Il batent fames et enfans,
Ainssi gascent les mescheans
En un jour, par leur lecherie,
De quoy leur fame et leur mesnie
Vesquisent bien une semainne.
Voire on fet plus d’evre vilainne
Au dimenche qu’[a ]autre jour ;
Mes certes c’est trop grant folor.
Du premier vous lairai ester ;
De secont estat veil parler.
Car par le lundi entendon,
Qui de la lune prent son non.
La lune est froide, fresche et tendre :
Par cela nous poons entendre
L’estat de gent religieuse
Qui doit estre douce et piteuse.
Aussi coume la lune rent
Eaue quant est plainne sovent,
Doivent gent d’ordre grant plenté
Euvre fere d’umilité ;
Mes le deable les tarie
De bouter en ipocrisie,
En vainne gloire bien souvent.
Ceulz qui pour le los de la gent
Font en cest monde penitance,
L’evangile dit sans doutance
Que il ont ja eu le lourier.
Nus ne se doit pour bons jugier :
Jhesucrist dist que cil sera
Essauciés qui s’abaisera.
Cil est sage qui poi se prise :
Du tiers estat dirai la guise.
Mardi vient de Mars par droiture ;
Mars, senefie l’escripture,
Diex de bataille, pour tant di
Que puis comparer au mardi
L’estat de chascun chevalier
Qui pour la foy Dieu essaucier
Se doivent combatre a effors ;
Le droit doivent sevrer des tors,
Et jugier loyaument tourjours.
Mais maintenant en pluseurs cours,
Ne veut on povres gens oïr
Aus avocas covient blancher
Les mains d’argent, non pas de chaus.
Les chevaliers si sunt trop chaus
D’aler tournoier et jouster ;
Mes miex leur vousist conquester
Le saint sepulcre ou Diex fu mis.
Les Sarrazins ont ja occis
En Garnade moult de no gent.
Nous voion tuit coumunalment
Que l’un crestïen l’autre occist :
Le grant menjue le petit.
Les laboureurs sunt trop folés :
Fain et avoine, vin et blés,
Prent on seur eus soir et matin ;
Voir ce n’est mie larrecin,
Mes c’est toute qui poi mains vaut.
Du merquedi parler me faut
Qui sus la planete Mercure
Prent son non, ce dit l’escripture.
Pour ce, selonc m’entencïon,
Des marcheans vous parleron.
On doit en tous [les ]lieus amer
Les marcheans et honnourer
Qui veulent ouvrer loyaument ;
Mes on m’a dit n’a pas graument
Que qui loyauté veult tenir,
Qu’a grant painne se puet chevir :
Il faut mentir et parjurer,
Et le plus biau dehors moustrer
Qui veult avoir s’achevisance.
Bonne gent, c’est grant mescheance
Quant on met Diex en nonchaloir
Pour amasser trop grant avoir.
L’en souloit croire un marcheant
Par son dit, mes d’ore en avant
On voit tant de fauses mesures,
De termoiemens et d’usures,
C’om ne se set en qui fier.
Se je vouloie deslier
Ma langue en disant verité,
Voir, on ne m’en saroit ja gré.
Des marcheans a tant me tés :
Diex ament trestous les mauvés !
Du cinquiesme estat vous diron ;
Car par le jeudi entendon,
Ce sunt les laboureus de terre
Qui penssent tant ades [d’]aquerre
Les biens dont soumes soustenus.
Mes les uns en sunt deceüs
Par une tres mauvaise guise,
Car il labourent par faintise.
De par main demandent loier,
Afin de leur journee avoir,
Et si heent, c’est sans douter,
Ce qu’il deüssent plus amer :
C’est saint Eglise, clerc et prestre,
C’il vousissent pacïens estre
Plus tost qu’autres fussent savez.
Je croy qu’il en i ait assez :
Il vouroient que pain fust chier
Quant ont de pain plains leur grenier.
Ne di pas qu’il soient tous tiex ;
Entendés si en vaudrés miex.
Parler vous veil du vendredi,
Et puis apres du samedi,
S’arés les sept estat tous sus.
Le vendredi vient de Venus :
Venus senefie luxure.
Moult de gens i metent leur cure
A fere trestous leur delis,
Bonnes vïandes et bons lis,
Et bonnes robes a vestir ;
Orgueil fet le monde honnir :
Trop fort souprent fames et homes.
Se regardon de qui nous soumes,
D’estre orgueilleus n’arons talent ;
Se pensons a l’engendrement,
Voir ce n’est pas chose moult nete.
Au premier ne soumes que glete ;
Tant com vivons ne valon riens :
Le plus c’est plain sac de fiens.
Un arbre rent fuilles ou fruit,
Mes de nos corps c’ordure n’ist.
Il n’est bouche ne si biau nés
Dont il n’isse d’ordure assés,
Et tantost com nous soumes mors
Vous poés savoir que le cors
Put plus que d’autre criature.
Les vers font de nous leur pasture,
Pour ce est fol qui s’orgueillist.
Afiner me couvient mon dit.
Du samedi, se Diex me saut,
A cel jour la semainne faut.
Le samedi si prent son non
De Saturnus, et nous trouvon
Qu’il n’est estoille si diverse
Comme elle est, et pour ce j’enverse
Seur li l’estat de povreté.
Trop i a de diversité,
Car cil est povre d’esperit
A qui povreté enbelist.
Povres i a d’autre maniere
Qui n’ont de rien povreté chiere,
Car moult voulentiers s’il pooient
Riches et puissans devendroient ;
Mes il n’i puent avenir.
On voit bien povre devenir
Aucunes gens par mescheance
Et les autres par leur enfance,
Qui ne veulent leur amis croire.
Les uns sunt povres par trop boire,
Les autres par le gieu du dé ;
Quant se veoient a povreté
Il maugreent saintes et sains.
Les autres perdent piés ou mains
Par meffet ou par maladie.
Aucuns musars par leur folie
Se desesperent bien souvent :
Ceus sunt povres parfetement,
Car il perdent le corps et l’ame.
Pour ce tout homme et toute fame
A qui Diex a presté avoir
Doit conforter a son povoir
Ceus c’on voit qui en ont mestier,
Mes l’un ne veut mes l’autre aidier.
Diex, un petit de secourance
Gete homme de desesperance.
Roys Alixandres est finés,
Les biaus dons ne sunt mes donnés,
Et s’on donne, je vous creant,
Si n’es ce fors qu’en retraiant.
S’un bourjois ou un chevalier
Donne sa robe a un barbier
Ou a un autre menestrel,
Il couvient qu’il serve a l’ostel
Et i fera mainte corvee,
Tant qu’il maudira la journee
Qu’il prist la robe, car plus chiere
Li couste que d’une frepiere.
Douce gent, petit vaut tel don ;
Tel don resemblent au lïon,
Car quant le lïon veut mengier,
Les bestes prent fort a huchier ;
Elles i viennent sans respit :
Celle prent qui li abelit.
Quant toute ne la puet user,
A un autre la va donner ;
Mes s’il avient a l’endemain
Que li lïon n’ait point de fain,
Tantost la beste mengera
A qui son remainant donna.
Son don n’est gueres profitable.
Or oés un mot tant notable :
Vous veez le jour des estrenes
Que on presente les dousennes
De fourmages es grans mesons,
Dont on renvoie cras chapons.
Ja n’i alast on riens porter
Se on n’en cuidast amender.
Tiex dons plesent petit a Dieu,
Mes ce c’on donne de cuer pieu
El non du tres dous Jhesucrist,
C’est le don qui vient a profit,
Car a cent doubles est rendus,
Mes uns usages [est ]venus
Que l’en let les povres juner,
Et fait on les biaus dons donner
A ceulz qui [n’en ]ont nul mestier ;
Pour ce dit on en reprouvier :
C’est au cras porcel le cul oindre.
En la fin de mon dit veil joindre
Un mot qu’ai [oy ]mainte foys :
Pour ce te donne de mes pois
Que de tes feives veil ravoir.
C’il vous semble que je di voir,
Se m’en creés seürement,
Et se vous avés aisement,
Si me fetes aucun confort.
Diex vous gart de vilainne mort !