Dieu et /ſa douce mere Que chaſcun doit amer
Et /le baron ſaint Jaque De qui je veul parler
Veille ſauver touz ceus Qui voudꝛont eſcouter
.I. merveilleus example Ou bon feroit penſer
D'une moult noble dame Fame de chevalier
Que l'ennemi d'enfer Fiſt ſoutilment glacier
Enmi conſentement De moꝛtelment pechier
Mes ne fiſt pas le fet Ou ne li voult laiſſier
Non pourquant fait l'eüſt Mais n'en out pas laiſir
Trop laidement vouloit Son dꝛoit ſeigneur trair
Mais puis ſ'en repenti Si l'en convint ſouffrir
Crueuſe penitance Com vous poꝛrez oir
Vous ſavez bien c'on dit En repꝛouv[i]er ſouvent
Qui eſt bien ne ſe mueve Mes qui a mal ſe ſent
Tantoſt ſ'en doit geter S'il eſt en aiſement
Je le vous di pour tant Belle tres douce gent
Que qui eſt en pechié Tantoſt ſ'en doit iſſir
A chëoir n'a pas honte Si grant comme en geſir
Aucuns ſe laiſſent Si en pechié endurcir
Qu'a la grace de Dieu Ne puent revenir
En la guyſe c'on dit Du /roy Antiocus
Qui cuidoit plus valoir Que Dieu qui eſt laſſus
De treſtous maus eſtoit Garniz et revetus
Ne pꝛiſoit tout le monde Valliſſant .ii. feſtus
Il voult les ſerjans Dieu En touz lieus tourmenter
Plus fauſſe creature Ne povoit on trouver
/Jherusalem cuida Une foiz graventer
Mes /le douz roys des roys Ne le voult endurer
Dieu laiſſe bien regner A la foyz faus gloutons
Et leur donne des biens Tempoꝛielz plus qu'aus bons
Mes en la fin ont il De leur fais guerredons
Ainſi comme le roy De qui nous vous parlons
Qui fiſt parmi ſa terre Mander toute ſa gent
Car le pueple de Dieu Cuidoit metre a toꝛment
On dit que ceuz qui ſuefrent Aſſez et longuement
Que quant ce vient au foꝛt Trop euvrent cruelment
Tout en ce point fiſt Diex Du roy que je vous dis
Quant vit qu'en ſon malice Eſtoit ſi endurcis
Un mal li envoia Dont il fu ſi acquis
Qu'il n'out en tout ſon oſt Garſon tant fuſt chetis
Qui ſ'apꝛochaſt de li Pour nule riens vivant
Car ſon coꝛps qui eſtoit Moult bel et avenant
Devint ſi tres meſel Et tant foꝛment puant
Que touz ceus d'entour Li alait enpulentant
Li meiſmes au cuer Si grant meſchief avoit
De la pꝛopꝛe puour Qui de ſon coꝛps iſſoit
Qu'il li eſtoit avis Que d'angoiſſe crevoit
Les vers de touz coſtes De li iſſir veoit
Quant /le meſcheant roy Tel deſtreſce ſenti
Bien crut que Diex eſtoit Plus grant meſtre de li
A tout [de Noſtre Sire] Avoit cuida merci
Mes donques n'en ot point Trop tart ſe repenti
Ses membꝛes li chairent Treſtouz par pourreture
Au dëable fu ſ'ame Et mourut en laidure
Touz ſes meilleurs amis Virent ſa moꝛt ſi ſure
C'onques ne li aiderent A avoir ſepulture
Es foſſes fu getés En la guiſe d'un chien
Plus a .i. hons honnoꝛ Plus doit ſavoir de bien
Le chetif perdi ſ'ame Et ſon coꝛps et le ſien
Ainſſi va de ceus Qui Dieu ne pꝛiſe[nt] rien
Qui oꝛgueilleus ſe poꝛtent Pour biauté ou pour ſens
Pour avoir ou pour foꝛce Ou pour leur foꝛs parens
Si voit on au jour d'uy Grant quantité de gens
Que quant il ſont malades Ou ont autres toꝛmens
Il croient trop bien Dieu Et le vont reclamant
Et pꝛometent qu'iront Aſſez de bien feſant
Mes quant ſe ſentent aiſe Sachiez il vont diſant
En la guiſe c'on va d'un bon homme coutant
Qui en la mer eſtoit En grant peril moꝛtel
A /ſaint Michiel promiſt Sa vache et ſon veel
Mes des ce qu'il percut. Qu'il fu en ſon hoſtel
Il diſt a /ſaint Michiel Ne vache ne veel
Le paiſant ſout bien. /Saint Michiel apeler
Au foꝛt mes n'en tint conte Q[ua]nt fu hoꝛs de la mer
Et pour cela dit on Promettre ſanz donner
Ne vaut riens ſe ce n'eſt A fol reconfoꝛter
Mes Diex n'eſt mie fol voir Quant nous li prometon
A faire bonnes euvres Et nous ne les faiſon
Nous nous mocon de li Si nous en ſentiron
S'a vraie repentance En la fin n'en venon
Ainſi comme fiſt celle De qui je vous vueil dire
Qui pour ſon pechié vout Endurer grief martire
Le navré ne doit pas Avoir honte de myre
Ains doit mouſter ſa plaie Plus couve plus empire
La dame de qui j'ay La raiſon pourpoſee
Eſtoit de /Bouloignois De moult noble gent nee
.I. chevalier la pꝛiſt De bonne renommee
De li ot [.]ii. enffans Jumeaus d'une poꝛtee
Li ſires ot grant joie Dieu loa bonnement
Et /le baron ſaint Jaque Qu'il requeroit ſouvent
.I. jour diſt a la dame Qu'il avoit grant talent
D'aler au /ſaint apoſtre En /Galice bꝛiefment
La dame qui avoit Son mari foꝛment chier
Li diſt mon chier ſeigneur Par amour vous requier
Que je voiſe ovec vous Bien me vueil traveillier
Pour l'amour de /saint Jaque J'en ay grant deſirrier
Li ſires qui amoit La dame de cuer fin
Li diſt trop eſtes tendꝛe Pour faire tel chemin
Il ſe faut tart couchier Et lever bien matin
Pas n'ont toutes leur aiſes Li loyal pelerin
La dame reſpondi Bien vueil mal endurer.
Pour l'amour de /saint Jaque Qui nous vuille ſauver
Le chevalier diſt dame Bien m'i vuel acoꝛder
Voſtre devotion Ne vous vuel pas oſter
La dame fiſt grant joie Quant oÿ l'acoꝛdance
Mes puis l'en y avint Doulereuſe grevance
Par l'art de l'ennemi Ou n'a que decevance
Com vous oꝛrés ſe Dieu M'en donne la puiſſance
Trop vilainement Fu la dame deceue
Il li vauſiſt trop miex Qu'el ne ſe fuſt meue
Le chevalier qui ot Sa choſe pourveue
Droit l'endemain de Paſques S'eſmut ſanz attendue
O li mena ſa fame Miex li vauſiſt laiſſier
Moult bien furent montez S'oꝛent .i. eſcuier
Et .i. loial vallet Qui menoit le ſommer
Mes ou chemin trouverent .I. autre chevalier
De leur pais eſtoit N'out q[u]'un carcon trotant
O ceus ſ'acompaigna Dont je vous voiz parlant
Au premier leur mouſtra D'amiſtié grant ſamblant
Mais puis les tourmenta Com vous oꝛrez avant
S'en ont il en la fin Tres doulereus louier
Com vous pourrez oir Bien bꝛiefment prononcier
Tres douce gent on dit Souvent en repꝛouvier
Qu'a paine ſe puet on De traiſon guetier
Le jonne chevalier Qui n'avoit point de fame
Toutes foiz qu'il povoit Apꝛouchier de la dame
S'amour li requeroit De quoi c'eſtoit diffame
Mes celle qui penſoit Au ſauvement de ſ'ame
Li diſoit a bꝛiez mos Voſtre paine perdés
Se mon ſeignour ſavoit Ce que me requerez
Il vous en meſcherroit Ja ne vous en doubtez
Comme fauz pelerin Par foy vous maintenez
Celui qui eſtoit chauz Et plain d'art d'anemi
Li diſoit chiere dame Deſſus terre langui
Et tout pour vostre amour Se n'en avez merci
Mourir me convenra Loialment le vous di
Le mari a la dame A ce pas ne penſoit
Pour ſon loyal amy L'autre touz jours tenoit
Qui de tout ſon povoir Sa honte pourchaſſoit
A decevoir ſa fame Moult grant paine metoit
Mes [l]a dame n'avoit De faire mal envie
Tant qu'a /ſaint Jaque vindꝛent .I. ſoir apꝛés complie
L'endemain quant il oꝛent La ſainte meſſe oye
Et faites leur offrandes Ne ſe targerent mie
Il pꝛinrent leur enſaignes Si ont fet leur retour
Celui qui requeroit La dame de folour
La pꝛia ſi ſouvent Que il avint .i. jour
Qu'ele li diſt amis Trop ſouſfrés de dolour
Ce c'eſt voir que me dites Mes fere n'oſeroie
Ce que me requerez Car ne puis trouvoir voie
Se je le fes qu'errant Encuſee ne ſoie
Quant celui l'entendi Moult out au cuer grant joie
Liement li diſt dame De ce ne vous doubtés
Bien vous conſeilleray Se croire me voulez
Ja a vostre ſeigneur Apꝛés diſner direz
Que vous eſtes malades Foꝛt vous douloſerés
Et ditez qu'il vous faut Belement chevauchier
Devant l'envoierés Lui et ſon eſcuier
Pour atourner les choſes Qui nous aront meſtier
Mon garcon ſ'en ira Avec eus ſans dangier
Nous dirons qu'apꝛés[ eus] Irons tout belement
Et que truiſſon tout pꝛeſt Ja a l'aveſpꝛement
Et nous iron couchier Bien et pꝛiveement
En tel lieu ou feron Tout a nostre talent
Et puis demain matin Au point de l'ajournant
Chevaucheron vers euz Bien les iron trouvant
Loꝛs a vostre ſeigneur Feron foꝛt entendant
Qu'en nuit mourir cuidates Endꝛoit ſouloi[l] couchant
Et que de certain fuſtes Si tres mal atournee
Qu'entre bꝛas ou chaſtel Fuſtes par moy poꝛtee
La dame qui ſ'eſtoit Longuement bien gardee
Fu par art d'anemi Laidement enchantee
Elle crut le traitre Dont fiſt grant foleté
Puis l'en couvint ſouſfrir Aſſez de povreté
Quant vint qu'acomplir durent Leur fole volenté
Foꝛment leur meſavint Si comme je diré
La dame qui avoit Le coꝛps plaiſant et bel
Eſtoit par ſon dꝛoit non Apelee Yſabel
Li et le glouton vindꝛent Droitement au chaſtel
Errant ſe herbergierent Dedens .i. grant oſtel
Mes le mari la dame Qui ſ'en eſtoit alé
Pour retenir l'oſtel Des qu'il ot commandé
D'atourner au ſouper Diex li miſt en penſé
Qu'alaſt contre ſa fame Ja oꝛés grant pité
Quant ne l'encontra pas Il fu touz eſperdus
Mais il trouva .i. homme Qui eſtoit touz chanus
A qui il demanda S'avoit tiex gens veus
Et il li diſt biau ſire Par Dieu qui maint laſſus
Oꝛains les vit aler Droit vers ce chaſtel la
Le chevalier l'oÿ Foꝛment eſperonna
Car pꝛés eſtoit de nuit Dieu ſi bien li aida
Qu'en l'oſtel ou eſtoient Treſtout dꝛoit ariva
L'oſte et l'oſteſſe a l'uis De leur oſtel ſeoient
Le chevalier enquiſt Se tiex genz y eſtoient
Et il li reſpondirent Que couchier ſe vouloient
Il fu touz eſbahis De ce qu'i[l] li contoient
De mautalent verti Et diſt ſanz remanoir
Ferray le faus glouton Et la fauſſe douloir
C'eſt ma fame eſpouſe Je le vous di pour voir
Fetes mouſtrés le moy Il les me faut vëoir
L'oſte li requiſt biau ſire Par amour vous requier
Que cheens ne leur faites Ennuy ne deſtourbier
Le juge de la ville Eſt bon et dꝛoiturier
Se deſpit vous ont fet Bien vous fera vengier
On manda le baillif Qui mie ſeul n'eſtoit
Si comme li traitres Ou lit entrer devoit
Qui ſon mauvés deſir Bien acomplir cuidoit
Le mari a la dame Vit qui haut li diſoit
Fauz mauvés deſloiaux Au trenchant de m'eſpee
Vous ſera celle teſte Prochainement couſpee
La fauſe ſera arſe Bien l'ay pꝛiſe pꝛouvee
Pour Dieu oꝛ entendés Douce gent honnouree
La dame qui eſtoit Ou lit treſtoute nue
Pour honte de la gent Fu ſi foꝛt eſperdue
Qu'a ſon mari a dit Com fole mal oſtrue
Que rien ne li eſtoit Trop foꝛt fu deceue
Car elle renioit Son dꝛoit loyal mari
Pour l'autre qui n'avoit Onques geü a ly
Quant le mauvés glouton ſon parler entendi
Il pꝛiſt grant hardement Devant touz diſt ainſi
Biau ſeigneurs vous veés Ci endꝛoit en preſent
Que couchier me vouloie Bien et paiſeblement
Mes cel chevalier Ci y met empeeſchement
Et dit que j'ai erré Contre li fauſement
Mes il ne dit pas voir Diex en ſcet mon courage
Il n'a rien en la dame Je l'ay par mariage
Et ſe deſdire l'oſe. Contre li tent mon gage
Loꝛs [le mari ]la dame qui eſtoit Preuz et ſage
D'air bailla ſon gant Au baillis l'a tendus
Puis a dit en tel guyſe Se ne l'en rent confus
Je m'acoꝛt que je ſoie Com recreant pendus
Et ſe il avient choſe Que par moy ſoit vaincus
Qu'a mon talent me puiſſe De ma fame vengier
Et la puiſſe mener En mon pais arrier
Et li glouz ſoit pendus Qui m'a voulu trichier
Loꝛs l'autre diſt en hault Bien m'y vueil otroier
On fiſt lever la dame En pꝛiſon fu menee
Dedens une foꝛt chambꝛe Ou moult bien fu gardee
Et ſon mari et l'autre Tindꝛent priſon fremee
Tant que touz les ſeignours D'environ la contree
Pour v[é]oir la bataille Et pour le dꝛoit jugier
Le mari de la dame Manda ſon eſcuier
Et le garſon auſſi Qui menoit le ſommier
Bien ſe pourquiſt de ce Qui li eſtoit meſtier
L'autre qui out la dame Par ſon parler muee
Sanz ce c'onques l'eüſt Charnelment adeſee
Fu noblement armés Quant vint a la journee
Mes il a la bataille Moult foꝛment redoutee
Car de certain ſavoit Que ſiens eſtoit li toꝛs
Non pour tant il eſtoit Biaus et jonnes et foꝛs
Et ſi pꝛiſoit foꝛment La foꝛce de ſon coꝛps
Mes quant ce vint au jour Que il furent [de ]hoꝛs
Pour la bataille fere Qu'il oꝛent eſmeue
Mes la dame qui fu En la pꝛiſon tenue
Eſtoit ſi toꝛmentee Et ſi foꝛt iraſcue
Qu'elle vouſiſt bien eſtre Dedens terre fondue
Elle diſoit douz Diex. Que m'eſt il avenu
Bien eſt mon las de coꝛs En grant vilté cheü
Par ce faus loſengier Qui puiſt eſtre pendus
Mes Diex merci pas n'a Ovecques moy geü
Non pourquant de touz poins M'y eſtoie acoꝛdee
Mon mari renoiai Com fame foꝛſenee
Mais ſe je devoie eſtre Dedens .i. feu getee
S'en dirai je le voir N'i a meſtier celee
Ainſſi ſe dementoit La dame toute jour
Par une des feneſtres Qui eſtoit en la tour
Vit armé ſon ſeignour Pour aler en l'eſtour
Qui ſe devoit combatre Contre le traitour
Qui d'autre part ſe fiſt Moult richement armer
On apoꝛta les ſains Pour eulz faire jurer
Cil qui ont dꝛoit ſ'ala A genoullons geter
Tantoſt qu'il vit les ſains Il pꝛiſt haut a parler
Et diſt ſeigneurs je jure Par les ſains qui ſont ci
Et par treſtouz les autres De quoy Dieu eſt ſervi
Que ceſt mauvés glouton Qui ci eſt m'a tray
Et foꝛtraite la dame A qui je ſui mari
Je penſoie que fuſt .I. loial pelerin
Qui requeriſt /ſaint Jaque Ou j'ai fait le chemin
Mes pire l'ai trouvé Aſſez q'un Sarazin
Regehir le ferai Ains que jour prengne fin
En bonne loyauté Acompaignié l'avoie
Autant comme a mon frere En ſon coꝛps me fioie
Ma fame m'a tolue Et tourné en tel voie
Qu'a toꝛt et ſanz raiſon Par ſon art me renoie
Onques mes ne la vi Mauveſe ne ſauvage
Par amours mandés la Si ſarai ſon courage
Loꝛs la fiſt on venir Sans neſun arreſtage
Mes n'oſoit creature Regarder el viſage
Elle eſtoit ſi hideuſe Que ne ſavoit que faire
Quant ſon mari la vit Haut li diſt par contraire
A dame pelerine Moult ſemblés debonnaire
Devant les bonnes gens Levez haut le viaire
Tantoſt comme la dame Son parler entendi
A nuz genous ſe miſt Par devant ſon mari
Et diſt merci requier Bien connois que je di
Que je vous renioie Ce fu art d'anemi
Bien connois que vous eſtes Mon dꝛoit loial eſpous
Et que j'ai .ii. biaus fiuz En /Boulonnois de vous
Mes cel loſengier la Qui eſt foux et eſtous
M'avoit ſouvent requiſe Par moz courtois et douz
Mes onques n'out a moi Charnele compaignie
Bien connois que du tout M'y eſtoie otroie
Quant Diex vous amena Et /la Virge Marie
Bien vueil mourir en l'eure Se j'ai moꝛt deſervie
Son mari reſpondi Pas ne fuſtes bien ſage
Quant ovecques moi veniſtes Ou ſaint pelerinage
Pour moi fere tel honte Vous i arés domage
Loꝛs l'autre chevalier Diſt haut en ſon langage
Seigneurs oꝛ entendez Pour Dieu granz et petiz
Je jure ſus les ſains Qu'avez en preſent mis
Et ſus treſtouz les ſains qui ſont en paradis
C'onques de vilanie La dame ne requis
Ancois m'en requeroit Et me[nu et ſouvent]
Les gens qui la eſtoient S'eſbahirent foꝛment
Bien penſerent qu'ot fet Deſloyal ſerement
Loꝛs le mari la dame Li diſt moult fierement
Faus deſloyaus mauvés Vous y avés menti
Autres choſes dirés ains que partés de ci
Congnoiſtre vous ferai Comment m'avez tray
De Dieu et de /ſaint Jaque L'apoſtre vous defi
La dame c'on avoit En la tour remenee
Maudiſoit foꝛment l'eure Qu'ot onques eſté nee
Devotement pꝛioit /La Virge couronnee
Qu'el vouſiſt ſon mari Sauver celle journee
Celle qui en la tour Foꝛment ſe dementoit
Pramiſt a /Jhesucriſt Se ſon ſeignour ſauvoit
Que jamés en ſa vie Son col ne paſſeroit
De riens qui moꝛt goutaſt Douz Diex pas ne penſoit
Au doulereuz tourmenz Ne au crueus deſpis
Qui li fiſt en pꝛeſent De ſes meilleurs amis
Onques mes coꝛps de fame Vilaine ne gentis
Pour ſi petit meſfait Ne fu en tel point mis
Ainſſi com vous oꝛrés Se tout mon dit recoꝛt
Le jonne chevalier Qui avoit moult grant toꝛt
Pour ce que ſe ſentoit Legier hardi et foꝛt
Cuida bien mater l'autre Mes Diex li fiſt confoꝛt
Et /le baron ſaint Jaque En qui out grant fiance
A celui qui out toꝛt Avint tel meſcheanche
Que quant il fu el champ Son cheval n'ot puiſſance
D'aler encontre l'autre C'eſtoit grant demouſtrance
Car touzjours reculoit Et pꝛiſt a regiber
Si foꝛt qu'il fiſt ſon maiſtre Contre terre verſer
Loꝛs li mari la dame Ne le vout depoꝛter
Ains li ala ſon glaive Parmi le coꝛps bouter
Quant cil ſenti le coup Loꝛs diſt a haute voiz
Sire pour Dieu merci Ma mauveſtie congnois
Vostre fame requis D'amer par pluſeurs foiz
De male eure la vi Pour li a ma fin voiz.
Non pour quant elle m'ot Au derrain en couvent
Que feroie de ly Du tout a mon talent
Si euſſe je fait Mes je n'en fis nient
Car trop [toſt ]ſourveniſtes Avecques vous grant gent
Quant couchier me voloie Ou lit la dame virent
Loꝛs quant [les ]nobles hommes L'arraiſon oirent
Trainer au gibet Et puis pendꝛe le firent
Toute quite la dame A ſon ſeigneur rendirent
Et li pꝛierent tant Qu'il la vouſiſt quiter
Mes onques le ſeigneur Ne ſi vout otroiier
Ains diſt qu'il ſ'en ſara Bien par raiſon vengier
Quant venra au pais Qu'avoit [a habitier.]
De la ville parti La dame fiſt monter
Sur .i. povre roncin Que on fet acheter
Mes onques en chemin Ne vout a li parler
Ne il ne la daignoit qu'a paines regarder
D'aler en ſon pais Li ſire ſe haſta
Onques avec la dame Ne but ne ne menga
Ne ne jurent enſamble Celle qui ſe doubta
D'aver grant vilanie Foꝛment ſe dementa
Mes gueres de pité N'en avoit li pꝛeudon
Ains penſoit qu'il penroit De li venjoiſon
Auſſi toſt comme il fu En ſa poſſeſſion
Touz les amis la dame Manda en ſa maiſon
Et ſi i fiſt des ſiens Venir a grant plenté
Oꝛ entendés qu'il fiſt Pour ſainte charité
Il apela ſa fame Qui avoit grant biauté
Moult bien la fiſt veſtir Puis li a commandé
Qu'elle alaſt en la ſale Les bonnes genz vëoir
Qui eſtoient venuz Digner en ſon manoir
Cel jour fiſt .i. mengier Qui couſta grant avoir
La dame ſe laiſſa Devant ſes piez chëoir
En ſoupirant du cuer A dit a moult grant paine
Douz ſire pour la grace Qui ne fu pas vilaine
Que Diex fiſt a /la douce /Marie Magdalaine
Aiez merci de moy Bien voy et ſui certaine
Que vous voulez de moy Devant chaſcun vengier
Mes trop miex ſ'il vous pleſt Em poꝛrés eſploitier
Fetes ſecretement Vostre cuer eſclarier
Si que nos .ii. enfans N'i aient repꝛovier
Car vous les engendꝛates Chier ſire par ma foy
N'onques homme que vous Ne jut onques a moy
Combien que m'otroiaſſe A fere le deſroy
Par l'art de l'anemi Ne plout a Dieu le roy
Metez moi en tel lieu Se vostre cuer l'otroie
Ou lune ne ſoleil Jamés nul jour ne voie
Moult ay pꝛomis c'eſt dꝛois Que foꝛt pugnie ſoie
Fauſe diſt loꝛs li ſires Trop trouvas male voie
Quant tu me renias Ce fu grant eſtoutie
Je ne ſay gré qu'a Dieu Et a/ Virge Marie
Et au /baron ſaint Jaque De ce que ſuy en vie
En grant peril de moꝛt Fu par ta lecherie
Va de ci te digne Avecques tes amis
Jamés ne les verras Sur Dieu le te plevis
Loꝛs fu le cuer la dame Si foꝛt eſpouris
Que elle ſe paſma Deſſus le marbꝛe bis
Son ſeignour la leva Puis l'aſiſt ſanz ſejour
A la plus haute table Et ſes amis entour
De vins et de viandes Oꝛent aſſez cel jour
Le ſeigneur de l'oſtel Qui fu en grant triſtour
Des qu'il oꝛent lavé Diſt haut oꝛ entendés
Seigneurs ne ſavés pas Pourquoi vos ai mandés
C'eſt pour .i. jugement Que cil vous plaiſt ferés
D'un fait qui vous ſera Maintenant recoꝛdés
Un chevalier erroit Il n'a mie granment
Avecques li ſa fame Qu'il amoit loyalment
Mes .i. autre jonne homme La requiſt ſi foꝛment
Qu'elle acoꝛda du tout A fere ſon talent
Mes voir il ne pooient Lieu ne place trouver
Tant que hoꝛs du chemin S'allerent deſtoꝛner
La fauſe a ſon mari S'alla tant dolouſer
De mal que l'envoia Pour haſter le ſouper
Mes courage n'avoit Que ce ſoir la veïst
Ancois ſe herberga Et coucha en .i. lit
Son ribaut ſi vouloit Couchier ſanz nul reſpit
Quant le mari la dame I ſourvint qui tout vit
Tuer cuida la fauſe Et ſon ribaut auſſi
S'avoit il amené Pluſeurs genz avec li
Mes celle qui avoit En ſon coꝛps l'anemi
Devant ceus qui la furent Renoia ſon mari
Si foꝛt fu par ſa fame tenu le chevalier
Que gage de bataille Li en convint baillier
Contre l'ami la dame Mes Diex le dꝛoiturier
Vout ſauver le pꝛeudomme Et nuire au loſengier
Car ou champ fu vaincu Et encroué au vent
Loꝛs r'ot le chevalier Sa fame quitement
Tant a fet que elle eſt Dedens ſon tenement
Mes bien vous di que j'aimme Le chevalier granment
Car pꝛivé ſuy de li Moult a longue ſaiſon
Conſeil m'a quis comment Penra la venjoiſon
De celle qui a fet Vers li tel traiſon
Chaſcun de vous en die Ce qui l'en ſemble bon
Loꝛs le pere a la dame Qui eſtoit touz flouris
Qui ne ſout pas pourquoy Tiex moz eſtoient dis
Reſpondi voir ſ'eſtoie De tel fame garnis
Qui m'aroit fet tel honte Son coꝛps ſeroit bꝛuis
A ſon dit ſ'acoꝛda La compaignie toute
La dame fu entr'eus Qui eſtoit en [grant ]doute
El n'oſoit dire mot Ains ſouſpire et eſcoute
De honte vouſiſt eſtre Confondue et deſroute
Loꝛs parla ſon mari Qui eſtoit pꝛeuz et ſage
Et diſt ſeigneurs ma fame Eſt de voſtre lignage
Sachiez bien que c'eſt celle Qui m'a fet tel domage
Mes ne ſera pas arſe Car je n'[en ]ay courage
Et ſ'en penrai venjance Crueuz par autre tour
Loꝛs les amis la dame Requirent par doucour
Qu'en tel point ſ'en venjaſt Ne fuſt leur deſhonneur
Et il leur reſpondi Que jamés a nul jour
N'en oꝛroient parole un Soir la fiſt mander
Droit au poꝛt de /Wiſſent. Bien ſ'ala confeſſer
De treſtouz ſes pechiez Que elle pout penſer
Bien cuida qu'en la mer La vouſiſt on geter
Elle avoit .i. anel De fin oꝛ ſeulement
Son mari li oſta De ſon doy rudement
En la mer le geta Et dit qu'acoꝛdement
N'ara a li ſe Diex L'anel d'oꝛ ne li rent
Il ne penſaſt jamés En neſune maniere
A revoier l'anel Dont la pierre fu chiere
Mes puis le [re]vit il Et ot la dame chiere
Plus que devant mes Loꝛs out volenté ſi fiere
Qu'ennelés ot fet fere Gros et rudes de fer
Es .x. dois a la dame Les a fet .x. bouter
Si foꝛt qu'il n'eſtoit homme Qui les poiſt oſter
Et puis la commenca Foꝛment a ramponer
En diſant belle dame De tiex anés avés
Dont toute vostre vie En ſaiſine ſerez
Elle reſpondi ſire Fetes vo volentez
Il l'a pꝛiſt par le bꝛas Et diſt oultre paſſez
En .i. batel la miſt Ou il n'avoit riens nee
Puis la bouta en mer De moult grant alenee
La dame ſ'eſcria Sire ſ'il vous agree
Penſés de vos enfans Leur mere eſt adiree.
Je vous commant a Dieu Puis qu'ainſſi departon
De mes pechiez me face Nostre Seigneur pardon
Le ſeigneur ſ'en revint Tout penſant en maiſon
.I. petit de la dame Se il vous pleſt diron
Qui eſtoit u batel Seule ſanz nule ſoulas
Les ondes la feſoient aler Puis haut puis bas
Elle diſt tres touz Diex Qui ſauvates /Jonas
El ventre a la balaine Car ne m'obliés pas
Et ſ'il vous pleſt ainſi Que [je ]ſoie noie
Aiez merci de ma vie Qu'elle ne ſoit perie
Et ſauvés monſeigneur Et toute ſa meſnie
Adonques vint .i. vent Devers deſtre partie
Et au plaiſir de Dieu Le batelet mena
En .i. ille de mer Ou ame n'abita
Loꝛs pꝛiſt la dame terre Tout partout regarda
Ne vit homme ne fame Dont moult ſe dementa
En celle ille de mer N'ot boꝛde ne maiſon
Pain ne blé ne farine Ne autre gariſon
Mes poumetes ſauvages Y avoit grant foiſon
Rouſes et aube eſpine Et maint eſpés biſſon
La dame ſoſpira Dieu pꝛiſt a reclamer
Car ſi grant [paoꝛ ]avoit Que ne povoit durer
Des poumetes ſauvages Commenca a taſſer
Car .ii. jours et .ii. nuys L'out falu jeuner
Des herbes et des pommes Que par l'ile trouvoit
Veſqui .xl. jours. De citernes bevoit
Qui eſtoient en l'ile Et puis quant il plouvoit
En .i. creus d'un viex arbꝛe A garant ſe boutoit
Bonne gent par .i. mot Qu'elle diſt par folie
Et pour ſoy conſentir Au mal que ne fiſt mie
Souſfri moult de douleurs Mes ains que perdit vie
Out ſi com vous oꝛrés Pes a ſa compaignie
Mes aincois li convint Pluſeurs maulz endurer
Des anelés de fer Vous vueil .i. poi parler
Que ſon pari par foꝛce Li fiſt es dois bouter
Tant li firent d'angoiſſe Que foꝛt eſt a conter
Car les .x. anelés Si tres eſtrois eſtoient
Que les dois et les mains Moult foꝛment li enfloient
Le cuir et la char tendꝛe De touz poins li rompoient
Poi de gent en bon gré Telle douleur prendꝛoient
Mes celle avoit au cuer Si ferme repentance
Tant plus ſentoit de mal Et de dure grevance
Loꝛs baiſoit les aneaus En devote plaiſance
Et pꝛioit /Jhesucriſt Par ſa digne puiſſance
Gardaſt de mal celui Par qui li furent mis
Et diſoit voir mon coꝛps Deüſt eſtre bꝛuis
Quant reniai celui Qu'eſtoit mon dꝛoit maris
Et le mis en peril D'eſtre vilment fenis
Quant celle out dedens L'ile eſté .xl. jours
Qui eſtoit tout adés En lermes et en plours
/Li tres douz Jhesucriſt Li envoia ſecours
Si ſouſfri elle puis Aſſez d'autres doulours
Si comme je dirai S'il pleſt a Dieu le pere
Vous n'oiſtes pieca Plus piteuſe matere
La nuit d'une /ſaint Jaque Que la lune fu clere
S'agenoulla la dame Qui ſouſfroit grant miſere
Et diſt gloꝛieus Diex. Qui vouſiſtes aler
xl. jours entiers Ou deſert jeuner
Donne moy en ceſt monde Tiex paines endurer
Qu'en la parfin me puiſſe Envers vous acoꝛder
Et a mon bon mari Qui me hait et dꝛoit a.
/Saint Jaque douz apoſtre Vostre feſte ſera
Demain je le ſai bien L'anemi me tempta
Quant de vous revenoie En griés las me bouta
Vueilliez pꝛier pour moy A /la Virge pucelle
Qui poꝛta le douz fruit Qui pecheurs rapele
Qu'en ceſt monde Ca jus face penance telle
Qu'apꝛés ma moꝛt ſoit M'ame devant /Jhesucriſt belle
Car du coꝛps ne me chaut Bonne gent oꝛ oez
Comment le roy des roys Eſt plains de grans bontez
A paines ot la dame Ses parlers definés
Quant elle vit venir Droit vers l'ile .ii. nes
Car .i. eſtourbellon Leva en haute mer
Qui fiſt les .ii. veſſiaus Deſſous l'ile ariver
Il dit voir qui le dit Moult l'ay oÿ conter
Que ja ne perira Ce que Diex veult ſauver
En l'une des nes Ot .i. conte palazin
Qui avoit pluſeurs villes Deſſus le grant chemin
En /Eſpaigne par ou Paſſent li pelerin
Qui vont dꝛoit a /ſaint Jaque Moult ot cuer pur et fin
Premier percut la dame Adonc diſt a ſa gent
Je voi la une dame Qui moult a le coꝛs gent
Hoꝛs de la nef iſſi Vers li vint haſtiment
Et puis la ſalua Bel et courtoiſement
Apꝛés diſt doucement Qui vous amena ci
Elle reſpondi ſire Voir une nef peri
En la mer ou j'eſtoie En cel batel ſailli
Au gré de Dieu ving ca De noier me gari
.xl. jours et plus A que je ne vi pain
Le ſeigneur l'emmena Qui fu bon et certain
En la nef bien penſa Que elle eüſt grant fain
Il fiſt devant li metre De viandes tout a plain
Mes qu'a pain et a eue Ne vout onques touchier
Si l'esfoꝛcoit ſouvent Le ſeigneur de mengier
Mes quant percut les mains Foꝛt ſe pꝛiſt a ſeignier
Que les aneaus li oꝛent Trop foꝛt fet domagier
Loꝛs li diſt doucement Celui qui fu courtois
Dame ſe Diex me gart Ce ſeroit grant deſrois
Se ne fetes oſter Ces anelés eſtrois
Qui ainſſi vous afolent Et les mains et les dois
Il a ſi ens .i. mire Qui bien les oſtera
D'une petite lime Souef les limera
De la doulour qu'avez Tantoſt vous garira
La dame reſpondi Sire ja n'avenra
Que les anelés chient hoꝛs De mes .x. dois jus
Se n'eſt pas le vouloir De Dieu qui maint laſſus
Il partirent de l'ile Quant l'oꝛé fu cheus
A .i. des poꝛs d'/Eſpaigne Sont a ville venus
Le conte vout la dame En ſon pais mener
Mes elle li pꝛoia Qu'i li vouſiſt pꝛeſter
Lieu ſus le grant chemin Ou peüſt demourer
Afin qu'elle peüſt As pelerins parler
Qui travaillent leurs coꝛps Pour /la ſaint Jaque amour
Li ſire reſpondi Trop ſouffrés de doulour
Celle diſt doucement Servir mon creatour
Vueil de tout mon povoir N'ay ſoing d'autre labour.
Au conte qui eſtoit Douz et loial et ſage
Pleſoit moult de la dame Le coꝛps et le viſage
Il li diſt voir je croi Qu'eſtes de grant lignage
Volentiers vous penroie Par loyal mariage
Tantoſt ſeroit le mal qu'avez es mains garis
Apꝛés moy ſ'il vous pleſt Tenrés tout mon pais
Moult ſuy riche d'avoir Qu'en m'effance conquis
Onques n'eſpouſai fame Ne n'ai fille ne filz
La dame diſt douz ſire De baſſe gent ſui nee
J'ai grant part de ma vie Com pechereſſe uſee
Penance me faut faire Pour eſtre racoꝛdee
Voué que jamais d'omme Ne ſeroie pꝛivee
Mes pour Dieu fetes moy Ce que vous ai requis
Je pꝛierai pour vous Et pour tous vos amis
Li ſires qui eſtoit Plain de certain avis
Li fiſt ou chemin fere .I. biaus lieu et faitis
.XII. fames i miſt Qui beguines eſtoient
Et leur amarti rente De quoy elles vivoient
Le[s] pelerins de ca Qui a /ſaint Jaque aloient
Par devant cel oſtel Dont je vous di paſſoient
La dame qui avoit En Dieu ſervir ſa cure
Combien qu'eüſt mol lit Geſoit a terre dure
Bonne vie pour l'ame Menoit mes moult fu ſeure
A ſon coꝛps pas n'avoit Apꝛis tel noꝛreture
Le conte qui avoit Cel lieu fet oꝛdenner
Venoit ſouvent La dame vëoir et viſiter
Car loyaument l'amoit Sans nul vilain penſer
Mes la moꝛt qui tout pꝛent Vint au ſeingneur hurter
Quant il percut ſa fin Et ſout qu'il ſe mouroit
La rente de la ville Qui .vc. mars valoit
Vout laiſſier a la dame Qui ſaintement vivoit
Loꝛs treſpaſſa li ſires Qui moult amés eſtoit
La dame de la rente Fiſt fere .i. biau mouſtier
Et [.]i. bon hoſpital Pour povres herbergier
Chaſcun parloit de li Et avant et arrier
De confoꝛter les povres Ne ſe povoit targier
Par le pais aloit De li grant renommee
De penitance faire N'eſtoit onques laſſee
Souvent requeroit Dieu Et /la Virge loee
Qu'envers ſon dꝛoit ſeignoꝛ Peüſt eſtre acoꝛdee
Devotement pꝛioit auſſi poꝛ ſes .ii. fiex
Qu'encoꝛe les veïst ſains Et ſaus de ſes iex
Pour Dieu oꝛ entendés Treſtous jonnes et viex
S'oꝛrés les grans vertus Que fiſt le roy des ciex
Par quel point il donna Talent au chevalier
De retrouver ſa fame Que il en fiſt chacier
En .i. quareſme avint .I. pou devant mengier
Que li ſires ala vëoir Son cuiſinier
Qui atoꝛnoit poiſſon Mes dedens l'un trouva
L'anel qui fu la dame Qui par mer ſ'en ala
Le ſeingneur le connut Tendꝛement le baiſa
Pour l'amour de ſa fame De pitié lermaia
Tres douz Diex diſt li ſire Certes ſe je cuidoie
Que trouvaſſe la dame Voulentiers la querroie
Mes de perdꝛe ma painne Foꝛment me douteroie
Voir de ceſt anel Ci doy bien avoir grant joie
Car je penſe que Dieu Le m'a fet envoier
Pour avoir remembꝛance De ma laſſe moullier
Qu'en .i. batel laiſſai En doute de noier
Mes peüſt eſtre Que Dieu li a voulu aider
Le chevalier ſ'ala A /saint Jaque vouer
Et dit qu'il li fera Ses .ii. enfans poꝛter
Afin qu'encoꝛe puiſt Sa fame retrouver
Adonc fiſt ſes .ii. fiex Par devant li mander
Ceulz i vindꝛent tantoſt Qui leur pere doutoient
De treſtoutes faitures Mout bien li reſembloient
[.]VII. ans tant ſeulement De dꝛoit aage avoient
Encoꝛe de leur mere Nulle riens ne ſavoient
Quant leur pere les vit Foꝛt pꝛiſt a ſouſpirer
Ses choſes oꝛdenna Pour a /ſaint Jaque aler
Dedens une litiere Fiſt ſes enfans poꝛter
De conter leur journees Ne me quier ja meller
Mes herbergier ſe firent .I. ſoir ains l'anuitier
A .ii. lieues de la Ou eſtoit ſa moullier
La dame apꝛés ſouper Parloit a ſon poꝛtier
En tant devant la poꝛte Paſſoit .i. meſſagier
La dame le hucha Qui avoit grant envie
De ſavoir ſ'il venroit Ame de ſa partie
Au meſſagier a dit Frere di je te pꝛie
Ses tu ſ'il vient Nului de devers /Picardie
Dame diſt il oyl Demain paſſe[ra] ci
Uns hons de /Boloignois Bon chevalier hardi
Qui ſes .ii. filz amainne A /ſaint Jaque avec li
Loꝛs diſt la dame bas Bien croy c'eſt mon mari
Mes n'en fiſt nul ſemblant ainz priſt Diex a loer
Loꝛs d'un ſoutif engin La fiſt Diex aviſer
A ſa gent coumanda C'on ne laiſſaſt paſſer
Pelerin l'endemain S'a li n'aloit parler
L'endemain par matin ſi com prime ſonnoit
Vint la le chevalier Qui ſes enfans menoit
Mes les ſerjans li dirent Qu'avant ne paſſeroit
S'a la dame du lieu Congié n'en demandoit
Li ſires qui n'eſtoit Outrageus ne eſtous
Leur diſt [je ]ne vueil pas Desobeir a vous
Son eſcuier hurta En diſant frere douz
Alés dꝛoit a la dame Parler pour nous treſtous
Loꝛs a l'oſtel la dame S'en ala l'eſcuier
Elle diſt quant le vit Dont eſtes frere chier
Voir de /Boulonois Dame a .i. tel chevalier
Qui .ii. filz jumeauz Mainne au /saint Jaque mouſtier
Afin qu'il puiſt la mere aus enfans retrouver
.I. anel qu'elle avoit Geta dedens la mer
Pour ne ſai quel deſpit Il le r'a ſans fauſſer
Loꝛs coumenca la dame Foꝛment a ſouſpirer
Non pour tant elle diſt amis oꝛ entendés
Je ſai bien c'on vous a La devant arreſtés
Se paſſer voulés outre Vous me creanterés
Que vous et vostre meſtre Par ci repaſerez
Et ſi ferez a moy parler le chevalier
De vëoir les enfans Ai moult grant deſirier
Adonques reſpondi Doucement l'eſcuier
Dame je le vous jure Sur Dieu le dꝛoiturier
L'eſcuier retourna a ſon ſeignoꝛ tantoſt
Mout bien li recoꝛda Du parler qu'oÿ ot
Tous en fu eſbahis Mes que dire ne ſot
Adonques ſe [re]mirent El chemin a bꝛief mot
Il eſploitierent tant Que a /ſaint Jaque furent
Bien firent leur offrendes Et ce que fere durent
A oſte n'a oſteſſe Nule choſe n'acrurent
Quant il en fu ſeſon A retourner ſe murent
Car d'aler en ſon lieu A chaſcun deſirance
Mes /le douz Jhesucriſt Qui ſur tous a puiſſance
Vout mouſtrer a la dame Belle ſenefiance
Car bien ſout qu'ot ſouſferte Crueuſe penitance
C'unne vois li vint dire Ton ſeingnour ſera ci
Et tes .ii. filz dimenche [.]I. pou devant midi
Va t'en celle journee Humblement contre li
Quant tu l'enconterras Si li requier merci
La dame fu mout lie Quant la vois eſcouta
Tous les clers et les preſtres De la terre manda
Le jour que ſon ſeingnoꝛ Ou pais arriva
De pꝛoceſſions fere Doucement leur pꝛoia
Ceulz qui l'avoient chiere Bonnement l'acoꝛderent
Encontre le ſeingneur Devotement alerent
Chaſſes et ſaintuares Devotement poꝛterent
Et loenges de Dieu Gracieuſes chanterent
L'eveſque du pais Qui ſavoit bien la guiſe
Par la confeſſion qu'ot Oie en l'egliſe
Coument la dame fu Vers [ſon ]ſeingnour meſpriſe
Vint dꝛoit au chevalier Et li diſt par franchiſe
Que ſe il li pleſoit Qu'il li donnaſt .i. don
Le ſires qui eſtoit A merveilles pꝛeudon
Reſpondi je l'otroy Se fere le poon
Adonques vint la dame En grant devocion
Au[s] piez de ſon mari Se laiſſa jus chëoir
Et li diſt tres chier ſire Vueillés merci avoir
De celle qu'anemis Cuiderent decevoir
Le chevalier l'ala lever Sanz remanoir
Quant il vit qu'eſtoit celle Qu'il avoit eſpouſee
L'eaue du cuer li eſt Juſques aus iex montee
Mes quant il vit ſes mains La couleur ot muee
Car il n'i avoit celle Ne fuſt trop mal menee
Car les petis anneaus Qui trop eſtrois eſtoient
La char juſques aus os Uſee li avoient
Toutes les bonnes gens Qui la choſe veoient
Pour la pitié de li [T]out tendꝛement plouroient
Loꝛs par devant le pueple La dame recoꝛda
Coument ſon batelet En l'ille l'amena
Et la grant povreté Que dedens endura
Et la guiſe conment Le conte l'en jeta
Son mari li diſt dame bien avez achetee
Voſtre fole parolle Qui trop mal fu getee
Oꝛ le vous pardoint Diex Et /la Virge loee
Et je ſi fais auſſi Par devote pensee
Pour Dieu oꝛ entendés Treſtous grans et petis
Tantoſt con l'aquita Ses dꝛois loyaus maris
Belles vertus i fiſt Le roy de paradis
Car de ſes dois chairent Les anelés tous dis
Pour quoy avoit ſouffertes pluſeurs douleurs tres grans
Loꝛs acola la dame Ses .ii. petis enfans
Et baiſa tendꝛement Mout fu ſon cuer joians
Loꝛs ataint ſon mari Qui fu pꝛeus et vaillans
L'enel qui par deſpit jeta Dedens la mer
A ſa fame l'ala Doucement preſenter
Et li conta conment Dieu li fiſt retrouver
Mes ſachiez que la dame Ne ſe vout remuer
N'aler en /Boulonnois Ou ot grant ſeignoꝛie
Onques puis n'ot a homme Charnele compaignie
Quant ſon mari le ſout Ne l'en effoꝛca mie
Ainz voua chaasté Et mena ſainte vie
Douce gent les perſonnes Que je vous ai nonmé
Uſerent ſi leur vies Que Diex par ſa bonté
Vout recevoir leur ames En la digne clarté
Laquelle nous otroit La ſainte Trinité.