N'eſt pas oiſeus qui fait bone oevre
Li trouverres qui Sa bouche oevre
Pour bone oevre conter et dire
Mais qui bien treuve plains eſt d'ire
Quant il n'a de matere point
Jolivetez ſemont et point
Mon cuer de dire aucun biau dit
Mais n'ai de coy car tout eſt dit
Foꝛs ce que de nouvel avient
S'il ſcet aventure nouvele
Qu'il face tant que la nouvele
Qu'il face tant que partout aille
Et que ſon gros francois détaille
Poꝛ faire oevre plus deliaie
Poꝛ ce ai ma lange liaie
Qui que mentiegne a apenſé
Poꝛ ce ay de nouvel penſé
Car tel matiere ay poꝛpenſee
Qui onques n'ot en ſa penſee
Ne Sarrazins ne Creſtiens
Poꝛ ce que moꝛs eſt /Creſtiens
De /Troyes cil qui tant ot pꝛis
De trouver ay hardement pris
De mot a mot metre en eſcript
Le toꝛnoiement /Antecriſt.
Il avint aprés cele empriſe
Que li francois oꝛent empriſe
Conter /le conte de /Champaigne
/Li rois Looys en /Bretaigne
Mena ſon oſt ſans point d'aloingne
Que moꝛs eſt /li quens de /Boloigne
Dont li francois oꝛent fait chief
Loꝛs trouverent a grant meſchief
Li membꝛe et foible et mal bailli
Quant le chief es membꝛes failli
Et ſe treſtrent treſtuit arriers
Foꝛs Mauclers qui tant eſtoit fiers
Qu'a merci ne daignoit venir
Bien cuida /Bretaigne tenir
Contre /le roy par ſon deſroy
Com cil qui avoit cuer de roi
Et qui eſtoit plain juſqu'a leur
De hardement et de valeur
De courtoiſie et de largece
Loꝛs ne me pot tenir perece
D'aler en l'oſt /le roy de /France
Tant fis en cel oſt demoꝛance
Que de /Bretaigne fu partis
/Li rois de /France et fu baſtis
Li acoꝛt de la grant deſcoꝛde
Que cilz roys ſi com le recoꝛde
Avoit au /conte de /Bretaigne
Poꝛ ce que n'ert pas moult lointaigne
La foꝛeſt de /Broceliande
Mon cuer que ſouvent m'en commande
Faire autre choſe que mon pꝛeu
Me fiſt faire ainſi comme veü
Que en /Broceliande iroie
Je m'entoꝛnai et pris ma voie
Vers la foꝛeſt ſans plus atendꝛe
Car la veité voloie apꝛendꝛe
De la perilleuſe fonteigne
.I. eſpie ou ot fer d'Andangne
Dont la meure n'eſtoit pas trouble
Et ot haubert a mele double
Poꝛte qui puis m'oꝛent meſtier
Sans tenir voie ne ſentier
Chevauchai .iiii. joꝛs entiers
Sans tenir voie ne ſentiers.
Que par mi une gaſte lande
Me mena en /Broceliande
Qui moult eſt eſpeſſe et obſcure
En la foꝛeſt par aventure
Perdi la ſens de mon ſentier
Li ſoleus ſe voloit couchier
Qui avoit faite ſa joꝛnee
Mais la clartez m'eſt rajoꝛnee
De la lune qui loꝛs leva
Mais au lever ſon vis lava
En la mer ains que fuſt levee
Et qu'ele ſe fuſt bien lavee
Bie[n] parut a ſa clere face
Car ne cuit pas que jamais face
Si bele nuit com loꝛs faiſoit
Car ſe la lune cler luiſoit
Ses puceles tout enſement
Enlumine ce me ſambla
Que ſ'onques nuis joꝛ reſambla
Cele nuit reſambla le joꝛ
Sans faire aloigne ne ſejoꝛ
Vi la fontaine pꝛez de moy
Ce fu la quinte nuit de may
Que le toꝛnoy par aventure
La fontaine n'ert pas obſcure
Ains ert clere com fins argens
Moult ert li pꝛez plaiſans et gens
Qui ſombꝛoioit deſſous .i. arbꝛe
Le bacin le perron de marbꝛe
Et le vert pin et la chariere
Trovai tot en itel maniere
Comme la deſcript /Creſtiens
En plus clere eue creſtiens
Ne recut onques joꝛ bapteſme
Ne ſambla pas que ce fuſt creſme
Quant le bacin ting a la main
Tout autreſſi le puiſai plain
Com ſe la vouſiſſe eſpuiſier
Tout le firmament vi troubler
Quant j'oï puiſie loꝛs vi doubler
Cele troubleur a .iiii. doubles
Et ſe mil temps fu nous et troubles
Quant j'oï ſus le perron verſé
Je qui tous ſeulz y fui laſſé
Ne talent n'en oÿ de mentir
Mais le ciel oÿ deſmentir
Et eſclairier de toutes pars
De plus de .vc.mile[.] eſpars
Eſt la foꝛeſt enluminee
Se tout li ciex fuſt cheminee
Et tout le mont arſſiſt enſamble
Ne feïſt il pas ce me ſamble
Tel clarté ne ſi grant oꝛage
.C. fois maudis en mon coꝛage
Par quel conſeil ting la mon erre
Car a chaſcun cop de tonnerre
La foudꝛe du ciel deſcendoit
Et tronconnoit et poꝛfendoit
Par mi le vois cheſnes et four
Oꝛ eſcoutez com je fui fous
Et eſperdus et entrepꝛis
Qu'encoꝛ plain bacin d'eue pꝛis
Et ſoꝛ le perron le flati
Mais ſe le ciel ot bien glati
Et envoié foudꝛes en terre
Loꝛs doubla la noiſe et la guerre.
Que j'oï mené a tout le monde
Car de tonnoirre a la reonde
Toute terre ſenti trambler
Je cuidai bien que aſſambler
Feiſt Diex ciel et terre enſamble
Ce fi folie ce me ſamble
De .ii. fois le bacin widier
Mais je fis par mon fol cuidier
Car le temps a paiſier cuidai
Quant le ſecont bacin widai.
Mais loꝛs apercui que qui cuide
Il a dedens la teſte wide
Car en .c. nuis ne puet avoir
De cuidier plain poing de ſavoir
Cuidier me vint a grant meſchief
Car le ciel vi de chief en chief
Si deſcouſu et ſi ouvert
Qu'en poiſt bien a deſcouvert
Veoir en parvis qui peüſt
Les yex dont veir y peuſſt
Et tuit cil qui en parvis ſont
Pueent bien vëoir tout le mont
Sans couverture cele nuit
Qui qu'il veiſſent moy ce cuit
Virent il bien la loꝛ merci
Drois eſt que je les en merci
Car il font bien amercier
Ne doi je bien ceulz gracier
Qui de meſchief m'ont deffendu
La foudꝛe m'eüſt poꝛfendu
Que tous les arbꝛes poꝛfendoit
Mais des que bien me deffendoit
Fiſt le tonnoure de partir
Quant ot leſſie a eſpartir
Plus ne tonna ne plus ne plut
Tout ot le ciel quanqu'il li plut
Recouſu et rafaitie tout
Le couſturier qui l'ot du tout
Si c'onques n'i parut couſture
Apres cel temps fu moult oſcure
La nuit car ja ſ'eſtoit couchiee
La lune qui ert traveillie
D'errer p[ar]mi le firmament.
Loꝛs cuidai bien ſe Diex m'ament
Que poꝛ ce que paoꝛ n'eüſt
Du tonnoirre qu'alee fuſt
Plus toſt que ne ſoloit couchier
Loꝛs commenca a apꝛochier.
Li joꝛs dont l'aube ert ja venue
Joie furent en ſa venue
Treſtuit li oiſellon menu
Qu'a avole ſon et venu
De partoute /Broceliande
En bꝛoce n'en foꝛeſt n'en lande
N'en vi mais nul tant amaſſez
Soꝛ le pin en vi plus aſſez
Que ne n'i vit /calogrenans
Et faiſoient de divers chans
Une ſi douce melodie
Que a ma moꝛt ne a ma vie
N'en queriſſe avoir autre gloire
Encoꝛ quant me vint a memoire
M'eſtoit il vraiement avis
Que c'eſtoit terriens parvis
Tant ont chanté en loꝛ latin
Li oiſeillon que plus matin
L'ont fait lever qu'il ne ſoloit
Le ſoleil poꝛ ce qu'il voloit
Oir le chant des oiſeillons
Li ſervices fu biaus et lons
Qu'il furent a loꝛ creatoꝛ
Li ſoleus qui ot pris ſon toꝛ
Erra tout dꝛoit vers occident
Et monta dꝛoit el firmament
Poꝛ tout le monde enluminer
Quant devant moi vi cheminer
Par le vois .i. moꝛ de /Moꝛtaigne
Qui ſiſt ſoꝛ .i. deſtrier d'/Eſpaigne
Et chevauchoit ſans atendue
Par mi une viez voie herbue
Menoit .i. trop riche hernois
.I. grant deſtrier eſpaignois
Faiſoit conduire devant ſoy
Des ſommiers le conte ne ſoy
Mais bien en y ot .c. et mes
Onques hons moꝛtez n'i vit mez
Si grant hernois ne tel charroi
Vers moi bꝛoche a grant deſroy
Li moꝛs qui aperceue m'ot
Je montai ſans lui dire mot
Qu'il ne me ſon pꝛeiſt a pié
Et pꝛis a ma main mon eſpié
Que au pin apuié avoie
Et cil qui guerpi ot la voie
Brocha vers moy ſans nul reſpit
Bien cuidai que tuit a deſpit
De ce que ne ſaluai pas
Vers lui alai le petit pas
Que j'avoie trop grant hideur
Qu'il ert de ſi haulte laideur
Com les poꝛroit dire de bouche
Mais Diex le fiſt a une couche
Si tres roidement abuiſſiez
Que la teſte avant trebuchier
Li convint du deſtrier a terre
Loꝛs cuidai bien que nostre guerre
Fauſiſt quant le moꝛ vi a pié
Car je le voil a mon eſpié.
Encontre la terre eſpoier
Mais auſſi penſe apuier
Les pié a une roche biſe
Dont le moꝛ a la hante pꝛiſe
Et la me volt el coꝛs baignier
De paoꝛ me convint ſaignier
Quant en piez eſt li moꝛs ſaillis
Trop cruelment fuſſe aſſaillis
Se de lui m'oſaſſe deffendꝛe
Couart fui ſi ne voil atendꝛe
Ains li ai m'eſpee rendue
Et li moꝛs a la main tendue
Et l'a pꝛiſe ſans demourance
Clerc fait il par tel couvenance
Que tu me ſuivras ou que j'aille
Soit au tournoy ou en bataille
Quelqu'aventure que t'aviengne
Je ne gart l'oꝛe que cy viengne
Mes ſires monte maintenant
Et je li reſpondi commant
Convient il dont que je te ſuive
Oil diſt il ou pais ou trieuve
N'avras oꝛendꝛoit ne t'occie
Loꝛs li dis en ta compaignie
Irai quant aler m'i convient
Mais qui eſt cilz ſires qui vient
Apres toi et comment a non.
Le te dirai non frere non
Diſt il mais monte ſans arreſt
Quant ſerons foꝛs de la foꝛeſt
Quanque tu voudꝛas demander
Te dirai ſans contremander.
Loꝛs ay mis le pié en l'eſtrier
Et chevauchames par eſtrief
Par mi le bois andui enſamble
Li hernois ert ja ce me ſamble
Eſloigniez .ii. liuues galeſches
Foꝛs du bois entre .ii. bꝛeteches
Aconſuiviſmes le hernois
Loꝛs ay dit au moꝛ de ma vois
Comment as tu non bꝛas de fer
Diſt il qu'en la palu d'enfer
Recui regeneration.
Je fui de foꝛnication.
En ceſt monde principoteres
Et ſi ſui en enfer noteres
Poꝛ metre pechiez en eſcript
Je ſui chamberlens /Antecriſt
Et gart ſon oꝛ et ſon argent.
Apres moi vient a trop grant gent
Bien a .cm. couvert de fer
Des meillours chevaliers d'enfer
Car au Seignoꝛ du firmament
A pꝛis ſi grant toꝛnoiement
C'onques chevalier ne vit tel
Et je vois pꝛendꝛe ſon hoſtel
El premier chaſtel que veiron
Et ſachiez que nous y avron
Foiſon de vin et mes pleniers
Que la li doit .i. uſuriers
Pleniere pꝛocuration
N'i avra ſergent ne garcon
Qui ne ſoit yvres anquenuit
Et li ferons que qu'il ennuit
Toute nuit grant feſte et lie
Et merrons vie toneillie
Quant bꝛas de fer raconté m'ot
Son eſtre treſtout mot a mot
Loꝛs venimes une valee
Et pꝛaerie grant et lee
Riviere grant et .ii. chaſtiaus
Fermez a foꝛs murs a querniaus
Et a foſſes grant et parfond
Pales et pꝛencheis et pons
Y avoit et bares et lices
Breteches poꝛtes couleices
De fer veſtues et chaucies
A chaennes ſoꝛ les chauciees
Toꝛnoient li pont toꝛneis
Soꝛ les murs et foꝛs hoꝛdeis
Et as querniaus larges alees
Foꝛs bailes foꝛs toꝛs quenelees
Et foꝛs gaierites y avoit
La riviere au pié li batoit
Plus grant et plus rade du /rone
Onques hons ne vit ſous le troſne
.II. vils ſi tres delitables
En contant veritez et fables
Entraſmes en la meſtre rue
D'un des chaſtiaus noſtre veue
Savoit oꝛ bien ce me ſambla
Car treſtout li bꝛuis aſſambla
De la ville a nostre deſcendꝛe
Et bꝛas de fer eſt alez pꝛe[n]dꝛe
L'eſcu /Antecriſt a la poꝛte
De nostre hoſtel et l'on m'apoꝛte
Vin de /Poitou pour eſſaier
Et je qui que deüſt paier
Bui aſſez que c'eſt grant confoꝛt
Des mains troublés et du plus foꝛt
Car n'en croiſt nul ſi foꝛt en /France
La vile a non Deſeſperance
Ou /Antecriſt fu oſtelez
La vile a non qui eſt delez
Eſperance par ſon dꝛoit non
Et n'eſt pas de menoꝛ renon
Aincois eſt de greignoꝛ noblece
Droit a la meſtre foꝛterece
Vait l'en par une viez bꝛeteche
Eſpoir une liue galeſche
Dure le travers de la ville
Eſcuiers y vi bien .x.mile[.]
Querans oſtez de rue en rue
Tant y a grant pꝛeſſe venue
Des eſcuiers as hoſtex pꝛendꝛe
Que maint en y vi ce me ſamble
Poꝛ biaus hoſtex avoir a foꝛce
Et qui ains partout ſ'embatent
Par mi la ville ſ'entrebatent
Et ſ'entretolent les hotex
Et aſſez en y a d'itex
Qui par faute d'oſtel vont tendꝛe
En la pꝛee ſans plus atendꝛe
Et es vergiers qui ſont defoꝛs
Les tentes ou reluiſt li oꝛs
Et li azurs et li ſynoples
N'eſpargnent vergiers ne vignobles
Que partout abandon ne ſaillent
Et tout eſtrepent et detaillent
Et tendent paveillons et trez
Et ſe logent par mi les pꝛez
Ja eſtoit none et plus aſſez
Quant /Antecriſt ot treſpaſſez
Les pons et entra en la ville
Encontre iſſirent bien .iiM.
Boꝛgois dont tous li mains puiſſans
Peüſt bien .x[.]m. beſans
Eſligier ſans ſa terre vendꝛe
Et coururent a ſon deſcendꝛe
Tuit li plus riche par eſtrief
Li coururent au deſtre eſtrier
Et pꝛenne[n]t congié ſi ſ'en toꝛnent
Et cil qui le mengier atoꝛnent
Ont fait ſavoir que tout eſt preſt
Et /Antecriſt ſans plus d'arreſt
Commande les tables a mettre
Cil qui ſ'en durent entremetre
Des tables metre ſ'entremiſtrent
Par tout l'oſtel les tables mirent
En loges en pꝛaiax en ſales
De napes qu'il metent par ſales
veïſſiez ces tables couvrir
Et veïſſiez coffres ouvrir
As chambellens a conneſtables
Et veïſſiez couvrir ces tables
De pos et de hanaps d'argent
Moult ſervirent et bel et gent
/Antecriſt quant il fu aſſis
Avec .i. jongleur m'aſſis
Qui trop ſavoit ſons /poitevins
De divers mez de divers vins
Fumes plenierement ſervi
Mais ſachiez bien c'onques n'y vi
Feves ne pois oef ne harenc
Tous les mes /Raoul de /Hodent.
Euſmes ſans faire riot
Foꝛs tant c'uns entremes y ot
D'une merveilleuſe friture
De pechiez fruit contre nature
Flatis en la ſauſſe certaine
D'une done de honte plaine
Convint l'entremes abuvrer
Car il convoitoit ceulz toꝛner
Qui oꝛent la friture heü
S'il n'euſſent honte beüe
Moult en burent car ſans guerſay
Buvoient tuit honte a guerſay
Com loꝛ livroit a une ſeille
Et guerſai que a tous guerſeille
D'ivrece loꝛ fiſt .i. entret
Tant les fiſt guerſeillier a tret
Qu'ivrece qui tous les enteſte
Vint guerſeillier a ceſte feſte
Qu'il cuida la tone eſpuiſier
Lecherie pour aguiſier
Loꝛ aloit departant eſpices
Et dꝛagie de tous les vices
Que nulz pecherres puiſt hanter
De tant me puis je bien vanter
Qu'ains ne vi mais ſi foꝛt dꝛagie
Si ardant ne ſi bien bꝛoiſſie
Ne ſi delitable a mengier
Moult nous en a fait delechier
Lecherie tuit ſ'en delechent
Et cy et ca leurs levres lechent
Cil lecheoꝛ qui moult l'ont chiere
Car lecherie l'eſpiciere
Les fait delechier par angoiſſe
Poꝛ la poudꝛe qui les angoiſſe.
Qui ſi ert poignant. et ague
Qui loꝛ langue point et argue
Crie chaſcun le vin le vin
Mais as noces archedeclin
N'en ot mie ſi grant plenté
De honte ont a loꝛ volenté
Beü a muis et a ſeſtiers
Outrage qui eſt bouteillers
Les ſert de honte ſans chancons
Moult ert larges li eſchancons
Qui loꝛ livre a la grant meſure
Que l'en appelle Deſmeſure
Sans eſcript ſans taille et ſans conte
Onques mais chiez rois ne chiez conte
N'ot tant de hont deſpendue
Plus d'un Muy en a eſpa[n]due
Outrage le filz Gloutenie
Qui en boit tant quele ſe nie
Et yvrece tant en entonne
Qu'a po n'a voidié la tonne
Je n'en bui point car poi[n]t n'en oÿ
Ne li entremes uysqu'a moy
Ni vint pas et ne poꝛquant gié
N'en euſſe par dꝛoit mengié
Car ce n'eſt pas mes a povre homme
Itant vous di a la parſomme
Que noblement fumes ſervi
Apres mengier apoꝛter vi
Bon gingembꝛe confit en ſouffre
Et diſoient tuit que el gouffre
De chetivité fu confis
N'ert pas hoſtel a deſconfit
Ou /Antecriſt fu hoſtelez
Ja eſtoit le ciel eſtelez
Quant les tables oſtees furent
Cil jongleoꝛ en piez ſ'eſturent
Sont vieles et harpes priſes
Chancons lays ſons lais et repriſes
Et de geſte cha[n]té nous ont
Li chevalier /Antecriſt font
Le rabardel par grant deduit
Li autres /Antecriſt deduit
En ſons /gaſcons et /avenans
Mais de la goute /pivernans
Fiſt nostre hoſteſſe cele nuit
Grant feſte et quant ſe ſont deduit
Li chevalier tuit ſe couchierent
Cil jongleour loꝛ vielerent
Poꝛ endoꝛmir ſons /poitevins
Vieleures et foꝛs vins
Endoꝛmirent les chevaliers
Ains joꝛ ſaillirent eſcuiers
Et ſe veſtirent et chaucierent
Et chauces et haubers roulerent
Et covuertures a eſtriez
Qui veïſt poitraux et eſtriers
Rappareillier ices garcons
Et enuerſer ſoꝛ les arcons
Ces ſeles que neent n'i faille
Eſcuier et garcon ſans faille
Iſſi matin le joꝛ ſoupꝛis
Qu'il oꝛent les chevaus de pris
Entelez et loꝛ palefrois
Au lever fu grans li effrois
Par mi la ville a l'ains joꝛnee
La lune ert ja treſtoꝛnee
Et ces puceles départies
Car le joꝛ de toutes parties
Voloit le firmament poꝛpꝛendꝛe
La lune ne l'oſa atendꝛe
Poꝛ ce departir la convint
Et la nuit poꝛ le joꝛ qui vint
S'eſvanoi comme fumee
Loꝛs veïſſiez iſſir armee
De la cité la baronnie
La ville eſtoit ſi eſtoꝛmie
C'om n'i oiſt pas Dieu tonnant
Moult me tint bien mon couvenant
Bras de Fer ce qu'il me promiſt
C'onques poꝛ riens qui aveniſt
Ne me vault leſſier au toꝛnoy
De la ville avec li toꝛnay
Et chevauchaſmes
Jusqu'a lices.
Ja ne queriſſe autres delices
Que vëoir ſi tres bele gent
Que trop ſe departoient gent
/Antecriſt iſſi de la ville
Bachelers menoit bien .xM.
Dont li miendꝛes poꝛtoit baniere
Onques compaignie plus fiere
Ne mena /Herodes n'/Eracles
L'eſcu noir ot aus faus miracles
Qui trop eſtoit parans et biaus
Car boꝛdez ert de dyabliaus
A .i. crochet de dampnement
Eſcript poꝛtoit ſon jugement
En une bende trop eſlite
Car elle eſtoit de moꝛt ſoubite
Fretee de pechiez moꝛtex
Poꝛ ce c'om i voit foy de ceux
Me plaiſoit trop a regarder
Onques nulz poꝛ ſon coꝛps garder
Ne fu miex montez en eſtoꝛ
Plus fers eſtoit que une toꝛ
Le cheval moꝛs ou le joꝛ ſiſt
Qui ert d'un aymant crouſé
/Proſerpine li ot donné
En enfer par grant dꝛuerie
De ce mut la grant jalouſie
Dont /Pluto l'ot ſouſpeconneuſe
Mais elle eſtoit ſi deſdaigneuſe
Qu'aſſi toſt ſe feïſt larder
Com poꝛ li ſe daignaſt garder
Tant eſtoit d'/Antecriſt eſpriſe
Bien valoient tot l'oꝛ de /Friſe
Les armes qu'/Antecriſt poꝛtoit
Si gentement ſe depoꝛtoit
Que ce n'ert ſe merveille non
/Beelzebub ſon gouffanon
Poꝛ ce et deſploie et met au vent
.I. dëable et .i. ſerpent.
Vi combatre en mi la baniere
/Proſerpine ſ'amie chiere
Les y aſſiſt a ſes .ii. mains
.C. mars valent et non pas mains
L'enſaigne qu'en la Hante ot miſe
Qu'ele ot faite de ſa chemiſe.
Quant /Antecriſt vint jugiter
Et tuit li grant baron d'enfer
Dont y avoit .xM. ou plus
/Jupiter jouſte /Saturnus
Chevaucher et /Apolin le pꝛeu
/Mercurius fiſt bien ſon pꝛeu
Et /Hercules li pꝛeus li biaus
Poꝛ faire guenches et cembiaus
Y vindꝛent /Neptunus et /Mars
Tout le pire valoit .c. mars
De loꝛ chevaus nule doute
En ytele meiſme route
Eſtoit /Pluto et /Proſerpine
/Li roys d'enfer et /la royne
Et /Megera loꝛ damoiſele
Moult par fu cele jouſte bele
Quant /Cerberus y fu venus
Icil fu poꝛ meſtres tenus
Poꝛ ce que .iii. teſtes avoit
Chaſcun de ſes barons poꝛtoit
L'eſcu noir au label de honte
Et loꝛ gent ſans faire autre conte
Poꝛtoient treſtuit armeüres
Plus noires que meures meüres
Poꝛ ceulz d'Eſpérance aſſaillir
Qui loꝛs veïſt Oꝛgueil ſaillir
Soꝛ .i. deſtrier d'/Eſpaigne moꝛ.
/Boban qui du vis ſamble moꝛ
Avoit adez ploié ſ'enſaigne
Onques nulz a greignoꝛ compaigne
N'aſſambla mais n'a Greigneur pompe.
Mainte baniere et mainte trompe
Fait ſoner poꝛ ſ'oſt aſſambler
Si qu'il faiſoit terre trambler
De buiſines et de taboꝛs
Tous li chaſtiaus et tous li boꝛs
Fu eſtoꝛmis et eſmeüs
De gueules eſtoit ſes eſcus
Plus vermeilles que nulz ſynoples
Par mi Rampoit me ſire nobles
A une c'eüe boban ciere
Couronne ot precieuſe et chiere
Soꝛ ſon hyaume qu'eſt dyamant
N'eſt pas meſtier comme demaant
S'en la couronne ot pierres fines
Car topaces et crapaudines
Avoit en l'aymant aſſiſes
Et pierres de diverses guiſes
Dont la pire ert de grant renon
Une en y vi qui avoit non
Camaihien qui eſt la mains chiere
Mais poꝛ ce qu'a humainne chiere
Et qu'ele rent l'omme oꝛgueillous
Coꝛage lie et deſdaignous
Poꝛ ce en faiſoit chiere oꝛgues
Mais cele qui entre les eux
Du boterel eſt la plus fine
C'on ſeult appeler Crapaudine
Qui bien appartient a Oꝛgueil
/Bobans par mi le fons d'un bꝛueil
Au vent deſploie ſa baniere
Qui ert de trop plaiſant maniere
Poꝛ ce qu'ele eſt de Vanterie
Cel dꝛap dont cil de /Noꝛmendie
Se veſtent tuit communement
Le deſtrier oꝛgueil ſi ſouvent
Chopoit que ce n'eſtoit pas fins
Se ne fuſt ce il fuſt ſi fins
Qu'il vauſiſt bien .m. mars d'argent
Ne doit pas venir ſans grant gent
Oꝛgueil qui eſt rois de tous vices
Convoitiſe qui rent eſpices
Et des eſpaules et du pis
Bobans et Deſdaing et Deſpis
Et Vaine Gloire et Vanterie
Qui eſt dame de /Noꝛmendie
Furent de la maiſnie Oꝛgueil
De ceſte gent dire vous veil
Qui poꝛtoient l'eſcu tout plain
De Vanterie et de Deſdaing
Bien conneü en toutes places
A .i. ſautëoꝛ de menaces
A l'enguegnie de dangier
Mais entre ices vi chevauchier
Convoitiſe mignotement
Cointiſe vint ſi cointement
Que de toutes fu la plus cointe
Convoitiſe d'Oꝛgueil ſ'acointe
Qui trebuche tous ſes acointes
Poꝛtoit armes vermeilles cointes
En doucez d'oꝛ en vait d'ancies
A [.]iiii. bendes loſengies
De Vainne Gloire et d'Aroſance
A .i. mireoir d'Ignoꝛance
Qui fait muſer toute la gent
A .iiii. papegaus d'argent
Qui chatoient ioliueté
A l'oꝛiol de Niceté
Aſſis ſoꝛ Fole contenance
.I. penoncel ot en ſa lance
De ſes armes qui trop fu biaus
Qu'a las de ſoye et a froiſiaus
L'ot Cointiſe atachiee au fuſt
Et poꝛ ce que plus cointes fuſt
Ot ſonnetes et champeneles
Es armes freches et nouveles
Qui n'erent pas laides n'obſcures
Es loꝛains et es covuertures
Qui eſtoient d'un dꝛap de quin
De la maiſinee /Helequin
Me membꝛa quant l'oÿ henir
L'en ooit ſon deſtrier venir
De partout le toꝛnoiement
Et pour aſſambler cointement
Une gloire qui eſt ſa cointe
Devant cointiſe vait trop cointe
O le taboꝛ et la fleüte
Dont ſi tres cointement flaute
Que toute ententiſt la valee
O grant noiſe vient en la pꝛee
Tencon la marraſtre concoꝛde
Qui getoit l'eſcu de deſcoꝛde
A .i. label d'Anemiſtié
Felonnie qui het pechié
Avoit /boꝛgueignons a plenté
Et poꝛtoit l'eſcu endenté
A .i. rous maſtin rechignié
Par mi rampoit bꝛuns ſans pitié
Poꝛ bien demouſtrer felonnie
O grant freinte de baronnie
A treſpaſſee la chaucié
Et moult bien ſe r'est avancié
Hayne la mere Deſcoꝛde
Et ſe vait vantant que Concoꝛde
Appelera de trieve enfrainte
Par mi une grant poꝛte frainte
Sault coꝛrous le filz Felonie
Tuit cil ſievent Foꝛſenerie
Et viengnent comme foꝛſenez
Tuit cil furent noꝛri et nez
El chaſtel de deſeſperance
Ceſte gent vindꝛent ſa[n]s doutance
Et deſreez et deſrengies
Armes avoient loſengies
De racune et de deſuerie
A .i. label de freneſie
Ja eſtoit prime et plus ce cuit
Quant je vi venir a grant bꝛuit
Auarice et a grant deſroy
Auarice ot en ſon conroi
Grant gent /mains moult y ot /Romains
Convoitiſe n'en ot pas mains
Qui eſt ſa couſine germainne
Rapine bien autant en mainne
Comme avarice et convoitiſe
Cruautez qui loꝛ cuers atiſe
Loꝛ donna armes et chevaus
Lances eſpees et coutiaus
Poꝛ eſcoꝛchier la povre gent
Targe d'oꝛ boꝛdee d'argent
A une bende beſentee
Auarice le joꝛ poꝛtee
De la table a .i. /caourſin
Conuoitis et d'eſcu d'oꝛ fin
Bende de termes et d'uſure
Et rapine autel qui ſeure
Cuidoit eſtre de guerre abatre
Apres vint preſtre de combatre
De toutes coꝛs la dame envie
Mais tuit cil qui oꝛ ſont en vie
Son grant oꝛgueil ne ſon conroi
Ne la gent c'ot en ſon conroi
N'aconteroient ſans mentir
De trompes faiſoit retentir
La pꝛaerie de tous ſens
Apres oꝛdenerent les rens.
Fauſſetez et ypocriſie
Et barat le filz tricherie
Qui onques n'ama loiauté
Menconge qui het verité
Ouec tricherie ſe renge
Loꝛs vint meſdit le filz loſange
La couſine detraction
Et loberie et traiſon
L'ainſnee des enfans envie
Poꝛ vëoir ceſte baronnie
Toute la vile as poꝛtes coꝛt
Ne fu mi ſans gens de coꝛt
Ce me ſambla ceſte aſſamblee
Enuie y avoit aſſamblee
L'aſſamblee des meſdiſans
Bien avoit mis plus de .x. ans
A ceſte aſſamblee aſſamler
Pons et chauciees fiat fermer
Tant avoit grant frainte de gent
Armes plus noires qu'arrement
Et ſans autre deſcription.
Sa couſine detraction.
Eſt plus cointe et puis enuoiſiee
Une targe avoit loſengie
De faus ſamblans et de faus ris
Moult bien parans ce m'eſt avis
Ert li eſcus de traction
Trop ſambloit la detraction
Cilz faus eſcus dont Diex nous gart
As faus ſamblant a faus regart
A faus aiſiers et a faus diz
Moult fu bien par /Raoul deſcrips
A .iiii. rampones rampans
A une langue a .v. trenchans
Qui l'eſcu poꝛpꝛent et ſoꝛmonte
L'eſcu au mireoir de honte
A une fente de faintie
Convoitiſe d'anemiſtie
A .i. label de fauſſeté
Menconge qui het verité
Fu de la maiſnie /Antecriſt
Menconge avoit heual eſlit
Plus toſt courant que nul aronde
Car menconge partout le monde
A treſpoꝛtee en .i. moment
La baniere levee au vent
Poꝛſuioit traiſon de pꝛez
Et ot l'eſcu a fauſſes es
Loſengie a fauſſes noueles
A faus eſcus a .ii. iumeles
De loberie et de meſdis
C'eſt li eſcus de Dieu maudis
Que poꝛtent tuit cil meſdiſant
Moult le vont tuit cil maldiſſant
Qui ſont des chevaliers amoꝛs
Qui poꝛtent l'eſcu paint a floꝛs
Loſengie de bone eſperance
A une bende d'aliance
Beſantee de coꝛtoiſie
L'eſcu qui eſt ſans vilennie
A [.]iiii. rouſſeignox d'argent
Et l'eſpeurier coꝛtois et gent
Qui de voler ne ſe repoſe
L'eſcu a une paſſe roſe
Aſſiſe ſoꝛ oꝛ fueillete
A label de ioliuete
Qui tout le tournoy enlumine
De traiſon la /poiteuine
Se doubte moult cil qui le poꝛte
Au tournoi par la meſtre poꝛte
Vindꝛent tuit li enfant envie
Plaiſant eſcu ot loberie
Que trop ſambla la traiſon
Foꝛs itant que detraction
L'oꝛdena de faintes paroles
Et y miſt .i. label de lobes
Qui fait cognoiſtre loberie
Bel eſcu ot ypocriſie
S'il eſtoit a dꝛoit deuiſez
Car poꝛ ce qu'il ert deſguiſez
Faiſoit muſer toute la gent
C'eſt li eſcus de faus argent
A une bende d'eſriſie
Fretee de mauvaiſe vie
A .i. ſautoir de mauuaiſte
A languegnie de fainte
Au mireour de fauſſeté
A .i. label d'iniuquite
Que poꝛtent li diu ennemi
A .i. faus eſcucel en mi
Plain de fauſſe religion
Tez eſcrips en la region
De /France ont cil renouuelez
Qui ſont papelars appelez
De la ville iſſent a grant freinte
La avoit mainte lance painte
Et mainte enſaigne de cende
Maint eſcu d'oꝛ d'azur bende
Et mainte trompe et mainte arene
De la feſte qu'/Antecriſt mainne
De tous ſeulz la terre troubloit
Larrecin ſa gent reſambloit
En une grant foꝛeſt obſcure
Gens ot ſans conte et ſans meſure
Veſtus de fer en ſa compaigne
Moult fiſt bien el deſtrier d'/Eſpaigne
Foꝛt et courant de grant reuine
Larrecin maine o ſoy rauine
Homecide et deſloiauté
Foꝛce et murtrice et cruauté
Et coꝛrous et ennemiſtie
Felonnie qui het pitié
En .i. glaive a fer poiteuin
Poꝛtoit l'enſaigne larrecin
Qui eſt faite de dꝛap emble
Cil qui la facent aſſamble
Ont bien l'enſaigne conneue
Po de gent ſoꝛent ſa venue
Car il vint ſans noiſe et ſans bꝛuit
Le noir eſcu bende de nuit
Ot larrecin au col pendu
Et d'unes fourches a pe[n]du
Ot en l'eſcu .i. cheval fuſt
Et ſambloit que loſeng fuſt.
C'un rencontre et d'une chance
A .i. pſaltier de meſchëance
A .i. label de mai[n]s crocues
De ces ceus qui erent venues
Ert emeindus li plus cointes
Poꝛ ce qu'ert larrecin acointes
Et auteulz armes com il ot
/Gauain qui fu filz /le roy loth
N'ot pas tant abatu ne pꝛis
Chevaliers com il a occis
Et tout ſans foꝛfait de ſa main
Mutrice ot ſon eſcu tout plain
Foꝛſt tant qu'il y ot .i. label
De tenebꝛes parant et bel
A .i. quartier de cruauté
Une eſpee ot a ſon coſté
Qui eſtoit de trop bone foꝛce
L'eſpee avoit non cope goꝛge
Mais onques ſi trenchant ne vi
Li feures ot non ſans merci
Qui la fiſt et ſachiez ſans guile
Que larrecins a murtre ville
La fiſt foꝛbit chiez mienuit
Elle eſtoit d'un acier recuit
Trop dur et de trop male part
Plus ert dure que durendart
Cope goꝛge qui ruſt du fuerre
Ou mene routiers et piquars
Ou toꝛnoy ne vint pas ſoy quars
Aincois en ot [.]vc. ſeigniez
A ſon ſaing d'armes enſeigniez
Tuit cil vindꝛent en une flote
Mais trop y ot bele complote
Quant lecherie vint apꝛez
Lecherie ſuioit de pꝛez
Gloutonnie ſ'ainnee ſuer
.I. chevalier de trop grant cuer
Outrage le filz bele vie
Mener. ot ſa terre engagie
Apres lui vint comm eſragie
Vilenie la mere outrage
Vilennie tindꝛent poꝛ ſage
De ce qu'ele ert ſi bien armee
Soꝛ .i. roncin eſtoit montee
Si cras c'on li peüſt conter
Les coſtes tout ſans meſconter
Et couvrir de tuile ou d'aiſil
Auſſi com ſil veniſt d'eſſil
De tel deſtrier ert vilains dignes
N'i erent pas blanches comme cynes
Ses armes car n'ert pas reſſans
Moult li ſiſt bien li gambeſans
Qu'il ot tendu en la fumee
D'un hyaume avoit la teſte armee
Qui ot du vies chapel de fer
Si noir com ſil veniſt d'enfer
Et ot d'armes loialment et lees
De rous et de gris burelees
Et tint .i. pel en lieu de lance
Apres lecherie ſe lance
Qui eſtoit trop bele et trop cointe
Et ſous l'eſcu eſtoit plus iointe
Qu'eſpeurier mue de nouvel
L'eſcu poꝛtoit parant et bel
Parti d'outrage et de delices
Et ſi eſtoit plus grant de vices
Bende de gueules et de langues
Glotonnie qui vint les ambles
Armes de gueules engoulees
A la feſſe de deſmeſure
Cointes eſtoit outre nature
Outrages li entredoutez
De gloutenie ert engoulez
Ses eſcus qui eſt oultre biaus
S'ert .i. eſcus a .iii. tourtiax
Qui eſtoient troute leue
D'un trop levant leuain leue
Atant treſpaſſe la chauciee
De fer ſ'eſt veſtue et chauciee
Foꝛnication depꝛiſans
Par une viez poſterne ſault
Et en ſes oex poꝛte les dars
Tous empanez de fox regars
Qui maint home ont mis a meſchief
Molt avoit bien arme le chief
De foleur et de nimonnie
Et ſon avoir de vilennie
A .i. baiſier de dampnement
A .i. pſaltier de jugement
Qui l'eſcu poꝛpꝛent et ſermonte
L'eſcu au mireour de l'honte
Eſchequetee et entechie
De maintes taches de pechié
Et poꝛ ce quele doit enſaigne
Avoit qui la mouſtre et enſaigne
.I. penoncel ot en ſa lance
De dꝛap de nice contenance
Foꝛnication atachie
Qui honte la fille pechié
Qui moult vers lui ſ'umelioit
De ſa chemiſe fait li ot
Et bla[n]chi cil flun de vilté
Loꝛ vi venir trop bien monte
Plus enflambe qu'ardant tiſon
.I. des filz foꝛnication
Qu'en ſeult auoutire appeller
Sa pꝛoece ne quier celer
Car cel joꝛ fiſt moult biau ce[m]bel
Une targe des huis boꝛdel
Ot auoutire au col pe[n]due
.I. ſon couſin ſans atendue
Le ſuit dont vous dirai le non.
Nez fu de foꝛnication
Et engendꝛez contre nature
Eſcu de trop haute laidure
Ot cilz honteus dont je vous conte
Si ert li eſcus bendez de honte
Boꝛdez d'abomination
N'ot auec foꝛnication
Nul qui ne fuſt de lui plus cointes
Diex n'aimme gueres ſes acointes
Ja ne queriſſe autres deuiſes
Comme je vi a ceſte vois
D'une tauerne ſault grizois
Ou avoit beu a eſcot
/Noꝛmant et /englois a /eſcot
Eſtoient tuit de ſa maiſnie
Yurece aprés ſ'eſt adꝛecie
Preſte de faire vaſſelage
Guerſois avoit hyaune d'outrage
Lie d'un foꝛt cercle d'/oꝛliens
Ses eſcus qui ne doubte riens
Eſtoit poꝛtrais de glotonnie
A mireoir de vilennie
Au ſauteoir de deſmeſure
Lance poꝛtoit bele adꝛoiture
Qui fu faite d'un eſchalas
Donne li ot par grant ſoulas
Roberie la tauerniere
Il ne paroit pas a ſa chiere
Qu'eüſt meſtier d'aler en fuerre
Eſcu d'/oꝛliens bende de /ſeure
O labiaus de piez de hanas
Ot yvrece com floꝛs et glas
Vi en la contenance yvrece
Quele avoit l'une et l'autre teche
Par les eſpaules detrechiee
De lui firent le joꝛ chauciee
Li autres quant au toꝛnoy vint
Car yvrece doꝛmir convint
Enmi la place tout adente
Le joꝛ fu bien .xx. fois ou .xxx.
As piez des chevaus defoulee
Mal dehez ait tele goulee
Et la gueule qui tant en pꝛent
Moꝛte fuſt ſoꝛ le pauement
Yurece teſtoute adentee
Mais hazart la reconfoꝛtee
Qui la deſpoilla toute nue
Quant ribaudie fu venue
Moult fu foible cele aſſamblee
Ribaudie et hart emblee
A yvrece ont ſa robe route
Hazart qui radement deroute
Ot .i. glaive a. fer /poiteuin
Eſcu bende de larrecin
Ot hazard a .i. dez du mains
A .i. label de male mains
Atachie a faus ſeremens
Une engengnie avoit de dens
D'une mellee faite a poins
Atachiee a .xviii. poins
Au faus eſcus de meſchëance
Qui parti ot double cheance
De rencontre et d'enuiax
Ribaudie deſſous .i. ſaus.
Sarmoit en .i. pꝛe verdoiant
Une targe trop bien parant
Avoit d'un eſchecquier ioli
S'avoit entre haſart et li
.I. label par reconnoiſſance
Qui poutrait fu par meſchëance
D'un haſart fait arriere main
Des armes ſon couſin germain
S'en fu plus cointe et aceſmee
Lance ot d'une virge pelee
S'ot ceinte en toꝛ ſoi une fonde
Et que ſes ennemis confunde
Pierres conquiert agironnees
En plus de .c. lieus renouees
Erent ſes armeures toutes
Car hazart les y ot deroutes
A /bar a /la table roonde
De toutes les .iii. pars du monde
Vient au tournoy a baronnie
Et ſachiez poꝛ voir que folie
Moult richement au toꝛnoy vint
La macue bien li avint
Dont aloit departant la preſſe
Ni a celui qui plus l'empreſſe
Car chaſcun doute la macue
Qui oiſt com chaſcuns la hue
Moult ſ'en reſiſt car a ſon col
Ot une targe des de fol
Que je ting a merveille bele
Car .iii. foꝛmages en feſſele
Y ot aſſez ſoꝛ nicete
A .i. faus eſcuſel liſte
Qui ert pourtrait de deruerie.
A .i. label de freneſie
Et en crois ot ſon chief tondu
Et folie .i. hyaume coꝛnu
A .i. cercle de muſardie
Et ſi poꝛtoit une hardie
En ſa macue en lieu de lance
Del dꝛap de nice contenance
Une enſaigne qui moult me plot
La veïſſiez trop bel complot
Quant elle iſſi par mi la poꝛte
De tous pechiez l'enſaigne poꝛte
Car nul pechié n'eſt ſans folie
Perece qui eſt endoꝛmie
Se tient tous joꝛs a paueillons
Et couardie a reculons.
Vait tous joꝛs en l'arrieregarde
Traiſon dont nulz ne ſe garde
Vait eſpiant qui elle fiere
Une heure avant et autre arriere
Oꝛ es de loing oꝛe de pꝛez
Tuit cil vice ſont pꝛez a pꝛez
Car nulz ne vait ſans compaignie
Itant vous di que coardie
Eſtoit arme trop cointement
D'eſcu pale au lieure rampant
Qui eſtoit cheuronez de tramble
Coardie de paoꝛ tramble
A loiſir de deſeſperance
De tramble avoit eſcu et lance
Car trop eſtoit eſpointee
Le deſtrier ſoꝛ coy ert montee
Eſtoit appellez tourne en fuie
Grant talent a quele ſ'en fuie
Greignoꝛ que de faire mellee
Tel paoꝛ a que ſanc mellee
Fu ains qu'il veniſt en la place
Paoꝛ ot eſcript en ſa face
Qui la couloꝛ en a oſtee
Perece eſtoit trop bien montee
Deſſus .i. yuoire leſtrif
Si get eulz ſi relentif
Qu'il ne pooit venir avant
Car pꝛiſon meſtre fait autant
Com li ſinges poꝛ les malvais
Et gete ce qui tout adez
Soꝛ luure vait ſoumeillant
Eſcu avoit d'os d'olifant
A ſinges endoꝛmis aſſis
Lairons endoꝛmis jusqu'a ſis
Y ot aſſis ſeur ignoꝛance
Bendez eſtoit de negligance
A .i. label de non chaloir
De pꝛoece doit moult valoir
Chevalier qui tel eſcu poꝛte
Deiteniere iſſi de la poꝛte
De toute la gent /Antecriſt.
Dont je vous ay en ceſt eſcript
En deſpit de tous ypocrites
Les nons et les arbes deſcriptes
telz gens com je vous ay deſcript
Amena o ſoy /Antecriſt.
Ni ot foꝛs chevaliers depris
Et cil qui le toꝛnoi ot pꝛis
Encontre li a gent eſcripte
Fu en la ville devant dite
Qui eſt eſperance nomee
Qui tant eſt bonne et renomee
Que douce en eſt la remembꝛance
D'ilec jusque deſeſperance
A .ii. liues de bele voie
Deſeſperance eſt la /monjoie
D'enfer ſi comme /Raoul dit
Mais il dit voir ſans contredit
Puis dire et par raiſon prouuer
Quatre ſoꝛnon ne puis trouver
A eſperance ce m'eſt vis
Foꝛs monjoie de p[ar]uis
Tex eſt li ſoꝛnons ſans doutance
A grant gent fu a eſperance
Venus li rois du firmam[en]t
La veille du toꝛnoiement
Aus grans deſpens faire entendirent
Pluiſoꝛs en y a qui tendirent
En vergiez en champs et en pꝛez
Tentes et paueillons et trez
Car tuit en la ville ne poꝛent
Quant le joꝛ aperceue oꝛent
Qui ot les eſtoiles eſtaintes
Loꝛs veïſſiez en lances paintes
Deſploier au vent ces banieres
Et eſcus de mai[n]tes manieres
Qui le joꝛ recurent maint cous
Deſpendꝛe huis et metre as cous
A l'eſir d'eſpera[n]ce ot preſſe
Et le rois du parvis ſ'eſleſſe
Et ſe miſt el pꝛemier conroy
Bien ot contena[n]ce de roy
Car cointes ert et aceſmez
D'armes roy aus eſtoit armez
Soꝛ .i. grant deſtrier pommele
Large de pis de crupe le
Qui eſtoit biaus a grant merveille
Une couverture uermeille
Ot d'un ſamit emp[er]ial
Li roys qui ſiſt ſoꝛ le cheval
Poꝛtoit eſcu merveilles noble
A une grant crois de ſynople
Aſſiſe ſoꝛ oꝛ eſmere
Tres menuement eſtele
Bougles eſtoit mais en la bougle
Ot aſſis .i. cler eſcharboucle
Entre .iiii. euangiles blanches
Poꝛtrait et eſcript en .ii. manches
De la chemiſe Nostre Dame
Itel eſcu qui coꝛs et l'ame
Puet bien tenſer et garantir
Cilz ſires qui ne ſcet mentir
Nous doint pais et miſericoꝛde
Une trenchant ſi ſ'en coꝛde
A .i. ponc de ſaint amiſtié
A unes renges de pitié
A ſon coſté ſeneſtre ot ceinte
Onques de ſa lance plus cointe
Ne fu glaues ne iauelos
Quele ert a petis angelos
De blanc argent ſoꝛ azur ynde
Le fer eſtoit de l'acier d'/ynde
Qui fu trais du coꝛps /Jhesucriſt
Car ſi com je truis en eſcript
C'eſtoit la lance dont /Longis
Li ouvri le coſté jadis
Et en devint eue et ſanc
Moult ſiſt bien ſoꝛ le cheval blanc
Qui valoit l'oꝛ d'une cité
Il ot hyaume de deité
A .i. cercle de jugement
Et poꝛtoit l'arc du firmament
Qu'encoꝛda d'une douce coꝛde
/La Dame de miſericoꝛde.
Bons ert li ars qui tel coꝛde a
Car /la Dame qui l'encoꝛda
Volt qu'a ſon fil nous acoꝛdons
Qui d'une coꝛde a .iii. coꝛdons
Li fiſt l'arc du ciel encoꝛder
Poꝛ Dieu et poꝛ home acoꝛder
Et li coꝛdons de ceſte coꝛde
Sont pais et pitié et acoꝛde
Qui ſont coꝛde par cel acoꝛt
Par tex coꝛdons nos cuers acoꝛt
Cil qui les deſcoꝛdez acoꝛde
Car cuer qui eſt plain de deſcoꝛde
Ne puet avoir acoꝛdement
Ou li rois de concoꝛdement
Au pere de miſericoꝛde
S'onques li amiraus de coꝛde
N'offri armes ſi noblement
Com fu li roys du firmament
Car tous les hernois des deſtriers
Seles loꝛain poitral deſtriers
Eſtoient tuit d'oꝛ et de ſoie
Et que je menterres n'e[n] ſoie
Jamés y ot de mai[n]tes guiſes
En oꝛ et en argent aſſiſes
Trop riches et trop gracieuſes
Eſmeraudes ſi gracieuſes
Y ot que ce ne fuſt pas fins
Et eſcharboucles clers et fins
Et autres pierres plus de .M.
Dont valoit toute la plus vif
iiijC. mars d'oꝛ eſmere
Plus vert que n'ert here de pꝛe
Vi cherubin et ſa compaigne
Qui ſiſt ſoꝛ .i. deſtrier d'/Eſpaigne
Qui valoit bien .m. mars d'argent
/Antecriſt et toute ſa gent
Eſbahi d'une blanche enſaigne
Qui le ſeignoꝛ du mont enſaigne
Au tournoiement la venue
Qui ert d'une ſi bla[n]che nue
Qui de nule riens n'ert tachie
A glaive paint ert atachie
A .iiii. ſalus /Nostre Dame
Cil n'a garde de coꝛps ne d'ame
Qui eſt ſeigniez de cele enſaigne
.XX. trompeoꝛs en ſa compaigne
Avoit poꝛ aſſambler ſa gent
Chaſcuns tenoit trompe d'argent
Ou arainne ou buiſine ou grelle
Tant ſonnoient que gros que grelle
Qu'il aſſemblerent loꝛ grant toute
N'os anges vont en cele route
Qui erent tuit plus blans que cynes
De deſcrire ne ſui pas dignes
Les armes c'oꝛent ceſte gent
Tuit eſtoient d'oꝛ et d'argent
Li eſcu qu'a loꝛ cex poꝛtoient
Et poꝛ ce que treſtuit eſtoient
Es eſpaules des angres ne
Vous di qu'il erent empane
Sans faire autre diſcretion
Promier en cele region
Fu /saint Michiel qui tant fu fiers
C'onques nulz miendꝛes chevaliers
Ne fu ſi com nous dit l'eſtoire
Bien y put a la victoire
Qu'il ot jadis de /lucifer
Qu'il geta du ciel en enfer
Li plus biaus fu de cele gent
L'eſcu d'oꝛ as elles d'argent
Ot empenees de meſſages
Et /Gabꝛiel li pꝛeus li ſages
Apꝛez /Michiel el pꝛe ſ'eſleſſe
Son eſcu choiſi en la preſſe
Qui trop eſtoit parans et biaus
C'ert uns eſcus celeſtiaus
Tout empene ert li eſcus
D'azur enginez de ſalus
Dont /Nostre Dame ſalua
Et /raphael qui veü a
/Gabꝛiel monte el deſtrier
Sans metre le pié en l'eſtrier
Monte el cheval qui trop fu biaus
Ses armes furent a eſgliaus
D'oꝛ eſmere en vert aſſis
A .i. poiſſon qui y fu mis
Poꝛ ce que il poꝛte racine
Greignoꝛ que pierre ne racine
Que /thobie peſcha en mer
C'eſt li poiſſons de que amer
/Raphael rendi la veue
/Thobie qui li ot tolue
L'arondele ce ne vous ment
La lettre du /viez teſtament
Li ſolaus qui ne ſeioꝛnoit
Apres prime ſon vis toꝛnoit
Et cheminoit tout dꝛoit arriere
Quant je vi montee la fiere
De l'eſchequier dont Diex eſt rois
Quant je la vi .i. ſi cler rois
Me feri qui de li iſſoit
Que tous les yex m'eſbloiſſoit
Et bꝛas de fer cheï paſſez
Qui n'eſtoit pas de li amez
Mais poꝛ congnoiſtre et deuiſer
Mais moult grant paine a aviſer
/La Dame que cy vous devis
De bꝛas de mains de coꝛps de vis
Eſtoit ſi tres bele a deuiſe
Que ja poꝛ moi qui la deuiſe
Ne ſera a dꝛoit deuiſee
Car ſa biauté eſt deuiſee
D'autre part tel diuiſion
C'onques ne vi en viſion
Si grant biauté a home ne
Foꝛs a celi qui Diex donne
A de ſ'amoꝛ le priuilege
Cil la vit et deſcript et ge
Sera dont tex qu'il la deſcriue
Cil qui par grant prerogative
Fu a ſon coꝛps garder eſlis
Cil qui ſ'endoꝛmi ſoꝛ le pis
/Ihesu par grant dilection
De lui tele deſcription
Vous poꝛtrait en l'apocalipſe
Il ne fiſt pas comme neglice
Quant elle avoit la maiſniee
Car du ciel ert encoꝛtinee
Ou ne paroit tache ne nue
Et eſtoit du ſoleil veſtue
Et ot la lune ſouz ſes piez
Moult doit eſtre joians et liez
Cil qui elle a ſ'amoꝛ donnee
De leſtre l'avoit couronnee
En ſa main tint en lieu de ſceptre
Et ſeellees en la lettre
/La virge /aaron toute floꝛie
Moult avoit bele compaignie
De Virge et d'anges empenez
Moult ſeroit de bone heure nez
Qui ſouvent l'avroit en memoire
Car elle eſt mireoir de gloire
Que li ange en parvis remirent
Le mireoir ou il ſe mirent
Fait moult gloꝛieus remirer
En ſi cler mireoir mirer
Nous devons tous car qui ſ'i mire
Ja de mal qu'il ait n'avra mire
Foꝛs /la virge mere Marie
Ses eux et ſa penſee toute
Il puet bien dire que po doubte
/Antecriſt et toute ſa gent
En .i. tref a coꝛdez d'argent
D'un dyapꝛe de couloꝛ ynde
Qui fu fais et ouurez en /ynde
Deſcendi deſſus la riviere
Le treſt eſtoit de grant maniere
A merveilles parans et biaus
Car il ert ouurez a eſgliaus
De fin oꝛ en azur aſſis
Li pommiaus que Diex y ot mis
Eſtoit d'une eſcharboucle ardant
Soꝛ la riviere en .i. pendant
Entendus par tele meſtire
Qu'il faiſoit tout entoꝛ reluire
Le bois le pꝛe et la riviere
Si que li rais de ſa lumiere
Feroit juſqu'en la meſtre toꝛ
En .i. trone de riche atoꝛ
Pare de paile d'aumairie
Se ſil /la royne Marie
Poꝛ les chevaliers eſgarder
Et meeſmement poꝛ garder
Sa gent de moꝛt et de meſchief
Oꝛ me doinſt Diex venir a chief
De deſcrire virginité
Toute en reluiſoit la cité
Tant eſtoit pure et clere et fine
De /la devant dite royne
Eſt moult dame virginitez.
De lui eſt tex la verité.
Que moult eſt gloꝛieus ſes nons
Loꝛs deſploient les gonfanons
Religions et abſtinance
Confeſſion et penitance
Et charitez qui grant gent mainne
Virginitez vait primerainne
Soꝛ moult petite cheuauchiee
N'ot pas encoꝛe cheuauchiee
Une archie de pꝛe fauchie
Quant cil wui oꝛent cheuahcie
Auant furent venu as lices
Ja ne queſiſſe autre delices
Que regarder virginité
Son hyaume ſon eſcu liſte
Et ſa lance et ſon gonfanon
Prez de lui n'ot ſe virges non
Mais ſachiez il en y ot poi
Conques connoiſtre n'en y poi
De ueres virges plus de .xx.
Virginitez montee vint
Soꝛ grant deſtrier de /maſonie
Toute en reluiſt la praerie
Tant par eſt cointe et aceſmee
De blanches armes eſt armee.
Plus flamboians que nule glace
Ses eſcus fait luire la place
Qu'ele avoit poꝛ ſon coꝛps garder
Ne l'oſai pas bien eſgarder
Que je n'en eſtoie pas dignes
Li eſcus ert plus blans que cines
S'ert entelez de mainte iame
Bendez du ſalut /Nostre Dame
Cheuronnez de feſtes anniex
De blanches touailles d'autiex
Avoit fait tote a armer
Et d'un dyapꝛe d'outremer
L'avoit a la hante atachiee
D'une tache noire tachie
Ains ert blanche com floꝛ de lis
Moult mis mon cuer et mon avis
A regarder virginité
Elle ot hyaume d'umilité
A .i. foꝛt cercle d'ignoꝛance
Doure de nete conſcience
S'ot blanches armes ce m'eſt uis
Poꝛ ce qu'as anges de parvis
Eſt couſine ſi com moi ſamble
Et que virginitez reſſamble
Les anges et ſoit loꝛ germainne
En ſa lance ot .i. fer d'adꝛegne
Et poꝛtrais petis angelos
Onques glaive ne iauelos
Ne fu plus cointes ne plus gens
Qui trop eſtoit fins li argens
Ou il erent aſſis et paint
Volant les fiſt cil qui les paint
D'oꝛ et d'azur ſoꝛ blanc argent
S'en furent plus bel et plus gent
Abſtinence vint en la pꝛee
Soꝛ les armes dont ert armee
Sambloit qu'us trop bien negie
El poꝛtoit l'eſcu loſengie
De ieunes et d'aſtinance
Apres religion ſ'auance
De ſ'eſperance ſ'en parti
Quele poꝛtoit l'eſcu parti
D'oꝛoiſon et d'obedience
Et ot hyaume de pacience
A .i. cercle foꝛt et metable
Doꝛe de gloire pardurable
.I. penoncel de ignoꝛance
Relegion ſoꝛ penitance
Qui eſtoit d'un haubert veſtue
Et d'une heir a ſa char nue
S'ot eſcu de confeſſion
Loſengie de compuction
Et de pitié a une manche
Qui ſ'entreſambloient de vis
/Coꝛuain /cadꝛus et /meraugis
Ont fait de loꝛ gent .ii. parties
Et oꝛent armes mi parties
De biauté et de coꝛtoiſie
Poꝛ la biauté de loꝛ amie
Qui ot non /la bele l'ydoine
D'entre les poꝛs de /macedoine
Vient au toꝛnoy la baronnie
Les armes le roy d'oꝛcanie
Furent poꝛtretes de merveilles
/Perceual ot armes vermeilles
Qu'il toli jadis en /yrlande
Au vermeil de la rouge lande
Quant il fu chevaliers nouuiaus
/Me ſire kex li ſeneſchiaus
Sans faire autre diſcretion
Ot les armes de traction.
Endentees de felonie
As rampoſnes de vilonnie
A .iii. toꝛiaus fez et farſis
De rampoſnes et de meſdis
Qui trop bien en l'eſcu auindꝛent
Yceſte gent derrieres vindꝛent
Qu'il n'y avoit que de lacier
Les hyaumes mais pour ſolacier
Se l'ont loꝛ ancien deduit
Oꝛent cheuauchie toute nuit
Par bois et par foꝛes obſcures
Querant depoꝛs et auentures
Par /coꝛnouaille et par /yrlande
Et vindꝛent par /Broceliande
Ou par po ne furent tuit moꝛt
Car /percheual qui par depoꝛt
Cuida arrouſer le perron
L'arrouſa par tel deſraiſon
Que la foudꝛe occiſt plus de .c.
De loꝛ maiſnie et de loꝛ gent
Ainsi d'une ville et de l'autre
Sont iſſu et lance ſoꝛ fautre
La pꝛaerie ont cheuauchie
D'ambedeus pars ot grant cheucie
Mais trop plus ot gent ſans doutance
Li ſires de deſeſperance
Que cil d'eſperance d'aſſez
Car /Antecriſt ot amaſſez
Tant de gent comme pot avoir
Et abandonna ſon avoir
As ſeriens et as ſoudiers
Et poꝛ plus avoit chevaliers
Maint uſurier et maint vilain
Ot fait chevalier de ſa main
Poꝛ ce ſi ot plus /Antecriſt
Chevaliers que n'ot /Jhesucriſt
Amenez au toꝛnoiement
Poꝛ ce conuint moult longuement
De l'une et de l'autre partie
Barquanier de la departie
Des chevaliers que trop eſt grief
D'aſſambler a ſi grant meſchief
Poꝛ ce dient cil d'eſperance
Ne volons pas en tel balance
N'a ſi grant meſchief toꝛnoier
Mais donnez nous cel chevalier
A cel eſcu d'oꝛ fueillete
Et nous donnez cel oillete
Et cel noir et cel loſengie
Et cil .iii. qui ſont la rengie
A ces grans banieres vermeilles
Oꝛ eſcoutez fieres merveilles
Dient cil de deſeſperance
Ne ſ'auiez eſcu ne lance
Haubert en dos ne hyaume en chief
Si ſerions nous a meſchief
Mais ſe vous volez toꝛnoier
Donnez nous cel grant chevalier.
A cele grant baniere blanche
Et celui qui poꝛte la manche
D'ermine a l'eſcu liſte
Et donez nous cel billete
Au lyon rampant de /ſynople
Et celui que voi la plus noble
A angelos poꝛtrais d'argent
Avec vous avez tant de gent
Que n'en devez nul demander
Mais alez ſans contremander
Lacier les hyaumes viſtement
Car l'oꝛe du toꝛnoiement
Treſpaſſe le joꝛ ſe define
Atant la barquainne define
Car le toꝛnoy ont acoꝛde
Et /Antecriſt a demande
A .i. hyraut qu'as armes crit
Auſſi ont de par /Jhesucriſt
Fait crier ſi que tuit l'entendent
Et cil heraut ces heaumes tendent
A ces bons chevaliers de pꝛis
Qui plus volentiers les ont pris
Que chapeles de floꝛs nouveles
Que moult loꝛ plaiſent tex nouveles
Tencon qui premier a lacie
Le hyaume a l'eſcu embꝛacie
Et ſ'eſt miſe foꝛs du conroi
Par ſon oꝛgueil par ſon deſroy
Eſt alee iouſter premiere
Et freneſie ſa baniere
Poꝛte qui ſ'embat en la preſſe
Tencon contre ſilence leſſe
Cheual coꝛre ſans arreſter
Mais ſilence poꝛ eſcouter
Ot l'auctoꝛite de tencon
Coꝛrous plus ardant que raiſon
Aſſailli debonnairete
Ytant vous di poꝛ verité
Quele a coꝛrous pris et vaincu
Poꝛ ce quele poꝛtoit l'eſcu
De pacience qui tout vaint
Pacience qui ne ſe faint
Leſſe aler contre freneſie
Sus l'eſcu paint de reuerie
Auſſi com ſ'el fuſt foꝛſenee
Si a freneſie aſſenee
Que le heaume li fent par mi
Et du cheval l'abat en mi
La place treſtoute eſtoꝛdie
Priſon fiance freneſie
Quant elle ot le cheval perdu
El ne tint pas poꝛ eſp[er]du
.I. jongleoꝛ qui vieloit
Qui requiſt le deſtrier et l'ot
Amiſtie et pais et concoꝛde
Encontre hayne et deſcoꝛde
Leſſent coꝛre a ennemiſtie
Pais et concoꝛde et amiſtié
Ont faite ſi riche auenue
Que juſqu'es poins en loꝛ venue
Ont les lances frenines fraites
Au toꝛner les chevaus ont tartes
Les grans eſpees de /couloigne
Sans faire demoꝛe n'aloigne
Pais et amiſtié et concoꝛde
D'armes ont hainte et deſcoꝛde
Conquiſes et ennemiſtie
Par los largece et pitié
Mains meneſtrel y ot fait riche
Qu'il n'i avoit aver ne chiche
D'ambedeus pars fu grans l'effoꝛs
Larrecin qui fu pꝛeus et foꝛs
El toꝛnoy ſe fiert a emble
Par grant air a aſſamble
Lance beſſie a loiauté
Moult iouſta par grant cruauté
Mais ce ne fu pas au tant quant
Car bien ot larrecin .ii. tant
Chevaliers que loiauté n'os
Car larrecin o ſoi menot
Homicide et deſloiauté
Et muſtriſſe qui loiauté
La lance grant aaſtine
A deſloiauté abeſſie
Et loiauté toute eſleſſie
Et trebuchiee et reuerſee
Larrecins le filz mienuit
Haſart qui tricherie ſuit
Ne pot atendꝛe loiauté
Menconge devant v[er]ite
Vait fuiant car ne l'oſe atendꝛe
Verite poꝛ menconge pꝛendꝛe
Par le toꝛnoy toꝛne et retoꝛne
Qu'il encontre et ne ſe deſtoꝛne
Il es moꝛs car je le ſai bien
Car verité n'eſpargne rien
A ſes .ii. ennemis enſamble
Qui li veulent ſi com moi ſamble
Et li vouldꝛont coper la coꝛge
A loꝛ eſpee cope goꝛge
Mais juſtice tant ſ'entremet
Qu'a murtreuille le gibet
Les leva a .i. cheval fuſt
Aincois que retoꝛnee fuſt
Si com li cheuax la treſpoꝛte
Traiſon encontre en la poꝛte
Du cheval par en ſon la croupe
Et au retourner a fait ſoupe
D'ypocriſie .i. putel
Mais partout le meſtre chaſtel
A fait trainer meſpꝛiſon
Qui voult par ſa grant meſpꝛiſon.
Murtrier loiauté par deſtriez
O traiſon ſ'eſtoit coulee
Mais veritez toute pꝛouvee
La pꝛent le coutel en la main
Iuſtice encontre tout de plain
Rapine la ſuer roberie
Et abati ſa[n]s lauberie
Rapine et meſconte et meſtret
A hazart a le bꝛanc mi trait
Qui plus fu ioi[n]s que eſpeuriers
S'a des et viſtes et legiers
Et coꝛs loiauté a l'encontre
Mais loiautéz d'un ſol encontre
A fait tantoſt haſart du mains
Hazart tint l'eſpee a .ii. mains
Et l'en fiert mais ce fu en vain
Qu'il fiert haſart arriere main
D'un geter de .xviii. poins
Si qu'il li fiſt voler des poins
L'eſpee par ſa meſcheance
Et a donne double cheance
A haſart dont li meſchei
Qu'a cele cheance cheï
D'ou tant que li deſtriers fu haulz
Soꝛ l'eſcu paint a enuiaus
Mais a cel cop pas ne renuie
Haſart car il perdi la vie
Si n'ot mais de coy enuier
Car hazart conuint devier
Que loiauté ot en envie
Mais ne pot a cele eſcremie
Faire en mal non qu'il cheï
Mais abondꝛoit li meſchay
Car tous joꝛs de l'envie y ot.
Et .i. ribault qui envie ot
Du cheval ot haſart ot ſis
Le demande et ot ſi aſſis
Son francois a li demander
Que il l'ot ſans contremander
Li ſolaus qui d'oꝛe ne ment
Va ſi par mi le firmament
Monte de degre en degre
Qu'il laiſſa tierce tot de gré
Et devers miedie ſe toꝛna
Quant de toꝛnoier ſ'atoꝛna
Abſtinence contre guerſai
Ne iouſta pas par tel eſſai
Com /Raoul de /hodenc iouſta
Car /Raoul a li ſ'aiouſta
Et eſcremi et fu vaincu
Mais a guerſai hauberc veſtu
Ne valut riens a ceſt aſſault
Qu'abſtinence guerſai aſſault
Et le rent mat par atempꝛance
Et a ferue de la lance
Yurece deſſous la mamele
D'un cop eſtoꝛt elle chancele
Et chiet el pꝛe toute eſtoꝛdie
Apres yvrece a ribaudie
Au tournoier d'armes outree
Poꝛ ce qu'ele ert harigotee
Iouſta a lui par tel deſdaing
Qu'en .i. putel en a fait baing
C'onques n'i volt querre autre place
Au treſtoꝛner l'eſcu embꝛace
Et va jouſter a gloutenie
Et l'abat par tele ennaye
Du cheval par enſon la croupe
Qu'en .i. margas en a fait ſoupe
Et l'a en la boe leſſiee
Et vait ferir lance beſſiee
Lecherie plus que les ambles
L'eſcu de gueules et de langues
Li perce jusqu'en la foꝛcele
Son coup eſtoꝛt cele cha[n]cele
Mais ne cheï pas maintenant
Et abſtinence .i. dart trenchant
Quant elle ot froiſſiee ſa lance
Tres par mi la gueule li lance
Et en hault ſ'eſcrie biau meſtre
De tiex moꝛſiaus vous ſai je peſtre
Oꝛ engoulez ceſte goulee
Une foꝛt lance a recouuree
S'en a lecherie ferue
Si roidement ſans atendue
Quele chai honteuſe et mate
De la lance qui pas n'eſclate
Vait ferir par grant vaſſelage
N'ainſne filz vilennie enrage.
En l'eſcu paint de gloutonnie
Et l'empoꝛte jus et l'e[n]nvie
En .i. mergas trouble et puant
Et cil heraut le vont hua[n]t
Car au chëoir donna g[ra]t flat
La le leſſet honteus et mat.
Et ſe plunge entre ceus de la
Vilennie qui cheval a
Tout le meilloꝛ qui ſoit en vie
Poꝛ aſſambler a coꝛtoiſie
Des rens /Antecriſt ſe deſroute
Cele qui n'ert fole ne gloute
La recut au fer de ſa lance
Si roidem[en]t qu'il la li lance
En .i. foſſe toute eſtendue
Et .i. heraut ſans atendue
Qui la vit ou putel flatie
A eſcriee vilonnie
Et diſt Diex c'on l'a bien berſee
Ha Diex com l'a bien enuerſee
Vilennie Diex com biau lit
Oꝛ eſt elle en ſon grant délit
Tout ainſi com heraut la huie
Et tuit li autre a une huie
Ont ſi vilennie huee
C'onques mais ſi tres grant huee
Ne fu en nule place oïe
Quele fu ſi grant que l'oïe
Ala jusqu'a deſeſperance
Et coꝛtoiſie de la lance
Feri ſi roidement loſenge
Que l'eſcu poꝛtrait a loſenge
Li fent et l'auberc li deſmaille
Entre le fer par mi l'entraille
Et penoncel et fer et fuſt
Loꝛs li veniſt miex quele fuſt
Chiez les loſenges herbergie
Car coꝛtoiſie l'a leſſie
Enmi le pꝛe honteuſe et mate
D'un cop eſtoit la lance eſclate
Et ſ'en paſſe mais des retrous
Fiert meſdis qui vient a eſtrous
Iouſter a li par grant deſpit
Et coꝛtoiſie ſans reſpit
Au toꝛner a le bꝛanc mi trait
Et l'yaume a rampoſnes poꝛtrait
S'il poꝛfent ſi qu'en la ventaille
Si que li aciers qui bien taille
Toute la langue li foꝛcele
Et le fiert ſi qu'en la foꝛcele
Et trebuche cel dolereus
Et en venge cel amoꝛeus
Qui tous joꝛs heent meſdiſans
Meſdis remeſt el pꝛe giſans
Et .i. heraut en hault ſ'eſcrie
Oꝛa ma dame coꝛtoiſie
Qui met meſdiſans a declin
A cele a qui furent enclin
Tuit /cil de /la table roonde
La quele eſt la floꝛ du monde
/Mon ſeignoꝛ Gauuain afeta
Et de ſa mamele alaita
/Cliges /yvain et /lancelot
Ainſi dit cil et quant cele ot
Apres ſa jouſte ſon toꝛ pꝛis
Loꝛs ſailli li chevaus de pris
Qui fu meſdis par mi la reſne
Et au heraut qui ſe deſreſne
A donne armes et cheval
Qui furent /keu le ſeneſchal
Li joꝛs eſtoit ja mi partis
Quant de tierce ſeroit partis
Li ſolaus qui le mi parti
Quant poꝛ iouſter des rens iſſi
Auarice contre largece
Et largece vers li ſ'adꝛece
Par tel deſroy par tel eſtrif
Qu'il li tout l'un et l'autre eſtrif
Poꝛ avoir donner et deſpendꝛe
A la lance au large /alixandꝛe
Que largece tint en ſa main
Et largece qui de demain
N'a cure aincois donne en preſent
A convoitiſe fait preſent
De ſon coꝛps en l'eſpace flote
Ne ſambla pas gieu de pelote
Quant li a la la[n]ce plantee
Emmi la targe beſantee
Si que hoꝛs des arcons la plante
Le hyaume a terre ains que la pante
Du pié et toꝛne de rauine
Le deſtrier ſ'encontre rauine
Du cheval d'eſcu et de lance
Si que lui et le cheval dance
Soꝛ la targe de ſoie painte
En .i. foſſe a cele empainte
Et ſ'en vait frain abandonne
Mais tout a col guerredonne
Et au tournoy eſt retoꝛnee
Mais au toꝛnoi a encontree
Auarice toute eſleſſiee
Qu'ele cuidoit avoir leſſiee
Moꝛte et vaincue en mi la place
Mais /li lembart l'ont recontree
Qui eſtoient de ſa meſnie
De largece ſ'eſt bien vengie
Au chaple des eſpees nues
Qu'ele li fait voler as nues
L'eſpie a toute la main deſtre
Se la vertu du /Roy celeſtre
N'eſtent a largece ſa main
Par tans ſeront /francois /Rommain
Qui ſolent eſtre moꝛs et puis
De largece mais oꝛ ne puis
Dire qu'il ſoient large non
Largece n'a mais que le non.
Sa main ſeneſtre a en ſon ſain
Largece n'a pas le cuer ſain
Sa deſtre main li eſt copee
Foꝛs de la preſſe l'a getee.
Coꝛtoiſie qui moult l'a chiere
De ſ'armee li a la chiere
Et la ſous .i. pin eſtendue
Et de ſa main a eſtendue
Une coute de dꝛap de ſoie
Soꝛ la riviere loi[n]g ſe voie
Sous .i. pin fiſt faire une couche
Entre ſes bꝛas largece couche
Deſſous .i. pin vert et ramu
Poꝛ ſon meſchief ſon coy et mu
Cil meneſtrel et detoꝛdent
Loꝛ poins et ſi ſe deſconfoꝛtent
Qu'il getent loꝛ taboꝛs en loing
Poꝛ largece qui a plain poing
Loꝛ ſot donner oꝛ a perdu
Le poing ſ'en ſont ſi eſperdu
Qu'il dient tout oꝛ n'y a el
Viure nous eſtuet de chaſtel
Raiſons du miex que nous poꝛron
Se largece muert nous moꝛron
De povreté et de meſaiſe
Chevaliers ne ſont pas a aiſe
Puis la regretent moult ſouvent
Ne metent mais baniere au vent
Cil povre chevalier de pꝛis
Qui donra mais tire de /tyr
Ne riche paile d'outremer
Coꝛtoiſie a le cuer amer
Par ſon mehaing par ſon meſchief
Et proece des ex du chief
Pleure largece ſi a dꝛoit
Car qui le voit dire en voudꝛoit
Proece ſans largece eſt moꝛte
Proece ſance largece poꝛte
L'eſcu de biaus coulz oꝛphelin
L'eſcu ſans oꝛ ſans ſebelin
L'eſcu mate l'eſcu vaincu
Diex gart francois de tel eſcu
Ains loꝛ rende ains hui que demain
Largece o tout ſa deſtre main
Que je ſai bien que ne puet eſtre
Que largece o ſa main deſtre
Feiſt biau don que ne le pas
S'el le faiſoit je ne cuit pas
Le feïſt ains ſe tarderoit
Tant que li dons quele donroit
Dieu en dꝛoit ceulz pour l'antendue
Que ja n'en ert merci rendue
Devant pꝛouuidence la hardie
plus que le pas fuit coardie
Qui paour tient par mi la reſne
Et pꝛoece bꝛandiſt le freſne
Vers pꝛoece qui tourne en fuie
Cil ſ'en fuient a une huie
Foꝛs du tournoi ſans retoꝛner
Proece encontre au frain tourner
/Cerberus le poꝛtiex d'enfer
L'en ne poꝛroit n'en plom n'en fer
Entaillier ſi tres laide foꝛme
Contre nature qui tout foꝛme
[.]III. teſtes ot et a .i. mot
Vous di qu'en chaſcun hyaume ot
Qui ert de pierres d'aymant
Mais pꝛoece ſans contremant
Dehache le deſtrier et ploie
Et ſa fiche ſi qu'il le ploie
Par mi le mileu de l'eſchine
/Cerberus la lance freſnine
A loingn qui n'eſt pas menue
La terre tramble en ſa venue
Car il vient plus roide que foudꝛe
Et fait par l'air tant voler poudꝛe
Que li ciex en eſt noir et troubles
Plus troubles vient a .iiii. troubles
Qu'eſtoꝛbeillons plains d'ennemi
Ne recule pié ne demi
Proece ains vient toute eſleſſie
Et ſi la fiert lance a beſſie
Par tel air par tel angoiſſe
Que la lanche freſnine froiſſe
Dont li troncon volent as nues
Au chaple des eſpees nues
Fierent tex cops que tous ſ'eſtonnent
Moult menuement ſ'entredonnent
Par bꝛas par teſtes et par cous.
Retraites ſoupanes et cous
Soꝛmontees et entre deus
Si qu'en ne pooit entre eulz .ii.
Veoir que les eſpees nues
Proece fait voler as nues
A .i. ſeul cop au bꝛanc d'acier
.II. des teſtes ſon adverſier
Et refiert treſtoute a tel foꝛce
Que ne li vault une eſcoꝛce
Le cerf dont il ot fait colier
Car le tiers chief li fait volier
Par un lair comme une pelote
Le cheval pꝛoece en la flote
Treſpoꝛte qu'il ot dure bouche
/Cerberus dont elle couche
Eſt trebuchiez en .i. margas
Ou il remes honteus et mas
Apꝛez yceulz ne ſe faint pas
De venir plus toſt que le pas
Virginite pour aſſambler
Si qu'en ſon venir fait trambler
.C. piez enuiron ſoꝛ la terre
Et pour miex affiner la guerre
A chaſtee en ſa compaigne
Et bꝛoche le cheval d'/Eſpaigne
Encontre foꝛnication.
Et ſoꝛ l'eſcu paint a lyon
L'a ferue ſi roidement
Qu'eſcu et haberc li deſment
Et la flatie ſans delay
Enuerſe en .i. puant lay
Que ce n'ert ſe merveille non
Et coꝛt beſſie le gonfanon
Contre auoultire bien et bel
Car largece duis de boꝛdel
Li couſt aus bꝛas le bꝛas au coꝛps
Et le poꝛte des arcons foꝛs
En .i. putel tout enuerſe
Et au retoꝛner herberge
Li tiers filz foꝛnication
Arme d'aomination.
Qui cuidoit bien valoir .i. conte
L'eſcu au mirouer de honte
Li a fendu a la foꝛt lance
Et au courir de la foꝛt lance
Ens en .i. tay en el fait ſoupe
Au treſpaſſer ſon nez eſtoupe
Poꝛ la puour ou il reclot
S'a .i. buef beüſt a eſcot
S'en eüſt il pechié eü
Tant a du puant l'a beu
Qu'en puour eſt cilz renaieis
Par mon pechié puant neis.
Mais en une ſaucie eſpeſſe
/Li Diex d'amoꝛs et /la deeſſe
/Cupide et /venus enſamble
Remonterent ſi com moy ſamble
Foꝛnication de pꝛim ſaut
Loꝛs veïſſiez trop fier aſſaut
Quant /cupide .i. ars /truquoys
Tendi et a trait de manois
A conſtance en mi ſa gent
L'eſcu au rouſſeignol d'argent
Embꝛace amoꝛs li empannez
Et loꝛ lait coꝛre lez alez
De la riviere et tout dꝛoit point
Vers chaſtee qui en mal point
Fuſt ſ'el ne fuſt toꝛnee en fuie
Meſtier li eſt qu'ele ſ'en fuie
Car ele ne vient ſ'en fuiant non
Fuir l'eſtuet ou ſecenon
Ele fuſt pꝛiſe et retenue
Car /cupide ſans retenue
Li a lancie maint dart felon
Mainte fois fu pꝛez du talon.
A ma dame virginité
/Venus maint cop li a gete
La mere foꝛnication
Qui tint l'arc de temptation
Qu'amoꝛ encoꝛda d'une coꝛde
Que coꝛdee par grant concoꝛde
Ot de troucons a damoiſeles
/Venus qui virges et puceles
Aſſault rendi ſans atendue
L'arc amoꝛeus ſans atendue
Une ſaiete barbelee
Qui eſtoit d'amoꝛs empanee
Si vola hault par l'air bꝛuiant
Virginite qui va fuiant
Euſt par mi le coꝛps navree
Mais la dame ſ'eſt deſtoꝛnee
Eſpoentee et eſbahie
Et ſe miſt en une abbaye
Poꝛ ſon pucelage garder
Plus toſt c'on ne puet eſgarder
La ſaiete qui ſ'on vola
Cuilli ſi roidement vola
Tout dꝛoit par mi a la volee
Qui par mi les ex m'eſt volee
Dedens le coꝛps jusqu'a penoncel
Moult reclama Dieu et ſes nons
Quant le fer froit au cher ſenti
Mais trop a tart me repenti
Dont je ving au toꝛnoiement
Car li dars ſi parfondement
Feri qui raidement deſcoche
Qu'il encocha jusqu'a la coche
Dont amoꝛ l'avoit encochie
Mais /venus qui la deſcochie
L'ame fiſt par mes eux paſſer
Sans mes ex berſier ne quaſſer
Dont je me duel et ſi ai dꝛoit
Mais qui le voir dire en voudꝛoit
/Creſtien de Troyes diſt miex
Du dart navré del dart des eux
Que je ne vous poꝛroie dire
Si fu ſi bien de ma matire
Que je deiſſe de chaſtel
Je deſcendi que n'y ot el
Soꝛ l'erbe vert mat et penſis
De la doloꝛ du cop m'aſſis
Mal et deſtrois et angoiſſeus
Moꝛt fuſſe ſe je fuſſe ſeulz.
Les bꝛas de fer me confoꝛta
Mon cuer trove grant confoꝛt a
En lui qui eſt deſconfoꝛtez
Ne cuidai ja que confoꝛtez
Peüſt eſtre par nul effoꝛs
Tant fu li cous peines et foꝛs
Que je recui par grant meſchief
Eſperance me tint le chief
De ſ'eſpee entre ſes mains
Car tant eſtoient mas et vains
Qu'a po ne me convint paſmer
Adont me pꝛis a deſarmer
Mi compains pour cercher la plaie
Mal avoit ſa painne emploie
Car il n'y pert de plaie point
De tant eſtoie en piour point
De trop et en graindꝛe aventure
Ne trouuaiſſent cop ne pointure
Treſtout li mire de /ſalerne
Adont fiſt entoꝛ moy .i. cerne
Auſſi com poꝛ moy enchanter
Et puis me fiſt au col poꝛter
.I. bꝛief par nigromance eſcript
Ou il ot les nons /Antecriſt
Eſcript en /grieu et en /latin
Moult eſtoit bon poꝛ auertin
Le bꝛiez Mais li bꝛiez ne li non
Ne me firent ſ'empirier non
Ma doloꝛ qui point n'aleia.
D'eſperance tant m'agreua
Que je chai en paumoiſon
Tous paſmez une aviſion
Vi qui bele ert a deuiſer
Car tant me plot a aviſer
Que tous li cuers m'en reſioi
C'onques a nul eſvanoy
Si bele viſion n'avint
Vis me fu que devant moy vint
En tele foꝛme com doit eſtre
Foꝛme de deeſſe celeſte
La ou g'iere en ma ceſſion
/Venus a grant pꝛoceſſion
De deeſſes qui par amoꝛs
Vindꝛent pour moy donner ſecoꝛs
Du mal qu'avoie au cuer dedens
Qui eſt pire que ma; dedens
A tant ſ'aſſiſtrent errans
Et la deeſſe en ſon giron.
Me tint le chief poꝛ aleiance
Amoꝛs m'apoꝛta d'eſperance
Une merueilleuſe poiſon
Qu'avoit confite en ſa maiſon.
Delectation l'eſpiciere
La poiſon eſt de grant maniere
D'eſpices chaudes et agues
N'a ſururgien ſouz les nues
Qui pas la ſceüſt contre faire
Delectation la fiſt faire
La poiſon eſt de grant maniere
Qui moult eſtoit plaiſant et chiere
A /Biau Repaire en ſouſpecon
D'angoiſſe et de double fricon
Et de ſouſpirs la deſtrempa
Trop eſtoit foꝛt ſi la tempꝛa
D'une longue penſee fruite
En angoiſſe la leche frite
Amoꝛs ſi ioint com il eſtoit
Devant /venus en piez eſtoit
Qui tuit mon chief en mon doꝛmant
Et temptation vait devant
Com diſciple devant ſon meſtre
La poiſon tint en ſa main deſtre
Contre le cuer tout de ſon gré
Et me diſt baſſet a ſecré
En une fiole d'argent
Amoꝛs la fiole me tent
Et me dit que ſans nule doubte
Beuſſe la fiole toute
En non de bien et de ſanté
Et je qui voil ſa volenté
Acomplir tout a ſa deuiſe
De ſa main la poiſon ai priſe
Et l'a .i. po aſſauoꝛee
Mais tant la trouvai ſauoꝛee
Quele ne m'ot point de foiſon
A .i. ſeul trait bui la poiſon
Je bui treſtout Dieu moie coupe
Si qu'en l'argent n'en remeſt goute
Qui me duſt l'ame du coꝛps traire
S'eſperance la debonnaire
Ne fuſt qui me fiſt .i. entrait
Quant el me vit entrer el trait
Ou je cheï par bon eſpoir
.I. emplaſtre de bon eſpoir
M'aſſiſt ſoꝛ le coſté ſeneſtre
Et a pꝛez m'aſſiſt ſa main deſtre
Contre le cuer tout de ſon gré
Et me diſt baſſet a ſecré
Soꝛ le chief .i. merueillous charme
Et me poꝛtait d'un po de baſme
Le non /diane en mi le front
S'il charme greignoꝛ bien me font
Que les poiſons de ſa fiole
Car rendue m'a la parole
Et mon ſens et mon eſperit
Se vint et quant fui eſperis
Clamer m'alai a la juſtice
Qui tous les amoꝛeus juſtice
De trois qui ceſt mal m'oꝛent fais
Savoir liquelz a plus meffais
Mon cuer la deeſſe ou mon oeil
Li juges diſt blaſmer ne weil
La deeſſe par foy je non
/La Dame qui venus a non
Ne te cuida mie blecier
A .i. autre voloit lancier
Non pas a ty ſon iauelot
N'onques l'oil quant lanciee l'ot
Ne ſe daignerent deſtoꝛner
A tes eux pꝛies bien atoꝛner
Ceſte traiſon toute aperte
Qu'il recurent a poꝛte ouuerte
Sans contredit ton adverſier
El chaſtel dont il ſont poꝛtier
Ty oeil quele voir en retrai
T'ont fait de traiſon .i. trait
A icel mot loꝛ gage tendent
Et de traiſon ſe deffendent
Li oeil et dient la raiſon
Li cuer font il de la meſſon
Eſt li ſires nous li ſergent
Qui ſon voloir ſans contremant
Raiſon ſi toſt com il nous mande
Quanqu'il nous diſt quanquil commande
Reſon ne ja n'iron en pꝛoie
Se li cuers ne nous y enuoie
Sans qui commant rie[n]s ne faiſon
A ce mot vi venir raiſon
La moie fille ſapience
La diffinitiue ſentence
Rout et tout la deſputoiſon
Et diſt li cuers fu la choiſon
De mal qui a plus en doit eſtre
Blamez que nulz qui la feneſtre
Leſſa ouuerte comme folx
Par ou li deſcendi li coux
Du er dont il guerra a tart
Raiſon a fait loiel eſgart
Ce dient tuit communement
Mais onques poꝛ ſon jugement
Ne leſſai a eſgarder qui
Fu vaincus et li kex vainqui
Tant que je ſoy poꝛ verité
Que ma dame virginité
Et chaſtee et loꝛ gent toute
Fouirent tant qu'il ont ſans doute
Gaaignie le ieu par aler
Qui oÿ onques mais parler
De ſi gloꝛieuſe victoꝛe
Ceſte fu bien ſans noue gloꝛe.
D'autre part bꝛuiant ſ'entreuiennent
Et les lances beſſiees tiennent
Sainte fois encontre hereſie
Qui ert couſine ypocriſie
La ſingece de charité
De /cahoꝛs de la charité
D'/aubijois et de /tholoſan
Et de paine et de mellan
Y ot milliers mais ne ſai quans
De /hougres de /popelicans
Qui vindꝛent par une poſterne
Mais par la cité de /biterne
Oꝛent paſſe le joꝛ devant
Sainte fois loꝛ vint au devant
Et li meſtres de sainte ygliſe
Qui ont ſi bien largece empꝛiſe
Que dampne furent maintenant
Li /aubijois li /tiſſerrant
Et pꝛis et repꝛis a .i. point
De la foy dont ne tiengne[n]t point
Poꝛ leurs interpꝛetacions
Mais loꝛ fauſſes opinions
Cerche tant ſainte gliſe et pꝛeuue
Que de maluaiſte les repꝛeuue
Et ſainte fois poꝛte hereſie
Soꝛ l'eſcu paint de ſymonie
Entre les piez a /teſſerrans
Et lui et les /popelicans
A fait liurer a la juſtice
C'eſt dꝛois que fauſſeté juſtice
Loꝛ fiſt faire de daignement
A tous enſamble .i. jugement
Selonc ce c'oꝛent meſerre
Car tous les fiſt ardoir en re
Maintenant que il furent pꝛis
De ce lo je juſtice et pꝛis
Que ſans merci tous ſes priſons
Fait devenir cendꝛe et tiſons
A l'eure qu'oꝛgueil aſſambla
Veraiement a tous ſambla
Que la foudꝛe deüſt deſcendꝛe
Quant je vi la place poꝛpꝛendꝛe
Lui et ſa gent de toutes pars
En eulz me feri li eſpers
Des armes com vi luire l'oꝛs
Et de paoꝛ ſenti ay loꝛs
Plus de .c. fois en .i. randon
Quant oꝛgueil vint frain a bandon
Contre ma dame humilité
D'oꝛgueil vous di poꝛ verité
Que baucent deſſous li chopa
Si roidement c'une ſoupe a
Faite d'oꝛgueil en .i. margas
Ou il remeſt honteus et mas
Qu'onques aloꝛs ne tint priſon
Et boban par ſa meſpꝛoiſon
Let aler contre pacience
Et deſpit contre obedience
Mais trop cruaument ſ'entraiouſtent
Qu'en coſtiſſant des lances iouſtent
De chevaus d'eſcus et des pis
Siqu'a coſtir cheï deſpis
Et boban perdi les eſtris
Adon commenca li eſtris
Quant humilitez pꝛiſt ſon toꝛ
Quant vanteria en ſon retoꝛ
Encontre qui poꝛpꝛent les places
Soꝛ l'eſcu poꝛtrait de menaces
La fiert et ſi tres bien iouſta
Que vanterie en la jouſte a
Encontre qui poꝛpꝛent les places
Le cheval perdu maintenant
Et cointiſe en ſa main tenant
Une lance painte encontre a
Mais cointiſe a tel l'encontra
Que cointee cruel acointe
Que ſans nule cointiſe acointe
Cointerie ſi cointement
Qu'a ciel a tel acointement
De ſa lance vont les eſclices
Coi[n]tiſe que neſt des eſpices
Vole a terre toute eſtoꝛdie
Au releuer acoꝛt folie
En ſon col une grant macue
Et ſapience .i. cop li rue.
Du bꝛanc au prouerbe letre
Qu'abat moꝛte folie el pꝛe
Qui ne doubte devant que pꝛent
Nicetez qui vint nicement
.I. cheval bꝛandiſt coꝛre leſſe
Prouidence vers lui ſ'eſleſſe
Quant elle vit le bꝛanc mi trait
D'un glaive a argument poꝛtrait
Le poꝛte el pꝛe ſi cruelment
Qu'il n'ot ne ne voit ne entent
/Pluto ſ'embat en mi la flote
Ne ſambla pas geu de pelote
Quant /raphael le cheval a
Eſlaiſſie contre ceulz de la
Et a fait trop riche auenue
Qu'a terre poꝛte en ſa venue
/Pluto ſi durement l'empaint
Que l'eſcu de tenebꝛes paint
Que li a toute la canole
A .i. jongleur qui citole
A done armes et cheval
Qui furent andui infernal
Mais ne fu pas au donner chiches
Car moult fu biaus li dons et riches
D'un deſtrier qui bien vault .c. mars
A ſecourre /Pluto vint /Mars
Qui eſt Diex de batailles diz
L'eſcu embꝛace et ioint au pis
Et leſſe coꝛre a ceulz de la
/Mars qui tres roidement ala
Fiert /raphael de maintenant
Queil vit en ſa main tenant
Une lance ou ot blanche enſaigne
Et /raphael en mi la plane
Du lonc de la lance le poꝛte
Si com le deſtrier le treſpoꝛte
/Mercurius a enuerſe
Et au retoꝛner a berſe
/Neptunus le Dieu de la mer
Et au quart cop ſe vait clamer
De /necturnus a ſa foꝛt lance
Et au toꝛner /Apolin lance
En .i. margas de tel randon
Qu'il feri de ſi grant randon
Que di glaive parut derriers
Plus d'une toiſe et li deſtriers
/Gabꝛiel pꝛiſt le frain as dens
Envers et encoſte et as dens.
Tous ceulz que il encontra poꝛte
Si com le deſtrier le treſpoꝛte
Li ſolaus ot ja tant erre
Que par le grant chemin ferre
Eſt venus de midi a nonne
/Antecriſt le frain habandone
Au foꝛt deſtrier deſmeſure
Qui de pꝛin ſaut a meſure
Du pꝛe fauchie plus d'un arpent
La poudꝛe en fait voler au vent
Le cheval qui vault .i. muy d'oꝛ
La oiſſiez ſonner maint coꝛ
Et mainte trompe et mainte arene
Et au ciel la poudꝛe et la reingne
A grans eſtoꝛbeillons levee
Et come bꝛoillas en valee
Tout le toꝛnoient famer
Et ces chevaliers eſcumer
Soꝛ les hyaumes par grant angoiſſe
/Antecriſt que /Pluto angoiſſe
D'aſſambler et de faire d'armes
L'eſcu a pꝛis par les enarmes
Et bꝛoche contre /michel l'ange
Et l'eſcu comme .i. dꝛapel lange
Li a trové a cele empainte
Et la lance a dyabliaus painte
Que au ferir eſclate et froiſſe
Et /Michiel par ſi grant angoiſſe
Le fiſt par foꝛce des eſtriers
Mais foꝛs fu li arcons derriers
Si qu'il n'eſclate ne ne froiſſe
Son cop eſtoꝛt ſa lance froiſſe
Ou avoit paint maint angelot
/Michiel qui pas ne chancelot
S'eſt plungiez entre ceulz de la
Et ſi tres roidement ala
Pour eulz laidir et domager
Qu'aſi les a fait deſrengier
Et departir a grans tropiaus
Com li eſpeuriers eſtourniax
Et retourne le bꝛanc mi trait
Soꝛ le heaume a elles poꝛtrait
/Le fiere Antecriſt a bandon
Et /Michiel lui fiert de randon
Soꝛ le hyaume du bꝛanc molu
Si qu'a ferir li a tolu
Et camaheus et crapaudines
A grans eſpees acherines
Fierent com feures ſoꝛ enclume
Si que li feus d'enfer alume
Et envole mainte eſtancele
/Michiel le fent et eſcarcele
Le hyaume agu de chief en chief
Et /Michiel reſt a grant meſchief
Soꝛ le hyaume du bꝛanc molu
Si qu'a ferir li a tolu
Car le heaume a elles poꝛtret
Li a ſi eſtroue et frait
Que les eles en fait voler
Par tans couueniſt a foler
Ou fiancier ou l'un ou l'autre
Mais d'ambes pars lance ſoꝛ fautre
Vient chaſcun ſon ſeignoꝛ ſecoꝛre
Loꝛs veïſſiez vertus acoꝛre
Poꝛ pꝛendꝛe /Antecriſt tout entour
Et il plus foꝛs que une tour
Ert ſi es arcons affichiez
Com ſ'il y fuſt nex ou fichiez
Mais trop a ſoffert longuement
Ja fuſt li rois du firmament
Venu a /saint Michiel aidier
Mais ja avoit fait fiancier
/Michiel a /Antecriſt pꝛiſon
Et a mis le frain a bandon
Et leſſe coꝛre a ceulz de la
Et ſi tres roidement ala
Con la foudꝛe du ciel deſcent
Si qu'en ſon venir plus de .c.
A fait reu[er]ſer jusqu'a lices
Loꝛs veïſſiez vertus et vices
Ferir enſamble pelle et melle
Menuement come grauele
Y erent vertus ſans arreſter
Ne fuierent te tempeſter
Et de chachier et de ferir
Tant que deſeſperer ferir
Les fierent en deſeſperance
Loꝛs ſ'en retoꝛne a eſperance
Voiant le roy du firmament
C'eſt la fin du toꝛnoiement
Dont li depart qui vient apres
Et plus delitables adez
Li ſolaus qui clarté donnot
Leſſie l'eure de nonne ot
Et pere le firmament ala
Tant que par le pui devala
Des veſpꝛes el val d'occident
Quant li ſires du firmament
Qui deſarmee avoit la face
Ancois que partiſt de la place
/Raphael mande qu'il ſe pꝛengne
Confeſſion et penitance
Et /raphael qui pas ne tance
Ains obeiſt au premier mot
Les navrez que de cuer amot
Guerpi par la vertu celeſtre
Et de largece ſa main deſtre
Rendi par ſi bel maieſtire
Il n'eſt hons nez qui ſceüſt dire
La quel main on li a copee
Qui l'a li a ſi bien ſoudee
Qu'il n'i pert couſture ne poi[n]te
Mais je doubt trop qu'en ſi mal point
Ne ſeult jamais c'in el ſeult eſtre
Car on tien a ſi tres bon meſtre
/Raphael qui a loy divine
Appella la Dieu medecine
Que je croi que quanqu'il a fete
Recoit ſainte bone et parfaite
Car Diex qui oure par ſa main
Du moꝛt fait vif de l'enfer ſain
Con cil qui tout de noient fiſt
Et /raphael tant ſ'entremiſt
Qu'il gueriſt tous les afolez
Et ſuſcita les decolez
Et les navrez ferus des vices
Confeſſion autres deuices
Ne quiert que de li preſenter
S'aide et ſes plaies tenter
Car volentiers y met ſ'entente
Toutes les plaies qui le tempte
L'eue ſainte devotion
Et lermes de contriction
Qui ſont plus ameres que ſuies
Et penitance les eſſuie
Au dꝛap de ſatiffacion
Loꝛs me ſemont contriction
Que j'alaſſe parler au mire
Qui toutes les plaies remire
Des qu'en avoie a aiſement
Loꝛs ala a lui bonement
Et en ploꝛant criai merci
Et li dis Meſtres j'ai menti
Car je fui trop en mauvais point
Car /venus de ſon dart me point
Et /cupido ſi tres parfont
Que ſe cil mire ne m'en font
Qui m'ont le dart el cuer plante
Ja n'avrai joie ne ſanté
Li meſtre qui tout mot a mot
Ml't doucement eſcoute m'ot
Me reſpondi iſnel le pas.
Amis ne vous eſmaiez pas
Mais alez a confeſſion
Et gardez que devotion
Vous maint a li qui moult l'a chiere
Si vous fera plus laide chiere
Et plus volentiers vous garra
Et a vos plaies vous querra
.I. oignement dous et trempe
Qu'il a confit et deſtrempe
Des lermes de compuction
Savoir poez ceſte vltion.
Gueris ſera en .i. moment
Et ſachiez bien que autrement
Ne poꝛrez avoir medecine
Ne par herbes ne par racine
Que ſi parfont enracinez
Eſt li maulz que deſracinez
N'ert ja foꝛ par confeſſion
Loꝛs me ſemont compuction
Et devotion ſa couſine
Que alaſſe querre mecine
Si com li meſtres m'enſeigna
Et mon cuer faire ne daigna
Au conſeil croire demoꝛee
La ot mainte lerme ploꝛee
Dont ma dame confeſſion
Une merueilleuſe onction
Me fiſt et tant ſ'umilia
Quele meiſmes me lia
Sus mes plaies moult doucem[en]t
Icilz gloꝛieus oignement
Et une bente bele et blanche
Qui eſtoit faite d'une manche
De la chemiſe penitance
La ſouffri tout en paciance
Quanque la dame me voult faire
Liement me mis au repaire
Quant je me ſenti bien confes
Et legierement car mon fez
Dont j'avoie mon col chargie
M'a confeſſion deſchargie
Loꝛs m'en reuing au pont de fuſt
Ou cuidai que bꝛas de fer fuſt
Que je tout ſeul y oÿ laiſſie
Mais je le vi tout eſleſſie.
Deſeſperee deſperance
Entrer c'onques puis m'acointance
N'ama des que confeſſion
Me mena a devotion
Et penitance la miergeſſe
Par mi une ſauſſoie eſpeſſe
M'en ving tout dꝛoit a eſperance
Foꝛs eſt la cité ſans doutance
Et ſiet en trop bele veue
Onques tele ne fu veue
Car elle eſt trop bele a diuiſe
/Ezechiel qui la deuiſe
Dit quele a devers oꝛient
[.]III. poꝛtes devers occident
Autant en povreté vous di
Qu'autant en a devers midi
Et tout autant par devers biſe
N'erent pas fait de pierre biſe
Li mur dont elle eſtoit fermee
Car elle eſtoit cloſe et pauee
De pierre precieuſe toute
Et ſachiez bien ſans nule doute
Que li ange guetent tous joꝛs
La cité de nuis et de joꝛs
Ce ne tiengne nulz a merveille
Et ſe nulz eſt qui ſ'en merveille
/Le prophete ezechie liſe
Et ſi cointement la deuiſe
Qu'aprés ſon devis n'y os meſtre
Ne mot ne ſillebe ne lettre
Mais itant di a la perſone
Qu'/ezechiel la cité nomme
/Iheuſalem mais l'eſperance
Et qui ſcet la ſenefia[n]ce
De la /monjoie du parvis
Il doit bien ſavoir ſans avis
Que /monjoie eſt li nons expres
De dꝛoite viſion de parez
Que /iheuſalem ſenefie
par de devers la praerie
Mais nulz en mi la meſtre rue
Chaſcuns les bꝛas au col me rue
Et me font m[er]ueilleuſe joie
Cele nuit iui a la /monjoie
Du parvis a l'oſtel largece
L'uis a l'uis de l'oſtel proece
En unes ſales lambꝛoiſſies
En .ii. chaieres deboiſies
Siſtrent largece et coꝛtoiſie
Par amoꝛ et par compaignie
A .i. hoſtel enſamble vi[n]dꝛent
Lobes qui trop bien loꝛ auindꝛe[n]t
Oꝛent d'un vermeil ſinglaton
A boutonnez qui de laiton
N'i erent pas mais d'oꝛ et d'argent
Furent tiſſues bel et gent
Et eſtoient d'une facon
N'eſt pas meſtier que nous facon
Mencion des mos de la coꝛt
Ne du pueple qui y acoꝛt
Quant on ot fait l'eue coꝛner
Que largece avoit fait crier
Que treſtuit a loꝛ oſtel viegnent
Onques de li loꝛ gages pꝛennent
Tuit cil qui n'y poꝛront venir
Car elle veult oſtel tenir
Tout le plus bel de la cité
Li baron qui furent cité
Vindꝛent a grant proceſſion
La veille d'une aſcenſion
En eſté a .i. mecredi
Fu la feſte que je vous di
Qui moult fu noblement ſervie
Car largece ſ'eſtoit garnie
De quanque pot de bon trouver
En air et en terre et en mer
Et en eſtans et en riviere
Des chevaliers poꝛtant baniere
Qui y furent tant en y ot
Ne poꝛroie ſans grant riot
Aconter en nule maniere
Largece ſiſt toute premiere
Au large dois laſſus a mont
Ou plus biau pales qu'en ceſt mont
Que onques largece veïſt
Car largement y aſſeiſt
.xM. chevaliers enſamble
Contre largece ce me ſamble
Siſt coꝛtoiſie la coꝛtoiſe
Qui devant lui a une toiſe
Du chief du dois me fiſt ſeoir
Poꝛ ce quel me voloit vëoir
Et honoꝛer ſoꝛ toute rien
Apꝛez ice vous di je bien
Qu'a grant largece et a grant joie
Des viandes de la /monjoie
En largece et ſa coꝛt ſervie
Par les diſciples coꝛtoiſie
Qui bien le ſoient aceſmer
De dꝛap qui vindꝛent d'outrement
Si qu'il ſont bel ſoꝛ toutes choſes
Et ſeruent en chapiaus de roſes
Que tuit coꝛtois doivent poꝛter
Bien parut as mes apoꝛter
Qu'il ſeruirent moult cointement
De dignes mez moult richement
Dignes de ſi digne diſner
A diſner ſi riche diſner
Ne ſe doit nulz ſe ſaint et digne
Ne ſe ſent dignement ſi digne
Qui la conſcience digne a
O lui dignement ſe digna
/Saint iehans que /li rois benignes
Ne mont au diſner dont ert dignes
Ja voloit on lever les tables
Quant /Gabꝛiel li conneſtables
Le roy vint laiens en preſent
Qui a pꝛoure .i. pꝛeſent
D'un pain li roys au dez amont
Mais ceſt le plus biau pain du mont
Si blanc ſi pꝛés ſi prechieus
Que deſirrans et enuieus
Sui encoꝛ de tel pain avoir
Car l'en ne puet poꝛ nul avoir
Trouuer une denree a tendꝛe
C'eſt la manne que Diex deſcendꝛe
Fiſt pour beſoins raſazier
N'oꝛ pour beſans ne poꝛ denier
N'en a point car li rois le donne
Si largement qu'il abandonne
A ſon mes cil qui dignement
Nel pꝛent recoit ſon dampnement
Car cilz pains eſt li pains de vie
Li pains aus anges dont ſervie
Eſt leur table voire toudis
N'ont autre mes en paradis
Foꝛs .i. qui eſt de riche atoꝛ
Sa viſion loꝛ creatoꝛ
Qui ſi les peſt et raſſazie
Avoir ne veulent autre vie
N'autre biande n'autre mez
En la manne ot riche entremez
Car a coꝛt en vient po de tiex
En blanches touailles d'autiex
L'apoꝛterent dui angelot
/Gabꝛiel qui preſente l'ot.
L'oſtel pais la ſuer amiſté
Et li autre l'oſtel pité
A tous les eſgarez enſaingne
Monſtre l'oſtel virginité
Iex partoute la cité
Des chevaliers paroles tiennent
Chiez le roy moult biau ſe contiennent
En ſon palez laſſuz amont
Si que pour tout l'avoir du mont
Ne me teniſſe d'aler la
Tous ceulz que nus o moi n'ala
Par le vis que la meſtre poꝛte
Quant cil me vit qui les cles poꝛte
Maintenant me diſt eſtez ſus
Biau ſire ceens n'entre nulz
S'il n'eſt moult iuſtes et loiaus
Vous n'eſtes mie deſloiaus
Ne n'avez mie robe honeſte
Quant vous n'avez robe de feſte
Comment entraſtes vous ceens
Quant je vi que c'eſtoit neens
Et que n'y demoꝛoie pas
Moult vergondeus en el le pas
Du lieu iſſi qu'il n'y ot el.
Et m'en reuing a mon hoſtel
C'onques meilloꝛ oſtel ne vi
Chiez largece fumes ſervi
De plus que il ne nous convint
La nuit a la et le joꝛ vint
Qu'en la tour du chaſtel amont
Poꝛ enluminer tout le mont
En eſtiues de /coꝛnouaille
Coꝛna la guete qui ſans faille.
Le ſot pꝛendꝛe ſi bien a point
Qu'il en paroit ſi pres que point
Ne paroit qu'il en apparut
Ains que /phebus y app[ar]ruſt
Qui eſtaint toutes les eſtoiles
Veritez et vraies nouveles
D'/Antecriſt et palais conta
Et dient tuit que grant honte a
Faite au roy et a ſa coꝛt
A itant la parole coꝛt
Jusqu'au ſeignoꝛ du firmament
Qu'/Antecriſt ui volentiers ment
Qui ot fiancie pꝛiſon
Par oꝛgueil et par meſpꝛiſon
Avoit mentie ſa fiance
Et que il de deſeſperance
Seroit emblez a miennuit
Et traiſon qui le conduit
La ja mis el chemin ferre
D'enfer et ont a tant erre
Le chemin que /Raoul deſcript
Que ja ſunt les gens /antecriſt
A une joꝛnee d'enfer
Car du /royaume mulciber
Ont ja paſſez les pons eſtrois
Et tous les infernaus deſtrois
Et que traiſon qui les guye
En la cité de foy mentie
Les a fait par paoꝛ embatre
Et ont fait chaucies abatre
Et tous les pons tous abatus
De la vile ou ſont embatus
Et la vouldꝛont contre tenir
Se nulz oſe ſoꝛ eulz venir
Quant ot li roys du firmament
Et les barons a parlement
En ſon gnt palais aſſambla
Sapience ce me ſambla
Qui moult eſt de plaiſant maniere
Son avis eſt toute pꝛemiere
Et bel et gentement parla
Sire ſe vous alez par la
Par ou /Antecriſt eſt alez
Vous n'avrez ou en deualez
Tous les deſtruis de foy mentie
Et je ne ſai nule partie
Par ou nulz hons moꝛtiex y aille
Et foy mentie et de uinaille
Et de chevaliers ſi garnie
Q[ue] nul pꝛince qui ſoit en vie
N'a pooir de lui afamer
Car elle eſt choſe de la mer
D'une part et d'autre partie
De riviere poꝛtant navie
Si u'ain n'i puet avenir
Ne nulz n'y puet ſiege tenir
A mains de .ii. liues entour
N'il n'y a toꝛnele ne tour
Que mutiber n'ait maconnee
De tieule o cyment deſtrempee
Cuite en la foꝛnaiſe d'enfer
/Vlcanus les poꝛtes d'enfer
En ſa foꝛge toutes foꝛia
Qui ſon hoſtel en ſa foꝛge a
Prez du gouffre de ſathanie
El grant chemin de foy mentie
Et de moꝛt ſoubite et d'enfer
Et non poꝛquant vez cy yver
Que nulz hons ne puet oſtoier
Leſſiez /Antecriſt delaier
Tout c'eſt yuer a foy mentie
Et metez vostre baronnie
En vostre gloire pardurable
Tuit li baron a vostre table
Tiengnent le conſeil ſapience
Tuit ſ'acoꝛdent a ſa ſentence.
Et li roys qui moult het diſcoꝛde
Soꝛ tous a ſon conſeil ſ'acoꝛde
Et prouidence ſa ſuer mande
Et eſtroitement li commande
Quel aut avant et qu'il poꝛuoie
Le bel chemin la bele voie
De paradis qui moult eſt dꝛoite
Mais moult pareſt dure et eſtroite
Et y a moult de felons pas
Prouidence en el le pas
Le hernois la tour atoꝛna
A tant d'/eſperance toꝛna
Li roys du ciel a moult grant joie
Mais au partir de la /monjoie
M'eſtoit il vraiement avis
Que c'eſtoit la gent du parvis
Car trop grant joie demenoient
Qui oiſt comment tuit tenoient
Les loꝛains a ces chevaliers
Moult les eſcoutaſt volentiers
Et moult foꝛment ſe delitaſt
Et moult volentiers eſcoutaſt
Ces nouuiaus chevaliers chanter
Et ces meneſtriex fleuter
Qui ſont courtois et enuoiſiez
Et ſoꝛ ces chevaliers pꝛiſiez
Hennir ces riches palefrois
Des anges fu grans li effrois
Qui ſonnent trompes et arainnes
De .x. grans lieues toutes plainnes
Voit on cele proceſſion
Au ſaint jour de l'aſcenſion
En lair ſ'enmonterent laſſus
Chantant sanctus sanctus sanctus
Et vont au ciel par mi les nues
A tant entrens par mi les rues
La celeſtial region
A ma dame religion.
Me bailla li rys en conduit
Mais encoꝛ ne m'a pas conduit
Religion ce m'eſt avis
D'eſperance jus qu'en parvis
Mais en la fin ai tant erre
Que je ſui ou chemin entre
De parvis ſ'en moy me remaint
Religion quel ne m'i maint
Qui m'a ja mene par la main
Iuſqu'en l'egliſe /saint germain.
Des pꝛez lez les murs de parvis
Se de lui ſervir ne recroi
Si vraiement come je croi
Que ſe bien fais il m'iert meri
Y maint Diex /huon de /meri
Qui a grant paine a fait ce livre
Car n'oſoit pas pꝛendꝛe a delivre
Le bel francois a ſon talent
Car cil qui trouverent avant
En ont cuilli toute l'eſlite
Poꝛ ce eſt ceſte oevre mains eſlite
Et plus foꝛte a acheuer
Moult mis grant foꝛce a eſchiuer
Les diz /Raoul et /Creſtiens
C'onques bouche de Creſtiens
Ne diſt ſi bien com il diſoient
Mais quanqu'il diſtrent il prenoient
Le bel francois treſtout a plain
Si come il loꝛ venoit a main
Si qu'apꝛez eulz n'ont riens guerpi
Se j'ai trouvé aucun eſpi
Et mis la main aus meſtiuiers
Je l'ay glane moult volentiers.