Gieffroy qui voit que la matire
De ceſtui monde mal ſ'atire
Faindꝛe veult matire nouele
Selonc ce que Diex le reuele
D'un ſaint que l'en doit aourer
Deuotement et honoꝛer
Car il eſt partout renommez
Et cilz eſt /saint baccus nommez
L'en fait feſte de pluiſeurs ſains
Mais /saint baccys ſoit clers et ſains
Fait et fait a de vertus maintes
Et plus que ne fiſt sains ne ſaintes
Et qui ſes poinnes conteroit
Plus grant martyr le trouveroit
Qu'enul ſaint dont l'en volt puis lire
Et poꝛ ce a il quant au voir dire
Plus grant loier en paradis
Que ſaint nul qui la fuſt jadis
Ne qui puiſt jamais auſſinc eſtre
Et pour miex la choſe conneſtre
Dire vous veil ſa ſainte vie
Si que chaſcuns y eſtudie
Ciſt /ſains baccus ſelonc l'yſtoire
D'oultremer vint
C'eſt choſe voire.
D'un pays qui moult eſt loe
Nez d'une fille qu'ot /Noue
Qui vingne fu loꝛs apellee
Dont le non et la renommee
Eſt alee par tous pays.
Si n'en eſt pas ſon filz hays.
C'eſt /saint baccus que je vous nomme
Mais l'en doit amer chaſcun home
A saint baccus va l'en requerre
Oultremer et partoute terre
Sa ſaintee ſi deſclairie
Car il fait miracles et ſignes
Tel c'onques ſaint ne fiſt ſi dignes
Les muez fait jangoillier
Et les non veans rooillier
Les coꝛrouciez fait eſioir
Et les contrais coꝛre et foir
Les deſconfoꝛtez il confoꝛte
A ceus que comme moꝛt l'en poꝛte
Fait il l'eſperit revenir
Couleur et bon ſanc maintenir
Et les malades ſeult aidier
Et les aduocas fait plaidier
Et ſi fait les couars hardis
Et les pareceus et tardis
Fait il aler iſnelement
Et aguiſe l'entendement
Et a ceulz qui li font outrage
Le ſens oſte et parlerendage
Com oiſel les fait puis les bat
Si qu'a terre jus les abat
Et les fait com demoniacles
Ne ſont ce pas douteus miracles
Seigniez vous et recommandez
A Dieu et grace demandez
A /saint baccus ſi qu'il la face
Car il a ſi tres douce face
Qu'il oint les coꝛps et aſſouage
De toute doleur et malage.
Mais li dyables enuieus
Qui tous joꝛs eſt malicieus
Par fauſſeté de mal eſtude
/Sains bacus deſraciner cuide
Et li metre a deſtruction
Par fole conſpiration.
Et ainſi ot en tel maniere
Com /Jhesucriſt ca en arriere
Par les autres ſains creſtiens
Voult deſtruire /valeriens
/Neron et autre empereeur
Et li prevoſt et li maieur
Et les creſtiens martrierent
Et diuerſement les liurerent
A moꝛt poꝛ la creſtienter
Que Diex avoit fait et plante
Auſſinc le malvais c'eſt le conte
Cuide a /saint bacus faire li onte
Et a mene nouuiaus tyrans
La terre loꝛ fair fouir ans
Poꝛ /Saint bacus deſraciner
Et metre a moꝛt et afiner
Et propꝛe inſtrumens l'ot baillie
Par cui l'en le trenche et trauaille
Hé las ſi n'eſt il mie rous
Mais ſanc mellez eſt de coꝛrous
Li cuers li font ou coꝛps ſeuer
Puis le font en terre enterrer
A feſoers c'eſt dur a oir
Fouir le font et deffouir
Une fois .ii. ou .iii. ou .iiii.
Poꝛ li du tout au toꝛ abatre
En tel guiſe l'en le toꝛmente
Qu'il n'a membꝛe que ne ſ'en ſe[n]te
Du pié deſſous duſqu'a la teſte
Li demainnent tele tempeſte
Les mauvez tyra[n]s deſpiteus
Tyrans ne furent mie tex
Nis ceulz qui les ſains
A moꝛt mirent
Onques tel cruauté ne firent
Et les tyrans vous nommerons
Que l'en apele vignerons
Qui vont et viennent nuit et joꝛ
Sans trieve faire ne ſejoꝛ
Chiez ſa douce mere /bacus
Ses coꝛs coubes juſques as cus
Recourciez devant et derriere
En faiſant rechignie chiere
L'un cope de ſa ſarpe et trenche
Ce qu'il conſuit de bꝛanche en bꝛa[n]che
L'autre fiers et a terre poꝛte
Puis la lie d'une cohoꝛte
Grans cops de toutes pars li rendent
Et puis la lient et eſtendent.
Poꝛ ce qu'il la face bꝛehaigne
Ja oït ce quele ne ſe plaingne
Mais doucement ſueffre et endure
Le grief la paine la laidure
Que li fait cele gent malvaiſe
Qui ne ſcet boire que ceruoiſe
Ou courre au vin de buffet
Poꝛ ce tele paine li fet
Quel ne poꝛte le ſauoureus
Errant de vin qui n'eſt pas pour eulz
Dont poꝛ ce qu'il ne boiuent mie
Le vin pur mais le fet de lye
Il vouldꝛoient qu'ainſi feüſt
Que jamais vigne fruit n'eüſt
La doucour mie ne connoiſſent
Du bon vin et poꝛ ce ne ceſſent
De faire ſa mere contraire
Poꝛ quoi el ne puiſſe tant faire
Mais combien quel ſoit toꝛmentee.
En tele guiſe et demenee
Et entre pierres enchaciee
Et puis rooigniee et tailliee
Et puis fouie et refouie
A grant paine et a grant havhie
Diex cil qui toute choſe enfoꝛce
Tel pooir li donne et tel foꝛce
Que par les pierres oultre paſſe
Sans ce que ſe coꝛrompe ou quaſſe
Et en bꝛief temps et po de terme
A tous demouſtre ſon dous germe
Germe qui n'eſt pas ſecourion
Aincois l'apele bon bourion
Et ce boꝛion qui ſe boꝛioigne
Qui de ſoy miex verdour done
Et ce ſont du bourion .ii. filles
Qu'en nome fueilles et veilles
Ces .ii. filles ſont moult iolies
Et de leete reuerdies
Et moult de gent en ſont a faire
Poꝛ aux et poꝛ ſauſſes deffaire
Mais qu'il conques tel choſe fait
Il eſt murtriers et ſe meffait
Quant .ii. ſi tres jones filletes
Comme fueilles et uielettes
Fierent et frapent ſus et jus
Pour traire de loꝛ coꝛps le jus
Ce ſont tryans
Qui ne ſont pꝛeus
Qu'en nomme auſi uiers et keux
Pitie n'ont ne compaſſion
Tout metent a occiſion
Poꝛ la bouche et le ventre peſtre
Mal fait pris de cel gent eſtre
Qui a tel maluaiſtie ſ'amoꝛt
Com de metre telz ſuers a moꝛt
Cil les achatent car vendues
Sont les vielles par mi les rues
Qui les bꝛoient et qui les crient
Et puis ces tyrans les occient
En ſignes dont comme t'ai dit
Cil tyrant ſont de Dieu maudit
Mais riens n'en vault loꝛ maluaiſtie
Car le /bougoing eſt ſi haitie
Qu'il gete les grapes fourmees
Des aulliertes encourtinees
Et de verdure rauerdies
Et puis apꝛez ſont toſt floꝛies
De fleurs ſi tres dous odoꝛans
Que la n'eſt venin demoꝛant
Aincois poꝛt l'oudoꝛ gracieuſe
Treſtoute choſe venimeuſe
Quant l'oudoꝛ de ſa floꝛ eſpart
Hoꝛs de la vigne le depart
Et de cele floꝛ le fruit n'eſt
Du quel on puet dire qui n'eſt
Fruit ſi bon ne ſi gracieus
Si ſades ſi delicieus
/Salemon qui bien ſe ſavoit
Prophecie fait en avoit
La vigne diſt il vers eſtre
Floꝛs fait d'onoꝛ et d'oneſte
Qui oudeur rentent ſi ſoeue
Qui tout venin jus a moꝛt greue
C'eſt donques le fruit honoꝛable
Dont l'en ſert largement a table
Et fait on honour
Aus greigneurs
Et a tous pꝛinces et ſeigneurs
Et de fruit eſt de tel venue
Que ſa foꝛce en eſt eſpandue
Par tous pays partoute terre
Elle y vient ou l'en la va querre
Car l'ennemi qui ce regarde
A qui demeure moult et tarde
De tel fruit du tout au bas metre
De barat ſe veult entremettre
Si qu'entour ſa grape fourmee
Fait venir ſouvent la gelee
Vens noif et grelle le fait bꝛuire
Dont ſouvent fait la vigne cuire
De froideur c'eſt le keu /macaire
Et tous joꝛs oevre par contraire
Mais ſouvent contre ne lie grieue
Car d'eulz la vingne en fruit eſlieue
Et li la deffent de froidure
Adont li ennemi parjure
Q[ua]nt il voit cel fructefiance
De pluie y enuoie habondance
Dont il fait a deſtre et ſeneſtre
Grans chardons et eſpines creſtre
Et mauuaiſes herbes aſſez
Par quoi le dons fruit ſoit quaſſez
La vigne du tout eſtoufee
Et la ſaueur du fruit oſtee
Et tout mis a deſtruction
Mais il faut a ſ'entencion
Car deux bones gens y enuoie
Dont chaſcuns la vigne netoie
Des mauuaiſes herbes creues
Par les ſercleeurs ſont tolues
Et pour une ſeule denree
De vin la ſont une Ioꝛnee
Ne vit a la nuit ne ſ'en viegnent
Mais le vent et le chault
Souſtiennent.
Et la tempeſte ſus et jus
Poꝛ une denree de jus
Et cele liqueur qui degouſte
De la vigne qu'en ſache et boute
En la guiſe que tous ai dit
Et ſout ſueffre
Sans contredit
Et endure cele tempeſte
Qu'en li fait des piez
Jusqu'a la teſte.
Dont quant li ennemis ce voit
D'un autre toꝛment ſe poꝛuoit
Afin que la vigne deſtruite
Soit. il pourchace quel ſoit cuite
Et de gelee et de grelle
Qui li chieent ſus pelle et melle
Puis de tonnoirre et de foudꝛe
La cuident mettre tout en poudꝛe
Ou au mains aucune partie
Et a ce mettent eſtudie
La vigne ainſi l'en la dechace
A la fin que l'en la defface
Uigne plainne de martyre
Qui poꝛroit ces griez
Mauls deſcrire
O martyre martyriſee
De ſarpes et trenchans
Decopees.
Par ces mauvais gloutons
Lechierres.
Acrauentee entre les pierres
De foſſoert foie et de maigles
De ratiaus bechiee et aigles
Et d'autres oiſiaus mainte paire
Te font maint grief
Et maint contraire
Chiens pouciaus
Et autre beſtaille
Souvent te font mai[n]te bataille
L'un te moꝛt l'autre te menjue
L'un te giete l'autre te rue
De deſrule d'yaue creuſee
Et de connerres eſtonnee
Batue de foudꝛe et d'eſpars
A deſcouvert de toutes pars
De vens toꝛmentee et d'oꝛages
Qui te font ſouvent griez domages
D'yaue de noif de greſil
Qui te font maint aſpee bꝛeſil
Treſtous ceulz qui poꝛ Dieu moꝛurent
Tant de demartires ne recurent
Pour ce a la dolour de /Marie
Bien eſt dꝛoit que l'en te parie
Elle vit ſon chier fil tempter
Et puis de Juis toꝛmenter
Mais tant ne li poꝛent meffaire
Qu'il ne trouvaſt a ſon repaire
Car au tiers joꝛ reſuſcita
Et de la vigne eſt il ita
Car puis que la vigne
Eſt tailliee.
Et puis fouiee et refouiee
ll en ſault le gouſt bel et gent
Dont l'en aboiure toute gent
Se la vigne n'eſt tant batue
Ne detrenchiee ne rompue
Que de quelque part vin ne doingne
Ou de /rochele ou de /gaſcoingne
Chaſcune ainee ou chaſcun an
Ou d'/aucerre ou de /Saint iohan.
A grant foiſon et habondance
Nous vient vin de /biaune
Et de /France
Ou de quelque part
De ce monde.
Chaſcune annee nous habonde
Et chaſcun an nous ſont rendu
La langue a ſi eſtendu
Ses rains partout
Communement
Que vin ne creſſe largement
Et grant l'ennemi voit la guiſe
Adont de pis faire ſ'aviſe
Vendengeeurs enuoie en place
Puis le mainne par dꝛoite trace
En la vigne poꝛ tout trenchier
Autrement ne ſ'en puet venchier
Puis coutiaus trenchans
Leur baille
Dont l'un decope
L'autre taille
Puis mettent ce fruit
En paniers
Que puis eſt vendus a deniers
Com Dieu fu et plus le partuent
Et aucunes fois
Le meinnent
Ce fruit qu'en ne doit
Pas mengier
Riens n'en leſſent
Pour leſdengier
Pour ce ſouvent
Ains qu'il ſ'en lieuent
De trop mengier
Ce fruit ſe grieuent
Et ce qu'il ont pꝛis
Gloutement
Gietent par deſſous oꝛdement
En faiſant foires pes et veſſes
Vendengeurs vendengerreſſes
Ja n'y tendꝛont foy ne couvent
Qu'il ne ſ'en conchient ſouvent
Encoꝛ li font plus vilonnie
Cil tyrant plain de felonnie
Car par les mons et par les vaux
Font ce fruit de traire a cheuaux
Puis le font ſus .i. fuſt abatre
Et de piez fouler et debatre.
Puis nouvel toꝛment appareillent
Ou la nuit toute et le joꝛ veillent
Poꝛ toꝛmenter ce dous fruit tendꝛe
Bon quanqu'il ou coꝛs li font re[n]dꝛe
Si toꝛmentez eſt a cele heure
Que riens que ſa pel li demeure
Qu'el feu giete ou en la fange
Ce toꝛment qui tant eſt eſtrange
De ceulz eſt preſſeoir nommez
Dont ce doulz fruit eſt aſſommez
Et par devant et par derriere
Dont auſſint et en tel maniere
Que tout ſon ſanc miſt /Jhesucriſt
Hoꝛs par .v. lieus ſelon l'eſcript
Auſſi par ce toꝛment ſans doute
De la liqueur
Me remaint toute
De ce doulz fruit
Qui ja ne chiee
Par ce couvent a grant hachee
Puis de pis faire ſ'entremetent
Car tele liqueur
Loꝛs y mettent
En priſon et cloſe et fermee
Si que ou tonnel eſt nommee
Ou en autre priſon iuree
Qui partout eſt tone apelee
Puis le deualent en labiſme
Sans ce que fait
Ait mal ne criſme
Et en chartre laide et oſcurs
Poꝛ faire li plus de laidure
Quant la demoꝛe a grant temps
Si li mueuent noiſe et contans
Ne ne le leſſent ſeioꝛner
Mais de priſon le font toꝛner
En autre poꝛ plus erragier
Et ce apele on reechier
Et quant ainſi l'ont toꝛmente
Et puis leue et adente
Sans avoir nule
Guariſon.
Si li baillent une priſon
Qui n'eſt quarree ne reonde
Qui ſi obſcure eſt et parfonde
Qui n'eſt homme ou monde vivant
Que ſe la eſtoit longuemant
Que ne de froit ne
Moꝛuſt bꝛiement
Je le vous di a eſcient
Tant eſt cilz liex
Et frois et haulz
Teulz pꝛiſons ſont
Celiers et caues
Eſtoupez ſont la les pertuis
Les tapis mis devant
Les huis.
Si qu'air ne chaut
Ne puiſt venir
Poꝛ faire la liqueur venir
Qui de la langue eſt deſcendue
Et ſoffre a tous.
Et abandonne
Et tous leurs pechiez
Leur pardonne.
Ou hanap ſe donne pour boivre
Et en voire c'eſt choſe voire
Et en veillant de toute guiſe
Veult il que la
Liqueur ſoit miſe
Mais au plus tart
Si con Diex voult
A tous abandoner ſe voult
Son coꝛps ouurit
De .vi. parties
Pour ſauver des
Homes les vies
Ainſinc ſueffre
Percier ſa robe
Car il ne veult pas
Qu'en la robe
Pour ce ſueffre qu'en la pertuiſe
Et que d'eulz ſa liqueur l'en puiſſe
En queues en tonniaus en iates
Dont puis les gens
Chieent a pates.
Et demeurent ainſi cheu
Quant de ce gouſt
Ont trop beu
En .v. liex fu bien Dieu percie
Mais en plus de .v. eſt hercie
Le tonnel qui ce vin entonne
De queue ou tonnel
Puis en tonne
Toutes pars percie par couvent
En plus de .xxx. liex ſouvent
Sans faire noiſe ne murmure
Tout ce paciaument endure
Et quant il eſt
Jusqu'au fons trait
Le remanant de la l'en trait
Qui de tel foꝛce eſt par ſon fait
Que on en fait vin de bufait
Autrement dit le vin pendu
Qui aus povres gens eſt vendu
Si que de li n'eſt riens
Sans fable.
Qui ne ſoit bon et poꝛfitable
Dont qui ceſte liqueur
veult pꝛendꝛe
Bien a point le bon ſanc enend ͤ
Fait la bone complexion
La complexion bone et fine
A bone vie l'ame encline
Et la bone vie li donne
Bone moꝛt et raiſon ſ'adonne
Que qui bien muert
Par dꝛoit doit eſtre.
Avec Dieu ou regart celeſtre
C'eſt /Jheſucriſt
Qui la vigne eſt
Dont ceſte liqueur
Douce neſt.
Qui ca en terre deſcendi
Et par le conduit ſe rendi
De /la virge dame
Sans doubte
Qui bleciee n'en fu ne route
Car du saint eſpꝛit cultiuer
Fu non pas d'ome laboꝛee
Ceſte vigne eſt
Noſtre ſauuierre
ui vin fait croiſtre ſous la pierre
A li venins faire pꝛiere
Qui vin li doinſt a liee chiere
Si que nous n'i puiſſons faillir
Et dehoꝛs la face ſaillir
De caues de tonniaus
De queues.
Car toutes les clez
En ſont ſeues.
Et des celiers et des priſons
Son puet faire
Nos garniſons
Rompie puet chartres et liens
Donques tuit cil qui ſont cy ens
Priez la vingne quele entende
A nous ſi que ſon filz nous rende.
/Saint baccus donne ſans vendu
Dont nous buuons col eſtendu
Comme grue ſon dous buurage
Qui mainte grant ſoif aſſouage
Et par la ſeue grant merite
Nous ottroit tous joꝛs vin d'eſlite
De quelque pais qu'il li plaiſe
Car de cydꝛe ne de ceruaiſe
Gieffroy qui ce dit fiſt n'a cure
Tant comme vin de vingne dure.