Touz ceus et toutes celles Qui croiront fermement
Dou saint coꝛs /Jhesucriſt Le digne ſacremant
A qui Diex a pꝛeſté Sens et entendement
Ne doivent pas ouvrer Contre Dieu folement
Chaſcun le doit ſervir De bon cuer ſan faintiſe
Mes il ſont moult de gent Plains de granz covoitiſe
Ce fait li anemi Qui les tient et juſtiſe
Qui touz joꝛz de mal faire Les ſemont et atiſe
Des que Dieu fiſt /Adan Et /Eve ſa moillier
Les voſt li anemis Confondꝛe et engignier
Quant i fiſt par /Evain /Adan le fruit mengier
[.IIII.mil.]III.cenz. anz Les covint travaillier
Mes le roy qui tout fiſt Et ciel et terre et mer
Si ne les voſt pas perdꝛe Ainz les voſt tant amer
Qu'il en ſoffrit ſon coꝛs D'un glaive a entamer
Et ſon pꝛecieux ſanc Contre terre ſenner
La moꝛt que il ſoffri Cel jour nous racheta
Et a l'Aſanſion Aus ſainz ciez remonta
Le jour de Penthecoſte Ses amis confoꝛta
Des loꝛs en pain ſacré Son coꝛs repꝛeſenta
Cil croit mauveſement Qui n'a ferme creance
Que c'eſt le saint coꝛs Dieu Qui nos fiſt delivrance
Ce que le pꝛeſtre en tient Et en fait remenbꝛance
Autant comme /Longis En ferit de la lance
De tel oiſte ſacree En Dieu priſt ſa figure
Vous veil je raconter Merveilleuse aventure
Ce fu moult bel eſſemple Mes l'eure fu oſcure
Dont vous oꝛroiz la fin Et la verité pure
Deſouz /Laon avint Iceſte grant merveille
Je croi qu'en tot le mont N'ot onques ſa pareille
Ce fiſt li anemis Que touz joꝛz ſe travaille
Par coi puiſſe le monde Verſer en ſa coꝛbeille
Une grant riche fame En cel pais eſtoit
A la veüe du monde Beguine ſe faiſoit
Mes nen ne ſavoit mie Ce qu'en ſon cuer penſoit
Quar en grant avarice Tout ſon cuer mis avoit
Et tant que il avint Et n'a pas longuement
C'on vendoit le blé cher Et le pain enſement
Celle don je vous di En vendoit largement
Et moult avoit grant joie De l'encheriſſement
Un jour envoia vendꝛe Dou blé par ſon ſergent
Com celle qui eſtoit D'argent foꝛment engrant
A icelle joꝛnee Fu plus cher que devant
Ne qu'il ne fu apꝛés Ainz vint en abaiſſant
Quant vint .viii. joꝛz aprés Dou blé envoia vendꝛe
Et diſt a ſon ſergent Moult bien li ſot aprendꝛe
Ne le donne pour mains Que tu ſoloies vendꝛe
Non ferai je diſt cil Qui bien la ſot entendꝛe
Loꝛs ſe miſt a la voie Et ſe pꝛiſt a haſter
Onques juqu'au marchié Ne ſe voſt arreſter
Son blé ne pot pas vendꝛe Ne n'en voſt pas laſchier
A ſon oſtel arriere Se pꝛiſt a retoꝛner
Li valez retoꝛna En ſon oſtel arriere
Quant la dame le vit Si li fiſt laide chiere
De rage et de foꝛſen A mué ſa maniere
Loꝛs commence a maudire Sergent et chamberiere
Pour la raiſon de ce Que le blé ſ'abaiſſa
Dieu priſt a renoier Souvant ſe courouca
Et a ſainz et a ſaintes Moult durement tenca
Moult mauveſe pensee Dedenz ſon cuer penſa
En ſon jardin entra Anſi comme deſvee
Tout par lui ſe demente Grant dolour a menee
Ainſi com ele eſtoit En ſi faite pensee
L'anemi ſ'aparut A lui ſanz demouree
En guiſe d'un bel home Vint l'anemi a li
De la dame ſeurprendꝛe Mie ne ſ'alenti
Tantoſt li demanda Oꝛ ne m'i ſoit manti
Qui t'a ſi couroucie Et celle reſpondi
Certes ſire diſt elle Ne vous mentiré mie
Le blé eſt abeſie Dont je ſui couroucie
Reſpont li anemi Oꝛ ſoies apaſie
Car ſe tu me vuz croire L'annee ert encherie
Sire diſt la chaitive Volentiers vous creroi
Mes que le blé enchere Volentiers vous creroi
Reſpont li anemi Ne ſoies en eſmoi
Car ſe du tien me donnes Bien te conſeilleray
Quant celle l'entendi Si reſpondi bꝛiement
Je vous donrai ma granche Treſtout entierement
Quant le mauvés l'entent Si reſpont erranment
Je vueil la charte avoir Sanz point d'areſtement
L'anemi ſ'apꝛocha De la maleüree
Une pome li a En la boche boutee
De ſa ſalive prent Cele bien li agree
Une leſtre en a faite Sanz plus de demoꝛee
Quant il ot fait la leſtre Tentoſt ynellepas
La beguine en apelle Sez tu que tu feras
Tu te feras malade Le pꝛeſtre menderas
Et le coꝛs /Jhesucriſt En pain tu recevras
De ceſte choſe ci Te pꝛi et te requier
Quant l'avras receü Garde ne le toicher
Et ſe tu le puez faire A .i. crapoſt menger
Le blé encherira Dont tu as deſirer
Fai ce que je te pri Et ſi ſoies certaine
Que ſera ſi chier temps Ainz que paſſe quinzaine
C'onques mes ne veiz Annee ſi vilaine
Quant celle l'entendi Moult grant joie demaine
Li anemi ſ'en toꝛne Et celle demoura
Tantoſt ſe fiſt malade Le pꝛovoire menda
Et il i eſt venus Le coꝛs Dieu apoꝛta
Quant il [l']a confeſſee Erranment li donna
La fole recut Dieu Mes el ne l'uſa mie
Errant priſt .i. c[r]apouſt Ne ſ'i eſt alentie
Et dedenz .i. eſcrin Si le miſt par folie
Hé las comme ci a Robe tres mal partie
Oꝛ eſt /le douz Jhesus Avec le bouterel
Sachiez qu'il n'ot en li Ne joie ne revel
A bꝛaire ſi ſe puiſt Ne li fut mie bel
Anſi com un enfant Qui eſt nez de novel
Et quant la chamberiere Oï tel enfant bꝛaire
Que Damedieu [i ]voſt Demoſtrer l'eſſemplaire
En la chambꝛe ſa dame Se comenca a traire
La voiz a bien oïe Mes el ne ſait que faire
A ſa dame ſ'en vint Et ſi li va diſſant
Ma dame j'ai oÿ Braire .I. petit enfant
Je cuit que vous avez Travaillé maintenant
Quant celle l'entendi Moult la va laidengent
Dou miex qu'el onques puet S'en iſt tout eſbafee
La pucelle ſ'en part N'i eſt plus demouree
Chiés le preſtre en ala Si li dit ſa pensee
Qu'ele craint que ſa dame Ne ſ'ait enfantoſmee
De la voiz qu'el oït Avoit la face neire
Le pꝛeſtre l'eſcouta Mes il ne la puet croire
Et celle ſ'agenoille Par devant le provoire
Et jure fermement Que c'eſtoit choſe voire
Par foy ce diſt le pꝛeſtre g'irai a li parler
Et de ſa conſcience Enquerre et demender
Loꝛs ſe miſt a la voie Et ſe priſt a hater
Onques juſqu'a l'oſtel Ne ſe voſt arreſter
La fauſe papelarde voit le pꝛeſtre venir
De pooꝛ li comence Tout le cuer a fremir
Sur ſon lit ſ'eſt cochie Semblant fiſt de doꝛmir
Le pꝛeſtre l'apela Qui fu pour Dieu ſervir
Fame ce diſt li preſtre Eſtes vous endoꝛmie
Nenil ſire diſt ele Mes je ſui mehaignie
Oꝛ me dites fait il Et nel me celez mie
Eſt ce voir que vous eſtes D'un enfant acouchie
Ce c'eſt voir ſi le faites Apoꝛter au moutier
En l'eure le ferai Lever et baptizer
Quant celle l'entendi Vis cuida enrager
Moult vilment comenca Le pꝛeſtre a laidenger
Ainsi comme le pꝛeſtre Parloit a la beguine
Et qu'i voloit [s]avoir De ſon cuer la covine
Le roi qui ſires eſt De la vertu devine
En l'eſcrin ou il fu S'eſcria de ravinne
Quant le pꝛeſtre l'oÿ Coleur priſt a muer
A la beguine diſt Oꝛ ne puez tu celer
Que tu n'aies enfant Ja l'ay oÿ crier
Je croy que tu le penſes Anuit a eſtrangler
Preſtre diſt la beguine Voſ aiz male reſon
Quant vous me meté ſus Itele meſpꝛiſon
Loꝛs ſ'en parti li preſtre N'i fiſt aratoiſon
Chiés le pꝛevost ſ'en va Si li diſt ſa raiſon
Tout ce qu'il ot trové Au prevoſt raconta
Li prevoſt l'entendi Et moult bien l'eſcouta
Loꝛs ſe ſont mis a voie Chaſcun d'eus ſe haſta
Et quant il vindꝛent pꝛés Le pꝛevost ſ'areſta
Preſtre diſt li prevoſt Alez a li parler
Et de ſa concience Enquerre et demender
Je demoꝛai ca hoꝛs Poꝛ le fait eſcouter
Voire ce diſt le pꝛeſtre Penſez de l'eſpleter
Le pꝛeſtre entra a tant En l'oſtel erranment
La beguine apela Bel et coꝛtoiſement
Et celle reſpondi Moult oꝛguilleuſement
Et le prevoſt entre anz Toſt et iſnelement
Oꝛ fu la papelarde De ces .ii. areſnie
Ainſi com il parloient Et li coꝛs Dieu ſ'eſcrie
Si haut que chaſcun d'eus A bien la voiz oïe
Loꝛs prennent la begueine Erranment l'ont ſaiſie
Oꝛ toſt diſt le pꝛevost Rendez nous cel enfant
Ou nous vous en marron En priſon maintenant
Loꝛs entrent en la chambꝛe Par treſtot vont querant
Moult longuement ont quis Mes ne truevent nëant
Le pꝛevost et le pꝛeſtre Cel eſcrinet troverent
Ou le coꝛs Dieu eſtoit Errant le deſfermerent
Et quant il fu overt Le crapot i troverent
Et le coꝛs /Jhesucriſt Dont moult ſe merveillerent
Li pain ſi reſailli De l'eſcrin ou fu mis
Deſus la deſtre eſpaule Au pꝛeſtre ſ'eſt aſſis
Quant le pꝛeſtre le vit Si a ſon giron mis
Li coꝛs Dieu i deſcent Iluec fu recuillis
Le pꝛevost ſ'agenoille Foꝛment ſ'umilia
Sus le coꝛs /Jhesucriſt Son chaperon gita
Et il entre dedenz Le pꝛeſtre l'en poꝛta
Le prevoſt priſt la fole Que plus n'i arreſta
Li eveſque la fiſt Par devant lui venir
Et ſon fait li demende Et el li va gehir
De ce qu'a li a dit A fait chaſcun fremir
Loꝛs jugierent par dꝛoit Qu'el en devoit moꝛir
Erranment fu la buche En la place apoꝛtee
Pour la beguine ardoir L'ont tantoſt alumee
Par jugement fu arſe A icelle joꝛnee
El ne fu gaires plainte De ceus de la contree
A icelle joꝛnee Revint li anemis
Qui voſt avoir le don Que li avoit pꝛomis
Sanz nul autre dengier En la granche ſ'eſt mis
Treſtoute l'en poꝛta Moult grant foꝛce y a mis
Tout vëant eus l'en poꝛte Nus ne li os deſfendꝛe
Mauvais fait tel ſeigneur Servir c'on n'oſe atendꝛe
Gardon nous de ſes laz Qu'i ne nous puiſſe prendꝛe
Mes au /douz Jhesucriſt Nos puiſſion nous touz rendꝛe
Oꝛ pꝛion touz a Dieu Et a /ſa douce Mere
Qu'il nos weille deſfendꝛe De la grant moꝛt amere
Mes en la ſainte joie Qui tant eſt bele et clere
Puiſſon nous touz aler Devant Dieu noſtre pere