Un bon lechieꝛre fu de vins
Si ſe penſa Qu'a /pꝛouuins
A la foire voudꝛa aleꝛ
Et qu'il feꝛa de lui parleꝛ
Ainſi le fiſt com lot enpꝛis
Tout ſe veſti d'un buriau gris
Cote et ſourquot treſtout enſemble
Tout fu d'un dꝛap ſi com moi ſemble
Siot chauces d'un gros bourras
Ses ſolleꝛs ne ſont mie alas
Ainz font de vache dur et foꝛt
Et cilz qui tant de barat ſot
.I. mois et plus fu bien reme ſe
Sa barbe quelle ne fure ſe
Et ces cheveus avoit merles
Ne voult que pingne ifuſt boutes
Leiour ne .iiii. fois netrois
Bien contre fiſt le vilenois
Et pour miex reſembleꝛ vilain
Priſt .i. aguillon en ſamain
Une grande bource acheta
.XII. denieꝛs dedens mis a
Ainz nen mot ne plus ne mains
Loꝛs vint en larue au putains
Tres devant lamaiſon mabile
Qui plus ſavoit barat et guille
Que fame qui a/pꝛouins fuſt
Il ceſt aſſiz delez un fuſt
Qui eſtoit devant la meſon
Lez lui amis ſon aguillon
.I. pou tourna ſon dos vers luis
Oꝛ oꝛrez ja que il dit puis
Et comment il ſegoulouſa
Et le moquois qu'il recoꝛda
Dit le vilain ce eſt la voire
Puis que ieſui hoꝛs de la foire
Et en bon lieu et loing degent
Je deuſſe demon argent
Dutout en tout ſavoir laſomme
Ainſi le font tuit li ſage homme
Jai de rongeꝛ .xxxii. ſolz
.XXI. denieꝛs en ot girolz
Qui mes .ii. bues maida avendꝛe
A male hart le puiſt on pendꝛe
Quant il voudꝛa areꝛ ſa teꝛre
Et il vendꝛa mes bues requerre
Que il voudꝛa ſemer ſon oꝛge
Male goute ait il en lagoꝛge
Que jamés li feta nul pꝛeu
Ge li metrai tretout en leu
J'ai de bꝛunel .i. ſoulz
Illec ne fui je mie folz
Car mes compeꝛes dan gautiers
Ne men donnaſt par tant deniers
Et ſen vouſiſt creance avoir
Et j'ai enſemble mon avoir
.Lij. et .xxx.
Itant furent vendu mi bues
Et la laine de mes aingnaus
Et magument et meſpoꝛciaus
Furent vendus tout autretant
.II. fois .l. ce ſont cent
Ce dit .i. gars qui men fiſt compte
.V. livres me dit que cemonte
Mes je nel ſauroie des mois
Senauoie feves ou pois
A chaſcun pois prendꝛe .i. ſoſt
Ainſi le ſaure je bien toſt
Oꝛ ne leꝛe poꝛ nule paine
Que mabource qui eſt bien plaine
Ne ſoit voidiee en mon giron
Et li houlieꝛ de lameſon
Dient mabile quar eſcoute
Cil denieꝛ ſont nostre ſanz doute
Dit mabil fetes vous pes
Ne faites pas noiſe ne ples
Touz ces denieꝛ ieles vous doy
Creuez moy lueil et ielotroy
S'il lien remeſt ja .i. ſeulz
Mes autrement ira ligeulz
Qu'il ne penſent ſi commoÿ ſemble
Et li vilains conte et aſemble
.XII. denieꝛs ſans plus qu'il a
Tant les conta et reconta
Q[u'i]l dit oꝛ ay .xx. ſoulz .v. fois
Des oꝛe mes ſeꝛoit ſeꝛoit il bien dꝛois
Que les eſtuie ſieꝛe ſens
Hé; las dit il quant me poꝛpens
De mabile ma douce niece
Qui fu fille de ma ſueꝛ tiece
Qui ſen foui par fol ſavoir
Oꝛ fuſt dame de mon avoir
Mes .i. cleꝛc len mena par guille
Hai; douce niece mabile
Comment eus ſi fol courage
Qui eſtiez de bon parage
Ainſi la plaint ainſi la pleure
Oꝛ oꝛrez qu'il auine enleure
Mabile iſſi de ſa maiſon
Pour l'amour Dieu ſire prodon
Le vostre non quar me fuſt dit
Et cil reſpont ſanz contredit
J'ai non danfoucherdela bource
Et vous ſemblez maniece douce
Plus que fame qui ſoit u mont
Apres ce li vilains reſpont
Com ſil fuſt mourrir et plain dire
Niece dit il je ne puis dire
La joie que j'ai amon cueꝛ
Neſtez vous fille de maſueꝛ
Ouil dit elle de dame tiece
Moult ai eſté dit il grant piece
Et moult lonc temps ſans avoir aiſe
Tout maintenant la colle et baiſe
Entel manieꝛe li fet joie
Et li houlieꝛ d'en mi la voie
Qui iſſirent de la meſon
Demandent qui eſt ce prodon
Eſt il oꝛe de vostre ville
Il eſt mon oncle dit mabile
Dont je vous ai tant de bien dit
Vers eulz ſe toꝛna .i. petit
Tret la langue et toꝛne la ioe
Et li ribaut li font la moe
Eſt il vostre oncle ouil poꝛ voir
Moult en devez grant joie avoir
Et lui ſeꝛvir dutout entout
Et il vous amer ſans redout
Sire pꝛeudon tous ſommes vostre
Foy que doi /saint peꝛe lapoſtre
Loſtel avez /saint Julien
Il na homme iuſquau /gyen
Que nous aiens de vous plus chieꝛ
Par les bꝛas pꝛennent dant fouchieꝛ
Silont dedens leur hoſtel mis
Et puis [l'ont] en .i. banc aſſis
Mabile les miſt araiſon
Oꝛ ca migentil compaignon
Querez moi oes et poucins
Et ſi pourchaciez de bons vins
Et ſi queres de gras chapons
Adont parla .i. des gloutons
Dame fait il venez avant
Que pourrons nous faire d'argant
Qu'auez vous dit elle ribaut failli
Vous ſemvlez mouton acueilli
Engagiez cotes et ſourcos
Sus li vilains giſt lieſcos
Vous avrez ſempꝛes ces .c. ſolz
Cemengieꝛ vous ſeꝛa bien ſolz
Adont ſen vont ſans demoꝛance
Et apoꝛteꝛent ſanz doutance
.IIII. chapons atout .ii. oies
Ce dit mabile yſanne ſoies
I ſuelle de la pareillieꝛ
Qui donques veïſt cil houlieꝛ
Rire moult foꝛt et eſchinieꝛ
Et ſi apꝛeſtent le mengieꝛ
Plument ces chapons et ces oes
Et yſanne fait toute uoies
Le feu et ce quelle a afaire
Et mabile ne ce pot taire
Qu'el ne parole a ſon vilain
Biaus oncles ſont oꝛe tuit ſain
Et vostre fame et mi neveu
Sont il oꝛe vaillant et pꝛeu
Belle dit il il ſont tuit moꝛt
Mes vous ſeꝛez mon reconfoꝛt
En vo pais en vostre ville
Men ire ouous dit mabile
Par pou ne faitez pleureꝛ
Mes [ſe] ce fuſt apꝛés ſoupeꝛ
Il alaſt ja tout autrement
Et yfanne haſte foꝛment
Le mengier tant que tout fu pꝛeſt
Et les tables metre ſen veſt
Pour ce qu'an pꝛeudomme nennuit
Dame dit yſanne ceſt cuit
Et les oes tretes du haſte
Yſanne illecques moult ſe haſte
Qui veïſt ces tables guarnir
Et apareillieꝛ apleſir
De ſel de coutiax de bons vins
Aubꝛouet furent les poucins
Dont chaſcun ot grant eſcuelle
Siot .i. ribaut qui oeille
Qui ſouvent fet au vilain coꝛne
Il le voit bien il neſt pas boꝛgne
Qu'il eſt gabez en la meſſon
Devant lui met on .i. chapon
Et demi oe par delez
Et ſiiot de bons paſtez
Et oublees et chanetiaus
Bien fu ſeꝛuiz li vileniaus
Aſſez li donneꝛent aboire
Pour en yureꝛ et pour decoivre
Mes il ne les crient ne ne doute
Ses mains deſous ſa chape boute
Si fet ſemblant de treꝛe argent
Biaus oncles qualez vous queꝛant
Dit mabile dites le moy
Belle niece foy que doy toy
Je weil paieꝛ .xii. denieꝛs
Ice mengieꝛs vous eſt trop chieꝛs
Ce dit mabile et li houlieꝛ
Vous nen paieꝛez ja denieꝛ
Quant oꝛent mengie et beu
Mabile ne ceſt plus teu
Seigneurs alez en la hoꝛs
Grant bien vous feꝛa li eſſoꝛs
Et ſi repenſez du ſoupeꝛ
Quar moult bien vous na du diſneꝛ
Adont ſen vont en mi la rue
Mabille ne ceſt arreſtue
Apres eulz leur a bien luis clos
Bien fu feꝛme non pas eſclos
Loꝛs apꝛis aparler mabille
Qui moult ſavoit barat et guille
Oncle dites moi par vostre ame
Sonques euitez part en fame
Que la vostre fame fu moꝛte
Folz eſt li hons qui trop ſoꝛpoꝛte
Soulas de fame quieſt faille
Nient plus ne vault que fet paille
Belle niece par /ſaint germain
bien a .iii. anz ien ſui ceꝛtain
Qu'a fame noy ne part ne hart
De tiex choſe ne meſt pas tart
Et ſi nai de tout ce que faire
Teſiez vous oncle debonnaire
Mes regardez celle meſchine
A tant bat .iii. fois ſa poitrine
Laiſſe ien avré grant pechié
Aces amis la foꝛtrei gie
Gen euſſe eü grant avoir
Pour le ſien pucelage avoir
Mes vous laurez car je le weil
A yſanne en a guingne leuil
Que ſa bource liſoit coupee
Et celle en fu toute apensee
Yfanne ala avant couchieꝛ
Apres lui ala dant fouchieꝛ
Li vilains neſoublia mie
Pour par faire lalecheꝛie
Copa ſa bource de ſamain
Et ſi la miſſe dedens ſon ſain
Et tant qu'an lachembꝛe en entra
Et tant qu'il fu auala
Et tant afait qu'il aſouuit
Tout ſon talent et ſon délit
Quant ſelieue ſia veü
De ſa bource les .ii. pendans
Hé; las fet il chetis dolans
Comme j'ai fait male joꝛnee
Niece mabource meſt coupee
J'ai perdu .c. ſoulz de denieꝛs
Niece ci a maus acomtieꝛs
Quant mabile eſcouta fouchier
Sire commance aeſcrieꝛ
Oꝛ hoꝛs filz aputain larron
Iſſiez tout hoꝛs dema maiſon
Dont me faites ma boꝛce
Ainz me faites ma boꝛce rendꝛe
Ainz avrez la hart a vous pendꝛe
Se vous de ce ent uiſſiez hoꝛs
Je vous feꝛe moudꝛe les os
Je li re dont aupꝛeuoſt dire
Oꝛ toſt vilain ſans contredire
Samblant fet daleꝛ aupreuoſt
Apres lecul liont luis clos
Dont va ayſanne mabille
Sili adit treſtout par guille
Oꝛ ſa dit elle douce amie
Celle groſſe bource farcie
Dame comment vous bailleꝛay
Dit yſanne ce que je nay
Par /le baron saint Nicolas
Dame la bource ne je pas
Silai je aſſez rechiee et quiſſe
Tu mens apo que ne te bꝛiſe
Oꝛendꝛoit treſtoutes les dens
Tant par oꝛés demaupens
Tu la copas jel ſé de voir
Lacuides tu par toi avoir
Par la ſainte digne char de
Mar te vint onques enpenſe
Loꝛs la mabille ſi combꝛee
Que contre terre la getee
Si la tant frapee et batue
Par .i. petit quelle ne la tue
Et ſon houleꝛ ieſt venus
Qui moult en par fu iracus
Quant il voit ſa meſchine batre
En treulz .ii. ſe vont entrebatre
Et liautres houlieꝛ et ſurment
Qui amoult grant merveille vient
Quant il voit mabile en tel point
Loꝛs fieꝛt et frape et em point
Et ſe prent auhoulieꝛ yſanne
Sarobe qui eꝛt de couleur fanne
Li deſpiece toute et chapigne
Niremeſt coiſfe de compigne
A deſcireꝛ ne chapeꝛon
Tant sentrebatent liglouton
Et tant ont hurte et boute
Que tuit ſeſont en ſanglante
Il ſe de rompent les poitrines
Et auſi firent les meſchines
Il ſen tre rompirent les piaus
Sachiez ſil ieüſt couſtiaus
Ja ſe fuſſent entre dommagiez
Mes il les oꝛent engagiez
Pour le vin quoꝛent audiſneꝛ
Chieꝛ leur conuandꝛa acheteꝛ
Ce vous dis je bien ceſt eſtot
Sien ſeꝛont tenuz pour ſot
Si comme vous pourrez oir
Mes que weilliez .i. pou teſir
Li vilains tout dꝛoit ſenala
Ou le pꝛevost trouver cuida
Car il ſavoit bien ouil eꝛe
Li vilains ne ſetret arrieꝛe
Ainz va la ou le prevoſt fu
Quant dant fouchiers lot conneü
Tretout li conta mot amot
C'onques nen failli d'un ſeul mot
La lecheꝛie qu'il ot faite
Et li preuolz vers lui ſeſploite
Sile fiſt .iii. jours ſeioꝛneꝛ
Pour la moqueꝛie conteꝛ
Et quant dant boiuin sen ala
Le prevoſt .xx. ſoulz lidonna
Et mabile ſi fu mouſtree
Et par /pꝛouuins de tous moquee
Que miex amaſt eſtre a/coloigne
Qu'a venue lifuſt telle beſoigne
Pour ce qu'elle cuidoit plus ſavoir
Domme trichieꝛ et decevoir
Par barat et par traiſon
Que nulle fame ne nulz hon
Pour ce di atouz ce meſemble
Bon larron eſt qui autre emble