Toutes bones gens doivent Oyr le bien retraire
De Dieu et de /ſa Mere Qui tant eſt debonnaire
Oſter ſ'en puet on bien De pechier de mal faire
Oꝛ vous dirai bon dit Qui ne me fera taire
Vous ſavez tous et toutes Qui ſert /ſainte Marie
De bon cuer et de vrai Sans point de vilonnie
Ou a l'ame ou au coꝛps Quant la char eſt poꝛrie
A .c. doubles li rent En ceſte moꝛtel vie.
Un moult tres bel example Iſſy vous en devis
Comme /la Dame rent Loier a ſes amis.
El les ſcet bien hoꝛs traire Des mains aus ennemis
Que tous joꝛs eſt en paine D'oſter nos bons avis
Il avint a /Narbonne Qui eſt riche cité
Une bourgoiſe y ot Plaine de charité
Mais l'ainemi qui eſt Si plain d'iniquité
L'agrapa et li fiſt Paine et adverſité
La bourgoiſe eſtoit riche Si ot .i. bel enfant
A l'eſcole fu mis Si com le truis liſant
Les compaignons ſuivoit Quant il fu .i. po grant
La richeté ſa mere Aloit foꝛment gaſtant
La mere l'amoit moult Car plus d'enfans n'avoit
Trop debonnairement Son meffait li mouſtroit
Mais il par ſa foleur Croire ne la voloit
Quanqu'il pooit tenir Tantoſt aus dez jouoit
Li vallés ſi mena Par lonc temps ceſte vie
La boꝛjoise ſa mere En fu moult coꝛroucie
Elle a mandé grant part Du miex de ſa lignie
A ſon filz vouldꝛa faire De tous ſes biens partie
Quant furent aſſamblé La dame leur mouſtra
Comment ſon filz le ſien. Vilainnement gaſta
Sa part veil que il ait Et puis ſi en fera
Toute ſa volenté Quant devant lui l'avra.
Vous eſt il bien avis Que je die raiſon.
Oil font li parent Mais il eſt fol garcon.
Quant il ne vous veult croire Foy que doi /saint Symon
Il ſ'en repentira Si comme nous creon.
Elle fiſt ſa partie voiant ceulz du lignage
Et le vallet le pꝛiſt Qui ne fu mie ſage
En la ville ala Si y tint ſon meſnage
Mais toſt l'ot deſpendu Et gaſté par outrage
Quant n'ot mais que deſpendꝛe Si fu tous eſbahis
Oꝛ oez ja com fu deceus et trais
Poꝛ l'amoꝛ de ſa mere Qui ſervoit /Jhesucris
Se voult pener le dëable De decevoir le filz
Devant lui ſ'aparut l'ennemis Erramment.
Oꝛ te va il diſt il Certes moult pourement
Mais ſe tu me veulz croire Il t'ira richement.
Je te donrai plenté Avoir oꝛ et argent
Se tu veulz diſt li dëables Nous ſerons compaignon
J'ai de l'argent aſſez Largement en jouon
Es quant ceſtui faudꝛa De l'autre trouveron
Que je ſai bien ou eſt. Moy et toi l'embleron
Par foy diſt li vallés Qui fu du jeu eſpꝛis
Je ne t'en faudꝛai ja S'en devoie eſtre occis
Gardons que n'en ſoions Pendus ne mal baillis
Loꝛs ſ'entr'acompaignerent Lui et li ennemis
Il furent compaignons Enſamble longuement
Oꝛ et argent avoient A jouer largement
Mais ſ'a /la douce Dame Par tans pitié n'en pꝛent
De l'enfant ſera l'ame Et coꝛps a dampnement
En ſes las longuement L'a tenus l'ennemis
Tant que par .i. matin L'enfant a raiſon mis
Compains diſt li dëables Par foy le te plevis
L'avoir que nous avions Nous eſt treſtous faillis
Ses tu dont venoit oꝛe L'avoir qu'avona joué
Je le te dirai bien Certes je l'ai emblé
Ainſinc reconvient faire Ou tres grant povreté
Sera voſtre voiſine Ce ſachiez de verté
Et ou irai je embler Diſt li vallés amis
Je le te dirai bien Ce reſpont l'ennemis
Vien t'en aveques moy Loꝛs l'a par la main pꝛis
Vers le mouſtier le mainne Si l'a a raiſon mis
Compains diſt li dëables Sces tu que tu feras
Ca dehoꝛs demoꝛrai En l'egliſe t'en vas
Le pꝛeſtre n'i eſt mie Le calice embleras
Tu revendꝛas a moy Et puis jouer poꝛras
Li vallés li reſpont Que tantoſt le fera
En l'egliſe ſ'en entre Que plus n'i demoꝛa
Deſſus l'autel tantoſt Le galice pꝛis a
Oꝛ oez biau miracle Qui oir le vouldꝛa
L'en voloit le ſervice De la meſſe chanter
Les gens de la paroiſſe Le vindꝛent eſcouter
Cil qui tint le calice Ne ſ'en pooit aler
Loꝛs veïſſiez les gens Entoꝛ li aſſambler
Car tout a dezcouvert Le calice tenoit
Ne deſtoꝛner nel pot Chaſcuns li demandoit
Que il en voloit faire Nul mot ne reſponnoit
Il ne ſcet ne ne pot Car Diex ne le voloit
Pluiſeur qui le conurent En furent moult mari
Li pꝛeſtre y a coꝛut Qui moult fu eſbahi
Le calice li oſte A l'autel reverti.
Loꝛs fu le valeton De toutes pars ſaiſi
Aſſez vilainement fu menez en pꝛiſon
Loꝛs diſt piteuſement Ploꝛant en ſa raiſon
Las ſe j'euſſe fait A ma mere ſon bon
Je ne fuſſe oꝛe mie Mené comme larron.
Quant fu en la pꝛiſon Foꝛment ſe dementa
Oꝛ ſerai je pendu N'en eſchaperai ja
Par maiſe compaignie Qu'ai menee pieca
Se pitié n'en a cele /Qui le coꝛps Dieu poꝛta
Quant ſa mere en oÿ Les p[ar]oles retraire
Sachiez qu'ele ot au cuer Grant ire et grant contraire
Loꝛs ſe pꝛiſt a ploꝛer Qu'el ne ſe pot plus taire
Doucement reclama /La Dame debonnaire
Moult lié fu l'ennemi Quant par engingnement
Ot deceu l'enfant Oꝛ ſcet il vraiement
Que ſe il eſt pendus L'ame ira en tourment
Puis metra il ſa mere En deſeſperement
A conſeil en alerent Les barons du pays
Que ferons dient il du vallet Qui eſt pꝛis.
Par foy dient aucun Du fait fu pris ſaiſis.
Autre choſe n'i a foꝛs Qu'a la moꝛt ſoit mis
Loꝛs fu le valeton Mandé en jugement
Les barons li ont dit Confeſſe toy bꝛiement
Tu es jugiez a pendꝛe Saches certainement
Se n'eſt Diex et /ſa mere N'avras deffendement
Seignoꝛ diſt li varlez Oꝛ oez que dirai.
Je ſui jugiez a moꝛt Bien le voi et le ſai
Ce m'a fait compaignie Ce ſachiez vous de vrai
/La mere /Jhesucriſt En mon garant en trai
C'onques ne fis foꝛfait Foꝛs a moi ſeulement
Et a ma douce mere Qui le cuer a dolent
Et ce fait dont je ſui Repꝛis cy en preſent
Oꝛ me ſui confeſſez Faites vostre talent
Encoꝛ vous pri ſeigneur Que .i. po m'eſcoutez
Quant on me menra pendꝛe Pour Dieu de majesté
Que par devant l'oſtel Ma mere me menez
Si priera poꝛ moy Et autres gens aſſez
Nous le volons moult bien Dient tuit li baron
Loꝛs le font il mener Par devant la maiſon
Ou demouroit ſa mere Qui fu en grant fricon
Poꝛ ſon filz poꝛ tel cas Doloꝛ ſueffre a bandon
Quant en la rue entrerent Si leva le noiſier
Les voiſins ſi le vont La boꝛjoiſe noncier
Que l'en mainne par cy Pendꝛe ſon heritier
Tant qu'il ſera paſſé Dame alez vous mucier
La boꝛjoise reſpont Par mon chief non ferai
Ains m'en irai a l'uis Quant paſſer le verrai
En ſa tres douce bouche .I. baiſier li donrai
/La mere Dieu pour li Doucement pꝛierai
Loꝛs courut la boꝛgoiſe Plainne de mairement
A tant ez vous venir Multitude de gent
Et ſon fil c'on menoit Aſſez honteuſement
Le vallet vit ſa mere Si cria hautement
Mere diſt le vallet Mar me veiſtes neſtre
Mal emblai le calice Deſſus l'autel au preſtre
Se vous euſſe creue Et vous et mon anceſtre
Au gibet ne fuſt mie Ma maiſon ne mon eſtre
Quant la boꝛjoise l'ot S'eſt cheue paſmee
Li voiſin la redꝛecent Mainte lerme a ploꝛee
Et quant elle refu De paumoiſon levee
Son fil a regardé Si ſ'eſt hault eſcriee
Hay diſt la boꝛjoise Biau filz et que ferai
Quant hui ce joꝛ ton coꝛps A martyre verrai
Certes ſe tu y muers Je me deſpererai
/Jhesus et tous ſes ſains Ancui renoierai
Certes avant que muires .I. baiſier me donras
Loꝛs le courut baiſier Eſtroit l'acole au bꝛas
Puis diſt une parole Qui ne fu mie bas.
Biaus filz a Dieu te rent Et a /ſaint Nicolas
Loꝛs bꝛochent ſi emmainent Le vallet au juiſe.
La bourgoiſe courut Maintenant a l'egliſe
La bare de la poꝛte A .ii. mains a pꝛiſe
La gent qui fu dedens A elle toſt hoꝛs miſe
Oꝛ oez la merveille Et trop grant hardement
Et miracles apres Sachiez certainement
Les huis du mouſtier a Clos ſus li fermement
Puis ſ'eſt treſtoute nue Deſpoilliee erranment
Oꝛ oez qu'ele fiſt Quant el fu deſnuee
En chaſcune mamele Qu'ele ot ou coꝛps poſee
Une coꝛde des cloches A fermement noee
Loꝛs ſ'eſmurent les cloches Par la vertu nommee
D'icele [.II. ]mameles Les cloches foꝛt tira
Et a ſes biaus cheveus Toute ſ'i atira
Parfondement du cuer En tirant ſouſpira
Les cloches foꝛt ſonnerent Car Diex les eſpira.
Quant de tirer ſe fu La boꝛjoise laſſee
Loꝛs coꝛut a l'ymage De /la Virge honoꝛee
A li tance com fame Qui eſtoit foꝛſenee
/Dame diſt la boꝛjoise Oꝛ oez ma penſee
Dame je t'ai lonc temps Honoꝛee et ſervie
Et au beſoing voit on Qu'eſt amis et amie
Rent moi toſt mon enfant Que n'i perde la vie
Ou je ferai tantoſt Une grande folie
Car toi et ton enfant [...]
Que de ceſte grant [...] D [...]
Et se tu me le rens Tous joꝛs te ſervirai
A mon loial pooir Et ta ſerve ſerai.
/Cele qui eſt plus douce Que novel miel en ree
Sot de la boꝛgoiſe Le cuer et la penſee
Et ſot que l'ennemi L'avoit deſeſperee
A lui ſe demouſtra Sans nule demoꝛee
/Noſtre Dame li diſt Ne t'eſmaier amie
Des biens qu'as fait poꝛ moi Te rendꝛai je partie
L'autre part avra t'ame De ce ne doubtes mie
Ton enfant te vois querre En ſanté et en vie
Jointes mains a genoulz Cele l'en mercia
Toute nue en ploꝛant Diſt ave /Maria
/Nostre Dame s'en part Que plus n'i demoꝛa
Cele ſe reveſti. Et Dieu foꝛment pꝛia
A la juſtice vint. /La gloꝛieuſe errant
La coꝛde eſtoit ja miſe Ens el col ſon enfant
Eſtes vous .i. bꝛandon De feu ardant cheant
Les gens ſ'eſparpeillierent De paour vont criant
La Virge a l'enfant Par les [.II. ]mains comblé
Les coꝛdes li deſneue Et ſi l'a deſlié.
La gent qui furent loing Ont tout ce regardé
Au baillif ſ'en coururent Tout ont dit et conté
Quant toute gent le ſoꝛent Foꝛment ſe merveillierent
Les cloches de la ville Par elles ſi ſonnerent
Et les pourceſſions Tantoſt ſ'appareillierent
Chantant vont l'enfant querre Et ſa mere menerent
Le pueple vit /la mere /Le roy Jhesu puiſſant
Monter en paradis Et leur leſſa l'enfant
Le clergié vont[ partout et] Hautement chantans
La bourjoiſe ſon filz Va doucement baiſant
Par /la Virge pucele Fu le vallet gueris
Des mains a l'ennemi Qui ſi l'avoit trahis
Puis ama il foꝛment /La mere /Jhesucris
Qui de bon cuer la ſert Il n'ert ja deſconfis
Ceulz et celles qui ont Ce miracle eſcouté
Diex leur ſauve leurs coꝛps Et doinſt bien et ſanté
A tous nos bienfaiteurs Et aient la clarté
En paradis laſſus Avec les treſpaſſez.