A la douce louenge De /la Vierge Marie
Veil dire .i. biau dit Qui eſt ſanz vilenie
Poꝛ prendꝛe bone eſſemple En ceſte moꝛtel vie
De confeſſer touz ceus Qui n'en on eu envie
Un moult bel eſſemplaire vous vodꝛai recoꝛder
Coment /la douce Dame Sait ſes amis ſauver
Encontre l'anemi Qui nous veüſt craventer
Et nos deſvoie touz Que n'aillons confeſſer
Jadis une boꝛgoiſe Demourant a /Romme
Moult eſtoit bele dame Et ſon mari jonne home
Il ſ'entramoient moult D'avoir oꝛent grant ſomme
As povres genz donnoient Aſſez de biens par /Romme
De leur biensfez eſtoit Par tot le renon grant
Il oꝛent de .ii. anz .I. moult tres bel enfant
Il eſtoit valeton Si l'amerent foꝛment
Li preudon n'en ot plus En treſtot ſon vivant
Une nuit jut malades En ſon lit li boꝛgois
C'eſt le lit de la moꝛt Dont nullui n'a defois
A ſa fame ala Si li dit maintes fois
Plusſiex [mos] qui ſunt mout A /Jhesucriſt coꝛtois
Dame dit li boꝛgois Pour Dex je vous requier
Donez aus povres genz Qui en ont grant meſtier
Vous avez bien de quoi Diex devez mercier
De voſtre enfant penſez Et ſi le tenez chier
Sire dit la boꝛjoise Tout a vostre talant
Aus povres genz Donrai aſſez et largement
De voſtre enfant auſi Penſerai voirement
Ja pis n'avra de moi Sachiez certainement
Cil l'en a marcié Puis manda ſon curé
Qui ſes dꝛoiz li donaſt Quant l'ot bien confeſſe
Loꝛs a il le moꝛſel De la moꝛt enduré
Qui n'eſpargne nullui Foꝛt. floibe n'aduré
Grant duel fiſt la boꝛjoise Sachiez de ſon mari
Car moult pert en ceſt ſiecle Qui pert un bon ami
A tant me voudꝛai taire Plus n'en parlerai ci
De ſon fil vous weil dire Coment il fu nouri
La dame l'ama moult Mentir ne vous en quier
Tant l'ama qu'ele fiſt Avecques lui couchier
Il crut et enbarni Grant fu foꝛt et legier
De li ne voſt ſa mere Tant ne quant eſloignier
Li valez devint granz Si fu en bon aage
De ſoi apercevoir Si dit en ſon courage
De geſir o ſa mere Certes c'eſt grant folage
De ce qu'elle le ſeufre Ne la tint pas a ſage
Il ſ'en vait a ſa mere Et ſi l'areſſonna
Mere dit li valez Entendez a moi ca
Faites moi faire .i. lit Ailleurs ou coucherai
Ne guerrai plus o vous Par Dieu qui tout foꝛma
Je vous dirai pour quoi Ce ſeroit grant folie
Nature me ſemont De ce ne doutez mie
A pechié de luxure Par aucune foie
Si veil ailleurs geſir Sanz faire grant detrie
Sa mere le regarde Si l'en peſa foꝛment
Car ele l'ama moult Sachiez certainement
A nul mal n'i penſoit Si li dit erranment
Ailleurs n'iras geſir Par mon commandement
Bien ſai a quoi tu penſes De ce n'eſtue[t] douter
Tu veus aus folles fames Aler et abiter
Poꝛ deſtruire ton coꝛs Et du tot affoller
Je te couroucerai Se plus t'en oï parler
Li fil dit a ſa mere Que plus n'en parlera
L'anemi les eſcoute Qui moult grant joie en a
A pechié de luxure Treſtoz .ii. les metra
Dont la boꝛjoise a moꝛt Se il puet traitera
La nuit que il durent Au lit aler geſir
L'anemi fu moult preſt Qui les voudra trair
Le fil fiſt a ſa mere Engendꝛer ſanz mentir
Quant ot fait ſon malice En li n'ot qu'esjoir
Encoꝛ leur fera pis Si com oꝛrez conter
La boꝛjoise engroiſſa Lonc tens priſt a penſer
Et la tint l'anemi Ne ſ'oſa confeſſer
Honteuſe fu foꝛment Et dolente en penſer
La boꝛjoise de robe Veſti a ſon vouloir
Nului de ſa groiſſece Ne ſe [pot] perſevoir
Si la tint l'anemi Et la ſot decevoir
Que de le confeſſer N'avoit point de povoir
Mes ſe devant ot fet Aumoſnes largement
Plus en fiſt ele aprés Sachiez certainement
Et ſon pechié plouroit Sovent moult coiement
/La Mere Dieu prioit Au moutier doucement
Elle fiſt tant de biens Si com dit li eſcris
Li renon en fu grant Par treſtot le pais
Grant honeur li poꝛtoient Li granz et li petis
De ſon pechié ne ſ'eſt Nul[le] ame garde pꝛis
Li anemi en fu Coꝛrocié et dolant
Le terme aprocha Que dut avoir enfant
Le joꝛ vint ſanz demeure Le mal li priſt errant
Oez com l'anemi La decut plus foꝛment
En .i. vergier entra Quant ſon mal engoiſſa
Loing fu de tote gent Toute ſeule i ala
Et la tige d'un arbꝛe Par deſtrece embꝛaca
D'un biau fiz. en la place Tentoſt ſe delivra
Moult foꝛt ſe dementa Quant elle tint l'enfant
L'anemi fu delez Foꝛment la va tentant
Laſſe dit la boꝛjoise Que ferai maintenant
Je l'eſtrangleré ja N'ira plus en avant
L'anemi fu moult pres Que foꝛment la haſta
L'anfant priſt en ſes mains Tentoſt le devoꝛa
Et quant elle ot ce fet A terre le bouta
L'anemi ot grant joie Et celle ſ'en toꝛna
La dame fu ceſſie Des laz au maufé vis
Se devant ot feſt mal Encoꝛ fiſt elle pis
Et de ces .ii. pechiez Si com dit li eſcris
Ne ſ'oſa confeſſer Par foi le vous plevis
Mes des aumoſnes fiſt aſſez plus que devant
De ſon pechié ne ſot Le monde tant ne quant
A treſtoz et a toutes Fiſt dehoꝛs biau ſemblant
Mes ſon cuer va ſouvent Poꝛ ſon pechié plourant
La boꝛjoise lonc temps En cel point demoura
L'anemi voit moult bien Que enginee l'a
Ne que de ſes pechiez Nus hons riens n'en ſavra
Se n'eſt par lui oez Coment l'encuſera
En ſemblance ſe miſt D'un home creſtien
Et va diſant par /Romme Qu'il eſt fuiſicien
Et mires autreſi Si bon qui n'i faut rien
Tantoſt ot entoꝛ lui Maint enfers creſtien
Il gariſoit moult bien Ceus qu'il entreprenoit
Tant fiſt que grant renon Par tout de lui aloit
L'emperiere le ſot Grant joie en avroit
Se il en ſa court Demourer i voloit
Tant fiſt li emperiere Que cil en ſa court vint
Demourer avec lui Moult joiant en devint
Moult gariſoit malades A grant honeur le tint
Tant fiſt que delez lui Chevauchier li covint
L'emperere le tint A tout le plus privé
Qu'il eüſt en ſa coꝛt Tant li a ſens montré
Que treſtot li empire Eſtoit par lui mené
Pres qu'autant com li ſires Fu cremu et douté
Et tant c'unne joꝛnee S'aloient deduiant
Delez lui ce grant meſtre Que il aloit pꝛiſant
D'unnes choſes et d'autres Vont enſemble parlant
Loꝛs ne ſe pot plus taire L'anemi ſouduiant
Sire dit l'anemi pleſt vos a eſcouter
Une moult grant merveille Que je vous weil conter
Terre devroit iſſir Et partir et crever
Par pechié qui fet de Murtre et avouter
Il a telle boꝛjoise Meignant en la cité
Ou l'en cuide qu'il ait Moult grant humilité
Mes ſ'en ſavoit de li La pure verité
L'en diroit que en li a Moult grant iniquité
Sire je vous diré Elle a fet avotir
De ſon fil pꝛopꝛement Dont nen ne doit pas rire
C'el le vouloit nier De pꝛouver [ai ]matire
Encoꝛ plus grant meſfet Oꝛrez vous de li dire
Son enfant engendꝛa En li certainement
Mes de l'engendꝛeure Avint trop malement
Quant elle fu delivre Le vous di vraiement
Que elle a ſes .ii. mains L'eſtrangla erranment
/Sainte Marie Dame Ce dit li emperere
Qui ſavroit qui elle eſt Male juſtice amere
Seroit fete de li Par /le baron saint Pere
Nus ne l'en garderoit Se n'est Dieu ou /ſa Mere
Je la vous nomerai Que mentir ne vous quier
C'eſt /celle qui le monde Fait ainſi folloier
Des aumoſne qu'a fait Mes ſachiez ſanz cuidier
Qu'elle a bien deſervi Que en l'arde en bꝛaſier
L'emperere l'eſgarde Qui foꝛment ſe merveille
Meſtre ne dites ce Je vous lo et conſeille
N'a dame ne boꝛjoise Entre ci et /Marſeille
Je croi qui envers lui De bonté ſ'apareille
Sire dit l'anemi Droit vous covient juger
Faites faire .i. grant feu Devant toz voz priſier
Se ſeullement le nie Faites m'i balencier
Et ſ'elle le connoiſt Si l'i faites fichier
Par foi dit l'emperere Contre ce jugement
Ne puis je pas aler Ne bien ne loiaument
Tant haſte l'anemi Le feu fiſt erranment
La boꝛjoise ont mandee Toſt et delivrement
En ſon oſtel entrerent Maintenant li meſage
El n'i fu pas ains Fu au moutier com ſage
Et ſes pechiez plouroit Devant la douce ymage
Com celle qui le joꝛ La delivra de rage
Les meſages i vindꝛent Sanz nulle demouree
Il ont priſe la dame Si l'en ont amenee
/La Mere Dieu deſſant Si eſt au pape alee
Toute celle beſoigne Li a dit et contee
Vas toſt dit /noſtre dame Si li ſauve la vie
Les aumoſnes qu'a fait Ne veil que perde mie
Confeſſes la tentoſt Je li feraie aie
L'apoſtoille ſ'en toꝛne La nuit plus n'i detrie
L'anemie et la dame Furent ja en eſtant
Li anemi ſ'escrie Ceſte vois encuſant
D'avotir et de murtre Qu'a fait de ſon enfant
S'el le vouloit nier Je l'iroie pꝛouvant
La fiſt moult biau miracle /Noſtre Dame Marie
L'apoſtoille eſtoit la Mes on ne le vit mie
As tu fait ce meſfet Confeſſes toi amie
La boꝛjoise li dit Belement en l'oïe
Quant elle vit le pape Si ſ'ala confeſſant
Nus qui fuſt en la place Ne le vit tant ne quant
L'anemi qui l'encuſe Ne ſ'en va percevant
L'apoſtoire l'aſoſt Puis ſ'en ala a tant
Quant elle fu confeſſe Devant toz ſe dꝛeca
Une parole dit qui a toz agrea
Foꝛs que a l'anemi Oꝛ ſe traie en ca
Qui m'encuſe de rien Bien me deſfendꝛé ja
L'anemi la regarde ſi fu tot aveuglé
Et ſi a dit devant Que bien fu eſcouté
Certes ce n'eſt pas celle Que j'avoie acuſé
Si eſt voir dit chaſcun Vous ſeroiz mis ou ré
Dolant fu l'anemi Quant einſi la perdi
Mes quant en le dut prendꝛe Tentoſt ſ'en eſt foui
Se il fuſt hons charniex Il feüſt ja bꝛoi
Ceus qui iluec eſtoient En furent eſbahi
Loꝛs fu plus que devant la boꝛjoise honoꝛee
Mes elle priſt en li Moult tres bone pensee
Tantoſt leſſa le ſiecle Nonnain devint voillee
La ſervi tot ſon tens Celle qui l'ot ſauvee
Hé Diex tant eſt benoiſt Qui la ſert et honeure
Et qui a confeſſier Bien toz ſes pechiez pleure
Certes cil n'eſt pas ſache Qui en pechié demeure
Car nous n'avons reſpit Semaine joꝛ ne heure
Oꝛ prions touz /la Dame /Qui le coꝛs Dieu poꝛta
Qui des mains l'anemi La boꝛjoise oſta
Les euvres nous doint fere Par quoi nous ſoions la
Ou /Jh[es]ucriſt ſanz fin Regne et regnera