Pour donner [par ]exemple Proueſce et hardement
Pecheeurs pechereſſes Qui pechent moꝛtelment
Veul recoꝛder un dit A touz communement
Ou chaſcun poꝛra prendꝛe Moult biau chaſtiement
Pour lui hardiement Geter de ſes pechiez
Qu'il ne ſoit des dëables U puis d'enfer ſachiez
Regardons comment Diex Fu pour nous clofichiez
Et par piez et par mains. En la croiz atachiez
De tres parfaite amour loiaument nous ama
Quant pour nous tel tourment Et tel moꝛt endura
Pour nous bꝛiſa enfer Et hoꝛs nous en geta
Paradiz et ſa gloire Tout nous abandona
Dont quant il nous crea Et fiſt en ſa ſamblance
Et pour nous fu clofis; Et ferus de la lance.
Nous ne devons pas metre Tel oeuvre en oubliance
Ainz devons vers li querre Et pais et acoꝛdance
Car li anemis eſt Soutil de nous ſuſprendꝛe.
Et en ſez laz nous fait Trebuchier et deſcendꝛe
Nous nous poons moult bien Encontre li deffendꝛe
Par confeſſion vraie Li poons granz coups rendꝛe
Si toſt com le dëable A le pecheur feru.
Du baſton de pechié; Et il l'a abatu
Le pecheur doit pꝛendꝛe L'eſpee de vertu
Ja puis par l'anemi Ne puet eſtre vaincu
L'eſpee de vertu C'eſt confeſſion pure
Qui des mains au dëable Gete la creature
Celui qui par confeſſe Se neſtoie et eſcure
Fait a Dieu grant honnour Et aus mauvais laidure
Que ce ſoit verité Je le vous pꝛouverai
Par .i. moult bel eſſample Qu'oꝛendꝛoit vous dirai
En ſarmon l'oï dire Moult bien retenu l'ai
S'entendꝛe le voulez Je le recoꝛderai
Et pour ce que mon dit Soit plus ferme et eſtable
Je pꝛi /la mere Dieu /La roze delitable
Et /ſon tres douz enfant Le pere eſperitable.
Qu'a vos ames puiſt eſtre ce biau dit pꝛoufitable
Amen que Diex le veulle Et ſa tres douce mere
Sus oeuvre d'anemi Me faut pꝛendꝛe matere
Mais combien que celle oeuvre Soit honteuſe et amere
S'eſt la fin bonne et belle Plaiſant a Dieu le pere.
Ou temps qu'il fu jadiz [.]II. bonnes gens eſtoient
Par loial mariage; Bonne vie menoient
.I. moult biau valeton oꝛent Que moult amoient
Et pour l'amour de Dieu Moult d'aumoſnes faiſoient
Car il eſtoient riches Manans et aſſazés
Diex eſtoit de leur biens Servis et honnourez
Les povres ſoutenuz Malades confoꝛtez
Dont l'anemi eſtoit Dolent et airez
L'anemi les tempta Tant com l'omme veſqui
Mais ne le pot decoivre Vailliſſant .i. eſpi
L'omme qui eſtoit ſage Treſtouz pechiez guerpi
Si bien qu'en nul pechié Vilain ne ſ'embati
Cil veſqui juſqu'a tant Que Diex le vout avoir
La moꝛt vint qui le pꝛiſt Ne pot plus remanoir
Ses laiz li convint faire Et partir ſon avoir
Si com il apartint. Bien en fiſt ſon devoir
Ce pꝛeudons treſpaſſa S'ala de vie a moꝛt
Sa femme en fu dolente Et en grant deſconfoꝛt
Pour ſon ſeignour plouroit Souvent nuit et jour foꝛt
Mais touz jourz le tempta L'anemi qui ne doꝛt
De coꝛs et de viſage. Le filz ſambloit au pere
Et pour ce l'amoit moult Et tenoit chier la mere
Touz jourz leur pourchaſſoit L'anemi honte et here
Qu'il convendꝛa par foꝛce Que chaſcun la compere
Pour l'amour que la mere avoit a ſon enfant
Le coucha avec lui Tant qu'il fu bel et grant
Anemi qui touz jourz Va le mal enoꝛtant
Pourchaſſa tant qu'il furent L'un a l'autre abitant
Ou pechié de luxure Touz .ii. les embati
Lonctemps les y fiſt Eſtre d'eulx .ii. ſe departi
La dame devint groſſe Et ſon enfant ſenti
Quant ſ'en percut a poi Le cuer ne li parti
Le filz qui ot ſa mere Enſainte et engroſſie
Ot tel [duel ]a ſon cuer Bien vouſiſt perdꝛe vie
Adont pꝛomiſt a Dieu Et a /ſainte Marie
Que il ſ'amendera De celle grant folie
Le varlet et ſa mere Se vont apercevoir
Du pechié ou dëable Les a fait remanoir
Chaſcun ſon pechié pleure Tart tempꝛe main et ſoir
Mais l'anemi fait joie Qui les cuidoit avoir
L'anemis qui touz diz Au bons decevoir tire
Cuida bien filz et mere Avoir ſanz contredire
Et le fruit qu'engendꝛé Eſtoit en advoutire
Mais onques n'i ot part Dont il ot duel et ire
Ains les ot le vrai Dieu En ſon /ſaint paradis
Ainſſi com vous oꝛrez Ainz que le dit ſoit dits
Grant penitance en firent Si com dit li eſcris
Oez com le filz fu De ſa mere partis
Mere dit le varlet Trop mal avona ouvré
Moi et vous ont dëable Laidement encombꝛé
Ou feu d'enfer ſerons Et ars et deſmembꝛé
Nous avons Dieu perdu Et dyable recouvré
Mais ſe Dieu plait le pere Jamais ne finerai
Si ſerai confeſſez Penitance ferai
Se Diex plais ainz que muire Par quoi ſauvé ſerai
Je vois a nostre pꝛeſtre Mon pechié li dirai
Oꝛ ſe depart li enfes Sa mere demoura
Tant fiſt qu'il vint a preſtre Tout ſon fait li conta
Le pꝛeſtre reſpondi Qu'il ne l'aſſoudꝛoit ja.
Qu'il n'en avoit pooir Au pappe l'envoia.
Quant le varlet vit ce Si revint a l'oſtel
Bien ſot qu'il avoit fait Trop grant pechié moꝛtel
Tant fiſt qu'il ot monnoie De ſon meillour chatel
Loꝛs jura em plourant Le ſacre de l'aute[l].
A nus genoulz mains jointes Jamais ne fineroit
S'aroit parlé au pappe Et confez ſi ſeroit
Sa mere bꝛait et crie Qui pitié en avoit
Qui eſtoit ſi enſainte Qu'a paines ſon pié voit
La mere reſpondi Dolente et eſplouree
Biau filz je demourrai Penſive et eſgaree
Jamais honnour n'arai Ains ſerai diffamee
Et de treſtout[e] gent Serai au doi mouſtree
Le varlet reſpondi Ma mere oꝛ entendez
Vous avez tant d'avoir Que nombꝛe n'en ſavez
Donnez ent pour vostre ame Vers Dieu vous amendez
Et l[e] fruit de vo ventre Soigneuſement gardez
Se dëable vous a; En pechié embatue
Et il vous a navree gardez Qu'il ne vous tue
Aiez d'oꝛe en avant En Dieu vostre atendue
Et vous ſerez par li Aidié et ſecourue
Du fruit qu vous poꝛtez faites vostre devoir
Encoꝛ par aventure Le poꝛra Diex avoir
S'anemis a grant foꝛce Diex a plus grant pooir
Biax filz ce diſt la mere Certes vous dites voir
Tant parlerent enſamble La mere et le filz
Des raiſons moult piteuſes Et des biax mos ytiex
Que il ſe departirent Plourant de leur biax yex
L'un l'autre commanda Au vrai pere des ciex
Oꝛ demeure la mere Et li enfes ſ'en va
Tant fiſt que vint a /Romme Et au pappe parla
Touz ſes pechiez li conte Que riens ne li cela.
Comment jut a ſa mere Et comment l'engroiſſa
De ſi grant repenrance S'eſt l'enfes confeſſez
Que fondoit tout en lermes Moult eſtoit eſplourez
Mais il fu doucement Du pappe confoꝛtez
Et diſt Diex t'aidera Soiez aſſeurez
Diex eſt miſericoꝛs De toi avra pitié
Se li anemis t'a Enbatu em pechié
Pour ce ne t'a il pas De touz poins gaaingnié
Diex qui te racheta Ne t'a pas oublié
Puis qu'en ta plaine vie Quiers abſolution
Ferez vous penitance En grant devocion
Diex qui poꝛ toi ſouffri Et moꝛt et paſſion
Contre les a[ne]mis Sera ton champion.
Je qui ſui Diex en terre Ange de Dieu le pere
Et ſui en la chaiere De l'apoſtre /saint Pere.
Te met en nostre garde Et retieng comme frere
Car tu es filz de Dieu Et de /ſa douce mere
Saint Eglyſe a grant joie Quant tu es retournez
Du grant chemin. d'enfer; Ou tu eres entrez
Paradis te ſera ouvert Et deſfermez
Qui a vrais repentans Eſt touz abandonnez
Ainsi li apoſtolle Le pecheeur confoꝛta
Mais point de penitance Adont ne li donna
Moult bel et gracieus. Le vit puis dit li a.
Que ſ'il le veult ſervir Avec li demourra
Sire diſt le varlet volentiers demourai
Doucement de bon cuer Et bien vous ſervirai
L'apoſtoile reſpont Et je te retendꝛai
De ma chambꝛe ou je gis Chambellenc te ferai
Mes chambellens ſeras Juſqu'a ma volenté
Robes chevaus deniers Aras a grant plenté
Cil fu liez du biau don C'on li a pꝛeſenté
Oꝛ eſt dꝛois que vous die La pure verité
Pourquoi li apoſtoiles le retint de maiſnie
Et pourquoi ne li a Penitance baillie
Le ſaint pappe douta C'anemi plain d'envie
Ne feïſt le varlet Rencheïr en folie
S'il eüſt au varlet penitance donnee
Et il fuſt retournez Arriere en ſa contree
Anemi par pechié R'eüſt fait l'aſſamblee
De li et de ſa mere; Loꝛs fuſt leur moꝛt doublee
Aſſez plus que devant Fuſt le pechié vilains
Et ſ'eſtoit bien li pappe Et ſeür et certainz
Que la mere au varlet Vendꝛoit o derrainz
A /Romme pour avoir Soute de ſes mehains
Pour ce ne vout le pape Qu'il r'alaſt vers ſa mere
Qui doutoit c'anemis Ne leur baillaſt matiere
De rentrer en l'oꝛdure Puant oꝛde et amere
A la fin que perdiſſent L'amour de Dieu le pere
Et pour ce fiſt le pappe Le varllet demourer
C'a ſa mere n'alaſt par pechié raſſambler
Si lairons du varlet .I. petit a parler.
De ſa dolente mere Vous voudꝛai je conter.
Sa vie et ſon eſtat Et treſtout ſon couvine
Et comment l'anemi La tint en ſa ſaiſine
.X. anz treſtouz entiers Mais /la haute Royne
Seruoit de tout ſon cuer Et amoit d'amour fine
Car des lettres ſavoit aſſez et largement
Heures et oꝛoiſons Diſoit ſoigneuſement
En l'onnour /Nostre Dame Viuoit moult aſpꝛement
.III. jourz en la ſemaine Et ſi donnoit ſouvent
De moult belles amoſnes Que Diex par ſa pitié
Li vouſiſt garder ſ'ame Et metre a ſauveté
Mais combien que du ſien Feiſt grant charité
De confeſſer n'avoit Cure ne volenté
Car elle ot .i. dëable ſus l'eſpaulle ſeneſtre
Confeſſer li deffent Nuit et jour y voult eſtre
Et ſ'avoit .i. bon ange Deſſus l'eſpaulle deſtre
Qui diſoit ſeur va t'en Confeſſer a ton pꝛeſtre
Mais ſi le ſot dëable Tenir et decevoir
Que de li confeſſer N'avoit point de pooir
Le termine apꝛocha Que dut enfant avoir
Tiex maus priſtrent la dame Qu'elle dut recevoir
L'anemi qui eſtoit Touz jourz delez ſ'oꝛeille
D'eſtrangler ſon enfant Nuit et jour la conſeille
Mais /la vierge Marie Qui pour ſes amis veille
Pour li bꝛiement ſecourre S'eſmut et appareille
La bourgoiſe eſtoit ja En une chambꝛe entree
Ses griés maus la deſtraint Si ſ'eſt haut eſcriee
Au pꝛemier mot a dit /Royne couronnee
Je muir ſauvez moi l'ame Que ne ſoie dampnee
L'anemi ot grant duel Du bon mot qu'elle dit
Tourmenter le cuida Et li faire deſpit
Mais /la vierge Marie En qui ſont tout délit
Li a dit anemi Va t'en ſanz nul reſpit
Va t'en en ſus de li anemi Sathanas
A li n'apꝛoche ja Fui t'en iſnel le pas
Car tu n'as riens en li Folz fus quant le temptas
Loꝛs ſ'enfui l'anemi Aſſez plus que le pas
Loꝛs ſ'enfuit l'anemi Couroucié et dolent.
Onques puis en l'oſtel N'oſa eſtre habitant
La pechereſſe aloit Doucement depꝛiant
/La douce mere Dieu Qu'elle li ſoit garant.
Quant ſon mal la prenoit haut pꝛiſt Dieu a pꝛier
Et /ſa tres douce mere Que li vouſiſt aidier
/Celle qui au beſoing Veult ſes amis garder
Entra dedenz la chambꝛe S'amie confoꝛter
Quant /Nostre Dame fu Dedenz la chambꝛe entree
Devers la pechereſſe A ſa chiere tournee
Adonques fu la chambꝛe Treſtoute enluminee
D'anges qui avec li Vindꝛent ſanz demouree
Et quant la pechereſſe apercut la clarté
Qui fu dedenz la chambꝛe De cuer a reclamé
/La royne des ciex Ou tant a de bonté
Qui bꝛiement la delivre S'il eſt ſa volenté
/Noſtre Dame ſ'en eſt de la chambꝛe tournee
Chiés une femme vint Qui l'ot lonc tans amee
De la clarté de li Fu toute enluminee
L'oſtel la bonne dame; Ne ſ'eſt loꝛs areſtee
A genoullons ſe miſt La bonne femme errant
/La douce mere Dieu Va du cuer ſaluant
/Nostre Dame li diſt Va t'en apertement
Chiés tel femme Et ſoies a ſon delivrement
Des ce que la bourgoiſe /Nostre Dame entendi
Doucement de bon cuer Errant li reſpondi
A vostre plaiſir faire Treſtout mon cuer otri
Loꝛs ſ'en part /Nostre Dame Ses anges avec li
La mere Dieu ſ'en part Es ſainz ciex remonta
La bourgoiſe ſ'en tourne Tantoſt qu'elle vint la
Celle d'une fillete Maintenant delivra
Au mouſtier fu poꝛtee Et on la baptiſa.
Elle ot a non Philippe Quant vint au baptiſier
Touz ceuz de la paroiſſe Se vont trop merveillier
De celle vaillant femme C'on ſoloit tant pꝛiſier
Mais nus ne ſot du pere Parler ne teſmoingnier
De ſa groiſſeſſe Nul ne pot apercevoir
Car elle avoit des robes Du tout a ſon vouloir
Ne pꝛivee n'eſtrange N'en ſot onques le voir
Vous oꝛrez ja merveilles Moult granz ramentevoir
Quant la bourgoiſe fu De l'enfant delivree
Par tout fu la nouvele Eſpandue et alee
Pour autres aventures Fu la choſe oubliee
La dame apꝛés ſon mois Eſt a confeſſe alee
A ſon curé ſ'en vint En grant devotion
Ses pechiez li conta Par bonne entencion
Mais el ne pot Avoir point d'aſolution
S'elle ne va a /Romme N'en pot avoir pardon.
La bourgoiſe fu moult Dolante et eſbahie
Bien diſt que maintenant Aler n'i poꝛroit mie
Mais bien pꝛomiſt A Dieu et a /ſainte Marie
Qu'elle yra ca avant Se Diex li donne vie
Et ſe ſa fille vit Avec li la menra.
Par devant l'apoſtoile Son pechié mouſterra
La bourgoiſe .x. ans En ce point demoura
Sa fille devint belle Et crut et amenda
Si toſt qu'elle ot .xi. ans A l'eſcole fu miſe
Ainz qu'elle en eüſt .XII. Fu ſage et bien apꝛiſe
N'avoit de ſon aage Si ſage juſqu'en /Friſe
En Dieu amer avoit Toute ſ'entente miſe
/La douce mere Dieu De tout ſon cuer ſervoit
Quant ce venoit a Paſques Moult bien ſe confeſſoit
Et le coꝛs /Jhesucriſt Doucement recevoit
Mais el ne ſavoit mie qui ſes peres eſtoit
Car ſ'elle le ſeüſt A ce qu'elle eſtoit ſage
Jamais jour n'eüſt bien Ne joie en ſon courage
.I. jour fu la pucelle Devant le douz ymage
De /la vierge Marie Qu'elle l'avoit d'uſage
A celle pucelete vint une aviſion
Qui li diſt belle fille Va t'en en ta mai[ſo]n
Doucement em pitié Met ta mere a raiſon
Prie li que te die Comment ton pere a non.
A tant ſ'en part la voiz Et cele eſt demouree
De ce qu'elle a oÿ Fu foꝛment treſpensee
A ſon hoſtel ſ'en vint S'a ſa mere trouvee
Qui em plourant ſe claime Laſſe maleüree
La pucelete fu penſive et eſperdue
De celle voiz qu'elle ot Oie et entendue
Et quant trouva ſa mere Plourant le ſanc li mue
De Dieu le ſalua Devant li eſt venue
Puis li diſt douce mere C'avez vous a plourer
Onques mais ne vi femme Si ſouvent duel mener
Onques ne vous vi rire N'entre gent depoꝛter
Ne moi tant fuſſe jone Baiſier ne acoler
Touz jourz a vostre cuer Duel triſtreſce et anui
Ma mere d'une choſe Trop merveilleuſe ſui
Onques ne vous oÿ dire Qui fille ſui
Ne onques de mon pere Parler ne vous oÿ
Si com ces autres femmes parlent de leurs maris
Dites moi de mon pere S'il eſt ou moꝛs ou vis
Quant la mere ot ſa fille Le ſanc li eſt fremis
Tel deſtreſce ot au cuer A poi qu'il n'eſt partis
En eſtargie fu Auſſi comme paſmee
Quant elle pot parler Si ſ'eſt haut eſcriee
Fille mes cuers mes enfes La voie [a] deſiree
Que peüſſes ſavoir Qui t'eüſt engendꝛee
Belle tres douce fille Et je le te dirai
J'avoie .i. moult biax filz [qu']avecques moi couchai
Des qu'il eſtoit petit Pour ce que tant l'amai
Et puis quant il fu grant A li m'abandonnai
Il t'engendꝛa en moi Onques puis je n'oï joie
Tu es fille ton frere Dont a poi ne marvoie
Que je dout qu'en enfer Dëable ne me convoie
Et moi et toi et li; Se Diex ne nous ravoie
Et /la vierge Marie En qui j'ai grant fiance
Quant la fille l'oÿ Moult mua contenance
De perdꝛe coꝛs et ame Fu foꝛment en doutance
Loꝛs apela ſa mere Et li diſt en oiance
Mere pieca diſt on Et c'eſt bien choſe clere
La truie fait bien tant Son pourcel le compere
Le pechié eſt trop grant Quant ſui fille mon frere
Mais c'a Dieu ne deſplaiſe Mar fuſiez vous ma mere
Laſſe povre dolente Que poꝛrai devenir
Terre devroit partir Et mon coꝛs trangloutir
Ha; /royne des ciex Par voſtre douz plaiſir
A ſi vilain pechié Ne me laiſſiez partir
Certes oꝛ doi je bien eſtre deſconfoꝛtee
Quant es oeuvres du dëable Sui conceüe et nee
En aucun grant deſert M'en fuirai eſgaree
La ferai penitance Dont je ſerai ſauvee
Mere chaſcune beſte Par ſon [propre ]pié pent
Penſez de vous je vois querir mon ſauvement
Se je vous puis aidier Ne faire alegement
Je vous deſtournerai D'aler a dampnement
Des biens que je ferai Je vous fais parſonniere
Car jamais en ce monde N'avrai joie pleniere
Puis que je ſui Iſſue de ſi oꝛde matiere
Tenir m'en doi plus vil. Et moi mains avoir chiere
Je m'en vois a confeſſe Pour m'ame amender
Loꝛs ſ'en va la pucelle A ſon curé parler
Treſtoute l'aventure Li va dire et conter
Fille ce diſt le pꝛeſtre Ne te puis confoꝛter
Au ſaint pere le pappe Aler te convendꝛa
C'eſt cil qui de tes maus L'aſoute te donra
Quant celle vit qu'a /Romme Au pappe ſ'en yra
A l'oſtel ſ'en revint Moult tendꝛement ploura
Douce mere diſt elle En tourment m'avez miſe
A /Romme m'en yrai La voie y ai pꝛomiſe
Mais je ne ſai la voie Ne je ne l'ai apꝛiſe
Diex me veille conduire Par ſa douce franchiſe
Fille ce diſt la mere Entre nous .ii. yrons.
De l'oꝛ et de l'argent Aſſez empoꝛterons
Et de touz nos pechiez Nous nous amenderons
Mere diſt la pucelle Faites ſi nous haſtons
Mandez des plus preudomes De tout vostre lignage
Metez leur tout en garde Meubles et heritage
Et ſi faites [c]rier Par treſtout ceſt rivage
Une belle donnee Vous ferez comme ſage
Et ſi faites chanter Vostre meſſe au mouvoir
Fille ce diſt la mere En toi a grant ſavoir
Loꝛs manda ſes amis Pour garder ſon avoir
Et fiſt moult grant donnee Pour a Dieu miex vouloir
Quant la bourgoiſe ot bien Ses choſes oꝛdenees
Et leur meſſe fu dite Et fait belles donnees
Entre li et ſa fille Se ſont acheminees
Droit vers /Romme la grant Errant en ſont alees
Oꝛ les conduie Diex. Le roy de tout le mont
Jamais en leur pays Elles ne revendꝛont
Car fille et mere et filz Encoꝛe ſe verront.
Et tout en .i. hoſtel En une nuit moꝛront
Oꝛ commence biau dit Et plain de grant ſuſtance
Comment ces .iii. perſonnes Firent leur penitance
D'eſtre en enfer dampné Furent en grant balance
Oez comment il firent Vers Dieu leur acoꝛdance
La bougoiſe et ſa fille Sont venues a /Romme
Par devant l'apoſtoille Qui fu ſainte perſonne
La dame diſt au pappe De ſes pechiez la ſomme.
Le filz connut ſa mere Mais point ne l'araiſonne
Cil l'eſcouta parler Tant qu'elle ot tretout dit
Le bon pappe n'ot mie La bourgoiſe en deſpit
Pour l'oꝛrible pechié Mais moult bien li enquit
Tout le fait et la ſomme Li dit ſanz contredit.
Tout auſſi c'au pechié ſ'eſtoit abandonnee
Adont a pꝛis ſa fille Au pappe l'a mouſtree
Et li diſt ceſte fille. A mon filz engendꝛee
En moi j'en quier penance Que m'ame ſoit ſauvee
Quant la mere ot au pappe Sa confeſſion dite
Loꝛs a parlé au pappe La pucelle petite
Sire de celle oꝛdure Qui de Dieu eſt deſpite
Fu foꝛmee ma char Donnez m'ent tel merite
Que m'ame ne puiſt eſtre Du pechié parſonniere
Des oeuvres au dëable Me veü ge traire arriere
Fille diſt l'apoſtolle. Tu fais bonne pꝛoiere
Ta conſcience eſt bonne Nete vraie et entiere
Le varlet vint au pappe Et li diſt biau douz pere
Certes ſire diſt il. Veez vous ci ma mere
Et vez vous ci ma fille Nous ſommes ſuer et frere
J'en ai fait le pechié Drois eſt que le compere
Biau filz ce dit le pappe J'ai moult bien entendu
Le pechié ou dëable Vous avoit embatu
Pourquoi je t'ai lonctemps Entour moi retenu
Qu'anemis ne t'eüſt De touz poins confondu.
Trois jours vout l'apoſtolle La dame retenir.
Li et ſa fille fiſt a ſa court Bien ſervir
Au tiers jour chanta meſſe Adont a fait venir
La dame et ſes enfanz Vous poꝛrez ja oir
Grant pitié recoꝛder Et choſe merveilleuſe
La bourgoiſe fu moult Pour le pueple honteuſe
De bon cuer reclama /La Vierge gloꝛieuſe
Qui en ſes flans poꝛta La char Dieu pꝛecieuſe
Encoꝛ n'avoit la mere Son filz reconneü
Car biau varlet eſtoit Et foꝛt et parcreü
Mais adont le connut Quant de pꝛés l'ot veü.
Oꝛ ſachiez que ſes cuers Fur foꝛment eſmeü.
De paour de pechié Et de honte elle tramble
Tout le cuer li ſautelle Comme fueille de tramble
Cardiniaus et liegaus Sont laiens touz enſamble
Loꝛs leur fu penitance Baillie a touz enſamble
Moult fu leur penitance hideuſe a regarder
.III. cuirs de buef a fait L'apoſtolle apoꝛter
A chaſcun en donne un Pour lui envoleper
Dedenz les fiſt on queudꝛe Et bien eſtroit ſerrer
La mere fu couſue Ou ſien pꝛemierement
Et le varlet apꝛés Puis la fille enſement
Viſage piez et mains Ont a delivrement
Adont li apoſtolles Leur fiſt commandement
Bel enfant diſt le pappe Entendez a mes dis
Ja vous commant ſus toutes Vos pars de paradis
Que jamais de ces cuirs Ne ſoiez desveſtis
Si les aiez .vii. anz Poꝛtez par le pays
Ne en chaſcune ville C'une nuit ne geſez
Se de grant maladie N'eſtes trop agrevez
Ne duſques loꝛs les Cuirs vous ne deſpoullerés
Du jour d'ui en .vii. anz Ci a moi revendꝛez
Je vous charge et enjoins Et doins ceſte penance
Car elle plait a Dieu Dëable en a peſance
De tretous vos pechiez Je vous fais pardonnance
Jamais par l'anemi Vous n'en avrez grevance
Li apoſtolles fiſt par grant devotion.
Faire as clers et a preſtres Belle pꝛouceſſion
Pour convoier ces .iii. Par bonne entencion
Que /Jhesus les conduie A leur ſauvacion
A un chemin croiſié Le pappe les mena
Et a chaſcun par li Doucement commanda
Tu tendꝛas ce chemin Et toi ce l'autre la
Et tu tendꝛas le tiers Et ne le change ja.
Duſc'a d'ui en .vii. anz L'un l'autre ne verrez
Et ſ'aventure vient Que vous vous encontrez
Je vous deffent. Que l'un a l'autre ne parlez
Et vivez des aumoſnes Que vous pourchaſſerez
Tout l'avoir que la mere Et la fille apoꝛterent
Robes oꝛ et argent Pour l'amour Dieu donnerent
Et auſſi fiſt le filz Du tout ſe deſnuerent
Pain ne argent ne gages avec eulz n'enpoꝛterent
Touz nulz et touz deſcaus Furent et nues teſtes
Foꝛs que couſus eſtoient Dedenz les cuirs des beſtes
Jamais plus n'i aront Tant ſoient hautes feſtes
Adont a fait la mere au pappe ſes requeſtes
Sire diſt la bourgoiſe. Pour Dieu je vous requier
Donnez moi le congié De mes enfanz baiſier
Non ferai diſt le pappe Gardez n'i atouchier
Ne ton filz ne ta fille Bien poꝛroies pechier
Le filz pꝛiſt ſon chemin Devers ſoleil levant
Et la fille le pꝛiſt Devers midi ſonnant
La mere pꝛiſt le ſien Devers ſoleil couchant
Loꝛs ot la mere au cuer Doleur et pitié grant
Quant elle vit ſa fille Qui d'eulz ainſſi ſe part
Qui ſ'en va en eſſil; Et ſi ne ſet quel part.
Tel duel ot a ſon cuer A poi que ne li part
Et li filz et la fille Font grant duel d'autre part.
Adont a dit la mere Fille a Dieu te commant
Pour toi ai tel deſtreſce Ne puis aler avant
Loꝛs mainent ſi grant duel La mere et li enfant
Que touz ceuz qui les voient Vont de pitié plourant
Enfant ce diſt la mere Quant de ci partirons
En ceſtui ſiecle ci jamais Ne nous verrons
Mere ce diſt la fille Grant joie avoir devons.
Quant pour .i. poi de paine Paradis conquerons
Ma mere vostre amour ne me puet riens valoir
Ne de la moie auſſi Ne vous puet il chaloir
Penſon a Dieu qui voult Pour nous moꝛt recevoir
Par quoi en paradis Puiſſons nos lieux avoir
Mere je voue a Dieu que chaſcun jour dirai
Pour vous unes .vii. ſiaumes Que ja jour n'en faudꝛai
Et unes pour mon frere Bien les emploierai
Et touz nos bienfaiteurs Y acompaignerai
Pour moi en dirai unes Que Diex par ſa bonté
En quel lieu que je uoiſe Me maint a ſauveté
Et me doinſt par ſa grace garder virginité
Si qu'en ceſt monde puiſſe Faire ſa volenté
Mere diſt le varlet Veilliez moi pardonner
Toutes males facons C'a pechié puet tourner
Par quoi il vous convient Penitance endurer
Filz Diex le te pardoinſt Et puiſt quite clamer
Touz .iii. vont li uns l'autre Pardonner bonnement
Loꝛs parla le varlet Et diſt piteuſement
Fille je t'engendꝛai Ma ſuer es vraiement
Pardonner le me veille Le douz roy qui ne ment
La pucelle reſpont A Dieu mon tres douz frere
Moi et vous a poꝛté En ſon ventre une mere
Oꝛ ouvra tant nature En pechié d'adultere
Que je ſui vostre fille Et vous eſtes mon pere
Quant chaſcun ot l'un l'autre Doucement pardonné
Le mouſtier /Noſtre Dame A chaſcun regardé
A nus genous mains jointes De bonne volenté
Prient /la mere Dieu Qui leur doinſt ſauveté
Le pappe leur a diſt Oꝛ toſt departez vous
D'ui tout dꝛoit en .vii. anz Revendꝛez ci a nous
Et loꝛs vous ſerez quites De vos pechiez treſtouz
Alez que Diex vous ſoit Debonnaires et dous
Touz .iii. devant le pappe Se ſont agenouillez
Et le pappe les a beneis Et ſeigniés
Et l'yaue beneoite Les. a touz .iii. moulliez
Apꝛés pour cheminer Se ſont appareilliez
Li enfant et la mere L'un de l'autre ſevrerent
Chaſcun pꝛiſt ſon chemin A Dieu ſe commanderent
Oꝛ entrent en grief paine Ou moult ſe traveillierent
L'apoſtoille et ſa gent A /Romme retournerent
Oꝛ ſe ſont li enfant De la mere partis
Et la fille du pere Et la mere du filz
Jamais ne ſe verront Tant comme il ſoient vis
Grant fain et grant froit oꝛent Et [...]des durs lis
S'il n'avoient de mal que la paour des chiens
Et des gens qui leur getent Et cavates et fiens
Pour ce qu'il ne ſambloient Pas eſtre creſtiens
Pour leur grant piax velues Aront il poi de biens
Meiſmes les granz genz Leur firent moult anuis
Herbergier ne le voudꝛent Si toſt qu'il eſtoit nuis
Mais leur chiens leur huoient Et clooient leur huis
.VII. anz treſtouz entiers N'oꝛent autre deduis.
Mais ſi eſtoient fermes Et en Dieu ſi creans
Que plus oꝛent de maus Plus eſtoient joians
Enluminés eſtoient Embꝛaſez et ardanz
D'amer Dieu car riens plus N'eſtoient deſirrans.
Sept anz treſtous entiers Menerent ceſte vie
Pour rapꝛochier vers Romme Ont leur voie aqueillie
Pres de la cité vindꝛent Entour lieue et demie
Que li uns ne vit l'autre Ne n'ot nouvele oïe
Trop tart fu qu'il ne poꝛent Onques a /Romme aler
A .i. v[il]age vindꝛent Bien [voudrent] oſteler
Le varlet v[i]nt premier .I. homme va trouver
Au dehoꝛs de la ville Si li va demander
Se pour Dieu trouveroit hui mais ou herbergier
Cil a qui il parloit Eſtoit riche ahannier
Et menoit ſa charue Si reſpont ſanz targier
Certes biaux douz amis Ne ſai quel oſteler.
Qui pour Dieu te herberge Mais ſe tu as argent
Tu trouveras oſtel. Cil reſpont doucement
Certes ſire nenil Je ne quier ſeulement
C'un bien tres pou d'eſtrain Et le toit ſeulement
Cil qui onques pour Dieu N'ot bien fait en ſa vie
L'envoie en ſa maiſon Et li a enſeignie
Va diſt il a ma femme Di li qu'el ne leſt mie.
Qu'elle ne te herberge Sanz plus ceſte nuitie
Le penëant ſ'en tourne S'ala en ſa maiſon
La bonne dame trueve Si l'a miſe a raiſon
Dame herbergiez moi Ce dit voſtre baron
Que le vrai Dieu vous face De vos pechiez pardon
Quant la dam[e][ le ][vi]t Si fu toute[ eſfréee]
Pour celle g[r]ande pel Qu'il avoit afublee
En la grange le maine Si li a deffremee
De blanc eſtrain li mouſtre Plus d'une charetee
Cil ſe bouta dedenz Qui ot [et ]froit et fain
Malades fu et maigres Moult avoit le cuer vain
En ſes oꝛoiſons pꝛie Le haut roy ſouverain
Que il recoive ſ'ame A bꝛief terme pꝛochain
Apꝛés revint ſa fille Qui l'oſtel demanda
A celui qui ſon pere Propꝛement herberga
Le pꝛeudom le herberge A l'oſtel l'envoia
Quant la dame le vit Foꝛment ſe merveilla
Onques mais en ſa vie Ne vit gens ſi eſtranges
Car il n'ont ce li ſamble Veſtu linge ne lange
La dame le herberge Si l'envoie en la grange
Ou avant qu'il ſoit jour Deſcendꝛont .mil. ange
Quant la pucelle fu En la grange enbatue
Ou tas d'eſtrain ſe boute A tout ſa pel veſtue
A Dieu fiſt oꝛoiſon Et ſa coupe batue
Que pꝛochainement muire Et ſoit ſ'ame abſolue
Apꝛés revint la mere Foiblement apoiant
Au pꝛeudomme demande L'oſtel pour Dieu le grant
Cil l'envoie a ſa femme Qui l'amena errant
En la grange ou eſtoient Herbergié ſi enfant
Quant la dame la vit Onques puis que fu nee
Ne fu ſi eſbahye; Ne ſi foꝛt treſpensee
Pour ces .iii. gens qui ont Pel de beſte afublee.
Adont ſ'eſt la m[er]e Ou tas d'eſtrain boutee
Chaſcun des .iii. cuidoit Laiens eſtre tout ſeux
Dont pꝛiſtrent a pꝛier Le doux roy gloꝛieux
Qu'en celle nuit leur ſoit Si doux et ſi piteux
Qu'en paradis leur doinſt Le repos deliteux
L'oſteſſe ſ'em parti A la clef frema l'uis.
Ses maris a l'oſtel Revint quant il fu nuis
Sire ce diſt la dame Vous ſouliez eſtre duis
De ramponer les povres Et faire aſſez d'anuis
Onques mais ne vous vi Aumoſne ne bien faire
Je croi vous ſaintirez C'aviés oꝛe a faire
De tel gent herbergier Loꝛs ne ſe vout plus taire
Le ſire. ainz a dit dame Dieu puiſt il plaire
Se j'ai hay les povres Et je les vuel amer
Et poi leur ai valu Et je leur veul donner
Encoꝛ le me poꝛra Bien Dieu guerredonner
On diſt que ceſt aumoſne Des povres oſteler
Duſques apꝛés ſouper En ce point demoura
Loꝛs le ſire ſ'apenſe Sa meſchine apela
Di. as tu que poꝛter A ces povres genz la
Certes ſire diſt elle Nule choſe n'i a.
Par t'ame pꝛen y garde Et celle va tantoſt
Jurer qu'il n'i avoit Riens dedens le pot
Vuit le cuida mouſtrer Mais ainſſi com Dieu plot
Le trouva treſtout plain Dont grant merveilles ot
C'eſt bien fait diſt le ſire poꝛte leur et du pain
Car cil qui eſt ſaoul Et a le ventre plain
Ne ſent pas le meſchief De celui qui a f[a]in.
Loꝛs ſ'en va la meſchine Le pot pꝛiſt en ſa main
Du pain des eſcuelles avecques li enpoꝛte
A la grange eſt venue Et vit parmi la poꝛte
Une ſi grant clarté Paour ot d'eſtre moꝛte
A l'oſtel ſ'en rafuit Quanqu'el poꝛtoit rapoꝛte
En tramblant de paour S'aventure a contee
Et leur diſt que la grange Eſtoit toute embꝛaſee
Le ſire y acourut; La dame y eſt alee.
Si ont parmi la poꝛte La clarté regardee
Si virent et bien ſoꝛent Que ce n'eſtoit pas feux
Mais de la grant clarté Furent trop merveilleux
Dedenz entrer ne poꝛent Loꝛs deviſent entr'eux
Que il ont herbergié .III. ſainz coꝛs gloꝛieux
Certes il diſtrent voir bien le ſavront par tans
De ſon mari la dame Ot eü .ii. enfans
Li uns ot .XVI. mois. Et li autres .x. ans.
Onques n'avoit alé Sus ſes piez li plus granz.
Les jambes avoit molles Tout a[in]ſſi com dꝛapel
Car nus os n'i avoit Que la char et la pel.
Tout ainſſi fu il nez Sours eſtoit et muel
Vous poꝛrez ja oir. .I. miracle moult bel
Li mainsnés fu aveugles Onques n'avoit veü
De ſanté li enfant Furent mal pourveü
Car pechié avoit ſi; Leur pere deceü
Que envers Dieu n'avoit De riens fait ſon deü
Felon et deſpitouz Vers povre gent eſtoit
La diſme de ſes biens Mauvaiſement paioit
De ſarmon ne d'eglyſe Nule cure n'avoit
Et Diex par ſes enfanz Exemple l'en mouſtroit
Car a Dieu n'a ſa mere Ne plaiſoit point ſa vie
Mais puis fu il pꝛeudons Sanz oꝛguel ſanz envie
Et pour ce li ot Diex Cele gent envoie
Pour quoi charité fuſt En ſon cuer deſploie
Puis fu il moult pꝛeudons Et plains d'umilité
Et ama moult les povres En foi en charité
Et par miracles oꝛent Ses .ii. enfans ſanté
Puis furent il hermitez Par la Dieu volenté.
De la clarté qui fu En la grange venue
Vous dirai par quel choſe Elle y eſt deſcendue
La grant grace de Dieu Y fu ſi eſpandue
Que plus de mil anges Deſcendent d'une nue
Yces .iii. coꝛs ſainz couſus es cuirs de beſtes
Chaſcun entour matines Fiſt a Dieu ſa requeſte
Que de ce monde l'oſte. Ou il n'a que moleſte
Diex oÿ ceulz qui oꝛent Fait penitance honneſte
Car touz .iii. a une heure Du ſiecle treſpaſſerent
Granz congregations D'anges ſ'appareillierent
Qui les ames des .iii. En paradis poꝛterent
Et o douz roy de gloire Tantoſt les pꝛeſenterent
Moult gloꝛieuſement Les sains anges chantoient
Te Deum laudamus Et grant feſte faiſoient
Quant les ames des .iii. Em paradiz poꝛtoient
Devant le roy de gloire Errant les preſentoient
Oꝛ furent les .iii. coꝛs En la grange au preudome
Le pꝛeudomme bien matin Se lieve et va a /Romme
Devant le pappe vint Qui fu bonne perſonne
De ceulz qu'il herberga Li diſt toute la ſomme
Des cuirs qu'il ont veſtu Et de la grant clarté
Et du biau chant des anges De la ſollempnité
Qu'il oÿ a matines Treſtout li a conté
Et le ſaint apoſtolle L'a moult bien eſcouté
Des .iii. penans li membꝛe Qui penance il bailla
Les pꝛelaz de ſa court Tout maintenant manda
A grant pꝛoceſſion Alerent tantoſt la
Ou les .iii. coꝛs eſtoient Le pꝛeudom les mena
Onques nul foꝛs le pappe ne pot l'u[i]s deffremer
N'onques avant que li Ne pot dedenz entrer
Et le bon apoſtolle. Les fiſt touz encliner
A genoulz et mains jointes Dame Dieu reclamer
A celle fin qu'il fuſſent Dignes d'apercevoir
Les coꝛs pour qui Diex Fiſt la clarté aparoir
.I. ange diſt au pappe Diex t'a fait aſavoir
Que dedenz cel eſtrain A .iii. coꝛs sains pour voir
Et encoꝛe te mande Le vrai Dieu tout puiſſans
Cil qui ceſt oſtel eſt A .ii. petis enfanz
Contrés ſours et aveugles De ſanté non puiſſanz
Ja les verrez garis Dont moult ſerez joianz
Faites les apoꝛter Par devant les sains coꝛs
Le pappe ot moult grant joie Loꝛs fu mis l'eſtrain hoꝛs
Les .iii. coꝛs ſainz trouverent Luiſanz plus que fin oꝛs.
Les enfanz non poiſſanz Y apoꝛterent loꝛs
Si toſt com les enfans Sont devant les coꝛs ſains
Par les vertus de Dieu Furent garis et ſainz
Les cloches de l'egliſe De ce ſoiez certains
Sonnerent tout par elles Sanz metre piez ne mains
Ce faiſoit le vrai Dieu pour les ſiens eſſaucier
Oꝛ furent li enfant Sain et pꝛeux et legier
La grant joie leur mere Ne ſavroit nus pꝛiſier
Ne de leur pere auſſi Ni ot qu'eſl[é]ecier.
Le ſaint pappe vit bien Et ſot certainement
Que c'eſt ſes chambelens Dont cure ot longuement
Et la mere au vallet Et leur fille enſement.
Qu'il ont par penitance Conquis leur ſauvement
Chaſcun en ſa main deſtre .I. petit bꝛief tenoit
Eſcrit de lettres d'oꝛ Dedenz leurs nons eſtoit
Et avecques leur nons Une oꝛoiſon avoit
Que chaſcun diſt a l'eure Ou Dieu l'ame rendoit
Le pappe pꝛiſt le bꝛief Et dedenz regarda.
Le bꝛief ſon chambelenc Premierement trouva
Son non et ſa pꝛoiere Que diſt quant treſpaſſa
En loant /Nostre Dame /Qui le douz Dieu poꝛta
Au ſainz fonz de bapteſme Fu [...][nommez]
Apꝛés vit le ſaint pappe La pꝛoiere delez
Je la recoꝛderai S'entendꝛe le voulez
Que de Dieu tous vous ſoient Vos pechiez pardonnez
Ave /ſuperlative tres excellent royne
/Eſcharboucle enbꝛaſee De haute amour devine
Pour tous mehains vous eſtes /Parfaite medecine
Priez /vo filz qu'il mete M'ame en [votre] ſaiſine
Vierge pꝛiez vo fil qu'il ſoit mes avocas
Et qu'il deffende m'ame Contre les Sathanas
Qu'en paradis puiſſe eſtre Avec vous a ſoulaz
Amen. Je vous pꝛi /Dame Que ne m'oubliez pas.
Ou bꝛievet qui eſtoit En la main la pucele
Trouva li apoſtolles Une oꝛoiſon moult belle
/Vierge Dieu alaita Ta tres douce mamelle
Si comme ce fu voir Oÿ moi car je t'apelle
/Vierge par la vertu De /vostre douz enfant
Sus toute riens du monde A vous obeiſſant
Veilliez qu'en paradiz Puiſſe eſtre demourant
Amen. /Vierge Dieu mere Ne m'alez oubliant
Quant le saint apoſtoille Ot leu l'oꝛoiſon
Il va trouver Philippe Ainſſi ot elle non.
Apꝛés le bꝛief la mere A leü. le saint hom.
Que bien l'ont entendu [Entour ]et environ
Ou pꝛemier mot trouva Qu'ele avoit non Alaine
Apꝛés lut l'oꝛoiſon Et dit a haute alaine
/Vierge pure en qui Diex Vout pꝛendꝛe char humaine
Gardez moi qu'en enfer M'ame ne ſueffre paine
Dame vous eſtes /lumiere /ſanz luour tranſitoire
De qui /ſolail naſqui Qui eſt [le ]roy de gloire
Veilliez qu'en paradis Puiſt m'ame avoir victoire
Amen et treſtous ceulz Qui vous ont en memoire
Ces .iii. bꝛiés .i. saint ange Les bailla as coꝛs ſainz
Pour ce que de leur nons Fuſt li pappes certains
[...]
[...]
Le pappe les cuida faire a /Romme poꝛter
Mais nient plus c'on poꝛroit .I. grant chamel bouter
Par le cul d'une aguille Nes pot on remuer
Dont a l'apoſtolle Le pꝛeudome apeler
Preudons diſt l'apoſtolle Il te convient laiſſier
Treſtout ton heritage Je te ferai baillier
Ailleurs plus bel manoir Ja n'i perdꝛas denier
Car je ferai ci faire Abaie ou mouſtier
Le pꝛeudons reſpondi Moult liez et moult joians
Pour ce que Diex ot fait Vertuz ſuz ſes enfans
Sire a vostre gré faire Sui touz obeiſſanz
Tu as dꝛoit dit le pappe Ja ni ſeras perdanz
Le ſaint bon apoſtolle a l'euvre ſi haſtee
Que par li que par ceulz De toute la contree
Que riche abaie ot Sus le lieu fondee
Des vertus qu'il y firent Fu grant la renommee
Les .iii. coꝛs ſains fiſt on. En .iii. fietres lever
Toutes d'oꝛ et d'argent Richement atourner
De toutes maladies Qui les veult reclamer
Puet on as .iii. saint coꝛs Sa gariſon trouver
Touz ceulz et toutes celes C'ont de ſanté meſtier
Se n'eſt mal de la moꝛt Dont nus ne puet aidier
Se devant les saint coꝛs .IX. jours en leur mouſtier
Au neuviſme ſ'en vont Sain et foꝛt et legier
Chartriers mués et ſours Aveugles et contrais
Chaſcun y eſt gari Et de loins et de pꝛés
Et de touz les mehainz Doit chaſcun eſtre engrés
D'amer ces .iii. coꝛs ſainz C'on puet nommer apꝛés.
Vous qui avez oÿ ce biau dit recoꝛder
En ceſt example ci Vous devez remirer
Auſſi de vos pechiez Et de vous confeſſer
Nus ne puet tant pechier Com Diex puet pardonner
Mais nus ne doit pechier en ycelle eſperance
Prions Dieu et ſa mere Qui ſus tous a puiſſance
Que d'enfer nous deffende Ou il n'a que grevance.
Par quoi en paradis Soit nostre demourance Amen.