L'eſcripture teſmoingne Et nous fait aſavoir
Que chaſcuns et chaſcune Qui a ſens et ſavoir
Doit en ſa plaine vie Faire ſi ſon devoir
Par quoi il puiſt aler En paradis ſeoir
Car nus ne ſet le jour Ne l'eure qu'il mourra
Ne nus ne ſet quel part L'ame de lui ira
Au deſtroit de la moꝛt Quant du coꝛps partira
Dieus nous fiſt et deſfait Et tous nous deſfeꝛa
Chaſcun i doit penſeꝛ Qui a entendement
Qu'il nous convient paſſeꝛ Par la moꝛt qui tout pꝛent
Car nus ne puet veꝛs Lui avoir deſfandement
Pour ce doit on a l'ame Queꝛir ſon ſauvement
Ainſi com firent ceuls Dont vous m'oꝛrez retraire
Ou chaſcun pourra penre .I. moult bel eſſemplaire
Je le recoꝛdeꝛai ſ'il ne Vous doit deſplaire
Que Dieus nous doint ſ'amour Et ſa voulenté faire
Trois moult nobles chanoines Furent au temps jadis
Qui eſtoient moult riche Et enfoꝛcié d'amis
Et s'eſtoient pꝛeudomme Et en fais et en dis
De bonté de largeſce Avoient los et pꝛis
Et tant que chevauchoient enſemble a .i. matin
Par mi .i. cemetieꝛe Toꝛneꝛent leur chemin
Pour les ames des coꝛps Prieꝛent de cueꝛ fin
Au roi qui touz jours ieꝛt Et qui ja n'avra fin
Li ainſné de ces trois Commanca a penſer
Que parmi celle moꝛt Les convendꝛa paſſeꝛ
En ſen ce pourpenſa Et pꝛiſt a ſoupirieꝛ
Grant piece chevaucha C'onques ne pot parleꝛ
Et li autre doi furent En itelle pensee
L'un ne parla a l'autre De pꝛés d'une luee
Li ainſnés a pꝛemieꝛs Sa raiſon deviſſee
Loꝛs chevauchent enſemble S'ont leur raiſon contee
Seigneurs par celle foi Que vous a Dieu devez
Oꝛ me dites pourquoi Eſtez ſi tres penſez
Voulentieꝛs diſt li uns Mes vous me redirés
Par quel miracle Eſtez ci abomés
Cil reſpont biau compains Ne vous mentirai mie
Je penſe qu'il n'eſt nulz Qui ne peꝛde l'ame
Tous nous convient mourir Comment que chaſcun die
Il n'eſt nus que la moꝛt Ne face departie
Li autre reſpondi conpains Vous dites voir
Tous nous convient moꝛir Chaſcun le puet ſavoir
Il n'eſt ſi grant richeſce Qui nous i puiſt valoir
Chaſcun qui ſages eſt S'en puet apeꝛcevoir
Les .iii. chanoines furent enſemble d'un acoꝛt
Touz furent du courage De penſeꝛ a la moꝛt
Seigneur dist li ainſnés Entendez mon recoꝛt
Toute ma conſcience Me repꝛent et remoꝛt
Je weil laiſſieꝛ richeſce Et penre povreté
Et ſeꝛvir Jhesucriſt En fine loiauté
Li autre reſpondi J'en ai grant voulenté
Le tieꝛs diſt auſſi veu ge Maintenir loyauté
Les .iii. compaingnons Si d'une aliance
Et firent enveꝛs Dieu Si tres feꝛme acoꝛdance
De vivre en povreté Et ſouſfrir grant penance
Par quoi de leur pechiez Euſſent acoꝛdance
Et diſtrent que jamés il ne retoꝛneront
Ainz iront en eſſil Sainte vie merront
A Vaucleꝛ l'abaie Leur chevaus laiſſeront
Leur robes leur denieꝛs Pour l'amour Dieu donront
Ainſi comme il le diſtrent le firent bonnement
A Vaucleꝛ l'abaie S'en vont iſnelement
Leur robes leur denieꝛs Donneꝛent au couvent
Chaſcun d'un gros burel Se veſti povrement
De la ſe departirent Si ſont acheminé
Quant vint a l'endemain Siſe ſont deſſevré
Au departir pleurerent Si ſont entr'acolé
Deleur nons ſaige Bien dire la verité
Li uns ot non Felix Ainſi l'apeloit on
Cil ala demourer Tout dꝛoit a Beſancon
La ſouſfri povreté En grant devoſcion
Et du ſecont apꝛés Vous dirai je le non
Il ot non Dieudonné Outre meꝛ ſ'en ala
En Jeꝛuſalem fu Grant piece i conveꝛſa
Tout dꝛoit en Antioche Li autres ſ'en ala
La devint il reclus Sainte vie mena
Il ot non Bonniface La fiſt ſa demouree
Moult bon los i queilli De ceus de la contree
Dieu ſeꝛvi et ſa Mere De cueꝛ et de pensee
A Felix ſon compains Feꝛai ma retoꝛnee
A Beſancon ala Moult fu bonne ſa vie
D'oꝛgueil ne de boban N'ot talent ne d'envie
Pourement ſe maintint Ainſi comme en folie
Les enfans li faiſſoient Aſſez grant vilonnie
La boue li getoient Et ſavates et fiens
De quant que li faiſſoient Ne diſſoit nule riens
Plus de .vii. ans entieꝛs Ne mengoit nulle riens
Quant il vouloit mengier Il le toloit aus chiens
Toutes les nuis aloit En une viez chapelle
La ſeꝛvoit Jhesucriſt Et la Vieꝛge pucelle
Sus les pierres giſſoit En pure ſa cotelle
La fiſt tel penitance Qui li fu bonne et belle
Au temps que je vous di Avoit a Beſancon
.I. r[i]che chevalier Et de moult grant renon
Entre lui et un pꝛeſtre Oꝛent moult grant tencon
Et plaidierent enſemble Ne ſai par quel raiſon
Le chevalieꝛ perdi Par loial jugement
Le preſtre le fiſt metre En eſcommenjement
Le chevalieꝛ eſtoit Oꝛguilleus malement
Aupreſtre ne daigna Obeir nullement
En eſcommenjement Veſqui et en oꝛdure
De li faire raſoudꝛe N'avoit talent ne cure
Ens el mouſtieꝛ entra Courouciez en ardure
Le pꝛeſtre pour chanter Ot pꝛis ſa veſteure
Ainſi comme il vouloit La meſſe commancieꝛ
Le chevalieꝛ atrait .I. bꝛanc foꝛbi d'acieꝛ
Du pꝛeſtre ſ'apꝛocha Le chief li va trenchieꝛ
Et par devant l'autel Le fiſt jus trebuchieꝛ
Le chevalier ſ'en tourne Plus n'i fiſt demouree
Au pꝛeſtre qui fu moꝛs Fu moult grant l'aſemblee
Au mouſtieꝛ Saint Loꝛens Ont la foſſe cavee
Li ami de par li on grant Doulour menee
Le chevalieꝛ ſ'apenſe qu'il ſe veut amendeꝛ
Tantoſt au penancieꝛ Ala pour confeſſieꝛ
Tous ces pechiez li conte Ne li volt riens celeꝛ
Cil diſt qu'il ne le puet Nullement conſeillieꝛ
Le chevalieꝛ ſ'en tourne Courouciez et plain d'ire
A l'arceveſque ala Sa conſcience dire
L'veſteure li diſt Alez vous ent biauſire
Car je ne vous pourroie Aidieꝛ de tel martire
Alez a l'apoſtole qui vous conſeillera
Car il eſt Dieu en terre Moult bien vous aſoudꝛa
Le chevalieꝛ a tant D'ilecques ſ'en toꝛna
A l'apoſtole vint Tout ſon fait li conta
Quant le chevalier ot tout Son fait raconté
De l'escommingement Ou il ot tant eſté
Et du pꝛeſtre qu'il ot Devant l'autel tué
Le pappe le regarde Puis li a demandé
Biaus amis pour quel cas Tuas tu le pꝛeudomme
Le pechié eſt ſi grant Que je n'en ſai la ſomme
Qu'au ſeꝛviſe de Dieu Tu tuas la perſonne
Qui couchoit et levoit Celui qui tous bien donne
Tu demourras hui mes Et je m'aviſſeꝛai
Et demain au matin Je te conſeilleꝛai
Et ſelonc le pechié Penance te donrai
Le chevalieꝛ reſpont Voulentieꝛs le ferai
Le chevalier ſen part Le pappe ſ'aviſſa
Il meiſmes ſon coꝛs Le ſeꝛviſce chanta
U ſecré de la meſſe Au coꝛs Dieu demanda
Comment au penancieꝛ Penitance donra
Le Roi de paradis Entendi ſa pꝛieꝛe
.I. angre li tramiſt Qui giete grant lumieꝛe
.I. bꝛief li apoꝛta Et li diſt la manieꝛe
Quant le pappe le voit Si a levé la chieꝛe
Dedens le bꝛief trouva Ce que Dieus li mandoit
Comant en Antioche Celui envoieroit
Parler a Bonniface Qui reclus i eſtoit
Grant paine et grant travail Souſfrir li convenoit
Quant ce vint l'andemain Le chevalier revint
Quant il coiſiſt le pappe Simplement ſe maintint
La lectre de par Dieu En ſa deſtre main tint
Quant le pappe le voit De li bien li ſouvint
Biaus filz ce diſt le pappe Tu iras outremer
En la ciſt d'Entioche A un home parler
Il a non Boniface Se tu le veus trouver
Il te pourra moult bien De ton fait confoꝛteꝛ
Le chevalier lentant Si fu moult eſmaiez
A l'apoſtole a dit dolens Et courrouciez
A cil plus grant povoir La ou vous m'envoiez
Que vous qui eſtez Dieu En terre touz jugiez
Le pappe reſpondi Dieu le veult et commande
Sire dont irai je Puis que Dieu le me mande
A ce mot ſ'en parti Et le congié demande
Quant il fu loins de Romme S'entra en une lande
Maint ſauvage pais trouva Et mainte roche
Quant il fu outremeꝛ S'ala en Antioche
Des eſpeꝛons tranchans Souvent le cheval bꝛoche
Parmi .i. grant bocage Ou ces dꝛas li acroche
Quant vint en Antioche Bonniface trouva
Devant lui ſ'agenouille A lui ſe confeſſa
Tous ces pechiez li conte Li ſains hons l'eſcouta
Au chevalieꝛ a dit Amis entendez ca
Vous demourrés hui mes De ci ques a demain
Se Diex pleſt noste Pere Qui eſt roi ſouveꝛain
Qui ciel et terre et meꝛ Et tout a en ſa main
Ce que je vous dirai Ne ſera pas en vain
Le chevalier ſ'en part Le pꝛeudomme demeure
Tantoſt ſ'agenouilla Maintenant ens en l'eure
Souvent reclainme Dieu Des ieus tenrement pleure
Pour le pecheeur pꝛie Que Jhesus le sequeure
Jhesucriſt par ſon angre Li a tantoſt mandé
Di a ce chevalieꝛ S'il veult avoir ſanté
Voit en Jeruſalem Parler a Dieudonné
A tant ſ'en part li angres A Dieu l'a comandé
Quant vint a l'endemain Que la nuit fu paſſee
Le chevalieꝛ revint Qui fu en grant pensee
Boniface a la beſoigne contee
Ainſi com Dieus vouloit Qu'elle fuſt oꝛdenee
Vous en irés diſt il Droit a mon compaignon
Cil vous conſeilleꝛa Car il eſt moult pꝛeudom
Dedens Jeꝛuſalem En ſa conveꝛſion
Oꝛ le me ſaluez Et li dites mon non
Loꝛs li bailla enſeigne Qui fu bonne et ceꝛtaine
Moult fu au chevalieꝛ Celle voie grevaine
En Jeꝛuſalem vint Moult i ſouſfri grant paine
Dieudonné i trouva Qui ſainte vie maine
De par ſon compaignon Tantoſt le ſalua
Quant Dieudonné l'antant Grant joie demena
Le chevalier a lui tantoſt ſe confeſſa
Le pꝛeudomme li diſt Dieus vous confoꝛtera
Le pꝛeudom ſa pꝛieꝛe Fiſt enveꝛs Jhesucriſt
Et Dieu tout maintenant Son angre li tramiſt
Qui le reconfoꝛta Et doucement li diſt
Li Rois du ciel te mande Salut par ceſt eſcriſt
Di a ce chevalier Qu'il voit a Beſancon
Et ſi mande ſalus Felix ton compaignon
C'eſt cil qui li donra Sainte ſauvacion
Par autre homme ne puet Avoir loial pardon
Li angles ſ'en parti Sa raiſon a fin[i]e
Le chevalieꝛ revint Qui ne ſ'oublia mie
Dieudonné li a toute La beſoingne noncie
Et de ſon compaignon Li a compté la vie
Comment n'en quel manieꝛe Il le pourra trouveꝛ
La ſemblance de li Li va toute conter
A li vous convendꝛa Dignement confeſſer
Le chevalieꝛ l'entant Si commance a penſer
Et quant il ot penſé Si dit moult cruelment
A Dieudonné a dit Oꝛ me va malement
Arceveſque ne pappe N'ont tant de hardement
Qu'il me puiſſent aſoudꝛe Ne donneꝛ ſauvement
Ne vous ne vos compains Ne me povez aidieꝛ
Et vous me revoulez A .i. fol envoier
Que li enfant dechacent Et ſe giſt ou fumieꝛ
Et toſt le pain au chiens Quant il le veult mengier
Dieudonné li a dit Oꝛ ne vous eſmaiez
Que jamés par autre homme Ne ſerez conſeilliez
Tant li dit Dieudonné Que cilz c'eſt otroiez
Et qu'il ira au fol Parleꝛ moult voulentieꝛs
Le chevalier ſ'en part A la voie c'eſt mis
Juſques a Beſancon Ne ſ'i eſt alentis
Tant quiſt par la cité Qu'il a trouvé Felix
Qui des enfans eſtoit Vilainnement laidis
Le chevalier ſe pꝛiſt Foꝛment a demanteꝛ
Comant n'en quel Manieꝛe le poꝛra comfoꝛteꝛ
Si oꝛdeius perſonne Comme il voit la eſter
Jamés a tel perſone N'ira meꝛci crier
Oꝛ oez l'aventure Que Dieus i demouſtra
Quan que le chevalieꝛ Dedens ſon cueꝛ penſa
Felix ſot ſa pensee Pres de li ſ'apꝛocha
Maintenant li raconte Et tout li deviſa
Sire ce dit Felix Vous avez tel penſé
Vous ne daingniez a moi Dire voſtre ſecré
Mes compaignons Me mandent ſalus et amiſté
Par vous mais vous m'avez Malement en vilté
Adont ſot bien li ſires Qu'il eſtoit de par Dieu
Tantoſt se departi Et deguerpi le lieu
Et li pꝛeudom demeure Qui avoit le cuer pieu
Sachiez qu'il n'ot en lui Feſte ſoulas ne gieu
Oꝛ entendez pour Dieu .I. moult bel eſſemplaire
De Felix le saint homme Qui tant ſouſfri de haire
Qui de l'oꝛgueil du monde N'ot talent ne que faire
Il vont par penitance L'amour de Dieu atraire
Le chevalieꝛ eſtoit Soigneus de li guetieꝛ
Au ſoir le vit entrer En .i. gaſte mouſtieꝛ
Si toſt comme il fu ens S'ala agenouillier
Par devant une ymage Pour Damedieu pꝛieꝛ
Le chevalieꝛ regarde Toute la contenance
Comment Felix pꝛioit La Dame de vaillance
Et comment de ſon coꝛps Li feſſoit obligence
Sa coupe debatoit Par moult grant repantence
Duſques a mienuit Que ſomme l'abati
Fu devant Nostre Dame Ainſi com je vous di
Quant ne pot plus veillier Tous veſtuz ſ'endoꝛmi
La douce Nostre Dame Des ſains cieus deſcendi
Moult belle compaignie D'angles avecques lui
Devant Felix ſ'aſemblent Que il ne le ſot mie
Tous li cieus eſtincele De la biaute de li
Liés fu le chevalieꝛ Quant il vit tel meſnie
La douce Mere Dieu .I. oꝛeillier a pꝛis
Deſous le chief Felix Moult doucement l'a mis
Felix ne le ſot mie Qui eſtoit endoꝛmis
En depꝛiant la Dame A qui il fu amis
Quant la Vieꝛge Marie ot ſeꝛvi ſon ſeꝛgant
Es ſains cieus remonta Avec ſon dous enfant
Et Felix ſ'eſveilla Au point de l'ajoꝛnant
A coutes a genous Va ces heures diſant
Le chevalier tantoſt De Felix ſ'apꝛocha
Devant lui ſ'agenouille A lui ſe confeſſa
Et quant Felix le voit Tantoſt l'araiſonna
Et moult tres doucement Veꝛs lui ſ'umelia
Le chevalieꝛ li crie Meꝛci moult doucement
Ses pechiez li gehiſt De cuer devoſtement
Et Felix li reſpont Moult debonnairement
Je ne ſui mie dignes De tel pardonnement
Mais revenez demain Et je depꝛierai
A la douce Marie De bon cueꝛ et de vrai
Qu'elle ait meꝛci de vous Car je ſui en eſmai
Comment n'en quel maniere Je vous conſeillerai
Celle joꝛnee ala Et la nuit fu venue
Felix de Dieu pꝛier A voulenté eue
En la chapelle entra S'a l'image veue
L'iaue de cuer li eſt Parmi les iex courue
Devant lui ſ'agenouille En grant devocion
Fleur de virginité Qui par anoncion
Poꝛtas le Roy des rois Qui ſouffri paſſion
Tu ſauvas Daniel En la foſſe au lyon
Dame voſtre dous non Doit on par tout loeꝛ
En quel lieu que ce ſoit Ou en terre ou en meꝛ
Vous eſtes l'eſcharboucle Qui puet enluminer
Les cueꝛs des fins amans Qui vous veulent amer
Dame vous eſtez celle Qui n'a point de pareille
Quar vous eſtez la fleur Qui naſqui de la treille
De quoi li roiſins vint Dont la goute vermeille
Racheta tout le mont Belle en fu la meꝛveille
Dame de doucour De toute bonté plaine
Priez vo dous enfant Qu'i a dꝛoit poꝛt nous maine
Et ſi nous donnez dame Voulenté ſi ceꝛtaine
Que nos ames ne ſueffrent En enfeꝛ la grant paine
Vieꝛge Dame des vieꝛges Je vous pꝛi et requier
Donnez moi eſſemplaire De celui conſeillier
Qui enveꝛs vous ſe veult De ces maus aquitier
Et enveꝛs voſtre enfant Ses meſfais adꝛecier
Dame je vous requier Et de cueꝛ vous apelle
A ce mot deſcendi La Roine pucelle
Droit devant le pꝛeudomme Dedens la viez chapelle
De la biauté de li Touz li lieus eſtincelle
La douce Mere Dieu C'eſt a li demouſtree
Preudons diſt Nostre Dame Tu m'as tant apellee
Di moi hardiement Treſtoute ta pensee
Toute ta voulenté feꝛai Sans demouree
Quant Felix entendi La Roine de gloꝛie
De joie treſſailli Si mua ſon memoire
A Noſtre Dame a dit Parole qui fu voire
Ha; dame qui avez Sus tout le mont victoire
Je vous requieꝛ meꝛci Fleur de virginité
Par qui li tenebꝛeur Oꝛent joie et ſenté
Treſoꝛieꝛe de grace De ſainte charité
Ou vous eſtez aſſiſe En la grant deité
Onques mais ne vous vi Dame foꝛs vostre ymage
De la biauté de vous Tout mon cueꝛ raſouage
Dame pꝛiez celui Qui en vous pꝛiſt hommage
Que li faus anemis Ne nous face dommage
Quant Felix ot ainſi La Dame ſaluee
Du chevalieꝛ li a La beſoingne comptee
Comment n'en quel manieꝛe S'ame ſera ſauvee
Loꝛs li a Nostre Dame Sa raiſon deviſſee
Amis dit Noſtre Dame Ses tu que tu feras
A la tombe le pꝛeſtre Le chevalieꝛ menras
Puis comjures le coꝛs Au miex que tu pourras
De par Dieu qu'il ſe lieve Toſt et iſnellepas
Et il ſe levera Saiches ceꝛtainement
Quant il ſera levés Fai li comandement
Qu'aſouille le chevalieꝛ De l'eſcommeniement
Et tu le raſoudꝛa Moult debonnairement
Quant le pꝛeſtre avra Raſous le chevalier
Puis le ſeingnes et beni Si le refai couchier
De par Dieu qui tout fiſt Et qui tout puet jugieꝛ
Quan que tu li diras Fera ſans atargieꝛ
La douce Mere Dieu a ce Mot ſ'en tourna
Avec ſon dous enfant Es ſains ciez remonta
Et Felis li ſains homs Tout par li demoura
Le chevalieꝛ ſ'en tourne Quant le jour eſclaira
A icelle joꝛnee la Saint Loꝛens eſtoit
La feſte devoit eſtre Ou le pꝛeſtre geſoit
Pour le peleꝛinage Moult de gent y aloit
Felix atandi tant Poꝛceſſion aloit
Quant la poꝛceſſion Fu hoꝛs du grant mouſtieꝛ
Felix par la main deſtre A pꝛis le chevalier
Lez la foſſe le pꝛeſtre Le fiſt agenouillier
Chaſcun ſ'i aſſembla Et pꝛiſt a merveillieꝛ
Devant treſtout le pueple Felix ſ'agenouilla
Ses mains joint vers le ciel Jheſucriſt reclama
Que tiex miracle mouſtre Devant ceus qui ſont la
Pourquoi aucuns pecheꝛres Veꝛs Dieu ſ'amendera
Quant Felix envers Dieu ot faite ſa pꝛiere
Le pꝛeſtre comjura Et dit en tel manieꝛe
Preſtres u non de Dieu Et de ſa mere chiere
Lieve toi et ſi mouſtre A ceſtui belle chiere
El non de Dieu le Pere Et de ſainte Marie
Pardonnez a ceſtui Haine et felonnie
A ce mot devant tous C'eſt la terre partie
Loꝛs ſe leva le pꝛeſtre Comme ſ'il fuiſt en vie
Quant le chevalieꝛ vit le pꝛeſtre ſuſciter
Des iex du chief commance Tendꝛement a pleurer
De cueꝛ crie meꝛci Pour ſa vie amender
Devant treſtout le pueple Li va tout pardonner
Le chevalieꝛ raſout Devant toute la gent
Apꝛés ſi li a fait Felix commandement
Preſtres recouchiez vous Toſt et iſnellement
Par les veꝛtus de Dieu Le Pere omnipotent
Le pꝛeſtre en ſa foſe Entra ſans demouree
Devant toute la gent Qui la fu aſſemblee
Chaſcuns vit le miracle Que Dieus out demouſtree
Pour Felix qui ſeꝛvoit La vieꝛge honnoꝛee
Tuit cil de Beſencon Virent bien que Felix
Eſtoit amez de Dieu Le Roy de paradis
A coutez a genous Devant lui ſe ſont mis
Sire font il pour Dieu Aiez de nous meꝛcis
Sire pardonnez nous Que nous avons meſfait
Prenez ent la venjance Ainſi comme il vous pleſt
Et Felix reſpondi N'ai cure de tel plait
Je le vous pardoins bien Bonnement ce meſfait
Felix a regardé La tres grant obligance
Que les gens li ont fait Et la grant honnoꝛence
De la ville ſ'en part Plus n'i fiſt areſtance
A Vaucleꝛ ſ'en ala faire Sa demourance
La fu il recueillis En la religion
Et Diex lamma puis tant Et ſonha ſon non
Que puis fu arqueveque De toute Beſencon
Par les bien que il fiſt Acueilli bon renon
Tant veſqui en ceſt ſiecle Qu'il l'eſtut treſpaſſer
Oꝛ oez les miracles Que Dieus voult demouſtrer
Car ces .ii. compaignons Qu'eſtoient outre mer
A celle heure meiſmes Les convint devier
Tous .iii. les compaignons A .i. jour treſpaſſerent
Et a une ſeulle heure En paradis entrerent
Par les biens que il firent En paradis entrerent
Bonnes journees firent Celle qui les poꝛterent
Si pꝛions touz et toutes A la Vieꝛge Marie
Qui en ces flans poꝛta Le tres dous fruit de vie
Qu'il nous doint ſi ouvreꝛ En ceſte moꝛtel vie
Par quoi aions des angres La ſainte compaingnie