Une pucelle Me pꝛia
Que je .i. chapel Li feiſſe
Com longuement que g'i meiſſe
Et je li fis tout par loiſſir
Moult voulentieꝛs a ſon plaiſſir
Au commancier de mon chapel
Pour que il ſeꝛa plus bel
G'i metrai la fleur de lis
Qui eſt moult belle a grant devis
La ſeconde eſt la violete
La tieꝛce fleur une flourete
La ſouſie qui eſt moult belle
Laquarte flour eꝛt la perſelle
La quine flour eſt la conſaude
Par quoi li chapeles ſe ſaude
La ſiſime roſe eſpanie
Et la ſeptime lacolie
Ueſci chapel degrant hauteſce
Chaſcun fleur donne ventance
Que la pucelle doit avoir
Et retenir par eſtouuoir
La fleur delis eſt blanche et digne
Qui ala pucelle deſtine
De /lameꝛe Dieu honnoꝛeꝛ
Et Dieu et ſainte egliſe ameꝛ
Et ſiſoit coie et taiſans
Pour eſcouteꝛ les meſdiſans
La violete eſt la ſeconde
Ceſt une douce floꝛ amonde
Qui deuiſſe par ſa doucoꝛ
A la pucele grant voloꝛ
Voulentieꝛs aleꝛ aumouſtieꝛ
Et eſcouteꝛ le Dieu meſtieꝛ
La tieꝛce floꝛ eſt la ſoucie
Qui moult grant choſe ſenefie
La ſouſie reſemble loꝛ
Qui bien regarde en treſoꝛ
Soit en iaue ou en fumieꝛ
Moult longuement ſans empꝛirieꝛ
Auſi doit pucele ſon coꝛs
Gardeꝛ com ſe garde lioꝛs
Sans male teiche recevoir
Com puiſt ſur lur aperceuoir
La peꝛſelle eſt de grant bonté
Qui ſenefie humilité
Pour ce vous dige vraiement
Pucele doit vivre humblement
La couſaude eſt la quinte floꝛ
Qui contre laclarte du jour
Euure auſoleil et ſi reſtant
Et la pucelle qui ſentant
Doit ouvrir ſon cueꝛ en bonne euvre
Tout auſſi com la couſaude euvre
Et clot contre lanuit obſcure
Doit lapucelle par nature
Eſcueꝛ toute vilonie
Et entendꝛe alacourtoiſſie
La ſiſime ſi eſt la roſe
Qui toutes autres fleurs apoſe
Debiauté et de ſeignoꝛie
Pour l'amour de/ſainte Marie
/Qui du coꝛs Dieu fu honnoꝛee
/Et fu pucelle demouree
La ſeptime eſt liacolie
Qui toutes autres floꝛs alie
Que Dieu li afet lucanetes
que pour lui loeꝛ furent faites
Quant .i. chapel part une floꝛ
Moult en dechiet deſa valoꝛ
Ainſi eſt il delameſchine
Qui deſa chaasté de chine
Pucelle uns vallés vous pꝛoie
Que chaſcunne ſon cueꝛ otroie
Du chapel et ſi le retiegne
Et de ces .vii. floꝛs li ſouueigne
Ceſt li chapiaus
Des .vii. flouretes
Que je donnai par amouretes