Hom de gent de vaillance eſtrait
Les poins de nature Meſtrais.
Se le main en ton cuer aſſambles
et les pꝛeudommes ne reſambles
Dont tu ies eſtrais et venus
et ſe tu es mauvais tenus
C'eſt .i. lais nons et deſpiteuz
Moult deuroies eſtre honteuz
Se tu te conniſſoies bien.
Quant de ton cuer oſtes le bien
et au retenir le mal tens
Oꝛ ce trai ca et ſi m'entens
et ſi pꝛen garde a mon chaſtoi
Tu fais tu premier honte a toi
Apres a ceulz qui t'apartiennent
Quant les genz loꝛ parlement tiennent
De toi en mal c'eſt honte lais
Puis que le bien a faire lais
Que tu doiz faire par nature
Par dꝛoit doit gentiex creature
As gentiex dont elle iſt retraire
Dont tu doiz en ton cuer a traire
Nul vilain vice et ſ'il y eſt
Ne li doiz laiſſier faire arreſt
Car li homs eſtrais de noblece
A le cuer plain de grant foiblece
Se vilonnie hoꝛs n'en chace
et cil qui ſa honte pourchace
Aſſez legierement y vient
et ceſt choſe qui mal avient
A celui qui gentiex doit eſtre
Quant on le tiont de vilain eſtre
Dont Diex et li mondes le het
S'en diſt chaſcuns du pris qu'il ſet
Pour ce qu'il ne fait ce qu'il doit
L'un ſe fait enſeignier au doit
Qui diſt ja mules ne ſera
Li autres diſt qu'il paſſera
Les mauvais car il queurt apres
et enſement et loing et pꝛés
En diſt chaſcuns laide parole
et aucuns quant on en parole
Met par contraire au fier ſa main
et diſt ſ'on en parloit au main
On n'en ſeroit ja le jour aiſe
Enſi ſa maniere mauvaiſe
En fait par tout dire lait conte
Ja m'amera honour qui honte
Ne crient a toi le faiz ſauoir
Hom ſe tu veulz honour avoir
Crien honte a honour paruendꝛas
Puis qu'en ceſt chemin te tendꝛas
Sanz faille ſe tu as eur
Ja n'i fauras ce t'aſſeur
Iones hons filz de grant ſeignour
Entent ci ſe veulz a honnour
Venir et en auancement
Prendꝛe en doiz le commencement
Entr'eulz que tu es jones dans
Car ſ'a honneur es entendans
Se de iouuente en toi commence
As dꝛoit y reprent ſa ſemence
Toudiz de plus en plus croiſtra
et tant que chaſcuns connoiſtra
Que tu as a honneur beance
Si te vient de dꝛoite eſceance
De ton taion ou de ton pere
et certes li homs bel ſe pere
Qui en iouuente ſe lait duire
En bien poꝛ a honneur conduire
et uns pꝛouerbes nous reprent
Qui ce que li nouuiaus nez pꝛent
Quant il eſt viex il ſe ſaueure
Dont ne dois en ton cuer une heure
Vilaine teche conſentir
Mais ſi toſt que le puez ſentir
Fai tant que le chaces en voie
et au bien faire te ravoie
Oꝛ y a tel n'eſt pas ſi ſages
Qu'il connoiſſe touz maus uſages
C'il doit des bons le conſeil croire
et de ſa folie recroire
Par le conſeil des bonnes gens
Cis poins li eſt et bons et gens
Car trop laidement ſe ſourduiſt
Se il en mal faire ſe duiſt
Car li gentiex doit par [dꝛoi]ture
Avoir courtoiſe nourreture
Qui le bien li mouſtre et le duiſe
Par quoi a honneur ſe conduiſe
Ne a oꝛdure ne ſ'aſſente
Mais auſſi toſt comme il le ſente
De ſon cuer hoꝛs le deſracine
Car quant bons viſces ſ'en racine
Trop eſt foꝛs a deſraciner
A tant voult ſon chaſtoi finer
/Iehans de /conde/ qui repꝛent
Celui qui ot et riens n'apꝛent
Bien fera li homs a reprendꝛe
Qui ne voudꝛa a garde prendꝛe.