Moult eſt bone acoi[n]tance D'eſtoire bone gent
Bien m'en puis p[er]cevoir Et en maint lieu ſouvent
Que quant je dis .i. dit A tous generaument
Car il nous convient vivre Des bons pꝛemierement
Jadis .I. chevalier fu Moult nobles et biaus
Riches hons fu de villes Et de nobles chaſtiaus
Et ot en ſa jonece Aſſez de cens aniaus
Il ne li eſchapoit Ne tournois ne cembiaus
Quant il n'ot que deſpendꝛe On n'avoit de li cure
On le tenoit poꝛ vil Con garcon qui eſcure
En folement deſpendꝛe Avoit miſe ſa cure
Sa joie li toꝛna A grant doloꝛ obſcure
Du leu l'eſtuet partir Qu'il n'i pot plus remaindꝛe
Sa char li commenca A palir et a taindꝛe
Loꝛs ſe pꝛiſt en ſon cuer Durement a complaindꝛe
N'ot vile ne maiſon Ou il peüſt remaindꝛe
Hé las dolans diſt il com dure deſtinee
Quant m'en convient fouir En eſtrange contree
Et ſi ne metrai hoꝛs Ne lance ne eſpee
Vous me veilliez aidier /Sainte Virge honoꝛee
Toute joꝛ chevaucha bien li dut ennuier
Dedens .i. bois entra Grant et lonc et plenier
El mileu de ce bois Rataint .i. eſcuier
Triſte et dolant de cuer N'i ot que coꝛroucier
Le chevalier l'apelle Et ſi l'araiſonna
Amis /celi te gart Qui le monde foꝛma
Reſpont li eſcuiers Il ne m'aidera ja
Bien me ſui perceü Que onques ne m'ama.
J'ai le mien deſpendu Et gaſté par folie
Si ne m'en eſt remez Vaill[iss]ant une aillie
Oꝛ m'en convient fouir Tous ſeulz ſans compaignie
Et ſi ne ſai meſtier Dont me cheviſſe mie
Larron et murtrier Me convient devenir
Je ne me puis mie De fain leſſier moꝛir
Bien ſai que par ce tour Me convendꝛa venir
Se je truis compaignon Bien me cuide chevir
Reſpont le chevalier Compains avez trouvé
Auſſi ai je le mien Deſpendu et gaſté
Oꝛ m'en couvent fouir Tous ſeulz par povreté
Nous ſerons compaignon Quant je t'ai retrouvé
Sire diſt l'eſcuier Vous ſoiez bien venus.
Vos compains voudꝛai eſtre Vos amis et vos dꝛus.
Toute joꝛ chevauchierent Tant que joꝛ ert faillus
Sous .i. arbꝛe herbergent Ne chevauchierent plus.
Ne li uns ne li autres Cele nuit ne menja
Prez ſont de deſperer Chaſcuns ſe dementa.
L'ennemi les eſcoute Qui pꝛendꝛe les vouldꝛa
S'il les puet acrochier Moult joians en ſera
Devant eulz s'apparut Si les a raiſon mis
Seignoꝛ comment vous eſt Ce dit li ennemis
Vous avez tout perdu Et avoir et amis
Mendier vous convient [...]
C'eſt grant meſchief a faire Quant apꝛis ne l'avez
Se vous me volez croire Je vous donrai aſſez
Que vous pꝛendꝛez avoir Partout ou vous voudꝛez
Ne jamais en pꝛiſon Retenus ne ſerez
De tous les leus. Du monde je vous deliverrai
Si dit le chevalier Et je vous ſervirai
Et de cuer et de coꝛps Homage vous ferai
Et l'ennemi reſpont Et aſſez te donrai.
Mais que Dieu et /ſa Mere Te convient renoier
Tous ſains et toutes ſaintes Il ne t'aront meſtier
Sire dit l'eſquier De gré et volentier
Je les renoierai Tous qu'il ne m'ont meſtier
Moult fu fol l'eſcuier Et de mauvais coꝛage
Que l'ennemi a pris Ce fu par ſon outrage
Au chevalier a dit Vien ſi me fais homage
Et je te rendꝛai tout Tantoſt ton heritage
Reſpont le chevalier volentiers liement
Renoie Dieu fait il Treſtout premierement
Tous ſains et toutes ſaintes Toſt et iſnelement
Fais le ſe tu m'en crois Et tantoſt erranment
Et je te renderai Treſtout ton tenement
Je les renoie tous je ſui de ta meſnie
Reſpont li ennemis Tu ne fais pas folie
Je te donrai honour Et grande ſeignoꝛie
Se tu as renoié Auſſi /ſainte Marie
Reſpont le chevalier Ce ne ferai je ja
Que je renoie cele /Qui le coꝛs Dieu poꝛta
/Qui la perte du monde Par ſon coꝛps reſtoꝛa.
Et la pais et l'amour De /ſon Fil nous donna
Il te doit bien ſouffire Quant j'ai Dieu renoié
Tous ſains et toutes ſaintes Je ſui ja en pechié
Et de cuer et de bouche Je le t'ai otroié
Leſſe eſter /Nostre Dame Trop m'avras engignié
Reſpont li ennemis Tu ſeras mendians
Se tu ne la renoies Seras povres truhans
Et ſ'as Dieu renoié Qui te ſera grevans
Sire dit l'eſcuier Faites li ſes couvans
Reſpont le chevalier Par ma foy non ferai.
Ja [mais ]joꝛ de ma vie Ne le renierai
/La Royne des ciex Ja tant ne mefferai
Se j'ai Dieu renoié A cele me tenrai
C'eſt cele qui puet tous A /ſon Fil racoꝛder
Li ennemis voit bien Qu'il ne le puet mener
A ce qu'il la renoie Ne le puet engignier
De maltalent ſ'en toꝛne Si le leſſa eſter
Dolant fu l'ennemi Quant ainſi le p[er]di
Si emmena celui Qui a li ſe rendi
Le chevalier demeure Qui cuer ot eſbahi
Tout dꝛoit a l'adjoꝛner Hoꝛs du bois ſ'en iſſy
Quant il fu hoꝛs du bois Devant lui eſgarda
Et vit .i. biau chaſtel Une chapelle y a
Au plus toſt que il pot Cele part ſ'en toꝛna
Poꝛ ſaluer /la Virge Ileques ſ'arreſta
Quant il y fu venu Si iſſi de la celle
Son palefroy atache Au rain d'une ſaucele
Toſt et iſnelement Entra en la chapelle
Et a veü l'ymage De /la Virge pucele
Devant li ſ'agenoille Et merci li cria
Et de cuer et de bouche Foꝛment le reclama
Li ſires du chaſtel Par matin ſe leva
Et lui et ſa meſniee En la chapelle entra.
Quant il vit le cheval. Si ſe va merveillant
[...]
Le chevalier entent Moult tendꝛement ploꝛant
.I. po ſe treſt arrieres Poꝛ vëoir ſon ſamblant
Le chevalier eſgarde Qui requeroit merci
/Douce Dame fait il Aiez merci de mi
J'ai /vo fil renoié L'ennemi m'a trai
Tous ſains et toutes ſaintes Ay renoié auſſi
Ne ſai ou retourner Se je n'ai vostre aieue
Que j'ai Dieu renoié Si ai m'ame perdue
A yceſte parole a ſa coꝛpe batue
L'yaue du cuer li eſt Par mi les yex courue
L'ymage de ſon lieu Maintenant devala
Et de ſon cuevrechief Le vis li eſſuia
Maintes lermes recut Qui du chief li coula
Le ſire du chaſtel Le vit et eſgarda
Il a veü l'ymage Devant lui en preſant
Qui le reconfoꝛta Bel et coꝛtoiſement
Amis diſt /Nostre Dame Ne ſ'eſmaie noient
Je te racoꝛderai A /mon fil vraiement
Et ſi avras par tans honour et richeté
Puis remonte en ſon leu Quant l'ot reconfoꝛté
Li ſires du chaſtel A tout ce regardé
Bien penſe que en li A aucune bonté.
Un po ſe treſt arriere Et touſi et parla.
Le chevalier l'entent Sus ſes piez ſe leva
Li ſires l'araiſonne Et ſi l'en apela.
Et cil li reſpont bel Qui tres bien apꝛis l'a
Li ſires l'en apelle Si l'a mis a raiſon
Amis dont eſtes vous N'i faites reſtoiſon
Et cil li reſpondi Belement a bas ſon
Sire .i. chevalier ſui De moult povre renon.
Je ſui .i. chevalier Du tout deſheritez
Amis ce dit li ſires Gardez ne me celez
Feüſtes vous onques A fame mariez
Nennil ſire diſt il Onques n'i fu donez
Et ſi avez des ja Voſtre terre perdue.
Eſt paſſee l'anee Que elle fu p[er]due
Nennil ſire diſt il Bien ſeroit ſecoꝛue
Se j'euſſe deniers Dont feüſt ſecoꝛue
Amis ce diſt li ſires Je vous en bailleré
Et avoir et deniers A plenté vous donrai
S'ay une bele fille Qu'a fame vous donrai.
Et de toute ma terre. Chevetain vous ferai
Sire pour Dieu merci Fait il ne me moquiez
Je ſui triſtes de cuer Dolans et coꝛrouciez
Amis ce dit li ſires Oꝛ ne vous eſmaiez
Vous eſtes ſe Dieu pleſt A bon poꝛt arrivez
Soiez certains et fis Envis vous moqueroie
Laiſſiez eſter le duel Et ſi demenez joie
En l'onnoꝛ /Nostre Dame Qui ſi bien vous avoie
Et de cuer et de bouche Le don vous en otroie
Cil ſi l'en mercia Qui la raiſon agree
A iceſte parole a ſa Fille mandee
Si li donna a fame Et il l'a eſpouſee
Et l'onnoꝛ de ſa terre Li a toute donnee
Et avoirs et deniers A plenté li bailla
Dont ſa terre recut Et ſi le rachata.
Et fu hoir de ſa terre Li ſires treſpaſſa
/La Royne des ciex Ces biens li pourchaca.
Pour ce qu'il la ſervi Ot il bon guerredon.
Cil qui la renoia Fiſt trop grant meſpꝛoiſon.
Com vous oꝛrez conter A petit d'achoiſon.
Comment li ennemis Li fiſt la traiſon.
Lonc temps ala par terre Des maulz ot il aſſez
Et tant que il fu pꝛis A .i. fait atrapez
Et fu eſtroit liez Et fu empꝛiſonnez
Et fu jugiez a pendꝛe Que il fu pꝛis pꝛouvez
Quant il fu en pꝛiſon Durement ſe doubta
Que il ne fuſt pendus L'ennemi appella
Et le mauvais y vint Tantoſt qu'il le hucha
Maiſtres car aidiez moi Ou l'en me pendꝛa ja
Reſpont li ennemis Je te deliverrai
Vez cy le hanap d'oꝛ Que je te baillerai
Et .iiii. beſans d'oꝛ Aveques te donrai
Tien met tout en ton ſain Fai ce que te dirai
Quant le bailli t'avra Devant li en preſent
Et il te voudꝛa pꝛendꝛe Poꝛ faire jugement
Donne li ceſt avoir Pour ton delivrement
Et il eſt convoiteus Et d'oꝛ fin et d'argent
Il te deliverra Saches par verité
Cil a pꝛis le hanap En ſon ſain l'a bouté
Et les .iiii. fermaus Foꝛment l'ont agree
A iceſte parole l'a li baillis Mandé.
Amis diſt li baillis Il te convient moꝛir
Il n'eſt hons foꝛs que Diex Qui t'en puiſt garantir
Dis moi toſt tes meffais Tu les doit bien gehir
Au boꝛriau le bailla Qui le doit mainburnir
Sire diſt l'eſcuier Ains m'en lairez aler
.I. jouel ay moult riche Que je vous veil donner
Il vault .lx. livres Ne vous eſtuet doubter
Je le vous baillerai Faites moi delivrer
Oꝛ toſt diſt li baillis Fai errant mouſtre ca
Cil miſt main a ſon ſain Et trouver le cuida
Et il trueve .i. cheveſtre De ſon ſain le ſacha
Quant li baillis le voit Il ſ'en rit et gaba
Hé las diſt l'eſcuier L'ennemi m'a trahi
Par foy diſt li baillis Et tu m'as bien ſervi
En ſon col le laca Au bourriau le tendi
Qui le mena aus foꝛches Et puis ſi le pendi
L'ennemi ſe tint pꝛez Ne le vault eſloignier
Quant l'ame iſſi du coꝛps Il ne la volt leſſier
Il la poꝛte en enfer La dedens herbergier
Ainſinques vouldꝛoit il Tout le monde eſloignier
Oꝛ fu de ſon ſervice A duel et a dolour
Ainſi eſt il ſervis Qui ſert mauvais ſeignoꝛ
Mais qui ſert /Nostre Dame /Cele dame d'onour
Il ne puet en ce ſiecle Certes ſervir meillour
Jehan de /Saint Quentin Dit qui le doit ſervir
On puet de ſon ſervice A grant honoꝛ venir
C'eſt le treſoꝛ de grace Poꝛ tous ceulz garantir
Qui la veille[nt] de cuer Et amer et chierir.
Oꝛ pꝛions doucement A /la Virge Marie
Par qui le monde fu Remis de moꝛt a vie
De l'enging l'ennemi Qui le monde tarie
Nous gart et nous otroit La pardurable vie.