A toutes bones gens Qui ont entendement
Qui croient /Jhesucriſt Et le ſaint ſacrement
Doit on par bon example Mectre et apertement
Les vertus que il fait A tous generaument
De li avons vertus C'eſt treſtout verité
Et ſi nous racheta Quant il fu toꝛmentez
Des Juis en la crois Poꝛ nostre ſauveté
Et nous miſt hoꝛs d'enfer De la grant obſcurté
Tous le devons nous croire Par bone entencion.
Car il ſouffri pour nous En la crois paſſion.
Qui ainſi ne le croit C'eſt ſa dampnation
Jamais ſ'ame n'avra Vers Dieu redemption
Et qui ne croit ainſin Que ſon coꝛps propꝛement
Fuſt mué ou ſaint pain Dont on fait ſacrement
S'ame ſera dampnee Au joꝛ du jugement
En la maiſon d'enfer Prendꝛa herbergement
Bone gent je vous veil Mouſtrer une [ examplaire]
Qui eſt bon a oir S'il vous plaiſoit a taire
Et ſi en poꝛriez L'amoꝛ de Dieu atraire
Car il fait bon leſſier Le mal poꝛ le bien faire
En /la Vie des peres Eſcript en parchemin
Trouvons nous que .ii. homes Qui eſtoient voiſin
Eſtoient bien enſamble Deſſi a cele fin
Que li uns ſi meſcrut Par le dëable engin
Et l'autre fu pꝛeudons Si vous dirai comment
Car il ſe confeſſoit Par bon entendement
Et ſi crut bien en Dieu Et ou saint ſacrement
Et l'autre n'i voult croire Ce fu ſon dampnement
Ce fu a unes Paſques C'on ſe doit confeſſer
Et faire penitance Pour ſa vie amender
Et netoier ſon cuer Ou ſon Dieu doit entrer
Qu'en l'arbꝛe de la crois Leſſa ſon coꝛps pener
En icele joꝛnee Que je vous conte cy
Reſuſcita de moꝛt Celui qui tant ſouffri
En l'arbꝛe de la crois Au jour du vendꝛedi
Et le ſanc de ſon coꝛps De .v. plaies iſſy
Qui ne le croit ainſi Je vous di de certain
Des oevres au dëable A il le coꝛps tout plain
Nous le devons tuit croire Car il eſt ſouverain
Et ſont toutes vertus Iſſues de ſa main
Li uns de ces .ii. homes Dont je vous parolé
Il creoit fermement C'eſt fine verité
Et l'autre ſi fu ſi Du dëable tempté
Qu'il ne crut pas qu'en pain Fuſt le ſien coꝛps mué
Celi qui ce ne crut Si ſ'en vint au pꝛeudon
Si li diſt bien veigniez Venez en en maiſon
Si vous deſjunerez Avec moi d'un chapon
Nous avons trop juné Il en eſt bien ſaiſons
Celui qui fu pꝛeudons Si fu tous merveillans
De ce que ſon voiſin Li aloit deviſans
Il hauca ſa main deſtre Si ſ'en ala ſeignant
Et puis ſi li a dit Vous eſtes meſcreant
Il eſt hui la joꝛnee Que l'en doit recevoir
Le coꝛps /Nostre Seigneur Ce devons nous ſavoir
Qui ne le croit ainſi Je le vous di pour voir
Il n'a pooir jamais De paradis avoir
Alons en au mouſtier Et ſi le recevron
Si ſerons hoꝛs des mains A l'ennemi felon
Quant ſerons revenus Si nous deſjunerons
Le meſcreant reſpont Par ma foy non ferons
Que ce ſoit le coꝛps Dieu Je ne le croirai ja.
J'aimme miex mon chapon Qui eſt roſti pieca.
Se vous me volez croire Mengié ſera bien ja.
Quant li pꝛeudons[ l'oÿ] Tout le coꝛps li trambla
Sire diſt li pꝛeudons Eſtes vous hoꝛs du ſens
Qui avéſ le cuer plain De ſi malvais poꝛpens
Mais alons au mouſtier Avec ces autres gens.
Recevoir nostre Dieu Car il en eſt bien tens.
Et ſi gardez pour Dieu Que ſoiez bien confez
Et repentans auſſi Des pechiez qu'avez fez
Li meſcreans reſpont Oꝛ n'en parlez jamez
Mon chien mengeroit bien Treſtous ceulz qui ſont fez
Sire diſt li pꝛeudons Vous dites grans folie
Muez voſtre pensee Poꝛ Dieu /le Filz /Marie
Et ſi vous confeſſez Et amendez vo vie
i en avrez de Dieu La pardurable vie
C'eſt tout voir que ſon coꝛps voult il en pain muer
Le meſcreant reſpont Oꝛ me leſſiez eſter
Qui en vouldꝛoit mon chien .IIII.mile[.] doner
Il les mengeroit bien Sans ſon [fain ]ſaouler
Je ferai gageure A vous ſe vous volez
Et li pꝛeudons reſpont En la paume l'avez
Adont fierent en paume Gage furent livrez
Oꝛ entendez miracles Se croire les volez
Compains diſt li pꝛeudons A vous me ſui gagiez
Vo chien ne mengera Ne .I. ne la moitié
Li meſcreant reſpont J'en ſui oꝛés moult liez
Vous ne garderez l'eure Mon chien l'avra mengiez
Compains diſt li pꝛeudons Savez que nous feron
Moy et vous tous enſamble Au mouſtier en yrons
Et /nostre Sauveur Au mouſtier recevron
Vous garderez le vostre Deſſi a vo maiſon.
Et je le ferai toſt Li meſcreans a dit
Adont vont au mouſtier Sans niſun contredit
Chaſcun a receü Le coꝛs /Dieu Jhesucriſt
Et puis ſont retoꝛné Sans pꝛe[n]dꝛe plus reſpit
Le meſcreant y vint Qui pas ne demoꝛa
Ains le tint en ſa bouche Moult bien et enſerra
Ce fu de p[ar] le dëable Qui ainſi le tempta.
Mais ancois qu'il ſoit veſpꝛes Son loier en avra
Seigneur cel meſcreant Dont je vous conte cy
Avoit ſi doctriné Son chien et ſi noꝛri
Que quanqu'il commandoit A faire riens poꝛ li
Il le faiſoit tantoſt Et couroit avec li
Li meſcreans ſ'en vint En ſa maiſon tout dꝛoit
Il met main a ſa bouche Ou le coꝛps Dieu eſtoit
Et il l'en a trait hoꝛs Car avoir le voloit
Poꝛ donner le au chien Qui mengier le devoit
Li pꝛeudons et meſcrant A l'oſtel ſont venus
En une chambꝛe entrerent Poꝛ eſtre miex repus
Il ont pꝛis de l'eſtrain A terre l'ont mis jus
Une blanche touaille Ont miſe par deſſus
Quant la touaille fu Sus l'eſtrain entendue
Li meſcreans ſault ſus N'i a fait atendue
Le Coꝛpus Domini Sus la touaille rue
Et cuide que ſon chien Erranment le menjue
Non fera de certain Ja Diex nel ſousferra
Car il eſt ſi puiſſant Que faire le poꝛra
Et pour mouſtrer example Au peuple le fera.
Ainſi li pleſt et veult Et tout ainſi ſera.
Le meſcreant ſe lieve Que plus n'y atarja
Son compaignon apele Biau ſire venez ca
J'ai gaaignié a vous Vous le verrez bien ja
Que ne garderez l'eure Mon chien le mengera
Et li pꝛeudons reſpont Oꝛ toſt apertement
Faites venir le chien Toſt et iſnelement
Je me fi tant en Dieu Et ou ſaint ſacrement
Qu'il ne touchera ja A lui ne tant ne quant
Quant li meſcreans l'ot Son chien a appellez
Vien avant biaus amis Ce dit li foꝛſenez
Et ſi le menju toſt N'i ait plus demoꝛez
Le chien ſailli avant Mais n'i a adeſé
Le meſcreant ſon chien Seconte fois apele
Et le chien vint a li Qui de paour ſautele
Il a pꝛis a .ii. mains Devant lui une aſtele
Le chien en a feru Tres par mi la cervele
Par Dieu fait il au chien Maintenant mengeras
Yce tantet de pain Ou tu le comperras
Le chien pꝛent au muſel Qui de batre fu las
Vers le coꝛps Dieu le touche Mais il ne le pꝛint pas.
Ains ſ'eſt maintenant trait Arrier apertement
Quant ſon meſtre le vit Flairier le ſi foꝛment
Il reſault au baſton A ſes .ii. mains le pꝛent
Le chien en a batu Moult angoiſſeuſement
Quant le chien a veü Qu'il n'i avra duree
Il regarde ſon meſtre Comme beſte deſvee
A lui ſ'en eſt courus Tantoſt gueule baee
Par la goꝛge le pꝛent Si li a entaſmee
Le chien a pꝛis ſon meſtre Par la gueule tout dꝛoit
Il l'a eſtraint foꝛment Et ſi foꝛt le tenoit
Qui l'eſtrangle en ſa chambꝛe Ainſi Diex le voloit
Que l'ennemi [l']empꝛiſt Que deceu l'avoit
Le mauvais en enfer L'ame de lui poꝛta
Le pꝛeudons fu ilec Qui de paour trambla
Adont ſ'eſt aviſez Que au pꝛeſtre ira
Et confaite gajure Treſtout li contera
Chieus le pꝛeſtre eſt venus toſt et delivrement
Sire diſt il au preſtre Poꝛ Dieu omnipotent
Ainſi m'eſt avenu Sachiez certainement
J'ai paour que n'en ſoie Repus vilainement
Quant le pꝛeſtre a oÿ Le pꝛeudomme parler
De la hydeur qu'il ot Commenca a trambler
A la juſtice ala La parole conter
Poꝛce que le pꝛeudomme En voloit deſcoꝛper
Quant le pꝛevost oÿ Tel parole retraire
Il a dit au pꝛovoire Sire que volez faire
Le preſtre reſpondi C'eſt moult bel examplaire
Que Diex nous a mouſtré Le dous Dieu debonnaire
Prevoſt ce diſt li pꝛeſtres Alons et moy et vous.
Si mouſterrai l'example A toutes et a tous
Et li prevoſt li diſt Sire ſi ferons nous
Adont d'ilec ſ'en part Durement angoiſſous
A l'oſtel ſont venu Chaſcuns laiens entra
Le pꝛeſtre ſi regarde La touaille aviſa
Ou le coꝛs Dieu eſtoit Que /la Virge poꝛta
Il le pꝛent a ſes mains Au pꝛevost le mouſtra
Quant le pꝛevost le vit Si fu tous eſbahis
Sire ce diſt le pꝛeſtre Je vous requier mercis
Oꝛ regardez de ca Ceſt homme qu'eſt murtris
Onques mais en ma vie Si lait moꝛt je ne vis.
Sire ce dit li pꝛeſtres je vous di de certain
Qu'il avoit du dëable Le coꝛps noꝛri et plain
Andeus ſ'en ſont toꝛné Ambedeus main a main
Si fiſt on la juſtice Quant vint a l'endemain
La juſtice fu faite tout le pueple le vit
Et le pꝛeſtre a pꝛis Le coꝛpus Domini
Si le mouſtra a tous Et grant ſermon leur fiſt
Au mouſtier l'en poꝛta Ou coꝛpoꝛal le miſt
Pour ce vous di je bien A tous communement
Car qui ne croit en Dieu Et ou saint ſacrement
Son loier en avra Au jour du jugement
Jamais ſ'ame n'avra Vers Dieu rachatement
Qui mauvais maiſtre ſert Ainſi eſt il ſervi
Mais qui ſert le coꝛps Dieu Qui de /virge naſqui
En paradis li eſt Son hoſtel eſtabli
Laſſus avec les anges E[s]t poꝛté et ravi.
Celui doit on ſervir Et au ſoir et au main
Qui le ſien coꝛps mua Et en vin et en pain
Et ſi foꝛma /Adam Et /ſa moillier Evain
Et ſouffri moꝛt en crois Pour le pueple humain
Si pꝛions tous et toutes A /la Virge Marie
Si vraiement com Diex Li dona ſeignoꝛie
De confoꝛter tous ceulz Qui l'avroient ſervie
Que racoꝛder nous veille Envers /le fruit de vie