Petit ſai; mais; matere ou pꝛendꝛe
De quoi je puiſſe Dit repꝛendꝛe
Qui puiſt eſtre a chaſcun plaiſans
D'autre part ſe je ſui taiſans
Il ne m'en vendꝛa nul pouris
Selonc mon metier j'en ſui fis
Et ſ'il n'iert nus qui mes meſiſt
Entente a ce que bien feſiſt
Ne ſe devroit mie retraire
Li homs qui ſ'eſt le bien [re]traire
Que ſon cuer a ce ſ'acoꝛdaſt
Que bien deſiſt et recoꝛdaſt
Mais ſi poi voi mais aconter
A bien dire et a bien conter
Que poi eſt nus qui foꝛce y face
Ainz tournent d'autre par la face
Pluſeurs en qui n'a de bien tant
Qu'il ſoient ſanz plus eſcoutant
Ce c'on veut recoꝛder et dire
Si en ſui plains d'anui et d'ire
Plus que je ne mouſtre ſouvent
Li homs qui ſouffle contre vent
A enſient ſa paine pert
Et auſſi fait cil en apert
Qui le bien a celui recoꝛde
Qui a l'eſcouter ne ſ'acoꝛde
Ainz li deſplaiſt et li annuie
Se ſaumons a pourciaus donnoie
Moult ſeroient mal emploie
Mes quant bel dit ſont deſploie
A ceuz qui volentiers les oient
Moi ſablent bien emploie ſoient
Car on en puet loꝛ cuers deduire
Et eulz a bien faire conduire
Et qui puet donner examplaire
Qui puiſt et poꝛfiter et plaire
Plus l'en loe l'en et pꝛiſe on.
Il ot jadiz en la pꝛiſon
A .i. tyrant .ii. compaignons
Deuz ne vous ſai nommer les nons
Mes deniſes fu li tyrans
Nommes qui n'eſtoit deſirrans
Foꝛs de mal penſer et mal faire
N'avoit foꝛs mal en ſon afaire
Li uns eſtoit mal herbergiez
Car il eſtoit a moꝛt jugiez
Se li eſtoit li jourz nommez
Que ſes temps ſeroit aſſommez
L'autre fu reſpitez ſes viures
Qu'il en devoit aler deliures
Cil qui on ot a moꝛt jugie
Li pꝛia au pꝛendꝛe congié
Qu'en ſon pais vouſiſt aler
A ſes pꝛochains amis parler
Qu'il vouſiſſent pour li pꝛoier
Que Diex vouſiſt ſ'ame otroier
Pardon des pechiez qu'il ot fais
Car de lui iert li coꝛs deffais
Cil reſpondi qu'il y alaſt
Il meiſmes et y parlaſt
Qu'en pꝛiſon pour lui demouroit
Li tyrans diſt que il moꝛroit
Se li autres faiſoit ſejour
Qu'il ne reueniſt a ſon jour
En tel abandon ſ'eſt cil mis
Et li autres a ſes amis
S'en ala et bien li ſouvint
De ſon compaignon qu'il revint
A ce jour que moꝛir devoit
Et li tyranz quant il le voit
Moult durement ſe merveilla
Et tenu a grant merveille a
Qu'il ert pour moꝛir reuenuz
Car il ne cuidoit pas que nus
Deüſt faire tel loiauté
Il amoli ſa cruauté
Et fu ſi eſpꝛis de pitié
Que il a de moꝛt reſpitie
Celui qui cuidoit en la ſente
Eſtre de moꝛt tantoſt preſente
Mais moult bonnement li quita.
Et as .ii. compaignons dit a
Qu'il loiaument le receuſſent
Ne nul mal gré ne li ſeuſſent
Du mal que il loꝛ avoit fait
Cil li pardonnent le meſfait
Et de lui partent en amour
Si ſ'en vont ſanz faire demour
Oꝛ oiez com furent loial
Li doi compaignon et feal
Et a grant pourfit loꝛ tourna
Car loꝛ loyautez retourna
Le tyrant en miſericoꝛde
Si com la veritez recoꝛde
Ci puet on bel example prendꝛe
Et a ceſte aventure aprendꝛe
Qu'adez a loiautéz ſaiſon
Mes mal ſcet on mes ſa maiſon
Ne ne ſai mais ou elle regne
Ne en l'empire ne el regne
Ne ſcet on mais ſa revenue
Oꝛ puet elle eſtre deuenue
Diex le ſache je ne le ſai
Souvent m'en ſui mis en l'eſſai
Pour trouver mes ne ſai la voie
Ou elle maint Diex m'i avoie
C'on cuide en tel lieu mainte foiz
Que loiautéz y maigne et foiz
Ou on n'en trueve a li firt demie
C'ai bien pꝛouue n'en doutez mie
Auſſi ont fait autre tamaint
Pour ce ne ſai en quel lieu maint
Loiautez bien le vous afin
Li compaignon loial et fin
Sont perdu bien le m'eſt avis
Je ne ſai ſ'il en eſt nul vis
Selonc ce c'on voit en apert
Le ſiecle en fauſſeté deſpert
Qui en haut cheval eſt montee
Et loiautéz ſi deſmontee
Que nes ſur piez ne puet eſter
Cui on voit jamais apreſter
De ſoi loiaument maintenir
A mon pꝛopos veul revenir
Des compaignons que cil deniſes
En cui les branches ſ'erent miſes
De felonie et de deſpit
Donna celui de moꝛt reſpit
Qu'il vit pour moꝛir revenir
On a bien veü avenir.
Que par bien faire rapelon
A grant doucour le cuer felon
et Marciſt on ſa felonnie
Toudis deuroies avoir envie
La volenté de bien afaire
Puis que li cuers de mal afaire.
S'en puet changier et mieudꝛes eſtre.
Dont ſe doit li cuers de bon eſtre
Tant plus pener qu'il ſe detiengne
En tel point que le bien maintiengne
Car biens fais n'eſt onque perdus
De ce ne ſoit nus eſperdus
Car ſe domage y a li coꝛs
Diex li piex et li miſericoꝛs
En rent a l'ame vrai pardon
Pour ce fait toudiz bien pꝛeudon
A ſon povoir et ſ'il meffait
Enuers Dieu ſa mendiſe en fait
Oꝛ li pꝛions tuit de cuer fin
Qu'il nous amaint a bonne fin