Diex qui poꝛ nous ſauver voult en terre deſcendꝛe
Et en /la Vierge mere Voult char humaine pꝛendꝛe
Et en la ſainte crois Souffrir ſon coꝛps eſtendꝛe
Doinſt ſa grace a tous ceulz Qui me vouldꝛont entendꝛe
Aucune gent n'ont cure D'oir de Dieu parler
Ne de /ſa douce Mere Que tant devons amer
Tex y a qui n'en font Que gaber et uller
A tiex gens n'ai je cure De biaus diz recoꝛder
Mais en quelconque leu Que je ſai bone gent
De bien parler de Dieu Ne ſui je mie lent
Ilec et bien parler Car poꝛ no ſauvement
Voult il moꝛt recevoir De doloꝛeus tourment
Et pour l'amoꝛ de ce Que il nous rachata
De la pꝛiſon d'enfer Quant il reſuſcita
Devons nous moult amer /Cele qui le poꝛta
Car qui le ſert et aimme Bon loier en avra.
Cil qui de bon cuer l'aimme Ne doit pas ſommeillier
Ains ſe doit poꝛ ſ'amour Nuit et joꝛ traveillier
Si com la pꝛeudefame Dont vous m'oꝛrez nuncier
Que l'ennemi cuida Decoivre et engignier
Le mari cele fame Coꝛdouainer eſtoit
Aus foires aus marchiez Aler le convenoit
Si comme le pꝛeudome Hoꝛs de la ville eſtoit
La boꝛjoise ſa fame Au mouſtier ſ'en aloit
Cele couſtume avoit Si la tenoit d'uſage
Et a /la Mere Dieu Metoit tout ſon coꝛage
Car tous joꝛs vouſiſt eſtre Devant ſon ſaint ymage
Tous les joꝛs y aloit Par dꝛoit perlerinage
Li ennemi en out Grant duel et grant envie
De ce qu'ele ſervoit Si bien /ſainte Marie
Mais par temps li fera Domage et vilennie
Se cele ne la garde Qui l'a lonc temps ſervie
Le jour eſtoit alee La bourgoiſe au mouſtier
Devant /la Mere Dieu Recoꝛder ſon pſaltier
Et l'ennemi commence Tel choſe a pourchacier
Dont la boꝛjoise avra .I. moꝛtel encombꝛier
Oꝛ eſcoutez comment li mauvais eſploita
En guiſe d'un bel homme Tantoſt ſe figura.
Au mari la boꝛjoise Erranment ſ'en ala
Quant il vit le pꝛeudome Erranment l'apela
Preudons ou eſt ta fame Cil reſpont je ne ſai
Elle n'entra ceens Des que je me levai
Li ennemis reſpont Et je le te dirai
Elle eſt avec le preſtre Maintenant l'i trouvai
Li pꝛeudons de ſa fame Fu en merancolie
Et l'ennemi ſ'en part Qui male oevre a baſtie
La bourgoiſe ſ'en vint Qui ce ne ſavoit mie
Quant ſon mari la vit Foꝛment l'a laidengie
Tantoſt qu'ele entra ens Son mari li coꝛt ſeure
Vilainnement la bat Et elle crie et pleure
/La Mere Dieu reclaimme Que ele la ſequeure
Et quant vint au matin N'i fiſt longue demeure
Puis ala au mouſtier Comme faire ſoloit
Et li mauvais revint Qui pas ne ſ'oblioit
De ces .ii. gens decoivre Grant volenté avoit
Le pꝛeudomme appela Qui ſon meſtier faiſoit
Diva dit li mauvés Tu te mes en grant paine
Tu ne fines d'ouvrer Treſtoute la ſemaine
Poꝛ ta fame chevir Qui pot te pꝛiſe et aimme
Je la vi oꝛendꝛoit Ou le preſtre l'emmaine
Li pꝛeudons reſpondi Qui ot le cuer dolant
De ce que li mauvais Li faiſoit entendant
Eſt ce dont verité Que tu me vas contant
Oil fait cilz qui d'eulz Tourmenter eſt engrans
Preudons diſt li malvais Sces tu que tu feras
Tu diras a ta fame Que a la foire iras
Et puis en aucun leu Tu te deſtoꝛneras
Par ſi faite maniere Ta fame eſpꝛouveras
Li pꝛeudons reſpondi Ainſi le convient faire
Et l'ennemi ſ'en part Qui le cuida atraire
La bourgoiſe revint Qui fu de bon afaire
Qui ſervoit de bon cuer /La Dame debonnaire
Dame diſt li pꝛeudons Je veil demain aler
En cele foire la Poꝛ du cuir acheter
Je mouverai grant piece Demain ains l'adjoꝛner
De par Dieu diſt la dame Qui vous puiſt ramener
Devant la mienuit Li pꝛeudons ſe leva
En .i. lieu de ſa granche Repondꝛe ſ'en ala
Quant le joꝛ apparut La dame ſ'eſveilla
De aler au mouſtier Tantoſt ſ'ap[ar]eilla
Derriere l'autel[ fu] Maintenant a genoulz
Et li mauvais revint Qui tant eſt envious
De bone gent decoivre Eſt foꝛment convoitous
Le pꝛeudome appella Qui eſtoit moult irous
Oꝛ toſt diſt il vien t'ent Ta fame eſt au mouſtier
Ou elle atent le pꝛeſtre Bien te doit ennuier
Quant elle te deffault Poꝛ .i. tel pautonnier
Se tu me crois moult bien T'en poꝛras ja vengier
Li pꝛeudons au mouſtier A ſa fame trouvee
A coutes a genouls A la terre enclinee
Oꝛ toſt diſt li mauvés Que elle ſoit tuee
Li pꝛeudons reſpondi Je n'ai coutel n'eſpee
Et dit li ennemis Qui tous joꝛs le tarie
Pren ce grant maillet la Et ſi ne te fain mie
De li grant cop donner Qu'ele ne te voit mie
Loꝛs ſi ſeras vengiez S'elle a perdu la vie
Cil va ferir ſa fame Si angoiſſeuſement
Que li oeil li volerent Et la teſte li fent
Hé la diſt li pꝛeudons Oꝛ me va malement
Car je ſerai pendus Sans nul arreſtement
Li ennemis reſpont Tu n'en pues eſchaper
Croi moy pꝛen ceſte coꝛde Si te vas eſtrangler
Avant que le prevoſt Te face trainer
Ne que les gens te voient A tel honte mener
Li pꝛeudons reſpondi volentiers le ferai
A la coꝛde ſes ſains Tantoſt me penderai
Oꝛ toſt diſt li mauvais Et je te ſouſtendꝛai
Fai toſt ainz que nulz viengne Ou je te leſſerai
Li pꝛeudons a la coꝛde Entoꝛ ſon col noee
.I. las courant y fait Poꝛ eſtre miex fermee
L'ennemi le ſouſtient Qui l'ame a goulouſee
Pour poꝛter en enfer Quant du coꝛps ert ſevree
Mais il n'empoꝛtra point Si con dit la matiere
Car /la Dame qui eſt /De tous biens treſoꝛiere
Ne volt pas oublier Sa bone chamberiere
Sa vie et ſa ſanté Li a rendu arriere
La boꝛgoiſe ſe dꝛece Sus ſes piez ſe leva
A ces mos /Nostre Dame Devant lui l'apella
La boꝛjoise l'oÿ Au cuer grant joie en a
/La Mere Dieu ſalue d'un Ave /Maria.
Oꝛ toſt fait /Nostre Dame Va ton mari deſpendꝛe
Que l'ennemi fait la a cele Coꝛde pendꝛe
La bourgoiſe y coꝛut Que plus n'i vault atendꝛe
Du ſigne de la crois Erranment li remembre
De ſa main a ſeignié Son coꝛps et ſon viſage
Et l'ennemi ſ'en fuit Comme beſte ſauvage
Cele voit ſon mari Au cuer en ot grant rage.
Par les coſtez le pꝛent Contremont le ſouglage
La coꝛde de ſon col Maintenant li oſta
Li pꝛeudons vit ſa fame En ploꝛant dit li a
Dame vous eſtiez moꝛte Qui vous reſuſcita
Eu non Dieu dous amis /Cele qui Dieu poꝛta
Li pꝛeudons a conté Sa fame maintenant
Tout ce que li mauvais Li faiſoit entendant
Merci li a crié Du cuer en ſouſpirant
Et la dame li va Bonement pardonnant
Lonc temps furent enſamble La dame et le ſeignour
.II. lampes eſtablirent De leur meilloꝛ labour
Devant /la Mere Dieu Qui leur fiſt tele amour
A tous les temps du monde Qui ardent nuit et joꝛ
Ainſi voſt l'ennemi ces .ii. gens decevoir
En enfer avec lui Les cuida bien avoir
Mais /la Dame des ciex Qui a partout pooir
N'oblie pas les ſiens Quant il font ſon voloir
Le cuer qui dignement /Tel dame ſervira
En la fin de ce monde Tel loier en avra
En pardurable joie L'ame de lui ira
Fox eſt qui poꝛ pechié /Tel dame guerpira
Oꝛ pꝛions tous et toutes /La Dame gloꝛieuſe
Et ſon filz qui poꝛ nous ſouffri Moꝛt dolereuſe.
De la pꝛiſon d'enfer Qui tant eſt angoiſſeuſe
Nous gart et nous otroit La joie deliteuſe.