A toutes bones gens ne devroit pas deſplaire
Oÿr de /Nostre Dame Bon example retraire
Car on y puet des coꝛps Les ames ſauves faire
A ceulz a qui deſpleſt Doit toꝛner a contraire
Par bon example oir Se puet l'en amender
Et vous en voudꝛa[i] dire Sel volez eſcouter
Comment /la douce Dame Sot ſes amis garder
Du mauvais qui les veult Souspꝛendꝛe et engignier
Quant plus eſt homme et fame vers Dieu humilieus
Et vers /ſa douce Mere De grace gracieus
Plus eſt li ennemis D'engingnier curieus
Ne ſi n'en ſera ja Jour ne nuit oublieus
Il nous eſt teſmoignié En la ſainte Eſcripture
.II. chevaliers eſtoient Li uns plains de luxure
En amer Dieu ne ſaint Ne miſt onques ſa cure
Ne a /la Mere Dieu /Qui eſt et nete et pure
Certes mal l'en avint Auſi com vous oꝛrez
Se je en ſui de vous Creu ne eſcoutez
De l'autre ch[eva]l[ie]r Avant parler oꝛrez
Qui moult eſtoit pꝛeudons De /Nostre Dame amez
Il eſtoit moult vaillant Et plain de bone vie
Si avoit /Nostre Dame Honoꝛee et ſervie
En ſon vivant li fu Sa grant bonté merie
Encoꝛe miex aſſez Que ſ'ame en fu guerie
Ces .ii. chevaliers furent Andeulz de grant renon
Il ſ'entr'amerent moult Si furent compaignon
Mais li pꝛeudons a l'autre Mouvoit ſouvent tencon.
S'il le vouſiſt croire De ſa ſalvation
Entre les .ii. maiſons Pres d'une liue avoit
De bois grant et foillu Qui a eulz .ii. eſtoit
Mais li pꝛeudons ſouvent Ꝑar grant amour venoit
A l'autre de bien faire Souvent l'admonneſtoit
Un joꝛ furent enſamble Andeus li compaignon
Li pꝛeudons diſt a l'autre Par bone entention
Sire compains poꝛ Dieu Qui ſouffri paſſion
Muez vostre coꝛage A bien comme pꝛeudom
Et l'autre reſpondi une folie grant
Sire compains diſt il Qui m'alez pꝛeechant
Tant comme ſerai jones M'irai je deduiant
Et quant je ſerai viel M'irai convertiſſant
Li pꝛeudons reſpondi Oꝛ eſt ce trop mal dit
Nous n'avona de nos vies .I. ſeul joꝛ de reſpit
Se la moꝛt vous queure ſus De vos biens fais petit
De mouſtrer devant Dieu Loꝛs o[n]t cil grant deſpit
Moult coꝛrouciez li diſt Trop ſarmonnez de fable
Taiſiez vous de par Dieu Ou de par le dëable
Voſtre ſermon hui mes Ne tendꝛai a eſtable
Ce poiſe moi diſt l'autre Par Dieu l'eſperitable
Le pꝛeudon chevalier A ſon hoſtel ala
A Dieu ſon compaignon Doucement commanda
De ce qu'il li ot dit Point ne ſ'en coꝛrouca
Aincois pꝛie poꝛ li Car moult foꝛment l'ama
Le pꝛeudom chevalier S'en ala maintenant
Son compaignon leſſa Qui ot cuer de tirant
Toudis en ſa jonece Cuidoit eſtre vivant
Mais el li dura po Si comme oꝛrez avant
De ſa mauvaiſe vie Foꝛment li meſchei
Il acoucha malades Point ne ſe repenti
N'il a preſtre nis .i. Ses pechiez ne jehi
Ne a Dieu n'a /ſa mere Ne cria il merci.
Quant ſon compaignon ot Dire qu'il fu au lit
A li ſ'en vint tout dꝛoit Qu'il n'i a pris reſpit
Sire compains poꝛ Dieu Li pꝛeudons li a dit
Confeſſes vous biau ſire Recevez /Jhesucriſt
Une vois au malade Si a dit erranment
Ne te confeſſe pas tu vivras longuement
Le pꝛeudom chevalier Ne l'entendi noient
Car c'eſtoit li malvais Qui du bien n'a talent
Loꝛs a dit le malade Au chevalier pꝛeudom
C'eſt merveille de vous Leſſiez vostre ſermon.
Quant je ſerai gueris Miex ſavrai ma raiſon
Dire a vostre curé et ma confeſſion
Leſſiez moi repoſer Si ferez que coꝛtois
Volentiers ce dit l'autre Car oꝛendꝛoit m'en vois
Jhesucris qui fu moꝛs Poꝛ nous tous en la crois
Vous doinſt tel repentance Que n'en aiez ennois.
Li pꝛeudons chevaliers S'en toꝛna tout errant.
A ſon hoſtel ſ'en vint L'autre leſſa giſant
Qui ſouſglout a la moꝛt Et le va ſi haſtant
Que jamais a provoire Ne ſ'ira confeſſant
Tant le hurta la moꝛt Qu'il treſpaſſa de vie
Chaſcun de ſes parent Le pleure et bꝛait et crie
L'ennemi fu moult pꝛez Qui l'ame en a ſaiſie
Moult liez fu et joians Quant en ot la meſtrie
Li parent ont le coꝛs Tantoſt enſeveli
Si foꝛt a l'en ſonné Li bois en retent
Le pꝛeudom chevalier De ſon hoſtel l'oÿ
Loꝛs ſe poꝛpenſa bien Que c'eſtoit pour celi
Que il avoit leſſié Dedens ſon lit giſant
Loꝛs diſt en ſon coꝛage Doucement ſouſpirant
/Mere Dieu je vous pꝛi Faites poꝛ moy itant
Que de l'ame de li Sache le couvenant
Loꝛs s'apparut a lui /La Virge Dieu Marie
Qui des anges avoit Moult bele compaignie.
Clers luiſans comme flambe Et /la Virge Marie
Comme ſoleil ſus lune Par deſſus eulz flambie
Quant li pꝛeudons les voit Si ſ'eſbahi foꝛment
Et la Virge pucele L'apele doucement
Amis tu t'eſbahis Mais monte iſnelement
Deſſus ton palefroy Si t'en va erranment
Parmi ce bois amis Tout dꝛois chevaucheras
L'ame ton compaignon De certain trouveras
De choſe que tu trueves Tu ne t'eſbahiras
A tous joꝛs bon example Prendꝛe tu y poꝛras
/Dame diſt li pꝛeudons Benoite ſoies tu
A toi m'ame et mon coꝛps Commant et a /Jheſu
Loꝛs monte iſnelement Ne ſ'i eſt arreſtu
Par mi le bois chevauche Qui fu grant et foillu
Li pꝛeudons ſi n'ot pas Demi lieue alé
Qu'il a en mi le bois Le malvais encontré
En guiſe d'un noir moine Sachiez de verité
Quant li pꝛeudons le voit Si l'a hault ſalué
De /cele ſainte Dame /Qui le coꝛs Dieu poꝛta
Tes toi diſt li mauvés Ou il te meſcherra.
Ne veil point ton ſalu Li pꝛeudons ſe ſaigna
Oꝛ n'ai pooir vers toi L'ennemi dit li a.
Li pꝛeudons li demande Et quele creature
Es tu que du ſalut /Noſtre Dame n'as cure
Diſt li mauvais je ſui De la maiſon obſcure
Qui a a non enfer Ou tant a de laidure
Comment dit li pꝛeudons J'ai souvent oÿ dire
Que qui entre en enfer Il n'a meſtier de mire
Qui l'en puiſſe geter Et il a tant martyre.
Cuer nel poꝛroit penſer Ne main de clerc eſcrire.
Comment es tu iſſus De l'infernal maiſon
Par foy diſt li mauvés Ja ne t'en mentiron
Enfer poꝛtons o nous Partout ou nous alons
Auſſi cruel et plus Que ſe nous y fuſſion
Et que tu miex me croies Vois tu oꝛ mon chapel
Qu'a .iiiim. piez Du bas duſqu'au coupel
Plus eſt peſant d'aſſez Que la tour de /Babel
Par foy diſt li peudons Cy a peſant feſſel
Tu dis voir chevalier Le faiſſel eſt peſant
Sueur me fait ſuer Chaude com plons boulant
Hé; Diex diſt li pꝛeudons Cy a merveille grant
Car le plons quant il bout Si eſt treſtout ardant
Li mauvais li a dit Oꝛ met ta main de ca.
Li pꝛeudons li tendi Une goute en vola
Par le fons de la paume Tout oultre li paſſa
Cy a povre ſueur Li pꝛeudons dit li a
Encoꝛ diſt li mauvais Ne ſces tu le toꝛment
Qui eſt deſſous ma chape Que je ſueffre griement
Loꝛs a levé le pan De la chape erranment
Feu et flambe en ſailli Si tres crueuſement
Que la moitié du bois Devant lui embꝛaſa
Fueille bꝛanche ne tige Onques n'i demoura
C'eſtoit le bois au moꝛt Que dëables empoꝛta
L'autre fu au pꝛeudomme Onques feu n'i toucha
Le malvais a le pan De ſa chape avalé
Et li pꝛeudons li a Maintenant demandé
Poꝛquoi il a le bois Son compaignon gaſté.
Par foy dit li mauvés Et je le te diré
Onques ton compaignon Ne fiſt bien en ſa vie
L'ame de li ſi eſt A la moie baillie
Pour ce ai je ſa part Du bois toute gregie
La toie t'ai laiſſie N'i claing point d'avoꝛie
Et ſi te dis je bien volentiers te nuiroit
En toutes les manieres Que je onques poꝛroie
Poꝛ ce que ton compains Voloies metre en voie
De ſa vie amender Nul gré ne t'en ſaroie
Mais /la Dame des ciex Moult bien le me deffent
Que grever ne te puiſſe Car tu fais ſon talent
En li as bon eſcu Je te di vraiement
Et tous ceulz qui la ſeruent De cuer entierement
Li pꝛeudons li reſpont Dont doi bien aourer
/Ycele ſainte Dame Qui ſi me veult garder
Voire diſt li mauvés Mais oꝛ te veil mouſtrer
L'ame ton compagnon. Que ſoloies amer
Loꝛs li a mouſtré l'ame Qui fu ſon compaignon
L'une partie en fu Noire com moꝛt charbon
Et l'autre plus rouge Que n'eſt l'on vermeillon
Li pꝛeudons ſ'eſbahi Quant voit tele facon
A l'ame a demandé De la noire partie
Poꝛ quoi elle eſt ſi noire Ne qu'ele ſenefie
De la rougeur auſſi Que maintenant li die
L'ame li reſpondi Ne t'en mentirai mie
De la noire ce dit elle Te dirai chevalier
Je ſui en tenebꝛeur A celer ne t'en quier
Avec la tenebꝛeur Mon martyre eſt ſi fier
Cuers ne le puet penſer Ne bouche deviſier
De la rougeur auſſi Sces tu que ſenefie
Le feu d'enfer m'art tout Devers deſtre partie
Tant comme Diex ſera J'avrai ceſte haſchie
Aumoſne ne m'i vault Ne pꝛiere c'on die
Se mon coꝛs t'eüſt creü N'uſſe pas ce toꝛment
Que tous joꝛs ſoufferrai Enfer crueuſement
Iſſi pues tu bien pꝛendꝛe Moult bon chaſtiement
Il n'eſt nulz qui me puiſt Racheter ſauvement
Se ceulz qui ſont au monde Grans et petis eſtoient
Preſtres meſſes chantans Et chaſcun joꝛ chantoient
Poꝛ moi .xxv. meſſes Et faire le pooient
De ceſte grant doleur Ne me rachateroient
A mes parens diras Je t'en pꝛi chevalier
Que ne facent pour moy Meſſe dire en mouſtier
Aumoſnes ne prieres Ne m'avroient meſtier
Oꝛ t'en vas je m'en vois Recoivre mon loier
Le mauvais comme foudꝛe Maintenant ſ'en toꝛna
Le pꝛeudom chevalier Aus parens ſ'en ala
[Et ]toute l'aventure Dure leur raconta
Puis vint a ſon hoſtel Que il plus ne tarda.
Le pꝛeudom chevalier y pꝛiſt grant examplaire
De ſa vie amender Auſſi doit chaſcuns faire
Puis honoꝛa il tant /La Dame debonnaire
Qu'il deſervi la joie Qui a tous bo[n]s eſclaire
Oꝛ pꝛions /cele Dame /Qui eſt et fille et mere
De la pꝛiſon nous gart Qui tant par eſt amere
Que nous veille empoꝛter A /ſon Fil par pꝛiere
Et nous aions la joie Qui tant eſt bele et clere
Ainſint ſoit il amen Si ferons grant miſere
Que Diex nous doinſt venir Es ciex avec no Pere.