Oꝛ eſcoutez une choſete
Petite qui eſt nouvellete
Que je doi pour dꝛoiture dire
O eſt bien dꝛois que je m'entremete
De dire choſe ſi tres nette
Que on ne puiſt par dꝛoit desdire
Droit en eſt iugement et ſire
Droit dit c'om ne doit pas mesdire
De la choſe qui eſt bien faite
Car qui eſt en bonne matire
Drois dit c'on nel doit contredire
Ce ſeroit vilaine retraite
Droiz deſfant toute vilaine
Droiz mouſtre toute coꝛtoiſſie
Et enſaingne tout bien afaire
Drois dit c'on ſoit de bonne vie
Et que on n'ait en ſoi envie
Par quoi on puiſt l'autrui foꝛtraire
Droit dit que on ſoit debonaire
Droit dit que on ſe doit bien taire
De choſe qu'a li n'afieꝛt mie
Droit dit c'on ſoit de tel afaire
Que on puiſt a treſtouz ceus plaire
Les qui on eſt en compaingnie
Droit dit et jel ferai eſtable
Que puis c'om eſt aſſis a table
C'om ne doit mie trop parler
S'on dit choſe qui n'eſt eſtable
On li tourne ſon dit a fable
Si li veniſt miex repoſſer
C'om puet tel choſe reveler
Que qui la voudꝛoit recoꝛdeꝛ
Qui ne ſeꝛoit mie honnoꝛable
Droit dit c'on doit .iii. fois penſeꝛ
La choſe c'om veut recoꝛdeꝛ
Ainz c'om ſ'en face conneſtable
Droit dit c'uns meſdiſans vaut pis
Qu'avoir .ii. moꝛtiex anemis
C'om en het les gens ſans raiſon
S'uns meſdiſans dit ſon avis
Celui qui bien eſt ces amis
Le banira de ſa maiſon
Droiz dit c'eſt moꝛtel traiſon
Que d'aleveꝛ mauvés renon
Tant c'om fait le meſfait apꝛis
Droit dit j'en fais mencion
Jugement par eſlection
Trairoit la langue a tiex chaitiz
Droit dit c'on voit aucunne gent
Mouteplieꝛ et bel et gent
C'om nés doit mie deſtourber
Ainz doit on avoir cueꝛ joiant
Quant Diex leur donne avencement
Par quoi ſe puiſſent amender
Droit fait le povre en haut monteꝛ
Et toꝛt fait le riche avaler
Ce voit on avenir ſouvent
Droit dit c'on doit ces gas celeꝛ
Ne ne doit on nului gabeꝛ
Chaſcun ne ſet qu'a l'ueil li pent
Droit dit et en cel dꝛoit m'afi
Que on ait pitié et meꝛci
D'ome qui peꝛt par meſchëance
S'il peꝛt par ce qu'il ait plevi
Par feu par mal par guerre auſſi
Nus nel doit avoir en viltance
Droit dit qui en a la puiſſance
.I. poi li face ſecourance
Selonc ce qu'il a deſeꝛvi
Droit dit c'um poi de ſouſtenance
Sauve homme de deſeſperance
Au beſoing voit on ſon ami
Droit mouſtre que chevalerie
A ſur toute gent ſeingnoꝛie
Et par hauteſce et par valour
Philoſophes n'en mentent mie
Ainz qu'an latin fuſt la clergié
Eſtoient chevalier ſeignour
Touz li mont leur poꝛtent honnour
Et encoꝛ ſont il li greignour
Du monde je n'en doute mie
Et puis qu'il en ont le meillour
Droit dit que nulle deshonnour
N'en doit iſſir ne vilannie
Droit dit et retrait pour le dꝛoit
En quelque liu que li hom ſoit
Que il poꝛte aus fames honour
Et ſe poꝛteꝛ ne leur vouloit
Droit dit que trop ſe meſferoit
Et qu'il feroit ſa deſhonnour
Pour /la mere nostre Seignour
En ont les fames le meillour
Et qui ainſi ne le feroit
Drois dit qu'il avroit le piour
Ne ja de court de jugeour
Bon jugement n'empoꝛteroit
Droiz dit par raiſon eſcriee
Que puis que fame eſt mariee
C'on ne li doit querre hontage
Puis qu'elle eſt par bien aſſenee
A celui qui on l'a donnee
Qui li requieꝛt il fait outrage
Car ce teſmoingnent li .vii. ſage
Puis que fame eſt en mariage
Et elle eſt o autrui trouvee
Droit en deſcuevre ſon courage
Qu'ele conquieꝛt par ſon outrage
Que on la pꝛent putain provee
Drois dit et j'en ſui tous certains
Que li maintenir de putains
Vaut puis que ſeꝛpans ne que vivre
Car qui a ou metre ſa main
Il deſpant pour lui ſoir et main
Tant qu'il ſe voit d'avoir delivre
Droit dit que tiex hom ne doit vivre
C'om voit pour fame fol et yvre
Tant qu'il fait de ſon oꝛ eſtain
Il a .i. proveꝛbe en mon livre
Que dꝛoit y apꝛent a eſcrire
Tant as tant vaus. et je tant t'aing
Droit dit .i. mot qui eſt de pꝛis
C'on honneure ſon povre amis
Non pas ſans plus du ſien donneꝛ
Mais ſalueꝛ enmi le vis
Si en ſera plus avant mis
S'on le vous voit araiſonneꝛ
Lui chaſtoieꝛ et lui blaſmer
Lui bonnement amonneſteꝛ
Deſfandꝛe qu'il ne ſoit mellis
Les gens ſagement a parleꝛ
Non pas avec les folz aler
Car on a toſt le mal apꝛis