Vous qui volez oir Retenir et apꝛendꝛe
.II. examples moult biaus Ou il n'a que repꝛendꝛe
Diex doinſt que je les puiſſe Recoꝛder ſans meſpꝛendꝛe
Et nous gart du malvais Qu'il ne nous puiſt ſouſpꝛe[n]dꝛe
La pꝛemiere example vus dirai ſans mentir
Oꝛ metez tous et toutes Les cuers a retenir
Car aincois que de vous Me doie departir
Vous dirai je tel choſe Dont grans biens puet venir
La divine Eſcripture Nous en fait mencion
D'un pꝛeudomme jadis Qui en devotion
Priſt les dꝛaps et le pain D'une religion
En /Nostre Dame miſt Toute ſ'entention.
En /Nostre Dame amer Miſt ſon cuer et ſ'amoꝛ
Devant ſon dous ymage Eſtoit et nuit et joꝛ.
De la haire veſtir Souffri paine et doloꝛ
De jeuner de veillier Ot tainte la coulour
En /la Mere Dieu ot Son cuer ſi afichiés
Qu'il amaſt miex avoir Tous les membꝛes trenchiez
Que il la parjuraſt Ne n'en fuſt entechiez
Mais d'une male tache Fu ſon coꝛps entechiez
Le convers que je di Dont je fais remembꝛance
Poꝛ riens ne pooit croire Ne n'avoit eſperance
Qu'yaue benoite eüſt Ne vertu ne puiſſance
Et diſoit que ja joꝛ Il n'i avroit creance
Quant li pꝛeſtres getoit L'yaue par le mouſtier
Ja cil ne l'apꝛochaſt Ains ſ'en traioit arrier
En ſon pꝛopos diſoit Ja ne me quier moillier
Car je n'ai pas fiance Qu'el me peüſt aidier
Lonc temps a li convers Ceſte vie menee
Diex qui ſcet de chaſcun Le cuer et la pensee
Volt que la ferme foy Fuſt en ſon coꝛps entee
Et la malvaiſe fuſt Toute de lui oſtee
/Li dous roys gloꝛieus Qui tout ſcet et tout voit
Si voult mouſtrer que foꝛce L'yaue benoite avoit
Et poꝛquoi eſtablie En Sainte Egliſe eſtoit
Dont chaſcuns Creſtiens Arrouſer ſe devoit
Un jour fu li convers En ſa chambꝛe tous ſeulz
En ſaluant /la Virge D'un ſalut gracieus
Devant lui vit venir .I. grant poꝛc moult hydeus
De l'autre part regarde Si en va choiſir .II.
Devant li en po d'eure En vit plus de .vc.
Chaſcun eſtoit plus Noir que pois ne arremens
Le convers aſſaillirent Environ de tous ſens
Poꝛ ce qu'il le voloient Devourer a leurs dens
Onques n'i ot celui Qui le peüſt touchier
Juſqu'a tant que le meſtre Vint tout au derrenier
.I. croc de fer poꝛtoit Moult grant cel adverſier
Droit au convers ſ'en ſault Si le va acrochier
A terre l'abatirent Li autre l'apꝛochierent
Loꝛs pꝛennent le convers Et ſi le defoulerent
Li uns encontre l'autre Laidement le geterent
Et d'oꝛribles tourmens Foꝛment le tourmenterent
Li convers en ſon cuer /Nostre Dame apela
Et l'Ave /Maria En ſon cuer recoꝛda
Hé fait il /douce Dame /Que chaſcuns pꝛier doit
Se ne me ſecourez Je moꝛrai oꝛendꝛoit
Ce fu par le voloir /Le Pere tout puiſſant
Pour celi chaſtier Des cele heure en avant
Mais /la Virge Marie Pria tant /ſon enfant
Qu'ele peüſt ſecoꝛre Et vengier ſon ſergent
Faites vostre voloir /Mere ce dit /Jhesus
Loꝛs deſcendi /la Dame De paradis laſſus
Entre les ennemis Qui eſtoient ca jus
Si toſt comme il la virent Chaſcuns fu eſp[er]dus
/La douce Mere Dieu Le convers garanti
Onques puis ne touchierent A lui li ennemi
Quant li convers la vit Si li cria merci
Ha; fait il /douce dame Aiez pitié de mi
/Dame ſe j'ai meffait N'a vous n'a vostre enfant
Je me veil amender De ce jour en avant
Ainſi com li convers Va /la Dame loant.
Li abbes et .iii. moines Paſſoient par devant
Li abbes regarda Si choiſi le convers
Qui eſtoit en ſa chambꝛe Eſtendu tout envers
Le coꝛps ot tempeſté Et plus noirs fu que fers
Grant hideur ot li abbes Quant il le vit ſi vers.
Loꝛs le firent couchier Si le font confeſſer
Et puis aprés le coꝛps Noſtre Seignoꝛ donner
L'yaue benoite pꝛirent Deſſus lui a geter
Dont n'i ot ennemi Qui peüſt demourer
Quant li convers les vit Iſſir de la maiſon
Loꝛs commence a huchier A moult haute raiſon
Getez yaue benoite Partout a grant foiſon
Li ennemi ſ'en fuient Ne m'ont fait ſe mal non
Quant li abbes l'entent S'ot grant merancolie
Que cilz ne feust fox Et plain de freneſie
Et dont li demanda Et ſon fait et ſa vie
Et li convers li conte Qui ne li cela mie
Tout ainſi li conta Comme il fu abatus
Et comment par /la Dame Ot eſté ſecourus
Et de l'yaue benoite La foꝛce et la vertus
Par quoi li ennemis S'en eſtoient iſſus
Des los ot li convers Ferme foy et eſtable
Que l'yaue benoite eſt Et bone et poꝛfitable
Envers Dieu ſ'amenda Le Pere eſperirable
Dont il conquiſt des ciex La joie delitable
Le ſecont des examples vous veil ramentevoir
Ainſi con les sains peres Le nous font aſſavoir
Que jadis fu uns hons Riches de grant avoir
Qui onques de bien faire N'ot talent ne voloir
Onques en ſon vivant Aumoſne ne donna
Ne de biens qu'il eüſt Povres n'en amenda
Poꝛ tant qu'il le ſceüſt Tant que Diex l'eſpira
Par .i. moult bel example. Si con vous oꝛrez ja.
Car Diex qui eſt a tous vrais ſecours et amis
Le volt geter et traire Des mains aus ennemis
Une nuit en ſon lit Eſtoit ſi endoꝛmis
Con cil qui n'avoit pas Le ſien cuer a Dieu mis
En ſon doꝛmant ſonjoit Qu'il li pꝛiſt ſi grans fains
Par po qu'il ne menjoie Par deſtrece ſes mains
Par rage de famine Eſtoit ſi foꝛs eſtains
Qu'il ne pooit aler Tant eſtoit ſon cuer vains
En cele aviſion Que cil ainſinc eſtoit
Par delez .i. jardin Fermé de murs eſtroit
De tous les fruis du mond En ce jardin avoit
Avis li fu c'uns anges Tout le vergier gardoit
Cil qui ainſi ſonjoit Qu'i avoit tel famine
Vers l'ange qui gardoit Tout le fruit ſ'achemine
Par amours li a dit Et doucement l'encline
Que du fruit du jardin Li doinſt par amoꝛs fine
La garde reſpondi Je ne t'en donrai pas
Mais ſe tu y vois fruit De quoi l'arbꝛe plantas
Entres ens ſi en quers Tant comme tu voudꝛas.
Se riens n'i as planté Vas t'en iſnelepas
Le fameilleus reſpont Dolant a raiſon baſſe
Certes je n'i voi riens Que je onques plantaſſe
Il me fu bien meſtier Que .i. ſeul li donnaſſe
Par quoi a mon beſoing A ma fain en menjaſſe
La garde reſpondi Quant elle ot eſcouté
Amis cilz vergiers eſt Tous fais de charité
Puis que tu n'as dedens Nule choſe planté
Tu n'empoꝛteras riens Se ne l'as apoꝛté
C'une toute ſeule ente Dedens planté eüſſes
Sans congié de nului Du fruit mengier peüſſes
Et a ton abꝛicel Moult bien aler peüſſes
Nul ne t'en deſtoꝛnaſt Tant aler y ſceüſſes
A ce mot ſans plus dire Le fameilleus ſ'eſveille
De ce qu'il ot ſongié Li vint a grant merveille
Son cuer vers /Jhesucriſt De pꝛier ſ'apareille
A Dieu et a /ſa mere En ploꝛant ſe conſeille
Ha; fait il /haute Dame /Fleur de virginité
/Dame pꝛiez poꝛ moy /La ſainte Trinité
Que mon cuer ſoit empli De vraie charité
Car j'ai trop longuement Veſcu en vanité
Bien m'en ſui parceus Ennuit en mon doꝛmant
C'onques je ne fis bien En treſtout mon vivant
Mais ſe Diex par ſa grace Me leſſe vivre tant
Je ferai .i. vergier Merveilleuſement grant
Ainsi li riches hons Fu en cele pensee
Quant ce vint au matin Que la nuit fu paſſee
Partout a fait crier C'on viegne a ſa donnee
Loꝛs fu de ſon avoir Povre gent confoꝛtee
Des loꝛs toute ſa vie Grant aumoſne donna
Et par grant ſapience De bons arbꝛes planta
Quant il fu treſpaſſez Le fruit en retrouva
Dont Diex l'ame de lui Et ciex repꝛouvenda
Tout ainſi doit chaſcuns Son vergier eſtablir
Et planter arbꝛiſſiaus Dont bons fruis puet venir
Y puet a ſon beſoing Hardiement cuillir
Nulz ſelonc ſon pooir Ne ſ'en doit repentir
Par menues aumoſnes Aus povres gens donner
Puet chaſcuns et chaſcune Son jardignet planter
Par quoi en l'autre ſiecle Qui tous joꝛs puet durer
Puiſt on pꝛiveement Son bienfait retrouver
Oꝛ pꝛions de bon cuer A /la haute roynne
/Qui poꝛta /le Filz Dieu Par la vertu divine
Qu'ele pꝛie pour nous Au tres dous roy hautiſme
Qu'i nous otroit ſ'amour Qui tant eſt bone et fine