Oꝛ eſcoutez Ma bone gent
Un miracle Qui moult eſt gent
Vous vodꝛai dire et recoꝛder
Pour pecheours amoneſter
A rendꝛe ce que a Dieu promeſtent
Trop folement ceus ſe demeſtent
Et ſi ſe tuent et afollent
Que ce que pꝛomeſtent ne ſollent
A Dieu et a /ſa douce Mere
Mon livre dit et ma matiere
Que devant une viez ygliſe
Un ymage oꝛent la gent miſe
Pour l'igliſe qu'i[l] refeſoient
Au piez de l'ymage metoient
Leur ofrandeſ li treſpaſent
Sovent ſ'aloient amaſent
La joinne jant en celle place
A la pelote et a la chace
Un joꝛ i ot une grant flote
De clerſſonaus a la pelote
Devant le poꝛtau de l'igliſe
Ou cel ymage eſtoit aſiſe
Un des clerſſonz i ot moult bel
Qui en ſon doi ot .i. anel
Que ſ'amie li ot doné
Amours l'out tant aubriconné
Poꝛ grant choſe ne voſit mie
Que le anel qui fu ſ'amie
Fuſt ne perdus ne deſpeciez
Vers l'igliſe ſ'eſt adꝛeciez
Pour l'anel meſtre en aucun lieu
Tant qui ſe fuſt parti du geu
Cil qui penſoit en ſon coꝛage
Regardé a ſi voit l'image
Qui moult eſtoit freſche et novelle
Quant il a veue ſi belle
Devant li ſ'eſt ajenoulliez
Devotement aux iex moilliez
L'a enclinee et ſaluee
En po de tens li fu muee
La volenté de ſon coꝛaje
/Dame dit il tout mon aage
Des oꝛe mes vous ſervirai
Que onques mes ne remirai
Dame meſchine ne pucelle
Qui tant parut plaiſant ne bele
Plus belle et plus pleſſant eſtanz
Que celle n'e[ſ]t .c.m. tanz
Qui cet anel m'avoit doné
Je li avoie abandoné
[Tout ]mon couraige et tout mon cuer
Mes pour vous la veil je leſſier
Li et ſ'amoꝛ et ſes joiaux
Ceſt aniau ci qui moult eſt biaux
Vous veul doner par fin amour
Par covent que james jour
N'aré mes amie ne fame
Se vous non /bele douce dame
L'anel qu'il tinſt bouta loꝛs droit
Ou doy de l'ymage tout dꝛoit
L'image toſt et erranment
Ploia ſon doi ſi fermement
Que nus ne l'en peüſt retreire
C'il ne voſſit l'anel deſfere
Li clercon qui ot grant paoꝛ
Si ſ'eſcria de la freoꝛ
En la grant place ne demeure
Petit ne grant qui n'i aqueure
Et il leur conte tout le fet
Ce que a l'ymage avoit fet
Chaſcun ſe ſeigne et ſe merveille
Loꝛs li dit chaſcun et conſeille
Que un ſeul joꝛ point il n'atenge
Leſſe le ſiecle et ſi ſe prenge
A ſervir Dieu toute ſa vie
Et /Madame ſainte Marie
Qui bien li moſtre par ſon doit
Que par amours amer la doit
Ne autre amie ne doit avoir
Mes il n'ot pas tant de ſavoir
Qu'il li teniſt ſa couvenence
Ainz l'ot toſt mis en ouibliance
Que pou en niant l'an ſovint
Un joꝛ paſſa et l'autre vint
Le clercon crut et amanda
L'amour ſa vie li banda
Si foꝛt les iex qu'il n'i vit goute
/La Mere Dieu oublia toute
Cuer ot vollage qui ne crut
Saichiez c'onques ne ſe recrut
Cel qui l'anel avoit eſté
Son cuer i ot ſi arreſté
Que poꝛ li leſſa /Noſtre Dame
Si l'eſpouſſa et priſt a fame
Il fiſt es noces feſte fere
Car il eſtoit de grant afaire
De haut parage et de grant gent
Le lit fu fet et bel et gent
En une chambꝛe bel et gente
Li clerc qui ot miſe ſ'entente
A amer la gentil pucelle
Qui tant eſtoit et gente et belle
Si deſiroit l'aler geſir
Pour fere de li ſon pleſir
Mes auſi toſt c'on vint au lit
Ne li ſovint de nul délit
Endoꝛmi ſ'eſ[t] ſanz plus non fere
/La douce dame debonnaire
Qui plus eſt douce que miree
S'eſt tantoſt a li demontree
Au cler ſembla que /Nostre Dame
Jeüſt entre lui et ſa fame
Li doi le mouſtre atot l'anel
Qui moult li ſoiet bien et bel
Car li dois eſt polis et dꝛois
Si n'eſt mie fet cele dꝛois
Ne loiauté que tu me fez
Vers moy n'es oꝛe trop meſfez
Vez ci l'anel a ta meſchine
Que me donas par amour fine
Et ſi diſoies que .c. tanz
J'ere plus bele et plus plaiſanz
Que pucelle que tu ſeuſes
Loial amie en moi euſes
Se tu ne m'euſes degrepie
/La roſe leſſes pour l'oꝛtie
Et /l'eſglanter pour le ſeü
Chetif tu es ſi deceü
Que /le fruit leſſes pour la fuille
/La lenpꝛoie pour la ſoꝛoille
Eſbahi ſ'eſ[t] en ſon coꝛage
Celui cuidoit trover l'image
De toutes parz taſte a ſes meins
Mes n'i trueve ne plus ne meins
Loꝛs ſe cuit il a decwu
Quant n'a a ſa fame jeu
Mes il ne puet venir a chief
Car /Nostre Dame de rechief
Li raparut iſnellement
Coꝛrecié moult durement
Aſſez li diſt honte et ledure
Sovent le cleime ſanz parjure
Foi mentie et renoié
Bien tant dyable fauz noié
Et enchanté dit /Nostre Dame
Quant tu pour ta chetive fame
M'as renoié et degrepie
En la puante puantie
D'enfer ſeras enpuantez
Par tes dolentes puantez
Li clerc ſaut ſus tot eſbahiz
Bien ſoit que moꝛs eſt et traiz
Que couroucie a /Nostre Dame
Se tant ne quant touche a ſa fame
Du cuer ſoſpire et des iex pleure
Du lit ſaut ſus plus n'i demeure
Si l'eſpira la belle dame
Que ne le vit home ne fame
Ainz ſ'en foi en hermitage
Et pris abit de moniaje
La ſervit Dieu toute ſa vie
Et /Madame ſainte Marie
Ne veüſt au ſiecle remanoir
Avec ſ'amie aloit manoir
Ou il avoit par amours mis
L'anel ou doi com vrais amis
Treſtout le ſiecle ſi leſſa
A /Marie ſe maria
Oꝛ prion /Dieu le fil /Marie
Qu'il nous doint a touz bone vie
Et aprés vie pardurable
Car celui eſt bon heritage