/Li dous Roys Jhesucris Qui par annuncion
Priſt en /la ſainte Virge Sainte incarnation.
Doint ceus qui m'entendꝛont Sainte ſalvation.
En la crois ſouffri moꝛt Poꝛ no redemption.
A tous en general veil dire et raconter
.I. moult tres bel example Vous vouldꝛai recoꝛder
D'un bourjois qui ſon cuer Miſt tout en Dieu amer
I. moult biau fil avoit En point de marier
Li bourgois maria ſon enfant en ſa vie.
De ſon avoir qu'il ot Li donna grant partie
La moꝛt pꝛiſt li boꝛjois Qui ne l'eſpargna mie
Le ſien fil appella Ou durement ſe fie
Biaus filz diſt li boꝛgois il me convient moꝛir
Vas ſi fai mon curé par devant moy venir
Peres diſt li vallés je ferai vo plaiſir
Mais j'ai grant duel au cuer Quant je vous voi moꝛir
Le vallet ala querre Le preſtre iſnelement
Le boꝛjois devant li A fait ſon teſtament
Loꝛs appella ſon filz Moult debonnairement
Si le laiſe et acole Et eſtraint doucement
Mon enfant tu vois bien Que tu n'as ſuer ne frere
Poꝛ Dieu fai des aumoſnes Poꝛ l'ame de ta mere
Et ſi pꝛie poꝛ moy Biaus filz qui ſui ton pere
Car la moꝛt m'a ſaiſi Qui eſt peſme et amere
Biaus filz toy et ta fame Veil dire et enchargier
Tant comme vous vivrez Que volliez herbergier
.II. povres chaſcun jour Et donner a mengier
Par ce point vous poꝛrez Envers Dieu alegier
Pere dit le vallet En couvent le vous ay
A tous les joꝛs du monde Tant comme je vivrai
Poꝛ vostre amoꝛ .ii. Povres herbergerai
A boire et a mengier Largement loꝛ donrai
Que Diex face a m'ame Et a vous vrai confoꝛt.
Loꝛs treſpaſſa li peres S'ala de vie a moꝛt
Car il nous convient tous Arriver a tel poꝛt.
Adont ploꝛa ſon filz Et ſes .ii. poins detoꝛt
Oꝛ fu le boꝛjois moꝛt Et a ſa fin alez
A moult tres grant honoꝛ Fu ſon coꝛps enterrez
Son fil tint ſon avoir Si fiſt des biens aſſez
Diex fu de tout ſon cuer Servis et honoꝛez
Entre lui et ſa fame Menerent ſainte vie
La dame fu d'enfant De nouvel acouchie
Dieu en ont mercié Et /la Virge Marie
En ſa geſine fu Moult richement ſervie
Huit joꝛs devant Noel Si com trouvons liſant
Fu la dame acouchie D'un moult tres bel enfant
Oꝛ oꝛrez ja comment L'ennemi ſouduiant
Volt toꝛmenter la mere Et le petit enfant
Mais Diex y eſtendi largement ſes vertus
La veille du Noel Q[ua]nt le ſoir fu venus
Fu li bourgois en cuer Durement iraſcus
Ainſi com vous oꝛrez Se je ſui entendus
En guiſe d'un povre home S'en vint li Satenas
Moult fiſt le mehengnié Et contrefiſt le las
Le boꝛjois l'encontra Si le pꝛiſt par les bꝛas
Belement en l'oſtel L'en a mené le pas
Mais /li Rois Jhesucris Qui tous les biens depart
En ſemblance d'un povre Vint en l'oſtel tout tart
Et jouſte l'ennemi Qui fu de l'autre part
Si toſt com le choiſi Si ſe n'eſt d'autre part
Preudons diſt li bourgois volez vous herbergier
Oil diſt /li ſains hons Car j'en ai grant meſtier
Entrez ens diſt li hoſtes Bien vous ferai couchier
Et ſi avrez aſſez A boivre et a mengier
Oꝛ fu Diex et dëables Enſamble en la maiſon
Li boꝛjois ne ſot mie Quele eſtoit loꝛ facon
Sa chamberiere apelle Si li diſt ſa raiſon
Serf moi ces .ii. pꝛeudommes Sans noiſe et ſans tencon
Il eſt ennuit la nuit Que li vrais Diex fu nez
Poꝛ ce veil bien qu'il ſoient Servis et honoꝛez
Je m'en vois aus matines .II. cops ſont ja ſonnez.
Cele diſt volentiers Puis que vous le volez
Hoſtes diſt /Jhesucriſt Aveques vous irai.
Li boꝛgois reſpondi Moult joians en ſerai
Et quant nous en venrons Moult aiſe vous ferai
Loꝛs ſ'en vont au mouſtier N'i font plus de delay.
Oꝛ ſ'en va li bourgois Avec /le creatour
Mais il ne cuidoit pas Qui fuſt /le ſauveour
Enſamble ſ'en alerent N'i font point de ſejour
L'ennemi demoura Poꝛ faire grant doloꝛ
L'enemi demoꝛa Qui fu au feu aſſis
Et faiſoit le malade Et le maltalentis
La meſchine l'apele Et li a dit amis
Ce que voudꝛés mengier Tantoſt vous ert tramis
De mengier dit li dëables Ne me pꝛent nul talent
Mais j'ai ſi tres grant ſoif Que la bouche me fent
Vas toſt a la fontaine Que je ſai vraiement
Quant je avrai beu J'avrai treſpaſſement
La fontaine de quoy Li dëables demandoit
Eſtoit hoꝛs de la ville Et grant preſſe y avoit
La dame de laiens Qui de l'enfant giſoit
Diſt a ſa chamberiere Erranment qu'ele yroit
La pucele l'entent Si pꝛiſt .i. pot errant
A la fontaine ala Moult durement courant
La dame ſi ſ'en doꝛt Par delez ſon enfant
L'ennemi ſe dꝛeca Si vint au bers courant
Le petit enfant pꝛent Si le deſvolepa
Tout nu entre ſes bꝛas Au feu l'en apoꝛta
Ou grant bꝛaſier l'enfant Tantost ou feu geta
Puis ſ'eſt eſvanoys Laiens plus n'arreſta
Dedens le grant bꝛaſier En la douce rouſee
Sa tendꝛe char fu toſt Gregie et embꝛaſee
La meſchine ſ'en vint S'eſt en l'oſtel entree
Quant ne treuve leur oſte Si eſt toute effraee
Le bꝛaſier vit moult grant Qui fu amoncelez
Et le pié de l'enfant Qui eſtoit embꝛaſez
Paoꝛ ot en ſon cuer Mais nul mot n'a criez
Ses poins bat et detoꝛt Ses cheveus a tyrez
Hoꝛs de l'oſtel iſſi Si ſ'en cuert au mouſtier
Ou ſes ſires eſtoit Pour Damedieu prier
La pucele li conte De l'enfant l'encombꝛier
Que ſes oſtes avoit Geté ens ou bꝛaſier
Quant li ſires l'entent Au cuer en ot grant rage
Du grant duel que il ot Li eſt taint le viſage
De Dieu a regardé Le gloꝛieus ymage
Doucement le reclaimme De treſtout ſon coꝛage
Ha fait il /Jhesucriſt Qui en crois moꝛt ſouffriſtes
Et a ceſte journee De /la Virge naſquiſtes
/Sire confoꝛtez moi Par vos ſaintes merites
Gardez moi mon enfant Poꝛ qui mon cuer eſt triſtes
Puis va devant l'ymage De /la Virge Royne
[...]
Poꝛ ſa fame deſpꝛie Qui giſoit en geſine
Adont a li boꝛgois Huchiee ſa meſchine
Oꝛ toſt diſt il vas t'en A l'oſtel maintenant
Et ſi n'en fais ta dame Ne chiere ne ſamblant
Tu pꝛendꝛas .i. blanc dꝛap Si y metras l'enfant
Si le met en l'eſcrin Deſſi a l'ajournant
La pucele ſ'en toꝛne Que plus n'i demoꝛa
En l'oſtel eſt venue L'enfant tantoſt pꝛis a.
En .i. dꝛap l'envolepe En l'eſcrin le bouta
Son meſtre vint aprés Foꝛment ſe dementa
Li bourgois en l'oſtel S'en eſt errant venus
/Jhesucriſt avec lui Par coi fu ſecourus
Les grans biens qu'il a fais Li ſeront bien rendus
Oꝛ entendez comment Diex y a fait vertus
Li boꝛgois fiſt errant Tantoſt la table mettre
Car poꝛ l'amoꝛ de Dieu Voult le povre repeſtre
Pain et vin et viande Comme a tel joꝛ doit eſtre
A mis en charité Et poꝛ /le Roy celeſtre
/Le Roy de tout le monde Fiſt aſſeoir premier
[...]
Le boꝛjois le ſemont Et pꝛent a effoꝛcier
Jhesucrist le regarde Priſt loy a areſner
Hoſtes diſt /Nostre Sires Savez que vous ferez
Apoꝛtez moi le mes Qui eſt envolepez
Ou dꝛap de cel eſcrin Qui oꝛe y fu poꝛtez
Car j'en voudꝛai mengier Tele eſt ma volentez
Quant li boꝛgois l'oÿ Si ot merveille grant
De ce que cil li va Tel choſe demandant
Amis il n'i a riens Diex li reſpont errant
Sire je vous requier C'om le m'apoꝛte avant
Quant li bourgois l'entent Si commence a penſer
Par la chamberiere a Fait l'enfant apoꝛter
Devant /Nostre Seigneur Le va deſvoleper
Adont a li bourgois Commencié a ploꝛer
Li bourgois [.]i. coutel A ſus la table pꝛis
A ſon hoſte le baille Si li a dit /amis
Trenchiez ent ſ'il vous pleſt Car il eſt bien roſtis
Adont priſt le coutel /Li bons roys Jhesucris
Du lonc et du travers Sus l'enfant en fiſt crois
Et ſi l'a alené En la bouche .iii. fois
Loꝛs ot li enfes vie Et crie a haute vois
Loꝛs ſe part de leens /Li Rois de tous les roys
Si toſt com li bourgois Vit ſon enfant en vie
Loꝛs ſot il bien que Diex /Li filz /ſainte Marie
Avoit laiens eſté Et en ſa compaignie
Ses mains tint vers le ciel Jhesucriſt merci crie
Adont acole et baiſe Doucement ſon enfant
A ſa mere le poꝛte Et tout li va contant
Quant la dame le ſot Si ot merveille grant
Loꝛs firent plus de bien Que n'oꝛent fait avant
Li enfes a .vii. ans Fu a l'eſcole mis
Des lettres ſot aſſez En Dieu a ſon cuer mis
Son pere li conta Comme /Diex Jhesucris
L'ot reſcous et tenſé Des mains a l'anemis
Ou boꝛc de /Valenciennes Avindꝛent ces vertus
Ainſint ſont bones gens Du vrai Dieu ſecoꝛus.
Si li pꝛions de cuer Et li rendons ca jus
Par coi nos ames ſoient En ſes ſains ciex laſſus