Puisque Diex m'a pꝛeſté Sens et entendement
Et bouche de parler Et cuer d'aviſement
Que ne ſoie repꝛis Ne blaſmez folement
Dont me doi je pener De parler ſagement
Voirs eſt que biau parler Ne puet aus bons deſplaire
Qui bien y veult penſer On y pꝛent examplaire
Poꝛ ſa vie amender Et lui de pechié traire
Diex me doinſt dire choſe Qui a tous puiſſe plaire
Se vous volez a moy .I. petit[et] entendꝛe
Vous y poꝛrez tel choſe Retenir et apꝛendꝛe
Que vous vous garderez Tous joꝛs mais de meſpꝛendꝛe
En toutes les raiſons Sus quoi je doi deſcendꝛe
Ce ne ſont pas menconge Ains eſt choſe certaine
Car j'en trai a teſmoing L'Eſcripture divine
De cui creſtienté Et la loy ſe decline
Car c'eſt confeſſion Qui tant eſt bone et digne
Voirs eſt que il n'eſt nul S'il ſe veult amender
Et repentir de cuer Et Dieu merci crier
Et en devotion Netement confeſſer
Que Diex ne li pardoinſt Sans jamais reprover
Mais que face penance Tele c'on li enjoint
Puis ſe gart de pechié Qu'il n'i renchiee point
Ainſi ert racoꝛdé A Dieu et en bon point
Prions li que ſ'amour Et ſa grace nous doinſt
Entre vous tous et toutes Je vous pꝛi et requier
Ens en l'onnour de Dieu Qui tant puet juſticier
Entendés .i. biau dit Que je vous veil noncier
Qu'il avint de certain Au temps ca en arrier
Il fu .i. riches hons Si com trouvons liſant
Entre li et ſa fame Avoient .i. enfant
La moꝛt priſt le boꝛjois Ne pot vivre en avant
Quant la moꝛt fu venue Moult ot le cuer dolant
Dolans eſt cil qui pert Sa bone compaignie
Apꝛez que li bourgois Ot perdue la vie
La dame fu de plait Durement aſſaillie
Moult y a deſpendu De ſon avoir partie
Li filz fu a l'eſcole Qui moult y deſpendi
La dame largement De ſon avoir perdi
Po but et po menja Povrement ſe veſti
Tiex le ſoloit vëoir Qui ſ'eſloigna de li.
La bourioiſe cheï En moult grant povreté
Ne pot avoir les aiſes Ou elle avoit eſté
Et ſi fu delivree De tout ſon parenté
Car il n'eſt nulz ſ'il pert Qui ne chiee en vilté
Un joꝛ cele boꝛjoise Entra en .i. jardin
Ploꝛant deſconfoꝛtee Moult faiſoit male fin
Ses .ii. poins detoꝛdant Et eſrachant ſon crin
Dëables qui ne doꝛt Vers li pꝛiſt ſon chemin
En guiſe d'un marchant Devant lui ſ'arreſta
Par moult ſimple raiſon Tantoſt li demanda.
Dites fait il m'amie Pour quoy ploꝛez vous la
Et cele ſans plus faire Tout ſon fait li conta.
Cele cuidoit qu'il fuſt uns hons de bone vie
Certes ſire fait elle Je ſui moult eſbahie
Je ſoloie eſtre riche Oꝛ ſui moult apovrie
Li ennemis reſpont Oꝛ ne t'eſmaie mie
Se tu veulz faire ce Que je t'enſeignerai
Oꝛ et argent et robes A plenté te donrai
Et deſſus ton lignage Je te ſeurmonterai
Sire diſt la bourioiſe Commandez je ferai
Li ennemis reſpont Sces tu que tu feras
Tous les joꝛs par couſtume Au mouſtier t'en iras
Ceulz qui pꝛieront Dieu Tu les areſneras
Et de toute ton pooir Tu les deſtoꝛberas
En ce point que li preſtres Fera le ſacrement
Si dis tes oꝛoiſons Oians tous hautement
Par coy cil de l'egliſe N'aient entendement
A Dieu et a /ſa mere Foꝛs a toi ſeulement
La boꝛjoise reſpont Sire ſe je cuidoie
Poꝛ itel choſe faire En richece montjoie
Ce que commanderés Moult volentiers feroie
Et encoꝛe aſſez plus Se faire le ſavoie
Li ennemis reſpont Encoꝛe plus feras
.III. povres chaſcun joꝛ Au ſoir herbergeras
Et jus du pꝛemier ſomme Tu les enchaceras
Ne jamais en ta vie Ne te confeſſeras
Se tu le fais ainſi Tu avras a plenté
Avoir et grant richece Tout a ta volenté
Ne jamais en ta vie Tu n'avras povreté
Tu ſeras honoꝛee De tout ton parenté
Je ferai dit la dame voſtre commandemant
Poꝛ eſtre a grant honour Et vivre largemant
Encoꝛ diſt li dëables Feras tu autrement
Car je veil que tu faces Grant appareillement
De boire et de mengier Quelque doie couſter
Loꝛs ſi fais clers et preſtres Et chanoines mander
Fas que ſoient ſervi Richement au diſner
Tant que par glotonnie Les puiſſes enyvrer
Puis ſi les fais couchier Chaſcun en .i. biau lit
Quant il ſeront couchiez Pouchaces ſans reſpit
A chaſcun bele fame Pour avoir ſon délit
Ainſi con je le di Le fais ſans contredit
Cele ſi reſpondi Ne vous eſmaiez mie
De faire vostre gré Sui je appareillie
Et je de cuer pour voir Certes le vous afie
Que voſtre volenté En ſera aſſouvie
Voire dit li mauvais Si m'avras fait Grant joie.
Et je t'apoꝛterai Rouge oꝛ blanche monnoie
Cele ſ'i abandonne Adont ot il grant joie
Li ennemis ſ'en part Et ſe met a la voie
La dame en ſa maiſon Maintenant eſt entree
Sa huche de deniers Toute plaine a trouvee
De robes de joiaus En ſa chambꝛe paree
Quant elle vit l'avoir Grant joie a demenee
De l'avoir au dëable Grant bobant demenoit
Tous les joꝛs par couſtume Au mouſtier ſ'en aloit
A toutes et a tous Tant de raiſons contoit
Que nulz a Dieu pꝛier Entendꝛe ne pooit
Trois povres chaſcun jour Herberjoit enſement
Et puis les boutoit hoꝛs Contre l'anuitement
Des pꝛeſtres des chanoines Tenoit coꝛt moult ſouvent
Chaſcuns leens avoit Fame pꝛiveement
La bourgoiſe lonc temps Veſqui en tel uſage
Et envers l'ennemi Miſt tout ſon avantage.
Ne de li confeſſer N'avoit el nul coꝛage
Et tant qu'ele cheï En .i. moult grant malage
Malade fu ſouvent Que moꝛir la convint
Son fil qui eſtoit clers Devant ſon lit ſ'en vint
Le chief li a taſté Et longuement le tint
Quant le vit ſi malade Du preſtre li ſouvint
Mere ce diſt li clers je vous voi au deſſous
Se j'amainne le p[re]ſtre Vous confeſſerez vous
Se moꝛiez ſans langue Ce ſeroit honte a vous
Cele li reſpondi Non ferai biau filz dous
Quant ſon filz l'entendi Si fu tous eſmaiez
En ploꝛant li a dit Dolant et coꝛrouciez
Se vous eſtiez confeſſe De treſtous vos pechiez
Nulz ne vous en ſeroit Devant Dieu repꝛochiez
La mere reſpondi Biaus filz leſſiez m'eſter
Je n'ai cure de preſtre Ne de moi confeſſer
Quant ſes filz l'entendi Si commence a penſer
Bien ſot que li malvais Le voloit enchanter
Loꝛs li diſt doucement Confeſſez vous a moi
Nulz ne doit deſconfez Moꝛir en nostre loy
Je vous celerai bien Par la foy que vous doy.
La boꝛjoise reſpont Biaus filz je le t'otroi
Adont ſe confeſſa La dame a ſon enfant
Tout ſon fait li conta Ne li vait riens celant
Si diſt ma douce mere Je vous pꝛi et commant
Que le pꝛeſtre veniſt A vous tout maintenant
Tant li a dit ſon filz Qu'ele li otroia
Filz puis que tu le veulz Si le m'amainnes ca.
Cilz ſ'en va chiez le preſtre Tantoſt amené l'a
Tantoſt li ennemis Au lit la dame ala
Pour ce qu'il ne volt pas Qu'ele fuſt confeſſee
A bouche de pꝛovoire Ne a Dieu racoꝛdee
Par la goꝛge le pꝛent Errant l'a eſtranglee
Et quant ſon filz revint Si l'a moꝛte trovee
Li filz a la boꝛjoise Fu foꝛment coꝛroucié
Le pꝛeſtre d'autre part Si fu moult eſmaié
Sire ce dit li enfes Poꝛ Dieu me conſeilliez
Par coy ma mere ſoit Quite de ſes pechiez
Li pꝛeſtres reſpondi Par ma foy je ne ſai
Sire diſt li vallés Et je le vous dirai
Tous les pechiez ma mere Je vous recoꝛderai
Et ſelonc le meffait La penance ferai.
Car ains que vous alaſſe Querre en vostre maiſon
Loꝛs regehi ma mere A moi par tel raiſon.
Q[u'e]le eſtoit pꝛez de moꝛt Et en grant ſouſpecon
Qu'el ne moꝛut ſans langue Oꝛ ſavez l'achoiſon
Et poꝛ ce que ma mere Ne puet a vous parler
Vous voudꝛai je ſes fais En ſecré recoꝛder
Puis me bailliez penance Que je puiſſe poꝛter
Je pꝛi [Diex ]qu'il m'en veille Aidier et confoꝛter
Li preſtres reſpondi C'eſt bone choſe a faire
Pour quoi puiſſes ta mere De tenebꝛes retraire
Loꝛs ſe coucha li enfes Qui moult ert debonnaires
Sus la bouche ſa mere A poſé ſon viaire.
A tant le premier mot Si diſt moult doucement
Sire pꝛeſtres a Dieu Et a vous ſeulement
Et a /la Mere Dieu Veil dire entierement
Les pechiez que ma mere Fiſt outrageuſement
Adont ſe confeſſa Li enfes pour ſa mere
Au confeſſer des yex Li cheoit l'yaue clere
Li preſtres entendi Treſtoute la maniere
Bien vit que la boꝛjoise Eſtoit peſme et amere
Le pꝛeſtre l'en abſolt penance li charja
Et li enfes la pꝛiſt Et en couvent li a
Qu'il la fera moult bien Au miex que il poꝛra
Loꝛs ſ'en parti le preſtre Et l'enfant demoꝛa
L'endemain fu li coꝛps Poꝛtez en ſainte egliſe
Moult ot grant luminaire A faire le ſervice
A honnoꝛ fu la dame Ce joꝛ en terre miſe
Ses filz fiſt la penance Que poꝛ ſa mere ot pꝛiſe
Avec ce fist li enfes Treſtous les joꝛs chanter
Meſſe de requiem Poꝛ ſa mere ſauver
A moult de povre gent Fiſt ſ'aumoſne donner
Que Diex vouſiſt ſa mere Ses pechiez pardonner
Quant vint au chief de l'an Treſtout certainement
La boꝛjoise revint A ſon fil propꝛement
Plus blanche [fu ]que fleur Si li diſt doucement
Biau filz parole a moi Je n'ai mal ne tourment
Benoite ſoit l'eure Qu'en mes flans te poꝛtai
E an .ii. les mameles De quoi je t'alaitai
Tu m'as traite des paines Ou jamais ne ſerai
Poꝛ ce que mes pechiez A toy je recoꝛdai
Ton lit eſt apꝛeſté Aveques moi es ciex
Quant ſon filz l'entendi Si pleure de ſes yex
De la joie qu'il ot A dit Gloꝛieus Diex
Con bon vous fait amer Et ſervir en tous liex
Li enfes doucement A ſa mere parla
De leur raiſon enſamble L'un a l'autre conta
La dame ſ'en parti En repos ſ'en ala.
En po de temps apꝛez Li enfes treſpaſſa.
Tout ainſi fu la dame Par ſon enfant ſauvee
Ele fiſt bone painne Quant el fiſt tel poꝛtee
En ceſt example cy Nous eſt raiſon mouſtree
Confeſſion [doit ]eſtre Sus toute riens amee