Pour ce que de bien faire Ne puet nul mal venir
Veil d'un fait merveilleus Ma parole tenir
/La Vierge qui de grace Set les ſiens raemplir
Gart treſtouz ceulz et celles Qui nous voudꝛont oir
Douce gent es croniques De /Saint Denis en /France.
Voit on moult de merveilles Mais ſachez ſanz doutance
Celles de /Romme ſont; De trop plus grant ſuſtance.
S'en oꝛrez ſ'il vous plaiſt Belle ſenefiance.
Une noble pucelle Plainne de grant biauté
Fille fu l'emperere; De /Romme la cité
Qui ſouffri en ceſt ſiecle Tant de grant cruauté
N'eſt nulz ſ'il oit retraire Qui n'en ait grant pitié
Celle gentil pucelle Fu nommee Flourence.
Qui moult ot a ſouffrir De cruel peſtilence
En Dieu ſervir avoit Bien miſe ſ'eſperance
Des que n'ot que .x. ans Ot bonne conſcience
Voua a /Jhesucriſt Que jamais en ſa vie
N'avroit a homme nul Charnelle compaignie.
Puis fu ele parjure S'en ot tant de hachie
Que l'eſcripture dit De ce ne doutez mie
C'onques n'en ot tant femme Elle fu eſleue
A la plus bele choſe Qui adont fuſt veue
Comment qu'elle feüſt D'oꝛ et de ſoie veſtue
S'avoit elle la harre Tout en pꝛés ſa char nue.
Avecques la bonté Et la vraie pensee
Li ot nostre Seignour Si grant biauté donnee
Par toutes terres fu De li la renommee
.I. roy la voult avoir A moullier eſpouſee
La pucelle qui n'ot ſoing De nul charnel deſirs
Car elle ot ſon cuer mis Ou /tres douz Jhesucris
Ne le vout eſpouſer Li roys ot tel deſpis
Par moult fier mautalent Jura touz ſes amis.
Dont puis convint Maint homme a grant dolour fenir
La pucelle meiſmes En ot tant a ſouffrir
C'onques n'en ot plus femme Ce croi je ſanz moꝛir
Ainſſi com vous oꝛrez Se me voulez oir
Car le roy que je di Tout ſon eſfoꝛs manda
En l'empire de /Romme Fierement ſe bouta
Par foꝛce la pucelle Moult bien avoir cuida
Mais ſon pere com pꝛeuz En contre li ala
A l'aſſambler d'eulz ot Moult merveilleuz eſtour
Le pere la pucelle Y fu navré ce jour
D'un carrel en ſon chief Paſmez fu de doulour
Ses hommes l'en menerent A /Romme la majour
Les barons de la terre Firent grant deſconfoꝛt
Pour ce que l'emperere Eſtoit navrez a moꝛt
Sa fille la pucelle Demenoit duel trop foꝛt
Son pere li diſt fille Par foi vous avez toꝛt
Quant plourez devant moi Car vous me faites pis
Que le mal que je ſent Le roy de paradis
Vous veille confoꝛter Douce fille gentis
Qu'au jour d'ui perdez .I. de vos meilleurs amis
La moꝛt me tient au cuer Je muir a trop grant rage
Que ceulz qui m'ont occis Tenront mon heritage
Il honniront la terre Et metront en ſervage
Sa fille li diſt pere Ci a griés mariage
Quant ſon pere ſenti Qu'il le convient moꝛir
Il a dit a ſes homme Je vous lo ſanz mentir
Volentiers m'acoꝛdaiſſe C'on la feïſt plevir
A homme qui peüſt L'empire garantir
Car plus aiſe moꝛroie S'elle eſtoit aſſenee
Adonques eſt Flourence Hautement eſcriee
Chier pere j'ai a Dieu Ma chaasté vouee
Se je me marioie Je ſeroie dampnee
Puis que pour moi moꝛez Diex qui tous les biens livre
Ne veille qu'apꝛés vous .I. treſtout ſeul jour vive
Adonques fu mandé .I. pꝛeſtre a tout ſon livre
Le filz du roy li firent Fiancier a delivre.
On ne ſavoit el monde Chevalier plus iſnel
Ne plus loial de li Il fu courtois et bel
Mais il avoit .i. frere Qui n'eſtoit pas autel.
Pis valoit que /Cain Qui miſt a moꝛt /Abel.
Qui a la damoiſele Fiſt puis tant de toꝛment
Onques tant n'en ſouffri Femme de ſon vivant
Mais puis en ot li glous Dolereus paiement
Ainſſi com vous oꝛrez Recoꝛder bien bꝛiefment
Le roy fu enterré Dedenz une chapelle
Grant duel mena ſa fille A /la virge Pucelle
Se complaignoit ſouvent La noble damoiſele
Celui qui l'ot plevie La pꝛiſt par la main belle
Et li diſt douce ſuer Ne ſoiez en fricon
De la moꝛt vostre pere grant vengance pꝛendꝛon
Aincois que vous eſpouſe Ceulz de l'oſt deſtruiron
Adont ſ'ala armer Et maint autre baron
Hoꝛs de la vile iſſirent Moult noblement armez
Cil par qui leur ſeigneur Avoit eſté tuez
Aſſaillirent ſi foꝛt Que tout maugré leur nez
Jusqu'a .i. poꝛt de mer Les ont fuiant menez
Le roy qui par ſa foꝛce Vouloit avoir amie.
Entra en une nef Pour garantir ſa uie
Mais le franc damoiſel Qui la belle ot plevie
Apꝛés li ſe feri Par moult grant aramie
Car grant deſir avoit Que par lui fuſt occis
Que demourer li peüſt Flourence o le cler vis
Par ſon hiaume l'a pꝛis La l'eüſt a moꝛt mis
Quant il ſ'agenoulla Et li cria mercis
Tant li pꝛomiſt a faire que il le reſpita
Mais tant comme il parloient Leur nef ſe deſriva
Par la foꝛce du vent Vers /Greſce ſ'en ala
Ceulz de /Romme le virent Chaſcun grant duel mena
Ens ne poꝛrent ſaillir Pour celui ramener
A qui li emperere Voult ſa fille donner
Quant ſon frere leur diſt Seignours leſſiez eſter
Oiez de quel malice Il ſ'ala pourpenſer
A ceuz de /Romme diſt Savez que nous feron
Certes mon frere eſt moꝛt Jamais ne le verron.
Mais ſe vous voulez faire Mon talent et mon bon
Je vous donrai a touz Oꝛ et argent foiſon.
Pour tant que teſmoingn[i]és Quant a /Romme vendꝛés
Que mon freres eſt moꝛt Et a ſa fin alez
Et qu'i me fiſt jurer Quant a moꝛt fu navrez
Que Flourence pꝛendꝛoie Vous le teſmoignerez
Et me ſouſtendꝛez tant Que j'aie la baillie
De Flourence la belle Que mon frere ot plevie
Et je ne vous faudꝛai Jamais jour de ma vie
Adonques ſ'acoꝛderent De Rommains grant partie
Mais il en y ot .ii. Qui diſtrent a cler ton
Fole gent deſloial Creez vous cel glouton
Qui a trai ſon frere Ja tant com nous vivon
Il n'avra la pucelle Loꝛs diſt le faus larron
A ceulz qui a la fraude S'eſtoient acoꝛdez
Seignours diſt il pour Dieu La vengange pꝛenez
De ceuz qui me mesdient Loꝛs eſt outre paſſez
L'un des .ii. pꝛeudes hommes A maintenant tuez
A terre chay moꝛt Quant li autres le vit
Par doutance de moꝛt Au faus parjure diſt
Qu'il feroit ſon talent Loꝛs miſtrent ſanz reſpit
Le coꝛs en une biere A la voie ſe miſt
Le plus mauvais devant Et les autres derriere
[Diſt ]Miles leur ſeigneur Dites qu'en ceſte biere
Giſt Eſmeré mon frere Et faites mate chiere
Loꝛs entrerent a /Romme En ſi faite maniere
Et diſoient aus gens Que moꝛt en la mellee
Fu le franc chevalier. Plain de grant renommee
A qui li empereres; Ot ſa fille donnee
La pucelle l'oÿ Foꝛment fu effraee
Vers la biere ſ'en vint La pucelle au cler vis
Du duel ſ'eſcria haut Tres douz loiaus amis
Bien maudire devroie L'eure que je tant vis
Laſſe tant nobles hommes Sont pour mon coꝛs ocis
Laſſe bien me devroit La terre trangloutir
L'autre jour vi pour moi Mon chier pere mourir
A .i. franc chevalier. M'avoit faite plevir
Oꝛ eſt il pour moi moꝛt Je me doi bien hai
Flourence diſt vrai Diex Comme dure plevine
Je ſui bien de touz poins Demouree oꝛfeline
Oꝛ vou ge de bon cuer A /la haute Royne
Que jamais de mon coꝛs N'avra homs ſaiſine
Puis que celui eſt moꝛt A cui me creanta.
Mon pere par amours Adont Milles parla
Et diſt belle tielz mos Pour Dieu ne dites ja.
Car a ſon treſpaſſer Mon frere commanda
Devant les haus barons Que je vous eſpouſaſſe
Et pour lui que l'empire De /Romme gouvernaſſe
Flourence reſpondi A ſa voiz qu'elle oſt baſſe
Mile foi que doi Dieu Miex ameroie eſtre arſe
Vous n'eſtes pas preudome Je le ſai vraiement
Quant veez vostre frere Moꝛt devant em pꝛeſent
Et de vous marier Parlez ſi haſtieument
Par foi ne vous pꝛendꝛoie Pour cent mil mars d'argent
Adonques reſpondi Miles le loſengier
Par foi vous eſtes moie Poi pꝛis vostre dangier
A ceulz de ſon acoꝛt A dit franc chevalier
Prenez la veille ou non Menez la au mouſtier
Quant le coꝛs i ert en terre Tantoſt l'eſpouſerai
Le chevalier l'oÿ Qui ſ'eſtoit acoꝛdé
Maugré ſien a la fraude S'en eſt tantoſt alé
Au pape ſe li a treſtout; Le voir conté
En haut li diſt ſaint pere de ce ſoiez certain
Le coꝛs qui giſt en biere C'eſt mon frere germain
Mile m'eüſt ocis Quant li creanté a plain
Que ja ne le diroie A franc ne a vilain
Je m'acoꝛde par doute A leur grant tricherie
Eſmeré le courtois Qui Flourence a plevie
Je croi bien e[s]t tout ſain Et plain de bonne vie
Mais ſon frere li veult Tolir ſa ſeignourie
Adonques vint le pappe A la biere garder
Bien vit n'i ert pas leur ſire Coiement fiſt mander
Les bourgois de la vile Et puis les fiſt armer
Le traitour fiſt pꝛendꝛe Et em priſon geter
Le frere Eſmeré; fu mis en une tour
Miex veniſt c'on l'eüſt fait Deſtruire celui jour
Car puis fiſt a Flourence Souffrir tant de dolour
Que nus ne l'ot retraire Qui n'en ait grant tendꝛour
Douce gent vous avez Oÿ ſouvent conter.
Qu'a paine ſe puet on De fauſe gent garder
D'Eſmeré le courtoiz Veul des oꝛ mais parler
Qui o le roy de /Grece Fu en la haute mer
De retourner a /Romme Avoit moult grant talent
Pour l'amour de Flourence Qui avoit le coꝛs gent
Auſſiques la pucelle Le deſirroit foꝛment
Mais tant ala la nef Par la foꝛce du vent
Qu'a .i. des poꝛs de /Greſſe Arriva le vaiſſel
Quant le roy de la terre Le vit moult li fu bel.
Li jonnes empereres Se douta de ſa pel.
Mais le roy fu pꝛeudons Si li a dit iſnel
Sire n'aies doutance S'eſtes en ceſt pays
Je ſui vostre homme lige Car vous m'avez conquis
Vous n'i arez ja mal Par Dieu de paradis
Li jonnes empereres Li diſt vostre mercis
Vous ne povez riens perdꝛe A loiauté mener
Mais vous ſavez qu'a /Romme Me convient retourner
La fille l'emperere Doi bꝛiement eſpouſer
Quant le viex roy l'oÿ Si pꝛiſt a ſouſpirer
Puis diſt franc damoiſel Je l'ai lonc tans amee
Mais miex ſera [en] vous Que en moi emploiee.
Aus noces voudꝛai eſtre Sire ſ'il vous agree
Adont fu la navie Maintenant apreſtee
Les nes furent garnies De moult riches treſoꝛs
Les maiſtres mariniers Firent tant par effoꝛs
Qu'a .vii. lieues de /Romme Ariverent aus poꝛs
Quant [F]lourence le ſot Moult ot grant joie loꝛs
Mais ſa joie tourna Aſſez toſt en triſtreſce
Flourence qui le cuer Ot plain de gentilleſce
Son ſerouge qui ot Penſee felonneſſe
Fiſt iſſir de pꝛiſon Dont elle ot puis deſtreſce
Mais Flourence le fiſt Pour l'amour ſon ami
Treſtouz les Romains furent Moult foꝛment eſjoy
Contre le nouvel roy Alerent ſanz detry
Flourence vint aprés Son ſerourge avec li
Ainſſi comme il paſſoient Une foꝛeſt pleniere
Par la foꝛce du vent Leva ſi grant poudꝛiere
C'on ne pooit vëoir Ne avant ne arriere
Loꝛs Miles qui eſtoit Plain de male maniere
Priſt le frain a la mule Sur quoi la dame ſiſt
Par une fauſſe ſente Qu'il ſavoiſt bien la miſt
Bien .iii. lieues plenieres El bois entrer la fiſt
Aincois que la pucele Point garde ſ'em pꝛeiſt
Qu'elle cuidoit avoir pꝛés de li ſa maiſnie
Quant el ſe vit ſi ſeule Foꝛment fu eſbahie
Qu'elle devint plus blanche Que n'eſt la noif negie
Loꝛs diſt a ſoi meiſmes Laſſe je ſui traie
Arreſter ſe cuida Quant li fauz deputaire
Li a dit douce amie. Pres de moi vous faut traire
Moult ai pour vostre amour Enduré de contraire
Adont la voult baiſier; Mais el n'en ot que faire
Flourence qui n'avoit De ſon afaire cure
Li diſt en ſoupirant Tres fauſſe creature
Femme ſui de ton frere Et me requiers laidure
Celui qui eſtoit chaut Et ardant de luxure
Errant hoꝛs de la mule Le ſache par grant ire
Flourence ſ'eſcria Diex aidiez moi ſire
Oꝛ commencent les paines Et le cruel martyre
Que la belle ſouffri Si com vous oꝛrez dire
Son ſerourge l'avoit. en la foꝛeſt menee
En .i. moult deſert lieu Bien ſavoit la contree
Coꝛrompꝛe la cuida. Loꝛs ſ'eſt haut eſcriee
Car me veilliez aidier /Mere Dieu reclamee
Si voir que n'ai fiance Foꝛs en vostre ſecours
/Eſcharboucle luiſant Qui cuers plains de dolours
Enlumines de grace /Foꝛt chaſtel ferme tours
Ou touz desconfoꝛtez Doivent aler recours
En vostre ſainte grace Commant mon coꝛs et m'ame
Et ſi pꝛomet a Dieu Et a vous /haute dame
Que de ci a .vii. anz A homme ne a femme
Ne me ferai connoiſtre Pour meſchief /haute jemme
N'a /Romme n'autre part Ne tendꝛai ſeignourie
Mes en eſtrange terre Querrai pour Dieu ma vie
Se je ne t[r]uis ſervice En aucune abaie
Ou puiſſe demourer Loꝛs l'a li glous ſachie
A terre l'abati; Moult felonneſſement
Mais Flourence la belle Se deffendoit foꝛment
Le glout n'oſa yluec Demourer longuement
Sus ſon cheval monta Par l'un des bꝛas le pꝛent
Sus la mule l'aſiſt Puis priſt foꝛt a chacier
Cel jour paſſa maint tertre Et maint deſruble fier.
.VII. lieues el bois furent Quant ſouleil dut couchier
A ceulz de /Romme veul. .I. petit repairier
Qui contre leur ſeigneur Moult noblement aloient
Trompes harpes naquaires Et vieles ſonnoient
Nus ne poꝛroit conter La feſte qu'il faiſoient
A piece ne penſaſſent Au duel qu'il atendoient
Esmeré le vaillant; Aſſez toſt encontrerent
Nus ne vous poꝛroit dire La joie qu'il menerent
Pour Flourence. la gente Derriere eus regarderent
Mais quant il ne le virent Moult foꝛment ſ'eſmaierent
Adonques la cercierent Par la foꝛeſt ramee
Mais ſon ſerourge l'ot Autre chemin menee
Car trop ſouffri de maus Ainz que fuſt retoꝛnee
Ainſſi com vous oꝛrez bꝛiement ſ'il vous agree
On la quiſt en maint lieus Mais ne valoit noient
Loꝛs firent ceulz de /Romme Grant duel communaument
Eſmeré deſſus touz Ot le cuer moult dolent
Adont li diſt li pappes Bel et courtoiſement
Comment ſon frere voult La royne eſpouſer
Et c'on le fiſt par foꝛce En la tour enfermer
Mais au matin le fiſt Flourence delivrer
Oꝛ juge qu'i l'a faite Par barat deſtourner
Loꝛs jura Eſmeré Sus Dieu le dꝛoiturier
S'il puet ſon larron frere Jamais nul jour baillier
Que ja fraternité; Ne li avra meſtier
Que ne le face ardoir Ou tout vif eſcoꝛchier
Esmeré et ſa gent A /Romme ſ'en entrerent
Paremens et courtines Tout a terre geterent
Nulz ne vous poꝛroit dire Le grant duel qu'il menerent
En mains lienz loins et pꝛez Les meſſages alerent
Pour querir la pucelle Qui a toꝛt fu traie
Par foꝛés par deſers L'a li glous tant traitie
Que ſouz .i. grant rochier Vindꝛent a l'anuitie
La li fiſt moult de luite Le glouton plain d'envie
Quant Flourence la belle /Jhesucriſt reclamoit
Son deſloial ſerourge granz bufés li donnoit
Puis ſon coutel a pointe Sus ſon pis apointoit
Mais la douce pucelle Miex a moꝛir vouloit
Qu'elle fuſt coꝛrompue De li ſi faitement
Celui qui l'anemi Avoit ſoupꝛis foꝛment
Du manche du coutel la feroit bien ſouvent
Et la poignoit es cuiſſes Mais ne li valu nient.
Quant il fu mienuit Deſouz le rochier vinrent
Onques il n'i doꝛmirent Ne mengierent ne burent
Mais les beſtes ſauvages Par le deſert ſ'eſmurent
Et firent moult grant noiſe Que bien faire le durent
Miles les oÿ bien Mes gaires ne les priſe
A coꝛrompꝛe Flourence Ot ſi ſ'entente miſe
Qu'il ne doutoit riens nee De rechief la repꝛiſe
Tant li fiſt de deſtreſce Qu'el fu ſi foꝛt aquiſe
Qu'a paine pooit ele Ne pié ne main ſachier
Il l'eut coꝛrompue Quant Dieu le dꝛoiturier
Fiſt .i. ſerpent creſté Deſcendꝛe du rochier
Loꝛs convint au glouton La pucelle laiſſier
Quant il vit le ſerpent la main miſt a l'eſpee
Sifflant ſ'en vint vers lui Com beſt foꝛſenee
Mais il ſ'en deffendi Com perſonne membꝛee
Quant Flourence percut D'entre eulz .ii. la mellee
Tout au miex qu'elle pot Se leva de la place
En la foꝛeſt ſe miſt. Mes tant y ot grant mace
De ronces et d'eſpines Que dꝛas coꝛs et viſage
Li deſrompoient Si c'on veoit bien la trace
Du ſanc et de la robe Que la belle ot veſtue
Mais il ne li chaloit Qu'elle fuſt devenue
Pour tant que ſ'en alaſt Sanz eſtre coꝛrompue.
Des mains a ſon ſerourge Qui tint l'eſpee nue.
Tant li aida dëable Que le ſerpent tua
Puis revint en la place Ou Flourence laiſſa
Mais quant il ne la vit Moult grant duel demena
/Jhesucriſt et ſa mere Trop foꝛment maugrëa
Par deſpit ſe vouloit bouter el coꝛs l'eſpee
Quant il ot une piece De ſa robe trouvee.
Pendant a une eſpine Loꝛs ſot bien que paſſee
Fu par iluec Flourence Qui ſ'eſtoit deſciree
Tant ala qu'il trouva La trace de ſon ſanc
Le coꝛs qu'elle avoit tendꝛe Net et poli et blanc
Fu foꝛment deſciré. En coſté et en flanc
Miles ataint Flourence Pres d'un petit eſtanc
Ou plus avoit ſanſues Et laiſardes et dars
Singes ſerpens et ours Et lyons et lyepars
Eſcoꝛpions et tingres Souuent de toutes pars
Il venoient pour boire Moult fu lais li eſſars
En trop oꝛrible lieu Se fu Flourence miſe
Miles li faus traitres Si l'a par la main pꝛiſe
Puis li diſt douce ſuer Trop vous eſtes malmiſe
Mais vous n'eſchaperez De moi en nule guiſe
S'arai de vostre coꝛs fait Treſtout mon plaiſir
Fauz glous ce diſt Flourence Miex voudꝛoie moꝛir
Adont la repꝛiſt Miles Par merveilleuz air
Mais ne plot pas a Dieu Qu'il peüſt avenir
Le fauz glouz qui au dëable S'eſtoit treſtout donné
Li diſt fauſſe mauvaiſe Vous m'avez enchanté
Mais ſe Diex et ſes ſainz L'avoient tuit juré
Si ferai je de vous Tout a ma volenté
Loꝛs l'a par les .ii. piez A un arbꝛe liee
L'angoiſſe qu'il li fiſt Ne pot eſtre contee.
En ſi deſtroit la miſt Qu'il l'eüſt vergondee
Quant uns ours merveilleuz Entra en la contree
Loꝛs vers les .ii. perſonnes Moult fierement ſ'en vint
Et l'oꝛs ſe leva Miles Qui la pucelle tint
L'eſpee trait du fuerre Fierement ſe contint
A l'ours ſe combati Si bien comme il convint
Tant fiſt que l'ours tua Mais quant il dut moꝛir
Il cria ſi foꝛment Qu'entour li fiſt venir
Une ourſe et .ii. ourſiaus Qui ſanz point d'alentir
Aſſaillirent le traitre Mais tant fu plain d'air
C'onques ne recula Les ourſiaus le navrerent
Du ſanc et de la char Des coſtez li oſterent.
Mais ſi ſe deffendi. Qu'en la fin ſ'en alerent
Les .ii. ours et la mere Qui les cops redouterent.
Car il n'i ot celui. Qui ne fuſt mehanniez
Adonques vers Flourence Eſt Miles repairiez
Mais n'ot ſoing de de[d]uit Que trop fu travailliez
La belle deſlia Et puis ala ſus piez
En mi une ſentele Entra au point du jour
Virent .i. hermitage En .i. petit deſtour
Ou .i. saint pꝛeudomme Ot longuement fait ſejour
A l'uis vint ſi hurta Le cuivert traitour
L'ermite leur ouvri L'uis ſanz atargier
Miles li diſt bons hons Avez vous que mengier
.II. jours ne mangames Moi ne ceſte moullier
L'ermite reſpondi Vous avrez ſanz dangier
De tiex biens comme j'ai Loꝛs ataint .i. pain d'oꝛge
Mais onques la pucelle N'en pot paſſer la goꝛge
Le glouton en menga. Qui poi pꝛiſa /saint Goꝛge.
Puis a ſachié l'eſpee Qui fu de bonne foꝛge.
L'ermite lia foꝛt Puis a le feu bouté
Dedenz ſon hermitage Treſtout l'a embꝛaſé
Flourence vit le fait Foꝛment l'en a peſé
Li faus par .i. des bꝛaz La pꝛiſt outre ſon gré
Bien avant l'emena En la foꝛeſt ramue
Coꝛrompꝛe le cuida Mais Diex l'a deffendue
Quant il vit que ne pot Par li eſtre vaincue
Par ſes blons cheveus l'a. A .i. arbꝛe pendue.
Loꝛs pꝛiſt le faus larron .I. baſton d'englentier
Tant en bati Flourence Et devant et derrier
De touz coſtez veoit De li le ſanc raier
Moꝛte l'eüſt en l'eure Quant Diex le dꝛoiturier
Fiſt parmi la foꝛeſt Venir .i. chaſtelain
Sa gent avoit perdue .I. coꝛ ſonnoit a plain
Quant le faus larron Mile L'oÿ tout pour certain
Cuida ce fuſt ſon frere Loꝛs ot moult le cuer vain
A la fuite ſe miſt Foꝛment ſe deſconfoꝛte
La royne leſſa Qu'eſtoit demie moꝛte
E; vous le chaſtelain Que /Jhesucriſt apoꝛte
Parmi une ſentele Qui eſtoit toute toꝛte.
La pucelle vit pendꝛe Si ſ'en vint celle part
Moult en ot grant merveille Mais foꝛment li fu tart
Qu'elle fuſt deſpendue De ſon cheval liart
Deſcendi loꝛs Flourence. Li fiſt .i. douz regart
Car ele avoit d'angoiſſe la parole perdue
Loꝛs l'a li chaſtelains Miex qu'il pot deſcendue
Deſſouz l'arbꝛe l'aſſiſt Moult l'a vit derompue
Puis li diſt [douce ]ſuer. Dont eſtes vous venue
Elle li diſt douz ſire De baſſe gent ſui nee
Mais nobles genz ſervoie. Qui m'ont toute alevee
Oꝛ m'ont mauvaiſe gent Ci endꝛoit amenee
Ne m'en demandez plus Pour /la Vierge honnouree.
Car au cuer ai tel duel Que bien mourir voudꝛoie
Ma ſuer diſt il chiez moi Volentiers vous menroie
Je croi bien que ma femme Aroit de vous grant joie
Flourence li diſt ſire Moult volentiers l'otroie
Par ytel couvenant Que mon coꝛs garderez
De toutes vilonnies; Le miex que vous poꝛrez
Le chaſtelain diſt ſuer Ja mar en douterez
Sus la mule l'aſiſt Qui ot le frain doꝛés
Le chaſtelain Tierry La royne a ſuie
Deſiques au chaſtel Ne ſ'atargerent mie
La dedenz fu Flourence Moult noblement ſervie
Tant que de ſes griez maus Fu la dame alegie
Foꝛment la tenoit chiere La france chaſtelaine
Bien voit n'eſt pas eſtraite De lignie vilainne
Et Flourence ſe miſt. De li ſervir en paine
Nous veons au jour d'ui C'eſt bien choſe certaine
Qu'il a plus de ſervice Et de bonne duiſon
En .i. enfant qui eſt De bonne naſcion
Qu'en .i. truant Flourence ot laiens bon renon
Le chaſtelain Tierry Qui moult eſtoit pꝛeudon
Avoit une fillete. De .vii. anz et demi.
Par grant chierté couchoit Flourence avecques li.
Mais il avoit laiens .I. glouton anemi
Qui .i. trop vilain plait Sanz raiſon li baſti
Le faus fu ſenechal au courtoiz chaſtelain
Nommez eſtoit Maquare C'eſt .i. non trop vilain.
Souvent requiſt Flourence Et au ſoir et au main
Que ſ'amour li donnaſt Mais il ouvroit en vain
Car ele ſe laiſſaſt Avant vive eſcoꝛchier
.I. jour le trouva ſeule Le glouton pautonnier
Par foꝛce le cuida Acoler et baiſier
Mais Flourence li fiſt Le ſanc vermeil raier
A grant ru de ſa bouche Et .ii. denz li bꝛiſa
Li glous hoꝛs de la chambꝛe Erranment ſ'en ala
Moult manace Flourence Et diſt qu'il bꝛacera
Tel plait ſ'il onques puet De quoi arſe ſera.
Si toſt con fu couchie le deſloial glouton
Deſſouz le liſt ſe miſt Coiement a larron
Ou Flourence giſoit Avecques l'enfancon
Mais pas ne ſe gardoit De telle traiſon
Car quant le murdꝛier vit Qu'elle fu endoꝛmie
A la fille ſon maiſtre A la coꝛge trenchie
Dedenz la main Flourence Qui fu blanche et polie
Miſt le coutel trenchant Et doꝛmant la laiſſie
Maquares fiſt matin; Le chaſtelain lever
Par la chambꝛe Flourence Le convenoit paſſer
Quant vouloit de la ſeue Ens en la ſale entrer
Le ſanc du lit ſa fille Vit aval devaler
Il vit que la goꝛge ot Trenchie et le tuel
Et en la main Flourence A veü le coutel
Ne pot par le duel Let li fu non pas bel
Maquares qui ot fait Le dolereus chaudel
Li diſt franc chaſtelain. C'a fait ceſte murdꝛiere
Leſſiez le duel Et faites ardoir la loſengiere
Adont leva le cri Et devant et derriere
La chambꝛe empli de gent Qui firent mate chiere
Flourence ſ'eſveilla A merveilles li vint
Des gens qui la eſtoient Et du coutel que tint
Et quant l'enfant vit moꝛt Plus vermeille devint
Que roſe de roſier Loꝛs paſmer la convint.
Moult fu grant la dolour En la chambꝛe menee
La chaſtelaine y vint Treſtout eſchevelee
Errant eüſt Flourence A ſes mains eſtranglee
Quant on li a par foꝛce Hoꝛs de ſes mains oſtee.
Adont fiſt l'en Flourence Si foꝛt les poins loier
Qu'aval par mi les ongles Convint le ſanc raier
En une chartre obſcure La fiſt on eſtuier
A ardoir fu jugie Tantoſt ſanz atargier
Mais avant qu'elle fuſt A jugement menee
Li vint dire une vois Ma ſuer pas ne t'esfree
Car tu ſeras encoꝛe. A Romme couronnee
Mais avant ſoufferras Mainte male journee
Aies en /Jhesucriſt. Tres parfaite creance
Que ſaches que de ceulz Qui te feront grevance
Avras en .i. ſeul jour Merveilleuse vengance
On te merra ardoir Mais n'aies ja doutance
Car Diex te gardera Oꝛ le ſerf d'amour fine
Loꝛs vint le bourel querre Flourence la royne
Droit au feu le mena Qui eſtoit fait d'eſpine
Le chaſtelain qui ot Conſcience enterine
Li diſt femme comment Fus tu ſi eſragie
Qu'a moꝛt meis ma fille Je te rendi la vie
Quant pendoies au bois Loꝛs Flourence ſ'eſcrie
Sire pour Dieu merci Tel fait ne creez mie
C'onques feiſſe mal A la gentil pucelle
On m'a ceſt plait baſti Ne ſai par quel querelle
Diex ſet que j'ai bon dꝛoit A garant l'en apele
Adont le chaſtelain S'enclina en la ſele
Si con li chaſtelains Sus ſon arcon penſoit
Avis li fu c'un angle De par Dieu li diſoit
Qu'aler leſſaſt Flourence Quel part qu'ele voudꝛoit
Et honnour pourfit Bien bꝛiement l'en vendꝛoit
Loꝛs quant fu redꝛeciez Il diſt a haute voiz
A ſa gent c'on alaſt Toſt querre ſon hernois
Et la mule ſur quoi Il l'amena du bois
Je ne veul qu'elle perde Du ſien vaillant .i. pois
Il li fiſt treſtout rendꝛe Et quite delivrer
Quant Flourence monta Foꝛment pꝛiſt a plourer
Car ou aler ne ſot Le ſire fiſt crier.
Que nul ne le ſuiſt Pour les membꝛes couper
Maquare pour le cri point ne ſ'eſleeſca.
Errant l'eüſt ſuiie Mais aler n'i oſa.
Flourence ſur la mule Foꝛment ſe dementa
D'un peril eſt iſſue Mais en plus grant ſ'en va.
Ainſſi com vous oꝛrez Se me voulez entendꝛe
Flourence qui avoit De pitié le cuer tendꝛe
Trouva en ſon chemin .I. larron c'on vout pendꝛe
Adont tourna ſa mule Celle part ſanz atendꝛe.
Au pꝛevost vint tantoſt. Si le miſt a raiſon
Et li diſt gentis ſire Pour Dieu requier .i. don
Car me donnez cel homme Qui ſera mon garſon.
Le prevoſt li diſt dame Pas ne vous refuſon
Mais laiſſiez le nous pendꝛe Par ma foy je me dout
Se vous le delivrez Que bꝛiement ne vous couſt
Bien vous fais aſavoir Que de mal a fait moult
Le larron li diſt dame Mon coꝛs je vous doins tout.
A vostre plaiſir faire Se de ci me getez
Que je vous ſervirai Sanz nule fauſetez
Adont fu le larron A Flourence livrez
Miex li vauſiſt qu'il fuſt Penduz et trainez
Ainſſi com vous oꝛrez Aſſez bꝛiement retraire
Flourence li diſt frere Oꝛ penſez de bien faire
Se tu me poꝛtes foy Tu avras bon ſalaire
Le larron li diſt dame Quel part voulez vous traire
Flourence li diſt frere Moult volentiers iroie
Outremer au /ſepulcre Se paſſer y povoie
Dame diſt le larron G'i ſai moult bien la voie
Puis diſt entre ſes denz Demain ainz que jour voie
Vous ferai de la goꝛge Se je puis .ii. ſouflois
La mule ſera moie Et tout l'autre hernois
Droit a .i. poꝛt de mer S'en vindꝛint a eſlois
Ou le larron avoit. .I. hoſte trop mauvois.
Il ot mainte perſonne en ſon hoſtel murdꝛie
Flourence ſ'eſt la nuit En l'oſtel herbergie
Le larron fiſt a l'oſte Son marchié c'on l'ocie
L'oteſſe qui l'oÿ; ne ſ'i acoꝛda mie
Et diſt ja caiens n'iert fait. Si moꝛtel pechiez
Le larron diſt oſteſſe Pas ne vous courouciez
Nous le diſon ainſſi Savoir que vous diriez
Qui en larron ſe fie Il eſt bien engigniez
Quant Flourence la belle Fu com nonnain veſtue
De bon cuer ſervi Dieu Et /la Vierge abſolue
La haire jour et nuit Avoit a ſa char nue
Hui mais oꝛrez comment Elle fu conneue
Diex li donna tel grace Qu'il n'ot en la contree
Perſonne tant malade S'en devote pensee
Veniſt a li parler Ne fuſt reconfoꝛtee
Em pluſeurs lieus aloit De li la renommee.
Bien aparut foꝛment Que a Dieu fu amie
Car de ſes anemis Fu en .i. jour vengie
Et ſi ot puis de /Romme Toute la ſeignourie
Dont ſon ſerourge l'ot A grant toꝛt departie
Eſmeré ſon ſeignour Souvent pour li plouroit
Meſſes du Saint Eſpꝛit Pour li chanter faiſoit
Que Diex la li rendiſt Par deſconfoꝛt juroit
Que jamais n'avroit femme S'elle ne revenoit
Ne remeſt en l'empire Ne cité ne chaſtel
Ou ne la feïſt querre Et tant que d'un quarrel
Fu navré l'emperere En .i. eſtour moꝛtel
El fron moult malement N'ot mire qui fuſt tel
Qui l'en peüſt garir En doute de moꝛt fu.
Tant qu'il oÿ nouveles Si com plot a /Jhesu
Que pour une nonnain Faiſoit mainte vertu
Le pere de laſſus; Loꝛs eſt le roy meu
Pour venir a la dame Qui moult eſtoit ſ'amie
Tout dꝛoit en /Biau Repaire Ou ot bonne abaie
Eſmeré chevauchoit A petite maiſnie
Hui mais eſt bien raiſon Que de Mile vous die
Qui ot fait a Flourence ſouffrir tant d'encombꝛier
Il ala demourer Avec .i. chevalier
Qui le tint en ſoudees Mais Diex le dꝛoiturier
Qui du bien et du mal Rent a chaſcun loier
Fiſt le faus deſloial Si meſel devenir
C'on n'oſoit entour lui Ne aler ne venir
Gros cu comme .i. tounel Ne ſe pot ſouſtenir
.I. jour fiſt a ſon meſtre Prier et requerir
Qu'il le feïſt mener Tout dꝛoit a /Biau Repaire
Ou Diex pour la nonnain Vout tant de vertuz faire
Le ſire l'otroia Ja oꝛrez de Maqua[i]re
Qui miſt a moꝛt l'enfant Pour Flourence deffaire
Si mal fu atourné Que de pié ne de main
Ne ſe pooit aidier Mais le franc chaſtelain
Le mena pour garir A la france nonnain
Moult amoit le traitre Ne ſot pas le certain
Comment avoit murdꝛie Sa fille en traiſon
Errant l'eüſt fait pendꝛe Plus haut que .i. larron
Oez com fu ſervis Archembant le glouton
Et ſon deſloial hoſte Qui n'eſtoit pas pꝛeudon
Du feu d'enfer eſtoient Par le coꝛs alumez
Cadot li mariniers Eſtoit ſi atournez
C'a potentes aloit Les piez ot touz enflez
Touz .v. a /Biau Repaire Sont .i. jour arivez
Douce gent es croniques De /Romme ſont trouvees
Les paroles qui ſont Ci de par moi contees
Mais .i. Rommans en eſt Ou en a ajouſtees
Granz bourdes qui n'i doivent Pas eſtre recoꝛdees
Les glous qui a Flourence oꝛent tant fait dolour
Vindꝛent ou ele eſtoit Treſtouz a .i. ſeul jour.
Auſſi fiſt l'emperere Qui eſtoit ſon ſeignour
La dame ſ'eſtoit ja Couchie en ſon doꝛtour
Quant l'abeeſſe ſot Que pour les granz vertuz
Eſtoit li empereres De /Romme la venuz
Au lit Flourence vint Et li rendi ſalus.
Les nouveles li diſt La dame ſailli ſus
Onques puis ne doꝛmi En oꝛoiſons ſe miſt
Doucement reclama /Le tres douz Jhesucriſt
Que bon conſeil li doint Une voiz li tramiſt
Le pere de laſſus; Moult doucement li diſt
Flourence belle ſuer Ta penance eſt fenie
.VII. anz a que venis En yceſte abbaie
Diex veult que tu t'en voiſes A /Romme la garnie
Avecques ton ſeignour De vous iſtra lignie
Dont /Jhesucriſt veult eſtre honnourez et ſervis
Eſmerez eſt malades Mes demain iert garis
En ceſte ville ſont Treſtouz tes anemis
Diex ne veult conſentir Que plus demeurent vis
Il ont eü eſpaſſe Moult grant d'eulz amender
Demain vendꝛont a toi Pour ſanté recouvrer
Il ne te connoiſtront Haut leur feras conter
Les pains qu'il t'ont faites Souffrir et endurer
Flourence diſt vrai Dieu Je ne vouſiſſe mie
Qu'il moꝛuſſent pour moi Ne ſouffiſſent hachie
De bon cuer leur pardoins Toute la felonnie
Qu'il m'ont fait; la voiz diſt Tu ne fais pas folie
La dame bien matin. l'endemain ſe leva
Les traitres connut. Mes point ne l'aviſa
Eſmeré ſon ſeigneur Mes bel la ſalua
Elle le connut bien. Mais il pas ne cuida
Que ce fuſt la royne Que Miles ot ebmlee
Que de quevrechiez fu bien et bel atournee
Adonques ſ'eſt Flourence Hautement eſcriee
Que touz ceulz qui voudꝛoient Garir celle journee
Faut que touz leur pechiez Dient oiant la gent
A ſon ſerourge Mile A dit pꝛemierement
Vous qui en la bꝛouete Giſiez enflez foꝛment
Commenciez tout pꝛemier Le glout diſt baſſement
Dame plus volentiers En ſecré le diroie
Flourence diſt amis Il faut que chaſcun l'oie
Par foi diſt le traitre Pourquoi le celeroie
Je ne fis onques bien En chemin ni en voie
Combien que meſiaus ſoie De certain je ſui frere
A Eſmeré qui eſt Des Rommains emperere.
Sa femme li emblai Et li fis tant de here
C'onques tant n'en ſouffri Je croi fille de mere
Mais onques ne poi faire Que fuſſe bien de li
Au derrain par les treſches En .i. bois la pendi
Quant ſon frere l'oÿ A poi du ſens [n'i]ſſi
Adonques ſe leva Le chaſtelain Tierry
Et diſt a haute voiz par /la Vierge abſolue
Je trouvai une dame A un arbꝛe pendue
De moꝛt la garanti Trop eſtoit derompue
Mais la bonté m'en fu Trop malement rendue
A grant honnour L'avoie tenue en mon hoſtel
Mais a .i. main trouvai En ſa main .i. coutel
Dont elle ociſt ma fille Mais onques ne fu tel
Que la feiſſe ardoir Tant avoit le coꝛs bel.
Par foy je ne vi onques Plus belle creature
Sa mule li rendi Et toute ſa veſture
Qu'avoit quant le trouva Diex et /la Vierge pure.
S'elle eſt vive La veille deffendꝛe de laidure.
Chaſtelain diſt Flourence. Autrement a eſté
Au ſeneſchal fiſt dire Si [com il ]ot ouvré
Maquaire qui cuidoit Moult bien avoir ſanté
Cria je ne fis onques Ne bien ne loiauté
Puis diſt franc chaſtelain Pour Dieu merci deman
Voir j'ocis vostre fille D'un grant coutel trenchant
En la main a le dame La mis en ſon doꝛmant
Ardoir la cuidai faire Mais Diex li fu garant
Pour ce que ſ'amiſtié Ne me vouloit donner
Glout diſt le chaſtelain Diex te puiſt mal donner
Jamais ne mengerai Si t'arai fait finer
Le larron qui eſtoit Eſpꝛis du feu d'enfer
Se dꝛeca ſus ſes piez Et parla a haut ton
Et diſt je ne fis onques Auſſi jour ſe mal non.
Mais ſachiez cele dame Dont il font mencion
Me fiſt moult grant bonté S'en ot mal guerredon
Car on me vouloit pendꝛe Quant par ſa grant franchiſe
Me requiſt au pꝛevost Et m'oſta de juſtice
Moi et mon oſte auſſi L'euſſons a moꝛt miſe
Se ne fuſt nostre oſteſſe. Mais puis par convoitiſe
L'alaſmes ſus la mer Vendꝛe tous .ii. as mariniers
Bien avoir en cuidaſmes .I. plain ſac de deniers
Mais en chetis meriaus Fu nostre argent changiez
Loꝛs parla le marchant Qui ot enflez les piez
Et diſt je l'achetai Et changai vostre argent
Mais quant de li cuidai Tout faire mon talent
.I. oꝛage leva Par la mer et tel vent
Que treſtout mon avoir Y perdi et ma gent
Fendꝛe convint la nef Et em pieces froer
A cheuauchons me mis Pour ma vie ſauver
Sus .i. fuſt moult de paines Me falut endurer
Sus .i. ſac de ferine Vi la dame floter
Pas n'eſchapa je croi Dont ce fu grant domage
Si fiſt diſt l'abeeſſe La jus en ce rivage
La nous envoia Diex Flourence qui fu ſage
Ne ſe voult plus celer Tout bas en ſon langage
Loꝛs diſt a l'abeeſſe Souffrez vous .i. petit
Puis vint a ſon ami Qui ot ſi grant deſpit
Que parler ne povoit Sa main ſus ſon chief miſt
/Jhesucriſt pour Flourence Beles vertus y fiſt
Car la pointe du fer Du dolereuz quarrel
Que l'emperere ot fichié Pres du cervel
Sailli hoꝛs ſanz main metre Le miracle fu bel
Flourence fu moult lie Loꝛs geta jus ynel
Le cuevrechief de quoi Elle eſtoit atournee
L'emperere le vit errant L'a aviſee
Entre ſes bꝛas la pꝛiſt Eſtroit l'a acolee
Puis diſt a haute voiz J'ai Flourence trouvee
Pour qui j'ai tant ſouffert De dolour nuit et jour
Mon frere le m'embla Le murdꝛier traitour
Mais je m'en vengerai Par Dieu le creatour
Devant touz le ferai Moꝛir a deshonnour
Miex a deſervi moꝛt que nul autre murdꝛier
Flourence li requiſt Pour Dieu le dꝛoiturier
Que il li pardonnaſt Qu'aſſez ot d'encombꝛier
Mais onques l'emperere Ne le voult otroier
Ainz fiſt .i. grant feu faire En une praerie
Son frere et les .iiii. autres Furent ars a hachie
Le chaſtelain Tierry Retint de ſa partie
Et puis donna biau don A ceulz de l'abaie.
Puis n'oꝛent povreté a nul temps les nonnains
L'emperere de /Romme Et le franc chaſtelains
Enmenerent Flourence Eſtre povez certains
Que pour ſ'amour menerent Grant joie les Rommains
La feſte c'on li fiſt Dire ne poꝛroit hon
Puis ot .ii. enfans marles En petit de ſaiſon
Flourence ſouffri moult De paine ſanz raiſon
Mais ceulz qui mal li firent En oꝛent guerredon
Juſqu'a la fin mena Flourence ſainte vie
Moult de bonnes gens ſueffrent A grant toꝛt vilonnie
Mais Diex les venge puis Combien que il deſtrie
Prions Dieu qu'il nous veille Touz traire a ſa partie.