Clemens eſt .i. non debonnaire
Qui par dꝛoit a pitié doit traire
De li ſont li eſtatut venu
Mais je croi que cil ſont venu
Cil qui ſont aucun a cheval
A pié vont amont et aval
Cil qui les dignitez avoient
Oꝛendꝛoit li plus
S'en eſmoient
Leur eſtat tenir convendꝛa
Mais ne ſa dont ce leur vendra
Dont eſtat puiſſent maintenir
Leur deſpens ne poꝛront foꝛnir
Ne finer auſſi leurs eſcos
Si metront cotes et ſurcos
En gages pour l'eſcot paier
C'eſt ce qui les fait eſmaier
Cil qui ont pluiſeurs benefices
Par ce en ſeront mis
Hoꝛs des lices.
Dont perdu ont maint rigoler
Ne ſi hault ne poꝛront voler
Si nel doit tel eſtatut plaire
Et autre part par tel afaire
Preſtres clers qui ſe looient
Aus ſeunes quant il y venoient
Ne ſeront tant loe ne pꝛis
Si demoꝛront tous entrepꝛis
Et puis qu'auront perdu leurs chans
Il deuendꝛont bergiers des champs
A la charrue ſ'en iront
Preſtre et clerc mais il mauridont
Ceulz par cui auront tel office
Perdu auront le temps crois et calice
Puis que le temps aiſi ſ'adonne
Pluiſeurs muceront
Leur couronne
Beſoing leur ſera et meſtre
De commencier autre meſtre
Dont clerc ne ſ'apeleront mie
Car il leur ſeroit vilonnie
En couronne mener charrue
Povre quant iront par la rue
Li plus muceront leur toncure
C'il veulent de vivre avoir cure
Mais pꝛiuilegiez ſeront
Tuit cil qui tel meſtier feront
Ou ſoient clerc ou ſoient preſtre
Car poꝛ ce c'on les puis conneſtre
Tele grace leur habandone
Qu'il a a novilles couronne
Soient ſus les vilains de ville
Ou ſoient .c. ou ſoient mille
Il ſont tous reputez pour beſtes
Et poꝛront anoncier les feſtes
Deſſous l'oꝛme et ou cymetiere
Et poꝛter la crois et la biere
En une ſoꝛcaine blanche
Et l'yaue benoite au dimanche
Poꝛ ce eſt dolente tel clergié
De teulz eſtatus ſe gramie
Aus mendians religions
A cui l'en fait relacions
De lais de confeſſer d'aſſoudꝛe
De pain ſec loꝛ conuendꝛa moldꝛe
Sans plus au molin de leurs dens
Si ne ſeront plus reſidens
Mais iront aval et amont
Puis que povreté les ſemont
Il leur convendꝛa controuver
Se leur vivre veulent trouver
Puis qu'ainſi nous
Sont treſiete
En tel doleur et pouerte
Controuuer faudꝛa
Maintes lobes
Pou leurs viures
Et pour leurs robes
Dont par leurs mes biaus et ſouciex
Les gens trairont
A leurs autieus
Pour faire emplir leur tirelire
Ainſinc ira de pire en pire
Et tournera tout en deffit
Je ne ſai qui tant d'oꝛdꝛes fit.
D'une part avons les /croiſiez
Qui ſont goles et enuoiſiez
A piez reſont les guillemins
Et d'autre part les /matebins
Freres y a de /Trinité
Qui bien aimment charnalite
Encoꝛe y a /freres barrez
Qui ſont comme .ii. dez quarrez
Que l'en nomme /frere du carme
Et bien ont des fames
Sans charme.
Puis r'avona /freres des billetes
Oꝛ y a Dieu de ſes filletes
Qui /filles Dieu ſont apelees
Et quant veulent ſont mariees
El ſont bien filles Dieu nommees
Teles que Diex n'a endendꝛees
Bien ſceuent les hoſtiex
Aus moinnes.
Et auſſinc celes
Aus chanoines.
Par /paris font leurs crieries
Apꝛés viennent les repenties
Li bon enfant li /Jacobin
Qui meniuent maint gros lopin
Dont bien ſceuent leurs auantages
Et poꝛchachent les enterrages
Si font /ceulz de /saint auguſtin
Qui ſouvent en font
Maint huſtin
Avec ces /freres coꝛdeliers/
Et ceulz du val des eſcoliers
Apoſtres y a et hermites
Qui bien ſceuent
Trouuer leurs giſtes
Et ſont de /l'oꝛdꝛe /saint iehan
Hé /pape iehan en ceſt an
Deſaieuure le grain de la paille
Les mauuaiſes herbes retaille
Si que foy puiſt fructefier
L'en ne ſcet hui ou ſoy fier
Tant eſt grande hypocriſie
Que l'en ne ſcet ou l'en ſe fie
Car chaſcuns penſe de bouler
Poꝛ toutes ces gens ſaouler
Et que de leurs mains ne labeurent
Mais par le pais vont et queurent
En cherchant tous les quarrefours
Poꝛ ce qu'il n'ont molins
Ne fours.
Par le pays vont prechant
Dont maint poiſſon
Sont peechans
A grant eſcharde et groſſe teſte
Dont bien ſceuent oſter la reſte
Et la char a eulz retenir
Si com n'en le voit avenir
Sus ſainte egliſe nostre mere
Mette y bon conſeil ſaint pere
Encoꝛ ſe plaignent d'autre part
Les beguines que l'en depart
D'eux ſoient ces beguines
Li barre par dꝛoit leurs voiſines
Faites en auront tex meſchiez
Celes qui vendent cueurechiez
N'en vendꝛont tant comme ſoloient
Oꝛ convient que mains
Vendus ſoient.
Camelins poꝛ ces bones dames
Puis qu'il ſeront comme autres fames
Camelins ſeront a marchié
Mais oꝛ y a autre meſchie
Car burnete eſcarlate et vers
Fourrure de gris et de vers
Et de couleur la dꝛaperie
Nous en ſera plus enchierie
Si comperrons ceſte venue
Se n'en vient a deſcouuenue
Li /coꝛdelier li /pꝛecheur
Qui la eſtoient peſcheeur
Et mains autres religieus
Des quelz il faiſoient leur Diex
Et il en faoiſient deeſſes
Laiens chantoient
Il leurs meſſes
A oꝛgue a chant ja deſchant
Dont il aloient eſleecant
Maintes gens qui les eſcoutoient
De leurs vois ſeraines
Sambloient.
Oꝛ eſt ſous le banc loꝛ viole
S'autrement Diex ne les citole
Loꝛ oꝛdꝛe faudꝛa pou a pou
De la pꝛoiſſe ſont /saint pou.
L'apoſtre de non et de fait
Je ne ſai qui ce leur a fait
Mais il en ſont en grant toꝛment
Mais il ſ'en plaignent moult foꝛment
Veus en font as sains et a ſaintes
Et a /saint francois loꝛ
Complaintes
Et a /saint dominique enuoient
Moult leur prient qu'il les r'avoient
Et /saint bernart auſſi reclaimment
Car ſon oꝛdꝛe et ſes freres aimment
Et anſinc /ſainte bertine
Car c'eſt leur prochaine voiſine
/Nostre Dame du /carme aprés
Retiennent il ſouvent de pꝛez
Bon fiſt que miracle en feiſſent
Si que dedens les remeiſſent
En leur juſte poſſeſſion
Poꝛ ce ſont en affliction.
Joꝛ et nuit que Diex les ſequeirre
Car le ſecours moult
Leur demeure
Enuoie ont c'eſt verité
Au pape qu'il ait d'eulz pité
Et je croi ien que tant feront
Par les freres qu'il renterront
En leur ſaiſine primeraine
Car les freres y metent paine
Car ces requierent humblement
D'eſtatus au /pape climent
Iointes mains et a nus genoulz
Auſſi /ſaint pere ſommes nous
Qui vos clers et vostre gent ſommes
Du col nous oſtez ces
Grans ſommes
Le vostre non plain eſt de grace
Clergie ſupplie que li face
Et a ces gens que j'ai nommez
Puis que /gratiens vous nommez
Faites grace et miſericoꝛde
Il ſe rendent ou col la coꝛde
Tous a vous Mais
Qu'il puiſſent vivre
Pour Dieu en ce
Septieme livre
Que /le pape clement quint fiſt
Se vous veez qu'il ſoit profit
Metez y aucune atempꝛance
Gardez vos clerions de treu
Mal bꝛouet nous eſt eſmeü
Se vostre non ne vous viſite
Vous /ſire dont qui par eſlite.
Eſtes /saint pere et apoſtole
Ourdiſſiez nous une tel tele
Dont nous puiſſons eſtre veſtu
Clers ne pꝛiſe l'en .i. feſtu
Chaſcuns les moquer et deſpꝛiſe
Mais vous qui l'auctoꝛite pꝛiſe
Sus tous avez faite tel choſe
Que ſainte egliſe en pais repoſe
Au beſoing pas ne li failliez
Ne la trenchiez ne retailliez
Car elle eſt ſi foible et ſi tendꝛe
Qu'au joꝛ d'ieu ne ſe puet deffendꝛe
Des g[ra]s lous qui entoꝛ li courent
Que li et tous ſes biens devourent
Sainte egliſe et treſtout le monde
Mais tuit penſent qu'en la confonde
Auſi chaſcuns com fol tondu
Penſe a ſoy qu'il ſoit confondu
Et de ſoy meiſme deſtruire
Poꝛ ce /ſire veilliez eſtruire
Oꝛden a ce tele et tel fait
Que puiſt oſter ce qu'eſt mal fait
Et tout tourner a bone voie
Faites /ſire que l'en le voie
Briement mon dit
Vous fine a tant
Car moult ennui qui a tant
Poꝛ tous ceſte requeſte di
Qui fi faite a .i. vendꝛedi
Tiers joꝛ en l'aing
Si con moi ſamble
Mil . iijc . [.]xviii. enſamble