Pour recoꝛdeꝛ un dit Sui ci endꝛoit venus
Dieu gart touz ceulz et celles dont ſeray entendus
D'un roy vous weil parleꝛ Par qui fu maintenus
Le pais d'Engleterre Oꝛ eſt ſ'ame laſſus
En la joie des cieus Ou tous pourrons aleꝛ
Se faiſon com le roy Dont je vous weil parleꝛ
L'eſcripture teſmoingne Que qui veult hault monteꝛ
Il ne doit pas grans fais Deſus ſon col poꝛteꝛ
Et c'eſt eſcript c'un riche qui ne veult dire rien
N'enterroit en la gloire Ou Dieu maint et li ſien
Nient plus que un chameul Ne paſſeroit pour rien
Par le cul d'une aguille Mes oꝛ entendez bien
Pas ne devons entendꝛe que roys dus ne marchis
Ou autre gent qui ſont De richeſce garnis
Ne puisſent auſſi bien Entrer en paradis
Comme les povres gens Qui ſont touz deſſaiſſis
Pour tant ſans plus qu'il veulent oꝛdeneꝛ par raiſon
Des biens dont il ſe voient En la poſſeſſion
Par Saint Loys de France Prouveꝛ le vous poon
Et par le roy englois De qui parleꝛ voulon
Bien eſt voir que les riches Sont temptés plus foꝛment
De la char et du monde Que ceus qui n'ont nient
Mes quant un chanpion Se combat bien ſouvent
Et tourjours a victoire Plus grant louieꝛ a tant
Se les riches donnent achoiſon de pechieꝛ.
Et les gens qui ſont riches S'en ſevent bien gaitieꝛ
Tant doivent il avoir De Dieu plus grant louier
Les povres deſpit ſont Du ciel heritieꝛ
Le philoſophie diſt C'eſt eſcript en maint lieus
Que la choſe que l'onme Et la famme ainme miex
De ſon cueꝛ feꝛmement C'eſt droitement ces Diex
Oꝛ voions ſ'il eſt gueres De celles ou de cieus
Qui metent leur cuers plus En amaſſeꝛ avoir
Qu'a ſervir Jheſucriſt Pour paradis avoir
Oil dont c'eſt donmage Mes bien fiſt ſon devoir
Le roy de qui la vie Vous weil ramentevoir
Il fu roy d'Engleterre Et duc de Noꝛmendie
Et d'aſſez d'autres lieus Avoit la ſeigneurie
Mes il metoit ſon cuer Et toute ſ'eſtudie
A ſeꝛvir Jheſucriſt Et la Vieꝛge Marie
En pais maintint ſa terre Partout eſtoit amés
Pas n'eſtoient les povres En ſa court de bontés
Une pucelle pꝛiſt le roy Dont vous oꝛrés
Qui de bon cuer l'ama Entendre le pourrés
Elle ot non Gracienne Si comme il m'eſt avis
Qu'elle eſtoit gracieuſſe Et en fais et en dis
Son ſeingneur ſi ſervoit Le Roy de paradis
Auſſi feſſoit la dame Tout ſon cuer i ot mis
Le roy et la royne ſainte vie menoient
Les povres membres Dieu Parfaitement amoient
Lonctemps furent enſemble Mes tel uſage avoient
Que treſtoutes les nuis A matines aloient
Paiſſiblement veſquirent Mes que tant i avoit
Que la douce royne Nul enfant ne poꝛtoit
Li commun d'Engleterre Foꝛment en murmuroit
Et diſſoient ainſi Com les départiroit
Quant le roy l'oÿ dire S'en fu foꝛment dolent
Et jura devant tous Qu'il n'en feroit noient
Et que ja de la dame Qu'il amoit loialment
Ne ſe départiroit Juſques a ſon finement
Adont par Engleterre commenca li deſcoꝛs
Pour ce que la royne N'ot enfant de ſon coꝛps
Mes par le pleſſir Dieu Qui eſt miſericoꝛs
Devint la dame enſainte On fiſt grant joie loꝛs
Mes ſachiez celle joie N'ot gueres de duree
Que la gent d'Engleterre Fu puis moult tourmentee
Vous oꝛrés par quel cauſe S'il vous pleſt et agree
Nule plus grant meꝛveille Ne fu pieca comptee
Douce gent entendez Pour l'amour Dieu meꝛci
Le bon roy d'Engleterre Guillaume dont je di
A matines aloit Tant qu'il avint ainſi
Que la gentil Royne Foꝛment apeſanti
Le roy percut moult bien Qu'eſtoit apeſantie
Quant matines ſonnerent Il li diſt douce amie
Je m'en vois a l'egliſſe Mes pour Dieu je vous pꝛie
Que vous n'i veniés pas Quar ce ſeroit folie
Quar ſachiez de ceꝛtain Se voſtre fruit perdoie
Et Dieus ne me gardoit Hoꝛs de mon ſens yſtroie
La dame reſpondi Chier ſire je l'oſtroie
Car voſtre voulenté Si doit eſtre la moie
Adonques li bons roys a matines ala
Et la dame courtoiſe En ſon lit demoura
Mes ne ſe doꝛmoit pas Tout adés Dieu pꝛoia
Tant que ſon chieꝛ ſeigneur Arriere ſ'en tourna
Au revenir li fiſt La roine moult grant chiere
L'autre nuit voult ouvreꝛ Le roy en tel manieꝛe
Mes avant matines Parmi une verrieꝛe
Entra dedens la chambꝛe Meꝛveilleuſſe lumieꝛe
Avec celle clarté deſcendi une vois
Qui diſt au roy Guillaume Moult es lié quant tu vois
Que ta fame eſt enſainte Mes ce ne vault un pois
Que ſoiez touz ceꝛtains Ains que paſſe le mois
Peꝛdꝛas coꝛs et ame La famme et les enfans
Se n'obeïs a Dieu Le pere tout puiſſant
Il te mande par moy Et je le te commans
Que voiſſes en eſſil Juſqu'a .xxiiii. ans
Si ne te fai connoiſtre Pour meſchief ne pour paine
A nulle creature ne franche Ne villainne
Bon fait laiſſieꝛ l'onneur Du monde qui eſt vainne
Pour conqueſter la joie De ciex qui tant eſt ſaine
Sueſfre tout en bon gré El non de Jhesucriſt
Loꝛs ſ'en parti la vois Tantoſt qu'elle ot ce dit
Et le roy ſe veſti E chauſſa ſans reſpit
Son meſtre conffeſeur En l'eure mandeꝛ fiſt
En alant a matines Li conta et gehi
Le parleꝛ de la vois Que vous avez oÿ
Et ſi conme en la chambꝛe La clarté ſ'embati
Le pꝛeſtre qui fu ſage Tantoſt li reſpondi
Mon ſeingneur je me dout par la Vieꝛge Marie
Que celle vois ne veingne Par art de diablie
Mes pour ce ne larrés Vo terre desgarnie
Car en l'onneur de Dieu Vous conſeille et depꝛie
Se riens avez tolu a homme ni a famme
Ne vous ne voſtre pere Dont Dieus aſoille l'ame
Que vous le faſſiez rendꝛe Cil qui fu ſans diſfame
Li diſt je le weil bien Foy que doy Noſtre Dame
Il fiſt par Engleterre Crieꝛ tout d'un acoꝛt
Que ceus a qui ſon pere Ne lui oꝛent fait toꝛt
Veniſſent veꝛs la court Et tantost ſans reſoꝛt
On le reſtabliroit Et au foible et au foꝛt
Loꝛs vint a court du pueple et aſſez et largement
A ceulz qui mouſtroient Leur cauſe iuſtement
Rendoit on par meſure Le leur bien lëalment
Loꝛs pour le roy Guillaume Pꝛioient toute gent[iment]
Le roy en tel tempoire Donna moult de biaus dons
Aus povres abaies Et aus religions
Mes le dous Jheſucriſt Qui eſſaie les bons
Li renvoia la vois Si comme nous liſſons
Droitement a celle heure Qu'il vint a l'autre fois
Mes la clarté ſe miſt Dedens la chambꝛe ancois
Hautement a parlé Et diſt Guillaume roys
Voir il te meſcherra Briément ce ne mécrois
Dieu veult qu'en eſſil voiſſes Fous es quant tu n'i vas
Je m'en revois arrieꝛe Fai ce que tu voudꝛas
Adont le roy englois Se leva ens eſpas
A ſon comfeſſour vint C'om apelloit Thommas
Et li diſt en quel guiſſe La vois fu revenue
Trop foꝛment me menace Se je ne me remue
Quant ſon comfeſſour Ot la parole entendue
Il li a diſt chier ſire C'eſt bien choſe ſeue
Que l'eſcripture dit C'om doit pour Dieu laiſſieꝛ
Muebles et heritages Et enfans et mouillieꝛ
Pour comqueſteꝛ la joie Que nulz ne puet pꝛiſſieꝛ
Mes franc roy debonnaire Un ſeul don vous requieꝛ
Pour ce ſe je ne ſai Se c'eſt fantoſme ou non
Qu'ains que vous départez De voſtre région
Atendez que la vois Revaingne c'eſt raiſon
Se la tieꝛce vois vient Ce me ſemblera bon
Qu'aliſſiez en eſſil Puis que Diex le vous mande
Chaſcun de nous doit faire Tout ce qu'il nous commande
Le roy engloys qui ot en Dieu Amour tres grande
Apꝛés matines fiſt A Dieu une demande
Que cil li vient en gré Qu'il en pꝛaingne la voie
Pour aleꝛ en eſſil Que la vois li renvoie
Et tantoſt il ira Voulentieꝛs et de joie
Loꝛs ſ'en vint en la chambꝛe La dame trouva coie
Endoꝛmé c'eſtoit Au point de la journee
Le roy fu toute jour Et moult tres grant penſee
Moult donna de biaus dons Ainz que fuſt la veſpꝛé[e]
Au ſoir ſ'ala couchier Ovecques ſ'eſpouſſee
Mes onques n'i penſeꝛent A nul charnel délis
Un petit apꝛés ce Qu'il furent endoꝛmis
Revint le meſagieꝛ Au roy de paradis
Qui apella le roy En diſſant fous nais
Va t'en hoꝛs d'Engleterre En eſſil il le faut
Et ne nommés ton non Ne en bas ne en haut
Jusqu'a .xxiiii. ans Fain et ſoif froit et chaut
Avras et grans meſchief Mais Dieus qui ſur tous vaut
Le te rendꝛa moult bien Loꝛs la vois ſ'en parti
Et le roy d'Angleterre Requiſt a Dieu merci
De ſon lit iſſi hoꝛs En l'eure ſe veſti
De la plus ſimple robe Qu'en la chambꝛe trouva
D'oꝛ ne d'argent n'ot cure Guillaume le bon roys
Il ne ſaint que ſ'eſpee Mes ains beſſa la crois
Bien cuida que la dame Doꝛmiſt a celle fois
Bas diſt en ſoupirant Douce ſueꝛ je m'en vois
Douce ami loiale Jamés ne vous verré
Ne le fruit que j'avoie Dedens vous engendꝛé
La royne l'oui moult Ot le cueꝛ ſerré
Semblant fet que ſ'eſveille Si li a demandé
Quel part vouloit aleꝛ Et le roy li reſpont
Dame a matines vois Car par temps ſonneront
Hé; roy diſt la roine Vos amours fauſſes ſont
Mes les moies ſont vraies Jamés ne fauſeront
Adonques la roine Aus piez du roy chai
Et li a dit chieꝛ ſire Pour Dieu qui ne menti
J'ai bien la vois oïe Qui par .iii. fois vint ci
Vous me voulez laiſſieꝛ Mes pas n'ira ainſi
Car je ne vous lairai Tant com je ſoie en vie
Vous alez en eſſil Mes ſans moi n'irés mie
Quant le roy l'entandi Si li diſt douce ami
Pour Dieu parlés Plus bas que ne ſoiez oïe
Car voir ſe les gens ſevent Que je m'en doie aleꝛ
Pour rien ne me pourroie De leur mains eſchapeꝛ
La dame diſt franc roi Trop avez fol penſeꝛ
Ne pourroie ſans vous En vie demoureꝛ
Nous .ii. avons enſemble Moult eües d'amours
Pour ce doi ge o vous Endurer les doulours
Le roy englois qui plains Eſtoit de bonnes meurs
Baiſſa loꝛs la roine En leꝛmes et en pleurs
Puis li diſt douce ſueꝛ Se je vous enmenoie
Le fruit de voſtre coꝛps Et vous meiſmes perdroie
Elle li reſpondi et ſe je demouroie
Je ſuis toute ceꝛtaine Que de duel m'ocirroie
Loꝛs li diſt le roy Dame ſoit a vostre pleſſir
Mes l'ui de noſtre chambꝛe N'oſſerions ouvrir
Parmi ceſte feneſtre Nous convandꝛa iſſir
Afin c'om ne nous puiſſe Aviſſeꝛ ne choiſſir
Le roy par la feneſtre Premieꝛ ſe devala
Puis recut la roine Que de bon cueꝛ ama
Par mi un lonc jardin Par la main la mena
Tant c'unne fauſſe poꝛte Qu'il ſavoit bien trouva
Par la iſſirent hoꝛs A Dieu ſe commandeꝛent
En une grant foꝛeſt Ainz qu'il fuſt jour entrerent
Car d'encontre de gens Moult foꝛment ſe doutoient
Mes quant les chambellens Au matin ſe leverent
Et la chambꝛe virent Qui fu bien cloſe
Li un a diſt a l'autre Monſeigneur ſe repoſſe
Quant le ſoulail fu haut Chaſcun diſt et pꝛopoſſe
Que le roy eſt malades Mes c'eſtoit autre choſe
L'uis cuidierent ouvrir Mes clos eſtoit foꝛment
A foꝛce l'ont ouveꝛt Sans nul delaiement
Quant ni truevent nului Si font grant meꝛrement
Loꝛs quiſtrent tout partout Mes ne valut noient
Quant on ne pot trouveꝛ Le roy ne la roine
Les varles de meſtieꝛ Et garcons de cuiſſine
Rompirent les grans coffres Plains de monnoie fine
Parmi l'oſtel le roy Et des biens deſcipline
Un eſquieꝛ vint Qui moult ot le cueꝛ gent
Le coꝛ le Roy trouva Puis le guarda grantment
Bon louieꝛ en ot puis Vous oꝛrez bien comment
Mes du roy weil parleꝛ Qui cheminoit foꝛment
La roine les lui Que il amoit foꝛment
Si avant ſ'enbatirent Dedens le bois plenieꝛ
Qu'il ne trouvoient mes Ne voie ne ſantieꝛ
Moult ſouſfrirent de paine Bien l'oꝛrés pꝛononcieꝛ
On les queroit partout foꝛs que la ou eſtoient
Des pometes ſauvages Qu'an la foꝛeſt trouvoient
Et des nois et des meures Qu'en la foꝛeſt trouvoient
De treſtous leur meſchiés Jhesucriſt aouroient
Vestus es crues des arb[r]es Les convenoit geſſir
Le bon roy d'Engleteꝛre Priſt foꝛment a neꝛcir
Et a eſmegrieꝛ Mes Dieus par ſon pleſir
Vout adés la roine En ſa biauté tenir
Un mois furent ainſi en la foꝛeſt ramee
La robe le roy fu Moult foꝛment deſciree
De la foꝛeſt iſſirent Par une matinee
Une roche aviſſeꝛent Qui eſtoit grant et lee
Tout ainſi comme il durent De la roche apꝛochieꝛ
La dame pꝛiſt griément Denfant a traveillieꝛ
Doucement commanca Jheſucriſt a huchieꝛ
Et les ſains et les ſaintes Qu'il li veullent aidieꝛ
Un anel qu'elle avoit Oſta d'entour ſon doy
En ſoupirant foꝛment En apella le roy
Plus li a dit gardes Ceſt anel de par moi
Et iſſi reſpondi Voulentieꝛs par ma foi
Le roi recut l'anel Par la main de ſ'amie
Il le garda lonc temps Ains qu'en fuſt reſaiſſie
Car mauveſſe gent firent D'eus .ii. la departie
Pour l'amour de Dieu Oꝛent grant planté de hachie
Le roy diſt a la dame Voir trop ſui courouciez
Que ne puis trouveꝛ fame Dont vo coꝛps ſoit aidiez
Elle diſt mon ſeingneur Oꝛ ne vous eſmaiés
Alons a celle roche Sans eſtre delaiez
Le roy fiſt tant c'u crues De la roche ſe mirent
Les griés maus d'enfanteꝛ Loꝛs a la dame pꝛiſtrent
Dieu et ſa douce Mere Si grant grace li firent
Que .ii. biaus enfans malles De la dame naquirent
Le bon roy d'Engleterre Qui ot la dame chieꝛe
Servi celle journee D'ofice de ventriere
Ce qu'elle commandoit Feſſoit a bonne chiere
Car a ſon grant beſoing N'ot autre chamberieꝛe
L'un des pans de ſa cote le roi tantoſt coupa
Le pꝛemier des enfans Dedens en velopa
Par decoſte la mere Doucement le coucha
Puis tailla l'autre pan Car autre dꝛapiau n'a
Le ſecont fils i miſt Doucement l'aplanie
La royne qui ot moult Souſfeꝛt de hachie
Ou geron ſon ſeingneur S'eſt un pou endoꝛmie
Quant elle ſ'eſveilla A haute vois ſ'eſcrie
Hé; tres dous roi de gloire je m'eſrage de fain
Mourir me convandꝛa Se bꝛiement n'ai du pain
Le roi requiſt de cueꝛ le pere ſouverain
Loꝛs la dame li diſt Sire ſoies ceꝛtain
Que l'un de mes enfans Mengier me covendꝛa
Se je n'ai char ou pain Loꝛs le roy ſouſpira
Il a traite ſ'eſpee Sa chauſce desfeꝛma
Et diſt que de ſa cuiſſe A la dame donra
Le bon roy d'Angleterre qui moult eſtoit pꝛeudon
Vout coupeꝛ de ſa cuiſſe Tout le meſtre bꝛeon
Pour donne[r] ala dame Qu'il amoit de cueꝛ bon
Mes la dame li diſt Pour Dieu chier ſire non
Par le poing le ſaiſſe Puis diſt j'eſtrai du ſens
Se je vous voi couper Ja ſe Dieu pleſt mes dens
N'uſſeꝛont voſtre char Le roi qui fu dolens
Reſpondi douce ſuer Ne puis trouveꝛ pourpens
Par quel point voſtre fain puiſt eſtre rapaiſſie
Trop miex vaut que mengiez De ma char grant partie
Que ceſt petit enfant Ni a moꝛt deſeꝛvie
A ce mot la roine Moult tendꝛement leꝛmie
De la pitié qu'elle ot fi ſa fain treſalee
Adonques diſt au roy S'il vous pleſt et agree
Alés querre du pain Toute ſui treſpaſſee
Voir j'atendꝛai moult bien La voſtre retoꝛnee
Adonques li bons rois Iſſi hoꝛs du rochieꝛ
Pour aleꝛ du pain querre A ſa franche mouillier
Mes le jour li avint Si moꝛtel encombrier
Qu'ains fu .xxiiii. ans Qu'il la veïſt mengieꝛ
Ainſi com vous oꝛrés S'il eſt qui le vous die
Nulle plus grant pitié Ne fu pieca ouye
Le roy chemina tant Qu'il vit une navie
Ou ot de marchéans Une grant compaingnie
Quant le roy vint pꝛés d'eus Moult doucement leur pꝛie
Seingneurs pour l'amour Du tres dous Jheſucriſt
Donnés moi de vos pain S'il vous pleſt un petit
Loꝛs un mauvés glouton S'eſcria par deſpit
Biau ſeingneurs regardez Pour Dieu com fait truant
Trop eſt foꝛt et delivre Et va ſon pain quérant
Trop envis li donroie Je li toudroie avant
Un autre reſpondi Qui eſtoit plus ſachant
Sire que ſavez vous S'il ſet point de meſtieꝛ
Eſpoir qui ne fiſt onques Foꝛs que lui pourchacieꝛ
Et c'eſt des povres gens Et avant et arrieꝛ
Qui ne puent trouveꝛ Leur pain a gaaingnieꝛ
Ceus ſont fous qui meſdient De la menue gent
Le bon roy d'Engleterre Parla moult doucement
Sire foy que doi Dieu Je n'ai pain ne argent
Pour Dieu vous en requier S'en avés aiſſement
Voir onques tel meſtier N'en oÿ jour de ma vie
Loꝛs un mauvés glouton A haute vois c'eſcrie
Ceꝛtes n'as pas ta lengue Pour ton eſcot laiſſie
Les bꝛibes qu'as mengiés Ne comteꝛoie mie
Le roy qui ot grant duel Doucement reſpondi
Seingneurs puis qu'il vous Pleſt bien weil qu'il ſoit ainſi
Mes pour l'amoꝛ de Dieu Aiez de nous meꝛci
Ou ma fame moꝛra Lëaument le vous di
Car de deus enfans c'eſt En l'eure delivree
En un crués d'une roche La giſt toute afanmee
L'un des marchéans diſt Voir belle la trouvee
Par ce point cuide avoir L'aumoſne recouvree
Le meſtre de la nef A dit oꝛ entendon
Par foy ſavoir voudꝛai Se il dit voir ou non
Alons ovecques lui Se menteur le trouvon
Je los qu'il ſoit batus A retour marion
Aſſez des plus hardis Qui grans et foꝛs eſtoient
Treſtous ont pꝛis baſtons Et bien ſ'aatiſſoient
Se le truant mentoit Que treſtant le batroient
Que juſques a un an Les coſtes li deudꝛoient
Le bon roy d'Engleterre Mena les marchéans
Droitement a la roche Ou ot laiſſié geſans
La dame debonnaire Et ces petis enfans
Il leur a dit ſeingneur Je ne ſui pas mentans
Vés ici ma famme Et mes enfans petis
Quant les marchéans la virent Touz furent eſbahis
Pour la biauté la dame Seingna chaſcun ſon vis
L'un d'eus qui eſtoit plains Des ars aus anemis
Diſt au roy faus truant on vous devroit bien pendꝛe
Quant avec vous giſt fame Si douce et ſi tandꝛe
Voir nous l'enpoꝛteꝛon En no nef ſans atendꝛe
Quant le roi l'entendi S'eſpee courut pꝛendꝛe
Mes gloutons a foꝛce De ces poins li oſteꝛent
Loꝛs par grant mautalent A terre le geterent
Les .iiii. entre leur bꝛas La roine enpoꝛteent
Les autres de batons Maint coup le roi fraperent
Et puis ſi li crieꝛent Hautement non pas bas
La dame enpoꝛteron Jamés ne la veꝛras
Les batars te lairons Par les mouſtieꝛs iras
On te donra aſſés Tant com tu les avras
La dame ſ'eſcria Pour Dieu ſoiez nous dous
Je vous jure ſur ſains Que c'eſt mon dꝛois eſpous
Les gloutons diſtrent fole Et pourquoi mentez vous
Loꝛs ſe paſma de duel La dame devant tous
En tant comme les .iiii. La roine empoꝛtoient
Les autres contre terre Le roi englois tenoient
Mes le meſtre leur diſt Que grant pechié feſſoient
Quant ainſi ſans raiſon Le povre homme batoient
Il pꝛiſt une bourcete Qui fu de rouge ſoie
.V. floꝛins miſt dedens Au roy diſt je te pꝛoie
Que plus ne te combates La foꝛce n'eſt pas toie
Ceſte bourcet[e] avras Lonctemps a eſté moie
S'on te fait desraiſon Voir Dieu t'en vengeꝛa
La bource o [.]v. floꝛins Tout dꝛoit au roy geta
Mes a une bꝛanchete D'un arbꝛe demoura
Le roy la vit moult bien Mes il n'i a de ſa
Adont les marchéans Dedens leur nef entrerent
Tout le plus toſt qu'il poꝛent De terre ſ'eslonguieꝛe[nt]
Mes maugré leur ſeingneur La roine enpoꝛterent
Les petis enfans A leur peꝛe laiſſierent
Le roy vit que ſa foꝛce Ni valoit .ii. eſpis
Veꝛs la roche revint A ces enfans petis
Devoſtement requiſt Au roi de paradis
Qu'il li donnaſt conſeil Quel part ſeꝛoit veꝛtis
Le roy qui ot aucueꝛ Douleur peſant et ſure
Vit un batel tout vuit Loꝛs diſt et ſa ſeure
Que lui et ces enfans Metra en aventure
U batel enterra Oꝛ en pꝛeingne Dieu cure
Un des enfans a pꝛis Ou batel le poꝛta
L'autre revenoit querre Devant lui regarda
Un leu grant et hydeus Qui ſaiſſi l'avoit ja
Le roy courut apꝛés Ataindꝛe le cuida
Le roy apꝛés le leu Courut lieue et demie
Mes ce ne li valut La monté d'unne alie
Il fu ſi travailliez Et ot tant de hachie
Je croi qu'il n'est nus hons Qui le recoꝛdaſt mie
Le bon roy d'Engleterre Si fu foꝛment laſſés
De courre apꝛés le leu Tant qu'il chai paſmés
Moult longuement i jut Pour Dieu oꝛ entendés
Que l'enfancon devint Qui du leu fu poꝛtés
Le leu qui l'enpoꝛtoit Fu de marchéans choiſis
Qui ſus la meꝛ erroient Chaſcun d'eus a atis
Priſtrent foꝛt a hueꝛ Le leu fu eſbahis
Si qu'il laiſſa l'enfant El milieu du larris
Les marchéans i coururent Quant ſain virent l'enfant
De bon cueꝛ en louerent Le dous pere puiſſant
L'un d'eus a dit aus autres Seingneurs je vous demant
Que ceſt enfant ſoit mien Et je vous acrëant
Que bien ſera nourri Se Jheſucriſt me gart
Chaſcun des autres diſt Je vous en quit ma part
Loꝛs le pꝛiſt le pꝛeudomme Et jura Saint Liénart
Qu'il le feꝛa riche homme Sa toꝛt de lui ne part
L'un des enfans le roy Ot un pere nouvel
Oꝛ vous dirons de l'autre Qui eſtoit ou batel
Si foꝛt pꝛiſt a crieꝛ Quoi fu ſon apel
De pluſſeurs marchéans Qui furent un tropel
De tourneꝛ celle part Ne furent pas laſnieꝛ
Loꝛs un pꝛeudomme Priſt l'enfant a convoitieꝛ
Voiſin eſtoit a l'autre Qui ot pꝛins le pꝛemieꝛ
Chaſcun li otroia De bon cueꝛ et d'entieꝛ
Les .ii. marchéans Qui oꝛent les .ii. enfans trovez
Toſt et delivreement Entreꝛent en leur nés
Tout le plus toſt qu'il poꝛent Quant furent as hoſtiex
Penſerent qu'as enfans Fuſt bauteſme donnés
Celui ot non Louvet Qui au leu fu tolus
Marin ot non li autres Qui ſour mer trouvé fu
Douce gent entendez Pour le dous roy Jheſu
De leur pere diron Qui ot grant duel eü
Longuement jut paſmés Mes quant ſe releva
Du leu ne de l'enfant Nule riens veü n'a
Bien cuide qu'il ſoit moꝛt Adonques ſ'apenſa
Qu'il ſ'en iroit a l'autre Que u batel laiſſa
Le roy vint celle part Mes ne le trouva mie
Loꝛs li doubla ſon duel Quant ſa peꝛte a choiſſie
Foꝛment pꝛiſt apleureꝛ Et diſt Vieꝛge Marie
Oꝛ ai je tout peꝛdu Loꝛs vint celle partie
Ou la bource au marchéant Fu pendant demouree
Qui fu de rouge ſoie Meimement ouvree
Cinc floꝛins ot dedens Le roi a haut levee
Sa main qu'il la vout Prendꝛe mes il fu fols et bee
Que li dous Jheſucriſt Fiſt une aigle deſcendꝛe
Qui au bec et aus ongles Ala la bource pꝛendꝛe
Il cuida ce fuſt char Loꝛs le roy ſans atendꝛe
Fu ſi foꝛt eſbahis ne ce ſot Desquiex rendꝛe
Le bon roi d'Engleterre Qui fu plain de franchiſe
Vit que l'aigle volent Ot la bource pꝛiſſe
Il ſe miſt a genous Puis a diſt en tel guiſſe
Tres dous Dieus gardé Moy de male convoitiſe
J'ai aujourd'ui peꝛdu Ma fame et mes enfans
Je fui bien fols Et parfait meſchëans
Quan[t] j'amenai la dame Je ſui d'entre deus bans
Cheus jus a la terre Tres dous peres puiſſant
Si voir com vous feiſtes Le pꝛeudomme tempteꝛ
Que l'en apelle Job Par l'anemi d'enfeꝛ
Vueilliez moi pacience Si parfaite donner
Que mauvés ne me puiſt Faire deseſpérer
Bien croi que le meſchief Que j'ai m'eſt avenu
Pour la cauſe de ce Que j'ai trop atendu
A aleꝛ en eſſil puis Qu'a m'onneſté fu
Dous roi de paradis Chieꝛ le m'avez vendu
J' en ai perdu ma fame Et mes enfans petis
Dieus weille d'Engleterre Maintenir le pais
Le pueple eſt pour moi Trop foꝛment eſbahis
Pa foy c'eſt grant Meꝛveille que je demeure vis
Quant la dame ai Perdue et toute ſa poꝛtee
J'ai poy eü de joie De ma laſſe engendꝛee
N'a pas plus dolent homme Juſques a la meꝛ Betee
Qu'eſt mon chetif de coꝛs Douce Vieꝛge honnoꝛee
Veilliez moi confoꝛteꝛ grant amoſne ferés
Dieus m'avoit les enfans Et la dame donnés
Se tolu le mes a Il en ſoit aourés
Adoncques c'eſt le roi Veꝛs la terre enclinés
Un petit ſ'endoꝛmi Et Dieu qui moult l'ama
Li tramiſt une vois Qui bien li aſfeꝛma
Qu'ancoꝛe ces enfans Et ſa fame ravra
Mais ancois maint Meſchief endureꝛ li faudꝛa
Loꝛs ſ'eſveilla le roi La vois ſ'en eſt partie
Un poy ſe confoꝛta Pour tant qu'il ot oïe
Veꝛs la meꝛ regarda Et vit grant compaignie
De marchéans qui Dignoient en une pꝛaieꝛie
Vers eulz vint quar du pain Voult pour Dieu demandeꝛ
Quant les marchéans Le virent haut priſtrent a crieꝛ
A leurs garcons qu'alaſſent Cel grant ribaut frapeꝛ
Loꝛs ala chaſcun d'eus .I. grant baſton hapeꝛ
Quant le roy vit la gen De mal faire entrodite
Les talons leur mouſtra Et ſe miſt en la fuite
En la foꝛeſt entra Par cel point fu il quites
Pour paradis avoir Endura longue luite
Tant erra par le bois Qu'il vit un hermitage
Ou un hermit[e] avoit Jadis fet ſon menage
Mes treſpaſſés eſtoit Le lieu ert mout ſauvage
Au bon roy d'Engleterre Vint adont en courage
Qu'il ne ſ'enpartiroit Jamés jour de ſa vie
S'aucune autre nouvelle N'avoit de Dieu ouie
Hui mes eſt bien raiſon Que de la dame die
Qui eſtoit en la meꝛ Ou foꝛment bꝛait et crie
Pour ces petis enfans Dont on l'ot deſſevree
Et pour ſon bon ſeigneur Qu'amoit plus que rien nee
Noblement fu ſeꝛvie Tant que fu relevee
.II. fames la gardoient Mes point ne li agree
La nef ou elle eſtoit Vint au poꝛt d'un chaſtel
Le ſire du chal ot .i. uſage tel
Que quant nés i venoient Il n'i avoiet jouel
Dont il ne poinſt pꝛendꝛe A ſon chois le plus bel
Les marchéans avoient Entr'eus comtemps meü
Pour l'amour la royne Qui belle et douce fu
Mes le ſeingneur vint la Pour querre ſon treü
Bien a des marchéans Tout l'eſtrif entendu
Hautement leur a dit Ne vous combatez pas
La dame ſera moie Pour qui muet li debas
Tout l'autre avoir vous quit Car par Saint Nicolas
Je croi qu'el n'eſt pas nee De lingnage moult bas
Ainſi fu la royne Aus marchéans oſtee
Le ſeingneur du chaſtel L'a tentoſt pꝛeſantee
A une bonne dame Qu'il avoit eſpouſſee
Mes ne demoura pas Je croi plus d'une annee
Que ſa fame mourut Le ſeingneur fu dolent
Qu'il avoient veſcu Enſemble longuement
Le chevalier fu vieil et ancient foꝛment
Mes il avoit eſté Moult pꝛeus en son jouvent
Par vigeur ot ſa teꝛre En ſ'anfance conquiſſe
Un poi apꝛés com ot Sa fame en terre miſſe
Il diſt a la roine Qu'il veoit bien apꝛiſſe
Ma ſueꝛ vous ſavez bien En quel lieu vous ai pꝛiſſe
Voir je ne ſai dont eſtes Ne de quel parenté
Mes je vous voi tant plaine De ſans et de bonté
Que je vous feꝛai dame De ma grant herité
Eſpouſeꝛ vous voudꝛai Dedens un mois paſſé
Quant la douce roine Le parleꝛ entendi
Du bois li mambꝛa Ou laiſſa ſon mari
Le bon roy d'Engleterre Son tres loial ami
Et ces petis enfans Tout bas diſt Dieu meꝛci
Je ne ſai que reſpondꝛe Voir miex mourir voudꝛoie
Que la char de ceſt homme Atouchaſt a la moie
Loꝛs diſt la roine Sire pas ne ſeꝛoie
Digne a vous deſchaucieꝛ Voulentieꝛs vous diroie
Mon eſtat en ſecré Et ma dolente vie
Loꝛs de moi eſpouſeꝛ Ne vous pꝛendꝛoit en vie
Je fui jadis nonnain D'unne bonne abaie
Mes je m'en iſſi hoꝛs Par ma merencolie
Plus erré comme fole Lonctemps par le pais
Ne veoie mon coꝛps A grans ni a petis
Celui qui ot ſon cuer En la roine mis
Li reſpondi ma ſuer Ce ne vaut .ii. eſpis
Ne me chaut qu'aiez fait Mes que d'oꝛe en avant
Me weilliez eſtre bonne N'en alez plus parlent
Loꝛs ſa la la roine D'autre engin a penſant
Au chevalier a dit Sire je vous crëant
Se je vous refuſoie ſe ceroit grant deſpit
Mes ne vous ne d'autre Homme ne puis avoir délit
Deſiques a un an .I. prodons le me fiſt
Chargieꝛ en penitance El non de Jheſucriſt
Que .iii. me rendꝛoie D'avec homme hanteꝛ
.II. ans m'en ſui tenue Oꝛ faut le tieꝛs paſſeꝛ
Adont me pourres vous S'il vous pleſt eſpouſeꝛ
Le ſire diſt m'amie Ne vous en faut doubteꝛ
Je vous eſpouſerai pour ce ne lerai mie
Mes ja n'avrai veꝛs vous Charnele compaingnie
Juſqu'a tant que l'anee Sera toute acomplie
La dame l'oſtroia Mes el n'en fu pas lie
Adont fiſt le chevalieꝛ tous ces hommes mandeꝛ
La roine eſpouſa Moult la voult honnoꝛeꝛ
Mes ains qu'il l'en leſſaſt Nul des ſeingneurs aleꝛ
Il leur fiſt a treſtout Deſus les ſains jurer
Que ſil mouroit avant Que la dame eſchenie
Qu'elle tenroit la terre Quite toute ſa vie
Mes onques le ſeingneur Ne jut avecques ſ'amie
Que ains que l'an fuſt paſſé Mourut par maladie
La terre demoura A la royne ſage
Moult voulentieꝛs li firent Grans et petis hommage
Du roy englois diron Qui fu en l'eꝛmitage
Tant que li rois des rois Li tramiſt ſon meſage
Que tant avoit ſoufeꝛt Et douleur et martire
Que je croi qu'il n'eſt cleꝛs Qui le peüſt eſcrire
Une nuit endꝛomant Li vint une vois dire
Que laiſſaſt l'eꝛmitage Par le ſouverain ſire
Le bon roi d'Engleterre Priſt Dieu a reclameꝛ
De la foꝛeſt iſſi Et ſ'en vint ſur la meꝛ
Bonne gent vit au poꝛt Qui vouloient paſſeꝛ
Le roi vint dꝛoit a eulz Moult les fiſt eſfreeꝛ
Quar descharnés eſtoit Et de fain toulz velus
Mieus ſembloit moꝛt que vif Quant d'eus apꝛochés fu
Doucement diſt ſeingneur El non du dous iheſus
Metez moi en vos nef L'un d'eus a reſpondu
Biaus amis dont viens tu Moult as ſouſfeꝛt de paine
Bien peꝛt que as hanté Entre gent trop vilaine
Je te doins ceſte cote Veſt la en bonne eſtraine
Le roi l'en meꝛcia Qui avoit foible alaine
Quant la cote ot veſtue En la nef ſe bouta
Et le dous Jheſucriſt Tant les veſſiaus mena
Qu'a un des poꝛs d'Eſpaingne Sain et ſauf ariva
Le roi tous eſbahis Sur la meꝛ demoura
Ja ne ſeüſt venir En ſi diveꝛs pais
Se nommeꝛ ſe vouſiſt Qu'il ne trouvaſt amis
Mes il avoit ſon cueꝛ Parfaitement aſſis
Au pleſſir de Dieu faire Pour avoir paradis
Il ne ſot ou il fu Ne en quelle contree
La roine ſa fame A foꝛment regretee
Et ces petis enfans Mainte leꝛme a plouree
Bien ot ſa contenance Un bourgois regardee
Au roi vin ſi le miſt Doucement a raiſon
En diſſant biaus amis Comment avez vous non
Adont ſouvine au roy De la deſfancion
Que la vois li ot fete Li baiſſa le menton
Il penſa un petit Son non a retrenchié
Il dit j'ai a non Gui [Mes beaume a beissié]
Le bourgois qui eſtoit Ou pais moult pꝛiſié
Li dit Guis biaus amis J'ai de toi grant pitié
Pour ce que t'ai veü ſi tendꝛement pleureꝛ
Se meller te ſavoies D'un palefroi gardeꝛ
Avec moi te pourroies De tes maus reſpaſſeꝛ
Le roy reſpondi ſire Je m'en puis bien venteꝛ
Que d'atourneꝛ chevaus Bien la guiſſe ſavon
Le riche homme mena Le roy en ſa maiſon
Onques mes marchéant N'ot ſi riche garcon
Des .ii. enfans le roy Un poi vous parleron
Conment et en quel guiſe les retrouva leur pere
El commant a grant toꝛt Guerroierent leur mere
Oꝛ commance du dit La piteuſe matere
Mes a tous et a toutes Pri pour le coꝛs .Saint Pere
Que pour nous donneꝛ Soient les bources deſfeꝛmees
Avoir doit bon argent Qui a bonnes denrees
Des meilleurs de l'oſtel Vous avon apoꝛtees
Le bon roi d'Engleterre Servi pluſſeurs journees
Le bourgois ſi apoint Que de bon cueꝛ l'ama
Et moult de ces denrees Entre mains li laiſſa
Mes ſouvent pour ſa famme Et pour ces filz pleura
Chaſcun des deus enfans Crut moult et amenda
Les marchéans qui chiez eulz Les enfans nouriſſoient
Furent pꝛochains voiſins L'un les l'autre manoient
Les .ii. petis jumiaus Si foꝛment ſ'entr'amoient
Quar il eſtoient freres Mes pas ne le ſavoient
A paine povoit on Départir les enfans
Ainſi furent nourris Tant qu'il oꝛent .x. ans
Dous et courtois eſtoient Sages et bien parlens
Adonques ſ'apenſa L'un des marchéans
Que l'enfant qu'il gardoit Apꝛendꝛoit a meſtier
Par un matin le fiſt De ſon lit descouchieꝛ
Puis li a dit il faut Que ſoies peletieꝛ
L'anfant li reſpondi Ja meꝛleꝛ ne m'en quieꝛ
Par foi ja ne coudꝛai Mantiau ne pelicon
S'avecques moi n'aprant Auſi mon compaignon
Quant le marchéant oÿ Qu'il desdiſt ſa raiſon
Errant pꝛiſt une veꝛge S'en bati l'enfancon
Par deſpit l'apella Mauvés garcon trouvé
Coment oſe tu dire Contre ma voulenté
Je te pꝛis ſur la meꝛ Eſtroit envelopé
U pan d'une viez cote Que j'ai long temps gardé
Errant vint a ſa huche Celui qui ſ'aira
Le pan en a trait hoꝛs A l'onfant le geta
Et jure que jamais Nul bien ne li fera
Loꝛs pꝛiſt l'enfant la piece En ſon ſain la bouta
Puis iſſi de l'oſtel Moult tendꝛement pleurant
Ne cuidoit avoir pere Foꝛs que le marchéant
Mes filz eſtoit de roi Foꝛt ſ'ala demantant
En ſon cueꝛ afeꝛma Qu'il chemineroit tant
Qu'il ſavra dont il eſt Hoꝛs de la ville iſſi
Son frere qui eſtoit En l'autre hoſtel nourri
Vouloit on cel joꝛ metre A meſtieꝛ autreſi
Mes ille refuſa Si que on l'en bati
Et puis fu apellé Mauvés garcon volage
Le marchéant li geta L'autre pan a viſage
Et li diſt par deſpit Tien vés la biau gage
Ou giſſoies quant fus Reſcous au leu ſauvage
Loꝛs quant le filz le roy Le marchant entendi
Au marchéant a dit Sire pour Dieu meꝛci
Voir bien me devez batre Pas ne vous en desdi
Quant alevé m'avés Et de moꝛt garenti
Ne ſeꝛa jamés heure Que ne vous doie ame[r]
Quant le marchéant l'oï Si ſagement parleꝛ
Foꝛment ſe repenti Qu'il l'avoit fet pleureꝛ
Doucement li a dit Mon enfant lai eſteꝛ
Pour toi chaſtieꝛ Ai ceſte bourde trouvee
Voir tu es mon dꝛoit filz Plus t'ainme que rien nee
L'anfant li diſt dous ſire Par la vieꝛge honnoꝛee
Ne pourroie plus faire Ci endꝛoit demouree
Je vous ai trop couſté Dieu me doint vivre tant
Que le vous puiſſe rendꝛe Loꝛs le pꝛeudon pleurant
Li fiſt donneꝛ .x. livres Et un cheval courant
Et pour lui miex conduire Li bailla un ſeꝛjant
L'enfant n'oublia pas Le pan ou couchié fu
Quant naqui de ſa mere Par cela fu comneü
D'un arc et de ſajeſtes C'eſt moult bien poꝛveü
Puis monta a cheval Adont c'eſt eſmeü
Par le vouloir de Dieu Tant fiſt et eſploita
Que il ataint ſon frere Compaingnon l'apella
Puis li a demandé Pourquoi ainſi ſ'en va
L'autre enfant reſpondi Compains vous l'oꝛrés ja
Ne vos meſtieꝛ apꝛendꝛe Si que on me bati
Li autres diſt compains Avenu m'est ainſi
Cil qui fu a cheval A terre deſcendi
Et a dit a ſon frere Lëaument vous afi
Que je ne vous faudꝛai Jamais pour nulle rien
Ainſi ſ'acompaingnieꝛent Mes il ſe tindꝛent bien
De parleꝛ des .ii. pans Chaſcun cela le ſien
Dedens un bois entrerent Ou ot maint biau merrien
Un poi apꝛés midi Qu'an eſté doit chaut faire
Virent [un] joune ceꝛf L'un des filz pꝛiſt a treꝛe
Tant dꝛoit ſi comme il plot Au dous roy debonnaire
Que le ceꝛf cheï moꝛt Sans crieꝛ et ſans bꝛaire
L'enfant ot moult grant joie Quant le ceꝛ vit tué
Bien le cuide avoir fet En l'eure l'ont levé
Sus le col du cheval Qui eſtoit enſellé
Mes un des foꝛeſtieꝛs A tout ce regardé
Baut leur diſt qu'an priſon Paſſeꝛ les convenoit
Auſſi com .iii. bꝛebis Devant li les menoit
Le ſeingneur de la terre Par la foꝛeſt chaſcoit
Quant il vit les enfans Il en quiſt que c'eſtoit
Le foꝛtieꝛ diſt ſire beꝛſant vont par le bois
Ceſte beſte ont tuee Le ſeingneur fu courtois
Il diſt je leur pardoins Pour Dieu a ceſte fois
Mes je weil qu'il demeurent En mon hoſtel un mois
L'un des enfans li diſt Qui eſtoit le plus ſage
Sire de vous ſeꝛvir Ai moult tres bon courage
Le conte les mena En ſon meſtre menage
Bien penſa qu'il eſtoient Eſtrait de bon lignage
Moult avint aus enfans Cel jour bonne aventure
Pas n'avoient eſté Nourris a leur dꝛoiture
Les chiens et les oiſſiaus Amoient par nature
En poi de temps retindꝛent Foiſon ſans et meſure
Toute gens haus et bas Les avoient moult chieꝛs
Quant il oꝛent .xx. ans Foꝛs furent et legieꝛs
En fait d'armes eſtoient Tout adés les pꝛemieꝛs
Tant les ama le conte Qu'il les fiſt chevalieꝛs
Le conte qui ſi foꝛt Les .ii. enfans amoit
Leur meꝛe la roine Moult foꝛment gueꝛroiet
Pour tant qu'a mariage Prendꝛe ne le vouloit
Mes tous les chevalieꝛs Que li ſires avoit
Pas de ſi grant air La dame ne grevoient
Comme faiſſoient ceuls Qui ces enfans eſtoient
Pluſſieurs deſpit li firent Et bien ſ'aatiſſoient
Se tenir la povoient Que voulentieꝛs l'ardꝛoient
En tant comme la guerre Dura dont je vous di
Le noble roi Guillaume Le marchéant ſeꝛvi
Quant le vouloit huchieꝛ Ne l'apeloit foꝛs Gui
Il l'apella un jour Et diſt Gui mon ami
Vous eſtez loiaus hons Bien vous ai eſſaié
Ja laſſa en Engleterre Se je fuſſe hetié
Il li fiet une foire Ou j'ai moult gaagnié
Se pour moi i alez Bien en ſerés paié
Quant le bon roy Guillaume Son parler eſcouta
Foꝛment pꝛiſt a penſeꝛ Quar foꝛment ſe douta
Que conneü ne ſoit S'en ſon royaume va
Mes toute vois diſt il Que voulentieꝛs ira
Errant fiſt une nef De derrees chargieꝛ
Diex leur vout ſi bon vent Dedens l'iaue baillieꝛ
Qu'ariverent a Douvre Droit a un eſclarier
Le roy requiſt de cuer Le pere dꝛoiturieꝛ
Qu'il ne ſoit conneü En la foire ſe miſt
Es loges qu'il loua Grant avoir poꝛteꝛ fiſt
.I. coꝛ qui ja fu ſien Deſus un homme vit
Loꝛs l'apella le roy Moult doucement li diſt
Biaus amis voulez vous Cel coꝛ d'ivoire vendꝛe
Et il li reſpondi ouil Sans plus atendꝛe
Vint ſouls en eſteꝛlins L'en ala le roy tendꝛe
Cil qui recut l'argent Li a dit rendꝛe ou pendꝛe
Quar voir je n'ai nul dꝛoit En ces eſteꝛlins ci
Aus povres les donrai Pour l'amour de celui
A qui cel coꝛ eſtoit Car ſouef me nourri
Ce fu le roy Guillaume Dieus li face meꝛci
Quant le roy l'entendi Si li a reſpondu
Eſt donques celui moꝛt A qui ce coꝛnet fu
Ouil ſire diſt il puis Qu'il n'eſt revenu
Adonques ſ'en parti Plus n'i a atendu
Au povres qui trouva Donna trétout l'argent
Et leur diſt qu'il pꝛiaſſent Pour le roy bonnement
Le roy le vit bien Sot qu'il l'amoit foꝛment
Puis li en rendi il .I. courtois paiement
Les anciens d'Engleterre Regardoient le roy
L'un le mouſtroit a l'autre Tout coiement au doit
Et puis ſ'entrediſſoient Cel marchéant que la voy
Reſemble au roy Guillaume Par la foi qu'a Dieu doi
Tant ala la parole Du roi qu'oiez conteꝛ
Que celui qui avoit Engleteꝛre agardeꝛ
S'en vint dꝛoit a ſon oncle Moult doucement parleꝛ
En diſſant tres dous ſire Je vous viens demandeꝛ
S'eſtes le roy Guillaume par amour ſire dous
On diſt que li ſemblés Pour Dieu dites le nous
Se le voir en ſavon Je et les barons tous
Obeïron en l'eure Devotement a vous
Quant l'oncle ot le neveu Si faitement parleꝛ
Il li a diſt biau ſire Pour Dieu leſſiés eſteꝛ
Je ne ſui pas venus Ci endꝛoit pour moquieꝛ
Mes pour vendꝛe les biens Quar j'ai fait ameneꝛ
Le roy ot moult grant doute Qu'il ne fuſt aviſſez
Quar les .xx. et quatre ans N'eſtoient pas paſſez
A ſon neveu a dit Biau ſire oꝛ entendés
Se le roy revenoit De quoy vous me parlés
Seroit il receus Son neveu diſt errant
Ouil ſe Dieus me gart A ſollanpnité grant
Mes pour l'amour de li Dont avez le ſemblant
Serés mon ſeneſchal Des oꝛ mes en avant
Non feꝛai dit le roy L'oſfice n'ai pas chieꝛe
Que ſe le roy Guillaume Repairoit ca arrieꝛe
D'ofiſſe m'oſteroit Bien connois ſa manieꝛe
Fous eſt qui ſi haut monte Qu'il en trebuche arrieꝛe
A ce mot le neveu De ſon oncle parti
Tout ce qu'ot amené Le roy englois vendi
La nef fiſt rechargieꝛ Puis en meꝛ ſ'en bati
Mes par le gré de Dieu Qui onques ne menti
Un vent leva ſi foꝛt Que la nef ariva
Au poꝛt que la roine D'Engleterre garda
Quant la nef fu a terre La dame n'areſta
Pour pꝛendꝛe ſon truage Droit a la nef ala
Le coꝛ vit qui eſtoit Enmi la nef pendu
Bien ſot qu'en Engleterre L'avoit auroi veü
D'autre part regarda S'a le roy perceü
L'annel qu'il ot el doi A bien reconneü
La dame vint au roy Et li a dit moult bel
Sire ſe vous voulés Aquiteꝛ ceſt veſſel
J'aurai de vostre doi Seulement cel anel
Et ſi venrés diſneꝛ Laſſus en mon chaſtel
Le roy ot moult grant duel Quant ce mot endenti
Puis a dit a la dame Vous avez mal choiſi
Cëans a tel jouel Qui vault je vous afi
Plus de tiex .xxx. anniaus La dame reſpondi
Je ne weil que l'annel Adont le roy li tant
En ſoupirant li diſt Je vous jur lëaument
C'onques mes en ma vie Je ne fui ſi dolent
Foꝛs le jour que je tins L'annel pꝛemieꝛement
Quar larrons me tolirent En la laſſe journee
Une moult noble dame Que j'avoie eſpouſſee
Et perdi .ii. enfans Qu'elle ot d'une ventree
Quant la dame l'oÿ Errant chey paumee
Pour ce que ces enfans Cuidoit avoir perdus
Le roy entre ces bꝛas L'en a levee ſus
Puis li diſt chiere dame Pour Dieus qui maint la ſus
De quoi eſt voſtre cueꝛ Si foꝛment eſpeꝛdus
La dame li diſt ſire Se Jhesu me pourvoie
Mon cueꝛ eſt eſperdus De courrous et de joie
Lié ſui quant vous tien Quar moult vous deſirroie
Quar de mes .ii. biax filz Ne ſai ne vent ne voie
Tantoſt que li rois ſot Que c'eſtoit la roine
Doucement la baiſſa Qu'il l'amoit d'amour fine
Le pueple ot grant joie Quant il ſot leur couvine
Le roy diſt a la dame Sur j'ai grant envie
Qu'allons en Angleterre Le pais renonmé
Pres de vint et quatre ans Ai en eſſil eſté
On fiſt les table metre Quant le roy ot diſné
Un petit ſ'endoꝛmi En un biau lit paré
A viſion li vint Que chacieꝛ aloit
Que il pꝛendꝛoit tel choſe Dont moult joiant ſeroit
Quant il fu eſveillié Si grant talent avoit
Qu'alaſt el bois chacieꝛ Que meꝛveilles eſtoit
La dame li diſt ſire Puis qu'avez celle envie
D'aleꝛ el bois chacieꝛ Par fine amour vous pꝛie
C'un ruiſiau qui i eſt Pour Dieu ne paſſez mie
C'eſt la terre d'un conte Qui trop foꝛt me guerrie
Le roi li a diſt dame Ne vous en doutez ja
N'irai gueres avant Que retournerai ca
Le roi et ces veneurs .I. poꝛc ſanglieꝛ leva
Mes de ſi grant air Le ſuivi et chaca
Que ces chiens et ces hommes Tout a un coup perdi
Et paſſa le ruiſſel Que l'an li deſfandi
Deus chevalieꝛs armés Sous un arbꝛe choiſi
Qui li crierent meſtre Vous paſſerés par ci
Par foi vous valez moꝛt Se vous ne vous rendez
Loꝛs le roy reſpondi Voir ſ'a moi main metez
Je vous jure ſus ſains Vous en repentirés
L'un des chevalieꝛs diſt Tu es un fol pꝛouvés
En noſtre dangieꝛ es Et nous vas menacent
Pres va que ne te fieꝛ De mon eſpié tranchant
Le roy leur reſpondi Au mains ſouſfrés vous tant
Que vous aie conté Quel choſe vois quéꝛant
Je ſui roy d'Engleterre Mes Dieu le tout puiſſans
Me manda qu'en eſſil Fuſſe vint et quatre ans
O moi menai ma fame .I. jour ot .ii. enfans
A foꝛce la m'oſterent Faus gloutons marchéans
Sans mere me laiſſieꝛent Les .ii. enfans petis
Es .ii. pans de ma cote La les couchai et mis
Par un leu me fu un De mes enfans ravis
Et en un batelet Sur meꝛ l'autre fu pꝛins
Quant les .ii. chevalieꝛ Oirent la raiſon
L'un regarda l'autre Ne dit ni o ne non
S'il qui fu plus haſtis S'eſcria a haut ton
Sire voſtre filz ſui De ceꝛtain le penſon
Reſcous fui a un leu Qui m'avoit engoulé
Ou pan d'unne viez cote Eſtoies enuelopé
L'autre chevalieꝛ diſt Voir et je fui trouvé
En un batel ſur meꝛ Si comme on m'a conté
Ou pan d'une viés cote Envelopés eſtoie
Quant le roi les oÿ Au cueꝛ en ot grant joie
Puis a dit biaus enfans Se les pieces vëoie
Ou couchai mes enfans Moult bien les connoiſtroie
S'un des enfans a dit Se venez avec moy
La piece ou fu couchié Vous mouſterrai par foy
L'autre chevalieꝛ diſt Par la foi qu'a Dieu doy
Bien ſai ou eſt la moie Freres ſommes en doy
Les .ii. freres menerent Leur pere ciés le conte
Qui avoit a leur meꝛe Par pluſſeurs fois fet honte
Chaſcun d'eus trait la piece Dont je vous ai [fet ]conte
Le roy les vit puis diſt Vray Dieu qui tout ſurmonte
On vous doit bien loueꝛ tres dous peres puiſſans
Oꝛ ſui je tout ceꝛtain Que ce ſont les .ii. pans
Que tranchai de ma cote Pour couchieꝛ mes enfans
Moult furent les .ii. freres En leurs cueꝛs tres joians
Devoſtement requiſtrent A leur pere meꝛci
Pour ce qu'en la foꝛeſt L'avoient aſſailli
De cueꝛ leur pardonna Et puis leur diſt ainſi
Biaus enfans je vous lo Qu'aillons ſans nul detri
Parler a votre mere Le plus toſt que pourron
Bien ſai que pour moi eſt En male ſoupecon
Se li avez meſfait Requéres li pardon
Les enfans reſpondirent Voſtre commant feron
Le pere et les enfans Murent ſans plus parler
Ou bois virent leur mere Qui ja ot fet armeꝛ
Sa gent pour le roi querre Que tant pooit amer
Les enfans ſi ſ'alerent A nus genos geter
A nus genous requiſtrent Pardon devotement
Elle leur pardonna De cueꝛ parfaitement
Mes quant le conte ſot Le fait parfaitement
Il vint a la roine En pleurant tanrement
Des maus que li ot fet Li demanda meꝛci
Le roi englois li diſt A gré m'avez ſeꝛvi
Vous avez mes enfans De leur armes garni
Ci endꝛoit de la terre La dame vous ſaiſſi
Que jamés pié de terre De ſa meꝛ ne tendꝛa
En Angleterre iron Ou roine ſeꝛa
Adont le roy englois Par meſſage manda
Qu'il enterroit a Londꝛes A un jour qu'il nomma
Cil qui maintint la terre Et li autre baron
Furent liez et joiaus Quant ſoꝛent la reſon
Preslas abés et moinnes Gens de religion
Furent contre le roy Belle pourceſſion
Receü fu le roy a grant ſollenpnité
Qui vint et quatre ans Ot en grant dengieꝛ eſté
Mandeꝛ fiſt le marchéant Entour qui ot hanté
D'Engleterre li fiſt Tenir une conté
Puis fiſt l'eſcuieꝛ querre Le franc roi ſans venin
Qui li vendi le coꝛ Bien ſot que de cueꝛ fin
L'amoit il li donna De terre en eſterlins
Douſe mille livrees Et en fiſt ſon voiſin
Et les .ii. filz le roy ſans reſpit mandeꝛ fiſt
Les .ii. lëaus marchéans Qui .x. ans les nourrirent
D'eus firent moult grant joie Si toſt comme il les virent
A eus et a leur hoirs Moult grant rantes aſiſtrent
Le roi et ces .ii. filz E la dame gentils
Oꝛent en bonnes euvres Si tres bien leur cueꝛ mis
Que la joie conquiſtrent Ou Dieu met ces amis
Laquelle nous otroit Le roy de paradis