Un cheval ay Qui eſt a vendꝛe
Pour avoir argent A deſpendꝛe
Je croi cil qui l'achatera
Que moult petit i gaignera
C'eſt oꝛe voir il eſt ferans
Et eſt mauveſement errans
Et a .iiii. felons reneus
Et a ſoz la goꝛge .ii. neus
Et eſt ſoz la queue tigneus
Et eſt pouſis. et eſt moꝛueus
Et ſi dient la gent entr'eus
Que il voit moult petit des ieus
Et ſi ſai bien que il n'oit goute
Ne li ventres ne li tient goute
Foi que je doi /ſainte pecine
Il n'a meſtre de medecine
Car ſe verité eſt en recoꝛs
Riens ne li demeure ens el coꝛs
Et ſi moꝛt et regibe et grate
Et ſi fiert derrier de la pate
Et ſi meniut mauueſement
Mes il en giſt plus netement
Maigres eſt et roides et lons
Hauz eſt et ſi eſt trop felons
Il n'emble ne paſſe ne trote
Il ne vaut pas une viez bote
Et quant on fiert et il trebuce
Il chiet c'une pourie huce
Et ſi ne ſai que ce puet eſtre
Il mengue tout ſon cheveſtre
Et ſi eſt de mauueiſe loi
Car il a le mal /ſaint eloi
Les barbes a et le lenpas
Maueiſement va trop et pas
Je croi qu'il fu nez en enfer
En pié ne li demeure fer
Et ſi a derriere une courbe
Qui a l'aler moult li deſtourbe
Et ſa ferine et ſa molete
Il eſt chetive beſtelete
Encoꝛdez eſt devant derriere
Oꝛeilles pendanz mate chiere
Farſilleus eſt ſales relens
Il eſt mauais et ſi eſt lens
Encoꝛe plus i meterons
Il eſt trop durs a eſperons
Et ſi vous di ſe Diex m'avoie
Il chiet en rue et en voie
Foi que je doi a mes .ii. mains
Des mehains n'i a mie mains
Paeureux. onbꝛageus. reſteux
Onques mes ch[e]vaus ne fu tiex
Des p[l]us le tens de /perceval
Ne veiſtes ſi fier cheval
Lons eſt d'eſchines es pies neus
Courbatus enfoſſet et creus
Il ſera moult bons a vous tieus
Oꝛ l'achates ſe vous voles
Vendus eſt ſe ne vous haſtes