Un pꝛeudons pꝛiſt dame iouenne
Une moult oꝛguilleuſſe dame
Et ſi tres deſpiteuſſe eſtoit
Que riens vaincre ne la puoit
Tant que par aventure avint
Que cel pꝛeudomme li diſt
Jouenne alons vëoir vos ueces
L'en i fait ſentieꝛs et adꝛeces
Et en nos bles et en nos pois
L'en nous honniſt tout nos tremois
Et nous devons ſi com moi ſemble
Eſtre moult bonne gent enſemble
Comme jonnes gens que nos ſommes
Mout eſt oꝛ bien chargie de pommes
Vostre pommieꝛ et de moult blanches
Il n'a pas d'ici juſqu'a /planches
Homme qui miex reſemble faux
Mes enging ſe tu ne me faus
Je te metrai trop bien a point.
Boi iouenne ſe Diex me doint
Joie de quanque j'ai ou monde
Ne par Dieu ou tout bien habonde
Onques ne le dis par nul mal
Car vous eſtes dame loial
Et pour ce vous eſpouſai ge
Boi chetif las c'apotai ge
Quant vins en vostre compaignie
G'eſtoie blonde et bien pingnie
Et fille de moult bonne gent
Et ving bien trouſſe d'argent
Ou il n'avoit point de rechange
Et ſ'apoꝛtai et linge et lange
Et couſte en lit et coutepointe
Et huche moult belle et moult cointe
Et .iiii. paire d'oꝛilleꝛs
Et .v. paire de cheurechies
Me cuidiez vous ſouz piez tenir
Nenil ſi puiſſe je venir
A la vraie confeſſion
Je ſui bien en poſſeſſion
D'eſtre touz jours dame de vous
Boi iouanne ſi eſtez vous
Et de moy et de quanque j'ai
Voirement le ſui et ſeꝛai
Que j'ai .i. art plus que dëable
Iouenne ce n'eſt mie fable
Se vous voulez tenir en ceſte
Ja par Dieu par ciſt ne par ceſte
Ne leꝛai que je ne m'i tieingne
Et mau grant damage me veigne
Se vous n'eſtes coups ſe je vif
Iouenne auſſi eſt le baillif
Par aventure et le viconte
Mes pꝛeudefame qui crient honte
Se doit tenir a ſon ſeaignoꝛ
Oꝛe iouenne par amoꝛ
Et pour ſainte natiuite
Ne me tenez pas en vite
Je ſui jonne et grant et foꝛt
Avis m'eſt que vous toꝛt
D[e] commancieꝛ ſi male vie
Eſfondu ſoiez vous en abiſme
Ce faites vous qui commanciez
Mes vous en ſeꝛez courouciez
En la fin ou je i faudꝛai
Car touz jours miex de vous vaudꝛai
Et iront mes raiſons avant
Je l'ay voue oꝛ m'en avant
Celui qui bien faire le puet
Oꝛe iouenne il vous eſtuet
Cuire des pois car je m'en uois
Atandez mous n'en poues mois
Pois avrés vous par auanture
Et Diex me doint male aventure
Se vous n'avez de la poꝛee
Si en ſui je mal eſtoꝛee
Mes c'eſt pour faire le rebours
Et me deuſſieꝛ comme .i. ours
Batre ſi feꝛai je la dame
Vaudꝛa oꝛ miex homme que fame
Par dëable qui ſe pendi
Nenil voir Dieu le deſfendi
C'eſt oꝛe le plus et le mains
Que miex valent mes blanches mains
Et mes biaus bꝛas et ma figure
Damage eſt quant tel creature
Eſpouſſa onc tel rodoen
Hé; mal me leuaſſe je ouen
Quant onc eſpouſſai ceſte fole
Et /le bon baron saint nicole
M'en delivre c'el ne ſ'amende
Agua chie oꝛ faut ci bende
Trop ſui bonne a ton eus
Car tu ne vaus ne tu ne pues
Foꝛs tant com je te fais valoir
Ceꝛtes trop te pourras douloir
Quant de partir nous covendꝛa
Et ceꝛtes par tans auendꝛa
Se le ceꝛvel m'eſmuet .i. poi
Avoi dame iouenne avoy
Souſfres encoꝛe vostre engoiſſe
Qui me tient oꝛe que ne te laiſſe
De ma quenouille coup pullant
Par Dieu je te feꝛai ſullant
Le front et le muſſel de duel
Je voudꝛoie mourir mon weil
Quant je regarde ma biauté
Et je te feꝛai loiauté
Ceꝛtes dëables le veꝛront
Et ou ſont ceus qui ce ſeꝛont
A cel mengieꝛ ja Dieu n'i veingne
Boi iouenne ſe Diex me doint
Qui joie et ſanté vous doint
Sont les pois bien ſalez a point
Que je vous commandai a faire
C'eſt .i. mes qui trop me puet plaire
Je n'ai touz jours eſté noꝛri
Par Dieu vilain meſiau poꝛri
Tu n'i avras ne pois ne feue
Enciez changeꝛai .i. poi d'eue
A vostre poꝛee eſloignieꝛ
Oꝛ toſt trop povez polognieꝛ
En non Dieu iouenne il m'anuie
Benoit ſoit ce que on eſtuie
C'eſt de la poꝛee d'eꝛſoir
Par Dieu vous ne dites pas voir
Ainz mentez par mi la guargate
Mengiez ant plaine ceſte jate
Ja ne vous iſſe elle du ventre
Tenez paſſion vous i entre
Qui vous rut moꝛt enmi ceſte eꝛe
Oꝛ iouenne il me convient taire
Il m'eſt avis que c'eſt du miex
Vous dites voir ſi m'aiſt Diex
Vous ſavez bien qu'eſtre convient
Debonnaire quant plus foꝛ vient
Et tant plus en grouceꝛiez
Et tant plus que folz feꝛiez
Oꝛ ſus vous eſtez trop ſaoul
Que fuſt cil a /chaſtiau Raoul
Qui de nous .ii. fiſt l'aſemblee
Miex veniſt que on m'eüſt emblee
Quant g'eꝛe genne ciez mon peꝛe
Par poi que ne m'en deſeſpeꝛe
Quant c'eſt vilain ne me leſt
Faire ce qu'a faire me pleſt
Oꝛ ſus c'eſt diſneꝛ a chanoingne
Boi ja Diex ne m'i part d'eſſoigne
Se je ne vous oſte la nape
Veez du dëable comme elle hape
Elle eſt du lignage a eſcoufle
S'elle me pꝛiſſaſt une moufle
Ne ne cremiſt ne ne doutaſt
Ja ſi laidement ne m'oſtaſt
La nape comme elle m'a oſtee
Mais je li feꝛai tel toſtee
Ou elle avra aſſez a moꝛdꝛe
Fol ſui quant l'ai laiſſie amoꝛdꝛe
Au premieꝛ a moi meſtrieꝛ
Oꝛ m'a laiſſie tout eſtraieꝛ
Et ma uiande a eſpendue
A male hart ſoit el pendue
Et li et toute ſa banieꝛe
Elle poꝛteꝛa la banieꝛe
Je cuit quel poꝛte poꝛteꝛa les bꝛais
Voire maugré que tu en aies
Et les bꝛaies et le bꝛaiel
Va ſi t'en plaing a ton aiel
Se tu en cuidez avoir dꝛoit
Harou qui me tient oꝛendꝛoit
Qnt je n'enrage toute vive
Quant cel villain pullant eſtriue
De ce que a faire me plaiſt
Je ſeꝛai dame ſe Dieu plais
Voire ſi l'avoit pꝛis a main
Et Diex m'envoit mau joꝛ demain
Se je ne
ou a trois
J'ai eſté ce n'eſt mie dꝛois
Trop pꝛeudefame ou que je fuſſe
Plus que voiſine que g'euſſe
Mes oꝛ deurai ge putain
En deſpit de vous dant vilain
Oꝛ vous convient eſtre ſoufrable
En non Dieu iouenne au dëable
Soient celles qui te reſemblent
Miex me ueniſt o ceus qui emblent
Avoir fait compaignie .i. an
Mes foi que je doi /saint iehan
Je m'en vengeꝛai ſe je puis
Se je truis ou maillieꝛe ou puis
Je t'i balenceꝛai avant
Que je ſoie d'oꝛe en avant
En tel doleur en tel tempeſte
Qu'a bon joꝛ ni a bonne feſte
N'ai je pais a iceſte laſſe
Et c'elle vouſſiſt plus l'amaſſe
C'onques ne fis peꝛe et meꝛe
Mes tant la truis ſure et ameꝛe
Et plaine de male boidie
Riens ne di que elle ne deſdie
Di weil poꝛee j'avrai pois
Toute rien me fait ſus mon pois
Et ſe je weil char de bacon
Loꝛs met elle cuire .i. tacon
De la plus dure vielle vache
Quelle truiſſe ne quelle ſache
Et ſi ne m'oſſe encoꝛe en batre
A li feꝛir ne a li batre
Par enging me couvent ouvreꝛ
Car je vourai ſi arengieꝛ
Trois feꝛs d'aleſne bien agus
Ens ou fons de ce peꝛtus
Et puis ſi li deſfendꝛai
Ou peꝛtus ne boute ſon doi
Quant je li avrai fait deſfence
Seꝛa ce pechié ni eſfenſe
S'elle ſe blece et i boute
Honnis ſoit qui pechié en doute
Iouenne ne boutez ci rien
En ceſt peꝛtus je vous di bien
Que celui qui riens bouteꝛa
Ou peꝛtuis ſ'en repentira
Se tu as tourne les talons
Ne lairoie pour .ii. galons
De vin que je mon doi n'i boute
Que ma penſee ſi eſt toute
A faire ce qu'il te deſplaiſt
Oꝛ vous en ſouſfres ſi vous pleſt
Je vois .i. poi hoꝛs de la ville
Harou j'ai fait trop belle guille
Se ceſte laſſe ſe mehaingne
Hé; /saint iehan de /la champaigne
Oꝛ me ſui je trop oubliee
Je m'en vois toute deſliee
Bouteꝛ mon doi en ce pertus
Si eſſaieꝛai quel veꝛtus
Mon chetif de mari i a
Mout roidement ſon doi bouta
Ou pertus dont ſe repenti
Car en es pas hay hay
Quant ſe ſenti pointe ſi cria
/Douce dame Ave /Maria
Cel larron vilain m'a traie
Harou harou aye aye
Je ſouloie eſtre ſi ſoutiue
Mieus m'amaſſe moꝛte que vive
Non pas pour mal mais pour la ho[n]te
Car il me tenra en ſon conte
Que il m'ara pꝛiſſe au bꝛay
Par /Nostre Dame de /cambꝛay
Qu'il m'en eſt grant honte avenue
Boi harou dont li eſt venue
Ceſte grant traiſſon ſoutaine
Hé laſſe comme mon doi ſainne
Je cuit qu'il le m'eſtuet lieꝛ
Se je truis fueille d'alieꝛ
Je croit quelle me ſeꝛoit bonne
Oꝛ ſui je venu iouenne
Comme pꝛeus et bien et enſeignie
Et qu'eſt ce l'en a ci ſaignie
Iouenne ne vous diſie bien
Ou peꝛtus ne boutiſſiez rien
Et que cil qui riens bouteꝛoit
Ou peꝛtus ſ'en repentiroit
Tart eſt main a cul pet eſt hoꝛs
Male joie et elle de ſon coꝛs
Qui moult bien ne le vous rendꝛa
Oꝛ nous ueꝛron qu'an avendꝛa
Iouenne leſſon ceſte noiſſe
Il y a de quoi plus me poiſſe
De nostre pꝛe qui n'eſt fauchie
Qui eſt tout en tour deſchaucie
Dant Guillaume a fauchie le ſien
Auſſi ſoies tu bel et bon
Con fauchie n'eſt pas mes tondu
Et il a tantoſt reſpondu
Qui n'i metroit tout ſon enhan
Ne ſeꝛoit tondu en .i. an
Et celle ſi a Dieu jure
Que il fu tondu et touſe
Nel m'otrieꝛoit pour /Paris
Que il ne fuſt tondu touz dis
Il la pꝛent et bien la bati
Et trop durement la laidi
De piez de poins li donna tant
Que deſus lui ſe va laiſſant
Et quant el ne pot mes parleꝛ
A .ii. dois commance a mouſtreꝛ
Il fu tondu tondu fu il
Adont i ot .i. grant rouil
Trait ſoit arrieꝛe et l'eſgarde
Et au dëable la commanda