Seigneur je di pour voir Qui a entendement
S'il n'entent a bien faire Qu'il oevre folement
Car par les bones oevres Vient on a ſauvement
Chaſcuns puet bien ſavoir Se je dis voir ou ment
Cil qui en ſa jonece Veult le bien commencier
S'il le veult pourſuivir Ja n'avra encombꝛier
Diex le gart et deffent Qui li rent ſon loier
Comme il fiſt a celui Dont vous m'oꝛrez nuncier
En /Egypte manoit Au temps anciennour
.I. Juif ou n'avoit Charité ne amour
Voirres fiſt et voirriers Tel eſtoit ſon labour
.I. enfancon avoit Diex l'amoit par amoꝛs
Sus l'enfant du Juif Veil pꝛendꝛe ma matere
Biaus fu et gracieus Et de bele manere
Aus enfans creſtiens Faiſoit moult bele chiere
Avec eulz ſe jouoit Et avant et arriere
Plus croiſſoit le Juif Plus les enfans amoit
Quant ſon pere le ſot Moult ſouvent le batoit
Combien qu'il fuſt batus Poi[n]t ne ſ'en recreoit
Quant pooit eſchaper Aus enfans ſe clamoit
Par /ma loy creſtiens Mon pere ſi me bat
Pour ce que avec vous Me ſoulace et eſbat
Miex aing vo compaignie Que ne fais no ſabbat
Son meſtier ne ſuivrai Fex eſt qui ſ'i embat
Li enfes du Juis Si amoit les clergons
Son pere le batoit Qui fu mal et felons
A ſa fame diſoit Le nostre enfant p[er]dons
Il ſera creſtiens Quel gré que nous aions.
Li cuers le me dit bien Regardez ſa maniere
Il ne ſ'en veult fouir Tant le bate ne fiere
Qu'il ne face aus enfans Creſtiens bele chiere
Il harra /nostre loy Il a /la leur trop chiere
Et la mere reſpont Il ſ'en chaſtiera
Quant il avra .xx. ans /Noſtre loy amera
Il ſera hoꝛs d'enfance Et ſ'en li mouſtrera
Tous les poins de nostre oꝛdꝛe Les Creſtiens harra
Par /ma loy dit li peres Qui fu fel et engrez
Qu'il a paſſé .vii. ans Nous le ſuivrons de pꝛez.
Se il eſt bons Juis Nes amera jamés
Les enfans creſtiens Ains ſ'en tenra en pais.
Mais tous joꝛs il avoit Au cuer melancolie
Que ſon fil fauſſeroit /La loy de la lignie
Trop ſouvent li ooit Nommer /ſainte Marie
Poꝛ ce batoit l'enfant Et faiſoit vilonnie
Quant la mere veoit Que li peres batoit
Si ſouvent ſon enfant Par maltalent diſoit
Devant que le fol pꝛent Sa folie ne croit
Ton fil ert creſtiens Ce ſera a bon dꝛoit
De l'enfant du Juif Parlerai de rechief
C'iert mon commencement Si ſera ce mon chief
De ſon pere lairai Le plait mais c'eſt trop grief
Diex ama ſon enfant Et toꝛna a bon chief
Ainſi com vous oꝛrez Qui me vouldꝛa entendꝛe
Li enfes du Juif Qui eſt et doulz et tendꝛe
N'ot cure de /loꝛ loy /La nostre volt apꝛendꝛe
Diex l'ama et tint chier A ſa part le voult pꝛendꝛe
Volentiers compaignoit Les enfans creſtiens
/Noſtre loy li mouſtrerent Selonc leur eſciens
Treſtoute ta lignie Ne vault ne que .i. chiens
Par Dieu non feras tu Se /nostre loy ne tiens.
Paſques ſerons demain Nous acommuicherons
Et yrons au mouſtier Noſtre Seigneur pꝛendꝛons
Mais tu n'i vendꝛas mie Poꝛ voir le te diſons
Tu n'es pas creſtiens Pour ce la te lairons
Et comment compaignons yrez vous y ſans moy
Menez moi avec vous Poꝛ le grant Dieu vous pꝛoi
Quant ſerai retoꝛnez Baptizier me feroy
Li plus ſages reſpont Par ma foy je l'otroy
Ha diſt il biaus amis Sces tu que tu feras
Demain quant il ert jour A matin leveras
Puis t'en venras ycy Matin nous trouveras
Nous yrons au mouſtier Avec nous parvenras
Pour le grant Dieu vous pꝛi Que vous cy m'atendez
Car matin vous verrai De ce pas ne doubtez
Car ſ'en voſtre mouſtier Sans moi vous en alez
En vostre compaignie Jamais ne me verrez
Vas mais hui a l'oſtel Diex te doinſt bone vie
Le gloꝛieus du ciel /Le Filz /ſainte Marie
Car nous t'aimons de cuer Toy et ta compaignie
Se ne t'antendons cy No foy avrons mentie
Li enfes ſ'en tourna Chiez ſon pere ſ'en va
La nuit doꝛmi petit Bien matin ſe leva
Et quant fu deſcouchiez A ſes compaignons va
Ne furent pas levé Liez fu quant les trouva
Li Juif et l'enfant Alerent en l'egliſe
Volentiers et de cuer Oyrent le ſervice
Le Juif fu laiens Mais nul ne le raviſe
Chaſcuns a Dieu pꝛier Avoit ſ'entente miſe
Quant la meſſe fu dite Le ſervice finé
Le preſtre leur a dit Oꝛ vous agenoilliez
Et vous adꝛecerai Treſtous de vos pechiez
Nul n'apꝛoche a l'autel S'il n'eſt tres bien confez
Quant li pꝛeſtres leur ot Fait le commandement
Chay devant l'autel S'agenoille humblement
Haſquin fu lez l'autel Sambla li vraiement
Que li pꝛeſtres donoit A chaſcun .i. enfant
Haquin fu lez l'autel Qui le cuer ot eſpꝛis
D'avoir .i. tel enfant Com chaſcuns avoit pꝛis
A l'autel ſ'agenoille Come enfes bien apꝛis
Et li preſtres li donne De ce fu entrepꝛis.
Quant il ot receü /Le Seignoꝛ qui tout guie
Par le mouſtier ſ'en va Querant ſa compaignie
Les enfans a trouvez Ne li ennuia mie
Onques ne fu ſi liez A nul jour de ſa vie
Quant leens ont l'enfant Si en oꝛent grant joie
Du mouſtier ſont iſſus Si menerent grant joie
D'ilec en leur maiſon Le Juif les convoie
Vers ſon pere ſ'en va Qui poꝛ li moult ſ'eſmoie
Quant le felon Juif Vit ſon fil apꝛochier
Qui li ſambla plus bel Aſſez qu'il n'eſtoit hier
Haquin di dont tu viens Ne le me dois celer
Et li enfes li diſt Qu'il ne le voult celer
Par /ma loy du mouſtier J'ai mengie .I. enfant
.I. grans ſires le donne Alez y toſt courant
Avec mes compaignons Encoꝛ en y a tant
Prenez en .i. pour vous Et pour ma mere autant
Quant ſon pere l'oÿ A po qu'il n'enraja
Son filz pꝛiſt par la main Que plus ne ſe tarja
En ou milieu du four Maintenant le geta
Ou li voirres eſtoit Mais Diex garanti l'a
Li enfes fu ou four Ou la chaleur fu grant
La mere vint dehoꝛs Demanda ſon enfant
Et li peres li diſt. Moult felonneſſemant
Je l'ai gete ou four Et te dirai commant
Avec ſes compaignons A eſté au mouſtier
Leur Dieu a receü A celer ne vous quier
Et pour ce l'ai geté Ou milieu du bꝛaſier
Oꝛ puet dire a ſon Dieu Que il le viengne aidier
Quant la mere l'oÿ Si ſ'eſt hault eſcriee
Tu as fait au joꝛ d'ui Une male joꝛnee.
Cele pꝛent a crier Comme fame deſvee
Quant on l'oÿ crier Toſt y fu l'aſſamblee
Juive que as tu Dis nous la verité
Et elle leur a tout L'afaire recoꝛdé
Mon mari a ſon filz Ou feu ardant geté
Car le Dieu avoit pꝛins De la creſtienté
Quant li voiſin l'oirent Tuit furent eſbahi
Au Juif ſont venu Si l'ont pꝛis et ſaiſi
Et il fu tantoſt pꝛis Point ne ſe deffendi
Au four vindꝛent tout dꝛoit Si ont l'enfant choiſi
Qui au boullons du voirre De ſa main ſe jouoit
Car /li Sires des ciex En ſanté le tenoit
Li enfes le voit bien Mais nulz ne l'apercoit
De /tel Seignoꝛ vëoir Nulz d'eulz dignes n'eſtoit
Au Juitiau demandent. Qui t'a ſauvé la vie
L'enfant que j'ai mengié Ne le veez vous mie
Il me tient par la main J'ai bone compaignie
Se de lui m'eſlonjoie Bien feroie folie.
Quant le pere et la mere oyrent l'examplaire
Que /li Sires des ciez Poꝛ ſes amis ſcet faire
Baptizier et lever Se firent ſans contraire
/Nostre Dame ſervirent De /leur loy n'ont que faire
Et li uns et li autres Furent de bone vie
/Noſtre Dame ſervirent Tant com furent en vie
Leur filz mirent a lettre Ce ne fu pas folie
Si bien apꝛiſt li enfes Preſtres fu en ſa vie
Le cle[r]s qui ce dit fiſt nous dit et nous teſmoigne
Que il eſt fox pꝛouvez Qui /tel Seignoꝛ eſloigne
Et qui de lui ſervir Nuit et joꝛ ne ſe paine
Con font cil /Coꝛdelier Cil /Jacobin cil moine
Oꝛ pꝛions tous et toutes De bon cuer /le Seigneur
Qui l'enfant au Juif Sauva dedens le four
Qu'il nous doinſt en ce ſiecle Ouurer de tel labour
Que nous puiſſons avoir Son conduit et ſ'amour