Il eſt aucuns folz qui ſe plaint
Par maint grief plaint
En mo[n]ſtrant plaint
Qu'amours en li seruant l'amoꝛt
Si toſt qu'en ſon seruice maint
J'en connois maint
Qui ſe remaint
D'amer en deſirant la moꝛt
Mais le cuer qui a ce ſ'amoꝛt
Amours connoiſt bien ſ'il ſe faint
Car en depoꝛt
Sanz nul deſpoꝛt
Vit li cuers qui amours achaint
Je le connois evidanment
Par .i. lieu gent
Noble excellent
La u je choiſi .i. papegant
Qui pꝛioit amoꝛeuſement
Et doucement
De ſentement
Une Mauuis par douz aſaut
De cuer gay amoꝛeus et baut
Li diſoit li miens cuers ſe rent
Sanz nul defaut
Ne point ne faut
De faire vo comendement
Quar par vous ſui pris et eſpris
Et entrepꝛis
Par ſi douz pꝛis
Que ſe plus que ſouhait avoie
De touz bien d'umain paradis
Se m'eſt il vis
Par vo douz vis
Que mielz ſouhaidier ne poꝛroie
Tant ai dedenz mon cuer de joie
Et eſt d'amours mes cuers ſaiſis
Qui ſi ſ'eſioie
Ou que je ſoie
Qu'il eſt touz en deduit ravis
Et en ce point a dez ſ'arai
Tant com vivrai
Car ſanz eſmai
Ai demoure toute ma vie
Depuis que premiers vous amay
Si ſeruiray
De vrai cuer gay
A vous de qui j'eſpoit l'aiie
Car j'ai eſperence jolie
A qui du tout m'apoy et cray
Dont ſanz folie
Serez ſervie
Pour la grant valoꝛ qu'en vous ſay
Premiers pris fin par regarder
Et aviſer
Et par penſer
A la voſtre plaiſant figure
Qui le cuer me vint enbꝛaſer
Et alumer
Sanz entamer
De ſi amoꝛeuſe pointure
Que je le ſenz outre meſure
Par dedenz mon cuer figurer
Ce m'aſeuure
De la ſeuure
Voie de liece trouver
Car voſtre douz regarz joiex
M'eſt deliteux
Et ſauoureux
Sique la pꝛeng douce subſtance
Et ce me fait vivre amoureux
Et deſireux
D'eſtre ſongueux
De manoir adés en plaiſence
Car tres amoureuſe eſperance
M'i fait vivre comme euureux
Et ſanz grevance
Le mien cuer lance
Poꝛ voſtre amour coꝛs gracieux
Et ſi ai amoureux deſir
Pour moi nourrir
Sanz ja partir
Du douz noble amoꝛeus repaire
La u je pris le douz ſouvenir
Qu'en ſon venir
Par conioir
Me fiſt a vous amer atraire
Ne ja je ne m'en quier retraire
Quant plaiſance ai en vos veir
Quar moi refaire
Par douz afaire
Poez par vo ſimple pleſir
Car amours a en vous plante
Humilite
Aveuc biauté
Ce me fait vous amer ſanz faindꝛe
Car garnie eſtes de bonté
Et d'onneſte
Deshonneſte
Ne puet dedenz vo cuer remaindre
Et pour ce ne me doi refraindꝛe
De vous ſervir en loiauté
Et joie graindꝛe
M'en vient achaindꝛe
Car biens ſanz nombꝛe j'ai trové
Donc je doi amour gracier
Qui moi lier
Sanz deſlier
Me vaut de ſi noble liien
Que j'ai amoureux deſirier
Sanz empirier
Ne ja changier
Ne poꝛroie a ſi hautain bien
Li miens cuers le ſent et ſet bien
Que plus ne me puis avancier
Si n'ai mais rien
Cuer qui ſoit mien
Car tout l'avez a juſticier
Par vo douz amoureuz ſemblant
Sui menez tant
Que cuer d'amant
Couient frans cuers loiaus que j'aie
Car en vostre grace eſp[er]ant
Et en amant
A vous penſſant
Ne quier ja que je m'en retraie
Ainz vous seruirai d'amour vraie
De loial cuer en deſirant
Si ne m'eſmaie
Que grace n'aie
Se bien connoiſſiez vo seruant
Car en vous maint ſenz et raiſon
Diſcretion
Et motion
De connoiſtre .i. vrai cuer loial
Qui met en vo pꝛouiſion
S'entention
Sanz traiſon
Penſer come a la floꝛ roial
Et ſur toutes eſpecial
Si que la pꝛeng refection
Si general
Qu'eſquiex de mal
En ſui et oſte de fricon
Ainsi en joie et en deduit
Prent ſon refuit
Et ſon conduit
Mon cuer qu'amoꝛ argue et point
Et en plaiſance ſe deduit
Rienz ne le nuit
Ne ne deſtruit
Tant l'a amours a li aioint
De ſi tres amoureuz aioint
Que de tout meſchief ſe ſent voit
Si ne faut point
De gaiete et joꝛ et nuit
Car vo douz regarz atraians
Qui eſt rians
Et deſuiſans
Me miſt en l'amoureuſe ſente
Par quoi je fui deduit ſenz tens
Si ſui manans
Et demoꝛans
Si eſt roiſon que mon cuer ſente
En l'eſtolz de l'amourouſe ente
Par qui je ſui gais et chantans
Et en l'atente
De la pꝛeſente
Joie dont amis eſt joians
Je ne me plain que d'un trop tart
Qu'amour ſon dart
Par vo regart
Par dedenz mon cuer treſperca
Car ſi parfetement ſ'eſpart
Tout ſanz eſcart
Mon cuer e[n] part
Autre que vous bele n'i a
Ne jamés ne ſ'en partira
Si ſupli amour qui le gart
Car il ſent ja
Coument il va
Des nobles biens qu'amours depart
Ainsi mon cuer joie demaine
En vo demaine
Dame hautaine
Et eſt eſchieuez de triſtour
Qui moi ſoloit eſtre prochains
Oꝛ m'eſt lointaine
Tres ſouueraine
D'onneur et tres parfaite floꝛ
Qui j'aime criem croy l'aour
Et ferai par amoꝛ certaine
Meilloꝛ laboꝛ
Ne puet nul jour
Faire cuerz qui joie a pour paine
Car par .i. gracieux eſpoir
Par qui j'eſpoir
La crace avoir
Que vrais cuers d'ami doit atendꝛe
Lieſce me fait eſmouoir
Sanz moi mouvoir
Ne main ne ſoir
De ce qu'amours m'a fait emprendre
Car puis qu'amour m'a fait eſprendre
Et mis en ſon noble manoir
Je doy entendꝛe
De vray cuer tendꝛe
A vostre grace recevoir
Si vous ſuppli dame loee
Tres bien amee
Et deſirree
Que vous ſoiez vers moi piteuſe
Car ma plaiſance eſt oꝛdenee
Et ma pensee
Que ja muee
Ne ſoit de vous tres gracieuſe
Car j'ai par vous vie joieuſe
Qui m'eſt en enmant pꝛeſentee
Si deliteuſe
Qu'adés ſongneuſe
Ert de vous amer bele nee
Douce mauuis ſoiez eſpriſe
Et d'amour pꝛiſe
Par telle guiſe
Qu'en toz eſtaz me retenez
Car amour m'embꝛaſe et atiſe
Par ſa franchiſe
Que ſanz deuiſe
Es tous mes cuers a vous donnez
Et ſi eſt ſi encoꝛpoꝛez
Dedenz l'amoꝛeuſe pourpꝛiſe
Que ja oſtez
Ne deſeurez
N'ert. puisque m'entente i ert miſe
Car amour d'eſpoir me prevoit
Qui aſſez voit
Se j'ai bon dꝛoit
Et bone cauſe d'eſtre amans
Car en ce lay chaſcuns percoit
Que ſanz deſtroit
Mes cuers recoit
Tout le contraire des dolans
Car je ſui en joie manans
Ne nus grief ne m'en oſteroit
Tant ſoit grevans
Qu'adés joianz
Ne ſoit me cuers que lieu qu'il ſoit
Dame car ſouuenirs eſtaint
Touz maus et taint
De ſi gent taint
Que li miens cuers prent ſon reſoꝛt
En celle vertu qui tout vaint
Mal. et reſtraint
Non pas eſtraint
Mes les loiaus tien en confoꝛt
Et oſte de touz deſconfoꝛt
Qui ainſi qui doit ſi enpaint
Si qu'en deſcoꝛt
Et ſanz acoꝛt
Eſt a moi qui ſe plaint et faint