En l'onneur De marchéandie
M'eſt pꝛis talent que je vous die
Se il vous plaiſt .i. nouvel dit
Bonne gent ce eſt du lendit
La plus roial foire du monde
Si com Diex l'a fait a la ronde
Puis que g'i ai mentencion
Primerain la pourceſſion
De /Nostre Dame de /Paris
Y vient que Dieu gart de peris
Tous les bons marcheans qui y ſont
Qui les granz richeſces y ont
Que Diex les puiſt tous auancier
L'eveſque ou le penancier
Leur fet de Dieu beneiſon
Du digne bꝛas /saint ſemion
Devant aprés ne doit nus vendꝛe
Oꝛ vous voudꝛe ge faire entendꝛe
La fernaiſie qui me vint
Quant a rimoier me covint
Au bout par de ſa regratiers
Trouve barbier et ſeruoiſiers
Tauerniers et puis tapitiers
Aſez pꝛez d'eulz ſont li mercier
A la coſté du grant chemin
Eſt la foire du parchemin
Et aprés trove li pour point
Dont maint homme eſt veſtu a point
Et plus la grant peleterie
La tiretaine dont ſimple gent
Sont reueſtu de pou d'argent
Les luigieres n'i ſont pas toutes
Je m'en retourne par les coutes
Puis m'en reuing en une plaine
La ou l'en vent cuirs criz et lainne
Puis adꝛeſai au bout arrier
La ou je commencai premier
Par devers la crois du lendit
Pour miex aconſeuoir mon dit
M'en ving par la feronnerie
Apres trouvai la baterie
Coꝛdouanier et bourrelier
Sellier et freinier et coꝛdier
Chanure fille et coꝛdouan
Aſſez y ot paine et ahan
Marchans qui la ſont aſſamblez
Faus aprés fauſilles a blez
Si y trouvon qui les ſet querre
Queus d'/ardenne et d'/engleterre
Haches coignies et tarieres
Et trenchans de pluſeurs manieres
Moꝛtelier bancier trouvai
Taneur megeis de bon conroi
Chauſier huchier et changeour
Qui ne ſont mie le menour
Il ſe ſont logie bel et gent
Apꝛés ſont li jouel d'argent
Qui ſont ouvré d'oꝛfauerie
Come ſample grant deſuerie
Je ni ui que .iii. eſpiciers
Et ſi le mes convient noncier
Puis m'en vins en une ruelle
Eſtroite ou l'en vent la telle
Yceulz doi je bien anoncier
Et aprés le chaneuacier
Aincois que je ſoie a repos
Plairiaus eſcueles et pos
Trouve qui ſont ouvré d'eſtain
Oꝛ dirai du meſtier hautain
Que n'a matere miex apere
C'eſt cis qui tous les autres pere
Ce ſont li dꝛapier que Dieu gart
Par biaus dꝛas l'alions regart
Diex gart ceus qui les ſeuent faire
Des marchéans de bon afaire
Doit on parler en tous bons lieus
Pour ce que je ne ſoie oiſeus
Voudꝛai nommer ſelonc mon ſens
Toutes les viles par aſſeus
Dont la foire eſt maintenue
Premier eſt /paris amentue
Que c'eſt du monde la meillour
Si li doit on poꝛter honnour
Tous biens en viennent dꝛas et vins
Apres parlerai de /pꝛouuins
Vous ſavez bien comment qu'il ſiet
Que c'eſt l'une des .xvii.
Apres /Rouen en /noꝛmendie
Oꝛ oez que je vous en die
En mon dit vous amenteurrai
/Gant et /ypꝛe et puis /douay
Et /maaline et /bꝛoiſelles
Je les doi bien nommer com celles
Qui plus belles ſon a voir
Ce vous fai je bien aſſavoir
/Cambꝛai cité et /moncoꝛnet
/Mauberge et /avés i met
/Nogent le rotro et /dinein
/Manneval /toꝛot et /caen
/Louuiers et /bꝛeteul et /vernon
/Chartes /biauuais cité de non
/Eureus et /amiens noble halle
Et /troie et /ſens et /aubemalle
/Endeli /doullens /saint lubin
Selon c'on dit en /conſtentin
Et /montereul deſus la mer
Et /saint cointin et /saint omer
/Abeuille et /tenremonde
/Chaalons ou moult de pueple abondele
Bons marcheans et plain d'engien
/Dieſtre aprés et puis /enguien
/Louuain /popelines trouvai
/Valenciennes et puis /tournai
/Toꝛigni et puis /darneſtal
Et aprés trouvai /boneval
/Nogent le roy et /chaſtiaudun
/Maufumier metrai en quemun
/Aubenton y doit eſtre bel
Et le temple de /mont doublel
/Coꝛbie /courterai et /erre
/Baieus /chanbel M'i faut atraire
/Hal et /grant mont tret en /bꝛebant
/Boutras et gent plein de biens
/Villeuoꝛt ne veul pas leſſier
/Pauilli ne /moutier villier
/Monſiaus y metrai et /blangi
/Lille en /flandꝛes /creſſi et /hui
Et /arras cité et /vervin
Par tans en ſarez le couuin
/Eſtampes metrai en commun
Et /le chaſtiau de melleun
/saint Denis ou je fui tout aiſe
Nommerai et aprés /pont aiſe
/Gamaches bailleul et /endene
Pour ce que je ne mes aſenne
N'oubli pas /miaus ne /laigny
Ne /chaſtiau landon quant y fuy
Au lendit merci /Jhesucriſt.
Je les mis touz en mon eſcriſt
Si n'obli pas comment qu'il aille
Ceus qui amainent la be[s]taille
Vaches bueus bꝛebis et poꝛciaus
Et ceuz qui vendent les chevaus
Ronſins palefrois et deſtrier
Les meilleurs que l'en puet trouver
Iumens poulains et palefrois
Telz comme poꝛ contez et pour roys
/Jhesus qui eſt ſouverain Diex
Leur ſauve a treſtous leurs chatiex
Et leur doint grace de gaaignier
Quanqu'il eſt de bon poꝛ mengier
Et bon vin tout vient au lendit
Il me ſamble que j'ai voir dit
Et pour mon dit miex peublier
Je n'i doi mie oublier
Les belles dames que Dieu ſaut
Qui demeurent en pipenſaut
Je pꝛi Dieu qu'en terre et en mer
Gart tous Marcheanz et veille amer
Sainte eglyſe eſt d'euz ſecourue
Et la povre gent ſoutenue
A biref parler Diex les gart tous
D'anui de parte et de courous
Et ſi leur doing marchéander
Qu'en paradis puiſſent aler
Et les marchandes auſſi
Je pꝛi a Dieu qu'il ſoit ainſſi