Ce fu ou moys pleſant de may
Que le ſoulaus eſpant ſon ray
Et que cleꝛe eſt la matinee
Et li rieu queurent par la pꝛee
Et par le bois et par les plains
Tant que maint kaues en eſt plains
De ces ruis venans des fontaines
Li oiſel de leur vois hautaines
Fonttanir riuieꝛes et bois
Tout dꝛoit le premieꝛ joꝛ dumois
De may que je ai ſus nomme
Enlan dela natiuite
Noſtre ſignour mil.trois cens
Et trente huit .i. pou penſans
Tout ſeul ſus mon cheval aloie
Le ſentieꝛ d'une eſtroite voie
Qui a .i. bois mena dꝛoit
Ne faiſſoit trop chaut netrop froit
Ainz ieꝛt cleꝛs et ſoues luours
Et mes chevaus ala entours
Le bois et dedens bien parfont
Regardai aval et amont
Et ne ui riens foꝛs ſeul oiſſiaus
Qui chantent ſus les arbꝛiſſiaus
A vois claretes et plaiſſans
Et tant debien me fiſt leur chans
Que dꝛoit illecques remanoir
Me convint. ſifis mon manoir
Dun arbꝛe haut grant et foillu
Si biau nauoie mes veü
Le bois regart et letemps cleꝛ
Soy. le chant dont pris apenſeꝛ
A celle aqui j'ai tout donne
Mon cueꝛ debonne voulenté
pour ſa biauté pour ſa valour
Je croi quains Dieus nefiſt meillour
Bien et ſauoirs par faitement
Eſt enli honneur me fiſt grant
Amours quant pour moꝛ leſtabli
Et plus grant bien mefait auſſi
Ce que veꝛs moi eſt tres loiaus
Mes dous repos et mes ſoulaus
Silain decueꝛ ſus toute rien
Pour le ſoulas et pour le bien
Que j'ai delui ſans vilonnie
Ceſt mon cueꝛ mon ſens et mauie
Meſpeꝛance mon bien monnour
Panſant alui en tel doucour
Vi venir par le bois le pas
A pié plante de gent nonlas
Mes viſtes et eſcourciez haut
Oꝛent leur dꝛas comme bidaut
Eſpiez poꝛtant lances et dars
Hardis ſemblent comme liepars
Enſemble furent plus de vint
Maint chaceeur aprés eulz vint
Qui mainnent les chiens en couples
Damoiſſelles i vint aſſés
Et dames ſus apeꝛs courſieꝛs
Qui en laiſſe mainent leurieꝛs
Alans d'eſpaingne et chiens meſtis
Coꝛps diuoire avoient fetis
Li plus delles pendens au couls
Je ne fis pas adont que fols
Car je uing eꝛranment vers lour
Entre la gent vi mon ſeignour
Gaſton de lille ſans cheval
Tantoſt me diſt remon vidal
Deſcent apie prent une lance
Se Dieus vous gart demeſchëance
Sire fis je dites moi dont
Quel gent ſont ce qui par ci vont
Et il me reſpont voulentieꝛs
Le vous dirai mes amis chieꝛs
Remon. ceſt le conte defois
Mes couſins et tu nel connois
Mes freꝛes meſire beꝛtrans
Et dautres compaings n eſai quans
A o eulz ſi ont leur afaire
Apareillie pour chace faire
Oꝛ me dites des damoiſelles
Et des dames qui tant ſont belle
Qui elles ſont ne ſe chacieꝛ
Veullent o vous ouil deꝛieꝛ
Sont parties por choſe faire
Qui doit atreſtous les bons plaire
Car chacieꝛ veulent meſdiſant
Qui ſont aus amans nuiſſans
Et. la en pues vëoir tel paire
Dont chaſcune a plaiſant viaire
Ja ala chace commancie
La belle blonde leſchenie
Qui tient armygnac et rodais
Des meſdiſſans veult faire pais
O lui ma dame margueꝛite
Entre bonnes por bonne eſlite
S'il en a nule enceſtui mont
Ceſt viconteſce de biaumont
Et cil et celles qui ci vois
Et vous meiſmes chaceꝛois
O ces .ii. que vous ai nommes
Qui de bien ſont toutes comblees
Je reſpondi liez et ioiaus
Sui de chacieꝛ faus meſdiſans
Mes ou le pourrons nous troueꝛ
Dont me dit il a .i. ſengleꝛ
Qui demeure dedens ceſt bois
Grans et hydeus coꝛſus et noirs
Eſt demoure y a lonc tans
Si a bien .i. connte dedens
Oꝛ pourrez oir grant merveille
Ainz mes noiſtes ſa pareille
Cilz poꝛs dont je vous vois parlent
Fu jadis homs grant et puiſſant
De coꝛs et damis et dauoir
Et de terre et moult ot pooir
Mes faus et meſdiſſant eſtoit
Sique plus eſtre nel pooit
De touz meſdiſſoit arelay
Des hommes fuſſent cleꝛc oulay
De dames et de damoiſſelles
Et mariees et pucelles
Nul ne povoit ali dureꝛ
Tant eſtoit plain demeſparleꝛ
Pres de lui eſtoit .i. chaſtiaus
Ou demouroit .i. damoiſſiaus
Qui biaus eſtoit adés meſure.
Enlui foꝛmeꝛ ot mis nature
Toute ſentente et ſon povoir
Si biaus eſtoit adire voir
Que nuls ne le pourroit deſcrire
Ne cueꝛ penſeꝛ ne bouche dire
S'il ieꝛt biaus trop plus ot bonte
Sens et valeur et honneſte
Neſtoit pas filz de vauſſour
Mes filz de dame et deſeignoꝛ
Vint et .ii. ans povoit avoir
Et nëant plus adire voir
Pres deus manoit une pucelle
Se cilz ieꝛt biaus elle eꝛt plus belle
Et de bien et doneur ſi plaine
Quelle en ieꝛt la dꝛoite fontaine
Tant avoit en li de bonté
Que de touz biens avoit paſſe
Celles qui ains furent et ſont oꝛés
Et qui eꝛent autemps deloꝛes
Ainſi com renommee poꝛte
Sus tretoutes lonneur empoꝛte
Moult eſtoit daage auenant
Acomplis n'avoit pas .xx. ans
De haut lingnage eſtoit iſſue
Et de gent de moult grant value
Andui loiaument sentrameꝛent
Et foi et honneur ſe poꝛteꝛent
En ce bien veſquirent lonc temps
Elle amie et li urays amans
Moult viuoient achieꝛe liee
Nulz deulz ſi n'ot dautrui envie
Et pour l'amour dela pucelle
Fiſt cil mainte pꝛoeſce belle
Li felons traitres puans
Ciſt lechieꝛre ceſt meſdiſſans
Qui pꝛés de ces .ii. demouroit
Par pou li cueꝛs ne li crevoit
Quant apeꝛcut leur bonne vie
Dont cuida bien mourir d'envie
Dit que petit ſepꝛiſſeꝛoit
Sen bꝛief. dolens ne leſfaiſſoit
Dont commanca deus ameſdire
Je ne vous pourroie tout dire
Mes tant furent ſi parleꝛ fieꝛ
Quil convint ces .ii. eſloignieꝛ
Car meſdit a ſi troublee
Leur belle et bonne renommee
Qua pou dutout ne lont perdue
Par ſa mauveſſe langue ague
Cil dui vrai amant qui ſage eꝛent
Quant connurent et aviſſeꝛent
Que len enſement deulz parloit
Moult furent leur cueꝛ adeſtroit
Par acoꝛt ne ſe ueꝛront mais
Se dient il ſiſeꝛa mais
Iuing Iuingnet et aouſt paſſez
Bien le tindꝛent mes maus aſſez
En ſouſfri puis li damoiſſiaus
Qui tant eſtoit et bons et biaus
Car quant il vit que conſirrieꝛs
Le convint par foꝛce daleꝛ
Veꝛs ſa dame que tant ot chieꝛ
Il peꝛt le boivre et le mengier
Palez des coulourez deuient
Du mal qui au cueꝛ foꝛt li tient
Ne ſot que dire ne que faire
Por le mal qu'il li convient traire
Leſtut dutout aulit venir
Entel point qu'il cuidoit mourir
Autreſi fiſt la damoiſſelle
Qui tant eſtoit et bonne et belle
Car leur deſtreſce et leur dolour
Leur a croiſſoit de jour enjour
Li danziaus qui touz eſtoit tains
Fu .i. jour du mal ſi atains
Que on cuidoit qu'il deüſt partir
Du ſiecle et illecques fenir
Grant piece ſouffri cel toꝛment
Qu'il n'ot ne ne voit ne nentant
A chief de piece eſt revenus
Parla a dit dame venus
La deeſſe des amoureus
Et vous vrais Diex d'amours qui tiens
Eſtez que vous touz connoiſſiez
Les penſeꝛs vous pꝛi quadꝛeciez
Soit vos povoir et vo uaniance
Sus celui par qui tel grevance
M'eſt hui toꝛnee ſus le coꝛs
Si uraiement conques encoꝛs
Jour en vers vous ne mes ſeꝛvi
Ne vers celle que j'ai ſeꝛvi
Et ſeꝛvirai toute ma uie
Sanz penſeꝛ rain de vilonnie
Li vrais Diex d'amours tout puiſſans
Li gouuerneꝛres des amans
Sa pꝛieꝛe recut en gré
Et eꝛranment il a ouvré
Car ce mal meſdiſſant felon
Qui onques nefiſt ſe mal non
Devant treſtoute ſameſnie
Qui ſeꝛvi lot toute ſauie
Droit enmi lieu de ſon palais
Ou eſtre cuidoit plus empais
En .i. poꝛc ſanglieꝛ le mua
Toute la gent ſen merueilla
Quant delez eulz virent tel beſte
Il ne ſeuent que cepuet eſtre
Par le Dieu d'amours voulenté
Saillent ſus en talente
Delui ocirre et detrenchier
Et quant il ſe vit dechacieꝛ
Hoꝛs ſaut en cebois vint tout dꝛoit
Il a bien .c. ans oꝛendꝛoit
Et a tant teꝛmes li fu mis
Dont Dieu qui nieꝛt pas ces amis
Ce teꝛme paſſeꝛ ne povoit
Mes dꝛoit ace point moꝛt ſeꝛoit
Par les plus amoureuſſes gens
Qui ſeꝛoient aicel temps
Bien croi ces teꝛmes eſt venus
Por ce ſommes nous eſmeüs
Par tans le veꝛres eſleueꝛ
Adont commanca a coꝛneꝛ
Ses freꝛes meſire beꝛtrans
Et chaſcune vait des tachans
Les chiens qui bien ſeuent tracieꝛ
Premieꝛs commanca deſtachieꝛ
Margueꝛite dechauuigni
Deus chiens dont l'un ot non ainſi
Belacueil qui bien vait cheꝛchant
Lautre leeſſe eſt puiſſant
Pour meſdiſſant meneꝛ amoꝛt
Elles eſcrie pour confoꝛt
Belacueil alez bien ceꝛchant
Belacueil vous ſavez bien tant
Que faites meſdiſant creveꝛ
Pres de vous ne puet demoureꝛ
Belacueil nul mauvés felon
Leeſce par bone raiſon
Ledeuez vous cherchier tout tans
Leeſſe confont meſdiſſans
Qui ont dire tout le cueꝛ pꝛis
Il ne veulent ne ieu neꝛis
Pour ce leeſce les confont
Ceꝛchiez aval ceꝛchiez amont
Leſenglieꝛ qui tant eſt mauvez
Blanche defois ſen vint aprés
A tout .ii. chiens que maine apart
Biau maintien avec dous regart
Que laiſſe aleꝛ criant plus haut
Biau maintien crieꝛ ne vous chaut
Vous chaciez vilains par uſage
Dous regart vous faitez dommage
Aus felons par leur faus cuidieꝛ
Biau maintien alez les cheꝛchier
Ces meſdiſſans trop vous gueꝛroie
Dous regart courez ala pꝛoie
Pour ce le devez vous honnir
Dous regart vous faites mourir
Les meſdiſans ſeul pour vëoir
Apꝛés vint pour li decheoir
Sebilla a grant voulenté
De chaſtiau nuef ſon chien bonté
Et grace maine pour chacieꝛ
Hautement commance acrieꝛ
Bonté bonté alez alez
Le meſdiſſant toſt me prenez
Bonté il eſt vos anemis
Mes pour ce vous nen valez pis
Foꝛs detant que par ſon mentir
Vous fet a vos voiſins hair
Et fet croire pour veꝛité
Ce qui eſt pure fauſſeté
Mes vous pour ce ne vous changiez
Dont li ſangleꝛs eſt courouciez
Faites le creveꝛ ſans demour
Grace ceꝛchiez bien la entour
Grace quant meſdiſſant vous ſent
De duel mourir cuide ſouvent
Vous li faites ſon dur cueꝛ fendꝛe
Grace chaciez alez le prendꝛe
Car il vous het ſus toute rien
Puis vint genſac de muſyden
Cheuauchant la groſſe embleure
O ſon bon chien quot non dꝛoiture
Lautre valour qui tres bien chace
Il leſſe aleꝛ par mi la place
Les chiens criant agrant baudour
Ceꝛchiez dꝛoiture et valour
Le meſdiſſant fax plain doꝛdure
Vous le devez ceꝛchieꝛ dꝛoiture
Car toꝛt maintient et ceꝛchier maus
Et vous honneur com vil et faus
Le dechaciez auous en eſt
Car anul meſdiſſant ne pleſt
Honneur pour riens bien leſauez
Autre polie vint apꝛés
Galharde cointe et enuoiſſie
De chaſtel nuef ſon chien deſlie
Iouneſce l'un l'autre franchiſſe
Elle crie com bien apꝛiſſe
Ionneſce ceꝛchiez par dela
Le le meſdiſſant la ouil va
Car il vous poꝛte grant hayne
Franchiſſe traciez qu'il ne fine
De vous meſdire touz les jours
Gardez nait reſpit ne ſe cours
De duel le faites toſt mourir
Apres vint amoult grant pleſſir
De bꝛion lapꝛeus margueꝛite
Pour tueꝛ et rendꝛe meꝛite
Auſenglieꝛ meſdiſſant felon
Car nul temps nefiſt ſemal non
Elle maine .ii. chiens legieꝛs
Cointiſe apelle lipremieꝛs
Lautre bon eſpoir qui tant vaut
Elle les eſcrie moult haut
Avant cointiſſe bien ceꝛchiez
Bon eſpoit tantoſt le trouvez
Le faus felon qui deſconfoꝛte
Cointiſſe grant envie poꝛte
Le meſdiſſant quant il vous voit
Bon eſpoir ja foꝛſenne dꝛoit
Li cuiueꝛs quant il vous ſet vif
Tuez dont le ſangleꝛ cheſtif
Alés ceꝛchant toſt ſans targieꝛ
Apres vint ſus ſon grant courſieꝛ
Madame aude de noble fueꝛ
Debel pug qui chace de cueꝛ
Le ſangleꝛ et ne la ſeure
De ſon bon chien qua non meſure
Et l'autre bonne voulenté
Sileur eſcrie de bon gré
Avant meſure ceꝛchiez bien
Le meſdiſſant qui ne vaut rien
Bonté voulenté courez foꝛt
A ce felon qui vous ha toꝛt
Car il vous het vous maudit
Voulente celonc que il dit
Il vous poꝛte moult grant hayne
Autre vint degrant valour fine
Lapꝛeus de talayrant al gaya
.II. chiens maine quetant eſt gaye
Par leur nons pꝛivé et doutance
De tueꝛ meſdiſſant ſauence
Si dui chien ſeuent bien chacieꝛ
Encrient leur veult bien aidieꝛ
Sileur dit doutance et pꝛivé
Ceꝛchiez le boys ceꝛchiez le pꝛe
Le meſdiſſant ouplus parfont
Doutance vous ſavez qui ſont
Cil pour qui convient adouteꝛ
Priue vous devez bien aleꝛ
Et le ceꝛchiez aqui quan poys
Apres vint amoult grant eſfrois
Girarde du foſſe la large
.II. chiens maine dont nulz ne targe
Pour donneꝛ auſenglieꝛ triteſce
Li uns deus eſt nommes largeſce
Lautre biau parleꝛ qui eſt bons
Et les eſcrie par leur nons
Largeſce alez et bieu parleꝛ
Anemis eſtez du ſangleꝛ
Qui tant eſt vilz bien le ſavez
Une autre vint plus toſt aſſez
a coꝛs faitis polis et biau
La ſimple madame yſabiau
De ſaiſſac acueꝛ adure
Qui ſon bon chien humilité
Mainne pour chacieꝛ et ſouffrance
Eſcriant foꝛt ſi les auance
Et dit humilité tout dis
Eſt li ſanglieꝛs vos anemis
Et ſouſfrance le vaint touz jours
Alez donnez li mal ſeiours
Car par vous ieꝛt li felons moꝛs
Apres vint amoult grant eſfoꝛs
katheꝛine la bien ſenee
De talairant qui moult ſagree
Dechacieꝛ meſdiſant honnis
O ſon chien qui ot non biau ris
Douce pensee avecques lui
Elle ceſcrie alui alui
Biaus ris alez faites languir
Ce meſdiſſant ou toſt mourir
Doutance pensee ceꝛchiez tant
Que muire ce faus meſdiſant
Car raiſon eſt que par vous meure
Une autre len ſuit ſanz demeure
Ce eſt girarde de maſas
Ceſte n'ot onques le cueꝛ las
Touz joꝛs veut chacieꝛ loin et pres
Elle ot ces .ii. chiens acouples
Li premieꝛs eſt acointement
Lautre deliz plus toſt que vent
Le vont ceꝛchant toſt ſanz arreſt
Et elle crie par ici eſt
Acointement et vous deliz
Par vous doit bien eſtre honnis
Faites le mourir adolour
Lautre qui vient agrant baudour
Ce eſt Marie de chaumont
Biau reſpons mainne qui confont
Le ſanglieꝛ et a ſeure
Ces .ii. chiens ot el amene
Enhardir les fait en crient
Alez biau reſpons tout avant
Je croi que par vous honnis ſoit
Aſeure li cuiueꝛs doit
Mourir par vous que bien le ſai
Une autre vint tout ſanz delai
Qui de chacieꝛ touz jours ne fine
Qui de laroche anon daufine
L'un de ces chiens anon deſir
Et l'autre pꝛis qui veut honnir
Les meſdiſſans par grant anui
Haut leur crie pꝛenez celui
Pris et deſir par vo nature
Chaciez le ſanglieꝛ plain doꝛdure
Et de meſdis quieſt tout plains
Ceꝛchiez par tombes et par plains
Gardez que plus ne die mot
Sus ſon courſieꝛ vint le grant trot
kateꝛine agrant valour
De painne qui ſon chien baudour
Mainne pour chacieꝛ et confoꝛt
Si va criant amoꝛt amoꝛt
Baudour confoꝛt ceꝛchiez apeꝛt
Le meſdiſſant ſevil cuiveꝛt
De mal eſt plain et de venin
Ceꝛchiez toſt et menez afin
Confoꝛt prenez le vif ou moꝛt
Courant vint le courſieꝛ trop foꝛt
De cardillac quot non conteſſe
Elle mainne .ii. chiens en leſſe
Ceſt honneur et habandonne
Si leur crie haut entonne
Avant ha bandonne honnour
Faites mourir agrant dolour
Le faus meſdiſſant plain denuie
Je croi qu'il doit peꝛdꝛe la vie
Et mourir en ceſte joꝛnee
Le grant tropt vint par mi lapꝛee
La pꝛeus bien apꝛiſſe aſſalhie
De bedos cointe et polie
Ses .ii. bons chiens quelle menoit
Quant furent eſlargi tout dꝛoit
Vont auſanglieꝛ poꝛ li ocirre
Eſcriant leur commance adire
Raiſon et ſavoir bien alez
Ceꝛchiez partout ſi le tuez
Alés dꝛoit alui ne vous chaut
De lui honnir que petit vaut
Car il eſt ſanz toute bonté
Aucoꝛs faitis bel atoꝛne
Ma dame phelippe la ſage
De lautrie vint a grant coꝛage
Meꝛci ot non ſon petit chien
Lautre connoiſſance qui bien
Seuent les meſdiſſans trouveꝛ
Elle commance aeſcrieꝛ
Avant alez touz jours mercis
Il eſt bon ſe tout eſt petit
Et pꝛens le ſanglieꝛ ſanz faillir
Connoiſſance vait laſſaillir
Et le tue ſeul pour ſentir
Alez dont faites lemourir
Alés meꝛci oꝛ iparra
Puis vint tout ſeul de par dela
uns chiens faitis blans comme nois
Se chien avoit non bonne foy
Si n'avoit ne dame ne maiſtre
Mes miex chaca ſelonc ſon eſtre
Que chiens qui en la chaſe ſoit
Nuls de lui neſentremetoit
Ne dame ni a qui leſcrie
Non pourquant il toudꝛa la vie
Je croi le felon meſdiſſant
Il voit tout dꝛoit apeꝛtement
La ou il ieꝛt ſanz plus atendꝛe
Car le poꝛc cuide il bien pꝛendꝛe
Oꝛeſont li chien eſlargie
Parmi le bois et cil dapie
Criant vont la et ca ceꝛchant
Et tuit li chien vont glatiſſant
Courent par mi le pꝛaieꝛie
Et qui plus puet aus chiens eſcrie
Bel acueil leeſce ales
Biau maintien dous regars coures
Bonne grace valeur dꝛoiture
Ioneſce metez igrant cure
Et franchiſe par ici va
Cointiſſe bon eſpoir dela
Meſure bonne voulenté
Ceꝛchiez doutance et pꝛivé
Largece biau parleꝛ ali
Humilite ſouffrance auſſi
Alés biau ris douce pensee
Acointement deliz magree
Biaureſpons et aſſeure
Deſir et pꝛis ſans fauſſeté
Confoꝛt alez i et baudour
Habandonne et vous honnour
Raiſon et ſavoir et meꝛci
Connoiſſance ceꝛchiez auſſi
Et bonne foi ou plus parfon
Clip clop clap clop ouchemin ſont
Criez dela criez bien haut
Frapes feꝛes criez oꝛ vaut
Bien parfont ceꝛchiez les buiſſons
Avant chiens que tantoſt laurons
Eſtabli fu aus .iiii. coꝛs
Du bois qui gardaſſent dehoꝛs
.IIII. dames achaſcun une
La conteſſe d'armignac lune
Qui tient .ii. leurieꝛs bien courans
Li uns avoit non hardemens
Et li autres fu loiauté
Lautre qui gardoit vers lepꝛe
A .ii. leurieꝛs quel amoit moult
La uiconteſſe debiaumont
Li uns leurieꝛs fu coꝛtoiſſie
Lautre biauté chieꝛe hardie
Qui trop ot lepoꝛc en hayne
De malhoꝛques lapꝛeus royne
Tient biau ſemblant aveques joie
Qui contre meſdiſſans gueꝛroie
Lautre fu lapꝛeus viſconteſſe
Debenauges qui oleeſſe
Tenoit pitié et bien celeꝛ
Chaſcune doit tresbien gardeꝛ
Pour le ſanglieꝛ qui doit venir
Pour li tueꝛ pour li honnir
Oꝛ eſt li ſanglieꝛs hoꝛs iſſus
A foꝛce de chiens eſt venus
Dehoꝛs lebois ſenfuit courant
Illecques meſire beꝛtrant
Tient .i. eſpie a .i. feꝛ large
Dun arbꝛe couveꝛt comme targe
Atandans tous dis leſengleꝛ
A lui ſen vint comme aveꝛſieꝛ
Machant eſcumant dꝛoit alui
Meſire beꝛtram le feꝛi
Du feꝛ de leſpie ſus lateſte
Ilec avant point ne ſarreſte
Le cuida feꝛir de la dent
Adont ſaut meſire beꝛtrant
En .i. teꝛtre qui moult ieꝛt haut
Ha; ſire fis je ne vous chaut
Dautre fois vous afait feꝛir
Tu dis bien voir par faus mentir
Arrieꝛe plus d'une joꝛnee
Le ſanglieꝛ fuit par mi la pꝛee
Et apꝛés li les .viii. leurieꝛs
Et les chiens glatiſſans deꝛrieꝛs
Et les dames ſus les chevaus
Courant par tombes et par vaus
Criant moult haut oꝛ iparra
Aus leurieꝛs qui le tueꝛa
Le ſanglieꝛ eſt tant dechaciez
Qua foꝛce de chiens eſt laſſez
Il eſt tant las que plus nenpuet
A un arbꝛe guenchir leſtuet
Contre chiens la teſte gita
Feꝛant de la dent ca et la
Si qu'an a navré. plus detrois
Meſire de foys vint deffrois
Courant apie gita ſon dart
Sus leſpaule fieꝛt d'une part
Et le ſanglieꝛ vint dꝛoit ali
Li contes atraueꝛs ſailli
Et cil li met leſpie devant
Et li ſanglieꝛs ſen paſſe avant
Ha; fis je meſire defois
Com je croi bien qu'il vous connois
Dautre fois vous a fait anui
Tu dis voir ſi feꝛai je lui
Grant talent ai delui tueꝛ
Loꝛs ſenuait bꝛuiant le ſangleꝛ
Touz navrez ſemiſt en .i. lac
Loꝛs vint madame d'armignac
Sus ſon cheval foꝛment criant
Alez mes leurieꝛs hardement
A lui rendez le moi tue
Et vous bon leurieꝛ loiauté
Sus touz vous le devez bien prendꝛe
Loiaute alez le tout fandꝛe
Car vostre pooir le confont
Auſſi ma dame debiaumont
Confoꝛtant ces leurieꝛs eſcrie
A li bon leurieꝛ coꝛtoiſſie
Que tous dis vouſe melle courrous
Biaute je croi bien ſavez vous
Coment ſetuent meſdiſant
La royne vient haut criant
De malhoꝛques a ſon leurieꝛ
Biau ſemblant alez le chacieꝛ
Et vous joie ſans nulle faute
La uiconteſſe a voiz haute
De benauges crie de gré
Avant bien celeꝛ et pité
Tues le meſdiſſant vaincus
Il eſt naures il eſt feꝛus
Tantoſt ſeꝛa moꝛs bien le voi
Loꝛs vint le chienet bonne foy
Le vil ſanglieꝛ prent par loꝛeille
Maintenant par trop grant merveille
Li ſanglieꝛs commance aparleꝛ
Hé; las je ne pus plus dureꝛ
Il me convient mourir par foꝛt
Hui deſtinee eſt ma moꝛt
Et mes teꝛmes eſt hui venus
Je ſui naures et recreus
Riens ne me vaut crieꝛ merci
Ne courtoiſſie avecques li
Ne franchiſſe ne bonne foy
Il ſont treſtuit en contre moy
Et touz les biens qui damours ſont
Par coi irai ouplus par font
Denfeꝛ que je fui meſdiſſant
Des mon iouuant tout en avant
Touz jours ai eſté des loyaus
Pour ce mourrez traite faus
Diſtrent tuit car bien eſt raiſon
Loꝛs le feꝛi premieꝛs gaſton
Delille deleſpie dacieꝛ
Sire fis je itel louieꝛ
Avoit lonc tans ja deſeꝛvi
Et meſire iohan feꝛi
De gaillart .i. cop de ſeſpee
Feꝛes ſire ſil vous agree
Que moult nous afait grant dommage
Grant cop lefieꝛt ſus le viſage
Meſire oliuieꝛ de boꝛt
Vous ſavez bien qu'il vous a toꝛt
Ne quans deſtoꝛbieꝛs vous afais
Et meſire le fieꝛt apꝛés
Demon feꝛrant par le coſté
Feꝛes car trop vous a couſte
Le felon plus que il ne vaut
Gantonet fieꝛt qui pas nefaut
Deſpee tranchant par leſchine
Sire fis je la grant hayne
Que il vous poꝛte li rendez
Meſire guirart vint delez
De chaſtiau nuef ſi fieꝛt grant cop
Sire fis je ne povez trop
Feꝛir car tant vous pot hayr
Pieꝛre d'oꝛneſen vint feꝛir
Le meſdiſſant de cop delance
Pieꝛre ce dis je en grant doutance
Vous afait eſtre mainte foys
Tu dis voir et moy tenir cois
Li ſires de iumet vint
.I. grant glaive en ſa main tint
Courant aufelon le gita
Par les flans contre li paſſa
Raymon heꝛnaut ſigrant cop fieꝛt
De pꝛeſſac que mire niquieꝛt
Iohan debiron fieꝛt d'un dart
Siquil paſſe delautre part
Bien ifieꝛt guieꝛart detemines
Sigrant cop que par les eſchines
En .ii. moitiez dꝛoit le parti
Meſire beꝛtram bien feꝛi
De lille qui miex eſt manieꝛ
Defeꝛir ſus hiaumes dacieꝛ
Conneu lauoit autre fois
Et meſire ifieꝛt de foys
Tant qu'il atout de cartelle
Et je ſilai dehoꝛs gite
Du lac ou il eſtoit tuez
Dis meſire beꝛtrans coꝛnez
Lamoꝛt du meſdiſſant felon
Il coꝛne et puis diſt gaſton
Voulez tuit ſoit amon pleſſir
De ceſtui ſanglieꝛ de partir
Ouil crient tuit hautement
Iel feꝛai dont par tel conuent
Que ma dame d'eꝛmignac pꝛeigne
Le pꝛemieꝛ cartieꝛ celle daigne
Et pour ce que miex ſoit veus
En armignac ſeꝛa pendus
Ens ou meilleur lieu qui iſſoit
Apres je weill tout oꝛendꝛoit
Que l'autre cartieꝛ par devant
Soit acelle qui le veult tant
La uiconteſſe de biaumont
Et pour ce qu'il la heoit mout
En en iou le pende moult lait
Madame de malhoꝛques ait
Du ſanglieꝛ le deſtre cartieꝛ
De par deꝛrieꝛe tout entieꝛ
Et quan face itel iuſtiſſe
La uiconteſſe en autel guiſſe
De benauges enait ſapart
Par deꝛrieꝛ leſeneſtre quart
Et ſi le pende ſans delois
La teſte en ait liquens defois
Sans la langue et bien ſegart
Quen haut ſoit pendus aſapart
En lieu ouſoit tres bien veue
Et la langue fauſſe et ague
Mes freres meſire beꝛtrans
Poꝛt avec ſoi car eſt nuiſſans
Soit peꝛtuiſſiee a feꝛs agus
Le cueꝛ ne donrai je anus
Samoi meiſmes non je le weil
Il fu faus cueꝛ et plain doꝛgueil
Diniquite et de meſdis
Pour ce le poꝛteꝛai tout dis
En un feu ardant ſanz cremeꝛ
Ce queſt ou ventre du ſengleꝛ
Tantoſt ſoit ici touz bꝛouis
Car il eſt touz plains de venins
Soꝛ terre ne doit remanoir
Oꝛ eſt moꝛs com povez vëoir
Auſi fuſſent tuit cil qui ſont
Et vous madame debiaumont
Et d'armignac qui ce voulez
A touz vos pouoirs les tuez
Mes dous repos le ueut auſſi
Qui de cueꝛ les het et pour li
Les heꝛrai je ſus toute rien