Qui eſt liez toudis bal
Et a l'eſtuef tribale
Voit a la fois triſtece
A celui choſe eſt male
Qui monte et puis auale
Et chiet a qu'il ſe blece
/Lucifeꝛ fu jadis
Angles en paradis
Sur touz voit eſtre ſires
De ſi haut quieꝛt ſaillis
Chei o ſes eſlis
En enfeꝛ a martire
De tant qu'il eꝛt plus biaus
Des autres et plus haus
Eſt cheus el plus bas
Surs tous eſt fel et faus
Racin eſt de tous maus
Entre les Satenas
Vous qui ceſt eſcript oés
Humblement vous tenes
Si monteꝛes amont
Qui dire enflames
Ses ſens li eſt mues
S'arme et ſon coꝛs confont
Qui d'autrui a envie
Trop a mauveſſe vie
Et ſ'arme endameꝛa
Auarice n'eſt nie
Au charitable amie
Qui ſeꝛt povre ſeꝛa
Accide eſt uns pechiez
Qui eſt a l'ame griez
C'eſt de Dieu adoſſeꝛ
Tieus eſt en luxure lies
Qui en enfeꝛ ſeꝛa lies
Se veꝛra tourmenteꝛ
Qui quieꝛt tout ſon délit
En gloutonnie vit
Son avoir gaſté et ſ'arme
Cil qui ſont endoꝛmit
Es pechiez qu'ai ſi dit
Pueent dire va arme
Li arbꝛes que veü avez
En .vii. ſeꝛpens enracines
Li arbꝛes des pechiez dis eſt
Qui des .vii. ſeꝛpens croiſt et neſt
Pechiez ſeꝛpens dire puet on
Qui ſont felon plus que lyon
Seꝛpens beſte eſt eſpouantable
Car en figure eſt de diable
Que ci comme ſeꝛpens el ciel
Combati contre /saint Michiel
Par ſeꝛpent vint premieꝛs pechié
Dont tous li mons fu engingniez
En cui c'eſtoit li anemis
Pour nous decevoir atapis
Seꝛpans eſt beſte deceuans
Sour toutes autres deuoꝛans
Les coꝛs decoit l'arme deuoire
Quant en enfeꝛ les puet encloꝛre
Dont nous decoit quant nous pechons
Devoꝛe ſommes ſ'en pechié mourons
Chaſcuns ſe mouſtre par painture
Deꝛrieꝛe en humaine figure
Des .vii. la contenance
Puet on noteꝛ et la ſemblance
Sour l'arbꝛe touz montre nous pleſt
Qui de l'oꝛgueil vienent et neſt
Car adont ſur l'arbꝛe montons
Quant les delis del coꝛs queꝛons
Onques nos cueꝛs ſolle ne ſont
Tout dis voulons monter amont
La ou nous cuidons en pais vivre
Icelle qui partout fait cuire
En deꝛrieꝛe nous trebuche arrieꝛe
De teꝛre iſſons et repairons
Et non pour quant pou y faiſſons
Eſcript trouvons en /l'euengille
Que parmi le tuiau d'une aguille
Pourroit miex .i. chameus paſſeꝛ
Que ja riches hons puiſt entreꝛ
Avec Dieu el regne des ciex
Car en richeſce giſt oꝛguiex
Deus fois ſe point j'ai oï dir
Cil qui contre eſguillon eſtriue
Deus fois mueꝛt que enuis mueꝛt
Car le moꝛt d'enfeꝛ en aquieꝛt
Cil mueꝛt en uis qui lait arrieꝛe
Richoiſſes grans maiſſons de pieꝛre
Qu'il a toute ſa vie aquis
Pou penſe d'autre paradis
Se Diex nel fait qui pour nous tous
Eſpendi ſon ſanc preſcious
Sire eſt de tout le mont et roys
Et pour nous vot mourir en crois
Et vainqui l'oꝛguillous serpent
Qui dont regnoit ſur toute gent
De lui nous devroit ſouvenir
Quant il daingna pour nous mourir
Et nous deurions humelieꝛ
Et pour ſoie amour tout laiſſieꝛ
Et pour avoir remiſſion
De nos maus mourir en ſon non
Entendes ſa ſoit hons ſoit fame
Que vaut quant on met riche lame
Sur coꝛs qui pourrit en terre
Quant dedens .i. ſacu de pieꝛre
De ſimple oevre faite uolt geſir
Cil qui tout fiſt a ſon plaiſſir
Entre nous humblement naſqui
Entre nous humblement veſqui
Oꝛ n'eſt nus hons ſ'il n'a denieꝛs
Qu'il ne ſoit oꝛguilleus et fieꝛs
S'il mueꝛt on li fait une lame
Com ſe touz jours i fuſt li arme
Chaſcun chaſcunne ſur ce bee
Et dient tant bien eſt ouvree
Et puis de la endꝛoit ſ'en vont
Pour l'arme autre oꝛoiſon ne font
De l'arme cuident moult de gent
Que ce ne ſoit foꝛs el que vant
Car ſe bien le voir en ſavoient
Je croi autre choſe en feꝛoient
Et moult en ſont ſ'en ſeuſſent
Le jour que il mourir deuſſent
Ja puis ſe di bon jour n'aroient
Car a la moꝛt adés penſeꝛoient
Et non pourquant onques ne fine
Sur nous ne veigne a grant rauine
Helas bon i feꝛoit penſeꝛ
Et de touz maus faire ceſſeꝛ
Si c'om ne fuſt mie ſouſpꝛis
Qui garnis eſt n'eſt deſconfis
Par celui Dieu qui diſt le troſne
Plus ſeure eſt ce croi l'aumoſne
Faite quant en vie eſt li coꝛs
Quelle ne fait quant il eſt moꝛs
Qnt il eſt moꝛs qui ſavra dire
En quel point la pꝛiſt Noſtre Sire
Bien fais c'om fait en vie plaine
Homme et fame a bonne fin maine
Un ſonge vous vourai conteꝛ
Proi vous quel weilliez eſcouteꝛ
Car tel choſe oir i pourrez
Dont a la fois i penſeꝛez
En fable oir et entendꝛe
Pue on ſouvent eſſemple prendꝛe
Une heure avint que je penſoie
Entrues que el penſeꝛ eſtoie
Moult merueilleus ſi m'endoꝛmi
Tantoſt en mon doꝛmant ſi ui
.I. arbꝛe veꝛt grant et fouillu
et a meꝛveille bien fueillu
Mais une fueille n'ot mie
Chaſcune pechié ne ſenefie
Sur l'arbꝛe une dame ſeoit
Qui moult bien aournee eſtoit
Si com fuſt une empeꝛeis
Des oiſſillons ooit les cris
et le ſoulas et le deduit
De quanque vouloit jour et nuit
Devant lui faiſſoit vieleꝛ
et pour li eſbaudir trompeꝛ
Mais a ſa ſeneſtre partie
Eſtoit une eſchiele dꝛecie
Deſus une fame montoit
Sous ſon bꝛas .i. linſel poꝛtoit
La face avoit laide et oſcure
Li maufes en laide figure
L'eſchiele a une main ſouſtient
En l'autre main .i. crochet tient
et diſſoit moꝛt tout li la vie
Car de pechiez eſt entechie
Va pꝛi toi vigueꝛeuſſement
L'eſchiele tieng ſeurement
La uie n'ot de tout ce mie
Car de tout deliz ot partie
Iouiaus ot et ſi eſt ſi awglee
Qu'a ce elle n'entendoit mie
Car li arbꝛes ſur quoi ſeoit
De .vii. viſces moꝛtiex naiſſoit
.Vij. racines de .vii. pechies
Naiſſoient moult bien m'en apens
De l'oꝛgueil qui eſtoit roine
Enmi naiſſoit une racine
Par mi le gueule d'un ſeꝛpent
Adeſtree eſtoit fieꝛcement
De .ii. diables moult tres lais
Car chaſcuns eꝛt moult contrefais
Couronne et ſeptre li donnoient
Avec tout ce li comandoient
Que tant que li ſiecles duraſt
Par tout le monde elle regnaſt
Elle reſpont tant com vivrai
Plain pié de terre ne peꝛdꝛai
Ainz aqueꝛrai de plus en plus
Car plus de moi n'eſt poiſſans nus
Es cieus fui ja dame clamee
Et i demenai grant poſnee
Mais ceus qui dont ſur moi regna
Mout laidement jus me bouta
Et mi et tous ceus qui me seruoient
Et qui de ma partie eſtoient
Puiſſe di ai regne ſa jus
Vers moi ne pot onques puis nus
Pour moi chevalier et pourgois
Maintienent bien toutes mes lois
Meſmement en religion
Ai je ſeꝛjans a grant foiſſon
Qui tout ſont ja a moi aclin
Et ſeꝛont iuſticiez en la fin
Chanoine cleꝛc preſtre diacre
Tout ont de moy aucunne tache
Mie ne le tenez a gas
Tout ai conquis et haut [et ] bas
Et damoiſſelles et grans dames
Et moult d'autres communes fames
Qui ſont cointes et aceſmans
Et qui demainent grans bobans
Mais moult me tolent de mes lois
Li iacopin et coꝛdelois
Et non pour quant tous me gueꝛie
Qui ſouvent eſt de ma meſnie
Si ai de ſous moy .vi. princeſſes
Qui ſont duchoiſſes et conteſſes
Et ſi me ſont apeꝛtenans
Et de moi leur terre tenans
C'eſt ire envie et avarice
Luxure accide avec .i. viſce
Queon apelle gloutenie
De chaſcune ai ſa foi plevie
Ceꝛtes trop me merueilleꝛoie
Se je par tout povoir n'avoie
Uenez a moi conteꝛ dame ire
Que maint homme avez fait ocire
A moi devez venir premieꝛe
Car poꝛtee avez ma banieꝛe
Treſdont c'ociſt /cains /Abel
Son frere dont moult me fu bel
Je ai encontre .i. roy afaire
Qui nous fait toute grant contraire
Il raigne en paradis laſſus
Bien ſai n'oſſe venir ſa jus
Dites moi quel povoir avez
Et qu'avez fait nel me celez
Treſdont qu'/adans manga la pomme
Dame tueꝛ ai fait maint homme
Teꝛres ardoir et eſcillieꝛ
Dieu ai fait ſouvent renoieꝛ
Deſeſpeꝛeꝛ et pariureꝛ
Et de ca meꝛ et de la meꝛ
Et ſ'ai deuiſſe maint toꝛment
Par coi peꝛiſſent moult de gent
Si fais ſouvent pꝛince de terre
Pour peu de choſe entreꝛ en gueꝛre
Par coi povre gent ſont honnis
Et il meiſmes deſconfit
Je ai par tout moult grant pooir
Soit par folie ou par ſavoir
Dame que vous diroie plus
En tout ceſt monde n'eſt cleꝛs nus
Qui peüſt deſcrire ne lire
Ne le toꝛment ne le martire
Que j'ai fet ſouſfrir mainte gent
Par courrous et par mautalent
Contre celui qui laſſus eſt
Pourron moult bien ſe il vous pleſt
Dame partie vous aideꝛai
Jusqu'a la moꝛt ne vous faudꝛai
Racinne ſui de moult de rains
Veꝛs et foillus entieꝛs et ſains
Ca uenez avant dame envie
Si me contes de vostre vie
Et quelle enſeigne vous poꝛtez
Piece a moi conte n'avez
Grant meſtieꝛ ai de vostre aie
Contre /Jhesu le fil /Marie
M'anſeigne dame une flour a
Qui deſus .J. ſeꝛpens eſta
La fleur voit on apeꝛtement
Le ſeꝛpent tient couuertement
Que on ne le connoiſſe mie
Pour miex couvrir la tricheꝛie
La flour bel ſemblant ſenefie
Li ſeꝛpens du cueꝛ le boiſſie
Entre moy et ma ſeꝛeur ire
Auons fait mainte gent occirre
Et /ſon fil chacieꝛ /iacob
Mais onques ne la tienſt a cop
Puis fis /ioſeph entreꝛ em pꝛil
Par ſes freꝛes ſi comme cil
Qui fu en moult grant aventure
Es deſeꝛs fis mainte murmure
Encontre /moyſen mouvoir
Mais onquez ſur lui n'oï povoir
Puis fis /ſaoul /dauid chachieꝛ
Nequedent nel pot damagier
Car Diex ſes ſires li aidoit
En qui ſeꝛuice adés eſtoit
Ou fuſt a dꝛoit ou fuſt a toꝛt
Puis fis ihesum jugieꝛ a moꝛt
As /apoſtres auſi maint martire
Feis me entre moi dame ire
En religion ſui plantee
Et partout ſui enracinee
Que nuls ne me peut eſſoꝛbeꝛ
Foꝛs ſeulement par confeſſeꝛ
Et ne pour quant reuieng aprés
Ja ne ſeꝛa on ſi confeſſes
Que voules que je plus vous die
Ades a mal faire eſtudie
Jamés ne ſeꝛoit dis mez vices
Ne racontes tous mes maliſces
Gens conduiroie a os banie
Contre /le ſoudan de /perſie
Onques point ne vous eſmaies
Car je ai en moi une vainne
Qui de conſeil eſt toute plainne
Dame auariſce ou eſtes vous
piecha que ne contai a uouz
Vous avés bien ſai maint .denier.
Qu'avez vous fait a eſpargnieꝛ
A uſureꝛ a teꝛmineꝛ
Vos eſcrins vaudꝛai deſfeꝛmeꝛ
Car ne pout eſtre ſanz denieꝛ
Nuls hons qui vuele uſurieꝛ
Dame au eſoing voit on l'ami
denieꝛs ai pour vous et pour mi
Mais petit me ſaries de gré
Se faiſoie tant de bonte
Que pour noient lez vous preſtaſſe
Car de ce ne vient nulle craſſe
Denieꝛ vont toſt mais ne reuienent
Seignour sont tout cil qui lez tiennent
S'il vous plaiſt ains c'uſe l'ai
Onze pour douze vous pꝛeſtrai
Ainſi ai je chachie maint homme
A povreté c'en eſt la ſomme
/Arras /amiens et en /loꝛraine
Ai je pꝛeſte mainte ſemainne
En /rommenie en /lombardie
Ai ge preſte toute ma vie
Em mainte vile em /piquardie
Ai termine toute ma vie
Et ſi vous di qu'au commenchier
Les ſai moult bien a planoieꝛ
Si c'on aplaine le chat
Tant c'on li di eſchiek et mat
Nulle choſe donneꝛ ne veul
Car onques faire ne le ſueul
Se ce n'eſtoit tien ce pour ce
Autrement ne feꝛoie je
Carite ai ſi enchachie
Et ſa compaigne courtoiſie
Que on ne ſavroit ou queꝛre
Pour nulle painne en nulle terre
bien le ſachiez caſcune eſt moꝛte
Et quant /larres vint a la poꝛte
Du riche homme a cui j'eſtoie
Faire aumoſne ne li laiſſoie
El monde n'a Roy ne roine
Ne riche homme qui ne m'encline
Car par touz les lieuz ou je vois
Cri on a moi a haute vois
Dame bien venue ſoies
Ci ſ'il vous plaiſt vous hebergiez
Et je demeure volentiers
Ou eſpargnieꝛ puis mez denieꝛs
Car a l'oſtel /ſaint Julien
Fait bon ou il ne couſte rien
Et me fille eſt ſi bien pꝛouvee
Qu'a l'apoſtoille l'ai donnee
C'eſt convoitiſe qui as juges
Oꝛ et argent fait mettre en huces
Car bien ſentent en riquoꝛike
Et en treſtout l'art de fiſique
Pour ce que l'une eſt lucratiue
Et li autre moult burſſatiue
Si fait chevauchier biaus chevaus
Aus prelas et aus cardinaus
Car en tout ceſt monde n'eſt nus
Tant ſoit heꝛmites ne renclus
A cui ma fille ne puiſt plaire
Et qui n'en ait ſouvent afaire
Bien le ſachiez tout a delivre
Sans ma fille ne pout nus vivre
Il n'eſt pꝛinces dus coins ne roys
Ne face bꝛiſieꝛ dꝛois et lois
Ja dꝛoiture n'apꝛocheꝛa
Celui ou ma fille ſeꝛa
Car fauſete et foi mentie
Toute dis li tiennent compaignie
Eſqueuin ne baillif ne maire
Ne li oſent faire contraire
Tout sont obeiſſant a li
Dame pour veꝛité vous di
Nus povres ne peut avoir dꝛoit
En quel lieu que ma fille ſoit
Elle donne conſeil d'embleꝛ
Et de toulir et de robeꝛ
Et quant touez nous acoꝛdons
Moult grant povoir partout auonz
Que vouz feꝛoie je lont conte
Mainte gent vont par moi a honte
Moꝛs eſt /alixandꝛez li roys
Qui me touli moult de mez dꝛois
Dame vo gent eſt bien pꝛouvee
Et partout mainne grant poſnee
Tout le ſiecle pouons deſtruire
Nus n'oſeꝛa ruire ne muire
Oes il conuient dame accide
Que vous fachies a moi aide
Mais je me crieng de traiſon
Ca[r] il a en vous goufanon
Enſeingne de mon anemi
Que ains je ne ting a ami
Dame car ne doutes de mi
Car n'ai talent de faire ainſi
Ains me lairoie les dens traire
Si me gart Diex de tous biens faire
Sachiez g'i fis poindꝛe ſon non
Pour lui faire deꝛriſion
Male pensee geteꝛ peur
Je ne le feꝛoie a nul fueꝛ
Car tez amis eſt mez amis
Si en devons plus eſtre amis
/Le pule iſrael fis eꝛreꝛ
Souvent ydoles aoureꝛ
Dont /moiſez ſe courouchoit
Ou autrez qui lez gouuernoit
Dont Diex loꝛ enuoioit tempies
Qui lez peꝛiſſoit c'eſtoit piez
Et que mez /le Roi ſalemon
Qui tant par eſtoit ſages hon
Donnai ge tel puiſſon a bouire
Par quoi il le couint meſcroire
Et auſi fiſtent autre troi
Car il treſpaſſoient loꝛ loi
Et leſſoient loꝛ dꝛoit chemin
Dont il pꝛendoient pute fin
Meiſmement oꝛ as Creſtiens
Deſtourne je a faire biens
Car quant deuoient meſſe oir
Je leur fais en loꝛ lis geſir
Et quant il enuont au mouſtrer
L'un a l'autre fais conſeillier
Ioueꝛ bourdeꝛ iengleꝛ et rire
Ou aſſés toſt d'autrui meſdire
Maint i vont donc loꝛ oꝛoiſon
Ceꝛtes ne vaut mie .i. bouton
Je l'os bien dire et bien m'afice
Que loiaues ſui en tous ſeꝛuice
Venés avant dame luxure
Acointez vous de vo dꝛoiture
Encontre celui ai afaire
Qui moult peu pꝛiſe voſtre afaire
Gardez que bien ſoiez garnie
Et bien maintenes vos amies
De touz ceuls qu'avés pris atrape
Gardes que nus ne vous eſchape
Dame adés fais vo volenté
Et en yueꝛ et en eſté
Armurez me deues pꝛeſteꝛ
De quoi je me puiſſe apꝛeſteꝛ
Oꝛgueillous dꝛas riches iouaus
Aumoſnieꝛe chainture aniauz
Boire et mengier en lecheꝛie
Adont feꝛai chevaleꝛie
Non pour quant je vous ai ſeꝛvie
Moult loiaument toute ma vie
Car ſanz raiſon et ſanz dꝛoiture
J'ai fait pechié[r] contre nature
Lez .v. cites dez /ſodomites
Par mon engieng furent deſtruites
Dont Diex de laſſuz grant ire ot
En ſes filles fis pechié /loth
Par la gloutonnie del vin
Et la lignie /bengamin
Par moi fu pꝛés toute eſſillie
/Dauis pecha en la fame /urie
/Amon en la fame /abſalon
Qui puiſſedi ociſt /amon
/Abſalon es famez /dauid
Apertement fiſt ſon délit
/Salemons damez que meſcines
En ſa vie ot .viic. roines
Et .iii. cens amies auſſi
Par quoi Dieu de laſſus gueꝛpi
Et ſeꝛvi lez mahomueꝛies
De ſez fames de ſez amies
Par tout le mont ai en mon non
Plantee foꝛnication
Sachiez qu'a mainte damoiſele
Fais perdꝛe le non de pucelle
Coiement lez fais acoleꝛ
Baiſieꝛ pinchieꝛ luitieꝛ taſteꝛ
Karole danſſez et eſpꝛinghes
Fais eſbaudir pour lez meſchinez
Tabours et muſez et viellez
Fais eſbaudir pour ces pucelles
Sachies c'eſt fine veꝛites
Par moi peꝛiſt virginités
Que mes papelars et beguines
Souvent doinz de mes deſciplinez
Que voulez que je plus vous die
Tant ai fait faite puteꝛie
Adu[l]teꝛe et ribaudie
En gens mondainz et en cleꝛgie
Que nus dire ne le poꝛroit
Se a tous jours vivre voloit
Veullies devant veulliez deꝛrieꝛe
Moult ai de gens a ma banieꝛe
Entendés a moi gloutonnie
Trez dont avez eſté m'amie
Que feiſtes le premieꝛ homme
Et ſa fame mengier la pomme
Grant beſoing ai de vostre aie
Et de voſtre chevaleꝛie
Quant vo banieꝛe ſuz leues
En moult de lieuz povoir avés
.J. hanap i a et .i. pot
Paieꝛ i faites maint eſcot
En touz les lieuz ou je poꝛrai
dame a vo gré vous ſeꝛvirai
Par vo conſeil et le ſatan
Fis la pomme mengier /Adam
Si toſt qu'o fait le premieꝛ moꝛs
Regna cha jus pechies et moꝛs
Sur lui ſur toute ſa lignie
Dont en ynfeꝛ a grant partie
/Noe fis mengier le roisin
Yures en fu comme de vin
Et comme yvres ſe deſcouuri
L'un de ſes fis l'en eſcharni
Mais li autres le recouvri
Li tieꝛs de ce en gemiſſoit
Et de parfont cueꝛ ſoupiroit
Quant ſ'ezveilla ſi beney
De Dieu celui qui le couuri
Mais a celui qui l'eſcharni
Moult ireement le maudiſt
De cel naſcuirent ce dit on
Vilain ribaut ſeꝛf et glouton
oꝛ eſt je vous di ſa lignie
Par tout le mont ſi eſſauchie
C'a paingne i trouveꝛoit on mie
De ſobꝛe gent une partie
Au vin vont tout petit et grant
Et tant em boiuent li auquant
Dont par euls naiſt telle mellee
Qui ne puet eſtre dezmellee
Ou ſoit a dꝛoit ou ſoit a toꝛt
Qui n'i ait aucun homme moꝛt
Je ſui dame de mainte teꝛre
Winſſe plantai et /Engleterre
Les couſtumez ont /engles tenu
Des le temps /le bon Roy artu
Que li coꝛs reſpondi ſour lui
Dont puiz au cueꝛ ot grant anui
Winſe ce vouz diſt loꝛ latins
Et bons hoꝛs li meꝛs eſt vins
/Galois /tiois et /aualois
Maintenent bien toute mez lois
En /flandꝛez ai maint bon ſeꝛiant
A /jpꝛe a /bꝛuges et a /gant
Li povre vont a la cheꝛeuoiſe
Ou la bonne eſt a moult grant oure
Ou a mies ou au lieuekin
Li enfanchon tempꝛe l'aprendent
Pour la doucour aprés quoi tendent
Et tant i vont mi glouton cel
Qu'il en deuiennent larroncel
Et quant il n'ont plus que deſpendꝛe
Si emblent tant que il vont pendꝛe
Ainſi a tel fin ſont venu
Pluſour et jone et quenu
Que vous feꝛoie pluz l'ont conte
Qui me mentient va tout a honte
Partout on connoiſt bien m'enſeingne
D'/iſlande juſqu'en /alemaigne
Toutes ſommez enrachinees
Partout et feꝛmement plantees
En tous lez tans aidieꝛ vous veul
Foꝛs en quareſme maladez ſuel
Eſtre chaſcun an une foiz
Par .xl. jours .i. et trois
Toutes en avons a ſouffrir
Et de noz gens vont moult peꝛir
Mais apꝛés reuieng en veꝛtu
Auſſi grande com devant fu
Pour Dieu dame ne doutez rien
Il n'eſt nuls hons je ſai bien
Tant ſoit envers Dieu papelars
Ne ſoit enuieus ou eſchars
Preceus glous ou luxurieus
V dire plainz ou oꝛgueilleuz
Ceꝛtes je ne ſai nul par fait
Que devons l'une auec lui n'et
Dame ſoues fieꝛe et eſtoute
Nes li paſteur ne voient goute
Qui ſont enmi l'arbꝛe rampe
Car loꝛ oeul ſont ſi aombꝛe
De fuelles et de veꝛs raiſſiauz
Que ne lez peut touchier ſolauz
Car ſ'il apertement veoient
Tout quantqu'il dient il feꝛoient
Quel choſe eſt ce dit oꝛgueuls
Que tu as dit et dire veus
Comment dame nel ſavez mie
N'entendés nient d'allegoꝛie
Il nouz dient en /Jhesucriſt
Quant il ala par le pais
Pour pꝛeechieꝛ et ſarmouneꝛ
Son peule qu'il vouloit ſauveꝛ
/Si deſiple aprés lui aloient
De ſimplez dꝛas veſtuz eſtoient
N'avoient mie dꝛas roiaus
A pié aloit chaſcuns deſchaus
Ne chevauchoient nul deſtrieꝛ
N'eſtoient oꝛgueilleus ne fieꝛ
Souvent lez ſeꝛvoit li pluz ſire
Sans envie eꝛent et ſanz ire
Sans gloutonnie et ſanz luxure
Ne en eulz n'avoit nulle oꝛdure
Quant fain avoient li painz d'oꝛge
Souef aualoit en loꝛ goꝛge
Moult eꝛt loꝛ vie nete et pure
D'oꝛ ne d'argent n'avoient cure
Ne de palais ne de chaſtiauz
Avec aus eſtoit li ſoulauz
Qui leur veue enluminoit
Sique nuls d'euls ne chaloit
Foꝛs ſeulement li Sathenas
Qui ſe miſt ens ou /fel iudaz
Et no ſeur coouuoitiſe auſſi
uant Qaus /Juis le vendi
Meſmement /ſainz iehanz baptiſtez
Viuoit ſi comme .i. ſeinz heꝛmitez
Que de poul de camel veſture
Veſtoit a ſa char aſpꝛe et dure
Quant avoit aucques grant famine
Dont mengoit aucune racine
Ou laouſtez ou miel ſauvage
Ainſi veſqui en l'eꝛmitaige
Quant dut /ihesus ou /flum Jourdain
Baptiſieꝛ il n'oſoit ſa main
Metre ſur lui ſ'a doute non
Car bien ſeur qu'il ieꝛt Diex et hom
Oꝛe .i. oꝛeſtrez meſſe dira
Le coꝛs Dieu en ſez mains tenra
Et uſeꝛa tel ſacrement
Quant avra fait aſſez bꝛiement
Vourra aleꝛ boire et mengieꝛ
Sans contredit et ſanz dangier
De dꝛus mes de .iii. ou de .iiii.
Aſes de l'un plus que de l'autre
S'il a bon vin qui li talente
A ſon compaignon le preſante
Tien je t'en doins aprés m'an donez
Cilz crut ſus une vigne onne
De tieus ja ne pueent vivre
Se il ne ſont chaſcun jour jure
Longuement bien ſai en tel lieu
Ne puet on mie tenir Dieu
Apres conuoitent riches dꝛas
Riches hoſtieus d'argent hanas
Riche del riche acourtoiſſie
Pour plus monteꝛ en ſeignoꝛie
Ainſi rampent tous dis amont
Tant que il en mi l'arbꝛe ſont
Ou des pechiez loꝛ deliz ont
Telle eſt la vie de ceſt mont
De tieus i a qui pour leur vies
Sauveꝛ entrent en abaies
Qui ja ne deueniſſent moinne
S'il peuſſent devenir chanoinne
Aucun dient cui vie plaiſt
Dont delis de char vient et naiſt
Que jadis fu foꝛte nature
Plus c'oꝛe aſſés et moult plus dure
Petit vaut c'on enſi ſe cuevre
Et ne dit on li cueꝛs fait l'ueure
Plus que ne facent li lonc jour
Ou voit povre gent en langour
S'aſes euſent pain a meſure
Se leur ſeꝛoit riche peuture
Qui vraiement Dieu ameꝛoit
De quanqu'il li demandeꝛoit
Pourroit moult bien eſtre aſeur
Pulſanti apeꝛietur
Quant chaſcune ot bien aſcoutee
Celle qui ſur l'arbꝛe eꝛt montee
Qui dite eſtoit del mont la vie
De grant leeſce en haut ſ'eſcrie
Humaine moꝛs je ſui roine
Ne ſoiez jamés ma voiſine
Se tu es pres de moy ſi t'en fui
Pour Dieu ne me fai nul anui
Li moꝛs reſpons moult as oꝛgueil
Veſci je t'apoꝛt .i. linſuel
Avec moi aras compaignie
Ne te weil plus ſouſfrir en vie
Je te ſui venue tapeꝛ
Cuidoies tu touſdis regneꝛ
Moult toſt ſeꝛas noire et oſcure
Car tu ies cendꝛe et pourreture
Toute ta char mengeꝛont veꝛ
Soit en eſté ou en yueꝛ
Au telle con tu ci me vois
Seꝛas entre ci et .i. mois
Pour Dieu meꝛci ce dit li vie
Ne me fai ceſte felonnie
.I. jour entieꝛ n'ai pas veſcu
Et ja viens tapeꝛ mon eſcu
Dedens terre ne ſai manoir
Pren tant que veus de mon avoir
Si me donnez encoꝛe reſpit
Li moꝛs reſpont j'ai en deſpit
Ce que t'as dite tel parole
Car tu l'as parlee moult fole
Se tu viuoies .xm. ans
Petis te ſembleꝛoit li tans
Je ne demant autre avoir
Foꝛs que ton coꝛs ce veü ge avoir
Dont ne ſeꝛoit nulle dꝛoiture
En mou trouvee n'en nature
Se tout a fait enmi ma voie
Et povre et riche ne pꝛenoie
Pour Dieu l'ai moi mander le preſtre
Si li gehirai tout mon eſtre
Et pechiez dont ſui entechie
Si comme famme couroucie
Que veus mandeꝛ ne pues parleꝛ
A painez pues l'angueteꝛ
Bien vois qu'il te convient mourir
Ne de mes mains ne pues fuir
Mil m'atendent oꝛ en ceſt heure
Je ne puis ci faire demeure
Atandu as trop longuement
La painne hauce irieement
Si li donna .i. ſi grant cop
Que li et l'arbꝛe jus abat
De la noiſſe qu'adont oÿ
De mon doꝛmant trus treſſailly
Grant paour ai et non pour quant
L'arbꝛe fis paindꝛe maintenant
Que je nel meſiſſe en oubli
Ce que j'en vi et qu'en oÿ
Tout ainſi com veü l'avoie
Plus en feꝛoie ſe le ſavoie
Le mirouoir de vie apelai
Et de moꝛt ce que fait en ay
Car qui en .i. miroeꝛ ſe mire
De ce qu'an ſa face a a dire
Puet connoiſtre et aperceuoir
Tout autreſi ſachiez pour voir
Quant voir et hoir ces pechiez
Et aucuns des ciens adꝛeciez
Et puet de la moꝛt ramembꝛeꝛ
Avoir par ceſte remambrance
Vie en ceſt ſiecle en l'autre eſt moꝛs
Et c'eſt pourreture li coꝛs
Se ſachent tout a la parcloſe
Que parfaite fu ceſte choſe
Si com nous diſt cilz qui l'ecriſt
L'an /nostre ſeigneur Jhesucriſt
Mil .cc. ſeſſante et ſix
Le jour /ſaint marcel de /Paris
C'eſt au commancement d'eſté
Tieꝛs jour apꝛés le Trinité
Pour ce le volt en rommans faire
Li lay en pꝛengnent eſſemplaire
Huit cens d'une rime et .viii. veꝛs
Pou plus pou mains en fiſt /robeꝛs
Pour ce c'om l'apeloit /del oulme
Fiſt cil d'un houlme naiſtre .i. houlme
Dis et .viii. veꝛs fiſt en latin
Mais oꝛ vous pꝛi touz en la fin
S'il a en aucun lieu meſpꝛis
Vilainement ne ſoit repꝛis
Car il n'eſt nulz ce mot parole
Soit hons ſoit fame ou cleꝛs d'eſcolle
Ne die tel choſe a la fois
Dont aucuns tienent loꝛ boufois
Et dit que tieus conſeille autrui
Qui povre conſeil donne a lui
Pour ce requieꝛ par charité
Ancois pour Dieu et pour pitié
Part li donnez en vos biens fais
A tant de ſon ſonge me tais