/Li ſages ſalemons Nous mouſtre
Par bon exemple et par vrai mouſtre
C'om doit touz joꝛs ſon ſanz mouſtreꝛ
Par biax eſſemples demouſtreꝛ
Car li ſans qui n'eſt demouſtres
Par biax diz et par fais mouſtres
Il n'es a nului prophitans
Ne ne vaut riens plus que li tans
Qui eſt peꝛdus ſans recouvreꝛ
Dont doit touz jours ſages ouvreꝛ
En fais en maintien et en oeuvre
Par quoi le bien mouſtre et deſcuevre
C'on doit noncieꝛ et deſcouurir
C'eſt pechiez de ſon ſans couvrir
Pour ce vous ieꝛt ci a ouueꝛs
Mes petis ſans et aouueꝛs
Par .i. bel eſſemple aſſez court
C'on puet bien dire en haute court
C'eſt de la nois que je compeꝛe
Au ionne homme filz de bon peꝛe
Que bien ſe veut d'onneur pareꝛ
A la noiz ſe doit compareꝛ
S'eꝛt a dꝛoit ſa vie paree
S'a la nois groſſe eſt comparee
Car biaus eſt li comparemens
Quant d'aneur vient li paremens
Dont pꝛinces puiſſans eſt pares
Bien eſt a ſon dꝛoit compares
Qui a la nois ſe compara
De tres haute honneur ſe para
Li pꝛemies en eſt apparans
Eſgardes par mois et par ans
A chaſcune ſaiſon nouvelle
Que li noieꝛs ſe renouvelle
Qu'il eſt veꝛs et renouuelles
Conueꝛs de fueille et eſtelles
De flour dont la nois naiſt et point
Tant quelle eſt groſſe et en ce point
Toute veꝛte l'eſtuet cueillir
Pour confiture recueillir
Ainſi ſ'en convient entremetre
Qui la nois veut en confit metre
Cueillir l'eſtuet ionete et tendꝛe
Et par ce point poons entendꝛe
Ce puet on eſpꝛouueꝛ ſouvent
C'on doit en ſon ionne jouuant
L'enfant jone aprendꝛe et eſtruire
Que ou chemin le veut conduire
De valeur d'armes et d'amours
Comfir le doit en bonnes mours
Et apꝛendꝛe d'onneur l'uſſage
En tant qu'il eſt de jone aage
On le doit par bien doctrineꝛ
Faire obeir et alineꝛ
A l'eſtat qu'il doit maintenir
Pour miex dꝛoite voie tenir
A bien faire eſtre couſtumieꝛs
C'eſt li eſſamplaire premieꝛs
De la nois veꝛde et la matire
C'on doit en bonnes meurs confire
L'anfant tant qu'il eſt jones d'ans
Pour miex eſtre a honneur tandans
Ou autrement il en meſchiet
La nois le pꝛueue celle chiet
Ou on la queꝛra a pentecouſte
Il n'i a riens foꝛs que la crouſte
Aygre et ameꝛe ſans douceur
Oꝛ la faut de bonne liqueur
Qui confire la veut a dꝛoit
Et qui la ſaiſſon doꝛendꝛoit
Que je di lairoit treſpaſſeꝛ
Pour noient ſe pourroit laſſeꝛ
Jamés confite ne ſeꝛoit
Puis que ſa veꝛdeur paſſeꝛoit
Et on veꝛroit l'eſcaille dure
Auſſint eſt il de la nature
A l'enfant jone damoiſſel
Si comme ou afaite .i. oiſſel
Le doit on d'onneur afaitieꝛ
Lui net tenir et pꝛés gaitieꝛ
Touz jours l'ueil avoir a ſa face
Pour regardeꝛ qu'il ne meſface
Encontre les bonnes veꝛtus
Et quant d'enfance eſt des veꝛtus
Si com la nois qui ſe deueſte
Hoꝛs de c'escoꝛce en vie honneſte
Doit ſa vie en ſon temps mueꝛ
Et lui de pechié desnueꝛ
La nois que nature desnue
De c'escoꝛce tant quelle eſt nue
Et l'eschaſillons nes et nus
Nous eſt exemple contenus
Puis c'on eſt d'enfance mues
C'on doit nes eſtre et deſnues
De vilonnie et d'autre vice
Douteꝛ Dieu ameꝛ ſon seruice
Tandꝛe a honneur et le bien faire
Et qui plus eſt de noble afaire
Miex doit eſtre en honneur parfais
Miex aſfaitiez et en touz fais
Doit eſtre d'oꝛgueil deschargiez
De pechiez nes et eſpurgiez
Son cueꝛ tendꝛe et ſon coꝛs peneꝛ
Tant qu'a valeur puiſt aſſeneꝛ
Prendꝛe garde a l'eschafelote
Qui grans biens ſenefie et note
Qui nous eſt comparee au coꝛs
Biaus en eſt et bons li recoꝛs
Drois le teſmoigne et ſ'i acoꝛde
Li coꝛs que pechiez ne le moꝛde
Doit auſſi durs eſtre et ſeurs
Que li eſchaillons meurs
Qui le novel nourriſt et guarde
Sans empirieꝛ c'eſt bonne guarde
Qui bien uoudꝛoit regardeꝛ
Ainſi doit coꝛs l'ame gardeꝛ
Et nuit et jour eſtre encitez
De fouir toutes vanitez
Qui pueent l'ame a Dieu tollir
Riens ne doit le coꝛs amollir
Dont l'ame ſoit a pechié mole
Coꝛtois et de couce parole
Debonnaire et humbles doit eſtre
Damoiſſiaus eſtrait de bon eſtre
Ne ſe doit en oꝛgueil creſteꝛ
Ne en vilanie arreſteꝛ
Ne doit ſes cueꝛs gentilz et dous
En richeſce n'en grans adous
Aus bons ſ'umelie et adouce
Si con la nois ameꝛe et douce
Doit avoir cueꝛ dous et ameꝛ
Ainſi ſe feꝛa il ameꝛ
Durs doit eſtre ameꝛs et puiſſans
Et fel contre les meſdiſſans
Felons qui ſeꝛuent de mentir
Et li bon le doivent ſentir
Dous amiable et fin courtois
Ne doit laiſſieꝛ de ſous ces dois
Felons traitours conueꝛſeꝛ
En ſus de lui les doit veꝛſeꝛ
Car toute honneur chiet et reuerſe
En lieu ou traiteur conueꝛſe
Il eſt fel mauvés deſpiteus
Et on doit veꝛs lui eſtre feus
Puis c'om le puet mauvez proueꝛ
Nulle douceur ne doit troueꝛ
Li fel ne traitres renois
Mais plus ſurs qu'eſcoꝛce de nois
Plus ameꝛs de durte greignoꝛ
Doit trouveꝛ le cueꝛ ſon ſeignoꝛ
Li fel et l'enuieus meſdis
Et li pꝛeudom pꝛeus et hardis
En loyauté feꝛme et eſtable
Le doit trouveꝛ dous amiable
Humble coꝛtois et debonaire
Oꝛ vous dirai je l'eſſemplaire
Du novel qui eſt douz et blans
Eſt moult bien a l'ame ſemblans
Quant la nois eſt en ſa maiſon
Eſchailliee en veꝛde ſaiſon
S'on en veut le novel mengier
Voulentieꝛs ploie et ſanz dangier
En tant qu'il eſt veꝛt apellez
Mais ja puis n'ieꝛt aiſſe pellez
Ne la pelace jus pellee
Que la nois ieꝛt viez apelee
Ce puet on eſpꝛouueꝛ avoir
Bon eſſemple en povez avoir
A l'ame ſ'elle eſt entechiee
D'aucun pechié vilain tachie
Que Diex pꝛaingne et ait en deſpit
Li coꝛs ſans prendꝛe nul reſpit
S'en bonnes meurs veut abondeꝛ
Ione en doit le pechié mondeꝛ
Car n'eſt riens tant l'ame vergonde
Que viex pechiez dont qui ſ'eſmonde
Ainz que il ſoit viex devenus
De touz pechiez grans et menus
S'il ſ'en veut jones eſcureꝛ
Plus legieꝛe eſt a endureꝛ
La penitance et mains en dure
La paine qui ionne l'endure
Ce puis je pour voir ſouſtenir
Ceſte voie doivent tenir
Li damoiſſel noble puiſſant
Pour miex eſtre en bonté croiſſans
Doiuent entendꝛe a bone fin
C'eſt ce c'on aimme de cueꝛ fin
De fin coꝛage eſt afinez
Qui tient qu'a ualour ſoit finez
Et d'onneur ſa vie afinee
Jamais parole n'ieꝛt finee
Du pꝛeudomme qui ainſi fine
Qui vie a menee bonne et fine
Ses renons ja ne fineꝛa
Mais auſſi bien l'afineꝛa
En honeur comme li oꝛs fins
Tant eſt des bons bonne la fins
C'om les doit pꝛiſſieꝛ finement
Oꝛ vous doi je dire bꝛiement
L'eſſemplaire et toute la gloſe
Par quoi ou novel a encloſe
Et eſparce de touz coſtez
Une eſchaille que vous otez
Quant on veut le novel peleꝛ
Ne le ſai commant apelleꝛ
Mais il n'i a riens de bonté
Non pour quant par le voir comte
Mout grant eſſemple ſenefie
S'il eſt qui le declaire et die
Il nous deſcuevre le pechié
D'/Adam dont fumes entechie
Quant /Evain la pomme menga
Celle moult nous adommaga
Mais grant pꝛoufiſt fiſt ces dommages
Se li pechiez fais eſt ramages
Les ames des bons c'om dampna
Diex tel reſtoꝛ en amena
C'onques tiex ne fu reſtoꝛes
De teꝛre et ciel fu aoures
Et des angles cilz biax reſtoꝛs
Tous en fumes d'enfeꝛ reſtoꝛs
Et rachetez de moꝛt ameꝛe
Si toſt com Diex ot fait /ſa meꝛe
De /la gloꝛieuſſe pucelle
/Vieꝛge Marie qui fu celle
Par qui Diex /Jhesucris noz peꝛes
A nous deuint en terre freꝛes
Pour la parte /Adam reſtoꝛeꝛ
Bien le devons touz aoureꝛ
Quant tel reſtoꝛ nous reſtoꝛa
Que. ciel et terre aoura
/La douce virge en qui ſans paine
/Le Filz de Dieu priſt char humainne
Pour nous des paines relaſchieꝛ
Quant il ſe daigna abaiſſieꝛ
Et avons freres ſe clama
Il parut bien qu'il nous ama
Quant d'enfeꝛ nous a rachetez
De ſon ſanc ſans autre chatez
Quant en crois ſouſfri la moꝛt ſure
Pour l'enuenimee moꝛſure
D'/Adam quant le fruit moꝛſilla
Diex fu et hom qu'il eſcilla
A toute ſa grant deité
Devint de nostre humanite
Et encoꝛ fu ice du mains
Et fu a nous freres humains
Car il fiſt plus quant vole offrir
Le ſien coꝛs pour nous a ſouffrir
En crois moꝛt ameꝛe et deſtroite
Devant /la douce beneoite
/Gloꝛieuſe vieꝛge Marie
Qui mainte laſſe ame eſmarie
Par pꝛieꝛe de cueꝛ entieꝛ
A redꝛecie a dꝛoit ſantieꝛ
Par lui ſont tout li deſcoꝛde
De pechié a Dieu racoꝛde
Plaine eſt de douceur et d'acoꝛde
Fontaine de miſeꝛicoꝛde
De pitié poꝛte de ſalu
Moult nous a ciſt reſtoꝛ valu
Ce fu .i. precieus iouiaus
Pour nous. ſi com li dous noiaus
Croiſt en l'eſcoꝛce a,eꝛe et ſure
Ainſi vint elle nete et pure
Et croiſſi entre ſa lingnie
Vieꝛge fu nete et eſpurgie
De pechié; ainz ne volt pechieꝛ
Ne ſon coꝛs de vice entechieꝛ
Par lui ſont tuit li bon ſauve
S'en avons empetre l'aue
Purgez en ſommes et lauez
Li avez nous a touz ſauvez
Et de pechié l'ame lavee
Toute eſt la gent d'aue lavee
Et tuit li bon ſe ſeuueꝛont
Qui d'aue ainſi laueꝛont
Et cil Diex qui par aue leue
Le grant pechié d'/Adam et d'/Eve
Et volt les bons d'enfeꝛ laueꝛ
Nous weille les ames ſauveꝛ
Et nous otroit ſon ſauuement
Dites amen aufinement
De la nois dont li contes fine
Que Dieus nous maint en joie fine