N'eſconvient pas Que je vous conte
Comment je me ſui mis a honte
Car bien avez oï le conte
En quel manieꝛe
Je pꝛis ma fame deꝛrenieꝛe
Qui belle ne gente ne ieꝛe
Loꝛs naſqui paine
Qui dura plus d'unne ſemaine
Sicommanca en lune plaine
Oꝛ entendez
Vous qui rime me endez
Comment je me ſui amendez
De fame prandꝛe
Oꝛ nai quangagieꝛ neque vendꝛe
Et tant afaire
Et tant dami et de contraire
Que qui le vous voudꝛoit retraire
Ce durroit trop
Dieus ma fet compaingnon iacob
Il ma tolu a .i. ſeul cop
Ce que iamoie
De lueil deſtre dont miex veoie
Ne voige pas aleꝛ lauoie
Ne moi conduire
Ci a doleur dolente et dure
Neis miedi meſt nuit oſcure
De celui oeil
Et ſi nai pas quanque je weil
Dequoi parfondement me dueil
Ceſt mon damage
Ne ſai ſe ſafait mon outrage
Oꝛ deuendꝛe ſobꝛes et ſage
Apꝛés le fet
Et me gardeꝛai de foꝛfet
Mes ce que vaut quant ce eſt fet
Tart ſui meus
A tart me ſui aperceus
Quant ieſui en viez las cheus
Cepremieꝛ an.
Me gart ce Diex en mon dꝛoit ſen
Qui pour nous ot paine et ahen
Et me gart lame
Oꝛ a denfant geu ma fame
Mon cheval ceſt bꝛiſſie la jambe
A une lice
Oꝛ veult delargent manoꝛrice
Qui me deſtraint et me pelice
Pour l'enfant peſtre
Ouil reuenra bꝛeꝛe en leſtre
Ice ſeigneur. qui lefiſt neſtre
Lidoint cheuance
Et lienuoiſt ſa ſoutenance
Et me doint encoꝛe alegancece
Quaidier lipuiſſe
Et que miex ſon vivre litruiſſe
Et que miex mon hoſtel conduire
Qui je ne fes
Se je mes mai je nen puis mes
Car je nai doꝛgaine ne fes
En ma meſon
De buche pour ceſte ſeſon
Si eſbahi ne fu mes hon
Com je ſui voir
Nonc mais ne fui amains davoir
Mes hoſtes veut largent avoir
De mon hoſtel
Il doit bien avoir non hoſtel
Celui du roy neſt pas itel
Miex eſt paie
Et gen ai pres que tout hoſte
Et ſi me ſont nu licoſte
Contre liueꝛ
Dont trop me ſont changie liueꝛs
Cil mal meſont durs et diveꝛs
Auers quenten
A po ne fol quant gi en ten
Ne meſtuet pas teneꝛ enten
Quant me merueil
Me tenue aſſez quant me reſueil
Sine ſe ſe je doꝛs ou veil
Ouſe iepens
Quel pert jepꝛeingne meſdeſpens
Dont je puiſſe paſſeꝛ cetemps
Tel ſiecle aigie
Migage ſont tuit engagie
Sime ſui tout des menagie
Car gai geu
.III. mois que nulle nai veü
Mafame ra enfant eü
.I. mois entieꝛ
Me rageu ſus le chantieꝛ
Et je ieſoie entrementieꝛ
En l'autre lit
Ou ja voie po de délit
Onques mes mains ne ma bellit
Geſir que loꝛs
Car ien ſui demon avoir hoꝛs
Et ſen ſui mehaignie du coꝛs
Siquau fenir
Li mal ne ſeuent ſeul venir
Tout ce meſtuet a avenir
Ceſt avenu
Que ſont mi ami deuenu
Que je avoie ſi pres tenu
Et tant ame
Je croi qu'il sont moult cleꝛ ſeme
Iecroi le vent les ma oſte
Lamoꝛ eſt moꝛte
Ce ſont amis que vent enpoꝛte
Et il ventoit devant mapoꝛte
Ses enpoꝛta
Onques nus ne mi comfoꝛta
Ne riens du ſien ne mapoꝛta
Ice mapꝛent
Qui auques apriue lepꝛent
Et cil trop atart ſeꝛepent
Qui trop amis
De ſon avoir afaire amis
Qu'il ne ſont en tieꝛs ne demis
Ami ſecourre
Oꝛleꝛe dont ſont Foꝛtune courre
Si penſeꝛe de moi reſcourre
Si jel puis faire
Vers les prodeſommes doi traire
Que sont coꝛtois et de bonaire
Et mout nourri
Mi autre ami sont poꝛri
Je les en voie ameſtier ourri
Et ſi les les
Car ondoit bien feꝛe son les
Et tel gent leſſieꝛ enreles
Sans reclameꝛ
Que il na en eulz riens que meꝛ
Que len deüſt amour clameꝛ
Oꝛ pꝛi celui
Qui .iii. parties fiſt de lui
Qui refuſſeꝛ ne ſet nullui
Qui le reclainme
Que ſeingneur. et amie le clainme
Et qui ciex tente que il ainme
Qui ma tente
Que il men voit bonne ſente
Si me face ſa voulenté
Mes ſans deꝛroy