Del recoꝛdeꝛ eſt grans ſolas
De cheaus qui garderent le pas
Contre le roy ſalehadin
Des douces princes palaſin
Qui tant furent degrant renon
En mainte ſale leſpoint on
Pour miex vëoir leur contenance
Moult eſt bele la remembꝛance
A regarder a maint preudomme
A cel tempoire fut aronme
Li vaillans papes luſiiens
Qui fiſt croiſieꝛ mains treſtoiens
Car iheꝛuſalem eꝛt perdue
Enmains deſarraſins ceue
Li roys guis d'acre deſconfis
Par traiſon uendus et pꝛis
Et fuſt piureis ſalehadin
Cis roys pꝛiſt acre et miſt afin
Tous les creſtiens que il trova
Dont mains Paiens lecompara
Des traitoꝛs faus loſengieꝛs
Li quens detribles fu premieꝛs
Et li marcis deponfeꝛan
Et d'aſcalone pieꝛes liban
Apꝛés li ſires debaru
Et deſate. quens poꝛu
Cilz cink firent letraiſon
Et uendirent le roy guion
A ſalhadin le roy ſoudant
Dequoy il oꝛent maint beſant
Le ſaint ſepulcre liliurent
Madit ſoient dedieu lepeꝛe
Le roi trairent parenuie
Laſainte teꝛre en fuſt peꝛie
Quant li papes loiit adire
aucueꝛ en ot doloꝛ et ire
Haſtiement ſi com je crois
Fiſt il ſeꝛmoner de lacrois
Entoute France et enBretaigne
En engleterre en alemaigne
Li bons roys phelippes deFrance
Cis ſecroiſa ſans demoꝛance
Et d'engleterre roys richars
Enſemble lui mains bons vaſſaus
Dont ſecroiſont iſnele pas
Tuit cil qui gardeꝛent lepas
Et avec eus maint bon preudonme
Dont dire neuos ſai la ſomme
Princes et dus et mains contoꝛs
Se croiſieꝛent poꝛ deu amoꝛs
Lameꝛ paſſent aoſt banie
Et ariveꝛent enſurie
Mout lauoit riches conrois
Du roy de France et deſenglois
Chaſcun pꝛiſt terre poꝛ ligieꝛ
Pour repoſeꝛ et pour aiſieꝛ
La trouuerent le roy guion
Qui iſſus eſtoit depꝛiſon
Les roys conioit doucement
Et leſcontat ſon eꝛrement
Sire fait il auroy deFrance
.V. traitoꝛ parleur hubance
Ont mis agrant deſtruction
/La teꝛre depꝛomiſſion
Li quens detrible eſt ceue ceans
Et ſi vos di bien poꝛ certains
Mafame vot prendꝛe et avoir
Par tant qu'il voloit eſtre roys
Li patriarcle enfu moiens
Madame onques parnule riens
A ce ne vot ſe acoꝛdeꝛ
Ains ma poꝛtoit grant loyauté
Et vraie amoꝛ ſanz point dameꝛe
Quelle moy tint bien amari
Elle fu ſueꝛ roy amari
Et partant que moꝛut ſans oir
Fui ge de iheꝛuſalem roys
Dont li mauais oꝛen envie
Et me voꝛent tolir la uie
Car uendus fui ſalehadin
Argent empreſent et oꝛ fin
Par teis furent loꝛ couens fais
Loꝛ terres tenroient enpais
Liureꝛ medurent ſoꝛ leschaus
Loꝛ ſeꝛemens priſt ieſoudaus
Detout ce ne ſauoi ge rien
Mais li oudans leme fiſt bien
Apꝛés dirai qui enait vint
Bataille avoms aſalhadin
Et tantvoint alaſſembleꝛ
Li mauais traitoꝛ pꝛouue
Loꝛ banieꝛes laiſont chair
Et ſe toꝛneꝛent afuir
Cel joꝛ neplot auroy degloꝛe
Que li nostre euſſent victoire
La fui ge pris et retenus
Creſtiens moꝛs et confondus
Salehadins a tous ſaiſi
Iheꝛuſalem et le pais
De tant me fiſt il grant bonté
Depꝛiſon me laiſaſt aleir
Car je nauoy oꝛ ne argent
Et li me fiſt tous mes deſpens
Oꝛ avons chier aſſiſe ſeur
Car enfuiſent fondi limur
Quant li roys guis ot tout conte
Leꝛoy empriſt moult grant pité
Moult doucement leconfoꝛterent
Et la roine quallet lieꝛe
Seignoꝛ fait il cil levos meꝛe
A cui Marie eſt fille et meꝛe
Aſſiſe fu ſur agrant joie
La veïst on maint tref deſoie
Doꝛ et dazur inde et uermel
Reluire encontre leſoleil
Ou il ot maint bon chevalier
Qui moult ſauſiuent apriſieꝛ
Et tant li roys ſoudans leſout
Il aſſembla tantoſt ſonoſt
Apres manda auroy de France
La bataille ſains demoꝛance
Et li bons roys li ramanda
Cant voet ſeuengne il latendꝛa
Philippes li roys fu preus et ſages
Bien fiſt gaitieꝛ tous les paſſages
Con ne poiſt ſagent greveꝛ
Par devers acre coſté lameꝛ
Droit alentree deſurie
Aufoꝛt paſſage d'armonie
La ot roces et deꝛ[u]bans
De la loga li roys ſoudans
Qui moult ama cheualerie
Et honnoꝛa toute ſa uie
Degueꝛir fu moult preu et ſages
Par mi la roce eſt li paſſages
Mout par eſt frois et perilleus
Salehadins li oꝛgueilleus
Jura mahon et Apolin
Paſſeꝛ ifeꝛa ſarraſin
Qui aus Creſtiens franc deſtoꝛbier
S'il ne ſeuent bien gaitieꝛ
Mais il alat tout autrement
Auroy defrance apertement
A on treſtot conteut lafaire
Que li ſoudans vet par latraire
Son grant oſt conduire et mener
Li roys reſpont laiſſies aleꝛ
Li oiſeillons diſt en apert
Tiex quide gaagnier qui peꝛt
Li roys phelippes diſt en oiant
Seingnoꝛ francois venez avant
Pour et ſi me conſeilliez
Jones hons ſui ſi nai meſtier
Pelleꝛin ſommes gel vos di
Celui qui ſon ſanc reſpandi
Pour nos treſtous arecheteꝛ
Par lui auoue paſſe lameꝛ
Bien deuon mes encelui croire
Cui Juif fiſent ainſi boire
Ce fu li tres dous ijesu͗ criſt
Cui enla crois pilate miſt
Poꝛ racheteꝛ tous ſes amis
Las conuint lefeꝛis Longis
De la lance par mi lecoꝛs
Par nos treſtous ſemiſt amoꝛt
Bien nos endoit tous remembꝛeꝛ
Et del ſepulcre ſe fiſt poſeꝛ
Qui eſt enmains deſarraſins
Et ſe veſqui ſalehadin
Qui diſt qua nos ſeuet combatre
Oꝛ ſachent tuit et un autre
Contes et dus et chevaliers
Que ieſui dous apareilles
A feꝛe tout quan que vos voꝛres
Des iex coumencent alarmeir
Li barons tous degrant pitieꝛ
Quant le roy virent ſi humilieꝛ
Et ſi biaus mos dire et retraire
Chaſcun ot le roy debonnaire
Embꝛaſes darmes et damoꝛ
Poꝛ Jhesucriſt nostre ſeingnoꝛ
Auroy reſpondent hautement
Nous vos aideꝛons loyaument
Bien devons faire vo plaiſir
Et avec vos vivre et moꝛir
En pies fuſt hues defloꝛine
Si regarda vers la marine
Si achoiſiſt le roy richar
Enſemble lui maint bon uaſſal
Parleꝛ venoit auroy deFrance
Et li bons .hulles. ci ſauance
Au roy adit treſtot enhaut
Sire veés ci le roy Richart
Ceme plaiſt bien ce diſt li roys
Ceſt bien raiſon qua conſeil ſoit
Ci ſachent le roy d'engleterre
Deſon cheval miſt pié aterre
Leꝛoy ſalue et ſon barneit
Li roys deFrance autreteit
Li rent ſalus coꝛtoiſement
Sire fait il certainement
Mandes nos a ſalhadin
Partaille par uns ſarraſin
par ce eſt tous cilz tuit enſemble
Pour Dieu nos moſtres bon example
Pourque ſi bien nos deffendon
Que neſengabent li glouton
Li ſarraſin fel deputaire
Richars cis neſi vot pas taire
Ains reſpondit tres bien magree
Sus les coꝛous gulee baee
Riens ne nos vaut li lons termines
Ceſt vois diſt hues defloꝛines
Mais ſeuos tuit me volies croire
Ieuos dirai parole voire
Par foy oil dient li roys
hues apella le barrois
ſire barrois venez avant
A ces grans roces la devant
Diſt li ſoudans qu'il paſſeꝛa
Nos douze gardeꝛons le pꝛis
De teis quenlire voꝛons
Sedieu plaiſt bien ledeffendꝛons
Puis que grees lemont li roys
Et ielotroie diſt li barons
Seil ſunt chevalier depris
par foy dit huos ainſi lafis
Oꝛ enliſſies ſire barons
Si mait Diex iepꝛen gofroy
Qui eſt ſires delaſegnon
Etiou gautier dechaſtelon
Pour quoy feꝛoy lon prolonge
Et je pꝛen Renart deloigne
Ce diſt li barons enriant
Et hues leduc valeꝛant
Qui lenboꝛ tien et celle terre
Gienlis lebon roy d'engleterre
Diſt Guillaumes par saint ba[u]on
Hues leconte philippon
Deflandꝛes car bien li agree
Et li larons priſt longue eſpee
Guillaume qui fu grans et foꝛs
Hues pꝛiſt ſimon demonfoꝛs
Ki falis naſtoit ne coiarz
Li barrois pꝛiſt meſſe bernaiz
ki li reiz eſt de hoꝛſtrinale
Oꝛ arez vous ſire de barre
Choiſit a vostre volenté
Oꝛ me covient po bien pourpenſoir
Ce diſt hues par ſaint urry
Je pꝛen le piou conte tiry.
Decleues ki neſt pas lanieꝛ
quant eſt monteis sus son deſtrieꝛ
Et il le fieꝛt des eſpeꝛons
Plus joins que uns esmerilhons
Seit il une lance bꝛisier
Oꝛ eſt il bien tens de laiſieꝛ
Huimais ceſti enlexion
Treſtout apoint nos .xii. aſton
On ni puet ne metre ne pꝛendꝛe
Mais veult chaſcun ſes armes pꝛendre.
Treſtuit laleꝛent fianchieꝛ.
Dont il feſoient moult apꝛiſieꝛ
Filippes loꝛ fiſt meſſe chanteir
Apres laleꝛent adobeir
A tant monteꝛent en cheuaux
Li rois de France les ſengira
A Dieu les a tos commandeis
Et il cheuarent bien ſeꝛeis
Et ſi ont tant eſpoꝛonneit
Droit a bꝛochieꝛ sont ariueit
la deſcendirent des deſtrieꝛs
Ses atachent aus oliuieꝛs
Tot a pié furent li baron
Fieꝛ et hardit comme li on
Chaſcun aſtoit dire enbꝛaſſeis
Et ſi eſtoit moult bien armes
Tout furent rengiez grans et mendꝛe
Le pas vauront moult bien deffendꝛe
Encontre touz les ſarraſins
Oꝛ dirai de ſalehadin
Treſtot enſi qu'il eſploita
Tantoſt tuit ſon conſeil manda
Les rois et tous les amirans
Biaue ſeigneur ce diſt [li] ſoudans
Je weil que vous me conſeilles
De cha la meir ce eſt tos mieus
E li creſtien tuient de la
Oꝛ ſont francois venuz de cha
Ceſt pour mateꝛre calengieꝛ
Acre cuident bien regaingnieꝛ
Ceſt pour aidieꝛ le roi Guion
que je ai mis hoꝛs depꝛiſon
Car li roiaumes vint a li
De par le ſueꝛ roiy a mary
Qui ſa fame eſt bien le ſeton
Niece Godefroit de bulon.
Qui ieꝛusalem conquiſt
Et tant Paiens a la moꝛt miſt
Apꝛés conquiſt dont il me toche
Seur et trible et Antioche
Et bien .cc. caſtias feꝛmeis
Et pꝛiſt .lx. foꝛs chiteis
Ce conquiſt dedens .iii. ans
Loeir me doit deteꝛuagant
Et de mahon mon avoe
Car je ai tot reconqueſte
Ce kecis godefrois gangna
Oꝛ sont franchoiſe logiet de cha.
Par mahumet ſont fait folie
Li rois reſpondit d'amari
que on appelloit malaquin
Grant toꝛt avez ſalahadin
qui ci nous faite ſoioꝛneꝛ
Alons les franchois reuiſdeir
Apertement ſens atargieꝛ
Faites venir tos vos archieꝛ
A pik a dars agauelos
Dedens ces roches aſtons enclos
Faite vostre oſt outre paſſieꝛ
A cel conſeil sont acoꝛdez
Turs et Paiens et ſarraſin
Et muit bien plot ſalehadin
Li ſoudans a dit enoiant
Roy malaqin venez avant
Vos condureis bien leſtandart
Avec le l'un roy eſcoꝛfart
Li paſſages neſt pas trop lon.
Bien paſſeꝛez vous .x. a fron
Alez li faites lauangarde
Ce vachies et ſinares garde
Volentieꝛs ſire par mahon
A tant monteꝛent a ſen vont
Achemineis sont par larue
De ſous ac mainte roche ague
Baut et joiant ſen vont li rois
Et enmoinnentnt en leur conrois
Qui vant .x. mille ſarraſins
El premieꝛ chief fu malaquin
Et eſcoꝛfaus fut a ſon leis
Ains qu'il ſoient oultre paſſeis
Aueꝛont il ten encomrieꝛ
Qui les feꝛat les cueꝛs jrieꝛ
Car aliſſue dautre part
La troveꝛent .xii. ly epart
Ce furent noble chevalieꝛ
le pas loꝛ voꝛront calengieꝛ
Ce oꝛeis dire en petit doure
.II. ſarraſins plus noirs demoꝛe
Vinrent poingnant hoꝛſaliſſue
Chaſcun deaus depaoꝛ treſſue
Cant il vinrent ſoꝛ les franchois
Diex bonne eſtrine diſt li barrois
A ceſt mot eſt paſſeis avant
Del fueꝛe traitleban nubꝛant
Le paien fieꝛt de tiel veꝛtut
Le bꝛach litrence a tot leſcut
Et chis a ſtoit rois malaquis.
qui conduiſoit les ſarraſins
Fuir ſen uot mais il ne pot
Car li barrois lirent tiel cof
Par mi ſon chief debꝛanch moluu
Iuſques es dens lat parfendu
Moꝛt le trenuche do ceual
Moult enpenſa roy eſcoꝛfal
A vois eſcriant a ha ton
Feꝛez avant ſignour gloton
On nos at moꝛt roy malaquin
Qui veïſt turs et ſarraſin
Venir poingnant hoꝛs aliſſue
Mais cil qui pꝛoece ſalue
Loꝛ ont ſi foꝛt liciet le pas
Par la ne parfont il pas
quanchois mait mant paien moꝛt
Rois eſcoꝛfans ſoat .i. coꝛ
Poꝛ ſarraſins mies rebandir
Puis trait ſon bꝛanc ſi va feꝛir
Le roy richar ſoꝛ le lme agu
Ne len pita pas .i. fiſtu.
Al roy richar foꝛment enpoiſe
Par grant air le bꝛanc entoiſe
Le paien fieꝛt de tiel randon
Tot le pourfent juſquenlarchon
Si quala terre lat veꝛſe
Glos diſt richars oꝛ en aueis
Qui dont veïſt les chevalieꝛs
commenceꝛ un eſtoꝛ planieꝛ
Bien poiſt dire ſans doutance
que puis les. xii. puis de France
qui furent moꝛs enrenceual
Ne trouaiſt on les parigal
Qui furent cil dont je vous crante
qui dont veïſt renar le conte
Cil feꝛont comme vaſſaus
Moꝛs letrebuche dos deuans
Anſi faiſoit li pꝛeus huons
Plus aigrement conme lyons
Les coꝛoit ſus ſans miſeꝛicoꝛde
Car del ſepulcre li recoꝛde
Philippes deflandꝛes li uaillans
Jofrois et lidus valeꝛans
Cis ifeꝛirent des eſpees
Et mainte teſte yot copees
Des ſarraſins et des Paiens
Liquens decleues. li fiſt bien
Et tout loyauté adire voir
Chaſcun ifiſt bien ſon devoir
On neles ſet dequoy repꝛendꝛe
Maint bon eſſemple ipuet on pꝛendre
Qui a bien bee et ahonnoꝛ
Ceꝛent delmonde li meilloꝛ
Et la floꝛ de chevaleꝛie
Qui grant noblece ſenefie
Oꝛ vos dirai du roy ſoudant
Qui foꝛment ſaloit merueillant
Quant il vit ſon oſt recueilleir
Car bien quidoit outre paſſeir
Licueꝛs lidiſt et li teſmoigne
Que li creſtien li font vergoigne
Et grant domage de ſagent
Il en apelle toꝛneuent
Son eſpie que moult amoit
Les pꝛeus chevaliers connoiſſoit
Par toute France et emBretaigne
Enengleterre en alemaigne
Car jadis iſuet onueꝛſeir
Les eſcus ſeit bien deuiſeir
Car darmes eſt bien conuoiſſans
Toꝛneuent ce diſt li ſoudans
Va toſt monter ſoꝛ ces grans roces
Pren garde cefrancois delogent
Ouſil ſont aus Paiens melleit
Enſi que laueis coumandeit
Seꝛa il fait diſt toꝛneuent
A itant allaleꝛ ſepꝛent
Tant que vus eſt aurochieꝛ
Apertement va ſuſpuieꝛ
Deſour la roche haute et grant
Fu lieſpie au roy ſoudant
Qui darmes fuſt apris et ſages
Et regarda veꝛs les paſſages
Droit aliſſue del rochieꝛ
La vit il. xii. chevaliers
Qui moult foꝛment ſecombatoient
Aus ſarraſins ui la uenoient
Qui parfoꝛce quident paſſeꝛ
Tant en ifirent uis uerſeꝛ
Que toute plaine en eſt lauoie
Mais tant vos dige tot voie
Ceſt ſens paſſeꝛ aus ſarraſins
Tant furent pꝛeus li palaſins
Et voulentieꝛs du pas deffendꝛe
Quancois ſe uoꝛont moult chier uendꝛe
Que il ſoient ne pris ne moꝛs
Deleſpie vos dirai loꝛs
Qui les barons a regardes
Et leur eſcus bien auiſes
Treſtous les connut toꝛneuent
A tant de la roche deſcent
Si ſenreua dꝛoit auſoudant
Je li dirai ſon couvenant
Quant liſoudans jut toꝛneuent
Si li demande apertement
Quaſtu ueu nemement pas
Sire faite il iſnele pas
Je ai veü treſtout lemonde
Si com il clot ala reonde
Sans plus en .xii. chevaliers
Par mahomot il ſunt enlies
Par les plus preus les plus uaillans
Qui ſoient ens en loſt deſfrans
Et les plus foꝛs les plus hardis
Enſi com roſe et et floꝛ de lis
Seur monte de biauté les floꝛs
Habonde et pꝛoeſce et honnoꝛs
Es chevalieꝛs dont je vous conte
.XII. en y a treſtout par conte
Par leur armes connuis les ai
Oꝛ eſcoutez ges nommeꝛai
C'eſt d'Engleterre rois richars
Et de boulongne quens renars
Liquens de flandꝛes phelippons
Et de monfoꝛt meſire ſimons
Tieꝛris de cleues li vaillans
Delenboꝛc li dus vailleꝛans
Meſire beꝛnars de hoꝛſtemale
Et li pꝛeus guilſe de barre
Meſire gautieꝛs dechaſtillon
Meſire iofrois deloſe gaon
Meſire Guillaume longe eſpee
Chaſcun abien lateſte armee
Et meſire hues de floꝛine
Li douſſieſmes je vous afine
Que tuit ſont pꝛeus hardis auſarmes
Chaſcun tient leſcu as enarmes
Bien ſemblent angles enpannet
Ceſt la floꝛ de creſtientet
Et de croire ne men voulez
Droit aliſſue del rochieꝛ
Les pourriez vëoir ſanz faille
Car a vo gent font grant bataille
Et moult en ont naures et moꝛs
A teꝛre en vi geſir maint coꝛs
Et ſoꝛ loꝛieꝛe del chemin
Vi geſir moꝛt roy malakin
Son compaignon roi eſcoꝛfart
Qui conduiſſoit vostre eſtandart
Li ſoudans ot le cueꝛ dolent
De ce quot dire toꝛneuent
Bien leſcoutoit et tint loꝛeille
Des chevaliers moult semerueille
Que tout li mondeſloe et priſe
Bien voit qu'il ſont de grant enpriſſe
Moult ſa penſa de grant bonté
Que ce ſeꝛoit trop grant pité
De metre telle gent amoꝛt
Cenefeꝛoit il mour nul treſoꝛt
Les pꝛeus darmes ne haoit mie
Touz jours amaſt cheuallerie
Quar .i. quans hues ladoula
Treſtoute loꝛdꝛe li mouſtra
Li ſoudans lauoit enpꝛiſon
Poꝛce li uita ſarencon
Puis ſen rala engalillee
Sires eſtoit de la contree
Apꝛeſlirois ſoudans parla
Le roi de halpe en apela
Le roi d'aufrique parlamain tint
Avez oÿ ſeingnoꝛ couſin
De leſpie et contes et dis
De ce vous dirai mon avis
Cil .xii. dont je los parleꝛ
Pourroient plus nos gens greveꝛ
Que tout li oſt des Creſtiens
De treſtout ce ceꝛtains ſoiens
Que par ci ni voi point depaſſage
Diſt li ſoudans qui moult fu rage
Par mahommet en cui je crois
Ce ſont francois de grant boufois
Li rois d'aufrique li reſpont
Veꝛs damiete nous meton
Car ceſt la clef et ceſt li ſeꝛre
Et li plus foꝛs lieus delaterre
Bien eſt garnie foꝛt ſont limur
Dedens ſeꝛons nous aſeur
Acel conſeil ſont acoꝛdet
A tant eſt leur oſt atoꝛnet
Veꝛs damiete vont tout dꝛoit
Mes d'eſcofart ſont en eſfroit
Et del vaillant roy malakin
Ci vous leꝛai de ſalhadin
Si vous dirai des haus barons
Qui le paſſage gardent tous
Quant Paiens virent des logieꝛ
En haut les pꝛiſtrent ahuchieꝛ
A enalez ſeingneur glouton
Ves ci letref leꝛoi phelippon
Ouil ratant leꝛoi ſoudant
Liſarrazin ſen vont fuiant
Nia paien tur nieſcleꝛ
Qui ait talent de retourneꝛ
Car chaſcun reſoignoit lamoꝛt
Des haus pꝛinces vous dirai loꝛs
Qualoſt francois ſont retoꝛnes
Mains pꝛeudons eſt encontre ales
Lirois phelippes y ala
L'un apꝛés l'autre ſalua
Et les acole par doucoꝛ
Aſſez iot leꝛmes et ploꝛ
De lagrant joie qu'il avoient
Des vaillans pꝛinces qu'il rauoient
Dont moult furent reconfoꝛtes
Et touſt lioſt renlumines
Li rois de France fu coꝛtois
Par lamain priſt Richart langlois
En ſon tref mainne les barons
De tous leur oſte les blaſons
Et les aida adés armeꝛ
Le ſoupeꝛ firent apareileꝛ
Puis pꝛiſtrent liaue ſeoir vont
Vin et viandes afoiſon
Firent venir et apoꝛteꝛ
Chaſcun menga agrant plenté
Ilen avoient bon meſtieꝛ
Car moult eſtoient traueilliet
Quant oꝛent mengie et beut
Loꝛ mains lauent grace ont rendut
A Jhesucriſt demaiſte
Qu'il leur a fait ſi grant bonté
Que ſain et ſauf ſont repairies
Dont li barnages fu tous lies
Moult firent grant cheuallerie
Quant auſoudant de paiennie
Aleꝛent deſfandꝛe le paſſage
Grant honneur firent leur lingnage
Tous jours en ieꝛt larenommee
Ou les point en ſale pauee
Ceſt .i. tres nobles mireoꝛs
A ceulz qui tandent a honnoꝛs
Et maintienent chevaleꝛie
Prions adie le filz Marie
Quen paradis mete aſoulas
Les .xii. qui gardont lepas
Et la noble chevaleꝛie
Que li rois guis ot enbaillie
Peleꝛin furent outremeꝛ
Arrieꝛ ne voꝛent retourneꝛ
Soient pꝛis ſur acre conquiſſe
Et le roi Gui. mis enbaillie
Dacre fu rois et du pais
Ainſi ſe court Dieus ces amis