Dites vos pate noſtres Pour toute ſainte egliſe
Car elle eſt acouchiee Et ſi ne ſcet ou giſt
En nul plus povre eſtat Ne poꝛroit eſtre miſe
Tant eſt fait que ſus lui Chace eſt coꝛuee et pꝛiſe
Et pour ce que chaſcuns La deboute et dechace
Dites vos patenoſtres Que Diex pardon li face
Dites vos pate noſtres Sainte egliſe travaille
L'en la ja mis genir Au fuerre et a la paille
Chaſcun du ſien apꝛis Nul n'i a qui li baille
L'en la pert e recope Et retrenche et retaile
De floꝛins a chaiere Et de floꝛins a mace
Dites vos pate Que Diex pardon li face
Dites vos pate noſtres Sainte egliſe vault moꝛte
Ce qu'on li a oſte Et pꝛins de vie toꝛte
Couſin n'a ne parent Qui de riens la confoꝛte.
Car tuit ſont eſmeü Contre lui d'une ſoꝛte
L'un la boute des piez L'autre crache en ſa face
Dites vos parenoſtres Que Diex pardon li face
Dites vos patenoſtres Pour /iehan l'apoſtole
Qui fait a grant mouſtier De petite chapele
Et d'un eueſchie .iii. C'eſt bien choſe nouvele
Onques mais ne joua Papes de tel merele
Eueſques et abbes ∴ Enſamble ioint et lace
Dites vos patenoſtres Que Diex pardon li face
Dites vos patenoſtres Pour cardinaus de /Romme
Car il ſont vaillant rien Avec ce qu'il ſont home
De l'autrui cure n'ont Se ce n'eſt de grant ſomme
Car pas ne ſont enfans Pour apaier de pomme
Poꝛ ce ne veulent pas Des bꝛas c'on les embꝛace
Dites vos patenoſtres Que Diex merci li face
Dites vos patenoſtres Poꝛ pape et cardinaus
Qui ſont de tous coufouls Mais qu'il aient dons hauls
Et d'autre part pꝛieres Seront eſpeciaus
Poꝛ ce meſtre antipape Et ces chardonneriaus
Qui contre ſainte egliſe Courent a la harache
Dites vos patenoſtres Que Diex merci li face
Dites poꝛ nos prelas Qui gouuernent le monde
Qu'il ſachent traire argent De la ou trop habonde
Meſmement poꝛ tous ceulz Qui mainent vie monde
Et prechent la foy Ne ne doutent vergoigne
Ne moꝛt qui leur chief nus Ne ſoit a decolace
Dites vos patenoſtres Que Diex pardon loꝛ face
Pour ceulz ne pꝛie l'en Des prelas qui ſe paiſſent
Et les leur riches font Noꝛriſſent et encraiſſent
Et d'amendes leurs gens Contre raiſon expreſſent
Et leurs povres voiſins Terre en famine leſſent
Et leſt treſoꝛs amaſſent De pierres d'eſtopace
Dites vos patenoſtres Que Diex merci li face
Dites vos patenoſtres Ainſi vous en ſouuiegne
Poꝛ clergié ſi qu'a mains Pires pas ne deuiengne
S'il ne veult amender En ceſt eſtat ſe tiengne
Je li pꝛi qu'il ne face Tant le bien qu'il enſaigne
Le dire leur ſouffiſt Sans entrer en la trace
Dites vos patenoſtres Que Diex merci li face
Pour tous officiaus Pour gens d'auocatie
Poꝛ tous procurateurs Pour clers de notairrie
Et pour pꝛeſtres curez Qui ne ſe ſaignent mie
De leurs parrochianes Par joꝛ et par nuitie
Viſiter ſi qu'il aient Ouuerte la creuace
Dites vos pate noſtres Que Diex pardon li face
Pour clers eſtudians Poꝛ tous ceulz des enqueſtes
Poꝛ les meſtres auſſi Qui ſieent aus requeſtes
Poꝛ aduocas et juges Qui debatent leurs teſtes
Et tous joꝛs leurs mains ont Poꝛ pꝛendꝛe l'argent preſtes
Se en deffaut les gens chieent Poꝛ eulz en couſtumace
Dites vos patenoſtres Que Diex merci leur face
Dites vos patenoſtres Poꝛ la chancelerie
Que vers nous ſoit courtois Piteus ſans felonnie.
Poꝛ les phiſiciens Drois eſt c'on ne l'oblie
[...] Et ceulz de cyrurgie
Que nulz en ſon meſtier Vers nous ſe foꝛface
Dites vos patenoſtres Que Diex pardon leur face
Dites vos patenoſtres Pour ces religieus
Qui chaſcun anchargie Sont d'abſolutions
Des oꝛ mais pou vaudꝛont Leurs grans executions
Poꝛ vivre loꝛ convient Vendꝛe poſſeſſions
Poꝛ ce que l'en leur toſt Leur pain et leur fouace
Dites vos patenoſtres Que Diex pardon leur face
Pour ces religieus Qui ont diſmes et rentes
Dites vos patenoſtres Doucement endementres
C'ont leurs coꝛps en mouſtier Qu'il n'aient leur ententes
A celes qui ne ſont Couſines ne parentes
Et ſe par fol deſir Euure leur font homage
Dites vos patenoſtres Que Diex merci loꝛ face
Pour oꝛdꝛes mendians Ne fault il pas pꝛier
Car bien ſceuent partout Leur pꝛofit eſpier
Il pueent aſſeur Aſſez eſtudier
Et dedens leurs mouſtiers Chanter hault et crier
Lays ont et ſepultures Et uiuent ſans menace
Dites vos patenoſtres Que Diex pardon leur face
En ce monde les voi Faire de diuers tours
Ces oꝛdꝛes mendiaus Qui ont diuers atours
Les grans chaperons ont Par villes et par bours
Dire ſouvent le bien Aucun font a rebours
Et pour ce auſſi com fait A terre une lymace
Dites vos patenoſtres [...]
Dites vos patenoſtres Pour ces /hoſpitaliers
Car l'en leur cloſt leur Granges maiſons celiers
A leur domage ont il Les biens a ces /templiers
Car il en ont le plait Ne ſai que les deniers
N'encoꝛ n'en a l'en fait Choſe que a Dieu place
Dites vos patenoſtres Que Dieu pardon li face
Dites vos patenoſtres Pour roy pour duc pour conte
Qu'en eulz de joꝛ en joꝛ Pris et puiſſance monte
Et qu'aient tele gent Que riens ne leur meſconte
Dont puiſſent maintenir Leur bon eſtat ſans honte
Et que le lis ne ſoit Point de male eſpinace
Dites vos patenoſtres Que Dieus merci leur face
Dites vos paternoſtres Pour vostre baronnie
Que de Dieu pooir ait Contre mer ſoit baſtie
Vers Paiens trieve grant Adont ne faudꝛont mie
A leurs gages avoir Sus nostre diſmerie
Car de telle meſſe oient Volentiers la preface
Dites vos patenoſtres Que Diex pardon loꝛ face
Dites vos patenoſtres Poꝛ cha chevalerie
Que plus quel n'a eſté La face Diex hardie
Et que tele foꝛce ait Et puiſſance et aie
Q'outremer faire puiſt Une tele enuaie
Poꝛ coy les meſcreans De ſainte terre enchace
Dites vos patenoſtres Que Diex pardon leur face
Dites vos patenoſtres Et aval et amont
Poꝛ la chevalerie Qu'oꝛendꝛoit l'en ſemont
Poꝛ aler oultremer En nef et en dꝛomont
Aveques m'en irai Quant l'yaue contremont
Coꝛra ou quant ſera Toute noire la glace
Dites vos patenoſtres Que Diex pardon leur face
Dites vos patenoſtres Auſſi poꝛ ces ducheſſes
Pour conteſſes auſſinc Et puis poꝛ ces pꝛinceſſes
Qu'au mouſtier el ne ſoient Mie caqueterreſſes
Et qu'entre leurs priſons Ne laſchent nules veſſes
Et ſe aucune veult faire Ou file ou filace
Dites vos patenoſtres Que Diex pardon leur face
Dites vos patenoſtres Poꝛ toutes nobles dames
Et pour leurs damoiſeles Qui ont ames de fames
Que Diex leur doinſt uſer De celles ſans diffames
Si qu'en la fin ou ciel Soient ſauves les ames
Non obſtant ſe loꝛ coꝛps Au monde ſe ſolace
Dites vos patenoſtres Que Diex pardon loꝛ face
Dites vos patenoſtres Poꝛ beguines celees
Poꝛ filles Dieu nonnains Veuues et mariees
Que Diex a toutes doinſt Faire leurs deſtinees
Si que leur fait ne ſoient Repꝛiſes ne prouuees
S'il avient de couſtume Qu'aucune ſe mefface
Dites vos patenoſtres Que Diex merci leur face
Dites vos patenoſtres Poꝛ ceulz qui vraiement
S'entreſont entrame Et aimment fermement
En foy et an fiance. Et ſans deceuement
Car auſſi bien ſe treuve Et ſi entierement
Amours ſous camelins Comme ſous paonnace
Dites vos patenoſtres Que Diex merci leur face
Dites vos patenoſtres pour les jones filletes
D'entre .xv. et .xiiii A poingnans mameletes
Que au Dieu d'amours puiſſent Rentre et paier leurs debtes
Sans ce que vilonnies D'eulz en ſoient retraites
Ne domme meſdiſant Ne de vielle riace
Dites vos patenoſtres Que Diex merci leur face
Pour ces coꝛtoiſes dames Qui tant ont de franchiſe
Qui des coꝛps et des biens Font partie et diuiſe
A ceus qui de cuer aimment De ſi parfaite guiſe
Que ſurcot et puis cote Pelocon et chemiſe
Chaſcune a ſon ami Quant il li plait rebꝛace
Dites vos pate noſtres Que Diex pardon loꝛ face.
Dites vos pate noſtres Poꝛ /flamens a grans ſaus
Qui font tant aus /francois Pluiſeurs divers aſſaus
Il ſe ſont bien mouſtre Au roy come loiaus
Teulz mains lettres on ont Ou il n'a nulz ſeauls
Et poꝛ ce les ay mis Dedens ceſte rimace
Dites vos patenoſtres Que Diex pardon leur face.
Dites vos pate noſtres Auſſi poꝛ la monnoie
Qui ca et ſi reuient Oꝛ nerciſt oꝛ blanchoie
Qui le pꝛofit en a Je ne ſai Diex le voie
Je ne feroie pas .I. chevalier de croie
Poꝛ tout le grant conſeil Qui ce nous fait et bꝛace
Dites vos patenoſtres Que Diex pardon li face
Dites vos patenoſtres Pour chaſcun boulengier
Poꝛ ce qu'il nous ont fait Pan de bꝛen a mengier
Encoꝛ de pain loial Faire nous font dangier
Diex doinſt que au prevoſt Qui nous puiſt vengier
Encoꝛes jadis furent Es /halles /saint eüſtace
Dites vos patenoſtres Que Diex pardon leur face
Pour les gens de meſtier Au mo[n]de neceſſaires
Poꝛ feures mareſchaus Et poꝛ apoſticaires
Qui vendent les cyrops Et les bons laituaires
Et pour tous coꝛratiers Preuos baillis et maires
C'on face leurs offices Ne nous facent fallace
Dites vos patenoſtres Que Diex pardon leur face
Priez que Diex confonde Tous ces mauls meſdiſans
Et que de celer ſoient Aus amans auiſans
Priez auſſi pour tous Ces vilains paiſans
Et poꝛ leur archepreſtre Pri con meſtres liſans
Aus feſtes deſſous l'oꝛme Sermonne ou auocace
Dites vos patenoſtres Que Diex pardon leur face
Pour toutes gens qui ſont De bone renommee
Qui boiuent volentiers De jour et de nuitee
Si que la teſte en deult Souvent la matinee
Afin quel ſoit guerie Et toſt reconfoꝛtee
Qu'il ait de la puree Ou d'yaue de radace
Dites vos patenoſtres Que Diex pardon loꝛ face
Dites vos patenoſtres poꝛ gent de maladie
Si qu'encoꝛ puiſt mengier Et boivre vin ſus lye
Et chanter et dancer Et mener bone vie
Et doinſt la male moꝛt Meſdiſans plain d'envie
Et que loial amoꝛ D'amans ne ſe deſlace
Dites vos patenoſtres Que Diex pardon li face
Pour ceulz qui ſont enflez Et plain d'ypocriſie
Et poꝛ ceulz qui le mal Sueffrent d'apoplexie
Poꝛ ceulz qui la la pierce ont Et mal en leur veſſie
Et poꝛ les trop ſerrez Que ſ'eſmueue et deſlie
Loꝛ ventre a cele fin Qu'iſſe hoꝛs de loꝛ chaſſe
Dites vos patenoſtres Que Diex pardon loꝛ face
Pour treſtous enfermes Qui ſeulent eſmaier
Que Diex ſanté loꝛ veille Et ſa grace otroier
Ceulz qui ſont en peril Aident ſans delaier
A ceus auſſi qui doivent Doinſt foꝛce de paier
Si que ſes crediteurs Un chaſcun ſatiffaice
Dites vos patenoſtres Que Diex pardon leur face
Priez auſſi poꝛ ceulz Qui trop ſe deſconfoꝛtent
Et pour ceus qui partout En biens ſ'entredepoꝛtent
Poꝛ amans qu'en amant D'aler dꝛoit ne ſe toꝛtent
Aus contrais impotens Qui dꝛoit loꝛ coꝛps ne poꝛtent
Qu'aient pour ſouſtenir Ou baſton ou eſchace
Dites vos patenoſtres Que Diex merci loꝛ face
Dites vos patenoſtres Poꝛ les gens qui labourent
Non pas poꝛ ces gloutons Qui bons moꝛſiaus deuourent
Et qui la ſainte egliſe N'aitent ne honoꝛent
Mais poꝛ les marchéans Qui les pais ſecourent
Et les biens nos apoꝛtent Et les metent en place
Dites vos patenoſtres Que Diex pardon leur face
Dites pour marchéans Qui font marchéandiſe
Quelque part que ce ſoit Ne de quelconque vie
Poꝛ les bons compaignons Qui nus en leurs chemiſes
Couſtumier ſont d'aler Contre le vent de biſe
En yver eſt beſoins Ou qu'en loꝛ face grace
Dites vos patenoſtres Que Diex pardon loꝛ face
Dites vos patenoſtres Poꝛ le fruit de la terre
Que Diex nous doinſt bon vin Sans loing aler le querre
Si que fainn ne ſoit plus Ne nous tiengnent en ſerre
Et du royaume oſter Le contens et la guerre
Et que ceulz ſi ſ'amende Qui la noiſe pourchace
Dites vos patenoſtres Que Diex pardon li face
Pour ceulz qui ſont coart Qu'il aient hardiece
Et pour les deſvoiez Que bien Diex les adꝛece
Poꝛ la gent qui ſ'eſtent Du lonc quel ſe redꝛece
A tous ceulz qui foloient Que Diex loꝛ doinſt ſagece
Tele com /virgile ot /Aritote et /oꝛace
Dites vos patenoſtres Que Diex pardon leur face
Pour toutes gens qui ſont d'office ſeruiables
Qu'il ſoient tous joꝛs liez En cha[m]bꝛes et en ſales
Et que teulz ſeigneurs aient Coꝛtois et aimables
Des quelz puiſſent avoir Leurs loiers convenables
D'oꝛ d'argent et de robes E non pas de foꝛnace
Dites vos patenoſtres Que Diex pardon loꝛ face
Pour tous bons pelerins QueDiex dꝛoit les convoie
Poꝛ povres qui querant Vont loꝛ pain par la voie
Poꝛ ceulz qui n'ont argent Ne ami qui leur croient
Que Diex a leur beſoing Tel confoꝛt loꝛ envoie
Qu'encoꝛ oꝛ et argent Aient en leur beſace
Dites vos patenoſtres Que Diex pardon loꝛ face
Pour /iacobins qui vont de nouvel oultre mer
Poꝛ la foy creſtienne Aus /Sarrazins ſemer
Et poꝛ ceulz qui les ſiuent Doinſt on Dieu reclamer
Que les cuers des payens Si puiſſent entamer.
Que par eulz Diex la face Nouuele dedyace
Dites vos patenoſtres Que Diex pardon leur face
Dites vos patenoſtres poꝛ pelerins laſſez
Qui par de la mer ſont Poꝛ Dieu pꝛis et quaſſez
Il en y a trop mains Qu'il ne deüſt aſſez
Et poꝛ tous ceulz qui ſont En la foy treſpaſſez
Et pour ceulz qui vis ſont Que bien Diex loꝛ parface
Dites vos patenoſtres Que Diex pardon loꝛ face
Pour tous ceulz dont l'en doit En bien faire pꝛiere
Dites pater noster Tout ce devant derriere
Apꝛez ces patenoſtres Buuons a lie chiere
Si que de Dieu aions Pardon et grace entiere
Poꝛ /gieffroy qui ce fiſt Qu'il ne ſoit on eſpace
Dites vos patenoſtres Que Diex pardon li face