Par la grace de Dieu Noſtre ſouverain pere
Vel parler .i. petit De /ſa tres douce Mere
D'une de ſes vertus Vous dirai la manere
Dont la matere fu Hoꝛriblement amere
Bon fait ſervir tel dame Con /la Virge Marie
C'eſt /cele qui poꝛta /Le tres doulz fruit de vie
Ou cel en terre en mer Doit bien eſtre ſervie
Cuers qui a lui ſe pꝛent Richement ſe marie.
Un de ſes [biaus ]miracles vous voudꝛai raconter
Que toutes bones gens Doivent bien eſcouter
Cil qui bien loiaument La veult de cuer amer
Doit volentiers tous joꝛs De li oir parler
De .ii. freres germains vous veil ramentevoir
Li uns ot une fille Riches hons fu d'avoir
Mais la moꝛt qui le pꝛiſt L'a fait le cuer doloir
Tantost manda ſon frere Il vint ſans remanoir
Biau dous freres diſt il Il me convient moꝛir
Je vous leſſe du tout Ma fille maintenir
Cil diſt ſ'ele ſe veult A mon voloir tenir
Nient plus qu'a mon enfant Ne li vouldꝛai faillir
Quant li pꝛeudons fu moꝛs Sa fille ſ'en ala
En la maiſon ſon oncle .II. ans y demoꝛa.
Poꝛ l'amoꝛ de ſon pere Moult d'aumoſnes donna
En /la Virge Marie Treſtout ſon cuer mis a
En /Nostre Dame amer Miſt treſtout ſon coꝛage
Nuit et joꝛ voloit eſtre Devant ſon dous ymage
En lire ſon pſaltier Miſt treſtout ſon uſage
Mais li malvés li fiſt Deſtourbier et domage
Ainſi com vous oꝛrez Aſſez prochainement
Oez com li mauvez La decut laidement
Tant pourchaca dëables Par ſon enchantement
Qu'ele fu ſe don oncle Enceinte vraiement
Nului de ſa groſſeſſe Garde ne ſe dona
Poꝛ ce qu'ele ot grant robes Dont elle ſe para
Quant ſe dut delivrer En .i. ſolier ala
Par l'enging l'ennemi Son enfant eſtrangla
Adonques le geta Dedens une privee
Liez fu li ennemis Quant ainſi l'a temptee
Loꝛs fu la pecherreſſe Foꝛment deſconfoꝛtee
/La douce mere Dieu A de cuer reclamee
Devant ſon dous ymage Se va agenoillier
A lui ſe plaint foꝛment Du felon adverſier
Que dedens les pechiez Li face trebuchier
Et le maint a bon poꝛt /Son fil que tant a chier
Le felon Sathenas Ne ſe tint mus a tant
Aſſez prochainement Refu groſſe d'enfant
De ſon oncle mes nulz Ne ſ'en va percevant.
Quant elle fu delivre Si l'eſtrangla errant
Trois en ot de ſon oncle Et tous les eſtrangla
Ne ſon oncle ne autre Garde ne ſ'en donna
Dedens une pꝛivee Les .iii. enfans geta
Ainſi li ennemis Par .iii. foys la tempta
Encoꝛ li fiſt il pis Si com m'oꝛrez conter
En .i. ſolier la fiſt Toute ſeule enfermer
D'une temptation Li va ſon coꝛps tempter
Poꝛ les .iii. enfa[n]cons Qu'il li fiſt eſtrangler
Laſſe dit la chetive Comment me chevirai
S'en treuve mes enfans En feu arſe ſerai
Li ennemis li diſt Pens toi je t'aiderai
Cele li reſpondi Ta volenté ferai
Cele pꝛiſt une coꝛde Sus .i. tref l'a getee
.I. las courant y fiſt A ſon col l'a fermee
Mais ains qu'el ſe pendiſt Li vint une penſee
De ſaluer /la Virge Ot moult grant deſirree
Un Ave /Maria Recoꝛda maintenant
En l'onnoꝛ des .v. joies Qu'ele ot de ſon enfant
L'ennemi la ſemont Et la va ſi haſtant
Qu'ele ſe lait aler Par le col bꝛandelant
Onques ne pot moꝛir quant elle fu pendue
Car la coꝛde rompi S'eſt a terre cheue
Tant li dit l'ennemi Et tant foꝛment l'argue
.III. fois ſe pent tous joꝛs Eſt la coꝛde rompue
Quant li ennemis vit Qu'el ne poꝛroit moꝛir
Une moult grant yraigne Fiſt devant li venir
Cele tantoſt la pꝛent Si l'ala tranſglotir
Loꝛs fu de venin plaine Com ſ'ele dut partir
A ſi grant meſchief fu Qu'a po qu'el ne partoit
Mais /la Virge Marie En vie la tenoit
Qu'ele ſavoit moult bien S'en ce point treſpaſſoit
Que l'ame de ſon coꝛps En enfer ſ'en iroit
Loꝛs diſt la pecherreſſe Laſſe moi que ferai
Comment n'en quel maniere Occirre me poꝛrai
Li ennemis reſpont Et je le te dirai
Boute dedens ton ventre .I. coutel ſans delay
Loꝛs a pꝛis .i. coutel En ſon coꝛps la bouta
Toute ſe pourfendi Mais point [ne ]treſpaſſa
Quant el ne pot moꝛir Adont ſe pourpenſa
Que /la Virge Marie De cuer reclamera
Cele que le mauvais Avoit ainſi temptee
Eſtoit bone clergeſſe Et de grant ſens letree
Une oꝛoiſon commence De /la Virge honoꝛee
De grant devotion L'a dite et recoꝛdee
/Douce Virge Marie /Temples plain de vertus
/Veiſſaus enluminee En qui /li rois Jhesus
S'eſconſſa virgement Poꝛ traire de palus
Ses amis qui eſtoient Dampnez et confondus
/Virge tres gloꝛieuſe /Flour de virginité
Ou il n'ot onques tache De nule peſanté
/Precieuſe eſcharboucle Qui de ta grant clarté
Enlumine les cuers Qui ſont en obſcurté
/Dame par ta pitié veilles moi regarder
Envers ton doulz enfant Qu'il me veille tenſer
Qu'ennemis ne me puiſt En enfer toꝛmenter
Qui m'a fait mes enfans A mes mains eſtrangler
La laſſe pecherreſſe Se dementoit auſi
En pꝛiant /Nostre Dame Erranment ſ'endoꝛmi
/La douce Mere Dieu Devant lui deſcendi.
Par la grace de Dieu Enchaca l'ennemi
De lez la pecherreſſe Delez lui ſ'arreſta
De ſa bele main deſtre Le coꝛs li pourtaſta
Tous les pechiez de li Et le venin oſta
Et de la moꝛtel plaie Tout le coꝛps li ſana
/La douce Mere Dieu L'a ſi tres bien curee
Du venin et de plaie L'a ſi tres bien vuidee
Onques puis de pechié Ne fu entalentee
De /la Dame ainſi fu Guerie et confoꝛtee
Quant /la Mere Dieu l'ot curee netement
Elle ſ'eſt eſveilliee S'a veü en pꝛeſent
/La Dame qui li diſt Moult debonnairement
Amie amende toy Vien a repentement
Sers moi d'oꝛe en avant Et amende ta vie
De quanque tu as fait Te pardoins la folie
A ce mot /Noſtre Dame S'eſt du lieu departie
Cele qui demoꝛa Durement l'en mercie
En ſa chambꝛe eſt entree En .i. lit ſe coucha.
Ses oncles vint dehoꝛs Couchiee le trouva
Moult debonnairement Tantoſt li demanda
Comment il li eſtoit Car moult foꝛment l'ama
Elle reſpont biaus oncles Oez que je dirai.
A Dieu et a /ſa mere De cuer en couvent ay
Qu'a vous ne a nul autre Pechié je ne ferai
Je veil eſtre nonnain Plus toſt que je poꝛrai
Loꝛs a conte ſon oncle Toute ſa deſtinee
Comment ſes .iii. enfans Geta en la pꝛivee
Et comment /Nostre Dame L'avoit reconfoꝛtee
Jamais de lui ſervir N'oſteroit ſa penſee
Quant ſon oncle l'oÿ Si ploꝛa tendꝛement
Ses enfanz enfouy Par nuit pꝛiveement
Sa niece fu rendue Aſſez prochainement
La ſervi /Nostre Dame De cuer entierement
Pour la grant repentance /Nostre Dame l'ama
Et entoꝛ les nonnains Tel grace li donna
Puis fu elle abeeſſe Sainte vie mena.
Onques puis l'enemi Vers li ne converſa.
Ce biau miracle cy A tous vous ſenefie
Que chaſcuns endꝛoit ſoy Doit amender ſa vie
Et guerpir l'ennemi Qui tous joꝛs a envie
Par quoy il nous atrible A ſa grant compaignie
Prions a /cele Dame Qui tant eſt de hault pꝛis
Qu'ele ſoit nostre eſcu Entre nos ennemis
Et nous doinſt ſi ouvrer Et en fais et en dis
Que nous puiſſons conquerre Nos lieus en paradis.