Oꝛ eſcoutes ſeingnoꝛ Qui dame Diex uous ames
Qui les poines d'enfeꝛ Et les toꝛmens doutes
Je vous feꝛai oir S'entendꝛe me voules
Coument pechieꝛres hons Eſt en enfeꝛ penes
Des grans paines d'enfeꝛ Vous conteꝛai partie
Par garant d'eſcriture Si n'en mentirai mie
Coume pechieꝛes homs Le deſeꝛt en ſa vie
Que Diex ne veut ameꝛ Ains maint en felonie
Seingnour . deſous cel air a .i. ciel ce ſavés
De ſoleil et de lune Et d'eſtoilles liſtes
Par qui tous li mons eſt Tres bien enlumines
Deſour cel a .i. autre Qui eſt ciel apeles
Apꝛés eſt li tieꝛs cies ou eſt la maiſtes
Ou /li fix Diex parmaint Qui de /virge fu nés
Qui pour le nos pechies Fu en la crois penes
Quant diable nos ot Tretous deſeꝛites
Puis ne fu hons moꝛtex Qui ces .iii. ciex ne iſt
Foꝛs /l'apoſtre ſaint Pol Qui lamoꝛ Diex conquiſt
Qui quiſqu'a tieꝛs cel vit La joie /Jheſu criſt
Par /ſaint Michiel l'arcangle Que il a lui tramiſt
Icelle grant hauteſce Qui la joie eſt apelee
La ou /ſainte Marie Eſt roine clamee
Par cueꝛ de creſtieꝛ Ne puet eſteꝛ pensee
Par bouche de bon cleꝛc Ne puet eſtre eſcoutee
Icelle grant hauteſce Vit /ſaint Pol reſplandir
Ne la puet nus hons dire Pour nul tres grant loiſir
Foꝛs li fis Damediex Qui poꝛ nos vot moꝛir
Ne li mons n'eſt pas dignes Qu'il la puiſſe ſouffrir
Seingnoꝛ oꝛ vous dirai ce que vous ai pꝛemis
Com grant ſunt li toꝛment El doleꝛeus pais
La ou li pecheoꝛ Seꝛont en flanbe mis
Qui ne veulent ameꝛ Ne Diex ne ſes amis
/Sain Pol fu en enfeꝛ Aincois que il trauſiſt
Ou/ſaint Michiel l'archangle Le mena et condiſt
Diex vot qu'il conneüſt Les painnes et veïst
Tant en poons ſavoir Com /ſaint Pol nous en diſt
Oꝛ oies dont parleꝛ De l'infeꝛnal dolour
A garant en a trai /Saint Pol nostre doctoꝛ
Coument ſunt toꝛmente Li mauais pecheoꝛ
Qui pour la roine gloire Perdent leur creatoꝛ
A l'entree d'enfeꝛ A .i. arbꝛe plante
Dont les blanches deſeure Sont charbons enbꝛaſe
Et de boutons de feꝛ Eſtre tous boutones
De boutons plus ardans Que nus feus embꝛaſes
Ilueques vit /ſaint Pol Pecheoꝛs cruciez
Par les bꝛanches deſeure Eſt chaſcun clofichiez
Li uns peut par les jambes Li antres par les pies
Li autres par les bꝛas Chaſcuns pour ſes pechies
/Saint Pol a regardé de la ſeneſtre part
Et vit une foꝛnaiſe de feu Qui touſiours art
La flambe par .vii. luis Se deuiſe et depart
Oꝛ pꝛions Damediex Que il tous nos engart
Seingnoꝛ en la foꝛnoiſe a bien .c. et .vii. tros
Et .vii. flambes en iſſent De diueꝛſes couloꝛs
Set diaubles la tiſent Que ce eſt loꝛ laboꝛs
De cheſcune des .vii. En iſſent .vii. chaloꝛs
Environ la foꝛnaiſe A .vii. crueus toꝛmens
As pecheoꝛs reuient Moꝛtex cruciemens
[.]VII. diaubles le gardent O crueus feꝛemens
Quant ont l'ame ſaiſie Si la plungent laiens
Set plaies les apelles Les apele la devine eſcriture
La pꝛemieꝛe de noif Deſtraingnent froidure
La ſeconde de glace De deſtraingnent nature
Et la tieꝛce de feu De merueilleuſe ardure
Et la quinte ſet plainte C'eſt infeꝛniaus ſeꝛpens
Et la ſiſte de ffoudꝛe De grans engraignemens
La ſeſine de puours Et d'enpuiſeuemens
Dame Diex ſi nous gart De deſheꝛbeꝛgemens
Quant ces .iii. diaubles Ont une ame ſaiſie
Par mi ces .vii. toꝛmens Chaſcuns par ſoy le guie
L'un a l'autre la lance Quant il l'ont garde gueꝛpie
Quel part que ele court Diauble la ſaiſie
Quant il l'ont fait paſſeꝛ Par mi ces .vii. toꝛmens
Loꝛs vient a la chaitive [.]I. grant encombꝛement
As autres cil la lancent Qui mout en ſunt joians
El fons de la fournoiſe Ou elle eſt plus ardans
R cil .vii. la graillent El fons de la fournaiſe
O fourches et o bꝛanches En heꝛbeꝛge puneſe
L'ame qui la ira Mout aia de meſaiſe
Gardes que ne facies choſe Qu'a Diex deſplaiſe
Seingnoꝛ je ueil a vous parleꝛ ſi parfondement
/Saint. Pol ſe merueilla De l'angoiſſe toꝛment
A saint Michiel demande Qui ſunt oꝛ celle gent
/Saint michel li a dit Sans nul delaiement
Sire cil que uees Qui en tenebꝛes ſunt
Ce ſunt li pecheoꝛ Qui dame Diex meffont
Confeſſion requieꝛent Que /Jheſu peur pardon’t
Et quant il ſunt confes Penitantce ne font
Seingneur ne cuides pas Quant pechies et nommes
Que par tant ſeulement Puiſt eſtre pardonnes
Tres que li coꝛs en ſoit Trauaillies et penes
Et que par penitance ſoit Vaineus et mates
Sachies que grans doloꝛs Eſt a ciaus otroie
Qui par leur pꝛeeſche Penitance laiſie
Donnes de la richeſce Dont Diex vous a ſaiſie
De ſour tous autres biens Eſt aumonne eſſancie
Il ne oÿ /ſaint Pol Tant doleꝛeus crieꝛ
Li .i. bꝛaient d'angoiſſe Et li autre ploureꝛ
Et tant oꝛriblement A ſa vois eſcrieꝛ
Souvent regretent moꝛt Ne la peuent trouveꝛ
Pour ce ſunt li toꝛment Si cruel et ſi fieꝛ
Chaſcun de ſa deſeꝛte Receure ſon loieꝛ
Ja la vostre richeſce Ne vous ara meſtieꝛ
Toſt vous poꝛra toꝛneꝛ A mout grant encombꝛieꝛ
Seingneur car pourchacies contre ce gariſon
Que vous ne ſoies mis En icelle maiſon
L'eſcriture coumande Que nous le vous diſon
Que les paines d'enfeꝛ N'aront ja raencon
Ne vous anuit il pas Ma parole a oir
Au'il nia nul de vous Qu'il n'eſcue ce moꝛir
Et eſpaules et bꝛas Et la langue pourir
Hauteſce ne avoir Ne vous poꝛra garir
Dieu avés vous veü moꝛir Vous anciloꝛs
Qui laiſie nous ont Ceꝛtes ce m'eſt uis et honoꝛs
N'en ueiſtes puis nul N nus n'en eſt reſours
Diex gart et nous Et eus des infeꝛnaus doloꝛs
Nous iront apꝛés eus N'eſteꝛa deſtourne
Mout ſe par puet liex faire Qui maint encharite
Car charites eſt Diex Dont maint en tamelde
Et Diex maint en celui Qui maint charité
Oꝛ pꝛions Damediex Qui en la crois fu mis
Premieꝛement pour nous Et puis pour amis
Qu'il ait merci des moꝛs De pechié gart les uis
Que en enfeꝛ ne ſoient Vilainnement aſſis
/Saint Michiel et /saint Pol Sunt enenfeꝛ entre
Et ont devant eus [.]I. toꝛment encontre
De la paoꝛ qu'il ot Reclama d'ame de
Merci biaus ſire peꝛes Bons roys de maiſte
Meꝛci biaus ſire peꝛes Bons roys de majesté
Targes m'ame et mon coꝛs Que ne ſoie dane
/Saint Michiel l'eſgarda S'el vit eſpoente
De dame Diex le ſaigne Si l'a aſſeure
Le toꝛment dont /saint Pol Ot la paoꝛ ſi grant
Couuert une grant roe De noir feu tout ardant
M. toyſes a de le Et de lonc autretant
La roe eſt de noir feu Legieꝛement toꝛnant
Eſtencelles en vont Menuement ſaillant
Indes rouges et noires Mout eſpés et quiſant
De la menoꝛ poꝛoit ardoir [.]I. aimant
Nel tenes a mencoigne Cou eſt voirs vraiement
C'eſt la plus dure pieꝛe Qui puiſt eſtre trouvee
Que pieꝛe daimant Iſi eſt apelee
S'ele eꝛt el feu d'enfeꝛ Ja ni aroit duree
Arma qui laira mout Ieꝛt maleüree
Mil cheuilles Ja rengies et agues
En .iiii. pans copans Plus qu'eſpee moulue
Qui en la roe ſunt Fichies et couſues
Pour tourmenter les armes Qui la ſeꝛont uenues
Ilueques a .i. diauble Del feu denfeꝛ fournie
En ſamblance fu fais D'un angle enpene
N'a ſi hardi el monde Si l'avoit ſ'il avoit eſgarde
Qu'il n'en perdiſt le ſens Et tretout ſon penſe
Les la roe ſe ſiet Ne ſe puet remueꝛ
Car cou eſt ſon meſtre A la roe toꝛneꝛ
.M. foys la fieꝛt le joꝛ Pour mieux eſtenceleꝛ
A chaſcun des. mil foys Le fait. mil toꝛs toꝛneꝛ
Mil. diaubles les li De la gent paignoꝛ
Chaſcun tient en ſa main L'arme d'un pecheoꝛ
Chaſcun en ſa cheuille Le fieꝛt a grant doloꝛ
Quant toutes ſunt fichichies La roe pꝛent ſon tour
Cil diables la fieꝛt A donques ſi foꝛt vient
Plus toſt le fait aleꝛ Que foudꝛe ne deſcent
Ains que ele ait toꝛne A il dit a ſa gent
Oꝛ toſt apoꝛtes autres Toſt et iſnellement
Oies com grant doloꝛ Et grant deſtruſion
Quant la roe a toꝛne Mil. foys en une randon
Et il i ſunt noirci A guiſe de charbon
Le diauble les fait Hurteꝛ a .i. peꝛon
Quant el fieꝛt a peꝛon A coup queelle pꝛent
Loꝛs croiſt et eſtencelle Si angoiſſeuſſement
Que tout en fait enfeꝛ Troilleꝛ parfondement
Com te ſe fuſt tonoirres Ou foudꝛes qui deſcent
Li pecheoꝛ qui ſunt En la roe fichie
Tout cheent ca et la Quant il ſunt detrenchie
Deauble les recueillent Qui ſunt appareillie
Chaſcuns en ſa cheuille L'eꝛa mout toſt fichie
Mil foys en ont le joꝛ La roe ſi charchie
/Saint Pol vit chaſcune Flamblant et embꝛaidie
[...]
[...]
[...]
Chaſcune trait la langue Qu'eſt de feu enlumee
Et tuit crient enſamble Coume gent toꝛmentee
Hai; las chaitive Ou eſt la moꝛt alee
Ici eſt la moꝛt alee Que doit que ne repeire
Ja fu ele tant douce Et fu tant debonnaire
Bien deüſt retoꝛner poꝛ nous Foꝛs d'ici traire
Trop ſoums en deſtrece Ne ſavon mes que faire
/Saint Pol vit le toꝛment Et foꝛment ſ'eſmaia
/Saint Michiel fu les li /Saint Pol li demanda
Qui eſt cele chaitive Qui ce deſeꝛvi a
/Saint. michel li reſpont Ce vous dirai je ja
Ce ſunt li oꝛgueilleus Qui ont l'oꝛ et l'argent
Qui tiennent en deſpit Et gabent povre gent
Quant voient leur beſoing Pitie ne leur enpꝛent
Pour ce ſunt toꝛmente Enſi aſpꝛe toꝛment
Seingnoꝛ je vous chaſti Ne vous oꝛgueillies
Car oꝛguex eſt li pire De tous autres pechies
Mais bonne humilité Dedens vos cueꝛs aies
De ſires penitance Charites et pities
Seingnour oyes apꝛés Neuous anuit il mie
Tant com vous poes eſtre En ceſte moꝛtel vie
Donnes de uoſtre avoir Ne vous atargies mie
Car quant vous ſeꝛes moꝛt De riens nares baillie
Sueꝛpiſſies convoitiſe Dont tout eſtes carchie
De dame Diex ſeꝛvir Soies appareillie
Que vous nepuiſſies eſtre En enfeꝛ trebuchie
Dame Diex nos en gart Par la ſoie pitié
/Saint Pol. et /saint Michiel Sunt en enfeꝛ entre
Apꝛés ice toꝛment Ont .i. autre encontre
.I. flueue mout oꝛrible Et peꝛeilleus et le
Et leue en eſt plus noire Que nus charbons trible
/Le lac tartarion L'apele l'eſcripture
Dieu entrai agarant Qui de mentir n'a cure
M. fiees le joꝛ change En l'iaue nature
De froidure en chaloꝛ De chaloꝛ en froidure
Quant la ture change Le flueue muit et bꝛait
Car uns vens les commuet Qui toꝛmenteꝛ le fait
Qui del puis d'enfeꝛ vient Et par conduit ſ'en vait
Quant l'une paine I faut l'autre a ſoy le retreit
La pꝛemieꝛe des paines Eſt de ſi grant douloꝛ
.I veꝛe glas et gielee Ce eſt moult grant froid
Deles cele froidure Reſembleꝛoit chalour
L'arme qui .la ira Mout ara de douloꝛ
Quant la froidure change En chalour eſt mue
Qui tant par eſt cuiſant Et tant deſmeſuree
La flamble et la chaloꝛ Eſt enſemble meſlee
L'ame qui la ira Seꝛa mal hoſtelee
Les autres paines ſont Tant crueus et tant fieꝛes
Puans et eſpꝛenans De diueꝛſes manieꝛes
Seingnoꝛ oꝛ faiſons toſt Pour les ames pꝛoieꝛes
Que doume Diex les gart A ſon oes les ait chieꝛes
Sus cele eue a .i. pont Qui par mi la depart
L'eue eſt treſtoute Deveꝛs ſeneſtre part
Rouge deveꝛs la deſtre Coume flamble qui art
Ja n'avra le cueꝛ lie Pecheoꝛ qui les gart
Le pont eſt tout d'acieꝛ D'infeꝛnal tempꝛement
M. toiſes a delonc Se l'eſtoirement
Par engien de diauble Fu foꝛgie ſoutilment
Plus trenche que raſoir Eſmolu tenuement
El flun a noirs diaubes Qui ſambles beſtes mues
Par l'iaue vont tumbant Oꝛibles et hidouſes
De grans flotiaus de feu Sunt treſtoutes ueſtues
Grans d'eus ont en leur guelles Et ſi ſunt bien agues
Cedit /ſaint Pol qui vit D'autre part de ce pont
Poiſons hideus et lais Qui par mi l'iaue vont
Chaſcuns d'eulz a .ii. teſtes Qui a redouteꝛ font
Plus oꝛibles ne vit onques Nus hons du mont
Seingnour par iceſt pont Nous eſté eura paſſeꝛ
Qui tant par eſt eſtrois Com vous m'oes conteꝛ
Et les bons et les maus Reſcouura paſſeꝛ
Ni ara ſi hardi Qu'il n'eſtuet trambleꝛ
Oꝛ depꝛions le roy Qui tout a a gardeꝛ
Qui gouueꝛne le ciel Et la teꝛre et la meꝛ
Et a la fine foꝛme Nous daigna enfoꝛmeꝛ
Qui de painnes d'enfeꝛ Nous daigna delivreꝛ
Seingnoꝛ tes eſt li pons Com je vous ai retret
Chaſcun pechieꝛe i monte Ou quan que il a fet
Son pechié poꝛte O ſoy qui chenceleꝛ le fet
[...]
[...]
[...]
Li uns paſſe .x. coiſes Li autres .v. ou .vii.
Tant va ſeurement Com il a de bienfet
Seignoꝛ quant chiet del pont Sachiez tout entreſet
Les poiſons et les beſtes Loꝛ sont tout en aguet
Enſement com le leu Chaſcun a ſoi le tret
Et la tire et devoꝛe Et deſrage et detraet
E Quant icil deauble Lonc avec aus ſaiſi
Comme leu le douoꝛent Ja n'en aront merci
Moult eꝛt maleure ne Qui l'avra deſeꝛvi
Gardez vous de pechié Que vous n'alez enſi
Quant /ſaint Pol vint au pont Outre ala ſanz doutance
Quar il avoit en Diex S'amoꝛ et ſa creance
/Saint Michiel le connut En qui il a fiance
Ceus vit iluec geſir En aſpꝛe penitance
/Saint Michiel diſt /saint Pol Qui sont cil pecheoꝛ
Que je voi demener Si tres aſpꝛe doloꝛ
Ce sont diſt /saint Michiel Larron et rauiſoꝛ
Qui a la povre gent Tollirent loꝛ laboꝛ
En ce flueue aſeneſtre En ce moꝛtel peril
A tant pecheo mis En pardurable eſſil
Li uns juſqu'a ienous L'autre juſqu'a nombꝛil
Li autres juſqu'a aſiex L'autre juſqu'a ſoꝛcil
Cil qui juſqu'a ienous Sont enleue a doloꝛ
Sont cil qui en ceſt ſiecle Ont eſté tricheoꝛ
Qui pour avoir conquerre Paruirent loꝛ ſeignoꝛ
De vendre et d'achateꝛ Furent engigneoꝛ
Cil qui juſqu'a nombꝛil Sont en l'eue boute
Ce eſt pour homicide Qu'il ont fet et mene
Par foꝛnication Faite a leur parenté
Ces .ii. sont en loꝛ cox Pour ce sont toꝛmente
Cil qui juſques as iex Eſtuet l'eue ſoffrir
Ce sont cil qui eſtriuent Quant il doivent oir
Les commandemenz Dex S'avoir et retenir
Sont cil qui en l'igliſe Nont de parler loiſir
Cil qui duſqu'a ſoꝛcis Sont en l'eue a doloꝛ
Vos di ge vraiement Ce sont li robeoꝛ
Qui demoſtrent as homes Grant ſemblance d'amoꝛ
Puis les vendent as auers O /Judas loꝛ ſeignoꝛ
Grant maſſe avez oï Quel li lieu d'enfer sont
Les paines les toꝛmentes Qui ja ne fuieꝛont
Et coment les deſeꝛt Pecheoꝛ en ceſt mont
Cil qui seruent le diable Tel louieꝛ en aueꝛont
Seigneur moult devez eſtre Treſtoz en grant eſfroy
D'ameꝛ le roy du ciel De maintenir ſa loy
Car il neſt mes el monde Ne cheꝛice ne foy
Dame Dex ne demande A chaſcun ne mais ſoy
Bien ſavez que ceſt ſiecle Ne dure longuement
Quar dame Dex le diſt En ſon enſeignement
Charites ſi refroide Ce veez vous ſouvent
Charites ſi refroide Contre le finement
Seygneur oꝛ eſcoutez Que je vous dirai voir
/saint Pol i vit apꝛés .I. doloꝛeus manoir
Tant obſcur laidement Et ſi oꝛrible et noir
Nus qui abite iluec N'i puet coute vëoir
/Saint Pol a regardé En cele grant doloꝛ
Ne pot goute vëoir Poꝛ cele tenebꝛoꝛ
/saint Michiel diſt /saint Pol Poꝛ deu le creatoꝛ
Enlumine mes iex De ta grant reſplendoꝛ
Que je puiſſe vëoir Dedens cele oſcuroꝛ
En cele tenebꝛour A /saint Pol eſgarde
Ne puet eſtre par home Veu ne deuiſe
Se li ſoulaus ieꝛt Ni donroit il clarté
Icele tenebꝛour A /saint Pol regarde
Li anges vit /saint Pol. Qui foꝛment fu penſis
La croiz au ſaueoꝛ Li fiſt enmi le vis
Del ſaint eſppeꝛit ja Enlumine et mis
Puis vit la tenebꝛour Et dedenz les chetis
Et d'omes et de fames Eſtoit toz plains cil lous
Qui ſi eꝛent couveꝛt De toꝛment engoiſous
De flambe rouge et noire Plus ardenz que n'eſt fous
Plus eſpés qu'il ne puet Chiet ſus les pecheoꝛs
Entre ces pecheoꝛs Qui en tenebꝛe ſont
A fames a malaiſe Qui noirs veſtemenz ont
Li feus loꝛ chieꝛ es bouches Si com il vient d'amont
Tres par mi les oꝛeilles Par mi les iex del front
Icil veſtement ſont Tant grief et eſpꝛenant
De pois qui toz joꝛz art Et de ſoufre puant
Liſtes ja par lieux Du feu d'enfer ardant
Qui la pois et le ſoufre Dont toz joꝛz eſprenant
De laiſardes puanz De crapaus venimos
Sont icil veſtement Tout couvert par deſoꝛs
Venim gitent ſouvent Puant et engoiſeus
A celles qui la ſont N'a meſtre ris ne gous
Ele ont en coꝛ loꝛ coz Coulueures et ſeꝛpenz
Touz joꝛz traient loꝛ langues Plus noires qu'aremenz
Enz v coꝛs loꝛ embatent Grant enpuiſonemenz
Qu'il loꝛ metent es bouches Les palais dedenz
Tout environ ice aus Qui les dꝛas ont veſtus
Errent .iiii. diables Oꝛribles et hidous
Toz joꝛz vont criant fames Sachiez Dex eſt venus
Conoiſes /Jhesucriſt Et les ſieues veꝛtus
Cheſcune a haute voiz Quanque puet crie et bꝛait
/saint Pol en ot pooꝛ Veꝛs /saint Michiel ſe trait
De la paoꝛ qu'il ot Le ſanc li eſt foioit
Et toz les .iiii. diables Loꝛs sont toz en agait
Sire icelles fames Qui ſi bꝛaient et crient
Ce sont icelles fames Qui dame Dex oublient
O loꝛ peꝛe ſe couchent Et carnement li lient
Poꝛ luxure meneꝛ La loi Dex en oublient
En ces paines meiſmes En cel toꝛment ſi foꝛt
Ou nus ne puet avoir Ne joie ne confoꝛt
Si vont icelles fames Qui tant ont de depoꝛt
Qui pour honte du ſiecle Metent loꝛ fruit a moꝛt
Oꝛ prions dame Dex Qui ne faut ne ne ment
Que pour celle pitié Qu'il i vint en preſent
Quant il fu en la croiz Poꝛ nostre ſauvement
Sa meꝛe regarda Qui ploꝛoit tendꝛement
Qu'a /saint Jehan bailla A gardeꝛ vraiement
Enſi comme ceſt voirs Seigneur que je vous di
Que telle pietie ot Quant il la degrepi
La pꝛoia il pour nos Et puis pour nos amis
Que ſon pere des cieux De nos toz ait mercis
En cele tenebꝛour A une roche aſiſe
.M. toiſes a de haut Et roide de grant guiſe
De cheſcune des paines Qui eſt en enfer miſe
Environ cele roche Sont fichie par deuiſe
Mil. de grez a entoꝛ Chaſcun a ſon toꝛment
Le primeꝛain deſeure Eſt de ſi rouge vent
Qui de deſoꝛ la roche Tient ſon toꝛnoiement
Riens ni pue demoꝛeꝛ Tant par ſoufle foꝛment
Li autre degre ſont De plus grant cruauté
De dur acer tempꝛe Et de plus dur aſſez
Oe feu treſtot ardent Ce ſachiez ſanz fauſeꝛ
.M. en a contre val Juſqu'a pié compaſſe
Tout environ la roche A .i. foſſe parfont
Qui eſt plains de ſeꝛpenz Qui tempeſte font
Qui ja n'avront viande Se ne loꝛ vient d'amont
Et quant ele loꝛ vient Grant denourage en font
Mil. dyables i a Comme anges enpanes
Les pecheoꝛs deuoꝛent Chaitis maleures
Grans ongles ont de feꝛ Bien agus et quarres
Chaſcun poꝛte le ſien Contre mont les degres
Aint sont de ſoꝛ la roche Ses commandent au vent
Tout contreual l'en paignent Toſt et iſnellement
Ius les font trebuchieꝛ De toꝛment en toꝛment
Juſqu'a fous de la roche Toſt et iſnelement
Seꝛpenz ont les chauis Treſtot environ eus
Chaſcuns moꝛt en ſa part V dos ou es coſtes
Poignent ſuchent et rungent Les las maleures
Qui en ce peril eſt Si eꝛt de ſirites
As pecheoꝛs qui ſont Entre ices ſeꝛpens
Eſt encoꝛe dones Moult plus aſpꝛes toꝛmens
Il meiſmes ſe font Moꝛtex cruciemens
Aſpꝛes et engoiſous Trop doloꝛeuſemens
/Saint Michiel diſt /saint Pol Meꝛci poꝛ l'amoꝛ de
Qui ſont cil pecheoꝛ El fons de ceſt foſſe
Qui manuieng loꝛ langues Puis qu'il sont toꝛmente
Soꝛ toz autres chaitis Sunt cil maleure
Ce sont li uſeꝛieꝛ Qui pour loꝛ grant avoir
Tollent as povres gens Ce qu'il peuent avoir
Ne teꝛre ne meſon Ne loꝛ puet remanoir
Quant il crient meꝛci Riens ne loꝛ puet valoir
Oiez com la meſon A ciaus eſt vile et oꝛde
Gardez qu'il n'i ait nus Ca uſeꝛieꝛ ſa coꝛde
Que dame Dex le diſt Cele eſt miſeꝛicoꝛde
Qui merci a d'autrui A dame Dex ſ'acoꝛde
Seigneur ja le diſt on Pieca en repꝛovieꝛ
Que la maille eſt bone Qui ſauve le denieꝛ
Dones pour l'amoꝛ Dex Si avras bon loieꝛ
.C. foiz le vous pꝛomet Dex amouteploieꝛ
Ice que nous trouons En l'euangille eſcrit
Qu'en bon eure sont nez Li poure /ihesucriſt
Bien le deuries croire Car dame Dex le diſt
Que chaſcuns ſeꝛa ſans Sans nes .i. contrediſt
Tant doit hair l'avoir Hons qui ſi eſt manant
Qui l'en part paradis Et la joie ſi grant
Et ſi entre en enfeꝛ En la puour puant
Ou avoir ne doneꝛ Ne puet avoir garant
En icelle maiſon A /ſaint Pol regarde
Chaitis vit juſqu'a coux En glace ſeele
L'une moitié d'icex Sont iſi afame
Que li uns ſi moꝛt l'autre Anſi com fuſt de ve
Par engoiſe de fain Sont iſſi toꝛmente
Fruit de pluſeurs manieres Loꝛ eſt devant poſe
Mais il n'ont mie itant Treſtout de poeſte
Que par aus puiſſe eſtre Ne pꝛis ne adeſe
L'autre moitié de ceaux Suefrent ſi grant froidure
Qu'il rechinent les denz Par la grant deſmeſure
.III. diables iſtre De moult laide figure
Gueꝛreglas et gielees A froidoꝛ aſpꝛe et dure
Loꝛ ruent ſoꝛ les teſtes D'autre laboꝛ nont cure
Cil qui mueꝛent de fain En la gielee nu
Sont cil qui en ceſt ciecle Ont eſté meſcreu
Qui geune deſpiſent Et mout pas tendu
Poꝛ ce sont en enfeꝛ De fain tout confondu
Cil qui en la froidure Sont toꝛmente griement
Sont cil qui oꝛfelins Et venes enſement
Iugent et deſheꝛitent Par loꝛ faus jugement
Qui perdent ame et coꝛs Poꝛ oꝛ et poꝛ argent
/Saint Michiel a garde Devant ſeneſtre a part
A tres ames i vit Et entr aus .i. viellart
Chaſcun tint en ſa main .I. crochet et .i. dart
I cel chaitif deuoꝛent Chaſcuns tire a ſa part
E celui bꝛait et crie Et vlle comme los
/saint Michiel diſt /saint Pol Qui eſt cil doloꝛeus
Ce fu diſt /saint Michiel .I. Eueſque oꝛgueillous
Tant com veſqui a monde Si fu luxurious
Quant /saint Pol ot oï Qu'il ot veſques eſté
Eueſques et cleꝛgie Avoit moult a ame
Du cueꝛ en ſoſpira Des iex en a ploꝛe
/Li ange le regarde Si li a demande
Poꝛ quoi pleures /saint Pol Donc vient ceſte triſtoꝛs
Des granz paines d'enfeꝛ As veü des gregnoꝛs
Quant tu ſeꝛas au mond Sel di as pecheoꝛs
Quel li lieus d'enfer ſont Et quelles les doloꝛs
Seygneur moult devez eſtre Treſtoz en grant penſe
Qui le joꝛ et la nuit Faites iniquite
Les eues meiſmes Qui sont a/Dieu ſacre
Par engin dediable Sont vaincu et mate
Qui voient en eſcript Que la loy loꝛ deſfent
Et qu'il doivent tenir Et il n'en font noient
Si les decoit diaubles Pa ſon enchantement
Qui loꝛ done l'avoir Par engin les ſouprent
Seygneur ne couoities Aſembler grant avoir
Moult toſt eſt treſpaſſes Ce poez vous ſavoir
Mais toute vostre entente Et treſtout vo ſavoir
Metez en dame Dex Ce vous poꝛra valoir
Moult toſt eſt treſpaſſes Vostre avoir teꝛrient
Quant venra a la moꝛt Vos n'en arez nient
Mes en Dex vous fiez Qui ſire eſt de toz biens
Qu'en la joie celeſtre Ne vous faudꝛa ja riens
Icelle douce joie Vous di ge ſanz mantir
A icelle grant joie Qui durra ſanz faillir
Que riens qui ſoit el monde Si ne la puet tolir
Se bien au amone Ne nos fait parvenir
Oꝛ prions /Jhesucriſt Qui pas ne veut mentir
Que a nos ienfaitours Doiſt avoir bon loiſir
De ſes biens fais el monde En paradis venir
Dame Dex en ſa gloeꝛe Nos face paruenir
/saint Michiel va avant Poꝛ un toꝛment moſtreꝛ
/saint Pol ala aprés Qui le cuide eſgardeꝛ
/saint Michiel diſt /saint Pol Ci t'eſtuet arreſteꝛ
Tu ne poꝛroies mie Le toꝛment eſgardez
Cou eſt le pui d'enfeꝛ Que tu pues la oir
Ci teſtuet demoꝛeꝛ Ne pues avant venir
Tu ne poꝛroies mie La grant puoꝛ ſoffrir
Qui del pui d'enfeꝛ iſt Ja t'eſtouuroit moꝛir
/Saint Michiel a la chartre D'enfeꝛ des ſcelee
La puoꝛ en iſſi Grant et deſmeſuree
Onques nus hons de char Ne ſenti tel puee
Com il iſt de cel puis C'eſt veꝛitez pꝛouee
Par touz les lieus d'enfer Sention la puoꝛ
Chaſcun eſtue paſmeꝛ D'engoiſe et de doloꝛ
Foꝛs /saint Michiel l'arcange Qui tint le coueꝛtoꝛ
Et /l'apoſtre saint Pol Qui en Dex a ſ'amoꝛ
/Saint Michiel diſt /saint Pol Poꝛ l'amoꝛ Dex merci
Ci eſt le pui d'enfeꝛ Bien avant ſi me di
Qui ſont icil chaitis Qui ſi ont deſeꝛvi
Qui iluec ſeꝛont mis Donc la puoꝛ iſſi
/Saint Michiel diſt /saint Pol Entent a ma raiſon
Cil qui iſeꝛont mis N'aront ja raencon
Ce sont cil qui ne croient La loi que nous tenon
Le coꝛs Dex /ihesuſcriſt Ne l'incarnacion
Ce sont li omicide Li escommenie
Qui mueꝛent desconfeꝛ N'eſtre acommichie
Pour ce sont en enfeꝛ En la puoꝛ lancie
Et toz joꝛz iſeꝛont Pene et trauaillie
/Saint Pol a regardé Vers le ciel contremont
.Vij. diables i vit Qui grant tempeſte font
Ou il tienent une ame Qu'il apoꝛtent d'amont
Entr'els vont deuiſant Ou la toꝛmenteꝛont
Mil. diaubles loꝛ vienent Devant alencontreꝛ
Quant il oirent l'ame Que il ont a poꝛte
Li maiſtres va devant Sa l'arme demande
Li autre vont devant Dient pour l'eſgardeꝛ
O merveilleus tulmude Lo grant diaublie
I ſont tantoſt venuz Si ont l'arme ſaiſie
Une chartre li baillent Et dient que loꝛ die
Treſtoz ices pechies Ō le a fait en ſa vie
En la chartre qu'ele a Sont eſcrit ſi foꝛfet
Ele meiſme i liſt Et diſt quenquele a fait
Quant a tout a conte Cil li sont en agait
Et puis ſi la boutent El feu ſanz autre plet
Oiez com la chetive Ses pechiez conte a
Ele meiſme lut Et puis ſi les iuga
Chaſcuns ce qu'il deſeꝛt Iluecques trouuara
Moult eꝛt mal enreus Qui ne remenbꝛeꝛa
Certes qui ne feꝛa Ce que nous li diſon
Dedenz enfeꝛ avra Moult crueus gueꝛredon
Devant toz les diables Prendꝛa confeſſion
Puis ſeꝛa mis en paine Et en dempnacion
Oꝛ prions dame Dex Qui tot ot et tot voit
Qui conuoiſt nos pechiez Et goueꝛneꝛ nous doit
De pecher nos deſfenſe Li ſiens plaiſirs ſoit
Que diauble ne ſache En nos clamer nul dꝛoit
QÑr /saint Michiel a tout A /saint Pol demoſtre
En .i. petitet d'eure L'en a en ciel poꝛte
Paradis li mouſtra Le regne dame de
Ou la grant joie eſt Et la grant noblete
Seigneur de paradis Ne vous ai nens conte
Car tant eſt grant la joie Ce ſachiez par verite
Par nul home del ſiecle Ne puet eſt panſe
Ne par bouche de cleꝛc Ne puet eſtre conte
/Saint Michiel ſe regarde Devers deſtre partie
Et vit une bone arme Que li ange ont ſaiſie
Et lapoꝛtent amont Coꝛonee et ſaignie
Et les anges qui ſont En la dez compaignie
Oꝛ duz chanz vont encontre Et o grant melodie
Une chartre li baillent Et loꝛ commande lire
Ou dame Dex ot fait Treſtouz ſes biens eſcrire
Toute lachartrelut Ainz ui leſa que lire
Et quant ſa bone vie ot tote racontee
Li ange A /saint michael. Ont l'ame commandee
Il l'a en paradis Aſiſe et honoꝛee
Que jamais a nul joꝛ N'en ſeꝛa remuee
Oies com par eſt grant La joie au ſaueoꝛ
Cil qui amone fait Ja Dex a ſ'amoꝛ
Ara ſi grant clarté Et ſi grant reſplendoꝛ
Mil. foiz ſourmontera Le ſoleil et le joꝛ
Oꝛ prions dame Dex Pour icelle pitié
Que il ot de /Marie Quant li chai a pié
Et qu'il pardona Son oꝛrible pechié
Qu'il nous pardoint les noz Dont toz ſomes chargiez
Et nos doinſt parvenir Ou li bons ſeꝛont lie