Tuit cil ſoient benei De Dieu et de /ſa Mere
Qui ſe trairont en ſa Et oꝛront ma matere
Et leur doint le pardon Qu'i donna a/ ſaint Pere
Quant il reſut pour nous En crois la moꝛt ameꝛe
Je vous weil une eſſemple Amentevoir et dire
De bon eſſemple dire Ne puet nus eſtre pire
Se cera d'un enfant Qui ot painne et martire
Pour deseꝛvir l'amour /Jhesucriſt Noſtre Sire
Le pere de l'enfant Eſtoit .i. riches hom
Denieꝛs et heritages Avoit a grant foiſſon
Voulentieꝛs ot requis /Saint Jaſque le baron
Une voie i devoit Encoꝛe le pꝛeudom
Li pꝛeudom envieilli Et fu en maladie
.I. ſien filz apela ou durement ce fie
Biau filz dit le pꝛeudom N'eſt pas dꝛois que j'oublie
Le baron de /saint Jaſques Tant com je ſoie en vie
Encoꝛ ne me ſui mie Du voiage aquitié
Ne du voiage faire Ne ſerai aquitié
S'uns hons ne m'en aquite Qui ſoit de m'amitié
Mes encoꝛ ies trop jones De quoi j'ai grant pitié
Le voiage eſt trop grans Ne le pourroies faire
Li enfez reſpondi Qui fu de bon afaire
Se je le fas pour vous Ne me doit pas deſplaire
Car Diex et li bons ſains M'aideront a parfaire
Quant li peres entant Que li a dit ſon filz
[...]
Et li a fait ſa feſte Belle fu a devis
Quant [vint] a l'andemain L'enfant ſ'en eſt partis
De l'oꝛ et de largent En poꝛta grant foiſon
Son pere le convoie Se fu dꝛois et raiſon
Sa mere chiet paumee A la departoiſon
Si ami l'en ramannient Arriere en ſa meſon
Mon enfant dit li peres Qui fu en grant eſmai
Gardez bien ces .iii. pommes Que je te baillerai
Par ces .iii. pommes ci Tel ſans t'apꝛenderai
Qui t'avra grant meſtieꝛ Entant que je dirai
Quant ſeras a chemin Moult de gent troveraz
Bien ſai qu'avec aucuns Tu t'acompaingneꝛas
Ainz que t'i acompainez Tu li demanderas
Se a /ſaint Jaſque va Qu'il ne te celle pas
C'il te dit qu'il i va Si li tien compaignie
Se tu vois que il ſoit Preudom de bonne vie
Quant ſerois a chemin Ce de ſuef ſe gramie
Une pomme li donnes Et ne le laiſſes mie
Se la pomme mengue Et il point ne t'en doint
Je te fais aſavoir Que il ne t'amera point
C'il veoit que tu fuſſes Du coꝛs en mauvés point
Il te larroit touz quois Car ainſi le font maint
De celui te depars Bel et courtoiſſement
Et li di que tu es Malades durement
Du ſecont et du tieꝛs Feras tu autretant
Biau fis oꝛ retiens bien Ceſtui commandement
Et ſe li uns t'en donne Seurement t'i fies
Fai tant que de celui Aiez la foi plevie
Car il te gardera ou a Moꝛt ou a vie
Et ſe nul ne t'en donne Va t'an ſans compaignie
Mon enfant dit li peres Qui eſtoit enſcien
Ne pꝛens pas autre hoſtel Ou chemin que le mien
Pere non feré je Vous me conſeilliez bien
Alez vous ent a Dieu Et a /.ſaint Julien
A tant ſe departi Li enfes de ſon pere
Peres alez a Dieu Saluez moi ma mere
Biau filz ſi ferai je Dieu qui eſt vrai ſauvieꝛre
Te puiſſe ramener A mon hoſtel arriere
Li enfes ſ'en entra Touz [seulz ]en ſon chemin
/Cil Sire le conduie Qui fiſt de l'iaue vin
Tant erra tout par lui Qu'il trueve .i. pelerin
Bellement l'areſonne Et li a fet enclin
Li enfes demanda Qui fu pꝛeus et ſenez
Pelerin dites moi Quel part vous en alez
Le pelerin reſpont Je dirai veritez
Droit au /baron saint Jaſkes Eſt mon chemin toꝛnez
Sire ce dit l'enfant Auſſi i eſt ma voie
Compaigne vous tendꝛai Mes qu'il ne vous annoie
Li pelerin reſpont Ce li coꝛs Dieu me voie
Voulentieꝛs m'i acoꝛs Et ſi en ay grant joie
Li prodon et l'enfant ſe ſont acompaigniez
Mais n'oꝛent pas alé demi lieue d'aſſez
Que licompains l'enfant c'eſt de ſuef gramentez
Pour la ſuef qui l'argue eſt malement laſſez
Quant l'enfant l'entendi une pomme a paree
Et a ſon compaignon la maintenant livree
Et li a dit compains mengiez ſ'il vous agree
Par ceſte pomme ci eſt vo ſuef estanchiee
La pomme priſt tantoſt et la mengue toute
Bien s'apercut l'enfant qu'il ne l'ameroit goute
Loꝛs dit qu'il partiroit de lui et de ſa route
Car le commandement de ſon pere aimme et doute
Ce joꝛ et celle nuit firent aſemblement
Mes li enfez dit a l'endemain bꝛiement
Compains alez a Dieu a qui je vous comment
Je ne m'en puis aleꝛ maladez ſui foꝛment
A ce mot ſes compains c'eſt de lui departiz
A Dieu le commanda qui onques ne menti
Li enfez aſez toſt ſe chauca et veſti
.I. autre acompaigna dont puis ſe repenti
Car ainſi le ſeꝛvi comme ot fet li premieꝛs
Quant l'enfant l'aperſut ſi ſ'en retrait arrieꝛs
Le plus toſt que il pot racompaingna le tieꝛs
Cil li fu vrais compains et loiax et entieꝛs
Ainſi com vous oꝛrez qui voudꝛa eſcouteꝛ
Le pꝛeudom et l'enfant commancent a errer
En .i. deſeꝛt entrerent que je ne ſai nommeꝛ
Le pꝛeudomme ot tel ſuef ne [puet ]avant aleꝛ
Quant li enfez entant que de ſuef ſe gramie
La tieꝛce pomme pꝛiſt tantoſt li a baillie
Cil a trait ſon coutel ſi l'a par mi partie
De la pomme bailla a l'enfant la moitié
Loꝛs ſouvint a l'enfant que li ot dit ſon pere
Le pꝛeudom apela ſi li a dit biau frere
Compaignie vous tendꝛai mais qu'il vous weille plaire
Volentieꝛs m'i acoꝛt foy que je doi /saint Pere
Oꝛ me bailliez vo foi mes qu'il ne vous anoie
Que vous me garderois volentieꝛs en la voie
Et je vous enſement ce li coꝛs Dieu me voie
Li pꝛeudom reſpondi volentieꝛs m'i otroie
Enfez dit li pꝛeudom de ma foi te plevis
Au /baron te menrai ce tant puis eſtre vis
Sire ce dit li enfez a Dieu ſoit les mercis
Puis ce joꝛ en avant ſerois vous mes amis
Oꝛ[e] voit bien l'enfant compaignie a trovee
Que par le ſans ſon pere l'a moult bien eſpꝛovee
Le pꝛeudom et l'enfant ſe sont matin levé
Jone fu li enfant de ce fu moult grevé
Le pꝛeudom et l'enfant en une ville entrerent
Tans fu de herbergier bon hoſtel demanderent
Tant ceꝛchierent la ville qu'en l'oſtel ariverent
Du pere au valeton leans ſe herbergierent
Le pꝛeudom voit la fame qui jone dame estoit
Et li ſires viex hons a l'enfant va tout dꝛoit
Et dit qu'an cel oſtel mes hui ne remainroit
Car du /ſans Salemon moult bien li ſouvenoit
Li enfez li a dit ce de ci me partoie
Contre la volenté de mon pere feroie
Demourez avec moi ſe Damedieu vous voie
Si nous metrons demain bien matin a la voie
Amis dit li pꝛeudom de folie parlés
Que je n'i demourroie pour quanque vous avez
Tant que vous hucherai gardez ne vous mouvez
Sire non ferai je a /Jhesucriſt alez
Li prodom ſ'en depart a Dieu le commanda
Quant fu hoꝛs de leans Autre hoſtel trouva
En li en mouſtra .i. Voulentieꝛs ſ'acoꝛda
De remanoir ennuit Quant la dame eſgarda
Oꝛ dirai de l'enfant qui fu de l'autre part
Dolent fu du pꝛeudomme Qui de lui ſe depart
Son oſte en apella qui eſtoit .i. veillart
Ses denieꝛs li bailla Et dit qu'il les li gart
L'oſte apela ſa fame et li a commandé
Que les denieꝛs l'enfant Soient tres bien gardé
Sire ſi ſeront il par le coꝛs /saint Mandé
La mauveſſe en la vile a ſon ami mandé
Et cil i eſt venus qui connut le meſage
Car bien avoit apꝛis De la dame l'uſage
En l'oſtel eſt entrés Plain de mauvés courage
A mainte dame avoit tolu ſon mariage
Amis dit la mauveſſe Bien puiſſiez vous venir
Comme l'omme du monde Que miex ains et deſir
.I. enfant eſt ceans Qu'il vous convient murtrir
Dame dit li murtrier Je ferai vo plaiſſir
Li enfez fu murtri a duel et a dolour
Du pꝛeudomme dirai Qui fu en grant errour
De ſon lit ſe leva ſi toſt com vit le joꝛ
A ſon compaignon va ne fiſt paſ lo[n]c ſejoꝛ
L'enfanſon apela moult debonnairement
Et on lireſpondi moult felonneſſement
Voz compains ſe depart de ceans erranment
Il dit que le ſuivez toſt et iſnellement
Oꝛ entendez a moi ſi oꝛrez g[ra]nt pité
Acés avez oï ce que j'ai recité
Le pꝛeudom erra tant qu'il ſot la verité
Que nus hommes N'eſtoit iſſus de la cité
Le Juge demanda ne ſ'i eſt alentis
Car de ſon compaingnon Trouveꝛ fu talentis
Veꝛs lui ne volt pas eſtre Parjures foimentis
A loiauté mener fu toz joꝛs ententis
Sire dit il au juge pour Dieu de paradis
Je ſui .i. peleꝛin entendez a mes dis
Mes compains a eſté en cel oſtel murtris
Preudom dis le pꝛevost Gardez bien que tu dis
Amis dit li pꝛevos Gardes que tu diras
Car ſe tu ne dis voir En tel eſtat ſeras
Comme celui doit eſtre Qui fait le mauvés cas
Sire dit li pꝛeudom je ne vous deſdi pas
Li juge et li pꝛeudom Se ſont acheminez
A l'oſtel ſont venu Ou cil fu herbergiés
Erranment fu l'oſtel De toutes pars cerchiez
Ceus de laiens ont pꝛis Ne ce ſont atargiez
Tant ceꝛchierent loſtel Le Iuge et le pꝛeudom
Qu'a grant painne troverent l'eſcharpe et le boꝛdon
Quant le pꝛeudom le voit ſi cria a hau[t] ton
Jamés n'eſchaperoiz pour denieꝛ ne pour don
Le ſeigneur et la dame Furent erranment pꝛins
En maint lieu de leans fu le valeton quis
Une citerne trevent ou l'enfant eſtoit mis
Le pelerin le voit ſi c'eſcrie a haut cris
Chaſcun puet bien ſavoir Quel fu le jugement
Du pꝛeudom vous dirai Qui fiſt grant merrement
Mes Dieu par .i. ſien angre li fiſt commandement
Qu'il aquitaſt ſa foy Veꝛs l'enfant loyaument
Quant le pꝛeudom entant la voiz qui a parlé
Toſt et iſnellement a l'enfant a toꝛné
Si a .i. charpentieꝛ en la ville mandé
.I. travetieꝛ fiſt faire L'enfant a ſus poꝛté
Quant le pꝛeudom vouloit Ne boire ne mengieꝛ
Pour l'enfant et pour lui feſſoit apareiller
Et puis donnoit la part De l'anfant ſans targieꝛ
A .i. povre pꝛeudom qui en avoit meſtier
Plus faiſoit le pꝛeudom que je ne vous ai dit
L'anfant couchoit par nuit Avec lui en ſon lit
Pour ce qu'il eſtoit moꝛs Ne l'avoit en deſpit
Bien aquita ſa foi envers l'enfant petit
Tant poꝛta l'enfancon Qu'il ot fait ſon voiage
loiaument l'aquita de ſon pelerinage
Quant a l'eg[l]iſſe fu ſ'ala devant l'image
Pour l'enfant et pour lui oſfri de bon courage
Bonne gent oꝛ oiez Pour /ſaint Pere de /Romme
S'il vous vient a plaiſſir Et les veꝛtus vous nomme
Que Dieus et li bon ſaint Firent pour le pꝛeudomme
Li enfez en l'egliſſe ſuxita c'eſt la ſomme
Li bons prodom li a maintenant raconté
Comment ſe herbeꝛga contre ſa volenté
Et comment fu murtris Comment l'avoit poꝛté
Sire ce dit l'enfant a Dieu ſoit labonté
Compains ce dit l'enfant par amours je vous prie
Puis que vous m'avez fait ſi bonne compaignie
Venez en mon pais Si ne vous ennuit mie
Li pꝛeudom reſpondi volentiers m'i otrie
Tant errerent tous deus Qu'au pais ſe vont traire
Li bons hons a compté a ſon pere l'afaire
L'ofevre manda puis fiſt .ii. hanas faire
Tous .ii. d'une facon qu'il n'i ot que refaire
Son compaingnon donna Un hannap lieement
Compains alez a Dieu a qui je vous commant
Par ce hannap ici ſachiez le vraiement
Ferai vostre plaiſſir et vo commandement
Seingneurs oꝛ eſcoutez Que Dieus vous ſoit amis
Le prodom retourna arrieꝛ en ſon pais
Mes en petit de temps fu meſiax ſi poꝛris
Car il fu deſpitez de grans et de petis
Quant ſa fame le voit Erranment li a dit
Moult felonneſſement Et par moult grant deſpit
Vidiez iſnellement ma meſon et mon lit
Car vous eſtez ſi ladꝛes nus plus pourri ne vit
Li ladꝛes reſpondi tantos la viderai
Je veü a Dieu le pere jamés ne retoꝛrai
Devant que mon compaing Se Dieu plaiſt trouverai
Se ne le puis trouver bien ſai que je moꝛrai
Li ladꝛes ſ'en parti qui ot le cueꝛ deſtroit
Son bon hanap enpoꝛte Que durement amoit
Li lardꝛes erra tant Et par chaut et par froit
Qu'an la ville arriva ou ſes compains eſtoit
Le joꝛ qu'il arriva ſes compains tenoit feſte
De ces pꝛochains amis Fu belle et honneſte
Li ladꝛes oꝛendꝛoit devant l'oſtel ſ'areſte
L'aumoſne demanda Pour Dieu le roy ſeleste
Li ladꝛes cria tant que chaſcun l'entendi
On li poꝛta du vin cil ſon hanap tendi
.I. varlet li a dit qui fu mal averti
Ce hannap n'eſt pas votre [...]
Si eſt ce dit li ladꝛes par Dieu le creatoꝛ
Par foi dit li varles aincois eſt mon ſeigneur
Li varles retoꝛna qui fu en grant errour
A ſon ſeigneur conta du bon henap le tour
Quant li ſires oï du bon henap parleꝛ
Li ladꝛes et le henap fiſt devant li mandeꝛ
Bien connut le henap loꝛs commance a ploꝛer
Devant tous ces amis va le ladꝛe acoleꝛ
Li riches hons recut le ladꝛe en ſa meſon
Contre lui l'aſeoit c'eſtoit dꝛois et raiſon
Mes ſa fame li dit qu'il feꝛoit meſpriſon
Car il eſtoit tous plains d'oꝛdure et de puiſon
Tant tarja la dame Nuit et jour ſon ſeingneur
Que ladꝛes fu mis Tout ſeul en un deſtour
Ou nus ne le veoit Ne ſentoit ſa doulour
Se n'eſtoit le ſeingneur Qui l'amoit par amour
Une nuit c'eſt li ladꝛes Moult foꝛment dementez
Une voiz li a dit toſt ſeꝛoiez ſannez
Se de ton compaignon eſtoiez tant amez
Que tu fuſſes du ſanc A ces enfans lavez
Li ſires viſita le ladꝛe l'andemain
Doucement l'apela et le priſt par la main
Dous amis dites moy Par le coꝛs /ſaint Germain
S'il eſt riens en ceſt monde Qui vous puiſt faire ſain
Quant li ladꝛes l'entant Des iex pleure et ſopirre
Par foy ſire dit il ne l'oſſeꝛoie dire
Oꝛ le me dirés vous foi que je [doi ]/saint Gire
Que ja ne me verroiz merrir [ne m']escondire
Li ladꝛes li a dit courouciez et dolent
Se j'eſtoie lavez du ſanc A vos enfans
Auſſi ſain devendꝛoie Comme poiſſon noans
Par autre medecine Ne puis eſtre alejans
Quant li ſires l'entant Des iex pleure et leꝛmie
Conſeilliez moy dit il /Dame Sainte Marie
Comment oſterai je A mes enfans la vie
Car ſe je le refuſſe ma foi aré mentie
Li ſires retoꝛna en ſon oſtel arrier
A la dame commande qu'el voit au mouſtier
A l'eſtrange meſniee Fiſt la meſon voidieꝛ
Au .ii. filz qu'il avoit Va les goꝛges trenchieꝛ
Le ſanc en recueilli Bel et courtoiſſement
Les enfans recouvri En leur lit gentement
A ſon compaignon va toſt et iſnellement
Et le lava du ſanc Moult debonnairement
Dont fu celui plus ſain Qu'il n'ot onques eſté
De bon cueꝛ reclama Le Roy de maiſté
Qu'a ſon compaignon Rende l'onneur et la bonté
Que bien a en veꝛs lui Gardé ſa loiauté
Toſt et iſnellement Sont alé au mouſtieꝛ
Devant /la Mere Dieu Se vont agenouillieꝛ
Jhesucriſt et /ſaint Jaſque Conmancent a pꝛieꝛ
Que a celle journee Leur weille aidieꝛ
La bourjoiſſe ſi fu Du mouſtieꝛ revenue
L'abeeſce apella elle eſt acourue
Va veſtir les enfans Pour /la Vieꝛge aſolue
Pour ce que ne les voi Tout le ſanc me remue
Oꝛ oiez les veꝛtus Que Dieus i demoutra
Et /le baron ſaint Jaſque Que chaſcun reclama
Si toſt com la pucelle En la chambꝛe entra
Touz ſains et touz haitiez Les .ii. enfans trouva
Se jour devoit li ſires Feſtoieꝛ ces amis
Le diſneꝛ fu tout pꝛeſt Pour mengier ſont aſſis
Quant le ſeingneur N['i] voient moult furent eſbahis
Il eſtoit au mouſtieꝛ Devant le crucefis
Celui qui l'aloit querre .I. des enfans poꝛtoit
Pour ce que l'enfancon Son ſeingneur demandoit
Son ſeingneur apella Qui a genous eſtoit
Le ſeigneur ſe reſtoꝛne Son enfant apercoit
Lui et ſon compaignon Sont a l'oſtel venus
A leur amis conterent L'onneur et les veꝛtus
Que Diex a fait pour eulz Li Sires de laſſus
Se la joie [orent ]double Ne ſe meꝛveille nus
Par eſſemple vous ai en ce dit raconté
Comment nous devons tous garder no loiauté
Prions tous le ſeingneur Dont nous vient la clarté
Qu'en la fin nous otroit Sa graſce et ſa bonté