Tous ceulz qui volentiers Oient de Dieu parler
Et de /ſa douce Mere Qui tant a le cuer ber
[...]
[...]
A ceulz qui le reclaimment Set paier loier Dieu
Qui nen ſe pueent plaindꝛe Au departir du lieu
[...]
[...]
Poꝛ ce que /Nostre Dame Scet paier largement
Veil je metre m'entente A mouſtrer plainement
Les miracles qu'el fait. A tous communement.
Qui la veulent ſervir De cuer parfaitement
Un chevalier fu ja Qui ot grant heritage
Tout l'avoit deſpendu Gaſté et mis en gage
En folement deſpendꝛe Metoit tout ſon coꝛage
Mais ſa fame eſpouſee Etoit tout d'autre uſage
Sage fu et coꝛtoiſe Et de bele maniere
De ſervir /Nostre Dame N'eſtoit onques laniere
Povre gens ſaluoit Et faiſoit bele chiere
De faire des aumoſnes Eſtoit bien couſtumiere
Le chevalier faiſoit Du tout ceſtui contraire
Tant haoit ſainte Ygliſe Qu'il ne ſ'i voloit traire
Ains alaſt au boꝛdel Une folie faire
Ne feïſt une choſe Qui a Dieu peüſt plaire
Quant ot tout deſpendu povres fu et chetis
Il fu de ſes amis A merveilles hays
De ſon pays ſe part Dolans et eſbahis
A l'encontre de li Revint li ennemis
En guiſe d'un bel homme Et moult tres bien veſtu
Le chevalier apele Biaus amis que quiers tu
Bien pert a ton ſamblant Que tu es iraſcu
Je croi que tu es povres Le tien as deſpendu
Certes vous dites voir Je ne ſai que je face
Je n'ai ſi bon ami Qui foꝛment ne me chaſſe
A noier ou a pendꝛe Chaſcuns d'eulz me menace
Tant ſui povres et las Ne puis lever la face
Reſpont li ennemis S'afier me voloies
De ce joꝛ en avant Que tu m'ameneroies
Ta fame eſpouſee Iſſi en ces .ii. voies
Plus que n'as deſpendu En petit temps aroies
Reſpont le chevalier Et je le vous crëant
Car je l'i amenrai Treſtout certainement
Oꝛ vas a ton hoſtel Ne t'eſmaie noient
Aſſez y trouverras Et rouge et blanc argent
Le chevalier ſ'en toꝛne Que plus n'i demoꝛa.
De venir a l'oſtel Durement ſe haſta
Deniers chevaus et robes A grant plenté trouva.
Quant l'avoir apercoit Foꝛment li agrea.
Des deſpens qu'il mena Fu grant la renommee
Chaſcuns ſ'en merveilla Par toute la contree
L'autrier eſtoit ſi povres C'eſt verité pꝛouee
Ne li creus de pain .I. boulengier denree
Une nuit fu alez le chevalier couchier
Du terme li ſouvint Qu'il veoit apꝛochier
Loꝛs ſe pꝛiſt en ſon cuer Foꝛment a eſmaier
Hé las dolant diſt il Com poꝛrai eſploitier
La dame l'entendi Qui ne ſe doꝛmoit mie
Son ſeignoꝛ apella Qui menoit malle vie
Sire poꝛ quoi ploꝛez Toute nuit a nuitie
Avez vous ſe bien non Ne le me celez mie.
Demain avra .i. an Bien vous en puet membꝛer
Si com je m'en cuidoie De ceſt pais aler
A l'encontre de moy Se miſt .i. bacheler
Ceſt avoir me donna Ne le vous quier celer
Par yceſte maniere Li ai ma foy plevie
Que je vous y menrai Sans plus de compaignie
Ce fu li ennemis Ne le meſcreez mie
Qui vous cuide deſtruire Et traire a ſa partie
Oꝛ ne vous eſtuet plus De ceſt fait eſmaier
Car g'irai avec vous Poꝛ vo foy aquitier
Je pꝛi /la Mere Dieu Qu'ele vous veille aidier
Encontre l'ennemi Qui vous cuide engingnier
Le chevalier ſe lieve L'endemain par matin
Entre lui et ſa fame Se metent au chemin
/Cilz ſires le conduie Qui de l'yaue fiſt vin
Car ſ'el ne les deffent Trouvé ont mal voiſin
Si comme il chevauchoient ambedeus ſeulemant
La dame regarda Devant li .i. pendant
Et vit une chapelle Coꝛtoiſe et avenant
Ou le pꝛeſtre chantoit La meſſe hautemant
Quant la dame l'oÿ Foꝛment li agrea
Le reſne du cheval Cele part treſtourna
Son ſeignoꝛ li demande Dame ou alez vous la
Je vois au ſacremens Aſſez toſt fait ſera.
Oꝛ venez avec moy. Si vous deffendꝛez miex
Encontre l'ennemi Qui tant eſt enviex
Reſpont le chevalier Le couvenent fu tiex
N'enterroie en mouſtier Ne baiſeroie autiex
Dame alez y toſt Et ne demoꝛez mie
Priez /la Mere Dieu Qu'el vous ſoit en aye
S'ele ne vous deffent La choſe eſt ſi baillie
De nous .ii. defaudꝛa En ce joꝛ compaignie
A ce mot deſcendi La dame de la cele
Toſt et iſnelement Entra en la chapelle
Dieu pꝛia de bon cuer Et /la Virge pucele
Que contre l'ennemi Li garde ſa querele
Si com la bone dame Eſtoit en oꝛoiſon.
/Nostre Dame deſcent Tout dan cele facon.
Comme la dame eſtoit Ne la connut nulz hon
Au chevalier a dit Faites toſt ſi monton
Dame moult volentiers Mais j'ai moult grant doutance
Que de nous .ii. ne ſoit Par temps la deſſevrance
Vous n'eſtes pas bien ſage Savez fole creance
Diex nous y aidera G'y ai moult grant fiance
Le chevalier chevauche Devant li /Nostre Dame
Il ne la connut mie Cuidaſt que fuſt ſa fame
Grant piece chevauchierent N'enconterent nule ame
En treſtout leur chemin C'un home et une fame
Tant cheuaucherent enſamble Qu'il vindꝛent aſſez pꝛez
Du lieu et de la place Ou eſtoit li mauvés
Qui de grever la dame Eſtoit foꝛment engrez
Mais il ne l'avra mie Couroucié ert de pꝛez
Car /Nostre Dame vient Mais il ne le ſcet mie
Non fait le chevalier Qui li tient compaignie
En la place deſcendent Ou la foy fu baillie
Quant li mauvais les voit A haute vois ſ'eſcrie
Au chevalier a dit A moult grant alenee
Hoſtes moi ceſte fame Que tu m'as amenee
Car ce n'eſt pas la dame Que tu as eſpouſee
Seur toute riens la hé Tu m'as ta foy fauſſee
Mais ſoies tous certains Tu t'en repentiras
Et bien pꝛochainement Si que tu le verras
De la place ſ'en tourne Que n'i demoꝛa pas
Par ſon manoir ſ'en toꝛne Si le gete en .i. tas
Le chevalier ſ'en toꝛne Durement ſ'eſbahi
Dame qui eſtes vous De moꝛt m'avez gueri
N'eſtes vous pas la dame Qu'eſpouſai et plevi
Nennil faus chevalier Poꝛ ſ'amoꝛ vins iſſy
Ou eſt donques la dame Pour Dieu rendez la moy
Je vous jur et crëant Jamais mal ne feroy
Dont me puiſſe garder Tant comme je vivrai
Et reſpont /Nostre Dame Et je la te rendꝛai
De la place ſ'en toꝛne N'i fait plus demoꝛee
En la chapelle vindꝛent Ou la dame ont trouvee
Qui par devant l'ymage Eſtoit agenoilliee
De l'yaue de ſon cuer Ot ſa face moilliee
/Noſtre Dame les leſſe es ciex ſ'en remonta
La dame [se ]retoꝛne Son ſeignoꝛ regarda
Quant les lui ſ'apercut Tantoſt li demanda
Sire demeure je Poꝛ vous aquiter la
Certes dame nennil Moult bien m'a aquitee
/La douce Mere Dieu Poꝛ la vostre amiſté
El meeſme ſon coꝛps A avec moi eſté
Dont le malvais m'a dit Que j'ai fait fauſſeté
Si me veille elle aidier Je nel ſavoie mie
Que le fuſt avec moy N'en ma compaignie
Mais puis qu'ele m'a fait Si tres grant coꝛtoiſie
Je la vouldꝛai ſervir Tous les joꝛs de ma vie
Sire vous avez dꝛoit Et ſi eſt bien raiſon
Car qui la ſert de cuer Il a bon guerredon
Mais qui ſert l'ennemi Qui ne fait ne mal non.
Il en a en la fin Le honni du baſton.
Certes vous dites voir Bien m'en ſui aperceu
Car poꝛ la vostre amoꝛ M'a grant meſtier heü
Encontre l'ennemi Qui m'avoit deceü
Se ne fuſt le ſervice Qu'el a de vous heü
Ainſi fu garanti Le povre chevalier
Qui de folie faire Eſtoit bien couſtumiers
Que l'ennemi cuida Decevoir par deniers
Mais /la Dame n'ot cure Tout li rendi arriers.
Oꝛ pꝛions de bon cuer A /la Virge Marie
Qui au chevalier fiſt. Bonté et coꝛtoiſie
Que chaſcuns et chaſcune L'ait ſi a gré ſervie
Que nous aions des ciex La ſainte compaignie