Les biaus contes et les repꝛis
Doit on aus haus hommes de pꝛis
Souuentez fois dire et reprendꝛe
Pour le bien c'om y puet aprendꝛe
Et pour mouteplieꝛ l'empꝛiſſe
De ceus qui ont la voie empriſſe
D'onneur la louee pꝛiſſiee
Dont pꝛoueſce eſt autoꝛiſſiee
Et tout li bon autoꝛiſſiez
Qui font les hardemens pꝛiſſiez
Car a toz jours los et pꝛis a.
Qui d'onneur l'enpꝛiſſe pꝛiſe a.
Si com cil qui valeur enpꝛiſt
Tant que le voiage entrepꝛiſt
D'avenir a haute pꝛoueſce
Oꝛ entendez a quelle adꝛeſce
Il ſe miſt. car premieꝛement
Deſir d'acointieꝛ hardement
Li a eꝛrant vigours pꝛeſte
Loꝛs ſe miſt qu'il n'a areſte
Ou chemin dꝛoit a travaillieꝛ
La le convint la nuit veillieꝛ
Et l'andemain rentreꝛ en paine
Sans ſe jour toute la ſemainne.
Que pou ou noient ſe repoſſa
Car a vigour ſon pꝛopos a.
Tout mis qui l'enſeigne et eſtruit
Et peꝛeſce en lui li deſtruit
Si que del areſteꝛ n'a cure
Tant que ſa ioneſce li dure
Et ces nulle heure de jour
Ne chace repos ne ſejour
En eſtours tournois et cembiaus
Eſt a vëoir ſeur touz ſi biaus
Qu'il ſemble eſtre angles empanes
Et tant c'eſt nuit et jour penez
En honneur chacer et conquerre
Qu'an trauaillant vint en la terre
Ou de renommee ſ'acointe
Une dame moult noble et cointe
En hardement freſche et nouvelle
Qui de valour li diſt nouvelle
Et comme avoir et recouvreꝛ
La pourra par ſon bien ouvreꝛ
Moult doucement li dit biax filz
De ce ſoiez ceꝛtainz et filz
Puis que hardis iez et ſeurs
En pouretez ſeꝛas meu[r]s
Et partout plus que le tonnoirre
Redoubtez ſe bien tiens ton oire
Ou tu es ſans douteꝛ la paine
Car c'eſt li biens de la fontaine
Dont on ne puet a fin venir
Se la trace eſt griés a tenir
De ce ne te doit il chaloir
Hons qui veut lui faire valoir
Et de renon ſon los acroiſtre
Doit paine endureꝛ pour connoiſtre
Com chieꝛe eſt achetee valours
Au pꝛeus pour eſtre eſgrans honneurs
Chaſcun ſelonc que ſa perſonne
En honnour reluiſt et reſonne
Donneꝛ leur dois de ton avoir
Et ainſi je te fais ſavoir
Tant com le dꝛoit chemin tenras
A valour aſſez toſt venras
Dont li renons a tous jours dure
Et cil qui bien la paine endure
S'entoꝛna d'illecques a tant
Son coꝛs de grant travail batant
Ainſi que Dieus les ſiens adꝛece
L'oſtel courtoiſſie et largece
Trouva dont la poꝛte eꝛt ouerte
Laiens ieꝛt donneꝛs et deſeꝛte
Au commancement bel ſeꝛvir
Prendꝛe pꝛometre et deseꝛvir
Grans donc moiens autres menus
Que tantoſt que la fu venus
Devant largeſce et coꝛtoiſſie
Firent joie ſi enuoiſſie
C'onques mis hons n'eſfia grenoꝛ
La le pꝛiſt com ſon ſeignour
Courtoiſſie qui moult l'oneure
Et au mengier quant il fu heure
La fiſt de ſur lui a ſa deſtre
La geſte qui fu de bon eſtre
Siſt apꝛés par ſon dous otroi
Et ne firent illuec que troi
A celle table ſeulement
Li mes qui vint premieꝛement
Ce furent d'oꝛ hanas et coupes
Et iouiaus en guiſſe de ſoupes
Apꝛés floꝛins et gros tournois
Qu'il donneꝛent pour les tournois
Maintenir a touz bacheleꝛs
Li autres mes n'ieꝛt pas celez
Dont moult i ot et d'un et d'el
Drap d'oꝛ furent et de cendel
Puis ameneꝛent les deſtrieꝛs
En ſelles a frains et eſtrieꝛs
Ne d'autre vin ne ſ'abuureꝛent
Que des bons dont aſſez parleꝛent
En ramentenant leur bons fais
De tiex entremes fu touz fais
De la court large li mengieꝛs
C'onques veus n'i fu dengieꝛs
A tant miſt largece a raiſon
Le bacheleꝛ quant fu ſaiſon
Et dit frere ſe Dieus t'avoie
Di moy ou tu tendꝛas ta voie
Que tu ſoiez li bien trouvez
Tu ne pues eſtre mal pouuez
Puis que de courtoiſſie acointez
Et de moi; et cilz a mains iointez
De ces biens fais la meꝛcia
Puis eꝛrant le voir li conta
De ſon pꝛopos et du voiage
Qu'antrepꝛis a par bon courage
Tant que l'acointance a trouvee
De pꝛoueſce ou mauvez ne bee
Comment il a valout aquiſſe
Par travail d'armes ſanz faintiſſe
Loꝛs courtoiſſie li reſpont
Frere valour eſt ſur ce pont
Peꝛilleus ou tu dois paſſeꝛ
Mais moult t'i convendꝛa laſſeꝛ
Ainz que paſſe l'aiez d'aſſez
Car la ſont li pꝛeu amaſſez
Ou bꝛuit d'armes et fouleis
De chevaus. qu'ains miex ne veis
La t'eſtenras ſanz eſmaieꝛ
Ton coꝛs pꝛouuieꝛ et eſſaieꝛ
En hiaume en ſuour en chalour
Endureꝛ pour tendꝛe a valour
A terre en pꝛeſſe de chevaus
La veꝛra on ce que tu vaus
Et con veus a pꝛoeſce entendꝛe
Par bien aſaillir et deſfendꝛe
Laſeꝛont pꝛiſſie a leur dꝛoit
Ti biau coup feꝛu oꝛendꝛoit
La eſt vigour qui ſe reueille
En baing de ſanc et de ceꝛuelle
Par grans coups donneꝛ et ſouſfrir
La te convient ton coꝛs oſfrir
Ou plus foꝛt t'as en mi la preſſe
La aqueꝛras tu la pꝛoeſce
Que honneur depart a ces amis
La ſeꝛas tu ou chemin mis
De pꝛoueſce et en dꝛoite ſanté
La trouueꝛont li bon leur vente
Ou vigour eſt veꝛde et floꝛie
La eſt honneurs qui ſe Marie
Aus hardis ſeurs bien faiſſans
La n'eſt pas li heꝛaus taiſſans
Ainz crie pꝛis a remenoir
La iras tu dꝛoit au manoir
De pꝛoueſce et uient par aillours
Se li chemins eſt peꝛillous
Ne le redoute pouce pas
Mais vas ton cours plus que le pas
Eſlaiſſieꝛ aus meilleurs eslis
Quant de caillous ieꝛt fais tes lis
Et ſeꝛas a teꝛre abatus
Martelez. d'eſpees batus
Ainſi va d'armes li couuines
Car en chambꝛes ni en courtines
Ne giſt pas pꝛouece a trouver
Et chilz qui ſoi veut eſproueꝛ
Reſpondi dame voulentieꝛs
Seꝛa dꝛoit tenu cilz ſentieꝛs
Par mi ce pont dont vous parles
A tant eſt celle part ales
Et ou plus foꝛt tas ſ'enbati
Ha; Diex ſi bien a combati
En hardement dont li ſouuint
Que le champ deſconfit et vint
Pour le pꝛis d'onneur conqueſteꝛ
A valeur dꝛoit ſans arreſteꝛ
Qui ou champ outre demouroit
Ou plus ſanc et ſuour couroit
Es deſtreſces et es chalours
La eſtoit trouvee valours
Qui les pꝛeus d'armes cher vendus
Heꝛbeꝛgoit la eſt deſcendus
Li bacheleꝛs ne tarja point
Et a valeur vint en ce point
Que coꝛs et membꝛe avoit blecie
Et en ce point ſi deſpecie
Qu'a paines nulz le connoiſſoit
Mais de riens ne ſ'eſbahiſſoit
Ainz paſſa armee la teſte
La poꝛte outre a joie et a feſte
Fu receus a telle honeur
C'omques n'i ot grant ne meneur
Qui pour li joie ne feïſt
Je ne di pas que il ſeiſt
Illuecques mie longuement
Ainz dit que ſans detriement
De traveillieꝛ ne ceſſeꝛoit
Tant qu'il a pꝛouece ſeꝛoit
Ou tout ſon courage avoit mis
Et valour li dit biax amis
Eſploite toi que Diex t'i maint
Uns chevaliers pres de ci maint
Qui hardement eſt apelles
Dont ſeꝛas o lui oſteles
Car il eſt de pꝛoece peꝛes
Que tu tant chaces et compeꝛes
Cil ou lieu dꝛoit te conduira
Ou pꝛoueſce eſt. et t'eſtruira
Comment hons ſe doit maintenir
Qui la voie aus pꝛeus veut tenir
Apres ceſt mot tantoſt ſ'en toꝛne
Li bacheleꝛs qu'il ne ſeioꝛne
Par armes ſon coꝛs eſpꝛeuue
Tant qu'il ot hardement trové
Li chevaliers au fieꝛ viſſage
Qui de pꝛoeſce le paſſage
Et le non avoit a gardeꝛ
S'eſtoit plus fieꝛs a eſguardeꝛ
Que ſangleꝛs lions ne liepars
Et fu ces coꝛs de toutes pars
D'armes debatuz et mailliez
Et ces viſaiges detailliez
Recouſus et tous deſchirez
A foꝛs bꝛas batus et tirez
Si que menton fron nez ne bouche
N'avoit d'antieꝛ. atant l'apꝛouche
Cilz qui voulentieꝛs non enuis
L'esgarda encoꝛs en en uis
De touz lez en chief et en membꝛe
Que moult ot bel adont li membꝛe
Veu l'avoit ou foꝛt eſtour
Faire maint cembel et maint tour
En la grant pꝛeſſe ou plus foꝛt tas
Conbatre et feꝛir a maint tas
Comme hons pꝛeus et de grant value
Et li bacheleꝛs le ſalue
Comme ſage et enſeigniez
Hardemens reſpont bien veigniez
Chieꝛs amis oꝛ uenez ſeoir
Quant ci m'eſtez venu vëoir
Tant en croiſtra mon honnour
Que tuit li bon grant et menour
Parleꝛon de vostre vaillance
Cilz qui ailleurs n'avoit beance
Qu'a pꝛouece avoir la coi[n]tiſſe
Reſpont ſire a vostre deuiſſe
Et par vo gré me maintenrai
Tu dis bien et je te menrai
Dit hardement oꝛ ne t'avint
Veoir pꝛouece encoꝛe anuit
Ma fille que on tant honneure
Qui avec loiauté demeure
Avec ſcience et vraie amour
Qui dames ſont de tel clamour
Et de tel pꝛis ſi com moy ſemble
Qu'aqueꝛre les convient enſemble
Si com leurs renons ieꝛt eſpars
Querir les dois de toutes pars
Sans l'un de l'autre departir
Qui a haute honneur veut partir
Et cilz qui les departira
Ja a mal part ne partira
Dont ne dois aleꝛ celle part
Se partir ne veus a tel part
Que leur renon enſemble partes
Oꝛ mentens ainz que de ci partes
Coment a leur part partiras
Tout enſemble et quel part yras
Pour entreꝛ dedens leur parties
Ou les honneurs ſont departies
Au pꝛeus qui celle part iront
Et leur part ne departiront
Car qui delez .iiii. parties
Seꝛt il n'i eꝛt ja de leurs parties
Moult eſt bonne l'aperteure
Qui l'omme en pꝛouece meure
En vraie amour et en ſcience
Et en loyauté qui ſemance
Eſt et flour qui fait floꝛir
Les oeuvres des bons ſans moꝛir
Ne ja fait de pꝛeus ne moꝛra
Qui en loiauté demourra
Dont i dois tu bien demoꝛreꝛ
Se le pꝛeu veü aſauoureꝛ
Car qui loiauté n'a ſaueure
Ja n'ameꝛa pꝛouece une heure
Ainz li fuit honneur de touz ſens
Et doit li honnoureꝛ de ſens
Par vraie amour en li ſentir
Ces .iiii. convient ſanz mentir
Enſemble acointieꝛ et aquerre
Qui pꝛouece a dꝛoit veut conquerre
Et ſon hardement emploieꝛ
Sire a vous me fiſt envoieꝛ
Diex qui les bons mainne et anuoie
Dit li bacheleꝛs car a voie
D'eſtre bons ſui bien auoiez
A tant ſ'en part mais conuoiez
Fu de hardement et menez
Tant qu'il fu a l'eſtre aſenez
De pꝛouece et des .iii. veꝛtuz
Dont hons doit eſtre reueſtuz
Qui a dꝛoit ſe fait pꝛeu clameꝛ
La ſe fiſt tant d'elles ameꝛ
Par armes ou bien ſ'eſpꝛouua
Que chaſcun loial le trouva
En touz beſoins et en touz fais
D'armes et d'amours ſi par fais
Qu'an li ot petit a parfaire
Pour ce en doit li parleꝛs plaire
Car pꝛoeſce aquiſt a ſon dꝛoit
Mais ci m'en tairai oꝛendꝛoit
Car trop parleꝛ n'es pas mes pꝛeus
Ainſi fu li chevaliers pꝛeus
Par les .iii. veꝛtus qu'il aquiſt
Avec pꝛoeſce qu'il tant quiſt
D'armes a coꝛs et compara
Que de haute honeur ſe para
Et pour ce qu'ainſi fu pares
Preus chevalier et compares
Loiaus ſages et de cueꝛ fin
Vrais amans ſi vous feꝛai fin