En la douce louange de la Vieꝛge pucelle
Roine gloꝛieuſe Marie Dieu ancelle
Qui le dous Jhesucriſt Nourri de mamelle
Weil recoꝛdeꝛ un dit Dont la matieꝛe eſt belle
A mon commancement Depꝛi la treſoꝛiere
De grace qui poꝛta La tres haute lumieꝛe
Que veꝛs ſon dous enfant weille faire pꝛoieꝛe
Que tous ceus qui m'oꝛront Aient joie plenieꝛe
De la Vieꝛge loiaus Qui eſt la ſouveꝛaine
Qui tous les deſvoiez A leur dꝛoit poꝛt ramaine
Vous dirai comment voult Garentir .I. chanoinne
Cil qui ſeꝛt Noſtre Dame Il ne peꝛt pas ſa painne
Le chanoinne leſſa a faire une folie
En l'onneur de la dame Qui eſt nete et polie
Mes la Vieꝛge pucelle Si ne l'oublia mie
Car au tieꝛs jour apꝛés El li ſauva la vie
Si comme ceus oꝛront Qui voudꝛont eſcouteꝛ
.I. petit du chanoinne Vous leꝛon a parleꝛ
Aſſes pꝛochainement I voudꝛon retoꝛneꝛ
D'un chevalieꝛ gentil Vous voudꝛé recoꝛdeꝛ
De Noꝛmendie eſtoit Ce eſt verité fine
Il avoit une dame Loialle et enterine
Il en ot une fille De ſi bonne doctrine
Que de ſon cueꝛ ſeꝛvoit La tres haute roine
Mes la Vieꝛge Roine L'en rendi bon louieꝛ
De ce que fiſt ſon peꝛe Qui eſtoit chevalieꝛ
Tant ſui les tournois Par ſon grant encombꝛieꝛ
Qu'il ne li demoura Palefroi ne deſtrieꝛ
Tant fiſt par ſa folie Qu'il ot tout deſpendu
En toute Noꝛmendie N'ot vaillant .i. feſtu
Nul n'ot mes de li cure Quant il ot tout perdu
Sachiez qui n'a argent Il eſt trop vil tenu
La dame a ſon ſeingneur S'en vint et li diſt ſire
Vuidon ceſte contree Tout le cueꝛ me font d'ire
Le chevalier reſpont Foi que je doi ſaint Sire
Nul n'a cure de nous Plus ne vous ſai que dire
Nous paſſeron la meꝛ S'iron en Engleterre
Je ſerai ſoudoieꝛ Il i ara grant guerre
Faites toſt diſt la dame Treſtout le cueꝛ me ſerre
Loꝛs paſſerent la mer Vindꝛent a ſeque terre
A Rippon le Chaſtel le chevalieꝛ entra
Li ſa fame et ſa fille Que de ſon cuer ama
El milieu de la ville Le chanoinne trouva
Doucement le ſalue Et puis li demanda
Moult belle compaingnie Ovecques lui avoit
Frere au conte /Nicole Li chanoinnes eſtoit
Le chevalieꝛ du ſien Por Dieu li demandoit
Aucune courtoiſ[i]e Quar meſtieꝛ en avoit
Quant le chanoinne entant Qu'il li a demandé
Il li donna du ſien Si en ot grant pitié
Sa fille regarda Qui ot tant de biauté
En ſon cueꝛ la convoite Mes il n'a mot ſonné
Le chanoinne repaire arrieꝛe en ſa meſon
Mes lanemi li met El coꝛps temptacion
D'avoir la damoiſſelle S'apella un garcon
Le chevalieꝛ manda Si le miſt a raiſon
Sire dont eſtes vous Je ſui de Noꝛmendie
J'é le mien tout perdu Et tout par ma folie
Oꝛ pes diſt le chanoinne Ne vous eſmaiez mie
Se vous me voulez croire Vous en avrés partie
Diſtes qui eſt la dame Que je vi avec vous
Et celle pucelete Qui le viaire a dous
Ceſt ma fame et ma fille Par Dieu le createur
Oꝛ entrés en ma chambꝛe Je weil parler a vous
Le chanoine qui fu Moult tres foꝛment temptés
Au chevalieꝛ a dit Qu'il vit en pouvretés
Prenez de mon argent Tout a vo voulenté
Mes que j'aie vo fille A faire touz mes grés
Le chevalieꝛ reſpont Qui eſtoit mandiant
Donnez moi .iic. livres D'argent tout maintenant
Je la vous iré queꝛre S'en faites vo talent
Alés diſt le chanoinne Toſt et apeꝛtement
Les denieꝛs ſont tous pꝛés Mes que la m'amenés
Le chevalieꝛ retoꝛne A l'oſtel eſt alés
A ſa fame diſt dame Enveꝛs moy entendés
Ceꝛtes nous ſeꝛons Riches ſe croire me voulés
Je vien d'un gentil homme Qui a a moi parlé
Il veult avoir vo fille Tout a ſa voulenté
Il mena .iic. livres D'argent ſec pꝛeſanté
Il faut que je li maine Car je l'ai creanté
Loꝛs reſpondi la dame Es ce par mariage
Nenil c'eſt un chanoine De moult riche linage
Quant la dame l'entant Si ot au cueꝛ grant rage
De l'iaue de ſon cueꝛ Arouſa ſon viſage
Sa fille vint a li Et li diſt douce mere
Dame pour [quoi ]pleurés Vous a feru mon pere
Nenil voir douce fille La choſe eſt plus amere
Car vous eſtes vendue Dont je fais mate chieꝛe
Voir diſt la pucelle J'é voué chaaſté
Au tres dous Jhesuchriſt Le roy de maeſté
Je pꝛi ſa douce meꝛe Ou tant a de bonté
Car elle gart mon coꝛs D'oꝛdure et de vilté
Tres douce Mere Dieu Qui eſtes ſouveraine
Qui voſtre chaaſté gardaſtes C'eſt bien choſe ceꝛtaine
Et ſi eſtes des vieꝛges Dame et ſouveraine
De grace et de veꝛtus Le puis et la fontaine
Dame deſfandés moy De l'oꝛdure du monde
Par quoi m'ame ne ſoit En la pꝛiſon parfonde
Et mon pere et ma mere Gardez de moꝛt ſeconde
Le chevalieꝛ li diſt oꝛ ca Dieus vous comfonde
Venez en avec moy Et ſi ne leſſiez mie
Sire dit la pucelle Je ne vous deſdi mie
Hautement c'eſcria Douce Vieꝛge Marie
Je vous requier meꝛci Que ne m'oubliez mie
Le chevalieꝛ ſa file Au chanoinne mena
.IIC.livres recut Moult joiant retoꝛna
Pleurant la damoiſſelle Illecques demoura
Le chanoinne tantoſt Doucement l'apella
Belle pourquoi pleurés Ne par quelle raiſon
Sire diſt la pucelle J'ai au cueꝛ mariſſon
D'eſtre ainſi violee Oꝛ ſavez la raiſon
Teſſiez vous belle ſueꝛ Nous vous marieron
Il couchierent enſemble Loꝛs ſouflent la chandelle
A moult tres foꝛt pleurer Se pꝛiſt la damoiſſelle
Dites moi fait il belle Comment on vous apelle
Sire j'ai non Marie Se reſpont la pucelle
Quant le chanoinne entant Le dous non de Marie
Tanptacion ſe fu Tantoſt de li partie
Pour l'amour Nostre Dame Qui eſt nete et polie
Ja mon coꝛs ſe Dieu pleſt Ne vous fera vilonnie
En l'onneur Nostre Dame Qui le coꝛs Dieu poꝛta
Mon coꝛs vilainement A vous n'atouchera
Il ſaut ſus et revest Un ſeꝛgant apella
Au chevalieꝛ ſa fille Doucement envoia
La pucelle ſaut ſus Doucement l'en mercie
Et ſi en rendi graces A la Vieꝛge Marie
A toꝛches l'en menerent Et ſi lont comvoie
Quant ſa mere l'entant Elle fu reſjoie
Les ſeꝛgens retoꝛnerent La pucelle comta
A ſon pere la cauſe Pourquoi la reſpita
De faire villonie Chaſcun Dieu meꝛcia
Il dient Noſtre Dame Moult tres bien li rendꝛa
Si fiſt elle pour voir Quar le tieꝛs jour aprés
S'en aloit le chanoinne Joeꝛ parmi les pꝛés
Ses ſeꝛgans avec lui Sus bons chevaus montez
Deſſus une rivieꝛe La ſe ſont areſtés
Pour tant qu'annes Sauvages i avoit a foiſon
Le chanoine leſſa Voleꝛ un ſien faucon
Un oiſſel abati De ſi tres grant randon
Touz .ii. chient en l'iaue Sans point d'areſtoiſon
Apꝛés diſt le channoine Qui boꝛcha le cheval
L'iaue fu trop parfond Si eſt alés aval
Les ſerjans regardeꝛent Leur bon ſeigneur loial
Aidier ne li povoient Dont leur fiſt le cueꝛ mal
Quant vint deſus l'iaue A li aute vois ſ'eſcria
Tres douce Vieꝛge pure Car me ſauvez la vie
Adont eſt reſfondꝛés Le diable l'eſpie
Savoir ſ'il le pourroit Atrere a ſa partie
Les eſcuieꝛs en pleurent Et mainnent marrement
Et dient l'un a l'autre Seingneurs alons nous en
Si pꝛenon des denieꝛs Aſſez et largement
Nous ne poon ici Demourez longuement
Demandé nous ſeꝛa Ceſt bien choſe certaine
Arriere retoꝛneꝛent Mes /la douce Roine
[La ]Mere de pitié fu la Pour le chanoinne
Elle le voult gardeꝛ Cel jour de moꝛt vilaine
D'angres grant compaignie Avecques lui avoit
Le chanoine poꝛterent En ſa chambꝛe tout dꝛoit
En ſon lit le couchierent Ou grant luour avoit
De grace et de veꝛtus Ne ſavoit ou eſtoit
Il ſ'endoꝛmi la Dame Es ſains ciex remonta
La bonté que li fiſt Moult bien rendu li a
L'un des ſeꝛjans errant La chambꝛe deſfeꝛma
Le chanoinne ſ'eſveille Mes nul mot ne ſonna
Il pꝛiſtrent les eſcrins De martiaus a frapeꝛ
Qu'es ce diſt le chanoinne Me voulez vous robeꝛ
A la fuite ſont mis Sans plus de l'areſteꝛ
Il cuident ſoient diables Qui les weille[nt] enpoꝛteꝛ
Qui pour eus decevoir Se ſoient laiens mis
Leur ſeingneur les apelle Et leur a dit amis
Seingneurs je ſui vos ſire Par Dieu de paradis
Et quant il lentendirent Au retour ſe ſont mis
Quant il ont entendu Qu'il a de Dieu parlé
Arriere retoꝛnerent Si li ont demandé
Ha; ſire quelle gent Vous ont ci amené
Seingneurs diſt le chanoinne Le roi de maeſté
Alés en celle ville Queꝛés le chevalier
Qui me vendi ſa fille Par amour vous requieꝛ
Et il li ſont alés Sans point de delaier
Le chanoinne li donne D'avoir un grant ſommieꝛ
De quoi lui et ſa famme Moult bien ſe gouveꝛna
Et puis le bon chanoinne La choſe leur conta
Comment la douce Vierge De moꝛt le reſpita
Le chevallieꝛ ſa vie Par cel point amanda
Il veſquirent au ſiecle Treſtous trois ſaintement
Ceſt eſſemple nous mouſtre A tous generaument
Que qui ſeꝛt Noſtre Dame Qui ne faut ne ne ment
Et en a en la fin .C. doubles paiement
Si pꝛions a la Vieꝛge Qui eſt et fille et mere
Qu'elle pꝛiſt ſon dous filz Comme tres digne mere
Que il nous gart d'enfer Celle pꝛiſon amere
Et nous otroit la joie Qui eſt et belle et cleꝛe