Moult fu nez de bone heure Qui bien fait en ſa vie
Choſe qui a Dieu plaiſe Et a /ſainte Marie.
L'ame en a ſon loier Quant du coꝛps eſt partie
En paradis ſ'en va Quant elle eſt eſpanie
Cil qui en ſa jonece A bon commencement
Et il a en la fin Mauvais definement
La divine Eſcripture Nous dit qui pas ne ment
Que il ſera dampnez A paine et a tourment
Mais nostre Sire Diex Eſt ſi miſericoꝛs
Combien que li pechierres Li eſt fait de grans toꝛs
S'il eſt pꝛins en bienfait Quant l'ame part du coꝛps
Tantoſt eſt des eſcrips Au dëable mis hoꝛs
Ainſinc com nous trouvons En la ſainte eſcripture
D'un moult riche bourgois Qui de Dieu n'avoit cure
Povres gens deſpiſoit Et faiſoit grant laidure
A /Romme la cité avint Ceſte aventure
Moult avoit ce bourjois Partout grant renommee
Et plus avoit d'avoir Que nulz de la contree
Mais onques en ſa vie N'ot talent ne penſee
Que aumoſne poꝛ Dieu Feüſt par lui donnee
Une joꝛnee avint Qu'il ot grant coꝛt tenue
Mainte povre gent ſont A ſa poꝛte venue
Pour ſ'aumoſne avoir Dedens font atendue
Quant li bourgois les voit Tout le ſanc li remue
Les povres gens oÿ Qui demandent du pain
Que moult en y avoit Qui avoient grant fain
Li ſires vint a lui .I. baſton en ſa main
Onques n'y leſſa povre Qu'il ne meiſt au plain
Il leur diſt je l'aing miex A donner a mes chiens
Laidement les enchace Ne leur a donné riens
Et l'endemain revint .I. povres Creſtiens
Qui pour l'amoꝛ de Dieu Demanda de ſes biens
Li riches hons li diſt Sire coquins truans
Alez vous en de cy n'i ſoiez Arreſtans.
Que vous y poꝛriez eſtre Jusqu'a .xxxii. ans
Qui vous [n']y aiez riens Alez baillier aus champs
Quant li povres l'oÿ Erranment ſ'en toꝛna
Si comme il ſ'en aloit .I. ſien compains trouva
Dites fait il biau frere Dont venez vous de la
Et cil li reſpondi Je le vous dirai ja
De chiez ce grant riche home Qui ne m'a riens donné
Ains m'a clamé truant Et moult foꝛ vilené
Il n'eſt nulz qui en puiſt Traire ne pain ne blé
Je metrai dit li autres Se g'y vois j'en avré
Loꝛs ſ'en toꝛne le povre A l'oſtel au riche home
Qui tant avoit d'avoir Que n'en ſavoit la ſomme
Poꝛ Dieu [et ]poꝛ /ſa mere Poꝛ /saint Pere de Romme
A requis au boꝛjois Que de ſon pain li donne
Li riches hons le pꝛiſt tantoſt a eſcondire
Com cil qui ot le cuer Oꝛgueilleux et plain d'ire
Moult felonneſſement Li commenca a dire
Dont [viennent ]tant de povres Que Diex les puiſt maudire
Quant li povres l'oÿ Erranment ſ'en toꝛna
Le clarcelier encontre Qui du pain apoꝛta
Quant li povres le voit Arrieres retoꝛna
Ou qu'il voit le riche home Poꝛ Dieu l'en demanda
Quant li riches hons vit Le povre revenir
.I. pain en la coꝛbeille A pꝛis par grant air
Le povre homme en cuida Par mi le chief ferir
Mais il ne le toucha C'il va le pain cuillir
Quant le pain fu geté Maintenant ſ'averti
Qu'il avoit fait pechié Tantoſt ſ'en repenti
Foꝛment bati ſa coꝛpe Si li cria merci
Au roy de paradis Qui onques ne menti
/Noſtre Pere des ciex Qui ſus tous a puiſſance
Du riche homme entendi La vraie repentance
De ſes pechiez li fiſt Pardon et alejance
Mais nous ne devons pas Pechier en tel fiance
Comment qu'il ot le pain Geté par felonie
En fu moult liez li povres Le pain ne leſſa mie
Et diſt qu'il en donra A ſa povre meſnie
S'en ſeront repeü Car moult on povre vie
Li povres hons ſ'en toꝛne Le pain en a poꝛté
Lui et ſa compaignie S'en ſont la nuit ſoupé
Quant il oꝛent mengié Dieu en ont aouré
Gracié l'ont de ce Que il leur a pꝛeſté
Enfans diſt li pꝛeudons Oꝛ vous agenoilliez
Et pꝛiez poꝛ celi Qui ce pain a gaignié
Que li vrais Diex li veille Pardonner ſes pechiez
Et treſtous les meffais Dont eſtoit entechiez
Les enfans ſ'agenoillent Toſt et iſnelement
/Jhesucriſt reclamerent De cuer devotement
Qui il face au boꝛjois Du ſouper paiement
Car du pain ont eü Aſſez et largement
Auſſi toſt comme il oꝛent Loꝛ oꝛoiſon finee
Tres devant les sains ciex Eſt l'oꝛoiſon alee
L'aumoſne que le riche Ot au povre getee
Devant la face Dieu Fu bien repꝛeſentee
/Li Rois de tout le monde Qui hault ſiet et hault voit
Oï bien la pꝛiere que le Povre faiſoit.
Poꝛ le pain au riche home Dont repeü eſtoit
Qui onques en ſa vie Aumoſne fait n'avoit
Li ennemis l'avoit Si toꝛné a ſa part
Que tous joꝛs de mal faire Li coꝛps li frit et art
Se /Jhesucriſt ne fuſt /Qui tous les [biens ]depart
Li riches hons ſ'eſtoit Aperceus trop tart.
Car cele nuit meiſme treſpaſſa et fu moꝛs
L'ennemi qui eſtoit Tous joꝛs delez le coꝛs
En enfer l'empoꝛta Qui tant eſt vilz et oꝛs
Ileques le toꝛmentent Et en font leurs depoꝛs
Mais li Diex qui tout ſcet Dit et fait et penſee
Ne volt mie ſoffrir Que l'ame fuſt dampnee
.II. anges qu'il tramiſt Grant clarté ont getee
Des mains a l'ennemi Ont l'ame delivree
Monſeigneur /saint Michiel Le ſaiſi tout premier
A l'enemi a dit Sathanas averſier
Tu n'avras mie l'ame Rapoꝛtes la arrier
De par Dieu nostre Pere La te veil chalengier
Li ennemis reſpont Ce ſeroit deſraiſon
Car onques en ſa vie Il ne fiſt ſe mal non
Poꝛ cele veil je avoir En ma ſubgeſtion
A perpetuité Sera en ma pꝛiſon.
Li ennemis parole A l'ange d'une part
Poꝛquoi Diex veult avoir En ceſte ame part
Il m'eſt avis qu'il ſ'eſt Aperceus trop tart
Poꝛ les mauls qu'il a fais Diex n'i a part ne hart
Vas toſt diſt /saint Michiel Ses meffais apoꝛter
Car je les veil oir Devant moy recoꝛder
Et ſi vouldꝛai ſon bien Contre ſon pal peſer
Tant que tu revendꝛas Vouldꝛai l'ame garder
Li ennemi ſ'en parte Li ange demoꝛerent
Entr'eulz .ii. l'ame miſtrent Et moult bien la garderent
Li uns encontre l'autre Moult foꝛment eſtriverent
Pour l'ame conqueſter Fierement eſtriverent
/Saint Gabꝛiel parla Et diſt a /saint Michiel
Coment poꝛra ceſte ame Laſſus eſtre ou ciel
Tous joꝛs fu le coꝛps plain De venin et de fiel
Loꝛs parla /saint Michiel Qui eſt plus dous que miel.
Il eſt pꝛins en aumoſne Que Diex a bien recue
La pꝛiere du povre Li a meſtier eue
Que il la fiſt de cuer Et Diex la bien ſceue
Par ce point ſera l'ame De joie repeue
Ainſinc comme il parloient Li ennemis revint
Qui tous les maulz apoꝛte De quoi il li ſouvint
Contre l'ame en balance Les miſt que l'ange tint
L'ame ne peſa pas Ne le quart ne le quint
Li ennemis a dit Elle eſt de ma partie
Non eſt diſt /saint Michiel Encoꝛ ne l'as tu mie
Loꝛs a pꝛiſe l'aumoſne Que Diex ot requeillie
Quant l'ennemi la voit S'en mainne male vie
Li anges miſt le pain Et l'ame en la balance
Poꝛ faire a l'ennemi Et [grant ]duel et viltance
En l'aumoſne ot plus De bien et de ſuſtance
Que en treſtous les mauls Que il ot fais d'enfance
/Saint Michiel li a dit Sathanas tu vois bien
Que nous averons l'ame Tu n'i as nule rien.
Revas t'ent en enfer Vers nous plus ne revien
Que l'ame ne ſera Jamais en ton lien.
Li ennemis ſ'en part Moult grant duel demenant
/Saint Michiel remiſt l'ame Ens el coꝛps maintenant
Noſtre Seignour ſervi Puis ce joꝛ en avant
Onques puis ne hay Povres gens mendians
Noſtre Seigneur ſervi Et mena ſainte vie
Sainte Ygliſe fu puis De li moult bien ſervie
De ſon avoir y miſt Et donna grant partie
De l'avoir de ce monde N'ot onques puis envie
Lonc temps veſqui au ſiecle Puis l'eſtut treſpaſſer.
La nuit vindꝛent les anges Qui l'en vouldꝛent poꝛter
Te Deum laudamus Commencent a chanter
Poꝛ ce ſe fait il bon En ce ſiecle amender
Qui en ſa plaine vie En bien faire labeure
Ne ſe doit pas douter Que Diex ne le ſequerre
Ains doit douter enfer Qui eſt plus noir que meure
Nulz ne ſcet de ſa fin Ne le dꝛoit joꝛ ne l'eure
Oꝛ pꝛions de bon cuer /Le tres dous Roy des roys
Et a /ſa douce Mere /Qui le poꝛta .ix. mois
Que nous ne ſouffrons ja En enfer les deſtrois
Et nous doinſt paradis Dont nous ſommes ſes hoirs