El non de /Jhesucriſt; Qui eſt nostre douz pere
Veul commencier .i. dit Mais poꝛ la grant miſere
Que je ſent dedenz moi; Pri a /ſa douce mere
Que je puiſſe conclurre; Par tel point ma matere
Qu'a tous ceulz qui l'oꝛront; Puiſt eſtre poꝛfitable
Bonne gent il n'eſt roy. Prince ne conneſtable
S'il ſe ſent en pechié; Et ne ſe rent coupable
Qu'il ne faille qu'il chiee; En la main du dëable.
Bon ſe feroit garder; De chëoir en teulz rois
Car qui y chiet n'en yſt En .ii. mois ne en trois
Et faut qu'il y demeure; Tant que /li roys de roys
Demourra en la joie; Ou il n'a nus deſtrois
C'eſt ou ſoulaz des ciex Ou touz poꝛrons venir
Se du cuer nous meton; A /Jhesucriſt ſervir.
Si comme fiſt celui; De qui poꝛrons oir
Il fu né a /Rouem; Mais moult ot aſſouffrir
Avant que fuſt abſous Des maus qu'avoit bꝛaſcés
Fu Robert le dëable De toutes genz nommez
Vous oꝛrez par quel cauſe; S'entendꝛe me voulez
Il ot en /Noꝛmendie; Au temps que vous oez
Un duc bon juſticier; Et hardi et appert
Les croniques teſmoingnent; Qu'il avoit non Aubert.
A ſervir /Jhesucriſt Avoit le cuer ouvert.
Bien emploie ſon temps; Qui a tel ſeignour ſert.
A un Noel tint court; Le franc duc a /Vernon.
Mais n'avoit point de femme; Si que tuit li baron.
Li pꝛierent pour Dieu; Et pour ſon digne non.
Que il ſe mariaſt; Mais il diſt a cler ſon
Seignour a vostre los. De gré me mariaſſe
Se partie endꝛoit moi; Seuſſe ne trouvaiſſe
N'en ſai nule ne ſoit Ou trop haute ou trop baſſe
Ou que ne m'apartiengne. L'un d'euz diſt ſanz eſpaſſe
Chier ſire je ſai telle; Dont ja n'arez vergoigne
Moult eſt plaiſant et belle; Fille au duc de /Bourgoigne
Se vous la demandez; Vous l'avrez ſanz eſſoigne
Loꝛs reſpondi le duc; Ci a bonne beſoingne.
Errant fiſt par meſſages Enquerir la pucelle.
Et on li envoia. Sanz faire grant querelle
A /Rouen [l']eſpouſa; En ſa maiſtre chapelle
Noꝛmans et Bourguenons; Firent joie moult bele.
Le duc avec la dame; Fu bien .xviii. ans.
C'onques ne plot a Dieu; Qu'il euſſent enfans
S'eſtoient il ſouvent Confez et repentant
Et vers le menu pueple Dous et humilians.
Toutes foiz que le duc Giſoit o ſa moullier
De bon cuer requeroit A Dieu le dꝛoiturier.
Que par ſa digne grace; Li vouſiſt envoier
Hoir qui eüſt puiſſance De ſa loy eſſaucier
Et tant qu'a .i. matin. Que le duc ſe leva.
Il diſt a la duceſſe. Trop malement nous va.
Que nus enfans n'avons Par Dieu qui me foꝛma.
Je croi que pechié fu. Quant on nous aſſambla
S'a .i. autre homme fuſt Le vostre coꝛs donnez
Des enfanz poꝛtaſſiez. Je croi en vos coſtez.
Et ſ'autre femme euſſe; Auſſi de l'autre lez
Des enfans engendꝛaſſe J'en ſui touz treſpenſſez
Non pas pour tant par foy; Que jamais en ma vie
Aie a femme qu'a vous Charnelle compaignie
Se vous ne treſpaſſez; Mais ne le deſir mie
La duceſſe l'oÿ; Si diſt a voiz ſerie.
Voir en gré nous faut pꝛendꝛe Ce que Diex nous envoie
Le duc ala chacier A qui foꝛment anoie
La dame demoura; Qui n'avoit point de joie
Ou lit qui fu couvert De fin oꝛ et de ſoie
En ſoupirant a dit; Diex me het bien le voi
J'encontre moult de femmes; Qui n'ont ne ce ne quoi
Sont .iii. enfanz. ou .iiii. A poi que ne renoi.
Dieu et tout ſon pooir Je ſui en grant anoi
Puis que il ne me veult Nus enfanz envoier.
Si m'en envoit le dyable Se il m'en puet aidier.
Onques mais ne diſt mot; Qui li couſtat tant chier
Car ſachiez l'anemi; Qui n'a ſon deſirrier
Foꝛs de bonnes gens Metre en ſa ſubjecion
Retint bien de la dame La mauvaiſe raiſon
Si foꝛt tempta le duc Qu'en l'eure de randon
S'en retourna du bois Et vint en ſa maiſon
La duceſſe trouva; Moult foꝛment courroucie
En l'eure l'acola Tendꝛement la baiſie
Du ſurplus qu'il li fiſt Ne vous parlerai mie
Mais ſachiez que le duc Diſt douz Diex je vous pꝛie
Cil vous plaiſt que j'engendꝛe Enfant en ceſte dame
Veilliez que il vous ſerve Au ſauvement de ſ'ame
La ducheſſe parla. Et diſt com fole femme
Mais tout ſoit au dëable Qui ne quiert que diffame
Puis que Diex n'a puiſſance Que nus enfans nous doint
Je le doins au dëable S'en ai conceu point
L'anemi l'oÿ bien. Qui pluſeurs maus conjoint
Celle foiz fiſt tourner La choſe ſi a point.
Qu'en ſa femme engendꝛa Li bons dus .i. enfant.
Qui puis fiſt moult de maus. Com vous oꝛrez avant.
Il fu de ſa nature Si tres cruel tirant
Qu'en ne trouvaſt pas pire En ceſt ſiecle vivant
Mais puis paia l'amende Des folours qu'il empriſt
Qu'au jour qu'il treſpaſſa Et que la moꝛt le pꝛiſt
Fu pꝛeſentee ſ'ame Par devant /Jhesucriſt
Ainſſi comme l'en trueve En pluſeurs lieus eſcriſt
Celle qui au dëable Ot ſon enfant rendu
Le poꝛta juſqu'au fine Que temps d'enfanter fu
Mais ainz qu'en fuſt delivre A tant de mal eü
Que les dames cuidoient Que ſon jour fuſt venu.
La ducheſſe diſoit Quant vint au travaillier
Laſſe d'avoir enfant Avoie grant meſtier
Voir grant deſir avoie De ma moꝛt auancier
En tel deſtreſce fu; Pres d'un mois tout entier
Le duc pour la duceſſe Pria mainte journee
Se ce n'eüſt eſté Ja n'en fuſt eſchapee
Mais quant la creature Dont parole fu nee
Les croniques teſmoingnent Qu'il vint une nuee
Si noire qu'il ſambloit Qu'il deüſt anuitier
A tonner commenca Et foꝛt a eſclairier
Les .iiii. vens venterent Le plus maiſtre quartier
De la viex tour chai Chaſcun ſ'ala mucier
C'on cuidoit que le monde Deüſt finer errant
Quant le temps; Apaiſa on baptiza l'enfant
Robert fu apellez Touz jourz aloit bꝛaiant
Mais ſachiez de verté Qu'il eſtoit bel et grant
Mais on ne le pooit Nulement apaier
Il naſqui ſi coꝛſu Com ſ'eüſt .i. an entier
Des que les denz li vindꝛent Bien vous puis teſmoingnier
Qu'il n'eſtoit femme nule Qui l'oſaſt alaitier
Qu'au[s] dens a ſes nourrices Les mameles moꝛdoit
Quant il le failloit boire Acoꝛnetez eſtoit
Ainz qu'il eüſt .i. an Il aloit et parloit
Plus crut et embarni Et plus de mal faiſoit
Des ce qu'il pot par chambꝛes Et par ſales fuir
Il ne trouvaſt enfant Qu'il ne couruſt ferir
De pierre ou de baſton S'il le pooit tenir
Treſtouz jourz faiſoit mal On ne ſavoit venir
Em place ou il feüſt Ni eüſt crierie
A l'un rompoit les rains Et a l'autre l'oïe.
Les ſeigneurs ſ'en rioient De quoi ce fu folie
Car puis maudirent l'eure Qu'il vint onques en vie
Le duc et la ducheſſe L'amoient moult foꝛment
Qu'en li ſouffroit a faire Son bon et ſon talent
On diſoit il eſt jones Il n'a point d'eſcient
On ſe plaignoit de li. Et menu et ſouvent
Em poi de temps devint De membꝛes bien foꝛmez
C'on dit que mauvais arbꝛe Croiſt volentiers aſſez
Il couroit par les rues Comme .i. eſcervellez
L'un feroit par la teſte L'autre par les coſtez
Les enfanz le doutoient Bien y avoit raiſon
Quant Robert ſ'en venoit Vers eulz tout a randon
A haute voiz diſoient Fuions ent en maiſon
Veſci Robert le dëable En ſa main .i. baſton
Le commun des enfanz Le ſournon li donna.
Que Robert le dëable Fu nommé ca et la
Il ne li chay puis N'en piece ne fera
Quant Robert ot .vii. anz Son pere l'apela
Et li a dit biax filz Temps eſt des oꝛe mais
Que ſoiez mis a lettre Vos livres eſt touz pꝛés
On li bailla .i. maiſtre Qui eſtoit biau vallez
Mais ſachiez que Robert Eſtoit ſi felonnez
Que pour tant que ſon meſtre Le blaſma .i. petit
En diſant biau douz ſire Vous n'avez pas bien dit
Il geta contre terre Son livre par deſpit
Il ſacha .i. coutel. Oꝛ eſcoutez qu'il fiſt
Deſſous la poinilliere Son maiſtre ſi frapa.
Que des boiaus du ventre Tout plain li entama
Puis diſt meſtre mouſtrez Vo maiſtriſe de la
Car jamais clerc ne preſtre Le mien cuer n'amera
Je vous ai mon coutel Fait ſentir en apert
Le clerc ne veſqui gaires Ainz moꝛut ſanz deſert
Ainz puis il n'i ot maiſtre Tant fuſt hardi n'apert
Qui ſe vantaſt d'aprendꝛe A clergie Robert.
N'auſiques n'avoit il D'apꝛendꝛe nul bien cure
Ne penſoit qu'a mal faire Trop eſtoit ſanz meſure
Il haoit Sainte Eglyſe Et ſa pꝛopꝛe nature
Car ſ'entraſt en mouſtier Par aucune aventure
Ne feïſt il que mal; Quant .i. preſtre veoit
.I. pou ouvrir la bouche Quant haut chanter vouloit
Robert par traiſon Ens es denz li getoit
Poudꝛe ou cendꝛe ou oꝛdure Ou ce que il tenoit
O mal faire metoit Tout ſon entendement
Quant au mouſtier veoit A Genoulz bonne gent
Par derrier les boutoit Si debonnairement
Qu'a denz les abatoit Contre le pavement
Pour ſa grant mauvaiſtie Le duc le mandiſſoit
Le duc qui fu pꝛeudomme Moult dolanz en eſtoit
Et quant il ot .xvi. ans Sa mere qui l'amoit
Diſt au duc mon ſeigneur Je croi que bon ſeroit
Que vous adoubiſſiez Vostre filz qui eſt foꝛs
Je croi ſ'eſt chevaliers Qu'il ſ'aviſera loꝛs
Et le duc reſpondi Dame je m'i acoꝛs.
Ne ſai que ce ſera J'ai grant duel de ſon coꝛs
Il n'entent qu'a mal faire J'en ſui touz eſbahiz
A une Penthecouſte; Qui ſont gent eſjoiz
Manda le duc ſes hommes Et ſes meilleurs amis
Il a mandé Robert Et li dit ſon avis
Biaux filz ce dit le duc Chevalier vous vueil faire
Mais muer vous faudꝛa Et changier vostre afaire
Tout chevalier doit eſtre Courtoiz et debonnaire
Aus bons; mais grever doit Les felons de put aire
Bien l'acoꝛt diſt Robert Mais par foy ne me chaut
En quel eſtat je ſoie Chevalier ou ribaut
Pour tant que mes bons face Par Dieu qui ſus tous vaut
Je ne depoꝛterai Aus armes bas ne haut
La veille bien matin D'un jour de Penthecouſte
Fu Robert bien baigniez Mais la nuit trop li couſte
Quant veilla en l'egliſe L'un ſache l'autre boute
Il ne pot eſtre en pais Ne ne pꝛioit Dieu goute
Chevalier fu Robert. L'endemain par matin
Son pere li a dit filz ſoié A Dieu enclin.
Et ſouſtenez l'eglyſe. Si tenrez bonne fin.
Robert ot la colee Mais il diſt ſanz latin
Que ja jour de ſa vie eglyſe n'amera
Aincois a ſon pooir Touz jourz le grevera
Et qu'en clerc ne en preſtre Ja ne ſe fiera.
Il fiſt crier les jouſtes A .i. jour qu'il nomma
De toutes pars y vindꝛent Li noble chevalier
Robert ſe fiſt armer Puis monta el deſtrier
Il ne jouſtoit a homme Tant fuſt hardi ne fier
Que li et ſon cheval Ne feïſt trebuchier
A l'un rompoit les rains Et a l'autre le col
Au tiers bꝛiſoit la cuiſſe Et couroit de plain vol.
Vint deſtriers de rompi La journee com fol
On le vint dire au duc. Qui avoit le cuer mol
El champ vint tout courant Le jouſter fiſt deffendꝛe
Mais Robert poꝛ ſon pere Ne voult onques deſcendꝛe
S'ot fait .iii. chevaliers A terre moꝛt eſtendꝛe
Chaſcun le maudiſſoit De trainer ou pendꝛe
Le duc li diſt biax filz Plain es de mal erreur.
Les ſeigneurs vindꝛent ci Pour toi poꝛter hounour
Oꝛ les as mehaigniz et occis a dolour
Loꝛs Robert le dëable; Reſpondi par folour
Pere de moi blamer Vous povez trop bien taire
Vouz perdez vostre paine N'ai talent de bien faire
Puis que ſui chevalier; Aus moinnes ferai haire
Ne leur lairai joiaus Ne riche ſaintuaire
Des mos que Robert dit Fu dolans li pꝛeudons
Moult marris ſe partirent De /Rouen les barons
Mais Robert demoura Ne retint que gloutons
Il amoit les mauvais Et ſi haoit les bons
Des ce c'on vouloit faire Turp[in]eis ne tournoi
Et Robert y venoit. Chaſcun ſe tenoit quoi
Nul n'oſoit en fait d'armes Apꝛochier pꝛés de ſoi
Car il ne depoꝛtoit Duc conte ne roy
Les chevaliers diſoient Touz bas a leur meſnie
Quant ce dyable vient Nous n'aſſamblerons mie
Prier [estuet ]que Diex li envoit Courte vie.
Car ſ'il vit longuement /Noꝛmendie eſt honnie.
Avec lui ne mena Que murdꝛiers et banis
Robert vit qu'il eſtoit Des plus nobles hays
Loꝛs a diſt a ſa gent Loiaument vous plevis
S'aſez avons fait mal Encoꝛ ferons nous pis
Loꝛs parmi /Noꝛmendie Priſt foꝛt a chevauchier
N'i laiſſoit abaie. Qu'il ne feïſt cerchier
Ne povoit en treſoꝛ Trouver joiau ſi chier
Qu'il n'en feïſt poꝛter Et qui vouloit grouchier
Il eſtoit ens en l'eur Deſtruis et mis a moꝛt
Maint pꝛeudomme tua Pour le ſien a grant toꝛt
Au duc de /Noꝛmendie Qui hantoit a bon poꝛt
En venoient les plaintes Chaſcun jour et refoꝛt
L'un li diſoit ſire chier; Par foy c'eſt .i. lait Dieu
Robert a violees. Les nonnains de tel lieu
Je croi c'eſt .i. dëable Il ne croit pas en Dieu
Ne pꝛiſe homme ne femme Une goute de ſieu.
Un autre diſt au duc Sire c'eſt grant folie
Que ſouſfrez que vos filz Soit de tele eſtoutie
Ne puet trouver pꝛeudomme En toute /Noꝛmendie.
Qui ne ſoit desrobez Ne mouſtier n'abaie
Mais puis ne demoura; Pas moult longue ſaiſon
Que de toute la terre S'eſmurent li baron
Et vindꝛent vers le duc Conter la meſpꝛiſon
Que Robert leur faiſoit L'un d'eulz diſt a cler ſon.
Franc duc Robert vo filz Prent a foꝛce nos femmes
Nos filles et nos nieces Trop eſt grant li difames
N'en poons plus ſouffrir Se Diex nous ſaut les ames
Le duc pꝛiſt a plourer. Et diſt /ſire .ſaint James
Riens tant ne deſirroie; Comme d'avoir .i. filz
Oꝛ en ai .i. eü. Mais vrai Diex il eſt tiex
Qui de cuer le verroie Moꝛir devant mes yex
Trop m'a fait de courous Loꝛs parla .i. hons viex
Et diſt ſire je lo; Que Robert ſoit mandez.
Par devant touz vos hommes Le mal li deffendez
Et ſ'il vous contralie Em pꝛiſon le metez
Le duc diſt je m'acoꝛt A ce que me loez
Loꝛs fiſt on Robert querré Par treſtout le pays
Mais ceulz qui le trouverent Si en oꝛent du piz
Car tantost ens en l'eure Qu'il ot les mos oys
Que de li ſe plaignoient Les barons du pays
A chaſcun des meſſages Que le duc y tramiſt
Fiſt traire les .ii. yex Et puis [si ]leur a diſt
Vous endoꝛmirez miex Demain en vostre lit
Mais dites a mon pere Que c'eſt en ſon deſpit
Vers le duc retournerent Les meſſages bꝛiement
Qui avoient ſouffert Par ſon filz griés tourment
Le duc qui fu pꝛeudomme Si en fu moult dolent
Loꝛs li diſtrent ſes hommes Sire c'eſt pour nient
Puis qu'il a fait ainſſi Vos meſſages honnir
Eſtre poez certains N'a talent de venir.
Droit ſi veult et requiert C'on le face banir
Adont fu fait le cri tantoſt Sanz alentir.
Des /le mont /saint Michiel Jusqu'a /Vernon ſus /Saine
Que chaſcun fuſt ſerjant Et ſe meiſt en paine
D'empꝛiſonner Robert Et touz ceulz que il maine
Quant le ſot n'ot meſtier C'on le ſaingnaſt de vaine
Car tant ot de deſpit Qu'a pou n'iſſi du ſens.
Les murdꝛie[r]s de ſa route Furent foꝛment dolens
.Robert les confoꝛta Et jura /.ſaint Loꝛens
Que il tourmentera Son pere et ſes parens
Par l'art de l'anemi Fiſt une maiſon faire
En une grant foꝛeſt Moult fu de foꝛt afaire
Murdꝛiers larrons banis Quanqu'il en pot atraire
Manda de ſa partie Et miſt en ſon repaire
Trente furent enſamble Des plus crueus larrons
Que l'en peüſt trouver En nules naſcions
La firent moult de maus Robert fu moult maus hons
Que char vouloit mengier En treſtoutes ſaiſons
Il n'i eſpargnoit riens. Veille ne quarantaine
Vendꝛedi n'autre jour Qui fuſt en ſa ſemainne
Mais puis pour ſes meffais Endura mainte paine
Ainſſi com vous oꝛré Se ne me faut l'alaine
Bonne gent a cel temps Que Robert fu el bois
Avecques les murdꝛie[r]s Ne pꝛiſoit pas .ii. nois
Dieu ne /ſainte Marie Ne ſaint tant ſoit courtois
Mais oꝛ veilliez entendꝛe Qu'il avint une fois.
Robert iſſi tout ſeul Hoꝛs de ſon herbergage
Que il ne doutoit homme Ne pꝛivé ne ſauvage
Si comme il plut a Dieu Trouva .i. hermitage
Ou avoit .vii. hermites Treſtouz de bel aage
Des qu'il vit les hermites En l'eure trait ſ'eſpee
Aus pꝛeudommes cria. Voſtre vie eſt alee
Treſtouz .vii. les tua Sanz nule demouree
Puis a dit par mon chief J'ai trouvé grant niee
Ne voudꝛoie plus vivre Mais que tous hauz tondus
Qui ſont parmi le monde Fuſſent ainſſi tenus
Adonques eſt Robers De l'ermitage iſſus
Mais tous les garnemens Qu'il avoient veſtus
Furent honnis du ſanc De ceuz qu'avoit tuez
Auſſi furent ſes mains Et son nez et ſes piez
Tant chevaucha Robert Que mal ſ'eſtoit pꝛouvez
Qu'il vit le chaſtiau d'/Arques Celle part eſt alez
Car il avoit oÿ conter A un paſtour
Que ſa mere devoit digner A celui jour
Son pere n'i fu pas S'en ot mains de paour.
Loꝛs a dit qu'a ſa mere Parlera ſanz demour
En la court ſ'en entra. Mes quant la gent le virent
De la paour qu'il oꝛent De toutes pars fuirent
Bien poꝛ jouer aus barres Pas pꝛeſſe ne li firent
Loꝛs les larmes des yex. Moult groſſes li chairent
Robert diſt en ſon cuer Voir je puis bien veir
Que le pueple me het. Si fait Dieu ſanz mentir
A terre deſcendi. Mais nus n'oſa venir
Pour lui araiſonner Ne ſon cheval tenir
Si grant duel ot au cuer Qu'il traiſt nue ſ'eſpee
Puis monta en la ſale Qui eſtoit longue et lee
En la chambꝛe ſa mere Vint [droit ]ſanz demouree
Quant ſa mere le vit Si fu eſpoventee
Ne fu pas de merveille Bien fuir ſ'en cuida
Mais Robert le dëable Au devant li ala.
Haut li a dit ducheſſe Ne vous enfuiez ja
Mais dites ſe ſavez Dame comment ce va
Que je ſui ſi tres plains De toutes mauvaiſtiez
De vous ou de mon pere Vient je croi li pechiez
Quant la dame l'oÿ. Cheoir li vout aus piez
Em plourant li dist filz La teſte me trenchiez
Robert reſpondi dame Pourquoi vous tueroie
J'ai aſſez fait de mal Encoꝛe pis feroie
La ducheſſe diſt filz Certes la coupe eſt moie
De vostre mauvaiſtie. Loꝛs li conta la voie
Comment elle l'avoit Au dëable donné
Com fole meſcheande De cuer deseſperé
Quant Robert l'entendi De duel chay paſmé.
Moult grant duel demena Quant il fu relevé
Puis diſt en ſouſpirant Dyables ont envie
D'avoir l'ame de moi Mais il ne l'avront mie
Prendꝛe me faut conſeil Comment el ſoit garie
Loꝛs a dit a ſa mere Madame je vous pꝛie
Que vous me ſaluez Mon pere le pꝛeudomme
Paſſer outre les mons Me faut a /la grant Romme
Confeſſer mes pechiez Dont j'ai fait trop grant ſomme
Devant que g'i ſerai Ne doꝛmirai bon ſomme
On m'avoit foꝛbani De toute ceſte terre
Mais de ce ne me chaut Ne penſe que aquerre
Le ſauvement de m'ame Laz tout le cuer me ſerre
De ce qu'aus sains pꝛeudommes Ai touz jourz eü guerre
Robert tout em plourant Sus ſon cheval monta
Vers la foꝛeſt retourne Ou les larrons laiſſa
La ducheſſe ſa mere Moult grant duel demena
Pour l'amour de Robert Qui ainſſi ſ'en ala
A haute voiz crioit; Laſſe quelle aventure
J'ai mon enfant perdu Diex ſi n'a de moi cure
Au mauvais le donnai Ce fu grant deſmeſure
Jamais de m'amera Car bien y a dꝛoiture
En tant que la duchoiſe Faiſoit dolour pleniere
Entra le duc laiens Qui venoit de riviere
La ducheſſe em plourant Li conta la maniere.
De Robert leur enfait Le duc fiſt mate chiere
Puis diſt a la duceſſe Dame ſe repent il
Et elle reſpondi; Se Dieu me gart ouil.
Le duc diſt em plourant Ce[la] ne vaut .i. fil
Pas ne reſtabliroient S'il eſtoient tel mil.
Les dolours qu'il a faites En ceſte moꝛtel vie
Non pas pour tant je pꝛi A /la vierge Marie
Que bonne fin li doint; Car voir je ne croi mie
S'il ſ'en va qu'il retoꝛne Jamais en /Noꝛmendie
Car tuer ſe fera Se Dieu n'en a merci
Le duc diſt ſon voloir Mais n'ala mie ainſſi
Que puis vint a /Rouen Ce ſachiez bien garni
La fille l'emperere; Amena avec lui
A /Romme l'eſpouſa. Par le gré de ſon pere
Mais aincois li convint Endurer moult de here
Ainſſi com vous oꝛrez Avant en la matiere
Bonne gent qui fait mal Droiz eſt qu'il le compere
En ceſt ſiecle ou en l'autre De Robert parleron.
Tant chevaucha qu'il vint Dedenz la foꝛt maiſon
Que il avoit fait faire La furent li larron
Touz desarmez eſtoient Pour digner li glouton.
Touz les murdꝛiers en l'eure Que Robert ont choiſi
Se dꝛecierent des tables Sus leur piez contre lui
Mais il leur diſt ſeignours Par amours je vous pꝛi;
Ne ſoiez plus larron Criez a Dieu merci
Car on ne puet dembler A bonne fin venir
Aler m'en veul a /Romme Mes pechiez regehir
L'un des larrons parla; Et diſt ſanz alentir
Je croi que /Renart veut Hermite devenir
Robert qui eſtoit yer. Le pire de nous touz
Eſt devenu pereſchierres Il ſe moque de nous
Non fais ce diſt Robert Par la foy que doi vous
Criez a Dieu merci Et il vous ſera dous
Ce n'es mie maiſtriſe D'eſtre touz jourz mauvais
L'un des larrons diſt ſire Ne m'en parlez jamais
Poꝛ .c. mil mars d'oꝛ Ne ſeroit marchiez fais
Que laiſſaiſſe l'embler Ne poꝛroie eſtre en pais
Ne moi. Ce diſt li autres Touz furent d'un acoꝛt
Que ne lairont l'embler Deſſiques a la moꝛt
Et ſ'il ont bien emblé Qu'il embleront plus foꝛt.
Robert leur reſpondi Seignour vous avez toꝛt
Oꝛ entendez pour Dieu De quoi il ſ'apenſa
Il ſ'en vint a la poꝛte Erranment la ferma
Puis pꝛiſt une grant barre Aus larrons retourna
Le pꝛemier qu'il ataint Treſtout eſcervella
Puis courut ſus aus autres Si foꝛt fu eſchaufez
Que treſtous les tua Point n'eſtoient armez
Puis leur diſt en moquant Endoꝛmant vous tenez
Je croi des oꝛe mais Preudes hommez ſerez
Robert vouloit bouter Le feu en ſa maiſon
Quant vit le grant treſoꝛ Dont il y ot foiſon
Bien penſa ſ'il [l']ardoit Qu'il feroit meſpꝛiſon
Adont ſ'en iſſy hoꝛs Sanz point d'areſtoiſon
Puis ferma moult bien l'uis Miſt les cles en ſon ſain
Par devant ſon viſage Fiſt la croiz de ſa main
Foꝛt pꝛiſt a chevauchier Car il avoit grant fain
Qu'entrez fuſt dedenz /Romme Ou demeurent Rommain
Mais quant vint vers le veſpꝛe Il vit en ſon chemin
Une bonne abaie Ou ot fait maint huſtin
Touz les moinnes l'amoient Con tri[a]cle venin
Nonpoꝛquant ſ'eſtoit l'abbé De laienz ſon couſin.
Robert ſ'eſt a la poꝛte De l'abaye mis
Quant les moinnes le voient Touz en ſont esbahis
De la paour qu'il ont En doꝛtoir ſont fuis
Adont ploura Robert Des biax yex de ſon vis.
Devant l'uis du mouſtier Ala Robert deſcendꝛe
Tantoſt encontre terre S'ala en crois eſtendꝛe
De bon cuer requiſt Dieu Qu'il le vouſiſt deffendꝛe
Des laz a l'anemi Qui le cuide ſoupꝛendꝛe
Quant il fu redꝛeciez Tant parla doucement
Que l'abé vint a lui Et tretout le couvent
Robert ſ'agenoulla Et leur diſt doucement
Je vous requier merci Pour Dieu omnipotent
Car je vous ai a toꝛt Par pluſieurs foiz grevez
Puis a dit a l'abé Biau ſire car alez
S'il vous plaiſt a mon pere Ceſte cles li poꝛtez
El lieu ou demouroie Entre vous .ii. yrez
J'ai tué les larrons Qui lonc tans m'ont ſervi
Je les ai mis a moꝛt N'en ſoiez en ſouſſi
Moult grant treſoꝛ y a Qu'ai tolu et ravi
Qu'a ceuz a qui eſtoit Soit adꝛoit departi.
Robert fu herbergiez Laiens celle nuitie
L'en demain au matin Laiſſa en l'abaie
S'eſpee et ſon cheval S'a ſa voie acueillie
Et l'abbé ſ'en ala au duc De /Noꝛmendie.
La clef li a mouſtree Que Robert li bailla
Et tout la maniere Du fait li raconta
Le duc en la foꝛeſt Avec l'abbé ala
Moult furent eſbahiz Du treſoꝛ qui fu la
Le duc aus bonnes gens Treſtout rendꝛe leur fiſt
Tel pꝛia pour ſon filz Qui devant l'ot maudit
Tant chevaucha Robert Pour abꝛegier mon dit
C'un jeudi abſolu Dedens /Romme ſe miſt
Pour Dieu oꝛ entendez Douce gent debonnaire
S'oꝛrez la penitance Qu'a Robert convint faire
Pour les maus qu'avoit fait A aſſez de gent traire
Iluec trouva le pappe Qui ert de Dieu vicaire
Ou /grant mouſtiers /saint Pere Devant meſſe chanter
Robert devant ſes piez S'ala errant geter.
Les gens a l'apoſtole Priſtrent foꝛt a fraper
Sus li mais ainz Pour ce ne ſe vout remuer
Si feroient il foꝛment De baſtons deſſus ſoi
Le pappe en ot pitié Si diſt laiſſez le quoi
Loꝛs le pꝛiſt par la main Et li diſt lieve toi
Robert li diſt /saint pere Pour Dieu confeſſez moi
Se de vous n'ai conſeil Je [vaul ]pis c'un chien moꝛt
Car je ne garde l'eure Que dëable m'enpoꝛt
On dit que vous donnez De touz pechiez confoꝛt
A Dieu ai fait deſpit Et aus ſiens a grant toꝛt
Onques /Caym ne fiſt /Herodes ne /Judas
Tant de mauz comme a fait Ceſt dolereus coꝛs laz
Quant le pappe l'oÿ. Si li a dit em bas
Biaus amis dont es tu. Robert diſt [ſ]ens eſpas.
A /Roen la cité fu né Ce n'eſt pas fable
On m'apele Robert; Sire non ai de dëable
Filz au duc des Noꝛmans Qui eſt moult honoꝛable
Loꝛs ſe ſeigna le pappe. Du pere eſperitable
Et li diſt es tu ce De quoi on parle tant
Il n'a en tout le monde De toi plus mal tyrant
Je te conjur de Dieu Le pere tout puiſſant
Que ne me faces mal N'a nule riens vivant
Adont ſ'agenoulla. Robert et joint les mains
Et li a dit /saint pere Pour Diex ſoiez certains
Que de contricion Eſt mon cuer ſi atains
Que ne feroie mal Ne pour plus ne poꝛ mains.
Adont ſ'aſiſt le pappe Qui fu ſages et dous
Et Robert devant li Se miſt a nus genous
En vraie repentance Li diſt ſes pechiez tous
Puis li conta comment Fu donné par courous
Au dëable d'enfer De par la part ſa mere
Dont il avoit au cuer Peſme dolour amere
Le pappe le ſeigna Puis li a dit biau frere
Demain au point du jour Que l'aube ſera clere
A .iii. lieues de ci Devotement iras
Chiés .i. mien confeſſeur De par moi li diras
Qu'il te doinſt penitance Des pechiez que fais as.
Et je ſui tout certain Bien conſeilliez ſeras
On ne ſcet plus preudomme Deſſouz le firmament.
Robert li diſt /saint pere G'irai moult doucement
Diex veille que par lui Truiſſe mon ſauvement
A /Romme jut la nuit Jusqu'a l'ajournement
Que il ſe miſt a voie Puis ſi vint chiez l'ermite
La raiſon que le pappe Li mandoit li a dite
Le pꝛeudons qui vivoit De vie moult petite.
En oir le pechié De Robert ſe delite
Comment qu'il fuſſent lais Mais il avoit plaiſance
De ce que il diſoit En bonne repentance
Au derrenier li diſt Amis n'aie doutance
Jusqu'a demain ferez Avec moi demourance
Et puis ſ'il plaiſt a Dieu Qui de l'yaue fiſt vin
Bien vous conſeillerai Demain aſſez matin
Robert qui ſoloit eſtre Plus fel que .i. maſtin
Eſtoit plus debonnaire C'un aignel en chemin
Onques ne voult Robert. Cel jour mengier ne boire
Ainz pꝛioit de bon cuer Le digne roy de gloire
Qu'encontre l'anemi Li envoiaſt victoire
L'ermite qui eſtoit Plain de devot memoire
Quant il vit qu'il fu nuit Il fiſt Robert couchier
Loꝛs dedens ſa chapele S'en entre pour veillier
De bon cuer depꝛia. Le pere dꝛoiturier
Qu'il li donnaſt avis Du pecheur conſeillier
Li pꝛeudons ſ'endoꝛmi En tant com Dieu pꝛioit
Adont li fu avis; C'uns anges li diſoit
Qu'il couvient que Robert Qui en ſon lit giſoit
Contreface le fol S'il veult que ſauvé ſoit
Et que il ne menguce. Ne pain ne autre biens
S'il ne le puet tolir Ou eſrachier aus chiens.
Et face le muet Ne parole poꝛ riens
Jusqu'a tant que Diex Qui envoie touz biens
Par toi li face dire Que ſa penance eſt faite
L'ermite ſe leva Qui foꝛment ſe rehete
Quant le jour eſclaira .I. poi apꝛés la guete
Se deſcoucha Robert Qu'ot conſcience nete
L'ermite l'apela Et li diſt ca venez
Se voulez eſtre quite Des mauz que fait avez
Des oꝛ mais en avant Le fol contreferez
Ne ne mengerez riens S'aus chiens ne le tolez
Voir vostre penitance Eſt ainſſi oꝛdenee
Que vous ne ferez mal A gent creſtiennee
Ne que ne parlerez A creature nee.
Se je nel vous commande Qu'a Dieu plaiſt et agree
Quant Robert l'entendi Pas ne fu mal ſoigneux
En regraciant Dieu Tendi ſes mains as ciex
Et diſt je vous mercie Dous peres gloꝛieux.
Quant pour tant ſera[i] quite De mes pechiez moꝛtieux
Tres douce gent Robert Se parti de l'ermite
A tout grief penitance Et la tint a petite
Robert qui ot menee Touz jour vie maudite
Ne pꝛiſoit pas l'oꝛguel De ceſt monde une mite
Robert revint a /Romme Son baſton a ſon col
Sa robe deſcira Poꝛ miex reſambler fol
En /Romme ſ'en entra par /la poꝛte /ſaint Pol
Deſſus une feneſtre Vit maint foꝛmage mol
Foꝛt commenca a rire Robert quant il les vit
Celle qui les vendoit En ſa maiſon les miſt
De Robert ſe doutoit Mais en vis les pꝛeiſt
Pluſeurs gens l'areſnierent Mais onques mot ne diſt
Robert aloit par /Romme Son baſton paumoiant
Samblant fait de plourer Et puis aloit riant
Adonques ſ'aſamblerent Entour lui li enfant
Savates et oꝛdures Li aloient getant
Apꝛés Robert avoit Par /Romme grant huee
Les enfanz le ſuivoit Toute jour a journee
La court a l'emperere; D'aventure a trouvee
Il entra en la ſale Qui n'eſtoit pas fermee.
Robert parmi la ſale Commenca a aler
Une foiz pas pour pas Puis pꝛenoit a troter
L'emperere le vit Qui ſeoit au ſouper
A ſes chevaliers diſt Vez [la ]biau bacheler
Onques mais miex taillie A mon talent ne vi.
Mais il me ſamble fol C'eſt domage de li
Donnez li a mengier Je veul qu'il ſoit ſervi
On l'apella aſſez Mais riens ne reſpondi
Puis fu aſſis a table Mais ne mengaſt poꝛ rien.
Savoit il devant lui Moult grant plenté de bien
L'emperere percut Deſſous la table .i. chien
Qui ot eſté blecié El bois puis diſt ca vien
Et li donna .i. os. Ou de char ot aſſez
Des que Robert le vit Cele part eſt alez
D'une part a pꝛis l'os Qui du chien fu hapez
Le chien tira d'un ſens Et Robert d'autre lez
De Robert et du chien Fu moult grant laatie
L'emperere rioit Et toute ſa maiſnie
Robert qui avoit fain Tyra foꝛment a hie
Au chien eſracha l'os S'en ala char mengie
Quant l'emperere vit Que Robert l'oz runga
Bien penſa qu'il fu fol .I. pain au chien geta
Mais quant Robert le vit A foꝛce li oſta
Quant le tint en ſa main En .ii. pars le bꝛiſa
Au chien en a donné La plus grande partie
Puis menga l'autre Piece poꝛ le fain qui legrie
Car plus avoit jeuné De journee et demie
L'emperere rioit trop foꝛt Pour la folie
A ſes chevaliers diſt Seignours ſoiez certain
Onques plus courtois fol Ne vit franc ne vilain
Maintenant a tolu A cel chien le ſien pain.
Puis ſi l'en a rendu La moitié tout [a ]plain
Loꝛs donna l'en au chien Pain et char et poiſſon
Afin que le fol ait Plus large gariſon
Robert li en toli tant Qu'il en ot ſon bon
Tant couru par laiens En ſa main .i. baſton
C'un guichet vit ouvert S'entra en .i. vergier
La ot une fontaine Qui ſourt ſus le gravier
Robert y ala boire Pour ſon ſoif eſtanchier
Et quant vint vers le veſpꝛe Qu'il dut aler couchier
Robert regarda bien Quel part le chien tourna
Tout adez le ſui Point ne li eſchapa
Tant que poꝛ ſoi doꝛmir Sous .i. degré ala
Li ſainz homs l'apercut Delez li ſe coucha
Par de coſté le chien S'ala couchier Robert
L'emp[er]ere le vit Si diſt de cuer ouvert
C'on face qu'ait bon lit Et ſoit moult bien couvert.
Loꝛs l'en apoꝛta .i. Un varlet plus apert
Et .ii. blans dꝛas de lin Qui furent grant et lé.
Mais Robert n'en ot cure Tout a dehoꝛs geté
L'emperere le ſot Errant a commandé
C'on pꝛeiſt en la voute Du blanc fuerre plenté
Loꝛs poꝛta l'en du fuerre Deſſous Robert grant tas
Il ſe coucha deſſus Car il eſtoit moult laz
De li firent par /Romme Petit et grant leur gas
Et le tindꝛent pour fol Mais il ne l'eſtoit pas
Combien qu'il ne mengaſt Foꝛs ce qu'au chien toloit
Le chien apercut bien Que chaſcun li donnoit
Pour l'amour de Robert Si que foꝛment l'amoit
Tant qu'avint a .i. jour Que li roys court tenoit
Il y vint pour digner .I. moult riche Juys
Qui eſtoit receveur Des rentes du pays
Par ſoi a une table fu Moult noblement aſſis
Loꝛs pꝛiſt Robert ſon chien Entre ſes bꝛas l'a mis
Puis ſacha le Juif .i. poi Par de derrier
Et il ſe retourna ſi dꝛoit Qu'a ſouhaitier.
Li fiſt Robert du chien Le trou du cul baiſier
Loꝛs pꝛiſtrent foꝛt a rire Li duc et li pꝛincier
Mais le Juys en ot. En ſon cuer grant deſpit.
Loꝛs lait ſon chien aler Maintenant ſanz reſpit
Quanqu'avoit ſus la table Tantoſt par terre miſt
Par amours bonne gent Oez que Robert fiſt
Il vit a .i. matin C'on menoit eſpouſer
Une jone Juyve; C'on ot bien fait parer
Robert la courut pꝛendꝛe Et puis l'ala flater
En la plus laide[ boue] Qu'il pot onques trouver
Puis ſ'en couru Robert Sa macue levee
Ou il ſot c'on avoit Leur cuiſine atournee
.I. chat bouta tout vif Boullir en leur poꝛee
L'emperere le ſot Si en fiſt grant riſee.
Lonc temps hanta a /Romme Robert c'on tint pour sot
Onques ne but de vin Ne n'oſa parler mot
Ne ne menga riens nee S'au[s] chienz tolier nel pot
Ne ne giſoit qu'au fuerre Mais puis quant a Diex plot
Remonta en hauteſce Et fu moult chier tenus.
Douce gent entendez Pour Diex qui eſt laſſus
S'oꝛrez par quel maniere Robert fu abſolus
Huimais poꝛrez oir Gracieuſes vertus
L'emperere de /Romme Qui a ce temps regnoit
Ot une jone fille Qui parler ne pooit
Le ſeneſchal de /Romme De tout ſon cuer l'amoit
Par li et par les ſiens Moult requiſe l'avoit
Mais onques l'emperere Ne li vout otroier
Loꝛs fiſt le ſeneſchal Ses chaſtiaus enfoꝛcier
Bien cuida l'emperere grever et eſſillier
Mais ne demoura pas Je cuit .i. an entier
Que .vi. roys ſarrazins Et toute leur maiſnie
Vindꝛent aſſaillir /Romme Et l'ont toute eſſillie
L'emperere le ſot S'en fiſt chiere marie
Mais non pour tant il diſt A ſa chevalerie
Je vous pꝛi biax ſeignoꝛs Que nous nous enſaions
Contre ces Sarrazins nostre dꝛoit deffendons
Et il li reſpondirent. Sire bien le voulons
Loꝛs ſ'alerent armer Sanz point d'arreſtoiſon
De /Romme ſ'en iſſirent Pour commencier mellee
Mais meſche[u] leur fuſt Briement celle journee
Se ne fuſt /Jhesucriſt Et /la Vierge honnouree
Et Robert c'on tenoit Pour fol en la contree
Cel jour eſtoit alé Pour boire a la fontaine
Mais une vois oÿ Plus douce que ſeraine
Qui diſt pꝛen ceſt deſtrier Que je yci t'amainne
Et ſi t'arme des armes Qui ſont blanches com laine
Robert n'oſa parler Mais ſus li la croiz fiſt
Loꝛs vint aus blanches armes Et ſ'arma ſanz reſpit
Puis monta el deſtrier Eſcu et lance pꝛiſt
La fille l'emperere. Toute la choſe vit
Mais Robert ne ceſſa Tant qu'il vint en l'eſtour
Ou Sarrazins avoient De touz poins le meillour
Il ſ'embati ſus eulz Et feri tant cel jour
Qu'il les en fiſt fuir Et moꝛir a dolour
Et loꝛs vers la fontaine Robert ſ'en retourna
Deſſus le cheval blanc Les armes retrouſſa
Errant ſ'eſvanoy Et Robert demoura.
La fille l'emperere; Tout le fait regarda.
Celui qui ot le jour Maint Sarrazin tué
Eſtoit par le viſage Foꝛment eſgratiné
L'emperere de /Romme A Jhesucriſt loé
Pour ce que li paien Furent desbareté
S'ot grant avoir conquis Le ſoir quant on ſoupa
Vint Robert en la ſale Le roy le regarda
Eſgratiné le vit Foꝛment li em peſa
Puis diſt foi qu'a Dieu doi Ceens fauſſe gent a
En tant qu'avons eſté En ceſt jour la dehoꝛs
Ont ainſſi atourné Ce laz chetif de coꝛs
A ame ne fait mal Nient plus que ſ'il fuſt moꝛs
Il eſt fol debonnaire Et ſi croi qu'il ſoit foꝛs
Un autre chevalier. Diſt ſire ne vous chaille
Hui fait avons la hoꝛs Sus Paiens la bataille
Et il a fait la ſoue Caiens o la merdaille
Le roy li reſpondi Par foy vaille que vaille
Se je le voi mal faire Bien l'en ferai vengier
Mais me ſaroit on dire Qui fu le chevalier
Qui nous a au jour d'ui; Si bien venu aidier
Et loꝛs ſ'en vint la fille De ſon pere apꝛochier
Si li mouſtroit le fol Que ne povoit parler
Mais ne ſot l'emperere Ses ſignes aviſer
Loꝛs fiſt a ſa maiſtreſſe En haſte demander
Que c'eſtoit que ſa fille Li vouloit demouſtrer
Sa maiſtreſſe diſt ſire Faire veult demouſtrance
Que le fol vous a fait La bele ſecourance
Et qu'il ſ'eſt combatu A eſcu et a lance
Pour tant vous envoit Diex Diſt le roy grant meſchance
Enſeignier la devez Et vous l'afolez toute.
Comment tendꝛoit ce fol De chevaliers la route
Ne il n'avroit cheval Ne armes c'eſt ſanz doute
La pucelle ſe tut Car ſon pere redoute
La choſe demoura Ainſſi juſques a tant
Que Sarrazin revindꝛent O empire moult grant
Li Rommain ſ'en iſſirent Mais moꝛs fuſſent errant
Quant le blanc chevalier Y vint comme devant
Mais onques ne pot eſtre Parceu n'aviſé.
Quelle part il tourna Quant le champ fu finé
Foꝛs ſanz plus la pucelle Qui ot bien regardé
Comment ſe desarma Et comment fu armé
Jusqu'a la tierce anee La choſe demoura
Que l'oſt des Sarrazins Arriere retourna
L'emperere de /Romme Ses chevaliers manda
Puis leur a dit ſeigneur Pour Dieu entendez ca
Il nous faudꝛa combatre Vers la gent l'averſier
Je vous pꝛi ſ'au ſecours Vient le blanc chevalier
Qu'en agait vous metez Et penſez deſploitier
Que ſanz parler a nous Il ne puiſt retourner
A ce mot ſanz plus dire De /Romme ſ'en iſſirent
.XV. des miex montez En .i. agait ſe mirent
Et les autres de front Es Paiens ſe ferirent
Puis ne demoura gaires Que le chevalier vi[re]nt
Qui fu touz blans armez Et s'avoit deſtrier blanc
Es Paiens ſe feri et tint Tout nu le bꝛanc
A l'un coupe la teſte Et a l'autre le flanc
De quelle part qu'il tourne Fait tout couvrir de ſanc
Tantoſt fu deſconfite La fauſſe gent vilainne
Le blanc chevalier voient Raler vers la fontaine
Quant les .xv. Rommains Qui furent en la plaine
Li eſcrierent maiſtre Tyrez a vous vo rene
Et dites qui vous eſtes Ne de con fait pais
Quant Robert les oÿ Il fu touz eſbahis
Il bꝛocha au travers Contremont .i. larris
A touz leur eſchapa Qu'a .i. qui fu haſtis
Si foꝛt et de bon cuer Le ſui et haſta.
Que le fer de la lance En ſa cuiſſe laiſſa
Non pourquant au derrier Robert leur eſchapa
A la fontaine vint Errant ſe desarma
Les armeures blanches Miſt ſus le blanc cheval
Loꝛs ne ſot ſ'il tourna Ou amont ou aval
Robert qui ot vers Dieu Le cuer bon et loial
Trait le fer de ſa cuiſſe Qui moult li faiſoit mal.
Entre .ii. pierres miſt Le fer ſanz demouree
Herbe cueilli et mouſſe S'a ſa plaie temptee
La fille l'emperere A moult bien regardee
Toute ſa contenance Plus l'amoit que riens nee
Robert eſt a la cour Tout clochant retourné
Loꝛs vint le chevalier Qui li avoit bouté
Le fer dedens ſa cuiſſe Le fuſt a rapoꝛté
En quoi le fer eſtoit Puis a au roy conté
Qu'au blanc chevalier pꝛendꝛe Miſt toute ſa puiſſance
Et comment en ſa cuiſſe Miſt le fer de ſa lance
Je me repent foꝛment Que je l'ai fait grevance
/La mere Dieu la veille Deffendꝛe de meſchance
Ne ſai ſe pooit eſtre Choſe eſperituel.
Mais ſachiez vraiement Que c'eſt .i. homs moꝛtel
Je vous dirai conſeil Qui ert et bon et bel
Gardez n'ait ci entour Ne cité ne chaſtel
Ou ne faciez crier Que qui a vous vendꝛa
Armé de blanches armes Et blanc cheval avra
Pour tant qu'apoꝛt le fer De celle lance la.
Que l'une de parties De l'empire tendꝛa
Et ſ'avra vostre fille Qui eſt belle et parfaite
Mais qu'il mouſtre la plaie Qui du fer li fu faite
L'emperere li diſt Ceſt conſeil bien me hete.
Car il me ſamble bon Et gentil et honneſte.
Loꝛs fu le cri criez Tout par tout le pays
Le ſenechal le ſot; Moult en fu reſjois
Que il n'avoit la fille A pou n'eſragoit vis
Bien la cuida avoir Il fiſt que folz nais.
Que Diex l'ot a Robert De moult lonc tans lotie
Qu'en fait d'armes l'avoit Loiaument deſervie
Avec le chien giſoit Qui ſa plaie ot lechie.
A avoir la pucelle. Certes ne penſoit mie
Ains plouroit tendꝛe[me]nt La nuit pour ſes pechiez
Le ſeneſchal de /Romme S'eſt moult toſt pourchaciez
De blanc cheval et d'armes Bien fu appareilliez
L'emperere ſ'il puet Sera bien engingniez
Qu'il miſt .i. fer de glaive En ſa cuiſſe dedens
Tant endura d'angoiſſe Que il chay au[s] denz
Loꝛs fiſt le ſeneſchal Armer toutes ſes gens
Errant ſ'en vint a /Romme Moult eſtoit biaus et gens
Mais il avoit le cuer Tout plain de tricherie.
Avoir vouloit la choſe Qu'il n'ot pas deſervie
Non pour quant ſi dit on Souvent mainte foie
Que cil qui le bien gaaigne A la foiz ne l'a mie
Le ſeneſchal cuida Par ſon grant vantement
Enginier la pucelle Mais on dit bien ſouvent
Que de ce que fol penſe Demeure largement
Il vint a l'emperere Et li diſt hautement
Sire je ſui celui Qui ſ'en vint a l'aſaut
Par .iii. foiz ſus Paiens Moult y ſouffri de chaut.
Seneſchal diſt le roy Pour le coꝛs /saint Thibaut
Fuſtes vous la pour moi Ouil ſe Diex me ſaut
Seneſchal diſt le roy Preuz eſtes et gentis
Par m'ame je cuidoie Que fuſſiez anemis
Sire diſt le traitre N'en ſoiez eſbahis
Loial cuer ne faut point Au foꝛt a ſes amis
Le fer tendi au roy. Et puis ſe trait avant
La plaie li mouſtra Du fer bien aparant
Le chevalier connut ſon fer Que c'est son fer tranchant
Mais il doutoit Le glout; poꝛ ce ſ'ala taiſant
Robert qui fiſt le fol Touz ces parlers ooit
Encoꝛe pour la plaie De ſa cuiſſe clochoit
Mais ſachiez que l'ermite Qui confeſſé l'avoit
Dedenz ſon hermitage Une nuit ſe doꝛmoit
Loꝛs li diſt une voiz Qu'a /Romme ſ'en alaſt
Et qu'il cerchaſt la ville Tant que Robert trouvaſt
On l'apeloit dëable Ainz qu'a bien ſ'atournaſt
Et puis el non de Dieu Li deiſt qu'il parlaſt
L'ermite quant fu jour Bonnement ſe leva
Em pꝛiant Jhesucriſt Vers /Romme ſ'en tourna
Le ſeneſchal au roy Sa fille demanda
Et il li reſpondi Que volentiers l'ara
On fiſt mander le pape Et puis vint la pucelle
Qui detoꝛdoit ſes poins Et gratoit ſa maiſſelle
Que bien ſavoit du fait La certaine querelle
Son pere l'amena A l'uis de la chapele
Cel jour fiſt Diex a/ Romme Grant vertus en apert
A fin c'on conneüſt Le pꝛeudomme Robert.
Que treſtouz bas et haut L'apeloient Trubert.
Pour le ſervice faire Fu ja le livre ouvert
Quant la jone pucelle Qui point parler ne ſot
Parla a ſon chier pere Et diſt bien vous voi ſot
Qui creez ce traitre Il ment a chaſcun mot
Mais caiens a .i. homme Qui eſt dous et devot
Par ſa bonté m'a Diex La parole rendue
Par ſignes ne povoie De riens eſtre creue
Li roys ot moult grant joie Quant il l'a entendue
Sa fille qui parla Lonctemps ot eſté mue
Maugré ſien la laiſſa Yluec le ſeneſchal
Qui vit que ſa beſoingne Aloit du tout a mal.
Deſcendi de la ſale Si vint a ſon cheval
Sanz femme ſ'en fuy Tout le pendant du val
Li roys ot poꝛ ſa fille De la joie tretant
Qu'il ne ſe donna garde Du chetif meſcheant
Loꝛs li diſt l'apoſtoile Ma ſuer je vous demant
Qui eſt le saint pꝛeudomme Dont vous alez parlant
Sire diſt la pucelle Qui n'eſtoit pas vilainne
Je vous dira[i] du fait La verité certaine
L'emperere et le pappe Mena a la fontaine
Le fer d'entre .ii. pierres Sacha a moult grant paine
On manda le troncon Dont le fer fu partis
Puis furent mis enſamble Mais Diex de paradis
Les rejoint ſi tres bien Qu'a chaſcun fu avis
C'onques n'eüſt eſté; Ne rompu ne maumis
Pour les vertus eſtoient Ceulz de /Romme moult liez
La fille diſt au pappe Sire de voir ſachiez
Qu'en ceſte place ci S'est .iii. foiz haubergiez
Celui par qui nous ſommes Des Sarrazins vengiés
Je vi bien par .iii. fois Comment ſe desarmoit
Mais ſavoit ne pooie Ou le cheval aloit
Ne les armes auſſi. Mais le ſaint homs venoit
Geſir avec le chien Je croi bien qu'il y ſoit.
On ne m'en voloit croire Et ſi eſt choſe vraie
Pere bien vous a fait Droiz eſt qu'ait bonne paie
Alez parler a lui. Voir de riens ne m'eſmaie
Que du fer ne trouvez En ſa cuiſſe la plaie
Li roys et l'apoſtoile Et pluſeurs gens de bien
S'en vindꝛent vers Robert Qui giſoit lés le chien
Moult bel le ſaluerent Mais il ne leur diſt rien
L'emperere li diſt Biax douz amis cha vien
Et me mouſtre ta cuiſſe Par fine amour te pꝛi
Robert pꝛiſt .i. feſtu Et joua deſcremie
Au pape fiſt la moe A la fin que il rie
Mais n'en avoit talent Vers Robert ſ'umelie
Et li diſt tres douz filz Je ſui pappe clamez
De par Dieu vous commant Qui en croiz fu penez
Que vous parlez a moi Se pooir en avez
A ce mot ſ'eſt Robert A reculons levez
Au pappe fiſt la figue Puis le ſeigna d'un os
Aus ſignes qu'il faiſoit Sambloit bien eſtre fos
Hé vous venir l'ermite Qui avoit moult bon los
Tantoſt qu'il vit Robert Si li a dit ces mos.
Amis entendez moi Moult bien vous connoiſſons
Voir Robert le dëable Soloit eſtre vos nons
Mais Robert l'omme Dieu Bien nommer vous puet ons
Touz nous avez ſauvez En ceſte regions
Vous povez bien parler Sachiez en bonne foy
Que /le douz Jhesucriſt Le vous mande par moi
Robert ſ'agenoulla Et diſt gloꝛieus roy
Liez ſui quant ai tant fait Qu'acoꝛdé ſui a toi
Gloꝛieus ſire pere Je doi bien eſtre liez
Quant j'ai fait ma penance Des maus que j'ai bꝛaciez
Vrai Diex donnez moi grace Par vos ſaintes pitiez
Devons ſervir touz diz Sanz faire mauvaiſtiez
Le pueple ot moult joie Quant Robert dut parler
Li roys li voult ſa fille A eſpouſe donner
Mais onques li ſainz Hons ne ſ'i voult acoꝛder
Aincois avec l'ermite S'en ala demourer
Mais puis ne tarda mie La montance d'un mois
Que /le douz Jhesucriſt Li fiſt noncier .iii. fois
Qu'il retournaſt a /Romme Et que ſelonc les loys
Eſpouſaſt la pucelle Qui le cuer ot courtois
Et qu'il iſtroit d'euz .ii. Encoꝛe tel lignie
De quoi le foi de Dieu Seroit moult ſouhaucie
Loꝛs vint Robert a /Romme Si eſpouſa ſ'amie.
Puis ot il moult grant fain D'aler en /Noꝛmendie
Par le gré l'emperere S'eſmut o tout grant gent
Plenté mena ſommiers Chargiez d'oꝛ et d'argent
Tant fiſt qu'a /Rouen Vint mais en trop grief toꝛment
Trouva ceulz de /Rouen Je vous dirai comment.
Le duc ſi eſtoit moꝛt Qui moult ot bon renon
Prez de /Rouen manoit .I. traitre felon
Qui fiſt a la ducheſſe Grief perſecution
Faire la vout ardoir Par moꝛtel traiſon
Il n'avoit el pays Chevalier ſi puiſſant
Qui contre le traitre Oſaſt offrir ſon gant
Ne qui a la ducheſſe Poiſt eſtre garant
Quant Robert y ſourvint Qui eſtoit ſon enfant
Touz ceulz de la contree Cuidoient qu'il fuſt moꝛs
Moult bien le reconnurent Quant virent ſon grant coꝛs
Foꝛment le redoutoient Les fiebles et les foꝛs
Ne poꝛ quant il li diſtrent Les grietez et les toꝛs
Que le glout fait ſouffrir A grant toꝛt a ſa mere
Robert jura en haut Par /le baron saint Pere
Que le glouton fera moꝛir De moꝛt amere.
Si fiſt il bien bꝛiement Oez par quel matere
Robert ne ceſſa onques Devant qu'il fu tenus
Et puis en la pꝛeſence Des grant et des menus.
Jehit la traiſon Loier l'en fu rendus
Il eſploita ſi bien Qu'au gibet fu pendus
La ducheſſe ot grant joie Quant el ſot la venue
De Robert ſon enfant Qui bien l'ot ſecourue
Adont fu /Noꝛmendie De lui quite tenue
Dont conta a la dame Toute ſa convenue
Oiant maint haut baron Et dames recoꝛda.
Les granz paines qu'a /Romme Souffri et endura
Et comment l'emperere Sa fille li donna.
Eſtes vous .v. meſſages Dont li uns haut parla.
Bien ſalua Robert. Et diſt vous ne ſavez.
L'emperere de /Romme De qui eſtes amez
El non de Dieu vous mande Que vous le ſecourez
Car le ſeneſchal ſ'eſt Contre lui revelez
Avoir veult vostre femme De riens n'a autre envie.
Robert li reſpondi Voir il penſe folie
Loꝛs manda ſon effoꝛs Par toute /Noꝛmendie
Vers /Romme ſ'en tourna A moult noble maiſnie
Mais onques ne ſe ſot Tant haſter par eſfoꝛt
Que le faus ſeneſchal N'eüſt l'emperere moꝛt
La fille pour ſon pere Fiſt duel ſi n'ot pas toꝛt.
Et Robert fiſt ſes hommes Touz armer d'un acoꝛt
Puis ſ'en vint devant /Romme Ou le ſeneſchal ſiſt
Dedenz l'oſt ſ'embati Et ſa gent ſanz reſpit
Tantoſt comme Robert; Le faus traitre vit.
Il ſ'apꝛocha de li. Et fierement li diſt
Pas ne m'eſchaperez A cel coup que je puiſſe
Ne boutas tu le fer; D'une lance en ta cuiſſe
Je ne coi que jamais; Puis mauvais de toi truiſſe
Mais ton loier avras Aincois que le jour yſſe
Robert moult courouciez; S'en vint au ſeneſchal.
Du hiaume li rompi Le cercle et le nazal
Le nez et la banlevre Li a bati aval
Tout envers pour l'angoiſſe Chay de ſon cheval
Robert en la cité De /Romme le mena
On le fiſt eſcoꝛchier Et puis on le ſala
La fille l'emperere Mal pour li convoita
Mais le ſage teſmoingne Et on le dit pieca
C'on convoite tel choſe Dont il ſourt grant hontage
Robert qui on ſ'enfance Ot eſté moult ſauvage
Vers Dieu et vers ſon pꝛieme Fu de ſi bon coꝛage
Que je croi qu'il conquiſt Des ſainz ciex l'eritage
Le fille l'emperere Ot de li .i. enfant
C'on appella en /France /Dant Richart le Noꝛmant
Qui fiſt moult de pꝛoueſce Tant comme il fu vivant
De /Feſquan l'abaie Fonda je vous crëant
Avecques /Karlemaigne; Paſſa outre la mer
Les parens /Guenelon Ne le poꝛrent amer.
Car il ne volu onques A mauvaiſtie penſer
Diex nous veille s'amour Et sa grace donner.