/Roys des /frans Haez les deſroys
Regardez com /Li roys des roys
/Jhesucriſt qui les ſiens avoie
Com de loins vous a mis a voie
De lui bien connoiſtre et ameꝛ
En terre vou a fait clameꝛ
/Roy des /francois la noble gent
Ceꝛtes ci a bon bel et gent
En grant dignete par creü
Bien vous a de loing pourveü
Moult li devez bien obeir
Encoꝛ vous puet il eſchair
De li plus grant reaume aſſez
C'eſt paradis qui apaſſez
Touz les rotaumes de ceſt monde
Roys vo vie doit eſtre monde
Et nete de vilains pechiez
Et vos coꝛs ſi bien entechiez
C'om pꝛaigne a vous bonne eſſemplaire
Si pourres miex a tous ceus plaire
De qui vous eſtez roys clamez
Bien doit de vous Diex eſtre amez
Et bien pert que il vous a chieꝛ
Quant de ſi loins vous volt huchieꝛ
Pour /les francois metre en vo garde
Gentilz roys dont oꝛ prenez garde
A quelle heure a vous les liura
Ce fu au jour qu'il deliura
Les ſiens de la paine d'enfeꝛ
Le cueꝛ avrés plus dur que feꝛ
Se vous a ce jour ne penſez
Et la gloſſe n'en diſpenſez
Si com bons roys qui doit penſeꝛ
De ſa vie a dꝛoit diſpenſeꝛ
Roys au jour du bon venredi
Si voir comme je le vous di
Vous fiſt Dieus roys de tous /les frans
Oꝛ ſoiez dont courtois et frans
Iuſtez piex et miſeꝛicoꝛs
Si com Diex fiſt qui tout ſon coꝛs
Volt as /felons Juis liureꝛ
Pour les ſient d'enfeꝛ delivreꝛ
A cel jour furent deliurez
Qu'il vous fiſt roy donques livrez
Vo cueꝛ a oir et entendꝛe
A quel fin la gloſſe vent tendꝛe
Du vendꝛedi aprés comple
Qui comſommee et acomplie
Fu de Dieu toute la pꝛomeſſe
Cilz jours vous doit tenir en pꝛeſſe
Le cueꝛ que il ne ſe desuoie
A oeuvre ou mal ſon temps emploie
Penſſez de vostre regne acroiſtre
Vous devez miex les bons connoiſtre
Aſſez c'uns nouuiaus apꝛentis
/Roys ſoiez donques enentilz
Au pueple Dieu le ſouveꝛain pere
Gouueꝛneꝛ ſi que il li peꝛe
Et des toꝛmens les rachetez
Ou tant de coꝛs et de chatez
Sont de longue main embatus
Car ſur paine d'eſtre batus
Les a Diex en vos guarde mis
Deſfendez les des annemis
Vous eſtez chiés et garde d'iaus
Roys cil anemi ſont bediaus
Et preuos ſeꝛians et baillis
Dont vo pueples eſt mal baillis
Tel gent ſont du monde eſcilleur
Aduocat et faus conſeilleur
Chaſcuns i grape et arapine
Et ſi a gent d'autre couvine
Qui les ont navrez ladement
Faite par vos gouueꝛnement
Gentilz roys qu'il ſoient ſavez
Et hoꝛs du meſchief les planez
Metez y .i. petit de paine
Dieu vous en fiſt don et eſtraine
De ſon royaume a ce saint jour
Pour ce qu'il veult que ſans ſejour
Ses povres gens li deliures
Du meſchief ou il ſont livres
Si com a cel jour deliura
Les bons quant a moꝛt ſe liura
Faites qu'il en ſoient deliures
Ni eſpargniez ne mars ne livres
Et les gardez d'eſtre eſſilliez
/Gentilz roys et ſi eſueilliez
Loyaute dꝛoiture et raiſon
Faites les en vostre maiſon
Demoureꝛ avec charité
Et ſi prenez a veꝛité
Conſeil de vos bonnes paroles
Si que bien ſoit li ſains empoles
Emploies dont vous eſtez onis
/Gentilz roys oꝛ vous ſoit cilz poins
En vo cueꝛ eſcrips et poꝛtrais
Car vous eſtez nez et eſtrais
Touz de roys de .iiii. coſtez
S'an doit de vous miex eſtre oſtez
Oꝛgueil qui ainz vons ne vot eſtre
/Gentilz roys et quant de tel eſtre
Vous a Dieus pour ſoy eſleu
De ſi loing c'om n'a pas veü
Que ſe ſoit euvre naturee
Aiez vostre court eſcuree
Des mauvés ſe nul en y a
Car quant Diex a vous octroya
La couronne de /ces francois
Bien vous avoir mouſtre ancois
Qu'il eſt puiſſant d'un autre metre
Quant il ſ'en voudꝛa entremetre
Se iuſtement nes gouuernez
Et a ce garde ne prenez
Que vostre vie a dꝛoit lignie
Soit ſelonc la noble lignie
Dont eſtrais eſtez et venus
Et quant des grans et des menus
Vous a Diex fait en terre chief
Se vous voulez venir a chief
Du royaume a dꝛoit maintenir
Le conſeil vous convient tenir
Qui bons eſt et biaus et loyaus
Des .iiii. vertus pꝛincipaus
Seur toutes de plus grant arroy
Qu'/ariſtotes eſcrit au /roy
Alixandre qu'il fuſt veſtus
Et aournez de ces vertus
Qui ſur toutes ont grant renon
La premieꝛe ſageſce a non
Qui par le vrai entendement
Gouueꝛne l'omme ſagement
Si que dꝛoiture en ſoi maintient
Li autre ſe bien m'en ſouuient
Eſt apelee a dꝛoit juſtice
Qui ſoi maiſmes et autre iuſtiſce
Et fait a chaſcun iuſtement
Raiſon juſte oꝛ oꝛrez comment
La tieꝛce eſt apellee apꝛés
Qui bonne eſt et de loing et de pꝛés
Et toſt et tart et main et tempꝛe
C'eſt la veꝛtus qui miex atempꝛe
Fol hardement et couardiſſe
Entre ces .ii. raiſon l'a miſſe
Pour homme gardeꝛ de dommage
S'a non foꝛce de grant courage
Moult eſt ceſte veꝛtus puiſſans
Et bonne car elle eſt croiſſans
A haute honneur de plus en plus
A point oeuvre et nient a ſeurplus
Bien ſet contre vice eſtriueꝛ
Et faire enpꝛandꝛe et acheueꝛ
Sans paour tout ſeurement
Quanc'om puet par vrai hardement
Et a juſte cauſe entrepꝛendꝛe
Et fait fol hardement repꝛendꝛe
Et a meſure rameneꝛ
Bon fait a tel point aſſeneꝛ
A haute honneur et a bien faire
Ceſte veꝛtus doit tres bien plaire
A touz les pꝛinces de haut pꝛis
Que il ſoient duit et apꝛis
De couardiſſe desdaingnieꝛ
Elle ſet les poins enſeignieꝛ
C'on ne doit douteꝛ nulle empꝛiſſe
Qui par raiſon doit eſtre empꝛiſſe
Ceſte veꝛtus doit a tous plaire
Et la quarte eſt de tel afaire
De tel nature et de tel fait
Que riens encontre Dieu ne fait
C'eſt atempꝛance la ſenee
Qui n'eſt pas en lieu aſſenee
Qui entechiez ſoit de lait viſce
Ceulz fait ameꝛ le Dieu ſeꝛuice
Qui l'aimment de cueꝛ et honneurent
Et o lui main et ſoir demeurent
Et ceꝛtes a bonne heure vit
Soy regneꝛ qui demeure et vit
En atempꝛance qui meſure
Toute riens a juſte meſure
Et fait nature en homme vivre
/Roys ces .iiii. veꝛtus vous livre
Pou gouueꝛneꝛ vous et les vostres
Si com Dieu fiſt de /.iiii. apoſtres
/.iiii. benois euangeliſtres
Soueꝛains teſmoins et meniſtres
De nostre voy a maintenir
Fait ces .iiii. veꝛtus tenir
Sur toutes a plus ſouueꝛainne
Et les meilleurs et les plus hautaingnes
Pour bien gouueꝛneꝛ en tous tans
Bonnes vous ſont et pꝛoufitans
Et ont a touz autres eſté
Oꝛ vous en ay amonneſte
Pour ce que miex vous en ſouueingne
Et que tous jours a l'ueil vous veingne
Que vous tant ne quant n'eſtriuez
A atempꝛance mais viues
Par ſon conſeil et par ſon los
Seur toute rien je le vous los
Et me batez ſ'il vous em poiſe
Car elle tout compaſſe et poiſſe
Quanqu'il faut par nature au coꝛs
Se vous eſtez de ces acoꝛs
Et vous weillies ſon conſeil croire
Le mangieꝛ a point et le boire
Vous apꝛendꝛa bien a uſſeꝛ
Et touz outrages refuſſeꝛ
Vous feꝛa de charniex delis
Atemprance eſt la fleur de liz
Et roſe de toute veꝛtus
Gentilz rois ſoiez ent veſtus
Et de lui ſi apꝛis et duis
Que de tous vos autres deduis
Prenez par atempꝛance a point
Ne ne metez vostre cueꝛ point
Outre raiſon aprés ces chates
N'a ces riuieꝛes. car les traces
Peꝛent a ceus trop malement
Qui enpꝛanent l'eſbatement
Sans atempꝛance outre meſure
Et mains li coꝛs du pꝛince en dure
Quant il en uſe du ſeur fait
Et vous ſavez qu'il ne ſont fait
Au monde pour autre achoiſon
Que pour la recoꝛeacion
Du coꝛs quant il en eſt meſtieꝛs
Pour el n'eſt fais cilz biax meſtieꝛs
C'om empꝛaigne par atemprance
Et a point et j'ai eſpeꝛance
Qui ainſi uſeꝛ en voudꝛoit
L'un et autrui miex en pourroit
Gouueꝛneꝛ bien et a point
Gentilz rois dont pꝛenez la point
En atemprance vous tenez
Iuſtice et foꝛce maintenez
De courage et ſageſce adꝛoit
Il vous eſt meſtieꝛ oꝛendꝛoit
D'eſtre bons trop plus c'onques mais
Vostre royaume eſt .i. dꝛoit mais
Et auris ſus touz ceulz du monde
Et cilz ou plus d'onneur habonde
Et que Diex miex aimme et honneure
Et ceꝛtes ſ'en vous ne demeure
Sur touz roys miex vous aimmeꝛa
Ne nulz foꝛs lui ne clameꝛa
Seur vous poeſte ne hauſage
/Gentilz roys dont faites que ſage
Metez paine d'eſtre aournez
De ces veꝛtus et vous tenez
Nuit et jour ſi a Dieu ſeꝛvir
Que le don puiſſiez deseꝛvir
En ceſt royaume teꝛien
D'eſtre roy ou celeſtien
Avec ces ſains en paradis
/Gentilz rois pour vous eſt diz
Et remires cilz enſeignemens
Dieus doint que voz commancemens
Vous atraie a la bonne fin
Ditez ent amen de cueꝛ fin.