L'autrieꝛ par .i. matin A l'entree de moy
Entre en .i. jardin Pour joueꝛ i alai
.I. petit m'acoſtai Deſoz une aube eſpine
Eſcript en parchemin .I. livre i trovai
Je lui duc en la fin Moult durement l'amai
Le non de ce liuret Ne la fui Je ne ſai
Oꝛ me ſui poꝛpenſe Comment l'apeleꝛai
C'eſt la vie du monde Einſi le bautiſai
Sainte yglieſe ſe plaint Ce n'eſt mie merveille
Chaſcun de gueꝛroieꝛ Contre lui ſ'apareille
Elle eſt en grant [...]
Peꝛeil. ſe Diex Ne la conſeille
Puis que Ioſtice cloche Et dꝛoit pant es encline
Et loyauté chancelle Et veꝛité definne
Et charité refroide Et foi faut et afine
Je di que n'a u monde Fondement ne racine
Fauſe marchandiſe eſt Couuerte en uſure
Et chaſte ſi eſt miſe Arrieꝛe poꝛ luxure
Chaſcun aime le coꝛs Et de l'ame n'a cure
Oꝛ ſachiez que le monde Eſt en grant aventure
Onques mes ne fu tant De grans pꝛeſcheeurs
Et ſi ne peꝛt au ſiecle Trop eſt des pecheeurs
Qui ſont touz auueglez Auſi comme li ours
Et fuient en enfeꝛ Les galoz et les cours
Ainz puis que noſtre ſires Foꝛma /le pꝛemieꝛ home
Ne puis que noſtre peꝛe /Adan menga la pome
Ne fu Diex mains doutez Deſeus la foi de /Romme
De /Romme vient le mal Qui les veꝛtuz aſomme
/Rome qui deüſt eſtre De noſtre foi la fonde
Simainne avarice Et touz maux i abonde
Cil sont plus conchie Qui doivent eſtre monde
Et par mauveſe eſſemble Honiſent tout le monde
Qui argent poꝛte a /rome Aſſez toſt prouende a
Ou ne la donne mie Si com Diex comenda
Ou ſet bien dire a /rome Si ſonne il empetra
Et ſi ne donne rien Enda la voie enda
/France qui de franchiſe Eſt dite par dꝛoit non
A perdu de franchiſe Le los et le renon
Il ni a mes nul franc Ne prelaz ne baron
En cité ne en ville Ne en religion
Au tans que li francois viuoient en franchiſe
Fu par eux mainte teꝛre Et gaigniee et conquiſe
Et feſoient li rois Du tout a leur deuiſe
Car on pꝛioit pour eus De cueꝛ en ſainte ygliſe
L'oſeꝛoie bien dire Devant touz ceus de /Romme
Que Dieux onnaroit plus Pour la voiz d'un preudome
Ou pour une viellote Qui de bon cueꝛ le nomme
Que pour tout loꝛ d'/Eſpaigne S'il eꝛt en une ſomme
/Judas macabeus Dit encienement
Que victoire n'eſt mie En grant mace d'argent
N'en grant cheuaucheure N'en grant plenté de gent
Aincois vient du ſeigneur Qui fiſt le firmament
/Sainte ygliſe la noble Qui eſt /fille de roy
/Eſpouſe /Jhesucriſt /Eſcole de la loy
Cil qui l'onc aſſeruie Ont fait moult grant deſroy
Ce a fait convoitiſe Et defaute de foy
Conuoitiſe vault vault pis Que .i. ſerpens volans
Tout le monde a honni Dont je ſui moult dolans
Se /charlemagne fuſt en /France Ne ſe y fuſt /rollans
N'eüſt pooir en fra[n]ce Ne /hyaumont /agoulant
Ains puis que li diſiemes En pꝛis en ſainte ygliſe
Ne fiſt /li rois de /France Riens qui l'eüſt empꝛiſe
/Damiete ne /tunes Ne /pulle n'en fu pꝛiſe
Ne n'en pꝛint /enagon /Li rois de /ſaint deniſe
Oꝛ ſe gart bien chaſcuns Tant com en le penra
Honnour joie et et victour Aus francois n'en venra
Et ſi puet bien apꝛendꝛe Cil qui le maintendꝛa
Par les choſes paſſees Ce qu'il en avenra
Quant /artin lapoſtoile C'on apele /Symon.
Donna au fil le roy Le regne d/aragon
S'il li eüſt donne .xxx. Iours de pardon
Il li eüſt miex valut Que faire ſi fait don.
Onques ne vi diſieme Qui fuſt bien emploie
Ne puis que /l'apoſtole En a ce aploiez
Que li diſiemes fuſt Donnez ne otroiez
Ne pot venir le terme Que il fuſt parpaiez
Deſſous la loy de /Romme N'a nule legion.
Qui a /Romme obeiſſent Se ceulz de /France non
Et de ſ'obedience A ſi biau guerredon
Que on queüſt i avoir Sa lainne et ſa toiſon
Pourquoi ne pꝛent le pape Diſieme en /alemaigne
En /bauiere en /ceſſoigne En /Friſe ou en /Bourgoigne
Il ni a cardinal Tant hault l'eſpee ceigne
Qu'il alaſt querre la Pour eſtre eſtre roy d'/Eſpaigne
Des prelas vous dirai Mais qu'il ne vous envint
Diex leur a commande Veillier et joꝛ et nuit
Et refraindꝛe leurs rains Et poꝛter fueille et fruit
Et lumiere ardant Mais nel font mie tuit
Quel gent a Diex leſſie Pour garder ſa maiſon
Sa vigne eſt deſerte Ni labeure mais hom
Li fil /elie la tiennent A toꝛt et ſans raiſon
Et ſi eſt ſymonie Plantee de ſaiſon.
S'il eſchiet une rente A /rains ou a /couloigne
S'uns pꝛeudons li demande Cuidiez que l'en li donne
/Symoine l'empoꝛte Sans noiſe et ſans eſloingne
Car Diex eſt ſi ſouffrans Que nulz ne le reſoingne
Quant Diex donra ſa vigne Veoir poꝛ vendengier
Et il ne trouuera choſe Qu'il puiſt mengier
Des mauvais ſe voudꝛa Moult malement vengier
Il ne ſeront pas que tens S'en pꝛés poꝛ vendengier
Des biens de ſainte egliſe Se complaint /Jhesucris
Que l'en met en guians Et en vair et en grans
S'en trauient leur queues /Margos et /beatriz
Les membꝛes Dieu en ſont Povre nu et deſpꝛis
Moult volentiers queriſſe Une religion
Ou je maine ſauuale En bone entention
Mais tant voi en pluſeurs De bone entention
Qu'il ne tiennent de l'oꝛdꝛe Foꝛs l'abit et le non
Qui en relegion veult Saintement venir
[.]III. choſes li convient Et vouer et tenir
Chaaſte et ſimplece De cuer et obeir
Mais on y voit ſouvent Le contraire avenir
Obedience gronce Charité ſe varie
Chaſcun bee a l'avoir Pourete eſt haie
La parole eſt bien De Dieu entreleſſiee
Qui dit rendez vos veus Et ne le leſſiez mie
Chanoinne ſeculier Mainnent tres bone vie
Chaſcuns a ſon hoſtel Son lieu et ſa meſine
Et ſ'en t a de tiex. Qui ont grant ſeignoꝛie
Qui po font poꝛ amis Et aſſez poꝛ amie
En l'oꝛdꝛe de chanoine Que l'en dit auguſtin
Il viuent a plenté Sans noiſe et ſans huſtin
Je lo qu'il loꝛ ſouuiegne Au ſoir et au matin
Que la char bien noꝛrie Poꝛte a l'ame venin
En l'oꝛdꝛe des noirs moines Sont a ce atoꝛne
Il ſoloient Dieu querre Mais il ſont retoꝛne
Ne Diex n'en trueve nul Car il ſont retoꝛne
En l'oꝛdꝛe /saint benoit C'on dit le beſtoꝛne.
L'oꝛdꝛe de ciſtiax tieng A a bone et bien ſeant
Et ſi croi que il ſont Preudomme et bien creant
Mais trop il me deſplaiſent Que il ſont marchéant
Et de charité faire Deuienent recreant
De ceus de /permouſtre Reconuient dire voir
Oꝛgueil et convoitiſe Les ſcet bien decevoir
I ſont par dehoꝛs blanc Et par dedens ſont noir
S'il fuſſent par tous blans Il feiſſent ſavoir
/Jacobin coꝛdelier Sont gent de bon afaire
Il deiſſent aſſez Mais il les convient taire
Car li prelat ne veulent Que l'aient nul contraire
A ce que il ont fait N'a ce qu'il veulent faire
Les blanches et les griſes Et les noires nonnains
Sont ſouent pelerines Aus ſaintes et aus ſains
Se Diex leur en ſcet gré Je n'en ſui pas certains
S'eles fuſſent bien ſages Elles alaiſſent mains
Quant ces nonnains ſe vont Par le pais eſbatre
Les unes a /Paris Les autres a /monmartre
Tel fois en part l'en .ii. C'on en amainne .iiii.
Car ſ'on en perdoit une Il les conuendꝛoit batre
Moult mainnent bone vie Beguines et beguin
Avec eulz me rediſſe Le ſoir ou le matin
Ja ne croirai glouton Aveques le bon vin.
Ne geline avec coc Ne chat avec ſain
J'ai grant piete penſe A ces deans royaus
Car trop bien je cuidoie Aucun pꝛeudome entr'aulz
Mais il na ſi pꝛeudome D'eſſi a /rainceuaus
C'il deuoient doiens Qu'il ne deueniſt maus
Cil qui doivent les vices Blaſmer et leſdengier
Qui pꝛeſtre ſont mais il Sueffrent trop de dangier
Et ſ'en y a de tiex Qui ſueffrent maint dangier
Qui l'eveſques fait dire J'ai fait du leu bergier
Auguſtin li ſaches Li frere de la pꝛe
Comment trouueront il En ce ſiecle loꝛ vie
Il ſont trop tart venu Que il eſt ja commplie
Si eſt le pain done Ne ſi atendent mie
Conuoitiſe qui fait Les avocas mentir
Et le dꝛoit beſtoꝛner Et le dꝛoit conſentir
Les tient en ſa pꝛiſon Nes leſſe repentir
Devant que l'en leur fait Le feu d'enfer ſentir
Nous auo[n]s .ii. prouerbes Qui font tous les deſcoꝛs
Car il traient enſamble Et les dꝛeis et les toꝛs
Se dꝛoit fus ſoutenus Et le toꝛs feüſt toꝛt
Tel chevauche a loꝛain Qui troteroit en coꝛps
Oꝛ pꝛions en la fin Au ſeignoꝛ qui ne ment
C'on ſault les pꝛeudes hommes Et les pecheurs ament
Et nous doiſt en ce ſiecle Viure ſi dꝛoitement
Que nous aions ſentence Poꝛ nous au jugement